هند: (عينيها كيتشقلبو) غنموووووووت
الحاجة: لا بنيتي مغتموتييش الله يعطييييه لݣطع
وليد: (بشوية مدخلين هند لطنوبيلتها) لاش خليتييه يمشي..
زهير: شماااايت هربووو دابا زيد ندييو لبنت تخيط
هند: (غير سمعت لخياطة بقات تبكي)
وليد: صافي اهند راه الجرحة ممغرقاش
زهير: (طلع معاها وليد اللور.. ضار عند مو وباس ليها راسها) مّا سيري طلعي للدار
الحاجة: لا حول ولا قوه الا بالله العلي العظيم عيطلي اوليدي وݣولي سمو كاين
زهير: وااخا ولكن راه مغرجعش نمشي نشووف أمال
الحاجة: (بتنهيدة) واخا اوليدي رد لبال راسك وبعد من خووتها (طلع ديمارا طموبيلة ديال هند للي متكية راسها على صدر وليد وكتوجع ووليد حاس بالشمتة من ولد عمو لبرهووش متوقعهاااش منو يسدو يقتلوو فهاد اللحظة.. زاد زهير هند كتغوت يديوها المصحة ماشي سبيطار المخزن داوها فين بغات ودخلها وليد ليرجونص ولاخر بقا برا.. حتى تيليفونو مجابوش معاه مكانش متوقع هاكا كان داير يخرج أول حاجة يديرها يصوني على محمد يکولو شي عذر بلا ديال الحبس ومن بعد فلعشية يمشيو لدار أمال ولكن هرووبها من الدار ضيع كولشي فين غيلقاها داابا وفين غتكون عطات الرااس… دخل ليرجونص كيسمع هند كتغوت عرفها من النوع للي لحمها عزييز عليييها بقا واقف ساهي.. حتى خرج وليد) امدرا؟؟؟
وليد: دارولها 3 ديال لغرزات ولد ***** والله منخليها ف****
زهير: هادشي غير للي شفنا سمو يكونو دارو فأمال باش هربات
وليد: أمال كانو حابسينها فشي بيت
زهير: وعلاه ممشيتش جبتهاا أوليد لاش تخليها ليهم سد ديلمو داك المحال وسيير جيبها هي
وليد: (براسو مظنهتش تهرب شاف فرملية خرجت دخل عند هند للي وجها تنفخ بلبكى حس براسو هو سباب معاه واخا هكاك كلاتتتها) نديك للدار
هند: (مزالة كتبكي حركت رأسها باه) اممم
وليد: بففف (مشا حداها أول مرة يقيس يديها حصنم بين يدو وهو كيشوف فعينيها) سمحيييلي اهند انا سبااب
هند: (على سبة عنقااتو وهي كتبكي نقطة ضعفها لحمها مكتقدش للي يقيسها ولا حتى جرحة صغيرة هنا دخل زهير للي دغيا جبد راسو وخرج ووليد بشوية وقف هند مبعدها عليه.. وقفااات حايد لفيست للي لابس لبسهالها وهو بقا بتيشورت وتم مخرجها)
زهير: هند كبقيتي اختي؟
هند: الحمد الله هانا (كتمشى بشوية وهي ضور) وأمال
زهير: نتي غير سيري ترتاحي وليد مهم هانتا مع هند والمحال زيد ݣابلو على ݣلبك
وليد: (اكيد مغيخليش هند حيت عارف زهير غيدير جهدو مضوبل وكتر أول حاجة داروها مشاو داو زهير لدارو هز تيليفونو وراقو بيرميه فلوس وزادو هو وصلوه لفين أشرف نعت لزهير على حساب طموبيلة كراها ووليد رد هند للي دغيا طلعات ليها سخاانة…. زهير شد طريق هاد لمرة لتاوريرت وغير كيتحلف….)
فتيحة: (خلات مرت ولدها كتغسل لماعن لبست جلابتها لبيضة وقصدات دار ليلى فين نعتولها لعيالات واصلا الدار جات باينة بوحدها للي مبنية فداك السيكتور حيت حي جديد وياله كيتبناو حدااه ديور.. طلعت بدوك تلاتة دريجات كدق فلباب بالجهد وشحال متأكدة هاد الدار غيكون بانيها ليها راجلها حيت ياله باش كانو عطلة لبني فهاد البقع طلت ليلى لقاتها فتيحة عوجت فمها)
ليلى: اش باغا مسا الله
فتيحة: حلي لباب
ليلى: (قادت الوقفة كتعوج) علاه؟
فتيحة: (بعصبية) حلي دلبااااب
ليلى: ااااااهيا شتك حتى هنا مخرجة دوك لݣروون وتغوتي حݣل مصطفى مكان يحملك مكان يقبلك
فتيحة: انا بغيت نعرف غير وقتاش تجوجك وجا عندك
ليلى: هههه منين كنتي مݣابلة الشواافات هو كان يجي عندي وكان ماشي ولادك وكان راه طلݣݣ من شحال مرا للي متحمل مواالو اشمن نفع كان عندو تفوووو غير الشوفة فيك تعيف (تنهدت طانزة) الله يرحمو تعذب فالدنيا ݣبل لااااخرة
فتيحة: وبزااااااف علييك وايييلا سمييتك مرا حلي لباب وهضري ݣداامي
ليلى: ههه هي اللولة (هبطت لابسة بيجامة طويلة غير نص كم ولكن مزيرة على طايتها ولمريشة خارجة شوية حلت ودارت ابتسامة على وجهها) زييدي (سبقتها ليلى كتعوج وفتيحة غير مطرطقة عينها فالي قدامها وصلت حدا لباب ومخلاتهاش دخل وقفتلها فلباب) اش بغيتي القردة
فتيحة: القردة هي نتي يا خطااافت رجال
ليلى: ههه راني مجوجاه احبيبتي (دارت يدها) عشر سنيييين بسلامتك ونتي مساايقة خباااار
فتيحة: سقتلك لخبااار ونهار عرفت صيفطتو النووبة فيك
ليلى: هههه خلعتيني حقي وحق وليدي غنشدو غنشدو
فتيحة: هاهااااو الا لحݣتي ودنييك عضيها
ليلى: يطواااال ويعجبك ااااا القردة هههه عبر عليك بهاد الكلمة باش كان يذكرك والله الا ههههه (جات تطرشها وشدت ليها يديها) ههه تيقتي راسك والله يا **** حتى نشرݣ لمك داك لوجه
فتيحة: حتى ميكونوش عندي رجاال
ليلى: (كظحك كتقليلها السم) سيري تمشي فحاالك
فتيحة: دار راجلي
ليلى: (تشرملت عليها) وتي سييييييري ت**** من هنا ولا نوريك اش سااوية ليلى
فتيحة: انا للي نوريك سمو سااااوية
ليلى: عااارفااااك شنو سااوية براكة غير بنتك ملقياااش الخير معاك عاد يلقاااه شي حد معااك تفووو ݣاطعة يدك من يد الرحماااان (فتيحة نيشان بوناااات ليلى لكرشها للي دغيا كانت ردة فعلها تدفع فتيحة بالجهد فدرووج للي حسبااتهم بݣنتها كتغوت ربي للي خلقها موصلت لاخر درجة حتى عينيها تقلبوووو ليلى هبطت درووج شادة فكرشها للي كتحرقها لقات دمايات فدروج لبويض طلعت عليها كان راسها مقلووب هبطت ففخاضها هزت عينها كانو شي بناية كيشوفو حيت سمعو غوااتها ليلى طلعت كتجري والخلعة ركباااااها هزت تيليفونها وصونات على لبوليس اول حاااجة….. )
زهير: (كان طااير ماشي غير صااايݣ تشد جوج مرات من عند الجدارمية مخلصش لبروسيات حيت معندوش لفلوس كاش خداهم حتى يخلص فالمحكمة.. وصل لتاوريرت نيشان لدار أمال لقا طموبيلة ديال محمد وجاجها اللور مهرس.. خرج من تمااك هاز عصى جابها معاه من دارهم بدا كيشخشخ فالطموبيل حتى كولشي للي تماااك خرج ومنهم محمد للي تصدم مخلى لا زاج لا بولات شاف محمد خرج وهو وقف هاز عصااتو) غتعاود تصلحها اللهم تصلحها كاملة
محمد: (كيقلب على وليد) هادووو مخصايلش رجال
زهير: رجال يهضرو مع رجال وكون لݣيييتك رااجل وكون هضرت بفمي.. فين امال؟؟؟
محمد: صليييب مع رااسك جاي هنا تهرس وتشخشاااااااااااخ
زهير: ݣاااد… فينها أمل.. فينها ختك امحمد للي حبستيييها بحال شي مشة
محمد: (شاف الناس كيتجمعو وهو كيضور عينييه)
زهير: هادشي علاش كنتي حابسها وكان!! ياك بغييتها فلحلااال عطيييهاالي
محمد: (مكيهضرش.. زهير ضار كيشوف الناس خنزر فمحمد ومشا ركب فطموبيلتو صااݣ ووصل حداه)
زهير: خلي خوووك مخبع مزيااان… (مشا نيشان قصد المحطة الطرقية دخل هاز تيليفونو صونا على وليد) شوف مع هند تصيفطلي شي تصويرة ديال أمال
وليد: وااخ (هي كانت فطواليط… هز تيليفونها دخل هز تصويرة تكون باينة صيفطها لراسو عاد صيفطها لزهير للي غير وصلاتو شاف فيها شحال لدرجة زوما كيشوف فيها مزيان عاد ردها مقاادة ودخل للمحطة كيقلب بحال تالف ليه شي بيبي….)
~~~~~~~~~~~~
هند: (خرجات من الحمام بحرا كتقد تمشا لقات وليد خرج) فين مشاا؟؟ (دخلت لبيتها كتجر رجليها شافت فيديها وفلفاصمة تنهدت) الله يعطيييك موصييييبة يا لهماااجي الله يااخد فيك الحق نتا وطاسيييلتك كاملة.. (تكاااات) الله ياااا ربي فين تكوني مشيتي يا أماال نهار خرج زهير هربتي نتي… (دقايق دخل وليد هاز ساشيات رجع طرق لباب)
وليد: هند هند
هند: انا فبيتي أوليد
وليد: (دخل عندها كان هاز بيتزا وعصير لقاها متكية لابسة تيشورت فلكحل وسرواالو دايرة بونضو ومخلية شعرها مطلووق) صاڤا؟؟
هند: شوية
وليد: لواحد الا بغا يعذبك غير يقرسك
هند: هههه لحمي عزييز علية بزااف راه الا تجرحت بالصح تنبكي
وليد: (تبسم بلا نفس) مبيناش فيييك
هند: عفااك متقلقش رااسك راه داك لكلب الي حماار
وليد: (زفر) كولي
هند: لا لا مافيااش والله
وليد: (جر كرسي لحدااها كيشوف فخاضها وليهونش باينين وقف) نغطييك
هند: واخا (وراتلو بيديها) راه تماك
وليد: (غطاها فرجليها هو مابغاش يشوف ولكن عينيه ماشي خوت عقلو هو مديرونجي ولكن عينيه كيهربو يفليييوها..حل كرطون بيتزا وحطها قدااامها) هانتي كولي نشوف زهير فين وصل
هند: خليك هنا
وليد: واخا (بقات كتهز تاكل وهو كيصوني على زهير للي كيقطع علييه صونا على محمد تيليفونو طاافي حط التيليفون وشاف فيها) كضرك
هند: ماشي بزااااف…
هند: ماشي بزاااف تخلعتي علية؟؟
وليد: (شاف فيها مطولا) غتيقي الا ݣلت ليك كنحسك أمانة فعنݣي حتى نموت
هند: (تبسمت بحب) الله يطولي فعمرك يااا رب
وليد: كولشي فيك يعجبني… (زفر) علي حسابو معايا تقيييل بالله منخلييها فيك مواالف ديما نبعد على داك تبرهيش وتصوڤاجيت ديالهم ولكن بربي المعبووود لا نسيتهااالو
هند: الا كنت عزيزة عندك غير بعد منهم لقاااو غير أمال وبعد منهم
وليد: (تبسم بشمتة) شفتيه جاي يذبحها ݣاالك (صونات مو جاوب) وييي مي
نعيمة: (كتجري فصبيطار) ولدي مرت عمك كتمووت
وليد: (متهزش ولكن فضول منو فقط) مالها
نعيمة: معرفت اولدي الله يا ربي ݣاع المشاكيل جاااونا فدقة
وليد: مشاكلهم هوما نتي ديري صواب ورجعي لدااارك
نعيمة: ولدي!!!!!
وليد: علي ضرب هند شماااتة (غير كيتفكرها كيوقف ويبقا ياكل فشنايفو بلفقصة) غرز ليها يديها وݣداامي
نعيمة: (وقفت) أوييييلي
شيماء: (ضارت) مالكي اماما؟؟
نعيمة: وفينها وكبقات؟؟
شيماء: لݣااو هاديك
وليد: ها هي فداارها شماااتة والله ونلݣاه حتى نتبالا بيه شحال ݣدني نبقى هنا راجعلو راجعلو
نعيمة: ارالي هند
وليد: راها عيانة شوية عاد جينا من طبيب غرزلها يدها وطلعت ليها سخانة
نعيمة: الله يا ربي على بنتي حتى حنا عيط محمد خارجلو لعقل جابو مرت عمك لبوليس قطع مفهمت وااالو
وليد: هادوك غير ذنووب بنتها للي علم الله فين مليووحة
نعيمة: (تنهدت) لباس اوليدي على هند انا نمشي نشوف مرت عمك
وليد: شوية ونولي نصوني عليك (قطع وشاف فهند ورجع جلس مقابل معاها) غلطنا نهار مشينا لربعين من تماك وكولشي مشتت
هند: حتى أنا قلتها والله
وليد: بففف هدا مكيجاوبش
هند: شنو قالت ليك خالتي نعيمة
وليد: ݣالت فتيحة لݣاوها لبوليس مليوحة والله مفهمت ومبغيتش نفهم (صونا زهير دغيا جاوبو) الوووو امدرا؟؟؟
زهير: (كان جالس لداخل) واالو مبااانتش (كان ظلام لحال) هي فوكاش خرجات
وليد: منين ناض محمد صباح ماݣاهاش ومحمد كينوض جوايه 7
زهير: دابا حتى كار مكاين والمحطة ݣلبتها مزيان غنضرب دورة المدينة ونرجع هنا
وليد: لا اله الا الله مي عيطاتلي ݣالتلي مها لݣاوها لبوليس مليوحة
زهير: ميتة؟؟
وليد: لا.. اممم يمكن لا
زهير: لا حولة ولا قوة الا بالله العلي العظيم انا نمشي نݣلب فقنت اخر.. (قطع داز فصاكة خدا ݣارو وبقا كيقلب بشوية فلمدينة رجع حدا دارهم مكانتش طموبيلة ديال محمد بقا واقف تمااك شحال معرفش ربما ترجع حيت من صباح وهي غابرة… قشع شيماء هابطة هي وشي وحدة ومرا بقا متبع بنص عين حتى قشعاتو شيماء ووقفت حداه.. كان مهبط الزاج)
شيماء: سلام واش وليد معاك اخويا؟
زهير: لا
شيماء: اممم جيت تقلب على أمال؟
زهير: (مشافش فيها بحال کاع مكاينة)
شيماء: انا غير بغيت نعاون حيت صونات جوج دلمرات فلكس
زهير: (بالزربة شاف فيها) فينها؟؟؟
محمد: (عقلو خارج ومو لداخل فالعمليات مشا خارج طاير شد تاكسي نيشان لدار ليلى للي مزال لبوليس تماك شاف دمايات للي يبسو حدا باب الدار.. تم طالع كانو شي 4 دلبوليس تماك عاد عائلتها وهي ناعسة فوق سداري كتوجع فكرشها غير شافتو)
ليلى: كبقات مك امحمد
محمد: عليها جاي نسول سمو وقع؟
ليلى: جات عندي الدار كلمة مني كلمة منك الله يسمح لها ضرباتني لكرشي للي نهرب زلقت ليها رجليها وطاحت مع دروووج
محمد: (مطرطق عينو) طاحت ولا دفعتيها ؟؟؟
ليلى: الله يسمح ليك بنت ليك قتالة
محمد: وما يانا بانت ليك قتالة منين ݣلتي ضرباتك فكرشك (شاف فلبوليسي) واش مي مليوحة كتكون وهي جايين لدارها وتستجوبوها وهي جالسة توحوح علييكم
….: احترم راسك اشرييف
ليلى: (كتبكي) الله يسمح ليكم
محمد: (شاف فيها محمد) علاه دفعتيها؟
ليلى: سول مك هي لاش جات مهجمة علية كولشي شاهد من لبنايا شحال كانت تغوت
محمد: لعبتيها مزيان ولكن مدوووزلكش اليلى
….: لا نتا جي قتلها ݣدامنا ݣاااع
محمد: (تم خارج من تماك عارف مو للي غتكون هجمت وتيق انها تكون مدت يديها ولكن متيق ان ليلى دفعتها غيحماق كانت زوينة معاه وخايبة مع لوخرين كتبقى مو ومومو عينو… رجع كانت ݣاع العائلة تماك بقا واقف تماااك عاصر ونفس الوقت بالو مع أمال للي فين غبرت كلام زهير كان بحال شي بوق فودنيه بحال شي CD كيتعاود فرااسو… خرج فرملي طار عندو) امدرا اخويا مي كبقات؟
فرملي: راه كيركبو ليها لحديد فرجليها
محمد: لحديد؟؟ وهي فااقت؟؟
فرملي: اخويا راه خاص نرجع نمشي نجيب سمو بغات طبيبة (مشا كيجري ومحمد رجع وقف كيتسنى غير يݣولو راه مكاينش شي حاجة خطيرة…)
~~~~~~~~~~~
زهير: فينها؟؟
شيماء: شوف حنا مزروبين مرت عمي راه كتموت
زهير: (بعصبية) وهضري فينها؟؟؟
شيماء: معرفتش
سناء: (كتويل خايفة يشوفهم ادم ومنها غير كضور عينيها معارفااش زهير) شيماااا زيدي نمشيو
شيماء: صبري اصاحبتي راه ملقاوش تاكسي
زهير: (عصباتو) وهضري فينها
شيماء: معرفتش جوج دلمرات كتصوني فلفيكس ودغيا كتقطع
زهير: (كيضور عينو كتصوني اذا تيليفونها شاعل هز تيليفونو كيصووني والو طافي عاود عاود ضار لقااهم مشاااو.. صونا على وليد للي كان رجع للمحال من بعد منعست هند…) الوو
وليد: امدرا لقيتها؟؟؟
زهير: ***** لواااه
وليد: بفففف الا مبانتش غدا متحلش نهبط نݣلب عليها
زهير: ݣولي صوني على واحد فخوتك نطلع لداركم
وليد: (باستغراب) زعما تكون تماك؟
زهير: لا (مفيه ميشرح حيت معصب) نتا غير کولها لشي وااحد
وليد: واخ (قطع صونا على ادم للي كان فالمحال) ادم زهير راه تماك
ادم: عارف راه شخشخ طموبيلة دمحمد واش داك صاحبك مريض فراسو
وليد: راه ولاد عمك للي شماايت مهم هو بغا يطلع للدار طلع معاه وبلا متزايد معاه فالهضرة من بعد ونݣولك علاه
ادم: واااخا.. (قطع خرج لقاه تماك واقف سلم عليه عادي وطلعو للدار من سكات دخلو كان ظلام اصلا مكان حد دخلو وهو مفاهمش شنو بغا) واش تصلي؟؟
زهير: لا ݣولي فين لفيكس؟؟
ادم: (باستغراب وراه فين مشا زهير كيقلب على نماري لدللي صوناو كانو جوج وحدة ******0535 ووحدة *******0539 قيدهم زهير صونا تيليفونو وهو كيفكر ديالمن هاد نوامر….. صونا تيليفونو وهو يطرطق عينو دغيا دارو فودنو) فيييينك؟؟؟؟؟
أمال: (… داك صباح غير هبطت من دارهم فكرت وفكرت مها طردتها جوج مرات خوها علي مكيعتابرهاش بنادم واخا محمد نقص تعاملو المتوحش بزااف ولكن باقية حالتها هي هي وعاد محبووووسة معندها مدير هنا وزهير للي ينقذها فوقاش غيخرج وحتى الا رجعت لوجدة متأكدة غيتبعوووها وصلت لباب دلمحطة كانو ناس قلال بقات واااقفة ساهية شافت كار خارج ولݣريسو مزال معلق)
….: طنجة اختي؟؟؟
أمال: (بلعت ريقها وحركت راسها باه طلعت مشات نيشان اللور جا عندها قطع ليها ورقة وجلست كتفرج فمدينتها للي محرومة حتى باش تسارااها ولكن كتكرهها كما كتكره دارهم خرجو من تماك حطت راسها على الزاج للي كان كيتزعزع وكفكر فزهير نهار تبعها وبغا النمرة ومبغاتش تبسمت تابعاها دمعة حاارة من عينها كدعي معاه من قلبها باش الله يفك سرااحو… شافت تيليفونها طافي كانت على الاقل تعلم صاحبتها للي كتيق فيها… وصلو لمكناس وقلبها كيضرب فكرة انهم غيلقااوها مسيطرة عليها.. شافت الناس هبطو حتى هي هبطت شرات رايبي ومادلين) خويا غتقلع دابا؟؟؟
….: شوية اختي
أمال: (فكرت تشري شارجور ولكن فين غدير مشات كتقلب على تيليبوتيك مكاينش خاصها تخرج حيت خافت يمشي عليها لكار.. طلبت ورغبت غير مول القهوة للي عطاها تصوني ونمرة وحدة للي حافضة هي فكس ديال دار عمها..) الووو الووو (سمعت طيط طيط.. مفهمتش بغات تعاود تصوني ولكار كلاكصونا ضارت لقاتو هو) شكرا اخويا الله يجازيك بالخير (مشات طلعات للكار وزاد بيهم كتمنظر فطرييق حسبت لفلوس كان لأكبر مبلغ تشد من عند مها كانت بقات ليها 66 الف ريال وربعميا وصلو للقصر لكبير ووقف كتشوف غير دخاخن وكتشم غير روايح زويينة معدتها غرغرت شافت أغلبية هبط هبطت حتى هي كتقاد فشالها جلست فطابلة حتى جات لمرا عندها) اممم جيبيلي كفتة
….: شحال اختي
أمال: (كضور عينها) نص كيلو
….: صافي اختي؟؟
أمال: كاينة بطاطا مقلية؟
….: اه كاين حتى شلايض
أمال: جيبيلي بطاطا مقلية ووو حتى شوية ديال لكوطليط زعما شي نص كيلو (مشات لمرا وامال كتفكر فكلام نعيمة خاصها تهضر معاها هاد بنت عمها للي كاينة فطنجة من ديما كانت كتهضر عليها وديجا شافتها مرة وحدة جات لعندهم ومها كانت كتقول عليها غير ***** ولكن مها كانت كتقولها على كولشي حتى نعيمة اي وحدة متفتحة كانت كنقولها عليها.. وعاقلة حتى على الحي للي كانت كظل تهضر عليه جابتلها لمرا بقات غير كتاكل وللي شاط جمعاتو فخبز دارتو فميكة وطلعت للكار… وصلات لطنجة حسات لإحياء غريييب بلا الخوف والرهبة هبطت بميكتها كضور عينها محطة كانت فوسط لمدينة خرجت بحال شي وحدة جاية من الفضاء لقات مرا جالسة بولادها كتسعى مشات عندها)
….: صدقة يرحم والديييك
أمال: (عطاتها لميكة) اختي نسولك
….: سول العايلة
أمال: ها…
….: سول اختي
أمال: واحد الحي سميتو بنمݣاد هنا؟
….: شنييي؟؟؟؟
أمال: حي كاين هنا فطنجة سميتو بنمݣاد
….: اختي معرفتوشي فاينا موطع كاين؟؟
أمال: (بحزن) هنا فطنجة ياك هادي طنجة
…: هي هاادي العائلة واش نتي تايهة؟؟
أمال: (تنهدت وقالتها بشوية) لا هاربة…
….: (بقات كتشوف فيها ديك لمرا) شبر تاكسي وعطيه لادريسة يوصلك للموطع للي بغيتي تمشي ليه
أمال: (أول مرة تسمع لكنة بحال هاكا وحتى شي كلمات ممفهومينش عندها بقات كتشوف الدنيا عامرة وضواو كتتااار ميمكنش تبقى فالمحطة وهي من ديما كتسمع الكوارث كتكون تمااك قطع الشانطي لقات تيليبوتيك دخلت صونات على نعيمة نفس للي وقعلها صباح لدرجة شكت واش النمرة للي حافظة بالصح ولا لا بقات زايدة شحاال حست راسها غتلف كتهز راسها كتلقى سهم ديال #المنار ظناتو شي حي بقات واقفة حتى حبست حداها تاكسي.. طلعت ركبت وشافت فيه) بنمݣاد اخويا
….: (شاف فيها) فاين؟؟
أمال: (حست براسها كتݣولها غلاط) يمكن يݣولولها بنمݣاد
….: نتينا ماشي من طنجة؟؟؟
أمال: هم لا عندي العائلة هنا كيتسناوني فف بنمݣاد؟
….: يمكن اختي تقصد بني مكادة؟؟
أمال: واه واه هي (تبسمت) كنت معاك فسمية
….: مرحباا (زاد بيها وهي كتمنظر فلمدينة للي أقل ما يقال عنها راااااائعة سااحرة بكل معنى الكلمة داز الرومبوان اللول الثاني طلع بيها على ليمن كتشوف فلخضورااات حتى زعزعها) اشمن موطع بالظبط
أمال: حدا مول التيليفون (عرفها ماشي من هنا وحتى هي حست بالغباء ولكن شنو غدير كولشي واقف على نعيمة للي مكتجاوبهاش حطها حدا للي كيقادو التيليفونات كان حي عااامر ومزال الروااج فيه خلصاتو وزاد وهي نيشات على للي خاوي مشات قصدااتو) خويا عطيني شارجوور ونيت شارجيلي تيليفوني غير 5 دقايق طفالي وضرووري محتاجاااه
….: مرحبا (عطاتو التيليفون وبقات واقفة ساهية والخوف غيخليها تسخف واخا كتحاول تبان مهدنة وكان كانت عندها غير لماارت ناسيونال تشد اوطيل تفكرت نهار مشات عند زهير باش تقولو نتزوجو ووصلت حداه مقادة تنطق بحتى شي حرف وخداها ليها وكان عرفت غتوقع فهادشي وكان زعمت وقالتهااالو… بقات كتشوف فالناس واللكنة ديالهم وفينما تسمع شي غوات ولا مطايفاات لداخل ديالها كيتكمش… حتى حطلها داك الدري تيليفونها فوق لكونوار) ختي غنشد المحال (خلصاتو فالشارجور ودخلات 2 سوايع فنمرتها هاد شعلاتو لقات الغراق ديال ميساجات دبواط فوكال ولكن نيشان صونات على نعيمة للي مجوباتش ورجعت صونات على هند للي تعطلت باش تجاوبها)
هند: (كانت ناعسة بسخااين صدعها التيليفون للي غالبا فيكون وليد حلت عينيها بتقااالة غير شافت Amoula طرطقت عينها لدرجة سكان تكون غير كتوهم بسخانة جاوبات) الوو الو أمال
أمال: هند
هند: (شهقت حتى ناضت من بلاصتها) فينك نتي كولشي تيقلب علييك
أمال: (جاتها لبكية) انا هربت من الدار
هند: عاارفة راه كولشي تيقلب عليك حتى زهير
أمال: زهير؟؟ ياك هو فالحبس
هند: خرج خرج هاد صباح
أمال: (تصدمت)
هند: فينك نتي يجي عندك راه غيحماق عليك بالتقلاب فتاوريرت
أمال: انا فطنجة
هند: طنجة شكون داك تماك؟؟
أمال: بوحدي ركبت فلكار وجيت هنا انا فبنمكادة
هند: شنو كديري تماااك؟؟
أمال: بففف عقلتي بنت عمت خالتي نعيمة للي كانت جات فعرس ادم وحتى محمد
هند: بديعة؟؟
أمال: واه هي ساكنة هنا وجيت عندها
هند: وعندك نمرتها؟؟؟
أمال: لا كانت عندي فالتيليفون اللول
هند: وعلاش مجيتيش لوجدة
أمال: راه خفت من خوتي
هند: شوفي عيطي على زهير بعدا راه غيحماق تماااك ونتي حاولي تمشي لشي بوسط دلبوليس على ميجي عندك متيقي فحتى شي واحد امال
أمال: (تنهدت اصلا ميتة بالخوف قطعت مع هند ودوزت نمرة ديال زهير وقلبها كيضرب كولشي تخلط عليها واش تفرح لخرووجو ولا تندب على زهرها نهار خرج هي هربت ولا بالاصح مها طردتها مع ياله بغا يدير طيط جاوب)
زهير: فييييينك؟؟؟؟
الشماليات ديرو عين ميكة على اللكنة
زهير: (خارج من تماك) فييينك؟؟؟
ادم: (مشا كيطل فدوك نماري مفااهم وااالو ولكن محد وليد تحلف فولاد عمو ودافع على صاحبو الا كاينة شي حااجة… سد لباب وتم هابط)
أمال: (غير سمعت صوتو جاتها لبكية) انا فطنجة
زهير: سمو كديري تما؟؟؟؟
أمال: هربت محسابليش غتخرج
زهير: (بعصبية) وملݣيتي تمشي غير تم وفينك وعند من؟؟؟ وشكووون داك؟؟
أمال: لكار
زهير: (زفر) معاك شي واحد؟؟
أمال: (بلعت ريقها) لا
زهير: انا دابا نشد طريݣ لعندك واش باقية فالمحطة ولا زدتي لشي بلاصة
أمال: انا كنت جبت لبني مكادة كنݣلب على وحد السيدة من العائلة و (غوتت)
زهير: أمال أماااال (شاف فالتيليفون كيسمع غير صوت موطوور حتى تقطع)
أمال: (مزالة مصدومة من التيليفون للي تهز ليها من جوج دراري مريشين فشعرهم فموطور ݣاع سلوكاتو خارجين.. عرفت راسها تݣريسات بقات غير كترمش فعينيها شافت فالناس للي كانت كتشوف وللي زاد ممسوقش جاري بيه العمل وحتى هي مغوتت مواالو هنا بقات كتبكي بالخلعة حنات راسها وزاادت كدور ببيجامتها حتى شافت تاكسي مشات كتجري هو شافها ووقف حلت لباب وجلست) عفاك ديني للكوميسارية
….: اشمن كوميسارية؟؟
أمال: ديال لبوليس
….: عرفت ديال لبوليسي اشمن موطع؟؟
أمال: (منين كيكترو عليها الأسئلة كتخاف شاف فيها كان راجل كبير وباينة عليه موقر)
….: مالكي ابنتي؟؟
أمال: انا تشفرت (بقات كتبكي) داولي تيليفوني ديني للكوميسارية عفاك غيجيو يديوني دارنا راهم غير هنا
….: لا حولة ولا قوة الا بالله العلي العظيم واخا بنتي (زاد بيها) فين تشفرتي ابنتي هنا بنتي مكادة ولا لعزيب ولا كسباراطا
أمال: غير هنا
….: واخا انا نديك لبوسط لي هنا (صاݣ بيها وهي خايفة متايقة حتى فشي واحد حاضية مناش دايز حتى حطها حدا لبوليس خلصاتو من لفلوس للي مخبعاهم فجيب لبيجامة للي هابط الفوقاني عليه ووقفت كتشوف وكان غير كانت حافضة نمرة زهير ولا هند…)
~~~~~~~~~~~
هند: (كانت علمات وليد راه أمال كاينة فطنجة جا عندها دغيا)
وليد: انا نمشي عندها
هند: نمشي معاك
وليد: (ياله بغا يرفض وتفكر علي للي يقدر يرجع ولا معرفت معندو ميتوقع من ديك العائلة) وااخا (أول حاجة فكرت فيها مشات هزت كيطمة ولباس تحتاني ديال امال وشي تخربيق ديالها دارتهم فصاك هزاهم باليد للي ممجروحاش وهبطت لتحت من بعد مشربت فيتامين C باش توݣض شوية لقات وليد هز وراق بيرمي وتمو ماشيين لطموبيلة ديال هند ديمارا الطموبيل ودوز الخط لزهير) فيين
زهير: هاني شاد طريݣ
وليد: حتى حنا
زهير: تشفرت يا صاحبي كطيير كطييير ديك الطفلة
وليد: دابا لݣاوها وصاافي
زهير: ياله سير انا نشد شي قهوة ونزييد (داز لقهوة خدا نص نص حيت راسو غيطرطق عاد نهار كامل موااكلش ولكن اشمن شهية بقاتلو هز مادلين من القهوة وشد طريق لݣرسيف باش عاد من تم يدخل لوتورووت…)
شيماء: (كانت متوقعة زهير يلحق عليها ولا يتبعها يسول على أمال ولكن مجاااش تمناات غير يكون ممسوقش ولكن مجا هنا وكفاش سولها باينة طااايح كتفكر غير علاش حتى هي ملقاتش للي يبغيها هكااك ويخاف عليها وعلاش أمال بالظبط بقاو كيتسناو وكتشوف فمحمد للي كيهضر مع مرتو لوات شنايفها… جا ادم وقف حدا مو)
ادم: كان جا زهير طلع للدار
نعيمة: زهير صاحب وليد؟؟ وخليتيه بوحدو
ادم: لا كان خرج طااير شاف شي نماري فلفيكس وطاار
نعيمة: (باستغراب) نماري؟؟؟
ادم: واه وليد للي ݣالي نخليه يدير للي بغا حتى انا مفهمت منو والو ݣبيل جا شخشخ لمحمد طموبيلتو وشوية طلع كيݣبلب فلفيكس
شيماء: (طرطقت عينها) شنو كانو دوك نوامر
ادم: كانت نمرة ديال فيكس وحدة ديال فاس ولا ميسور ولا مكناس ووحدة 39 يمكن طنجة
نعيمة: (ضربها الضو عرفت أمال للي كانت كتصوني حيت غير نهار الربعين هضرو على هادشي وكانت كتݣول الا مجاش زهير تهرب)
شيماء: (تحليل بسيط من كلام خوها زهير شاف دوك نوامر وطار واخر نمرة كانت صونات فالدار هي ديال 39 إذا أمال هربت لطنجة مرداتش لبال كانت كتقول راها غير فتاوريرت.. بلا متحس عاونااتها تمشات شوية مسلتة من حدا مها شافت فمحمد ودارتلو إشارة بعينيها باش يتبعها وهنا مريم قشعتهم.. شافت فمحمد ممشاش قلب وجهو دازت 5 دقايق)
محمد: نخرج ونجي (كان باغي يخرج غير يكمي لقا شيماء واقفة فالدورة)
شيماء: تأ تعطلتي؟؟
مريم: (تبعاتوو)
محمد: واش مريضة نتي فراسك؟؟
شيماء: سمع ختك راها فطنجة
مريم: (كتصنت)
محمد: (طرطق عينو) باش عرفتيها؟؟
شيماء: (قالتها كتعوج) حيت زهير مشا لتماك واصلا سمعتو كيهضر معاها من ݣبيلة بغيت نهضر ولكن مصلاحش
ممحمد: (بقا غير كيشوف حتى قشع خيال طل كانت مريم) مريم
مريم: (قصدت شيماء للي جىدتها من شعرها) وهااااااا هي مشاااات لطنجة لاااش كتݣولييها علاش ناوياالها يااا لكلبة (شيماء بقات كدافع على راسها ومحمد كيفك دخل وسطهم)
شيماء: الله بنعل ديلمك يا لكلبة يا الخاانزة لحماارة
مريم: بعدي منا واش مكتفهمييييش بعدي منا وبعدي من أمال وبعدي من محمد ونتا امحمد نهار جيت تخطبني ݣلتيلي انا ختاريتك نتي
محمد: سكتونا الله يحرق ديل ملتكم كاملين
مريم: (عينيها غرغرو)
شيماء؛ محمد كيموت علية بغيتي ولا كرهتي (جا يطرشها وهي تبعد)
محمد: شتي ح*** ومدايزااش فيك و**** علية خليني محتارم مك
شيماء: (بقات كتشوف فيه)
محمد: (ضار عند مرتو) مريم (طارت وخلاتو ) بفففف (شاف فشيماء بقرف) والله مفهمتك نتي سمو بااغا
شيماء: باغااك نتا علاش مبغيتيش تفهمها
محمد: انا راه منشوغش فشياطة ديال غيري واش كتفهمي ككنشوفك مريم هي مرتي ولݣيت فيها كولشي زوين نتي كنتي عاجباني من شحال هادي غير شكلا اما حتى دابا كنشوووفك بحال شي خر** بعدي مريم وعطيها التيقار هاد لفعايل ديال ل**** هي مكتعرفش ليهم (هز صبعو) بعدي عليك مريم حسن ليك…..
كانت 12 دالليل
أمال: (مسحت بيديها الردان للي رداتو هي فاش كتخاف كتبقى ترد معرفت متقول لداخل حتى لبوسط كان صغير ماشي كبير وشماكرية كتاار جا خارج بوليسي شافها وااقفة)
….: بغيتي شي حاجة؟؟
أمال: (بلعت ريقها وحنات راسها)
….: اشريفة معاك هاضر بغيتي شي حاجة دخلي ولا تسوخري من هنا
أمال: (كانت اللكنة ديالو ماشي بحال كسمعت هاد لعشية) انا كنتسنى دارنا هنا
…..: كفاش داركم نتي مسكناش هنا
أمال: لا انا جيت تخبعت هنا حيت كنتسناهم
…..: (بانتلو مؤذبة) قربي
أمال: (قربت جوج خطوات وحابسة دموعها معرفت كفاش فكرت غتلقى لمرا دغيا كفاش كانت مسهلة الأمر صافي غير توصل تصوني على نعيمة للي تݣولها لبنت عمها وتجي تهزها ولكن فينما كانت غتمشي غتكرفس براكة غير زهير للي خرج وݣالها غيجي)
…..: هنا راه شوية ويسدو لباب
أمال: (تخلعت) ياك بوليس مكيسدوش
….: واش نتي درتي معاهم يجيو عندك لبني مكادة بالظبط حيت هنا غير بوسط صغير شوية ويسدو حسن سيري ديال السونتر
أمال: فين؟
….: (شاف فيها) منين نتي؟؟
أمال: وووجدة
….: وجدة واش كديري هنا
أمال: غي جيت عند شي عائلة ومعرفتش نولي
….: (باين الخوف فيها) شكون جرحك فوجهك
أمال: (حطت يدها على حنكها فين حسات بالشفار جرحها) غير انا
….: اممم مهم الا كانو غيجيو عندك سيري للكوميسارية ديال مرشال تعرفيها
أمال: (معرفت باش تبلات منين غتعرف هاد سميات) لا
….: شدي تاكسي يوصلك انا نعيط لواحد يجي يدييك
أمال: شكرا بزااف براك الله وفييك
…..: (قوس عينو فيها) معندكش تيليفون باش تݣوليهالهم؟؟
أمال: (حست بيه انسان مزيان) راه تشفرت (تضببو عينيها)
….: اممم ديري شي محضر
أمال: لا لا بغيت نمشي غير فحاالي
….: سمعي اختي واش نتي جاية عند شي عائلة ولا باغية ترجعي لوجدة الا بغيتي ترجعي زيدي نوصلك المحطة نصيفطك
أمال: لا والله الا جايين (كانت عندها فكرة خايبة على لبوليس من نهار تشدت على حساب أنوار وكفاش تعاملت خايب ولكن هدا ها هو ميعاونها شوية صوت داخلي كيقولها واش نتي مزالة كتيقي!!)
….: للي بان ليك واش داركم من ݣبيبة قلعو؟؟
أمال: لا غير دابا شوية
….: وحدة راه بعيدة بلوتوروت 7 سوايع ولا كتر
أمال: (طرطقت عينها)
….: ودابا راها علاين 1 يعني حتى لصباح عاد يوصلو
أمال: (قلبها كيضرب باالخلعة)
….: (خرج عندو شي صاحبو كيخسر الهضرة ويظحك هي حنات راسها وكتمسح دمعتها دغيا حست ببرد خفيف حيت تاوريرت أو وجدة سخانين على طنجة كتفكر غير فين تمشي باش يجيو عندها محست غير وقف عليها داك لبوليسي) تمشي نوصلك؟؟ (بقات كتشوف فيه) راه غير خير مني ابنت الناس اما انا مدابية غير نوصل لداري رتاح
أمال: (حركت راسها باه… (تصدمت منين شافت صطافيط وقفات)
…..: ياله طلعي (طلعات وهي كترجف كانت مظلامة جلس هو اونفاص ليها وحايد كاسكيط ديال ليونيفورم وتجبد طالق رجلو قوس عينو فيها مطلعها ومهبطها وهي كانت جالسة كازة حانية راسها ويديها مربعااهم) ݣلتيلي نتي وجدية؟؟؟
زهير؛ (مكرهش شي دفعة تجيبو فطنجة صونا على وليد جاوباتو هند) فين وصلت؟
هند: هانا اخويا فتنا تازة
وليد: (كيشعل الشوفاج باش ميبقاش داك ضباب) سوليه فين وصل هو
هند: فين وصلتي
زهير: راني موراكم للي سبݣ مزيانة.. ختي مولاتش صونات
هند: لا واالو داك الشفار دغيا طفااه
زهير: (بفقسة كتخليه يزيد بكسيري) اممم ياله الا ولات صونات عيطولي (قطع كيحك فهيمة ويجغم من القهوة باش يبقى مصحصح….)
هند: (صونا تيليفون وليد) وليد محمد تيصوني
وليد: (شد من عندها التيليفون قطع عليه وكمل ااصوݣان بقا كيصوني شحال جاوبو) وي
محمد: وليد دابا غنتفاهمو
وليد: صافي امحمد ساليينا وداك لبرهوش دخووك للي هربتو وهو ضاارب بنت والله متبقى فييه
محمد: دابا غير سمع وكان خليتو ليكم فين كنتو توصلو
وليد: نوصلو الحبس غير خليييه
محمد: وليد نتا مول لعقل
وليد: دابا سمو باغي؟؟؟
محمد: مفخباركش مي راها فصبيطار
وليد: لا فخبااري غير ختك تالفة ونتوما كتݣلبو ذبحوها
محمد: مكنتش نخليه يقيسها كنت باغي رجعها للدار (كيسمع صوت طريق زفر) راك ماشي تجيبها من طنجة
وليد: واه قبل متوصل ذبحوها راه عندكم عادي ضربو وليات
محمد: (عيطلو واحد لبوليسي) مهم ياك هند مزيا (سمع طيط طيط عرفو قطع مشا عند صاحبو) سمو تما
….: كبقات الوالدة مزيان؟؟
محمد: (زفر) الحمد الله راه فاقت واخا مهرسة
….: مهم ليلى مرت بااك راه كتاهم مك للي قتلت بالك
محمد: (غوبش) سمو؟
….: هادشي للي كتݣول فلونكيط للي درنا ليها ݣالت مك للي عتارفات وكانت جاية تقتلها باش ميتزادش ولد وحتى الضربة فكرشها باينة
محمد: اوا!!!
….: واش نݣولك اخاي محمد مك راه دخل فيها الحبس
محمد: الحبس؟؟؟؟
…..: راه هي هاجمة وعاد غتنوض روينة ويقلبو على تحاليل دياك هادشي الا مجبدوهش يعاودو البحث عليه بشنو مات
محمد: اممم
….: سير هضر معاها تجمع وتطوي وحتى نتوما متبقاوش داعيينها حتى وتكون مك معندها يد فموت باك غتشد حيت هجمات على لوخرا واخا هي لي كلاتها ولكن كتبقى هي للي هاجمة
محمد: (الارض كدوور بيه… زفر کاع المشاكل تجمعو عليه فهاد اللحظة حسد أمال حيت هربات منهم ومن هم عائلة للي مكيتسالاش..)
مريم: (كانت كتشوف فتيحة وهي كتبغي تحرك راسها ولكن مقادااش حيت دايرين ليها لبراي على عنقها) خالتي بغيتي شي حاجة
فتيحة: (كتهضر سخفانة) فينو محمد
محمد: (دخل مكره ومريم مكتشوفش فيه بلا مقدمات) لاش مشيتي عندها!؟؟
فتيحة: (بحرا كتقد تهضر) مشيت نݣلب على ختك
محمد: کلبي على شي سبة حسن من هادي تݣوليها لبوليس
فتيحة: واش انا للي كنت نموت ونتا تکولي لبوليس
محمد: الآلة راه هي داعياك راك نتي للي مهجمة عليها بسبااابك غنمشي نطلبها باش مدخلكش الحبس تفووو على عائلة (خرج زادح لباب ومريم متبعاه شافت فيها)
فتيحة: شتي ابنتي شتي انا كنموت وهو كيهضر معايا
مريم: (حركت راسها وحتى هي تفكيرها فأمال ولكن ما فجهدها مديييير وحتى فتيحة ماشي خافت عليها ككانت من شحال هادي….)
~~~~~~~~~~~
أمال: لا انا من تاوريرت
….: اممم ولاش ݣلتي وجدة
أمال: کلت ماعرفها
….: نعرفها راها قريبة لمدينتي ميسور
أمال: (فبالها وكان غير هربت تماك قريبة بعدا… حبست صطافيط حل لباب وشافت فيه)
….: لكوميسارية هنا راه كتبقى محلولة حتى لصباح
أمال: (بخوف وقف خرجت وهي تشوف فيه) شكرا بزاف اخويا الله يجازيك بالخير
….: (بقات فيه ولكن باش يدخلها على دراري مجاياش براسو غير ساكن مع عزارا) واش جايبة كارت ناسيونال ديالك
أمال: (بحزن) لا
….: (معندو ميدير ليها) انا نهضر مع صاحبي يخليك بعدا لداخل واخا سمو سميتك؟؟
أمال: أمال (حرك راسو باه سد باب صطافيط ومشا أما هي ضارت شافت فلكوميسارية للي كانت كبيرة طلعت دوك دريجات ودخلت من لباب كانو مشغولين مع شي مطايفاات وجلست كتحسب الثواني فوقاش يصبح الحال…..)
شيماء: (كانت مشات لدارهم كولها دخل ينعس وهي بقات مكونيكطية طاير عليها نعاس مرضياش بالنتفة للي عطاتها مريم دمعا ميفوور وهي كتحس براسها رخيسة للي جا يضربها ينتفها يسمعها كلام الرخص وحتى من محمد عيات تحاول معاه واالو ديما ميصدها… جات تخرج تشرب وتهز شي حلوات تاكلهم وهي كتسمع نعيمة كتهضر مع بنت عمها وكتسولها واش وصلات عندها أمال كانت 5 دصباح.. مشات حداها) اويلي واش مزال فايقة؟؟
نعيمة: (قلبت وجهها)
شيماء: حتى نتي اماما؟؟
نعيمة: سيري دخلي لبيتك ولا نوض نكمل على والديك تفوو وليتي غير مشوهاااني
شيماء: راه ديك الخرية دمريم للي كيحساب ليها كنضور بداك لمجرتل
نعيمة: سيري دخلي ولا نوض لوالديك ونتي عارفة الا نضت كولشي يدير يدو فيك
شيماء: بفففف صيفطوني نقرا وهنيوني من هاد الحبس دلويل (دخلت معطيهاش خاطرها مها تبقى مقلقة منها…)
~~~~~~~~~~~~~~
أمال: (كانو خرجوها وجا لبوليسي للي وصاه اللي وقف معاه دخلها لداخل وبقات تماك بدات تعمر شوية جلس حداها واحد الراجل) عمي شحال الساعة
….: 7 ونووص
أمال: (حركت رأسها بلا وعينيها ذابلين الليل كامل وهي حالة عينيها واخا ونسوها لمطايفات الا خايفة تبقى فهاد لمدينة وتلف عليهم… أما زهير ووليد وصلو قد قد حيت تلقااو فلوتوروت ديال سيدي قاسم)
هند: هي غتكون فشي كوميسارية
زهير: متأكدة؟؟ (بخوف) تكون تحركات ولا شي حاجة
هند: مممم انا قلتلها تمشي لشي كوميسارية وحنا نقلبو عليها ولبارح كانت فبني مكادة ممكن تكون بقات تماك
زهير: بففف واخا
وليد: باقي عاقل على طريق شوية
زهير: انا ندير Waze (أبليكاسيون ديال طريق) نشوف لكوميساريات للي قراب الله فين ݣلتي
هند: بني مكادة
زهير: بني مكادة صافي (هو ركب وزاد وهند شافت فوليد)
هند: ضعاف شوية
وليد: بالسيف ياله نمشيو حنا (مشاو كيقلبو تماك واالو مكينااش ومدازتش عندهم اصلا للي خدمو الليل نبدلو مع 6 دصباح رجعو كيقلبو فبلايص اخرين بحال كدار زهير للي تم داخل للكوميسارية واول من شاف هي.. كانت ساهية قرب ليها كيحس بدمو كيفووور وهي بديك الحااالة)
زهير: أمل
أمال: (غير سمعاتو هزت راسها لقاتو هو وقفت فرحانة من لدااخل) جيت
زهير: ياله (ملامحو مكيتفسروش خلالها طريق زادت قدامو وهي خايفة من ردة فعلو هز تيليفونو كيشوف فيها) لݣيتها
وليد: وايلي مزيان فين؟
زهير: انا غير ندخل لوطيل نݣولك سمية واجيو (هي كتسمع شنو قال ضارت عندو) مدن كاااملين بانت ليك غير طنجة
أمال: (حنات راسها)
زهير: (بعصبية ولكن محافض على نيرة صوتو) سمو كان عندك فداك الطنطون منين جيتي هنا؟؟
أمال: (بشوية كتهضر) انا كنت بغيت غير نهرب
زهير: (غوت عليها) وبانت ليك غير طنجة وكان تلفني وكان شحال من حاجة (شاف حنكها للي مجروح والدم بيابس) وكان وقعت ليك شي حاجة ولا ملݣيتكش سموووو ندير ديك الساع!؟؟؟
أمال: (بقات كتبكي) راه معرفت مندير مشيت للمحطة اول كتر ركبت فيه
زهير: متبكيش هضري فهميني لاش هااربة؟؟ علاه متسنييتنيش امل مكنتش غنتشد حياتي كاملة مبغيتكش تجي غير باش مدخليش لكوميساريات تماك باش فالتالي دوزي ليلة فيها؟؟؟ سيري هربي عند مّا (كيهضر معصب وهي كتبكي) بفف ودابا لاه تبكي؟؟
أمال: (كتشهق) راه ماما للي طرداتني فداك صباح وݣالتلي الا لقيتي فتاوريرت ولا وجدة ولݣاوك خوتك يقتلوك
زهير: (سكت كيشوف فيها كتبكي بنيتها) صافي أمل انا راه غير خفت عليك
أمال: لا غوتي علية
زهير: (تبسم عاد بقا كيشوف فيها غير شاف ديك الجرحة زاد كعى) ياله نمشيو
أمال: (تمشات حداه مرتاحة كتمسح فعينيها كتشوف فيه حتى ضار عندها فاتح ليها لباب حنات راسها)
زهير: سمو دابا نهرب بيك يانا؟؟ (شافت فيه لقاتو كيشوف فيها بشوفة فشكل) ركبي بعدا
محمد: (واقف فلباب كيتسنى البوليسي يخرج من حدا مو للي كيستجوبها.. شاف فمريم للي معاوداتش شافت فيه مشا حداها) مالكي ݣالبة وجهك على صباح عاود
مريم: (بهدوء) مماليش
محمد: متكونش برهوشة فمخك
مريم: مݣلت والو
محمد: سمعي ديك لموسخة مابيني وبينها واالو
مريم: (شافت فيه) وسطح؟؟ كنتو تلکاو فسطح؟؟
محمد: بففف دابا انا کاااااع هاد المشاكيل امريم وتجي ديري هاد الحالة
مريم: (سكتت حانية راسها حتى شافو نعيمة واحمد جايين) محمد راه منسمحلكش الا لعبتي بية (بهاد الكلمات مشات عند نعيمة سلمت عليها ولوخرا تلقاتها باالأحضان وصلو حدا محمد)
نعيمة: ولدي كيف بقات مك؟
محمد: راه عندها لبوليس
احمد: ولدي اش ديك الهضرة مك ݣالت على بااك
محمد: واش اعمي نتا عارف مي هكاك وزايدون شكون تبق مرت خوك ولا هاديك للي تسلطت علينا
احمد: انا مݣلتش دارتها بالصح انا سولتك لاش تݣولها
محمد: معرفت
احمد: وسمو دشي سمعت على ختك فين زادت؟؟؟
محمد: راها مع صاحبتها
احمد: ولاش حبستيها فالدار!!
محمد: (مكره) عمي والله الا براسي معارف علاه بفف راسي غيطردݣ علية
احمد: لا حول ولا قوه الا بالله العلي العظيم (خرجو جوج بوليس للي كانو تماك ومشاو عندهم محمد واحمد ونعيمة بقات حدا مريم مبعدين على كريمة متسمعش)
مريم: خالتي شنو عرفتي على أمال؟
نعيمة: راه معاها ولد عمها وصاحبو وهند صافي لݣاوها بيخير
مريم: بفف الحمد الله هي کاع مكانت باغية تهرب لباب انا فالليل سورتو ورجعت الساروت لمحمد راه كاينين تلاتة فالدار واحد عند محمد وواحد عند علي ولاخر عند خالتي
نعيمة: اممم (بتنهيدة) اوا ابنتي راه باين سمو وقع
مريم: زعما خالتي للي حلاتلها لباب
نعيمة: الله وعلم ابنتي مهم متعمريش راسك بكلام شيماء راها منين كتعصب مكتعرف متݣول
مريم: بقا فيا الحال اخالتي بزااف
نعيمة: وصاافي ابنتي (كريمة غير كتشوف وباغية تعرف غير علاش كيهضرو….)
~~~~~~~~~~~~~~
هند: (كانت فالطموبيل كتبدل لجرحة وباقا فيها راسها عاونها وليد تقاد لفاصمة وهبط ليها لكابيتشو) بففف باقية مقسحة
وليد: (تبسم معاها) دابا تبراي
هند: (لوات شنايفها) وغااااانبرا ولكن لاطراس
وليد: نتبعو عند طبيب الجلد ميبقاش فيك حتى نبشة
هند: (حركت رأسها باه.. لقاتو كيشوف فيها) شنو؟؟
وليد: والو
هند: قولي علاش تتشوف فية
وليد: من بعد.. فيك الجوع؟
هند: بزاااااف ولكن باغية نشوف أمال مقالكش زهير فينهم؟؟
وليد: ݣالي منين يمشيو لوطيل يعيط لينا
هند: (تجبدت) حتى انا فية نعاااس
وليد: إوا شتي وكان كنا عاقدين ݣاع منتسناوهم نمشي نتييهو من ݣبيل
هند: ههه صوني عليهم
وليد: (رجع نقاد فالجلسة هز تيليفونو غير يصوني مكيجاوبش) مكيجاوبش
هند: تأأ (ديمارا) فين غادي
وليد: غتبقاي بالجوع؟؟؟؟
هند: وليد العيد لكبير مبقى واالو ومي لالة غتجي شي سيمانة ݣااع ونديرو خطووبة
وليد: (شاف فيها) اهاااه
هند: والعرس؟؟
وليد: فوكما بغيتي
هند: على منقلب على خدمة فشي كلينيك
وليد: اهااه
هند: ونتا على مترسي امورك
وليد: اموري مرسية هضري غير على راسك هاد الساعة
هند: اممم مهم العرس نخليوه للصيف الجاي
وليد: مزياان نديرو سبوع وعرس دقة وحدة….
زهير؛ سمو دابا نهرب بيك؟؟؟
أمال: (شافت فيه بنص عين وهربت عينها)
زهير: غير للي بعلݣ مك طنجة دقة وحدة دابا نهار نغضبك تزيدي نيشان للمحطة
أمال: (تبسمت بعياء) اصلا نتا کاع متغصبني
زهير: والله يا جدك وتجيني وانا طالعالي القردة نعلݣ مك فشي قنت حتى نهرب (تبسمت) من فوكاش ونتي هنا باك ݣلتيلي كاينة فشي حي
أمال: واحد لبوليسي مسكين جابني بصطافيط هنا ووصى علية واحد لبوليسي اخر وبقيت حتى جيت عندي
زهير: اممم زيدي طربيني مزيان
أمال: (ضورت عينهاا وحنات راسها)
زهير: زعمنا حتى ولينا نباتو فلكوميسارية ويوصلوك بصطافيييط!!!
أمال: لا دابا (معرفت متݣول شافت كان مغوبش) حݣا على سلامتك (شافتو هز حاجبو) كنت خايفة عليك عرفتي منين سمعتك تشديتي ݣلت صافي حياتي ضاااعت (زاد هز الحاجب الثاني) ولكن لبارح منين سمعت صوتك فرحت واخا كنت هنا ومعارفة حد ݣلت زهير كاين معاك أمال معندك مناش تخافي
زهير: (لعب بلسانو فوسط فمو كانت كتهضر بحال شي بنت صغيرة) اوا الا مت ولا وقعتلي شي حاجة غتهوري بحال لبارح وتمشي طجي لشي خلا كحل
أمال: (حنات راسها بحزن) انا مكنتش باغية نهرب هنا راه ديك لمرا ݣالتلي
زهير: مك؟ (حركت رأسها باه… زفر محس غير جر يديها وشدهم كانو مݣلاصيين كمشهم فوسط يدو وهو كيشوف فيها) مااضسرش عليك شي واحد
أمال: (أول مرة يقيسها فيديها توترت بقات غير كضور عينها وعاد سخونية ديال يديييه وهو حس بهادشي عاد مزاد يد شاد يديها بجوج زيد بحال كيحك فوقهم باش يسخنو وعينيه مركزين فيها هزت عينها لقاتو كيشوف فيها هكاك بعداتهم دغيا كانت صفرا بالخلعة ولكن بهاد الحركة للي دار التزنيݣة بدات تطلع معاها شوية بشوية)
زهير: جينا جينا لطنجة ساريني فيها
أمال: (استخلات الشدة فيدو ومدارت حتى محاولة تجرها بلعكس حسات باحساس زوين) انا مكنعرفهاش
زهير: ݣوليلي غير علاش جيتي
أمال: زدت فاول كار خرج من المحطة راه كانت 6 دصباح وخفت نبقى فالمحطة واصلا خفت يتبعوني
زهير: اممم (جبدت يدها شوية ورخااها.. حط فعينو) يوماين منعست
أمال: سمحلي جبتك حتى لهنا كتݣلب
زهير: (شاف فيها بنص عين) هبيلة؟؟ جاب الله كنت خارج اما غنبقى تماك بحال لحمق متعاوديهاش أموول (كيهضر وبحرا كيقدر يحل عينيه.. حركت راسها بلا) فين نمشيو دابا (زاد مكسيري شافت فيه كاين باين عيااان وماشي حيوي ونشيط كما موالفة كتلقاه جاه ميساج) أموول شوفي لميساج واش من عند وليد
أمال: (بفرحة هزاتو دخلات لبلاصة دواتساب لقات وليد مصيفطلو) ݣالك وليد راحنا فلمنار لبارح انا قريت لمنار
زهير: دخلي الابليكاسيون ديال waze وكتبي هاد لمنار (دارت شنو ݣال بان طريق للي يمشيو عليها وحطاتو فلبلاصة للي كيتعلق فيها التيليفون… كانت كتشوف فطريق وكتخطف الشوفة فيه ممتيقاش هي مع زهير غطير بلفرحة اما هو كان وجهو باين عيااان ومديرونجي… غير بأن ليها لبحر مع ديك الطبيعة بقات غير كتشوف منظر خياالي ششاف فيها لقاها كتمنظر رجع راسو مزيان باش تاخد راحتها حتى دخلو وهي تصدم بداك الديكور كانو ألعاب كبااار والدنيا مقاادة أحسن بلاصة فالمغرب تلعب فيها لافوار قشعو طموبيلة ديال هند للي غير شافتهم وقفت كتشير باي باي وحتى اما تبسمت فرحانة غير وقف هبطت ومشات كتجري عند هند لي تعانقو.. خرج زهير وسد لباب ماشي حدااهم)
زهير: وااااه يا محااينك جات معاك شي يتعنݣ وشي يشووف
أمال: (حشمت وبقات كتفرنس شدت فذراع هند حتى غوتت) ماالكي؟؟؟
هند: (شدت بلاصة الجرحة) كنت تجرحت (أمال ضارت عندها وهي كشير بيدها وعينها باش ميقولولها واااالو حيت عارف غتأزم الا عرفات راه خوتها جاو يذبحوها هند تجرحت مهم ترد اللومة ليها)
أمال: فين فين؟؟
هند: بلاتي نوريك
وليد: أمال!! (ضارت شافت فيه) طنجة مرة وحدة غزالة تحرݣي ولا
زهير: زيييد دخلها لحريݣ فالراس
وليد: لا لا أمال بعقلها
هند: هههه (خبرتها باغا ظحك معاها) غبرتي حتى ربيتي لموسطاج
أمال: (خرجت عينها) أحاااي (حطت يدها فوق فمها) حلفي حلفي
هند: غير شوية ماشي بزاف ههه وراه كنظحك معاك والله مباين بزاااف
زهير: أمل
أمال: (ضارت عندو ديك العيطة للي كيعيط ليها بسميتو كتصطيها ولكن دايرة يدها فوق فمها بطريقة ممعيقاش) هم
زهير: تجي معايا؟؟
أمال: نبقى مع هند
زهير: (حرك راسو باه مشا لريسبشن كانو شاليهات زوينين بزااااف ومنهم للي كيطل على لبحر خدا جوج حيت سبقو وليد وخدا ليه واحد ولهند واحد أما هند وأمال كيتوشوشو ووليد كحز من حداهم كيهضر مع مو)
أمال: بففف دازت علية اختي هاد الوقت كامل
هند: حتى انا والله عرفتي خرجت مرة وحدة نهار سوتنونص صافي
أمال: شحال كنت بغيت نحضر معاك
هند: معليش مهم دابا تجمعنا
أمال: (تبسمت.. شافت زهير جاي ووقف حداها ردت يدها لحدا فمها زعما كتحك مد ليها ساروت)
زهير: (عاد انتابه راها لبيجامة للي كيبين انها مطرود كما قالت ماشي هرباات) نرتاح شوية ونمشي نجيبك سمو تلبسي
هند: راني جبت ليها تبدييلة
زهير: (دخلو لداخل كان خدا ليها شموبر مقابلة مع لبحر وحداه.. حلها لباب ودخل ومشات من موراه بشوية رجع بخطوة مقرب ليها) نرتاحو ونخرجو شوية
أمال: غير رتاح حم (بعدت شويييية اللور)
زهير: مرتاح ازين غير تكون لالة أمل مرتاحة
أمال: (تبسمت حانية واليد مزالة حدا فمها)
زهير: داك نهار كنت مكلخ وكان ضربنا الكحل فلبيض راحنا هاربانين بجوج
أمال: (طرطقت عينها ظحك بعياء وخرج ساد لباب وهي متبعاه بنص عين دخل للشومبر للي حداها حطات الصاك للي جابت ليها هند أول حاجة دارتها دخلات للدوش للي باين حيدت شالها كان شعرها مخربق جبدت داك تخربيق اول حاجة دارت هي لاصير لموسطاج وحتى لفرقة دلحجبان دارت ݣوماج لوجهها عاد دارت ماسك من للي جابت ليها هند والمساند الرسمي ديالها.. عاد دخلات دوشات غسلت شعرها لبست بينوار كان تماك عاد خرجت دايرة فوطة عليها شافت فلمرايا شهقت حيت دوش بان عليها كانت حالتها خرجت عاد كتمنظر فداك المنظر للي قدامها ظحكت على راسها بلا زهير كانت غتنعس فالأرض ودابا منين بان كاينة فأحسم بلاصة خرجت لبالكو كطل على لبحر.. شمت ريحة الݣارو ضارت لقاتو زهير هاز حاجبو فيها ولݣارو فيديييه دخلت كتجري سدت لباب ودوزت الريدو ودخلت فالنموسية.. اما هو بقا شحال ساهي لاح لکارو للي كان فيدو)
زهير: ابردي على الطفلة غتخرج علية (دخل حالف مع يدخلو لوجدة نيشان لعدول تكا فبلاصتو وصورتها كما شافها فباالو واخا الشمتة للي فيه مغتنسالوش …)
كل واحد دخل شومبر للي شد ونعس من بعد أيااااام كل واحد وكيفاش دازت علييه وليد وتمارة ديال المحال وكيجري فبراءة زهير هند مع السوتنونص والإحساس بالوحدة أمال مع مشاكل دارهم وبعدها على زهير وزادت الهربة لطنجة واخيرا زهير للي ناعس وممرتاحش 💯٪ داكشي للي داز منو مساهلش باش غينساه بين ليلة ونهار… دازت 4 سوايع فاق هز تيليفونو مزال فيه مينعس ولكن خلاه حتى الليل صونا على مو
الحاجة: (مشات لبيتها باش ميسمعوهاش) وليدي
زهير: مّا لباس؟؟
الحاجة: الحمدلله اوليدي ݣولي فين امال؟؟
زهير: راني لݣيتها طيارة امّا ديك الطفلة محدتها حتى لطنجة
الحاجة: طنجة!! سمو مشات دير تم؟
زهير: مشات تفقصني وصافي
الحاجة: ههه شو سمو خلاها اوليدي طج من دارهم
زهير: اودي مهم غدا ونروحو ان شاء الله
الحاجة: واخا اوليدي
زهير: الدار مزال عامرة!
الحاجة: واه اوليدي
زهير: اممم اوا حتى نجي ونهضرو (كمل معاها كيهضر على صحتها قطع وناض كيتجبد وكيتفوه تفكر منظرها ݣبيلة ملوية فبينوار كانت مختالفة على كيف موالف كيشوفها لدرجة محيدش عينو عليها مينكرش شحال عجبااااتو وجاتو على لݣانة وقف نيشان للحمام كان الساعة 4 دلعشية.. توضى صلا الظهر وهز تيليفونو كيصوني على وليد للي جاوب مكوخ لنعاس) فيق اداك الجحش
وليد: (مقادش يفيق) اممم
زهير: وطلݣ راسك ونتا جالس ت**** علية (قطع عليه حل لبالكو كان منظر زوين تجبد كيطل على بالكو أمال واش محلول كان مسدود بانتلو يدخل عندها غير شد راسو.. صونا على احمد باش السبت يحل المحال وهو لعشية يكون عندهم سمع اذان العصر ناض صلاه لبس قبيتو حيت واخا #فصل_ربيع الشمال مزال محرك فيه شوية دلبرودة…
مشا كيدق فشومبر أمال ووليد حل بابو شافو زهير) صدعتك اخااي
وليد: هه لا حولة
زهير: (رجع دق ومتكي على بابها) أمل!! (وليد مزال واقف) وسير فيق هند ولا صوني عليها بقا حاضيني
أمال: (فاقت من دقانو وهضرتو ناضت وهي مشعككة) حم انا فقت
زهير: متحليش… لبسي حوايجك هاحنا نتسناو فيك
أمال: (تبسمت ودخلات للحمام وحتى هند كانت كتلبس نص ساعة وهو مينݣرو حدا لباب عاد تمات هند خارجة لابسة ڤيست طويلة كارويات مع شوميز بلبيج خاشياه وسط سليم كحل مع طالون فلمارو وطالقة شعرها مع ميكاب خفيف زهير غير خطف شوفة وقلب وجهو.. وليد طلعها وهبطها دارها إشارة لشعرها دارت راسها مفهماتوش)
وليد: جمعي شعرك مفهمتيهاش (أفأفات ودخلات وهو يتبعها.. زهير للي كان متكي على باب شومبر أمال)
زهير: أمل راه غير غنحوسو شوية… وااايلي هاد لعيالات شحال كيشدو دلوقت (حلت لباب وهو وقف) باني نشووفو سمو من صباح ونتي تروني (طلات عليه كتبسم كانت لابسة شوميز كارويات فلمارو ولكحل ومن الوسط سميطة عازلة خصر ديالها مع سروالو مارون سامبل دروا مع صبيبيط مارو دارت شديدة زوينة بلفولار بينها فشكل كانت زوينة بزاف لدرجة خلاتو غير كيشوف شاف فوجهها كانت غزااالة فعينيييه)
أمال: حم (مصت شنافتها بتوتر) مزال مخرجات هند (مجاوبهاش بقا غير كيشوف فيها بين عينها وشنايفها) زهير
زهير: ݣليييع ݣلب زهير…
أمال: (تبسمت حانية راسها طايرة بالفرحة شحال توحشت كلامو زادت خرجات عندو.. خرجت هند ظافرة شعرها جنب وكتعوج شنايفها غير شافت أمال تبسمت)
هند: وينو على التووت غزااااالة ما شاء الله عليييك
زهير: داكشي سمو ݣلت تا يانا
هند: ههه (أمال غير كتفرنس.. شدت فيها أمال وزادو ودراري من موراهم مع خرجو كانت الدنيا عامرة بالناس دراري صغاار وقفو كيشوفو حتى الالعاب الناس بداو يلعبو أمال أول مرة تشوف هادشي بقات غير حالة فمها كتشوف حتى سمعت زهير كيعيط ليها ضارت)
زهير: باغية تلعبي؟؟
أمال: الااا غير كنشوف
زهير: زيدي ناكلو شي حاجة ومن بعد سيري لعبي حتى تشبعي (شافها كظحك وباينة فرحانة طلعو للقهوة للي كان منظر اخر كيهبل جلسة بربعة كيهضرو ويظحكو حتى تحطت الماكلة أمال وهند كياكلو ويتوشوشو ورجال كياكلو من سكات… هبطو لتحت هند كتزعم فأمال طلعو ركبو فتراان للي شبعو غوات ووليد كيفيلمي فيهم كملو ومشاو لعبو الطموبيلات زهير غير حاضي علماتها هند كدير وبداو كيلعبو وأمال ياله كطلق يدها حتى زدحها شي واحد من اللور كانت بغات طيح كلاها فالجنب..)
زهير: (عرفو كيضسر عليها دخل فوسط الحلبة ماشي مقصدو) اااا باسم الله عليك اشرييف….
أمال: (بالخوف وقفت خارجة)
زهير: رجعي نتي تلعبي (كولشي ضار كيشوف)
…: خايلاه سماحلي العايلة مقصدتشي
زهير: (خسر كمارتو) عور للي ولدك (مشا جلس حدا أمال دور لفولون زدحو وهي جامدة حداه.. دار يدو من مور ظهرها) ايااا رولي
أمال: (تبسمت شدت لفولون كتصوک وهو كيوريها حتى سالا الطرح عاود طرح اخر وحتى لوخرين.. جات هند ضربات فيهم فيهم من اللو حتى مالت أمال عليه ضار لقاها هي كتقليلهم السم خنزر فيها اما أمال حشماانة رجعت كتقلب فديك لڤلون وهو ضار عند هند دارلها إشارة تعاود ضربهم ظحك وزاد حتى رجع هو مطرد على هند ووليد كملو الطرح وناضو خارجين كيظحكو… كانت بلاصة كافية باش ترد الروح بقاو كيتمشاو لبنات لقدام ودراري اللور شوية زهير تقاد مع لبنات)
زهير: هند تكلمي (ضارت هند وزهير تقاد مع أمال للي كتشوف فيه وهي متبسمة) فرحانة معايا أمل
أمال: (غمضت عينها متبسمة) كتر من فرحااانة
زهير: اممم (عجبو الحال) هي صافي مرتاحة معايا
أمال: (حركت رأسها باه)
زهير: (بنص عين خشا يدو فجيابو) ݣولي راك تبغيني وصاافي
أمال: هههه
زهير: امحاينك أمل ݣلبك معذب وسااكتة
أمال: هههه (دارت يدها على فمها حيت ظحكت بالجهد)
زهير: سمو داابا واجدة نمشيو نديرو الكاغييط
أمال: (حشمت حنات راسها)
زهير: عيد لكبير معايا دلعام
أمال: (شافت فيه زاعمة) علاش عندي من غيرك
زهير: (بقا ساكت وكيشوف فيها وصلو للقمة على لبحر وضار عندها لقاها كتشوف كيحاول يقرا عينيها واش فرحانة ولا كتصنع ولا كتخبي) سمو دارولك باش هربتي
أمال: انا كنت باغيا غير نجي لوجدة مسخيتش نحبس من المعهد وووو (بتردد) منين سمعت شنو طرالك بغيت نجي عندك
زهير: (جلس فوق صخرة وجبد ݣارو كيكميه) وكان جيتي كنت نتفاهم معاك
أمال: راه مكانوش يخليوني تجي ݣاع
زهير: وحنا دراري صغاار أمل كنت نجيبك نجيب سوا بالسيف سوا بالخااطر
أمال: مكنتش نحمل نزيد نݣلس تماك والله كنت كنتخنق
زهير: (كيكمي) ضربوك؟
أمال: (تنهدت كتشوف فلبحر ضارت لقاتو كيشوف فيها) حتى نتى متبقاش فݣعان
زهير: (صاط الدخان مجاوبش ضواو اسبانيا كتبان مع لبعد وغرق فأفكاارو محس غير طيراتلو لݣارو هز عينو فيها)
أمال: هاء كان شوية يحرݣݣ
زهير: (شد ذراعها موقفها ووقف لدرجة خافت منو من بين صباعها هز داك لبونت للي مزال بدخانو ولاحو) متعاوديش تقيسيه بيديك
أمال: (حنات راسها ورخا يدها)
زهير: أمل داكشي للي وقعلي مسحيه من راسك معليش الدنيا هاكا توريك الخداع من لحبيب وكما نݣول ناقص واحد ناقص مشكلة أنوار منويتهاش منو ولكن معليييه
أمال: أنوار كان حتى..
زهير: أمل داك الموضوع هنا نسدووه سميت داك لبغل منعاودش نسمعها
أمال: حم هو ميستاهلش تقليقة منك ازهير نتا راجل مزيان وقلبك بيض وصافي هو ححح حمار ومنافق (أول مرة يسمعها كتهضر هاكا وتسب حتى هي)
زهير: هه صافي برااكة عليك هاد نهار.. رواحي دابا نهضرو فداكشي ديالنا
أمال: (تبسمت)
زهير: خاصك تجي تشوفي الدار.. باش نݣادها
أمال: كما درتيلها (بفرحة شافت فيه) زهير
زهير: (قوس عينو فيها بحال كانت بغا تقول شي حاجة مترددة وفجأة تشجعت) امم
أمال: نتا عزيييز علية بزااااااف…
وليد: (جالسين فقهوة) والله حتى حرت اهند
هند: معرفت منقولك نتا كنتي خايف تلقا بأنوار وداك شماتة اصلا هنانو منو
وليد: سمو كنتي تعرفي عليه
هند: من اللول كنت نعرفو شماتة وختك شحال من مرة قلتلها هدا مصالحش ولكن هي الحب كان عامي ليها عينيها
وليد: وعلاش مݣلتيلي والو
هند: راه بالصح تنهضر معاك راه انا تصدمت منين جا خطبها
وليد: انا عجبني الحال ݣلت من تريكة زهير فيكون ݣابض بحال عمو ساعة منين عرفتو لݣيتو خاااوي
هند: اوا الحمد الله منين مشا
وليد: حتى وكان بقا مكنتش نخليها معاه.. والله معرفت مال شيما مكانتش هكااا
هند: الله يهديها (مكتبغيش دخل معاه فالتفاصيل حيت أمال غتجبد غتجبد)
وليد: عرفتي ادم سمو ݣالي دارت لبارح دابزت مع مرت محمد على شي هضرة خاوية كان نبيل تم بغا يقتلها
هند: (عرفاتها كضور بمحمد) الله يحفظ وصافي
وليد: غنردها لعندي على متكمل هاد العام ونݣادلها دوك تراابي شوية ونيت نشوفو حنا سمو نديرو
هند: منكذبش عليك أمال وشيماء مكيتفاهموش اما تسكن معانا
وليد: عارف
هند: (بدلع) سمعتك كتقول لزهير بغيتي تشري شي بقعة
وليد: كتصنتي
هند: فشي حاجة تتخصك.. اه
وليد: هه واه ݣالي كاينة شي بقعة مكبيراش بزاف شي 120 متر حداهم ݣلت تابعني نشري نشري علاش منبنيش شي دويرة وعلى ذوقي ونيت معنديش مع ديور لمشروكة
هند: حبيت الفكرة
وليد: مول الفكرة؟؟
هند: هداك تنموووت عليه…..
~~~~~~~~~~~~~~
زهير: (تبسم) عزييز!! زيدي سمو ياخر؟؟
أمال: ووو صاافي
زهير: صافي!! لا لا كاينة شي حاجة كبر
أمال: (حركت راسها باه وكتبسم حتى كتفلت ليها الظحكة)
زهير: (حس بيها فرحانة) واشتا اخر
أمال: كتعنيلي بزاااف
زهير: سمو كنعني ليك
أمال: (قلبت وجهها لجهة لبحر) حم لبرد
زهير: هه كنعني ليك لبرد
أمال: ولالا زعما راك عارف
زهير: معاارف واالو للي عارفو هو أمل دݣلبي.. انا سمو كنعنيلك نتي
أمال: نتا أحس راجل عرفت فالعالم
زهير: اممم وسمو اخر
أمال: هههه وصافي ازهير
زهير: كتݣطري علية اشنيولة
أمال: اممم معرفت فين زادت هند
زهير: ونتي مالك بهند ولا ممقنعكش يانا..
أمال: ااااا لااا
زهير: نساي هند من دابا مكاااين غير زهير..
أمال: معرفت علاش بغيتني؟
زهير: (قربلها) عجباتني ديك البوسة داك نهار من تم وانا حالف نديها (خرجت عينها) حلااااالا طيبا ههه متحشميش راه مبقات غير شي سوايع وهانتي مرتي
أمال: (تبسمت قالبة وجهها ولكن دوك بوسة وݣضاتها هدا راه زواج راه غتولي مرتو يعني أي حاجة ساتراها غيولي يشوفها ويقيس فيها كبغا شافت فيه لقاتو مقوس عينو فييها) نمشيو
زهير: وين؟
أمال: معرفت
زهير: نمشي نحسو طنجة شوية ولا محوسة فيها
أمال: لاااا عمرني اصلا انا عشت فتاوريرت حتى جبت قريت فوجدة وداك نهار جيت لفاس
زهير: اممم نهار کردعتيني وخليتيني نتسنا فييك (حنات راسها) ووجدة محوساها مزيان
أمال: صراحة كنخرجو انا وهند ونضوروو
زهير: اممم مزيان ولكن مزال انا للي نضورك مزياااان
أمال: (تبسمت) ان شاء الله
زهير: ياله نمشيو
أمال: ووو هند
زهير: (هز حاجبو) شحال ݣدها تبقى معاك هند تاليتك غير معايا ازين (مزادتش معاه زادت قدامو تابعها ركبو وخرجو من تماااك… بقاو كيتسرااو حتى صوناو على هند وراتهم لبلاصة فين كاين حوايج شارع مكسيك وطلعو فداك الشاريع مقربها ليه حيت الدنيا عامرة جلسو جاب ليها زعزع وليه عصير لافوكا مع مكسرات عجبها الحال بقات كتاكل اما هو هبط على العصير دقة وحدة) نجيبلك حلوة
أمال: لا هدا ومصاب نكملو ههه
زهير: (بقاو كيهضرو وهو قاتلها بالظحك شبعت ناضو من تمااك نيشان محال شاف شي لبيسة عجباتو هي تحشم وهو يحلف حتى قيساتها خداهاالها هي وبيجامة حيت باش جات رجعت جفاف…عاد مشاو من تماك نيشان للكورنيش يتمشاو حدا لبحر… كانت الساعة الوحدة خداو بيتزات ورجعو لمنار مدوزين أحسن نهار ليهم وحتى هو كان محتاج هاد الهدنة مع نفسو ومع أمال لاقي راحتو…. وصلو نيشان لشومبر ديالهم غير زهير للي كل واحد فرقلو بيتزا ديالو وهو دخل صلا شنو عليه وتافقو هو وأمال يتلقاو فلبالكو هي جالسة فكرسي ونسيم البحر كيضرب فوجهها وهو نفس شكل كياكل ومجمع معاها حتى كزت بلبرد عاد خلاها دخل وهو بقا حتى كما عاد دخل ينعس….)
شيماء: (كانت كتشوف فانستغرام ديال أنوار للي من نهار مشا وهو كيحط تصاور مع مرتو بوزيسيونات قهاوي ديسكوتيكات لباس بلا التعناق… كتبقى تزومي تصويرة بتصويييرة هي ݣاع مكان كيدير معاها هاكا اصلا حتى شنو كان كيدير مع أمال مكانش كيدورو معاها.. تنهدت) هو عمرو بغاني غير يانا للي لحت راسي عليه.. شكون يقبل بية داابا حتى من محمد للي حݣرتو كل مرة مسمعني كلمة (ندمت علاش تفارقات مع لبنات على الاقل هوما كيونسو أما دابا حتى نعيمة قاطعة معاها الهضرة على حساب مريم.. ناضت جمعت طبلة دلفطوور وهي غير ساكتة وكتنهد حتى دخلت مها)
نعيمة: ݣادي لغدا متخليش مرت خوك تنوض راها مكتݣدش تشم ريحة طيااب
شيماء: واخا ماما
نعيمة: (خرجت وشيماء غير كتحاول تصالح مها.. هبطت لتحت فين محمد مغاوت مع مو من نهار مات باه وهاد الدار كتر فيها لغوات) اماااااااااالكم
محمد: هضري معاها (ضار شاف فمو) راه متشوفيش جبتك هنا صافي راه كولشي تسد راه مزالة تݣبلو فالمحكمة
نعيمة: افتيحة ديري لما منين يدووز واش على مبارك باغية تمشي لحباسااات
محمد: راه كولشي شجلاتو فتيليفونها وعاد كتݣول صييفطت مصطفى (مكره) واش هادي هضرة تݣااال
فتيحة: هي لعبتها علية
محمد: (كيغوت) ولاااه ماشياا لها
فتيحة: مشييييت نݣلت على ختك
محمد: ختي ملݣات فينا الخير حتى حنا للي من دمها عاد تلݣاه فمرت بااها
فتيحة: تجلااااااا ݣاااع
محمد: خالتي نعيمة الله يرحم الوالدين هضري معاها
نعيمة: لا حول ولا قوه الا بالله العلي العظيم افتيحة دابا سمو حسن الحبس ولا تجي هي عندك
فتيحة: الحبس
نعيمة: سير اولدي جيب لمرا مك راه خرجلها العقل (فتيحة سكتت خرج محمد) صبري غير تولد وراه تمشي فحالها
فتيحة: ايييييييه تلات بية وشووفلك بنت لحرام باش تسمح ݣالتلك تجي تسكن فدار راجلها حتى تولد (شافت فرجلها ليمنة للي معلݣة) الله ياخد فيها الحق
نعيمة: صبري 5 شهور دغيا دوووز
فتيحة: احياااني انعيمة انا غير نشوفها كنبغي نقتلها
نعيمة: اوا نتي اش داك لييها وعارفااها کااادة
فتيحة: (زفرت ساكتة دخلت مريم عطاتها شي دوايااات) هلا بنتي يانا شتي نهار نطيح ملکا غير مريامتي
مريم: (تبسمت) الله يخليك لينا اخالتي
نعيمة: مکلناش العكس ولكن حتى وكان كانت بنتك حداك تهزني
فتيحة: تهز غير راسها ديك لمنونخة
نعيمة: الله يهديك عليه (ناضت) ونمشي نكمل شغلي
فتيحة: هانتي جالسة راه لبنات فالدار
نعيمة: غير شيما حتى من سنا مكتݣدش على الريحة
فتيحة: لوحم الهاوي
نعيمة: وبااااز مدوزتيش تلاتة (خرجت طلعت لقا شيماء كتجفف جاها لعجب هاد ايام كتخدم شغل بلا نݣير وغير ساكتة) هاري نكمل عليك
شيماء: كملت اماما غير دخلي
نعيمة: اعلم الله شنو راك باغية
شيماء: ههه اش بقالي منبغي (كملت تجفافها ومها دخلت تخبز الخبز…..)
زهير: (زاد فالصوت مجهدو)
“””اراايي شحال نحبو””
“”” وشكون يجي فبلاصتو”””
“””راني تبغييه راني نبغييه”””
“”” غادي نحرݣ خيمتو ونباصي عليه…..”””
“”””كدايرة بالزين أمال”””
“””صورتك متمشيليش من لعقل””
“””راني نحبك حتى لممات”””
“”””بسبتك نتي نسيت شغل ….””””
أمال: هههه (كظحك فرحانة وهو كيغني حتى نقص الصوت حاضي مع طريق بعين ومرة كيشوف فيها)
زهير: ياااجدك لعقل للي كان طيرتيه
أمال: (تبسمت وقلبت وجهها فرحانة بزاااف كانت لابسة لبيسة للي شرالها لبارح وكتمنظر فطريق حيت راجعين لوجدة وهند ووليد حتى هوما من موراهم.. أول مرة تشد طريق معاه هاكا رجع زاد فالصوت مرة الرݣادة مع الشعبي فرق كبيييير بين عيشة مع دارهم وبينو هو تفكرت نهار لكار للي صدااتو وجاها باااسل وفضلات أنوار عليه غير كتفكرها كتخسر كمارتها حتى سمعاتو)
زهير: أمول ياكما عييتي
أمال: لا لا بلعكس عاجبني الحال
زهير: بالصح!!
أمال: والله بزاااف شحال كيعجبني نساافر
زهير: نبقاو نسافرو غير ماشي بزااف مرة فالعام وشي مرات نخطفو حيت احبيبة المحال كيبغي ديما نكون حاضر
أمال: (فرنست هي مشدت من هضرتو غير ديك حبيبة)
زهير: منكدبش عليك كنت عوال نمشيو لبرا شي سيمانة ولكن داك ل… (سكت كيعض فشنافتو التحتانية)
أمال: انا لمهم عندي هو نكون معاك سافرنا بقينا (هزت كتفها) مهم نكون معاك
زهير: (هز حاجبو) ݣولي طايحة فية وصافي
أمال: ههه
زهير: ݣولي واش غتبقاي مزقرمة علية ولا
أمال: ولا ههه
زهير: وااخا لالة أمال كولشي يجي معاك غير من دابا نعلمك خوتاتي راهم كبارااات وشوية هاربلهم لفريخ يعني شي كلمة هاك مهااك ديري راسك مسمعتي والو ولكن الا عيقو راه انا لي غنتجابه معاهم
أمال: لا لا انا منديير والو
زهير: عارفك مديري واالو بناتهم راه کدك داكشي باش ݣلت ليك نتي احتارميهم ولباقي خليه لية… (شاف فيها) مكنبغيش نغيض مّا
أمال: (حركت رأسها باه)
زهير: (شافها سهات) مرانيش نخلع فيك انا غير كنبغي نعرفك على التريكة الزينة للي باغية تجوجي منها
أمال: هههه أنا شفتهم داك نهار ضريفات
زهير: وراه ضريفات غير شي مرات للي كيهرب ليهم وصااافي اما نتي راك لدارك تماك حتى حد ميݣد يݣولك لا طابت لا تحرݣت مّا نشركو معاها لماكلة والجلسة اما نعاسنا راها فبيتنا
أمال: (غير كيذكر ليها نعاس كتسقل وهو بلعاني كيشوف ردة الفعل ديالها.. قلب الهضرة على الدار وصليحها منين يبداو ولفراش بقا كيعاود ليها على شنو داز عليه فالغربة جمعو مزياان اما هو كيتفادا يسولها على عائلتها وحتى هي مكتذكرهمش حيت معندها حتى شي ذكرى زوينة تعاود عليها وكولشي راه باين…. أما وليد وهند عندهم مع الغربي شطيح حتى هوما مونسين فطريق… دخلو لتازة باش يتغداو هند مكتساليش من السيلفياات غير كتبغي تقرب لوليد كيهرب حيت هي معندها سوق تقرب تصور وتمشي اما هو راها واصلة ليه لعظم.. رجعو لطريق 4 سوايع كانو داخلين فالدخلة ديال وجدة)
زهير: أمول تمشي عند مّا؟؟
أمال: اممم دابا هو
زهير: صافي فهمتك مهم انا نحطك نمشي للدار ندوش نبدل حوايجي ونمشي للمحال فالليل نبان عندك
أمال: (شحال عجبها منين تفهمها) شحال نتا ظريف
زهير: هه غير نتمسكن على منحطك عندي فالدار….
زهير: رجع للخدمة ديالو للي استقبلوه دراري فرحانين واهم حاجة تنقنيقة ديال الحبس موصلاش طلع للمكتب ديالو عاقد حواجبو تفكر دار نهار منين طلع يجيب فلوس السيد لقا غير الريح وباسبورو مقطع وملاين متجمعاتش بالسااهل ولكن غترجع بالساااهل كما داير فراسو بقا خدام مقلبش من مور وليد بلعكس كان غير كيقلب على شي حاجة مدوز نهارووو اما وليد مع وصل كان ادم جا على حساب شي سلعة شد معاه طريق لتاوريرت… هند وأمال واخيرا بقاو الرأس فالراس وأعمال علودات ليها کاع ليديطاي وشنو وقع ليها فهاد 15 اليوم وحتى هند كولشي عاوداتلو من غير شنو دار علي ومحمد رجعت هند لبيتها ترتاح وأمال نعست فرحانة معنقة لوسادة للي كان عطاها لها فنهار حل المحال وكتفكر غير فيه حتى نعست….
أشرف: (مع سد محالو نيشان عند محال زهير للي ݣالو احمد السبت غيكون زهير فيه لقاهم مزال مشغولين مع شي كليان دخل حتى كمل زهير ومشا سلم عليه بالوجه وطلعو للمكتب) على سلامه ابا زهير
زهير: الله يسلمك… للي وقع بحال عمرو داز داز
أشرف: واش حنا براهش أخاي زهير غير هو كولشي ضدو علاش متديكلاريش بلكلب مع يدخل يتشد
زهير: (زفر) كان عليك أشرف نهار طاح لفيديو فيديك تجيبو
أشرف: واشتا نݣولك منويتهاش فيه ݣلت صافي راه كبر ونسا داك تروهيق الخاوي ساعة صدق شماااتة
زهير: مهم خويا وخوتو مكاينش لاش توصلهم وعلاش مديكلاريتش بااه راه ياله داز مرضة ديال سكر ومناض منها بالزز وهادشي غير عرف ولدو حرݣ ومّا حتى هي كتفقص وترد خاطرها مناقصش للي يغييضهم لي هاد السااااع
أشرف: اممم كون هاني اخاي زهير… ياك الأمور دابا مزيان؟؟؟
زهير: بإذن الله كولشي يكون مزيان (بقاو مجمعين شوية أشرف حط رزق زهير من الخدمة للي شركو وناض مشا فحالو… وزهير بقا حتى سد المحال عاد مشا نيشان عند أمال للي كانت كتسناااه وشادة تيليفون هند غير صونا خرجت للبالكون.. داير تيليفونو بين كتفو وودنو وبيديه كيتجبد من لعيا) أبردي وشحال تسخسخت
أمال: ههه انا بعدا غير جيت نعست
زهير: (بعياء) المهم هو لالة امول ترتااح
أمال: (تبسمت) حتى نتا سير ترتاح
زهير: زعما متݣوليش نطلع نرتاح عندك
أمال: ههه مديرهاش
زهير: شيطاني يديرها
أمال: أحاااااي
زهير: هههه ياااو هاد أحاي راها دير فية لضاايح (ظحكت حانية راسها وهو متبعها) غدا بلعشية دوزي عندي للمحال غتجي شي سلعة وبغيتك تختاري
أمال: زعما!!
زهير: نجيب شي وحدة أخرى للي تختار فراش دارك امول؟
أمال: لا زعما بلا متزير راسك نتا عاد مش..
زهير: (بنبرة اخرى على للي كان كيهضر بيها) أمل (انتابهت ليه هو كان باغي يتعصب ولكن هي فاش جات هاد الموضوع وخا يبان ناشط وناسي ولكن مزال كيخلي دمو يفور) واشا بان ليك معنديش زعما دوك لفلوس هو رطلي كنت باغي نتجوجك بيهم صافي لبارح ݣلت ليك هاداكشي للي وقع يتمحى
أمال: حم واخ
زهير: منبغيش نهض فيك أمل بغيتك تفهميني داكشي ينتسى الله يرضي عليك
أمال: واخا
زهير: مزيان دابا ندوزو للموضوع التاني نتي غتفرشي دارك منبغيش منك تکولي لا ناخد غير باش نديباني نهار اللول عنيتها الغالي يرخاص ليك نتي مترفدي هم لواالو رفديه غير لهاد العبد
أمال: (فرنست)
زهير: مزينك (مزويناتك) بظحكة
أمال: ههه وصاافي سير ترتاح
زهير: واخا نكملو فالدار ياك لبيسي باقي عندك
أمال: واه اصلا مديتوش
زهير: مزيان وكان ديتيه تبقى فية فقصتو وحدها
أمال: ههه حتى نتا حاجتك عندي غالية منݣدش نفرط فيها…
زهير: (هز راسو كيشوف ويتبسم من عينيه للي كانو ذابلين بلعيا.. شحال كيعجبو لحال يسمع منها كلام بحال هاكا) نمشي للدار ونكملو هاد الهضرة الزينة
أمال: ههه وااخ رد بالك فطريق
زهير: واخ اݣليع لݣلب……
أصبحنا وأصبح الملك لله
وليد: منين مشا شيماء مخرجتش من بيتها حيت عرفات من مها وليد عرف شنو دارت فصبيطار ومشافش فيها…
شيماء: (كملت شغلها وردات لغدا.. ودخلت لبيتها جالسة فنموسيتها ساااهية لا مها كتهضر معاها لا خوها مسوق ليها أنوار مشا محمد تجوج بنات كل وحدة عندها حبيبها كيمووت عليها حتى من وحدة تحرمااااات منها… حتى دخل عندها وليد للي حيح فدار عمو وعلي عندو زهر ملݣاهش اما محمد غير حاني راسو عارف مدارو فيها ما يصلح وخصوصا مع هند للي مشاف منها غير الخير واخا كانو متوقعين هي للي تخرج على لبنات.. منين وليد محمد مردش حتى عليه كملو تحياحو وخرج من الدار.. دخل عند شيماء شاف فيها)
وليد: جوج كلمات تمشي تقرااي وتنساي داك تنووعير الخاوي ولا غتجلسي هنا حدا مك وديك زيااغة بربي حتى نحيها ليك
شيماء: (حنات راسها كتبكي خرج وخلاها كتبكي بشهييييق… مشا جلس حدا مو للي كتحاول تبردو)
وليد: مشتييش يدها كانت غتسخف
نعيمة: لا حول ولاقوة الا بالله العلي العظيم
وليد: عرفتي امي سمو هي تضرب وهي فظهري من ولاد عمي
نعيمة: هند مسيكينة بعقلها
وليد: وكان غير سمعتلي وديكلاراات بالخنز يتجمع
نعيمة: معليش اولدي برد داابا
وليد: (زفر وناض لبيتو حتى دخل محمد عندهم)
نعيمة: دخل اولدي
محمد: (دخل) فين راه وليد
نعيمة: هاوا دابا يجي
محمد: ݣولو امرت عمي يلحݣ بية لسطح (تمات خارجة شيماء ولكن بلا فولار شافت فمحمد بعينين باكيين)
شيماء: واخا تزيدني على مريم والله حتى نبغي
نعيمة: (طرطقت عينها وهو تصدم فيها سمعت وليد طلق لما فالحمام بالزربة جرت بنتها من شعرها)
شيماء: عفااك امحمد والله حتى كنبغييييك وحتى نتا كتبغييني عف.. (جرتها سدت لباب نعيمة وضارت بالطرش لبنتها ونتيف ولوخرا كتبكي بحرقة ولكن كاتمة شهقاااتها…..)
محمد: (بقا مصدووم حتى خرج وليد غير شافو كحل بلعمى) سمع انا منين مشيت لدار صاحبك كنت باغي غير رجعها
وليد: ومنين شماتة دخووك غرز لبنت لاش مهربو
محمد: ونتا وكون كنتي فبلاصتي متهربش ادم ولا نبيل
وليد: لا حيت اولد عمي عندي حق حق ولباطل باطل وخوك صدق شماتة وجمعك معاه حتى نتا بنيتك اصااحبي ماشي تݣلب على ختك عند راجل اخر… وحاجة اخرى هو كان ياله وصل مكانش فالمغرب وقعلو مشكل على برا وكان ضرووري يمشي داكشي باش مجااش ولكن الحمد الله لݣا ختك للي دور عليها فطنجة قنت بقنت واش عرفتي ختك ككانت منين لݣاها فلكوميسارية مشفرها شماكري
محمد: (حنا راسو للي غيتفرݣع)
وليد: مهم انا عندي شي غرااض هاد الساع وداك خوه ابربي لا دااازت لييه…..
زهير: (لبارح بلعيى نعس وهو كيهضر مع أمال للي بقات كتشوف فيه فرحانة بهاد لمكتاب للي عطاها الله…. مع فاق مشا عند مو للي فطرو فسطح مع شميسة زوينة وجو دافي وبقاو مجمعين) مهم انا درت مع واحد السيد نمشي نشوف شي طموبيل شحال ݣدني ندي لخويا طموبيلتو ونيت نرد هادي لمولاها
الحاجة: الله يسر ليك اوليدي
زهير: اميييين أمّا مع الظهر نجي تواليك لهن نديك تقداي لامل شي حاجة
الحاجة: (بفرحة) منخلي منشري لبنيتي
زهير: ماشي بزااف خليها هي تختار معاك ديلها غير شي حاجة دصوااب
الحاجة: ومنمشيوش لدارهم؟؟
زهير: اشمن دار امّا راني هبيل الا عاود فرطت وطلݣتها ليهم
الحاجة: والعرس؟
زهير: الدار يجري فيها الخيل امّا ديري العرس فينما عجبك.. (حط كاس داتاي) مع 10 غيجي صاحبي لکباص يبدا الخدمة عطيه الساروت ديال الدار
الحاجة: واخا ولدي وصبغ لها لبيت بالوردي غيعجبها الحال
زهير: تصبغو حتى بلكحل تجي وتشوف (ناض باس لمو راسها) متبقايش تعيي راسك (هبط من سطح داز سلم على حوتاتو للي ناضو وهبط تلاقا مع خوه للي منين جا كيتفادا يمشي لعندو هو معندو علاقة ولكن هاكا لداخل دياالو)
لكبير: (مقلق منو) على سلامة سي زهير
زهير: (مشا سلم عليه) الله يسلمك اخويا كبقيت مزيان؟؟
لكبير: واشتا هادشي ديالك
زهير: مكانش فخبري ومشيت على قبل شي ورااق فبلجيكا
لكبير: اممم (بقاو كيهضرو سطحي حتى استأذن زهير ومشا للمحال للي حلو على مجاو دراري رد الطموبيل لاجونص على مجا داك السيد للي شاف الطموبيل عندو وبغا يشريها…. وصل الظهر جا عندو عطاهالو باش يسييها ويديها لمعلم… مشا عند مو كبجربها فالصوݣان وصل عندها فرحات بالطموبيل ومشاو نيشان تقداو لأمال شي حاجة ورجعهاا جايب لغدا ليه ولخدامة للي معاه حتى صوناالو وليد لي وصل لوجدة وكانت معاه ختو للي حنكها مزرق شوية وفيه قمشات صغار…. )
أمال: (لبسات هي وهند كسيوات كل وحدة فلون وشكل غير هي زايد عندها فولار ولوخرا دايرة سنبولة فشعرها..)
هند: (صيفط ليها ميساج) وليد جا وجاب معاه شيماء
أمال: اممم مزيان
هند: (ردات عليه بأنها غتخرج وحتى هو دار معاها هو للي غيديهم)
وليد: (طريق كاملة وحتى كتبكي حتى عينيها تنفخو معرف ماالها.. حتى منين دخلات مشات للي عطاها داك نهار طل عليها وهي متكية) تخرجي؟؟
شيماء: (بصوت مخنوق) لا خويا عفاك بغيت غير نعس
وليد: واش مريضة؟؟؟؟
شيماء: لا خويا غير كرشي ضراني شوية
وليد: نجيبلك شي دوا
شيماء: عندي اخويا غير سير (خرج مديرونجي لقا لبنات ناشطين نيشان عند زهير كان المحال مطرطق وليد دخل نيشان كيعاون زهير غير شاف أمال كمل مع شي ناس وتم ماشي عندها)
زهير: هانا على أمال دݣلبي غير مزايدة تزيان
أمال: (فرنست بحرا كتجمع الظحكة) سلام
هند: واقلة انا غير متطفلة
زهير: لا لا حاشا نتي هي لمحرم ديال امولتي
هند: هههه
زهير: (شاف فأمال) هبطي لكاب سيزي والدية على ملحݣ عليك…
هند: هدا هدا ݣرب وكيجي زوييييين
أمال: (شافت فيه بإعجاب) ولكن هدا غيبغي يبيعو
هند: وراه كولشي هنا كيتباااع وهو داكشي باش قالك شوفيهم نتي اللولة.. خليه ليك غيجييك وااااعر والله
أمال: (حركت راسها باه كان فوتوي كبير ديال L متول وهمة بخديدات صغار وديكورات زوينين مع بوفة زوينة) انا عمرني شت الدار وراهالي غير فتيليفونو
هند: اوا من ديما كيکولك خاص تجي تشوفيها
أمال: (تبسمت) والله بحال كنحلم ممتيقاش كاين واحد كيعاملني بحال شي ملكة
هند: تستاهلي الزين ربي مهنااك من ديك الكصيلة الكحلة حتى حط زهير قدامك
أمال: ههه (حتى داك لبكى والحزن للي كانت متحس بيه اتجاه دارهم مبقاش يعني بحال مكينينش زهير بمشاعيرو وتعامولو غطا عليهم حتى ولات كتبانلها الدنيا زويييينة.. مشات كتشوف شنو اخر داكشي ديال ترياات حتى سمعو لباب تحل كان هو لابس غير تيشوورت ݣري مع سروال دجبن كحل وسبردبلة ݣري من ديما انييق فحوايجو.. بكترة الحركة سخن)
زهير: سمو عجبك الآلة أمال
أمال: (حشمت وشيرت بصبعها) دا
زهير: دا؟؟ (شاف فيه اصلا كان مونطيه حيت عجبو.. هند مشات خلاتهم بوحدهم) مزيان
أمال: الا معجبكش نشوف وحد اخر
زهير: الآلة واش سمعتيها مني زيدي سمو عجبك
أمال: معرفتش الدار كدايرة
زهير: وهانتي وݣفتي على هضرتي شحال وانا تابعك تجي طلي عليها
أمال: (حنات راسها)
زهير: بيوت نعاس سمو عجبك فيهم؟؟
أمال: (حشمت) مشتهمش
زهير: وااايلي وداك باش خاصك تسبݣي (حط يدو على ظهرها) اجي معايا نوريك
أمال: معليش حتى نشوفو غير طلع لخدمتك
زهير: ياااو زيدي حنا غير غنشوفوه ماشي نخدمووه (مزادتش معاه الهضرة مشاو خرجو من ديبو كان مقاد شي تلاتة حاطهم للبيع وقف قدامهم) هادو بتلاتة عجبوني من الخشب من الناموسية نتي ختاري سمو الديكور للي عجبك (بقات كتشوف فيهم واحد ينسيك فلاخر بزااف عليها هادشي هو متبع عينها فين كتشوف للي وقفت حدا واحد فيه كحل وݣري جاي طووووب قربلها) عجبك هدا (جا اونفاص معاها وجلس مفرق رجليه..وكانو حتى شي كوبل كيقلبو فيه)
أمال: (تبسمت) زوين بزاااااف
زهير: (ضار لظهر دالنموسية) خاص احبك للي بتحط فيه يكون مسبوغ بلكحل (غير متحرك راسها باه) صافي هدا للي عجبك
أمال: (جات هند وقفات حداها كتشكر فهاد الناموسية) واه
زهير: (وقف مشا لمجر وحط من فوقو خشبة مكتوب عليها (sale) مبيوع) غدا نديك تشوفي الدار راه الݣباص خدام فيها (هي غير مبهوضة فييه كيهضر على شنو غيدير ويزيد وداكشي دالإليكترونيات وصا عليه) غير داكشي دلماعن نمشي معاكم تختاري سمو بغيتي حتى مّا تمشي معاك
أمال: (حركت رأسها باه ممتخيلاش كتجهز دارها للي غتكون بوحدها ولدابا احسن حاجة كتاخدها قرب حداها)
زهير: دابا غنطلع نكمل هانتي كدوري شوفي لفوق طابل مونجي وداكشي واخا حبيبة
أمال: حم واخا شكرا بزاااف
زهير: (حك فراسو وحنا خبرها) غنتخلص فهادشي (شاف فيها غمزها غميزة خفيفة وتم ماشي انا هي حالة فمها فيه)
هند: هههه يدي داك الدلقووش ابنتي راك دخلتي لصحييح هههه مسمعتش شنو قالك ولكن تخيلت ههه
أمال: هه حمارة (شافت فالنموسية كانو دوك الجوج حاطين عليها قبل زهير ميحط ديك لبلاكة جلست عليه كتلمس فلفراش) عجبني بزاف
هند: حتى انا طربني بزااااف بصحتك حبيبتي تستاهلي كل خير (بقاو كيقلبو وكيشوفو أمال تطبيقات عزلت صال مونجي خطيييرة مع شي ديكورات اخرين… بقاو فالمكتب ديال زهير على مكملو شغلهم وبدات الدنيا اخوي حيت 10 سدو من تماك نيشان تعشاو برا بالظحك ديال زهير ووليد وحتى هند اما أمال غير كتشوف فرحانة وكدير مقارنة كفاش كانت عايشة فدارهم وكفاش عايشة دابا مع زهير….)
اراااائكم حيت اليوم كاين حدث مهم فالقصة
أصبحنا وأصبح الملك لله
شيماء: (فاقت كانت 10 حلات السرجم اول مشافت طموبيلة ديال هند.. تنهدت وخرجت من لبيت كان بيت وليد مسدود مشات الحمام قضات غراضها وخرجت طلت على التلاجة ما فيها واالو عمرت أتاي وحطاتو كتمنظر علييه شافت تيليفونها للي الليل كامل كتصوني على محمد حتى بلوكاها مولاش صونا عليها خرج وليد كيتجبد مسخسخ) صباح الخير خويا
وليد: صباح الخير كوليتي؟؟
شيماء: لباس..
وليد: (شافها موجدة أتاي بوحدو) انا نخرج نجيب باش نفطرو على كنجيب تقدية بلاتي
شيماء: (بهدوء) واخا
وليد: غدا تمشي تقراي
شيماء: واخا (تعجب من هاد سكات مشا للحمام توضى خرج صلا ومشا نيشان باتيسري صونا فطريقو على هند للي فيقها جاب فطور داز جاب بيض وشي سقاطة لشيماء ورجع للدار عطاها داكشي حطاتو قالت البيض وبقاو كياكلو بسكات)
وليد: سمو داكشي للي درتي مع مريم مرت محمد فصبيطار
شيماء: (بلعت ريقها) غير مفهمونيش وهي مقروصة
وليد: بعدي لبنت عليك اشيماء واش متهنيتي حتى خسرتي مع كولشي
شيماء: (حركت رأسها باه) بغيت نطلع نجلس مع لبنات شوية
وليد: حتى الليل منين نجي وطلعي
شيماء: واخا
وليد: (شاف فالساعة كانت 12 قل ربع صونا على زهير ) انا دابا جاي… هههه واههه ابن عمي راك تݣووول.. (قطع وهو كيظحك) انا غنخرج دابا الا خصاتك شي حاجة عيطيلي متخرجيش
شيماء: واخا خويا (ناض دخل لبيتو لبس وهاد لمرة لابس شوميز فلبيج مع سروال لاطوال مارو وصباط زوين دار شال كارويات على عنقو رش بارفانو) جيتي زوين اخويا
وليد: (تبسم معاها) انا مشيت اشنيولة (بهاد شنيولة عرفت خوها راه سمح ليها تبسمت على الأقل واحد كيهضر معاها واخا استغربت بشكلو الأنيق للي خرج بيه ولكن قالت خارج مع هند… بقات كطل من السرجم معلقة وسااااهية بتفكييرها شحال كانت عندها الحرية المطلقة فالسيتي وانوار للي ضيع ليها كوولشي.. ياله بغات دخل قشعت الحاجة وقفت قدامها لابسة جلابة فلبيض ولاوية عليها كاب من الخيط مغليضش وقف حداها زهير بنفس ستيل وليد كلاص بقات غير كتشوف وكتفكر نهار كانت تنقص منو على اساس صبااغ.. شافتهم دخلو عرفت غيكونو طلعو لفوق عند لبنات…)
~~~~~~~~~
أمال: (كتحط لفطور وهي كتفوه) هند واااااااا هند شي حد كيدق
هند: (خرجت من بيتها مصدومة وشادة التيليفون فيدها) زهير والحاجة
أمال: هااء (بشوية هضرت) هوما للي كيدقو؟؟؟؟ (هند تمشات حدا لباب وأمال طارت لبيت تلبس شال وتبدل لبيجامة للي لابسة تريكو فشكل وكولون…)
هند: مرحبا مرحبااااا (أول مرة تشوف زهير بلكلاص فيست فلݣري وتيشورت كحل مع سرولطال لاطوال فلكحل وصباط كلاص حتى من شعرو متبدل ليه ستييل.. سلمت على الحاجة بحماس) دخلو (دخل زهير هاز ساشيات كبار)
زهير: فيها أمول
هند: ها هي فبيتها كتلبس حوايجها
الحاجة: (فرحانة كدور فعينها فالدار حتى خرجت أمال لابسة بيجامة لبينوار طويل وشال وقفت وامل جات سلمات عليها كترحب ومن لبعد شافت فزهير كتبسم كان زويييين)
زهير: جلسي أمل (جلست حدا الحاجة للي جراتها لعندها جبد شي وراق من ساشية وحطهم قدامها فوق الطبلة) ها ورااقنا باش نمشيو نعقدو داابا حتى من لوراق عطيتهم للمحكمة ودارو معانا شي سااعة نكونو عندهم
أمال: (تصدمت وشافت فعند للي كانت متوقعاها)
الحاجة: (عنقتها بيد) نحطوك ابنتي فعينينا وكان ماشي.. كنا نمشيو لداركم ونديرو صواب
زهير: أمل سمو ݣلتي؟؟؟
أمل: (مفكرتش تانية.. حنات راسها وحركت راسها باه)
زهير: (تبسم) ݣلتلك أمّا راها طايحة فية غير مابغاتش تݣر….
أمال: (تبسمت كتفرنس حانية راسها) الحاجة: (فرحانة كتشكر فأمال فزينها وطيابها نقاوتها لزهير لدرجة أمال بقات غير كتشوف فالحاجة واش هادي للي غتكون عݣوزتها من ديما كنسمع لعݣايز خايبين وهادي كتشكر فيها مدارتها حتى مها للي ولداتها) راني جبت ليك حويجات ابنتي باش نمشيو
أمال: (هزت يد الحاجة وباستها) لهلا يخطيك الحاجة
زهير: وانا للي شاريهم
هند: هههه
الحاجة: أبردي على هاد لولد
زهير: ظحكي اختي نتي هه
الحاجة: هه بنتي من دابا عيطولي مّا كنا كيعيطولي ولادي
هند: وااخا امّا ههه (ناضت أمال وتابعاها هند كتصلي على نبي زهير نتبعها متبسم حتى زغرتت مو مقفزااه)
زهير: مبقاوش فيك لحلاقم
الحاجة: وحتى زغارت محسوبين على لحلاقم نظحكو ونشطو مولاها ربي
أمال: (مع دخلت لبيت بقاو هي وعند كينقزو ممتيقينش حلو الساشية كانت جلابة فالصومو غزااالة من اخر مخرج باينة مشرية طالعة ولكن ماشي سوااقية بداكشي دياالو وشي تواب اخرين وصبابط.. لبست أمال حوايج وقلبها كيضرب وكلها كترجف مخلوعة وخايفة وفرحانة لاقصى درجة قداتلها هند مكياج خفيف ودارت ليها شديدة سامبل وزوينة لبست صباط طالو معاليش بزااف وحتى هند لبست جلابتها ظافرة شعرها من نهار وليد قالها كتجيك ظفيرة زوينة وهي كظفرو رشت برفان وهزت صاك جاي مع جليليبة.. خرجت عندهم وهو غير كيشوف نظراتو باينين عاجباااه ولكن مطمر…)
الحاجة: تباارك الله على بنيتي للي لبستييه يجي معاااك (هاد لكلام كتخلي زهير تزيد تعجبو كتر واخا هو غاااارق ولكن اي واحد كيتشكر قدام حبيبو كيرد لبال… )
زهير: وسمووو راه داي الزين كولو (تبسمت فرحااانة زادو مع طريق مخليين فطور فوق الطبلة… هبطو فدرووج سابقهم زهير شيماء طلات من الهرج شافتهم خرجو كولهم ركبو مع زهير نيشان عند لعدول للي رضا معاه وقفو وهبطات أمال وهند للي كانو اللور شافت فبلاكة ديال لعدوول تزادت معاها الخلعة زهير شاد مو مطلعها دروج وكيشوف فأمال طلعات هي وهند مبقاتش ظحكات كان فالطابق اللول وصلو كان النوبة فيهم دخلو نيشان عند لعدول للي كانو جوج فالمكتب ديالهم دخلو زهير جلس فكرسي والحاجة وامل وهند فلفوتوي لكبير عاد تم داخل وليد مزرووب للي غير شافتو أمل فرحااات بعدا كاين شي وااحد من لحمها ودمها ومن ديما كان نعم الاخ حسن من خووها نيييت.. اما هند غير شافتو بلكلاص غمزااتو خلاتو كيتبسم من هاد البنت للي تبلا بيييها وكيبغيييها.. جلس وليد وبدا لعدوول كيخطب عليهم حتى نطق لعدوول)
….: خديتي صداقك ابنتي
أمال: حم واه
زهير: عطيتك شي حاجة؟؟ (خرجت عينها)
…..: سمو صداقكم ابنتي
وليد: واحد لمحال عندو يكتبو ليها
زهير: ههه تستاهل
أمال: ههه
زهير: (ضار عندها) سمو بغات لالة أمال: مبغيت واالو
زهير: (عارفها ماشي مادية) راه حقك فشرع ابنتي
أمال: حم (حشمت غير كدور عينها مستحيل تعطيه رقم كولشي كيشوف فيها مكرهتش تنوض تهرب ولا هاد الموقف) صافي غير نسني مبغيتش صداق
كولشي بقا كيظحك عرفوها حشمت زهير قال مبلغ ديال 30000 درهم كان باغي يعطيها كتر ولكن.. فتا عليهم مكان عندها حتى شرط وحتى هو سنا زهير وعيطلها وقف زهير جلست فكرسيه شدت ستيلو كترجف كيوريها زهير فين تسني وسنا وليد فبلاصة والي أمر الزوجة كولشي بقا كيبارك لزهير للي كيرد ظاحك اما أمال حنات راسها ممتيقاش.. حط يدو على ظهرها ماشي عشوائيا ولكن بطريقة بحال صبااعو وكف يدو كيتلمسو ظهرها.. هزت عينها فيه
زهير: مالكي؟؟
أمال: (لسانها تربط غير كتشوف تبسم الحال زيدها يخرجو من بعد مخلص لعدول وهدا تيتر على ميخرج وراق لاكط كولشي فرحاان وأمال مصدوومة وصلو لبرا وليد ركب فلمطور وهند متبعاه ولقلوبة خارجين من عينها مشا رجع للمحال وزهير طلع فالطموبيل ضار عند أمال للي مابغاتش الحاجة ترجع اللور..)
زهير: اوا عرووستي الزينة مكاين لا مبروك لا واالو؟؟!!!!
وليد: (رجع للمحال للي كان عامر شوية طلع نيشان للمكتب كان فرحان لفرحة صاحبو وختو شحال تمنى الامور تمشي طبيعية ويخطبها ويعقد عليها فداارهم ولكن… تمنى راسو فبلاصة زهير يعقد هو وهند ويتهنى من داك الحدود للي كيعيى وهو كيرسم فيهم.. صونا على مو للي مكيخبي عليها والو وحيت عارف مكانة أمال كدايرة) …واه راه تجوجو
نعيمة: (تبسمت دخلت للكوزينة كتهضر بشوية) مبرووك مبروك عليهم اولدي ولعقبا ليك
وليد: امين ولكن ݣطعتلي ݣلبي جالسة وحدها مسكينة لا حولة وصاافي
نعيمة: معليش حتى نتا راك خوها
وليد: اودي ولكن منخافش عليها زهير والحاجة يديروها فعينيهم
نعيمة: الحمد لله اولدي وفين شيماء؟؟
وليد: فالدار سكات مزال هو هو
نعيمة: الله يهديها وصاافي رد بالك اولدي عليها والا مكانتش تقرا ردهالي
وليد: دابا تقرا انا نعاونها
نعيمة: وفينهم لبنات باش نصوني عليهم
وليد: مشاو داو أمال عندهم
نعيمة: انا نصوني عند الحاجة…. غير هو اولدي واش متݣولوهاش ليهم؟
وليد: دابا نهضر مع داك لبغل انا حتى مرت عمي حتى بکولهالها هو نيت مبقيت نحمل حتى الشوفة عاد نهضر معاها
نعيمة: حشومة اولدي مربيتكش على هادشي
وليد: واالو كنت نضويها شوي ولكن من داك نهار للي طردت بنتها فجنازة باها صااافي
نعيمة: الله يهدي مااا خلق اولدي وصااافي….
~~~~~~~~~~~~~~~
زهير: اوا عروستي الزينة مكاين لا مبروك لا والو؟!!!
الحاجة: ههه متحشمش لبنت
زهير: (ضار كيضحك وحط يدو على لفولون) راها مرتي دابا مكاين لاش تحشم (بهاد الكلمة تشوك لحم أمال بالفرحة وهند كما العادة السلفيات والظحك.. شاف فمو) واشتا تاوريرت؟؟؟
أمال: (تخلعت وهزت راسها) لا لا لا عفااااك
زهير: (ضار عندها) غير نظحك ابنتي مانيش هبيل نروحو لتم
أمال: (حركت رأسها باه مبغاتش فرحتها تسالا هو قلب وجهو وشاف فمو للي كانو بالصح باغيين يمشيو لتماك بطلب من مو للي حركت راسها باه.. ديمارا الطموبيل وزاد)
زهير: نمشيو للدار دابا
أمال: (هنا طاحت عليها النقطة بالخوف راه دارت لاكط يعني مرتو يعني يدخل عليها يعني هي مموجدا والو أضعف الإيمان ممنقياش راسها بحال شي عرووس بلا تقااف للي كاين حتى ليطاش للي فالترمة مبقاوش بزااف بكترة لبرودويات للي كتجيبلها هند ولكن راه سيقانها يديها حتى حاجة ممقادة محست حتى نطقت) اشمن دار؟؟
زهير: دااارك ههه كاين شي دار اخرى امول؟؟
أمال: ولكن انا ݣاع مكنت عوالة نتجوج (هند كحزت من حداها للشرجم قالبة وجهها دايرة يدها على فمها شادة الظحكة مو غير كتافها للي كيتهزو بالظحك وهو تبسم ابتسامة طوييييلة.. اما هي غير كترمش عينها كتشوف مزال شادين طريق للدار طاح عليها خوف كتر من للي جاها فاش هربت لطنجة يدها كتحكهم مع الجلابة حست براسها عرااقت وهي منين كتخااف ولا كتوتر كتعراااق حست براسها لكحت وحست بطريق قصيرة عكس فكل مرة كتجي فيها لهاد الدار من مور كلامها حتى حد مرجع هضر من غير الحاجة للي مرة مرة كطلق شي ظحكاات للي مخلية زهير طريق كاملة وهو متبسم وصلو للدار هبط هبطت الحاجة هند وهي بقات تمااك..)
هند: هبطي (لوخرا حركت رأسها بلا) اويلي هبطي
زهير: (طل عليها لقاها مطرطقة عينها ميخافش عليه هاد الوجه منين كتكون مخلوعة طلع جلس حداها) علاه مبغيتيش تهودي؟؟
أمال: (كدور فعينها وكتبرك على صباع يديها)
زهير: (شد يدها كيبرك عليها بشوية) دابا راك وليتي مرتي علاه الحشمة؟؟ خاصك طلݣي راسك معايا ازين باش تولفني…
كانت الحاجة عالمة بناتها للي وجدو غدا متول ومقااااد حيت زهير مخلا مجااب واخا نݣرو على على هاد زواج لمزروب فينها الخطوبة وفينهم التقاليد وعلاش عائلتها مكينينش واش غالط معاها واش واش واش… ولكن الحاجة مكتجاوبش حدها كتكول الا غتبقاو تسولوا سيرو لداركم بلا متخليو خوكم يبهدلكم وينوض صداع نتوما خاسرين فيه حيت هو عاقد عاقد… طلعت الحاجة كتزرب وجدو مبيخرة فيها ريحة بخور الحج وصينية فيها حليب وتمر وبناتها وحفيداتها كيتسناو حتى من لكاملة عرفت وجاية تشوف هاد عروس الغفلة…
زهير: ياااو جاوبي
أمال: (شافت فيه كتزعم فراسها واخا حشمانة) انا محسابليش نجيو هنا
زهير: (كيشوف فعينيها للي مقادين بالألينر وشفار مجبدين مع ايشادو خفيف) مبغيتيش ندخل عليك دابا؟؟؟
أمال: (طرطقت عينها فالارض من ديما كيحدهم ليها وكيجيها بلا زواق)
زهير: ههه راه جينا غير نتغداو ونردك لفين ساكنة حتى توجد دارك ونديرو عرس وديك الساعة مكاين غير #سانديكة_متحركة (بغات تبكي بالحشمة واش هدا كيهضر على… شافها غير زادت غرقت لدرجة وجهها رجع حمر ويديها غيطرطقو بسخونية) أمل.. وأااااامل دݣلبي (شافت فيه وعينيها كيبريو) شحال مزييينك بنية (تبسمت باتسامة موصلاش لعينيها ولكن الخوف طاغي عليها) ياله نهودو قبل منرجع فكلامي (هبط تابعاه وهو باقي شاد ليها فيديها شاف فهند) هبيلة دلبنت ههه
هند: ههه غير حشمانة
زهير: (شاد فيها وهي كتشوف فهند) مشينا؟؟ (تمشاو وهند تبعاهم من اللور خارية بالظحك على أمال وصلو لدروج طلعو بجوج وهي كتصور من اللور حتى وصلو حداهم وبداو صلا وسلام وكيبرݣݣو من أمال الحاجة بوحدها للي عينيها دمعو بالفرحة مداتلو ختو عيشة حليب وتمر..) حتى نتغداااو (دخل جار امال للي وقفوها حوتاتو كيسلمو عليها ويباركو حتى بناتهم للي كانو قدها هي غير مضهشرة بالفرحة ولكن دايرة صواب مع ابتسامة خفيفة… دخل زهير الصالة فين كاين خوه وولاد خوتو ورجال خوتاتو كيياركو ليه..)
هند: (كتصور وفنفس الوقت لاصقة فأمال خايفة يسممها شي واحد بشي كلمة ساعة مسولوهاش فمرة وقفت التصوير وجلست حداها حتى جات الكاملة كتحنزز متصرطاتلهاش زهير للي مسوقش لغياب ولدها للي كولهم جاتهم مصييييبة الا هو للي ناض تزوج ومجاش حتى سول فيه حتى مبروك مخرجتش من فمها وحتى أمال معرفاهاش حتى واش كاينة.. حطو أتاي وحلاوي للي جاب زهير وكيهضرو فموتضيع لعراس أمال حدها كتبسم هنا حيت بإحساس خاايب إحساس اليتم وعائلتك مزال حية حست بلخنقة بقاو هكاك حتى تحط لغدا للي كان مظخم نص حولي معمر عاد دجاج بالدغميرة شلايض وديسير كلات أمال ولكن ماشي بخاطرها شوية سمعت)
زهير: أمل
الحاجة: تكلمي لراجلك ابنتي (تلفت ناضت من تماك غير حشمت انا تدي معاها هند خرجت كان واقف متكي هاز بوشنيخة دايرو فمو غير شافها خرجت لبست صباطها وقف)
زهير: روااحي معايا (ومشات حداه بشوية تم خارج لكبير)
لكبير: أمل لباس عليك ابنتي؟؟
أمال: الحمدلله اعمي
لكبير: مبرووك عليكم ابنتي والله يكمل بالخير
أمال: الله يبارك فيك اعمي
لكبير: للي خصاتك ابنتي اجي عندي راني فمقاام باااك الله يرحمو للي خصااتك
أمال: (تبسمت) براك الله وفيك اعمي (بقا كيهضر ويوصي زهير عليها حتى لاخر دخل وهو جرها لتحت) حم فين نمشيو؟
زهير: (هبطو لتحت) للدار
أمال: هادي (كتشير بيدها) هادي (ظحك شدها من يديها وتمشاو وهي كتبيضهم بيض بيض وصلو وجبد ساروت كيحل وهي كتفكر غير تشدها بجرية هنا شاف فيها تخلعت حسابلها غير سمعها فتح لباب)
زهير: دخلي الغزااااال (بقات كضور عينها كتشوف فالدار) ݣولي باسم الله ودخلي
أمال: (دخلت كان الأرض حالتها بالݣبص وسطولة دسبااغة دخلت هازة جلايلها شوية بقات كتشوف كانت مساحة كبيرة باين صابون فصالون ودروج فالوسط دخل من موراها وسد لباب بشوية) زوينة
زهير: (غير حاضيها)
أمال: (تمشات بشوية كتشوف حتى من لكبص عجبها دخلت جهة الكوزينة وكما كتحماق الكوزينة كبيرة مع بوطاجي ضاير وسرجم كيطل على جنان كان كيركب فيها رخام جا من موراها مقرب كيشرح ليها كتحسس من قلبو ولكن كتسمع ليه فرحانة شد يدها كيوريها الصالون وفنفس الوقت مزيدها لدروج طلعت بشوية حيت كيزلق) غنطييح ههه
زهير: كاين للي يشدك
زهير: كاين للي يشدك
أمال: (طلعت مدارتش مزال وصلو كان فيها شي 4 ديال لبيوت وباب ديال طواليط وصالة صغيرة وفالجنب بوطاجي صغير فرحت) جوج كوزينات؟؟
زهير: (دار يدو على كتفها مقربها ليه) عجبووك (تبسمت وكتحسر بجسمو قريب ليها) هادي غير صغيرة مثلا ديري عصير قهيوة تشربي فهمتي (حركت رأسها باه) اجي نوريك بيت نعاس (جرها وهي خايفة حل لباب حتى تماك كان خاوي كيقاد لݣبص تبسمت) ههه دابا عاد ظحكتي الجنية انا جبتك هنا غير باش تشوفي الا بانتلك شي حاجة نݣادوها محد الدار كتݣاد
أمال: (عاد تطلقات) كولشي زوين وعجبني (بقات كتشوف كاين باب اخر يعني كاين دوش فلبيت ممتخيلاش غيكون عندها بيت هاك تفكرت بيتها فدارهم كان صغير وفينما كان شي ربل كانو كيعمروه تماك)
زهير: وصباغة؟؟
أمال: (كتوريه) هنا احبك سبغو بلحكل وليت كامل بلݣري هاكا تخيلتو
زهير: وسمو اخر كتخيلي؟
أمال: (خرجت عينها)
زهير: ههه مهم بعدا كتفهميني (بقاو كيهضرو على الدار حتى هبطو لتحت) شي 10 والدار تكون واجدة (حركت راسها باه) ݣوليلي سمو بغيتي توجديلي باش خفتي ݣبيل؟؟
أمال: (كترمش عينها) والو
زهير: (هز حاجبو) والو؟؟! امم واخا نديك ترتاحي فالدار شوية
أمال: (حركت راسها باه.. شافت فيه وهي حشمانة) مبروووك علينا
زهير: ههه الله يبارك فيك الآلة مزيان بعدا منين خرجت
أمال: راه.. راه ممتيقاش لداابا علاش لبارح مݣلتيلي والو؟؟
زهير: خفتك تهربي عاود ههه
أمال: انا الا هربت داك نهار غير حيت نتا مكاينش وراه اصلا شدوني هاربة لوجدة فاللول ههه
زهير: دابا مبقالك هروب؟؟؟ (حركت رأسها بلا وهي كتفرنس.. صونا على مو) مّا عطي لهند داكشي تهبطو نمشيو نوصل أمل.. لا دابا راها عيات حتى لعشية ونجيبها… واخا بلا متهودي فلعشية وارا متشوفيها (قطع)
أمال: نطلع نسلم عليها
زهير: راه داك الكاغييط كان معايا.. سلمتي علية انا؟؟؟
أمال: هاء
زهير: تصدمتي اختي؟؟
أمال: ههه راني نحشم ازهير
زهير: ݣليع ݣلب زهير مخاصوش يحشم.. فاتحة شي كانت فلبانكة
أمال: هم واه
زهير: حتى تصيفطيلي بلاتي فميساج باش ندوز ليك فلوس
أمال: معليش حتى يكون عندك (شاف فيها زعما بنيتك هبطت هند حازة قفة حط يدو على ظهرها مزيدها وصلو للطموبيل أمال مشات جلست حداه وهند اللور)
هند: والله ابا زهير حتى درتيها متووورخة هاد نهار
زهير: هه ياك
هند: حبييييت.. أمال شوية داابا؟؟
زهير: واالو غير مخلوعة (شاف فيها) درنا لولاد بكري
هند: ههههه (شافت أمال قلبت وجهها دازو لمدينة حتى شافوه كيكلاكصووني دار أشرف خرج زهير عندو مبعد على الطموبيل بشوية كان ديجا عرف زهير عقد اليوم مع سلم عليه قشع أمال راكبة حداه هي قلبت وجهها)
زهير: شي تيليفون للمداام ݣدو بدوك توااشا ديالو ودير شي نمرة فيه بلاتي نجي من موراه
أشرف: (مبينش انه تصدم) مبروك أسيدي
زهير: الله يبارك فيك فلعشية رواح مع دراري تعشا
أشرف: ان شاء الله صافي بلاتي يكون ناضي
زهير: مزيان بشحال؟؟
أشرف: امبيناتناش اصاحبي
زهير: وخدمتي بكري الا بقيت متبع هاد مبيناتناش يا وهضر بشحال؟
أشرف: ههه شي 4500 درهم تيليفون اخر مكاين
زهير: 4500 وعاد معرفة ومبيناتنااش!!! وكان كان بيناتنا نمشي نهز كريدي من لبنكا واقلة
أشرف: ههه والله حتى كتفوج علية ابا زهير
زهير: (كان ناااشط ورشقااالو هاد زواج كان منقذ ليه كتر مكان منقذ لأمال.. توادع معاه ورجع لطموبيل نيشان لدار لبنات هبطت هند مهبطة القفة للي عامرة احم دجاج حلاوي حيت داير حساب أمال مغتكونش كلات على خاطرها حط يدو فوق فخض امال) نمشي للمحال بلاتي نجي وراك نروحو للدار (حركت رأسها باه) شي كادو ابنتي راه من صباح وانا نحطهم صحاح على ݣلبي
أمال: ههه الزنقة؟؟
زهير: الزنقة؟؟ (لعب بلسانو فوسط فمو) وااخا (قبل متخرج جرها زارب عليه سلم عليها بلبيز فوجهها) سيري وكان دابا نصوني عليك عند هند (حركت رأسها باه وخرجت على مطلعو هو عاد ديمارا للمحال ديالو….)
محمد: (صيفطلو فيديو للي صيفطاتلهالو هند منين زهير سنا وسنات أمال بقا غير كيشووف عينيييه تضببو بقا غير واقف كان متوقعها من زهير.. جلس فدروج دارهم غير سااااهي ها هي ختو تجوجت بعيد عليهم بحال هوما مكاينش رجع شاف فلفيديو كفاش كظحك وتبسم والحشمة بانت فيها الفرحة.. وقف كيتنهد طلع للدار لقا مو مضاربة هي وليلى على تيليكوموند) ليلى خرجي نهضر مع مي
ليلى: هضر ݣدامي
محمد: (غوت) وخرجي ابنااااادم ونتي غير حاشية راسك معانا واش تيقتي روووحك منين جيتي تسكني هنا (ناضت مكرهة سد لباب من موراها)
فتيحة: الله يعطيها مصيييبة كما كظل تفقصني
محمد: معليش داكشي للي كنتي ديري مع بنتك جا للي يردولك
فتيحة: (خسرت كمارتها) ييييه زيدني
محمد: مهم.. بنتك تجوجات
فتيحة: (طرطقت عينها) هاا!!!!!
محمد: صباح عقدت (جبد تيليفونو ودار لفيديو تفرجت فيه وريتها بغات تجبدها تاكلها)
فتيحة: شفتي السااايبة للي مكنتيش تخليني نعصي والديها
محمد: هه واش بالصح كتهضري؟؟ صرااحة هادي أصغر حاجة ديرها تهناات والله حتى تهناات مهم انا دابا غنشد طريݣ نمشي عندها غنشوف وغنطلبهم واش يبغيو يجيو هنا ويخرجووها من دار باها عروووس
فتيحة: والله لاكانت ليها
محمد: ختاري تخرج من هنا ولا من غدا نݣلب نشري شي دار وتجي تخرج من دار خووها هاني مشييييت (خرج وهي دخل ليلى)
ليلى: لولوولووووووي مبرووك اضرتي تجوجت بنتك ومعرضااتكش ههههه
فتيحة: الله يعطيك الموت نتي وهي
ليلى: هههه صعييبة عليك افتيحة تبردييييها معليش نخليك هاد نهار بلا منفقصك غير هو اضرتي واش نبداو نوجدو للعراسية
فتيحة: (بعصبية) بعدي منييييي مريم مرريييييم (جات عندها مريم متجري فرحانة بهاد الخبر) ديني لبيتي نعس خزيييييت فدااري ومالݣييت راحتي (عوناتها مريم حتى طلعاتها فالكرسي المتحرك وجراتها لبيت عواناتخا تنعس وفتيحة راسها زند عليييها… خرجت مريم ومشات عند محمد)
مريم: وكان ماشي مقابلة خالتي نمشي معاااك
محمد: الا لݣيت الدنيا مزيان نجي نديك (لبس حوايجو تعطر وخرج…)
~~~~~~~~~~~~~~
هند وأمال كانو ممتيقيينش اول حاجة دارتها هند هي خرجت مشات جابت كيلو ديال واكس لمزيان وشدت أمال للي بقات بدوبياااس ݣاع نتفاااتها من غير لمايووو للي مبغاتلهاش دخلت للدوش غسلت لحمها للي رجع كيبري وكملت نقات لمايووو خرجت موجدة ليها هند لبرودويات بقاو مطلعينها بالظحك والنشاااط عاد مشاو للكوزينة سخنو داكشي للي عطاتهم الحاجة وحطوه كياكلو وأمال كتعاود على الدار بفرحة ضربت 8 دلعشية
هند: أمال اجي نقادلك شعرك زهير والله نبزݣلك هاد نهار وغيحايدلك لفولار
أمال: هههه الحمد لله على نعمة لبلاك
هند: غدا نشدو رونديفو عند نورة ونمشيو تعاود ليك لبروتيين
أمال: وااااه (مشات هند قدات ليها شعرها دارت سيرووم ليه وجمعاتو ونقات ليها شي زغيبات ياله كيكبرو دارت ليها مكياج خفيف ولبست جلابة من للي جابت ليها الحاجة بقفطاانو وحتى هند لبست جليليبة للي لبست صباح كانت وصلات 9 جا زهير دق عليهم فتحات هند وهي كظحك كل براسو كانت أمال لابسة)
زهير: نمشيو؟؟
أمال: لبس صباطي ونجي (دخلت تبعاتها هند وهو كيتسنى أما وليد علم ختو تلبس حوايجها منين كان جاي)
شيماء: خويا فين نمشيو؟؟
وليد: عند دار الحاجة
شيماء: مبغيتيش نمشي اخويا لتماك
وليد: غنمشيو لدار الحاجة ماشي عند لوخرين براسي راه مكندوزهمش
شيماء: بففف ضرووري؟؟ واش عرضاني انا؟؟
وليد: (سيرا صباطو) واه معروفين كاملين على حساب الكاغييط ديال أمال وزهير
شيماء: علاه هوما تجوجو!؟
وليد: واه صباح (بقات غير كتشوف مصدوومة داكشي باش صباح خرجو وكانو مأنتكين جارها وليد وهي فحالو صدمة لقات لوخرين هابطين) العرسااان!! أمال بيخيير؟؟
أمال: (تبسمت فرحانة) الحمد لله اخويا (شافت فشيماء وفاهمة شوفوها للي مصدوومة محست حتى زعمت وشدت فيد زهير للي ضار عندها) نمشيو راه مّا كتسناناا
زهير: (تبسم) هااديك على مّا ( زير على يدها وخرجو زهير وأمال ركبو بوحدهم وعند ووليد وشيماء ركبو تابعينهم….)
محمد: (وصل بطموبيلتو حدا الدار بقا برا شحال مقادرش يدخل وهادشي كيزيد يمرضو فدمااغو ختو لداخل تجوجات ورجعت دارها هنا وهو مقادش يدخل.. صونا على وليد للي مجاوبوش حتى رجع صونا عليه مرة أخرى وهاد لمرة جاوب) الو
وليد: ويييي
محمد: انا حدا الدار
وليد: اوا دخل
محمد: فين غندخل
وليد: ولاه جاي؟ (هابط مع دروج) ياكما يحسابليك عاود غترد ختك معاك.. (خرج عندو لبرا وقطع لابيل حتى محمد خرج) سمو جاي دير هنا امحمد
محمد: راه ختي للي لداخل بغات ولا كرهات راه عندها عائلة
وليد: سبحان الله هاد العائلة منين بغاتها وحتاجتها ݣاع ملݣاتها مسكينة خلي لبنت فرحانة شوية
محمد: انا مجايش نديها جاي نهضر معاها هي وصاحبك وصافي
وليد: (بقا كيشوف فيه هز تيليفونو صونا على زهير للي قطع عليه)
~~~~~~~~~
زهير: وݣولي
أمال: (تبسمت) عرفتي تختار
زهير: شكاارت راسها راه نتي للي عرفتي تنيشي ههه
أمال: ههههه (رجع قرصها فالجهة التانية) أحاااي
زهير: زينة عندك هاد أحاي
أمال: (شادها مزيان وتيليفونو كيصوني.. بصوت خافت) زهير تيليفونك
زهير: ينعل *** هاد التيليفون (يد لواها على خصرها ويد جاوب بيها وليد) مال مك اصاحبي
وليد: محمد راه برا
زهير: شكون محمد؟؟
وليد: نسيبك اصاحبي ههه
زهير: اممم (شاف فأمال للي غير سمعت محمد جمعت الظحكة) واخ انا جاي (رد التيليفون لجيبو وبقا عاصر عليها) خوك برا
أمال: (بخوف) متخلينيش نمشي معاه
زهير: وايلي أمال على تمشي يااا مبحاينو الا فكر فيها
أمال: بففف نمشي انا نطلع للدار
زهير: صبري نوصلك مديري فراسك واالو.. غتكون وصلاتو راه عقدها وصاافي
أمال: (حركت رأسها باه طلق منها كان عاجبو الحال يزيد وقت معاها وحتى هي تلطقات معاه شوية.. ولكن هاد
المسمار تابعو تابعو يطرقو بقا كيهضر معاها وصلو حدا باب الدار شافتو وحنات راسها مكملة طريق اما هو بقا كيشوف حتى وصلها زهير لحدا باب الدار وبحال كيهضر معاها وهو كان كيتسناها طلع للدار عاد ضار مغوبش ومشا حدا لباب بقا واقف)
زهير: (بصوت غليض رجولي) سلام
محمد: (معرف باش يبدا حيت شاف راسو غيخربق الا لامو حيت عاد مشا عتق ختو قلب عليها حتى لقاها شنو يقول) مبروك
زهير: (كان متوقع بلا بلا بزاف) الله يبارك فيك
وليد: (حتى هو مكانت متوقع محمد يقول مبروك)
زهير: طلع للدار
محمد: ياك باقي غديرو عرس؟
زهير: واه
محمد: تمشي أمال معايا علاما تجي وتخرج من دار باها..
شيماء: (كانت بلا حتى نقطة ديال لمكياج مرضت وكان عرفت المحبة هنا تقاد راسها دخلت أمال للصالة طلعتها وهبطتها جلابة فلبيج مع قفطان جوهرة من لتحت وشال زوين حتى وجهها كان مقلد سامبل ولكن طايح عليها السر وباينة عروووسة جلست حدا هند للي بقاو كيتوشوشو ويظحكو باينة كانت دارت شي حاجة مع زهير وفرحانة علاش متفرحش وشو هو على قبلها شنو كيدير وعاد صباح عاقد عليها بالسيف على كولشي طلقت تنهيدة.. حتى دخلت الكاملة وعيالات ولادها زادت تكرهت محملاش راسها وأكترية منين بينوها ليها كيشوفو فيها ويظحكو عصرت على شنايفها كتقلب عينها حتى سمعت)
الكاملة: اوا شيماء لباس كبقيتي مع الفقصة؟؟
شيماء: نعام!!!
نزهة: ݣالتلك عݣوزتي كبقيتي مع الفقصة؟؟
شيماء: ديالاش؟؟
الكاملة: ههه معليش خليوها علييكم
هند: اشمن فقصة والسيدة من صباح وهي ناشطة هههه شيماء كتفقصي ومفخبارناش
شيماء: ههه هانتي تشوفي
جيهان: ولواه اشيماء ݣاع عارفينك تكوني تفقصني منين مشا أنوار وطلع مجوج شوفي غير كمارتك صفرة
شيماء: هههه (هزت يدها للي كانت مزالة دايرة خاتم مرياج) شهر باش تخطبت حسبيها ودوريها فدمااغك (بقاو كيتشاوفو) وانوار ماشي مشا لا هرب الحبيبة واقلة نتوما اخر من يعرف انا نفهمك هو كان يخاف من باه وكان يسرق فلوس من هنا ومن لبنات لمكلخات باش جمع حصيصة ومشا و ونتي جهان آخر وحدة تهضر على لوجه
لكاملة: ايييييييوا حدك تم والا مرباتكش مك نجي نربيك
شيماء: ربيتي ولدك بعدا بقالك تربي لاليااااتك…..
~~~~~~~~~~
زهير: ههه دابا دار باها خرجت منها المرة اللولة مطرود والمرة التانية هاربة علاش المرة التالتة زعما؟؟؟
محمد: (شاف فيه ورجع حنا عينيه مغوبش كتر) كلمها هي
زهير: وعلاش غتبغي تفقصها وهي فرحااانة ختك راحتها معايا وداكشي للي درت هاد نهار قبل ميسخن عليك راسك نتا ولبرهوش دخوك وتجيو عندها
محمد: شوف حنا غلطنا وبزااف ولكن هدا اخر حاجة نديرهالها تخرج من دار باها عروووس
زهير: وسمو غتستافد ولا باغي باش الناس يݣولو واااااه مات باها وخوها مهلي فيها
محمد: هادشي انا للي بغيتو يدار ماشي على قبل شي حد
وليد: (كيشوف فمحمد متأثر حتى من أكترية ديال كلامو حاني راسو ولا مكيشوفش فيهم)
زهير: معرفت نشوف مع ختك واش تبغي ياك راحتها كتهمك
محمد: ݣولها حتى الا مابغاتش تخرج من تماك نكري دار اخرى لمهم نهار رواحها تخرج من عندنا وتجي لعندك انا عارفك شاريها بالغالي وغتهلى فيها كتر مكنا حنا دايرين ولكن غير هادي حتى واحد مغيآذيها ولا يتكلم معاها
زهير: (زفر وجبد ݣارو كيكمييه) هادشي هي للي نشوف واش تبغيه ولا لا
محمد: كلمها تهود
زهير: حتى نسولها دابا نتا طلع كما كان الحال راك جيت جبت وكون واحد من عائلتها للي فرحانين معاها فدنهار
محمد: (غير مغوبش)
زهير: انا نهضر معاها تجي لتاوريرت نهار العرس للي نكونو حنا جايين فيه کد هاكا معندي باش نوااعدك
محمد: (حرك راسو باه)
زهير: نعل الشيطان امحمد ختك راه أكتر وحدة نية ومتعرفش فالخبث ختك زييينة بأخلاقها وانا للي تعرف علية غتعيش فوݣ فݣيݣ معايا (لاخر حرك راسو باه.. لاح لݣارو من بعد مكما النص فيه) ياله طلع
وليد: ياله امحمد
زهير: دخل طموبيلتك من هنا (محمد زفر طلع ويدخل لداخل تابعو وليد وزهير كيتوشوشو طلعوه للفوق فالصالة فين كانو ولاد خوه للي غير شافوه كحلة بلعمى ولكن قدام باهم ميقدوش يتنفنفو..)
لكاملة: (محيحة على شيماء للي جالسة ودايرة رجل على رجل بوجه بارد دخلت الحاجة وهي شيماء دارت وجه مصدووم) ولدي خلااااك الشااايطة ومشا تجوج لالاااك للي متوصليهاش حتى ربع فزينها ولا فلووسها
شيماء: حرام عليك صافي ولد شد تيقارو حتى انا بعدتو من شحال هادي علاش راكي تݣولي كما هاك؟؟
الحاجة: الكاملة!!
الكاملة: (بقات كتشوف فشيماء للي كطيح دميعات لدرجة لكبير دخل جيهتهم) بنت لحرااام
شيماء: انا راه بنت دارنا هءء ومرببية ممتݣوليليش هاكا
نزهة: (تصدمت اما هند وأمال عارفينها كدايرة) اويلي عاد كنتي مخرجة عينك حتى نتي
شيماء: الله يسمح ليكم (وقفت) الحاجة انا جيت غير باش نفرح لبنت عمي ساعة حتى لمرة اخرين ونجي بسلامة
لكبير؛ الكاملة (خرج عينو) زيدي
الكاملة: (بقات كدور عينها سكتت حيت فهمت ان شيماء هي للي باينة مظلومة خرجت مكرهة ونزهة غير كتشوف حتى من جهان مشات ترضع ولدها فلبيت لاخر…)
شيماء: (بقات كطبطب عليها الحاجة حتى سكتات وجلست مشات الحاجة وهي تبدل ملامح وجهها كتمسح دموعها ببرود شافت فنزهة) كلمة أخرى سحور للي داسااه تحت ماريوووك نفصحك بيه (نزهة طرطقت عينها وناضت من تمات)
هند: شفتي علاش كنت كنقولك هاد الناس مصالحينش ليك ولكن حتى وكان عشتي معاهم كنت غتخرجي راسك هههه
أمال: ههه (تفكريها فمحمد للي جا)
شيماء: أمال اوا مبرووك متكتعلميش
أمال: (مجوباتهاش هزت كاس أتاي كتشرب)
شيماء: قلبك قسااح کولي غير الله يبارك فيك
أمال: (شافت فيها) ماشي قلبي للي قساح غير مبغيتش نكون منافقة بحالك مكتحملينيش علاش تباركي ليا ولا نفكرك منين كنتي تݣولي لماما هادي غتبقى غير حجرة زايدة فالدار
شيماء: عقل صغر وصافي
أمال: امم زعما دابا كبرتي
شيماء: أمال صافي نساو داكشي ياك دابا تجوجتي للي بغيتي
أمال: شوفي انا وياك عمرنا نرجعو بنات لهم ككنا اصلا وكان لݣيت ديك العائلة منبقاش حتى نعرفها
هند: سكتونا غيسمعونا الناس
أمال: هي تبعدني متهضرش معايا
شيماء: هضري معاها اهند
هند: معندي منهضر معاها اشيماء صاافي هنيونا (سكتو منين جاو بنات خوتات زهير بجلسة للي بقاو كيتعرفو على مرت عمهم حتى بان زهير للي دغيا أمال هزت راسها فيه)
زهير: رواحي معايا (ناضت مخلية شيماء متبعاها مشات لبيت لقلت خوها تماك وليد والحاجة.. حنات راسها دخل زهير وسد لباب من موراه) خوك بغا يدير ليك العرس أمال فتاوريرت
أمال: مبغيتوش (غوبشت)
محمد: علاه مبغيتيش
أمال: (شافت فيه ورجعت حنات عينيها تعيا تبغي تحداه فالنظرات الا شي حاجة فيها لداخل مكتقدش تواااقح كيبقى كبير عليها) مبغيتيش وصافي
الحاجة: بنتي نعلو الشيطان وصفيو لخواطر خوك بغاك ديري عرس فدار باك ونجيبوك هنا ونفرحو بيكم
وليد: ختي راه معندك مناش تخافي
محمد: مكاين للي بکولك شي كلمة انا بغيت ندير شي حاجة ليك صغيرة
زهير: متكتروش عليها (شافها مواقفة حانية راسها مغوبشة وكتشابك يديها بتوتر) أمل شوفي فية (هزت عينيها للي مدمعين) حتى حاجة ما بزز خوك بغا يفرح بيك ولكن حتى الا بغيتي مغتمشي حتى لنهار العرس يعني غنكونو كاملين معاك
محمد: (قلبو كيزدح محملش الديكور من ديما كيحسسو زهير انه وحش مع ختو واخا هادشي حقيقي الا نفسو مكتحملش الموقف فين كيتحط ولكن هاد لمرة غيسمع ويحني الراس…)
أمال: (عضت على شنافتها بتوتر وفبالها اصلا مزال خاصني نرجع قبل العرس وهادي هي المناسبة واخا جايلها كتر من تقيييييلة..)
الحاجة: صافي ابنتي؟؟
أمال: كلامك هو لكبير امّا (بهاد الحملة كبرت فعينين جوج دالناس للي زهير مكرهتش يبوووسها وليد عجبو الحال حتى هو كانت عندو نفس الفكرة أما محمد هاد لمرة كان جاي و90٪ متأكد مغتبغيش ترجع لدارهم….)
زهير: (تبسم) مزيان بلاتي ونهضرو كتر فهادشي أمول (حركت راسها باه باستها الحاجة فجبهتها للي أمال دغيا باستها فراسها خرجت)
محمد: أمال علاه هربتي داك نهار
أمال: حيت مك للي فيقتني مع 6 دصباح وطردتني.. مك للي عطاتني فلوس وݣالتلي خرجي من داري راكي رزيتيني فماعني.. مك لي عطاتني 70 الف ريال وݣالتلي متمشيش لوجدة ولا تاوريرت حيت خوتك غيݣلبو عليك ويذبحوووك.. مك للي حلاتلي لباب ديال الدار والتحتااني باش هربت… شنو نجلس ندير تماك أمحمد؟؟؟
محمد: فيقيني واش كنت نخليها تݣربك ولا تقيسك
أمال: كنت عيييت منكم امحمد نتا عارفني كنت غنهرب غنهرب داكشي باش كنتي ساد علية
زهير: (كيسمع ومخصر كمارتو)
أمال: أول كار بانلي طجيت منو (شافت فزهير) حيت وكان كنتي كنت غنجي لوجدة واخا نعرفهم يتبعوك ولكن للي كنت متيقنة منو هو للي هربت عندك مكاين للي بقيسني ولا يذبحني
محمد: (سكتااتو زفر كان بغا يخرج ميبقاش فهاد الموقف ولكن بقا تمااك وعينيه مقادش يحطهم فعينيها) واخا هكاك مكانش عليك تهربي
زهير: واه مكانش عليها تهرب (شاف فأمال) كنتي عارفة علاه مجيتش مور الربعين دبااك
أمال: عارفة وداكشي كان سرنا ممحق حتى واحد يعرفو والا امحمد طلع ليك الدم علاه مجاش زهير انا كنت مصدومة على ردة فعل ديالك حيت بينتي لية انه الا مكانش زهير غرجع حيوان عندكم فالدار
وليد: دابا لي فااات مات
أمال: كنت نتسنى منك تحت فية فاش مات لا للي عمرو حسن فية ولا حتى شاف فية نهار كنا فلقبور واعدتني واعدتني ولكن كنتي غير تكذب (بقاو دموعها كيهبطو) واش انا معندي حتى معزة عندكم واخا غير ݣد هاك (قرنت ) نݣولو مك مكتحملنيش حيت بسبابي بابا تجوج عليها ولا مبقاتش تولد ولكن نتا علاه؟؟؟؟ واش عمرني حتى رديت عليك الهضرة ولا هزيت صوتي ياك حتى منين كنتي تضربني كنت ناكلها فعظامي ونووض
محمد: (حاني راسو بحال قدام شي معلمة كتوبخو علاش محفضش ولا مكتبش الواجب)
وليد: (غير كيسمع اصلا هادشي فرااسوو اما زهير غير مكيزيد يحقد عليهم)
أمال: (مسحت دموعها) قراية الي كانت معمرا علية خليتوني غي حيت شيما مشات تقرا.. وحتى منين شفتني كنقرا بقيت غير تستهزأ بية رغبتك امحمد ݣلتلك نرجع مع هند هند صاحبتي مسكينة للي من نهار شفتها وهي كتعاملني بحال ختها لا شي مرات كانت لحال ماما اول وحدة تنصحني وتنبهني لشحال من حاجة مكنتش نعرفها خليتها مشات دوز الامتحان وحدها.. (رجعت كتشهق) ودابا جاي تݣولي دار بااك مدار باك
زهير: (لوا يدو على كتافها ويبدو كيمسح دمعتها) شششششت
أمال: (وليد مدليها كلينكس كتمسح نيفها) کلت غير شوية من بزااف
محمد: (جلس فوق سداري حاني راسو)
زهير: وصاافي امول خووك عرف سمو دار داكشي باش جا يهضر معاك
أمال: (كتشهق فيها متخرج عينها وتݣول لاااا ولكن مزالة مربوطة بيهم… شافت فزهير) نخرج عفاك
زهير: (ضار مخرجها نيشان للحمام دخل معاها غسلت وجهها هزت راسها كيبانلها حنوكها فيهم طبايع كوحل تفكرت لماسكارا والأيلينر مشااااااااااو رجعت دغيا كتغسل وجهها حتى من لفون دوتان مشاات هزت راسها ودغيا هزت لفوطة مسحات وجهها هبطت لفوطة بشوية كتشوف للي تمسحو معاها الألوان هزت راسها فلمرايا كان وجهها حمر حتى عينيها حومر محملتش ݣاع تبكي حدااه كان مقابل معاها كيشوف فيها) شوية دابا؟؟؟
أمال: (تنهدت وضارت عندو بشوية حانية راسها) الحمد لله
زهير: (قرب لعندها بصبعو صغير دوز تحت عينيها للي دغيا دارت صبعها كتمسح) هاد نهار مكنتش بغيتك تبكي
أمال: (تنهدت تنهيدة طوييييلة)
زهير: اجي نخرجو بعدا من هنا قبل ميصفݣنا شي جن (تبسمت خارجة وتابعها ميتصادفو غير مع شيماء باغية دخل جرها لبرا حتى سمع)
الحاجة: رد لبنت نديرلها حنيينة
زهير: راه بغيت نهضر معاها امّا
الحاجة: ݣلتلك طلݣها
زهير: (شاف فأمال للي كتبسم) وااخا (مشات أمال حدا الحاجة) اوا عقلي على هادي امّا (تبسم معاهم هي داتها للصالة وهو مشا للصالون فين رجع محمد غير مربع يدو وصاقر…)
أمال: (مشات عندهم قبل مدخل للصالة) هند اجي معايا (خرجت هند بقاو كيتوشوشو) عتقيني
هند: تقبلك؟!!
أمال: ولا!! مريضة نتي؟ بغيت لمكياج ݣاع مسحتو من وجهي
هند: وعلاش مسحتيه؟؟
أمال: بلاتي ونعاودلك واش جايبة معاك؟؟
هند: راك شفتي لبوشيط فيها غير سوارت والتيليفون ولكن واااقلة عندي فالطموبيل
أمال: بففف الصالون فيه رجال غيشوفونا هبطنا
هند: شوفي سيري نتي للبيت انا دابا نجي اصلا حدو يتبعني وليد ندوخو بجوج كلمات
أمال: شكرا اختي.. (مشات لبيت للي غير تشوفها الحاجة تردها غير تخليها تمشي وترجع أمال لتماك.. هنا هند هبطت ولكن بوحدها منتابهش ليها وليد للي كان هاكي بظهر ومجمع جابت شي حاجة كان غير قلم بودر وعكر حمر طلعت حضاها وليد دغيا دخلت كتزرب مشات عند أمال قداتلها غير بداكشي للي جابت جات الحاجة للي هبلتها أمال)
الحاجة: اجي ابنيتي نديرلك حنينة (ناضت أمال متبسمة مشات للصالة وبقاو كيصليو على نبي مع مكانتش عوالة على حنة واصلا العرس مزال دارت ليها غير دويرة فيديها بجووج عيطت على زهير للي معتارضش مو للي فرحانة مد يدو دارتلو دويرة صغيرة فيديه بجوج وهو كيظحك مع خوتاتو وبناتهم للي شادين فيه وأمال فرحااانة حنا عند أمال كما طلبت هند وصورااتهم وقف متبسم وشاف الظحكة فعينين أمال لقاها غير نية دغيا تبكي دغيا ظحك خرج من تماك شي ربع ساعة تحط لعشا تعشاو وناضو لبنات باش يمشيو فحالهم توادعو مع الحاجة وخرجو ودراري من مورااهم.. شيماء كانت غير حاضية محمد أشرف مزال ممستوعب ان أمال كانت مصاحبة مع أنوار وها هي تزوجات عمو واش انتقام منو ولا صدفة؟؟؟…)
محمد: (مشا عند أمال) انا غنوجد كولشي.. كولشي غيعجبك ندير للي بغيتي نتي غير عصري مع مريم وݣولها سمو بغيتي وغنديرو (حركت رأسها باه وهي مكتشوفش فيه لفرحة للي فيها كافياااها.. ركبت فطموبيلة ديال زهير وهو بقا واقف جا حداه وليد)
وليد: مزيان منين جيت
محمد: اممم (ضار باغي يمشي لقا شيماء كتشوف فيه قلب وجهو متكره وطلع لطموبيلتو تم جاي عندو زهير)
زهير: جلس تبات
محمد: لا الله يحفظك نمشي
زهير: غدا صباح وسير
وليد: خليه غيمشي معايا للدار (شيماء فرحت… محمد زاد تبعو زهير مع أمال للي مجمعين وعاد وليد ولبنات ومن موراهم أشرف للي غير كيشوف فهاد جالووخة يعني زهير وأمال باينة كانو كيتعارفو ماشي زواج تقليدي وكفاه دارهم مكينينش كاين غير خوها نفض راسو من هادشي حيت ماشي شغلو وأمال ماشي شي وحدة خفيييفة تقنع هي كانت مع أنوار باحتراامها متفاهمووش تفارقو…)
محمد: (وصلو هبط هو يشوف أمال كظحك مع زهير دخل حدا لباب تم جاي عندو وليد لاسقة فيه شيماء) حلي لباب
وليد: (مدلو سوارت) هند طلعي شيماء تبات عندكم
شيماء: بفف
هند: اجي اشيماء معايا (طلعو فدروج)
شيماء: بلاتي نجيب بيجامتي (هبطت وهند طلعت..) حم ولييد ندخل؟
وليد: (خرج عندها) سمو بغيتي؟؟
شيماء: غير بيجامتي (بعدت من لباب دخلت كان محمد فلبيت فين كتنعس هي ضارت لقات وليد من موراها هزت بيجامة وتمت خارجة لقات زهير وأمال ياله طالعين وبجوج كيضحكو…..)
زهير: (ضار لقا شيماء جر أمال عندو حتى لسقات فيه) دوزي اختي
شيماء: هاا
أمال: (شافت فيها) طلعي اشيماء (طلعت شيماء من حداهم ودخلات للدار تبسمت فيد زهير للي مزال لاوي يدو على خصرها) صافي راه طلعات
زهير: (زاد قربها عاصر يدو عليها) مال مك غير كترعدي صااافي ولفي
أمال: هههه عفااك راه يطلع خويا ولا وليد
زهير: طلعي للدار انا جاي (مد ليها ساشية) لبسي هادي انا جاي (ضار هابط وهي مخرجة عينها طلت بانتلها ساشية اخرى طلعت كتجري لقات هند بدلات حوايجها لابسة كولون وتيشورت)
هند: مشا زهير (طلت شيماء من لبيت للي عطاوها)
أمال: لا مزال يجي هند اجي معايا (دخلت لبيت وشيماء مخسرة كمارتها… حلات الساشية) ݣالي زهير نجي لݣاك لابسة دشي
هند؛ غوب دونوي ههههه
أمال: أحاااااي (حلات الساشية لقاتها سورفيت مفهمتش كان بحسابها غوب دونوي كانت المري من ستيل للي خارج جديد كتبان لكريشة والسروال مفخف شوية ولكن مزيرة من جهة المؤخرة)
هند: ههههه دماغنا للي خااسر السبع عندااك تلبسي شي تريكو غير فوق السوتيامات
أمال: أحاااااي
هند: نتخاطرو حتى غيعريييك هههه ويلي على با زهير صراحة سورفيت غزالة وكان ماشي وليد وحتى لبسها نخرج بيها ولكن السيد باغي يشوف حلالو للي لابسااها هههه ناااري
أمال: كظحكي علية
هند: صافي راه درت ليك لاصير حتى لكرشك داكشي راه عندك صانك صانك انا خرجت وغندخل شيماء معايا لبيت ههههه
أمال: هههه (خرجت هند مدخلة شيماء معاها وهي بقات كتبدل زادت سوتيامات ديال لبونج من فوق للي كانت لابساهم عاد لبسات الفوقاني للي غير كتهز يديها كتبان السرة ديالها طلقت شعرها ولوات عليه شال خلاتو خفيف عاد دارت باغفان وݣلوص قريت حنيكاتها حتى سمعت سميتها خرجت وهي كتهبط داك تريكو لقاتو فلباب هاز ساشية صغيرة طبعها وهبطها)
زهير: هزي يديك
أمال: (حابسة الظحكة وكتحىك راسها بلا)
زهير: والله ومتخزي يديييك حتى نعيط على خووك يجي يردك لتاوريرت
أمال: هههه زهير
زهير: ياله ابنتي هزي نشووف داكشي
أمال: أحااااي شنو تشووف
زهير: وريني غير ككانت دايرة لمانكا
أمال: ههههه
زهير: اجي بعدا ندخلو لبيتك قبل مايخرجو لبنات (سبقاتو وهو كيشوفها من اللور اما هي حاسة بعينيه فين ماشيين دخلت بالزربة دخل وسد لباب طل على لبيت كانت جلابتها مزالة فوق النموسية والمكياج مجبود بقات كتجمع دغيا وظهرها كيبان شوية خلاها على خاطرها ضارت عندو ووجها حمر)
أمال: حم والله ديما كيكون مجموع
زهير: اممم دابا خليك معايا.. حيدي داك لفولار نشووف شعر لمشكرد
أمال: انااااا لااا شعري زوين
زهير: مشكرد وجيكس
أمال: والله حتى زوين
زهير: نشوف؟؟؟ (حيدت فولارها كانت مصايباه ليها هند مزيان بان مطلووق وهنا بقا مفيكسي فيها أول مرة بتمعن الشوفة وهي طالقااااه موالفها ديما بلفولار هي ملسات بيدها كترجع شعرها اللور وهنا هزت يدها بانت السرة ولكريشة شوية)
زهير: (معرف فين يشوف كرشها ولا شعرها للي عجبو) سراق الزيت فوق شعرك (دارت يديها بجوج وهنا كيتمعن فكرشها حاني راسو حتى شافتو تبسمت وبقات كتهبط تريكو) هداااي
أمال: زهييير (مد يدو شدت فيه بقا كيقربها وعطاها التيليفون الي كان اخر ما خرج زائد الوسيط فلݣري ولحمر كيبري مهم ديكور زوين تبسمت) شكرا بزااااف
زهير: متعاوديش تشكريني عنکيني نيشااان (جارها عندو معنݣها حنا براسو وحط دقنو على كتفها أما هي فرحااانة واخا حشماانة ولكن حضنو أأمن بلاصة فالعالم عندها حتى حست بيديه كيكمشو ترمتها) هااااااااااه….
هند: (واقفة حدا باب بيتها وكتشوف فشيماء) شفتي فين وصلتي راسك
شيماء: بففف متزيدينيش حتى نتي اهند
هند: من ديما كنت تنقولك بعدي من أنوار
شيماء: وانا قديت؟؟ راه كنت نبغيييه
هند: ومحمد حتى هو تتبغيه؟؟
شيماء: واه كنبغيه حيت انا للي حمارة فلتو من بين يدي وعطيتو وااجد لمكلخة مكتعرفش حتى تهضر وغير حانية الراس
هند: مريم متتعرفش تهضر؟؟
شيماء: (بقات كتبكي) مبقاش حتى كيبغيني كيف كان حتى واحد مكيبغيني حتى من ماما مبقاتش كتشوف فيا وليد للي كان مخنتني رجع قاسح معايا نتي للي كنتي صاحبتي ديما كتفضلي أمال علية
شيماء: حيت نتي مريضة وعندك مرض سميتو أمال مخصهاش تفرح غير قبيلات باغا تصالحي معاها ولكن اقرب فرصة جات بقيتي كتخشيلها الهضرة انا نفهمك أنوار سرقها وسرق ليها ݣاع لفلوس كفاش عرف كود كارت كيشي فيكون عرفو من عندك
شيماء: من عندي؟؟ لا لا والله معطييتو شي حاجة
هند: وباش عرف
شيماء: هي مكلخة غتكون عطاتوولو
هند: ههه عمرك تبدلتي
شيماء: انا درت بزاف وهضرت فيها وشحال ولكن معطيتوش كود ديالها
هند: بغيت غير نعرف علاش كتكرهي أمال لوقت للي كضيعيه باش تكرهيها وتخربي من موراها ضيعييه فييك قراي ديري ديبلوم قلبي على للي يبغيك بلا تاحراميات والله غترتاحي تعلمي من أمال كما تعلمت هق صاافية مع راسها عمرها تحط راسها على مخدة ديالها وتحس بتأنيب الضمير…
شيماء: (بقات كتشوف فيها)
هند: خوك ومك وحتى باك ميستاهلوش هاد تشيطين لمبرهش للي فيك
شيماء: انا عاد فهمتك علاش كنتي فاللول مبغياش أمال تفكر فوليد حيت كنتي نتي باغياااه
هند: (هزت حاجبها) اه
شيماء: اوا حتى نتي بحالي
هند: حاشا نكوون بحالك نتي وحدة مريضة ف**** انا بالصح كنت باغية وليد ولكن حتى سمعت منها راه كتعتابرو بحال خوها وهو كذالك عاد هضرت معاه ونهار عرفت شماتة كداير انا اللولة وقفتلها فيه واخا كان كيبغيها وبراسو ممعتارفش انه طاايح فيها وجاك نتي غير زكاارة فيها مبغاااتوش لاحتو كفاش نقولك عااافتو وانا أمال عندي كتر من ختي تنبغييها ومنبغييش للي يضرها وانا تنقولهالك تحاولي تفكري ديري شي تخلويضة مع زهير بربي بلاناتك كاملين يتحطووو
شيماء: ياك اهند!!
هند: انا علمتك بعدي أمال عليك (هزت حاجبها) هي مرت الراااجل للي محاارش حتى فخوتها ولا مها
شيماء: وانا شغلي فيها
هند: حتى انا غير قلتلك (تيليفونها بقا كيصوني.. مشات هزاتو كان وليد مشات للسرجم) وي وليد
وليد: (متكي فبلاصتو) صافا؟؟
هند: الحمدلله
وليد: باقي زهير تماك
هند: ههه معرفت سدينا علينا لباب
وليد: مزياااان ههه خوها بغا يديها غتكون عاودات ليك
هند: اه قالتلي حتى علاش تافقتو حسن والله
وليد: وي حتى انا هكاك فكرت حسن ليها ولكولشي غير هو غتبقاي ساكنة بوحدك
هند: ههه والعرس مزااال على متبدا نتا تبني حداهم ونبقى نعمر عندها
وليد: غتسكتي معايا ولا نجيب حوايجي نسكن معاك
هند: ههه قلتلك من شحال هادي اجي سكن معايا راه 3 دلبيوت كاينين
وليد: لا نجي لبيتك
هند: هههه
وليد: منديرووش بحالهم زعما
هند: مور عيد لكبير
وليد: غير باغيا تعقديها وصافي حناك على متجي تلقانا حيدنا عليها لعقيد وتماارتو
هند: ههه مسكا عليك حد أسيدي غير خليها ضرب تمارة
وليد: اممم زعما واالو ما فيهاش نديرو غير الفاتحة
هند: ههههههه (ضارت لقات شيماء كتشوف نساتها راها كاينة) وليد من بعد ونهضرو واخا
وليد: الا منعستش
هند: اوكي بيبي
وليد: هه سيييير على الله…
هند: (قطعت وبقات كتستف حوايجها)
شيماء: انا نسكن معاك منين تمشي أمال
هند: اصلا غنطلق لكرا مبقات لا قراية لا والو غنتسنى ناخد غير الديبلووم…
أمال: أحااااي (بغات تبعد راسها لقاتو شاد بالزز) شنو كدييير ازهير
زهير: (عبز اللولة ومشا للثانية) واالو
أمال: (كتبقى تنقز حشمت تصدمت توترت معرفت شنو بغا يدير) زهييير
زهير: اممم
أمال: عفاااك
زهير: (وقف وهي بعدت منو خايفة من تهور ديالو..
مد يدو على حنكها ملمس حتى شعرها للي باليد التانية كيقيس فكل خصلة عجبااها ومطيراالو عقلو شكلها بلفولار غير ولا بلا فولار غييييير كاي وحدة متحجبة منين كتݣلع فولارها… رجع مقربلها معنقها وهاد المرة كانت تعنيقة حنينة وحقيقية كيشم ريحة شعرها.. اما هي والو متيقاش فيه إحساس زوين ولكن راادة لبال باسها فجبهتها لمرة التانية ودار يدو تحت ذقنها وهز وجهها حنا باس حنكها ليمن وهي متبسمة وزاد ليسر.. شاف فيها)
أمال: (بخوف) براكة هاد نهار
زهير: (ظحك حتى تغمضو عينيه) هههههه
أمال: عفاك
زهير؛ كل نهار شوي زعما؟؟
أمال: لا صاافي حتى لعرس ووو (حنات راسها)
زهير: كملي
أمال: (شادة الظحكة وحركت راسها)
زهير: وااخا لالة وكحزي دابا نشوف كجاتك هاد السورڤيت
أمال: وراك شفتييها
زهير: مال جدك كتزقرمي علينا
أمال: (تبسمت وبعدت كتعوج قدامو بحال شي بنت صغيرة وتوريه مرة مرة كتبان درويشة ولكن دغيا كتخبعها.. رجع تبسم وهو كيتفرج فيها)
زهير: على باااك نبغيك ديما تلبسي هاك فداري
أمال: (تبسمت) فدارنا عمرني حايدت حتى لفولار ونتا تݣولي لبس هاكا ههه
زهير: (استغرب) راجلك راه غتبقاي الليل كامل محشية فية ونتي عرياانة
أمال: (جمعت الظحكة ووقفت مستقيمة كضور فعينها)
زهير: هههه واخا برااكة هاد الليلة غير هو (قرب عندها بخطوات بطيييئة هي رجعت اللور حتى كلاها المكتب ديالها فين حاطة كتوباتها ولبيسي ديالها زاد قرب كتر حتى حط يدو فوق المكتب حاني ليها وعينيه مقوسهم فيها) حمقتي جدي هاد نهار كل شبر فيك خلاني متووشي فيييك كتر وكتر (أمال كتشوف فيه بلعت ريقها) نمشي؟؟ (حركت رأسها باه) متبغيش نبات معاك اليوم (حركت راسها بلا.. تبسم وعينيه معسلييين فيها) نمشي؟؟ (حركت رأسها باه) قوييسحة أموول (تبسمت قلبت وجهها حيت زاد قرب وهزت يدها دارت خصلة من مور ودنيها… وقف وهو عينيه عليها) عجبك التيليفون
أمال: (قلبت عينها) فينو
زهير: فجيبي رواحي هزيييه
أمال: هه زهيييير
زهير: (جبد التيليفون من جيبو ومدو ليها) الا معجبكش نمشيو نشوفو اخر
أمال: (فرحت بيه.. شداتو كان داير تصويرة ديال منين حناو فاش كانت هند كتصورهم.. كانو فلقطة كيتشاوفو وكيظحكو تبسمت باعجاب وشافت فيه) فوكاش صورتها
زهير: صيفطاتلهالي بنت ختي
أمال: (عجبها بزاف كبير والصورة وااضحة عاد فيه 3 دلكاميرات وباين غالي) شكرا بزااف
زهير: سمو ݣلنا فهاد شكرا
أمال: هههه وصافي والله كنحشم
زهير: ومتبقايش تحشمي مباغيكش تحشمي مني انا بالظبط…
أمال: امم مع الوقت
زهير: متأكدة مباغانيش نبات زعما غير نتيليشارجيلك شي أغاني فتيليفونك
أمال: ههه (حركت راسها بلا)
زهير: ضيعتي عليك بزاف هاد الليلة (بعد من حداها جات تابعااه شافت فالساعة كانت 3 دصباح تبسمت فرحااانة خرجو من بيتها ومشات من موراه حدا لباب حل لباب وهي من موراه) غدا رواحي عندي نخرجو لواحد المحال حدايا (حركت رأسها باه) متسلمييش!!
أمال: حم (تعلات على صباع رجليها وهو يزرب عليه شد ذقنها بيدو حاني عندها راسها فشنافتها بلا تغرااق خرجت عينها مرجعة وجهها بشوية)
زهير: يهوودي باش حتى بوسة منشدها.. سدي لباب مزيان ابنتي (بقات كتشوف فيه) مسخيتش بية نمشي احبيبي!! (سدت لباب بشوية هبط فدرووج وهي بقات تمااك كتشوف ولحيتو للي دݣاتها مزال كتحس بيها فوق وجهها)
هند: (فتحت لباب وخرجت حتى شيماء كتحنزز فأماا وشنو لابسة وشعور للي مطلووقة) هاي هاي النااس مبقاوش ساهلين
أمال: (ظحكت فرحانة) ههه
هند: انا قلت صافي دخل علييك
أمال: (خرجت عينها فيها) لواااااه
شيماء: وشنو كان يدير عندك الا مدخلش بيك ولا ما فيدوووش
هند: (صارت عندها) كبغبتي نرجعوك صاحبتنا ونتي لساانك كوولو سم
شيماء: وراااه غير كنظحك
أمال: (حركت راسها مشقلبة عينها زعما موووهييييم) انا ندخل نعس عيييت اليوم (كتحرك يدها وهي هازة التيليفووون)
هند: (،قوست عينها فيه) اجي لهنا قلاك تنعسي (أمال كتجري وهند مطردة عليها حتى حيداتولها من يديها كتشوف) اوااااااا غزااااال أمال حسن من تيليفوني
أمال: (كتقليلها السم) وشنوووو عااد
هند: بصحتك الالة اليوم مكاين غير الله يعطيك الصحة والله يبارك فيك
أمال: هههه اوا الله يعطيك الصحة
شيماء: (غير كتحنزز من ديما كان عندها كولشي حسن من أمال ودابا تقلب كولشي) بصحتك زوين
أمال: شووكرا… (مشافتش فيها جلست حدا هند للي دغيا دخلت تحنزز فديك التصويرة ونقلب les applications للي فيه شيماء مشات لبيت فين عطاتها هند تنعس سدت لباب تحشات فبلاصتها وبقات صاقرة كتفكر كتفكر وتفكيرها طير النوم من عينيها… أما أمال كتعطي رابوور لهند للي كتنصها باش متكونش قاسحة مع زهير وفنفس الوقت متسلمش ليه راسها حتى تفك تقاف ونيت من مور العرس… كملو سهرتهم كل وحدة دخلت تنعس فبيتها وأمال بكترة مكتيقش فشيماء سدت عليها لباب بحال عزري للي عندهم فالدار ماشي بنت ولكن هاكا ولات التقة ولات عندها محسووووبة….)
محمد: طار عليه نعاس كلام ختو موقفو كولشي تجمع عليه محس غير ناض وخرج من الدار لبرا هز كيكمي محس حتى صونا على مريم للي ناعسة رجع عاود صونا وااالو رد التيليفون لجيبو بقا يكمي ويصوووط هز طموبيلتو وبقا كيدوووور فوسط لمدينة للي كانت خااااوية وقليييل الغاشي فيها… حتى ضربت 8 رجع للدار طلع نيشان للفوق نمرة ديال ختو للي كانت مطفية تفكر منين زهير ݣالو تݣريساااات فطنجة بقا كيدق لباب ويصوووني ويعيط أمااال.. مدة وهو هكاك حتى حلات هند مدوخة بنعااس
محمد: (مقدرش يشوف فيها على شنو دار هو وخوه داك نهار) ختي عيطيلي على أمال
هند: لا.. (شاف فيها) مغتديهاش
محمد: (عض على شافتو قالب وجهو) مغنديهاش بغيت نهضر معاها وصاافي
هند: هي ناعسة
محمد: فيقيها انا اصلا ماشي داابا بغيتها فشي حاجة وترجع دخل تنعس
هند: (متاقتش فيه.. تمشات بشوية لبيت أمال بغات تخلو لقاتو مسدود دقت عليها شحال عاد فتحات لباب كانت ببيجامة عادية سروال وتيشورت بحكم بدا الحال يدفا) خوك بغاك
أمال: شنو بغاني
هند: معرفتش قالك بغا غير يقولك شي حاجة وصافي
أمال: (قلبها زدح) بففف (لبست بينوار وهزت شال لبساااتو وخرجت هي وهند عينيها مبوقين ولكن خاضية شنو بغا) امم سلام
محمد: (مد ليها فلوس كان مبلغ مهم مباينش شحال ولكن بزاااف) للي خصااتك عيطيلي نصيفطهالك فلبوسطا وهضري مع مريم وصلها سمو بغيتي يداار لهيييه
أمال: (كتشوف فدوك لفلوس وشافت فيه) مبغييتش فلوسك
محمد: أمال هادو راه فلوسك نتي شدي شري للي خاصك وللي بغيتي وغير يخصك صوني علية
هند: (نغزتها) صافي شدي من عند خوك
أمال: (شدتهم) انا راه منجي حتى يقرب العرس ومنين نجي (بتوتر وبحرا كتزعم راسها) خاصك تهضر مع مك
محمد: هي معندها مديرلك اصلا جهد لوقوف مشا حيت هي رجعت كتمشي غير بلكرسي؟
أمال: تشللت؟؟
محمد: وهادشي للي تبغيه لمك؟؟
أمال: لا انا غير سولتك
محمد: طاحت من درووج وتهرسات من رجليها وعنکها دارت لحديد
أمال: (شهقت) ه…
محمد: مهم انا غنمشي واش خاصك شي حاجة (حركت رأسها بلا) ياك غتجي؟؟؟؟
أمال: (حركت رأسها باه وكتشوف فيه بحال خايفها متجييش ضار ماشي بحالو وهوما دخلو كيتشاوفو بيناتهم…..)
زهير: (فاق نااشط اول حاجة دخل دوش من فقصة دلبارح للي مبغاااتش تحاايد من باللو وحتى منين نعس خرجاااتلو فنعاسو فدا فيها شنو مقدش يديرو فالوااااقع.. خرج ظاحك غير على رااسو لقا مو حاطة لفطور حيت كينعس عندها فالدار)
الحاجة: دابا وليدي خاص نشري لمرتك جهاجها
زهير: للي بان ليك ديريه امّا
الحاجة: وذهب حتى هو
زهير: سمعي ما علية غير نمدهم ليك نتي ويااها وتكلفو فداكشي ديالكم انا غدا غنمشي لأزرو على حساب شي كومووند
الحاجة: تجلس بزااف
زهير: لا حدي الا طولت نهار ولا يوماين
الحاجة: الله يديك ويجييبك على خير اوليدي
زهير: اميين اما.. بلاتي نخرج نمشيو عند واحد صاحبي تهز شي حوايج
الحاجة: نجي معاكم؟؟
زهير: تأ (جغم من أتاي وحطو) داكشي ديال قلة لحيا معندك مديري بيييه (دارت يدها على عينها وكظحك ضرباااتو لكتفوو)
الحاجة: هههه ولد النييييفر (معرفتش شنو كنعني بالظبط ولكن نݣولوها بحال ولد اللدينة ههه) مبقيتش تحشم
زهير: (حط الكأس متبسم وخرج غسل يديه رجع عند مو باسلها راسها وخرج كان داير مع لݣباص للي جا كيكمل شنو بقاالو باش الصباغ يبدا فالدار… وراهم شي اضافات وخرج من تماك نيشان للمحال ديالو كيخدم…)
~~~~~~~~~~~~~~~
فتيحة: (مع وصل محمد خطهتلها سخوووونة) سموووو هواااا؟؟!!!
محمد: كسمعتيييها العرس للي درتيلي غديريه حسن لبنتك
فتيحة؛ والله لا جلست برزت فييه
ليلى: (دخلات هازة صينية) اويييييلي عليك افتيحة.. بنتي مريم جيبي الحلوى لرااجلك واجي جلسي حدااه شوية… تقاااي الله راه بنت وحدة للي عندك
فتيحة؛ دخلي سوق جوااااك
محمد: عندها الصح بنت وحدة للي عندنا لااااه مديريلهاش عرس وكان شفتي عݣوزتها ككانت طايرة بيها تحشمي تݣولي انا مها
فتيحة: اااااصبر دابا يعيقو بيها ويردوووهالك
محمد: يعيييييقو بيها لله مالها سمو كدير
مريم: (دخلت هازة حلوى وحطاتو حدا محمد ليلى كباتلو كاس أتاي مداتولو) سلام محمد لباس عليك؟؟
محمد: الحمد الله مريم ها أمال غتصوني عليك وتݣولك سمو بغات
فتيحة: هههه غييير كضيع وقتك اوليدي راه مغيدار لا عرس لا هم يحزنوون
ليلى: ويلي على ميدارش العرس بالفرحات علينا انا نجري معاك اوليدي فهادشي نتا غير فووورني على ختك وكبر بيها ݣدام نااااسها اااو حشومة تجوج بلا هيلالة ولا غيطة بحال معندها حد ݣد بختك وراها جايين بجوج خوتااتك فطريق
فتيحة: (مخسرة كمارتك) تحط يديك اوليدي محمد فهادشي ما نتا ولدي ما انا مك
محمد: (شاف فمريم) داكشي ديال طياب ولحولاوي انا غنشوف واحد تريتوورة كتقدا من عندي السلعة نتوما کادو غير شي لاخر وحتى من حوايجها كل عشية نخرجك تقدايلها شي حاجة عارفك عند الذووق فكولشيشش
مريم: (تبسمت وحركت راسها باه فتيحة غير مطرطقة عينها بغات تدفع داك لكرسي وبالجهد ضربت فالطبلة حتى تزلع كاس أتاي على فخض محمد….)
من بعد نهار طويل ضربت 6 دلعشية أمال لبست حوايجها.. بقاو كيتوشوشو هي وهند مباغيينش شيماء تبقى بوحدها فالدار تافقو لحل أمال تمشي بووحدها قدات راسها خرجت كتزعم فراسها اصلا بالفرحة كتحس براسها مالكة الدنيا… شدت تاكسي نيشان لمحال لزهير للي غير قالتلو على بلاصتو عرفو فرحت كتر لنجاااح راجلها فهاد الميدان… ربع ساعة كانت قدام المحال نزلت هازة صاكها وتمشت فرحانة دخلات لقات المحال عامر شوية كضور عينها حتى قشعها من الكاميرا هز كويرتو حيت كان بتيشورت ونزل عندها غير شافتو تبسمت وقف حداها ونزل حنكو فهمت مدت حنكها غير مرة وحدة حك بلاصة حنكو
زهير: كتنطحي ابنتي ماشي كتبوسي
أمال: أحااي زهير
زهير: زيد أحاي زيد (حط يدو على ظهرها خرجو برا كان الجو زوين داافي والشمس بدات تغرب) ناخدو الطموبيل ولا نمشيو على رجل
أمال: على رجلينا حسن (حرك راسو باه وقف حداها مدخل يدو فجيابو ومد ذراعو.. مفهمتش) ه…
زهير: دخلي يديك (دخلت يدها شاد ذراااعو مع قاست بيدها كانو عضلات ذراعو بارزين بلا متحس بركات على نفس العضلة للي عجباتها بلقسوحية ضار شاف فيها مقوس عينو فيها) سمو تما؟؟
أمال: (عاد طلعات معاها) هم حم والو
زهير: ههه (تمشاو بشوية) تصالحتي مع بنت عمك
أمال: ممدابزينش
زهير: وايلي!!
أمال: صافي مبقيناش نتفاهمو وكل وحدة جبدت راسها على لوخرا
زهير: اممم حسن واخا خوها صاحبي ولكن هند حسن ليك
أمال: علاه؟؟ (كتسناه يعاودلها شنو وقع بيناتهم فسطح)
زهير: غي حيت كتبانيلي مفاهمة معاها كتر
أمال: (تبسمت) هاديك راها لعمر ديالي
زهير: (طل عليها) عاوديها
أمال: الخير للي لݣيتو فهند عمري لݣيتو فحتى واحد (رجع طل عليها) لا نتا هو كولشي
زهير: هكاك كملي
أمال: ههه هند ظرييييفة بزاااف عرفتي وليد فاللول ههه كان يداابز معاها
زهير: عارف غير هو ميبغيش لكذووب
أمال: ونتا؟؟
زهير: انا نبغيك نتي
أمال: (تبسمت فرحااانة أول مرة يقولها لها واخا اصلا كتحس بيها فأفعاالو من نهار اللول)
زهير: ناشفة الدعوة عندك ابنتي الصحرااا وحمييد زاهيير
أمال: هههه
زهير: اوا هند لعمر ديالك وانا؟؟
أمال: نتا حياااتي زويييينة نتا هو أحسن إنسان عندي
زهير: (تبسم موالف كيسمع هاد لهضور غير من عند مو) ݣولي طايحة فية وصااافي
أمال: هههه (وصلو لمحال غير شافتو طرطقت عينها دخلو كيبان غير دوبياسات ليغوب دونوي جات عندهم لبنت للي تماك)
…: مرحباا نتا هو سي زهير
زهير: واه بغيتك دوري مدامتي توريها داكشي (كيضور عينو) دهنا… سعيد كاين
….: وي سي زهير راه كيتسناك (شاف فأمال ماد يدو لظهرها)
زهير: ختاري سمو عجبك انا فلاكيس
أمال: (حطها امام امر الواقع.. حركت راسها باه.. بقات لبنت كتوريها وهي غير مخرجة عينها ولكن على حساب هضرة أمال شحال قدها تحشم بقات كتختار ولكن لقلت راسها كتصوني ابيل فيديو على هند للي شدت فيها ختارت معاها شي بيااسات للي هزت لبنت للي خدامة تمااك لقاتو كيشرب أتاي مع مول المحال للي بارك ليهم جاوبات حانية راسها شاف فيها زهير)
زهير: صافي أمول؟؟
أمال: (حشمت) اممم
زهير: جمع لحسااب وقيدو فالثلج
سعيد: هههه مرحبااااا وحتى الأمانة راه واجدة مع السلعة للي غتجيبها لبنت (جابت لبنت ساشيات كتار.. كتر من داكشي للي ختارت، عرفاتو قبل راه عزل للي بغا.. عطاهم بيجامة حرير كادو هز داكشي مد ذراااعو شدت وخرجو من تماك…)
زهير: (شاف فيها) هزيتي سمو عجبك؟
أمال: (تبسمت محركة راسها وهي حانياااه) اممم
زهير: حتى انا ختاريت شي لعيبات ياااا شرك وكتجي فييهم
أمال: (عضت شنافتها) وااا زهير..حم (بغات تبدل الموضوع حيت زهير غير قبل لاكط بجوج دقائق كان بعقلو منين داروووه وهو خاارج السيطرة) خويا محمد جا عندي صباح
زهير: يااك!! مکلتي والو
أمال: كنت بغيت حتى نتلکاك
زهير: ياكما دار شي حاجة عاود
أمال: لا بلعكس (شافتو جلس دورات عينها كانت محلبة جلست حداه مكملة) عطاني فلوس بزاف کالي للي خصك شريه ونزيدك ووو ݣالي نعيط على مرتو باش نݣولها شنو باغية انا زعما على العرس وداكشي
زهير: خوك مزيان غير شي مرات كيتفروح علينا بغا يتبدل خليه يتبدل (شاف فعينيها) معندك دابا مناش تخافي فالاول كانو يهزوك ويدو مبغااو داابا راكي حرة
أمال: (تبسمت) ديال راسي
زهير: لا حرة واه ولكن حرة ديال زهير
أمال: هههه (تبسم صور وجهو كيقلب حيت كانت عامرة رجع شاف فيها)
زهير: رايب ولا عصي
أمال: رايب
زهير: (ضار طلب جوج مع حرشة هي بغات غير الرايب.. ضار عندها) اوا أمل دݣلبي!!
أمال: (تبسمت) اممم غدا غتسافر
زهير: واه على حساب شي كومووند ولكن مغنطولش الا بغيتي سيري عند مّا نتي وهند
أمال: معليش خاص نبريباري وعاد نكمل خياطة ديال شي حاجة باش نديها للمعهد راه قربت نشد الديبلووم (فرنست)
زهير: مزيااان ومنين تكملي الديبلووم
أمال: غنشد السفلي ديال محالك وتفتح خدمتي يانا ههه
زهير: ݣولي داخلة على طمع
أمال: هههههه
زهير: اهااا نظحكو بشوي
أمال: (سكتت ولكن جمعاااها حتى دمعو عينها) هه
زهير: نتي خدمي غير لراسك (شافها سكتات) تماك مكاينش فين نحل ليك شي محال راك شفتي ديور مباعدين وانا نهار كامل نظلو فالمحال غيبقى بالي معاك ونتي عارفااني منخليك مخصووصة من وااالو
أمال: نکولك حاجة!!!
زهير: ݣولي احبيبي
أمال: (تبسمت) الا بغيت نخدم انا فالدار ونمشي نبيعهم فشي محال مهم نحس براسي كندير شي حاجة انا عارفاك مغتخصصني من واالو بلعكس غنغرق فخييرك ويا ربي يزيييدك من عندو ولكن بغيت غير نشد شي 4000 الف ريال تكون ديالي انا خدمت عليها
زهير: اممم نحطهم فالمحال عندي والا لݣيت داكشي تمشا ليك نشوفلك شي محال حدايا تكريه
أمال: (فرحت) بالصح؟؟؟ ووولفااك
زهير: کلت ليك طميميعة
أمال: ههه عفاااااك
زهير: على هاد عفاك كملي ولكن غير غنمشي دوزي امتحانات تم
أمال: (تبسمت) شكرا بزااااف
زهير: راه هضرنا على هاد شكرا (تبسمت كياكلو ويهضرو حتى مشاو حتى لعند مو جابوها فالطموبيل هي رجعت اللور والحاجة عجبها التصرف جلست القدام مشاو لريسطو غير بتلاتة مجموع مع أعز ما عندو)
زهير: (حك راسو) أمول سمو ناكلو
أمال: للي بغيتو
الحاجة: ݣولي ابنتي للي طلبتيه ناكلووه
أمال: اممم (توترت) الحووت؟؟
الحاجة: ناكلو الحوت ابنتي نيت انا شحال مكليتو
زهير: (شاف فأمال وهز حواجبو بجوج كيحك فذقنو) الحوت امال؟؟؟
أمال: (بقات كترمش عينها فيه حنا دار إشارة براسو تقرب… قربت لعندو عاطياه وذنها) هم!!!
زهير: انا مبلاني بلاش وباغا تزيديني الحووووت!!!!!
أمال: ها (كترمش عينها مفهمت واالو)
زهير: (رجع دارها إشارة ترجع.. رجعت) الا كليت الحوت غنهرب بيك لشي قنت…
كملو السهرة ديالهم فالظحك وعلى المستقبل زوين للي أمال فرحاااتلو من نهار لقاها فطنجة وهي عايشة الحيااااة… تعشااو وصلو أمال لحدا الدار سلمت على الحاجة وهبط زهير وصلها طلعها دروووج وصل حدا لباب
زهير: ياله تباتي معانا
هند: (حلت لباب كان غطيح أمال للي كانت متكية كتفرنس) جيتو
زهير: ياله على وقات عندك
هند: ههه استيمح نرجع نسد لباب
أمال: ههه
زهير: صافي غير خليك أمول صيفطيلي ريب ديال كارت ݣيشي ديالك باش غدا ندوز ليك فلوس حيت بكري غنشدو طريݣ
هند: حتى وليد غادي؟؟؟
زهير: لا هو غيݣابل المحال
هند: اممم حاولي على لموسيو ابا زهير الله يخليك راه مبقيناش تنتشاوفو
زهير: خلي السيد يخدم على ولادو بغيتي تشووفيه ضربي لكحل فلبيض
هند: (شهقت) تشاااكا لييييك
زهير: ههه (دار يدو فظهر أمال من تحت ضارت عندو مد يدو تعلات ولكن هاد لمرة منطحاتوش غير بشوية كدير بييز حشماانة… شاف فيها) امممم مهم ههه (ظحكت حتى هي هو هبط من بعد مدخلهم سدو لباب وهبط ناشط عند مو…)
~~~~~~~~~~~
دازو يوماين زهير مزال مرجع.. لبنات كيخرجو فلعشية يتقداو شنو خاص أمال من ميكاب دهاني أما البلدي وليجامات خلات حتى تخرج معاها الحاجة وفنفس الوقت أمال رجعت كتراجع دروووسها.. شيماء لتحت مكتخرجش وليد طلع الدروس من عند أمال وهبطهم ليها.. أما محمد تفكيرو غير فعرس أمال للي حلف حتى يكون احسن عرس… خرج مريم كيعرج شوية حيت ياله حريق أتاي كبيرا والمشكل كان بين فخااضو
مريم: (شافت فيه) محمد الا مݣديتش تخرج حتى لغدا
محمد: لا لا مزيان (شاف فيها ركبت حداه كتقاد لاسنتييغ) مزااالة فݣعاانة
مريم: (شافت راسها عريقات فالغضبة من نهار صبيطار وهي كتعامل نااقص فحدوود مكتغوت مكانتش غير حانية الراس وقاطعة لغاااا) لا
محمد: (زفر) شيمااا لاحت راسها علية ما مرة ما جووج ومغاانديهاش واخا نكون ممجوجكش
مريم: (شافت فيه) متعاودش تغوت علية ݣدامها
محمد: (تبسم بعياء) مرة جاية نسلخك ݣداامها باش تعاودي ديريلي هاد التعذيييب طلعتي مساهلاش ابنت خالتي
مريم: ههه وياله نمشيو راه خلينا ضرااااير بوحدهم
محمد: اربيييييي ككدوزي نهارك معاهم
مريم: والله كيفوجو علية شي مرات
محمد: مي رجعات كتفوج عليك رجعت فرااجة عندكم
مريم: كلام الحق امحمد.. والله كتبقى فية ولكن راه شحال من مرة كتكون جالسة حتى مضرب ليلى بالي حداها غير لوخرا كظحك وحاضية راسها
محمد: (زفر) اوديييييييي (زاد مشاو للنݣافة مزيانة فتاوريرت دخلت مريم كتسول دوزت ابيل فيديو مع أمال وكتوريها وهند كيختااارو الجلسة ديال الحنة اما البرزة غتكون فدار زهير للي الحاجة حتى هي بدااات تجري وتݣول مجرااات….)
زهير: (كان صايݣ هو مول السلعة للي جا معاه ومن موراهم شاحنة للي فيها جليسات وبيوت نعاس من أحسن أنواع الخشب للي كيكونو فمدينة أزرو (الأرز) وصلو لوجدة مع 10 دالليل.. نيشان للمحال فين كانو كيتسناو دراري دخلو ديك السلعة كاملة تحطات فديبو مكملو حتى ل12 دالليل)
وليد: (كيتجبد) تسخسييييييخة ابا زهير
زهير: (طرطق عنقو وعينيه نايمين) والله مݣاد حتى نصوݣ
وليد: بات معايا وغدا صباح سير
زهير: وختك؟؟
وليد: طلع حدا لبنات
زهير: باينلي نمشي نبات عند مرتي حسن
وليد: ههه هنيينا دير عرسك وباتو حتى فالزنقة
زهير: حاطك خوها عساااااس
وليد: انا خوها
زهير: اݣلب على مرتي ݣلاك خووها بحرا تفكيت من جووج باغي تزيد تالت ولا!!!
وليد: زيد وكان (وليد ركب على مطوورو وزهير من موراه صايݣ وعينيه ناعسين وصلو زهير صونا على أمال للي كانت هي وهند كيقيسو لكسيوات للي أمال سهرت عليهم حتى كملات ليهم لفينيسيون مسمعاتش تيليفونها عاود صونا واالو.. هز راسو فسرجمها كان الضو حتى فسرجم هند كان الضو وليد مشا بعلم ختو وهو طلع دق سمع شكون)
زهير: أمل (كانو كيبدلو هند كانت لبسات بيجامتها وأعمال ياله كتلبس.. خرجت هند عندو حلات كان متوقعها أمال) ختي صافا!
هند: حمد الله اخويا ونتا
زهير: الحمدلله فينها أمل
هند: كتلبس ها هي دابا تجي
زهير: بلا متعذب راسها باك نتوما ملاح؟؟
هند: (حست بيه بحال تقلق) ها هي جاية
زهير: ياله تصبحو على خير غير رتاحو (هبط… كان متوقع هي تلقااه راه يوماين مسافهاش توحشها كيبغي غير دوك لميساجات وتكون حتى هي فيها اللهفة عليه حتى منين وصل هو للي صونا عليها من تماك مصونات ولا سولات شنو كيدير تلاقا مع شيماء للي قالتلو السلام مردش عليها دخل نيشان) ندخل ندوش أوليد.. الله يحفظك جيبلي صاك راه فلكوفر نبدل علية (دخل دوش بالزربة توضى لقا وليد جابلو حوايجو مدهم ليه للحمام نشف لبس تيشورت وسروال كيطمة خرج صلا للي كان باقيلو تيليفونو كان حاطو صيلونص مع سوارت الطموبيل لوراق وبزطامو ودخل نعس بكترة لعيااااا.. أما امال الفوق كتبيضهم بيض بيض)
أمال: ݣلتيلو دخلات تبدل
هند: والله حتى قلتلو دابا غتجي واقلة كان تيتسناك نتي للي تفتحيلو لباب هاكا حسيتها
أمال: (خافت من تقليقتو اصلا متبغيش تقليقتو) دير زمر دلكسوة مكانتش بغات تحلي تفووو…. أحااااي غيطلݣني
هند: ههه لواااااه
أمال: (شداتها صريصرة كتصوني عليه واالو مكيجاوبش) نهبط عندو
هند: اويييلي عليك فين تهبطي عندو صبري نصوني على وليد…. بيبي
وليد: حبيبة
هند: نعستو؟؟
وليد: زهير للي طاح كاااو أنا مزال كنتسنى فييك
هند: (دارت ليعا باي باي بلا متقولها ليها مع فتحات لباب جراتو كانت غطيح شيماء للي كتصنت.. هند طلعات وهبطات فشيماء ومشات لبيتها كتكمل الهضرة معاه وسدت بابها.. وأمال بجنون ناضت من فوق كرسيها ىدخت لباب على شيماء حتى قفزتها وسورتاتو)
أمال: تصنتي دابا لحيووط….. (بقات ماشية جاية فداك لبيت صونات عليه 3 دلمرات عاد وليد قال لهند نعس.. ندمت ݣاع علاش ممشاتش هي حلاتلو حطت تيليفونها وبقات متغبن وكتخيل راسها كطلق خااايفة يسمح فيها كبرت الأمر فدمااغها حتى طار عليها نعاس.. اما شيماء مشات لبيتها جلست بوحدها طلعلها هاد الوضع فراسها حتى واحد مكيعاملها مزيان… )
وليد: (صدعو صونيط تيليفونو بالزز حل عينيه كانت 6 دصباح جاوب كانت ميشيل… خبرات انه خاصو يرجع باش هي تاخد كونجي 15 اليوم للي متافقين عليه وان فلوس للي كيوصلوه كل شهر تحطو فالحساب ديالو… طلب منها بلطف تصبر عليه مدة غير على ميفوت عرس زهير خلات حتى ترد عليه حط التيليفون ورجع نعس ولكن مخبرق حيت ضاع نهاية كيفكر عاود يمشي تماك كولشي زوين رجع فالمغرب… بقا مغمض عينو ولكن دماغو خدام حتى سمع تقرقيب ناض كيتجبد خرج كان زهير) با زهير هانتا مبكر؟؟
زهير: راها 8 انا غنحل صباح نتا غير رجع تكى حتى ل3 واجي باش انا نمشي للدار نشوف الصباغ غيبدى الخدمة
وليد: واخا (عاودلو شنو الجديد تناقشو فيه كالعادة لبس سبرديلتو خرج نيشان ركب فطموبيلتو على مكيديماريها شاف فسرجم أمال صور راسو اللور راجع ماشريال حتى مشا للخدمة للي حل على مجاو دراري…)
أمال: (كانت من مور لفجر نعسااات بكترة لعيااا ضرباتها لفيقة شافت فالساعة كانت 11 عرفاتو غيكون مشاا.. هزت تيليفونها ملقات حتى ابيل واخا لبارح صونات شي 4 دلمرااات.. تنهدت قلبها ضارها ممولفااش هادشي منو مكرهتش تمشي تلحق عليه للخدمة ولكن جاتها عييييب.. خرجت كانت هند فاقت جالسة كتهضر مع حنااها) صباح الخير
هند: صبااااحو.. مي لالة سيري نتي تصلي حتى تكوني مسالية وهاودي صوني علية… ههههه لا لا متخافيش حتى تجي نتي…ياله بسلامة حبيبة بيزووو (قطعت مع جداها وشافت فأمال) متقوليش مولاش هضر معاك
أمال: لا
هند: ونتي صونيتي
أمال: لبارح صونيت بزاااف ولكن منين عرفتو نعس موليتش صونبت خفت نفيقو أخاااااي اهند يكون مبقاش بغاني
هند: هههه حمقة ماشي لهاد الدرجة هاد لخصام تيوقع عااادي
أمال: بفففف لا يختي انا مݣدييتش غنصووني عليه (صونات شحال عاد جاوب ولكن ماشي ظاحك بصوت رجوولي غليض)
زهير: ويييي
أمال: سلام زهير
زهير: وي امال؟؟ مليحة؟؟
أمال: لا
زهير: سمو وااقع؟؟؟
أمال: انا لبارح كنت بغيت نشوفك ونتا مشيت دغيا
زهير: (كان واقف فالمحال كيمونطي تريا لشي ناس) أمل من بعد ونهضرو دابا مشغوول (قطع وهي جاتها لبكية لا ماشي جاتها دغيا بقات كتبكي)
هند: اويلي ماالكي تتبكي؟؟
أمال: ݣطع علية هءء
شيماء: (واقفة فلكولوار مبيناش ليهم كتصنت)
هند: ههه وكان مكنتش نعرفك نقول تتوحمي على زهير
أمال: (كتمسح خنوتنها) کالي مشغول وݣطع علية هو کاع مموالف يديرلي هااك صااافي خدا غرااضو فية وغيمشي
هند: (هزت حاجبها) اشمن غراض
أمال: شاف شعري وكرشي وباسني
هند: ههه كنعرفك بعقلك اولا داكشي من حقو تانيا غيكون مشغوول تاالتا هو مقلق منك يعني ضرووري حتى هو يبغي يتفشش عليك تانيا خدا غرااضو هي تقبك وحملك ماشي باسك خامسا مسحي علية ديك لخنووونة خليه من بعد وهو غيصوووني متوليش تصوني داابا نتي تفاهمنا ؟؟ وسااادسا وللي أهم دوورك فلفطوور ياله ورينا حنة يدك راه غتزوجي امدااام وريني علاش قااادة ونتي جا زهير فششك كتر من لقيااس…
أمال: (عبست مشات للكوزينة ردت الغلاي وكتشوف فراسها بالصح رجعت عايشة دور لفششة تبسمت شحال كانت أمنيتها تلقا علامن تفشش ولات جمعت الابتسامة منين تفكرت زهير مقلق منها وهادش طي مموالفااااهش منو….)
داز نهار كامل مولاش صونا هي كتحاول تشغل راسها غير بلحفاضة وهند كتقاد عشيوة لوليد مقابلة غير يوتيوب كتعلم داكشي بالوصف الدقيق اما شيماء بقات معاهم هازة بوليكباتها حتى هي جالسة فوسط الدار كتحفظ زعما… خرجت أمال من بيتها هازة شي توب مشبك وجلست فين دايرة ماكينة كتخيط داكشي حتى قربت ليها شيماء..
شيماء: شنو بغيتي تخيطي
أمال: شي حاجة
شيماء: شنو هي؟؟
أمال: (شافت فيها معصبة غير بوحدها) شي حاجة وصااافي واش نتي باغيا تعرفي كوولشي راه ميمكنش
شيماء: وعلاش كتغوتي انا غير بغيت نعرف
أمال: الآلة اش بيني وبينك باش تجي تعرفي شي حاجة علية صافي من شحال هادي فرقناااااه
شيماء: (طلعتهت وهبطتها ومشات للكوزينة لقات هند دارت روييييينة تماك) هند نغسل ليك لماعن
هند: لا لا انا نكمل ونغسلهم
شيماء: غير خليني (ݣفظت يديها ودارت طابلية) اصلا مكاين ميدااار (دارت اوني وبدأت كتغسل) هانية والله
هند: (حركت رأسها باه ورجعت كتخلط كتحاول تقاد بسطيلة ديال الحوت… وليد رجع من الخدمة وأعمال كتسنى زهير يجي ساعة واااالو.. طلع وليد تحت إصرار ورغيب هند جلس وحطات داكشي للي المنظر تقناتو جلسو كياكلو مجموعين كولشي كيشكر فيها حيت بالصح تقناااتها عجبها الحال بزااف ومهامها حد من غير وليد للي بوحدو ضرب النص تقريبا)
وليد: (كيمسح يدو) الله يعطيك الصحة الالة
هند: بصحتك اعمري
وليد: معندكش فرانات
هند: عندي هيير الحب هاد الساعة هههه (تبسم ووقف)
وليد: شيماء ياله
شيماء: خليني اخويا حدا لبنات عفاك
وليد: شيمااااء زيدي
هند: حم خليها هاد الليلة الا بغات غدا اصلا الجمعة نتا كتبغي تصبح ناعس
وليد: (شاف فأمال للي تحرجت وهي تهضر)
أمال: وااه.. حم (خلاها وهي كتفكر غير فزهير خلاتلهم روينة ودخلت لبيتها مكرهتش تصوني على زهير ولكن سمعت كلام هند.. بقات فوق ناموسيتها كتغدد دخلت عندها هند) واالو مصوناش اهند
هند: تقليقتو خايبة با زهير
أمال: زعما (سمعان تيليفونها هزاتو كان هو.. وقفت فوق ناموسيتها كتنقز) هو هو ههه
هند: هههه حمقة انا نخرج نخليك كتعراااقي بوحدك ههه (خرجت كانت شيماء فبيتها وهي مشات تكات حيت عيات ونيت غتشد الهضرة مع وليد بحال ديما …)
أمال: حم الو (قلبها كيزدح جلسات فبلاصتها) لباس؟؟؟
زهير: (صاط الݣارو) غاااية.. نتي مليحة؟؟؟
أمال: انا توحشتك
زهير: (قوس عينو نتر من لݣارو وخرج الدخان بشوية) ينعن دين شرك حتى تكفريني ودابا جاية تݣولي توحشتك
أمال: مدرت واااالوووو…
زهير: سمعي أمال منين كنجي ندق فبالك كنتسناك نتي تخرجي راه راجلك خرجي عندي بشنو لابسة ولا ملبساااش ماشي يوماين دازت كولها نشفتهاش باش فالتالي ديري هاااك
أمال: والله حتى مرضت بييك
زهير: مرضتي بية انا؟؟
أمال: وعلاش عندي من غيرك متعاودش تغضب
زهير: مغضبتش وهاني نهضر معاك العشية كاملة وانا معلݣ فصݣف كنكمل مع الصباغ باش كمل كوولشي
أمال: لا ݣطعتي علية
زهير: راه كنت حدا الناس ابنتي منين ندير هكاك عرفتي ماشي وحدي
أمال: (بدلع) الاااا
زهير: (تبسم) واخا الآلة المرة جاية منجاوبكش حتى نسالي
أمال: الاااا
زهير: ههه مشيييينك (زعما خايبة)
أمال: انا زويييينة
زهير: معرفت منين
أمال: من كولشي
زهير: مزال مشفنا واالو
أمال: (ضربت الطم)
زهير: كتسبݣيها جبهة وفالتالي تخرجي عينيك
أمال: هههه
زهير: غدا غنجيبك نتغداو مجموعين
أمال: كولشي؟؟
زهير: واه
أمال: مزيااان.. (بقاو مكملين هضرتهم حتى رجع كيظحك ويشد فييها حتى مشا بلاصتو ينعس…)
دازت أيام زهير كيقاد فالدار حتى من جوج صالونات كان مقادهم الخشب شرا بونجات وهادشي ديما معاه الحريم الحاجة وأمال وهند.. دفع لطلامط على ميوجدو والحاجة كتكمل معااهم جهااج كيعطيوها ارااااءهم ولكن مخليينها هي تختار شنو بغاات زهير للي عندو غراض فيه راه شراااه أما دااابا مكيخلص حتى كيتشطر.. كملو مع النݣافة للي غدير ليها جوج لبيسات الوجدية وتكشيطة حيت مبغاتش تكتر…. دازت الأيام وكولشي ماشي مزيااان جا الوقت الغد ليه غيمشيييو لتاوريرت.. أمال كانت كترجف فبلاصتها عيات هند طلقها وليد زهير واااالو تظحك شوية وترجع تسهى وتخمم وتبدا ترجف ديك لبلاصة رجعت عندها بؤرة سودااااء الدار للي خاص تكون مرتاحة وتبكي حيت غتخرج منها محملاش حتى تمشي ليييها
زهير: (تعصب) وبناااقص من لمشية
هند: غير تستريسات وصاافي
زهير: أمل شوفي فية (هزت راسها) الا مكنتيش مرتاحة منمشيوش راحتك هي اللولة اصلا كولشي واجد هنا كبغيتي
أمال: حم لا نمشي
زهير: (مبغاش يتعصب عليها ولكن حاس بخووفها وهادشي للي مرضة مبغاهااش تولي تخااف وهي معاه.. خرج هو ووليد ولبنات بقاو بوحدهم)
أمال: (هاد لمرة هضرت قدام شيماء ماشي حيت ولفتها ولكن المشكل للي عندها أكبر من وجود شيماء) مبغاااتش اهند
هند: مرض والله حتى لمرض
شيماء: شنو؟؟؟
أمال: بففف مݣديتش نݣولها لزهير راه غرقت فحوايجي حتى نبغي نطقها ونحشم تفووو كولشي ضايع فحياااتي
هند: دابا متقوليش هاكا مزاال يوماين ياك غدا غنمشيو لكوافوورة تماك وبعد الحنة عاد الغد لي غنجيو لوجدة
أمال: (حركت رأسها باه) ديما حانية راسي ولكن هاد لمرة والله منحشم (مشات لبستها شيماء ضرها راسها حتى سمعت خوها كيعيط هبطت كما العادة كتفكر غير شنو واااقع وشنو للي موتر أمال وحتى هند… نعسو ديك الليلة والغد ليه وجدو راسهم ودوزااانهم وشدة طريق لتاوريرت ب5 بيهم حتى يرجع زهير لعندهم باش يدوز حتى هو الحنة ويكمل شنو خاص.. اما الحاجة ݣاع لمرض ولعيا للي كان فيها جا عرس ولدها رجع فيها جهد 10…)
أمال: (شافت بلاكة ديال مرحبا بكم في مدينة تاوريرت تزاااد معاها الزاااايد وقلبها غيسكت بقوة مكيضرب..)
زهير: (شاف فيها لقاها مخرجة عينها) حشوومة تكوني مرت زهير وفيك هاد الخوف
أمال: هم….
زهير: توݣضي ابنتي تخراج العينين غير معايا
أمال: (شافت فيه) بففف
زهير: صوطي فية ابنت مصطفى بنت ديل شر هادا للي يقلق لي هاد لغزاال ديالي (تبسمت مع وصلو لحدا الدار كيبانلها فسطح كاينة القاعة ولبز لبز لتحت.. زهير بقا طيط طيط طيط وتبعو وليد خلا أمال غير كظحك كولشي كيطل وقفو هبط هو كيتجبد وهي بقات شحال عاد جا زهير حلها لباب هبطت كانت لابسة جلابة فموڤ بارد سمعت طقزطق طقزطق ميخفاش عليها صوت الطااارة والغنايااات الشعبية ديال مدن الشرق تبسمت جاو لبنات حداااها مكانتش كتسنى استقبااال منهم ولكن منين لقاااتو فرحااات شافت نعيمة هابطة متبسمة تابعاها مريم هازة بلاطو فيه جوج كيسان حليب وطبسيل تمر معمر بالعقدة داللوز…)
محمد: (مع مو محيح عليها منين وصلاتو مريم راها متقفة وخاص تحايد ليها تقاااف قبل مترووح عند راجلها.. كانت بلحوحتو خاارجة) رااااه كيتسمى سحووووور هدا الآلة
فتيحة: (كتحاول تبردو مغترضاش يتسمع غواتو لعيالات واخا راهم ناشطين بالطارة) صاافي اوليدي على وجهك نتا نکلعو ليها بالليل اما والله لا لݣلعتو ليها
محمد: لا حولة تفكري راه تاليتنا موت وهاديك بنتك للي راكي تعذبي فيييها (خرج مكره أما هي باغا تاكل ريتها وبااغا غير تعرف شكون ݣالهااالو… هبط كيجري لتحت دار باتسامة عريييضة وقف حدا نعيمة للي كتسلم على لبنات) مرحبااااا وألف مرحباااااا….
أمال: (فرحت ونعيمة كتشجع فيها هزت كاس ويديها كيرجفو باغية نمو لزهير حنا عندها شد يدها للي كيترعدو جغم منو وهو نيت دوزولها تشرب هز تمرة عامرة دخلهالها فمها حتى خرجت عينها بقا كيضحك محست حتى هزات جوج وكتعلى حل فمو وهو متبسم ودخلاتهوملو ساعة دغيا زرب عليهم كلاهم فجو ديال الظحك باغي غير يفااجي عليها أما هو كيكره شي حاجة سميتها لحليب حط يدو على ظهرها مزيدها شد يدها ليمنة وتمات طالعة بصلى وسلام هي كترجف بالفرحة ضارت كتسمع زغاارت كتسمع بلحووح هند كتزغرت بحال شي معييييزة ظحكااتها… طلعو دخلو للدار كانت ريحة بخور زوينة عاطية وتابعينها لعيالات بالبندير ودوك الأغاني ديال الراي لعرووبي وبلا بيهم مكيدوووزش العرس حتى نطقت)
نعيمة: “””ايااا فتيحة فرشي لمرااح ولباااب””””
“”””أيااا فتيحة غير العائلة ولحباااااب””” تبعووها لعيلااااات بهاد الغيوااان زهير شاف غير نسااا (وقف وقفات أمال شافت فيه وحنا لودنيها)
زهير: أمووول انا نخرج هنا كاينين غير نسا تيليفونك عندك.. وااخا (حركت رأسها باه طلق منها وتم رااجع حاني راسو وهنا بدا تحنزيز وتبرݣيييݣ فييه كاين للي سكناتو من راسو برجليه وكاين للي ياله شافت وجهو وكاين للي برݣݣت حوايجو… لعيالات جلسو فالصالون اصلا كانو غير العائلة وقفو من لغنا وهند وأمال ومريم كيهضرو ويظحكو)
مريم: راني کلتها لمحمد وصيفطتو شااعل عند مك الله يسمح لية
أمال: (بفرحة) حلفي بالله
هند: وبينو على لحشوومية فرحانة غت**** لينا
مريم: هههه
أمال: (دارت يدها على فمها) أحاااي حشمي
هند: قلت شي حاجة مكيناش ههه صراحة شهيتوني فشي تجوييجة
أمال: وليد يبقى صابر حتى يمشي يݣلب فقنت اخر
هند: (هزت حاجبها) مش حيأدر يا روووحي (بقاو مجمعين حتى بقات العائلة كيجيو واحد واحد كيباركو.. أمال كتجاوب بصواب منسياش شنو دوزو عليها ونهار تطردات حتى وحدة من عماماتها ولا خولاتها هضرت ولا قالت عين من غير نعيمة للي طلعاتها لدارها… حتى منين يسولو فوكاش كانت الخطبة ولكاغط كتجاوب كولشي جا بالزربة.. ومن تعابير وجهها للي حاولات باش تبين أن سؤالك وقح ماشي شغلك كيخليوهم يمشيو يجلسو ويبداو يجلدووها فيها…)
~~~~~~~~~~~
نعيمة: اويلي افتيحة واش هبلتي
كريمة: اختي غير ݣدااام الناس بعدا
فتيحة: انا لابسة حق الله مخاصنيش نبان فشي فرح برااكة غير خازنة على راجلي يطالب مكمل حتى العام وناضو بنتو تجوج وخاصها العرس
كريمة: بنات الوقت..
نعيمة: واش كضحكو على شي حد معارفكمش كتهضرو بحال باها كانت غير بموت فيها ولا نتي داياها فييها انا كنݣولك خرجي غير على ود نسا
كريمة: صافي مبغاتش صافي متبززيش عليها انعيمة
نعيمة: يييه كلامكم هو لكبير حتى الا مخرجتش مها مرت بااها راها دايرة صواااب وفايتاااه لهييه.. (مع خرجت نعيمة شافت لباب تحل وكريمة دافعة بختها للي وجهها باين شراااني ظحكت عليها مشات للكوزينة لقات ليلى واقفة على تستاف الحلوة جاتها عجب سيمانة وهي جري جري كتوجد صغييرة والكبيرة حتى من جهااج كانت كتعاون فيه بلا دبليج ذهب للي دارتولها كادو..) ليلى واش نحطو
ليلى: واه نحطو ݣول لمريم تعيط على راجلها يطلع كاس كروط لرجال (ورات لبنات شنو يحطو كان كولشي مقااد وجا محمد كيسربي لرجال للي رجع كتفااهم مع ليلى غير بمجرد وقفاات فالعرس ماشي رجعات عندو عزيزة ولكن رجعت هدنة بيناتهم…..)
زهير: (شاف فوليد) الا هااك انا نشد طريݣ باش نوقف برجلي على سمو خااص راه حتى واحد ميتعول عليه,» تمااك وغير مّا للي راها تخبط
وليد: شووف محمد معندو ميدير حتى لكلب دعلي من داك نهار مولا بان
زهير: اممم اوا صافي دابا نشد طريݣ (وقف قشعو محمد للي كيظحك مع عمامو) سيادنا هو هدا
محمد: غتمشي؟؟
زهير: واه باش بعد غدا نجيو الأمانة ها هي عندك
محمد: هه راها ختي
زهير: كاينة.. (خرج من حداهم وقف محمد تابعو وصلو حدا دارهم) كلملي أمل
محمد: حم واه (دخل كانت شادة كاس أتاي) أماااال (هزت راسها شافت فيه دارها إشارة باش تخرج مشات عندو بكاسها بكترة التوتر) تكلمي لراجلك
أمال: (حشمت وخرجت كان حدا لباب) حم زهير
زهير: (ضار عندها) مرتاحة؟؟؟
أمال: (تبسمت وحركت راسها باه)
زهير: انا غنرجع لوجدة دابا ها وليد معاك خوك معاك متخافي من والو يوماين هاني عندك..
أمال: واخا
زهير: ياله احبيبة سيري دخلي واخا غنتوحش جدك
أمال: ههه راه هو فدارو طلع عندو لفوݣ
زهير: هاها واخا با جباار مكناخدو منك حتى شي كلمة زينة
أمال: (تبسمت فرحانة) والله حتى غنتوحشك بزاف ولكن مزيان باش نتا توحشني كتر..
زهير: وااايلي على نتوحشك كتر!!! من نهار لكار وانا كنتوحش فيك
أمال: هههه
زهير: سيري وكان دخلي انا بحرا نشد طريݣ وعاود غبري
أمال: ههه لا (شافها فرحانة مقوس عينو فيها مد حنكو سلمات عليه هبط ضار شاف فيها وهي دارتلو باي باي والابتسامة فوجهها فهاد اللحظة ندم ݣاع علاش جابها وكان ركب عقلو متصالح مع حد حتى من عرس بناقص منو يهرب بيها غير لدارو ويسد عليها.. مشا وهي دخلات لقات فتيحة بكرسيها كتشوف فيها.. حتى أمال وقفات كتشوف فيها عمرها شافتها بهاد الضعف شادة الكرسي رجليها مهرسين وعنقها دايرالو لابراي باش واقف..حنات راسها ورجعت هزت عينها كتقرب ليها بشوية) كبقيتي؟؟
فتيحة: لباس نتي للي راكي دايرة فيها عروس وفرحانة
أمال: (تبسمت) حيت بالصح راني عروسة اماما
فتيحة: (خسرت كمارتها) طيحتي الدل عليك تفوو على بنات كيفك
أمال: (مزالة متبسمة) الدل طيحتيه علية نتي ولكن الحمد الله صبر للي كان عندي جزاني الله بيه براجل كيبغيني وعݣووزتي دايرة كتر من جهدها لا حسبااني بنتها وعاد صاحبتي للي أحسن حاجة جزاتني بيها هاد الدنيا.. (بابتسامة) معلييك غير تفرحي معايا (دورات عينها فالدار) اخيييرا غنتهنى من هاد الحبس ونتي غتهنااي من هاد المصيبة للي تبليتي بيها.. (تنهدت) ووو تقااف ݣالي محمد اليوم غتݣلعيه لي
فتيحة: (غير كتخنزر)
ليلى: (جات سلمات عليها بالوجه) انا ليلى مرت باك الله يرحمو هه
أمال: ههه (سلمت عليها وشافت بناتها حنات عندهم) سلاااام انا أمال ختكم (جاو سلمو عليها)
ليلى: تي طلقي ديك عباااسة ظحكي ونشطي راه دار لبنات خاااالية….
دازت ديك الليلة ظحك ونشاااط محمد خوا بيتو خلا أمال فيه
أمال: لا لا غير جلس نتا ومرتك
محمد: وصاافي ݣلنا ليك بقاي هنا مع صاحبتك
مريم: حتى انا نبقى معاهم؟؟
محمد: (خرج عينو) ه.. اجي بعدا بغيتك فشي حاجة
هند: ههه هاد خوك متعرفي منين تشديه يا ختي زيدي بعدا حلالك لبيت كبير (دخلت كانت مريم مقاداه مفرشااه وكاين باليزات) هنا جهاجك يمكن
أمال: (تبسمت منوتاهاش فمحمد.. شدت تيليفونها صونات على زهير للي شدها) ههه مبقاليش الصوولد
زهير: يااا شرك ديك 3 دلمليون وستة وستين ألف ريال للي حاطلييك ماشي فلوس تهزي وديري بيها للي بغيتي..
أمال: هههه مخرجتش وصافي
زهير: وصيفطيلي ميساج يا جدك نصيفطلك
أمال: هههه انا غدا وندير
زهير: سمو ديري ههه
أمال: روشارج
زهير: اممم مشيتي لكوافوورة
أمال: لا حتى لغدا صباح
زهير: متكتريش داكشي
أمال: (تبسمت) لا متخافش
نعيمة: (دخلت) بنتي أمال اجي معايا
أمال: حم واخا مرت عمي.. زهير انا نتكلم شنو بغاو
زهير: واخا (قطع ومشا رجع جات الهوندا للي فيها شي ربعة دلحوالة دخلهم مع دراري وحطووهم فالدار التحتانية للي فيها الخضرة لمونادا الديسير لفوق كانو كيستفو الحلوة فطباسل.. والفرقة لوخرا كيقادو الكعك الوجدي للي كتميز بيه المدينة.. اما هو كان فرش الدار تقريبا من غير لماعن للي مافيهاش وشي 2 بيوت ممفرنشيش فيهم غير شي دبش.. دخلات الحاجة للدار كتبسم عاجبااها دار ولدها وفراشها دار سلوم كيقاد تريااات)
الحاجة: تبارك الله اولدي هادشي زيين
زهير: خاصو غير مولاتو
الحاجة: درك تجيلو نشاعالله
زهير: ان شاء الله
الحاجة: ورواح اولدي تعشا راه كيتسناوك غير نتا
زهير: واخا أمّا نݣاد واحد لبولة ونجي (رجع صونا على أمال مجاوباتوش.. عرفها غتكون مشغولة مع العائلة مشا طلع للدار تصادف مع الكاملة فدروج هابطة)
الكاملة: الله اوليدي ملݣيت تناسب غير مع الناس للي سلخو ولد خوك داك نهار فوسط الدار
زهير: وانا مالي الا هو تسلخ للي دار علاش يستاهل ذبييحة من عندي
الكاملة: (شهقت) يااك!!
زهير: (كيتغزز وعينيه دغيا تقلبو للعصبية) ولدك لݣاه ݣدامي انا للي نخوي فر** سلاح الدار كااامل فطنطونو باش نوري للكلب الشفرة كداايرة مرة أخرى تهضري معاه ݣولو زهير دايرك فراسو طال زمان ولا قصااار جايك جااايك
الكاملة: (غير كتبرق فعينها) ولدي ميديرهاش
زهير: ولدك دارها شفرني من محاالي وهاد الهضرة توصل لخويا غنݣلب على *** كولشي وفيديووه غتحطو عند لبوليس نتقب لمو لوراق عند كولشي عاد نلحݣ بيه لتم
الكاملة: (خافت وغير كتشوف)
زهير: ومنين غتجي مرتي منها منك فهاد الدار معليها منك غير لاحترام حيت متبقايش فمقاام مها وحناااها (طلعها وهبطها وزااد داخل اما هي خافت وفنفس الوقت تغددت من كلمة حنااها.. وفلداخل ديالها مستحيل ولدها يشفر)
زهير: (دخل كيحاول يخفي ديك تخنزيرة بقاو كياكلو ويظحكو ݣاع العائلة تقريبا تجمعو حتى من رجال بنات خوه لكبير للي جاو من امريييييكا…..)
يتبع
شاركنا رأيك في هذا الفصل 🌹