ضحك وانا كنشوف فالتضاريس ديالو وقالي
عجبوك
قلت ليه وانا كنشرح بيدي جهة صدري
عندك جسم جداب.. يعني مختالف على الغرب
خرج راسو من تيشورط قالي
حنا العرب ماشي هما الغرب..حنا راه مزغبين عليهم
قلت ليه: اه انا عارفة ..ولاكن ماشي زغب مقرف
قالي: لا كاين اللي بحال القرد..حنا دمنا سخون واقيلا على داكشي مزغبين
قلت ليه :يمكن..نتا مدايرش نفخ عضلات
جمع يدو كيضحك حدا الشاشة قالي وراني العضلة يارزة وعروقها بارزين قالي مابانش ليك هاد النفخ ؟
قلت ليه: اه باين ماشي طبيعي
هز حجبانو كيضحك قالي: اشمن نفخ !! منفخوج بالخدمة وهز التقل حط التقل ..الطريق وفوق منها فاش مكتلقا اللي يهبط ديك السلعة كنهبطا راسي
قلت ليه: كاملة !
قالي: كوللللها ..كنت فالاول كنتقطع ..اللحم كيقطع فيا..دابا عادي ولات كتجيني بحال الهبطة
قلت ليه: حاول على راسك ..حيت الصحة مهمة
قالي: مهمة والخبز حتى هوا باش تربي الصحة مهم
قلت ليه : الصحة الى كانت مخدومة على الصح وشوية بشوية مزيان اما اللي منفوخة بالابر والبروتين لا مصالحاش
لبس كابيتشو ديالو كحل ودلا القب على راسو وتكا دار يدو ورا راسو وهزني قدامو قالي
رجعتي للسبور ؟
قلت ليه رجعت كندير غير المشي الصباح والجرى مزال مارجعتش مع الكوتش ديالي.. خاصني نقاد بروكرام نعاود نضم اوقاتي
قالي: مزيان لانسان يكون من منضم
تنهدت قلت ليه : مزال ما لقيتي شي ريزو زوين يشد ليك فالطريق ؟
تنهد قالي: واحبيبية راكي عارفة الريزوات ديال هنا كيدايرين ..تفوت داركم يمشي الريزو كامل
حليت عيني قلت ليه : ااه نسيت..عرفتي ليوم شنو وقع لي
قالي بتركيز : شنو وقع ليك ؟
يديت كنعاود ليه وهوا كيسمع وختمتها بدي على فمي عضيت شنايفي قلت ليه
الحمد لله ماسنييتش
قالي: نااااري..ولاد للل… برافو عليك مزيان مللي ماوقعتيش..مانو ناويين يديرو ليك ميسسسة..بناقص كاع من هاد الكونترا
قلت ليه لالا رادة بالي ماتخافش.. علاش لبستي حوايجك؟
قالي: علااش؟ هههه نبقا عريان
قلت ليه: الجسد ديالك مثير ..
ناض جلس حيد. حوايجو قالي
هاهوا يالاللة
تكا على ضهرو هز يدو ورا راسو كيشوف وقالي
نتي عندك الدار ..اما انا مسخنها غير بالصهد ديالي ههه
قلت ليه حنا عندنا كيحيدو زغب كامل..الجسد المثير هنا هوا اللي كيكون فيه عضلات ورطب مفيهش الزغب
قالي: يمكن اول مرة تشوفي شي واحد هاكا نو؟
قلت ليه لا اول مرة ..المشكل ديال الرجال هنا كيحيدو اللحية ..كيحيدو الشعر ..كايحيدو كلشي.. لدرجة البنات كيفضلو يعايشرو السومر والافارقة .. الرجال الغرب بحال الاطفال.. قليل اللي كايبقا كما هوا .. اما اللي متعلق بالاثارة وداكشي كلهم متبعين هادشي اللي قلت ليك
قالي: حتى هنا ..حنا عندنا البنات عاوتاني مكاين غير نفخ ..نفخ الصدر نفخ لكر .. نفخ الفم ..نتا خارج وهما دايزين حداك بحالللل..بالبگر صدرها لقدام وطرمتها اللور
مكتعرفها غادية ولا جايا بكثرة النفخ
قلت ليه: كيديرو التجميل
قالي: والله ماعرت اش كيديرو ..كياكلو شي حاجة هادو ..
حطيت يدي على بزولتي مصدومة قلت ليه كياكلو الدوا باش يديرو الصدر ؟!!
قالي : والله مانعرف..مهم داكشي ماشي عادي …ياكما تا نتي نتفخة؟
رجعت اللور قلت ليه لاااالا الله ينجيني
حليت الصدقة على صدري كنقيس فيه ونعكبز ونتأكد ونقول شنو اللي بينو منفوخ حتى سولني هاد السؤال . حركت ليه راسي قلت ليه
لا طبيعي!!
دور وجهه قالي : غتبيتينا بلا نعاس هاد الليلة
قلت ليه: سولتيني !! اشنو اللي بان ليك فيه ماشي طبيعي
شاف فيا قالي وااغير سولتك ..غطي داك الصدر غطيي
سديت الصدفة وبقيت حاطة يدي حتى قالي
واحيدي يديك خلينا نهضرو ..الليل هادا والبعد والوحدة غنباتو كنستحلمو
قلت ليه :شنو هي نستحلمو؟
قالي: قارية الدين شوية؟
قلت ليه: قارية القرآن قارية شوية .. الحمد لله
قالي: معارفاش اشناهوا الاستحلام؟. وشناهوا الغسل من الجنابة؟ وشناهوا الوضوء
قلت ليه: الوضوء كنعرفو.. لخرين لا
حل عينو قالي: دابا نتي مزالة مجونبة من العام اللي فات على هاد الحساب
بقيت كنشوف فيه قلت ليه شنو معاناتها؟
شرحها لي بلونكلي صدمني وقلت ليه
لااااا وييلي انا كل نهار نهار كندوش
قالي: وكتغسلي كل شق بوحدو؟
قلت ليه: الشقف؟!
قالي: صافي نساي.. ياك كتغسلي؟
قلت ليه: بيان سيغ
قالي: وصافي الشي لاخر حتى لمن بعد وتعرفيه ماشي فتيليفون
حرك ليه راسي كنتفوه وحطيت حنكي على المخدة كنهضرو و عيني كيتسدو حتى نعست .
صبحت على السباق كنتسابق مع الوقت ..مشيت عند الكونطابل من مور درس التسيير وجلسنا كنخدمو على باقي الاوراق وبالصدفة سولتو على الكونطرات وواش نقدر نجيب مستخديمن من بلاد بعيدة وقالي
بطبيعة الحال تقدري تجيبيهم حتى حاجة مكتنمنعك. يكون المسائل ديالك مضبوطة وصافي
قلت ليه وكيفاش ديك قضية الاقناع اللي خصني نقنع بيها السلطات المعنية الى سولوني علاش مانجيبش مستخديمن من الدول الاروبية .
قالي ساعلة كاين باش تقنعي وكاين عدة اسباب اللي ممكن تأكدي ليهم النوايا الحسنة ديالك بحال مثلا مستخدمين دول العالم الثالت كيخدمو مزيان ..يعطيو مجهود اكثر مقابل تحسين ضروف العيش ديالهم ..كيصبرو .. مكيخلقوش مشاكل لان ضروفهم الاقتصادية مأزمة وباغين يديدو للقدام .. ماعندهمش متطلبات كثيرة وشروط وووو الى اخره عكس المستخدمين لاروبين مثلا اللي من والو كيخلقو مشكل حيت ماعندهمش اسباب تخليهم يصبرو فالعمل ديالهم ..بينما المستخدمين الافارقة مثلا اللي كيجيو بالفيزا ولكونطرا ..وبصعوبة باش كيقدرو يجيو لهنا هادشي كامل وبزاف ديل الاسباب اللي كياخدوها بعين الاعتبار وقيموها ..ماتخافيش من هاد الناحية انا سبق لي خدمت على لكونطرات نقدر نخدم ليك عليهم
قلت ليه: وهادشي واش خصو مثلا مصاريف كثيرة
قالي: لالا .. ماشي ضاروري ي حاحة المهم يكونو المسائل القانونية مضبوطة وصافي
قلت ليه: وشحال ديال لوقت خاص باش تو جد هاد لكونطرا؟
قالي: على حسب..ربع اشهر ست اشهر .. يرسلو لينا الاوراق ديالهم حيت غالبا هما اللي كيديرو روطار حنا هنا عندنا الوقت وقت والرد كيكون سريع الى مكانوش حتى مشاكل ادارية ولا الشركة عندها سوابق ومشاكل فهادشي..ونتي مزيان ..اول تجربة ليك مايرفضوش..مكاين لاش يرفضو والشركة غادية فطريقها المستقيم
قلت ليه:عندي الملفات ديالهم واجدين والطلب حتى واجد ..كلشي فيدي
قالي: شحال هما ديال الناس؟
قلت ليه: جوج ديال الناس..عندهم شواهد دراسية عليا وعندهم اللغة وعندهم كلشي مضبوط
قالي: مزيان..الى كان هاكا شهر شهراين تخرج ليهم لكونطرا
تافقت معاه نرجع عندو غدا نجيب ليه الملفات ديالهم ورتاحيت نسبيا مللي لقيت هوا نيت اللي يتكلف ليا وهوا ادرى مني وعارف كولشي.
رجعت للدار جبدت الملفات وحطيتهم على جنب ومابغيت نقول لناصر والو ..جاني حماس المفاجأة وفرحت وبديت كنتخيل لكونطرا خرجات ليهم وغادي نعلمهم بالخبر وكيفاش غتكون ردة فعلهم .. احساس زوين قلت خلي مانقول والو باش نردك فعلهم بجوج .تسترت على الموضوع وخليت المحادثات ديالي مع ناصر بعاد على الكونطرا واخا عمرو سولني عليهم ولا قالي شي حاجة حتى لواحد كنتفاجأ ..
كنتفاجأ وانا سايقة السيارة باتصال مغربي وديت باستغراب قلت الو
رد: وافييييين اختي نهى ..هل القمر علينا
ضحكت عرفتو هوا ..وشكون من غيرو
قلت ليه: ادمين..صافا
قالي: بااااقا ادمين؟!!
قلت ليه : صافي ولفتها
دخلني واحد الدخلة ديال لاباس بيخير سولني على عائلتي كلها وانا مامولفاش يسولني شي واحد على اخباري كلهم من غير سلام لاباس صافي ..لاكن لاحضت هاد القضية فالمغاربة كيطولو الهضرة غير فكيف الاحوال بجميع مفرداتها .
قلت ليه:صااافا صافا
قالي: واختي نوهاا واا عنننن..خليتني منشور اختي نوها
قلت ليه: منشور ؟!!
قالي: زعما كنتسنا فديك لكونطرا شهر دابا
قلت ليه: اااااه نسيت ..
قالي: لا متقولييييهاش
قلت ليه: باقي باقي
قالي: نو اختي غنزيد نتنشر؟
قلت ليه: شوية .. غير تنشر الى كانت شي حاجة غادي نعلمكم
قالي: واااخا اختي واخا نزيدو نتنشرو ..الربيع خرج وانا مازالت ماخرجت..
قلت ليه: لالا غير تنشرو حتى تكون شي حاجة ونقولها ليكم
قالي: هااحنا ختي منشورين.. غا ماتنسايناش الله يرحم ليك الوالدين ..ااه ماتقوليش لناصر عيطت ليك راه غير طبيت النمرة من تيليفونو وصافي
قلت ليه: طبو٠٠ن!!!
طلق واحد الضحكة قالي: هادييك ..الله يحفضك اختي نوها..سرقتها ليه وصافي خليها بيناتنا
قلت ليه: اوك
ساليت معاه المكالمة وهوا كيطلبني ويرغبني بزز باش قطع ..ومن ديك المكالمة وهوا كل ثلت ايام يصوني ليا حتى لواحد النهار كنت متكية كنهضر انا وناصر ونسيت وقلت ليه ادمين مسكين ديما كيسول فيا
خرج عينيه قالي. فين كيسولك ؟
بقيت ساكتة كنشوف فيه ونرمش وقالي
كيعيط ليك؟!!
قلت ليه: بعد المرات
قالي: خدام ورا ضهري ولد اللدينة ..وانا كنقول مالو مابقاش فارع ليا راسي كل نهار بلكونطرا ..غا بلاتي تا نتلاقاه ..غنشر مو شي نشرة هي هاديك
قلت ليه: راه منشووور مسكين فلكونطرا وانا ماعندي منقوليه حيت مكاين والو دابا
تنهد قالي :ومنين جاب النمرة؟!!
قلت ليه : ماااانعرف
بقا كيشوف فيا وانا كندور وجهي وقالي نوهاات..شوفي فيا مزياان
شفت فيه حالة عيني والطريقة باش كيشوف فيا ضحكت وقلت ليه صافي صافي باي
قالي: سرقها ولد ل٠٠٠بة من تيليفوني .. بقا كيتبربص كيتبربص بيا تا داها ..دااابا نوري لمو
درت ليه باي باي كنضحك وقطعت حيت ماقدرتش نزيد نبقانشوف فيه كنت غنسخف بالضحك .
دازت خمسطاش ليوم بالضبط ومع تسعود ديال الصباح دخلت للدار من بعد الرياضة تاصل بيا الكونطابل قالي
مدام نوها ..المونطرات خرجو ..راهم واجدين اجي خوديهم
اللللللله فرحت واحد الفرحة لا توصف ..حسيت بالدولة عطاني قيمة وتاقت فيا وتزادتني التقة فالنفس حيت حققت شي حاجة اللي حساسة وماشي ساهلة ..ديك الساعة دوشت ومشيت كنجري عندو فرحانة شديتهم فيدي وكنقرا وداك الطابع عليهم ديال الدولة غزال كيشهي ..جلست فشلانة سديت عيني ووفيت بكلمتي ورتاحيت .. فرحت فرحة لا مثيل لها ..شكرتو وعاودت شكرتو وصورتهم للمحامي قالي الكونطرا سليمة ومافيها حتى خطأ..زدت رتاحيت اكثر وطمأنت وطلبت من الكونطابل هوا يتكلف ليا ويرسلها ليهم باش يخرجو من المغرب . دارت الكونطابل خدمتو كما يجب وعطيتو الاجرة ديالو وفوقها بريم زايدة ..قبل منخرج من عندو تاصلت بناصر لقيتو ناعس..قلت ليه ضاروري نشرفكم فابيل فيديو نتا وادمين ليوم ..المسألة مستعجلة .
قالي: علاش واش كاين شي مشكل؟
قلت ليه: مشكل كبييير بزاف وخطير ..ضاروري نشوفكم
قالي: شنو هوا المشكل اشنو واقع ..
مابغيتش نقوليه وبقا كيلح عليا وقلت ليه منقولش ليك حتى نشوفك نت وادمين فآبيل فيديو
قالي: انا داااابا نعيط لمو يهبط فالتران المسالي اللي ولدو .. هوا سباب المشاكل ماطلبتي يبان تا داير شي موصيبة
قلت ليه: المهم فلعشية ضاااروري نشوفكم
قالي قطعي نعيط لديلمو هوا اللي غيقول ليا شنو دار
قطعت وجلست مع لكونطابل قالي يالاه نخرجو ..باش نرسل لكونطرات
قلت ليه اوك وخرجت انا وياه هوا مشا يشوف شغلو وانا مشيت نخرج للماكزا حيت كانو المعدات الجداد اللي غنخطو فالطابق العلوي وصلو..وثفت على كولشي مع الجيرو حتى تقاد كولشي وقالي
واش تبغي تشوفي السيفيات ديال الناس اللي حاطين عندنا حيت خاصنا نزيدو ليبيخسونيل لهاد الطابق
قلت ليه. لا بلا ماتجيب ناس جداد انا عندي الناس اللي غيجيو ..خلي ليهم بلايص خاويين .
جيت نازلة تصادفت مع لجنة المراقبة داخلين ورجعت معاهم دخلو دارو جولة فالمحل ولقاونا صاوبنا البلاطو الجديد وقالو لينا خاصهم مستخدمين جداد حيت هادو اللي عندكم ما كافيينش
وريتهم الكوبي ديال لكونطرات اللي عندي على اساس غيجيو مستخدمين جداد وسولوني على جنسيات المستخدمين اللي عندنا لقاو افارقة سومر وجوج من سويسرا وواحد من فرنسا وعاد الجيرو حتى هوا جنسية فرنسا وانا جنسية المانيا ..عطاوني ورقة ديال الرضى على ديك المراقبة وعطيتها للجيرو يعلقها حتى هيا فالحيط باش تبقا باينة ومشيت بحالي .
غادية فالطريق وتيليفون كيصوني كل مرة يعيط ليا واحد مرة ادمين مرة ناصر .
وصلت للدار جمعت القوى ديالي كلها وجلست فتحت ليهم لاكام كنشوف فيهم جالسين فقهوى بجوج كيشوفو فيا ..
درت يدي على نيفي سديت عيني وهما على اعصابهم كيشوفو فيا مخلوعين وكيتناكرو
ناصر: عرفتي وتكون داير شي حاجة .. والله تا نقلب على مك هاد القهوى
ادمين: واسكتناااا فرعتي لنا مخنا قلنا مادرنا والو
ناصر: مزال مانسيتش ليك النمرة اللي خديتي.. من ورا ما خديتيها وثعات شي حاجة اصلا. زبور مك منحوس
ادمين: ولااااينننييي.. دوي اختي طلقنيا راه عرقنااا
هزيت تيليفون عاضة شنايفي كنشوف فيهم وسيفطت تصاور لكونطرات فالواتاسب فتيليفون ادمين باش تبقا لاكام خدامة فتيليفون ناصر ونشرفهم شنو غيديرو ..رجعت لاكام بالزربة شفت فيهم لقيت ادمين كيخشي يدو فجيب يجبد تيليفون وكيخلف لناصر ما داير شي حاجة .. هز تيليفون شادو وكيشالي بيه ويهضر معاه وانا نقوليه
ااادمين..شوف تيليفون سيفطت ليكم شي حاجة تشوفوها
ناصر: سيفطتيها لينا حنا؟ علاش ماسيفطتيهاش ليا انا!
قلت ليه: نتا داير كام
خل الادمين تيليفون وحاجب داخل فحاجب وطيرو ليه ناصر من يدو قاليه ارا نشوف
دخلو بجوج فالشاشة بنفس التعابير والتساؤل كنشوف شنايفهم كيقراو وانا ونرجع اللور غوت ونقزت قلت ليهم
خرجااااات ليكم كونطراااااااا. غتلقاااوها فالبوسطااا
شافو فيا وانا كنقز فبلاصتي وندور ورجعو للتيليفون كيقراو ويكبرو وشاف فيا ناصر قالي
كونطرا دلكونطرا
وقفت كنرتاح درت يدي على فمي قلت ليه
ااه ..كونطرا دسويسرا
رجع طل على تيليفون وادمين مزال كنشوفو كيكبر الصورة قاليه
فين سميتي!!! هااااهيا…ناريييي هاهيا ..ميمكنش
ناصر: حلفي بالله !!
ادمين: والله تا كونطرا!!
حطو تيليفون شافو فيا قالو ليا واش بصح كتهضري!! مكضحكيش!!! ..قولي اقسم بالله
حركت راسي قلت ليهم كنت مخباياها عليكم حتى تخرج ..ودابا خرجات وسيفطناها ليكم
شاف ناصر فالادمين ولا دمين شاف فيه قاليه
شي طرشة الله يرحم من رباك
بالفرحة ناصر وقف ورجع هز تيليفون كيشوف ويتأكد اما الادمين بقا جالس بحال المصدوم كيشوف فيا حال فمو وهوا اللي كنت متوقعة يدير شي حاجة بقا مصمر بحال المسمار .
طاح ناصر على الكام قالي حلفي حتى بصح
هزيت الكوبي اللي عندي قدامهم وريتو ليهم خرجو عينيهم بجوج وناض نقز شفت البريق فعينيه وجر ادمين عنقو ولاخير مزال مسهوت ..نزل عليه ناصر بواحد الدقة قاليه خرجات الكونطرا الحبس
وقف الادمين كيشوف فالناس وبدا يضحك تدريجيا وقاليه
كونطرا ديال بصح ياك!!! ياك الكونطرا اخاي ناصر ..مكنحلمش ولا شي حاجة !!
شنق عليه ناصر زعزعو قاليه وا كونطراااا واافيق ..وغتمشي لسويسرا الله ينعل ديلمك
طاح ادمين عليا فلاكام قالي ماشي شي برانك ياك .. راه والله تا نتزعز
هبط عليه ناصر كيضحك لضهرو زعزعو تا دخل فالشاشة عاد بدا يستوعب وناض قجأة جر ناصر قاليه بالغوات
خرجاااات ..والله تا خرجااااات … وا سويسراااا واسويسرا اخاي ناصر والعلااااااام
طار عليه عنقو حتى تقلبات الطبلة ولات كتبان ليا غير السما وواحد شناتف ديال النخلة حداهم كيطلو وكنسمع صوتهم ونقز بالفرحة وكيبان ليا غير الضل كيمشي ويجي وغواتهم بجوج عاد هزو الطبلة وقابلوني معاه. شفت السرباي واقف معاهم وادمين كعنقو ويبوسو وناصر واقف وشاد فراسو كيشوف فيا ..
دمعو عيني وجلست كنشوف فيهم بحوج والفرحة غتخرج من عينيهم ..اما القهوى قلبوها وبقاو شحال هاكاك عاد جلسو تقابلو معايا ومزال ماقادرينش يصدقو .
قلت ليهم غدا تقدر توصل .. غتلقاوها حيت ليوم رسلتها ليكم
هبط ناصر يدو على الطبلة وراسو والادمين كيهضر والهضرة تالفة ليه قالي
راه ماقدارش نتيق..واش بصح بصح!! صافي باي باي لو ماغوك
قلت ليه صافي غير تشدوها تقدرو تجيو فأي وقت .. مرحبا بيكم
جر ناصر من عنقو قاليه راه قالت ليه سويسرا مرحبا بيكم ..مرحبا بينا اصاحبي
هز ناصرو راسو وحهه حمر وخط يديه على وجهه كيرتاح حرك ليه راسو قاليه ماقدرتش نهضر.. مزال كنترعد اصاحبي
سديت عيني تنفست بقيت كنشوف فيهم وقلت ليهم فاش تكونو غاديين تاخدوهم ضاروري ديرو ليا كام
قالي ناصر: ماشي غير كام اللي ندير ليك.. راه نتي رااه والله ماعرفت فين نحطك.. كلوتي نعطيها ليك والله وطلبيها تا نعطيها ليك
احساسي لا يوصف .. احساس انك تفرح شي. واحد هوا فحد داتو انجاز عضيم.. حسيت بالجو تبدل عليا والنشاط والحماس وكنتحرك فالدار بحال الريشة..تلفت وكنضحك بوحدي وكلشي تلف ليا مابقيتش عارفة شنو كنت ياغا ندير وكي دايرة حياتي اصلا وفين وقفت وشنو خصني نكمل.. بقيت تحت تأثير الفرحة شحال عاد عرفت راسي خصني نمشي نحفظ شوية الدروس كيتسناوني..مشيت راجعت شوية وتسدات ليا الشهية بقيت غير على المشروبات كنشرب واحساسي كينقز ويغرد ويشطح وقلبي رجع ابو عضلات فرحان وكيستعرض عليا قوتو وعضلاتو ..اما عقلي وقف احتراما ليا كيسفق ليا وقالي
برافو نوهاات.. بينتي انك كبابل .. قادرة تحققي شحال من حاجة شابو ليك .
كلشي حواسي كيحييوني ويسفقو ليا اما معدتي قالت ليا
عفااك اختي راني مكعصة راسهم جالسين ليا على فمي كاملين ماقدراش نستقبل شي حاجة ولا حتى نتحرك ..
نعست ديك الليلة فرحانة ومتحمسة نشوف وجهم فاش يشدوها فيديهم .. بقيت كنحسب الوقت لغد ليه فالصباح وانا كنجري انا وسام حتى صونا ليا ناصر ابيل فيديو ووقف فتحت لاكام فالشارع حدا اللاك شفتهم غاديين يخرجو الكونطرات بجوج
طل عليا الادمين قالي وا مانعساناااااش اختي نهى والله مانعسناااا.. قلبي قلبي ديك لاكام نشو سويسرا الله يحفضك
قلبت الكامرة كنضحك وريتهم المنضر اللي انا حداه وديك العولمة ديال جيت ضو وقالي
اح ححححححح
ناصر: هاحنا حبيبة قربنا ..خليك معانا
قلبت الكام عندي بقيت كنتسنى وبديت كنسمع غير الهضرة خفيفة على توقيع ما توقيع وكيبانو ليا غير رجلين ديال الناس حتى خرجو وقفو حدا واحد الحط و تيليفون فالارض ووقفو مخاطفين على داك الضرف اللي وصلهم كل واحد باغي يخلو
ادمين: ااااحححح على ديك الكتبة ديال سويسرا ..فتح فتح بزربة
حلوه وجبدو الاوراق كانو غيقطعهم حتى خلعوني قلت ليهم ويلي ويلي ويلي بشوية
ماداوهاش فيها وبكثرة اللهفة واحد خدا الورقة ديال لاخر ورجعو تبادبو كيقراو ويشوفو وينقزو برجليهم بحال الى كيتسناو شي بيت يتمركا وفجأة نقزو بجوج فدقة كيغوتو وتعانقو ورجعو للورقة .. وبانت الفرحة فعينيهم ..بكيت فديك اللحضة وانا كنشوف ناصر طار حتى للسما بعد على الارض فواحد القفزة والا مين جلس سرح رجليه حطها على قلبو وهز راسو فالسما كيقول
اللله….الللللله ياربي…اللللله غنموت قبل منوصل
بديت كنضحك ومشيت كنجري فالشارع كتخرج ديك الفرحة وديك الطاقة الاجابية اللي فيا وشادة سام بيدي تابعني حس بيا فرحانة بدا كيجري وينبح وبديت كندور بلاصتي قلت ليهم فوقاش تجيو..توحشتكم بزاااف
قالي ناصر : غداااا ..غدااا غنجي انا عاد باقي نزيد هنا شي ضربة
الا دمين: صااافي سيفيييني.. غدااا تلقاينا تما نكاااينش
ناصر: راه غنخرج ليك من تيليفون انهى قلت ليهم : صافي سيرو وجدو راسكم وعلموني فوقاش تجيو نتعرض ليكم
قالو بجوج : وااجدين
هزيت راسي كنضحك وندور فبلاصتي وهزيت سام عنقتو حيت كنت محتاجة نعنق شي واحد نتقاسم معاه هاد كمية الفرحة اللي حاسة بيها .
بقيت على تواصل معاهم فاش رجعو للدار ودوز ليا ناصر مو مسكينة كتبكي وترضي عليا ولقيت الدار عندهم عامرة قالي راه جا الواليد وخوتي اللي هما خوالي وخواتاتي الشقاق فاش قلت ليهم خرجات ليا لكونطرا ..دارت لينا الواليدة لعشا مسكينة ..اما الادمين غير شد الورقة رجع فتران كيجري
دوز ليا باه اول مرة نتعرف عليه .. بقيت كنسمع ونقول اه خفت نقول شي زبلة عاوتاني ..
شكرني وماخلا مقال ليا حتى حيدات ليه شي بنت تيليفون من يدو قالت لي سلام حبيبة صافا ..كي دايرة
قلت ليها الحمد لله
قالت لي انا ختو وبقات كتشكر فيا وتعاود حتى بغات تبكي قالت لي ماتصوريش شحال فرحنا ..وشحال داز علينا باش يمشي غير لسبانيا ولا فرنسا ..عمرك خيرك نساوه
حيد ليها تيلفون واحد الراجل شوية كبير قالي انا خالو ابنتي لاباس عليك كولشي مزيان ..الله يجازيك بيخير ..فكيتي واحد الكربة كنا عايشينها معاه معالم بيها غير الله ..راك عارفة لواحد الى قرا وماخدمش اش كيوقع ليه ..لا الاه الا الله وصافي
طلات عليا واحد البنت حتى هي قالت قالت لي سلام ختي انا ختو ..يااااه شحال زوينة حسابني كبيرة عليه !!
طير ليها تيليفون كيشوف وراه قاليها
واااا البشااار وااا ..غانننن غنخسرو الهضرة .. قطعي قطعي نهى تنفك من هاد سبيطار ونعيط لك
قطعت كنضحك وديك العشية صونا ليا ادمين قالي هاكي الواليدة بغات تهضر معاك
قلت ليه: اوك
ردات عليا مرى مراكشية تقيلة فالهضرة قالت لي
كي دايرة بنيتي ..لاباس..الله ينورك ..وينورك طريقك ..الله يعطيك ما كتنواي فخاطرك .. كما فرحتيني سيدي. ربي سهل على هاد الولد وتنهيت من جيهتو سيدي ربي مولاي يسهل عليك ونقي طريقك من الشرك ياربي العالمين .
حسيت بيها كتبكي مسكينة وهضر بلاصتها قالي هاكي تا لواليد با يهضر معاك
سمعت بنت صغيرة قالت ليه بيت نهضر تانا
قاليها :سيري بسعي مني دابا نننن قالك تااهيا بيت نهضر اش بيت تقولي ليها!! صافي تانمشي ندجيكوم كاملين اش بيتو كثر من هادي
باه: االو بنتي.. لاباااس.. اااش بيت نكوليك.. الله يرزقك ما تمناي .. هزيتي علينا هم هاد العزاوي كنا هزين ليه الهم .. كي شتي دروكا عيينا نسعاو بيه فالوضائف وفالشركات تا حد ما داها فيه وتعقد بالمعقد لاخر عقدنا معاه رجعات حياتنا عقدة . تا حطك ربي فطريقو بحال الريال دلحلال الله يفتح بيبانك وبيبان الرزق عليك ابنتي.
حسيت بالانشراح فصدري.. حربت احساس الفرحة فاسعاد الغير وطعم السعادة فالخير.. صوتهم وكلامهم ودموعهم اثرو فيا بزاف .. شكروني ودعاو معايا حتى تشبعت بدعاويهم ..دازت عندي الليلة من اجمل ليالي عمري ناعسة وعارفة راسي خليت ناس بايتين بلا نعاس من شدة الفرحة وعندهم الحفلة والسعادة اللي ماتخليهمش يرمشو ولا يغمض ليهم جفن .
خليتهم يستمتعو ورجعت لحياتي العادية . كل ليلة كنبات نهضر انا وناصر ونترقب اخبارهم وفين وصلو وكل مرة كيخبرني بالجديد فحياتو وشنو دار حتى كنعس ليه قدام الشاشة .. خرج من الخدمة اللي كان فيها وتشغل بالفيزا و تجهيز نفسه مباشرة من بعد ما يشد الفيزا .. بقيت انا وياه على اتصال كل نهار حتى عيط ا مين واحد النهار ابيل فيديو خارج من القنصلية هوا ومو وباه هاز الباسبور فيدو فيه الفيزا وكيضحك فرحان ويبوس الراس لمو وباه كيعنقو .. تشارك معايا ديك اللحضات وتكشفت مو فالكامرة كتمشي معنقاه وتبكي وتمسح وتجرو تبوسو ..احساس ميمكنش ليا نوصفو وانا كنشوف بحال ديك المناضر. خرجات ليه قبل ناصر بثلت ايام عاد خرجات لناصر وعيط ليا حتى هوت ابيل فيديو خارج بوحدو من القنصلية نقز وفيدو الباسبور فرحان قالي
نهااا … هانا جاي ليك ..
ضحكت على ردة فعله وهوا غادي وكيقول ليا غنشدك راه ميممكنش..راه غنسرطك بقوة ماتوحشتك وغنتسطا عليك
قلت ليه حتى انا توحشتك وفوقاش غتجي .
قالي: كولشي وجدتو ..حتى حاجة مانسيتها ..كنت كنتسنا الفيزا تخرج صافي وغنجي.. ليوم اخر نهار عندي هنا فالمغرب صافي غدا الصباح غنجي غنتلاقا انا وسيمو فالمطار نجيو بجوج
حطيت يدي على قلبي كنتسنا ديك اللحضة توصل اللي غنتلاقا ليهم هنا وبدا الوقت عندي كيتقال وبكثرة ما متحمسة وغنطير ونحسب الوقت هوا عاد مكيزيد يتقال ماجا فين يطيح الضلام حتى تعصرت مزيان وليت كنقول ياربي غير نعس ..نعس باش نصبح فالنهار د غدا .
عيط ليا الادمين صور ليا الاجواء عندهم فالدار قالي باه داير الصدقة وجايب الفقهاء عندو للدار والجيران كلهم مجموعين.. كل شوية كيقول مابقا والو ..هااننااا عاوتاني سويسرا ..اححححح ..نتي راك الحب والله تا الحب ديال بصح..
قلت ليه شنو غدير فالكروب لمن غتخليه
هز حاجبو قالي: شناهوا !!! اشمن كروب انا كنعرف شي كروب؟
قلت ليه اويلي لكروب !!
قالي: تتتتتاااا واحد مافراسو مسافر.. ريحة السفر ماشامينهاش.. مالي هبيل نقوليهم غادي باش يحضيوني تهبط بيا الطيارة فطنجة ..تا نمشي ونعيط ليهم من تما نضرب عليهم واحد السيلفي مضخااااام نعام اسيدي نفركع بيه داك الكروب نشتت مو
قلت ليه: لالالالا عقاك خليه زوين خليه انا بغيت فاش نمشي للمغرب نبقا نخرج معاهم
قالي: واش باغا غير هايش مايش انا نجمع ليك الهيوش دمراكش فنهار واحد..
قلت ليه :لا غير خليه عجبوني دوك الرحلات
قالي: وا هوااا غايبقا راه كاين دراري اللي يشدوه ومزاحمين معايا على ديك الزقة اللي كنشد مور دوك الرحلات
قلت ليه: ناصر كيصوني لي
قالي: يالاه هوا هادا… نمشي نعس مابقيتش بيييت نحل باقي عيني هنا ..بيت نحلهم فسيوسرا
قطعت عليه كنضحك جاوبت ناصر ابيل فيديو قالي معامن كنتي كتهضري
قلت ليه :مع اديمن كيعاود ليا شكايدير
قالي: داير الزردة اش غيدير .. مسخوط الواليدين
قلت ليه : شنو كدير عندكم الصداع
قالي: العائلة تجمعات ..لخوال ولحباب فين ما كان شي دكالي جا يتزاد غير واحد دابا نخرجو نجلسو فالزنقة
قلت ليه: صافي واجد؟
قالي صافي .. كولشي ناضي
دور ليا الكامرة للبابيزات اللي محطوطين مستفين وكنسمع قوة الهضرا وصوت راجل كيقول
سميتها نهاااا ..وانهاااا باقاااا صغيرة شمن شارفة الشارف هوا باك هههه
بقيت كنضحك وهما كيضحكو فشي مجمع حتى ضار ناصر سد الباب قاليهم الله يعطيكم الغراق..تريكة ديال لللل
قلت ليه مالهم مزيانين ..
قالي فيهم بلايلا بزاااافففف..طيبوني واحق الرب
جلس كيهضر معايا حتى سمعت الباب تخل وهز عينيه قاليه
فيين جااي؟. فين داخل البرهوش؟
الرد: نجلس معاك اخالي
ناصر: يالاه اجي جلس.. بلا بسالة ..دير البسالة نبرح مك من الشرجم
جلس حداه دري صغير قلت ليه حران عليك خليه مسكين
دور راسو قالي : اااحححح نتي اللي مسكينة
بقيت كنشوف فيه ونضر معاه وداك الدري الصغير كيشوف فيا شوية تكبو عليهم كاملين الدراري الصغار كل واحد من جهة ومن ور ضهرو كيطلو وهوا جالس عليهم هدا رسا وبدا يعرف بيهم واحد
هادو ولاد ختي ..هادو بنات ختي هادو ولاد خوتني اللي هما خوالي ..هادو ولاد بنات خوتي لكبار تا هما ..هادا خويا الصغير
عرام بيهم مجوقين عليه شي كيعط خالي شي كيعيط عمي وخوه كيجرو ويقول ناصر ناصر
بقا من واحد لواحد حتى داخ وعيا يصبر وهز يديه قاليه
ومااا عم حد.. ماخال حد ماناصرش ..صااافي ..عرفتي شدير. بلاتي بلاتي بلاتي
جبد عرام ديال الصرف فجيبو قاليهم
اصلا متقل عليا هاد الصرف مابقا عندي مندير بيه ..
فرقو عليهم كاملين ومشاو تشتتو كلهم حتى رجع عندو واحد صغير كيبكي قاليه
انا عطايني ربعة دريال!!
طل ناصر فيدو قالي ماشي عشرة دراهم ؟
قاليه: لا ربعة دريال
خشا يدو كيقلب لقا عشرة دراهم قاليه
هادي اللي بقات كدور يالاه سير
فرقهم كلهم وانا كنتفرج فيه ونهضر معاه حتى تسدو عيني .
الصباح كي فقت لقيت مسج مع الفجر .. قالي مابغيتش نفيقك.. حنا فالمطار دابا ليوم غنتشاوفو احبيبة ديالي ..توحشك
نضت هزيت يدي تكسلت فرحانة وكلي حماس كنتسنا يوصلو..
حسبت ليهم الطريق شحال غيديرو من المغرب للمطار شاغل دو كول فباغي باش يديرو ليسكال وشحال ديال الوقت غيجلسو وي غيتسناو فالمطار حتى يوصل توقيت الطيارة اللي يجيو فيها لسويسرا وشحال ديال الوقت عندهم باش يوصلو لقيتهم غيوصلو مع الربعة ونص هادشي الى ما دارتش الطيارة روطار فباغي وتعطلات ماتقلع .
ضربت ليه حسابهم على الربعة وقاديت بروكرامي اللي مايفوتش الربعة.
كانت تمينة دالصباح ..خديت بروتين ديالي ومشيت لاصال نتريني وكان عندي موعد مع الكوتش ديالي ..ضربتها من الدار حتى لاصال على رجلي كنجري لابسة واحد الشورط كحل ايلاستيك ديال السبور فوق الركبة شوية وفيت دياللو ديال الرياضة من لوكليكسيون الجديدة اللي جبنا ..كانت مجموعة ومزيرة وجمعت شعري ودرت نضاضر على شميسة .. الربيع مالي المكان والجو زوين بزاف خصوصا في فصل الربيع .. درت التسخنيات فديك الطريق ودخلت نيشان مع التوقيت ديالي لقيت فالقاعة
قلت ليه مانحتاجش التسخينات صافي جيت جرية من الدار حتى لهنا .. دزت نيشان ندير سكوات .. حليت بلاكار كان صغير ديال لحديد كنحط فيه الاغراض ديالي الرياضية ..هزيت قفازات مسمطين لبستهم ومشيت للسكوات ..هزيت واحد الحبل تقيل طويل وتقاديت القرفصاء وبديت نعطيه ونحبد مع الارض مزيان حتى حسيت بالعرق نازل مع ضهري.. حيدت ديك الفيتة بقيت بديباردور كحل ديال السبور ورجعت كمل السكواط ومشيت نتاقلت للبكوس. لبست القفازات وبقيت هاك بالاك فواحد الشكارة كنعطيها ونبرد فيها كاع الوقت الس مالعبتش فيه حتى جا الكوتش وقف ورايا شد ليا خصر وقفني قالي ماتحركيش.. يبقا تابت ..يالاه
رجع اللور ميشوف فيا شنو كندير ويحسب ليا وكل مرة يتبت ليا يدي ولا رجلي وانا كنلعب حتى سخنت مزيان ولعبت انا وياه واحد الطرح هوا هاداك عطيتو وعطاني وطيحني ما مرة ماجوج وكنرجع نوض نكمل حتى صونا ليا لكرونو فيدي ورفقت كنهج قلت ليه صافي سالا الوقت ..
بديت كنقطر ودراعين حمارو وركابيا حتى هما وشعري فزك ..مشيت لداك البلاكار الصغير حقدت واحد الفرطة كنخليها تما مشيت شللت غير بالماء ولبست سروال واسع رمادي وتريكو واسع حمر خليتهم سوكور تما ..هزيت الصاك اللي كمشت لداخل جمعت فيه شراوطي ودرت ليه باي بيدي دار ليا بصبعو برافو ورجع يخدم مع اللي ورايا ورجعت انا بحالي فالطرام شريت واحد ديطوكس فكوبلي دوزت بيه الطريق حتى للدار ودخلت عاودت دوش اخر ديال الصح والمعقول.. غسلت شعري ولحمي وخديت واحد نص ساعة راحة فالبانيو عاد خرجت نشفت شعري ومشيت كليت شوية ورجعت خرجت مشيت ليكول كان عندي درس فيه ساعتاين دوزتها وكحاول نتناسا وعيني على الساعة حتى بقات ساعة للربعة ..حسيت بالوقت كينعس عاوتاني..الدرس ساليتو وكنقلب فين ندوزها باش ترصل دغيا..بانت ليا فدفاري وكنت دايرة ديكور فيه شوية دلكحلوتفكرت شنو قالي ناصر ..تفكرت باللي ماعجبوهش ومشيت كنجري بالطموبيل وفيدي كوبلي فيه لافوكا ومكسرات مطحونين كنشرب فيه حتى وصلت للصالون بلا غونديفو ولحسن الحظ دخلت وجلست مالقيتهمش مشغولين.. وعاودو ليا دفاري يالغوز بيبي والابيض حتى صونا ت الربعة وحسيت بقلبي ناض من بلاصتو ..خلصتهم ورجعت كنطير للدافو نبدل حوايجي اللي توسخو بالغبرة ديال الدفار الجداد ..بسرعة البرق حبدت سروال كري هارلي ديال دجين طاي هوت على للكرش ودرت معاه تريكو قصير حد السمطة ديالو غوز مكتوب بالابيض ويديه طوال وطلقت شعري بالزربة نزل ولبست سبادري اديداس وهزيت صاك برادا دزت عليه كنجري ديتو معايا وطلعت فطموبيل مشيت كنطير للمطار ونرش الريحة فالطريق وكنشوف وجهي فالمرايا عاد كنقاد راسي حتى وصلت سطاسيونيت ونزلت هازة غي تيليفون والكونطاك فيدي بكثرة الستريس والحماس مابغيتش كاع نتقال بشي حاجة ..دخلت كندور ونصوني وتالفة فبلاصتي.. وكنقلب فتيليفون على الطيارة اللي جايا واللي حسبت ليها توقيتها واش وصلات لقيتها وصلات
.. بدا قلبي يضرب بالجهد وبديت كنفرد يدي مع بعض وتيليفون عرق ليا وكنمشي من قنت لقنت حتى بانو ليا المسافرين اللي وصلو خارجين . اشمن طيارة خطات هادو ؟ الله واعلم .. سولت واحد على سمية الطيارة اللي جاو فيها ومنين جاو قالي باغي جونيف ..اذا هي .. هي الطيارة اللي عندها ديبار من باغي واللي غيجي فيها ناصر وادمين
ترثرت حسيت بنيفو التوتر طلع ليا اكثر .. وبقيت كنمشي ونجي ..الدورة اللي درت شفت ادمين خارج جار داك الشاريو كيغوت والمطار كامل كيسمع وشهقت وشفت وراه ناصر جاي.. جات عيني فعينو وطلق من الشاريو وجا كيطير عندي وانا حالة يدي بداك الجهد وقوة الاصدام بحال الطحين تلاقينا وطيحين فالارض طاح عليا ونضنا معانقين ..حسيت براسي دخلت بين ضلوعو والصدفة ديال الكويرة اللي لابس دخلات فحنكي وماحسيتش بيها.. توحشت ريحتو ..توحشت الطيف ديالو .. حوايجو تعنيقتو كلشي توحشتو ومعنقاه وماقدراش نشبع بحال هاداك اللي كيشرب ومايشبع بقوة الفرحة بديت كنبكي وكنحس براسو دخل فراسي وفعنقي وكنحس بادمين معنقني من اللور انا وناصر حتى مابقيتش كنبان بيناتهم .. تفرقنا بالشهيق وماجيت فين نطلع النفس حتى عنقني ادمين بالجهد وداني وجابني فبلاصتي بواحد تعنيقة مكمدة وطلقني كيشوف فيا وعينيه غيخرجو من بلاصتهم والضو ضارب فيهم بالفرحة ..اما ناصر حط يدو على نيفو بالمقلوب وقطع النفس حبس البكية وعينيه مغرغرين .. طاحو دموعي وعنقتو وحسيت بيه مخبي وجهه فيا وكيبكي وانا كنشهق ونترعد.. ماقدرتش نتجاوز داك الاحساس..احساس قوى مني زلزل داتي واتر عليا بزاف حتى يديت كنحس بالجسد ديالي تنمل وكنترعد من لداخل… تباعدت انا وياه وذرت يدي بجوج على نيفي كنتنخصص وكنشوف بعض الشباب ضاحك عاجبو الحال وكيصور المنضر ديالنا ..
مسح ناصر وجهه تنفس وعنقني بيدو باس ليا جبهتي ورجع عنقني قالي
توحشتك ماتصوريش قداش
قلت ليه: حتى انا .. توحشتك ..حاسة براسي غنسخف
عطاني الماء شديتو كنترعد شربت منو وعنقني خارجين جارين الشاريو كل مرة يجرني يبوسني فبلاصة . شفت هاكا وهاكا ماعرفت فين زاد ادمين..مشينا لبرا خرجنا لقينا خارج كيطير حتى للزنقة سبقنا فات الباب فالخارج وطلق الشاريو سجد حط راسو على الارض ورجع ناض قاس الارض باسها ونفس الحاجة دارها ناصر فاش خرج من المطار تحنا على الارض قاسها بيدو وحطها على جبهتو وباسها
ركبتهم معايا فالطموبيل غاديين فرحانين كلنا وادمين اللور كيتمنضر فالطريق ويقول
شووف ليا الطرقان .شوف ليا الارض اصاحبي حسن بلاصتي اللي كنعس فيها
هزيت راسي فيه كنضحك وقالي
ختي نوها ..والله نتي رجولة.. صدقتي احسن من نيتي واحق الله شاف فيه ناصر من المرايا كيضحك قاليه
وا لسقا تا نتا اصاحبي وحضااااي
ادمين: حضاي وافختر اخاي .. كون ما الحضية واللسقة كون راك كتصور وتسفط ليا ..كن راه با كيقلب ليا على العقل يشريه بالفلوس..خلييييني ..اللهم حضاي ونعيش هنا فسويسرا ولا ق٠٠٠اد فداك البلاد
ناصر: البلاد مادارت والو اصاحبي..غا الارض وتراب ..خصها تخسف بدوك ولاد لكلاب كاملين ويتعاود التوالد من اللول الى بغات تقاد
ادمين: وكاع لا يتوالدو من عندي انا الله يعطيهم العكر .. خلينا نعيشو ماتعاودش تجبد ليا الحياة تما باغي نفقد الذاكرة انا !
كملت السياقة حتى للدار ووقفت السيارة ونزلت قلت ليهم صافي هنا
قال ادمين وهوا نازل : خليني انا نعيش غا فهاد الطموبيل .. صافي
ضرت عندو كنضحك وحليت الكوفر خرجو الشنط ديالهم كاملين
وهز ادمين راسو قالي
كتسكني هنا ختي نهى ؟
شرت ليه بالكونطاك اللي فيدي قلت ليه
اه كلها هادي داري
ادمين: تباارك الله
ناصر: براكة من الاسئلة اوجه الجوع واه داركم قدها فمراكش
ادمين: فمراكش ماشي فسويسرا.. اش جاب قعو لبعوو
دخلت كنضحك دفعت باب من الحديد كبير كامل مرايات وطلعنا فالدروة وقفت فالطبقة الاولى حليت ليهم باب كبير من الخشب قلت ليهم
دخلو مرحبا بيكم
وقفت فالجنب كنشوف فيهم داخلين كيشوفو فالدار وقلت ليهم
ما زال ما مخملة حيت كان ساكن فيها صاحب ادوارد ومشا بحالو .. الى ماعجباتكمش شي حاجة قولوها ليا نبدلها
ناصر: حسن من برطمات المعاريف انهى .
ادمين: راحسن من دارنا لاعساك.. بشااخ على شوميني.. سمعنيييي.. قالك ماعجباتكمش!!
وابنادم ديلمو فالمغرب ساكن فتقبة والد طناش كيدوز الاحصاء كيبدا عليهم ..اه تلاجة !! تلفازة. فوق التلاجة والفران تحت لفيريكو والمرى والدة ربعطاش كيقيد تمنية ولخرين الله واعلم مهم نسات اصلا شحال والدة وفين هما وحتى باش تعشات لبارح ناسياه وكيقول ليها شحال كتخلصو فضالو كتشير عليه بستين الف كريدي كتسالها ريضال وجارين الضو من البوطو اللي حداهم وسارقين الويفي لجارهم وكيسخنو بالحزاق ويفيقو الصباح مصافين على طواليط قد التقبة مكيجي اللخر فين يبول تا كيبول فانطة … كتقولي ليا ماعجبكمش ..اودييي
جريتهم ورايا وريتهم الدار كلها وبيت النعاس وقلت ليهم
هانتوما ..حتاا ترتاحو على خاطركم وخملوها كيف بغيتو .. والى بغيتو شي حاجة ولا مرتاحيتوش فشي حاجة قولوها ليا انا غير لفوق
ناصر: كولشي هوا هاداك .. ماناقصة حتى حاجة
جرني عنقني وباسني قالي
شكرا .. تعدبتي معانا
ادمين: خيرك عمرني نساه اختي نهى
جلست على واحد الكرسي قلت ليهم
بلعكس انا فرحانة جيتو ..كنحس بواحد الاحساس زوين.. بحال الى جمعت بين المغرب وسويسرا
اديمن: عطيني سيمانة…سيييمانة نولف لهوا مزززيان ونقاد لختي رويحلات من داااكشي هنا ..غير تسناي عليا نسخن بلاصتي
ضحكني قلت ليه ان شاء الله
اما ناصر جر الباليزات ديالو حطهم فالارض قداك واحد الكنبي كحل ديال الجلد حدايا وبدا كيحل فيهم حتى جاه الصهد حيد الكويرة بقا بتيشورط كحلة وقالي
الصهد .. طالقة شي حاجة؟؟
قلت ليه اه شوفاج ديال الضو خدام جاك الصهد
قالي: لا غير هادي صهداتني
جبد واحد الكارطونة مربعة كبيرة قالي هادي سيفطاتها ليك الواليدة
تفاجأت قلت ليه ليا !!
شديتها فرحت بيها قلت ليه تقيلة !!
قالي : واقيلا فيها الحلوة
ادمين: فكرتيييني
جر حتى هوا الباليزات ديالو حلهم حدا ديال ناصر وجبد شي حاجة ملوية بجورنال وهزها قالي هااانا ..هااااهيا
قلت ليه شنو داكشي!!
قالي: الطنجيااااا!!!
هز ناصر راسو كيضحك قاليه : جايب معاك الطنجية لسويسرا امسخوط لواليدين
قلت ليه: بصااااح .. الله .. باقا سخونة ؟؟عطيني ندوق
جيت نوض لاكن قالي وهوا كيحيد الكواغط عليها
خاوية!!! ولاكن نصاوبها لختي
قلت ليه:ههاء!! حسابني عامرة
قالي: ولاش انا جايبها!! نشرف فيها!! غنطيبو الطنجي غير قوليلي فوقاش بغيتي ونوجدوها ..هانا عاوتاني
جبد الطاجين ديال الطين قالي
الطواجن نعام اسيدي.. مكاين غير اوا برررع .. ها البرقووق.. ستة كيلو دالبرقوق ..وها المشماش… ها لاناااناس… هاااااااا العطرية ..بلاتي..هادي المروزية قالت لي الوالدة.. منعرف اشنو دارت خور هنا كاع فهاد العطور… هاااااا الخلييييع اودييع ..ارا برررع .. تمنية دياول سطيلات ولكبار
ضحك ناصر قاليه : جايب معاك جامع الفنا فديك الباليزة !! كنقول مالها كبيرة
ادمين: بلااااتي مزال ماسليت .. هانا وهانا وهاااانا وهاااانااااا وهانااااووو و عاد عادااا.. طق رطقططرطق..طقيتيقات. ..من جماع لفنا لسويسرا
عراهم عطاهم ليا شديتهم. وشحال تقال ..بقيت كنقرقب بيهم وهوا كيجبد ويحط وديك الباليزة تقول كتولد مابغاتش تحبس..كلها عامرة بالماكلة والمفاجآت .. اما ناصر جلس القرفصاء جبد شي حاجة ملوية بحال الكتاب قالي
هاكي.ها الرفيسة ههه..سيفطاتها ليك الواليدة ..وها لمساخن تاهما … هادا قفطان ولا منعرف جلابة ولا منعرف شنو سيفطاتو ليك ختي..ها شربيلو
حطهم حدايا وانا كنشوف فيه كيجبد وقالي
هادي شباكية.. سلو واقيلا هادا !!
ادمين: نصاوب ليك شي معيجنات بداك سلو اخاي ناصر ناااضيين
ناصر: اهاه ومنين غتجيب لعشوب اعشيري
ادمين: بلاتي نطل من سرجم نعيط عليهم يبانو ..
ناصر:شو. الواليدة تا هي شنو عاطياني!! الصايون البلدي والكيوسة دلحمام ههه.بقيت كنشد ونخشي ماعرفت تا شنو جمعت واحق الرب
ادمين: ها خو دنجال .. عشوب اتاي
قلت ليهم : ماشدوكمش فالمطار يقولو ليكم شنو هادشي!!
ناصر: راه ولد الحرام كان غيخرج علينا بداك خوه الدنجال ..داونا كيقلبو شنو داكشي مرضونا عاد طلقونا
قلت ليهم: حيت هادشي كيشكو فيه
ناصر: اكبر مونتيف هاز انا هوا هاد الولد …..
اديمن: وفاللخر حا لاخر قاليهم مو دنجال وصدقنا عاطينو شوية ..مالك اصاحبي
نضت قلت ليهم خليكم ترتاحو وتستفو الحوايج ديالكم ..راه عندكم بلاكارات وببثت نعاس .. من بعد نجيبو ناموسيات صغار
اديمن : بلاتي.. هاكي هاد الصاك ماعرت اش فيه سيفطاتو ليك الواليدة
تبسمت ونضت هزيت داكشي اللي عطاوني كامل حتى وصل لراسي وقلت ليهم
هانا لفوق الى بغيتو شي حاجة طلعوعندي
طلعت خطيت داكشي فبيتي ويالاه جلست نشوف شنو فيهم سمعت الصونيت ومشيت حليت الباب لقيت ناصر واقف كيضحك ودرت ليه الطريق قلت ليه ناصر ! دخل
دخل وكان هاز شي حاجة فيدو ..سرح عينو فالدار بعيون مبسمة قالي
دارك زوينة
قلت ليه: من بعد ونصلحو الدار فين كاينين نتوما دابا
هيط عينو فداكشي اللي هاز قالي مكاين لاش ..
مد ليا داكشي قالي
قبلي علينا ..وسمحي لينا ..ماشي حاجة كثيرة قدام داكشي اللي درتي معانا ولاكن غير نتحركو شوية نكملو ليك الباقي
شديت داك الضرف فيدي مستغربة فشنو داكشي وكنحس بيه تقيل.. حليتو لقيت فيه فلوس كتيرة مصرفة للفرنك وبقيت كنشوف فيهم
قلت ليه ..شنو هادشي ؟
قالي وهوا حشمان كيدور فعينيه : قبلي علينا وصافي
جبد داكشي يديت كنحسب لقيت لقيت خمسة ديال المجموعات فرنيكة كتجي عشرة دالمليون مغربية وشفت قلت ليه
دايلاش؟
قالي: ديال لكونطرات اللي صاوبتي لينا.. غير نتحركو نكملو ليك الباقي ان شاء الله
بقيت كنشوف فيه مطولا قلت ليه
واش بصح كتهضر ؟؟. واش قلت ليك خلصني اناصر
قالي: ماشي كنخلصك انهى .. نتي اولا من هادوك اللي نصبر علينا وتستاهلي كتر..حنا كنا عوالين نخلصو الكونطرا شحال جات ..ونتي اولا بيهم
رديتهم ليه ليديه قالت ليه
انا مابغيتش الفلوس؟ شكون قالك انا باغا الفلوس؟ انا بغيت نطلعكم باش تحسنو الوضعية ديالكم ماشي باش نزيد نكمل عليكم..دابا نتوما محتاجين لهاد الفلوس ..وسويسرا فيها العيشة غالية ..غادي تحتاجوهم على بيدمن تستاقر الوضعية ديالكم المادية شوية
ردهم ليا بجدية قالي: شوفي ايلا ماشديتيهمش مغنتفاهموش.. شديهم باش حنا نرتاحو ..
دورت وجهي قلت ليه : لالالالالا
مابغيتش نشدهم وحطهم ليا على واحد الطبلة قالي
والو غتشديهم باش نبقاو مزيانين.. يا تشديهم يا مغنتفاهموش؟
ضرت عندو بقيت كنشوف فيه قلت ليه علاش اناصر كتقول هاكا؟ علاش شنو درت ليك باش تقولي مانتفاهموش
تنهد بتعب وتبسم وجا عندي عنقني قالي
غير هضرة كنقولوها وصافي .. عمرنا نتخالفو انا ونتي واخا .. ولاكن شديهم عفاك باش نرتاح .. انا مغنقدرش نرتاح والله مانقدر غانمرض فهمتي
قلت ليه: ولاكن انا ماطلبت منك والو ؟ علاش غتمرض؟ علاش فين كاين المشكل
قالي: ماكاين حتى مشكل.. ولاكن انا مغنشوفش الراحة وانا هنا معاك فسويسرا الى ماشديتيش لفلوس
قلت ليه: انا عندي الفلوس هادشي راه ماعندي مندير بيه ..نتوما محتاجينو علاش غنشدو انا ونشري بيه صاك ولا صندالة ونتوما ماعندكمش!! علاش زعما
قالي: صافي شري بيهم صاك ولا شي حاجة ..ماشي مشكل ..المهم شديهم وشري اللي بغيتي
قلت ليه: مابغييييتش اناصر كن بغيت صاك ولا صندالة كن مشيت شريتو .. انا مابغيتش هاد الفلوس ومغنشدهمش واخا تموت دااابا هنا ..مغنشدهمش.. نتا رتاح وانا نبقا هازة الهم وضميري يحرقني ..راه يحرقني مايعقلش عليا
ضحك قالي: ضميرك ماعندو مايقول ليك ..عادي حنا الحمد لله مسلكييينها
تنهدت قلت ليه: انا عارفة ضميري.. غيمرضني .. خليني عفاك هاكا ..
قالي: ايوا لاا.. وانا منين غدوز ليا النفس!! صافي خليهم محطوين تما ماتقيسسهمش كاع وهني راسك ..يالاه
ضار كيتهرب ليا وانا نجرو قلت ليه
هزهم ..هزهم ولا غنتعصب
قالي وصافي: خليهم حتى لمن نبعد
قلت ليه: لالالا هزهم مايبقاوش عندي هنا ..الى بغيتي تشكرني شري ليا كادو وصافي
قالي: كادو ؟! ..واخا لاللة
مشا هزهم لواهم وانا كنشوف فيهم غادي وتبعتو للباب قلت ليه ناصر
بلاتي.. الى مشيتي حتى شريتي ليا شي كادو ساوي هاد الفلوس كلها غتخسرني..اوك
تلفت بقا كيشوف فيا ويرمش وقالي
واا..اا.. والله تا حشومة عليك
قلت ليه: انا قابلة بكادو مايفوتش عشرالاف درهم مغربية.. الى فاتها مغاديش نقبلو ..والفوس مغنقبلهمش بلا متحاول ..كضيعك جهدك وصافي
بقا كيشوف فيا مطولا حيت بيه ماعجبوش الحال وعقد دوك الحجبان وهبط كيلوح فيدو بدوك الفلوس ويشوف فيهم ويرخي يدو حسيت بيه شادهم بحال الى شاد العافية ..
خليتهم يرتاحو مك ويقادو حوايجهم فخاطرهم ودخلت للكوزينة نقاد شي حاجة للماكلة ..نتعشاو بيها كلنا ..اكيد غيلقاو تلاجة خاوية وهما عاد وصلو واخا مكنعرفش نطيب نهائيا.. من غير داكشي لخفيف بحال البيض ولا لي لي غوسيط ديال الرجيم الساهلين اللي فيهم غي خضرة مقطعة اما البقية مكنعرفش ندير هادي مع هادي وشنو كيجي مع هادا وهادا كيفاش يطيب .جبدت واحد الكتاب قلت نطيب شي حاجة تقيلة زعما حيت حنا دابا ثلاتة .. قارنت الوصفات مع داكشي اللي عندي فتلاجة وبانت لي اسهل وصفة هي الروز ..غسلتو وحطيتو يتصلق ودرت فيه دجاج مقطع وخضرة مقطعة وقطعت الربيع وبديت كنزيد فالعطرية وخليتو كيطيب ومشيت وجدت الطبلة وداكشي ديالها ونزلت عندهم دقيت فتح ليا ادمين وشعرو كيقطر فازك
قلت ليه بالصحة دوش ..شنو كديرو
قالي: الله يعطيك الصحة ..هاحنا كنخرجو داكشي اللي خصو يخرج وكنردو داكشي اللي خصو يرجع ..
قلبت بعيني على ناصر وسولت عليه قالي راه كيدوش
جلست درت رجل على رجل قلت ليهم العشا كيطيب .. يالاه باش نتعشاو
ادمين: هاي هاي هاي على العشا كيطيب..
ضحكني قلت ليه وصااافي ماتحشمنييش.. مكنعرفش نطيب ولاكن غادي تاكلو عليهم يديكم
سمعت الباب تحل وانا كنهضر وضرت جهة الحمام شفت ناصر خاوج ملوي عليه فوطة كحلة وكيمسح شعرو بالفوطة التانية.
ضار عندي حسيت بيه تفاجأ ولاكن انا عيني مشاو لتفاصيل جسمه وكيفاش داكشي مقاد ونازل ومرتب وداك الشعر كحل رطب ..حسيت بابتسامتي تفيكسات على ديك الاشراقة ديال الدوش ..ضحت قلت ليه بالصحة والراحة
دار نيشان ماوقفش قالي الله يعطيك الصحة
شفت فالادمين قلت ليه : مالو؟
قالي: والو!!
قلت ليه: ماهضرش معايا مقلق مني!!
قالي: لاا راه مشا غير يلبس حوايجو
قلت ليه : ااه ..فهمتك
قفزت انا وياه على صوت جهاز الاسعاف اللي فدار قالي
شنو هادشي!! بنكة تحت منكم
مشت كنجري قلت ليه العشاااا لعشااا ويلي ويييلي ويلي
طلعنا كنجريو لقينا الطنجرة كتشوط والدخان طالع وجرس الاندار كيصمك الودنين.. مشيت كنجري طفيت ليها وبديت كنكحب من ريحة الحريق خنقاتني ومشيت طفيت جرس الاندار وادمين واقف شاد راسو
قالي: كنتي كتحرقي الدار كاملة !! واش نسيتيها
شعلت جهاز تصفية الجو بالزربة قلت ليه
حسابني غتعطل كطيب
مشا بالزربة هز الطنجرة وبدا يتفتف على الطبسيل لقاه فالجنب وحيد داكشي الطري اللي لفوق ويدا كيطرها بشوية و وقالي
الروز والحليب غير دور وجهك صافي ..واحد يفيض واحد ينشف
وقفت حداه قلت ليه واش باقي مزيان ؟
قالي: النص اللي لفوق مزيان ..اللي لتحت ماشي غير لسق .. خل مع الطنجرة
حطها فلافابو طلق عليها الماء بالزربة عاد طلع ناصر لابس سروال سورفيت واسع وتيشورط كحلة كيشوف فالدار قالينا
شنو واقع !! شديك الصفارة كانت كتصفر شي عافية ولا شنو
تبسمت قلت ليه
لا والو غير درت ليكم لعشا وتحرق.. ولاكن ماتحرقش كامل غير النص
بقا كيشوق فداك الدخان قالي
مانتابهتيش ؟. كن شعلت العافية فالدار
ادمين: وكانت كتشبك اخاي ناصر كن ماديك الصفارة كن لقينا غير الضالة
هزيت الطبسيل قلت ليهم اجيو اجيو تعشاو.. راه باقي زوين غيعجبكم
حطيت الطبسيل فوق الطبلة لاكن ناصر بغا يرجع قالي
انا مافيا اللي ياكل فيا النعاس مشيت جريتو قلت ليه غير دوق غيعجبك ..هانتا دوق
جيتو حدا الطبلة جلستو وجلست حداه عطيتهم الفورشيط وبقيت كنشوف فيهم
داق ادمين اللقمة اللولة قالي
البنة ديال الشوا فالروز ..
شفت فناصر كنتسنى رأيو لاكن ما قال والو بقا ساكت كيمضغ بحال الى كيمضغ الشوك وماباغيش يسرطو ..مافهمتش مالو ما كيضحكش وماكيهضرش !! شفت فادمين قلت ليه واش زوين
قالي: ناقصو الملحة
مشيت جبت ليهم الملحة ولقيت ناصر حط الملعقة ووقف جرني من خصري قالي
ميغسي
وباسني من جبهتي وقالي. بون وي
مشا وخلاني واقفة كنشوف فيه ودور وجههي عند ادمين قلت ليه
مالو ؟
قالي: راك عارفة دابا مع الصفر مع العيا ..الشهية كتسد..ولاكن تبارك الله عليك هدشي هوا هاداك ماعندي مانتسالك ..ناقص ملحة وصافي
جلست حداه ضحكت قلت ليه
بصح ؟! كول بالصحة والراحة
ادمين تعشا وانا جالسة حداه كنشوف فيه عجبني الحال .. كل مرة يقولي كولي لاكن انا دايرة ريجيم ماقدرتش ندوق .. بقيت حاضياه كنسولو وا عجبك ؟ واش ما عجبكش.. حتى كنلو كامل وسخف ورجع اللور قالي
صافي.. جا وااعر اختي نهى كن ماكانش زوين ما نكملوش ..
قلت ليه: بصحح!!! صافي نزعم نبقا نطيب
تقاد فالجلسة قالي: لالالالالالا بلاااش عليك.. مالكي شداك لشي طياب.. خليك حتااا وكان يكون عندك الوقت وسقلي الموهبة ديالك..بلا ماضيعها وضيعي وقتك ..حتى تقراي عليها ان شااااااااااء الله الرحمان الرحيم عاااد ديك الساعة دخلي فالطياب من اوسع ابوابه
ضحكت فرحت حيت اول مرة تصدق ليا شي حاجة فحياتي من جهة الطياب وقلت ليه
هي الصراحة ماكيعجبنيش اصلا نطيب .. ديك قسس قسس فالبصلة والربيع وداكشي
حط يدو على فمو قالي
لالالالا بلاش خليك بعيد على شي ربيع .. وحتا الى قالك راسك صاوبي شي تخربيقة بلاش ماديري فيها شي ربيع حيت جا الكرافس مجهد بغيت نقول الربيع جا مجهد عطا البنة
حرك راسي مافهمتوش مزيان ولاكن بان ليا كيشكر ماكلتي وعجباتو وقالت
ااه ..صافي ..نسقلب الموهبة
هز يدو قالي فالهوا قالي : سقليها .. سقليها مززيان باش تسقل اختي نهاا ..احمم المهم هوا هادا الله يجعل البراكة تصبحيعلى خير
نضت وقفت قلت ليه اااه نسيت .. غدا طيب لينا الطنجية ؟!! كتب ليا داكشي اللي خاص نجيبو معايا
حرك صبعو ويدو على فمو فيه فوقة قالي
لاااالالا لهلى يمحنك انا نمشي نتقداه غير رتاحي
قلت ليه:شكرا..عفاك طيبها لينا فالغدا حيت انا مكنتعشاش بالليل..باش نقدر ناكل صافي؟
قالي: كوني هااانيا اختي نهى يصبح ويفتح ان شاء الله تصبحي على خير
خرج مشا وسديت الباب وراه فرحانة مشيت كنجري جمعت الطبلة وحطيت الماعن فلا فيسيل ..
نفسي: نهى ..الصراحة تبارك الله عليك ماعندي مانتسالك..
عقلي:شتي. نتي انهى راه عندك مواهب ضايعة.. ادمين عندو الحق خصك تسقليها ..ايوا هانتي جاب ليك الله لمن طيبي وتفنني واخا نتي دايرة ريجيم وماكتاكليش
نفسي: لالالالا اشمن طياب.. واخا عندك الموهبة ..لالالا خليك بعيدة على داكشي انا مكنتحملشديك قطع قطع طبخ طبخ .. بغيت اللي يطيب ويعطيني ومافيا اللي يبقا يتقدا ويجلس فلكوزينة ثلاتة دسوايع .. شوفي غيد روز وداكشي شحال خدا ليك دالوقت وشحال ونتي كتوجدي ماعييتيش
عقلي: وا مراااا مرا ماشي دييييما ..
ضميري: الللله على راحة … الله يدوم هاد الكونجي على خير وبيخير
قلبي: انا مامرتاتحش… انا محتاج نصي تاتي حدايا عاد نرتاح .. حاليا انا غضبان فكعان زمران خريان .. نزلي عند ناصر ولا قولي ليه يطلع عندنا نجلسو شوية معاه
عقلي: ليزابدو .. داكشي من داكشي انهى هااا.. شي نعيسة فوق دوك ليزابدو ولا تمريرة باليديدة. .. احمم .. مااانعرف كيفاش غيكون ننن..هااا كيشبه لفوق ولا شي حاجة احسن
نفسي: ويييلي حشمت .. اويييلي شكيقول .. ويلي راني ماكرهتش ..اويلي حشمت !! اويييلي شكنقول تلفت
زوزو: ااااااااااحح صباح الخير .. عام ماشفتكم الاخوان كيق دايرين كيف عاملين اش خباركم ..شميت شي ريحة وجاتني الحكة ..توحشت نحك جنابي كلشي كياكلني
عقلي: كاااين اللي يحك ليك غير هوا كيفاش عندو الحكان داير مانعرف يالاه شفنا ليزابدو والضهر
اويييلي ..احم احم ..شنو هادشي كنفكر فيه واش مالي حماقيت!! ..نمشي نعس احسن ليا
فقت الصباح على عادتي.. تبسمت فرحانة فاش تفكرت باللي ناصر غير تحت مني كاين ..مابغيتش نطل عليهم ولا نقلق راحتهم وخليتهم وخرجت بحال العادة ان ا وسام نجريو ..الهوا نقي والفياق بكري من عادتي من نهار الاول جربتو ولقيت راحتي عليه قررت نمشي على نضام واحد وفعلا حياتي تغيرات للافضل وحتى الجسم ديالي تحسن .
تمشيت تمنية كيلو متر فالمشية ورجعت تمنية كيلومتر اخرى حتى قربت للدار ودخلت للميني ماركت اللي قدامي ناخد شي حليب وشي حاجة.. زدت شوية كنشوف شنو ناخد اكثر وشادة سام بالسمطة
حتى كيبان لي واحدالشاب من دون دوك الكور اللي تما وبوحدو شعرو كحل جالس القرفصاء لابس سورفيت كحلة قدام واحد الدرج ديال الحليب وشاد فيدو كرطونة كيقرا ..تبسمت جاني كيشبه لناصر بزاف .. تبسمت بلا منشعر حسيت بقلبي ضرب لاكن دورت وجههي مشيت وقفت بعيدة عليه شوية ناخد الحليب.. هزيت اللي هزيت ومع ضرت وقف هوا وتصدمت ضحكت قلت ليه
ناصر!!!
تفاجأ فاش عيطت ليه وشاف فيا قالي
نهى!!
مشيت عنقتو قلت ليه
ماحسابش ليا نتا .. حسابني شيواحد كيشبه ليك .
باسني فعنقي بقوة مع التعنيقة وقالي
فين كنتي ؟
شاف فسام وقالي: هادا هوا الحيوان
هزيت سام قلت ليه
ماتقوليهش الحيوان .. ضريف
قالي كيضحك: وشنو نقوليه !!
مد يدو يلعب مع سام وهوا يعضو من صبعو حتى تصدمت قلت لقيه
هييه!!! ويلي ويلي!!
شفت فسام كيعوج راسو حسيت بيه مقلق ومامرتاحش وعنقتو كنهدنو ونخفف من الغيرة الى كان حس بيها .. اما ناصر بقا غير كيشوف فيا قالي
انا اللي عضيتو!! بوسيه بوسيييه مسكين سعداتو .. انا اللي عاضو وكنت غنطير ليه صبعو
شديت ليه صبعو طليب عليه قلت ليه وا غير عضيضة ..ماشي عضاااا
ناصر: عضييضة ..ايه غير عضيضة وصافي
ضحكاتني طريقة ناصر فالهضرة وطليت على شنو خدا لقيتو تقدا مزيان
قلت ليه : علاش ماقلتيش ليا بغيتي تقدا نوريك فين كان كولشي وعندك اختيارات
قالي: وا ماعرفتش بان ليا هاد القنت صافي هنا
قلت ليه: حط دابا داكشي ..نفطرو ونمشيو نوريكم بعدا لمكازا فين كاينة ..اصلا مزال ماتبداو الخدمة حيت البلاطو ديالكم مزال موجد كامل باقي ليه فينيسيو .. وديك الساعة نمشيو نتقداو
قالي: صافي بلاتي نرجع هادشي..
قلت ليه: رجع كولشي
قالي: لالا هادو غنخليهم للفطور
قلت ليه: هاهوا ديال الفيور عندي ..صافي رجع داكشي
مشا رجع كولشي ورجع عندي حدا لاكيس سبقني وحط الفلوس بقيت غير كنشوف فيه
هز بيا الصاك ديال التقدية اللي خديت وخرج سبقني خلاني كنشوف فيه !! تبعتو جريتو من يدو قلت ليه
علاش خلصتيه!! انا معايا فلوس عل…
ضار عندي قالي سمعي سمعي سمعي ..انا عندي انا مانعرف شنو..اخر مرة تقولي ليا عندي ماتخلصش..ولا ماتعطينيش..تفاهمنا ..خلصت انا بحال الى خلصتي نتي صافي
قلت ليه: لا راه بصح هادة معايا علاش خلصتيه دابا يالاه؟!!
قالي: حتى انا هاز معايا .. صافي ماتبقايش تحاسبي بزاف انهى
زاد قدامي خلاني واقفة قطع الشانطي وضار عندي لقاني مزالة واقفة فبلاصتي وقالي
ويالاه !!
قطعت الشارع عندو بقيت غير كنشوف فيه ودزت فيه طلعت للدار وتبعني دخل ورايا ..حطيت سام فكيتو مشا كينقز وضرت عندو قلت ليه
تيست ديالك خرج نيكاتيف ياك ؟
بقا كيشوف مطولا وقالي
اشمن تيست؟!
قلت ليه: تيست ديالك ..هضرنا فهادشي قلت ليك تقدر تجي ويتبدل الرأي ديالك فيا .. تقدر تلقا راسك كنتي فنزوة وصافي
ضحك باستغراب قالي : اشمن نزوة !! اش كتخربقي انهى !!
قلت ليه: قولي الصراحة ..بلا متكدب عليا
قالي: مكنكدبش عليك ..علاش غنكدب؟! شنو كاين ؟
قلت ليه: تبدلتي عليا..مابقيتيش كما كنتي.. وليتي كتعاملني ببرودة !! تبدلتي اناصر غير من لبارح ليوم كنحس براسي كنهضر مع شي واحد مكنعرفرش
تزيرت حسيت بالبكية غير رميت ليه الهضرة ومشيت للحمام وزدحت الباب ،حسيت بالخنقة وناضو الحواس ديالي كيتحاربو عاوتاني .. بدا كيعيط ليا من مور الباب وانا كنحيد حوايجي قلت ليه ما بغيتش نهضر ..صافي انا دابا محساش براسي عادية ..
قالي:حلي الباب .. قولي ليا مالكي !! ماوقع والو علاش تقلبي هاد القلبة هادي
حليت الرشاشة بالزربة دخلت تحت منها مجاوبتوش.. بديت كنخلط ونجلط ماعرفت راسي باش كنغسل ..البكية فيا و وحاسة بيه مابقاش باغيني اصلا.. نفر مني وزاد وخلاني واقفة ولبارح مشا ماهضرش معايا .. واش كيحاول يخلي بيني وبينو الحدود ولا شنو؟ داك القرب اللي كان بيني وبينو م ابقاش..حسيت براسي كنهضر مع واحد اخر !!
طليت راسي بالرغوة والماء كيهبط كنسمعو حدى الباب كيطلب مني نحل ليه الباب وقالي
خرجي ندوي معاك..
قلت ليه :كندوش .
قالي: هانا غادي
مجاوبتوش وزدت تأزمت اكثر فاش قالي انا غادي. بكيت ديك الساعة وماعارفاش علاش اصلا كنبكي!! كنحس بالاهمال من جيتو واخا كنت متوقعة هادشي وعاملة بحسابو حتى هوا لاكن حسيت بالالم فصدري وبالديق والاختناق ..ماعرفتش كي درت لداك الدوش ديال الرياضة حتى لقيت راسي كنلوي عليا الفوطة فوق شعري ونتنخصص..لويت الفوطة وكنفكر شنو ندير ..شنو ندير مع راسي اما هوا حر فحياتو..انا كيفاش غنضبط راسي!! تمنيت كن جاني البرود بحالو ونخرجو بتعادل كان يكون حسن .
حليت الباب بغيت نخرج ولقيتو وااقف قدامي خلعني حتى رجعت اللور .. دفع الباب دخل عليا وسط الدوش قالي
مالكي؟! شنو واقع؟
بقيت كنشوف فيه هربات ليا الهضرة ماعرفت شنو نقوليه وحسابني وحسو تقطع .. بقيت كنرمش حتى تهدنت قلت ليه مامستعاداش نهضر دابا وضرت بغيت نمشي جهة المرايا لاكن جوني من الرقبة ديالي بواحد القبضة بحال الى قبطني شي لقاط وجرني ودورني بجهد نيشان جاب ليا فمي على فمو باسني ووبقا شادني من رقبتي غادي بيا حتى لسقت مع لافابو دالمرايا وبعد شوية قالي
شكون قاليك تيست ديالي خرج نيكاتيف ؟ امم
شدني من وجهي بيديه بجوج باسني حتى بديت كنترعد ..مافهمت حتى حاجة .. زرب عليا ماعرفت مانقول ليه نسيت حتى فاش كنت كنفكر وسط دوك القبلات الحارة اللي كنت كنستقبل بحال شي وحدة اول مرة تعرف شنو هما القبلات وتتعرف على احساسهم .. ستاجبت معاه وكنحاول نتقاد انا وياه فالمستوى لاكن غلب عليا وليت كنهج بغيت نرتاح نرد النفس الباردة لاكن مكاين غير الشوم والصهد والنفس كتحرق.. بقينا هاكا وهزني جلسني حدا لافابو تقادينا فالطول ..قبلة ورا قبلة بحال شي الة كتعطي وتشفط.. ماعرفت راسي كيفاش ندير !! فين ما حط يدو كيهرني وكنعواج ونبعد ليه يدو وكملات فاش هبط لعنقي شدني واحد الشدة حتى خرجت الصوت .
رجع اللور شوية و طلعت النفس واحد الثانية فين حيد كاع داكشي اللي كان لابس من لفوق بقا بسروال بوحدو .. بلعت ريقي كنشوف فدوك ليزابدو اللي وليت مني ليهوم وكنقيسهم بيدي ..حسيت براسي تشتت والفوطة دشعري طاحت اللور وجر ليا الفوطة اللي ملوية كانت على سبة تحلات .. جيت ندرق بيدي وبعدها دخل يديه بين يدي وجسمي وانطلقات الرحلة ..مابقيت لا كنسمع لا كنشوف وليت كنحس وصافي وتركيزي مشا وجميع حواسي هاجو فمرة وحدة ب الطريقة اللي تعامل معايا بيها وليت كنشد ليه فراسو الى تحنا على صدري وفكتافو للى طلع فمي وهوا كينهج .. هز ليا رجليا حتى وانا جالسة حتى كنت غنتقلب وشدني من رقبتي جلسني .. شاف فعيني كيضحك وكيقرب وانا نخرج حسيت …
سخفت وعييت وكنت غنموت حسيت براسي فقبضة هرقل .. شطحت على لافابو حتى شبعت وبقيت كنشوف فداكشي مابغاش يسالي.. انا مع الدقة اللولة سلمت .. عاد تبعني هوا وبعد شوية قدف على برا قدام عيني ..شفت فالعضو التناسلي ديالو وخرجت عيني كنقول وييلي!! شنو هادا! هادشي ماشي عادي
جمعت رجلي بزز وعضامي مفصلين ولسقت مع الخشب حتى كان غيطيح .. هز الرشاشة كيشلل ولويت عليا الفوطة دغيا وقفت حداه كنطل عليه وهوا كيضحك قالي
اشنو كتشوفي؟
شرت ليه بصبعي كنتسائل: شنو ؟!! هادشي ؟
قالي: مالو هادشي؟!
قلت ليه: داير تجميل!!!
قالي: لا داير الحلقة..اشمن تجميل كتهضري بصح!!
وصفت ليه بيدي كنهضر قلت ليه
عندك بحال هاكا ..شابو
قالي: عادي ختانة هادي ..حيدي هاد الفوطة واجي
حيد ليا الفوطة جرني عندو قبل منكمل هضرتي باسني وهزني ليا راسي كيبوسني قالي
جوتيم
عنقتو قلت ليه
حتى انا
عنقني بقوة وانا كندوز يدي على ضهرو فرحانة ورجعت شفت فيه وشرت ليه لتحت قلت ليه
واش كلشي الرجال بحال هاكا ؟
بقا كيشوف فيا باستغراب عاد طلق البشرة قالي
ااه .. دابا فمهتك .. المسلمين ..هاكا دايرين كلهم مختنين .. الشي لاخر لا ..اول مرة تشوفيه؟
حركت راسي قلت ليه : صراحة اول مرة ..مي ..ممم.. ادوارد مكا..
سد ليا فمي قالي : ماتبقايش تجبدي ليا ادوارد.. اخر مرة تجبديه ليا
قلت ليه: وعلاش ؟
قالي: هاكاك ..مابغيتش نعاود نسمع سميتو ..واش نتي كتبغيني ولالا؟. اه لا!!
قلت ليه: اه كنبغيك .. انا متأكدة من راسي
قالي: واخر مرة تجبدي ليا شي واحد.. داكشي اللي فات صافي ماتعاوديهش ليا وماتشبهيني بحتى واحد اخر ..
بقيت كنشوف فيه مافهمتش مالو !! عاوتاني تقلب!
قالي: هادشي كينرفزني
هزيت كتفي عطيتو بالضهر شعلت الماء وعنقني من اللور باسني فعنقي لاكن قلبت وجهي عليه حتى زير عليا قالي
انا كنغير..فهمتي ؟ كنغير فاش كتجبدي ليا شي واحد
هزيت كتفي قلت ليه: اصلا ماعندكش مناش تغير..نتا كتخربق ماشي كتغير
قالي: كنخربق كنزمر كنزعتر المهم ماتجبديش ليا دي السمية ..
بقيت ساكتة قالبة وجهي حتى قالي فودني
واش نتي متأكدة بعدا كنتي مزوجة !!
صدمني ضرت عندو قلت ليه : كيفاش؟!
شد ليا يدي دورهم على خصرو قالي
مابايناش عليك كاع كنتي مزوجة
بقيت كنشوف فيه باستغراب: علاش مابايناش عليا !!مافهمتش!
قاسني بجبهتو قالي والو .. صافي نساي
باسني فمي بوسة خفيفة حسيت فيها براسي باغا نزيد وزادني بوسة اخرى طويلة وبقينا على داك الحال بوسة هنا بوسة هنا حتى هزني فالسما ما عرفتش راسي علاش جلست .
خرجت من الدوش حمراء ملوية الفوطة وعاضة على شفايفي مشيت نيشان للبيت ووقفت قدام المرايا كنشوف فوجهي وكنضحك ..شفت الساعة لقيتها جوج !! اويلي كنا غنفطرو ولينا فالغدا !! الوقت كيطير
بان ليا عقلي قدام المرايا كيضحك قالي
هاي هاي هاي على نهى ..
قلت ليه: فين كنتي نتا!!
قالي: كنت كنرتاح ..ورتاحيت من الافكا ر السلبية الصراحة..
قلبي: نهى الزين .. شوفي بلاصة ناصر قداش..شتيها!! قرب يكتاسح المنطقة كولها
بقيت كنشوف قدامي ونضحك بوحدي حتى طلع دزوز من الجنب كيضرب بحال القلب قالي
انا اسعد واحد فهاد الدنيا..
العقل:كليتي الدق مزيان .. بنتي ليا مطبع
زوزو: انا كناكل احسن دق ..واحسن عذاب .. كيتك نتا اللي كتاكل الدق حتى كيقربو عروقك يتسوطاو وكتبغي تخرج من بلاصتك..اما انا ديما مرتاح ..الى مافرحتش منتعصبش..وهاد المرة كليت لعصا مزيان .. هادشي جديد عليا .. كيوصل لابعد الحدود مكنبقاش تابعو ولا نجر فيه .. هادا هوا اللي بغيت انهى واخا كلشي كيضرني دابا ولاكن مستاعد نعاود من دابا..كنحس براسي ترخيت وتفزرت .. ولاكن مع الوقت نولف ماشي مشكل ..
ضربت وجهي جوج مرات وحيدت من قدام المرايا كنضحك بوحدي.. احاسيس مخربقة كلشي فيا فشكل .. الستريس والاعصاب والتقليقة كلشي مشا..كنحس بالراحة والفرحة والضحكة .. جبدت حوايجي لبست دو بياس كحلة سوتيان من الفوق مربعين قصار كيبينو الصدر مهزوز من الفوق ويعطيوه شكل متير ..سامبل مافيهم حتى زواق من غير الحديد من لداخل داير على الصدر فالجناب.. طانكة ديالو كحل حتى هوا ووقفت كنطلق سروالي اللي نلبس حتى سمعتو عيط ليا
نهى؟! فثن مشيتي؟
طليت براسي جهة الباب قلت ليه هانا ابب اجي عندي
دخل عندي بالفوطة
لقاني واقفة هازة السروال وعنقني من اللور حط يديه على جنابي باسني فعنقي قالي
صافي ! دغيا لبستي؟
ضرت كنضحك عنقتو قلت ليه
علاش!!
هبطت يديه على صدرو كنشوف فيه قلت ليه
عرفتي ..تشهيت شحال من مرة نعنقك ونقيسفيك بحال هاكا ونتا خارج من الدوش
زيرني عندو قالي
انا تشهيت شحاااال من مرة نعاشرك ونبوسك هنا فهاد البلاصة اللي ورتيني فالكامرة… وتشهيت بزااف دالحوايج
ضحكت قلت ليه : دابا من غير السيكس انا بقات فبالي واحد الصورة شفتك بيها لبارح ونتا خارج من الدوش.. فهمتي
باسني ودورني قدام المرايا وعنقني من اللور من يدي وحطهم على كرشي ..شفت صورتي انا وياه ..شحال جينا مواتيين.. وزوينين ..
بقيت كنشوف فينا وضورت وجهي نبوسو لاكن قاطعنا الصونيت فالباب .
قالي هادا سيمو
قلت ليه: بلاتي نمشي نحل ليه الباب
لبست حوايجي بزربة وجمعت شعري الفازك لفوق ومشيت حليت الباب لقيتو متكي عليه بيدو قالي
سيمو ماطلعش لهنا؟
درت ليه الطريق قلت ليه
اه كاين ..دخل
هز عينيه فشعري ودخل قالي
ويقولي غير راني طالع لفوق ماشي هابط لتحت ..من لعشرة وانا جالس كنتسنا..جففت صبنت مسحت ونعست وفقت وهوا مازال مابان
خرج عندو ناصر لابس حوايجو قاليه
مالك اصاحبي كتنكر نزل تسخر راه الحانوت قدام عينيك
ادمين : انا درت فيك التييييقة وخنتي تيقتي.. ديم الرفيسة اللي جبتي كوراه خسرات فتلاجتها
ناصر: عاد لبارح جبناها
عنقت ناصر من خصرو بستو فمو قلت ليه
يالاه نمشيو نجيبو داكشي يصاوب لينا ادمين رفيسة؟
شفت فادمين لقيتو معبط وجهو كيدور يدو على شعرو قالي
ايييه اختي نطيب ليك الرفيسة. شكتدير انا هنا .. نتي توحمي وانا نوجد
ناصر : يالاه يالاه ..نوض تكعد ..انا غنهبط دغيا ونجي لقاكم لتحت
خرج بالزربة ورجعت حت ى انا نشفت شعري وخرجت لقيت ادمين خرج حتى هوا ..نزلت لتحت لقيتهم بجوج واقفين عاد عرفت ناصر علاش سبقنا حيت بدل حوايجو كاملين .
ركبنا فطموبيل ديتهم لواحد السوق تقليدي ديال الخضرة ونزلنا دخلنا ليه قلت ليهم هنا كاين كولشي خرا ديسير اللي بغيتو
ادمين: شوف ليا للسوق ..بحال الى داخل شي جردة اصاحبي .. شوف ليا الارض والنقى ..حتى البلاصة فين دايروه ختارو ليه شارع واعر والخضرة نقية ومستفة ومنضمة كتر من حياتي.. حنا كتلقا الارض كلها
دخلنا للسوق كنشوفو شنو فيه واحد اللحضة سمعنا حس ادمين تقطع ..ضرت نشوف فين هوا لقيتو واقف مع واحد البنت كتبيع ديسير وكيقيد النمرة ..تبسمت وضار ديك الساعة ناصر شافو وقالي
مكيضيعش الوقت
قلت ليه: يمكن حس براسو خصو اللي يونسو.
عنقني قالي: ونتي مخصكش اللي يونسك
عنقتو قلت ليه : عندي ناصر ديالي
بستو وكملنا الطريق حتى لحق علينا ادمين فرحان قالي
الزيين عندكم هنا .. تقول كتبيع الورد ماشي الخضرة
ناصر: ايوا علاش سميتها سويسرا
امدين: احم ..طلقونا للفراجة الرفيسة كتسنى
في ساع تقدينا كاع اللي خصنا من السوق ورجعنا للدار .. بقيت معاهم فدارهم جالسة كنتفرج فيهم كل واحد شنو كيدير
ناصر شاد البصلة كيكرض ويبكي وادمين شاد دجاج كيرقدو وانا فيدي الربيع كنشوف فيه وقات ليهم
فين الزبور وفين المعدنوس
قالي ناصر كيضحك : خلي عليك داكشي غيتخلط كامل
ادمين بقا ساكت كيضحك وربعت يدي كنشوف شنو كيديرو ..عطاني ناصر ال رفيسة قالي قطعيها وجلست كنتف فيها بشوية حتى سالاو كلشي وطلعات ريحة المرقة بنينة .. بقينا كنطلو عليها واحد بواحد حتى وجدات وحطيناها فطاجين وجلسنا قدامها .بقيت كناكل حتى سخفت وحسيت بالدوخة وتكيت قلت ليهم غنعس ..عيني كيتسدو .
نعست قدام الطبلة ماعقلت لوالو حتى شبعت نعاس ونضت لقيتهم بجوج كل واحد فين ناعس قالب وجهه وناصر مقابل برجليه مع رجلي ناعس..نضت وحس بيا ناض معايا جلس شاف الساعة قالي اااه اه اه ..السبعة. هادي !
تخلعت قلت ليه. اويلي ! ماعطيتش لسام ياكل
مشيت كنجري طلعت لقيتو فالباب كيتسناني سبقت منو هوا اللول ومشيت دوشت من الصهد والعرق اللي عرقت باش نخفاف شوية .وبقيت كندور ونمشي ونجي حتى صونا الانتيرفون لقيت ناصر كيعيط ليا من الدار قالي تشربي اتاي
هبطت عندهم فيا واحد العكز كيقطع فيا ومزالة متقلة بالماكلة لقيتهم حاطين اتاي والحلوة .. جلست حدا ناصر عنقني بيدو قالي
مزالة دايخة
قلت ليه : فشلانة
قرب حدايا ادمين قالي
ختي نهى .. زعما مننن …
ناصر: ماشي فعايل
ادمين: وا غير نسولها
ناصر: لااا
ادمين: ختي نهى بالرجولة ..مانعرضش على ديك التيتيزة تجي تجلس معانا شوية
بقيت كنوف فيه قلت ليه تينسة!
قالي: لاا مولات النوار ..الديسير زعما
قلت ليه: ااااه ماشي مشكل نتا حر
ادمين: هااا قلتها ليه اخاي ناصر نتا مصعبها
ناصر: سخن بلاصتك اصاحبي
اديمن: نتا مسخن عضامة وانا نبقا نشوف فيك. انوووض تكعد اواا
ناض ادمين ديك الساعة سمعتو كيهضر معاها ورجع جلس قالي
انا سيفطت ليها لادغيس..ياك هانيا
قلت ليه: اه اه ماشي مشكل صاوب لينا حريرة
خرج فيا عينيه قالي
دابا!!
قلت ليه:ااه
قالي: خصها الوقت
قالتي باقي الحال
دور ناصر وجهه كيضحك قاليه : لحريرة كتسناك
ادمين: خاصها حمص وكرافص
ناصر: عندها الكرافس اصاحبي لبارح طيبات لينا بيه الروز
قلت ليه: ربيع عندي
قالي: عرفتو عندك
ادمين:وا الحمممص ..شوفي ..غدا نصاوبوها ..راه الحريرة مع الرفيسة ..ترونت سيس نيشان اختي نهى
بقا كيشرح ليا وكنهضرو على لحريرة حتى صونا الانتر فون وناض طار مت بلاصتو قالينا
السعادة جات
تقلبت جهة ناصر عنقتو قلت ليه
نطلعو لفوق
ناض قالي يالاه وشد ليا فيدي خرجنا قبل ما يطلع ادمين..حسيت براسي عندي رغبة وداكشي خصوصا فاش كيقرب مني ناصر .. طلعنا سدينا الباب علينا وضرت عندو جريت ليه وجهه بستو وهزني دخلني للبيت ورد الباب
بقينا سادين علينا حتى لواحد الوقت وخرجت لويت عليا واحد البينوار عاجبني الحال فرحانة .. مشيت للثلاجة لقيت لافوكا وطحنتها جبتها للبيت وناصر كيشوف فيا قالي
واش من نيتك!!
قلت ليه : لافوكا زوينة باش تزيدك الجهد بزاف وتعطيني اكثر
بقا كيشوف فيا قالي
نعطيك اكثر !! ماضرك والو !
حركت راسي قلت ليه: لاا
قالي: مزال فيك اللي يزيد
حرك راسي قلت ليه اه
بقا كيشوف فيا مطولا قالي
تباارك الله .. على هاد الحساب اري هاد الكيسان بجوج
عطيتهم ليه شرب اللول والثاني وقلت ليه
بلاتي نمشي نزيدك باش تزيد القوة مزيااان
مشيت كنجري للكوزينة طحنت ليه كاع داكشي اللي بقا خويتو فكاس كبير ودرت ليه فوقو فواكه جافة ودخلت فرحانة قلت ليه
كتحس بالفرق
بقا كيضحك ويشوف فيا قالي اري اري لهنا .. واقيييصا معاك نتي عاد بانت
تكيت حداه وهوا جالس مغطي نصو كيشرب ويشوف فيا قالي
ونتي ماخصكش؟!!
قلت ليه: لااا .. انا عندي جهااااااد
ناصر: الجهههههههد واعرة عندك هادي
قلت ليه: واش عيتي؟
قالي: ماشي عيت.. الطاقة محدودة خصها دور عاوتاني فهمتي.. عرفتي شحال من … مابقيتش عاقل كاع ..فين عمرك شفتي شي واحد كيفوت داك العدد من غير الى كان فالحبس
قلت ليه: برااافو عليك .. عرفتي نتي سيييييكسي بزاف.. عجبني كلشي ديالك
دور وجهه كيضحك قالي
اعتراف هادا
قلت : اه
قالي: وا
عنداك شي نهار تبدليني
قلت ليه: نوو جامي !! ما كاينش بحالك هاكا عجبني .. اون بلوس كنبغيك
عنقتو وعنقني قالي
حتى انا كنبغيك ..عنداك شي نهار نطلع ليه فراسك
قلت ليه: لالالالا راسي صغير غتهرسني.. طلع كرشي على ضهري فقن ما بغيتي مي راسي لا حماقيتي
هبط ليا وراسي كيضحك وكمل داك العصير وجرني قالي اجي ..ملي نتي هاكا اجي نعلمك ما ينفعك
مع شبعت نعاس بزاف فلعشية طار ليا النعاس بالليل .. بقيت سهرانة معاه حتى تنصص الليل وقلت ليه واش عيتي؟
قالي: عييت!! ها حنا غنشوفو شكون يحد لا خر
قلت ليه: مافهمتش؟
قالي: غنشوفو شنو غيتحد ليه الجهد
قلت ليه: ايوا هاد الليييلة نحدك
قالي: واحديني نشوفو
كملنا السهرة حتى سالينا الشوط اللخر وتكينا كنهضرو في انتضار نرتاحو وتنوض فينا الرغبة عاوتاني لاكن ماجات فين تنوض حتى نعست ماعقلتش لا انا لا هوا .
الصباح صبحت بحال الى دايرة الرياضة .. صبحت عليه هوا الاول فيقتو مع السبعة قلت ليه نوض نزيدو لينيغجي
حل واحد العين بزز قالي شحال الساعة
قلت ليه السبعة .. يالاه نوض باش نمشيو نديرو سبور
قالي: واخا سبقيني تا نجي
قلت ليه: ولااا .. نديرو سيكس هوا اللول
تنهد قالي السيكس!
طلعت عليه باش بنوض لاكن جلسني قالي
يالاه تحركي نتي شوية.
بديت كنتقاتل كي ندير وكنعواج تمحنت .. ماعرفت كيفاش ندير ليه وسفخت قلت ليه نوض هزني
قالي نهزك على الصباح .. مافياش
قلت ليه: فيك راه فيك الجهد نتا تخي فووغ نوض ..بلاتي بلاتي..اجي نمشيو ندخلو للدوش حسن
نضت بالزربة وجريتو دخلتو للدوش تما هزني وموراها دوشنا حسيت بيه فاق وتوكض .. خليتو تما وخرجت بالزربة ومع ولفت الروتينات ديالي بالخف دوزت على شعري نشفتو ولبست حوايج السبور ومشيت دورت واحد الساشي ديال ليزيبينار مع ليمون طري شريتو واجد وحليتو بالعسل وعمرت كيسان كبار ديال الزاج حطيتهم حتى خرج ملوي عليه الفوطة قلت ليه
اجي اجي..اجي دغيااا
جبتو عطيتو الكاس هزو شاف فيه قالي
هادا مكيال ماشي كاس
قلت ليه: هادو راه الكبسان دالبيرا ديال هنا ..غرارف ولا منعرفشنو سميتهم . شربت كاسي وخليت فيه النص ماقدرتش نكملو عمرتو فقنينة نديه معايا وهوا هبط عليه كامل شربو وقالي
غنزل نلبس حوايجي
قلت ليه :غنتسناك لتحت
دار غليه حوايجو اللي طلع بيهم وهبط للدار سبقتو انا لبست سبرديلتي ووكلت سام وهبطت تلاقيتو فالدروج خاوج لابس سورفيت كحلة وحداء رياضي .. بقيت كنشوف فيه قلت ليه سييكسي دييما
قالي: هاد سيكسي خوات ليا الركابي.. يالاه نشوفو هاد السبور فين غيخرج
خرجنا ومعانا سام بقينا كنتمشاو شوية بدينا كنجريو ..بداك الشتا كتنقط قلت ليه سام غيفزك ..بلاتي نردو للدار
رجعت كنجري وهوا ورايا قالي
وصافي تا حنا نطلعو نتكاو. الشتا غتصب
قلت ليه: لا النشرة الجوية مافيهاش الشتا هادي غير نقيطات
طلعت سام للدار بالزربة ونزلت عندو كنجر بيكالتي
قالي: فين غادا بهادي
قلت ليه: نمشيو واحد بلاصة زوينة
قالي: نتي تركبي وانا تجريني بحال سام ديالك
قلت ليه: لااا راه عندي غير وحدة اجي نهزو وحدة اخرى
ركبت على بيكالتي وهوا كيجري حدايا دزنا حدا باركينغ صغير فالشارع فيه البيكالات بالكود ديال الرياضة ولا السخرة ..
حررنا وحدة ركب عليها وتبعني حتى دخلنا للغابة بقيت غادية وهوا تابعني حتى خرجنا فبحيرة كبيرة كلها خضرا .. تكسل وقالي
كنحس براسي اوونفورغم كنت كنقول غنعيا وفشلان ..درتي شي حاجة فداك العصير
قلت ليه: لا غير ليزيبينار وليمون .. حتى لهوا زوين كيساعد
وقفنا بيكالات بجوج وقلت ليه يالاه نجريو
شار ليا براسو مشينا كنجريو ودزنا حدا واحد البنت زعرة ضارت من جيهتو دازت حداه ودوزات يدها على صدرو بطريقة مغرية ومشات كملات طريقها ضارت عندو وعطاتو بوسة وهوا كيشوف فيا ويشوف فيها وهز يديه فالسما كيتمتم .. طيتها واحد الصبع قلت ليها فاكيوو بييتش
جريتو من يدو قلت ليه نتا بريئ هي اللي ق٠٠بة
نتا بريئ هي اللي…
بقا كيعاود ويعاود غدي الكلمة ويضحك على ردود افعال نهى .. حط كاس القهوة فوق الطبلة وهوا كيتمشى فالدار التحتية مع الصباح الباكر. شاف فالساعة اللي فيدو لقاها السبعة ومشا لبيت سيمو اللي كان ناعس غارق فالنعاس نوضو بزز وخلاها حتى توكض وصحح مزيان وجلس كيشرب قهوتو ووقف حداه كيلبس حوايجو قاليه
طلق راسك اصاحبي.. واش حساب ليك المغرب هادا راه التوقيت جيكس عندهم هنا… دابا وهي هبطات تقولينا يالاه واش غنبقاو نتسناوك
سيمو: مقادرش اصاحبي لحمي مقطع طراف
ناصر: وا نتا ساهر تاللفجر قاليك شي واحدسهر…متبع ليا ديانا اللي مولفة تسهر تا للصباح وتصبح فالمارشي مع الربعة وعندها عادي..بحالك نتا اللي مولف تنعس تا للخمسة يوميا وتفطر مع المغرب
صونا باب الدار ومشا ناصر فتح بابتسامة صباحية استقبلبيها نهى اللي كانت واقفة مستعدة لنهار جديد ديال الخدمة معاهم .
عنقها باسها ودار وراه عيط لسيمو ونزلو طلعو فالطموبيل معاها مشاو كيضحكو بحال العادة حتى للمكازا ونزلو شافو فيها شرفة التعرف على مقر العمل ديالهم ودخلو لقاو نضرة على المكازا كلها ووقفات قدامهم بجدية كتهضر مع المسير بالفرونسي وتوح ليهم الامور من بعد ضارت عندهم وقالت
دابا هوا يشرح ليكم كولشي ويوريكم طريقة ديال الخدمة وداكشي كله اوك ..يالاه نتلاقاو مع الوحدة باي
خرجات خلاتهم فالماكازا متبعين الجيرو فتعليماتو دار ليهم فوغماسيون خفيفة ضريفة وخلاهم منهم لديك الخدمة الجديدة عليهم ..واحد حياتو كلها ادمين ديال كروب وواحد كيعرف غير الرموك والطريق طويلة .. اش عرفهم فالبيع والشرا وحوايج الرياضة والاحتكاك مع الزبناء.. بقا كل واحد منهم فين خاشي راسو حتى دايخ بين ملابس الدراري الصغار فالطابق العلوي والزبناء كل مرة يدخل واحد حتى طلعات وحدة زعرا لابسة اونسومبل موف رياضي مزير كامل والكرش عريانة وكلها مطراسية ومقادة فالفورمة ومعاه دري صغير زعر كيبان بحال خوها لاكن فجأة عيط ليها ماما وهوا كيشيو بصبعو لواحد سبادري كحلة كيقول ليها هادي
ضارت عند ناصر هوا اللي لقات واقف حداها بحال البوليسي فالوقفة لابس تيشورط كحلة وسروال توني كحل شاد واحد الحك ديال لبروتين كحل كيقرا عليه وقالت ليه بالفرونسي
عفاك ..واش خدام هنا ؟
ضار عندها بعفوية حط الحك بلاصتو قاليها
اه مرحبا شنو خصك
تبسمات ليه قائلة بغيت قياس كبر من هادا شوية
حرك راسو كيمضغ مسكة قاليها مرحبا انشوف ..شحال كيلبس فرجلو
خدا الحداء من يدها وهبط عند الولد ضحك معاه وهز ليه رجلو شاف النمرة وقاليها
واخا نشوف ليك واش كاينة
دخل لواحد البيت عامر بالكراطن ماعرف منين يبدا..دار يديه فجنابو وهز راسو كيشوف فداكشي ويسوط لقا راسو خصو عام باش يلاه يلقا علاش كيقلب.خرج من تما يسول شي واحد لاكن لقا سيمو قضا الغرض وبيعها وحدة اخرى وجلس كيشكر ليها بالفرونسي ديالو اللي كلها لهجة مراكشية حتى قتانعات وجات مع ناصر نيشان خارج من السطوم قالت ليه بابتسامة
صافي شكرا..بدات رأىي ..غناخد هادي
بقا كيشوف فيها ويشوف فسيمو اللي واقف وراها كيشبر لقه بيدو من تحت الدف ويقول ليه سلك سلك
قاليها
صافي بالصحة والراحة ونزل معاها لاكيس جمع ديك سبرديلة فكارطونتها وخلاها منها لاكيس وطلع بحالو غند سيمو اللي مان ديار يديه وراه كيدور تما قاليه
صافي اصاحبي مالقات لكبيرة عطيها وحدة اخرى واش نباتو هنا .. دوز عليا بنادم بيع وصافي والمهم تبيع ياك كولشي كاليتي ايوا صافي كركب البزار يمشي دغيا ..دوك البراهش معاهمش الخاطر تجبد ليه الكحلة يبغي الحمرة تعطيه الزرقة يبغي الكحلة ونتا غادي..اللهم قوليه هادي حانت عند ميسي هادي عند رونالدو وعطيه الباكور يمشي يلعب..
بقا ناصر غير كيشوف فيه قاليه ونتا بزاف اخويا ..الى ماصدقاتش ليها ولا ندمات ورجعات منك ليها
سيمو :مني ليها ..هاانا باااغيها ترجع … ليهودية الطرف عندها جاامد..تقول كتجلس غلى راسها راسها اصاحبي..شتي على فورمة كي معصورة ..بفففف الناس دالخص ومطيشة .. والرياضة عالجوع حنا فمراكش السبقا على مول الطنجية تقول غيصبح ميت.. ها الشحومات ها اللحومات اوديييي ليدام هوا اللي خرج علينا ..بنادم خصو غيااكل.. ياكل وصافي ..اللي كان هي عطيه ينعس شبعان باش ميضورش يبقا على جهة وحدة حتى يصبح الحال كتصبح ديك الماكلة كلها خاترة ليه فجهة وحدة ويقول ليك دارو ليا توكال ..دارو ليا السحور نص ركد عليا ..وهوا نيت اللي راكد على نصو وعلى ايامو وعلى زهرو وعلى حياتو وكيسبيها فتوكال .. توكال اللي اصلا ميكرش فيه واخا ياكل منو قنطار ..المعدة محصنة بلدان والزيت والمرقة ..اودي ..شوف ليا لفورمة كي دايرة ..توكلها العدس تخراه ليك عقيق..الى ماتخراه ليه مستف فخيط هل وجهي.. بقوة نا عندها النضام من برا ومن لداخل كلشي كدير ليه التدوير ..اعادة الانتاج اصاحبي ..ووالدة ولد..والدة ولد تحلف عليه تا خوها ..فين كبر داك الولد الله واعلم ..واش لقدام ولا اللور والله ماتعرف..
ناصر: كاسيطة اصاحبي… واعياو ليا ودنيا ..الصراحة نتا اللي تصلاح فالبيع والشرا مكتقداش ..انا والله ماكرهت غاشي رموك مرسيديس يكون ناضي.. واخا نضرب بيه الطريق حتى لادرابيجان وهانيا ..اللهم رموك نسوقو ولا رموك ينفخ ليا راسي
تنهد ادمين قاليه : اححح مشهي شي ركبة مع ديك الزين
ناصر: تركب..حساب ليك اجي وركب مع هادو .. الى عطاتك تركب اجي ركب عليا انا نيت اللي مسالي كري مجمع معاك
وصل وقت الغدا وباين على ناصر مامرتاحش فالخدمة الجديدة وكيحاول يحفر كما كيحفر الفاس فالحجرة. عكس سيمو اللي غادي جاي كيشد الهضرة مع كولشي وناشط مرتاح وحقق نسبة المبيعات كثيرة فداك نص النهار اللي دوز تما .. بالهضرة والضحكة هلا الزبون بلاصة مايشري وحدة يشري جوج وجلس عليهم هادي فيها غير بياسة ..هادي عمرها تعاود ترجع ماضيعوهاش.. هادي درنا ليها صولد كانت سواية دوبل..
قوة الهضرة والكدوب ماعياش حتى وصل وقت الغدا ومشا عند ناصر اللي كان كيستف السطوك بلاصة ما يبقا شاد الخاطر مع هادا ومع هاديك وكلهم دراري صغار اللي شافوها كيبغيوها .
سيمو: واخملتيه اخاي تجي معاك فام دميناج ..ومع المسكة ناقصك شي عكار ..بحون عند نهى علاش ماقلتيش ليها تسلفك شي واحد تل دير وشريه
ضار عمدو ناصر حيدها من فمو قاليه غنلسقها ليك فعينيك نوزيك العكر .. مالك اصاحبي مالك ..والله مناقصك بالله
سيمو: وناقصنا الغدا انا راه شحفت بالهضرة.. اش درتا فلغدا
ناصر: والله ماعرفت ..هبط سول خونا قوليه واش غنمشيو نتغداو وواش غنتغداو هنا وكيفاش كيديرو
سيمو: المهم هانا غادي
نزل سيمو وبقا ناصر كيستف فالكراطن حتى عرق ليه الضهر ووقف كيتفخ بحال الغوريلا قدام داكشي ويالاه حا يخرج راب عليه كاع داكشي اللي ستف كله حتى سخط وخرج خلاه هاكا تلاقامع سيمو طالع بشوية عليه قاليه
عرقتي اصاحبي اقول كنتي كتهز الحجر
ناصر: غا سكت دابا راه طالع ليا واحد ال٠٠٠٠ صافي خليني
سيمو: المهم خونا قاليك عندكم ساعة ونص.. تغداو فيها ولا ولدو فيها المهم ساعة ونص هي اللي كاينة ..شنو نديرو دابا
تنهد ناصر كيفكر قاليه
المشكلة دابا حتى الى بغيتي تاكل فشي قنت هنا ماتعرف راسك اشكتاكل.. غضيع لينا نص ساعة غير فتقلاب على مطعم ولا شي لعبة حلال
سيمو:الله واكبر..والبيرا ولكويسات حلال اخاي ناصر
ناصر: وماتسمعش حرام وتغرق تا لودنيك.. هلي سيئاتك قليلة ونتا ناوي تغطس كامل .. تغلبتي فشي حوايج نفسك مطاوعاتكس ماشي تكمل فالحرام كله ونتا قادر تقاوم وتبعد ..ومن هادشي كله ديها ف٠٠٠ انا كنشرب وكن٠٠٠ ومكناكلش لحرام وياربي تسمح لي كتسالني شي حاجة ؟ غتشفع ليا !!
سيمو: ومالك معصب اصاحبي .. لالااا نتا ماشي هوا هاداك ..عرفتي شنو .غنضرب لشي حوينيت هنا نجيب لشي لعيبة نديبانيو تا نرجعو للدار ونديرو شي طاجين ناااضي
كملو النهار على نفس الريتم ونهى مابانتش كاع حتى بدا للضلام يطيح وجلس ناصر فواحد الكرسي فالقنت كيصوني عليها مكتجاوبش.. صونا وعاود حتى بدا يضرو راسو وترفع مابقاش عقلو معاه .. صبر بزز على ديك السويعة اللي بقات ليهم وخرج سبق سيمو نيشان للدار وخلاه تابعو كيلحق عليه حتى وصل وطلع للدار عندها يالاه بغا يصوني سمع الضحك لداخل بالجهد وصوت راجل كيهضر ومعاه صوت نهى حتى هي كضحك وهبط يدو على الصونيت تلفت شاف فسيمو قاليه
سمع واش كنسمع ولا جاب ليا الله
حط سيمو ودنو غلى الباب وشاف فيه قاليه مااانعرف اخاي
بقا ناصر كيشوف فيه والدم مشا ليه من وجهه وبلا ميتردد هز يدو على الصونيت كيصوني ويعاود حتى تحل الباب
تفتح الباب ولقا قدامو نهى واقفة كضحك فيدها كاس دلقهوى .. قالت ليه. متفاجاة
اااا ناصر!!
باستو فوجهه كضحك وهوا بحال الخشبة كيشوف فيها ودخل دور عينيه لقا شاب اشقر جالس على الكنبة .. جراتو نهى من يدو بغات تديه معاها عندو لا كن هز يدو بعدها وحتى كان غيهضر وجرو سيمو من اللور قاليه
صافي غييرها .. اجي ندويو
رد ناصر كيشوف فنهى قاليها علا مكتجاوبيش؟
هزات كتفها باستغراب قالت ليه كنت مشغولة جا عندي الصديق ديالي عطيتو الوقت!!
نهزو سيمو قاليه صافيه غييرها ..صافي
بقا كيغمز وجرو ولاخر وجهه احمر كيشوف فنهى حتى خرج لبرا خلاها واقفة وهبط للدار دخل وزدح الباب وراه . ماهي الا ثواني حتى تبعاتو كتصوني فالباب وفتح ليها سيمو ودخلات كتسائل بغينيها. على شنو واقع
لقات ناصر عاطيها بالضهر كيحيد حوايجو ووقفات وراه قالت ليه ناصر !! مالك ؟!
شاف بنص جهة كتفو قاليها
سيري رجعي فحالك .. سيري
بعد من قدامها هز حوايجو دخل لواحد البيت شد عليه وبقات هي واقفة كتشوف وتسائل حتى قاليها سيمو
راه عيان راه خمل واحد البيت ديال السلعة ..مكاين والو غير رجعي خليتي صديقك بوحدو ..
قالت ليه :انا بغيت نعرفهم على بعضياتهم وهوا خرج مافهمتش شنو واقع!!
قاليها: والو الساعة لله.بنادم هاكا ..تا لمن بعد وهضرو .
بقات كتشوف جهة الباب وتفكر بأسى حسات انها السبب ولاكن شنو الخطأ اللي دارت ! الله واعلم
تنهدات ومشات رجعات بحالها للدار عند الضيف ديالها والضيم طايح عليها.. حتى هوا ماطولش وماشدهاش اكثر وودعها وعنقها وخرج مشا بقات بوحدها جالسة ويديها تحت فكها كتفكر وتنهد حتى عيات وناضت هبطات عاوتاني للطبقة الاولى فتح ليها سيمو ومع الدخلة قاليها
الى كنتي كتقلبي على ناصر مكاينش
تلفتات شافت فيه وقالت
فين مشا؟
هز كتفو قاليها ماعرفتش خرجت قبيلا مقالي والو
جلسات على واحد الكنبة كتشوف بعينيها هنا ولهيه وقالت ليه
مالو ؟ شنو واش انا السبب؟
هز حجبانو وربع يديه تنهد وبقا ساكت وعاودات سولاتو قالت ليه
قولي واش انا السبب؟
حك لحيتو وقاليها
علاش ماكتجاوبيش فتيليفون؟
قالت ليه ببساطة : حيت كنت مشغولة كنهضر مع صديقي وتيليفون محطوط ماتفكرتوش.
هز سيمو حبانو كيحك لحيتو وشعرو قاليها
واا ..ماعرفت ما نقوليك.. ماعرفتش واش تفهمي ولالا ..
تنهد بعمق وهي كتسناه يهضر حتى دخل ناصر جات عينو فعينها وسد الباب وقلب وجهه لاكن ناضت وقفاتو قبل مايزيد قالت ليه
ناصر..مالك معايا شنو وقع
بعد يديه قاليها قلبي عليا هاد الساعة ..اوكي..يالاه قلبي عليا
شداتو وقفاتو قالت ليه شنو كتخربق؟؟ مالك كتعامل معايا هاكا !!
عاود بعد ليها يديها وقاليها: سيري كملي شنو كنتث كديري نتي والصديق ديالك ..
بقات كتجابد معاه وتحاول تفهم حتى زعف عليها خلعها وخرج عينيه قاليها
ماتشديش فيا.. وماعندي مانفهمك. قلبي على اصل مي احسن ليك
داز فيها ومشا وهي واقفة مصدومة كتشوف فيه وتشوف فسيمو .. قاليها سيمو
جاوبي فتيليفون عادي..قولي ليه انا جا عندي لامي ديالي وجالسين وكدا مافيها والو كانت غتجي عادية .. نتي خليتي كيصوني ويعاود قلنا شي حاجة وقعات ليك وجا كيطير من الماكازا لهنا مخلوع ..كن جاوبتيه مكانش كاع يطرا هاد البلان ودخلي ليه الشك والتناوي على والو
بقات كتشوف فيه وترمش قالت ليه
علاش غادي يشك فيا واش انا خائنة!!
تنهد قاليها ماشي خائنة .. سوء تفاهم وصافي ..غيكمدها ويبرد ويرجع عادي غير نتي مرة اخرى بقاي تجاوبي وصافي
نهى: ندخل عندو للبيت؟ ..يبغي يهضر معايا؟!
سيمو: ماشي دابا خلي تا دوز هاد العشية ولا غدا دابا غير غتزيدو نرونوها وصافي
تنهدات وهبطات راسها قالت ليه اوك وطلعات فحالها للدار سدات عليها وانفاردات براسها وبقات كتشوف فتيليفون والاتصالات ديالو حتى عيات ونعسات
صبح نهار جديد صبات فيه شتيوة دالربيع والشميشة مضوية وقوس قزح فالارض . لبسات حوايجها بالزربة وجاكيط ديالها من لفوق باش دوز عليهم يمشيو لاكن لقات الباب مسدود مكاين حتى واحد فالدار .. شدات الطريق للمكازا ودخلات لقات سيمو نازل مع الدروج هاز واحد الكارطونة صغيرة ..تبسم ليها لاكن كانت تعابير وجهها كتسائل على ناصر ..هزات عينها بان ليها من مور الزاج لفوق جالس شاد تيليفون فيدو .. طلعات عندو لقاتو ناض من بلاصتو واقف بعيد قدام احدية الاطفال كيسوط بوحدو ومشات عندو وقفات حدا تبسمات قالت ليه صباح الخير
ماردش عليها لاكن بقات كيل عليه بابتسامة وتعلقات حدا حنكو باستو وقالت ليه بارتباك فالكلام
دقيت عليكم ..حسابني مزال ماجيتو.. نجيو مجموعين..فطرتو؟ فطرتي؟ نفطرو انا وياك؟ مزال مافطرت
تلفت عطاه بالضهر كيقاد الاحدية كأنه ماسمعهاش.. فديك الاثناء اللي كانت واقفة كدور بيه من جهة لجهة حتى دخل للبيت اللي فيه السلعة كيشغل راسو وهز واحد الفردة صغيرة فيدو ووقف تكا على واحد المكتب فوق منو الكراطن كيشوف النمرة .. وقفات قداو بدون سابق انضار ترمات عليه عنقاتو قالت ليه
كنبغيك.. ماقدرتش نعس مرتاحة لبارح .. ماقدرتش نفكر فشي حاجة من غيرك
هزات عينيها شافت فيه وشاف فيها مطولا وهي كتوسل بعينيها وباستو وعاوداتو عنقاتو كتنهد ..هز يدو دوزها على ضهرها وقالي
يالاه.. صافي ماطرا والو ..
شافت فيه بابتسامة قالت ليه
مابقيتيش مقلق مني!!
تنهد وقال : قلت ليك صافي ..ماوقع والو.
عنقاتو بقوة وقالت ليه
يالاه نفطرو انا وياك
رد: دابا حنا فالخدمة .. حتى للغدا ونتغداو بجوج اوك
تبسمات قالت ليه صافي ..غنمشي للدار وفالغدا نرجع كنبغييك
عنقاتو ومشات رجعات للدار للروتين ديالها وصاوبات الغدا جهد داكشي اللي كتعرف ليه وغلفاتو وشافت الساعة لقاتها وصلات وقيتة الراحة عندهم ومشات كتجري رجعات للمكازا هازة الغذا فيدها وطلعات كتقلب على ناصر بعينيها..دخلات لواحد البيت صغير فيه كراسة وطاولة حطات كلشي ورجعات كتقلب مالقات حتى واحد لا سيمو لا ناصر.. نزلات تسول لاكن دخل سيمو فديك الاثناء هاز فيدو سوندويتش ووقف كيضحك معاها بحال العادة
شافت وراه كتسنى ناصر وقالت ليه
فين ناصر؟
قاليها ماعرفتش!! ضربات ساعة الغذا ماشفتوش !
تنهدات مشات كدور تما وتسنا وبدات كتصوني عليه وتعاود حتى تزيرات .. حسبان الوقت بالدقيقة والثانية حتى انتهى وقت الغدا وبدا كل واحد يرجع لخدمتو ودخل اثنائها ناصر ومعاه الشقراء الجميلة اللي سبق وجات شرات لولدها الصغير من تما . داخلين كيضحكو ونهى واقفة فواحد الجهة متبعة ليه العين وتبعاتهم لفوق وتقدمات بابتسامة باهتة حتى لعندهم ووقفات كتشوف وتسمع
مد ليها كارطونة صغيرة وهي فرحانة قالت ليه
خصك تعرف انني رجعت على قبلك ناصر.. شكرا قبلتي الدعوة ديالي للغدا
تبسم قاليها: كنتمنى ماترفضيش الدعوة ديالي المرة الجايا
ضحكات قالت ليه..طبعا منرفضهاش. ومستحييل
سلمات عليه من الوجه وشافت فنهى اللي كتحرك راسها وتجاوب معاهم بابتسامة باهتة حتى مشات الزبونة وتلفات عندو كتشوف فيه بنية وبرائة وابتسامة قالت ليه
جبت معايا الغذا..حسابني غنلقاك هنا
تلفت ابتسامة قاليها : شكرا عدبتي راسك
بقات كتشوف فيه وترمش قالت ليه كنحس براسي غريبة عليك!!
حان غادي ودار عندها بابتسامة قاليها : لا .. كجيب الله
حركات راسها بالايجاب وبقات كتمشي وتجي تما وجلسات على واحد الكرسي خشات يديها بين فخادها فصمت كتراقب تحركاتو حتى خرج سيمو من داك البيت قاليها واش ديالك هاد الماكلة اللي فوق الطبلة!
هزات يديها قالت ليه غير كولها
وحطات يدها على حلقها بلعات ريقها وسكتات شدات تيليفونها ساهية فيه وبلا متشعر مشات كتشوف مكالامتها وشحال من مرة صونات ليه وتنهدات وخرجات من داك التيليفون فمرة وناضت مشات وقفات حداه ساكتة مطولا وقالت ليه بتردد
شكون ديك البنت ؟
صغر عينيه كيشوف فواحد الحداء قالبو على وحهه قاليها
آمي ديالي
حركات راسها كترمش وتشوف فجنابها مطولا وقالت ليه
باينة ضريفة مسكينة
حرك راسو بالايجاب وصونا ليه تيليفون ديك الساعة جبدو قدامها ..طلات لقات السمية جورجينا
دار الكيت فودنو جاوبها قاليها نسالي الخدمة ونعيط ليك. وقطع
شاف فنهى لقاها عير كتشوفيه وساكتة وعينيها كيتيزيرو حتى بغاو الدموع يطيحو ودورات وجهها كتمتم مالقات ماتقول ونزلات من تما
جا عندو السيمو اللي كان كلشي كيدوز على عينيه قاليه
عيقتي..واحق الرب تا عيقتي..
مجاوبوش ناصر بقا كيشوف فدوك السبوديلات كأن شيئا لم يكن ..اما سيمو ماعجبوش الحال قاليه
درتي فعايل الهاربات اصاحبي.. وكن غير مع شي وحدة تستاهل نييت
تلفت ناصر قاليه
اش درت؟
سيمو: داير هاد الزمر كامل ضد فيها كن عينك فالزعرة نقولو السيد شهواني.. وا نتا اصاحبي شوطاتك رجعتي ليها التشويطة فالبلاصة.. سير اصاحبي حزر وبززر شوية سيفطتيها كدمع هاكاك ولاهيلا عيب وعار عليك
هز ناصر حاجبو قاليه : دخل سوق راسك سيمو .. خليك بعيد
سيمو: وراه بحال ختي هاديك كن شي ولد ل٠٠٠ اللي دار معاها هاكا نوري لمو .. جيتني صاحبي .. ماتنساش الفضل اصاحبي وماتنساش العقلية عندها كي دايرة ..
مشا ناصر جلس على واحد الكرسي كيسوط قاليه
انا مارتاحش هنا اصلا.. خدام غير بزز وماعنديش مع دير الخاطر لهادا وهادا ..بلا ماتزيدني حتى نتا …
سيمو: الراحة مهمة فالخدمة الخاوا..الى ماكنتيش مرتاح هنا نوض دوز ليك بيرمي درموك ماحد فلوس الكونطرا اللي كتي غتعطيها عندك وماخسرتيهمش..هاني فين كنوصيك
مسح ناصر وجهه قاليه داكشي نيت اللي غندير .
رجع سيمو لخدمتو وبقا حاضيه واش يعيط ليها ولا يمشي عندها ساعا والو ماتحركش حتى سالاو لخدمة ورجعو الرجل على الرجل حتى للدار
بحال ديما رجعو للدار .. دوشو عادي رتاحو كلرو شوية وكل واحد تكا يرتاح فبلاصة ..هز سيمو راسو قاليه مغطلعش دوي مع نهى
ود عليه ناصر : عيان مافيا اللي يودي
سيمو: مافيك اللي يدوي ..
قلب سيمو وجهه خلاه ودتها فراسو. ولغد ليه مشا للخدمة عادي فالصباح بدا خدمتو حتى دخلات نهى دايرة النضاضر وباينة على وجهها مغبونة .. ماهضرات مع حد ما شافت فحد .. تلاقاها الجيرو صدمها على الصباح قاليها ناصر خلا الخدمة عندهم ومابقاش غيرجع ليها . تصدمات وماقدراتش تيق ..عيطات لسيمو كتستفسر منو ووجها صفر قالت ليه
شنو واقع ؟ ناصر خلا الخدمة علاش ماقالي والو !! شنو كيوقع. مالو؟
هدنها بشوية وانفارد هوا وياها قاليها
ماشي خلاها راه مامرتاحش فيها ماعارفش ليها وكيخدم معصب ماعندو لا مع بيع ولا شرا ..بغا يدوز البيرمي ديال الرموك وماعندوش كي يدير يفرق بيناتهم وصافي تبع حاجة وحدة هاذا ما كان
بقات كتشوف فيه قالت ليه
علاش مقالي والو؟ ..كنت نقوليه يبقاخدام ويمشي يدوز البيرمي فنفس الوقت
سيمو: وااالو المشكل فيه هوا مارتاحش فهادشي.. صاااافي دابا هوا ولف الرموك والطرقان ميقدرش يخدم خدمة اخرى من غيرها واحا يخلصوه بالملاير ..مشات ليه مع الدم صعيب ينسا الرموك
قالت ليه:وعلاش ماينساهش مالو. ياك غير خدمة وصافي!!
سيمو: كاين شي خدامي كيمشيو فالدم ماتقدرش تبدلهم واخا يعطيوك اللي عطاو..دابا هوا ولف يمشي ويجي ويشد الطرقان ويسوق الرموك ..كيلقا راحتو وكيخدم عاجبو الحال ..صافي خليه يخدم الخدمة اللي كيرتاح فيها احسن ليه
تنهدات وجلسات فشلانة ومصدومة ماتوقعاتش يخلي الخدمة معاها ..صدقات كلام سيمو بالحرف وجلسات فسيارتها كتفكر وجبدات تيليفونها دخلات كتقلب على انواع الشاحنات الكبار وكتقرا الاثمنة ديالهم . لقاتهم كيبداو من تسعين مليون لفوق وبدات كدور ليها فكرة تشري الرموك ودخل بيه لهاد الميدان واخا ماشي ديالها ومكتفهم فيه والو.. تفكرات كلام ناصر اللي كان قاليها ماكرهتش غير شي رموك ميرسيديس يكون ناضي وصافي. قلبات الصفحة جيهتهم كتقلب وجات فواحد الرموك كحل كيبري جديد قدو قداش وحاطين عليه تخفيض فالثمن ..بلا متردد او تفكر حطات عليه الحجر قبل مايطير
بدا ت نهى تخطط فجهة..وناصر حتى هوا يخطط فجهة .. العلاقة بدات كتبرد والمساحة بيناتهم بدات كتكبر.. واش من الغضب ..واش من الغيرة؟ واش من الضغط النفسي؟ شنو سبب هاد التغيير وهاد البرود؟ مزال الايام تورينا وتزيد توضح لينا.
طيب ليهم سيمو طاجين على امل يجمعهم ويصفي الخواطر بيناتهم وحطو ليهم للعشا وعيط ليها هبطات عندهم لقاتهم جالسين كيتسناو ..شفتت فناصر بنص عين كترمش وحشمانة كأنها دايرة جريمة فحقو..اما هوا كان عفوي اكثر من القياس.. وكيهضر عادي وبلا حواجز .
تبسمات قالت ليه
كي غادي مع البيرمي؟ مزيان؟
حرك راسو قاليها مزيان الحمد لله
تبسمات قالت ليه: مابقيناش كاع كنتلاقاو من نهار خرجتي من الخدمة .
ضحك وقاليها: هانتي كتشوفي سيمو ..فيه عشرة
بقات كتشوف فيه بابتسامة باهتة وقالت. ليه
شنو كتفكر دير من بعد؟
قاليها: غنقلبع خدمة
بقات ساكتة وتبسمات ليه قالت ليه
والى كانت هاد الخدمة فمدينة اخرى ؟ تمشي ليها؟
تلفت شاف فيها قاليها: واش غنبقا نتشرط على الخدمة!
سكتات وشيمو كيقوليها كولي وهي حابسة تسدات ليها الشهية .. قالت ليهم بصحة انا خصني نعس ..مشا الحال ..تصبحو على خير
ناضت خرجات مشات بحالها خلاتهم جالسين بجوج وسيمو غير كيشوف فيه مالقا مايقول ليه ومافهمش حتى علاقتهم كي دايرة وفين عادين بيها .
داها كل واحد دايخا فشغلو
فصباح من صباحات فصل الربيع وفالماكازا ..وكما ديما مع الوضع الجديد اللي ولات نهى كتعيش فعلاقتها مع ناصر..اللس مابقات كتعرف اشنو واقع اصلا..وشنو نوع العلاقة اللي ولات بينو وبينها..مابقا لا كيسول فيها لا كيشوفها ..حتى رسالة مابقاش كيرسلها ليها.. تحطات سطل بلا تقرقيب ومكانتش كتخيل ابدا يعاملها ديك المعاملة.. مايسول مايعاتب ما يشكر نا يغازل..حتى اخباره رجعات كتعرفهم غير من عند سيمو . مشات عندو كالعادة بابتسامة صبحات عليه وقالت ليه
واش ناصر صافي كمل البيرمي؟ قلتي لي ليوم اخر نهار
تبسم قاليها : اه ليوم صافي يقدر ياخد البيرمي ديالو
بقات ساكتة مطولا وقالت ليه
واش غير البيرمي اللي شاغل ليه بالو ولا شي حاجة اخرى ؟!!
قاليها: امكاين والو ناتعمريش راسك بالخوا الخاوي
تنهدات قالت ليه
ديك البنت اللي كانت كتجي لهنا ..باقي كيتلاقاها؟ حيت مابقاش كاع كيبان
سيمو: ماديري فراسك واالو مكاين حتى حاجة من هادشي
سكتات مطولا عاوتاني وقالت ليه
واش ناصر كيبغيني؟ واش مكيقوليك عليا والو ؟!! مكيهضرش عليا
حك سيمو راسو قاليها واه خصكم تجلسو وتهضرو توضوحو الامور ..حسن
تنهدات ومشات بفشل خرجات من تما مقبوطة ورجعات بحالها للدار تايهة و دايخة. لقات ناصر فالباب داخل حتى هوا وتبسم سلم عليها عادي وكيهضر عادي وهي غير كتشوفيه.. قالت ليه واش خديتي البيرمي؟
تبسم قاليها عاد تنهيت ..
قالت ليه :نجلسو نهضرو شوية؟
تنهد قاليها: يالاه لقيتيني غادي نقضي شي غرض ..
تبسمات قالت ليه :امم .. اجي نهضرو شوية ومن بعد سير
جراتو من يدو داتو معاها للدار وقفات قالت ليه
انا عارفاك مهووس بالرموك والسفر والطرقان.. لقيت ليك الحل ..
شاف فيها باستغراب وربع يديه قاليها اشمن حل؟
قالت ليه: فكرت وقررت ..ونفدت ..وشريت رموك
حل عينيه قاليها :شريتي رموك؟!!! وعلاش بالسلامة؟
ردت ببساطة : باش تخدم بيه.. احسن ماتلقا خدمة فمدينة اخرى وتمشي ..شريتو على قبلك
هز راسو وضار فبلاصتو كيضحك ماقدرش يصدقها وهي. مربعة يديها كتشوفيه قالت ليه
مالك ؟!
شاف فيها مطولا وقال: خططتي وقررتي ونفدتي!! تشاورتي معايا!! سولتيني؟!
قالت ليه:علاش نسولك نتا كتبغيالرموك باينة
قاليها:سولتيني واش تبغي تخدم معايا؟ واش كتخططي بوحدك وتنفدي بوحدك !! كنتي عارفاني غادي نبغي نخدم معاك ولا غنقبل اصلا تشري رموك على قبلي!!شكون قاليك شريه ؟!! شكون قالك فكري ليااا ولا ديري ليا ولا على قبلي معااااامن تشاورتي!!!!
بقات مصدومة كتشوف فيه قالت ليه
انا حسابني غتفرح وغيعجبك الحال .. علاش ماعجبكش الحال فين كاين المشكل؟.. علاش كتغوت
رجع حمر قاليها :ومابغيت منك والو ..صافي جبتيني لهنا . خليني نعول على راسي واش فين ما نضور لقاك موجدة ليا شي حاجة بحال شي دري صغير!
تنهدات بتعب وشدات جبهتها سادة عينيها حتى برد على غدايدو وقالت ليه
وضح ليا اناصر.. وضح ليا علاش وليتي كتعامل معايا هاكا؟ انا بغيت نعاونك ..
قاطعها:ومابغيييتش… ماتعاونينيش خليني نضارب مع الحيوط راسي مابغيتكش تعاونيني..
قالت: دابا اما ماقلت ليك والو اصلا..داكشي اللي كتقلب عليه عندي..انا اولا من ناس اخرين مكتعرفهمش..
جر حوايجو كيسوط قاليها : مامرتااااحش..مابقيتش مرتاح انهى .. لا فالخدمة معاك لا فهاد العلاقة.. ولا فحتى حتااجة
شافت فيه مصدومة قالت ليه: مافهمتش!!
دور وجهه تنهد وشد جبهتو قاليها
خلينا نبعدو شوية… كل واحد فينا يجلس بوحدو واحد الفترة زمنية .. هاكا احسن انهى
بقات ساكتة مطولا وبلعات ريقها وحركات راسها قالت ليه
اوكي… اللي بغيتي..
قطعات النفس فراسها ودورات وجهها خلاتو كينهج بحال الى كان حابس شي حاجة وطلقها ..خرج من عندها هبط نيشان للدار معصب وتالف ..حيد جاكيط ضربها مع الكنبي وبقا كيدور بلاصتو ورجع جلس شد راسو كيشوف فالارض .. جبد كارو شعلو ضرب منو جوج نترات ورجع طفاه فالطفاية بالزعفة وناض للبيت جمع كاع حوايجو فالباليزة وسد على كلشي وحطهم فالجنب وخرج لبرا مشا .
من موراه بنص ساعة نزلات للدار عينيها حوم ر بالبكا وحلات الباب بمفتاح اضافي ودخلات لقات نضرة ..شمات ريحة الكارو ولقاتو طافي فوق الطبلة .. سرحات عينيها لقات الشنط محطوطة فالجنب ووقفات قدامهم كتشوف فيهم مطولا
ردخات ورضات لامر الواقع .. انفطر قلبها وتكسرات ..ماقدراتش تقول تنها تخدلات حيت ماوقعاتش شي حاجة اللي تخليه يخدلها.. مادار والو ..ومع الاسف ما دار لا بالزوين لابالخايب..بين ليلة ونهار خدا قرار .. وماكان عليها غير تقلب وتعطيه حريتو يعيش بيها، فقدات الامل وتأكدات ان التيست ديالو خرج بوزيتيف والدقة كلاتها هي..المشكلة مشكلتها هي وكتعلق بيها وخصها تحلها هي..حيت بوحدها هي اللي عايشة علاقة حب بدون طرف اخر .. لهاذا قررات تعيش الحزن ديالها كما ينبغي بوحدها وتلذذ فيه وتشبعو منو ويشبع منها باش تفرغ كل الاحاسيس ومايعدبوهاش من بعد فكل مرة .. سدات عليها ..وانعازلات ..ورفضات تشوف شي واحد او تهضر مع شي واحد..دارت حداد وعتاكفات.. بكات وسهرات وتعدبات وخدات وقتها الكافي حتى رجع الروتين الكئيب ممل ومالقات ما تفرغ ..تعايشات مع الوضع وتأقلمات وقررات تقلب على متنفس يخرجها من حالتها . كان فكل مرة يسول فيها سيمو كانت كترفض تهضر وحبساتو باش مايعاودش يقاطع حدادها حتى تخرج هي عندو وتعيط ليه بنفسها .وفعلا جا النهاو اللي خرجات من عزلتها واخا الحزن كان مزال مخيم على نفسيتها وقلبها .. نزلات واحد الليلة تشاركو الحوار ولقاتو مصاوب طنجية غير ليه بوحدو . فرح فاش شافها فالباب ورحب بيها وبالزربة جمع الروينة وجلسها قاليها
نهار كبير هادا ..نهار غليض..جيتي مع واحد الطنجية هي هاديك ..نيت كنت كنصاوب فيها وكنقول الله يجيب اللي يتشاركنا فيها
تبسمات وجلسات لقات نضرة فالدار وقالت ليه
مكتقنطش بوحدك ؟
ضحك قاليها : القنط ضاروري..
قالت ليه: زعما واش ماعندكش شي صاحبتك تعيش نتا وياها؟ توانسو؟
ضحك قاليها الوحيد اللي كان كيونسني هوا ناصر وكنت كنتفاهم انا وياه ..
قاطعاتو بتعب وهزات يدها: سولتك واش ماعندكش صاحبتك تونسك..ماسولتكش على شي واحد اخر ..عفاك ماتعاودش ذكرو لا بالزوين لا بالخايب..طويت ديك الصفحة وجيت عندك باش نبدا صفحة جديدة
بقا ساكت كيشوف قدامو بأسى وتنهد مطولا..تردد باش يهضر مطولا وقال
ولاهيلا حرام هادشي اللي ضربكم بجوج ..
ردت: حرام.. اي حاجة حرام مكيكملش فيها الله..قالتها ماما اللي فالمغرب شحال من مرة..ودابا تأكدت . كنتمنى تنسا اي حاجة زوينة عشناها خنا بثلاتة..وتعرفني غير انا بحال الى عمرك عرفتيني مع شي واحد اخر … هاكا غتعاوني ودير فيا خير ..غلى الاقل غير حتى نشا فمرة ولا نلقا حب جديد زوين ..وحب حقيقي من الطرفين
بقا سيمو ساكت مطولا ماهضرش ..سكتات شوية وقالت ليه ساهية
شي مرات كنقول ..واش الانسان ممكن يحب مرة وجوج وثلاتة ..وفكل مرة يكون احب حقيقي؟ ولا لا..وشي مرات كنقول..الحب الحقيقي هوا اللي كنعيشوه من الطرفين وحتى هوا كيموت ونقدرو نلقاو حب اخر ..وشي مرات كنقول الحب الحقيقي اللي عشت لحد الان هوا الحب ديالي انا وادوارد.. حيت فعلا حب وكله سعادة حتى فاصعب ايام حياتنا وحتى فوقت فراقنا ..تفارقنا وحنا كنحبو بعضياتنا وكنشوفو فبعضياتنا.. شي مرات كيجيني تأنيب الضمير حيت هوا مات وهوا كبغيني ..وانا خنتو حيت بغيت واجل اخر من غيرو .. واخا رحل لحياة اخرى وعالم اخر ولاكن وحل بالحب ديالي..وانا بقيت فهاد الحياة وفرطت فالحب ديالو..وشي مرات كنقول..كما انا نسيت الحب حتى هوا غيكون نساه وعايش فداك العالم كما انا عايشة فهاد العالم وبغيت غيرو.. (تنهدات) الحياة بلا حب ..بلا شغف.. بلا حماس..وبلا امل ..ماشي حب..ولو يكون الحب ديالك لخدمتك ..لهوايتك ..كيتسمى حب..حيت الحب هوا اللي كيعطيك الامل والحماسوالشغف فالحياة
تنهد وقاليها:انا والله كن كانت عندي وحدة بحالك مانفرط فيها ولا نخليها
تنهدات وقالت:ماشي اخاطرنا.. ولو تكون عندك..ماتقدرش تخليها حيت خاطرك فيها ..ولاكن نهار تنفر منها ويهرب ليك خاطرك منها ..ماتقدرش تقبلها واخا تكون واعدتيها ودرتيالمستحيلعلى قبلها ..كلشي متعلق بالمشاعر..والمشاعر كتقلب ماتقدرش تيق فيها..هادشي اللي كيخليني مانلومش شي واحد..ولا نتاهمو بالكدوب..حيت يقدر يكون بصح بغاني وبغاني بصح..ومن بعد فقد داك الشغف
دارت يدها فالطنجية كتاكل معاه وقالت ليه
توحشت نسافر..نسافرو بجوج؟
شاف فيها مستغرب قاليها :فيييين!!!
قالت ليه:اي بلاصة..نمشيو للمغرب؟
خرج عينيه واللقمة كطل من فمو كلها مرقة بقا كيشوف فيها قاليها والله لا رجعت ..باقي تا لعام ماضربتو هنا نرجع عندهم انا ويشدوني رجال البلاد ونبقا تما ..مسخوط الواليدين انا
قالت ليه:لا نديك معايا ونردك
قاليها:الاللا خليني هنا ..اي بلاصة بعيدة على ديوانة ديالنا والفيزا ديالنا نمشي ليها. الا المغرب..كيقلبو كي يديرو يشدوك عندهم واخا يكون باك سميتو جاك .. عساك انا اللي با سميتو العربي ومي سميتها ميلودة وفمراكش نيت..كلها مدهونة بلساق كتسناني غير نحط فيها رجلي وتسرطني
قالت ليه:وفين نمشيو؟
شاف قدامو كيغمس قاليها
ايوا عطا الله ..نمشيو غير هنا فسويسرا ..انا باقي كاع ما تساريت هنا
قالت ليه: نمشيو ديزني لاند ؟ لباغي
هز يديه قاليها :هااا دابا هضرتي..ايوا يعدا نلعبو شوية بلالعاب ديال بصح..ماشي بالحجر كي لعبت انا فصغري
حركات راسها:صافي نمشيو هاد لويكااند .محتاجة نخرج شوية
رن الهاتف ديالو ابيل فيديو وشاف فيها بنص عين وبعدو للجنب قطع ورجع صونا ابيل عادية حدا ودنو كيهضر وينقص الصوت من الجنب وهي كتاكل ساكتة
سيمو:فين ااا…. كنتعشا تا نسالي.. امم.. انا ونهى .. تلفت شافيها وقال ..الحمد لله ..يالاه يالاه ..حتى نهضرو
قطع وتلفت قاليها
هاد عمي كيعيط غير فوقت الماكلة
خططو للسفر فالويكاند بجوج ..وشدو الطيارة نيشان لباغي وحجزات مسبقا جوج غرف ليهم بجوج حطو فيهم الشنط ومن بعد خرجو يسمتعو بالمدينة ..تبعها سيمو وماعارفش فين يمشي وفين يجي وغير لاسق فيها منين ما دازت ويهز ليها الصيكان وهي تابعة شوبينغ منين مادارت تشري وفكل مرة كتنفق الفلوس كتحس بالراحة ..متخلاو حتى بلاصة مامشاوش ليها وماجلسوش فيها وفين ما مشاو ياخدو صور ليهم بجوج ..نفعا السفر وخرجها من ذكراياتها وتفكيرها ونسات الهم واستمتعات مع السيمو اللي كان ليه دور كبير فسعادتها وخير ونيس .مشاو فالنهار الثاني لديزني لاند كل واحد حامل شكراتو ..خداتو بوندو دارتو على واسها فيه ميكي ودخلات لمحلات ديرني لاند خدات ملابس كارتونية واواني كارتونية ومشات حدا سيمو لابسة سروال رياضي واسع حتى للارض رمادي والفوقاني ديالو واسع محلول وديباردور كحل من لداخل وكرشها كتبان وكونفيرس كحلة وعادية حاملة شكارة فالغوز كتسارا وتلعب هي وسيمو من قنت لقنت بحال الدرادي الصغار ..اما الضحك ماقصروشمن جهدهم ..كل مرة يتشتت واحد فيهم فالارض بالضحك.. دوزو نص نهار فالالعاب وجلسو يرتاحو فمكان خاص بالطعام ..جبدات الماكلة اللي داو معاهم باش ميطيحىش فماكلة محرمة. واكتفو بشراء المشروبات وتقابلو كيتغداو وهي كضحك وسيمو كيعاود ليها ..
قاليها: عرفتي نتي..اللي شافك يقول شي شينوية ..لا فصالتك ولا وجهك ولا شعرك..بحال دوك الشينويات اللي يعزلوهم غير هما ويجيبوهم بطلات فشي فيلم ولا مسلسل
قالتليه:ولاكن هما عمدهم واحد الجلدة على عينهم مسدودة
قاليها:هادا باش فايتهاهم..عينيك واعرين وكبار وزايدة عليهم بالشفار.. مك توحمات على شي مونيكة شيموية
حلات عينيها فيه ولاباي فمها كتمص المونادا قالت ليه
ماتنعرف هه
شاف فيها كيضحك قاليها…شوف شوف شوف.. شينوية محطوطة..الفييم والنويف..والحروف كوحل ولحجبان
غطات وجهها كضحك وقلبانو للجنبقالت ليه وصافي..حشمت كاع
ضحك وقاليها:كنقول هي اللي كاين ..واش كدبت!!
درقات وجها وحلات صبعانها كتشوف فيه بواحدالعين وقالت ليه
هادا غزل ولا غزل؟
قاليها:وا نتغزل فالزين ..الزين حبو مولانا
هبطات يديها كضحك قالت ليه: صافي براكة عليا ..شبعت
قاليها: مناش شبعتي؟ من الماكلة ولا الصباغة بغيت نقول الغزل. هههه
قالت ليه:شبعت من الماكلة..ايوا كمل ليا..قولي انا كي دريرة ؟ زوينة ؟
قاليها:نتي واه الفن الفنون..الزين ديال بصح بلا ماكياج..دايرة المكياج دابا؟
ودات بالنفي ويديها على وجهها متكية كتسط ليه قالت ليه
كمل
ضحك قاليها: شنو نكمل
قالت ليه:قولي شنو كنتي كتقولي دابا..حسيت بواحد لينيغجي زوينة ..
تنهد قاليها:اااش غنقوليك.. لعوينات لوووز نعام اسيدي..ونيف مووس منكد..والفم شهيدة عامرة بعسيلة
جمعات حجبانها قالت ليه :ها؟!!
قاليها:هادا هوا الغزل ديالنا ماعندي مندير ليك
قالت ليه:اها ه كمل..ولاكن قولي الحقيقة..
قاليها:الحقيقة فالدقيقة.. الزين ولاطاي كولشي كاين..شوف شوف الشعر تبارك الله ..بحال الحرير.. كيفاش كيبري وتبارك الله كثيف..والحجبان كباو والشفار طوال..
تنهدات :ايوا
قاليها:ايوا يوا..تسناي غدا نقوليك واحد الغزل واحد اااخر واعر..دابا جيتيني على غفلة مالقيتيش عندي الالهام
بعض الديون …….. ليست أموالاً
الديون قد تكون…….. كلمة طيبة في لحظة إنكسار
مواساة في …. لحظة حزن
مساندة في …. لحظة ضعف
دعوة من القلب في ……… لحظة ضيق
لمسة حب على كتف …….. في لحظة يأس
هذه ديون مسموح أن لا تسدد أو ترد
ولكنها لا يجب أبدًا أن تنتهي …»»
#همسة_حب🌹√
يوماين كانت كافية باش تجدد فيها الطاقة اللي ضاعت منها خلال هاد الشهور كلها . رجعو لسويسرا لاكن بمجرد ما رجعات لحياتها الطبيعة تلفات على كلشي .. ماعرفاتش باش تبدا ولا حتى منين تبدا ..ماعرفاتشحتى كيفاش كانت عايشة من قبل باش تقدر تكمل. تلفات ليها البداية وكأنها يالاه رجعات ليها الذاكرة . شنو الروتينات ديالها اللي كانت عايشة من قبل وشنو هما اهدافها وطموحاتها..وشنو هما الطرق اللي كانت كتسلك ..كلشي تلف وبدات كتحاول تبدا من اي نقطة وكتحاول تستاقر نفسيا وفكريا.. خلاتها على الله غادية ورجعات لروتيناتها المتكررة وكانت كل يوم كتهبط عند سيمو تجلس معاه..مرة تلقاه بوحدو مرة مع صاحبتو وكان ديما كيشدها تجلس معاهم وتخرج معاهم حتى لواحد النهار .
قررات تسافر وتمشي تشوف ماماها فالمانيا..حزمات الامتعة ديالها وفضلات تمشي فالطيارة باش متهدرش طاقتها فالسياقة وفنفس الوقت تكسب الوقت..
حجزات فالدرجات الاولى من الطيارة وخدات المقعد ديالها حدا النافدة .. شوية جلس جنبها شاب اسود الشعر ابيض البشرة من الفصيلة الكورية وتبسم ليها فالاول ضن انها كورية او شينوية حيت ملامحها كيشبه للملامح الكورية وكذلك بشرتها البيضاء وقال ليها
انا محظوظ جيت مع بنت بلادي فنفس المقعد
تبسمات ليه وضحكات كثر قالت ليه
شوف كبير ليا ولاكن انا اصلي مغربية
تعجب وقاليها
ااه بصح!! حسابني كورية.. قلت يمكن دارت تجميل كبرات عينيها شوية
ضحكات وقالت ليه
لا لا عمرني درت تجميل..هادي خلقتي ومقتانعة بيها ..الاخ من كوريا؟
تبسم قاليها
اه من سيوول
مدات يدها الرقيقة قالت ليه
متشرفين ..
صافحها حتى هوا وقاليها
عمرك زرتي كوريا
قالت :كنت كنفكر نزورها بنا انها دولة عندها طابع خاص بيها وثقافة مختالفة ..
تبسم قال:الى شي مرة بغيتي تزوريها كنصحك تمشي ليها فالصيف ..حيت فالبرد مستحيل تصبري..خصوصا نتوما فافريقيا عندكم الجو سخون واخا فالبرد
تبسمات وقالت
زرتي المغرب شي مرة ؟
قاليها :لا ولاكن كنسمع عليه
تحمسات وقالت :كنصحك تزورو .. ماتشبعش منو..حتى هوا عندو طابع خاص بيه..وخصوصا مراكش..
هاكا تجبدات الهضرة بيناتهم وبقاو كيتجمعو حتى اندامجو وتقاربو وخداو راحتهم فالهضرة الطريق كلها حتى وصلو .. خرجو بجوج من المطار ووقفو يتوادعو
تبسمات ليه وقالت كترد على كلامو
ماشي بزاف غير اسبوع وصافي..راني عاودت ليك فالطريق قصة حياتي ههه
ضحك وقاليها: اذا غادي نتلاقاو مرة اخرى فسويسرا ..لحسن الحظ طلعتي غير مسافرة
ضحكات وقالت ليه:ولحسن الحظ حتى نتا طلعتي مسافر وصافي
عنقها ومسح على ضهرها قال
اذا نبقاو على تواصل حتى نرجعو لسويسرا
كمشات كتافها قالت ليه
اوكي
باسها فحنكها ومشا وبقات واقفة كتشوف فيه وقالت
شحال كيوت
كملات طريقها جارة باليزتها الصغيرة كضحك.. اخيرا شي حاجة كتبعت السرور ..لاول مرة تتعرف على شي شخصية كورية والاهم انه كله طاقة اجابية ..والاكثر انه مختالف تماما على البقية..لا من ناحية التفكير ولا طريقة الحوار ولا حتى الحركات ..تقيل لاكن كيوت وفنفس الوقت حسات بيه راجل..بعيد كل البعد على الافلام والمسلسلات ..وانما الواقع شيء اخر ومختلف تماما .. وصلات لفيلا من الفيلات اللي كانت فواحد الحي ووقفات فالباب كتصوني وكتسمع الكلب لداخل كينبح ..حلات مرى طويلة ورقيقة ..ماتعرفها مرى وبلا بنت ..شعرها لوكلي كامل كحل ولابسة كولون رقيق وكابيتشو واسع خصر وبانطوفة كحلة ..حلات عينيها متفاجأة وعنقاتها بقوة كتهضر الالمانية ومصدومة
شنو هاد المفاجأة !!! هااااا!!!
تراجعات كتشوف فيها ورجعات عنقاتها.
ماقلتيش ليا غتجي
نهى: بغيت ندير ليك مفاجأة
عنقاتها مها بقوة قالت ليها
توحشتك توحشتك بزاف كنت اصلا غنجي عندك
طار عليها الكلب كينقز وهي كتعنقو ..جرات ليها مها الباليزة ودخلات للدار الكبيرة اللي كانت اكثر من رائعة وفيها اكثر من ربعة دالقطوط وخمسة دالكلاب كل واحد وشكله وكل واحد ونوعه . عنقاتهم واحد واحد وباستهم واحد واحد وجلسات وسطهم فرحانة وهما كل واحد فين كيجر حتى ناض الصدع بيناتهم وناضت ليهم مها زعفات عليهم فرقاتهم خلات كل واحد فيهم مكمش فجهة. وجلسات حداها عنقاتها وقالت
ايوا يا بنيتي كي دايرة اش خبارك ..اش هاد المجية اللي ماعلمتيني بيها
عنقاتها نهى وقالت :توحشتك داكشي علاش جيت بلا منفكر
عنقاتها مها وبقات ساكتة مطولا ورجعات شافت فيها وتنهدات
كنتمنى من قلبي تكوني بيخير..تكوني مرتاحة ..واخا ما مطمناش وحاسة بيك عندك شي حاجة
بقات نهى ساكتة مطولا وقالت
تيتو مكاينش؟
تنهدات مها وقالت
تيتو فالعيادة .. منقوليههش جيتي حتى يجي يشوفك
ناضت كتشوف فالدار ودور قالت ليها
توحشت الدار ..غنمشي نشوف بيتي..توحشت هادشي كامل
مشات كتجري طلعات لفوق لبيتها وتلاحت على ناموسيتها كتعنق فنونوساتها وتتكور ختى لواحد اللحضة تقلبات على كرشها وسهات لمدة طويلة حتى داها النعاس هاكاك
شبعات نعاس من بعد ناضت لقات راسها فبيتها والباليزة حداها ..ناضت جبدات بيجامة لبساتها ونزلات كتسرح عينيها لقات مها وراجلها جالسين على الطاولة كياكلو ..
قالت ليه مساء الخير
تلفت راجل مها اللي كان ابيض الشعر مخلط بالاشقر وابيض البشرة شاف فيها مصدوم وفمو عامر وشاف فمرتو وعاود شاف فنهى وناض من بلاصتو كيمسح فمو قاليها
ميمكنش!!! نهااا
طارت عليه عنقاتو وعنقها بقوة حتى تهزات ومها كضحك قالت ليه
خليتك تكتاشف المفاجأة راسك
رجع شاف فنهى وشد ليها وجهها قاليها
مامتيقش!!!!
عنقها فرحان بيها وجلس هوا وياها فالطبلة قاليها
ماكنتش متوقع هاد المفاجأة هاد العشية .. ووو.. الحمااااس دابا.. شتي على ملل ..الملل من نهار مشيتي وحنا فواحد الروتين بزز باش كنعيشوه
شدات ليه فيدو قالت ليه
انا حياتي بلا بيكم خايبة بزاف.. اصلا حياتي تبدلات كلها ..من يوم ما خرجت من هنا وتحملت مسؤوليتي وانا من فشل لشفل ..
شدات ليها مها فيدها كتشوف فيها بأسى وقالت
علاش شنو وقع؟ علاش مكتعاوديليا والو؟
تنهدات نهى وقالت : عادي..ضاروري حتى انا غادي نعيش حياتي..نصيبي فالفرح ..ونصيبي فالحزن ..نجربالفشل ونجرب النجاح ..
سكتات مطولا وقالت :
هاد الساعة كاين غير الفشل
بقاو كيشوفو فيها بأسى وقالت ليها مها
الى قدرتي تعاودي لينا ..حنا مستاعدين نسمعوك ..ياك ا تيتو ؟
ود بالايجاب قاليها معلوم مستاعدين فأي وقت
بقات نهى ساكتة مطولا ساهية بأسى وقالت
انا ماعنديش الزهر فالحب..
قالت مها:واش وقع مشكل مع ناصر!!
ردت: ناصر مشاا.. صافي مشا بحالو .. ختار يعيش بوحدو .. ويبقا حر ..وانا تقبلت هادشي
تزيرات ما وقالت ليها: قلت ليك ماتيقيش.. وحدرتك ..ووصيتك ..ولاكن نتي بغيتي تجربي خليتك تجربي ..وتعرفي الحياة على حقيقتها ..
شد ليها تيتو فيدها قاليها: على العموم عشتي وجربتي..وتعلمتي.. عادي نتي مزال بداية مشوارك ..غادي تخدلي..غادي تعيشي تجارب..المهم ماتعطيش للحاجة اكثر من حقها ..حيت مكايناش غير هي فحياتنا والحياة مليئة بالمفاجآت ..خودي العبرة باش ماتخسريش فالاختبار الموالي.. مهما كان الدرس قاسي ..نتعلم منو حيت فالحياة كاين ما اقسى من اللي قبل.. تعلمي تنقزي المآسات حيت الحزن عليها ماعندو باش يفيدك.. وتعلمي انه من بعد كل نهاية كل مرحلة او تجربة .. راه جاية فالطريق تجربة اخرى ..وماشي حنا اللي كنجيبوهم ولا نهتارهم ..هما كيجيو راسهم .. هادا علاش خصنا نعرفو ..ان بعد كل نهاية ..كاينة بداية ..وبلا منحزنو على النهاية وانما خصنا نستاعدو للبدايات ..فكل مرة نستاعدو
الام : واخا تحسي بحياتك توقفات ..حيت النهاية كتبقا نهاية . كتخلينا حتى حنى نوقفو ونحسو بالنهاية فكولشي وفكل حاجة كتحيط بينا .. ولاكن هاد الفترة واه فترة وجيزة وغدوز باش نبدا تجربة اخرى ..يعني تأملي لشنو الجديد وشنو جايك .. باش تسرعي الوقت وتجاوزي هاد المرحلة بسرعة وماتحسيش بيها واخا تكون قاسية .. حطي فبالك ان بعد كل نهاية ..بداية جديدة ..بلاصت ما تحزني ..بلعكس فرحي..فرحي عتخوضي تجربة اخرى ..وستافذي من اللي قبل وعيشيها بشغف ..استمتعي باي حاجة زوينة فيها
سكتات مطولا كتشوف قدامها وتيتو كيشوف فيها وشاد ليها فيدها ..قاليها
عادي .. نتي دابا عندك جوج تجارب فحياتك لحد الان ..الاولى كان سببها الموت ..والثانية سببها الانفصال.. الثالتة ماعرفناش شنو غيكون سببها ..حزنتي فالاول وقلتي حياتي توقفات..ولاكن بديتي حياة جديدة..عاوتاني حزنتي وقلتي صافي وقفت.. ولاكن مزال غتبداي حياة اخرى جديدة.. انا نوصيك ابنتي.. ديما فاش تبغي تبداي فشي حاجة حطي فبالك .. قولي انا غنخوض هاد التجربة.بحلوها ومرها .. ماتفكريش فحلوها وصافي..ولاكن قولي..انا غادي ندخل لتجربة ماصانعاهاش بيدي..يعني نتوقع اي حاجة ..كانت زوينة ولا خايبة..ولاكن. الهدف من دخولي ليها..هوا نستمتع باللحضات الزوينة.. والخايبة نتجاهلها ونقلب على لحضات اخرين زوينين ..وصافي.
تنهدات قالت ليه عندك الحق.. انا فالطيارة تعرفت على واحد الشاب كوري.. ضريف بزاف..وكيوت.. حسيت باحساس فشكل..احساس كيقولي باللي هاد الشاب مغاديش يكون صديق ولا غيدوز عادي..حسيت براسي نساجمت معاه ..مافكرتش فالحوايج الخايبين فاش كنا كنهضرو .. تفاهمت معاه فالهضرة..حسيت براسي غنعاود نتلاقاه مرة اخرى ..خصوصا انني حسيت بالراحة معاه وكله طاقة اجابية نفعني فهاد السفر
الام: وتوقعي انه يقدر يكون مزوج ..يكون خاطب..يكون عندو صاحبتو..يكون معتابرك صورة ودايزة…ديما توقعي الزوين والخايب
نهى: ااه بصح!! انا كاع ماسولتو واش داير علاقة!!
تيتو: ماتسوليهش.. خلي حتى تعرفي شعورو اتجاهك اولا..واش كيشوفك كما كتشوفيه ولا العكس..يقدر ينفع صديق احسن كاع من حبيب..
الام: المهم من هادشي كله…الجنس لا.. اوكي.. الجنس لا حيت نتي ماشي عاهرة
تيتو:ماشي عاهرة ولاكن عندها حتى هي رغبات!!
الام: لاالا حسن ماتفكرش فهادشي وتبعد عليه ..قوة المعاشرات يقدرو يجبو ليها مرض
تيتو: الجنس بحالو بحال الماكلة ولا النعاس ولا دخول الحمام ..نهاو الانسان كيحتاج انه يمارس الجنس كيمارسى عادي بحال فاش كيحتاج انه ينعس ويرتاح ولا ياكل فاش يجيه الجوه
الام: تيتو ..من الاحسن مادخلش ليها هاد الافكار فراسها.. ماتنساش راها مسلمة ..حرام بعيدا كل البعد على الحتياجات اللي هضرتي عليهم.
هز تيتو كتفو وشاف فنهى قاليها : نهار كبير اللي جيتي فيه وشفناك ..هادا المهم هوا انكي جيتي عندنا وشفناك
الهضرة مكتساليش.. والجو العائلي زوين.مكاينش بحالو.. استمتعات بكل لحضة مع عائلتها والصباح صبحات بطاقة جديدة .. واتصال جديد
انه يان.. ردت بابتسامة وهي خارجة للجردة تتكلم فراحتها قاىلة
صباح النور ..
يان : صبحت مزيان .. ونتي ؟ كي وصلتي ؟ وكي صبحتي وكي لقيتي عائلتك مزيانين
ردت: كولشي مزيان ..الجو زوين وكلشي زوين
رد: امم ..كنت كنتسائل..واش نلقا عندك شي وقت. نخرجو بجوج نتمشاو ..ولا نجلسو فشي بلاصة؟!
ردت بابتسامة: اه اااه طبعا .. مكاينش مشكل
رد: معاياش تبغي نخرجو ؟
ردت: انا ماعندي والو ..غير جيت نشوف عائلتي ..نتا اللي قلتي لي عندك الخدمة هنا اذا نتا اللي شوف الوقت وانا معاك فيه
رد: انا دابا واجد !
ردت: اوكي مزيان ..نوجد راسي ونقوليك فين نتلاقاو
رد: اوكي مزيان نتسناك
قطعات ودخلات مبسمة كتنهد لقات مها كتوجد اشهى الاطباق وقالت ليها
ماما.. غادي نخرج نتلاقا بيان ..
قالت الام متفاجأة : درت لغدا على قبلنا ليوم ماعلمتينيش!! وتيتو غيجي لهنا على قبلنا يتغدا معانا
تفاجآت نهى وقالت ليها: شنو ندير دابا انا قلت ليه غادي نلبس ونجي!! دابا غنقوليه يجي يتغدا معانا حسن وعاد نخرجو
الام: ااه قوليه يجي حسن ..حتى انا بغيت نتعرف عليه
نهى . اوكي اذا نعيط ليه نقولها ليه
تمهدات وتاصلات بيه كتمشي وتجي فالدار قالت ليه يجي عندهم وشرحات ليه الوضع كما هوا وقبل الدعوة ومشات للمطبخ عند مها قائلة
صافي غادي يجي عندنا
الام :شحال فعمرو ؟ مقالش ليك !
نهى : تمنية وعشرين
الام: على هاد الحساب مغيكونش مزوج ..ولاكن يقدر يكون عندو صاحبتو ما تأمليش بزاف
رن الهاتف وكان المتصل سيمو وردت بسعادة
الو ..سيمو ..
سيمو: وافين الالااالمان
ردت كضحك: فالدار السي مزال كاااع ماخرجت منها
سيمو: كي دايرة تلعائلة مزيانة
نهى: من هادااااك الشي الزوين
سيمو: هاي هاي على الدارجة
نهى : ايي ه وشنو حشاب ليك تغلبني زعما ..عرفتي درنا واحد الحوت مممم واعر ..ااه عرفتي..تعرفت على واحد الكوري اسيدي!’
سيمو: كوري ديالاش! لبهايم!
ردت: لااا ماتفلاش..كوري كوري .. داكشي اللي فنن
سيمو: كنضحك اهاه. زيدي
نهى: وصافي غيجي دابا يتغدا معانا ..وغادي نخرجو باش نتعارفو مزيان ..
سيمو: ايييه .. بيه فيه
نهى: فيه فيه واش انا كنلعب. !! صافي دابا قررت نسا لكلب دصاحبك ..
تصدم سيمو وتصدمات حتى مها بقات هازة الطاوة وكتشوف فيها .. اما السيمو مالقا مايقول وهي تكمل هضرتها وقالت ليه .
عااد دابا وليت كنشوف مزيان.. وشفت شنو وقع لي.. جبتو من المغرب وعطيتو دار يسكن فيها وخدمة. واي حاجة كيتفنى عليها الراجل باش يديرها فهاديك الربعيييم دالعام .. انا عطيتها ليه فشهر ولا اكثر..هوا مشا ما عطاني حتى مبرر.. ماقدررش كاع داكشي اللي درت معاه ..ومشا بطريقة بحال الكلب.. ماكيسواش وماشي ولد الناس .. مايستاحقش كاع شنو درت معاه.. حمار وكلب .. ماعطانيش سبب مقنع..هرب بحال الكلب.. المشكلة انا حمارة كبيرة عليه حيت بقيت كنبكييي!!! واش دابا انا ماشي حمارة !! يالاه
سيمو: واا.. شس مااا…
ضحكات بسخرية وقالت ليه: ولاهيلا ماعرفتش كااع علاش كنبكي..تقول مات ليا !!! مشا وخلاني وانا بقيت كنبكي واش دابا ماشي حماقيت!! حشاها لي!!
سيمو بقا ساكت وهي كتعبر فاللخر قالت ليه : انا غااادي نمشي نخرج .. قررت نبدا تجربة وحدة اخرى ..اخر مرة بعدا ندير علاقة مع مغربي !! اخر مرة فحياتي ماحسابنيش الصراحة مساخيط !!
سيمو: طفيتني اختي نهى واحق الرب
نهى: ايوا عرفتي دابا..انا غادي نقطع باش نوجد راسي ونلبس شي لبسة نخرج بيها باش مايجيش يان ويلقاني مغبونة وفيا ريحة الدود.. ومكلكة . يالاه الزين بسلامة
قطعات وضارت لقات مها كتشوف فيها بنص عين وساكتة وقالت ليها
طلقتي لسانك فالعربية!
نهى: حيت سيمو كيهضر معايا العربية ..كيقولي الجمال. الفنون الزين.. ديما وانا كنهضر معاه صافي ولفت فهمتي القضية فالطقية فهمتي
مشات كتلوح بيدها طلعات لبيتها بدلات حوايجها ونزلات لابسة ليبة موس كحلة وصاية ومينية دالجلد فيها فتحة وبودي كحل كول في ومونطو تروا كار طويل حتى للارض خفيف وبروطكان كحل طالع تحت الركبة بالسيور وصاك لوي فيتون ..شعرها مطلوق ومكياج خفيف برز جمالها والعطور كتفوح .. لقات تيتو وصل للدار كيوجد الغدا حتى هوا وسمعات الصونيت فالباب وعوجات الطريققابت ليهم انا غفتح ..يان وصل قالها لي فتيليفون
مشات حلات الباب لقاتو هوا..طويل والابتسامة والسنان بيضين وحتى هوا لابس كلشي كحل تقول متافقين ..دجينز كحل وبوط كحل دالرجال وبودي كحل كوول مونطي تروا كار حد الركبة خفيف كحل ومطلع شعرو اللور ..عنقها بيدو سلم عليها وجراتو من يدو فرحانة بيه دخلاتو للدار كتعيط ليهم ..جاو عمدو وحبو بيه وعرفاتو عليهم وجلسو مجموعين فالغدا كيتغداو ويتجمعو وتما عرفاتو خدام فالبورصة فسويسرا وتعرفات على مساره الدراسي من خلال هضرته مع تيماس “تيتو”
خرجو بجوج لاحد المقاهي الكلاسيكية فشوارع برلين وجلسات خدات كابوتشينو وكرواصة هي وياها وبداو كيتجمعو
نهى: اول مرة نشوف كوري طويل ..حيت معروف عليكم قصيورين
ضحك وقال : معروف علينا بالسمع ماشي بالشوف!! شنو بان ليك دابا ..تعاودي تسمعي الاشعات؟
ضحكات وقالت: لاا ابدا ..
يان: امم ..قولي لي .. مرتابطة ؟ ماشي مرتبطة؟
تنهدات وقالت: يالاه خرجت من علاقة فااشلة بامتياز وبأحسن معدل
جاتو الضحكة وقاليها : بأحسن معدل هه.. شحال جبتي فيها؟
ردت :اعلى نقطة.. اصلا انا علاقاتي كلهم فاشلين .. المرة الاولى تزوجت ومات راجلي وخلاني فغبينة..والثاني سمح فيا وخلاني .. عاونتو باش يبني مستقبالو وديتو لسويسرا ووفرت ليهم جميع وسائل العيش والخدمة حتى هي.. فاللخر مشا ..نعس وفاق وقالي بسلامة ومامرتاحش وبغيت نبعد ومشا !! بلا مادرت ليه حتى حاجة!! عطيتو كلشي وخلاني!! واش انا مسخوطة ولا ملعونة ولا منعرف شنو!!
هبط راسو كيضحك وهي بكل عفوية كتشرح حتى سالات وقاليها
نتي ما مسخوطة ما ماملعونة.. الاهتمام المفرط كيخنق.. اي علاقة كتبغي مجهود من الطرفين باش تنجح .. اما الى كان واحد منهم متوفره ليه كلشي كيفقد الشغف ..والشغف هوا اللي اللي كيعطينا الحماس والمجهود ..ولحاجة هي اللي كتخلينا نبدلو مجهود.. وهوت يمكن ما لقاش الحاجة اللي يبدل عليها مجهود فعلاقتكم وحض بالملل والشغف مشا وزاد تخنق من كثرة الاهتمام والعطاء فهمتي كيفاش
تنهدات وقالت ليه: اول مرة نسمع هاد الهضرة الصراحة
رد:العلاقة المملة كتحول لعجلة من المشاكل ىالكآبة
ردت:الصراحة شفت راسي عطيت بزاف بدون مقابل.. بحال مصباح علاش الدين..حققت ليه احلامو وماحقق ليا حتى نتفة من احلامي.. ماوفاش حتى بكلمتو .. تصدمت فيه وتخدلت ..كلين صفعة ديال المعقول
بقا كيشوف فيها مطولا وقاليها
باينة عاد خرجتي من هاد العلاقة
تنهدات وقالت:شي شهور دابا..
تنهدات وتبسمات قالت ليه: ونتا زعما مادايرش علاقة
هز الكاس خدا منو رشفة وقال
هاد الساعة لا
هزات حاجبها قالت ليه:امم ..زعما هاد الوسامة وهاد الشياكة ..وهاد الحذابية كووولها وحدانية!! ميمكنش!!
ضحك وقاليها
ماشي مكاين واالو ..حتى انا عاد خرجت من علاقة فاشلة ..
ضحكات وقالت :تواتينا الفاشلين انا وياك
حك نيفو كيضحك وقاليها
ماشي فاشلة فاشلة ولاكن طريقها مسدود.. وكما قلت ليك العلاقة اللي كيرجع فيها الملل كتموت تدريجيا
ذوات يدها تحت فكها وقالت
اهمم..عاود نستافذ من تجربتك شوية
تكا على الكرسي اللور بارتياح تنهد وقال
المسألة مسألة بعد..هي حياتها فسيوول وانا خدمتي فسويسرا واستقريت فيها ..البعد اللي بيني وبينها هوا اللي خلانا نتفارقو.. العلاقة ضاعت ..هي مابغاتش تجي تعيش معايا وماقدراتش تخرج من كوريا وتخلي حياتها تما ..وانا منقدرش نخلي خدمتي ومستقبلي ونمشي نعيش معاها تما .. بقينا هاكاك مرة تجي عندي مرة نمشي عندها ولاكن فالاخير اقتانعنا وشفنا باللي هادشي مغاديش يسلكنا ومايمكنش نبقاو عايشين هاكا واحد فالشرق وواحد فالغرب
تنهدات نهى وقالت:كن كانت كتبغيك كن كنتي نتا هوا حياتها وسعادتها وتعيش معاك وحداك فين ماكنتي..
رد:قلت هادشي مع راسي وقلت نخليها نشوف واش تحس بالفرق ..واش تحن
نهى: وغتبقا تسناها حتى تشوف واش تندم ؟’
ضحك وقال: لا ..الى لقيت حب جديد مغنتردد حتى دقيقة
تنهدات نهى بأسى وقالت :حتى انا ..كنتمنى نلقا حب جديد ..هاد التجربة ألماتني بزاف..وتضلمت فيها والشعور بالضلم اكبر من الفراق
لقاء كلاسيكي هادئ فاحدى مقاهي المانيا الكلاسيكية على الشوارع .. من بعيد كانو كيبانو ثنائي متفهم .. وكأنهم كيعرفو بعضياتهم من زمان .. داتهم الهضرة حتى نساو راسهم وطاح الضلام وشعلو الاضواء ورجع الجو اكثر رمنسية .. عشية كانت كافية يعاود كل واحد على راسو ويتعرفو اكثر ويتقربو من بعضهم اكثر حتى تم التفاهم والانسجام ببناتهم تلقائيا وفضلو يتمشاو فشوارع بيرلين الجميلة وجوها البارد وهما كيتحدثو وبضحكو وشيئا فشيئا تلامسات الايادي وتشابكات الاصابع وتحول اللقاء لعلاقة غرامية توجاتها قبلة خفيفة قبل فراقهم وبعدها دخل كل واحد لدارو .
سدات باب الفيلا وسدات عينيها عاضة على شنايفها بابتسامة و خلات لقات معا جالسة على كنبي مغطية من بغطاء خفيف وكتسناها .مشات نهى نهى جلسات حداها بابتسامة وقالت
علاش منعستيش؟
الام: بقيت كنتسناك ..اش هاد الوقت واش مولفة كدخلي معطلة للدار!!
نهى: لالللالا بلعكس مع الستة كندخل عمرني بقيت برا..غير دابا الوضع مختالف
الام: شنو اللي مختالف؟
تنهدات نهى وقالت: انا ويان دخلنا فعلاقة غرامية
الام: وشنو اخرت هاد العلاقة؟!! ..
نهى: الزواج !!
الام: ماشي مهم تزوجي .. المهم بيمن تزوجتي؟! وواش مرتاحة فالزواج ومستعدة تكوني اسرة؟! ومستقبل..هادا هوا المهم..اما زواج الحيوانات راه كنعرفوه..كل مرة تزوجي بواحد !! لا..وكل مرة فعلاقة مع واحد لا.. الحياة كتبغي سند..كتبغي شريك حقيقي ..كتبغي دفئ العائلة ..التفاهم والاستقرار .. والراحة النفسية.. الزواج ماعندو علاقة بهادشي ابنتي الى مكانش الشريك ديالك فهاد الزواج حتى هوا كيفكر بهاد الطريقة وكيختار اللي دفي ليه حياتو ماشي زواج بارد ..تقمري عليه وصافي
نهى:وشنو ندير!! باش نعرف انا شنو مخبي ليا القدر؟!
الام: يكون يان كيبغيك.. كيبغيك بصح ويضحي معاك ..يفرحك قبل ميفرح. ويقدم ليك كاع هادشي اللي قلت ليك..
سهات نهى وقالت : هوا برج العذراء.. شنو كتعرفي على برج العذراء!
الام: بحال تيتو.. كيغيو الحرية.. ونتي احبيبة برج الحمل ..الحمل الوديع ..الهادئ..التقيل ..المحب للحياة والفشوش وكيدير للماء منين يدوز..وفوق هادشي رمنسي ..ومنطقي ماشي عايشة الاوهام
نهى:وهوا!!
الام: هوا العذراء..راه باين من اسمه ..عذراء..وكيبغي يبقى عذراء
نهى: يعني منتأملش بزاف!! واخا رتاحيت ليه
الام: هوا بحال تيتو .. منطقي..واقعي واذكى برج .. ورزين وحكيم .. كيتمتعو بالحكمة وماشي عاطفي..يعني ماتسنايش يمشي معاك بالعاطفة.. وحدودي.. وماكيديرش علاقات بزاف..تلقاي فحياتو علاقة وحدة ولا جوج ..هادشي اللي كنعرف عليه واللي عشتو مع تيتو ..
نهى: شنو دابا؟! يعني مكاين والو
الام: خلينا من الابراج..جمعي راسك..نتي يالاه تعرفتي عليه صبري حتى تزيدي تعرفي عليه وعاد فكري فالزواج ..المهم يكون الشخص المناسب..وختابريه واش يقدر يصبر معاك فالحياة..واخا راه من الابراج اللي كيصبر بزاف اكثر ما تخيلي..بلا ماتقولي راضي عليا قدر يكون صابر ليك وصافي.
دارت نهى يدها على خدها كتسمع شي فهماتر وشي ما فهماتوش فاللخر ناضت لبلاصتها تنعس وجبدات تيليفون حتى كانت غتصوني ليه وتراجعات تذكرات كلام مها
ختابريه..ماتنسايش باللي ماشي عاطفي.. نتي يالاه دخلتي معاه مزال مكتعرفيهش.. ماشي مهم تزوجي المهم بيمن تزوجتي.
تنهدات وحطات تيليفون وقالت
مالي انا مزروبة!! واش مشتاقة فشي زواج!! مالي انا ديما اللي نعيط ونسول مانحسش براسي حتى انا عندي قيمة ويسولو فيا هما .. ومزال ماعرفت حتى طبع الكوريين كي داير اصلا وزيد عليها هاد عذراء حتى هي..بلاتي ندخل نقرا عليها شوية
احم احم ..مولود العذراء.. هو أكثر الابراج دقةً وحرصاً وانتباهاً، كما يتمتع بشخصية قوية تجعله مرجعاً للعائلة والاصدقاء لاخذ النصائح منه، شخص حساس اخلاقي، وصبور.
يتميز برج العذراء بقدرة عالية على تحمّل التعب والضغوط في العمل، وهو يتمتع بحماسة كبيرة في اداء عمله فلا يضجر او يملّ وبالتأكيد لا يستسلم. هو صادق في احاسيسه ومشاعره، ويعشق الجمال والترتيب.
ابرز نقاط القوة التي يتمتع بها مولود برج العذراء هي الوفاء، الصراحة، اللطافة، والعمل الجاد. في المقابل، لدى هذا المولود نقاط ضعف ابرزها الخجل، القلق، انتقاد نفسه والاخرين، يغرق في العمل وينسى التسلية والمرح.
في الحب، يملك مولود العذراء جانباً رقيقاً وقلباً حساساً، لذلك على الشريك ان يشعره بالاطمئنان والحب لكي يرتاح له ويفتح له قلبه. يفضّل مولود هذا البرج العلاقات العاطفية المستقرة والجدية بدل التسلية.
اممم هادي مهييييمة هاد يفضل العباقات الجدية بدل التسلية..يعني داخل بنية حسنة ماشي باش يتفلى ويدوز علاقة عابرة! همممم دزيد. اش قالو
يتميز بنضرة ثاقبة وهوا قادر على التقاط ادق التفاصيل وكذلك ينجح في العمل كناقد
لالالا انا الصراحة مابغيتش واحد يبقا ينتاقدني فالصغيرة والكبيرة.. ولاكن الصراحة بغيت واحد كيتمتع بالحكمة والصبر باش يصبر عليا ومايديش عليا كاع ..افففف عوتاني غنجلس نخطط وندرس وانا مابقا فيا اللي يحلل ويناقش.. غادي نخلي هاد العلاقة هاكا حتى نشوف فين غتخرج
جاها اتصال من حفصة فجأة وفتحات الكام كضحك وتكات كتهضر قالت ليها
عرفتي فين انا
حفصة:فين!؟؟ شفتك غبرتي غبرة وحدة
نهى: انا عند ماما فالمانيا
حفصة : ماقلتي لينا والو !!
نهى: جيت نبدل الجو كنت مخنوقة بغيت نموت
حفصة : مالكي اختي شنو اللي خانقك!!! ماتخنفت حتى انا اللي غارقة وسط الكتوبة والدفاتر !! الل هيعطيني حياتك ويعطيك حياتي تعرفي الاختناقكي داير
حكات راسها وقالت: ولاهيلا راني مخنوقة ..الدنيا كدور بيا ماعرفت لا شنو باغا لل شنو ماباغاش
حفصة: واعيييشي حياتك اش بغيتي تعرفي..ماتابعك والو ياختي. عيشي وتمتعي مع راسك ونساي عليا الهم اللي اصلا ماعندكش !! ربي ربي قولي ليا شنو اللي خانقك نتخنق معاك !!!
نهى:. اففف.. دابا تعرفت على واحد الدري ..ولاكن ماموافقنيش!! .. لالالا هوا كيقولو عليه صريح وجدي فالعلاقات وداكشي ولاكن ممل!! فهمتي !! انا بغيت شي واحد جدي وصريح ولاكن ماشي ممل
حفصة: هاي هاي هاي دابا نتي بديتي مع شي واحد !! وناصر
تنهدات نهى وقلبات عينيها قالت ليها
ناصر سماااح فيا ومشا
حفصة: اوييلي غلى سمح فيا!! كيفاش سمح فيا
هزات كتافها وقالت
سمح فيا راسو ومشا.. مادرت ليه حتى حاجة ..طلعت ليه فراسو وقالي نمشي نعيش بوحدي بسلامة عليك الله يعاون ..خلاني فازمة نفسية ماخرجت منها حتى كنت قريب نموت ويالاه وماشي حمار
حفصة:اويييلي صدمتيني !!! وشحال دابا باش تفارقتو
تنهدات نهى كتشوف فدافرها وتقشرهم وقالت
شي ست شهور دابا
حفصة: والاطررررني على ولد لحرام كان باغي غير يطلع سويسرا وصافي
نهى: ايييوا الله واعلم ..فالاول كان كيبغيني فاللخر قالي تهلاي فراسك
حفصة:مقالش ليك تستاهلي ما احسن
نهى : لا مقالهاش ليا الصراحة واخا انا اصلا نستاهل ماحسن
ضحكات حفصة وقالت: ويييلي غلى غدايدي.. فقصتيني .. شوفي راه نسيتني حتى علاش عيطت ليك..المهم راني صافي ساليت لقرايا غنجي نضرب عندك واحد الشهر عطلة ..ياك نتي مساليا قبك حاليا باش تفرغي ليا تبرعيني.. مامشغولاش ياك
نهى: ماعندي مايدار دابا
حفصة: ايوا هانا جايا كنتسنى الفيزا تخرج ليا .. راه سيماااانا باش دفعتها كنتسنى تخرج .. شوفي راه مغنجيبش حوايجي غتشري ليا كولشي جديد.. واااربي تخنقت فهاد مراكش الشوا وريحة الشياط وريحة العرق ليت نموت با يسكت ليا القلب بيت هير امتى نجي نتبرع شوية فدية سريسرا نعوض عير شوي من داك العام داز عليا كحل زحل كي ززفت .. .. زدت كملتها درت الكدرة وحرقات لي قزيبتي دابا ولات زرقة لا بيت هيي نعوم غنعوم بيها زرقة كي دنجالة خخخ تتتفوووو.. فالك لاكتآب والنفسية انا اللي نقولها اللي نهار حتاجيتك اوجهيقمشوك المشاش خخخزيت
انتهت المكالمة وطاحت نعسات مباشرة .. الصباح مع الفيقة لقات رسالة نصية من يان < Your smile lights up your eyes , good morning my love
تنهدات على اثرها وبدات يومها السعيد بديك الرسالة اللي كان ليها تأثير كبير جدا على نفسيتها وصبحات نشيطة كضحك كتلعب ومتفائلة حتى تعجبات مها لديك الحيوية المفرطة وضحكات قالت ليها
شي مكالمة هادي ولا مسج اللي بدل ليك الجو على الصباح
تفاجآت نهى وقالت ليها باش عرفتيها !!
ضحكات الام بسخرية ووهي كتوجد الفطور وقالت
من داك تيليفون اللي هازة فيدك وغادية بيه جاية
شافت نهى فتيليفون فيدها وشافت فيها كضحك قالت ليها ااه بحال هاكاك
الام: ايوا ماترتاحيش فالفرحة كثر من القياس باش ماتصدميش شي نهار كقر من القياس
تنهدات نهى بتمدمر وهزات واحد القط فيدها كتلعب معاه وقالت
خليني نفرح علاش كتفكريني.. الى كنت غنتصدم على الاقل نكون خديت واحد الطريفمن السعادة
تنهدات الام وقالت
الفراااغ الغراغ انهى اللي كتعيشي صعيب … قلبي ليك على اصدقاء بحالك .. يعمرو ليك حياتك ويشغلوك شوية .
نهى: هاهي حفصة غتجي عندي.. هضرات معايا لبارح وغتجي دوز معايا العطلة كلها
الام: ايوا مللي جايا جايا تجي عندك لهنا وجلسو هنا شوية علاش هاد الزربة علاش باغا ترجعي
نهى: لالا نرجع احسن على الاقل نكون قريبة من المكازا
الام: انا كن جيتي عليا كن ديتيها شوية فالمشاريع ديالك وزدتي طورتي منهم اكثر
نهى: براكة عليا انا مابغيتش نعيش حياتي غير للخدمة ..انا باغا نخدم شوية ونعيش بزاف..ماعندي ماندير بقوة المشاريع والصدع ومافيا اللي يخدم اصلا..
دارت الام يدها على جنبها وقالت ليها
اجي.. ياك قريتي على الفاشن ديزانير .. علاش ماديريش وكيعجبك..علاش ماديريش شي حاجة من داكشي اللي قريتي تلهاي فيها
ردت نهى بالنفي وقالت
لالا مافياش.. حتى ندير شي تلاتين عام عاد نفكر فيها دابا مافياش اللي يخدم
الام: بداي من دابا باش ماتجي توصلي ثلاتين حتى تكوني نجحتي فيها
نهى: مافياش غير خليني… ايييلى لقيت شي واحد ندخل معاه شريكة اه ..اما نخدم بوحدي لالا مافياش..
الام: ايوا الو مافيكش ستثمري فالعقارات
نهى: كيفاش!!!
الام: استثمري فالعقار ..احسن ماديري فحياتك مللي نتي فنيانة ..عوض تخلي الفلوس فالبنك محطوطين حطيهم فالديور ..فالاراضي.. فشي حاجة دخل لفلوس اكثر..
نهى: ولاكن انا ماعنديش دوم الفلوس كاملين اللي نستثمر بيهم فسويسرا
الام: ستقمري فالمغرب فين كاين تما البيع والشرا فالعقارات اكثر .دوك الفلوس اللي عندك راه يبنيو ليك تجزئة فالمغرب وتررديهم بالضوبل وحوليهم لحسابك فسويسرا.. فكري شوية هاكيفاش كيديرو الناس الفلوس.. مدامك عندك دارك ماتابعك عليها حتى واحد وبروجي ديالك كيدخل ليك معيشك مفطحة ..ايوا ستثمري بالفلوس اللي راهم محطوطين فالبنك مكتحركيهمش كاع..من هنا ثلاتين عام ترجعي ميليارديرة
نهى مصدومة:بصح!!! نرجع مليارديرة!! ومايضيعوش ليا
الام: العقار عمرو مايضيعك .. مع الوقت كيطلع ويردك ليك الضوبل..جربي فشي حاجة صغيرة
نهى: بحالاش!!
الام: شوفي فمراكش مثلا شي ارض كبيرة شريها وخليها دوز عليها واحد العماين وبيعيها.. ولا بني شي عمارة صغيرة وبيعي الديور بالوحدة .. عطا الله مايدار .. قلبي راك قارية ..بابا يعاااونك فهادشي عندو معاه غير قولي ليه ها شنو بغيت ندير وتشوفي
نهى: حتى نفكر ..دابا مشغولة ماعنديش التركيز
الام: اللي سمع مشغولة يقول عندك العمارات فسويسرا كيتبناو !!
نهى: نعيط ليان!! سيفط بيا مسج قالي صباح لخير ياك غير نعيط ليه ختى انا نسول فيه ؟!
بقات كدور دور دور حتى عيطات ليه ومالقات ماتقول..ولا عندها ماتقول وماعرفاتش كي تقولها .. جلسات تمتم وضحك وتحت فراسها وتجر شعرها وتسولو اشنو كيدير واش مسالي واش مامساليش يخرج معاها فاللخر قالت ليه
اممم كنت كنتسائل واش عندك شي وقت نخرجو بجوج.. قلتي ليا عندك ميسيو ماعرفتش معاياش كتسالي بالضبط ..واش نتسناك ولا نخرج بوحدي
رد بصوت منخفض: انا فاجتماع .. فاش نسالي نعيط ليك..غالبا غنخرجو بجوج كنتمنى يسالي الاجتماع دغيا ونسالي هادشي اللي مكلف بيه ولاكن منقدرش نواعدك
ردت في حيرة: امم..اوك ..نتسناك شوية ونشوف
تبسمات وودعاتو وجلسات فالجردة على واحد الارجوحة كتسوط وتخمم فاللخر ربعات يديها قررات تسناه حتى يسالي ، لاكن مع الاسف طال انتضارها ساعات وساعات وهي كل مرة كتحاول تلهي راسها بشي حاجة وكل شوية كتشوف فالتيليفون وتسنا اتصاله ..
تنهدات بملل كتشوف فالشمس كتغرب وهي جالسة مربعة رجليها فالجردة ولابسة قفازات وفيدها مقص ورشاشة كتنقي الجردة وقالت
متأ..مابقا خروج دابا.. مشكيلة .. نعاود نعيط ليه ؟ لالالا مانبرزطوش كن كان مسالي كن عيط
رجعات كطرد افكارها من بالها وبدات تقصص فالربيع وتقاد الورد شوية عاوتاني تنهدات وهزات راسها
نعيط ليه.. ياااه ! مالو شنو فيها!! نسولو الى مان مسالي نقوليه مي داز نهارك يالاه..نقوليه غير كي داز نهارك
حيدات القفازات وهزات تيليفون كتصوني ليه وتعاود ولا من مجيب.. حطاتو فرق الربيع كتشوفيه وقالت
لالا ..يمكن الكوريين ماكيبغيوش اللي يصدعهم.. صافي خليه حتى يصوني على خاطرو
ناضت شطبات داكشي فجأة بدا تيليفون كيصوني وطارت عليه ردت فالبلاصة
الو ..يان ..
يان: لاباس عليك؟ .. مزيانة؟
نهى: الحمد لله ..كنت كنصوني عليك نسولك كي داز نهارك
رد:كنت فالحمام .. عاد دخلت ودخلت معطل.. عرضوني شي صحابي من بعد الاجتماع على قهوة وجلست معاهم شوية..كنت كنفكر نعيط ليك فاش نرتاح شوية ونشوفو شنو نديرو.. شنو بغيتي نديرو ؟
شافت الجو كيضلام وقالت ليه
صافي مشا لياالشغف والحماس..كنت بغيت نخرج الصباح دابا مابقيتش اصلا باغا نخرج .. داز عندي النهار ممل لاقصى حد تخنقت
يان: سمحي ليا الى كنت السبب .. ماقصدتش
تنهدات وردت: غنمشي ناخد شي دوش حيت رجعت حالتي بالتراب .. بغيت نشغل راسي بأي حاجة ..
يان: شنو بان ليك تجي عندي نحضرو شي فيلم بجوج ؟
تنهدات شافت فالسما قالت ليه
انا اصلا راني فيلم.. مافياش اللي يشوف شي فيلم ولا مسرحية .. صافي حتى ندوش ونغير المزاج ديالي ونهضرو بلا منعكر ليك المزاج ديالك
يان: لااا لا بلعكس.. انا غنبقا متضايق الى نتي بقيتي بقيتي مقلقة
ردت: المهم ندوش عاد نهضرو ..يالاه باي
دخلات دوشات وخدات راحتها حتى نعسات ودخلات مها عندها لقاتها مجبدة فالبانيو حساب ليها ماتت ..بالخلعة خلعاتها حتى هي ناضت مخلوعة شافت فيها لقات راسها فالماء قالت ليها
شنو وقع
الام:نتي اللي شنو وقع!!واش نعستي!
نهى: ماحسيتش
الام: اوييلي واش لهاد الدرجة !! نوضي نوضي ..سكتي ليا القلب
ناضت نهى شللات وخرجات لبسات حوايجها عاد جاتها الكانة تهضر فتيليفون.. شدات مع يان الهضرة حتى شبعات ولغد ليه عوض ليها الخرجة ودوز معاها اطول وقت ممكن.. من ديك الساعة وهي كل نهار تلاقاه ويخرجو بجوج حتى وصل وقت الرجوع لسويسر ورجعو بجوج فالطيارة موانسين وفجو غرامي كانت فيه اسعد وحدة وقالت صافي لقيت اللي يفهمني ونفهمه وغنبدا قصة حب جديدة .. لاكن قبل حاولات تختابر راسها وتشوف واش فعلا نسات ناصر ولا غير كيتهيأ ليها..
مع وصولها للدار اول واحد شافتو هوا سيمو.. نزلات عليه على غفلة لقاتو كيغسل الماعن.. طارت عليه عنقاتو فجأة وفرح بجوعها وجلس معاها كيتجمع بحال عادتو ويقشب حتى جبدات ليه اسم ناصر وبقا كيشوف فيها
نهى :بغيت نعرف شنو دار فحياتو… اشنو الجديد ديالو ..
سيمو: وااا ..شغنقوليك.. انا مكندخلش معاه فالتفاصيل الزين.. ولاكن راه عايش..راكي عارفة كيبغي يسوق الرموك ويخدم فيه ..
نهى: لالا بغيت نعرف واش عندو علاقات واش عندو جديد..
سيمو: شوفي ..غير باش تعرفي .. ناصر الهدف ديالو الاول يدير مستقبلو ويجمع راسو ويكون راسو ..هادا هوا الهدف ديالو الرئيسي.. ماحدو مزال مادار حتى وحدة من هادو راه اي وحدة شفتيها معاه ولا سمعتيه معاه راه دايزة مع الطريق وغيدوز معاها وقيتة وسالا الفيلم.. ماشي هادا هوا الهدف وماشي هادا هوا المهم فحياتو
نهى: امم مزيان .. صافي هادشي اللي بغيت نعرف
سيمو:وعلاش كتسولي
نهى: كانو عندي شي تقابي سايط فيهم الريح عمرتهم الفنون .. المهم هانا غنطلع اه وحفصة راه غتجي هاد السيمانة .
مشات خلاتها ليه فودنو وطلعات كتجمع النفس وسدات عينيها قالت
علاقات عابرة .. المهم يبني مستقبلو..ماشي مشكل .. انا منهم مايبقاش فيا الحال ماشي بوحدي .. المهم فالحياة نبنيو مستقبلناا ونكونو راسنا ..الباقي لا يهم ..اوك
بلعاتها وزادت مع الطريق لاكن بقات ليها ديك الكلمة مسجلة فالراس.. كل مرة تراجعها ..كل مرة تفكرها والحياة مستمرة واللقائات مع يان فحدود قهوة حسب الوقت الضيق اللي عندو لاكن كانت مرتاحة فالعلاقة والتفاهم على اكمل وجه .
لاكن مع الاسف ..تأتي الرياح بمت لا تشتهي السفن ..
حتى قالت رتاحيت .ك ولقيت اللي يفهمني صدمها اتصال فواحد العشية منو وطلب منها يشوفها كالعادة لاكن كانت نبرة صوتو غريبة شوية ..مشات فرحانة تلاقات معاه وجلسو فمقهى كتسول على نهاره كي داز ..من بعد المقدمة المملة حط يديه على الطبلة وقاليها بأسف
ماعرفت باش غنبدا ليك..
استغربات وقالت: علاش شنر واقع؟
تنهد وقال: نتي بنت عمرني شفت بحالها فحياتي.. زوينة… وضريفة.. وتمنيت كن تعرفت عليك من شحال هادي.. كنت غنبقا معاك حتى لاخر رمق
ضحكات وقالت: اممم.. بصح!!
تنهد وقال: بصح .. وتستاهلي نبغيك ..منكرش باللي رااحيت معاك.. وعلاقتنا واخا خفيفة وضريفة غتبقا محفورة فالذهن ديالي وعمرني نساها..وعمرني نساك.. ولاكن انهى ..منقدرش نكمل انا ونتي
تصدمات شافت فيه وقالت:علاش!!! علاش قلتي ليا عاد الهضرة الزوينة وكتقولي دابا منقدرش نكمل معاك .! شنو السبب!!
بقا ساكت مطولا وقال: صاحبتي اللي كنت عاودت ليك عليها رجعات..وقررات تعيش معايا هنا..وانا قررت نصلح علاقتنا ونرجعو كي كنا ..ولاكن هادشي مكيعنيش كدبت عليك ولا نافقتك..انا فعلا نسيتها فهاد المدة هادي.. وخرجات من بالي ورجعت كنفكر فيك غير نتي..ولاكن فاش رجعات ماقدرتش نضبط المشاعر ديالي تأكدت انني مازال كنبغيها..وماقدرش نساها.. يقدر كن مارجعاتش وكن درزت معاك وقت اطول كنت غادي نساها ..ولاكن ماقدرتش انهى ..كنتمنى تفهميني
دورات وجهها ضحكات بسخرية وقالت
سعداتها ..سعداتها .. تمنيت كن يدير ليا شي واحد بحال هاكا .. يكون صادق ومخلص ويبغيني كما نتا كتبغيها..
شد ليها فيدها وقال
انا مابغيتش نخسر معرفتك..الى واقفتي نبقاو اصدقاء
تنهدات بقات ساكتة وحركات راسها بالايجاب قالت ليه
خصني شوية دالوقت حتى انا ..نجلس مع راسي ونراجع حسابي.. انا منقدرش حتى نقول شي حاجة دابا..لحسن حضي ماتعلقتش بيك اكثر..هاد الوقت اللي دوزت معاك كان كافيني باش حتى انا نتفك من القيود ديالي وفنفس الوقت منتربطش بقيود اخرى ..
ناضت وقفات بغات تمشي وجرها عنقها بقوة وهي كتبسم وقالت
غادي نمشي ..محتاجة نجلس بوحدي من بعد هاد الصدمة
طلقات من يدو ويالاه عطاتو بالضهر غادية وانفجرت بالبكا مهبطة راسها حتى غابت
وصلات للدار وسدات عليها ولاحت الصاك وجلسات عاى الكنبة تكمشات كتبكي وتمسح حتى تفشات وناضت وقفات كتقول
اااانا علااش كنبكي؟!!! علاااااش!!! واش ضلمني شي واحد؟! تعدا عليا شي واحد ؟! كدب عليا شي واحد؟!!! كل واحد خر فحياتو.. كل واحد من حقو يختار اللي بغا ويعيش معامن بغا.. انا علااااش كنبكي ؟!! شنو ضاع مني ؟! شنو مشا ليا ؟
مسحات نيفها كتنخصص ومشات للحمام غسلات وجها ونشفاتو بفوطة وشافت فالمرايا وقالت
توحشت حياتي اللولة… توحشت كااع حياتي فقرياتي.. توحشت حياة العزوبية بغيت غير نعرف كيفاش كنت عايشة من قبل؟! كيفاش كنت عايشة فاش. ماكنت كنبغي حتى واحد… توحشت ديك الحياة الزوينة اللي ماعرفت حتى كيفاش كنت عايشاها ومرتاحة فيها.. مالي حياتي تقلبات ؟؟؟ مالي. على على هاد الحال اصلا!!! مابقيت بغيت لا حبلا زمر .. يخخخ منو ويخ من اي حاجة جات منو.. لا لموت خلاني نفرح ولا …. اففففف عييييت عييييت عيييييت
قاطع تدمرها رنين الهاتف وناضت مشات ردت لقات المتصل حفصة وبكل حماس وفرحة قالت ليها
انا جااااااياااوووون…. حيدو حيدو انا جايا فاقصة العدو
نهى: فين جايا؟!
حفصة:اويلي !!! مالكي بيتي تحمقنيي تا نتي راني قلت ليك غني بعد غدا نسيتي!!
نهى: اه اه ..
حفصة: ايوا مالكي !! مال صوتك ؟
نهى: تفارقت انا ويان
حفصة: فففف تفارقت انا ويان… تفارقت انا وناصر..تصاحبت مع عبد المولا .. تزوجت بحزوق تخاصمت مع بزووق!!! مالكي مالكي ياختي معدبة راسك ومعدباني معاك !! مالكي ماطفطحي ليا مع راسك وطرشي بيا دوك الفلوس على دهوبات والدياماند واللبس واللبس اللبس حتى يخرج ليك من ودنيك وطفقصي ليا البشار وطرطقي ليا العديان وشي يتبعك من هنا شي يجري وراك من هنا ونتي غاديا نعام لاللة منخوية بحال فلامينكو ماقاداكش لارض وطفقصي ليا البنات وطفقصي ليا الرجال ومايديو منك لا حقلا باطل ويباتو يحلمو بيك وهادا يعيط وطقطعي غلى باباه هادا ديري معاه وتنشريه وهادا يرغب ويزاوك ونتي نعام اللاللة عاجبك راسك ودافعة كبير وتتلبسي هي اللبس المخير وتضربي ليا هي البراندات وتركبي فالحدجيد المخير وهاااكا ديري هاكا هاكا دياماندا مع راسك..خخخ …جالسة تبكي وطقهري فراسك على هادا وعلى هادا ..لواه هادا روسي..هادا عربي..هادا كوري… هادا بنكلاديشي!! بكي ليا على شي لوي فيتون..على شي ديور ..على شي ايرميس وشي شانيل والنهار اللي مايبقاش عندهم الصاك اللي بيتي ديري كنازة تا الى درتيها نبكي معاك فيها ونعاون على موصيبتك ..نتي تتبكي ليا على كحل الراس وبو٠٠٠ اللي فين ماااا مشيتي تلقياه.. مشيتي للعرب تلقياهم هااااكككا كينغلو مشيتي للشمال. تلقايهم مشيتي للجنوب القايهم وفين ما ماشيتي تلقايهم هييي مششششتين… هي مزلعين فوق الكرة الارضية لعلك ترضى!!! كتبكي ليا تقول تقاداو من الدنيا لاباقيش تشوفيهم!!! اويييلي!!! اوييلي بيبييت نطرطق بيييت نموت… بكي ليا غلى السفااااار ..على اللللللبس والبرندات وميلانو وطايلاند والنرويج والنخويج وتركيا وازمير وايباكير وهاواي وتاي وميامي والمالديفز و الذهب الذهب الذهب الديامند الديامند الطيااارير بزنز كلاس و والحديد ديال لففففريع والخرج والدروج والماركات اللي ماااااشي اي واحد كيوصل ليهم .. وكلشي كيحلهم بيهم ويبكي عليهم وعايش الواقع غير بالدفيع ودوليبران .. ها علاش تبكي وتندبي..على هادشي اللي تسعين فالمية من البشرية كتحلم توصللثه وكيتسنا و يديرو لاباس من نهار تولدو..ماشي بو كرش..بو زلاط .. شري شي زلاط دالميكة وهنينا الله يعطيك الغبينة مللي نتي هاوكايا فيك دودة القز ودوة الفز شريه وضوري مع الدورة مشافك حد وصبحي فالمالديف فقصي ليا الجنس القصيف خليه مشرع فمو تا لزكو ..خخخخ تفو ما تفوجو ماتخليو اللي يفوج
تكهمات نهى بالهضرة حتى سكتات مابقاتش تشكات ولا نطقات .. ولات تقول كلمة تعطيها حفصة عشرة حتى خرجات من داك المود المغبن فين كانت خاشية راسها ولقات حفصة عندها الحق.. هي اصلا ماستمتعات بفلوس ما عاشت بيهم.. من نهار ضرباتها بورثة وهي من غبينة لغبينة .. من قهرة لقهرة ..مالبسات براندات تشبع منهم ما سافرات لجزر ما عاشت حياة الاغنياء ما عاشت فالمستوى اللي هي فيه . كانت كتحلم وطمح تكمل قرايتها وتشق طريقها باش ترجع ثرية شي نهار ..لاكن للحياة عطاتها كلشي دقة وحدة وتختاصر ليها الوقت وعاشت اكبر الاحداث فوقت وجيز خلاها تنسا طموحاتها واهدافها اللي كتسعى عليهم من قبل.. جلسات كتخمم لقات الحياة كتمحور على اهداف ..اهداف كانو كيخليوها تحمس ودير مجهود باش توصل.. وكانت شادة طريق صعيبة كلها عثرات وفشل ونجاح .. وهادشي اللي خلاها تعيش سعيدة في فترة العزوبية .. تعيش طعم الحياة فالثابرة والكفاح وتدوق طعم النجاح بعد كل محاولة فاشلة.. الصمود والتحدي كأنها فلعبة ولعبة حقيقية ممتعة والركض نحو النجاح وتحقيق الاهداف.. لاكن بعد ما خدات كلشي واصبح كلشي بين يديها وانتهت اللعبة اللي كانت عايشاها وطفات شعلة الحماس زائد الخذلان والفراق توقفات حياتها..مابقا حماس ولا طموح ولا حتى الاستمتاع بدوك الفلوس اللي بين يديها .. اللعبة كانت كدور نحو النجاح والوصول لفين هي حاليا.. والان فاش ولات ثرية وعندها اكثر مما كانت كتصور رجعات الحياة باسلة.. مملة.. حتى الملابس اللي كانت كتحلم تلبسهم ولات كتشريهم وتحصل عليهم بسهولة وبرودة.. حتى حاجة مابقات ليها قيمة ولا طعم ..كلشي عادي ..مابقاش الغرض اصلا من انها تشري منهم .. رجعو كيبانو عاديين كأي نوع من القماش.. حيت ثمنهم بالنسبة ليها ماشي غالي باش دير مجهود وتوصل ليهم .. رجع كلشي فعينيها رخيص مايسوا والو ..واي حاجة بغاتها تاخدها بسهولة .. حتى الفرحة اللي كتشرا بالثمن مابقاتش كتحس بيها..مابقات المتعة فحتى حاجة . فحتى حاجة من داكشي اللي كانت كطمح ليه نهائيا.
جلسات مع راسها كتنهد وتشوف فالحاسوب ديالها وتقرا شوية على اسباب السعادة والحماس والشغف فالحياة وفنفس الوقت كتفكر فشنو الحاجة اللي تخليها تفرح..تخلي قلبها ينبض.. وينبض لدرجة انعل تبكي من الفرحة وقلبها يرفرفر روترحع شغفها وحماسها فالحياة..اشنو هي هاد الحاجة ؟!! اكتشفت ان الفلوس فقط وسيلة لتسهيل الحياة .. ولاكن ماشي السعادة كلها..فعلا حياتها ساهلة والمجهود اللي تبدل مكاينش..لاكن السعادة اللي كتقلب عليها فين هي؟! كانت كضن انها موجودة فالثراء.. وربما تكون موجودة فيه ومالقاتها..ربما ماشي فداكشي اللي قالت عليه حفصة.. ولو كانت حفصة بلاصتها كانت تحس بنفس الاحساس ،عكس الزلط اللي كيصور ليها ديك الحياة المرهفة والجميلة ..ومعارفاش انه وسط الثراء كتموت القيمة وكترجع كل ديك الاشياء من الروتين .. روتين الاغنياء الممل اللي هي كتشوفو مصدر السعادة والفرح من كثرة الشوق ليه و حلم الثراء اللي هضرات عليه . وكما كانت نهى كتفكر بحالها قبل الثراء ومتشوف بنفس النضرة حتى اكتشفت الحقيقة اللي معارفهاش المحتاج وكيتبها بيها واها معندوش ..كيتباها باشياء تافهة حيت لو فعلا كان عايش وسطها وشبعان بيها كاين يستحي يتباها بيها حيت غتبات ليه لاشيء..لاقيمة لها قدام المال اللي عندو ومايحتاجش اصلا يشريها وكتبان ليه كجميع الاغراض والاشياء اللي العادية..حيت فعلا الانسان الثري والثري الحقيقي يستحي يتباهى ..كما المزلوط يستحي يتباها باللوبية اللي كيشريها رخيصة وياكلها كذلك الثري يستحي يتباها باشياء بالنسبة ليه رخيصة.. وكيبقى التباهي من صفات المزلوط .. ومن صفات الناس اللي كيشوفو داك الغرض دو قيمة عاليا وماشي كلشي كيوصل ليه ..ويتبهى دائما على اللي اقل منو حيت طل طلة غلى المستوى العالي للاثرياء ..فقط طل لة وداق صدق انه واحد منهم وبغا الجميع يصدقو من خلال التضاهر بالثراء والتباهي والكدبة اللي عايش فيها ..ولو كان عارف قيمة داكشي وهوا ثري ماكان غادي يفكر للحضة انه يشريها من الاصل..بل يشري لجودة فقط لنفسه ويختار راحته وفاش يرتاح ومايحتاجش يتباهى ويبان حيت حقيقته وعارفها ومكهوم بيها .
تنهدات بعمق وهي كتفكر وتهضر مع نفسها وتستنتج حتى طلعات ليها صورة ديال دري صغير افريقي حفيان كيشرب ماء مسخ .. وكاتبين عليه..افريقيا تتدور جوعا. ساعدو اطفال افريقيا
خفق قلبها وبرقو عينيها فجأة لداك الطفل وديك الجملة وقالت
مساكن شحال ضعاف!!
دخلات كتقلب ومافيها اللي يقلب ويشوف شي منضر يألمها وهي مناقصة الم ..لاكن قلبها خفق خفقان لداك البحث ودخلات كتفرج فيهم فاليوتوب وبدات فكرة تقديم المساعدة كدور فعقلها.. الفكرة كدور والقلب كيخفق والحماس كيزيد وسرعة البحث كتزيد حتى جمعات المعلومات الكافية واسماء المناطق الفقيرة جدا وتحمسات للفكرة وتقلب المزاج ديالها وقررات تقدم ليهم المساعدة ..مجرد فكرة خلقات ليها الحماس والشغف وقالت مع راسها
هادي غير فكرة وشطحاتني فبلاصتي اما الى عاوتنهم ومشيت عندهم ماعرفت ديك الساعة كيفاش غيكون الشعور ديالي
بدا الحماس اللا منتهي اللي خصو وقت وهي كتسنى غير فوقاش تعاون دوك الاطفال.. بدات كتفكر وتقلب على طرق الوصول ليهم وكلها حماس وتشغلات بهاد الموضوع اليوماين كلها حتى وصلات ختها من المغرب ومشات تعرضات ليها فالمطار جابتها للدار ودخلات هي وياها هازين باليزة وحدة حطوها وسط الدار
حفصة:ديك الباليزة فيها ماكلتك..داكشي سيفطاتو ليك ماما
نهى:وفين حوايجك نتي؟
حفصة: انا براااكة عليا هاد الصاك علد غادي تشريلي وطهلاااااي فيا الصح ما يتمكن ..
بدات نهى كضحك وحلات ديك الباليزة خرجات منها كاع داكشي اللي رسلات ليها امها ستفاتو وجلسات هي وحفصة من بعد رتاحت من السفر وجبدات واحد البيجامة ديالها جابتها معاها فالباليزة اللي طلعات للطيارة وجلسات وسط الدار كترتاح
حفصة: عيييت بيت هي نعس شوية عاد نقد ندوي كي الناس
تكات نعسات العشية كلها حتى شبعاتها وناضت لقات نهى دايرة عشا خفيف ودارت يدها على جنابها قالت ليها
شبيتي ديري!! هادا هوا العشا؟! ويلي هادي هي بيت تهلاااي فيا وتوكليني الضلعة … هادشي بايهرني فكرشي ويدير ليا عي المشاكل دالمسران مع المعدة
نهى: ها نتي صاوبي اللي بغيتي كولشي فثلاجة .. ها البلاكار
خرجات نهى هزات عشاها مات جلسات تاكل وبقات حفصة كدور تما وتفلي الدنيا قنت بقنت كتجبد وتقلب وصاوبات واحد مولاي طبسيل دسباكيتي بالكفتة قدو قداش وجلسات قدامو على الطبلة كتعشا ونهى كتشوف فيها مصدومة. قالت ليها
كليتيها كلها؟!!
حفصة: لا بيت نخليها فقرجوطي باش ضيعش!!
نهى:شنو؟!!
حفصة: والو .. ايوا هانا جيت لهاد سويسرا ..اللي سمع سويسرا يقول ما نعرف شنو..شانطي كبير والناس قلال …الصراحة القنط والحس مقطوع ..هادا ماهوا هادا موحااال انا نقدر نعيش هنا الصراحة
نهى: لااا لا تولفي
حفصة: لاالا مانولفش انا عارفة راسي.. نتوما الثمنية دابا الحس مقطوع كاع ! السكات؟! طليت هي من السرجم لقيت كلشي مسدود ..حنا فمراكش عاااد دابا عاد با تبدا عندنا الفراجة .. واخا البلاد زوينة والدار زوينة وكلشي زوين ولاكن باينة مقناطة من النهار الاول… واحد السيمو كاع ما سمعت حسو ياكما رحل
نهى : لاااالا كاين بلاتي نعيط ليه نقوليه يطلع
هزات تيليفون عيطات ليه وقطعات قالت ليها
خارج برا قالي نص ساعة ونجي
حفصة: وولف هنايا؟
نهى: عادي كيدير حياتو كيدير علاقات ..انا اللي فالغربة ما شي هوا
حفصة: نتي فالغربال ماشي الغربة..سكتي بيتي تعصبيني..راني هضرت معاك فتيليفون مافيا مايعاود من الاول
نهى: لا صافي انا قررت نبدا حياة جديدة..غادي نسافر هاد الويكاند لافريقيا انا وياك نعاونو الناس اللي محتاجين تما
قربات منها حفصة شافت فيها مزيان قالت ليها: مابان ليك اختي فوقا تمشي لافريقيا حتى جيت انا !! انا عاد جايا منها بيتي ترديني ليها !! كاع هادا زعر عندي
نهى:غنمشيو فير ثلت ايام صافي ونجيو ونمشيو ديك الساعة فين ما بغيتي
حفصة: انا عاد جايا فين بيتي ترضيني!!! ديك الساعة قوليها ليا نبقا تما حتى تجي عندي وتسالي كولشي ديالك ونجي معاك ..باقي تل قزيبتي ما خرجات من بلاصتها عاوتاني نكعصها بالجلاس فجوج طياير وعاد ليسكال ..الله اربي الله
نهى وادغيااا .. غنمشيو ونجيو دغيا..
صونا عليهم سيمو وهما كيهضرو ومشات نهى كتجر بانطوفتها الزهرية لابسة سروال بيجامة فيكتوريا وديباردور ابيض وطالقة شعرها حلات ليه الباب لقاتو واقف مبسم سلم عليها وقالت ليه كضحك
حفصة جات ..دخل دخل كنتسناوك
دخل بخطوة وقاليها
شي واحد جا عندك
استغربات وشافت وراه لقات ناصر دابر كاسكيط كحلة ولابس تيشورط كحلة هز راسو شاف فيها ..تصدمات وتفاجآت وحلات عينيها بقات كتشوف فيه لاكن بسرعة تداركات الموقف وهزات يدها قلبات وجهها بغات تسد الباب وكتردد
لالا ..سمح ليا
وقف ناصر الباب وقال
نهى ..
ماخلاتوش يكمل سمحات فالباب هازة يدها بغات تهضر وماقداتش ومشات قالبة وجهها ويدها على نيفها كتلوح بيدها بنفور ومشات سدات الباب عليها فالبيت وهبطات وك راسها مصدومة كتشوف فالطبلة والدموع كيهبطو بغزارة وهي كتنفس مابغاتش تبكي وكتنفس وتسد عينيها وتحلهم ولاارديا كتنخصص.. حتى سمعات الصدع على برا وصوت حفصة كيكسر المكان وهي كتغوت على ناصر وكتقوليه
خرج براااا…خرج براااااا …
تخلطو الاصوات ونهى واقفة كترعد بلاصتها كتسمع وسيمو كيتبت حفصة ويسكتها .. هزات راسها خرجات الصدمة فدوك الدموع ورتاحت من الضغط ومسحات خدودها بسرعة وعينيها وتنفسات وحلات الباب بقوة خرجات عندهم لقاتهم مشادين بثلاتة وسط الدار ..هزات يدها كتهضر بشوية سكتاتهم ووقفات قدام ناصر كتشوف فيه وصدرها كيطلع ويهبط قالت ليه
شنو بغيتي ؟
ناصر: باغي نهضر معاك
حفصة: اااشنو غتقوليها؟!!!! اش بيتي تقول ااااصلا اش بقا ليك ماتقوليها
جرها سيمو وهي تقيلة بزز اما نهى حركات راسها بالايجاب قالت ليه
واخا كنسمعك
ناصر: بوحدنا
دارت يدها على نيفها جمعات النفس وقالت لسيمو وحفصة
خليونا بوحدنا
حفصة: كيفاش بوحدنا ياكما ناوية تسمحي ليه !!! راه سمح فييييك سمح فييييييك وخلاك ونتي ماصرفتي فيه غير لخير وبغا يضحك عليك بجوج كلمات ويزيد مع الطريق
حركات ليها نهى راسها بالايجاب ويدها على جنبها كتشتت النضر باش تتحمل قوة الضغط والتوثر وقالت
خلينا بوحدنا احفصة
جر سيمو حفصة بزز نترها قاليها
واجي هي ندوي معاك وااااوااو
انا رها خرجها وسد الباب وهي كتنكر على برا وبقات نهى وناصر الراس فالراس وشافت ليه فعينيه مزيان وقالت
علاش رجعتي؟
رد بأسى:حيت كنبغيك
دارت يدها على نيفها وضارت كضحك قالت ليه حيت كتبغيني!!!
خلاتو واقف كيشوف فيها ومشات خوات ليها الماء شربات حتى روات وضارت عندو قالت ليه
عندك خمسة دقايق.. مغنزيدش نسمع ليك اكثر من خمسة دقايق تقنعني بسبب رجوعك
شافت فساعة وربعات يدها قالت ليه يالاه
بقا غير كيشوف فيها وتنهد وقال
مكنكدبش عليك انهى ..انا كنبغيك هادشي اللي خلاني نرجع
ردت:سبب اخر من غير هادشي
رد: هادا هوا السبب الوحيد اللي خلاني نرجع
نهى: شنو المطلوب مني ؟
بقا كيشوف فيها في حيرة واسى وقاليها
تسمحي ليا
عزات كتفها وقالت
انا مامقلقاش منك ..علاش غنسامح ليك ؟!
بقا ساكت مطولا ومسح بيديه على وجهه قاليها: ماعرفتش شنو نقوليك.. انا معارفش حتى باش كيبداو الناس …
مشات جلسات دارت رجل على وجل وقلبات وجهها كتسمع ليه وقالت
هضر …عندك فرصة تقول داكشي كااع اللي بغيتي..وكن متأكد..ان هادي فرصتك الوحيدة..
مشا جلس القرفصاء حدا رجليها وهي مدورة وجهها وشد ليها يدها وقال
انا عارف راسي ماطلعش راجلك معاك.. وعارف راسي غلطت فحقك.. وماتستاهليش كاااع داكشي اللي درت معاك ..انا براسي معارفش علاش حتى درت هاكاك..فوق نفسي وخاطري كان مريض وكنت تالف
شافت فيه حركات راسها قالت ليه لقيتي الطريق دابا؟
رد بالنفي: كنحس بالذنب .. ماقادرش نعيش مرتاح
بقات كتشوفيه وهوا مزير وجهه حمر وكيتعصر باش يهضر ومدور وجهه مقادرش بشوف فيها وقالت
ماعندكش علاش تحس بالذنب.. انا كنت كنتسناك منك تجي وتقولي ..ابنت الناس ..انا مامرتاحش معاك.. مضغوط ولا مكنبغيكش ولا اي مبرر وتوضح ليا ونعذرك .. ولاكن نتا هربتي بحال الكلللللب… ولقيت ليك اعذار فبلاصتك ودوزتها مع حلقي بزز وقررت نكمل حياتي عادي ونساي اي حاجة ربطاتني بيك .. اناا ماغالطاش.. اي حاجة درتها درتها على قبلك …حيت كنت كنبغيك..وبغيت نعاونك وكنت كنحس بالفرحة وانا كنعاونك .. ولاكن نتا ضلمتيني ..رديتي ليا كلشي بالشر.. وخلقتي مشكل من المساعدات ديالي ليك اللي كنت فرحانة وانا كنديرهم وكنحس بالمتعة بحال الى كنحقق احلامي . وماندمتش.. حيت انا اللي بغيت نعاونك ..سواء بقينا بجوج ولالا .. ولاكن ماكنتش عارفة باللي هاد يد العون اللي مديت ليك غتكون هي السبب باش تجازيني..ولا يمكن كاين سبب اخر وانا ماعارفاش
بقا ساكت ومهبط راسو على يدها كيسمع ليها فصمت وحيد ديك الكاسكيط على راسو مضغوط وقلب وجهه لجهة اخرى كيتعصر فصمت وقال
انا نستاهل ..سبيني ضربيني.. ديري بيا اللي بغيتي.. غلطت معاك
حيدات يدها بسلاسة وهزات راسها تنهدات وقالت
تعطلتي.. كان قدامك سبع شهور..كنتي تقدر ترجع فالشهر الاول ونسمح ليك ..ووترجع الشهر الثاني ونسمح ليك ..وترجع الشهر الثالت والرابع والخامس..والسااادس ونسمح ليك.. ولاكن نتا ضيعتي الوقت بزاف..وعطيتك فرصة فغيابك وتسنيتك ترجع وتعطيني مبرر… كانو قدامك ستة ديال الفرصة.. ضيعتيهم من يديك.. وقدرتي تعيش هاد المدة كلها بلا بيااا..وحتى انا قدرت نمشي حياتي ونتعرف على غيرك .. ونجرب الحياة بلا بيك واخا صعيب ننسى ..وماشي بهاد السهولة..انا اناصر كنعطي..كنقدم كلشي..كندير طرقان ونوسعهم باش ندوز ..مكنكبرش المواضيع ..ونكنضيقهاش عليا وعلى الناساللي منبغي فحياتي.. صريحة وصافية مع الجميع.. وعندي مشاعر ماشي بيدي كنتحكم فيهم..تجرحني ونسامح ..ونسا كاع غلى السبب..ولاكن فاش تمتص سعادتي وتحولها لجحيم وتعيشني فيها وتحفرها فقلبي.. تما اسيدي.. كنقوليك مانقدرش نسمح ليك… ولا نعيش فالمحيط ديالك .. غيير بعد مني والله يجيب ليك مااحسن ..بلااا مصيع ليا لاوقتي..ولا نضيع ليك وقتك ..ولا تعصبني ولا نعصبك بسبب شي حاجة اللي اصلا طريقها مسدود والى الابد
وقف ديك الساعة عنقها باس ليها راسها قبل متكمل الكلمة الاخيرة قاليها
ماتقوليش هاد الهضرة انا غلطت ولاكن كنبغيك بصح .. كنبغيك. مابغيتش كاع تهزي همي ..انا نهز ليك الهم وانا اللي نعاونك وانا اللي نساندك .. كتقولي هاد الهضرة لواحد الانسان اللي كيبغيك ..اللي نصف حياتو هي نتي ..ونصه لاخر يعيش معاك ..
بعدات بيدها وبعدات راسها قالت ليه
ماتجرني ما طيح ليا كتافي.. اللي عندي راني قلتو ليك..وضحتي ليا ووضحتك ليك..السبب دابا صبح معروف.. لا انا نوالمك ولا نتا توالمني وخطوطنا تباعدات يستحيل تتقارب مرة اخرى .. بلا متهدني بالهضرة ولا تسخفني وماضغط عليا منضغط عليك
ناضت مشات جهة الباب وحلاتها وبقات واقفة حداها قالبة و جهها وجالس فالارض بلاصتو ومهبط راسو.. ناض بانكسار مشا وقف قدامها بقا كيشوف فيها وفملامح وجهها وهي مدورة وجهها وقال
مكانش كيحساب ليا قاصحة بحال هاكا
ردت على نفس الوضعية
شهر شهراين..ولاثلاتة ولا حتى عشرة وغتعايش او تى نتا وتبدا حياة جديدة.. الحياة مكتوقف على حتى واحد ..كنتمنى ليك التوفيق
هبط راسو وعض شفاهه الفوقانية باسف وقال بعد صمت طويل..
على الاقل .. نبقاو اصدقاء ..ونبقاو نتشاوفو
دورات وجهها وعينيها كيبريو وقالت
انا اللي بغيتو من قلبي مينفعشي يكون صديقي.. مينفعش اناصر.. وانا مسامحاك على كلشي..سامحتك من كل قلبي .. كنتمنى ليك حياة سعيدة ..بسلامة
دورات وجهها خلاتو واقف وهبط راسو للارض ورجع شاف فيها وقال
عمرني مغنساك ..عمرني ماغنعيش مرتاح ..وعمرني نسامح لراسي ..غنبقا نتسناك ديما وغتبقاي فقلبي ديما ..وقت ما رجعتي تلقاني كنتسناك .
هزات راسها فالجنب فصمت مجاوباتوش خرج بخطى تقيلة ووقف كيشوفها وهي كتسد الباب بشوية وتشوفيه حتى سداتر فمرة
اشنو جاني من مور هاد الحب ؟! قدمت قلبي..مشاعري..راحتي..نفسيتي..جميع حواسي.. حطيتهم على طبق من ذهب وضحيت بيهم فدقة وحرقتهم فدقة.. واش هادا جزاء المحب؟! واش هادا جزاء اي واحد كيخلص فعلاقة ويخلص فحبه ويتأمل ويحلم وينعس على جنب الراحة .. هادا جزائي؟!! هادا جزاء واحد عشق وخلص فحبه .. درس من اقسى الدروس فالحياة تلقيتو.. تعلمت منو وضفته للسيفي ديالي اللي نزيد بيه القدام فحياتي.. طويت صفحة ناصر بانكسار والم شديد..تمنيت نغفر ليه ونرجعو ..ولاكن ماقدرتش ..ماشي بيدي.. حطن زر الغفران بيدو وخلا فمشاعري خلل كنصلح فيهم بوحدي.. تمنيت كن ماوقعش اللي وقع ..واللي للاسف ماوقع والو وحتى حاجة ماتستاهل ..لو على الاقلكان مشكل كنت ندوزو ونلقا ليه حل..مع الاسف مكاينش.. مستألة ارتياح فقط والراحة مهمة فالعلاقة.. مع الاسف تسدات نفسيتي على كاع الرجال .. وعلى جميع العلاقات .. الوحيد اللي كان نفسي فيه ولقيت فيه كلشي هوا ناصر..ولاكن مع الاسف الشديد ماقدرتش نسامحو ..ومشاعري كلهم هاربين منو ومتخوفين .. وحتى الثقة ديالي فيه تكسرات .. كسر جميع الاحاسيس الزوينة اللي كنت كنكن ليه..خلاني قارورة فارغة لل انا قادرة نزيد معاه ولا نبعد عليه.
خديت قرار لا رجعة فيه .. خليت الحياة تنسيني فما تبقى من الذكريات .. مزال الوقت قدامي ومزالة فريعان شبابي.. وخديت دروس كثيرة وقاسية مع بداية مشواري..يا ثرى شنو اللي مزال غنعيش من تجارب..شنو مزال غنشوف وانا مزالة فأول عشريناتي..
حزمت حقيبتي وختاريت ناخد هاد الرحلة بوحدي.. ماسمحت بلا حفصة .. وماسمحت لحتى واحد بجبد معايا مواضيع كتخصني انا بوحدي .. بعدت من الحوارات والمشدات مع حفصة وقررت نمشي لافريقيا..لعل هاد السفرة وهاد الشعور الجديد يغير ليا مزاجي ويدخل الفرحة والسرور على قلبي.. وفعلا كانت رحلة شاقة وممتعة فنفس الوقت بحيث كانت اول رحلة ليا لافريقيا..كتاشفت مناطق وطرقان .. وطريقة عيش كل قبيلة منهم .. كانو معايا مساعدين اللي رافقوني فديك الرحلة من تما بسيارات محملة بالماعونة والمساعدة .. قدمتها ليهم وانا كنشوف السعادة والفرحة فعيونهم وفعيون دوك الاطفال الصغار..ولو بيديا. لا حفرت ليهم انهار ووديان ..ولاكن ماشي بيدي وقدمت كل ما اسطاعت ..فعلا حسيت بنفسيتي تغيرات ..حسيت بالسعادة وقلبي رفرفر ..كنت محتاجة لهاد الشعور ودوزت وقت من اجمل الاوقات فحياتي ورجعت بحالي بطاقة اجابية ونفسية متجددة ومرتاحة ..
دخلت للدار لقيت حفصة خملاتها والروايح عاطية..مشيت نيشان خديت اطول دوش واطول روتين عناية حتى تشبعت عاد جلست معاها كنعاود ليها على الرحلة وكيفاش دازت
تفرغت لحفصة اللي عاد بدات عندها العطلة وجبدات الخريطة سرحاتها قدامها كضحك مربعة رجليها وقالت
يا باسم الله … دابا اراك للفراجة
احم احم
قاطعها صونيت فالباب ومشيت حليت لقيت سيمو ..دخل كيضحك ويسرح وكانت فيدو علبة صغيرة عطاها ليا وقالي
هاكي الامانة ديالك
شديتها مستغربة قلت ليه امانة؟! اشمن امانة ؟!
قالي: حليها وشوفي
حليتها لقيت فيها اغلفة كثار ومحاطة بثوب حريري من لداخل جاني الفضول نعرفهاد الهدية للثمينة شنو فيها..جبدتها من قلب اغلفتها لقيتها ساعة يدوية جميلة مستطيلة الشكل بذهب ابيض ومرصعة باحجار الالماس ..تفاجأت وقلت ليه
هادي غالية علاش كلفتي راسك لهاد الدرجة
تبسم قالي كنتمنى تعجبك وتقبليها
بقيت كنشوف فيها وحبيتها وجذباتني وعلى دوقي.. جات حفصة كتجري تشوف وقالت لي
ايوا هادا هوا الكادو ولا حيد بلاك
سيمو : هاد الساعة غير حيد بالاك
قيستها فيدي وهما كيضحكو ويهضرو جات على قياسي كأنني انا اللي عطيت مقاسها وعلى يدي تماما ..فرحت بيها واخا عرفتها مكلفة وسعرها غالي وهوا كيحاول يقاد امورو ويكون راسو بشوية لاكن ماقدرتش نرفضها وقلت ليه
نعوضها ليك بشي حاجة ما احسن ان شاء الله
تبسم كيشوف فيا وبقا ساكت كيتنهد.. حيدتها من يدي بغيت نردها لبلاصتها ونتابهت لكتابة منقوشة بالانجليزي وراها وقلبتها نشوف شنو المقصود وكنحاول نقراها
بريقكما واحد
شفت فسيمو وضحكت قلت ليه شكرا ..
قالي: عجباتك؟
تنهدت من كثرة اعجابي ليها وقلت ليه بزاااف
قالي: من ناصر
شطب الابتسامة على وجهي وصدمني وقلت ليه من عند من؟
قالي: من عند ناصر ..انا هي وصلت ليك الامانة
سديت على نفسي وسط صدري ورديتها بلاصتها وسديتها عليها قلت ليه
رجع امانتو .. انا ماخصنيش بيها
هز يديه قالي انا وصلت ليك الامانة ودرت اللي عليا ..
قلت ليه: مغنقبلهاش.. مستحيل نقبلها ..شنو كيحاول يدير ؟ شنو باغي مني بالضبط؟
دار يديه ورا راسو قالي
انا غير مرسول.. بيتي ترجعيها رجعيها ليه نتي
بقيت كتشوف فيه وهرب ليا خلاني شاداها فيدي ومشا كيهضر فالدروج قالي الله يعاون
خلاني واقفة وحفصة حدايا لاسقة فيا كتقولي عطيها لي .. عطيهالي نعاود فيها البيع نربح وراها هي باش نشري شي طوينيبيلة
بعدتها قلت ليها والله لا شتيها.. هادي خاصها ترجع ليه ليدو .. الى بقات عندي هادشي كيعني صافي رجعنا صحاب وحباب
خداتها لي من يدي قال ت لي: الاللة لهلا يعقلو ولا يتبتو ليه.. مالكي هازة همو خلي يعاود لمخو واري المكانة نوريك كي بيت ندير ليها..مجاياش اصلا قدي بيت نبيعها ماحدي هنا نيييت فهاد سويسرا هي دثال الماكن والشكلاط..ماجا وراه هي البلا اول مرة يدير شي منفعة فحياتو نتفكروه بيها
خطفتها ليها من يدها سديت عليها وقلت ليها
حلمي… هادي غنردها ليه .. ماعندي مندير بالكادو ديالو .. واسيري شوفي اشمن بلاد نسافرو ليها ولا ندير بناقص حتى من هاد السفر
خليتها ومشيت للبيت خبيتها وسديت عليها فالكوفر فور حتى نردها ليه ورجعت لقيتها كتقول
مالزيا.. والنواحي د اسيا.. نشبعو هي بحور وطبيعة
هزيت يدي قلت ليها
صافي اخر قرار ماشي غدا تقوليلي بدلت رأي
حفصة : لا غدا بينا نخرجو نشوير اللللللبس… اللبس اللبس اللبس اللبس وغير الفريع الفاروعي باش نفرتو الطرح ..بيت نضربشي مايوات فديك اسيا ديال تبراد القلب.. بيت نمشيو لدوك الشللات ودوك الوديان ونتسوطا فيهم هااااكاويا ونضرب ليا فالعواصر دالكوكو وداكشي ديالهم ونطفطططح مع رساتي وندير الورد تا انا ونلبس كاش مايو هي لتحت وداكشي ديال اشهرات هاواي اللي فقصونيوانا صغيرة كنت نشوف فيهم مبرررعين بالالوردوالطبيعة والعراصر وانا فوق الصداري تانتكلاطا بالصهد فمراكش وطنطشوا فرق التلامط حورش.
بقيت كنشوف فيها وكنقول .. غير الله يحضر السلامة فهاد السفر معاها.. جايا مشارجيا البلان من صغرها يعلم الله كيفاش غندوزوه .
صبحنا كندورو فالمولات من قنت لقنت .. جينا مع حوايج الصيف يالاه خرجو .. ماخلينا حتى ستيل ولا شي موديل ماشريناهش بحال الى غادي نمثلو شي مسلسل تما . رجعنا متقلين بالصنادل والنضاضر والصيكان والحوايج حتى نسينا شنو شرينا كاع . جلسنا كنوجدو لبابيزات والشنط عمرنا ربعة ديال الباليزات كبار وعاد اللي طلعت فيدي فالطيارة وجلسنا فمقاعدنا ربطنا الاحزمة وطرنا الى اسيا في رحلة جنونية متحمسين ومتفائلين بالحياة
وصلنا لهونك كونغ وكان وجهتنا الاولى .. لاحسن اوتبل شبه كوخ حديث على الطبيعة الخلابة فاعالي الجبال مباشرة مع شلال كبيرومنضر هائل .. ماتصورتش نشوف بحال داك الجمال الطبيعيعلى ارض الواقع.. بالحماس الكبيراللي فينا ولينا كنتسابقو باش نجربو كلشي.. اما حفصة ولات وزن الريشة كطير وخف مني.. واخا طبوزية كتلبس اللي قاليها راسها وطالقة الشعور ومستمتعة بالرحلة.. خرجنا لواحد الساحة كبيرة فالاوتيل بحال شي قصر من القش والخشب.. واسع وكله محيط بالخضورية والطبيعة والمياه .. لقينا تما قائمة طويلة بالصور بالانجليزية على كل ما كيقدمو لاوتيل للزبناء ديالو من حمامات ومساجات ..وجلسات العناية و اكل وسهرات وكل شي طريقتهم الخاصة .. ومع حينا نيت وصلنا مساليين مع السفر مشينا نيشان نجربو المساج ديالهم ودخلنا لغرف خاصة بطابع تقليدي وطبعا لايخلو من لمسة طبيعة الموجودة فكل مكان .. كانو الاسرة فالارض وتجبدنا عاى موسيقى هادئة درنا المساج بالاحجار والوخز لالابر .. فعلا كان يستحق نخلص عليه اي فلس ..نضت وحدة اخرى مدلوكة ومطرطقة وخفيفة والنفسية ياسلام ..من موراها جراتني خفصة قالت ليوالو نجربو الحمام ديالهم .هاد النهار غير ديال هادشي.. دخلنا لقينا ساريج كبير كمدنا فيه عضامنا بمياه حارة جبلية حتى سخفنا وتصلقنا وكان هادا هوا الحمام وحنا حسابنا الحكان وداكشي ديالنا.. شللنا من وراها راسنا وغسلنا راسنا فبلاصة اخرى وجلسنا قدام داك الساريج الكبير والماء كيدفق فيه درنا احسن مانيكير وبيديكير على وجه الكرة الارضية حسيت بيدي ورجلي تبدلو عليا..موراها مشينا ناكلو.. لقينا بوفي كبير فيه جميع اصناف الطعام .. دازت عليهم حفصة بحال الجرادة..كلات حتى بدات كتنهج وبكثرة ما كان لذيذ داكشي مابغاتش تحرك من تما .. اما انا تأكدت انني وسعت المعدة حتى بغات تخرج من بلاصتها بكثرة الماكلة.. ايوا وراه مشينا تكينا نتسنطو على عضامنا قدام داك المنضر الخلاب والعواصر غادية جايا حتى طفات لينا البولة ونضنا نعسنا .. صبحنا كنتسابقو عاوتاني .. خرجنا تساريينا المدينة قنت بقنت ..ماخلينا ماكلينا..ولا جربنا ..وغادية تابعة حفصة ومكتخافش وكتزعم حتى تلفت عليها.. ايوا تقلب ليا النهار كحل..وليت بحال الحمقة غادية كنقلب عليها وصاكي وفلوسي معاها وكلشي هازاه هي وماعندي لا فاش نعيط ليها لا باش نركب نرجع فحالي.. دار فيا واحد السائح خير ركبني معاه فبيكالتو وصلني لاوتيل فين كنت جالسة حيت حتى هوا جالس تما عاد عيطت ليها من عندهم لقيتها كتقلب عليا وقلت ليها رجعي عندي للاوتيل..كنا غنتناتفو فاش رجعات حيت انا كتمشي قدامها وكنقول راها مورايا وهي دهلات لشي حانوت ولا تخشات فشي جوطية بلا متعلمني.. حلفت مانعطيها صاكي تهزو ومن تما وليت كنهزو راسي وتلفت وعاودت والفت وعاودت وديما تالفة ولاكن تيليفون كيفكني كيلاقينا.. شبعنا مساريا ودوران باللي والنهار وغيرنا الوجهة .. تايلاند والبحار والرمال البيضاء يا سلام .. كل نهار فالبحر ..النهار كامل حتى رايت سمرا ..ومع ذلك ماشبعتش.. قالت لي حقا تايلاند عندهم الشعر زوين نمشيو نشريو الشعر باش تركبو يبان طويل.. مشينا كنتساراو كنا فالشعر وليتا فالشفار والدفار والشعر والعجب الكحل اللي عمرني عرفتو فحياتي.. الدنيا شعبية بزاف وقوة الماطر اكثار وجاتها لحفصة على الكانة..كرينا موطور وبقينا غاديين جايين فيه.. ومسخوطة هي مولفة مراكش وعندها الموطور كبير لعبات بيا كما بغات فالشرارع حتى كنقول صافي تقلبا وكنحلف منركب. معاها وكطمعني وكنمشي .. ناري شحال مكتعياش من الدوران وتقول عايشة تما !! كدخلب لشي سواق لعجب كيتباع فيهم.. شادة الخريطة وغادية وفين ما شمات ريحة الماكلة كتجلسني..وشحال ميعجبها تاكل ودوق وبقات تنقب من عند هادا ومن عند هادا حتى كلات الجران مقلي وزرفاتني معاها كليت شي حوج حبات مكرملين وماعرفناش شنو داكشي حساب لينا جناح الدجاج صدق جران فاش بغينا نخلصوه.. ايوا تقيينا حتى سخفنا وعفنا الماكلة قلت ايام قطعنا الاكل المقلي وحلفت عاوتاني مانحط فمي شي حاجة ولا نسمع ليها .. اما هي داك النهار ضربات طبسيل ديال الجران اما انا غير دقت معاها
عجباتنا التايلاند بزاف .. وشحال كانو فيها ديال العرب وشي لباس كيلبسوه فالزنقة ديال الكباريهات.. قلنا نسهرو شي سهرة زوينة صدقنا دخلنا لواحد الكباريه فيه داكشي شرقي .. ايوا وجا عندنا واحد كيساومنا نمشيو معاه.. انا مافهمتوش فالاول ولاكن حفصة فهماتو وعطاتو على ود نيه وشرخات ليا من بعد اش بغا ..تصدمت وعفت ديك البلاصة ودرنا بناقص كاع.. يخ مكاينش فين تسهر سهرة نقية ولا تفرج فشي فولكلور ولا شي حاجة متعلقة بتقافتهم.. غير الوسخ والخنز ..بقينا فالجو ديالنا ديال الخروج والمساريات وبالليل كنقلبو لينا على انشطة تناسبنا ولا كنطيحو نعسو فالاوتيل.. عجباتنا التايلاند حيت شعبية ومتوفر فيها كلشي والبحر عندهم زوين وكتمزج بين الطبيعة والحضارة .. دوزنا فيها الشهر كامل ..كله دوران ورحلات استكشافية وانشطة وشوبينغ ماخلينا ما درنا .. غصنا فالبحر طرنا فالبر مللي مامتناش الحمد لله .
جا الوقت نرجعو بحالنا وماسخييتش.. بغيت نزيد ندوز شي ايام اكثر ولاكن حفصة تابعها مزال امشي المانيا تشوف ماما اللي هي ختها ومن تما تمشي للمغرب.. سيفطنا الشنط الاوالى تفكيت منهم تعرض ليهم سيمو حيت تقلنا بزاف تقول راحلين.. بقينا خفاف ورجعنا بحالنا لسويسرا سومر ولاطراس ديال المايوات فلحمنا.. دخلنا للدار دوشنا وطحنا نعسنا رتاحينا وما هزيناش الراس قلت ايام ولو لا الطيارة ديالحفصة لا بقينا ناعسين نعوضو داكشي اللي مانعسناهش فتايلاند. دوزنا واحد الليلة دايخين بين الحوايج كنجمعو ليها حوايجها .. رسلت ليها الشنط الكبار والتقل للمغرب بوحدهم باش تقدر تمشي المانيا بلا تقل ووصلتها للمطار توادعنا بالعناق وواعدتها نبقاو ديما نسافرو فين ما تجي فرصة نمشيو لشي بلاصة حيت لقيت فختي الصديقة الوفية ديالي واللي نقدر نسافر معاها مرتاحة وهازة ليا الهم لحواجي وخايفة عليا نتسرق ولا نسا شي حاجة .. رتااحيت معاها ومكانتش عارفاها مزيان عن قرب بسبب البعد والسنوات اللي عشت بعيدة عليهم .. ماكنتش عارفة باللي عندي صديقة واخت كلها طاقة اجابية وطاقة متفجرة ماحسيتش معاها لا بالوقت ولا بالملل ورجعت متحمسة ليها تسالي قرايتها دغيا باش تجي تعيش معايا فمرة ونستمتعو بالحياة وتونسني ومنبقاش كنقلب على ناس اخرين نعمر بيهم الفراغات.. واعدتها غير نرتاح شوية وليا موعد مع بابا ومشية للمغرب باش نبدا خطوة جديدة ونتبع نصيحة ماما ليا ونجرب الاستثمار فالعقارات ونتعلم باش ندخل لهاد الميدان اللي كما قالت لي ماما كامل ارباح .. ضاقت بيا فاش مشات ركبات .. حسيت بقلبي ضرني.. خرجت من داك المطار مضيومة وركبت سيارتي رجعت بحالي فعز الحرارة ..طالعة وكنقول مع راسي شنو ندير دبا؟ رجعت للوحدة والضيم..شكون يصدعني ويهضرني ويسهرني بالليل.. ويضحكني ويفقصني ..سديت باب السيارة ومشيت جهة الباب يالاه حليتو سمعت .. نهى
حسيت بقلبي ضرب.. عرفت هاد الصوت ديالمن.. تلفت لقيت ناصر واقف فالجهة لاخرى من الشارع فالحي ديالي.. كيشوف فيا و بريق الحزن فعينيه .. بقيت واقفة كنتأمل ملامح وجهه وهوا واقف وانا واقفة وبيناتنا شارع صغير.. ماهضرتش.. مانطقتش ..وحتى هوا عيط ليا وبقا ساكت..وماتحركش من بلاصتو .. كيشوف فيا وكنشوف فيه ..عطيتو ضهري بغيت ندخل وعاود عيط ليا قالي
نهى..
شديت فالباب وتلفت شفت فيه فصمت .. وعم الصمت كأن الصوت تقطع .
النهاية ❤️
شاركنا رأيك في هذه القصة 🌹