جيتك ياالأيام بالتيسير ووقفتي في طريقي بالتعسير…خلاوها اللوالة مول النية وقليل النية طريقهم منسية ،والثقة والغدر حجارهم في النار مرمية … هذا شحال قبل مايتعلم الإنسان حرب الفهامة والحكام،كانت الكلمة فحال الجبل ماتراد والرجلة كي الخيل الفحل ماتهد …يقولو الثقة كي الجوهر ماتعطا غير اللي يستاهلها،أما الغدر سهمو من سهم الثعلب … في قديم الزمان كانت الريح ماتحرك بيبان ،أما دبا في قصر عرش السلام رجعات كتزعز الحيوط وتنبش السيسان…
•••في جناح عريض وسقفو عالي ، حاملة في إيدها المرود ديال الكحلة كتجبد في عينها الواسعة …لونهم كي لون اللوز الغالي رسمات ضحكة على شفايفها ،و خطفات المرايا المصنوعة من شجرة الصبار من جنبها، قابلتها مع وجهة ..اللي بحال النجمة في السماء ،زادت وسعات ضحكتها كثر …وخدات منديل من الحرير مسحات به على حاجبها اللي كي الهلال …ووقفات كتفتل في ضفيرات شعرها المذهب وتقاد في قفطانها المرصع بخيوط حرير الدودة …
دخلات مرأة لونها لون العُناب عامرة وطويلة، وعلى وجهة مرسومة التبسيمة ،حاملة في ايديها النبالة من الياقوت وخلخال من النقرة الصافية.. قربات لها كتساري عينها على زينها اللي فثن المحكوم ورجعاتو في التخمام هايم كالمجنون …أما زينة البنات في حضنها ترمات والبسمة والدمعة من عينها نزلات …شافت فيها ونطقات
ــــ “عطور” غادي نتوحشك أدادا بزاف شكون غادي يحوك ليا حتى يطيب نعاسي..شكون غادي يسمع لمحايني فاش نقاسي…شكون يهرني حتى نسى باسي
ــــ “الباثول” سنة الحياة أبنتي اللي ماجابتها كرشي واللي هرب من السنة هرب من الطاعة
ــــ “عطور” عارفة اللي كاين أدادا غير هو البعد صعيب مايداويه دواء مايعالجو طبيب
ــــ ولواه تاني اعطور نقصي من الفشوش وتبثي الوتاد وياك يغرك عدو الله وتخطاي كلمة السياد
جلسات فوق التكاية مدلية شفايفها اللي بحال الثوث …أما الباتول جابت بريق من الفخار وجيرة من الصخر محروقة بالنار حطاتها تحت رجليها
ــــ مدي رجيلتك أبنتي باش يزول النحس ويتسكد ميمونك
ــــ أش هذا أدادا ؟
ــــ ماء النقرة والمسك الكحل
غسلات لها رجليها بماء النقرة من بعد لبساتها شربيل مطررز بالذهبي …
جابت النبالة والخلخال قادتهم لها زادو عطور زين على زين …شوية وهو يدخل سيد الكامل وجهو مبشور وغير من التبسيمة اللي محلية شفايفو باين عليه الفرحة والسرور …حامل في ايدو صندوق منقوش قرب من عطور وانطق
ــــ تبارك الله على نوارت قصر عرش السلام شحال طالعة فنة.. كي النجمة اللامعة في السماء
عطور تزنگات و وراء حشمتها تخبات مسكات ايد سيد الكامل قبلتها ثلاتة دالمرات …أما هو فكان حاس براسو ايطير مع الطيور بالفرحة وأخيرا بنتو ونوارت قلبو غادي تعرس وتمشي لدار راجلها …حل الصندوق سل منو تاج مرصع بالعقيق والمزون ..حطو فوق شعر بنتو ،طول الشوفة فيها وانطق
ــــ سبحان الله كتشبهي المرحومة مك نفس العنين ونفس الحشمة والتبسيمة
ــــ [حنات رأسها بحزن ]مكرهت كون كانت معايا في هاد النهار الميمون كانت فرحتي غادي تكمل كثر
ــــ هي رآها معاك وكتشوف فيك.. ليوم يومك خليك فرحانة وحتى هي غادي تكون فرحانة
في ساحة القصر واقفين الطبالة كيضربو في الطبول وناس دالقبيلة فرحانين لعطور …من غير السالكة مرات عمها اللي مكوية بنار الحسد مكرهات تهب شي عاصفة وتقلب لهم العرس سفاه على علاه…وقفات ساست عبايتها الكحلة تقول جات لجنازة ماشي لعرس ،شافت فيه شوفة وحدة وتبعها بحال الكلب المصعور بعدو على القصر شوية وهي تشنق عليه حتى تزعزع من بلاصتو
ــــ “السالكة”أش ساير الدير ياعيفت الرجااال ولدنا غادي يموت بسبب ديك الكرجيتة الصفراء اللي ضاربها الشمس وانت واقف التفرج مخاصك لا خير ولا خمير
ــــ “الطاهر”اسالكة الله يهديك أنا مابيدي حيلة لا الحكام حكمي ولا الكلام كلامي واللي دار الذنب يستاهل العقوبة
ــــ اسمع ليا اطاهر وحالفة باش تحلف العيالات الحرات لدخلتي لدار ولا عتبتي بابو ولا قربتي لوتادو… إلى ما خدتي حق ولدي اللي مسجون بين الحيوط لا حنين لا رحيم وانت بارك حال فمك كي الهبيل
ــــ وشنو المعمول نمشي نقتل ولد أمي وبويا والنقد ولدك اللي دارها بيا وضحك العديان فيا
ــــ أنا عارف شنو المعمول أنت ماعليك غير تنفد باش نزولو هاد القرد الشارف من طريقنا ونقلبو عليه الحكام ويرجع هو المدلول
ــــ كفاااش اسالكة لا لا مايرك خالعيني بغا طيحيني في شي مصيبة اللي منها مانولي
ــــ تبعني وسد دلقوشك ولا والله حتى نخلطك معاه…
تعشات العشية والضوء اختفى وجاء بدلو الظلام …وفي قصر عرش السلام البندير والغناء مسموع في كل مكان.. ها اللي فرحان ها اللي ناشط وفي تخمامو سرحان وها اللي قلبو كينبض بالغل والحقد وكاره يشوف الفرحة على وجه كل إنسان …أما زينت الزينات فمادا ايديها لحناني كتقشب مع بنات القبيلة اللي دايرين بها ومحيدين العين عليها وعاطينها لتقرقيب الناب وضريب المعاني.. انطلقات شامة مولات الخالة
ــــ ايوا شوفو على عطور ها هي غادي تزوج ويغبر نحاسها في نقرة القايد سليمان
ــــ [ضحكات عطور ] ايوا لعقبة لكم يالبنات يالمسرارات انتوحشكم بزاف ونتوحش تقرقيب الناب معاكم والتشيطانيت ديالي وديالكم
انطلقات تفاحة اللي ريحت عبايتها فواحة بالمسك والبخور
ــــ ايوا عاودي لينا على القايد سليمان
ــــ بحالو بحال غيرو من الرجال لكن في الزين مابحالو زين والشوفة فيه تخليك بحال الدجاجة المتلوفة ،أما العين والكلام الرزين فكيخلوك مبهوض بحال الهبيل [تنهدات ورسمات ضحكة على طرف شفايفها وكملات] أما الطولة طولت النخلة الشديدة، والوقفة كي السيف الماضي منين ما جتيه يبكيك
ــــ “شامة” احم احم الحب ومايدير يااااختي
ضحكو البنات مجموعين جات الباتوب هازة في ايدها اليمنى طبق من الثمر واليسرى طبق من الحنة ورق ..وسط منها المسكة والحلوى حطاتها فوق الطابلة، شوية تبعاتها الخادم هازة في أيديها الحباق وبالعمان… حطاتهم جنب الطبوقة ورجعات تكمل شغالها …أما المقصورة اللي على برا كانت عامرة بالرجال وكلها يلغي بلغاه ويحكي على عرس بنت السلطان اللي ماليه مثال والماكلة اللي كتفرق بالزايد … في كل بلاصة في القبيلة…دخل السلطان الكامل وفي جنبو المشاورية اللي عمرهم خطاوه ،كيرحب بالناس بنفسو وفرحان بالجاي والغادي بالنسبة له هذا هو النهار الميمون مني كتاب له ربي يشوف عرس بنتو عطور ويفرح لفرحتها ويتهلا في ضيوف عرسها …
ــــ “الكامل “نهار كبير هذا مرحبا والف مرحبا بأهل القبيلة شاركتنا فرحتنا ونتمنى ربي مايخيبنا في قدامكم تفضلو جلسو [عيط على الخدم ديالو اللي كانو لابسين سلهام بالبيض وتوب بالحمر وحاطين عمامة بالحمر فوق رأسهم ] بغيتكم تهلاو فالضياف مزيان الجاي مايبقا جيعان والغادي يمشي فرحان
ــــ “واحد من الخدم” كون هاني امولاي
خرج سيد الكامل طلع لجناحو يرتاح شوية من عياه لابين مايجي هودج العروسة وعريسها سيد الرجال… حط راسو على المخدة كيراجع فكارو ويشاور خيالو بخصوص ولد خوه المتعوس اللي حاط راسو في النخلة حتى نقبو الدجاج …وكما كيقولو اللوالى اللي دار الذنب يستهل العقوبة ،بعد فكارو محيت هذا ماشي وقت الحديث والتخمام هذا وقت الفرحة والصلاة والسلام …شوية وهو يدخل واحد من الخدم مبهوض واللون من وجهو مخطوف كينهج ويقول مانهجت والو …
وقف سيد الكامل مخرج عينه من الطريقة اللي خادم دخل بها عليه
ــــ ياااك لباس شفتك مخلوع تكلم
ــــ مولاي موصيبة وقعات فوق راسنا
قبل مايكمل الكلام وينقل الخبار اللي تريب الدار … تسمع الغوات وصوت الخيل وريحت المضى وخطاوي الرجلين ، سل سيد الكامل الخنجر من حزامو وخرج كيجري والخدم والحراس ديالو كلها فين مرمي ودمو سايح اما ناس دالقبيلة كلها فين هرب ونفد بعظامو …قلبو تقبض ونفسو رجعات بزز كطلع وتهبط كيقلب بعينه على بنتو ودواء قلبو أما القصر فرجع حالتو حالة ….دخلوه القطاطعية والزواگة مخلاو لا طير يقد يطير ولا عبد يوقف على رجليه كلها فين مصلي …يلاه ايتحرك وهما يدورو به وعلى عنقو تحطو السيوفة …رجال كي غربان الواد ملتمين برزات كحلة ولباسهم كي الظلام في ايام البرد القارس ،،وعيونهم كي الجمر في وقت الصهد الحامي شاف في كبيرهم اللي متوسطهم وانطق
ــــ شنو بغيتو عندي وشكون نتما ؟
ــــ “كبيرهم” حناااا هههههههه السلطان الكامل بهمتو وشانو وماعاقلش على الورادة اللي من قبيلتو خروجهم ومن ديورهم جردهم ومن ولادهم حرمهم ولا عند بالك قطعتي الواد ونشفو رجليك ومن المرجة غسلتي إيديك
ــــ نتما اللي ظلمتو راسكم وباغين تخدو اللي ماشي ديالكم وأنا حكمت بحكمة الله وانتما كتبقاو غير قطاطعية وعديان الله مافقلبكم رحمة ولا شفقة كتعرفو غير النهيب والسريق
ــــ جاء الدور عليك باش تخلص بالمْثْني والمتَني وتفدي كاع دكشي اللي خسرتنا(شاف فهم) سلسلو ليه رجليه مع إيديه حتى يوصل الحاكم ويشوف شغلو معاه
ــــ الخلاص الله اللي غادي يخلصكم والحاكم الله هو اللي غادي يحكم فيكم
ــــ دوه عليا من هنا ربطوه فين كان مربوط جابر
جرينو كيردد [في حسبي الله ونعم الوكيل فيكم طول الطريق ] دخلوه القفص ربطو ليه ايديه لفوق وخلاوه كينين ويحاسب فهم ربي اللي قادر عليهم …
وقفات السالكة في وسط القصر كضحك وتورخ عاجبها الحال.. ومنظر الناس المدبوحة كي الخرفان ..قربو لها انطق كبيرهم
ــــ ايوا شغلنا وكملناه والكامل حبسناه دبا النوبة عندك توفي بكلامك
ــــ أنا عند كلامي ووعدي من مقامي [خرجات رزمة كبيرة مصرورة] ايوا هاأنا الشئ اللي تفقنا عليه.. فيها اللي يقدكم من هنا لأعوام ويسد محاينكم ويخلص دينكم ويكبر من مقامكم
شافو في بعضياتهم وضحكو كيحركو في رأسهم عاجبهم الحال خدا كبيرهم الرزمة فتحها …غير شافوها وخرجوا عينهم أش منك يا جوهر وأش منك يا ذهب وخلخال واش منك ياعقيق المرجان و كثراات الفلوس اللي ترجع العداوة مابين الجار وجارو ولد العم و عشرانو…
ــــ ايوا دبا ماشفتوني ماشفتكم لا راس تألم و لا لسان تكلم
ــــ كوني هانية ومن اليوم فين ما بغيتنا أتلقينا واقفين حسكة حدا رجليك ونفدو لي رضيك
كلها ركب على الخيل ديالو وكملو طريقهم أما السالكة فطلعات القصر كتغوت وتجري وتجاري دايرا فيها مسكينة ومافخبارها مايتعاود… أما ناس دالقبيلة والرجال اللي جاو يعاونهم وكيقلبو على السلطان وبنتو اللي غبر لهم الأثار تقول الأرض تشقات وبلعاتهم …كتقلب بعينها على عطور عاقدة حجبانها شافت واحد من الخدم اللي كانو مخبين وانطقات
ــــ قلبو على عطور راها مخفية مابان لها الأثار بغيتكم تلقاوها وتجيبوها فين ما كانت
ــــ هي اللولة السالكة
وقفاتو مخنزرة فيه
ــــ عاااود شنو قلتي انا لالك السالكة ومن اليوم حلي بها فمك بحال العسل وإلا غادي نقطع لك راسك ونرميه الضبوعة
ــــ سمحي ليا الآلة السالكة
مشا كيجري خدا معاه جوج من الخدم كيقلبو فكل بلاصة في القصر على عطور واالو تقول خداوها أهل المكان …
قضاو ليلة كاملة وهما كيقلبو عليها …في غرفة المشاورة جالسة السالكة على كرسي الكامل.. كدوز عليه بايدها والتبسيمة مرسومة على وجها أما الطاهر فواقف جنبها بحال الفار الخيفان ميسمع ما يتكلم مايعطي رأي ما يتمتم …أما جابر فغير غادي جاي وغارق في التخمام… كيفكر في اللي خدات قلبو وسلبات عقلو من بلاصتو ماهمو لا مقام ولا حكام شاف فيها وانطق
ــــ عاااجلك هادشي اللي درتي اممم هاهيا دبا معرفتها لا ميتة ولا حية لا مجروحة ولا مدبوحة
ــــ “السالكة”يشوني فيك وفيها خاصك تهز بمقام موك اللي رجعاتك همة وشأن أما ديك الصفريطة النايحة كون بغاتك الله لا فاتك وتختار اللي علا من شطايطك
ــــ أمي فهميني أنا إلى متزوجت عطور غادي نقتل راسي وانتي عارفة هادشي انا ماهمني لا قصر ولا مقام خليهم لك انا باغي عطور باااغي عطور جيبو ليا عطوور اعباااد الله بغيت عطوور
وقفات كتجري سادة ليه فمو هي والطاهر
ــــ شوووت فضحتنا سكوت الله يقطع لك الحس لانت ولا ديك الكرجيتة الصفراء غادي لقاو لك هاد عطور ولكن غادي تبع كلامي ودير بوصايتي وعطور القاوها وخا تكون مخبية في الماء
حرك راسو …بعدو أيديهم عليه كيتنفس قلبو مقهور على عطور اللي خلات غصة في قلبو ومشات مابقا بأن ليلها من نهارها جلس نشر رجليه فالارض كيلتقط الأنفاس ديالو
ــــ أمي اأمي جبي ليا عطور بغيت عطور بنت عمي والله مانكل مانشرب إلى ماشفتها قدامي
ــــ وخا وخا اولدي غير كون هاني غادي نقلبو عليها ماعندها فين تغبر إلا مالقاوها في شي قنت في القبيلة
جرات الطاهر مخنزرة فيه كون كانو عينها قرطاس كون خرجاتو فيه … كتشير ليه بعينها فاتجاه والدو جابر اللي الدموع سايحين من عينه بحال شي دري صغير
ــــ “الصاهر”ولدي جابر نوض الله يهديك غادي لقاو عطور بركا من البكا
شافت السالكة فيه وفي التعاطف ديالو وكلامو البارد وهي تجرو مخرجاه حتى لبرا …فسخات شربيلها من رجلها وبدأت كتشحط فيه
ــــ شد ياااا تركت الويل كون تلاقيت بضبع ولا نتلقا بفااار بحالك شد شد ها متستاهل تركت الدجاج المتلوف غبر عليا شقفك قبل مانديك حدا داك الشارف الهارف ديال خوك
مشا طاهر الخواف كيجري ماقاد يتكلم ولا يتمتم أما هي لاحت شربيلها مكرفتاه ليه
ــــ الله يتبعك البلا وينعسك على جهت القبلة
دازت الأيام ولاد القبيلة عياو يقلبو على عطور اللي غابت ومابقات بانت ، أما سليمان ولد القايد لقاوه مدفون جنب الروضة المنسية … الحصول ومكاين الدنيا بحال دراعة العريس كل واحد كيلبسها مرة وحدة …ياتخرج سالم ولا تخرج تألم .
في القصر عرش السلام جالس جابر مهموم وفي جنبو المشاورية كيخيطو ويفصلو غير بوحدهم…وااالو قالك باغين ياخدو حقهم من اللي كان سباب ومعارفين باللي دايرين بهم الدياب …دخل الطاهر اللي رجع من المشاورية ديال ولدو غدر في ولد باه ومو وتبع كلام مراتو اللي العيشة معها بحال السم إلى ماقتلك ما يداويك …حاطه تحت الصباط بحالو بحال الفأر الهربان من غارو… نزل عند اوذن جابر اللي رجع ينفد الحكام
ــــ ولدي جابر وصل الشيخ ورجالو قلبو القبيلة سفاها على علاها مالقاوش عطور شنو المعمول
ــــ خليهم يمشو ويعاودو يقلبو من جديد
خرج الطاهر خبرهم بالأمر ديال جابر.. الشيخ والعوان ديالو عياااو نهار ومطال وهما كيجرو من دار لدار لا هم رتاحو ولا كلاو حتى شبعو….
واقفة كطل من السرجم مقادة حاطة الكحل في العين والسواك بين السنين لابسة قفطان فالابيض والكحل …هازة حاجب ومنزلة الاخور كتشوف فيه معوجة فمها … كتندب رأسها على زهرها المنحوس هز عينو شاف فيها وتبسم غير شافت ضحكتو قالت من بعد ما سدات السرجم ودخلات لجناحها
ــــ تهجرو إن شاء الله ياكحل العفطة كن كحلت بالماء حسن ليا وما نكحل بك …
وسط ارض بالعمان كلها ورد وحباق وسوسان أرض خضرة مايكسبها كاسب ومايورثها عطاش كيقولو لها الأرض الميتة ،محيت مديال حد وناسها مجهولين والسلطان الكامل عمرو خلا شي حد يقرب منها معروف عليه العدل والوقار … وكما كيقولو اللوالى اللي قنع بالقليل يدزيه واللي تبع الطمع كيعميه ورزق الشوف يبات فيه …جنب شجرة البلوط جالسة شامة مولات الخالة،وتفاحة مولات الريحة الفواحة والعليا مولات السالف.. كينقو في السبول وشادين الناب مانهم لصحبتهم اللي مابان لها أثر ولا لحكام جابر المطيار لا هو يكساب عقل صحيح ولا لسان فصيح…
انطلقات شامة من بعد ما تنهدات من قلبها
ــــ أنا البنات مابقات فيا غير ديك المزغوبة ديال عطور هادشي اللي وقع لها ماعرفناه ديار ماعرفناه سحور
ــــ “العليا” لا لا هادشي بان ليا فيه شي إن واااه العرس رجع جنازة وعطور ودادا الباتول غابر لهم الأثار.. وسيد الكامل قالو قتلوه ولد القايد لقاوه مدفون حدا الروضة المنسية ومن الفوق جابر مرة تولى الحكام بلاصة السلطان …متأكدة كاين شي حاجة تما
ــــ “تفاحة” سمعت في القبيلة كيقولو باللي كل شي من ديك اللفعة ديال السالكة والله واعلم وباللي جابت القطاطعية باش يقتلو السلطان وبنتو
ــــ “شامة” ردي بالك أتفاحة ولجمي لسانك بلجام لا يسمعوك العديان وترجعي في خبار كان حنا ماشفنا ماسمعنا
ــــ “تفاحة” وأنا غير قلت اللي سمعت وزيدون الهضرة اتبقا هنا
ــــ “العليا” ايوا الله يلطف بنا وترجع عطور لنا أما السالكة ربي غادي يخلصها… هي قراتها حسيفة في السلطان من نهار حكم على جابر بالحبس فاش سرق عطور وخبها في الغابة
ــــ “تفاحة” عندك الحق أالعليا سالكة الشر والحسد كينقط من عينها …خلاتها أمي فتوش القريب خليه ديما غريب لا يجي نهار ويتقلب ويولي عقرب
ــــ “شامة” البنات خليونا نمشو نبدلو الساعة بأخرى وهاد الموضوع ماتجيبو سيراتو لحد
وقفو البنات كل وحدة قادات صرايرها وعقدات لتامها على وجها وشدو الطريق لديورهم قبل مايبدا يطيح الظلام …
في غابة كحلة قحلة خاوية من البشار .. جوج نساء وحدة كبيرة وطويلة والأخرى صغيرة وقصيرة ، تايهين وسط الأشجار ضاربين اللتام وحاملين الهم وغصة على موت السلطان …خطاويهم زربانة بحال المشة الهربانة …وقفات المرأة الكبيرة كتنهج محيت عيات والنفس فيها تقطعات ،ريقها نشف وعطشات قربات القصيرة شادة في صرتها حطات أيدها على كتفها
ــــ ” عطور” دادا غير زيدي صبري إلا مالقاو شي بئر ولا واد جاري
ــــ “الباتول” لا لا ابنتي انا صافي مبقا فيا نفع رجليا عياو وجهدي تقطع غير كملي وخليني رآه عيت ومابقات عندي الرجل اللي تزيد الدفع
ــــ “عطور” رجلي على رجلك مانسخا بك ولا نفرط فيك أدادا بركا غير البا اللي راح ضحية ماتزدني انتيا… غير صبري على قبل هاد متعوست الأيام لي صرات ولاية
ــــ “الباتول” خلينا نرتاحو بين ما طلع الضوء وخا هاد الخلا مافيه أمان
شدات عطور بيد الباتول كيقلبو على شي شجرة كبيرة يباتو حداها حتى يطلع النهار …جلسو قرب من شجرة أركان وسدات الصرة لداداها أما هي بقات طول الليل كضارب مع التخمام.. وتراجع هاد الشئ اللي وقع لها من نهار خطبها سليمان …في نفس الليلة خطفها جابر وعاشت ليلة كحلة كي الظلام …وهاهي دبا هربانة وعلى طريقها تلفانة ومن السالكة وداك المطيار ديال جابر خيفانة … كتشوف حتى تعيا وترجع تقول هذا ميمونها العيان زين الفولة في سعدها الطايح وخيبة الدنجالة في سعدها المسكد… تنهدات من قلبها مخرجة الهم والغم كتشوف في جنابها حاضيهم علات عينيها لسماء اللي كانت طبق من التمر ..شحال وهي سارحة بعينها في النجوم اللامعة انطلقات بشوية
ــــ علاااش ياالنجمة زيني بحال لماعانك وسعدي بحال البئر الغارق حتى من عرسي مافرحت به كي الناس [هزات كفوفها كتشوف في الحناء اللي تخربقات في ايديها] شوفي حتى من الحناء رجعات بحال المرجة في ايديا ياااربي شوف من حال سيد الكامل وحميه بحمايتك
وسدات ركبة الباتول مغمضة عينيها وانطقات قبل ما تغرق في نعاسها
ــــ رضيت بالهم ومارضى بيا زهري في صفيحت العود وتعاستي في رجليا
طلع النهار وبنار الضوء بدأت الشمس تشرق والطيور تزقزق … كتحل فعينها اللي فحال اللوز الشعة ضارب فيهم خبات عينها بضهر ايدها ناضت تكعدات حركات الباتول اللي كانت غارقة في النعاس …فاقت حتى هي كتمسح في رويكها وتزول عمش عينها ، نطقات عطور
ــــ صباح الخير أدادا
ــــ صباح الخير ابنتي طلع النهار من كثرة العيا ماجبت خبار
ــــ خاصنا نشدو الطريق ونخويو هاد القبيلة
شدات بيد داداها نوضتها هزات صرتها في جنبها وشدو الطريق قطعو الغابة اللي كانت طويلة … غير بان لهم الغاشي وهما يتلتمو كملو طريقهم وخا العيا دارها بهم والجوع قتلهم لكن حلفو مايدوقو النعمة ولا تجي فمهم اللقمة إلى ما خرجو من القبيلة …
جنب واد جاري وقطيب الكراع داير به من كل مكان …
واقف راجل هاز عصا فيديو والغنم والكلب في جنبو.. عمامتو فوق راسو والوسخ والتراب معبي كساتو … وقفات عطور والباتول من وراه انطلقات عطور
ــــ السلام عليكم اشريف
تلفت يشوف منين جاي هاد الصوت
ــــ وعليكم السلام الآلة اش حب الخاطر ؟
ــــ إلى جات على خاطرك بغينا نمشو لقبيلة عروب واش تقدر دلنا على الطريق ؟
ــــ أيه الآلة الله أودي قبيلة عروب كاينة من وراء هاد الواد غير تقطعيه واتلقاي طريق طويلة مابين الجبال وهانتي دخلتي القبيلة ولكن شكون نتما ياك متعرضو لهم الزواگة في الطريق
شافت عطور في الباتول ورجعات شافت فيه وقالت
ــــ لا لا أسيدي ماتعرضو لينا زواگة ولا قطاطعية غير المرض والمحاين اللي داروها بيا… أنا مرأة مرملة ورجلي خلا ليا عگوزتي مسكينة من نهار مات وهي مريضة وشي ناس نعتو لينا واحد الشيخ حكيم وباللي دواها عندو والكمال على مولانا
ــــ بقيتو فيا الله يشافي ويعافي وتبعد العلة وشنو سماك الله
ــــ ءءأنا ههههه سمتي الكاملة اه الكاملة سمتي وعكوزتي غنجا
ــــ ايوا عرفتو دبا شنو غادي الديرو اتسناو حتى ينشف الواد هلي قطعوه محيت فالصباح كيكون حامل وجاري
ــــ وزعمة منقدروش نقطعوه دبا رآه ايمشي علينا الوقت ونخاف عكوزتي يتزاد عليها الحال
ــــ [ضحك] ايوا شنو انقولك ألشريفة ناس اللولين مخلاو التالين مايقولو وهذا شحال قالو متقطع الواد حتى يبان حجارو وماتمشي فالليل حتى يبان نهارو وما تعاشر صديق حتى تعرف خبارو وانتما تعرفو
ــــ عندك الحق أسيدي [لمحات الحمارة اللي مربوطة قريب من الكراع] وهديك الحمارة متقطعنا
ــــ لا لا ابنت الناس حمارتي هي اللي تهز شطانتي ما تمس ماتحدا مانقدر نفرط فيها ولا لحد نعطيها… بويا قبل مايموت وصاني نتهلا فيها ومانطلقها لحد يهز عليها
ــــ وغير شوف اوكان ماد لينا العون ماعرفتي ربي مناش ايحفضك وينقي طريق
ــــ كلمتي تابتة ومانرجع فيها الله يعرضكم السلامة واللي في جهدي درتو معاكم
شافت فيه عطور وتبسمات
ــــ أنت اللي جبدتي البلا واللي قلب على الضد انا مولاتو وحمارتك هي باش انقطعو الواد
ــــ “الباتول” بنتي عطور مقادين على مطايف ولا مصايب خلينا نتسناو حتى ينشف الواد ويبان حجارو
ــــ ألا أدادا غير ثقي بيا أنا راني ماندير لا بيديا ولا برجليا بغيت انعلمو كفاش يعاون الناس وتكون فيه شوية الإنسانية انتي غير حضني وتفرجي
بقات كتمشي هي وداداها حتى تخباو من وراء واحد النخلة جريدها مفرع وتمرها في الأرض مسرع …كطل عليه شافتو ملاهي كيغسل ايديه في الواد وكلبو جنب منو خرجات كتسلت بشوية بحال الديب اللي أينقض على فريستو …كان واحد الخروف صغير ماشي بزاف باش تزاد ناعس في الربيع شداتو بايدها واليد الأخرى قفلات ليه فمو باش مايبعبع رجعات تخبات شوية… قربات من الواد وهي ترمي فيه الخروف الصغير اللي بدا كيضرب برجليه وسط الماء طلقات غوتا وحدة حتى تخلع الراعي …نزلات الواد في بلاصة باين فيها الحجر هزات الخريف مطلعاه من الماء نصف في كساتها رجع مبلول خرجات …وقف الراعي اللي جاي كيجري ويلهث عطاتو الخريف
ــــ بقا ترد البال ليغرقو لك الخرفان كون ماشفتو ونقدتو كان الواد داه وعلى عينيك جلاه
ــــ [حنى راسو حشمان ] الله ينقي طريقك من الشوك كما نقدتي ليا الخريف [شاف حتى عيا وقال ]أنا انعاونكم حتى تقطعو الواد وهاد الحمار عتابروه لكم من هاد النهار
ــــ ألا أسيدي بغينا غير تعاونا حتى نقطعو الواد وينشفو رجلينا مابغينا لا حمار ولا بهيمة
ــــ ماقلتي عيب ابنت الناس تسناي نجمع الغنم ونجي نعاونكم حتى تقطعو الواد
رجع هز عصاتو باش يجمع الغنم ديالو و يكون عند كلمتو …أما عطور فرجعات عند الباتول اللي كانت جالسة جنب النخلة قردات حداها وضحكات طبطبت الباتول على ضهرها
ــــ يابنتي ياعطور فعايلك ولا بغاو يتبدلو منك بغيت انعرف فين تعلمتي هاد التحرميات
ــــ زمان الدياب هذا أدادا إلى مكنتي ذيب ايديروك وسطهم ويطبلو عليك وتكون غريمتهم
ــــ اه ابنتي اأه فين كنا وفين وصلنا شكون قال يجي النهار اللي يتقلب الزمان علينا ونرجعو ماعرفين ساسنا من رجلينا هاربين من العدو اللي عتبرناه صديقنا ورجع الطبلة علينا ودارها بينا
ــــ هذي هيا الدنيا أنا مابقا فيا لا قصر ولا مال لا جاه ولا زمان مابقا فيا غير بويا السلطان اللي ماعرفناه حي ولا ميت وأكل ولا جيعان مغطي ولا عريان
ــــ ربي كبير ابنتي وسيد الكامل عمرو اذى شي واحد لكن العديان حسفوها فيه حسيفة وغادي يجي النهار اللي يتقلب عليهم الميزان
كايد البهيمة محلسة وملجمة قرب لنخلة …غير شافوه وقفو عاونو الباتول حتى تقادت فوق الحمارة وطلعات وراها عطور اللي كانت مشبرة وخائفة ..جر بهم الراعي الحمار باش يقطعهم الواد طولو طول النهار وعرضوا عرض الليل …مشبر مزيان في العصا اللي مكيتحرك حتى يعرف فين حاط رجلو لا يغوس في شي حفرة ديال الدهس وتمص رجلو …داز وقت طويل وقفو في الجيهة الأخرى من الواد وانطق
ــــ على سلامتكم هاني قطعتكم وفيت بوعدي لكم
نزلات عطور وعاونت الباتول حتى هبطات هزات صرتها اللي كانت حازمها دادها وانطقات
ــــ الله يرحم والديك أسيدي وكما درتي فينا هاد الخير بغيت ربي مايخيبك ويزيدك خير فخير
ــــ أمين الشريفة دبا غير قطعو هاد الطريق واتلقاو جوج جبال وسطهم حيوط المقدار وياااكم تم ويااكم يقبضكم الليل بين حيوط المقدار الرايبة
ــــ ” عطور “وعلاااش أسيدي ياك مكائن بأس؟؟
ــــ كيقولو باللي مسكونة وساكنها راجل وجهو بحال الذيب وخليقتو كتسيف بالليل
ــــ ههههه وباقي كثيقو بهاد الخرفات
ــــ ايوا كما كيقولو ماعلى الرسول إلا البلاغ دوزو بخير
رجع الراعي لقبيلتو …أما عطور والباتول كفضو على عبايتهم وطلقو رجليهم شادين الطريق …شمس بدأت تروح أما الباتول فقلبها مامطمنها وخصوصا من بعد ما شافت الظلام بدأ يطيح وحيوط المقدار قربو يوصلهم ….صوت موكا والطيور كيتسمع والليل سدل ظلامو والقلب دخل لو اوهامو… شدات عطور في ايد الباتول اللي كانت كتقطقط بالخوف من بعد ما شافت شي خيال مر من قدامهم …حسات بقلبها في كرشها طاح والصرة من ايديها تلاحت، شافت في الباتول اللي عينيها خرجو من بلاصتهم والبولة مبقا لها والو وتنزل ،أما ركبيها رجعو كيقفقفو، بحال الشارف الهارف اللي مابقا بينو وبين القبر غير شبر دالتراب انطلقات عطور بشوية
ــــ دادا شفتي اللي شفت
ــــ “الباتول “مشينا فيها هاذي هي اللاخرة لينا مامتنا على ايدين عديانة وانموتو بين حجر ديال حيوط المقدار المسكونة
ــــ وقيلة غير كيتخايل لينا خلينا نزربو في المشية باش نفوتو هاد الحيوط المخلية
تحركوا وخا الخوف شادهم من صباعهم لرجليهم كيتمشاو مرة مرة عطور كتلفت ….كملو طريقهم غير دارو مع الدورة وهما يلقاو شي حاجة واقفة قدامهم ضل طويل وعريض غادي وكيقرب لهم وهما كيرجعو باللور …عطور حسات بالسخفة قطعو الحس وضربوا الطم … أما الباتول كتسرط في ريقها كرزات على يد عطور وطلقو رجليهم الريح كينهجو ويلهثو …دموع عطور على خدها مسرسبين
ــــ واااا ربي شكون هادشي فكنا يالعالي ورجانا فيك مالينا حد من غيرك
ــــ “الباتول” جري ابنتي جري قبل ما يشدنا ويتعشا بينا هذا مايكون غير الديب اللي عاود لينا الراعي
بقاو كيجرو وسط النواعر المخلية البلاصة اللي سلكوها كيلقاوه قدامهم وكيرجعو يجريو من جديد كاع الاتجاهات جراو فيها حتى عياو وهما يوقفو الوسط…عطور والباتول كيحسو بالدوخة والأرض كدور بهم ماحسو حتى تغمى عليهم….
في قصر عرش السلام جالسة السالكة لابسة قفطان في الحمر وشال فوق راسها فيه الابيض والصفر كتشرب فأتاي جنبها جابر وفي جنبو الباه الطاهر اللي لايح عليه السلهام وعمامة صفراء فوق راسو دخل واحد من الخدم قرب من اوذن جابر غير سمع الكلام اللي قال ليه وهو ينوض واقف شار له بيدو وتبعو …شافت فيه السالكة ونطقات لكن مداها فيها ولا تسوقها
ــــ شنو واقع الولدي جابر
شافتو مشا وماجاوبها كتغدغد في سنيها شافت فالطاهر اللي عاطيها الصريط والمريط وهي ضرب طابلة بيدها حتى قفزاتو
ــــ الناس يتحزمو بالرجال وانا محزمة بالسلاوي اللوي نووض جمع الوقفة شوف شنو واقع وانت عاطيها الصريط وشئ مايشيط
ــــ وخا انشوف دبا
وقف الطاهر تحرك باش يعرف اش واقع بقات متبعة ليه العين مخصرة صيفتها وكالدعي فيه ….عيطات على الخادم اللي غير من التبريحة اللولى وقفات جنب رجليها محيت قاطعة فهم الزاي ماتخليهم لا يتحركو ولا يتململو ،ماشي بحال الباتول كانت كتعامل جميع الخدمات بحال بناتها وحتى من الفلوس كتعطيهم لهم ومرة مرة كتخرجهم السوق تساريهم كيف ما كانو كيبقاو بشار وخا عبيد عندهم …شافت فيها خرجات واحد الصريرة من حزامها هزهزتها وانطقات
ــــ سمعني أزهور بغيت منك تكوني عينيا فالقصر ودنيا فالقبيلة اللي وقعات واللي تزعزعات نبغي نعرفها وانبقا نطهلا فيك
ــــ” زهور” كوني هانية امرات سيدي
ــــ [هزات حاجبها كتشوف فيها ] عااودي اش قلتي حتى داك الدجاجة اتقولي لو سيدك امممم
ــــ سمحي ليا بغيت نقول مات سيدي
ــــ ايوا هكاك شدي ونفدي الكلام والى مشا حتى عرف شي واحد هاد الهضرة انقولهم يرموك في الواد ويغبا لك الأثر
ــــ كوني هانئة سرك في بير مايوصلو عطشان ولا قرحان
رجعات زهور لخدمتها من بعد ما حطات الصريرة في حضنها عاجبها الحال .
في المقصورة واقف جوج من الحراس والطاهر والشيخ وسط منهم جابر
ــــ بغيتكم تقلبو قبيلة عروب وحتى هذاك اللي عاونهم قطعو الواد جيبوه ليا قدامي باش نعلمو يقيس اللي هو ديالي يلااااه سيرو
خرجو الحراس بزوج سرزو الخيل ولجموه وركبوا شادين الطريق لقبيلة عروب أما جابر كيمشي ويجي جاتو فكرة في راسو …شاف في الشيخ وانطق
ــــ بغيتك تخبر البرااح يقول لناس لقبيلة أي واحد شاف عطور أولا لقاها غادي نعطيه اللي قد مبغا من الفلوس وجوج نبالات من ذهب وخللة من النقرة
ــــ ” الشيخ “هي اللولى اسيدي
خرج الشيخ بقا غير الطاهر وجابر
ــــ ولدي عطا ربي البنات تخير وختار نت دبا السلطان و100 وحدة تمناك
ــــ بويا انا ماباغي لاحكام ولا نكون سلطان ولا بنت من البنات باغي عطور ومنها مانتفرق عطور ديالي واتبقا ديالي واللي حادها كسب عداوتي …
وسط سوق القبيلة بين البياعة والشراية كدور شامة مولات الخالة وتفاحة مولات الريحة الفواحة والعليا مولات سالف حاطين توب من الحرير على ريوسهم بالحمر واللتام بالكحل مغطي وجهم…ها لي شرات الكركاع وها اللي خدات اللوز أما العليا فخدات غير الحمص كيتمشاو ويصاومو في التواب حتى شافو البراح كيدق الطبول والناس مجموعين عليه
ــــ سمعووووو ياااااأهل القبيلة جااايب لكم خباااار زينة العاااالم يحضر الغاااايب قااالكم السلطاااان جابر اللي لقاء عطور ايعطيه قد مااا بغا من الفلوس وتلاتة النبالات من الذهب وخللة من النقرة سمعووووو يأهل القبيلة وبلغو الغايب ….
بقا كيدور ويدق فالطبل ويعلم الناس بالوصية ….أما الناس فكاين اللي بدأ كيضحك على جابر وكاين اللي كيقول عليه مجنون وخرج عقلو أما شي بنااات مكرهوش كون كانو عطور ويبغيهم شي واحد بحال هاد الحب ….
شامة مولات الخالة كتحرك في رأسها واقفة هي وصحابتها انطلقات
ــــ جابر هبل وخرج ليه العقل
ــــ ” العليا” سيد مابقا كيشوف ولا كيسمع هذا ماشي حب هذا الهبال
ــــ “تفاحة” ياااربي مايلقاو عطور هي تفضل تموت ولا تزوج بجابر المطيار
ــــ “شامة” المحبة بحلاوة اللسان ماشي بالتزيار والشدان خليونا نمشو البنات
كملو البنات طريقهم غادين لأرض الفريك (الفريك هو الكباال) باش يقجفو الكبال ويجيبو البشنة…
في جناح السالكة اللي من نهار خداتها بالغدر وهي مقابلة غير المرايا وعينها والكحلة هاهي فسخات هاهيا لبسات عند بالها اللباس هما اللي غادي يرجعها سلطانة خلاتها مولاتها عمر الدبانة الجيعانة ماترجع نحلة شبعانة …
دق الباب دخلات زهور حانية رأسها شافت فيها ومزال غير كتقاد فالجوهر الابيض على عنقها
ــــ شنو كاين ازهور
ــــ لآلة مات سيدي سمعت واحد الخبار وجيت نقولها لك
ــــ [تلفتت لعندها ] تكلمي شنو عندك
ــــ سيدي جابر طلب من الشيخ يخبر البراح باش يقول الناس ديال القبيلة باللي للقاء عطور ايعطيه قد ما بغا ديال الفلوس وتلاتة النبالات من الذهب وخللة من النقرة
ــــ شنو و جابر خرج له العقل رجع غير كيخرف صافي سيري
خرجات زهور أما السالكة وقفات ضربات على فخاضها كتغدغد على ولدها اللي باغي يرزيها فكاع اللي سعات له
ــــ لا لا خاصني نحط حد لهاد الولد وإلا غادي يخسرني كاع اللي وصلت له من الخير
خرجات من بعد ما لاحت عليها السلهام كتمشى بحال الدجاجة اللي خائفة بيضها يتفقص دخلات لعندو لجناح ديالو كان هاز ريشة من النعام كيرسم بها عنين ومن الشوفة باينين ديولمن …شادة على جنابها
ــــ تبااارك الله على الوليد لا اولدي عرفتي شنو الدير قاد لها شئ صنام ورجع عبدها محيت هادشي اللي بقا لك ياالمدلول باااغي تشوهنا وترزينا فخيرنا
ــــ هذااا ماشي خيرنا خير غيرنا وسرقتيه وقالك اللي تبع الطمع كيعميه
ــــ هكاوااا ايوا مااابقا لك غير ضربني أما صوتك هزيتو عليااا وعلى قبل من على قبل متعوست الأيام ديال بنت عمك الله يخليها سلعة
ــــ جابر [تعصب ضرب ايدو مع طابلة حتى تشتات الصباغة اللي كان يرسم بها] هديييك هي اللي غااادي ندي بززز ولا بالخاااطر بزز والا بالخاااطر عطوور ديالي بوحدي كتسمعي
شافت فيه حتى عيات وانطقات ومن بعد خرجات وضربات بالباب
ــــ تريكة وحدة بحالك بحال داك المتعوس المدلول ديال الباااك إلى معشتو فالدال ماتربو الريش
وصل الليل ولقاه غارق في تخمامو …بالو مع البنت اللي دمرات أيامو وضيعتو فاوهامو …كيقولو سيادنا اللولين الحب داء واللي داقو يعيش في عدابو…وقف حاط ايديه وراه مقرب من الشرجم كيشوف في النجوم اللي كاسية السماء ومونسة القمر غمض عينيه ورجع حلهم من بعد ما طلع النفس المقطوعة في الداخل ديالو وانطق
ــــ ياااربي رجع ليا عطور مابقيت بغيت لا غداء ولا فطور لا جاه ولا قصور فيينك اعطور فيينك قلبي تكوا بنار العشق والغرام وخليتني عايش وسط الحرام
رجع لتكاية ديالو جلس في جنبها طامة الورقة اللي فيها عينها مرسومين كمرر صباعو عليهم …ماحس غير بالدمعة طاحت على المومو ديال عينها تحنى على الورقة باسها وفي حضنو خباها.. غمض عينه كيتخايل في اللي أسرت قلبو وكسرت خاطرو…
اما في جناح السالكة اللي كانت اتكول جنابها بالغدايد ماحيتها لولدها الهبيل غارق في حب وحدة مامعبراه ولا مسوقاه ،ماحيتها لراجل اللي بحالو بحال شطابت الجامع …كتمشي وتجي واقف قدامها وحاني الرأس والعين شافت فيه وانطقات
ــــ لااا صااافي كملناها داكشي اللي جمعتو في ليلة العرس أنخسرو فالجنازة واااشوباغين تصطيوني نلوح صنادلي ونجري ونجاري ادوي أكحل العفطة دوي
ــــ الله يهديك اسالكة الدري مغروم بعطور شنو باغاني ندير وهو كدير غير اللي قاليه راسو
ــــ تغرم بك جنية إن شاء الله وتكون كحلة قحلة وتلفك على القبلة سمع ليا مزيان أطويهر والله ويمشو حتى يلقاو ديك الصفريطة النايحة حتى نصفيها لك الخبار قبل ماتكون عندو تكون عندك وعندي
ــــ كوني هانئة أعمارت الدار خليك فرحانة وعطي الخاطر لراسك
ــــ [ ميقت فيه ] عمارت الدار ؟ سير سير خليني نرتاح
خرج الطاهر المدلول أما السالكة فاجلسات كتبلاني وتخمم خاصها ضروري الطرق المسمار ديال هاد الهبال وخرجان العقل ديال ولدها …تبسمات والشيطان زار عقلها
ــــ صااافي لقيتها مكاين اللي غادي تهنني من هاد الهبال قدها وشكون من غيرها …
تكات بلاصتها ونعسات من بعد ما رتاح لها البال ..
صبح الحال وبان ضوء النهار واقفين جنب الباب دالقصر كيتسناو يدخلو بخيلهم والخوف بادي على وجهم.. نزلو دخلو المقصورة من بعد ما سمح لهم الشاوش دالسلطان ،غير شافهم وهو يوقف
ــــ “جابر”امدرا لقيتو عطور فينها جبتوها معاكم
ــــ [حانين رأسهم وقاطعين الحس محيت كل شئ عارف جابر ولد السالكة هبيل مايتحادى ولا يتمس ]
رجع نطق والخوف باين من الشوفة فهم
ــــ تكلمووو فيينهاااا عطور فينهاااا
ــــ مولاي جابر ماخلينا مكان ،مخلينا خيمة ماخلينا زربة حتى من ناس القبيلة سولنهم واحد واحد مخفي لها الأثر جبنا غير الراعي اللي شافهم وقطعهم الواد
ــــ [ شد شعرو بيديه ضرب الطابلة مع الأرض كيغوت بحال الكلب المصعور ] عطوووور فييينك أنحمااق جيبو ليا هداك اللي عاونها دبااا
جارينو مدخلينو رماوه قدامو…قرب ليه حاط ايديه وراه أما الراعي فكان كيطلب ويرغب فيه
ــــ مولاي مادرت لا بدي ولا برجليا قلت عقلي اللي جابتها ليا هااا العار إلى ماسمح ليا ماكنت عارف باللي بنت السلطان عطور لقاتني نية ودارتها بيا
ــــ غاااادي نخليهم يتهلاو فيك باش المرة الجاية تعلم تخدم عقلك ومايبقا حد يدرها بك وأنت ذنبك عاونتهم حتى هربو ومن حكمي عليك انفدو
ــــ [تلاح على رجليه شاد فيهم كيرغب ويزاوك ] سمح ليااا امولاي سمح ليااا مانبقا نعاود هاااعار الحكام سمح لياااا
ــــ[شاف فالحراس] دوه عليا من هنا وتهلاو فيه حتى يتربى 100جلدة فالصباح و100 في العشية حتى يتعلم مايدير النية
هزوه جارينو والراعي مسكين كيغوت ويطلب يسمح ليه …شاف الطاهر في ولدو وانطق
ــــ ولدي جابر بان لي قصحتي الحكام والسيد مكان عارف باللي بنت السلطان
ــــ بويا جنب الحيط وقطع الكلام أنا اللي انفد ونقرر الحكام واللي دار الذنب يستهل العقوبة
خرج جابر جار عبايتو كيتمشى بالزربة طالع ليه الدم وعلى هروب عطور يتندم …
داز النهار باللي فيه وسيرة عطور بنت السلطان رجعات على كل لسان …مجموعين رجال القبيلة في خيمة التاجر زيدان شادين الهضرة في سيرة هبال جابر اللي رجع كيتصرف بحال الهاتر انطق بياع الحمير
ــــ اوسيادنا خاص نتجمعو ونقلبو على حيلة اللي تفكنا من هاد الحريرة
ــــ “تكلم تاجر زيدان” ياااه ياالأيام فاخير ايامنا يحكمنا واحد قل من مقامنا لا عقل صحيح ولا كلام فصيح
ــــ قال مول الثواب “جعفر” ما باليد حيلة خلينا في حك راسنا وبلا ماندخلو في اللي مايعننا اللي عطى الله عطاه واللي زلق جاء على عين كفاه
ــــ ” زيدان” أنا بالي نخوي القبيلة ماقاد على حكام هبيل يشرق ويغرب لا باه قادر يتكلم ولا واحد فينا قادر يتمتم
دخل ولد زيدان هاز طبق الخبز حطو فوق المرفع وانطق
ــــ انا مابقات فيا غير ديك الزغبية ديال عطور ماعرفنها فين هيا ولا اشمن بلاد مجلية
ــــ “جعفر” زيدان كوب كوب لينا شي كأس بركا علينا من هاد السيرة
ــــ زيدان” هي اللولى [ شاف فولدو اللي باقي واقف وكيفكر ] ولدي جبران جيب الحولي المشوي نعطو الناس العشاء
ــــ هي اللولى ابويا
خرج جبران يكمل الضيافة وباه كيكوب الرجال أتاي يدوزو بالفاكية …
في كهف بين الجبال …ماليه باب ولا جدران ،يومين وهما مربوطين عياو يغوتو ويطلبو العون ..بلا فايدة سمعات عطور شي واحد جاي خرجلت عينها وحلات ودنيها انطلقات بشوية
ــــ دادا سمعت الخطاوي وقيلة شي واحد كاين هنا
ــــ “الباتول” الله يابنتي عطور الله بقينا هنا لا حنين لا رحيم رجلينا داروها بينا ولاحونا في اللدين لي مايعتقونا
ــــ دادا صبري الله عوينا وكما وحلنا قادر يخرجنا شكووون تماااا واااش كاين شي حد هنا شكووون تما عاوننا يعاونك العالي
سمعات ضحكة طويلة وغليضة كتخوف انطلقات الباتول
ــــ حنااا في عار الله حنااا في عاار الله شكون انت ولا انتي بأن نشوفك
دخلت امرأة كبيرة شعرها بيض وحجبانها غلاض كتعكز بواحد العصا مقوسة حاطة في عنقها بزااف ديال المزانگ وفي ايدها محاصر من الفضة واشامها بين عينها وحاطة خلخال في رجليها كتحرك بشوية صوتها غليض ومبحوح بحال الديك المدبوح انطق
ــــ عليكم الامان ياضياف الله طريقكم طويل وزهركم ناعم بحال الحرير اااح اربي الكريم [قردات بشوية ] إيوا ازينت الصفات تكلمي وقولي أش جابكم لأرض الجنيات
عطور شافت في الباتول قلبها كيشطح بحال الشيخة مخرجة عينها والريح كيصوت من اوذنيها كتصرط ريقها الناشف والتقفقفة شادها من رجليها… أما الباتول كتردد وتقول في خاطرها [حنا في عار مولانا حنا في عار مولانا] انطلقات عطور اللي كلامها تقاضى والجهد سلا
ــــ ح حنااا غ ير شادين الطريق وتابعين رجلينا ماعرفين شكون نتما ولا شنو نديرو هنا عااافاك الشريفة إلى ماشوفي من حالنا وطلقي صراحنا
ــــ فين زربانة هاذي اعوام وانا بوحدي قنتانة ودبا جاب ليا الله اللى ونسني ويسمع همي ويشاركني الملحة و الطعام
ــــ “الباتول” القيد دخل فايدينا والعصاب تلواو في رجلينا غير حلي لينا الشريفة
شافت فيهم شحال تبسمت وبانو سنانها اللي رجعو كوحل فمها انطقات
ــــ غادي نحل قيدكم ولكن وياااكم تفكروا مني تهربو
ــــ “عطور”كوني هانئة مانتحركو مانتململو غير فكينا
هازات العصا المقوسى دوراتها جيهاتهم غمضات عينها كتمتم في خاطرها بأن واحد الضوء بحال الكهرومان غادي وكيتكاثف …
عطور كون ماشادا في رأسها كانت أطلقها في حوايجها من كثرة الخلعة أما الباتول فشبرت في ايد عطور كتقفقف غمضات عينها من الضوء اللي ضارب جهتهم …شوي هو يحسو بأيديهم تحلو والرباط ترمى بعيد عليهم ….فتحو عينهم كيدورو فيهم في كل مكان مخلوعين مبهوضين هزات عطور أيديها كتشوف فيهم ياك ماوقع لها شاي تلفتات في الباتول حتى هي شافتها صحيحة فصيحة وانطقات
ــــ مسلمين و طااالبين التسليم الشريفة وااش انتي جن ولا إنس
ــــ الفضول الزايد كيقتل مولاه وكثرة الكلام كتسكت القلب وتخليه يموت بلا هواه
ــــ مدريهاش مني قلة الصواب غير هادشي مكنسمعو غير فالخرايف عمري شفتو فالواقع
ــــ تابعك يابنت السلطان شلا ماتشوفي
ــــ [خرجااات عينها ] وبااااش عرفتي بويا سلطان لا لا أنتي ماتكوني غير جنية أما كون كنتي إنسية ماتعرفي والو عليا
ــــ ثبتي ياعطور الريحان وبلا ماتسرعي في الحكام أنا بحالي بحالكم نشرب الماء ونحمد الله على النعمة
ــــ “تكلمات الباتول” وخا الشريفة نسولك وتأمني عليا
ــــ عليك الامان سولي وما تكثري
ــــ امتا انخرجو من هنا واش انبقاو على الدوام ولا ايجي نهار اللي أنتفكو
ــــ [تبسمات وقفات كتمشي بشوية جلسات على الحجرة اللي مقابلة معاهم شادة في عصاتها ] ضيافة النبي ثلاثة أيام وربي حطني في طريقكم باش نأمن عليكم هذا مكان
ــــ “عطور” كفااش
ــــ كيف الفشفاش اللي طاب وما حلاش ههههه عجبتك هذي
ــــ تبسمت ” غير اللي جات من فمك سمن وعسل الشريفة اش سماك الله
ــــ سمتي راجيا الله ومكتابي هازة حمل على كتافي ومانرد اللي وقف في بابي
حطات العصا حداها وعنين عطور مراقبها …خشات أيدها في حضنها كتسل شي حاجة عطور والباتول طالبين السلامة وراعينها اش غاتخرج ،جبدات واحد التسبيح طويل وعقيقو بالكحل ويلمع كضوء القنديل… وقفاتو في اتجاه عطور اللي مافهمات شنو كدير بدأت كتحركو هضرت معاه بشوية وانطقات
ــــ تحرك ياتسبيحي وخرج ماعندك بشر ضياف الله بخيرهم وريهم طريقهم وبين عدهم من صديقهم
وقفات أيدها بشكل مستاقم حسكة ماتحرك والتسبيح بدأ كيتحرك في اتجاها شوية بدأ كيدور بشكل دائرة غير بوحدو أما الشريفة فكانت مغمضة عينيها ومتبتة ايدها …عطور كتشوف فهادشي اللي قدامها وكطلب التسليم في خاطرها مرة مرة كتشوف في دادها اللي غير ساكتة وقاطعة الياس ..نطقات الشريفة وعينها باقي مغمضين
ــــ راجل هبيل طايح في غرامك طياح الطير في البير ، وراجل غادي يغرق كثر من هاد الهبيل أثورتي الحكمة إلى تبّعتي الكلمة والعديان أيموتو قدامك غير هو خاصك تشدي الطريق وهاد الطريق هي اللي غادي تخرجك من الضيق وتوسع رزقك وتسگم سعدك اللي شبع نهيق ورجع بحال الحمار اللي تقاضى ليه العتيق
ــــ اشمن طريق الشريفة وشكون هذا اللي غادي يغرق
ــــ هذا قاضي من القضى وحاجتك على ايديه اتقضى أما الطريق فيه شلا شهيق وشوك رقيق غير هو الصبر كيقصح القلب ويخلي مولاه على ميمونو يزيد يقلاب فهمتي ابنت الجواد والسخاء والسياد
ــــ باقي الآلة الشريفة الصورة مغشغشة قدامي زدتني فضول وهيمان في تخمامي إلى ساعفتني غير ريحي شطانتي وخفي عليا همي
ــــ الهم مايخفو غير الله العالي، الطريق بين بحر ديال الفريك كتحدها شجرة جبران وقبالتها سدرة عمران والوسط فيه بئر حامي وعود من الفخار، ثمرو يشبع الصغير والكبير وراقو عليها يتغدى الطير … هادشي اللي خاصك تبقاي هازاه في عقلك ماتزكلي كلمة ولا حرف ينقصك
ــــ ومن بعد فاش لقا هاد البلاصة اللي قلتي ليا شنو ندير ؟
ــــ الديار ديال مولانا اللي حاطين فيه رجانا اتلقاي حجرة من طين معقودة بحبل طويل الرزمة عليها مقادة والعقدة صحيحة وفي الحجرة شادة زولها وحفري ثلاث دالحفرات وحدة على القبلة والأخرى جهتك والوسطانية فيها حيلتك
ــــ لآلة شريفة كلامك مايفهو فاهم ولا جن دخت والفضول دخل لعقلي ماعرفت مانوخر ولا نتالي
ــــ كل شي واضح وباين ومني تلقاي اللي قلت ليك بهاد الماء اللي أنعطيك تغسليه ماتفتحيه ولا تجربي تقرايه لا تعود عليك الحيلة ولعقلك تنساي
ــــ وشنو هو هادشي وكفاش انعرفو
ــــ مصرور في ورقة من العقيق ومعقود بخيط كحل رقيق غير الديري اللي قلت لك سعدك ايفتح بيبانو لك تبعي الكلام والوصية وماتخلي الفضول يرجعك ضحية
ــــ وخا لآلة الشريفة وابويا قولي لي حالو موكلينو ولا مجيعينو قاتلينو ولا رادمينو
ــــ بوك السلطان قلبو يقاسي وعلى فراقك لهمو يواسي ودبا تقاضى التسوال حطي الرأس وغمضي العين محيت تابعاك طريق طويلة
ــــ بغتي تقولي غادي تخلينا نخرجو من هنا ؟
ــــ ماشي انا هذا أمر ديالهم بقيتو فيهم وبغاو يطلقو سراحكم
وقفات الشريفة حطات تسبيحها في حضنها وهزات عصاتها في أيدها وخارجة كتمشى بشوية حتى غبى لها الأثار …أما عطور فتنهدات من أعماقها شافت في الباتول اللي غير تقياس وانطقات
ــــ دادا فنضرك هادشي يكون بصاح ولا غير خرفة من خرايف زمان
ــــ دري النية ابنتي بانت لي هاد المرأة حكيمة وكون كتكدب گاع ماتفك لينا إيدينا وتطلق صراحنا وتمشي وتخلينا
ــــ ولكن فين غادي لقا هادشي اللي قالت مافهمت منو والو
ــــ خلينا نحطو الرأس يطلع الصباح ويكون خير وسدي ركبتي وانا نوسد هاد الحيط حتى يصبح ويفتح
تكات على ركبت داداها حاطة أيدها على حنكها وغارفة في تخمامها …
طلع الضوء وبأن النهار …جنب بئر العمير فوق منو طورني ديال الحديد ودلو معلق في حبل طويل ، ناعسين وماجيبين الدنيا خبار كون ما الشمس اللي ضاربة في وجهم تما ايكملو نعاسهم …بدأت عطور كتحل عينها من بعد ماسمعات نهيق الحمار كتجبد وتعاود تجبد ولا بيتفتحو تقول ماشافت الضوء شهور وأعوام …حركات الباتول اللي باقا كتشخر بحال الرخلة اللي فيها الداويسة تلفتات وراها بأن ليها البئر… ورجعات شافت قبلتها وشافت الخير أرض خضرة كلها تفاح …سمعات شي حاجة جنب الباتول تلفتات وهي تشوف حمار عليه أحلاس والشواري وفوق منو الرزمة اللي كانت معاهم …وقفات عطور مخلوعة ما جات في بالها غير النبالة والخللة ديال مها السلطانة حلات الرزمة قلبتها وقلبها مقبوض لقات كل شي فيها وسط من النبالة والخللة كاين تسبيح هزاتو في أيدها حتى تفكرات فين شافتو نفسو… اللي كان مع الشريفة مولات العصا المقوسى دبا عاد فهمت باللي كلامها صح ومعقول تبسمات …
شافت عين الشواري لقات فيها شربيل من الجلد وحايك بيض من الحرير ولتام كحل رقيق منو تبان السماء ويخرج الماء،… وقفات الباتول كتحك في عينها انطقات من بعد ما دورت وجها ولقات رأسها وسط أرض خضرة
ــــ فين حنا ابنتي عطور ياك كنا وسط الظلام
ــــ بحالي بحالك أدادا شوفي شنو لقيت
ــــ [مدات ليها التسبيح] هذا تسبيح الشريفة شنو جابو الرزمة
ــــ علمي علمك أدادا خلينا نشدو الطريق قبل مايطيح الظلام ونطيحو في شي كهف غريق
شدات اللجام ركبات الباتول على الحمار وعطور گايداه …طريق تلوحهم لطريق مرة يوقفو يتسارحو مرة على الگيادت الحمار يتبادلو …. الطريق اللي شادين طويلة لاهما لقاو الغاشي ليدلهم ولا شيخ يفك لغزهم …وقفات عطور كتمسح العرق من جبينها لمحات واحد القبيلة تلفتات في الباتول اللي عينيها حمارو بالشمس ورأسها تقال عليها وكتافها طاحو عليها انطقات عطور
ــــ صبري أدادا بانت ليا واحد القبيلة على الله نسولو ونلقاو الوصية اللي وصاتني الشريفة مولات البراكة
حركت الباتول رأسها وبواخا …وكملات عطور طريقها حتى قربو لواحد الطريق وباين باللي كدخل القبيلة، بانت ليها واحد الشجرة ديال الخروب جرات الحمار حتى تخبات وراها وقفات
ــــ دادا نزلي خاصنا نتلتمو ليكون شي واحد فالقبيلة كيعرفنا
ــــ وعلاه شنو غادي اللبسو وحنا ماجبنا معانا لا حايك ولا درة لا كسا ولا غطا
ــــ واالا عليك أدادا أنا غادي اللبس العبايا اللي لقيت في عين شواري وانتي لبسي درتي الكحلة حتى واحد مايعرفنا ومن دبا انتي غنجا وانا بنتك الكاملة ويااك يزلق لسانك
ــــ الله ابنتي الله فين عمر لساني زلق وكما يقولو اللوالى اللي عضو الحنش يخاف من الحبل والامان مابقا من هذا شحال
خرجات عطور الرزمة جبدات العينين اللي كاللوز بالكحلة وشمات أيدها وتحت فمها وبين عينها بشريط القصير.. حطات اللتام ولابست العبايا وفوق منها الصايا ..أما الباتول فتغنبرات مابقا يبان منها غير عينها اللي كي البلوط،رجعات الباتول ركبت وعطور گايدة طريق يلحهم الطريق …
حتى لمحو راجل جنب الطريق مهموم شاد ايدو وجالس بلا صديق قربت ليه عطور ملتمة مايبان منها غير العنين الملوزة والوشام اللي زادها جمال انطقات
ــــ الله يعاونك أسيدي [ماسمعها] اشريف ، ااااشرييف
ــــ [تلفت لعندها من بعد مارجع لعقلو اللي علم الله فين هربان] انعم ألالة ياك لباس
ــــ إلى جات على خاطرك واش هذي هي قبيلة عروب
ــــ ايه ابنتي هذي هي القبيلة اللي نورها فتان وحاكمها راجل مزيان
ــــ عندي واحد الوصية انقولها لك وشوف إلى فهمتي فيها وخا غير شوية « طريق بين بحر ديال الفريك كتحدها شجرة جبران وقبالتها سدرة عمران والوسط فيه بئر حامي وعود من الفخار ثمرو يشبع الصغير والكبير وراقو عليها يتغدى الطير » ودبا قوليا فهمتي شي حاجة
ــــ طريق الفريك هي هادي ولكن شجرة جبران وسدرة عمران ماعرفتها شاي عمري سمعت بهم
ــــ الله يكمل نواياك ويهون همك
كملت عطور طريقها متبسمة وفرحانة محيت قدرات تلقا خيط من الوصية …بقات گايدة الحمر حتى خرجات فواحد الدار …جنبها امرأة كطيب خبز الفراح ومقراش جنبها فوق كانون المقدار ، شافتهم حطات الخبزة فوق الفراح ناضت واقفة قاصدهم
ــــ مرحبا مرحبا بضياف الله على من كتسولو باين عليكم غراب ماشي من أهل القبيلة
ــــ بحاالة علمك مولانا حنا جاين تابعين المعاش حتى جابونا رجلينا لهنا
ــــ زيدو تفضلو عندي تشربوا كأس دالاتاي ونتشاركو الملحة والطعام
ــــ الله يبارك فيك ويكتر خيرك وتفيض الرزق عليك
ربطات عطور الحمار هزات صرتها في جنبها وشادة في ايد داداها …دخلتهم المرأة الدار جابت لهم مقراج من الفخار عامر بالماء البارد كي الثلج كبات لهم يعتقو …انطقات
ــــ ” إيجاء” ايوا عاودو ليا منين جيتو وعند من قصدتو
ــــ [ضحكات الباتول] قصدنا الدار الكبيرة
ــــ “عطور” ولقانا الله بك ياالمرضية مابغينا والو بغينا غير فين نباتو حتى يطلع النهار
ــــ مرحبا بكم الدار الداركم شوية ويوجد العشاء
مشات إيجاء تجيب الطاجين أما عطور والباتول فغير كيشوفو في الحيوط وكيدورو فعينهم وساكتين …
حطات لهم الطاجين وجابت الخبز وتشاركو اللي قسم الله…كيكلو ويتبننو انطقات الباتول
ــــ الله يعطيك الصحة أ اش سماك الله
ــــ سميتي إيجاء مولات المحاين
ــــ ” عطور” متشرفين ألالة إيجاء الله يعطيك الصحة
ــــ “الباتول” طيابك فكرني فأمي الله يرحمها
ــــ بصحتكم وراحتكم ايوا ما قلتو ليا اش سماكم الله وعلاش قصدتو هاد القبيلة الصغيرة
ــــ “عطور” أنا سمتي الكاملة وهذي أمي غنجا
ــــ”الباتول” الرزق فاش كيتقضى من البلاصة خاصك تخويها وتشوف غيرها
ــــ كاينة ابنت الجواد ايوا مرحبا بكم كولو وماتحشمو
ــــ “عطور” بارك الله فيك قدام الطعام مكاينة حشمة
كملو ماكلتهم ولحسو صباعهم على الطاجين اللذيذ جمعات إيجاء الماعن وعطاتهم غسلو…مشات عمرات براد ديال أتاي وجابتو مع طبق عامر باللوز والكركاع والحماص والكعكاع حطاتو قدام الباتول اللي مربعة رجليها
ــــ يلاه الآلة غنجا طلعي أتاي نشربو واحد الكويس
ــــ “عطور” عدبناك معانا اخالتي إيجاء
ــــ لالا ابنتي عذاب الضيف راحة خلوها ناس زمان الضيف اللطيف يبان من وجهو تهلا فيه وماتنقص في حقو
ــــ “الباتول” كاينة واللوالى ماخلاو التالين مايقولو
ــــ أيه الآلة ايوا كبي لكاملة أتاي ذوق وترد عليا الخبار
ــــ كبات الباتول أتاي كطلع فيه عطات كأس لإيجاء وكأس العطور وكبات كأس ليها كيشربو ويدوزو بالفاكية
ــــ “عطور” ماعندي مانقول اخالتي إيجاء كويس منغم
ــــ “الباتول” قالك أتاي العشية كيخلي الهموم منسية
ــــ “إيجاء ” ايوا شربو ونساو الهم الدار داركم وسمحو ليا إلى قصرت في حقكم
ــــ “الباتول” عيب تقولي هاد الكلام وانتي درتي معانا اللازم والوجاب
بقاو مكملين تقرقيب الناب كلمة تجبد كلمة وحديث ينسيهم في حديث حتى حسو بالنعاس وكلها فين تلاح….
في قصر عرش السلام اللي غاب فيه السلام وفقد نورو وغاب فيه الأمان من نهار التحجز سيد السلطان …مربوط داخل قضبان الصمرة والبرد خلاوه گندان سنيه كيقرقبو وايديه كيترعدو…
دخل الطاهر كيتسلت هاز صرة في ايدو وحاضي جنابو ليشوفو شي واحد …خرج السوارت من جيب الحارس اللي حارس الحبس ،دخل عند خوه نادم ومابيدو مايسوگر حل الصرة حركو وانطق
ــــ”الطاهر” خويا ولد بويا هااالعار إلى ماسمح ليا المرأة لفعة
وخايف تلسعني بلسعة كول من ايدي وعتق روحك وخا يوقع اللي وقع راني نبقا خوك ودمي من دمك
ــــ “الكامل”[هز فيه عينه الدايخين وانطق ] مكذبوش اللي قالو ثق في الغريب وما الثيق بالقريب محيت كاين ناس تصون وناس تخون ونااااس عليها العشرة تهون
ــــ خويا ولد بويا ثق بيا هادشي اللي درت ماشي بيديا ومراتي حاكمة فيا معرفتها موكلاني لسان لحمار ولا دايراني في فايد سحار
ــــ الطاهر سير من هنااا حالف بحلوفي نموت ومانكول من اليد اللي صرفقاتني وفضهري غدراتني وبكيدها جرحاتني يلاه سير قبل ماتجي اللي حاكماك وتعشيك بعشاء الذيب وترجعك عليها غريب
شاف فيه الطاهر وعينو هازة دمعة الندامة ومن بعد الندامة ماتحس بالشبعة هز صرتو اللي فيها رجلة ديال اللحم المشوي لمها وخرج سورت الباب وعطا اللي حارسو ماقسم الله وكمل طريقو…
جلس تحت الشجرة كيفكر في خوه ولد بوه اللي باعو على قبل لفعة صلتها عليه الله …كيمسح دموعو اللي بحال شلال الواد شحال صعيب تحس بالندامة من بعد مايفوت الفوت لا انت قادر تصلح اللي فات ولا ترجع اللي مات …دايزة لجناحها مگفطة على رجليها اللي حناتهم بالحناني شافتو من بعيد جالس ولرأس حاني شدات جنبها وعلات حاجبها وانطقات بينها وبين نفسها
ــــ “السالكة”شوف لك داك المجعور تاني بارك يهرنن وينين وداير فيها مسكين ياااربي بليتني بدجاجة ماقضية حاجة
كملات طريقها لجناحها وكل همها تبان همة وشأن في عرس تاجة بنت الفقيه سالم اللي كل عمرو وهو للحروب الجان يتعلم …
صباح مزوهر كيف ناسو وخا كيقولو زهرهم في مهراز إلا أن ربي هو اللي عارف أش كاتب الناس … حلسو الحمار ولجموه بلجام هزو صرتهم وشدو طريقهم …
الباتول راكبة وعطور مگيدة خطوة بخطوة حتى وصلو عند الجامع …شافت واحد الولد صغير وسولتو عطور
ــــ سمح ليا اولدي نسولك الفقيه كاين في الجامع
ــــ لا اخالتي خارج العين المطفية مغايكون حتى يقرب الظهر
ــــ الله يرضي عليك قوليا واش عارف شي دار الشراء
ــــ كاين عمي الراضي هو اللي يكري الديور ويتكورت في القصور الى بغتي نوريك دارو
ــــ الى مكاين عذاب غير نعت لي فين حال بابو
شاد منها الرباط وگاد الحمار وهي تابعاه من درب لدرب حتى وصلو لواحد الدار طويلة والعالية وقدامها شجرة أركان وقريب منها الساقية وقف بالحمار وانطق
ــــ هذي هي الدار اخالتي
ــــ الله يرضي عليك اولدي
مشا البعلوك… أما عطور شافت في الباتول وانطقات
ــــ دادا انقوليه يبع لينا شي خيمة صغيرة تكون على قد القياس فين نرتاحو ونحطو الرأس
ــــ ولايني حنا رآه ماهازين حتى فلوس
ــــ ولا عليك خلي كل شي عليا
قربات عطور لباب الدار دقات وبعدات جوج خطوات …عاودت دقات مرة أخرى تحل الباب خرج منو راجل والرجلة قليلة
ــــ نعم ألالة محتاجين شي حاجة
ــــ قصدناك والمقصود الله قالو ليا باللي كتبيع الديور وتكورت في القصور وبغينا شي دار على قد قياسنا ومناسبة لجيبنا
ــــ طلبك موجود نطرق الباب وهاني معاكم
دخل لاح جلبتو فوق كتافو وعنايتو فوق راسو طرق الباب وسبق وهما تابعينو بحمارهم ،حتى وصل لواحد الدار بابها ديال الخشب حل الباب ودخل
ــــ هذي هي الدار شوفو وتمعنو إلى ناسبتكم فمازدتكم غير الخير
نزلات الباتول من فوق الحمار دخلات هي وعطور كيشوفو الدار بانت لهم مزيان وخرجوا يتصاومو معاه عليها
ــــ ايوا الشريف شحال هاد الدار غير هو ماتغلي علينا في الثمن رآه غير وليات مانا كسابة ولا بيعا
ــــ ايوا اش غنقول لكم هاد الخيمة هي اللي بقات أما كل شي عامر ومبيوع وساوية غير تلاتة قنطار
ــــ [ شافت عطور في الباتول رجعات شافت فيه] ماعندي لا قنطار ولا دينار ولايني عندي اللي غلا منهم
ــــ على عيني نشوف ونحكم
فتحات الرزمة خرجات منها النبالة مداتها ليه وانطقات
ــــ هذي رآها من الذهب ومالها ثمن
شد من عندها النبالة كيقلب فيها يشوف واش ذهب نيت ولا نحاس
ــــ وخا الآلة قبلت ناخدها مقابل الدار ودبا ها الرسم والساروت الله يجعلو عليكم بالخير
ــــ الله يرحم والديك أسيدي
حاط الرجل النبالة في اقراب ديالو وكمل طريقو عند بالو دارها بهم …أما الباتول فبقات مخرجة عينها في عطورو انطقات
ــــ عطور اش هادشي درتي فرطي في النبالة ديال موك الله برحمها
ــــ ماعندي ماندير أدادا اللهم خيمة نحطو فيها الرأس ولا نهيمو في الطرقان ونبقاو بلا نعاس دخلي الدار هاني راجعة
ــــ فين غادية ابنتي
ــــ انقلب على اللي شبع كروشنا ويسد جوعنا
دخلات الباتول من بعد ماربطات الحمار هازة الصرة في جنبها وشي حوائج فواحد الرزيمة صغيرة … أما عطور فاتبعات الراجل اللي عطاتو النبالة بقات كتسلت بشوية وراه …لمحت الغاشي وسط ارض الزرع، شقات حوايجها من جهت كتفها وعمرات عبايتها بالتراب بدأت كتغوت وضرب في فخاضها حتى تجمعوا عليها الحصادة كتبكي وتنين …سولها واحد من الحصادة من بعد ما شافها في ديك الحالة
ــــ أش واقع لك الشريفة يااك لباس
ــــ واحد الشفار سرقني ضربني وفي التراب مرغدني وخدا ليا النبالة اللي عطاتني امي عفاااكم إلى ماتعاونوني شافني ولية ودارها بيا
ــــ فين هاد الرجل الآلة وريه لينا نربوه
ــــ [كتنعت لهم بصبعها وتمسح في دموعها ] راااهو هداك اللي حاط العناية الله يرحم والدكم رجعوها ليا
هزو المناجل وتبعوه يجرو وقفو عليه ودارو به غير شافهم تخلاع انطق واحد منهم
ــــ ماحشمتي مارعتي تعدا على مرأة من القبيلة وتسرق نبالتها ولا لقيتها ولية وباغي دير اللي بغتي
ــــ أش كتخرف اسي محمد شكون نتما واش من سريقة
شافو في بعضياتهم وتجمعوا عليه بداو يعطوه في العصا حتى مابقا قاد يتحرك طاح فالارض … خداو النبالة من أقراب ديالو ورجعوها لها دعات معاهم وعداتهم نهار جمعة القصرية ديال كسكسو على حسابها …
رجعت عطور الدار بالخف طرقت الباب والتبسيمة مرسومة على وجها …شافتها الباتول وانطقات
ــــ جبتي باش نعتقو ابنتي
ــــ لا مالقيت والو ولايني جبت ما اغلى من الماكلة [ سلات النبالة من حضنها ] تنتناااا
ــــ [الباتول ضربات فخاضها وخرجات عينيها] واااهي ميمتي اش درتي ياك ما سرقتيها المول الدار
ــــ [ جمعات شفايفها كتراري ] وراااه امي اللي هداتها ليا مانقدرش نفرط في الهدية وحنا ماعندنا فلوس باش نخلصو الدار
ــــ والى عرف وشكاك القايد شنو نديرو ندوز مابقا لينا في الحبس
ــــ [ضحكات بشيطانية ] ماتهزي مادخلي لقلبك غم راني عطور واجرك على الله ماشي غير اجي ونخلي الحجة عليا
ــــ ايوا عاودي ليا وريحي بالي
بدأت عطور كتعاود عليها من اللول حتى اللاخر …أما الباتول مبهوضة من فعايلها اللي فعايل الشيطانات
ــــ لا لا ابنيتي عطور تقول الشيطان مقريك
وصلات العشية جالسة جنب الرحى تايهة في أفكارها وتخمامها وقفات عليها الباتول وقالت
ــــ خاصنا نلقاو شي حاجة نديروها باش نكونو مع راسنا ماعندنا لا مونا ولا طعام
ــــ عارفة أدادا كيقوليا واحد الرأس نبيع الفلايك والخلخال وخا ماصخيت بهم
ــــ لااا ابنتي خلي فلايكك ليك وخلخالك انتي راكي فعز شبابك ماعرستي ما تونستي [ خرجات محصر عريض من الفضة ثقيل ووازن] هاكي هذا قادر يجيب لينا باش نقضوا حتى يحن مولانا
ــــ عيب أدادا هذا اللي عندك وعلم الله شكون خلاه ليك بلا مانضيعوه أنا نبيع الخلخال ديال الذهب ونقضي به الغراض
ــــ وانا قلت لك لا هي لا خلي كلمتي مسموعة ومكانتي عندك مرفوعة
ــــ كلمتك فوق راسي وانتي هي تاج راسي وميمتي اللي عليها نحط راس ونحكي المأسي
خدات المحصر ديال النقرة صراتو في صرتها قالت مع رأسها غدا نخرج نشري اللي خاصناويسد جوعنا
وسدات عتبة أما الباتول فحطات الرزمة تحت رأسها مفرشة حصيرة ديال السمار انطقات
ــــ عرفتي أدادا شنو جاء فبالي
ــــ وشنو جاء فبالك ؟
ــــ قالو ناس بكري إلى مات لوب وسد ركبة والى ماتت لوم وسد العتبة وانا رآه مابقا عندي حد من غيرك أدادا الله يخليك ليا
ــــ انا معاك وربي معاك ومعايا واتبقاي ديما في جنبي وحدايا والسلطان إن شاء الله غادي نعتقوه الى طول ربي فالعمر
ــــ ياربي من فمك لباب السماء
غمضات عينها ونعسو غارقين فنعاسهم وناسين رأسهم …
في قصر عرش السلام خارجة السالكة مع الخدم هازين بها الهودج لدار تاجة …مكحلة وبأنقاب من النقرة لوجها مزينة… داربة الهم بركا همها في المقام وخا كيقول المثال النجمة كتبقى نجمة وخا طيح في الماء أما لمبا إلا مايجي نهار ونورها يطفى …وصلو لدار العرس اللي عامرة بالبراني وناس القبيلة فرحانين وكلها فين يشالي …تاجة بنت الفقيه سالم تبان بحال القمرة وسط النهار الزين زين الحاجب والغمازة تقتل الحاسد… أما قطيب الروح اللي فوق راسها فزايدها زين على زين حشمانة ومادة أيدها لحناء …أما عند جابر اللي عقلو رجع جاعر محيت فراق عطور جاه واعر جنب شجرة الزيتون جالس فوق التكاية غارق في تخمامو كيكتب بالقلم ويخرج همو …كلام معسول ونفس الوقت مكسور قال «قلبي يبكي بالجروح في الهانا … عيني عشقت في الزين الغالي
مولات الشعر الزعر وزين الحالة … عليها نضمت بيات واقوالي
الفم مرسوم والخدود رمانا … العيون الكبار والحاجب هلالي
الرموش ارماح زينها فتانة.. والشعر حرير طايح يشالي
علاش الحبيب مشا ونسانا …وانا اللي قلت ليه أغزالي
ااااخ يامحبوب شكون يبقا معانا … خليت قلبي مهول تهوالي
نزلت دمعة وراء دمعة حتى طفات الشمعة …قلبو كيتقطع شوية بشوية تمنى كون نسى راسو ولا عطور تكسر احساسو جمع القلم والورقة اللي خط فيها أحساسو ودخل لجناحو …يحط الرأس ويغرق في جراحو..
صباح الصباح وكل صباح بخيرو….ناس تخدم وتأمن فين ترتاح وناس هازة في بطونها الدلاح…
جوج رجال من دار القايد مسلحين ولسلهامهم لابسين الخنجر في الجنب والشهامة في القلب ….كيهرسو في الباب بالدبيز على الصباح ،ناضت عطور مخلوعة والنفس فيها مقطوعة قالت مع رأسها وااقلة طاح الفاس في الرأس ناضت الباتول شافت فيها
ــــ عطور علم الله شكون كيهرس في الباب شوفي شكون
ناضت غطات وجهة بلتامها قربت من الباتول كتوصي فيها
ــــ دادا إلى كانو رجال من دار القايد وااياك تقولي شي حاجة ديري راسك نية ومعارفة والو ضربها بنكرة وماتخافي والو
ــــ وخا ابنتي الله يفك الجرة على خير
مشات عطور وقفات وراء لباب انطقات
ــــ اشكووون بشوية ولا باغين تهرسوه ونسدو علينا بالشطب
ــــ حلي الباب الآلة كنقلب على مولات هاد الدار حنا من دار القايد
عطور غير سمعات دار القايد رجعات كتقفقف خرجات عينها كتحاول تثبث رأسها وتعامل بحالة مكاين والو
ــــ ءء وخا وخا دبا نحل
تلفتات عند الباتول اللي اللوان كيتخاطفو من وجها حطات صبعها على فمها وأشارت لها بايدها باش تهدن …فتحات الباب كطل عليهم بعينها الملوزة انطقات
ــــ انا أسيدي هي مولات الدار شنو بغيتو منا
ــــ خاصك تمشي معانا عليك شكاية
ــــ نمشي معاكم اووويلي كفااش شكاية مالنا سرقنا ولا قتلنا
ــــ [جروها واحد من اليمن ولاخور من اليسر] حتى لقدام القايد وقولي هاد الكلام
كيمشو جرينها وناس القبيلة كيتفرجو رجال حالين فامهم في الزين ونور العين وكاين اللي غير كيشوف ومتعجب شكون هاد الغريبة في القبيلة …طريق تلحهم لطريق حتى وقفو قدام دار القايد دخلوها وحطوها قدامو مغنبرة مايبان غير عبنيها وحاجبها.. شافت في الراجل اللي عند بالو دارها بها حتى صدقات دارتها به مضوبلة …شاف فيها القايد واحد اللحظة سهى في عينيها القتالة اول مرة يشوف بحال هاد اللون فالعنين …
أما المشاورية فردو القايد البال حنحنو وانطق واحد فهم
ــــ سيد القايد المرأة اللي تشكا منها السي حوماد ها هي قدامك
ــــ “القايد” [نطق بلا مايحس] قول گمرة ماشي مرأة
ــــ شنو ؟
رجع القايد لوعيو شاف في المشاورية اللي كيتشاوفو بالعنين غير شافو التخنزيرة اللي دار فهم وكلها جمع قبو …رجع شاف في عطور اللي غير ساكتة وانطق
ــــ اش سماك الله الشريفة
ــــ [دايرة رأسها درويشة ومظلومة ] سمتي الكاملة أسيدي انا هاد السيد سمحت ليه وخا سرقني وتعدا عليا شافني ولية وعلم الله كون ماغوت شنو باغي يدير ليا [نزلات دموعها وبدأت في التحرميات ديالها ]
خنزر القايد في الراجل اللي تصدم من كلامها مابقا مايقدم ولا يوخر هههه هذي هي ديال دربني وبكا وسبقني وشكا ههههه كثرة الهم كضحك
ــــ واااش عارفة اش كتقولي ألالة هاذشي راه كبير وعليه الحبس
ــــ انا أسيدي غير مرأة وحدانية مانأذي صغير ومانحادي كبير ولايني هاد السيد تعدا عليا وسرق نبالتي والى بغيتو سولو الحصادة هما الشهود
ــــ “حوماد” لاااا لاااا أسيدي هي كظلمني انا بعث لها الدار وقالت لي ماعندي لا دينار ولا قنطار وعطاتني النبالة مقابل الخيمة
ــــ [شافت فيه وضربات في فخاظها] ااااويلي اووويلي مالك سير طلق الكدوب والبهاتان انا عطيتك ثلاثة قنطار كما قلتي ومني شفتي نبالة حطيتي عينك عليها خليتي الطريق حتى خوات وجتي مني سرقتيها
ــــ “القايد ” براكا من كثرة الكلام غادي نعرفو الصحيح من الكداب [عيط على رجالو ] سيرو جيبو ليا الحصادة في حين
خرجو رجال قصدو الحصادة وبالخف جابهم… داز شوية ديال الوقت ودخلهم كاملين من بعد ماطلبو إذن القايد اللي نطق موجه كلامو لهم
ــــ شوفو مزيااان فهاد المرأة وقولو ليا واش كتعرفوها
كيقززو فيها انطق واحد فهم
ــــ ايه اسيد القايد هذا السيد اللي قدامك تعدا عليها قطع لها حوايجها ومرغدها في التراب وسرق لها النبالة وحنا درنا الواجب ديالنا
ــــ[ القائد شاف في الراجل وجه كلامو الرجال] دوه يتربى 20 جلدة محيت سرق 20 محيت تاهم مرأة وطعنها في عرضها أما نتما “الحصادة” فسيرو الخدمتكم
خرجو الحصادة أما الرجل فكيغوت وكيقول مظلوم مظلوم …عطور وخا هكاك بقا فيها ضميرها بدأ كيزنزن شافت في القايد بعينها اللي كتأسر الغريب والقريب وقالت بحلوة لسانها
ــــ وخا نطلب منك طليبة اسيد القايد
ــــ [شاف القايد فالمشاورية وطلب منهم يخرجو اول مرة توقع لهم تعجبوا ] طلبي وتمناي
ــــ غير سمح ليه انا وخا دار فيا العار قلبي كيسامح ومافيه لا حقد ولا عار
ــــ هي اللولى ياگمرة النهار
ــــ الله يرحم والديك أسيدي
وقفات غادية وكتبسم محيت خرجات منها بحال الخيط من وسط العجين …أما سيد القايد فبقا شارد ومتبع ليها العين كيتمرحد بلاصتو تقول فيه شوك البيض ….
كملات عطور طريقها كتمشى وساهية وخا هكاك رجع عليها هادشي بالندامة تفكرت بوها السلطان اللي كيعدل بين الناس ومايظلم حد أما هي فظلمات راجل قد باها غير باش ترجع النبالة …بقات غادية وساهية حتى سمعات صوات التبراح في كل مكان قربات بأن ليها سوق كبير عامر بالنساء قربات منو وفي باب السوق كان راجل جالس هاز لوحة من العود ،وباين عليه من حالتو باللي هبيل وزاگل عقلو حطات رجلها ادخل وسمعتو انطق
ــــ سوق النساء سوق مطيار اللي دخل ليه مايبقا في جيبو لا قنطار ولا دينار
شافت فيه وتبسمات في وجهو كملات طريقها بقا كيردد نفس الكلام غادية كتمشى حتى جاء في بالها اللغز اللي خاصها تفك رجعات بالزربة عندو ولايني لقاتو مشا بقات كتقلب عليه بعينها تقول الأرض كلاتو ومن فوق منها مسحاتو …تلفتات قبالتها بأنت لها امرأة من النساء كتبيع دواء دالسوسة سولتها
ــــ شريفة صباح الخير ماشفتيش داك الراجل اللي هاز لوحة العود وحالتو مبهدلة
ــــ ديب العرصة يلاه داز دوري من القنط لاخور ديال السوق وأتلقايه حدا مولات العنب
رجعات عطور تمشات كتقلب عليه بعينيها حتى لمحاتو جالس كيخط في اللوحة قربات منو غير شافها ورجع قال
ــــ ياك قلت ليك سوق النساء سوق مطيار اللي دخل ليه مايبقا في جيبو لا قنطار ولا دينار
ــــ عندك الحق اشريف وخا نسولك إلى سمحتي
ــــ “كيضحك بحال شي هبيل ” سووولي سووولي باين عليك نية وقلبك بيض ومول النية حاجتو ديما مقضية
ــــ بركا الله وفيك الشريف بغيت نحكي لك واحد اللغز وصية والى قدرتي تفهموا قولو ليا
ــــ ودنيا بداو يتزمتو عليا تكلمي تكلمي نسمع
ــــ طريق بين بحر ديال الفريك كتحدها شجرة جبران وقبالتها سدرة عمران والوسط فيه بئر حامي وعود الفخار ثمرو يشبع الصغير والكبير وراقو عليها يتغدى الطير عفاااك أسيدي إلى عرفتي شي حاجة خبرني
ــــ فهمت فهمت ماشي غير اللي جاء يعرف شجرة جبران وسدرة عمران
ــــ هاااعار إلى ماقول ليا المقصود من الكلام
ــــ طريق الفريك طريق فيها الكبال وسط القبيلة كتحدها شجرة جبران وقبالتها سدرة عمران هذي طريق أخرى كدي لقصر السلطان أما البئر الحامي فهي شجرة الداليا الكبيرة وعود الفخار عواد الدالية اللي فيها العنب والمقصود من يشبع الصغير والكبير فاش يوصل وقت العنب كاع ناس القبيلة كيجو يعمرو سلات العنب وهاد العنب ماشي بحال اي عنب كيخلي الجوع مايبقى وحلاوتو ماتنسى
ــــ وفين كاينة هاد الدالة أسيدي نقدر نشوفها
ــــ صعيب دخلي لها مكتحل فوجه القبيلة غير في وقت الشمس والحر وقصر السلطان ماشي غير جي ودخل ليه
ــــ تقدر دلني على هاد القصر
ــــ باااين انتي ماشي من هنا محيت كل شي فالقبيلة عارف قصر العرصة
وقفات عطور وهي فرحانة واخيرا لقات الحل ديال اللغز دعات مع الهبيل مول اللوحة دالعود مشات دخلات لسوق مشات نيشان لعند الصايغة عطاتها المحصر تشطرات معاها حتى عطاتها الثمن اللي بغات خرجات من عندها…بدأت كدور في السوق كان عامر بالنساء ها اللي تبيع البخور والعطور والمسك والعنبر والجاوي اللي كيداوي ها اللي تبيع الكحل والسواك هاللي تبيع الحايك والتواب على الالوان والشكال أما واحد العطارة فدايرين بها النساء من كل قنت حاطة الشبة والفاسوخ سنة حرام وعواد الحناء والسوسان وقعقلة والرطم ها الريحان والورد البلدي ها تموسايت والصابون البلدي ها غويسيلة والغسول الكحل ها الضبيانة وعرق سوس …خدات الصابون البلدي والحناء والبخور والغاسول والكحل والسواك وخلصات …كملات طريقها بانت ليها واحد الخيمة صغيرة وفيها بزاف دالنساء جاها الفضول تعرف شنو تمااك
قربات و دخلات كانت مرأة موشمة وجها وايديها ومدورة الضفاير على رأسها قدامها راس الضبع وشوك القنفود وصفيحة العود وضهر الفركون وحاطة قدامها مجمر ديال الجمر وكتقول والنساء ضايرين بها
يابخرتك بتارا فين ما تشوفها ترارا
يابخرتك براس الضبع فين ما تهضر معاك تخلع
يابخرتك بورقة باخا اللي قالتها تقول وخا
يابخرتك بعين الديب فين ما مشتي ماتغيب
يابخرتك براس الحنش وقتما ناضت تركز انت تبدأ ترش
يابخرتك بجلد الفكرون فين ما تقهرها تنعس محروم
يابخرتك برجيلات الديك غير تشوفها تشقا وتقولها زيدي ندور بك
يابخرتك بقبظة الفاس كي تشوفها تحني الرأس
يابخرتك بشوك القنفود كي تخونها يرجع قلبك مقبوض
يابخرتك بلباس الميت كتشوفها بالليل ترجع بحال الفلوس المبيت
عطور غير شافت هادشي مابغا يسالي وهي تخرج مشات شرات خضيرة الدار وميعنات يأكلو فهم وزيرة من الفخار … ووقيد باش تشعل النار شرات القمح وفراش لغطاء …برحات على الحمال بحمارو يوصل لها المقدية لدار …
دازت أيام وأيام وعطور مخلات طريقة باش تقدر دخل لقصر العرصة ، هازة بين إيديها طبگ كتنقي الزرع وهايمة في التخمام كتقلب على حيلة اللي دخلها القصر …شوية شافت ولد صغير كيبكي ويخنن ولإيدو كيحك حطات الطبگ من ايديها وبكلامعا وقفاتو
ــــ أمالك الزوين علاش كتبكي
ــــ [مزال غير كيشهق ويخنن ] ايديا كيكلوني وفي قلبي حرقوني
قربات ليه شداتهم بايديها نفتات عليهم وبصبع الشهادة دوراتو على الحكة اللي دايزة بالدم شافت فيه ورسمات التبسيمة على وجها
ــــ الله يشافيك ازوين هذي الحكة الشديدة اللي كتجي بسبب ريحت البهايم
باس لها أيدها وكمل طريقو ،
أما عطور فهزات طبگها ودخلات الدار، وصل الدري الصغير لدار جماعة الغزال اللي كيغزلو فيه الصوف وكيصنعو زرابي ديال المنزز …دخل كيجري وفرحان كانو ستة النساء هازين مشاط دالصوف نطق وقلبو كيتفرح
ــــ أمي أمي ايدي برات والحكة منها مشات
شدات مو ايد ولها كتقلب فيها متعجبة
#يتبع
شاركنا رأيك في هذا الفصل 🌹