غيثة: (بقات غير كتبكي وملاك جالسة حداها كنخمم فمشاكيلها ولكن جاها الفضول بزاف من جهة غيثة وكتفكر واش هادشي للي درت بالصح ولا غلطت بحال نهار بغات تعتق جارهم!!!!) ولكن صااااافي رتاحيت منين عرف كولشي!!
ملاك: غيثة غيكون مراد مزال معرف كولشي ولا مغيخليكش تخرجي من دارهم!!
غيثة: غيكرهني!! غيكرهني كما كرهني خويا وهاني ضيعت كولشي!!!
ملاك: مكيهمش واش اورطيغا يكرهك حيت ماشي بحال مقام خوك يوسف للي خاصك ترجعي ثقتو!! (بقات فيها بزاااف… كتعقل عليها نهار اللول كفاش كانت بحال شي باربي كانت كتقول هادي عمر شي مشكل دور بيها المشكل لي تلقاه فحياتها هو الا شي ظفر تهرس ليها ولا شي حاجة تافهة وقعت ليها، ولكن دابا عندها مشاكل كبااار وشبه مستحيلة باش تحل… دارت يدها فوق كتف غيثة)
ربي غيكون معاك ومعانا
غيثة: خاصني نهرب خاص نمشي نغبر من هنا
ملاك: وإلا داك الكلب كان باقي حي!! معرفت علاش حسيت من هادشي كامل داير غير شي ملعوووب عليك باغيك تعيشي هادشي نتي وكولشي
غيثة: ميمكنش انا ضربتو بزاف وعاد الشوكة!! الحالة للي خليتو فيها مقادرش يتحرك
ملاك: ولكن محرقتيهش وكتقولي عائلتو مكيقلبوش عليه غير هادي كاافية تبين راه داير عاود شي تنووعيرة ونتي كتقولي واحد مسمووم وخبييث اختي توقعي منو أي حاجة!! الغلط لي درتي كان خاصك متخليلوش التيليفونات
غيثة: واورطيغا!!
ملاك: غير متبانيش قدامو!!
غيثة: باقي نتي وياه اونصوبل
ملاك: (خرجت عينها) عاود اغيثة!!!
غيثة: والله غير سولت عادي سؤال بريئ
ملاك: اه مزال والمشكل كيجي هنا وخاص نعرف كفاش نغبرك عليه!! عرفتي شنو البيت لاخر تماك غيكون بيتك متخرجيش منو غير الا انا علمتك حيت هو عندو سوارت الدار وأنا غنقولو شي صاحبتي جات عندي!! هو اصلا حسابلو مشيت قبل يعني متلاقيناش انا وياك ومكنتش اصلا معاكم منين ناض لغوات
غيثة: (باغية تبقى معاها) مبغيتش نوض ليك المشاكل!!
ملاك: نوضتيه ووللي عطا الله عطااه وانا منقدرش نسمح فيك دابا (مشاو للبيت جاب الله كان مفرش داك لبيت تحسبا الا بات بقا ناقصهم غير لحوايج بجوج بيهم.. خاص تجيب شوفاج باش يسخن بيتها هاد الايام)
غيثة: بشرط نخلص معاك فلكرا
ملاك: واش حمقة!!
غيثة: لا والو هدا هو شرطي
ملاك: (بقات كتشوف فيها) صافي واخ!! مزيان هاكا غتحسي براسك بديتي كتعتامدي على راسك!!
يوسف: (ولدو بقا غير كيبكي ليه معرف شنو يدير كيشوف فاليوتيوب كفاش يعمر ليه لحليب ولكن بكثرة البيبي مبغاش يسكت تلفو ومعطاهش خاطرو يخليه فوق النموسية وعقلو خاارج بلبكى حتى سمع لباب كيتحل مشا بالزربة بحال شي منقذ جاه كانت خديجة للي بقات مطرطقة عينها فيه وهي كتشوفو ولدو فحضنو كيبكي جاها بحال هداك الياقوت ماشي ولد صغير بحال تشد كيخوونها!!!)
خديجة: اويلي!!! شنو كدير؟!!!!
يوسف: (براسو تلف عارف موقفها مزياان وعاد من مور لباب كاين اورطيغا للي داير يدو فجيابو)
خديجة شوفي بعدا علاش تيبكي
خديجة: (بلغوات) تشوفو مو!!!! علاش جبتيه؟!!! (بغات تنوض لغوات باش مراد ميلقاش منين يدوز ليوسف)
يوسف: (مشات لبيتها كتشنتر وتخبط) خديييجة خديييجة
اورطيغا: احم (دخل) مالو؟!
يوسف: (تخربق) معرفتش مشيت جبتو من المصحة قالو خاصو عملية وعاد كان مريض حتى واحد مبغا يقابلو ومبغيتش نسمح فيه
اورطيغا: عملية!!! علاش؟!
يوسف: دابا خاص غير يسكت يمكن جاع ولا خاص يبدل معرف شنو ندير الوالدة سمحت فيع قالت هداك ولدك
اورطيغا: راه بالصح ولدك!! اجي رغبووها هاد بنات رشيد تقليقتهم خايبة
يوسف: فين غيثة مكانتش معاها ؟!
اورطيغا: (مجاوبش مشاو دقو على خديجة لباب) خديجة ختي الولد راه معرف ميدير ليه شوفي غير كفاش يعمر ديك القرعة باش يعتق راسو
يوسف: خديييجة راه مريض بزاف جبتو من عند طبيب!!! (حلت خديجة وعينيها منفوخين بلبكى، شدت الولد مكتشوفش فيوسف دخلاتو لبيت نعاس وسدت لباب عليهم، بدلت ليه ليكوش كان داير غير بيبي باقي كيبكي صونات على مريم ابيل فيديو وراتها شحال دير فلحليب خرجت غسلت لبيبرو مخلياه كيبكي فوق النموسية دخل يوسف عندو دفاتلو لحليب عاد رجعت عندو كتعطيه)
اورطيغا: (وهوما منشاغلين قلب الدار على غيثة مكيناش وكان حاس راه مكيناش فالدار!! بقا جالس فالصالة كيخمم فهادشي)
خديجة: شحال فعمر ولدك؟!
يوسف: 6 شهور!!
خديجة: راه خاصو يكون كياكل شوية دابا!! (شافت فيه بعتاب كبير قارنة حواجبها) فين هاد مو؟!
يوسف: (حرك راسو بمنعرف)
خديجة: وجداه؟!
يوسف: مبغاتش!!
خديجة: حيت هادي خطتهم من نهار اللول
يوسف: خديجة انا عارف هادشي تيضرك ولكن شنو ندير؟! نسمح فيه؟! نلوحو؟!!!! عطيني غير شي حل!!
خديجة: معرفتش معرفتش!!! يوسف خليني بوحدي هاد الساعة الله يرحم باك!! (بقا كيشوف فيها) خرج عند مراد راه عرف كولشي من غير غيثة هي للي جرات مو وكانت سبابها فلكسيدة!!
زهرة: مزال مبغيت تقيل عليك ولد الناس ارشيد!!
رشيد: صافي!! حتى دابا ماشي شغلي منين خيراتو علية صافي
زهرة: واش بعقلك اش جابك ليه نتا راك باها واش معارفش قيمتك عند بنتك
رشيد: كنت عارف منين كانت تحت جناحي!!!
زهرة: بنيتك!!!
رشيد: (مفقوص) اه
زهرة: لااااا حولة!!! انا ونكون بلاصتها حيت نهار بغيتك كنت غنختارك غير نتا ومرايتي هي بنتي ولا حنا من حقنا نبغيو ونختار معامن نعيشو حياتنا وهي لا!!!!
رشيد: يااك ازهرة!! شفت بحال عاجبك الحال تعيش بحال الزوفري!! وبغيتي عاد من لفوق نخليها ليه بلا زواج بلا والو!!!
زهرة: اوالله بنتك ميدي منها الواحد باش ينقي سنييه!!! بنتي تربيتنا انا وياك ونتا عارفها مزياان وحتى من زواج الا مقتلهاش اه مغدير والو!!
رشيد: وترضايها تزوج هاد التزويج ديال الدل اول واحد يعايرها هو نيت يتزوجها هربانة بلا عائلة بلا صواب بلا والو كولشي بالساااهل!!! ياك هادشي للي بغيتي ليها؟!!! وعاد ديك الدار معيشو معاها نيت فيها
زهرة؛ مقلتش هكاك
رشيد: اوا هوما هاكا قالو عيني عينك كتقولي بغيت نتزوجو اليوم قبل غدا
زهرة: (فنفسها: ديرها وتقد بيها) غير مفهمتيهاش هي بغات تعني ليك راه ختارتو وبغاتو هو راه عاوداتلي وشحال وهي خايفة تهضر معاك غير معرفتش شنو تختار فالكلمات باش توصلها ليك!
رشيد: (بقا ساكت منتابه فطريق وهي ردت راسها كتشوف فطريق تبسمت منين تفكرت ذكرى جاتها فبالها…)
#فلاش_باك
كانو لبسوها جلابة واسعة وفولار وشهدت وتبعت كلام لفقيه بقاو الناس كيكبرو فرحانين وللي بكا ݣاع اكترية منين عرفو قصتها وأنها كانت من ديانة يهودية وبغات تسلم وهادشي كانو واليديها غيقتلوها عليه وكان مهربهاش رشيد
الفقيه: بنتي زهرة دابا نتي وحدة منا مسلمة وغنعلموك الدين ديالنا وغنكونو معاك حتى تفهمي كولشي وتعلميه
زهرة: (تبسمت) صافي انا دابا وليت مسلمة؟!
الفقيه: بجهد الله ابنتي والله يقدرني على فعل الخير انا وهاد الناس
زهرة: (شافت فرشيد مفرنسة) واش وليت مسلمة؟!
رشيد: (تبسم محرك راسو باه) اه
زهرة: يااي ههه (طارت عندو عنقاتو بايساه فحنكو) انا فرحانة بزااف بزاااف
رشيد: (تحرج، بعدها بشوية كيشوف فرجال للي حنا راسو للي بقا مبلݣ عينيه للي بقاو كيتبسمو)
اممم صافي حنا نمشيو اسي الفقيه
الفقيه: (متبسم) خاص نوجدو باش نزوجوكم اولدي…
رشيد: (خرج من الجامع والفرحة غتطرطق من عينها اول مرة يشوفها هكاك حتى هو تبسم وفرح واخا المرار للي كيحس بيه نساتو بيه بهاد الفرحة..)
زهرة!! متأكدة من هاد سمية عاجبااك!!
زهرة: هاد سمية من نهار عيطتي لية بيها وهي عاجباني بزاف
رشيد: هضرنا مع المقدم غنقادو ليك وراقك وكولشي غيكون هو هداك اصلا منين عرفو قصتك كولشي بغا يدير الاجر
زهرة: ووو انا فين غنتعلم؟!
رشيد: الدوار للي لهيه (شير بيدو) غنبقى نديك ليه كل نهار، كاين تماك معلمة كتقري فالجامع منين سمعوك سلمتي عجبهم الحال بزاف وغيبداو معاك كولشي دقة دقة
زهرة: (تبسمت فرحانة) هادشي زوين بزااف لوكان غير بابا وماما فهموني وشافو هادشي غيعجبهم (سكتت شافت فيه)
مهم امتى حنا غنتزوجو؟!
رشيد: (صدماتو) نتي باغية؟!
رشيد: ياك قلتلي خاص نتزوجو باش نعيشو بجوج انا هنا واخا تعرفت على الناس بغيت نبقى معاك نتا وأصلا بيناتنا مشاعر زويينة!! من بعد تقدر تزيد تطور ونكملو فزواجنا
رشيد: نعطيك شوية دالوقت فكري يمكن غير تحمستي من الفرحة!!
زهرة: نتزوجو ونفكر من بعد قالتلي مي الحاجة غيطيرو ليك بيه لبنات
رشيد: هههه للي دار هادشي كامل على قبلك باقي غتجي شي بنت المرأة تعمر لي عيني من غيرك!! غير خليك تفكري مزيان!! انا غنتسناك غير نتي ولكن بغيت باقتناع منك ماشي غي حيت فرحانة ولا حيت كتشوفيني بطل ديالك بغيت هاد زواج يكون عن قناااااعة منك
زهرة: انا فكرت!!
رشيد: (تبسم وبقا كيشوف فيها) جيتي زوينة بالفولار
زهرة: حتى انا عجبني راسي بزاف!!!
#عُـــدْنَـــــــا
يوسف: (خرج من لبيت منين شاف خديجة كتسكت ولدو ومبغاتش تهضر معاه، مشا حدا اورطيغا للي جالس جلس قدامو كيتسناه يبدا يحاسبو)
مراد!!!
اورطيغا: شنو هادشي للي تتعيش فيه اصااحبي علاش مجيتش عندي؟!
يوسف: (بملامح حزن) انا لدابا ومزال مفاهم والو!! كولشي تعرم علية!!
اورطيغا: شنو قصة ولدك واشمن عملية (شرح ليه يوسف كولشي…)
والوالدة قالت بيناتكم شعلتها وهربت!! مو نتا عارف الياقوت باسلة ميكرووية همها غير نتزوج بيها وهادشي مغيكونش!! خديجة متقلة ومعصبة وانا سامح فيها مع هاد المشاكل، ولكن ها شكون لقيت معايا غير هي!!!
اورطيغا: وغيثة ختك!!
يوسف: هاديك قصة أخرى مفهمت فختي والو ورجعت تدخل وتخرج فالهضرة
اورطيغا: لا حول ولا قوه الا بالله العلي العظيم شبكات وصافي
يوسف: خلينا من هادشي لالة أمينة كيف بقات ماوليتش طليت ولا شفتها
اورطيغا: الحمدلله راها ماشية مزيان!!
يوسف: الحمدلله..
ملاك: (مشات للكوزينة كتقلب فالثلاجة جابت ليها شي حاجة تاكلها مراد معمرها ليها وعاد سقااطة للي تشهات.. عطاتها تاكل وكتشوف فيها وفكرشها)
خوك يوسف غيكون كيقلب عليك
غيثة: متقوليلوش انا هنا عفاك املاك
ملاك: غيكون عرف من خديجة حيت ميمكنش خرجتو بجوج ورجعت بوحدها غيسولها والا كانت مطورة ومتخربش عشها بيدها غتقولو الحقيقة.. الحقيقة اغيثة كتهنيك من بزااااف دالمشاكل!! وحيت نتي مهضرتيش شوفي فين وصلتي!!
غيثة: (حركت راسها باه، وبقات كتاكل رغم المشاكل والكوارث مكتقدرش متاكلش) غنتقل عليك
ملاك: بحالي بحال خديجة حنا كولنا خوتاتك
غيثة: (تبسمت معاها والخوف مزال متملكها.. خرجت ملاك من حداها مشات لببيتها بدلت حوايجها وحتى هي قلبها واكلها على كلام باها وعاد الموقف للي اخطات فيه قبيلة بيناتهم بجوج!! مهضرتش مع مراد حتى يجي هو يهضر معاها.. صونات على مها مجاوبتهاش رجعت صونات والو.. حتى صونات عليها هضرو قالت ليها ان باها فهمها غلط هي مختارتش مراد عليه هي بغات غير ترتاح اما كل واحد عندها وبلاصتو وباها ديما غيكون فالمرتبة اللولة!!)
زهرة: دابا يبرد ابنتي ويفهم
ملاك: مخاصوش يتقلق مني خاصو يفهمني اماما فهاد روينة كاملة والمشاكل بغيت غير نرتاح هادشي للي طالبة وبغيتو يحتارم مراد هو مدار والو بلعكس كيعاملني مزيااان… مفهمتش علاش كيكرهو قبيلة بينها قالو شكون قالك اصلا غنعطيك بنتي!!!
زهرة: المشكل يحلوه بزوج ابنتي نتي متجي فصف حتى واحد
ملاك: لا غنجي فصف الحق مراد شنو دار لبابا للي حاݣرو هاكا علاش ميقولش هاد ولد الناس مهلي فبنتي لي فهاد الوقت كولها كيقول يا انا يا راسي مراد لدابا اماما عمرو ملامني حتى على شنو وقعلي فدار حمزة بلعكس كيقولي انا بغيتك غير ترجعي كيف كنتي مراد لي واخا كيدخل عندي معمرو نوا ولا قاسني ولا تبسل علية محتارمني ومحتارمكم، وااااااخا حتى الا وقعت شي حاجة مكانش غيكون فخباركم
زهرة: ياك!!
ملاك: انا غير عطيتك مثال اماما اناااا… انا من سابع المستحيلات ندير شي حاجة قبيحة ماشي انا للي نبيع راسي برخا
زهرة: صافي ابنتي دابا نهضر معاه
ملاك: عفاك اماما قولو ميتقلقش مني ومباغاش نرجع لتماك بغيتو غير يفهمني
زهرة: شحال قدك ابنتي تبقاي تماك!! ها العيد لكبير قرب
ملاك: من هنا العيد يكون خير عفاك اماما هضري معاه!!
زهرة: خاصك شي فلوس؟!
ملاك: لا مزال عندي شي براكة ومراد عمرلي الدار أثثها عمر الثلاجة كولشي دارو بغيت غير حوايجي!!
زهرة: وكيف نديرلهم نصيفطهم ليك مع حمزة؟! حيت سمعت غيرجع لتماك
ملاك: لا لا واش حماقييتي راه مراد دم سنانو هو حمزة وكينوضو لية مشاكل معاه بسبابو
زهرة: اوا!!
ملاك: غير جمعيلي انا نشوف كيفاش نجي ناخدهم…
اورطيغا: (بقاو ساكتين هو ويوسف حيت مجاتش يسول على غيثة للي همو دابا يعرف شنو مخبيين!! بغا يعرف واش عندها علاقة مع مو والكسيدة وكفاش جبدت سيرة ادم!! شايف صاحبو غاارق حتى الودنين ولكن فنفس الوقت مغيقدرش يسمحش فحق مو..)
محتاج شي حاجة!!
يوسف: (حرك راسو بلا عقلو غير مع ختو فين غتكون!!! وهاد صاحبو الا عرف شنو دار ختو شنو غتكون ردة فعل ديالو واش يحط راسو بلاصتو ولا يحمي ختو ويضرب على هاد الصداقة!!)
العز اخاي مراد
اورطيغا: ختك تكون مشات لداركم؟!
يوسف: بحال والو!!
اورطيغا: مهم انا بغيت نهضر معاها ولكن حتى تبرد شوية حيت قبيلة كانت تدخل وتخرج فالهضرة مفهمتش منها شي حاجة، مهم انا منغبرش غير ايوسف تهلا فخديجة متنساش هي راه معندها لا يد لا رجل فهاد المشاكل وعاد حاملة رد ليها البال شوية
يوسف: (بزفرة) يصاوب الله
اورطيغا: (وقف) انا مشيت حتى نتقاشعو!!
(خرج من تماك تااالف معرفش علاش عندو احساس كبييير كسيدة ديال مو مرتابطة بهادشي!! خاصو غيثة هي للي غتشرح ليه اما حتى مو عارفها ساكتة ومخبعة شي حاجة!!
بقا برا واقف حدا طموبيلتو تفكر ملاك ومشكلتو لكبيرة مع باها وللي مشات قبل حتى متعرف هادشي ولكن حريرتها هي بوحدها!! وللي ريحة نسبيا ممشاتش معاه بقات ففاس)
~~~~~~~~~~~~~
الياقوت: (كتهضر معاها فالتيليفون) طاتي شنو هادشي للي سمعت من عندو يوسف؟!!
الغالية: كيما سمعت!! نتي مغترجعش لولدك خلاص!!!
الياقوت: انا غدا عندي الطيارة شفت يوسف مردش علية شنو غيدير وانا عائلتي منقدرش نخسرها ونقولهم عندي ولد بلا زواج
الغالية: دابا عاد بانت ليك عائلتك، وإبنك؟!
الياقوت: مغنسمحش فيه غير غرجع غناخدو ونرجع فحالي صافي مبغاش يدير الحل نديرو انا
الغالية: يوسف مغيبغيش يتزوجك!!
الياقوت: غنشوفو منين يولف ولدو!!
الغالية: (معجبهاش الحال هاكا غير كتلعب بولدها وحفيدها تأكدت الياقوت مغارضهاش فيهم بجوج هي باغية غير ترضي غروورها وتكسرو كما دارت من قبل!! والمشكل غتكون عاوناتها ب80٪ فهادشي!!! حطت التيليفون وبقات غير كتفكر فهادشي وفكلام الياقوت وفولدها للي تبدلت معاملتو ليها 💯 يمكن حتى الشوفة مبقاش كيشوفها فيها بحال شي برانية ولا شي جارة كتقلب غير على صداع والمشاكل ليه!! هنا تفكرت كلام خديجة منين قاتلها غيجي نهار غتندمي على هادشي تفكرت بنتها صونات عليها تيليفونها طافي للي مهنية منو نسبيا هو وجودها فدار خوها.. ندمت علاش مكانتش كتخليه يدخل فغيثة من شحال هادي ندمت منين جات عندها خديجة قالت ليها راه ادم مصالحش ليها وحسابلها غير غيرة منها ندمت علاش مسمعتش كلام بنتها وهي كانت رافضة تخطب ليه وتشوفو…)
يوسف: (سمع حس ولدو مكاينش سكت من لبكى مشا دخل عندها لقات نعساتو فوسط النموسية مدورة عليه وسايد وجالسة متكية حداه.. بهمس)
خديجة!!
خديجة: اممم
يوسف: عفاك اجي.. (ناضت متبعة العين للولد حيت مزال معارفة حركاتو كيف دايرين واش يطيح ولا لا!! خرجت حدا لبيت جرها للكوزينة وهي تنتر يدها)
خديجة: طلق!!
يوسف: علاش تديري هاكا!!!
خديجة: شنو بغيت ايوسف؟!
يوسف: فين غيثة خرجتو بجوج بلا متعلموني ولا تقولوهالي ورجعتلي بوحدك!! ونتي عارفة مخاصهاش تخرج!! علاش اصلا مخرجاها وكفاش مراد عرف؟
خديجة: (بقات كتشوف فيه مدة بقا فيها الحال حسابها غيطلب سماحة يرغبها تقابل ولدو يسولعا على راسها) فهمت علاش كنتعامل معاك هاكا!!! كتسول غير على ختك مك ولدك وانا فين؟! وولدك ولا بنتك للي فكرشي فين؟!
يوسف: نتوما حدايا!!!
خديجة: مبانلييش وحتى الا كنا حنا حداك نتا لا!! دابا شنو باغي مني حيت هاد الهضرة غير زايدة نتا عارف شنو للي لليك وللي عليك ماشي انا للي غنجي نوريك كفاش تهتم بالي دايرين بيك
يوسف: رجعتي حساسة بزاف!!!! مبقيتش عارف كفاش نتحاور معاك
خديجة: ولا نتا رجعت كتهملني بزاف (تبسمت باستهزاء) عادي اصلا ولفت الاهمال!!!
يوسف: (خرج عينو حيت اوطوماتيك فهم انه رجع بحال راجلها اللول للي كان مهمل ليها بزااف شدها من يدها مزير عليها)
تتقارنيني بداك الكلب للي كنتي مزوجة بيه!!!
خديجة: (جبدت يدها كازة على فمها) متعاودش تقيسني!!! ااااخر مرة تزير على يدي الا شفتني هاكا كندير داكشي للي بغيت متقولش هادي غير جفاف انا كندير هادشي حيت أنا باغية اااخر مرة تزير على يدي فهمت!!!!
يوسف: (بقا واحد كيخنزر فلاخر خلاتو دازت فيه قايسااه راجع بخطوة اللور ودخلت لبيت نعاس ساداه عليها وطلقت العنان لدموعها غواتو والشدة فاليد كتسمى عنف يكون قاصد ولا لا!!
اما هو بقا معصب ومجنن علاش اصلا تجبد طليقها فوسط مشاكييلهم اه يقدر يكون تسرع وغااالط ولكن باش تجبد الماضي لا!!!!!
هادشي مغيقبلووش خرج من تماك عيا كيصوني على غيثة تليفونها طاافي ومزال عندو ثقة كبيرة فخديجة محد هي مهدنة وهادئة من جيهتها الا ختو راه غتكون فأمان غير فين منعرف!!!
صونات عليه مو قطع عليها اخر همو دابا هو يسمع سم ديال مو ولا شي مشكل اخر براكة غير للي عندو ومقادش حتى بيهم!!!)
ملاك: (سمعت باب دارها تحل خرجت من بيت غيثة بالزربة دايرة ليها إشارة متهضر متزعزع سادة لباب عليها بالساروت قبل ميدخل لقاها واقفة فوسط الدار مخرجة عينها بحال دايرة شي زبلة وكتسنااه تشوف واش يعيق ولا لا!!!)
مراد!!
اورطيغا: (طلعها وهبطها مموالفالهاش هاد الاطلالة!!!
كانت بكولون وتريكو فلغوز بيبي لاسقين عليها ومبين كل حاجة فيها وشعرها جامعاه سفنجة مطلعاها الفوق لابسة تقيشرات طوال فلبيج.. حك على نيفو متلفاه باينة معيقاش براسها)
ملاك!! وهاد لباس!!
ملاك: (زادت خرجت عينها عاد تفكرت دارت يدها على راسها قاست شعرها وعاد للي لابسة طارت لبيت ديالها سبقها مكاليها مع لباب وهي عاطية بظهر حاطة يدها على باغية تحل لباب)
طلق امراد.. متعيقش.. طلق!!
اورطيغا: (مكحز راسو رادو اللور ميلو كيشوف طايتها وهي كتنقز كدفع لباب قرب لعندها ضرباتو بكوعها لكرشو متزعزعش ضارت عندو كاعية وهو كيحاول يحفظ ملامح وجهها بلا فولار)
ملاك: مرااااد (عاود شافها من القدام وعينيه على صدرها كيزيد يعصبها) واش نتا مريض!! حل هاد ال***
اورطيغا: حشووومة هاد الهضرة!!! ( كيزيد يعصبها قمشاتو فيدو ووالو عاود ضرباتو لكرشو حتى ظحك بعد من لباب جات داخلة قاس ترمتها بطراف صباع يدو حيت هاربة دغيا دخلت زادحة لباب عليه)
ملاك: (بلغوات) مرييييييض!! خرج علياااااا !!!! (قلبها بقا كيضرب!! حطت يدها فوق صدرها سمعاتو مشا للكوزينة كيقرقب تبسمت ودغيا جمعتها)
اويلي على هاد السفالة للي فية راه خاصني نتعصب نتقلق نتفارق معاه ݣاع!!!
بفففف شوووهااا وحتى هو خاصو غير منين يدوز
(مشات للمرايا كتشوف طايتها كانت ضعافت باقي كاين المعنى لبست بيجامتها ودارت شالها وكتهضر مع مرايتها)
بففف الا مخرجتش عندو مغيمشيش بفف واخا اصلا بغيتو ميمشيش!! (تبسمت وهي كتحاول تقنع راسها باش تبين الجدية والغضبة)
(حلت لباب لقاتو كيحل لبيت التاني)
شنو كدير؟!
اورطيغا: صافي تغلفتي!!
ملاك: مرااااااد راه خاصك تبقى تحتارم الخصوصية ديالي ماشي تبقى تحل راه مااا.. نكون ملابساااش حشومة ݣاع
اورطيغا: كنت منوي تكوني مضروبة بمقلة من اللور وتكوني زيرو ترمة
ملاك: بزااف عليك!!
اورطيغا: (تبسم) مكاينش شي برومو اخرى هاد الليلة!!!
ملاك: (قامعة الظحكة) سير سير!!
اورطيغا: هاد لبيت مالو مسدود!!
ملاك: غتجي واحد لبنت تجلس معايا وجابت حوايجها وسدت عليهم
اورطيغا: شكون هادي!! وامتى هادشي!!
ملاك؛ بنت خالة راجل مريم ختي بغات غير دوز شي امتحان شي يامات وصافي تمشي بحالها، (كتهضر لكل ثقة) رغباتني ختي ملقيت منقول وحشمت من راجلها قلتلها صافي جابت شي حوايج قلتلها حسن تسد عليهم على مترجع باش متقولش هزيت ليها شي لعبة
اورطيغا: (هز حاجبو) اممم (دخلت للكوزينة وتبعها) هادشي عاد نبت!! فشيييي شكل!!
ملاك: اوا جات عندي مريم حتى لهنا وكانت معاها وعاد بغاتني نرجع معاها لازرو اصلا قربت تولد مسكينة
اورطيغا: (تكى على البوطاجي) اوا!!
ملاك: (ضارت عندو) صراحة مبقيتش قادة نخليك ونمشي، راحتي وكولشي معاك (تبسمت متلفاه) حتى تولد ان شاء الله ونمشي عندها ولكن دابا بغيت نكون غير معاك!!!
غيثة: (كانت جاتها فوبيا خايبة وهيستيرية باش تبقى تغوب بالخوف وهي كتصنت ان مراد كاين فالدار رجع فوبيا عندها!!! شدت على فمها كتبكي باش ميتسمعش حسها ونفسها)
غيقتلني غيقتلني غيقتلني…
(مشات النموسية تكات فيها وتغطات حتى على راسها كتبكي من هاد المشاكل كاااملة تفكرت حبها لمراد وكفاش هو ختار وحدة أخرى عكسها تماما.. مبقاش فيها راسها حيت مختارهاش ولكن بقا فيها راسها حيت واخا كان رافضها مليون مرة كانت كتقنع راسها انه غيجي نهار ويبغيها هي ويرغب ويطلبها لزواج حيت هي زوينة ومن عائلة غنية وعاد خوها صاحبو ولكن ملقات منو والو بلعكس زاد بعد عليها وغيكرهها مع المدة!!! لقلت ان ملاك حسن منها فكووولشي ولكن حتى فات الفوت)
~~~~~~~~~~~~~~
اورطيغا: (بقا غير كيشوف فيها بدوك العينين للي نايمين حرك لسانو فوسط فمو وهو سادو)
وباك؟!
ملاك: مال بابا!! (عاد تفكرت المشكل) بابا انا كنبغيه وكنحتارمو وكلمتو عندي مهمة وضروورية ولكن حتى نتا قيمتك عندي كبيييييرة وخاصو يعرف مكاينش شي راجل للي غنعيش معاه من غيرك واخا تنطابق سما مع الارض
اورطيغا: غمقتي علية ابنت رشيد هاد الليلة
ملاك: (متبسمة) بابا غير مقلق مني ولقاك حتى نتا فطريق
اورطيغا: (بجدية) ملاك!! تنعرفك تطيريها فسما وراك حضرتي على كولشي باك بالعربية وتاعرااابت مباغينيش
ملاك: انا باغياك
اورطيغا: وكفاش غتجمعي بين هاد الجوج واحدد تيشرق ولاخر تيغرب!!
ملاك: شوية دالوقت وصافي
اورطيغا: متأكدة!!!
ملاك: ها الدليل!!! بقيت هنا ومرجعتش معاه.. (شدت يدو) مراد بابا غير مزال معرفك مزيان ومزال ماااعرف قلبك شحال كبييير وحنيين
اورطيغا: (حنا باسها فشنايفها وبعد شوية هزت عينها فيه كانو قراب بزااف بغا يرجع يشلقم وهي تبعد وجهها مدورااه هزها من خصرها حطها فوق البوطاجي وجات قدو كتشوف فيه بكلامها نساتو كولشي وشنو جاي يهضر وهي براسها نسات مشاكلها)
اجي نديرو غير الفاتحة باش نتبواسو بعدا
ملاك: هههه مراااد…
بقاو مجمعين شحاال حتى قالها يخرجو يتعشاو برا دابا راه تعرفت فين هي مبقاتش كتخاف.. قبلت دخلت لبيتها بدلت حوايجها خرجو من الدار فجو الظحك والنشاط معاودوش جبدو المشاكل وصداع للي ناض ليهم هاد لعشية!!!
مشاو غير للأطلس تعشاو بمشاوي وطلبت كتر باش تاخد معاها لغيثة بحجة كيجيها الجوع فالليل وصلها للدار بغا يدخل ومخلاتوش هو مشا وهي دخلت مطرقة لباب وهاد المرة دوزت الصاقطة لداخل مشات لبيت غيثة دقت عليها عاد فتحت عليها لباب وهي تخرج كتجري كانت مزيرة تبعتها لحدا طواليط
ملاك: غيثة!! كنت سديت عليك غير باش ميحلش ويلقاك
غيثة: ماشي مشكل اختي!! (كملت وخرجت من تماك)
ملاك: باغدون زين، انا نسخن ليك لعشا فيك الجوع!!
غيثة: بزااااااف واخا هاد المصايب للي عندي الشهية باقية هي هي
ملاك: واختي آش جاب الجوع للمصائب فخبارك انا الا الماكلة للي منقطعهاش مهم انا نجيبلك
(مشات سخنت ليها داكشي حطاتو فطبسيل وخداتو ليها لبيتها)
ياكما جاك البرد هنا؟!
غيثة: شوية
ملاك: غدا نجيبلك شوفاج
غيثة: بزاف اختي هادشي للي كديريه معايا انا غنجيب ليك فلوس لكرا بشحال 2000 3000 درهم شحال؟!!!
ملاك: بلاش عليك
غيثة: لا والو ضرووري خاصني نخلص معاك الكرا
ملاك: اممم هو هادي داري انا مكرياش ولكن مزال كنخلص طريطا غير دابا انا واقفة من الخدمة
غيثة: بالصح مفخباريش!!!
ملاك: هادي حريييرة اخرى كان وقعلي مشكل وكان البوليس طرف فيها وضروري من التحقيق وتوقفت بانت البراءة ولكن مزال خاص شي إجراءات
غيثة: ومناش تتخلصي!!
ملاك: غير السيد صابر معايا ومتفهم
غيثة: انا نعاونك كما عاونتيني وكما قلت ليك غنعتابر راسي تنخلص معاك لكرا وعفاك متقوليش لا ولا غنمشي نقلب على راسي
ملاك: فين غتقلبي ابنتي واش حمقة
غيثة: عفاك املاك
ملاك: (على قلبها) صافي ولكن غير متبانيش قدام مراد
غيثة: (حركت راسها اه بحزن) براڤو عليك شريتي الدار صراحة نتي هي القدوة ديالي
ملاك: ههه غير كيبان ليك حتى نتي مزال عندك الوقت فين غتعرفي للي صالح ليك وللي لا!!!!
خديجة: (فاق الولد بقات كتشوف فيه اوتوماتيك جات فودنها نهار ملاك كانت كتقولها منين متكونش مجربة شي حاجة متهضريش وتعاملي بحال مواقع والو!! تفكرت نهار باها جاب أنير وهي جاتها عادي وعاد وكانت كتقنع مها انه معندو ذنب واخا باها غلط راه ندم وبقى معاها غير هي!! بقات كتسائل واش هي كتعاقب حيت حنات فخوها ومحساتش بمها واش غتعاقب على احاسيس زايدة ولا كانت مكتابة عليها!! هي هربت من زواجها اللول باش متحسش بهادشي مع مراتو التانية ولقاتو فهاد زواج غير كااين فرق انه مقدرتش تكره لا راجلها لا ولدو الكره لكبير لياقوت ومو بالخصوص!!
شافتو كيلعب بيديداتو ويغاغي وريوݣو كيسيلو تبسمت معاه هزت فوطتو كتمسح ليه فجناب فمو شمت ريحة عرفات دار كرشو مشات كتقلب على ليكوش وبقا كيبكي دخل يوسف لقاها كتقلب فصاك البيبي والولد كيبكي مشا حداه)
يوسف: علاش تيبكي؟!
خديجة: (مجاوبتش، جابت شنو تحتاج وجلست حداه كتحايد ليه حوايجو كيبغي يعاونها كتجر يدها حلت عليه ليكوش وهي طلع ريحة خلاتها مروعة بغات تكابر تمسح ليه وهي تطلع ليها الردة مشات كتحري للدوش يوسف بقا غير كيشوف عاد كملها شاف ولدو كيبول وجا فوق الكوڤر معرف ميدير اول مرة يتحط فهاد الموقف وحتى ولدو سكت من لبكى، خرجت خديجة)
جيبو للدوش نغسل ليه
يوسف: نهزو انا؟!
خديجة: (بعصبية) نهزو انا اسيدي!! (مشات جيهتو هزت الولد دخلاتو وهو وقف كيشوف فداك ليكوش مشا جاب بالة كيحاول يهز داكشي مخيب وجهو لاحو فزبل عاد رجع كيحايد الكوڤر قبل متخرج تشوفو وتزيد تعصب عليه..
هي غسلات ليه نشفاتو بفوطة عاد خرجاتو فهمت غيكون فراشها تقاس حطاتو فوق النموسية زاربة دارت ليه ليكوش ملقاتش شي حاجة تدهن ليه بدلات ليه لحوايج كاملين دخل يوسف من بعد مدار الكوفر يتصبن.. بلا متشوف فيه)
خاصك تشريلو فراشة باش نبقى نبدل ليه وتجيب ليه شي زيت بان ندهن ليه وتزيدو شي حوايج
يوسف: واخ، جاوبيني بعدا اخديجة غير فين غيثة؟!
خديجة: غيثة عند ملاك ولكن بلا متجبد ليها صداع مع مراد حيت مغيقولولش راها تماك، ختي خبعاتها من بعد مبقات غير كتهضر ومنين سولها هربناها
يوسف: شنو قالت
خديجة: كانت غير كتخربق
يوسف: وهي فدار ملاك دابا؟!
خديجة: اه
يوسف: (بقا كيفكر تماك حتى واحد معارفها فين غتكون وعاد ساترين على مراد يعني ختو راها فأمان وعاد الحومة دمراد شكون يزعم يقرب ليهم!!! واهم حاجة مع ملاك للي مغتطيرش معاها)
وكفاش خرجتو بلا متشاوري معايا؟!!
خديجة: (شافت فيه ديك الشوفة ديال بنيتك) جيب لولدك لابراي باس نبقى نسخن ليه لبيبرو…
يوسف: جاوبيني بعدا علاش خرجتو؟!
خديجة: خرجت بغيت نشوف ماما وختي وختك رغباتني ومقدرتش نخليها بوحدها حيت خفت عليها فهمت دابا!!!
يوسف: علاش تاشوفوني غير انا للي غالط
خديجة: حيت بالصح غاالط وبزاف، (جا يهضر) متفرعليش راسي بغيت نعس
يوسف: كفاش متفرعليش راسي عرفي شنو تتخرحي مع فمك اخديجة ونتي غير معصبة
خديجة: معجبكش الحال ساهلة!! حتى دابا نمشي لدارنا!!!
يوسف: مفهمتش مالك ؟!
خديجة: اوا حتى تفهم اسي الواعي والمثقف عاد اجي هضر معايا وكما قلت ليك متجبدش لختي المشاكل مع مراد بغيت تشوف ختك عيط عليها قبل عاد شوفو شنو ديرو
يوسف: (بقا غير كيشوف فيها حتى ناضت ودخلت طواليط مبغاش تكون علاقتو معاها هاكا ومعرف شنو يدير خلاها خرجت وخرج من الدار!!)
~~~~~~~~~~~~
أمينة: (صونات على ملاك طمناتها ان غيثة معاها وحتى هي مباغاش ولدها يدخل راسو فشي مشكل عاود!! قطعت معاها صونات على ولدها مجاوبهاش عرفاتو تعصب عليها ودعت ختها للي غتمشي فحالها، هاد الحادثة للي وقعات ليها قرباتهم من بعضياتهم كأنهم مكانوش مقاطعين سنيييين صوناو على مراد يتوادعو معاه مجاوبش)
عمر: خالتي ها وفاء مرة مرة تجي طل عليك ووو ها هي معاكم!!
أمينة: وفاء راها بنتي حتى هي الا بغات ورتاحت تبقى معايا مونساني هنا
عمر: هنا كاين لعزارا بزاف تلقى راحتها فالدار ديالها حسن ورغباتني مرة مرة تمشي عند صاحبتها
أمينة: اه ملوكة الله يعمرها دار بحال راها كاينة مع ختك !! مهم للي بانلكم اولدي حتى هنا دارهم فوقما بغات تجي تجي
عمر: لهلا يخطيك اخالتي.. (توادعو معاها مشات وفاء معاهم للمطار مسخياش بعمر للي ولفاتو بزااف وكان طلبها هاد الايام تجلس مع ملاك متخليهاش بوحدها حيت عاودات ليه المشكل للي عندها ماشي كولشي غير مخاصمة خفيفة مع عمها.. صونا مراد عليهم عرفهم تماك كان مع ملاك لحقو بيهم المطار توادعو معاهم وجلسو حتى مشاو رجعت معاهم وفاء للي زادت ملاك كتأكد عليها تبقى معاها واورطيغا مطمر حيت مغياخدش راحتو فدخول ولخورج عندها فالدار وهدا كان مقصود من عند ملاك…)
#بعد_يوماين
رشيد: عيطي على بنتك تجي اليوم والا مرجعتش غير بلا متبقى معولة ترجع مرة أخرى هنا
زهرة: أعوذ بالله العلي العظيم الله يهديك ارشيد
رشيد: اييييه انا للي الله يهديني حيت انا للي خاوي الدار
زهرة: علاش متقبلش يتزوجو وتخرج تسكن عند دارها نيشان، هي تكون مرتاحة ونتاا هاني عليها؟!!
رشيد: ترجع للدار اليوم!!!!
زهرة: ونقول للناس يجيو يعقدو؟!
رشيد: لا
زهرة: اوا الا نتا راسك يابس بنتك راه طلعت كتشبه ليك
رشيد: حتى انا هضرت انا خارج دابا رجع لقاها هنا (خرج معصب وهي بقات بين نارين صونات على ملاك قالت ليها شنو كاين وملاك باقية على رأيها كتبغي باها وكتحتارموو ولكن مقدرتش ترجع لعندهم حاليا!!! من موراها جاهم أبيل ان مريم كتولد)
ملاك: خاص نمشي لأزرو
وفاء: (عرفت بغيثة وقصتها) نمشي معاك؟!
ملاك: لا بقاي هنا الا مشينا بجوج مراد غيجي للدار وغيلقاها (شافت فيها) متخافيش مغيوصلكش
غيثة: سمحولي بزاف
ملاك: وصافي ازمرة انا ضروري خاص نكون مع ختي اما منخليكش راك حتى نتي ختي (كتصوني على خديجة باش تعلمها)
غيثة: وفاء نتي بغيتي تمشي؟؟
وفاء: انا مريم عندي عزيزة بزاف ولكن كما قالت ملاك منقدرش نخليك وعارفة مراد فاش كيتعصب كيتسيف
غيثة: (إحساسها بالذنب عمرو يتحايد)
ملاك: (تفكرت طموبيلتها خاص تجيبها صونات على اورطيغا عرفاتو مكاينش ففاس خارج لشي عروبية على حساب الغنم.. خرجت من الدار شدت تاكسي ونيشان لاݣار فين خلات طموبيلتها دخلت تجيبها حتى لقات السيكيوريتي عطاها شحال جاتها فورقة)
شنو هادشي!!! 1800 درهم!! كنت تترضعها اخويا؟!!
….: خلصي الا بغيتي طموبيلتك راه 45 يوم
ملاك؛ علاش شحال باش طالعة علية الليلة بالسلامة؟!
….: 40 درهم
ملاك: بنيتك؟!! انا ومكنصرفش على راسي 40 درهم فنهار
….: متفرعليش **** فهاد صباح…. (مشا وخلاها واقفة مصدومة حيت قالت ݣاع الا طار شانها تكون شي 100 درهم ولا 200 لشهر والمشكل عاد خاصها تقطع ليها لوراق وتقلبها وتعمرها مازوط حست بالسخفة طالعة معاها من صباع رجليها)
ملاك: (دخلت لاݣار لداخل تسول واش هادشي بالصح للي قال ليها سيكيوريتي كولشي كيقولها اه كلام للي قال صحيح، معرفت مدير مشات شدت تاكسي رجعت للدار الا قالتها لمراد غتبين ليه انها بحال كطلب ليه الفلوس باش يخلص عليها الخطية هو اه مغيبخلش عليها ولكن مع الوقت غطلع ليه فراسو هو ماشي شغلو فطموبيلتها فين كانت براكة غير شنو دار معاها!!
ياله حطتها التاكسي لقات حمزة تماك بحال كان كيتسناها بغات تطلع دارت راسها مكتعرفوش وهو يلحق بيها كيعيط)
شنو شنو
حمزة: علاش مجيتيش للجلسة؟!
ملاك: اشمن جلسة؟!! مفخباري والو!!
حمزة: علاش مقالهاش ليك عمي رشيد؟!
ملاك: لا.. شنو وقع ياكما غتحسب علية؟!
حمزة: لا قلنا راك مصدومة مكتقدريش تخرجي ولا تواجهي شي واحد وباباك حط شهادة طبية من عند طبيب نفسي
ملاك: امم وشنو دارو؟!
حمزة: مزال خاص الكلبة تباان، حيت حنان تشدت وشهدت فيها
ملاك: تشدات حنان؟!!!!!!!! مقالولي والو؟!!!
حمزة: وعلاش مترجعيش لداركم خلاص باش تبقاي تعرفي كولشي!!
ملاك: حيت ماشي شغلك احمزة
حمزة: ملاك رجعي لداركم صافي جدك راه برا وكولشي مزيان حتى عمي رشيد كيبان غير مقلق منك راه مغيخليش للي يهضر معاك
ملاك: شكرا حيت علمتني (بقا فيها الحال حيت باها مقالها والو) نتا شنو مزال كدير هنا؟
حمزة: جيت عندك
ملاك: السيد للي انا معاه مكيبغيش يشوفك هنا!! فهمت دابا راه كتخلقلي غير المشاكل
حمزة: (بقا غير كيشوف) الا جا عندك شي واحد يهضر معاك وي..
ملاك: انا ماشي صغيرة باش غيجي شي واحد يعطيني حلوة ونقولو واخ اعمي ونمشي معاه فينما بغا يديني
حمزة: واخ غير سمعي!! راه فالقهوة جالس انا شحال وانا حاضيه وعارفني كنجي هنا عندك حيت عارفني قريب منك
ملاك: (ميلت راسها كتقلب) كفاش هاد قريب؟!
حمزة: مهم سيري طلعي انا نتبعك نبقى غير فلباب ونمشي
ملاك: لا هاكا كتخلقلي المشاكل ومشاكيلي احمزة قادرة عليهم غير بلا متصدع را… (سمعو غوات هزو راسهم كتبان ليهم غيثة بغات تلوح راسها غير جرها شي واحد دغيا طرطقت عينها)
بنت لحرام غتفرشنا!!!
حمزة: شكون هادي!!!! (شافها طلعت كتجري تبعها هو!!)
يوسف: (كانت الهضرة معدووومة بيناتهم حتى فاش كيبغي يهضر معاها كضور فيه ويقلبوها صداع!! رجع من الخدمة لقاها تالفة والولد جالس فالرولاكس من ديما كيلقاه مبدل ونقي ومهلية فيه فماكلتو ليكوشو دواه…)
مالكي؟!
خديجة: (بعصبية) ختي مريم كتولد وخاص نكون معاها!!
يوسف: ووو..
خديجة: (مخرجة عينها) هضر هضر!!! ولدك ياك حيت نتا كتفكر غير لراسك!!! ولا ياكما ختك نتسناها ترجع؟!!
يوسف: واخا نهضرو بلا عصبية !!
خدبجة: نهضر بعصبية نهضر كيف بغيت!! حيت انا للي هازة الدقة وحاملة نتا شنو عندك مشاكل ݣاع عندنا!!! ولكن كنت كنهز ليك الهم وباقا نتا شنو معارفينش حتى كفاش كندوز نهاري!! ودابا كتقولي منعصبش!!!!
يوسف: (بقا غير كيشوف فيها) نديه عند الوالدة ونتي نديك عند ختك
خديجة: (فكرت شحااال وبلا متشعر قالتها) منقدرش نأمن عليه مع مك!!
يوسف: كفاش!!!
خديجة: (مخرجة عينها) كيف سمعت للي تخليه وهو مريض وعارفاه مكاينش للي يقابلوو تسمح فيه شنو غتسنى منها!!! ياك انا غير الشلحة للي مصالحة لا لزواج لا لولاد علاش مصيفطاااهلي وساخية بيه!!! وزايدون هاااا بنتها لدابا معرفتهاش حتى فين كاينة عاد حفيدها!!!
يوسف: (المشكل قنعاتو وربطاتلو لساانو)
خديجة: (كتفكر بصوت مرتفع) الا خديتوو معايا غيبقى يسولو شكون هدا وكفاش وفين!!! بففف تلفت مغرضاااش بهادشي!!
يوسف: (معارف ميقول غير متبعها وهي كتهضر)
خديجة: (حارت وداخت وتعصبت فشنو غدير!! جلست فوق كرسي وشدت فكرشها)
شنو غندير؟!
يوسف: عفاك بشوية عليك…. سمحيلي اخديجة
خديجة: (عينيها عمرو بدموع) لا.. لا لا …لا
يوسف: (ديك لا قسماتو وهو كيشوف فيها عرفها وصلات ليها لعظم ومزال مرجلة معاه!! لدرجة معرف ميقول بقا غير سااااكت كيشوفها كتفكر!!! وللي قرراتو غيديرو معاها)
~~~~~~~~~~~~~~~~~
وفاء: (عطاتها طرشة حتى ضارت موݣضاها) واش مريضة بغيتي تقتلي راسك!!!! (بحرا كتجمع نفسها) حمااارة!!!
غيثة: (بهستيريا من الخوف) عرفتو مماتش عرفتو مماااتش وغيرجع يفدي دقتو عاود!!!
وفاء: (منين فاقت من نعاس وهي هاكا مفهمتش حتى التيليفون طافياااه للي نقولو هددها ولا صيفط ليها شي ميساج ولا اوديو ولاوڤيديو!!!)
غيثة: (دارت يدها على ودنيها كتغوت وصوت مصدعها فراسها)
#غيثة_انا_رجعت_متوحشتينيش؟..
ملاك: (حلت لباب دخلت داخل حمزة معاها) مالها؟!!
وفاء: معرفت مسكينة حالتها خاايبة (شافت فحمزة) شنو كيدير هدا هنا؟!
ملاك: (ضارت شافتو ) حمزة سير فحالك؟!
حمزة: شكون هادي؟!
ملاك: ونتا ماالك صافي سير فحالك
حمزة: (شاف فغيثة للي سخفت مشاو يهزوها مقدروش هزها وراتو فين يحطها كتزربو باش يخرج دغيا)
شكون هادي واشمن مشكلة حاطة راسك فيها عاود املاك؟!ااا
ملاك: ديها فراسك ومتعاودش ترجع (وصلاتو لحدا لباب وزدحت لباب عليه) هاد زمر غيجبد لية المشاكل
وفاء: مزال مبغا يتفااك
ملاك: (قلبت على تيليفونها هزاتو صونات على مراد مجاوبهاش رجعت صيفطات ليه اوديو قبل ميوصلوها ليه صحاب الحسنات)
مراد اليوم جا عندي حمزة دازت الجلسة اللولة ومكنت عارفة عليها واالو حتى واحد مقالي شي حاجة.. مهم، تشدت حنان وݣرات بكولشي واعتارفات على أميمة بقا غير تشد ونرتاح من هادشي!!
(صيفطات الاوديو وبقات كتشوف فغيثة)
وفاء: جبتي طموبيلتك خاص نديوها تشوفها شي طبيبة
ملاك: لقيت علية خطية ديال الباركينغ مجبتهاش!! شنو وقع معاها؟!
وفاء: اودي الخوف مكيخليكش تعيشي فراحتك
ملاك: غنعيط على خوها ميمكنش نزيدو نخبيو مرضها على الاقل تشوفها طبيبة وترجع ولا يجيب شي طبيب هنا
وفاء: (حركت راسها باه ملاك صونات على يوسف علماتو بشنو كاين ولكن خاصو يدير احتياط باش ميبانش قدام يوسف)
فين مراد؟!
ملاك: فشي قنت كيجيب لحوالة
وفاء: مالكي؟!
ملاك: طلعولي فراسي هاد المشاكل للي مدرت لا بيدي لا برجلي
وفاء: على غيثة؟!!!
ملاك: لا لبنت مسكينة براسها غير ضحية بحالي بحالها انا للي بقا فية هو بابا للي غاضب علية مقالي والو على الجلسة!! جدي عمي للي كيكرهوني غي حيت تظلمت ماما للي بعدت منها وانا محتاجة ليها مراد للي كيتعصب علية حيت باغي نتزوجو ومنين يعرف حمزة جا غيدير حقو حتى هو… يعني رجعت من المغضووب عليهم من العائلة!!
اورطيغا: (من بعد مكمل مع الحاج شغلو هز تيليفونو سمع اوديو ديال ملاك جا عندو كيهضر بروكو باغي يصوني ويرد عليها…)
الحاج غرجعو؟!
الحاج: نبقاو هاد نهار هنا
اورطيغا: انا خاص رجع عندي شغال ففاس ضروري خاص نقضييهم
الحاج: اجي نشربو كاي أتاي بعدا.. (مشا معاه) شنو غدير فموضوع زواجك؟
اورطيغا: نتسناو الوالدة توقف على رجليها مزيان وديك الساع يحن مولانا
الحاج: هي راك عارفها مكرهتش اليوم قبل غدا
اورطيغا: (مرضاش يقول راه مرفوض من طرف نسيب) لا تزيد تبرا شوية غنشد طريق غتمحن
الحاج: علاش متعملش العقد وحتى تبرا لالة أمينة مزيان ونديرو العراسية
اورطيغا: الحاج انا مباغي لا عرس لا والو حفيلة بيناتنا قاضية الغرض
الحاج: علاش من دون خوتك متتفكرش فراسك
اورطيغا: حيت تنفكر فراسي مباغيش العرس تفاك غير مع عرس ولدك لي جاي فطريق
الحاج: انا قاد بيكم كاملين ونتا بحال بحال شريف
اورطيغا: الحاج بلا متحمق راسك معايا انا غير نسا ندير شي عرس!! شنو دابا معوالش تمشي!!! خاص ضروري نطلل على الوالدة
الحاج: باقي عندي شي شغال هنا
اورطيغا: صافي هانتا هنا منين تبغي ترجع علمني نجي ناخدك
الحاج: الله يرضي عليك..
اورطيغا: (مشا للفرمة هي اللولة كانو وصلو لحوالة حسب شحال من راس وصل عاد مشا المحال كياخد الفلوس والتسبيق من عند الناس للي باغية تشري على حساب العيد كان غاارق فالخدمة..)
~~~~~~~~~~~
يوسف: (جاب طبيب معرفة للي وراتو ملاك كفاش يدخل من الموبل التاني للي نقزت فسطح ونزلت حلاتلهم لباب ومشاو لدارها بنفس الطريقة يرسف تحشم ولكن كيرغب داك طبيب مهم يديرو احتياطهم.. دخل هو عند غيثة وهوما كيتسناو طبيب برا) شفتي على حريرة فيها انا!!!
ملاك: سلاك اخويا
يوسف: تيجي مراد هنا؟!
ملاك: دابا لا ولكن مخاصوش يعرفها هنا راك عارفة كيف داير ومنكذبش عليك أي واحد فيلاصتو غيبغي يفهم ويعرف وعاد ردة فعل ديالو غتكون قاسحة
يوسف: (حرك راسو باه) ونتي شنو درتي!!
ملاك: (بزفرة) اودييييي خلي داك جمل ناعس!!! معرفتيش شي حاجة على داك زبل دادم!!
يوسف: (بعدو للصالون) مو عيطت للوالدة قالتلها ادم ففرنسا ومنين يرجع غيحددو نهار العرس
ملاك: كفاش!! يعني غيثة مقتلاتوش كما كظل تغني!!!
يوسف: هي كانت متيقة شنو تتقول انا مفهمت والو راه خاص يبان فالصورة شكون قالي باغيين غير يصيدو غيثة!! حمقتني معرفتها واش هي تتهلوس يا هو لاعبها عليها
ملاك: محممقها ماشي غير لاعب عليها ختك راه كتفكر فالموت كتر مكتفكر تعيش
يوسف: مكرهتش نديها لشي سونطر ولكن بحملها مصالح ليها حتى دوا
ملاك: مشكلة…..
يوسف: …مشكلة وصافي!! راه مشاكل!!
ملاك: وشنو باغي منها مكفاهش شنو دوز عليها مسكينة
يوسف: غيثة تتقول غراضو فمراد حيت موصلوش دارها هي قنطرة مهم انا عارف شنو غندير
ملاك: علمو البوليس !!
يوسف: مكاين حتى دليل وهو مزال مبان على الاقل خاص يبان
ملاك: زعما يقدر يعرفها هي هنا!!!
يوسف: (حرك راسو بلا) متنظنش!! (خرج طبيب للي علمهم غيثة ضروري خاص دير شي تحاليل وتبع عند طبيب نساء اختصاصي هو ميقدر يعطيها حتى شي دوا حتى دوز عند مختص ودير تحاليل باش يقدر يعطيها شي حاجة!! ونصحوباش تدوز عند طبيب نفسي..
خرجو طبيب منين جابوه بقات ملاك غير جالسة عرفت ختها مريم مزال موولدت وداوها لصبيطار حست براسها مربوطة شافت مراد قرأ الاوديو ومردش يعني عاود تقلق من شي حاجة مدارتها لا بيدها لا برجلها..)
يوسف: (مشا تقدا ليهم حتى صونات خديجة عليه خاصها تمشي لأزرو ختها محتاجاها علم ملاك تجي تاخد تقدية من المحال نعت ليها فين وصيفط الفاكتورة فالواتس ومشا يشوف شنو الحل للي لقات خديجة… دخل لقاها جامعة لحوايج)
خديجة!! شنو غنديرو
خديجة: غنشوفو شي أوطيل تماك غنجلسو وملاك تلحق علينا ونتناوبو على سليمان هدا هو الحل للي لقيت
يوسف: (بقا كيشوف) نهضر مع الوالدة!!!؟؟!
خديجة: (متكلمتش يعني اوكي صونا ودخل لداخل للكوزينة كيهضر… تم جاي عندها لونو مبدل كيتمتم فهمت انها رفضات)
نمشيو؟!
يوسف: (حرك راسو باه زاافر مقدرش يخلي حتى ختو ولكن الميزان تقال بزاف على خديجة براكة غير تنازلت بزاف اصلا علاقتهم مكهربة ودايرة معاه فوق جهدها… سمعها علمات ملاك حتى تلحق هبطو لحوايج)
شحال خاصك تعطيها؟!
خديجة: (مكتشوفش فيه) باشما سخاك الله (ركبت فالطموبيل بقات كتسنى مشا للݣيشي جبد فلوس جبت اونڨلوپ دار فيهم فلوس ركب وشدو طريق فسكات من غير فاش بدا كيبكي سليمان وقفاتو ورجعت اللور قدات ليه حليب زاد صايݣ بيهم بشوية وهي كترضعو ݣرعاتو ودارتو فحضنها كطبطب عليه وهو حاضيها مرة مرة من لمرايا ساهية فطريق وباين عليها الحزن التعب وكولشي….)
يوسف: خديجة سمحيلي!!
خديجة: لا…
ملاك: (مشات جابت تقدية للي قالها يوسف جات متقلة عطات غير لواحد البرهوش 5 دراهم عاونها حتى وصلات للموبيل، طلعتها كتلهت دقت حلو عاونتها وفاء شاف فالساعة كانت 2 مزال غتكون شي طبيبة كاينة خاصهم يتهناو على صحة غيثة على الاقل دير غير ايكوغرافي وتعطيها شي ڤيتامين قلبت ديك تقدية عجبها داكشي هزت تليفونها قلبت على طبيبة وخدات رونديڤو دخلت عندهم للبيت لقاتها هي ووفاء كيتبكاو عاود)
نااااري قلبكم شحال هشيش
وفاء: (كانت غيثة كتعاود ليها) ماشي بحالك الهيشة!!
ملاك: عار الله غير قوليلي نتي شنو جاك فبالك منين بغيتي تلوحي راسك من السرجم واش انا اختي مزال متفاكيت من حريرتي وعندي محكمة ونتي باغية تزيدي تغرقيني
غيثة: (جابتلها الظحك… بتعب) سمحيلي
ملاك: ها تقدية جابها خوك نوضو ستفوها على ميوصل الرونديڤو تمشي عند طبيبة انا نصيفلك العنوان ونمرتها فالواتساب عندك اوفاء
وفاء: نتي مواكلة والو؟!!
غيثة: لا
وفاء: مزيان باش ياله نديرو شي تحاليل وتمشي عند طبيبة منين يخرجو نردهم ليها انا وهي تخرج ليك دوا
ملاك: اه حتى هادي فكرة وحسن خرجو من الموبل اللوراني ماشي هدا للي حدانا شفت دراري معرمرين تماك وعاد منهم شي وحدين كيكونو مع مراد، وفاش تكونو جايين علموني باش الا كان مراد هنا نقولهالكم
وفاء: صافي.. (ناضت غيثة الكوزينة هي ووفاء ملاك بلعاني كتخلي غيثة تجمع فراشها وتغسل فين كلات باش وحدة متكي على لوخرا.. اما هي دخلت لبيتها رجعت كتصوني على باها مكيجاوبش صونات على مها كانو فطريق)
ملاك: فين وصلتو اماما؟!
زهرة: حنا فايفران ابنتي
ملاك: انا الا مجيتش هاد لعشية غدا نجي ان شاء الله
زهرة: وعلاش مجيتيش مع ختك خديجة؟!
ملاك: (ياله جات تعاود ليها على الطموبيل والخطية)
رشيد: (هنا الشيطان وسوس ليه ان مراد للي مخلاهاش تمشي وهي سمعت ليه) قطعي قطعي عليها قطعي على المسخوطة
زهرة: نوصل ابنتي ونصوني عليك (قطعت) واش كيجيك عليها جهل!!!
رشيد: ياله قولي علاش متكونش هي تماك ياك هي دابا لا خدمة لا شغل شنو للي شادها فاس وختها عمرها خلاتها!!!
زهرة: مغديروش عقلكم!!
رشيد: انا ديك لبنت غسلت يدي عليها!! وهداك كما خلاها تبعد مني غيخليها تبعد منكم وحدة بوحدة!!!
اورطيغا: (صونا عليها جاوبت دغيا) راكي فالدار؟
ملاك: اه
اورطيغا: عندي خدمة مزيرة بزاف هنا !!
ملاك: اممم..
اورطيغا: تجي عندي للمحال؟!
ملاك: (يعني مغيكونش فالحومة واخا هكاك لبنات يمشيو منين قالت ليهم كاحتياط ونيت باغية تشوفو باش ميبقاش سوء تفاهم بيناتهم)
واخ..
(قطعت علمتهم غتخرج عندو وعطاتهم لادريس ديال طبيبة لبست حوايجها وخرجت مشات عندو فتاكسي عندها بزاف فين كتفكر المحكمة الطموبيل ديالها الخدمة ولكن للي شاغلها هو باها وهاد الغضب لكبير للي سبابو اورطيغا وكان غير شافت منو شي عيب كانت غتعفط على قلبها وتقلب عليه ولكن مشافت منو غير الخير!!..
وصلت عندو المحال كان عامر شوية بقات برا وهو باين غااارق هز عينو فشي كليان كتبان ليه واقفة دارلها إشارة بعينييه باش دخل وداكشي للي دارت كان تماك خاوي ولكن الريحة دلحم قهراتها!! شي 10 دقائق تم داخل عندها بأجوندا )
اورطيغا: زين!!
ملاك: كتقهر هاد الريحة حسن عوانك
اورطيغا: معجباتكش!! (وقف حداها حاط فوق البوطاجي وراق زاافر باين غارق خدمة)
ملاك: لا كيعجبني يكون طايب حسن..
اورطيغا: (تبسم) باقي داك الز**** تيدور تماك !!
ملاك: (شافتو مهدن عكس شنو كانت متوقعة) هو جا كيقولي غير شنو كاين (بغصة بانت فحلقها انها باغا تبكي) اليوم كانت عندي جلسة وهو تكلف
اورطيغا: ومالك مرعودة!!
ملاك: بقا فية الحال مقالوهاليش!!
اورطيغا: (قرس حنكها) هناااوك اش غديري بشي محاكم ولا شي ***** انا جايب ليك خدمة ترزقي منها
ملاك: هممم!!!
اورطيغا: (عطاها وراق) هادشي دخليه عندي كما ديما (وراها لبيسي) ومنها تخلصي طريطا ديالك
ملاك: ههه واش أنا كنهضر فجهة ونتا فجهة
اورطيغا: ملاك نساي المشاكل شوية باباك لوكان عارفك ضروري خاص تحضري كان غيعلمك فهميها نتي هاكا.. ياله بداي تتخدمي غنتهلا فيك فلخلاص
ملاك: (تبسمت حتى كانت غتقولو على الطموبيل ولكن باينة غيبغي يخلصها وهي مبغاتش كترت عليه بزااف غدا وتمشي تخلصها وتجيبها معندها مدير!!!) قالك السمسار عيقت عليه معطيتوش طريطا شي شهرين كنصوني عليه كيقولي معليش
اورطيغا: متعاوديش تصوني عليه انا هضرت معاه نتي غير خوي راسك من هادشي..
ملاك: (شدت لبيسي كتقاد ليه الخدمة كانو ملايين تماك ولكن كولشي ديال الحاج حيت هاد المرة دخلت باسمو وعاد فلوس اخرين شكت يكونو لمراد واخا هاد سمعاتو كيتفاصل مع شي واحد فالتيليفون على شي خشب بغاه لدارو..
هاد لكلاڤيي للي كطاپي فيها خلاتها توحش خدمتها بقا فيها راسها بزاف هي مغلطت فوالو علاش كتخلص فشي حاجة مدارتهاااش!! كملت ديك الخدمة بغات تشوف لحساب ديال مراد لقاتو بدل المودباس)
اممم مكيتييقش فية!!! بااز!!!..
(تفكرت ان عندها حتى هي شي فلوس ولكن متقدرش تغامر وتقول ولا تحطهم كولهم فالدار ولات كتخاف تطرا ليها حاجة مستقبلا وتلقى راسها لا ديدي لا حب الملوك..
كملت وبقات جالسة صونات على مريم مجاوبتش صونات على باها والو رجعت صونات على مها مجاوبتهاش بقا فيها الحال رجعت خديجة صونات عليها جاوبت)
وي خديجة!! وصلتي؟!
خديجة: اه انا عندها شنو درتي نتي ف……فداكشي!!
ملاك: راه وفاء داتها طبيبة مهم مصالحليش نهضر هنا شنو دارت مريم؟!
خديجة: مزال مسكينة كتوجع ميصلاحش ليك تجي دابا؟! خليت يوسف بوحدو مع الولد!!
ملاك: (تبسمت) خديجة هادشي للي كديري فيه راه اجر زوين وكبير متعرفي باش غيرجع ليك
خديجة: راه عندو مو اختي!! والمشكى مو هي صاحبتو لقديمة دراجلي!!!
ملاك: ولكن لاحتو.. وغي باش زعما تفقسك شنو نلوحووه!!! انا عارفة غتجيك قاسحة وغتجيك بحال خياانة من يوسف و،و،و… ولكن راه داك الولد تزاد قبل حتى متعرفي يوسف
خديجة: جاتني قاسحة بزاااف املاك وعاد انا ويوسف مبقيناش كيف كنا
ملاك: اوا جلسو وهضرو راه الحوار كيحل 50 فلمية من المشاكل
خديجة: معرفت.. (شافت مها جاية هي وعدوزة مريم) ها هي ماما هنا ندوزها ليك؟!
ملاك: (تم مراد داخل) من بعد!! (قطعت وشافت فيه) كملت االشاف؟!!
اورطيغا: نتغداو؟! ولا نخلصك اللول!!
ملاك: (تبسمت) نخليو الخدمة بعيدة على الرومانسية ديالنا
اورطيغا: ههه لعز!! بشحال خدمتك؟!
ملاك: (هزت حواجبها مع ابتسامة)
اورطيغا: من اللول عرفتك داخلة علية بالكسوور (دوز نمرة ديال السمسار)
الصاط انا غندوز ليك لكونت فلوس طريطة ديال دار “مليكة أملال”
(جمعت تفرنيسة قطع وهو متبسم)
تتقامي غالية ازين
ملاك: علاش أنا شوية فالبلاد!!!
ملاك: …خلص غير طريطة وحدة صافي!
اورطيغا: اه
ملاك: ومتعاودش تعيط لية بمليكة انا ولفت من صغري ملاك ولا باغيني غير نتخاصم معاك وصافي!!
اورطيغا: علاش عمركي عيطتي لية باورطيغا
ملاك: وعلاش نعيط ليك هكاك معنديش مع الألقاب وزايدون منين جاتك ݣاوري باش نعيط ليك اورطيغا
اورطيغا: ومنين جاتك ملاك!! باش نعيط ليك بيها عطيني شي حاجة فيك تتيبنك ملاك!! (خرجت من حداه وهو كيظحك هز المسائل ديالو وتبعها ركبت فالطموبيل خلاها طلع للدار دغيا طرف راسو بدل حوايجو رش بارفاانو عاد نزل عندها) وكان طلعنا للدار حسن
ملاك: كتعجبني الثقة النفس للي عندك (شافتو ماشي للأطلس) فين ماشيين؟!
اورطيغا: لواحد القنييت غيعجبك
ملاك: انااااا أنا تشهيت السوشي
اورطيغا:(طاانز) ياك!!
ملاك: اه هداك كاين ف.. فالسعادة لهييييه
اورطيغا: كنا تماك ابنادم علاش مقلتيهاش!!!
ملاك: نعاودو نمشيو (بدا كيهلل عليها ويغوت وهي ساكتة ولكن داير داكشي للي بغات ونيت تبعدو على فين ممكن يتلاقاو بلبنات حيت طبيبة وبلاصة التحاليل كاينة فالأطلس.. مشاو الكافي وهي كتكره شي حاجة سميتها السوشي كلاتو مرة وحدة معاه دار ليها لادياغي محملاتوش..
جلسو هو كيهضر فالتيليفون على حساب حوالة والعيد هي طلبت بيتزا وشدت تيليفونها كتصوني على خديجة كتهرب من شوفاتو منين طلبت بيتزا)
احم شنو دارت مريم اخديجة؟!!!..
..بالصح؟!! على سلامتها مسكينة!!..
…بالصح؟!..
.. وريني البنوتة… صيفطيلي التصويرة
..حتى لغدا ونجي…
..صافي.. (قطعت وشافت فيه متبسمة) ولدت ختي مريم
اورطيغا: على سلامتها عقباالك
ملاك: (مفرنسة) مكرهتش
اورطيغا: ساهلة احبيبة دابا الا بغيتي!!!
ملاك: هه بالصح بالصح كنهضر شنو تبغي نتا بنت ولا ولد؟!
اورطيغا: هاد الساعة باغي غير ****
ملاك: زمر!!
اورطيغا: (شد يدها) معنديش مشكل للي جابو الله يكون غير بصحيحتو!!
ملاك: انا مكرهتش نولد توام ويكونو عندنا بزاف دلولاد يعمرو علينا الدار نكبرو معاهم ويكونو عندنا بزاف دلحفايد
اورطيغا: (تبسم) تنسمع لبنت متتبغيش تولد بزاف باش تبقى الفورمة وداكشي
ملاك: لا لا لا انا باغية بزااف كنشوف ماما وبابا وحنا بيناتنا بزاف كيكونو فرحانين وعاد فاش كولشي كيتجمع ولحفايد كيكون جو وااااعر…
كملو غدااهم حتى كيقولها يمشيو يوصلها وكتجبد موضوع ويجلسو مسكتاتش من الهضرة، جاها ميساج من عند وفاء علماتها رجعو للدار شافت فيه..
ملاك: مالك؟!
اورطيغا: (بجدية) مكتشوفيش خاصكي ترجعي لداركم املاك؟!!
ملاك: علاش؟!
اورطيغا: لامتى غنبقاو هاكا باك عمرو غيبغي يعطيك لية الا مرجعتيش!! خاصك تنازلي حتى نتي باش نعرف كفاش نجيبك انا هاكا هو تيشوفك غالطة انا تيشوفني داك الشيطان لي تيعمر بنتو عليه كفاش غنديرو ليها
ملاك: لا مبغيتش نرجع دابا
اورطيغا: وإمتى؟!
ملاك: غير يفوت شوية دالوقت على الاقل تخرج غير البراءة ديالي من المحكمة (حطت يدها فوق يدو شدها وجرها تحت الطابلة)
الا رجعت غيبقاو يسمعوني الهضرة الا سكت غنجيبها فراسي والا هضرت وجاوبتهم غنجيبها فراسي وفراس بابا وماما يعني غنجبد صداع وصافي.. دابا انا كرهااهم ومبغيت نشوف حتى واحد فيهم آذوني بزااف امراد ومن طبعي مكنافقش وهادشي غير غيزيد يعقد الامور مع بابا
اورطيغا: على ودي تنازلي مغنخليكش بزاف تماك الله يجعل تمشي غدا بعدو نهز أمينة بعكاكزها ونجيبها نهار التاني
ملاك: غير شوية امراد!!!
اورطيغا: واخ!! نسولك.. نتي باغية زواج كما أنا ياك!!
ملاك: اه، راه وقفت فوجه بابا على حسابك
اورطيغا: على حسابي هي نتزوجو نديرو لاكط ومن بعد نحلو المشاكل منين تخرج البراءة ديالك
ملاك: لااااا منقدرش علاش ماالي غنسرق راه أهم لحظة فحياتتي وغنبغي نعيشها وانا مشاركها مع كولشي مع الناس للي كنبغي واليدية وخوتاتي..
اورطيغا: يعني موقفتيش فوجه باك على ودي نقدر كاين واحد شوية ولكن راه نتي مبغيتيش ترجعي على حساب عائلتك
ملاك: 70 فلمية عليك
اورطيغا: مغديري حتى حل؟؟؟!!
ملاك: بغيتك تصبر معايا غير شوية امراد (بنظرة ترجي) عفاك!!
اورطيغا: اه.. صافي.. واخ.. ( طلق من يدها وجبد ݣارو كيكمي، هنا خافت حسات بيه بحال غيبدا يتراجع)
ملاك: تبغي تزوج نتا وخالتي أمينة مكيناش معاك؟! تكون مقلقة منك الله بجد الباس ونتا متسوقش ليها؟!
اورطيغا: (زفر) يا صافي قلنا واخ
ملاك: فهمني امراد
اورطيغا: فاااهمك املاك واش قلت العكس!!!!!.. (عفس الݣارو فالطفاية) الا كملتي نمشيو عندي شي خدمة خاص نقضيها..
وفاء: (شافت فيها قاست ليها كريشتها) الحمدلله واخا هادشي كامل للي داز عليك صحة البيبي وصحتك مزيانة غدا يخرجو التحاليل انا نديهم لطبيبة ههه.. ممتيقاش عندك 7 شهور ونص واش مكنتيش كتحسبي؟!
غيثة: (حركت راسها بلا) معنديش الكرش بزاف
وفاء: غي حيت ضعافيتي بزاف وتربالك فجناب، دابا غتبداي هاد الڤيتامينات باش مولاي السلطان يلقى الجهد باش يخرج
غيثة: وعاد ولد!!! شحال خايبة تحملي فهاد الظروف نااااري ربي غيعلقني من شفار عيني
وفاء: واش نتي كنتي باغية!! مهم غتقوليها لماماك؟!
غيثة: هاديك هي سبابي فعذابي بالظبط!!!
وفاء: اممم مهم تكاي شوية على كنجيب ليك شي حاجة تعتقي بيها.. (ناضت للكوزينة تقاد شي حاجة فالماكلة صونات عليها خديجة دوزت ليها مريم تبارك ليها عاد تعاودت هي وخديجة على غيثة وقالت ليها كولشي..)
خديجة: عندها وليد؟! وهي بيخير؟!
(شافت يوسف فأخر الممر خرجت عينها حيت متافقين ميجيش)
وفاء بلاتي ونهضر معاك
(مشات عندو وهي كتلفت واش كاين شي واحد شافها وصلت عندو والمشكل جايب معاه ولدو)
شنو كدير هنا واش حماقيت؟!!
يوسف: معرفتش نبدل ليه ليكوش وخفت توقعلو شي حاجة
خديجة: عيطلي فالتيليفون نوريك
يوسف: مقدرتش نقيسو خفت نضرو فلبلاصة للي غيدير فيها العملية ولا شي حاجة!!
خديجة: وانا؟!!! مخفتش ضرني ونتا جايبو هنا؟! كتفلى علية ايوسف؟!!
يوسف: راه عادي يعرفو قولهم ولدو من مراتو اللولة علاش غنخبيوه راه حتى انا بغيت نكون معاك هنا
خديجة: مرض!! تفوووووو!!!
(مشات سابقاه هو تابعها تعصبت بزااف صونات على مها علمتها غتمشي مشات للطموبيل لحق هو بيها بالزربة ركبت اللور حط حداها الولد ومشاو فسكات لوطيل طلعت الشومبر حطات الولد بدلت ليه نقاتو لبساتو حوايج اخرين وفكرتو كدور فبالها تقول ان هاد الولد ولد مرتو للي طلقها ولا ماتت متبقايش عايشة فهاد الكاابوس جلس كيشوف فيها والغضب مرسوم على وجهها)
خاصك تعلم تبقى تبدل ليه
يوسف: راه قلت ليك تنخاف نعطبو ولا نقيسو فين غيدير العملية وانا عمرني بدلا لشي بيبي ليكوش
خديجة: متخافش غير غتحاول معاه بشوية ماشي ديما غنكون معاك ايوسف…
ملاك: (شافتو معصب كيصناطع الهدوء مزادتش معاه الهضرة حيت الحل للي عطاها مستحيل ديرو واخا خايفة تخسرو وصلها للحومة)
فين غتمشي؟!
اورطيغا: غنطلع نرتاح شوية فالدار
ملاك: اه.. صافي (مهبطتش)
اورطيغا: باقيين لبنات معاك؟!
ملاك: مزال وفاء ووو ديك لبنت
اورطيغا: مزيان.. (بقاو ساكتين حتى شافتو نزل، نزلت حتى هي وبقات واقفة حداه)
ملاك: مراد علاش منخرجوش خالتي أمينة لشي بلاصة غتكون قنطت بزاف؟!!
اورطيغا: عيااان..
ملاك: علاش مالك؟!
اورطيغا: بغيت نطلع نرتاح وصافي (حركت راسها باه بغات تطفي داك الغضب وياريت وكان غير كينݣر ولا يغوت كما موالف دابا حساتو باارد فلحظة تقلب.. شيرت باي باي ومشات لجهة دارها هو بقا متبعها جبد ݣارو كيكمي حدا طموبيلتو شافتو باقي فين خلاتو دخلت للموبل وبقات حاضيااه من شق لباب واش غيطلع ولا يمشي لشي بلاصة.. حتى شافتو سد طموبيلتو وطلع عاد رتاحت طلعت حتى هي دخلت لدارها كانو عاد كيتغداو حيت طيبت وفاء معطلة عاودو ليها الجديد وكانت فمزاج ماشي هو هداك صونات على مريم هضرت معاه معتاذرة حيت مكانتش معاها اليوم كتحس بتأنيب الضمير وعاد الخاطر مبقاش..
كفاش الا بقات هي واورطيغا هاكا غتقدر تسافر وتجلس مع ختها لايام!! مشات لبيتها صونات عليها نعيمة عرفت غتجي للمغرب وعاود المشكل كترغبها ترجع للدار تخنقت حطت راسها على الوسادة كتفكر فهادشي..)
غيثة: (شعلت تيليفونها وهي تصوني مها جاوبت حيت وصل ليها شعلت التيليفون)
وي!!
الغالية: جيبي خوك واجيو للدار باباك غير تيسول عليكم
غيثة: قولو الحقيقة باش يفهم شنو تيدور من مور ظهرو
الغالية: حيت مبقالك ماتخسري اما انا نحشم نقولو هادشي للي حطيتينا
غيثة: (جاتها لبكية مقدرتش تزيد تهضر قطعت عليها وطفات تليفونها..)
~~~~~~~~~~~~
….: شحال وانا حاضي هنا غيثة مكيناش ومرجعاتش من داك نهار…
حتى هوما شفتهم خارجين من دارهم بباليزة ومولاوش رجعو…
تأكدت!! حتى فدارهم مكيناش!!…
#ادم غيثة مرجعتش هنا يمكن سفروها لشي بلاصة حيت بانلي متيقلبوش عليها باش تكون هربت…
وصل الليل واورطيغا مرجعش صونا عليها ومموالفالوش، بقات مقابلة طموبيلتو من سرجم الصالون كانت باقا كاينة معرفت مدير ميمكنش يبقاو هاكا!! للي كان ضد فكرة زواج رجع هو كيلح عليها وبااغي ميمكنش تخسرو اصلا كيجيها الخوف غير مجرد تفكير انها ممكن تخسرو!!
مفكرتش بزااف مشات لبست حوايجها تقادات شوية عارفة انها خطوة غالطة ولكن ميمكنش يبقاو مخاصمين خرجت من بيتها كانت وفاء فالصالون كتهضر مع عمر أبيل ڤيديو
وفاء: الزين فين عاطية؟!
ملاك: غير هنا فين غيثة نعسات؟!
وفاء: بغينا نطلعو لسطح شوية الجو زوين تطلعي معانا؟!
ملاك: نقضي واحد الغرض ونجي!! (رجعت رشت من بارفانها وخرجت مبقاتش كتخاف تسركل فالحومة وحتى كلام حمزة زعما شي واحد حاضيها من عائلة مها ممسوقاش مشات محلبة خدات الرايب ومسمن فيه جبن والعسل وزربت ماشية عندو للدار لقات باب الموبل محلول طلعت لدارو استجمعت قوتها ودقت مرة جوج تلاتة حتى جاها الشك ان تكون معاه شي وحدة بقات كدق بالجهد يدها ورجلها حتى حل لباب منيرڤي!!)
علاش مكتحلش دغيا؟!
اورطيغا: (طلعها وهبطها) شنو تديري هنا؟! (دخلت من تحت يدو كتقلب بعينها شكون كاين سد لباب وتبعها لقاها دخلت للبيت فين شاعل الضو كان فرش بيت نعاس جديد)
ملاك!!
ملاك: غير.. علاش محليتش دغيا ؟!!
اورطيغا: واش لمك جاية صاعرة علية!!!
ملاك: اه.. شنو مشكلتك معايا؟!!
اورطيغا: (بقا كيتمشى جيهتها وهي واقفة سنطيييحة مخرجة عينها فيه)
هادشي علاش جاية فارعاالي ***!!!
ملاك: احتارم راااسك (جات بغات تمشي وهو يحبسها) حاايد
اورطيغا: دخول لداري ازين ماشي بحال خروجو
ملاك: (بتحدي) خلعتني!! سمع امراد (حنا لعندها بعينيه النايمين هنا تخلعت وهو كيقرب وجهو لوجهها رجعت اللور حتى جلست فوق النموسية)
انا جاية نهضر معاك!!
اورطيغا: غنبقاو غير تنهضرو؟
ملاك: ممكن نتقاتلو الا بغيت؟؟
اورطيغا: (تبسم) اه
ملاك: انا جيت هنا باش نشرح ليك ومتبقاش.. (سكتت منين جر كرسي جالس اونفاص ليها لدرجة حاصر ركابيها برجليه)
بعد شوية باش نكمل انا.. (شد يديها بغات تحبدهم)
هدا راه سميتو اغتصاب!!! حيت مغنديرش شي حاجة بخاطري معاك!! كون هاني!!
اورطيغا: انا جلست باش نسمع ليك
ملاك: نتا فااهم غلاط حسابلك انا مبغااكش ومب.. (كيقيس بطراف صباعو حنوكها بلعت ريقها وهي كتشوف شنايفو)
راه بغيت غير نهضر ابنادم
اورطيغا: (كيهضر بشوية) كملي تنسمع!!
ملاك: (تلفها وهي كتهدن الشيطان للي كيوسوس ليها تبوسو) انا كنبغيك بزاف..
ملاك: ..أنا كنبغيك.. وبزااف
اورطيغا: (بصبعو قاس شنايفها وهي كتهضر رجعت راسها اللور كتحاول تركز فكلامها بقا صبعو فذقنها)
ملاك: وكنبغي حتى بابا منقدرش نخسرك ومنقدرش نخسرو نتوما أهم جوج رجال عندي فحياااتي!!
اورطيغا: (شد يديها بيديه بجوووج وباسهم وهو كيشوف فيها)
هادشي للي محمقني ومخليني باغيك تكوني عندي دابا قبل من بلاتي!!
ملاك: (وبالصح مبغاتش تخسرو) منقدرش ندير شي حاجة من مور بابا امراد غادي نهرسو وانا هادشي اخر حاجة باغية منقدرش واخا نعرف نموووت مغنديرهاش مباغاش نخسرك وباغية نكون معاك حتى انا ولكن ماشي على حساب كرامة وقيمة بابا
اورطيغا: متخافيش..
ملاك: منبغيكش تقلق نتا عندي مهم بزاف وتقليقتك منبغيهاش تكون مني ولا من واحد اخر
اورطيغا: (تبسم) نتي راكي حبيبتي حتى ونتقلق غي حيت باغيك بزاااف وحتى انا منبغيش تكون مشاكل مع عائلتك انا للي تنطلب حاولي ترجعي دغيا.. مغنسمحش فيك املاك ومغنخليش شي حاجة ضرك باباك بغاك ترجعي غير باش يعرف ويتأكد ان بنتو مزال تتبغيه ومزال كلمتو ماشية عليها حاولي حتى نتي تفهميه كما نتي باغياه يفهمك
ملاك: (بقات كتشوف فيه وكان غير من اللول قالها هكا ميخليهاش لعشية كاملة كتفكر كفاش تفهمو) غرجع.. غير شوية دالوقت انا بحرا كنبرا منهم امراد راه تماك معرفتش كفاش نشرح ليك مبقيتش قادة ندخل حتى للحومة تآذيت بزااف معمرني ننسى نهار خرجت من تماك بديك الحالة وعاد فاش رجعت هضرتهم للي مزال كتعاود فودني!!وخدمتي للي ضيعوني فيها وانا شحال وانا نقرا ونحفظ ونطلع ونهبط لفاس باش فالتالي وحدة مريضة معرفت شنو عندها فعقلها تحفرلي بحال هاكا..
راه… راه بحال الا قلت ليك رجع لݣرسيف عند ديك العائلة!!
اورطيغا: (كيسمع ليها وهو شاد يديها)
ملاك: بابا وقف معايا وخلاص حتى ماما خوتاتي مرت عمي ولكن لوخرين وعاد فاش وقع لجدي هكاك الا رجعت غلقى ما اكفس وانا والله ما مستعدة نسمع حتى حرف من شي واحد انا باغية غير…
اورطيغا: شنو؟!
ملاك: غير بعدا تبان برائتي
اورطيغا: الا على الخدمة مستاعد من غدا نديرلك بروجي
ملاك: ماشي قضية بروجي ولا فلوس بغيت يعرفو راسهم شحال ظلموني
اورطيغا: هوما عارفين ولكن لي بقات فعقلهم هي داك نهار واخا تجيبي القاضي معاك يشرح ليهم واحد بواحد نتي خاصك تيقي فراسك كتر
ملاك: تايقة والله حتى تايقة
اورطيغا: اوا احبيبة متحتاجيش تبيني لشي واحد شكون نتي..
خديجة: (بدلاتلو ليكوش وحوايج عطاتو حليب يرضع خشات ليه سكاتو فمو وناضت كتلبس حتى
دخل يوسف الشومبر هاز بوكي الورد وشي ساشية قلبت وجهها لمرايا شافتو من انعكاس لمرايا طل على ولدو ظحك معاه عاد جاي جيهتها)
يوسف: ختك مزال مشفتها
خديجة: (مردتش عليه)
يوسف: خديجة!! واش متأكدة من هادشي!!! انا متنظغطش عليك مبغيتش نفرض عليك هادشي
خديجة: اممم
يوسف: جبد البوكيه وهاد لكادو لبنت خيتك
خديجة: (حسابها جايبو ليها مجاوبتش هو بقا جالس ضار عند ولدو للي كيظحك تبسم معاه)
تبقى تهزو وتهضر معاه
يوسف: تنخاف نعطبو
خديجة: (ضارت عندو) ومتخافش تعقدو!! بلعكس هزو ظحك معاه ولعب وهضر هادشي لي تيبغي تربية
يوسف: (عرقاااتو، لبست صباطها جمعاتلو صويك ديالو مشات عند سليمان كتبسم معاه وتهضر هزاتو حطاتو فالكونة جات تهزو)
انا نهز عليك تقل
خديجة: (عوجت فمها) سبحان الله تفكرتي راني حاملة
يوسف: (مجاوبهاش هز الصاك والكونة والبوكي هي هازة صاكها وسابقاه وصلو للطموبيل رجع جلست معاه اللور وهي للي كانت كتحماق تجلس القدام ولكن هرب خاطرها من كوولشي… وصلو المصحة صافي قررت شحال قدها تخبي وعاد علاش غتحشم راه هو للي دار الفضيحة ماشي هي، هي غير بغات دير احر فداك تربية.. طلعو الفوق كانو العائلة تماك ومنها مها للي ديجا قاالت ليها شنو غدير دخلت عند ختها ويوسف هاز ولدو والبوكي)
يوسف: سلام عليكم.. على سلامتك اختي مريم (من بعد مبارك ليها ولراجلها ولزهرة دخل رشيد جايب لبنتو الكفتة مشوية والديسير واخا راجلها جايب ليها الا هاكا موالف سلم عليه)
رشيد: وهاد لوليد ؟!!!
خديجة: (شافت فمها وزهرة جرت رشيد يخرج تشرحلو جبدت لبواطة والظرف من صاكها وعطاتهم لمريم) هادو لااااالة شنو غتسميها؟
مريم: الله يخلف عليكم عذبتو راسكم (حمقها لبوكي اول مرة يجيلها واحد)
يوسف: مكاين حتى عذاب اختي
مريم: ربي يخليك قلت نسميها اميرة (حلت لبواطة كانت سنسلة وكوميط حلاقات وخاتم ديال تربية)
اوووووو كيحمق شكرا شكرا بزاااااف… (خديجة براسها عاد كتشوفو) نردو ليكم فساعة الخير… حمقني ههه…
رشيد: هادشي كان خاص يقولو قبل ميتزوج بنتنا عندو ولد ومقالش!!!!
زهرة: علاه هو كان عارف حتى تزوج عاد فاقت لوخرا وجات جايبة ليه الولد ولاحتولو ونتا عارف بنتك حنينة مقدرتش تخيرو بينو وبين ولدو
رشيد: راه هي خاص لي يقابلها
زهرة: عقلت نهار قلت ليك راه الا وقع لوحدة من لبناتك كما درتلي مغيعحبك حال
رشيد: ها ولا.. ولك..
زهرة: رشيد بنتك متشكاتش اذا هي قادة حنا ندخلو الا لجئت لينا وهي للي قالتلي نهضر معاك ونشرح ليك باش متمشيش عند راجلها وتلومو
رشيد: (مبقى عندو ميقول.. رجعو دخلو كانت خديجة هازة لبنيتة وولد يوسف كيمد يدو لخديجة تهزو دوزو معاهم ديك الوقت زهرة كتبات مع بنتها وخديجة ويوسف مشاو لوطيل وانا عياو فيهم عائلة مريم يمشيو للدار..)
يوسف: (كان عايش الدور وخديجة كظحك معاه وتهضرو قدام الناس ولكن غير ركبو فالطموبيل قلبت وجهها عليه مشاو لريسطو قلب عليه يحاول غير يهضر معاها دير معاه غير هدنة سلام هو محتاج ليها بزااف وباغي يصلح علاقتهم..)
~~~~~~~~~~~~~
ملاك: (بقاو كيتشاوفو حتى رجعت الحرارة بيناتهم حنات راسها) احم.. جبت ليك تاكل شي حاجة !! عرفتك مدرتيش الݣوتي
اورطيغا: (بعنين غياكلوها) نبداك؟!
ملاك: ههه متقدرش
اورطيغا: علاش؟!
ملاك: حيت نتا كتحتارم واليدية ومتقدرش دير شي حاجة قبيحة لية
اورطيغا: ويييييينو تتهضري بحال شي وحدة صغيييورة (قوست عينها فيه) اولا اكبيدة ال** ماشي شي حاجة قبيحة وتانيا انا باغي..
ملاك: صافي صافي فهمت غير بلا متكمل.. حيت عارفاك مغدير والو تاايقة فيك
اورطيغا: ههه هاكا راه تتزيدي تجعري أصل مي عليك
ملاك: ولا زعما نتا فهمت
اورطيغا: اواااا هنا منقدرش نقولك اه معرفت الوقت اش جايبة
ملاك: ياله خليتي نمشي
اورطيغا: مغتمشيش غتبقاي معايا وريني شنو جايبة!! (وراتو شنو جايبة وتبسم مافيه للي ياكل داكشي حيت فطر بيه صباح بكري)
نمشيو عند أمينة!!
ملاك: داباااا مشا الحال!!
اورطيغا: نجلسو معاها غير شوية ونوصلك انا مكرهتش نبقاو بوحدنا و..
ملاك: صافي ياله نمشيو
اورطيغا: (تبسم غير منين جات ترطب خاطرو وتقولو كلام ماشي ديما كيخرج من فمها عحبو الحال وحاول يفهمها حيت خاصو يتفهمها…)
مشاو فجو الظحك للرياض واخا كيتبسل عليها بشي لمسات كيبغي يبوسها عمرو فقد الامل ولا قال صافي مبغاتش يدير للي عليه حتى تحن!!
دخل مدرم للرياض جارها لبيت مو للفوق نيشان كانت جداتو وخالتو لوخرا معاها فبيتها متوقعش وجودهم وشي وحدة من عائلة الحاج مزيانة مع مو سلم على مو للي كديرلو إشارة بعينيها للي مخرجاهم باش يبوس لجداتو يدها حنا باس راسها ومجاوش حتى شنايفو فوق راسها وعاد قاطع التنفس غير بالسيف عليه
جداتو: الله يرضى عليك اولدي
اورطيغا: (مردش عليها مشا حرك الكرسي لحدا راس مو داير إشارة لملاك تجلس حداهم)
زين!!
أمينة: اجي ابنتي حدايا (حطت يدها كطبطب لبلاصة حداها)
اورطيغا: عدوك انا؟!
أمينة: (كتهضر تحت لسانها) وسلام هداك!!!
اورطيغا: حمدي الله حتى تن..
ملاك: ههه خالتي كيف بقيتي؟!!
اورطيغا: علاه هاد الجحموم يخليك تبراي وتݣادي
اورطيغا: انا جحموم؟!
ملاك: ههه هو!!!! ولكن قلبك وسنانك بويض متقلقش
أمينة: هاااااااااه عبرت على طاسيلتك هه
اورطيغا: (تبسم) واخا لالة ديريها فين تجيك أنص نص (غمزها وهي أكيد دماغها مشا شماااال.. بقاو مجمعين جا وقت لعشا هبطو عائلتها وأمينة طلبت منهم يجيبو لعشا ليهم فبيتها حيت لا هو لا ملاك غيهبطو لتحت)
أمينة: بنتي فوكاش تمشي لأزرو؟!!
ملاك: غدا ان شاء الله
اورطيغا: غدا عندي خدمة مع الحاج فتاونات صبري حتى لبعد غدا
ملاك: غنمشي بالطموبيل!!
اورطيغا: بوحدك مغتمشيش معاك وفاء ؟
ملاك: لا هي غتبقى فالدار بغات تبقى تماك على حساب شي وراق كتقادهم
اورطيغا: صبري نرجع من تاونات ونديك
ملاك: راه اليوم كان خاصني نمشي غير أجلتها ونتا عارف مصالحش راه العائلة كاملة تماك
امينة: حتى يانا ݣلت نمشي
اورطيغا: فين غتمشي ونتي هاكا؟!
أمينة: وراه غتديني نتا نهار سبوع نمشي نفوج اولدي
ملاك: الا بغيتي تمشي معايا من غدا
اورطيغا: لا… (شاف فمو) نسيتي نهار الخميس عندك كونترول ضروري خاص تحضري ليه
ملاك: (جات المساعدة حطت لعشا ياله جاو ياكلو)
….: لالة أمينة بنت سي محمد كتسول عليك بغات تطلع تشوفك قلت حتى نعلمك
أمينة: شكون؟!
….: ديك ليلا!!
أمينة: ااااه ݣولي هوما للي راهم لتحت؟! (ملاك غير كضور عينها) ݣولها تطلع
اورطيغا: هي نمشيو حنا؟!
أمينة: حشومة أولدي نعطيها غير صوابها وتهبط مجاتش سولت علية وانا نݣولها لا!!!
ليلا: (طلعت لبيت أمينة لقات مراد وملاك جالسين كيوريها شي حاجة فالتيليفون)
بونصواااغ..
أمينة: زيدي ابنتي.
ليلى: (كانت عارفة بوجود اورطيغا ولكن معرفتش ملاك حتى هي كاينة!! شافتهم مداوهاش فيها حيت كانو مشغولين مع التيليفون جلست حدا أمينة كتسول عليها وعلى كيف بقات حيت عزيزة عندها حتى نطق..)
اورطيغا: فين خوك؟!
ملاك: (ضارت مخنزرة فيه)
ليلى: باغدون!! معايا؟!
اورطيغا: اه فين خوك؟!
ليلى: ففرنسا
اورطيغا: علاش ماشي لبارح كان هنا؟! (بغا يقلقلها)
ليلى: لا عاد قبيلة هضر معانا وقال قرب يجي بغيتيه؟!!
اورطيغا: حتى يرجع
أمينة: (كولهم بقاو كيتشاوفو) بنتي تعشيتي؟!
ليلى: دايرة ريجيم اطاتي
ملاك: (ميقت فيها من ديك طاتي وعلى الريجيم كتشوفها ضعييفة مفهمتش اشمن ريجيم!!! شافت فلكريشة للي بغات تخرج ليها وهي تجمعها كدخلها)
خاص نمشي!!
اورطيغا: صبري شوية.. (بغا يتأكد) ليلا كنت بغيت شي حاجة من فرنسا يقدر خوك يجيبهالي!!
(عارفينو فين كيفكر ولاش باغي يوصل ولكن محملاتوش يهضر معاها)
ليلا: هو الصراحة مباغي حتى واحد يعرفو راه تماك هادي تيأكد عليها بزاف ولكن قولي شنو تبغي كاين ناس تنعرفهم يصيفطولي للي بغيت
اورطيغا: علاش مباغي حتى واحد يعرفو تما؟!
ليلى: معرفتش..
اورطيغا: اممم ونتي متأكدة هو ففرنسا؟!
ليلى: (مفهمتش علاش كيأكد جبدت تيليفونها وسمعاتهم اوديو كيهضر معاها وكيقولها انه شهر جاي يقدر يدخل للمغرب وراتولو فالتيليفون اوطوماتيك شاف الوقت واش جديد ولا قديم رد ليها التيليفون)
امم صافي..
اورطيغا: الوالدة (وقف) حنا نمشيو دابا
ملاك: (وقفت حتى هي تسالمو مع مو للي رتاحو من جهة غيثة للي كان كل واحد هاز همها واخيرا تعرفت انها مقتلاتوش.. ليلا خرجت حتى هي عيطت على مراد ضارت ملاك عندها)
ملاك: شنو بغيتي؟!
ليلى: بغيت نهضر مع اورطيغا
ملاك: (شافت فيه وسبقات معفرة تابعها حيت من شوفتها الا متبعهاش غتبدى حربهم خرجو برا)
هادي غتبقى غير كتلسق!!!
اورطيغا: (دوز نمرة يوسف) صبري.. (جاوب يوسف)
وي يوسف..
مهم سمع الجديد ادم مماتش وكاين ففرنسا..
من ختو..
اه وسمعت الاوديو..
اه.. فين هي دابا؟!..
صافي واخ.. (قطع)
اورطيغا: مفهمتش علاش تيخبيو علية فين كاينة غيثة؟!!!!
ملاك: وعلاش نتا اصلا كتقلب عليها؟!
اورطيغا: بنيتك راه مغنتهنى حتى يعاودولي شنو واقع خلينا من داك الغيرة ديالك
ملاك: (ميقا فيه كطلع وتهبط فيه) سييير امسكين راك تيقت راسك!!!
اورطيغا : ملاك راه خاص نعرف شنوا وقع
ملاك: شنو واقع؟! الا مك مبغاتش تهضر ونسات صافي حتى نتا نسا ولا غير باغي تقلب على صداع الراس
اورطيغا: (مجاوبش مشا لطموبيلتو تبعاتو ركبت كتشوف فيه)
ملاك: مراد صافي نسا نتا دمك سخون والا عرفت شي حاجة معجباتكش مغتسكتش علاش كتقلب على صداع
اورطيغا: اش غنسى راه خاص نعرف نفهم باش نسى!!
ملاك: ياك مك مبغاتش تهضر علاش نتا باغي تعرف بالسيف
اورطيغا: ملاك خليك نتي برا هادشي
ملاك: (دارت الصمطة وضربت الطم ومشاو للحومة نزلت وحتى هو نزل) غدا غتمشي بكري؟؟!!
اورطيغا: مور الفجر ان شاء الله وكان أجلتي السفرة حتى نتي
ملاك: مجاتش امراد راه مريم هاديك براكة غير هاد نهار للي ممشيتش فيه وأصلا عارفيني مخدامة موالو شنو غيخليني منمشيش عندهم وكولشي راه تماك وبابا غير كينݣر وانا براسي بغيت نمشي عند مريم ونشوف بنتها راه شحال وهي كتمنى تولد بنييتة
اورطيغا: اممم وشحال غتبقاي؟!
ملاك: حتى يفوت سبوع
اورطيغا: بزااف
ملاك: بحرا توحشني اه حقا وفاء غتبقى هنا فالدار
اورطيغا: علاش متمشيش معاك؟!
ملاك: يمكن مبغاش عمر قالها كاين رجال تماك
اورطيغا: اممم للي تيعرف يحكم
ملاك: تخربيييق هداك راه الثقة هي كولشي على اساس غيبقى خازنها حياتها كاملة
اورطيغا: ياااك!!
ملاك: مهم انا نطلع باش نوجد حوايجي
اورطيغا: شحال خاصك؟!
ملاك: واالو.. (بغا يجبد فلوس) والله مغنشد منك شي حاجة ولا غنتقلق صافي براكة غير خلصت طريطا وعاد غتبقى تسالهالي
اورطيغا: وباش غتمشي؟!
ملاك: عندي… عندي شي حاجة
اورطيغا: (بقا كيشوف فيها) اخر مرة تعاودي تحلفي علية ولا غتلقاي وجه اخر
ملاك: (تبسمت) تصبح على خير
اورطيغا: هاكا الناس تيتسالمو
ملاك: (فرنست وتمت ماشية بقا متبعها حتى سدت لباب مشا هو لدارو تابعو غدا نهار طويييل ودماغو خدام غير مع مشكلة ادم غيثة مو…)
~~~~~~~~~~~~~~
ليلا: (صيفطت اوديو) قنعتوو راك ففرنسا!!
ليلى: (منين صيفطت ليه الاوديو صونا عليها خرجت برا باش تهضر على خاطرها) وي ادم!!
ادم: شنو؟ صافي!
ليلى: صافي راه وريتو راك كاين ففرنسا وحتى اخر اوديو شافو وباينة قلب على الوقيتة فاش صيفطتيه
ادم: اممم مزيان
ليلى: شنو واقع باش تيقلب عليك هاكا؟! وباين ماشي غير هو
ادم: مهم نتي درتي شنو قلت ليك من بعد ونصوني عليك
ليلى: ديما تنقولك خرجني من هادشي ديالك بابا وولف يعيش هنا ونسا فرنسا علاش نتا مزال تتقلب على المشاكل
ادم: (قطع معاها وبقا فظلام صااااااقر ودماغو خدام هو بغا يعرفهم انه حي وفالمغرب وعاد يكمل شنو بدا…)
~~~~~~~~~~~~
ملاك: والله حتى سمعتها بودني هو مماتش وكاين ففرنسا
غيثة: يعني مقتلتوش!!!
ملاك: كانت باينة من اللول!!! دابا شنو غديري؟!
غيثة: معرفتش
ملاك: انا خايفة يكون حاضيك مفهمتش شنو بغا منك
غيثة: هو باغي ينتاقم من مراد ونسا انه معندي حتى علاقة بيه من غير هو صاحب خويا
ملاك: وعلاش غينتاقم منو؟!
غيثة: (تفكرت) اه واحد المرات سمعت منو تيهضر مع شي وحدة باش حتى نتي تحفر ليك ياكما هو سبابك فالخدمة؟!
ملاك: تيهضر مع أميمة؟!
غيثة: معرفتش شنو بالظبط مهم مرة وحدة سمعتو نهار نيت درت ليه داكشي كنت مركزة غير معاه باش نضربو
ملاك: بلاتي بلاتي.. كفاش هضر وشنو قال؟!
غيثة: قال هو غينتاقم من مراد بطاتي وبيك نتي
ملاك: (بقات غير كتشوف زعما يكون هو وأميمة تافقو؟!) وعلاااش؟!
غيثة: (بزفرة) حيت قالك مراد هو للي حفر لباباه ودارلو لادغوݣ فالمطار!!
ملاك: كفاش!!! (بقات غير كتشوف ودماغها خدام كيشرك شي مع شي وأهم سؤال كفاش تجمع ادم وأميمة!!!)
اصبحنا واصبح الملك لله..
ملاك: (ناضت جمعت حوايجها كلام غيثة متنساش ليها لبست حوايجها كانت وفاء خرجت مشات للجامعة وهي مشات باركينغ تجيب طموبيلتها وتخلص لخطية معندها مدير حتى كتفاجئ ان طموبيلتها مكيناش فلاݣار داوها ديباناج حيت مبغاتش تخلص تغاوتات مع للي كاين تماك كلمة منو وعشرة منها محايراش فيه، صونات على مراد يعاونها يفهمها ولكن مجاوبش بغات تعرف غير منين تخرج طموبيلتها)
تفووو شحال معكسة هاد المشية!!
(عاود شدت تاكسي للحومة كتصادف مع حمزة تماك مفهمتش شنو مزال كيدير جاها هادشي كتر من مبالغ فيه تم جاي جيهتها وهي مخيخة ولكن تفكرت خاصو يعرف ان أميمة كانت دايرة يد مع ادم يمكن هادشي يزيد يعاون فقضيتهم)
حمزة: مالكي؟!
ملاك: مماليش غير كنشوفك بحال اللصقة لاسق هنا شنو باقي باغي
حمزة: جيت ناخد شي حوايج من هنا
ملاك: سبحان الله فاس بطولها وعرضها عندك الغرض غير هنا عيقت بزاف احمزة (تم ماشي) صبر (ضار عندها) أميمة مكانتش بوحدها فاش دارت داكشي كان حتى واحد الكلب متافق معاها
حمزة: راه حنان قالت كان واحد لي عطاهم فلوس وفلوس كتييرة
ملاك: تنعرفو!
حمزة: شكون هو حيت لوخرا معرفتش شكون هداك وحتى سمية معرفتهاش
ملاك: سميتو ادم مفهمتش اصلا كفاش تعارفو وتلقاو هو خطيب راجل خت خديجة لا علاقة بيناتهم ولكن جامع بيناتهم فعايل ليهود
حمزة: شنو سميتو كاملة باش نحطوها فالمحضر
ملاك: معرفتش ولكن نسول ونقولك يعني تجبدووه ؟!
حمزة: اه
ملاك: وتعرفو واش هو فالمغرب ولا ففرنسا؟!
حمزة: اه (بقات كتفكر هادشي غادي يعاون حتى غيثة اصلا الا كان فالمغرب وداير ملعوب بحال والو يكون حتى هو مراقبها من هنا دورت عينها كتخمم)
مالكي؟!
ملاك: والو.. والو!!
حمزة: مغتمشيش لأزرو عمي رشيد راه مقلق منك بزاف على الاقل سيري لتماك
ملاك: ونتا مالك؟!
حمزة: حيت بخوفو عليك مخليني هنا حاضيييك اه فهمنا راك باغية السيد للي نتي معاه ولكن هاكا كتبيني لباك انه معندو حتى قيمة عندك
ملاك: وشغلك؟! (بقات كتقلب بعينها على هاد ادم بحال والو يكون هنا) صبر بعدا الا جبت ليك سمية ديالو تقدر تقولي واش هو فالمغرب وفين بالظبط؟!
حمزة: وعلاش باغية تعرفي؟!
ملاك: بغيت وصاافي
حمزة: ان شاء الله !!
ملاك: مهم بغيتك تفهمني واحد لحاجة!! داولي طموبيلتي لفوريان معرفتش فين كاين هاد زمر وكفاش نجبدها كنت خليتها فلاݣار كتر من شهر وحسبو علية زبالة فلوس منين جيت هاد صباح نخلصها لقيتهم داوها واخا غير لبارح مشيت عندهم
حمزة: اري سوارت والوراق
ملاك: غتخرجها؟!
حمزة: عطيني.. (عطاتو حيت معندهاش حل اخر)
ملاك: (مدت ليه الفلوس باش يخلص) هادو هوما الفلوس
حمزة: كنعرف ناس مغنخلصش… (تم ماشي وبقات كتقلب بعينها على ادم مشات السمسار تخلصو فطريطا شد من عندها وتمت راجعة للدار حتى جاها ابيل من عند مراد)
ملاك: قبل متهضر انا نعاود ليك قبل ميوصلوها ليك
اورطيغا: (مفخبارو والو) اش تما عاود؟!!
ملاك: طموبيلتي كنت مخبعاها (عاودات ليه كولشي) وحمزة مشا يجيبهاالي حيت معرفت فين هاد زمر فين داوها وهو غيخرجها بمعارفو
اورطيغا: (بعصبية) وعلاش لبارح مقلتي والو؟!!
ملاك: مبغيتش نزيدك راه مكتبغيش تشد علية حتى لفلوس!!!
اورطيغا: غير تترݣعي!!
ملاك: وانا فهمتك علاش امراد هو بوليسي ساهل يحبدها
اورطيغا: ***** ****** (هي مبعدة التيليفون على ودنها حتى يكمل) الوو!!
ملاك: وصافي امراد وزعما كنفهمك شنو كاين مكندير من موراك والو راه صونيت عليك قبل غير نتا مجاوبتش (رجع كيخصر الهضرة بعدت التيليفون شافت طلعت ليها ابيل تانية كانت مها معرفت واش تقمعو تقطع عليه ولا تجاوب مها خلاتو كيهلل ويتحلف عليها)
مراااد واااا مراااد (قطع عليها) يييخخخ شحال عصبي!!
(صونات على مها لي كتسول عليها فين وصلت عاودت ليها باختصار وأنها غير تجي الطموبيل غتشد طريق قطعت ورجعت صونات على مراد مكيجاوبش صيفطات ليه اوديو)
وصافي امراد متقلقش انا غير وحلت ونتا بعيد راه صونيت عليك مجاوبتش وخاصني باش نمشي راه صدعوني بامتى نوصل عندهم!!
قولي منين تجي الطموبيل شنو ندير واش ناخدها لميكانسيان ولا شنو ندير ؟!!! (هي عارفة شنو غدير غير بغات تحسسو انها محتاجة ليه..)
اورطيغا: (كانو راجعين فطريق وكلام ملاك كيتعاود فودنو يمكن خاصو يرخف عليها حيت عندها بزاف دالظغوطات منو من عائلتها من كولشي ولكن داكشي ماشي بخاطرو يسمع حس حمزة كيحس بعرق غينفاجر فراسو ماشي بيدو…
مشاو لبنسودة حطو الغنم فالكوري ديالهم كمل لحساب مع الحاج عطاه نصيبو حيت كيبغي يتخلص على خدمتو فوقتها عاد بداو شي ذبيحة.. كان مكرهش يمشي عندها هو يقضي الغراض ولكن مربوط بالخدمة!! حيت دغيا خاصو يوصل الكموند المحال ديالو فين كيتسناو الكليان)
~~~~~~~~~~~~
يوسف: (متصدمش بزاااف من كلام مراد ان ادم حي وهادشي غيزيد خوفو على ختو ادم شنو غراضو يبان ميت ليهم!! كان مقابل ولدو فلوطيل بغا يخلي لخديجة شوية ديال الحرية مع عائلتها صونات عليه مو حتى كيتفاجئ بيها كاينة فازرو هي وباه)
شنو تديرو هنا؟!
الغالية: جينا نقومو بالواجب مع نساابك اولدي
يوسف: (مبقاش كيتيق فيها) عطيني الواليد… الواليد صاڤا ياك لباس علاش جيتو؟!…
لا لا حاشا.. اممم.. صافي قولي فينكم نجي ناخدكم.. انا فلوطيل.. اه اوطيل ***** صافي..
(قطع صونا باش يعلم خديجة خايف من ردة فعلها مجاوبتش تسنا مدة حتى وصلو طلعو عندو لاشومبغ ديالو دخلو)
اب يوسف: فين غيثة؟!!
يوسف: بقات فاس
الغالية: بوحدها؟! علاش مجبتيهاش معاك وحتى منين كنتو غتسافرو بوحدكم جيبها عندنا للدار؟!
اب يوسف: شنو مخبيين علية ستين ألف مرة تنسول وغيثة غير طافية تيليفونها شنو وااقع
يوسف: رتاحت عندي وكانت مقابلة خديجة فحملها
الغالية: داكشي للي قلت ليه ومتاقش
اب يوسف: لا لا مخبيين شي حاجة!!
الغالية: (مشات هزت سليمان) تتهلاو فيه بعدا؟!
يوسف: لقا للي يحن عليه حسن من كولشي
الغالية: (طمرت وسكتت) غتبقاو هنا!!!
يوسف: نتي عارفني متنبغي نتقل على حتى شي واحد
الغالية: اوا ياله نمشيو لدارهم تتعرفها بعدا؟!
يوسف: شكون قالك حنا هنا؟!
الغالية: شفت مرتك حطاها فالواتساب صونيت على مها اوا قلنا حنا بوحدنا جينا هنا نديرو صواب نشوفوكم ومنها نرتاحو شوية الجو هاد الايام تيكون زوين وباك محتاج هاد الطبيييعة..
حمزة: (كيدق فدار ملاك للي كانت داخلة كدوش باش تمشي لأزرو.. غيثة دخلت تخبعت ومشات وفاء حلات لباب كان هو تأفأفت من وجودو) فين ملاك؟
وفاء: شنو بغيتها؟!
حمزة: راه طموبيلتها لتحت
وفاء: صافي (خدات من عندو سوارت والوراق، جات تسد لباب ووقفو بيدو) شبااغي عاود؟!
حمزة: بغيت تصويرة ديال داك الكلب للي تعاون مع الكلبة
وفاء: شكون هاد الحيوانات؟!!
حمزة: كلمي ملاك هي للي عارفة علامن داوي
وفاء: مكيناش وبلا مترجع ودير السبة بهادشي
غيثة: (كانت كتصنت حلت لباب طلت لقاتو غير بوحدو) واش نتا هو البوليسي؟!! (كتسمعهم كيهضرو عليه وعارفاه شنو وقعلو حتى هو بسباب ادم ومرتو)
وفاء: (خنزرت فيها) دخلي نتي!!
غيثة: راه عندي تصويرتو الا كان غينفع يشدووه
حمزة: عطيهالي
وفاء: (ربعت يدها واقفة مخنزرة مشات غيثة دخلت شاعلة تيليفونها وجات عندهم عطاها نمرتو صيفطاتها فالواتس)
غيثة: هو سميتو ادم **** خدام فهاد الشركة **** وعندو طموبيل اودي فلبيض ساكن ف***** ولكن معرفتش واش باقي ساكن تماك حيت خويا قال مكاين حتى واحد تماك
حمزة: عارفة الماتريكيل ديالو؟!
غيثة: عاقلة على 3 الارقام لوالة 880 و… معقلتش على شي لاخر.. عندي الانستغرام ديالو حاط تصاورو الا تبان ليك الطموبيل (صيفطات ليان فلواتس)
حمزة: صافي (شاف تصويرتو.. رجع شاف فيها وشاف وفاء لي باينة كتكرهوووو) قولها راه لوراق والطموبيل مريݣلين (تم ماشي هابط مدوز شي أبيل..)
وفاء: (سدت لباب وشافت فغيثة) اخر مرة تعاود تخرجي تباني والا كان مراد ولا تم طالع وشافك؟!
غيثة: انا غير بغيت نعاون
وفاء: غتعاوني راسك!!! اوا وملاك؟! منين تجبدي ليها صداع مع مراد ويقولها خبيتيها عندك شنو غيوقع ديك الساعة!! الله يرضي عليك اغيثة تبقاي تعرفي شنو كديري فكري عاد زطمي
غيثة: والله مبغيت ندير ليها شي مشكل
وفاء: اوا مرة أخرى, متعاوديش..
غيثة: شكون هدا؟!
وفاء: ولد جيرانهم فصفرو وراكي عرفتيه ياك خارجة كتقولو البوليسي
غيثة: غير سمعتكم تتهضر عليه.. وعلاش تتعاملو معاه قبيح؟!
وفاء: حيت ملاك وقعلها نفس لبلان بغات تعاون وصدقت فمشكل كبير داكشي باش كنقولك عرفي شنو كديري متخلقيش ليها المشاكل.. للي فيها مكفييها…
خديجة: (بقات غير صااقرة للي خلاها متنفاعلش وترفض مو قدام عائلتها مكتبانش على حقيقتها معاها زائد كاين باه وللي فحضورو كيكون تعامل اااخر..)
…بنت لحرام تابعاني حتى لهنا!!
زهرة: راه مو جمعي راسك
خديجة: راه غير كتمرضني شوفتها مكنحملهاش مبقيتش كنحلم نشوف وجهها ولا نسمع حسها
زهرة: خديجة!!
خديجة: ونكذب؟!!! مكنحملها مكنقبلها!! (سكتو منين دازو حداهم ناس من العائلة دخلو عند مريم علموها غيجيو عائلة يوسف) حتى ملاك قالتلي غتكون شادة طريق
مريم: على سلامتها منين طلقوها رجال لبلاااد
خديجة: عمرك شفتي ملاك محكومة!! غتشوفيها دابا.. يا خاي مكتنهنهش قدامو ههه
مريم: ههه بانلي هدا مغدوزهاش عليه!!
زهرة: عنداكم تقولوها قدام باكم
مريم: ياك هي ختارتو خليها ضبر راسها معاه يشرط عليها مترجعش تشكي وتبكي عليه
زهرة: اوا اجي نتي دخليلو هادشي فراسو
مريم: ههه مسخاش بيها وصاافي.. (يوسف علم خديجة راه وصلو مشات تعرضت ليهم سلمت عليهم وصلت للغالية تسالمو بالوجه وهي تهمس ليها)
خديجة: الا هضرتي على مشاكيلي مع ولدك غنهضر على بنتك!!
الغالية: (طمرت ووجها تبدل لوونو دخلو تحت ترحيبات عائلة راجل مريم وزهرة..)
خديجة: يوسف اجي معايا عفاك (خرج معاها كانت الغالية هازة سليمان وغير ساكتة فقط كتعطي صواب..)
ياك فهمتها شنو تقول؟!
يوسف: متخافيش
خديجة: نتوما للي خاصكم تخافو حيت أنا للي مغنسكتش
يوسف: خديجة نقصي شوية من العصبية حتى واحد مباغي ولا قادر يتحارب عارفين شنو دوزنا عليك حتى واحد مغيقولك حتى شي كلمة
خديجة: (عاد رتاحت) مزيان حتى انا مبقيت باغية لا نتحارب لا والو باغية غير راحة لبال ونبعد على صداع الراس
يوسف: وأنا؟!
خديجة: (مجاوبتش دخلت وهو مشا حدا رجال..)
ملاك: (كانت نيت فطريقها دازت على محال اورطيغا لقاتو تماك ولكن مشغوول بزاااف شافها مشات عندو متبسمة)
سلام
اورطيغا: دخلي!!
ملاك: (دخلت كتسناه تعطل وهي تخرج مشات حداه كان كيكتب شي بون) كبييدة!!
اورطيغا: (هز عينو فيها) قلنالك دخلي!!
ملاك: تعطلت خاص نمشي بغيت ندوز عندك قالولي فݣعان!! (فرنست)
اورطيغا: فݣعان لمك!!
ملاك: وصافي زعما مكنخبع عليك والو ومبغيتش نشد طريق ونتا مقلق مني
اورطيغا: سيري لطموبيلتك انا جاي (خرجت حيت لكليان تماك، مكملاتش 2 دقائق جا عندها مكيظحكش)
ملاك: السلامة يا ربي!!
اورطيغا: حلي هاد ***** نشوف الزيت (حلات ليه قلب الزيت والما عاد تم ماشي عندها) خلصتيه!!
ملاك: (بكل ثقة) اه
اورطيغا: متأكدة؟!
ملاك: غنتقلق منك!!
اورطيغا: تفرݣعي!! نعرفك مخلصتيهش غنتفاهم معاك ديك الساعة ياله سيري توصلي زغرتي علية
ملاك: هاكا نمشي
اورطيغا: ياك قلتيلي مزرووبة
ملاك: وصافي بغيتك تبقى على خاطرك زعما
اورطيغا: واش متعرفيش تقلبي عليه متهضريش معاه مفهمتش شنو حاكم صعيب باش كل واحد تعطيوه بلاصتو
ملاك: دابا غير كفاش نفهمك راه هو هو للي كيجي يهضر معايا والله مكنخليلوش بالهضرة والغوات
اورطيغا: وشنو للي مخليه تيحوم عليك؟!
ملاك: بابا… بابا للي مخليه حاضيني عند بالو دابا راه مهني بعدا عارفني بيخير هو براسو قالي رجعي لداركم ومغتبقايش تشوفني راه باك للي كيصيفطني نحضييك وباينة حتى هو مباغيش غير داير الخاطر لبابا
اورطيغا: (مغيفهمهاش هاد الساعة) صافي سيري من بعد ونهضرو
ملاك: ممقلقش؟!
اورطيغا: (حرك راسو بلا) بشوية عليك فطريق
ملاك: جيب خالتي أمينة فسبوع واجي نشوفك منعرف نسلت معاك شي سليتة (غمزاتو)
اورطيغا: الا كان على العامر!!
ملاك: (هزت كتفها) منعرف!!! (خلاتو متبعها متبسم بعينيه ركبت ديمارات وزادت المهم عندها ميبقاش مقلق..)
ملاك: (شدت طريق وهي كتمووسق حتى وصلت لأزرو نيشان لدار ختها لقات باها ويوسف وباه حتى عمها كاين ولكن هداك للي مزيان غير هو واش باقي مزيان ولا حتى هو عوجووه؟!!
خرجت مُحْرَجَة معارفاش كفاش غيسلمو عليها وتكون ردة فعلهم كاملين جبدت الباليزة من الكوفر بطرف عينها حاضية باها توترت بزاف صونا عليها مراد تخبعت من مور باب الكوفر للي مهزوز كتجاوب)
الوو
اورطيغا: وصلتي؟!
ملاك: ياله وصلت العمر!! مزال مطلعت لقيت بابا وعمي كولشي حدا باب الدار لي لتحت، معرفت شنو ندير؟!
اورطيغا: ديري راسك عورة ولا حولة ولا هبيلة ركبي طموبيلتك واجي عندي راه مزال باغي نتحاسب معاك
ملاك: هه بالصح بالصح شنو ندير؟!
اورطيغا: سيري سلمي عادي ماالك قاتلة!! باك شنوما قالك ولا غوت حني الراس متجاوبيهش شي لاخر صوطي فلقلا** كامل
ملاك: يا ربي غير مينوضش شي صداع
اورطيغا: تنعرفك صنطيحة سيري دفعي الجبهة وتركني حدا ختك ونساي قوة خيطي بيطي خليك رزيينة
ملاك: (ضارت كطل برويسها بهمس) ياله باي باي نمشي ونبقى معاك فلميساجات..
(قطعت عليه سدت لباب وجرت باليزتها جاو عندها ولاد ختها كيعنقوها سلمت عليهم وتمت ماشية عند لوخرين سلمت عليهم عمها جرها عنقها حسابلها غيحاسبها على باه اما باها داير راسو مشغول مكيعرفهاش واخا وقفت كمل كلامو مع بات يوسف فشي موضوع جرتلو يدو من جيبو بالسيف عليه باستها ورداتها خلاتو غير كيشوف طلعت الفوق سلمت على للي كان فلبيت وتحشات ناعسة مع مريم شادة لبنيتة)
زهرة: مغتزرريش بنت ختك؟!
ملاك: معارفاش لفلوس ممزيانينش لبيبي راه كيكونو عامرين ميكروبات وجراثيم
زهرة: ههه شريهم ذهب!!
ملاك: ملبساتو حتى خالتها !!!
مريم: ياك لمك!!!
ملاك: (جبدت جوا من صاكها وعطاتوو ليها) منسمحش ليك الا خديتيلها شي ريال منهم
مريم: هههه باااز يا ختي بااز.. بهاد الفلوس غنمشي نحل ليها كونت فلبنك ونديرهم ليها تماك باش غير تاخد لباك دير بيهم شي مشروع مزيااان!!
ملاك: ها ها ها (كتشقلب عينها) الموووووهيييم.. خدوووج فين!!! مزال مبانلك شنو عندك؟!
خديجة: مزال اجي معايا نهضرو
ملاك: غير رتاح شوية ونهضرو هاد نهار داز عندي مسخسخ!!
حمزة: (عطا المعطيات للي عندو على ادم للسيد للي خدام معاه ومشا للمحامي قالو هدا للي كانت معاونة معاه أميمة وغاابر وبحال والو هوما بجوج..
كمل وتم ماشي لدارو عيان وحداني مو مولاتش رجعات للدار بكترة المشاكل للي دازو منها نفرت ديك الدار ولقات راحتها فالعروبية عند عائلتها هو لي كيمشي لعندها يطل عليها ويشوف شنو خاصها..
فكر فملاك للي رجع إحسلسو من جهتها عادي عندو عزيزة كان مكرهش يرجعو لبعضياتهم قبل ولكن دابا كيشوفها فشكل!! جاه ميساج من عند ديك النمرة ديال ديك لبنت)
غيثة: خويا واش هو باقي حي؟!
حمزة: (باستغراب) شكون؟!
غيثة: ادم!!
حمزة: (مفهمتش تعݣد وجلس) علاش هو مات؟!
غيثة: (مجاوبتش حسابها منين بغا يعاون راه عارف كولشي بقات كدور عينها) ناري انا شحال مكلخة غادي نزيد نضيع بزاااف بهادشي لي كندير
حمزة: (صونا عليها جاوبت) كفاش ميت؟!
غيثة: واش نتا ثقة؟!
حمزة: كفاش!!
غيثة: باش نقدر نعاود ليك وتفهم بزاف دلحوايج خاصني نتيق فيك انا مبغيتش ندخل الحبس!!
حمزة: الحبس!! علاش شنو درتي؟!
غيثة: بزااااف
حمزة: وعلاش ملاك مخبعاك شنو كتجيها نتي باش تخبيك
غيثة: انا خت راجل ختها
حمزة: مفهمتش دابا شنو واقع؟!
غيثة: هو ظحك علية… واش غتعاوني؟!
حمزة: باش قدرني الله
غيثة: (كانت محتاجة تخوي قلبها لغريب) هاد ادم من العائلة ولكن كما تنقولو ريحة الشحمة فالشاقور دخل فحياتي فواحد الوقت لي كنت محتاجة يكونو عندي أصدقاء هو استغلني تنخرج معاه ومع حتى كليكة ديالو مكنتش عايقة بيه تيعطيتي لادغوݣ مرة فالعصير مرة فقهوة حتى رجع تيعطيهالية نيشان وبضوز كبيرة مقدرتش نبعد من لادغوݣ ولقيت راسي حاملة منو وانا معارفاش حتى كفاش وعلاش وامتى حتى كنا انا وياااه للي فهمت منين كنغيب كان تيدير فية للي بغا والحاجة لقبيحة تيوهمني انه معندو حتى علاقة بهادشي خلاني بحال شي حمقة (مكتبكيش مخرجة عينها وهي كتعاود كتفكر كولشي)
عاقو بية دارنا وخويا عاونوني باش نزول داكشي ولكن كل مرة تيبان وتعطيني لدرجة منين بغيت نبعد انا وبخاطري حيت تكرفست بزاف وكرفست معايا كولشي بقا تيهددني اول حاجة دارها عطا لماما شي حاجة فالقهوة ديالها وقالي الدور على خوك ومرتو وباباك خفت عليهم بزاف… شوية خويا دار كسيدة هنا كنت غنحماق حيت عرفت انه انسان خبيث ملحد متيآمنش حتى بالله مرييض وقادر يدير أي حاجة باش يوصل لداكشي للي بغا..
غيثة: ….مريض وقادر يدير أي حاجة باش يوصل لداكشي للي بغا وهادشي كامل غير باش ينتاقم من اورطيغا
حمزة: شكون هدا عاود؟!
غيثة: مراد خطيب ملاك!!
حمزة: واش دخلو هو فهادشي؟!!
غيثة: هو معارف والو حيت نهار غيعرف غيقتلني انا اللولة!!!
حمزة: (خربقاتو) علاش؟!
غيثة: حيت هداك فاش بقا تيهددني قالي غنحبس هادشي كامل ونبعدك ولكن ديري شنو بغيت هو نقتل مو
حمزة: كفاش؟! وقتلتيها؟!!
غيثة: لا
حمزة: مفهمت والو!!
غيثة: دابا مراد وطاتي مقربين لية بزاف (زفرت) كان تيهددني حتى تلقاه تيصيفط لية ڤيديوهات مصورني وانا معاه فاش كنت مدروݣية وصلت بيه صيفط لماما ولخويا وبابا بابا للي معارف والو حيت ابسط مشكلة ولا صدمة غتقتلو
حمزة: (غير جالس داير التيليفون فودنو وكيسمع لهادشي)
غيثة: درت شنو بغا وديت طاتي لبلاصة لي قالي نديها وانا عزيزة علي طاتي أمينة بزاف عاودت ليها كولشي وحتى على ادم وشنو مصيفطني عندها ندير مسكينة فهماتني وسامحتني والإبرة للي عطاني ندير ليها لحتها ولكن هو كان داير خطة اخرى حتى كنتصدم تاكسي جاية وضرباتها وصلتها كومة لصبيطار
حمزة: وشنو علاقتو بمرتي؟!!
غيثة: هو نهار للي كان مراد بغا يخطب فيه ملاك تافق معاها يعني كان غراضو يضرب جوج دالناس للي تيبغيهم مراد فنهار واحد
حمزة: كنتي عارفااه متافق على الكلبة؟!
غيثة: لا هادشي قالولي حتى فات شحااال نهار للي بغاني نكمل شنو بديتي مع طاتي ولا.. عاود التهديد ديالو
حمزة: (باغي يسمع كولشي) كملي..
غيثة: خليتو حتى كمل شنو بغا وعطاني إبرة قالي هاد المرة غادي تشلل طاتي فمرة محس بية حتى كنت هازة فرشيطة سرقتها من صبيطار وبقيت تنغرزها فيه رجلو كرشو اي بلاصة حكمتها يدها ودݣيت ليه الإبرة فرجلو خليتو فلخلا بدماياتوو مشلل وهربت فاش خويا عرف مشينا لتماك تلقاو الطموبيل تفحمت وللي فيها رجع رماد مفهمنا والو حيت أنا محرقتوش!!
حمزة: هو دابا مات؟!
غيثة: حتى واحد ممتيق موتو حيت دازت بزااف عائلتو عادي مكاين حتى خبار عليه قالي خويا ماماه عيطات لماما وقالولها غيجيو عندنا على ميرجع من فرنسا مفهمت والو واش هو حي واش اصلا درت ليه شي حاجة هو اصلا من اللول تيخليني نتيق انني غير تنتخيل واخا تتكون ديك الحاجة حقيقية وكاينة ولكن تيلعب بية خلا ماما كولشي تيكرهوني واخا تنقول الحقيقة ليها متتيقنيش ندمت علاش مصارحتش خويا يوسف هو للي كان تيتيق بية وكان غيعاوني
حمزة: هادشي لي عاودتيلي راه بزاف عندك شي دليل؟؟
غيثة: متيخلي حتى شي دليل من موراه حتى من الكاميرات تيعرف فين كاينين وتيبعد عليهم حتى فاش تنتلقاو تيجي بطموبيلات ديال لكرا النمرة عاطيني تيليفون صغير باش كان تيهضر معايا وماشي بنمرتو
حمزة: وكفاش تلاقا هو وأميمة؟
غيثة: …معرفتش كفاش تعرف على مرتك ولكن فهمني انه تيهضر معاها مدة طويلة هي كان غراضها باغا تنتاقم من ملاك وهو من مراد وتجمعت مصلاحتهم بجوج شنو وقع وكفاش مفهمتش للي فهمت هو بجوج منعو الخطوبة متكملش..
حمزة: نتي وملاك صحابات؟!
غيثة: اه
حمزة: ولكن تتغامر بهادشي لي كدير معاك!! فين خوك وعائلتك من هادشي كامل؟!
غيثة: انا هربت عندها خليت خويا يعيش شوية حياتو وملاك مبخلاتش علية تعاوني.. (تنهدت) فكرت نموت باش نتهنى ونهني كولشي جوج مرات كنت غنديرها مصدقوش لية والتالتة هي فاش هربتني ملاك انا كنت كنفكر نجري غير لطريق اي طموبيل تضربني نتهنى وصافي
حمزة: لا لا لا أعوذ بالله ݣاع درنا أغلاط ولكن منفكروش بهاد الطريقة بلعكس شحال ما تقربنا من الله تيبانو لنها بيبااان
غيثة: بحال هادشي للي فيه انا لاا!!
حمزة: حتى انا درت حقي (عاود ليها على موضوع ولدو ولكن لبنت لي كيبغي مسماهاش باسمها)
….والكلب نهار منع ديك الخطوبة جات فية انا وملاك الضربة (عاود ليها كفاش مات باه وهي خرجت من الخدمة وطجت وتقلب حياتها)
غيثة: (كانت عاودت ليها ملاك ولكن هو قال التفاصيل على حياتو) كولشي بسبابي
حمزة: تتخربقي نتي براسك ضيعك وكان دايرك طريق لينا كاملين
غيثة: (بتنهيدة حزن) ضيعنــــــــــــــــــي!!!!
حمزة: معليش كولشي يتصلح دابا غنشوفو هاد الكلب فين هو ويطيح ويطيح
غيثة: حتى نتا تآذيتي منو بزاف واخا متيعرفك متتعرفو
حمزة: الصمطة كدوووور اختي.. شنو سميتك
غيثة: ههه شحال وحنا تنهضرو.. انا سميتي غيثة نتا حمزة!!…
~~~~~~~~~~~~~~
دازت أيام وفاء جالسة مع غيثة للي كانو هي وحمزة مكيقطعوش التيليفون فحكم أصدقاء..
اورطيغا غارق مع الخدمة حيت قرب عيد لكبير وكيكتر عليه الحساب والطلبيات وخاصة يرد الفلوس للي شحال وهو واقف مع الشطنة ديال مو..
ملاك مستانسة مع خوتاتها العائلة واخا مألمة من باها للي مبغاش يهضر معاها ودخلو لبنات ومهم مبغاش خلاو داكشي مستور على حساب عائلة مريم..
خديجة مبقاتش فلوطيل جابت سليمان معاها مقاسمين معاها التربية وخلات يوسف وعائلتو فلوطيل حيت مبغاوش يتقلو على الناس وكيحاول غير يرد علاقتو مع خديجة بعدا هي كانت كتقويه قدام مشاكل ديالو…
غيثة: (كانو فوسط الدار واقفة كتوادع معاها وفاء وكتوصيها متخرجش متبلنش متحلش السرجم مطلعش لسطح من بعد مجابت ليها للي تحتاج هاد اليوماين)
كوني هانية
وفاء: عنداك اغيثة راه خايفة عليك وحتى على ملاك مراد واخا غيدينا لأزرو راه عندو عينيه هنا وعاد غيرجع وهو كيعمر هنا
غيثة: صافي كوني هانية انا اصلا والله مبغيت نخرج (عنقتها وخرجت وفاء مطرقة لباب عليها غيثة شدت فكريشتها للي جلستها فدار ملاك ريحاتها بزاف وزاد وزنها شوية ولكن للي عطاها واحد البصيص هو حمزة الصديق الغرييب وشحال عحباتها فكرة تهضر مع انسان مكيعرف عليها والو تقولو الخايب وزوين فيها متخافش يشوف فيها بنظرة خايبة بلعكس قالت كوولشي حتى من حبها الاعمى لاورطيغا ولمبرهش لقاتو كيسمع ليها بلا ميقولها لا كان خاصك ولا نتي غالطة فقط كيسمع ليها وحتى هو هضر وعاااود…
مشات للكوزينة كانت خلات ليها غداها طايب مبغاتش تاكل دابا دارت فباݣيط فرماج زبدة زيت زيتون داند فيمي زيتون كحل فرماج احمر عمراتو مزياااان كبت كاس حليب كبير من بعد مدفاتو دايرة فيه الشكلاط ومشات لبيت ملاك للي مخلياه محلول على حسابها اصلا ما فيه والو وهي كدخل ليه على حساب التلفازة.. جلست كتفرج وهي تصيفط ليه ميساج)
غيثة: كوكوووو فين غاابر
حمزة: (كان فأزرو حتى هو خدا مو تماك.. صونا عليها) جبت الوالدة لأزرو
غيثة: غتبقى تماك؟!
حمزة: لا حتى رجع نجيب الوالدة غنطلع لتاونات عندي شي شغال تماك
غيثة: تخيل انا بنت فاش عمرني وصلت لتاونات
حمزة: ضيعتي بزااف واكترية ربيع مبقا ليه والو كتكون الدنيا زاااهية هنا
غيثة: دابا تحرمت حتى من سطح
حمزة: معليش على الاقل على ميبان داك خونا
غيثة: دابا نتا متأكد هو ممشاش لفرنسا وداك نهار ختو كتقول لمراد راه ففرنسا وحتى مو علاش زعما
حمزة: حيت هدا هو الميساج لي بغا يوصلك انه ففرنسا بغا يشوفك كدخلي وتخرجي كيف بغيتي وتاخدي راحتك حتى يبان قدامك… مهم خوي راسك شنو كديري
غيثة: بقيت بوحدي لبنات حتى هوما مشاو لأزرو
حمزة: تبغي شي حاجة؟!
غيثة: لا صراحة هاكا مرتاحة ولكن الا بقيت على هاد الحالة غنولي طووبة ههه تناكل بزاف
حمزة: مع الحمل.. شحال عندك؟!
غيثة: 7 شهور و(تبسمت) عندي وليد
حمزة: اممم شنو غتسميه!!
غيثة: نكذب عليك الا قلت ليك مسوقة لشي سمية ولا كفاش غيكون انا للي تيهمني هو تكون صحتو هي هاديك ومنكونش آذيتو بداكشي للي كنت تنتعاطاااه…..
اورطيغا: (خداو وفاء من حدا الدار جلست حدا أمينة اللور دازو خداو كادويات وفاء خدات تكشيطة كانت كرااتها باش تحضر وتمو ماشيين)
أمينة: عقبال منين نمشيو نزوجوك اولدي
اورطيغا: (زااافر) اممم
أمينة: مال مك؟
اورطيغا: والو غير مبرزط مع شي خدمة خاص رجع ليها
أمينة: جلس بقا معانا
اورطيغا: بنيتك الوالدة اش غنبقى ندير تماك نهز ليكم الميزان!!
أمينة: ههه غتفرݣع!! (بقاو كيتحدثو هي ووفاء وهو صاقر مرة مرة كيجاوب فالتيليفون على حساب الخدمة)
ولدي فين وصلتي فالدار ديالك
اورطيغا: كملت شي سيمانة هادي
أمينة: ݣاع مݣلتها!!! منين رجعو ديني نشوفها
اورطيغا: ان شاء الله.. (وصلو لأزرو صيفط ميساج لملاك باش تشوف الا صلاح يتلقاو.. تبع لابايكاسيون لي صيفطاتلو ملاك وصلو لفين عطاتهم ومع كان الغاشي باينة ديك الدار فيها مناسبة نزلت ملاك متبسمة لابسة قميص هو عاون مو جات حتى هي كتعاونو.. شافها كانت دايرة شوية دلميكاب ولكن باينة فيها مرتاحة)
التوووت!!
ملاك: (فرنست سلمت على أمينة ووفاء وهو مدت ليه يدها حتى كيبان ليها باها وراجل ختها نعيمة جايين جمعت تفرنيسة ويدها دغيا خلاتو معلق) احم خالتي ياكما تعذبتي فطريق!!
اورطيغا: (فهم شافت شي واحد دار يدو فجيبو واليد التانية عطا لمو عكاكز ديالها ومشا الكوفر خرج البݣاج ديالهم.. جات خديجة استقبلتهم باش يطلعو للدار على ميمشيو للقاعة فين دايرين سبوع)
فين يوسف؟!
خديجة؛ خدا سليمان وخرج صوني عليه تلقاو
اورطيغا: انا خاص رجع
ملاك: مغتبقاش؟!
اورطيغا: حتى لغدا رجع باش نرجعها.. (شاف فباها دايز مقالش حتى السلام عكس راجل نعيمة للي جا كيعاون يهز الباليزات ويعرضو يبقى زاد جعر من لداخل) مرة أخرى اخاااي…
ملاك: (مشات حداه) بقا غير شوية!!
اورطيغا: بلا متحبدي راسك المشاكل احبيبة التيليفون بيناتنا
ملاك: (شافت باها كفاش حتاقرو بدوك الشوفات معجبهاش الحال ومتقدرش تهضر حيت براسها مكيهضرش معاها) مكرهتش نمشي معاك
اورطيغا: غدا اجي مع الوالدة
ملاك: (شافت عمها لي غير كيخنزر وكيݣمکم) بحال والو الا مهربتش بلاتي
اورطيغا: (حرك راسو بلا) صبري.. واخا!! (حركت راسها باه مشا توادع مع مو ركب فطموبيلتو ومشا راجع فحالو طلعو وهوما للدار مكملين المناسبة..)
~~~~~~~~~~~~~
ادم: (حلت السرجم عليه شاف فيها مكمش عينيه) ليلااااااااا
ليلا: براكة عليك من نعاس واش مغتنوضش
ادم: (بقا كيشوف فسقف) صافي سيري نتي غيجيو عندي صحابي دابا!!
ليلا: ماما وبابا تيسولو بزاف امتى ترجع من فرنسا انا بغيت غير نعرف شنو تتخطط عاود!!
ادم: ليلا عطيتك تقضي غراض واحد تجيبيلي بلاصة غيثة!! فين كاينة؟؟؟!!
ليلا: باش نعرف!! كانت فدار خوها منين خرجت مشات للرياض من تماك معرفتش فين مشات وراك شفت عاود رجعت تماك مكيناش مرجعتش لعند خوها وحتى فلڤيلا مكيناش
ادم: وفين غتكون مشات!!!
ليلا: معرفتش يمكن بالصح مشات لشي بلاصة اخرى واش هي سبابك باش دا…؟!
ادم: صافي سيري!!
ليلا: شنو قالك طبيب؟!
ادم: (بعصبية) ليلااااااااا!!!! (مشات فحالها وهو بقا مغووبش وغير كيتحلف فيهم كاااملين…)
أمينة: ……(تبسمت) خليتلك الراحة اسي رشيد..
رشيد: (حرك راسو بأه هي بقات كتمشى بصعوبة حتى وصلت حدا وفاء للي عاونتها وهو بقا غير كيخمم)
وفاء: خالتي شنو قلتيلو؟!
أمينة: لي خاصو يتݣااال ابنتي.. (رجعت حدا لعيالات اما ملاك شادة مها فالقنت تابخة ليها راسها كتشكى من باها للي فاش مشات تهضر معاه قمعها وطردها..)
زهرة: صبري ابنتي هو دابا مقلق منك
ملاك: حتى انا مقلقة منو علاه مدرت هاد الحالة للي دار وداك عمي راه الا بقا مقاابلمي والله حتى نصيفط ليه شي حجرة لداك الراس
زهرة: ياااك!!!
ملاك: مهم بابا عيق علية!!
زهرة: هي نتي للي والداه!!!
ملاك: وغير والدني يتكرفس علية!! ولا نساو مقراوكش اماما فداك الجامع للي قراوك فيه كما الواليدين عندهم حقوقهم عليهم حتى واجبااتهم!!!
زهرة: شحال فيك تخراج دالعينييين بغيتيه يتصالح معاك رجعي فحاالك
ملاك: والبنت؟!!! نسمح فيها راه لقاو الكلب باقي حي وداير راسو ميت
زهرة: (قوست عينها فيها) حتى منكونش كنعرفك ابنتي البنت دايراها غير سبة اما نتي عاجبك داك تازوفريت للي لقيتي تماك دخل وخرج وعايشاالي الحب والغرام مع ولد أمينة
ملاك: (فرنست) اااااااه ولكن كولشي باحترام
زهرة: باحترام الكلبة!! سمعي منزيدكش سيمانة وغترجعي تقادي مع باك وخلي الناس يجيو راه قالي بغا يجي وبغاك ترجعي ولكن نتي للي شاداه
ملاك: (مخرجة عينها) هو؟!
زهرة: لا هوما!! وهانا هضرت معاك (زادت مخلياها كتعوج فمها اصلا عولت ترجع مشات لبيت مريم دخلت طلت على لبنيتة جمعت لفلوس للي تحت مانطة ديالها)
ملاك: الفلوس كِالرُّوووووز!!
مريم: حطي داكشي!!
ملاك: مالي غنديهم!! واخا ختك مزيرة عندها الدعوة ها لكرا الضو والما وتقدية والعيد قرب
مريم: ههه باااز!! كتباني فرحانة
ملاك: مرتاحة اختي فدويرتي وبغاو يردوني عندهم لداك الحبس وعند داك القوم.. قوليلي واش نرجع؟!
مريم: اه صافي عطيتي وقت لراسك براكة من لخصام مع بابا
ملاك: ولبنت للي عندي فالدار؟!
مريم: خوها قاد بيها مراد غيعرف غيعرف شوفي غير حنا شحال من واحد عرف شنو كاين فنظرك هو مغيعرفش اما كنقول اللهم تشديه نتي بالخاطر وتقوليلو كولشي وتعاوديلو شنو كاين وخرجي راسك من هاد لحريرة
ملاك: خفتو غير يدير شي حاجة ندمو عليها
مريم: راه عندو العقل ومو دابا راها بيخير نتي بعدي من المشاكل!!!
دازت يوماين ديال سبوع نشطو فيها ودوزو وقيتة زوينة فصباح منين فاقو قلبو على ملاك لقاوها فاقت على النبوري سلتت مشات لفاس..
أمينة: وكان غير داتني معاها بنت اللدينة!!!
زهرة: واش للي هارب كيفكر لغيرو اختي امينة
أمينة: ههه جنية.. نعيط على ولدي يدينا
خديجة: علاش تعيطي عليه حنا فلعشية غنمشيو بقاي معانا نمشيو مجموعين
أمينة: واخا بنتي.. حقا كيف بقيتي مع ديك العݣوزة شفتها منين جينا حنا هي خوات ولا منين كيحضرو الملائكة كيغيبو الشياطيين
خديجة: تمشي تخ** مبقيتش كنحلم الشوفة فيها
أمينة: هااااا نتي تمشي تجيبينا وتولدينا شي غالية صغيرة
خديجة: الله يستر… (بقاو مجمعين صونات امينة على اورطيغا علماتو غيجيو مع يوسف صافي مهضرش حيت عارف يوسف يتهلا فيها فطريق قطع صونا على ملاك)
اورطيغا: وصلتي؟!
ملاك: (فيها نعاس) اه قبيلة شوية صليت وتكيت
اورطيغا: مكيناش شي بلاصة حداك
ملاك: حتى الا مكانتش انا مستعدة نتنازل ونعس فوقك اكبيدة
اورطيغا: ههه تيتطلق ليك لسان غير فالتيليفون
ملاك: ههه خليني نعس
اورطيغا: نشوفك بلاتي؟؟؟
ملاك: اوكي… (قطعت ورجعت تكات جات عندها غيثة دقات ودخلت شافت فيها وهي مكوخة بنعاس)
غيثة: ملوكة على سلامتك
ملاك: الله يسلمك خاصك شي حاجة؟!
غيثة: لا انا نقاد لفطور ونعيط ليك
ملاك: واخ.. (مشات غيثة وهي بنفسية اخرى حتى صونا تيليفونها تبسمت)
غيثة: الوووو..
غيثة: الووو..
…: (كان صوت مجهول الصوت للي كيتسمع منين كتبغي تخبي صوتك الحقيقي (أبليكاسيون) ) ادم تيقلب عليك..
غيثة: (شافت فالنمرة كانت بريڤي مردتش البال مع موالفة هاد الايام كتهضر غير مع حمزة) ادم!!
….: هو دابا معارفكش فين كاينة وحاط بزاف تيقلبو عليك تلفتي ليه نهار دخلتي للرياض فين كنتي متبانيش
غيثة: (بخوف) شكون نتا؟!
….: متيهمش المهم هو مخاصكش تباني حيت مناويش ليك الخير من مور داكشي للي درتي ليه
غيثة: انا مدرت والو!!
….: انا حبيت نعلمك.. (تقطع لابيل وبقات غير مطرطقة عينها شافت لبيض كيتحرق هزت المقلة دغيا من فوق البوطة حطاتها فوق البوطاجي.. وبقات غير كتشوف مفاهماش راه آذاها كتر مآذاتوو هو!! صونا تيليفونها كان خوها يوسف)
وي يوسف.. صاڤا الحمدلله.. لا مخرجتش
(كيصوني عليها بزاف دالمرات فنهار نفس السؤال)..
اه كاينة جات قبيلة..
صافي واخ…
(قطع معاها رجع حمزة صونا عليها جاوبات)
وي حمزة!!
الحمد لله.. فالدار!! عرفتي شنو وقع دابا!! معرفت واش نقولها لخويا ولا شنو ندير؟!..
صونا علية شي واحد تيقولي ادم تيقلب علية وهو معارفينش فين كاينة وتيوصي منبانش ليه حيت غيديرلي شي حاجة!!
لا صوتو داير ديك الابليكاسيون للي كتخبع الصوت..
مقلتهاش ليه خفت عليه..
زعما!!!…
صافي.. واخ.. واخا.. باشما غنعلمك!!
(صونات على يوسف وهي مترددة عاودات ليه شنو وقع علمها متخرجش من الدار غيجي عندها من مور ميوصل لأزرو… وجدت الفطور ومشات لبيت ملاك لقاتها كتجخر فيقاتها وناضت تفطر معاها)
غيثة: ملاك خويا يوسف بغا يجي
ملاك: علاش؟!
غيثة: (عاودت ليها شنو وقع) يمكن بغا يردني للدار عندو
ملاك: ادم عارف فين ساكن خوك؟!
غيثة: اه ولا يمكن حيت عرفني خويت من تماك داكشي باش كيقلب علية حيت معرفنيش جيت هنا
ملاك: بحال والو!!
غيثة: وشنو الحل؟!
ملاك: معرفتش اختي حتى يجي يوسف خوك انا اصلا دايرة نخرج مع مراد ونيت نغبرو من هنا تخافيه غير يكون متبعو هو نيت…
اورطيغا: (دارت ملاك تجي لعندو للمحال مقال والو بلعكس غتنقص عليه طريق طلع للدار خدا دوش خفيف من ريحة الذبيحة ولحم نزل لقاها كتقلب فين تسطاسيوني نزلها وخدا الطموبيل حطها فواحد دريبة وتم جاي عندها سلم عليها بالوجه وهي كتنݣر والمشكل مادة ليه حنكها)
الوالدة شوية وتوصل غينزلها يوسف هنا
ملاك: مزيان غتجلس فدارها
اورطيغا: داكشي للي قالت لي وبغات تشوف الدار فين وصلت
ملاك: اه حتى انا بغيت نشوفها (عيبها) ههه علاش عيبتني؟!!
اورطيغا: حيت عمرك سولتي حتى فين وصلت
ملاك: والله حتى بغيت نشوفها راه غير مكنتقيش نكونو انا وياك بوحدنا الرأس فالراس والشيطان تالثنا
اورطيغا: راه غير محطيتكش فراسي اما باك وكان شحال هادي هاز تربية فيدو تابعني نجي نتزوجك
ملاك: ههه واخا تولي بيض منديرهاش
اورطيغا: ههه خاص ن**** فداك الفم باش ياله تقادي
ملاك: يييع
اورطيغا: دابا نفكرك فهاد يييع!! (بقاو واقفين حدا المجمع السكني مقشبين بيناتهم… حتى وصل يوسف نزلت أمينة معاها وفاء عنقها اورطيغا)
توحشتك ازين ديالي
أمينة: حتى انا احبيبي مالك ضعافيتي هاكا؟!
ملاك: (طلت عليه كتشوف واش بالصح ضعاف)
اورطيغا: وااا نتي غابرة علية كفاش بغيتي نولي!! (بقا مدرعها ومحاول على كتفها ومعاونها كتمشى حتى وصلو للعمارة فين شرا طلعو فالمصعد وكلامو غير مع مو تقريبا ووفاء وملاك كيتوشوشو وصلو ليطاج الرابع وتمو ماشيين حل لباب للي دار شباك لحديد قبل عاد باب الدار دخلو كان كولشي مزال مرون صباغة بقايا فوق الجليج وحتى الجبص ولكن حلق عليها مزيان حتى من الديكورات فالحيط بالخشب الصالون فسقف دار ميلونج بين الخشب والجبص التقليدي الكوزينة عاود صلحها دار رخام فلبوطاجي وقادها بلبلاكارات مشاو لبيت نعاس حتى هو قادو بالدوش ديالو بكولشي مشات ملاك زولت ميكة كحلة على كنابي حتى كتصدم بيه لقات اورطيغا مخرج عينو فيها دغيا ردت الميكا اما وفاء مبغاتش ظحك باش متعيقش خرجو من تماك وأمينة كتهندس فالفراش وهوما كينعمو ليها ملاك معندها غراض جاتها عادي تختار لي بغات اصلا ذوقها زوين.. كملو من تماك وعرضهم اورطيغا يمشيو يجلسو فشي بلاصة مجموعين…)
اورطيغا: شفتي لكناپي؟!
ملاك: مشفتش… (زادت مخلياه)
اورطيغا: وفين ديك صلابة ديالك أنص متر لي تتكون فيك فسلوكة!!!
يوسف: (كان عند غيثة فالدار هو وخديجة للي شادة سليمان وناعس على كتفها مكيبغيش يفرقها)
يعني كان متبعك فاش كنتي عندي وبحال والو يكون حاط عساس عليك
غيثة: راه هو لي ظلمني علاش باقي تابعني
يوسف: ظلملتي راسك نتي لوكان مطاوعتيهش من اللول مكنتاش غنوصلو لهادشي!!! (حنات راسها) كنت باغي نسفرك لأكادير
خديجة: عندمن؟!
يوسف: عندنا دار تماك
خديجة: وتبقى بوحدها ختك راه بقاتلها شهر ونص وتولد والا وقعت ليها شي حاجة الله يستر؟
يوسف: متفكريتيش بداك لحمالة!!
غيثة: راه تكرفس علية اخويا ماشي مشيت معاه بخاطري ولا باغية راه حتى صدماتني طبيبة قالتلي حاملة مفهمتش حتى امتى
يوسف: صافي سكتي (مكيبغيش دخل معاه فالتفاصيل)
خديجة: (مشات عندها خديجة وهو كيفكر غير شنو يدير حتى ويمشي يدير بيه شكاية باش ميقربش ليها ولا الا وقعت ليها شي حاجة غيكون ادم ولكن خاص يكون شي تعدي فاللول باش يدار المحضر وبحال والو ميخافش حتى من القانون ويرزيييه فختو)
خديجة: خاص نمشيو قبل ميجيو لوخرين
يوسف: خاصك شي حاجة؟!
غيثة: (حركت راسها بلا) خوياا… هو منين معرفنيش كاينة هنا حيت للي صونالي أكدلي راه معارفنيش دابا فين كاينة قلت نكري فشي دار غير فهاد الموبل ولا للي حداه ونسد علية ميعرفني حتى واحد فيها من غيركم ومنها نبعد صداع على ملاك
يوسف: تبقاي بوحدك؟!
خديجة: فكرة زوينة ونيت نجيبو لمياء تقابلها تصبن ليها تطيب ليها.. (خدامة عندهم فلڤيلا)
يوسف: انا نقلب على شي دويرة ومراد خاصو يعرف اللهم يعرفها منا حيت مزال داك الكلب تيدور بيكم الا مزال حاطو فبالو باش يحضي منو ماشي غير حنا للي نحضييو
خديجة: داكشي للي قلت حتى انا السيد خاصو يعرف
يوسف: (شاف فغيثة) انا غنقلب على شي دار ونفرشها ليك بداكشي للي تحتاجي وتكون بعيدة على هاد السيكتور ونتي متعاوديش تجاوبي بريڤي
غيثة: واخا خويا منحاوبش ولكن الدار حسن تكون غير هنا نقز ليها غير من سطح مبغيتش نبان ݣاع فالزنقة
خديجة: عندها الصح قلب بعدا هنا عاد نشوفو سيكتور اخر
يوسف: (زفر) حنا مشينا
خديجة: (سلمو عليها خرجو من تماك ركبو فالطموبيل ماشيين لدارهم فسكااات)
يوسف: انا نطلع معاك سليمان نقضي شي غراض ونرجع (حركت راسها باه)
خديجة: ومتنساش ليكوش..
حمزة: (جمع معلومات مزيان من عند غيثة بظل ستيل لبسو واختار جوج شخصيات الا تلاقا ليلا ولا شي حد اخر… مشا للدار للي عطاه صاحبو العنوان ديالها هضر مع العساس خلاه يهبط الباركينغ لتحت بقا كيقلب ولقا الطموبيل نفس الماتريكيل ديال ادم وغيثة أكدت منين قالت ليه اودي فلݣري بقا كيقلب ولمس سطح الطموبيل مغبرة جوج احتمالات مكيسوقش لنظافة طموبيلتو ولا محطوطة هنا مدة متحركااتش من بلاصتها مشا للمصعد طلع الطابق التالت توجه للدار دار ودنو حيت الكولوار خاوي كاينة هضرة لداخل مواضحاش باينة الدار كانت عامرة رجع راسو اللور كيفكر شنو الخطوة الجاية ولكن ضروري خاصو يتأكد ادم للي كاين لداخل..
مشا للدار للي حداها جبد من جاكيطتو روجيستر دار نظيظرات ديال الشوف دق كيتسنى يتحل وجبد ستيلو.. تحل لباب)
سلام عليكم لالة
…: وي سيدي!!
حمزة: انا مفوض قضائي بغيت سي ادم **** يوقع لية على هاد الورقة
….: لا سيدي هنا مساكن حتى واحد سميتو ادم يمكن لاباغطومو لي حدايا
حمزة: اااه.. يمكن العساس تلف ولا انا (كيتأكد من رقم الدار) اه اه سمحيلي انا للي غلطت
….: واش عندو شي مشكل؟!
حمزة: عندو دعوة طلاق خلعي
….: علاش هو مزوج؟! اممم عليها لبنات داخلين خارجين من عندو
حمزة: ياكما دابا معاه شي وحدة باش نديرو معاه الإجراءات؟!! تنعرف مراتو
….: (طاح فيها مسااالية حتى هي) لا دابا دخلو عندو غير صحابو هاد لعشية شفتو جايبينو بكرسي واقلة دار كسيدة ولا شنو وقع ليه
حمزة: بطموبيلتو؟؟! حيت هي ديال مرتو
….: لا طموبيلتو متهزاتش ختو للي تتجي وشي مرات صحابو
حمزة: لهلا يخطيك الالة.. (دخلت سادة لباب وهو بقا واقف كيشوف فبابو تفكر باه للي مات بسباب هاد الكلب للي كان دار يدو مع أميمة اذا حتى هو عندو يد فموت باه..
مشا من تماك خاصو يدرس هادشي مزيان ادم باين ماشي شي واحد مدمدم خاصو يعرف كفاش يطيحو… وغيبدا بختو..
خرج برا صونا على غيثة)
غيثة: (بحزن) وي حمزة
حمزة: جا خوك؟!
غيثة: اه شحال خايبة شي وحدة تحط فهاد الموقف لي فيه انا..
علاش مبغاوش يفهمو راه الحمل مكنتش عارفة اصلا راه معدي علية
حمزة: غيثة خوك غتجيه قاسحة كما بغات تكون سوا بخاطرك ولا بالسيف عليك فهميه حتى هو راه راجل يعيى يفهمك كتبقى واحد النغزة مغيتقبلهاش فيها
غيثة: وانا؟!
حمزة: نتي خاصك تحمدي الله حيت عندك خوك فظهرك الا تعصب ولا تقلق منك غي حيت كيبغيك وخايف عليك…
اورطيغا: (من بعد متعشاو مشاو وصلو أمينة للرياض للي كتقنع بنات يباتو معاها ومبغاوش بحجة عندهم شي شغل فلافاك وصلهم لحدا الدار وبقاو فالطموبيل)
شنو درتي مع باباك!!!
ملاك: غرجع السيمانة جاية ان شاء الله
اورطيغا: وجدي قواعطك
ملاك: ههه وجد صداق
اورطيغا: اااححح اقلبي متخليهمش لية طريطات
ملاك: منصيييبش علية شي كريديات ومشاكل خاص نفكهم
وفاء: ههه الشرفة نسيتوني انا هنا!!!
ملاك: ههه عجباتني الدار بزااف امراد
اورطيغا: لفراش غنبداوه غير دقة دقة
ملاك: معنديش مشكل.. وهداك للي شفت!!
اورطيغا: قديم
ملاك: (عوجت فمها بقاو مجمعين حتى وصلو) مهم حنا نطلعو عييت بزاف هاد نهار (ضارت عند وفاء) حقا شنو قالو فاش ملقاونيش
وفاء: حتى واحد نهضر حدها ماماك قالت لعمي رشيد راكي علمتيها
اورطيغا: معلمتيش حتى مك!!
ملاك: (خرجت عينها) غير مبغيتش نصدعها!!
اورطيغا: (مقوس عينو فيها وبينو بين راسو هادي صعييييبة ولكن انا فالذمة!!)
سيري طلعي وكان..
(هبطت هي ووفاء طلعو للدار دايين معاهم حق غيثة دخلو للدار وهو مشا لدار السعادة حيت تماك اقرب ليه لخدمتو)
غيثة: (عاودت ليهم الجديد ويوسف من حسن حظو لقا دار حداها فالموبل، يعني ساهلة تنتاقل ليها بلا متحتاج تخرج عطاتها فلوس لكرا ديال هاد شهر واخا مبغاتش اشد ولكن حلفت ليها باش تشدهم وشدتهم..
بقاو مجمعين عطاوها تاكل وكل وحدة مشات تنعس…)
~~~~~~~~~~~~~~~
اصبحنا واصبح الملك لله…
اورطيغا: (صدعو السمسار منين بقا كيصوني عليه جاوبو) خاي عبد المولى غير نكمل شي شْغيَّل ونصوني عليك
السمسار: بغيت غير نعلمك الدار للي فموبل 3 كراه صاحبك لي تيجي عندك
اورطيغا: شكون؟!
السمسار: يوسف
اورطيغا: (باستغراب) من بعد ونصوني عليك.. (بقا كيفكر كفاش يومرا تماك وعلاش؟!!!…)
الغالية: (صيفطات لغيثة بيت نعاس وشي مااعن وشي اثاث للي تحتاج والمساعدة لي غتقابلها هي ممشاتش حيت يوسف أصر ونبه انها ممكن تكون حتى هي وماشي غير شاكين راه متأكد!!!
مشات صطافيط للي خدات داكشي من قلب الڤيلا ووقفات حدا دار شريف تماك غتبات ليلة عاد من بعد غتمشي لدار فين كرات غيثة.. مشات الغالية مع يوسف لدارو دخلت لقات خديجة كتوكل سليمان لبابة ديال خبز القمح مع زيت بلدية)
اويلي شنو كتعمل هاد (كانت غتقول الموصيبة وسكتت) هادي؟!
خديجة: كندبح فيه!!
الغالية: داكشي للي بان لية يوووسف واش بعقلكم تتوكلوه هادشي
خديجة: هادشي باش كبرت انا وخوتاتي وهاحنا الحمدلله بصحيحتنا وحتى خويا أنير هاد النعمة باش كيكبر
الغالية: ولكن راه باقي بيبي واش تتفهمي شنو هي بيبي
خديجة: يوسف شنو!!! نتوما عطيتوه لية نربيه ومغنبقلش بالشروط من الفوق يا بيض يا كحل يا نربيه على خاطري يا هاكوووه
يوسف: (شاف فمو) الوالدة خديجة عارفة شنو تدير
الغالية: الزيت البلدية؟!
خديجة: خالتي شحالما تواضعتي غتعرفي تعيشي شوية الحياة.. مال الزيت البلدية؟!!
الغالية: بداي ليه بالصوبا
خديجة: انا عارفة شنو كندير (كملت كتعطيه ياكل منخلاها وهوما جلسو حداها كيناقشو فأمور غيثة..)
~~~~~~~~~~~~
حمزة: (مشا للقهوة عاصر تحت دار ادم حتى كتبان ليه شي وحدة جبد تيليفونو شاف فالتصويرة لي صيفطات ليها غيثة وقارنها كانت هي ليلا.. مشا تابعها قبل متركب فطموبيل زرب وقف عليها)
جريت من موراك بزاف
ليلا: باغدون!!!
حمزة: مادموزيل ليلا!!
ليلا: وي!!
حمزة: (مد يدو) حمزة كنت كنقلب عليك (غمزها) وقولي حاضيك
ليلا: وعلاش؟!
حمزة: بغيت نتعرف عليك مبقاش كافيني نشوفك غير من لبعيد
ليلا: (تبسمت) وشكون قالك انا ممرتابطاش!!
حمزة: مكيهمنيش حيت غتعرفيني غتبغي تبقاي معايا انا!! (بقات كتشوف فيه متبسمة) نعرض عليك لشي بلاصة نجلسو نتعارفو!!!
غيثة: (بقات شاعلة تيليفونها مطفاتوش كتسنى ابيل من عند حمزة الصديق الغريب للي ونسها وكان كيسمع ليها..
وفنفس الوقت كتحاول تفكر داك نهار واش بالصح دارت لادم شي حاجة ولا كانت غير كتهلوس والا مدارتش ليه علاش غبر والا دارت ليه علاش غبر خايفة من للي جاي وعارفاه مساهلش الحاجة للي مخففة عليها هو وجود يوسف معاها وكولشي عرف حكايتها واخيرا مغتآذي حتى واحد… مشات لبيت ملاك فين كانت جالسة كتفرج)
زين نجلس معاك شوية؟!
ملاك: دخلي اصاحبتي
غيثة: (جلست) انا هاد الايام تنهضر مع حمزة ولد جارتكم (ملاك هزت حواجبها بجوج) ماشي بيناتنا شي حاجة ولكن لقيتو ضريف وتيسمع لية وحنين وحتى هو مسكين تيعاني
ملاك: هو راه باقي مزوج!!
غيثة: اه راه قرب يطلق وهادشي متيعنينيش، حيت حنا غير اصدقاء وصافي مستحيل نعاود نفكر ندخل شي واحد لحياتي
ملاك: اممم ولك.. (تدق لباب) جري تخبعي.. (مشات غيثة كتزرب سدت لباب عليها بشوية وناضت ملاك دايرة شالها مشات حلت لباب كانو جوج دالناس واحد راجل كبير والتاني شاب يكون فالتلاتنيات)
سلام عليكم!!
…: (الشاب) نتي مليكة؟!
ملاك: (عوجت فمها والابتسامة مشات) نعام؟!
….: (الجد… بدارجة قحة) انا جدك
ملاك: (طلعاتو وهبطاتو) عندي جد واحد كاين فصفرو! (مكمشة عينها فيه) ياكما نتا باين ماما داك ليهودي؟!؟
….: اه انا هو
ملاك: اممم اوا اسيدي عندي جد واحد راني فرݣعت ليه نيفو حيت فيه فعايل ليهود بلا منزيدك حتى نتا عليه (جات تسد لباب والشاب للي معاه حط يدو على لباب بقا حالو)
زول يدك ولا ميعجبك حال
الجد: انا احفيدتي بغيت غير نتعرف عليك وصافي
ملاك: مسكييييين!! وشنو باغي تعرف علية حيت بانلي راك شحال ونتا كتجمع علية الخبارات وتابعني حتى لهنا ياكما حسابلك معايقينش بيك
الجد: بغيت نعاونك فالمشكل ديالك ونخليك تعوضي على كل دقيقة تظلمتي فيها المحامي ديالي غيجيبلك حقك بالضوبل مع تعويض كبييير
ملاك: (بقات ساكتة كتشوف فيه)
الجد: انا بغيت غير نتعرف عليك نتي وخوتاتك اما حتى ماماك ختارت تحسبني ميت وانا حي…
ليلا: (مشاو لكوان ديسكو بار طلب شيشة وحتى هي خدات وحدة شافت فيه كان كيهضر فالتيليفون وهي كتسناه يسالي.. كمل وحط يدو على ركبتها)
حمزة: فين خليناها
ليلا: شنو تدير فحياتك!!
حمزة: الوالد ديالي خلا كولشي على راسي وانا متكلف بكولشي
ليلا: اممم شنو المشارع ديالكم
حمزة: حشيش (غمزها ظحكت وتبسم تحطت الشيشة بقاو مجمعين كتعاود ليه على راسها وهو كيتصنت ليها مرة مرة كيتلمس فيها حيت ملقاش منها رفض بلعكس كتحس بأنووثتها ويعجبها الحال)
عائلتك جات حتى هي للمغرب
ليلا: ويييييييي كولهم معايا اصلا بابا وماما تقريبا استقرو هنا وانا وخويا مرة هنا مرة تماك.. نتا عمرك سافرتي لباريس ؟!
حمزة: اممم لفرنسا لا!! مرة اسبانيا ايطاليا على حساب الكليكة كل مرة فين..
ليلا: (عجبها الحال) عندي بلاصة فهاد لكليكة؟! تيعجبني نسافر ونغامر حتى انا
حمزة: (همس فأذنها وهو حاط يدو على فخضها) نكونو بوحدنا احسن
ليلا: (تبسمت ناضو من تماك مشاو تعشااو) اممم تعطلت خاص نمشي
حمزة: فين تبغي نوصلك؟!
ليلا: (مكانتش باغا تبات معاه حتى تعرفو مزيااان.. وصلها لفين قالت ليه الحد الان مهضروش على الموضوع المهم.. تبادلو نوامر وتم ماشي لفين جالس رجع مكيحس بوالو فهاد الدنيا عايش نهار بنهارو وصافي همو لكبير أميمة تشد عاد باش يعرف يكمل حياتو..)
~~~~~~~~~
ملاك: (كانت جالسة فدروج كتفكر فكلام هدا للي سمى راسو جدها والعرض للي عطاها تسائلت بينها وبين راسها)
باين عرف كولشي علية!!! ولد لحرام دخلني دخلت طمع وكنبغي الفلوس!!
اورطيغا: (حل مراد باب لموبل لقاها كتسناه لتحت فدروج وظلام) شنو تديري هنا؟
ملاك: غير بقيت كنتسناك!!
اورطيغا: تسناي الفوق اصلا الجو خايب الريح بزاف برا
ملاك: غير الدار عامرة وصافي جاو شي بنات مع وفاء وعاد ديك البنت..
اورطيغا: اممم هي نمشيو للدار ديالي حسن
ملاك: فية الجوع!!
اورطيغا: تتحصلي تتلسقيها فالجوع!!!!
ملاك: ههه الاحتيااااط..
اورطيغا: نضربو شي نص عند محمد
ملاك: مزيااان ويكتر الحار
اورطيغا: متتخافيش من لباسر ؟؟
ملاك: لا موالفة الحار (عارفاه غيدخل فالمواضيع)
اورطيغا: راه تتشوط ديك التقبة لي تماك البنت حاولي على لماتريال
ملاك: ههه واخ
اورطيغا: نسيت على شكل ط*** معاك ابنت الزهرة
مراد: مراااااااد!!!!
اورطيغا: (وصلو عند مول السندويشات خدا داند مشوي مع الشحمة وحتى هي بحالو جاب أتاي من عندو وهي خدات كوكا وبقاو كياكلو) جا عندك يوسف لبارح؟!
ملاك: لا.. هو نسااا الصحبة ديالنا (هز حاجبو فيها مخزز) زعما هو ياله صراحة مسكين بقا فية ياله مكافي مع مشاكل ديالو صراحة غااارق حتى الودنين وخديجة كتشكى حتى هي مكتعرف شكون الظاااالم وشكون المظلوم
اورطيغا: اممم.. (كمل ماكلتوو مزادش فموضوعو حيت باين هي معارفة والو!! مفهمش علاش يوسف غيكري فالحومة قال ربما بغا يريح راسو ولكن كان غيقولهالو…
سالاو من تماك بقات ملاك غير كتفوه وهو براسو عيان وصلها)
ملاك: مراد صافي نسا موضوع غيثة (بغات تعاود ليه
اورطيغا: غير نلقاها مصارن كرشها نݣمطها بيهم!!
ملاك: مكتسامحش
اورطيغا: لا تدخلي سوق راسك ياله شرييييه غدا تابعني نهار م***
ملاك: (جات خارجة جرها من حنوكها باسها فشنايفها ودفعاااتو) هاد ايييخان
اورطيغا: ياله شرييييه (خرجت كتنݣر وزدحت الطموبيل مخرج راسو كيهلل طلعت وهو مشا للسعادة…)
~~~~~~~~~~~~
يوسف: (جاب رحيل صباح بكري ياله شميشة بغات تشرق جاب دراري للي طلعو داكشي فهدوء حيت مكانش بزاف ديال رحيل غير للي ضروري وصافي، مشا من تماك كما جا الدنيا خاوية حتى حوانت مزال محلوش حتى يبان بنادم على غادي تجي المساعدة تماك للي غتبان فالصورة هي للي كارية.. رجع للدار كانت خديجة فاقت من نعاس)
حبيبة علاش فقتي دابا؟!
خديجة: فقت
يوسف: نمشيو نفطرو برا؟!
خديجة: عندي رونديڤو مع طبيبة الا بغيت خود سليمان وخرج فطر برا
يوسف: خديجة!! بغيت نهضرو شوية نفطرو مجموعين ومن بعد نمشيو عند طبيبة واش انا غنخليك بوحدك؟!
خديجة: 5 شهور وانا بوحدي
يوسف: انا كاانبو دابا بغيت نعوضك عارف هملتك وبغيت نعاود نرجعو كيف كنا (ملامح وتعابير وجهها باردة حركت راسها اه بحال متاقتش فهضرتو..)
انا نلبس سليمان على متكملي روتينك…
اورطيغا: (وصلو اخبار من عند السمسار وحدة للي غتجلس فالدار للي كرا يوسف ماشي هو زاد خربقو بلا عݣز صيفطلو تصويرة غيثة فلواتس سولو واش هادي قالو لا وهو يمسحها من عندو باش متبقاش عند السمسلر)
صافي حتى نعرف…
(بقا كيفكر واش هدا كيخون مرتو ولا شنو؟!!! خربقو)
ملاك: (عاونو غيثة تنقز من سطوح باش مشات لدار لي كرا ليها يوسف كانت المساعدة تماك للي جات بكري كتقاد فلفراش وتستف السلعة) هانتي الالة تهلا فيك خوك
غيثة: ولكن ولفتكم!!
ملاك: انا غير هنا نبقاو نجيو عندك غير نتي متعاوديش تنقزي راه صعيب عليك
غيثة: (حركت راسها باه شادة فكرشها) تهنيتي من المشكل مع مراد
ملاك: ههه صراحة اه
غيثة: ههه حتى ماما ممنوعة تجي عندي
ملاك: معليش غير على ميتشد داك ايخان.. حمزة مقالك والو!! فين وصل فهادشي؟!
غيثة: هضرتو رجعت قليلة ملاك عاوديلي عليه
ملاك: انا معرفتي بيه قدييييمة وهو باينة تبدل دازو عليه حتى هو شي حوايج صعاااب ولكن كان ولد الناس ومعقوول هادشي لي كنعرف عليه
غيثة: مبغيتش نخسرو خفت يسالي هادشي وصافي
ملاك: ياكما حبيتيه؟! راه السيد مزال مزوج
غيثة: لا… ألااااا غير تتعرفي فاش تتلقاي شي صديق تيسمع ليك مزيان ومتيلومكش تيعطيك طاقة إيجابية تخيلي (كتعبر بيدها) خلاني تنبغي ولدي ومنسمحش فيه بكترة متيعاود لية كفاش تيحس منين خسر ولدو وباقي لدابا تيبكي عليه
ملاك: واخا هكاك ردي البال
غيثة: (حركت راسها باه شافت المساعدة كتوجد الماكلة) خويا حبيبي حتى من تقدية جابها فكر فكووولشي
ملاك: وهداك عندك هو أحسن صديق حسن من البراني والله.. مهم انا غنخليك حيت نسيت تيليفوني فلبيت وغيصونيو علية مالين الدار غيجيو عندي هنا
غيثة: تصالحتي مع باباك
ملاك: انا مصالحة هو لي مخاصم معايا ههه.. الا خصاتك شي حاجة صوني علية وفاء حتى هي غتكون معايا
غيثة: صافي واخا حبيبة
ملاك: الا قالك حمزة شي جديد قوليلي
غيثة: كوني هانية!!…
حمزة: (تلقاو هو وليلا من بعد مخلاها هي لي طلبت تلاقاه كان متقل ومرزن معاها فالهضرة، مشا كرا نفس طموبيل للي مشا بيها عندها المرة اللولة حيت عارف اول حاجة خاصو يضربها بيها هو المظهر ويضربها على شعا..
مشاو لكافي من اختيارها كيتعامل معاها بكل جنتلمانية بقاو كيهضرو هو كيكذب عليها فأي حاجة كيعاودها ليها وهي حالة فمها فيه)
عندي خويا كاين فأمريكا كنشوفو مرة مرة
ليلا: متيبغيش المغرب؟!
حمزة: لا.. غير مشغوول ومتشبت بالثقافة تماك تنظن نسا المغرب وثقافتو يمكن حتى دينو!!!
ليلا: حتى انا عندي خويا بهاد هاد شكل؟!
حمزة: بقا حتى ففرنسا؟!
ليلا: يا ريت وكان بقا تماك رجع وجايب معاه مشاكل ديالو صعيب صعيييب بزااف
حمزة: صغير ولا كبير ؟!
ليلا: كبير ولكن معرفتش كفاش نقولهالك هو حقووود الا مشا حقد عليك وحطك فراسو صافي غير سني على حياتك
حمزة: اممم قبيح هاد النوع
ليلا: بزاف تنعاتي منو والمشكل متنقدرش نخليه بوحدو اكترية دابا!!!
حمزة: مالو؟!
ليلا: مشاكل وصافي….
حمزة: (مبغاش يحكر واخا باغي يعرف) مع الوقت غيتقاد..
ليلا: ادم مستحيييييل يتقااااد!!!
~~~~~~~~~~~~~~
جات نعيمة وراجلها خرجو مجموعين مدوزين نهار زوين ففاس حتى الليل عاد تفارقو نعيمة وراجلها مشاو لمكناس وهي ووفاء طلعو للدار
وفاء: تفكيتي مع مشكلتك مع مراد
ملاك: اوووف جبل وتحايد تخيلي وكان لقاها هنا
وفاء: ويييه كنت خايفة ولكن الحمد الله ستر الله
ملاك: ياله نطلو عليها مراد راه مكاينش هنا.. ونقزو عند غيثة يديو ليها الماكلة للي جابو ليها واكيد حتى المساعدة ويشوفو شنو دارت دقو حلات ليهم كانت الدار مقادة
وفاء: (عطاتها تاكل حيت كانت مشهية الطيحال مشوي) زويييين هادشي ولكن ديما خليك كتخبعي الا دق شي واحد
ملاك: اه بالصح (تدق لباب) كتسناو شي واحد؟!!
غيثة: كنا طلبنا عشا من برا
ملاك: (كانت حدا لباب حلت لباب حتى كتلقاه هو بقات غير مطرطقة عينها) مرااد!!!
مراد: (دفع بشوية لباب بيدو تحل مزيان كيطل مزيان وبانت ليه غيثة) هانتوما مجموعين هنا!!
يتبع
التعليقات 0