بعيد على البلاد ..بعيد على الاحباب وبعيد على الصحاب..هادي حياتي من نهار قررت نخرج برا بلادي.. مكنتش كنضن ان خروجي من بلادي مغيكونش فقط مغادرة ارض الوطن ..بل غادرت لهجتها وتقافتها ومجتمعها وحتى عقلياتها ..حياتي فالخارج لمدة طويلة خلات بلادي تجيني غريبة عليا كأنني ماشي منها ومكنتميش ليها واخا حبها فقلبي محفور وذكرياتها فعقلي راسخة. عشت بديت اول يوم ليا من بعد ما سافرت اول سفر لالمانيا..تما بدات حياتي وتعرفت على شريك حياتي فسن صغيرة ،لاكن بحكم العمل دياله وجنسيته مشيت معاه لسويسرا وقررت نعيش الحب معاه ونبني حياتي انا وياه ..لاكن مع الاسف الشديد تصاب بالسرطان فالسنة الاولى من زواجنا وتوفى قبل عيد زواجنا بنهار. دوزت العيد وحيدة كنضحك على سخرية القدر مني ومن احلامي..كنت كنتسنى داك العيد يوصل باش نحتافل بيه بحال انا وياه بحال اي كوبل كيبغيو بعضياتهم خصوصا واننا تزوجنا عن حب .لاكن مع الاسف دوزتو بوحدي ودوزت معاه اصعب انواع الالم والفراق حتى كنت كنتمنى لو مت ورتاحيت من هاد العداب . كنت كنقول موحال نقزها بلخصوص انني كنت بوحدي فسويسرا ومكان معايا حتى واحد يصبرني ..وماكنت عارفة القانون فسويسرا كيفاش داير والحياة فيها كيفاش غتكون.. حتى كنتفاجأ بخبر هزني وحطني عمرني كنت متوقعاه..بعد الانتهاء من اجراءات الدفن واللاوراق القانونية كلها فاجئني المحامي بخبر الورث اللي عمرني توقعتو..بقيت غير كنسمع ليه وهوا كيقول لي باللي الدار صبحات ملكي والمكازا ديال الملابس الرياضية للرجال والنساء اللي مساحتها كتعدى مئة وخمسين متر حتى هي صبحات ملكي والفلوس اللي فحسابو اصبحو ملكي..يعني انا المالكة الوحيدة لممتلكاته كلها خصوصا انه وحيد وواليديه توفاو وماعندوش اخوة!! .. انا النهار الاول فاش تعرفت عليه وقالها ليا شفقت عليه حيت ماعندو عائلة وهادا من بين الاسباب اللي خلاوني نبغيه الى جانب الادب والتعامل والحب اللي قدم ليا خلاني نبغيه قبل منعرف حتى شنو كيملك ..قبلت نتزوج بيه وماسولتوش على البيت اللي غنسكنو فيه .. الحاجة الوحيدة اللي عرفت عليه انه عندو محل ملابس رياضية ورتو على باه فقط لكن مع الاسف ماورتش غير المحل بل ورث حتى المرض الملعون اللي خلاه يلتاحق بوالديه قبل مايحل عينيه على الدنيا ..ماقدرتش نفرح بداك الورث كله بل تخلعت ..خلعني وقلت للمحامي انا كيفاش غادي ندير بوحدي لهاد الثروة. هادي وانا مزالة صغيرة ماعنديش حتى استعداد لتقبل الفكرة!! انا عمرني تخيلت راسي نكون صاحبة بيت او مشروع او عندي فلوس فالحساب. وخصوصا فبلاد من غير بلادي وبلاد اللي معارفاش عليها بزاف ومزال ماتعودت عليها ويالاه كملت فيها عام !! خاصني اعوام باش نتأقلم باش ندير اصحاب باش ندير شبكتي الخاصة اللي تعاوني على التأقلم ..لو كان هاد الورث وقع فألمانيا كنت نقدر نتقبلها حيت عشت فيها مدة طويلة مع ختي وعندي فيها عائلتي لاكن فسويسرا!! اللي اصلا جاتني مقناطة ماقدرتش نتأقلم فيها وغير راجلي مسكين اللي كان عندي فيها ومكانش القنط كيبان ليا!! تلفت ماعرفت ماندير كان خاصني ضاروري استراحة من هاد الوقائع كلها والابتعاد على كلشي وكان خصني شي واحد جنبي يوقفني ويقولي شنو ندير واخا المحامي كان كيعاوني لاكن بصراحة كان خاصني شي واحد من الاقارب ديالي حدايا ف في فترة بحال هاديك .يجمعني ونحس بالدعم وبالقوة خصوصا انني انسانة كتأثر وحساسة بزاف وشخصية كتحب الضحك والمداعبة وماليهاش فالاحزان والى دخلات فالحزن كتيه وتبدا تقلب فيمن تشد وتتمسك
قررت نهرب من سويسرا ومشيت على وجه السرعة لالمانيا عند ختي لقيتها كتسناني ولقاتني ضعيفة ومكسورة وبدات كتجمع اشلائي وتقويني ولقيتها سند ليا كتشجعني وتقولي باللي جا الوقت اللي تكبري فيه فكريا ونفسيا وماتبقايش معولة على ركيزة وكوني نتي الركيزة ديالك وماتخليش حقك يضيع او ضيعيه بيدك .. تخيلي لو كان عندك بيبي شنو كنتي غديري؟ غتنوضي على قبله تهزي المسؤولية ..يعني نتي بيبي ديال راسك هزي راسك ووقفي لانه كاين بنات ثلاتة وعشرين سنة مزوجين وهازين مسؤولية بيت .
فكررت وقلت ميمكنش ثلاتة وعشرين سنة يكونو مزوجين وعندهم اطفال حيت انا كنت مستبعدة فكرة الاطفال ونحيتها جانبا الى سن ما فوق الخمسة وعشرين سنة ..ولولا الحب ماكنتش ابدا نفكر فالزواج وكنت فقط ندير معرفة صطحية او الحد الاقصى ديالي ندير بوي فراند لاكن نتزوج لا .حتى تلاقيت بالحب اللي خلاني نخاف نخسرو وغطيت عيني على جميع انواع الشباب واقتنعت .
موتو مكانش ابدا ساهل بالنسبة ليا ..لاكن جات موجة الورث اللي شطناتني خلاتني نتشغل على وحدتي وتفكيري واحزاني..لاكن من بعد مللي رجعت لجونيف واستقر الوضع قانونيا واصبحت المالكة للمحل والبيت اللي كان كيتكون من جوج طبقات وسيارة مرسيديس كلاسيكية بقيمة تمانين مليون مغربية و مال فالحساب البنكي اللي تحول مباشرة لحسابي بعد انتهاء كل الاجرائات
بعد استقرار الوضع المادي جلست نصفي الحسابات انا وضميري ونفسي وقلبي وحطيت عقلي وسطهم وجلست نخاطبهم بلساني..اشنو بغيتي نتا ؟ وشنو بغيتي نتي؟ ونتا اشنو كطلب ؟. اشنو بغيتو مني ميمكنش تتجمعو فجسد واحد وتردوه حلبة مصارعة وضاربو فيه
قالي قلبي شوفي فينا وشوفي شكون واكل العصى فديك الحلبة ديالك
تلفت جيهته لقيتو فعلا كينزف والضمادات كيلسقو ويرجعو يطيحو ..قالي واخا بالدوا واخا بالضمادات حتى حاجة ماقضات فيا..حاولي تجربي شي دوا اخر من غير النسيان يمكن يوقف النزيف ونرتاح شوية من الالم ونوقرك حتى نتي
قلت ليه علاش هادشي كله ؟. علاش هاد الكدمات والجروح كلهم من كل جهة واش مابغيتيش تبرا واخا داز شحال على الفراق
شار لي بصبعه جهة عقلي اللي كان قالب وجهه مكيشوفش فينا بالمرة وقالي
ها اللي كل مرة كيفكرني وينزل عليا بضربة
تنهدت بتعب كنحاول عقلي بالسياسية لعل وعسى يتنازل شوية ومايعاندش وقلت ليه
ماكفاكش هادشي اللي عشنا وهادشي اللي داز علينا كله ؟ ماقدرتيش تفكر فالمستقبل شوية وتبعد على العاطفة
قالي ميمكنش انا حاليا ماعنديش ذكرايات من غير داكشي اللي مخزن وميمكنش ليا نتوقف على التفكير ..اتيني بالجديد اللي يخليني نرد الذكريات الزوينة اللي عشتو مع بعضياتكم للارشيف..نسيتي باقة الورد اللي كان جاب ليك وكنبغيك اللي كان قال ليك
دورت عيني جهة القلب لقيتو كينزف اكثر وبديت كنترجا عقلي ونقوليه براكة ..صافي براكة فكر فهاد الفلوس اللي عندنا فكر فشنو غنديرو فكر فالحياة
قالي..الفلوس وكلشي والوحدة والحب فين هوا ؟ كلشي كيدار على قبلالحب والمتعة فين هي
سكتو قبل مايبدا القلب ينزف قلت ليه سكت ..صافي ..صافي ماتقولي حتى كلمة
قالي شوفي مع نفسك اللي ماعندها نفس فحتى فحتى حاجة اللي عييت نضغط عليها تخرج وتعيش باش تعطيني ما نخزن ونعمر سينتك جديدة لاكن هي مامساعدانيش
شفت فيها لقيتها غمامة كحلة مطوية عاطيانا بالضهر ..قبل مانتكلم قالت لي
ماتقوليليا والو ..مابغيت حتى حاجة بغيت غير نعس ..حتى واحد مايصدعني ولا يملي عليا رغباتو .. ماعندي جهد لحتى حاجة خلينوني عليكم فالتيقار .
مالقيتها من حتى جهة ..هزيت راسي فالسما وهزيتهم معايا مدكدكين بثلاتة وقلت لراسي
ماعندك فيين تهربي يا نهى ..حقك فالعداب غتعيشيه غير وجدي راسك بلا ماتقاومي تكيت على قلبي قلت ليه صبر .. لامفر من هادشي ماعليك غير بالصبر صبر حتى يفرج مولانا
مجاوبنيش ورجعشد بلاصتو ورجعت كل حاجة فين كانت وجلست على البكا لعل وعسى نرتاح شوية..شفت نفسي الغمامة كيفاش مطوية وكيفاش سادة على راسها وقررت نجرب ندير بحالها باش نتغلب على عقلي ونخلي قلبي يرتاح شوية وعطيتها غير للنعاس ..النعاس ولا شيء غير النعاس ..لحسن حضي ان الماكازا كان عندها مسيير والقوانين فسويسرا صارمة وكلشي ماشي بالوضح وبالورقة وستيلو والا كان غيوقع ليا السيزي..بحكم ان المكازا كبيرة كان عندها كونطابل وجيرو وكانو كاع ليفاكتور اللي كتجي بيهم السلعة والمصاريف كلها كدخل فالحساب وتسجل فجدول العمل وكانو الايمايلات ديال الشركات اللي كنتعاملو معاهم كلهم كيوصولني انا هاكا كنت كنعرف شنو دخل وشنو خرج بلا منسول .
بقيت على داك الحال لمدة سنة تقريبا كنطالع على الميل ديالي ونشوف رسائل التسويق ونرجع نتكا حتى بديت كنعيا من النعاس ونمل وبدا عقلي كيدفعني نتحرك ..ضحكت عليه بسخرية قلت ليه صافي هادا جهدك !! لا غير خليك طاغي نشوفو شكون غيعيا انا ولا نتا .قالي عييت من النعاس وليت مكنعرفش نفكر صافي ديري اي حاجة الا النعاس ..راه كلشي تلف ليا وكلشي تخربق ليا
طليت على قلبي لقيتو كيرغب ويزاوك ويقوليلا غير خليك ناعسة راه فاي لحضة يرجع ينزل عليا بشي ذكرى واجا ما جمع الجرحة
تنهدت بعمق ودورت وجهي جهة نفسي قلت ليها مزال مابغيتي تصفاي من ديك الكحولة؟ ديري الدراع شوية ويالاه نتحركو راه عيينا وراحنا مقهورين
ضارت عندي قالت لي انا توحشت المغرب..توحشت البنات لقدام وريحة البلاد ..مانقدرش نهز الراس هنا ونتعالج هنا خرجيني من هاد البلاد اولا اللي مكنطيق فيها حتى واحد
تنهد واحد تنهيييدة ودرت يديه على خدي قلت كنتسنا الرد ديال عقلي.. ماردهاش فوجهنا حيت عارف راسو غنطمسوه بالنعاس وأييدنا فقرارنا وتافقنا على سفرة للمغرب واخا الجو مكهرب وفصل الشتاء والجو غير ملائم للسفر لاكن حنا مابيناش المسارية والدوران ..بينا نبدلو اللغة والحيوط والريحة حتى هي
اذا ..هيا بنا الى المغرب..مباشرة من بعد ماتقبل عقلي الطلب قلبي تكمش مابقيتش كنسمع حسو وخليتو يتسنط لعضامو ..لاكن تصدمت فنفسي اللي ناضت تحمسات للسفر ودفعاتني نجمع حوايجي ودوزت الليلة كلها كنطوي ونحط فالباليزة حتى ساليت وقلت ليها
صافي هادشي اللي بغيتي
قالت لي شوفي مافيا اللي يتمرمرد فالطرقان ..الى بغيتي نبقاو مزيانين دي طموبيل
طار علينا عقلي قالي ديها غتنفعك حسن ماتمشي وتكري باش غتكري دي معاك طموبيلتك ونمشيو مساريين من بلاد لبلاد واخا نشدوها كرجة فالطريق لاكن حسن حنا غرضنا نخرجو من الخيوط ولعل هاد السفرة تكون سفرة صلح بيناتنا
قلت ليه ماقلتو عيب على بركة الله
شديت الطريق بالطموبيل وبكثرة ما شبعت راحة ماحسيتش بيها حيت كنت متلهفة ندير شي حاجة ..اي حاجة تحسسني بوجودي فالحياة المهم مانبقاش محسوبة من الاموات ..توحشت نتحرك توحشت نشد طريق طويلة..توحشت نسافر ..توحشت نضحك وتوحشت روح الدعابة اللي فيا..عييت من الحداد ومن الكآبة حتى عقلي مل من ديك الاسطوانة الحزينة يعاودها بقوة ما كل مرة يطلقها علينا ..اما القلب بكثرة ما كلا دق مابقاش كيحس بالالم واخا ينزف ولا يجلس. حسيت بأي حاجة رجعات كتطلب تعيش وكطلب مني انا مدير محاولة ويمشيو معايا فيها ..المهم ما نسدش عليهم من جديد.
دزت على فرنسا دوزت يوماين فيها وخديت بعض الهدايا للعائلة اللي علمتهم بالقدوم ديالي..خديت شي حاجات كانو خاصيني حتى انا وانطلقت من جديد دزت على اسبانيا حتى للخوزيرات وشديت الباطو لميناء طنجة ودخلت .حليت السراجم وواخا كان البرد واستنشقت ريحة البلاد.. الله على ريحة شحال غزالة..احسن من عطور شانيل وكرستيان ديور ..وقفت السيارة فالمدينة واخا ماعندي غرض بالمدينة لاكن بغيت نسمع الدارجة اللي تعشطت ليها بزااف.واخا بدات كتهرب ليا مع البعد والغربة وكنعيا وانا كنهضر بيها لمدة طويلة لاكن كنحبها ..على قبلها وعلى قبل الوجوه المغربية والشعبية ديال الناس دخلت للمدينة سرحت رجلي وانا لابسة بوط حتى للربكة بلاستيك فالاسود وسروال كحل وجاكيط رمادية غليضة والطبوش كحل ويدي فجيابي والصك محزمة بيه قدامي وعادية كندور ونضحك مع الناس حتى حسيت براسيرصيت نفسي شوية ورجعت بحالي للطموبيل سديت عليا وحطيت قدامي صاك من الكارطون فيه جيبيوبرينكلز وشوية دالشكلاط يونسني فالطريق وكافي سخونة خطيتها حدايا..حيدا الجاكيط حطيتها حدايا فالكرسي وبقيت بواحد البودي خفيف صدره عريان وحيدت الطربوش حتى هي وخليت الطموبيل كتسخن ختى صهدت وكملت الطريق نيشان مونسة بدوك الطقيطقات والموسيقى المغربية حتى لمراكش. يالاه دخلت ماشفتش السطوب حيت اصلا طافي مافيه حتى لون حتى وقفني البوليسي للجنب وشاف الماطيريكل لقاها سويسرية وشار ليا بيدو نهبط الزاج
شفت الجو مابيهم فمراكش ماشي بحال طنجة ولبست الجاكيط باش نهبط الزاج وميضربنيش البرد وانا سخونة وهبطتو قلت ليه السلام
قالي السلام لاللة .لوريقات
مديت ليه لوريقات شافهم وقالي عندك مخالفة حرقتي السطوب
قلت ليه هوا اصلا محروق واقيلا ماخدامش !
قالي: السطوب اللي مقابلمع الناس اللي من الجهة لاخرى مابنش ليك شاعل فيه الخضر .يعني نتي غيكون شاعل عند الاحمر
بقيت كنضحك على هاد العملية اللي دار ليوقلت ليه شنو المعمول
قالي غتخلصي
ماكترتش معاه الهضرة حيت بان ليا غياكلني بعينيه قلت ليه شحال وعطيتو وخديت التوصيل وزدت فحالي كنضحك على استقبال مراكش ليا من اول دخلة ليها من نهار خويت البلاد..هادي باينة غضبانة على غيبتي وعطاتني فالباب قبل منزيد
فييين دارنا ..فيين الحي..حي المسيرة ..الاحبااااااس..الله الشارع جيت معاه عامر غيطرطق بالناس والطموبيلات غاديين جايين..كما خليتو لقيتو ..ميمكنش شحال توحشت شارع الاحباس . بلا منشعر دمعو عيني من كثرة الشوق لبحال ديك الاجواء..الدراجات النارية بكل انواعها فكل بلاصة راكبينهم بنات واولاد وعيالات واللجهة المراكشية اللي مستحيل ننسا عليها وبقات كتردد فاذاني طيلة غيابي على البلاد. هبطت الزاج كنضحك مع الناس بالفرحة ودخلت السيارة مع واحد الشارع لمجمع سكني كبير عندو باب كبير وجيت مع وقت المغرب دخلت حتى للمجمع لقيت الكارديان تما وقفني فمكان فارغ وحيدت الحزام لحت عليت الجاكيط ونزلت تبسمت ليه قلت عمي مبارك مابقاش هنا
شاف فيا باستغراب قالي مااات مسكين الله يرحمو انا ولدو انا الليوليت شاد بلاصتو ..شكون نتي واش كتعرفيه؟
تأسفت ليع وعزيتو قلت ليه انا بنت الحاج عمار
قبل حتى منكمل كلامي معاه خرجات ختي اللي كبر مني بعماين وماما وراها كيجريو بالفرحة طارو عليا عنقوني وعنقتهم وبدينا البكاء الحار وخرج بابا بجلابة غليضة ديال الحبة كحلة وباغة وتقاشر رماديين رقاق وطربوشة ديال رقيقم على راسو عنقني شميت فيه ريحة المسك ..بست يدو توحشتهااااوتلمست فنعومتها وعنقتو وعنقت ماما وطلعت معاهم موحشة دارنا المغربية بالكبص ديالها والزرابي والصالونات ..لقيت معاهم ولد ختي فالدار حيت حسب ماقالو ليا فتيليفون كتخليه معاهم وتمشي للخدمة حيت استاذة فالاعدادي.
الحوار اللا منتهي ..هما كيسولو على حالي وكيف بقيت وانا كتسول على حالهم وكيف دايرين مافراسهمش باللي نفستي المأزمة هي اللي جابتني ولاكن مابغيتش نقوليهمعلى حقيقة مشاعري واحوالي باش منشطنهمش وعطيتهم غير الحاجة اللي تفرحهم وتريح بالهم باش. حتى انا نفرح فاش ونرتاح فاش نشوف وجوههم ضاحكة .
وصلات ختي سلمى من الخدمة جات عندي كتجري حتى هي تعانقنا وجلسنا نهضرو مابغيناشنساليو لعشية كلها
اما ماما مسكينة لقيتها موجدة لينا لعشا كلنا وجا حتى راجل ختي لتاحق بينا وتجمعنا ديك العشية تعشينا مجموعين وكانت ماما مصاوبة لينا طنجية باللحم ..الله شحال بنينة وشحال توحشتها وتوشحت التغماس والمرقة ..بقيت كنغمس ونعاود ماهموني دفاري اللي صاوبت ولا لفرانش الابيض اللي رجع اصفر
كليت وكنتلدد بديك البنة وديك اللمة دالعائلة اللي فعلا كانت هي دوايا وهي العلاج لنفسيتي المستعصية الكئيبة .
بعد العشا مشيت رقدت دفاري فالخل حتى صفاو من الصفورية وجلست كتفرق فالكادويات .. قالت ليا ماما بالضحك كاع ماجبتيليا صباط ام كتلوم والمشطة دعبد الحليم
قالت لي ختي الكبيرة اييه والصابون راه من نهار مشيتي ماغسلنا وجهنا
بقيت كنضحك قلت ليها جبت ليك الصابون ديال شانيل تكايسي عليه ماتعرفي فوقاش نعاود نرجع وتجلسي بلا غسيل
دوزنا العشية كنضحكو على الكادويات ولاكن الصراحة والله واعلم كنقول تهليت فيهم حيت خديت ليهم داكشي اللي كنبغيه لراسي وتشريه لراسي والل كيعجبني..والادواق كتختالف عاوتاني والله واعلم لاكن بان ليا فرحو بيا وماعطاوش اهمية للكادويات بقدر ما لسقو فيا كل مرة تعنقني وحدة .
نعست اجمل نعسة فحياتي مع ختي فالبيت وصبحت على الفطور المغربي على حقو وطريقو ..كنفطر وكنفكر فصحاباتي القدام اللي مشيت وخليت وسولت عليهم ختي عطاتني رقم واحد صاحبتي فيهم سميتها احسان .عيطت ليها صدمتها قالت لي متقوليش ليا نتي فالمغرب!!
قلت ليها انا فالمغرب ايوا وجدي راسك نتشاوفو
ديك الساعة ناضت كتجري بغات تجي عندي لاكن انا بغيت ناخد راحتي مع صحاباتي بوحدنا كنا كما خديتها مع واليديا ودرت معاهم نتلاقاو ونتغداو فشي بلاصة وناخدو وقتنا حيت اللقاء الاول كيكون عميق.
وجدت راسي لبست جيب توب فيها كارويات كحلكة كلها مخططة ولافيست ديالها قصيرة بالبوطون ديال ليبيغل وبودي رقيق كول مونطي ودرت شاو مايل للجنب فالغور وهزيت صاكي وبوط بالسيور كحل مع لبية موس . كان ستيل كلاسيكي فرنسي شوية مؤنث على اللزوم لاكن كيجي معايا حيت ملامحي شوية مايلة للشينوا غير انا عيني كبار عليهم ومشفرين لاكن نفس الشبه بيني وبينهم وفمي صغير ووجهي بحال القلب وبشرتي مابين خمرية وبيضا كل مرة كيف كنبان على حسب الجو ..شعرب كحل بزاف لمتسوط الضهر متومج شوية وحجبامي غلاض مسحوبين مع عيني .ماغليضة مارقيقة بين وبين مرة نغلاض مرة نضعاف داكشي عني على حساب الكانة لاكن مؤخرا بقوة ما كترت من النعاس بقيت كما اانا واخا الخاطر مريض مادا مني والو
دزت على صاحبتي حدا دارهم بالطموبيل ونزلت نعنقها ، غير تعنقنا اجاا مافارقنا تفاقرنا بالبكا وركبات معايا لقات الكرسي عامر بالصيكان ديال شيبس وبديت كنخوي ليها ونضحكو باش تجلس ومشينا دزنا على نور حتى هي لقيتها فراس الشارع كتسنى ونفس العناق ونفس الاشتياق حتى كلشي بقا كيشوف فينا
ركبتهم معايا وبقينا كنقلبو فين نجلسو..حسيت بيهم كيبعدو من الاماكن الغالية وقلت يمكن ماعندهمش امكانيات ليهم خصوصا فاششفت واحد الغيسطو فكيليز ووقفت قدامو قلت ليهم هادا باين زوين
قالت لي احسان:ويلي ويليهادو قرعة دالماء بربعين درهم
قلت ليها واخا ..كيبان زوين
حطيت الطموبيل ونزلنا جلسنا تما على برا ..حان الجو رائع .. مابين الدفئ والبرودة لاكن الشتا مطاحتش والسما حمرا ..الجو ساهم فديك الجلسة الزوينة اللي جمعاتنا وحاولت منقول حتى حاجة عليا ..حيت الى جبدت غير كلمة غنضطر نشرح كلشي واي كلمة خصها تفسير وانا جايا باش نفوج ومانقول حتى حاجة لا على حياتي لا على حياة شي واحد اخر . حدهم سولوني قالو ليا واش مابقيتيش فالمانيا مع ختك قلت ليهم لا مشيت عشت فسويسرا وخدمت تما .صافي هادشي اللي قلت وسديت على الموضوع باش منرجعش نتخبط من بعد ونعيش الازمات وداكشي..سولتهم على احوالهم قالت ليا احسان انا درت اوتيست دوليغ وخدامة فالمطار دابا كنتسنى يحولوني للسرفيس دو فول
ونور قالت لي خدامة فباغا فاغماسي فالاحباس ..بقينا كنتجمعو على الاحوال ونتذكرو ذكرياتنا حتى داتنا الوقت ونسينا راسنا وبدا الضلام يطيح وقلت ليهم توحشت جامع الفنا
قالو لي يالاه نمشيو ليها
جمعت الحساب كله واخا ماخلاونش نخلص لاكن حسبتها عراضة حيت انا اللي قلت ليهم نجلسو تما .دفعت الفاتورة ومشينا لجامع لفنا ..بزز باش لقيت بلاصة للطموبيل ومع طويلة كتمحني فالسطاسيون الى كان مضيق.
هزيت صويك ديالي حزمت بيه فالجنب ومشينا كندورو وكل خطوة كنخطيها كنحس بقلبي كتحل والروح كدخل معايا .. مشاهد توحشتها واصوات ماكرهتش نضمها..حماس لوموبيونص ..يا سلااام
تلفت جهة القرد كنشوف فيه لاكن ماقدرتش نهزو شفتو لتيراتو طريبشة الغوز فوشيا بغا يشدها وخفت يجرليا حتى شعري معاها حيت تفرجت فبزااف دالفيديوهات ديال القرودة فمراكش كيديرو زبايل
رجعت اللور بعدت كنضحك وضرت لقيت احسان واقفة كضحك مع جوج دراري طوال ونور كتسلم ..كانو شباب كنضن مواصلينش الثلاتينا وواحد شاف فيا شوفة حسيت بيها ماشي شوفة عادية وتبسمت ليه ..واش تبسمت حيت ديك الشوفة حسيت بيها مميزة ليا ولا حيت اصلا كنضحك لكلشي منين مادزت وموحشة فالبشار يقولو عليا هادي غير شي حمقة .
لتاحقت بيهم من شوفتو حسيت بيه متوقعش نكون مع البنات وضحك معايا مد ليا يدو ومديت يدي سلمت عليه قلت ليه صافا
قالي صافا الحمد ونتي
قلت ليه الحمد لله
سلمت على صاحبو حتى هوا ضحك معايا حتى تسدو عينيه وتأكدت ان اصلا شوفات الدراري هاكاك دايرين مع البنات مكاين لا مميزة لا والو غير انا اللي شحال هادي ماجيت للمغرب تخلطو ليا الناس
شارت ليا احسان للولد لاول اللي شفت قالت ليا نصر الدين ..والولد التاني فيصل
تبسمت انا ونور قلنا ليهم متشرفين وشفت بنص عين جهة ناصر كان لابس دجينز ازرق وجاكيط الكوير وصاحبو لابس دودون
ماعرفتش علاش نصر الدين لفت انتباهي واخا انسان عادي رجل شرقي يقدر يشبه لبزاف ديال الرجال الشرقيين..ملامح وجهه عادية ماشي شي زيين اللي يطيحو عليه الارواح بحال الزين اللي كنشوف فسويسرا .. وحتى فورمتو عادية كيبان عامر وطويل بحال صاحبو ..عينيه كوحل وحجبانو كوحل ماعندوش مسافة واسعة بين العين والحاجب الشيء اللي عطا غموض لعينيه ونضراته للناس كتبان غامضة ومسرار ولحيته كحلة خفيفة .. ربع يديه ساكت كيشوف فجهة اخرى وانا كنعبرو كنشوف شنو اللي فيه اتيراني ؟! عندو وقفة زوينة ..عندو نضرات صارمة ..لاكن هادشي اصلا كنشوفو عند الرجال الشرقيين كلهم وفالمغاربة اكثر ماعرفتش علاش غير هما اللي فيهم هاد عزة النفس اللي كتخلي عليهم انطباع خارجي واضح ..قلت مع راسي يمكن شحال هادي مقابلت شي مغربي رجع كيبان ليا مميز.
دورت وجهي شادة فنور واحسان كتهضر مع فيصل ..داز واحد القريد اخر حدانا شيرت ليه بيدي بغيت غير نضحك معاه ساعا خلعتو كان غينقز عليا وهربت اللور كنضحك حتى داز ..ضرت جيت مع احسان نيشان كتشوف فينا وتشاور عاد فهمت باللي فيصل وصاحبو عرضو علينا نتعشاو تما وقبلت حتى انا ومشينا بثلاتة حدا بعضياتنا وانا وسط البنات وفيصل حدا اخسان وفالطرف ليه نصر الدين دخلى وسط الناس وتخربق الترتيب جيت فبلاصة نور فالطرف وهي رجعات لوسط حتى حسيت بنصر الدين داز من مورايا وجا حدايا
وسط الدخاخن وداك الرواج وديك الاجواء اللي واخا نوصفها منقدرش نوفيها حقها وقفنا قدام واحد عندو طبلة طويلة مدورة بحليسات بونج صغير وبدينا نتخشاو واحد من مور واحد وقالي نصر الدين غير دخلي نتي اللولة
ودخلت جلست حدى نور وجلس حدايا نصر الدين وبدينا نتشاورو شنو ناكلو ..تشهيت الشوا ونضت وقفت ضرت عند مول الشي كنطل لقيتو حاط شواية وشيرت ليه بصبعي و ريوكي سايلين على داكشي اللي كيشوي قلت ليه
عفاك صاوب ليا قطيبات مشويين
شفت الدنجال فالاول ماعرفتوش لاش كيصلاح ولا حتى شنو هوا جاني مرخي فوق الربيع حتى قالي دنجال مقلي وانا نقول اللللللله شحال توحشتو .طلبت ليه واحد جوج دنجالات حتى هما وجيت نجلس جلست على صاكي ورجعت نضت حطيتو على رجلي لقيت نصر الدين غير كيشوف فيا وصاحبو حتى هوا .همسات ليا نور فودني قالت لي راهم عارضين علينا دابا ومع مكيعرفوكش غادي يقولو هادي كتغنم
قلت ليها الاا راني غنخلصو راسي!!
قالت ليا غير قلت ليك شنو يقدر يقولو وصافي
هزيت كتفي قلت ليها لالا راه عادي
دازو قدامنا كناوة بطقيطيقات وقفو لينا كيضحكو وبداو يشطحو ويطبلو ووقفت كنسفق ليهم بالفرحة كنت غنتسطى .. تقول كنت محبوسة فشي حبس ماكنتش عايشة ..هاد الاجواء كنت كنشوفها غير فاحلامي وكان قلبي كيفرح اما فالحقيقة راه ميمكنش شحال تحمست وفرحت والناس كيزيدو يحمسوني بلومبيرنص..عطاني دوك طقيطقات شديتهم فبلاصتي وانا واقفة بديت كنقرقب بيهم شوية ورديتهم ليه ك ورجعت جلست شفت نصر الدين جبد بزطامو عطاهم شي حاجة ومحاسبليش انا واش كيدورو على الفلوس حتى شفتو عطاهم وبداو كيدعيو معانا وانا نحشم وجلست كنشوف بعيني وساكتة حتى حطو لينا الماكلة وكحز ليا نصر الدين الدنجال قالي عزيز عليك دنجال مقلي
ضرت عندو كنضحك قلت ليه عزيز عليا شحال هادي ماكليتو
قالي موجود علاش شحال هادي ماكليتيه
بقيت ساكتة مطولا وقلت ليه ماكتابش وصافي
قالي مساكناش هنا واقيلا ؟
قلت ليه علاش؟
قالي هضرتك بحالنا ماشي مراكشية
عاد انتبهت ليه حتى انا وقلت ليه حتى نتا ماشي مراكشي واقيلا
قالي ولد انا كازا غير جيت لهنا مع الدري صاحبي وصافي
قلت ليه اااه فهمت ..كازا حسن من مراكش؟
قالي علاش عمرك مشيتي ليها؟
قلت ليه لا عمرني مشيت ليها
استغرب قالي ميمكنش كاين شي واحد مزال مامشاش لكازا
ضحكني قلت ايه اناا نيت
بدا كيضحك قالي ايوا مرحبا بيك
بقيت كنشوف فالضحكة ديالو قلت ليه عندك واحد الضحكة زوينة
هز عينو بقا غير كيشوف فيا والقطيب فيدو وكمل الضحكة قالي شكرا حتى نتي عندك ضحيكة زوينة
عجباتني عندو هادي حتى وضحكت من قلبي وكليت الماكلة اللي كانت قدامي كلها وقالي واش تزيدي
قلت ليه لا منزيدش مزالة باغا ناخد حلزون
بدا كيضحك وطل عليا صاحبو قالي الشهية تبارك الله عندك محلولة..اشنو سماك الله بعدا
قلت ليه سميتي نهى
قالت ليا احسان بالصحة والراحة حتى تهضمي بخودنجال
مسحت يدي رجعت اللور تكيت على واحد الخشبة كنتسناهم حتى كملو و جا الطباخ جمع لينا الحساب وحليت بزطامي يالاه غنمد ليه الفلوس شدني نصر الدين من يدي هبطها قالي الله اودي اش كديري؟!!
قلت ليه علاش راه خصنا نخلصو شنو كلينا
بدا كيضحك قالي الله يهديك مكدارش هادي حتى بالضحك
رجعت فلوسي لصاكي قلت ليه واش غتخلص عليا نتا!!
بقا كيشوف فيا وخلص داك العشا هوا وصاحبو ونضنا كنتمشاو شديت فاحسان قلت ليها فين كاين مول الحلزون
قالت لي هاهوا غير هنا
داتنا كلنا حتى لعندو وقفنا لاكن فيصل بغا وقف قالينا
البنات .هوا هادا فرصة سعيدة
تلفت ضحكت معاه درت ليه باي باي قلت ليه شكرا على العشا
قالي بالضحك غنتسالكم عراضة دابا
قلت ليه صافي غدا نعرضو عليكم صافي
بقا غير كيشوف فيا وضرت عند نصر الدين نقوليه بسلامة لقيتو شاد تيليفون فيدو قالي تعطيني النمرة ؟
قلت ليه اه اه بيان سيغ خودها ..زيغو سيس
مليتها عليه قيدها عندو وهز عينيه شاف فيا عاوتاني بديك النضرة العجيبة ماعرفت شنو معناتها ..سمعت تيليفون كيصوني فصاكي وحبدتو بالزربة بغيت نجاوب لاكن قطع قالي غير انا ..قيدي نمرتي عندك
قيدتها ديك الساعة ومدو لينا يديهم سلمنا عليهم ومشاو وبقيت انا مع صحاباتي حدا عربة الحلزون ..ضرت ورايا نشوف فيهم وبقيت متبعة ليهم العين حتى ضار نصر الدين لقاني كنشوف فيه ودرت ليه بيدي باي باي وهز يدو ردها ليا ومشا
اللللللله شحال زوين هاد الحلزون ..كليت حتى ضراتني كرشي وبقات ليا جغيمة يالاه هزيت راسي نقطرها فيك مي حسيت بدقة حدى صاكي وضرت بالزربة
احسان : اهياااا اش اوا تادير !!!
لقيت احسان شادة اليد لواحد الدري صغير فوق صاكي حيدات ليه تيليفون ديالي وقلت ليها
هيييه تيليفوني!!!
قاليها بغيت غير نعيط لمي تلفات عليا
جراتو قالت ليه بيتي تعيط لمك فصيكان ديالنا عندنا تيليبوتيك حنا الشمكار اللي اللي ولدك انعيط ليك للبوليس
بدا كينقز ويحلف ويقوليها بيت نعيط لمي لاكن هي عطاتو واحد التصميكة للراس قالت ليه هاا مك للحلوف اللي ولدك
مشا كيجري حتى بعد وهبط سروالو ورانا داكشي وبدا علينا بالمعيور قدام الناس..قالت لي حضي تيليفونك على شويكيك با يديه ليك ..شدي الصاك قدامك كي تا ندير ليه انا راه ولاد الحرام اير الشفار على خوه . القلاّوي لاخر ..الكحلوش اللي ولدو
شديت صاكي قدامي من ديك الساعة وانا معنقاه وجينا خارجين مع الشارع حتى خرجات لينا واحد المجموعة ديال الدراري صغار ومعاهم داك المسخوط اللي كان غيسرق ليا تيليفون .. فالاول حسابني غير دايزين لاكن فاش شفت احسان ونور هربو كيلسقو مع الحيوط بقيت واقفة بوحدي كنشوف وجاو عندي شي وحدين ولخرين تبعو احسان ونور ..مافهمتش علاش جاو عندي حتى حسيت بواحد طلع ليا الميني جيب وضرت بالزربة هبطتها غوت وجات لاخر جر ليا الصاك شديتو حتى هوا وبقيت كندور فبلاصتي كل واحد منين كيجرني وانا كنقوليهم شنو بغيتو مالكم ؟!! حسيت بواحد خورني وطرت بالزربة كنغوت دخلت لواحد المحل ديال الصيكان وقفت فيه وماعجبنيش الحال حسيت بيهم اقتاحمو خصوصياتي ومسوني فالنقط الخاصة بيا الممنوعة على شي لي كان كيقربها ولو بلمسة هوائية ..
بديت كنبكي وجا مول المحل قالي مالكي قلت ليه دارو ليا هاكا وجروني من حوايجي ..
جبد واحد العصى وخرج عندهم بدا كيشحط كل واحد فيهم فين نقز مشا وبدا مول المحل كيسب فيهم عاد قدرت نخرج ومشيت مع جنب الحيط كنقلب على البنات ونمسح عينيه ونتنخصص لقيتهم ملاسقين مخبيين حدا واحد الحانوت كيضحكو وخرجو عندي كيجريو ويشوفو موراهم خايفين وقالو ليا علاش كتبكي !! خوروك حتى نتي
بقيت كنتنخصص وكنشوف فيهم هما كيضحكو وقالت لنور
ولد الحرام حسيت بالسليب تجر من بلاصتو ..ال٠٠٠امل اللي ولدو
قلت ليها علاش دارو لينا هاكا قدام الناس
اخسان: وا تا نتي راه ديما هاكا..اللي ماخورو برهوش راه خورو حمق شكون هادا اللي ماعمرو تخور فحياتو
نور: اللي ماتخور بصبع تخور بقوالب
بقاو كيضحكو مافهمت اشنو كيقصدو .المهم مشينا وحاضيين جنابنا حتى للطموبيل وركبنا وصلتهم كل وحدة حدى دارهم ومشيت بحالي لدارنا لقت بابا كيصلي العشا وماما فالكوزينة قالت لي تعطلتي..درت ليك واحد الكصحة دالرفيسة بالمساخن ودجاج البلدي من داااكشي
وقفت حداها قلت ليها على دوك الدراري شنو دارو لينا وشدات حناكها قالت لي ويل الشيطان الى ولاد لحرام ..بقاي ابنتي تلبسي السروال..لبسيييي السروال لا يعودو يحيدو ليك الصاية فالزنقة
قلت ليها اخر مرة نعاود تلبسها
مشيت لقيت ختي فبيتها كتقرا حيت كانت كتوجد للماستر وجلست حداها حتى هيا عاودت ليها كولشي وبقات كضحك قالت ليا راه انا خورني حمق ختى حزقت وانا جايا من الحمام فالصيف وودرت براسي ماتخورت ماوالو كملت طريقي للدار
قلت ليها اخر مرة نلبس الصاية
بدات كضحك قالت لي علااش!! لالا غير لبسيها كتجيك زوينة .. راه ماشي دييينا ديما كيوقع بحال هاكا غير دابا تلاقيتو مع دوك البراهش وصافي اما راه ماشي ديما كيوقع هادشي
تنهدت سمعت تيليفوني كيصوني وجبدتو ماعرفت النمرة ديالمن!! رديت قلت الو. ورد عليا. قالي
الوو نهى ..صافا
قلت ليه صافا الحمد لله شكون اللي معايا؟
قالي معاك فيصل..خديت النمرة ديالك من عند احسان دابا عاد ..بغيت نسول واش وصلتي للدار واش كلشي مزيان ..ياكم جو طو ديغوج؟!
بتسمت قلت ليه اااه لالالا بلعكس..وصلت للدار مزيان ونتا وصلتي مزيان ؟ ونصر الدين وصل مزيان
ضحك قالي لااالا وصلنا مزيان ..المهم كنت بغيت ناخد نمرتك من عندك نتي شخصيا مي فاش شفتك عطيتيها لناصر قلت صافي ..
قلت ليه اه هوا اللي قالي نعطيها ليه وعطيتها ليه
قالي: المهم عطيتيها ليه وصافي مكاين والو
قلت ليه. مافهمتش؟!! كيفاش؟
قالي: والو غير بغيت نسول فيك شوية ونهضرو شوية
ضحكت قلت ليه اه ماشي مشكل
قالي ماكرهتش نتلاقاو غدا الى ماكانش عندك حتى مشكل ..نديرو كافي اونسومبل الى مكان عندك والو
قلت ليه ماعندي والو غير فالدار وصافي
قالي دونك نتلاقاو دوما نديرو كافي انا وياك
قلت ليه واحسان ونور ؟ وناصر ميجيش معاك؟
قالي لالا بغيت نهضر معاك فشي حاجة مهمة وبغيت نكون غير انا ونتي
قلت ليه صافي واخا حتى لغدا نتلاقو
ماعرفتش اشمن موضوع بغا جاني احساس غريب من ناحية هاد المكالمة ..خليت ختي حتى خوات البيت ونفاردت بوحدي ودرت اجتماع من جديد مع نفسي وعقلي وقلبي ..ربعت يدي تنهدت كنشوف فيهم قلت ليهم شنو بان ليكم دابا
القلب بقا ساكت ماهضرتش وشفت الجروح اللي عليه مابقاوش كينزفو شفت جهة نفسي قلت ليها شنو بان ليك فهادشي
قالت لي لا مابغيتش نتلاقا بداك فيصل هارب ليا منو ومامرتاحاش
قالي عقلي وعلاش اشنو فيها الى طلاقتييه ؟ تعرفي بعدا غير شنو باغي..ماشي ضاروري ترتاحي ليه .
قلت ليه وشنو غيبغي مني ؟ هوا يالاه عرفني
قالي : ماتقدريش تحكمي على الناس تلاقايه شوفي شنو عندو مايقول وصافي.. ماتعرفي
جمعت وطويت قررت نتلاقاه ونعرف شنو كاين ولغد ليه الصباح قالت لي ختي يالاه نمشيو للحمام .قلت ليها الللله على الحمام ..توحشت الحمام ديال المغرب
جمعت حوايجي فواحد الصاك ومشيت معاها للحمام دلحومة .. دخلت جلست فالسخون والضبابة كمدت عضامي وعطاتني شي عشوب وشب صابون وشي عجب فالطاسات بقيت فير كندهن ونغسل .
خرجنا هازين سطولاتنا وحومر بحال الجمر لا انا لا هي بقوة الحكان والسخونية..حسيت براسي انضف وحدة فالدنيا وكولشي مسخ الا انا . رجعنا للدار تغدينا وقالت ليالا نمشيو نصاوبو شعرنا ونزلت انا وياها كان عندها موطور كبير بركمان كحل وطلعات هي اللولة لابسة جلابة ديال الكاشمير طويلة وتقاشر بيضين والصابو دمامل وانا كنت غنبدا قالت ليا غير خليك بالبيجامة ديالك ديري غير المونطو ..قلت ليها نمشي بالبيجامة !!
قالت ليا عادي ديري عليك شي حاجة اخرى وصافي
درت عليا مونطو كحل ديالي وتقاشري والصابو دماما حتى هوا والبيجامة زرقة دالكاشمير ومخطيين بالزيوف على راسنا .
ركبت وراها ومشينا للصالون فين كتصاوب شعرها صاوبناه ونشفنا الزيوف رديناهم على راسنا وخرجنا رجعنا للدار قلت ليها علميني نسوق الموطور
قالت ليا سااهل دابا نعلمك ..ونتي علميني نسوق طموبيل
قلت ليها صافي تافقنا
قلت مع راسي اجي علاش ما نقولش ليها تخرج معايا بلا منمشي بوحدي وسولتها لقيتها واجدة وسولاتني شكون وفين تعرفتي عليه وعاودت ليها كولشي وبقات واقفة كتشوف فيا قالت ليا دابا نتي عطيتي النمرة لصاحبو وهوا معيط ليك شنو زعما !
قلت ليها ماعرفتش المهم صاحبو مابيني وبينو والو وحتى هادا مابيني وبينو والو
قالت لي وهي كتلبس سروالها :ولاكنسمحي بيا ماشي معقول هادشي..هادا فيه الدغل بلانو ماااهواش
قلت ليها : وشنو دابا ندير بناقص!!
قالت لي:قولي ليه غتجي معايا ختي باش يجيب داك نصر الدين معاه ..الى مشا جاب شي صاحبو اخر نت غير هاداك عرفيه راه فيه الخواض
فكرت فكلامها لقيتو معقول وخليتو حتى صونا عليا وقلتها واخا حسيت بيه مارتاحش فالاول وقالي كنت باغي نجلس غير انا وياك ولاكن ماشي مشكل
اكدت ليه حتى انا قلت ليه جيب معك صاحبك ناصر
حركات ليا ختي صبعها قالت لي لالالا مكانش عليك تقوليها ليه
بقا ختى هوا ساكت وقالي انا غنشوف الى كان مسالي
قلت ليه راه عندي نمرتو نقولها ليه انا
قالي: لالا صافي انا غنأكد عليه
قطعت معاه وقلت لختي صافي خليه يقولها لصاحبو
قالت ليا ختي وا مللي قلتيها اختي دابا غير عيطي ليه قوليها ليه بلا مايوقع شي سوء تفاهم ..حيت بنتي ليا نتي كتميلي جهة هاد نصرالدين وهادا باين ناوي يخورك
بقيت ساكتة كنفكر وصونيت على نصر الدين لقيت تيليفون طافي وعاودت صونيت ليه مرة اخرى كذلك فالاخير حطيت تيليفون ونضنا لبسنا حوايجنا ولبست هاد المرة سروال كحل وفيست ديال الصوف رمادية مع ليبوط طالعين حتى للركبة وخرجنا يالاه غنمشي نحل طموبيل قالت ليا نمشيو فالموطور احسن
قلت ليها البرد… ناري مافيا اللي يتمرمرد مقادراش والله
طلعات قالت ليا واعير ركبي دابا تولفي..ماتبقايش تبيني لبنادم شنو عندك وفين عايشة..راه الطمع طاعون ا نهى ..خليك عادية مع الناس اللي كتعرفي واللي عاد غتعرفي باش تعرفي راسك معامن .
بصح هضرتها معقولة ..انا مشات ليا من بالي هاد القضية لاكن مزيانة ..باش نشوف شكون اللي باغيني على فلوسيولا باغي الصحبة ديالي وشخصيتي .
المهم مشينا تلاقينا بفيصل فواحد القهوى وشافنا فاش نزلنا .دخلنا لقيناه هوا وواحد اخر وسلمنا عادي وجلسنا معاهم
جلسنا معاهم واخا مارتاحيتش فديك الجلسة حيت حسابني غنلقا نصر الدين تما ..جلست غير كندوز الوقت وصافي معاهم وبقيت كنتسنى نشوف شنو يقول ليا .تعطل بدا كيراوغ بزاف وانا كنتسناه يهضر فاللخر قلت ليه علاش مجاش معاكم نصر الدين
قالي راه تيليفونو طافي كنصوني ليه والو ..اصلا هوا ماشي ولد هنا ولد كازا غيكون رجع
تصدمت قلت ليه بصح ؟!! غيكون رجع !
بقا ساكت وقالي اجي نجلسو ليه نهضرو
نضت معاه خليت ختي مع لاخر وجلست كنسمع قالي
نتي تبارك الله بنت زويونة ومأدبة وعجبتيني..وبغيت نتعرف عليك اكثر..زعما تكون بيناتنا شي علاقة
غير سمعت علاقة وهما ينوضو عليا حواسي كلشي كيرفض وقلت ليه انا دابا مامستاعداش نهائيا ندير شي علاقة عاطفية وماعنديش الرغبة فيها
بقا كيشوف فيا قالي واجربي معايا وشوفي..انا متأكد غادي ترتاحي ليا كنا رتاحيت ليك حتى انا
رفضت قبل ميكمل قلت ليه لالا مابغيتش نهضر على هاد الموضوع كيزعجني..
قالي واش كتبغي شي واحد ولا عندك ديجا شي علاقة
قلت ليه ماعندي والو ولاكن خرجت من ازمة غير مؤخرا مابغيتش نهضر فموضوع بحال هادا
بدا كيحاول يقنعني لاكن مابغيتش وقديت كنرفض نسمع ليه فالاخير قالي نبقاو اصدقاء..المهم ماتقطعيش الامل فمرة
خلينا نتشاوفو ونخرجو ونتلاقاو
قلت ليه ماشي مشكل..الى كانت صداقة في الحدود اه ..ولاكن الى مارتاحيتش فالصداقة حتى هي غنساحب منها تفاهمنا
قالي صافي تفاهمنا ماقلتي عيب
تبسمت ونضنا رجعنا جلسنا مع ختي وصاحبو كانو كيهضرو على الماستر وجلسنا بدلنا الموضوع بقينا كنهضرو على مواضيع اخرى ورجعت سولتو قلت ليه واش ناصر عندو غير ديك النمرة صافي؟
قالي واش بغيتيه فشي حاجة ؟
قلت ليه لا غير حيت حتى انا صونيت عليه لقيت ايليفون طافي
قالي راه كيصبح ناعس مع هوا كيخدم شيفور كيشد الطرقان ..مولف يسهر بالليل ويفيق معطل
قلت ليه خدمتو واش شيفور
حرك ليا راسو بالايجاب قالي خدمتو ماشي شي حاااجة..واخا يعطيوها ليا بالملاين مانخدمش ديك الخدمة
استغربت قلت ليه علاش مالها !!
قالي واش تخدم فشركة تبقا غادي جاي فالطرقان على خمسالاف درهم!! فاللخر دالشهر يلوحو ليك ديك جوج دريال ونتا كضرب السوايع هاز السلعة ومكرفص ..
قالت ليه ختي :وشنو خدام نتا ؟
هز يديه قاليها هاد الساعة باقي..دافع ليكونكور ودافع لشحال من خدمة ماردوش عليا..انا باغي نخدم مع الدولة الى مكانتش خدمة مع الدولة ماعندي مندير بيها..نقدر نقبل نخدم فشركة خاصة ولاكن يعطيوني بوسط فالشركة وشي صالير على الاقل يكون واصل واحد عشرين الف درهم.. اما باش نبقا نقصر فالطرقان كي كيدير ناصر دابا كيضرب من كازا لموريطانيا وشي مرات حتى لسبانيا ولا اكثر على خمسالاف درهم ..مالي مالقيت مناكل!
بقينا ساكتين وشارت ليا ختي براسها باش نوضو ونضنا ودعناهم قالي نعاودو نتشاوفو قالت ليه ختي نشاء الله
خليناهم خلصو داك العصير ومشينا ركبنا فالموطور بدلنا القهوى وجلسنا فوحدة اخرى كنتجمعو وهزيت تيليفون عاودت صونيت لنصر الدين لقيت تيليفون طافي وقلت لختي
ماعرفتش علاش تيليفونو طافي
قالت لي شوفي ياكما غلطتي فالنمرة ..كي داير هاد نصر الدين ؟
قلت ليها عادي بنادم ..غير انا رتاحيت ليه
حركات ليا راسها قالت لي حتى انا ..صاحبو بدا كيحاول يطيح من قيمتو ك ويرخصو مي انا جاني هاد نصر الدين بدراعو على هاد الفلوس..على الاقل مجالس كيتسنى اللي يعطيه ولا الخدمة تجي حت لعندو ويتشرط .
قلت ليها: انا اصلا مافهمتش علاش طفا تيليفون ..مشكيلة
بقا عقلي معلق بنصر الدين يدور ويدور ويفكر فيه وفين غبر !! ميمكنش يكون طافي تيليفون والخدمة ؟ كيفاش يدير فيها؟ بقيت كنفكر شحال على السبب اللي يخلي تيليفونو يطفا مالقيت حتى سبب وكل مرة نسول ختي كتعطيني اسباب هما . تفكيري فنصر الدين من جهة واتصالات فيصل من جهة اخرى كل مرة كيقولي نتلاقاو وكنقوليه لا حتى رجعت كنلقا راسي مجمعة انا وياه فتيليفون وجابد ليا موضوع اللي يخليني نهضر فيه ..رجع كيطمعني بالخرجات الزوينة ورسل ليا كروب ديال الرحلات اللي حدانا فالمدينة واللي ماكنتش كنعرفهم اصلا واش كاينين وبديت كنتبع دوك الخرجات ديالهم وتحمست نخرج حتى انا نتسارا ونعيش فالبلاد ونشبع منها وبديت كنستقبل اي دعوة وصلاتني وكنخلص الخرجة مع الكروب وكنمشيو فالكار ديما كل مرة فين ..مرة داونا لسيتي فاضمة والثلج ومرة داونا لوارزازات ..ومرة داونا لاوريكا ..
المهم كانو خرجات زوينين بزااف وتعرفت على داك الكروب كله بالبنات بالاولاد ولقيت راسي عندي بلاصة بيناتهم وتعودت على وجود فيصل معانا واخا مابيني وبينو والو لاكن مخليا بيني وبينو مساحة .
عشرين يوم فالمغرب دازت كلها مساريات وخرجات كل ويكاند وكنت كنبغي نخرج ختي لاكن كتوجد للماستر وكان كت وقيتة ديال القرايا يعني الاغلبية اللي معانا فالكروب بعقلهم وخدامين الا انا اللي اصغر وحدة فيهم ماعندي لاشغل لا مشغلة غير كنقلب فين نمشي وفين نتسارا
دخلت للكروب نطل لقيتهم منضمين خرجة لافران وتاصلت بصحاباتي نشوف واش يبغيو يمشيو ..لقيت نور مسافرة عند جداتها واحسان بوحدها اللي بغات تسافر لاكن ماعندهاش مسكينة باش تمشي وقلت ليها غنخلص عليا وعليك باش نمشيو نسافرو بجوج ونيت نتوانسو واخا كنعرف البنات فالكروب ماكرهتش كن ديت معايا صحاباتي..
قالت ليا راه عاد خصني نشوي جاكيط ونشري بوط. ونشري ونشري
قالت ليا خاصها الحوايج وماعندهاش الفلوس صافي وخليتها قلت ليها صافي اللي بغيتي ..ماعندي مندير ليها الصراحة كنت باغا نخلص عليها تمشي ولاكن مللي عندها بزاف دالعراقل صافي ماكملتش معاها الهضرة حيت ماقادراش نسمع شكوى ولا نحس بشي طاقة سلبية تغير مزاجي..كنقلب على الطاقة الاجابية فقط شي حاجة دالمشاكل والعراقل كنتفاداها .
عيطت للادمين دالكروب قلت ليه صافي قطع ليا غير انا. قالي اصلا بقات فير بلاصتك خليتها ليك الكار عمر وحتى ليشومبر فلوتيل عمرو وجاو الناس بزاف بغاو يسافرو مالقينا فين نزيدو شي واحد
قلت ليه ماشي مشكل ياك بعدا بلاصتي كاينة
قالي كاينة غير تهناي بلاصتك موجودة ديما
قلت ليه. شكرا وسيفط ليا البروكرام ديال السفر دخلت نشوفو حتى قاطعاتني احسان عيطات ليا جاوبتها وقالت لي
صافي راني ضبرت فالحوايج دافران غير قطعي لي معاك
بقيت ساكتة مالقيت منقول ليها قلت ليها تعطلتي دابا عاد هضرت مع الادمين قالي كلشي عمر ..مابقاوش البلايص ..من الاول كن قلتي ليا غنضبر فيهم باش نعلمو
قالت لي ماحسابنيش انا ماكنتش عوالة نسافر وافران خصو الحوايج ماشي بحال مراكش
تأسفت ليها قلت ليها ايوا خلي حتى لمرة اخرى
قالت ليا عاودي سوليه شوفي يدير ليا بلاصة قلت ليها ميمكنش صافي الكار عمر ولوتيل عمر ماعندو دابا فين يزيد شي واحد
تنهد تنهييدة نيت وشرحت ليها وقطعت معاها مشيت حليت الماريو اللي فيه حوايجي كنشوف شنو ندي معايا لقيت عندي غير حوايج مابين وبين ..يعني خصني حوايج الثلج عاوتاني!!
بديت كنقلب مزيان وتفكرت جاكيط ديالي اللي جيت بيها جبدتها وكانت تقيلة وماركة اصلية كلها مبطنة من لداخل فالبني وعامرة والقب كبير مزغب ..جبدت ليبوط ديالي الكحل ديال البلاستيك مكيدهلش الما كان عمدو بزيم حدى الركبة وهزيت اي حاجة تسخني ومانسيتش الباور بانك ديالي وجمعت باليزتي..دخل بابا يطل عليا لقاتي كنوقف البابيزة وحرك ليا راسو قالي فين غتمشي شي رحلة عاوتاني
قلت ليه غنمشي لافران
حرك ليا راسو قالي افران بارد دي معاك حوايجك ..الكبابط الكبااابط عنداك يضربك البرد
قلت ليه ديتهم راه حتى حنا فسويسرا عندنا واحد البرد قاصح
قالي ايوا مزياان..سيري تفوجي شوية ..شحال غتجلسو تما
قلت ليه دو جوع وصافي..غير ويكاند..كن غير بغات حفصة تمشي معايا
قالي:وادابا حفصة غارقة فالقرايا خليها..سيري نتي بعدا شخال هادي ما جيتي هي راها ديما هنا دابا تمشي وقت ما بغات
عنقتو خديت الرضى ديالو وبدا كيوصيني ندي معايا الحوايج سخان ومشا..
متأ..بابا مسكين شحال حنين..عزازين عليه حنا وكان كيتمنى يكون عندو ولد ولاكن جاب ليه الله غير البنات ..ختم بيا انا اللخرة فاش ماجاش الولد واقتانع بقسمة الله ليه وفرح بينا وكان حنين مع كل وحدة فينا وتعامل معانا معاملة البنات وعمرنا لمستا فيه الجانب القاصي..حتى فاش كيهضر معانا كيبدا طريقتو فالهضرة ويرجع لطريقتو معانا ..دوج اختي لكبيرة مشات لالمانيا وختي اللي من موراها مشات لميريكان وكنت بقيت انا وختي حفصة ..داتني ختي لكبيرة عندها حيت مسكينة مكتولدش وكانت تزوجات وانا صغيرة بزاف وفاش عيات وفقدات الامل قالت لماما عطيني نهى نربيها وجات داتني وانا فالابتدائي ومن تما وانا عايشة معاها .. كنت كنسافر عند ختي لامريكا ونرجع لالمانيا مع ختي لكبيرة ..كانت ماما وبابا هما كيجيو عندنا وحتى ختي فاش كانت كتبغي تجي للمغرب كنت انا كنسافر لامريكا عند ختي لاخرى وبقينا هاكا كل مرة سبب فشكل حتى كبرت ..لاكن لحسن الحظ كنا كنهضرو الدارجة فالدار وكنديرو التلفازة المغربية اما كن راه كندخل ونخرج فالهضرة وحالتي حالة
السبت مع الربعة دالصباح نضت حطيت سوارت الطموبيل لبابا حيت كيعجبو يسوق طموبيلتي واخا عندو سيارتو كيعجبو يسوق بحال النوع اللي عندي ويخرجها . المهم لبست على حسب الجو ديال افران وحتى ديال مراكش..حاولت نجمع بيناتهم بجوج ولبست واحد السروال كحل كينز ماط ولبست بوط تريكو بالسيور حتى للركبة بخال بروطكان فالاخضر ميليتير سومليلة ديالو كًومة غلييضة ديال الثلج وتريكو من لفوق فضفاض ديال الصوف طويل من الكمام والكول مونطي حتى هوا منفوخ واسع والصوفة ديالو غليضة ..غير هوا صهدني وعاد جاكيط ديالي هزيتها فطموبيل مع باليزتي فالكحل كلها كًومة قاصحة وهزيت صاكي حزمت بيه فالجنب كحل وطلقت شعري ووصلني بابا حتى للمحطة فين كان كلشي مجموع حدا الكار ..نزل مسكين بجلابتو ديال الحبة فاكرونة والبلغة ولحيتو بيضا مخلطة بالكحل حط ليا البابيزة فالكار وبدا كيوصي عليا الادمين اللي لقينا تما ويعاود وانا كنضحك وكنسلم على اعضاء الكروب .مشا وقف حدا الطموبيل كيتسنانا ..قلت ليه صافي غير سير ترتاح قالي لا غير خليني مرتاح
ربع حداها وكروازا رجليه وغير هوا بوحدو اللي جا معايا كلشي حا بوحدو ولا بطموبيلاتهم وحطوهم فالبراكينع الا انا اللي جا معايا بابا
وصل فيصل كينقز بدا كيسلم علينا وخفت يبغي يتمادا وبابا كيشوف ومشيت بالزربة وقفت حدا بابا وشديت فيه خليتو كيشوف فينا فهم راسو وهبط عينيه حتى تجمع كلشي وبدينا كنطلعو
عنقت بابا ومشيت لتاحقت بالاعضاء طلعت فالكار جلست كنتسنا الكار يعمر حتى جلس حدايا فيصل قالي واش باباك جا معاك
تبسمت قلت ليه اه وصلني مسكين
تسد الكار وسرحت عيني لقيت اماكن كثيرة فارغة والادمين كيدور ويقاد المسائل قلت ليه
قلتي ليا مكاينش بلايص !!
قالي هادو ديال ماليهم راه مقطعين من كازا ومن الرباط ..قلت ليه
ااه فهمت
رجعت تكيت والكار خارج من المحطة حتى شفت طموبيلتي قدامي كتكلاكصوني ونضت كنجري ماعرفتش بابا مالو
مشيت عند الادمين قلت ليه يهضر مع مول لكار يوقف ووقف فتح ليا الباب خرج بابا عندي كيجري هاز فيدو صاك ديال التوب كبير قالي نسيتي هادا ديالك
شديتو كنضحك من بعد الخلعة قلت ليه ماشي مشكل فيه غير السقاطة
قالي ايوا ماشي مشكل دوزي بيها الطريق..يالاه طريق السلامة
شديت داك الصاك بست ليه يدو مسكين والادمين كيشوف فينا قالي سعداتك بباك
رجعت بحالي هازة صاكي حطيتو حدا رجلي جبدت واحد شيبس كبيرة حليتها وقالي فيصل
واش نتي ديما هاكا ! غادية بسقاطة وجايا بيها
مدت ليه ياكل هز واحد الحبة وسكت وطفاو علينا الضواو باش نعسو حتى نوصلو وبديت كنتلف بديك الشيبس حتى داني النعاس ونعست .
ضرني عنقي ونضت هزيت راسي لقيتو محطوط غلى كتف فيصل وهوا معنقني .شفت فيه مصدومة وكحزت بلعت فتاوت الشيبس اللي بين سناني وقلت ليه فين وصلنا !!
قالي قربنا لافران
حيدت الريدو على الزاج لقيت الشمس ضاربة فالسما ويدي باردة اللي جهة الزاج
قلت ليه دزنا على رباط وعلى كازا
قالي :وصلنااااا وحبسنااا وكملنااا..مكتشوفيش التلج والجبال ..راكي غدخلي افران
قلت ليه بصح!!
طليت كنتمنضر وتفكرت الصاك اللي حدا رجلي جبدت واحد دانيت وكيكة حليتهم دوزت بيهم المنضر وكنسمع الهضرة والضحك حتى قربنا نوصلو وناضو كينشطو ويغنيو ويضحكو ووقفت كنتفرج قدامي ونسفق ختى وصلنا وحبس الكار وخرج فيصل من الكرسي باش ندوز ..
ضرت جهة الزاج كنلبس جاكيط ديالي والطربوش الكحل وكنهر حوايجي حتى سمعتو كيهضر مع شي واحد قاليه
ماشفتكش اصاحبي!! كنا ناااعسين مع من الربعة وحنا شادين الطريق عيينا
ضرت لقيت و كيهضر مع نصر الدين وكيسلم على دراري اخرين..ماعرفتش شنو وقع ليا حسيت بقلبي ضرب واحد الضربة بحال الخلعة فاش كيقفزك شي واحد..تصدمت وكان حتى هوا فالرحلة معانا وماشفتوش!! لابس جاكيط دودون كحلة وهاز شكارة فيدو كبيرة ..ضحكت معاه قلت ليه
نصر الدين!!!
مد ليا يدو قالي سلام ختي صافا
مديت ليه يدي نسلم عليه لاكن مافهمتش سلم عليا بحال الى مكيعرفنيش
بقيت غير كنشوف فيه حتى داز هوا وصاحبو ونزلت انا وفيصل ماقدرتش نحيد عيني عليه وفرحت ملي شارك معانا فالرحلة عاد تحمست وعجبني الحال حسيت براسي لقيت شي حاجة عزيزة عليا
هزيت عيني لقيت لاوتيل اللي غنجلسو فيه كلنا كان ستيل اوروبي من برا بداك السقف والقرمود لاكن من لداخل تقليدي مغربي وديكورات زوينين وكبير فيه صالون كبير بالسدادر فالاسفل جالسين فيه النزلاء. تقسمنا شدينا غرف كبيرة كل غرفة فيها ثلاتة ديال البياصات .عطاونا نص ساعة نطلعو ناخدو فيها راحتنا ونوجدو راسنا باش نفطرو ونخرجو نبداو الانشطة ديالنا
طلعنا حطينا حوايجنا وبقيت بنفس الحوايج ديالي مابدلتش وكاين البنات اللي بدلو اللبسة ونزلنا لقينا الدراري سبقونا وجلسو غلى واحد الطبلة ديال الخشب طويلة فيها الفطور محطوط . مشات عيني نيشان لنصر الدين شفت حداه بلاصة خاوية ومشيت كنجري نجلس حداه لاكن جرني فيصل قالي اجي تجلسي من قبيلة وانا شاد ليك البلاصة
جلسني حداه فالجهة المقابلة مع نصر الدين وداك الكرسي جلسات فيه واحد البنت اخرى ..ناض عليا الخاطر فاش ماجلستش تما وطارت لي وبقيت غير كنشوف فيه وهوا كيضحك مع ديك البنت ..
حطو لينا القهوى واتاي وشديت واحد الكاس ديال اتاي عنقتو بسخانتو وكنشوف فتصر الدين كنتسناه يشوف فيا لاكن ماشافش كاع فيا..مافهمتش علاش تجاهلني!! واش ميعرفنيش؟!! ياك تلاقينا فجامع الفنا وهضرنا بجوج !! واش يكون مابغانيش حيت درت ديك الفضيحة زعما!! اصلا مادرت والو ماعرفتش واش تهرب مني حيت كنت كنضحك وكنهضر !! واقيلا مكتعجبوش البنت اللي كتحرك بزاف؟ انا اصلا مكنتحرش بزاف! علاش ؟ يمكن مارتاحش ليا
بقيت كنشوف فديك البنت اللي كتهضر معاه وضحك معاه وعمر ليها الكاس باتاي عطاه ليها وعنقات ليه يدو قالت ليه شكرا ..تبسمت بلا منحس وانا شاردة وتذكرت واحد الذكرى بنفس المشهد فاش يالاه تزوجت
حسيت بعيني بغاو يبكيو ونضت بالزربة مشيت سولت على طواليط ودخلت سديت عليا وتكيت على الحيط كنبكي وسديت عيني كنخاطب قلبي
قلت ليه مالك ؟ علاش بديتي كتنزف عاوتاني ياك بريتي
قالي انا كنبرى ولاكن العقل كيرجع يعطيني الدق
تنهدت قلت لعقلي شنو بغيتي مني؟ مافهمتش لشنو بغيتي توصل
قالي مابغيت نوصل لوالو ..انا رجعت الذكرى فاش بانت صورة مشابهة ليها صافي هادي خدمتي ماعندي مندير.. القلب اصلا حساس وعلى سبة
سمعت نفسي كتقولي
انا مخنوقة .. مخنوقة غنطرطق
قلت ليها ياك حنا مزيانين ومرتاحين شنو اللي خنقك
قالت لي شي حوايج كيدوزو كيخنقوني
قلت ليها شنو بغيتي بالضبط باش ترتاحي
قالت ليا بغيت تهضري مع نصر الدين ..ماتبقايش كتشوفي فيه من البعيد ..ولاكن ماتبززيش عليا نحضر معاك عطيني مخدر عاد هضري معاه
قلت ليها مافهتش!!
قالت ليا مغنتفش الى هضرتي معاه نتي يجي هوا يبادر حيت هوا اللي بعد وتجاهلني
والى بادرتي نتي هاد الهوا كله اللي جامعة غنبخو عليك نقتلك
رد قلبي وقاليها
علاش متهضرش معاه نيشان نتهناو ونرتاحو من هاد الضغط
قاليها عقلي. اه مالها علاش عاد قوة التفكير هصنا نعرفو سبب التجاهل والغيبة هادي كلها
ردت نفسي قالت ليهم
لااا هوا يجي يعطي مبرر ..علاش نمشيو حنا نتنازلو ..هوا تجاهلنا خصو يجي وبأي طريقة
رد القلب وقال: وعلاش غنطولو الطريق ونبقاو صابرين لهاد الهم هادا كله
رد عقلي قاليه
لالا عندها الحق..علاش حنا نتنازلو ياك هوا اللي بدا التجاهل
تنهدت بتعب قلت ليهم شنو المعمول دابا عطيوني الخلاصة
قالي لعقل:صبري نوصلو لنتيجة مرضية
سكت خليتهم شد ليا نقطع ليك شي قابل شي مقابلش وشي قابل وبطريقتو ونوضوها بيناتهم فاللخر طفاو وتقدم ليا العقل وقال
وصلنا لنتيجة
الحل هوا تباني ليه فالواجهة ..اما باش تمشي نتي وتنازلي لا حيت النفس ماقابلاش وعندها الحق والقلب كيقلب على الساهلة وديما واكل الدق بسبب غباىه ..غتبعيني انا حيت انا اللي كنعرف نسير ليك الامور
دابا رجعي بلاصتك وديري براسك ماعنرك شفتيه حتى نتي .. تنازل وجا مرحبا بيك ماتنازلش صافي خليه اما نتنازلو حنا لا ماعندنا ربح فهادشي فكلتا الخالتين
ناض القلب قاليه ماتافقناش على هادشي تافقنا تعطيها الوصفة اللي تخليه يجي يرضينا
قاليه العقل يجي يرضيك نتا يا المشرمل شو حالتك بغيتي نتسطى انا بكثرةالندم فاش نتنازل ويتعفر علينا ونبات فايق كنتفكرها وندب..نتا اصلا غتندب سوا جا ولا مجاش واصلا مجايش الله ندب بوحدك بلا متجرنا حتى حنا معاك فالهاوية
حليت عينيه ونفضت راسي كنسوط وجمعت النفس وخرجت بلا نتيجة رجعت لبلاصتي جلست
دورت وجهي ماقدرتش نفطر تسدات ليا الشهية ..شديت غير داك الكاس فيدي كنسخن بيه صبعاني وبقيت كنشوف فجهة اخرى وكلشي كيفطر ..قالي فيصل فطري راه غتسخفي مافطرتيش
تلفت نقوليه لا وجات عيني على نصر الدين لقيتو كيشوف فيا وضحكت معاه بلا منحس لاكن مشافش الضحكة دغيا بعد عينو ..مشكييلة هادي مافهمتش علاش كي دير هاكا واش مكيعرفنيش!!
تنفست بعمق ونفسي شاداني ماخلاتنيش نمشي وعقلي تقلب عليا كيقول ليا سيري سوليه ..شوية كضغط عليه نفسي ويرجع يقولي لالا خليه يجي هوا
بقيت هاكاك حتى لقيت كلشي فطر الا انا وناضو ونضت معاهم هزيت صاكي ومشينا كندورو وعيني على نصر الدين وفيصل تابعني ..
داوزونا حدا السبع ووقف الكروب كامل كيتصور وشي كيصور شي..ضرت على غفلة لقيت نصر الدين واقف داير يديه فجيابو كان لابس جينز وكاط موطارد كيهضر فتيليفون وكيشوف فيا ودغيا بعد عينيه ..بقيت كل مرة نشوف فيه حتى قطع ومشيت عندو بالزربة وقفتو ضحك معاه قلت ليه
ناصر لاباس عليك
حرك ليا راسو قالي صافا اختي نتي صافا
قالها وكيحرك ليا راسو باغي يمشي لاكن شديت ليه يدو وقفتو قلت ليه علاش تيليفونك طافي
شاف فيدي وشاف جهة فيصل وحيد يدو تبسم ليا وهبط راسو قالي تكلمي يمكن كيعيط عليك
تلفت جهة فيصل لقيتو كيشوف فينا وماديتهاش فيه عاودت شديت نصر الدين بيدي بجوج وقفتو قلت ليه كنت كنصوني عليك تيليفونك طافي ؟؟
بقا كيشوف فيا ويرمش ويشوف فيدي ماعرفتش شنو بغا يقولي حتى جات ديك البنت اللي كانت جالسة حداه بقات كتشوف فينا وتبسمات قالت ليا نهى ياك
رخيت يدي على يدين نصر الدين بتتاقل حسيت براسي كنضعاف خصوصا فاش شدات فيه قالت ليه كاع معرفتيني عليها !!كتعرفها ؟
بقيت كنشوف فيه شنو يقول عليا حيت هاد الجواب هوا اللي كنت كنتسنا لاكن طول الشوفة فيا وقاليها Un ami en commun
بقيت كنشوف فيه حتى مشا معاها ودار يديه فالجيب عطاني بالضهر وبقيت واقفة بقا فيا الحال ماعرفتش مناش؟ كن غير جاوبني ولا قالي علاش مكانش كيجاوب؟! مقالي والو
جا عندي فيصل قالي شنو كنتي كتقولي لناصر؟
قلت ليه علاش كان طافي تيليفون مقالش ليك علاش؟
قالي مانعرف باش غنعرف
قلت ليه شكون هاديك البنت اللي معاه
قالي هاديك صاحبتو راه باينة ماشفتيهاش مكتفرقش هي وياه ..يالاه نمشي ..بنتي ليا عيانة مالكي
عنقني وكنت فعلا عيانة شديت فيه ومشينا كملنا الطريق وهوا معنقني وهز ليا الصاك قالي انا نهزو غير رتاحي
سبقونا كلهم قدامنا وحنا اللخرين وراهم غاديين باش نركبو على الخيل وحسيت براسي فشلانة غادية ومتكي على فيصل ومتبعة نصر الدين بعيني ..شفتو كيهضر اغلبية مع الدراري وضار عندنا واحد اللحضة شاف فينا ورجع شاف قدامو حتى وصلنا عند لخيول وسط واحد الطبيعة كبيرة خضرا ووقفنا
ركبنا كلنا وقالي فيصل نركب معاك قلت ليه لا بغيت نركب بوحدي
قالي نتوانسو
قلت ليه لا كيعجبني نركب بوحدي
شديت ليه اللجام وقالي مولاه واش كتعرفي تركبي عليه قلت ليه غير طلق كنركب عليه من صغري
شديتو بوحدي ولخرين بقاو شادين معاهم ماليهم وغادين كندورو ..سولت مولاه واش نجري قالي الى كنتي مولفة بيه جري الى ماكنتيش مولفة بيه غطيحي تهرسي
قلت ليه مولفة وبقيت غادية فديك الارض الهضرا كان المنضر زوين سبقت كاع لكروب اللي جاي بشوية وبدا الخيل كيزرب شوية بدا كيجري بيا بالجهد حتى طارت ليا الطربوشة وقفت بديت كنجري والبرد كيضرب ليا فوجهي..احساس زوين حسيت بالراحة وتوحشت نركب الخيل والصراحة جا فوقتو ..مشيت بعدت بزاف وضرت مابقاوش كيبانو ليا ورجعني الخيل مع الطريق راسو بشوية حتى تلاقيتهم جايين كلهم ومتبعين ليا لعين ..جا فيصل عندي فوق الخيل قالي كاع ماحساب ليا كتعرفي تركبي الخيل
تبسمت ليه وسكت وشفت فنصر الدين لقيتو كيشوف فيا وتبسمت ليه ليه ..دور وجهه قدامو وكملنا غاديين ضربنا دورة ورجعنا لاوتيل نتغداو . جمعونا فنفس الطبلة وهاد المرة ماتسابقتش مشيت جلست فأي بلاصة لقيتها خاوية ..حطو لينا الطواجن داللحم وكنت مشهياه ومافطرتش فرحت فاش تحط..كليت حتى ماقدرتش نزيد وكملنا بديسير وفاش سالينا جابو لينا الدقة المراكشية لديك البلاصة اللي تغدينا فيها نوضو الحماس والنشاط وكلشي ناض كيشطح ..اما فيصل بدا كيدير واحد الشطحة كتقتل بالضحك
البنات بداو بالشعور كيشطحو وكاين اللي دارت الحزام ..اما انا ماعرفتش ندير شطيحهم بقيت كنتلوى ماعرفت ندير شرقي ولا غربي المهم درت محاولات بحالي بحال كلشي وكنقلد البنات فالشطيح وكنتعلم حتى سخفت وجلست على واحد السداري ..
دوزنا العشية فالشطيح كل مرة ينوض واحد فاللخر تفرقنا كل واحد فين مشا وطلعت للبيت نعست شوية حتى فيقوني لبنات باش نتعشا وبدا الادمين يجمع الاعضا ونضت غسلت وجهي وحكيت سناني ولبست بيجامة سخونة فالشيبي وبانطوفة طالعة بيضا ولحت عليا كاب غليض وطربوش ونزلت لقيت كاع البنات بالبيجامات .تجمعنا على الطبلة تعشينا كانو دايرين دجاج محمر فالطباسل والشلايض وحتى كملنا وغسلنا يدينا وتجمعنا فديك الصالة كلنا ..شي كيلعب الكارطة شي كيلعب الرامي
جلس معانا نصر الدين وقالو يلعبو كانت كوبي..ماعرفتش شنو هي هاد كانت كوبي حتى شرحوها ليا باللي كيجي كوبل مع كوبل وكيفسرو ليا وبداو يفرقو الكارطة باش يبان شكون غيجي مع شكون .جات فيا انا اللولة وفيصل متحمس كيتسناها تجي فيه باش يطلع معايا لاكن حات فنصر الدين
فرحت فاش جيت معاه بديت كنسفق قلت ليهم يااااي كنت باغا نجي مع نصر الدين
بقا نصر الدين غير كيشوف فيا بانت ليا الصدمة فعينيه اما فيصل قالي غيبقا كل كوبل مع بعضياتو بلا منديرو هاد الروندة
مافهمتش قلت ليه كيفاش!!
قالي مدايزاش غنبقا انا ونتي وهوا مع هدى ..صافي ليكوبل باينين
شفت نصر الدين حط الكارطة فوق الطبلة وانا نلوحها قلت ليهم مالاعباش .. مكايناش المصداقية فهادشي ماطلعتيش ليا نتا علاش غنجي معاك
كلشي بقا كيشرف فيه ويشوف فيا وهوا عقد حجبانو قاليهم صافي خليوها على خاطرها مابغاتش تلعب خليوها نكملو حنا
بغيت نوض ورجعت جلست قلت ليهم غنلعب ولاكن غنجي مع نصر الدين هوا طلع ليا غنبقا معاه
قالت لينا هدى اللي كل ساعة لاسقة فيه حتى هي
نعاودو ..غنعاودو اخر مرة اللي طلع مع شي واحد يلعب معاه
كان الادمين جالس معانا كيفرق الكارطة قالينا شوفو ..اخر تعاويدة
قلت ليه لا منعاودوش صافي جيت انا ونصر الدين غنلعب انا وياه
الادمين:نتي من الاول باغا تجي معاه ..وعلااام تا نتي
قاليه نصر دين :صافي عاود ..هادي اللخرة لي جا مع شي واحد يلعب معاه
قلت ليه علاش يعاود راه فرقها وجيت انا وياك مابغيتيش تلعب معايا!!
بقا كيشرف فيا ويرمش وفيصل حتى هوا اما الادمين شاد صبعو حدا لسانو بغا يلحسو باش يبذا وبقا مصمر وقالي
واشن طن اخاااي مافيهاش تخرشيش هاد السيدة
ربعت يدي قلت ليه يالاه عاود ..اخر مرة
فرقها الادمين وطلعات الورقة الاولى عند فيصل ..بقا كيفرق وانا حاضية هدى كنتسناها طلع عندها حتى قالي الادمين هاهي عندك ..
شفت قدامي لقيت راسي غنلعب مع فيصل وهوا كيضحك
دورت وجهي كنفخ مابغيتش نجي معاه وكنت كنتسنى نجي مع ناصر لاكن مالقيت منقول انا اللي حمارة قلت ليهم نعاودوها اخر مرة
بدينا اللعب وجا عندي فيصل كيوريني الغمزة وقلت ليه صافي حفضتها
ربعت رجلي وكلشي ربع فالارض كنلعبو وانا شادة الاوراق كنشوف فنصر الدين وناضر حاضي هدى وتافقنا على الحكام اللي خسر يطبق شي حاجة
بقينا لاعبين حتى شفت ناصر كيشوف فالكارطة وكيضحك وقلت ليه كوبي
هز عينو كيضحك حط الكارطة ومكانتش عندو محموعة ..مافهمتش شنو وقع وطليت على هدى لقيتها باقا كتجمع حتى هوا وشفت في فيصل لقيتو غيطرطق ومعصب قالي من صباح وانا هااه هااه هااه ماخليت تا اشارة باش تشوفي هنا ..هاااهي جمعها كنتسناك غير نتي
قلت لناصر علاش كنتي كضحك بوحدك؟!! بغيتي تقولبني زعما
رجع اللور تكا على المخدة كيضحك قالي والله مابغيت نقولبك ولا شي حاجة
قاليه فيصل واشووفي فياااا ومالكي بقاي ليا نرض نجرك نقوليك هااهياااا
الادمين بقا كيضحك وانا ربعت يدي كنشوف فيهم كيضحكو قلت ليهم نعاودو نفرقو نشوفو ليكوبل
قالينا الادمين بلاتي بعدا ارا لينا لحكام راكم خاسرين قلت ليه شكون غيحكم علينا
قالينا ناصر وهدى
ربعت يدي كنشوف فناصر قلت ليه باش غتحكمو علينا دابا؟
شاف فهدى كيدوز يدو على شعرو قاليها ماعرفتش..باش غنحكمو عليهم ؟
قالت لينا هدى: شي بوسة طوييلة قدامنا
شفت فيصل مصدومة لقيتو كيدوز لسانو على شنايفو وقلت ليها وعلاش هاد الحكمة بالضبط !!!
شفت فناصر حتى هوا لقيتو مصدوم قاليها غنحكمو عليهم بشي حاجة اخرى
قاليه ناصر قابلين ..صافين ندوزوها ونكملو اللعب
كحزت اللور قلت ليه لا ماقابلينش مكاينش غير البوسان
هدى:هادي هي الحكمة
قلت ليها ناصر حتى هوا مامتافقش ياك اناصر
كلشي شاف فيهم واولهم فيصل وهوا كيشوف فيا بقا ساكت قالي ديرو اللي بغيتو هاهيا عندك اهدى حكمي
بقيت كنشوف فيه مافهمتش علاش ماعطاش رأيو والادمين حتى هوا قالينا
يالاه يالاه ..صافي حكمة ساهلة بوسة مادات ماجابت بالزربة
سكت ربعت يدي وقرب مني فيصل عطيتو حنكي وناصر قالب وجهه كيشوف فجهة اخرى كنتسناه غير يشوف فيا مابغاش
باسني فيصل فحنكي فرحان لاكن هدى قالت ليه لالا ماشي هادي..بوش ابوش.
قلت ليها صافي اختي قلتي بوسة هاهوا باسني فحنكي
وماشي غير باسني عنقني كاع
شفت فناصر لقيتو كيشرب من واحد القرعة دالماء وهي كتأكد علينا نعاودوها قلت ليها صافي البوسة طبقناها من الاول قولي لينا بوش ابوش..ماشي الحنك ..دابا غنوليو فجوج بوسات
قالت لينا المهم من دابا نعلمكم البوسة مزال ماتطبقات عليك غاتخسري غتطبق عليك واخا يجي معاك الادمين
قاليها الادمين: صاف صافي وا تا تخسر بعدا
قلت ليها مغنخسرش عاد المرة والى خسرتي نتي غتباسي بوش ابوش فيها خمسة الدقايق يالاه وان شاء الله يجي معاك الادمين
قالت ليا :ان شاء الله نتي اللي غتباسي ديك خمسة دقايق ..دابا كلكم متافقين على الحكمة من دابا باش اللي خسر معاها يطبقها بلا منبقاو نعاودو الهضرة ..حيت ماطبقاتهاش اصلا
هزيت كتفي قلت ليها ان شاء الله مغنخسرش ونتي اللي غطبقيها مع اي واحد جا معاك
تراجع ناصر قاليهم انا عييت شوفو شي واحد يلعب بلاصتي
قاليه الادمين:وصافي كملو هاد اطرح ونقلبو اللعب
ناصر: وايلي اصاحبي لاعبين كارطة ولا لاعبين بوش ابوش
الادمين:سلك اودي سلك
عاود فرق علينا ديك الكارطة نشوفو ليكوبل وبديت كنشطح بصبعي وحاضية ناصر كنقول ياربي يطلع معايا ياربي يطلع حتى طلع معايا وطرت كنسفق قلت ليهم اخيبيييييرا
بقا شي كيشوف فشي وتلفت الادمين كيضحك عمد فيصل قاليه مشااات عليك اودي اخاي فيصل
هز فيصل راسو شاف فيا قالي ماعييتيش من اللعب. براكة عليك
جمعت الكارطة قلت ليه لا غنكملو
بقا فيصل كيشوف فيا ويشوف فيه وهدى ختى هي سكتات .فرق الادمين الكارطة علينا وجمع يديه كيشوفينا وقالينا
باقيين عاقلين على الحكمة ..والراجل هوا الكلمة ..يالاه انطلقو
قاليه فيصل سكتنا اصاحبي مابلان ما والو
الادمين: صااافي تافقتو وساليتو ..شروط المسابقة باينة
بديت كنحاول نجمع الكارطة كانت عندي جوج عشراوات جاو فيا من الدقة اللولة ولاح ليا ناصر واحد جوج ديال السوطات جيهتي مع الهزة اللولة ماعرفتش كيفاش حتى عرفني كنجمعها .. الادمين حاضينا كلنا وانا كنشوف فناصر جاتني الضحكة وكنحرك ليه حجباني معنقة الكارطة بغيت يقولي ديك كانت باش
نربحو ويخسر فيصل وهدى ويديرو ديك بوش ابوش ونتفرح فيهم لاكن قفزني فيصل وحتى كان ناصر غيهضر زرب عليه فيصل قالي كوبي و ..حطيت الكارطة كاملة فيها دوك السوطات بربعة و
تقلب الادمين كيضحك قاليه وا كن غا سكتي ..وغاااسكت اصاحبي خسرتيهم بيديك كن غير خليتيهم يربحو
طل فيصل على الكارطة اللي عندي قاليه والله تا حساب ليا باقا ماجمعاتها ..مع شفت ناصر لاح ليها جوج ديال العشرات قلت راه عندها غير وحدة وبان ليا بغا يقول ديك كانت وهيا اصلا مجامعاهاش
قلت لناصر وهوا شاد لحيتو كيضحك ..علاش مادرتيش ليا الغمزة!! جمعتي الطناش كلها !!ًهييه ولاهيلا
قالي درتها ليك وعاودت حتى هدى عاقت بيا وبقات ساكتة ونتي ماعقتيش هاحنا خسرنا على والو
فيصل:مابلان ماوالو
الادمين: سمح ليا اخاي فيصل حتى واحد مقال ليك قوليها كوبي وهي حامعة ربعة ..دير مدارت هدى وسكت تا تخسر..اصلا حصلتو فيها دابا لانتا لا هدى ولا ناصر ونهى ..بربعة كنتو غطبقوها بزز منكم ..ودابا يالاه طلقونا ..خمسة دقااايق ارا بررع
قلت ليه شكون حنا ولا هما ؟!!
قالي نتوما الزين
فيصل:والله مابلان
الادمين:وبلان كن درتيها نتا وهدى!! دابا كمدها حيت نتا اخاي فيصل كطير حيديتها الكانت من يديها
بقيت كنحاول نفهم اشنو كيقصدو مافهمت والو اللي فهمت هوا خسرنا وغادي يحكمو علينا ..هدى دورات وجهها سكتات وفيصل كيعارض والادمين كيشوف فيا قالي
شتك سكتي ما عتارضتيش
قلت ليه انا كنطبق القانون وهما اللي مكيطبقوش
قالي وانوضي الزين طبقي القانون عندك خمسة دقايق ارا مطبقي فيها ..هااااه ..بوسة ديال بصح خليني من ترافيك دوالو ..يالاه نوضي جلسي حداه غتشبعي بوسان ليوم هه
نضت مشيت جلست حدى ناصر وهوا موقف رجليه بتقاشر بيضين ومتكي عليهم بيديه ومهبط راسو ماعرفتوش واش ساكت ولا كيضحك..كحزت حداه وشفت فهدى كنضحك وماعرفتش علاش جاتني الضحكة ..اما فيصل ناض من حدانا قالينا المهم هانا لهيه
بقا الادمين كيشوف فينا ونهى حتو هيا قالبة وجهها وكتشوف فينا
هز ناصر راسو قاليهم ماشي لعب هادا اصاحبي وماشي حكام..
شفتو دار حركة بصدو من لفيصل ونفخ بحال الى مابغاش
دورت عيني جهة الادمين شفتو غمزو وكيشير ليه براسو مافهمتش شنو كيقصد وفاللخر قاليه وهي بغات صافي طبق
مافهمتش انا شنو كيقصدو بدك العينين وكيفاش انا بغيت ؟ زعما بغيت من اينا ناحية
سمعت الادمين قاليه خود الرضى اصاحبي مالك مصعبها
قلت ليه شنو عما بغيتي تقصد هضر نيشان مالك كتخربق
قالي لا والو غير كنقادو الامور باش دوز الحكمة مقبولة ومنعاودوش مرة اخرى نعاودوها
قلت ليه اصلا اخر مرة لعب
قالي واغير قضي تا لقاي معامن تلعبي وبدا كيضحك
دورت وجهي شفت فناصر وجاتني الضحكة لقيتو كيشوف فيا عن قرب وكيستاعد..قلت ليه بلاتي تسنا وجبدت واحد الشكلاطة من جيبي كليتها باش نحيد مداق الزيتون اللي كنت مكنقب كل شوية وسرطتها عاد استعديت وقربت منو وكنسمع الادمين كيضحك بوحدو ويهضر بالالغاز مافهمتش اشنو كيقول
حدي سمعتو قاليه عوالة على شي نص ساعة
ضرت قلت ليه نص ساعة ديالاش
قالي ماشي معاك مع لخرى كنهضر
رجعت ضرت لقيت ناصر كيضحك ويشوف فالادمين وكل مرة كيبغي يقرب كيرجع يشوف فالادمين ويبدا يضحك حتى عيت من ديك الجلسة المعدبة ورجعت اللور تكيت على الحيط قلت ليهم عييت
شفت الادمين جالس وكيغمز ويالاه دورت عيني نقوليه مالك من الصباح ونتا كتغمز ضار عندي ناصر نيشان وباسني فمي وسكت بقيت مصدومة شفت فيه ..كان حاط شفاهه على شفافي وكيشوف فيا وبدا كيضحك حتى تبعدو الشفاه وضحك حتى شبع وانا كنشوف فيه حاسة بواحد الراحة و حسيت بقلبي كيضربي بالجهد..تلفت عند الادمين قاليه سكتنا اصاحبي شوية
قاليه الادمين هانا ساكت والله مندوي تا دوز خمسة دقايق . فاش تسالي نعلمكم يالاه بداو
عاود قرب مني وحط شفافه على شفاهي غير تقاسو وبقا هاكاك وانا كنتسناه يدير شي حركة اخرى لاكن متحركش..بقا ميشوف جهة فمي وبلا منشعر حركت شفاهي شوية وتحركو معاها الاحاسيس ديالي وقصت ليه شفتهه بطرق شفاهي بجوج وتحرك تجاوب مع الحركة ورديت عليه بحركة اخرى وقربت اكثر وعاود رد عليا بحركة وحدة اخرى
حسيت بيه حط يدو على جنبي وبدا صدرو كيتحرك بحال الامواج فوسط البحر كيتهز ويتهز ويتحط وحرك راسو باسني نيشان ..هزيت يدي حطيتها على كتفو شديت فيه وزاد قرب بشفافه اكثر ختى تحولات لقبلة حقيقة بمداعبة الشفاه وتخالطو الانفاس ووصلني مداق فمو حسيت بمدام اتاي مع نسمة الكارو ومخلطة مع بارفان اللي راش فحوايجو ..جدبني هاد المزيج كله وقبلنا بعضنا حتى سمعت الادمين كيسفق ويضحك قالينا صافي..انتهى الوقت…وا انتهى الوقت
تراجع ناصر شاف فيا وضحك وبعد شاف فالادمين اللي قالينا كيضحكو
نوضو تشللو
درت يديه على فمي اما شفت فيه اما ناصر بدا كيتبرا منو بيدو وناض كيضحك مشا وبقيت انا كنشوف فالادمين لقيتو غير هوا اللي قدامي اما هدى مشات حتى هي
قالي اجي نسولك ..دابا غير بيني وبينك ..شنو بينك وبين فيصل بالرجولة وماتقوليها لتا واحد خليها بيناتنا
قلت ليه مابيني وبينو والو
قالي ومالو لاسق فيك واش اونكوبل نتي وياه
قلت ليه لااالا ماشي بوي فراند قالها لي ومابغيتش قلت نبقاو دي زامي
الا مين: هاااكاك ..يعني غير امي نتي وياه
قلت ليه:امي وصافي
هز حاجبو قالي وازيييري شوية السمطة واش جالس علينا جمتي جمتي مالنا على هاد الفعايل
قلت ليه كيفاش مافهمتش!
قالي واش نتي معايشاش معانا !! راه ردك صاحبتو ..وازيري انهى شوية
بقيت كنحاول نستوعب كلام الادمين وزاد فهمني مزيان وقالي
راه طالقها علينا وحنا كيحساب لينا مصاحب معاك وجالس كيردع فالبنادم ..
قلت ليه واش على هادشي مابغاش ناصر يهضر معايا واش حساب ليه بيني وبينو شي حاجة
قالي هاااانتي فهمتي داااابا.. واميمكنش نتي مصاحبة معاه يجي صاحبو يدخلك شي دخلة ماشي رجلة هادي فهمتي
تعصبت حيت بسببه جلست كنبلاني بوحدي ونخمم وندير فالمجهودات وقلت ليه
انا داااابا غادي نوريه الكداب
جرني قالي لالالااا غتجبدي الصدع
نترت يدي نضت مشيت عند فيصل كان واقف قالب وجهه علينا جريتو قلت ليه علااش كتكدب كتقولي للناس انا ووياك فعلاقة ياك قلت ليك لااا وقلتي ليا نبقاو دي زامي قلت ليك واخا
بقا كلشي كيشوف فينا وناضو وفيصل كيشوف فيا قالي شنو كتخربقي اميانكوبل بحال بحال
قلت ليه لا ماشي بحال بحال
ضرت عند كولشي قلت ليهم انا ماعندي حتى علاقة بشي واحد ومداخلة فحتى علاقة وفيصل عرض عليا علاقة عاطفية مابغيتش وبقينا ديزامي ..اوك
يعني وفصل عمرنا اصلا كانت بيناتنا شي علاقة من الاول..التعامل ديالو معايا كان يحساب ليا كصديق محسابنيش غيكدب ويخلق ليا مشاكل مع ناصر وانا مفاهماش علاش ناصر مكيهضرش معايا وكيتجاهلني
قالي بغضب وكيشوف فالاعضاء : اش جاب دابا ناصر للهضرة؟
شفت ناصر جاي وجريتو قلت ليه شنو قاليك قول الصراحة ؟
قاليه ناصر :اه مالك تنكر علاش جاي كتقول ليا مصاحبين ما مصاحبين مافعايل ما تا لعبة هادو
قلت ليه :وكيحاول يطيح منك قالي غير شيفور ديال السلعة ومايرضاش يخدم بحال الخدمة ديالك
قرب منو ناصر معصب:قاليه شيفور تقد عليها؟؟ براكة عليك تجقر الفلوس اما الخدمة بالدرااه بزاااف علك
ضرب ناصر على دراعه بالقوة وقاليه كن جينا ندفعو كبير منجلسوش مع البراهش ومنضسروش علينا لقرودة حتى رجعو ينقزو لينا فوق الراس
شار فيصل بصبعو ليا قاليه وراه غااا٠٠٠بة…مالها رابعة العدوية ولا اشنو بغات تكون ..غااا٠٠بة باش تنوض عليها هاد الريكاطة كلها ..محلولة ديلمها شو كيدايرة
دفعو ناصر بجبهتو قاليه
ااه جمع راسك جمع راسك من تخصار الهضرة سمعتي..
قلت ليه لالالا انا ماشي ٠٠٠بة…ياك جيتي قلتي ليا علاقة ماعلاقة قلت ليك لا ..علاش كتكدب على الناس
قاليه الادمين حشومة اصاحبي ..بنت عائلة وشفنا باها وشفتي العقلية عندهم كي دايرة ماتقولش كاع عليها بحال هاد الهضرة
قلت ليه انا اصلا ماشي ٠٠٠بة علاش غادي نقوليه يسكت خليه يقول اللي بغا
فرقهم الادمين قاليهم بلاتي بلاتي..البلان باين ..صافي ..هي باينة باغا ناصر.. ياك نتي باغا ناصر ؟ باينة غا من ديك بوش بوش اللي مابغاتشدير معاك نتا ودارتها مع ناصر..صاف يراه باينة دابا مابينك وبينها والو ..صافي خليها منها لناصر
فيصل: ومابغيتش انا كاااع هاد الصداع ينوض على وحدة ماعرفت ديلمها بعقلها ولا هاربة من شي سبيطار
قلت ليه نتا اللي هارب من شي سبيطار نتا اللي كتكدب ..انا اصلا بغيت نهضر مع ناصر مابغيتش نهضر معاك نتا مارتاحيتش ليك. كاين شي مشكل؟!واش بزز مني!!
قالي الادمين تا حاجة ما بزز وتا حنا فهمناك ..جبتيها من اللخر قلتياش كاين هاهوا كيسمعك دابا كولشي بان منك ليه
الحمد لله توضح كلشي وتصدمت ف فيصل .. بقيت واقفة انا وناصر وبقا كيشوف فيا ونشوف فيه وكنتسناه شنو يقول ليا ..مسح على لحيتو وقالي اجي نمشي نجلسو لهيه؟
حركت ليه راسي ومشيت معاه جلسنا على واحد الكنبي بعيد على الكروب وقلت ليه
فيصل صدق كداب ومنافق .. ومامربيش وكيعايريني تصدمت فيه!!
بقا كيشوف فيا بتساؤل قالي:مافهمتش اصلا شنو بينك وبينو هوا قالينا تصاحبتي نتي وياه!!دابا صدق داكشي ما منوش
قلت ليه : كنت كنصوني عليك فتيليفون كان طافي وكنت كنتسناك تتاصل بيا ومتاصليتش ؟!!
قالي نسيت تيليفون فطاكسي داك النهار نيت ..عاد خديت واحد اخر ورديت النمرة وقبل مانردها تلاقيت فيصل لغد ليه بالليل قالي راكم خرجتو انسومبل وتافهمتو ..قلت ليه الله يسخر
تصدمت وقلت ليه: هيييه مااايمكنش هاد فيصل شحال كداب ..انا قلت ليه مامستاعداش لحتى علاقة ونبقاو دي زامي صااافي..مشا كيكدب على الناس
هز يديه قالي دابا صافي كلشي بان ..نتي ياك مزيانة ! اش كتعاودي
ضحكت قلت ليه الحمد لله ..انا كنت باغا نشوفك فرحت فاش جيتي معانا للرحلة
بدا كيضحك قالي شفت تصاورك مع الكروب كتخرجو ..عجبك الكروب
قلت ليه عجبني بزاف كيديرو خرجات زوينين وقالينا الادمين غيدير لينا كولة نهار السبت فيها الشعبي
قالي :كولة؟!! شنو هي هادي؟
قلت ليه كولة هوا اللي قالينا كولة ..دايرة بحال العرس. ولاكن مافيهاش عروسة وعريس
حك حاجبو قالي اااه كَالة سميتها ماشي كولة ههه.. وغتمشي؟
قلت ليه اه غنمشي ونتا واش غتجي
قالي:دابا نشوف الى كنت جاي طريق ندوز على مراكش..
قلت ليه : واش عايش فكازا ؟
قالي:معايش فحتى مدينة ..غادي جاي بحال الرحالة ..مي عندي لافامي فكازا
تبسمت بقيت كنشوف فيه وتلفت شفت هدى واقفة بعيد كتشوف فينا وقلت ليه
واش هدى صاحبتك؟!!
ضار شاف فيها قالي :لا ..مكاين حتى شي حاجة واضحة
قلت ليه : حتى انا
بقا كيشوف فيا وقالي شحال فعمرك؟
قلت ليه انا دابا طالعة فربعة وعشرين بقات لي شهرين..ونتا
قالي غندير سبعة وعشرين الشهر الجاي .
بقا ساكت كيشوف فيا وقالي:كتقراي؟ ولا خدامة ؟ شنو كديري؟
تلفت بقيت كنتمتم وتفكرت حفصة اللي قالت لي ماتقولي لحتى واحد شي حاجة باش تعرفي شكون صادق معاك وشكون كيكدب راه ينادم طماع
تبسمت قلت ليه مكندير والو
قالي والو حتى حاجة؟!!
قلت ليه واالو حتى حاجة
قالي:ولاكن هضرتك جاتني فشكل ..بحال شي واحد مامولفش يهضر الدارجة واش كنتي عايشة برا؟
قلت ليه لالا كنهضر هاكا ديما
بقا كيشوف مطولا قالي فشكل..قريتي فشي ايكول بريفي يمكن فيها غير الكور هنا فالمغرب
حركت ليه راسي قلتي ااه ولاهيلا قريت فايكول مافيهاش المغاربة..لالا فيها ولاكن غي شوية
تبسم كيشوف فيا قالي مزيان ..
قلت ليه ونتا شنو كدير فحياتك؟
تنهد قالي شديت الاجازة ابخي خدمت واحد العام فالبنكة ..ورجعت كملت درت الماستر فماخكوتينغ ستخاتيجيك ..دفعت لبزاف ديال ليكونكوغ ماردوش عليا ..خدمت فشي شركات كل مرة مع وحدة ..ابخي قلت ندوز بيرمي كبير نشوف يقدر ينفعني ..خديت بيرمي ديال رموك من بعد شفت مع واحد الشركة دفعت ليا بالشواهد ديالي ماجاوبونيش سمعت كيقلبو على شيفور يسوق الرموك ..دفعت ليهم السيفي ديال السياقة جاوبوني ..بديت معاهم عجباتني الخدمة بعيدة على الستريس وقوة التفكير وكتحتاج غير مجهود بدني شوية ..هادي اول تجربة ليا كسائق شاحنة.ابخي ردات عليا وحدة من دوك الشركات اللي دفعت ليهم وبدلت الخدمة..خدمت عام معاهم من بعد وقعو مشاكل بدت كتنقص من الناس اللي خدامين ..خرجت منها بديت كندفع هنا ولهيه بالشهواهد وبالبيرمي بكاه داكشي اللي عندي..
ردات عليا الشركة اللي انا معاها دابا وراني خدام معاهم كنسوق الرموك
عجبني الحال فاش سمعت بالتجارب ديالو وقلت ليه
عمرك فكرتي تمشي لبرا وتخدم تما
ضحك قالي :ماكرهتش.. راه مشاو لنا الفلوس غير هاكاك ومكاين والو
قلت ليه: علاش واش حاولتي شي مرة؟
قالي: حاولت مي كاينين غير النصابة..شكون غيديك لبرا واخا بالفلوس
قلت ليه : برا فيها الخدمة..
ضحك وقالي:الى كتعرفي شي واحد كونفيونص نشريو من عندو شي كونطرا 
بقيت ساكتة كنشوف فيه ونفكر واش نقوليه الصراحة..نقوليه انا عايشة برا وارملة..والى قلتها ليه وتبدلات النضرة ديالو ليا كما قالت ليا حفصة! لالا منزربش ..نصبر حنا اصلا فالبداية
سكت وبقا ساكت كيشوف فيا وتبسم قالي عرفتي شنو..كنت باغي نجلس انا وياك طيط ا طيط
قلت ليه انا ماعنديش بوي فراند..بغيت تكون نتا بوي فراند صافي؟
بقا مصدوم بقا مصدوم كيشوف فيا وفاللخر ضحك قالي علاش لا . فرحت ونضت جلست حداه شديت ليه فيدو كنشوف فيه قلت ليه صافي
حسيت بالراحة والسعادة حسيت براسي بغيت نطير وحسيت بقلبي فرحان وعنقتو ..ماعرفتش علاش حسيت براسي توحشتو من ديك اللحضة اللي تلاقينا فيها وانا كنتسنا نعاود نتلاقاه وفرحت بزاف خصوصا فاش لقيت الراحة وحسيت باستقرار نفسيتي واطمأنان قلبي..اما هوا حسيت بيه مصدوم واخا عنقني لاكن بقا ساكت .بقيت معنقاه وتكيت عليه كنشوف فاعضاء الكروب كل مرة يشوف فينا واحد ..اما الادمين كل شوية يضور عندنا ويبدا يضحك..هزيت راسي شفت فناصر لقيتو كيضحك معاه وقلت ليه
علاش كنتو كتغامزو قبيلا ودابا كضحكو؟ كضحكو عليا زعما؟
تسنيتو يجاوبني لاكن زاد فالضحك حتى حسيت بيهم كيضحكو عليا وهزيت راسي بعدت حسيت بالاحراج وقلت ليه غادي نمشي نعس ..تبسمت قلت ليه تصبح على خير حتى لغدا ونتشاوفو
ناض وقف جرني قالي علاش غنضحك عليك؟ واه سيمو هاكاك داير غير كيكركر بوحدو ماتديهاش فيه
تبسمت حسيت بيه غير كيسايسني وداك الاحساس بالاحراج مابغاش يتحيد قلت ليه اه كضحكو عليا انا احساسي مكيكدبش عليا ..عرفتكم كضحكو من قبيلا ..ماشي مشكل المهم تصبح على خير حتى لغدا ونهضرو دابا مابغيتش نهضر رجع شد فيا قالي بجدية مكنضحكوش عليك علاش شنو درتي باش نضحكو
قلت ليه صافي مغنهضروش..حتى لغدا ..دابا لا
وقفني قالي علاش دابا لا ؟ عاد كي كنا مزيانين ؟
قلت ليه كنا مزيانين ونتوما ضحكتو عليا صافي ..انا مضحكتش عليكم
بدا كيحلف ويشوف فيا رجع احمر لاكن ماقدرتش نبقا جالسة معاهم كان خاصني نجلس بوحدي عاوتاني خصوصا داك احساس الاحراج اللي كنحس بيه مغنقدرش نبقا جالسة لتحت وانا مامرتاحاش. المهم صافي تفاهنا وتافقنا نبداو بجوج هادا هوا المهم فاش نرتاح نهضرو عاوتاني لاكن هوا مخلانيش نطلع وانا مكنبغيش اللي يبزز عليا شي حاجة صافي خصني نبقا بوحدي هي خصني نبقا بوحدي.ماجاوبتوش ومشت حتى للدروج وتبعني قالي غتخليني كنرغبك على والو
قلت ليه لا مترغبنيش راني قلت ليك غادي نمشي حتى لغدا ونهضرو
بقا واقف كيشوف فيا وتبسمت قلت ليه بون وي وطلعت بقا مصدوم كيشوف فيا وفاللخر ضحك قالي علاش لا . فرحت ونضت جلست حداه شديت ليه فيدو كنشوف فيه قلت ليه صافي
حسيت بالراحة والسعادة حسيت براسي بغيت نطير وحسيت بقلبي فرحان وعنقتو ..ماعرفتش علاش حسيت براسي توحشتو من ديك اللحضة اللي تلاقينا فيها وانا كنتسنا نعاود نتلاقاه وفرحت بزاف خصوصا فاش لقيت الراحة وحسيت باستقرار نفسيتي واطمأنان قلبي..اما هوا حسيت بيه مصدوم واخا عنقني لاكن بقا ساكت .بقيت معنقاه وتكيت عليه كنشوف فاعضاء الكروب كل مرة يشوف فينا واحد ..اما الادمين كل شوية يضور عندنا ويبدا يضحك..هزيت راسي شفت فناصر لقيتو كيضحك معاه وقلت ليه
علاش كنتو كتغامزو قبيلا ودابا كضحكو؟ كضحكو عليا زعما؟
تسنيتو يجاوبني لاكن زاد فالضحك حتى حسيت بيهم كيضحكو عليا وهزيت راسي بعدت حسيت بالاحراج وقلت ليه غادي نمشي نعس ..تبسمت قلت ليه تصبح على خير حتى لغدا ونتشاوفو
ناض وقف جرني قالي علاش غنضحك عليك؟ واه سيمو هاكاك داير غير كيكركر بوحدو ماتديهاش فيه
تبسمت حسيت بيه غير كيسايسني وداك الاحساس بالاحراج مابغاش يتحيد قلت ليه اه كضحكو عليا انا احساسي مكيكدبش عليا ..عرفتكم كضحكو من قبيلا ..ماشي مشكل المهم تصبح على خير حتى لغدا ونهضرو دابا مابغيتش نهضر رجع شد فيا قالي بجدية مكنضحكوش عليك علاش شنو درتي باش نضحكو
قلت ليه صافي مغنهضروش..حتى لغدا ..دابا لا
وقفني قالي علاش دابا لا ؟ عاد كي كنا مزيانين ؟
قلت ليه كنا مزيانين ونتوما ضحكتو عليا صافي ..انا مضحكتش عليكم
بدا كيحلف ويشوف فيا رجع احمر لاكن ماقدرتش نبقا جالسة معاهم كان خاصني نجلس بوحدي عاوتاني خصوصا داك احساس الاحراج اللي كنحس بيه مغنقدرش نبقا جالسة لتحت وانا مامرتاحاش. المهم صافي تفاهنا وتافقنا نبداو بجوج هادا هوا المهم فاش نرتاح نهضرو عاوتاني لاكن هوا مخلانيش نطلع وانا مكنبغيش اللي يبزز عليا شي حاجة صافي خصني نبقا بوحدي هي خصني نبقا بوحدي.ماجاوبتوش ومشت حتى للدروج وتبعني قالي غتخليني كنرغبك على والو
قلت ليه لا مترغبنيش راني قلت ليك غادي نمشي حتى لغدا ونهضرو
بقا واقف كيشوف فيا وتبسمت قلت ليه بون وي وطلعت
طلعت للبيت لقيتو خاوي مافيهش البنات اللي معايا وكلشي بقا لتحت ..جلست كنتنتسا داك الاحراج وصونيت لختي نهضر معاها شوية تقولي شنو ندير ودنا ابيل فيديو وبديت كنعاود ليها كلشي وعاودت ليها على فيصل وكلشي بالتفاصيل لمدة نص ساعة غير ديال التعاويد حتى كملت وقالت لي
مكانش عليك ديري هاكاك انهى ..نتي كتصرفي عادي ولاكن هاد التصرفات ماشي ديال المغاربة.. هادشي كيديرو هنا غير اللي مدلولات واللي كيرخصو راسهم ونتي طيحتي من قيمتك بلا ماتقصدي وخليتيهن كيضحكو عليك وعطيتي انطباع على راسك بعيد على حقيقتك..مكانش عليك نهائيا تصرفي هاكا واخا عجبك نصر الدين ماكنتيش تبيني ليه هاكا مغاديش تعجبيه غير غينفر منك ..اما داك فيصل انا شميت فيه ريحة الشمايت من الاول وهاهوا طلع شماتة
قلت ليها عندك الحق الصراحة قلتيها ليا وداكشي كامل اللي قلتي صدق بصح ..نتي عندك الحاسة السادسة
قالت لي لاالااا ماعندي لا حاسة سادسة لا سابعة غير معاشرة هاد القوم هنا عارفاه كيفاش كيفكر وشنو ناوي يدير..
تنهدت جريت واحد الخنشة دشيبس بشومبينيو كبيرة قلت ليها شنو ندير دابا؟ انا عاودت ليك كلشي بحال الى كنتي حاضرة معانا ..قولي ليا شنو ندير وانا ندير
تنهدات وكانت دايرة النضاضر كتحفض وقالت ليا
دابا صافي وقع اللي وقع ..ولاكن المرة الجايا ماتقوليش داكشي باش كتحسي..ماتبينيش للناس الحقيقة ..هاهوا نصر الدين حتى هوا ضحك عليك
تنهدت قلت ليها شنو دابا المعمول..انا تحرجت حسيت بيهم كيضحكو عليا
حفصة:بيان سيغ غتحسي مالكي ماشي بنادم ! شوفي عزة النفس هي كولشي..ماتعاوديش ضحكي مع شي واحد فيهم صافي ..بيني ليهم باللي مقلقة
حسيت بالخنقة قلت ليا منقدرش.. صافي منقدرش بغيت نجي اخر مرة نخرج معاهم مابغيتش نتلاقاهم .
قالت ليا:لالا مالكي دغيا نضتي..غير بالشوية انهى نتي دغيا كتقلبي
نضت قلت ليها :لاا صافي غادي نجي بحالي..ضحكو عليا انا صارحت ناصر وهوا ضحك عليا
حفصة:وصاافي مالكي صافي عادي ماوقع والو
قلت ليها: ندمت مغنعاودش نقول ليه شي حاجة ..حتى هوا بحال فيصل..صافي غادي نرجع بحالي ومنبقاش كاع نفكر فيه
حفصة:ويييلي ندمتيني كاع علاش هضرت معاك
نضت خليتها كتهضر حسيت بالخنقة وجمعت حوايجي ورجعت قدامها كنلبس قلت ليها غادي نجي
ناضت جلسات قالت لي فين غتجي فهاد الليل !! شكون غيجيبك؟
قلت ليها ماعرفتش..المهم غنجي
قالت ليا ايوا مللي بغيتي تجي انسطالي ابيلكاسيون كريم عندك شوفي واش تلقاي تما شكون يجيبك حتى لمراكش
قلت ليها لالا غادي نسول فالغيسيبسون واش عندهم ترونسبور يجيبيني صافي اخر مرة غانخرج ..تخنقت حاسة براسي باغا نبكي
حفصة: صافي ماتبكي ماوالو اجي بحالك الى مامرتاحاش اجي
حطيت باليزتي مور الباب ونزلت لابسة حوايجي للاستقبال مادزتش جهة الصالون ومشيت سولت على ترونسبور يوصلني وقالي غيكون ولاكن غادي نخلص بزاف
قلت ليه ماشي مشكل غير عيط ليه
بقا كيتاصل ويجرب وقالي الفين درهم الى بغيتي يديك حتى لمراكش فهاد الوقت
قلت ليه صافي يجي عندي دابا مايتعطلش عليا
قالي صافي هاهوا غيجي عندك دابا
رجعت لبيتي عيطت على حفصة قلت ليها صافي لقيت اللي يجيبني غنجي دابا
قالت ليا صافي اجي ..حسن كاع ماتبقاي تما يدوروك وضحكو عليك..
حسيت براسي بغيت نبكي وبديت كنتفكر المشاهد ونلاقيهم مع كلام حفصة وزدت حسيت بالاحراج اكثر حشمت من راسي وناضت ليا نفسي بغات تقتلني بغيت نتفك منها ماقدرتش لقيت الحل الوحيد هوا نمشي مانبانش ليهم مرة اخرى
رجعت لبيتي هزيت باليزتي وحزمت بصاكي ونزلت للغيسيبسيون لقيت تما الادمين كيهضر معاهم وغير شافني تصدم قالي علاش باغا تمشي شنو المشكل
وقفت الشنطة وقلت ليه بغيت نمشي مافيا اللي يجلس هنا
بقا كيشوف فيا مصدوم قالي حتى لغدا وغادي نرجعو كاملين علاش باغا تمشي دابا والليل وعلى والو واش شي واحد دار ليك شي حاجة
ربعت يدي قلت ليه اخر مرة غنخرج معاكم وغنخرجش حتى من داك الكروب..
قالي علاش شنو درنا ليك ؟ مالكي قولي واش شي واحد قلقلك؟
قلت ليه كضحكو عليا وكتستهزؤو بيا وبقيتو كتغامزو عليا ..انا حسييت بيكم ودابا عادفهمت كووولشي
دورت وجهي كنتينى الطاكسي وهوا مصدوم كيحلف ليا ولاكن انا فهمت تصرفاتهم كلها وحفصة شرحات ليا كولشي مابقا عندهم علاش يكدبو عقت بتصرفاتهم .جا ناصر عندنا حتى هوا مصدوم شاف الشنطة ديالي محطوطة وبدا كيسول شنو واقع
قاليه الادمين بغا تمشي بحالها اصاحبي !!
قالي ناصر :فين غتمشي ؟؟
هزيت صبعي فيه قلت ليه نتا بالدات ماتهضرش معايا اوكي..مابغيتش نسمعك
حل عينيه فيا مصدوم وقلبت وجهي بقا كيتفتف قالي مافهمتش؟!! شنو وقع ؟!! ياك لاباس اشنو درت ليك انا ؟
قلت ليه نتا منافق اصلا ماتستاهلنيش..حيت صارحتك ونتا كضحك عليا وكتستاخف بيا
خرج عينيه قاليه هييه بلاتي كيفاش منافق وكيفاش اش كتخربقي فين اصلا بدينا باش نافقك؟ واش نتي مريضة ولا مالك ؟
قلت ليه لا انا مامريضاش نتوما اللي مراضين فيكم مرض سميتو النفاق خاصكم تعالجو حيت انا صارحتك قلت ليك بغيت نكون معاك ..بقيتي كضحك وتغامز عليا حساب ليكم انا هبيلة ولا حمقة ..ماعرفتش اصلا شنو اللي ضحككم فالموضوع ..غلطت فيك حسابني غادي تصارحني..نتا طلعتي منافق ..كنسحب كاع هضرتي كلها اللي قلت ليك
هز يدو قالي بلاتي بلاتي مالنا على هاد الهضرة كلها .. منافق ما منافق!! فاش اختي ناققتك؟! جيت كدبت عليك ولا قلت ليك شي هضرة وطلعت داير غيرها ؟!! نتي جيتي قلتي ليا نكونو بجوح قلت ليك واخا مالكي كتسبي دابا !! نتي بنتي ليا ماشي طبيعية فشكل وانا داير فيك راسي
دورت وجهي حركت ليه راسي قلت ليه نتا اللي طبيعي ..كتغامزو على الناس وكضحكو عليهم ..صافي كنسحب كلامي
عقد حجبانو كيشوف فيا قالي سحبيه ولا خليه اش غيوقع !! نتي ماشي عادية
هزيت صبعي قلت ليه نتا اللي ماشي عادي نتا منافق..الحمد لله كتاشفتك دابا قبل ماطول العلاقة
شاف فالادمين وشاف فيا قاليه واش كتبان ليك عادية؟!! واش نتي شوية لاباس!! بناقص كاع من هاد العلاقة سيري اختي شوفي راسك راك ماشي حتى لهيه
تعصبت قلت ليه انا كنت باغا نعاونك باش تمشي لبرا وتخدم تما ولاكن نتا متستاهلش انا اصلا ندمت كاع تهدلت فيك اناصر ماحسابنيش نتا داير هاكا
بقا كيشوف فيا قالي اش غتعاونيني ولا نعاونك واش نتي صافا ؟؟ سير اختي بعدي مني
هزيت صبعي قلت ليه انا مبعدة منك ماتقوليش بعدي مني سمعتي..ندمت علاش هضرت معاك اخر مرة نهضر مع شي مغريبي فيكم النفاق والكدوب
جريت باليزتي جاتني البكية وزدت خلفة وضرت ورايا شفت فيه لقيتو كيشوف فيا قلت ليه تخدلت فيك انا مابغيتكش كاع تكون بحال هاكا
دورت وجهي وخرجت من تما بغيت نبكي وطلعت فالطاكسي زدحت الباب عليا وبديت كنبكي بوحدي وقلت لطاكسي سير عفاك بغيت نمشي من هنا تخنقت
رجعت لدارنا سخفانة بالطريق ولاكن بردت شوية على فاش خرجت من الاوتيل .. فتح ليا بابا الباب فالصباح بكري لقاني فالطاكسي وتصدم مافهمش علاش رجعت
سولني قالي مالكي رجعتي علاش مارجعتيش فالكار ياك كنتو دايرين ترجعو الاحد بالليل
جريت باليزتي قلت ليه دابزت معاهم وجيت
قالي علاش دابزتي معاهم ياكما دار ليك شي واحد شي حاجة
قلت ليه لا انا مارتاحيتش تما وجيت بحالي
تنهد قالي ايوا دخلي دخلي..دخلي سيري تنعسي باينة على وجهك مسهوتة
طلعت لدارنا انا وباليزتي وبابا مشا يجيب الكومير للفطور بحال ديما ..دخلت عند حفصة لقيتها ناعسة وحيدت حوايجي مابغيتش نفيقها ونعست حداها شبعت نعاس ورتاحيت مزيان ..فقت لقيتها الوحدة ونضت غسلت وجهي ولبست بينوار فوق البيجامة وخرجت لقيت حفصة جالسة قدام البيسي ديالها كتقرا وماما فلكوزينة
بدات كضحك قالت ليا اجي جلسي عاودي ليا
جلست حداها حطيت واحد الزلافة دكورنفليكس كنفطر وبديت كنعاود ليها بالتفاصيل..شدات حنكها كضحك قالت ليا
وييلي ويلي ويلي..والله حتى كنت عارفاك غادي ديري ليهم تما شي سكوندال عاد تجي ههه
قلت ليها :صافي اخر مرة نخرج معاهم
صحكات قالت ليا داك نصر الدين بعدا موحال يكون نعس..غيقول هادي مالها جات عندي برجليها ورجعات قلبات وجهها ..كنتخيل وجهه كي غيكون
هزيت كتفي قلت ليها الصراحة خدلني..كنت بغيتو يكون مختالف ..مابغيتش نتهدل فيه حيت رتاحيت ليه بزاف ..ولاكن دابا صافي قلتها ليه مغاديش نعاود نفكر فيه مرة اخرى
تنهدات حفصة قالت لي: خليي عليك كحل الراس غادي غير يحمقك والله مايليق ليك..انا عارفة اش تنقول ..غيردوك حمقة
تنهدت قلت ليها وشنو دابا غندير كنت كنفوج مع الكروب
قالت ليا التفواج بحال هادا غير بلاش منو .. البسالة كي دايرة
قلت ليها ندمت علاش صارحتوش
قالت ليا عنداك تعاودي تصوني ليه ..صافي نوضتيها معاه خليه حتارمي راسك شوية
قلت ليها منعيطش ليه صافي قررت ..ومغاديش نهضر معاه خديت قرار .لحسن الحظ ماطولاتش العلاقة اما كن تخدلت فيه اكثر
حفصة: عنداك تمشي ديري شي حاجة مع شي واحد ..
قلت ليها شنو هاد الحاجة
قالت لي: تمشي تنعسي مع شي واحد
قلت ليها لاااا اويلي
قالت ليا ايوا مانعرف وصلت مع ناصر للبوسان راه توصلي لما اكثر
قلت ليها :لالا منديرش النكاح
حفصة: ايوا هاكاك ..النكاح بالكاغيط الى مكانت لاكط مكاينش نيكاح فهمتي
قلت ليها فهمت راني عارفة نيكاح خصو لاكط ..ضاروري
قالت لي :ايوا هاكاك
جلست كنحاول نتلف شوية باش نسا شنو وقع وكنخرج غير مع ماما وحفصة صافي
رتاحيت شوية لاكن بديت كندخل للكروب كنشوف التصاور ديالهم اللي دارو فافران وكنشوف شنو دارو من مورايا وكنتحسر..بقيت كنتحاك بوحدي ودخلت كنقلب على كروبات وحدين اخرين باش نبقا نخرج معاهم ودخلت لشحال من واحد لاكن طلعو ليا فمدن اخرى ..
كان نهار الجمعة وكانت ماما مصايبة لينا كسكسو ودارتو بالكديد وكليت بزاف حتى دخت وانا مومولفاش بالماكلة التقيلة وخصوصا الكديد..بقات كتعطيني وانا كناكل حتى جاني النعاس .شربت واحد الكاس داللبن وتكيت على واحد السداري شادة تيليفون كندور فيه ختى طلعات ليا لالونص ديال لكروب دايرين الكًالة فيها الشعبي وجايبين شيخة ومغني ودايرين الحلوة والسوشي والعدد محدود ..بقيت كنشوف فديك التيكي وبقا فيا الحال حسيت بالبكية عاوتاني ماكرهتش نقطع وحدة ونمشي .. جلست غير كنشوف فيها حتى داني النعاس ونعست ماعقلتش على راسي
فيقني تيليفون كيصوني لقيت حفصة قدامي كتفرج فواحد المسلسل ديال الخمسة دلعشية ونضت كنقلب فين تيليفون لقيت راسي ناعسة. عليه
طلع ليا ادمين سيمو وتصدمت جلست وقلت لحفصة
الادمين كيصون عليا نجاوبو؟
ضارت عندي قالت ليا شنو بغا ؟
قلت ليها منعرف
قالت ليا جاوبي وكبري الصوت نسمعو اشنو بغا
درت مكبر الصوت قلت ليه الو
قالي ختي نهى صافا شخبارك لاباس عليك الواليد لاباس عليه
قلت ليه الحمد لله شنو بغيتي؟
خرجات فيا حفصة عينيها وحيدات الصوت قالت ليا بشوية اويلي خلينا نعرفو شنو بغا
ردات الصوت وهوا كيقول
بنتي ليا مزالة مقلقة
حركات ليا حفصة راسها قلت ليه لا مامقلقاش
قالي واهانتي ماتقوليش ناسيك ولا شي حاجة ..خليت ليك تيكي ديالك ديال الكالة في اي بي لا بغيتي تجي تحضري
هزيت كتفي قلت ليه لا مغنجيش
قالي وصافي نعلي الشيطان ..ماطرا والو والكالة واااعرة وداير دجاج محمر على قبلك
شفت حفصة كدور راسها وسولتها بعيني حركات ليا صبعها قلت ليه مغنجيش
بقا كيحاول يقنعني ويعتاذر قاللخر قطعات ليه حفصة الصوت قالت ليا قولي ليه غنجي انا وختي قلت ليه مهم حتى لغدا ونجي انا وختي
قالي مرحبا بيكم صافي غنخلي ليها بلاصة
قلت ليه اوكي
بقا كيوصيني باش نحضر وقالي راه كلشي غيلبس البلدي باش يجي تصوير زوين وداكشي مقاد يتلاح فلكروب والبنات غيلبسو الابيض والدراري الازرق باش تجي الكالة زوينة
قلت ليه ان شاء الله وقطعت شفت فحفصة قلت ليها شنو ندير دابا؟
قالت ليا الكالة بااينة زوينة ..شنو سمية الكروب؟
قلت ليها سميتو سبوتد فراند
قالت ليا ااه عرفتو كيطلع ليا ..وااعر فيه الناس نقيين مافيهش البراهش..شكون دخلك ليه؟
قلت ليها دخلني فيصل ..انا اصغر وحدة فيهم راه كاين اللي عندو ربعين عام
قالت :لا راني عرفتو كروب زوين ..الصراحة كيحطو داكشي واعر
قلت ليها دابا غادي تخليني كنتفقص عاوتاني
قالت لي:خليك فلكروب تساراي مع راسك ياك الادمين براسو عيط عليك صافي ماشغلكش فالشي لاخر .المهم غدا نمشيو واللي ماعجبناه نفقصوه
قلت ليها ماعنديش داكشي بلدي
قالت لي: نكريوه ولا نضبرو فيه داكشي حالو ساهل
تافقنا نمشيو وبديت كنقلب على ليباج ديال البلدي اللي عندنا فمراكش لقيت بزاف ولاكن انا مافيا اللي يلبس شي تكشيطة ولا قفطان بغيت غير شي حاجة خفيفة نرتاح فيها ..عيات حفصة كتوريني فتكاشط والصراحة داكشي زوين وبالالوان وتقليدي ولاكن انا مابغيتش وخرجت قلت ليها نمشيو عمد وحدة طلعات ليا كتبيع البلدي ..بغيت شي حاجة خفيفة وتبقا لي ماشي ملبوسة وفنفس الوقت نبقا نلبسها الى كانت شي مناسبة
مشينا لواحد المكازا كبيرة فيها كولشي وهضرت مع مولاتها وريتها شنو بغيت بالضبط وباللي باغا نشري..جبدات ليا اشكال وانواع داكشي مصمم وبالسمية وليديطاي زوينين ..قيست شي ربعة ولا خمسة ديال قفيطنات وعجبني واحد الشكل هوا اللي لقيت قريب لشخصيتي وحتى هوا فالابيض وشريتو من عندها دارتو ليا فكارطونتو وحفصة ختي كرات من عندها تكشيطة بيج فاتحة بليزاكسيسوار ..ورجعنا بحالنا للدار وريت لماما داكشي قالت لي علاش شريتي كن كريتي براكة عليك
قلت ليها مكاينش بحال هادو للكرا
قالت ليا بشحال شريتيه
قلت ليها خمسالاف درهم
خرجات عينيها قالت ليا داكشي اللي لقاو عندك داوه ليك..مالكي حالتك
قلت ليها عجبني موديغن وبلدي كيجي زوين
قالت ليا ضبري راسك
جمعتو فكارطونتو ولغد ليه الصباح مشيت مع حفصة لحمام راس الدرب فركاتني الطايبة مزيان ولبست سورفيت رمادية ديال ديور وخرجنا عاوتاني مشينا للصالون ديالها نصاوبو شعرنا ودارو ليا شوية دالمكياج حيت بصراحة مكنعرف منين نجيه ومامولفاش نديرو ..وريتها تصويرة ديال مكياج خفيف وصاوباتو ليا كما بغيتو ونقلت منها شوية باش نعرف نصوفي راسي وخرجنا رجعنا للدار
بدينا كنوجدو وتحمست نحضر بديت كنحس بالفرحة عاوتاني خصوصا وانا كنعيش دوك اللحضات ديال التحضيرات
وقفات معانا ماما فباب البيت متشوف فينا ويدها على جنبها وقالت لي
ردي البال عنداك يجرك شي واحد
نضت كنقاد واحد المجدول قلت ليها علاش غيجرني!!
قالت لي يمشي يكدب عليك شي واحد ويضحك عليك ماتيييقيش فيهم بايضحكو عليك وبايخليوك راه هنا ماشي هوا المانيا ولا سويسرا ..بايديو ليك فلوسك وتجلسي كتبكي ايوا عنداك
حفصة :اصلا ماقالت لحد راه جايا من لخاريج مايديوها منها لا حق لاباطل
ماما:ايوا هاكاك ..حضي راسك وحضي جنابك وحضي صاكك ..اللي قالك شي حاجة ماتيقيش بيه راه غير ولاد لحرام اللي كاينين
بقيت واقفة كنسمع ليها وهي كتوصيني وقالت لختي لحفصة
عنداك معاك. ومشات خلاتنا كنلبسو
جبدت داك القفطان الابيض كان من لفوق بحال القميجة بالكول طالع فيه سفيفة والعقاد بلاصت الصدايق وتوب ديالو رطب ..اما يديه حتى هما فالابيض ولاكن توب مختالف ترونسبارون ومطروز بالابيض نيت وفيه شي عقيقات بالاييض واليدين من لكتاف حتى للكمام ومحموعين من بحال القميجة بالعقاد .حا من لتحت سامبل ابيض محلول حد الركبة فسفيفة خفيفة وعقاد دوغي ولبست معاه صباط سومو بارد وسرحت شعري طلقتو كامل اللور ودرت حلقات صغار وساعة فيدي والخاتم ديامو اللي تزوجت بيه وعزيز عليا لاكن بدلت ليه البلاصة درتو فليمن ..شوية بارفان شوية من الحاجة وهزيت صاك صغير مربع فيدي ديال ديور وضرت عند حفصة لقيتها مقابلة مع المرايا كتقاد الحلقات ولابسة تكشيطة تقيلة بيضاء جاتها زوينة ولاكن انا غير شوفتها وهي عامرة طيحات ليا الكتاف.. منقدرش نلبس شي حاجة منرتاحش فيها واخا تكون ماشي غير زوينة
ضارت عندي قالت ليا جاك وااااااعر ..جيتي فنة
قلت ليها حتى نتي ولاكن مجاكش داكشي تقيل
قالت لي تقيييل اشمن غير صابرة
قلت ليها باز ليك ..انا نزيد غير داك الحزام نتخنق ..هاد المجدول وقنطني
بدات كضحك وهزات صاكها وخرجنا قلت ليها شنو نديرو دابا
قالت لي نمشيو فطموبيلتك اختي..ياك داا صافي فكيتيها معاهم غتبقاي غير تخرجي تساراي وصافي
قلت ليها صافي
قالت ليا ايوا نمشيو فيها والى مابغيتي حتى واحد كاع يعرفك نحطوها بعيدة على الباب حيت بااينة للعمى الى مشاو حتى شافوها الصراحة كلشي غيبغي يبروفيتي وبحال هاد طموبيل اصلا ماشي اي واحد يقدر يديرها وساوية الزبابل دلفلوس فهاد البلاد
تنهدت وحفصة كتهضر وركبنا طلقت الموسيقى ومشينا للعنوان اللي حاطين لقينا الكالة فأوتيل وبزاف طموبيلات مصافين تما اشكال وانواع .وقفتها بين الطموبيلات ونزلنا مشافنا حد دخلنا رشدونا لقاعة الحفلات اللي فداك الاوتيل ودخلنا لقينا الدنيا عامرة والتمر والحليب فالباب بحال شي عرس تماما خدينا حقنا وطليت على تيكي كنقلب على النمرة ديال الطبلة ومشينا لقينا جوج كراسا خاويين ديالنا وجلسنا سرحت عيني كنقلب واش يبان ليا ناصر لا كن مابانش واخا قلبت فالقاعة كلها وسط داك العرام والناس داخلين والقاعة كتعمر ..قالت ليا حفصة فين هوا هاد ناصر؟
قلت ليها ماشفتوش يمكن ماجاش
قالت ليا والادمين ديالكم
يالاه جيت نقول ليها ماعرفتش وهوا يدخل وتالف ومشطون يهضر مع هادا ويهضر مع هادا حتى شافنا وجا عندنا كيضحك سلم علينا ورحب بينا وقالي
درتيها زوييينة ..واشتي كنتي غضيعي عليك الكالة
قلت ليه كنت ماحفصة ختي كاع منجي
رجعات حفصة اللور طرطقات فيا عينيها ودارت يدها على نيفها والادمين كيضحك قاليها مرحبا بيك اختي ..واش داخلة معانا للكروب؟
قلت ليه لا ولاكن كنعرف الكروب ديالكم
قاليها :مرحبا بيك تا دخلي معانا
شاف فيا كيضحك مافهمتش علاش كيضحك عاوتاني وقلت ليه
علاش كضحك؟!
قالي والله ماعلى شي حاجة ختي نهى نتي كنشوفك كيفاش كتشوفي فيا كتجيني الضحكة وصافي
جر واحد الكرسي جلس حدا حفصة قاليها واش هي ديما هاكا حتى معاك نتي
قالت ليه معاشتش فالمغرب فهمتي دابا
هز راسو فيا قالي اااااااااااااااااااه …وهاكاك قوليها من الاول!!! قولي ليا نتي عقلية وداكشي ودابا عاد فهمت….اينا بلاد كنتي عايشة
قلت ليه المانيا
قالي كيضحك : ابنداخ تشيخ نداخ وداكشي عاوتاني..ومالكي ماقلتيها من الاول؟..هي غير فاكونص وصافي
حفصة:لا غتستاقر هنا مابقاتش غترجع
قالي:سمحي لينا الى قلناك راه غير سوء تفاهم وصافي…كن قلتيها لينا من الاول غنعرفوك عقلية وداكشي نتي ماقلتي والو مافهمناكش كاااع..ولاكن هانية ماطرا والو ..مرحبا بيكم
حركت ليه راسي قلت ليه شكرا وناض بغا يمشي وقالي ياك مابقيتيش مقلقة ولا شي حاجة ؟
قلت ليه لا
ضحك قالي شتي نتي توليه نتيقك تقولي نتيقك
مافهمتش شنو كيقصد بالضبط لاكن ضحكت معاه ومشا
قلت لحفصة علاش قلتي ليه عايشة برا
قالت لي: باش مايحسابهمش مكلخة ولا هبيلة فهمتي…الصراحة حات زوينة البنات يلبسو الابيض والبنات الازرق.
سرحت عينيه قلت ليه اه ..حتى لحوى بننييينة
حليت فمي ندخل واحد الحلوى وشفت ناصر داخل لابس دجينز وجبدور غير الفوقاني زرقاء . رجعت الحلوى من فمي قلت لحفصة هاهوا هاااهوا نصر الدين
دورات عينيها قالت ليا مور دجين زرق؟
قلت ليها اه
دارت يدها تحت خدها كتشرف فيه قالت لي
تباااارك الله ..ايوا هانتي عندك الدوق يا لمسيخيطة
قلت ليها خايب؟!!
قالت ليا وييلي على خايب!! الطولة والفورمة ..وييلي على الوقفة ياختي مرسيديس واقفة ..مكيضربش على الشعا ولاكن باينة عليه قويصح مع راسو وشخصية ..هانتي لاتقولي غير شيفور راه الاخ دواق الاللة ومهلي فراسو ماشي صحاب السوايع المدرحين قدها قد الراس والسمطة قد البغل وكلشي مدرح ..واخا داير غير ساعة ديال كازيو ولاكن اوريجينال مادوزش عليا انا
استاقمت فالجلسة كنشوف فيه وقلت ليها كجاك؟ دابا نتي تقدري تشوفي حسن مني واقيلا
قالت ليا :الصراحة مافيه مايتعاب ..السر فالبساطة..باينة عليه بسيط ومقبول وكتبان عليه شخصية وعقل..هانتي شوفي ..دخل مشا جلس..مابقاش كيلعب بعينيه ويشوف هنا ولهيه..جلس مع صاحبو وكيهضر هوا وياه وعاادي.. مافيه تعنكير ما ضارب على الشعا…جبد تيليفون ..تيليفونو عادي جدا..سويعة زوينة ماشي قد الراس ..خويتم صغيور..لبيسة محددة ..سبرديلتو نقية زوينة.. شعرو نقي ..جليسة عندو مرجلة وجامع راسو ماشي شي منونخ كيهضر مرخي ..شتي ..هاكا خصك تقراي بنادم غير من التفاصيل ديالو يبان ليك ..دابا هاد ناصر كيبان عليه نقي وكيدير لراسو ماشي للناس..كيعيش على قدر المستطاع ..ماشي واحد حاازق م٠٠ودة عليه كيمشي يشري اخر مكاين فتيليفونات ولا يضرب شي لوس فيتون فرجليه مدرحة كلها نجوم وشي سمطة البزيم ديالها بحال ديال العسكر وراسو بحال شي قلوش دالسمن كله معلك بالدهنة والخملة لاسقة فيه وباغي يبان فهمتي..يعني كيدير للناس انا باش يشوفوه اما لراسو هوا لا ..وهاد النوع هوا اللي كتلقاي سليبر كارم بالخنز مكيبدلوش حيت مكيشوفو حد..مي لاخر باين نقي..باينة كيدير شنو بغا ..المضاهر راه كتعكس شخصية مولاها وهادا راه والله ماتقنعيه على شي حاجة متعلقة بالناس واخا طيري حيت مكيتعلقش فين يتفلق باش يبان ماعرفت كي داير..وعاد باقي صغير وغادي بهاد العقلية ماغاديش مع الموجة وخدام بدراعه مكيتسنا حتى واحد يعطيه وكيمشي على قد جهدو ..كيبان الواحد غير من البروفايل ديالو ..
بقيت كنشوف فيه بابتسامة وهوا كيهضر ويضحك مع اللي حداه حتى لواحد اللحضة جات قدامو مباشرة واحد البنت لابسة قفطان ابيض جسمه بحال الساعة الرملية تماما وجمعات القفطان لقدام وكانت عندها مؤخرة منفخة وكتهبط وتطلع وترمي القفطان فوق منها وكتشطح وتمايل .. دور وجهه لقاها قدامو شاف فيها وضار عند صاحبو كيضحك عطاه يدو رشقو لاخر وبقاو كيضحو ويشوفو فيها ..عض على شنايفو كيشوف فيها بابتسامة ورجع شاف فصاحبو ماعرفت شنو قاليه وبقاو كيضحو وانا كنشوف فيهم ..تفكرت راسي فاش كان كايتغامز هوا والادمين عليا ودرت فراسي الضحك وعند بالي عادي تماما كما واقع مع ديك البنت .. فهمت كيفاش كنت كنبان ليهم ديك الساعة وعاد ستوعبت ولاكن استوعبت معطلة .. قلت ماشي مشكل نستوعب معطلة احسن ما نبقا دايرة فراسي الضحك ديما ومانستوعبش كاع . وخصوصا هاد الجانب هادا اللي كيتعلق بالكبرياء والكرامة .
بقيت كنفكر ونشوف فيه وفديك البنت ودور وجهه جر معاه الضحكة وشاف جيهتي بعفوية كيشتت النضر حتى جات عيني فعينو وقلبت وجهي بشوية للجهة الاخرى وتنفست باش نرتاح وقلت لحفصة
هضري معايا ماتبقايش ساكتة
ضارت عندي كضحك قالت لي كنشوف فداك بوشعكوكة غيتسطى مسكين بالشطيح تقولي كان مربوط
قلت ليها فين كاين؟
قالت ليا راه لهيه ميلت راسي كنشوف فيهم كيشطح براسو خلعني حطيت يدي على قلبي قلت ليها ناري راسو غيطير
ضارت عندي قالت ليا ماشفتيش اللي كتشطح معاه شوية ماتكربع قتلها بالتنقاز ..ناصر كيشوف جيهتك
هزيت كتفي قلت ليها خليه انا والله منشوف جيهتو ..غنمشي بداك البوفيت اللي لهيه ناخد شوية دالحلوى
قالت لي:سيري وجيبي ليا معاك شوية
هزيت طبسيلي وطبسيلها ونضت دزت وسط داك الشطيح مشيت وقفت كنشوف شنو حاطين وهزيت ليا فطبسيلي وهزيت لحفصة ..جا واحد الولد حدايا ضحك معايا وقالي بالصحة والراحة
ضحكت معاه قلت ليه الله يعطيك الصحة
قالي نشد عليك
قلت ليه واخا
عطيتو الطباسل وهزيت القفطان مشيت حداه لطبلتنا ووقفت شديت من عندو الطباسل حطيتهم حدانا وسلم على حفصة قاليها
عادل
ردات عليه قالت ليه حفصة
قالي واخا نجلس معاكم شوية
قلت ليه اه مرحبا بيك جلس
جلس حدايا قالي شرفيني بسميتك
ضحكت معاه قلت ليه نهى
قالي زوينة بحال سميتك
صدمني وعجباتني قلت ليه شكرا حتى نتا ضريف بزاف
قالي ياكما برزطتك ولا شي حاجة الى ديرونجيتك نمشي..مابغيتش نتقل عليكم ولا شي حاجة
قالت ليه حفصة نووووو نو غير خليك
قالينا اول مرة نشوف بنيتات زويونات ومأدبات بحالكم
درت شعري مور ودني قلت ليه ميغسي
قالي مكتشطحو ما والو جيتو غير تفرجو
قالت لي حفصة نوضي شطحي انهى ..
قلت ليها بخجل مكنعرفكش
قالت لي غير نوضي كتعرفي حسن مني
بديت كنضحك وناض عادل شد ليا فيدي وشديت قفطاني قدامي وهي كتشوف فيا وتحرك ليا راسها كتقولي شطحي ..تعكلت من الوقفة اللولة وشديت فيد عادل جرحتو بدفري وقلت ليه سمح ليا
قالي مكاين حتى مشكل خودي راحتك
شد ليا فيدي كنشطح معاه وحفصة كتسفق لينا وناضت حتى هي معانا وجا واحد الدري اخر شد فينا وبقينا كنكبرو حتى درنا دائرة غير فبلاصتنا بلا منمشيو للوسط وجا المغني وصل حتى لعندنا كيغني وانا كنشطح بشوية ونسفق بيدي ..بنت ليه غير انا وجا عندي قالي سميتك
قلت ليه نهى
بدا كيغني عليا وكيعطيني نعاود موراه لاكن ماعرفتش شنو نقول بقيت ساكتة وهز يدو قال فالميكرو
بلاتي بلاتي بلاتي
بديت كنضحك وسكت الجوق قالي الزين سميتو
قلت ليه نهى
قالي نووهاااا..قالي مال نهى مابغاتش تغني
قلت ليه مكنعرفش نغني
قالي يالاه انا نقول ونتي قولي مورايا
قالي :لهواااا لهواااا وفين ماليه ..جيبو المراكشيات يلعبو علييه
عطاني الميكرو قلت ليه حوااو حواااو فين ماليه ..
ماكملتش سمعت كولشي كيضحك والقاعة كتهز كلها وهوا يحيد ليا الميكرو وجا الادمين كيجري ماعرفت شنو قاليه فودنو ورجع قاليهم فالميكرو
نعلو الشيطاان ..براكة من الضحك ..قولي ليا منين ابلاد نتي
قلت ليه سويسرا
قالي:المانيا ولا سويسرا
قلت ليه مابقيتش فالمانيا وليت فسويسرا
قالي يالاه غني لينا شي حاجة بالالمانيا
بديت كنضحك وصوتي على قد لحال كي كنهضر كي كنغني بديت كنغني وعطيتو الميكرو قالي الصوييت ياسلام
درت يدي على نيفي كنضحك وضار عندي كيغني قالي الضحيييكا ياسلاااام هااو ضحيكا يا سلام
بدا كينقز وجرني من يدي داني لديك القعدة علاش كيشطحو بقا كيغني ويقولي شي شطيحة يا نووهااا شي شطيحة يا نووها
هزيت القفطان كنتقاتل ونضرب برجلي ونضحك وجات حفصة علقات ليه واحد جوج ورقات زورق وشدها طلعها قاليهم
بلااتي بلاتي بلاتي
سكت كولشي وقاليها اشنو سمية لاللة لغزالة
قالت ليه حفصة
قاليها الله على ناس مراكش..نتي من هنا ولا من لهيه تا نتي
قالت ليه انا من هنااا
قاليها شكاتجيو بعضياتكم
قالت ليه خواتات
هز الميكرو كيغني ليها قاليها
هادا الزين سلالة من العمة للخالة
ردات عليه تا هي وبدا ينقز ويغني هادا لزين سلاللة من لعمة للخالة وبدات كتشطح وتركز بالسباط وخليتها كتشطح بغيت نزل كلشي تعرض ليا بيدو وشديت فعادل نزلت وقفت كنسفق والمغني كيشوف فيا وقرب عندي كيضحك قالي خليك من الشعبي براكة عليك لالمان
مافهمتش شنو قصد وقلتها لحفصة فاش نزلات بدات كضحك قالت لي والو ..ووك وووك فوجنا ولاهيلا
سخفنا..مشينا جلسنا بلايصنا ورديت شعري اللور كنقادو بيدي ..شفت جهة ناصر مالقيتوش وبديت كنقلب بعيني واش يبان ليا ..قالت ليا حفصة صوريني بتليفونك كيصور زوين
جبدتو من الصاك نصورها لقيت مسج جاني من عند نصر الدين ..خليتها مقادة باغا تصور وقلت ليها بلاتي بلاتي
حليتو لقيتو كاتب
Je vous présente mes excuses pour mon silence et pour mon erreur: vous êtes le propriétaire d’un grand cœur
بقيت كنشوف فالمسج ديالو وقلت لحفصة شوفي شنو كتب ليا ناصر
طلات على المسج قراتو وشافت فالجهة فين كان جالس مالقاتوش تما وقالت لي
تسناي..شنو نتي بغيتي تصالحي معاه؟
قلت ليها لا واعدت راسي منعاودش نهضر معاه مرة اخرى
تنهدات قالت ليا واش متأكدة ؟
قلت ليها اه متأكدة حيت خدلني ماطلعتش كما بغيت وعاد دابا كيتأسف
قالت ليا وشنو بغيتي واش مغتسامحيهش فمرة زعما
رديت بالنفي قلت ليها مابغيتش نهضر معاه ما دار حتى حاجة على قبلي وعايرني ..انا باقا عاقلة على كولشي منسيت حتى حاجة ..مغنسامحوش
حفصة:وصافي ديري داكشي اللي بغيتي .بغيتي تجاوبيه جاوبيه مابغيتش ماتجاوبيش ديري اللي يريحك
بقيت كنفكر ولقيت راسي هضرت وقلت اللي يكفي ديك المرة ومكاين لاش نهضر مرة اخرى ولا نجاوبو
حطيت تيليفون وربعت يدي كنتفرج وكنقرا ديك الرسالة ونعاودها فعقلي حتى بدا تيليفوني كيصوني وطلع هوا .هزيت تيليفون قلت لحفصة بلاتي نجاوب ونجي الصدع
مشيت جيهة الكولوار حدا الباب ووقفت قلت ليه الو
قالي : نهى صافا
قلت ليه:صافا الحمد لله علاش كتعيط لي
قالي :قريتي مسج اللي سيفطت ليك؟
قالت ليه قريتو .
قالي:كنت كتسنى تجاوبيني
قلت ليه تخدلت فيك راني قلتها ليك..مغاديش نجاوبك ماعندي ما نقوليك
ضرت شفتو جاي شاد تيليفون فيدو وقطعت بغيت ندخل ولحقني كيجري شدني ردني اللور وقالي
نهى نهاا ..بلاتي نهضرو
رجعت وقفت برا شفت فيه قلت ليه شنو بغيتي تقول ؟
قالي :جوسوي فغيمو ديزولي انا فالاول مافهمتش التصرفات ديالك..نتي ماشرحتيش ليا ..ماقلتيش ليا كاع فين عايشة وفين كبرتي وسولتك ماقلتي لي والو ..وكدبتي عليا
قلت ليه كدبت عليك باش نعرف حقيقة مشاعرك جيهتي وعرفتها
قالي شنو عرفتي؟
قلت ليه عرفت الحقيقة دبصح حيت ماكنتيش عارفني..ضحكتي عليا وعلى تصرفاتي ..وهادشي شفتو بعيني وعايرتيني قلتي لي مريضة وقلتي لي نتي ماشي طبيعية وقلتي لي بعدي مني وقلتي لي بناقص من هاد لاغولاسيو ..صافي بينتي على حقيقة مشاعرك جيهتي ونافقتني ونتا اصلا من الاول ماقبلتيش وماعرفتش علاش نافقتيني وفاللخر بينتي ليا باللي مقابلش اصلا..ودابا جيتي عتاذرتي مني حيت عرفتيني معايشاش هنا وجيت من سويسرا وجيتي دابا باعتذار مزيف باش نسمح ليك على قبل مصلاحتك
بقا كيشوف فيا مصدوم ومخرج عينيه قالي
حتى حاجة من هادشي ماصحيحة ..هادشي كاااامل تخيلتيه ولا قالو ليك شي واحد..اشمن مصلاحة عندي فهادشي ؟
قلت ليه عيتي بالخدمة فالمغرب بغيتي نديك تخدم برا..انا كنت باغا نديك فالاول حيت بقيتي فيا عندك شواهد وكتقلب على مستقبل حسن وقلتي لي الصراحة ..دابا مغنديكش ومغنهضرش معاك مرة اخرى . هادي اخر مرة نهضرو فيها ونفسر ليك والمرة الجايا مغاديش نهضر معاك نهائيا هادا وعد
بقا كيشوف فيا مطولا حسيت بالنفس كطلع وتنزل من مناخرو وقالي
سمعي بغيتي الصرااحة..انا ماباغي منك والو ..واخا تجيبي ليا الطيارة حتى لعندي مغنمشيش فهمتي… تيقيها ولا متيقيهاش ..فالاول فاش هضرتي وقلت ليك ديك الهضرة حيت نتي اللولة سبيتي قلتي ليا منافق..انا مزال مكنعرفكش مزيان..لحد الساعة مزال مكنعرفكش شكون نتي وشنو كديري وشنو هي حياتك .. وبغيت نجي نهضر معاك قبل مادوي نتي حيت عجبتيني شكلا اولا وجيتني ضريفة وفشكل …المهم نتي الى كنتي كتشوفيني منافق انا كنشوفك كدابة وبرهوشة..
قاطعتو:انا كدابة وبرهوشة!!!
سد عينيه وهز يدو قالي خليني نكمل ..نتي هاكا كتباني ليا..ماشي بوحدي اللي عندي عيوب نتي براسك عندك عيوب وماكتشوفيهمش..هادشي جا بالزربة وسالا بالزربة ومافهمت والو . جيت كنعتاذر حيت عرفتك معايشاش هنا وعقلية اروبية وداكشي وانا خطيت قلت ليك مريضة وبعدي مني حيت عصبتيني وكتقولي ليا شي هضرة اصلا مكايناش كما كتهضري دابا ..اوكي..قلتي ليا باغا تديني ولا ماتدينيش..نفرضو بغيتي تديني؟! وقلت ليك واش كتعرفي شي واحد يدير ليا كونطرا..نتي شديتيها باغي نمشي بأي طريقة. وانا كنت كنقصد نشري ديك الكونطرا ..ماشي غديري فيا هير ولا يجي شي واحد يدير فيا خير ويبدا يحل عليا فمو ..واصلا من هادشي كامل ماطعمت فيك ما نافقتك ماكدبت عليك..وقع سوء تفاهم جيت نحلو معاك باش منبقاوش هازين فخاطرنا انا وياك ..سمحي ليا ختي ماعرفتكش بهاد العقلية باش نعرف كيفاش نتعامل معاك هادا ماكان ..شي حاجة اخرى مكايناش ومغتكونش وفهميها كما بغيتي دابا.. انا ونتي عمرها غتكون بيناتنا شي حاجة مستقبلا باش ترتاحي فمخك ويرتاحو حتى اللي ضايرين بيك وكيعمرو راسك راسك ..هاد ناصر اللي طامعك فيك توصليه للمريخ و باغي ياكلك هاهوا كيقوليك الله يعاون ..حضي غير مع اللي ضايرين بيك كيضحكو ليك سمعتي.
بغا يمشي ووقفتو قلت ليه حتى انا مزال مساليت هضرتي
رجع وقف قدامي قالي واخا هضري هانا كنسمع
قلت ليه علاش ماجيتيش هضرتي معايا قبل ماتعرفني يالاه ..حتى لدابا عاد سيفطتي ليا مسج؟
قالي: شوفي اااانهى ..تحليلاتك اللي بحال هادو خليهم عندك ماعندي باش نجاوبك..الهضرة اللي عندي قلتها ليك ..بغيتي تيقيها تيقيها ..مابغيتيش نتي حرة ..البلان باين والله يسهل علينا وعليك ..تهلاي فراسك
دخل للقاعة خلاني واقفة بوحدي ودخلت وراه مشيت جلست حدى حفصة قالت لي فين كنتي؟ مالكي واش كنتي كتبكي
وقفت الدمعة فالقنت ديال عيني ودورت وجهي قلت ليها من بعد ونعاود ليك
قربات مني قالت ليا شكون اللي بكاك ؟
درت بالجنب عطيت لناصر بجنبي وحطيت يدي حدا وجهي هبطت راسي كنمسح عيني قلت ليها
هضرت مع ناصر..
شافت فيه وشافت فيا قالت ليا مالكم ؟ تا هوا شتو معبس شنو قاليك
قلت ليها من بعد ماشي دابا
شدات ليا فيدي قالت طحتي فيه الزغبية.. كاين شي واحد كيبكي بسبب شي واحد اخر غير هاكاك
قلت ليها ماطيحني ماطيحتو غير هضرنا وصافي
تنهدات رجعات اللور وبقيت انا كما انا عاطياه بالجنب..هزيت كاس دالماء شريت وشفت فيه لقيتو كيضحك وسط صحابو فطبلة جاو فيها اغلبية غير الدراري والرجال وشي ثلاتة بنات صافي
زدت فالبكا اكثر فاش شفتو كيضحك ماعجبنيش الحال علاش مامقلقش بحالي وعلاش كيضحك وانا مأزمة..بكيت واحد شوية وكنمسح الدمعة قبل متهبط حتى رتاحيت شوية وبردت ورتاحو عيني ودورت وجهي للناس جات عيني فعينو نيشان لقيتو كيشوف فيا وهبط عينيه لاكن بقيت انا كنشوف فيه مابغيتش نهبط عيني..بغيت ندير ليه تأنيبالضمير ويتأزم بحالي..لاكن صحابو ماخلاوهش حتى يسكت جالسين وكيضحكو ويهضرو ويوريوه وانا حاطة عليه حتى دور وجهه عندي المرة الثانية شاف فيا وبعد عينيه ورجع شاف فيا لقاني مزال كنشوف فيه
بقينا هاكاك حتى حطو لينا لعشا ..هزيت حقي حطيتو قدامي وهزيت الفرشيطة والموس كنتعشا ونتهند
ماعرفت ديك العشية اللي دازت مور لعشا كي دازت ترفعت حتى لقيت الحفلة سالات وخرجنا رجعت بحالي للدار مرفوعة على العالم كنتسنى نجلس انا وختي نعاود ليها ونشوف باش تنصحني
لبست بيجامتي وغسلت وجهي وجلست فوق الناموسية عاودت كلشي لحفصة فاللخر قالت ليا
عرفتي شنو ديري..صافي نسايه خليه ..مايصلاحوش ليك المغاربة انهى بعدي منهم وخليك فالكروب خرجي وتساراي وضحكي ونشطي وماديري حتى علاقة مع شي واحد وخليك على طبيعتك احسن
بقيت ساكتة وشديت واحد المخدة عنقتها حتى كنلقا ضميري حدايا كحل بحال شي ضلمة خلعني قالي
صافي هادشي اللي بغيتي؟ شتي ناصر عندو الحق نتي برهوشة ونتي اللي كضلمي الناس ..تنهاي دابا هاوا خدا عليك نضرة خايبة وطلعتي فعينيه كدابة وبرهوشة رتاحيتي دبا؟ بردتي؟. حتى ديك الصورة الزوينة اللي شاف عليك النهار الاول باش عجبتيه خسرتيها ودابا عمرو يشوف جيهتك واخا تكوني ملكة الجمال..مافهمتش انا مالكي وليتي كدخلي وتخرجي فالهضرة وغير كتخربقي وتتاهمي الناس..ماخليتي فيه غير اللي نسيتي واش لقيتي يدو فجيبك ؟ واش نصب عليك وخدا ليك شي حاجة ؟ واش بين ليك على شي طمع ولا على شي حاجة كتشبه ليه؟ بقيتي عليه طمعاه منافق مانعرف شنو. مالكي على هاد السرعة مالكي يصلاح ليك غير فيصل ..فيصل كنتي كتعامليه مزيان واخا عطاك وجه منافق وهادا اللي خدام على راسو مطامع لا فيك لا فغيرك وجا كيطلب منك السماحة ندمتيه على النهار اللي عرفك فيه ..اخخ على شخصية ..تافهة وغبية ونتي اللي ماتستاهليش ..متناقضة ومكتعرفي لا شنو ديري لا شنو اصلا باغا .
غبر من حدايا خلاني كنشوف فالحيط مالقيت شكون نجاوب وبانت ليا نفسي شاعلة فيها العافية غادية جايا مكتهضرش وكطير وتنزل وقالت ليا مسحتي بيا الارض وبهدلتيني والله لا داك النعاس
جاتني البكية وحضرت عقلي قلت ليه شنو ندير دابا فكني نتا سبب المشاكل علاش مكتحضرش كنخليني كندبز
قالي ماعندي منقول ليك دابا باغي نعس ومضغوط من جهة الضمير والنفس زيروني ماعندي كي ندير خلي يبردو ونشوفو الحل
شديت راسي كان غينافجر وعطيت وجهي للحيط نعست ومن ساعتها مادخلت ماخرجت وكنتسنى نبرد باش نرتاح وجا واحد العرس من عائلتنا وقالت لي ماما يالاه معايا..مارديتهاش لها فوجهها ولبست قفطاني وقاديت راسي ومشيت معاها حضرنا للعرس فواحد القاعة وبديت نتعرف على العائلة وكلشي باغي يتجمع وكلشي باغي يسولني ويبحث فيا وانت ماعندي كانة نهضر كنحرك ليهم غير راسي
كيقولي لي البراكة فراسك ونزلو عليا بكثرة الاسئلة بزاف ماعفرتش علاش كيسولوني وا عندهم بيهم شي غرض ولا شنو مافهمتش..واللي زادت صدماتني جات واحد المرى كتقولي تشهيتك لولدي وولدي مربي وغزال والصواب والاداب وبغاتني نتزوج بيه ..قلت ليها لا مكنفكرش فالزواج وبقات عليا زوينة وغزالة وفنة وبزاف دالهضرة ماعنديش ليها استعداد .دورت وجهي درت راسي مكتهضرش معايا وخليتها هضرات حتى شبعات ودازت لماما كتهضر ليها عليا ..شافت فيا ماما كحك وحركت ليها راسي بالنفي وقلبت عيني ..ناضت هي جات وحدة اخرى بدات عليا بالبحث وقوة البوسان والتعناق تخنقت مابقيتش كاع مفوجة ونضت قلت لماما غنمشي ميمكنش هادشي راه قتلوني بالاسئلة مللي دخلت كلشي تكب عليا ..جيت نفوج مرضوني بناقص كاع
ايداتني حتى هي قالت ليا سيري ماعندك ماديري هنا ..بناقص خليني غير انا حت يجي باك يديني
هزيت صاكي خارجة وكل مرة يوقفني راجل وزاد كمل عليا واحد الشارف بقا عليا مرحبا مرحبا وبنتي وبنتي فاللخر قالي
سلفيني واحد خمسين مليون ابنتي الله يرضي عليك
جاني القبض وجاتني البكية قلت ليه ماعنديش استعداد اعمي والله عيانة كن جيتني فشي وقيتة من غير هادي نسلفك ..سمح ليا بغيت نمشي
خليتو ومشيت بحالي رجعت لدارنا نعست تهنيت كاع فدماغي
الصباح بحري مشيت نفطر لقيت بابا كيهضر فتيليفون وحسيت بيه كيقصدني ويقول
غير قولي فاش بغيتيها ..هاا؟ تسلفك خمسين مليون ؟ الله يهديك السي دكالي واش خمسين مليون كسلف..ماعندهاش ..الله يعاون
قطع عليه وقالي هاكاوا على خمسين مليون
قلت ليه واش داك السيد الكبير؟ ياكما مريض باغي يدير شي عملية
قالي باغي يبني الدار قالك خمسين مليون ..هاكاوااا…عنداك تعطي لشي واحد شي ريال بلا خباري اللي قاليك عطيني قولو ماعنديش راه غينصبو عليك ..كلشي كداب وشفار ماتيقي بحد ابنتي الله يرضي عليك
حركت ليه راسي بالايجاب وهوا غادي جاي كيوصيني حتى خرج وبقيت بوحدي جمعت دوك الماعن فاش فطرت ديتهم لماما للكوزنية وغسلتهم وحطيتهم بلاصتهم و رجعت عند تيليفوني كان كيصوني لقيت ختي اللي فألمانيا اللي رباتني ومكنقولش ليها ختي كنقول ليها ماما هزيت تيليفون فرحانة جاوبتها بالالمانية حيت كتسخف حتى هي فالهضرة بحالي بالدراجة
الو ماما
ردت:كي دايرة ماما لاباس عليك كي دايرة ماما وحفصة وبابا وهند
قلت ليها الحمد لله كولشي مزيان
ردت: عجبك المغرب ماما تساريتي شوية
قلت: زوييين مشيت بزاف دالمدن تساريت
ردت:فوقاش غتجي مزال مطولة تما
قلت: ماعرفتش فوقاش نجي مزال بغيت نبقا بزاف
ردت: بقاي شوية ماعندك ماديري فسيوسرا ..الشغل تما غادي مزيان؟
قلت: مزيان حمد لله
ردت: هضرت مع المحامي ديالك سولتو كي غادية الامور قالي كولشي غادي مزيان ..مي دوك الناس اللي كريتي ليهم السفلي مارتاحيتش ليهم
قلت: دابا هادا صاحب ادوارد وهوا اللي كرا ليه وصاني قالي خليه ماتخرجيهش وعزيز عليه
ردت:ايوا انا غير وصيتك ..
قلت: كيوصلني اشعار من الكامرات فتيليفوني كل مرة تحركات شي حاجة ولا داز شي واحد حدا الدار ..كندخل نشوف كولشي مزيان مكاين والو
ردت: انا كن جات عليا كن خويتي الدار احسن ماتكري لحتى واحد..باقا معاه صاحبتو تما ؟
قلت: باقا اه من الاول ساكنة معاه
قالت: ايوا ردي بالك وصافي.. تهليتي فماما شوية؟
قلت:كيفاش نتهلا؟ جبت ليا هدايا معايا فاش كنت جايا
قالت:واخا جبتي ليها هدايا شري ليها شي حاجة عطيها فلوس..ماما كتبغي الذهب شري ليها شي سرتلة ولا نبالة
قلت: كيفاش دايرة ؟
قالت:انا غنهضر مع حفصة تويك ..صافي حبيبة تهلاي فماما شحال هادي ماشفتيها ..تهلاي فبابا حتى هوا ..واخا مايبغيكش تعطيه مي نتي عطي لماما صافي
رديت :صافي
قالت:يالاه حبيبة تهلاي فراسك سلمي عليهم
قطعت معاها وجلست تفكرت التاريخ وطليت لقيتو النص دالشهر ..حليت عيني لقيت عقلي قدامي قالي
هااا ..لاتقولي مكنتفكركش وناسيك..نسيتي شنو كاين هاد الشهر؟
قلت ليه علاش فكرتيني؟
طلع ليا الضمير خلعني قالي
واش نتي دايراها قد راسك وكتسولي..قليلة الاداب والترابي انانية ومامخلقاش..حشومة هادشي ماشي من اخلاقك وشيمة ضلمي الناس وتمشي..مالكي وليتي هاكا وليتي خايبة ..الى كنتي نتي مرتاحة واحد اخر راه مامرتاحش ..جرحتيه وطعنتيه فرجولتو وخليتيه فين مايتفكرك يسبك ..قليلة الاصل نتي انهى
تأزمات ليا نفسي وتكمشات قالت ليا انا عيييت رحموني صافي براكة عليا..ديري ليهم خاطرهم خليني نرتاح شوية
طل عليا القلب من وراها قالي توحشت نهضر معاه ..غير شوية وصافي..غير شوويييكيك ..يلاه يالاه تصالحي معاه نتي ضريفة وحنينة
شاف فيه العقل كيضحك قالي شوفي ..هادي هي المناسبة باش تصالحي معاه وتهضري معاه ..راه قالك غيدير سبعة وعشرين ولاستة وعشرين الشهر جاي اللي هوا هاد الشهر نسيتي؟ وحنا فنص الشهر
القلب:عيطي عيطي ليه نسمعو صوتو يالاه دغيا
غبر الضمير وبقات نفسي حتشوف فيا بنص عين وترجاني وانا بيناتهم دخت ماعرفت مندير حتى قالي عقلي
خرجي هاد العشية خودي لماماداك الكادو اللي قالت ليك ختك وخودي ليه كادو زوين مع الشكلاط وعيطي ليه فنمرتو اش بان ليك
نفسي: اهيييه علاش هوا جا عتاذر بلا كادو كاين شي واحد كيعتاذر بلا ميجيب هدية
القلب: بعدي مني ..تفرقي عليا قهرتيني فصحتي منين كطلعي ليا منين
العقل: صافي هنيونا ..غادي نشريو ليه الكادو ونتصالحو معاه
طلع ليا الضمير فجأة قالي نتي سبب هادشي كامل والى ماعتاذرتيش كنضبر معاك ..الانانية لخرى قليلة الترابي
عبر عاوتاني وشفت جهة نفسي لقيتها تخبات وماراضياش لاكن ماقدراتش تهضر خوفا من الضمير يخرج لينا عاوتاني وبقا غير عقلي كيملي عليا ويعطيني فالحلول وقلبي كيدفعني فرحان فاللخر خرجت بنتيجة
صافي غادي نشريو الكادو ونتصالحو مع ناصر بزز من نفسي
تسنيت حفصة على احر من الجمر حتى دخلات ومشيت كنجري عندها قلت ليها نو قالت ليا ختي على الكادو وقالت ليا حتى لغدا ..ماقدرتش نتسنا جريتها ديك الساعة لبست واحد سورفيت رمادية وجاكيط ودودون وسبرديلتي ودرت كاسكيط على راسي وهزيت صاكي وتيليفوني وسوارتي ونزلت كنجري لباركينغ ركبت وزدت مشينا لواحد القيصارية ديال الذهب وراتني داكشي ديال العيالات حت مكنقشع فيه والو خديت واحد السرتلة فيها طناش ديال العيالات غليضة قالي الذهاييي هادو احسن مكاين فالسرتلات وخديت ليها واحد الكورنيط ديال العنق حتى هي ديال العيالات غليضة ومشينا لجهة الجلالب درجال خدينا لبابا وحدة رمادية بالسروال ديالها فالابيض والبلغة حيت كيعجبو البلدي وكيلبس اغلبية الجلالب والبلاغي ورجعنا للطموبيل حطيت داكشي وقلت ليها ديني لشي مول نشري شي كادو ..سولاتني لمن قلت ليها لناصر .
قالت لي واش. مزال كتهضري معاه قلت ليها غنتصالحو
بقات كتشوف فيا وضحك وقالت ليا ديري اللي عجبك
مشينا جا فبالي غير شي بارفان واخا ماعرفتش دوقو فالروايح مي قلت بارفان احسن..خديت وحدة ديال لاكوست عجباتني ورشيت منها حيت كيعجبوني روايح الرجال اكثر ..خديت لحفصة وحدة حتى هي عجباتها اما انا جيت نشوف لقيت كاع الروايح اللي فداك المول عندي وخرجت بحالي بحالي مشيت لبلاصة الشكلاط خديت واحد لبواطة زرقا ديال الشكلاط لقيتو وعرفتو زوين حيت عندنا ديك الماركة فسويسرا معروفة ..قادوها ليا بواحد السينتة دوغي وخرجت من تما كنت محتاجة نشرب شي قهيوة ولا شي حاجة ودزنا خديت واحد ستارز كافي باردة وجلسنا على الطبلة .ناضت قالت لي نمشي طواليط واستغليت غيابها باش نهضر مرتاحة وجبدت تيليفون بغيت نصرني لناصر حسيت بقلبي غيوقف ولساني تقال وفشلت وصبعي اللي غيصوني كيترعد. ترددت خوفا من ديك كمية الاحاسيس اللي كنحس بيها لاكن صونيت واخا بديت كنحس براسي كنعرق وخايفة مايجاوبنيش ولا يقمعني تما غتجيني شي كريز كاردياك .
كنسمع تيليفون كيصوني وكنقول موحال غيجاوبني لاكن جاوبني وضحك بلا منشعر قالي
الو
قلت ليه :ناصر صافا ؟؟ انا نهى
قالي :صافا ختي الحمد لله نتي صافا
قلت ليه صافا .فرحت فاش جاوبتيني هه
جاوبني بشوية قالي:علاش ؟ واش بغيتي شي حاجة؟
قلت ليه :اه بغيت نتلاقا بيك
قالي:علاش ؟ كاين شي مشكل؟
قلت ليه:لا بغيت نعطيك شي حاجة
قالي:شي حاجة؟. شنو هي هاد الحاجة ؟
قلت ليه:واحد الحاجة زوينة ديالك
بقا ساكت وقالي علاش بغيتي تعطيني هاد الحاجة؟ مافهمتش؟
قلت ليه فاش نتلاقاو نقوليك ..واش كاين فمراكش نتلاقاو دابا؟
قالي:لا انا فكازا
قلت ليه :صافي نجي عندك
قالي مستغرب:واش ضاروري ؟ شنو هاد الحاجة ؟
قلت ليه خاصني نعطيها ليك فيدك
قالي :الى مكانتش شي حاجة ضارورية خلي حتى لغدا غندوز على مراكش فطريقي
قلت ليه صافي غدا فاش تجي صوني عليا ..غادي نتسناك
قالي: اوك ان شاء الله
ضحكت قلت ليه بسلامة
قطعت
تحمست بديت كنحسب الوقت من ديك الساعة ورجعت للدار عند ماما لقيتها جالسة كتفرج فواحد المسلسل وعطيتها داكشي ..حلاتو وتصدمات قالت لي ذهب هادشي؟!!!
قلت ليها اه شريناه من عند الذهايبي
بقات كتشوف فيه وتشوف فيا وناضت عندي عنقاتني كترضي عليا وحفصة كضك قالت ليها الله يعطينا مناش نعطيو حتى حنا وناخدو الرضى
قلت ليها غنديك معايا لسويسرا فاش تسالي القرايا
بدات كضحك قالت لي انا اصلا طامعة فيك تديني غير صبري نسالي مع هاد الماستر مزال مجرجرني
مشيت للبيت كنضك هليت ماما متقيس وتردد ..طبااارك الله ..اودي لهلا يخطي علينا بنات
مشيت حطيت داكشي وبدلت حوايجي ورجعت لقيت بابا لابس ديك الجلابة والبلغة وواقف كيقيسها ويضحك قالي بصوتو القوي المراكشي
ايواا الله يعطيك الخير… الله يرضي عليك ابنتي
قلت ليه واش جات قدك؟
قالي هي هااااديك الله يغطي بالرضى…ايوا هانتا ايوا شتي..هادو هما البنات ولا حيد بالاك
قالت ليه حفصة ناقصاك غير شي ساعة
قاليها :ايييه … جااابت ليا الساعة من سوسيرا من داكشي الرفيع ..هااهي
جقد يدو وراها الساعة اللي جبت ليه قاليها مكاينش اللي شافها وماسولنيش
قلت ليه بالصحة حنا عندنا السوايح زوينين تما
قالي. الله يكثر خيرك ويخلف عليك
ماحسابش ليا غيفرحو كن راني كل مرة نشري ليهم حاجة ..تعشيت ومشيت نعست والصباح بديت كنحسب الوقت ونتسنا ناصر يصوني ليا ..حتى وصلات الستة دلعشية وبغيت نفكر قلت عنداك يكون نسا لاكن صونا ليا وانا فواحد الصالون جالسة كنعاود الدفار بالجيل .
رديت عليه بزربة قلت ليه
الو ناصر
قالي الو ..نهى
قلت ليه وصلتي؟
قالي نص ساعة وندخل لمراكش..مي مايصلاحش ليا ندخل للمدينة بالرموك
قلت ليه لالا صافي غير خليك فالدخلة غادي نجي عندك انا قالي اوك ماتعطليش مزال تابعاني الطريق لموريطانية
قلت ليه صافي غادي نجي دابا
قطعت وبديت كنحس بستريس قلت لديك اللي كتصاوب تزرب وعندي الزهر بقات ليا غير يد وخدة
سالات ليا وشفت دفاري الصراحة ماقنعونيش بزاف قلت ليها
عندنا فسويسرا كيصاوبوهم ليا حسن من هاكا ..مزال خاصك تعلمي
تصدمات فيا قالت ليا بلعكس جاوك زوينين نتي اللي بغيتي هاد الموديل
قلت ليها اه ولاكن كيصاوبوهم ليا حسن من هاكا ..غنرجع نبدلهم ولاكن ماشي دابا حتى لغدا وعاودي ليا كيف ما اللي فالصورة
بقات كتحلف وتقولي زوينين ولاكن انا مارتاحيتش ماشي هاكاك ولفتهم جاوني ناقصين شي حاجة ماعرفتش شنو هي
قالت ليا كيبانو زوينين هانتي شوفي
قلت ليها انا ماكيبانوش ليا زوينين كاع مارتاحيت ..بلاتي شوية
صونيت على ناصر عاوتاني قلت ليه واش وصلتي؟
قالي قريب
قلت ليه واش كاتقدرش تسنا شوية حيت دابا انا فالصالون
قالي :لالا صافي خلي حتى نكون راجع
قلت ليه لالا صافي هانا غنجي
قطعت وتنهدت قلت ليها كنت باغا نعاودهم دابا ماعندي كي ندير
بقات كتشوف فيا مالقات ماتقول وقالت ليا اللي بغيتي..الى مابغيتيش نبقا نصاوبهم ليك ماشي مشكل
قلت ليها لا غير اللون جاني مامنساجمش مع الابيض
قالت لي ندير ليك بيناتهم الحجر
قلت ليها لا حتى نرجع انا دابا مزروبة
نضت بالزربة خلصت داكشي اللي صاوبت ومشيت طلعت فطموبيل كنجري رجعت للدار لقيت السكات والقنط ..ماما ناعسة متكية وبابا مكاينش وحفصة كتحفض ..مشيت دغيا لبست سروال كحل كينز وتريكو كحل وجمعت شعري كوب شوفال وخرجت جوج زغبات لقدام ودرت جاكيط دودون قصيرة غوز وسبرديلة بيضا وهزيت داكشي خرجت كنجري حتى ناضت ماما طلات عليا قالت لي بسم الله عليك فين غادية
قلت ليها غنمشي نتلاقا واحد الولد وخرجت كنجري طلعت فالطموبيل ومشيت بالزربة تعرضت ليه حدا ماكدو ووقفت الطموبيل فالباركينغ ونزلت كنقلب بعيني بان ليا واحد الرموك كبير ابيض كيخلع على الشارع وقطعت الشانطي كنجري هازة الصاك طليت عليه من لتحت كان جالس كيشوف فايليفون ..دقيت عليه وضار عندي حل الباب كان لابس سرال سورفيت كحل واسع عليه وتريكو خفيف عنقو مدور ومشمر على يديه وسيرديلة كحلة .بقا كيشوف فيا باستغراب وانا كنضحك فرحت وعنقتو قلت ليه هابي بيرداي
بعد راسو كيشوف فيا مصدوم ومستغرب وعطيتو الصاك قلت ليه هادا الكادو ديال لانيف ديالك
شدو كيشوف فيه ويشوف فيا وبدا كتمتم ومسحو جبهتو قالي
ماااا..مم ..ماعرفتش شغنقول ليك
طليت على الرموك من لداخل قلت ليه فين غادي
قالي موريطانية
قلت ليه نمشي معاك ..يالاه
ضربتو لكتفو وضرت كنجري للجهة لاخرى دقيت عليه قلت ليه حل ليا نطلع
حل ليا الباب ساكت طلعت واول مرة نركب فشي رموك ولا شاحنة قد هادي ..تفاجأت بحال الى راكبة فشي مركبة ..الكرسي ديالو كبير وعندو بزاف ديال الاحهزة قدامو والمقود كبير وعندو سرير تابت مور كرسي السياقة ..جلست فالكرسي اللي حداه كنشوف وكنطل من لفوق للارض حتى ركب فالكرسي ديالو وسد الباب قالي واش متأكدة ؟؟
قلت ليه مناش؟
قالي متأكدة باغا تمشي معايا ؟ عرفتي موريطانية فين جات؟
قلت ليه وي بيان سيغ ..غير خليني نمشي معاك بغيت نسافر
قالي :فكري مزيان راه موريطانية هادي
قلت ليه اه اه باغا نسافر ..ولاكن بلاتي ..نزل شري لينا شي حاجة ندوزو بيها الطريق
دار يدو على لحيتو قالي شنو هي هاد الحاجة ؟
قلت ليه شي حاجة ناكلوها ..
فتح الباب كيتنهد قالي شنو نجيب ليك؟
قلت ليه حيب ليا دانيت ..جيبس دوك الكبار ..ااه جيب ديال شومبينريو ..وحدة دوليتوس ..ولوز وكاوكاو
قالي :بقاي هنا ماتنزليش وتخلي الرموك بوحدو
حرك ليه راسي ومشا جوج خطوات ورجع قالي يالاه تمشي معايا غنسد البيبان
نزلت وسد البيبان بجوج ومشيت معاه داني عند واحد كيبيع كاع داك التخربيق عمرت واحد الصاك وزدت عليهم واحد جوج برينكلز وبواطة درفاييلو وكحزت اللور مشا خلص داكشي وشار ليا براسو قالي يالاه
مشيت معاه جهة الرموك وقالي عاوتاني
واش متأكدة ؟!! عنداك ديري لينا شي مشكل
قلت ليه متأكدة واش كنرضع يدي
حرك ليا راسو قالي وا المهم يالاه زيدي
حل ليا الباب طلع وزدحها سدها وطلع حدايا سد الباب وشمر على يديه بجوج وقال
بسم الله
ديمارا الرموك وخلعني صوتو قلت ليه ناري اول مرة نركب فالرموك
قالي ديري السمطة
قلت ليه مغتيقلبش ؟؟
قالي الله يستر ..غير ديري السمطة
جريتها بغيت نديرها قنطاتني وحيدتها حطيتها اللور وبقيت بالبودي ودرت السمطة كنسوط
شاف فيا قاليا
صبري ختى نشدو الطريق وحيديها
قلت ليه اوك ..الصهد
هبط ليا الزاج تنفست وسمعت تيليفوني كيصوني وهزيتو لقيت ماما
ماما:الوو..فين مشيتي؟
رديت:غنسافر مع واحد الدري ونجي
ماما:ويل الشيطان ..شكون هاد دري
رديت : واحد الدري ضرييف ندوزو ليك ؟
ماما: اوييلي ..هاكي باك هاكي هضري معاه
رديت:الو بابا
بابا: فينك معامن مشيتي تلاقاي؟
رديت: مع واحد الدري
بابا:وفين كتعرفيه؟
رديت:فالكروب !! علاش؟
بابا: فينك دابا فين غادية؟
رديت: غنمشي لموريطانية ونجي
بابا: اري ليا هاد الولد هادا نهضر معاه
عطيت تيليفون لناصر قلت ليه هاك بابا بغا يهضر معاك
شاف فيا وشاف فالطريق قالي: باباك!!!
قلت ليه اه
شد تيليفون كيرمش قاليه : الو السلام عليكم عمي… غندي واحد السلعة لموريطانية ونرجع .. واش نردها ؟ ..باقي ما خرجنا الطريق
حيدت ليه تيليفون من ودنو ونضت وقفت
الو بابا..
بابا: رجعي ابنتي الله يرضي عليك..وا هادا راه لعب دراري
رديت: لا انا بغيت نمشي ..القنط عندكم فالدار ماما ناعسة وحفصة كتقرا ..قنطت
بابا: ايوا قنطتي بغيتي تمشي حتاا لموريطانية
رديت: وشنو فيا غنمشيو ونرجعو ..غاديين فرحلة
بابا: الله يهديك..رجعي بحالك..هادشي مكيديروهش البنات الله يرضي عليك
رديت: لالا صافي انا غنبقا مابغيتش نرجع ..انا مرتاحة هاكا
تنهد بقا كيحاول يقنع فيا فاللخر قالي دوزي ليا داك الولد
درت المكبر دالصوت باش نسمع وقلت ليه هاهوا
بابا: الله يرضي عليك اولدي لما شو كي دير ردها ..راه مكتعرفش اش كدير غادي طيح فشي زوبية
قلت ليه :لالامغطيح فحتى زاوية صافي كون مرتاح
ناصر: باك عندو الحق ..
قاطعتو وصافي غادي عاوتاني نتخنق الى رجعت صافي انا درت فراسي غنسافر صافي اباباعفاك
بابا:واسمع اولدي اش سماك الله
ناصر:نصر الدين اعمي
بابا:والله يرضي عليك ديرها بحال ختك ..راه نية فايتة القياس ديرها بخال ختك عنداك طرا ليها شي حاجة ..
ناصر: كوني هاني اعمي ماعندك مناش تخاف
بابا: ايوا الله يهديها ..هاد ولاد الخاريج هاكا دايرين ..الله يهدي ماخلق.
ناصر: ماتخاف من والو راه الطريق مولفين نضربوها ديما
بابا: ايوا ردك بالك ..ملي مابغاتشاي ترجع صافي خليها ..غير رد ليها البال
ناصر:هانا غنسيفط ليك الشركة اللي خدام معاها والسمية والكنية باش يبقا بالك هاني..نصور ليك تا لاكارط تا هي
بابا: اييه ..يالاه اولدي الله يعاون
قطع وتلفت ناصر قالي هزي لاكارط صوريها لياك راها لهيه محطوطة هي وواحد الورقة دلونطرا فيها السمية دالشركة والاسم الكامل
شديت ديك الورقة صورتها ليه هي ولاكارط سيفطتهم ليه وقالي ناصر
حطيهم هنا لفوق راه كاين جوندارم فطريق غيطلبوهم
حركت ليه راسي وجمعتهم ورجعت جلست فرحانة كنشوف الضلام كيطيح وحنا شادين لوتوروت ..
تلفت بابتسامة كيشوف فيا قالي
عقل تلت سنين فلوكوغ ديال ربعة وعشرين عام
ضرت شفت فيه قلت ليه شنو؟
هز يدو شاف قدامو قالي والو
قلت ليه فوقاش لانيف ديالك واش داز ولا باقي؟
قالي داز السيمانة اللي فاتت
حركت ليه راسي قلت ليه فين دوزتيه ؟
قالي :دوزتو فاحسن بلاصة ..داز واعر
ضحكت معاه ضحكة صفرا قلت ليه علاش ماعرضتيش عليا؟
قالي ماحسابنيش غتبغي ضربي الطريق اما كن عرضت عليك
استغربت قلت ليه اشمن طريق؟
قالي الطريق بحال هادي
بقيت كنشوف فيه عاقدة حجابني مافهمتش شنو كيقصد ..ضار عندي شاف فيا وشاف فاطريق ويدا كيضحك قالي دوزتو فالطريق..غير كنضحك معاك ..بقاي غير لانيف هاد الساعة
بقيت كنشوف فيه وهزيت رجلي عييت خطيتهم قدامي وحيدت سبرديلتي بقيت بتقاشر وطلقت رجلي قدام البار بريز وهزيت واحد شيبس حليتها و تكيت كنشوف الطريق غير لخلا والضلام حتى حاجة مكتبان ..خفض السرعة وتجنب وقالي
هانا جاي
نضت كمشت ديك شيبس فيدي تخلعت وقلت ليه
فين غادي؟!!
بقا كيرمش ويتمتم قالي: غننن..نن غير غير دقيقة ونجي
قلت ليه غنبهط معاك ..منبقاش بوحدي تخرج ليا شي حاجة من اللور
بقا كيضحك قالي شنو غيخرج ليك؟!
قلت ليه منعرف المهم نهبط معاك
بقا كيشوف فيا قالي هانا حدا الرموك ماعندي فين نمشي
قلت ليه لا غير خليني نهبط
حل الباب قالي ماعندك فين تهبطث تسناي
زدح الباب نزل وبقيت انا كنشوف فجنابي وفالزاج غير الضلام ..حل الباب طلع دايا فيدو قرعة دالماء حطها فالجنب وهز فوطة مسح يديه وقالي
خرجات ليك دابا شي حاجة ؟
قلت ليه علاش هبطتي
بقا ساكت كيشوف قدامو ويضحك وزاد شد الطريق ورجعت تكيت على الكرسي جاني العطش يقوة الملوحة ديال شيبس..هز قرعة دالماء كانت بيني وبينو كيشرب منها عطا ها ليا هبطت عليها كلها شربتها بكثرة العطش حتى سخفت ..تلفت عندي قالي هانيا واخا نشعل كارو؟
قلت ليه اه ماعنديش مشكل
هز واحد دارو فمو وهبط الداج حداه حط يدو على برا وقالي
مكتكميش؟
قلت ليه لا
قالي كتشربي؟
قلت ليه بعد المرات
حرك ليا راسو قالي كتشربي لا بييغ؟
قلت ليه اه
جبد ليا وحدة صغيرة حداه قالي هاكي
حليتها وتكيت كنلعب فتيليفون ونشرب حتى حسيت بيها تقلات ليا راسي.مع الطريق دوخاتني وزيراتني حطيتها قلت ليه فيا بيبي
خفض السرعة قالي تهبطي ؟
قلت ليه اه تزييرت
وقف ليا قدام واحد الحدورة فالجنب ونزلت ونزل ونزل بقا واقف بعيد ..كانت واحد الهبطة فالجنب فيها الشجر مشيت دايخة حدا واحد الشجرة درت بيبي ومسحت بكلينيكس ونضت طلحت سليب وبغيت نطلع السروال لاكن دخت وجيت نطيح وشديت فالاغصان اللي فوق راسي باش منطيحش وبقيت كنتمايل والاغصان كيمليو بيا وبديت كنغوت ونعيط ليه حا كيجري عندي لقاني معلقة بين الشجرة والارض وماقدراش نشد راسي
جرني بواحد اليد كيضحك وانا كنقوليه غنطيح الهبطة كتجرني
قالي مكيجرك والو
طلع ليا سروالي دغيا وهزني للشانطي بغا يوقفني يخيد ليا لعواد اللي لاسقين فيا لاكن مشيت وجيت بلاصتي وطحت حدا الرويضة ماجا فين يشدني حتى لقيت راسي فالارض وتعكل فيا كان زطم فيا كن ماتحكم فراسو
هوا كيضحك وينفض ليا وانا شادة البولة عاوتاني قلت ليه ناري فيا بيبي
وقفني قالي
ياك عاد درتيها
قلت ليه عاوتاني جاتني
شد فيا قالي بولي غير هنا ماتهبطيش لتحت
قلت ليه شد فيا غنطيح
شد ليا فجنابي قالي
هانا شاد فيك
هبطت سروالي عاوتاني والسليب وجلست حداه بلت وجيت نوض رجعت باللور وسروالي حدا ركابيا كنت غنجلس وشدني نوضني كيضحك قالي شداك لشي بيرة كن حساب ليا غتشروطك كاع منعطيها ليك
شديت فيه جاتني الهستيرية ديال الضحك قلت ليه نااري بيبي
قالي
عاوتاني!!
قلت ليه شنو ندير
قالي طلعي غنعطيك قرعة ديري فيها
طلعني وشد واحد الموس قسم واحد القرعة وقالي رجعي اللور وبولي تما على خاطرك
شديتها بغيت نبول ومشات ليا البولة درت بناقص ورجعت جلست فالكرسي تكيت حداه كنشوف فيه وهوا سايق .. شحال زوين ونقي
قلت ليه يديك زوينين
شاف قدامو كيضحك قالي :يااك
قلت ليه انشوف سنانك
ضار عندي كيضحك شفت سنانو نقيين وبيضين. وقلت ليه
سنانك حتى هما زوينين
دور وجهه قدامو قالي طلعات ليك علياا ؟
تنهدت مديت يدي لعندو قلت ليه عطيني يدك
مد ليا يدو شديت فيها كنلعب ليه فصبعانو وقلت ليه
عمرك بغيتي شي بنت ؟
قالي :لا
قل ليه بصح؟ عمرك بغيتي شي بنت. فحياتك؟
حرك ليا راسو بالايجاب قالي :علاض غنكدب عليك؟ عمرني بغيت شي بنت بصح..ونتي؟
تنهدت تفكرت ادوارد وبقيت ساكتة كنشوف قدامي مطولا وقلت ليه
انا عمرني نسا ادوارد
تلفت شاف فيا ورجع شاف قدامو ساكت ..شفت الصورة ديال ادوارد قدام عيني وتنهدت قلت ليه ..بغيت غير ادوارد بوحدو..ومقدرتش ننساه ..
حيد يدو على يدي شد فالفولون وحطيت يدي على عنقي تنفست قلت ليه
انا وادوارد عشنا قصة حب زوينة بزاف.. اففف تخنقت كنحس بقلبي كيضرني فاش كنبدا نهضر عليه..كنتحسر وكنموت فاش كنتفكرو..
تنهدت مسحت واحد الدمعة وقالي بلا ميشوف فيا
وفين مشا ادوارد فين قصة الحب ديالكم
شفت فيه قلت ليه مات مسكين
هز وتحد الحاجب وحطو وبقا ساكت وقالي
الله يرحمو
تبسمت مديت ليه يدي قلت ليه عطيني يدك
دار يدو على حاجبو قالي شنو بغيتي ديري بيدي
كحزت عندو قلت ليه بغيت نشدها
مدها ليا شديتها وبقيت ساهية كنشوف فيه قلت ليه كيفاش عمرك بغيتي شي وحدة فحياتك؟
قالي : ماتلاقيتش مع شي وحدة نقدر نبغيها ..عادي ماشي شي حاجة
تفكرو الكادو وقلت ليه
كاع ماشفتي الكادو اللي جبت ليك
تلفت كيشوف فين حطو وضرت لقيتو محطوط مورانا وهزيتو قدامي جبدت ديك الريحة وريتها ليه ..ضار شاف فيا قالي
اااه ..لاكوسط..
حليتها ونضت عندو رشيتها ليه قلت ليه كي جاتك
قالي زوينة ميغسي
كنت غنطيح بالدوخة وجيت نشد فالكرسي مالحقتوش وطحت جيت جالسة وضربت الريحة مع واحد القنت فيه حديدة كنت باغا نكالي عليه وتهرسات كلها تزلعات وعطات الريحة كتقلب فوسط الرموك .. رجعت نضت لقيتو كيشوف موراه ويشوف قدامو قالي عنداك تجي على راسك
وقفت مد ليا يدو شد فيا وقلت ليه
ويلي ويلييي تهرسات الريحة !!
قالي :ماكنابتش
سديت نيفي قلت ليه كتخنق..تروعت بغيت نرد
هبط الزاج وعطاني ميكك قالي تقياي فهادي..جلسي بعدا ديري السمطة عندخلو لفيراجات
جلست ودرت السمطة وبديت كنتمايل حيت بالتقية طالعة وشديت ديك الميكة تقييت فيها كاع ديك شيبس اللي كليت والبيرة اللي شربت وجمعتها والسخفة فيا ..
شفتو طفا الضو لداخل وقالي رجعي اللور وهبطي تحت داك البياص مافينا مانعصرو مع الجوندارم
قلت ليه وهادي
طول يدو شد الميكة لاحها من الشرجم
ونقص السرعة رجعت اللور دخلت تحت داك السرير ولاح ليا الجاكيط والصاك قالي دخليهم معاك
لاح ليا سبرديلة حتى هي وهبطت سديت عليا سكت وكنحس بالرموك كيتمايل بيا حتى نعست
حسيت بالضيق وعضامي عواجو وبغيت ندور ماقدرتش..حليت عيني وهزيت راسي سمعت اجراس الكنيسة وسط مخي بواحد الدقة كليتها مع واحد الحديدة ورجعت هبطت راسي وخرجت من ديك القنيتة كنحبو ونحل عيني لقيت الرموك مزال غادي والضو والشمس ضارب فقلب الرموك والموت دالصهد..لقيت نصر معري لابس واحد سو فيطمو كحلة بالسماطي من اللور بحال xومتكي لايح يدو على السرجم وغادي كيشوف قدامو داير النضاضر
تلفت شافيا وضحك قالي فقتي
سرحت عييني قلت ليه فين حنا ؟
لقيت غير الصحرا والخلاء والحرارة كترعد على برا ..
قالي حنى فالحدود ..باقي لينا خمسة دالسوايع وندخلو لموريتانيا
جلست حداه كنشوف فيه قلت ليه الصهد..تخنقت
هزيت داك التريكو حيدتو بقيت بواحد ديباردور كحل رقيق وتنفست كنسوط على راسي ونستوعب .حليت شعري وعاودت جمعتو لفوق كو تشوفال
وبديت كنتفكر فعايلي وحدة مور وحدة وشديت حناكي سديت عيني
الضمير: تشوهتي يا البهلة …هاهوا غياهد عليك نضرة خايبة ..شداك لشي بيرة واش نتي مولفة كتشربي البيرة؟ هااا؟ حدك حد العصير مخلط بشوية دلالكوا اش داك لشي كانيطة يا المعفونة يا البوالة ..فين النقى فين البريستيج فين الترابي يا قليلة الترابي
نفسي: حسبي الله ونعم الوكيل فيك ها اللي يدير فراسو الضحك ..ها اللي يبهدل براسو..ها اللي يشري المادو ويهرسو
بقات كتنفخ كتنفخ حتى تفركعات وبديت كنبكي تمنيت كن تشق الارض وتبلعني..سمعتو قالي
نهى ؟؟ مالكي؟
ضرت عندو قلت ليه سمح ليا على داكشي اللي وقع ..ماشي كاع لخاطري…سمح ليا هرست ليك البارفان
ضحك وشاف فيا قالي عادي ماشي مشكل..
سكت ربعت يدي وقلت ليه :ماعندكش شي قرعة نغسل وجي
وقف فالجنب عطاني قرعة دالماء ونزلت وسط ديك الصحرا لبست سبرديلتي غسلت وجههي وشللت فمي مزيان ورجعت طلعت حيدت سيرديلتي من الصهد وحتى هوا كان جالس بتقاشر وكيسوق.. عطاني كيلنيكس مسحت وجهي وقالي
خودي شندويتش ديالك فطري
شفتو قدامي وحداه قرعة ديال العصير صغيرة وهزيتو لقيت فيه البيض والفرماج والكاشير ..قلت ليه منين جبتيه؟
قالي خديتو من سطاسيون فالطريق..
قلت ليه ونتا؟
قالي: انا فطرت .غير فطري بالصحة
هزيت رجلي طويتهم وجلست على الكرسي شديتو فيدي كنفطر وشديت تيليفون لقيت حفصة مسيفطة ليا مساجات كتسول عليا وبديت كنكتب ليها .. بغيت نصورو ليها تشوفو وميلت تيليفون باش ميحسش بيا ساعة جيت نبرك ضرب فيه الفلاش قدو قداش وتلفت عندي
هيييه!!! ويلي ويلي ويلي
درقت وجهي وعطيتو بكتفي حسيت بالصهدة طلعات معايا واخا مقال والو ورجع شاف قدامو ..وحل ليا البيض فحلقي ماقدرتش نسرطو وبقات اللقمة فمي وكتب لحفصة
جيت نصورو ليك تشوفيه ضرب الفلاش تفوو.
حفصة:ناري كطيريني هههه راه ميمكنش
رديت: عاق بيا
حفصة: وراه باينة اويلي على عاق بيا..صافي قلبيها ضحك قولي ليه بغيت نصور راسي ..ولا ماتقوليش ليه كاع صافي ..ديري ليا كام نشوف الطريق
حليت ليها كام وريتها الطريق وقطعت ليها الصوت باش متهضرش وبديت كنوريها البلايص وبدات كدير ليا اشارة نوريها ناصر وقلبت تيليفون بشوية جيهتو وريتو ليها وهوا سايق ورجعت بعدت تيليفون وقطعت عليها باش نكتب ساعا سبقاتني وكتبات ليا
بوكوص اختي..والله حتى بوكوص
كتبت ليها:قلتي ليا عادي
ردت: لا اختي والله حتى بيكيص ماكيضربش على الشعا ..هادي هي تبوكيصة دبصح هي اللي كل ما قربتي منها كتزيد تعطي وتبان ماشي اللي ضارب على الشعا تهضري معاه جوج كلمات يبداو العيوب يبانو وتهربي منو
قلت ليها :انا كيعجبني ناصر اصلا كما بغا يكون
حفصة: ايوا ختي راه بوكوص .. حتى الزين والفورمة كيلعبو دور ماشي غير الضرافات
رديت: انا كتهمني شخصيتو ..عجباتني اكثر
ردت: سمحي ليا ..الى كانت لشخصية والفورمة خايبة والوجه مسندر كي غتبان هاد الشخصية!! كتبان من برا اولا عاد اجي نشوفو لداخل
خليتها كتكتب وحطيت تيليفون وكملت داك السندويتش ديالي فصمت حتى هز كارو وقالي
انا غنشعل صافي
حركت ليه راسي قلت ليه خود راحتك
شعلو وخرج يدو من السرجم كيكمي حتى بدا تيليفونو كيصوني
قشعت السمية من هنا مكتوبة هدى وهز تيليفون رد
ناصر:الوو..صافا الحمد ..نتي صافا؟..لا مزال …يالاه حتى نوصل ونعيط ليك ..بسلامة
قطع وبقيت كنشوف فيه قلت ليه
هدى؟
حرك ليا راسو بالايجاب وقلت ليه
شنو طبيعة العلاقة اللي بيناتكم ؟
بقا ساكت مطولا وقالي ..سولتيني فافران قلتي ليا شنو بينك وبينها ..قلت ليك مازال ماواضحة حتى حاجة
قلت ليه: ودابا وضاحت الصورة؟
بقا ساكت وقالي: عاد دخلنا فعلاقة ..ماشي بزاف
حسيت بقلبي تشوط ولاكن نفسي تصدات وقفات ليا فنيفي هاد المرة وتبسمت قلت ليه
مزيان.. هدى باينة عليها ضريفة
حرك ليا راسو بالايجاب وبقا ساكت ..تفكرت ديك الصاك ديال شيبس وضرت عندو هزيتو جيد وحدة كنقب منها وكنشوف فطريق وكنتساؤل
عقلي:اصلا مابينك وبينو والو علاش غتقلقي..فين كاين المشكل..حسبيه صديق وصافي
نفسي: مابقيتش غنتنازل هاد المرة ..مكاين لا بوي فراند لا والو صافي قالك دار علاقة مع هدى ..صافي دوزي معاه العطلة وصافي ..ملي نتي مرتاحة معاه خليك صديقة وصافي نتي اصلا مزال مانسيتي ادوارد ومكاينش بحاا ادوارد
قلبي: انا في حداد ..
تنهدت وضرت عندو شفت فيه لقيتو كيشوف فيا مستغرب قالي
معامن كتهضري؟
شفت فيدي اللي فيها شيبس واقفة قدامي وقلت ليه
همم؟؟
قالي: كتهضري بوحدك؟
تبسمت قلت ليه ااه هه..غير مع راسي وصافي
قالي: وا حوار عندك مع راسك؟
قلت ليه علاش شنو قلت؟
قالي:شوفي نتي شنو كنتي كتقولي
بدا كيضحك ورجعت شفت قدامي مافهمتش واش هضرت بلساني ولا شنو ؟!!
اويييلي عنداك نكون قلت داكشي اللي كنت كنفكر فيه!! هيييه!! عنداك يكون سمعني
سكت ماجاوبتوش حيت حسيت براسي باقا تحت تأثير الكلام اللي قال بخصوص هدى لاكن نفسي واقفة ليا فنيفي باش منسول منهضر حتى ضرني نيفي.جبدت واحد القصة من كوكل نقراها باش نسا ومتهضرش وبديت كنقرا ماحسابليش غادي نتخشع فالاحداث وتشدني القصة ليها بديك الطريقة ..بديت كنقرا وكنضحك من قلبي وهوا كل مرة كيسولني علاش كنضحك كنقوليه كنقرا قصة .. بقيت كنقرا وناكل ماحسيتش بالوقت حتى قالي
رجعي تخباي فديك البليصة..وخبي حوايجك باش بلا ميعصرو علينا فالحدود
قلت ليه واخا
ونضت تخبيت وخبيت كلشي معايا وسكت ..سمعتو قالي
سكتي تيليفون حتى هوا
سكت تيليفون وبقيت كنتسنط حتى سمعت الرموك وقف وسمعتو كيهضر معاهم ..سمعت الحلان والسدان اللور وشوية تحرك الرموك زاد وسمعتو قالي
صافي خرجي فتنا الحدود
خرجت عوجة لقيت الدخلة ديال المدينة والنخل والريات ديال موريتانيا مستفين
جلست حداه قلت ليه واش صافي وصلنا ؟
قالي وصلنا هانتي فموريتانيا على سلامتك
سرحت عيني كانت كلها صحرا وانا اول مرة فحياتي نشوف الصحرا ونشوف النخل والجو اللي بحال هاكا مباشرة ..فرحت عجبني الحال وبقيت كنطل من السرجم وشعري كيمشي ويجي على وجهي ..واخا الجو مزموت حسيت بالرملة فمي ولاكن دافي وزوين ومنضر الصحرا شيءء رائع
شفت عيالات لابسين الملاحف وجههم مكيبانش وغلاض غلدين مع جنب الطريق وشفت الرجال حتى هما لابسين قشابات واشعين ..بقيت كنصور المناضر بتيليفوني حتى شفت الرموك وقف جنب الطريق قدام واحد الباحة فيها الدخاخن والشوا والماكلة بحال شي سوق ..تلفت عند ناصر لقيتو كيجبد تيشورط من واحد الشكارة كحلة لبسها وقالي
لبسي حوايجك باش نهبطو
شفت فراسي قلت ليه الصهد ..نخرج هاكا
شاف فيا وهبط عينيه لصدري كانت الشقة كلها كتبان والديباردور نصو مشبة فوق السوتيان فالكحل وقالي
لا ..ماشفتيش العيالات عندهم كي دايرين ..ماكيبانوش..ونتي تهبطي هاكا يبقا ينادم مايسواش يتفرج فيك
هزيت كتفي قلت ليه وانا نموت بالصهد
حيد ديك تيشورط اللي لبس عطاها ليا قالي هاكي ..لبسي هادي
شديتها حسيت بواحد الفرحة ولبستها كنشم فيها ريحة زوينة وباقا جديدة ..اما هوا دار على كتافو داك تريكو وعقدو من القدام ونزل علق على جنب جيبو واحد المجموعة كبيرة دالسوارت وهز قرعة دالماء غسل وجهه ويديه وخواها على راسو نفضو ومسحو بالفوطة وقالي يالاه
هزيت صاكي معايا فيه تيليفوني وقلت ليه
فين غنمشيو
جا حدايا شد ليا فيدي حتى ضحكت وقالي
متغدايش؟
قلت ليه :الصراحة فيا الجوع
قالي:وايالاه
دخلني شاد ليا فيدي قدام الناس وحتى السياح كانو تما جالسين وجر ليا الكرسي جلست قدام واحد الطبلة مبنية بالزليج وجلس قدامي قالي
كتاكلي الروز ؟
قلت ليه اه كناكلو
قال لواحد الراجل صمر يعطينا وجبة بواحد السمية ماعرفتش كي دايرة حتى حطو ها ليا دايرة بحال كسكسو ديالنا ومسقية وفيها الخضرة والدنجال واللحم ..دقتها بالملعقة اما كولشي اللي طالبها كياكلها بيدو الا انا وناصر ..ميمكنش شحال بنينة وشحال زوينة
كليتها كلها حتى ساليت عاد قالي ناصر
عجباتك؟ تزيدي شي وحدة؟
قلت ليه لا براكة شكرا
ناض خلصها ليهم بفلوسهم ورجعنا شرا ليا قرعة دالماء وطلع هوا هز شيتة دسنان ديالو نزل حك سنانو وبقيت انا كندور عيني جريت واحد الخيط من البودي ديالي بديت كنحيد بيه اللحم الل بقا لاسق ليا فسناني وكملنا الطريق كيوريني الاسماء ويشرح ليا حتى وصلنا لنواكشوط .. دخلنا لواحد السوق كبير كان عامر شاحنات وحيد داك التريكو هبط عندهم وهبط واحد الدفتر فيدو وانا كنشوف فيه من اللور واقف متكي على الرموك ويدو على جنبو كيتسنا السلعة تنزل وانا حاضياه مكنشوف كيفاش كيتعامل مع الناس.. قويصح مع راسو كيهضر بتخراج العينين ..جبد واحد الكاشي طبع على واحد لورقة عطاها ليهم وشد واحد الكمشة دلفلوس طواها فيدو حسبها بلمح البصر وجمعها فضرف ورجع طلع سد الباب وبدا كيقيد فداك الدفتر ويحسب فواحد الالة حاسبة حتى ضرب واحد السطر بالستيلو وسد الدفتر شاف فيا وتنهد قالي
ايوا شنو..ضربي دورة فموريتانيا تشوفي كي دايرة ؟
عجباتني الفكرة ومشينا فطاكسي للصحرا ركبنا على الجمال.شرا ليا واحدالشال زرقدرتو على وجهي من الرملة والريح وهوا كان عندو واحد فالرموك جابو معاه ومشينا تسارينا فوق الجمال وعطيتو تيليفوني صورني بيه ورجعنا للخيمة اللي ركبنا منها كانت مركز استقبال السياح والضيوف..عطاونا اتاي ديالهم والحلوة ورجعنا شدينا طاكسي من الطريق رجعنا للمدينة .. داني للميناء مع الغروب تساريت تما ومشيت للشاطىء ديالهم تساريت فيه وخرجنا للشارع الرئيسي..عجباتني نواكشوط فيها مايدار ولاكن مكانش عندنا بزاف دالوقت وكان خاصو ينعس ويرتاح باش يشد الطريق الصباح ويرجع فالوقت ونزال قدامنا ربعة وعشرين ساعة ديال الطريق..
طلقت من يدو كنشوف كنشوف واحد ديكورات حدا واحد الحانوت وداز واحد الحمق خلعني وتفكرت نهار تخورت فجامع الفنا .. تخبيت حتى داز مشا كيغوت ورجعت مشد فناصر مالقيتوش ..بقيت كندور فبلاصتي ونقلب عليه وجبدت تيليفوني لقيتو طفا وتفكرت اصلا باللي نمرتي سكتات والكونيكسيون مابقاتش شادة ..تخلعت وبقيت كندور فداك الشارع ونبكي وماعرفت باش نهضر مع الناس ..بقيت بحال الحمقة غادية جايا كنجري فبلاصتي وكل مرة كنجر شي واحد ونقول هوا كيطلع ماشي هوا وكنبدا نبكي وشكلي مختالف على الناس ..ضلام الحال والشارع عمر وماجات فبالي غير داك السوق فين حاطين الرموك وبديت كنتهجى سميتو على الناس ولحسن حضي قريت سميتو فداك الدفتر اللي كان كيحسب فيه ..نعتو ليا فين كاين ومافهمتش ومالقيت حتى حل من غير الطاكسي..مشيت كنجري عندو قلت ليه السمية ديال السوق وركبت معاه وصلني ليه عاد تنفست ونزلت كنجري لديك الساحة لقيت الدنيا خاوية تما ..تبعني مول الطاكسي كيجيري مافهمت اشنو بغا عاد ستوعبت باللي بغا نخلصو وجبدت فلوس مغربية عطيت ليه ميتين درهم وبقا كيشوف فيا ويشوف فيها ومشا . وقفت حدا الرموك ديالنا ومخلوعة حيت حتى واحد مكاين تما والدنيا مضلمة والشاحنات مصافين
جا عندي واحد العساس بقا كيهضر تا هوا مافهمتوش.بقيت كنقوليه ناصر ناصر..نصر الدين ..الوو نصر الدين
قالي: ااه نصر الدين ..المغرب
قلت ليه اليييه الو نصر الدين ..انا هنااا
حبد تيليفونو بقا كيقلب عليه وصونا ليه مافهمت اش نو قال . ضار عندي قالي قادم ..نصر الدين قادم
حركت ليه راسي بالايجاب ومكمشة. بالخلعة حدا الرويضة قدي فالطول وكنتسناه..دازو واحد الجوج خلعوني وبقيت كنشوفالعساس فين هوا مابانش ليا كاع ..رجعو دوك الجوج عاوتاني ومعاهم تالت وبداو كيشوفو فيا وكيهضرو بعينهم ..بديت كندخل فديك الرويضة بالخلعة حتى جاو عندي قاصديني ووقف عليا واحد خلعني بقاكيشوف فيا ويضحك وحسيت بشي واحد ورايا ضرت لقيت واحد اخر واقف هرني حتى نقزت ..حيدو ليا واحد الصاك وانا كنترعد والنفس مشات ليا مابقيتش قادرة نتنفس..سمعت صوت ناصر عيط. نهاااا نهاااا
غوت بالخلعة ماعرفت منين عيط ليا عيطت ليه ناااصر
طارو دوك الدراري من قدامي وناصر جاي كيجري عنديلاكن شاف واحد غادي بالصك وعوج الطريق حل يدي بحوج تبعوه قدامي طار عليه هزو بواحد الركلة من الارض جمعو حيد ليه الصاك وزطم عليه بقا كيعطيه بالركول ..رجعو دوك الدراري كيجريو عندو لاكن ناصر هز واحد الحجرة من الارض قدها قداش وبدا كيرجع باللور وهما تابعينو حتى لباب الرموك وحل الباب بالزربة والحجرة مزال فيدو جبد واحد العصا كتخلع وتبعهم كيجري رجع هوا غادي وراهم عطا لواحد لكتفو طيحو ولخرين هربو ..عاد جا العساس كيجري بالعصا ختى هوا
رجع عندي ناصر والصاك والعصا. فيديه كينهج خلعني قالي
فييين مشيتي؟؟؟ فييين مخلياني كنقلب عليك
بقيت كنتفتف تخلعت ماعرفت باش نبدا وهوا كيغوت عطاني بداك الصاك اللي هاز لراسي ختى بكيت وقلت ليه كنبكي
خفت من الحمق يخورنيييي
خرج فيا عينيه قالي: شنوو!!! واش غتسطيني؟!! كن دابا مالقيتكش؟؟؟ هااا؟ ماشي بلادنا ..وكن شدوك هادو فرعو مك ..وياك موصيني و طلعي تحركي
لاح ليها الصاك/شدي صاكك
شديت الصاك طلعت والخلعة مزالة فيا اما هوا بقا واقف لتحت وبقيت بوحدي نعست على داك السرير كنبكي تما وكنترعد بالخلعة حتى داني النعاس.
فقت لقيت النهار طلع ولقيت راسي مغطية بواحد الكاشة خفيفة ..حيدتها ونضت لقيتو ناعس على الكرسي ديالو .. تفكرت شنو وقع لبارح لاكن بردات الخلعة وبقات الدقة اللي عطاني بالصاك كطلع وتهبط فيا ونفسي كترعد ..شكون هوا كاع اللي يضربني وشداني اصلا نجي معاه ..بقيت كنلوم فراسي حتى حس بيا كنتحرك وناض حل عينيه شاف فيا وهبط رجليه لارض ماهضرش معايا ..نزل غسل وجهه وخلا ليا القرعة هبط حتى انا غسلت وجهي ورجعت طلعت جلست حتى سمعت البيبان تسدو عليا وشفتو غادي داير يديه فجيابو ..بقيت كنخمم ونصارع مع نفسي الراس فالراس حتى قضات عليا بغاتني ناكل راسي على ديك الدقة اللي عطاني..رجع هاز فيديه شي حاجة وطلع حطها ليا ونزل وقف برا كيشرب القهوى ويهضر مع العساس وجلست انا كنشوف شنو داكشي اللي جاب لقيت كاس دالعصير مطحون والفطور فيه بيض مقلي وشي حاجات اخرين
حيدت تيشورط ديالو اللي نعست فيها طويتها وحطيتها ليه وبقيت جالسة بديباردور ديالي فوق الكرسي متكية بالجنب جيهت الباب اللي حدايا وخليت ليه داك الفطور تما ماقستوش..خديت ديك البكية دالشكلاط درفاييلو حليتها كناكل منها حتى حسيت بيه طلع ديمارا الرموك وخرجنا من تما شدينا الطريق ..بقينا غاديين واحد مكيهضر مع لاخر حتى دخلنا فالصحرا والخلا ونقص فالسرعة وقف للجنب وعيط ليا
نهاا
ماضرتش عندو وماجاوبتوش وناض من بلاصتو ضار عندي جيهة الباب نزل لمستواي وقالي
علاش مابغيتيش تفطري؟
دورت وجههي هزيت واحد الشكلاطة قلت ليه مابغيتش
بقا كيشوف فيا وشد ليا فيدي قالي وصافي فطري براكة عليك من الشكلاط على الصباح
جمعت يدي تقلبت قلت ليه مابغيتش
وقف قدامي ربع يديه كيطلع ويهبط فيا وقالي
تعصبت لبارح تخيلي كن تلفتي؟ تخيلي معايا كن وقعات ليك شي حاجة؟
هزيت كتفي وهوا كيشوف فيا وقالي
دابااللي وقع وقع صافي نعلي الشيطان
بقيت ساكتة مجاوبتوش وهبط لمستواي من جديد حيد ليا الشكلاط من يدي وحك ليا شعري قالي
وصافي.. يالاه فطري
ربعت يدي شفت فعينيه قلت ليه مغنسمحش ليك على الضرب..
تنهد قالي :ماقصدتش نضربك..انا تعصبت راه كن شديت شي واحد فهادو كن قتلتو ..وكن قتلتو فين كنا غنوليو يالاه؟ ماشي ارضنا وجبتك مغامر بيك وماهازة معاك حتى ورقة .. وصافي فطري ماتخيناش نرجعو مخاصمين ..
قلت ليه عتاذر اولا.. وواعدني عمرك تعاود تهز يدك عليا شنو مابغا يكون
ضحك وجرني من يدي عنقني قالي
سمحي ليا ..اول مرة واخر مرة نهز عليك يديك
مسح على ضهري وكتفي وحط جبهتو على جبهتي قالي صافي ؟ تصالحنا؟
كملنا الطريق مصالحين وكليت داكشي اللي جاب ليا فطرت بيه كنهضر وياه وكنعاود عليه حلى كيفاش مشيت لبرا وعلى عائلتي وسولتو على على حياتو وعائلتو
قالي عندي جوج خواتاتي مزوجين وباه متقاعد ومو ماتت مسكينة
قلت ليه مسكييينة الله يرحمها ..ضرك قلبك ياك
قالي:راه الام هاديك حتى حاجة مكتعوضها
قلت ليه :باش ماتت؟
قالي: موتة ديال الله ..بييخير ماعندها حتى حاجة.نعسات عادي ضاحكة بيخير الصباح دا مول الامانة امانتو
بقا فيا مسكين قلت ليه: وباباك ..يكون حرن عليها مسكين
هز يديه ضحك قالي:الواليد تزوج من الدقة ولدو راه قدك عندو ربعة وعشرين
تصدمت قلت ليه ماتت فاش كنتي صغير؟!!
قالي كانت عندي ثلت سنين..كبرنا مع جدة كلنا وباقي لدابا فدار جدة قليل فاش كنمشي لدار الواليد
سكت بقات فيا ماماه وبقا فيا ضرني فخاطري ونضت عندو عنقتو من اللور وهوا سايق قلت ليه
ماشي مشكل جداتك بحالها بحال ماما
بدا كيضحك قالي صافي داكشي فات وتعايشنا عادي
وقفت قدامو تكيت على واخد لعيبة مسطحة كيحط فيها القهوة وربعت يديه كنشوف فيه بأسى قلت ليه
انا مارباتنيش ماما رباتني ختي وكنقول ليها ماما..ولاكن واخا هاكاك منقدرش نتخيل حياتي بلا ماما..ولا بلا بابا..ولا بلا ختي لكبيرة..مستحيل نصبر كنتخيلها كيجيني الدمار النفسي..الصراحة باز ليك داز عليك الويل
شاف فيا مطولا وتبسم قالي:عادي ربي كيصبرنا وكنكملو ..
قلت ليه:مرت باك ضريفة معاك؟
قالي:معايش معاها عايش مع خوالي انا ..تكون ضريفة ولا مضريفاش اصلا معايشش معاها
تنهد وقفت حدا كتفو حطيت عليه يدي وقلت ليه
الصراحة الحياة قاسية بزاف..والموت اقبح حاجة ممكن توقع خصوصا الى كانو هادوك الاشخاص عزازين علينا…
بقا ساكت مطولا وقالي معامن عايشة فسويسرا؟
تنهدت بعمق قلت ليه كنت عايشة انا وادوارد..دابا عايشة بوحدي..من نهار بان داك المرض دالسرطان وحنا كنعانيو فاللخر تغلب علينا
بقا ساكت مطولا قالي
الله يرحمو ..وكنتي عايشة معاه غير هاكاك عادي؟!!
وقفت قدامو عاوتاني ربعت يدي قلت ليه مافهمتش؟
قالي: كنتو صحاب ولا شكون كنتو؟!!
قلت ليه نوو كنا مزوجين بيان سيغ!! زعما كنت كنديرو النكاح غير وصحاب
تصدم قالي:شنوو!!!
قلت ليه :ميمكنش نسكنو بجوج انا وياه ..خصنا لاكط باش نقدرو نديرو النكاح
بقا كيشوف فيا ساهي وشد الفران بالزربة حتى تزعز الرموك وقلب المقود بالزربة خلعني شديت فجنابي حتى اسقر الرموك على الطريق وقالي
واش عارفة شنو هوا النكاح؟
قلت ليه: وي بيان سيغ ..هوا الجنس!!
شاف قدامو هاز حجبانو ورجع قالي: صدمتيني..ما حسابليش مزوجة ديجا!!
تنهدت قلت ليه: تزوجت غير عام صافي..شتي انا ماعنديش الزهر ..غير تزوجنا ومرض دغيا
حرك ليا راسو قالي
ماعندك ما ديري قد الله
حرك ليه راسي قلت ليه
ااه مسكينة انا ..
شاف فيا كيضحك قالي:علاش مسكينة مالكي شنو ناقصك؟
قلت ليه: مافرحاناش بزاف..
قالي:المهم فرحانة شوية؟
قلت ليه:شوية ولاكن هاد الموضوع كيدايقني..كنحاول نتجاوزو ..داكشي علاش جيت للمغرب باش نرتاح شوية..تمشي معايا لسويسرا تونسني؟انا عايشة غير بوحدي والله
هز راسو كيضحك شار بصبعو قدامو قالي
خليني نكمل الطريق..غتسطيني
قلت ليه :علاش غنسطيك!! ياك بغيتي تمشي لبرا..يالاه تمشي معايا
قالي:ااه سويسرا غير هنا انمشيو ليها بالرموك ياك
قلت ليه :نووو بالطموبيل..مي دابا مغاديش تمشي معايا غتجي غير بوحدك
بقا كيشوف فيا ويضحك قالي
كتهضري من نيتك!!! اجي وسير كن كانت ساهلة كا ع مايقولبونا فالكونطرات
قلت ليه: انا اللي غنعطيك الكونطرا!! واش غنقولبك؟!!
قالي كيضحك:سويسرا ديالك؟
قلت ليه:ديال كولشي!!كيفاش سويسرا ديالك؟؟ ماتقتيش بيا؟
قالي واخا ..نفرضو كاع كتهضري بصح ..سويسرا غتجي ودخلني
قلت ليه:لا غادي نمشي نرجع لجونيف ونهضر مع المحامي ديالي هوا يعاوني ونصاوب ليك كونطرا ..
قالي:راه مايمكنش هادشي اللي كتقولي كونطرا كتعطيها الشركة ولا تعيط ليك الدولة براسها
قلت ليه :راني عارفة !!! انا ماشي مكلخة راني قارية وعارفة القانون كيفاش داير!! غندير ليك كونطرا بسمية المكازا حيت المكازا راه شركة فحد داتها فهمتي..
بقا كيشوف فيا مستغرب قالي
اشمن شركة ولا مكازة!!! مافهمتش ..
قلت ليه : انا عندي شركة تما فسويسرا ..شركة صغيرة ماشي عملاقة..غندير ليك كونطرا فيها عاماين وتجي تخدم ..
بقا مصدوم كيشوف فيا قالي
نتي عندك شركة!! فهاد اللاج وعندك شركة !
قلت ليه: اااه خلاها ليا ادوارد ..وعندي الناس خدامين كنبعيعو حوايج دالسبور..الصيكان سبرديلات الحوايج الكورات كولشي ..مكازا كبيرة فجونيف
بقا ساكت ماجاوبنيش وكمل الطريق كيشوف قدامو وانا كنشوف فيه كنتسناه يجاوبني ..تنهد قالي
مزال مامستوعش ..كل مرة كتصدميني بشي حاجة فشكل
قلت ليه :انا بغيتك تخدم معايا نتا كتهدم مزيان عجباتني الخدمة ديالك..حتى عندنا تعامل مع الشركات الكبار اللي كيسيفطو لينا السلعة وكنعرفو ماليهم شخصيا ..الى بغيتي تبقا فالرموك نهضر مع شي واحد فيهم يلقا ليك بلاصة فالتوصيل ..عطا الله مايدار
بقا ساكت كيشوف فيا مطولا وقالي
ماعرفتش..مزال عاد غندورها فراسي بعدا حيت نزلتي عليا دوختيني دابا مابقيتش عارف راسي معامن كنهضر
قلت ليه:فكر فيها مزيان..نتا دابا انسان طموح وكتخدم تبارك الله تستاهل تخدم تما ..شحال كتقبط هنا ؟
قالي :كنشد خمسالاف درهم فالشهر وثلت مية وخمسين من السيمانة للسيمانة ديال التوصيل
حرك ليه راسي ودرت يدي فجيابي قلت ليه
لااالا هادشي قليل بزاف على اقل خاصك تاخد ثلاتة مليون علااااا اقل
هز راسو كيضحك قالي ثلاااتة …نعذرك معايشاش هنا من حقك. تقولي حتى عشرة
قلت ليه : ليبيخسونيل اللي كيبيعو ليزاغتيكل فالمكازا كياخدو دي ميل كانز ميل ..اما الجيغو كياخد خمسين الف درهم
قالي مصدوم : تباااارك الله ..وكتمشا تما عندكم السلعة باش كيتخلصو هاد الفلوس كاملة
ضحكت قلت ليه بيان سيغ كتمشي عندنا الكليان ديالنا و السيت ديالنا ولي بخي غيزونابل وحتى ليزاغتيكل كاليتي ..وكنبعو حتى سيغ انترنت وكنديرو اشهارات فتلفازات على الشارع ديما..راه المكازا معروفة وعندها اقدمية من جد ادوارد ايام الحروب ..الحمد لله ربي كيبغيني بزاف عطاها لي
شاف فيا كيضحك قالي ربي ماشي غير كيبغيك ..ربي غناك ..تباارك الله
قلت ليه :حتى نتا كيبغيك الله ..ضريف وزوين ..
شاف فيا كيضحك قالي: يااك ضريف وزوين
ضحكني قلت ليه :ااه ضريف وزوين ..الصراحة بغيت تمشي معايا غتعجبك سويسرا..زوينة والطبيعة فنة..حتى انا ماتساريتش فيها ولاكن كتبان زوينة حسن من المانيا
قالي:شحال دايرة الكونطرا ؟
قلت ليه :فابور !! ماتخلص والو ماعندكش الفلوس كتشد غير خمسالاف درهم صافي!!
قالي:لالا جامع شي حاجة غير قولي لي شحال دايرة
بقيت كنفكر ماعرفتش شحال تكون دايرة وقلت ليه
ماعرفتش..مي علاش بغيتي تعرف غتخلص غير الطيارة صافي
قالي:لااا كونطرا راه مهمة كاينة اللي كتكون فيها غير الخدمة كاينة اللي فيها الخدمة والسكن .. هادشي كامل خصو يكون واضح فيها ويكون باين باش كلشي يبقا مرتاح
تفكرت داك صاحب ادوارد وتنهدت قلت ليه مشكييلة دابا داك كابي ساكن ليا لتحت ماجاتنيش نقوليه سير بحالك..ولاكن تقدر تكري شي دار ياك
قالي: نكري بيان سيغ .. مي واش كتهضري بصح؟!! دخلي ليا الفكرة لراسي وفاللخر تخبطيني بلااش
قلت ليه :لالا كنهضر بصح منخبطكش ..صافي غنديك معايا قررت
تكا اللور كيضحك قالي :قررتي ههههه
بقيت كنشوف فيه مطولا الصراحة خدمتو صعيبة ..حتى الرموك ماشي موريح بزاف مافيهمش لاكليم وقديم شوية ..تنهدت قلت ليه
كتمشي بوحدك ديما وتجي بوحدك ماكيمشي معاك حتى واحد؟
قالي:لا كنمشي بوحدي ونجي بوخدي..بعد المرات كيمشي معايا واحد الدري صاحبي فالمسافات لقصيرة
تنهدت. قلت ليه صعيب الحال .. كاع ماتستاهل انا عييت بالطريق عمرني نسافر معاك
عض شنايفو كيشوف قدامو كيضحك قالي ميمكنش نتي والله لعضيم
هز واحد الكارو كيكمي ووقفت حداه هزيتها كنقرا سميتها وقلت ليها مكتكميش بزاف
قالي :كنكمي كتر من باكية فاش كنكون شاد الطريق..غير دابا نتي معايا كنساه
قلت ليه :خصني نبقا معاك ديما باش تنساه فمرة..خايب على الصحة ..خصك دير سبور ضاروري
قالي كندير السبور ..ونتي كديريه؟
قلت ليه:بيان سييغ كندير سبور كاين شي واحد مكيديروكش؟!!! ولاكن الصراحة مللي جيت مادرتوش ..كن غير كنتي ساكن فمراكش على الاقل نبقا نخرج انا وياك نديرو واخا غير لاماغش..ختي حفصة مكتبغيش دير السبور وغليضة بحال هاد الرموك شفتي على حالة
قلب وجهه للجهة الاخرى كيضحك. وقلت ليه
اه راه فيها بزاف ديال الضحك وفيها بزاف ديال الشحمة..افف ميمكنش ..هي مكتبغيش تجري كتقولي جري فبلاصتي!! شتي على مكلخة !! انا غنضعاف وهي غتبقا تقيلة بخال الرموك
شاف فيا قالي:ماتزيدي ماتنقصي راكي تما ..هي هاديك
قلت ليه :لا راه بغات نجري حقها باش نضعاف انا ..وانا مابغيتش نضعاف عاوتاني كتر ..
قالي :فين صحاباتك اللي تلاقيتك معاهم اول مرة ؟
قلت ليه : كاينين ولاكن مابقيتش كنبغي نهضر معاهم
قالي وعلاش؟
قلت ليه مامربيينش..ماعرضوني حتى مرة وانا عرضتهم فاش جيت ..وهما كاع ماشراو ليا حتى شكلاطة !!
هز حجبانو كيضحك قالي من حقك ..ماعرضوش عليك ماتهضريش معاهم
ربعت يدي قلت ليه
ياك عندي الحق..ماضلمتهمش؟
قالي لا
قلت ليه : انا ونتا عندك الزهر قصحابك؟
قالي: بحالي بحالك راك شفتي شنو وقع مع فيصل
هزيت راسي تفكرت فيصل قلت ليه
ااه هاداك راه مامربينش بزاف كاع ..كداب انا عمرني شفت فحياتي شي واحد بحال فيصل..كيقول للناس انا وهوا مصاحبين داكشي ديال الحب! شفتي على مسخوط..اه نسيت هوا اصلا كيعرف احسان يعني مامربيش باينة
قالي: كيفاش حتى هضرتي معاه النهار الاول
قلت لي: تاصل بيا قالي بغيت نقول ليك شي حاجة ايييغجوو..قلت ليه اوك وتلاقيتو وقالي نديرو علاقة ما علاقة قلت ليه مامستاعداش..صافي ضغط عليا شوية فالاول مي فاللخر قبل نبقاو دي زامي صافي ولاكن ماصدقش ليا ..ماطلعش مزيان ..هداك يصلح يكون ممتل حيت خدعني ماخلانيش نشك فيك..ولاكن المشكل شنو غيستافد؟ ماعرفتش علاش دار هادشي وانا مغاديش نبغيه
قالي :بغا يبان بيك وصافي هادشي اللي غيكون
قلت ليه :يبان بيا!! شنو زعما يبان بيا
قالي: بغا يبان ..ماعرفتش كيفاش نشرحها ليك..يبان يعني يقولو عليه مصاحب مع بنت زوينة وكدا فهمتي ..
قلت ليه :والو قالو شنو زعما ؟
قالي: هادا هوا الهدف ..هوا يقولو..الهضرة والقيل والقال فهاد البلا. هي راس مال الواحد
قلت ليه:وييلي شنو هاد تخربيق؟! يعني هوا مريض فعقلو !!
قالي:ماشي مرييض..هوا قالو عقلو يدير بحال هاكاك..وحتى بنادم فاش كايكون عمدو نقص كيبغي يعوضو ..التباهي التباااهي فهمتي..التباهي الهدف منو الرفع من القيمة المزيفة ..وجلب الاحترام والتقدير من عند الناس اللي كيعرفوك ولا حتى اللي مكيعرفوكش ..يعيش ديك المتعة ديال التباهي والقيمة العالية المزيفة .. فهمتي
بقيت كنفكر قلت ليه :فهمتك شوية .. يعني هوا هدفه تافه
قالي:راه غا التافه على خوتو دوز حيد
قلت ليه : فهمتك ..بغيتي تقول التكبر
قالي: ماشي التكبر وصافي ولاكن تقدري تقولي تكبر.. النفخة ..النفس الخااوية اللي عند بنادم كيرضيها بحوايج مزيفة ماشي حقيقية ..انسان مامتصالحش مع نفسو
قلت ليه بحالي…حتى انا نفسي كتمرضني عمرني تصالحت انا وياها
ضحك قالي : ماشي هاكاك..نتي متقبلة راسك ..راكي متصالحة مع نفسك ماعندكش مشكل فشخصيتك وكتصرفي عادي ..كاين اللي مامتصالحش مع راسو كيقلد ناس خرين باغي يكون بحالهم ولا بلاصتهم وكيحاول يخرج من دايك الشخصية الحقيقية ديالو اللي ماراضيش ويعيش بشخصية مزيفة حياة واوهام مزيفين ..الانسان عندو يقول عندي ..ماعندوش يقول ماعنديش..عادي يبقا مرتاح ماشي يضعاف قدام شي واحد يبقا يزوق ليه باش يتقبلو ولا يخبي العيوب ديالو باش بنادم يحتارمو زعما ..لا علاقة ..تقبلني كيف ما انا وكيف ما هي شخصيتي والواقع ديالي..ماتقبلتينيش عادي مغتعطينيش البيي نمشي بيه للصين ..ولا غتنقط ليا بستيلو احمر ..شكون هوا اصلا داك الشخص اللي سبقا بنادم يقلل من راسو بينو وبين نفسو ويعطيه صورة ترضيه. فهمتي
حركت ليه راسي :فهمتك عندك الصح ..مي هادشي كاع مكاين برا ..كاين غير هنا ..عندكم صراعات غير مع راسكم بلا صراعات المعيشة ..
ضحك قالي: وا هادشي اللي عطا الله ..مجتمع هاكا داير عقلية وحدة تقافة وحدة .نتوما عاوتاني مجتمعكم عقلية وحدة وتقافة وحدة ..ماعندكمش هاد المشاكيل النفسية مع بعضياتكم كل واحد دايها فحياتو واحل غير مع راسو ..هنا لا ..بنادم واحل مق٠٠دة عليه وماباغيش الناس يعرفوه راه واحل ومق٠٠٠دة عليه وماراضيش يخدم اي خدمة باش الناس ماتعيقش بيه مق٠٠دة عليه وكيفضل يبقا تناعس باش الناس يقولو راه مام٠٠داش عليه
قلت ليه :زعما النعاس هوا اللي مزيان ؟!!
قالي :راه واحد جالس شومور كيشوف راسو حسن من واحد خدام سرباي غير باش تفهمي.. كيشوف راسو حسااان كاع من اللي خدام شي خدمة بسيطة .. وحتى واحد النوع هنا عندو هاداك اللي جالس هاز خنافرو وفدارهم كيسعا الفلوس احسن من واحد كيفيق مع الفجر يمشي يحرث ولا يبني..البنت براسها ماترضاش تزوج واحد بناي ولاكن تزوج واحد ماخدامش وساكن مع باه ..فهمتي العقليات ..العياقة ..العياقة خرجااات على بنادم
خرجت عيني قلت ليه اويييلي واخا ميكونش الحب ضحك قالي
مكاين لا حب لا والو بنادم كيشوف باش يعيق على عائلتو على صحابو على جيرانو..هادي الحياة هنا وهاكا غاادية وبعد المرات كتلقا واحد خدام شي خدمة على قد الحال وماراضيش بيها والى سولتيه يقول ليك ماخدامش غير جالس هاد الساعة.. وشي مرات بنادم كيحتاقر واحد خدمتو على قد الحال ومايحتاقرش واحد مسالي عاطيها للدوران لا خدمة لاردمة
تأسفت مالقيت منقول وبقيت واقفة كنشوف فيه حتى عييت وقلت ليه
الصراحة خاص الانسان ينوض يخدم…انا كنت كنقرا وكنت كنفكر نخدم ونخدم فشي حاجة تعجبني ونرتاح فيها باش نقدر نعطي وننجح . ولاكن ربي بغاني عطاني كلشي اللي كنت كنحلم بيه وبغيت نديرو قوقت وجيز
قالي : المشكل ديال هاد المجتمع ..واه واخا تعيا تفسر بالمنطق ماتقدرش تحلل..حيت المجتمع اصلا مكيخليكش تخدم بقوة التنمر والاحتقار ورفض الناس ليك ومايتقلبوكش ونتا على قد الحال..هادشي اللي كيخلي بنادم يتشمس ومايخدمش..اما الخدمة موجووودة ..كاااينة هنا فالبلاد..ودير مستقبل على قد الجهد وتعيش الى بغيتي تعيش وكنتي قانع باللي قسم ليك الله وفنفس الوقت سعا وخدم على طموحك ..ولاكن هادشي قليل اللي كيديرو ..خاص تكون بنفسك ونفسك مانكونش عندها النفس فهمتي البلان كي داير..وتخدم فاش ما كان ..وماتديها فحتى حمار .راه بنادم هنا فيه مايخدم وكلشي كيحلم يمشي يخدم على برا وفاش كيمشيو كيخدمو ويدمرو وتلقاهم كيشطبو الزناقي وعادي تما وكيضرب تماارة ديال بصح والوقت هوا الوقت ومكاينش اعياد مكايناش الحياة وغير الخدمة..ولاكن كتلقاه خدام ومرتاح حيت بعيد على المجتمع ديالو ووسط مجتمع كيحتارم جميع انواع الاعمال .. وكتلقاه تأقلم ومشا معاهم وعايش على قد جيبو تما .ولاكن فاش كيسافر فالصيف ويجي لهنا اوطوماتيكمو كيتقلب ليه البارابول فالمطار وكيتسيف كيحيد العقلي لاروبية ويضور للعقلية الخراوية ديالنا ويكري طموبيل من المطار ويتم جاي بيها معنكر ونيفو لاسق مع السما وصدرو لقدام وماكيتفسش ..حيت المجتمع حتى هوا سر مك بحال هادو حيت كن داها كل واحد فراسو كوراه هاداك اللي كيغسل الماعن على برا يكون كيغسلهم هنا فبلادو ومع مو وباه واكل شارب ساكن ولا كاري المهم هاز راسو ويدير شي حاجة راسو من بعد وكن واحنا تا حنا حسن من اوروبا..مي العقليات والمجتمع كيساهمو فالمزيرية وولد وطلق و اللي خدام فشي مقاطعة تاهوا مايعطيك ورقة تا تحيد عليه سروالك واللي اصلا دافع الوقة سامح فيها تاااا كدوزش شت شهر عاد يمشي يجيبها خيت عارفهم مغيعطيوهاش ليك ديك الساعة واخا يكون فيها غير شينياتيغ دالقايد وفاش كيمشي يجيبها كيمشي موجد فمو للغوات ..اوااالو ..حيد عليااا..عمرها تقاد اللي فيه شي فيز فيه عمرو يتبدل..مال اوروبا ماتدبلاتش بقات كما هي واللي مشا ليها كيمشي على نفس السيستيم..هاكاك تاهنا ..نتي براسك ضربي هنا عام تولي ضربي وتزكلي وحاضية مع جنابكم
حرك واسي قلت ليه
لاالا ..انا منقدرش نبقا هنا بزاف لاا..منقدرش غادي نبقا جالسة حتى نعيا وغنرجع بحالي ..
بقا ساكت مطولا وقالي
اشمن نيفو وصلتي فالقرايا؟
قلت ليه : الاجازة
ودرت عماين ديال haute couture وصافي موراها تزوجت بادوارد دغيا ومشيت لسويسرا
قالي دابا فين اللي حسن بالنسبة ليك المانيا ولا سويسرا؟
قلت ليه
سويسرا احسن من المانيا
قالي علاش؟
قلت ليه: سويسرا فيها الفلوس على المانيا وفيها الكالم ..فخبارك باللي سويسرا ماعندهمش الجيش والعكسر اصلا هي الدولة الوحيدة اللي ماعندهاش العسكر
قالي:وي عارف عاد عرفتيها؟
قلت ليه:اه عرفتها حتى مشيت ليها ..عندهم الشرطة وصافي..اما العسكر لا
قالي :عندهم الجيش ماشي كبير غير صغير ..متشي خاجة كثيرة.. سويسرا بلد مختالف عاوتاني وقوية واخا معندهاش شي جيش نيت مي ععندها البنك..معتامدة عليه ..البنك السويسري راه محمي من طرف كاع الدول..كاع الاغنياء دالعالم حاطين فلوسهم فسويسرا والبنك هوا العماد ديالها داكشي علاش مختالفة ومأمنة وكيخلصو مزيان حيت كلها فلوس ..
قلت ليه:حتى الكتافة ديال السكان قليلة..اما المانيا عامرة بزاف والجالية المغربية تما اكثر من القياس..اما فسويسرا مرة وحدة اللي سمعت واحد مرى مغربية كتهضر دارجة ..والناس تما قلال ولاكن لاباس عليهم .. واخا المعيشة غالية ولاكن الناس كيتخلصو مزيان ومافيهاش الناس كيسعاو مساكن فالزنقة ولا الفقر يمكن فشي مدن يكون ولاكن حسب معلوماتي سويسرا غنية مافيهاش الفقر خصوصا فجونيف.
رد:دولة غنية اللي من حقها تباها وقاطعة الحس وهاد البلاد اللي غتزلع بينادم والفقر عايشين بالعياقة
بقينا كنهضرو مرة نجلس مرة موقف باش منعياش حتى بدا الضلام يطيح وتلفت قلت ليه
فيا الجووع
ضحك قالي :هاحنا قربنا ندخلو للمغرب..صبري شوية
جريت الصاك ديالي لقيتو خوا ..تصدمت فاش لقيت راسي كليت كولشي وبغيت غير نقب مالقيت مانقب..دورت وجهي كنتنهد شفت فداك الصاك دالكادو اللي جبت ليه ووقلت ليه
واش ممكن ناخد واحد الشكلاطة
شرت ليه بصبعي مافهم علاش كنهضر وقالي اينا شكلاط؟
قلت ليه الشكلاط اللي حبت ليك
بدا كيضحك قالي
خوديه بالصحة والراحة
هزيتو حليتو من ديك التغليفة وكليت واحد الحبة وضرت عندو حطيت ليه وحدة حدا فمو كلاها كيضحك وقالي
زوين هاد الشكلاط
قلت ليه ديال سويسوا
قالي:بااينة..اي حاجة ديال سويسرا زوينة
قلت ليه بحماس:عرفتي غتعجبك سويسرا..راه ماااايمكنش شحال فنة ..هي كتبغي الفلوس وفيها ليزاكتيفيتي بزاااف زوينين..هنا مكاين والو القنط..دابا كن كنا تما كن راحنا على الاقل كنخرجو للطبيعة على لبيسيكليت ولا نديرو مينطاد ونديرو تورة فاللاك بالباطو ..عرفتي تشهيت نديرهم ولاكن مالقيتش معامن وكيطلعو ليا دوك ليزاكتيفيتي فتيليفون وكنبقا غير كنشوف فيهم .. عرفتي مقهورة انا
قالي:نتي مقهورة نتي..ومسكينة
قلت ليه :ااه والله عرفتي الحياة قاااسية بزاف ..مكتعطيكش كلشي..كتعطيك شوية وتحيد ليك كاع اللي كتبغي
تنهد وقالي:واقولي لحمد لله ..نتي بعدا راك متركبي فالطيارة وتمشي وتجي اما حنا هنا كنعرفو الرموك والطاكسيات والكيران واللي طالع كراد كيمشي فتران..اما التيجيفي كيمشي فيه غير اللي. زربان
قلت ليه :ماكرهتش نمشي نشوف تركيا ..ونمشي لسانتوريني
قالي:ليونان؟
قلت ليه: اه …ماكرهتش نمشي ليونان ..عرفتي دوزت واحد العام من حياتي عمرني نساه
قالي:ايوا سيري تسراي مع راسك
قلت ليه :نمشي انا وياك
ضحك وقالي: مايوصلناش الرموك حتى لتما غيعيا
قلت ليه:اويييلي على الرموك !! نمشيو فالطيارة
قالي: ايوا صافي..فوقاش نمشيو غدا؟
قلت ليه :لا غدا خصني نمشي نجلس مع ماما شوية..حتى لسيمانية الجايا..واخا ماغتكفيش خمسالاف درهم باش تسافر ماشي مشكل انا نعرض عليك هاد المرة حتى تخدم وعرض عليا صافي
بقا كيضحك وشاف فيا قالي
خليني نعرض عليك انا الاول بعدا وعاد عرضي عليا نتي الى بغيتي..مي ماشي دابا
قلت ليه :وفوقاش؟.
قالي:يكونو الفلوس واجدين ونتي اللولة نعرض عليك
تنهدت قلت ليه مشكييلة ..خاصك ضاروري تخلص مزيان .. وتبدل الخدمة ..انا غادي نعاونك تيق بيا
بقا ساكت كيشوف قدامو وحنا كنقربو من واحد الباحة استراحة وقالي
هاحنا قربنا ندخلو للكويرة ..يالاه تخباي عاوتاني وجمعي حوايجك
جمعت كولشي وتخبيت حتى دزنا وقالي خرجي وخرجت عندو وقفت حداه وحطيت يدو على كتفو والضلام داكس مكنشوف والو
قالي كن كان النهار ماتقديش دوزي من هاد البلاصة
عندك الزهر جينا مع الليل وراجعين مع الليل
قلت ليه علاش؟
قالي: كتخلع ..بحال الثلت الخالي وغير العسكر والرملة .. ينزل هنا بنادم مايلقا منين يخرج تسرطو هنا يبقا
حطيت يدي على صدري قلت ليه الله يستر ..عمرك وقع ليك مشاكل قالطريق
ضحك قالي ماشي غير مشاكل اللي وقعو ليا ..المهم بلا منخلعك حتى نوصلو ونعاود ليك
حيت قدامو قلت ليه لالا غير عاود ليا بغيت نسمع
قالي:واحد المرة خرج ليا واحد العجب..ماعرفتو بنادم ولا شنو هوا..طلقت القرآن وكملت الطريق ..وفنفس البلاصة عاوتاني وقع ليا بلان فشكل
قلت ليه اشمن بلان ؟
قالي وصلت للبلاصة وماجيت فين نفوتها سمعت الرموك تزعزع من اللور ..قلت بسم الله الرحمان الرحيم..مافايتاش جوج دقايق سمعت اللور صوت بقرة وانا راجع خاوي اصلا مهاز والو
حسيت بالما جمد ليا فالعروق وكحزت عندو لسقت حداه شفت فجنابي وقلت ليه
ايوا ..كمل!!!
شاف فيا كيرمش وقالي: لالا غير كنضحك ماشي بصح ..غير بغيت نشوف واش غتخلعي
حطيت يدي الى قلبي قلت ليه خلعتيني
بغيت نهبط الزاج نتفنفس وقالي لا غير خليه طالع الغبرة كتنوض هنا ..سيري تنعسي بحال لبارح حتى نفيقك
قلت ليه لالا مافياش النعاس
قالي:واجلسي وديري السمطة حيت الارض فيها الحجر
جلست ويالاه بغيت ندير السمطة سمعتو طلق القرآن ونضت بالزربة لسقت حداه قلت ليه علاش طلقتي القرآن
قالي:عادي كنطلقو ديمت فالطريق..ماتخافيش راه غير كنت كنضحك معاك
شفت فجنابي تخلعت وبديت كنعرق قلت ليه قلبي غيسكت بالخلعة
قالي:راه غير كنضحك ..ماكاين والو ..
هز تيليفون شاف الوقت وجهد فالسرعة قالي واخليك جالسة حدايا يالاه
جلست على واحد المخدة محطوطة حداه وشادة فيدو وهوا سايق باليد لاخرى كنحس بالرموك كيجري وخاوي من اللور كيتهز ويتحط
تخلعت والرموك كيجري كنسمع الحجر كيضرب اللور وهوا كيقول ليا راه الروايض ديال الرموك كيقلبو الحجر لفقو غير جلسي ماتخلعيش
شفت قدامي كان الضلام ختى حاجة مكتبان من غير الضو ديال الرموك ضارب فالطريق والطريق كتبان مسرحة قدامنا كلها شانطي ملس ولاكن الرموك كيمشي عليها بحال الى غادي على الحجر وشي حجر مكنشوفو قدامنا
قلت هزيت راسي شفت فيه وهوا كيشوف قدامو قلت ليه شي حاجة ماشي عادية
عقد حجبانو كيشوف قدامو سايق وقالي
غير صبري هاحنا غندخلو للعيون مابقا والو
هبطت راسي كنترعد شادة ليه فركبتو اللي جيهتي وهوا كيحركها فالسوقان حتى سمعت لفران تشد بالجهد بحال شي حادثة وهزيت راسي بالزربة لقيت قدامنا واحد الكاميو قديم تقلب وغوت وكنش ناصر كيزيد فالسرعة غادي يدخل فداك الكاميو حتى وصل ليه وانا نسخف ماعقلتش على راسي
حسيت بالماء نازل مع صدري ووجهي ودخل ليا معايا نيفي خنقني ونضت شهقت حليتي عيني وهزيت يديه نشد فشي حاجة ونضت جلست مخلوعة شفت فناصر لقيتو واقف قدامي والقرعة فيدي..بقيت كنشوف فيه مصدومة وهزيت راسي بالزربة قلت ليه
الكاميو!!! درنا اكسيدو
قالي مادرنا والو مكاين والو ..مالكي تخلعتي
هزيت راسي كنشوف فين حنا لقيت راسي فسطاسيون والضوء والاضواء ديال المدينة فكل جهة وبديت كنتساؤل مافهمت والو وقلت ليه
فين حنا؟
قالي فالعيون
قلت ليه كيفاش؟ واش ماطرا والو
بعد ليا العشر الفازك على وجهي قالي ماطرا والو غير تخايل ليك
بقيت كنحاول نفهم وكنقول ليه
لالا انا شفتو بعيني..شفت الكاميو تقلب..ميمكنش عيني يكدبو
قالي :مكاين والو انهى ماكاين لا كاميو لا حتى حاجة..جاك الجوع قلتي ليا فيا الجوع ..قلت ليه غندخلو للعيون نجيب ليك شي حاجة تاكليها ..صافي من موراها طحتي سخفتي
حطيت يدي على قلبي قلت ليه قلبي غيسكت ..قيس
حط يدو على قلبي كيشوف فيا ويكأكد ليا باللي مكاين والو لاكن ماقدرتش نستوعب..مافهمت والو ..واش دخت بصح ولا تهيأ ليا..ولاكن كن كان بصح وتقلب الكاميو قدام بديك الطريقة ودخلنا فيه بديك السرعة كن راه تبجغنا ..دخت ..المنطق ديالي داخ ماعرفت شنو كاين
قالي ماتخافيش جلسي غنهبط نجيب ليك شي حاجة تاكليها
جريتو من دراعه لسقت معاه وكنشوف فجنابي قلت ليه
مانبقاش بوحدي..غنهبط معاك
دور يدو على خصري قالي يالاه لبسي تيشورط اللي عطيتك ..خوافة
جريتها لبستها وخليت شعري حيت تشنتف ولسق مع وجهي بالخلعة ..هاد التسافيرة خصني موراه حمام ديال نص نهار يالاه نرجع كي كنت ..
جمعت شعري كوي شوفال عالية ونزلت لاسقة فيه وهوا بديك سو فيتمو كحلة سورال كحل كيطمة والسوارت فيدو ..عنقني جرني حداه ومسح على كتفي قالي مازالة مخلوعة
قلت ليه مزال مافهمتش شنو وقع
هبطنا جلسنا انا وياه فالقهوى ديالهم لداخلهم وخدا ليا سوندويتش وخدا لراسو واحد وجلست قلت بسم الله ..مع عضيت جريت البصلة وعطيت اللقمة حيدتها من فمي حتى بدا كيقول ليا مالكي
قلت ليه :مكاناكلش البصلة
خدا ليا داك السوندويتش حلو حيد منو البصلة ونقاه وعطاه ليا قالي شوفي دابا
عضيت وحركت ليه راسي بالايجاب وتكيت كنشوف فالناس اللي واقفين تما اغلبيتهم شوافرية .. حيت المنطقة بعيدة وقليل كيوصل ليها ..
كلينا وسالينا وشتو غيشعل الكارو وتكيت على كتفو قلت ليه قلتي ليا انا معاك ماتكميش
لاح يدو على رجلو قالي
صافي منكميش
قلت: قليتي ليا حيت انا معاك مانكميش…هانتا بلاتي
هزيت ديك البكية كنقرا قلت ليه شرف شنو كاتبين..هما براسهم كيقولو ليك مضر بالصحك وكيسبب السرطان وعدة امراض..واش بغيتي تمرض؟!!
قالي لا عندك الحق
قلت ليه :راني عارفك راسي عندي الحق ولاكن نتا خاص تكون عندك الادارة. باش تحيدو
حط يدو على وجهي كيضحك غطاه وقالي
:الارادة ماشي الادارة
بعدت وجهي قلت ليه اييه::الارادة والعزيمة ..خاصك تخي فوووغ…
سترونغ باش تغلب عليه ..حيت فيه نيكوتين تسعين فالمية عرفتي شنو كيدير فالصدر ..مكيضركش صدرك؟
حرك ليا راسو بالنفي كيشوف فيا وعينيه ضاحكين. وقالت ليه
كيمرضو راه باينة ..شنو غيكون كيدير ليه فنضرك
قالي: تبقاي تسافري معايا ديما باش منبقاش نكمي صافي
رجعت اللور قلت ليه
لاااالا انا منعاودش نسافر معاك .. انا خاصني ندوش دابا حاسة براسي بحال المرقة
هبط راسو كيضحك قالي وانا كيفاش كتحسي بيا
شفت فيه وشميت ريحتو قلت ليه حتى نتا بحالي..
قالي:بحال المرقة ؟
قلت ليه : ااه الصراحة كتعاني بزاف كن غير كانو دايرين ليكم شي حمام صغير بحال الكرفان تبقاو دوشو باش ترتاحو ..شحال باقي لينا دابا ونوصلو؟
قالي:غنوصلو غدا ان شاء الله لمراكش فالوقيتة اللي قلعنا من تما بالضبط
قلت ليه مع الخمسة دلعشية؟
قالي:اييه
قلت ليه :نمشي نعس باش منعياش اكثر ..اففف ميمكنش شحاا ديال القهرة ..ولاكن تبارك الله عليك الراجل ديال الزمان
ضحك حتى شبع وقالي :فين تعلمتي هادي حتى هي
هزيت حاجبي قلت ليه ماما كتقولي الراجل دالزمان هوا اللي كيخدم ويضرب تمارة ومايخافش..كتهضر عليك تماما
تكا على ركابيه كيحرك راسو ويشوف فيا قالي
ماعندي منتسالك راك حافضاا ه
بقيت ساكتة كنشوف فيه مطولا وقلت ليه
الصراحة هدى كاع ماتجي معاك ..نتا زوين وضريف والراجل دزمان
مسح وجهه كيشوف قدامو ويضحك وقالي
من اناحية ماتجيش معايا؟
قلت ليه حسيت بيها مامزياناش..انا احساسي عمرووو كدب عليا.. متأكدة مامزياناش ..قلبها ..قلللبهااا مازوينش وانا متأكدة من راسي..تنهد وناض هبط يدو على راسي ونزل باسني من شعري وقالي
يالاه نوضي نمشيو الى رتاحيتي
نفضت يدي جمعت دوك الكواغط اللي فوق الطبلة فاش كلينا وبقيت كندور كنقلب فين نرميهم مالقيت فين وديتهم للرموك وبديت كنجمع الروينة .. كاع الكواغط جمعتهم فصاك الكادو وحيدت سبرديتلتي وجلست شديت واحد كلينيكس فزكتو بالماء كنمسحها من الجناب ونقيها وهوا شاد الطريق سايق وكل شوية يدور يشوف فيا..حطيتها حدا الباب ونفضت ديك البلاصة فين نعست مزيان والكرسي فين جلست وغسلت يدي من السرجم قبل مايجهد السرعة ورجعت جلست حليت صاكي وجبدت واحد الريحة وخيدت تيشورط شميت بيطاني لقيت فيهم الريحة وبديت كنرش وتفكرت الريحة اللي هرست ليه وقلت ليه
الصراحة خسارة هرست ليك البارفان ..ولاهييلا
قالي ماعليش اجي رشي ليا البارفان ديالك
شفت فيه قلت ليه :بصح!!
قالي :اه بصح
نضت رشيتها ليه فيدو وحدا عنقو وجلست جمعت حوايجي فالصاك ونفضتو من الغبرة ونقيتو من الجناب وقتلت. ليه
الحمد لله ما سرقوش ليا الصاك عاد شريتو باقي اول مرة نهزو
تلفت شاف فيا قالي داك الصاك اريجينال
قلت ليه اه
قالي شحال واخداه؟
بقيت كنحسب من الفرنك السويسري للدرهم المغربي وقلت. ليه
شريتو بشي ثلاتين الف درهم تقريبا
هز حاجبو قالي ثلاتين الف درهم ولا ثلاتين الف ريال ؟
قلت ليه ثلاتين الف درهم علاش خايب؟
قالي :غاالي وكانو غيرخدو داكشي اللي فيه ويرميوه ..الصاك غلا من تيليفون
قلت ليه هادشي باش كنشريهم !!
قالي الى كنتي كتشري الصاك بثلاتين الف درهم صبايط شحال كتشريهم
قلت ليه هاديك بالونسياكا كنت شريتها بديك تمنالاف وتسعمية درهم
هز حجبانو قالي: بااااخ …تبارك الله ..الصالير ديالي فجوج ..الى كنتي كتشري الصيكان بداك الثمن غير ديني معك لسويسرا
شاف فيا بقا كيضحك وقلت ليه
راه غنديك صافي قررت ..غنمشي نسيفط ايك كونطرا باش تخلص مزيان ..الصراحة كتكرفس بحال هاكا مكيخلصوكمش مزيان . واش غير بوحدك ولا شنو؟
قالي: بحالي بحال كاع الناس باش حسن منهم انا
قلت ليه :ايوا تمشي برا تخدم بالساعة وتخلص حسن من هنا ..كيضلموكم دابا ربي يحاسبهم حيت شركة بحال هادي اللي خدام فيها شركة عملاقة باينة..نتوما خاصكم تخلصو مزيان خصوصا فاش كتوصلو الساعة في امان ..راكم نتوما اللي كتوصلو ليهم سلعتهم وخصهم يشكروكم
تنهد تكا على الشرجم اللي حداه قالي
اااودييي: خلي داك الرماد طافي وصافي
كحزت حداه تكيت على كتفو وشديت ليه فيدو فيدي بجوج وسكت كنشوف فالطريق حسيت بواحد الراحة وبغيت هاد الطريق ماتساليش..بغيت نبقا غادية بلا منحبس فيها واخا سخفاتني وعياتني وتكرفست ولاكن مرتاحة فيها وعاجباني .
حسيت براسي بغيت نعس ونضت تكيت كنشوف فيه وكنقول باز ليه مسكين..يعلم الله شحال فيه ديال النعاس وشحال وهوا سايق وجالس..غيكون عيا
بقيت كنفكر ليه هزيت ليه الهم فراسي وفقلبي وعرفت شحال خدمتو صعيبة ماشي ساهلة..خصها الصبر وكلها مخاطر وسهير كتمص الطاقة وماشي اي واحد يقدر يدير بحال هاد الخدمة ويتنقل مسافة فيها ربعة ساعة ديال الطريق ويرجع ربعة وعشرين ساعة اخرى..السفر مرة فشحال كيسخف ويعيي فما بالك هوا اللي دايرها خدمة وكيخدم كتر ما كيتخلص….خلصتو مكتقضي ليا انا والو كتمشي ليا فنهار .. يستاهل على المجهود وهاد الكفاح وهاد الصبر وحتى الشجاعة انني نعاونو ونمد ليه يد المساعدة ..الحمد لله ربي كيبغيني وعطاني ومما نقدرش نشوفو مكرفس وانا قادرة نعاونو بلا منخسر والو ..طارت عليا الراحة وليت باغا غير فوقاش نديه لسويسرا وحتى الى خدم ودار مجهود يتخلص عليه خسن ما يبقا فهاد الخدمة ديال الويل على والو توقع ليه شي حاجة شي نهار ولا يبقا يتشجع ويغامر بحياتو حتى تجيه فصحتو
بقيت كنفكر ونخمم حتى داني النعاس ..وفاش فقت لقيت الشمس ضاربة ليا فوجهي ونضت حسيت بالبرد شوية ولقيتو مزال سايق
درت يدي على كتافي قلت ليه صباح الخير
تلفت قالي
صباح النور ..نعستي مع راسك راه قربنا نوصلو
قلت ليه :مانعستيش؟
قالي :نعست شوية بالليل
حطيت يدو على الرقبة ديالو من اللور مسحت على شعرو قلت ليه نااري بزاف عليك ..بناقص من هاد الخدمة كن بدلتيها كن حسن
تبسم من عينيه كيسوف قدامو وقالي
ان شاء الله..فطري راه الفطور ديالك ..جمعي فطور وغدا وقبلي علينا
ضرت لقيت سنوديتش فيه الفرناج والبيض وعصير ..وخبزة مقسومة فيها الكفتة مشوية الوسط
هزيت قرعة نغسل وجهي ووقف ليا حتى غسلت وشللت فمي وطلعت بغيت ناكل وقلت ليه
واقيلا خسرتي عليا بزاف دالفلوس فالماكلة
تنهد قالي:وااايلي شخال خسرت عليك وشحال كتاكلي
قلت ليه:بصح !! خسرتي عليا داكشي كامل اللي عندك؟!
قيدا كيضحك قالي الله يهديك اش خسرت ..كولي ماتبقايش تحاسبي بزاف والو بغيتي نزيدك والى تشهيتي شي حاجة قوليها ..شحال قد بنادم يبقا يجمع الفلوس راه كتمشي وتجي
قلت ليه شكرا وجلست فطرت وماقدرتش نزيد وعطيتو ليه قلت ليه خودو ومابغاش بقا كيقولي كليت كليت ولاكن انا حسيت بيه غيكون جاه الجوع عاوتاني واخا كلا وكلتو ليه بزز وبقينا كنضهرو ماحسيتش بالوقت حتى شفت البلاكة دمراكش وقلت ليه
وصلنا؟!!
قالي:وصلتييي.انا مزال غنزيد لكازا
شفت فيه بقا فيا حزنت وتبسمت فنفس الوقت قلت ليه
ربي دابا يعاونك .. نتا انسان مزيان تستاهل غير الخير وربي كيبغي الناس اللي بحالك
بقا ساكت كيشوف قدامو مجاوبنيش حتى وصل للبلاصة اللي هزني منها وكنت لبست حوايجي بقات ليا غير جاكيط نديرها قبل منزل ..دور المرسي جيهتي وجرني من يدي عنقني زير عليا وعنقتو سديت عيني واستنشقت كاع الاكسيجين اللي تما ..مسح على ضهري قالي شكرا ..شكرا ونستيني فهاد السفر
شفت فيه قلت ليه ماشي مشكل غنبقا نوسك ديما ماحدي انا هنا ..واخا عييت وتكرفست ولاكن نمشي معاك على قبلك ماشي مشكل
عنقني كيضحك قالي واخا قلتي ليا عمرني نمشي معاك
قلت ليه واخا هاكاك ..اشغندير غنصبر باش نونسك ماعندي مندير ..مشكييلة دابا
ميل راسو كيشرف فيا ويضحك وعاود عنقني بواحد اليد قالي
دابا غادي نولف ونهار تمشي غنسمح فهاد الخدمة مغنقدرش عليها..الفشوش بزاف كيضسرو
قلت ليه :غير خليها اصلا غتمشي لسويسرا هادا وعد ..انا عارفة شنو كندير
قالي : عتقي باك غيكون تسطا ..ماعطيتو حتى النمرة وتيليفونك. طافي
قلت ليه:لالا هضرت مع حفصة قلت ليها غيطفا ليا ماجبتش معايا شارجوج دابا تقولها ليه
لبست جاكيط ديالي وهزيت صاكي طليت شفت واش كلشي مجموع فيه ونزل سبقني لابس تريكو ديالو مشمر عليه من الكمام خل ليا الباب ومد ليا يديه هزني من تحت يدي هبطني وقالي
فاش غتمشي نشد ليك طاكسي؟
قلت ليه:لالا جبت طموبيلتي ..حطيتها لهيه فماكدو
سد البيبان قالي يالاه نمشي معاك نوصلك
قطعت الشانطي تابعاه كنجري بانت ليا مزالة فبلاصتها كحلة ومربعة عالية فيها الشارة دمرسيديس مدورة وكبيرة من القدام والبولات ديالها مدورين والشتا طاحت عليها كتبان كتبري..
مشيت جيهتها بالزربة وهوا ورايا جبدت الكونطاك شعلات الضوء وحليت الباب لحت صاكي لداخل وضرت عندو قلت ليه صافي غادي تمشي لكازا
بقا ساكت كيشوف فيها وضحك قالي هادي طموبيلتك ؟
قلت ليه اه
رجع اللور كيشوف فيها قالي عرفتي شنو..صدمتيني والله
قلت ليها علاش غنصذمك!!!
قالي:اولا تبارك الله الله يزيدك من فضله ..ثانيا حسابني واش كنتي كضحكي وصافي بخصوص سويسرا وداكشي..
تنهد كيشوف فيها قالي : ماعرفت منقول
بقيت كنشوف فيه ونرمش مافهمت والو وشاف فيا بنص عين داير يديه على جنابو وضحك قالي
حضي مع الناس انهى ..عنداك يضحك عليك شي واحد ولا ينصبو عليك
ضحكت قلت ليه اه راني عارفة كلشي ولاد الحرام الا نتا
حط يدو على وجهه كيضحك قالي
ميمكنش ..نهى ..سويسرا . .الشركة. مرسيديس جي كلاص ..تسطية والله
يتبع
شاركنا رأيك في هذا الفصل 🌹