ــــ والله إلى مابقات بلاصة الحكة كفاش مشات من بعد ماكانت دايزة بالدم
ــــ وحد المرأة هي اللي دورات صبعها عليا ومن بعد مابقيت حسيت بوجع
ــــ بصاااح ولا غير تكدب وشكون هاد المرأة
ــــ اول مرة نشوفها في القبيلة
ــــ زيد قدامي وريها ليا نشوف
ناضت ساست جلايبها وحطات المشاطة من ايديها حطات لتامها وشربيل في رجليها شادة بيديو وهاد الشئ جاها غريب كفاش مرآة تقدر تشافي الحكة في رمشة عين…
موقفاتها حتال باب الدار قربات دقات ورجعات اللور ..فتحات عطور شافت فيها وشافت في الدري الصغير وانطقات
ــــ مرحبا بضيف الله ياك مكاين بأس
ــــ ولدي قال ليا باللي داوتي ليه الحكة وبرات ومن إيدو ختفات [وراتها ايدو الله مابقا فيها والو خرجات عينها عطور ] هانتي شوفي
ــــ سبحان الله العظيم كانت دايزة بالدم ودبا مابقا غير بلاصتها
ــــ الله يعطيك حتى يغنيك الآلة ولهلا يغلب زمان عليك باين من وجهك باللي حكيمة وكداوي الصغير والكبير
عطور بقات متعجبة كتحاكي رأسها “زعمة بصاح تكون ايدي فيها البراكة ” مابقا عندها ماالتالي ولا توخر تبسمات وانطقات
ــــ غير نيتو ونيتي تلقات داكشي علاش ربي عجل بشفاه
خرجات المرأة من حضنها صريرة صغيرة فيها قطع ديال الدينار ومداتهم ليها
ــــ ها البياض الحكيمة الله يرحم والديك
ــــ لالا الآلة انا درت ايدي والكمال من عند مولانا مكائن لاش تبرزتي راسك
ــــ ولا البياض هذا وقالو ناس بكري اللي داوك بحالة غناك مترديهاش في وجهي
رسمات عطور تبسيمة على وجها خدات اللي رزق الله …ومن بعد المرأة مشات وعطور لدارهم دخلات …متعجبة والفرحة والرضى مرسوم على خدودها اللي موردين كي الرمان ،شافتها الباتول اللي كانت كدور الرحى وكضحن البشنةو انطقات
ــــ شكون كان فالباب اعطور شفت الضحكة على وجهك وعينك كيشعو بالنور
ــــ دادا واقيلة أنا ايدي فيها الحكمة ورجعت نداوي وبقدرة ربي يتشافى المريض
ــــ كفاااش ابنتي
بدأت عطور كتسرد ليها والباتول كتسمع ليها …
ضحكات من الفرحة انطقات
ــــ عطور هذا مايكون غير حكمة التسبيح الكحل اللي لقيتي وسط الصرة
عطور عاد تفكرات التسبيح اللي للقات مشات لصندوقة صغيرة حاطة فيها النبالة والخلالة محيت هما اللي اغلى من اي حاجة جبدات التسبيح الكحل بدأت كتشوف فيه ومركزة مع العقيق اللي كيبري …شوية تسمع الدقان في الباب حطاتو وناضت تفتح لقات بزااف ديال الناس هااللي مريضة بالهلقة وها اللي قاتلها الحرقة هاللي فيها وجع الركابي وهاللي فايديها التقابي أما الوليدات الصغار فكانوا كيلعبو جنب الدار وحتى هما كل واحد باش مريض …شافت فيهم مخرجة عينها
ــــ مرحبا أسيادي ياك مكائن بأس
ــــ [نطقات وحدة منهم] والو بأس الحكيمة سمعنا اللي حطتي عليه ايديك كيداوى وجينا قاصدينك الله يرحم والديك
عطور شافت فيهم كثار تخلطو عليها العرارم معرفت بشكون تبدا داكشي علاش دارت معاهم واحد الحل مزيان …فكرات وقررات
ــــ أنا غير سبب والله هو اللي عندو الكمال نهار الخميس في العشية انداوي الكبار وليوم في الصباح نداوي الصغار أيوا اش قلتو
ــــ [نطقات وحدة أخرى وجها مبشور وباين فيها لبيبة] وحتى هذا بلان مزيان الله يسهل عليك الحكيمة
تبسمات عطور في وجوهم برحات على الدراري الصغار …بدأت واحد بواحد حتى كملاتهم كتقرا عليهم ودور ايدها على علتهم…فرحات محيت شافت التبسيمة على وجوهم أما النساء فمشاو لديورهم كل شي فرحان بالحكيمة اللي جات لدوار …رجعو الدراري الصغار كيلعبو حدا الدار أما هي دخلات جابت الگلية وخرجات كتفرق عليهم ناويها صداقة على امها الله يرحمها جلسات فوق العتبة كتشوف فيهم يلعبو ويضحكو…شوية برحات عليهم وجنبها تجمعوا
ــــ اجو اجو الوليدات غادي نحكي لكم الغاز وانتما عليكم تفكهم وايوا شنو قلتو
ــــ “كاملين” وخا الحكيمة قابلين
ــــ يلاه نبداو سمعوني وتمعنو مزيان …حاجيتكم على اللي تمشي بلا رجلين وتبكي بلا عنين يلاه شكون يفكها
بقاو كيفكرو ويخمو انطق واحد منهم
ــــ العصا
ــــ ههههه لا ماشي العصا
ــــ دري اخور” عرفتها عرفتها السحاب هي اللي تبكي بلا عنين
ــــ ماعندي مايتسالك هي هديك ايوا دبا دوزو الأخرى حاجيتكم على العين والعين عدو ديال البشار الجمل يتحملو وحتى الصبار والماء ليه قهار ايوا شكون عرف هذي
بداو كيفكرو واحد يشوف فواحد أما عطور كتبسم وتشوف فيهم كيعصرو في دماغهم …شافو فيها بقلة حيلة
ــــ معرفناهاش
ــــ هههه صافي بعتو حماركم ليا
هاد الكلمة جابت لهم الضحك بداو كيضحو وانطقو مجموعين
ــــ بعناه بعناه قولي لينا المقصود منها
ــــ العطش اوليداتي كل واحد مايقدر يبقا عطشان والجمل ليه كيصبر وباش نقضو عليه ايخصنا الماء دبا فهمتو
ــــ اه فهمنا زيدنا حجايات خرين
ــــ ولفتو يالباندية هههه وخا انزيدكم واحد واللي بقا حتى شي نهار اخور صافي يلاه سمعو وطلقو وذنيكم وركزوا لآلة يالالة ياللي الريش داير بيك يعطوني فيك ألف قنطار ومانفرط فيك ايوا يلاه وروني شطارتكم وفهمكم
كيخمو وكاين اللي فيهم كيضحك سولاتو
ــــ أش ضحكك ازين هدبة العين
ــــ [حشم ] حجاياتك صعاب اخالتي الحكيمة
ــــ الحجايات الولدي كيزيدو في العقل وفي الشطارة وخا انقولكم المقصود وخا بينت لكم ولايني معرفتوش هي العين والعين حرة مايفرط فيها البشر ولو فترة …ايوا دبا سيرو حتى بحال ليوم وجو نعاود لكم الحجايات ونفقهكم مزياان
ناضو باسو ليها أيدها وكلها مشا لدارو … أما عطور فضحكات من قلبها شحال هذا مافرحات حتال ليوم …رجعات كتفكر في شي حيلة لدخلها للقصر السلطان …حتى بان ليها رجال تابعين القايد اللي راكب فوق العود ديال حجر الويدان وقفات بجنب تخبات بحرامها اللي على رأسها محيت كانت دايرة انقاب فضي على وجهة …قرب ليها القائد لابس سلهام بيض وجلابة في الكحل وكرزية على راسو مع عمامة في الكحل في جنبو خنجر حنحن وانطق
ــــ السلام عليكم ازينت البنات
ــــ وعليكم السلام اسيد القايد اش حب الخاطر
ــــ [تبسم كيحاول يشوف وجهة اللي مخبياه بطرف الحرام] احينا كون تعرفي اش بغات الخاطر ..
ــــ كفاش شنو كتقصد بكلامك
ــــ سمعتهم كيقولو باللي حكيمة وكداوي المريض وتشافي القلب
ــــ هدا عليا اسيد القايد نشافي النساء والصغار أما رجال والقلب ماعندي عليهم خبار
ــــ وغير جربي راني مهلوك ازينت البنات
طلع ليها الدم جمعات الحرام على وجهة وشافت فيه بعينها الملوزة
ــــ شوف اسيد القايد انقول كلمة مانفوتها اما تمشي واللا مايعجبك حال احتارمتك لمقامك لهذا سير في طريقك وشد وعطيني الوقار
دخلات الدار وخلاتو فيها محلول كلامها يلاه مازاد عزمو وإصرار ضرب على قلبو وانطق
ــــ يالكاملة ياگمرة النهار مانمشي إلا وجبتك تحت جناحي باش تسخني كتافي
تحرك ركب على العود اللي كحجر الواد وتبعوه من اللور العوان…
اجيو نمشو لطريق مسدودة ورجال مگلدين ليها حارسين …بين شجرة جبران المحروقة بالنار وسدرة عمران اللي بلاصتها مغروس نبات الصبار كاين قصر وماشي أي قصر قصر كبير وبيبانو بالخشب المطرز منقوشين …داخل القصر اللي عامر خدم وحراس وكلهم لابسين صبابط الجلد في رجليهم وكرزيات كحلة لراسهم مغاطينهم …أما الخدمات كانو كالفاخر كلهم كحلات وكلهم لبسين قفاطين من حرير الدودة وخيط عامر باللوبان الصفر ومحزمين بحزام صفر …أما في جناح كاين مابين عرصة كبيرة وكرمة صغيرة جالس راجل كيصلي ويقرا القران لابس دراعة بالزرق شعر راسو خفيف وجهو زين وعينه خضرين كي ورق النعناع ، الرجلة والشهامة مابحالها حال والطولة والفخامة صعيب تلقها في اللي كان ، كيقولو عليه فحل كالخيل الجوهر وقاسي كالسيف النحاسي …سلم وناض هز كفوفو طلب مولانا اللي في قلبو ودعا مع باه السلطان يترحم برحمة الرحمان …جمع الهيضورة ديال الصلاة دخلت وحدة من الخدمات حانية الرأس وجامعة ايديها انطقات
ــــ مولاي القاسي العشاء موجود ولالة السلطانة كتسناك
ــــ سبقي هاني جاي
مشات الخدامة …أما سيد القاسي فالاح سلهامو على كتافو وخرج كيتمشى بالعبار واللي شافو كيحني الرأس …دخل لمقصورة خاصة بالماكلة والقصارى كانت امرأة كبيرة لابسة قفطان حمر وحاطة مشبوح على راسها وخيط اللوبان الحر في عنقها الشوفة معقولة والتبسيمة على شفايفها مرسومة حاطة في يدها المحاصر وبين عينها وشام مهلل …قرب منها مولاي القاسي باس على راسها وقال
ــــ كي مسيتي أتاج راسي
انطقات السلطانة مرضية
ــــ هاني امولاي غير مع واحد الركبة ضارني وفي قلبي فاقصني وبالليل مسهراني
ــــ نجيب ليك شي حكيم يشوف شنو عندك
ــــ غير خليها وكان مولات المهارز كانت عندي وقالت باللي خاصني نبخرها بالحدجة اليابسة 40 يوم وغادي يزول الوجع
ــــ ايوا على الله اميمتي تبراي وتشافاي وترجعي صحة سلام يالاه بسم الله
بداو كياكلو في السكات ،محيت السلطان القاسي العدو ديالو اللي يتكلم ويتمتم فوق الماكلة كيقول العيال والخدم والحراس والعوان وقت الماكلة مابقات كلمة …كملو ماكلتهم جابت ليهم الخدمة لوبانة الدسير هي اللي مكلفة بماكلة السلطان باش إلى شي نهار وقع شي حاجة تحمل المسؤولية ….قطع طرف البنان وخثم بقطعة من الرمان …مسح فمو وغسل ايديه في الساقية اللي جنب الباب دال المقصورة حمد الله على النعمة ورجع جناحو من بعد ما بأس رأس تاج راسو ….
داز الليل وجاء نهار جليل نهار بخيرو وبزهرو الشمس على بنادم تراراة والبرد القارس في جلودهم كي جلد الطارة …فطر وشبعت كرشها وخرجت تسراح رجليها كدور من هنا لهنا في القبيلة ووسط النواعر الأرض الخضرة والشجار شبعانة برد وصمرة …من بعيد لمحت الغاشي بدات كتقرب حتى وضاحت ليها الصورة كانو بنات جنب شجرة الزيتون كانو جالسين و دايرين وزريعة الگرعة هازين … قربت منهم وبقات كتسمع على حديثهم
بنات جميلات هاللي زينها فتان وهاللي سموريتها كي العسل إلى طاح في العين يداويها ….انطقات وحدة شابة ومبشورة وبلباسها الطويل مستورة
ــــ ” نوارة الدار” أنا مابقا عندي صبر وقلبي طاب وعقلي قرب يهتر
ــــ” فنة ” ايوا شكون داها فيك العصيد نهار العيد مولاي قاسي ماباغي بنت ولا مرأة واقلة ساحراه شي جنية حرة
ــــ ” شمس الضحى” [تنهدات ] الله ياقلبي إمتا يجي نهار اللي يختارني فيه السلطان
ضحكو البنات عليها شافت فيهم وجمعت شفايفها ..انطقات السمرة زينت السنان
ــــ ” سواد الليل” ايوا خلاااص يا شمس الضحى السلطان مالقاء مايدي غير وحدة بحالك هبيلة والضل دايعة في القبيلة
ــــ وعلاش مالي حسدتني محيت عقلي هاني وعارفة باللي سعدو من سعدي
ــــ ” زاينة ” وفين ايخلي الزين والتباتة مولات الرتاء والكلام الزين والقصيد الحلو اممم
ــــ ” فنة ” يشويني فيك وفي كلامك المبهلل حتى دوك الكلمات اللي كتخططي فيهم نقولهم انا قصيد
ــــ ” زاينة” وعلااه مالو كيقدر يتخطى بحالو ولا غير اللسان ماضي والدراع كادي
ــــ ايوا صافي لآلة زينة ودمغها الغربال ساليت لراسي وشطانتي باش نجلس خطط في كلام مالو ساس ولا راس
ــــ “نوارت الدار” البنات خاصنا لقاو شي حيلة حتى نشوفو السلطان انا راني توحشت غير نضرة من عينه الخضرة اللي كوراق الشجر والى بقينا على هاد الحال حتى وحدة ما غادي تأسر قلبو القاسي
ــــ “سواد الليل” عندك الحق ولكن كفاش والحراس مانعين الناس
هنا داز الكلام كلو على ودنين عطور تبسمت ومرة أخرى طاحت عليها حيلة مالها مثال خرجت من ورا الشجرة مغنبرة وبين عينيها وشام وفي يدها هلال شافوها البنات وتخلعو كاين اللي دفلت في حضنها ..نطقات عطور
ــــ صباح الخير عليكم يالبنات الزينات
كيشوفو في بعضياتهم مركزين في عينها الساحرين والطريق باش مرسومين وبشرتها البيضاء وحاجبها المهلل انطقات فنة
ــــ شكون انتي ابنت الناس خلعتنا وطيرتها خلعة منا
ــــ “عطور” ماتخلعو ما دهشو غير بالصدفة كنت دايزة من هنا وجا كلامكم لوذنيا ولقيت ليكم الحل
شافو في بعضياتهم مرة أخرى انطقات نوارت الدار
ــــ وديالاش الحل
ــــ الحل ديال باش تشوفو السلطان القاسي
ــــ “سواد الليل” يااك ماتكوني ختو ولا بنت عمو وبغا ديرها بينا محيت باين اللي زينك غير ديال بنات الناس الكبار
ــــ [تبسمت عطور] ألا ياهبيلة الزين الصافي هو زين العقل أما زين الوجه فاني والزين في الفعل علاه مكاتشوفو الذفلة زينها حمام ونوارها جنان ولكن حارة ومرة ولا لا ؟
ــــ “شمس الضحى” هضرتك صحيحة فصيحة ايوا قولي لينا الحل باش نشوفو السلطان
ــــ سمعوني يالهبيلات يالمرضيات يا للي زينهم زين الزينات راكم على السلطان قادرات تكسبوه ويطحوه وقلبو تسلبوه
ــــ نوارت الدار” ولايني كيفااش نديرو
ــــ نهار الخميس في العشية سيرة لسوق النساء وأتلقاو مرأة حكيمة حاملة التسبيح كحل والنبالة وراشمة ايديها بالخالة حاطة الحريم على عينها وتبيع الحرير بيدها …شري الحرير وخودي البراكة راها كتعطي سلات العنب فيهم حرام بالحمر وشربيل بالصفر والمحضوضة هي اللي تاخد ماء البراكة في سلتها …ولايني كنقولها ونعاودها حرام على شي وحدة تفتح السلة خليهم مغطين هي راها حكيمة وكبيرة وايدها إلى دوزتها عليك مايبقا مرض فيك
ــــ ” شمس الضحى” ولكن باش انعرفو هد الحكيمة وباللي هادشي صحيح وماشي بهتان
ــــ الحكيمة مولات الحمار كتوقف قدام باب السوق النساء [هزات كتافها دورات عينها عليهم ] وانا غير قلت لكم بقيتو فيا وحبيت نساعدكم
ــــ” فنة ” واش بغتي في المقابل ديال هاد النصيحة
ــــ ألا فهمتي بالمقلوب انا راني غير عاونتكم محيت شفت قلوبكم محروقة على السلطان ورحمة الولدين كافياني ومكفياني ايوا دوزو بخير
وقفت عطور تبسمت دازت وخلاتهم على حيلتها يتشاورو وعلى كلامها يتحاورو …
تعشات العشية وطاح الظلام …وفي قصر العرصة مولاي القاسي في جناحو كيحيد السلهام…قرب من الشرجم الكبير ديال جناحو بغا يسدو باش مايسمع حس الطبول…حط ايدو على باب الشرجم اللي مطرز بالرخام حتى جات عينو في اللي مكان في الحسبان …قشع امرأة خلف الشجرة الكبيرة لقريبة لقصر حاضية الشرجم ومن خلف لتامها كتمسكن…بقا سارح في العنين الكبار ولونهم الفتان بقات شحال وهي كتشوف فيه مطرطقة عينها في عينيه …أما هو سارح في وعقلو واقف ….شوية وهي تختافى مابقا ليها أثار رجع كيقلب عليها بعينها اللي خضوريتها كي وراق الشجار …تعجب ودخلوا التخمام تنهد وغلق الشرجم ومشا لبلاصتو يرتاح حط راسو على الوسادة وبقات دوك العنين كيتخيلهم قدامو وعقلو كيفكر ويسأل حالو ” شكون هذي؟ ومنين جات؟ ” بقا كيفصل ويخيط حتى دخلو النعاس وغمض عينو …
رجعت عطور لدار والليل سدل خيوطو والسماء غبات بالظلام …دخلت لقات الباتول غير غادية جاية في الدار غير شافتها ضربت على فخاضها وقالت
ــــ الله ابنيتي الله فين دايعة في هاد الليل إلى شافك شي واحد من القبيلة انبداو نسمعو القال والقيل وهادشي ما نقبلو
زولا اللتام والحرام اللي كانت به مغنبرة طلقت شعرها وجلست فوق الحصيرة ديال السمار وقالت
ــــ دادا ماتكلي هم ماتهزي غم راني عطور بنت السلطان وعارفة أش خاصو يدار دادا راني لقيت حل الوصية هذا شحال ولايني كاين واحد مشكل واقف فطريقي
ــــ وكفاش عرفتي الوصية ديال الشريفة وشكون هاد الحكيم اللي فسرها
ــــ هبيل ودايع في الزناقي ولايني حكيم وعارف اللي كاين غير هو البلاصة اللي فيها الوصية كائنة في قصر سلطان القبيلة ومكاين حتى حيلة باش ندخل ليه
ــــ ايه وشنو غادي الديري مني عرفتي
ــــ غادي ندير اللي عليا والكمال على مولانا
ــــ لا لا ابنتي خايفة غير الطيحي راسك في شي واد غارق
ــــ دادا انت غير نعسي على جنب الراحة أنا راني قد وقدود مايقد عليا لا عبد ولا نفود عارفة نخرج راسي وندفع باسي ايوا تعالي حكي ليا راسي باش يدور الدم في عروقو ونخمم في حيلتي مزيان
تكات الباتول على الوسادة أما عطور فحطات رأسها في حجر داداها بدات كاتخمم والباتول لراسها تفلي وتكزن … نطقات الباتول
ــــ جات في بالي واحد الحجاية بحالها بحال حكايتك ومولاتها فعايلها بحال فعايلك
ــــ [طلقت ضحكة طويلة] ايوا هاني كانسمع لك راه شحال هذا ماعاودتي ليا الخبير وطيبتي نعاسي
ــــ ايوا سمعي وتنغمي فحكاية وبلسان غنجا تعلمي
أجي يابنت الهمة والشان تسمعي حكاية بنت المرشان
لي جرات وجراات …وحكايتها فكل دوار تساراات… وبلسان السلطانة غنجا تحكات…
قالت كلامي اقوال وقيل …سمعاتو بنت الدربانة والهبيل …
هاذي بنت بحال جميع البنات…واخا تعيا دور عمرها تنسى اللي فات
ولا ترجع اللي مات…ولا تحقق لي تمنات..
هادي بنت طاغية على نفسها…ماشي على ربها ولا غيرها …
ماخلات مادارت…وماخلات ماشافت .. وعمر نيتها خيابت…
قلبها صافي وكبير بحالو… بحال عمق البير..
هادي بنت بحال جميع البنات…والايني فعايلها ديال الشيطانات…
مجموع فيها الزين والخبيث…وعلاش ما قلبت تعطيك…
فواحد…المجمع قالت:
أنا بنت بحالي بحالكم …والايني فشطارتي فايتاكم
…وبفعايلي غالباكوم
…وبطيبتي قاتلاكم
…وبحلاوة لساني هالكاكم
…وبقوتي حاكماكم
…وبشري موقفاكم
… وبزيني مهتراكم
هادي بنت من هاذ الزمان …بقلبها عاشت الفرحة وقسات الاحزان
فعز ضحكتها بكات….مابغات لاهذا و ذاك…وبتجارب الحياة مرات
والحمدلله على لي فات…
عطور غفات ولنعاسها ستسلمات…أما الباتول فا بقات كادوز ليها على رأسها والتبسيمة على فمها كاتشوف فيها تنهدات ومن بعد قالت
ــــ الله يجعل زهرك فايض ابنتي وتعيشك تحت الجناح المرضي
أما في قصر عرش السلام جالس جابر اللي حالتو حال الجمل الجاعر لا الرأس أهنى ليه ولا قلبو هداء عليه …كما يقولو العشاقة حال المغروم مامفهوم لا هو يقدر ينسى عشقو ولا فرحتو دوم …باقي كيتفكر ويضحك كي الهبيل الدمعة نازلة ،وقلبو طاير مع الطيور لبعيد …في واحد النهار من نهارات الله واقف بعيد كيطل عليها من الطقة اللي كيجلسو فيها الخدم …هازة مرود الكحلة وكتكحل العين وتقاد الحاجب المهلل كتغني وكضفر في الشعر المذهب …سارح في الزين اللي كزين الدفلة بنوارها الوردي التبسيمة على فمو والشطيح كيدق في قلبو ….بقا حاضيها حتى شافتو وبالحيك تغطات وللشرجم قفلات …انطق من بعد ما سالا التخمام
ــــ فينك اعطور.. فينك اللي معدباني وكاوياني بكية …دموعي سالو وخلتني كي البنية ….
دخلات السالكة شافت فيه …حالت ولدها ماعجباتها خايفة يدير شي مصيبة في راسو صفقات جوج تصفيقات دخلو جوج من البنات لشعر مزينين بخيط الروح مذهب والراس حانين من الخوف …شافت فيهم السالكة وحركات رأسها باش يقربو لها …جابر باقي غارق في التخمام حتى نطقات
ــــ ولدي جابر جبت لك زين الزيون تخير وختار واللي عجبتك نزوجها لك
تلفت جابر ونقطة ديال الدموع فطرف جفارو انطق
ــــ خرجي عليا ودي هدو عليا ماخصني زواج ولا بنات بغيت عطور
ــــ جابر بركا من كثرة الأوهام عطور مابقا لها آثار خاصك تنسها وتحط فوق قلبك حجرة ماشي هي اللي كائنة في القبيلة عتا ربي البنات
ــــ [وقف شير بصبعو في جهت باب الجناح] خرجووو عليا خرجوووو مابغي نشوف حد حدايا
السالكة شافت في البنات وطلبات منهم يخرجو أما هي فنغسها هاد متعوس ليام ديال ولدها تعصبات خرجات وخلاتو في تخمامو غارق ….
داز الخميس وجات الجمعة ….وفي وسط سوق النساء واقفة عطور بحمارها كتبيع السلعة…حاطة حرام على وجها ولابسة عباية كحلة كتبرح وتقرب النساء لها تجمعوا عليها وكلها كيصاوم ويتنزاه وكما كيقولو الناس اللي ماشرا يتنزاه
ــــ قررررربو يااالعيالاأاااات خترو وتخيرو ولحرير دودة شرو….هاااكي ألالة تخيري وشري هالعكر الفاسي هاكحل أگوم لبسي وتزيني قربووو يااالبنات راح حرير الدودة مايلبسوه غير الزينات
ــــ “وحدة من النساء “شحال هاد الثوب ألالة
ــــ هذاك بقنطار والعكر والكحل بدينار
ــــ ايوا جمعي ليا تلاتة الثواب والكحلة والعكر الفاسي
ــــ هي اللولى قربو يااالبنات [شافت سواد الليل ،وشمس الضحى،وفنة،ونوار الدار و تبسمات ] قربووو يالبنااات قربو هاسلة الميمون واجدة فيها براكة الحكيمة وتوب الرزينة تخيرو وختارو يلااه ازينات النساء ،تفضلي ألالة ها طلبك…. الله يخلف
وقفو البنات مزينين ولحرامهم لابسين كيشوفو في بعضياتهم انطقات فنة
ــــ لآلة مولات الحرير جينا باغين سلة الميمون اللي فيها حرام بالحمر وشربيل بالصفر وماء البراكة
ــــ هي اللولة موجودة ازينات ولكن سلة البراكة ماتحل ماتحادا كديها هدية السلطان في ليلة الجمعة المباركة
ــــ “سواد الليل” غير عتقينا أشريفة نجربو حضنا ونسبقو لفال لزهرنا
بدأت تسل في السلات من عين شواري سلات فاش كيدار العنب مغطين بحرام سود ومكروفين بخيط زرگ عطاتها لهم وكملات في تبراحها
ــــ قربو يالبنات هاتوب الحرير اللي بحال نور القنديل ها العكر الفاسي اللي غادي يطير نعاس سيد القاسي هاااا الكحلة اللي تعجب الرجال الفحلة قربو سلة البراكة موجودة وكاينة …هاكي الآلة تخيري مع راسك ليلة الجمعة مباركة تخدي فيها الهدية لسلطان اللي حارق قلوب نساء
بداو البنات الزينات والنساء اللي عطورهم فايحة في السماء كيقربو ويشرو ويتخيرو مابقات سلة في عين شواري ولا ثوب كيشالي ….7 السلات كلهم تباعو لبنات والتواب والعطور والكحلة والعكر داوهم النساء …جمعات شغلها وقادت الحمار راجعة لدار ….دخلات الحمار خباتو ولحرامها حيداتو ولحواجبها اللي عمراتهم بالجير مسحاتو والخالة الكبيرة والوشام اللي على وجهة بعداتو أما وجهة اللي حماتو باش تبان كحلة شوية ويغباو حروفها غسلاتو …كيقولو الشطارة إلى موگدات العقل فراها خسارة …دخلات لدار بلا ماتبين اللي دارت ولا تشطن عقل داداها بحروبها اللي فيهم غرقات…. لقاتها موجدة گسرية ديال كسكسو بسبع خضاري وحلاب ديال لبن البگر اللي صيفتوه لها النساء الدوار …غسلات أيديها وعلى المرفع تربعات كتلگم وتاكل وتبنن وتشرب اللبن ونطقات
ــــ الله يعطي الصحة الليديات اللي دارو هاد البنة
ــــ أمين ابنيتي عطور ايوا شفتك غايبة من الصباح فين كنتي
ــــ غير ندور أدادا ونلگت السبول ضايق بيا الحال وخايفة يجني الهبال بسبب فراق بويا السلطان الكبدة مشوية والنفس داخلها مكوية
ــــ ولاااوه ابنتي كون غير جلستي حدايا نعلمك طيبي الطعام
ــــ [لحسات صباعها ] وانا يادادا مانطيب في نحاس ولا كسكاس
ــــ لالا لازمك تعلمي باش نهار تزوجي تعرفي اش الدري
مع كملات هاد الكلمة تسمع الذقاان في الباب …وقفات عطور غسلات ايديها وحطات لتامها وغادية تشوف شكون
ــــ أشكون في الباب
ــــ “نساء القبيلة” غير حنا ألحكيمة
مشات من بالها باللي ليوم جمعة وكداوي الناس …
فتحات الباب دخلاتهم لواحد البيت مفرش بالحنابل والمخاد دخلو ورجعات عند دادها باش تقاد الضيافة….
أما في ديور البنات فنة،وسواد الليل، ونوار الدار ،وشمس الضحى ،وزاينة فكل وحدة في دارهم شادة قنت هاا اللي تكبر العين وها اللي تكحل الحاجب ها اللي ترش العطور وترش بالرشوش أما واحد سواد الليل فغير بارك لوجهة كتبيض ولهدبتها كتجبد …تزينو بالعكر الفاسي ولبسو الحرير وجدو السلة اللي فيها الحرام والشربيل والبراكة…وخا فيهم الفضول يشوفو شنو فيهم إلا أنهم مابغاو يفوتو كلام الحكيمة ويتصرفو بحال البهيمة….
وصل الليل والبنات جنب قصر العرصة مصفات …دخل واحد من الحراس علم لآلة مرضية باللي بنات جايبين الهدية لسيد القاسي …صيفتات لوبانة تخبر السلطان …
جالس ومتكي كيكتب ويخط بخطوط القران لابس توب حمر وفوق راسو العناية …تسمع باب جناحو قال تفضل دخلت لوبانة حانية الرأس
ــــ مولاي القاسي بنات القبيلة جابو الهدية
ــــ[حط القلم وطل من الشرجم دار ايديه وراه ] قولي الخدم يدخلوهم والهدايا فتشوهم ومن بعد قولهم مايرجعوهم خاوين
ــــ وخا امولاي
خرجات لوبانة دارت بكلامو باش يزيد يعلا مقامو …دخلو بنات القبيلة منهم جوج بنات غرابات ولا خرين فنة ورباعتها…كلها فين مزينة كيقلبو بعينهم لعلا وعسى يلمحو سيد القاسي …خداو الخدم سلات قلبوهم لقاو وحدة هي اللي فيها ماء من الزعفران وشجرة البراكة عمرو لهم سلات باللوز والكركاع وصريرة عامرة بالفلوس وعطاوها لهم …سولت سواد الليل واحد من الحراس
ــــ سمح ليا نسقسيك …سيد القاسي كاع مابان
ــــ عندو شلا شغال وراه دار معاكم الوجيبة
سواد الليل طلقات شلقمها وماعجبها الحال هزات السلة وتبعات البنات …دايزين وفي الطريق مضيومين كانو تابعينهم جوج بنات غرابات انطقات سواد الليل
ــــ ياااختي تقادينا وتزينة ومني صبح الحال وانا هازة الهم وفاللاخير ماشفت سيد القاسي
ــــ”فنة” خائفة غير ديك الحكيمة تكون دارتها بينا
ــــ نوار الدار اتي سكتي وانتي بحال اللي يفيق العماء في تحاوط الحجر دروك يسمعونا البنات اللي غرابات ولقاو خبارنا في القبيلة تحاحات
كملو البنات طريقهم لديورهم…
أما في القصر دخلو الخدامات الثواب على الشكال في الحمر …وشربيل مزوق في الصفر هازة لوبانة قرعة فيه ماء الزعتر والبراكة وعطتها السلطانة مرضية…شداتها من عندها شافتها
ــــ هذا ماء البراكة هاكي الوبانة ديه في كأس لسلطان يشرب منو لعلا وعسى يداوي الحال ويهديه الله يفكر يتزوج ويدير التريكة
ــــ هي اللولى أمات سيدي
خرجات لوبانة خدات كأس فيه الماء عطاتو لسلطان
ــــ مولاي هاد الماء دالبراكة صيفتاتو لآلة مرضية
خداه سيد القاسي من عندها شربو …أما لوبانة مشات وقفلات باب الجناح …رجع يخطي ويكتب القصيد …تفكر دوك العنين الكبار ولونهم الفتان والحجبان الهلال تبسم حط القلم وفي تخمامو سرحان ،شوية بدأ يحس براسو تزير وكرشو كتوجعو ولونو رجع حمر ويديه كترعد ناض من فوق الكرسي كيحاول يوقف ورجليه فشلانين …صوتو تقطع ومصارنو كتقطع… حط ايدو على باب جناح غير حلو وفالارض تلاح…شافو واحد الخدام جاء يجري مخلوع برح على الخدم يعاونوه وصيفت واحد يخبر السلطانة مرضية …
جات تجري وتجاري والخلعة في قلبها كتراري حطوه في المحمل ديالو …وجهو مخطوف وغايب انطقات السلطانة مرضية وقلبها خايف والدموع في عينها تجمعات
ــــ برحوووو على الحكيمة والشيخ
مشاو الخدم بالزربة تلاحو على خيلهم يشوفو الحكيمة والشيخ …جابو الحكيمة قنديلة والشيخ حماد شافوه دارو اللي عليهم شربوه الدواء وعطاوه العسل والدغموس …أما مولاي القاسي فاباقي غايب شافت فهم السلطانة مخلوعة
ــــ امدرا اش طرأ لسلطان ريحي شطانتي
ــــ “الحكيمة قنديلة” شرب شي حاجة اللي خلاتو فهاد الحالة
تفكرات السلطانة مرضية الماء اللي عطات لوبانة …خرجات مرضية زربانة نيشان عند لوبانة
ــــ لوبانة اجي لهنا
ــــ نعم أمات سيدي
ــــ الماء دالبراكة عطيتيه لسيد القاسي؟
ــــ ايه درت كما قلتي ليا ياك لباس مال مولاي
ــــ رجعي الشغلك
خرجات السلطانة مرضية عند الحراس وقالت
ــــ جيبو ليا كاع البنات اللي جابو الهدية وحدة فيهم حطات في الماء شي حاجة دبا بغيتهم عند رجليا
ــــ قايد الحراس “هي اللولى الآلة
جمع الحراس ركبو على خيلهم ومشاو كيقلبو دار بدار جمعو بنات القبيلة اللي جابو الهدية …كانو خايفين لهما الحيلة عارفين ولا فاهمين …جارينهم ولحبل في أيديهم مگيدينهم كيبكو ويغوتو ويقولو مالنا وشنو درنا وفاش غلطنا
دخلهم لقصر جلسو على ركابهم وحدة تشوف في وحدة كلهم شادهم التلفة …خرجات السلطانة مرضية الدم طالع ليها عاقدة غوبشتها وكاتمة غصة في قلبها شافت فيهم وانطقات
ــــ وحدة فيكم جابت سلة فيها ماء الباركة شكون هي؟
بداو البنات يشوفو في بعضياتهم وكلهم خايفات كيصرتو ريقهم ويفكرو في حيلتهم المزغوبة …قطعو الحس والياس وعينهم طابو بحال الدشيش في الكسكاس …رجعات نطقات السلطانة مرضية هضرتها مرفوعة وكلمتها مسموعة
ــــ راااني هضرت ومااانعاود الهضرة اللي جابت ماء البراكة تبان وعليها الامان
ــــ انطقات فنة” لآلة مات سيدي حنا شرينا السلات ولايني حتى وحدة معارفة شنو فيهم محيت الحكيمة مولات الحرير وصاتنا مانحلوهم ولا نقشعوهم
ــــ[السلطانة مرضية تعجبات ولحاجبها رافعات] كفاااش ؟واشمن حكيمة ؟
بدأت سواد الليل كتعاود ليها من الطقطق حتى السلام وعليكم استغربات وهادشي في عقلها تلفها شافت في البنات وانطقات
ــــ وفين هاد الحكيمة مولات الحرير كيف شكلها وكيف العين
ــــ نوارت الدار” هي كبيرة في العمر وجهة لون السواد وحجبانها شايبين ومكثفين بالشعر وفيها خالة بين حجبانها وقبالتو وشم أما نص وجهة مغطي وعمرنا شفناها ولايني البنت اللي وصفاتها لينا كاينة في القبيلة غير هو فين ماعرفنا …
ــــ بسبب هادشي مولاي القاسي في فراشو كيقاسي ماء البراكة فيه العلة وانتما جبتو الهدية بلا ماتعرفو شنو في السلة …والى مابرا السلطان غادي يكون ليا معاكم حساب ودبا غبرو ولهاد الباب عمركم تعتبو [شافت في الحراس] خرجوهم عليا
وقفوهم غادين بهم حتى تفكرات وحدة من الغريبات الحكيمة اللي تشافي دارت حانية الراس و انطقات
ــــ لآلة سمحي ليا نقول شي كلام
ــــ أش بغا تقولي
ــــ كائنة واحد الحكيمة فهيمة وكداوي في رمشت عين
ــــ وفين هاد الحكيمة
ــــ كائنة فجنب طريق الدوار قريبة من بياع الديور اللي جنبو الساقية والصور
ــــ [شافت في الحراس مرة أخرى] سيرو جيبو هاد الحكيمة في الحين
خرج واحد من الحراس ركب على الخيل كيقلب على الدار اللي نعتو ليه اللي شاف كيسولو على الحكيمة الفهيمة اللي داوي الصغير والكبير…
أما النساء في دار عطور كانو مقشبات باركين على الضحك والقصارى كل وحدة تعاود نكتة ولا حجاية ولا معنى باش تكون وصية وتاخدها خرس فالاوذن ..حادة اللي قد النخلة المقادة ضحكات وتورخات عجبها الحال وقالت
ــــ الله يعطيك صحيحتك يالالة الكاملة معندي ميتسالك الكلام الزين والفهامة والحجى علم الله منين ورثيه
ــــ [ضحكات الكاملة اللي وراء لتامها حشمانة ] الورثة حلال واللي ماورث نقطة من الفهامة ايعيش حياتو ودنيتو عيانة
ــــ ” عبوش مولات الدموج” وحتى لآلة غنجا تبارك الله على الماكلة الزينة شي جمعة نتجمعو ونديرو كسكسو في قبة سيدي عامر
ــــ “عطور” ديالاش هاد القبة
ــــ “عبوش مولات الدموج” زيارتها في ليلة الجمعة كتزيل من عينك الدمعة وتخلي سعدك يتگعد
ــــ “الباتول” ايوا خاصنا نزورها على هاد الحساب
ــــ “لآلة خميسة” ايوا خاصنا نمشو يالعيالات راح مشا الحال والرجال في الخيمة ايديرو حيحة علينا
ــــ “عطور” ايوا تسناو نختم لكم بالختام ونقول لكم واحد الحكاية خفيفة ضريفة
ــــ عبلة مولات المراود ” ايوا نغمينا يازينت العيون
ــــ سمعو مزيان يانساء القبيلة شنو كاين في هاد الزمان هاذي مرأة لفعة لفاحة مرجعة راجلها كخنز السفاحة [بداو كيضحو ويتورخو] هو كان راجل يوزن حصان أما مني طاح فيديها رجعتو عريس وداتو في الغفلة وكما يقولو الناس الكبار عريس الغفلة عرسو كي شعيل النار
تلقاه يبوس الرجلين وما يتخطى باب الدار
يكويه شهاب مشعول من الفخار
يتألم ويجري طول النهار
وفي الليل ينعس في بيت المقدار
نهار وراء نهار وراء نهار
تلقاه ينهق بحال الحمار
حاني الرأس و تقاطع الحس
لاهو يتحادى ولا يتمس
هااااااهااااهااااا
محيت حكماه السحرة من ليلة العرس
مسكين بحال الشكح لي مسجون في قفص
يفهم كلامها من الشوفة
ويغمض عينه بحال دجاجة المتلوفة
الحصول ومكاين
رد بالك يامول الكلمة والحكام
ليطرقوك بقفل وترجع بلا معنى ومربوط بلجام
ايوا كيف جاتكوم الحكاية (حكاية الطاهر والسالكة)
ـــ عبوش مولات الدموج” لا لا تبرك الله عليك وخلاص تعرفي تحاجي ولناس تناجي
تسمع الدقان في الباب وقفات عطور تشوف شكون في الباب
خرجات وخلاتهم يكملو لغاهم …لاحت الحرام على رأسها وانطقات من خلف الباب
ــــ أشكون كيدق في الباب
ــــ واحد من دار الحكام صيفتاتني مولاتي مرضية بغاتك في الحين تشوفي سيد السلطان مريض
ــــ [تبسمات وهنا عرفات باللي حيلتها نجحات] وخااا بلاتي نجيب المزود وهاني تابعاك
دخلات عند النساء خبراتهم باللي طالبينها في دار الحكام وباللي السلطان تزاد عليه الحال …كل شي جمع الضحة والتمام كلها يقول وشنو صرا لو …خرجات عطور من بعد ما غمزات داداها الباتول تبعاتها لبيت لگدي والطبيخ كتوشوش في وادنها
ــــ دادا وياااك تجيبي سيرة لشئ واحدة على شكون حنا ولا لاش جينا خلي حكايتنا حسي مسي
ــــ هني البال ابنتي وسير داوي السلطان راعي القبيلة
هزات عطور المزود فيه كاع اللي تحتاج خرجات قريعة صغيرة حطاتها في حضنها ولاحت حرامها على رأسها وخرجات… طول الطريق وهي كتمشي والحراس مرافقينها حتى وصلات لقصر السلطان …فتشوها مزيان محيت من بعد هادشي اللي وقع مابقا أمان
قابلت السلطانة مرضية باست على أيدها ومن النظرة الأولى لقلبها دخلات
ــــ”مرضية” الله يكمل رجاك وتسگم سعدك إلى ما شوفي ولدي وشافيه
ــــ ادوني لجناحو الآلة والكمال على الله
مشات معها والخدم وراها دخلو لجناحو كان ناعس والقرآن في جنبو غايب …حطات المزود جنبها والسلطانة مرضية حاضياها شافت فيه وسهات حروفو فحروف راجل فحل باين صعيب وحتى وهو ناعس قاعد حجبانو هزات أيدها حطاتهم على عينه باش تشوفهم قلبها ضرب بالجهد حسات بالخوف …ونفس الوقت كتفكر في حيلة باش توصل الشئ اللي على قبلو دارت هاد الفضيحة ومرضات السلطان صرتات ريقها والسلطانة من وراها خيفانة
ــــ امدرا الحكيمة ولدي ومولاي اش عندو هو مزيان
ــــ [سكتات شوية ونطقات] عندكم عرصة وراقها ملوصة
ــــ ايه الحكيمة كائنة ولاش بغيتي العرصة
ــــ خاصني وراق منها باش نردمهم وتزول العلة ومن بعد نشربو دواء الشيفاء
ــــ ايه دبا نقول لحراس يجيبو لك قد مابغيتي من الوراق
ــــ لا الآلة خاصني انا اللي نستيهم ونعرف فين انردمهم
ــــ [صفقات مرضية ] اجو سيرو ورو الحكيمة العرصة فين كاينة وعاونها في اللي بغات
جاء واحد جوج من الرجال رافقوها حتى لجنب العرصة شافت فيهم وكلامها في فمها مرعود
ــــ ايوا وصافي أنتما بقاو هنا انا غادي نقلب على الوراق
وقفو بعاد عليها شوية هي حاضيهم من تحت الحرام عينيها كيدورو هنا ولهيه غمضات عينها كتحاول تفكر كلام الشريفة مولات التسبيح كتهضر مع رأسها بشوية
ــــ قالت باللي أنلقا حجرة من طين معقودة بحبل طويل والرزمة عليها مقادة والعقدة صحيحة وفي الحجرة شادة نزولها ونحفر تلات الحفرات وحدة على القبلة والأخرى جهتي والوسطانية فيها حيلتي اللي تسگم سعدي …دبا فهمت
قربات خطوات كتقلب بعينها وتعاود دارت بالعرصة كاملة حتى عيات تأففات وحتى قالت صافي فرصتها ضاعت وهي تقشع حجرة من طين معقودة بحبل طويل شافت في الحراس اللي واقفين ورجعات قربات منها، زولات رزمة الحجر …خرجات وطلبات من واحد من حراس يجيب لها عتلة مشا واحد من حراس لي واقفين جاب لها مدرة علمات فين اتحفر …حفرات وحدة على القبلة والتانية جهتها والأخيرة في الوسط بدأت كتحفر حتى خرجات حجاب من الوراق مدفون في صندوقة بحال فاش يهزو المرحوم راشية والورقة طابت والخيط رشاء شافت في الحراس اللي عينهم لقدام حطات الحجاب في حضنها وهزات الوراق اللي قطفات من العرصة وفي بلاصت الحجاب ردمات …وقفات عطات الحارس العتلة ورجعات لجناح السلطان دخلات لقات السلطانة مرضية جالسة جنبو وكدوز على وجهو ودموعها بحال شلال الواد شافت فيها وقالت
ــــ لآلة السلطانة بلا متكوني غضبانة مولاي ايتشفى ويحل عينه غير هني بالك
ــــ الله يعلي مقامك ويكثر من مثالك إلى تشافى السلطان طلبي وتمناي واللي بغيتها اتحقق لك وتجي حتال عند رجليك
ــــ بارك الله فيك الآلة غير يبرأ سيد القاسي وانا مابغيت شاي بلاتي نطمن ونشوفو
ناضت السلطانة جلسات جنبو عطور مسات ايديه اللي باردين خرجات واحد الصرة فيها “بروبوليس” النحل حلات ليه فمو وعطاتو ليه شربو …هذا ترياق خاص بالنحل غالي في الثمن لكن يداوي العلة من الإنسان هي اصلا ماء البراكة دارت فيه واحد نقاطي بحال لسعة النحل باش يغيب وتقدر تنجح حيلتها وتوصل لعرصة …شوية بشوية بدأ السلطان كيفتح عينيه الضبابة مغشغشهم …حط ايدو على راسو اللي كيحرقو بحالة بايت يطبل مسح على عينه وهي تجي عينها في عينه بقا ساهي ومبهوض انطق
ــــ “مولاي القاسي “انتي!!! نفسهاااا مولات العنين الكبار اللي كنتي وراء الشجرة اللي جنب الدار
عطور خرجات عينيها وقلبها رجع كيقفقف خافت غير تقفرها وماعند بالها باللي عاقل عليها لسانها تشد
ــــ دوي تكلمي شنو كنتي كديري عند الشجرة
ــــ ءء انا اموااي لااا شكون علاش تهضر
ــــ صافي تقاضى لك الكلام
عطور شافت في السلطانة اللي غير سمعات ولدها فاق ومن عند شرجم رجعات …
باستو في راسو وانطقات
ــــ خلعتنا وشطنتنا اولدي على سلامتك
أما سيد القاسي فبقا كيشوف في عطور وعينيها اللي خايفين حانية الرأس والعين …السلطانة مشات تبشر أهل القصر باش يوجدو الصداقة لناس القبيلة محيت السلطان تعافى …أما عطور فغير قربات المزود باش تهزو وهو يشد لها سيد القاسي في كساتها
قلبها خرج من بلاصتو وريقها بدأت كتصرتو كوشت على أيدها …وبقات مخرجة عينها أما سيد القاسي فعاقد الحجبان والشوفة كي شوفة الغربان انطق وقال
ــــ شكون انتي؟ ومنين جيتي؟ وشنووو بغتي؟
عطور مرة طامت المزود وهربات…يلاه غيوقف وحس بالعيا…رجع تكا وقال مع راسو
ــــ غير بلاتي إلا ماتجيبك ليا الايام ونعرف شكون انتي لي مخبيا وراء اللتام
الليل سالا والصبح بان في القبيلة كيتسمع صوت تقعيت الديوك وتقرقير بيبي بوخنونة وتصياح البهايم …في قصر سيد القاسي الصدقات كتفرق في كل زاوية وكل مكان من الجامع حتال القبة ولالة مرضية فرحانة لمولاي اللي تعافى …واقفة على الخدم لحمير محملين ومجملين بالقفاطن الزينة والحناء والتمر والسواد والعطور والمسك والعنبر والفلايك وانقاب على الشكال والجوهر الحر والخلاخل أما الماكلة والحلاوي فهم على شكال حزمو الخدم ورزمو الشواريات شافت فهم لآلات السلطانات مولات القلب الكبير والخير والخمير وقالت
ــــ دو هادشي لدار الحكيمة وصولو لها سلامي وقولو لها قالت لك السلطانة مرضية غير قبلي عليها وكان
ــــ هي اللولى ألالة
خرجو وشدو الطريق …. أما في دار عطور اللي مامتجنبة الركنة وجامعة رجليها وسارحة في التخمام …كيقولو الناس اللهم الف تخميمة وتخميمة ولا ضربة بالمقص ،عطور مكان في بالها باللي سيد القاسي عقل وركز في عينها وعقل على حاجب الهلال …خايفة لايكشف حيلتها ويعرف اللي عمرو كان في الحسبان …تنهدات ولشنانفها طلقات أما عند الباتول اللي حاطة طاجين افلون فوق النار كتخبز ومجمر ديال الجمر حداها فوق منو هراش من الفخار …عامر بالبيض والجلبان ومدردرة فوق منو البزار كينبر ويطلع البخار ….
سمعت الباب وعلى عطور عيطات
ــــ عطوور اعطور اتي شوفي شكون في الباب
عطور فينها في تخمامها ساهية وفي شطانتها مانها هانية …لاحت الباتول الخبز فالطاجين وقلبتها لاتشرف وناضت تشوف شكون…ضربات لتامها وقالت شكون
ــــ أشكون في الباب
ــــ الخدم جينا الآلة من دار السلطان
الباتول تخلعات خافت لتكون عطور لشئ حاجة دارت قلبها طاح فيه النص ولعينها خرجات مشات كتسلت لعند عطور اللي كاع محاضرة في هاد العالم
ــــ عطور عطور مالك ساهية الرجوع العالي
ــــ شنو كاين أدادا خلعتني
ــــ شئ وحدين من دار السلطة والحكام كاينين برا ياك مدرتي شي حاجة ؟
عطور شداتها التقفقفة ولفخاضها ضربات كتمشي وتبيض بيضاء هنا وبيضة في العش
ــــ مشيت فيها مشيت فيها سلطان القاسي وقيلة عرفني دادا ماتحليش لهم الباب هااالعار
ــــ [تسمع الباب كيدق] سيري شوفي ليا الخبزة لتحرگ وانا غادي نشوف شنو بغاو
ــــ (بخوف )وخا غير متحليش لهم خائفة يدوني وفي سجن السلطان يحبسوني
رجعات الباتول وراء الباب وقالت
ــــ علامن كتقلبو وشنو بغيتو منا ؟
ــــ صيفتاتني لآلة مرضية مات السلطان باش نجيبو الوجيبة والهدية
فتحات الباتول الباب كطل بشوية غير شافت الحمير محملين ومجملين وفتحاتو كامل
ــــ هادشي جاء من دار السلطان صيفتتو لالة مرضية ماتوسيدي لحكيمة واش كاينة هنا؟
ــــ ايه كااااينة [بدأت كتبرح عليها] الكاملة ءالكاملة تعالي مات السلطان جابت لك الهدية والوجيبة
عطور غير سمعات هاد الكلام تنهدات ورجعات فيها الروح حطات لتامها على وجها وقربات من الباب شافت فيهم وقالت
ــــ دخلو الخناشي
بداو الخدم يدخلو الخناشي
والصندوق من الخشب منقوش وصرة من الحوايج …شاف فيها واحد من الحمالة وقال
ــــ لآلة كتسلم عليك وكتقول لك قبلي على ما وجد
ــــ “عطور”قولها الله يكثر الخير وتزيد في المال وانا قابلة وهادشي كافي ومكفي
كملو الخناشي ودورو الحمار ومشاو قفلات الباتول الباب وقالت
ــــ ايوا باين هذا خير واشمن خير [شافت في عطور اللي مضيومة ] مالكي غير سارحة في التخمام مني جيتي لبارح مادوتي
ــــ دادا الباتول لقيت داكشي اللي قالت لي الشريفة جنب العرصة ولايني مزال ماكبيت عليه الماء اللي عطاتني فيا الفضول نعرف شنو فيه
ــــ اري نشوف
مشات عطور لمزود جابتو ومداتو لباتول بقات كدور فيه كان راكم قالت
ــــ وكفاش لقتيه ؟
بدأت عطور كتسرد ليها كل شي لوقع وحيلتها من نهار خرجات في الصباح …أما الباتول مبهوضة ومتعجبة من هاد البنت اللي ماتخاف ماتخوف
ــــ لالا انتي مايقد عليك إنسان حتى من السلطان بشلاغمو ودرتيها به وانا نقول فين دايعة هاد البنت طول النهار
ــــ المشكل سلطان شافني وخايفة يكشفني
ــــ هو على حساب علمي شاف غير العنين ومافيدو لا حجة ولا دليل ريحي شطانتك وخلينا نشوفو اش جاء في الهدية
قربو الخناشي كيقلبو فيهم …والصرة حلوها لقاو الحوائج والتواب اللي يناسبهم أما الزينة فعلى الشكال ها الذهب وها الفضة …جمعو داك الخير وحمد الله على النعمة وحطو الفطور باش يفطرو …داز الوقت والساعة دايزة باش ماعطا ربي ناضت عطور تحزمات وترزمات وشدات الطريق لقبة سيدي عامر اللي كانت خارجة على القبيلة شوية …جنبها مطفية قديمة ومن وراها شلال …وقفات ربطات حمارها في الشجرة وخطات خطوة كان في الداخل راجل كبير ولحيتو بيضاء وعينيه مغمضين هاز تسبيح في البيض انطق قبل مادخل
ــــ طلبي التسليم أمولات العيون الكبار الحسادة دايرين بك وباغين لك غير الحكرة وسوءالقهرة
ــــ مسلمين وطالبين التسليم اسيدي
دخلات شافت في الراجل اللي قدامها جالس ولعينه ساد جلسات قدامو ملتمة وقالت
ــــ جيت قاصدة القبة والمقصود فيه نية أنا غير ولية وبغا نعرف شنو بيا ونعرف ساسي من رجليا ..[جبدات الحجاب من حضنها] بغيت نعرف شنو في هاد الحجاب وااش هو سحور ولا فيه التعاب
حطاتو ليه في ايدو دفل عليه ثلاثة الدفلات وحلو بدأ كيدوز عليه بعينيه المغمضين …هي غير حاضياه وكتشوف فيه …جمع الحجاب ورجعو كما كان وانطق
ــــ هذا سحور مديور لسلطان باش مايتزوج مايجيب ولاد لا هو يثبث خيمة ولا يدگ وتاد واللي شافها ماتعجبو ولا تنغمو
ــــ وشنو المعمول احاكم الجواد
ــــ بطلي السحور وباني قدام السلطان محيت انتي اللي لقتيه ياك ؟
ــــ ايه انا اللي لقيتو وفكيتو
ــــ ايوا باني في وجهو باش يتسگم سعدو ويتبت الوتاد ويدير الولاد
ــــ الله ينفعنا براكتك احاكم الجواد [خرجات عقد من النقرة ومداتو ليه] ها الفتوح ومديرها مني قلة الصواب
ــــ حطيهم في الركنة ديال القبلة والله معاك أبنت الهمة
حطاتهم وخرجات عطور شادة الطريق بعدات حتى مابان ليها لا غاشي ولا غريب خرجات الماء والحجاب وكباتو عليه بدأ لون الورقة كيدوب كيف الشمعة ماتحركات حتى دأبت كلها رمات القرعة وكملات الطريق وهمها على قلبها تزال …ولكن باقي لها شوفت السلطان
مرات سبع ليالي بفضل الله العالي حافض البهايم والإنسان ومطلع الشمس ومتحكم في الليل وفي الهلال …من دايك الليلة رجع السلطان غير ساهي وفي مولات العيون الكبار غرقان لا هو قادر يشوفها ولا قادر يلمح صورتها …هادشي اللي حاس به عمرو من قبل كان به ….قلبو بحال البيضة اللي قربات تخرج الفلوس وعقلو لعيونها هاوي …تنهد دخلات لآلة مرضية اللي من نهار تشافى وعقلو واقف وشارد …بقات كتعيط عليه وتنادي وعقلو باقي سرحان قربات منو وحطات ايديها على كتافو
ــــ واش صاري لك ياتاج راسي فين ساهي وشردان
ــــ [شاف فيها وقال] متلفاني مرأة وزينها جميل وفتان لا انا قادر نعس ولا يرتاح لي البال
ــــ وشكون هاد زينت الزهر والميمون اللي ولدي فيها سارح ولهان
ــــ [تنهد] الله ياربي على قلبي يالالة مرضية واااش سلطان السلاطين اللي مخوف الصغير والكبير تأسرو امرأة
ــــ الحال مايشاور اولدي والقلب هو سيد الحاكم والحكام غير قولي شكون هي ونزوجها لك
ــــ بغيت لقاها راسي ونعرف ساسها من ساسي ومن بعد يكون خير
ــــ ايوا رتاح اولدي الوقت تأخر يطلع الصباح ونكملو كلامنا ريح بالك وتهلا في قلبك متقلش عليه باش مايضرك
خرجات السلطانة مرضية …وبقا سيد القاسي لقلبو كيقاسي المحاين وماااشي أي محاين هدو راهم محاين الغرام وكيقولو الله ينجيك من القلب الى تعاشى بالغرام …بقا جالس وكيقول مع راسو
ــــ فينك اعيون الغزال فينك بأني نشوف غير نظرة من عينك
تنهد مرة أخرى طفا القنديل وناض باش يسد الشرجم حتى لمح عينها الكبار خلف الشجرة لقريبة لدار توسعو عينيه وتبسم… أما هي غير شافتو وهربات…خرج السلطان من الجناح حط العمامة فوق الرأس اللي كتزيدو شأن دخل لزريبة اللي فيها الخيل والبغال ركب على عودو الكحل وزاد تابع آثارها كيجري بعودو ويقلب بعينه قلبو خارج وعينيه مفتوحين …عطور كانت كتجري غير سمعات صوت قدام العود وحسات باللي هو دخلات الغابة كتخبا وراء كل شجرة وكتنهج طلات عليه وهو يقشعها بقا تابعها وسط الشجار بالعود ديالو لقات واحد الشجرة كبيرة ومفرعة وهي تخبأ من وراها …
بقات كطل عليه وقلبها كيضرب وورجليها فشلانة أما هو بقا كيدور في عينه …حتى سمع صوت زگية والغوات ..
تبع الصوت غير شافها وهو يتلاح من فوق العود ..شد اللفعة من رأسها لي كانت اعض عطور.. زير عليها لواها على ايدو وبقا في عنينيها ساهي انطق
ــــ “سيد القاسي “شفتي الهروب شنو من وراه
عطور كتشوف فيه وقلبها كيطلع وينزل وايديها كيقفقفو عينيها على اللفعة اللي وسط ايدو …عينيه باقين فعينيها خطف الخنجر من جنبو وهو يقطع راس اللفعة ورماها لبعيد …خبات وجهة من المنظر اللي خلعها …بدأ السلطان القاسي منها كيقرب حيدات أيديها ولقاتو قريب ليها …حسات بالصهدة وقلبها تمجهد وعينيها كيشوفو فيه …أما مولاي القاسي طاح طيحة العماء في البير حط ايديه وراه ونفسو كطلع سخونة من نيفو انطق
ــــ شكون انتي؟ وشنو كدري وراء الشجرة ديال الدار ؟
عطور كتصرت ريقها كتحرك عينيها بالزربة دفعاتو بايديها ودازت تجري …والجدر دالشجرة عطرها وطاحت على ركابيها…تجرحات في أيدها ومابقات قادة توقف ….قرب منها السلطان شاف فيها قرد ومد ايدو لإيدها …عطور بقات شحال كتشوف فيه مدات أيدها ليه نوضها وجرها حتال لعند الشجرة …هي تخلعات وتلفات هضر بصوت مجهد حتى قفزات
ــــ راااني كنتسنى أمولات العيون الكباااار وحاجب الهلال تكلمي
ــــ [انطقات بصوتها الخيفان وبشوية] أنا الكاملة
غمض عينه صوتها الحنين زاد مابيه شاف فعينيها ورجع قال وقلبو مسيطر عليه
ــــ وااش عارفة شنو درتي بسيدك السلطان؟ قتلتيه وحمقتيه لا النعاس يطيح في عينيه ولا الماكلة رجعات تحلا ليه …دبت بحال شي شمعة مضوية في عز النهار قولييي شكون انتي شكووون غادي نحماق ونعرف شكون طول عمري وانا نشوف في النساء وبحالك عمر عيني شافت طول عمري والسلطانة تجيب لي فهاذي وهاذي وقلبي ماتأسر بحتى وحدة شنو درتي ليا اممم؟
عطور بدأت كتبكي ماعرفت علاش كلامو خوفها حسات بحالة ايقتلها كما قتل اللفعة حطات كفوفها على عينيها باش مايشوف دموعها …قلبو ألمو وحاس بحال تخشا فيه مسمار انطق بصوت حنين
ــــ شوووت أمولات العنين الكبار بركا دموعك كيألمو فيا
باقي عطور حاطة أيديها على وجها …قرب ايديو حطها على أيدها كيبعدهم على عينيها شاف في الدموع سايلين كشلال الواد وبلا مايشاور ولا يتشاور حط لسانو على دموعها ولحسهم …عينيه ناعسين أما عطور فمن جرأتو تخلعات ولعينها خرجات وعلى ايديها كرزات ولشفايفها وراء لتامها عضات …
بعد شوية وقال بلا تفكير ولا تخمام
ــــ أنتي ليا من ليوم وزواجنا غدا غادي يكون
فتحات عينيها شافت فيه مصدومة ماعارفة شنو تالي ولا توخر وقالت
ــــ ” عطور “ماشاورتني ولا عرفتي قراري
قرب منها تنهد من قلبو حط ايديو على لتامها ايزولو وهي تمنعو
ــــ “عطور” مايشوف وجهي غير لي أنرجع على ذمتو وكساتي من كساتو وشأني من شأنو
زير على ايدو وتحت سنيه قال
ــــ انتي ديااال السلطان ماليك لا مشاورة ولا قرار وكلامي واضح وباااين مدام لقلبي دخلتي ولعقلي حيرتي تحملي نتيجة الفعال سمعتي أمولات لعيون لكبار وغدا وجدي راسك ودبا زدي نوصلك لدار
ركبها قدامو وهو وراها ريحتها سطاتو وداخلو فرحان ..أما عطور ساااهية في التخمام تفكرات كلام الشريفة والتبسيمة على شفايفها ترسمات …حطها جنب الدار ورجع القصر …كانو كل شي كيقلبو عليه السلطانة مرضية غير شافتو دخل ومشات كتجري عنقاتو … باس لها رأسها وقال قبل مايطلع
ــــ جهزو لعرسي غدا قبل من بعدو
السلطانة شافت فيه وتصدمات والخدم كل شي مبهوض وكيشوفو في بعضياتهم …كفاش مولاي القاسي ايتزوج وهو اللي رفض بنات الشيوخ والقضى وليوم فجأة بغا يكون زواجو غدا …تبعاتو مرضية وقالت
ــــ انت في عار الله اولدي ياك لباس كفاش اتزوج غدا قبل من بعدو
ــــ لقيت اللي حرقات قلبي بنار الغرام مابقا عندي صبر تبقا بعيدة عليه بغيتها غدا عندي ونشبع من عينيها اللي مغرقاني
ــــ مدام هكا اولدي غادي ندير اللي خاصو يدار ولكن ماقلت ليا شكون هاد بنت الناس
ــــ انتي عارفها مزيان هي اللي دوات ولدك ورجعاتو باش يحكم الناس الحكيمة
ــــ(دهشات ولعينها خرجات ) الحكيمة الحكيمة
ــــ ااايه هي اللي خدات عقلي وقلبي بسببها كيتقطع وهايم بالغرام [بأس أيدها ] لآلة تاج راسي وجدي كل شي كما خاصو يدار
دخل لجناحو اما لالة المرضية مزاال مافهما كيف صرا وجرى حتى بنت غريبة قدرات طيح سيد القضى
طلع النهار وعطور شادة رأسها في قنت الركنة والباتول كتفتل دشيش باش ترجعها بوفية قالت وعينيها كيشوفو لبعيد
ــــ دادا ليوم غادي يتزوجني السلطان
الباتول طلقات واحد الضحكة ماضحكتها مني كانت في قصر عرش السلام
ــــ بنتي ياك ماخرجتي عقلك فين هاد السلطان
ــــ دادا كنهضر من نيتي مولاي القاسي طاح في غرامي وحلف حتى ليوم ياخدني
الباتول ساست أيديها وشافت فيها مخرجة عينيها
ــــ وكفاش وهو ماخطبك ما دق باب الدار
ــــ لبارح كان طويل شوية ومشيت نطل عليه من وراء الشجرة ولحق عليا وقالي هاذ الكلام
ــــ فرحي بنتي وسعدي بها اتزوج ولد الهمة والشان
ــــ ولايني خائفة يعرف قصتي
ــــ حطي الرأس يالهبيلة وكسبيه بحلاوة اللسان خليه يزيد يطيح فيك ويغرق كالشارف العطشان ومن بعد دخلي في الكلام وديما نوصيك ثبثي والوتاد ويااك تهزي العين ولا تخالفي كلام السياد
تسمع الدقان في الباب مشات الباتول تحل كانو رجال لابسين السلاهم وحاطين العمايم ومعاهم هودج كبير ومزين انطق اللي راكب على العود
ــــ “الخدم”مات سيدي لقصر طالباكم
الباتول شافت في عطور وقالت جهزي راسك باش تمشي عند زمانك الميمون تسگد ابنتي وانا فرحانة لك فرحة الطير الهربان
الباتول تغطات بلتام وعطور تزينت بحرام مشات لصرة هزات النبالة والخلالة والتسبيح أما داكشي لاخور خلاتو تما ركبو في الهودج ديال قصر سلطان …أما البنات فاش سمعو السلطان ايتزوج ها اللي تندب رأسها وها اللي تقطع في شعرها وها اللي تبكي وتخنن وها اللي قالت بغا تقج رأسها …نص في بنات القبيلة مقهورين باغين يعرفو هادي اللي قدرات الطيح السلطان حتى قرر يتزوج فهاذ النهار …
وصلو لقصر دخلو تلقاو لهم الخدم بالحليب والثمر أما السلطانة مرضية فالفرحة موسعة وجهة هي نهار لول شافت عطور دخلات لخاطرها من عند الله …باست عطور لمرضية أيدها وحتى الباتول كانت بغا تبوس لها لكن مخلاتها محيت هي قدها قدها …دخلاتهم لمقصورة الضياف وامرت الخدم يجيبو الضيافة والقفاطن والزينة ويتخيرو شافت السلطانة مرضية في عطور وقالت
ــــ زولي اللتام ابنتي هنا مافيه رجال
تبسمات عطور وشافت في الباتول اللي حركات ليها عينيها زولت اللتام والسلطانة مرضية مبهورة بهاد الجمال زادت قربات منها وقالت
ــــ تبارك الله ماشاء الله على زينة الحسن مگوا السلطان قلبو مكوي بنار الغرام ختار وعرف اش ختار ايوا شنو سماك الله
ــــ سمتي عطور الآلة
ــــ ايوا راك بحالك بحال سميتك فنة وشهوة منك يلاه جلسي باش يسخنو الحمام تغسلي وتزيني بالحناء في اللدين والرجلين
مشات لآلة مرضية علماتهم يوجدو كل شي باش تنقى عروست ولدها ودير الحناء …نهار ومطار وكلها فين يجري ويجاري كل شي فرحان والتبسيمة مرسومة على وجه الناس …من بعد ما عطور تنقات وبريحة الورد غسلات ولشعرها المذهب زينات.. الخدم تبهرو بزينها عمرهم شافو بنت شعرها زعر رجعات سيرة في فوم الخدم كل شي كيمدح في زينها …مادا أيديها الحناني وجنبها صينية عامرة بالسكر وشمع كيضوي أما الصينية الأخرى فيها التمر والحناء ورق والصينية اللي جهت الباتول فيها الحلوى والمسكة وجنبها الرشوش وريحة العود بنات الهمة واللي قراب لدار السلطان جنبها كيحوشو ويغنو أما عطور كانت مجبدة العين بالكحلة وعيونها كالنحلة ومقادة الحاجب اللي كالهلال وشفايف كالثوث وزين الغزال والنيف الواقف أما الشعر فعليه سنسلة من الذهب حاطة النبالة وفي القفطان متبتة الخلالة أما الفلايك فزدوها جمال على جمال …راسمة التبسيمة وفرحانة وفي داخل ديالها حزنانة تمنات لو باها معها ومها في جنبها …
طاح الظلام وصلو الشيوخ والحكام في المقصورة اللي جنب بيت المشورة ديال السلطان جالسين الرجال ومبرعين الماكلة والضيافة الزينة وكل شي فرحان وفي القصر مجموعين النساء والبنات بغين يأكلو جنابهم ويعرفو شكون اللي خدا السلطان …الغناء والرقص في السماء خدام والبارود في السماء كيطاير بحال الضشاش خرجو لآلات البنات لابسة زين اللباس حطوها في الكرسي بين الناس أما السلطان فتقدم بلباسو لابس البرنوس والعمامة فوق راسو والخنجر في جنبو …جلس حدها قرب منهم الشيخ باش يكتب كتابهم قدام ناس القبيلة …سواد الليل نزلو دموعها ونوار الدار كتلعن في حظها وزهرها…قزو في العروسة وهما يتفكرو البنت اللي جات تهضر معاهم تحت الشجرة ودبا هلي فهموا القالب منين جاي ..انطقات سواد الليل
ــــ شوفي الشيطانة دارتها بينا وفاللاخير هي اللي تزوج السلطان
ــــ نوار الدار ” ايه ياختي وحنا كالهبيلات مصدقات ومحلولات ولي جا يلعب بينا
ــــ فنة” صافي البنات اللي عطى الله عطاه واللي زلق جاء على عين كفاه دبا هي مرات السلطان بلا مايسمعنا شي واحد ونرجعو في خبر كان يامكان ..هنو الوقت وخليو السويعة دوز
سكتو البنات اللي مكوين بكية …تكتب عقد القران على عطور بنت السلطان …شاف فيها سيد القاسي ورسم تبسيمة على وجهو فرحان أما عطور فراها كتصرت ريقها محيت عارفة اش يتسناها …
تسالا الفرح والناس خرجو فرحانين …القلوب صافية وللبال هانين…السلطان شاد في يد عرستو زين البنات والبنات الهمة والسلطانة مرضية والباتول جنبهم كيزغرتو مرافقينهم لجناح السلطان وصلو لباب جناح شافت السلطانة في عطور اللي حشمانة قربات منها وعطاتها توب الحرير وسط منو منديل وقالت لها في اوذنها
ــــ ليلتك حطيها في هذا وخبيه وماتغسليه ماتفرطي فيه كيقوي المحبة ويطول العشرة
حركات عطور رأسها والحشمة مغطية وجهة دخلو وقفل السلطان باب الجناح شد بايدها وقال
ــــ غادي نصلو زوار عاد يبان اللي خاصو يدار
صلوا ركعات وهي طول الركعات وهي خيفانة وريتها فشلانة كطلع النفس بالجهد …من بعد ما سالاو وقفات شاف فيها وقال
ــــ اجي لمحمل
قربات والنفس كطلع بالجهد …جلسات حداه قرب ايدو للتام بغا يزولو شافت فيه حطات أيدها باش تمنعو تبسم وقال
ــــ ياك قلتي ماتكشفي وجهك غير اللي ترجعي على ذمتو وكساتك من كساتو ايوا صافي طاح الفاس في الرأس
عطور غير ساكتة بعدت ايديها زول اللتام بشوية مغمضة عينيها …غير حيدو فتحات عينها وبقا في زينها سارح قلبو كيضرب بالجهد انطق وبقا عاض على شفايفو
ــــ اوووف منين لك هاد الجمال العينين لي كالغزال والحاجب كي الهلال أما شفايف فراهم كشجرة الثوث منين نبداك غير قولي ليا حرت وتقالو علي ايديا وليت بحال العاشق الهبيل بسبب جمالك تكلمي لاش ساكتة [هز ليها وجهة بايديو ونفسها كضرب في نفسو قزز فيها وقال] قلبك فيه شي حاجة من جيهتي صارحني وهنيني
هزات فيه عينها الملوزة بقات شحااال كتشوف في عينيه حركات رأسها بقبول…ودبا هلي هنا ليه لبال تبسم وناض وقف مشا لواحد الصندوق من الرخام فتحو خرج منو الكاحل وريشة ديال الطاؤوس …جلس قدامها كيشوف فيها خرج الشربيل من رجليها زول الخلخال حط رجلها فوق ركبتو اللي مزيناها الحناء ركب لها الكاحل اللي كان مزين بالموزون والجوهر …هز رجلها وباسها وطول البوسة ورجعها لشربيل …
جلس جنبها كيمرر نيفو على وجهة …قرب من نيفها الواقف …نفسو قوية ونفسها قوة من نفسو هز ليها أيدها وقبلها ثلاثة دالمرات أما عطور فراها تزيرات وحشمات …هز ريشة الطاؤوس بدأ كيقرب ليها شوية بشوية حتى تكات وعلى المحمل تسرحات…أما هو فتحنى عليها بجنب صدرو كينهج نفسو سخونة بدأ كيمرر ريشة الطاؤوس على وجهة الفتان هي جاها هر كمشات عينها وزيرات على توب المحمل بايديها …زاد قرب لوذنها والريشة كتمشي على عينها حتى وصلها لفمها اللي كي الثوت وقفها ساهي فيه انطق جنب اوذنها بصوتو الخافت اللي طاغي عليه رغبة الغرام
ـــ عينيك بحر هائج وأنا كي الغرقان طايح فهم …منين نبداك دوي اعطور قلبي منين نبداك من عينك الملوزة ولا من شفايفها اللي كي ثوت… اخخخ شنو درتي بقلب هاد العاشق الولهان
عطور ساكتة وعاضة على شفايفها هنا تقاضى لها الحيل والكلام …زول ألاي وتبعو اقران طلع ايدو لفوق شعرها زول أجبيني اللي مزين جبينها زول الغطاء اللي على شعرها المذهب تبسم وهز خصلة من شعرها شمها من أعماق قلبو الغرقان وقال
ـــ اااااالله ياك قلت ليك باللي انتي ملاك على وجه الارض وأنا غارق فيك حتى من شعرك طلع كي لون الذهب…حط شفايفو على جبينها باسها بوسة طويلة عطور غير كتشوف وساكتة هز ليها رأسها بايدو يلاه بغا يحط شفايفو على شفايفها وهي دفعو حتى طاح فوق المحمل وناضت بعدات كتنهج كارزة على أيدها ومغمضة عينيها …أما سيد القاسي تبسم وعرف باللي منو حشمات بقات واقفة عاطياه بالظهر …قرب ليها وشد في أيديها وجمعهم مع ايديه وعنقها من كرشها …طلعت تأويها سخونة وخلاتو يزيد نار على نار بعد شعرها المذهب بشوية وغطس في بحر عنقها اللي ريحت الرشوش فايحة منو …أما عطور فلعينها غمضات ونفسها سخنات دارت عندو بالزربة وفي حضنو ترمات عنقها بالجهد وانطق جنب اوذنها
_ ثقي بهاذ العاشق لعينيك وترخاي كل شي ايكون مزيان …
زادت ضماتو كثر وعينيها مكوشين تحنى وبالخف هزها وحطها في المحمل قرب منها …كيشوفها وتشوف فيه ….هز القنديل وطفاه ورجع ياكل عشاه ولايني هذا عشاء ماليه مثيل يشبع الغني والفقير وزيدها حتى الهبيل….
صباح الحال والليلة كانت باهية والأمور زاهية …دخلات السلطانة وتابعاها لوبانة هازة الفطور لسيد القاسي ومراتو اللي صبحت كريش النعام وخدودها حمرين كي الرمان جالسة فوق المحمل لابسة قفطان بالبيض ومشبوح وفوق منو أجبيني وحاطة النبالة وفايديها المحاصر وزين الخواتم …أما رجليها فحاطة فيها الكاحل غير شافتو السلطانة وتبسمات عرفت القلوب على بعضها صافية…”انقول لكم سر هاد الكاحل ديال جداه وكان عند السلطانة مو ومنين مات باه عطاتو لسيد القاسي باش يعطيه اللي تبغيه ويبغيها يعني يكون في قلبها حب وغرام ليه وخا كيبان قديم ولايني عندو قيمة كبيرة في قلوبهم …باست السلطانة لعطور رأسها وقالت
ـــ “مرضية”تبارك الله على ميمون ولدي اللي موردد بحال الرمان الحمر
ـــ “عطور”لهلا يخطيك الآلة السلطانة
ـــ [شافت في لوبانة] حطي الصينية الوبانة وجيبي البخور والعطور لهاد عطور الزينة هههه
ـــ “عطور”فين هو سيد القاسي مابان ؟
ـــ اممم ياك ما توحشتيه
ـــ [حنات راسها بالحشمة ] اممم لا غير شفتو مكاين
ـــ دبا يجي يازينت العيون غير مع المشاورية
دخلات عندها الباتول هازة البخور والعطور
ـــ صباح الخير ببنتي الغزالة كيف دازت ليلتك
ـــ لابس أدادا دازت مزيانة وخا كنت خيفانة
ـــ مرضية” ايوا قولي ليا فين منديل الليلة
ـــ حطيتو بين التواب وصريتو في توب الحرير
ـــ حافضي عليه وياااك يهزو لك شي واحد ولا تغسليه كيقولو جدودنا الكبار براكة الدخلة كطول العشرة إلى بقات بلاصتها
ـــ وخا الآلة غادي نحضيه ووسط حوايجي نخبيه
دخل السلطان باس لمو رأسها والمرضية أيدها محيت ولات بحال مو نيت خرجو وخلاوهم يفطرو …قرب ليها سيد القاسي بأس رأسها وقال
ـــ كيف صبحت سلطانة قلبي ودواه
ـــ [تبسمت ونطقات بشوية] بخير الحمد لله وانت
ـــ انا حامد الله مني طلعتي في طريقي
بدأ كيوكلها وكتوكلو بصبيعاتها اخر دغمة مداتها ليه شد أيدها كيشوف فيها بعينيه اللي كنعناع بدأ كيقرب ليها شوية بشوية بغا يبوسها فيمها حنات رأسها وحشمات وتبسمات رجع باسها في خدها وقبل مايبعد قال
ـــ الليل ونخدها بلا ماتخافي أتاج راسي
كال الدغمة من عندها وقلبو فرحان.. حاس باللي باغي يطير مع الطيور ويقول أنا وليت اسعد إنسان.. كملو ماكلتهم وخرجوا هو وياها يدورو في القصر حاطة النبالة واللتام أما هو لايح عليه السلهام وكيتمشى وايديه وراه …شافت العرصة وتفكرات كاع الشئ لدارت باش تبطل الديار وشكرات الله محيت حط في طريقها ديك الولية اللي معرفتها من الجن ولا من الإنس …كملو طريقهم حتى شافو العياد سارح تبسمات وقالت
ـــ انا عزيز عليا الخيل كثر من الإنسان
ضحك شافها وقال
ـــ يادبا الخيل حسن مني ههههه
ـــ حاشا أمولاي انت كاين في قلبي
ـــ بغتي تقربي من الخيل
ـــ إلى كان مولاي موافق ومعندو مانع علاش لا
قربو لواحد من الخيول بيض وفيه الكحل حطات أيدها عليه كتمسح ليه بدأ السلطان كيحكي القصيد وقال
العود الزين كحجر الشبة تحطو على الضرس يداويه…
وصاونا عليه الجداد ماشي الطلبة …وقالو كسبوه إلى قديتو عليه…
خير لعياد حوافرو الصلبة…لتقدح الأرض ونارها تقديه…
عالي القوام ممدود الرقبة …سبيبو طايح عليها كاسيه…
والعود المخير شوفو في القلبة …كيف يدير يضرب رجليه…
(ناس زمان قالو فيه)
ـــ كلام موزون اسيد السلطان عجبني ونغمني
ـــ مزال انسمعك كلام وكلام ازين قلبي
رجعو الدار هو مشا لبيت المشاورة مع الشيخ والقائد اللي بقا فيه الحال من جهت عطور محيت عجباتو وفي عقلو دوخاتو ولايني قدام السلطان مايجي قايد ولا عطار….أما عطور فاغير كدور في القصر وتسارى اللي شافتها كتسلم عليها هي وخا فيها الشطارة وكتحايل ولايني قلبها كبير وصافي كالحرير …ايوا هكا داز النهار تغداو وتجمعوا بنات القبيلة جنب عطور وجابو العصيد في طبگ من السمار معسلة بعسل النحل والتمر …ها اللي تشطح وتغني هااللي تحاجي وتقول النكات دوزو عشية زينة فنينة…حتى وصل المغرب وكلها لدارها مشات…دخلات عطور لجناح السلطان زولات اللتام وجلسات قدام المرايا اللي داير بها الرخام حلات شعرها يرتاح محيت طول النهار وهومعقود لفوق …زولات زينتها وبقات بالفلايك…
كتمشط شعرها وتشوف في زينها شوية وهو يدخل السلطان مع فتح الباب شافها وشافتو من المرايا وقفات حطات الحرام على رأسها وقالت
ـــ ماشفتك امولاي
قرب ليها وايديه وراه وعينيه في عينيها تبسم وقال
ـــ هذا حطيه فاش يكون الغريب أنا مني يكون الحبيب فخليه بعيد
تبسمات شافت فيه وحنات رأسها قرب خطوة أخرى كيشوف فيها هز ليها وجهة بايديه حتى قربات عينها من عينيه قال
ـــ بغيت نعرفك كثر شكون انتي وعلاش اول مرة شفتك في سميتك كذبتي وقلتي الكاملة
ـــ عند بالي نسيتي شنو قلت لك ديك الليلة
ـــ اه نسيت محيت تلفوني عينيك الكبار الملوزة أما دبا باغي نعرفك كثر [شد خصلة شعرها اللي كيفوح منها ريحت الورد شمها] ونعرف هاد الزين كلو منين جاي
شافت فيه وقالت من بعد ماتنهدات
ـــ حكايتي طويلة وخصها الوقت
ـــ خودي وقتك الليل كلو ديالك وانا ديالك
ـــ [شافت فيه مدات ايدها وقالت] ولكن قبل عطني العهد والأمان باش تسمع ليا حتى اللاخر ومتحكم حتى نكمل
ـــ وخا الآلة عليك الامان والعهد ديال رجال
بعدات فرشات حنبل غليض فالأرض وحطات عليه حنبل اخور باش مايكون البرد جابت المخاد وحطاتهم …هو كيشوفها ومافاهم والو من غير أن كيتبسم وفرحان بها …من بعد ما قادات الفراش فالارض قالت
ـــ اجي جلس باش نبدا ليك الحكاية
ـــ وعلاش مال المحمل
ـــ فالارض غادي نكون مرتاحة كثر
ـــ خاطرك هي اللولة أمولات العيون الكبار
جلس جنبها وهي جلسات جنبو كيشوف فيها يتسناها تبدأ …كتزير في صباعها تنهدات غمضات عينها وطلعات النفس وقالت
ـــ أنا كذبت عليك فداك النهار ماسمتيش الكاملة وسميتي عطور وراك عرفتي من بعد باللي عطور هي سميتي …ولايني انت غير جيتي وتزوجتي معرفت بمن تزوجتي
ـــ لا لا عارف تزوجت بوحدة من زينت البنات
ـــ ماشي ازين علاش نهضر [سكتات وحنات عينها ورجعت قالت] مولاي القاسي انت خصك تعرف الحكاية واللي لها لها
ـــ وانا كنسمع لك اعطور
ـــ أنا راني بنت السلطان بويا صاحب همة والوقار
سيد القاسي تعجب واستغرب وطلع حاجبو وقال
ـــ كفاش بنت السلطان وعايشة فالدوار وحكيمة
فهاد اللحظة تسمع باب الجناح ناض فتح لقاء لوبانة وقبل ماتهضر قال
ـــ مابغيت حتى واحد يصدعني والعشاء جيبوه هنا من بعد ما نصيفت الحراس لكم
ـــ وخا امولاي
مشات لوبانة عند السلطانة اللي كانت كتسناهم لعشاء دخلات
ـــ لآلة سيد القاسي قال باللي مابغا حد يصدعو وعشاه بغاه في جناحو
لآلة مرضية وخا هكاك بقا فيها الحال ولكن مخداتش في قلبها هي عارفة حال الراجل الى كان يلاه مزوج بحال الدري صغير نهار العيد مايبغي حتى واحد يخسر ليه خاطرو ..انطقات وقالت
ـــ صافي الوبانة سيري عيطي ليا على الباتول نتعشاو انا وياها
مشات لوبانة عيطات على الباتول وجات في الحين جلسات معاها كيكلو شوية وهي تنطق لآلة مرضية
ـــ ايوا الآلة الباتول عاودي ليا أنتما منين جيتو وخا باين فيكم باللي ناس همة ومقام
ـــ منين انبدا لك الآلة مرضية الحكاية بحال حكاية الديب اللي خرج في السكة
ـــ ايوا عاودي نسمع منها نسى الغم شوية ونتمتع
بدأت الباتول تحكي لها من نهار تخطفات عطور …نرجعو عند السلطان ومولات الزين الفتان …بدأت كتعاود ليه من صغرها حتى الكبرها وكلما كتزيد تحكي ليه كيزيد يتعجب كثر …طول الليل وهي تحكي ليه مخلات حتى حاجة حتى سبب علتو قالتها ليه وحكات ليه على سر العرصة وعلاش كان كاره النساء …مسحات دموعها مني تفكرات بوها قرب ليها وقال
ـــ نعطيك العهد باش نحرر باك فين ما كان ونرجع ليه مقامو والشأن ونعاقب اللي كان سبب وهادشي قبل ماتكمل ثلاث أيام
ابتسمات شدات أيدو وقبلتها…شاف فيها وتبسم
ـــ بغيتها هنا [شار لها لشفايفو] ماشي في ايدي
حنات رأسها وحشمات …زاد قرب لها كثر هز وجهة بيدو هايم في عينها وقال
ـــ ولايني شوطينة كون وقعات لي شي حاجة اتقلدي بروحي فين تعلمتي هاد التمكارت والتحايل امممم سبحان الله جامعة كل شي الزين والعقل وحتى تشيطانيت
طلقت ضحكة حتى بانو سنينتها زاد قرب لها وقال
_يازين النساء ياقطعة الثوب الملساء قتلتي هاد العبد وخليته لعقلو ينساء …وخا نعيا ندير عليك العسا الغرام ايبقا مقاد في قلبي ومرتاح كيف الجلسا …
غفلها وخطف بوسة من فمها شاف فيها حشمات ورجع خطف بوسة أخرى …شاد في أيدها بأسهم وهزها بين ايديه…دورات أيدها وراء عنقو وقالت
ـــ والعشاء
ـــ انتي احلا عشاء شوووت خليني نتعشاء ونتبنن ياك أنا سلطانك
حركت رأسها بأه
ـــ ايوا صافي نساي العشاء العادي وخلينا فعشانا اللي بحال دوانا
حطها زول السلهام كيشوف في خدودها لي موردة بحال نوار بلعمان تحنى عليه وقال
_بغيت نغرق فيك وندفن بين الرمان ونسمع صوت الغرام والنينان شنو قلتي اعريش البنان
عطور بكلامو ترفعات ودقات قلبها تجهداات …شافت فيه بعينيها وقالت
_لي يروي عطش سيد القاسي لي مطير نعاسي جاهزة نلبيه ليه
_(حط ايديو فايديها وقال ) غمضي عينيك محيت هاد المرة القنديل ايبقا مضوي عليك باغي نشهد على حركاتك باش ترسم لي في الخيال ونبقا نتفكرها في ليلة وكل عام
عطور لشفايفها عضاات ونفسها زادت تمجهدات ولعينيها غمضات …رسم بوسة حنينة على خدودها وطلع لعينيها وختم بشفابفها الموردة…أما نيفو فيمشيه على عنقها لي ريحتو دوخ العديان…زيرات على ايدو وقالت
_خليني أمولاي نحكي لك حكاية قبل مانبداو
_(هز راسو فيها وعارف بلي حشمانة من نور القنديل لي فاضح كل شئ) رصاي وتهناي هي فيك فيك غير نسالي وترسم هاد الليلة في خيالي وماتخطى بالي وحكي لي حكاية من حكايتك ازينت البنات
جمعت شفايفها مدلياهم أما سيد القاسي فنزل غاطس بين الرمان ولسانو سارح بحال الجدي الجيعان …كلما زير بايدو كتزيد في النينان أما هو فطاير في السماء بحال الطير الفرحاان …كملو الوقيتة لي ترسمات في الخيال وشاف كاع لي تمناه وهناء ليه البال مسرح فوق المحمل لابس جبدور دالسلهام وصدرو باين أما مولات العيون الكبار وحاجب الهلال تحت جناحو ناعسة وايديها على قلبو محطوطة كيراري في شعرها المذهب التلفان …تنهد وقال
_يلاه ازينت البنااات حكي ليا الحكاية ونغمي حبيبك
_(تبسمات وقالت) انحكي لك حكاية ولايني ماشي أي حكاية مولاها عارف بحق الزمان وضارب حساب الايام وفيها معنى
_هااني كنسمع لك ازينت الزيون
تقادات في الجلسة كتشوف فيه وقالت
_هدا شحااال في يااام من يااامات زمان في قبيلة عطوش بنت القايد وهران
تكتبات حكاية بالقلام وتحفضات لوليدات الصغار باش مني كيبرو ويعقلو ويضربو حسبة لزمان ويعرفو بحق الايام…حكاية مافيها قوالب ولا عتاب لا حيلة ولا ضغينة ضريفة لطيفة وعلى القلب خفيفة …رجل شارف هارف بخيل ماليه مثيل صحيح وفصيح اللسان يعرف لحكمة وحامد الله على النعمة ولاااايني سقرام وكيضرب به المثال بحالو قليل مايهمو من الدنيا غير جميع المال…يضل يلم ويكدس في بيت الخزين حتى رجعات حكايتو على كل لسان وشكون من غيرو عابد بودربالة مامعاه كلام ولا بسالة مايلايم ولا يتلايم مزكرم و سكت حداك تم..مايعرض مايتعرض لاهو يتشارك ملحة ولا طعام ماعندو ولاد ولا عياد حگااا قالك مابغا يورث فيه حد …أما دارو مايعتبها غريب ولا جارو لا حبيب ولا جبااد عاارو ،يخيط بايديه ولي شافو يشفق عليه ويقول الصداقة دايزة فيه ..أما دربالتو لي رشات على لحمو مايمسها ماء ولا صابون حتى رجعاات مصدية كالبستون خلاوها ناس زمان حاجت الدواام كتقوب الرخام ،..واحد نهاار من ياماات الله خالق الانسان وقهار البشر، الجماعة عليه تلمو شافو فيه وتكلمو قال له شيخ القبيلة
_اسمع ابو دربالة غير الحواال وكون بحالك بحال الرجااال شوف حال حوايجك وصلح الأحوال الغريب لي شافك يحساب ليه في عقلك الهبال كون بحال غيرك يكون فيك الملاغي وشوية الكلام
أما عابد بو دربالة قوس عينيه وعلى اقرابو المشرشگ دور إيديه ضحك وتكلم بصوتو لي كصوت الغربان يزعز الحيوط ويريب البيبان
_دخول الصحة كيرشي العظام وكثرة الكلام ماتخلي غير الندام مانطلب عبد ولا نسعى حد عنايتي فوق راسي وخبزي تحت باطي وحد مايسمع عياطي شاد التقار وعاطي لغيري الوقاار ضارب حساب لزمان وعارف بحق الايام دااكشي علاااش كل واحد يشد وقرو وعلى نحسي بلا ماتحفرو
بو دربالة غير قال لهم هااد الكلام دخل وسد الباب… بقاو شي يشوف في شي وكلها تفرق كالدبان لهما عرفو يجاوبوه ولا يعاتبوه…أما هو فرآه عااارف سم العديان بااغين يعرفو سر مالو ويرجعو به يتمخشو كالجدياان ولاايني لقااوه صحيح وخطياه البسالة و كثرة الكلام وكما كيقولو نااس زمان الرباح إلى سأقو ليه الناس الخبار يرجع خطية أما الرباح لي مخفي في سلوك الغرباال فهو خطياه الخطية ويبقا على الدوام وهادي هي حكاية عابد بودربالة الشارف الهارف فصيح الكلام …
جرها لعندو والبسمة ترسمات على شفايفو وقال
_ هذا راهو انسان مزيااان وهدوك لي جاو له غير العديااان باغين يطيحوه في كيدهم ويعرفو شنو كدير بكاع داك المال
_”عطور” ولايني لقاوه صحيح وكلامو فصحيح ومايديها في نبيش الجديان
_ايوا هذا هو المعقول اعطور قلبي ودبا خلينا نريحو البال
جر الغطا عليه وعليها دور ايدو عليها وقرب ليها كيشوف في عينيها ويتبسم من فرحتو بها
نهار جديد من بعد ما فطرو في المقصورة …شاف سيد القاسي في لآلة مرضية وقال
ـــ لآلة تاج راسي القصر ايبقا في أمانتك حتى نرجع
ـــ فين غادي اولدي
ـــ [شاف فعطور] غادي نزور قبيلة عطور انا وياها وخاصني نرجع ليها حقها مدام هي دابا مراتي وفي ذمتي
ـــ [حطات مرضية أيدها على ايد عطور] هاد الولية داز عليها محاين لآلة الباتول عاودت ليا اللي وقع وبقا فيا الحال من جهتها
هزات عطور ايد مرضية وباستها
ـــ الله يرضي عليك ابنتي وانت اولدي كون هاني غادي نتهلا في القصر والباتول غادي تعاوني الله يديكم سالمين وترجعو غالمين
ناض السلطان برح على الرايس ديال الحراس باش يجمع الرجال كاملين يهزو السيوفة ويسرزو العياد ويجهزو هودج لعطور باش في العشية يشدو الطريق ويقطعو الواد ….دازت الساعة والوقت عطور جهزات رأسها ولبست كساتها ركبات في الهودج والرجال نص فيهم سبق والهودج الوسط وجنبو السلطان على العود ديالو وراهم باقي الحراس ….الطريق طويل والليل كلو وهما يمشو …عطور جاها النعاس ونعسات …ومني فاقت لقاتهم قطعو الواد دالكراع وشادين الطريق لقبيلة قصر عرش السلام …
طلع الصباح وكما كيقولو اللولين كل صباح كيكون فيه رباح …في قصر عرش السلام جالسة السالكة مقادة كيف النخلة الشادة لابسة قفطان فالحمر وتاج على رأسها رجعات بلاصت ولدها من بعد ما حماق وشد الركن …كانت كتشرب في أتاي وتاكول الحلوة حتى تحل باب القصر والرجال ديال القاسي دارو بالقصر حاطين على الحراس ديالها السيوفة من باب الاحتياط السالكة تخلعات ومن بلاصتها قفزات …حتى طاح الكأس من أيدها نزل السلطان من فوق العود وقال
ـــ”القاسي”(حط ايديه وراه وخنجرو في جنبو ) مابغينا فضيحة ولا تحريك الضحايا جينا باغين الحق يرجع لمولاه
ـــ”السالكة”(مخرجة عينيها ماعرفات باش تبلات ولا اشمن مصيبة عليها ترمات) شكون انت؟ واشمن حق باغي عندي؟ جاي هاجم على السلطانة في قلب قصري وعند بالك اتفلت
فهاد اللحظة نزلات عطور من الهودج بلباسها الغالي ضاربة اللتام وانطقات من وراء السلطان
ـــ”عطور” بغتي تقولي القصر اللي خديتي من بويا وطعنتيه في ظهورو
السالكة شداتها التقفقفة خرجات عينيها ماعرفت ماااتقول صرتاات ريقها ورجعات قالت
ـــ “السالكة”بوك مااات من هذا شحال وأنا لي ستالمت الحكام
ـــ”عطور” تموتي انتي ياعيفت النساء ياتركت السوسا المقوصة بويااا باقي عايش وعارفة باللي راك حابساه في القصر
السلطان أمرهم يقلبو على السلطان وكلها فين تفرق ….ناس القبيلة تجمعوا وشامة مولات الخالة وصلات الخبار لتفاحة والعليا اللي من فرحتهم بكاو وجاو كيتجارو القصر …أما ناس القبيلة بحالة رجعات فهم الروح مني شافو عطور بنت السلطان …دخلت شامة وتفاحة والعليا كيعنقو ويعاودو في عطور اللي زادت زيانت
ـــ “شامة” توحشناااك اعطور فين كنت غابرة
ـــ تفاحة” كل ساعة كنتفكرو حجاياتك توحشناااك وعمرنا من البال حيدناك ولا نسيناك (تلفتاات في الرجل الصحيح الفحل واقف كالسيف الماضي وقالت) شكون هذا اعطور وفين كنتي غابرة هذا شحال
ـــ “عطور”(تبسمات وقالت )هذا سيد القاسي راجلي وعمارت قلبي
ـــ العليا”(خرجات عينها بفرحة) تزوجتي يالعفريتة
ـــ(عطور ضحكات وقالت) ومالي نبقا بلا سعد وبلا زواج لا خيمة ولا ولاد … اوووف شحال توحشتكم اجو عنقوني
ترماو عليها معنقينها …شوية وهو يخرج جابر اللي عينو خارجين كيضحك لباسو تقطع عليه …ورجع كاع مسخ …غير شافتو عطور وبقا فيها انطقت شامة بحزن
ـــ مسكين بقا فيا عيا ميقلب عليك هاد المطيار وفاللاخير هتر ورجع كيف المسمار
يلاه جاي يجري ويضحك لعند عطور حتى وقفو السلطان حط السيف على رقبتو وقال
ـــ “القاسي” وياااك تزيد خطوة هديك رآها مرات السلطان
جابر تصدم بدأ يغوت ربي لخلقو يحك رجليه مع الثران وينتف في راسو أما السالكة جات تجري لعندو كتسكتو ودموع دايزين من عينيهاعلى حالتو …بدأ كيتمرغد فالارض ويعطيك ويصيح بسميتها
ـــ عطوووور عطوووور عطوور ليا عطوور ديااالي علاااش مشتي لغيري علاااش
عطور بقا فيها مابغات ليه هاد الحالة ولايني الوقت والزمان والحب والغرام مايشاور …مشا كيجري ويجااري ودموعو على خدودو كتراري أما رجليه لي كلهم ضبرو فدايزبن بالد/م…. طلع فوق الصور دالقصر وبلا مايفكر لاح راسو ونهى حياتو …أما السالكة فكضرب في فخاضها مخرجة عينيها من منضر ولدها لي مرمي بحال الخروف نهار العيد …عند الطاهر اللي كان جاي لقصر غير شاف الناس ملمومين ودخل كيجري شاف السالكة وعطور وراجل غريب ولدو جنب الصور والد/م دايز معاه طاح عليه كيبكي ويهرنن …شوية وهما يخرجو السلطان اللي رجع حالتو حالة مانو الجوع مانو العطش والوسخ …حطوه فوق الكرسي جات عطور كتجري ودموعها شلال معرفت تفرح مني باها طلع حي ولا ولد عمها اللي ق/تل راسو بسبب غرامو لها …عنقات باها اللي رجعات فيه الروح من بعد ما شافها ….زير عليها وفرحان
ـــ”السلطان الكاكل”( كيحاول يهضر والنفس مقطوعة فيه)بنتي بنتي نوارت القصر الحمد لله لي ماقتلوك ورزاوني فيك
ـــ هاني ابويا معاك معاك الله يطول فعمرك ليا وتبقا سند ليا
شاف في السالكة حاقد عليها …انطق
ـــ دخلوووها تربااا في الحبس باش نعلمها التمرد على سيادها اللي مدو لها العون في شبابها
كانت طايحة كتبكي وكتغرد حتى جاو الحراس ديال سيد القاسي شدوها وسلسلوها جارينها لقفص القصر رجع عليها كل شي بالندامة غرها عدو الله ونكرت النعمة دخلها الحسد والغرور وكحلت بالغدر ونساات ياام الملامة …وأما السلطان الكامل رجع شاف في الطاهر اللي كيبكي ويغرد والخوف باين في عينيه وقال
ـــ اللي دار الذنب يستهل العقوبة والغدار سهمو من سهم التعلب المكار والخدااع يجي نهار ويتشوى في النار
جاء الطاهر تلاح على رجليه كيطلب منو السماحة بعدو عليه دفعو حتى طااح وقال الحراس
ـــ دوه رموه برات القبيلة واي واحد شافو فهاد القبيلة يخبرني هذا هو جزاء ديالك اولد بويا لي نسا العشرة وتق/تل الدم و اللي غدر الدنيا فيه تغدر واللي تبع الطمع كيعميه ويسطيه ويرجعو يحبو على رجليه…
_”الطااهر” هاااعار الد/م لي بينا الى مسمح ليا عقلي خرج عليا وتبعت مراتي اللفعة حتى ترميت في بحر الضغينة وتوسخت بطمع الروينة
_(وقف السلطان الكامل حط ايدو وراه وهز راسو الفوق وقال) سماحة طلبها من الله أما أنا فسامحتك ولايني في قبيلتي منشوف وجهك (سفق على الحراس)دووه من هنا
خرجوه حتى هو وخداوه مكتفينو وجارينو كيغوت ويطلب يبقا فيوقبيلتو …
قرب السلطان القاسي لجنب السلطان بات مراتو شاف فيه ورجع السلطان شاف في عطور
ـــ “الكامل” شكون هذا انوارت الدار
تبسمات وراتو النبالة …هنا تبسم حط ايدو على راسها وفهم باللي هذا راجلها
ـــ فرحت ابنتي وبدل الفرحة فرحتين
قرب سيد القاسي بأس على ايد عمو محيت كبر منو ودخلوه لجناحو طلبت عطور من شامة مولات الخالة تعلم الخدمات يسخنو الحمام الباها ويوجد ليه الماكلة …أما تفاحة والعليا فبقاو معها…
دازت أيام وأيام وعطور ومولاي القاسي رجعو لقصر العرصة من بعد مرجع السلطان مزيان …أما سيد الكامل فتشافى ورجع كما كان رجع يصدر الحكام …وحتى من الباتول رجعات لقصر عرش السلام تعاونو وتونسو …
في شهر شعبان لي قريب لرمضان شهر الحكمة والغفران …جالسة في المحمل لابسة سلهام من الحرير ومشبوح من الفضة..مسرحة رجيلتها كدوز أيدها على كرشها وهو فجنبها قرب من كرشها اللي منفوخة وقال
ـــ “سيد القاسي “غادي يكون ولد ونسميه برادة على جدي السلطان ونعلمو الحكام
ـــ “عطور” (ضحكات وشافت فيه بعينها الملوزة ) والى كان بنت نسموها الكاملة ونعلمها المثال
ـــ “سيد القاسي”اللي بغتي ازينت البنات المهم يكون بخير وعلى خير
ـــ عطور[تبسمت وحطات رأسها على صدرو العريض وقالت] عمري معاودت ليك حكاية الكاملة في يامات المحاين
ـــ”القاسي” (ضحك وباس راسها وقال) بغتي تقولي تشيطانيت لي دارت باش طيح سيد السلطان ياك
ضحكات وتورخات فرحات مني ربي جمعها به وكان ميمونها وزهرها وقالت سمع باقي الحكاية وتنغم معايا
حاجيتك على الكاف والكاف كاملة مكمولة،
تأسر قلب الغريب والحبيب وتروح لدار باها مستورة،
الكاف ماتقتلك ماتحييك،
تشربك السم والدواء وترجع تتشفى فيك
الكاف ماعندها لا ساس لا رأس،
ماتشرب في كأس ماطيب في كسكاس
الكاف بنت الكاف قلبها مسرار وكلامها حار كله مرار
الكاف طيتها طيت الحمام وشوفة فيها تعيشك في الأحلام،
طولتها طولة الغزال ومشيتها كيف دالنعام.
حاملة النبالة وتقول أنا الحكيمة مولات التسبيح، نداوي الصغير والكبير ونخليه يتشافى بحكمة الرحمان الرحيم.
الكاف بنت الحرام من فعايلها، شيطانة في شطارتها تلعب الحاكم والمحكوم،
وتزول الحجرة من فوق قبر المرحوم.
الكاف تحاجي الخبير، تقرا كف اليد وتبشرك بالخير، ودور في القبيلة تبيع العطور و الحرير
الحاصول وما كاين رد بالك يا السامع لا تحصل و تتعلق فوق باب الجامع،
هاذي راها الكاف، منها يخافو القضى وإلى حطاتك في بالها عمر حاجتك تتقضى.
ايوا كيف جاتك
ـــ زينة وفتانة بحال مولاتها زينت الشفايف والعيون الكبار وحاحب الهلال
(تأوهات شاف فيها وتخلع ) مالكي ؟
ـــ (شافت فيه وتبسمات )ولدك كيركلني اسيد القاسي لي مطير نعاسي
ضحك جرها لعندو تنهد من قلبو على الغرام لي مليئ قلبو بنار تكاها في حضنو مستمتع برائحتها لي كتأسرو وقال
_”سيد القاسي “حكايتنا طويلة مالها مثال جميلة واتحكى على كل لسان في كل قبيلة وفي كل زمان أما قصة الغرام فما يعرفوها غير لي تكواو بنارو.
••وهذي هي حكاية قصر العرصة اللي فيها كتغوس وتخليك لراسك تنسى ومشات حكايتي من غريب لغريب وانا بقيت مع ظابط قلبي الحبيب …
••نتمنى تنال إعجابكم البنااات ،كتبتها بكل حب لكم ومزال بوحدة اخرى نجيكم وفي الحجى نحاجيكم ودبا ماااح عليكم ومتنساوش رأيكم �
#النهاية
شاركنا رأيك في هذا الفصل 🌹