أصبحنا وأصبح الملك لله..
ملاك: (كان السبت مخدامش، فاقت بقات فبلاصتها كتسمع صوت شتا مساخياش تنوض من كاشتها هزت تيليفونها من فوق لكوافوز والو لا أبيل لا ميساج دخلت للواتس مكاين والو منو)
ولد لحرام ومقلق عاد من الفوق!! دابا غيدير الطموبيل سبة باش نهضر انا معاه!! تسنييت بكري العزي!!!
(ناضت باش تصلي لبست بينوارها وشالها وخرجت تمشي لحمام مها للي ولفااتو واخا اصلا بيتها حدا طواليط ولكن قليييييل فين كدخل لتمااك..
شافتهم كيفطرو فالصالون كان حتى عمها محسابلهاش غيجيو شيرت باي باي مولفينها بحماقها ومشات لبيت مها تقضي روتينها عاد ترجع تسلم واخا معندها لا ݣانة ولا خاطر!!!)
العم: مبروك الطموبيل ديال لبنية اخويا
رشيد: الله يبارك فيك شراتها لراسها
مرت العم: منين كانت صغيرة وهي على فمها غير نكبر نخدم نشري الطموبيل والدار ونصيفط بابا وماما الحج
رشيد: خلاتنا بعدا حنا توالا
زهرة: النية بعدا كاينة ههه (بقاو مجمعين كيظحكو.. حتى جات كتسلم وجلست كتفطر.. كيتسناها عمها تكمل باش يفاتح معاهم موضوع الخطبة)
~~~~~~~~~~
اورطيغا: (مشا معاهم حتى شريف اما يوسف للي كان مشهي يسافر معاهم مبقاش عندو الخاطر ولا الݣانة بحرا يشوف شنو يدير فحريرة ختو..
كانو قربو يوصلو لمرزوݣة شاف لبلاكة بقاو شي كيلومترات قلال، داير نظاظرو ومركز فطريق وعمر وشريف كيهضرو هز تيليفونو كانت 11 دنهار عارفها غتكون فايقة دابا ولكن مغيهضرش معاها حيت خاصها تعلم وتيق فيه ماشي لبنت لي وقف معاها صافي راه كتجمعهم شي حاجة والمشكل انه برر ليها وهضر ووالو مقلقة من شي حاجة للي متستاهلش وهوما كانو دوزو وقت زوين لي فضلت النكد على انها تكون مستمتعة وهوما كيخططو لمستقبلهم…)
عمر: واش ݣلت اولد خالتي تردم!!
اورطيغا: نتردمو مالها غتخلعنا تاليتها مووت وحدة!!!
شريف: انا غير عفييوني
اورطيغا: راك معفي ديما ازين
شريف: ههه كان خاص غير يوسف يكون معانا
اورطيغا: حقا عاودلك على لبلان دلبارح؟!! شووو أبربي المعبود داك الميكرووب عندو صبع فداكشي دغيثة وهو للي وصلها لعندي باغي يبين ليوسف ولالاهم الغالية انني انا للي خارج عليها
شريف: زعما!!
اورطيغا: زعماتين.. نهار التالي قولو مراد قالها
شريف: معرفت راك شفت كيف تيبان!!
اورطيغا: تيبان بحال شي ق*** ميهزش البيضة من بلاصتها غير يجلس عليهم.. خاي الزين داك الوجه للي عاطييكم هو الوجه للي باغيكم تشوفووه وتقولبو بيه…
شريف: ولكن علاش غيضيع غيثة!!
اورطيغا: هنا فين حفا الراس!! (بقاو ساكتين طاحت فبالو يمكن حيت كان هو باغيها وهي معروف كانت مزعوطة فيه ومتشداتلوش وبغا يمرضها ولا هي نيت بقفوزيتها وطيرانها شافتو كيتدروݣا وبغات تجرب ووخا هكاك بزااف دالاسباب للي مكتشفعلوش يضيع ديك لبنت للي اصلا من الفاميلا!!!…
وصلو لتماك كانو ديجا حاجزين فلوطيل للي على شكل رياض وكانت النوبة باش يتدفنو حيدو حوايجهم بقاو غير بالشورط موجدين ليهم فين)
خاي عمر زعما ماشي حرام هادشي بحال تندفنو فقبرنا!!! لا!!
عمر: هه توكل على الله وݣول باسم الله
اورطيغا: على رقبتك (شاف شريف للي كيصور ويظحك) فيلمنا باش تبقى دليل على هاد خونا وانا عاد للي ناااوي نكمل ديني..
غيثة: (جاتها الحالة عاود ولكن ماشي بوتيرة عااالية، كتشوف راسها محبوسة فبيتها كولشي كيغوت عليها حتى من تيليفونها خداوه ليها خرجت لقات الخدامة تماك يعني غتوصلها لمها رجعت زدحت لباب ساداه تفكرت التيليفون صغير مشات جبداتو من قجر ديال النموسية صونات على ادم مجاوبش.. دازت 5 دقايق رجع هو صونا عليها)
الو… ادم!!
ادم: وي غيثة؟!
غيثة: بغيت هداكشي!!
ادم: سيري عندك داك المووسخ هو يعطيك شنو بغيتي
غيثة: مفهمتش!؟ شكون هاد الموسخ؟؟
ادم: غيثة انا وياك صافي سالينا منين لقيتك عندو فالدار وناعسة عندو ولا يمكن كنتي معاه، صافي مبقى كلام بيناتنا
غيثة: شنو تتخربق!!
(قطع بقات كتصوني شحال من مرة مجاوبهاش طلعلها الدم!! حطت داك التيليفون بقات جالسة فوق نموسيتها كتفكر غير فهادشي منين غتجيبها وحتى الا ملقاتهاش شنو الحل والبديل وفين تلقاه؟!!!)
~~~~~~~~~~~~~
ملاك: (شافت فالساعة كانت 9 دالليل لا أبيل لا ميساج من عندو عمرو داارها بدا راسها يزنزن قلبت فلواتس محاط حتى شي تصويرة ومحالش الكونكسيون!!)
اويلي ياكما يكونو موصلوش!! ولكن وكان وقعت شي حاجة مو غتصوني على ماما..
لا لا ان شاء الله يكون بيخير..
يمكن خاص نسول فيه هو راه شد طريق.. بففف
(كتبت ليه ميساج كتكتب وتمسح وفالتالي كملت لميساج حيت جاتها قااسحة متسولش فيه)
“”واش نتا بيخير؟””
(صيفطاتها، زتسنات يجاوبها ووالو جات عندها مها لبيتها حطت التيليفون تحت وسادتها)
زهرة: شنو كديري البرغوتة هنا؟!!
ملاك: غير جالسة وصافي
زهرة: شنو بانلك فالهضرة ديال عمك ياك شحال ونتي باغية تمشي لبرا ها هو جاك عريس كما باغية
ملاك: (ممسوقاش ومعطاتش الأمر أهمية) الااااااا منقدرش نسمح فيك اماما ممكن نتزوج لشي مدينة تكون قريبة ليك ولكن نقطع لبحر لا !!
زهرة: انا ولا هداك للي معامن كتهضري؟!
ملاك: بجووجكم اماما انا عطيتو الكلمة وهو صراحة ولد الناس معايا وفين بزاف دلحوايج زوينة وعاجبني
زهرة: وشنو كيتسنى!!! باك غير كيسول علاش مبغيتيش؟!
ملاك: كيتسناني انا نعطيه الأوكي ولكن ماشي دابت حتى نشوف فين غنحط رجلي على حساب الخدمة وشحال من حاجة انا وياه هاكا تافقنا ونيت كنزيدو نتعرف على بعضياتنا كتر ولكن باحترام راكي عارفاني اماما
زهرة؛ معرفتلك ابنتي هادشي ديالك
ملاك: ماشي بزاف باش غيجي هو ومو.. عندو غير مو معندوش باه ومو مزوجة واحد اخر
زهرة: واش تعرفتي عليهم
ملاك: (كتشوف فيها راس كيقولها قولي كولشي ميمكنش مو تعرف ومك مقلوبة عليها القفة خاصها تعرف وتنصحك وراس كيقولها الا قلتيها لمك ممكن ميعجبهاش الحال وتاخد موقف من أمينة للي واخيرا لقات علامن تحط الراس ويضلو يتعاودو ويتفاشو القلوب)
هو كتعرفيه حتى نتي مهم تلاقيتيه شي مرات!!! اممم مغنقولكش دابا حتى شي حاجة صبري علية غير شوية وغتعرفيه منك لراسك
زهرة: ياكما رجعتي مع حمزة!!!
ملاك: ايخان لوااه (قرستها ففخضها) اااااح واش مكتعرفيش تهضري بفمك!! صافي انا غنتزوج بهداك للي جاب عمي ونسكن بعيدة عليك تبقاي تشتاقي غير تشوفي فية وتهضري معايا..
اورطيغا: (حس براسو زند مزيااان ولكن عظامو ترخاو عليه مزيااان كان داير ترازة شاف فعمر مع بيض حنوكو حماارو.. جا الوقت خرج من الرملة لواو عليهم كواش واخا الحرارة طاالعة بقا هكاك فواحد لبيت هو ولد خالتو وجابو ليهم أتاي كيحس بالعرق نازل منو بحال شي شلال لدرجة صباع رجليه كيشرشرو بالعرق.. شاف فعمر للي كولو مزنݣ)
الله ياخد فديلمك الحق
عمر: ههه استغفر الله علاش اولد خالتي
اورطيغا: انا مشوط خلووق وزدتي كملتي علية
عمر: (تبسم) ولكن رجل للي كانت عاطياك لحريق؟؟!!
اورطيغا: (جبد رجلو مزياان سبحان الله مبقاش فيهم لحريق بقاو مرخيين حتى دازت ساعة عاد ناضو دوشو تغداو بالمدفونة (خبز معمر بلحم والبيض واللوز وكيطيب ففرن الاعواد ولا على الحجر نتا كفاش تبغيها) بقاو مجمعين شوية والارهاق باين على دوك الجوج عكس شريف للي داير شال صحراوة وجالس واخد رااحتو!!
كولها تلاح فشومبر للي شاد.. مراد محس براسو حتى جبد عليها بنعسة… وكانو دارو يتلقاو حتى الليل.. ضرباتو الفيقة كان ظلااام هز تيليفونو كانت 10 دالليل عمرو نعس قد هاكا!! لقا ليزابيل صونا على مو هي اللولة طمئنها على حالتو ولقا ميساج من عند ملاك براسو مبقاش كيسخا بيها وغير منين صيفطت ميساج لباس!!…
شعل الضو مشا للحمام كيشوف وجهو كان مزنݣ)
غير فااخرة وزندت!!!
( ..خرج صونا عليها أبيل ڤيديو حط التيليفون واقف وبقا كيشوف فديك الثلاجة شنو فيها شحال باش جاوبت كتقاد شالها فبيتها وكتشوفو حاني حتى وقف هاز ليمونة كيقشرها، شقلبت عينها منفخة)
فين نتي!!
ملاك: (ببرود) هانا
اورطيغا: مزال مبغيتي ديري عقلك خلاص؟
ملاك: مالي أنا شنو درت؟!
اورطيغا: (كيشوف فيها وكياكل الليمون سنوف بسنوف)
ملاك: مالك كتبان حمر
اورطيغا: وكان عندك بية الغراض غتسولي علية كيف وصلت فين راني ولكن لا!! لالة ملاك قاتلها التكبر وميمكمش تسول غير الا سولت انا، هدا هو عندك الحب!!! (كتشوف فيه.. جلس اونفاص للتيليفون كيشوف فيها وياكل) مشكلتك نتي متتيقيش فية والا متقتيش معندنا فين نزيدو غنبقاو مشاكل فمشاكل فمشاكل!! ولا انا، و لا نتي باغيين هاد فريع ل**..
(بقا فيها الحال منين قالها معندنا فين نزيدو ولكن بقات كتشوف)
خاصك تيقي بية أملاك داك العالم ساليت منو قبل حتى منعرفك قلتها اف مرة ليك، ودابا حتى هو مغتحلالي من غيييرك كما بغات تكون اصل جد مها
انا وياك بدينا واحد لعيبة زويينة بغينا نكملوها بشي حاجة زوينة.. متافقة معايا؟!! (مكتجاوبش)
واش معايا؟!!!
ملاك: اممم (حركت راسها باه)
اورطيغا: تفاهمنا دابا!! متبقايش تقلقي مني على شي حاجة انا اصلا مديرهاش حيت هاكا غنشوف راسي تنكب الما فالرملة وانا هادشي مباغييهش
(مزال مقتانعة انه مخاصش يعطي وقت واخا يوقفوه بالزز ولكن معرفتش كفاش توصلها هاد المرة)
والطموبيل غرجع وغتقاديها نتي
ملاك: غير خليها باش كل مرة تشوفها غتفكر منين توقف عليك شي زبلة دير فيها مضهصص وزيد فطريقك منبغيش تجمعك مع شي وحدة كانت فماضييك لا سلام لا كلام!! هاكا باش غنتفاهمو انا وياك ومنكبوش الما فالرملة حيت حتى انا هادشي مكيعجبنيش…
اورطيغا: (هز حواجبو بجوج مغيزيدش يهضر حيت ميساجو وصلها وهي لي فراسها غتقولو راه بدا كيعرفها وعاد مغتسكتش على شي حاجة معجبهاهاش..)
ملاك: احم.. كيف وصلت بعدا؟! واخا صيفطت ليك ميساج قبييلة ومجاوبتش
اورطيغا: كنت ناعس املاك
ملاك: ناعس حتى لهاد الوقت (بقا كيعاود ليها شوية بشوية رجع بيناتهم الابتسامات والظحك صيفط ليها ڤيديوهات للي صور شريف صونا عليه عمر خلاتو على خاطرو يمشي حتى يسالي ويصوني خرج مشاو يتعشااو بقاو مجمعين حيت كانت كصواريه.. رجع صونا مكتجاوبش عرفها تكون نعست وحتى هو جبد عليها واخا نعس بزاف فصباح..)
~~~~~~~~~~~~~
أميمة: (صونات على حمزة جاوبها) حمزة لباس عليك ؟!
حمزة: الحمد لله ونتي كيف بقيتي؟!
أمينة: الحمد لله.. هضرت قبيلة مع عمي ومرت عمي طلبت سماحة منهم (بعقلانية) وبقات نوبتك دابا..
حمزة: (بلا خاطرو) متحتاجيش طلبي شي سماحة، الموهيم هو ديري عقلك نتي
أميمة: راك شفت شنو داز علية مكنتش كنحس براسي فاش كنت كندير هكاك لملاك ولا ليك ولا لعمي ومرتو كنت بلا عقل معارفاش شنو كندير ولا كنقول
حمزة: ودابا؟!
أميمة: (زفرت) ولدي الله يرحمو حتى حاجة مغتعوضو ولكن كما قلت نتا الحياة مغتوقفش
حمزة: نطويو الصفحة؟! (شحال تمناها تطلب طلاق ولكن دابا مغيظلمهاش وداكشي للي عندو غيدفنو فيه)
أميمة: بغيت نرجع للدار
حمزة: غدا نجي من موراك
أميمة: بغيت غير سيمانة على منقاد راسي مزيان
حمزة: واخا.. خاصك شي حاجة؟!
أميمة: بغيت فلوس حيت دارنا مكيعطيوني والو ومقلقين مني
حمزة: غدا صباح ندوز عندك
أميمة: شكرا.. تصبح على خير
حمزة: تصبح على خير
أميمة: (قطعت وبقات شحال كتفكر كتبت لبنت خالها)
غير وجديلي الكونترا اسناء خاص نمشي دغيا من هنا، الفلوس غيكونو واجدين عندي من بعد…
حمزة: (كان فسطح.. مبقاش كيمشي من الجهة للي كطل على دار ملاك باش يتفادا اي اتصال بيناتهم.. هاد الابيل كان غيجي غيجي غير كانت أمنيتو يكون محتواه بغيت نطلق ماشي رجع..
ولكن دابا منين سمع كلامها لي بينت دارت عقلها مبقى عندو فين يتراااجع يعطيها فرصة ويحاول حتى هو يعطي هاد الفرصة لراسو معاها ماشي ݣاع المتزوجين كيبغيو بعضياتهم…..)
دازت أيام….
غيثة: (عيات ترغب مها تخرج بكات غوتت زاوݣت ووالو تسد عليها لباب بالساروت والماكلة كتحط ليها ويرجع يتسد عليها يوسف معجبوش هاد الوضع حيت غيزيد غير يأزمها ولكن مو وااقفة ليه ومفهمين باها وخوها لاخر انها معاقبة حيت تصاحبات مع شي بنات ملايقينش ليها… دازت 5 أيام بلا جرعة كانت قاسحة عليها بزااف قربت تحماااق.. كدق فباب بيتها من لدااخل)
عفاك اماما خليني نخرج
الغالية: الا خرجتي من هنا غنقتلك..
غيثة: واش غتبقاي حبساني راه تخنقت هنا نبقا غير لتحت
الغالية: تخنقي ولا موتي الموووهيم متخرجيش ولا قسما بالله نصوني على يوسف يجي يديك حدا الشمكارية يا شماكريية
غيثة: (كتبكي وتحك فجلدها بحال فيها الجربة شافت فسرجمها مشات طلت كانت شتا كطيح خفيفة كتشوف لتحت ماشي شي مسافة بعييييدة حيدت دوك لمحيبقات لي تماك لاحتهم فبيتها حتى تهرسو بترابهم ووقفت بلحفا تنقز تمشي عند ادم للي مبقاش جاوبها فمرة ولا تمشي تقلب فشي بلاصة اخرى.. مع حطت رجليها زلقت بيها جات طايحة مغوتة…)
~~~~~~~~~~~~~
أمينة: (من بعد معاودات ليها على الخطيب للي جا لملاك وانه كامل مكمول والكمال لله..)
وقبلت ؟!!
زهرة: لا، قلتلك راسها قاسح مبغاتش وهاكا عيني عينك قالتها لعمها للي قلبها ظحك راني عاودت ليك على هاد لوسي تبارك الله قااري ومتفهم، ولكن باها من تماك وهو سااخط وغير يصوووط
أمينة: ومالو بغا يزرب عليها
زهرة: ماشي يزرب عليها ولكن شككاتو بغا يعرف علاش، وعاد السيد للي جاها تبارك الله خدام مزيان وفالدولة وهي كانت باغيا تمشي لبرا معرفتلها دابا
أمينة: ختي زهرة نجيك من لخر ملاك غتكون ان شاء الله وبجهد الله والا بقينا حيين مرت ولدي
زهرة: (بقات كتشوف)
أمينة: ماشي حيت ولدي ومومو عيني ولكن والله متلقاي شي حد يبغي ويتهلا فبنتك ݣد ولدي.. باغيها وناويها المعقول من شحال هادي كيتسنى غير يݣاد راسو باش يجي عندكم
زهرة: واش كتهضري بالصح أمينة؟!
أمينة: ولاه راني نزعرط عليك؟
زهرة: دخلنا عليك بالله!!
أمينة: والله اختي ماني نكذب عليك، بنتك مكاينش لي يحيدهاالي زعما يحايدها لولدي
زهرة: واش هي كتهضر مع ولدك؟!
أمينة: بلحرااام
زهرة: أمييينة!!!
أمينة: اختي زهرة نتي عارفة معزتك عندي ݣداش ومعزة بناتك من بناتي للي معنديش, نعطيك عاهد الله معندك مناش تخاافي بنتك تبارك الله مربية وعارفة شنو كدير وليداتنا غير كيتعارفو وصاافي..
اورطيغا: (دخل للدار مسخسخ جايب شي تقدية ناقصااه لقا مو غير جالسة صاقرة دايرة يدها على خدها وباينة بحال سامعة شي خبار ولا شافت شي حاجة معجباهاش!!)
زين… مالك؟!
أمينة: واش نتا معوالش دوز رمضان معايا؟!
اورطيغا: لا
أمينة: وعلاه؟!
اورطيغا: عاود نهضرو فهادشي؟!!
أمينة: (حركت راسها بلا حولة حط داكشي فلكوزينة هز البراد عمر كاس ومشا حداها جالس فالكرسي اونفاص معاها)
نسخن ليك تاكل
اورطيغا: لا نشرب غير هاد لكويس ونهبط للمحال، قولي نتي مالكي؟!
أمينة: عاودت لزهرة عليك وعلى بنتها
اورطيغا: (بقا كيشوف فيها جغم من الكاس هز حواجبو بجوج ببرود)
علاش؟!
أمينة: حيت جاو فيها الخطاب!!
اورطيغا: هاي هاي على نص متر تيجيو فيها الخطاب!!
أمينة: تا مالك مبرد!!
اورطيغا: شنو بغيتي ندير نمشي نهلل عليهم، (جغم من أتاي) حيت عارفها مغتقبلش ونيت مها مزيان تعرف الا مكانش اليوم غدا
أمينة: خاص نمشيو نهضرو معاهم حسن، حيت باها غير يضور ويسولها علاش مبغيتيش؟!
اورطيغا: هانتي قلتيها هي مبغاتش باها مغيزوجهاش بالسيف
أمينة: اوا!!!
اورطيغا: شوفي بردي وكوني هانية مكاينش للي غيديهانا
أمينة: ههه ويل الشيطان ماشي ݣلتها لمها
اورطيغا: وااايلي!!! دايرة صبعك معايا فيها سيف!! (بقات كظحك) عطيني المفيد مها قبلت بية؟! شنو قالت!!
أمينة: مݣالت لا طابت لا تحرݣت
اورطيغا: هي قبلت.. (حط داك الكاس فوق الطبلة) غتباتي ولا نوصلك؟!
أمينة: مخفتيش على لبنت؟!
اورطيغا: (جا يهضر وهو يصوني تيليفونو كانت هي) نعطيهالك تفرݣع عليك
أمينة: حجارها يشدوها
اورطيغا: شريتيهالها مع مها وتسعتي اللور!!! انا هبطت نفصل شي كموند ونديك
(قطع عليها ورجع صونا عليها خارج من الدار)
القطيطة
ملاك: (تبسمت وأكترية منين هضر معاها باها ونعم ليها باش يعطيها لفلوس للي بغات ولكن حتى يبحث براسو) مزال هداك السيد باغي يبيع؟!
اورطيغا: (عرف مفبالها والو) اه وجدتي شي حصيصة؟؟
ملاك: قووول
اورطيغا: امتى تلقاوه؟!
ملاك: ولكن متبانش نتا فالصورة
اورطيغا: واخا.. ملاك هضري مع مك علينا
ملاك: علاش؟! واش مبغيتيش نعاودو نتلقاو على خاطرنا والله بابا حتى يوقفلي فالدخلة والخرجة (من جهة مضرب على راسها باش تسارا شوية)
اورطيغا: ملاك هضري مع مك تسمعها منك، هي اصلا فخبارها لبلان
ملاك: واش قالتهالها مك؟!
اورطيغا: مك يا مك باشما صوني علية انا نتسناك
ملاك: ويلي استغفر الله (قطعت وبقات ملبداها مخرجة عينها!!)
ملاك: (خرجت من بيتها وعينيها مطرطقين كتوجد شي سيناريو لمها، كانو عيلات عمامها كيقادو الشباكية وروايح ضااايرة للي كيقلي وللي كيغطس فالعسل وللي كتشبك كانت الدار عامرة حيت عمها ومرتو غيدوزو رمضان معاهم) مرت عمي فين ماما
سهام: اجي نتي تعاوني
ملاك: مكناكلهاش!!
سهام: اويييلعدا على مكتاكليهاش زيدي تعلمي زيدي دردرينا غير الجنجلان فيها
ملاك: (ممسوقاش مشات للكوزينة لقات مها كتنصب لعشا) ماما!!!
زهرة: اممم (كتشلض البصلة)
ملاك: احم انا راه كنهضر مع مراد ولد خالتي أمينة (شافت فيها مها مقوسة عينها) مبغيتش نزيد نخبع عليك راكي عارفاني كنعاود ليك كولشي
زهرة: سكتي دابا يجي شي واحد، سيري تعاونيهم شوية
ملاك: مغتقولي والو!! راحنا باغيين نتزوجو وداكشي
زهرة: سيري تعاوني
ملاك: قوليلي بعدا انا بغيت نعرف رأيك
زهرة: دابا عاد بان ليك الحمارة رأيي
ملاك: ماااا مكانش صلاحلي نقولها من قبل حتى نعرف كفاش هو كيفكر وتفاهمنا على بزاف دلحوايج للي كنت كنشوفهم واش صالحلي ولا لا
زهرة: ملاك سيري عاونيهم من بعد ونهضرو
ملاك: راه هو بغا يجي يخطب ولكن انا مبغييتش دابا
زهرة: (هزت المغرف) سيري ولا نزرق ليك ظهرك
ملاك: (بقات كتشوف فيها مفهمتش واش باغية ولا لا كان عليها تعاود ليها من شحال هادي ولكن للي عارفة هي عزيز عليها مراد!! واش زعما مبغيااش؟؟! خرجت من تماك مشات جلست كتشوف فداكشي هي معندهاش مع الشباكية)
مغديروش بريوات؟!
سهام: هي الا شمرتي على كتافك وفسختي داك اللوز
ملاك: (شافت فديك الطاوة مشات كتلهي راسها فيه جاها ميساج من عند اورطيغا)
اورطيغا: شنو درتي؟! ياكما غوتت عليك؟!
ملاك: (جاوبت) مزال مهضرت معاها علاش قالتهالها؟!
اورطيغا: على الخطاب لي جاوك ومعلمتينيش
ملاك: (خرجت عينها عرفت حتى هو كيتسنى نوبتو من التوبيخ ولكن مهامهاش قد مكيهمها رأي مها، كملت فسيخ اللوز ومرة مرة كتاكل كتسنى مها تخرج تعيط ليها حيت كلمتها مهمة فهادشي.. جاها ميساج منو قراتو)
اورطيغا: مزال غنتحاسب معاك على هاد **** للي مابغاش يتحايد منك… كملي مع مك وغنبدا معاك انا…
زهرة: (كتنصب لعشا وسااكتة ولكن عقلها خدام مبغاش يحبس كتفكر فملاك وحريرتها وكفاش معاقتش هاد المرة بيها راه شحال من مرة تجمعو بلعكس شحال من مرة فاللول كانت كتعايرو وهي كانت كدوور فيها حيت كانت كتهضر فيه بعنصرية واحتقار ودابا فجأة بغاو يتزوجو!!! حتى صونات عاود أمينة للي شحال طلبت سماحة وزهرة مكتعرف باش تجاوب حيت كاين غلط كبير من جهة بنتها.. جاوبت)
آ…أمينة!!
اورطيغا: لالة زهرة!! واخا نهضر معاك شوية؟
زهرة: (وقفت فبلاصتها شي 10 الثواني عاد باش جاوبت) تسنى دقيقة..
(ردت مغطة ديال الطنجرة حطت المغرف ديال الخشب فوق طبسيل باش ميتوسخش البوطاجي غسلت يدها ناقصة على البوطة خارجة كتمسح فالسربيتة والتيليفون دايراه فجيب الطابلية.. شافت فعيالات لوايسها وحتى نجية كاينة وواحد الجارة اخرى)
الله يعاونكم
ملاك: ماما انا كنفسخ اللوز
زهرة: (حركت راسها باه ومشات لبيتها بالزربة، سدت لباب متبعاها ملاك برويسها خاص ضروووري تسمح ليها متقدرش تجلس مرتاحة ومنها غضبانة عليها فأهم موضوع فحياتها..
دخلت لبيتها من بعد مطرقاتو دارت التيليفون فودنها)
كنسمعك اولدي
اورطيغا: (كان فلبالكو كيكمي سمع كلمة ولدي.. فتحات ليه المجال فين يهضر بأريحية)
انا عارف هاد الهضرة خاص نقولها لراجل سي رشيد
وهادشي علاش كنت عوال من اللول.. ولكن انا بغيت نهضر معاك نتي دابا حيت تنعتابرك فمقام خالتي.. (جاتو صعيبة يقولها ولكن كان أقرب تعبير كفاش كيحس اتجاه زهرة) الا جات على خاطرك مبغيتكش تقلقي من ملاك..
زهرة: هادشي للي كدير..
اورطيغا: لالة زهرة غير سمحيلي نكمل كلامي، (سكتت) انا بنتك باغيها المعقول ومعاها معول نكمل حياتي الا كتاب وبقيت حي، كنت باغي نجي قبل متعرفي هادشي من الوالدة للي عاد باش قلتها ليها وفرحت بزاف،
ولكن مباغيش ندي بنتك نسكنهاا فديور لكرا وهي موالفة تعيش فدار باها معززة مكرمة وحتى وتكون ساكنة فلكرا انا نبغيها تعيش فدارها مرتاحة..
الا كتاب بغيت نشري دويرة تيسعنا انا وياها ونبداو من الزيرو نتي عارفة انا كفاش بديت ولكن تنتقاتل على طرف الخبز نجيبو حلال، وبنتك ملاك لقيت معاها راحتي..
زهرة: (كتسمع ليه وفنفس الوقت حاضية من السرجم واش جاي راجلها وكتشوف فبنتها للي جالسة ممرتاحاش ولكن كتاكل فاللوز)
اورطيغا: للي نقولك هو عمرني درت شي حاجة قبيحة معاها ولا عمرني نفكر هي عندي عزيزة بزاف، ووجهكم ديما حاضر قدام عيني وبلا هادشي راكم عرفتو شنو ربيتو.. لالة زهرة مبغيتكش تاخدي مني موقف والوالدة راه حتى هي فاش قلتهالها فرحت بزااف واول حاجة قاتلي هي نمشيو عندكم أنا للي مزال معطل فقضية الدار ولكن قريب ان شاء الله نجيو عندكم وخليت حتى الوقت لملاك باش تفهمني ونفهمها هدا راه زواج الواحد خاصو يريݣل شحال من حاجة باش يدخل ليه ولكن كولشي فحدود..
زهرة: مراد انا نهار اللول درتك ولدي
اورطيغا: الله يكبر بيك الآلة زهرة حتى نتي فمعزة الوالدة
زهرة: (بقات ساكتة)
اورطيغا: (وتراتو بسكاتها واش حتى هي مغتقبلش بيه وحكمت عليه مسبقا شمكار ومصالحش..)
زهرة: مرحبا بيك اولدي عندنا..
الغالية: (كانت مع بنتها فصبيطار ميتة بالخوف جابوها غير هي والخدامة اما مرت ولدها مخبعة عليها كولشي وولدها وراجلها مسافرين على قبل الخدمة، تسنات طبيب يخرج)
الله يا سيدي ربي لحبيب عمرني آذييت حتى نملة!!!
شنو غندير فهاد الموصيبة للي طاحت علينا (هزت كفوفها لسما)
الا هي من عندك يا سيدي ربي د مرحبا بيها الا من عند العبد الله ياخد الحق الله ياخد فيهم الحق واحد واحد…
(صونات على ادم جاوبها ممكن تلقى جوابها علاش بنتها لتحت راسها)
ولدي فااينك؟!!
ادم: انا فطنجة الآلة الغالية
الغالية: اااه صافي حتى ترجع وصوني علية (عيا كيأكد عليها شنو واقع مقالتلو والو قطعت، هو براسو توحشها ومدام عيطت مها الا كاينة شي حاجة هز طموبيلتو ومشا لدارهم كيحووم… خرج طبيب وحيت جات على الݣازو كانو عندها ضربات خفاف وخبيشات ومكاينش شي هرس مناش كانو خايفين ورجلها تلوات شوية)
نخرجوها اليوم ادكتور!!!
….: خليوها اليوم ترتاح حيت سخفانة شوية
الغالية: لا لا خاصها ترجع ادكتور غير خليني نديها للدار
….: واخا مدام ولكن تسناو على ميكمل ليها السيروم…
الغالية: (جلست فالكرسي كتبكي واش بنتها كانت بغات تنتاااحر تفكرت بنتها كفاش كانت بحال شي وردة ودابا كتمشيلها من بين يدها وهي كتشووف واش طيع فشنو بغا ولدها ويديوها تعالج ولكن راه بحال كتقتلها فالحياة هضرة العائلة غيخليوها تسمم نهار على نهار وهي عارفة مزيااااان شنو كيسوااو وعاد راجلها للي أبسط مصيبة غتصيفطو كوومة!!…)
المساعدة: لالة سي يوسف باغي يهضر معاك (مدت ليها التيليفون)
الغالية: (بهمس) علاش جاوبتيه الملعووقة (شدت التيليفون معصبة مبعدة من تماك حيت ليرجونص والدنيا عامرة واخا كلينيك)
الو حبيبي…
يوسف: الوالدة!! جيت للدار ملقيت حتى واحد.. فينكم!!
الغالية: حنا خارجين شوية ونجيو
يوسف: فينكم نجي عندكم وغيثة واش معاك؟!
الغالية: اه معايا خرجتها تفوج شوية
يوسف: مزيان قوليلي فين؟! بغيت نشوفها ونشوف كبقات بقا بالي معاها بزاف
الغالية: (بعصبية) صافي قلتلك حنا غنجيو دابا يااااه شحال تتلسق… (قطعت وتمشات لغرفة فين كاينة بنتها.. دخلت لعندها تفيقها باش يمشيو دغيا مالقاتهاش!!! ضربت ففخاضها)
اويلي فين مشات لبنت؟!!!!
زهرة: مرحبا بك اولدي..
اورطيغا: (غمض عينو متبسم عارف هاد السيدة فشكل) ليلي الشرف لالة زهرة
زهرة: (حركت راسها باه زرب عليها بلكلامو لحلو) غير قولي خالتي
اورطيغا: هه مرحبا خالتي
زهرة: غير هو اولدي انا عارفة بنتي وعارفة حدودها وحتى نتا بديت كنعرفك ولكن باها صعيب مغيتقبلش هادشي كأي أب هو مكيعرفكش ونتا عندو غرييب حدو كيعرفك ولد أمينة
اورطيغا: ..عارف.. عارف وللي بغيتك تعرفين عمرني غندير شي حاجة للي تكرهوني فيها، انا وياها غير تنتعارفو كتر قليييل بزاف فين تنشوفها حدنا أغلبية غير التيليفون .. ومبقى والو ونجيو عندكم وكولشي ان شاء الله يكون رسمي..
نطلب منك حاجة اخرى ومتديهاش مني قلت صواب.. الله يرحم ليك الوالدين متقلقيش من ملاك راه انا للي شحال وانا تنتبعها باش تبغي تهضر معايا
زهرة: (حتى متكونش عارفة بنتها زايغة) يكون خير اولدي
اورطيغا: سمحيلي بزااف اخالتي زهرة… انا نقطع، (تفكر) اه وحتى الوالدة راه من قبيلة وهي ساخطة علية خايفاك تقلقي منها راك شفتي الحالة راه نتي للي لقات فيك الخير ومبغيتش نكون سباب باش تخسرك
زهرة: ههه معندها علاش تسخط انا نهضر معاها
اورطيغا: الله يكبر بيك.. بسلامة (قطع معاها عاد تهنى.. دخل عند مو عاود ليها باختصار) صافي هادشي للي كاين
أمينة: عجل اولدي فشرا باش نمشيو عندهم راه منحقهم ميبغيوش نتا وتكون عندك ختك متبغيش
اورطيغا: انا متندير حتى حاجة خايبة لبنتهم صافي غير نفري ديك لمنانة ونشدوها عندهم… شنو نتي نوصلك ولا تبقاي هنا تباتي؟
أمينة: غير وصلني اولدي..
(وصلها وهوما كيهضرو فنفس الموضوع هبطت دخلت للرياض هو مشا للحومة يقضي شي غراض عاد رجع للمحال)
~~~~~~~~~~~
ملاك: (صونات عليها وفاء للي مشات لتازة تشوف واليديها ناضت من تماك ودخلت لبيتها) واش مزال جالسة تماك؟!
وفاء: غندوز معاهم شي يامات فرمضان وغنهبط لفاس
ملاك: اجي دوزي معانا شي يامات
وفاء: ضرووري.. مقالكش اورطيغا واش عمر رجع؟؟
ملاك: نهضر معاه فهادشي باش يزيد ينوضها معايا؟!
وفاء: (قررت) صافي انا غنهضر معاه
ملاك: ههه تكلمااي ابنتي وصبري على خبزتك
وفاء: مبقالي فين نصبر باش نعرف واش كحل ولا بيض
ملاك: (هزت حاجبها) شكون؟!
وفاء: ازمر زعما واش عمر معايا ولا لا ونتي دماغك غير خااسر!
ملاك: ههه (جات تهضر وهي دخل مها) وفاء بلاتي ونهضرو!! (قطعت دغيا ووقفت)
ماما!!
ملاك: (بخوف كضور عينها) ماما!!!
زهرة: راه نتي للي ماما دابا!! يا لالة وشحال قادة!!! مكتخلي لا هدا لا هدا للي جا فطريقك ترديه على ملتك!!
ملاك: هو للي كيبغيوني!!
زهرة: ومزال زايدة فيه!! بغيتي تعاودي قصتك مع حمزة؟!
ملاك: منكذبش عليك اماما لا علاقة هو وحمزة والله حتى مراد زوين وظريف فن فن
زهرة: دابا مبقيتيش باغياه زهرة ولباس عليه
ملاك: باقا غندير واحد دارت ونديه يدير سي عملية يبياض شوية، ولا غير خليه هاكا يحايد علية العين شوية
زهرة: (ظحكتها) هه جلسي لمك
ملاك: اوا هكاك ظحكي.. (زفرت متبسمة) هدا بغيتو واخا ما فيه ميتبغى ومعنديش مشكلة فحالتو المادية حيت عارفاه..
زهرة: يتعول عليه!!
ملاك: لا.. راجل مو لباس عليه ميمكنش ميخرجلو منو والو
(مها خرجت عينها)
اغير كظحك هو عاودلي على كولشي الا مخدمش على شي حاجة ميشدش فلوسها.. وعاد باغي يشري الدار باش يجي
زهرة: اممم مهم منين نتوما غراضكم زواج نساو ديك الملاقية التيليفون راه قاضي غراض
ملاك: حشوومة عليك اماما راه كنبغي نخرج نفوج شوية وعندو شييييي مسااارية يا ماما..
زهرة: اوا وباك؟!
ملاك: هانتي شحال وانا معاه عمرك عقتي بية ولا عيقت فلخروج راه كولشي عندي بلقيااس
زهرة: وهادشي علاش مقلتيهش لية من شحال هادي؟!
ملاك: خفتك حتى نتي تحݣريه ومتبغيش انا عارفة نتي باغيالي غير الخير وباغية تشوفيني مستقرة مع واحد لباس عليه
زهرة: (خرجت عينها) اعوذ بالله!! من فوقاش كنقولكم سيرو غير مع للي لباس عليهم؟!!
ملاك: ماشي زعما هكاك!!
زهرة: ملاك متخليش باك ياخد منك موقف الله يرضي عليك كنعرفك بعقلك وهداك ولد الناس راه تعذب باش كبر عارفاه كيخدم ويدمر وي..
ملاك: ونتي.. نتي باغية اماما؟؟ قوليلي الصراحة ككيجيك؟!
زهرة: باغية الا حضرتي عقلك, أمينة وولدها متلقايش حسن منهم ولكن شنو غديري فخدمتك؟!
ملاك: كنتسنى تخرجلي ميطاسيون
زهرة: علاش دفعتي ميطاسيون؟!!
ملاك: (خرجت عينها)
زهرة: (طلعت معاها بقرسة مسمومة وملاك خسرت كمارتها مقدرتش تغوت) وهو للي وراك الدار للي بغيتي تشري؟!
ملاك: (بحر القرسة) لاااااا… (كتحك فيها مغبنة) اه هو..
غيثة: (ماشية بلحفا والبرد كيضرب فيها وهي كتعرج ويد شداها باليد التانية حيت كضرها شوية هاملة الجرح للي دارتو من بعد منترت إبرة السيروم.. عينيها غير كيدورو وودنيها ضروها من صداع الناس والطموبيلات الموسيقى فالمحالات.. كانت باغية تقلب على شي واحد يعطيها شي حاجة تكالما بيها ومكيهمش شنو يطلب مستاعدة تعطي أي حاجة معندهاش مشكل تقبلت الواقع المخزي ديالها..
بقات غير كتمشا للي كيضسر عليها كتوقف تشوف واش يكون عندو شنو باغية وكتحرك راسها بلا بحال شي حمقة وتزيد فطريق لقات رجليها داوها لمحال اورطيغا يمكن حيت لاكلينيك نيت فالسعادة وكان قريب ولا فطرة عندها منين توحل تمشي عندو رجعت مبعدة شوية بقات مترددة الا شافها فهاد الحالة غيعيط لييها على ليوسف للي كيتسنى إشارة منها يديها المركز شافت طموبيلتو قلبت ضرب بالجهد تخبعت مراقبااه حتى كتشوفو نزل توحشاتو بزاااف ودخل للمحال ضرتها معدتها ماشي بيه ولكن من هاد القطعة للي هي فيها شافت دري موراها كيتبوق بجوان مشات عندو وهي حشمانة من راسها ولكن شي حاجة كتخليها دير هادشي)
عفاك واخا تعطيني نكمي
…: (طول الشوفة فيها عاد مد ليها الݣارو وهو مبوق باينة من عينيه، شداتو دارتو فمها جبدت منو وهي تبدا تكح معرفتش تخرج لهوااا جا ياخدو منها)
عفاك غير مرة وحدة!
(رجعت جبدت ولكن مكتعرفش تخرج لهوا بقات جبدة من مور جبدة حتى تسالا داك جوان واخا كتكحب الا انها مستامرة باغا تبوق والسلام، داك المبوق زاد فحالو وهي جلست على كرطونة فين كان جالسة مغمضة عينها كاين شوية ديال التأثير ولكن مكافييش بقات جالسة متبعة رجلين الناس وحلمها تلاقا غير بادم دير للي بغا مهم يعطيها غير حبة وحدة تنهي هاد العذاب. فاش كاينة..
غمضت عينها كتحاول تفكر غير نمرتو المشكل حافضاها ولكن الرقم التالي للي معقلاش عليه وقفت كتطلب وترغب الناس يعطيوها مكالمة وقف دري عطاها حيت مزال حالتها كتبان نقية وبنت الناس.. خلاها تجرب حتى طاحت فيه فالمحاولة الثلاتة بقات كتبكي)
الو ادم انا غيثة عفاك اجي عندي
ادم: فينك ماماك من قبيلة تتقلب عليك؟!!
غيثة: عفاك اجي عندي نتا بوحدك عفااك متقولها واالو
ادم: واخ واخ غير فينك؟!
غيثة: انا.. انا.. ف.. معرفتش بالظبط شوف انا حدا.. قرييب محال اورطيغا…
ادم: (بعصبية) عاود
غيثة: والله مدخلت عندو غير قريبة اما صاافي اصلا مكنبغيهش مكنحملوش غير وصفت زعما عفااك عفاااك متخلينيش…
ادم: انا جاي
(قطعت وشافت فالولد كتمسح دموعها بتريكو بيجامتها)
شكرا اخويا
…: واش اختي تبغي نوصلك لشي بلاصة ولا نعطيك فلوس تاكسي
غيثة: لا لا صافي ها هو جاي خطيبي.. شكرا
(الولد مشا وهي بقات واقفة مكمشة بلبرد كتقلب على طموبيلتو بأحر من الجمر حتى بانلها مشات بالزربة ركبت وشافت فيه بلهفة) عطيني عفاك شي حاجة
ادم: (كيشوف فيها مشوكي بان فيها الضعف ويدها فيها دم يابس) شنو هاد الحالة فاش كاينة نتي؟!
غيثة: (كتبكي) هادي حالتي بلا بيك
ادم: (كيشوف فيها حتى كتبغي تبقى فيه وكيترااجع هاكا غيخليها محتاجة ليه كتر) شوفي انا غنوصلك لصبيطار فين كنتي
غيثة: لا لا عفاك، ادم عطيني شي حاجة عفاك كنموووت..
ادم: (جبد من جيبو بواطة صغيرة حلها كانو فيها شي حبات بغات تخطفها ودفعها) صبري.. حبة وحدة الا شربتي كتر غتموني!!
غيثة: غير عطيهملي عفاك كاملين كل نهار نشرب وحدة
ادم: (جبد حبة حلت فمها حطها فوق لسانها مد ليها قرعة ديال لما شربت بالزربة والما كيسيل من جناب فمها..
كان متبعها دابا رجعت مدمنة رسميا.. زفر معاجبوش الحال ولكن هي ختارت كان عندها اختيار،
وكانت اسهل وحدة غتحقق ليه لي بغات اما وكان عول على ملاك وكان راه دابا فالحبس وهو مو وختو ولكن استفزازها لغيثة غتدفع ثمنو…
وصلها لصبيطار مقريها الا جبدت سميتو عمرها باقي غتشوفو دخلت لصبيطار وبقا متبعها رجع صونا على الغالية للي خارج عقلها)
لالة الغالية شي خبار!! انا شاد طريق لعندكم من طنجة
الغالية: (بخوف) والو اولدي صيفطت الخدامة تتقلب برا وانا بقيت هنا تنتسنى الا بانت
ادم: شوفي قلبي غير تماك فصبيطار راه معندها فين تمشي..
يوسف: (رجع عند خديجة حيت عصباتو مو بزااف لقاها دايرة عشا رومانسي ومقادة البيت واجواء شاعرية، والمشكل هو معندو ݣانة فمرة ومبغاش يجرحها حيت معندها دخل فهادشي..)
خديجة: حبيبي انا وجدت ليك الحمام شوية ولحق عليك (غمزاتو متبسمة ومشات كتحلون للكوزينة..)
يوسف: (بشبه ابتسامة) واخ… (حط حوايجو دخل للحمام مكره طلق الرشاشة دغيا دوش وخرج لقاها كتحط حوايجها باش دخل)
الحمام فيه ريحة الݣاز مجهدة!!!
خديجة: و… و لكن حنا عندنا شوفو ديال الضو!!
يوسف: ياكما البوطة فالكوزينة؟!
خديجة: معرفتش يمكن حيت شاعلة الفران (رجعت كتلبس حوايجها تابعااه)
يوسف: (طفا الفران بقا كيقلب فالبوطة ورجع شعلو بلا بريكة باش تكتر الريحة وميتحشمش خلاها توصل وحل الفران)
حبيبة خاصك تنتابهي راه شي مرات تيتشعل ويتطفا بوحدو
خديجة: مشميت والو.. (عاد شمات) اه بالصح عندك الحق
يوسف: حيت كنتي حداه ردي بالك احبيبة سيري خرجي انا نفس الكوزينة عاد نشعل على لعشا
خديجة: صافي واخا.. ولكن عندك يضربك البرد راك باقي بلبينوار
يوسف: متخافيش… (معجبوش الحال يستغباها ولكن اللهم هكا ولا يجرحها.. خرج من تماك لقاها حدا لباب)
حقا اليوم مشيت للدار، خويا والواليد مسافرين على شي خدمة لقيت غير مرتو منين سولتها على لوخرين قالتلي مشافتهمش منين خرجو
خديجة: اوا!
يوسف: صونيت على الوالدة تنسولها تتجاوب بلݣرام فالتالي قطعت علية بحال تتقولي ماشي شغلك فغيثة حيت كنت بغيت نشوفها
خديجة: الا غير.. الا كانت مشغولة ولا..
يوسف: حبيبة هي تتهرب مني على حساب المركز
خديجة: (تبعاتو لبيت كيلبس حوايجو كتشوف العضو ديالو مرخي.. دغيا قلبت عينها يعني معندو ݣانة) علاش متجيبش ليها طبيب للدار كما قالت مك
يوسف: معارفش على هاد الموضوع انا تنعرف خاصها تمشي تعالج تماك باش نقطع الشك باليقين اما الدار معارفش اصلا شكون تيدخل ويخرج والخدمة عندي مزيرة ميمكنش نخليها ونبقى عاس تماك
خديجة: جرب بعدا عاد شوف قضية المركز
يوسف: يكون خير..
خديجة: (بانلها معندو ݣانة يعني بلا متفكر تكون بيناتهم شي حاجة هاد الليلة) انا نشوف لعشا
يوسف: واخا حبيبة…
اورطيغا: (كمل خدمتو سد المحال من بعد منقاه.. طلع للدار كانت مخلية ليه مو عشاه، دوش لبس مزيان حيت تحرك البرد شعل التلفازة وحط لعشا صونا عليه عمر للي وصل الداخلة وكيوريه فين هو ومن موراها غيشد الطيارة لفاس وعاد يمشي لݣرسيف)
دوز شي يامات معانا وعاد سير…
صافي مزيانة دوز شي يوماين سير لݣرسيف وجيبهم..
صافي، الله اودي مرحبا…
هي غير تجيو هنا غترجع من الرياض..
مرحبا… (قطع معاه.. كمل عشااه وكتب ميساج لملاك)
*شحيييمة سيري لبيتك نشوفك شوية*
(صيفطو وتسناها تعلمو باش يصوني كمل ناض غسيل فين كلا.. رجع جلس يرتاح من مور هضرتو مع زهرة رتاح باقي غير تكون شي خطوة رسمية باش يتهنى كتر، حتى صونات عليه.. جاوبها)
زين
ملاك: (دارت راسها منفخة حيت يمكن نسا علاش مقالتش على الخطبة وكشعار عندها نضرب ونبكى نسبق ونشكي!! ) علاش حطيتوني فهاد الموقف مع ماما؟؟! حشومة عليكم!
اورطيغا: وعلاش ممنحقهاش تعرف؟!!
ملاك: تعرف مني أنا امراد وحط راسك بلاصتي
اورطيغا: دابا شنو قالت ليك
ملاك: معجبهاش الحال نخبع عليها
اورطيغا: كنت قلت ليك تعاوديلها نتي خير حيت متنديرو حتى حاجة قبيحة
ملاك: وخا هكاك
اورطيغا: معليش مهم دابا عرفت بقا غير باك
ملاك: ههه متحاولش دابا!! ولا نسا شي ملاقية بيناتنا
اورطيغا: مغنزيدكش فوق رمضان ازين (تبسمت) حيدي علية دوك لحوايج نشوفك مزيان
ملاك: باسم الله عليك ههه عاد كنت كتقول مكنديرو حتى حاجة قبيحة
اورطيغا: وريني غير شعرك
ملاك: كرد حرش ما فيه ميتشااف
اورطيغا: ههه أَمّييي زيديني..
~~~~~~~~~~~
الغالية: (جات عندها بنتها بملامح جاامدة عيات تسولها فين كنتي وعلاش خرجتي لامتها.. ووالو غير كتشوف فيها كانو رجليها موسخيين مجرحين عيطت على المساعدة وخداوها للدار دخلت دوشت ليها كتشوف فبنتها وقلبها كيتعصر بغات تبكي عليها الدم لبستها حوايجها كتشوفها ضعافت بزااف وغير صاااقرة مفهمتش هاد تقلب المزاج فين راها)
عفاك احبيبتي قوليلي شنو بيك؟!
غيثة: بغيت نعس
الغالية: عفاك اكبيدة قوليلي غير مالكي؟!
غيثة: والو اماما بغيت نعس (مشات لبلاصتها تغطات وغطات حتى وجهها بقات غير كتبكي خرجت مها حتى هي كتبكي ومشات لبيتها وكولها كترعد كتحس براسها غتفقد الوعي فأي لحظة…)
ادم: (صونا على الغالية) لالة الغالية انا قربت نوصل لفاس
الغالية: عذبتي راسك اولدي حنا رجعنا للدار
ادم: معليش، ياك غيثة مزيان دابا؟!
الغالية: الحمد لله اولدي.. مزال مغتصالحو؟!
ادم: انا غدا نجي نشوفها
الغالية: ان شاء الله…
خديجة: (تعشاو.. وكانت غسلت لماعن وكتسمح البوطاجي وسااهية غدا عندها الإباضة ومن جهة أخرى يوسف غارق مشاكل ديال ختو، كتبغيييه ولكن المشاكل للي دازت منهم كتار لدرجة مبقاش عندها القوة تزيد تصبر العمر كيجري وتمنات وليد ولا بنيتة يعمر عليها حياتها هي ويوسف، بغات تربي وتسهر وترضع عينيها عمرو دمووع متقدرش تظغط عليه ولا تقول شي كلمة حيت يوسف كان ليها نعم الزوج…
مسحت البوطة اصلا نقية كتحاول متخلي من موراها حتى حاجة موسخة حيت عارفاه كيكريتيكي وهادشي موالفاه شغل وشقا مشات لبيتها ملقاتوش مشات للصالة كان جالس داير نظاظرو وكيقرا مخشع فشي كتاب باين فرونسي جلست حداه مدورش حتى وجهو بحال مجلستش ولا كاينة حداه)
يوسف!!!
يوسف: (دار صبعو فاخر كلمة قرا)
وي حبيبة
خديجة: مجاكش نعاس؟!
يوسف: مزال… (شير ليها) هزي هداك لكتاب قرايه
خديجة: (شافت فالطبلة كان حاط كتاب هزاتو) نقرا هدا؟!
يوسف: اه تعمري وقتك
خديجة: مفيااش!!! (وقفت) انا غندخل ندير شي فلم نتفرج فيه
بوسف: جو بونص كتاب حسن ليك من شي فلم
خديجة: (جا يهضر) الا كملت من هداك الكتاب لحق بية.. (خلاتو متبعها وهي كتنݣر) الوقت لي يضيعو فداك لكتاب ينوض يدير دراري!!!
يوسف: (رجع كيقرا لكتاب للي كيهضر على كفاش تعامل مع المدمنين.. عقلو بدا كيفكر فخديجة محس حتى سد لكتاب ومشا لحق بيها لقاها لابسة كسيوة جالسة فوق النموسية كتاكل شكلاط وكتفرج)
مقلقة؟!!!
خديجة: لا.. غير كنتفرج
يوسف: (شاف فالتلفازة) فاش تتفرجي؟!!
خديجة: فشاروخان
يوسف: اممم منين كنت برهوش متفرجت فيه.. نقاد بوبكورن؟!
خديجة: اه (معرفتش شنو هو)
يوسف: انا جاي…
~~~~~~~~~~~~
ادم: (صونا على غيثة لقا تيليفونها مطفي صونا على التيليفون للي كان عطاها حتى هو مطفي معرفش كفاش يتواصل معاها كان باغيها تخرج عندو حيت توحشها وفنفس الوقت قلق عليها، والا صونا على الغالية غيبان فالصورة وماشي فصالح ديالوو…
حتى كيبغي يتراجع ويخليها ويخلي هاد الانتقام ويمشي فحالو وعقل كيمنعو حيت غيعيش حياتو وهو كيقول وكان غير كملت مغيجلسش مرتاح وللي دار ليهم هاد هادشي فاش كيفكر عاد غيرتاح ويرجف فحالو وتكون قرية اذن باش يتعلمو مزيان.. )
أصبحنا وأصبح الملك لله..
خديجة: (فاقت من نعاس مسخسخة، لقات يوسف كيدوش فكرت مزياان شحالما كانت المعاشرة كيكون حظووظ كتر فالحمل.. ناضت كانت عريانة لوات عليها بينوارها ملبساهش ومشات للدوش دخلت لقاتو تحت الرشاشة)
صباح الخير..
يوسف: (تبسم) صباح النور
خديجة: (حيدت لبينوار معلقاه ودارت يدها على صدرها، تبسمت) كاينة شي بلاصة حداك؟!
يوسف: (تبسم مشير عليها تجي كتسالي معاه بهاد الحركات للي كتجي منها مرة مرة كتخليه ناسي كووولشي…)
~~~~~~~~~~
ملاك: (مشات للخدمة كما العادة وهي كتهضر مع مراد وصلت قطعت.. خدمت شوية كانت خارجة على برا لشي دوار على حساب شي قنطرة، ورجعت لقات زيينب كتسناها) قلت غلقاك مشيتي
زينب: تسينتك. جبنتلك خبار قبل ميقولهالك المدير
ملاك: السلامة يا ربي!!
زينب: هه… واخا على مك صافي سخيتي بينا!!
ملاك: (خرجت) لاااااا متقوليهاش؟!!!
زينب: والله سمعت فاس كاين بوسط والمدير غيعمر ليك سمييتك
ملاك: (قلبها ضرب وتبسمت) ولكن مزال مقالي والو
زينب: دابا يقولهاالك انا غير راجلي للي قالها لي ولكن ديري مفراسك واالو حتى يقولهالك هو
ملاك: (فرحت جاها ميساج فلواتس من عند اورطيغا حلات كانو تصاور ديال الدار لي بغات تشرؤ كما قال كحلة كتبات ليه)
واش صافي كملت؟!
اورطيغا: بقات لفنسيون ديور ب5 تباعو بقات ديالك تتسناك
ملاك: (خافت طير ليها) وشنو ندير؟!
زينب: شو لمها انا كنهضر معاها وهي خاشية وجها فالتيليفون
ملاك: ههه غير مع ختي بغاتني فشي حاجة
زينب؛ اممم مهم ديري مفراسك والو حتى نتلقاو غدا…
ملاك؛ شكرا حبيبتي لهلا بخطيك وسلمي على سي عبد العزيز..
اورطيغا: (صونا عليها) ملوكة
ملاك: (خرجت برا الادارة باش ميعرفوهاش علاش كتهضر) بانلي حتى انا غنمشي نݣريسي الغالية نكمل فلوس الدار
اورطيغا: ههه شوفي معاها راه ملعقة
ملاك: ههه هي نبلانيلها
اورطيغا : لا لا بلاش خليةدوك الافكار عندك متخرجيهمش
ملاك: ههه انا غنهضر مع ماما
اورطيغا: غير زربي شوية
ملاك: امتى مولاها يكون ففاس
اورطيغا: تلاقيتو قبيلة راه مزال هنا على ميكمل البيع
ملاك: وشحال يخص ديال الفنسيون!!
اورطيغا: شوفي بعدا شرا وديك الساعة نشوفو الفينسيون من بعد تنعرف هنا ناس يصبرو معاك
ملاك: (تبسمت) صافي واخ..
أميمة: (دقت هي ونجية باب دار رشيد.. تحل لباب كانو عارفينها جاية حيت علماتهم نجية دخلت حانية راسها حطو اتاي حلوة وهي تنطق مكتشوفش فيهم بخجل)
انا جيت هنا طالبة منكم سماحة على شنو كنت درت هداك نهار
زهرة: الله يسامح ابنتي ولكن طريق ملاك فوتيها عليك شفتيها فطريق ديري راسك مكتعرفيهاش حتى ووهي تهضرك متهضريهاش واخا انا عارفة بنتي عمرها تشوف فيك وحتى الا بغيتي سماحتها غتسامك من بعيد غير متقربيش ليها..
أميمة: كوني هانية خالتي زهرة عمري نعاود هداك تبرهييش والله (طرطقت كتبكي) معرفتش شنو كان وقعلي!!!
(بقات كتعاود كفاش مرضت من مور موت ولدها وشحال كانت كتمنى تشوفو وتسمع بكاه وترضعو، بقاو كيواسيوها ناضو مشاو وهوما بقاو مجمعين حتى دخلت ملاك)
ملاك: ماماااااا اجي معايا
زهرة: (ناضت مشات لبيت ملاك لقاتها كتسناها سدت لباب) مال مك (حسابها عرفت بوجود اميمة)
ملاك: (جبدت التيليفون كتوريها الدار للي بغات) عفاك اماما قوليها لبابا يوجدلي فلوسي دغيا
زهرة: فلوسك!!
ملاك: (خرجت عينها) اه فلوسي ديال عرسي انا حرة مبغيت بو عرس بغيت الدار نكريها نترزق منها
زهرة: اوا والفنسيون؟!
ملاك: احم فلوس صداق للي غيعطيني ولد مينا
زهرة: ههه لفراش غتشريه بفلوس نحيلة ديال الولد؟!
ملاك: ههه لا هادوك ضربت ليهم الحساب غنفرش بالكادويات لي غتعطيوني ههه.. ماما والله مبغيتش نزݣل هاد الهمزة
زهرة: خاص يمشي معاك باك يشوف
ملاك: اه راه ضرووري غير يزرب عفاك اماما راه لبنات فاطمة ونعيمة غيعاونوني بمليون ونص لوحدة ومريم مبغيت نشد من عندها والو حيت تابعها سبوع اوا بابا يعطيني ديك البراكة ديالي ونتي باشما سخاك الله
زهرة: ههه وانا لاش!!
ملاك: وا غير باش تدخل البراكة ديالك فديك الدار.. هه غير كنظحط معاك نتي تكلفيلي غير بابا عفاك هضري معاه
زهرة: واخ يجي يتغدا نهضر معاه
ملاك: صافي باش من مور لغدا نمشيو لفاس
زهرة: اليوم؟!
ملاك: اه خير البر عاجلة
زهرة: ومنين مراد ضبر ليك على هاد لبيعة وشرية رخيييصة علاش مشراش هو؟!
ملاك: مابغاش يشري تماك يمكن بغا فين ساكنة مو، وتماك غالي ماشي بحال هاد ديور
زهرة: اممم بدلي حوايجك واجي على ميجي باك…
~~~~~~~~~~~~
ادم: (جا لدار الغالية جايب بوكيه دالورد وشوكولا) لالة الغالية!!
الغالية: (بتعب) مرحبا ولدي
ادم: شكرا.. فين غيثة بغيت نشووفها؟!
الغالية: واخا انا نعيط ليها
ادم: واخا (طلعت علماتها هبطت عندو ببيجامة وزيرو ميكاب سلمت عليه بالوجه وجلست)
غيثة مالكي رجعتي هاكا؟!!! واش عندك شي مشكل؟!
غيثة: ماما واخا تقولي لنادية تقاد لينا فطور.. تبغي تفطر معايا فالجردة؟
ادم: اممم واخ (ناضت مها وشاف فيها) خاص نتلقاو اليوم
غيثة: ادم كفاش غنقدر نحبس هادشي!!
ادم: متبقايش تاخديه اشيغي
غيثة: مقدرتش
ادم: (لهدوء) سيري مع خوك للمركز
غيثة: (كتبكي) منقدرش
ادم: (جبد من جيبو حبة) هادي قسميها على 4 باش ميوقعش ليك بحال اخر مرة وانا غنفكر ليك كفاش تبراي واخا حبيبة
غيثة: (شدتها بالزربة راه أي واحد مدمن تعطيه هادشي بحال عطيتيه الحياة..)
رشيد: (كيهضرو هو وزهرة) راه ماشي معقوول لبنت منديرلهاش العرس، وعاد ملاك لا لا منقدرش!! بنتي صغيرة ومنديرلهاش!!
زهرة: اوا غير بالعقل ارشيد هي فضلت تشري دارها ونتا غتمشي معاها تشوف واش هادشي مسلك ولا لا ونتا كتقول عرس صافي هي ختارت نديرولها صويديقة بالطلبة والله يعاونها
رشيد: وشحال بغات؟!
زهرة: نتا عارف كل وحدة جمعنالها حقها من شحااال هادي، عطيها داكشي للي جاها فنصيبها والباقي غتخلصو طريطات وحتى خوتاتها غيعاونوها ومن تماك صبر راسها مع دارها تفينيها تفرشها للي بغات
رشيد: (باستلام) نشوفو هادشي (تحط لغدا كلاو وخرجو هو وبنتو شدو طريق لفاس، كيهضرو على الدار وهي كتزيد تقنعو كتر وعندها مع الاقناع، بقالها شوية وتبكي) ههه صافي خلي نوصلو ويكون خير
ملاك: من ديك الدار منخلاق ابابا هاني كنقولهااالك..
(كتبت ميساج لاورطيغا علماتو غتكون هي وباها تماك وحتى هو سبق مشا للحومة..
وصلو كان هو فالقهوة حاضييهم من لبعيد للي اونفاص معاهم السمسار كيشرح ليهم وموصيه اورطيغا يزيد يقنع الراجل مزيان, طلعو للدار شافوها كاين للي بدا فالفنسيون ورشيد هضر معاه يخليلو يوماين يرجعو ويوجد وراقهم ونيت يسول ويقلب على راسو.. خرجو هو وملاك)
شنو بان ليك ابابا
رشيد: كاين واحد السيد كنعرفو غيسول لينا ويعرف شنو كاين واش هادشي قانوني حيت بانلي رخييسة بزاف راك سمعتي للي حداها شحال تباعت اوا ونجاوبك
ملاك: صافي واخا.. نمشيو ناكلو صلاد فروي؟! (هزت حواجبها متبسمة) على حسابي
رشيد: (تبسم) نمشيو..
ملاك: لهلا يخطيك علية العمر (دارت يدها فذراعوو ومشاو للطموبيل ركبو وزادو)
اورطيغا: (حاضيها من لبعيد كفاش كتظحك وتشد فباها تبسم عارفها كتݣجم الواحد تقنعو تقنعو.. من مور ممشاو ناض ومشا عند السمسار يعرف شنو كاين انا حتى ملاك خاص حتى يصوني ويسول عاد تقول شنو كاين…)
~~~~~~~~~~~~~~~
الياقوت: (مشات عند الغالية كان ادم وغيثة برا فالجردة كيهضرو جلست كتسناها حتى جات وقفت سلمت عليها) طاتي كيف بقيتي الحبييبة؟!!!
الغالية: الحمد لله ابنتي ونتي
الياقوت: الحمد لله اطاتي تتباني عيانة!!
الغالية: غير شوية البرد
الياقوت: لباس عليك احبيبة.. قوليلي انا دابا غنجيب…
الغالية: بالصح؟ هنا!
الياقوت: انا نعيط على ختي ولكن هادشي تيخوف منعرفش كفاش يوسف غيتقبلها وهو محاملش حتى يشوفني!!
الغالية: بالسيف عليه غيقبل عيطي لختك..
الياقوت: (صونات على ختها للي كتسناها فالطموبيل برا، تبسمت) غتفرحي اطاتي
الغالية: (حركت راسها باه كتسنى فلباب حتى بانت ختها هازاه ناضت الغالية فاتجااهم كتشوف فلبيبي ناااعس فكونة ديالو، ضارت عند الياقوت)
ولد يوسف؟!!
ملاك: (مشات لطواليط من بعد مكلات الصلاد هزت تيليفونها صونات على مراد للي صونا عليها ومجاوبتش) ألووو
اورطيغا: واش بنيتك كتفااصلي مع السمسار يزيد ينقصلك الثمن وانا اعطيك ثمن ميحلم بيه حتى واحد!!
ملاك: قلت نجرب حظي هه
اورطيغا: باغا الدار فابور ابنتي؟؟!
ملاك: مكرهتش كنموت على حاجة فابور كتجيني حلوة حلوة
اورطيغا: ناااااري على زقراامة
ملاك: ماشي زقرامة غير مزال كنفكر فالفنسيون وشحال خاصني باش نقادها دغيا نكريها
اورطيغا: مهم شنو دار باك
ملاك: صراحة كيبانلي عجباااااااتو الدار وسول على كولشي ومزال غيزيد يسول
اورطيغا: يعني الاثنين تجيو تشريو؟!
ملاك: داكشي نييت واخا غتجي فرمضان
اورطيغا: صافي مزياان، باقية فاس بغيت نشوفك شوية!!
ملاك: باقية ولكن مع بابا
اورطيغا: وانا معنديش حق فيك شوية راه توحشنا النظر لوجهك الجميل
ملاك: (تبسمت) غدا؟!
اورطيغا: اممم نشووف.. مع رمضان الخدمة تتولي عندي تريبل شحال من مرة تنبقى فذبيحة حتى لعشية
ملاك: ورخف على راسك
اورطيغا: وباش ندير الدار ازين ولا صافي نعول عليك
ملاك: اصلا الراجل بحال الفاس فينما مشا كيحفر واخا تبقى تذبح حتى الليل
اورطيغا: هههه مبقيتش خاص نرخف على راسي
ملاك: دابا تكبر وارا مترخف.. مراد
اورطيغا: عيون مراد
ملاك: (تبسمت) خاص نرجع عند بابا، نوصلو للدار ونصوني عليك
اورطيغا: اممم مكاينش زعما شي بوسة ؟!
ملاك: ههه باي (قطعت كتجييها فشكل تبوس فالتيليفون تبوس مباشرة ولا هاد تبرهيش ديال البوسان فالتيليفون رجعت عند باها للي عاود فاتحها فموضوع زواج وتهربت بحجة حشمانة وحتى تهضر مع مها ولكن بينت الرفض انها مبغياش تبقى بعيدة عليهم بحال فاطمة ونعيمة للي كيجيو مرة فشحااااال، هي ولفتهم وكانت نسبيا كتقول الحقيقة…)
الغالية: (كتقرا الورقة للي عطاتها الياقوت تحاليل ADN للي باينة سمية المركز عندمن دارتو باش الا بغاو يزيدو يتأكدو شافت فالغالية)
وعلاش مقلتي والو؟!!
الياقوت: كنت خايفة اطاتي حملت بلا زواج كنت بغيت نطيحو ويوسف كان مخيرني الا طيحتو صافي غنتفارقو وانا كنت مخلوعة وخايفة هو محسش بية مفهمنيش
الغالية: ولدي كان غيتزوج بيك نتي عارفة
الياقوت: تيقيني اطاتي فديك اللحظة مكنتش عارفة شنو غندير ولا كفاش نفكر ،كنت غير خايفة معرفتش كفاش حتى جمعت حوايجي مشيت لدبي واخا كنت غنتزوجو مكنتش لا انا لا هو غيعجبنا الحال راه حملت قبل زواج!!
الغالية: وخليتي ابني مشوي عليك ومعارفش حتى راه عندو ولييد حرمتيه من بزااف دلحوايج الياقوت غلطتي بزااف وخليتيه غلط ومشا تزوج باش ينساك
الياقوت: (كتبكي) مقدرتش اطاتي راه ماما وبابا لدابا مفخبارهم والو عارفيني غير مشيت عند ختي
الغالية: ومنين رجعتي الولد فين تتخليه؟
الياقوت: نتي عارفة انا ساكنة بوحدي ومنين تنمشي عندهم تنخلي ختي يعني تنديرو النوبة ولدابا معارفين واالو
الغالية: وعلاش هاد الكذوب كاملة وكان ممكن تسترو فضيحتكم وتزوجو وتولدو بالفور يا الشيفور
الياقوت: كنت طايشة!! ومبغيتش تسنى علية فديك الوقيتة تزوجت غير باش نستر راسي مرضيييتش
الغالية: (شافت فالولد مدت يدها هزاتو كتسمي بالله كان نااعس) شحال عندو
الياقوت: 4 شهور.. وسميتو سليمان كما كنتي باغية وتتقولي ان شاء الله ولد يوسف انا غنسميه سلميان
الغالية: (شافت فالولد متحسرة وكانت ديجا ملامحها عياانة كتشوف ملامحو كاين شبه شوية الياقوت) ودابا شنو المعمول
الياقوت: معرفتش اطاتي يوسف صعبها بزااف منين تزوج ويا ريت وكان تزوج وحدة متفهمة وواعية!!
الغالية: واخا تزوج هو مرتو متتولدش
الياقوت: (تصدمت) بالصح؟!!!!!!!؟
الغالية: راه هادشي علاش طلقت من التزويجة اللولة قالتهالي مرت عمها غير مخبيين علينا
الياقوت: اوا علاش مزال مزوجها؟!
الغالية: حيت ذكية وعرفات كفاش تخليه غير تيهتر بسميتها ماشي بحال للي خليتيه فنص طريق وزدتي مقلبتيش طلبو شنو دابا عاد جاية ندمانة حسابلك غيسمح ليك..
بسبابك الياقوت هو تزوج هاد التزويجة الخايبة وحرمتيه من ابنو مفرحش بيه محضرلوش فزيادتو،، علاش اشنو عمل فيك خاايب باش تجازييه هاكا!!!
الياقوت: (كتبكي) حتى انا تعذبت بزاااف اطاتي راه كنت غنقتل سليمان وتراجعت نهار للي كنت غنطيحو متخيليش شحال تعذبت فحمالتي مرضت بزاااف وولادتي كانت صعييبة..
الغالية: خاص يوسف يعرف دابا
الياقوت: اه خاصو يعرف راه عندو ولد يفرح شوية ونشوفو شنو غيدير…
ادم: (كانو فبيت الخدامة للي ما فيهش كاميرا سادين عليهم ناض كيهز سرواالو ويسد السنسلة اما هي مزال راكعة وكترد أنفاسها) حبيبة خاص نخرجو من هنا دغيا
غيثة: (بحرا كتحل عينها) اممم
ادم: غيثة!! (وقفها هز ليها سليبها وسروالها وهبط ليها الديبردور وتريكو كيقاد ليها حوايجها عارفها مرفووعة وهي بحال شي مونيكة غير كتشووف وكترد أنفاسها بحال ضاربة الكيلومترات.. لمس حنكها)
غدا تخرجي عندي واخا ؟!!
غيثة: صافي نتزوجو ادم..
ادم: ههه مزال الوقت شوية
غيثة: (بحال فيها نعاس) هادشي للي تنديرو حرام
ادم: مكيناش احبيبة شي حاجة سميتها حرام وحلال هادي الطبيعة ديالنا تنلبيو النداء كما تنشربو تناكلو تنعسو خاص حتى هادشي يكون.. عادي
غيثة: لا هادشي حرام
ادم: الحرام هو تحركي راسك من هادشي زوين.. مهم نتي خوي راسك من هاد تخربيق وعيشي حياتك نتي مزال صغيرة باش تفكري واش هادشي حلال ولا حرام اصلا شكون ضامن ليك كاين شي جنة ولا نار جسمنا منين تنموتو تيتدفن متنبقاوش على وجه هاد الكورة الأرضية تنرجعو غير عظام والعظام مع الوقت تيرشاو وترجعو ترااب داكشي غير خزعبلات ديال باش يتحكمو فيك احبيبة فهمتي
غيثة: (غير كتشوف فيه) خاصنا نتزوجو
ادم: اوكي.. عتابري راسك انا وياك مزوجين .. دابا خاص نخرجو من هنا باش ميشكوش كتر..
غيثة: بغيت نعس
ادم: واخا انا نطلعك لبيتك ورتاحي ديري التيليفون يتشارجا باش نهضرو!! ياك قلتي غديري اي حاجة على ودي؟!!
غيثة: اه
ادم: بون.. انا غنشوف لحبيبة ديالي شنو غدير!!! (خرجو من تماك طلب منها تصاوب شعرها حيت تخربق تمشاو دخلو للدار كيبان ليهم كاين ضياف)
بونصواغ…
الغالية: هدا ادم خطيب لالة غيثة
الياقوت: متشرفيين ادم، غيثة صاڤا!!!
غيثة: صاڤا.. انا نطلع لبيتي رتاح
الياقوت: (تحرجت وشافت فالغالية اما غيثة بحرا شادة راسها باغا غير تنعس)
الغالية: امم حم، حيت عيانة شوية (شافت فادم) وهادي الياقوت من الفاميلة ديالنا
ادم: متشرفين لالة الياقوت انا غنمشي الآلة الغالية من بعد وندوز عندكم
الغالية: ان شاء الله انا جاية معاك (خرجت معاه) شنو بان ليك فغيثة؟!
ادم: تتشكى من يوسف واش ضربها؟!! حيت قالت يوسف للي عرفني باورطيغا ودابا تيضربها وتبدل معاها معرفت شي مرات متنفهمش مزيان شنو تتبغي توصلي على اورطيغا
الغالية: اورطيغا!! شفتي من اللول داك الشمكار محملتوش
ادم: حتى يوسف خاصو يرخف عليها هي تتقول شحال هادي مخدات شي حاجة وانا صراحة تيقتها
الغالية: اه وانا شاهدة شحال مخرجات من بيتها
ادم: اوا رخفو عليها الآلة الغالية.. خليتلك الراحة…
ملاك: (وصلو لصفرو فجو مرح مع باها شحال مرجعت هاكا وحتى هي ندمت على اصرفها واخا شي راس كيقولها يستاهل حيت وحدة بحال مها مخاصش تخااان ولكن كيبقى باها، هبطت من الطموبيل وباين على وجهها مستمتعة اكترية منين عطاها الكلمة غيعطيها الفلوس نهار الاثنين حسباتها فراسها لقاتها مسلكة وكضرب الحساب فراسها تم جاي عندهم حمزة سلم على رشيد وملاك حدو قال السلام من البعد مشافش فيها) وعليكم السلام
حمزة: عمي راه صافي هضرت مع الناس على حساب الزاوية
رشيد: الله يرضي عليك اولدي.. هاد نهار مساليتش ياله جيت من فاس انا وملاك مشينا شفنا الدار للي بغات
حمزة: مزيان اللهم يسر!!
رشيد: اميين (ملاك كتشوف فباها مكتفهمش مكيخبي والو على حمزة عندو عزيز بزاف لدرجة كيتعاود معاه بحال واحد من ولادو) دويرة زوينة الصراحة
حمزة: مفينية ولا كحلة؟!
رشيد: كحلة ولكن صليحها ماشي صعيب شي 3 ݣاع تكفيها.. (شاف فملاك) خوك حمزة شجعك بزاف على هاد الدار ومشا لتماك وسول شي صحابو تماك
ملاك: امم (شافت فيه تبسمت رجعت شافت فباها)
انا نمشي للدار.. بسلامة
(مشات وهي كتحسبها فراسها هي عندها 3 ونص وقالت عندها 2 نعيمة وفاطمة غيعطيوها 3 ها هي 5 وباها غيعطيها 5 اذا 10 ديال المليون هي غتعطي تسبيق غير 8 ولا 9 باش تشيط على حساب الفنسيون، ودايرة دارت ب 2000 درهم جاية فيها 2 هي باش غتكاتب وللي شاط تفيني بيه وغتبقالها طريطا ديال 2000 درهم فشهر لمدة عامين جاتها زوييينة باش متزيرش ومتحبسش نيت دارت حيت كتجمعلها فلوسها وتبقى تأثث فيها من بعد حيت فكرت تكريها بفراش غيدوبل فلوس كراها.. كان عقلها خدام غير فهادشي عقلها غيخرج بالفرحة انها كتشري دار بالساااهل..
وصلت لباب الدار كتشم ريحة زرارع ديال الزميتة كيتحمرو دخلت لقات كولشي مجمع كولها وشنو كدير حتى خديجة كاينة كتشبك فالشباكية)
امتى جيتي؟!!
خديجة: غير شوية وصلني يوسف ومشا وكان عرفتك نتي وبابا فاس كون جيت معاكم ݣاع منعذبو
ملاك: اوا نتي مكتعلميش، انا نبدل ونجي (دخلت لبيتها صونات على مراد لقاتو مزال فبن سودة)
شيغي انا وصلت
اورطيغا: ويتك على شيغي، حقا هداك عمك مزال تيجبد معاك ديك الخطبة
ملاك: ههه ݣاع مجبدت معايا هاد الهضرة
اورطيغا: وا سولت!!
ملاك: لا صافي قلت لبابا مبغيتش
اورطيغا: وشنو قال؟!
ملاك: بقا كيسول علاش وقالي نتي اصلا مشفتيش السيد انا جيتو من التالي منسمحش فخدمتي ومبغيتش نمشي لبرا
اورطيغا: اممم حتى هاد عمك
ملاك؛ ههه وشنو حسابلك انا راه المخاطفة علية خاصك تعرف الجوهرة للي عندك
اورطيغا: (تبسم) جوهرة ومغيديك غير العزي..
أمينة: (مكاين لا اجواء ديال رمضان لا والو كولشي كيتقاد ويجي حتى لعندهم كما العادة وهادشي كل عام كتفتاقدو واخا تبغي دير بوحدها ماشي بحال جماعة!!! شدوها لهوايش منين كتوريها زهرة شنو كيديرو فكرت مرة وحدة خرجت مشات لهري تقدات شنو بخصها حيت غتجي ختها دوز معاها شي يامات فدارها اللهم تقاد وتخلي فدارها ونيت اورطيغا كيبغي هادشي، عيطت على الحاج علماتو بغات تمشي عند زهرة مكتبقاش المشكل معاه واكترية منين عاوداتلو، صونات على مراد يوصلها كان مشغول بزااف صيفط غير دري صاحبو يوصلها جا خداها من المدينة القديمة علمات زهرة للي شحال وهي معاها تجي تجي وتعرض فيها ومشات لصفرو… صونا عليها اورطيغا وهي فطريق)
احبيبي
اورطيغا: شوفي متكتريش الهضرة على ملاك راه ياله تقادت مع مها
أمينة: كون هاني
اورطيغا: هاد كون هادي هي للي تتخلعني معاك اخر مرة قلتيهالي عاودتي لمها كولشي
أمينة: ههه لا لا متخافش مبغيت عداوة مع ملوووكة
اورطيغا: مزياان
أمينة: انا نجلس تواليهم حتى الليل الا كنت ݣاد اجي خودني نتا الا مݣديتش نشوف شي تاكسي
اورطيغا: صافي ان شاء الله انا نجي..
أمينة: الله يرضي عليك اولدي.. (وصلت لصفرو هبطها حدا القهوة فين صيفطلو اورطيغا لوكاليزاسيون بالظبط لقات ملاك كتسناها سلمت عليها وهزت معاها شنو جايبة بقاو كيهضرو كلام عادي وصلو للدار رحبو بأمينة ودغيا دخلت فالاجواء معاهم الخدمة والهضوور خديجة كتقلي لبريوات وملاك كطفيهم فالعسل حداها)
خديجة: وفاء مغتجيش؟!
ملاك: قالت حتى دوز شي يامات مع دارهم
خديجة: خلات بلاصتها هنا قالتلي ماما ولفناها
ملاك: ويييه حتى أنير كيظل يعيط باسميتها
خديجة: مسيكين الحبيب ديالي.. شحال تمنيت اختي شي وليد ولا بنيتة حتى انا
ملاك: حقا داك نهار قلتي رجعتي لطبيبة
خديجة: قالتلي كولشي مزيان اختي انا نشوف هاد شهر
ملاك: ان شاء الله يكون خير غير متبقايش كتحكري عيشي حياتك وللي مكتبو ربي غيكون..
خديجة: يوسف قرب يطلب شرع فينما شديتو كنجرو
ملاك: هههه سعداااتك
خديجة: ههه ويلي ويلي البنت طايبة
ملاك: اوا ختي الا 30 راه كملناها وبزاااف هه.. حقا مسمعتي والو على غيثة
خديجة: على للي فهمت مزال مسخسخااهم خاصها تعالج مسكينة شحال بقات فية متستاهلش هادشي والله..
الغالية: (مشات شافت غيثة كانت متكية فبيتها وكتسوف فسقف سااهية!!!)
بنتي خوك يوسف غيجي وجدي راسك
غيثة: (طرطقت عينها خايفة ناضت بالزربة كتشوف شنو تلبس) واش انا مزال غنتحبس!! بغيت نرجع لسطاج!! واش متنبانش هي هاديك؟!!! عندك يوسف يعيق بية!!
الغالية: ابنتي حلفي بالله متعاودي ترجعي لداك السم
غيثة: (مراضياش) اصلا انا متندير والو
الغالية: قولي الصراحة ابنتي واش ولد الݣرسيفية هو لي تيعطيك
غيثة: ماما شحال من مرة نقولها لك اورطيغا معندو حتى شي يد فهادشي انا للي بغيت نجرب قلتها ليك نتي ويوسف ولكولشي
الغالية: صافي صافي سكتي مرت خوك راها فبيتها لبسي وهبطي اليوم غتسمعي اخر الاخبار
غيثة: اشمن اخبار!!! واش غندير العرس انا وادم؟!
الغالية: العرس مغيدار حتى تبراي, هبطي وغتسمعي المفاجئة
غيثة: واخ، انا نازلة.. (لبست سورڤيت شافت راسها فلمرايا ضعاافت وعينيها دخلو قدات ميكاب يخفي هاد الاثار للي ولاو فيها كتحس حتى بشرتها رجع لونها باااهت.. رشت بارفان ديالها وكتدرب تبتاسم وتهضر.. هبطت لقاتو جالس مع مو دارت ابتسامة فوجهها)
يوسف: (كيطلع وبهبط فيها الشوفة) غيثة صاڤا!!
غيثة: (حنات عندو سلمت عليه بالوجه) الحمد لله اخويا ونتا صاڤا؟! فين خديجة شحال هادي مشفتها؟! مبقاش ݣاع تتسول فية ولا تجي عندي!!
يوسف: هي فصفرو
الغالية: سبحان الله صفرو تتجيها قريبة وهنا تتجيها بعيدة؟!
يوسف: هادشي علاش عيطتيلي؟!
الغالية: لا خاصك تهضر مع الياقوت!
يوسف: (هز حواجبو بجوج مستغرب ورجع شاف فغيثة)
غيثة: ماما!!
الغالية: داكشي للي عرفت اولدي غيخليك تفكر فشحال من حاجة سمعها بعدا باش تفهم
غيثة: شنو غيعرف؟!
الغالية: شي حاجة للي كانت بيناتهم (شافت فيه) انا عرفت علاش تفارقتو مفهمتش علاش مجيتش قلتلي من الاول كنا غلقاو حل
يوسف: (كيشوف فمو) اوا؟!
الغالية: اوا اولدي خاصك تعرف هي بغات هي تقولك
يوسف: (بقا حاني راسو شحال)
الغالية: اجي بعدا مرتك متتولدش؟!!
صونا عليها اورطيغا دخلت لبيتها سيدات عليها..
ملاك: الوو
اورطيغا: خرجي عندي نشوفك
ملاك: اويلي الدار عامرة
اورطيغا: وشنو بغيتيها تكون خاوية باش تخرجي عندي؟!
ملاك: (كتفكر) 5 دقايق
اورطيغا: واخ غير اجي انا فبلاصتنا.. (كانت ديجا لابسة حوايجها ماشي بيجامة دارت عكر خفيف رشت بارفان وخرجت كدور فعينها كولها فين مشغوول دغيا سلتت خرجت السيكتور كان خاوي زربت وهي تفكر رجعت للدار مشات لفين كيلعب أنير حتى الا تشدت تشد تقولهم كنت مسخرة بيه ولا ماشية نشريلو شي حاجة!! وزربت ماشية..
لقاتو مركن فطموبيلتو مشات ركبت وسدت لباب دغيا حطت يدها على قلبها قرب ماد حنكو يسلم وهي تزرب عليه سبقت وجه أنير)
مال مك معايا؟!
ملاك: وصاافي
اورطيغا: واش حنا مزال ݣاع منتسالمو راه غير السلام البنت؟
ملاك: مرة أخرى.. مرة اخرى
اورطيغا: (هز أنير) مزال الوالدة مكملت؟!
ملاك: مزال عرفتي مسكينة باينة فيها كانت قنطانة
اورطيغا: هي الا سربيتي راسك راه ݣاع قنطنا
ملاك: ههه (شدها من ذراعها مزير عليها) باسم الله عليك!!!
اورطيغا: امتى كنتي ناوية تعلميني على ديك الخطبة!!
ملاك: مراد (حطت يدها على يدو باش يرخف عليها) هادشي غير تيخلق صداع على والو صافي جا واحد مبغيتش وداازت مشافني مشفتو مكيعرفني مكنعرفو كنت غنقولها فالليل فاش كنكونو واخدين راحتنا فالهضرة
اورطيغا: (حيد يدو دغيا كتقنعو) ولو خاص تعلميني!!
ملاك: كنت غنقولهالك والله غير جات مع فاش عرفت ماما راك عارف تلفت وصافي
اورطيغا: اممم مزال مكاين شي خبار على داك لميطاسيون
ملاك: مزال ولكن قرييب
اورطيغا: ومديريش شي هبطة لفاس؟!
ملاك: حتى لرمضان دابا معندي والو تماك
اورطيغا: معندكش انا؟!
ملاك: وعليك انا اصلا غنهبط
اورطيغا: تجي تفطري معايا شي نهار؟
ملاك: علاش كتفطر بوحدك؟!؟
اورطيغا: أغلبية الوقت اه من غير الا جات الوالدة.. (بقاو مجمعين نسات راسها حتى صونا تيليفونها كانت مها) صافي سيري انا غنمشي نتقهوا عند باك على متكمل الوالدة…
ملاك: (دخلت زااربة شارية لأنير دانون ديراه حجة ساعة شكون مسوقلها الدار زادت عمرت حتى مريم جات هي وعݣوزتها باش تاخد حقها من الزميتة والشباكية ولبريوات حطت أنير فين كان كيلعب وهي تجبدها مها من يدها)
ماما!!
زهرة: فين كنتي؟! خليتي ختك واحلة بوحدها ؟!
ملاك: من قبيلة وانا نقاد غير مشيت نجيب دانون لأنير سميتيني هربت باااز!!
زهرة: باز نتي لمك على هاد تخراج العينين للي فيك!!ا بقاي كطيري هاكا حتى تخرجي فباك وديك الساع غتوحلي نتي
ملاك: (كتلعب بحواجبها) راني محزمة براااجل (غوبشت جمعت الظحكة)
هاد الهبيلة اش جابها هنا
زهرة: (جرتها مها لبيتها وقفت ليها فلباب) سكتي
ملاك: (بصوت عالي) منسكتش هادي اش جابها لدارنا؟!! (كولشي دار كيشوف وأميمة مبينة انها محرجة)
باشمن وجه يا وجه زبل جاية عندنا عاود!!!!
نجية: أميمة سيري للدار
أمينة: (غير كتشووف..)
زهرة: (دخلتها مها لبيتها وتبعتها مريم) واش الحمارة مكتحشميش مني
ملاك: علاش نحشم مشفتيش شنو دارت داك نهار؟!! متجييش لدارنا
مريم: عندها الحق اماما طلبت سماحة اه ترجع تبقى دخل وتخرج لا انا هاد النوع مكنتيقش فيه
زهرة: فين عمرني طردت شي واحد من داري راه غير الكلب لي كيبقى ينبح ويطرد الناس
ملاك: الآلة انا كلبة وغنطردها
زهرة: سكتي هاد الكلبة انا نخرج عند الناس ونتي نسيتي راه أمينة هنا عطيتيها فين تسول دابا
ملاك: مديرش متخاافش.. (صبعتها مها) عنداك تقولها على حمزة !!
زهرة: انا نوري لمك هاد الجبهة للي فيك (خرجت تبرد الاجواء)
مريم: (بتشكيك) وها هي أمينة هنا؟!
ملاك: اممم زعما ماما ممعاودلكش انا عارفها عوداتلك كولشي غير متبهلليش علية امريم
مريم: هههه باش كتعجبيني فينما ماما تصاحبت مع شي مرا كتصاحبيلها مع ولدها ههه
الغالية: اجي بعدا مرتك متتولدش؟!
يوسف: تولد ولا متولدش داكشي تيبقى شغلي انا وياها
غيثة: حشوومة اماما دابا انا وكان مكنتش تنولد تبغي للي يحݣرني بحال هاكا
يوسف: نسات راه عندها بنت وتتشفى فبنات الناس
الغالية: لباس عليك نتي الحمارة وانا متنتشفاش ولكن متنضرقش الشمس بالغربال انا باغا حفيدي وظاكشي ماشي غير ديالك بوحدك هادشي ديالنا كاملين
يوسف: الاالة انا مباغيش الولاد الا غير تكوني تتعاملي ماماهم هاكا بلاش
الغالية: وشكون قالك انا باغياهم منها!!!
يوسف: (وقف) غيثة تمشي معايا؟!
غيثة: (خافت الا مشات معاه غير تنسى ادم يعطيها شي حاجة)
الغالية: (وقفت) الياقوت مطيحتش ولدكم كما قالت ليك منين تفارقتو
يوسف: شي لعبة جديدة دايرها!! مفهمتش هاكا راك متضريش خديجة تضري غير ولدك انا ديك بنت الناس بعيييدة عليك
الغالية: (كانت شادة ورقة وعطاتهاالو) قراها وانا عيطت عليهم وأكدولي، والا بغينا نتأكدو كتر نعاودو التحاليل وغنعاودوهم
يوسف: (شد الورقة كيقرا ورجع شاف فمو لايح الورقة فالارض ببرود)
او من بعد
الغالية: قبيلة الياقوت جابت ولدها لي هو ولدكم بجوج عندو 4 شهور باقي لحييمة مسيكين
يوسف: اوا!!
الغالية: واش متتفهمش تنهضر على ولدك.. نتا راه عندك ولد من احمد ودمك ومن لمرا للي كنت تتبغيها ويمكن باقي
يوسف: الوالدة انا معندي ولاد وتنبغي مرتي خديجة، وهادشي للي بديتيه هنا غتساليه هنا!!!
متنبغيش نتعامل معاك هاكا ولكن تقولي كلمة وحدة قدام خديجة ماشي غير كلمة حرف غنهز ديك بنت الناس للي مربية ومأصلة أحسن ميطاسيون ولا نديميسيوني ݣاع متيهمش، مهم وجهي مباقيش تعاودي تشوفيه ونتي ختاري
الغالية: (خرجت عينها) يوسف!!!
يوسف: نتي عارفااني مزيان معندي منخسر عندي هانية حتى المغرب نخويه نخدم فينما بغيت، تنعاود نقولها الوالدة!! هاد الموضوع هنا يتسد.
الغالية: وولدك؟!
يوسف: معندي ولاد هاد الساعة خليني هاني الوالدة الياقوت ماشي بنتك باش غتبقاي دايرة هاد الحالة عليها!! راه انا للي ولدك ونتي ختاري انا ولا هي
الغالية: ولكن حفيدي
يوسف: رجووع الله نسيتي ولاد أشرف؟؟ تتهضري بحال عمر كان عندك شي حفيد
الغالية: ماشي بحال ولدك نتا
يوسف: غيثة تمشي؟!
الغالية: بنتي تبقى معايا براكة غير نتا للي ضعتي من بين يدي سير رجع عندها
يوسف: الله يعاون (خارج مكيضويييش معصب منرڤز ممتيقش ومباغيش يتييق مغتجيهش عجب الا كان هادشي ملعوب من عندو مو والياقوت راه مبقاش كيتييق فيها…
بقا فطموبيلتو شحال عاد زاد ماشي لعند شريف نيشان..)
مريم: أباش كتعجبيني فينما ماما تصاحبت مع شي مرا كتصاحبيلها مع ولدها ههه مكتزݣليييش اختي
ملاك: اولا انا عرفتو قبل منها، وزايدون طلبي السلامة راه حتى نتي تقدري تولدي بنت وتطلعلك بحالي
مريم: هههه مكرهتش مهم تكون قويفزة
ملاك: ماشي غير قويفزة كنطيير مع طيوور
مريم: عارفة راسك بعدا!!! وريهلي راني معقلتش عليه بزاف
ملاك: غتنمري عليه!!! (مريم هزت حاجبها) غادي نوريك ولكن منسمحش ليك تقولي عليه عزي ولا شي حاجة انا بوحدي للي من حقي نتنمر عليه كيف ما بغيت
مريم: ههه وري وري (ملاك جبدت تصويرة مصورينها بجوج) هاي هاي وصلتو ديرو تصاور بجوج!! ولكن عارفااك دغيا كتحرقي المراحل
ملاك: ايخان لواه (بعدت من حداها باش متقرسهاش)
مريم: الزييين يا ختي!! شكيليطة، زينو مسراار ولكن فين زعورية ولبيوضية علاش كنتي كتقلبي وفاضحانا؟!
ملاك: مكاتيب.. عرفتي اول مرة تلاقيتو كان كيكرهني وانا كتر منو انا لدابا مفهمتش كفاش انا وداك السيد تفاهمنا
مريم: اوا دابا؟؟
ملاك: صراحة كنبغيه
مريم: هاي هاي هاي على لالة ملاك ولبغيان!! ياك نتي ديما لي هضرتي معاه كتبغيه شنو الجديد
ملاك: لا لا هدا غيير، بيناتنا واحد الكمياء فشككككككل تخيلي شحال دابا وحنا كنتعارفو عمرنا قلنا شي حاجة رومنسية لبعضياتنا ولا قالي كنبغيك داكشي كنحس بيه كيديرو كتر مكيقوول
مريم: ملاك هاكا كنحس مع راجلي ولكن نتي عارفة مشكلتي معاه للي لقيتي هادي سينبن!!! حنا نسا كنوصلو لواحد لوقيتة كنبغيو نسمعو كلام زوين
ملاك: يمكن حيت أنا مزال راسمة ليه حدود بلعكس كيبغي يهضر ولكن ديما كنقمعو حتى هو كيبقى يقولي خاصنا نزيدو شوية نبدلو لكلام وداكشي وانا والو
مريم: اوا وفوقاش باغيين تزوجو؟!
ملاك: شوفي اختي زواج مسؤولية انا بغيت نخلي شي ذكريات زوينة قبل مندخل لداك العالم الغامل ديالكم
مريم: ههه هادي غير فاطمة للي موصياك هاكا
ملاك: كناخد منك شوية ومن نعيمة ومن فاطمة
مريم: وخديجة؟؟
ملاك: خديجة!! صراحة يوسف داير ليها بحال لما لقليل عايشين الحياة وحتى هي راك عارفها دغيا كتأقلم عايشين مزيان، من داكشي للي كتعاودلي غير وجهها منور يبين ليك لخباار ولكن عمرهم كانو عندي قدوة ولا حسبتهم شي كوبل وااااو اصلا دغيا تعارفو تزوجو بعداات معشت معاها والو ماشي بحال رجلاتكم فهمتيني…
غيثة: ماما انا صراحة متقتش فالياقوت غضبر على أي بيبي وتجي تقول هدا ولد يوسف فين كانت هاد العام كامل!! سبحان الله خلات حتى يوسف تزوج وستاقر فحياتو وعاجباااه مرتو عاد بانت
الغالية: فكرت فيها ولكن عيطت على فين دارت التحاليل وتيقنت
غيثة: ماما تجيب غير شعرة ولا شي حاجة من يوسف قديمة عندها وتمشي ديرهم وتقولك حقا ولدنا وزايدون باش دارت التحاليل؟! وفيني أمر من المحكمة انا كنعرف على هادشي خاصة يكون قانوني ماشي غير اجي ودير هاد النوع ديال التحاليل
الغالية: سكت علية نتا خلا… وزايدونساهلة.. نعاودووهم؟!
غيثة: ماما ياك نتي قلتيها ليوسف! خليه منو ليها راه ولدو هو هدا الا كان ولدو متزيديش لعداوة بيناتكم
الغالية: اش عرفك نتي فهادشي!! وزايدون غيندم حيت مرتو عاقر متتولدش!!!
غيثة: شكون قالهالك؟!
الغالية: انا للي مرا بحالي بحالها راني عارفة شهرين و20 يوم باش تزوجو سمعتيها حاملة؟! لا وهي ميتة باغية تولد!! اه وعاد جلست عند الراجل اللول 9 سنييين وطلقها ومرتو حملت غير تزوج بيها فشهرها اللول راه باينة ابنتي غير نتوما ضبعااتكم ديك الهجالة
غيثة: نخافك ظلمي خديجة
الغالية: معندي منظلم فيها هادي سنة الحياة ولدي باغي ولادو وهي راها جالسة عندو مقلتلوش نوض طلقها المهم يعقد على الياقوت ومريضنا معندو باس طرف دالخبز غتاكلو معانا
غيثة: اوا راك بحالي تتقول طلقها هي طلقت حيت راجلها تزوج عليها غترضى زعما دابا
الغالية: اوا ضبر راسها انا تنعرف ولدي وتيهمني مصلاحتو عليها هي..
غيثة: (بقات ساكتة صيفط ليها ادم ميساج شنو كدير… جاوبت كارهااه) جالسة مع ماما عاد خرج يوسف من عندنا
الغالية: انا غنطلع نرتاح متنعسيش نتي!!
غيثة: نصاوب شي حاجة ناكلها
الغالية: كول شوية راك رجعتي شووهة
غيثة: راه بديت تنشرب سيرو ديال الشهية
ادم: بغيت نشوفك خرجي عندي كنتسناك فين موالف
غيثة: جبتلي داكشي؟!
ادم: اه (صونا عليها ناضت مشات للكوزينة جاوبت)
لبسي كسوة بلا سليب
(قطع بقات جامدة فبلاصتها رجع كتب ليها وكلامهم كولو فالتيليفون صغير للي عاطيها)
خرجي عندي نشوفك 5 دقايق متعطليش
غيثة: (كانت بغات تاكل دارت بناقص شد ليها الشهية طلعت لبيتها متحسرة على حالتها دابا خدات لقب ق***** بامتياز حيت رجعت كتخلص والمشكل ماشي حتى بالفلوس كتخلص بلادروݣ للي كيزيد غير يهلكها كتر وكتر….)
خديجة: (جاتها غريبة كفاش خلاها تبات وعاد قبل ميجيبها كان كيأكد عليها بلا متحاول تقولو تبات حدها تقاد شنو بغات وفالليل يجي يجيبها) اممم يوسف واش معصب من شي حاجة؟!!
يوسف: (بلا خاطر) نفس السوجي وصافي
خديجة: اممم معليش.. غدا الا مصلاحش ليك تجي انا نشد تاكسي بلا متعذب راسك
يوسف: لا لا انا غدا نكمل الخدمة ونجي نتغداو معاهم عاد رجعو
خديجة: صافي مزيان… (بقاو كيهضرو عادي شافت أمينة ماشية) انا نسلم على خالتي أمينة راه ماشية
يوسف: واش مامات اورطيغا! كاين حتى هو تماك؟!
خديجة: اه ظلت معانا لعشية وحتى هي جات خدمت حقها وراني منسيتش حق داركم حتى هوما جبت ليهم حقهم من هادشي
يوسف: (سكت مدة ساهي)
خديجة: ياله بسلامة
يوسف: خديجة! واخا حبيبة تجي مع اورطيغا يوصلك؟! اصلا معاكم مو!!
خديجة: ولكن!!
يوسف: عفاك احبيبة انا مكنتش غير قادر نصوݣ ولكن منين كاين اورطيغا انا نسبقك للدار.. بغيت نكونو بزوج
خديجة: ولكن قلت لبنات غنجلس معاكم وفرحنا نباتو مجموعين (مقالت والو ليهم غير استرجاع الكرامة)
يوسف: خديجة باغيك هاد الليلة حدايا واخا!!
خديجة: ههه أنا نرد عليك والله معرفت
يوسف: لا خديجة، عفاك انا غنتسناك فالدار احبيبة (قطع ورجع عند شريف) الا بقيت متبع الوالدة غتحمقني شي نهار
شريف: دير للي يسلكك ايوسف حسابلهم دوك الق**** غنبقاو نتسناوهم شتي أكبر غلط كنت غنديرو انا وياك ويكون الطابع دالحمار مرسوم على جبهتنا كما كان تيقول اورطيغا هو وكان تزوجنا دوك لمساليات
يوسف: كااارثة!! مهم انا نمشي نتلقا مرتي فالدار
شريف: هادي هي الخدمة نقية
يوسف: هه انا غنوجد ليها شي عشا زوين تستاهل هاديك بنت الناس
شريف: اوا بينلياا.. (مشا يوسف داير ياخد بوكيه دالورد يدموندي عشا من شي ريسطو مع حليوة ومشا يقاد شي جو زوين كانت معندو ݣانة حتى فكر مزيان علاش يصعبها على راسو وعلى مرتو!! غيعيش حياتو مع خديجة والي بغا يوقع يوقع…)
ملاك: (لبست حوايجها باش تخرج حتى هي مع أمينة لبرا ومنها تشوفو.. شوفة وحدة من مها خلاتها تراجع على ديك الفكرة اكتفت غير مدت حنكها لأمينة كتسلم عليها) خالتي أمينة عاودي زورينا مرة أخرى
أمينة: ان شاء الله احبيبتي (بهمس) قريب نخطفووك من هنا
ملاك: هه
خديجة: (هزت الصاك ديال مرجان للي فيه حقها من الزميتة والشباكية وبربوات ودات طاسة كبيرة فيها بريوات وشباكية للغالية حيت زهرة للي صيفطاتها سلمو عليهم مشا معاها ولد عمها لي عاد وصل من خريبݣة فين كان كمل ديبلوم ديالو للي غيعاونو باش يدخل يخدم OCP اكيد كاين للي غيعاونو ويسهل طريقو.. وخديجة وامينة كيتعاودو)
شنو غنقولك اخالتي قبلت ولا لا انا للي علية نوصلها الأمانة للي صيفطات ماما وهي ضبر راسها
أمينة: من سعدها تكون عندها عروسة بحالك
خديجة: شكون فهمك ههه (وصلو عند اورطيغا للي ديجا جا عندو رشيد عرضو يتعشا ولكن رفض بطريقة لبقة جمع معاه شوية ومشا كمل شغلو شاف الولد لي معاهم معرفوش حل الكوفر دخل داكشي تماك)
غتوصلني معاكم اخويا
اورطيغا: مع الخرجة غنحطك تماك
خديجة: ههه هدا ولد عمي كمال هدا مراد ولد خالتي أمينة
كمال: مشرفين
اورطيغا: (حرك راسو باه ملاك مقالت ليه والو على شي ولد عمها كاين معاهم) مشرفين
كمال: الله يعاونكم
خديجة: بسلامة اخويا
اورطيغا: (بقا متبعلو العين مكانش شي ولد صغير راه كبير قدو فالطول تقريبا غيكون فاواخر العشرينات يمكن!! طلع ركب شاف فمو)
شكون هاد خينا؟!
أمينة: (كتغمزو يسكت) ولد عمهم للي ساكن فخريبݣة جاو يدوزو رمضان هنا
خديجة: يقدر عمي يبقى هنا حيت شد التقاعد
اورطيغا: ياك!!!
أمينة: بالصااااااح!!!! ولكن مرتو شحال ضريفة حتى هي
خديجة: اه مرت عمي صفية بزاااف غزاالة ديك السيدة
اورطيغا: (غوبش شد طريق وخديجة ومو كيهضرو ويتعاودو صونا عليه يوسف علمو بقات شي ربع ساعة.. حتى نطق)
والولد حتى هو غيسكن تما؟!
خديجة: غير على ميعيطلو للخدمة تبارك الله على للي سمعت غيخدم فالفوسفاط ان شاء الله.. يستاهل مسكين شحال قرا
اورطيغا: مسكين!!.. وشحال فعمرو هاد المسكين!
خديجة: هه 26 عام مزال صغير
اورطيغا: صغير علاش بالظبط؟!
خديجة: زعما على الخدمة
اورطيغا: 26 عام انا كانت عندي.. (شاف فمو للي شافت فيه وهو يسكت) زعما كنت ذابح شي 100 عجل
أمينة: ههه (كيبقى فيها حيت بالصح هو كبرو الوقت معاش لا طفولة مقادة لا مراهقة نيشان كبر حتى من قرايتو سمح فيها)
خديجة: ههه تبارك الله.. (وصل خديجة طلع معاها هداكشي ممشا حتى شاف يوسف خرج لباب كيتسناها عاد هبط عند مو مشاو للدار نيشان مشا جاب عشا ليه اما مو تعشات ومكانش فخبارها ولدها برا من فوقاش.. كلا وهوما مجموعين وهي كتشكر فملاك وعائلتها.. هي مشات تنعس وهو دخل لبيتو غيشد السهرة مع ملاك..)
خديجة: (تبسمت من هادشي للي موجد ليها عاد فهمت إلحاحو عليها باش تجي واش كان دايرها مفاجئة من قبل منين قالها تبقى ولا غير رأيو؟؟! مهم هو للي كاين دابا)
تعشيت؟!! حيت جبت ليك لعشا ديالك!
يوسف: (تبسم) ولكن ماشي حشومة؟!!
خديجة: علاش حشومة!! راه ماما للي صيفطاتلك
يوسف: الله يخلف عليها.. (كانت بواطة فيها المدفونة مشا جاب فورشيط وذاق) اممم البنة حااضرة تبارك عليكم عندكم بنة فطيابكم خاصة بيكم..
خديجة: (تبسمت) وجبت الشباكية وكولشي ديال رمضان (كتوريه)
يوسف: (حط لبواطة ومشا عنقها) زواجي بيك كان أحسن حاجة درتها فحياتي… وعمري غندم عليك بلعكس كنت غنكون حمق الا زݣلتك..
خديجة: (بإستغراب ولكن تبسمت)
يوسف: (باسها فخدها، وشاف فيها) انا وجدت ليك شي حاجة تلبسيها لداخل.. (باستئذان) واخا تلبسيها؟!!
خديجة: اممم واخا.. (مشات دخلت لبيت اول حاجة دخلت للحمام طرفت راسها دغيا على حساب تمارة دهنت راسها بكريم ديالها وخرجت لبست داك لغوب للي جاب ليها قدات ميكاب خفييف رشت بارفان ديالها عيط ليها طلقت شعرها حنات ورداتو القدام نفضااتو مزياان عاد هزت راسها قداتلو لڤوليم لبست الخلخال حلت المجر ولسقت بيرسينغ فسرتها للي كتلسق بكولة ديال رموش.. شافت فلمرايا الغوب كانت ديال الجلد سميطات رقااق على كتاف ومضرق شوية من صدرها ومن الكرش ليهونش كانت شبيكة وباينة البيرسينغ منو..
خرجت عندو كان قاد لمسات الأخيرة فين شعل شمع شافها متبمسة جاية كتحلون فمشيتها طلعها وهبطها بإعجاب كبيير مد يدو شدت فيه باسها)
زوين هادشي
يوسف: ماشي بحالك.. (رجع باسها فعنقها) تنبغييك..
~~~~~~~~~~~~~~~
اورطيغا: شنو نتي زعما
ملاك: شنو؟!
اورطيغا: شنو بلان خونا للي معاك فالدار
ملاك: شكون فيهم؟!
اورطيغا: (هز حواجبو) اه كاين جوج!!
ملاك: اه ولاد عمي جاو مع باهم لفين ساكنين واش فنظرك غنطردهم؟!! شكون انا اصلا للي نهضر كما انا جالسة حتى هوما جالسين
اورطيغا: صلابة بعدا!!!
ملاك: مراد هوما اولا صغار علية وحنا كبرنا بحال لخووت كما نتا كتقول غيثة هاكا كبرنا وانا بيتي بوحدي يعني بابي سدان علية ومنين كنخرج راه كنبقى بدرتي وحوايجي واغلبية رجال بوحدهم وحنا لوحدنا يعني مكاينش اختلاط
اورطيغا: (مكتخليلوش منين يشدها) وعلاش مقلتيهاش
ملاك: فاش جيت من عندك لقيتهم فالدار كانو عاد وصلو
اورطيغا: اممم… اوا تيعجبك تلبسي سترينغ؟!
ملاك: (صدمها) دغيا كتنقز!!….
~~~~~~~~~~~~~
اصبحنا واصبح الملك لله..
اورطيغا: (فاق بكري كما العادة مقادرش ينوض منعسش بكري حيت أول مرة غيهضر مع ملاك وكيدخلها الموضوع فوق 21 بالسيف واخا عيات تهرب ليه ولكن حس بيها حتى هي حتى كتبغي تهضر فهادشي كتراااجع مهم بدات الامور كتطور ميمكنش يبقاو يهضرو بحال لخووت.. ناض بالسيف قضا روتينو صلا صلاتو خرج بكري مشا حتى لتماك ويفطر.. صونا عليها فاش وصلت 9 كان فطر وسالا)
التوووت
ملاك: صباح الخير
اورطيغا: صبااحو.. منشوفكش هاد نهار!!
ملاك: ماشي بزاف تجي لصفرو ونتا مضوبل الخدمة
اورطيغا: ومتجيش نتي أسميمو!!
ملاك: ههه مصالحليش بابا اصلا غيكون تماك اليوم هو وشي واحد غيسولو على الدار (مبغاتش تقول حتى حمزة)
اورطيغا: (عيطلو شي واحد) شوية ونزغرت ليك
ملاك: ها!!
اورطيغا: نصوني نصوني زعما…
ملاك: اممم
اورطيغا: كتعرفي قضية تزغريت
ملاك: (خرجت عينها وبغات تبدل الموضوع) ديال صلا وسلام
اورطيغا: ههه اه ديال الله يبارك فعمر سيدي.. انا شوية ونصوني..
غيثة: (الليل كامل منعستش اصلا مدخلتش بكري كانت معاه فشي قنت معقلاش بزاف ولكن حاسة بشنو كانت كدير معاه ولكن منين سولها على شكون ديڤيرجاك تصدمت معرفتش تجاوب كانت كتمنى هو يجاوب واش كان هو اللول ولا دوك الاسماء للي كيجيو فبالها ومنهم اسم اورطيغا؟!
وصلت 8 دصباح دخلت دوشت خرجت نشفت شعرها قدات وجهها بميكاب خفيف يخفي داك الشحوب والحبوب للي بداو كيطرطقو ليها، لبست حوايجها وخرجت ناوية تقطع علاقتها بيه فمرة وعطا الله فين تشري شنو بغات تخلص فلوس ومتبقاش معاه كتخلص بلحمها..
حتى تشوف شي حل لمشكلتها فاالقريب.. فطرت مع مها وخرجت شدت تاكسي لاتوليي نيشان بغات ترجع كيف كانت ولكن تدريجيا ميمكنش تجي وتقطع فمرة بغات تشغل وقتها ما أمكن عندها عزييمة انها تبري راسها براسها وعاد عندها أمل كبير فرمضان انها تبرا من ديما كانت كتسمع أي مدمن بغا يقطع داكشي للي مبلي بيه رمضان احسن خيااار…
تبسمت بأمل كبير غتكمل فمشروعها ومغتزيدش تخلي خوها ومها كيتعذبو معاها وعليها كتر من هاكا،
خاصها دير عقلها مع غتحل لباب دخل، خرج شريف تبسمت وسلمت عليه من الوجه حتى عنقاتو وكولها أمل كبيييير)
توحشتك بزااف
شريف: (متبسم شاد فظهرها) غبرتي الأميرة ديالنا
أسماء: (كانت موراه كتوصلو لباب بقات كتشوف فهاد التعنيقة متعحبة!!، عاد حيدت من حداه ورجعت حتى هي عنقتها بنفس الحرارة مستغربة كتشوف فشريف للي مولفها هاكا دايرة.. )
غيثة: باغدووون اسماء كنت تنغيب بزاف ولكن دابا صافي مبقالي فين نغيب بغيت ناخد ليكسبريونس دغيا باش نبدا حتى انا مشروعي ان شاء الله ياك غتوقفي معايا
أسماء: بيان سيييغ حبيبة
شريف: (عجباتو منين رجعاتلها الطاقة راه كانو كيعانيو معاها فصمت واخا بعيد ولكن ميبغيهاش ضيع وعقلو كيبقى معاها وعاد يوسف للي مدمر من جيهتها.. غيثة عندها مكانة فقلووبهم كبيرة)
هي صافي نويتي ؟!
غيثة: اه ان شاء الله
شريف: مزيان.. ياله فتيات نخلييكم من بعد نتلقاو
غيثة: باااااي (دخلت تخليهم يتوادعو على راحتهم كتشوفهم اليقين لبعضيااتهم صونا تيليفونها كان ادم رداتو لصاكها من بعد مدارت صيلونص باش تعرف تركز مزيان مع أسماء..)
~~~~~~~~~~~
خديجة: (دوزو صباح زويين من بعد ليلة رومانسية فطرو وكان نيت هو للي وجد لفطور وقادو)
شنو مور هاد الحلاوة راك غتولفني هاكا!!!
يوسف: هه بصحتك احبيبتي تستاهلي كل خير
خديجة: (تبسمت كتاكل) خاص ندي لخالتي الغالية داكشي للي جبت
يوسف: انا نوصلو ليها.. امم عرفتي مشهي داك معقلتش سميتو اه مسمن بالشحمة بغيتك تقاديلي منو (مباغيهاش تمشي لتماك)
خديجة: بغيتيه اليوم؟!
يوسف: لا على حساب رمضان ياك هاكا تتوجدو دوك تويشيات
خديجة: ههه مرحبا شنو اخر
يوسف: شوفي انا نوصلك لسوبر مارشي تقداي شنو بغيتي نغبر ساعة منتعطلش على مضوري على راحتك ونلحق عليك نكمل معاك
خديجة: امم واخ.. (هناها من المشية عند الغالية ناضو دوشو بجوج مكملين*******
لبسو حوايجهم وصلها لمرجان هو مشا للخدمة مغيديش لمو داكشي حيت عارف جوابها اصلا مباغيش يتحااك معاها ولحق عليها كيكملو السخرة…)
الغالية: (اتصلات بالياقوت دارو يتلقاو فقهوة لبست حوايجها وهي كتهضر مع ختها للي عاودت ليها كولشي وكتسمع نصيحتها انها متسمحش فحفيدها خاص دخلو باسم يوسف وفنفس الوقت مدخلش بين يوسف ومرتو تخليه هو يقولها ليها وهي تبعدها)
تمشي تموووت شكون سوق ليها وأصلا شكون بحالها الياقوت غير عتقتها من طلاق التاني..
مهم ختي من بعد ونصوني عليك…
ههه ضرووري نصورو ليك…
معلوم غنعاود نديرولو تحليل الأبوة واش هادشي فيه اللعب!!!
ياله بسلامة حبيبتي…
(قطعت صونات على غيثة الي أكدت عليها انها فلاتوليي ودارت معاها أبيل ڤيديو كتبان ليها بنتها رجعت ليها شوية الظحكة.. ولكن مزال متعرف واش بالصح غتقاد ولا لا.. فطريقها صونا عليها راجلها علمها فلعشية غيجيو هو وولدها…
وصلت لتماك لقات الياقوت كتسناها وحداها بوسيت..)
~~~~~~~~~~~~
حمزة: (كان رجع من الخدمة الحد الان مقادرش يقيس أميمة من غير الا جات من عندها المبادرة واخا معندو ݣانة حتى لحاجة الا وقفت عليه غيقوم بالواجب ديالو مع مرتو.. دخلت عليه كيبدل كتبانلو مهدنة بزااف بحال هزيت وحدة وحطيت وحدة)
أميمة كولشي مزيان!
أميمة: الحمد لله احمزة قولي واخا نمشيو لقبر ولدنا..
حمزة: واخا
أميمة: واش كنت كتزورو؟!
حمزة: ضروري نهار اه ونهار لا وكل جمعة
أميمة: (بقات كتشوف فيه ممتيقاش) داكشي للي سمعت بابا كيقول واش بالصح بغيتيه فالتالي
حمزة: والله حتى بغيتو.. أميمة عارف راسي غلطت معاك بزااف نتمنى تسمحيلي على داكشي للي فات
أميمة: مسامحاك اولد عمي حتى نتا سمحلي.. (تبسمت) حنا غنحطو لغدا متعطلش
حمزة: واخ.. (خرجت غير كيبغي يفكر فملاك كيشغل راسو باش ميفكرش فيها صافي خدا قرار ومغيرجعش فيه واخا يوقع لي يوقع واخا يعرف هي تجي عندو مغيتراجعش براكة غير بسباب عنادو عليها خسرها وخسر رووح وماشي أي روح خسر ولدو للي موحال واش شي نهار غيبرى من هاد تأنيب الضمير للي كيعيشو سوا فايق ولا ناعس…)
#رمضااان
كان أول نهار فسيدنا رمضان وجا بالسبت، ملاك كانت فبيتها مقدرتش تنوض واكترية هي كتبغي تشرب بزااف راه زهرة فاطمة بناتها كاملين على لما..
فضلت تشد الطابليط وتجلس ملاهية تماك ولا تخرج برا وتلقا شقا وهي كيسالي معاها رمضان وصيام.. وصلت 12 نهار اورطيغا مصوناش ݣاع!!
ملاك: معرفتش مالو ماصوناش ياكما كيجيه صوتي سيكسي ولا كيبقى يتخيلني!! كولشي ممكن!! ههه
(نعلت الشيطان وناضت توضات باش تصلي هزت القران ديالها للي شراتو مؤخرا فالغوز مع لبيسة ديال صلا وتسبيح فنفس اللون وبدات كتقرا صونا تيليفونها خلاتو كيصوني مشافتش حتى شكون فقط قطعت الصوت.. كملت 4 أحزاب للي كدير فنهار عاد سدت القران بايسااه حطاتو على جنب وهزت تيليفونها لقات اورطيغا تبسمت ورجعت صونات عليه قطع ورجع هضر معاها)
سلاااام
اورطيغا: كتكووت
ملاك: فين غابر
اورطيغا: بين لغبابر.. مزال فذبيحة قربت نكمل غنمشي للدار نبدل باش نمشي للمحال
ملاك: يحسن عوااانك
اورطيغا: ويييه كتزيدني حتى القطعة ولفت الݣارو فصباح من مور ذبيحة
ملاك: بحرا تهنا من داك الدخان غيخرج على شنايفك.. احم على ريتك
اورطيغا: (تبسم) هنييينا البنت حتى لدابا عاد بديتي تهضري!!
ملاك: ههه بالصح بالصح خاصك تقطعو
اورطيغا: اممم
ملاك: مراااد والله حتى كنهضر معاك بالصح معندو باش ينفعك ولا يزييدك مكرهتش تزولو فمرة
اورطيغا: واخا ملاك (كيهرب من مو لقاها هي)
ملاك: فخبارك حنا فالدار حتى واحد مكيكمي ولا حتى فرجال خوتاتي
اورطيغا: اممم اولا رجال خوتاتك للي فبرا تيكميو بجوج وباك وعمك تيكميو السبسي
ملاك: (بثقة) لااااااا بابا مكيكميش
اورطيغا: اااه بالصح
ملاك: (مرضاتش) راه بالصح بابا مكيكميش معمرني شفتو كيكمي
اورطيغا: الله يهديك ابنتي راه كيكمي شقيفات مدرحين
ملاك: (بانفعال) بزاااف عليك انا بابا مكيكميش
اورطيغا: مال مك تتغوتي
ملاك: حيت بابا متيكميش انا للي عارفاه عرفتي شنو من بعد ونهضرو
اورطيغا: (قطعت عرفها تكون مرضاتش راه كضل تهضر على باها بحال شي بطل ولكن هو هضر عادي بانتلو هي للي مقطووعة ماشي هي…)
ملاك: (بقات فبلاصتها عارفة ماشي تصرف بعقلو ولكن باها ومها وخواتتها متقدرش شي واحد يهضر فيهم بالخايب واخا يكون خايبين هوما كيبقاو خط أحمر عريييض ممنوع شي حد كما كان يهضر فيهم ولا يمسخم..
وعاد يقولها باها كيكمي هي عمرها شافتو حتى كما ݣارو عادي!! يمكن يكون كيكمي ولكن ميقولهالهاش بغات ديما تشوفو كما موالفة.. تعصبت بزااف رجعت تغطات غير سمعت الدقان سقرت باش متنوضش تعاون رجع صونا مجاوبتش.. )
زهرة: ملاااك حلي..
ملاك: (ناضت من بلاصتها حلت لباب باينة معصبة) صباح الخير
زهرة: 2 دنهار هادي اصلا، صباح ابنتي فقتي ومخرجتيش!!! عاود رجعتي لعادتك ولقيتي نيت لبيت فين تخباي
ملاك: اماما راكي عارفاااني كيسالي معايا صيام كندوخ وقلبي كيوجعني وركابية كيفشلو
زهرة: سمعي نقولك لحريرة طابت ودابا اجي تعلمي طيبي شي حاجة تنفعي بيها
ملاك: (خرجت عينها) لا
زهرة: (هضرت بشوية) باغا تزوجي ونتي مفضية!!
ملاك: مغنتزوجش!!
زهرة: حطي حوايج صلا واجي قبل مدخل شي وحدة من مرات عمامك
ملاك: اماما!! (مشات خلاتها تأفأفت لبست بيجامتها ودارت شالها حيت ولد عمها كاين فالدار مشات للكوزينة لقات بصلات فوق البوطاجي)
قطعيلي غير البصلة وشلضيها
زهرة: يااااك والأميرة شنو غدير؟
ملاك: شوفي اصلا انا البصلة غنبقى نشريها من عند صحاب سناكات مقطعة ومصايبة
زهرة: باغا تجشميني مع أمينة!! راك شفتيها شحال حاارة نسااي داك تبهليل الخاوي راه ولدها هو للي راجل وعندو طياب زوين
ملاك: اوا هانتي قلتيها بجوجهم كيطيبو مزيان انا علاش نداحس معاهم فالكوزينة
زهرة: شلظي البصلة املاك
ملاك: علاش و الهاشوار؟!
زهرة: ياله غير طلقينا، راه مزال تابعك العجينة
ملاك: بناقص من شي زواج ݣاع (جات خارجة جرتها مها من قب بيجامتها زيدتها بالسيف عليها تقاد بطبوط معمر..)
زهرة: قالتلي أمينة بغا يشري فشي حي زوين..
ملاك: اه بغا يشري فنفس الحي للي كاينة فيه مو زوين داك الحي موقر مافيهش صدااع
زهرة: امم مزيان الله يسهل عليكم ابنتي
ملاك: (تبسمت) أمين.. ولكن قالي الفراش غنبقاو كل مرة نشريو حاجة
زهرة: ماشي مشكل ابنتي راه حتى حاجة مكتجي دقة وحدة حاجة بحاجة. حتى نتي تعاوني معاه
ملاك: انااا.. انا غيكون عندي كريدي ديال داري راه سمعتي بابا شي 3 ايام ونطلعو نقادو لوراق وداكشي صافي زويييت
زهرة: سمعي اديك زقيريمة هو مغيكونش وااقف عليك ولكن نتي مرة مرة دخلي شي حاجة هاديك راه دارك حتى نتي وتباركالله راكي بخلصتك ومتابعك والو ما فيها باس تقادي لبلاصة لي غتكوني عايشة فيها كما غتكون دارو راه دارك حتى نتي..
اورطيغا: (رجع للدار مهدود دوش لبس حوايجو صلا العصر جلس 5 دقايق كيرد النفس، وهبط للمحال وبدات الخدمة مزيرة واخا فرمضان كيجيب جوج دراري من الحومة يخدمو ياله كيجيبو التعادل مع الناس ومرة مرة كيزيدو الرابع..
بقات للمغرب ساعة بدات رجل كتقل شوية وهو حس بلعيا بزااف كما العادة خرج المحلبة للي موالف باش يجيب زلافة حريرة ومسمنة طلع حطهم فالدار جبد صوص مطيشة للي صيباتلو مو دارهم فطجين جبد الكفتة دارها كويرات فالطاجين زاد العطرية وخلاه فوق البوطة مشاعلش عليه ونزل للمحال يصيفط دراري حيت بعاد وهو بقا على متبقى نص ساعة يسد ويطلع..
رجع صونا على ملاك مكتجاوبش قال تكون مشغولة مع التوجاد ظالكوزينى صونات عليه مو كما العادة مبغاهاش تصيفطلو حتى شي حاجة من تماك..
نقا المحال سدو فمرة حيت مغيحلش من مور المغرب وطلع للدار مهدود يكمل توجاد لفطور..)
~~~~~~~~~~~~
غيثة: (جالسة شادة تيليفونها بدات الحالة كتجيها وهي كضور فعينها ميمكنش ترجعلو راه قررت تبعد خاص تصبر راه يوماين جلست بلاش تزيد تصبر حتى توالف كان عندها التحدي تصبر 20 يوم حيت هاكا قرات فكتاب ان أي واحد بغا يحايد شي بلية خايبة ويطردها من الجسم ديالو خاصو يوقف منها 20 يوم وغيبدا ينساها حتى يكرهها وميعاودش يقرب يديرها…)
الغالية: (جلست حدا غيثة) علاش مبقيتيش تتجاوبي ادم؟!!
غيثة: غير مناقشين اماما فشي حاجة ولكن غنتصالحو غير تنعلمو يحتارمني
الغالية: علاش قلل منك فشي حاجة!!
غيثة: اه شي حاجة من خدمتي مهم ماشي شي حاجة خايبة غير تنعلمو يبدا يحتارم انني غندير مشروع وغنكون بيزنس وومن سيدة اعمال (عارفة هنا مغظغطش عليها تهضر معاه)
الغالية: اه خاصو يحتارمك
غيثة: داكشي باش متديهاش فكلاموو نتي غير قولو الله يهديها وصافي
الغالية: اممم.. خاك مهضرش معاك؟!
غيثة: هضرنا أخر مرة.. ماما خاصك تقولهم يجيو يفطرو معانا ولكن نساي موضوع الياقوت
الغالية: عرفتي ابنتي داك الوليد منين شفتو لبارح فالقهوة غير يوسف منين كيحل عويناتو وظحيكتو كما كان صغير
غيثة: عفاك اماما مدخليش اصلا راه وليتو بجوج بعاد على بعضياتكم مبقيتوش كما كنتو فمرة؟!
الغالية: كولشي بسباب الشلحة
غيثة: عفاك اماما عيطي عليه هو وخديجة ميمكنش نبقاو مفرقين رمضان هدا ديما كيبغي جماعة ياك ديما تتقوليها نتي
الغالية: وكان غير يجي بوحدو.. صافي دابا نعيط ياك ابنتي مبقيتي تديري والو!!
غيثة: لا متتشوفيش حالتي كيف ولات
الغالية: الله يهديك على راسك وعلية ابنتي…
ملاك: (من بعد مبداو الفطور كتشوف للي هز بطبوطة يا مكيكملهاش يعض عضة وحدة ويحط الباقي مكيوليش يدور بيه ولا كيكمل شوية ولكن مكيزيدش الثانية!!!
كتعرف على هاد البطبوط فاش كتقادو مها ولا مرت عمها كيطيير ولا من اللول كيتفرق باش كولشي ياكل منو هزت وحدة عضت وبقات كتاكل وكدور عينها العجينة مافيهاش حس الملحة وجاية حلوة شوية ولعمارة مذاق العطرية غالب بزاف واكترية الخرقوم وسكينجبير والبصلة مزال خضرة شوية)
احم.. منين درت بطبوط صحي شفت حتى وحدة مكتاكل، باز كيعجبكم غير كنوور (رجال بوحدهم وعيالات بوحدهم)
سهام: اشمن صحي املاك خليهم يديهم عمك لدجاج ولقنون
زهرة: قل خيرا او اصمت هاكا خاصنا نديرو اسهام، البنت ياله كتعلم
سهام: قلنا غير كلمة الحق هه
ملاك: منعاودش نطيب
زهرة: (هزت كتاكل منها) انا بعدا عجبتني تبارك الله على بنتي دابا تزيد تطيب وتعلم وترجعو تشتاقو ذوقو غير من يديها
ملاك: (حركت راسها بلا) مغنعاودش نطيب!!!…
داز الليل كامل مبغاتش تجاوبو كان مخدمش غير صلا تراويح مشا للحومة قضا غراضو وبقا مع دراري.. رجع للدار وجد لعشا ديالو صونا مرة مجاوبتش وبقا متكي حتى داتو عينو بلعيا.. مفاق غير على صوت اذان الفجر! شداتو فقسة استغفر الله ناض توضا خرج للجامع كيحس براسو عطشان من دابا صلا صلاتو ورجع للدار جبد عليها بنعسة ساعة ونص ومشا لذبيحة مدوز نهار قااسح ومن زهرو كان نهار مشمش..
~~~~~~~~~~~~
خديجة: (قدات بلاطو ديال المعجنات مالحين و كتحاول يكون داكشي مقاد مزيان باش متسمعش كريتيك من عند الغالية.. جمعت الكوزينة مزيان عاد مشات طرفت راسها وبقات كتسنى يوسف يخرج من الخدمة للي جاتو على غفلة باش يمشيو لدارهم)
~~~~~~~~~~~~~~
ملاك: (كانت فسطح كتلعب مع أنير قرات ميساج ديالو وباينة كاتبو هو معصب)
*مال مك متتجاوبيش*
ملاك: امم من صباح مصوناش ومنين مصيفط ميساج مصيفطو مالي مكنجاوبش ونتا من لبارح مصونيت من غير 2 مرات!!!!.. (مجاوبتش مبغاتوش يقول على باها كيكمي وعاد شقوفة!! قرب يأذن صونا جاوبت منفخة)
اورطيغا: (معصب وزادتو هي) علاش نتي متتجاوبيش؟!!
ملاك: نتا عارف انا علاش معصبة!!
اورطيغا: علاش الخ** شنو قلت ݣاع باش منفخة وهازة خناافرك من لبارح!!!
ملاك: (خرجت عينها عمرو هضر معاها هاكا قطعت معجبهاش الحال يهضر معاها هاكا!! رجع صونا مبغاتش تجاوب باين معصب وغادي غير يخليهم يوصلو لمواضع خاايبة حيت هي مغتسكتلوش وعارفاه حتى هو صعييب!!!! )
ملاك: (كملت الفطور دورت عينها كيهضرو على بنات عمها للي غيجيو والدار غتعمر.. جات تسلت وهي تعيط ليها مها وعاد معندها ݣانة كلات بالزربة باش تمشي تحل المشكل مع اورطيغا مبغاتش يبقاو هاكا..) شنو اماما خاص نزرب نصلي ترااوح
زهرة: تراوح مزالها ربع ساعة غيقدك تغسلي فيها الماعن
ملاك: (خرجت عينها) غير زلافة وكاس ومعلقة للي كليت فيهم وشي لاخر كلينا فيه مجموعين علاش انا!!
زهرة: (بتهديد) نلقا الماعن كيشعلو كتفهمي!! ياله ياله بحرا تجيبيها مع ترااوح اه ملقاش كوكوط عامرةتحت البوطاجي وطبسيل نغطي طبسيل وفوسطهم تمرة.. اه طباسل الشباكية والزميتة مكنديرهمش فسطولة كنخويوهم ونغسلو طباسل… تفاهمناا ازين
ملاك: (عرفت مها حمرت فيها العين يعني غتغسلهم غتغسلهم اللهم تمشي تسالي دغيا.. مشات للكوزينة لقات جبل ديال الماعن بقات تنݣر وتسب وزادتها مدابزتها مع اورطيغا جات بغات تبدا وهي توقف عليها مها كتأمر وتوريها حتى حيدت الوسخ كامل ونقات الدنيا عاد بدات تغسل الكيسان هوما لوالة ومها كتوريها بقات واقفة عليها حتى غسلت الطنجرة ديال لحريرة حيت كانت متأكدة الا موقفتش عليها مكانتش غتغسلها وبحال والو تحطلهم زلايف وتعمرها باما بحجة كيرقدو… كملت وشافت فمها)
شي حاجة اخرى الالة!!!
زهرة: الله يرضي عليك ابنتي غدا ديري حسابك طيبي لينا شي شهيوة من دوك ليديدات لغزاليين
ملاك: هاد الساعة كنعرف غير تطياب الݣلب نطيبو ليكم؟!! (مشات كتنݣر ومها كظحك مشات لحمام مها توضأت عاد رجعت لبيتها بدلت لبيجامة للي عمرت ليها بلما لبست حوايج صلا وبدات كتصلي.. متنكرش عيات باش تركز فصلاتها وعقلها كان مع اورطيغا كتر عمرو هضر معاها هاكا!! وعاد خاص يتحايد هاد العناد شوية باش يزيدو يتفاهمو كتر..
كملت وجلست فوق زربيتها مربعة يدها هزت تيليفونها حتى هو مرجعش صونا ولا صيفط ليها شي ميساج جاتها فشكل يوماين كاملة مهضروش وكملها هاكا!!
غدا الاثنين غدا غتهبط لفاس هي وباها تشري الدار واش غتلقاه ويجي عندها!! ولكن باينة مغيجييش غير منين مسولش لحد الان دارت مود أڤيون وبقات مرخية فبيتها كتفكر غير كفاش يتصالحوو شدت التسبيح وبقات كتستغفر الله باش يصفا دماغها وتنقص هاد العصبية للي كتركب فيها فرمضان مع الجمييييع..)
~~~~~~~~~~~~~
أمينة: (شادين طريق لصفرو) مغتݣولش شنو طاااري
اورطيغا: والو.. ياك داك نهار وصاتك على كرعين اليوم طاح فية داكشي بزااايد قلت تاخديه ليييهم… (كمل الصوݣان زرب على مو مع فطرت مشا عندها لقاها فطرت هزها يمشيو بلا تسبييق.. كانو قربو يوصلو) صوني على صاحبتك علميها
أمينة: ونتا غدخل؟!
اورطيغا: دابا نتي صوني الوالدة راك عارفاني فاش تنكون معصب
أمينة: معصب على راسك!! واش نتا ماشي تشوف البنت ونتا هاكا عنداك دير شي حاجة للي تندم عليها… واش دابزتو؟!
اورطيغا: (مكيهضرش، صونات على زهرة علماتها انها جايبة ليها شوية الكرعين للي وصاتها عليهم وزهرة رحبت بيهم وقالت أمينة قنطت وجات تشووفها… وصلو القهوة كانت عااامرة خرجو هز دوك الكرعين للي جايب فݣلاصيير كبيرة ديال لحم..)
أمينة: عنداك تخرج جنونك فلبنت ݣولي غير شنو بينكم؟
اورطيغا: زيدي الوالدة زيدي..
أمينة: لوكان جبنا غير كرطونة سكر وهانا خاطبينها ههه (شافتو مكيظحكش)
السلامة يا ربي.. ها ودني وديرلها شي حاجة!!
اورطيغا: وا زيييدي…
ملاك: (مفهمتش مجية ديال أمينة والسؤال المهم والأهم شكون للي جايبها!!! والا كان هو غيكون صونا تفكرت انها دارت مود أفيوون مشات جرات لبيتها شعلاتو لقات جوج ديال بواط فوكال شداتو جات عندها زهرة دارت راسها كانت كتصلي مخرجة عينها عارفة من مور هاد المجية غيكون شاااعل عليها…)
زهرة: هانتي هنا اجي وجدي معايا شنو نحط
ملاك: ماما نتي هاد نهار عاد حرتي فالكوزينة
زهرة: (كظحك معاها) زعما راه غتكون عݣوزتك
ملاك: هه سيري اماما انا راه كنت كندعي ربي يسهلي فلبيعة وشرية ديال غدا
زهرة: الله يقبل احبيبتي ويسهل عليك.. (كتفتاخر بهادشي حيت منين وعاو بناتها مدخلة ليهم فكرة فوقما صعابت عليكم شي حاجة صلييو وربي غيجيب التيسير..)
ياله نوضي راه قالتلي قربت
ملاك: واش مراد للي جايبها؟!
زهرة: منعرف نسولوك نتي عليه!!!.. يمكن هو حيت قالتلي جا هزني وهو مكيفطرش معاهم جالس بوحدو
ملاك: اممم.. (ناضت تبعت مها حطو للي قسم الله عيالات عمامها خرجو مشاو لمدينة يتقداو شي حاجة على حساب فطور الغد للي غيكون ضياف وكانو غير هي ومها بجوج هزت أنير سمعت الدقان)
احم يمكن وصلت!! هاد المجية جاتني فشكل!! غير الله يحضر السلامة
زهرة: سيري حلي (مشات هازة أنير قبل متحل قرست حنوكها تبان مزنݣة شوية حلت لباب كتشوفو مخنزر وزهرة كتبسم)
ملاك: (مدت حنكها سلمت على أمينة وعينها عليه للي باينة طايرة ليه)
زيدي اخالتي أمينة مرحبا بيييك
(دخلت أمينة مدورة وجهها كتشوف فولدها) مراد!!
اورطيغا: علاش نتي طافية داك ال**** ؟؟
أمينة: (خرجت عينها فيه) مراااد!! (جات زهرة كترحب وهي دور دارت ابتسامة)
ملاك: (صدمها كتفكر غير واش جا على حسابها منين طفات التيليفون)
اورطيغا: تنهضر معاك البشار!!! علاش طافياه ومن لبارح ونتي منفخة شنو واقع فملك الله؟!
ملاك: (كتهضر بشوية) مراد واش حمق؟! دابا يجي بابا!! ولا ماما تسمع
اورطيغا: دابا نفريوها هاد تبرهيش معنديش معاها تشدي طريق معايا مرحبا متشديهاش غنخلي مك تشديها بلا هوااك
حمزة: (خارج من دارهم كيتفاجئ بيهم بجووج حنا راسو وزاد ماشي من طريقو)
اورطيغا: (مكشكش) هضري.. واش انا دايزة علية تمااارة تنسرق الوقت نهضر معاك تفاجيها علية وتتزيدي بهادشي ديالك!! تقطعي وتهضري فوقما بغيتي وانا اخر همك!!
ملاك: (غير كتشووف فيه باينة فيه كتر من معصب أنير كيمد يديه باغي يمشي عندو)
اورطيغا: اااخر مرة املاك تطفي علية التيليفون الاخر مرة.. (حنا هز لݣلاصيير مدخلها مبعدة من لباب متبعاه حطها فوسط الدار كانت زهرة وامينة جالسين فوسط الدار) سلام لالة زهرة لباس عليك؟!
زهرة: الحمد لله اولدي ونتا؟!
اورطيغا: الحمد لله براك الله وفيك… (شاف فمو) انا نتسناك برا على متكملي..
ملاك: (وصل حداها منين جا خارج مكيضويهاش) صبر مالك دخلتي فية هاكا طول وعرض
اورطيغا: (شاف فيها ورجع شاف من موراه دارو لوخرين راسهم مكيشوفوش واخا راه متبعينهم بطرف عينهم) شي نهار غندخل فمك ونوريك هاد صلاابة للي فيك
ملاك: راك نتا للي غلطت معايا، علاش مكتعتارفش بالغلط ديالك امراد؟!!!
اورطيغا: (مقرب ليها مخزز حاني راسو ليها) فاش؟!!! فاش غلطت؟!!!
ملاك: احم (شافت فيه) مراد هوما هنا
اورطيغا: (بقا كيشوف فيها تم ماشي وهي تلحق خرجت لبرا) سيري دخلي..
ملاك: لبارح نتا غلطتي ونتا عارف
اورطيغا: وهانا غلطت!!! شنو وقع ݣاع فملك الله للي يخليك تطفي التيليفون ومتجاوبنيش!!! (مقرب ليها حتى كلاها فالحيط) بالعقل املاك شنو هاد الغلط للي درت!!
ملاك: (شافتو شعل) احم مراد!!
اورطيغا: (عاد وعى رجع اللور زاد ماشي تبعاتو لطريق) سيري ولا غنعطب مك!!
ملاك: (خافت تخسرو) صبر غير نهضرو بعدا واش مكتعرفش ندتحاور
اورطيغا: (مخرج عينو) شوفي غير تمشي ولا احسن ملوية تجيك فالوجه
ملاك: (شدت فيديه كانو سخان عكسها للي باردين) انا مكنبغيش للي يهضر على بابا محسيتش براسي فاش درت هاكاك.. انا هاكا واخا يكون بابا غالط لا مكنقبلش كلمة صغيرة عليه
اورطيغا: (كيشوف فعينيها) انا مهضرتش فباباك جا موضوع عادي مفهمتش اصلا علاش كبرتي الموضوع
ملاك: لا مكنبغيش للي يهضر فيه
اورطيغا: (سكت كيشوف فيها)
حمزة: (كان فراس الدرب شايفهم وكفاش ملاك شدت فيد صاحبها قلب عينو كيدير جهدو باش ينسى واخا صعييب ولكن خاصو ينسى ويطوي صفحة ملاك)
اورطيغا: (حرك يدو وجمعات يدها) سيري دخلي دابا..
ملاك: (كتحلون عليه بعينيها وكتحرك حواجبها) صافي!!
اورطيغا: قلت هاد شهر زعما غنعل الشيطان ساعة تسلطتي علية نتي قلتي للشيطان متتعرف والو
ملاك: (بدلع) انا شيطانة!!
اورطيغا: (بقا كيشووووف فعينيها مدة والتعب باين عليه) دخلي املاك
ملاك: (تبسمت ومشات دخلت اما هو مشا نيشان لطموبيلتو.. سمعت أمينة كتهضر مع ولدها باش تخرج)
هانتي جالسة اخالتي
أمينة: نمشي ابنتي خاصو ينعس شوية حيت كيفيق صباح بكري وكيعيا بزاااف
زهرة: اااه الله يعاونو مسيكين
أمينة: الله يهنيكم.. ،(توادعت معاهم مع مشات ضارت زهرة عند ملاك مع مدت يدها تقرسها حيت بانت شنو سر هاد المجية طارت لبيتها سادة عليها مخبعة)
زهرة: حتى تخرجي لمك ونوريك هاد ضسااارة كون محشمتي وكان دخلتيه لبيتك..
اورطيغا: (كانو فطريق كيهضرو هو ومو موضوعهم ملاك) من مور رمضان ان شاء الله نجيو واخا ميخرجش ليها الميطاسيون
أمينة: صافي هي نوجدو راسنا؟!
اورطيغا: اش غتوجدي غير غنسبق خطوبة نتبتها حتى تجي لفاس عاد نعقد على مها ونجيبها نيشان مكاين لا عرس لا سطا حمص
أمينة: العرس غاااانديرو غييير تهنا
اورطيغا: عرسي نتي وياها الا بغيتو ومنين تكملو طلقيلي لبنت نكمل شغلي معاها
أمينة: الله يمسخك الجحموووم
اورطيغا: (تبسم بتعب وصلها للرياض وهو مشا للدار مقادرش يزيد يوقف ولا يهضر طلع للدار، وجد طاجين معرف كفاش ݣاع دارلو وحطو فوق نار مهييلة ريݣل التيليفون باش ميتصيدش حتى طلع ابيل ڤيديو منها جاوب)
وي ملاك
ملاك: (تبسمت) كبيييدة
اورطيغا: غير ديال شي صقلة!!
ملاك: حشومة عليك!!
اورطيغا: (تكا بلاصتو) زوينة ديك الكسوة للي كنتي لابسة قبيلة
ملاك: هاديك ديال صلا، عندي شي 5 كيعجبني كل مرة نصلي بلون كتفتحلي الشهية على صلا
اورطيغا: امم مزيان
ملاك: باغدوون مراد مكنتش عارفاك غتقلق هاكا وتجي ونتا عيان ولكن..
اورطيغا: غتبقى تجيك النفس علية هاكا بحال كدرتيلي مع باك!!
ملاك: أكيييييد، نتا راك أهم حاجة عندي منبغيش للي يقول فيك شي كلمة خايبة
اورطيغا: (غير كيشووف وعينيه كيتغمضو)
ملاك: ولكن الناس كيجيو يزورو بوكي فلوغ شكلاط حليوات نتا جايب كرعين ههه
اورطيغا: (تبسم) المرة جاية نجيب ليك مليجات اما حسن ضربي لحم ولا تشمي الورد
ملاك: ههه عندك بعد نظر
اورطيغا: (عيا بزاف) ملوكة نعول عليك تفيقيني
ملاك: واخا امتى؟!
اورطيغا: شي ساعة ونص صوني علية
ملاك: صافي واخا غير رتاح…
يتبع
التعليقات 0