غيثة: (كتشوف فديك تقدية) تهلا فيك عموو رشيد
خديجة: ههه مسيكين هادي طبيعتو معانا كاملين للي حملت فينا كيدير ليها هاكا ولبنات للي برا كيصيفط ليهم داكشي ديال لبلاد
غيثة: الله يخليه لييكم (بقات كتشوفها كتجبد هادشي للي بسيط وعادي يوسف يجيبو ليها ويجيب ما اكتر ولكن معنويا كيعني بزااف….
حتى هي باها حنين وزوين ولكن من نهار كان غيموت فشي مشكل وقع فالدار قررو يبعدوه على مشاكل العائلة كاملة كما كان المشكل، رجعت كتحس بيه بحال شي ضيف مخاصوش يتقلق مخاصوش يسمع مشاكل العائلة مخاصوش حتى يحزن كولشي كيأثر على قلبو!! ولكن هي شكون غيحس بيها واخا خوتها معاها ولكن الا مشات قالت هاد الفضيحة فاش كدوز غتنوض كارثة وشافت غير خوها للي بسبابها كما قالت ليها مها دار كسيدة حيت عقلو رجع غير معاها وخايف عليها!!)
يوسف خويا خاص نمشي لاتوليي
خديجة: انا ندخل هادشي للكوزينة، غيثة حبيبة اي حاجة بغيتيها هزيها (غيثة رسلت ليها 😘)
يوسف: غيثة هضرتي مع ادم؟
غيثة: لا قلتلو بغيت نفكر
يوسف: الا رجع تعرض ليك قوليها لي انا ولا أشرف صافي نتي خرجي راسك من هاد الموضوع
غيثة: (حركت راسها باه ودخلت لبيتها لبست مبقاش عندها ݣانة دير ميكاب ولا تلبس وتناسق هزت صاكها للي فيه داكشي ديال سطاج وخرجت لقاتو جالس كيقرا كتاب)
يوسف انا مشيت
يوسف: علاش مبقيتيش تتهزي طموبيل ديالك؟
غيثة: غير مرشقاليش على الصوݣان (فهاد اللحظة وسوس ليها الشيطان تهز تصوݣها ودخل فشي حيط تكون ضربة قوية ومنها يطيح البيبي واخا غتاكلها فصحتها ولكن هادشي مزال كيتعتابر قتل وكلام طبيبة مزال كيدور فراسها… نفضت هاد الافكار الشيطانية من راسها)
يوسف: غيثة!!!! غيييييثة!!!!!
غيثة: ها.. هم!! غير تفكرت اسماء قالتلي اليوم غنمشيو نشوفو شي ثوااب
يوسف: هي قربنا نفتحو المشروع
غيثة: (تبسمت) هو صراحة الفكرة ديالك للي غنطبق غنخدم معاها تقريبا شي عام حتى نفهم بزاف دلحوايج نعرف السوق نداخل مع لكليان نشد هادشي فيدي مزيان عاد غنفتح شي واحد
يوسف: (تبسم بفخر) وليتي تتكبري اغيثة!!!
غيثة: (تبسمت بحزن كبير) ضرووري اخويا (هزت صاكها حنات باستو فحنكو وخرجت الوجهة ديالها مشات لطبيبة للي خلاتها تبدل شحال من حاجة…)
ملاك: (رجعو للدار هوما بقاو فالقهوة وهي رجعت للدار صونات مرة وحدة على اورطيغا مجاوبش)
*** هاد ايخان شحال معصب غير مع راسو!!!
(دخلت للدار كانو كيخملو)
الاااااا!!!
(خرجت مها من الصالون بفواطتها ومݣفضة يديها)
زهرة: جيتي؟!
ملاك: لا غرجع للخدمة دابا جيت غير نبدل هاد لبوط ضبرني فرجلي
زهرة: حطي حطي حوايجك وزيدي تعاوني
ملاك: راني مريضة اماما
زهرة: ملاااك!!!
ملاك: وراني عروسة زعما!!! مفهمتش غير ديك المرات خملتو علاش عاود روينة!! صراحة من حق حنيني كيطلعلو هادشي فراسو كل مرة لايحين الما وتجرو واش مكتخافوش يضربنا الجفاف هادشي راه زايد فينا!!!
زهرة: (جات عندها) بنتي زواج راه ماشي هو الخروج والظحك راه مسؤولية خاصك تديها فدارك وتكون ديما متولة ونقية هنا فدار باك راك كنتي مخنتة مكديري والو حيت أنا هنا معاك وخليتك تحت جناحي عكس خوتاتك ولكن تماك راك غتكوني غير نتي وراجلك
ملاك: والله اماما الا عارفة انا غير دابا عييت راه صباح الخدمة ومن تماك لفاس مجلستش ݣاع كنت كنشوف الخدمة ورجعنا للدار وعاد طلعت واحد السخرة فيها 20 كيلو لخديجة حتى لدارها حيت كان لاخر مخدامش (بقات كتلهت وهي كتعاود وتحاول تقمص دور لعيا) والله الا عييت
زهرة: باااااز!! ديما جاية السبة!!!
ملاك: والله مكنكذب عليك اماما وعاد خاصني بلاتي نخرج نشوف مع الكوافورة (هزت حواجبها كتقلي السم) غندير المكياج المكياج المكياج
زهرة: ههه فالخطبة؟!
ملاك: ومتعرفي يديرلي مفاجئة حتى انا ويجيب لعدول معاه حق ربي حتى نبصم بالعشرة
زهرة: كتفرجي ابنتي بزااف فالافلام، سيري قابلي خوك ولعبي معاه شوية متخليهش يخرخ فهاد روينة
ملاك: (تعلات باستها فحنكها) يخليك ليلي يا احسن أم فهاد الدنيا
يوسف: (صونات عليه الياقوت علماتو انها تنازلات على القضية باقي خاص يكون هو على الوعد للي عطا ويبقى فكلمتو ويعتارف بولدو كانت خديجة جالسة كتاكل شبس حداه وكتفرج ولا يحة ودنيها معاهم)
الياقوت: شنو ايوسف مزال مبغيت تشوف سليمان
يوسف: منين نبغي غنقولهالك
الياقوت: غادي تحبو تيشبه ليك بزااف
يوسف: الله يعاون… (قطع وشاف فخديجة)
خاص نبدا الإجراءات
خديجة: واش غديرو فحالة مدنية بوحدو!!!
يوسف: معرفتش الإجراءات احبيبة، ولكن غالبا غيكون بوحدو خاص نهضر مع المحامي هو غيتكلف بكولشي
خديجة: امم.. (شاعلة فيها العافية) مغتبغيش تشوفو كما قالت ماماه؟!
يوسف: (من وجهها كتبان هادئة ولكن عارف من لداخل مغتكونش مرتاخة) صراحة مبغيتش
خديجة: اممم فخبارك لبارح جات وقفتها غير ملاك ومراد من حدا لباب مخلاوهاش دخل
يوسف: هنا؟!
خديجة: اه حدا باب الدار (شيرات للباب) وباينة شكون لي عرضها (تبسمت) كفاش كنت قادر دوز معاها 4 سنين والله مافهمت هاد الوقاحة ديال جوج دريال!!
يوسف: (بانزعاج) مبغيتش نفكر فداك تخربيق
خديجة: اممم.. قولي غنمشيو لخطوبة ديال ملاك؟! ياك تقدر؟!
يوسف: ضرووري ان شاء الله
خديجة: خاص نشري ليها شي كادو زوين
يوسف: ختاري للي بغيتي ونخرجو نشريو… ملوكة تستاهل كل خير
خديجة: فاللول مكنتيش بغيتها تكون مع مراد!!!
يوسف: مكنتش عارف مراد غيفكر فالمعقول ولكن منين عرفتو جدي بلعكس راجل ديال الوقت حتى هو يستاهل بنت الناس بحال ملاك… انا دخلنا العجب فاللول ولكن براڤو عليها بدلات واحد بحال مراد كان كاره حس زواج هنا عرفي راه ختك مميزة بزااااف
خديجة: (بقات غير كتشوف فيه!!!!!!)
يوسف: اي واحد يتمنى تكون عندو ملاك فحياتو
خديجة: (تشدت شهيتها رجع كيقرا وهي بقات مبلقة عينها فالتلفازة!!!)
اورطيغا: (وصل الليل من بعد مسد المحال طلع للدار يرتاح كان داز عليه هاد نهار بالاعصاب كتر من الخدمة!!
حط عشاه للي جابو وجلس كياكل صونات عليه أمينة هضر معاها شوية وعلماتو الغد ليه يجي عندها بكري باش يمشي معاها يشريو حوايج الخطبة لملاك،
قطع معاها وبقا مكمل عشاه تفكيرو كان فرشيد للي باغي حمزة لملاك وحمزة مزال باغي ملاك ولكن متأكد ملاك معاه هو!! دماغو خدام بزاف سؤال كيجيه فبالو واش مبغاتش تبوسو حيت محترمة راسها وباغية مسافة بيناتهم، ولا حيت مزال مكتبغي ولد الجيران!!!
تخربق بزااف هو راه كتر من عام باش كيعرفها ورجع عارف طبعها ولكن!!! رجعت صونات عليه قطع ورجع صونا عليها)
وي!!!
ملاك: باقي مقلق!!
اورطيغا: واش غيبقى لاسق فيك املاك!!
ملاك: ملاسقش فية هو كان مع بابا راف فرق
اورطيغا: حطي راسك بلاصتي ومتقوليش عاود حتى نتا مع غيثة!! انا اصلا خويت ساحتها وعارفها تتضيع وبسبابك بعدت عليها
ملاك: بسبابي!! يعني مزال باغي تبقى معاها!!
اورطيغا: ملااك!! نتي فاهمة شنو تنعني.. غيثة منين كانت صغيرة وهي قدام عيني تتبغيني ولا عاجبها سوقها هداك انا من ديما كنت تنشوفها ختي صغيرة وغدعمرني فت مع الحدود!! وداكشي غير مرحلة مراهقة منها وصافي
ملاك: مراهقة ف27 عام!!
اورطيغا: شنو بغيتيني ندير كتر!! راه للي أهم مكانت حتى حاجة من جيهتي مكناش مخطوبين وومابيناتنا والو!!! راه فرق كبيير اما داك ***** راه كان خاطبك واش تتفهمي شنو هي كان خاطبك يعني مفكر فيك باغيك تكوني مراتو ففراشو فحيااتو تشاركو كولشي
ملاك: مراد!!
اورطيغا: خلي نكمل هضرتي باش تفهمي مزيان اه غيثة ماشي ختي وخاص نعطيها شبر التيساع وعطيتو وحتى حمزة راه ولد جيرانكم ولكن معطيتيش شبر التيساع
ملاك: نتا مبغيتش تيق راه بابا للي لسقو وجا معاه!!
اورطيغا: تنعرفك املاك وعندك لا هي لا مبغيتيش تمشي مغتمشيش
ملاك: الهضرة عندك ساهلة راه كان بابا وعمي جاو عندي كفاش غنديرلهم!! راه تحطيت امام امر الواااقع
اورطيغا: (بقا ساكت)
ملاك: مراد علاش حتى نتا مبغيتش تفهمني كما فهمتك
اورطيغا: علاش تفارقتو؟! ميمكنش السيد مزال تتبعك بحال ظلك وتفارقتو على شي حاجة تافهة
ملاك: (بقات غير ساكتة) الخلاصة نتا مكتيقش فية!!!
اورطيغا: علاش تفارقتو!!! شي حاجة كاذبة فيها علية عاود!!!
ملاك: اولا انا ماشي كذابة تانيا نتا كتيقش فية وهاد شغلك!!
اورطيغا: مدخليش الشكلي فالعكلي لبنت لي باغي نتزوجها باها ديما حجار للي كان خاطبها معاهم هادشي متيديرش تناوي!!!!!
ملاك: (عاد فهمت مشكلتو) شوف بابا هو لي تقريبا ربا حمزة معانا مكانش كيخرج من دارنا منين كان صغير، حتى كبر و وقف معاه عاود باش دخل البوليس حيت باباه مابغاهش يخدم تماك يعني واخا تفارقنا وانا لي فسخت الخطوبة بابا عمرو قالي لا هو مزيان ولا مربي حتى حاجة، صافي تفهم مرجعش ناقش معايا ݣاع وحيت اصلا مطولناش فهاد الهضرة مكملاش حتى 10 أيام ومكانتش خطوبة رسمية غير هضرة قبل متكون شي حاجة كولها شد طريقو، واش فهمت امراد بابا نسا انه كانت شي حاجة بيني وبين حمزة بقا عاقل غير هو بحال خونا وكبر معانا
اورطيغا: وعلاش تفارقتو؟!
ملاك: حيت ماما هربت مع بابا وتزوجو وهو عايرني بهادشي ماشي عايرني ولكن جات فالهضرة وانا الا ماما منقدرش شي واحد يهضر عليها
اورطيغا: (تيقها حيت مكانش عارف القصة كان فاهم كانت شي حاجة على زهرة ولكن عمرو دخل فالتفاصيل مع مو تعاود ليه)
ملاك: فهمت دابا!! هادشي للي خلاه فاللول ميتقبلش نتفارق معاه ومبغاش جاه سبب تافه كما هو كان كيقول وانا منقدرش نسمع ولو نص كلمة على ماما حيت عارفاها شحال تعذبت هي وبابا ويجي برهوش يبقى يحل فمو
اورطيغا: اممم فهمت
ملاك: مبغيتيش ندخل معاك فهاد التفاصيل امراد حيت هادشي من خصوصيات ماما وهي اصلا نسات كولشي وعاشت حياتها هادشي راه داز عليه كتر من 38 عام
اورطيغا: صافي فهمت علاش مقلتيش هادشي من شحال هادي !!
ملاك: معمرني هضرت فشي حاجة ديال ماما مع شي واحد
اورطيغا: وانا ماشي أي واحد نتي حبيبتي ونبغي نعرف كولشي عليك زوين والخايب، بعدا عرفنا السي رشيد دوز الغرااام الله يسمح ليه باغي يحرمها علية انا!!
ملاك: هه (هو مسولهاش علاش هربت يعني مغتقولش كولشي)
اورطيغا: قولي كانو مدوزينها!!
ملاك: وصااافي امراد
اورطيغا: عليها مكنتش تنشوف خوالك وخولاتك تنسمع غير عمك بنت عمك ولد عمك مرت عمك
ملاك: هههه براكة هادو فيهم الكافية
اورطيغا: اممم واخا هكاك السلام منبغيهاش بيناتكم
ملاك: مكاين والو غير بابا للي تنلقاه معاه وهانا فهمتك علاش.. وغيثة منبغيش بالصح نشوفها كظيع وفيدك الحل ومديروش مكنبغيش لبنت تضر والله يعني ماشي بسبابي غتخليها غارقة فهمت…
اورطيغا: (من بعد مشرحاتلو وقالتلو امر حساس للي باين عندها كتر من حساس، مبقالو فين يعاتبها كتر، ولحد الان مزال باغي يكون جنتل مان فموضوع حمزة ويحل معاها الموضوع لغويا..)
شنو غديري؟!
ملاك: دابا؟!
اورطيغا: غدا
ملاك: حكمت علية ماما باش نعاونهم عرفتي قلبو الدار سفاها على علاها ومن موراها نمشي للحمام
اورطيغا: (تبسم) شتهم ما صدقو شي واحد جا يخطبك!!!
ملاك: بزاااااف عليك ولهلا يحيييك… (بعد التيليفون من ودنو عارفها مغتسكتش)
اورطيغا: صافي صافي… وانا من داك زهر يعطيوني مليييكة!!
(سمع طيط طيط عرفها قطعت عليه، ظحك حط التيليفون هاد لبنت لقد مكتعصبو وتجلطو فثانية كظحكو وتخليه مااشط،
ناض جمع الطابلة غسل الماعن مسح الدنيا مشا لبيتو فرش فراشو طلق الشوفاج يسخن لبيت شوية مشا طواليط عاد رجع مصوني عليها مجاوبتش حتى صيفط ميساج كيتمعشق فيها ويتودد، عاد صونا وجاوبااتو دخل ففراشو وكملو تمعشييقهم…)
~~~~~~~~~~~~~~
اصبحنا واصبح الملك لله..
#ساعات_قبل….
غيثة: (رجع جاها الڤيديو من نمرة اخرى مسحاتو قبل متشوفو وهدا يمكن الرابع، وكل ڤيديو مختلف على الڤيديو للي صيفط داك نهار، جبدت التيليفون من تحت حوايجها فلماريو للي عطاها شعلاتو وهو يصوني منين وصلاتو انه شعلاتو.. بعصبية ولكن كتهضر بشوية)
شنو باغي مني الحمار شنو!؟!!!
ادم: توحشتك!!
غيثة: مستحيييل راه مستحيل نعاود نخليك تقيسني شي نهار واش متتفهمش!!!
ادم: فين نتلقاو ولا غير فالطموبيل!!
غيثة: واش متتسمعش الحيوااان!!!
ادم: غيثة!!!! كالم طوا!!
غيثة: (بقات غير كتشوف فهاد الحقارة والبرود للي كيقتلها بيه) شنو بغيت مني ادم واش مكفاكش هادشي للي درت فية!! باش اذييتك انا بااااش؟!!!
ادم: عاود هاد الديسك؟؟
غيثة: معمرني درت فيك شي حاجة قبيحة
ادم: غيثة خاصك تفهمي نتي ديالي بوحدي هادشي بغيتك تفهميه
غيثة: لي تيبغي متيديرش هاكا
ادم: يعني بغيتيني منبقاش نتعصب ونعاقبك!!
غيثة: شتتخربق!!!
ادم: غيثة لا انا لا نتي بغينا الغالية تآذى ياك!!
غيثة: واش حسابلك السيبة كاينة!!
ادم: معايا كاينة غير السيبة ولي بغيتها تنديرها وانا مرتااااااح
غيثة: بعد من ماما!!
ادم: اذا غطبقي داكشي للي بغيت ومتخافيش حتى واحد مغيغرفك نتي
غيثة: شنو تتخربق؟!
ادم: كاينة وحدة بغيتك ديري معاها واحد لبليزير!!! وهادي للي غتهنيك من هادشي كامل غترجعي تفيقي بحال مكاين والو…
نجية: (مشات لبلاد وفلعشية غترجع مشات تطل على عمتها للي جات من الحج.. وصات أميمة على عمها وزادت)
أميمة: (تبسمت بشر صيفطات ميساج لادم)
اليوم غندير داكشي
ادم: تنتسنى أخبار زوينة وفلوسك غتلقايهم من بعد منسمع الخبار
أميمة: هههه (كان عطاها نص وبقا نص!! بقات فالكوزينة كتقاد لغدا ودماغها خداام شافت فالساعة كانت 11،
حمزة حتى الوحدة عاد غيخرج غيجي يتغدا ومن موراها كيخرج يا القهوة يا يلعب كورة مع دراري مكيبقاش فالدار اما عمها كيبقى نهار كامل فالدار من غير الا جا عندو رشيد ولا خوه يخرجوه للقهوة وغالبا كيخرج للقهوة.. الاجواء كولها فصالحها!!!)
~~~~~~~~~~~~~~
أمينة: (خرجو على صباح حيت الخطوبة بقات ليها يوماين يعني بعد غدا، مشاو تقداو شرات ليها جوج تواب جلابة جوت تواب جوهرة وكريب وتوب ديال تكشيطة عاد دازت خدات ليها 4 بيجامات جوج طوال وجوج قصار خدات ليها حوايج ديال لتحت كولونات بيديباردور وتريكو خدات ليهم الشيلان وخدات 6 ديال دوبياسات وخدات فوطة كبيرة متوسطة وصغيرة، خدات باليزة كبيرة فين دارت لحوايج وباليزة صغيرة غدير فيها روايح برودويات وصبابط بغات تشري المكياج مخلاهاش مراد كملت تقدية وتابعها كيخلص مهضر موالو حدو كيشارك معاها الرأي فاللون ولا ستيل منين كيكونو اختيارات
مشاو ذهايبي خداو ليها خاتم بسلسلة حوالق وبراصلي عاد خداو الفاكية والحنة مقادة، اما تمر معمر والحلوى عطاتهم كموند لبارتيسري يتقادو وحتى لاطاغط ولحم ودجاج ساهل حالهم والديسير..)
معرفتش شنو باقي!!
اورطيغا: باقي غتكركبي للدار
أمينة: سكت سكت، علاش زواج سااهل!!
اورطيغا: (كيدير داكشي فالكوفر) لا صعيب انا تنشوف وتيهلك الجيب
أمينة: ههه وعلاش ملوكة عندنا قلييلة
اورطيغا: عليها شفتك حكيتي جييبك كولشي من حميدة قرصي شوية حتى نتي الحيط ولا ملاك دوزت ليك لاماص
أمينة: ههه اوا زيد احميدة نمشيو نشوفو العصري
اورطيغا: انا غنحجبها فالدار بلاش
أمينة: هادشي غير الخطوبة مزاال العرس فين تحطهم صحااح
اورطيغا: الله يبشرك بالخير!!
زهرة: (كانت كتعيط على ملاك باش تمشي دغيا للحمام) وسربي ابنتي راه باقي سلا ميدااار
ملاك: هاني جاية كنجمع حوايجي واش تصيفطيلي أنير؟!
زهرة: لا غير سيري متعطليش راه مزال تجي ختك مريم باش تمشي معاك لكوافورة متعطليش ابنتي
ملاك: لا اصلا نشد فاطمة الكسالة دغيا تزرب علية راني نقية
زهرة: اجي ياكما خليتي بيتك مرون؟!
ملاك: ها!! غير داكشي ديال لاصيغ نجي ونجمعو دغيا
زهرة: داابا!!! ياله تحركي تعلمي تجمعي رويينتك من موراك
ملاك: واخ.. (مشات لبيتها جمعت كولشي سدت بيتها بالساروت عطاتو لمها هزت سطلها صاكها ومشات للحمام للي فالحومة كدندن فرحاااانة لهادشي للي جاي!! صونا عليها اورطيغا جاوبت)
على شوية كنت غنصوني وتلقاه طافي
اورطيغا: الاحد تخيلت داك ط****
ملاك: نااارييييي على زمر!!!!!
اورطيغا: ههه وراه تنتخيل مبقا والو ونقولو 500 مبروك لالة ملاك
ملاك: علاش 500!!
اورطيغا: حتى تزيدي تكبري ووتطوالي ونقولو 1000
ملاك: ههه كحل وكتنمر باااز
اورطيغا: ههه بصحتو منين تخرجي صيفطي ميساج متصوريليش زعما!!
ملاك: ايخان لواه (قطعت كتفرنس ودخلت للحمام طافية التيليفون على متخرج)
~~~~~~~~~~~~~~
غيثة: (لبست بالزربة حوايجها ومشات خرجت بهمس معايقة بيها لا خديجة لا يوسف.. مزال مصدومة من داكشي لي طلب ليها ادم)
لا ميمكنش لا ميمكنش!!!
(مشات لدارهم من مور لابيل لي ختمها تمشي توادع مع مها لقات مها بالصح سخفاانة وطبيب عندها وهادشي للي كان قالها غتكون عليه، وميمكنش يكونو متافقين هي وادم وهي كتسمع طبيب كيقول ان سبب الاغماء الطونسيو ومها صفرة!!!
كفاش عرف الغالية غتسخف وكفاش عرف بالظغط خلاها غير مصدومة واقفة)
ماما مالكي؟!!
الغالية: معرفتش ابنتي يمكن من القهوة كترت منها بزاف هاد الايام (بحرا كتقدر تحل عينها واخا بارد الحال كانت عرقانة بزاااف)
اب يوسف: ديما تنقولهالك الغالية نقص من داك القهوة
غيثة: شكون كان هنا
الغالية: حتى واحد غير باباك (ادم كان قبل بشي ساعة)
غيثة: (تفكرت منين قالها ساهلة نحط لأي واحد فالماكلة ديالو للي بغيت!! شافت فمها ميمكنش حتى هي تعيش داكشي للي عاشتوو ميمكنش يخليها مدمنة!!
بقات كتبكي خرجت من تماك ومشات لبيتها حست بخنقة كبيرة والدنيا كحالت فعينيها كيبانلها غير تقتل راسها ولا تشوف الناس للي ضايرين بيها كيموتو واحد بواحد بسبابها وبسباب ملحد مكيخاف من والو!!!!)
غيثة: (بقات جالسة فالصالون مصدوومة حتى شافتو دخل من الباب وقفت خايفة منو مقربة ليه)
شنو تدير هنا؟!
ادم: (تبسم بخبث ومشا من الجهة الأخرى ممجاوبهاش، مشا فين كاين خوها جالس مع باها حيت الغالية بقات معاها ختها لفوق نعست كترتاح سلم عليهم وهي بقات غير واقفة قلبها غيسكت بالخلعة حتى جاها ميساج شافتو مكانش هاز حتى التيليفون جاها ڤيديو اخر من داكشي للي مصورها، مشات عندو)
ادم بغيتك واحد دقيقة
ادم: احم (دار راسو ارتابك) واخا, احم نطلع نشوف لالة الغالية؟!
غيثة: غير نقولك شي حاجة وسير
ادم: (شاف فباها وخوها باينة معجبهمش الحال الطريقة باش واقفة واللهفة باش تهضر معاه!! مشا جيهتنا سبقاتو للصالة لوخرا وبقات واقفة مربعة يدها حتى وقف حداها بنظرات كولهم ثقة مع ابتسامة استفزاز)
وي حبيبة!!
غيثة: شكون تيصيفط هاد الفيديوهات؟!
ادم: شي ناس صحابي تيعجبك المونطاج؟!
غيثة: هادي هي الرجلة عندك مفرقني تيشوفوني شمايت للي بحالك
ادم: (تبسم) اليوم غنبغي نسمع منك شي خبر تيفرح
غيثة: ميمكنش راه مستحيل
ادم: اممم، سمعت حتى باباك مريض بزاف وحتى يوسف مرت خوك حاملة!!! عرفتي مكنتش قلت ليك ولكن عندي شبكة كبيييرة هنا ففاس
غيثة: حمار!!
ادم: اه لعشية نبغي نسمع شنو كنت قلت ليك (مشا عند باها وخوها وهي بقات واقفة مصدوومة ميمكنش دير هاكا ولكن عارفاه خبييث عارفاه باغي يآذي عائلتها، وراه بدا بمها دخل يوسف وخديجة وزادت حالتها تأزمت كتر وكتر شافت فادم للي شير بصبعو على الساعة..)
يوسف: (طلع دروج وخديجة معاونااه مشا لبيت مو لقاها ناعسة)
خالتي مالها؟!
الخالة: (سلمت على خديجة) احبيبي حتى عيطلولي قالولي سخفت وجا طبيب قال الطونسيو طايح ليها بزاف
يوسف: وعلاش؟!
الخالة: قالت كترت من القهوة بزااف اليوم
يوسف: هي موالفة تتشربها
خديجة: حتى تفيق ايوسف ونفهمو من عندها دابا الحمد الله على سلامتها…
ملاك: (دغيا سرباتها الكسالة حيت كان لحمها نقي غسلت شعرها وخرجت كتلبس حوايجها لقات جارتهم تماك للي مبقاتش كتبغي ترد عليها السلام وحتى هي مسوقتش لبست الدوبياس وجلست كترتاح)
…: الزين صاڤا!!
ملاك: (شافت فيها وحنات كتمسح رجليها بفوطة) الحمدلله
(معندهاش مع هاد النفاق الخاوي)
….: وغير ظحكي معانا
ملاك: (تبسمت وهي حانية) واكلة شي حاجة احنان من غير الخبز؟
….: لا غير شحال متشاوفنا وشفتك قالبة وجهك علينا
ملاك: مقالبة والو (وقفت كملت لباسها تغلفت مزيان باش ميضربهاش البرد مخاصهاش تمرض خلصت الكسالة وأكدت عليها واش بلاصتها تغسلت مزيان كما كتوصيهم مرت حنينهم، خرجت دازت للحانوت شرات رايبي ومريندينا وبقات كتاكل وماشية بشوية.. وصلت لبابهم وهي كتشعل تيليفونها لقات أميمة كدق وشعرها عريان لابسة غير كولون وبينوار خفيف مموالفالهاش تخرج هاكا)
أميمة!!!!
(رجعت دغيا لباب دارهم مخبعة زعما)
أميمة: ملاك جابك الله اختي عتقيني عمي طاح وانا بوحدي مكاين لا حمزة لا مرت عمي، ومقدرتش نهزو وكولو دمااياات فوجهو
ملاك: مناش طاح؟!!
أميمة: معرفتش عفاك غير هزيه معايا راني عيطت للوقاية عفاك اختي الله يستر عليك
ملاك: صبري نمشي للقهوة نجيب بابا ولا نصوني عليه يجي (جبدت تيليفونها)
أميمة: غير نهزوه وعيطي لعمي رشيد حتى حمزة مكاينش عييت نصوني كيكون كيلعب الكورة تيليفونو كيحطو بعيد (بغات تبكي) ومرت عمي مشات لبلاد
ملاك: (دورت عينها) اممم واخ.. (دخلت عندها للدار)
أميمة: عطيني نهضر مع باباك نرغبو
ملاك: (حطت سطلها وصاكها فوقو، دوزت النمرة دغيا وهوما ماشيين لبيت شيخها وملاك ديجا عارفة بيوت فالدار قبل متبرك على اتصال خطفت ليها التيليفون مع ضارت عندها دفعتها بكل قوتها للبيت وجرت لباب لوخرا دغيا ساداااه)
شنو هاد تبرهيش
(كتبغي تحل لباب كتغوت)
أميمة!!!!!!!!!!!!
أميمة: (هزت تيليفونها جاتها تصويرة وبقات محافضة على تيليفون ملاك باش ميطفاش)
انا نوريك ال***** أميمة البهلة علاش قادة!!!
ملاك: (مفاااهمة والو كتحاول تحل لباب بالجهد)
أميمة وديك ***** حلي هاد لخ** براكة من داك تبرهيش ديالك!!!!
حمزة: ملاك!!!
غيثة: (خرجت كتبكي بهستيرية معارفاش من مور هادشي شنو غيوقع واش غتعاود تشوف عائلتها ولا تكون حية قلبها غيسكت بالخوف والخلعة… مقادراش حتى تهضر الا غير لمحت ولا بغات تقول شي حاجة لخوتها ولا شي واحد قريب غتشوه وادم باين حاط عليها العين بزااف وناوي يفضحها والسلام!! وعاد باينة عندو اكتر من ڤيديو للي مواضحش هو فمرة غير هي للي باينة مزياااااااان!!!
بقات كتبكي حدا باب دارهم بحال شي بنت صغيرة ميمكنش داك الطيش البسيط غتعاقب عليه ݣاع هاكا حست بظلم كبيييييييير ولكن غطبق هادشي راه شافت الشونتيي ونسأل ودخل عند مها المرة جاية غيزيد ويقصد شي واحد يصفيها ليه..
مشات على رجليها أقرب صاكة خدات نمرة جديدة دارتها فتيليفونها جبدت نمرة ديال أمينة وصونات)
الووو..
طاتي أمينة!!
أمينة: غيثة!!
غيثة: (بصوت مخنوق) اه، عفاك نتلقاو؟!!
أمينة: اجي احبيبة انا فالرياض نستنى فيك
غيثة: لا بغيت نتلقاو بعيد على تماك عفاك اطاتي
أمينة: مالكي؟!
غيثة: (كتبكي) عفاك نتلقاو ونهضرو
أمينة: واخا حبيبتي تجي لدار فالسعادة
غيثة: (بحزن كبير) غيكون اورطيغا (عضت على صبعها لكبير شادة لبكية)
أمينة: واخا بنتي فين تبغي نتلقاو
غيثة: انا حدا مرجان للي فطريق موزار
أمينة: واخا بنتي انا نشد تاكسي ونجي عندك (قطعت كتبقى فيها هاد لبنت حطت داكشي من يدها للي كانت كتقاد فيه هدية ملاك وداكشي للي شرااو..
ناضت لبست جلابتها دارت كاپ فوق كتافها كان الحاج خرج للݣرنة هزت بزطامها وخرجت للشارع تشد تاكسي..)
غيثة: (حطها التاكسي حدا مرجان بقات ماااشية مبعدة على البشار من مور مرجان، صونا تيليفونها كان ادم)
الو.. ادم عفاك منديرش هادشي عفاااك نرجع ندير للي بغيت نبقى معاك غير منديرش هادشي عفاااك
ادم: (فطموبيلتو حاضيها)
غيثة حبيبة هادشي غيخليك مرتاحة ومنعاودش نآذيك لا نتي لا حتى واحد من عائلتك
غيثة: عفاك ادم
ادم: غيثة سوا علمتي البوليس ولا أي واحد واخا نعرفك تموتي نتي!! (سمع شهقتها) الا مكملتيش داكشي للي طلبت منك الڤيديوات غيتنشرو وماماك ولا شي واحد قريب منك غييمشي فنفس طريقك واخا حبيبة!!
غيثة: حسابلك مغتشدش!! ياكما حنا فغابة!!!
ادم: بقات 10 دقايق وغنركب الطيارة ومخليت حتى دليل ضدي احبيبة وحبابي دابا راه مراقبينك مزياان متخافيش حتى حاجة مغتكون ضدك وديك النمرة دابا نكملو الهضرة لوحيها..
غيثة: (بقات غير كتبكي مقادرااش تزيد تهضر اما هو قطع وبقا مراقبها ومغيكذبش انها بقات فيه ولكن اورطيغا هو سباب هادشي!!)
غيثة: (كانت جالسة على رصيف صونات عليعا قالتلها فين تجي عندها وهي كترعد وقفت منين شافتها جاية بالزربة وباينة خايفة عليها، وصلت عندها أمينة) طاتي!!!
أمينة: (كتبها حيت حسابها واقعة شي حاجة) بنتي مالكي جاية هنا نتلقاو فشي بلاصة حسن؟!
غيثة: (كتبكي) سمحيلي اطاتي ماشي انا للي كنت بغيتك تجي ولكن تيهددني (كترعد وتشهق بين كلمة وكلمة) هو للي قالي جيبيها
أمينة: شكون ابنتي؟!
غيثة: ادم!! هو للي كان تيعطيني لا دروݣ.. وانا حاملة ومعرفتش شكون باباه هو تيقول داير احتياطو ماشي هو بابات هادشي للي فكرشب (كتهضر وتشهق) وهددني بڤيديوهات مصورني عريانة ناعسة معرفت معامن (كتبكي) بغا يشوهني وحتى ماما دارها لادروݣ راها سخفانة فالدار
أمينة: اويلي استغفر الله!!!!
غيثة: ودابا تيقولي غنديرو لباباك ولا يوسف ولا خديحة الا مطاوعتوووش فشنو بغا
أمينة: وعلاه الدنيا ساايبة ابنتي
غيثة: (جبدت سورانݣ وهي كترجف) قالي نديرلك هادي فيدك
أمينة: (خرجت عينها) وعلاه؟!
غيثة: باش ينتاقم من اورطيغا ديما تيقول هو سباب باباه هو للي دارلو لحشيش فلمطار باش ميسافرش وبغا يضرب فيك باش هو يضييع
أمينة: (بقات غير كتشوف) ششش ياله نمشيو ابنتي البوليس متخافيش هداك من اللول قلتلك حمار بعدي منو وقلتها حتى لماماك الله يهديها حتى هي
غيثة: (كتبكي وترجف) غيشوهني انا منقدرش نآذيك اطاتي نموت ومنآذيكش انا منقدر ندير حتى شي حاجة لشي واحد قبيحة واكترية نتي انا بغيت غير نموووت
أمينة: حبيبتي، صافي دابا براكة من لبكى
غيثة: انا حاملة (زادت كتبكي) حاااملة وغنشوه خوتي حتى واحد مغيولي يبغيني غيكرهوني
أمينة: انا نتكلف بيك حتى تصالحي معاهم مغنخليكش ابنتي نتي من دابا محسووبة علية حتى نفكو المشكل. لكن منخليوش هداك شماتة يلعب بيك كما بغا
غيثة: (عنقتها ولاحت ديك الإبرة مقدرتش تآذييها اصلا من سااابع المستحيلات دير ليها شي حاجة) سمحيلي اطاتي جبتك هنا انا والله مبغيت نديرلك شي حاجة هو للي بزز علية راه دار لماما بالصح شي حاجة فقهوتها وسخفت انا بغيت غير نهضر
أمينة: متيقاك ابنتي غير ياله نمشيو من هنا البوليس
غيثة: (حركت راسها باه شحال محست بهاد الأمااان بقاو كيتسناو تاكسي حتى جاية وحدة من لبعد كتجري، أمينة كتشير ليها وهي جاية مكسيرية)
طاتي مال هادا!!!
أمينة: حرفي حرفي (بعدو من طريق ولكن لاخر قاصدهم هوما.. غوتت)
بعدي هربي اغييثة
(مع دايرين عاطيين بظهر باش يهربو غيثة كتسمع
#ددددددددددفففف ✨💫
شافت أمينة سابقااها جات قدامها مليوحة على وجهها وكرشها، وشالها مغطي وجهها وصباطها واحد عوج واحد جا حدا رجليها…
غيثة: (خرجت عينها) طاتي!!!!!
اورطيغا: (كان فالمحال ديالو كيصوني على ملاك تيليفونها مزال طافي قال فبالو غتكون مزال فالحمام، كمل الخدمة ديالو جا عندو شريف جابلو لحم ديالو)
تعطلتو اعشيري اليوم!!!
شريف: بزااف، ناضت مطايفة تماك مع سعد واحد من الݣزارة
اورطيغا: علاش؟!
شريف: على شي خلاص قالك الݣزار حيت نتا مشيت وهو للي شد كولشي خاصو يتخلص بحالك ونتا عارف سعد فهادشي دالهلاص ريال ميزيدهاش الواحد!!
اورطيغا: (حرك راسو بماشي شغلي فهادشي واخا توحش ذبيحة ودوك الاجواء وكيحس بالفراغ حيت الحاج مزال واقفلو فهاد الخدمة وعاد فلوسها عندو مدخل مهم..)
شريف: عيطت على صاحبي من البوليس لدابا قضيتك ما فيها واالو، حتى شي جديد
اورطيغا: ولاد **** مدورينها مزيان وعارفين شنو تيديرو
شريف: (كملو دراري للي دخلو لحم) هو هدا غنمشي
اورطيغا: هانتا معلوم غنهبطو لصفرو
شريف: موراها بيوماين غنطلعو لكازا
اورطيغا: وايلي نويت!!
شريف: شي ثقااف هدا ونتا للي فكيتيه اللول
اورطيغا: ههه سيييير وكان لوكان عارف شنو تابعك دالمصاريف احميدة ݣاع متزطم
شريف: علاش الدار موجودة!!
اورطيغا: هاااااح قالك الدار!!! خليك تكمدها فقلبك بحاالي غير هاد صباح حطيت 8000 درهم فجوج شرااوط بلا ذهب
شريف: وايلي!!!
اورطيغا: ومزال مكملت
شريف: خبار زوين هدا
اورطيغا: ههه للي بغا العسل..، ياله الاخ بحرا نكمل شغلي نمشي نشوف الوالدة شنو خاصها
شريف: ههه تلاح
اورطيغا: (دخل لفريݣو لداخل جاه ميساج من ملاك دخل قراه)
*حمزة دير بحسابك مغنتعطلش عندك بحال المرة للي فايتة وتحصلنا عاود مرتك، خلي باب بيتك محلول*
حمزة: (باستغراب منين سمع صوتها) ملااك!!!
ملاك: (كان ظلام هو بغا يشعل ضو ديال لڤايووز ديالو ملقا والو فوق لكوافوز كان ناعس فالنموسية عريان من صدرو غير سرجم صغير فوق لباب للي مدخل شوية ديال الضو من زاجو الخضر خرجت عينها وهي كتشوف فيه عريان قلبها زدح القااالب باان بقات كضرب بالجهد فالباب بيدها ورجلها صااعرة)
أميمااااااا!!!!!!!!!!!!
حمزة: (دايخ) شنو وااقع؟!!!!!
ملاك: أميمااااااا (جاتها البكية) حلي هاد لخ**!!!!!!!
حمزة: (حيد الكاشة عليه كيبان ليه راسو غير بالشورط مفاهم والو هو كان كيتغدا هو وامينة جاه نعاس بقات كتسوبو مالك بغا ينعس من تماك معاقلش!!! كفاش حتى نعس فبيت باه ومو وكفاش جا هنا !!!!
ناض بشوية دايخ كيسمع ملاك كتغوت باسم أميمة وتبكي حتى بقات كترغبها تحل لباب)
ملاك!!!!
ملاك: (مشات عندو ضربااتو فعنقو وكان غراضها توصل لحنكو تطرشو بقات كتبكي)
شنو بغيتو مني اولاد ***** بغيتو تخرجو علية!!!!!!
حمزة: (شد يدها) شنو وااقع!!
ملاك: طلق مني الحمار الله ينعل ******* فهاد نهار يا الكلب!! أميمااااااا عفااااك خلي عفااااااك الله يعطيك موصييييبا فهاد نهار (بعد كيقلب غير شنو يلبس والو حل الماريو مكاين حتى شي شروييطة من ديال باه!! كولشي محايد )
غير فهميني شنو كاين وشنو جابك هنا؟!
ملاك: (عرفت غتكفاس عليها بلمزيان, بعصبية) مرتك جابتني مرتك الهبيلة دخلتني هنا قالتلي باك طاح ودخلت نعاون الله ياخد فيكم الحق يا ولاد ****** كولكم من الطرف الطرف بغيتو تخرجو علية
(رجعت كدق بيدها رجلها وتجبد فالقابضة الباب هو دايخ بغا يحاول يهرس الباب والو، مشات كتقلب تشعل الضو لقاو البولة مكيناش كانت كولشي مقادااه)
صوني على باك ولا ارا نصوني على ماما
حمزة: (مشا كيقلب على تيليفونو مكاينش!!! حتى هو بدا يفهم مشا للباب)
اوميمااااااااا!!!! (بقا كيضرب الباب بكتفو وهي كتبكي حست بنهايتها فهاد اللحظة!!!)
~~~~~~~~~~
أميمة: (كانت علمت البوليس للي جايين عاد خرجت كتغوت فالحومة باش تجمع شهود)
ويييييك وييييييك اعبااد الله.. (كتبكي)
عتقووووني راااجلي مدخل كلبة معاااه!!!!!!
(كانت متافقة مع جارتها حنان للي وقفت كاميرا ديال بابها و بدات تجمع معاها الجيران، خرجت مرت عم ملاك ومرت الجد وزهرة كطل من موراهم حتى هي وكتسائل فنفسها)
زهرة: فين ملاااك؟! ݣاع هدا حمام!!!
أميمة: (كتغوت وتضرب فحنوكها وجلست فالارض كتبكي)
كيخوووني… وانا للي صبرت معاه من بعد قتلولي ولدي….
صبرت وصبرت الله ياخد فيييه الحق هو والكلبة بنت زناااااقي للي معاه
الجارة: لا حول ولا قوه الا بالله العلي العظيم.. فينو
أميمة: لداخل راه البوليس جايين شهدو عليه اعباد الله هاد المرة مغنسكتش على حقي واخا نعرف نمووووت
الجارة: فين نجية!!!
أميمة: (كتبكي) يا ربي شنو درت باش نتجازا هاكا!!!!
زهرة: (كتصوني على ملاك تيليفونها طافي حيت منين كدخل الحمام كطفي تيليفونها…)
….: حنا معاك ابنتي متحليش عليهم الباب حتى يوصلو البوليس…
رشيد: (كيشوف صطافيط البوليس وقفت حدا الحومة وتابعاها بارتنير جاتو فشكل جالسين مجموعين مع باه وخوه واب حمزة وجارهم اخر) عبد الله شنو واقع تماك!!!
اب حمزة: (كانت اميمة للي رغباتو يخرج من بعد مغداتو غداه بكري بحجة غيجي حمزة وناويين يتغداو بجوج ويهضرو فموضووعهم وحتى هو بغا يخليهم على خاطرها على الله تصفى الخواطر وفنفس الوقت يبدل الجو شوية مع صحابو عيا بجو المرض ونعاس)
ياكما صحاب ولدي
رشيد: موالفين كيتسناوه حدا البنكة هادو باينين جايين قاصدين شي واحد فحومتنا (جا عندو الولد للي فلبريسة يجي يقادلو شي حاجة فلبراي للي جابوها جديدة)
انا جااي
اب حمزة: انا نمشي نطل شنو كاين راه ولدي بقا فالدار غيكون عارف شنو كاين… (ناض من تماك داير قبو من البرد ودار يديه فجياب الجلابة وتم ماشي)
ملاك: (عيا حمزة يحاول يحل لباب ووالو تسمع الهرج برا كتر وهي قلبتها غير بكا عرفتها غتكون ضاربة حسابها لكولشي… بقات غير كترجف)
خرجتو علية خرجتو علية!!
حمزة: متخافيش مغيوقع والو انا غنتحاسب مع ديك الكلبة
ملاك: (سمعت صوت أميمة كتقول هوما هنا قلبها زاد تكمش كتر وكتر 💯 غيكون باها ومها جايبااهم!! بدا الساروت كيدوور وهو يتحل وكانو موراها شي 4 دالبوليس باللبسة وجوج بلا لبسة!!! بقات غير كتشوف زادت تصدمت وبقات تبلع ريقها)
علاش درتي هاكا!!!
أميمة: (خابشة وجهها وكتبكي)
ها هوما لكلاب الكفرة بالله الله ياخد فيكم الحق ياك احمزة ياااك ومع ملاك صاااحبتي وجارتي علاش اختي علاش ونتي عرسك غدا علاش هاد الفضيييحة ولغدر
حمزة: (خارج بشوورطو باغي يضربها مبقاش كيضوي شدووه لبوليس وهو كيتعافر حتى ركبولو المينوط وهي واقفة معاها بوليسية)
ملاك: والله مدرت شي حاجة هي للي لعبت علية (كتبكي بحرقة) والله مدرت شي حاجة (لبكية غالبة على هضرتها)
…: تحركي من هنا نتي!!! (خرجت كترجف من لبيت) والله مدرت شي حاجة والله هي للي ظحكت علية سولووها والله مدرت شي حاجة (كتشوف حمزة صااعر كيغوت على للي شادينو وعلى أميمة للي دارت راسها سخفانة مليوحة فالارض، ركابيها زادو مبقاوش هازينها طاحت فالارض على ركابيها دايرة يدها على وجهها)
والله مدرت شي حاجة!!
(واحد من البوليس نترها من ذراعها بقوة دار ليها المينوط مراكش ليها يديها اللور وهي كتشهق بالبكى)
عفاااكم مديروش هااكا والله مدرت والو!!!
أميمة هضري ياك نتي للي دخلتيني
حمزة: صافي شدوني غير انا اصلا لبنت لابسة دخلو لبيت شوفو مبقيتش شنو لبس راه كولشي من ديك الكلبة حنا ماشي فحالة تلبس للي ديرولها هاكا
ملاك: (فحالة صدمة وغير كتبكي) والله مدرت شي حاجة عفااااكم والله مدرت والو…..
اورطيغا: (عقلو غيخرج عيا يصوني عليها والو واش غير صيفطت الميساج جات موصيبة اكفس جاتو تصويرة ولكن دغيا تمسحت وحيت عندو واتساب ݣولد لقاها كاينة زاد مخرج عينيه منين زوما التصويرة كانت باينة هي ولكن بحال مغفوولة ومضببة بحال فشي دوش ولا حمام زاد صعر كتر متأكد التصويرة كانت مغفولة حيت مكتشوف مامبوزيا!!!! معندو حتى حل من غير يهبط عندها اول مرة يسد الحانوت مخلاش حتى الدري يقابلو اصلا دمااغو حبس نيشان ركب فطموبيلتو شاد طريق لصفرو وهو مزال كيحاول يتاصل بيها ملقى غير يسب ويغوت على ميوصل واخا دمو حس بيه غلا مزيااان!!! )
جاوبي جاوبي قبل منوصل ونقتل **** كاملين !!!!!
~~~~~~~~~~~~~
غيثة: (بقات جااامدة فبلاصتها ومع من مور مرجان والدنيا خاوية شوية معامرااش ضارت شافت فديك التاكسي ماشي ادم كان شي واحد ملتم وابطموييل تضربت من القدام بقوة الكسيدة، رجع ماشريااال وكعط مشا مخلي من موراه غير الغبابر!!!
رجعت شافت فأمينة للي الدم ديالها بدا كيباان فالأرض بين ربيع والحجر داير طريقو)
طاتي!!!
(مصدومة كترجف عينها مطرطقين حلقها نااشف وبقات جامدة فبلاصتها صوتها مقادرش يخرج مزيان من حلقها)
طاتي!!!
(جاي واحد من لبعيييد كيجري ويشير ليها وهي تحنات على ركابيها بيناتهم 2 متر مقدراش تزيد كتر وعينيها كيطفااو… بصوت كيرجف)
طاتي!!! عفاااك نوضي
طاتي امييينة!!!!
(كتهضر سخفانة)
طاااتي!!
…: (وصل داك الرجل عندهم كيجري) لا حول ولا قوه الا بالله هرب داك الكلب!!!
غيثة: طاتي!!!
…: (حنا عند أمينة حيد الشال من على وجهها كولو دم مخمج)
غيثة: (شهقت من الصدمة بحال ماشي أمينة للي كاينة محسن بقات غير كتغوت بكل جهدها بهستيييرية وكتضرب فحنكها….)
….: صبري ابنتي هادي ماماك!! (هي غير كتغوت) صبري
….: (هز تيليفونو كيصوني على 15 المرة اللولة التانية وقف فالشاريع الطموبيلات باش يوقفو يعاونو من بعد المحاولات عاد جاوبووه قالهم المعلومات عاد صونا على البوليس وقفو شي ناس تماك وبدات الجوووقة كتجمع للي باغي يعاون وللي باغي يبرݣݣ اما غيثة طاحت فاقدة الوعي!!!!)
حمزة: فكها (بصعرة) فكها اصاااحبي بأشمن حق كتمنيطها
فكها دخلو للبيت كيعاينوه هو مقدرش يصبر بالمينوط هاجم على أميمة للي مجلسينها فوق كرسي سخفاانة حتى بعدووه
…: البيت خاوي فيه غير كاشة!!!
حمزة: راه هاد ال*** للي لاعباها (عاود ماشي عندها)
زهرة: (قلبها كلاها بغات تطل قبل ميدفعها البوليس لقات بنتها كتبكي وحداها حمزة دايرين ليه المينور وهي لاحو عليها دايرين عليه ليزار.. طرطقت عينها بالصدمة)
ملاك!!!!
…: سير الالة من هنا
زهرة: (بقات مصدوومة … بقات كتبكي وهي كتعيط بشوية مصدومة)
ملاااك!!!! ملاااك!!!!
(دفعها البوليسي بشوية باش البارتنير توقف حدا الدار مخرجين ملاك بليزار على حساب الجيران وحمزة رغبهم حيت خدامين معاه قبلو خرجووهم والجيران كيغوتو ويسبو مرت الجد عرفااتها راه ملاك من ردة فعل زهرة للي منطق سمية بنتها بلا صوت، أميمة مخرجاها بوليسية سخفانة وكتقولهم)
أميمة: كيخوني مع ملاك بنت رشيييييد والزهرة!!!! (كتعاودها)
كيخوني مع ملاك بنت رشيييييد والزهرة!!! البنت للي كانت بنت الجيران وتايقة فييها!!!!
مرت الجد: (دخلت نسا الدار للي تصدمو وزهرة للي كتعافر تمشي عند بنتها للي قلبها كيقولها مظلومة دخلوها بالقوة متشوفش بنتها فداك المنظر والجيران للي كيسبو..)
اب حمزة: (من مور البوليسي ممتيقش هضرة الناس حتى شاف ولدو خارج بداك المنظر مركبينو البوليس بقا غير مخرج عينييه لا حركة لا كلام حتى عينو مرمشهاش!!!!)
رشيد: (وصلو الخبار جاي كيجري ولكن وصل والبارتنير محركة شاف حمزة وجهو معري وحداه وحدة دايرين ليزار عليها!!!)
ملاك!!! ملااااااااك (عينيه ضببو بدمووع)
ملاااك!! (الناس للي فالقهوة وللي تماك كولو تجمهرو دارو عرقلة!! رشيد تبع البارتنير كيدق فالجااج)
رشيد: واش بنتي!!! واش ملااك!!!
حمزة: (حنا راسو مقدرش يشوووف فيه!!!! كيسمع غير صوت شهقاتها كان غيتفرݣع اصعب موقف داز منو فحياتو)
رشيد: (بعدوه البوليس باش دوز البارتنير وهو كيبكي ويبعدوه الناس شاف زهرة جاية كتجري وكتبكي)
اورطيغا: (حط الطموبيل بعيد وهو كيشوف الجووقة تحركت البارتنير من حداه بانلو حمزة وشي وحدة حداه مبايناش خرج عيينو مكمش عينيه ميمكنش تكون هي!!
مشا مكمل طريقو وخاطرو ممهنيهش وصل لتماك الناس كيهضرو والبوليس كيفرق الجووقة وصل لقا رشيد وزهرة للي كتبكي على ذرااعو وباه كيغوت)
لا!!!!!
(وقف حداهم)
فين ملاك؟!!!
(مجاوبو حد صافي راه باين كولشي وعاد واحد داز من حداه)
حشومة على بنتك هادشي اسي رشيد!!!
…: قالو خرجوهم عريانين!!!
اورطيغا: (شنق على رشيد بكل غضب) كنتي باغيها تكون مع داك الز*** (الناس دخلو كيفااكو ورشيد مرفوووووع بحال شي شرويطة خوه دفع اورطيغا والو مطلقش منو، منين شدات فذرااعو زهرة غوتت عليه)
زهرة: مرااااد!!!!
اورطيغا: ربح دابا ارشيد!!
حمزة: (بقات فيه بزاااف) ملاك غير سمعيني متخافيش مغيوقع والو وديك الكلبة غتحااسب
ملاك: (نشوفو دموعها غير مخرجة عينها وصوت باها فودنيها وهو كيسول واش ملاك بنتي؟! )
حمزة: غنقتل مها غير صبري والله حتى ندمها على هادشي!! ملاك!!!!
ملاك: (لا رد)
حمزة: (دغيا وصلو للكوميساريا مدخلوهمش من الباب الرئيسي دخلوه من اللور صحاب حمزة جابولو شنو يلبس حايدو ليزار من على ملاك للي دخلوهم نيشان لبيرو محايدين لحمزة المينوط بقات واقفة بحال شوية ديال الهم وهو يسب ويلعن كيهضر معاها ودنيها غير كيصوطو مكتسمع والو كتسمع ودنيها فيهم غير طيييييييييييييط.. حتى دخل الرئيس ياخد أقواالهم!!!)
~~~~~~~~~~~~~
رشيد: (اورطيغا كيهضر يسب واحد جا يهضر على ملاك حس براسو باغي يقتل شي واحد فهاد اللحظة، رشيد جاار زهرة وباه كينݣر تابعو باغيين يدخلو للحومة للي اغلبيتهم كيحتارمووه يعني حتى واحد مبقى كيهضر كيشوف اب حمزة واقف حدا لباب وشي جارات كاينين لداخل مع أميمة كيصبروها حتى شافوه طاح على وقفتو مشا عندو كيجري ورجعو عاود تجمعو الناس)
اورطيغا: (واااقف فبلاصتو كيحاجي ويحلل ممتيقش مبغاتش تدخل ليه للراس!!! ميمكنش ملاك دير هادشي!!! جانب منو ممتيقش ممتيقش!!
ولا تكون غير الصدمة وكترة الثقة للي كان دايرها فيها؟!!!!!!!!
قرر يتبعها للكوميساريا ميمكنش خاصو يفهم منها!! بوحدها للي ممكن يتيق شنو غيخرج من فمها واخا عينيه والمنطق قالو كلمتهم وبينو شنو كاين
جاه أبيل من غيثة قطع رجعت كتصوني وتصوني حتى جاوب معصب)
ممسالياش دابا ابناااادم قو*** علية
غيثة: طاتي أمينة (كتبكي) ماااتت
اورطيغا: شنو شكون للي مات!!! (طلع لطموبيلتو يبعد من الهرج وأصلا حاس بودنيه صماكو)
غيثة: (كتبكي بالغواات وكتشوف الوقاية كيحاولو يهزوووها)
طاااتي (كتبكي) ماماك معرفتش واش مااتت!!! (كتسمع كولشي كيقول ماتت وللي كيترحم عليها وللي مخلوع من قوة الضربة)
اورطيغا: (جاااهل) واش عارفة شنو تتقولي؟!
غيثة: طاتي!!! (كتبكي حتى الحروف مكيخرجوش مقادين وكتشهق) اجي..
اورطيغا: غيثة شنو واقع متكفريش اصل ***** شنو واقع!! فين الوالدة!!!
غيثة: (خدات نفس مزيان تهضر تفهمو) ضربتها تاكسي وهربت معرفتش واش حي .. حية.. اجي عندنا (كتهضر مع هدا للي فالوقاية) عفاكم قولولي واش حية؟!!
اورطيغا: (بقا مصدوووم والتيليفون فودنو جاتو غير تصويرة مو بين عينيه كظحك)
شنو!!!! كفاش واش حية!!!!!
حمزة: (دخل الرئيس للي هو الشاف ديال حمزة)
سي طارق واش معقول يديرو هاد الحالة كاملة دراري!!!
طارق: كنتي باغي ضرب مرتك احمزة!!
حمزة: لوكان غير جا واحد جوج بلبارتنير كنا غلتاحقو ماشي يديرو الشووهة فالحومة !!!
و هادشي للي واقع راه غير ملعوب من مرتي راك شفت داك نهار شنو جات دارت هنا!!
طارق: هادي نيت للي دارت شكاية بيها؟!؟
ملاك: (حانية راسها مصدوومة من هاد الكوشماغ للي هي فيه كتخيل غير ردة فعل باها مها عائلتها…. اورطيغا فاش توصلو لخبار، أمينة!!!)
حمزة: اه هي لبنت راه بحال ختي كبرنا مجموعين راه الدار على الدار وخلات ديك الموووسخة حتى قربت خطوبتها ودارت هادشي
طارق: حمزة نتا ووو (كيقرا سميتها) ملاك ايت ملال بنت رشيد ايت ملال تشديتو بتهمة الخيانة الزوجية بشهود وجبدوكم من بيت واحد وعاد كولشي ضدكم
ملاك: (قلبها ضرب بالضو حتى حست بالتنفس كيمشي ليها وهي كتسمع هاد الكلام ومقدرتش تهز عينها)
حمزة: واخ شوفو غير الكاميرات ملاك كانت داخلة تعاون!!
ملاك ملاك!!
ملاك: (هزت عينها فالشاف ودغيا حناتهم) كنت خارجة (بحرا كتنفس) من الحمام وهي تخرج قالتلي عمي طاح على راسو ودخلت نعاونها
حمزة: ببشوية عليك تنفسي مزيان
ملاك: (بحرا كتهضر) دخلت نعاونها حيت قالتلي مكاينش للي يعاوني ودخلت حتى دفعاتني لبيت وسدت لباب من برا
حمزة: والتيليفون ديالك؟؟
ملاك: اه قالتلي نهضر مع بابا باش يجي حيت بابا (طرطقت كتبكي من هاد الكلمة)
حمزة: البنت مربية اسي طارق ماشي ديال هادشي
طارق: وهادشي للي قدامي احمزة؟! (تدق لباب دخل بوليسي عطا سلام وحطلو فوق البيرة تيليفون حمزة وتيليفون ملاك وخرج..)
شعلو التيليفونات
(تقدمت ملاك كترجف شعلت تيليفونها جاوها بزاف ديال بواط فوكال من اورطيغا ومها صافي اذا عرف!!! حلت الشيما وحمزة شعل تيليفونو حطوهم وكيقرا ميساج بصوت عالي من تيليفون حمزة)
اجي عندي راه الدار خاوية متعطليش وصيفطيلي تصويرتك دابا ونتي عريانة
(حمزة كيشوف باستغراب.. رجع قرأ ديال ملاك)
انا جاية صدر مرتك الهبيلة راني مكنحملهاش وغنقتلها بحال كما قتلت ولدها
حمزة: شنو هاد تخربيق!!!
(شاف التصويرة للي حانية فالحمام كتمسح رجليها ولابسة الدوبياس وراهم التصويرة ملاك بقات غير مطرطقة عينها ممتيقاش كتحرك راسها بلا)
حمزة: سي طارق دوز هادشي فالخبرة هادشي غير ملعوب من ديك (سكت) راه غير مظلومين لا انا لا هاد بنت الناس..
اولا ماشي هاكا انا كنكتب الميساج وباينة لعمل هي للي كاتباهم بجوج
طارق: كولشي غيدوز فالخبرة من التيليفونات الكاميرات وحتى الآنسة غدير فحص…
اورطيغا: (رجع باللور من مور كلام غيثة وهي كتسول وتبكي.. كان غيدخل فوحدة جارة ولدها فلبوسيت.. بقات كتغوت وتنݣر عقلو والو مكاينش دار الرومبوان وكسيرا دارلو البوليسي إشارة باش يوقف حيت جاي بسرعة كبيرة وماشي طريقو هو للي يدوز، وقف وكان جايو بشوية ومع معندو صبر زاااد مخليه كيلونصي بيه يشدووه وداكشي للي وقع فالخرجة كان على أعصابو وقف كيحاول غير يبرد باش ميتعكسوش معاه ماشي وقت هادشي!! جاو عندو قبل واحد ميهضر)
الشاف الله يرحم ليك ميمتك خاص نمشي لفاس دغيا
…: تقتل لينا فعباد الله باش نتا تمشي
اورطيغا: الشاف راه عيطولي قالولي مك ميتة وحتى واحد معطاني شنو وااقع (عينيه حووومر خرجين) الله يرحم الوالدين خليني نمشي
….: (منين كتوصل للأم شحال من واحد كيتساعد)
غنكتب ليك بعدا مخالفة
اورطيغا: كتب للي بغيت غير خليني نمشي الله يرحم ليك الوالدين راه عندها غير يانا ومعفرتها فين مليووحة الله يرحم ليك الواليدين!!!!
….: (مكتبلوش) سييير ولكن بشوية هاكا راك غير غتزيد تعطل!!
اورطيغا: الله يحفظك الشاف الله يرحم ليك الوالدين الله
(معرف نيزيد يقول زاد ماشي بشوية على ميغبر من حداهم اخر همو شي ردار ولا شي مخاالفة رجع كيصوني على غيثة تيليفونها طافي كيسب ويلعن هو خلا مو فالدار!! رجعت صونات غيثة)
مال الق**** دمك طافية التيليفون
غيثة: حنا ف CHU
اورطيغا: واش حية!!
غيثة: اه ولكن (كتبكي)
اورطيغا: حية يااك!!
غيثة: اه ولكن دخلو بيها لداخل معرفت مسكينة كيف بقات!! فينك نتا ؟!!
اورطيغا؛ انا فطريق شنو قالو اغيثة وشنو وقع؟! فهمتني الله يرضي عليك!!
غيثة: (كتبكي) ضرباتها تاكسي وهربت ومقالولي والو من قبيلة وانا ترغبهم حتى واحد متيهضر معايا قلتها لشريف ويوسف راهم جايبن
اورطيغا: (عقلو غيخرج ممستوعبش شنو كيسمع على مو)
متقطعيش حتى نوصل
(زاد مكسيري وحيت طريق كبيرة دايرة بحال لوتوروت عاوناتو ومن حسن الحظ المستشفى كاين فالدخلة ديال مدينة فاس..)
~~~~~~~~~
خرج طبيب:
لا حول ولا قوه الا بالله العلي العظيم انا لله وانا اليه راجعون
زهرة: (دخلت لبيتها سدت عليها مصدووومة)
ميمكنش ميمكنش!! (دايرة يدها على عنقها مخنووقة) بنتي مظلوومة بنتي غدروووها ميمكنش بنتي دير هاكا!!!
(كيدقو عليها مكتحلش)
سهام: هااااااا شنو كنت نݣول من اللول!! وحتى حد مسمع مني
راجلها: سكتينا دابا
سهام: اش نسكت راه عندي بنت ونخاف عليها من بنادم يبقى يهضر!!! الا لكبيرة وداروها بيها يحيرو فصغيييرة داك نهار ملاك كتغوت وتݣول راه هاد لهبيلة منوياش على خيير ها هي ضربت بينا الطر والشووهة
مرت الجد: (كانت غتبدا تسبها حتى سمعتها مزيان)
كانت قالتلها
الجد: مصخوووطة مصخوووطة مرمدت وجه باها فالارض ووجهنا
مرت الجد: الله يهديك الحاج واش هي من لحمك ودمك ومعارفهاش مزيان
الجد: شوهتنا الله ياخد فيها الحق.. (دخل لبيتو زادح لباب)
سهام: بنت لحرام خلاتها حتى قربت خطوبتها الله ياخد فيها الحق ولعبت عليها متݣولوووش هادا ملعوووب منها
مرت الجد: (بقات كتبكي داك المنظر شحال قااسح بقات فيها ملاك وزهرة ورشيد كولشي بقا فيها جا عندها أنير هزاتو وكان سكااات فالدار عكس دار دأميمة للي داخلين عندها الجيران)
~~~~~~~~~~~~~~
أميمة: (ضربت سطل الحمام برجليها حتى تزلع داكشي للي فوسطو)
بنت زناااقي الله ياخد فيها الحق من اللول كنت كنقولها حتى واحد متيقني
الجارة1: انا تصدمت فملاك اما حتى راجلك أميمة كان ناوي عليها من شحال هادي
أميمة: كفاش ناوي؟!
الجارة1: كانو بيناتكم المشاكل من شحال هادي ياك حتى كتوصلو لطلاق والغد ليه كيصالحووكم العائلة
أميمة: خرجي علية قبل مندير فيك شراع يدي يا الشارفة راك بحالك بحالها نيت الموسخة كتدافع غير على ختها
الجارة1: عيييب هاد الهضرة (خرجت هازة الشبكة ديال ملاك للي فيها داكشي دالحمام وهزت حوايجها جات تحايدهم ليها)
اسمعي اديك البرهوشة راه ماشي غير نتي للي تعرفي المخزن وتحطي فالباطل!! وحايدي يدك حسن ليك
(أميمة جروها لعيالات وهي كتغوت وتسب والجارة خرجت هازة حوايج ملاك داياهم لدارهم حتى الوقت المناسب وتديهم لمها قبل ميديرو فيها شي حاجة، وهادشي زاد أكد ليها شنو شكت فاللول ان ملاك غير مزرفة!!!)
اورطيغا: (وصل لتماك استفسر من غيثة للي كتبكي كتر مكتهضر مقاالت حتى جملة مفيدة دابا للي كيهمو غير يعرف موو واش حية وشي لاخر ملحووق عقلو وقف جوج كوارث فنهار واحد ووحدة كفس من التانية..
🚨🚨واقف حدا باب العمليات وأسوء مخاوف ديالو كيتوقعهم معرف واش يبكي واش يقوي راسو بقا غير مخرج عينيه كيتسنى الصاااعقة للي يا غدمرو يا غيرجع يحيى ويعيش!!!!
محس حتى دموعو نزلو وكل مكيدوز قدام عينيه هو ذكرياتو مع مو منين كان صغير حتى كبر ميمكنش يكون خسرها واخر لقاء بيناتهم ولا وداع هو كانت كتشري حوايج وفرحانة بخطوبتو!!! عقل غيحبس بالألم وصداااع جات غيثة حداه شافتو هكاك تعلات عنقاتو كتبكي عارفة هي سبااااب حتى دفعها بشوية مبعدة
اورطيغا: (مسح وجهو) بعدي اغيثة
غيثة: غنموت الا وقعات شي حاجة لطاتي
اورطيغا: (بحال مسوق شكون يموت ولا يحيى !! زفر وقلبو غيتقسم خبط بيدو فلباب)
تعطلو هاد الق**** غير شي واحد يقولنا شي حاجة
غيثة: اورطيغا!!
اورطيغا: (قرد ودار يديه على ودنييه بحال مباغيش يسمع شي حاجة للي تزيد تكمل ما بيه ولكن فأعماااااقو تمناها لوكان كانت هي حداه دابا!!
دخل شريف والحاج كيسولوه مكيهضرش غير غيثة للي كتقولهم جات الفرملية باش تسكتهم بقا شريف كيهضر معاها بالعقل)
~~~~~~~~~~~
خديجة: اويلي!!! نمشيو دابا، يوسف تقد؟!
يوسف: اه اه
الغالية: (تفاجئت حتى هي بالخبر اه كتكرهها ولكن ماشي لدرجة الموت وبهاد الطريقة!!!)
خديجة: (هزت تيليفونها كتصوني على مها مكتجاوبش وكتبت ليها ميساج)
ماما منين تقراي الميساج صوني انا دابا غنمشي لصبيطار خالتي أمينة دارت مسكينة كسيدة خايبة وراها بين الموت ولحيا
(عارفة مها عزييزة عندها يعني غير غتقرا الميساج وغتشد طريق.. صونات على ملاك تقطع عليها قالت يمكن تكون مع اورطيغا.. لبست مونطوها ومشات هي ويوسف وأشرف لصبيطار اما اب يوسف بقا مع الغالية…)
ماما مصوناتش!!
يوسف: قبيلات قالت ليك ملهية فالتوجاد يمكن مشافتش التيليفون
خديجة: داكشي للي قلت!!
أميمة: (كتجمع شعرها حيت تزيرت والجيران كيشوفو فيها) هادي باينة مصيفطاها اليهودية دمها حسابها غنسحرو ليهم بحال مما هوما ظلو كيسحرولي وخرجو على حياتي وقتلو ولدي وطججو راجلي
….: بردي اختي أميمة فينها نجية واش مزال مجات!!
أميمة: (بخوف) عفاكم بقاو معايا راه مغتيقنيش عاود وتقولي
دخلتي ولدي الحبس !!!
حنان: اويلي لا خالتي نجية بعقلها وغتوقع معاك
أميمة: الله يهديك انا للي عارفها…
~~~~~~~~~~~
رشيد: (واقف بلا عقل مزال ممستوعب شنو وقع مع بنتو وحمزة.. ملاك!!!!!!!!!! مستحيل بنتو دير هادشي ولكن راه خرجوها من بيتو عريانين كما قالو الجيران!!! ولكن هي وحمزة وكانت خطوبتها بعد بعد غدا راه كانو مخطوبين ولي مبغاتش علاش دابا!!!!!
كيفكر فحاجة وحدة ماشي يقتلها ولكن مكرهش يهز زهرة وأنير ويخويو من ديك الحومة حيت بقد مكانت مصدر استقرار دابا غترجع جحيييم… خرج طبيب)
امدرا!!
….: لا حول ولا قوه الا بالله العلي العظيم انا لله وانا اليه راجعون الله يرحمو
رشيد: واش مات!!!
اخ رشيد: لا حول ولا قوه الا بالله العلي العظيم
رشيد: (تصدم وبقا غير كيشوف راه صحاب ومن هوما صغاار واش هادي نهايتهم على يد ولادهم واحد مات وهو شنو غيوقع فيه كتر من هاد الشوهة اللول مصبرش مشا عند للي خلقو وهو!!!!
وصلو العائلة خوتو كيتسمع غير لبكى وصلت مرتو كتنووووح هو خرج برا كيحس براسو صافي فشل دازو عليه مشاكل كبار قاسحة وكان واقف بحال جبل ولكن بحال هاكا!!!!
غمض عينو شحااال وحلهم بغضب كبييير وأكبر ظااالم بين عينيه هو حمزة وملاك حمزة للي كان بحال ولدو ورباه هو حيت باه كان زهواني ممسوقش لشي تربية وملاك طرف من كبدتو للي كان دايرها عينيه!! صونات زهرة عليه)
زهرة: (كتبكي) رشيد لحق بلبنت ها العام متخليهاش بوحدها
رشيد: اشمن بنت الزهرة انا بناتي كولهم تزوجو وفدار رجلاتهم
زهرة: بنتي مظلومة ارشيد
رشيد: اممم والبرهان هو عبد الله للي مات دابا مسكين مات بقوة الصدمة
زهرة: مات!!! الله يربي فين كان هاد نهار مخبي الله يرحمو (كتبكي) بنتي مظلومة ارشيد والله حتى (قطع عليها دقت مريم حلت عليها تعانقو كيبكيو)
بنتي مظلووومة امريم
مريم: فين هي دابا؟!
زهرة: داوها مسيكينة حبيبتي تدااارت بيها ومات عمكم عبد الله
مريم: مات!!
زهرة: اااااااه اقلبي غيسكت فين كان هادشي مخبع!!
مريم: الله يرحمو…
🚨🚨
حمزة: بقا مصدوم منين عرفها غدخل الحبس عرق فراسو غيطرطق ممستوعبش هاد الموصيبة للي نزلت على راسو… بقا غير كيدو عينيه كيتسناها تشوف فيه!!!
دخلت بحال شوية دالهم حانية راسها جلست فالقنت تسد لباب وظلام جيول مهموش راسو مهماتوش خدمتو للي كتهمو هو هاد لبنت للي ضايعة فالنص ومتستاهلش!!!
وهادشي كااامل سبابو هو عرفها غتخسر ناس وغتخسر بزاف دلحوايج للي عزااز عندها والمشكل مدايرة والو!!!
ملاك ملاااك
ملاك: (جلست فوق كرسي مصدوومة كتخاف من ظلام ولكن دابا الخوف لكبير ماشي من ظلام من هادوك للي فبرا اول مرة فحياتها تمنات الموت حرفيا عمرها جاتها حتى على البال بلعكس كانت ديما متفائاة وكتبغي الحياة وكانت ضد هاد الفكرة وفأي واحد كيفكر بتفكير مشؤوم ونهار فكرت فيها تمنات ودعات الله من أعماااقها متزيدش دقييييقة من مور هادشي للي واقع معاها)
حمزة: ملاك عفاك غير جاوبي متخافيش كولشي غيتحل كاين كاميرات كاين الخبرة كاين بزااف دلحوايج
ملاك: (بصوت مخنوق وهاااادئ) وشكون يحايد خرجتي هاكاك من عينين بابا وماما!!!
حمزة: غيتيقو وكولشي غيعرفك مظلومة
ملاك: (تفكرت اورطيغا زاد وجعها قلبها كتر، فلحظة كانت فرحانة وكانت غتحقق واحد من احلامها تزوج بحبيب القلب فلحظة خسراتو وخسرات أهم جوج فحياتها باها ومها منين حتى واحد متبعها واخا يجيو يضربوها غير يتبعووها اذا باينة وأصلا فين غيتبعوها من قلبها عاطيااهم العذر وكتفكر ليهم واش اصلا غيقدرو يخرجو من الدار ديك اللحظة فاش خرجوها وهي كتسمع سبان الجيران ومرت حنينها كتشوفها من تحت ليزار كدخل كولشي وسدت لباب كانت صعييبة وباها فاش سول واش هي للي كاينة فوسط البارتنير خلاها مكرهتش غير تغوت بقات غير كترد وحمزة كيعيط ليها كترد غير لمرار وكملاتها بلبكى وشهييق)
حمزة: (كيعيط ليهم يجيو يحلو يشوفوها ولكن شكون غيسوق عيا يهضر معاها والو مرة تبكي مرة تبقى غير كتشهق مرة طلع معاها التروييعة ولكن معندها متقيا)
~~~~~~~~~~~~
نجية: (دغيا خرجو العائلة شراو لحوايج لبسوها لبيض ومشات ترغب فأميمة للي مرة تسخف مرة بحال طيح بعظامها رغبتهم الجارة حنان تبقى معاها تهضر معاها، دخلها لبيتها سدو لباب طرقووه ووحدة شافت فلوخرا وطرطقو كيظحكو…)
نجية: (معرفت تحزن على راجلها معرفت تحزن على ولدها ولكن بغاتو يخرج يكون معاها فهاد المحنة) هضرو معاها تدير تنازل تخلي ولدو يجي يدفنو ها العااار غير هاد المرة على وجهي
(كتبكي وتنوووح جاتها صدمة وصدمة كبيرة راجلها مات وولدها فالحبس)
نبوس ليها رجلييييها غير تخرجو يشووفو قبل ميتدفن ااااااااااااااه احمزة
(كتقولها بحرقة كبييييييرة وكاين للي حاس كاين للي كيتعجب حيت ولدها هو سباب هادشي كامل وهي مزال حنينة عليه, وكاين غير للي جاي يجمع يبرݣݣ وياكل كسكسووو…)
أميمة: (ناضت كتشوف وجهها فلمرايا حيت خبشاتو على اساس نذبت وجهها منين كانت فانهيار عصبي) شفتي مو بنت لحرام كتقول خرجيلي ولدي بحال ديتو للحضانة ماشي الحبس!!
حنان: انا مقلتش صراحة توصل يموت باه بقا فية الصݣعة!!
أميمة: اوااااا مكاتب ربي هو اصلا مكتابلو يموت اليوم بهاد شي ولا بلا بيه ندخلو حنا فقضاء الله!!
حنان: واش بالصح مبقاش فيك عمك؟
أميمة: عمي هو سبابي فعذابي كان يزينلي ولدو فعيني تقول غير هو للي والد وشحال كان كيعيق على با حيت هو زعما والد الولد وبابا والد غير لبنات.. ها لبنات اش كيديرو وعلاش كيقدو وحتى دابا راه قلنا الله يرحمو ويسمح ليه
حنان: ههه انا ظحكتني غير ملاك خارجة عروسة من هنا ههه
أميمة: ومزاااال مشافت شنو غيوقعلها
حنان: اوييلي علاش هي باقيلها شي وجه ترجع بيه للحومة
أميمة: وحتى الراجل طاااار، عرفتي بنت لحرام كانت مع واحد خاانز فلوس
حنان: شفتووو داك العزي عندو طموبيلة فنة
أميمة: نعطيك نمرتو دوري بيه
حنان: حلفي!! ربي الا معطيهالي
أميمة: خلي تهدا الدنيا ونعطيهالك راه حتى هو شاف كولشي قبيلة على عينيه والا عرفتيلو راك نتي هي المباااركة
حنان: اممم.. مصاااب… حقا متنساينيش أميمة
أميمة: ياك عطيتك مليون بقات مليون نتي غير متعيقيش وخليك كدخلي بخيط بيض قدام الجيران (دخلت ففراشها) باش منبينوش حنا صحابات ومتافقاات غير تهدا الدنيا شوية وننطيك فلووسك
حنان: واخا ختي (غطاتها) انا نخرج نقولهم راكي تجبدت شوية وعاطياها غير لبكى
أميمة: مدخلش غير ديك الزبلة تبدا تخنخن علية هنا (خرجت حنان لقات نجية دايرين بيها وهي سخفاانة بلبكى.. مشات حدا وحدة من الحاضرين)
حنان: عائلة هاديك مجاوش؟!
…: نتي عارفهم عائلتها الله يعمرها دار باها وعمامها هوما للي واقفين على كولشي برا
حنان: اممم خرجت ليهم غير لبنت من الجنب الله يسترنا وصافي!!!
اورطيغا: (تصدم من كلام طبيب مو دخلت كومة وطلعوها لغرفة الانعاش جات عندو خديجة)
خديجة: خويا مراد مديرش فراسك هاكا (بقا فيها واقف بوحدو مطرطق عينيه تخيلت وكانت كانت بلاصتو غتسطى!!!) خالتي أمينة ان شاء الله غدووزها وتبرا وترجع تجمع نتا وياها
اورطيغا: (هز راسو لسقف)
خديجة: مرااد
اورطيغا: (بحرا كيقدر يهضر) عفاااك (دارلها إشارة بغا يبقى بوحدو، مشا من حداها كيقلب فين كاين هاد الانعاش تابعاه خديجة اما حتى شريف للي يرد ليه لبال باه سخفان من الخبر وكولشي داير بيه بقا كيرغب الفرملية جبد من بزطامو وهو مفافي 200 درهم من جيبو عطاهالها مابغاتش تشدها)
…: خويا غير صبر راه معاها لداخل كيقادو ليه.. غير شد فلوسك
اورطيغا: الله يرحم الوالدين اختي نشوفها غير من الزاج انا مباغيش ندخل نزيد نمرضها بغيت غير نشووفها
خديجة: عفاك اختي خليه يشوفها راه غير هي للي عندو الله يستر عليك اختي يشوفها غير من لبعيد (كتبكي وزادوها الهرمونات)
….: واخا خويا صبر معايا (دخلت كتشوف كولشي قادوه ليها فغرفة العناااية حيت دخلو حبايب الحاج وميمكنش يديوها لشي مصحة خاصة اصلا حتى هنا كاين بروفيسورة كباار للي غيراقبو حالتو وينقدو الا نبقاو مينقدو..
خلاتو يدخل من داك الكولوار شافها من الزاج يدها من كتفها كولو مݣبص كانت عريانة دايرين عليها ليزار فوق صدرها وبزااف دسلوكة مبرونشيين فيها!! ووجها كولو زرق منفوخ وجرااحي ومدورين فاصمة على راسها وجبهتها فين كانت عندها الضربة دموعو عينيه حتى شقو دموع حنوكو نازلين حااارين وتفاحة ادم طالعة هابطة بكترة الغصة للي عندو تماااك خديجة بقات كتبكي على حالة أمينة للي عزيزة عندها بزااف)
خديجة: خويا مراد ان شاء الله أزمة ودوووز يالا ربي يا ربي شاااافيها!!!
اورطيغا: (مقدرش ميبكيش مقادرش يهضر غير كيشوف فيها الا مشاتلو صافي!!!
جات الفرملية خرجتهم حتى يكملو الإجراءات للي نيت هو غيبقى معاها خرج باش ميديرش مشاكل ويعكسو معاه واخا خايف تغبر من عينيه وتمووت!!!
خوف كبييير تملك قلبو معرف هاد المرة شنو الحل للي يدير راه هي للي كانت كتعاود باش ينسى الهموم وينسى الخوف وحتى للي كانت كتواسيه مكيناش!! خديجة شدت كرشها جاها حريق طفيف فكرشها شافها، مسح على وجهو)
ختي سيري ترتاحي
خديجة: لا لا الحمدلله انا مزياانة اجي تجلس شوية
اورطيغا: (حرك راسو بلا)
خديجة: مراد ياك نتا للي غتبقى معاها هنا خاصك ترتاح مرة مرة باش تبقى قاادر توقف على رجلك انا مكرهتش نبقى ولكن ممنوع علية
اورطيغا: (حرك راسو باه) سيري اختي ترتاحي
خديجة: نمشي نجيبلك شي حاجة تاكلها (جا يعتارض) لا خاصك تاكل.. (مشات لدروج هو جلس فالكرسي شاد راسو بين يدييه ممتيقش هاد المصاب وفنفس الوقت كيدعي مع مو وموقفش وكل ذكرياتنا كتجيه فباالو وكيحاول يتفاااائل..)
خديجة: (هابطة فدروج وكتصوني على ملاك تيليفونها طافي مفهمتش واش مخاصنين واخا يكونو راه خاصها تكون معاه فهاد المحنة ولو غير فالتيليفون صونات على مها شحال عاد جاوبتها)
الو ماما!!!
مريم: مريم اخديجة
خديجة: ماما مكتجاوبش وحتى ملاك راه واقعة هنا كارثة
مريم: شنو عاود؟!
خديجة: خالتي زهرة دارت كسيدة خايبة وراها كومة مسكينة قبيلة صيفطت لماما ميساج واش مزال مقراتو؟!!!
مريم: اويلي!!!
خديجة: والله
زهرة: (فناموسيتها سخفاانة دايرة حامض على نواظرها) أشنووو!!! اشنو عاود!!!!!!
مريم: خالتي أمينة راها كومة
زهرة: (تخلعت) علاه!!
مريم: كسيدة مسكينة، ونتي فينك وكيف بقات هي؟!
خديجة: انا فصبيطار فين ملاك كنصوني عليها مرة تقطع مرة تطفيه
مريم: كيف بقات السيدة؟!
خديجة: راه ردوها من الموت شي تاكسي ضربها وهرب واد لحرام خلاها منشورة مسكينة، دخلت دابا شفتها من الزاج مكرفسة بزاااف، فين ملاك؟! تشوفي حالة ولدها تبكي يا ختي
مريم: (خرجت من بيت مها) خديجة متبقايش تصوني على ماما وتسولها على ملاك
خديجة: علاش؟!
مريم: من بعد ونفهمك نتي ديها دابا فراسك راك حاملة
خديجة: واقوليلي علاش؟؟
مريم: وصافي اخديجة من بعد ونهضرو
خديجة: واش مخاصمة هي واورطيغا ؟!
مريم: خديجة وصافي اختي، و متفورصيش على راسك (قاست فكرشها للي كبرت شوية)
خديجة: حيرتيني وماما مزال مجات هنا جاتني فشكل راه كتعزها بزااف
مريم: اوا لا اله الا الله…
هبطو البوليس حلو لباب عليهم حلو على ملاك اللولة عطاوها كاشة فلݣري خفيفة حيت حتى واحد من عائلتها مجاو عندها ولا جابولها شي حاجة وحطو ليها خبز فيه فرماج وكاشير وقرعة ديال لما بلا مغطة غير كتشوف بعويناتها وكتشوف دراري كيهضرو مع حمزة بشوية
حمزة: شنو بغاني دابا!! ياك هو كيكون مشا!!!
صاحبو: خاي حمزة قوي ايمانك
حمزة: انا اقسم بالله مدرت شي حاجة وديك بنت الناس غضييع راه والله مكاينة شي حاجة ونتا اصاحبي جبد شي 30 درهم من جيبك جيبلها شي حاجة تاكلها مقلدة
…: واخ انا نمشي نجيبلها دابا
صاحبو: شحال احمزة قلت ليك صافي طلق لخ** ونتا راسك قاسح
حمزة: على ود الواليد زعما راك عارف (زفر) جا؟!
تشاوفو دراري بيناتهم
…: ياله طلع عند الشاف
حمزة: (شاف فملاك جالسة فالقنت مهموش راسو قدها خرج من تماك)
نشوف غير الشاف ونهبط (لا رد منها ، تسد باب الحديد بالجهد حتى تزعزعت طلعوه الفوق، منين مجا لا باه لا رشيد لا مها اذا القضية غتزيد تكفاس دخل لقا الشاف تماك عطاه سلام ودخل)
….: حمزة جلس
حمزة: الشاف شوفو الكاميرات راه شحال من حاجة غتبان هاديك مرتي جيبوها غير واحد يقررها مزيان غتقول كولشي
….: حمزة!!
حمزة: الشاف راه لبنت غضييع وهي راه مربية ماشي ديال لحباسات والكوميساريات
….: حمزة جلس بعدا (جبد باكية دالݣارو وعطاه واحد حمزة دغيا دارو فمو وشعل كيكمي)
حمزة: لعبت بية مكانش علية نخليها
….: التيليفونات مشاو للخبرة وحتى الكاميرات ديال الجيران جابوهم وصباح بكري غتجي طبيبة
حمزة: (حرك راسو باه) راه طرشة تخليها تݣر بكولشي الا بقات برا غادي غير تهرب
…: حمزة قوي راسك معايا اصاحبي (شاف فيه باستغراب)
حمزة: واش كاين شي حاجة!! غنتوقف من الخدمة ولا الطرد؟!
….: الواليد ديالك.. الله يرحمو…
رشيد: (حتى واحد مجبد معاه موضوع بنتو، داير كرسي وجالس حدا باب دارو غير كيشوووف وتفكيرو كولو فيها كان غاااضب بزاف وأبسط نقاش غيخليه يتفرݣع خرج باه بعكازو)
با سير تنعس…
الجد: طاااار مبقا بغا يجيني نعاس ديك المصخوطة مخلاتلي فين نحط راسي
رشيد: (ببرود) حطو فوق الوسادة ونعس
الجد: وشنو نديرو مع الفضيحة واحد مشا القبر وحنا؟!
رشيد: مالنا حنا!! حنا هاحنا جالسين فدارنا
الجد: غنخليوها هاكا؟!
رشيد: نمشي نقتلها؟!؟
الجد: مكرهتش نزهق رووحها ونتهناو من هاد العار فين دارتنا
رشيد: (زفر ورجع كيشوف فسما) سير أبا نعس
الجد: الله يسخط عليها الله يسخط عليها.. (دخل كيرددها حتى كيخرج فزهرة هازة انير)
زهرة: (بانفعال) برااااااكة برااااااكة من هاد نݣير واش مكتشوفش حاالتنا ونتا زاايدنا من قبيلة ونتا زن زن زن
الجد: ومزال تزيدي تهضري!!!
زهرة: (كتغوت) اه نهضر ومنسكتش بنتي مظلووومة بغيتي ولا كرهتي بنتي مظلوووووومة
رشيد: (دخل) زهرة!!!؟
زهرة: هضر مع باااك ماشي انا ربي لي عالم بية وهو كل مرة يلوحلي هضرة تزيد ما بيا (كتزيد تعاودها وتغوت) بنتي مظلوووووومة بنتي شرييييفة بغا للي بغا وكره لي كره
الجد: راه فضحتنا وسط حبابنا وجيرانا
زهرة: حبااااابك نتا وجيرااانك نتا انا حبابي وجيراني هوما بناتي ومنسمحش لي يقول فيهم كلمة وحدة
رشيد: (نفاااجر) سكتوووووو واش مكفاتكمش الشووهة ديال قبيييلة والسيد للي مشا عند الله!!! (شاف فزهرة) وملاك مبقاتلها بلاصة هنا معانا
زهرة: رشيد!!
رشيد: صافي من اليوم معندي بنت سميتها ملاك شنو بغيتي الزهرة نمشي نتبعها للمحكمة ولحباسات ندي ليها الݣفة!!! شفتي لوكان سرقت ولا قتلت ولا دير للي بغات وشدوها غنوقف معاها ونموووت باش تخرج، ولكن دابا واش خلاتلي شي وجه!!
زهرة: (مشات لبيتها كتبكي) والله منخلي بنتي واخا يجبدوها من وسط 100 راجل…
رشيد: زهرة!!! (دخلت لبيت زادحة لباب، شاف فباه) صافي تمشي تنعس دابا!!!
الحد: صافي مبقالها بلاصة عندنا
رشيد: (استغفر الله) با راك غير كتخرجني على طووعي وانا دابا فوق معصب ونقتل ولكن ماشي بنتي غنقتل عليها واخا نقول للي نقول مغااانسمحش فيها حيت عارف شنو مربي (خلاه مطرطق عينو وخرج برا، عاد دابا قال مابقاش بنتو زهرة حتى سمعت هاد الهضرة عاد بردت)
سهام: (خرجت لوسط الدار) الله يجيب ملاك على خير لدارهم الظلم شحال خاايب!! (هربت قبل ميسمعها راجلها…)
مريم: (خرجت تابعاه) بابا!! (مشا وهو حامي راسو بقات حدا لباب غير كتبكي على حالتهم وبقات فيها ختها هي متأكدة كما قالت مها كاينة شي إن فالموضوع سمعت غوات دارت كتشوف كانت سهام خارجة من دار حمزة كتغوت ولعيالات كيجرووها)
أأأمرت عمي!
سهام: خرجتو على البنت والله متخرجلكم طرييفة والله يا الكلبة الهبيلة ألهبيييلة مكترضايش للي يݣولك هبيلة!! قبيلة قبيلة هبيييييييييلة
مريم: (مشات كتجرها واميمة تابعاها كتغوت) ياله ندخلو فحالنا
أميمة: سيرو سيرو دخلو وتحشاو فبيووتكم تخبااو، وبراكة عليكم غير الشوهة للي شوهاتكم بنتكم تخليكم عمركم مزال تهزو الراس فهاد الحومة ولا المدينة
مريم: (طلقت من مرة عمها) ايييييييييييوا نتي اديك الهبيلة قبل متهضري على لالااااااك ملاك شللي فمك الحماارة
أميمة: مكيناش لحمارة قدك ولا موالفين كولكم كدخلو رجال يا قبيلة ليهوود نتي براسك تلقاااك كدخلي يا ال”**** رجال منين مكيكونش راجلك
مريم: (طرطقت عينها مصدوومة!! شافت فبنت عمها صغيرة هازة التيليفون كتفيلمي وكانت طبيعة فيها غير كظل تصورهم، شدت مريم فكرشها كتغوت كولشي دااار كيشوف فمريم تجمعو عليها)
حسبي الله ونعم الوكيل حسبي الله ونعم الوكيل كتقذفي فشرفي حسبي الله ونعم الوكيل
أميمة: اسيري ت**** كولكم بحال بحال انا بغيت داكشي للي حاملة بيه ميشووفش الدنيا (شافت لبنت صغيرة كتصور جات ماشية ليها)
مريم: عنداك امرت عمي عنداك هاد الحمقة راه بغات تضرب بنتك (سهام على سبة مشات نيشان نتفتها مريم مزال كتوجع شدت التيليفون حمدات الله منين لقاتو ڤيديو دارتو فجيب بينوارها وبقات كتوجع جا باها كيجري حيت تجمعو الناس عاود كولشي دخل يفك أميمة من يد سهام حتى زهرة خرجت كتشوف فبنتها للي كتوجع)
ديوني لصبيطار
(ما فيها والو) كنمووووووت كنموووت اسيدي ربي (كتبكي وتفكر فختها فين غتكون دابا باش يكون عندها سبب علاش تبكي)
رشيد: يا ربي يا ربي على هاد نهار!!!!
أميمة: (غير كتشوف فهادشي وكترد شعرها اللور) بغاو يلعبو بيا!!!!
مريم: عيطو لرااااجلي يسمع شنو كتقول عليه هاد الحمقة؟!
أميمة: (رجعت اللور غير كتشوف شافت هادشي ممسلكش!!.. خطفو مريم لطموبيلة ديال باها داوها لصبيطار كتوجع وتبكي…)
نجية: والله يا بنتي أميمة ويكون كلام سهام بالصح !!!
أميمة: اشمن بالصح انووضي توݣضي راه كولشي بالأدلة التيليفونات والكاميرات براكة غير ولدك قتل باه بالفقسة
نجية: ها العااااار سيري خرجيييهم ياك تشوهو سيري خرجيهم خلي الولد يحضر لدفينة باه
أميمة: تماااك غيبقى وخدمتو لا هو لا هي غير يديرو ليها باي باي!! قتلولي ولدي وضيعوني فحيااتي ربي بين فيهم البرهان فالدنيا قبل الآخرة…
زهرة: (هضرات مع مريم للي فهمتها مموجعة موالو غير ملعوب وكاين عيالات يشهدو معاها على الهضرة للي قالت أميمة وأكدت عليهم باش ميعيطوش على راجلها..
جلست فوق ناموسيتها كتشوف فسهام للي شحال وهي ضد لبنات ولكن فموقف ملاك جاتها النفس بزااف عليها.. تخيلت بنتها فين تكون قلبها ضرها على جوج بنتها وحتى أمينة للي سمعت خبارها تفكرت مراد فاش كان حاضر على بنتها غيكون بقا فيه الحال والكلام للي قال لرشيد ديال من اللول بغيتي بنتك مع حمزة!!!
راسها غيطرطق ولكن الاهم دابا عندها هو بنتها وحريرتها والحݣرة للي فيها دابا خاص أميمة تسمح باش تخرج!!!)
~~~~~~~~~~~~
حمزة: (بكااا حتى قلبو تنفخ جاتو صدمة من مور صدمة يعني هو سباب فموت باه ولكن هو راه مدار والو بلعكس كان متبعو فرايو صبرو الشاف ديالو وصحاابو طلب باش يهبط لتحت مبقالو فاش يهضر باغي يبقى غير بووحدو هاد الساعة، دخل هاد المرة خلاو الضو مشعول برا عاطيهم الضو حطولو عشا دجاج بالروز وكاشة غليضة وقرعة ديال لما وحتى ملاك جابولها هادشي اما اللول مقاستوش وحتى اما باقي هو هو..)
…: البركة فراسك اخويا حمزة
حمزة: (حرك غير راسو بأه مشا جلس ممتيقش ودموعو سايلين ݣاع ذكرياتو مع باه جات بين عينيه ملاك غير كتشوف غير مشاو البوليس ناضت بخوف كبييير واخا رجليها مهازينهاش غير كترعد)
ملاك؛ (صوتها كيرجف خايفة من شي صدمة اخرى) حمزة شكون مات؟!
حمزة: (بحرقة وغصة كبيرة حاني راسو) بَّا
ملاك: (شهقت محست غير الردة طلعت معاها عاود ومعندها فكرشها واالو غير لمرار حتى قلبتها بكا ورجعت جالسة فالارض أصعب نهار فحيااتها، هاكا داز بيناتهم كولها كيبكي فقنت وغير تنهيداتهم للي كتسمع..)
~~~~~~~~~~~~~
ادم: (كان فصفرو جالس فالقهوة للي مقابلة مع قهوة رشيد سمع مزيان شنو وااقع اذا أميمة قضات الغراض صونا عليها جاوبت)
خرجي عندي
أميمة: (مخبعة فطواليط) مصالحش العينين علية
ادم: وفلوسك؟!
أميمة: دوزهوملي الكونت
ادم: لا غتشديهم بيدك
أميمة: مصالحش راه عائلة ديك الكلبة غير حاطين علية العين ومرضاوش صيفطت بنتهم الحبس
ادم: مهم انا درت للي علية
أميمة: وفلوسي؟!
ادم: بغيتيهم خرجيلهم دابا
أميمة: ميصلاحلكش تخليهم عند شي واحد
ادم: لا، يدي ليدك، عندك 10 دقايق علميني حيت غنمشي من هنا
أميمة: صافي صافي واخ…
خديجة: (كانت هي ويوسف واقفين واورطيغا جالس كانت كتهضر معاه خالتو وولدها باش يجيو من ݣرسيف للي تلغى رواح فآخر لحظة وغيجيو يوقفو معاه)
..عرفتي شكون مات!
يوسف: شكون؟!
خديجة: جارنا للي اونفاص معانا شحال بقا فيا
يوسف: هداك سميتو حمزة ولا معرفت شنو
خديجة: لا لا باه
اورطيغا: (هز راسو فيها يعني باين حمزة غيكون مات بالفقسة؟! ولا مريض!! تفكر ملاك كيزيد غير يحقد على شنو شاف لبارح قاالب وجهو باينة ختها مفراسها والو على شنو واقع)
يوسف: لا حول ولا قوه الا بالله العلي العظيم مسكين الله يرحمو، ولكن!!
خديجة: صافي صافي فهمتك شنو بغيت تقول (هزت حواجبها) براسي مفهمت والو
يوسف: (استغرب بزااااف لعدم تواجد ملاك!! جات ختو للي صفرااااا وغير كتشهق) غيثة حبيبة سيري للدار ترتاحي
اورطيغا: (وقف) غيثة شنو كنتو تتديرو فداك القنت!!!!
غيثة: (بخوف وباين فيها بزااف) انا مدرت والو
اورطيغا: مقالك حتى واحد درتي شي حاجة
خديجة: (بشك كتشوف فيها)
غيثة: (رجعت كتبكي) كناا غاديين تنهضرو وصافي
اورطيغا: نتي للي قلتيلها تجي عندك لتماك
غيثة: اه، حيت كنا دايرين نتلقاو فمرجان صافي تنهضرو حتى (طرطقت كتبكي جاي عندها هز يدو يدرعها وهي تحامات بيدها حسابها غيضربها حتى عنقها وزاد ما بيها ولكن عندو راه هي للي نقذت مو حيت قال طبيب لوكان تعطلتو شوية كانت غتموت)
يوسف: (بقا غير كيشوف حيت فديك الوقيتة للي خرجت غيثة مها حتى هي كانت عيانة بزااااف بالصح سؤال كيدور فراسو اشنو خرجها لتماك ومع أمينة!!!)
غيثة اجي نوصلكم نتي وخديجة
اورطيغا: خاي يوسف حتى نتا راك عيان سيرو ترتاحو
يوسف: انا غرجع
غيثة: لا انا بغيت نبقى حتى تفيق طاتي أمينة
اورطيغا: (مهدوود) غتفيق ان شاء الله سيرو دابا رتاحوو واجيو من بعد
يوسف: انا نوصلهم ورجع
اورطيغا: بلاش اخاي يوسف
خديجة: (حاطة ليه صاك تماك) عفاك كول شي حاجة راني جبتلك غير شي حاجة خفيفة تقوت بيها (حرك راسو باه) كول باش تبقى موݣض اخويا..
أميمة: (طلعت لسطح كتسلت سولتها مها للي تماك، خرجت عينها فيها بعصبية)
بغيت نبقى وحدي ممنحقيش نبقى بوحدي نتفس شوية!!!
(ختها غير كتشوف فيها معاجبهاش الحال هوما وحزنانين على عمهم وختهم واالو بحال تقول كانت كتسنى هاد نهار!! حتى حزنها راه راجلها لقاوه مع وحدة ممقنعش عارفينها كتمووت على حمزة ولكن ختهم تبدلت بزاااف.. خلاوها باش متزيدش على نجية للي بقات فكوولشي خاسرة جوج وأعز جوج عندها نقزت لسطح حنان للي دايرة معاها تحل ليها باب سطح هبطت كانت الدار خاوية حيت عائلتها فدار نجية هبطو بجوج من بعد متلتمو بلتام مها وخرجوو من الدار ماشيين للتيرة فين علمت ادم لقاتو كيتسناها حيدت لتام… كتهضر بالزربة)
عطيني عطيني دغيا باش نمشي
ادم: (ببرود جبد تيليفونو صورها وهي مصدومة بغات تهرب وجهها وشدها من يدها بقوة)
أميمة: اااااااي طلق مني
ادم: (كمل تصوار على خاطرو، مد ليها جوا للي تافق معاها فيه) تجبديني فالهضرة نصيفطك عند عمك نيشان
أميمة: (بخوف) لا لا منهضرش
ادم: غير هضري انا مغتدي مني باش تنقي سنانك ولكن انا غندي منك غير متحاوليش!! (مشا خلاها وااقفة شافت داك جوا ويدها متقلة هزت كتافها ممسوقااش اش غيشدوها ولا تهضر راه هي للي ضحية فهادشي!!
رجعت عند حنان للي حاضية السيكتور وزربو راجعيين دخلت أميمة طواليط كتحسب لفلوس هوما هادوك عطاها 3 فاللول وزادها 3 هزت 5000 درهم وعطاتوو لحنان)
حنان: يا بسم الله
أميمة: هانتي تقولي رجعت فكلامي ولا شي حاجة مليون ونص شكون قال تشديها باردة هاكا
حنان: هه وييه، قوليلي شكون هداك؟!
أميمة: راجلي المستقبلي ههه
حنان: ههه بيناتنا مبقاش فيك حمزة كنعرفك كتبغييه
أميمة: (بقا فيها) اوا هو للي ضبر عليها اش داه يخوني
حنان: اشمن خيانة واش نكذبو الكذبة ونتيقوها
أميمة: مكنهضرش على دابا كنهضر على من شحال هادي
حنان: امم، شحال جاتك نتي دلفلوس ؟؟
أميمة: بحالك راه قسمتها معاك ولكن نسدو فامنا ومنبينوش علينا الفلوس حتى تبرد القضية وخبيهم مزيان
حنان: نتي قبيلة عيييت نغزك تسكتي تسكتي ونتي حليتي فمك مع ختها لكبيرة موليتيش شديتيه وعاد البرهوشة واش صورات ولا لا
أميمة: ما شعرتش باينة حتى هي غتحفرلي ولكن انا غندير دخلت فانهيار عصبي وماعرفت شنو نقول جوج دميعات نطلب سماحة قدام الناس ومريضنا معندو باس!!!
مريم: (ورات طبيبة الڤيديو وبقات كتبكي وتألم وتكتائب عطاتها تمشي لطبيب نفسي وكتبت ليها دوا على لحريق خرجت شادة فباها)
دابا هاد لخبيثة ابابا متكونش دار..
رشيد: صاااافي امريم دابا شوفي غير صحتك علاش مشيتي عند هاديك الهبيلة ݣاع تهضري
مريم: ممشيتش انا شفت غير مرت عمي للي جاتها النفس على ملاك ومشيت نفاك
رشيد: متمشيش متهضريش معاها واش حنا باغيين نفاكو المنامة ونتي ماشية تهضري معاها!!
مريم: (مبغاتش تزيد تعصبو عارفة باها كيتعصب من بعد كيتهدن، مشاو للدار دخلو الحومة كان صقيير)
بابا غنخليو ملاك بوحدها!؟
رشيد: (مجاوبهاش حل لباب بالساروت دارلها إشارة دخل وهو رجع لطموبيلتو مقادرش يدخل للدار)
~~~~~~~~~~~
أذن الفجر ملاك وهي مزال غير كتخمم وتفكر ناضت كطل على حمزة فهاد الظروف وعارفة راسها خسرت بزاااف ولكن مقدرتش تشفى فيه بلعكس حتى هي جاتها ذكريات مع باه قبل ميتسيف راه كان ظريف معاهم وكيعاملهم بحال بناتو قبل ميصدمووولدو وقالو بغيت نتزوج بملاك، حطت راسها بلاصتو كانت تحماق الا باها وقع ليه شي حاجة وهي هنا عاد الاحساس بالذنب!!!
ملاك: (وقفت شادة فدوك القضبان ديال الحيد كطل عليه) حمزة
حمزة: (هز راسو) رتاحي املاك غدا ان شاء الله نشوفو كنديرو
ملاك: البركة فراسك
حمزة: (زفر بقهرة) سمحيلي املاك
ملاك: شنو غنديرو؟!
حمزة: مزال الخبرة مزال الكاميرات غدا غتجي طبيبة (بحرقة ولبكية غالبة كلامو) خاصني ندفنو املاك ميمكنش نبقاو هنا
ملاك: (بقهرة) ميخليوكش تمشي؟؟ نتا ماشي مشدود على الحشيش ولا لقتيلة غير رغبهم غيخليوك
حمزة: (ها باش هي عندها مكانة خاصة، برغم ازمتها كتفكرلو ماشي حبا ولكن إنسانيا واخا هاد الإنسانية ديالها هي للي خلاتها هنا!!)
عطيتك عهد الله مغتبقاي هنا وحقك غنجيبو ليك
ملاك: (عينيها دمعو) وبابا؟!
حمزة: ندير جهدي كامل باش ترجعو كما كنتو وغترجعي للحومة وراسك مرفووع نتي مدرتي والو هادي اول حاجة حطيها فراسك وخليك تاايقة فراسك ماشي هادي للي غتهرسك بلعكس غتقويييك
ملاك: (حركت راسها باه مشات القنت جلست جا شي واحد خرج حمزة على للي فهمت يمشي يصلي هي كانت عارفة عليه مكيزݣلش الفجر مع باها وباه وجدها وعمها تفكرت اورطيغا مسخاتش بيه ولكن غيكون صافي كرهها، هو غير السلام مع حمزة كانت كتنوغشو اما دابا يكون كرهها!! واخا تمنات غير يجي يحيح يدير شي حاجة ولكن هاد الطريقة قاسحة للي هو صافي هز يدو عليها!!
بقا فيها راسها بزاف حيت تظلمت ظلم كبيييييييير وهادشي غيهرس كولشي وكل علاقاتها…
بقات هكاك راسها غيطرطق حطت راسها على الحيط مقدرتش تشرب حتى جغمة ديال لما كل تفكيرها كفاش غتخرج من هاد الحبس!!! الحبس للي عمرها فكرت شي نهار دخل ليه ولا جاتها حتى على البال ها هي فووسطو حتى البرد للي تماك خلاها باردة حتى من لدااااخل!!!! ولكن حمزة مرجعش واخا بدا صباح كيطلع!!)
حمزة توقع الشاف ديالو غيدير معاه المزيان باش يخرج لدفينة بقا فالمكتب شحال سنا ورقة عاد خلاوه يخرج مع دراري للي غيرافقوه بلا مينوط ركبو فلبارتنير داوه (لا موغ ) باش يشوف باه كانو عمامو وعائلتو تماك سلمو عليه عادي اصلا الراجل مكيتحاسبش على هادشي دالخيانة سوا ثبتت عليه ولا لا!!
واخا لي تخانت هي بنت عمو غير العائلة كاملة عارفة قصتهم وانه شحال من مرة بغا يطلق كيوقفولو هوما نيت عمو عنقو كيبكي على خوه وحتى هو مقدرش يشد راسو، دخل شافو قبل ميديروه فالصندوق طلب سماااحة وعطاه سمااحتو من قلبو واخا مجرووووح بزااااف ولكن كيقنع راسو بالسيف باش ميردش اللومة عليه حيت حتى هو طرف فهادشي!!
باسو فجبهتو ودموعو فراس نيفو دخلت مو كتبكي عنقااات حمزة وكتغرد زادت بقات فيه لمن غيخليها وهوما بجوج مشاااو باس راسها
نجية: مشاااا باك اولدي مشااااا
حمزة: (باس يدها) دعيلو بالرحمة أَمِّي وبشوية على صحيحتك
نجية: شنو غدير اولدي فهاد الموصيبة
حمزة: حضي غير ديك الكارثة متهربش متخافيش غنخرج اليوم!! شنو قال عمي رشيد؟؟
نجية: حالتهم اوليدي ولكن هوما للي واقفين على ݣنازة باك هو وخوتو الله يجازييهم بالخير
حمزة: بنتو راه معذبة بزاف تكرفست عليها ديك الموووسخة واش ملاك ديال لحباسات امي!!
نجية: شواتنا شواااتنا
حمزة: با مات بمسبتها والله متبقى فيها بغات غير تصيفطني الحبس انا نصيفطها فين صيفطات با
نجية: متقولش هكاك اولدي باك ربي بغااه ووصلت نوبتو (رجعت كتعنقو وهي مضروووورة غير كتبكي جا الوقت باش يخرج حمزة رجعوه لبارتنير على ميديو باه للجامع دالحومة يصليو عليه وصلو لتماك كيشوف رشيد للي كيشوف فيه شوفة غرق فراااسو تمنى يموووت ولا هاد النظرة منو!!
هبط حمزة دايرين بيه صحابو للي ملابسينش اللبسة باش يدخلو معاه الجامع صلا عليه صلاة الجناازة وهو كيبكي خرجو من تماك وكولشي ركبو ماشيين للمقبرة حضر لدفينة للي دفنو بيدو وتم ماشي وهو يوقف عم ملاك للي كيشوف فيه مخزز دفل على صندالة حمزة جا يبعدو البوليسي وحمزة شدو رشيد جر خوه كيعاتبو وحمزة غير متبع وشافو مشا مقهووور خارج من المقبرة وبين عينيه غير بنتو شي حاجة واحلة فحلقو مقادرش يخرجها ملاك عندها مكانة خاااصة من بين خوتها ودابا مشاااات، زفر وهو شاد فصدرو للي كيألمو ومشا لطموبيلتو كيشوف حمزة ركبووه ومشااو…)
خديجة: (فاقت بكري اصلا محلالهمش نعاس وامينة فديك الحال ناضت لطواليط كولشي مزال متكي، جالسة كتفكر فملاك شنو وقع وحتى مريم لبارح كتهضر معاها بغمووض ناضت من تماك مكملة روتينها هزت تيليفونها مشات لبالكو ديال الكوزينة قبل ميفيقو صونات على مها للي جاوبتها سدت باب البالكو عليها)
زهرة: (منعست مشافتو) ابنتي!!!
خديجة: ماما شنو وااقع عندكم فين ملاك علاش كتصوني تليفونها طافياه!!! مريم قالتلي منسولش عليها بزاف شنو واقع حتى بابا مكيجاوبنيش
زهرة: راكي بوحدك؟!
خديجة: اه غير قولي واش فرتكوها هي ومراد واخا ݣاع مو راه كتمووت الله ينجينا
زهرة: (بقات فيها صاحبتها) اويلي!!
خديجة: والله، راها كومة مسكينة وطبيب قال ليوسف غيشوفو الا مستاجباتش غدخل فشي حالة خايبة بزااف للي تاليتها موت على للي فهمت عندها شي نزيف فالراس
أمينة: لا حول ولا قوه الا بالله العلي العظيم (كتبكي) الله يا ربي خفف علينا حنا تحت رحمتك
خديجة: شنو واقع اماما؟! عفاك قوليلي
زهرة: ختك حتى هي تعداو عليها ابنتي ولسقولها تهمة راها فالكوميساريا
خديجة: اويلي اشمن تهمة؟!
زهرة: أميمة مرت حمزة معرفت كدارت ليها وحبستها مع حمزة وجابت ليهم البوليس (نفسها كيتقطع بلبكى) وكان تشوفي كيف خرجو لحبيبة ديالي من الدار وداوها البوليس
خديجة: اويلي!!!!
زهرة: (كتمسح دموعها) متبقايش تقولي اويلي، بنتي غيوقف معاها اللي خلقها هدا غير امتحان ليها لحبيبة ديالي الله ياخد حقها
خديجة: اوا؟!
زهرة: باك حلف لا تبعها لبارح وانا راني كنسايس معاه لبارح ناعس حدايا وهو كيبكي جدك مبغاش يسكت من نݣير مرت عمك مسكينة تفقست بزاف ومي حلو طلع ليها السكر راها فبيتها طايحة
خديجة: وشنو غنديرو؟!
زهرة: غتسكتي قدام ناسك بحال مقلت ليك والو حتى نشوفو شنو غدير ختك راه خرجت صباح دات ليها محامية
خديجة: واش نجي اماما؟! ميمكنش نخليوها بوحدها
زهرة: لا بنتي خليك تماك معندك فين تجي ولكن سدي فمك
خديجة: وعلاش هادشي كيتقال ملاك داك نهار قالتها هادي منوياليش على خير ومسمعها حد
زهرة: قالتلها لحبييييبة قالتها…..
خديجة: (قطعت مع مها منين سمعت الحس دارت تليفونها فجيب بينوارها وبقات كتشوف الجو خايب مرة مغيم مرة تخرج الشمس ولكن البرررررررد دق باب الزاج ديال البالكو ضارت لقاتو يوسف كيدير ليها إشارة باش دخل دخلت باسها فحنكها تبسمت)
يوسف: مالكي؟!
خديجة: واالو
يوسف: علاش جبتي هنا البرد عليك!!
خديجة: غير جيت وصافي الجو دغيا كيتقلب
يوسف: دخلي باش متمرضيش نمشيو عند طبيب ديالي ومن موراها نجيبك هنا ونلحق على اورطيغا
خديجة: نمشي معاك
يوسف: لا نتي خاصك الراحة من نهار حملتي مشفتك جالسة مرتاحة الا بغيتي اليوم نمشيو لداركم
خديجة: لا لا.. راك عارف الجو تماك والموت خاطري مغيكونش مرتاح تماك اكترية داك السيد كان عزيييز عندنا الله يرحمو مسكين
يوسف: اممم لا حول ولا قوه الا بالله العلي العظيم هو نيت للي مات ليهم حفيدهم
خديجة: اه مسكين.. فين غيثة؟! فاقت؟
يوسف: مزال مخرجت من لبيت انا نخرج نجيب شي حاجة لفطور تبغي شي حاجة
خديجة: (حركت راسها بلا اصلا مسقووظة تفكيرها فملاك جا ماشي وتم راجع عندها)
يوسف: شي خبار على ملاك!!
خديجة: فالدار!! واقلة مخاصمين وبابا راك عارف مغيخليهاش تجي لفاس
يوسف: داكشي للي قلت حتى انا مهم انا مشيت (مشا لبس جاكيط ديالو كيمشي غير بشوية مزال الدوخة والراس كيضروه الا جهد على راسو وعاد الهرس هي بقات غير واقفة صونات على مريم)
خديجة: فينك اصاحبتي واش مشيتي عند ملاك
مريم: (كتهضر بشوية) بلاتي شوية اخديجة انا عندها
خديجة: غير تكملي صوني علية راه غنحماق هنا..
مريم: (صونا عليها راجلها مجاوبتش كتسنى برا خرجت طبيبة من الغرفة ومشات عند البوليسية للي تماك واقفة) عفاك واخا نشوفها عفاك اختي (كانت رغبتها بزاف)
البوليسية: غير 5 دقايق اختي
مريم: الله يسهل عليك اختي الله يرحم ليك الواليدين (دخلت عندها لقاتها كتلبس حوايجها وكتبكي غير شافتها عنقتها)
صافي احبيبة دابا يفرج ربي
ملاك: (بقات غير كتبكي كتحس بحݣرة خاايبة اكترية داك التقلاب للي دارت ليها طبيبة اول مرة فحياتها تقلب والمشكل هنا تقلبت ليها العذرية من جوج جيهات كتمسح وججها وباينة عليها مفقوووسة ووجها شاااحب)
كيف بقات ماما وبابا
مريم: دابا فكري غير فراسك واش خاصك شي حاجة
ملاك: بابا شنو قال؟! انا عارفة ماما غتيق فية بابا للي شنو دار وشنو قال؟!
مريم: ملاك حبيبة دابا ديها فراسك
ملاك: (بحزن اكبر) يعني سخط علية (بتنهيدة) حتى خدمتي غيوقفوني هادشي للي قالتلي المحامية قبيلة
مريم: مسخط والو راه انا وياه صباح قلبنا على المحامية
ملاك: بالصح؟! ولكن مقلق !!!
مريم: شوفي متفكري فوالو دابا
ملاك: الله يهديك اختي راه كولشي ضاااع كولشي خسرتو كفاش منفكرش راه موتة دالكلاب حسن من هادشي للي كيوقع لية!!!
مريم: ومراد؟! فخبارك شنو وقعلو؟!
ملاك: (بخوف) شنو؟!
مريم: خالتي أمينة دارت كسيدة خايبة وراها كومة
ملاك: اويلي امتى!!
مريم: لبارح حتى هي, شي عين كانت تابعاكم بجوج يا ربي السلامة
ملاك: ودابا كيف بقات ناري غيحماق مسكين!! الا وقعت لمو شي حاجة وديك السيدة الله يعمر ليها الدار
مريم: حنا للي عاد عرفناها وقطعت لينا قلبنا الله يكون معاه ومعاك اختي (خرجو برا شافت حمزة دخلووه جات البوليسية دخلتها) متخافيش انا غير على برا مع المحامية
ملاك: صافي غير سيري وقولي لماما انا بيخير وحتى نتي سيري ترتاحي متهزووش همي (مع تنطقها بقات كتبكي دخلتها البوليسية بقات مريم غير كتبكي على ختها دخلت حمزة شافها كتبكي)
حمزة: سي طارق انا واخا نعرف المحضر يتكتب فيه دابا تافقنا انا ومرتي باش ندخلو ملاك للدار على اساس دايرة معايا ونديرو ليها القالب باش نظحكو عليها ولا شي حاجةا!! مهم هي مغتزيدش ليلة فالحبس وأصلا فين تقرير طبيبة؟!
ملاك: (شافت فيه كتمسح دموعها كان عامر تراب باينة من حالتو كانت فالقبور حنات عينها تفكيرها فموصيبتها وباها ومراد!!!)
جاو البوليس خداو تسجيلات الكاميرات للي فالحومة دق وواحد فباب أميمة عيطولها جات علمها باش تلحق عليهم للكوميساريا وعطاوها الاستدعاء وأكدو باش متسافرش حتى يقدموهم للمحكمة غير الا بغات تنازل حركت راسها باه وجاتها نجية
نجية: عفاك ابنتي سيري خرجي الولد يوقف على ݣنازة باه (بغات تبوس يدها) عفاااك ابنتي
أميمة: الا خرجتو غيقتلني واش مكتفهميش وحتى هاد البوليس علاش غيبغيوني نتنازل شي إن تماك!!!
نجية: ميقدش ابنتي مكاين لي يقرب ليك عطيتك عهد الله الا خرجتيه مغيقرب ليك
أميمة: اوا انا شنو غربح؟! شنو خارجلي من هادشي عارفاه غير غيخرج غيطلقني!!
نجية: (بقات كتشوف فيها) للي بغيتي ابنتي (خرجت زهرة وهي تشوف أميمة محست غير قصدتهها جراها من شعرها بلا متشعر)
زهرة: انا نوري لمك شنو هي اليهودية!!! انا تديري لبنتي هاكا وتفقسيلي بناااي (قبل متهبطها جاو لعيالات كيفااكو وهربو أميمة للي كتعاير وتسب من الصمطة لتحت كولهم ضربوها!!!)
زهرة: والله متبقى فيك يا الهبييلة حسابلك معندها عائلة والله يا الكلبة حتى الحبس للي بغيتي دخليلو بنتي غدخليلو نتي ولا انا ندخلو عليك غاااا صبري
(قدات حوايجها هازة راسها من حدا لعيالات للي جالسين فلكراسا)
غير للي موصلش لالاها ملاك حلت فيها فمها الله ياخد حقها من أي واحد طعن فيها ويبين فيه البرهان
(تمت ماشية وهي تلقاها وحدة من الجيران جات عندها بعصبية)
شنو!!!
الجارة: (جرتها مبعدة على الناس كتهضر بشوية) انا كنت خليت صاك بنتك وسطلها عندي فالدار خفت عليها وداك نهار منين بغيت نخرجو ديك لهبيلة بغات تبخ ريتها
زهرة: (بعصبية) عطيهملي، والله يرحم بيها الواليدين
الجارة: سولت الكسالة الحمام هاد صباح.. الحمام للي كانت فيه بنتك وكانت فيه حتى حنان (شيرت ليها لدارهم للي اونفاص معاها) ويمكن بحال والو صورتها وهي كتلبس
زهرة: حنان بنت حَدْهُمْ؟!
الجارة: هي ولكن اختي مقلتلك موالو
زهرة: هاي هاي دايرين على بنتي عصابة!!
الجارة: سيري سولي على بنتك متخليهاش تماك مظلومة
زهرة: الله يرحم بيها الواليدين
الجارة: اودي الظلم مكيبغيه حد
زهرة: كاين ربي… وبناء مدارتش معندها فين تخاف حقها يرجع يرجع…
الرئيس: (كيقرا المحضر وشهادة الطبية ديال ملاك للي تفلات كاملة من عنقها لتحت) جلس ابنتي
ملاك: (جلست طلب منها تعاود ليه كولشي ومتنسى حتى تفصيل حيت القضية مبقاتش غير خيانة زوجية) …حتى دخلاتني وسدت لباب شي شوية جات جايبة البوليس بحال كانت عالماهم من قبل حيت معروف عندنا البوليس والوقاية كيجيو معطلين
طارق: (تبسم)
ملاك: احم لا زعما ماشي مكيديروش خدمتهم غير جات علية انا وجاتهم الروح الوطنية
حمزة: هه صافي املاك فهم.. سي طارق انا فقت دايخ ومعاقلش على راسي وبيت الواليد ماعمري نعست تماك علاش دابا غندخل ليه وانا عندي بيتي؟!! بيتي راه حداه تقريبا وأصلا مكنتش عوال نعس داير مع دراري نحركو شوية ولعبو كورة
ملاك: تكون عطاتك شي حاجة دنعاس فلغدا!! وحتى باك الله يرحمو قلت تغدا بكري ياك موالفين كتاكلو مجموعين
حمزة: ڤوالا حنا معروف فالدار كنجلسو مجموعين هو لي يشهد (بحيرة مخرج عينيه) مشا عند الله
الرئيس: الله يرحمو، خاصك دير تحليلة ديال الدم
ملاك: والتصويرة غتكون صوراتني حنان حيت هي للي كانت حدايا منين كنت كلبس حوايجي وأصلا كانت باغية تجبد معايا الهضرة وانا مبغيتش
حمزة: (كيشوفها صفرااا) انا مكيهمنيش حقي يرجع بكترة ميرجع لهاد بنت الناس..
ملاك: حتى نتا اخويا حمزة خاص حقك يرجع راه باك للي مات اه واميمة كانت كتهضر مع واحد البوليسية فاش جاو بحال زعما صحابات
طارق: (مخرج عينيه) شكون كان؟!
حمزة: (كيحاول يتفكر) معقلتش خاص نسولو دراري لي جاو انا كنت مرفووع (شاف فملاك) براڤو عليك..
~~~~~~~~~~~~~
اورطيغا: (مقدرش ينعس كيخاف ينعس وتفيق وهو ناعس ولا تحتاجو ولا العكس!! جغمة دلما هبطها من حلقو بالسيف.. جاه أبيل من عند شريف ان الحاج تزاد عليه الحال وغير كيهترف بسمية أمينة بقا فيه ولكن عقلو عااامر بمو هاد الساعة داوه هو المصحة فين موالف كيتعالج وهو بقا بووحدو كيتسنى شي معجزة من عند الله..
جات غيثة للي من 5 دصباح وهي معاه جابت ليه قهوة كحلة كفاش خلاوها دخل مفهمتش ولكن باينة ضارت فلوس)
غيثة سيري للدار
غيثة: منقدرش خاص نبقى هنا نخاف يرجع
اورطيغا: شكون؟
غيثة: للي بغا يقتلها واش مكتشوفش نتا فرمضان ودابا طاتي جاتك عادية!!
اورطيغا: (جا فبالو سعد دخلوه تناوي) عارفة نتي شي حاجة
غيثة: (خافت يمشي يتهور بقات غير كتشوف)نتا فين شاك؟!
اورطيغا: (هز حاجبو) فسعد !!!
غيثة: لا عمو سعد ميمكنش يدير هاكا
اورطيغا: امم.. (حرك راسو بأه جغم من القهوة خاصو يكمي يرد الراس شوية)
غيثة: فين ملاك؟! علاش مجاتش
اورطيغا: شنو بغيتي ملاك تجي تبات معايا اغيثة (ببرود) هي فدارهم
غيثة: لا انا غير سولت
اورطيغا : قلت ليك من شحال هادي متعاوديش تسولي هي متتخرجش فهاد الوقت!! مهم انا نخرج السرجم برا نكمي الا رجع طبيب عيطي لي!!!
خديجة: (خدات فطور لاورطيغا من بعد مفطرو هوما ومشاو طبيب ديال يوسف كانت حالتو في تحسن ومن تماك مشاو لصبيطار طلعو عندو نيشان حيت كانت وقت الزيارة لقاو غيثة تماك للي حسابلهم مشات عند مها صباح بكري)
غيثة: مقدرتش اخويا نعس بغيت نشوف غير طاتي بغيتها تفيق مزال صورتها وهي واقفة حدايا حتى شفتها بدماياتها مخلاتنيش نعس ولا رتاح
يوسف: (كيدابع بصباعو حنوكها) دابا تفيق ان شاء الله
خديجة: (حطت بانيي ديال لفطور فالشومبر للي كيعطيو لمراد يرتاح وفراشو ممقيوسش اذا منعسش) غيثة فطري راني جايبة بزايد فين مراد؟
غيثة: خرج تيكمي فالسرجم
خديجة: (مشات تشوفو لقاتو كيكمي بشوية وسااهي فسما) مراد.. اجي تفطر اخويا
اورطيغا: (لاح داك الݣارو بعيد جايبو فالحجر) علاش تتعذبو راسكم اختي
خديجة: مكاين بو عذاب كيف ب..(صونا تليفونها كانت مريم ضرووري تجاوب)
سمحلي نجاوب
(بعدت شوية وحيت الدنيا خاوية صوتها مسموع واخا كتهضر بشوية)
وي مريم امدرا!!
اورطيغا: (باغي يسمع بقا فالسرجم عاقد حواجبو وطااالق ودنيييه)
خديجة: صافي غتخرج!! الحمد لله يا سيدي ربي!!!
وعلاش اصلا خلاوها تبات؟!
يااك!! بنت الحرام دايرة عصابة عليها!!
صافي واخ..
بالصح!! ولكن هي غير مظلومة!؟!!
تجي عندي هنا ترتاح
صافي واخ.. بسلامة باشما جاوبيني انا كنتسناك
اورطيغا: (هو عارف شي حاجة ماشي هي هاديك ولكن!! عاود كيرد السيناريو كفاش عصابة وكفاش ملاك ومو فنهار واحد!! كفاش اقرب جوج دالناس على قلبو وقع ليهم هاكا فنفس نهار وفنفس الوقت تقريبا!!!)
خديجة: (بلا عقل مشات حدا يوسف مبغات تعاودلو والو حتى تبان براءة ختها)
~~~~~~~~~~~~~~
زهرة: (وصلت عند رشيد للي كيتسناها، كانت القهوة محلولة ولكن لعزو ديال صاحبو، تماك دايرين رجال ونسا فالدار طلعت للطموبيل شاعلة)
بنتك غتخرج حيت صدقو دايرين عليها عصابة
رشيد: شكون؟!
زهرة: أميمة وحنان وعلم الله شكون اخر ميمكنش هاد الطرنونات يديروها بووحدهم
رشيد: (مهضرش هو عارف مريم دات محامية ليها دابا وراه واقفة معاها حيت هو للي عطاها الفلوس وجاب نمرة المحامية شافتو ساكت ولكن حزن كبيير فعينو)
زهرة: بنتك راه مظلومة ارشيد واش غتسمح فيها وهي مظلومة؟!
رشيد: (شدو طريق لفاس) زهرة!! (سكت شحال) مكانش خاصها دخل لتماك كان عليها تجي عندي
زهرة: كتااابت شنو نسمحو فيها!!
رشيد: انا مقلتش نسمحو فيها غرجعو من عند السيدة ونمشيو عندها
زهرة: الحبيبة ديالي الا مكناش حنا معاها ربي راه وااقع معاها حسن منا ومن كولشي!!!
رشيد: زهرة يهديك الله
زهرة: امين يهدينا ويهديييك!! (شادين طريق لفاس كتعاود ليها شنو قالت ليها الجارة…)
ادم: (كان فدارو مخبي منين مزال مكيقلب عليه حتى واحد إذا غيثة مزال مهضرت واخا معندها حتى دليل الا مبغاش الاصابع تشير ليه..
دار اتصالاتو عرف أمينة مزال مماتت صونات عليه أميمة فالنمرة للي عاطيها قطع عليها وبلوكاها اخر همو دابا هي هادي للي شاد عليها بزاف دالادلة ميقدرش يغامر براسو الا مشدش على شي واحد واخا يكون صديقو شي دليل للي يخليه ديما داير احتياطو، وعاد حلها ساهل مغيحنش فيها..
صونا بريڤي على غيثة جاوبت بصوت مخنوق)
حبيبة تتبكي؟!
غيثة: (خرجت عينها وبعدت من حداهم) مزال عندك الوجه للي يصوني علية
ادم: علاش مكملتيش داكشي للي قلت ليك بغيتيني ندير داكشي باش واعدتك!!
غيثة: متقدر دير والو دابا حيت أنا غنفرش كولشي، صافي!!! بغيتي تشوهني للي بغيت ديرو ديرو مبقاش تيهمني الا جات شوهتي على حساب حياة الناس صافي غير شوه
ادم: متأكدة!!
غيثة: (قطعت وهي كترجف ميمكنش على اعصاب مركب فيها رجعت عند لوخرين)
اورطيغا: (تنوغش بزااف على ملاك وصل عمر ووفاء وخالتو معطاهمش وقت برااف تم هابط فدروج حتى كتبانلو زهرة ورشيد طالعين تصدم من وجودهم بقا وااقف كيشوف فيهم)
زهرة: (كسرت داك الصمت) ولدي كيف بقات أمينة!!
اورطيغا: راه.. اجيو معايا (تم راجع متوقعش نهائيا يجيو مشا داهم فين كاينة بقا رشيد برا حيت اورطيغا بين مو فالعناية ملبساش دخلت غير زهرة شافتها من الزاج وكانت حتى خالتو تماك بقات كتبكي، كولشي لبنات تجمعو عليها حيت سخفت مخرجينها هو غير كيشوف فيها ضارت عندو زهرة وهي مدمعة ولكن بلا غوات ونديب شدت فيدو وعينيه مضببين)
زهرة: (بصوت مخنوق وكيرجف بلبكى) ان شاء الله ختي أمينة غتبرا وترجع حسن من اللول حنا علينا بالدعاء اولدي ربي كبير وحنين وكيحن فينا هدا غير امتحان من عند الله اولدي (سالو دموعو) خليك قوي اولدي خاصها تفيق تلقى ولدها حداها فجنبها
اورطيغا: (مسح دموعوو مقادرش يهضر)
زهرة: غتبرا اولدي بجهد الله غتبرا وترجع لينا..
اورطيغا: (حرك راسو بأه كيحس بيها كتفهمو بزاف بقات كتهضر معاه تخفف عليه وهو مقادرش يخرج من حلقو حتى كلمة جات عندو خالتو كتعنقو طلقت منو زهرة.. بعد منها بشوية)
انا نمشي نقضي شي غرااض..
(خرج من تماك مخنوق ركب فطموبيلتو وشد طريق لصفرو..)
رشيد: (كان بوحدو وااقف حتى يوسف معطاهش صواابو اكترية منين كيسولو على ملاك وفين غابرة، صونا على مريم كيعرف الاخبار فين وصلو)
اوا وشنو دارو؟! راه عيطلي السيد للي خدام معاها
مريم: شنو قال؟!
رشيد: غادي توقف من الخدمة حتى تجيب برائتها من المحكمة وترجع تخدم
مريم: ولاد لحرام حتى هوما غيزيدو عليها
رشيد: وفين هي؟!
مريم: لداخل مع المحامية دخلو شي بوليسية كيتصنتو ليها و كيتسناو أميمة تجي ومن موراها غدير محضر ونمشيو للمحكمة باش ملاك ترد حقها هادشي داخلين فيه بزااف ابابا وحنان فاش مشاو عندها يعيطو ليها تجي ملقاوهاش كاينة
رشيد: يااك!! (تم جاي عندو شريف للي جا يسلم عليه) ياله ابنتي الله يعاون..
اهلا ولدي لباس عليك…
~~~~~~~~~~~~~~
أميمة: (عيطولها اتاني مرة باش تجي تعطي الإفادة ديالها ولكن خاافت وبغات تزيد تعطل وتخليهم يتعذبو كتر مشات عند حنان ملقلتهاش ختارت حتى هي تهز صاكها بقات بعبايتها الكحلة خرجت كتسلت وأصلا دايرة فيها مصدومة مكتبغي تهضر مع حد مشات للمحطة يديها لفاس باش تركب فتران تمشي لطنجة..)
~~~~~~~~~~~~~
اورطيغا: (مع دخل كتبانلو مريم مع شي وحدة غير شافتو تصدمت من وجودو هنا)
مريم: سمحيلي أستاذة واحد دقيقة.. (هو وقف وهي مشات عندو بلا مقدمات) شنو كدير هنا؟!
اورطيغا: (ببرود) كان جاني شي ميساج من ختك ودخلوني فيه تناوي مغتكونش هي للي كتباتو ولا حتى صيفطات التصويرة
مريم: راه بالصح ماشي هي !!!
اورطيغا: عارف، عارفها مغدير حتى حاجة من هادشي داكشي باش جيت الا كان غيفيدها هادشي
مريم: يعني نتا متيقها مظلومة!!
اورطيغا : لا هي ظاالمة حيت مشكلتي معاها هي ديك الدار للي من الأول دخلت ليها من بعد متيهمش علاش وكفاش من اللول كان شرطي الوحيد عليها هو تبعدو وهي ختارت تلوح هضرتي فأقرب زبالة ودخل
مريم: هي غير تزرفت بغات دير الخير
اورطيغا: ختي الله يحفظك.. (زعما سكتي) اشمن خيير اشمن خير غديرو فدوك ل(سكت) اش داها دخل لتماك!!
مريم: شوف دابا للي وقع هي تظلمت وبزاف تجي معايا (تبعها) هادي هي المحامية ديالها (هضر بأدب واخا كيبان معصب عاودلها الهضرة وكان هادشي فصالح ملاك للي وراها الميساج والتصويرة هوما كان غراضهم يشوفها)
المحامية: (كتشوف وقت اتصال أميمة البوليس مبيناتهم بزاف) يعني البوليس صونات عليهم قبل حتى متدخل عند حمزة بشي دقايق
اورطيغا: علاش هي دخلت عندو!!
مريم: لا زعما بغات تقصد ليك منين دخلت مع أميمة
المحامية: اه وحتى هو كان مخدر ومخلياه فلبيت (رجعت شافت فالتصويرة)
اورطيغا: ختي هاد التصويرة راه ميمكنش تبقى تضوور هاكا السيدة راه محجبة ووو مجاتش!! راه عمرها عرفات حتى ذراعها باش دابا يشوفوها المنواالة
المحامية: لا غادي تعطى للقاضي مغطية مغتكونش هاكا
مريم: كيف بقات خالتي أمينة
اورطيغا: (حرك راسو باشارة يعني باقية هي هي تم راجع فحالو مخلي النمرة المحامية منين تحتاجو يجي وهو طلع للطموبيل ديالو بقا فيها شي 5 دقايق بحال واحد مصدووم باغي يدخل يشوفها يسمع منها ولكن لا الوقت سامح لا هو مستاعد ستواجه معاها ويبقى مكالمي تظلمت اه ولكن مسمعتش لهضرتو!!!
تم شاد طريق لعند مو للي مخاصوش يخوي من حداها حتى دقيقة…)
مريم: (بقا غير ساهية باينة كيبغيها غير منين جا وهو فهاد الحالة لي كان باين عليه التعب بزااف وفنفس الوقت غاااضب، فنفسها) مزيان مشافتووش ملاك كانت غير غتزيد تأزم..
حمزة: (جا المحامي ديالو للي تسناو أميمة تجي منين مشاو قلبو عليها ملقاوهاش وحتى دارهم معندهم عليها حتى شي خبر)
إوا شنو غندير دابا غنبقى محبوس حتى تجي؟!
المحامي: حنا نتسناو نتيجة ديال التحاليل قربت توصل
حمزة: (شاف فالشاف) كولشي مخططة لييه
طارق: حاليا نتا غتوقف من الخدمة ولكن من حقك تابعها وانا معاك فأي حاجة بغيتها
حمزة: وحفصة!! شنو غندير معاها انا مغنسكتش على حقي واميمة مكانتش عندها صحابات بوليسيات
طارق: خاص مرتك تحضر
حمزة: (هو صافي قرر غيديميسيوني ولكن خاصو يجيب حقو منها او بالأحرى حق ملاك للي جالسة ولكن غير مصدوومة مخرجة عينها)
ملاك صاڤا!!
لا رد منها غير كتفكر وتخمم تحلل وتحاجي وتفصل…
(دخلت المحامية ديالها عطاتهم شنو جاب مراد للي الميساج جاه وملاك تليفونها كان عند أميمة وبشهادة البوليسي حيت زعما نسات ملاك تليفونها فالصاك دلحمام وفاش جات أميمة ولقات داكشي حدا لباب وهي عيطتلهم قارنو بين وقت الميساج وبين وقت فاش عيطت لبوليس لقاو من مورا فاش عيطت ب10 دقايق زاد هادشي أكد انهم غير متفاهمين عليهم وهنا غيخرجو بجوج بيهم… وغيتم استدعائهم الا كان شي جديد
~~~~~~~~~~~~~~
رشيد: (راجعين فطريق وزهرة كتبكي) دابا تفيق ان شاء الله ويكون خير
زهرة: (بقات فيها بزاف) تحلف ما هي للي مجبدة تماك مسيكينة وجهها غاابر ومهرسة الله ياخد فيه الحق هدا للي ضربها وهرب
رشيد: حتى ولدها هاكا وقعلو فرمضان!! شي واحد هدا للي تابعهم ولا مقصدهم ولا شي عصابة نييت
زهرة: ديني عند بنتي
رشيد: (هو كان ماشي اصلا لتماك نيشان للكوميساريا وقفو فباركينغ قطعت طريق لتماك كانت مريم واقفة شادة فجنابها) شنو دارو؟!
مريم: (فرحت منين جا باها) لقاو فالدم دحمزة عاطياه شي حاجة كدوخ بحال سيرو دنعاس
رشيد: وهي شنو كتقول؟!
مريم: ملاك؟!
رشيد: لا الجايحة دمرتو
مريم: عيطو ليها تجي مجاتش مشاو يجيبوها ملقاوهاش ودابا غيلونصيو بيها هربت بنت لحرام
رشيد: هربت!!
زهرة: يااااا ربي مع الڤيراج اللول يلقطووها وفين بنتي فين ملاك؟!
مريم: مزال لداخل حيت جا الوكيل وخاص يعطيو أقوالهم دابا باش يخرجو وعاد فيها شي بوليس حتى هوما عندهم يد القضية مرونة وخاص الكلبة تحضر باش يكملو الإجراءات دالبراءة
رشيد: (حرك راسو باه وبقاو كيتسنااو حتى شافوها خرجت هي وحمزة والمحامين غير شافت واليديها طلقت بكية بحال دراري صغاار للي كتغيب مو نهار كامل وكيضربوه غير كيشوفها كيبكي ويشكي ليها مشات عندها مها عنقتها)
زهرة: صافي احبيبتي محنة ودوووز مكتاب الله ابنتي والحمد لله على كولشي…
ملاك: (من بعد مسالات العناق مع مها شافت فباها للي داير يديه من مور ظهرو وحاني راسو مشات عندو وهي كتشهق بلا بكا)
بابا.. !!!
حمزة: (جا عندو) عمي ملاك مظلومة بزااف مسكينة من لبارح وهي مقهوورة كانت داخلة تعاون حتى طاح عليها باطل وباطل صعيب وقاااسح
رشيد: (شاف فبنتو للي بكترة القهرة كطلع ليها الردة شد فكتفها وهي ترما عليها عنقااتو كتبكي وهو كيطبطب عليها)
صافي براكة عليك ابنتي
زهرة ومريم كانو واقفين على اعصابهم مستريسيين خايفين من شي ردة فعل خايبة منو راه كان قال صافي معندو بنت سميتها ملاك ولكن زهرة عارفاه غير غيشوفها كيتطفى داك الغضب..
رشيد: علاش ابنتي دخلتي ديك الساع اجي عندي
ملاك: محستبليش كتكذب حتى فهادشي!!
رشيد: حقك دابا يرجع ابنتي..
طلعو ركبو ملاك كانت فيها السخفة من لبارح بحال هاد الوقيتة مكلات مشربت ولدابا مزال نفس الحالة غير للي تحسن ماشي خروجها من الحبس بكترة منين شافت باها ومها كيتسناوها.. (ركبو كاملين مع رشيد حمزة كيعاود لرشيد شنو وقع من اللول وملاك متكية فحضن مها مكتهضرش ولكن جاها نعااااس..
وصلو للحومة قلبها تقبض كتر كيهضرو معاها مكتجاوبش حط باها الطموبيل وخرجو هي مقادراش تهز راسها حتى شافت مرا هي بنتها كيشوفو فيها بصعوبة هزت راسها بشمووخ متبينش انكسارها بقاو كيشوفو حتى قلزت ليهم بصبعها ومغتجي غير فباها شافها دغيا جمعت يدها حنات راسها قلب وجهو تمو ماشين دازت من حدا طموبيلتها للي شي واحد خابشها بساروت ولا شي حاجة حادة مكتوب ق*** شافها غير حمزة وطمر بعد من حداهم مخليهم يمشيو بوحدهم وجودو معاهم غير كيزيد يضيعها، بقا واقف فراس الدرب وهي طلع معاه نسااا نسا فمرة انه غيدخل للدار ومغيلقاش باه للي غيعاتبو عاود علاش لاسق فملاك!!!
بحال تضرب بالضو كفاش قدر ينسى هادشي كفاش اصلا نسا راه بيدو دافن باه فصباح ونسا فالعشية انه مات!!!!
بقا غير كيضور عينيه بحال شي حمق حس براسو تزعزع فمخو كفاش قدر ينسى وعاد منين بدات الناس لي متلقاهمش فالمقبرة كيجيو يعزيو فيه!!! تلف معرف حتى شنو يقول وشنو يجاوب)
ملاك: (دخلت خايفة مرعوبة ضورت
رااسها لدار نجية للي عامرة عيالات من هنا خرجت لبارح مشوهة!! دغيا قلبت وجهها جات عندها مرت جدها كتعنق فيها وحتى مرت عمها للي دغيا دخلت معاها فالموضوع شنو دارو وكفاش ومعاااش ومريم عطاتها الخاطر كتشرح ليها مغتنساش كفاش وقفت مع براءة ختها قبل مدخل جات نجية لعندهم كتبكي للي لدابا زهرة معزاتهاش عنقت ملاك)
نجية: سمحيلي ابنتي سمحيلي ومسحيها فية سمحيييييلي انا للي خليت لفعة عندي عندي
ملاك: (غير ساكتة معندها متقول، عاد عزااتها زهرة ومريم معرفتش علاش كتحس موت اب حمزة كان بسباب هادشي حيت لدابا مفهمتش كفاش مات!! هاد قدرت تنطق)
البراكة فراسك اخالتي..
اورطيغا: (وصل لتماك عقلو كان مع ملاك وعلامة استفهام كفاش عصابة!!!!
طلع لقاهم كولهم مزال باقيين من غير زهرة ورشيد باينة غيكونو مشاو عند بنتهم جا عندو عمر كيهضرو حيت دابا طبيب دخل عندها لداخل، تسالات وقت الزيارة جاو باش يخرجوهم بقا غير هو للي مسموح ليه يبقى عيات ترغبو خالتو هو يمشي وهي تبقى مبغاش واخا دارت جست زوين ولادها وراجلها وبنتها ياسمين رجعو مشاو للسويد وهي أجلت سفرتها على حساب ختها)
غير سيري اخالتي نعطيكم الساروت سيرو للدار
خديجة: يمشيو معايا!؟
اورطيغا: للي بغيتو (مشا هو حدا لباب مخليهم كيتعارضو بينااهم، للي عندو مهم هو كيتسنى طبيب يخرج مشوش بزاف على مو وعندو تشويش اخر على ملاك اه هو عارفو ملعوب وزاد تأكد ولكن هي علاش من الأصل تدخل لتماك!!)
خديجة: (جا يوسف جايب غدا لاورطيغا للي مكلا والو من لبارح كما كيحطولو لبانيي كيردووها)
مراد غنرجع لعشية غلقاك واكل هادشي راه ميمكنش غتبقى عايش غير على القهوة والدخان!!
اورطيغا: ان شاء الله
خديجة: تبغي شي حاجة من حوايجك نجيبهالك
اورطيغا: بلا متعذبي راسك اختي
خديجة: مكاين بو عذاب راك خوويا قولي شنو تبغي؟!
اورطيغا: واالو.. (مقادرش يدير صواب يجمع يظحك يهضر عندو هم كبييير مخلي ملامح وجهو فقط تبين التوتر.. مشااو هوما وبقا جالس بوحدو خرج طبيب نفس الهضرة لي قال لبارح وعندهم أمل تفيق.. شوية كتبانلو غيثة جاية بحال هاربة ولا كانت مخبعة)
شنو تديري نتي هنا؟!
غيثة: بغيت نبقى معاكم
اورطيغا: (معندو خاطر) غيثة دابا غتمشي للدار ولا غنصوني على يوسف
غيثة: عفاك اورطيغا خليني هنا
اورطيغا: غيثة دابا غتمشي!!! (حنات راسها وتمت هابطة فدروج هو مباغي يعذب معاه حتى واحد براكة غير هادشي للي دارو كااافي وعاد مباغي حتى شي خلوة مع غيثة واخا فصبيطار.. بحالها بحال لوخرين تجي تزور دير صواب ولكن تبقى معاه لا!!!)
~~~~~~~~~~~
ادم: (جمع حوايجو جاتو زوينة منين طلبوه فالخدمة يرجع لفرنسا ونيت باش تكون حجة قوية ميتسماش هارب الا مثلا غيثة ولا شي واحد فرش بيه.. صونا على غيثة مجاوبتش هز التيليفون لاخر صيفط ليها ڤيديو وهي تصوني عليه)
ضرووري حتى نوريك شي حاجة احبيبة باش تجاوبي؟؟
غيثة: غير زيد صيفط ݣاع داكشي للي عندك باش نوريه البوليس
ادم: ههه نصيفطوه بعدا لالة الغالية ولا باباك حسن؟! (قطعت عليه وهو شد تاكسي نيشان للمطار قبل ميدخل عيطولو علموه بغاو من بعد سيمانة ماشي دابا بقا كيفكر اذا هدا دليل عليه وبكترة مموسوس كولشي كيضرب ليه لحساب فيجاس سيمانة وغيمشي على ميكمل شغلو للي بداه…)
ملاك: (تسلات من ديك جماعة وبغات تدخل غير لبيتها كان مسدود جا عندها أنير كيعيط ليها بحروف مخربيق ولكن ولفاتو وكتفهمو تبسمت ومشات هزاتو جات مها مدت ليها سوارت)
بغيت نعس اماما
زهرة: سيري احبيبتي انا نوجد ليك متاكلي، اري نشد عليك خوك
ملاك: لا لا غير خليه معايا
زهرة: تبغي دوشي؟!
ملاك: لا مافيهاش حتى نوض.. (مشات ملاك مدخلة معاها أنير دخلت لبيتها سدت لباب سالو دموعها توحشت اورطيغا بزااااف بغاتو هو يكون معاها فهاد اللحظة، ولكن شنو غتشكيلو وهو غيكون محاها من بااالو وفنفس الوقت بقى فيها حيت هو فمصيبة أكبر للي هي مو هوما ياله عرفوها وتلعقو بيها وحسبوها وحدة منهم وهو للي عندو غير هي!!
حطت حوايجها كاملين حتى من الملابس الداخلية بدلتهم وأنير كيغنغن كملت فرشت كواش ودخلت فنموسيتها جاي عندها أنير بقات كتبكي وهو شاد حنوكها كيشوفها حتى بقى كيبكي سكتت كتحاول تظحكو وهي بلا خاطر حتى حست بعينيها كيتغمضو مقدرتش تطفي الضو وغفاات وهو فحضنها حتى هو نعس…)
~~~~~~~~~~~~
يوسف: خديجة علاش ملاك مجاتش اليوم وحتى فاش كنصوني عليها نمرتها طافية!!!
خديجة: يمكن مخاصمين هي ومراد
يوسف: تتشوفيها منطقية يتخاصمو ومتجيش فهاد الظروف؟!!! لا لا ملاك متتفكرش هاكا !!
خديجة: راه حتى هوما تماك عندهم ݣنازة
يوسف: خديجة الله يهديك واش انا غنتيق هادشي
خديجة: وراه قلت ليك شنو كاين مخاصمين (مشات للكوزينة حتى سمعت الدقان) يوووووسف
يوسف: انا غنحل (حل لقا ختو) فين تتمشي نتي ياك قلتي غتسبقينا للدار شي نهار غتحمقيني تنعيى نحضي فيك وتلقى راسي محاضي والو
غيثة: (بعياء) غير مشيت خديت شي حاجة ديالي
يوسف: شنو هي؟
غيثة: يوسف خويا والله حتى عيانة بغيت غير ندخل نرتاح (بعد من طريقها دخلت نيشان للبيت قبل متسد لباب دخلت خديجة عندها وسدت لباب)
خديجة مالكي؟!
خديجة: نتي حاملة اغيثة!!
غيثة: لااااا اويلي واش حماقييتي!!!
خديجة: غيثة!! الا كانت شي حاجة قوليها باش نعرفوا شنو نديرو ماشي حتى تزيد تكبر كرشك
غيثة: (أمينة للي كانت غتعاونها راها بين الموت ولحيا شافت فيها بحزن وارتباك) اه (خديجة متصدمتش راه شحال وهي شاكة) شنو غنديرو؟؟
يتبع
التعليقات 0