الفصل 12

وإن سألوه عن الجمال أجابهم بــزيـــنــــة ... كان عاشقا لها وفجأة اصبح هو الــنّــمــرود❤️‍🔥

قضاو الغرض وعاشو أول لياليهم لي غادي يجيو من وراها بزاف ومع كل وحدة غيتزاد الحب الشوق الشهوة والنشوة غير لحشمة لي غتقلال مع غتبدا تولف ومن هاد الليلة بدا كعجبها الحال بزاف كانت غير كتسمع ودابا جربات حطات يديها على قلبها وهي ساهية ومزال تتفكر غير سالاو جرها لعندو مغطيها وحاضنها بين يديه خاشيها فيه وهما ناعسين تقصحات لكن التعامل ديال لي خفف ودم عذريتها لي شافت خفف كثر على ودو كانت كتاقصي وكتحارب باش تحافظ على راسها

كلشي داز ميسر الحمدلله بما فيهم زواجهم كذلك

دوشات وهي كل مرة تغلبها الابتسامة بخجل فاش تتفكر شي لقيطة وقلبها كزيد يتوهج وهي تتفكر بلي مزال غتعيش داكشي معاه لي عجبها وبزاف خرجات لاوية عليها الفوطة جلسات بشوية حاجة عادية انها تحس بشوية الحريق واخا كلشي داز مزيان لكن ضروري منو نشفات شعرها لبسات ومشات قصدات المجر حلاتو بشوية وهي تتشوف المنديل لي خلات فيه نقطات من دم عذريتها تنهدات براحة وهي تتشوف فيه مبتاسمة بغات تخليه عندها ذكرى تبقى تفكر بيه دوك اللحظات طول عمرها خباتو وناضت خرجات كان جالس فالبالكو فين محطوطة طابلة الفطور كتسنى فيها شافيها جاية منزلة راسها مبتاسمة وقف وهو كشوف فيها مبادلها نفس الابتسامة تاهو طايح عليه السر ديال الصباح هزات فيه عويناتها بشوية مبتاسمة شي لخلاه يهز يديها بشوية ويطبع قبلة عليها بعدما نطق:مزيانة؟

كانت فهمات شنو كقصد واش مقصحة ولا كانت فعلا مقصحة شوية ولكن ماشي لديك الدرجة عادي غادي دوز حركات راسها بلا وخدودها موردين شي لخلاه يقرصها فنيفها بشوية وهو مضور يديها على كتافها جارها للكرسي ديالها تجلس باش يفطرو فداك الصباح المشرق البرج مقابل معاهم والحان اغاني فرنسية من المحلات زايدة لمسة على المكان عينيه عليها مبسم مقادرش يزيحهم منها باغي يبقى غير يشوف فيها صافي غالية وغلات كثر وكثر كلشي فيها زوين وكلشي من جيهتها بحلاوتو ليلة راسخة وغتبقى عندو حتى هو بعدما ملكها هاد المرة بكامل تفاصيلها تستاهل الصبر وتستاهل كلشي دار على ودها حيت كلشي معاها عندو طعم هي مجاتش بالساهل ومعاشوش ديك اللحظة دغيا داك الصبر هو لي كقلب كلشي زوين من مور ما كنوصلو لديك الحاجة لي صبرنا على ودها

من ما فطرو نيشان خرجو بزوج قاضيين وقت بينهم وسط ضو نهار باريس وكيفما الليل زوين فيه النهار تاهو كان عندو طعم آخر

فنفس الوقت فجيهة أخرى بالضبط فالمغرب

الفيرمة كلها عامرة وعلاش لا وهي دار العرس كلشي مجموع ولمة العائلة طاغية وديما الجو لي ككون قبل ولا بعد العرس ككون زوين وهو جامع الحباب والقراب كانو كلهم مستفين فالصالة لي يجري فيها عود عينيهم على وسطها فين كانت جالسة سكينة ووليد بينهم وبين روعة الحاج لي شاد واحد الجبانية فيها الوراق بزاف مطويين

أنيسة شادة معلقة على شكل ميكرو تتهضر وهي تتشوف فكلشي وواقف قدامها يوسف شاد الطيلي كصور زعما هو لكاميرة مان:اذن سيداتي وسادتي جات لحظة الحسم اللحظة لي كنتسناوها جميع ولي هي نعرفو شكون الفائز بلقب العرس الاسطوري القادم لبرنامج لالة العروسة الفائز الجائزة ديالو هي انه غادي نسبقو له العرس ديالو هو الاول كي شفتو حنا كترو عليها الازواج وكل واحد خاص ندوزوه بوحدو لهذا قررنا نديرو قرعة السحب معانا هنا سي وليد (وليد لي تتبسم لكاميرة وكنزل فراسو زعما حشمان وحداه سكينة تاهي بحالو لي شافهم يحسابلو غاشي حفلة ديال الابتدائي)ومعانا فالجيهة الاخرى لالة روعة لي تعذر على الزوج ديالها الحضور

روعة دارت باي باي للكاميرة وهي جالسة بوحدها ماحداها عريس خخخ

انيسة:اذن نطلبو من سي الحاج يعلن لينا على الفائز فهاد القرعة وشكون غيتهز فالعمارية من مور سي يزيد وحرمه المصون لالة زينة

كانو عايشين الهبال ديال بصح وكلشي تلاݣى فديك الڤيلا الحاج لي بدا كضور فدوك الوراق تاهو هاز ليهم هبالهم كثرو عليهم الافراح والازواج حتى ولاو يديرو فالقرعات فديك اللحظة الحاج هز وريقة حلها مصغر عينيه وهو كشوف شكون الفائز ومخبيها على لي حداه كمشها ومدها لأنيسة لي حلاتها ومع قراتها تاهي ضارت عند يوسف لي كصور

انيسة:اذن سيدة وسادتي لقب لالة العروسة 2024 من نصيييييييب

كلشي كتسنى والانظار عليها غيفرحو بيهم بزوج غير هو كبقى شكون غادي يسبقو انيسة فديك اللحظة نعتات فالهبل ونطقات:كووووبل طااااح الحب وصاب غطاااه

كلشي بدا كضحك وشي وليد ناض كيحنقز هوليااا هوليااا وحالتو حالة سكينة ناضت تتصفق ومشات عنقات روعة لي دلات قنانفها بحال شي بنيتة صغيرة غير بالضحك كلشي كضحك وجو من الفكاهة مالي المكان وليد لي شد المعلقة كدوي مع الكاميرة مخلا انا فرحان ما خلا الحمدلله زايد عليهم عاش سيدنا تعانق هو وسكينة وجلسو كتناقزو فرحانين غيتجمعو بزوج والعرس الجاي من نصيبهم قصدو روعة كواسيو فيها زعما وهي حاطة راسها على كتف فريدة وتتبكي زعما

الحاج:انا مغنخليش بنتي مقلقة الخطبة ديالها ان شاءالله غتكون فوسط التحضيرات ديال عرس خوها

عاد ناضت تتصفق وهي مبسمة مخلية تاهي كلشي كضحك عليها مسعودة طلقات واحد التزغريتة متبعاها مليكة وام الغيث فجو من الفرحة لي كتمناو ديما تبقى عليهم طلقو الشعبي وناضو على الشطيح انيسة وراضية لي كروشهم لفمهم مكاين غير الله يعطيك صحيحتك زايدين اضافة دالسبوعات على العراس لي عندهم

داز الوقت فجيهة أخرى عند العرسان كان ظلام الحال وكانو بالضبط فواحد المدينة ديال الملاهي فرحانة وعينيها كبريو الروح الطفولية لي فيها خلاتها تفرح مين فاش جاو لعبات فكلشي وتتجرو معاها وهو هاز ليها هبالها غير فسبيل ديك الفرحة لي غيشوف فعينيها كانو واقفين قدام الكيوصك ديال القنص الفردي فيديه وهي حداه شادة نفاخات وكتشجعو مابقى ليه والو كان قناص نيت طيح كلشي ومابقى ليه والو ويطيح العدد المطلوب وداكشي لي كان نقرات بفرحة غطير وهو مبسم وشي ناس حداهم صفقو ليه مد الفردي لمول الشي لي عطاه الجائزة ولي هي نونوس دبدوب فالغوز مدو ليها وهي غطير بالفرحة اصلا لعب غير على قبلها تهزات وطبعات قبلة على خدو وهي فرحانة مضور يديه على خصرها وغادين عايشين لاڤيدا يومين بقات ليهم فرنسا من بعد غيزيدو لإيطاليا ناويين يضورو اوروبا الغربية فهاد زوج سيمانات ديالهم بغاوها تكون مميزة حيت اول رحلة لهم بزووج

راجعين من مور ما خيطو الزناقي فداك الليل هو تتمشى بشوية تتحس ببعض الوخزات مرة مرة لي كخليوها تقل فالمشية وهادشي لاحظو هو وعارف شنو سبابو تحاجة مكتخفى عليه غير كنشوفها تقلات كتقل حتى هو واخا خطاويه كبار لمح ليها لطبيب لكن جاتو نيشان بلي ماشي شي حاجة غير ضروري من شوية الآلام وهادشي عاااادي جدا غير تحل السانسور غفلها هازها بين يديه ممسوقش للخلق اصلا الغرب فشكال يعني كلا مديها فجنابو

دخلو للجناح ديالهم بدلو دخل هو يدوش وبقات هي جالسة شادة الطيلي تتهضر مع عائلتها وكطمنهم عليها وفنفس الوقت قايلة لها بلي دوزو داكشي مزيان مخلياها فرحانة بيها وكدعي معاها دوزات ليها فريدة سولات فيها وكذلك سكينة وهما كطمنو عليها خرج من الدوش لبس عليه قصدها وجلسو تتفرجو كضحكو على لڤيديو لي سيفطو ليهم ديال قرعة الزواج من بعد ما هضرات مع عائلتها ناضو لبالكو جالسين فواحد الجليسة كانت فيه كهضرو ويخططو ليزاكتيڤيتي لي غيديرو فالرحلة الجاية لي من مور يومين غتكون وغيقصدو إيطاليا بشوية كدوز يديها على شعرو كانت متكي فالجليسة على طولتو مسرح وراسو على فخضها مبسمة وهي تتشوف فيه مغمض عينيه بريد خفيف ضارب وهي يديها على خدها مرة تهز راسو لتوغ ايفيل ومرة تشوف فيه تنهدات براحة لأجمل راحة تتعيشها دابا تحنات بشوية وطبعات قبلة على خدو خلاتو تبسم وهو مزال مغمض عينيه وهاز يديها عاطيها بوسة وسط الرحى ديالها جو حميمي هادئ وسط فرنسا الرومانسية

دازت هاد الليلة وجا نهار جديد تتمشى بشوية فوسط الشارع لي كان شبه خاوي فداك الصباح كانت شي 9:00 دالصباح الشميسة ساطعة ريحة كرواصة عاطية وهادشي لي خلاها تنزل من لوطيل كان وسط المدينة فاش شماتها تتمشى بوحدها فالشوارع لي حفظات فالخرجة معاه وتتاكل مخلية ليه وحدة ديالو تتستنق الهوا النقي خلاتو ناعس وخرجات تشم شوية الهوى وتكوانا مع دماغها ضارت مع واحد الشارع او بالضبط درب لي كان طويل وكخرج غادية وهازة عينيها وهي تتشوفو فالمعمار الفرنسي وتستكشف بعينيها لاحظات ان الشوارع كلها نظيفة وكلشي منظم وهادشي معروف على الغرب النظام وسط داك الهدوء لي كان سايد على المكان كسراتو ضوضاء ديال طوموبيل دايزة من نفس لكاغتيي فين غادية مجات فين تلفت حتى كانت الطوموبيل لي كلها كحلة زاج كحل تاهو تقادات معاها تحل الباب محسات على راسها حتى تحل لباب وتجرات بكل قوة لداخل ورجعات تسدات وزادت بحالا تحاجة موقعات وبلا مايدريي حد

معرفات باش تبلات فاش تجرات داخل الطوموبيل داكشي وقع حقا زربا مفهمات والو غادية فأرض سيدي ربي حتى بعثو معاها هادو تلفتات عند خونا لي كانن لابس كلشي كحل مخرجة عينيها جابليها الله بحال شي فيلم ديال المافيا وماشي بعيد تكون مافيا غير من هاد الحالة لي دارو ليها وماشي بلادها يا حسرة راجلها مخلياه ناعس مغيجيب خبارها حتى تيليفونها مهزاتوش الصدمة مخلياها تتفكر فكلشي فديك اللحظة نيشان خونا دار يديه على فمها كسدو ليها ديك الساعة هي عرفات القضية حامضة بدات مدابزة معاه وهو كسد ليها فمها ولي صايݣ غادي مورك مديماري تتغوت معافرة مع خونا وفدماغها ݣاع الجرائم لي ديجا سمعات وقعو فأوروبا وقضايا صفاء اليوتيوبرز دوك القتل/ة المتسلسلين لي اشهرهم كانو من الغرب اش هادشي هي جاية دوز غير شهر العسل وتولي ضحية باقية عروسة مشافت متشوفات بداك الجهد لي عطاها الله بدات تضربو وهو كسد ليها فمها فواحد اللحظة شداتو من وذنيه مليعاه منها حتى غوت وطلق منها بدا عليها بالفرنسية ماشي هادشي علاش متافقين ماشي هادشي وهي ݣعما تتسمعو ݣاع شكقول تضرب فيه فينما جات وهو واخا هكاك مهزش عليها يديه حدو كان باغي يسد ليها فمها مين ليعاتو طلق منها فديك اللحظة مع دازو داك الدرب كامل خرجو لواحد الساحة لي كانت عامرة بشي ناس مع دخلو ليها زينة هنا ضارت وهي تتلهت وصفرا بدات تتضرب فالباب والزاج وهي تتشوف واحد خونا جاي قاصدهم مخنزر وكقولهم وقفو وقفو وقفات الطوموبيل وهي مفاهمة والو نزلو هما بزوج وهي حل ليها لباب داك السيد لي معرفاتو واش بوليسي ولا آش نزلات وهي صفرة لاصقة فيه وتتهضر بخوف:بغاو يخط/فوني بغاو يخ/طفوني

السيد بدا ككالمي فيها وهو كشوف فدوك الزوج مخنزر رجع شافيها ونطق:تهدني مواقع والو

داك لي جرها جاي قاصدهم مخاطبها شاد فوذنيه ليعاتو تلييعة الجواد تخبات ورا السيد لي حل ليها لباب:ماشي هادشي علاش تافقنا قالك المخرج غير غاطلعي غتعطينا الملف من مور ما نهددوك

زينة مفهمات والو كانت صفرة وقلبها كضرب وهي تتشوف اشكخور عليها هدا وهي مخشية ورا السيد لي نطق نيشان مخنزر فخونا:وحتى تكون بعدا هي الممثلة البشار واش قلت لكم دوزو من هنا السيناريو فيه هاد الطريق؟(ضار منعت فالدرب لاخر لي كان حدا الدرب مين خرجو هما)راه فين حنا راهي الممثلة الاصلية(كانت البلاصة فين منعت ليه كولها رموكات وداكشي ديال التمثيل الممثلة الاصلية كانت واقفة مربعة يديها ومخنزرة غير نعت ليه فيها وهي تهز صبعها دايرة ليه فاكيو على هاد الحالة لي دارولهم والتعطال لي عطلوهم)معطلينا وزايدين بفضيحة مع الناس فين هو مارتن مااارتن

فديك اللحظة جاي مول الكاستنيغ كجري عند خونا لي هو فالأصل المخرج:وي موسيو

المخرج:مين ضبرتي على هادو الكلاخ كمشي على رجليه منييين

مارتن:اسيدي راه ماشي اول مرة يخدمو معانا لقيطات قلت نديبانيو بيهم حتى دابا مكطلبوش الثمن غالي

هداك لي قرصاتو زينة فوذنيه:نهار غندير بلاصة فهوليوود الثمن ديالي ميقدر يخلصو حد

المخرج وهو مشربن:على هاد الكلاخ غدير بلاصة فالحبس ماشي هوليود رجعو لموقع انا جاي ونتفاهم معاكم عندكم الزهر وقع هادشي فالريبيتيسيو كن وقع فالتصوير ميفكوني معاكم غا البوليس

زادو كلهم مخليين زينة غير تتشوف فيهم ويديها على قلبها المخرج تلفت عندها ملاصق يديه مع بعض فحركة الاعتذار:سمحيلينااا بزاااف ڤغيمو سمحيلينا حشمان منك ولكن كيف تتشوفي ماشي محترفين فالتمثيل غير معديين بيهم والخطأ لي دارو صعيب

زينة روحها كانت غتخرج بالخلعة حتى تخايلات ݣاع السيناريوهات الدم/وية وفاللخر يطلع غير سيناريو تافه غالطين فيه وهادوك غير ممثلين:كنت غادي نمو/ت بالخلعة

جرها معاه لموقع جلسوها وعطاوها لما وهما كعتاذرو منها كاملين واحد واحد حتى دوك زاݣل وزويݣل مالين الروينة والمخرج كشرح لها وكنعت لها فالدرب لي خاص يدوزو منو ولي كان كشبه لاخر لي وقع فيه داكشي وكان كولو تجهيزات وكن كانو كصورو كان غيكون معاهم مول الكاميرة فالطوموبيل ومغاديش يوقع هادشي وكدا المهم كعتاذرو ويعاودو لانها عندها الحق تدعيهم بتهمة الازعاج بغاو يعوضوها وعيطو على المنتج وكدا لكن رفضات رفض قاطع صافي موقع والو خطأ وداز هي غير مين طلعات باقية حية وداكشي لي فبالها مامنوش تحمد مولاها وتشكرو مزال العاطي يعطي رجعات روحها شربات ميها وناضت مخلياهم وراها يعتاذرو ويعاودو غادية راجعة لوطيل زربانة هازة ديك الصويشية ديال كرواصة مسامحاتش فيها رغم الحروبات غادية ومع تفكرات ديك اللقطة فاش جروها وبقات مدابزة معاهم وليعات هداك وهو كقولها متافقناش على هادشي بدات كضحك غير بوحدها فالزنقة وهي تتحمد الله بلي ماشي لي كان فبالها وهي مزال عروسة البلا تابعها حتى لبلادات عباد الله حلات لباب ودخلات كان خارج من الجناح شافها من البالكو جاية تسالمو بلابيز مادة ليه الصويشية وهي مبسمة بلاما تجبد ليه البلان

يزيد:فين مشيتي فقت لقيت غا البرد حدايا

زينة:ضرباتني الفيقة بكري شفت الزنقة خاوية والجو زوين قلت نتمشى شوية واحد لڤايب غزال

حط الصويشية وضار عندها جارها من يديها عندو مضور يديه خصرها وهي مبسمة

يزيد:كترشق ليا فاش كنشوفك فرحااانة

زينة يديها على صدرو:فرحانة حيت معاك

نزل وطبع قبلة على نيفها مخليها كضحك بحال شي بنيتة صغيرة جمع ليها شفايفو من مور ما نطق:شي بيسة ديماريني هاد الصباح

ضحكات وهي عاضة على شفايفها صافي مابقى عندها فين تحشم دابا دارو شي فشي وسرحو الطريق وحبات داكشي تعلات على ريوس صبعانها وطبعات قبلة على شفايفو مع بغات ترجع باللور جرها عندو مرجعها مخلي شفايفهم لتاحمو ودخلو فقبلة حليلوة فداك الصباح الزين

فنفس الوقت فجيهة اخرى فالمغرب وبالضبط فالفيرما كانت واقفة فالإسطبل كدوز يديها بشوية على العود لي مولفها سمعات الحس وراها غير شافتو تبسمات ابتسامة عريضة وهو كذلك من مور ما وصل عندها ووقف مقابل معاها

رؤية:فرحتيني مين جيتي كنبقى بوحدي هنا لبنات مزال ناعسين

يوسف:مريض ومهلوك ارؤية

رؤية فديك اللحظة ختافات ابتسامتها:اويلي مالك باش كتحس اجي معايا راه الفيرما لي حدانا مولاها طبيب كعرفو بابا مزيان الدكتور الشرايبي

جراتو من يديه وزادت لكن رجعات وقفات فاش وقفها هو بلاما يتحرك مبسم على نيتها جرها عندو بشوية ونطق عينيه فعينيها:ضارني قلبي ونت هي دوايا وطبيبي

كلامو ختارق قلبها وخلاه يتوهج باعترافو المباشر كانو حاسين ببعضهم لكن مكانش اعتراف مباشر كانو غير التصرفات والأحاسيس لكن دابا لاحها ليها نيشان تزنݣات ونزلات راسها مبسمة قلبها كضرب دار يديه بشوية على ذقنها وهز لها وجها مقابل عينيه مع عينيها ونطق

يوسف:عطيني عام واحد نبين لي عندي وندير علاش نرجع وداك الساع الكلام غيكون مع عمي ابراهيم ان شاءالله عام ارؤية

دار اول خطوة نحو الحلم ديالو من مور داك الماتش شاف فمواقع التواصل الكلام عليه وشحال ديال الصفحات دالكورة هضرو عليه مشجعين كلشي يعني غادي فالطريق لي باغي وغيوصل بفضل الله طلب منها عام واحد باش يرصي داك الساع غيدير مدار راجل ختو الكبيرة وداكشي لي ناوي يدير لي بينو النهار الاول مع ختو الصغيرة ناوي الحلال وغيكمل دينو مع لي قدامو وكانت معاه فبدايتو وتشاركاتو حلاوة السعادة لي تتجي مع اول الخطوات نحو الحلم كيفما هو كذلك كان سند ليها فاش طاحت قلبها تهز وهي تتسمع كلامو وعينيه كانو كبينو ان هاد الوعد غادي يتوفى نطقات وهي حاسة بعويناتها غيغرغرو فرحات لبنات بزواجهم وهاهي تاهي اتكون فرحتها من وراهم

رؤية:مستعدة نتسناك العمر كامل غير نكون معاك

فديك اللحظة دارت يديها على فمها ودموع الفرحة نزلو جرها فديك اللحظة عندو معنقها حاضنين بعض بحب لي جا من ورا الصداقة وكانت علاقتهم صدفة ضاربين موعد من مور عام غيتوجو تاهما علاقتهم بالحلال وقف معاها فشدتها وسانداتو هو فبداياتو فارق السن لي كان غير عام بينهم فايتاه بيه هي مكانش عائق ابدا لانه غير عام فقط وزيد كان عقلو كبير هو وكبر من عمرو والسن عمرو كان عائق قدام الحب القلب مكعرفش داكشي

داز الوقت الظلام طاح فالمغرب وفرنسا فين كانو العشاق خارجين من الصواغي لي عرضو عليهم لوطيل ليها مين عرفوهم يلاه مزوجين طالعين فالدروج مقصدوش سانسور حيت ناويين على بلان مضور يديه على خصرها وكتموت بالضحك كلوح شي نويطة كخليها كتمرغ مرزن لكن معاها علام لابسة كسوة كحلة طويلة كلاص وانيقة وهو كوستيم فالكحل حفيانة وصندالتها فيديه مع كملو الدروج لي كانو طالعين وضارو مع الكولوار لي طويل ومن موراه دروج آخرين تحنى غافلها وهازها على كتفو مخليها كتموت بالضحك وكضرب فيه فظهرو وكتلعب برجليها عايشين اللحظة ومبروفيتيين فهاد الوقت لي كانو كتسناوه من شحال ممخلين حتى ثانية ضيع بلاما يفرحو وينشطو طالع بيها فالدروج وكلا مرة يدير بلي غيلوحها وهي على كتفو غادي معاها فالهبال وهبالو تتشوفو غير هي بوحدها وعلاش لا ميهبلش معاها وهي جاتو بالسيف وما وصل لها تزهقات روحو وصلو للطاج اللخر فلوطيل لي كان منو للسما حطها بشوية وهي كضحك مضور يديه على خصرها وتتمشاو بشوية حتى وصلو للقنت وهما هازين راسهم عينيهم على برج إيفل لي كيف ديما شاعل واضوائو هي سبب سطوع باريس لحظات آخيرة لهم فرنسا كودعو فيها الاجواء والڤايب الفرنسي مزال غيرجعو لكن المرة الاولى وهما بزوج كانت غير شهر عسلهم بدا فيها واول ليلة ليهم فالزواج كانت فيها احاسيس جديدة عاشوها تما زادتهم ديك الاجواء لمسة خاصة لحبهم نطقات فداخلها وهي ساهية وداعا باريس تحت ضوء القمر واقفين راسها على كتفو ويديه على خصرها فلحظة تلفتو بزوج لبعضهم وبدون ما يفكرو قصرو المسافة بينهم ودخلو فقبلة مخلية الاجواء عاطياهم لمسة وسحر خاص وهادشي مغريبش على مدينة الانوار وعاصمة الحب

ڤــيــنــيــســيــا إيـــطـــالـــيـــا🇮🇹🤍

أجمل مدن إيطاليا وأشهرها في العالم فينيسيا العائمة والحالمة ومن أجمل ما بنى الإنسان هكذا وصفها لويجي بارزيني مدينة العشاق وملاد الحب وملهمة الزوار على مر التاريخ مياهها الصافية العائمة بين المنازل وكأنها أحاسيس نابعة من القنوات لي هي فالأصل قلوب كل من زارها وهو عاشق كلشي فيها كوحي للحب والجو ديالها بحد ذاتو حب وكل جسر هو رابط بين روحين عاشقتين هي ليست مجرد مدينة بل قصيدة مكتوبة على سطح الماء بحيث تتجمع الارواح باش تشارك همسات الحب تحت سماء مرصعة بالنجوم فيها الحب ماشي شعور وإنما نسمة هواء كتنفسها كلما تمشيتي فأزقتها وجسور قنواتها مدينة الحب والفن والثقافة نعم إنها ڤينيسيا

لي تجمعو فيها بزوج وهما عاشقين باش تكون ثاني محطة لهم فرحلة عشقهم بين مياه المدينة النابعة من الحب كان القارب ديالهم كطفو وغادي بين أزقتها لي دايرة بحال الاحلام وكل زاوية كتروي قصة قديمة كيفما كل جدار ليها شاهد على حب عبر الزمان كيفما جاو حتى هما باش يشهدو على حبهم بالماء والحجارة كيف لي قبلهم دازو من تما مضور يديه عليها وجالسين حدا بعض هز راسو وتبسم شوية لكاميرة بعدما نغزاتو يتصورو وهي شادة السيلفي بزاف ديال التصاور خداوهم بزوج لكل بلاصة كانو فيها حيت كل وحدة عاشو فيها وغيعيشيو فيها باش يكونو فألبوم لرحلتهم يتفكروهم بيها على مر الزمان اول تسافيرة لهم عندها طعم خاص طفات الطيلي ورجعات تتشوف فجنابها وبعويناتها كتفحص ارجاء المدينة لي هي راحة للقلوب معارفاش باش تتحس بديك جمالية الأحاسيس جابليها الله بحال تتحلم هو حداها مزوجين وتجمعو اخيرا كقضيو بداية زواجهم فأجمل مدن العالم لي عمرها تخايلات انها تجي لهم بكل صراحة لكن ربي عندو رأي آخر واهم حاجة فهادشي كامل انها رتاحت نفسها هدات وروحها صفات نزلات راسها بشوية عاضة على شفايفها هو فديك اللحظة دخل لكاميرة هز الطيلي ونغزها بشوية هزات راسها شافت فالكاميرة مبسمة وصور لكن غير حقق فيها من الكاميرة تلفت عندها دغيا عينيه فعينيها لي كانو حمرين مغرغرين عقد حجبانو مرجع خصلة من شعرها ورا ودنيها:مالك؟

زينة نزلات راسها تنهدات ورجعات شافت فيه مبسمة:كنشوف راسي عايشة أجمل مداز فحياتي كنت كنشوف هادشي فالافلام وانا صغيرة ودابا كنعيشو نت حدايا تشافيت شنو بغيت مزال الحمدلله ياربي

تبسم لوصفها كنشوفو غير فالافلام ولكلامها لي كان كلخص كلشي هو معاها صحتها رجعات تزوجو ݣاع داكشي لي كانت باغياه هاهو وصل والعوض زوين تعوضات على كلشي والعوض كان هو الفرج صحتها وراجل لي كان سند بكل معنى الكلمة وهو كذلك تسنى بزاف ونال نالها هي حط يديه بشوية على عنقها مدوز إبهامو على خدها بحنية

يزيد:تستاهلي كل حاجة زوينة بحالك هاد الفرحة عندي بالدنيا ومافيها لي تمنيتيها وبغيتيها تحضر حتى لعندك غير فسبيل هاد الضحيكة لي هي الدوا ديالو

مع كمل كلامو حط يديه على قلبو لانها فعلا كان دواه من مور الوعكة لي دازت منها حتى هو رجعات فيه الروح وهاهي الحمدلله دابا صحة سلام عايشين ايام زوينة وهما مزوجين

يزيد:مزال جاي بزاف ان شاءالله وكولو ليك

كان باغي يعوض لها ݣاع لي دوزات حاطها فعينيه ومغتخصها حتى حاجة تعذبات ودابا غا ترتاح وفنفس الوقت يعوض حتى الوقت لي عاشوه بعاد على بعض كارزة عليه وهي معنقاه بعدما ضمها لصدرو مبسمة وقلبها كضرب غير هاد الحضن وهي بين يديه بالدنيا ومافيها وقف معاها وشد بيديها والا قال شي حاجة ككون قاد بيها راجل ديال الصح بمعنى الكلمة كانو مثال حي لكل مكتوحي ليه المدينة من حب وعشق وهيام

الظلام سايد على الجناح فقط نور الݣمرة لي ضاوي عاطي رونق على المكان جو مختالف فدولة مختالفة على لي قبل منها لكن القاسم المشترك ان كل وحدة ومتميزة برومانسيتها بطابع خاص كل قطعة من حوايجهم كانت فجيهة دالة على شنو واقع فديك اللحظة احاسيس ساخنة وقبلات كذلك متوهجة فوسط داك الظلام هي لتحت وكان هو فوق منها عريان من الفوق وجار الفراش مغطي نصهم غاطس راسو فعنقها ويديها بزوج على ضهرو ملمس الرحى ديديها مخليه شاعل وهي كذلك بقبلاتو عايشين ديك اللحظه لي فكل بلاصة كان عندها طعم خاص آهاتها كخرجو بصوتها الرقيق الشهوة مخلياها مقادراش تكتمهم وداك الصويت كزيد على مابيه مخليه مشوق لها كثر وكثر بحال راه اول مرة كان غاطس راسو وسط عنقها من اكثر ما كعشق فيها ورا عينيها مخليها مع كل بوسة حاسة براسها كتزيد تطلع فسلم الحلاوة لان هي براسها كان نقطة ضعفها هو عنقها خشات صبعانها وسط شعرو حركة لي كانت قادرة تزيد على مابيه من مور ما كتبقى تدوز يديها على ضهرو هز راسو بشوية من عنقها حطات يديها على خدو كتحسي شعيرات لحيتو بحنية وعينيهم على بعض كانو معسلين وشهوة الحب مخلية نظراتهم تتبري تجاه بعض بشوية بدا كداعب نيفو مع نيفها شي لخلاها تبسم وهو كذلك وعينيه كاو فديك اللحظة رجع قاصد عنقها وهما عايشين داكشي لي صبرو عليه سنين❤️🔥

إشــبــيــلــيـــه إســــبــــانـــيــــا🇪🇸❤️

معقل التاريخ العريق وملهمة الكتاب والشعراء عبر التاريخ عبر التاريخ وأجمل ما قيل عليها إشبيلية، يا موطن الحب والشعر، في كل زاوية من زواياك، تجد الحكايات تنبض بالحياة كانت مدينة مزال محتافظة بعبق الماضي كطلاقا فيها الشرق بالغرب المزج بينهم عطى عطى كنز معماري لا مثيل له وغيبقى راسخ طول الزمان جمالها مكتامل فأندلسيتها وتراثها العربي فيها كتراقص الحضارة الإسلامية والمسيحية بتناغم فني بحيث قصورها ونوافيرها كرويو قصص ألف ليلة وليلة لي كتعكس حقبة الحكم الاسلامي فداك التاريخ الحافل

مبتاسمة للكاميرة وهو كصورها تصاور تذكارية لكل بلاصة دازوها حماقت على داك المكان وتصورات حتى شبعات قدام كل معلمة تاريخية كان واحد الإلهام حسسها بلي راه رجع بيها الزمان اللور وتتعيش فديك الحقبة وكانت ديك البلاصة بالضبط هي “قصد المورق(الكازار)”ولي هو واحد من أجمل أمثلة العمارة الأندلسية الإسلامية قرون دازت عليه ومزال باقي وأقل ما يقال عليه تحفة فنية تتألق بالزخارف المعمارية العربية والنقوش الإسلامية

من مور ما تصورات تلفتات وهي تتشوف فيه شحال زوين تكون تتسمع على شي حاجة وتجي ليها حياتها كاملة وهي تتسمع الاندلس الاسم لي طلقوه المسلمون على المناطق لي حكموها فشبه الجديدة الإيبيرية تاريخ حافل بالازدهار التعايش السلمي بينهم وبين المسيح واليهود آنذاك وكذلك التقدم قرون من الحكم الاندلسي الحافل ورغم نهايتو مع سقوط غرناطة آخر إمارة إسلامية فشبه الجزيرة الايبرية الا ان الاندس ترك بصمة وحضارة معمار وثرات مزال قائم ليومنا هذا شدو السيلفي بزوج قدام القصر وهما مبسمين كل صورة عندها قصة وكل بلاصة عندها رواية مكانش شهر عسل عادي وإنما بغاو يكتاشفو حوايج جداد زوينين منهم ثقافات البلدان لي زاروها وتاريخهم يبقاو راسخين فالبال مكانش اول مرة يجي هو لكن هاد المرة مختالفة معاه هي لي محسساه انه اول مرة يكتاشف ويعيش هادشي مكملين خرجتهم والمعلمة الموالية كانت هي”الخيرالدا” لي فالأصل كانت مئذنة مسجد اشبيليه الكبير لي تبنى فالقرن 12 بعد استعادة المسيحيين للمدينة تحولات المئذنة لأجراس كاتدرائية اشبيليه لي هي كذلك كانت متميزة بتصميم هندسي فريد وزخارف إسلامية كانت عاشقة للتاريخ وهاد الرحلة بالذات روات حبها وعطشها للمعرفة وهي تتشوف داكشي مباشرة كانت شي حاجة مختالفة على السمع عليه مدينة زوينة وكانو فيها مغاربة كثيرة بالإضافة لقرطبة غرناطة وطليطلة كلهم عندهم طابع إسلامي وسحر الزخرفة العربية طاغي عليهم وسط هادشي كامل لهاد العبق المليئ بالتاريخ السائد على المدينة كانت كذلك الشوارع مزينة بفرق كثيرة لعروض الفلامنكو لي كان نوع من الفن الاسباني لي كقوم على أساس الموسيقى والرقص وهي موسيقى غجر إسبانيا(الخيتانوس)ولي كان فيه تأثير متبادل بينو وبين الموسيقى الاندلسية ولي بحذ ذاتو كان كضهر فبعض أنواع الموسيقى فشمال افريقيا وشي لي خلاها بحركاتو نغماتو وسينفونية تحس بالحماس بدوك الطقطقات بالحذاء والضورات الموزونين وبدات كدير بحالهم وهي بلاصتها حتى نغزها حيت تحمسات تلفتات عندو وهي كضحك دايرة يديها على وجها حشمانة متسوق لها حد لكن الشطيح ليه هو فقط قرب عندها بشوية وهمس ليها:نتعزلو وداك الساعة وريني ما عندك

خلاها عضات على شفايفها وهي تتفرج مبتاسمة بلاما تشوفيه الرجل كيفما كان حالو يموت فالشطيح يولي عبد مشرط الحناك قدام هزة الصدر وميلان الخصر من مور رحلة التاريخ الأندلسية الاسبانية الرحال تشد نحو دولة أخرى لي كانت جارة ووحدة من مدنها كانت هي محطتهم التالثة فرحلة زواجهم ألا و هي

لـــشـــبــونـــة عـــاصـــمــة الــبــرتــغــال🇵🇹💚

مدينة النور والهدوء والحنين بحيث البحر كحتضن الأرض والشميسة مضوية على كلشي هادشي كلو مخلي القلب يسافر للماضي لكن العين مكتقدرش تغض البصر على جمال الحاضر الراحة النفسية لي عاشت تما غزالة بزاف فيها خاصة أنه هو بنفسو عتارف لها الا بغى الكالم يرتاح ويرد دماغو من ضغط الخدمة كان كجي يدوز عطلتو تما بوحدو وفعلا هادشي حسات بيه هدوء زوين عاد ان البلاصة في جلسو كطل على البحر الهوا ديالو لا بالليل ولا بالنهار كصفي الروح ويعطي راحة كثر وكثر كل رحلة خلات بصمة خاصة عندهم مع اختلاف كل ثقافة وفداك الاختلاف كتكمن الحلاوة

جا الدور على آخر محطة ليهم وغادي يختمو بيها رحلتهم تعمد يخليها هي اللخرا حيت ديجا جاي لها وعارفها كيف دايرة وغيكون بيها الختام مسك ولي كانت زيـــورخ ســويـــســـرا🇨🇭🪵

ولي كتلخص فالجمال الطبيعي السويسري كانت هي إلهام الرسامة لي كخرجو اللوحات عن الطبيعة من إبداعهم إلا هي كانت طبيعتها من إبداع الخالق وبلا غلط وسبحان عزتو فداك الجمال الاخضر لي كاسي المدينة فور مشافتها نفسها تفتحات وهي تتشوف الطبيعة الخلابة والهدوء النابع منها فكراتها فمسقط رأسها دوزو رحلتهم فيها فطبيعتها عن طريق التريب متجردين من كل عوالم المدينة وجلسو وسط خيمة مدفيين بعافية كانت تتولع بالخشب السويسري لي من أجود الانواع تعمد أنهم يخليوها هي اللخرة على ود هادشي طبيعتها غتصفي دماغهم تحت نجوم الليل والصباح بإشراقة ساطعة من الشمس بزقزقة العصافير ومياه البحيرة الصافية والعذبة عرفات المعنى الحقيقي ديال التأمل حيت تفاصيل ديك الطبيعة كثيرة وبزاف لا من جبال وديان بحيرات و اشجار كلشي وسبحان الخالق

وكانت هي ختام رحلة شهر عسلهم لي مع كل مدينة عاشو سحر خاص كل ثقافة عطات نكهة لحبهم فرحلة الاحلام لي دوزوها بزوج وحلاوتها جات من مور صبرهم راجعين بأمل جديد للحياة وبدايتهم بصفتهم رفقاء درب بعض لي غتكمل برجوعهم لأرض الوطن المغرب الحبيب لي كبقى هو الأصل والملاذ فين غيكمل حياتهم

فالفيرمة بالضبط كانو عايشين الفرحة درجوع العرسان مشيتهم كانت بالزربة والفرحة بيهم غادي تعوض دابا وما أجمل دفئ العائلة كانو ناويين يفطرو مجموعين وداكشي لي كان الخدامات بزوجات معاونين وموجدين شهيوات مغربية ديال الفطور مستفين على طول الطبلة فالصالة الفخمة كاين لي جلس كاين لي مزال منزلش كانت تتجهز فبيتها لابسة فراشة فالغوز بارد باقية هازة بلاكة عروسة واصلا راه مزال يلاه زوج سيمانات باش دارو العرس جالسة وراضية كتضفر ليها وكهضرو

راضية مجاوبة انيسة لي كتعيط لها:هانااااا جااااااية يلاه ازينة نزلي

خرجات خلاتها تتخرج زغيبات من الجنب شوية التزنيݣة فالحناك مع ݣلوص خفيف فقط سمعات الدقان عينيها على المراية وقالت دخل عند بالها سكينة غير تحل لباب تلفتات مع شافتها وقفات:خالتيي

فريدة وهي مبسمة:صباح النور الزينة كصبحتو

زينة سلمات عليها بلابيز:الحمدلله ونت شوية

فريدة:الحمدلله احبيبتي تبارك الله السر مزال طايح

زينة ضحكات وهي منزلة عويناتها التفويجة لي فوجات مع حبيب القلب ريحاتها كثر وعرفات ان فعلا السفر زوين التفواج كنعاكس على المظهر الخارجي فديك اللحظة فريدة حلات البواطة لي كانت هازة تحت أنظار زينة لي غير تتشوف بلا حتى كلمة جبدات فريدة براصلي من الذهب أنيق ومنقوش حطات البواطة وشدات فمعصم زينة وهي تتشوف فيها:توصى عليه على قبلك لكن موجدش نهار العرس ومكاين ما حسن من هاد الوقت الكادو ديال صبوحك اعروسة ولدي ومدام الوزاني الاولى

تجردات من هاد اللقب حيت هي وقتها داز وعطاتو ليها حيت هي مرات الوريث دابا ولي فيدو كلشي زينة بقات تتشوف من طبعها حساسة وتتبلوكا فاش كغمروها احاسيس الفرحة فريدة كملات على كلامها وعينيها كبريو:من ديما كنت كنطلب الله يجيب ليه بنت الناس كيفما هو ولد الناس وربي محشمنيش لي بغاها ليه قلبو كانت هي مكتابو الحمدلله راك مرات الغالي والمرضي عمرك تشوفي منو العيب ولا لي يهرس خاطرك كيفما حاطني فوق راسو لا أنا لا خواتاتو حتى نت نفس الشي وكثر حيت شاريك بالغالي وربي شاهد مرحبا بيك فالعائلة ازينة القلب

عينيهم غرغرو بزوج من مور داك الكلام لي فور ما نطقاتو فريدة من القلب تعانقو عناق حار وعينيهم مغمورين بالدموع دموع الفرحة لي هي فرحة عارمة من مور داك الكلام لي كان عميق وعارفاه زينة مزيان دات مرضي الواليدين وبداك الرضى باش ناجح فحياتو رحبات بيها فالعائلة وهي واصفاها بزينة القلب بحال سميتها لأن لي دازو منو بين على طينتها كانو بزوج كمثلو الماضي والمستقبل دسيدات الوزاني لي دازو فسلالة العائلة لي عريقة لا من حيت المكانة الطبقة وكذلك الطبع كانو زمر للتواضع بعدو على بعضياتهم وهي شادة وجه زينة بين يديها وكشوفو فبعضهم بحب تعلات على ريوس صبعانها زينة وطبعات قبلة على راسها فرحاتها بزاف بالكلام والهدية كيفما فرحاتها حتى ميمتها بكادو عريق كان ميراث ديال جداها وكان من نصيبها هي بالذات كبين على غلاوتها وهي عروسة ثاني تسمع الدقان كان الحاج لي دخل تبسم ليهم نيشان وعينيه على زينة لي قصداتو طابعة قبلة على يديه

الحاج وهو كطبطب على راسها:الله يرضي عليك الغالية

كان بحالو بحال فريدة يديه على خدها وبكلام زوين مرحب بيها وسطهم:مرحبا بيك فالعائلة نت منا وديالنا امرات العزيز

ومع كمل كلامو طبع قبلة على راسها كانت قبلة تقدير لها بصفتها زوج الابن البكر مخلياها تعرف مكانتو فالعائلة ومكانتها حتى هي

بصفتها شريكة حياتو هو كذلك مقدم لها هدية ثمينة لي كان عبارة على كوليي فخم تعبيرا على فرحتو بيها كمرات ولدو وبحال وحدة من بناتو مخلاو ليها متقول داروهم وسطهم من شحال ووقفو معاها ودابا رسميا ولاو منهم والحمدلله القلب على القلب

نزلو مجموعين باش يفطرو فجو عائلي زايداه الفيرمة طابع مغربي كثر مع الدخلة لمحاتو جالس تبسم لها ومشات قصداتو كيفما دارلها بعينيه تجلس حداه صافي مبقاتش كتحشم كيف الاول واخا كانو دايرين العقد دابا صافي وثقو كلشي

سكينة بهمس:وا زينة لبنينة ݣعما حشمتي بينا

زينة شداتها الضحكة حتى كانت غتقلب عليها كاس ديال آتاي رجعات همسات ليها:قريب تولي سكينة بلاصة زينة

سكينة فديك اللحظة جمعات الضحكة شوية حيت فعلا قريبا تاهي اتولي بنينة بغات تشد فختها ناسية راسها راه تضربات بنفس مغرفتها ديال الزواج زينة نغزاتها:شتك صقلتي

سكينة:شاداني الخلعة من طرمتي واخا داك النهار باقي بعيد فيا غير الفم اختي

زينة بنفس الهمس وهي تترشف من كاسها:غا بردي فيك النفس غيعجبك الحال

سكينة مطلعة حاجب وضاحكة:هاي هاي هاي شكون كهضر ايوا بصحتك اختي

ضحكو بزوجات فجو من الضحك سايد على كلشي الرجال كهضرو مع بعضهم و العيالات كذلك الدار عامة ولمة الحباب طاغية والفرحة كدق عليهم فناقوص الفرح لي جايب المسرة عما قريب بمناسبة جديدة

العدول وهو هاز يديه وكلشي كقول آمين:اللهم ارزقهما السعادة والهناء واملأ دربهما بالسرور و الافراح وارزقهما البنين والبنات ذرية صالحة بإذنك يا رحمان سيدنا الله يجعل كلشي مبارك ومسعودة

كلشي قال آمين ومن موراها نيشان علات الزغاريد ارجاء المكان معلنة على فرحة مزينة بالحلال فمناسبة عقد قران سكينة❤️وليد لي طبع قبلة على راسها يديه فيديها من مور ما وقعو عقدهم ودارو اليد فاليد مكملين دينهم عاطيين صورة على ان زواج الصغر زويين بزاف بعدات عليه طلاقاو عينيهم وهما تتفكرو ذكريات بعض من بعد خوتهم لي مهدو ليهم الطريق كانو هما كانت مراهقة صغيرة بريهيشة وكان هو هاز ليها هبالها كبرو وفوسط الحقد والعداوة طلاقاو قلوبهم وكانو هما النقطة المضيئة وسط داك الظلام والحمدلله هاهما ليوم زوج وزوجة آملين حياتهم تكون مليئة بالفرحة والبهجة كعنقو فيهم حبابهم ويباركو ليهم كلشي ضاير بيهم العائلة كاملة وكذلك عبد الكريم لي قريب تاهو يكمل دينو مع لي ختارها قلبو وتاهي منهم مسعودة تدعي وتعنق فوليد وفريدة والحاج يرحبو بالعروس الجديدة يزيد ينصح فخوه الهبيل لي ولا عريس دابا يدير عقلو وهو ضامو عندو وزينة تعنق وتبوس فختها الصغيورة لي ليوم عروسة يوسف لي حالو غير على حالهم كان زايد نغزة فالفرحة وفنفس الوقت حزن شديد فقلبو وعلاش لا وهو وغيتفارق مع تويميتو الفردة ديالو لي تشاركو كلشي حياتهم كاملة لكن هادي سنة الحياة وسط المباركة والتهاني خدم الشعبي واول ما ناض العروسة والعريس لي كان بينهم وبين التباث غير السلامة معروف حالهم داكشي باش تفاهمو كلشي نايض يشطح وفنفس الوقت كلشي ضاحك عليهم وعلى حالهم هما بزوج حركاتهم تصرفاتهم وكلشي

وليد وهو كهمس ليها:ديتك والله ما خييييلتك

سكينة:واخا تفكر تخليني وراك وراك والزمن طويل

مع نطقات جملتها فرفرات قلبو خلاتو ضور يديه على عنقها جارة عندو وهما كضحكو وهبالهم زايد على الفرحة لي ضايرة بيهم بحبابهم صحابهم وخوتهم وكل العائلة لي حاضرة

مربعة رجليها وهو متكي حداها على جنبو التصاور ضايرين بيهم وهي قدامهم الالبوم كبير مزوق كل صفحة من صفحاتو كانت فيها صورة من صور رحلتهم فبلاصة من بلايص المدن لي زارو كل صورة وطابعها كمد ليها وهي تتخشي وكتقاد ومرة مرة يهز الاقلام ويجلس يزوق كان عندو مع الرسم وداك الالبوم كان ناويين يزوقوه ويقادوه مسميينو رحلة الاحلام🤍لكان فعلا كلشي فيها بحال شي حلم زوين خاضوه بزوج كان كضحكو ويهضرو وكل تصويرة فيها حاجة زوينة تتفكروها ولا شي طريفة وقعات ليهم كملو وسداتو بشوية رسم فيه قلب كبير متوسطاه تصويرتهم بزوج تاهي على شكل قلب كان عندو مع الحيل اليدوية داكشي لي خلا الالبوم زويييين بدوك الزينات لي زادوهم على التصاور على خلي عنوانو الكبير ضايفين حداه التاريخ لي كان داك العام اسثنائي فحياتهم رجعو فيه دوزو شلا ما يتشال ويتعاود تزوجو وهاهما دابا فدارهم لي عاد جاو ليها اليوم فأول خطوة لهم فيها من مور فرح خوتهم دارهم لي عاودو قادوها على الشهوة لا من فراش ولا كلشي دارهم لي غادي تأويه وغتأوي حبهم وحيوطها غيشهدو على قصة حياتهم ووليداتهم لي غادي يجي فالمستقبل كانت تتهضر وهو متكي على جنبو وداير يديه على خدو وكشوف فيها هايم كعسل فعويناتو لاحظات هادشي وهي تعض على شفايفها محنية مقربة ليه حتى طبعات قبلة على شفايفو مع بغات ترجع باللور بالزربة هربانة وهو يشدها بالخف مشقلبها وجاي فوق منها وهي كضحك مضورة يديها على عنقو طلع حاجب ونطق:علاش تتقلبي دابا؟

زينة وهي عاضة على شفايفها:عليييك

يزيد معطلهاش نيشان غاسط راسو فعنقها وهي غارسة صباعها فوسط شعرو:حاضر وموجووود ليك ازين

نهار جديد من أيام الحياة بدخولو مكمل شهر ونص على زواجهم لي نهار على نهار كولفو بعض اكثر من النهار لي سبقو وعلاش لا وهما تشاركو كلشي ومزال غتشاركو الصحة والمرض الفرح والقرح وكل ما كتضمنو الحياة الزوجين

داخل للدار بعينيه كقلب عليها وهو كسد لباب وراه فيديه بوكي ديال الورد وبواطة ديال الشكلاط اكثر زوج حوايج كتحماق عليهم ومتعمد يدخلهم فيديه باش يتصالح معاها ويحزرها قصد الصالة الاولى وهو كعيط لها خرج منها وقصد الصالة لوخرا ولا من مجيب حتى من الكوزينة راه مغتكونش فيها مين مجاوباتوش اصلا الدار حس بلي مافيها حد طلع نيشان لفوق قاصد بيت نعاسهم عند بالو تكون ناعسة لكن والو حط داكشي ورجع خارج مقلب بيت ببيت والو الجردة مكاينش فين غادي تكون ومو معيطة ليه تتقولو بلي ممشاتش وهما عادة عندهم يتجمعو نهار الجمعة ياكلو كسكسو عاد ان انيسة يلاه ولدات بسيمانة دابا وكلشي مجموع هو ممشاش حيت الخدمة والديفيلي قريب عند بالو هي غتكون تيليفونها النهار كامل وهو كصوني عليها طافياه فين غادي تكون خرجات تنفس ترتاح مبغاهاش تخرج مقلقة معندوش مشكل تخرج بوحدها مين كترجع تتقولها ليه لكن دابا حس بشي حاجة خصوصا انه مدواش معاها النهار كامل لا ابيل جاوباتو فيها ولا ميساجات رجع لبيتهم وهو كفكر يديه فجيبو ويدو لوخرا كمسح بيها على ذقنو وهو كزفر كتفكر لبارح والمشكل لي وقع كفكر واش دار شي حاجة لي تخليها تقلق قد هكاك وهو مقاصدش مكانش متوقع ايوصل هادشي هكا هو عارفها لكانو مكاعيين مغاديش دخل واليديه اتمشي عندهم عارفها مزيان بعقلها لكن دابا شوقع شنو بيها بين عينيه حالها لبارح كيف كان كحاول يحلل شي حاجة ماشي حتى لهيه

فــــلاش بــــــاك لــــبــــارح

داخل من الخدمة كعيط لها وهو كسد لباب سمع الحس جيهة الكوزينة وهو يقصدها راسم على وجهو ابتسامة مع دخل نطق:زين دياليي

متلفتاتش كملات شغلها بلاما تجاوبو مخلياه قاصدها مع جا وراها تلفتات كان مزال مبسم قرب عندها وتسالمو بلابيز والسلام بارد كان من طرفها مع بعد عليها نطقات ببرود:علاش قطعتي؟

يزيد:ما قطعتش راه طفى ليا قلتها ليك فاش تاصلت بيك من عند السكرتيرة

مع سمعات السكرتيرة رجعات تلفتات مكملة شغلها لكن الطريقة باش كانت تتقطع الخضرة تتبين شحال معصبة تنهد ونطق وهو مقرب عندها:شنو كنت بغيتي تقولي ليا راه عرفتك بغيتي تهضري معايا فشي حاجة داكشي باش عاودت تاصلت الطيلي دلبيرو عندي خاسر داكشي باش تقطع عليك تاهو

زينة غادية قاصدة الثلاجة بلا حتى اهتمام:مبقى عندي ما يتݣال مكاين لي يسمع اصلا

فديك اللحظة عقد حجبانو شوية من كلامها مفاهم والو السيدة بيها شي حاجه عمر مراتو كانت هكا واخا يلاه باديين فالزواج كعرفو مزيان مفيهاش التنتار بحال هكا والهضرة الباردة واخا تكون معصبة شدها من ذراعها بشوية مضورها عندو ونطق:زينة شكاين راه شرحت ليك شواقع ونت عارفة الشركة مزيان

زينة نتزات منو بلاما تشوفيه:صافي حتى انا مقلت ليك والو دابا ساعتو الله

رجعات عطاتو بالضهر وهي مكملة شغلها مخلياه وراها مفاهم والو تنهد وخرج بهدوء منساحب تا تبرد ويهضرو داز شوية الوقت بدل حوايجو دوش ورجع عندها للكوزينة هز موس وبغا ياخد مطيشة من جيهتها

يزيد:انعاونك شوية

مكانش غريب هادشي حيت كان كعاونها وكدوزو وقت زوين فالكوزينة وبغا هاد المرة يكون سبب باش أنه ينزاح هاد الجو المكهرب وترطاب لكن لا نيشان ضارت شافت فيه:قادة بشغلي غير خليني

يزيد فديك اللحظة حط الموس ونيشان ضار عندها:شكاين ازينة كنسولك دابا واش التيليفون لي مقلقك ولا شي حاجة درتها لبارح وانا معاقلش قولي ليا معاونين وكنهضرو اشنو فيها

زينة حطات الموس وهي مبعدة منو شادة فراسها:مقادراش نهضر ايزيد الهضرة معندها فاش تنفع غير خليني عفاك متعاونيش قادة بشغلي بغا نتحرك فالكوزينة بوحدي الزايد غير مخليني مرونة كثر

فور ما نطقات كلامها بقى كشوف فيها وزاد خارج بلا حتى كلمة مخليها على راحتها حتى يشوف هادشي فين ايوصل وهو معارفش اصلو منين حطات الماكلة وكلاو وهما ساكتين وهادشي لي عمرو كان كهضرو كضحكو كتسولو على نهارو وهو كلقى راحتو وهو كهضر معاها كانت بئر اسرارو لكن هاد المرة لا غير حتى الشوفة مكتشوفش فيه

كانت واقفة قدام المراية كتدهن الكريم ديال اليدين كتوجد باش تنعس خارج من الحمام وعينيه عليها نيشان قصدها كلشي الا زعلها ضور يديه عليها من اللور وهو طابع قبلة على عنقها وهامس ليها:مال زين ديالي؟

فديك اللحظة حطات يديها على يديه وبعداتهم عليها كيفما بعدات حتى ناطقة بنفس البرود لي غيحمقو:مافياش ليوم

عطاتو بالضهر وزادت لبلاصتها تخشات فيها عاطياه بالضهر وهي لي موالفة كتنعس فحضنو خلاتو مزال بلاصتو مبلوكي جاي يحزرها رضاتو باغي غير حاجتو محملش راسو فديك اللحظة كيفما ماحملش هادشي زفر وزاد لبلاصتو تاهو طافي الضو والبرود طاغي على ديك الليلة لي مكانتش كتنتامي لياليهم وحالهم

رجع الواقع وهو كفكر مفهمش واخا هكاك مداش عليها وجاي ليوم يصالحها واخا مداير والو حيت عارف مراتو كيف دايرة مغتقلقش حيت تيليفونو طفى والطيلي دلبيرو قطع عليها وفاش تاصل من عند السكرتيرة قطعات عليه وزيد عارفاه مظغوط بالخدمة وكانت معاهم فالشركة وعارفة كلشي مغاديش تزيد عليه حتى هي جلس وهو كخمم غيتسنى شوية الا جات يخرج يشوف فين هي معرفش واش الضغط ديال التوجاد لعرس ختها لي تصادف مع ولادة ختو ولا آش رغم انها كانت فرحانة ليهم بزوج

فديك اللحظة وهو جالس لمح البلاكار ممسدودش كامل بقى مركز حتى فلحظة ناض فتحو نيشان وهنا الصدمة البلاكار جيهتها كولو خاوي الا شي حاجات قليلة هزات حوايجها كاملين بدا كقلب فليڤاليز ديالها كانت وحدة ناقصة وهي لكبيرة لي جمعات فيها كلشي فديك اللحظة ضارت بيه وهو كلمح وريقة مخلياها ليه فوق الرف ديال البلاكار مع قراها تبلوكا بلاصتو جامد ام الغيث فرنسا خواتاتها بزوج عندهم فالدار وحدة غتزوج ولوخرا قريبة تولد الكلمة مخلية ليه فديك الورقة خلاتو يعرف بلي مبعدة بزاف وسؤال واحد كضرب له فبالو دابا هو فين غتكون مشات وهي جامعة حوايجها ومخلية ليه كلمة ثقيلة فديك الورقة

الدنيا ضارت بيه بعدما كمش ديك الورقة بعصبية لي كان فيها “متقلبوش عليا”كيفاش ميقلبوش عليها واش هي يتيمة راه عندها عائلتها غيتشوشو عليها عندها راجلها علاش ادير فيهم هكا وهي مافيهاش هاد الخصايل عارفها بعقلها لكن دابا شنو وقع زفر وهو كمسح على ذقنو وكفكر فين اتكون مشات طاحت فبالو لڤيلا ديال بوسكورة لكن مزال ممشاوش ليها مع العرس التسافيرة التوجاد دابا شحال من مرة بغا يديها لكن أجلات بداك كطيح ليه فبالو تكون مشات لڤيلاج مسح على شعرو بالجهد فور ما راوداتو هاد الفكرة متسناش بزاف حتى خرج طاير قاصد الطوموبيل ركب وهو عقلو غادي يخرج اتسافر بوحدها وتازة بعييييدة بزاااف والسؤال لي مزند عليه راسو هو علاش هادشي كامل اشبيها فديك اللحظة صونى ليه التيليفون كانت سكينة زفر شوية كحاول يهدن راسو باش ما يبين والو دار الطيلي فوذنو:آلو

سكينة:آلو يزيد صاڤا خويا نت فالدار؟

يزيد:الحمدلله وانت انا يلاه خرجت منها علاش

سكينة:والو غير حيت زينة مكتجاوبش ومجاتش تاكل كسكسو وبغيت نجي عندكم حيت دايرة معاها نخرجو نشريو شي حاجة دالماكياج وقلت نعيط لك نت زعما لمتكونوش ولا شي حاجة

معرف ما يقول ليها حيت السيدة جاية اتجي مغادي تلقى والو الدار خاوية مسح على ذقنو تلف وماعرف ما يدير الدماغ لي يفكر تسوطا ليه فديك اللحظة ما فيقاتو من أفكارو غير هي:آلو يزيد تتسمعني

يزيد نيشان:سكينة نجيك نيشان ولكن تبقى بيناتنا زينة معرفتهاش فين مشات جمعات حوايجها وخرجات فين معرفتش أنا دابا خارج كنقلب عليها

سكينة تصدمات حتى عينيها خرجو:اويليي كيفاااش

يزيد:بشوية قلت ليك تبقى بيناتنا مي مسعودة والواليدة ولا حتى حد ما يعرف هادشي اسكينة غادي نلقاها غير تهدني قولي ليا واش تتعرفي دار دشي صاحبتها

سكينة شدات فراسها وهي خايفة:كنعرف غير لبنى لي خدامة فالشركة ولكن معرفتهاش فين ساكنة

يزيد:صافي واخا المهم باشما كان غادي نرد عليه صافي

سكينة:يزيد عفاك نخرج نقلب معاك راني تشطنت مغاديش نقدر نصبر

يزيد:غير تهدني متبيني ليهم والو اي جديد غنعيط ليك غير كوني هانيا وعفاك يبقى بيناتنا هادشي

سكينة زفرات وهي كلها تترعد وترونات:صافي واخا عفاك الا عيطت ليك جاوبني

قطع معاها وهو كزفر محاملش راسو موالف لوقعات شي حاجة كغيزها حسي مسي بلاما يدري شي حد ودابا غير زلقات ليه وقالها لختها حيت تلف غادي كخيط فالزناقي وهو كفكر فلبنى صاحبتها وعشيرتها بانتليه قبيلة فالشركة لكن كانت عادية من كانت عندها اتجي تقولها له ولكن الا كانت هي طالبة منها تسكت قصد الشركة يجيب نمرتها حيت معندوش بما أنها صاحبتها تقدر تكون عارفة شبيها البنات كعاودو لبعضهم وهو غادي وقف فلفيروج كان حداه الطوبيس تاهو واقف تلفت شافيها ورجع كشوف فالطريق فلحظة ضربات ليه فدماغو النمرة ديال الطوبيس نفسو هو لي كان تتجي فيه للشركة وتتمشي ونيشان وهو كضور هادشي فدماغو شعلات ليه واحد البولة فراسو مع شعل الضو نيشان ورك قالب الطريق

جالسة وجامعة رجليها عندها تتبكي وتتنخصص حاسة براسها غطرطق تتبكي وتشهق وتقول مبكيتش جالسة فالارض مهدودة والبكى زايدها قلبها كضرها بزاف مباغية تهضر مع حد ولا تشوف حد مبغات والو بغات تبقى بوحدها هكاك تنعازل على كلشي تتحس براسها نادمة ونادمة بزااف على لي دارت وندامتها معندها ليها نفع هادشي لي مخلي دموعها شلال من عينيها وسخان تتسمع الصداع حداها والهضرة والضجيج لي خلاها دير يديها على ودنيها بعصبية هادشي لي زايد عليها أقل ما هي حاجة ولات كترونها وكترون مجاجها ومواصلة دموعها وشهقاتها لي كانت من القلب نيت

وقف قدام الحومة وعجاج الطوموبيل نايض كان جاي عافط بعدما طاحت ليه فبالو تقدر تكون تما نزل دغيا ودخل كجري قاصد الدار كانت مزال على حالها سادة ودنيها وهي تتبكي هزات عينيها بشوية وهي تتشوف ارجاء الدار والحنين فايض على قلبها توحشات دوك ليام الزوينة لي كانت مجموعة فيها هي وعائلتها تما والبساطة طاغية عليهم باها لي كان مزال فالحياة كان مدفيهم والساس ديالهم كان موقفهم توحشات هاد الدار لي عاشت فيها بزاف وبغات ترجع ليها بغات تبقى هنا فديك اللحظة قفزات فاش سمعات الدقان شي لي نرفزها باغية ترتاح علاش كصدعوها وهي مخلية ليهم كلشي غوتات ويديها على وذنيها:وااااابعدووو منيييي

الروح رجعات فيه فاش سمع صوتها كان توقعو صحيح انها تكون جات للدار لقديمة ديالهم وفعلا بدا كدق بشوية وهو كسايسها:زينة راك خلعتينا عليك نهضرو ونحلو المشكل لي وقع وشي باس مكاين

كان كسمعها غير تتبكي وبكى ديال شي واحد مضروبة فيه تالعظم معرف ما يدير الا بقاو هكاك مغاديش تحل فديك اللحظة تاصل بسكينة

سكينة:آلو يزيد اخويا امدرا قلبي باغي يخرج من بلاصتو

يزيد:غير رتاحي لقيتها فالدار ديالكم القديمة قولي ليا واش عندكم الدوبل ديال الساروت ديالها مبغاتش تحل ليا

سكينة:اه راه كاين عند مي انا غناخدو من عندها ونجي لعندكم دابا

قطع معاها وهو كوصيها ما تبين والو جلس فالدروج كمسح على ذقنو وكتنهد كسمعها مرة تتبكي مرة كتسكت قال فبالو ياكما تكون ليغيݣل لبيريود ديالها تتكون صعيبة داكشي باش خلا الموضوع يكبر من مور تقريبا شي ساعة جات سكينة جايبة الساروت تتلهت وهي تتحل سولها نيشان:فاش كتجيها الدورة الشهرية واش كتكون عصبية زعما على والو تتقلق

سكينة حركات راسها بلا:مسكينة كدير لخاطر لكلشي ومن ݣاع الجوايه واخا تكون هي بلا خاطر

حلات لباب ودخلو بزوج كقلبو عليها كانت متكية فبيت النعاس ديال ماماها وباباها متكية بالضبط جيهة باها على المخدة ديالو وتتشم ريحتو الحنين ديال الماضي شي حاجة لي بزاااف كانت عاطياهم بالضهر وهي متكية عينيها مغرغرين وتتبكي فصمت بقاو غير واقفين كشوفو فيها من لباب حتى تقدمات سكينة جيهتها ضارت عندها وجلسات القرفصاء وهي تتمسح لها على شعرها:زينة حبيبة مااالك علاش خرجتي من دارك

زينة فديك اللحظة بحال كان خاص غير ليقيسها بدات تتبكي ودموعها كسيلو كثر من الأول نوضاتها معنقاها وهي تتبكي وتشهق وقف مقرب ليهم هو وهو كشوف فيها غير حلات عينيها ولمحاتو بعدات على ختها ونطقات موجهة كلامها ليه وهي منهارة:يزيد لاش تابعني تالهنا خليت ليك الدار كاملة لاش جاي

سكينة مخرجة عينيها:اويلي زينة حشومة من الصباح وهو كقلب عليك مسكييين

تكات بالجهد وهي مغمية بالفراش من راسها تالرجليها مخلياهم غير كشوفو فبعضياتهم مفاهمين والو دارت ليه سكينة اشارة زعما واش مخاصمين حرك راسو بلا وهو كقول لها راني مفاهم والو معرفتش مالها بدات كترطبو تاهو غير باشاراتها غيعرفو مالها غير بشوية

يزيد:أنا لتحت الا حتاجيتو أي حاجة عيطو ليا

حركات راسها بآه وزاد هو منزل راسو كتنهد مع وصل لباب لبيت وقفاتو بصوتها بعدما حيدات عليها الفراش وهي ملفتة عندو:تسنى تسنى غادي خارج ياك سير عند هاد الفران لي فراس الدار الدرب قولو يعطيك محراشة ويدير فيها درهم زبدة ديال العبار ماشي دالباكية وتكون محروقة من لتحت

الطريقة باش كتوصف شبغات وكيف تتهضر كانت معاكسة تماما لحالتها ثواني هادي خلاتهم غير كشوفو مفاهمين والو واكثرية هو حرك راسو بآه وضار شاف فسكينة لي تاهي كانت بحالو:سكينة بغيتي شي حاجة

حركات راسها بلا وزاد خلاهم بزوج رجعات تقلبات على جنبها وختها تتشوف فيها مصغرة عينيها وكتخدم فالذكاء لي غتصكاني بيه حالة ختها

سكينة:دابا لاش خرجتي من دارك شنو دار ليك؟

زينة وهي تتمسح عينيها:مبقاش اختي كديها فيا نعيط ليه يطفى ليه التيليفون حتى يجي عاد يقولي آه حقا شكنت باغية تقولي راه مساليتش نشارجي التيليفون

سكينة:اويلي اصاحبتي راه خدااام ونت عارفة خدمتو كدايرة وكنت معاهم فالشركة متزيديش فيه يجي

زينة بانفعال باغية طلاح فختها:خدااام ميتزوجش سالينااا

خلاتها غير تتشوف فيها علاه فين عمر كان لي مخدامش هو لي كتزوج اشكتخور هادي مداتش عليها وبقات غير تتسايسها تيعرفو مالها اشمن دوا شاربة رجع هو جايب ليها شنو بغات دخلات فديك المحراشة طول وعرض بلاما ذوق ختها وهادشي تاهو لي ماشي من عوايدها تتشارك لي فيديها سوا قليل ولا كثير بقاو شحال وهما فالدار

يزيد بنفس الهداوة:نوضي يلاه نمشيو للدار ونهضرو مزيان وكلشي ايتحل

زينة مربعة يديها مكتشوفش فيه:مغنمشيش لديك الدار قلبي ولا مزموط ومغموق فيها

الدار لي فرشات بالعشق ولي هي معقل حبهم ولات دابا تتزمطها عاد انها من الصباح وهي كتنتر وهادشي لي مخالف لها عمرها هزات فيه الراس شي لمخليه ساكت لحد الآن وقف وهو داير يديه فجيابو:وشنو المعمول؟

زينة ناضت من الناموسية تمات خارجة قاصدة لباب:غنمشي عند خالتي

دازت من حداه بلاما تشوفيه خلاتو وراها كحرك راسو بلا وكتنهد وتابعها يشوف هادشي فين غادي يوصل شد ليهم طاكسي بزوجات مبغاتش تمشي معاه خلات له غير الباليزة زادو وهو تابعهم من اللور بالطوموبيل

كلشي كشوف فيها وهي وسط منهم وضايرين بيها فديك الصالة ماشي مبغاوهاش تجي ولكن راه مزال عروسة خاص مزال يكون فيها داك الحماس والجهد ديال الزواج لي كخلي لعروسة لاصقة فدارها وكطبق كاع لي تعلمات قبل الزواج لكن هي العكس جاية هي وبيليزتها وراجلها ضارب الطم شي إن تما

زينة:توحشتكم وجيت نجلس معاكم شوية هدا مكان

الحاج:مرحباااا بيييك ابنتي دارك هادي

فريدة:زارتنا البركة عروسة فوسط دار العرس وتوجادو فال زين هدا

زينة:ربي خليك اخالتي(حطات راسها على صدر مسعودة)توحشتك امي

مسعودة وهي معناها:تانا اكبيدتي ياك شي باس مكاين

زينة تݣعدات:مكاين والو امي قلت لكم مسخيتش بيكم وجيت نشوفكم هدا مكان

وليد فديك اللحظة شداتو الضحكة وهو كشوف فخوه كيف كشوف فمراتو فريدة مصغرة عينيها وهي تاهي تتشوف فيها شي حاجة ماشي تلهيه ومسعودة كذلك لمحو لبعضهم كن كان شي خصام غتجي بوحدها اما دابا هو لي جايبها ومعاها باليزتها الحاج خوه راجل انيسة مداو مجابو اما العيالات لي بقاو كحللو ويناقشو غير بعينيهم ناض وهو ياه يصليو العشى وهي طلعات مدخلاتش لبيتو هو وانما البيت لي جالسة فيه مسعودة

سكينة:ملاحظتي والو اروعة زعما انا وياك لFBI

روعة عينيها على الطيلي:فاش زينة زعما اتكون مزال مولفاتش وتبدل عليها الجو داكشي باش جات

سكينة:انوضي الله يجيبك على خير نوضي مشفتيهاش مدخلاتش لبيت خوك مشات لبيت مي

روعة شافت فيها:زعما يكون مخاصمين عجب خويا ميقلقهاش لهاد الدرجة وحتى زينة ماشي على سبة

سكينة:يختي فاش كتبغي تكلخيي اشهاد المخاصمة لي من مور شهر ونص تخليها تخوي وفهميني

وبدات تتعاود ليها على شنو وقع فالدار حتى فهمات وخرجات عينيها هنا سكينة حطات صبعها على راسها زعما فهميني ودوقينيييي

داز الوقت والموضوع الحالي العروسة لي خوات دارها من مور شهر وهي قبل كانو شايفين فرحتها كيف كانت لا هي لا راجلها مسعودة كانت تتسبح وهي تتشوف فيها كانت ناعسة حداها كاو بغات غتسولها ما تشدات ليها ومين طلعات لقاتها ناعسة

اما فجيهة اخرى بالضبط فلبيت ديالو كان هو وفريدة واقفين فلباب وتتهضر معاه بعدما سولاتو حيت شافتها مجلساتش عندو فبيتو عاود لها لبلان ومافيه بلي على والو مداير ليها تاحاجة

فريدة تنهدات:البنت حياتها كاملة مع دارهم هي لي كانت هازاهم واخا تكون فرحانة فالزواج صعيب تولف صبر عليها اولدي الله يرضي راك بعقلك ومتفهم

يزيد تنهد:هانا صابر الوليدة المهم ميديريش فبالك نت

طبطبات عليه وهي كترضى عليه وزادت مخلياه داخل لبيتو مشربن مزوج وغينعس جنابو باردين وهو مدايرش علاش متفهمها لكن كن كان داير شي حاجة كان عادي اما دابا مفاهمش اصلا اشواقع تكات وذراعو على جبهتو كان باغي يمشي للدار لكن عيات فيه مو مدام جاو يتجمعو نيت وهنا كوجدو وعرس خوه قرب

دازت هاد الليلة وجا نهار جديد فطرو ولي عندو شي شغل مشى يقضيه جالسة فبيت انيسة لي داخلة لحمام مخلية لي بنتها مولودتها الثانية هازاها وهي صغيورة يلاه عندها زوج سيمانات حاسة بقلبها كفرفر وهي هازاها واحد الحنان تدفق داخل خيالي وإحساس زوين بدات تتفكر شي نهار تاهي غتولد وتولي ماما تبسمات غير بوحدها ومحساتش حتى حطات يديها على كرشها وهي ساهية خرجات انيسة وجلسات تتبدل لبنتها وهما كهضرو:دار ليك يزيد شي حاجة؟

زينة تنهدات ونزلات راسها:مدارلي والو صراحة غا سكتي مين فقت وتفكرت هاد الشوهة شداتني السخفة

انيسة:عادي تانت مالك جيتي لدارك واصلا العرس قريب خاصنا نتجمعو

زينة:كنحس براسي مبقيتش سطابل كل مرة بنفسية فشكل لبارح محاملاش راجلي ومحاملاش داري وليوم باغية نهضر معاه وخايفاه يقمعني

انيسة:اويلي اصاحبتي ليقمعك مالك صاحبتو راك مراتو عادي هادشي فلبداية ديال الزواج مزال مولفتيش واخا تكون تتموتي عليه

روعة فديك اللحظة دخلات هي وسكينة جلسو معاهم شوية ومن وراها نيشان جروها معاهم بحجة أنهم باغين يخرجو مدات مجابت فاش شافت فريدة معاهم فالطوموبيل وكتسناو الشيفور يجي لمحو لبعضياتهم ونيشان ضارت شافت فيها فريدة ونطقات

جملة خلاتها غير تتشوف فيهم جاوها نيشان على حالتها وهي لي كانت ناسية هادشي تنهدات وهزات كتافها ملاقية ما تقول هنا الشيفور جا وزاد بيهم لوجهتهم يقضيو البلان لي حير العلماء فيها هاد اليومين

تسمع الدقان بشوية كانو عينيه لبيسي عطى الإذن بالدخول بلاما يشوف شكون تحل لباب مهزش راسو وهو كسمع الخطوات جيهتو عند بالو السكرتيرة لكن مع قربات وهز راسو غير لمحها دغيا وقف مصدوم ممتوقعش تجي وهي عالماه وفهاد الظرفية نيشان ضار عندها ناسي لي واقع شاد وجها بين يديه:مالك كصبحتي شوية اليوم؟

اهتمامو كان واضح وهي تتحرك راسها بآه وتتنهد تتشوف فيه كيف كعاملها ناسي شوقع لبارح:غير كنت دايزة وقلت نجي نشوفك نت لباس؟

يزيد جرها تجلس وهو شاد يديها بين يديه:الحمدلله الا كنت كتحسي براسك شوية نهضرو فلي وقع مقادرش نشوفك هكا ازينة قولي ليا مالك الا كانت شي حاجة نديرها نديرها بلاما نتردد السماحة نطلبها لي بغيتي

بلعات ريقها حاسة بالغصة بقى فيها فديك اللحظة زيادة على اللزوم وهي تتشوف فيه كيف كعاملها وباغي يعتاذر وهو مداير والو كن تقطع الطيلي فحالتها العادية متسوقش ومديرش ليه هاد الحالة لكن هي براسها ماشي لخاطرها شدات فيه تاهي كارزة عليه ونطقات:صافي نسى لي وقع مدرتي والو بلعكس انا لي خاصني نعتاذر ايزيد المهم خلينا من هادشي جاتك واحد البرية للدار

عقد حجبانو شوية وهو كتسائل اينا برية وشكون غيسيفطها كلشي كجيه باغ ايمايل وزيد مغتجيهش فدار مو خاصها تجيه لدارو مفهم والو وهو كشوف فيها تتحل فصاكها جبداتها ومداتها ليه خداها من عندها بلا حتى كلمة وهي تتشوف فيه حلها مع جبد داكشي لي فيها كرم بلاصتو كانت تتسنى ردة فعلو وهو كشوف داكشي وسميتها لفوق والتاريخ لي كان داك النهار مقدراتش تصبر وسط ديك اللحظة ونطقات بصوت باكي

زينة:يزيد انا حااملة🥺

ديك كلمة انا حاملة تحطات بحال الثلج على وذنيه واحساس فشكل على قلبو وسط ديك لقطة وهو كشوف فليكوغرافي بين يديه كان داكشي مضبب وكحل مزال مباين فيه والو لكن قيمتو كبيرة فديك اللحظة لي سمع شنو قالت هز فيها راسو ومعالم الدهشة على وجهو كانو دموعها كسيلو بفرحة وحركات راسها بآه وهي تتأكد له رجع كشوف فليكوغرافي ومعارف ما يقدم ما يوخر وهو كسمع مراتو تتقولو انا حاملة بطف منك من مور شهرين على الزواج لي كانت فرحتو كبيرة عليهم وهاهي غتزادهم فرحة اخرى فرحة الطرف الثالث لي غادي يتزاد باش ينور حياتهم ويعيش طعم حب واليديه فجو عائلي لي زوين ومتكامل رجع كشوف فيها وهو معارفش كيف يصرف فرحتو لي فداخلو عارمة وقف جارها عندو وتعانقو عناق حار ضامين بعضهم بحب

زينة وهي تتهمس له وتتبكي بفرحة:سمحليا سمحليا ماشي لخاطري

كانت تتعتاذر على تصرفاتها لي جاو نتيجة هادشي نتيجة الوحم معنقها وهو طابع قبلة على عنقها فرحان حتى مقاداه فرحة وهو كسمع فوذنيه كلمة أب لقب غالي غيتزادو فور ما يهز ولدو ولا بنتو بين يديه من مور تسع شهور ديال الحمل لي غيكون معاها فيها بحلوها ومرة تاهو خاص يعيش معاها باش نهار يتزاد يحسو بحلاوة حضورو بزوج والاكبر فهادشي كامل انه منها هي مالكة قلبو وحب حياتو لي غتولي أم ولادو حلمو يأسسو عائلة بزوج وهاهو غادين فطريق هاد الحلم عناق حار كلخص كلشي لبارح كان كقاصيو باش يتجمعو وليوم هاهما مجموعين وجاتهم فرحة الطرف الثالث لي غيجي الطرف الوحيد لي كتزاد على العلاقة ومكخسرهاش نسلهم وذريتهم لي كتمناو تكون صالحة بعدو على بعضهم وهو شاد وجها بين يديه الفرحة النابعة من عينيه عمرها شافت بحالها وهو كمسح ليها دموعها وباسها فراسها وفخدودها بزوج وهو فرحان يزيد:قلتيها للدار؟

زينة حركات راسها بآه:مشات معايا خالتي وسكينة وروعة لطبيب كلشي فرحان الحمدلله

وعلاش لا ميفرحوش على فرحة تزادتهم على افراحهم ضور يديه على خصرها هازها شوية وهما داخلين فقبلة قبلة صلح واخا مكانوش مخاصمين لكن جمعات كلشي هادشي معرفش تفسير لحالتها وهي براسها كن ما فيقوهاش عائلتها متجيبش لخبار جاوها نيشان فالطوموبيل فلانة راك واقلة حاملة وخاص نتأكدو حيت كانت وحدة أخرى متجردة من طباعها وهادشي عادي لان الهرمونات كتقاص والوحم طريق طويلة ومشقتو مضاعفة لكن كلشي كتسنى فاش كخرج للدنيا ليكوغرافي بين يديه وهو كتأمل فيها ولدو ولا بنتو هداك لي مع كلا شهر غادي يكبر والشوق ليه غادي يتزاد لنهار لي غادي يخرج فيه هز فيها عينيه تاهي كانت تتشوف فالتحليلة طلاقاو عينيهم وهز يديها وطبع قبلة كانت منعاكسة فيها فرحتو وبزااف

يزيد:قدامك ربح وخير من نهار دخلتي لحياتي وانا فرحان الله يخليك ليا

جملة كانت غالية وكتوصف غلاوتها عندو حيت كانت اكثر حاجة تمناها وخداها وهاهي دابا غتزاد عليها حاجة غالية بحالها اشنو بغا مزال ديمارا قاصدين الدار مخلي الخدمة لي ما بقى عقل ليها دابا

وسط هاد الفرحة لي بغا يدير الجناوح ويطير بيها هضرو فهادشي قبل ومكانش عندهم مشكل فالولاد يعني مكانوش مأجلينهم وهي براسها كانت مؤيدة هادشي مدارت لا فانيد لا والو واخا مزال باغية دير بزاف ديال حوايج مكانتش تتقول حتى نسالي عاد نولد لان بالنسبة لها الولاد مغاديش يكونو عائق قدام احلامها دارت بزااف وتحملات مسؤوليات كثيرة شي لمخليها غتقدر توفق بينهم وبين داكشي لي ناوية دير

الزغاريت فالدار من مور ما وصلو فرحة جديدة تزادت وهاد الفرحة كانت زايدة نغزة لأن البكر دالعائلة غيولي أب وواحد من النسل ديالو هو لي غيكون الوريث الاساسي وغيشد عرش باه وجدودو

العناق الحار والتهاني ليهم من طرف العائلة كاملة ميمتها فرحانة بيها مقاداها فرحة خواتاتها لي وحدة منهم قريبة تاعي تخرج مولودها عائلة راجلها كلشي ولي زايد فرحة ان الافراح كتزادهم على الافراح لي عايشين وهادشي كولو بفضل الله لي جزاهم على صبرهم لي صبرو والحمدلله

واقفين قدام لاڤابو فالحمام كجمع ليها شعرها اللور مضور يديه على خصرها حاكمها لأن رجليها مهازينهاش الدوخة دايرة فيها حالة غير كتوقف الدنيا كضور بيها كتقيا وكتلوح ݣاع داكشي لي كلات حتى حاجة مكتبقى فكرشها واخا تكون مواكلاش كتلوح غير المرار حاسة بمصارنها كتلواو عليها روحها كتبغي تخرج وهي كترد وهدا هو الوحم لي بوحدو مرحلة ومرحلة لي صعيبة كشوف فيها وكتنهد لو كان بيديه يوقف هادشي وهو كشوفها كتعاني يدير كلشي لكن هادشي مكتب واي امراة كدوز من هادشي منهم ماماه وماماها تاهي حتى هو مو فاش حملات بيه دازت من هادشي عاد خلي الثقل والحمالة والوضع لي بوحدو هداك قدما الحمل زوين وكتسناو بيه مولود يفرحهم وينور حياتهم الا انه مكجيش بالساهل داكشي باش من ديما كحتارم المرأة ومرضي ميمتو لأن المرأة كتساوي العظمة وربي مجاش وغفر لها ذنوبها من مور ألم الولاد لي ثاني اصعب ألم من مور الالام الحر/ق حي والله يسمح لينا من امهاتنا ولي ماتو الله يرحمهم هزات راسها بشوية وجها مخطوف وعينيها راݣدين غسل ليها وجها بشوية وهو مراعي لحالها وواقف معاها رجعو لدارهم وبداو عايشين رحلة الحمل الا تعصبات كبرد ومكديش عليها إلا بكات كطلقاه يعنقها ويمسح دموعها مزاجها متقلب وهو غادي مع كل موجة جاتها فيقاتو زوج مرات فالليل تتشهى وكخرج يقلب وعادي بكل فرح باغي يعيش هاد الاجواء باش يتقاسموهم بزوج بدا كقاد ليها شعرها وكمسح ليها وجها وهي حاطة راسها على صدرو كتنفس بالجهد هزها بين يديه وهي لاوية حطها بشوية فوق الناموسية غطاها وتخشى وراها معنقها وكهمس ليها فوذنيها

يزيد:داز كثر من هادشي وقدرتي تخطايه كامل ان شاءالله كلشي فايت نت قوية

بكلامو خلاها كرزات ليه على يديه وهو طابع قبلة على خدها كرفع لها معنوياتها حيت داكشي كنعاكس بزاف على الصحة خصوصا فهاد الفترات المتعلقة بالهرمونات سوا حمل ولا دورة شهرية

واقفين دايرين الصف وهما قدامهم الاوركسترا خدامة وكلشي عينيه عليهم كتسناو العروسة لي بالفستان الابيض متألقة ترمي الورد واقفة هي عريسها قدامهم عاطينهم بالضهر فآخر لحظات عرسهم لي داز شاخض وعلاش لا وهما لي عرسانو هبل بكل ما تحمل الكلمة من معنى فرحتهم مخلصينها فهبالهم شدارو لشطيح وشدارو لرديح عاد فاش طلعو فالعمارية خلاص مجاوش وسماوهم كوبل طاح الحك وصاب غطاه الاضواء عليهم وهما كتسناوها تلوح الورد فديك الورقة شافو فبعضهم كانو متافقين على شي بلان غير غمزو بعضياتهم هنا كلشي خرج عينيه كضحك وهما كشوفو الهبال ديالهم فين واصل تشادو وشدوها جرية وحدة هربانين هو بكوستيمو وهي بكسوتها وشي عقل مكاين هربانين من القاعة وكلشي وراهم تابعهم فجو فكاهي بامتياز مع خرج كلشي لقاوهم راكبين فالكوتشي عوض الطوموبيل لي صايݣو هو وهي اللور ملكة زعما وقفات وهي كدير ليهم باي باي بحال كتحيي الشعب وكلشي كضحك عليهم ويصورهم هادو لدارو الولاد اتكمل الدعوة تكرشخو حتى هما بزوج بالضحك رجعو نزلو راجعين عند عائلاتهم كودعوهم فليلة زفافهم لي دازت من اجمل ما يكون كيفما فرحو خوتهم فرحو حتى هما بليلتهم لي دوزوهم كلها هبال وهادي اجمل حاجة لواحد يضحك الدنيا فايتة ودعات خوتها بالدموع تاهي لان ديك الروح المرحة فيها هي لغتخلي بلاصتها عاد خلي الفراق مع خوها التويمي شريكها فكلشي لي بوحدو حالة خاصة مخلية ميمتها وراها مهنية عليها واخا دار البنات خاوية لكن الحمدلله كلهم تزوجو كلهم خداو سعد زوين وغترتاح دابا بقى ليها غير الوليد لي مفرحها بداكشي لي كدير دابا حتى لنهار يكتاب له تاهو ويكمل دينو وليد لي كان فنفس الشي كودع عائلتو ميمتو لي تتبكي عليه كيفما بكات على خوه كان هو الهبيل ديال العائلة وحتى هو هادشي لي غادي يخلي بلاصتو تبان فالعائلة واخا مزال غادي يتجمعو تحاجة مغادي تبدل لكن الواحد لمزوج مختالفة على فاش كان عازب طلقو الفلام والتفرݣيع فالسما خاتمين ليلة عمرهم تاهما بأجمل حاجة ولي هي الحلال شد فيها طلعات لكوتشي وطلع حتى هو صايݣ كلشي داروه مغاير

بغات تعيش داكشي ديال اميرات ديزني لقاتو تاهو كثر منها ضارت وهي تدير ليهم باي باي وكتودعهم وهما كذلك وهو صايݣ وضاير ملفت عندهم وقفات وهنا نيشان صوبات البوكي دالورد جيهة وحدة فهمات مزيان بلي ليها نقزات ولتاقطاتو وهي كضحك تحت تصفيقات كلشي

يوسف:بقينا غير حنا ازييين نديرو ما دارو لي قبلنا

بدات كضحك وهي شادة الورد فرحانة فعلا من مور روعة غيبقاو غير هما وكيف مواعدين بعضهم يصبرو على بعضياتهم وداكشي لي كان كلشي غادي يفرح ومدام نوى الحلال فراه ربي غادي يجازيه ويسر ليه مع لي ختارو يكون شريكو ورفيق دربو

الفرحة لي كسات قلبو فديك اللحظة وهو كشوف داكشي قدامو خلاتو تكرشخ بالضحك ممتيقش تلفت عندها وهو مزال كضحك وهي كذلك حاطة يديها جبهتها زعما اشهادشي وفنفس الوقت كضحك راضية لي جات معاهم وكانت ديجا ولدات بشهرين ونص بنية تاهي كتضحك ووسط داك الضحك كانت الفرحة وهما بتلاتة كشوفو فالتلفازة كحققو فيها فعلا كانو تلاتة كبانو ممتيقينش ان اول ولادة لهم غيجيو تلاتة على الدقة الاولى المعنى الحقيقي ديال الا جا الخير كجي مرة وحدة والحمدلله فور مجاو يشوفو الصورة فالشهر التالت مع الطبيبة لي متبعة معاها نيشان طلعو ومع قالتها ليهم كانت أول ردة فعل ديالو هو يتكرشخ بالضحك وهادشي كانت ناتج الفرحة والصدمة لي جاوه دقة وحدة اما هي غير عليه الاحساس لي حسات بيه وهي تتشوف فيهم بتلاتة داخل رحمها مقادراش تيق تلاتة غتهزهم فداخلها ونهار يخرجو واحد واحد غيتوجو حياتها بفرحة الامومة لي حسات بيها من ديك اللحظة وسط الضحك عويناتها غرغرو ݣاع الفرحات لي دوزات زوينين بزاف وهادشي كذلك غتولي ماما حسات بيهم من دابا واخا مزالين لحيمات يلاه فشهرها الثالث بغات غير فوقاش يوصل الوقت لي تولدهم وتشدهم بين يديها دير عليهم لي ميدارش احساس الأمومة اعظم ما فهاد الدنيا قصدها شاد فيها ويديه كدوزها على شعرها وهي متكية فرحة متقاسمينها بزوج فرحة لي زوينة بزاااف بداو بزوج كحسو بمسؤولية الابوة والامومة تلاتة ماشي حتى واحد غادي يكبرو العائلة دقة وحدة ويعمرو عليهم الدار طبع قبلة على راسها كان كعني بيها شكرا لها وشكرا للخالق لي بعث لهم هاد البهجة راضية مبسمة وهي تتشوف فيهم سبحان الله حتى طبيعة الولادة كتنتاقل مكنورتوش غير الشبه من عند واليدينا كيفما ماماهم ولدات توام هاهي حتى ختهم كذلك والحمدلله فرحو وداو معاهم الفرحة لحبابهم فرحوهم معاهم حامدين الله وشاكرينو على هاد الخير بي بعث ليهم دقة وحدة

مناسبة أخرى فالعائلة لي تسلسلات فيها الافراح كل مرة مسرة جديدة وهادشي خير من عند الخالق والحمدلله هاد المرة كان العرس ديال آخر العنقود فأبناء الوزاني الصغيورة لفنيكيشة لي تسنات وتاهي نالت مع حبيب قلبها عرسها تعطل شوية مقارنة مع العقد حيت وسط تجهيزاتو جاها الماستر سوتنونص ديالو ليزانفوغماسيو لي دوزات وبزاف دالحوايج لي خلاوها رسميا تولي تاني عضو فالشركة بصفتها مديرة الموارد البشرية كانو تاهما فآخر لحظات عرسها لي داز غزال بحالها بحال خوتها بلمة الحباب والصحاب عائلتها خوتها زوجات خوتها لي كانو بحال خواتاتها لان اصلا العلاقة كانت موطدة كثر وكثر كلشي فرحان ليها كيفما تاهي فرحات مع كلشي كانت بالكسوة البيضة اميرة فليلتها كلشي واقف ومن مور لحظات الحلوى ورقصتها مع حبيبها مختارتش انها ترمي لا بل ختارت ان لحظة معرف جنس الجنين لي كتسناه العائلة يكون ضمن احتفال عرسها باش الفرحة تزاد كثر كانو لحظات غزالين بزاااف كلشي واقف كصور وكتسنى واقفة بين خوها ومراتو مضورة يديها عليهم بزوج وفرحانين زينة لي كانت بتكشيطة بالاحمر كريشتها بانت مضاعفة على شهرها لي كان الخامس حيت مهازاش غير واحد الحمالة مطيحة عليها السر واخا العيا واخا شحال من حاجة لي غلاظت وطبيزات هازة فيديها الفلامة ويزيد حتى هو وعينيهم على بعض قلوبهم كضربو بالجهد وهما كتسناو اللون يخرج ويعرفو شعندهم وراهم سكينة وليد انيسة هازة بنيتها وراضية كذلك عبد الكريم سليمة انور صافية والديهم كلشي وفديك اللحظة كلشي نقز دقة وحدة والغوات والحماس التصفاق كلشي فاش لمحو اللون لي خرج تعانقو الواليدين عناق حار كان كتسناو اي حاجة لي جات من عند الله مرحبا بيها لكن كبقى داك الحماس لي اخيرا برد فاش عرفو جنس الأجنة ديالهم بتلاتة لي خرج زرق وكانو وليدات كاملين💙كلشي فرحان لأن إلا مزادتش واحد فيهم غيكون هو الوريث الاساسي بعدو على بعضهم تحت تصفيقات وفرحة الكل شاد وجها بين يديه مقرب لعندها وطابع قبلة على راسها ومن موراها نيشان نزل على ركبتو وباس كرشها تحت أنظارها وهي كاتمة دموعها دموع الفرح بغاتهم كاملين يطلعو بحالو مثال للرجل لي كتمناه اي بنت لا فالوفاء الحنية الرجولة كلشي فيه زوين ساندها طول رحلة وحمها وحملها وهاهو مزال ضارو بيها حبابها كباركو ليها وميمتها لي كتعنق وتبوس فيها طابعة قبلة على يديها عݣوزتها لي مقاداها فرحة شيخها كلشي والحمدلله على نعمة الافراح والمسرات لي كتجي كتنسي كل ظلام عشناااه

واقفة مبتاسمة يديها على كريشتها لي غادية وكتكبر نهار على نهار تتشوف فلبيت وحاسة بواحد الاحساس لي غزال بزاف مبقاش بزاف مبقاش بيتهم لي كملوه دابا خلا حماسها ولهفتها لداك النهار لي غتشدهم بين يديها وتحطهم على صدرها ترضعهم تبدل ليهم تشوفهم ككبرو قدامها وأهم انها غتسمعهم كقولو ليها ماما نزل بشوية من مور ما لصق الزواقات لي زوقو لهم بيهم البيت ضور يديه على كتافها جارها عندو حطات راسها على صدرو وهما كتأملو بزوج فيه كان سايد عليه اللون الازرق سماوي والابيض كلشي ليه الكونات ديالهم البلاكارات مزوقين وفيهم حوايجهم لي شراوهم بزوج بالعشق وهما كتخايلوهم لابسينهم شي حاجة لي غزالة ومن اجمل ما عاشو وهما كتسناو ثمرة حبهم لي زايد على هاد الفرحة لمسة خاصة كان فكل حيط مطبوعة سمية من سميات كل واحد فيهم لي ختاروهم بزوج وكان هي ليها لها دور كبير فإختيارهم ماهر💙وسيم💙نضال

سميات وليداتهم لي تختارو بالعشق باللهفة وبحر الانتظار ليهم عانات فالحمل ومع كل شهر كاينين مضاعفات واهمهم التعب الم فالعظام حيت الحمل مضاعف ومع ذلك صابرة وناسية كلشي بالسند لي معاها عائلتها وراجلها حبيبها لي داير ما فجهدر كثر تتشوفو غير فاش كشريو شي حاجة وكجلس يركبها كيف ككون فرحان غيطير الفرحة لي تتشوف فيه كتنسيها آلامها حيت بسندو هو شحال من مرة قوات من مور ما ضعفات كليا هزات فيه راسها بشوية ونطقات:واش فراسك غتكون احسن بابا فهاد الدنيا

ضار عندها والكلام لي قالت تحط على قلبو عسل بابا لي خرجات من عندها هي حنينة كيفما تاهي براسها غتكون احسن ماما حيت حنينة ضريفة وزوينة ضار عندها وهو حاط يديه على كريشتها لي كبرات نيت وهما فبداية الشهر السابع عينيه فعينيها ونطق:ݣاع لي حليت عليه عينيا والو قدامهم وهما منك نت يا احسن ما عطاني الله

كان كقصد بكلامو على الطبقة لي عايش فيها ولي حل عليها عينيه الفلوس الثراء مكان ساوي قدام ديك اللحظة لحظة الأبوة واليديه جابوه لهاد الدنيا عاشو معاه بزاف وهاهو دابا جات نوبتو باش يعيش مع ولادو ويشوفهم ككبرو قدامو وحتى واليديه يعيشو هاد الفرحة وعاد اكبر حاجة منها هي حب حياتو لي بنى معاها كلشي من جديد كانو غير عينيهم لي كعبرو على كلشي السعادة الفرحة والحب يلاه غادي تنطق وهي تعض على شفايفها من الوخز لي جاها فظهرها

يزيد:خاصك تكاي وقفتي بزاف اليوم

حركات راسها بآه وهنا ضور يديه على خصرها مكتبغيش يهزها كتبغي تمشى باش متقالش وزيد رجليها تنفخو كان حافظ كلشي حيت كبحث وفنفس الوقت الطبيبة شرا معاها معرفة كسول على كلشي وعايش معاها كلشي بالتفاصيل تكات بشوية وهو شاد فيها تسرحات وهو كقاد ليها المخدة وراه ضهرها وتكات وهو كقاض ليها اهتمامو من ديما ماشي غير حيت حاملة تكا حداها بشوية حاط راسو على كريشتها ونطق:كديرو البسالة عذبتو ماما ياك ماشي حشومة

كضحك وهي تتشوف فيه كان احسن منظر ممكن تشوفو الطبيب قالت بقاو تهضرو معاهم راهم كحسو وبزااف وفعلا شحال من مرة حسات بيهم تحركو رجع متكي حداها عينيهم على بعض دايرين حديث لوسادة وماشي غير هما بزوج لي فلبيت ولاو خمسة واخا مزال مخرجوش الاحساس بيهم كان طاغي🤍

جاية بشوية شادة الطيلي دايرة ابيل فيديو وكتهضر معاه كان الصباح وخرجات تمشى

يزيد:علاش ممشيتيش عند الوليدة قلت ليك متباتيش بوحدك

زينة:راه قادة براسي ايزيد وزيد راك غير لبارح مشيتي صافي انا غير نفطر وغنعيط لشيفور يجي يديني سكينة مفراسهاش راه عندك ديبلاصمو اما كن جات جلسات معايا

يزيد:خديتي الڤيتامين ديال الصباح

حركات راسها بآه حافظ كلشي مشى وبالو معاها عندو ديبلاصمو ديال الخدمة فإسبانيا

يزيد:كدايرين ولادي

زينة هبطات ليه الطيلي لكرشها وهي غادية بشوية:هاهما جالسين كلعبو وانا كركلو فيا

ضحكو بزوج وهما كهضرو وقفات قدام الدار وديك اللحظة نيشان ودعها وقت الاجتماع وصل

يزيد:ردي لبال لراسك غير نسالي نعيط ليك

سيفطات ليه بوسة فالهوى وقطعات معاه بقات واقفة شادة الطيلي قبل متدخل كانت الدنيا خاوية فداك الصباح كتمشى غير فالمجمع ديالهم نيت فين ساكنين فديك اللحظة حسات بشي حد تحطات عليها تلفتات غير شافتها تبسمات شوية ودارت يديها فجيبها هازة شي صريف غير من حوايجها باينة شي وحدة لي كطلب مرة مرة كسلتو لمجمع الا العساس مشى يتسخر مع بغات تمد ليها ختنا وهي تنطق عينيها مرة عليها مرة على البلاكة لي لاصقة فالباب دلڤيلا وكتأكد من السمية:نت هي زينة؟

زينة فديك اللحظة عقدات حجبانها شوية وهي مبسمة كتشوف واش تتعرفها ولا فايتة شايفاها:اياه هي انا

فديك اللحظة شهقات نيشان من مور ما قالت آه وكونفيرمات ليها بلي هي المقصودة الدقة لي غفلاتها بيها نيشان للكرش خلات الضو شعل معاها ورجليها مبقاوش هازينها قربات لعندها وهي تتشهق ونطقات عينيها فعينين زينة نيشان:سلمات عليك سعيدة

ومن مور ما نطقات نيشان هربات طايرة من تما مخلياها بوحدها كتوجع وكتشهق من حر الدقة لي عطاتها

خلاتها وراها وزادت تتجري طايرة ليشوفها شي حد ماحد الطريق ميسرة والعساس مشى يتسخر قضات الغرض ديال صاحبتها فالكاشو لي دوزات من مور نيشان ما خرجات من الحبس باش تمشي تركن وتوب مع خرجات جات قضات حسيفة زينة لي طاحت على ركابيها وهي تتشهق ضو ضرب ليها فكرشها من مور ديك الدقة وجا من موراه الم خايب حش ليها الركابي بدات تتغوت ربي لي خلقها مقادراتش عليه شدها من ظهرها نزلات راسها وهي تتشوف الما نازل من تحتها نيشان جات فبالها السݣية لي غتكون طرطقات دموعها كسيلو وهي تتغوت عالله شي حد يشوف من حالها ويمد ليها يد العون كتبكي وتنطق ياربي ياربي مقادراش تحرك تبلوكات الالم شادها من كرشها وشارك معاه حتى ضهرها راجلها مكاينش باتت بوحدها قاليها تمشي عند مو لكن مسمعاتش هادشي لي وقع كان مكتب فدماغها غير ولادها ليكون شي حد تقاص فيهم خايفة عليهم وناسية راسها وهي تتموت بالوجع وتتبكي فديك اللحظة خرجو الجيران لي كانو حداهم وكعرفوهم مزيان مرا وراجلها لي فور ما سمعو الغوات خرجو شدات فيها السيدة وهي تتبكي:زينة بشوية عليك بشوية تنفسي تنفسي واش هدا شهرك؟

زينة وهي تتبكي وكتقطع:لا لا سبع شهور ياربي ياربي كنتقطع اختي كنتقطع

السيد:فين هو سي يزيد خاصنا نتاصلو بيه

زينة بنفس الحالة:مكاينش فالمغرب ياربي غن/موت هئ هئ هئ

السيدة:هانت بشوية هاحنا معاك خاصنا نتاصلو بعائلتك كاين شي حد فالدار

زينة:لا لا اختي بوحدي عفاك عيطيلي غير لختي

فديك اللحظة السيدة لمحات سروالها فازݣ فهمات الما:طرطقات لك السݣية ازينة يمكن غتولدي قبل الوقت خاصنا نمشيو لوبيطال

زينة باغية غير داك الالام يحبس سوا تولد ولا متولدش غير ترتاح فديك اللحظة جارهم طار جاب الطوموبيل وهي بقات معاها حلات لها التيليفون وتاصلو بسكينة من موراها نيشان هزوها طايرين لسبيطار

جايين تتجاراو كاملين داخلين جملة مفاهمين والو والسيدة تاصلات بيهم تتقولهم جاها الوجع يمكن غتولد وهي يلاه الشهر السابع كسولو حتى نعتو ليهم فين غادين تتجاراو تالفين حتى وقفاتهم الفرملية لي خارجة من البلوك حابساهم

مسعودة:شواقع واش غتولد؟؟

فريدة:راه يلاه شهرها السابع

الفرملية:جاتها دقة للكرش خلات السݣية طرطق وواحد من الوليدات بدا كخرج معندنا منديرو

كلشي شهق فاش سمعو دقة واش طاحت واش زلقات واش جات فيها شي حاجة هي معرفوش الدنيا ضارت بيهم حيت فهاد الحالات كتكون الولادة صعيبة وككون الخطر على الجنين ولا على الأم سكينة:واش واقعة ليها ولا لوليدات شي حاجة

الفرملية:منقدر نقولكم والو دابا غالبا داك لي غيخرج الاول تقدر يكون هو المعرض الاول للخطر حنا غنديرو ما فجهدنا على قلبها وقبل الوليدات سيرو جيبو ليها الحوايج معندناش الوقت

مشات الفرملية تتجري تجيب لي موصيها عليه الطبيبة معندهمش الوقت بزاف الا تعطلو غيتخنقو الوليدات والسݣية مطرطقة تلفو ومعرفوش باش تبلاو مابيهمش الولادة المفاجئة وانما الدقة لي جاتها والوليد لي معرض للخطر كيفما قالت الفرملية طارت سكينة وروعة يجيبو الحوايج وبقاو غير هما كتسناو معرفو واش يعيطو ليه يقولوها ليه وهو بعيد وخدام ولا يسكتو الا سكتو ووقعات شي حاجة خاص يكون كلشي فراسو مسعودة بدات تتبكي وفريدة تتصبر فيها كلشي مخلوع كلشي خايف رجعات لفرملية طايرة دخلات وسدات لباب مخلياهم مفزوعين وراها وفنفس الوقت كقلبو على الناس لي جابوها يشكروهم ويسولوهم على بلان الدقة الا عارفين شي حاجة

فلبلوك كانو ضارو بيها الاطباء كيفما ضايرين بيها الآلات من ݣاع الجوايه الطونسيو دقات قلبها وكذلك دالوليدات ملبسينها اللبسة ديال السبيطار ومفرقة رجليها الاول كان غيتولد بولادة طبيعية حيت هو الاول خرج وسبق راسو ولي كظهر فالآلات هو لي معرض للخطر حيت جزء من الدقة جات فيه كتمناو انه متكونش جات ليه فالراس حيت تما غيكون مضاعفات على الأم وعليه تاهو وهادشي غيدخل فاحتمال العيش كتقطع وكتغوت الفرملية شادة ليها فيديها والطبيبة كطلب منها تزحم كتدفع بكل جهدها حتى كتقول غنم/وت دابا كتسخف وكتعاود ثاني تدفع تحت تشجيع الطاقم كطلب الله بالغوات يوقف معاها كيفما وقف معاها فحياتها كاملة قلبها باغي يخرج عرقات والسخفة طغات عليها باقين ليها زوج آخرين كخرج بشوية بشوية وهي مواصلة عيات تدفع والو والسبب انه هو لي هز الدقة زعزعات ليه بلاصتو وهي لي خلات خروجو صعيب واخا هو لي سبق فخوتو كتدفع حتى ما بقى جهدها على أمل تحس بيه خرج ووالو مزال تتسمع الطبيبة تتقولها زيدي زيدي ما بقى والو عيات بزاااف وهي تتقول لهم مبقيتش قادرة الوجع هدها ومقدراتش عليه بين عينيها غير عائلتها وراجلها لي بعيد عليها ومكاينش معاها ساندها ففترة الحمل وكان من المقرر غيكون معاها دابا وغيحضر لكن المكتاب وكان مقرر انها تولد بالفتيح حيت تلاتة بولادة طبيعية صعيبة عليها

الضبابة تتحس بيها على عينيها وهي تتفكر فطول هاد المدة لي كانت تتقول فيها بلي بغات غير فوقاش تهزهم بين يديها هادي هي الفرحة بدات تتفكر فما بعد متجاهلة الخطر لي إيلا فكرات فيه ايتزاد عليها الحال تتفكر فاش كانت تتوجد ليهم بيتهم بين عينيها فرحتها بيهم هي وباهم لا مثيل لها وعاد خلي العائلة والاحباب وطول هاد الانتظار فديك اللحظة شهقات بݣاع داك الجهد لي بقى عندها ورجعات كتدفع وهما كشجعوها كتدفع وتنفس وتغوت وكدير كلشي دقة وحدة حتى حسات بيه تزبق وما خرج حتى خرج روحها ولادتو كانت صعيبة بزاف حيت هو لي تقاص من مور ما خرج نيشان غيبات لكن كانت شوية واعية كتسنى تسمع صوتو صوت بكاه يعطيها جهد جديد باش تخرج خوتو لكن مسمعات والو فديك اللحظة سمعات كلمة وحدة من عند الطبيبة”مكتنفسش”كلمة كانت كفيلة باش تخلي ردة فعلها انا تغيب على الوجود تماما وهي فاقدة الوعي ودمعة سخونة نازلة مع خدها

الطبيبة كتغوت وهي كضرب فيه من اللور:مكتنفسش وااااالووو

الطبيب الثانية خطفاتو من عندها وهي كتحاول معاه:صافي شوفي لوخرين الوقت مكافيش غيتخنقو وla maman فخطار لا طونسيو كطيح لها كتبان من هنا

ضارو بيها كفيقوها ولوخرا كتحاول دير اساعافات لبيبي لي خرج مكتنفسش كفيقوها وهي والو مشات وهنا بلاما يترددو كان خاص دار عملية قيصرية من مور الولادة الطبيعة وهادي حالة نادرة خوت يتولدو بطرق مختالفة وكلشي على قبل الام لي الا بقاو فداخلها ايتخنقو غيكون خطر عليها وعليهم تاهما خاص يخرجو يتبعو خوهم كوجدو وكجريو الوقت كدوز ومزال كيفما هو كان ضهرو مسيكين زرݣ وتوضح ان الدقة جات ليه فضهرو ممكن يكون مهرس كلشي غيشوفوه من بعد فالتحاليل خاص غير يفيق يتنفس ويغوت العملية بدات الضغط كزيد وعائلتها برا مهولين عليها تبنجات وهي أصلا فاقدة الوعي الطبيبة كتحاول مع أول مولود والطاقم فمهمة انه يجبد لاخرين وداكشي لي كان خرج ثاني واحد ونيشان طلق غوتة ديال الدنيا لي طمناتهم وريحاتهم وخففات عليهم شوية باش يكملو فمهمة استخراج الثالت تحط الثاني على صدر ماماه وهو كغوت بصوتو الرقيق كولو دم وصغيور مدازش بزاف دالوقت حتى تجبد حتى الثالت تاهو نيشان غوت وحالتو كدل على انه مزيان بحال لي سبقو تاهو تحط على صدر ماماه وبزوجهم كبكيو كان ممكن الفرحة تغمرهم لو سمعو ثلاثة البكيات برا كانت الفرملية رجعات خرجات وقفوها ومقدراتش تسكت لاحت لهم بلي زوج مزيانين الام حالتها شوية صعيبة لكن عادي ولادة طبيعية وقيصرية مساهلينش لكن التالت مكتنفسش واحتمال انه يمشي وهو يلاه جاي للدنيا خلات صاعقة طاحت عليهم شي بدا كبكي شي تصدم عرفوهم تلاتة خاص يبقاو تلاتة اخيب حاجة ممكن توقع يبقى واحد ولاخر يودع الفرحة مكتكملش بقاو معافرين معاه لكن والو الجسد ديالو مزال سخون لكن التنفس مقطوع له طبيبة وحدة رجعات اللور وهي كتنهد معرفات مدير ولوخرا تكتبغي تفقد الامل وكترجع تحاول وهي تتسمع خوتو كبكيو وكغوتو فلحظة شافو فبعضياتهم ونيشان قصدوها وكأنهم فهمو بعض جراتهم بشوية وهي كتهبط لها البيجامة ديال الكلينيك حتى عرات لها صدرها كثر ونيشان حطاتو على صدرها حدا خوتو على امل انهم يحفزو بعض فديك اللحظة كانت غايبة لكن واعية تتحس بصداع بعيد غوات رقيق مضاد مع ديك الكلمة ديال مكتنفسش دازت من بزاف دالحوايج صعاب تخطاتهم وحتى هادي خاص تخطاها هزاتهم فكرشها بتلاتة خاص يبقاو بتلاتة دماغها فديك اللحظة سافر ومشى نيشان لواحد النهار نسج لها واحد الحدث وهي تتشوف الشيخ الشعراوي كنطق جملة بدلات كلشي فحياتها”إن الله مع الصابرين”صبرات وميمكنش صبرها يمشي هكاك عمر ربي ضيعها بدات تتفكر مكة وكل ما دوزات اي حاجة شفات روحها جات فدماغها فديك اللحظة لي نيشان رجع فيها الطونسيو ديالها ستاقر وقلبها بدا كضرب بالجهد نبضاتو كانت اشبه بشرارة توهجات ومع داك البكى ديال الوليدات لوخرين كانو شعلة من الامل لي خلات داك لي كمشي فلحظة تبين قدرة الخالق لي كمنات فأنه شهق واحد الشهيقة وتبعها غوات كاسر بيه المكان تقول ماشي هو لي كان ساكت دابا وكحاولو يفيقو فيه كبكيو بتلاتة دقة وحدة قلب ماماه وحبها ليه غوات خوتو حفزوه على الحياة كيفما هو طاكى عليهم الدقة لي دازت برد وسلام وكانت سبب فأنهم يتولدو قبل وقتهم قدام قدرة الخالق لي عمرو خيب ديك الانسانة كبان بلي العلم والو يعياو ما يختارعو وينسجو كجي ربي كحل طريق آخرى عندها سبب واخا داكشي وقع فرمشة عين وكان غادي يعيش لكن تاهو داز من مرحلة الصبر لي دازت منها مو ويبين المهم الحقيقي ديال الترابط مع خوتو والمعنى ديال التوأم لي كتشاركو كلشي ربي دار سبب ديك الحادثة باش أنهم يتولدو قبل الوقت ولادتهم متكونش عادية ووحدين آخرين يتحاسبو من بعد

فديك اللحظة الطاقم كلو تنفس الصعداء مهمة جديدة نجحو فيها بفضل الله الضغط لي ككون عليهم خيالي ومكانوش قادرين يعيشو شي صدمة بحال هكا خصوصا قسم التوليد كتأثرو حيت ككونو مزالين صغار يلاه تولدو تعذبات عليه ميمتو فاللخر يمشي صعيبة بزاف لا عليهم لا على الأم

الزغاريت سادت على المكان معلنة على فرحة جديدة لي كانو خايفين تنعاكس وسط الفرح لي عايشين دوزو العراس ودوزو فرحة الحمل خافو لا فاللخر يتقلب كلشي لكن الحمدلله ربي مخيبهمش فرحة المولود الجديد كانت عارمة لأنه مكانش غير واحد واخا غيدوزو فترة العناية حتى يكملو الوقت الطبيعي لكن على الاقل كلهم مزيانين والام كذلك واخا غتفيق عيانة كانت قوية وصبارة فكلشي ودابا ختمات داكشي فميزان حسناتها غادي يتحسب داك الساعة ضورو التيليفون لراجلها عالمين راه ولا بو قبل الوقت مخلينو مصدوم يلاه هضر معاها كيف دارت مخلينو خلا كلشي وقطع جاي عندهم لحظة الولادة لي كان بغا يحضر ليها فاتت عليه بالو معاها ومعاهم حتى هما وهو بعيد عليهم فبلاد اخرى مذكروش ليه السبب مخلين داكشي من بعد وهما مستمتعين باللحظة وبفرحتها

مكانش عندهم حق يشوفوها حتى تفيق قادوليها وطرفوها هي ولوليدات بالحوايج لي جابو لهم وخرجوها من البلوك لجناح عادي والوليدات بتلاتة نيشان للعناية من مور توثيق تاريخ الازدياد والوقت الوزن شحال والطول

سوايع دازو حتى ظلام الحال كان مزال مجاش حيت اقرب طيارة لقى للمغرب كانت مع السبعة دالعشية جلس على حر العافية والوقت كدوز عليه بالعافية وهو مدوز لابيل معاهم كعطيوه الاخبار

حلات عينيها بشوية والضباب طاغي عليهم رجعات سداتهم ودماغها كربط آخر حاجة شافت وسمعات قبل ما تغيب تتحس براسها عيانة ومدݣدݣة بزاف غير تفكرات شهقات بشوية ونيشان بدات كتنين وكتبكي بشوية الجهد معندهاش وهي مغمضة عينيها:ولدي ولدي فينهو فينهما ولادي

كتنين وهي تتفكر آخر حاجة سمعات بلي مكتنفسش مقادراش تستحمل تسمع لي جاي قلبها كضرب بالجهد وخايفة تسمع شي حاجة ضرها معرفاتش شنو وقع من مور ما سخفات فين هما وفين هو هداك بالذات وفنفس الوقت تتفكر ديك خيتي الوجع لي شدها دموعها كسيلو وقلبها مفزوع فديك اللحظة وهي على حالها دخلات الفرملية ناوية تراقب لها السيروم نيشان قصداتها وهي كدوز لها يديها على شعرها بشوية:زينة على سلامتك شوية بسم الله عليك

زينة حلات عينيها مدمعين بشوية:ولدي فين هو ولدي كان مكتنفسش شنو وقع ليه

الفرملية تبسمات:متخافيش الولادة كانت صعيبة لكن تخطيتوها كاملين الحمدلله راهم كلهم فالعناية ومواقع والو

زينة شدات فيها:مكتكدبيش عليا ياك مزال كاين موقع له والو بغيت نشوفهم

الفرملية:غادي تشوفيهم غدا ان شاءالله من مور ما ترتاحي غير كوني هانيا رتاحي دابا وغدا ان شاءالله انا لي غادي نديك تشوفيهم صافي

كطمنها بلي كلشي هو هداك وان شاءالله غادي تشوفهم قلبها برد فديك اللحظة كانت تتشوف فالسقف وهي فاشلة محساتش حتى تبسمات وهي تتفكر كلام الفرملية كتفكر عائلتها وباباهم لي بين عينيها عاد ستوعبات انها صافي تفكات وديك النشوة ديال الفرحة سادت عليها مخلياها تبسمات من مور ما غمضات عينيها وغفات وسط ديك الراحة لي كساتها من مور خوف عميق وكابوس ألم ووجع معمرها عاشت اصعب منو

نهار جديد الفرحة لي كسات قلبو فديك اللحظة مقادرش يوصفها من مور خوف وقلق وستريس كان باغي يحضر فالولادة لكن مكتابش ليه ودابا مع جا مع داوه يشوفهم واحد الشعور كتعاش مكتوصفش تلفت بشوية عند الفرملية وعينيه كبريو:شكون لي خرج الاول؟

الفرملية نعتاتو ليه:هدا مسكين هو لجات فيه الدقة ودوز وقت طويل مكتنفسش حتى قلنا يقدر ميعيش لكن الحمدلله ربي كبير

كان كسمع داك الكلام وهو عينيه عليه كبلع فريقو ووسط ديك الفرحة كاين حزن مقدرش يحضر ليها وفات عليه هاد شي كامل عاد انها طاحت ولا معرفش المهم شي دقة جاتها هي لحفزات الولادة المبكرة مسح على ذقنو وهو كصبر نفسو بلي مكتاب معندهم ما يديرو صافي الاهم انها خرجات طريفة تفكات وهاهما قدامهم بدا كقرب عندو وكشوف فيه عينيه كبريو صارع باش يعيش ومع اول لحظة ليه فالحياة بين شحال راه هو قوي كتشرح له الفرملية الحالة لي كان فيها وهو كشوف فيه قوي وصبار بحال ماماه تخطات شحال من حاجة وهاهو وليدهم دار بحالها حس بعينيه غرغرو فاش سمع صوتو من مور ما حل عينيه وتحرك وهو فالقرعة وصغيور قلبو كضرب بالجهد وهو كشوف الذرية ديالو ونسلو وخليفتو تݣعد وعينيه عليهم كاملين واحد واحد الخليفة ديالو قدامو غيربيهم ويكبرهم وغيعيشيو احسن عيشة وأهم حاجة غادي يقولو ليه بابا وماماهم هي حب حياتو دارو الطريكة الله على رزق الله شحال زوين ماشي ضروري يكون فلوس تقدر تكون زوجة صالحة بحال مراتو ذرية نافعة كذلك ݣاع لي جات من عند الله زوينة جا الوقت فين يخرج وفنفس الوقت جاتو الخبار بلي فاقت دغيا حيد اللبسة ديال العناية وزاد قاصدها

فريدة وهي تتعنق فيها:على سلامتك ابنتي على سلامتك بالنا وقلبنا كانو معاك قداش

مسعودة وهي شادة ليها فيديها:الحمدلله ياربي خوفتينا عليك اكبيدتي الحمدلله وعلى سلامتك الله يجعلهم ذرية صالحة ياربي

زينة وهي مبسمة طبعات قبلة على راسها ميمتها:اللهم آمين ياربي

سكينة وراضية جاو تعنقو فيها تبعاتهم روعة وكلشي فرحان بيها بالمولود الجديد لي غيعطي إضافة للعائلة وغيتزاد فالسلالة لا فريدة لا مسعودة مقاداهم فرحة والحاج كذلك هدا حال الجدود واخا يكونو ديجا هازين هاد اللقب كفرحو مع كل واحد تزاد فديك اللحظة راضية وروعة وسكينة زادو خارجين يمشيو يوجدو ل buffet

مسعودة:كيف درتي ابنيتي واش زلقتي؟

زينة فديك اللحظة بلعات وجمعات ابتسامتها وهي تتفكر شنو وقع كلمة سعيدة سلمات عليك كتعاود فبالها وعرفات بلي مزال مسالاتش تنهدات وهزات فيهم الراس ونطقات:والو غير تعكلت وتسطحت فالحيط دوك لي جابوني راهم جيراننا

فريدة:اه عرفتهم عائلة الصعيدي راه جاو مساكن الصباح سولو عليك قلنا لهم تفكات على خير غير مزال ناعسة

فديك اللحظة دخل يوسف لي كان صابح فلونطرينمو معاه وليد ورؤية سلمو عليها كاملين بفرحة وهما كباركو ليها سلامتها بلاما تبين والو لروعة حيت معندها دخل فديك اللحظة دق لباب ودخل كان ديجا شايف مو ونسيبتو سلم عليه خوه معنقو وهو كبارك ليه يوسف وكذلك روعة والابتسامة على وجهو جات عينيه فعينيها وقصدها نيشان طبع قبلة على راسها فديك اللحظة نساحبو وخلاوهم بزوج جلس شاد يديها لي طبع عليها قبلة ورجع شافيها:على سلامتك احبيبة

زينة وهي مبسمة مزال التعب باين عليها:الله يسلمك مزال مكملتيش الخدمة واقلة

يزيد:الخدمة والو قدامك نت وولادنا نتوما الاولين متخايليش شحال كان بالي معاك

زينة غير سمعات ولادنا قلبها تهز وفنفس الوقت تفكرات الوجع والولادة تنهدات من القلب:شفتيهم كلهم مزيانين؟

يزيد حرك راسو بآه:اول واحد خرج غيكون بحالك صبار

زينة:اهم حاجة تكون غير الصورة مزيانة وزيد حتى نت الا كانو بحالك هاديك الدنيا وما فيها

متكرهمش كاملين يكونو بحالو رجولة دين أخلاق وسند لي سندها من اول نهار عرفاتو عمرو لقاها طايحة وخلاها رجع طابع قبلة على يديها كحييها على صبرها ولدات بزوج طرق دالولادة والحمدلله كلشي داز على خير

يزيد:كيفاش حتى وقع داكشي؟

زينة نزلات عينيها:من مور ما قطعات معايا تعكلت ودخلت فالحيط عائلة الصعيدي لي جابوني هنا

عض على شفايفو باغي يعاتبها ويقولها من الاول قلت ليك سيري عند الوليدة ومتبقايش بوحدك لكن جمعها مكتاب وتصرف معندهم ميديرو ربي بغاهم يتزادو قبل الوقت سول الطبيبة واش عندها شي مضاعفات ولا شي حاجة خطيرة طمناتو بلي فقط غيبقى غير التعب واحد المدة اما الحمدلله كلشي رجع مزيان واخا حالتهم كانت صعيبة ربي وقف معاهم بدا كدوز يديه على خدها وعينيهم على بعض دابا ولاو ماما وبابا رسميا فرحة كانو متشاركينها بزوج وباينة غير من عويناتهم واخا ساكتين لكن كانو كقولو بزااف رجع قرب وباسها فخدها فرحان ومقاداه فرحة وفرحتو بيها بتعبها وصبرها كبينها بهادشي والله يسمح لينا من الواليدين كرزو على بعضهم وهما شابكين يديهم كل مرحلة من حياتهم كتزيد تقوي حبهم كثر وكثر وتقوي حتى الرابطة البلان ديال الدقة تجمع وطوا وهي بوحدها لي عارفة سرو مبغات تبوح بيه لحد واخا راه كتبين أن الخطر مزال محاط بيهم لكن سكتات

داز الوقت بالسوايع ل Buffet تقاد والجناح تزوق واللون لي كان سائد هو الازرق السماوي جالسة فالكروسة لابسة اللبسة ديال العناية وهو كذلك عينيها عليهم وكانو مغرغرين كبريو احساس الامومة زاد تعزز فيها وهي تتشوف فيهم واحد بواحد نسات كلشي ولي عاشت فولادتهم فاش شافتهم نعت ليها فلي خرج اللور من مور ما سولاتو ودفعها بشوية حتى قربو عندو وهي تتشوف فيه كحرك فيديداتو وصغيور بزاف الكلمات لي يوصفو احساسها معندهاش لأن تحاجة ما توفي بحق هاد الفرحة مضور يديه على ضهرها وكشوفو فيه كانت خايفة تفقدو من مور معاناة الحمل لكن الحمدلله عرفاتهم تلاتة خاص يبقاو تلاتة ولي وقع كان غير سبب نطقات بصوت رقيق وهي تتشوف فيه:ماهر

كان الاسم لي ختارت ليه يكون من نصيبو هو حيت فعلا ماهر قاوم باش يعيش وغريزتها هي وزعامة خوتو حفزوه كثر على العيش تلفتات عند لاخر لي كان هو الثاني وتاهو نفس الاحساس بحالو بحال خوه ونطقات اسمو:وسيم

هز عينيه فاللخر وهو مبتاسم وهداك من نصيبو اسم نضال كان كل اسم تختار ليهم بحب وعناية وكانت كل سمية تتعبر على صفة هزات فيه عينيها وهما كشوفو فبعض واقفين حدا ثمرة حبهم الدنيا وما فيها عندهم بزوج خلا كلشي حيت كيفما قال الخدمة والو قدامهم هما من الطيارة لعندهم وكان احسن استقبال

تحنى عندها وتعانقو عناق حار وصلو لداكشي لي بغاو صافي لبارح كانت فرحة زواجهم وانهم اخيرا تجمعو ثانيا فرحة الحمل وانهم غيكبرو العائلة ودابا هاهي ديك اللحظة وصلات وهما كشوفو نتيجة داك العذاب لي تعذبو الفرج جا على شكل افراح كثيرة وأكبرهم هي هادي وهما كشوفو ذريتهم قدامهم كبرات العائلة وغتكبر حتى حبهم والحمدلله كلام كثير بيناتهم وغير باحاسيسهم تقال وبفرحتهم تلخص

داز هاد النهار مميز بهاد الفرحة وجا نهار جديد على عكسو كانت فيه صدمة لكلشي من مور ما صبحو عليهم البوليس كقلبو على زينة لي جاوها نيشان ان جيرانهم قلبو الكاميرة لي تشدات فيها اللقطة ديال ديك خيتي ضرباتها ومشاو ديكلاراو

زينة منزلة راسها عتارفات بكلشي واخا كذبات على عائلتها:كان كحسابلي كتسعى المهم من مور ما وقع داكشي قبل ما تمشي قالت لي سلمات عليك سعيدة

الكوميسير:هادشي لي كنت كنتسنى نسمع ديك خيتي من مور ما خرجات من المجمع كانت تتجري وضربها موطور هزوها الناس لسبيطار من مور ما الناس جاو ديكلاراو طابقنا حوايجها فالكاميرة بالحوايج لي جابوها بيهم فالسبيطار زيرناها وبراسها عتارفات ان سعيدة كانت معاها فنفس الشومبغ وهي غتخرج قبل منها وصاتها باش تقلب عليك وتآذيك لكن ربي لطف

مسحات على وجها وهي كتنهد بنادم مآذاتو فوالو وناوي لها على الشر هزات عينيها فرؤية لي كانت تتبكي فصمت وكتسكت فيها راضية وسكينة

رؤية:انا لي درت هادشي كولو مشيت باش نشوفها وسولات عليكم عند بالي هداها الله وانا على نيتي كنقولها روعة تزوجات زينة حاملة وليد تزوج ساعة هي عمرها تهد

مسعودة بحزن:ماليك والو ابنيتي الله يهدي ما خلق

زينة:رؤية نت ماعليك والو اختي مديريش فبالك الحمدلله خرجات طريفة

الحاج ابراهيم وهو معصب فيمن طاح ومعامن دار الولاد شاف فزينة:عليا بليمين ومدوز ليها انا غادي نربيهاااا غانربيهاااا(شاف فالكوميسير)انا غنعيط للمحامي يتكلف

زاد معصب مشربن مخلي جو ديال الحزن مغيم يوسف جر روعة وخرجها كهضر معاها ويزيد جاي من الدار من مور مجاب التسجيلات تاهو من دارو لي كانو شادين كلشي كانت تتشوف فيه عاقد حجبانو شوية وهو كهضر مع الكوميسير لي علمهم بلي غيتفتح محضر ويتدفع للمحكمة ويتزاد ثاني على الوسخ لي عند سعيدة

يزيد:علاش كذبتي عليا ومقلتي والو كن وقعات شي حاجة

زينة:صافي ما وقع والو ايزيد دابا الحمدلله مبقاش عندي الجهد ديال هاد المشاكيل تفكيت الله يخلصها القانون ايدير خدمتو صافي

فريدة:صافي ايزيد خرجات طريفة القانون غيدير خدمتو خليها ترتاح

مسح على وجهو وهو كشوف فيها خوفو عليها لي دارله هكا وزيد الفقصة بعيدة عليهم ومزال ناوية على خزيت باش تعرف ان الشر فطرة فبنادم لكن الحمدلله خرجات طريفة هذا هو الاهم ناض جلس حداها مضور يديه عليها وجارها عندو معنقها وهي كتنهد باسها فراسها ونطق:خايف عليك ازينة لي ضرك ضرني أضعاف

زينة: الحمدلله خرجات طريفة وهدا هو الاهم

مسعودة:هادشي صعيب لكن منخليوهش يغطي على هاد الفرحة دالمولود جديد لي مكتاب عليه يخرج بكري بهاد السبب

فعلا كانت فرحة كبيرة واهم حاجة ما وقع والو سبب باش ان سعيدة تفرش وتزيد تعاقب وتاخد جزائها كيف لي سبقوها والحمدلله ربي ديما كنجيهم كعطيهم امتحان كمتاحنهم فيه باش يصبرو وصبرهم يتزاد فميزان حسناتهم وسط الفرحة جلسو كفكرو فلي جاي فطلع ونزل فالمحكمة والمحامي لي تكلف بيه الحاج من مور شهر على الحادثة تدفعات شهادة من الطبيب بلي متقدرش تحضر وهي يلاه والدة وداكشي كيفما سبق شهدات غير من الطيليفون بآبيل ڤيديو فالمحاكمة لي جمعو فيها سعيدة وطواوها وختنا شهدات فيها والحاج مخلا ما دار من جهدو مع المحامي باش تعرف ومن مور شهرين على لبلان تزاد لها 7 سنين على لي عندها وتبدلات من المدينة نهائيا ودار محضر ان اي ضرر يمسهم من جيهتها تكون فيه غير سميتها غتزادها مدة الحبس والتزام سيناتو مدى الحياة باش الا مشات خرجات وقربات لهم الحبس ثاني وسط فرحتهم وتوجاد للعقيقة كانو المحاكم خرجات لهم من الجنب ساعة تكمدات هاد المرة اللخرة والتالتة تابثة

الصلاة على النبي مالية المكان والأنظار كلهم عليهم وهما نازلين ريحة البخور والامداح عاطية فالڤيلا وكل مكان فيها كوحي لعقيقة وختان فنفس الوقت نازلين بزوج هي بقفطان ابيض هازة واحد من الوليدات وهو بجبادور هاز زوج الزغاريت واجواء الفرحة والبهجة بالمواليد لي شرفو العائلة وبأجواء مغربية محتافلين بيهم بالختان ديالهم وفنفس الوقت العقيقة برا كانو تلاتة ديال الحوالا كل واحد قداش صردي من الفيرمة دلڤيلاج لي حياو فيه صلة الرحم وجاو ليه من مور ما تبخر لي فات وختارو هو لي يديرو فيه السبوع لوليدات الناس ديال الدوار المعارف كلشي حاضر معاهم فهاد اللحظة نطق باسم الله ودوز على اول حولي احتفالا بسمية اول مولود واول واحد خرج تبعوه لحوالا لآخرين وكل واحد بسمية والاحتفالات والاهازيج فليلة دينية سايد عليها صوت الامداح والطلبة ودعاء باش تكون ديك الذرية صالحة الحاج هاز واحد من الدراري كعاود يؤذن له فوذنيه فانتظار خوتو لآخرين

عاد خلي حفل الحسانة تاهو كانو قادرين يتخطاو كلشي واخا هكاك ومن مور كل فرحة كتجي فرحة اخرى كيف تعودو ومن مور العقيقة نيشان كاين حفل عقد قران الحاج ابراهيم وام الغيث لي ضرب الدنيا بركلة وطلب يديها نيشان لحلال بحالهم بحال الشباب مزال قطار الحياة طويل وكيفما كان العمر المهم الشريك المناسب

كلشي هاز يديه وكقول امين وكبير المسمعين كلقي الدعاء على قبل الوليدات كدعي معاهم يخرجو ذرية صالحة وكدعي مع واليديهم ومع كل مشتاق للذرية ربي يعطيها ليه ولي ناوي الحلال الله يجمعو بمكتوبو ولي فبالو حاجة تحقق

سالا الدعاء وكلشي نطق آمين دقة وحدة وكلشي كبارك الزيادة يزيد وهو كسوط عليها بالنشاشة وهي حاطة راسها على صدرو شاداها السخفة والصهد بشوية دوز يديه على شعرها وهو كرد لها خصلة ورا وذنيها هزات فيه عويناتها مبسمة: فرحان؟

يزيد ضور يديه على عنقها وهو كنش عليها:طاير كثر ما كتخايلي

ضحكات شابكة يديها مع يديه كعيشو اجمل حاجة فديك اللحظة لي هي الاحتفال بمواليدهم ونسلهم كانت كل مرة فحياتهم كتعني بزاف وكل حاجة كتفرحهم وتتفكر بالصبر لي صبرو بزوج حتى وصلو ليها والحمدلله على كل حال

كـــأس الــــعـــالـــم الــــولايــــات الــــمـــتـــحـــدة الأمــــريــــكــــيـــة 2026🇺🇸⚽

التيران كامل لي كان كولو باللون الاحمر لون العلم المغربي تهز بفرحة الهدف لي جا فالدقائق الاخيرة مطلع المنتخب من التعادل للتقدم دقايق قليلة وتسالي المباراة ويتعلن المغرب فائز وحاصل على المرتبة التالتة فإقصائيات كأس العالم مسجل الهدف مشى كجري للكاميرة بفرحة تابعينو صحابو طعم الهدف فاللخر بوحدو لا مثيل له الجمهور كهتف ليه وكعيطو بسميتو وهو كسيفط ليهم بوسات فالهوى نيشان ضور عينيه لعائلتو لي كاملة تبعاتو مسانداه بفرحتهم ليه انه عيط ليه المنتخب من مور عامين فقط على ولوجو لعالم المستديرة لكن بين مهاراتو شي لخلاه محطة اهتمام المدربين اولهم الناخب الوطني عائلتو كلها كانت حاضرة ميمتو لي كطيح فدموع الفرحة خواتاتو لي كتناقزو فرحانات مراتو لي كملو ست شهور على الزواج ومن مور عقد القران نيشان عيط ليه المنتخب وكانت اجمل فرحة يعيشوها بزوج رجال خواتاتو راضية فريدة انيسة روعة عادل الحاج خوه ام الغيث كلشي حاضر يزيد لي كان هاز ماهر وكنعت ليه:شوف شوف راه هو خالو

ماهر مبسم وكشوف فيه خالو لي عزيز عليه وكحماق ليه راهو كلعب كورة زينة لي عينيها كبريو وهازة نضال لي كشالي بيديه تاهو ناشط:مغريب هو هو هو هادي بداية زازال هادي بداية زازال(مزال)

عاد خلي وليد لي كان هاز وسيم تاهو كشالي بيديداتو بفرحة وبداك اللومبيونص الزوين وكلشي فرحان سكينة لي يديها على كريشتها غوتات كيفما غوت كلشي فور ما صفر الحكم ومباراة الترتيب تحسمات لصالح المغرب كان نفس انجاز قطر تعاود النصف النهائي ومباراة الترتيب غير هاد المرة المغرب قدر يفوز بالثالتة فور ما سالاو نيشان اللعابة جلسو كتعانقو بيناتهم مع المدرب والطاقم والفرحة كاسية كلشي يوسف نيشان قصد عائلتو مسعودة تدلات وهي تتعنق فيه والجمهور تاهو باغي يسلم عليه كعنق فمراتو لي فرحانة بيه غطير وعينيها كبريو طبع قبلة على راسها ونيشان ضار عند وليد لي بزوجهم عارفين بيناتهم شكاين تعانق هو وياه وولاد ختو كتناقزو عليه سيفط قبلات لخواتاتو وضرب التحية ليزيد وعادل من بعيد بفرحة حيت كان خاص يرجع على ود توزيع الميداليات حيد التوني ديالو ولاحو لواحد من الجمهور لي كان اول واحد كطلب فيه عليه زاد من مور ما علم مو ومراتو ينزلو ودا معاه وسيم لي لصق عليه كلشي كصور والفرحة عارمة على كلشي لي حاضر فالتيران ولي فالمغرب وݣاع مغاربة العالم مبسمين اللاعبين للكاميرة وفنفس الوقت معاهم عائلاتهم هاز ولد ختو ومركب الميدالية لميمتو شاد فمراتو والكاميرا تتصور كلشي فديك اللحظة روعة نيشان نغزاتو مع ضار وراتو ليكوغرافي فوجهو بدون سابق انذار خلاتو جمد بلاصتو معارف باش تبلا شافيها بصدمة وهنا نيشان حركات راسها بآه وعويناتها كبريو بلاما يصبر طلاح عليها معنقها ومسعودة تتزغرت اللعابة ردو البال وضارو بيهم كصفقو ويغوتو بسميتو فواحد الجو لي زويين وكان مخبي ليهم من شحال بعدو على بعض وهو شاد وجها بين يديه وطبع قبلة على راسها عينيهم كانو كقولو بزاف علاقتهم جات غير بالصدفة لكن كانت مكتابة تشاركو الحلوة والمرة وكانو سند لبعض والحمدلله ليوم كتسناو اول مولود ليهم لي غيعطي إضافة زوينة لحياتهم الكاميرة تتصور وهنا يوسف ضار ووجه لها ليكوغرافي على المباشر مخلي كلشي يفرح معاه وݣاع لي تتفرج وهو كنعت فالسما وكقول الحمدلله ونزل ساجد كانت كرة القدم كتعطي درس فالصبر فرضى الواليدين الكفاح والجزاء والحمدلله ربي مكضيع حد كل بداية كفاح عندو جزاء ديالو وكل صبر عندو نصيبو وحياتهم هما كانت كتلخص فهادشي

خارجة تتفوه هازة ماهر لي كمل هو وخوتو عامين ولاو كمشيو كعرفو كهضرو شوية منورين حياة واليديهم لي غادين معاهم فمسار الحياة وشهدو على كل محطة لهم وهما ككبرو كان جالس كتسناها شاد نضال باش ينزلو يفطرو مع العائلة لتحت شدو اوطيل واحد من نهار بدا كأس العالم حتى سالا ومزال ناويين يبقاو شوية فأمريكا طبع قبلة على خدها ونطق:شوية الدوخة؟

زينة:وسيم نزل غطيح اماما نزل(شافت فيه حركات راسها وتنهدات)شوية يمكن الشمس ديال التيران هي سبابي حاسة بحتى قلبي مروع

تحنات بشوية حطات ماهر فالارض ومشى عند باه كتلصق فيه حتى هزو تاهو وهو كشوف فيها وكحاول يربط الاحداث وعينيه على وجها لي صفر ماهر كقيص له فوجهو باش يضور عندو وهو كشوف فيها غير هي مصغر عينيه

نضال نزل من عند باه وقصدها:ماما مشيو لتحت؟

زينة:هاحنا غادي نزلو يلاه زيد نلبسكم طاتي سكينة وعمو وليد كتسناونا

يزيد نيشان:واقلة تماركى لبيت الرابع امدام

زينة شافت فيه مفاهمة والو عقدات حجبانها شوية:كيفاش اويلي؟

يزيد قرب عندها كتملس على خدها بشوية:التقية الدوخة الترويعة ووجهك صفر مبانلك والو؟

زينة هنا خرجات عينيها آخر حاجة توقعها هي هادي:اويلي لا ميمكنش

يزيد:علاش ميمكنش راك هاد الشهر اللخر حبستي الفانيد نسيتي

بدات كضور فيها فدماغها امتى حبساتو امتى آخر مرة جاتها لغيكل وامتى آخر مرة مارسو رجعات شافت فيه عاضة على شفايفها شاداها الضحكة مخلياه غامزها:مرحبا بيه مع خوتو مالنا شخاسرين

وزاد هاز ولدو وخلاها دايرة يديها على خدها كيفاش هو رد البال وهي لا عند بالها الشمس لكن كلشي كان فالشمس وحد ما وقع ليه حاجة راسها زند عليها زعما تكون حاملة ضحكات فاش تفكرات واقلة تماركى لبيت الرابع فظرف تلت سنين ديال الزواج تسربك ربعة حركات راسها بلا وهي تضحك فنفسها جرات ولدها وزادت تابعة راجلها للبيت

وليد:يلاه قولينا سميتك بالفرونسي نعرفك واعر

نضال:جومابيل نضال وزاني

سكينة بدات تتصفق:برااااااڤو نضال شحال عندك من عام

نضال دار زوج صباع وكهضر بفرونسي مراجلة مزال مكنطقش مزيان هنا وليد بدا كطبل ليه فالطابلة:كاين والله حتى كاين

سكينة وهي تتشطح بلاصتها وكصفقو عليه ناض تاهو وبدا كشطح كان مكشبهش لواليديه نهائيا لي بزوجهم مرزنين خارج هبيل ومن صغرو كلشي كشبهو بعمو وخالتو

وليد حبس التطبال:دابا انا باش عرفتك نت نضال وماشي وسيم ولا ماهر

بدا كفكر نضال على نيتو كيفاش يبين لهم بلي راه ماشي شي حد فخوتو حيت مشارك معاهم وجه واحد ومكاين حتى اختلاف بينهم هنا شافيه ونطق:داك النهار انا سفتكم فاس كنت نت وطاتي فبيسين

هنا وليد سد ليه فمو وسكينة عضات على شفايفها وهي كضحك ويديها على كرشها تاهي غدير الولاد هي وهبيلها عندها ست شهور وبنية من الفوق

وليد:صافي سكت نت نضال متشرفين

بداو كطبلو ليه ويغنيو ليه وهو كشطح باش ينسى نهار حصلهم فلابسين ليمشي يفرشهم قدام العائلة وهما ناس محترمين بقاو مجمعين شادين فيه من بعد ناضو نزلو فين كانت العائلة كاملة مجموعة والوليدات كلعبو الا يزيد وزينة لي خرجو على شي غرض من مور وقت قصير رجعو هازين خبر زوين للعائلة فوسط الديار الامريكيه خبر المولود الرابع لي كان دهشة ليهم كيفما كان دهشة لمو لي فكل ولادة مكتعيقش حتى كنبهها شي حد الزغاريد علات فلوطيل مخلية النصارى دايزين وكتبسمو لداك المنظر الزوين العائلي شي كعنق فشي وفرحانين فرحة تابعة فرحة والحمل تشاركوه تلاتة سكينة ورؤية وزينة فإنتظار حتى روعة نهار يكتاب ليها تاهي بإذن الله

ماهر:غايجي عندنا خويا اميمة

فريدة وهي تتبوس فيه:اياه الغزال ديالي وغيكون زويييين بحاااالك

وسيم:بابا بابا غدا غيجي عندنا خويا يلعب معانا؟

يزيد:غيلعب معاك ابطال ان شاءالله ولكن مغاديش يجي دابا غنتسناوه كاملين

كانت جالسة تتشوف فيه هاز ولدهم وكهضر معاه كتحول عينيها كتلقى وليدها لاخر عند جداه فريدة ووليدها تالت هازو عادل كلعب معاه يديها على كريشتها وقلبها مفرفر وهاهو جاي واحد آخر غادي يكمل العائلة ويتخشى وسط خوتو ذريتها لي كتمنى تكون صالحة يارب وثمرة حبها هي رجل حياتها لي كلعب مع ولدو وعينيهم على بعض ضرب ليها غميزة غير بالريط خلاها تبسمات وتنهدات براحة وفرحة احساس الامومة غزال وبزاف كل صباح تتفيق بأمل جديد وداك الامل كجي من شوفتها فوليداتها واحد الطاقة من نوع آخر والله يخلي لينا امهاتنا ولي ماتو الله يرحمهم يارب

بــــعـــــد أشـــــــهــــــــر🤍

كلشي صفق تصفيق حار من مور ما مد ليها يزيد المقص لي شداتو ويديها كترعدو قطعات الشريط الاحمر معلنة على افتتاح مشروعها واول خطوة تجاه حلمها تعانقات هي وراجلها السند فكلشي وحتى فهاد الحلم لي درس معاها فيه كلشي من الفكرة حتال التطبيق على ارض الواقع عائلتها كلها وراها ووليداتها كذلك

كلشي دخل مسبق الرجل اليمنى تمنيا بالتيسير فديك العتبة ودخلو للمقر المقر ديالها فين غيكون مشروعها بصفتها ممونة حفلات وكل ما يخص الافراح والمناسبات كان حلمها الطبخ وكانت اكثر حاجة كتقنها والحمدلله ختارتها تكون مهنة ليها وتشارك الناس فأفراحهم بلذة الطبخ المغربي كلشي ضاير بيها لا من الاحباب ولا من الاصحاب مشاركينها فرحة الافتتاح لي كان داخل فيه لبايبي شاور بصفتو اول مهمة غدير فمشروعها وغتفتاتح بيها كلشي ضاير بيهم كلشي مزوق بالزرق والوردي يديها على كريشتها ومبتاسمة كترحب بالمدعوين لي منهم شي وحدين غادي يخدمو معاها اولهم صفية بصفتها المحاسبة وسليمة بنت عمها بصفتها وحدة من لي شيف كانو وارثين هاد البراعة فالطبخ وعبد الكريم كذلك لي غيتكلف بكل ما يخص اللوجستيك وأم الغيث كذلك لي غتكون ضمن فريق الطبخ وهي الرئيسة ديالهم الوليدات كلعبو سكينة هازة بنيتها فيديها مزال صغيورة كلشي فرخ وكلشي جاب شبيهو فالدنيا وكبرات العائلة

1 2 3 كان العد التنازلي قبل لحظات معرفة جنس الجنين مضور يديه على خصرها وهازين الفلام قلبو كضرب وكطلب فخاطرو وهي كذلك عينيها على الدخان لي غيخرج لي فور ما لمحو يزيد شير بديك الفلامة نزل ساجد بفرحة

ومن وراها ناض وبدا هولياااا هولياااا السيد تحمس وضرب الرزانة فالحيط وهي كذلك كتنقز بلاصتها كانت تتقول لي جا مرحبا ولكن نهار سمعاتو كدعي فصلاتو بمؤنسة غالية🌸تجي وسط خوتها بدات كتمنى تاهي تكون بنيتة باش يفرح تاهو كثر وفعلا فرحتو كانت باينة غير من ردة فعلو طلاح عليها معنقها هازها من الارض وكضور بيها الزغاريت من طرف ام الغيث مليكة ومسعودة وفريدة خواتات زينة طايرين وخواتاتو حتى هو وݣاع الناس فرحانين معاهم بهاد غيمة النور لي خيمات عليهم وخلاتهم فرحة من مور فرحة لأنهم يستاهلو بعدو شوية جبهتو على جبهتها مضورة يديها على عنقو ويديه على خصرها بوحدهم لي حاسين بما فداخلهم تعوضو بزاااف وعوض لي كبير وزوين من عند الله والحمدلله

زينة:نت لي غادي تسميها انا سميت الدراري ودابا نوبتك نت

عينيه لكبريو وقلبو توهج من مور مشاف اللون وسجد سجدة شكر للخالق لي دعاه ومخيبوش كان باغي بنية وهاهي غادي تجيه غزالة بحال ماماها نطق وعينيه فعينيها:غنسميها نعمة يا احسن نعمة عطاني الله❤️

ومن مور ما نطق كلامو نيشان رجعو تعانقو عناق حار لبارح كحاربو على حبهم واليوم هاهما عائلة ضايرين بيهم حبابهم وصحابهم ووليداتهم لي جاو من مور علاقة وطيدة قوية وقوتها تتجلى فالصبر لي داز على قبلها

خرجات من الكوزينة وهي هازة ليهم الطبيسلات فيهم الفواكه مقطعين والزبيب والمكسرات معوضة ليهم السقاطة بشي حاجة فيها المنفعة دخلات لبيت ديالهم لي غيطرطق بالالعاب وكولو مزوق كلا وشنو كدير وكلا واحد حطات ليه طبسيلو بوحدو هزات الطيلي تتهضر مع ام الغيت تتشوف فين وصلو عندهم كوموند دعرس كبيرة هماوية تلفتات وهي تتهضر معاها فاش شافتو داخل هاز نعمة بين يديه وحاضنها يلاه عندها شهرين باش تولدات ودخلات عليهم بفرحة وسط خوتها لي رغم صغر سنهم فرحانين بيها ماهر مع شاف باه دلا قنانفو زعما نبوسها وداكشي لي كان تحنى يزيد عندو عاطيها ليه يبوسها وناضو خوتو لآخرين دارو نفس الشي وهما كشوفو فيها ناعسة وكتبسم وسط نعاسها وهما كضحكو بشوية حيت ناعسة معلمين كلشي ومن نهار قالت لهم ماماهم هضرو بشوية فاش تكونو معاها حيت صغيرة وهما كسمعو ومطبقين كلام ماماهم قطعات الطيلي ودخلات تتشوف فداكشي لي سيفطات لها ام الغيث دابا شوية تشرف عليه قبل ما يتسيفط للناس تبسمات بلاما تحس وهي تتشوف البلاكة واللوغو ديال مشروعها لي منقوش عليه Traiteur zinah ليا لبارح كانت غير تتحلم وليوم حققات ولات عندها سميتها وكليانها ومزال غادية توسع حلمها بإذن الله طفات الطيلي وهي مربعة يديها وتتشوف فيهم كلهم من الاب لأصغر العنقود بنيتها وحبيبتها لي مع الوقت بدات كتلاحظ انهم عندهم نفس العوينات والملامح بداو كتفرزو وغطلع لها بشهادة الكل الوليدات طلعو نسخة طبقة الاصل من باهم لا فالشكل ولا التصرفات كيفما تتقول فريدة ديما باهم كان كالم وتربيتو مكانتش صعيبة حتى هما كسمعو مهدنين محبوبين وكجيها اكثر واحد خدا منو كلشي هو ماهر لي نهار تولد كان فالشك واش غيبقى ولا لا ودابا الحمدلله هاهو فعمرو تلت سنين كلعب بحالو بحال خوتو والدراري ذكي اهم حاجة لاحظو فيه وهي لبنيتة غتكون ديالها وكتشبه ليها تنهدات براحة اجمل منظر ممكن تشوفو رجعو هما ككملو لعبهم وهي قصداتو طابعة قبلة على خدو وهو كذلك مضور يديه على خصرها وعينيهم على نعمة لبنيتة ديالو لي خاطفة قلب باها لي نهار تولدات مقداتو فرحة لدرجة انه طلب يحضر لولادة تعويضا للولادة الاولى لي محضرش ليها عاش معاها الحمل كامل وكيف ديما سندها وحطات عليه الراس كيف الاول عاونها سهر معاها مع الدراري هز معاها ورضع وبدل كلشي داروه بزوج حتى دابا متبدل والو ضحكات وهي ناعسة شي لخلاهم شافو فبعضهم وهما كضحكو حولات عينيها لوليدات

وكان كلا واحد فيهم كدير حاجة ماهر لي كان كحماق على اللعاب ديال التفكيك ويعاود يجمعهم ليبوزل اي حاجة فيها تركيز كبغي يهبش فيها نضال لي كان فنان وكحماق على الرسم الالوان كلشي كان كرسم ومركز عندو حس ابداعي زوين وكناسق الالوان ووسيم لي كان هاز قصة صغيرة على قدو كقرا فيها وكل واحد فيهم عندو شخصية واخا كلهم كشبهو لباهم داخلة فيهم شي حاجة ماهر كالم نضال هبيل غير عمو وخالتو ووسيم بشوش بحال ماماه نعت ليها نيشان بصبعو فماهر ونطق وهو كشوف فيها:مستقبل الشركة ان شاءالله

شافت فراجلها ورجعات شافت فولدها ديما راجلها مكدويش فالخوا الا قال شي حاجة كتصدق كقرا بنادم وهاهو قرا حتى ولدو لي كان بشهادة العائلة انه غيطلع دماغ حيت كان كسول وكلاحظ وهي براسها سولها شحال من سؤال خلاها غير تتشوف كيفاش وليد صغير عندو هاد الملاحظات نطقات وهي حاطة راسها على صدرو:ان شاءالله ياربي

ونيشان نعتات فنضال الرسام:ها المصمم لي غيزاحم سكينة

ضحكو بزوج وهنا حلات عويناتها نعمة ومع شافتهم شافت واليديها تبسمات وهي تتحرك يديداتها خلاتهم ذايبين فحلاوتها فديك اللحظة

التصفيق حار من كل الحاضرين وهما كشوفو المصممة خارجة وشادة فمول الشي من ما قدمات كوليكسيو من داكشي لا من ناحية التصميم لاكلاص الالوان كلشي تعرفات وداعت سميتها بصفتها هي المصممة الرئيسية ديال الشركة الديفيلي كان كولو بسميتها بمساعدة فريدة لي سميتها بقات فالسر ومبغاتش تعرف بنتها بيان نيشان غير شافتها بدات تتنقز خلات وليد وقف ومدها ليها وهو كغمزها كان نعم السند حتى هو الكوليكسيو لي تزامنات مع الولادة ومع ذلك قدرات انها تخرجها وكلشي يدوز على اكمل وجه كتعطي الكلمة بكل ثقة وهي كتفكر البارح كانت غير متدربة حالمة وليوم هي مصممة بصمات سميتها فعالم الموضى تتهضر وتتشوف فيزيد مبتاسمة كان اول من مد ليها اليد لي خلاتها فعالم حلمها وليوم هاهي هي وياه قدام الكاميرة ووحدة من اهم الموظفين فالشركة كلشي رجع كصفق ووليد كصفر وكصفق بحرارة مشجع مراتو شافت فريدة وغمزاتها وهما كتبسمو لبعضهم غير بالتخبية زعما داكشي بيناتنا نزلات عند ميمتها وخواتاتها وسط اجواء الديفيلي والمزاد على الحوايج والشركة لي غير مزايدة فالارباح بروح التضامن والترابط

خرجو للجردة ديال لوطيل العائلة كاملة زينة تتبسم بتعالي وهي تتشوف لBuffet لي كان من اشرافها خوا واي حاجة متعلقة بالشركة دالماكلة كدخل فيها هي ل buvette ولا كلشي فيه ديالها دارت سميتها مزيان وكليانها كانو مختالفين من الطبقة الراقية وحتى الناس العاديين كدير لهم على قد جيبهم كلشي يفرح لي عندو ولي معندوش حيت تاهي واحد الوقت كان معندهاش

وهما واقفين فديك اللحظة دقة وحدة بداو كغنيو joyeux anniversaire joyeux anniversaire yaziid

معرف باش تبلا تلفت وهو هاز بنيتو فيديه كانت ميمتو جاية وهازة الحلوة احتفالا بيه مبسمة وعويناتها كبريو يلاه لبارح حملات بيه وكانت فرحانة بزيادتو هي وباه بصفتو اول مولودهم والبكر ديالهم مليون هاهو ككمل 35عام هاز بنيتو ووليداتو كلعبو حداه تقابلات معاه ونطقات:بطول العمر المرضي ونشوفك ديما لفوق لفوق ياربي

قرب وطبع قبلة على راسها ميمتو وباس حتى يديها وهي كترضى عليه كلشي ضحك فاش نعمة خشات يديها فالحلوة وبانوليها الزواق بغات تكتاشف وهي صغيورة هكاك قد البقة كلشي كبارك ليه بطول العمر والصحة باه خواتاتو نسيبتو نسابو وولادو لي باسوه واحد واحد تحت كلمة عيد ميلاد سعيد بابا تحت انظارها هي وهي مبتاسمة كانت كتسنى كلشي يدوز وهي اللخرى وداكشي لي كان قربات عندو عينيها فعينيه معنقاه:عيد ميلاد سعيد اعمري بطول العمر والصحة والسلامة ياربي الله يخليك لينا

يزيد ضامها لصدرو بالجهد لغة اجسادهم كانت تتبين الحب لي بينهم:العمر كولو معاك اقلبي

بعدو على بعضهم مبسمين فعلا العمر كامل غادي يدوزوه مع بعض بإذن الله

تستفو كاملين واخدين صورة جماعية المصور دالشركة قدامهم صورة جامعة كلشي الكبار دالعائلة جلسو القدام والصغار وراهم كلشي كان من الحاج لوزاني حتى لعبد الكريم ولبنى عاد خلي البز من غير يوسف ورؤية لي ولدات وليد تاهي مكانوش فالمغرب من مور مجاه الاحتراف لفرقة دورتموند الالمانية كلشي تبسم لصورة التذكارية ديال العائلة كلها جامعة كلشي الحب الفرحة والصفاء العائلة لي تجمعات من مور بزاااف دالحوايج واخا كانو خايبين وفترة ديال الظلام لكن بيهم تقوات العلاقة وطاحت القلوب على بعضها كان مزال هاز نعمة مكفرقهاش وتتشوف فجنابها كملات ربع شهور عينيها على ماماها وهي كضحك وكتبجغط مضور يديه على خصرها وقرب بشوية بجبهتو نزل عليها لراسها من مور تلتاقطات الصورة باش تلفت لعندو داكشي لي كان طلاقاو عينيهم وهما كشوفو فبعضهم

كانت رسالة غير بالانظار وكأنه كقولها عقلتي على ذكريات الديفيلي والغيرة وداكشي كان كلا حاجة كدوزوها عندهم معاها ذكرى حيت عاشو بزاف الحوايج نظراتهم لبعض تتلخص انهم صافي ختمو الامنيات حيت ݣاع لي بغاو وصلو ليه تجمعو تزوجو ولدو وهاهما ككبرو وليداتهم قدامهم ووسط دفئ العائلة لي ضايرة بيهم الحب زوين والطعم ديالو كتلخص فمعنى الوفاء والتضحية لي كانو اكبر مثال ليهم هما بزوج كانو حتى بعدو على بعض وفراقهم كان قاطع ولكن حاربو باش يرجعو ويربحو ليوم وفعلا حبهم لي نتاصر ونيتهم ربحات ربي عوضهم وزواجهم كان ميسر وعلاش لا واشارتو كانت فمكة المكرمة الشريفة كانت ليه امنية وتحققات وكان ليها السند نهار طاحت لقاتو هو شاركها طرف منو باش تعيش شي لخلاهم مشاركين كلشي ومزال مواصلين بمشيئة الخالق لي كتبهم لبعض من اول نظرة ولقاء حطات راسها على صدرو براحة طمحات لها من هذا شحال وهو طبع قبلة على راسها مزال غيكملو ومكملين ومزال الحياة قدامهم حيت حبهم بكل بساطة دوزو بزاف دالمراحل فحياتهم داكشي لبينهم صعيب يتلخص فكلام حيت عميق وعظيم ومعندوش نهاية حتى لنهار تقبض الروح✨

القصة قصة تضحية وكفاح من أجل الحلم وكذلك الحب قصة صبر وعوض فرج وتيسير المراد أن الأماني تحققات والقلوب تعوضات من مور ما صفات وتهنات وأهم حاجة أن مدام ربي كاين عمر غيرك ما يدي ديالك كيف مكان واخا يعيى يطلع وينزل النية كتغلب السم والحقد والدين هو علاج الروح الوحيد وكل من صبر كنال وكتجازا على كفاحو قصتنا كانت ملخص للمعنى الحقيقي ديال إن الله مع الصابرين🤍

الـــــنــــــهـــــــايــــــة❤️‍🔥

لآخر مرة غنقولكم قراو كلشي🥺🤍

شغادي نقولكم معرفت باش نبدا ما نسبق ما نوخر مغاديش نقولكم نطلاقاو غدا حيت ليوم الخاتمة شي حاجة لي دخلات فالروتين ديالك ودابا غادي تنقص بعدما كانت مهمة من المهمات باش كدوزي نهارك فشكل والله كتابة ديال القصص ماشي غير كتب وحط وانما احاسيس كتعيشيها مع الأبطال لي بديت كنحس براسي وحدة منهم انا فيا هادي كناخد وقت طويل باش نسى أبطالي والا بديت شي قصة كنبقى فبدايتها نتفكر الأبطال دلقصة لي سبقوها حتى كنولفها تاهي وهي غادية غيجيكم هادشي بيزار مي هدا واقعي وانا كنسج أحداث ناس من وحي خيالي✨

❤️‍🔥ســـكـــرتـــيــــرة الــــنــــمـــــرود❤️‍🔥من أجمل ما كتبت بكل صراحة عشت أوقات زوينين لأنني كنت كنكتب من قلبي وزينة كذلك من أقرب لبطلات ليا أما يزيد خلاص الرجل المثالي الوفي لي ضحى على ود حبو وتستاهل علامن دار داكشي كامل وكان سند حتى فعز الحقد لي مكانش حقد بل حب مراضيش بيه وهو عند بالو تغذر وهي بريئة من كلشي التهم عشنا الحزن بزاف وغير باش تعرفو انا أكثر وحدة كان كنعاكس عليا داكشي لدرجة ان قلبي بدا كضرني شحال من مرة آه وممحتاجاش الحلوف باش نأكد لكم لحاجة لأن داكشي كان من قلبي شي لخلاكم حتى نتوما تبكيو تخلعو تصدمو وآخر حاجة تفرحوا

سكرتيرة النّمرود قصة من الواقع المعاش شفنا كلشي الحݣرة الظلم الاستغلال الاستعباد الحقد الطمع الشر البغض فالمقابل الصبر الكفاح التضحية الفرج وأهم حاجة الدين العلاج الروحي للقلوب ولأي داء وجائزة الخالق لكل من نجح فامتحان الصبر الدنيوي شفنا الدنيا الضوارة والحال لمكدومش لي دعى القوة يموت بالضعف وحق المظلوم كتخاد فالنهاية وربي مكنساهش والا كانت شي حاجة مكتابة لك ميحدها لك حد واخا يتجمع وهو الدنيا كلها باش يحيدوها لك ديالك ومكتابك حتى تفارقو سنين وعاودو رجعو شفنا الحب الحقيقي والتضحية وأن لي يبغيك قادر يفديك بكل ما يملك غير فسبيل تكون رفيق دربو وهادشي كتجلى عند يزيد لي كان كتمناها فصلاتو وبفمو ذكر انه اكثر حاجة تمناها ومجاتوش بالساهل هادشي لخلا عندها حلاوة فاش نالها ومن بين أجمل الحوايج لي تذكرو هو ان صفاء القلوب والمعدن النقي كرجع على مولاه بالخير زينة مهزاتش فقلبها وخدات احسن عوض من عند الله

هادشي كلو حاولت نجسدو ليكم بين سطور وأحداث والحمدلله قدرت نوفق وهاحنا دابا كنعيشو النهاية لي كنتمناها تكون كانت على أكمل وجه عشنا فراقهم وعشنا حبهم زواجهم وحتى ذريتهم

حد هنا كنكونو سالينا تقريبا تلت شهور وحنا مجموعين وليوم غادي نتفرقو ماشي نهائيا ولكن غنتفرقو كجيش لقصة❤️‍🔥 سكرتيرة النّمرود❤️‍🔥لي غنطويو صفحتها لكن صراحة غادي تبقى فقلبي بغيت آرائكم كاملين وأي وحدة وصلات لهنا تخلي لي كليمة تفرحني ونحس بلي مجهودي ممشاش هكاك حيت بكل صراحة وصلت لواحد الوقت حسيت بطاقتي سالات ومع ذلك كملت فكل مرة كنشوف جيش متبعها وكتسنى بغيتكم كاملين تخليو تعاليقكم هنا وفنفس الوقت دخلو عندي للكونط ديالي وتخليو لي آرائكم فالبوسط لي غنحط باش يبقى ذكرى كنبغــــــيـــكـــم بزاف وشكرا لكم كاملين وحدة وحدة وأهم حاجة شكرا لصحيبتي شريكتي لي كان عندها دور كبير فمسيرتي من نهار عرفتها هي لي كنشاورها كتشاركني الأفكار كتعطيني رأيها وفنفس الوقت الدعم المعنوي والخدمة لي خدمات معايا كنبغيك اقلبي Yøuşra Anğeł 🥺❤️

خليتكم على خير الغزالات وشكرا مرة أخرى

ســـكـــرتـــيـــرة الـــنّــمــرود❤️

مــنــال بـــرنــيــش✨