أصبحنا وأصبح الملك لله
خديجة: (كانت نعست بكري فاقت لقات ختها مزال ناعسة مشات للكوزينة ياله بغات تقاد فطور صيفط ليها يوسف ميساج باش يخرجو يفطرو مجموعين رجعت شنو كانت جابدة من الثلاجة، مشات تفيق ملاك)
نوضي اديك لخميرة نوضي من امتى وليتي تقسري مع اورطيغا
ملاك: شنووووو اخديجة
خديجة؛ نوضي نفطرو يوسف غيجي من مورانا يدينا نفطرو
ملاك: (سادة عينها) مافياااش غير سيرو
خديجة: حشومة ختي ياله نمشيو راه كيأكد باش نكونو كاملين وهو مقلق منك كيقول مبقيتيش كتبغي تخرجي معانا
ملاك: ما فياااش اخديجة وفية نعاااس
خديجة: وغير نوضي عفااك اصلا غيجي هنا وغينوضك بالزز منك اللهم نوضي بوحدك
(بقات فوق راسها حتى نوضتها كتنݣر مشابعااش نعاس قضات روتينها وخديجة دخلت كتقاد راسها صلات الصبح عاد دخلت لبيتها لبست حوايج عاديين دهنت اكخو دارت شاالها وبقات كتسنى خديجة حتى صونا عليها يوسف)
هاحنا نازليين…
بلا مطلعو لا واجديين…
ملاااااك صافي؟!
ملاك: باااز اختي ساعة وانا جالسة كنتسناك
خديجة: ههه (هزو صيكانهم وتمو هابطيين، ملاك دازت من حدا دارو معرفاتو واش كاين ولا لا، وصلو لتحت مع بغاو يحلو لباب كيخرجو فحمزة كيحل لباب)
حمزة: (باستغراب) ملاك!!
ملاك: ياله اخديجة
حمزة: واش ساكنة هنا؟!
ملاك: شوف احمزة والله حتى نديكلاري بيك الا مبعدتينيش انا كنقولهاالك سير تبعدني حسن ليك
حمزة: (مشا جيهتها) صبري غير نهضرو
يوسف: (بغا يعيط ليهم دار تيليفون فودنو مقرب للباب لقاهم واقفين مع شي واحد دخل وباين الاجواء ماشي هي هاديك) شي مشكل؟!
خديجة: (خافت) لا واالو غير تلاقينا بولد الجيران وصافي ياله بسلامة اخويا
ملاك: (جرتها ختها وهي كتخنزر فيه وفراسها شنو كيدير هدا على هاد صباح وعاد فاش شافتو بقا تماك!!! يوسف كيهضر وهي عقلها خدام)
يوسف: ملاااك
ملاك: باغدوون منتابهتش
خديجة: (بغات تزرب على الموضوع) راني مفيقااها غير بالسيف نتا عارف ملاك فلويكاند كترتاح فيه وهاد مكتحملش للي يفيقها من نعاسها
يوسف: (شاف فملاك) مبقالهاش وقت لينا
ملاك: (تبسمت) لا لا غير كما قالت ليك خديجة فية نعاس وصافي
(شافت فطموبيلتو للي حاطها فبلاصة اورطيغا للي مكااينش ولكن كاينة غيثة للي مفخبارهاش كاينة حتى عي، وعاد حاسة غتكون بيناتهم الاجواء مكهربة وعاد غتزيد الا كانت شي حاجة خرجت سلمت عليهم وللي جاها فشكل كانت كتعامل عادي ماشي بحال لبارح بلعكس كظحك…)
غيثة: (ركبو بزوج اللور والحرام القداام) ملاك صاڤا؟!!
ملاك: الحمد لله ونتي؟!
غيثة: super، كيف غادا مع الخدمة؟!
ملاك: صاڤا
غيثة: (جرتها بهمس باش ميتسمعوش لوخرين) لبارح كنت مديرونجا وصافي
ملاك: (مكمشة عينها) امتى؟!
غيثة: لبارح فاش جيت عند اورطيغا كنا مناقشين شوية فشي حاجة وحتى الليل عيطلي وبقا تيفهمني
ملاك: (حركت راسها باه) ااه مزيان
غيثة: (كانت ديجا صيفطاتلو ميساج وصونات عليه مجاوبش ورجع كتب ليها ميساج)
“نكمل ونصوني عليك”
(وراتها لميساج وملاك بعفوية قرات)
هاحنا مزال فيها
ملاك: مزيان
غيثة: اوا كاين شي حبيب القلب شي خطيب
ملاك: (حركت راسها) لا
غيثة: وااايلي هاد الزين كامل معندو واالو ميمكنش
ملاك: مااااا هاد الساعة معلاباليش دابا بشي حاجة وصافي
غيثة: اوا معليش كولشي فوقتو زويين، لبارح شنو كنتي تديري عند اورطيغا
ملاك: شي خدمة وصافي
غيثة: كفاش خدمة؟! زعما نتي خدامة فالتجييهز!!!
ملاك: (فاهماها وماشية معاها) شي خدمة دابا يشرحها ليك هو من بعد
غيثة: ااه بالصح، (باغيا تجبد منها الهضرة، وصلو للقهوة نزلو وجلسو كولها ولفطور للي خدا رجعت صونات وقطعت عليه شي جوج مرات وهو يرجع يصوني غمزت ملاك زعما راه هو) انا جاية
يوسف: غيثة! فيين؟!
غيثة: انا جاية اخويا (بعدت عليهم غير شوية كتهضر بشوية) وي اورطيغا
اورطيغا: شي حاجة اغيثة؟!
غيثة: انا مقلقة منك
اورطيغا: علاش؟! (واقف على عجل باغيين يذبحوه)
غيثة: لبارح شفتني مشيت مقلقة ونتا مسوقتيش لي..
اورطيغا: واحد شوية ونصوني عليك اغيثة دابا مشغل بزاف (قطع ومشا عند الخدامة للي كيتسنااوه والناس للي باغيين يديو سلعتهم)
ملاك: (كتشوف فغيثة للي كتهضر مكتسمعش هضرتها ولكن من حركاتها كتحلون وظحك رجعت شافت فتيليفونها وفبالها علاش مطلبش نمرتها دوخها داك الاهتمام شنو موراااه؟! وهي شنو عندها ولكن قبل تسول راسها هي شنو كيعني ليها اورطيغا؟!!! وشنو المشااااعر للي كتحس تحط لفطوور جات غيثة متبسمة)
غيثة: (بهمس لملاك) مسمعنيش يوسف
ملاك: (عصبتها) نعام؟!!
غيثة: يوسف خويا مسمعنيش وانا تنهضر مع اورطيغا؟!
ملاك منتابهتش (رجعت كتاكل ومكرهتش غير تنتفها تبعدها حيت جاها هادشي مبااالغ فيه زعما حتى شفتيها بجوج عاد بديتي كتبينيلي شحال هو مهتم فيك فين كان هادشي من شحال هادي!!!!)
بقاو مجمعين كيتعاودو حتى قررو يشدو طريق لإيموزار ملاك رفضت وعيات تعكس وتمرض باش متمشيش. ترجع للدار ولكن ضارو كيقنعووها ووافقت بلا متبغي هي بغات ترجع تشوف اورطيغا راه دايرين العشية يتشااوفو وهو أكد عليها ولكن!!! بقاو تماك دوزو العشية كااملة..
~~~~~~~~~~~
اورطيغا: (كمل الخدمة مشا للدار للي فالسعادة دوش لبس وتقاد نيشان مشا عند مو مع داخل كيتسااطح مع اب ليلى وقفلو فطريق كيشوف فيه بقرف)
شي حاجة ابنااادم!!!
اب ليلى: مزال عن..
اورطيغا: وبقا حاضي (دخل فيه بكتفو حتى زعزعو شدو غير الحيط، اما باها بقا غير كيخنزر حيت ليلى بنتهم حيحت وعتارفت لباها انه هو للي ضيعها معاه وهو دابا مبقاش كيبغييها وبسبابو ضرب بنتو بطرشة باش ترجع الوعي ديالها)
اورطيغا: (بانتلو شي حاجة فشكل فالرياض! شاف فالحاج جاالس حدا النافورة كيهضر مع ليلى للي كتبكي بقا كيضور عينو بغا يسلت يطلع لبيت مو)
الحاج: مرااااد (ضار اورطيغا ومشا عندو سلم عليه)
مشفتينيش؟!!
ليلى: (كانت حانية راسها وحنكها كان حمر مشافتش فيه)
اورطيغا: شفتك مشغول مع ضيااف مشيت تنقلب على الوالدة (باغي يعرف شنو وااقع واش عندو شي دخل فهادشي عاوتااتي)
أمينة: (خرجت من الصالون شافت فولدها هي عارفة شنو وقع حيت تصنتات عليهم مشات جيهتهم) ولدي جيييت؟!!
اورطيغا: (مشا عنقها وهي تهمس ليه فودنو باش يطلع يتسناها فلبيت، استئذن من الحاج وطلع تبعاتو أمينة وليلى تبعاتو بعينها، مع دخلت سدت بيتها بالساروت وضارت عندو)
اورطيغا: (جاتو الظحكة)
انا والله مبقيتش شفتها من داك نهار
أمينة: عاارفة.. (معصبة) اش داك لهادشي اولدي واش بغيتي تقتل فية شي عرق
اورطيغا: وااا للي نطولووه نقصروووه ماااااناا على هاد الحالة هي تابعاني وانا مابااغيش واش بالسيف
أمينة: من اللول متمشيش عندها
اورطيغا: اوا هي طالقة اللعب (ضرباتو لصدرو) ههه اااح عندك شي ضربااات
أمينة: قسمت ليك بالله ونعرفك تابع شي قندووحة دابا
اورطيغا: وااايلي على قندووحة الوالدة ولدك كيطيييح غير فلبيااسات حتى هاد اليامات طحت على واحد لڤيس
أمينة: (بجدية) مكنظحكش امراد
اورطيغا: (جبد من جيبو بواطة حمرة حلها جبد ديك نباالة وهي غير متبعاه كتشوف حلها ودارها فيدها) متجي مع حتى شي بنت لمرا من غيرك (شد يدها وباسها)
أمينة: هه ولد الهم هاكا كظحك عليهم
اورطيغا: نتي غيييير الزين (عنقها وهي كتنهد خايفة عليه بعدت وشافت فيدها كتقادها فيدها) عجبك؟!
أمينة: غزااااااال اولدي الله يحفظك لية ولكن جمع الفلوس ودير شي دوييرة
اورطيغا: واخا واخا.. قوليلي شنو واقع؟!!
أمينة: شنو باغي تعرف اولدي للي خاصك تعرف هاد الساعة هو تبعد على لبنات هاد طريق راه مافيه ربح، وسيير تزوج ودير وليداتك (بجدية شدت فيدو)
اولدي انا مديمااش ليك (تكره)
غير سمعني كما لݣيييتك انا فطريقي حتى نتا تبغي تلݣا ولادك يهزوووك ويكبرو معاك تخدم وتحس بحلاوة فلووسك معاهم تربييهم كما بغييت نتا وتحن علييهم وتخاف عليهم، هاد زهوو اولدي والنشاااط عندو مدة ويفووت ويبقى غير المعقول خمم فكلامي ملييييح ودير علاش تولي امرااد العمر راه كيمشي غمض عين وحلها تلقا راسك بلا ولاد ولا وتاد
اورطيغا: ويلا سمحت فيهم؟
أمينة: (بقات كتشوف فيه مفهمتش علاش ديما كيقول هاكا)
مغتسمحس حيت أنا للي مربياك وعارفة شنو مربية
اورطيغا: (بعدم اقتناع) صعييييب منقدرش
أمينة؛ علاش صعيب حتى حاجة مصعيبة نتا غير توكل على الله وربي غيديرلك للي فيها الخير الواحد كينوي الخير وكيلقااه
اورطيغا: هي موجدالي العروسة
أمينة: ها غيثة لالة غيثة الزين والفنوون والطولة وظراافة
اورطيغا: ههه ياك معندكش مع مها
أميمة: مكنحملها مكنقبلها ولكن غنفݣسها الا ديت بنتها
اورطيغا: هههه قولي نتي باغية ديريني قنطرة تفقسي لالاهم الغالية
أمينة: معرفت منين جا لمها لغلا ولكن بنتها شهوة منها وعاد كتبغيك مسيكينة محتارمة ومربية وغتخليك مرتاح فحياتك تبع للي يبغيك اولدي
اورطيغا: الوالدة غنجيك نيشان، غيثة بحال ختي معمرني فكرت فيها ولا نفكر صافي هاكا عقلي كبر فيها هي بحال ختي ومباغيش نتحاشم مع يوسف شي نهار ولا مع باها وخوها غير باش تزوليها من راسك
أمينة: وعلاش غتحاشم
اورطيغا: معرفتش مهم دابا خلينا من هادشي
أمينة: نعطيك اولدي شهرين تقلب فيه ولا غندير شراع يدي
اورطيغا: ههه (سمعو الدقان مشا حل كان الحاج) ياله انا نخلييكم
الحاج: مزال عندي معاك شي كلام
اورطيغا: اهااه الله يسمعنا كلام الخير
الحاج: لالة أمينة حطيلي انا ولدي الغدا (خرجت هبطت لتحت مشاو لبيت فيه جليسة وكانو بوحدهم نفس الموضوع كيهضرلو على زواج وهو حسابلو غيقولو على ليلى ساعة موضوع بحال ديال مو، بقا غير كينعم ليه على اساس كيسمع ليه تحط لغدا كلاو بزووج وتلاوها بالهضرة على الخدمة وعلمو على شي فيرمة غيشريها فݣيݣو وكلفو باش هو يكمل ليه الإجراءات بالوكالة للي كيديرلو)
اورطيغا: ان شاء الله غير علمني على تيساع باش منشدش شي كموند
الحاج: ان شاء الله اولدي (وقف اورطيغا باش يمشي) العساس تيقولي مبقيتش تبات فدار السعادة
اورطيغا: اوا!!!
الحاج: واش كاري فشي بلاصة اخرى؟!
اورطيغا: اممم
الحاج: وعلاش متجمعش وتشري شي محاال راه بخيرك حتى نتا تبقى غير تتكري
اورطيغا: ان شاء الله (باسلو جبهتو حيت غيبقى يديرلو الاستنطاق وتم خارج مجمع مع مو شوية حيت كان الهدوء فالدار)
حقا بنات لالة زهرة مزال هنا؟!
أمينة: بالصح؟! اويلعدااا نسييتهم ݣاع
اورطيغا: تنشوفهم مع يوسف مرة مرة
أمينة: خاص ندير لهم شي عراضة هنا
اورطيغا: (عارف عقلية مو كتموت على لعراضات وجموع، حتى هو معطلهاش دوز نمرة يوسف وعطاها تهضر)
عرضيهم فالدار لهييه حسن هنا مغياخدوش راحتهم (شافتو زرب ولكن عجبها الحال يولي بعدا كيبغي العائلة هضرت مع يوسف وأكدت عليه غدا يجيو العشا هو ومرتو وحتى ختها وكملتها يجيب غيثة..)
اورطيغا: وغيثة لاش؟! (شد تيليفونو) راني هضرت معاك غير حيديها من بتلك
أمينة: حتى انا هضرت معاك جمع راسك ولا انا نجمعك
اورطيغا: هه (باس مو فيدها وراسها وتم خارج تساطح مع ادم للي حتى واحد فيهم معتاذر من لاخر ولا حتى تسالمو تم ماشي ركب فطموبيلتو وزاااد…)
اورطيغا: (منين كان هضر مع يوسف سمع صوتها معجبوش الحال كان داير معاها باش يخرجو علاش متسناتوش!!! بقا مدااابز غير مع راسو،
زادت تلفاتو واش كاينة شي حاجة من جيتها ولا غير صديق! وعلاش اصلا كيفكر واش كاينة شي حاجة ولا لا حتى هو يرجع لحيااتو لقديمة للي حاليا مبقاتش عاجباااه حس بيها مقرفة وكولشي طلعلو فراسو قلب طريق مشا لدار السعادة باغي يجلس بووحدو دخل نيشان لبيتو بدل حوايجو شعل لاكليم حيت سخن الحال شد تيليفونو داير فيه فلم باغي يصفي دماااغو…
صونا تيليفونو كانت غيثة مجاوبهاااش،
رجع راسو كيفكر مشد حتى وزة من داك الفلم هي بالصح فيها جميع المواصفات للي كيبغي فالمظهر الخارجي وحتى قلبها زوين وحاس بيها معجبة ولا كتبغيه ݣاع ولكن واخا هاكاك عمرو فكر ولا يفكر فيها فشي حاجة كتر من الأخوة!!
ملاك مو كيتعاود غتبقى بوحدك كيشوف غير الحاج ها هو كبر ولادة ضايرين بيه هو فاش يكون قدو شكون غيبقى معاه!!! ورجع لنفس السؤال
منين درت معاها علاش مجلستش وفضلت تمشي مع يوسف!!!!)
~~~~~~~~~~~~
ليلى: (مزالة مصدومة من طرشة ديال باها عقل كيقولها تمشي ترجع لفرنسا متعاودش ترجع وعقل مباغيش يرجع لتماك باغية تبقى فالمغرب، براسها مفهمتش علاش طايحة على واحد هانها فالانوثة ديالها المرة اللولة والتانية والتالتة.. وعاد تعامل دالويل وضربها وسبها واحتاقرها ومزالة تابعااه واش هدا حب؟! ميمكنش يكون فهاد المدة القصيرة!!!
واش غي حيت رافضها وهي للي عمرها ترفضات!!!
واش حسات بروجوولتو عكس باها وخوها للي اوبن وهي باغا تجرب العكس!!
ولا بغاتو يرجع ليها ومن بعد هي تخليه كنوع من الانتقام؟!
عمرها نخطا فهاد الموقف داكشي باش مفهمتش راسها!!!
مفهمتش هاد اللخبطة للي هي فيها ومعاجباهاااش كان قرار واحد ترجع لفرنسا تبعد واحد المدى حيت بسباب مشاعرها رجعت عنيفة مع كوولشي وحتى مع باها للي بررت تصرفاتها بالطيش لي خلاه يضربها…
ناضت جمعت حوايجها هزت باسبور ديالها وراقها كارت ݣيشي هزت تيليفونها صونات بريڤي عليه حيت عارفة مغيجاوبهاش بنمرتها)
حم الو
اورطيغا: وي!!
ليلى: بغيت نقولك اما ماشية فحالي
اورطيغا: وا ق*** (قطع حط تيليفونو ونااض كيوجد راسو باش يمشي لاصاال حسن ليه تماك كيلقى راحتو رجعت صونات عليه قطع هز صاكو وهو كياكل بنان وخرج من الدار متوجه لاصاال هو فين كيفرغ كوولشي…)
~~~~~~~~~~~~
ملاك: (عقلها مع اورطيغا كتشوف الساعة كانت 8 وظلام قرب يطييح شافت فتيليفونها)
غيكون خدا نمرتي وكان غير صونا ولكن باينة ممسوقش براكة عليه غير يصوني على غيثة..
(هزت عينها فغيثة كتلقاها حاضياها غير كتجي فيها العين لوخرا كتبسم )
هاد ايخانة غتبقى غير حاضياااني، اودي لا انا لا نتي ولد لحراام كيلعب بينا بجوج وتلقاه دابا مقنت شي بوجعراانة وحنا جالسين شوفي فية نشوف فيك!!!!
كملو نهارهم دازو تعشااو على برا وملاك بحال جالسة على جمر خاصها غير ترجع فحالها جاتها خرجة مقناطة كتر منفعاتها غير لبارح دوزت احسن خرجة واليوم الملل..
غيثة: خديجة اجي عندنا غدا
خديجة: غدا راكي عارفة عارضاانا خالتي أمينة وبعد غدا اختي غيجي بابا ونرجع مزال أيام الله طويلة ونتلقاو
غيثة: اممم قولي عليها خويا يوسف معاجبوش الحال
خديجة: ههه (شافت فيه وتبسم وفبالها زعما رجع كيبغيني!!!!)
مبقى والو ونتجمعو ان شاء الله
ان شاء الله.. ملاك ياله تباتي
ملاك: مرة أخرى ان شاء
غيثة: ها هي غنمشي خديجة بقاي نجي عندي ولا انا نجي عندك اشمن اوطيل نازلة فيه
يوسف: من بعد من بعد انا نجيبك عندها..
(توادعو وصلو غيثة لحدا الدار حيت يوسف مبغاهاش تعرف فين ساكن اورطيغا عاد وصلهم للحومة، مكانتش طموبيلتو للي قلبت عليها ملاك بعينيها)
يوسف: ملوكة كلامك رجع قلييل معانا
ملاك: هم لاا غير عييت وصافي ونضت بكري
يوسف: معندك متعاوديلي؟!! (خديجة كتشوف فيهم)
ملاك: هه (بإستغراب وعارفة الموضوع على اورطيغا) لااا
يوسف: زعما زعما!!
ملاك: علاش شنو فبالك؟!!
يوسف: غير قلت نتي منين غتحسي براسك باغية تعاودي غتجي وتقوليلي وانا غنصحك حيت نتي وغيثة عندي بحال بحال
ملاك: (حركت راسها باه، وفنفسها سير تخ**) اصلا انا كتاب مفتوح معندي منخبي
يوسف: داكشي للي كنت عارف عليك
ملاك: وباقية
خديجة: مالكم؟!!
يوسف: والو راه عشيييرتي هادي نبغي نعرف عليها الشادة والفادة
ملاك: (تبسمت وزفرت كتقلب على طموبيلتو وتسول فين هاد زمر!!.. وهي تجي فراسها شي حاجة دورت عينها على شي محال ديال إصلاح الهواتف) انا جاية
يوسف: فين ماشية؟!
ملاك: انا جاية (قطعت الشاريع ومشات للمحال تسنات نوبتها توصل)
حم خويا بغيت نعرف واش كيتجسس علية شي واحد فالتيليفون داك الكود للي كيديرو (شد التيليفون كيقلبو قالها مكاين والو بلعكس كان عاد تفورماطا ما فيه واالو)
وتقدر تجبدلي تصاور لقدام للي فيه (قالها لا بغات تخلصو ومبغاش حيت مدارس شي حاجة، شكراتو ورجعت عندهم مشاو حدا لباب هي ودعاتهم وطلعت وقفت حدا باب اورطيغا عقل كيقولها غير دق عليه وفالتالي كملت دروج لداارها وهي كتحل بالساروت سمعت خطوات ضورت عينها حسابها اورطيغا)
حمزة: ساكنة هنا؟!
ملاك: هزت راسها فيه مغووبشة زااافرة) شنو بغيتي احمزة؟!
حمزة: يوماين وانا تنقلب عليك بحال شي حمق وفالتالي نلقاك فلبلاصة فين كاري
ملاك: كاري؟!! اوا اومن بعد
حمزة: معلييش، باغي نهضر معاك
ملاك: هضر
حمزة: نمشيو لشي بلاصة ونهضرو (قرب ليها كيتودد بعينيه) عفاك املاك عطيني اااخر فرصة
ملاك: امتى عطيتك انا شي فرصة اصلا راه الا رجعت هضرت معاك غير حيت ولد الجيران صافي
حمزة: ملااك
يوسف: (كانو طلعو هو وخديجة قررو يسهرو فسطح حيت الجو سخون ونيت مشبعوش من بعضيااتهم، حتى كيشوف واحد مع ملاك قرااب مع شافت فيه ضار حتى لاخر للي مغرييبش عليه وعاد هو للي كان فصباح)
سلاااام..
خديجة: احححم حمزة!!! (شافت فيوسف) هدا ولد الجيران
يوسف: اه قلتيهالي صبااح ولكن (شاف فيه) شنو وااقع؟!
حمزة: (مد يدو ليوسف) ولد جيراانهم وكنت خاطب ملاك
يوسف: (دابا فهم شافت فملاك للي مغووبشة) مشرفين انا يوسف راجل خديجة، ملاك صاڤا!!
ملاك: الحمد لله (ضارت كتحل لباب) ياله بسلامة احمزة وسلم على مرتك
يوسف: (بقا غير كيشووف حتى شاف حمزة شد ملاك من ذراعها وقبل ميهضر ملاك تجننات بعد منو وبغوتة)
ملاك: بععععععععد مننننييييي (دخلت وزدحت لباب على جهدها عليهم) خ** تفوووووو…
يوسف: صاااحبي شنو وااقع واش شوية لباس؟!! شاد ليها يدها وحنا زعما من..
حمزة: (بعيااء) بغيت غير نهضر معاها
خديجة: كنت حمزة قلت ليك ملاك راه عمرها تعاود تشوف فيك رجع اخويا لمرتك وولي فكرشها راه هادشي للي كدير ماشي معقول خاي البنت عليك فالتيقاار هادشي راه مغيعجب حب واكترية بابا وباااك
يوسف: اجي اخويا معايا
خديجة: يووسف
يوسف: بغيت نهضر معاه أنا راه فبلاصة خوها وهادشي ممقبوولش، سيري دخلي نتي هبط معايا اخويا الا جات على خاطرك..
(هبط حمزة معاه لتحت وهي حلت لباب لقاات ملاك جالسة فوق السداري مجننة وكتبقى ترجف فهاد المواقف للي كتعصب فيهم)
خديجة: شنو بغا هدا منك
ملاك: (معصبة) منعرف عاد لق**** مرضني فحياااتي يبعدني علييه تابعني حتى لهنا تفوووو
خديجة: صافي راه يوسف كيهضر معاه
ملاك: (بقات غير جالسة مخرجة عينها معصبة وفنفس الوقت كتفكر فاورطيغا علاش مكاينش وفين كاين ومعامن دابا؟!!!! عيات تهضرها خديجة )
انا دابا معصبة اخديجة
(وقفت مشات لبيتها سدت لباب طلت من السرجم والو مكيناش طموبيلتو رجعت تلاحت فوق النموسية وعينيها فسقف عصبها بزااف..)
~~~~~~~~~~~~
يوسف: (شاد معاه الخاطر وحتى لاخر مساالم واكترية منين شافو لباقتو فالهضرة) ولكن أخاي حمزة صافي نتا ختاريتي طريييقك وهي دابا يسهل عليها الله فشي ولد الناس
حمزة: معمري غنخليها لشي واحد
يوسف: ميمكنش هنا راك غدخل فصراعات لا معاها لا مع باها وحتى معايا ملاك عزييزة عندي وفمقاام ختي صغييرة ميمكنش نتا دير حياتك وهي تبقى مرهونة بييك وعاد عارف ومتأكد مغدير معاك حتى حل حيت بالصح لوكان بغااتك كانت تسمح ليك، مثلا انا وياها اصدقاء بزااف تنتعاودو صغيرة ولكبيرة عمرها عاودات عليك ولا ذكرااتك
حمزة: ملاك متتعاود والو واخا تباانلك نتا صديق ديالها خوها ݣاع انا عارفها هي مكتعطيش راس الخيط ديالها كيبانلك نتا عارف عليها كولشي ولكن كتصدمك فشي نهار انك معارف عليها غير للي بغاتك هي تعرفو عليها
يوسف؛ (بقا كيشوف فيه وفبالو واش بالصح معارف فملاك والو!!) واخ بغيت غير نفهم علاش سمحتي فيها من المرة اللولة
حمزة: (مبغاش يعاود) شي تدخلات دالعائلة
يوسف؛ شوف من التالي أخويا راك غير كضيع الوقت ديالك وهنا فالموبل كولها داخل سوق راسو الا بقات هاكا غير غيجريو عليها ولا يسمعوها شي كلمة ماشي حتى لهييه
حمزة: والحل؟!!
يوسف: مكاينش حل انا عارف ملاك واخا نتا تتقول معارفهاش ولكن مستحيل دخل فعلاقة وتكون هي طرف تالت هي ماشي أنانية ومغتبغيش تخرب بين زوج سوا كنتو مفاهمين ولا لا سير صلح امورك مع مرتك ودير الحل نتا بعدا لراسك عاد فكر فملاك
حمزة: (بقا غير كيشوف مساخيش بملاك كان عندو يقييين انها غتسمحلو حيت كتبغييه)
يوسف: نصيحة مني منين عندك الوقت سير بعد وحط النقط على الحروف اما هاكا نتا للي غتكون مضروور كتر، اللهم يسر
(وقفت طموبيلة ديال اورطيغا)
الله يعاونك (تمشا عند اورطيغا للي واقف كيتسنااه)
اورطيغا: تتعرف هاد خينا؟!!
يوسف: ولد جيرانهم فصفرو…
اورطيغا: شكون هاد خينا؟!!
يوسف: ولد جيران خديجة فصفرو
اورطيغا: وباغي يجي يكمل الجورة هنا!!!
يوسف: هه صبر، (صونات عليه جاوب)
لا صافي.. قولها مديرونجيش راسها
(كيبعد على اورطيغا للي واقف كيتصنت بملامح غير مبالية كيشعل ݣارو)
صافي احبيبة..
اممم غدا غتكون عندي خدمة فمكناس نكمل ندوش ونجي عندك باش نمشيو عند لالة أمينة..
ضرووري احبيبة…
واخ نوصل للدار ونصوني عليك
(رجع عند اورطيغا للي متكي على طموبيلتو كيكمي وحاضي بطرف عينو حمزة للي ركب فشي طموبيل وزاد هز راسو لقا ضو دبيتها مشعول)
اوا فين شادها؟!
اورطيغا: غير هنا كنتو غابرين؟! عاد جيتو؟!
يوسف: اه خديت لبنات يبدلو الجو شوية ودابا غرجع عندي خدمة بكري
اورطيغا: امم وشنو بغا داك ولد الجيران، حيت مبلانش فشكل جاي يسكن هنا؟!!
يوسف: يمكن عندو شي خدمة وصافي
اورطيغا: (طانز) سبحان الله
يوسف: هه ماالك
اورطيغا: مهم انا كنت نسيت شاارج ديالي وغرجع
يوسف: هي مكبتها لهييه
اورطيغا: (لاح الݣارو عافس عليه برجلو)
تهلا..
(طلع الموبل وتفكير ديالو فيها وهو نيت للي مرجعو، دخل لدارو هز شنو بغا وللي مكانش محتاجو اصلا، هز تيليفونها وخرج كيوصل لبروميير كطلع معاه ريحة خفييفة ظن انه غير شي واحد من دراري منغم ولكن!! بقا وااقف فداك ظلاام مكاين حتى شي حركة فديور بزووج عاد هبط مشا فحاالو.. كان غيبات ولكن حسن يصفي دماغو
وصل للدار صوناتلو وحدة من للي كان معاهم بقا غير كيشوف فداك لابيل حتى قطعت)
وليتي تكبر على النعمة العزي!! الله يسمحلي وصاافي
(مرجعش صونالها واخا مكرهش الا جوج حوايج مانعينو الحلفة للي حلف ديك الليلة وعاد هي للي خلاتو ينفر كوولشي… تخيلها فدماااغو)
قصيييرة كيغنديرلها؟!!
(مشا غسل العنب استقطرو ومشا لبيتو هز تيليفونها نيشان للفايس الانستغرام للي بقاو خدامين فيه وجبد حتى الكود باغي يعرف علاش كتقلب باغي يعرفها كفاش كتفكر واخا كتحيروو كتخليه غير كيفكر فيها!!! ولكن اليوم عصبااتو ومعجبوش الحال تݣردعو ومتبقاش كتسناااه…)
اب ليلى: (تصدمو منين عرفو بنتهم مشات لفرنسا وبلا خباارهم وممشاتش حتى حبيا، مشات من مور السقلة للي عطاها باها!!!شاف فمرتو للي كتبكي) غترجع غير تكلماااي
ادم: (تبسم باستهزاء) هادشي علاش كانت تتقلب من شحال هادي
ام ليلى: واش نتا تتكره ختك لهاد الدرجة؟!
ادم: متنكرهااش ولكن مغنقبلش داكشي للي كانت تدير هنا لهيهات كانت هضرة وهنا كاينة هضرة
ام ليلى: اشنو دارت ݣاع؟!!!!
ادم: (شاف فباه) هو راه عاارف، مهم انا غنمشي عندي شي خدمة وباش ندير ليك خاطرك غنهضر معاها
ام ليلى: ومتهددهاش
ادم: (كيشوف فيهم وفهاد البرود بنتهم رجعت لبلاد اخرى طيحو جوج دمعات وهمهم ترجع وبلا شروط حرك راسو باه) الدار راها كملات واقلة جا الوقت باش تخرجو من ديور الناس
اب ليلى: كفاش ديور الناس راه دار عمي هادي ومن ديما كان فمقام الواليد
ادم: اه، ولكن خاص الواحد ميجلسش بزااف عند الناس
ام ليلى: عندو الصح انا عاجباتني الجلسة ولكن بسباب هاديك الهمجية للي كاينة مترتاحش بزااف….
~~~~~~~~~~~~~~~
أصبحنا وأصبح الملك لله…
ملاك: (فاقت خاسرة مع حلت عينها مع طلت من السرجم مكيناش طموبيلتو)
فين بات هاد زمر؟!!!
(الشيطان كيلعب فراسها رجعت جلست شافت خديجة دخلت هازة باليزة كبيرة)
منين جبتيها؟!!
خديجة: جابهالي يوسف قبل ميمشي للخدمة حيت عرف معنديش وحدة كبيرة لي تهز لية هاد لحوايج كاملة
ملاك؛ مزيان
خديجة: لول لبارح فاش خرجت بوحدي درت فلوس صداق فكونط وحتى دوك التحاليل طبيبة صيفطاتهوملي فالايميل ديال فاطمة كما قالتلي باش ديرهم فيوسبي
ملاك: مزياااااان فاطمة عارفة شنو كدير
خديجة: ولكن مقلتهاش ليوسف على حساب الكونت
ملاك: علاش نتي عارفة يوسف شحال عندو فلكوونت كاين شي حوايج ماشي بالضرورة يتقالو غير الا جات الصدفة وعاد مع الوقت غيعرف
خديجة: معرفت شنو نشري بيهم
ملاك: اممم خودي ذهب مثلا داكشي للي ناقصك.. كاين شي فطوور؟!!
خديجة: اه، وفاء خرجت تجيب شي حاجة وترجع، بلاتي منين تبغيو نمشيو خاص نديو معانا شي حاجة لدار خالتي أمينة
ملاك: (بقات غير كتشوف اي حاجة فيها سيرتو كتخلي قلبها يضرب، ناضت خديجة تجيب حوايج جداد وهي قلبت عاود فسرجم مطلعة الريدو حتى كيبان ليها اونفاص معاها تبسمت مزومية بعينيها كتكمشهم، كان فديك الارض للي حفروها كيقادوها وكاميو ديال الياجور كيخويوها.. بقات غير متبعاااه عيطت ليها خديجة منين جات وفاء)
هانا جاية
خديجة: اجي تفطريييييييي
وفاء: ملاااااااااك هادشي غيبرد
ملاك: خ** صبرو ولا فطرووو
شنو كيدير هاد زمر هنا؟! واش كيديباني حتى هنا؟!!
غيثة: (جالسة فبيتها غير كتخمم موالفة ديما كتشوفو مع بنات اشكال انواااع وعارفااهم كيباتو معاه ݣاع، وكانت كتجيها عادي حيت عارفاه غير كيدوز الوقت بيهم حتى منين عرفاتو مع ليلى مسوقتش بزااف حيت من اللول بين ليها اهتمام ديال نعاس ودوك اللمسات للي شافتهم فسطح كيديرلها
ولكن ملاك!!!
ماشي حيت زوينة عليهم بلعكس المواصفات للي كتعرفهم كيبغيها مكيناش فملاك نهائيا ومع ذالك تنكرات من جيهتها وحيت بخطر كبييير وعاد لوخرا مبينة ولا بالصح نيت ممسوقاااش، كانت عزيزة عندها ملاك ومزال ولكن دابا مغتنكرش انها مقروووسة من جهتها راه اورطيغا هدا اول حبات وحلات عينها عليه
جات عندها مها كتغوت)
شنو اماما؟!! شنووو!!!
الغالية: شحال وانا تنعيط ليك؟!
غيثة: (معصبة) مسمعتش
الغالية: مالك مك تتقابحي هاكا؟!! قول عارضاااكم ديك الملقطة
غيثة: بفففف شكون؟!
الغالية: وشكون من غيرها، (بتسائل) هضر واش عارضااك نتي وخااك وداك الملعوقة؟!
غيثة: اه
الغالية: مضورة بيها دراري صغاار من اللول عارفااها كتجمع عليها صغار باش ضيع ليهم تربيتهم
غيثة: اشمن صغار اماما يوسف كبيرنا عندو 40 عام
الغالية: سكووووت لمك انا للي عارفة وعارفاها علاش ناوية!! كتزرع فيكم دوك الافكار باش تقبلو داك لقيط دولدها وديرلو الهمة و الشان
غيثة: واات!! شنو تتخربقي اماما
الغالية: انا للي حافظاها ونتي غتمشي غيكون داك الشمكار ،تماك؟!
غيثة: اوووف اماما اوووووف (ناضت مكرهة) غنمشي للصالون
الغالية: هاكاااوا سير للصالون قاد شعر والظفران لشمكار دلخلا بعدا شوووف غير فشرييف
(هزت لوخرا صويكها وخرجت خلات مها كتنݣر)
~~~~~~~~~~~~~~
ملاك: (لبنات ناضو كيخملو وهوما كيشطحو وهي جالسة فكرسي مكدير واالو دايرة فيها مريضة وعظامها واجعينها هازة تيليفونها كتخرب فيه حتى صونات عليها غيثة)
وي غيثة
غيثة: الزين صاڤا؟!
ملاك: الحمد لله اختي..
انا فالدار.. لا مخرجنااش راك سمعتي يوسف البارح قال مشغول وانا نيت كنت تنراجع شي بوليكوبات..
الصالون؟!.. لا لا والله مفيا وأصلا طموبيلتي مزال حتى مجبتها…
اه.. واخا.. ان شاء الله.. بسلامة
(بقات غير كتفكر هاد الاهتمام دغيثا كان ولكن دابا كتحس بيه مكهرب فشكل وعارفااه مرتاابط باورطيغا خوفها غير يكون بالصح كيلعب عليهم بزووج يعني راه حتى غيثة كيتخابر معاها فالودنين ويضحكو والتيليفون بيناتهم بحال والو يكونو سهرات بحال للي دار ليها وعاد كتجي عندو المحال وبحال والو تكون عينو فيها..
نفضت افكار راسها ناضت جابت بوليكوبات للي جابت وبقات كتراجع فيهم وكان عطاوها حتى التلخيصات حيت معرفة من عند وفاء)
وفاء: لالة العروسة هزي رجليك
ملاك: اودي هرمنا على ديك اللقطة
وفاء: ههه طايبة اختي طاايبة
(سيقت من تحتها وكملو جميع تغدااو وكل وحدة تكات مع سخن الحال مكاين ميدار، خديجة بقات مع وفاء فبيتها كيتعاودو طالقين كليما، وملاك بوحدها فبيتها مقنتة فالسرجم كتقلب عليه مكاينش ولكن طموبيلتو كتبان ليها حاطها بعيد شوية، تدق لباب فرحت وقلبها زدح لبست بينوار طويل ودارت شالها معجبهاش الديكور رجعت لبست كيطمة خفيفة واسعة جاية مستيلية لوات شال كتزرب قبل متزرب وحدة من لبنات وتحل دارت عكر خفيف ومشات تحل لباب، غير لقاتو هو جمعت الظحكة وتنرڤزت)
شنو بغيت احمزة عااود؟!!
حمزة: باغي نهضر معاك جوج كلمات وغنمشي فحالي
ملاك: (ربعت يدها عاطياه وقت على الله غير يبعد منها) شنو احمزة؟!
حمزة: انا عمرني كذبت عليك فشي كلمة قلتها ليك ومنين قلت كنبغيييك راه كنبغييك بالصح وباقي كنبغيك كتر متخيلي
ملاك: واخا
حمزة: (بقا كيشوف فيها) مزالة كتبغيني املاك؟!!
اورطيغا: (منين شافو طالع تبعو وبقا فالدورة ديال درووج كيتصنت عليهم)
ملاك: (حركت راسها بلا)
اورطيغا: (غوبش مسمعش بشنو جاوبت وشاد راسو بالسيف ميطلعش حتى يفهم هي باش كنحس مع هاد خينا!!)
حمزة: غندير على قبلك كولشي غير باش نرجعو كيف كنا
ملاك: كيف كنا احمزة؟!! راه غير ولف حيت ولاد الجيران وصاافي اخر مرة هضرت معاك عادي غير نتا نويتها فشي حاجة اخرة
حمزة: عادي؟! متأكدة!!!
ملاك: اه عادي مكاين واالو من داكشي للي فباالك، عفاك نساني عليك مغنقولكش ديرتي بحال ختك لا، ديرني مكيناش انا وياك احمزة عمر شي حاجة غتجمعنا واخا تنطاابق سما مع الأرض واخا تطلق واخا مرتك متكونش حاملة واخا تعجن وتعاود تولد من كرش مك انا وياك لاااااا
اورطيغا: (هز حواجبو بجوووج باهتمام)
حمزة: (بقا كيشوف فيها)
وعلاش؟!
ملاك: واش بالسيف؟!
حمزة: مكنتيش هاكا
ملاك: كنا وكنتي صرنا وصرتي للي فات مااات وانا مكنعيش فالماضي عندي بزااف ميداار وقتي وحيااتي عامرين عمرك تخيل ولا تفكر انني غنوقف عليك حياتي جربنا انا وياك تخطبنا وربي مدارليش فيك الخير وجا السبب والحمد لله
حمزة: كتشوفيني شيطان لهاد الدرجة
ملاك: (زفرت كتشوف فيه) مكنشوفكش اصلا احمزة، وهادشي للي بغيت نوصل ليك من شحال هادي
حمزة: بهاد السهولة دغيا كتنساي؟!
ملاك: بحال شريب لما
اورطيغا: (فبالو راه هو خاص لي ينقذو ماشي هي)
حمزة: هاكا كتبينيلي العكس
ملاك: حمزة ڤغيمووو الحوار معاك عقيييم نتا اصلا مقتانع بفكرة انني كنبغيك ولا كنتسنااك ولا شي تخربيقة وماشي أنا للي غنبدلها ليك نتا خاصك تفهمها بوحدك (جرت لباب)
سير فحالك احمزة
حمزة: مصيرلك غترجعي
ملاك: لصفرو اه
حمزة: (تبسم) غترجعيلي انا.. (سدت لباب عليه وحتى هو هبط كيلقى اورطيغا مخزز لاخر قال السلام ولكن هاد المرة مردهاش علييه، دخل للدار…)
اورطيغا: (بقا وااقف شحاال عاد دخل حتى هو للدار..)
اورطيغا: (دخل لدارو واقف حدا لباب اذا هو مول لميساجات للي فلفايس وانستغرام وللي كيصيفط ليها من نوامر!!
وولكن هي مبغاتش تهضر معاه واخا هاد الاهتمام كاامل ومن كلامهم ديجا كانو مخطوبين ولكن كفاش كانت علاقتهم؟!!!!!!
غير هادشي كيخلييه مغووبش وعاد جا تابعها حتى لهنا صونا على السمسار ودخل لبيتو يبدل حالتو…)
~~~~~~~~~~~~~~~
ملاك: (دخلت للبيت كتفكر واش بالصح هادشي للي قالت لحمزة مبقى كيعني ليها والو واخا لاسق فيها وشحال من وحدة كيعجبها هاد الاهتمام ولكن هي كارهاااه اولا حيت مزوج وتاني حيت للي خلاها مرة وجوج يخليها ألف ومبقاتش كتيق فيه واخا يكون بالصح كيموت عليها..
تكاات محيدة شالها تفكيرها فاورطيغا كتر للي غبر واش غتعذب حتى مع هدا ولا هادشي غير من طرفها…
ميمكنش راه تصرفاتو بااينة كاين كتر هي ماشي كتوهم ولا حمقة!!!! هزت تيليفونها كتشوف فتصويرتهم للي تصورو كتزومي فيه وتفاصيلو وديك الابتسامة.. تنهدت عاود وقفت كتشوف فالسرجم مكاينش فديك البقعة للي رجعت كتبنى ولكن طموبيلتو باقي كاينة)
يكون فدارو؟؟؟؟
اويييييلي يكون داك زبل دحمزة كاري حداه ويمشي يقولو!! اش غيقولوو وهو اش عرفو راني كنعرف لاخر
لااا لا ميمكنش
ولا يوسف يمشي يقولو!!
ويقول ݣاع راه كان خاطبني وفركشناها مدايراش منخاافش (رجعت تكاات كتفكر غير شنو غتلبس فلعشية!!)
~~~~~~~~~~~
أمينة: (قطعت مع زهرة للي رجعو كيتعاودو ويتصافطو فلواتس وصونات على العساس واش جاب ليها علاش وصاتو طلعو ليها للدار صونا على ولدها)
احبيبي.. مزال بعيد!!
غير بغيتك توريني كيف كدير لديك شلاظة
(غمضت عينها عاد ظحكت) لاااا ماشي كنݣولك تجي تديرها
ههههه وا حيت صااحبك وبغيتهم يذوقو منها.. ههه واخا حبيبي متعطلش.. صافي.. (قطعت حيت قالها هو غيجي يقاد هي وجدت غير كوتي مشكل ودارت فيه داكشي زوين تدق لباب مشات تحل لقاتها غيثة)
اهلا اهلا اهلا بالحبيبة
غيثة: طاتي (تعانقو كانت جابت معاها بواطة فيها تمر بريستيج معمر)
من النوع للي تيعجبك
أمينة: كلفتي راسك احبيبتي دخلي دخلي
غيثة: اممم اورطيغا مزال مجا
أمينة: واحد شوية ويوصل فين يوسف ومرتو
غيثة: مغتجيش ملاك!!!!
أمينة: لاا.. غتجي علاش قالت ليك متجيش
غيثة: لا لا غير سولت مع جيت بوحدي معرفتش شكون جاي
أمينة: ااه ودخلي ابنتي
غيثة: نعاونك فشي حاجة؟!
أمينة: لا بنتي غير دخلي رتاحي كولشي واجد انا نجي نجلس
(سمعت الساروت كيدوور)
يمكن مراد جا (مشات حدا لباب ولوخرا كتقاد شعرها وقفت حدا لباب كتشوفو جايب ميكات فيدو وكيسلم على مو مع هز راسو فيها تبسم مشات متبسمة كتسلم عليه من الوجه)
اورطيغا: صونيت على يوسف عاد مشا يجيب لبنات قلت غتكوني معاه
غيثة: لا بغيت نسبقهم
اورطيغا: مزيان.. مرحبا مهم انا ندخل هادشي..
أمينة: (كانت مع غيثة مجمعة للي كتعاود ليها شنو غيديرو فالعرس وشنو كيوجدو) الله يكمل عليهم بالخير عندي خوك عزيييز عندي بزاااف
غيثة: حتى نتي اطاتي أمينة عزيزة عندو بزااااف وحتى انا (تبسمت) والله
أمينة: من معزتكم احبيبتي، انا نمشي نشوف مراد راه هو الطباخ اليوم
غيثة: امممم بالصح من ديما تيقولي غنطيب ليك
أمين: يااك!!
غيثة: اه، انا نمشي نشوف غير خليك مرتاحة
أمينة: واخا راه فالكوزيينة (ناضت لوخرا متبعاها أمينة واخا الغالية مكتحملهش ولكن تمانتها لولدها للي باينة كتبغييه وغتعطييه الحنان للي محتااج ولكن!!! هزت تمرة كتاكل)
ياربي ميطردهاش ويقلب عليها داك الكوزينة
اورطيغا: (طالق الملحون ومشغول كيطب فالصلاد للي مو نقات ݣاع الهضرة للي غيحتاج، محس حتى تكات غيثة على لبوطاجي هزت خيار كتاكل)
غيثة: من ديما تنتشهى ناكل من هادشي للي تطيب
اورطيغا: مرحبااا
غيثة: شنو كاين لبلا السوق الشاف؟!؟
اورطيغا: صلاد
غيثة: (كتشوفو مشغوول وفبالها سؤال واحد واش هو وملاك مصاحبين؟!!) فاش نعاونك
اورطيغا: غير سيري ترتاحي
غيثة: نووو بغيت نعاونك
اورطيغا: صافي اغيثة سيري جلسي (شافها لبست طابلية) راسك قااسح
غيثة: ههه انا بغيت نعاونك (شافتو حل الثلاجة جبد جوج كتاف دالحولي دار ليݣات وهي متبعااه بقا كيشرمل فيهم بديك الشرمولة للي داير)
شنو درتي فيها
اورطيغا: العطرية
غيثة: شنو هي؟!
اورطيغا: (مجاوبش شافتو دار الثوم واعشاب منسمة لوا عليهم ورق الطبخ عاد أليمينيوم وهي دارت سيلفي مشيفهاش، دارهم فلاطة، بقا كيقاد لي صوص المرافقة للصلاد وهي غير كتشوف فيه)
غيثة: شنو درتي مع ليلى؟!
اورطيغا: شكون ليلى؟!
غيثة: للي جات من فرنسا
اورطيغا: والو، سيري جلسي (أصرت تبقى بقات كتغسل ماعن معاه وهو تقريبا كمل بقا غير ديزاين دخلت مو عليهم شاف فيها ديك الشوفة ديال معاجبوش الحال وهي كتديرلو إشارة بشنوو ندير؟! تسمع صوت الدقان مشات مينا تحل بغا هو يخرج)
غيثة: اورطيغا، واش نتا مقلق مني؟!
اورطيغا: علاش
ذغيثة: معرفتش مبقيتش تتبغي تهضر معايا وشحال من حاجة
اورطيغا: لا مكاين والو
غيثة: بالصح
اورطيغا: سيري جلسي ترتاحي مكاين والو فوقما بغيتي شي حاجة غنكون معاك, وخوي راسك من تخربيق (تبسمت من هضرتو باين باارد ماشي الرد للي بغات وكتسمع صوت لوخرين تم خاارج من الكوزينة وهي تبعاتو)
ملاك: (كانت متبسمة شافتو ياله غتبسم وقلبها تزير منين شافت غيثة جات من موراه لابسة الطابلية وكافرنس قلبت وجهها وأمينة كترحب بيهم.. لاخر سلم عليهم وصل لعندها مهزتش حتى العين فيه وهو تنكرى من تسلامها)
يوسف: (معجبوش الحال على ختو) كنتي تعلميني منين سبقتي
غيثة: غير مساليتش خويا..
انا نحط الطابلية ونجي، آه اليوم انا واورطيغا درنا ليكم عشا ديال لووكس…
جلسو مجمعين مع أمينة للي كانت حطت طبلة مشكلة من الكوتي اشكال وانواع وقف اورطيغا حداهم فلبيت كيشوف فمو
اورطيغا: انا غندي داكشي للفران، يوسف تخرج؟!
يوسف: اه، (خرجو مخليين لبنات على خاطرهم)
ملاك: (كتشوف غيثة كفاش مجمعة مع أمينة وتعنق وتبوس فيها هي متقدرش دير هاكا مع شي وحدة من غير مها وعاد كانت معاهم ومعاه فلكوزينة ݣاع داك الحماس والفرحة باش تجي ترون من شوفتهم بزوج..
صونات مهم ابيل ڤيديو هضرو مجموعين من غير غيثة للي غير كتبسم حيت مكتعرفش زهرة بزااف ولكن دارت صواابها، بقاو هاد العصور وامينة تجمع وتحكي، دازت شي جوج سوايع تمو دراري راجعين مشات أمينة تحل وتبعتها غيثة)
ملاك: كطير كطير هاد الخ*** السلامة يا ربي
خديجة: (حست بيها) هههه كتسناك حرب
ملاك: اشمن حرب نتي عاود
خديجة: (بهمس) على مراد ههه
ملاك: (صبعاتها) ايخان لوااه
خديجة: هههه وينو كتغيير ولكن راه مكيحايدش عينو عليك
ملاك: (قلبت وجهها للباب دخل غير يوسف وسمعت غيثة ولا سمعتهم راه غتكمل مع اورطيغا للي بدااو فالكوزينة)
يوسف: غيثااااا (جات عندو وهي كتلبس الطابلية) اجي جلسي
غيثة: نكملو ونجيو
يوسف: شنو غتكملو؟!! (معجبوش الحال ومبغاش يقمعها قدام لبنات رجعت للكوزينة) بففف
ملاك: معرفت فين طواليط
يوسف: (وراها كيشوف فملاك للي مرزنة عكس ختو للي عصبااتو وبقا كيعاود لخديجة ان تصرفات ختو غيخليه شي نهار يتصرف معاها شي تصرف خاايب وهي كتهدنو)
ملاك: (دازت من حدا لكوزينة فين سمعتهم طلت وشافت اورطيغا)
اورطيغا: غيثة بروجوولة سيري جلسي ديزاين متنبغي حتى واحد يحادي معايا شي لعبة فيه
غيثة: نبقى غير نشوف
اورطيغا: لا والو حتى يوصل وشوفي
أمينة: احيي خلي لبنت بغات تشوف
اورطيغا: (ضار عند مو) نتي وياها خرجو
(شاف فملاك للي كتشوف غير جات عينو فيها كملت طريقها)
ياله بجووج
(أمينة كتطيب خاطر غيثة للي مشات جلست، اما ملاك دخلت للحمام بقات غير كتشوف فلمرايا وعقلها ساارح غسلت يدها ونشفتهم وهي كتبرݣݣ فالحمام خرجت دازت لقاتو واقف فلكوزينة عاطي بظهر دخلت جلست فبلاصتها وامينة عاطياها لجمووع مع يوسف وخديجة ..)
اورطيغا: (قاد الجاردينيي حط لي صوص فزليفات خاصين بيهم حط السربيتة من بعد متأكد كولشي هو هداك، عيط على الدري للي طلع لحم باش يجيبو ليه) مّي!!!
أمينة: انا جاية احبيبي
غيثة: تبغي شي حاجة اطاتي أمينة!! (خنزر فيها يوسف لدرجة كولشي شافو )
أمينة: غير خليك احبيبتي (حتى هي كتجيها خفيفة وزادت تأكدت، ولكن حيت عارفاها مزعوطة فولدها كتعذرها مشات لعندو باش تحط الطبق الثاني)
ملاك: (مرضتها غيثة وتصرفاتها شافت يوسف كيهضر معاها بشوية ولكن باينة كان كيأنبها وهي غير حانية راسها كتنعم ليه، شافت أمينة كتحط)
خديجة: انا نعاونك اخالتي أمينة (عيات معاها تجلس ولكن ناضت دارت صواب حطات معاها طباسل واحد فوسط واحد لفراشط ويوسف متبعها بعينيه حتى نطق)
يوسف: قلبتيهم، (مفهماتوش) هو الفرشيطة كتحط فليسر والموس فليمن
ملاك: هههه (حسابلها كيظحك حتى شافت تعابير وجهو جدية)
مكظحكش؟!!
غيثة: (ظحكاتها ردة فعل ملاك للي مكانوش كيقدرو يديروها قدامو) ههه
يوسف: هدا راه النورمال أنسة ملاك
ملاك: النورمال!! الله يا ربي.. الله معاك اختي الله معاك ههه
غيثة: (خرجت عينها حيت خوها مكيتعاتقش فهادشي وغير كتشوف فملاك للي كطنز على خوها)
يوسف: ههه بلعكس حتى نتي غيجييك الدوور
ملاك: (تم داخل اورطيغا بالصلاد) شنو غتعلمني (هز عينو فيها مخنزر فيها هي مكتشوفش فيه)
يوسف: هاد توااشي غير وجدي راسك
خديجة: ههه وهي شنو ذنبها
يوسف: ياك اخديجة هادشي فيه الذنب
خديجة: ههه لا غير نتا كيعجبك هادشي ولكن هي يا ربي تقول غير باسم الله فاش تكون كتاكل
ملاك: ماشي على ظهري اخديجة
خديجة: ههه هدا جهدي علييكم بجوج (جات مينا جابت عواصر واورطيغا مشا شعل لباف) خاصنا بحال هدا ايوسف فالدار
ملاك: هاد ستيل مغيمشيش مع الفورشيط والموس ههه
يوسف: صافي لقيتي فين تشدي
غيثة: عطييه املاك عطيييه راه عقدنا فالدار
يوسف: حتى نتي اشنيولة
اورطيغا: (طلق موسيقى كلاسيكية مغربية ونقص الصوت)
خديجة: هادي موسيقى كتفتح الشهية (بقاو شادين فيوسف واورطيغا غير كيشوف فملاك بقات كتاكل وتبنن)
الله يعطيك الصحة اخويا مرااد
أمينة: (بغا يجاوب) قولو اخديجة الله يزوجك
خديجة: ههه الله يزوجك اخويا
أمينة: اميييين يا ربي ويجيب للي تقولي طاتي أمينة شدي ولدك علية شدي شدي يا خاالة
(بقات كتلحنها وخالقة الجو وغيثة كتفرنس اما ملاك طالقة ودنيها ولكن الماكلة عجبتها كتر…)
ملاك: (وقفت من الماكلة باش تخلي بلاصة لحم للي عاطية ريحتو وباين بنييين)
أمينة: زيدي ابنتي املاك
ملاك: حمدالله اخالتي مينا شبعت الله يخلف عليك
اورطيغا: (كمش عينو فيها وهو كيمضغ على شوية كان غيقولها قولي طاتي أمينة ولكن!! رجع كيكمل ماكلتو)
بغات تخلي بلاصة لحم
ملاك: (تبسمت دورت عينها لقات غيثة كتشوف فيها عااود) كتفهمني
غيثة: اه بالصح حتى انا متشوقة ناكل لبلا التاني غيعجبك املاك قادينا الشرمولة انا واورطيغا غتكون تتشهي
ملاك: (حركت راسها باه.. مابغاتش تجاوب حيت اخرتها غيقلبوها صبااط بقاو مجمعين حتى تحط لحم للي زوقااتو أمينة بيض السمان المكسرات وفروي معسلين بقاو كياكلو وغيثة غير كتشكر فمراد حتى عصبااتهم بهاد القفووزية واحترااما ليوسف مراد مبغاش يقمعها حيت اوڤرات بزااف جمعو مع أمينة الطبلة غير غيثة للي جالسة حيت هو جالس)
أمينة: والله متغسلييهم
خديجة: علاش كتحلفي اخالتي أمينة راه بحال دارنا
أمينة: دااركم ابنتي ماشي بحال ولكن راك مزال عروسة من بعد ونطلق فشوشي عليك
خديجة: مرحبا خالتي على الراس والعين
أمينة: سعدات الغالية بهاد العروسة يوسف يستااهل (بهمس) وهي لا
خديجة: ههه
أمينة: (كيهضرو بشوية وملاك حدا لباب واقفة حاضية لباب باش ميتسمعوش يوسف وختو وهوما كيجلدوها فالغالية) واش حتى نتي دافعة عليك داك البخ الخاوي ديالها راه كتحسب راسها هي للي شادة سما بصبعها
خديجة: واش هي صعيبة بزاف؟!
أمينة: ياااا ربي تسمحلي مشيينها مشينها مشينها غير الله يهديها عليك
ملاك: (كتسائل واش غتكون هادي هي حماتها مستقبلا ولكن هي باينة كتعز غيثة بقا فيها الحال شوية ولكن من جهة الا تفاهمو غتكون زويينة وقشووبية)
خديجة: الله يجيبنا فصوااب وصاافي انا مباغية لا صداع لا مشاكيل باغية غير لهنا والتيقار
أمينة: فرضي رااسك قالاك مباغياش صداع باش ميحسابهاش غتركب عليك ولكن خلي داكشي بينك وبينها انا نهار تزوجت عمك الحاج كنت فحرب معاهم والله ومفرضتي ريك ابنتي وبينتي شخصيتك وراسك لا زططتيه معاهم
خديجة: الله يدير الى فيها الخير وصاافي
ملاك: (شافت اورطيغا خرج من لبيت داز من حداها مشافش حتى فيها تبعاتو بعينها دخل الحمام معجبهاش تجاهلوو)
العماااا العماا العماااا…
يوسف: (بانفعال ولكن بهمس) شنو هاد تبرهيش للي تديري من قبيلة؟! متخلينيش معاك فيك قدامهم
غيثة: (بغباء) شنو اخويا؟!
يوسف: كفاش شنو ونتي تتلسقي فالسيد واش حماقيتي
غيثة: مدرت والو
يوسف: جمعي راسك اغييثة متخلينيش ندير معاك شي حاجة خايبة قداامهم وفهمي حاااجة مغنعاودهاش مرة أخرى اورطيغا وكان كان غراضو فشي زواج منك كان غيجي يقولها هو معتااررك ختو، ختووو مكاين حتى حاجة اخرى
جمعي راسك اغييثة
غيثة: (عينيها دمعو وهي كتشوف فيه ناضت بعصبية)
يوسف: غيثة غييي… (مصلاحلوش يغوت ويسمع كولشي)
غيثة: (خرجت من لبيت حفياانة باينة كاعية اورطيغا كان خارج من الحمام شافت فيه وجراتو من يدو دخلو لبيتو بغا يهضر سدت لباب)
خاص نهضر معاك ضرووري
اورطيغا: (غير كيشوف فيها، هز حاجبو)
غيثة: (كتشوف فعينيه مقدرتش تنطقها وخافت يزيد يحطمها كتر وكتر)
انا عارفاك نتا مع موضوع زوااج متديش على طاتي أمينة
(هز حاجبو فيها بقات شادة فيدو وحست بلبكية والقهرة حيت كتبغيه بزااف ومكرهتش تصاارحو ولكن…. زفرت)
…نتا عزيز عندي بزااف
اورطيغا: (جر يدو وقرسها فحنكها) واش باغية خوك يصيفيها لينا ونمشيو بااطل (تبسمت شادة لبكية)
ياله سيري جلسي
غيثة: وو..
اورطيغا: غيثااااا سيري جلسي حدااهم (مقدرتش تهضر وهو حاس بيها باغية تقول شي حاجة للي الا نطقاتها!!
ماباغيش يخسرها حنات راسها حل لباب وتمات خارجة وهو من مورااها جات عينهم فملاك للي حدا الكوزينة هي مشات للحمام كتزرب وهو بقا كيشوف فيها للي قلبت وجهها اما هو رجع لبيت ملبدها جلس فين كان غير يوسف)
مالك
يوسف: والو.. (حطات خديجة طبسيل ديال الديسير وجلست حداه كتقاد ليه فطبسيل تبسم) ميغسي (أمينة كتقاد لمراد)
صراحة خاصك تزوج حتى نتا
اورطيغا: هنينا ابنااادم (شاف فملاك للي كتبقشش فتيليفونها وباين عليها الانزعاج)
أمينة: ومالو قول شي حاجة مكيناش
اورطيغا: (مجاوبش هاد المرة)
يوسف: تيليفون جديد هداك
ملاك:( مافيها متهضر) اممم
خديجة: فين غيثة؟!
يوسف: خرجت قبيلة حسابلي جات حداكم
أمينة: يمكن فالحمام (شافوها دخلت وملامح وجهها مبدلة عاد مقادة ميكاب جديد) جلسي ابنتي تاكلي
غيثة: واخا طاتي…
حمزة: (منين عيطلو السمسار ان الدار بغاها كراي أخر حتى هو كان كيفكر يرجع فحاالو هي مزال معصبة منو ومغتسمعوش يعطيها شوية دالوقت راه ديجا تفارق معاها عام ورجعت بغا يخليها تبرد شوية جمع صاكو داز عند السمسار عطاه الساروت ركب فالطموبيل للي كان شاري ومشا رجع لصفرو.. وصل للقهوة كان رشيد ياله حط حتى هو الطموبيل)
عمي رشيد لباس عليك!
رشيد: الحمد لله اولدي كيف راك مع السربيس
حمزة: سلك وصاافي
رشيد: صبر اولدي هادي هي الصمطة
حمزة: (حرك راسو باه وتم ماشي لدارهم حل لباب مشا دخل لبيتو لقا أميمة عريانة ياله خارجة من الدوش بقا كيشوف فيها) خرجي من هنا
أميمة: نخرج عريانة؟!!
حمزة: لبسي وخرجي
أميمة: (مهزتش البينوار بلعكس مشات عندو هكااك وشعر فازݣ نازل عليها ومقادة حالتها حيت كان علم مو راه جاي وبقات كتسناي وتقدات مزيااان واخا عندها شك انه كيتعاشر فقننت اخر) توحشتك احمزة
حمزة: (كأي رااجل تحركت فيه الشهوة) خرجي أميمة
أميمة: (حطت يدها فوق *** بدلع) متوحشتينييش؟!!
حمزة: (شاف فيها) لا
أمينة: (موالف كيكون عنيف كتر من هاكا، تبسمت) من داك نهار وانا كنفكر فيك ديك الليلة مابغاتش تحايد من رااسي قلت حنا مزوجين مزوجين علاش كنضيعو على راسنا هادشي على منتفارقو (بدلع) هاحنا
حمزة: (كيشوف فيها وقلبو متنااقض مع شهوتو وكان فصراع كبيير ولكن كاين ردة فعل لدرجة هي بدات بأحسن مداعبة كتخلي الراجل بلا ريزو وبلا تفكير…..)
~~~~~~~~~~~~
عيات أمينة تشدهم يباتو مبغااوش بحجة بات خديجة صباح غيجي يديها وملاك عندها الخدمة بكري وغيثة مكرهتش تبات ولكن يوسف نوضها وأصلا الغالية مستحيل تخليها تباات براكة غير خلاتها تعشا باش تجيبلها لخبار.. هبطو لتحت ومعاهم اورطيغا ملاك مشات لطموبيلة ديال يوسف كتسنااهم معصبة بزااف محاملة تشوف فحد من دوك الجوج..
اورطيغا: (غير سااكت ومرة مرة كيلوح عينو عليها) الا كنتي غتوصل غيثة نمشي نوصل لبنات
يوسف: (مزال باغي يسهر مع خديجة شوية)
بلا منعذبك كتر ونتا تابعك غدا سفر
غيثة: فين غتمشي؟!
اورطيغا: (شاف فيوسف) غيمشي شريف انا حتى لمور العرس ونمشي شي سيمانة
غيثة: فين؟!
يوسف: (بعصبية) سيري طلعي حدا ملاك انا جاي (مشات منرڤزة)
اورطيغا: صافي سيرو نتوما (هوما طلعو للطموبيل وهو بقا وااقف متبع غير ملاك الي مشاافتش جيهتو تبسم وطلع حدا مو للي كتوجد راسها باش يديها للريااض فطريقهم جبد معاها الموضوع)
الوالدة اخر مرة تبقاي قدام صحابي تجيبي سيرة زوااج وداكشي
أمينة: حيت بغيت نفرح بيك
اورطيغا: بغيتي تفرحي الوالدة نجيبلك كيلو حشيش فرحي حتى تشبعي ماشي نتي تنشطي يوماين وتفرحي وانا ناكلها عمري كامل
أمينة: ههه الله يعطيك الخير
اورطيغا: تنهضر بالصح واكترية قدام غيثة (شاف فيها ورجع شاف فطريق كيبغي يبين ليها الجدية فالأمر) هي راه كتنويها فشكل وانا عمرني نفكر نكون معاها بلا متخليها تتسنى حيت بربي المعبوود مغتكونش شي حاجة بيناتنا
أمينة: وعلاش شنو ناقصها هاد غيثة
أورطيغا: الديفو مني انا، مزيان!!
انا مباغيهاش خليني مزيان مع خوتها وباها غيثة راه بحال ختي صغيرة متبقايش تجبدي معاها هاد تخربيق ولا قدامها
أمينة: على مزيناتها زعيعرة وطويلة وكتݣولي طاتي
اورطيغا: ههه هادشي للي هامك تااليتك غطيحي فوحدة غتقولك خالتي مينا (رجعو مجمعين كيظحكو وصلها غير دخلت هو رجع فحالو وشاد طريق الحومة…)
اورطيغا: (وصل للحومة كانت طموبيلة ديال يوسف تماك طاالع فدرووج جبد تيليفونو صونا على وفاء للي استغربت من اتصال وملاك حداها جاوبت) بوحدكم؟!
وفاء: اممم (كانت جالسة كتفرج وحداها ملاك للي مربعة يدها ومغوبشة منين جات مبدلت موالو بقات غير مربعة يدها كتفرج) اه (ناضت مشات للكوزينة) علاش
اورطيغا: يوسف ومرتو؟!
وفاء: طلعو لسطح
اورطيغا: ملاك لابسة حوايجها وشالها؟!
وفاء: امم، باقية كما جات؟!
اورطيغا : حلي لباب ودخلي لبيتك
وفاء: (تبسمت) واخ (ملاك مكيناش فهاد العالم هنا فهمت وفاء مالها، انا لوخرا تفكيرها فداكشي للي شافت وبجوجهم خارجين من لبيت بين ليها شحاااال من حاجة كانت كتعاما فيها لوخرا حلت لباب بشوية بلا متنتابه التانية)
انا جاية ملوكة
ملاك: (عقلها ماشي هنا شافت لباب تحل ودخل حسابها غير كتخايل حتى خرجت عينها هو دخل وسد لباب وقفت
بقات كتشوف فيها شحال) شنو كدير؟!
اورطيغا: (ماشي جيهتها حيت عارف شنو بيها)
ملاك: (متبعاه حتى جلس حداها بأريحية) واش هاد الدار اي واحد يدخل ليها مكتحتارمش هنا ساكنين بنات بوحدهم؟!!
اورطيغا: (بهدوء كيقاد الجلسة وطلق يديه فلفوتوي) نهبطو عندي حسن، الا بغيتي
ملاك: (زاد معصبها) واش مريض فرااسك؟!
اورطيغا: (حرك راسو باه) و سلطني عليك ربي غير باش نزيد نمرضك
ملاك: (وقفت معصبة زاادها فالغنان، وقف حتى هو كظحكو فاش كنكون معصبة وهي هزت راسها فيه عيات بغات تبين انه مكاين واالو لكن مقدرتش تزيد تخبي)
اورطيغا: شنو معصبك؟!
ملاك: هاد الوقاااحة ديالك
اورطيغا: يعني أنا للي معصبك؟! تتفكري فية لهاد الدرجة
ملاك: لبعااابع لوااه
اورطيغا: (مقرب ليها كتر حتى رجعت بخطوة جات جالسة على لفوتوي) درت معاك لبارح نجي عندك علاش متسنيتيش؟!
ملاك: (بقات ساكتة)
اورطيغا: هضري (وقفت فوق الفوتوي بتحدي، وتقادات معاه فالطول محس حتى تبسم)
ملاك: (تلفها بالابتسامة ديالو بإشارة بيديها) بعد شوية
اورطيغا: (زاد مقرب) هاكا؟!!
ملاك: راه هضرت معاك ابنادم، وانا علاش اصلا نتسناك تجي ولا لا!!
اورطيغا: معندك علاش؟!
ملاك: (قلبها ضرب خايفة تخسرو) اه
اورطيغا: (لوا شنايفو وحرك راسو باه)
ملاك: كملتي؟! (شيراتلو لباب)
اورطيغا: (بقا كيشوف فيها وهي كتقلب وجهها هاربة من عينييه، بصبعو قرب كيخطط فوق يدها بلمسة خفيفة جات عينها فعينو مهربة يدها للي تبورشات)
غيثة من ديما كانت وغتبقى ختي صغيرة..
(جات تهضر)
بغيت غدا نشووفك (غمزها) غير بوطة صغيرة بغات تفرݣع
(تبسم ودار ماشي فحاالو مخليها متبعااه…)
يوسف: (هابطين من سطح ناشطين لقاو صقير) دخلو ينعسو
خديجة حتى انا عييت صرااحة
يوسف: ياله معايا متبقايش بوحدك
خديجة: ههه يووسف بقات سيمانة نااري ممتخيلاش بقات غير سيمانة مبغيتش حتى تقولي فين غنمشيو
يوسف: ياله معايا ونقولك (بقاو مجمعين شوية ومن بعد مشا فحاالو لقا اورطيغا جالس برا مع دراري اول مرة غيجلس معاهم واخا دراري كيكميو ولكن الحوار للي كان دااير بيناتهم فشكل بقا حتى ل2 صبااح عاد ناض تبعو اورطيغا)
دراري بعقلهم
اورطيغا: علاش شنو كنت ناوي
يوسف: لا ماشي هكاك غير دراري نقيين فعقلهم
اورطيغا: ياله تلاح غدا تابعني خدمة
يوسف: تهلا (ركب فطموبيلتو ومشا وهو ودع دراري وطلع غير بشوية دخل قضا روتينو وتكا غالبو الصهد ماشي بحال الدار دمو للي مجهزة وكليماتيزي هز تيليفونو شافها علاش قلبت هاد نهار لقاها مقلبة على غيثة فأنستغرام، تبسم حط التيليفون وجبد عليها بنعسة)
~~~~~~~~~
اصبحنا واصبح الملك لله..
مشات لخدمتها للي كان عندهم اجتماع فسبع عيون مشات معاهم يعني مغيصلاحش تودع ختها للي جا عندها باها على صباح علمها غيتقدى شي سلعة للقهوة ويرجع ياخدها
وفاء: عنداك تنساي داكشي للي قلت ليك
خديجة: لا شريت کاع داكشي للي خاصني
وفاء: حتى انا اليوم عندي تسافيرة لطنجة شي يوماين
خديجة: عنداك متجيش العرس
وفاء: ياك السبت
خديجة: لا اجي قبل حيت الجمعة عندي الحنة
وفاء: صافي غنجي مع ملاك
خديجة: وا عنداك (طلع باها هز معاها 2 شانطات ودعت وفاء ومشات معاه لصفرو..) يوسف كان بغا يجي ولكن الخدمة عندو مزيرة
رشيد: الله يعاونو ابنتي ياك تهلاو فيك
خديجة: بزااف صراحة ولد الناس الله يعمرها دار
رشيد: مزيان (بقاو مجمعين حتى وصلو للدار دخل معاها الشانطات ورجع للخدمة وهي لقات الدار كيخملوها صلاو على نبي منين دخلت وهي فرحانة شدت أنير للي توحشاتو مانعينها تحط يدها فلماا)
زهرة: (بهمس لسهام) بلا متقوليلها على مجية الشمالين
سهام: انا مشغليش فداكشي براكة غير شنو سمعني راجلك داك نهار
زهرة: الله يرضي عليك هانتي درتي عقلك…
كل واحد كان ظال فالخدمة ديالو ملاك عياات 6 دالعشية مزال فالخدمة تفكيرها كولو فاورطيغا واش تيقو ولا علاش غيتبعها ويبغي يبرر ليها علاقتو بغيثة!! وهاد لمستو لبارح مزال كتحس بأطراف صباعو فيها للي شدتها ومزالة تبوريشة خدامة)
ويلي مك هادي غير قاسني بصباع يدو ودرت هاد الحالة انا الا غنينا باينة غندير شي شوووهة غير الله يستر ههه
( شغل تفكيرها بزااف وفنفس الوقت خااايفة غير لبارح كانت حالفة متهضر متشوف فيه وغير وقف حداها بغات تسخف!!
جابو ليهم لغدا معجبهاش كلات شوية ومشات لكروصة حدا الخدمة كلات صوندويتش قهرها الجووع للي خلاها تاكل بلا متسوق، وعاد بعاد على بلاصة الماكلة مكرهتش تسلت ولكن كان حتى المدير ديالها كملو وصلوهم بلباص الاطلس هي مع لعيا بقات شحال كتسنى تاكسي باش عاد بانت وحدة حيت المسافة قريبة وقليل للي كيبغي يهز وعاد بلاصة وحدة وصلت للحومة وكرشها كتحس بيها مرونة دازت الحانوت خدات والماس مبانتش ليها طموبيل ديال اورطيغا طلعت وهي كتنهج حاسة براسها ماشي هي هاديك حلت لباب دخلت نيشان مشات لطواليط ردت ݣاع مصارنها وتبعتها لاديااري…
~~~~~~~~~~~
غيثة: (لبست حوايجها ومشات مع مها للرياض غير شافت طموبيلة ديال اورطيغا حلت صاكها رشت بارفانها ودارت ݣلوص حطو الطموبيل وتمو ماشيين مع غيدخلو كيشوفو اورطيغا خارج هو ومو سلمو على اب يوسف اما الغالية سلمت سلام ناقص ودخلت اما غيثة بقات واقفة معاه ضرباتو لكرشو بشوية )
شفتي نتا والله مصدقت
اورطيغا: (متبسم) علاش؟!
غيثة: (دخل باها وهي جراتو من يدو مبعدة من حدا لباب)
مبقيتش ݣاع تتسول فية
اورطيغا: مع الخدمة اغيثة مبقيتش تنجلس بزااف
غيثة: شنو الخدمة للي عندك مع ملاك
اورطيغا: مفهمتش
غيثة: قالتلي ملاك شي خدمة للي كنتو تديرو فالمحال
اورطيغا: ومن امتى ازين تنجي نتعاود معاك على خدمتي؟!
(ظحكت مع الزين وجمعاتها مع اخر جملة)
غيثة مالكي هاد الايام مركزة بزااف رجعتي كتر من مينا!!!
غيثة: مفهمتش
اورطيغا: انا للي مفهمتش تبدلتي
غيثة: (غوبشت بغات تمشي وشدها من ذراعها) وليتي تتقمعني بزااف
اورطيغا: حيت تدخلي فشي حوايج بعاد عليك اغيثة
غيثة: عاود!!
اورطيغا: (تبسم) فين يوسف جا معاكم؟!
غيثة: لأ قال عندو خدمة مزيرة، غتمشي لعندو؟! غتلقاو مجموعين؟!
اورطيغا: (شاف فيها ديك الشوفة ديال بنيتك) ياله سيري دخلي
غيثة: الا كنتو غتخرجو مجموعين نمشي معاكم
اورطيغا: لا مخارجينش اغيثة سيري دخلي (حاسة براسها عيقت ولكن هادشي كديرو بلا متحس راه كتعيا تقري راسها منين كتكون بوحدها غير كتشوفو كتنسى وتلف، هز راسو لقا ادم داير تيليفون فودنو ولكن حاضييهم)
ياله سيري اغيثة
غيثة: بسلامة (تهزت وسلمت عليه بليبيز) غنتقلق منك الا معاودتيش سولتي فية
اورطيغا: وااخ.. (لاخر مزال واقف تماك كيهرب عينيه حتى وقف مع شريف..)
لحقو لبنات مريم وفاطمة، ونعيمة حتى الخميس عاد تلحق الدار بدات كتعمر اجواء العرس حاضرة الحلوى تقاداات الدار كتخمل كيظحكو على ملاك للي من ديما كتهرب من شقا وهاد المرة عندها السبة بلا متحتاج دير فيها مريضة جمعو مع خديجة حويجاتها للي كانو غير ديال لفريع واغلبيتهم من لي مارك حتى من الخاتم بدلاتوو وراتهم الدار للي صورااتها ڤيديو وكل وحدة كتعطي رأيها فالاثاث للي باقيلها وحتى هي مخبااتش ان ملاك عاوناتها بزااف ودوزات ليهم ميساج من لتحت ان هي وملاك مبقات بيناتهم حتى شي حساسااات ولكن شدت فمها معاودااتش ليهم على اورطيغا باش متوليش تجبد على راسها نحل وحتى مجية حمزة طمرت عليها هي إلا بغات تعاود واخا عارفااها مغتعاودش..
دخلت الجارة ومرت ولدها مجمعين حاطين الݣوتي
أميمة: فينها ملاك؟!! ياك ملاك بعدا
خديجة: اه، مزال خدامة
أميمة: وايلي مغتجيش تحضر لعرسك؟؟
خديجة: لا غير تكمل وتجي (لوخرين مداو مجابو قالو غير كتسول عادي)
أميمة: (حركت راسها باه) اممم
مريم: كيف غادية مع شي خفة؟!
أميمة: حمدالله احبيبتي غير عندي الراجل مكيفهمش شي نهار يتقب لية الوالدة (تشاوفت مريم وخديجة لحقاش السؤال فين وجوابها فين وأصلا هاد الهضرة كتجيهم فشكل تقاال وعيب وحشوومة تشاركية اسرارك مع غرباء وحتى مع الاقرباء)
مريم: معليش غير ردو البال
أميمة: داكشي للي كنعيى نقولو الله يهدييه علية وعلى ولدو وصاافي
خديجة: (جاتها فشكل حيت راها هااضرة على حمزة للي شحال كيتبع ملاك وطيح على راسو الدل غير باش تهضر معاه..)
خالتي تزيدك اتاي
نجية: كبي أبنتي.. حقا راه جبت لحمام
خديجة: (حركت راسها باه) يجيك الخير اخالتي نريدها ليك فساعة الخير
~~~~~~~~~~~
ادم: (بقا حاضي غيثة للي باينة بينها وبين اورطيغا شي حاجة غير بعدت شوية كيهضر فالتيليفون جا راجع باللور وقاسها بكتفو)
باغدوون
غيثة: ماشي مشكل
ادم؛ غيثة!!! (متبسم ودار راسو قطع لابيل) معقلتيش علية
غيثة: امم ادم عقلت عليك
ادم؛ شحال مشفتك منين كنتي بجيغييطة، صاڤا؟!
غيثة: (تبسمت) الحمد لله ونتا
ادم: صاڤا الحمد الله (بقا كيشوف فيها شحال حتى هزت حواجبها) باغدووون هه غزاالة بزااف
غيثة: ههه ميغسي
ادم؛ متتجيش بزاف هنا شنو تديري؟!
غيثة: والو غير جالسة فالدار حاليا (عيطت ليها مها) انا مشيت
ادم: بلاتي بلاتي مزال باغي نهضر معاك
غيثة: حتى رجعو
ادم: (بترجي) نمرتك ميمكنش نضيع هاد الفرصة
غيثة: (تبسمت فتات نمرتها) متقيدهاش
ادم؛ (عاودها من موراها وهو كيشوف فيها باعجاب) 06********
غيثة: (تبسمت) باي.. (مشات وهو بقا متبعها حتى غبرت لاحقة على واليديها…)
اورطيغا: (مشا السعادة جمع صاك ديال لاصال هز تيليفونو كاسك كياكل بنانة ومشا يتريني شي ساعة ونص كمل داز خدا ماكلتو من سناك المعتاد نص دجاجة مشوية مع الروز وخضرة مشكلة وصل للدار مشا دوش بقا غير مدور عليه الفوطة كلا عاد ناض لبس بيل صماطي ديال باسكيط شورط هز مسائلو مشا داز للݣراج فين تصايبات طموبيلة ديال ملاك للي تغسلات ردها لاكاڤ ديال العمارة وصا عليها العساس عاد مشا الحومة كان باغي يمشي عندها قبل ولكن بغا يخليها على خاطرها، كانت 9 دالليل حط الطموبيل هز راسو كيبانلو الضو دبيت وفاء مشعوول قال غتكون جالسة تماك على حساب لاكليم، تلاقا السمسار خارج من الحانوت)
فيين
…: ختي اورطيغا، حقا داك خينا هضرت منين منين صونيتلي وراه حط سويرتات
اورطيغا: مزياان
…: واش دار شي مشكل فالموبل؟؟
اورطيغا: (حرك راسو بلا جبد 100 درهم عطاهالو) العز الا عاود رجع مرة أخرى حضرني
السمسار: مرحبا
اورطيغا: (قطع الشاريع مشا كيشوف فديك البقعة للي قادولها الساس هضر مع العساس للي تماك)
تبارك الله راه ماشي داكشي ناضي
…: يحضرو غير الفلوس أخاي اورطيغا كولشي يمشي فوق ناضي كناضي
اورطيغا: (حرك راسو باه) كولشي دراري للي كانو ساكنين هنا عطااوهم
….: تقريبا كاين للي عطاوه بعييد، ولكن ماشي كولشي لقا الطاشرون باش يبني
اورطيغا: (بتأسف) مع الوقت
…: هلكهم لكرا أخاي اورطيغا راه واخا كانو ساكنين فبرااكة كانو مكافيين مع الوقت اما دابا للي تزادو لكرا والما والضو والله كنا بيخييير قبل من هادشي
اورطيغا: اش عندك مدير الحبيب الدولة تتحارب الكاريان وعاد الليدو جا فالسونطر صعييبة يخلييوه بعدا ديور تيتقامو رخااس هنا
…: زوينة للي بغا يشري ولكن لي باغي يبيييع بطاااطا وصافي.. (بقا مجمع معاه عطاه 50 درهم وتم ماشي فحاالو حتى دخل فيه برهووش)
اورطيغا: تا مال مك على هاد الدخلة
….: (مقلوب بريحة السيليسيون بحرا كيجمع النفس للي مشاتلو مع الجرية) سمعت المقدم (بحرا كيتنفس)
اورطيغا: هضر ا***
….: عيطو على البوليس حيت فالموبل للي ساكن فيه نتا شي دراري كيخرجو منو الماحيا
اورطيغا: (طرطق عينو يعني الريحة للي كتخرج مرة مرة ديال الماحيا للي كانت كتجييه ماشي غرييبة وعاد القضية فيها البوليس والشوهة شاف فالدري صغير)
صافي غبر بلاتي واجي عندي نضبر عليك
(مشا كيزرب باش ميعقيش وصل الموبل طلع كيجري الطابق الللول مزال مكاين والو، بقا كيدق بالجهد حيت صعيب يفرع الباب راه خشبو صحييح مبغاوش يحلو بقا كيخسر الهضرة وهوما يحلو للي حل حصل ولاخر هرب طااالع كيجري فدرووج دخل لقا قوة الكوكوطات والبوطات صغار وتيويات دايزين فبانيويات داكشي خاانز)
دايرين فيها اولاد **** مصنع هنا!!!!
(لقا اخنز ماحية كتصايب ماشي حتى بالكرموص دايرين حتى ليكوش وداكشي خاانز وهادشي هو سباب الخنز للي كيعطي مرة مرة فدرووج ولكن الا جاو البوليس دابا ولقاوه هنا غيمشي فيها!!!!!
صونا على دراري دالحومة للي مساالين والدري لاخر كيطلب ويزاوݣ تعصب بزااف حيت هادشي ماشي فمصلاحتو….)
ملاك: (بحرا حلات باب الدار باش تمشي فرماسيان حيت منين جات وهي دايخة وكترد والحريق فكرشها ولادياغي خلات كرشها وركابيها يخواو، حتى كتشوف واحد طالع كيجري معطاهاش فرصة دخل تهرب ومع قلة الجهد للي فيها دخل فيها حتى طاحت فالارض سد لباب وهي دااايخة فالارض شادة تحت راسها للي تزدج…)
~~~~~~~~~~~~
اورطيغا: (جاو دراري للي كيعاونو دغيا مكيخرجوش مع الباب كيطلعو لسطوح ينقزو وللي جاتو من الجنة والناس خدا باش يتنغم فالليل راه السلعة كتييرة اما الطالب للي تشد عطاه اورطيغا الطرش حتى طاب بالفقسة، وعارف شنو تابعو من بعد اخر كوكوت خارج بيها واحد طلعو البوليس كيفتشو الدار وتشد بقا ملبدها هبطوه للفارݣونيط اما اورطيغا كان فدرووج شاد داك الطالب زام ليه فمو كيتفرج معصب خلا الدري تماك للي حذرو الا هضر مغيفكو حد، هبط حداهم مبين انه متفاااجئ كيتسنى شنو غيديرو واخا مبقى والو فالدار غير هو غتبقى العين وكاينة الريحة ومعارفش الإجراءات للي غيكونو!!!
جاو عندو كياخدو الاقوال للي صرح انه عمرو سمع ولا شاف شي حاجة ويمكن دراري للي كانو تماك غير كانو كيزهاو داكشي باش الريحة مجهدة تمااك سولوه واش كيعرفهم نكرهم حيت ملقاومهش جا السمسار للي كرا ليهم حتى هو نكر عطاهم سمياتهم ولكن خبرهم انه مكاينينش مشاو لبلادهم تاونات وحيت العطلة الصيفية مرة مرة للي كيجيو طلبو باش المالك ديال الدار يلحق عليهم للكوميساريا خبرهم انه كاين على برا وغير داير توكيل السمسار باش يكري ليه ديور مهم كانت رويينة طلعو الطابق الثالت دقو على ديور محلوش الباب واورطيغا طالق ودنيه هو عارفها تماك ولكن علاش محلاتش..
خرجو البوليس كيهضرو مع السمسار للي خبروه ممنوع يكري الطابق الاول حتى يكملو الإجراءات وباش يعيط لدراري باش يجيو.. مشاو فحالهم وهو بقا واقف ودراري مجمعين تماك)
فين داك الكلب؟!
…: كاين غير واحد هربناه من سكوح راه فالبرتوش المعلوم
اورطيغا: والتاني؟!! كان طلع كيجري الفوق
….: الا هرب من سطوح (رجعو للدار واخا البوليس مخلاوش شي واحد يدخل دخلو دراري ضربو ليها تسييقة وشعلو عود لقماري حيت غيرجعو مرة اخرى، بعدا يهبلوهم)
~~~~~~~~~~~
يوسف: (صونا على ملاك مجاوبتش وهي دخل مو) الوالدة
الغالية: مقلتيليش فين غتمشيو لشهر العسل
يوسف: علاش؟!
الغالية: كفاش علاش باغيا نعرف ولا مرتك مخلاتكش تقولي
يوسف: هي براسها معارفااش ومبغيت نقول حتى لشي واحد
الغالية: اوا المفاجئة ليها هي، انا علاش؟!
يوسف: معليش مور العرس وتعرفو
الغالية: اوا سعداتها انا اوروبا ماشيا ليها غير مع راجلي وولادي عمرهم فكرو يديوني ليها
يوسف: ان شاء الله يدوز شوية دالوقت ونمشيو مجموعين لفرنسا
الغالية: اممم تنسمعو منكم غير الوعود
يوسف: ههه مهم انا غنخرج مع شريف
الغالية: غدا خاص نخرجو باش نجيبو ليك حويجات
يوسف: ان شاء الله حقا ملاك غتخرج معانا
الغالية: لا (شاف فيها) غنخرجو غير انا وياك الراس فالراس ماشي من حقي نجلس مع ولدي بوحدنا
يوسف: (تبسم) من حقك…
شريف: ماشي قضية رجع فشكل
يوسف: انا شاك فيه طاايح فملاك ديال بالصح
شريف: ههه عاد شااك راه باينة غير هو ب*** محاملش هادشي يوقع ليه داكشي باش رجع تيتقاتل غير مع شبان وجهو انا راه مبقاش تيجاوبني وحتى الا هضر متيفوتش الهضرة على الخدمة هه
يوسف: صراحة معاجبنيش هادشي
شريف: علاش؟!
يوسف: البنت نية ومعقولة ونتا عارف خوك كفاش تيفكر يعني بزوج ميتلاقاوش
شريف: مااا.. هو عندك الصح ولكن بيناتهم ميمكنش دخل بين زوج وتبقا تفتي فريك هو بعقلو وهي كتر
يوسف: راها ختي
شريف: انا للي تنعرف عليه ماشي كياخدهم بالسيف يعني راه بعقلها وعارفة فين حاطة رجليها مدخلش فهادشي ايوسف باش متخسرهمش بزووج، مهم عيطات لية الياقوت
يوسف: وايلي؟!
شريف: كانت تتسول على العرس وكفاش دغيا رتابطتي وشكون هادي؟؟
يوسف: اوا!
شريف: مطولتش معاها فالهضرة شوية بدات تجبدلي موضوع صاحبتها صدرتها، صراحة والله مفهمت فين كان عقلي
يوسف: بجووجنا ههه…
شريف: بانلي حتى انا نقلب على شي بنت الناس بحالك نجمع ونطوي ندير وليداتني حتى انا..
~~~~~~~~~~~~
اورطيغا: (تفرقت الجوقة معاجبوش هادشي بقا مجمع مع دراري للي غبرو داك الخنز)
انا عارف الكرموس العنب ماشي ليكووش (بقرف) شكون للي كان تيشري من عندهم؟!
(حتى واحد مقدر يقول انا باش ميشدوش فيه اما كانو بزااف منهم للي بكر على ديك الماحيا، شوية سمع صوتها كتعيطلو من البالكو شوية بغات تعاود تعيط وهي تسكت من غير جوج حروف لوالة ناض من تماك مبعد هز راسو الطابق 3 مكاين والو حتى الضو مطفي من تمااك شاف فدراري)
سمعتو شي واحد عيط
…: مسمعت والو
…: اه جاني بحال الصوت من الفوق
اورطيغا: (هو عارف ملاك مغتعيطش عليه وبديك الطريقة رجع جلس مع دراري كيتسناو الطالب الثاني يبان… بقا مديرونجي معاها صونالو شريف مجاوبش حيت مافيه للي يمشي عندهم باغي يفك هاد الحريرة بعدا جبد نمرتها بغا يصوني وهو يتراااجع حتى قرر يطلع عندها عاد عارفها بوحدها فالدار ختها رجعت لصفرو ووفاء مشات لطنجة وحتى لبنات للي حداها مكاينينش.. طلع بشوية وصل لدارو دخل مشا للحمام كيسمع زديح لفوق موالف الكاالم من عندهم وعاد كاينة غير هي…)
اورطيغا: (هز ديك البواطة الحمرا حلها للي كان فيها خلخال ذهب للي كان شراه لملاك نهار للي كانو فيه بزوج عند ذهايبي وشرا لمو نبالة..
عاود سمع صوت شي دري كيغوت هز راسو فلبالكو ديال وفاء هو عارفها مكيناش فلحظة شك يقدر حمزة كاين مع ملاك فالدار غوبش لاح داك البواطة فوق النموسية وطلع بالزربة ساد باب دارو مشا دق كان شوية دالهرج مع دق كان صقييير هنا دخلوه تناوي مزيااان رجع دق بالجهد والو مكاين للي يحل حط ودنيه على لباب ميمكنش عاد كان سمع ذديح والهضرة ودابا لا!!! رجع دق بكف يدو بالجهد والو زاد غير تعصب هز تيليفونو صونا على وفاء)
فينك نتي؟!!
اممم.. صافي.. واخا
(قطع وفاء كاينة فطنجة اذا ملاك مخبية شي حد هنا!! هبط لدارو بكل برود مشا القجر ديجا عندو سوارت ديال الدار كانت خلات هم ليه وفاء فشي نهار طلع وهو بدا يحل فلبلاصة دازت الصاقطة هنا زاد كمل بالاعصاب بقا كيدفع لباب بكل جهدو حيت الصاقطة ماشي شي حاجة حتى تحل لباب لقا داك الطالب هاز عطا ديال شطابة في حالة تهجم، مجاتوش ݣاع البال يهرب داك الطالب هنا!! عند ملاك!!!
طلعو وهبطو وحواجبو كيتشركوو)
اورطيغا: فين البنت؟!!
…: واش باقيين البوليس؟!!
اورطيغا: (دخل بشوية كيدور عينيه عليها ومالها مكدير حتى شي صداع!!)
فين لبنت؟!
….: (خايف) لداخل واش مشاو البوليس؟!!
اورطيغا: ملاااك!!! (غير عيط باسمها لاخر خاف اذا كيعرفها، شاف فيه وعندو الدم فنيفو يابس شوية ونص كمارتو حمرة)
فين لبنت ا***؟!!!
…: والله اخويا بغيت غير نتخبا وهي(شاف فجهة لباب بغا يجري مسبق لعصا باش تضرب فاورطيغا يا يخاف يا يضربو بيها على ميهرب حتى تعرض ليه بركبتو جاي مزدوح دغيا طير ليه ديك العصا منين زطملو على يديه هازها على جهدو وعطاه لظهر حتى غوت الطالب باعلى صوتوو مخليه كيتلوى بالحريق)
اورطيغا: ملاااك!!! (دخل حل بيت وفاء لقاه مرون فوق ناموسية زاد صعر شافو بغا يتحرك رجع عندو هز ديك العصا عطاهالو للكرش وتبعها بضربة اخرى لحجرو حتى تقسمت عليه خلاها كيتلوى ويبكي رجع عاود قلب فبيتها للي مسدود لقاها فالقنت رابطها من رجلها ويدها وداير على فمها شالها وكانت بلا فولار ولكن ماشي جالسة كانت مرخية فالقنت وحداها مقلة مشا عندها كيزعزعها وهي غير كدور عينها مع حيد ليها الشاال من فمها بقات كترد كولشي جا عليه ولكن كانت سخفانة وجهها تخشا فكرشوو كترد غير لمرار صفر ورغااوي دار يدو على ظهرها كيطبطب فك ليها يديها ورجليها وفيها لبكية وهي محشية فكرشو رجعت وجهها للي عمر)
ملاك: نمشي طواليط (وقف هازها واخا مبغاتش داها بالزربة حطها تماك وبحرا قادة توقف سدت لباب وهو بقا غير واقف يعني كانت كتعيط ليه ضار عند لاخر مكااينش…)
اورطيغا: (صونا على عشيرو) داك ولد **** تعرض ليه لتحت
(طلع كيجري لسطح مكاينش طل فسطح لاخر ميمكنش ينقز راه واكلها رجع عندها دق فباب الحمام سمعها كترد وكتحس بمصارنها باغيين يخرجو)
ملااك!!!
ملاك: (مبقالها مترد هزت راسها والسخفة قاتلها ركابيها خوااو شافت فلمرايا كانت صفرا وعرقانة بزااف ردت لا فخونش من مور ودنيها كانت متأكدة اورطيغا غيجي واخا جا معطل.. سمعاتو عاود كيهضر فالتيليفون مع دراري باش يديو داك الطالب لشي قنت يعني شدو وعاد سمعت لخبيط للي عطاه بقات كترجف ماشي من الخوف ولا شنو داز عليها بقات كترجف من الطاقة للي مافيهاش وهاد التسمم للي وقع ليها وزادها داك للي دخل شاد ليها فمها)
اورطيغا: ملاااااك
ملاك: (بحرا كتهضر حيت بحت) عطيني شالي
اورطيغا: دابا غير خرجي
ملاك: لا عطيني شالي.. عفاك…
اورطيغا: (مشا لبيتها للي مرون كيقلب اصلا غير كتفكير كتف ليها يدها كيحس بدمو كيغلي باغي غير يمشي عندو
ولكن ميقدرش يخليها بوحدها داه ليها قلب على حوايجها هز شال باغي يعرف شنو وقع ليها دق لباب حلت لباب مدت يدها فين بانت الطبعة ديال يدها عطاه ليها وسدت لباب)
شنو دار ليك داك ****؟؟!
ملاك: (لوات شالها ورجعت عاود كتغسل وجهها حانية على لڤابو)
كضرني كرشي بزااف
اورطيغا: (بعصبية) شنو دار ليك؟!!!
ملاك: (رجعت كتبغي ترد ومكتلقى والو عيات تشد داك الصوت ومكتقدرش رجعت كتغسل وجهها عاد خرجت عندو كتحاول توقف مزيان عاونها داير يدو على جنابها حتى هزها كتنتر ولكن معندهاش القوة حطها فوق الفوتوي رادة راسها اللور شادة فكرشها حنا على رجليه اونفاص معاها كيشوف فيها)
كليت شي حاجة ضراتني
اورطيغا: شنو دارلك داك ***؟!!
ملاك: (بحرا كتقدر تهضر) كنت حليت لباب حتى شفتو دخل (بحرا كتهضر)
كليت شي حاجة ضراتني
اورطيغا: واخا انا نديك لصبيطار، قولي شنو دارلك؟!!
ملاك: مدارلي والو كان ولد لحراام بغا يتخبع من البوليس
اورطيغا: وعلاش ربطك
ملاك: مخلانيش نخرج كنت بغيت نمشي غير الفرماسيان حيت فية الحريق (بقا كيشوف فيها وتعابير وجهو باينين)
اورطيغا: ضربك؟!
ملاك: لا.. (جاتها الردة عااود جلس فطرف الفوتووي كيملس على ظهرها)
اورطيغا: شنو كليتي؟؟
ملاك: (مسحت فمها فتريكوه وهزت راسها داايخة) فالخدمة
اورطيغا: شنو دارلك؟!
ملاك: (شافت فيه) والله مضرب، (بزفرة) انا للي عطيت لمو بمقلة فوجهوو
اورطيغا: (بقا كيشوف فيها) ياله نديك لصبيطار
ملاك: مافياش جيبلي شي حاجة من فرماسيان
اورطيغا: ياله تمشي لصبيطار
ملاك: والله معندي الرجلين للي يتمشى
اورطيغا: ميمكنش املاك ضروري يشوفك طبيب, صبري (هز تيليفونو صونا على شي واحد باين من هضرتو كيسول واش كاين شي واحد فالغساني للي قريب ليهم بشي 5 دقايق عاد رجع عندها)
علاش بيت وفا مرون؟!!
ملاك: كنت كنهربلو وصافي مدارلي والو، داكشي للي فراسك مكاااينش..
اورطيغا: ميمكنش فوق ناموسيتها مرون علاش اصلا غتهربيلو فالنموسية
ملاك: بنيتك؟!
اورطيغا: اه بنيتي علاش مخلياه مطارد معاك فوق النموسية
ملاك: (شقلبت عينها اخر حاجة مسوقالها داابا هو فاش كيفكر غمضت عينها عاود طلعت ليها الردة دارت يدها على صدرها وتم جاي عندها معندها مترد ومخبعة فمها وقف مزول داك لبيل للي لابس وهي متبعااه وكتشوفوو مسح ليها جهة فمها)
اورطيغا: (بقا غير كيدوور عينه فالدار كيتخيل شنو وقع وهي حااضية بين كرشو صدرو ذراعو رجع شاف فيها وقلبت وجهها شاد لبيل ديالو وهي طلع معاها ريحة حامضة شدو من عليها لاحو فالأرض)
فهميني كفاش وقع من اللول
ملاك: (غيبقى مرضها) فتحت لباب بغيت نخرج حتى شفتو طالع كيجري دخل بغيت نهضر بقا كيرغب غير نخبعو على ميمشيو البوليس وانا كنت دايخة مشيت طواليط بقيت شحال تماك منين زاد علية لحريق خرجت بغيت نمشي مخلانيش دخلت لبيت وفاء فين كنت حاطة صاكي تبعني حيدلي صاكي طلعت فوق النموسية
اورطيغا: ولاش طالعة!!!!
ملاك: (زفرت وكملت) طلعت باش نهز الصاك هي هاديك جبدني من يدي كنت غنطيح
(كتشوف فعينيه كفاش ملهوف يسمع وعاد كيزيد يتعصب، مشيت للكوزينة تخبيت فيها بقا حتى هو برا كنت فاشلة بغيت ندخل غير طواليط عاود جيت نخرج رجع طرق علية بقيت كنرغبو يخليني ندخل طواليط خلاني كملت وخرجت مشيت لبيت وفااء بجرا لقيت طموبيلتك ياله عيطت وهو يجرني ولد لحراام هربتلو للكوزينة تبعني وانا نعطي لمو بمقلة لوجه تمااك تعصب وداني لبيت كتفني وسد علية)
اورطيغا: (بقا كيشوف فيها)
ملاك: الا كنت عزيزة عليك غير شوية متقيسوش متغامرش براسك هو اصلا كان بغا غير يهرب معندو غراض فية
اورطيغا: (رجع تيليفونو صونا جاوب كان علمو ولد الحومة ان طبيب دخل) ياله نمشيو صبيطار
ملاك: صافي بلاش عفاك
اورطيغا: تمشي على رجليك ولا نهزك مغتعطليش غدخلي يشوفك طبيب ونرجعو (ناضت فاشلة وتبعها) كنتي بلا فولار؟!
ملاك: لا كنت بيها
اورطيغا: دخلت لقيتك بلا بيها؟!
ملاك: (دخلت لبيت تابعها) راه بشالي حزم لية رجلي
اورطيغا: (مكانش عاقل عليها مزيان بلا فولار حيت كان خوفو عليها كتر ميعقل عليها كفاش كانت) شنو بغيتي هنا؟! هزي غير لكارط ديالك
ملاك: همم معقلتش فين حطيتها
اورطيغا: صافي غير ياله (هبطت معاه وصلت حدا باب دارو دخل دغيا لبس تيشورت هبط معاها دروج غير بشوية ركبها فالطموبيل بغا يهضر معاه شي دري غمزو بإشارة من بعد ركب ومشاو لطبيب…)
دخلت هي عند طبيب وهو بقا برا صونا على الدري..
خلي ولد **** تمااك..
حتى هو خليه..
ياك كرمتووه..
انا موحال واش غنجي هاد الساعة مهم هانتا تما..
صافي واخا…
اممم بنت الفاميلة..
تلاااح…
خرجت من عند طبيب كتعرج كان دار ليها إبرة وعطاها تاخد شي دوا خرجو من تماك وجلست فالكورسي للي برا كترتاح
ملاك: عييت
اورطيغا: هانتي مرتاحة
ملاك: (شافت فيه بحرا قادة تجلس هزت راسها فيه كان كيشوف بعيد باغي غير يوصل لداك الطالب)
مالك!!!
اورطيغا: (شاف فيها مغوبش) شنو كليتي؟!!
ملاك: معرفت سوندويتش من برا غير ديال شلاظة والطون (جبدت ورقة) عطاني طبيب ناخد هادو فصباح وقالي انني تسممت
اورطيغا: (بقا كيشوف فيها) شنو دار ليك داك الكلب املاك؟!
ملاك: (تبسمت بعياء) ظحكتيني، شتي انا نموت ومنخليش شي حد يديرلي شي حاجة نهار تلقاني ميتة عرف راه بالصح وقعاتلي شي حاجة
اورطيغا: (بقا كيشوف فيها بقات فيه حيت استنجدت بيه عيطت باسمو وهو سمع وكان قريب، حرك راسو باه مموالفش كيكون حنين مع لبنات هاكا،)
تقدري نتمشااو
(حركت راسها باه وقفت مد ذراعو حركت راسها بلا شد يدها لواها فذراعو باش تسند عليه تمشاو لجهة ديال الطموبيل)
شنو تاكلي
ملاك: لا لا متجبدليش ݣاع حس الماكلة
اورطيغا: ضرووري باش تشربي دوا واخا نجيبلك غير صلاد
ملاك: مفيااش بغيت غير نعس
اورطيغا: (وصلو للطموبيل حل ليها لباب جلست سد لباب ومشا لجيهتو وهي متبعاه باعجاب مشا لريسطو فالاطلس خدا ليها صلاد واخا عيات ترفض قلب على فرماسيان ليلية خدا ليها دوا عاد تمو ماشيين للدار، هبطت بشوية دراري للي كانو تماك حناو الراس وهوما دايزين من حداهم طلعت غير بشوية مبغاش يقجر عليها وصلو الطابق التالت حل لباب ودخلت)
ملاك: حم انا ندخل ندوش
اورطيغا: حتى انا ندخل ندوش (خرجت عينها) لتحت
ملاك: امم، شكرا على هادشي للي درتي معايا
اورطيغا: نكمل وغنطلع عندك، (قبل متهضر) ياله سيري، وديري فبالك غنوقف عليك حتى تكملي عشااك (ضار ماشي وهي بقات كتشوف سد لباب حتى كتسمع الساروت كيدوور)
ملاك: هز سوارت؟!!! (مشات للحمام حيدت حوايجها طلقت الرشاشة بقات تحتها مكانتش خايفة من داك الطالب هي كانت باغيا غير تمشي الفرماسيان كانت عارفة غيجي اورطيغا غسلت شعرها دوزت باندوش توضاات عاد خرجت بفوطة كتجري لبيتها دهنت صحتها واخا فااشلة ولكن البريستيج لبست بيجامة واسعة لوات شالها دارت عكر خفيف رشت رشة وحدة من لبارفان سمعت الدقان شافت فلمرايا)
الحمد لله جات فالردة ومكانتش فية لادياغي فاش جا…
اورطيغا: (من بعد مدق تسنى دقيقة عاد حل لباب لقا باب بيتها مسدود مشا للكوزينة للي مليوحين فيها طوايس وبانيويات صغار)
حربية مع راسها هاد الموصيبة
(تفكر ديك ضربت مو بمقلة تبسم غسل فورشيط، هز ديك الصلاد حطها فوسط الدار ورجع للكوزينة جمع داكشي للي باينة بلاصتو مشا لوسط الدار هز وسايد للي مليوحين غير كيتفكر انه يكون قاسها كيوقف ويبقى مخرج عينيه رجع لبيت وفاء متسرطاتلوش علاش ناموسيتها مرونة رجع مشا دق فبيتها)
ملاك!!
ملاك: (نسات كولشي مركزة غير بعدا تبان شوية زوينة ماشي بحال قبيلة كانت داخلاها الموت واخا مزال الدوخة والرجفة فيها)
انا جاية
اورطيغا: داابا (مشا جلس هز تيليفونو بغا يصوني على الدري وهي تخرج قطع شاف فيها)
بان فيك الدوش ابنت العبد
ملاك: ههه علاش كيف كنت؟!
اورطيغا: كتعرفي الزومبي؟!
ملاك: (ميقت فيه ومشات جلست شافت فديك الصلاد خيبت وجهها) مافياااش
اورطيغا؛ كولي علاش قديتي باش تشربي دوا وتكاي غترتاحي راه كنتي متسممة واخا مفهمتش اش داك لديك الماكلة
ملاك: (هزت فورشيط بغات تاكل وهي تروع ورجعت حطاتها) مقديييتش والله
اورطيغا: (قرب حداها وضربت فيها ريحتو ولكن متغيلفااتش تبسمت فلداخل ديالها للي حتى الترويعة عندها سافلة ياك ريحة ريحة هز الفرشيطة خدا بيها خيارة وحطها فوق شنايفها)
ياله
ملاك: (حشمت حلات فمها بشوية حانية عينها كتاكل بشوية وحاسة بيه قرييب وعينيه عليها نسات ݣاع باش كانت كتحس ومكانش كيعطلها كيوكلها وهي مستحليااها حتى طلعت معاها)
حم انا ناكل راسي
اورطيغا: (عطاها الفرشيطة ورجع اللور من موراها مراقبها، وهي بقات كتاكل بلا عقل ولا شهية)
سخن الجو
ملاك: همم!! اه
اورطيغا: غدا مغتخدميش؟!
ملاك: غنحط الشهادة ورجع
اورطيغا: معاش؟!
ملاك: مع 9 صباح (حست بالترويعة دار يدو من مور ظهرها وهي بعدت واخا هكاك تبعها بيدو)
اورطيغا: حاولي متردييش، صافي براكة عليك
(غمضت عينها رجعت اللور وتكات بدات كتعراااق والصهدة طالعة معاها شافها كتحمار والعرق فجبهتها دار يدو فوق جبهتها)
وكان ماشي داك الق*** للي شد ليك فمك كنتي عن
ملاك: عطيني لما عفااك (مشا جاب ليها كاس دلما عاونها تشرب وعطاها حتى دوا)
بغيت نتكى
اورطيغا: (عاونها توقف ومشات لبيتها بغات تسد لباب حيت غتبدل حوايجها) فين تيليفونك
ملاك: معقلتش
اورطيغا: انا نصوني عليك مرة مرة نشوف شنو خاصك (حركت راسها باه وسدت لباب سمعت لباب دبرا تسد عرفاتو مشا بقات بالديبابدور وشورط قصير خلات السرجم محلول حيت سخون الحال بزاف وعاد صهد فاس كيكون ناار وتحشات بلاصتها مفكرتش بزاف دغيا نعساات…)
غيثة: (مكونيكطية مع ادم للي ظحكها ولكن بين إعجاابو للي كيخليها مترددة حيت واحد للي بين عينيها هو اورطيغا ومجاتهاش حتى لبال تشوف شي حد اخر من غيرو)
ولكن العيشة ففرنسا غير هنا
ادم: على حساب كل بلاصة فيها للي زوين وللي خايب
غيثة: وغتبقى ديما فالمغرب
ادم: بالنسبة لخدمتي هنا كاين الراحة شوية ماشي بحال تماك للي خاص نكون ديما حاضر
غيثة: اممم باغي تغش
ادم: ههه وعلاش متقوليش نعيش شوية حياتي تماك غير الخدمة الخدمة حتى نسيت راسي
غيثة: هو صراحة شوية هاكا وشوية هاكا
ادم: داكشي للي بغيت انا دابا، (شافها مكتباتش)
قرب عرس خوك؟!
غيثة: اه عنداك متجيش
ادم: عارضااني؟! زعما نسمي هادي عراضة شخصية من عندك
غيثة: ههه اه
ادم: ولكن حسيت براسي أنا للي عرضت راسي ماشي جاتني عراضة شخصية
غيثة: ههه وكيفاش بغيتي العرااضة
ادم: مثلا انا غدا نعرضك لشي كافي ونتي عرضيني باش نحس بانني مرغوب فية نحضر
غيثة: (بقات كتشووف معرفت متجاوب ولكن شحال محست بهاد الاهتمام وعاد اورطيغا راه ألف مرة بين ليها انها غير ختو ولا صديقة وديك البنت صغيرة الدلوعة)
ادم؛ شنو قلتي الآلة غيثة
غيثة: (ظحكت طاح ليها فالكود) ههه واخا ولكن مغنتعطلش حيت هاد الايام مشغلين شوية مع العرس
ادم: تنواعدك مغنعطلكش
غيثة: اوك.. فين؟!
ادم: هنا المشكلة انا متنعرفش هنا بلايص زوينة نتي ختاري ومنها غتوريني فاس
غيثة: اممم اوكي انا غدا نعلمك
ادم: نجي ناخدك!
غيثة: بلاش انا غدا نقولك فين ونتلقاو تماك
ادم: واخا
غيثة: غنعس، تصبح على خير
ادم: تصبحي على خير (طفا التيليفون وبقا كيشووف مقوس عينييه كيرتب افكاارو…)
اورطيغا: (بقا مع شي دراري ماشي من النوع المبلي، لا دراري للي كبر معاهم وكولها شنو داير فحياتو كيهضرو فهاد الحريرة للي باين غدا غيجيو يديرو معاينة للدار وفيها سين وجييم دوك الطلبة مزال حابسينهم تمااك واغلبية غيشهد دراري مرجعوش من تاونات معرفوش شكون باع بيهم ولكن القضية اكبر من يشوفو شكون شكى) كنتي عارف؟!
….: كنت عارف شي واحد كيدير هاد البريكول ولكن مكنتش عارف فين وشكون وبااش
اورطيغا: ولاد ل***** كيبانو ميهزوش البيضة من بلاصتها
…: هادوك مناش تخاف وعاد جايبين كولشي معاهم نتا للي كفاش قلت ليك هادشي زعما الريحة كتكون ****
اورطيغا: مكنتش تنعمر بزاف وحتى الا جبت حدي فاش تنبغي نطيح الراس، دخلت للدار رادينها بحال شي معمل وكان غير دارو شي ماحيا مقادة دايرينها بليكووش؟!!!
…..: ديجا سامع بهاد القضية
اورطيغا: اول مرة
….: اوا شنو غديرو راه غتكتر الهضرة وخاصهم يغبرو قبل ميصبح الحال وعاد كاين للي غيديهم
اورطيغا: ندخل بعدا عندهم
….: غير نسا اخاي اورطيغا والله منخليك توسخ يدك فييهم طريحة راه كلاوها
اورطيغا: واش مريض **** ضرووري نشوف الكلب التاني
….: واالو اورطيغا غير نسا.. (تجمعو عليه مخلاوهش يمشي عند الدري حيت لاخر كان كيحلف ليهم مقاس البنت واخا معاودش ليهم اورطيغا ولكن عرفو القضية فيها بنت يعني راه مغيسكتش هو غير الشفار وهرسو هدا راه يدير معاه كتر ودراري كيعزووه ومغيبغيوش ليه الأذية مشا للحومة بالو مهانيش خاصو يرجع حيت غتبقاالو شمتة ولكن عارف دراري مغيخليوهش يدخل والا تبلبلات القضية غير غيزيد يفرش راسو، طلع مشا نيشان لدارها حل لباب بشوية دخل وسد لباب من مورااه شعل لبيل مشا جهة بيتها حل لباب بشوية وضرب لبيل فلبيت كيبان ليه غير ظهرها ناعسة على كرشها هبط لبيل لرجليها كانت مغطية بيزاار حرك راسو بحال شي واحد لداخل فيه للي كيمنعو طفا لبيل وسد لباب كان عندو فضول كبيييير يشوفها ولكن ترااجع فأخر لحظة وعاد مزال كيفكر!! بغا يبقى داك الغمووض حسن الا مكانتش شي حاجة بموافقتها مغيديرهاااااش، مشا لبيت وفاء تكا فوق نموسيتها محس حتى تغمضو ليه عينيه…)
~~~~~~~~~~
اصبحنا واصبح الملك لله..
يوسف: (رجع صونا على ملاك مجاوبتش كيحس بيها بدات كتهرب عليه) علاش مبقاتش كتجاوب
(صونا على خديحة)
وي زين ديالي… ياكما معذبيينك.. ههه
مزال غارق فالخدمة..
لا.. اه من بعد.. قوليلي فينها واحد ملاك شتها غبرت.. صونيت لبارح واليوم مجاوبتش.. وايلي مكتجاوبكمش حتى نتوما؟!… نكمل الخدمة ونضرب ضويرة عندها… واخا حبيبتي.. بييزو..
جاتو فشكل مموالفاش كتغبر بحال هاكا وعاد كلام الإكس ديالها ديال نية ملاك غارقة كتعاود غير شنو بغات!! فكر فكلام شريف انه مخاصوش يدخل بين اورطيغا وهي الا كانت غتكون بيناتهم شي حاجة ولكن هي عمرها بينت اصلا شي اهتمام لاخر!!! (رجع لخدمتو صونات عليه شي نمرة ماشي ديال المغرب جاوب حيت خدمتو كتعتامد على يجاوب ݣاع نوامر)
بونجووغ..
الياقوت: يوسف
يوسف: (بقا سااكت شحال عاد جاوب) وي!!
الياقوت: شنو هادشي سمعت
يوسف: (ببرود كيقلب فشي وراق) وانا مالي فشنو سمعتي؟!
الياقوت: سمعت طاتي الغالية معاجبهاش هاد زواج واش باغي غير ضيع راسك وضيع العائلة
يوسف: (هز حواجبو بجوج) باغدوون!! بأشمن صفة تتهضري معايا فأمور شخصية بحال هاكا وشكون نتي اصلا للي عاطية لراسك الحق تناقشي معايا
الياقوت: يوسف انا تنهضر على مصلاحتك
يوسف: من التالي الياقوت وااااا سيري ت*** والله ينعل ط*** مك يا بنت ***** الا عاودتي ضرتي بية فشي نهار (قطع وهي بقات مصدوومة عمرو خسر الهضرة ولا قال حتى خ** بقات غير مشووكية وكتشوف فالتيليفون)
اورطيغا: (ضرباتو الفيقة موالف كيفيق بكري ومع السرجم محلول الشمس كانت ضاربة فيه، هز تيليفونو كانت 8 ونص مسح على وجهو كيشوف فين راه بايت اخر مرة فاق فهاد لبيت كان مع وفاء، مشا خرج من لبيت مكاين حتى حركة مكانش ناوي يبات هنا ولكن جاتو عادي هو مكرهش يبات معاها ݣاع، مشا للحمام قضا روتينو الصباحي عاد وقف حدا باب بيتها دق عليها، كان عندو فضول يدخل عليها على الله هاد المرة يشوفها مزياان ولكن شي حاجة غاااارقة لداخل خلاتو محترم شوية)
ملاااااك
ملاك: (تزعزعت من تعييطة ديالو بحال مكانتش ݣاع ناعسة، جلست كتأكد واش بالصح سمعت صوتو ولا غير كتحلم)
اورطيغا: ادييك الوزغة
ملاك: (هنا تأكدت) هااا!!!
اورطيغا: عطيني الشهادة وعلمي الناس تماك انا نديهالك باش متمشيش
ملاك: (عضت على شنافتها متبسمة دارت يدها على جبهتها مكانتش سخونة ولكن فرحت بهاد الحركة)
اورطيغا: وا طلقي راسك!!
ملاك: بلا منعذبك
اورطيغا: بغيتك تعذبيني غير متخلينيش تنساين
ملاك: واخا (تبسمت ونااضت حست بدوخة خفيفة شدت فالنموسية عاد وقفت بشوية هزت صاكها جبدت الشهادة مكتسمعش الحس)
مرااد!!
اورطيغا: (هز حاجبو اول مرة كتعيط ليه باسمو، بقا سااكت دق براس صبعو انه كااين حلت لباب ومدت يدها فيها الشهادة تبسم براس صبعو لمس على يدها كيخطط بشوية، لاحت الورقة ودخلت يدها دغيا)
باسم الله عليك
ملاك: (دارت يدها على فمها شادة تفرنيسة) متبقاش تعاود دير هاكا
اورطيغا: صوني عليهم، فين بالظبط الخدمة؟!
(عطاتو العنوان بالظبط سمعات لباب تسد هبط لدارو يبدل حوايجو ويهز مسائل ديالو)
ملاك: (خرجت لقاتو مشا فرحت بزاااف بهاد الاهتمااام مابغاتش تفكر بسلبية خليها تعيش اللحظة تفكر كولشي داازت من وسط الدار شافت لبيل ديالو فالارض)
ويلي هدا للي تقييتلو عليه!!!
هههه نااري على حب بادي خاانز من اللول ولكن كيقولوها خاانز وبنيين
(هزاتو حطاتو فماكينة الصابون، دخلت لطواليط خرجت شربت دوا وبقات كتبسم بحال شي هبيلة على مواقف لبارح عاد تفكرت خاصها تصوني عليهم..
علماتهم شنو وقع ليها وشي واحد من طرفها هو للي غيجيب الشهادة حيت هي مريضة مكملتش 5 دقايق صونا عليها المدير ديالها للي طمن عليها وعلى صحتها عطاها يوماين تخدم غير نهار الا قدرت وترجع فحالها والا مخدمتش غير تعلمو،
تفكرت انه قال ليها غيصوني عليها اذا نمرتها عندو..
صونات عليها مها مجاوبتش خافت تعيق بيها مريضة ويتمو جايين عندها وهي بغات تبقى… شوية وصلها ميساج)
انا جايب لفطور تغلفي باش متبقايش تفتفي
(تبسمت واااخييييرا صيفط ليها ميساج مشات كتقلب شنو تلبس واخا باينة الكيطمة الواسعة للي مبردة وكتاخد فيها رااحتها دهنت وجهها باكخو دارت عكر خفيف فاغاجو خفيف عاد لوات الشال عليها…)
ملاك: (سمعت الدقان مهضرتش باغيا غير تحايد هاد تفرنييسة حتى سمعاتو كيحل باب الدار بقات وااقفة مع دخل هاز فيديه ساشيات)
ماشي عييب دخل على بنت ساكنة بوحدها
اورطيغا: (سد لباب برجلو شاف فيها مطلع ومهبط) ترقعتي شوية ابنت الحاج
ملاك: بزااف عليك
اورطيغا: (حط داكشي فوق الطابلة) شربتي دواك؟!
ملاك: اممم
اورطيغا: مغتفطريش؟!! (جلس كيخرج داكشي من الساشيات) جيبي طباسل
ملاك: (دخلت للكوزينة عاجبها كفاش كيتصرف بعفوية عارفة كاين الغلط ولكن الفرحة كانت كبييرة جابت طباسل مشات جلست لقاتو حط داكشي بدا كيااكل جلست كتشوف العصير وكااب فيهم قهوة حليب ولا حليب بالشكلاط كرواصة حرشة بالجبن والعسل بانكيك بالشكلاط قالت باسم الله وبدات كتاكل بشوية خايفة ترد عاود شاف فيها)
اورطيغا: فيك متخرجي؟!
ملاك: فين
اورطيغا: (طانز) نجيبو طموبيلة ديالك
ملاك: (تبسمت من هاد الحجة للي رجعت بيناتهم بحال الكود) اه
اورطيغا: (حرك راسو باه هو كياااكل ماشي بحالها صونا تيليفونو مسح يدو فموشوار ودارو فودنو)
وي…
صافي انا كلفت خونا…
اممم..
متتعرفني متنعرفك… مشاات..
(قطع شافها لقاها متبعااه بفضوول)
يااا فطري
ملاك: اممم (رجع صونا تيليفونو ومبغاتش تشووف فيه حيت عيقت ولكن فهمت انه اليوم معندوش الخدمة وحتى المحال غير غيبيع داكشي للي كان موجود.. مسحت يدها ووقفت)
الحمد لله
اورطيغا: (كانت ماكلتها قليلة) ماشي ديالك هاد الماكلة
ملاك: مزالة خايفة من الدوخة وعاد خفت ضرني كرشي
اورطيغا: معليش شربي دوا وشربي حتى شي كينة ديال الدوخة
ملاك: اه غنشربها
اورطيغا: ياله لبسي حوايجك انا نتسناك لتحت (حركت راسها باه، دخلت لبيتها كتقلب شنو تلبس وفين غيخرجو فهاد شموشاات والحرارة واصلة 40 ، مكانوش عندها حوايج زوينين صيفيين لبست اونصومبل صيفي سروال واسع مع بيل بيض والفوقاني ديالو حتى هو كيجي واسع دارت شال ولبست صنطالة صيفية عالية هادي هي اللبسة الوحيدة للي عندها زوينة فكرت خاصها تشري شي حوايج جداد هادي كانت جابتها ليها ختها فاطمة من كندا.. معرفت واش مشا خرجت من لبيت لقات الطابلة مجموعة تبسمت)
ملاك: بعدا واحد فينا حادݣ (مشات للكوزينة عمرت كاس دلما باش تشرب دوا، عاد تفكرت تدهن شي ايكخو زولت شالها وهاد المرة دارت حتى ماسكارا لشفرانها رشت باغفان ديالها هزت صاكها فيه كولشي للي تحتاج عاد هبطت لقات باب دارو محلول ولكن الهرج كاين لتحت بقات واقفة كتسنى حتى كتشوفو لابس غير شورط قشعها)
اورطيغا: دخلي
ملاك: لا لا انا نتسناك هنا
اورطيغا: (حرك راسو باه لبس تيشورت هز مسائل ديالو وصكادو وتم خارج) مشينا؟!
ملاك: شنو واقع لتحت
اورطيغا: (بوا شنايفو بمنعرف هبطو بزوج كانو البوليس تماك داخلين لديور بزوج ومعاهم السمسار)
ملاك: ياكما لقاو شي واحد ميت هنا، سمعت لبنات كانو كيقولو شمو شي ريحة فشكل
اورطيغا: بحال والو
ملاك: اويلي عنداك يكون هداك للي دخل عندي البارح هو للي كان (دار يدو على فمها مهبطها وهي كضربو ليدو حتى هبطو حدا لباب)
واش حمق، خنقتيني
اورطيغا: فيك الهضرة بزااف
ملاك: (غوبشت وتمت باغيا ترجع ووقف ليها حدا لباب) حيد من طريقي
اورطيغا: غنتعطلو
ملاك: مبغيتش نمشي معاك
اورطيغا: (دار يديه على صدرو شاد ليها الخاطر) انا للي فية الهضرة بزااف ياله نتحركو من هنا راه اصلا الا عرفو شي واحد كان معاك فالدار لبارح غتبقاي خيطي بيطي للكوميساريا واصلا هوما كيقلبو عليهم (بقات كتشوف فيه)
مشينا
ملاك: مالي أنا شنو درت
اورطيغا: غا عطلتينا (تم زايد بيها شادها من كتافها.. وصلو للطموبيل ديالو ركبت وهو مشا كيهضر مع شي دري عاد لحق بيها وركب بقاو ساكتين حتى كتشوف شد طريق لوتوروت وبلاكة كبيرة بزرق مكتوب فيها #الرباط )
ملاك: فين ماشيين
اورطيغا: مع الصهد قلت نضربوها بشي غطسة؟!
ملاك: فين؟!
اورطيغا: غير رباط
ملاك: كتقولها بحال كاينة فالدورة!
اورطيغا: راه غير فالدورة ساعة ونص وهاحنا تمااك شي جوج و3 سوايع ونتوما راجعين لدوارنا
ملاك: ولكن مقلتيلي والو
اورطيغا: هانا قلتها ليك ازين
ملاك: لا تقولها لي
اورطيغا: مبغيتش نخليك هاكا واكترية داكشي دلبارح بغيتك تبدلي الجو شوية (وساعو عينيها بتأثر وتبسمت كتشوف فيه شاف فيها وغمزها) ومكاينش شكون يحضي لية الفوطة
ملاك: هههه خلصني
اورطيغا: (تبسم محرك راسو دار موسيقى هادئة ولكن نقص الصوت) شنو وقع لبارح
ملاك: اوووف راه قلت لك
اورطيغا: عاودي ولكن بالتفاصيل
ملاك: حتى تعاودلي شنو واقع فالموبل ودوك البوليس
اورطيغا: لقاو شي دراري تيقادو الماحيا
ملاك: شنو هي هاد الماحيا؟!
اورطيغا: شرااب
ملاك: ولكن شراب مكتكونش ريحتو خانزة بحال هاكاك (هز حاجبو فيها) اوا وشنو دارو معاهم
اورطيغا: منين تتعرفي ريحة شراب
ملاك: غير قلت وصافي ديما تنتخيلو بريحة التفاح ولا العنب
اورطيغا: ههه وااخ، اوا البوليس غيبغيو يعرفو كفاش وشكون وشحال من حاجة
ملاك: مول الدار غيجيه السيزي مسكين كان غير كاري للناس غيصدق فحوايج مدارهم لا بيديه ولا برجليه
اورطيغا: علاش!!
ملاك: اوا راه مكايناش رخصة وشحال من حاجة من غير الا كانو شهود مع مول الدار حيت ضروري غتلسق فيه انه عارف شنو كيوقع عندو فالدار ونتا قلتي كيصاوبو يعني دايرينها تيجارة وعاد غيبان الشاري وشلا شهوود
اورطيغا: (حرك راسو باه) الله يبشرك بالخير
ملاك: ههه علاش
اورطيغا: اوا وغيديولو الدار
ملاك: لااا ماشي لديك الدرجة غير غيكون اجراءات شكلية وحتى شهود غينفعو والا كان كاري بالكونترا راه ميخاف من والو
اورطيغا: (حرك راسو باه..) اوا ونتي
ملاك: شنو انا..
اورطيغا: شنو وقع البارح
ملاك: لبارح اسيدي كنت مريضة وهمي غير نمشي لطواليط اما داك بوفسييو للي كان داير فيها صعصع مكنت خايفة منو حيت عارفااك غتجي وغتملخ مو (شافت فيه مشافش فيها كان مركز من الصوݣان غوبشت كتنݣر فالداخل ديالها اما هو لداخل تزاد عندو ݣراااض..)
من بعد موصلو لرباط كيقلب فين يمشي يعووم كيعرف بلاصة وحدة هو شاطئ الاميرات مشا نيشان ليها وصلو لتماك وهي متبسمة غطير بالفرحة خرجو من الطموبيل وكضرب فيها ريحة البحر وداك النسييم الخفيف هو هز صكادو ديالو وتم جاي عندها طلعو درووج وهي كتشوف البحر اونفاص معاها والرملة كدخل ليها بين صباع رجليها شدت فذرااعو بلا متحس
ملاك: يااااااه البحر
اورطيغا: اول مرة ؟!
ملاك: (بفرحة حركت راسها باه بوحدها من دون خوتاتها للي اول مرة تجي ليه اما خديجة كانت ساكنة حداه مريم منين تزوجات كانت كتمشي هي وراجلها وفاطمة ونعيمة حتى هوما كان كل صيف كيدوزووه بين العروبية وصفرو ومهم كانت مكتحملش البحر اذا باهم مغيخليهمش يسافرو ليه بوحدهم وحتى فاش تزوجت خديجة هي ممشاتش حيت كانت دابزت مع راجل خديجة فالعرس.. بقا كيشوفها)
اورطيغا: زولي صنداالتك (بقات شادة فذراعو على محيدتها بقات شداها عاد حيدت يدها منو بقاو كيتمشاو فالرملة جاه واحد كيكري كراسة وبراسول دارلهم جلسة حدا لبحر هي غير كتمنظر حست براحة خطييييرة حتى كيصوني عليها باها)
ملاك: ويلي ويلي ويلي ويلي بابا (جاوبت دايرة يدها على الميكروو)
الو بابا… فالخدمة اه… التلفازة مجهدة ديال الاجتماع … ا.. لا لا ماشي فالاطلس.. بحال لبارح.. واخا نخرج ونصوني عليك (قطعت وشافت اورطيغا للي كيشوف فيها ديك الشوفة ديال الكذاابة ردت التيليفون لصاكها)
بسبابك كذبت على بابا
اورطيغا: (طانز) وايلي!!
ملاك: وشنو!!! مهم هو نتا دابا راك محسوب خاطفني فخباارك بابا يحصلني والله منعقل عليك
اورطيغا: ههه (زول التيشورت وبقا بشوورط) جلسي جلسي ݣاع داك زهر عندك باش نخطفك
ملاك: مسكيييين تايق فراسو (جلست كتشوفو مشا جهة لبحر دخل كيحني يهز لما ويقيس كتافو وصدروو وهي متبعاه)
ولد لحراام كيدير الإغراء ولا شنو؟!!!
(عوجت فمها) شكون داها فيييه!!!
(شوية دار غطسة ومع موجة جاية بان حتى رجعت كشكووشة تبسمت حيت دار كيشوف فيها عاد كمل كيعوم.. ممتيقاش انها فالبحر عاد كانت فاس ودابا فربااط ومعاه!!! هزت صكادو ديالو حطاتو حداها باش متبقاش حاضية لبحر ويجي شي واحد يهزو..
دورت عينها كاين دراري صغار لبنات لابسين دوبياس ومكاين غير لعرا مسوقتش حيت فبالها كولها حر يلبس للي بغا، رجعت كتشوف فاورطيغا للي مبقاش كيبان ليها وقفت كتشوف مزيان)
اويلي ياكما غرق؟!!!
ويلي شكون يردني لفاس؟!
اليوم بابا يقتلني مافييهاش؟!
(كمشت عينها كتقلب) مشاااااا الراجل
(كتقلب لدرجة بعدت من الجلسة مقربة لبحر حتى كيبان ليها واقف مع شي جوج بنات غوبشت)
وكان غير غرق حسن (رجعت تجلس وهي كتنݣر)
للي فيه شي ڤيييس!! (دازو قدامها شي دراري غير الشوىط والعضلات بقات كتشووف فيهم متبعاهم ورجعت كطل على اورطيغا لقاتو كيعووم بوحدو)
العزواااا لااخر…
اورطيغا: (جاي كيقطر بلما وهي حاضي دوك القطرات نازلين من صدرو لكرشو وداك لوين فيه شكيلييط ونقيي) الما غزاال
ملاك: هم!! شهيتني فيه
اورطيغا: (بغمزة) شكون
ملاك: لماا (شقلبت عينها مدورة وجهها) يياااااء
اورطيغا: اممم دخلي تلعبي فالكشكوشة شوية
ملاك: ها ها ها احسن ميترناجور هنا يعلمني العومان
اورطيغا: (ضار مخنزر فيها وهي بتعالي شافت فقنت اخر) وااا جربي
ملاك: ممحتاجااش اصلا مبغيتيش وصاافي
اورطيغا: (حرك راسو بلا حولة وجلس بقا كيتمنظر صونا تيليفونو بلا متحس جبداتولو من صاكادو قرات سمية ديال اسماعيل عاد عطاتولو)
وي حبيبيي.. (خسرت وجهها لاوية شنايفها)
ياااك؟!!…
اممم لا صافي…
انا بعيد شوية..
صافي غير قضي نتا.. لععز..
(قطع وهي تصوني غيثة قطع الصوت ومدو ليها عاود قرات بلا متحس رداتو حتى هي للصكادو طافية لافيشور ݣاع)
ملاك: واش واقعة ليك شي مشكل فالخدمة؟!
اورطيغا: (بهدوء) لا..
ملاك: (حركت راسها باه) داك لبلان للي كيتبنى اونفاص مع الموبل للي كارين فيه، واش نتا خدام فيه ولا حاضيه
اورطيغا: واقف مع واحد صاحبي فيه
ملاك: اممم عندك صحاب بزاف فالليدو
اورطيغا: اوا راه فيه كبرت، واخا الوالدة خرجت منو من شحال هادي انا بقيت فيه
ملاك: عليها مبغيتش تقولها على لبلاصة الي كاري فيها
اورطيغا: حسن غتبقى مشوشة علية راك شفتي كل مرة تيخرج منتيف وهي تتخااف علية
ملاك: صراحة صعيبة ديك الحومة شوية انا فاش كنت كنقرا فلفاك كنت كنخاف منها وسبحان الله فبالي كنت كنقول مستحيل شي نهار نكري فيها، كتخوف ديك الحومة
اورطيغا: شوية وصافي ولكن انا راحتي تنلقاها تماك
ملاك: (حركت راسها باه، رجعت كتشوف فلبحر لدرجة سهاااات وقف قدامها كيعلمها غيرجع يعووم حركت راسها وبقات متبعااه)
امتى غنتحابو انا وياك اداك العزي
(بقات حاضيااه هاد المرة مطولش دغيا رجع مسح صحتو بالفوطة وبقا وااقف شافت فالساعة كانت دازت شي ساعة ونص)
اورطيغا: مشيينا؟!
ملاك: صافي؟!
اورطيغا: مسخيتييش؟!
ملاك: صرااحة اه، ولكن خاص رجعو
اورطيغا: باك يقدر يجي لفاس فأي لحظة، وأصلا مصالحش نبقاو هنا انا جبتك تبدلي الجو شوية
ملاك: باااز، باش بدلتو ياك نتا للي دخلتي تعووم
اورطيغا: ههه حتى دابا حنا فيها نمشيو نشريو باش تعومي ورجعو (شاف فالساعة كانت 3) مزال الحال
ملاك: (بقات كتفكر حتى كانت غتوافق وهي تفكر فباها للي سولها فين كاينة خافت يكون اصلا ففاس) صافي نمشيو فحالنا
اورطيغا: فوقما بغيتي نجيو نجيو معنديش مشكل، (مجاوبتش ناضت كتنفض الرملة،)
ملاك: معرفت,
نشووف..
اورطيغا: نمشيو نتغداو بعدا ونشدو طريق الا كتاب…
رجعو لفاس شادين طريق من بعد متغداو خالقين جو المعاودة ولا هو داير ليها لونكيط كتعاود على خدمتها وفاش قرات فاس 4 سنين ومنين خدمت يعني كتعاود داكشي للي باين ومعروف..
اورطيغا: معليش ندوزو للخدمة باغي ناخد شي حاجة؟!
ملاك: والطموبيل؟!
اورطيغا: نهار تبغي ترجعي لصفرو نجيبوها
ملاك: ههه بغيت غير نفهم علاش مبغيتينيش ناخد طموبيلتي راه 15 اليوم مشفتها
اورطيغا: نتي مريضة معندك فين تصوݣي دابا وللي بغيتيه نقضيه ليك انا
ملاك: لا بغيت طموبيلتي ونخلص السيد
اورطيغا: غدا نخرجو ونجيبوها
ملاك: (تبسمت اصلا ناقصة عليها المازوط ونيت حجة باش يتشااوفو حيت غترفض تخرج معاه بلا حجة، صونا عليها يوسف جاوبت هاد المرة) وي يوسف
اورطيغا: (زاد فالسرعة كتر مدابز مع الطموبيل للي قداامو) شوف قدامك البغل
ملاك: (ولفات عصبيتو فالصوݣان)
يوسف: شكون هدا؟!
ملاك: امم صاڤا يوسف؟!
يوسف: الحمد لله نتي مزيان؟!ا
ملاك: الحمد لله هاد الساعة
يوسف: شحال صونيت عليك لبارح صباح متتجاوبيش
ملاك: مشفتووش وقلت نعاود نصوني ونسيت، ياكما بغيتني فشي حاجة؟!
يوسف: وحتى نبغيك فشي حاجة عاد نصوني
ملاك: لاااا انا غير قلت زعما.. مهم الامور هانية؟!
يوسف: (معجبوش الحال وبغا يعرف شكون معاها) هانية.. تكوني بلاتي فالدار
ملاك: فالدار؟! اه غنكون
يوسف: حتى نجي ونصوني عليك
ملاك: واخا فاش تجي نهبط عندك.. ياله بسلامة (قطعت ردت التيليفون الصاك مراداش البال للي مخزز حداها وصلو للمحال هبطت حتى هي، شاف مع الدري شي حاجة متعطلوش وهي بقات كتفوه رجعو للطموبيل)
اورطيغا: هادشي كامل فيك نعاس
ملاك: هه وييه
اورطيغا: انا مزال عندي شي شغل فبنسوودة، تبغي نعطيك الساروت ديال الدار لفوق طلعي تماك رتاحي فيها على منكمل حيت الموبل راه مرون بالبوليس وتيسولو فالناس تماك صداع الراس وصافي
ملاك: بالصح؟!! ولكن انا مدايرة والو يسولو نجاوب بداكشي للي عارفة
اورطيغا: ماشي قضية مديراش غير الا تشدو دوك ولاد **** غيقولو كنا مخبيين عند لبنت للي لفوق ويبداو يمرضوك سير واجي
ملاك: (هو عارف دوك الطلبة مع 6 دصباح كانو فتاونات داوهم دراري، وهي عارفاه باغي يشدها تبقى معاه كتر ولكن هضرتو جاتها منطقية نوعا ما) اوا صافي نبقى فشي كافي
اورطيغا: عادي تمشي تقنتي فشي كافي ولكن متقدريش تنعسي فالدار
ملاك: ماشي هكاك
اورطيغا: انا بغيتك غير ترتاحي شي 2 سوايع على منرجع عندك
ملاك: والا جات مك امراد!!! لا لا منقدرش نتحط فداك الموقف
اورطيغا: وتمشي معايا لبن سودة حيت منقدرش نسمح فيك بوحدك
ملاك: (كانت عياانة) نمشي…
غيثة: (وصلت الكافي لقات ادم تماك وقف زرب عليها ماد حنكو تسالمو وجلست اونفاص معاه)
الصهد اليوم بزااف
ادم: سي.. (كيشوف فيها باعجااب)
غيثة: مهم مبغيتش نتعطل حيت تنخرج مع ماما بزااف نتقداو
ادم: العرس؟!
غيثة: اه، مبقالو والو
ادم: ونتي مناوياش تكوني عروسة
غيثة: هههه هاد السؤال رجعت تنسمعو بزااف هاد الايام
ادم: اممم من عندمن؟!
غيثة: لافامي
ادم: (حرك راسو باه) وشنو جوابك
غيثة: (فكرت فاورطيغا) نهار يكتاب ان شاء الله اما دابا باغية ركز على خدمتي
ادم: شنو خدامة؟!
غيثة: عاد ناوية عندي ديبلوم بغيت ندير شي سطاج خفيف باش نبدا وعاد من بعد ندير مشروع ديالي
ادم: شنو ديبلوم ديالك؟!
غيثة: fashion design تصميم الازياء
ادم: اممم مزيون
غيثة: (تبسمت جا السرباي طلبت) موخيتو فروي غوج
ادم: بحال الآنسة.. وفين بغيتي ديري سطاج
غيثة: خصني نشوف شي وحدة تكون برو فهادشي
ادم: تبغي نعاونك؟!
غيثة: مبغيتش نبرزطك
ادم: بلعكس شرف ليلي (تبسمت) تتعرفي ليلى
غيثة: ختك؟!
ادم: اه
غيثة: اممم شوية قليل فين تنتلقاو غتجي حتى هي العرس
ادم: هي دابا فرنسا معرفتش بالظبط امتى تجي
غيثة: ااااه.. (بقاو مجمعين كيتعارفو وكيهضر على خدمتو كانت ناوية متكملش ربع ساعة صدقة فساعة ونص أصر عليها يوصلها فين تحاشمات مع مها خارجة هي وخالتها وهي نازلة من طموبيلتو، نزل سلم عليهم ودعهم ومشا..
دارت الغالية عند بنتها)
متفهميش غلااط
الغالية: اوا حبيبة فهميني الصح؟!
غيثة: غير عادي وصاافي مكاين والو
الغالية: اممم (ظحكت مع ختها) زيد قداامي بعدا عرفتي تختاري هاد المرة (بقاو شادين فيها مشاو لتريتور باش يديرو اخر الاختيارات فالاطباق والمقبلات والغالية داافعة الجهد… لدرجة الماكلة دارت موني فيها يعني المعازيم يختارون اي حاجة فوقما بغاو عاد الاطباق الرئيسية استقرت ب3 دالاطباق لحم مشوي دجاج بالدغميرة وبسطيلة دالحوت عاد الديسير منوع بين ݣلاص وفواكه متنوعة…
رجعو عند النݣافة للي خديجة ختارت جوج لبسات باش دخل واللبسة البيضة مبغاتش دير الفاسية وشي لاخر وحتى يوسف أيدها اما الحنة غديرها فداارهم وهوما معروضين ليها)
غيثة: ماما واش يوسف غنديرو ليه الحنة
الغالية: ماشي من عوايدنا داكشي
اخت الغالية: كفاش اختي ماشي من عوايدنا؟!!
الغالية: خلاااص علية داكشي ديموودا وقدااااام الراجل مبقى تيدير شي حنة العروسة وقريب تبقا حتى هي دير بناقص منها….
اورطيغا: (دار بناقص من شي بنسودة حيت تماك غير تكرفيس وهو خاصو يدخل الݣرنة ومعندوش فين يخليها وحتى الا بقات فالطموبيل غادي غير تكرفس بالحرارة وعاد يتزللو عليها مشاو لبرج فاس طلعو للقهوة للي لفوق بعدا مبردة تمااك خداو ݣلاص جالسين كيتمنظروو ولهوا مغربي شوية)
ملاك: اممم مراد فين واصل فلقرايا؟!
اورطيغا: النيڤو
ملاك: وعلاش مدرتيش باك ليبر؟!
اورطيغا: شنو غندير بيه؟! نطلع ݣراض نبقى نذبح الخيل زعما
ملاك: ههه لا غير..
اورطيغا: انا من اللول مكانش عندي عقل ديال شي قراية، حليت عيني على ذبيحة ولحساب والبيع وشرا هادشي للي تنعرف ندير التجارة
ملاك: وحسابلك التجارة ساهلة!!! راه شي حاجة مهمة ماشي اي واحد يعرف ليها والله ومكنتي حافظ صواريك ومطور كتزيد فيها
اورطيغا: اممم (شاف فيها) ياك!!!
ملاك: وعاد فيها!! راه الموظف صالير ديالو باين وعاد يخدم سوايعو كل نهار نفس الروتين اما التجارة ويكون عندك عقل ديالها راه دير لبااس بيها
اورطيغا: (حرك راسو باه) اوا خرجي من الخدمة اجي خدمي عندي
ملاك: ههه اوهوو اووهوو كنحماق على خدمتي
اورطيغا: كل واحد فين تيرتاح
ملاك: (تفوهت دايرة يدها على فمها صونا عليها باها تفافات ولكن مبينة العكس)
الوو بابا..
انا قريبة للدار..
بالصح.. أنااا فبرج فاس
(اورطيغا هز حاجبو فيها اول مرة مكتكذبش)
صافي انا نتسناك فلباب.. واخ
(قطعت ووقفت)
بابا هنا
اورطيغا: نمشي معاك
ملاك: وشكون نقولو الفاهيييم
اورطيغا: شنو بغيتي تسميني نتي؟! (دار معلقة دلاݣلاص ففمو)
ملاك: (تبسمت) اممم (كطلع وتهبط فيه) صاحبتي
اورطيغا: (تخضر عليها محايد المعالقة) وسيري قبل منقلب على مك هاد الطبلة
ملاك: (ميقت فيه) هرموناتك مخربقين اصاحبتي هه تكالماي تكالمااي
اورطيغا: ملاااااااااك (بقات كظحك باين عليها العيااء هزت صاكها مشيرة ليه يدها باي باي وهو لا رد لا حركة غير متبعها بعينيه حتى هبطت من السلم الاليكتروني.. وهو بقا كيكمل لݣلاص مصوني على الدري يعرف اخر الاخبار..)
~~~~~~~~~~~
ملاك: (مع وقفت كتشوف باها جاي هو وجدها سلمات عليهم)
رشيد: شنو كديري هنا ابنتي
ملاك: غير خرجت من الخدمة وجيت نتقدا شي حاجة خصاني فالدار
رشيد: ياله نهبطو كاملين حتى مك وصاتني على شي حاجة نجيبها من هنا (هبطو لكارفور لتحت تقدات شي سقاطة وباها كينݣر على سقاطة للي كضيع ليها صحتها خدا حتى هو شي تخربيق للدار وهي خدات شكلاط لمها مصيفطاه معاه واخا هو اصلا للي خلص كولشي)
مزال مترجعي للدار
ملاك: بقات يوماين
رشيد: متعاوديش تقبلي بهاد الخدامي
ملاك: (هي اصلا راجعة ترغب المدير يزيدها وفينما تبانلو شي خدمة فاس يصيفطها) واخا بابا
رشيد: (كملو وهوما يهبطو لكاب دازت من حدا اورطيغا للي جالس فطموبيلتو وحال لباب دارت راسها مكتعرفوش بقا غير متبعها وركبت مع باها باش يوصلها للحومة…)
ملاك: (وصلها باها وجدها تحت توصيااتهم، ومشاو وهي بقات كدور عينها واش يبان واش جاي من موراها تسنات شوية ودارت السلة بالخلنوت دخلت شرات مسكة واالو مكاينش!! طلعت الموبل للي مكان فيه والو يعني تسالاو دوك الإجراءات وكان صقييييير، طلعت للدار سدت لباب دورت الساروت اما الساقطة مزال مفروعة خافت غير يجي عاود يحل بلا ميعلم حيت بغات تمشي تنعس، مشات بدلت حوايجها واخا زمتات راسها بلكيطمة وهي تفكر بيت وفاء كيتسد بالساروت حيت ساروت بيتها نسات خديجة وداتو معاها لصفرو، سدت عليها باب لبيت طرقت السرجم والبالكو عاد حيدت حوايجها شعلت لا كليم وبقات متكية على كرشها كتفرج فتصاور للي دارت وهي فلبحر تبسمت داز عندها نهار زوييين وأصلا اي نهار كتخرج معاه فيه كيكون زويين وعندو لمسة خاصة كتبقى فالبال، ومعاه كتمشي غير لبلايص لي عمرها مشات لييهم، صونات مها عليها وعينيها كانو كيتغمضو جاوبت وهي منشوية مع هاد الاحسايس زوييينة)
امم ويييي ماما
زهرة: فينك اديك الجروة من صباح وحنا نصونيو عليك
ملاك؛ (مفرنسة) كنت خدااامة
زهرة: جا عندك باك
ملاك: اه هو وجدي مشينا لكارفور ودابا راهم شادين طريق لصفرو
زهرة: اممم مالكي عيانة؟!
ملاك: لا غير عييت بالخدمة, صراحة اماما مكنتش خدامة اليوم سلت وعرفتي فين مشيت (تبسمت) لبحر
زهرة: (كان لبيت عامر) بالصح!! اوا مزيان مزيان ابنتي مزياان
ملاك: بالصح!! حسابلي غتقلقي مني
زهرة: لا لاااا ياله رتاحي شوية ونصوني عليك
ملاك: يخليك ليلي يا أحسن أم فالدنيا (قطعت مهم متكذبش على مها.. واخا مسولتهاش كفاش ومعامن جرت لغطا شوية ونعسااات)
~~~~~~~~~~~~
يوسف: (دخل معطل كلا ماكلتو وغيثة مزال كتهضر مع ادم فالواتس وجالسين مجموعين هضرتهم كاملة فالعرس صيفط ميساج لملاك علمها غيجي عندها باش تنزل عندو مجاوبتش)
غيثة مهضرتوش نتي وملاك هاد نهار؟!
غيثة: لا، مساليناش ݣاع وكان غير عيطتلها تجي تبات معانا
الغالية: علامن تتهضرو
غيثة: على ملاك خت خديجة
الغالية: مالها عاود هاد ملاك
يوسف: (كمل ماكلتو طلع لبيتو بدل عليه وتم خارج) انا جاي
غيثة: واش ماشي عند ملاك نمشي معاك؟!!
يوسف؛ لا خارج عند دراري غدا الا تلاقيتها نديك معايا
غيثة: اه ضرووري حيت خاصها تهضر مع النݣافة حيت كانت ديجا ختارت شي لبسة ومرجعتش أكدت عليها
يوسف: صافي واخ انا نقولهالها..
اورطيغا: (مشا لبنسودة باش يعرف شنو لكموند للي عندو باش يصبح عليهم الغد ليه بكري كيبغي يقاد.كولشي باش غير يجي ميبقاش كيدور وهاد جيب هادي وفين هادي، صونات عليه مو للي كانت فالدار ديالها مشا عندها وتفكيرو فملاك للي مزيان ممشاتش باش مطيحش فموقف خاايب هو كان غيكون معاها ومكان غيخلي مو تقول حتى شي حاجة ماشي هي هاديك ولكن صورتها تبقى بعيدة عليه حيت غيفهمو غلاط وينزل عليه الباطل وهو مداير والو!! لقاها هي والحاج تماك جلس معاهم مجمعين كيتعشااو شاف فالساعة كانت 10 دالليل)
ياله نخلييكم
أمينة: فين ماشي اولدي بات هنا
اورطيغا: لا لا غير خودو راحتكم داير مع دراري نتلقاو
أمينة: بلاتي مزال باغيين نهضرو معاك (عارفها شنو غتقول) مناويش دير عقلك
اورطيغا: علاش قالو لك علية ماشي وتنضرب عباد الله فزناقي
أمينة: نتا عارفني شنو باغية نقول اولدي
الحاج: بغيناك تزوج اولدي
اورطيغا: (شاف فمو للي فهمها مليون مرة ولكن واالو ومنين عرفت يوسف غيتزوج وهي كل مرة كتسولو وتبرزطو..) بغيت حتى نجمع راسي مزيااان
الحاج: شحال خاصك؟!
اورطيغا: لا بغيت نجمع راسي
أمينة: (خرجت عينها فيه) راه من حقنا نعاونوك اشرييف
اورطيغا: عارف، ولكن (حتى بغا يتعصب) مهم نهار يكتاب غنجي عندكم ونتوكل على الله
أمينة: محاط عينيك حتى على وحدة؟! ولا داير شي وحدة فراسك؟!!!
اورطيغا: لا
الحاج: كاينة غيثة بنت سي عبد الجليل
اورطيغا: لا هاديك بحال ختي
أمينة: اوا متعاودش تحسبها ختك
اورطيغا: راه هضرت معاك الوالدة يهديك الله باغا تلسقي البنت صحة فية!! انا عمرني نفكر نكون لية مراا ونهار يكتاب غنجي نوريك للي غنختار، (ناض خرج من لبيت مكيبغيش يتعصب عليها واكترية قدام الناس ولكن هي! مشا لبيتو وهي تابعاه كتهضر تهضر تهضر)
واخا انا غنتزوج (تبسمت) ولكن ماشي من غيثة
أمينة: ماشي مشكل فينما رتاح خاطرك انا بغيتلك غيثة غي حيت كنشوفها دريويشة ومربية ولكن شوف نتا فين ترتاح
اورطيغا: نهار نقاد اموري غنجركم معايا مزيان
أمينة: (متبسمة) ان شاء الله اولدي، غير هي نبدا نوجد
اورطيغا: اه شي عماين ولا 4 منتعطلش (خرجت عينها وهو ظحك باس راسها قبل متهضر سلت تابعاه فلكولوار زرب هبط باغي يمشي يلحقها معرف واش باقي باها معاها صونا مكتجاوبش استغرب!!! مشا نيشان للحومة لقا طموبيلة يوسف تماك خرج عينو معصب عاود رجع صونا مكتجاوبش هبط خابط لباب حتى كيشوف يوسف جالس مع دراري وهو حسابلو كاين مع ملاك لفوق.. زفر ومشا سلم عليهم جلس حداه)
هانتا هنا!
يوسف: سولت عليك دراري قالولي مجيتش هاد نهار
اورطيغا: اممم مساليتش
يوسف: بوحدك؟!
اورطيغا: انا وملايكتي
يوسف: هه، صونيت حتى على ملاك متتجاوبش
اورطيغا: (قلب وجهو كيهضر مع دراري لوخرين عاد رجع شاف فيه) اوا اش فيها؟!
يوسف: غدا محركين لايفران ياله معانا
اورطيغا: شكون ݣاع
يوسف: دراري نيت للي تتعرف
اورطيغا: امم (لوا شنايفو منعرف) عندي شي خدمة
يوسف: كملها ولحق الا كنتي معطل بزااف حيت كولنا حتى تعاشا لعشية عاد غنمشيو
اورطيغا: صافي (يوسف وقف) مشيت؟!
يوسف: واحد الراس تيقولي نطلع نشوف ملوكة
اورطيغا: تبع الراس التاني وسير لداركم تنعس ترتاح راك عريس وجد الا عندك متوجد
يوسف: ههه وااخا (وقف معاه لاخر ركب وهو طلع عندها يفهم علاش مكتجاوبش!!)
اورطيغا: (كيدق بالجهد عليها واخا عندو الساروت اصلا كانو غير بوحدهم فالموبل حتى سمعها كتقول يصبر، شي 2 دقايق عاد حلات وجهها منفوخ بنعاس)
كنتي ناعسة؟!!
ملاك: (تبسمت) كنت فغيبوبة محسيتش على راسي ݣاع
اورطيغا: اوا فالليل ازين شنو غديري؟!
ملاك: ههه دابا رجع نعس وهانية
اورطيغا: خميرة وصافي
ملاك: الحانوت لتحت حال؟!
اورطيغا: بغيتي شي حاجة؟!
ملاك: اه، انا ندخل نلبس صندالتي نمشي نشري شي حاجة (دخل تابعها، ضارت) راني بوحدي زعما
اورطيغا: والشيطان تالتنا
ملاك: ههه خرج خرج
اورطيغا: قولي شنو بغيتي نسخر الدري
ملاك: الا حشوومة، وخرج بعدا
اورطيغا: (دوز لسانو على ضرووسو وتم راجع حدا باب الدار) ياله نطلعو لسطح
ملاك: (باغية) مافياااش
اورطيغا: وياااله
ملاك: اممم نشووف
اورطيغا: شنو بغيتي تاكلي وكان؟!
ملاك: (هزت صاكها جابدة بزطامها وهو متكي على لباب) مكرهتش الا لقالي شي ݣلاص وشي طونيك ودانون مهم هادشي ديال سقااطة (مدت ليه 100 درهم وهو يشدها للي لواها بحال شكل ݣارو) وخود نتا الا بغيت شي حاجة
اورطيغا: وااااايلي!! شنو هاد الكرم للي نزل عليك دقة وحدة
ملاك: ههه علاش كفاش تنبان ليك
اورطيغا: جلدة!!!
ملاك: ههه غير كيبان ليك…
اورطيغا : انا سابقك لسطح غير توصل الماكلة نصوني عليك طلعي (حط فلوسها فوق بلاكار صبابط للي حدا لباب وجر لباب سادو وهو مشا يقاد الجلسة)
ملاك: (هزت فلوسها ردتهم للصاك) ويلي وكان خداها قلبي كان غيسكت (مشات بدلت حوايجها لقات مها وكولشي مصونيي عليها، رجعت صونات على مها للي شحال عاد باش جاوبت ابيل ڤيديو)
ازيين
زهرة: (بعصبية) لا مزيان تبارك الله طوال ليك الرجلين وليتي تمشي للبحر
ملاك: (جمعت الظحكة) ياك قلتيلي مزيان
زهرة: كانو حدايا الناس والله يا ملاك حتى نحلف عليك هاد الخرجات متعاودييهم معامن مشيتي الحمارة؟!
ملاك: بوحدي
زهرة: كفاش بوحدك؟!!
ملاك: (خرجت عينهل) والله مامشاات معايا حتى شي بنت قنطت، وانا عمرني مشيت شفت لبحر، مشيت للرباط مكملتش فيها حتى جوج سوايع ورجعت فحالي
زهرة: وليتي ديري شراع يدييك ابنت رشيد مبقى حكام عليك ولا شنو؟!!
ملاك: ومكنخبي عليك والو اماما
زهرة: اييه مكتخبيش حتى كترجعي من الموصيبة الي كديري عاد كتعلميني، سمعي املاك متخلينيش منعاودش نتيق فيك
ملاك: (لوات شنايفها معاحبهاش الحال)
زهرة: امتى غترجعي
ملاك: بعد غدا فلعشية ولا الليل
زهرة: اوا حسن اجي مع لعيالات ولا متعذبيش راسك حتى نجيبو ختك عروسة لتماك ونصيفطولك سميت القاعة الا كنتي مسالية اجي مجيتيش نديرو معاك ابيل ڤيديو
ملاك: وراه خدامة اماما ماشي كنتفلى
زهرة؛ مع تكملي خدمتك تجي
ملاك: على حݣااااااااارة خسارة فيك داك الشكلاط للي صيفطتلك
زهرة: (قطعت عليها وظحكت كتبغي تعصب وتحلف فيها ولكن كتجي حتى لملاك وكتساليهم ليها رجعت عند الناس الدار بدات كتعمر حيت كيجيو عائلة رشيد باش يحضرو العرس…)
ملاك: (صونا عليها اورطيغا اول مرة تهضر معاه فالتيليفون حنحنت مزيان عاد جاوبت) اااالو
اورطيغا: منين تكوني طالعة جيبي معاك جوج مخاد
ملاك: (بدماغ خاسر) علاش؟!
اورطيغا: (كتر منها) صافي جيبي غير وحدة لية نتي ختاري فين تجلسي (بقات ساكتة قطع عاد شغل دوك اللمبات صغاار للي لواهم فسلوكة دنشير وفرش فالارض مع وسايد صغار عندو كانت جلسة زوينة فسطح، والدري جاب الماكلة وسقاطة حطهم تمااك طلعت هي معنقة جوج وسايد مع دخلت لسطح عجبها الديكور تبسمت شافتو جا من موراها سد باب سطح ودور الساروت)
ملاك: علاش سديتييه
اورطيغا: باش ميطلع حتى واحد
ملاك: اممم (مشات جالسة متيقاش فيه، لقات قوة سقاطة حطت لوسايد وحطت صندالتها ودخلت جلست تم جاي هو شعل باف صغير داير فيه موسيقى)
كولي
ملاك: (اول حاجة هزت ݣلاص فتحاتو فتح ليها الشكلاط حطو حداها تبسمت بامتنان) شكرا
اورطيغا: (كيشوف فرجليلاتها كانو عاديين مغلاض ماارقاق ولكن صغار) شحال تتلبسي
ملاك: (جرت رجليها دايرة فوقهم الريبيكا للي لابسة مخبعاهم) 37
اورطيغا: وشحال الطول ديالك
ملاك: وعلاش كتسول
اورطيغا: بغيت نعرف، شي متر؟!
ملاك: ها ها ها
اورطيغا: معاك بالصح
ملاك: 156
اورطيغا: 156 باش تبان كتييرة ههه (ميقت فيه كتاكل، حرك راسو باه) وشحال تتوزني؟!
ملاك: ونتا مالك
اورطيغا: عندك غير لسان فيه 60 كيلو
ملاك: (كتسممو بحواجبها) بصحتي وراحتي
اورطيغا: (تبسم حل هرنيس كياكل منو حاضيها كفاش كتاكل لݣلاص حتى نواها وصدقت كتعض منو باش تساليه دغيا)
ملاك: ونتا شحال فيك
اورطيغا: مياااااا وتسعوووود وتمانييين
ملاك: اممم مبيناتناش بزااف (بقا كيظحك حتى تبسمت) راه عادي الراجل كيكون طويل على لبنت (بقا متبسم عاد طلعت معاها يكون نواها فين هي كانت قاصدة زعما هوما كووبل)
اورطيغا: معليش داكشي للي معندكش فالطول عندك فداك لساان
ملاك: عيقتي بهاد التنمر ديالك للي سمعك يقول هادي قزمة
اورطيغا: علاش ماشي قزمة؟!
ملاك: راك نتا للي طويل كتر من لقياس
اورطيغا: هه.. (حل ليها ساشي ديال المكسرات حطها قداامها) جا يوسف هنا
ملاك: بالصح!! غيقول غير مبغيتش نتلقاه
اورطيغا: وعلاش غتلقايه فهاد الليل (شافت فيه وفنفسها زعما نتا ضارب بية اللاكط ولكن هاد المرة مقدرتش تقولها) فين تعارفتي نتي وياه؟!
ملاك: تعارفنا فاوطيل
اورطيغا: (شاف فيها ورجع كمل) زعما بأي صفة باش تعارفتو كانت بيناتكم شي لعبة
ملاك: لااااا من اللول عادي
اورطيغا: نتي كان عادي عندك فاللول ؟!!
ملاك: مفهمتش؟!
اورطيغا: واش كان عاجبك فاللول؟!
ملاك: (بقات كتشوف فيه حيت ملامح وجهو تبدلو ومتوقعاتش هاد السؤال حست بالارتباك نورمال أي سؤال كتلقى ليه جوابو) شنو هاد الهضرة؟!
اورطيغا: جاوبي املاك!؟
ملاك: وعلاش غنجاوب هادشي غير تخربيق متنساش هو راه راجل ختي
اورطيغا: قبل ميكون راجل ختك!!
ملاك: دابا فنظرك غيكون معايا وشوية يمشي عند ختي يتزوجها!!
اورطيغا: منين تعارفتي نتي وياه فاللول النية ديالك كيفاش كانت!!! واش كان عاجبك؟!
ملاك: (بينت معجبهاش الحال حطت شنو كتاكل)
اورطيغا: عادي غتجاوبي اه ولا لا يا بيض يا كحل!!
ملاك: (بنرڤزة) لا ومعنديش مع هاد تبرهيش مفهمتش اصلا نتا كفاش كتفكر هاكا…. والله مفهمت
اورطيغا: (كان ديجا يوسف قالو هي مبينت والو ومكان حتى شي شعور من جيهتها وهو كان باغي يعرف منها ضروووري وبلسااانها)
غير سولت عادي حيت فاش كنت تنشوفكم فاللول كنت.. صافي نساي
ملاك: (قلبت وجهها وفبالها اصلا هدا هو الجواب للي كان باغي يسمع شخصية اورطيغا بدات كتوضااح عندها وانه مكانش باغي يسمع انه كان اعجاب من جيهتها)
اورطيغا: (شافها معجبهاش الحال) ملاك كانت شي حاجة فراسي وكنت بغيت نعرف
ملاك: انا بغيت نهبط
اورطيغا: غير الا لوح مك من سطح صافي هضرة مغتعاودش ديري بحال عمري سولتك هادشي
ملاك: مكيعجبنيش للي يبقى يسولني بحال هاكا ونتا شحال ونتا كتشوفني وباين كفاش انا ويوسف دايرين!! هو راه بحال خويا انا وياه أنتيييم لا غير
اورطيغا: (بهدةء) كنتو
ملاك: كفاش؟!
اورطيغا: كيف سمعتي
ملاك: مسمعتش
اورطيغا: مرة جاية (حرك راسو بحال كيدندن) امتى عندك الكونجي؟! (مجاوبتش) ملاااك صافي نسااي امتى الكونجي؟!
ملاك: الكونجي مخديتوش هادي شحااال
اورطيغا: هي عندك شي حصييصة
ملاك: كاين شي برااكة كنقول ناخذها نهار نبغي نمشي لشي بلاصة رتاح فيها
اورطيغا: (كمش عينو فيها) امتى تاخديه؟!
ملاك: مزال معرفت خاص حتى نهضر مع المدير بعدا حيت معارفاش شكون خارج دابا وعاد شهر 7 و8 كياخدوه للي عندهم وليدات
اورطيغا: (حرك راسو باه، بقاو كيتعاودو وحتى هو علمها عندو كونجي مزال مخداه.. بقاو هضرة كتجبد هضرة شافت فالساعة لقاتها 3 دصباح وكانت مزال مسخاات بكترة مكيضحكها دارت راسها ݣاع معرفت الوقت شحال باش متنوضش تمشي، واكترية كان مشوق منين بدا كيعاود على مغامرااتو فالليدو وشنو دوز مع الطلبة والسيمي وهي غير كتسمع وظحك..)
سمعو الاذان ديال الفجر وبقات كتشوف فيه وتبسم وهو مكمش عينو غير كيدير هاد الشوفة فيها كتلف
ملاك: اممم (وقفت) عييت خاص نعس وووو تعطلنا محسابليش الوقت فات 1
اورطيغا: (غير متبعها بعينيه)
ملاك: مغتنعسش مزال غتسهر؟!!
اورطيغا: الا بقيتي نتي
ملاك: ياك عندك خدمة بكري خاصك ترتاح
اورطيغا: (بهدوء ومزال نفس الشوفة) انا مرتاح
ملاك: حم (تبسمت كدور عينها هاربة من عينييه حنات معاطياش بظهر هزت وسداتها باش جات شافت فسقاطة للي ضربوها كولها لا وعاد قالتلو مقدرتش تاكل) انا نمشي اجي عفاك حلي لباب
اورطيغا: (حك حدا نيفو وناض وهي لبست صندالتها) وهاد روينة شكون يجمعها
ملاك: (كتبسم هزت حواجبها بجوج) للي عرض هو للي يجمع
اورطيغا: هه ياااك!! مردوودة
ملاك: هه (حنا كان باقي الشكلاط واحد عصير عطاه ليها شداتو وتمات ماشية من موراه معبزة دوك لوسادات حل باب سطح وبقا واقف فنص طريق) تصبح على خير
اورطيغا: (غير كيشوف فيها بغات دوز واقف فالنص دارتلو إشارة باش تدوز ووالو، واخا هكاك سبقت لوسادات وبغات تدخل بالجنب كدفعو بشوية غير وصلت اونفاص معاه مقرب مدخلها فالحيط هي ووسادتها للي جاو وسطهم وهو داير يد فوق من راسها)
ملاك: (خافت منو) رجوع الله، رجوع الله !!
اورطيغا: هههه (فشلاتو بالظحك حتى بعد وهي هربت كظحك لدروج تبعها بعينيه وهي هابطة غير غبرت مشا يجمع بلاصتهم وهي دغيا حلت لباب ودوزت الساروت حطات لوسايد ودارت يدها على قلبها كظحك دخلت لطواليط، ومشات لبيت وفاء طرقت عليها لبيت وبقات غير كتفرنس وتفكر شنو داز عمرها دوزت مواعيد بحال هاكا كانت كتصاحب ولكن هاكا بلا مصاحبة بلا هضرة زايدة لقات افعالو كتر وحسن من الهضرة تنهدت وهي متبسمة حيدت حوايجها بقات بديباردور ولبست شورطو طلقت شعرها متنغمة مع هادشي للي وقع ميهمش هاد الغلاط ولكن شحال ما عجبها الحال عاما!!!..
طرقت السرجم والبالكو وطلقت لاكليم يتبرد البيت وهي مزال كتفرنس هزت تيليفونها كتفرج فتصاور وكانو دايرين سيلفي بقات كتزومي وهي منتاعشة بدوك المواقف للي طراو بيناتهم حتى غمضت عينها على تفكيرو… حتى سمعت الدقان ناضت مفزووعة حيت هاد الدقان كيجهااد وأكيد هو، درت شعرها من مور ودنها خرجت رويسها من لبيت كتقلب عليه متيقااش فيه عاد مشات لجهة لباب فين كاين الدقان)
شكون
اورطيغا: متبقايش تقولي شكون راه باين أنا للي غندق عليك
ملاك: امم وشنو نقول
اورطيغا: مهم راه نسيتي واحد بيمو
ملاك: ههه مغنحلش الباب امراد
اورطيغا: راه زوين ديال الشكلاط
ملاك: عندي الشكلاط غير خودو نتا
اورطيغا: اممم.. هدا شكلاط زوين
ملاك: ههه سير فحاالك مغنحلش
اورطيغا: واخا، غدا نمشيو نجيبو طموبيلتك (فرنست من مور لباب) نكمل الخدمة وندوز عندك فلعشية
ملاك: واخا.. (سمعات صقيير بقات غير كظحك دخلت لبيت وفاء عاود طرقت ونيشان نعست…)
أصبحنا وأصبح الملك لله..
ملاك: (فاقت معطلة حيت متابعها واالو وعاد القلييب نااشط ومرتاح للي دوزاتو مع اورطيغا البارح ميمكنش يكون عاادي وعمرها غتنساااه، صبحت كدندن وكتطيب فطورها للي قلات جوج بيضات وعمرت أتاي بلويزة لبست كيطمة ديالها لوات شالها هبطت الحانوت شرات كوميرة كتشوف الدري للي دخل ولد الحومة كيكون حاني راسو احتراما ليها خلاها تحس بالفرحة،
طلعت للدار فطرت مزيان وهي شاعلة التلفازة كتفرج شربت دوا ديالها هاد نهار كتحس براسها مزيان، هزت تيليفونها كتخربق فيه اول حاجة دارت دخلت نمرة اورطيغا عندها وهي كتبسم)
ولكن علاش مصوناليش ولا كتبلي ميساج يقولي فيه “صباح الخير وداكشي”
يكون زعما من داك النوع للي معندوش مع التيليفون بزاف!! ولكن انا كيعجبني هاد تواشا، بففف مزال خاص روديييه على شحال من حاجة
(حطت التيليفون وهي تصوني عليها فاطمة ختها ابيل ڤيديو كانو عند النݣافة بقات كتشوف معاهم شنو كيختارو وحتى هي بغات يشدو ليها الاكسسوارات بقات شحال كتهضر معاهم حتى رجعو للدار صونات على مها والو مكتجاوبهاش عارفاها مقلقة منها، رجعت لبيت وفاء وجبدت عليها بنعسة حيت دوا الدوخة كيرخيها وهي اصلا طالبة على نعاس حيت غترجع للدار مع روينة العرس موحال واش يصلاح ليها تنعس على خاطرها..)
~~~~~~~~~~~~~~
اورطيغا: (كان فبن سودة (حي فاس) كمل خدمتو باش يمشي فحالو للمحال للي فالسعادة كيزرب حيت داير بروݣرام فباالو، حتى وقف عليه الحاج جاي مع شريف)
اهلان اهلان اهلااان بالحاج نهاار مشحم هدا
شريف: اورطيغا صاڤا!!
الحاج: أسمو مراد اش هاد سمية كتقولو (مكيحملش داك اللقب ولا يسمع شي واحد كيعيطلو بيه)
اورطيغا؛ بحال بحال الحاج، كريييم جيب كرسي الحاج (جابلو كرسي حطو فالظل والحاج جلس) أفين العوييتق
شريف: هاحنا موليتيش شفتك!!
اورطيغا: غير هنا نتا متتسولش
الحاج: علاش متتلقاش مع خووك وتسول فيه خوك صغير الا مسولتش فيه نتا شكون غيسول؟!!
شريف: (خنزر فيه اورطيغا وتبسم) غير انا الحاج للي مشغول شوية
الحاج: مشغول على خوك صغير؟!!!
شريف: متعاودش ان شاء الله
الحاج: مهم اولدي اليوم سير لݣيݣو على حساب داكشي للي قلت ليك
شريف: علاش؟!
اورطيغا: (بقا غير كيشوف حيت ديجا قالو علمني قبل) اليوم؟!
الحاج: اه اولدي الناس علمتهم قبيلة وراهم تيتسنااوك وموجدين ليك فين تجلس وانا غدا غنصيفط ليك الفلوس حتى تڤيرسيهم نتا ليهم
اورطيغا: ولكن قلت ليك علمني
الحاج: السيد مزروب والشرايا كتاار وعطاه واحد السيد كتر من داكشي للي عطيت انا وحيت عطاني الكلمة دار معايا اليوم
اورطيغا: وانا ممساليش (شريف من مور الحاج كيرغبو) كنت علمتك تعلمني ماشي تهبط علية سير اليوم نتا معارفش راه غتكون عندي شي حاجة مهمة!! مثلا!!!
الحاج: أولدي مكنتش عارف براسي شنو كاين حتى عيط لية الدري (اورطيغا تعصب كان عندو بروݣرام اخر وأصلا مكيحملش هادشي يكون هاكا ملقى قدامو غير يقبل)
اورطيغا: اوا والوكالة
الحاج: غير كمل نتا الإجراءات حتى تجي ونقادو الامور الفلوس غدا صباح يكونو عندك
اورطيغا: لا اليوم
شريف: (جا يهضر باه) صافي اليوم اخويا
اورطيغا: (كيشوف فالحاج للي قلب وجهو مكرهش ينزل عليه بالكروشيات ولكن باانت فيه كاعي الحاج وشريف مشااو خلاوه كيدابز مع ذبان وجهو…)
ملاك: (سمعت تيليفونها كيصوني هزاتو لقات ortéga جلست مرجعة لافخوونش من مور ودنيها وجاوبت كترقق صوتها وتلحنها)
الوو
اورطيغا: تمشي لصفرو ؟!!
ملاك: (مفهمتش) كفاش؟!
اورطيغا: عندي شي خدمة ومغنكونش ها ليام فاس
ملاك: (سكتت شحال) انا مزالة غدا
اورطيغا: مغنخليكش من مورايا غير جمعي حوايجك باش تمشي
ملاك: ميمكنش… ويااك كن..!!!
اورطيغا: ملااك ديجا مخ** فراسي شنو بقالك ديري هنا ياك حتى الخدمة مبقاتش
ملاك: ولكن!! (كانت باغية تلقااه)
اورطيغا: انا غنجيب طموبيلتك ونجي عندك لقاك واجدة الله يرضي عليك (قطع هو براسو محاملش هاد البلان ولكن بعدا لقا من عندها ردة فعل انها باغيا تبقى خلا طموبيلتو فالسعادة ومشا بطموبيلتها للحومة هبط وطلع عندها نيشان دق لباب بقا شحال باش عاد حلات لقاها بلباس ديال الدار للي موالف كيشوفها بيه)
ملبستيش؟!!
ملاك؛ اصلا مفهمتكش
اورطيغا: شنو مفهمتيش املاك انا مغنكونش هنا شنو غتبقاي ديري وحتى خدمتك مغتوليش تخدمي شنو للي غيخليك تبقاي؟!!!
ملاك: (معصبة) ولكن مزال خاصني نشري شحال من حاجة
اورطيغا: (تكا على لباب مربع يد وداير يد على نيفو ووفمو مباغيش يتعصب بقا سااكت وعاد هضر معاها بهدوء) شنو خاصك
ملاك: (بقات كدور عينها) ماما وصاتني على شي حوايج
اورطيغا: ساعة كافيااك نديك تقداي شنو بغيتي.. جوج سواايع!!!
ملاك: (بقات كتشوف فيه حيت معندها متقدى اصلا، تمت داخلة وهو غير متبعها دخلت لبيتها سدت لباب مساخياش ترجع فحالها راه تقدر تكون اخر مرة يعطيها المدير تجي هنا كانت مرتاحة وعاجبها الحال ديجا جمعت حوايجها فشانطة ديالها تأكدت انها منسات والو بدلت حوايجها دارت اكخو وعكر خفيف دماغها خدام انه كاين بزااف دالطرق يتشاوفو واخا مغتكونش بحال وجودها فاس وفوق من دارو، جرت الشانطة خارجة لقاتو جالس فدروج برا غير شافها بقا متبعها حتى وصلت حداه نافخة حنوكها)
اورطيغا: مال الزين مقلق
ملاك: والو
اورطيغا: مزال ترجعي؟!!
ملاك: معرفت
اورطيغا: غترجعي..
ملاك: (دورت وجهها معاجبهاش الحال)
اورطيغا: (حرك راسو باه وقف وهي هزت راسها فيه بحال بغا يهضر وهو يسكت حنا جيهتها تنغمت بريحتو هز ليها الشانطة وتم هابط سدت باب الدار وتبعاتو لقاتو واقف حدا باب دارو) حقا متشوفيش بيت نعاس ديالي؟!!
ملاك: مرااااد
اورطيغا: مدخليش!!
ملاك: (تبسمت تخطاتو وهبطت مع دروج تبعها وصلو لتحت شافت طموبيلتها وهي تبسم فرحانة) ناري توحشتها
اورطيغا: (حل الكوفر كيدخل الشانطة كيشوفها وهي كتقلبها قربت تعنقها وداكشي للي لقاها معنقة لڤولون تكا على الباب) سعدااتو (شعل ݣارو للي قلييييييل فين كتشوفو كيكمي)
ملاك: احم بشحال حسبها
اورطيغا: مليون ونص
ملاك: (تبدلو ملامحها) شناااااااهوااا!!!
اورطيغا: (صاك الدخان) كيف سمعتي ازين..
ملاك: (خرجت عينها) حلف بالله!!!
اورطيغا: ههه محسبش شي حاجة يمكن راه قلييلة، مهم شنو بغيتي تقدااي؟!
ملاك: صافي بلاش
اورطيغا: هه متاكدة؟!!
ملاك: اه اصلا خاص نرجع كولشي مجموع وانا بقيت هنا واش بالصح مليون ونص مالو ركباي فيها موطور ديال الطيارة
اورطيغا: هه نتي بزااف
ملاك: بعدا حين من شوية (هز حواجبو فيها) بالص بالصح شحال قلتي حسبها ليك باش نمشي نتيري
اورطيغا: دابا سد حتى ترجعي وخلصيه
ملاك: معارفاش المحال فين
اورطيغا: وانا لاش كااين، انا ندييك ليه (تبسمت وشافت فيه بغات تركب وهو يدير يدو مدخلش) انا نوصلك
ملاك: (عجبها الحال وفرحات) لا بلاش عليك
اورطيغا: (شير على شي واحد ضارت كتشوف كانت صطافيط) ياله املاك باقي تابعني طريق
ملاك: علاش فين غتمشي
اورطيغا: ركبي بعدا (مشات ركبات فالجهة الاخرى ركب هو وزادو تابعاهم صطافيط) مغدية بعدا
ملاك: لا حتى نمشي للدار
اورطيغا: علمتيهم؟!
ملاك: لا ماما كتبقى رادة البال معايا بزااف حتى كنوصل
اورطيغا: (نفس التفكير) عندي شي خدمة فݣيݣو
ملاك: ݣيݣو؟!!
اورطيغا: الحاج بغا يشري شي فيرمة تماك بكولشي ديالها، بك** مكنتش عارف حتى طاح علية بحال شي حز**
ملاك: (غير كتسمع تخصار الهضرة عندو فالدم ولكن كيعاود معصب مصلاحش تريكلامي) معليش
اورطيغا: الا فت الجمعة و البلان متغيزش حتى العرس موحال نحضر ليه
ملاك: ألااااااااااا
اورطيغا: (شاف فيها ورجع شاف فطريق)
مهم نشوف كنديرلها
(بقا كيعاود ليها على هاد الفرمة للي مهمة عند الحاج وشنو فيها للي خلاه يشريها، صفرو مكانتش بعيدة دغيا وصلو شافتو ماشي فطريق دارهم)
ملاك: عارف طريق؟!
اورطيغا: اممم
ملاك: من داك المرة فاش جيت
اورطيغا: تحفرات عندي (فرنست قبل ميوصلو للقهوة)
ملاك: صافي غير هنا
اورطيغا: علاش؟!
ملاك: بابا كيكون فالقهوى هو وعمي وجدي ورجال خوتاتي راك عارف
اورطيغا: (حبس فالجنب وشاف فيها وحتى هي واخا كتهربهم مرة مرة)
مهم، الألو بيناتنا
(حركت راسها باه حتى شافها هبطت حتى هو هبط وتمات جاية عندو هو كيشوف فالارجاء واش يبانلو حمزة، حتى ضارت من الجهة الأخرى ركبت فالطموبيل)
ركبتي الوزغة
ملاك: سير باش متعطلش
اورطيغا: اوووو متبكيش عارفك مسخيتيش بية
ملاك: ههه كنتخنق امراااد ههه (بقا كيتبسم سد باب طموبيلتها)
عنداك تزݣلي شي بوطو
(شيرت باي ومشات حاضيااه من لمرايا وهي تشوف دغيا حيت مزال موصلت لداك سطاج تصوݣ وتحضي اما هو ركب فصطافيط مع الدري وتمو ماشيين…)
ملاك: (وصلت حدا القهوى ديالهم وحطات الطموبيل ديالها كدور عينها كيبان ليها راجل نعيمة جاي فاتجااهها تبسمت معاه وقف حداها مدت يدها سلمت عليه كيتساولو على الاحوال خرجت الشانطة من الكوفر)
قولي الدار عامرة
حميد: عاااامرة
ملاك: ههه صبر وصاافي (بغا يجر معاها) معليش اخويا غير رجع للقهوى متقيلاش.. (رجع هو وهي بقات جارااها ووجها متبسم دوزت أحسن أيااام لدرجة مسخااتش ومتوحشاتش داارهم!!
وصلت للدرب كتلقا مع بنات عمها للي جاو تسالمت معاهم ودخلت الدار كانت عامرة بالعائلة هاد الاجواء كيعجبووها سلمت على كولشي ومها عجبها الحال حيت فهمت انه منين خاصمت عليها رجعات فحالها.. حطو الݣوتي بقاو كياكلو حتى جاها السؤال)
….: مزال مبان شي عريس املاك؟!
ملاك: (تبسمت) واامخبيتو عليك اخالتي
…: اوا راك كبرتي نوضي تزوجي ديري ولادك
زهرة: كفاش كبرات؟!! (من سؤالها بينت معاجبهاش الحال، هضرت وحدة من العائلة تبرد الطرح كتشكر فملاك، ومها بقات ساكتة ولكن هاد المرة مغتسكتش ومغتخليش شي واحد يآذي بنتها صغيرة)
سمعي افتيحة وهادي اخر مرة نعاودها لا ليك لا للكولشي بناتي انا ربيتهم ماشي على فكرة زواج هو كولشي فالدنيا هو مكتااب من عند الله ياك هاكا تعلمنا فالدين ولا لا!!!
الكل: كاينة
زهرة: اوا اخر مرة نشوف حباب بنتي كيسولوها على زواج حيت هي وكان بغات غير تسمى عليها مزوجة وكان راه مشحاال هادي تزوجت بنتي نهار تبغي ونهار يكتاب غتوكل على الله وللي بغا يفرح بيها بنتي تبارك الله خدامة وكتكمل قرايتها وعندها احلامها كتحققهم راسها انا مكنقص من حتى واحد ولا وحدة كولها ربي وباش كيسهل عليه وشنو مكتبلو ولكن كل مرة نسولو بنت على زواج انا براسي مكنفهمهااش هاد القضية (للي سولت معجبهاش الحال بقات غير كتصووط..
كملو جموع وملاك لقلوبة خارجين من عينها على حساب مها ولكن تلفت بقات غير كتشرب فأتاي كاس مور كاس كملو جموع وجا دجاج باش يتنقى)
خديجة: ملاك تمشي للنݣافة
ملاك: (حاضية تيليفونها كتسنى ابيل من عند اورطيغا) ما فياااش
خديجة: عفااك يااله باش نشوفو الجلسة دالحنة وحتى نتي تختاري دوك لعيبات
ملاك: وااخ (مشات لبيت ماماها كتسائل) واش نصوني عليه!! لا لا هو يصوني حسن (دخلت عندها مها مشات عنقتها)
توحشتك ازمرة
زهرة: (ضربتها لظهرها) شي نهار نحك لمك السودانية لدوك شناايف
ملاك: ههه وغير حبا فيكي وصافي
زهرة: معامن مشيتي لبحر
ملاك: (بعدت من حداها وتبسمت) مع واحد (كتفرنس)
زهرة: هااااااه (جات هادة عليها بغات تضربها وهي طلع ليها فوق النموسية مشايفاش أنير للي ناعس تماك)
ويل مك خوك نااعس
ملاك: (شاف تحتها على شوية كانت غتزطم عليه) والله مشفتو…
اورطيغا: (غير وصلو لݣيݣو
(ڤيلاج صغير بين صفرو وبولمان كولو فيرمات وفلاحة)
مشاو عند مول الفرمة للي كانت بعيدة شوية على لڨيلاج لقاوه كيتسنااهم دخل شافها كانت كبيرة فيها ارض الفلاحة فيها كوري كبيير مقسوم بين شيااه والبݣري فيها ساريج كبير ديال لما و3 ديال لبئر عجبو بزااف عطاه التسبيق على ميوصلوه الفلوس فالكونت ديالو نيشان مشات تكتابو عند العدول فالدار حيت هو عارف الحاج وتااايق فيه، عاد دااهم لبلاصة للي غيباتو فيها هاد الوقت منين يكملو..
دخل هو دوش عاد رجع تكا فطليق هز التيليفون هضر مع الحاج عطاه التقرير بالتفاصيل واخا هكاك علمو باش يفيق بكري يرجع للفرمة ويتحقق من كولشي، قطع معاه من بعد معرف انه غيتخلص على هاد الخدمة للي حتى هو مكيتعاتقش حيت الخدمة خدمة والعائلة عائلة، مصوني على مو يطمئنها على حالو ولقاها كتوجد باش صباح غتسافر لصفرو، قطع وحط التيليفون متكي فوق السداري اما الدري للي معاه مشا خرج يجيب شي حاجة، راسو عاامر بلمطااارق مغمض عينو باغي ينظم افكارو مزياااااان…)
~~~~~~~~~~~
ملاك: (مشاو للنݣافة تشغلو كيختارو الجلسة والاكسسوارات)
واش غيجي يوسف صافي تأكدتو
خديجة: هو اه غيجي ولكن المشكل مو مابغاتش تجي
ملاك: اوا يجي غير هو
خديجة: داكشي للي قال ولكن غير غتعرفوو جاي حتى هي غتبغي تجي
ملاك: تجي مرحبا بيها
خديجة: داكشي، ملاك انا عارفة يوسف قالك فين غنمشيو من مور العرس
ملاك: اه
خديجة: قوليلي فين
ملاك: هه لا
خديجة؛ وعفااك ختك انا
ملاك: بيناااتكم اختي وحتى نتي صبري على خبزتك السيد داير ليك مفاجئة علاش بغيتي تحرقيها!! مهم لبلاصة زوينة
خديجة: غير اشمن بلاصة فاوروبا
ملاك: علاش هو قالك اوروبا؟!؟
خديجة: (تصدمت) هااء!! وعلاش بغا الباسبور وهو بفمو قالي برا المغرب
ملاك: واااا اوروبا اختي خديجة راه فيها الڤيزا وشلا ورااق
خديجة: كفاش زعما راه غيكون صايبهم هو
ملاك: لا الڤيزا نتي كتكوني حاضرة فيها وبرا المغرب راه فيه بزاااف ماشي غير اوروبا (شافتها تصدمت) راه المهم هو غتسافرو بجوج ودوزو شهر عسل زوييين شوفي هو كيفاش فكر يبدل ليك الجو وباغي غير يفرحك
خديجة: اه. لكن غير فين زعماا!
ملاك: فينما خداك راه ربح متبقايش تحكري بزااف مهم البلاصة بحال شي جنة شي حاجة طووووووب
خديجة؛ بالصح!!
ملاك: كتحمق وكتر من هاكا مغنقوولك والو ياله زيدي نمشيو
خديجة: (خلاتها داايخة بغات تعرف فين غتمشي وكلام ملاك منطقي هي مقادات لا فيزا لا واالو علاش مفكرتش فهادشي حست براسها بالصح مكلخة!! زادت تنوغشاات فين غيدييها!!!
دارت لاصير لحمها كامل من غير المايو حتى نهار العرس ودارت معاها ترجع غدا باش تقاد ظفار اما الميكاب ارتيست غتجي للدار باش تقاد ليها داكشي دالحنة وتلبسها…)
يتبع
التعليقات 0