اكسيل : مزيان مزيان تانتي عندك يد فهادشي معليش ، او دبا اوليداتي باش تبغيونا نبداو لاعتراف و لا الضغط للاعتراف شنو حب لخاطر ؟
مجد : (بلع ريقو) كل الطرق تؤدي الى لموت ، خويا جود خصنا ندربو دبا ، من هو ربك ؟
جود : (شاداه تا هو لخلعة) الله
مجد : من هو دينك ؟
جود : الاسلام
مجد : من هو رسولك ؟
جود : محمد صلى الله عليه وسلم
مجد : منسالكش حافض العفريت
جود : نوبتك دبا راه قريب ايسالي طويان دكمامو ، من هو ربك ؟
مجد : (زاد تخلع ملي شاف اكسيل قريب اقصدهوم) الله
جود : من هو دينك ؟
مجد : (حدو شاف اكسيل قاصدهوم تقاليه لسان او تلفاتليه لهضرة) الاس….سسس……
جود : تعطلتي محافضش
اكسيل : شكون فيكوم ابدا لمعاودة ؟
مجد & جود : (شيرو على بعضياتهوم بصبهان) هو
اكسيل : غا مادابزوش شكون يبدا
مجد & جود : حجرة ورقة مقص (مجد دار لورقة او جود دار لمقص)
جود : عاود نتا انا لي ربحت
مجد : (شاف فاكسيل وبدا كيراپي عليه زبلتهوم بزربة) دبا حنا كرينا موطور بسميتك او خصرناه او حيت ماعندناش لفلوس باش نغرموه ، جينا عند لغالية تعاونا ناخدو شيك من عندك باش نخلصو مولاه او ملي خفناك تعيق بينا لغالية قاتلنا نديرو راسنا تهرسنا وصباح هي لي سيماتنا (طلق واحد النفس كبير) أ الله عاد رتاحيت
اكسيل : (شافيهوم كاملين واحد بواحد تا وصل عند لغالية هو يطول فيها الشوفة) ولادي بجوج سوا لي ولدت سوا لي ربيت كيكريو لحاجة بسميتي او يخصروها او يغرموها بفلوسي من لفوق ونا مسايق لدنيا خبار ، او لالاهوم بنتي كتستر ومخلياهوم اسرقو باها ، لا لا ولواعرة هي مرتي بيديها ضبراتلهوم على الشيك او عطاتهوم تا لخطة باش انا منعيقش ، كانبو قالدامكوم انا ادويو ؟
لغالية : حاشا احياتي حنا غا
اكسيل : نتي بضبط زميه منسمعش صوتك ، غنفكو هاد يد ورجل هاد الجوج عاد ديك الساعة نتفاهم معا كل واحد فيكوم ، صباح سيري جيبيلي شي مطرقة
مشات صباح جابت لباها شنو غيحتاج او بقات واقفة كتشوف فيه كيقشر السيمة عليهوم تا فكهوم
جود : الله عاد قدرت نحرك رجليا مزيان
اكسيل : (خنزر فيهوم) من ليوم او لمدة سيمانة غتبقاو التاكلو طياب صباح لفطور او لغدا وترضيضة ولعشا بلاما تفلتو تاشي وجبة
مجد : لا لا الواليد سلخني وماديرش فيا هاكدا بغيت نعيش مابغيتش نموت انا باقي صغير
اكسيل : نبداو ليك أبنتي صباح ميمونة ممنوعة عليك لمدة 15 ريوم او أي تسافيرة عندي ولا غاراض غنمشي بيها عواض طونوبيلتي
صباح : (بغا قلبها يسكت) لا لا ابابا ميمونة ݣاع مكتقد على دوك طرقان لي كضرب نتا مرة راك فجبال مرة فلوتوروت غتخبش ليا بنتي ولا تخسر
اكسيل : (دار راسو مسمعهاش) اما نتوما سيمانة ني ويفي ني مواقع التواصل ني لايڤات مفهوم ، او بالنسبة لديك لقضية تاع تسافرو بجوج لفرانسا تقراو فنفس لمدينة نساوها ، واحد فيكوم غيمشي لپاغي والتاني ايمشي لأنتيب مفهوم
جود : لا عافاك الواليد راك عارف لغربة صعيبة وخاصاها لموانية
مجد : راك عارف ابابا عندي لمعجبين نغبر عليهوم سيمانة نتسطا خصوصا اللايڤات
جود : يخليك بلخلى نتا ودوك لايڤات دياولك ، تا دوك تلاتة تاع الناس مسميهوم معجبين
مجد : او مالك ليوم 3 غدا 1000
اكسيل : او دبا وصلنا لمرتي عمارت داري
لغالية : (عرفات راسها ورقاتها معاه) راجلي حبيبي نتا عارفني كنموت عليك كون ما هددوني مانخونكش
اكسيل : تا انا كنبغيك لذلك هاد تلتشهور الجاية كاملة مغتشري تا قزديرة
لغالية : اويلي على تلتشهور بزاف
اكسيل : نخليوها ربع شهور او تا من هادشي لي عندك ممنوع تقيسيه ولا حتى ديريه سمعتيني
لغالية : لا لا عافاك راك عارف ديك لمسمومة تاع ربيعة عارضة عليا لسبوع ولدها ويلى ملبستش داكشي لي عندي كيفما موالفة غيقولو عليك زقرام تبغيهوم ايقولو عليك سامح فمرتك ماجاتش
اكسيل : كنتي تفكري فهادشي قبل ما تزبليها
مجد : باش كيعجبني باك ماعندوش معا لفرزيات كلى ياكل حقو
#نهاية لفلاش باك#
لغالية : بمسبتكوم مشيت لعراضة مݣردة قزديرة هي لخرة مدرتهاش ، او سيمانة وحنا الناكلو فطياب صباح تبوشاتنا لمعدة
جود : هههههه واخة هاكداك دازت زاهية
صباح : أجي بعدا داك لحتروف تاع مجد ايمتى غيجي عندنا
جود : قالي السمانة جاية غيسالي شغلو ويجمع حوايجو ويجي يلحق علينا
صباح : احقا بيتو ݣاع مشفتها كيف دايرة
لغالية : راها مسدودة وسوارت عند باك خاصو تايجي عاد يعطيهوم ليه (للمعلومة مجد راه تربا معا دراري من صغر كان ساكن معاهوم ، مرة مرة لي كيمشي عند عئيلتو ودبا كان عندو شي غرض داكشي علاش مكانش معاهوم)
جود : زاهي عصى و كاواريت ملي يرجع
صباح : غا الله يحفض او صاف
كملات لغالية الطياب تاع لعشا لي كان عبارة على لماقارنية بلاصوص تاع مطيشة ولكفة اما بالنسبة لاكسيل فدارتليه شلاضة بلخص او دجاج او الروز ، عاوناتها صباح او جود فحطان الطبلة عاد تم نازل اكسيل عندهوم
لغالية : (ݣلسات تا هي فوق الطبلة او بدات كتخوي لكل واحد فيهوم فطبسيلو) هاكو
صباح : بابا
اكسيل : نعام
صباح : غدا ملي تكون غادي لمحل ديني معاك غيخصني نمشي لكازا ندوز عند ماما خليت عندها شي وراق ، او حيت باقي محفضت طريق خاصك نتا توصلني
اكسيل : ان شاء الله
لغالية : غتعطلي عند ماماك ؟
صباح : لا علاش
لغالية : غا باش نعلمك طيبي كيما كتعرفي مجد غيرجع لدار او ماقادين على بوشات لمعدة
اكسيل : داك لحتروف دوا معاك ؟
جود : واه او قالي بلي غيرجع السمانة الجاية
اكسيل : مزيان ، يالاه نوضو تنعسو راه تعطل لحال
ناض اكسيل هو لول من فوق الطبلة وطلع لبيتو عاد لحق عليه جود ، مخليين لغالية و صباح كيجمعو لماعن باش اوصلوهوم لكوزينة بلاما يغسلوهوم تال غدليه ، حطو داكشي لي شاط فالتلاجة عاد كل وحدة فيهوم طلعات لبيتها تنعس
لغالية : (دخلات على اكسيل لبيت ، ولي كان متكي بضهرو على الناموسية او كيدوي فطيليفون ، سدات لباب من موراها او مشات بدلات عليها بواحد لپيجامة تاع نعاس عاد جات تخشات حداه)
اكسيل : (كيدوي معا مجد) قالي جود بلي راك قريب ترجع ساليتي داك سطاج لي عندك
مجد : لا الواليد مدفعتش ليه حيت يالاه عاد تخرجت او عطاوني الشهادة ، و قلت تا نرجع لكازا نيت او نقلبلي تما
اكسيل : فيها خير ، شهاد صداع حداك واش مراكش فالدار
مجد : لا راني كنصوݣ او طالق شوي دلموسيقة
اكسيل : فين غادي فهاد ليل بسلامة
مجد : راني شاد طريق لعندكوم نيت داكشي لي كنت انتسنا سيمانة باش نقضيه صدقت قضيتو هاد نهار او هاني جاي
اكسيل : مزيان الله ايجيبك على خير ، عارف طريق أبعدا
مجد : واه راني عارف ، نخليك دبا الواليد بسلامة
اكسيل : طريق السلامة
لغالية : (شافت فاكسيل) واش مجد هادا
اكسيل : واه
لغالية : هانية عندو ؟
اكسيل : هانية راه جاي فطريق
لغالية : (فرحات) بصح
اكسيل : واه بصح ايوا عنداكو متشعلوش لعافية فدار
لغالية : هههه كون هاني ، أجي مقلتيليش علاش نتا لي شديتي مجد منين تزاد
اكسيل : داك دحش زلق ليهوم ماكانوش ضاربين ليه لحساب ، ملي ولداتو مو كانت مرضات فيها وكانو ديك الساعة مسافرين ، داكشي علاش مشيت خديتو حيت ديك الساعة كانت صباح تزادت موراه بشي سوايع ، او صاف بقا معايا درنا ليه سبوع هو وصباح او سميتو وبقا معا دراري
لغالية : هاكداك ونا كنقول مال بزاف تاع الناس كيسولو صباح على تويمي ديالها ، أجي وخوك او مرتو معاودوش رضوه عندهوم
اكسيل : طولو فديك تسافيرة حيت كانو عندهوم شي ماشاكيل معدالهومش ارضوه ، تا دار خمسنين عاد رجعو من سفر او كانو بغاو ارضوه معاهوم ولكن هو مبغاش
لغالية : متأكد هو لي مابغاش ولا نتا لي مابغيتيش ترضو ربيتي عليك لكبدة
اكسيل : ههه كانت ديك جرانة فيها النشاط بزاف او ضسارة ولفت صداع ديالو فدار كانت دار كتولي مقناطة وساكة ملي كيمشي يزور واليديه فشي يامات داكشي علاش خليتو معايا
لغالية : او خوك يحيى و رابحة ماقالو والو
اكسيل : ماعندهوم مايقولو دري مابغاش يرجع او تما فلبلاد كترت لبز شي مربي ولاد شي ، ودبا طفي معاك داك ضو وخلينا نعسو
لغالية : واخة (مدات يديها لديك لفيوزة لي حداها وطفات ضو ونعسات)
~~~~~~~~~~~~~~
صباح بعدما دخلات لبيتها غسلات سنانها ومشات تخشات ففراشها هازة طيليفونها كتسرك ليها شوي فليوتيوب ، تا لقات راسها فلحساب تاع محسن لي كانت مبلوكياه من تم ، شافت تا عيات هي تمشي تحل ليها حساب جديد بسمية مغايرة وسيفطات ليه طلب لمتابعة
صباح : (طفات طيليفنها وغمضات عنيها باش تنعس سعا عاودات حلاتهوم من جديد ) شدرت انا لاش مسيفطاليه ولا حتى محاشياها ليه داك قليل ترابي ، ولكن الى جينا نشوفو ماقاليش شي حاجة بيزاغ ، لا شمن مقاليش واش هو كان كينعتلي لصدري وماشي بيزاغ ، او ملي الحاجة صباح هو قليل ترابي او ممحتارمش لاش حالة حساب جديد او مسيفطاليه أدوي ، واشكون عرف أنا انا معرفتش غا سيفط او صاف شنو فيها أصلن ، مافيها والو غا هوا غيبان ليه بحالا طايحة عليه تا مسيفطاليه ، واصافي عارفة راسي زبلتها غا هنينا خلينا نعسو (غمضات عينيها عاود باش تنعس شويا هي تحلهوم من جديد) تخايلي يعرفك نتي ، الا باش بغا يعرفني راه السمية مبدلة او تصويرة مكيناش ، وتخايلي ارفض الطلب ديالك ، لا منضنش ديك نهار دغيا قبلو ، وغا تخايلي ، وصافي بغيت نعس باركة من ديك تخايلي هالعار (غمضات عينيها مرة خرى ولكن هاد لمرة معاوداتش حالتهوم او دازت من لهيه)
ندوزو عند جود لي كان تا هو مخشي فراشو ولكن نعاس باقي مجاه ، سمع صوتيت تاع طيليفونو هو يمد يديه لعندو ، لقا مجد هو لي مصوني عليه
جود : واش بايت كتحلم بيا نتا ولا شنو
مجد : هنينا من صداعك او خرج عندي لبرا راني كنتسناك
جود : واش ضربك حمار ليل كفاش راك لتحت ايمتا جيتي بسلامة
مجد : غتبقا تعاطا معايا فلهضرة بحال هكدا تا يفيق باك هبط آصاحبي نمشيو نزهاو شوي ماحد الباك ناعس
جود : صافي صافي هاني جاي (ناض بزربة لبس ليه واحد لقبية معا سروال او سبرديلة ، هز طيليفونو وخرج كيتسلت تا وصل عند مجد ، لي كان متكي على الطونوبيل كيستناه) ايمتا جيتي
مجد : (سلم عليه) عادبا وصلت
جود : (ركب حداه فطونوبيل) ياك قلتي مغتجي تال السمانة الجاية
مجد : (كسيرا شاد طريق) قضيت لغاراض ديالي ورجعت
جود : فخبار لواليد
مجد : واه دويت معاه شوية هادي ولكن فبالو مغنوصل تال صباح ، فين نمشيو
جود : شوفنا نتا شي قنيية
مجد : واحد عشيري كنعرفو قالي بلي غيديرو شي حفلة جنب لبحر هاد الليلة او عرض عليا
جود : حفلة ؟ ومعالمنيش جدك إيلى فاق لواليد او ملقانيش
مجد : تانتا نقولوليه بلي مشينة لواحد لحفلة
جود : غنمشي هاكدا ؟
مجد : مالك جيتي ناضي غا يالاه
جود : الله اخرج هاد الليلة على خير هادا منقوليك
كملو طريقهوم لعند ديك لبلاصة فين مديورة لحفلة ولي كانت عبارة على قهوة كطل على لبحر ، مستفين قدامها كراسا على الرملة والديكورات لموهيم داكشي ناضي ، لعاصير شراب لي بغيتي كاين ، بنات ودراري كولشي مخالط ، شد جود او مجد واحد الطبلة كيتمنضرو منها ، بعدما سلمو على صحابحوم
مجد : ازاهية امعلم
جود : (عينيه كانو كيضورو تما بدون هدف ، ولكن واحد الصوت كيغني خلاه اهز عينيه فمولاتو بلاما يشعر ، على انغام ديك لمسيقة كانت كتمايل او تشطح ، وعلى لإيقاع كانت كتغني كأنها طير تسجن سنين هادي واخيرا تطلق سراحو)
*وقت غروب الشمس واقف ع البحر بعيد
*عمال بحكيله واشكيله واشرح واعيد
*فجأة لقيتها وكنت فاكرها عروسة البحر
*خارجة من الماية وطلتها اقوى من السحر
*لما شوفتها قلبي دق تلات دقات
#عند ياسمين#
بعدما دوزات نهار كامل فدار قررات تخرج تبدل لجو او تضبر على شي همزة تخرج منها شي صرف ، وعلى غير عادتها ليوم فضلات تلبس ليها كسوة نازلة تحت الركبة ملاسقة ومواسعة ، خلات قوامها يبان دارت ماكياجها كيفما موالفة او خرجات بحالها ، شادة طريق لواحد لبلاصة فلبحر حيت تما فين ضبراتلها على واحد لحفلة تغني فيها بلفلوس ، وصلات لديك لحفلة لي كان قوم ربي لعالمين كامل حاضر فيها ، متسوقات لحد او طلعات فوق ديك لخشبة تغني الأغنية لي طلبو منها تغني ، او فأوج اندماجها فلغنا او تمايلها معا لألحان هاكدا كانت هي كتنسا راسها عالمها آلامها وجروحها فلوسيقى لي كانت علاج روحهى لمرهقة ، حسات بنضرات تاع شي شخص عليها وللحضة حسات بلعالم ديالها توقف ، لجزء من التانية تلاقاو عينيهوم ربما كانت صدفة جمعتهوم ولا حتى قدر محتم عليهوم شكون عرف ، رجعات لغناها ممسوقاش ليه واخة حسات بوجها ولا حمر على اثر تذكرها لديك لقبلة السطحية و الساذجة لي جمعاتهوم لاقل من التانية ، وحدها سالات غناها خرجات مسلتة ومحاولة تتجنبة
ياسمين : (بانلها جود كان جاي قاصد هو وداك لي معاه واحد طبلة خرى قريبة من مكان تواجدها ، ستغلات انشغالو معا صحابو ودازت بزربة هاربة ولكن لسوء حضها تزادحاتلها معا واحد دري) سمحلي
دري : (ملي شافها بخات تكمل طريقها حبسها) فين غادة القطيطة ، طلب السماحة بوحدو مكافيش ولكن نمرتك كافية اولا
ياسمين : (كانت باغة تفك باي طريقة) طلقي نمشي لهلا تسامح ليا نتا
دري : (زاد لاصرار ديالو عليها) ماشي حشومة نتي ضارباني وبغا تمشي علأقل غا شطحي معايا
ياسمين : سمعني نتا راني جاية معا صاحبي عطيني التيساع قبل ميجي
دري : هههههه علاش كتكدبي من صباح ونا شايفك مكان معاك حد
جود : (لي كان حاضيها كفاش كتهرب منو قرر اخليها على خاطرها ولكن شوفتو لداك دري كيمنعها من لمشية خلاتو ميصبرش او مشى تدخل) جاية معايا انا عندك شي موشكيل
دري : جود هههه منيمتا وليتي كتجيب معاك شي بنت لحفلة
جود : كان خاصني ناخد شوارك ولا كيفاش
دري : لا غا جاتني غريبة كفاش جود مصاحب معا هاد النوع دلبنات
ياسمين : كفاش هاد النوع ديال لبنات علاه كيف جيتك بسلامة
لبنت : كي طحبة هادا ماكان ، جود شهاد لمستوى وليتي تنزليه
ياسمين : سمعيني مزيان اهاد عود سبسي راه طالعين ليا لاتخلينيش نحير فيك
دري : ههههههه واع على ماركة علاش طحتي أخاي جود
جود : كتبقى حسن من ختك
دري : خليني محتارمك او قيل عليك ختي اجود ولا غنغلط معاك
جود : هي لتكمشتي وعطيتيها شي شبر تاع التيساع ولا راك عارف شغيوقعلك لضرتي بساحتي مرة خرى منحتاش نفكرك لخبار فراسك ، ونتي زيدي تحركي لهنا
ياسمين : معايا داوي ؟
جود : معا خيالك
ياسمين : دوي معايا بحتيرام راه باقي ماتزادش هادي لي يآمر فيا
جود : زيدي لهنا البرهوشة باركة عليا من دوك لخيطابات تاع لخ*را
مجد : (لي كان حاضي لفيلم من لقطة تاع لغنا تال هاد اللحضة ، طول الشوفة فياسمين قبل ميدوي) مرة خويا شبالك نمشيو نشربونا شي كاس دلعاصير او نبعدو على دبان بنادم من صباح او هوا كيخ*را عنا
ياسمين : شكون مرة خوك نتا عاود عطيني تيساع فين كنعرفك
جود : (زيدها قدامو تا وصلو لواحد الطبلة خاوية عاد ݣلسو تما) شمخرجك فهاد ليل نتي
ياسمين : شدخلك فيا نتا ، واش انا فينما نمشي نلقاك
جود : بلاما تمرضي طاسيلت مي تا لاكارط باقي مدرتيها وسايرة تساراي ليا هنا
ياسمين : جيني نيشن نتا واش راك طايح فيا (مجد فهاد لحضة تخنق بداك لعاصير لي كان كيشرب)
جود : (شاف فيها ديك الشوفة تاع واش من نيتك أبنت لعبد) بنتلك كنشالي نلحجر ولا خارجلي لعقل تا نطيح فيك حفرة نتي
ياسمين : حسن ، خليك بعقلك حيت حفرتي لاطحتي فيها عمرك تنوض (مازادتش معاه لهدرة وخرجات فحالها راجعة لدار)
جود : (بقا متبعها تا غبرات من قدامو عاد رجع راسو راد لبال لمجد لي كان حاضيه) من بعد امجد من بعد ، يالاه نمشيو لشي قنة خرى لخنقة هنا
مجد : مقلت والو يالاه نمشيو
خرجو من ديك لحفلة وبقاو كيتمشاو جنب لبحر مبعدين على ديك لبلاصة تا وصلو لواحد جيهة فيها لحجر لكبير او امواج كيضربو فيهوم ، ݣلسو لهوم فوق وحدة فدوك لحجر
مجد : (هز راسو فسما حاضي نجومها) جود
جود : مكنبغيهاش امجد غابلاما تسولني
مجد : مكنتش غنسولك هاد السؤال ولكن نتا كدبتي على راسك بوحدك
جود : بلا ديك لفلسفة ديالك مجامعني بديك لبرهوشة غا لفقايس
مجد : على خاطرك اسي جود ، عرفتي معامن تلاقيت هاد نهار
جود : معامن شي صاحبك
مجد : تلاقيت بآسيا
جود : آسيا ؟ ديك آسيا لي كنعرف ؟
مجد : (تنهد) ديك آسيا لي كتعرف كانت معا راجلها او ولدها تخايل ولدها تكون عندو ديك عاماين يعني هي قدات تبني حياتها او تكون اسرتها بحالا تاحجة موقعات
جود : مديرش فبالك متستاهلكش ، اوزيد عطا الله حسن منها واخة انا لدابة معرفتش شعجبك فيها
مجد : أودي شغانقولك فاش كطيح فشي وحدة تعيا ماتبان لناس خايبة نتا كتبالك حسن منها ماكاين ، غتولي كتلقا لافعالها تصرفاتها اعذار او مبررات غا باش تقنع راسك بلي كان عندها سبب ، يمكن دبا مكتفهمش شنو كنقولك ولكن منهنا شوي غتولي كتفهم هادشي لي قتلك دبا
جود : يالاه نمشيو راه لبرد ونا عيان باغي نعس
مجد : ههههههه يالاه ، ولكن علاما بالي الخوادري طحتي طيحة خايبة فديك لحفرة بلاما تعيق
جود : (دار راسو مسمعوش او كمل طريقو هو وياه لطونوبيل ، ركبو فيها ورجعو لدار) غتنعس عندي فلبيت بيتك نتا سوارتها عند لواليد
مجد : اوكي انا غندخل ندوش لول
جر باريزتو بسكات لداخل خدا منها شي حوايج او دخل لحمام دوش ، عاد خرج لاقيليه جود نعس او شبع نعاس
~~~~~~~~~~~~~
بعدما رجعات ياسمين لدار طلعات لبيتها نيشن بدلات عليها وهزات طيليفونها مركبة النمرة تاع محسن او مصونية عليه
محسن : (كان تا هو باقي منعسش) الو
ياسمين : هادي انا
محسن : (فرح ملي عرفها ياسمين) كيدايرة لباس عليك ؟
ياسمين : هاد الساعة مزيان ، نتا
محسن : انا دابة راني فلكلية
ياسمين : شمن كلية ؟
محسن : لكلية تاع لبوليس ، عمك غيولي بوليسيه
ياسمين : مزيان ، لغالية قالت بلي غترجع ولكن انا مكنضنش بلي غترجع
محسن : لغالية الى قاتلك غترجع هي غترجع
ياسمين : الى رجعات نصوني عليك
محسن : لا
ياسمين : علاش ؟ مابقيتيش بغيتي تشوفها
محسن : ماشي مابغيتش نشوفها ولكن خلاها واحد السيد كنعرفو ، ماشي غاياجي وقول ختي الى مكنتي قاد بيها لاتسولشاي فيها
ياسمين : ويلى بغات هي تشوفك
محسن : قولها قليك خوك ملي يقدر اهز عينيه فيك غيحضر قدامك
ياسمين : واخ بسلامة
محسن : بسلامة تهلاي فراسك
#غدليه فصباح#
فاقت لغالية معا لوقيتة فاش فاق اكسيل دخلات ليها لحمام او طرفات حالتها عاد هبطات لتحت تشوف لبنات فين وصلو
لغالية : سلام
سهام : وعليكم السلام الالة صباح لخير
لغالية : صباح النور كاين شي فطور
سهام : راه كولشي واجد كنا غا كنستناكوم باش تنزلو
لغالية : درتو لمسوس لإكسيل
شيماء : واه عمرناه ليه
لغالية : مزيان يمكنلكوم دبا تمشيو تحطو فوق الطبلة كنضن كولشي فاق
خرجات من لكوزينة ومشات شدات بلاصتها فوق طبلة علاما سالاو لبنات لحطان او نزلو لوخرين افطرو
اكسيل : (كان اول واحد نزل لتحت ، تحنا عند لغالية بايسها من فمها قبل ويݣلس حداها) صباح النور
لغالية : صباح لخير كي صبحتي مزيان
اكسيل : لحمد الله
صباح : (تمت جاية عندهوم) بابا ، لغالية صباح لخير
لغالية : صباح النور ݣلسي تفطري ، جود باقي مافايق
جود : هاني (مشا تا هو شد بلاصتو فطبلة)
لغالية : (خواتلهوم آتاي فلكيسان) يالاه بسم الله
مجد : (هبط كيتسلت تا وقف على الراس دإكسيل لي كان يالاه جغم واحد الجغمة من آتاي) هادو هوما فعايلك ألواليد داز ليك أتاي بلابيا
اكسيل : جيتي توحلها ليا عاوتاني
مجد : (تلاح عليه معنقو) ههه واخدمتي هاديك الواليد ، ختي لغالية صڤا
لغالية : لحمد الله ونتا كيف داير ݣلس ݣلس تفطر أبعدا
مجد : (مشا ݣلس صباح) النعجة صڤا
صباح : جيتي بعجاجتك عاود
مجد : ضاروري
اكسيل : امتى وصلتي ؟
مجد : وصلت قبل لفجر بشوي
لغالية : اكسيل اترجع لغدا
اكسيل : لا مكنضنش
لغالية : ونتي اصباح
صباح : انا متليتش خارجة ماما مكيناش فالدار
لغالية : هاكداك ، شنو تبغيو لغدا ؟
مجد : مكرهناش شي ݣصعة تاع رفيسة بدجاج لبلدي
اكسيل : او معاها شي ربعمية تاع زرورة ، نوض تجمع عليا قالك رفيسة نفيسة نتا
لغالية : خلي عليك دري ، ندير لخويا رفيسة خاصني غا نشوف واش كاينة عندنا لحلبة
مجد : لعز الخوادرية الرجولة نتي نحبك انا
اكسيل : (عقدهوم فيه) جمع فمك نتا شمن كنحبك ولا كنزعترك
جود : ناري ناري على لواليد كيغير ، لغالية ماهذا
مجد : (باغي يشعل اكسيل) معلوم ايغير او هو واخد هاد لبلارة ، شوف الزين الشوف شعر حرير ، التاويل او لحداݣة (معا كان كيدوي لقا كاس مشير جيهتو ولكن حيت موالف خوا بلكاس) حفضتك الواليد
اكسيل : (مابغاش ايدير عقلو فيه هز راسو وطلع لفوق ابدل باش يخرج)
لغالية : ايوا شتي هانتا قلقتي ليا الراجل
مجد : ههه لغالية تي غا قولي ليا كي درتي تا تزرفتي فهاد الشارف (معا سالا جملتو لقا راسو مخشي فطبسيل او لكوفيتير طالي وجهو
اكسيل : شباليك اعاودليك هاد الشارف ترابي
مجد : (تا جمعها معاه اكسيل لقرفادة عاد حس براسو مزيان) الله يهديك شكون الشارف فينا ، تبارك الله لفورمة والزين
اكسيل : (مد يديه مخربق ليه شعرو) دير عقلك ادحش ، انا غادي دبا بسلامة
لغالية : بسلامة
جود : (شاف فمجد لي كيمسح وجهو) آسيدي ماكترتاح تا كتجيبها فعضامك
لغالية : ههههه راه ولف ياخد باراكتو
مجد : (ضار عند صباح لي كانت غا كتشوف فطيليفونها) آلعمالة شتك ساهي من صباح
صباح : مابقا حد يتأمل
مجد : لعفو قاسك لهبال عاود
صباح : انا غنطلع لبيتي بلاما يصدعني شي واحد خصوصا نتا امجد راني نخرج فيك (طلعات لبيتها سادة عليها)
لغالية : شبغات تصنع هادي عاود
جود : غتلقايها غا شداتها لحالة عاود
مجد : آخر مرة قاتلك ماتصدعونيش ݣلسات فلبيت بلتيام سادة عليها بابا مسكين تخلع كيقول مالها ، لماكلة معندهاش صبر تا عيا هوا يدوز من الشرجم لقا لالاهوم صباح نص فسلعة تاع الدار خازناها فبيتها ودايرة لينا فيها مكتاءبة
~~~~~~~~~~~
حدها دخلات لبيتها سدات عليها وبدات تنقز بلفرحة
صباح : سيفط ميساج والله تا سيفطو (حلات طيليفونها بزربة كتعاودي تأكد واش هو نيت لي مصيفط ليها ، وقبل مدخل تقرا شنو صيفط ليها جمعات معا راسها بتصرفيقة) هداي الكلبة شتك فرحانة ديكپريو مسول فيك ، توݣضي معايا وعطي شويا لعز لراسك او تعطلي قبل متقراي لميساجات باش تباني مشغولة ماشي مسالية قبك ، تي شمن مشغولة ياك انا لي مسيفطاليه طلب لمتابعة ، صافي غا سيفطي ليه طلب لمتابعة نوضي نتي نوضيليه الشان شوي تاع تعفار ، صافي واخة واخة هاني غندخل نقرا شنو سيفط
محسن : °سلام 👋°
صباح : نرد عليه لا لا بلاتي نزيد شوي ألا سلام الله نرضوه بزربة °وعليكم السلام°
محسن : (كان متكي فلبياص ديالو كيبقشش فطيليفون تا لقا طلب لمتابعة فلأنسطا ديالو ، فرح فلول كيسحابلو بلي صباح لي رجعات صيفطات ليه ولكن ملي شاف بلي حساب آخر خاب لأمل ديالو ، ولكن قبل ميرفض الطلب تاع لمتابعة ، قشع ديك لكتابة لي كتكون تحت لپروفيل ولي كانت عبارة على سميت صباح لحقيقية وعيد ميلادها ، محس براسو تا تبسم) هادي نتي الحاجة اوكي (قبل الطلب ديالها او سيفطلها ميساج)
صباح : (طلعات ليها فوق الناموسية وتخشات تحت لكاشة كتسناه اعاود اصيفط ليها ولكن هاد لمرة صونا عليها آپيل ، تلفات السيدة وماعرفات مادير بغات تقطع صدقات مجاوباه)
محسن : °الو°
صباح : احن ألو
محسن : صڤا ؟
صباح : حمد الله
محسن : شخبارك أ أمينة
صباح : شكون أمينة ؟
محسن : ولا خصني نقول صباح ياك
صباح : (عاد سرا معاها لقالب او عرفات راسها تفرشات او عرفها) كي عرفتيني
محسن : (حبس الضحكة تا عيا هو يطلقها) واش نتي مكلخة خلوق ولا يالاه كتكتاسبيه حيت ميمكنش تكوني بعقلك ، هههه كونط جديد او سمية جديدة وتصويرة جديدة واه تبارك الله عليك ولكن باش تكتبيلي سميتك لتحت خاصك تكوني صباح
صباح : مضحكش أصلن انا كنت عارفة
محسن : بصح ؟ هههههههه مزيان
صباح : ماضحكش
محسن : واخ (ماقدش ازيد يصبر او نفاجر بضحك) هههههه لا لا منقدرش ههههههه واع امي كرشي ميمكنش هههه الداكا الداكا
صباح : (مارضاتش اضحك عليها هي تقطع عليه)
محسن بعدما قطعات عليه صباح عاود صونا عليها ولكن قطعات عليه تال الصونيط التالت عاد جاوبتو
صباح : شنو
محسن : تقلقتي مني ؟
صباح : شكون نتا باش نتقلق منك بسلامة
محسن : وصافي راني غا كنت كنضحك معاك
صباح : مزيان ، لاش مصوني عليا ؟
محسن : معندك ماتقوليلي ؟
صباح : شغانقولك ؟
محسن : شي حاجة ولا ؟
صباح : بحالاش هاد لحاجة ؟
محسن : متلن شي اعتذار على داك سوء لفهم لي وقع ديك نهار
صباح : كتسنا مني نعتاذرليك على ديك قلة ترابي لي فيك
محسن : دبا نتي غا قوليلي شكنتي باغاني نقولك باش نبهك تغطي راسك نشيرليك عليه متلن
صباح : ومنعرف غفلتيني داكشي علاش ضربتك (بقات ساكة شوي قبل مدوي) صافي سمح ليا
محسن : شكاديري ؟
صباح : والو غا متكية ، ونتا ؟
محسن : يالاه لقيتيني باغي النوض نخرج عندي واحد لغاراض نقضيه
صباح : ايوا نخليك دبا بسلامة
محسن : بسلامة
بعدما قطعات معاه طلعلها بلي مصيفط ليها طلب لمتابعة فلحساب ديالها لأصلي وافقات عليه او طفات طيليفونها ، او مدات يديها لمجر ديالها جبدات منو لقرعة تاع دوة ديالها كانت اتبداه ليومة ، شربات ليها واحد لحبة منو وبقات متكية حيت داك دوا بحالا كيدروݣيها تزيد شويا تنعس .
فحين محسن بعدما قطع معاها و سيفطلها ليها طلب لمتابعة فحسابها لأصلي ، ناض من فراشو او مشا لماريو خدا منو شي حوايج بدل بيهوم او تم خارج قاصد واحد لقهوة فلوسط تاع كازا ، خداليه طبلة او بدا كيستنا صحابو يلحقو عليه
~~~~~~~~~
بعدما مجد او جود سالاو فطورهوم طلعو لبيوتهوم بدلو عليهوم او تمو هابطين معا دروج
لغالية : خارجين ؟
مجد : واه درنا معا واحد دري نتلاقاو
لغالية : متعطلوش باش تلحقو لغدا
جود : اوكي
خرج هو وياه من الدار او ركبولهوم طونوبيلة جود وكسيراو متوجهين لبلاصة فين التافقو يتلاقاو ، بلاصاو ليهوم قدام ديك لقهوة ودخلو ليها كيقلبو على صاحبهوم
محسن : على سلامتنا ملي جيتو
مجد : (سلم عليه سلام رجولي) قول غا السلام أبعدا
محسن : (سلم تا على جود ، او شدولهوم لكراسة) ايوا اشباب صڤا
جود : هاد الساعة لحمد الله
محسن : كاين شي جديد
مجد : هاد الساعة لجاديد من عندك البوليسي ديالنا
جود : ههه درتي عقلك اصاحبي او دفعتي لبوليس منسالكش
مجد : شمن قسم لاش دفعتي
محسن : فهاد لول راني كنقرا بشكل عاد بعد شوي عاد غندير تخصص لي بغيت
جود : وعلاش ناوي
محسن : الى كتاب داكشي تاع لمحقيقين
مجد : ههههههه واع على لمحقيقين ، رحلتي من سجين الى ضابط
جود : كتكركر بحالي مكنتيش كتكون معاه فاش كيتشد
محسن : دوك شدات والله تا كانو غا ضلم
جود : واه غا ضلم لاقيين عندنا صاك عامر غبرة بيضة وسلم
مجد : ضلم عاد علاه ماشي فاش قلبوهوم لقاوهوم غا ميزينا
محسن : نحلف ليكوم بلي داك شلاهبي تاع باك هو راس لحربة
جود : وراه من ديمة ، بغيتيه اعرفنا يالاه خارجين من واحد لقصارة او يخليها الدوز ملي محطش لينا لغبرة تاع بصح نحمد الله او نشكروه
محسن : زعما داك باك تحفة ههههههه غا لبارح بليل تفكرت داك لبلان لي وقعلي معاه اول مرة ههههههه سيد مكنعرفو مكيعرفني لقاني مقصر معا ولادو جمعني معاهوم او كرمني بحالهوم
مجد : هههههه هاكداك داير لواليد كيربي لكبدة على كولشي
جود : نتا بضبط متدويش كنتي كتشرب او تقيس او مخليني انا وهاد لخليقة مغرقين ، ملي جا علقتي وخليتينا الراس فالراس
محسن : ههههههه واييه فكرتيني طاعت الله غا شرح ليا بلانك هربتي ملي شفتيه ، ولكن ملي دخلنا لداك الديپو لقيناك سابقنا
مجد : جاتني حشومة نخليكوم بوحدكوم ماشي رجلة داكشي علاش مشيت عندو برجلي
جود : أسلݣية هو أسلݣية هو ، هاد لهضرة قولها لشي حد آخر مشي لينا قالك ماجاتنيش نخليكوم تلقاه صيفطهوم ايجيبوك مجرور
#فلاش باك#
فواحد لقنية فداك لبحر كان كل من محسن او جود او مجد ، ݣالسين فوق رملة ولقراعي تاع شراب قدامهوم هوما لي كانو سكرانين تاع لمعقول
مجد : (شاد قرعة فيديه كيشرب او يدوي بحزن ولفواقة شاهدته زيد على كلامو لي كان تقيل اثر شراب لي شرب) انعاودلكوم واحد لبلان هء انا كنت كنبغي واحد لبنت هء درت كولشي على قبلها هء ولكن تعرفو هي شدارت هء
محسن & جود : (مغرقين فشراب كتر منو لݣارو فمهوم ، حدهوم سمعوه شقال هما يدويو فدقة وحدة) غدراتك او سمحات فيك فلوقت لي كنتي محتاجها فيه
مجد : (شاف فيهوم بإستغراب) هء باش عرفتو كنتو معانا ؟
محسن : من صباح ونتا كتعاودنا نفس لقيصة ههههههههه ناري ادراري فين انا هء وشكون نتوما
جود : (قرب عندو مصغر فيه عينيه) هههههههه شكون عرف
مجد : (شهق ليهوم تما و بدا كيحاول إينوض على رجليه) ناري ادراري نسيت مانجيب ليكوش لدراري
محسن : علاه نتا عندك دراري ؟
مجد : نوغمال مو خصهوم ايكونو عندي هء ولا ياكما انا عاݣر غا قولولي لحقيقة منتقلقش
جود : ههههههههه هبيل هدا كيقولك دراري او هو تا لمرا معندوش
مجد : يعني دبا انا ممزوجش
جود : ممزوج ما مصاحب
مجد : (رجع عاود لداك لجو تاع لحزن ديالو) غنعاودلكوم واحد لبلان هء بدا انا
محسن : غيبدا عاود
جود : خليه خليه او قولي دبا نتا سميتك محسن او تويمي ديالك شنو سميتو حسنة ؟ ههههههههه
محسن : شمن تويمي ؟ علاه انا عندي تويمي ديالي
جود : راه ݣالس حداك اصحبي
محسن : ماتقولهاش خباوه عليا (بدا كيحاول إينوض تا هو)
جود : فين غادي
محسن : غادي نتفاهم معاهوم كفاش اخبيو عليا تويمي ديالي زيد تا نتا معايا
مجد : (بعد ماسلا قصتو بغا يعاودها من جديد تا بان ليه اكسيل جاي من بعيد) دراري كاينين جوج تاع بابا
محسن : (ضار لجيهة اكسيل او بدا كيشيرليه) تا نتا خباو عليك يالاه نمشيو ندعيوهوم
مجد : (داك شوية تاع لعقل او جهد لي بقا عندو بقا كيعافر تا وقف على رجليه او مشى هرب)
اكسيل : (الى قالولكوم زعاف تاع لمعقول طالع ليه ، ملاميحو ضلامو وقف عليهوم بطولتو مخنزر) هادو هوما فعايلك اولد تبي أدوي جاي تسكر عليا هنا بحال زوا*مل
جود : (عارف راسو قودها ولكن راه مكانش صاحي باتاتا)
محسن : (شايط فيه صواب ، هز ليه واحد لقرعة تاع شراب او مدها ليه) هاك تشرب هاك راه لخير موجود
اكسيل : (هز يديه تال سما ونزل عليه بواحد لبوكس تا طيحو لارض) زايدها بلعراضة
محسن : (بدا كيبكي) ناري امي تعميت جود مابقيتش كنشوف
جود : واحل عينيك آصݣع راك سادهوم
محسن : (حل عينيه او دوا فرحان) ياحليلي رجعلي الشوف نتا خاصك تدفع لطب اصاحبي
اكسيل : (قرب عند جود عايف ريحة شراب او لݣارو لي فيه شنق عليه او دوا) مابغيتيش دير عقلك اشماتة ، نبهتك او عاودت نبهتك والصيتك او قتلك طريق لحرام بعد عليها ، ولكن نتا غا مازايد فيه نتا وداك تامل لاخر ولكن والله لا فوتهالكوم ، بغيتو غا فعايل طحاب انا مولاهوم (عطاه تا هو واحد لبوكس لوجهو ، عاد ضار عند دوك جوج رجال لي كانو صحاح او عامرين) هزو عليا هاد جوج توامل منهنا نمشي نجيب داك بحلول التالت (خلى دوك جوج رجال مشاو هزو جود او محسن ، ومشا هو كيجري تابع داك لاخر)
مجد : (كيجري ويطيح وشادش راسو ، ولكن حدو سمع شي خطوات من موراها ضار قاشع اكسيل كيجري تابعو ، ماعرف باش تبلى وعطاها لجرى محبسش او هو كيغوت) والله الواليد تا غا جغمة لي شربت خليني غا نشرحليك
اكسيل : (تا هو كيجري موراه بجهد) وا غاهرب اولدي وفلت بروحك حيت الى مشيت تا شديتك الشمس متصبحش عليك
مجد : (جرى تا عيا ولكن معامن هوا تا فاش كيكون صاحي اكسيل كيشرو لاعساك دبا ملي سكران ، ماحس براسو تا جا طايح لأرض على ضهرو ، واكسيل شادو من واحد رجل او كيجرو فوق الرملة) طغمتي الواليد طغمتي تحردات
اكسيل : (حبس او تحنا عندو هازو على كتافو غادي بيه لواحد ديبو كان قريب من تم ، حطو فوق لكرسي وربطو بواحد لقنبة مزيان قبل ميضربو لكرش) هادو هوما فعايلك اقليل لعفة شقتلك انا ؟ دوي شقتلك
مجد : (ولا كيبكي او يزاوݣ) مانعاودش الواليد راه غا جغمة لي شربة
اكسيل : داوي على الجغمة تاع لفيل ولا تاع جمل الكلب ولكن تا يلحقو عليك هاد جوج عاد ندوي (ماهي الى لحضات قلال تا دخلو دوك رجال هازين معاهوم جود او محسن حطوهوم فوق لكرسي وخلاو اكسيل اربطهوم بيديه) اوا دبا ملي تجمعتو الحلالف بتلاتة نبداو لقصارة
محسن : لعز العميم كاينين الشيخات ؟
اكسيل : الله أودي مغتبقاش تسول فشيخات ݣاع نهئيا
محسن : ناري زاهية
اكسيل : مناش بغيتوني نبدا
محسن : أنا أنا نبدا
مجد : (شاف فيه واحد الشوفة فشكل) كنت عارفك بلي نتا هو الصديق لحقيقي
اكسيل : انا مكنديرش لفرزيات داكشي علاش فكل لعبة غتشاركو بتلاتة ، نبداو منك نتا اسي لفاهيم ، خمسة زائد خمسة شحال كتساوي
مجد : وايلي ساهلة 10 ، شوف اعمي متسهلش معايا حيت أنا صاحب ولادك صافي
اكسيل : هه لجواب صحيح
محسن : (مجا فين اعاود يدوي تا لقا اكسيل نزل عليه بخمسة تاع لبونيات تا رعف) ناري ادراري ضو كيطفا ويشعل
اكسيل : ندوزو دبا لجود جوج زائد تلاتة شحال
جود : خمسة (تا هو كلاليه خمسة تاع لبونيات)
اكسيل : او دبا لكتكوت ديالي خمسة فواحد كم تساوي
مجد : 0
اكسيل : مطور زعما ، ولكن ماشي معايا
مجد : (خدا من اكسيل ستة تاع لبونيات) سادسة لاش الواليد
اكسيل : حيت محافضش جدول الضرب ، او دبا ندوزو لشوط التاني (قرب عند محسن عاود) ذكر ليا لمكونات تاع لويسكي
محسن : معارفش
اكسيل : ماعارفش او كتشربو لا لا وكتعرض على الناس من لفوق ، ولكن معليش عمك اكسيل كاين (هز واحد السمطة ومعا كل مكون كيقولو كينزل عليه بشحطة ومحسن غا كيغوت او يبكي تا سالا ليه لماقادير) على سلامتك هانتا عرفتيهوم دبا ، او دبا نوبتك اولدي جود عاود قولي هاد لمكونات لي قلت
جود : (أصلن باقي شادة فيه الدوخة تاع شراب) لما
اكسيل : (رجع كيعرضهوم عليه او كيف لعادة معا كل مكون كياكلو شحطة تا سلا) و اخيرا نوبتك امجد شنو
مجد : (مخلاهش اكمل او بدا كيعرض عليه لمكونات تاع لويسكي)
اكسيل : ههههه امانسالكش حافض
مجد : معلوم
اكسيل : ولكن ماشي هادا هو السؤال لي كنت غنسولك
مجد : هاء ؟
اكسيل : يعني دبا نتا جاوبتي خطء كنت باغي نسولك على مناش كيصاوبو ماحيا معليش مرة خرى (نزل عليه بسمطة كيما دار لدوك جوج لي قبل منو ، تا سلى هو يمشي يجيب سطولة تاع لما خواهوم عليهوم) باش توݣضو معانا شوي ، كبرت او عجبكوم كر*كوم قلتو آجي نشربو باش نترجو ياك او نساو لهم ، ومعلى بالكومش بلمعصية لي نهاكوم ربي عليها ، بغيتو غا شراب او لݣارو ولقصاير تا منكونش باقي فلحياة ديك الساعة ديرو لي بغيتو (مشا هز واحد لكيسان فيهوم شي خيلوطات قرب عندهوم نشريها ليهوم بدر)
دراري حدهوم شربة داكشي حسو لعافية شاعلة فحلقهوم او فلهوم باغين احكو مالاقيينش باش ، تا اكسيل محبس هنا مشا هز لوراق تاع لحريݣة (ديك لعشية لي كدير لحكة) لي كان معسهوم شوي او كلاهما ليهوم لصحتهوم طبعا بعدما كان قطع ليهوم حوايجهوم فاش كان يالاه جابهوم لديبو مخليهوم غا بلبوكسو ، هنا او فهاد لحضة دراري تجمعات عليهوم الدوخة تاع السكرة او لضران تاع الصحة بسباب السلخة تاع السمطة ولكن لي زاد جهلهوم هي ديك لحكة لمجهدة لي شعلات فصحتهوم كاملة ، ولاو غا يطلبو او يزاوݣو
جود : لعار الواليد لما غا فكرنا غا نحكو راه لعافية شعلات فينا
اكسيل : داكشي لي بغيت تا انا تشعل فجدكوم لعافية باش تحيد ضسارة ، اكسيل كيولد رجال ماشي شمايتة ودراري لي يعصاو الله ونا باقي فلحياة ندبحهوم او نقطعهوم طراف طراف
مجد : لعار أبا والله ما باقي نعاودو مانضوروش بجيهتو
اكسيل : هاد لهضرة كنتي تفكر فيها قبل ، اما دبا فات لفوت انا اكسيل ولد لحاج محمد آيت اوسو لي دمر على فلوسو ريال بريال فلحلال ايجيو طحاب بحالكوم اخسرو ليه فلوسو فلحرام هاديك هي لي متكون سركوم تبقاو هاكدا
محسن : (صبر تا عيا هو ينفاجر) هوما ولادك ونا شكانجيك تا دير فيا هاد لحالة شغلك نشرب ولا نݣلس كتصرف عليا
اكسيل : (قرب عندو جامعها معاه بتصرفيقة قبل ميتحنا عندو يهمسليه فودنيه) قليل ترابي عند بالك اتلقاها بسكرة ولݣارو ، والله او ماترجلتي ماعايا او جمعتي راسك تا لاتر ديالها هو لخر مانخليهش او ديك الساعة شوف مناش تلقاها
محسن : (ضار شاف فيه صاعر) كتعرف ختي فين كاينة
اكسيل : (شاف فيه باستهزاء) ههه ماشي غايجي و قول ختي الى ماكنتي قاد عليها ماتسول ماتقلب عليها اوليدي ، ختم خاصها راجل ماشي ذكر كيسكر (بعد عليه اكسيل او شاف فدوك رجال ديالو قبل ميمشي فحالو) ماتعطيو لهاد لكلاب لا ما لا ماكلة لا غطا وكل نص ساعة دهنولهوم بهاد لحريݣة ، انا غنمشي دبا (خرج مخليهوم بوحدهوم)
جود : (سخفان مابقا عندو جهد) واش مشا
مجد : مشا ومامشا تا هلكنا
محسن : واناري على راجل واناري مي ، آشداني لشي شراب لي ناكل عليه هاد لقتلة دلكلاب
جود : شكوناهو شراب
مجد : حسن ليك غا متعرفوش نساه
محسن & جود & مجد : (ضرب طم لدقائق قبل مينفاجرو بضحك) هههههههههه كترت لهم كضحك
مجد : كترت لحريݣة شمن لهم
#نهاية لفلاش باك#
محسن : كان لقاء مليء بالذكريات ، خلانا تلتيام فداك لبرد او ضلام لا ماكلة لا ما غا لحريݣة
جود : ولكن عفا الله من بعدها دقة بطلة
مجد : ههههه نعقل ديك سيمانة كاملة لي تبعات دوك تلتيام مكاين غا قيام ليل او اخوتي في الله
محسن : ولكن الصراحة دار فينا خير كون بقينا متبعين دوك لقراعي ݣاع منطفروه ، اوا جيتو لهنا عوطلة ولا غتبقاو هنا نيت كيما قلتولي ديك نهار
جود : أخاي رحلنا كاملين لكازا
محسن : حسن نتا قربتي تخرج ياك
جود : بقالي غا هاد شهرين او هاني ساليت
مجد : عاد غتبدا تمارة تاع لمعقول سطاجات او زعتر
محسن : شفتي نتا لراسك شي شركة دوز فيها سطاج تما فوجدة
مجد : أخاي كدفع لشي شركة كيقولوليك خصاتك خبرة او لهبرة خصها سطاج فهم تسطا قلت نشوفلي هنا فكازا نديباني وصاف
محسن : أخاي داكشي لي عطا الله ماعندنا مانديرو
جود : (شاف فالساعة) يالاه أخاي محسن نخليوك دبا
محسن : الله ايعاونا تا انا خصني نمشي
مجد : نتلاقو ان شاء الله مرة خرى
محسن : ضاروري ، بيناتنا الطيليفون بسلامة
جود : بسلامة
مشاو دراري بحالهوم لدار ، فحين محسن مشا لݣاراج ابريكولي فيه شويا باش يلقى باش يتحرك او يديپاني
لغالية : (بانولها دراري داخلين معا لباب) رجعتو
مجد : (ريحة رفيسة دخلاتليه لنيف) لعز الخوادرية ريحة رفيسة كتشهي
جود : نتا واش كتوحم ؟ ياك كنتي فهاد لأواخر فلبلاد ماشبعاتكش مك طياب تا جاينا مخصوص
مجد : كون كليتي لماكلة تاع رابحة ݣاع متحل فمك
لغالية : شوف لمسخوط كتعيب فماكلة مك بلعاني
مجد : الله يهديك شمن كنعيب فماكلتها ، واش عمركوم شتو دجاجة مغتاصبة ؟ راه بعينية هادو حطاتلي رابحة دجاجة مفروعة او دم باقي كيغرج منها لا ولواعرة كتقولي سبحان الله هاد دجاجة حمرة ، واراها مطيباش شمن حمرة
لغالية وجود فديك اللحضة طاحو لأرض بضحك
لغالية : سيرو سيرو بدلو عليكوم او غسلو يديكوم باش نتغداو علاما سقيت انا لݣصعة
جود : صباح خرجات من بيتها
صباح : هاني هنا
مجد : (خربق ليها شعرها) تا كنا غنضربو لفݣد فلكوزينة نشوفوك واش كشطيها بحال ديك لمرة
صباح : عفا الله عما سلف
جود : خلاها با وباك عمر الشيخة تنسا هزة لكتف
صباح : طلع سربي قبل منغبر تا ديك لݣصعة
طلعو دراري لبيوتهوم بدلو عليهوم او نزلو لتحت اضربو رفيسة على ݣلبهوم
#عند ياسمين#
ليومة مخرجاتش من دار خصوصا انو مها طلباتها متخرجش ، داكشي علاش ݣلسات غا فبيتها تا شداتها لقنطة هي تهبط عند مها لكوزينة بصاية قصيرة وسيفيطمة ، تشوف فاش تعاونها
مريم : هبطي فيك جوع
ياسمين : لا ، كاين مانديرلك ؟
مريم : ههه علاه ابنيتي نتي فين كتعرفي تا تسلقي لبيض غا تعاونيني
ياسمين : وانتي لي معلمتينيش
مريم : لكوزينة ماعندها باش تنفعك ، كون كانت تنفع كون نفعاتني قبل منك ، حقا فكرتيني تلاقيت معا واحد صاحبتي استادة وسولتها على حرة قاتلي تا هي كتنفع
عبد الله : ماشي حرة لي مكتنفعش راه بنتك لي مكتنفع لوالو
كلتوم : لاواه لاواه اوليدي بنتي ياسمين الزين او صواب خاص غالي يعرفلها وصاف ، بنتي مريم وجد لغدا ولا باقي
مريم : راه واجد خص غا ضياف ايجيو
ياسمين : شمن ضياف هادو
كلتوم : صاحب باك او ولدو ومرتو ابنيتي
معطاتش ياسمين اهتمام لامر هاد ضياف بقات ݣالسة شوية معا مها تا جاو دوك ضياف او حطولهوم لغدا وݣلسو كيتغداو معاهوم
ياسمين : (لي معارتش باها اهتمام خصوصا انو عارفاه معصب بسباب لباسها ، ولكن لي برزطها فدماغها هو ولد داك صاحبو لي من صباح او هو كيشوف فيها بوقاحة)
مريم : (رضات لبال لداك دري هي توحل ليها دغمة خافت تدوي يصدق جامعها عبد الله هي وبنتها ، ولكن لداخل ديالها مكرهاتش تقبليه عينيه بلموس لي فيديها) ياسمين بنتي الى كنتي شبعتي طلعي شوفي خوك يوسف راني خليتو ناعس نخافو يكون فاق او مالقا تا حد معاه
ياسمين : (لقاتها من لجنة والناس حطات فرشيطتها وطلعات عند خوها لبيت تݣلس معاه ، تكات حداه هو لي كان ناعس او مكمش بلبرد حيت تحيدليه لغطا ، غطاتو وبدات كتربت ليه على ضهرو) والله اخويا كون كنتي بنت ماتنعس هاد نعسة لي ناعس دابة ، تلقاك ناعس او خايف لا تمشي عليك مك او يلقا باك طريق ليك ، ولكن من زهرك تولدتي دري وخليتي عبد الله لي مكيهز تا شوفة فبناتو ، يحطك فوق راسو ويبقى يلعب معاك او يراري لمخيرة ليك او الشايطة لنهيلة اما تا انا معارفنيش
بقات ياسمين متكية حداه تا غفلها نعاس يوسف فاق وعيا ميلعب ليها فوجها وتقول واش فاقتليه تا جات مريم عندو هزاتو وهبطات مخلية بنتها ناعسة ، ومفاقت تا فات لعيشة طلعات لبيتها ديك الساعة نيشن تبدل عليها تخرج ، وقبل متحيد شي حاجة من حوايجها حسات بيد محطوطة فوق خصرها ، تكوانسات او طلعات معاها احاسيس تاع ذكريات مؤلمة ، بجهد لي عطاها ربي دفعات عليها تا ختل توازنو
ياسمين : (شعلات ضو لي كان مطفي) واش نتا مريض تسطيتي آش كدير فبيتي ولاش مقرب ليا آدوي
دري : كالم طوا انا مشاكس واش كاينة فلبيت بلغلط قستك
ياسمين : ملي بلغلط خرج عليا راه بيتي هادي
دري : (زاد قرب منها تا حاصرها معا لحيط) دايرة ليا فيها ممسوقاش ونتي قبيلة فطبلة محيدتيش عينيك عليا وزيد لباسك او تصرفاتك دبا شنو بغيتيني نفهم منك
ياسمين : (كانت كتحاول تبعدو عليها) واش نتا مخور فدماغك ولا شنو كفاش محيدتش عينيا عليك زعما راني معجبة بيك كنغريك ؟ هههه لا لا نتا قطعتي لوراق بعد عليا شكون حاشاهاليك بقاونا غا توامل
دري : (فهاد لحضة مرضاش او طلعليه دم نيت نزل عليها بتصرفيقة ، وبما انو قوتو كتفوق قوتها مادارلها فين تا تحل فمها تغوت تا سدليها فمها بيديه ، فحين ليد لوخرة كانت كتحاول تبت ليها يديها باش متحركش ، وبلا حتى ذرة رجولة نزل بفمو لعنقها كيشم ريحتها او كيبوس عنقها)
ياسمين : (دموع خانو عينيها مهما كنتي بنت قوية قبيحة صامضة هاد اللحضات كتستنزف قوتك ، احساس الضعف الاشمئزاز كره الذات كان هادشي باش كتحس ، آخر نقطة تاع جهد بقات عندها هزات رجليها تال سما او شبرات معاه بين رجليه تا بعد عليها ، واخة كاملة كترعد هزات ڤاز او شخشخاتو ليه فوق راسو ولكن لسوء حضها مقاسوش ، وقبل ميعاود اهجم عليها غوتات بأحر جهدها كآخر محاولة ليها لنجاة) وا عتقو الروح اعباد الله ، ماما
عبد الله لي كان ݣالس معا صاحبو سمع داك لغوات هو ولي معاه او طلعو كيجريو لبيت ، بقاو الزاج مشتت فلأرض او ياسمين غا كترعد ودرب واقف عادي بحالي مواقع والو
مريم : (جرات عند ياسمين مخلوعة) ياسمين مالك أبنتي شواقع
ياسمين : (ستجمعات شجاععتها) هاد لحمار لقيتو فبيتي وبغا يتعدا عليا
ماين دري : كفاش ؟ واش بعقلك أبنتي ، ولدي قولي شواقع
دري : قتلك بغيت نرتاح شوي او نعتولي لواحد لبيت لفوق انا تلفو عليا لبيوتة او جيت لهاد لبيت أو نعست ، ملي فقت لقيتها كتهرس فلڤاز او كتغوت قربت عندها نشوف مالها وبدات عاود كتغوت عتقو الروح عتقو الروح
ياسمين : تلفاتلك لبيت ديك لكدبة قولها لشي حد آخر نتا كنتي باغي تعدا عليا
عبد الله : قطعي حسك
سليمان : خلي لبنت تشرحنا راه ميمكنش تجي وتقول بغا يتعدا عليها غا هكداك
صاحب عبد الله : دبا كتقولو بلي ولدي ممربيش غيتعدا على بنتكوم فبيتها ؟
ياسمين : إيه ولدك قليل ترابي داخل عليا لبيت أو باغي يتع…(قبل متكمل هضرتها لقات عبد الله جمعها معاها بتصرفيقة)
عبد الله : راه قتلك زميه ، شتي دري قليل لعفة بحالك اهجم عليك شكون عرف شدرتي ليه
ياسمين : (سمعات فودنيها صوت تاع تهراس يمكن صوت قلبها ولا امالها لي تشتت للمرة لألف من طرف باها ، باها لي كان خصو يكون السند او الدرع ليها هو اول واحد كيضربها) هههه دبا انا لي غالطة ياك مكانش خاصني ندخل لبيتي ياك
ماين دري : يالاه نمشيو مابقا عندنا مانديرو هنا سمعنا عليك قلت لحيا ولكن مكناش كنقولو بلي وصلات بيك تال هاد الدرجة شوف غا شنو لابسة ومابغاتش اتعداو عليها
مريم : (صبرات تا عيات هي تنفاجر عليها) كاين شي قليل لعفة قد ولدك بنتي بزاف عليكوم كتسمعو ، ولدك لي عينو زايغة من لغدا وهوا حاط عليها لعين ونا كنسرطها ونقول دبا يحشم على عاراضو ، بنتي تلبس لي بغات مشغل حد فيها ولدك اجمع عينيه عليها ، ممنحقوش كتفهمي ياشيبة لعاصية
عبد الله : (غوت) مريم سكتي
مريم : مساكتاش تال هنا وبراكة قلب هاداك لي عندك ولا حجرة بنتك مايتة بلخلعة كاملها كترعد او صفرة ومتسولها تا شواقع متيق لخانزة او ولدها ومخلي بنتك لي من لحمك او دمك اشماتة
عبد الله : (هز يديه تال سما او نزل عليها لحنك) قطعي حسك لانني لا هي حسابكوم من بعد (ضار عند صاحبو) مسحها فيا راك عارف لي كاين
نزل معا ضيافو كيبرد معاهوم فحين مريم او بنتها سدو عليهوم فلبيت ماحلوش تا صبح صباح ، عاد خرجات مريم من بيت بنتها وعينيها منفوخون بلبكا دخلات لكوزينة على سعدها او وعدها توجد ليهوم لفطور
ياسمين : (فاقت من نعاسها مفزوعة خايفة ضارت تشوف فين مها مالقاتهاش زاد خوفها أنو باها يكون دارلها شي حاجة داكشي علاش هبطات كتجري لكوزينة ، لقاتو يالاه دخل على مريم لي كانت مقنة ومخلوعة)
عبد الله : مشوهاني اطحبة معا صاحبي نتي وديك لكلبة تاع بنتك واش باغاني نقتلك أدوي (حدو بغا يمد يديه عندها لقا ياسمين واقفة قدامو)
ياسمين : تقيسها نسيفطك فين تربا ولا ياكما يسحابليك ماعندها لي يحامي عليها
عبد الله : البرهوشة تا نتي وليتي تهزي عليا
ياسمين : (ملي شافتو مقرب منها هزات واحد جنوية كانت حداها او وجهاتها ليه) تقرب ميعجبك حال
مريم : الله يهديك أبنتي طلقي لموس باك هادا الله يرضي على بنتي
ياسمين : ما باش كتسمعي مكيشرفنيش نكون بنتو ، غتقرب خطوة وحدة اعبد الله والله تا تلقا مصارنك قدامك ، حاكر عليها حيت ماعندها لي يحامي عليها ، راني باقي عايشة مناش باش نخليك دير فيها مابغيتي سمعتيني
كلتوم : (دخلات لكوزينة مخلوعة هي وسليمان) بنتي شكاديري حطي لموس اتجرحي راسك
سليمان : الله يرضي على بنتي لما غا بلعقل
ياسمين : (نفاجرات عليهوم) خليتو لمي شي عقل انا قتلكوم عطيوني شي شبر تاع التيساع انا وميمتي مابغيتوش ولكن والله ثم والله مابقيت غنسكتليك اعبد الله ، كيما دخلت لحبس او عاودت على دوك توامل لي قبل منك ، فهاد لمرة غندخليه على ضهرك كتسمع ، ولحبس على قبل مي نزاهة حكرتي عليها شحال من عام هادي لقيتها مقطوعة من شجرة لاحنين لا رحيم او درتي فيها مابغيتي ، ولكن ماشي منهنا لقدام كتسمع فوجها سرط فعايلك او قلت ماكاين باس ولكن والله لا عاودت فلتهاليك كتسمع غنخرج من هاد الدار او غنخرج معايا ميمتي وخوتي كتسمع
عبد الله : ماكفاتكش الكلبة الشوهة تاع لبارح باغة تزيديلي شوهة خرى باغاهوم ايقولو عليا جرا على مرتو او ولادو هاديك هي لي ماتكونش ليك لانتي لا مك
ياسمين : ههههههه الشوهة باقي ماشتي الشوهة تاع بصح اعبد الله
عبد الله : شمن شوهة خرى بقاتليك كولشي درتيه
ياسمين : باقي ماشتي والو الى ماضحكت فيك لعادي ولبادي وخليتك ديما حاني راسك بين الناس راني منتسماش كتسمع ، والله ثم والله مانخرج من هاد الدار غايلة جبتليك لفضيحة لكبيرة او ضربتليك طر معا لي يسوا ولي ميسواش ، ديك لبنت لي كنتي كل ليلة تشكي لربي تموت باش او يرزقك الله فبلاصتها دري ، عند رجليها غتركع تطلب او ترغب ولكن ماشي باش تسمحليك باش متصفيهاش ليك ، روحك اعبد الله أنا لي غنديها بيديا ونوز عليك باقي يامي فلحبس او هانتا غاتشوف
شدات ياسمين فيد مها تا خرجاتها من لكوزينة عاد لاحت داك لموس من يديها او تمت خارجة عند موطورها ركباتو ومشات مبعدة تكمي وتبرد لمزاج او تمنضر فلبحر وهي غا ساهي فيه ، وألف مطرقة ومطرقة فراسها كيدقو
أيام قلال دازو بعد داكشي لي واقع ، ولي مكان فيهوم تا حاجة جديدة من غير صباح او محسن لي ولاو كيدويو تقريبا يوميا واخة مكيقولو تا حاجة من غير كي دايرة لباس لباس او صاف ، ولكن واخة هاكداك صباح ولفات على لاتصالات ديالو
صباح : (كانت ݣالسة هي واكسيل او مجد او جود او لغالية فوق لفوطويات كيشربو فاتاي) بابا غنمشي لكازا هاد لعشية نݣلس معا ماما شوي
اكسيل : واخ تبغيني نوصلك ؟
صباح : لا متحتاجش غنعيط لطاكسي يجي يديني
اكسيل : لا أنا غنوصلك ولا واحد من خوتك اوصلوك
لغالية : ميحتاجش انا غنوصلها معايا غيخصني نمشي لكازا تا انا
جود : الى كانت شي صخرة بلاما تعدبي راسك غنمشي انا ومجد نتسخرو ليك
لغالية : لا ماشي سخرة انا غنمشي نشوف عئيلتي
مجد : علاه نتي منهنا الغالية
لغالية : واه علاش مكنتيش عارف طسيلتي كاملة كاينة هنا
جود : الصراحة تا انا مكنتش عارف خصوصا انك عمرك قلتينا غتمشي عند عئيلتك فهاد ربعسنين ولا دويتينا على كازا
لغالية : هههه مكنتش كنسخا نخلي باكوم بوحدو او نسافر
اكسيل : (طلع فيها حاجب او نزل لاخر) مكنتيش كتسخاي دبا وليتي كتسخاي ولا شنو
لغالية : (حولات تغير لموضوع) نمشيو دبا اصباح ؟
اكسيل : معندك فين تمشي جاوبيني أبعدا شبلانك
لغالية : ههههه راني غا ضاحكة معاك احياتي انا نسخا غا خصني نمشي نشوفهوم او صاف
جود : نخليوكوم دبا حنا
اكسيل : فين غا ديين تا نتوما بسلامة
مجد : غنشدو طريق لمراكش الواليد عندنا شي غرض تما
اكسيل : غتعطلو ؟
جود : غا واحد تلتيام او نرجعو
اكسيل : الله اعاونكوم طريق السلامة (مشا جود او مجد طلعو لبيتهوم هزو باريزاتهوم او هبطو فحالهوم)
لغالية : نطلعو تاحنا نبدلو باش نمشيو
طلعات صباح هي لولة ومجات لغالية فين تلحقها تا جرها اكسيل عندو مݣلسها فاق فخاضو او محاوطها بيديه
اكسيل : (خشا راسو فعنقها) شبلانك نتي
لغالية : مالي أنا
اكسيل : (راسها بوسة خفيفة فعنقها قبل ميهز راسو كيشوف فيها) باغة تخليني بوحدي فدار ماشي حشومة
لغالية : ههه مغنتعطلش دغيا غنرجع
اكسيل : متعطليش دراري مغيكونوش فدار
لغالية : هههههههه غنجيب معايا بنت خويا لدار
اكسيل : ياسمين ؟
لغالية : ياس ياسمين
اكسيل : شنو بالك ندوزو هاد نهار راس فراس او غدا نجيبو بنت خوك
لغالية : عرض مغري ولكن مرفوض
اكسيل : مغتندميش ؟
لغالية : لاء مغندمش ههههه او دبا طلقني خليني نمشي نبدل حوايجي غنتعطل على صباح
اكسيل : وايلي نطلقك غا هاكداك شنو لمقابل
لغالية : لمقابل هو الشوهة الى جات بنتك او شافتنا
اكسيل : (متسوقلهاش او مد يديه مور عنقها جارها لعندو و دامج شفايفهوم معا بعضهوم ، كيبوس فيها ويعاود ماساخيش اطلقها)
لغالية : (تا هي دخلات معاه فلجو ولكن حدها سمعات شي تقرقيب طرطقات عينيها فيه كتحاول تبعدو عليها ، ولكن هيهات ما طلقها تا كمل بوستو على خاطر خاطر) واش تسطيتي كون جات صباح ولا وحدة فلبنات شافتنا
اكسيل : شوفي تحرميها فجدي لباب متعتبيهش تݣلسي حدايا
لغالية : (ناضت من فوقو كتقاد فحوايجها) قاسك لهبال عاود
اكسيل : قايسني الشوق او لغرام
لغالية : الله اشافيك ازين ديالي (خلاتو ݣالس فوق لفوطوي او طلعات هي لبيتها بدلات عليها بزربة وهبطات عند صباح لي كانت كتسناها فطونوبيل ، وكسيراو غا ديين فحالهوم او مخليين اكسيل بوحدو)
صباح : وصليني غا حدا ديك جردة لي حدا الدار او هبطيني
لغالية : اهيتا شتك ضايرة بلحالة ياكما شي موعد غرامي هادا
صباح : الله يهديك شمن موعد هادا واش معا لحجر ولا شجر
لغالية : معا مول لاپيلات تاع ليل اسليحفانة
صباح : (طرطقات فيها عينيها) الالة مكتفلتي تا وزة
لغالية : احياني عليك تي هههههه اكسيل كيسحابلو دوا هو لي خلاك مزيانة هاد ليامات معارفش بلي مول لاپيلات
صباح : اسبق ليا لخبار ارزيه فشبابو
لغالية : غتلاقاي معاه فهاد ليامات
صباح : اويلي لا شمن نتلاقا معاه ونا مكتربطني بيه تا علاقة وزيد معارفة عليه والو
لغالية : دوك لاپيلات كاملين او معارفة عليه والو او مبيناتكوم والو ؟
صباح : كنضلو غا سلام صڤا سلام صڤا تا طبنا
لغالية : هههههه تلقايه غا باقي مزعم ولكن ان شاء الله عرسك فهاد الصيف ، غا هو لي نوصيك خلاتها جداتي الله ارحمها فهاد نهار ، دي وجيبي معاه فلكلام ولكن تقابيك شديهوم عندك او حضيهوم
صباح : شمن تقابي هادو
لغالية : فمك متلن تقبتك لوخرة متلن
صباح : اراك خيبرة هادشي فخبار لواليد
لغالية : تي شمن فخبارو علاه ماشي هو لي علمني ، اما انا راه كنت تا سلام بدرع باش كنقولو لخويا ولكن منهار عرفت داك شلاهبي تاع باك ونا كنكتاشف فلاسرار
صباح : لا هادو ماشي فعايل لواليد
لغالية : سايرة نكدب عليك أنا كولشي عارفو تا من كوية جرانة عارفها
صباح : كوية جرانة ؟ كي كيديرو ليها
لغالية : منبغيش نحرق عليك خلي تا تجربيها وتعرفيها
حطات لغالية صباح حدا ديك جردة لي قاتلها وكملات هي طريقها لعند دارهوم ، بلاصات طونوبيلتها فالراس تاع الزنقة وخلطات منها كتمشا بالنخوة خصوصا انو تقليدي كيجي معاها فن ، او هي فطريقها دازت لحانوت تاخد منو شي سقاطات لدراري
لغالية : عمي لعربي عطيني عافاك شي سقاطة لدراري شي ضانون شي شكلاط شي باسطة
لعربي : (كان راجل كبير راسو شايب صغر فلغالية الشوفة قبل ميدوي) لغالية بنت سليمان لا ؟
لغالية : (تبسمات ليه) ههه هي أنا اعمي لعربي
لعربي : الله يا بنيتي منهار تزوجتي معاودنا شفناك
لغالية : غا معا شغال اعمي لعربي راجلي ماشي من كازا داكشي علاش
لعربي : داكشي لي كاين نيت ابنيتي ها تقدية ديالك
لغالية : شكرا (خلصاتو فرزقو او مشات فحالها هازة دوك الساشيات معاها وغادية لدار واليديها ، دقات عليهوم و تسناتهوم تا حلولي ليها)
كلتوم : (ماقداتها فرحة ملي حلات لباب ولقاتها لغالية) بنتي رجعتي
لغالية : (كتدوي معاها عادي ولكن ماشي بودية) السلام
كلتوم : وعليكم السلام أبنتي دخلي دخلي متبقايش برا
لغالية : (دخلات لداخل او ݣلسات ليها فالصالون) فين ياسمين ؟
مريم : (دخلات عليهوم لصالون هازة يوسف او جارة معاها نهيلة وموراها سعاد هي ولادها أمين او يسرى) لغالية لباس
لغالية : لحمد الله هاد الساعة
يسرى : نتيا تاع ديك نهار ياك ؟
لغالية : (جراتها لعندها كتبوس فيها هي ونهيلة) عمتك انا ازويونة ديالي معقلتيش عليا ، مريم فين ياسمين
مريم : راها أختي فبيتها هاد ليامات كاملين مكتخرجش منو
لغالية : وقعات شي حاجة فاش مكنتش
عبد الله : (كان داخل عليهوم هو وباه او خوه) كترت لفشوش لخاوي وصاف ، مطيحة ليا لباطل على ولد صاحبي
لغالية : (ردات لبال لمريم لي دموع تحجرو فعينيها او شادة راسها غا بزز) يعلم شواقع ليها ولكن لومة ماشي عليها اللومة على باها لي كان خاصو يكون ليها لعون او لعوين ولكن راك شابه غا بوك ، مريم انا طالعة نشوفها غنديها معايا لدار دوز معايا واحد تلتيام او نرضها
مريم : غتديها لعندك ؟ علاه فين ساكنة نتي ؟
لغالية : رحلة لكازا فهاد ليامات
كلتوم : بصح ابنيتي ؟ جيتو لكازا بوحدك ؟
لغالية : انا وراجلي امي انا وراجلي
ناصر : باقة معا داك الشارف منوياش تلوحيه عليك
لغالية : (هزات يديها مدوراها شي لي خلى سرتلة لي دايرة تحرك او تعطي الصوت) راجلي تاج راسي شيبو وقر شاريني بلغالي من عند بويا وخوتو لي باعونو ليه برخيص (ضارت مخلياهوم غا ساكتين او طلعات هي عند ياسمين ، لي لقاتها ساهية فسما كتكمي وتبخ او غا ساكتة) ياسمين
ياسمين : (حياته بيدين لغالية محطوطين فوق كتافها) رجعتي هاد لمرة بكري
لغالية : راني عطيتك لعاهد ، نتي بيخير
ياسمين : (عرفاتها علاش داوية) عادي أصلن كيف لعادة منين عقلت على راسي ونا يتيمة با منكسابوش ماشي تال دبا
لغالية : هزي طيليفونك او يالاه معايا تبدلي شويا لجو منها نوريك داري
ياسمين : رحلتي لهنا ؟
لغالية : واه (مشات ياسمين هزات طيليفونها او لباكية تاع لݣارو دارتها فجيبها او تبعات لغالية لتحت)
كلتوم : غتمشيو دبا
لغالية : واه
كلتوم : ݣلسو غا تشربو كويس داتاي
لغالية : راجلي كيتسناني فدار
نهيلة : ياسمين فين غادة
ياسمين : خارجة غا لهنا ونرجع
لغالية : آمين نوض لبس سبرديلتك ، ونتي امريم او سعاد طلعو جمعو لدراري حوايج تبدال غنديهوم معايا تا هوما
مريم : بلاما تعدبي راسك غا خليهوم
لغالية : مكاين لا صداع لا والو جمعي تال يوسف شنو غيحتاج
مريم : واخ
عبد الله : ماعندك فين تديه دري باقي صغير غيبكي ليك تما او توحلي فيه
لغالية : انا ماشي بحالك فيا لفرزيات ندي كولشي ونخليه هو بوحدو او زيد انا كاينة وتا ختو كاينة
سليمان : خليها تديهوم معاها ابدلو لجو تا هوما شوي راك مخرجتيهومش فهاد لعوطلة ݣاع
تسنات لغالية عيالات خوها تا جمعو لولادهوم لحوايج عاد مشات بيهوم لطونوبيل راجعة بحالها لدار
~~~~~~~~~
بعدما لغالية حطاتها فديك جردة كملات على رجليها تال عند فين ساكنة مها ، دقات على دار وبقات فانتضار مها تحل ليها
سناء : بنتي جيتي
صباح : واه
سناء : دخلي دخلي
صباح : (بانتلها سناء لابس حوايج لخريج ) يالاه جيتي لدار ؟
سناء : لا لقيتيني خارجة
صباح : خارجة فين ؟
سناء : غنمشي نبات عند واحد صاحبتي
صباح : ولكن راني جيت باش نبات عندك
سناء : راني عارفة ها دار بقاي فيها وباتي تانرجع انا غدا
صباح : ملي مغتكونيش مكاينش لاش نبات غناخد لوراق ديالي او نرجع فحالي محد لحال باقي مضلام
سناء : على خاطرك
صباح : (دخلات بزربة خدات داكشي لي خاصها او خرجات) يالاه بسلامة
سناء : جبتي طونوبيلتك ؟
صباح : لا
سناء : تبغيني نوصلك ؟
صباح : لا بلاش بلاما نصدعك
سناء : (سيفطات ليها بيزو فلهوا) بايباي
هبطات عاود صباح خارجة من ديك لموبل او مشات جنب لبحر كتمشا تم تا صونا ليها الطيليفون
صباح : الو
محسن : الو صباح صڤا ؟
صباح : حمد الله اطوا
محسن : حامدينو وشاكرينو هاد الساعة شت صداع حداك مراكش فدار ؟
صباح : لا راني كاينة جنب لبحر
محسن : شمن جيهة
صباح : لبحر لي حدا إقامة ******
محسن : آه عرفتو سبحان الله أنا قريب ليه بزاف كيباليا ، شلابسة نتي
صباح : كسوة فنيدية
محسن : آه شتك لون تاع شالك ب
صباح : بلكحل
محسن : بنتي ليا عرفتك نسالي هاد لغاراض نلحق عليك ستنايني باغي نشوفك
صباح : واخة
صاحبو : (لي كان متبع لفيلم من لول) الله اعطينا وجهك شمن بحر بانليك ونتا تحت الطونوبيل
محسن : (خرج من تحت الطونوبيل بزربة غادي يبدل او يغسل حالتو شوي) سكتنا نتا شكتعرف غا حضيني
صاحبو : ههههههه الزعطة ومادير
محسن : (خرج من لحمام بعدما لبس جوايجو نقيين او دار بلحالة) مد ليا دوك سوارت تاع الطونوبيل مد
صاحبو : غتهز لسيد طونوبيلتو ويلا جا عليها
محسن : مول الطونوبيل صاحبي عشيري كنعرفو الى سول فيها قوليه راها عند محسن
صاحبو : (لاح ليه سوارت) هاك نتا تعرف
خدا محسن ديك الطونوبيل لي كانت عبارة على ميرسيديس ركبها وكسيرا لبلاصة لمعلومة ، بلاصا الطونوبيل او هبط كيقلب عليها بعينيه او معا كان قريب لمغرب بدرع باش قشعها ، بتاسم لي شافها وما غادي لجيهتها
محسن : تعطلت عليك ؟
صباح : (كانت عاطياه بضهر او ساهية فلبحر تا قفزها ، حناكها حياته بيهوم سخنة شوي ملي سمعات صوتو ، ضورات عندو وجها مبتاسمة ليه ابتسامة هادئة) لا لا متعطلتيش
محسن : (مسلمش عليها ولا مد يديه ليها وقف حداها مخلي مسافة بناتهوم احتراما ليها) ايوا شخبارك نتي
صباح : حمد الله هاد الساعة ونتا كي غادي
محسن : تا انا هاد الساعة غا كنعدي ، شكاديري هنا بوحدك
صباح : جيت اضربني شوي تاع لبرد او صاف غملت فدار
محسن : هههه مزيان ، شوفي انا راه فيا لموت تاع الجوع يالاه ناكلونا فشي سناك
صباح : واخ لي عجبك (تمشاو بجوجهوم واحد شوي على رجليهوم تا وصلو لواحد سناك جنب لبحر) غناكلو هنا ؟
محسن : معجباتكش لبلاصة نبدلوها ؟
صباح : لا لا بلعكس هنا حسن خاوي او مدرݣ
محسن : كتاكلي لحار ؟
صباح : لا
محسن : كتاكلي لبصلة ؟
صباح : واه
محسن : (مشا عند مول سناك خدا منو جوج كاسكروطات تاع الصوصيط او لحار ، خلصو ورجع عند صباح ماد ليها واحد كاسكروط) ها كاسكورط ديالك بلى حار
صباح : شكرا
محسن : (ݣلس حداها فوق رملة من طبيعة لحال معا مسافة بناتهوم) ايوا الالة صباح شنو كديري فحياتك
صباح : هاد الساعة كنقرى على طب لاسنان او صاف ونتا ؟
محسن : انا كنقرى هاد الساعة فلاكادمية تاع لبوليس
صباح : هاي هاي باغي تولي بوليسي
محسن : هههه شنو بالك ماتجيش معايا
صباح : (طولات فيه الشوفة) معرفتش شكون عرف
محسن : ايوا الى نتي معرفتيش شكون غيعرف
صباح : (كانت بغات تدوي تا شافت طيليفونها كيصوني ، قفزات ملي لقاتو اكسيل دورات وجها كتشوف ياكما موراها ، دارت إشارة لمحسن اضرب طم او جاوبات هي اكسيل) الو بابا
اكسيل : الو بنتي وصلتي لدار ؟
صباح : واه
اكسيل : واش راك على برا
صباح : واه ضرني الجوع او خرجت ناكل على برا
اكسيل : واش خرجتي معا مك ؟
صباح : لا بوحدي ماما خارجة
اكسيل : صاف ، متعطليش برا او رجعي لدار دغيا غيضربك لبرد
صباح : كون هاني بسلامة (حدها قطعات معا اكسيل تنهدات براحة) يوه
محسن : باباك هادا
صباح : واه ، انا خاصني نمشي دابة حيت غيخصني نشد طاكسي لدار
محسن : علاش طاكسي انا غنوصلك
صباح : لا بلاما نعدبك
محسن : ماكاين لا عداب لا والو او زيدون منرتاحش نسيفطك فهاد ليل معا مول طاكسي
صباح : (عجباتها هضرتو) زعما نتا فيك تيقة كتر من مول الطاكسي
محسن : تا حد مافيه التيقة غا هوا كاين شي حسن من شي ، فين تبغيني نوصلك وصل
صباح : انا ساكنة شوية بعيدة فدخلة تاع كازا
محسن : معليش راني جايب الطونوبيلة تاع عشيري
صباح : (تمشات هي وياه تا وصلو لطونوبيل) هاد عشيرك موالف اعطيك طونوبيلتو توصلةبيها لبنات
محسن : هههه قداش قلتيها لبنات ، بنت وحدة لي كاينة هاد ساعة هي صباح
صباح : (غوبشات شوي) شكون هاد صباح
محسن : ههههه مكتعرفيهاش ركبي
صباح : (داك لعرق تاع تكلاخ شدها ، ركبات ليه لور مخلياه هو لقدام)
محسن : (غا كيشوف فيها شكتصنع) شريفة شيفور تاع باك انا زيدي ركبي لقدام
صباح : الله اودي خلي لقدام لديك صحبتك صباح انا خليني اللور
محسن : هههههههه الله ياربي (ركب لقدام كيضحك على تكلاخها او مشا مكسيري فطريق )
صباح : (بقات حاضية معا طريق او ملي قربات توصل لدار صونات على لغالية) الو
لغالية : الو صباح
صباح : بابا حداك
لغالية : لا علاش
صباح : شوفي انا راجعة لدار ياك بغيتك تحضي ليا معا بابا ميخرجش لجردة باش ميشوفنيش نازلة من الطونوبيل مقادة على صداع
لغالية : هههههه كوني هانية
صباح : (قطعات معا لغالية) صافي نزلني غا هنا
محسن : (زاد بيها شوي تا وصلها بعيد بشوي على الصور تاع لفيرمة ديالهوم ، او نزل هو وياها)
صباح : يالاه بسلامة غنخليك دبا
محسن : غنمشي معاك تا تقربك لباب
صباح : لا غيشدوك لكاميرات ولا شافك بابا مغتخرجش لعقيبة على خير
محسن : غيضربك ؟
صباح : اويلي لا شمن يضربني ولكن نتا يقدر اصفيها ليك
محسن : تا حلقي باك صحيح ؟ يعني اقدر اشدني يعصيني
صباح : (كانت كتسناه اخاف سعا شافتو تحمس) اشدك يطويك على ربعة او يعلقك الى شافك معايا
محسن : (ماقداتو فرحة) حبيت باك
صباح : (دخلها شك فيه) اهي بابا راه مزوج او كيعجبوه لعيالات او كيلبس غا لون واحد ديك لقضية تاع بالوان او قوس قزح ماعندوش معاها بتاتا
محسن : هههههه حشومة ضنيها فيا هاكدا انا كيعجبني رجال لي كيسلخو دراري لي شافوهوم معا بناتهوم
صباح : تبغيني نديك ليه اكرمك شوي
محسن : لا ماشي دبا تاندير علاش او زيدون باقي باغي نشوفك الى كرمني دبا موحال نعاود نشوفك
صباح : (باقي شادة فخاطرها) ماعندك ماتشوف فيا تلاها غا مع صباح ديالك انا خنمشي دبا بسلامة
محسن : عندك لحق بسلامة
صباح : (زادة غادية فحالة وحاسة بلي باقي متحركش من بلاصتو تا دخلات معا لباب عاد سمعات صوت تاع الطونوبيل)
محسن : (تسنا تا شافها دخلات معا لباب عاد دخل لطونوبيلتو مكسيري وراجع فحالو لدار)
~~~~~~
لغالية بعدما خرجات معا دراري من دار واليديها مشات لدارها نيش ، دخلات الطونوبيل معا لباب لكبير او بلاصاتها لداخل عاد نزلات هي ودراري لي كانو مضهشرين فلكبورية تاع لفيرمة
امين : عمتي هنا فين ساكنة ؟
لغالية : واه الحبيب ديالي كي جاتك خيبة
يوسف : (كانت هازاه ياسمين) زوينة
لغالية : اخليلي زين انا يالاه ندخلو الناكلو شي حاجة او نوريكوم لفيرمة كاملة (دخلات بيهوم لقلب الدار وداتهوم اݣلسو حدا اكسيل لي كان باقي تما) حياتي شوف شنو جبت معايا
اكسيل : (هز عينيه فيهوم واحد بواحد قبل ميوقف متبسم) مرحبا
لغالية : (بانلها أمين مفاهم والو) أمين هادا عمك اكسيل راجلي
امين : (مدليه يديه بصواب) متشرفين اعمي انا آمين ولد خو لغالية
اكسيل : (كيعجبوه دراري لي كيكونو زاعمين ولكن زعامة فبلاصتها بادلو سلام تا هو)
لغالية : (تحنات عند نهيلة و يسرى) سلمو على عمكوم اكسيل البنات
نهيلة : (لي كانت زعيمة شوية قربات عندو هي لولة) سلام
اكسيل : (كيعجبوه دراري صغار تحنا عندها كيضحك) سلام اعمو شنو سميتك
نهيلة : نهيلة
اكسيل : (خربق ليها شعرها ومجا فين اضور عند يسرى تا لقاها وقفة قدامو كتشوف ليه فعينيه)
يسرى : (واخة حشومية سيدة كتشوف الزين كتلف) داير ليلونطي
اكسيل : هههههه لا مدايرش عجبوك عينيا
يسرى : نتا كاملك زوين مجوج ؟
لغالية : (باغة تموت عليها بضحك) اديك سليحفانة تي قيلي عليك راجلي شمن واش مجوج
اكسيل : كون عرفت عندك بنت خوك هاكدا ݣاع منحاشيها ليك
لغالية : أصلن راهة شابهة ليا
اكسيل : (خربق شعر تال يسرى او ناض واقف كيشوف فياسمين) ياسمين
ياسمين : (بتاسمات لاكسيل او باستليه يديه باحترام) عمي اكسيل
اكسيل : كي دايرة نتي لباس عليك
ياسمين : حمد الله هاد الساعة اعمي
اكسيل : (قرب عندها واخد منها يوسف هازو لعندو) وهاد الراجل هو شسماه الله
يوسف : انا ماشي لازل انا يوثف
اكسيل : ههههه خارجلها اوليدي نيشن
لغالية : انا غنمشي نبدل عليا او نوجد لدراري مياكلو ونتا رد ليهوم لبال
مشات لغالية طلعات لبيتها بدلات عليها عاد عاودات هبطات لكوزينة تصايب شي حاجة لدراري بيديها هي ، او تما نيت فاش صونات عليها صباح
صباح : (دخلات لدار عادي تا كتسمع صوت تاع دراري صغار فدار ستغربات او مشات نيشن لفين كاين اكسيل لقاتو مضور عليه يوسف او نهيلة و يسرى كيلعب معاهوم ، اما امين فكان شاد طيليفونو فواحد لقنت كيلعب لاقي لويفي مجهد او ياسمين غا ݣالسة ساكة ) بابا لا لا ماتقوليش درتيها
اكسيل : (غوبش) شدرت
صباح : هادشي فخبار لغالية ؟
اكسيل : واه راه هي لي جابتهوم
صباح : اويلي على هي لي جابتهوم او تقبلاتهوم عادي
اكسيل : علاش متقبلهوم راهوم من لعئيلة
لغالية : شواقع
صباح : (بانفعال) شوفي الى كنتي نتي قبلتي أنو يجيب ولادو لي خازن عليك فانا مقابلاش ، كون كان غا واحد ندوزو ليك ابابا بجغيمة تاع لما ولكن باش تبطبط ليا هاد الطاشمة كاملة مور ضهرنا وتجيبهومنا هاكدا عادي زعما هالواقع بغيتو ولا كرهتو هادو ولادي راني منقبلهاش ليك
لغالية : (شحطاتها مور ضهرها) نوضي تجمعي عليا مقفزاها مني كنقول شواقع ، هادو ولا خوتي لي جبت معايا
صباح : ولاد خوتك ههههههه تا حلفي يسحابلي بابا لي ولدهوم بلا خبارنا
اكسيل : (شير عليها بوسادة لوجه) تجمعي قاتلك ولتهوم بتخبية خايف منك
صباح : ههههههه متديش عليا راك عارفني مرة مرة داك لعرق تاع لكالاخ كيديماري عندي
مشات صباح هاجمة على دراري صغار خصوصا يوسف كلاتو بلبوسان تا ولا مسكين طالب لفكان منها عاد سلمات على أمين او دازت عند ياسمين تا هي
صباح : لغالية مقلتيليش بلي عندك ولاد خوك كبار
لغالية : (حطات ترضيضة فوق طبلة) مجابتهاش لوقت او صاف (خوات لدراري صغار لحليب معا كولاكاو بعدما برداتو ليهوم او قادات تا شكلاط اوسط لخبز او خلات صباح هي لي كتوكلهوم) آمين كول احبيبي
امين : شكرا ولكن مفياش الجوع
لغالية : (مابغاتش تبزز عليه) على خاطرك ياسمين نخويليك أتاي ؟
ياسمين : لا بلاش انا بغيت غا نخرج لجردة شوي
لغالية : (عرفاتها علاش بغات تخرج) واخة يمكليك تمشي
لحيط لي مقابل معا فين ݣلسين كان عبارة على حيط تاع لخشب فيك واحد لباب تاع الزاج دسكة كبير كيخرجك لجردة فاش كاين لاپيسين نيشن ، ناضت ياسمين من بلاصتها او خرجات منو غادية لجيهة مضرݣة شوي ، جابدة واحد لݣرو دارتو فمها وشعلاتو بلبريكة لي وا كانت عندها ، وبدات كتكمي مستمتعة بداك النسيم لي كيضرب فيها او بلخضورية لي ضايرة بيها ، تكات على ضهرها فوق داك ربيع مقابلة معا نجوم سما عينيها عليهوم ولكن عقلها يعلم الله فين هو غا كتفكر او كتخطط
صباح : (تبعات ياسمين تݣلس معاها شوي أصلن حاسة براسها ملات) فاش ساهية
لغالية : (تا هي تبعاتهوم) باغين تجمعو بلى بيا
صباح : فين خليتي دراري
لغالية : أمين راه مكونيكطي معا لويفي لبنات شعلتلهوم الرسوم بغاو اتفرجو ، او يوسف خليتو معا اكسيل كينعس فيه
صباح : (ربعات لارض حدا لغالية وياسمين)
لغالية : أجي نتي اصݣعة ياك قلتيلي متلاقايش معاه ولا قولي غا حطيتك مشيتي كتجري عندو
صباح : الله يهديك شمن مشيت عندو كان فدوك نواحي او صدفة تلاقينا
لغالية : (بحماس) اهيه شدرتو شقلتو
صباح : مادرنا والو كلينا كاسكروط تاع خمسة دراهم جنب لبحر او وصلني صافي
لغالية : شويا بشوية فطور بيناتكوم لعلاقة
صباح : شمن غطور سيد عندو وحدة حاط عليها لعين
لغالية : هاويلي باش عرفتيها
صباح : بفمو قالها ليا ، شاد طونوبيل من صاحبو قتليه واش موالف توصل بيها لبنات قالي لا هاد ساعة وحدة لي كاينة هي صباح ، بلعلاقي قالهالي
ياسمين : (لي كانت كتسمع فلقصة شافت فيها ديك الشوفة تاع واش من نيتك قبل متسولها) ختي صباح نسولك ؟
صباح : واه سولي احبيبة
ياسمين : لكلاخ لي فيك مزيودة بيه ولا وراتي ؟
صباح : هاء كفاش ؟
لغالية : كيف لمشماش لي طاب او محلاش اهاد لخليقة شنو سميتك نتي
صباح : صباح
لغالية : وشنو سميت لبنت لي قاليك عليها
صباح : صباح
لغالية : (شافت فياسمين) غتزيد واحد شوي عاد اتفهمها عندها لكونيكسيو تقيلة ، هادي هي لي فاش كتعاوديلها شي نكتة مكضحك عليها تال مور عام
ياسمين : يمكن دايرة تيصلات داكشي علاش الريزو عندها تقيل
لغالية : تي راها باقة خدامة بنوكيا پيل
صباح : (قلباتها ضحك ملي سرا معاها لقالب) زعما كان كيدق عليا
ياسمين : (جاتها لبكية) باقة كتقولك كيدق عليا واراه فرع عليك لباب اهاد لخليقة
صباح : شنو ندير دبا كنت كنقطع عليه نمشي نصوني ليه ؟
لغالية : شوفي نتي
صباح : صافي منصونيش عليه أش داه هو يمعني عليا لهدرة
لغالية : (شدات عنقها بلاعصاب) نوضي من حدايا لانرزيك فصحتك نوضي
صباح : شدرتلك
لغالية : الدارليك على هاد ݣرام تاع لعقل لي متكسابيش
صباح : صافي صافي هانا غنطلع ندوي معاه (طلعات لبيتها فرحانة مخلية لغالية و ياسمين ݣالسين)
ياسمين : راجلك عندو شي ولاد خرين ولا غا صباح
لغالية : عندو جوج خرين دراري ، يالاه ندخلو لداخل راه تحرك لبرد
ياسمين : كاينة عندكوم شي بيت خاوية بغيت نعس عييت
لغالية : دبا هوما كاينين جوج بيوت خرين تاع ضياف لي مفرشين اما لوخرينات باقي مفرشناهوم ، وحدة قلت نخليها لبنات انعسو فيها وتانية انعس فيها امين نتيا ملي عيانة شضهرلك نطلعك لوحدة من بيوت دراري تنعسي فيها
ياسمين : او هوما فين غينعسو
لغالية : راهوم مسافرين
ياسمين : هاكداك على هاد لحساب واخة
طلعاتها لغالية لبيت جود او شعلات ليها ضو فيها ، بقات ياسمين كضور فعينيها تا طاحت على واحد التصويرة مصورة فيها لغالية واكسيل او مجد او جود او صباح
ياسمين : (دارت راسها مكتعرفهومش او نعتات لغالية عليهوم) هادو هوما ولادو كبار
لغالية : هادا جود عندو 23 عام او لي حداك مجد صغر من جود بعام
ياسمين : هاكداك مزيان
لغالية : شوفي هانتي خودي راحتك لحمام لهيهة الى بغيتي دوشي صافي نجيبلك حوايج
ياسمين : لا بلاش
لغالية : نفيقك ملي يطيب لعشا
ياسمين : لا ميحتاش باغة غا نعس
لغالية : (عنقاتها وباستها) يالاه تصبحي على خير
ياسمين : ونتي من اهل لخير
خرجات لغالية مخلية ياسمين بوحدها فلبيت ، ولي انفوا شافت لباب تسد شعلاتها واحد لݣارو او تقابلات معا واحد تصويرة كبيرة تاع جود كان معلقها فلحيط ، طولات فيها الشوفة وهي مبتاسمة ابتسامة غامضة
ياسمين : (كتنفت دخان تاع لكارو او كدوي) آيت اوسو اسم كفيل اخليك تتذكرو طول حياتك واخة دازو عليك سنين كتار هههههههههههه جود آيت اوسو
دخلات ياسمين لحمام تاع جود لي كان كبير او واسع او مزدي بواحد لباب معا بيت تبدال ، نصلات حوايجها كاملين تامن سليپ او تخشات ليها تحت ديك رشاشة مخلية لما كيدوز على شعرها ومنحنيات جسمها ، حلات عويناتها لعسليين مقابلة معا انعكاسها فلمراية ، شافت فلوشام لي تحت بزولتها او طولات فيه الشوفة قبل متنزل بأنضارها لواحد طبعة حمرة بحال تاع لحريق فجنب لاخر تاع سرتها ، حسات بقلبها تقبط عليها او موجة من لألم لي كانت تناساتو معا لوقت رجعات ليها غواتها او دموعها حسات بيهوم دازو فودنيها ، ولحضات قليلة رجع بيها عقلها لماضي ، ولكن دغيا داركات راسها وخوات بالها من دوك دكريات ، كملات دوشها ودخلات لبيت تبدال ديال جود ، لاوية عليها فوط وكتسارا بين حوايجو
ياسمين : شغنلبس ؟ شغنلبس ؟ هاه لقيتها هاد توني زوين (خدات واحد توني من التونيات تاع جود ، كان توني واسع او خفيف بلبيض فيه شي كتابة من لور ، لبساتو واخة كان جاها واسع من جيهة لكول ، خرجات من ديك لبيت بعدما نشفات شعرها ومشات تخشات فناموسية لي كانت تا هي من نوع لكبير ديال جوج ، غطات راسها وغمضات عينيها تنعس)
#عند جود#
مجد : دبا شغانديرو داك سيد معامن درنا قالك مرتو مشات تولد
جود : نمشيو نولدو مرتو ، راه باين اعشيري شغانديرو غنرجعو فحالنا لدار يالاه نوصلو معا ديك جوج دليل
مجد : شكون اصوݣ انا ولا نتا
جود : غنصوݣ انا حيت الى بقيت غا ناعس غادي غا نهرس نعاسي باطل
مجد : صافي مشات
ركبو فطونوبيل او ديماراو راجعين لدار ، وبعد شي سوايع قلال بضبط ملي وصلات ديك تلاتة دليل كانو وصلو لدارهوم ، دخلو بطونوبيل لداخل عاد خرجو منها داخلين لدار
مجد : انا فيا الجوع تبغي تاكل معايا
جود : لا انا طالع لبيتي نعس فيا لموت دنعاس بدرع باش حال عنيا
مجد : انا الى ماعمرت كرشي ݣاع منعس
جود : ههه لي ضاربك ضاربك على كرشك نخليك انا دبا (طلع جود لبيتو مسخسخ باغي غا ينعس ، مشعلش ضو ݣاع حيد سباطو وتقاشرو وسروالو وطريكو ديالو ، وكمل لبيت تاع تبدال هز سروال تاع لپيجامة لبسو وبقا من لفوق عريا ، كانت فورمتو عادية ماشي مطراسي بلعضلات لخاويين ولكن مفصل تفصيلة زوينة ، شم شي ريحة فشكل فلبيت او بانتليه ديك لفوطة باش مسحات ياسمين فلأرض) شجاب هادي لهنا نكون زعما نسيتها قبيلة ، منعرف باغي غا نعس (خرج من ديك لبيت او مشا تخشا فراشو ، مكان حاس بتا شي حد حداه تا مد يديه وقاس لكرش تاع شي حد) صباح شجابك عاود لبيتي مزاحماني تا فنعاسي لمصيبة
ياسمين : (ضرباتها لفيقة على الصوت تاع حلان لباب عرفاتو جود ، داكشي علاش تقنتات او ضربات طم ، تا حساتو تخشا حداها وحط يديه فوق كرشها ، سكتات او مجاوباتوش واخة عرفاتو راه غلط فيها يسحابليه ختو ، بقات هاكداك مكوانسية تا شافتو هز عليها يديه أو نعس ، زادت صبرات شوي قبل متعيطليه بسميتو بصوت خافت) جود
جود : (فين جود ماش شد طران لوجدة ، من طبعو ملي يكون عيان واخة تجيب دقايقة حداه ميفيقش ليك)
ياسمين : (زادت قربات عندو تشوفو واش ناعس ولا لا ، حركات يديها فوق عينيه والو شعلات ضو تاع طيليفونها فوجهو والو مفاقش ، خصر ملامحو ولكن محلش عينيه بتاتا ، رجعات تكات ولكن مجات فين تغمض عينيها تا تلاحت عليها يديه متقلة ليها على عنقها ، بقات كدفع فديك ليد بدرع باش بعداتها عليها) يخ على بنادم كان غيقجني (معا قالت صافي رتاحيت تا عاود لاح عليها يديه أو تا رجليه هنا صافي مابقا عندها فين تحرك) وابندم وا لعمالة واش مموالفش تنعس معا شي حد فوق ناموسية ، عضامي كاملين غيتهرسو (بقات كتعافر عاود تا حيدات عليها رجليه او يديه أو لاحت عليه هي رجليها او يديها حطاتها فوق عنقو) باغي غا تقل هاحنا غنتقلوك
جود : (ستحلى سخونية باش حس او عاد مزاد قربها عندو محاوط خصرها بيديه او خاشي راسو فصدرها لي معندهاش بتاتا پلانشا (تشنمور))
ياسمين : (ندمات ݣاع علاش قربات عندو بغات تبعد عليه او هو غا مازايد مخشي فيها) شوف شوف سلݣوط ، تا فين خاشي راسك انا بالله او بشرع معاك لما طلقني نعس فلأرض غا طلقني (حاولات تفك منو تا عيات او جود غارق فنعاسو مجايب لحركاتها خبار سيد مايت ماشي ناعس ، عافرات تال لخر هو يغلبها نعاس او نعسات مشابكة معاه)
~~~~~~~~~~
مجد بعدما تفرق على جود مشا نيشن لكوزينة اقلب علاما يقصي ، ولكن قبل ميشعل ضو سمع شي تقرقيب تم شداتو لخلعة مد يديه لواحد لمقلة بانتليه فضلام ، وشعل ضو مغوت
مجد : حط داكشي لي عندك او هز يديك
أمين : (لي كان دخل لكوزينة حيت ضرو الجوع قال بلاما يشعل ضو او يكتافي غا بلپيل ، سمع شي حس قبل ميتشعل عليه ضو او يسمع مجد شنو قال ، ديك الدورة لي دار باش اشوف لقا مجد موجه ليه مقلة قدامو وكيدوي بجدية ، آمين فهاد لحضة ماعرف واش اخرى بضحك على مجد لي باغي يتيري عليه بمقلة ولا يخرى عليه بلفقصة) راك كبير زعما آصاحبي على هاد لبلانات
مجد : (طلع أمين او نزلو قبل ميحط ديك لمقلة او يدوي معاه بجدية) شكون نتا
أمين : لي كواك
مجد : هههه شوفلك لبرهوش شكادير فلكوزينة
أمين : ضرني الجوع او جيت نقصي
مجد : ولد من نتا
امين : ولد ناصر
مجد : شكون ناصر
امين : لي كواك (هاد طبيعة كاينة فأمين ولموشكيل لاسقة فيه فينما يقوليه شي حد شكون فلان اقوليه لي كواك هههههه) ناصر خو لغالية
مجد : يعني نتا ولد خو لغالية ولغالية عمتك
امين : الى بغيتي زعما
مجد : شوفلك لبرهوش فمك ماضي انا مجد ولد اكسيل
امين : علاه عمي اكسيل والد دحش قدك
مجد : حاشاك ، حيد من حدايا نشوف واش كاين ميتقصى
امين : والو مكاين تا وزة خصك طيب
مجد : كتعرف طيب
امين : لا
مجد : (حل تلاجة وجبد منها شي كفتة قلاها فشوي تاع الزبدة ولملحة ولبزار او حطها فوق صلى مونجي معا شبكة تاع لخبز) زيد تاكل
امين : (ݣلس كيخشي فوجهو هو ومجد تا شبعو وناض هاز طليفونو) الله يخلف غسل معاك لماعن
مجد : واخة ، شنو ؟ جي لهنا البرهوش محشمتيش مطيبلك او نغسل لماعن من لفوق
امين : راك كبير اصاحبي كتر التيد
مجد : (خرج آمين مخليه كيسبو ، غسليه لماعن او طلع ينعس تا هو)
#فصباح#
فاقت لغالية معا ديك لعشرة تاع صباح دخلات لحمام دوشات او خرجات صلات عاد لبسات پيجامتها وهبطات لتحت توجد لفطور ، سعا ملي هبطات لتحت لقات اكسيل هاز عندو يوسف كيوكلو ولبنات تاهوما كيفطرو ومعاهوم تا صباح
لغالية : صباح لخير
صباح : صباح النور فقتي
لغالية : (مشات كتبوس فلبنات) زوينات دياولي فقتو بكري ، شكون وجد لفطور سهام ؟ رجعات هي وشيماء من لكونجي ؟
صباح : لا بابا هو لي صايب لفطور
لغالية : (شدات كرسيها حداه) هاكداك ، أمين باقي مفاق
صباح : باقي
مجد : (تم جاي عندهوم) صباح لخير
لغالية : مجد رجعتو ؟
مجد : ياس ، هاء شهاد الزين كياكل (مخلا ليوسرى و نهيلة فين يستوعبو تا نقز عليهوم بلبوسان) شهاد تيتيز
لغالية : (كتخبطو على ضهرو) بعد علبنات خنقتيهوم
مجد : فين كنتي مخبية عنا هاد الزين الغالية أح ديال لماكلة شسميتك
نهيلة : نهيلة
مجد : ونتيا
يسرى : سكون نتا
لغالية : هادا احبيبتي ولد عمك اكسيل مجد
يسرى : (براءة) مجوج ؟
مجد : لا لا والله مامزوج
صباح : لي ضارب هاد لبنت ضاربها على زواج
مجد : لواليد نمشيو نخطبو هالعار
امين : (عاقدهوم فيه) تمشي تزعتر حيد يديك على لخوادرية
مجد : (لقا باش يفقص آمين ، هز عندو يوسرى وباسها من حنكها) كالم طوا انسيبي
امين : (شديه اطرطق ولكن مابغا يقول والو قدام اكسيل) يسرى نزلي
يسرى : لا غيجوجني
مجد : هههههههه اي اقلبي على لحلاوة
اكسيل : حط لبنت قاطع فيها لماكلة وزيد تݣلس
صباح : تا جود رجع
مجد : واه راه فبيتو ناعس
لغالية : (رضات ديك الجغمة لي شربات من أتاي) رجع ؟ فبيتو ؟ ياسمين فاقت ؟
نهيلة : (براءة) ختي ياسمين ناعسة لفوك او معنقها واحد دري
صباح : كح كح كح هههههههههه شمن دري الفنيونة ياسمين خليتها ناعسة فبيتي
لغالية : ههههههه حبيبة ديال عمتها مدوخة بنعاس غنطلع نفيق ياسمين تفطر معانا
اكسيل : خلي لبنت تنعس مكاينش لاش تفيقيها
لغالية : احن واه بصح
~~~~~~~~
بدات الشمس كضربليه فوجهو شي لي خلاه ابدا يفيق ، حرك يديه تا حس براسو كيقيس فشي حاجة ملسة وبحال لپونج
جود : (بإستغراب) شهادشي كنقيس
ياسمين : (لي كانت ضرباتها لفيقة قبل منو ولكن معدالهاش تنوض حيت كان معنقها من لور او لايح عليها رجليه ، توني طلع ليها وهي ملابسة والو من تحتو شي لي خلى طغمتها تبان او يد جود ماجات فين تحط غا عليها) طر*متي هاديك اولد طحبة حيد عليها يديك
جود : (حل عينيه مستغرب من الصوت تا ضرب فوجه ياسمين بلخلعها دفعها ورجع اللور تا طاح لارض ، وقف بزربة مطرطق فيها عينيه ، هي لي كانت ݣلسة فوق ناموسية كتشوف فيه برود فخاضها كيبانو و لكتف ديالها تا هو باين ، هنا جود تخلع ماعرف باش تبلى حدو بدا كيقلب فراسو)
ياسمين : غا تهنا مغتاصبتكش
جود : (كيحاول ميغوتش) شكاديري فبيتي لا فداري بصفة عامة مناش دخلتي وإيمتى ؟ شافك شيحد ؟ ناري الى شافك لواليد صافي قفارت عليا ليوم اعلقني نوضي نوضي تخباي ولا عرفتي شنو نقزي من لبالكو لا أويلي غتموتي ، شندير شندير
ياسمين : (خلاتو يولول تما او مشات دخلات هي لحمام لبسات عليها حوايجها وخرجات عندو قاصدة لباب) الى ساليتي تولويل انا غادة نفطر
جود : (شدها من يديها) هاويلي على خارجة الدار تاع باك ، باغاهوم اشوفوك ويقولو جود مدخل صحبتو لبيت
ياسمين : (قربات عندو) واش انا صحبتك
جود : لا
ياسمين : اذن هنينا وخليني نهبط فيا الجوع
جود : (شد شعرو) ݣلسي هنا انا غنجيبلك ماتاكلي تا نشوف منين غنخرجك
لغالية : (حلات عليهوم لباب) فين غتخرجها
جود : (تخلع او خبا ياسمين مور ضهرو) لغالية خليني غا نشرحليك راك فاهمة غالطة لواليد ماخصوش يعرف بلي كانت معايا فلبيت غيعلقني صافي
لغالية : يهديك الله اجود راه باك عارفها كاينة هنا
جود : لا لا ماتقوليهاش ليوم يقتلني لمسامحة
لغالية : يهديك الله اجود لاش مخلي ياسمين موراك
جود : كتعرفيها الغالية
لغالية : معلوم راها بنت خويا
جود : (طرطق فيها عينيه) بنت خوك ؟
ياسمين : (خرجات من موراه او مدات ليه يديها مبتاسمة) متشرفة بمعرفتك ، انا ياسمين بنت خو لغالية ونتا بلا شك جود ولد راجل عمتي
جود : (تلف ولكن مابغاش ابين قدام لغالية سلم عليها عادي ) الشرف ليا
لغالية : هههه غتكون تخلعتي ملي شفتيها فبيتك انا لي خليتها تنعس هنا حيت عند بالي راك باقي مسافر
جود : معليش
لغالية : ياسمين يالاه هبطي تفطري
ياسمين : واخ سبقيني اعمتي ناخد طيليفوني او نتبعك
لغالية : (حسات بلقضية فيها إن ولكن ميكات) واخ
ياسمين : (تسنات لغالية تا خرجات عاد قربات عند جود حاطة يديها فوق صدرو ومبتاسمة) صدقنا عئيلة وحدة اسي جود
جود : (بعد يديها) مغتنزليش تفطري
ياسمين : (براءة) مالك كتبعد عليا ياك بتي ليل كامل ونتا معنقني
جود : ياسمين واش هادي طريقة من طرق تعديب لي كتستعمليها معا شخص مكتحمليهش
ياسمين : هههههه لا بلعكس لاشخاص لي كيعجبوني هوما معامن كندير هاكدا
جود : (بإستغراب) لي نفهم منك دبا هو اني انا كنعجبك
ياسمين : تماما
جود : ضاربك حمار ليل ايمتا لحقت نعجبك ونتي غا لبارح مكنتي تحملي فيا شعرة
ياسمين : (بحزن) شنو ندير انا كرهت من داك نهار ونتا شاغل بالي
جود : شمن نهار
ياسمين : (حمارو ليها لحناك) من نهار فاش بستك
جود : (داكشي لي كان كيحاول ينسا فكراتو فيه هادي) شوفي هاد تبرهيش ديالك ماديريهش عليا سمعتي ملي نخرجو من هاد لباب ماتعرفني منعرفك
ياسمين : (دبالو عينيها وتدلاو شفايفها) حرام عليك تقول هاكداك انا كنقوليك كتعجبني ونتا ممتيقنيش حرام عليك ، شنو ندير باش تيقني ولكن هاه غندير لي فجهدي باش تيقني احياتي صافي
جود : (زادت خلعاتو بديك حياتي حس بتبوريشة شاداه ، بعد عليها بخطوة وعينيه مكيشوفوش فيها) غتعطلي عليهوم
ياسمين : واخة هاني هابطة نكملو هضرتنا من بعد
جود : (خرجات ياسمين من لبيت مخلياه مضهشر او مخلوع) مال هادي شحاف عليها عاوتاني ؟ كون زادت شوي كون تيقتها برهوشة دلخلا قطعاتها فيا بنت لهم ، نمشي ندوشي حسن
ياسمين : (نزلات لتحت عندهوم او ݣلسات معاهوم تفطر)
مجد : (تصدم ملي شافها تا دوا بلاما يشعر) مرة خويا
لغالية : شكون مرة خوك
ياسمين : معرفتش نتا هو مجد ياك ولد عمي اكسيل ولا غلط
مجد : (عندو زهر اكسيل كان ناض خرج لخدمتو) هههه واه هو انا
لغالية : (تغامزات هي وصباح) تشربي أتاي ؟
ياسمين : لا أنا غنخرج لجردة شوي
صباح : سيري اضربك شويا لبرد راه لجو فن ، لغالية غا نجمعو هاد طبلة
لغالية : واخة مجد عافاك اخويا تبعنا هاد الصينية يديا عامرين بطباسل
مجد : (معلبلوش) واخ
ناضت لغالية هي وصباح جمعو طبلة او عاونهوم تا مجد مخلي لبنات كيلعبو معا بعضياتهوم اما يوسف فكان معا امين
لغالية : أجي نتا لهنا
مجد : شنو
لغالية : ݣلس ندويو معاك
مجد : لا غا خليوني نمشي
صباح : زيد تݣلس
مجد : (ݣلس فوق لكرسي وضارو بيه لبنات) هاني ݣلست
لغالية : مناش كتعرف ياسمين
مجد : انا لي خصني نسولكوم هاد السؤال واش صاحبتك اصباح ؟
صباح : ياسمين بنت خو لغالية
مجد : وايلي
لغالية : واه او دبا قولي الصراحة جود او ياسمين كيعرفو بعضياتهوم من قبل
صباح : لا واش مصاحبين
لغالية : جيتيه نيشن شويا تاع لغموض المرض
مجد : (سرسب ليهوم على داك نهار) لي فهمت انا هو بيناتهوم شي حاجة ولكن مخبيينها
لغالية : داكشي لي قلت تا انا قبيلة نهيلة شافتهوم ناعسين خدا بعضياتهوم
مجد : وايلي كواها ؟
صباح : (خبطاتو على ضهرو) سكت شمن كواها مسمعنا والو
لغالية : شغتسمع نتي ؟
صباح : مسمعنا تقرقيب ماسمعنا غوات ماسمعا صوت تاع تدواش
مجد : شكتعرفي نتي غيكونو دارو سيلونص
لغالية : اويلي لا تا نتوما مشيتو بعيد ، سيد راه مكانش عارفها بنت خويا وكان عوال اخرجها بتخبية
صباح : عقلتو على ديك لݣورميطة لي شرا جود من قبل تا ليكوپل
مجد : مالها
صباح : ملي رجع من كازا ديك نهار قلبت عليها مالقيتهاش او سولتو عليها قالي حقا مات حقا تجلاتلي فكازا ، وليوم عاد رديت لبال ليد ياسمين كانت دايراها
لغالية : ويلي ويلي دبا دوك لمساخيط بيناتهوم شي حاجة
مجد : مئة فلمئة
لغالية : وشنو غنديرو دبا
صباح : لمراقبة
مجد : شوفلك لمحقق كونان
صباح : مابغيتيش تعرف واش جود مصاحب
مجد : باغي نعرف
صباح : ايوا هي لا راقبتي معانا وسكتي ، ولكن لي نفريض كانو بصح مصاحبين شغانديرو
مجد : غنقولوها لواليد ، وري لكلب تاع بوه يتصاحب مور ضهري ونا لا
لغالية : شوف لمسموم شهامو ، الى كان بصح غنديرو لعرس فصيف
صباح : ولا ماكانوش مصاحبين
لغالية : تا هي غنديرو لعرس فصيف او نزوجوهوم
مجد : لموهيم هو لعرس فصيف كاين كاين
لغالية : تماما
جود هبط عندهوم لتحت بعدما دوش او ݣلس فلبيت شحال استوعب شوقعليه ، خصوصا ملي كيتفكر فين كان حاط يديه كيبغي قلبو يسكت
جود : (دخل عليهوم لحمام لقاهوم مجموعين تما) شمن عرس هدا لي غيكون عندنا فصيف
صباح : عرسك
لغالية : (نغزاتها تسكت) هههه لقيتي هاد دحش تاع مجد كيقولك يدوي معا اكسيل ازوجو هاد الصيف
جود : تكمش زوجني تانا لي كبر منك بقيتي غا نتا
لغالية : ومالو تا ميزوجكش لخدمة راك خدام على راسك قريب توضف خصك غا تلقا بنت الناس وباك مغيقولك والو راك عارفة كيف داير كتوصليه لمعقول كيشد طريق
جود : (حرك ليها راسو بايه او مشا لتلاجة ياخد منها قرعة تاع لما) وا بينك بنت الناس لي فين نلقاوها
لغالية : ومالك عطا الله بنات الناس لي مادين يديهوم لحنة خصك غا نتا تقلب
ياسمين : (بعدما كمات رجعات لداخل ولقات يوسف كيبكي فيه الجوع هزاتو لعندها او مشات بيه لكوزينة طيبليه شي حاجة) عمتي عندكوم شي ݣرعة
لغالية : جود شوفلك معاك واش كاينة شي ݣرعة
جود : (بدا كيقلب فتلاجة تا لقا واحد لمورصو خرجو ومدو ليها) هاكي
لغالية : جود تفطر نسخن ليك لمسمن
جود : لا بلاش
لغالية : انا غنمشي نجمع لحوايج غيكونو كرمو فشمس
صباح : انعاونك ، مجد قابل معاك ديك الطاوة
يوسف : (بانليه جود واقف جيهتو كيقاد فكاس تاع لقهوة بدا كيتماطا عندو تا شدو من طريكو ديالو)
جود : (عاد رد لبال بلي ياسمين كان معا وليد صغير ، بتاسم ليوسف او مد يديه ياخدو عندو) أجي عندي البطل
يوسف : انا ماسي بطل انا يوثف
جود : هههههههه أجي عندي ايوسف أجي ، طلقي دري ونتي كارمة عليه
ياسمين : هاحنا طالقينو
جود : (هز عندو يوسف كيلعب معاه وقبل ميمشي يݣلس حدى مجد شاف فشنو كتصنع ياسمين لقاها باغة طحن ديك لݣرعة ) شكتصنعي نتي ؟
ياسمين : كنصايب لخويا الصوبة تاع لݣرعة
جود : شوف لفم لي كيقول الصوبة ، واش عمر جدك دخل لكوزينة باغة طحني لݣرع بلا سليق او بقشورة من لفوق كنتي تعطيه مورصو يغزو راسو وتهناي
ياسمين : بصح زعما ياكلها (هزات واحد لمورصو ومداتو ليوسف) هاك كول
جود : واش نتي هبيلة واش بالك دري معزة ياكل لݣرعة خضرة ، شدي شدي هاكدا دري وكحازي
ياسمين : (شدات خوها ومشات ݣلسات حدا مجد لي خدا منها يوسف)
جود : (مشا هز شي روز سلقو معا شوي تاع بطاطة وخيزو ولݣرعة معا شوي تاع لملحة ولبزار ، عاد طحن كولشي معا لحليب او لفرماج ورضهوم ايطيبو شوي ، عاد طفا لاسوپ او خوا شوي منها فزلافة ومشا ݣلس مقابل معا يوسف كيبرد فصوبة او يوكلو)
ياسمين : (ستاغلات جلوس جود حداها باش يعداليه اوكل يوسف ، او حتى صلى مونجي كانت مغطية حركاتها على مجد ، مدات يديها من لتحت او دوزاتها تحت توني تاع جود بشوي)
جود : (تسمر ملي حس بيديها كتسارا فجنب ديالو ، ولكن حاول يبقا متحكم فراسو كمل توكال تاع يوسف او حط ديك زلافة وقاد ݣلستو يشرب لقهوة مدوز يديه ناتر ليها يديها) مجد معاودتيش دويتي معا داك سيد
مجد : (كينعس فيوسف ، مجايب خبار لشو واقع تحت طبلة) باقي ناوي ندوي معاه بليل
جود : مزيان
ياسمين : (بعدما بعد ليها يديها هزات طيليفونها وكتبات ليه مساج) ° مقلق مني °
جود : (هز طيليفونو يشوف شكون مسيفطليه ميساج لقاها ياسمين مجوبهاش او طفا طيليفون)
ياسمين : (رجعات كتصيفطليه ميساجات) °ماباغيش دوي معايا ؟ ° / °عطاتك خاطرك طلعلي لvu°
مجد : جاوب آصاحبي ولا طفي طيليفونك دري يالاه نعس واش باغي تفيقو ؟
ياسمين : انا غناخد يوسف نديه نحطو فلباياص ينعس
مجد : (كرم على يوسف) لا لا خليه ليا شوفيلك نتي متقضي ، قابلية معاك الطاوة (ناض بيوسف وخرجو مخليهوم غا هوما بجوج)
جود : (ناض بزربة يحرك الطاوة لي كانت فيها اللوبية كطيب)
ياسمين : (شافت فضهرو قبل متدوي بابتسامة واتقة) بانلي من لبالكو ديالك لفدادن تاع زرع او شجر مخالط ، لعشية خاصك تديني نشوفهوم
جود : (مشافش فيها ݣاع) مكنعرفكش او ماعندي فين نديك سمعتيني
ياسمين : بصاح ؟ ايوا سمعني الحبيب دألبي الى مشيتي تا ماديتينيش نشوف دوك لفدادن عرفتي شنو غيوقع ؟ كل من مجد او ختك صباح او حتى عمتي لغالية وعلاش لا تا عمي اكسيل غيعرف بشنو وقع بيناتنا ديك نهار
جود : (مشا مقرب عندها هاز فيها حاجب او منزل لاخر) كتهدديني دبا ؟
ياسمين : ويلي حاشة نهددك انا كنقوليك غا شنو غيوقع الى مديتينيش هاد لعشية ، تبغي باك اعرفك كنتي كتباوس معايا
جود : هههه كنت كنتباوس معاك ؟ ايمتا بسلامة ؟ آه ولا ياكما كدوي على نهار قاسك لهبال او لسقتي شنايفك معا شنايفي ؟ ههههههه هاداك أبنتي مامحسوب تاعلى لهران لعب لبراهش ماديريهش معايا سمعتي
ياسمين : انا متأكدة الى مشيت عند عمتي وقلت لها (بدات كدوي بدرامية تقول سيدة بصح كترعد او تنزل دموع) عمتي انا كنت كنعرف جود من قبل او كنا فعلاقة ، واحد نهار ݣاع تلاقينا جنب لبحر ملي جا لكازا شافلي فعينيا وبدا كيقرب مني ونا كنت متوتر حيت اول مرة ليا ولكن فنفس لوقت كنبغيه داكشي علاش خليتو يبوسني ولكن دبا كيدير راسو معارفنيش هئ هئ هئ
جود : (غسل عليها يديه كون مكانش هوا علامن كدوي كون تيقها) الالة فين ابان الشيطان قدامك
ياسمين : باقي ماشتي والو ، ويلى مكفاتكش هاد لقصة شنو باليك نديرو ها بصح
جود : (بدات ياسمين كتقرب عندو باغة تبوسو ، بلخلعة هرب مبعد عليها ساد على فمو) واش تصطيتي نتي واش ضارب على طسيلتك لكاغيط تا كل مرة جاية ملسقة شلاقمك معا دياولي ، واش باغة ضيعيلي هاد لحسنات لي كنجمع فيهوم من هادي شحال وتصيفطيني ببروصي تاع الزنة
ياسمين : ماشي شي زنة تا نتا بوسة درتنا عليها هاد لفيلم كون دخلنا معاك لمعقول شغادير
جود : آلبنت آ لخليقة راه حرام حرام تبقاي الاوسي وعايا ونا ماشي راجلك واش راك ماشي مسلمة ؟
ياسمين : كي شتيني ضاربة لحساب لحرام ولا حلال
جود : نتي مضارباش لحساب انا ضاربو
ياسمين : ضرب لحساب او خليني انا فحرامك غارقة العمر ههه
جود : (طلعليه دم تاع لمعقول زعف طفا لطاوة وزاد خارج من لكوزينة)
ياسمين : ماتنساش لعشية
لغالية : (دخلات لكوزينة هي وصباح كيضحكو ويتجمعو معلى بالهومش تا ضربو فياسمين) ياسمين نتي بوحدك هنا فين دراري
ياسمين : مجد دا يوسف انعسو وجود طفا لطاوة وخرج
صباح : هاكداك (ݣلسات حداها)
لغالية : (خوات شي زريعة وشي تقاوت فزلايف او حطاتهوم قدامهوم) خصني ندوي معا باك ليومة
صباح : على حسباش ؟
لغالية : على حساب الصدقة تاع كل عام كما كتعرفي اللخر تاع شهر جاي غنديروها ، وبغيت نعرف واش غنعرضو على صحاب مكناس او صحاب هنا ولا غا صحاب هنا وزيد الصالون لكبير لي موهيم خصني نفرشو ونشوف معا نجار اجي يشد لعبار يالاه اوجدهوم نا وزيد عليها غيخصنا لبيوتة تاع ضياف نفرشوهوم او زيد او زيد
صباح : غا خليها عالله روينة لكحلة بابا عزيز عندو يجمع لغاشي كل عام
لغالية : بلعكس باك كيعجبو يكرم الناس برزقو او يكبر بيهوم
صباح : ( قبل مدوي صونالها طيليفون او ناضت كتجري خارجة لجردة لورانية من لباب لي فلكوزينة)
لغالية : دغيا طارت
ياسمين : زعطة ومادير
صباح : (قلبها كيضرب فحلقها ماقاداها فرحة ولكن كتحاول ايكون صوتها هادئ) الو محسن
محسن : (دايب كتر منها بدرع باش شاد راسو) صباح صڤا
صباح : صڤا لحمد الله ونتا شخبارك
محسن : حمد الله هاد الساعة واخة مدواتش معانا واحد لالة صباح منين حطيتها حدا دارهوم
صباح : هه سمحلي والله ، كنت مشغولة جاو عندنا شي ضياف داكشي علاش
محسن : هاكداك ايوا شكاديري
صباح : والو كندوي معاك او صاف ، ونتا ؟
محسن : متكي
صباح : احقا كنبغي نسولك واش نتا مسالي نهار كامل ديما فاش كنسولك كنلقاك متكي
محسن : دغيا مليتي مني ولا شنو
صباح : لا حاشا غا سولت حيت راك دبا فلاكادمية كيما قلتيلي
محسن : واه راها بحال لجامعة نيت غاهي تاع لبوليس فيها لعوطل او فيها شي مرات قلت ميدار
صباح : هههه ايوا الله ادومها قلت ميدار
محسن : هههه آمين ، ايوا امتا يمكلي نعاود نشوفك
صباح : (حمارو حناكها) تعاود تشوفني ياك غا لبارح شفتيني
محسن : تاع لبارح ممحسوباش بغيت نتلاقاو او ندويو او نعرفو بعضياتنا مزيان
صباح : هاكداك عطيني شوي تاع لوقت علاما نلقالي شي سبة راك عارف لواليد او خوتو
محسن : (ملي سمع ديك خوتي تخايل فبالو شي جوج صحاح مݣلضمين محس براسو تا طاح من فوق ناموسية ) اي
صباح : مالك واش طحتي ؟
محسن : (مارضاش اقولها طحت) لا لا التوني ديالي لي طاح
صباح : التوني دار داك الصوت
محسن : (باستسلام) ونا كنت اوسطو
صباح : (نفاجرات عليه بضحك) هههههه ياك أبعدا توني فلت ماتقسحش
محسن : هههه شوية فيديه او صاف
مجد : (دوا معاها من بعيد) صباح معامن كدوي
صباح : (عندها زهر كانت قطعات معا محسن قبل ميجي مجد) كنت كندوي معا صحبتي محتاجني لشي حاجة ؟
مجد : لا بابا لي كيسول فيك
صباح : رجع من برا
مجد : واه
صباح : هاني جاية دابة (سبقها مجد لداخل او تبعاتو هي لجردة فين كانو ݣالسين ) بابا
اكسيل : (كانو ݣلسين فواحد لݣلسة جنب لاپيسين ، ولبنات كيلعبو بيناتهوم فحين يوسف هازو جود كيلعب معاه) بنتي
لغالية : (جايبة معاها لغدا هي وياسمين) جيتي معا لغدا نيشن
صباح : (ݣلسات تا هي تغدا معاهوم)
مجد : (شاف فجود بشر) لخوادري لعبو شحال هادي ملعبنا
جود : قاسك لهبال عاود
مجد : غنعتابرك خسرتي غنحكم عليك
اكسيل : منبغيهالكش اولدي
جود : شمن خسرت باقي تا ملعبنا
صباح : لعبونا معاكم
لغالية : نجمعو الطبلة ونلعبو كاملين (جمعات طبلة بزربة وجات تلعب تا هي)
مجد : (جبد كارطة من جيبو) لواليد لاعب
اكسيل : انا خاطيني لعب لعبو نتوما نشوف
مجد : يالاه لي عندها شي قزديرة تحطها هنا غنبداو لعب
لغالية : (حيدات واحد من دبالجها) هاني حطيت
صباح : (حطات لحلقات) هاني تا انا حطيت
أمين : (حط واحد لݣورمطة عندو)
مجد : ديك لݣورمة واعرة عندك انسيبي تجي معا يد
مجد : (حط لخاتم ديالو) جود ، يسمين حطو داكشي لي عندكوم
ياسمين : (حيدات واحد السنسلة عندها وحطاتها قدامها) هاني حطيت
صباح : علاش متحطيش ديك لݣورميطة
ياسمين : هههه عينيك فيها ، منقدرش جاتني كادو
جود : (جبد من جيبو ألف درهم او حطها قدامهوم) هاني حطيت
مجد : (بدا كيتيك لكارطة) لموهيم باش لي معرفش كفاش كنلعبو يعرف ، غنلعبو طرح ولي سالات ليه لكارطة لول او خرج هو لي ربح او آخر واحد خرج هو لخاسر ، ولي ربح كياخد داكشي لي حط لخاسر او كيحكم عليه ، يالاه على بركة الله نبداو لعب
فرق عليهوم مجد كارطة وبداو كيلعبو كيلعبو تا ربح مجد او خسر امين
مجد : (خدا ديك لݣورميكة تاع امين لبسها) جاتني على مزيناتها تقول ليا لاش مصنوعة ، ماعلينا دبا جا وقت لحكيم
امين : طلبنا سربي
مجد : (شاف فيه بشر) من هاد اللحضة اتبقا تعيطلي راجل ختي ، ولا نسيبي تا يسالي نهار
امين : (دوا بهمس) راجل ختي
مجد : اعد لكرة لم اسمع
امين : (كارز على سنانو) فرق عنا لكارطة نبداو طرح جديد اراجل ختي
مجد : هي لولة انسيبي
عاود مجد فرق كارطة عليهوم او بداو كيلعبو ولكن هاد لمرة أمين لي ربح او ياسمين لي خسرات
امين : (خدا السنسلة عندو وشاف فياسمين بشر) بنت عمي شباليك فشي غطسة فاعلة تاركة
ياسمين : (شافت فلابيسين مشوكية وعاودات رجعات شافت فأمين) حكم شي حكمة خرى راه بارد لحال
امين : تي نوضي عليا قاتلك لبرد
صباح : ياسمين لحكمة هي لحكمة
ياسمين : احن مكنعرفش نعوم
مجد : هههههههه واع هي لكلب كيعرف ايعوم حسن منك
اكسيل : هي نتا بحالك بحال لكلب ملي كتعرف تعوم
جود : منبغيهالكش أودي احمادي ههههه ونتي غا سيري غطسي راه مغارقش
ياسمين : (صغرات فيه عينيها ) على ضمانتك ؟
جود : الله أودي نكدب عليك
ياسمين : (مشات على نيتها منقزة فلاپيسين ، او من زهرها كانت بقات شادة فجنب تاع لابيسين ايما كانت غتغرق حيت لعلو تاع لما كان طول منها ، عافرات تا طلعات او هي كتقطر او كترعد بلاعصاب) سبحان الله مغارقش
جود : آه عاد تفكرت مغارقش بالنسبة ليا اما لقصار غارق عليهوم
لغالية : طلعي نعطيك متلبسي قبل ميضربك لبرد
ياسمين : (ݣلسات فكرسيها ودوات باصرار) لا ميحتاجش خليونا نلعبو واحد الطرح
مجد : على خاطرك
تيك لكارطة و فرقها عليهوم واحد بواحد ، او بدا طرح بقاو لاعبين لاعبين تا غلبات ياسمين او خسر جود
ياسمين : (هزات لفلوس عندها وناضت من بلاصتها) لفلوس خديتهوم لحكمة باقي مفكرت فتاشي حكمة لعبو نتوما دبا انا غيخصني نطلع نبدل حوايجي
كملو دراري بيناتهوم لعب تا عياو او كل واحد طلع لبيتو يرتاح شوي
جود : (دخل لبيت ديالو عادي تا ضرب فياسمين ݣالسة فلبالكو ديالو كتكمي) شكاديري فبيتي
ياسمين : عجبك لحال ملي كنتي غتغرقني ياك حسيتي بمخك درتي انجاز ؟
جود : الى مدرتيش عقلك انا مبيدي غنلوحك فيه
ياسمين : لبس عليه باش نخرجو لفين قلتي ليا
جود : شقلتلك انا بسلامة ؟
ياسمين : بلاما تهوبل عليا قتلك غتديني ولا والله تا يسيقنا باك لخبار انا مخاسرة والو
جود : الله اصبرني معاك ، تحركي قدامي نمشيو ماحد كولشي مشا ينعس
خرج سابقها وهي موراه غا كتفرنس ومشاو متوجهين لفدادن لي فيهوم شجر تاع لفاكية
#عند اكسيل#
قبل ميتبع لغالية لفوق هز طيليفونو او صونا لمحسن
محسن : الو عمي اكسيل
اكسيل : سلام محسن هانية عندك
محسن : حمد الله اعمي هاد الساعة ونتا شخبارك كي دايرة صحيحة
اكسيل : حمد الله صونيت عليك حيت بغيتك فشي حاجة
محسن : الله أودي اعمي انا فلخدمة شحب لخاطر
اكسيل : عندي واحد الطونوبيل هادي مودة باش شريتها ولكن كانو خاصينها شي پياسات او مكرهتكش دوز تشوفها
محسن : صافي كون هاني فين او ايمتى باغيني نشوفها
اكسيل : واحد جوج سيمانات حيت راني باقي مجبتها من مكناس
محسن : صافي واخة
اكسيل : يالاه بسلامة
محسن : بسلامة
قطع اكسيل معا محسن او طلع لبيتو لفوق ، لي كانت فيه لغالية كدوش ، مشا هو مقرب لداك لحيط تاع الزاج كيشوف فدوك لفدادن او بضبط فدوك الجوج لي كانو كيتمشاو مباعدين تم صغر فيهوم الشوفة ولكن مقال والو
لغالية : (خرجات من لحمام لابسة لپينوار تاع لحمام ، مشات مقربة من اكسيل او معنقاه من لور) حياتي
اكسيل : همم
لغالية : (بتلحوين دوات مدوزة يديها على ضهرو كتحسس فيها) فخبارك توحشتك
اكسيل : (باقي كيشوف من الزاج) تا انا
لغالية : وشنو بالك نستاغلو هاد سوايع لي قدامنا
اكسيل : (ضار عندها بلعرض لبطيء او تحنا عنها بايسها فمها بوسة خفيفة قبل ميهمس فودنيها) حاسباني برهوش قدامك الغالية هممم
لغالية : (شافت فيه براءة) كفاش أ إكسيل مفهمتش
اكسيل : راك فاهمة مزيان علاش كندوي الغالية ، علاياش كنوصيك أبنت الناس ديما هممم علاياش
لغالية : اكسيل شواقع
اكسيل : ههه دايرة راسك معرفاش ، معليش انا غنقولك شدرتي ، نتي الغالية بغيتي تلعبي معايا لعب دراري صغار نضتي تقبتي ليا پروطيكس بلفنية باش زعما انا كيف لكانبو غنديرو متقوب ياك هادشي لي درتي
لغالية : شوف اكسيل خليني غا نشرحليك
اكسيل : شغتشرحي ليا الغالية كتر من هاكدا كتعاملي معايا بحالا دمدومة ، ولا ياكما عند بالك درتيها بية مرة غتعاوديها دبا هاديك لي عمرها تكون سمعتي ، داك تبرهيش لخاوي ماعندي ماندير بيه ، راه راسي مجاش او شاب هاكداك سمعتيني
لغالية : (نفاجرات عليه تا هي) شنو بغيتيني ندير نبقا هكدا انا بلا دراري نتا الى مابغيتيهومش راه عندك تلاتة انا معنديش ، مكتحاولش تفهمني الناس كاملين كيدويو عليا ونا عييت
اكسيل : والصيتك الغالية والصيتك أبنت سليمان او حذرتك قتلك داك لقريص تاع تحت دف ماعندي ماندير بيه باش نكونو مزيان ، فينما ندويو على دراري نتا مكتفهمنيش نتا نتا ، واش مكتشوفيش راسك الغالية متبعالي كلام الناس لي غا داويين ، نفعوك هاد ناس من قبل أدوي نفعوك فلعب لي لعبتي فدوك لعوام ؟ دوي جاوبيني نفعوك ؟ معقلك عليك تا حد أو دويت معاك قتلك الغالية الناس غا داوية ولي كيسالني شي قل*وة أجي يديها راه عندي جوج ، قتلك الغالية خوي راسك من دراري فهاد لعوام ركزي على راس خدمي على راسك قراي او ملي تكبري غيجي وقت دراري ، وشنو قلتي ليا صافي كون هاني ودبا رجعتي لدوك لفعايل ديالك عاود ، ولكن راني مناعسش على ودني باش نخليك تبندقيني مرة خرى ، والموضوع تاع دراري غادي نسدوه فهاد نهار او غندير عين ميكة وندوزها ملي يجي وقتو او ندويو فيه
لغالية : (هاد لقضية تاع تأجال موضوع دراري غامكتزيد تجعرها وتعصبها تا صدقات صاعرة عليه كتر من لول) امتى بسلامة باغينا ندويو على هاد دراري ، ياكما ملي تودع ليوم ولا غدا او يدي مول لمانة امانتو ولا ملي متبقاش قادر تولد ، ديك الساعة نضيع انا ولا شنو ، تا انا باغة دراري وماشي من حقك تحرمني انا منهوم او ماشي شغلك فيا صغيرة عليهوم ولا كبيرة شغلي هاداك
اكسيل : منخافش عليك الغالية الى ودعت ليوم ولا غدا اتلقايلك واحد مقريبش ايموت باقي شاد ، ولا خوديهليك تا صغير عليك باش تكون مدة صلاحيتو باقة طويلة
لغالية : (شافت اكسيل صعر تاع لمعقول او بغا يمشي تا شداتو) اكسيل نتا عارف بلي ماشي هادشي لي قصدت أنا أنا
اكسيل : (حيد ليها يديه كيحاول يدوي معاها بلاما يغوت) لغالية حسن ليا وليك متقربيش بساحتي هاد الساعة وخليني نخرج نبرد او تبردي عاد نهضرو فشنو قصدتي وشنو مقصدتيش
بعد عليها وخرج بزربة من لبيت خابط لباب بجهد او غادي فحالو
لغالية : (نهارت فوق لفوطوي كتبكي وهي سامعة الصوت تاع لكسيراتور تاع الطونوبيل لي بعدات دغية مخلفة وراها الصوت تاع احتكاك روايض معا لارض) شقلت انا شدرت عاود
صبرات تا عيات هي تهز طيليفنها وبدات كتصوني عليه والو طيليفونو طافي وهادشي زاد خلعها عليه ، بقات على هاكداك مودة طويلة تا عيات هي تمشي لبسات عليها وهبطات لتحت بعدما غسلات وجها
صباح : لغالية فقتي مبانلكش جود ؟
لغالية : لا مباليش
صباح : مالك بيك شي حاجة ؟
لغالية : لا غا لقيتي راسي ضارني شوي وصاف
صباح : شربي ليه دوليپران باش افوتك
لغالية : داكشي لي غندير
#عند جود#
جود : دبا حنا انبقاو نسرحو فهاد شجر كي لغنم ولا شنو
ياسمين : مال جدك محرر فينا تا النزهة فطبيعة والو تموت على النكد
جود : شوف شكون كيدوي على النكد
ياسمين : صافي سكتنا مابغيتش نتهاز انا وياك عاود راه راشقة ليا ليوم
جود : (هز لكمرة لي جاب معاه او بدا كيصور الطبيعة) لعجب
ياسمين : صورني
جود : شاري لكميرة بنص مليون باش نصور بيها كمارتك من نيتك ؟
ياسمين : صورني انا بلاصة هاد شجر علأقل انا غلى منهوم
جود : سربي سربي تصويرة وحدة منزيدكش كتر منها
ياسمين : (ضحكات ليه تا بانو لغمازات دياولها)
جود : (لي كان حاط لكمرة قدام عينيه مزومي عليها تا بانتليه تقبة تاع الزين ، سها ودوا معا نفسو) °كون غا تبقاي مكالمية هكدا°
ياسمين : (قربات عندو) جيب نشوف كي طلعات تصويرتي
جود : (هز لكمرة معليها عليها) معندك متشوفي مصورتكش
ياسمين : وعلاش
جود : بكل بساطة كميرتي كتصور كولشي الى ياسمين
ياسمين : مزيان (عطاتو بضهر او زادت راجعة فحالها)
جود : فين غادة اهيتا
ياسمين : ياك من صباح ونتا ݣالس عليا رجعو رجعو هاحنا راجعين صفي
جود : مقلقة ؟
ياسمين : لا
جود : تا قلت اتفرحيني بشي حاجة
رجعو بجاجهوم لدار فسكات داخلين لبيوتهوم نيشن او فسكات ، جود لي برونشا لكمرة ديالو معا لبيسي يشوف شنو صور تا كيتصدم فتصاور
جود : شت ݣاع تصاور غا دياولها (صرفق راسو) جود شهادشي كيوقعليك ݣالس عليها كميرتي كتصور كولشي الى نتي ونتا مصورها غا هي ، ولكن جات زوينة فيهوم (عاود صرفق راسو) توݣض معايا شمن جات زوينة غا هي لي عندها تقبة تاع الزين
بقات لغالية هاكداك كتحاول تلاهي راسها فطياب او دراري ولكن بالها مهانيش من جيهة اكسيل ، كيبان ليهوم لعشا وحطاتو فوق الطبلة لي كان كولشي ضاير بيها
مجد : لواليد مغيتعشاش
لغالية : (ݣلسات تا هي كتاكل) خرجليه شي غراض من جنب او مشا يقضيه
~~~~~~~~~
نمشيو دبا عند اكسيل لي كان غادي مكسيري معصب طالعليه زعاف ، عدوه لي يبغي يديرها بيه كيعجبو لواحد ايجيه ديريكت خصوصا لغالية ، مسألة لولاد حاجة خصهوم اتافقو عليها بجوج انا ديك زرب عليا نزرب عليك فراه غا تخربيق ، او هو فطريقو لبحر بدا كيحس بضبابة نازلة ليه على لعينين حبس الطونوبيل فواحد جنب تاع لبحر ، او نزل شاداه الدوخة يمكن طلعليه سكار ، لخطوة لي بغا يزيد رجليه خواو بيه او طاح لارض على راسو ولكن من زهرا كان باقي شاد شوي هزو يديه عليه ضربة واخة تخبشات ليه جبهتو او تحرد منيديه ولكن شي باس ماكان ، عافر تا ناض او حل الطونوبيل متكي فيها اللور علاما يفوتو شوي لحال او يبرد تا لبريد ، بقا على ديك لحال مودة يمكن تا يكون غيب فيها لشي دقايق ولا غلبو غا نعاس ، او بعد جوج سوايع تاع تكية قدر انوض او يتمشا شوي ، داز لكوفر او خدا واحد صنارة او كرسي عاد سد الطونوبيل او مشا ݣالس ليه فواحد لبلاصة او لاح صنارة لما كيتسنا بصبر تصيدليه شي حوتة ، بقا تما جنب لبحر تا صبح لحال عاد جمع صنارتو وكرسيه بعدما صيدليه شي حوت ، عاد رجع لطونوبيلتو ركبها وتم راجع لدار ، دخل داك لحوت لتلاجة وتم طالع لبيتو
لغالية : (لي كانت باقة فايقة منعساتش ݣاع بالها بقا مشطون معاه او مارتاحت تا شافتو داخل) اكسيل رجعتي
اكسيل : شباقي مفيقك نتي تال دبا
لغالية : كنت مشطونة عليك مكتجاوبنيش فطيليفون اوزيد عليها تعطلتي تخلعت عليك
اكسيل : انا مزيان سيري تنعسي دبا
لغالية : (قربات عندو) اكسيل لبارح
اكسيل : لغالية صباح هادا سيري تنعسي من بعد
لغالية : (ردات لبال لخبشة لي فجبهة اكسيل او تا دم لي كان فيديه) اكسيل شوقعلك مالك فجبهتك او يديك نتا بيخير
اكسيل : راسو تقيل عليه انا بيخير الغالية جرحة خفيفة وصاف دبا باغي غا نعس (مزادش معاها لهضرة ومشا حيد عليه لحوايج بزربة تا بقا غا بوكسور عاد تخشا فراشو) زيدي تنعسي اتبقاي هاكداك فايقة
لغالية : (شافت تا عيات هي تمشي تخشى تا هي فلفراش تنعس)
اكسيل : (ملي حس بيها جات تكات حداه مد يديه جارها لعندو مخلي راسها فوق يديه أو بليد لوخرة حاوط خصرها خاشي راسو فعنقها ومغمض عينيه ينعس)
#عند ياسمين#
كانت ناعسة ماعليها مابيها تا ضرباتها لفيقة معا ديك تمنية وطار ليها نعاس شافت تا عيات او تمت خارجة لجردة تكمي تا ضربات فجود غاطس فلابيسين كيعوم
ياسمين : (دارت لݣارو فمها او شعلاتو كتكمي فيه) شحاف عليك معا صباح
جود : (ليل كامل او هو كيهتر بيها فينما يغمض عينيه تحضرليه صورتها تا دار بناقص من شي نعاس ݣاع او قال يهبط اعوم شوي سعا ضرب فيها) صبحنا عالله شمفيقك معا نبوري
ياسمين : فيقني داكشي لي فيقك
جود : (خرج من لاپيسين غا بشورط قصير او كاملو فازݣ كيقطر ، لاحت عليه ياسمين لفوطة بزربة غطا بيها راسو) نسولك
ياسمين : لا
جود : لاش كديري هادشي كامل ؟
ياسمين : شنو كندير بسلامة
جود : كولشي داوي على تصرفاتك
ياسمين : واش كدوي على لݣارو ؟
جود : داوي على تصرفاتك معايا
ياسمين : مالهوم تصرفاتي معاك عاديين كأي جوج مصاحبين
جود : الله يهديك أبنتي شمن مصاحبين واش كتخايلي
ياسمين : دبا هادشي كامل درتيه حيت قتلك لبارح بلي كتعجبني ؟
جود : راعنا فين عواجت لفݣوسة ، كتكدبي عليا فوجهي بلا حشمة بلى حيى ، كتشوفيلي فعينيا وكتقوليلي بكل جرءة بلي كتبغيني ، ياسمين داك لعمر تاع لمراهقة انا دزتو شحال هادي عمري 23 عام مغضحكيش عليا عارف تحت راسك شي حاجة
ياسمين : (قربات عندو كتشوفليه فعينيه) ماشي مبدأ كنكدب عليك ولا كنقول لحقيقة لي ضارك اجود ، لي ضارك اجود انك بديتي كتيق هادشي لي كتقولو هاد لبرهوشة ، او بنسبة لشنو تحت راسي هههه شكون عرف انا براسي معرفاش شنو تحت راسي بقا غانتا
جود : خوي عقلك مني أياسمين انا ونتي منليقوش لبعضياتنا ومستحيل تجمعنا شي علاقة
ياسمين : (زادت قربات عندو تا تلاسقات معاه) ياسمين تقدر تحيد جود من عقلها بكل سهولة ، ولكن واش يقدر احيد جود ياسمين من قلبو هادي هي لمعادة لي خاصك تلقالها لحل
طفات ياسمين ݣاروها وعطاتو بضهر راجعة لبيتها بزربة و وجها كولو حمر ، فحين جود لي بقا غا متبعها بعينيه معرف ميقول ، شاف تا عيا وقلب طريقو لبيتو يبدل عليه الشروط لي دان فازݣ او ينشف نيت شعرو قبل ميتلاح فراشو ينعس ليه شي سوايع ارض بيهوم لمزاج
فاقت لغالية على الصوت تاع تدواش دإكسيل ، ناض من فراشها و مشات نيش بدلات عليها وهبطات لتحت غسلات وجها فواحد من لحمامات لي لتحت ، عاد مشات لكوزينة تصايب لفطور
صباح : (لي كانت تا هي عاد فاقت او طرفات حالتها ، هبطات لكوزينة تعاون لغالية فتصاييب لفطور) صباح الخير
لغالية : صباح النور نعستي مزيان ؟
صباح : طحت دودة لبارح مافقت تال دبا
لغالية : مزيان ، تبغيو بغرير نسخنو
صباح : و الله ماعرفت انا مكاناكلوش ويلا دراري راهوم حال او حوال
لغالية : صافي غنسخنو ولي بغا ياكلو ياكلو من بعد
صباح : تا هدا نضار ، دوك جوج بنات مقريبش ارجعو
لغالية : واش شيماء او سهام ؟
صباح : واه شتهوم مابانوش ليا
لغالية : طاسيلتهوم هنا فكازا ومنين جاو لمكناس معاودوش شافوهوم مودة و عطاهوم باك كونجي باش ايشوفوهوم
صباح : ياربي تسمح ليا ولكن راه ديك شيماء مابغاتش تسرط ليا
لغالية : (كدوق من أتاي) ديك لماركة كتموت على حاجت زحام ، او دوا زحام عندي
تسنات لغالية تا فاق كولشي ونزل عاد حطات لفطور فوق طبلة و خوات لكل واحد كاسو او قادات لبنات باش افطرو
صباح : (شافت فياسمين لي كانت لابسة لحوايج تاع لخريج) ياسمين خارجة لشي بلاصة
ياسمين : غنرجع لدار
لغالية : ترجعي فين غترجعي بقاي شوي
ياسمين : عندي شي غراض خصني نقضيه فكازا
مجد : (نقز) صافي ها جود اديك تا تقضي داك لغاراض او يرضك (جود ضربو برجل باش يسكت ولكن لا حياة لمن تنادي) مالك نتا ياك غادي لكازا غادي
جود : راه تا لواليد غادي لكازا يوصلها معاه انا نقدر نتعطل عليها
اكسيل : (شاف فجود قبل ميدوي) انا غادي نوصل ختك ونتا و صل لبنت او ردها معاك
جود : ولكن
اكسيل : جود دويت معاك
جود : واخة (ناض من بلاصتو) يالاه الى كنتي غتمشي
ياسمين : (مزادتش معاه لهدرة وناضت تابعاه لطونوبيل)
جود : (حل طونوبيل او دخل ليها وتسناها تا ركبات حداه عاد دوا معاها) غنسبقو لغرض لي عندي عاد نمشيو نقضيو لغراض ديالك
ياسمين : شمن غاراض هدا
جود : (دوا معاها شوي برود) ماشي ضروري تعرفي
ياسمين : (مكانتش عندها تا لݣانة باش تجاوبو كتافات انها تحل شرجم او تمد يديها لجيبها جابدة ݣارو حاطاه فمها و باغة تشعلو سعا حبسها الصوت تاع جود لي كانت فيه شوية تاع لحدة)
جود : متكميلياش فطونوبيل دبا تخنزيها ليا
ياسمين : (ردات لݣارو لجيبها او طلعات شرجم لي كانت هبطات ، وركبات ليكوت فودنها كتمزك متكية براسها على شرجم )
جود : (لاحض بلي راها مكالمية من لبارح ، سكت تا هو مقال والو او كمل الصوݣان ديالو ممسوقش ليها تا هو ، بقا غادي غادي فطريق تا خرج على كازا تا وصل لبن سليمان عاد حبس او جبد طيليفونو مصوني لواحد نمرة) الو
دري : السلام عليكم خيا
جود : راني دبا فبن سليمان كيما تافقنا
دري : أخ سمحلي أخاي يسحابلي مغاتجي تال لعشية داك شي علاش مشيت نقضي واحد لغراض الى كنتي تصبر عليا نساليه او نتلاقاو
جود : لا صافي مكاين تا موشكيل خود راحتك تال فينما ساليتي او نتلاقاو غنتسناك
دري : يالاه اخويا بسلامة
جود : بسلامة (قطع معا دري وضار عند ياسمين) درت معا دري لعشية ياكما غتعطلي على شغلك
ياسمين : لا أصلن لغاراض لي عندي فليل
جود : (صغر فيها عينيه) ياكما هاد لغراض ديالك شي بار
ياسمين : باش كيهم الى كان بار ولا ديسكو
جود : كيهم ݣالا حيت ممساليش نبقا نتسنى فيك تا تسالي لقرعة ديالك
ياسمين : يمكلك ترجع فحالك مابكيتش عليك باش ترضني
جود : وصلتك صاحية غنردك صاحية غا هنينا
ياسمين : (سكتات عاود او مجاوباتوش حلات لباب او خرجات منو مبعدة على الطونوبيل او جابدة لݣارو شاعلاه او غا كتكمي)
جود : (بقا غا حاضيها من بعيد كيتسناها ترجع او ماباغيش يخرج عندها ، وملي شاف واحد دري قرب منها ولا بحالا ݣالس على جمرة خصوصا ملي شافها كضحكليه) كضحكي تهجريه
كان ناوي ينزل عندهوم سعا صوناليه الطيليفون
دري : الو واش راك باقي فبن سليمان ؟
جود : واه راني باقي
دري : صافي أجي عندي لدار دابة راني كاين فيها
جود : واخة هاني جاي عندك (هبط من الطونوبيل او كل مرة كيطل على ياسمين كيلقاها باقي كتكركر كمل طريقو زاعف عند السيد خدا منو واحد الصندوق كبير فيه الشبكة خلصو بدكسة تاع لفلوس عاد رجع لطنوبيل ، لاقي ياسمين او داك دري واقفين حدا طونوبيل ، حط الصندوق فلكوسان لوراني وسد لباب عاد شاف فياسمين) ساليتي تجماعت نمشيو ؟
دري : ياسمين شكون هاد خوك
جود : “اخويليك دراس” لا ماشي خوها
ياسمين : (صغرات فيه عينيها) أكرم هاد غا واحد سيد تلاقيتو فطريقي يوصلني معاه او صاف
أكرم : او تقتي تركبي معاه ماعرفتيه لا شي حد مكيسواش ولا تاشي خاطف
جود : شي كواي طرا*مي لا ؟ ونتي طلعي نوصلك
ياسمين : متحتاجش شكرا غنݣلس مع أكرم نستناو شي مول طاكسي
جود : ركبي اغا غنوصلك (جاتو تقيلة يقولها) او نوصلو تا هو
أكرم : فكرة زوينة هادي يالاه نركبو
جود : (شافو باغي يركب لقدام) لور
ياسمين : جي ركب حدايا لور (ركبات ياسمين او أكرم الور حدا داك صندوق فحين جود ركب بوحدو قدام معصب ولكن ممبينش ، شافت فصندوق لي حداها ) شهادشي
جود : مش او مشة
ياسمين : (طلات عليه مخصرة وجها قبل ماترجع تشوف فجود) متأكد باعوليك مش ماشي سبع او مرتو
جود : لاواه حمار الزرد
ياسمين : صبحان الله هاد لمش كيشبه لمولاه ، مشعر بحال سبع او عاقدهوم او سيفتو تاع لمغضوب عليهم تقول واخديلو لمرا
جود : مرتو بعقلها شتيها كي ݣالسة ومتبتة ما تجمع معا شي مش ما ضحكليه فوجهو خصوصا قدام راجلها
ياسمين : (كانت بغات تقوليه شي حاجة تا صدق أكرم هامس ليها فودنيها)
جود : (شافهوم ملي تفرشخو بضحك او وشوشو لبعضياتهوم ، بقا صابر صابر تا دخلو لكازا ) فين نحطك ؟
ياسمين : حطنا غا هنا
جود : مداويش معاك داوي معا أكرم نتي سديه
أكرم : انا غنزل غا هنا ياسمين فرحت ليوم بشوفتك بزاف ملي عليا نمرتك نبقاو فتواصل
ياسمين : (ردات لبال بلي جود حاضيها من لمراية او تبسمات) نعطيك علاش لا 06 *****
أكرم : نبقاو على تواصل ازين
جود : (تسنا تا سد أكرم لباب هو يكسيري مبعد) كنتي تعطيه شي بُيْسة متخليهش امشي هاكداك ناشف
ياسمين : فكرتيني نسيت حبس حبس نزل عندو نبوسو ونرجع
جود : شلاقم مك نقلعهوم ليك من بلاصتهوم ، شدي لكوسان او قوليلي فين نوصلك راه ليل طاح
ياسمين : حطني حدا مرجان
جود : واخ (مشا فطريق مرجان او دخل لپاركينݣ مبلاصي فيه طونوبيلتو ونازل موراها او ساد طونوبيل موراه )
ياسمين : غا تسناني هنا مغنتعطلش
جود : كي شتيني تابعك عندي شي غراض باغي نشريه
دخلو بجوج لمرجان جارين معاهوم واحد لكريسة ، جود خدا لماكلة تاع لقطوط او شي سقاطات او تم تابع ياسمين لي شرات واحد لبكية تاع لݣارو او بقات كتمشا تشوف تا حبسات قدام الجيهة تاع لألعاب ددراري صغار او طولات الشوفة فصف لي فيه لعب باربي بلوردي ، طولات الشوفة فداك صف ساكة وملاميحها تبدلو
جود : (وقف موراها) شتك كاتشوفي فلالعاب ملعبتيش فصغرك ولا
ياسمين : (بصوت مبهم) ملعبتش
جود : نشريليك شي وحدة تلعبي بيها هههه
ياسمين : مكنحملش هاد لمونيكات او بضبط هاد اللون ، مجرد الشوفة فيهوم كتخليني نتخنق ، باغي تشريلي شريلي شي عكر نعكر
جود : تعكري لمن داك زا*مل ؟
ياسمين : بغيتيني نعكرليك نتا ؟
جود : متعكريش راك باقة صغيرة على داكشي
ياسمين : (تجاهلات كلامو او كملات طريقها لبلاصت لماكياج ختارات منهون شي عكورة فيهوم لفاتح او لمغلوق او واحد لكحل ، حطاتهوم فشبكة او زادت بحالها سابقاه لاكيس)
جود : (حط داكشي لي شراو لسيدة دوزو تما باش اخلصو)
ياسمين : (كانت باغة تخلص داكشي لي شرات سعا حبسها جود)
جود : جمعي فلوسك عندك انا غنخلص
ياسمين : بصح كنتي تقولها ليا من صباح ستناني هنا دقيقة ونرجع صافي (ماخلاتليه فين اهدر تا طارت من حداه)
جود : (شافها جاية وجايبة معاها لكراطن تاع لماكياج او لعكورة او تامن الدوپياسات شراتهوم ، لموهيم السيدة مقصراتش أو خدات غا لغالي ، غوبش ملي شاف داكشي كامل لي شرات) لحاجة قالو ليك انا هو بنك السلام
ياسمين : فكرتيني نسيت واحد شكل
جود : (شدها من قبها مخلاهاش تمشي) زݣاي دي معاك هادو رضيهوم
ياسمين : (شافت فديك لبنت بلي عاجبها جود داكشي علاش شافت فجود براءة شادة ليه فيديه) حياتي ماشي حشومة عليك شكون كيعجبو نعمل لماكياج قدامو ماشي نتا ، وشكون كيعجبو نبقا نلبس لالوان فدوپياس ياك بليمارة لبارح قلتيلي عاجبك ايكون عندي سترينݣ بزرق لملكي هاني شريت لملكي و لقوقي و ليموني و لحمر ألعمر ، دوزي أختي هادشي دوزي
جود : (حشم فبلاصتها ضرباتو لقوة خلص داكشي بزربة وخرج معاها لاتصدق خاوية ليه الجيب) نعاود نخرج معاك جي كويني صافي
ياسمين : مالك مقلق معجبكش لحمر ألعمر ؟
جود : نموت انا فلكحل ألݣنس
ياسمين : (ركبات لقدام حداه منزلة لمراية تاع طونوبيل ، او جبدات عكرها او لكحل وبدات تكحل او تغني بصوت تاع لعونيات وتعكر)
*ياو لبسي و طلقي شعر
*ياو كحلي و ديري لعكر
*يالي تايقة فالراجل
*ياو ضحكي وبيني سنان
*ياو عري على دوك السيقان
*يالي تايقة فالراجل
*ياو لبسي و طلقي شعر
*ياو كحلي و ديري لعكر
*يالي تايقة فالراجل
*ياو ضحكي وبيني سنان
*ياو عري على دوك السيقان
*يالي تايقة فالراجل
جود بقا مركز معا طريق او داك لفلاش تاع أكرم باقي كيضورليه فبالو مانساهش ، فرانا قدام الدار مخلي ست لحسن داخلة لداخل ناشطة وهو تابعها هاز لحوايج بيد او هاز صندوق بيد تا وصلو الدار
لغالية : رجعتو على سلامتكوم تعطلتو لا ؟
جود : قضينا لغاراض او رجعنا
لغالية : شتك محمل تقديتي لمحل كامل
جود : شي ناس سمعوني غنخلص كشطوني
ياسمين : لي معنا عليا إمعني على مو
جود : (عطاها حوايجها و مشا حط داك صندوق فوك طبلة)
لغالية : شهاتشي
جود : خلي تا يهبط كولشي او نوريكوم شهادشي
#عند صباح#
لي من بعد مفطرات هي و إكسيل طلعات بدلات عليها او لبسات قميجة معا سروال واسع او فولار ، عاد هبطات عند اكسيل لي كان كيستناها فطونوبيل
صباح : (ركبيت حداه) مشينا
اكسيل : مشينا (ضيمارا بطونوبيل متوجهين لعند طبيبة)
صباح : (تسنات تا وصلو لفين كاينة لعيادة تاع طبيبة عاد دوات) بابا يمكليك تحطني انا غنمشي بوحدي ونتا سير لخدمتك بلاما نصدعك معايا
اكسيل : على خاطرك أبنتي تا تسالي وندوز عندك
صباح : لا بلاش انا غنقدر ندوز عند ماما نشوفها شوي
اكسيل : واخة عندك شي سرف
صباح : عندي
اكسيل : (قرب عندها بايسلها راسها) الله يرضي عليك
صباح : آمين (باستو تا هي فحنكو وخرجات فحالها غادية لعيادة تاع طبيبة مخلية اكسيل غادي لخدمتو)
دخلات لعيادة و تسنات نوبتها تا وصلات عاد كخلات عند طبيبة
طبيبة : سلام صباح تفضلي
صباح : (مشات ݣلسات فوق داك لفوطوي لي فلمكتب مقابلة معا طبيبة لي ݣالسة فوق لكرسي )
طبيبة : كي دايرة مزيان
صباح : لحمد الله
طبيبة : كنتي متبعة دواك فهاد ليامات ياك
صباح : واه
طبيبة : او باش بديتي كتحسي
صباح : بديت كنحس براسي مرتاحة شوي
طبيبة : هادشي لي بغيت انا ، ولكن شنو باليك ندويو شوي على لماضي باش ترتاحي كتر ، او بضبط شي حدث عمرك تنسايه
صباح : (متكية بضهرها على لفوطوي او كتفكر) شي حدث عمرني نساه ؟
طبيبة : واه شي حدث ولا فلاش وقعلق معا ماماك معا باباك خوتك لي كان
صباح : (ترخات وبدات كدوي مخلية عينيها إتجمعو فيهوم دموع) فاش كانت عندي 15 رعام طربت من بابا يديني نشوف ماما فكازا بحكم أننا كنا ساكنين فمكناس او هي كازة فكان شي حد خاصو يوصلنا ، بابا مرضهاش فوجهي وخويا جود ديتو معايا بستة وستين كشيفة مكانش باغي يمشي يشوفها ، لموهيم وصلنا لكازا وخدينا أوطيل او قررت نمشي نفاجء ماما فواحد لحفلة كانت دايراها بمناسبة رجوعها من فرانسا بعد عماين تاع لغياب ، قاديت راسي مزيان لدرجة بقيت خمسة تاع سوايع ونا كنشوف شكون لحوايج لي يناسبوني ، هزيت فيديا لكاضو لي خديتو ليها بمية ألف ريال حيت كنت عارفاها مكيعمر عينها غا لغالي ، خديت بوكي دلورد أو شديت طريق أنا وخويا عندها لحفلة ، دخلنا لحفلة طبعا بعدما عطينا بطاقة الدعوة لي ضبرنا عليها من قنت خرا ، خويا جود خداليه واحد لقنية وانا مشيت عند ماما لي كانت معا صحابها نسلم عليه ، بفرحت شوفتي ليها تلاحيت عليها معنقاها ونا فرحانة وكنقول ماما توحشتك ، معنقاتنيش تخايلي ، سرطها ومديتلها لورد او لكاضو ونا كنتسنا منها تقولي كلمة زوينة ، خسرات عليا كلمة وحدة سيري تسنايني فديك طبلة تانجي عندك ، حركتلها راسي بإيه ونا حابسة دمعة بزز عطيتها بضهر او مشي تا كنسمع حوارها معا صحباتها ، “سناء نتي عندك بنت قد هاكدا ؟ / أويلي لا شمن بنتي الى ولا قدها غا ندير لحفايد هادي مسكينة غا واحد حفيدة خالتي مريضة نفسيا او يالاه بدات لعلاج ديالها وحيت عاونتها تعلقات بيا وصاف” ، فديك لحضة بضبط سمعت صوت تاع قلبي وهو كيتهرس لأشلاء ، ولكن عرفتي شنو لي مخيب للآمال كتر أنه رغم هاد لهضرة كاملة بقيت كنستناها فداك لقنيتة طيلة لحفلة أنا وخويا فلخر جا عندنا سرباي كيقولنا شنو باقين كتسناو راه كولشي مشا ، عرفت راسي شحال كنت مكلخة هزيت راسي أنا وخويا ورجعنا عند بابا وقلت ليه والو غي نرجعو لدار او دابة ، ما قاليش لا او رجعنا ونا غا ساكة طلعت لبيتي وبديت نبكي ليل كامل او رغم هادشي كامل حتى لاتصال متاصلاتش بيا
طبيبة : عزيزة عندك ماماك اصباح ؟
صباح : معرفتش ؟ يمكن إيه او يمكن لا شي مرات كنحس براسي مجبرة نبغيها حيت ماما او شي مرات كنلقا راسي منقدرش نعيش بلى بيها
طبيبة : وشنو كتمتليك ماماك اصباح
صباح : ماما هي داك لأمل الزائف لي كتحاول تشبت بيه
طبيبة : (بغات تلطف شويا لجو) عاودي ليا على شي حاجة دارها باباك او خوتك على قبلك
صباح : (بتاسمات بلا شعور) فاش كنت كنقرى فتاسعة كنت كنعجب لواحد دري ، كيحاول فكل فرصة يدوي معايا واحد نهار ضسر عليا شوي ، او حيت كانو خوتي كيقراو فنفس لمؤسسة شافوهوم ولكن مادارو والو او سكتو ولا نقول كان يسحابلي سكتو ، مشاو او من تحت دف خطفوه لدري او ملي نقولك خطفوه هي خطفوه كراو طونوبيل دوخو دري داوه او ربطوه معا واحد شجرة ، بابا ملي ساق لخبار آش دار مشا عندهوم او عواض ميفك دري او يتفاهم معا ولادو سيد بدا كيهر داك دري نهار كامل تا كان غيسخف ليهوم تما عاد حبس او خلاه معلق فشجرة ليل كامل تا مبقاش كيحمل شي حاجة سميتها صباح عاد رضوه ، ولا دري فينما يشوفني ابدل طريق
يتبع
التعليقات 0