الفصل الثالث: بين يد القدر

وصلو لدار هبطات كترمش فهاد الدار لي غتكون فيها بدون رائحة مهاا معندها مدير سوا تقبل وضعهاا لحالي وتندامج مع الحقيقة ديال مها مبقاتش فحياتها سوا ذكرى عمرها تنساا

خرجات باليزتها وصاكهاا تحل لباب من طرف حسام بملابس بيتية هاز بنتوو فايدو شاف ايمان وتبسم ليهاا وقال: ايمان …مرحبا بيك

ايمان (بابتسامة باهتة )شكرا

نور: ياااي غتبقا معانا ايماان انا فرحاانة ههه

حسام: غير دخلي غنجيب هدشي

هزات الصاك ولكارطابل ودخلات شادة فيها نور فرحانة

نورة: ها حسام غيطلع لييك حوايجك …طلعي دوشي شو كي ولات حالتك

ايمان: خفتي نوسخ ليك لفراش !

نورة: اه غتوسخيه شوفي على سبرديلة كي رجعتيها بالترااب

حسام: نوور طلعيي ايمان ل شومبر ديالها

شافت فيها ايمان قبل ميربت فكتفها حسام وقال: طلعي ا ايمان

طلعات كتعض فشفاييفهاا وكتسمعهم كيهدرو لتحت وقال: نورة متنسايش لي ماتت راه تاهيا كانت مهاا

نورة: هاد لبنت كتعصبنني …سكاتهاا كيعصبني كلهاا كتعصب

حسام: لوحم هدا جاك عليهاا …وصافي وخة بنتك متنسايش راه وصية لمرحومة

نورة: الله ارحمهاا نمشي نرتاح حاسة بلحريق شوية

حسام: ؤك

طلعات ما تبقا من دريجات قصدات لبيت لي مخصص لضياف …كتحيد فلكويرة حتى دق حسام وقال :ايمان (حل لباب ) ها حوايجك

ايمان: شكرا

حسام (شاف فيها وابتاسم شدها من كتاافهاا ) شوفيي وقت لي حتاجيتي شي حاجة جي عندي …حنا صحااب يااك (حركات راسهاا بالايجاب) ومتديش على نورة

ايمان: الاسطوانة تاني …نورة عصبية وزادها لحمل حفضتها

حسام: اش نديرو هدشي لي عطا الله هههه …فيك الجوع

ايمان: لاا ندوش ونرتاح

حسام: خودي راحتك

تم خارج وقالت: حسام…شكرا

من ديما كيتعامل معاها بطريقة ودية عمرها حسات انه كيخنزر فيها ديما مواجهها ب الابتسامة فقط …وايمان عائلتها كلها لي كيعامل زوين محسوبين على رؤوس الاصابع

جبدات حوايجها وتوجهات لدوش لي خارج على لبيت دوشاات ورجعات لبيت لابسة بينوار قصير وفوطة على شعرهاا لبسات وتكات شادا تيليفون طالعة هابطة بدون هدف وصلها مساج من منعيم قال: ايمان صافا بخير كيف بقيتي

ايمان: الحمد لله

منعيم:دزت من حداكم قبيلة بنتي ليا مهبطة الشانطة ؟

ايمان: جاني ترحييل من دار

صونا ليهاا وجاوباتوو وقال: كيفاش

ايمان: كيف كاتسمع جراو علياا وجابتني ماما لغزالة نعيش معاها

منعيم: مقوول ! وعلاش هدشي كلو

ايمان: سي عبد الله مبقاش باغيني فدار قالييك غنخرج ليه على ولادو ههه ااه ياربي كترت لهم كضحك

منعيم: فيهاا خير تهنيتي من نكيرو

ايمان: كتبدل صاحبك غير بما كفس منوو ..قولياا كتهدر مع ماريا !

منعيم: لا لا تقريبا مجاتش ليسي من اخر مرة جيتو بجوج ولعطلة هادي كنظن تكون مسافرة

ايمان: تلقاها فرحانة لزواجها خليهاا

منعيم:حتى نتي متسديش عليك …قضاء الله كيتصرف حنا غير مسيرين فارض الله

ايمان: ونعمة بالله

منعيم: فهاد لايام تقدر توصل النتيجة

تحل لباب من طرف نور وقالت: اجي تعشاي

ايمان: وخة …منعيم نهضرو من بعد

منعيم : صافي

زادت عليها بينوار وهبطات عندهم كان لعشا محطوط عبارة على لي باط …كلهم كالسين الا نورة وقالت: فين نورة

حسام: حاسة براسها عيانة شوية نعسات قبيلة

حركات راسها باه وهبطات راسها كتعشاا كتهزوو وكتشوف حسام كيوكل بنتو ويلعب معاهاا تبسمات ابتسامة خفيفة وهبطات راسهاا من ورا متعشااو هزو طباسل شللاتهم وحطوهم فلغسالة

حسام: تصبحي على خير

ايمان: تصبح على خير

طلعات لبيتها غسلات سنانهاا وتخشات فبلاصتهاا طافية ضو كتشوف فسقف وعينيها تغرغرو وقالت: 9 ايام دازت بلا بيك اميمتيي هء(ضارت لجنب وعنقات لوسادة كتشم فيهاا وتنخصص) الله ارحمك ويصبرنيي علييك امي هءهء

بكات حصتهاا الليلية من نهار ماتت نعيمة ونعسات حاضنة المخدة ولفيديوات مع نعيمة حتى نعسات

فاقت طافجة من لمسة يد عليهاا من بعد مكانت غارقة فنعااس لقات ضو ضارب فيها لقات قدامها حسام بسرعة غطات راسها كانت لابسة غير ديباردور وقالت بهلع : مالك

حسام: ايمان ردي لبال ل نور الى تفيق بليل …نورة تزاد عليها لحال غادي بيها لكلينيك

جرات لبينوار لبساتو وتبعاتو حفياانة تالبيت نورة لي كتبكي بلحريق …هزها فايدو مهبطهاا وطلب من ايمان تهبط صاكها لي فيه لورااق ديالهاا ..حطها فطموبيل وحطات لوراق على رجليها وقالت: ميكون باس عندك

نورة: ردي لبال ل نور عفااك

بقات متبعاهم حتى مشاو ورجعات سدات لباب شافت الساعة لقات قريبة الجوج طلعات بان ليها الضو شاعل فبيت نورة وقصداتو مفرش على حقو وطريقو بطريقة عصرية زوينة …دازت لبلاصة معلقين فيها التصاور …كانو تصاور نور ونورة وحسام او وسطهم مكتوبة happy family ربعات إيديها مقابلة معاه كتمعن فيهم …دازت لجيهة الروايح ولميكاب غير الاوريجينال

طفات الضو وخرجات من لبيت ومشات لبيت نور كان شاعل فيوز بلون خافت …بيتها طاغي عليه اللون لوردي بلكار غير تاع اللعاب …مشاو عينيها لدب ابيض صغير هزاتو وكلسات على لفطوي كتشوفيه

“”

شاداها فزنقة حتى دازو من حدا لالعاب وقالت: ماماا

ضغطات نورة على ايدها وقالت: اش قلت

ايمان(بطفولية ): نورة ..بغيت نونوس هداك الدب

نورة: واش نتي مكتعيايش ياله شرات ليك مي مونيكة

ايمان: حتى الدب زوين …عفااك

نورة: مهزاش معاياا داباا تالدار …زيدي راه تعطلت

هبطات راسهاا وتمشاات مقلقة والشكارة متقلة عليها

“”

تنهدات فبلاصتها معرفات امتاا غفات جارة عليها ملاية صغيرة تدفيها …حتى كيفيقها صوت طفولي ولمسات على خدهاا ..حلات عينيهاا كتبان ليها نور كالسة حداها

نور: صباح لخير(شدات صبعها دوزاتو على شفار ايمان ) عينيك زوينين …او شعرك زويين …تعطيهم ليا

ايمان: خوديهم وعطيني بلاصتك

نور: بيتي !

ايمان: ممم

نور؛اهااه خوديه ههه فين ماما وبابا !

ايمان(تكعدات هازة تيليفونها شافت الساعة ): دابا يجيو

نور: فيا الجوع

ايمان: اجي نهبطو

جمعات شعرها كتاوب دازت لبيت خدات بانطوفتها ونور تابعاهاا كتنقز فرحانة بزايد معاهم …شادة فيها وكتنقز فدروج توصلو لكوزينة كبيرة ومجهزة بلي بغيتي

ايمان: شنو ندير ليك

نور (طلعات فوق الطبلة وكلسات ) : ديري ليا كورن فليكس

بدات كتحل فلبلكارات لتحت ولفوق ونور كضحك عليها وقالت: ههههه راه فوقك راسك اطاطا ويلي مكتشوفيش عينيك كبار ومكتشوفيش

ايمان(ضحكات ) : بغيتي تقوسي عليا ههه

نور:ههههه

كبات ليها لحليب فزلافة وخوات ليها لكورن فليكس …حتى بانت ليهم سيدة داخلة لكوزينة وقالت :السلام

ايمان:السلام(شافت ف نور بغرابة كتسولها بعينيها شكون )

نور: هادي لا بون تاع ماما

فتحات ليها ايمان مجال دخل نطقات السيدة وقالت: مكايناش مدام

ايمان؛لاا شوية وتجي

انا ربيعة …ندير ليك لفطور اختي

ايمان:لا اختي شكرا …غنقطع غير فروي ناكلو

ربيعة :نقطعو ليك ؟

ايمان(شافت فيها وقالت) :وخة

خرجو لجردة فين كاين ارجوحة مقابلة مع لابيسين كالسين فيهاا شادة تيليفون كتقول واش تصوني ولا لا

مكاملاش دقيقة دخل حسام وباينة فيه مقلق ..مشات لجيهتو بتساؤل وقالت: حسام هانية لوقت

حسام(بتنهيدة ): نورة طاح ليها لبيبي

حطات ايدها على فمها بصدمة معرفات متقول وقالت: الله اعوضكم

حسام:ان شاء الله …فين نور

ايمان: كالسة معايا فجردة

حسام:صافي خليها …نمشي ناخد شي حوايج ل نورة ونرجع عندها..لعشية عاد تخرج

رجعات بلاصتها كدحرج مع نور لقليل من لوقت حتى كيبان ليها من لباب لي على برا داخلة ام حسام زكية او ولدها صغر من حسام تلقا ليهم حسام على برا عنقها ودخلو لداخل

تنهدات ايماان وهي مامرتحاش نهائيا فهاد لكلسة ديالهاا هناا قلبها مقبووط وباغة تخرج وتغوت باغة تهرب عند مهاا وتنعس على قبرهاا

خرجها من سهوتهاا صوت نحنحة تاع شخص من وراهاا نطق وقال: نوور

ناضت نور فرحانة من صوتو نقزات فحضنو وقالت : عمووو ديالييي

شاف فايمان بابتسامة وقال: ايمان صافا

ايمان: لباس الحمد لله اوسيم يسول فيك لخير

وسيم: مدة طويلة مشفتك …الله ارحم لواليدة

ايمان(بديق خاطر ) : امين

ناضت مخلياه متبع ليها لعين دازت سلمات على ام حسام وطلعات لبيت …ضلمات عليها لبيت وسداتو وغطسات فحزنها من جديد

فوضعيتها هكاك معارفاش لوقت شحال داز …نعسات من كترت تفكيرهاا حتى سمعات لهدرة برا تقلبات على ظهرهاا عرفات نورة جات ..شنو تقوليهاا هي انسانة رغم صلة الدم بعيدة عليها كل لبعد من ناحية الحب و من ناحية الولف ومن ناحية القلب

ناضت لدوش غسلات وجمعات شعرهاا وخرجات فطريقها دازت على بيت نورة بانت ليها فبلاصتها مغطية كتبكي او نور حداهاا

نور: مامي متبكييش مشا بيبي

نورة: هءهء مشا اكبيدة

نور :ولكن انا باقة انبقا معاك

نورة(عنقاتها ): نتي لي بقيتي ليا ابنتي الله احفضك ليا امامي

نور: مبقيتيش تبكي صافي

نساحبات ايمان بهدوء لتحت دخلات لكوزينة لقات المساعدة كتحط فبلاطو زلافة تاع لاصوب

زكية: ايمان طلعي ابنتي ل نورة شوية تاع لاصوب واجي تغداي

تنهدات وشداتو من عندها محاملاش دخل لعند نورة ويتلاقا وجه مع وجه …تنهدات ودخلات حطات ليها طبيلة على رجليها وقالت: سيفطاتها ليك زكية

نور: طاطا مبقاش غيكون عندي ختي

ايمان: متعرف تكون عندك شي ختك مخبية

نورة: ايمان

ايمان: متخافيش اختي

عطاتها بالظهر هزات نورة لمعلقة معصبة وقالت؛كنس قصيف

هبطات تغدات وعين وسيم عليهاا مبغاتش تحيد

حسام: اييه (بهمس )اش كاين ؟

وسيم: غزالة تبارك الله

حسام: جمع راسك ا وسيم مناقصناش صداع

زكية: كولي ابنتيي ..مكليتي والوو

ايمان:كليت اخالتي …سمحو لياا

ناضت خرجات لبلاصتها فلارجوحة مغمضة عينيها وكدحرج

دازت اياام وايام دازت قرابة شهر …. الحزن مزال طاغي على ايمان نفسيتها محطمة وقلبها معالم بيه غير الله …هزوها رجليها لروضة فين ساكنة روح قريبة ليهاا كانت انيستها فدنياا وخلاتها بدون ونيس

كانت نقيطات من شتا او ريح شوية …كلسات جنب لقبر فتراب وشافت لجيهة لخرى بانت ليها عمرات بجوج قبورة …رجعات نضرها لقبر مها..كتحيد لوراق لي جابهم لعجاج

ايمان:كنتي مواعداني نكمل 18 وتعطيني كادو زوين….ولكن فاجئتيني بموتك ومشيتي حتى قبل مطفي معايا الشمعة …موتك صعيب امي …صعيييب مقديتش عليه هءهء كلشي رجع لحياتو وانا مت معااك امي …

جبدات مادلين وشميعة وبريكي دموعها على خدهاا وقالت:جيت حتى لعندك باش طفيها معاياا هءهء (مسحات نيوفها بكمها كتشعل فشمعة ) سنة حلوة يا اناا …سنة حلوة يا اناا (غمضات عينيها سامحة لدموعها تهبط )هءهء مبقات حتى سنة حلوة بلا بييك اميي …اخر عيد ميلاد نشعل فيه شمعة …طفيها معاياا عفااك هءهءهء

هبط لمستواهاا شخص مكبط بلبرد شاد ليكات فايديه لابس كويرة كحلة وسروال كحل وكاسكيط عيون عسليية وحرووف حرشيين مميزيز ولحية سوداء نطق بصوت خشن هاز لبريكي من حداهاا جر ايدهاا شعل الشمعة لي طفات بالريح وهي غارقة فدموعهاا وقال: نطفيها معااك ؟

هزات عينيهاا فييه مضببين بدموع شاد ايديها على لمادلين والشمعة مغطيها على البرد وقال: happy birthday to you

Happy birthday to you

Happy birthday to you

1…2 ..3 فففففف

_بطولة العمر ان شاء الله …واكيد ربي مغيخليكش بوحدك ولابد يجيب ليك الله فطريقك ناس مزيانين ناس يبغييوك وتبغيهم … …موت شخص عزيز ماشي معناها نهاية العالم …ربي كيبغي يختابرنا باعز حاجة عندنا …باش يشوف صبرناا وتقتنا فالله …باش منقنطوش ..بكاك حداهاا معندو باش ينفعهاا …(طل عليهاا ملي حيد نضاضر شاف عينيها الزورق والابيض كان حمر بكترة لبكا ) هاد لعينين ميستاهلوش هاد دموع كلهم

ايمان (شافت فيه كتمسح دموعها ) : نتا لولد تاه لمحمدية ياك ؟

حرك راسوو بااه واشار ليها لوراها وقال: جيت نزور لمرحومة تاع جدة …ليوم كملات عام

حركات راسها باه وقالت: الله ارحمهاا

-امين ويرحم جميع امواتنا لمسلمين …تبغي نوصلك معاياا

ايمان(حركات راسها بلا ): مزال بغيت نكلس

_نخلييك …دعي معاهاا كتر ماتبكي عليهاا

عطاها بالظهر غادي هزات عينيها شافت فييه هاز كاسك حيد لكاسكيط ودارو ورجعات كتشوف ف الشمعة لي طفات …ربعات رجليها فالتراب وطلقات القران من تيليفونها وسهاات لمدة طويلة هزات راسها وتنهدات …حسات بشتاا غطيح كتر ناضت مساخياش ..دارت القب على راسهاا وخرجات من الروضة كتسوس سروالها من الترااب …غادية فشارع بدون هدف غير غادية وصافي …رجليها كل مرة منين كدوزها

حتى كيبان ليهاا محال مخصص بالتاتو فاتوو بخطوات ورجعات كتشوف فييه …جروها رجلييها لوسط لمحال فيه عرام تاع التصاور ها لي واشم وردة لي راسم قطة كل واحد وشنو راسم …خرجات بنت من لداخل لابسة تريكو نص كم رغم برودية الجو واشمة فايديها بجوج ورد كتير

_مرحباا …شنو حب لخاطر

ايمان: شحال كديرو طاطواج

_على حسب بغيتيه ديال ديما ولا غير ستيكرز

ايمان: لاا ديما

_ختاري شنو بغيتي ونشوف

عطاتها كطالوك عااامر دوزاتو كامل مبان ليها والو علاش كتقلب الله اعلم

نطقات كاسرة الهدوء وقالت: بغيت هادي …ولكن بلا هاد لكتبة وتكون صغيرة

_فين بغيتيها ؟

حطات ايدها على فوق قلبها وقالت: بغيتها هناا

كانت حمامة هازة وردة

_ ؤكي تكااي غتقسحي شوية

ايمان: ماشي مشكيل

عرات على كتفهاا جيهة القلب وتكات على لكرسي …قربات الاخيرة بلكرسي وهي كتجهز الة الوشم باش طبعو على كتف ايمان

_علاش ختاريتي هاد لوشم بالضبط

ايمان: كيفكرني فانسانة عزيزة عندي ماتت وبغيتها تبقاا سميتها محفورة فقلبي او فوق قلبي

_ شوفي هدا راه وشم يعني ايبقاا مدا الحيااة شفتك مزال صغيرة داكشي علاش قلت ليك هكا حيت شحال من واحد كيتسرع

ايمان: غير وشمييه ..ولكتبة لتحت كتبي my dove

_ؤكي …متحركيش ايدك

بدات كتوشم كيف طلبات ايمان فكتفهاا رغم انها مقسحة الا ان عقلهاا كيدوز لحظات طويلة عاشتها مع نعيمة ..لي فعلا فحياتها كيف لحمامة البيضاء …لوشم دا ساعة تاع لوقت باش يخرج كيف تخيلاتو بكتبة لتحت سلاتها بفريخات صغار غادين وكيتزلعو على لحمامة

بقات بلاصتو حمراء مسحات بلالكول من لفووق بقات كتحرقها …لبسات عليهاا حوايجها خلصاتها بداكشي لي كانت جامعة وخرجات لقات لحال بدا كايظلام وصلات لحومة فين ساكنة مارياا وقفات كتاكد بانت ليها لخزانة عند لباب …هزات تيليفونهاا كتصوني كتلقاها طافية النمرة …

ايمان:كنتي غير تعلمي اصاحبتي

كملات طريقها كتزيد تاسف على صداقة منذ الصغر من نهار لموت مشافتها ..مساج هوا االلخر سيفطاتو ليها هادي 15 ليوم …تبسمات باستهزاء على حالها وعلى محيطهاا لي ولات عايشة فييه ..كان منعم فقط لي كيسول عليها كل مرة وخصوصا ملي غيبات دابا 20 يوم على لمدرسة كيبزز عليها كل نهار باش تجي …

رجعات لدار مع طالعة فدروج سمعات :فين كنتيي نتي !

دار عندهاا وقالت: هانا جيت شنو

نورة:كيفاش شنو سولتك جاوبيني … غابرة من صبااح لمدرسة مابقيتيش كتمشي ليهاا كتقلبي على شي موصيبة

ايمان(ضحكات ): كوني هانية منعاودش غلطك

نورة(جعراتها): ايمان راه بدييتي كطلعي فوق الراس

ايمان: نمشي فينما بغييت …ونجي وقت ما بغييت ماشي نتي لي غتربيني داباا

نورة: ماحدك سااكنة فداري غتسمعي هدرتيي مناقصنيش صدااع

ايمان : غير كوني هانية ندير الصداع تنعياا معمري نوصلك

نورة(محسات براسها تطرشاتهاا وغوتات ): قليلة الادب مامربيااش الحمااارة …تعلمي تدوي مع لي كبر منك …مي لي كانت دايرااك وراهاا مبقاااتش غتجمعي رااسك وغتكالمااي …كون ما شديتك كون راك كتلاوحي فزنقة …حساب لييك بااك غيهزك

شدات حنكها كتشوف بصدمة فيهاا وقالت: كون كنتي نتي مربية …مكنتش غنتزاد ليووم

طلعات قبل متجاوبها كان حسام دخل وجر نورة لي بغات تبعها تبرد فيهاا

حسام: صاافيي صافي

نورة:طلقنيي نوريها قلة الاداااب لي فيهاا

حسام: واش دارة راسك فمرااهقة ا نورة …ملاحضتيش راسك وليتي كتعصبي على ابسط حاجة

نورة: مكنحملهاااش احسام صافيي مكنحملهاااش

حسام :نوورة هادي راه ماشي هدرة (بين سنانو )هاديك راه بنتك

نورة: ندمت على نهار لي ولدتها

دات فودنها هدشي وهي فلكولوار دخلات لبيت سداتو وطاحت كتبكيي بحرقة كانها طعناتها من جديد

عارفة مكانتها عند نورة من صغرها ترسخات هاد لهدرة فراسها ولكن باش تلوحها ليهاا فوضعها لحساس هدشي فات لحد ولكن جهدها مكافيش ومعارفاش شنو دير حالياا

مشات لبلاصتها كتمسح فدموعها وحنكها سخون بطرشة لي تعطاتها

سمعات دقان فلباب مجاوباتش وقال:ايمان ندخل ؟

مجاهش الرد وحل لباب..طل براسو بانت ليه كالسة فبلاصتها كتحك فايدها وعينيها فلارض

حسام:ايمان ! (جر كرسي كلس جنبهاا ) متديش عليهاا وخة

ايمان:متبقاش دافع عليها قدامي (مصات شفايفها )نقوليك واحد لحاجة !…نورة مكتبغي حد ..نورة كتبغي راسها صافي

سكت كيحرك راسوو وقال: ولكن ماحدك كتقسحي راسك معاها محدها كتزيد فزكير معاك

ايمان: ملي كنت صغيرة وهي هي معمرها تبدلات ..فصغر مكنت كنشد معاها لا ضد مكانجاوبهااش …ومع دالك مكانتش بغاني علااش ؟ عرفتي علاش ؟ حيت ولداتني مع راجل مبغاهاش

حسام(نحنح): كانت صغيرة والغلط كيوقع

ايمان (قربات وجهها لعندو ودموع جاين ): هي غلطات وانا كنخلص ..علاااش ! شنوو دنبيي شنوو

هز ايدو مسح دموعهاا وقال: كلشي غيتصلح مع لوقت …ايمان خاصك ترجعي لقرايتك 20 يوم مامشيتيش .. واش هاد لحزن لي مدخلة فيه راسك غيرجع لمرحومة …لا

ايمان (حركات راسها ): مقادراش نشوف شي حد تاني ويقولياا الله ارحمها هءهء مقدااش

حسام: ولكن لحيااة هي هادي شكون دايم …تواحد (تنهد ) نخلييك ترتااحي وغدا نهار جديد حاولي تمشي ليسي …هاد العام مخاصكش تفشلي فيه

*

حينما ترى أنّك لم تعد تهتم بأي أحد اعلم أنّه قد خاب ظنك بالكثيرين و أكثر الأشياء وجعاً هو أن تنام كل ليلة وما زال في صدرك أحاديث النهار لم تجد من تخبره بها أبداً.

*

ومن بعد ليلة اخرى كئيبة خرجات هازة صاكهاا فيه لكتوبة بملامح حزينة ساكنة جسد بدون روح ..كيضرب فيها لبرد بارد مع صبااح …شعرها كيتموج مع نسمات لبرد …ركبات فطوبيس فاتجاه الليسي من جديد حطها قبالتو وكملات داخلة مهبطة عينيهاا ماباغة تهدر مع حد …نظرا لغياابها لكتير فخاصها ضروري دوز للادارة تاخد ورقة الدخول …تلقاها لحارس العاام وقال: على سلامتناا كنتي ناوية متجي حتى يقرب الامتحان ؟

مجاهش الرد من جيهتهاا وكلس فلبيرو ديالو وقال كيقلب فلغياب ديالها : ففف اخر مرة يتعاود هاد لغياب ا ايمان مفاهمين… دنيا مكتوقفش ابنتيي الله ارحمهاا ولكن ميعنيش هدشي باش توقفي حياتك خصوصا هدا عام مصيري عندك وطني وفرووض …معليناا اخر مرة

ايمان:اخر مرة

_نتي عندك عذر او صاحبتك مارياا ضامنات معاك ولاا

ايمان: سمعت بلي تزوجات

ضحك كيطبع فلورقة : هي لي عبراات نيت

شدات لورقة وقصدات الاقسام …كانت مصبحة على الماط مع دقة فلباب كلشي دار جيهتهاا …تقدمات الاستاادة عندهاا بابتساامة وحضناتهاا بلطف غمضات ايمان عينيهاا لي غرغرو شحال محتاجة لحضن فهاد الحزة ديالهاا …ربتات الاستاادة على ايماان وقالت:الله ابدل لمحبة صبر ان شاء الله ابنتي

ايمان(بعيون كتلمع بدموع ) : شكرا

مشافت فحد فقط قصدات بلاصة خاوية كلسات فيهاا كملات الاستادة وقالت: نقراو من جديد سورة الفاتحة لام ايمان

نطقات مريم من الطاولة لي جنبها وقالت: جداها ا استادة

شافت فيها ايمان وقالت: ونتي شنو مشاا لييك هاديك مييي ميي ماشي جدة سمعتيي

_ الجدة دائما كتكون احن من الام فبعض المراات …ايمان. مريم مقصدات والو ابنتيي نقراو الفاتحة والدعاء ونكملو حصتناا

فعلا قراوها التلاميد ودعاو معاها بالرحمة ورجعو لحصتهم …الاخيرة مقادراش تركز ساهية والاستادة كتشرح كتخربق بالستيلو فدفتر

وصلات لعشرة كانت عندها ساعة خاوية خرجات لجيهة لقاعة فين تيكون منعيم لقاتو واقف كيتسناهاا كيطلو على التلاميد من لفوق

منعيم: احسن حاجة درتي ملي جيتي

ايمان: تحاجة مغترجع كيف كانت مزال

منعيم: كلشي كينسيه لوقت متقوليش هكا

تسالات الاسترااحة وهبطات كتشوف فمريم جاية جيهتهاا كتخنزر فيهاا ضربات فكتفهاا وقالت: مكتاااائبة وطالعة تحابي مع صحايبك

ايمان(دورات عينيها شافت فيهاا ) مالك حسوسة يكماا غرتي

مريم: منك هههه حتى ميكون عندي ميدار ونغير منك …او منعيم كون بغيتوو من غدا نتصاحب معاه

ايمان: معروفة من زمان واكلة عليه شراوط ومدهاااش فييك الزيين قالتلييك كون بغيتوو …حتى يبغيك بعدا

مريم: منديرش فيك راسي

ايمان: تخلعت

خلاتهاا كدوي وزادت فحالها لساحة كتسناا الساعة لخرى دارت لكيت فودنهاا وايدها فجيب كتشوف فساحة الرياضة عامرة بدراري كيلعبوو شوية بانت ليها مريم دازت لفيستير تاع لبنات …قصداتها فلحين عارفاها شنو كدير تما

دخللات وفعلا داكشي لي كاين لقاتهاا واقفة مع صاحبتهاا وفمها خارج منوو الدخاان …تكات ايمان على لباب مربعة ايدها وقالت: كتنشوااي

مريم(تخلعات وخنقها الدخاان ): كح كح كح …واش نتي مريضة وليتي تابعااني

ايمان: متحشميش كمي بصحتك

عطاتو لصاحبتهاا وقالت:مكنكميش غير جربت

ايمان: باينة غير من الشدة تاع لكارو (قربات ليهاا )مشغليش فيك كمي تالحجر

مريم: وعلاش تابعاني !

ايمان(سكتات شوية) :باقة كتاكلي داك لعجب

مريم(سرطات ريقها): شمن عجب ؟

ايمان: عارفة علاش كندوي

مريم: كتجري ليا لساني

ايمان: معندي بيك غراض بغيتو لياا

مريم: مبقيتش كنديرو

ايمان(ساطت): شوفي راه قلت ليك معنديش بيك غراض …بغيتوو اناا

مريم: مممم…شحال بغيتي

ايمان: على حسب شحال كتاخدو

مريم: بغيتي تاكليه ؟… كتعرفي ربيع مول زريعة (حركات ايمان راسها باه )قوليه يعطيك قرطاسة…10 دراهم مغدير ليك والو خودي 20 درهم وخلطيه مع رايبي

صاحبتهاا ورا ايمان خرجات عينيهاا فمريم لي كتهدر بتقة وهي كتشوف ف ايمان لي كانو عينييها ياااائسين و فوقت ضعف كبير باغة تلتاجئ لايي حاجة تنسيها

ايمان: مم وخة

مريم: مشفتيني ما شفتك

خرجات من لڤيستيير ومن المؤسسة مشات عند ربيع وقفات حداه وقالت: ربيع بغيت قرطاسة 20 درهم

…ياله كنصوب فيهم …جي مع 2 تلقايهم واجدين

حركات راسها بواخة ومشات قرات ساعة …تلاحت ورقة صغيرة فوق الدفتر ديالها وشافت ف مريم فطبلة لخرا …هزاتهاا قراتهاا ” كليتيه ؟”

كمشات لورقة ولاحتها لتحت وكملات كتبتها

12خرجات وصلها منعيم حتى لدار ودخلات من بعدما حلات عليهاا المساعدة ..لقات السكات فالدار وقالت: مكاين حد

_لا ابنتي مغدين براا حسابني واش حتى نتي معاهم معلماتنيش مدام نورة باش نوجد ليك غداك

تبسمات باستهزاء وقالت: فين كتعرفني هي

_نوجد ليك ابنتي شي حاجة

ايمان: متعدبيش راسك غنتغدا برا

طلعات بدلات كتوبتهاا وخرجات قصدات لبحر حطات لكارطابل و السبرديلة فالرملة وقصدات لبحر وشعرها كيدي فيه الريح …استنشقات الهواء برائحة لبحر …رجعات كلسات حاطة ايديها على ركابيها كتشوف فلبحر …حتى كتبان ليهاا مارياا بلباس الشرعي فلبيج شادة فايد زوجها لابس قميجة وسروال عادي مع لحية كتيفة بقات كتشوف فماريا مكمشة عينيها من الشمش حتى هزات ماريا عينيهاا وشافت فايمان

كانت كتسناهاا تجي تسلم عليهاا كأقل حاجة لكن مارياا هبطات عينيهاا متجاهلاهاا

*

الصداقة اصعب شيء يمكن شرحه في العالم..

فهي ليست شيئا يتعلم في المدرسة..لكن ان لم تتعلم معنى الصداقة …فكن على يقين انك لم تتعلم شيئا في الحياة

*

بنظرة خالية من اي احساس مبقاتش كتفاجئ باي حاجة غتوقع من هنا لقدام ولكن استغربات …واش الزواج كيبدل لهاد الدرجة

بين ليلة ونهار تحجباات ..تزوجات بدلات النمرة …واش لهاد الدرجة كتبان خطر على حياتها الزوجية ولا جاوها توصياات من واليديهاا

شنو ممكن يقولو ليها فوتي علييك ديك بنت لحراام وياك تدوي معاهاا ولا دخليها لدارك ! ولا يكون قالو ليهاا خافي على راسك ممكن تديه لييك …علاش انديه …مونيكة هواا ؟

اش هدشي وليناا كنشوفو….دغيا نسات الصحبة ديال 10 سنين …ولكن منلومهااش مارياا انسانة كتسير مكتخيرش فقراراتها هي انسانة كتنفد الاوامر فقط

قطعات حبل استنتاجها ف عقلها وتمتمات فشفايفها :الله يسهل عليك

كانو بعدو على انظارها وبقات هي مقابلة مع مواج لبحر حتى شدها الجوع …جمعات لكارطابل وناضت فاتجاه سنااك شحال كلسات فييه مع نعيمة خدات ليهاا پلا كتلعب بلفرشيط مرة تاكل مرة تسهاا ..حتى تجر لكرسي قبالتهاا وقال: واخيييرا شديتك

ايمان: مراد شنو كدير هنا

مراد(حط لبلا ديالو قدامها ) : كنتغدا …صافا اش خبارك …شهر داز على اخر مرة جيتي

ايمان: الظروف

مراد(باسف ): شفت لبوسط ديالك فلفيس…الله يرحمها

ايمان: امين

مراد: واش عرفتي شحال صونيت ليك

ايمان: عرفت …غير مكنتش قادة نجااوب …شي جديد

مراد: لجديد هوا علاش كنت كنصوني مدة هادي

ايمان: شنو

مراد: لمنتج لي قلت ليك بغاكم ديرو ديوو نتي و انس

ايمان:ممم

مراد: سمع صوتك فداك لكوفر اللخر ديال ” قلبي ميساعفنيش “

ايمان: فكرتيني فيه مزال كنتسالك فلوسوو شفتي شحال واصل فيوتوب !

مراد: غنعطيك رزقك غير صبري

ايمان: شنو لمطلوب داباا

مراد: عرفتي الى سجلتي شي حاجة بصوتك وصرعتيها …فين يبانو شي برامج ولا حتى طلعي طوندونس ا ايمان

ايمان: معنديش لخاطر لهدشي امراد

مراد: حاولي تفهمي هدشي راه مصلاحتك نتي اولا اول كوفر ليك مع منتج عاد بادي او فلباج ديالوو يقدر يدير ليك حتى. فيديو كليب على حسب الامكانيات وهانتي درتي اول خطوة لساحة …اما غير بيناتناا ا ايمان راه باش نوصلو خاصناا بزااف تاع لوقت …انا مزال كنقراا لموسيقى باش يوليو يتيقو بيا الفنانة نكتب ولحن ليهم غيخصنا طلعة مع شي فنان عاد بادي

ايمان: يعني نتا بغيتي مشروع على ظهري

مراد: عصفورين بحجر واحدة باني نتي للغناا من بعد اول اغنية نخدمو عليها بجوج …نتي غطلعي وغنطلع معااك …شنو بان ليك(هز ايدو)ماشي حلمك هدا

بقات ساكتة كتفكر وقالت: صعيب نوصلو لهادشي لي كتقول هنا امراد

مراد: تحاجة ماصعيبة لكنتي باغة لحاجة من قلبك …شوفي رِضوان ! كان عارف راسو ايوصل لعالمية وغينتج ل شاكيرا او لعرام تاع لفنانة

ايمان: اي واحد كيبدا من الزيرو وشتي رِضوان هو غيقلب عليا باش يدير ليا اغنية (بافتخار )عقل عليها

مراد(ضحك )داباا نتيي وليتي كتهتري دغيا وصلتي لرضوان خليك مع صديقك مراد هههه

ايمان: ميي الله ارحمهاا كانت كتقوليااا …تمناي ابنتيي غير لخير حيت مكتابنا شي مرات كيتخاد من داكشي لي كنفكرو فييه

مراد: فعلا الاقدار تأخد من افواهناا …وعنداك تنساي ايام الزلط معاياا ههههه درت معاك مجهود

ايمان: مكنساش كون هاني ههه

مراد: ضحكي ضحكي …لحياة قصيرة ا ايمان شنو قلنا نمشيو

ايمان: زربتي علياا دابا !

مراد: عرفتي شحال وهوا مبرزطني ..نتاصل بيه

ايمان: تاصل

تاصل بييه وهي كملت غداهاا او وشافت ساعتهاا كانت 2

ايمان: مراد راني داخلة مع 4

مراد: صافي غنمشييو داباا نهدرو معاه ويقولينا شنو كاين صافي

ايمان: وخة نوض ياله

خلصات غداهاا وخرجات حتى تبعها …شدو طاكسي بجوج ومشاو لفين دار مع المنتج

طلعو فلعمارة كيتسمع صوت لكيتار خدام لقاو باب ديال شقة محلول

مراد: السلام عليكم

تقد شاب لجيهتهم وقال:اهلا اهلاا (شاف فايمان)ايمان ؟

تقدامات ايمات مادا ايدها وقالت:سلام

مراد: هاهي جبت ليك لموهبة هههه

خالد: مرحباا ..جيتو فوقت كنت غير كالس

دخلهم لكلسة فيهاا فطويات ولداخل كان ستوديو تسجيل الصوت كان غرفة التحكم فالصوت ولموسيقى كيفرقهم زاج مع غرفة الصوت فين كيغنيي باش يكون الصوت نقي

خالد:فايت سمعت صوتك …ولكن حيت كانو لانستريمون بزاف(الات موسيقية)كان صوت ضعييف…بغيت نسمعو نقيي ..باش نعرف لخامة تاع صوتك …حيت كاين الصوت لي كيجي معاه الغربي او لعربيي او الهندي …يعني ماشي كاع الاصوات كيغنيو نفس الريتم فهمتيني

مراد: نقدر نضمن ليك بلي ايمان صوتهااا جوهري …كيغني اي خامة بغيتي طبعا مع التدريبات …تقدر تغني باي لحن بغيتي

خالد : داكشي لي بغيت نعرف

ايمان: نغني من اختيااري ومن بعد الى عجبك نقدر نغني اي حاجة بغيتي

خالد: كتقني الغنا بشي لغة اخرى

ايمان:الشرقية …الاسبانية …والتركية

مراد: وعاشقة لرااي

خالد: اصلا لموجة حالياا مركزة على اغاني الرااي …اجي معااياا وقولي شنو بغيتي تغنيي باش نضبط كلشي هناا

دخل معاها لغرفة قاد ليها لميكرو ولكاسك على ودنهاا وقال: هنا غطلق ليك لموسيقى باش تغني معاها داكوغ

حركات راسهاا باه

وخرج ومراد من ورا الزاج الازرق كايدير ليها اشاارة بمزيان بايديه حركات ليه راسهاا بمزيان …كلس خالد مقابل مع لبيسيات وقرب لميكرو عندو وقال: كيوصلك الصوت مزيان

حركات راسها باه …طلقات لموسيقة تاع الاغنية من اختياارها

غمضات عينيهاا مع لحنهاا

حالد: شنو السر حتى ختارت هادي قدييمة

مراد: عاد توفات ليها مهاا

خالد: اااه

ايمان(مغمضة عينيهاا مع صوت الموسيقى حتى بداات ) : توحشتك يا لميمة صبران مافاد صبري…صبران مافاااد صبري

كي نشوف صورتك الزينة ينوح ويضياق صدري وهااا

خالد(بانبهار) : واوو

ايمان: وكاااع ماننساك ها لعوينة اااه مكوي وهدا قدري ااه مغبوون وهدا زهريي (ارتاجف صوتهاا) لفراقك عجب بياا ..الحمام بطل يجي واااه (بصوت عاليي ودموع هبطو )وهداا ما كااااان مااا كااان ….ما كاااان من داااك زمااان

هداا مكاااان هءهء

حيدات لكااسك وكلسات فلارض شادة صدرها كتبكيي

ايمان (بصوت عاليي): علااااااش وااااااااااع وااااااع هءهءهءه وااااع

مراد بغا يمشي وحبسو خالد

خالد:خلييهاا لعافية لي فيها مغطفااش تاتخرجهاا بلغوات

تكاات فلارض كتنخصص من بعد مبح صوتهاا بلغوات دخل مراد شدهاا وقال: ايمان رجوع الله

مقدراتش تغطي دموعهاا خرجات بزربة من تما هزات لكارطابل وخرجاات بدون وجهة غير غادية كتبكيي وكتمسح دموعهاا فالطريق …حتى وقفات كتنهج وكترعد …قصدات ليسيي وفبالها غير شي حاجة تغيبهاا على ألمها لقات ربيع حال حطات عشرين درهم فوق لكونطوار بالزعفة بلا متهدر

ربيع: تاخدي شي حاجة معاهم

ايمان: رايبي

مد ليها رايبي وجر بايدو ورقة مغلفة شي حاجة لداخل وقال: لكنتي اول مرة متكتريش لايسطيك …

خداتو من عندوو مهدراتوش قلبات لورقة لقات فيهاا كويراات معجنين لونهم بحال سلو

كلاتهم بلا متفكر كدوزهم برايبي حتى كملاتوو ودخلات ليسي …مدازتش نص ساعة حتى بداو ودنيهاا كيصفروو والرؤية بداات كتحرك فعينيهاا كلشي كيبان ليهاا كيلعب قدامها …داز ولد من قدامها كيتمشا عادي ولكن فعينيها كيشطح …محسات حتى بدات كضحك باعلى صووت لي داز كيشووف

_ايمان كلات لمعجون يمكن

_اويليي

_شوف عينيها كيحمرين والله تفعايلو هادوو

بقات فالساحة كتردد الاغنية وكتبسم مرة مرة حتى صونات الربعة جرات شكاارتهاا غادية و كتغني …كتحك فعينيهاا وتساطح مع دراري …

لمعجون هوا نوع من لمخدرات لي يقدر يصنعو اي واحد ابرز مكون فيه هوا لكوزة ونهار كيبغيو ينشطووها كتر كيزيدو فيه زريعة تاع لكيف كيولي بنادم غادي كي لحمق فزنقة غير باش ينشط واحد السااعة

كلاتو ايمان بلا متعرف ب اشمن روينة مصاوب

دخلات القسم لقات كلشي داخل بان ليها منعيم واقف حدا الصبوورة اشارت ليه بايدهاا وتوازنها شداه بزز توجهات لاول طاولة لقات خاوية رمات تقلهاا عليه

منعيم:ايمان …مالك؟

ايمان:هههههه كيجيتك ….شوف متهدرش معااياا (شافت فمريم كتخرج عينيها فيهاا) لاكس ديالك كتغير

منعيم(حط الطبااشير وقرب لعندها ): شنو كليتي …ايمان دوي معاياا

ايمان:مكليت والوو (مسحات عينيها )هههههههه مالك كتشوف فيا هكاا

منعيم: ايمااان وكضي …شنو كلات هادي ؟

_معرفت ا استاد حتى فساحة كانت هكا

منعيم(بغا ينوضهاا وهي لصقاات ) نوضي معايا نغسل ليك وجهك …ايمان

ايمان: لاااااا مبغيتش نفييق بغيت نبقا مغيبة …مشغلااااكش غير خلييني

منعيم: ماشي ديالك هدشي

ايمان: وغير خلينيي …سير قرينااا هههه وسير فففف راسي كيدور

منعيم (خبط الطبلة): ايمااان

ايمان(دفعاتوو ): متغوتش علياااا عطيوني بالتيساااع مشغلكمش فياااا …انا بغيت نمووووت مشغلكش فياا …تالضحكة مخليتوني نضحكها

منعيم: ايمان سكتيي …سكتيي

_استاد نعيط لمدير راه حالتها فشكل

منعيم(خنزر فيه)كلس وسكت

هزات شكارة وزفات علييه وقال: نوووض قولهاا نوووض …اش يكون هاد لمدير بغا يخلعني ….انا رااه مي لي ولداتني ومكتحنش مممم

سكتهاا منعيم بايدو بدات كتجر لييه من ايدوو وتغوت كضرب هناا وهنا ولات هاايجة

سمع لمدير لغوات من لتحت وتم جاي كيجري هوا و الاساتدة لي مجاورين القسم

ولات كترد داكشي كحل وقلبها كيضرب بغا يطرطق

منعيم: ايمااان …ايماان اش كليتي دويي اش كليتي …جيب لياا لماا دغياا

ناض ولد كيجري لبيرو هز قرعة داها لمنعيم لي ترخات ليه ايمان فايدو كتشهق شادة على قلبهاا وعينيهاا تعرقوو بديك لحمورية لي فيهمم تجمعو عليها الاساتدة ولمدير …

منعيم (شافها كيف ولاات ): عيطوو لومبيلوونص

مزال مكملهاش حتى ترخات فايدوو مغمضة عينيها

*لم يعد في داخلي وطن ألجأ اليه

كل ما بداخلي غربة

ومازلت اردد …لا بأس ..لابأس

وكل البأس في قلبي

*

غرفة الاسعاف حلات عينيهاا فالسقف وكترجع تسدهم …جسدها مبنج وتقيل عليهاا ..دورات وجهها كيبان ليهاا سيروم معلق فايدها تسالا …كترجع شنو وقع ليهاا كيطيحو لحظات قلال فبالهاا … دخل لمدير معاه منعيم كيشوفو فيهاا نطق لمدير بغضب وقال: داكشي لي بقاا غير لمعجوون ضربيه وتجي تحيحيي علياا فلمؤسسة

منعيم: سي محمد انا متأكد شي حد وكل ليها هدشي … ايمان راه من التلاميذ المجدين فليسي وعمرنا سمعنا صداعها …ايمان شكون عطاك داكشي

ايمان: شريتوو

_هانتااا سمعتيها بودنييك بلا حشمة كتقول شراتوو …هدشي اخر مرة يتعاود ولاا غيكون الطرد نصيبك المرة جاية …مزيان تبارك الله ….غدا مغتجي الا وغتجيبيي ولي امرك ولا مغدخليش مزال …فين مهاا ؟

منعيم: تاصلنا بيهاا شوية وغتجي

_لهدرة غدا ماشي هناا …انا مشيت

خرج مخلي منعيم كيسوط وقال: فين كان عقلك ملي كليتي داكشي شنوو

ايمان:كنت بغيت نساا همي شوية

منعيم:ونسيتي

ايمان: تحاجة متنساات ،شحال وانا هناا

منعيم: دابا راه السبعة تاع لعشية …من 4 ونتي هناا

ايمان(حركات راسهاا) نورة قلتوها ليها ؟

منعيم: صونيت لقيتها فشي اجتماع …شرحت ليها لوضع قالت ليا تخرج من لخدمة وتجي

ايمان: كون قلتي ليها ماتت غيكون نفس جوابهاا

منعيم: بلعكس(حك لحيتو )تخلعات علييك …انا شرحت ليها لي كاين باش متجيش تصادف مع لمدير هنا حتى تهدري معاها

ايمان: مممم

تحل لباب من طرف لفرملية وموراهاا نورة بشعر مطلوق فيست وسروالها فلخضر مع قميجة بيضة كتبان كلااص ..داخلة مخنزرة كتبان ليها ايمان كالسة ولفرملية كتحيد ليها الشوكة ديال السيروم ….تسناتهاا حتى خرجات وقالت: تبعيني لطموبيل

مشات كتقرقب بطالونهاا فلكولوار ونطقات ايمان كتهبط تريكو : خافت نييت

منعيم: سلكي وهبطي راسك نتي لي غالطة هنا

ايمان: بحال ديما

حاولات تنوض وداخت شدهاا سندها عليه خرجو من سبيطار لقاو لحال غادي كيظلام ولمغرب كيادن

وصلها لطموبيل بقا شاد ايدها مبتاسم وقال : متنسايش تعلميني مل توصلي (مد ليها لكارطابل )وخة

حركات راسها باه ..حلات طموبيل كلسات حداها وسدات ..تحركات نورة بطموبيل كتغوت وايمان مربعة ايديها وساكتة

نورة: صاافي وصلتي لسطاج لمعجوون ابنت لحراام تقاداو ليييك الكلبة باغة تشوهينيي اااه ليوم السبيطار غدا لكوميسارية …بغيتي تشوهيني مع نااسي ورااجلي لي خير منوو مخلييك تسكنيي معايااا باااك لي جد اصل موو عمرو تفكرك محشاهااش لييك …هدشي لي يستااهل منك داك ولد الناااس ….كيفاش بغيتيه يسكن معاه حشايشية ابنت لحرااااام دويي الشمكااارة …علم الله واش حتى لكاروو وشرااب كتنغمي عليهم نتي وداك الرااي لخاامج ديالك …باغة تغنيي مزياان تشدي لحرفة من دابا شرااب والسسكرة باش يلقاك لكبااري واجدة …يبقا لجد امك غير هزان الرجلييين

وصلو لدار وحرف واحد منطقاتش بيه ايمان غير كتسمع كتسجل …كتزيد تحقد

هزات لكارطابل ديالهاا داخلة لدار مدوخة وراسها كيزدح ونݣير نورة وراهاا تدخلو وسط الدار بان ليها حسام هابط محسات غير بلكارطابل مجرورة من ظهرهاا

نورة: طلقي هاد زبل نشووف

بدات كتجبد وتلووح فلارض زلعاتها كاملة وهبطات هزات التيليفون ولكييت قطعاتهم اما التيليفون لاحتو فلارض وشتفات عليه بالطالوون

ايمان(بصدمة): شنووو درتييي شنو درتييي (دفعاتها )واش نتي مريضة فيه تصاوريي وتصاور ميي

نورة: غاتسكتي ولا غنصورها لييك فكمااارتك الشمكاارة

ايمان(بدموع): نتي بزااف عليك تكون ام نتيي ماشي من حقك تهرسي ليا تيليفوني ماشي نتي لي شاريااه لياا هءهءهء واش مريضة فراسك شنو درت ليييك باش مكاتحملينيش لهاد الدرجة

نورة: حيت نتي وحدة نكاارة لخير

ايمان: اشمن خير درتي فيااا شنوو جبتيني لهاد الدنيا باش تشبعيني سم هدا هوا لخير (هزات صبعها فوجها )مرة وحدة فحياتي عمري عقلت علييك فييه فرحتي معاياا واش نتي بناااادم حيت بزاف عليك تكوني ام

بغات طرشهاا وشداتها ايماان ايدها كتبكي وقالت: انا راه عمري نسمح ليكم عمري فحياتي نسمح ليكم

هزات تيليفونها من لارض مشخش وطلعات كتبكي بهستيرية ..تطاحت فدروج ورجعات ناضت

مشات لبيتها مدمرة عيات تشعل فداك تيليفون تهرس …كتسمع غوات نورة لتحت شوية حتى حسام كيغوت …مبغاتش حتى تسمع مشات لدوش هازة فوطتهاا عينيها غيتفركعو بلبكا …دخلات تحت رشاشة كتشهق …كتشوف فعروق ايدهاا وكترعد …حركات راسها بلا رافضة لفكرة وحطات ايدها على لوشم لي باقي كيضرها شوية بلاصتو مزاال حمرة …لوات عليها فوطة …طلات براسهاا مكاين حد وخرجات لبيتهاا …سدات ومشات لماريو حسهم تقطع مبقات كتسمع والو..جبدات حوايجهاا ونيوفها مخنوقين بلبكية..حلات لفوطة وتحل معاها لباب على غفلة هزات عينيها ف لباب وشهقات كتغطي فجسمهاا كان حساام لي دغيا دارك لوضع وخرج اما هي كلسات كترعد

‎مشات بجري سدات لباب بساروت من لداخل وكلسات كترعد من داك لموقف هوا لي بقا خاصهاا …لبسات حوايجها دغياا وكلسات فلارض شادة تيليفون كتحيد فلاكارط ولكارط ميموار دارتهم فلمجر ولاحت ما تبقا من تيليفون

‎جاها جووع ومقادرتش تشوف وجه نورة…عرفاها العشرة كتكون نعساات ..حلات لباب وخرجات لقات الضواو طافين …نزلات حفياانة لكوزينة شعلات الضو وجبدات لي تقدر تااكل

‎كتفكر تمشي ولكن فين وباش ! عندها فجيبها صريف قليل من لي كانت كتعطيهاا نعيمة ولي كان كيعطيها مراد مرة مرة ..مكافيهاش حتى لكرا ليلة وحدة

‎حطات لفورشيط كتنهد …لاحت عينيها جيهة لباب بان ليها حسام داخل هبطات عينيها باحراج

‎حسام: اايمان

‎ناضت خارجة: تصبح على خير…مرة خرا دق لباب عرفتها دارك بلا متمن علياا گلاسي معاكم مسألة وقت وصافيي معمركم غتشوفوني مزال

‎حسام: گلسيي من لهدرة ا ايمان…وگلسيي

‎گلسات مشا عمر كاس تاع لما وگلس قبالتها وقال: سمحيلياا على دخلتي قبيلة ..تاني حاجة انا ماغانمن عليك والو النهار اللول قلت ليك هادي داركم

‎ايمان: شكرا

‎حسام: حمم بغيت نقول شي حاجة وخفتك تفهمي غلاط ؟

‎ايمان: شنو

‎حسام:علااش (حط ايدوو على تحت كتفو بشوي ) وشمتي ؟

‎ايمان (تحرجات حيت اصلا لوشم جا فوق صدرها قدات تريكو لي لكول ديالو عريض ) : بغيت وصافي

‎حسام: متبقايش ا ايمان تاخدي داكشي …غيخرج عليك معند لمعجون ولا لحشيش باش يفيدوك غير نصيحة مني

‎ايمان: عمري خديت شي حاجة …اول مرة واخرها ..ربي مبغانيش نعاودها داكشي باش تمرمدت فيها

‎حسام: حيت ربي كيبغييك ..(مد ليها تيليفون فوق الطبلة بقات كتشوف فيه)خودي هدا

‎ايمان(دفعاتو لجيهتوو ) : لااا شكرا

حسام (قبل متهز ايدها حط ايدوو عليهاا ودفع التيليفون لجيهتها وخلا ايدوو ) : ياك قلنا حنا صحااب ومبيناتنااش لا وشكراا

‎ايمان(جرات ايديها من تحت ايدوو) : نورة فراسهاا !

‎حسام: نورة على حسابي …ولات عصبية بزااف …هدشي انا ولا كيمرضني

‎ايمان: غير نمشيي وترجع ناشطة متخافش

‎حسام: هدا طبع فيهاا من زمان وغادي داكشي وكيتزاد …عيت معاها باش تشوف طبيب الاعصاب ..وليت خايف حتى على نور منها حيت ملي كتعصب مكتبقاش عاقلة على راسها

‎ايمان: متخافش على نور …هاديك بنتها معندهاا باش تاديهاا كون هاني

‎حسام: ونتي ماشي بنتهاا

‎ايمان(ضحكات باستهزاء ): انا غلطتهاا …صعيب تعتابرني بنتهاا

‎حسام: لمهيم خودي تيليفون وخة ديجا قلت ليك خصاتك شي حاجة او بغيتي تهدري مع شي حد انا موجود

‎ايمان: شكرا …تصبح على خير

‎ناضت غادية بلا متهز التيليفون شد ايدهاا او حطو ليهاا وقال: تعياي تنكري …كتشبهي لنورة فقسوحية الرااس

‎ايمان: كاين فرق بزاااف

‎شداتو ومشاات محسااش بنظراتو تابعينها وقال بهمس : بزااف فففف

*

‎الغد كانت گالسة مقابلة مع نورة فمكتب لمدير

‎_شوفي امدام لمرة جاية مغنرحمهاش …هادي راه مؤسسة تعليمية ماشي شاارع …كنا كنفتاخروو بيها تلميذة مجتهدة ونقطها عالين تصدمنا بهاد الفعل متقبلناهش

‎نورة: هدشي اخر مرة يتعاود ا استااد

‎_لمرة جاية الى لقينا عليها ابسط حاجة غدوز لمجلس

‎التأديبي …دابا هاادي نغمضو عينيناا

‎نورة (مرضاتش ) : صافيي

‎_مع السلامة

‎خرجو من الادارة ونورة كتنكر: مزيان تبارك الله وليتي تشمتي فينا عباد الله كالس كيتنفخ عليا بحالا عاطيني خلصة لشهر …سمعيني ..اخر مرةة ..لمرة جاية متعرفيني منعرفك

‎خلاتها فلكولوار ومشاات بقات إيمان متبعاها بعينيها تخرجات وقصدات لقسم كلشي كيشوف جيهتها وكيتوشوش عليها

‎طلعات لقسم وكلسات فبلاصتها كتسناا لكل يدخل ..تمات جاية صاحبة مريم وكلسات حدا إيمان

‎آية: ايمان لبارح واش كليتي كاع داكشي لي خديتي

‎حركات ايمان راسها باه وكملات اية هدرتها: عندك الزهر مدار ليك داكشي شي موصيبة … راه ربيع كيدير فيه لحشيش

‎ايمان: هاد لهدرة مالك مقلتيها لبارح

‎اية: عفاك تبقا بيناتناا …شوفي بعدي من مريم والله …انا معرفتش شنو بيناتكم حتى حاقدة علييك ولكن بعدي منهاا

‎ناضت مخلياها كتحك فوجهها ربعات ايدها وكالسة حتا دخلات مريم شافت ايمان ومشات لجيهتها

‎مريم: باقي عندك لوجه ياختي

‎ايمان: حمدي الله محطيتكش نتي وداك صحيبك

‎مريم(جمعات الضحكة ): عرفتي الى مشيتي حتى جبدتي سميتو عمر النهار الزوين تشوفيه

‎ايمان: حساب ليك غتخلعيني ! حيت مصاحبة مع شمكاار ! تتء غير معنديش فين نزيدك …اما لدرتك فباليي … بفف والله متخرج ليك سالمة ابنت جميلة …اه بغيت نسولك …عمرك مشيتي زرتي باباك فلقبر !

‎مريم(باستغراب ): شنو وصل بابا لهدرة ؟

‎ايمان: مرة مرة فكري ماماك تزورو …قبرو توسخ ولحجر مزلع …من نهار دفنتوه مزرتوه حشوومة….تقول ماشي بااك لي ميت

مشات لبلاصتهاا دخلاتها سوق راسهاا كلسات وراهاا كتفكر امتا اخر مرة زارت باها ..توفى ملي كانت مزاال فلمدرسة يعني عاقلة عليه …تقريباا عمرهاا زارتوو..حتى مها عمرها عقلات عليها قالت غادية نزور بااك

سكتات مطمرة على راسها اما ايمان كان الدرس بادي من بعد جلسة توبييخ ليها من عند الاستاد على فعلتها لباارح …شادة دفتر وكتخطط فييه بدون هدف تشرط هنا وهناا وتحاول ترسم شي حاجة وتسهااا مكيرجعها غير صوت الاستااد كيطلب منها تنتاابه

_ايمان ..شنو كنت كنقول هنا !

ايمان(شافت فالسبورة وشافت فيه ): معرفتش

-تنهد وقال: راه حنا فدرس مهم زعمة خاص شوية تاع التركيز (حيد ليها ستيلو من ايدها ) انتاابهي …مرة خرى اتخرجي

ايمان: نقدر نخرج

_كيفاش !

ايمان: بغيت نخرج …نمشي ؟

_ايه خرجيي ياله غنقيدك غائبة

ايمان: معنديش مشكيل

جمعات دفتارها وهزات ستيلو وخرجات تحت صدمة الاستااد لي بقا غير كيشوف فيهاا …

ملي صونات السااعة كلشي غادي خارج نطقات مريم وقالت: استاد مقيدتيش ايمان غائبة

_نتي حاضرة فلقسم وغائبة شنو لفرق

كلشي ضحك وخرجات هي مقروصة لقات منعيم فطريقها وقال: فين ايمان ؟

مريم: معرفتش

تجاوزاتو وبقا متبعها مشا عند الاستاد عاود ليه شنو وقع فالقسم وخرج ف الاستراحة تاع 10 كيقلب عليهاا لقاها كيف عادتها مبعدة لتيساااع فساحة السپور كالسة فوق لكرسي مكالية ظهرها مع الشجرة دايرة لكيت ومغمضة عينيها …بقا مدة كشوف فيهاا قبل ميقرب ايدو ليهاا حيد ليها لكيت وحلات عينيهاا فيه وتقدات فلجلسة من بعدما كلس حداها

ايمان: محسيتش بيك

منعيم: اش كديري هناا …معندكش لقراية

ايمان: معنديش لخاطر لوالو امنعيم مبقيت قادة نعطي فوالو

منعيم: عندي ليك لحل (بطنز )تزوجي بحال ماريا

ايمان: لقيتي ليا راجل ههه

منعيم: نتزوج بيك انا نيت علاش نضيعو لوقت وحنا كنقلبوو

ايمان : مممم شحال تعطيني فالصداق

منعيم: لي بغيتي …نكريو شي دار جنب لبحر !

ايمان: كيعجبني لبحر تاع لمحمدية

منعيم: صافي مشات

ضحكات وقالت: كترة لهم كضحك

منعيم:ضحكي راه دنيا قصيرة

ايمان: قصيرة غير على حبابنا اما لي معندنا بيه عرااض طويلة عندو

منعيم: نوضي تقرااي من لفلسفة

ايمان: هي لي عندي داباا …مقداش امنعيم والله معنديش الجهد نركز ماشي لخاطري حاولت والوو

منعيم: زيدي حاوليي حتى توصلي لداكشي لي بغيتي واش حساب ليك شي حد هنا معندوش لي يكفيه من الهم ؟ …راه تواحد مهااني …اش بان لييك نهار لحد نديرو خريجة لبحر ولا نضربو دويرة بلموطور بحال ديما

ايمان: معرفتش

منعيم: لجو زوين مرة مرة لواحد يشم لهواء نقي

ايمان: ان شاء الله

منعيم: نوضي لقسمك ياله براكة من لعكز

إيمان: نوض

غادين فطريق وقال: بدلتي تيليفون

ايمان: تيليفوني تهرس هدا غير ديال راجل نورة

منعيم: متساليهش بعدا انسان واعي

ايمان: ممم …انا مشييت

بعد يوم داز غير بزز بحال كاع الايام لي دازت مؤخرا …كالسين مجموعين على لعشا شي مكيهدر مع شي ..كتسمع غير صوت لفرشيط كضرب فطبسيل او نور كتسول على شي حاجة ..

نورة: غنمشي نعس راسي كيضرني …باقة دوليبران فلبيت !

حسام: باقة

نورة(شافت فايمان): ملي تسالي ديري طباسل فلماشين حتى تشلليهم

طلعات مخلياهم كدور فداك طبسيل تاع ليباط ولعقل ساهي

نور: ايماان …توحشتي لميمة !

حسام: نوور

نور: نعاام

ايمان: اه توحشتهاا …ونتي

نور: حتى اناا

تنهدات ايمان وناضت هازة طباسل اما حسام شد بنتو وداها لبيتهاا ..جمعات طبلة او لكوزينة او طلعات لبيت…غير كتسدو كتشدها لوحدة ولبكية والقنطة كلشي كيتخلط عليهاا ملي كتشوف لبلاصة خاوية ومكاينش لي تحضنها وتحك ليها شعرها …بقا غير مخدة وتسبييح وزيفهاا كتشموو حتى طارت منو الريحة …كتعنقهم وتنعس

كانت مشعلة ضو خفيف فلبيت…تحل لباب بشوية ودخل كيخطوي لجيهة السرير ديالهاا ناعسة قدامو فتاة طرية بارزة فأنوثتها …شعرها كان طايح على لمخدة لابسة

دوني وشورط ولغطا طاايح بحكم لبيت كان دافي لوشم باين فكتفها مغطياه سميطة رقيقة تاع دوني كان رؤوس تدييها مطراسين فدوني حيت مدايراش سوتيان…قرب ايدو ليهاا متردد رجع ايدو وبقا كايتمنظر فيهاا لمدة ورجع بخطوات اللور سد لباب موراه

دازو اياام ورا اياام وحالهم مزال على حالو من. غير ايمان لي ولات كتلاحظ تعامل فشكل من جيهة حسام ..ماشي خايب ولكن تعامل زوين لدرجة كيدخل الشك

واش هي محسوسة ولا فعلا شي حاجة ماشي طبيعية معرفاتش تفرق احساسهاا …اي واحد تعامل معاها بلحسنى والجميل كاتنوا حيت مولفاتش

جارة نورة الشاريو ف رفوف مرجان مركبة نور فيها وايمان قدامها …لاخيرة غير كتشوف وايديها فجيااب كتجيها نورة انسان بعيد عليها باش تقوليها خاصني وخاصني

نورة: نور شوفي هاد لپوزل زوين

نور: وااو زوين خوديه لياا اماماا شوفي داك نوونوس نواغ زوين

نورة: نتي بغيتي ترجعي بيتك غابة هههه

نور: عفاااك

نورة: دابا ختاري نونوس ولا لپوزل

نور: ممم نونوس

هزاتوو وحطاتو ليها وقالت: شري ل ايمان نونوس

نورة: ايمان خاصها راجل

ايمان: خليتو لييك خاصني غير التيقاار (مشات لقنت لاخر كتشووف )

نورة: هاد طاطاك معقدة

ايمان شافت قدامها كيبان ليهاا كريم هاز شبكة ومهبط راسوو حتى هزو فنورة نيشان وحتى هي شافتوو …تلقاات العين بلعيين والشوفة كلها كانت كتلعن وتسب بلا ميتحرك اللسان

ايمان: اوووه واخيرا تجمعتو فبلاصة وحدة

نورة: سكتي شوية

ايمان(هزات ايدها ): مقلت والوو غير اول مرة نشوف (بركات عليها)بابا وماما فبلاصة وحدة وكلكم كتقداو اللعاب لوليداتكم …ما شاء الله باش كتعجبوني حنااان

‎

قاطعهم كريم هوا كينطق السلام :السلام …ايمان بخير

ايمان: لباس ونتاا

نور: مامي شكون هدا

نورة : ميحتااجش تعرفي …ايمان يااله نمشييو تعطلنا على حسام

كريم: السلام ديال الله

نورة(هزات حجبانها): حرام فوجهك

ضحكات ايمان وقالت: سمحوليا جمعتكم مرة خرى ههه لمرة جاية جيب مرتك ونتي جيبي راجلك ونتجمعوو فشي عراضة

نورة: راه هضرت معااك زيدي قدامي

كريم: خليهاا بغيت نهضر معاها شوية

ايمان: غير سبقيني هاني جاية

بقات واقفة مع كريم حتى مشات نورة وقال: سكنتي مع ماماك ؟

ايمان: مع الاسف

كريم: خاصك شي حاجة !

ايمان: خاصني بزاف

كريم: شنو خاصك !

ايمان: شي حوايج متعرفش ليهوم

بغا يدير ايدو فجيبو حتى سمع صوت مرتو وراه كتنادي كريم

دار لجيهتهاا وقال :هاني جااي

نجمة شافت فايمان بابتسامة صفرة: ايمان لبااس

ايمان: لباس الحمد لله

نجمة: كريم تعطلنا على ماما اتكون اميرة كتبكي

كريم: نهدرو فالتيليفون ان شاء الله لخصاتك شي حاجة صوني لياا

ايمان(تبسمات ليه ): حنا ولفنا الصدف …اما التيليفون مخدامش لينا

مشاو قدامها كتسمع نجمة كتقول : مالها اش خاصهاا ؟

كريم: كتبقاي تشدي فشي حوايج تانتي

محدهم كيبعدو مبقات كتسمع والو ولكن لحوار مستمر بيناتهم وباينة عليهاا

كتبان ليها نورة عند لاكيس كتخلص شافت فيها بتخنزيرة غطيرهاا وقفات حداها شدات فيهاا نور وقالت: غنتسنااك براا حدا طموبيل

خرجات جارة نور وفيديها نونوس لطموبيل فين كان حسام كالس حتى شافهم كلسو اللور

حسام: فين نورة !

ايمان:هاهيا جاية …غير سد ودنييك

حسام(شافيها كيضحك ): نوضتوها تاني

ايمان: عادي

شافوها جاية هازة ميكة اكتريتها سقاطة معامرااش حل حسام لكوفر حطاتها فيه ردخاتو ماشي سداتوو مجا فين يهدر حسام حتى شعلات نورة كتغوت على ايمان

نورة : غير قالها ليك راسك خرجتيي … خدامة عند بااك ولا شنو مكتعرفيش تعاوني تهزي معانا كي بناادم

حسام: راه غير صاشي ا نورة مالك فهاد لغوات

نورة: مكاين لي غيضسرها قدك احساام …مخليااني وغادية لعند داك خيناا

ايمان: هدشي لي كياكلك داباا غير حيت وقفت معااه …بغيتي نكروو كيف نكرتيني

حسام: شكون

ايمان: كريم عيط ليا واش منوقفش

نورة: الى بغيتي سيري عندو ياله توصليي

حسام: نورة باركة من تخربيق راه عيقتي

نورة: عيقت ؟ اييه اسيدي مزييان نقص منيي باش لالة ايمان كتقلقش يااك …” نزلات من الطموبيل و زادت مغددة”

حسام: نووورة …نورة ..تء

ايمان: تبعهاا انا غنمشي عندي شي غراض

حسام: كلسي ا ايمان

هبطات وسدات لباب وقالت: انا مشييت …قوليها لي ديتو منك انديه من كريم راكم بحال بحال

_

خلاتو تبعها كيتغاوت معاها اماا هي قطعات الطريق وزاادت من شارع لشارع حتى لقات راسها مقابلة مع لبحر رجليها ضروها بالطريق …رسلات مساج ل منعم …مبغاتش تبقا بوحدها حيت عاد مكتزيد تأزم

كلسات فوق لحجر مقابلة مع لبحر والغروب قريب …مكرهاتش تلوح حوايجهاا وتلامس بشرتها برودية لماا فهاد لجو فيقهاا من هدوئها منعيم لي كلس جنبهاا فايدو تيرموس او كرطونة بيضاء صغيرة وقال: سلام

ايمان:اهلا

كب ليها وليه لقهوة وحطو لكرطونة لي فيها بتيبان سويس مزال سخوون

ايمان:شكرا

من بعد مدة وهوما كالسين شافت فيه وقالت:مالك

منعم :والو علاش !

ايمان:ملي كتسكت بزاف كنعرفك كتفكر فشي حاجة

منعم:شحال وحنا كنعرفو بعضياتناا دابا ؟

ايمان: شي ربع سنين دابا ملي كنت فلكاطريام

منعيم: ويييه دغيا دازت…حمم ايمان

شافت فيه مكمشة عينيها من لبرد لي كيضرب فوجهها : نعام

منعييم: كنبغي شحال من مرة نهضر معااك و كنقول ماشي وقتها ماشي وقتهاا ولكن الى بقيت ساكت مغتوصلش وقتها

ابمان: شنو هادي حجاية ههه ماموالفاش ليك …شنو بغيتي تقول داباا

منعيم: زعما فهاد سنين كلها لي دوزنا مبان لييك والوو

ايمان: دوختيني امنعم والله مفهمت شنو غيبان لياا

منعم: انا

ايمان(تقابلات معاه كضحك ) ونتا كتبان لياا مالك جن كتهضر بلالغاز اصاحبي

منعم: كنبغيك

*

ليس كل ما تعرفه يريح قلبك.. فبعض الأمور أجمل لو بقيت مجهولة

*

مستوعباتش لكلمة وقالت: شنو

منعم: كنبغيك ا ايمان ملي عرفتك وانا كنبغييك

ايمان(مسحات على وجهها ودوراتو لجيهة لبحر ساكتة ملقات باش تجاوب لمدة حتى نطق وقال: مغاتقولي والوو

ايمان: معرفت منقول … كنبان ليك وحدة مستاعدة تفرح شي حد …كتشوف حالتي

منعم: عادي مرحلة كلشي كيدوز منهاا وانا معاك

ايمان: منعم منقدرش

منعم: نعطيك لوقت لي بغيتي …متجاوبنييش داباا

ايمان: منعم والله لا حالتي ولا وضعيتي تخليني ندير شي تجربة بحال هادي والله

منعم: ايمان واحد نهار اتكوني فوضعية تسمح لييك تجربي …وانا بغيت نكون داك الانسان لي تجربي معاه

لقا سكاات من جيهتها معرفها فاش كتفكر حاول ينطق من جديد وقال: ايماان انا معمري غنضرك ولا تشوفي مني لعيب …عطيني فرصة …فكري انا مزربانش

حركات راسها باه مكملة سكاتها مع صوت لمواج لقريبة

منعم: نوصلك ؟

ايمان: لا غير خليني مزاال شوية غير سير

منعم: متاكدة !

ايمان: ااه

مشا مخليها مقابلة لبحر مبقا لمن تشكي همهاا مزاال …بدا لحال كايظلام عاد ناضت كتنهد.. قصدات الدار ما باغة تشوف وجه حد ولكن معندهاش حل من غير تكلس معاها

صونات فلباب حل عليها حسام وقال: تعطلتي

ايمان: بقيت حدا لبحر شوية وصافي

دخلات كتبان ليها نورة فالصالون حداها بنتها

نورة : شوفي اخر مرة تعطلي حتى لهاد لوقت …8 راه الناس كينعسو فيهاا ماشي كيدورو فالزناقي

ايمان: جيت على رجلي داكشي باش تعطلت

نورة: جي فوقاش مبغيتي …7 تلقاك فدار …نور ولات كتشوفك كديري لحاجة كتبغيي دير بحالها …عرفي شنو كديري قدامهاا

هزات حاجبها وقالت : نمشي !

نورة: سيري غبري لهدرة معاك حرام تفو

مشات طلعات لبيتهاا بدلات وكلسات كتلعب بتسبيح ديال نعيمة كدور فحباتوو ولكتوبة قدامها خاصها تكتب لي فاتهاا وتراجع اشنو داز ولكن لعقل لي يركز مكااينش نهائياا

مكانش كيحساب ليها ان موت شي حد يقدر يهرسها لهاد الدرجة ولكن لي ماتت ماشي انسانة عادية غتنساها فاياام و تعود على فراقها فشهر خاصها سنين و شوف تشوف

جمعات دوك لكتوبة كيف حطاتهم هزاتهم مكتبات ما حفضات

كيوصلها مساج من منعم كتشوف ومكتجاوبش عليه

صونات لمراد وكتسناه يجاوب حتى سمعات الو

ايمان : مراد بخير

مراد: لبااس الحمد لله ونتي

ايمان: سمحليا على داك نهار

مراد: عارف لي كاين ا ايمان مديريش فبالك

ايمان: خاصني شي فلوس

مراد: راني موجد لييك فلوسك ديال اخر فيديو …ايمان كاينة واحد الحفلة وبغاوك تغني نتي وانس مكنتش بغيت نبرزطك ملي شفت حالتك ديك نهار

ايمان: فين هاد لحفلة !

مراد: فلفيلا ديال ***

ايمان: لا لا اخوياا لمخزن

مراد: ههههه مالنا بغينا نبيعو لحشيش راه غادي نغنييو عيد ميلاد …شوفي لعااقة والله

ايمان: امتا ؟

مراد: السبت بليل

ايمان: باش مكان غنرد علييك…تصبح على خير

قطعات معااه ناضت زادت على دوني بينوار وهبطات كيف لعادة تنقب الى لقات ميتكاال …لقات ضو شاعل بان ليهاا حسام وقدات لبينوار على صدرهاا ودخلات

حسام (كيكب لعصير فجوج كيسان ): كيجيك جوع فنص الليل

ايمان(سدات تلاجة ) : كتحل الشهية

حسام : خودي

ايمان(شدات لكاس من عندو ) : شكرا، لياا ؟

حسام: عرفتك جاية …كنت فبيت نور …عندك شي حفلة نهار السبت

ايمان(كمشات عينيها فيه كتشرب من لعصير ) ممم

حسام: كان لباب محلول وسمعتك كتهدري …غتمشي !

ايمان: مزال معرفت

حسام: نغطي عليك ماشي مشككيل

ايمان: ههههه غنخاف الى بغيت نمشي !

حسام: غير باش تفداي صداع وصاافي …تصبحي على خير

طلع وحتى هي ورااه طلعت لبيتها …دخل لبيتوو لقا نورة ناعسة ومغطية عينيهاا تكاا فبلاصتوو كيتقلب وكل مرة يشوف السااعة …فينما غمض عينوو كطيح ليه صورتها فلفراش كيفاش ناعسة

يوم جديد كتبداه ايمان …تلاقات مع مراد عطاها فلوسهاا واكد عليها تجي السبت

مراد : جي لابسة شي حاجة لفريع لفاروعي … عرفتي راه كاين غير ولاد پاپي ومامي

ايمان: والله منتفاك معااك فلفلووس

مراد: دايرين معاه الفين وخمسمياا .. حاولي تجي غدا باش نقادو لبروغرام ونشوفو الاغاني لي غادي تغنيو

ايمان: ؤك بيناتنا التيليفون

مشات نيشان الليسي نسات امر منعم حتى شافتو عاد تفكرات شافتو كيتسناهاا حدا القسم تبسمات ليه وقصداتو مصبحة عليه

ايمان: صباح النور

منعم: صباح لخير مالك مكتجاوبي فتيليفونك !

ايمان : صونيتي ؟(قلباتو )كنت دايراه سيلونس نسييت

منعم: ياله دخلي

دخلات وهوا وراها لقسم كلسات بلاصتها والكرسي لي حداها خاوي ،جبدات مسائلها وكلسات ..منعم كيشرح وهي حاضيااه

كان شاب جميل شهب شوية عاطي لعين شحال من وحدة فليسي كتكراشي عليه ولكن ايمان عمرها شافت فيه بديك النظرة تاع الاعجاب …صديق لا غير ودابا حاسة الى مشات حتى رفضاتو غترجع بوحدهاا من بعد ماريا مشاات وهي من النوع لي صعيب يدير بزااف تاع الصدقات

جاتها نغزة من ظهرها وشافت فيها مخنزرة

ايمان: مريضة نتي

مريم :مكاين شي مريضة قدك …غير قستك

منعم: اييه

ضارت ايمان قدامها اما مريم نطقات وقالت: معقدة

ايمان : منبودة

مريم(ضرباتها لكتفها ): بزاف على مك …انا لي بنت لحرام ولا نتي

قبل متكملها هزات ايمان ايدهاا سيفطات ليهاا لكود ديالها نيشان لنيفهاا حيت كانت مقربة راسها لعندها غوتات حتى ناضت ايمان شانقة عليهاا وقالت: الى مسديتيش فمك غنهرسوو لييك

جا بعدهاا منعم من مريم لاخيرة لي كتغوت وتبكيي ونيفها دايز بالد_م

منعم: مريم صاافي صافي موقع والوو

مريم: اهء هء نيفيييي نيفيي

منعم: ششش صافي اجي معاياا …بقاو هنا تاحد ميتحرك

خرج مريم شاد ليها نيفها لي كيدوز بالد_م وكتبكي لي قاليه مالها كيقول غير رعفاات

اما ايمان راه كلسات كتحك فايديهاا مع بعضياتهم ودراري ولبنات كيهدرو

جبدات تيليفونها كتخربق فيه حتى شافتهم جايين …رجعاتو لجيبها وهزات عينيها فمريم بحقد

منعم: ايمان اجي معاياا

ساطت وناضت كتمشى بشوية توصلات لكولوار فين واقف هوا ومريم داييرة لقطن نيفها

مريم: والله تنقولها لمدير نتي راك ضسرتي

ايمان: قوليهاا باش نقوليهم شكون عطاني لمعجون داك نهار

منعم: كيفااش ؟ نتي امريم

مريم: والله ما اناا

ايمان: صاحبتك شاهدة …ونتي لي قلتي ليا منين نشرييه وقلتي ليا خودي 20 درهم غتجيك مزيانة …كنتي باغة تصفيها لياا…شنو داباا تمشي ولا نمشي

منعم: غبري كماارتك امريم

مريم(بدموع) من

منعم: غبرييي

دخلات كتبكيي لقسم وتبعوها حتى هوماا …

منعم: ايمان كلسي فطاولة فهاد الطاولة اا …ياسر اجي نتاا هناا

بدل ليهم لبلايص وكلسوو دراري لي كالسين عند الشرجم سمعو الحوار كانو متعاطفين مع مريم صدقو دوروها عليهاا كلشي فلقسم وصلاتو من واحد لواحد

وصل منعم ايمان حدا دار وقال: ميبقاش يتعاود هدشي

ايمان: لي جبدني كيلقاني

منعم: مجاوبتينيش !

ايمان: حتى لكانت بيناتنا شي حاجة …بغيتها فحدود امنعم

منعم: ميكون غير خاطرك (تبسم ) شنو داباا وليتي حبيبتي

ديك لكلمة جاتها فشكل مولفاتهااش وقالت: صافي عششيرتي مشات

منعم: لي عجباتك فيهم

ايمان: خلي عشيرتي حسن …انا مشييت

منعم: جاوبي على تيليفونك مرة خرا

تبسمات ليه وعطاتو بالظهر لاغية الابتساامة معارفاش علاش قبلات …واش خايفة تبقا بوحدهاا ولاا بغات تجرب حظها وتعمر لفرااغ لي عندها

طلعات لبيتهاا بدلات وكلسات فييه دارت النفس شوية تلف بدات كتراجع الدروس لي فاتوهاا من دفاتر تاع دراري لي كيقراو معااها ..وهكا داز نهارهاا ونهارااتهاا كامليين

كانت ناعسة فبلاصتهاا كان نعاس بدا كيشد فيها وبدات كتغيب فيه حتى كتحس بلغطا كيتجر عليهاا ناضت مفزووعة وغوتات قلبها غيخرج حتى بان ليها حسام فوجهها بضو لخافت لي فلبيت

ايمان (بخوف قلبها غيسكت) اش واقع (كتجر فلغطا عليهاا)

حسام؛ اش وقع ليك مالك …كنت فبيت نور سمعتك كتغوتي

ايمان(كترجف) كي كيفااش كنغوت ؟

حسام:ااه غير بغيت نفيقك زدتي غوتي …شنو حلمتي

ايمان : م معرفتش ..(جرات عليها لغطا كتمسح على وجهها بخوف )عفاك واش تقدر تخرج

حسام: نجيب لييك لماا ؟ بغيتي شي حاجة ؟

ايمان: لا لا شكرا

خرج وسد لباب خلاها كلها كترعد هي عاد بدات كتنعس كيفاش لحقات تغوت وتحلم ..واش شكها فمحلوو

بقات كالسة جمعات شعرهاا وناضت لبسات بيجامتهاا بسروال عوض الشورط رجعات لبلاصتها وهزات التيليفون كتلقا الجوج تاع الليل…رجعات لفراش مكمشة رجليها عندهاا الرجفة والخلعة باقة فيها

مداهاش النعاس باقي كانت عارفة بلي تصرفاتو معاهاا ظريف معاها بلا قيااس ولكن مطاحتش فبالهاا توصل بيه يدخل عليهاا هكاا …مبغاوش عينيها يرجعو يتسدوو بقات كالسة ومكمشة كتبكيي ..حتى صبح الصبااح …معارفاش كيفاش غتصرف تميك حتى تعرف شنو تحت راسوو

ليوم السبت مقاريا تال 10 بدلات عليهاا جمعات فراشهاا وخرجات مع بغات تنزل من الدروج تلاقاات ب حسام خارج من بيتوو بدا قلبهاا كيضرب …قرب ليها وقال: صافا ؟

ايمان(بابتسامة متوترة ) لبااس(شافتوو متوتر كتر منها وقالت)هاد ليامات وليت كنحلم احلام فشكل …يمكن داكشي باش غوت …يكما فيقت نور

تبسم بارتياح عكس اللول وقال: لا لاا مفاقتش ههه نعاسها تقييل هاديك راه باقة كتشخر ههه قارية

ايمان؛ااه

حسام: ياله نفطروو

هبطو لقاو المساعدة كتحط لفطور فالطبلة ونورة هابطة مدوشة كتنشف فشعرهاا

نورة: سعااد ..حطيتي لعصير

سعاد؛اه امدام حطيتوو (شافت فيهم) صباح لخير

_صباح الخير

كلسوو فالطبلة ..كتهز ايمان عينيها فحسام كتلقاه كيشوف ويتبسم ليها وحتى هي كتبادلو الابتسامة وتهبط رااسهاا

نورة: بب تنين جوغ فغيي اش بان ليك نخرجو شوية

حسام: لي بغيتوو

نورة: شكون حناا ههه

حسام: نتيي ..ايمان

نورة: ااه نسيتها كااع …بغيت نكونو اونصومبل …نسيتي شنوو

حسام: شنوو ؟

نورة: حرام علييك

حسام: اااه عيد ميلادك هههه منسيتوش غير نتي مكتبغيش تخلي لحاجة سيغبخيز

نورة: مممم كااانعرفك نتا وداك الراس ديالك مرة ناسي مرة مفكر …دابا شنو قلناا …ندوزو نور لخالتي زكية او نكملو لافراان بلييز عفااك

حسام: معرفتش (شاف ف ايمان) و ايمان

ايمان: غير خليونيي هنا معنديش مشكيل

نورة: غنطلب من سعاد تبقا هاد لويكاند راه تنين غنجيو تاخدو ديك الساع كونجي

حسام: معرفتش لي بغيتوو

ايمان: انا مشييت

حسام: بلاتي نوصلك عندي منقضي حدا ليسي

نورة: متعطلش تجي تلقاني واجدة

حسام : صافي

خرجات اما هو خرج الطموبيل وتبعها …ركبات معاه ساكتة كدير فالسمطة كطرطق فصباعهاا وتحرك فرجليها وحتى هو مهضرش

حسام: اا ليوم غتمشي !

ايمان: ااه اصلا 12 غنكون فدار بلا متقولها لنورة مافيا لي يشرح ليها

حسام: ولكن 12 تكوني فدار

ايمان: مم

حسام: خاصك شي حاجة

ايمان: لاا شكراا عندي

حرك راسو بااه وقال بغا يرطب لجو : عنداك تخلعي بليل تاني

ايمان(بضحكة صفراء )هههه شكون عرف

حسام: والله مكرهت نفوجو مجموعين ولكن نورة تفكيرها بوحدو ههه

ايمان: ماشي مشكيل …صافي حطني هناا …شكرا

مخلاتو يقول والوو هبطات دغياا قاصدة ليسي اما هو رجع فحالو

دوزات داك الصباح فالليسي موراها مشات عند مراد هي ولكليكة دربوو على اغاني كتاار تغداو مجموعين موراها خرجات مع مراد لجنب الطريق

مراد: بغيت غير نسولك

ايمان: شنو

مراد: علاش مكتركبيش فطاكسي بوحدك كضربيها برجل ولا كتركبي فطوبيس لي كيحط بعيد و خاصك ضربي طوالة

ايمان: مكيعجبنيش وصافي كنبغي نركب مع بنادم ههه دخل سوق راسك

وصل طوبيس ركبات وخلصاتت شدات بلاصتها حتى قربات ومشات لدار مع الدخلة كتلقا الدار كتصفر طلعات لبيتهاا ياله حطات لكارطابل كتبان ليهاا ميتين درهم فوق الطبلة وحداها ورقة مكتوبة فيهاا ” الى خصاتك شي حاجة ” هزات لفلوس كتلقا 500 درهم … بقات كتشوف فدوك لفلوس ولورقة

ايمان: بيان سيغ ماشي نورة …ولكانت هي ؟

هزات تيليفونها بغات تاكد سيفطات مساج ل حسام “سلام ..واش نتا لي حطيتي لياا لفلوس فلبيت “

حطاتو ومشات كتبدل حتى كتسمع لڤيبر فتيليفون لقاتو مساج من حسام كاتب ” ديباني بيهم هاد لويكاند “

كلسات وهي حاسة بخيبة امل وحدة اخرى .. وكتقول فراسها واش هاد الانسانة ولداتني بصح …واش فعلا انا بنتهاا ..حيت دابا معاك فدار هادي شهر و الزيادة عمرك عطيتيها حتى درهم شنو واش مكتفكرش انه خاص وخاص

هادي هي ديال ملي كيجيك الاهتمام من الشخص الغلط وحسام فعلا شخص غلط وتفكيرو غلط شنو قصد بهاد لفلوس شنو بغا يدير بيهم

تنهدات كتحاول تفك هاد لمنامة والاكفس من هدشي انه مكاين حتى واحد ينصحها ولا غير تعاود ليه هدشي كافيهاا

مشات جارة رجليها لبيت نورة لقاتو مسدود ضحكات وقالت: من حقك معاك لبرانية (ضربات لباب بقبضة ايدها وخرجات تقدا شنو تلبس فلعشية )

**

امام ڤيلا من االطراز الرفيع وقفو بسيارة لكليكة ديال ايمان هوما 4 مشكلين فرقة …لݣيتار و الاورݣ … والكمان .. وايمان

هبطات بطالون اسود كيبري وليبة سوداء شفافة شوية…مع كسوة براقة لاصقة عليها فلاسود ومونطو فوقها شعرهاا مموج ومكياج ناعم على بشرتهاا …كانت ايمان وحدة اخرى كي تنقولو طلقات زينهاا كل من الدراري لي معاها بهراتهم بعينيها لي مع لكحل وضاح لونهم السمااوي

كانو طبالي طوال يعني كلشي غيكون واقف جهد 10 هكاك تريتور محلق على جردة كاملة بالاضواء ولوروود و الشمع الخ …فين غيحطو لماتريال قادوه الدراري عطاو لايمان ميكروو قلباتو بايدها واش خدام …كل واحد خدا بلااصتو حيدات لمونطوو وهو يصفر مراد وقال: فين مخبية هدشي

ايمان : مزال نصدمك ههه

دارت رجل على رجل فوق لكرسي طويل حداها انس بلكيتار وراها كان مراد وصاحبو …لابسين لباس انيق ومقادين لحالة…كدور ايمان عينها فارجاء لابيسين و الطباالي والشباب لي كل واحد شاد وحدة لي حاط لعصير لي حاط كيسان شراب لمعري كتر من لمغطي …نتابهات لشخص واقف كيدوي فتيليفون وحداه صاحبوو ..كمشات عينيها فيه …نفس الملامح ..نفس المواصفات … ف ولد المحمدية

ايمان(فنفسها ): والله حتى هوا

كانه سمعهاا وخة بيناتهم مسافة …هز عينوو فيهاا مهبطاتهمش …تبسمات ليه ابتساامة صادقة وبادلها الابتسامة متفاجئ بحضورها هنا اشاار ليها بايده وبادلات التحية بأنوثة ميلة راسهاا ورفرفات بصباعهاا ليه…فلبلاصة حط التيليفون وركز معاها

ركز معاها من بعدما كان ملهي فالتيليفوون …فور مسمع صوتهاا حس بنبرة فشكل…كتخليك تركز معاه …نبرة جذباتو باش يبقا متبع مع كلمااتهاا وصوتهاا لقوي …لي مامحتاج لالتعديل لا لتصفية الصوت باش يبان واضح

شاب بملامح عربية …كيمتاز بعلامات الرجولة ..من طول و لحية كحلة …بعيون بنية كان كيشوف فزرقة عينيهاا ..ايديه على لحيتو السوداء محني على الطبلة كيتمعن فيها

كان بقميجة بيضاء من الدرعان كتبان مزيرة علييه حيت هيئتو وفورمتو كانت عامرة شوية مناسبة لشبابو و طولتوو…كيبان فأواخر لعشرينات متبت عكس الشباب لي ضايرين بييه .كل واحد جار بنت معنقهاا …اما هوا كان فقط كيتمعن فديك اللوحة الجميلة لي قدامو

شعرهاا كان مموج ..مكياج زوين جا مع تفاصيل وجهها ..ايدياتها صغار مصبغة ظفرانها فلون د_م الغزال …حركاتها وابتساامتها كتبين انهاا مزال صغيرة واخا كتسها فبعض لمرات ..هدشي كيبين بلي عندها هم فخاطرهاا …

اما ايمان كانت كتحول من اغنية لاغنية مرة كالسة فلكرسي مرة واقفة كتمايل مع لموسيقى ودمج صوتها مع لݣيتار ..

كترمي عينيهاا لعندو كتلقاه مركز معاهاا …مرة مرة عينيها تهرب لييه …يعطيها ابتسامة لطيفة…كأنه كيشكر صوتها بلا مايتكلم …كان صاحبو كيباادلو لحوار ولكن هوا كيجااوب وعينيه ف ايماان …للحظات جاا ولد عندهاا خبات عليه الرؤية ميل راسوو كيحاول يوصل لصورتها …لقاها كتحاور مع لولد من بعد تبسمات ليها وشافت فالدراري معاها

مراد: مسمعتكش

ايمان: el regalo

انس:مكتجيش بلݣيتار

مراد: مدربنااش عليهاا غادي نرونووهاا

ايمان: عاوني غير بريتم امراد

مراد: حافظة الريتم كيفاش

ايمان: متخاافش

هزات عينيها فيه لقاتو كيهدر مع صااحبوو

ايمان: tu vas diciendo a la gente هز راسو لجيهتها كانها قالت ليه سمع لياا …تبسم بتلقاائية ونطق لولد لي معاه وقال: صوتها واعر تبارك الله والاغنية لي كتعجبك

نطق بهمس بلا ميسمع ليه : وهي اجمل (بدا كيردد معاها الاغنية الاسبانية وعينيه فعينيها

Tu vas diciendo a la gente,

سوف تخبرين الناس

Que me amas de verdadY

انك تحبينني كتيرا

Yo muero de alegria

وانا سأموت من الفرح

Ahii al saber que es verdad

عندما اعرف انها حقيقة

,Te voy a comprar un ragalo

ساشتري لك هدية

Pa que lo puedas llevarY

ل كي ترتديها

Que la gente lo veaQue

ودع الناس لتراها

Yo tambien se amarTe comprare

انني ايضا اعرف ان احب

Un collar de diamantesPara que la gente lo vea que yo tambe se amarteAaaiaiaaaa,

ساشتري لك قلادة من الالماس…لترى الناس انني ايضا اعرف كيف احب

Aya ya ha , y ya yaha a,Que cada dia yo te quiero mas

كل يوم احبك اكثر

كان لكل واحد بنت كيراقصها على نغمات الاغنية ولي كالس كيشرب وهوا مشعل كارو …كيحلل فنفسوو هاد الانسانة لي كل مرة كيشوفها فبلاصة فشكل …بحر …قبر …قصر ….مرة ضاحكة …مرة باكية …مرة كتغني ولكن بنبرة حزن متقدرش تخبيها هي لي مخلية صوتهاا يباان كتر

غنات عيد ميلاد سعيد ملي جابو لحلوة قدااش

من بعد طلبات الاذن دخلات لحمام قدات شعرها ومكيااجها وبقات كتشوف فراسها فلمراية …خرجات كتنهد

فاتت طناش تاع الليل بداو كيقلالو نااس بقاو قلال …هزات عينيها فيه اشار ليها بجوج صبااع بلي كيودعهاا…تبسماات ليه وكملات اخر اغنيية حيت عياات مولفاتش تغني لمدة طويلة

جمعو لماتريال خداو خلاصهم ومشاو فحالهم …وصلو ايمان لدار دخلات بالسكات …طلعات لبيتهاا …نفساات على راسها شوية بهاد الليلة…نشطات وجددات طاقتها شوية …مسحات مكياجها قدام لمراية فدووش …حتى طاح فبالهاا …تبسمات ملي تفكراتوو كيفاش كان كيشوف فيهاا …باين بلي عجباتوو حيت عينو محيدوش عليهاا

مشات لبلاصتهاا شادة تلفونها …كتلقا مسجات بزاف من منعم نسات مجاوباتوو عليهم

منعم: واش هانية لوقت شحال صونيت لييك

_كنتي كتجاوبي فلبلاصة دابا لاا

حطات تيليفونها كتسوط…معارفاش علاش وافقات على علاقة بحال هكاا وهي لا قلبها لا عقلهاا عمرهم فكرو فيه بطريق اخرى مختالفة على كيف شافتو نهار اللول ..

*

لكل واحد منا حياة يحياها وحياة يتمناها وحياة يتمنى لو لم يكن فيها.

*

وكيفما كان لحال …ليام كدوز كدوز سوا كنتي فرحان سوا كنتي مكتائب وحزين

حيت هادي هي الحياة ميمكنش توقف حيت نتاا ولا نتي مهموم او العكس

*

هابطة من لفوق بكسوة هابطة وسبرديلة بيضة ..ماشطة شعرهاا ودارت ليه ظفيرة ولكصيصة على عينيها

حنا لبنات نهار كنبغيو نبدلوو نفسيتناا كنحتاجو نلعبو فشعرناا هدشي لي عطا الله

لابسة بلوزة بيضة نص كم مزينة ايدها بساعة لا غير شافت جيهة لكوزينة بانت ليها نورة كتعمر فلغسالة تاع لماعن حيت ليوم ماخداماش

ايمان(دخلات جيهتها عمرات قرعتها تاع لما ) السلام

هزات نورة عينيهاا ف ايمان وقالت: السلام

شافت فيها ايماان وضحكات كتشوف فوجهها وقالت: نفختي فمك

كانو شفايفها بارزيين شوية باين انهاا نفخاتهم شوية جاوها زوينين ولكن كان باين لفرق

نورة: تعلمي تقولي بصحة

ايمان: بصحة …لعبتي فوجهك …غير مشات مي ونتي ديري لي بغيتي

نورة: دخلي سوق راسك

ايمان(بقاا ساهية كتشوف فلارض هزات عينيها ف نورة كتحرك فلكوزينة بكلون و تيشورت قصير …واخدة حقها فكلشي…مخلية فراسها اكتر شيء شعر ديما مصايب ديما روايح لغالين مكياج لفرييع …باينين فيها فلوسها وفلوس راجلهاا …كتدكر اخر حدث وقع ليها مع حساام كتبوورش غير بوحدها

*

كانت عاطية لباب تاع لبيت بظهرها معنقة لمخدة بحال ديما مغمضة عينيهاا كتدكر مهاا وترحم عليهاا وتشوف حالها فين غادي …حتى كتسمع لباب تحل حلات عينيهاا ورجعات سداتهم دغياا..كتحس بخطوات كيقربوو…حسات بشعرهاا تجر بلخاطر من فوق عنقهاا شموو …همس بصوتو وقال …ايمان…ايمان

ملي مجاهش الرد…دوز ايدو على فخاضها لي عريانين. بزز حبسات راسها متحركش…حسات بيه كيهز فالشورط من لتحت كيطلع فيه هنا تحركاات …بعد دغياا وخرج ساد لباب

قفزات فبلاصتهاا شادة على فمهاا و الدموع تجمعو فعينيهاا كان شك ولا يقيين

تفكرات لموضوع وتبورشاات بلخوف نطقات كتشوف فنورة

ايمان: بغيت نقوليك شي حاجة

نورة(كتحل فتلاجة عاطياها بالظهر ): ممم

ايمان: حسام شحال من مرة كيدخل عليا لبيت

نورة(شافت فيها ببرود وهي كتحط لخبز فوق لبوطاجي ) : قالها لياا

ايمان: كيفاش ..جاتك عادي يدخل علياا لبييت

نورة: حسام كيطل على نور حيت مرة مرة كتفيق بليل …شحال من مرة سمعك كتغوتي ودخل عندك

ايمان(بصدمة): جاتك عادي يدخل علياا لبييت ولكنت عرياانة !

نورة: اوى لبسي حوايجك …لمن كتعرااي

ايمان: لهاد الدرجة تايقة فيه

نورة: حسام لخير لي داير معاك الشماتة تاع باك عمرك شفتيه منوو …علاش منتيقش فيه …حساب ليك كلشي رويجل بحال كريم .تتت

ايمان: راك غالطة فييه

نورة: شنو بغيتي دابا بقى ليك غير حسام ترونيني معاه ولا شنوو … عرفي شنو كتقولي

ايمان: راك غالطة حيت كلهم بحال بحال

خرجات مصدومة هي كتقوليها كيدخل عليا لبيت …بنت شاابة داخل عليها فنصاص الليل بدون سبب علااش باش يحك ليها

نورة قررات تيق كلشي الا ايمان حيت فنظرها دير اي حاجة باش تكره عليها حيااتهاا

شدات الطوبيس و مشات لليسيي عقلهاا غيطرطق الصدمة باينة فعينيهاا …بكاات حيت نفسيتها صافي عياات كان ناقصها غير حسام يتحرش بيهاا..وقفات جنب الطريق كتمسح فعينيهاا…شنو دير باش تهنا من هاد لجحيم لي ولات عاايشة

دخلات ليسيي..لي هزات عينيها فييه تلقاه كيشوف ويتوشوش مع صاحبو عليهاا

اية: ايماان … ايمان

دارت وراها او وقفات: شنو

اية: عرفتي لهدرة لي ضايرة فليسي !

ايمان: دوي شنو

اية: واش بصح لقاوك مع الاستاد منعم كتباوسو فالقسم

ايمان(بصدمة): شنووو

ايمان: شنووو اش كتخربقي علياا نتيي

اية: اختي انا قلت ليك لهدرة لي وصلاتناا

ايمان: شكون وصلهاا لييكم بالسلامة !

اية: اناا غير قلت

مشات خلاتهاا كتشووف …هي منعم مكتخليهش يشد حتى فايديها عاد يبوسها …دارت بيهاا الدنياا هدشي لي مبغااتش …هبطات راسها ومشاات لقسم …كتهز عينيهاا فمريم كتلقاها كتبكيي واية كتمسح ليها دموعهاا …كلسات بعييدة كتربت برجليهاا ومن سوء الحظ منعم لي عندهم داباا ..دخل لبيرو ورمى عينو لايماان من بعد رمى السلام ليهم ودخل …هي عقلها مبلوكي …كتحس بكلشي كيهدر عليهاا

عرقو ايديهاا وقلبها كتحس بيه كيترعد لداخل لقسم جاها دياق عليها…منعم كيهدر وهي فعالم بوحدو حتى تحطات حداها لورقة تاع الامتحان …شافت النقطة بانت ليها 10 هزاتها كتقرا فيهاا ..كلشي مخربق

*

منعم: جمعو راسكم شوية …تابعكم امتحاان هاد العكز لي ولا فيكم معندو باش يفيدكم …

ايمان مهزاتش راسهاا قرات لورقة وحطاتهاا …هوا كيشرح وهي كتخمم

ايمان : يااربي رااني عيييت عييت فين نعطي رااسي يااربي

دازت ساعتين طويلة عليها كلشي خرج وهي بقاات …جر منعيم لكرسي كلس قدام طاولتها وفايديه ورقتهاا كانت بغات تنوض تشافتو كلس وقال: شنو هدشي؟

ايمان(تنهدات حاطة لكارطابل )معرفتش

منعم: واش كتفلاي علياا ….ايمان راه ماشي غير لونكلي راه لمواد كلهم جيتي ناقصة فيهم لمخير جبتي فيه 12 واش هكا كنتي الدورة اللولة

ايمان: ايمان تاع الدورة اللولة دفنتها مع مي …هادي وحدة مكنعرفهاش

منعيم: فيقي معاياا لموت حق علينا كامليين واش دفنتي راسك ونتي حية مفهمتش …واش هاد النقط هوما باش بغيتي تحقيي اهداافك

ايمان(طاحو دموعها وهي مهبطة راسهاا )مبقيت باغة والوو …بغيت غير نرتااح …بغيت غير نكون مرتااحة …و فرحاانة (هزات عينيها فيه ) عمري فرحة بلا مي …4شهور دازت بلا متعنقني وترضي علياا …حياتي من وراهاا جهنم امنعم ماشي غير هدرة ولكن انا بصح كنعااني (مسحات دموعها )مقداش نكمل حيت حيت مكاينش لي غادي يفرح لياا ملي نجح كينجحت كيف بقيت مغيتسوق حد اصلا

منعم: نتي غتنجحي لييك …وغتقراي ليك ا ايمان عفااك

ايمان(سحات دموعهاا وتنفساات بهدوء ) سمعتي لهدرة لي كدور عليناا ! بلي حصلنا شي حد فلقسم

منعم: كيفاش (قطب حجبانو )شمن هدرة عاود مفراسي والو

ايمان: كلشي صباح كيشوف فياا وكيهدر …خاصناا نبعدو شوية

منعن: نتي هدشي لي باغة غير تبعدي …فين كنتي قريبة مني باش يقولو بيناتنا شي حاجة

ايمان: كتصدمني ملي كتهدر هكا بحالا معارفش حالتي كيفاش دايرة

منعم: انا مقاصد والوو …بغيتك غير تكوني فرحانة معاياا مبغييتيش تعطيني هاد لفرصة …ايمان

ايمان: تخنقت …نمشي نغسل وجهي

جرات لكارطابل خلاتو متبع ليها لعيين حتى خرجات

منعم بالنسبة ليها غير صديق حولات قدما قدرات تحركو من بلاصتوو وتبين ليه شوية الاعجااب ولكن لاا بغاتو غير يبقا فجنبهاا ومتبقاش بوحدها لا غير …احساس اخر معندهاش ليه بلاصة وسط الكم لهائل تاع الضعوطات ف حياتهاا

هبطات غادية فلكولواار مهبطة راسهاا حتى كتسطحهاا مريم …ختل توازنها وطاحت فلورد عاامر شووك تغوتات بحر جهدهاا …ناضت كلها شووك شادة ايدهاا حيدات منها شوكة تهبط دم وكلشي وقف كيشووف

مريم: سمحيلياا غير قستك

ايمان(بلغوات)شنووو بغيتي شنوو واش نتي مريضة بيااا ولا مااك

مريم: مريضة بييك ؟ على زينك ؟

ايمان: اااه زوينة علييك وبزاف عليك توصليني

مريم (دفعاتها من صدرها)سكتي لنحطو ليك فالسطل ولي جا يطل

ايمان: عرفي شنو كتخرجي من فمك حيت غنهرسو لييك

مريم فرعنات حيت ضسروها الدراري لي كيصفقوو بغاو لمضااربة كتسمع غير ..

الي مريم الي مريم

الي ايمان الي ايمان

مريم: شنو خفتي نقول …كتقنتيي مع الاستااد فلقسم

ايمان(دفعاتها ): سكتييي سكتيي

مريم: من شابه امه فمااا ظلم ديري لينا شي بخيخيش مع الاستاد حتى نتي

تزادو دقاات قلب ايمان قبل متلااح على مريم جاراها من شعرهاا كضرب فيهاا بحال شي كومة قدامهاا ملقات مريم منين تشدها…نسات بليي كضارب مع وحدة شادة السمطة لكحلة

جرتلاتها فلارض لاحتهاا وكلساات كطرش فيهااا جااهلة محسااش والدراري كيجرووها وترجع ليهاا كي لحمقة الادارة كلها جاية كتجري …منعم والأساتذة كل كيشد من قنت …اماا مريم تجبدات سخفانة فلارض راعفة و الد_م خارج ليها من حاجبها فرعاتو ليهاا

المدير(بلغوات ) ديوهااا الاداارة …عيطي لومبيلونص و اوليااء امورهم دابااا (شاف فايماان )ليوووم اللخر لييك

جر لحارس ايمان لي ولات مجرتلة داها لادارة حل واحد لبيرو دخلها وسد عليهاا هزات ايديها كيترعدوو كتلقاهم فيهم د_م مريم مسحاتهم فالطابلية وكلسات فلكرسي شادة راسهاا

اما مريم هزوها فلومبيلونص حوايجها عامرين دمايا_ات من بعدما التاصلو بمهاا لي جات كتجري طيح وتغوت على حالة بنتهاا

كتسمع منعم كيتغاوت مع لحارس على ايمان باش يخليه يهدر معاها ولكن كيرفض

*

كانت نورة خارجة من الدوش واقف حداها حسام كيبوس فعنقها حتى شافت النمرة وقالت: علم الله شنو دارت تاني

حسام: جاوبي شوفي

نوة: ففف الو

_السلام عليكم .. ام ايمان السالمي

نورة: ايه شنو حب لخاطر !

_الى كان ممكن تلتااحقي حالا بالمؤسسة

نورة: شنو واقع بعدا

_ الابنة ديالكم دارت موصييبة …غنشرح ليك كثر الى جيتي دابا

قطع عليهاا وقالت:اويلي اش داارت البرهوشة

حسام: ففف لبسي ياله نوصلك دغياا

لبسات عليها دغياا وخرجاات فاتجاه الليسيي عروق راسهاا كيخبطوو …مع دخلات الادارة توجهات لحارس لعام ومعاها حسام وقالت: السلام عليكم عيطو لياا داباا

_نتي ام ايمان ياك …بنتك الالة ولات بغات دير ليينا لمؤسسة بلاصة لمضاربة …وكون غير مضاربة تاع لبناات هادي رااه هرسات لبنت وجهها خلاتو كلو د_ماياات …اش هاد قلة التربيية …كتسيفطو لينا لبراااهش مامربيينش وكتسناونا حنا نربييو ونقريييو من لفووق

حسام: استاذ شرح ليناا بلخااطر شنو وقع حتى وقعات هاد لمضاربة

نورة(خبطات جنابهاا مغيدة)ناري على السلكوطة الى شديتهاا …فينهياا داباا ؟ فييين

_راهاا فداك لبيروو كنتسناو لمدير يسالي الاجتماع ديالوو …بنتك غيكون مصيرها الطرد على هاد لافعاال لي دارت ليوم

حسام: هدشي كيوقع مراهقاات

_هدشي بعيد على مضاربة تاع لمرااهقاات هادي ولات كومبا فزنقة …فكوهاا مع لمعنية بالامر حيت هدشي غيسالي فلمحكمة

نورة: شكون هادي لي ضربات

_مريم التازي

خبطات نورة حناكها مع شهقة وقال: بنت خالتيي

كانت كالسة فلبيرو كتحرك رجلهاا وكتسمع لهدرة براا حتى سمعات لباب كيتحل بقات كالسة فبلاصتهاا تدخلات ليها نورة كي الثور الجااهل قبل متوصلهاا كان شدهاا حسام جارها اللور في حيين ايمان متحركاتش …كتشوف ف نورة بواحد الشووفة حاااقدة ونورة كتغرق ليها بلي جاا بفمهاا …بغات طير عليهاا غير حسام حابسهاا بزز …الدموع محجرين فعينيها وهي حابساهم مكترمش على مدة …

صدرها كيطلع ويهبط كانها مزال وسط لمضاربة نفسها مجهدة ولكن حاسة بلسانها مربووط مقداش تحل فمها بكلمة

نورة: شفتي لدعاتك والله السانتييم لخسرتو علييك سمعتيني …والله وخة تمرمدي فلحبااس متهزني علييك النفس

حسام: نورة نعلي الشيطاان

نورة: كون غير خنقتهاا بيدي ملي تولدات(بكره فعينيها ) شو بنت لحراام كيكاتشوف فياا

تسلاات من حساام و سبقاتها بطرشة فحنك ايمان تزلعو بيه دموعهاا مع غمضة عينيهاا

نورة: عرفتي شنوو غنعييط لحمار تاع بااك هوا يتكلف بييك …من لييوم ضبري لمخك معااه …اصلا كتشبهي لييه متقتلينيش بلعصااب وهوا عايش مرتااح

خرجات كتنهج مخلية حسام كيشوف فايماان لي بقات كتشوف فاص ليهاا محركاتش وجهاا مزال وقال: علاش هدشي ا ايمان عجبك لحال (قرب شدي ايدها )متخافيش غنبردهاا

تنتراات من ايدو وناضت قافزة جيهة لحيط وقالت :بعد منيي

حسام (بتوتر)ايمان

ايمان: غتبعد مني(طاحو دموعها )ولاا غنشوهك هءهءهءه بعدو منيي انا بغيت غير الزنقة رحم لياا منكم هءهءهءه كرهتوني فحياتيي …(لصقات فلحيط)بعد منييي

حسام(رجع اللور خايف)صافي غنمشي صافي

خرج كيمسح على وجهو مشا لنورة لقاها كتغاوت فتيليفون

نورة: لهلاااك تعرفنيي ..مصونيتش نسول فييك …اجي دابا ليسي لي كتقرا فيه لبرهوشة تاع بنتك

كريم: شنو واقع راني خدام صداع الرااس معندي مندير بيه

نورة: هاد لبنت مابنتييش بووحدي الى مجيتيش غنخليها هناا ومتعرفني منعرفهاا …داباا غتجيي نلقاو حل

قطعات عليه وبقاو واقفيين فلباب

كلسوو ايمان كتبكي فلبيرو …قدامها لمدير ولحراسة لعامة و واحد من النياابة لعامة لتعليم …اي كالسة فلمجلس التأديبي ..كيسولو شنو وقع وهي غير كتبكي …

دق لباب وتحل من طرف لحارس و وراه كرييم …مفكراتش بزااف مشات كتجري ترمات فحضنو كتبكيي : باباا هءهء

وجود الاب فحياة اي بنت هوا نعمة كبييرة من عند الله

*الحضن الدافئ

*الامان

*الحبيب الابدي

*هوا السند

ولكن ماشي اي أب تيكون فعلا اب ..كاين لي غير حتمات علييه المسؤولية يكون اب …كاين لي بلا رغبتو ولا اب

كل واحد كيفاش عطاه ربي ديك النعمة ديال الاب

مفكراتش جوج تلمرات بسرعة ترمات فحضنو كتبكي بغات تحس بالامان فقط

كريم(دور عليها ايدوو )صافيي صافي (شاف فنورة لي كتشوف هازة حاجبها بصدمة )هانا جييت متخافيش

كانت بالنسبة ليه انتصاار واضح على نورة بحالا كيقوليها ها واحد لزيرو هانتيي كبرتي حتى عيتي وجيت انا وعنقاتني

تكلم المدير موجه كلامو لكريم ونورة : الله يجازيكم بخير كلسو نحلو هاد لمشكيل

كلسو فطبلة وحسام بقا براا كيتسناهم

كريم: انا عارف بلي هدشي لي وقع مكانش خاصو يوقع بتاتاا

_واش اسي كريم غير لي قال لينا شي كلمة خايبة نوضو نترينيو فيه ؟ راه ماشي معقول ديك الساع غتوليي حلبة المصارعة ماشي مؤسسة

كريم: اخر مرة عفااك ..اصلا مبقاا غير شهراين لاخر السنة …تمشي وتبدا فمدرسة جديدة راه صعيبة …الله اخليك اخر مرة

_شوف اسيدي سبقنا وعطيت انذار لام ديالها

كريم(شاف فنورة ورجع شاف فلمدير)كناكد ليك هاد لمرة مغيوقع والوو انا غنكون فوجهها ديك الساعات

بقا شحال كيهدر مع الحراسة وقال: غتسني لينا التزام بالامر

كريم: مرحباا

فعلا سناو التزام وخرجوو شاد فكتافهاا وهي غير كتبكي

كريم: ايمان…العشية غنجي نديك جمعي حوايجك وتسناايني

نورة: ديها داباا نيت ولا خايف مراتك تجري عليكم بجوج ؟

كريم: ياك نتيي لي قلتي لياا ديها …تنادم معاك لحال ؟

نورة(بفقصة )لخلا وجلاا

كريم: ايمان صافي نساي هدشي …نكمل خدمتي ونجي نديك

ركبات اللور فطموبيل مع نورة اما حسام كان كيتسناهم تما وقال: امضرا فكيتو لمشكيل

نورة(بنفخة): عطاوها الالتزام و سيمانة متقراش

حسام: لمشكيلة فبنت خالتك عنداك تدعيها

نورة: حلفت بالله لدخلت خليهاا بقا ليها غير لحبس

ايمان: تاحد مطلبك ..سمعتي

نورة: سيري شوفيي هداك لي كاتعنقي فييه واش غيعتقك …تلاحت فيه كي لكلبة بحالاا 18 لعام وهوا يراري بيهاا

وصلو لدار طلعات لبيت جبدات باليزتها والصااك …جمعات حوايجهاا كتبكي …معارفاش فين غادية وهي عارفة بلي لي داتو من نورة تديه من كريم ولكن عيشتها مع نورة و حسام بالنسبة ليهاا جح_يم اللهم تمشي …هزات كل ماكيتعلق بيها و مخدة مها وكتوبتها

وبقات كالسة بدلات حوايجهاا وكتفكر ف جيملة االى مشات حتى دعاوهاا، كتاكل فظفارها وكتفكر

صونا تيليفونها بنمرة كريم وجاوباتو وقال:ايمان واجدة …انا جاي نديك

ايمان: وخة

كريم: عطيني العنوان !

إيمان:***

قطعات معاه وناضت مع حلات لباب شافت حسام ورجعات جوج خطوات اللور

ايمان: حيد بغيت ندوز

حسام: ايمان

ايمان: مكانش كيحساب لياا الصحاب كيدخلو لبيت صحابهم بل(سد ليها فمها )

حسام: ايماان عفااك

ايمان(بعدات منو): حساب ليك ناعسة على ودني (رجعات اللور )بعد مني

حسام: ايمان عندك تقولي شي حاجة لنورة …خلينا نهدرو ونشرح لييك عفااك

قطعاتهم نور كتشوف فايمان وقالت: فين غادا ؟

ايمان(تجاوزاتهم هازة صاكها فكتفها وجارة لبليزة فوقها مخدة …لابسة دجين وتريكو قصيرة وجامعة شعرها لفوق ) غادية فحالي

نور: ايمااان متمشييش عفاااك ايماان

تبعاتها شادة ليها فايديها وكتبكيي

نور: هءهءه ماما قوليها تبقا معاياا ..عفااك ..ايماان

ايمان(هبطات ل نور عنقاتهاا ونورة واقفة كتشوف من لفوق هي وحسام ) دابا نجي نشوفك

نور: وفين غتمشي هءهءه ميمة ماتت هءهء و حبيبي غيضربك تاني عفاااك عفااك ونعطييك نونوس لي كيعجبك والله

ايمان(هبطات دمعة من عينيها ): بسلامة

خرجات ونور واقفة فلباب كتبكي ولفاتهاا معاها وكتلعب معاها بنونوسات كدوز معاها الطفولة لي ملقاتش

لقات طموبيل كريم واقفة هبط هز ليها شانطة والصاك..بقات هازة لكارطابل عندها ركبات لقدام خايفة من هاد التحول ولكن غيكون ارحم من هنا

ركب حداها كريم وبعد من تما، كتلعب فسمطة تاع لكارطابل وكتنهد…ماحدها كتقرب لبلاصة فين ساكن كتهزها تنهيدة من الاعماق

اش هاد تكركيبة دارت ليها الدنيا …من دار لدار وهي عارفة بلي مامرغوبة عند حد .. ولكن خافت تغاامر وتخرج على حيااتهاا وذياب الزنقة مكترحمش…

فيقها كريم وقال: ياله هبطي

هبطات مشات معاه لكوفر هزات الصاك وهوا هز الشانطة غادي قدامها وهي موراه كتشوفيه …رغم صلة الابوة لي كاتجمعو معاها ولكن ك صلة مقربة مكايناش

طلعو فالسانسور وقلبها كيضرب غير من شوفات نجمة عارفاها محاملهااش بتاتاا ودابا ملي غتسكن معاها علم الله كيفاش غيكون ردها …تقدر تكون غالطة وتقدر تكون على يقين

تحل لباب وجاي اسامة كيجري تعلق ف كريم وقال: باباا

كريم(هزو ): ولديي جيتي من ليكول

اسامة: ااه

كريم: هادي ايمان…ختك لكبيرة

تبسمات ايمان ل اسامة وقالت:سلااام

اسامة : ممم هادي هي لي غتسكن معاناا

كريم: اييييه

اسامة: ممم ماما قاتليك لجبتيها نمشي ..واش غتمشي ماما ؟

#يتبع…توقعاتكم مزال مسخنت بلاصتها وصلها الصهد

كريم(ضربها بسقلة معرف باش يجاوب دار ضحكة صفرة لايمان ) مكاين والوو ..زيدي دراري كيسمعو كلشي مقلوب

سكتات كترمش بعويناتها وفداخلها حاسة انه غير مرحب بها..كيف لا وهي غلطة حياتو…حطات سبرديلتها الباهتة بحال ايامها بهدوء.. ودخلات كتلقا السكات..وتساءلات مع راسها واش مشات كيف قال ولدها ولا شنوو … علاش رافضاها لهاد الدرجة وهي مدارت ليها والوو ..فأجزاء من الثانية كان تفكيرها كولو كيحوم على عدد المرات لي تلاقاتها .. ولي مكانش بيناتهم ابدا شي احتكاك باش تكون بيناتهم علاقة زوينة ..رمات عينيها على الدار كتشوف بتركييز دار مصلوحة مزيان والصالون ..مفرش بطريقة زوينة دليل على ان مولاتو عندها الذوق…..كتشوف وساكتة..حاسة انه لا المكان مكانها ولا الوقت وقتها.. غريبة عليهم كامليين حتى من خوتها مكتحسش بلي راه منها…وبفضول تساءلات واش نيت كريم جابهاا يحن فيها ولا حتى هوا غير ضد فنورة

سمعات لحس فلكولوار وهي تهز راسها بهدوء وبرود ووذنيها لقطو صوت

اسامة الطفولي : هاهيا جاات

كتلقاه جار نجمة كانت ب بيجامة بيتية والشعر صابغاه ومقطعاه حد لكتاف ملامح وجهها كاشفين نيتهاا..بقد ماهي زوينة بقدر ما ربي هز القبول من وجهها من جهة ايمان.. بابتسامة صفرة قربات لايمان لي وقفات سلمات عليها

نجمة: مرحباا بييك (شافت فكريم )نورتيناا

ايمان: شكرا

كلسات حدا كريم مقاربة معاه كتبان هي وياه كوبل زوين لي شافهم يقول الحياة حلوة مقابلين معاها …ونتاشر السكاات…الدبانة تسمعهاا كتزنزن ..كسرات الصمت كتحاول تصطانع اللطف تجاهها وقالت: فيك جوع ؟

وبنبرة هادئة ونظرة باردة نطقات إيمان: شكرا مفيااش

نجمة:مم (دورات عينيهاا لجيهة الشانطة او الصاك )

كريم: أميرة ناعسة

نجمة: ااه نعساات …خاصني شي تقدية ..اجي معايا

كريم(وقف تبعها) : وخة

خرجو وهي تنهدات كتمسح وجهها بتعب .عارفا السيناريو لي غايكون دابا كيتكتب ولي كيتسمع فوذنيها ..عارفة راسها غير مرحب بها لكن فظروفها هي معندهاش حل

نجمةبملامح مكشرة)مامشيتي حتى جبتيها

كريم: نخليها فالزنقة ؟

نجمة: كري ليها عطا الله ميدار

كريم: نزيد عليا مصاريف ؟

نجمةباستهزاء)لاا احبيبي متزيد عليك والو …زيدها عليا اناا واش هي مها ولاحتهاا غنهزها اناا …علاش متديها عند مك تونسهاا

كريم: مي عياانة ..خليها معاياا حتى نشوف اش كاين ديك الساع نديها عندهاا …حاليا اتبقا هنا

نجمة: شوف راه متعولش تبقا معايا ديما …ياله مكافية مع ولادي …الى كانو فيها لمشاكيل معندي مندير بيهاا

كريم: ايكون خير ..نتي تعاملي معاها مزيان وصافي ..ديريها بنتك

نجمة(ميقات): بنتيي اوى صافي نولد قدهاا

كريم(ضحك باسهاا كيراضيها ): نتي راه اسامة وكيقولو خوك

نجمة(لمطات فمهاا وهزات حاجبها ): اوى منعرف لييك …نوبتك فلعشاا

كريم:وخة الزيين

فعلاقة كريم ونجمة هي علاقة غير عادلة بتاتا لكلا الطرفين لانه متبادلين الادوار..نجمة هي الري والشوار وهي الحكم فمباراة حياتهم..وهو بحكم انه مرخي لقاها دارت فيه مبغات..معندوش رأي بتاتا قدامها ومعندوش شخصية امام شخصيتها..تقوليه غدا رمضان يقوليها فيقيني للسحور..

دفعاتو وزادت لبيت عند بنتها اما كريم خرج لعند ايمان وقال: الدار داركم رتااحي …نقضي شي غراض ونرجع

ايمان: وخة

نجمة سدات عليها فلبيت مع ولادهاا و ايمان بقات فالصالون كتفكر لحريرتها حيت تاحد مغيفكر ليها بطبيعة لحال

هزات تيليفونها كتقلب على نمرة جميلة كانت كتهدر معاها نعيمة من تيليفونها وبقات عندها …ردات باب الصالون ودارت تيليفون فودنها غادية جاية كتسناها تجااوب

جميلة:الوو

ايمان: الوو …جميلة معاك إيمان

جميلة: عندك لوجه لي تصونيي ابنت لحرااام لمكردة …اااه دوي بغيتي ترزيني فبنتي والله غير لموصلتك لمحاكيم يالملقطة

إيمان: (باستهزاء)كتهدري عليا ونسيتي ايامك ولا ؟انا الى ملقطة حيت نورة حلاتو لكريم وولدوني ماعندي يد فهادشي نتي راك عاطياع لواحد.مرااضيش حتى يبان معاك…بنتك جبداتني وانا عطيتها حقها والى مشات حتى عوداتها غنعاود ليها التربية

جميلة: اسمعي اديك لبرهوشة لهدرة ماشي معااك

إيمان: لهدرة معاياا وانا كنهدر معاك داباا غنقولييك جوووج كلمات اجويميلة … الى مشيتي حتى دعيتيني نتي ولبرهوشة تاع بنتك

جميلة: هاي هاي تحل ليك لفم

إيمان: سمعينيي …والله وتدعيني وديري بيا شكاية حتى نضرب ليك الطر فلعائلة الى مشوهتك نتي وداك عبد الله ياتريكة الز_نى وتريكة لحرام برااسوو الى مشوهتكم ودرتكم مسكة بين الضراس مسمانيييش با ايماان ومد_بحش علياا

جميلة: اش كتخربقيي اش كتخربقي

ايمان: ااه كنخربق ..ولسميتك مراا ومزغرتة عليك خالتي عايشة دعينيي … وديك لحمارة تاع بنتك غتفوتنيي ولا دوك الجوانات لي كتكمي غنطفيهم ليها فعينيهاا…حيت اناا معندي ماانخسر …اش قلتي داباا اطاطا جميلة ؟

جميلة(سكتات شوية)غير بلااتي والله متبقا فييك

إيمان: وداباا بسلامة وبوسي لياا مريم …الله اشافيهاا

قطعات معاها حاقدة عليها وعلى نص الناس لي عرفات فحياتها على أول القائمة نورة وكيتبعها كريم..تابعهم خالها وزيد وزيد..تربات فيها صفة خايبة بزاف وهي لي اذااها وضرها كتحقد عليه ..والنص لاخر غير مزال متحكات معاه باش تزيدو فالقائمة …كلسات بلاصتهاا كتفكر شنوو دير ميمكنش حياتها تبقا هكا

جبدات ستيلو ودفتر ..كتخمم لبغات تكري شحال خصهاا …خصها تقرا وتخدم باش تقدر تعيش وكتساءل كيفاش مُخَيِّلَةْ مراهقة ممكن تحل مسألة فالحياة بحال هادي

.هي انسانة مولوعة بالرياضيات وكتحل المسائل دغيا لكن مسألة الحياة جاتها صعببة بزااف..كتفكر…خاصها تبعد من هاد لمدينة وتنسا ناسها فمرة ..خاصها تجمع مصرووف باش تبدا بييه ..خاصها تقرا..خاصها تحفظ وفالاخير رسخات بلي خصها تمو_ت

جبدات صندوقة بساروتها حلاتهاا …فيها تصاور مع جدهاا وجداها فعيد ميلادها الاكترية …سنسلة لي شرات ليها نعيمة دارتها فعنقهاا ودموع تحرجو فعينيهاا ..كتحسب لفلوس لي عندهاا ولي كتجمع منهنا ومنها تنهدات باسف

ياله واصلة 50 الف …معندها باش تنفعهاا حاليا..فزمن اصبح فيه الدرهم هو الحاكم

وصل الليل ومعاه سكاتو..عندها السكات فوبيا حيت كتحس بالغربة ومن بين أصعب ماعاشت ايمان هي الغربة وسط وطن هو فالاصل وطنها… تعشاو فلكوزينة حاطين قدامهم طاجيين وموناضة وكريم كايدلع فنجمة ويعاملها بود وحب لي كون عاملها هي غي بشويا منو غتحتارمو … كتنقب فصمت وكتفرج فمسلسل العائلة السعيدة”

اسامة: بابا سالييت

كريم: الحمد لله اجي نغسلوو

خرجو هوماا لحمام ونجمة هزززات بنتهاا وقالت: ايمان جمعي ليا هاد طبيلة غنعس اميرة ونجيب ليك فراشك لصالون

ايمانبهدوء)وخة

ناضت كتجمع فطباسل وطاجين غسلاتهم وجمعات دنيا ومشات غسلات سنانها كيعيط ليها اسامة ومشات عندو

اسامة: شوفي بيتي شحال زوين

ايمان: زويين بصحتك (قرصاتو فحنكو بود)

كان مصبوغ فلبيج فيه سرير عالي بيض مفرش ب سبايدر مان ماريو وبيرو فنفس اللون وزربية سبايدر

اسامة : هنا فين غتنعسي نتي

من تحت السرير ديالو جرو بحال لمجر سرير بماطلة وتاهوا مفرش بسبايدر

جات من وراهم نجمة وقالت: لا احبيبي هداك باش لطحتي مطيحش لارض …ايمان اتنعس فالصالون …شوفي جيبي حوايجك حطيهم هناا حتى نشوفو فين نديروهم …وخة

ايمان: وخة

نجمة: حطيت ليك لفراش ف الصالون تصبحي على خير …اسامة ياله نعس

قداتو ففراشو حطات مخدة فلفراش لتحتااني وقدات لييه جناب باش ميطيحش …مشات ايمان لصالون فرشات بدلات عليها وتكات متوسدة خيبات أملها فكلا الطرفين

لي كيضرها كثر ماشي انهم ميسواو بصلة ..انه هي الوحيدة لي كيعاملوها خايب انما مع الناس الى سولتي عليهم غتلقاي غي”الله يعمرها دار” لدرجة كتساءل واش غلطت فشي حاجة؟؟واش انا ذنب؟

توسدات بقايا خيبات أملها وعيونها مضببين بالدموع بتاتا واش عليهم انما على نفسها لي مقدراتش تطبطب عليها

*

عندما لا نجد من يفهمنا، وعندما نختلف في وجهات النظر، نجد أنفسنا دون ان ندري نتجه للعزلة، وذلك يكون رغما عنا، واجبرنا عليه وليس لنا فيه أي اختيار

*

داز اسبووع باياموو لي كانت طويلة عليهاا…ناس جداد عيشة جديدة عليها عائلة اخرى كتمتل عليها الحب والدفئ لعائلي وهي فقط زيادة غير مرغوب فيهاا ..كأنها دخيلة عليهم …كلامهاا محدود للحاجة كتهدر

ناعسة فبلاصتها فالصالون مع ان لبيت تقدر تنعس فييه ولكن نجمة بغاتها فالصالون تنعس بحجة أسامة كيتركل وكيطيح فلفراش لتحتاني غييطح عليك نعسي فالصالون مرتاحة.

سادة عليها باب الصالون وناعسة حتى كيضربها شعاا قوي فعينيهاا بلاصة الظلمة لي كانت فيها دورات وجهها مكمشة عينيهاا مع بدات كتحلهم كانت نجمة كتحل الريدو تاع الصالون لي دخل ضو الشمس من برا

طول هاد السيمانة كيخرج كريم و ولدو وهي كتبقاا تخبط هاد لباب وهاد لباب تجر طبلة تدخل وتخرج لصالة تهز شي حاجة

ايمان: الضو قااسح

نجمة: اوى نوضي 8 هادي تء …بغيت نمسح الصالون شوية ولات فيه ريحة النعااس …نوضي باش تعاونيني

كلسات كتحك ف عينيهاا وكتسوط دايخة بالنعاس …ناضت كتجمع فلفراش …مشات غسلات عليها وقضات حاجتها ودخلات لبيت أسامة هزات تبديلة وفوطة صحية ورجعات لدوش تبدل عليها غسلات ملابسها الداخلية مزياان وخرجات لبالكون تاع لبيت نشراتوو …تقابلات مع شمش كتستنشق لهواء الدافي لي كيعلن على فصل الربيع … شعرها كيديه الرييح خفيف على بشرتهاا …كتشوف الناس شي غادي شي جااي …شافت لبنات غادين ليسيي وتفكرات بلي ليوم اخر نهار وغدا غترجع …تقبط خاطرها تانيي ومعارفاش كيفاش غتعامل مع لوضع

نجمة: ايمااان…ايمان

خرجات عندهاا لقاتها فلبيت هازة اميرة لي كاتبلغ من العمر سنة واحدة

ايمان: نعام

نجمة: هبطي جيبي لياا لخبز من لمخبزة لتحت راه الصرف فوق لفران

ايمان: وخة

كانت لابسة سورفيت خفيفة مع تيشورت قصير لبسات صندالتها وخرجات مخلية نجمة تابعاهاا

نجمة: شوف ليك طيران كي خارجة بالسيف شكون مها ؟

مشات تقدات ورجعات …فطرو فلكوزينة بجوج

نجمة: ليوم جاية جداك وعمتك اسية

ايمان: مزيان

نجمة: جاية حتى مااما و ختي ومرت خوياا ..دايرة ليهم عراضة …تعاونيني !

ايمان: وخة ماشي مشكيل

نجمة: نتي جمعي لياا دار …سيقي او طلعي لحوايج لسطح …انا غنمشي نتقدا ونجي نصايب لغدا

ايمان: وخة

فطرات وناضت خلات ايمان كتفطر …بدلات عليها ودارت فولارهاا لبسات بنتها وخرجات ..ناضت ايمان شغلات التيليفون بلموسيقى غسلات لماعن ومشات جمعات الصالون ومسحاتوو بدات كتسيق حتى دخلات هازة لميكات او بنتها

نجمة: ويلي مزال مساليتي ؟

ايمان: بغيتي ندير مصباح علاء الدين ؟ راه ياله خرجتي

نجمة: عولنا علييك

ايمان:معندك علاش تعولي عليا انا غير كنعاونك

كملات تجفاف ودخلات حكات الدوش كيطلبات منهاا رجعاتو كيشعل …ياله كتبغي تكلس كتخرج ليها بشي حاجة من جنب نشري عطيني هاكي ..مخلاتهاش تكلس

دخل كريم محمل بلميكات شدات ايمان لميكات من عندو بابتسامة مبادلاه السلام دخلاتهم لكوزينة

نجمة: عطيني هدشي نستفوو وبدلي علييك يقدر يجي حتى باباا

خلاتهم ومشات لبييت كتسمعهم كيهدرو وطلقات ودنها من ورا لباب كتسمع

نجمة: عاجبك هاد اللبس لي كتلبس هادي ؟

كريم: غير فالدار مالها

نجمة: قبيلة راه خرجات بيه ويلي قزيبتها كتبان حشوومة اش يقول بابا ولا خويا لجاو …شوية الاحترام

كريم: دابا نهدر معاها ولا هدري معاها

نجمة: منك لييها اش وصلني هي على نقشة غي مقندشة باغة غير فيمن تشد..هدا لوقت جيب اسامة وجيب معاك لموناضة وديسير نسيتيه

لبسات عليها تريكو هابط شوية ومشات كلساات فالصالون كتقلب فتيليفونها

نجمة: ايمان هزي اميرة كتبكي راه فلبييت

قلبات عينيها ومشاات لبيت هزات لبنت من لكونة كتبكي حتى نتابهات لميكات لي شدات من عند كريم حلاتهم بصباعها كتلقا بيموات والشكلاط وشيبس بنواع…حركات راسهاا بلا حول وقالت: تريكة جوع

مشات عطاتها بنتها وقالت: قطعي لياا ديك لبصلة

ايمان(نخلاتها ومشات): فيا لوجع

خلاتها وطلعات لسطح فيه كراسة مطلعة معاها كتوبتها كتراجع من الامتحانات لقدام خصوصا انه بقا شهراين ل الامتحان الوطني

فهاد الاسبوع كامل عمر شي اتصال وصلها من نورة ولا حتى مسااج كانها عمرها كانت فحياتهاا …كانت كتسناها غير امتا تخرج وتعطيها التيساع وملي جاتها لفرصة مضيعاتهااش

بقات مدة لا بأس بها لفووق وعقلها غيطرطق بالافكار لي كيمشيو ويجيو.. حتى كيطلع اسامة كيعيط ليهاا

اسامة: ايمان راه جات الميمة وعميتوو وكيعيطو ليك

حطات ستيلو كتنهد.. شحال من واحد خاصها ضحك فوجهو وتدير راسها ماهازا من جهتو والو…اسم “الميمة وعميتو”جاها غريب جدا..وبدات كتساءل علاش هاد الميمة عمرها ماسولات فيها..ماتفكراتها..وحتى عمتها عمرها دارت البادرة باش تعرفها …مبقاتش عرفات واش حتى هي تحقد عليها ولا لا ..خرجات بعض الحروف بثقالة: هاني جايا

ناضت جمعات كتوبها وهبطات كتسمع لهدرة دخلات

بابتسامة مصطنعة لقات السلام غي بفمها على مليكة … وجودها فهاد 18 لسنة منعدم لشافتها كتشوفها فزنقة وتسلم عليهاا وتزيد اما اسية فمكانش بيناتهم تواصل ملي تزوجات وهاجرات على براا سلمات عليهم وكلساات

مليكة: لباس عليك ابنتي اش خبارك

ايمان: لباس الحمد لله

اسية: تبارك الله كبرااات ههه عرفتي شحال مشفتك(بابتسامة عذبة) …غير كريم سبحان الله هههه اش عندك هاد لعام

ايمان :لبااك

مليكة:بالنجاح ان شاء الله

نجمة(ضحكات )الى بغاات وهي راه مجرين عليها سيمانة هادي

اسية: علاش

نجنة:ضاربات مع شي بنت كانت غتق_تلها

مليكة: لواه ابنتيي اش بغيتي بشي مضاربة قرااي قرايتك

ايمان(شافت ف نجمة وببرود)كنتي معانا ملي ضاربناا !

نجمة:وشنو وقع بالسلامة (كتخوي اتاي)كونما باباك كون جراو علييك

..ايمان: الله اجازيه بلخير دار معجزة غا ملي عارفاه بابا راه لباس

اسية: (مبدلة الموضوع)نجمة مدي لماما اتاي مسوس ههه

نجمة(بتخنزيرة لايمان)غنوجدو داباا

مشات وبقات اسية جنب ايمان وقالت:مامفاهماش معاها ؟

ايمان: هي محاملانيش نكون هناا وعندها الصح.. وخاصها غير تحشي ليا لهدرة فاي وقت

مليكة: مديش عليها هادي راه دار بااك …وتانتي متبقايش تجاوبي معاها …كتهدري مع مك

ايمان: لا

مليكة: معندك مديري بيها كلسي مع بااك …كون فيها لخير كون داتك معاها النهار اللول ماشي تماتت لمرحومة

ايمانكطنز)لا هو الحمد لله بجوجهم فيهم الخير ههه

اسية:ميي !(شافت فايمان وتبسمات )تبارك الله خويا والد الزييين

ايمانتبسمات)شكراا حتى نتي زويينة

اسية:انا فرحانة حيت عندي بنت خويا قدك..عيطي ليا عمتي

حركات غي راسها بالايجاب ومنطقاتش بتاتا حيت لسانها باغي يقول”عاد طفات عليك الشمعة”

بعد حين ..دخلات عائلة نجمة من مها وختها ومرت خوهاا نضمو ليهم فالصالوون واسية ناضت كتعاون ف نجمة وايمان شادة اميرة فلكوزينة

نجمة: نتي لي جات معاك لكلسة وشدة تاع التيليفون

ايمان: واش جاك لهبال علياا مفهمتش؟؟ …هاد ليامات شكون كيعاونك ! وزايدون كتشقاي على دارك ماشي علياا

دازت مخليا كريم داخل عند نجمة وقال: مالكم

نجمة: حتى لمن بعد … جبتي لياا لمشاكيل عرفتي مالي (بتذمر)

كريم: نجمة نعلي الشيطان

داز لغدا على خير تغدات معاهم وجمعات لماعن معاهم وغسلاتهم ف حين نجمة مجمعة مع عائلتهاا …كملات ودخلات لبالكون كلسات فشميشة دايرة لكيت كتبان هادئة عكس البركان لي فداخلها

تفرق لمجمع وكل واحد شد بلاصتو ينعس …جالسة نجمة كدهن ايديها قدام مرايتها طالقة شعرهاا ولابسة ملابس مريحة لنوم …وكريم وراها فبلاصتو شاد تيليفون ..شافتو مركز وهي تبدا تسوط باش تلفت انتباهو

كريم: مالك(هز فيها راسو)

نجمة:(كتدهن مغددة)منهار جبتي ديك لبرهوشة وهوا مايل ليا

كريم:(تنهد )شنو دارت ليك تاني …كل مرة كنشوفها معاوناك اش بغيتي ؟؟

نجمة:(خرجات عبنيهاا ) كتعاوني وباااز …لكاس مكتهزو بغات ترجعني كي لخدامة عندهاا …زادتها وكملاتهاا قمعاتني قدام مك واسية وقالت ليا دخلي سوق رااسك …قليلة تربية والله ومتزير معاها تدير لينا الشووهة

كريم: هدري بشوية

نجمة: الى مها مولفاهاا داك لبس ولخروج وتعواج مديروش علياا … مصبغة ظفارها وكالسة بقا ليها غير تسخرني نييت …حتى فراشها مكتجمعوو

كريم: صافي دابا نهدر معاهاا غير دوزي تنعسي

نوع نجمة هي لي خرجو عليها مسيطرة وعند بالها راها واعرة ونوع كريم هو لي مخرجين عليه راجل لمرا

*

صبح لحال ناضت لبسات عليها سروال عريض وتريكو كم لارج ولكن قصير …شعرها من طبعها ديما كتخليه مطلووق ..جمعات جناب بمقبط صغير …لبسات سبرديلتها كتوجد تخرج حتى كتسمع صوتو من لكوزينة وهي بغات تحل لباب تخرج

كريم: غادية ليسي

ايمان: اه

كريم(طلعها وهبطها ) هكاا ؟ كيمشيو يقراو الناس هكا ولا !

شافت راسها فلمراية …لابسة عادي وعاد غتزيد طابلية فوقها وقالت: اه شنو فيها …راه غنلبس الطابلية ديالي

كريم: حيدي داك تريكو راه قصير …تهزي ايدك يبان لحمك ! لبسي شي حاجة بعقلهاا وهبطي نوصلك …ياله

حل لباب وخرج …غمضات عينيهاا وتنهدات ومشات بدلات حتى كتلقاا نجمة كتشوف فيهاا بنص عين

ايمان: راه مغتصوري مني والو(ببرود) …كيعمرتيه علياا بليل كي بنهار راه مغنزيدك مغنقصك

نجمة: نكدتيها على مك وجاية تنكديهاا علياا

ايمان(بضحكة مستفزة ) انا فدار بااا وليي معجبو حال يمشيي ولي فاقصاااه (حلات لباب وخرجات بغات تسدو )يخبط راسو مع لباب

خبطاتو بجهد تقفزات مجمة لداخل وخبطات جنابها مغيدة وقالت: بنت لحرام

هبطات لعند كريم كتسد الطابلية ركبات حداه كدير السمطة وتحرك ساكتين جبدات تيليفونها كتبقش فيه تقال

كريم: ديري عقلك …هاد لمرة غلط صغير ميعقلوش عليك

ايمان: ممم

كريم: واحتارمي لي كبر منك

ايمان: (شافت فيه وعينيها واخدين نفس شكل عينيه )كيفاش ؟

كريم:ملي تهدر معاك نجمة جاوبيها باحترام …حسبيها بحال ختك لكبيرة…لقالت ليك شي كلمة ماشي تجاوبيها ب 10

ايمان: قالت ليك شي حاجة ؟

كريم: هي عندها متقول ؟

ايمان: من حقي نجاوب على لي تقال ليا ولا لا ؟الظلم مكيبغيه حد..نتا (شيرات ليه بصبعها)وانا وهي عارفين بلي انا مكندير ليها والو ولكن هي باغيا طلعني خايبة وصافي

كريم: خلينا داباا من هدشي … قلة التربية معندي مندير بيهاا فدار ا ايمان … حيت غتجبد لينا غير صداع مع بعضياتناا

ايمان:(شافت فاص ليها جامعو تغوبيشة)شوف راه ماشي بزز منك تخليني عندك …لكنت متقلة عليك قولها لياا عاادي ..فاللخر كتبقا غي كريم

كريم: مكاين لاش نوصلوو لهادشي …كيفما كان لحال نتي بنتي

ايمان:(تغرغرو عينيها)مكرهتش كون كنت بنتك..بنتك هي اميرة

وقف قدام الليسي مع كلامها معطاتو فرصة يجاوبها وهبطات بلا كلمة بلا جوج …مسحات جناب عينيها من دمعة كانت غتهبط ووذنيها كيلقطو صوت الكلاكصون …كلاكصونا عليها ولكن مشافتش فيه كاع

دخلات مهبطة راسها تالداخل عاد تنفساات دازت لجيهت طواليط وهي تطلقهم بحال الروبيني ..وبهدوء غسلات وجهها وتنهداات كتشوف فلمراية قبالتهاا..صورة لمراهقة بملامح سبعينية

حلات طابلية ..دارت ايدها فجيب وطلعات فمدرجات الطابق التاني تاع الاقساام…مع هزات عينيها كيبان ليهاا منعم شافها وابتااسم فرحاان لي شاافهاا بشوق جاي عندها

ولكن هي محساات بوالوو يمكن حيت عقلها عامر لدرجة معطاها مساحة تفكر فمنعم بطريقة زوينة تحببو باش يدخل لقلبها و يزرع لفرحة و لفراشات لي كتسمع بيهم …ولكن هوا كيبغيهاا ؟ هدشي كافي تحس بلي شي حد باغييهاا

تبسماات لييه…محدها كتقرب عندو…وقال: يسلام نهاري كيفاش غيطلع ههه

شد ايدها متردد …جرها تعنقهاا غمضات عينيها لثواني كتحاول تستشعر الدفء او بالاحرى كتقلب على حضن حنين لكن بدون جدوى..بعدات مبتاسمة وقالت: غبرت حتى توحشوني

منعم: وحشك صعيب ا ايمان ههه (بقا شاد ايدها ) توحشتك وغبرتي علياا بزااف(بحماس) خصنا نكلسو ونهدروو شحال مجمعناا

ايمان(بعدات ايديهاا كترجع شعرها ورا ودنها ) مكرهتش نخرج والله

منعم: شوفي كيديري مع 12 نخرجو

ايمان: امتاا غير دوز هاد 4 السوايع

ضحك وقال : محسابليش توحشتيني ههه

هوا فهمهاا كيف بغا وهي قصدات حاجة اخرى …تبسماات لييه وقالت: نخليك داباا من بعد ونهدرو

منعم: صافي واخة

دخلات لقسم …خدات طاولة بعيدة على فين كتجلس مريم ورباعتهاا وبقات كالسة شوية بشوية بداو التلاميذ كيدخلو والقسم كيعمر مربعة ايديها وكالسة تدخلات مريم …دايرة فاصمة صغيرة على حاجبهاا فقط خنزرات ف ايمان لاخيرة تبسمات ليها وقالت: بالشفاء

نطق لولد لي كلس حدا ايمان وقال: على سلامة المصارعة

ايمان: بغيتي شي تفرشيخة

ضحك وقال: منقدرش ههه

دخل الأستاذ شاف ايمان دخلات وقال: ايمان …مريم ..اجيو وقفو هناا

ساطت الاخيرة وناضت عرفات بلي درس ليوم غتكون هي …كانت مادة الفلسفة ليوم غادي يرجعها درس

_فهاد الدنيا كنلقااو فطريقنا ناس كتبغي تحطمنا ..او تنقص منا ..ولكن حناا (شاف فايمان )مخاصناش نكونو ضعااف لدرجة لي قال كلمة فينا نردوها لييه خايبة …لاا حنا خاصناا نكون احسن منو بكتيير

قدامناا جوج تاع لحالات …مريم لي آذات ايمان نفسياا و داخليا

مريم: أستاد

_سكتي شوية

بداو الدراري كيضحكو وقال: شششش خلوني نكمل …ومعانا ايماان …لي ردة فعلهاا من جيهة لكلاام كانت عنيييفة وحناا مكنأمنووش بليي واحد جرح واحد بلهدرة …لا حنا كنشوفوو بعينيناا وكنحكموو ..وحكمنا بلي ايمان ..ضربات مريم وهدشي لي شهد علييه كلشي …فنظر كلشي ايمان لي غالطة ..ولكن تااحد معارف شنو الاثر لي خلات مريم فخاطر ايماان …نقدرو نقولو ايمان ضعيفة (شافت فيه بمعنى منيتك !)نعم ضعيفة …تهرستي من اول طيحة طحتي…كتخلي لهدرة تأثر علييك وتمشيك كيف بغيتي …يعني نتيي ضعييفة واي حاجة تأثر فييك …حزنتي مشيتي كليتي الس_م باش تنسااي …تقالت ليك حاجة خايبة رديتي عليها بلعنف الجسدي…نتي ك ايمان مامتصالحااش مع راسك

ايمان(دمعو عينيها )نتا معاارفش شكون هي ايمان ومن شنوو دوزات ايمان

_حتى نتي معارفانيش منااش دزت باش وصلت هناا …ومكاين لاش تعرفي حيت داكشي دياليي مخليه ليا ماشي ضروري كلشي يعرفو باش يتعاطف معاياا ؟ لااا انا متمحتاجش شفقة من حد واااه مسكين شوف مناش داز …انا لبغيت نقول شنو دوزت انبغي نقولو باش نخليه قدوة لنااس اااه شوفي فلان منااش داز ولكن وصل …وصل لشي حوايج كون وقع ليا لي وقع ليه مكنتش نووصل …فمهتينيي …ايمان

حركات راسهاا بااه كتمسح فدموعهاا وقال :ونتي ا مريم …كنتمناا تكون اخر مرة تمسي شي حد فشي حاجة ضاراه عرفتي علاش ؟ حيت غيدووور الزمان قدما داار وغيجيبك قداام هاد الشخص(نعت لايمان ) وغيكون عيبك بااين …واش تبغيهاا تعايرك بيه جاوبيني

مريم(شافت فايمان وحركات راسها بلاا )لا

_شر عيوبنا اهتمامنا بعيوب الناس و الى بعدناا ودينها شوية فحياتنا الشخصية غتكون حياتنا نظيفة…تعلموو متغتابووش فبعضياتكم …نتوما شباب مبقيتوش وليدات صغار

“شر عيوبناا اهتمامنا بعيوب الناس *

نطق الاستاذ بجدية :

_مريم …ايمان غطلبو السماحة من بعضياتهم هناا قدام زملائكم حييت حياة الثانوية غتساليي هاد لعام كل واحد فيكم غياخد مسار دراسي فشكل مغتبقاوش تلاميذ اتولييو طلاب جامعيين و طلاب المدارس العلياا كلهاا وشنوو غيحقق فمكاين لااش مشاكل ترافقكم فمسيرتكم من بعد …مريم طلبي سماحة

مريم (مرضاتش حيت دخل ليها لهدرة غير بلفن ) سمحيليا

_ ايمان!

ايمان(بهدوء)سمحيلياا

صفق بايدو وقال :ياله بلايصكم نبداو الدرس ديالناا

كلسات بلاصتها كدور فهدرة الاستااد فعقلها …هي فعلا مخلية ماضي هي غير مكدمة فيه يتحكم فحياتهاا داباا مخليهاا تعاقب على ذنب معندها فيه حتى نقطة في الموضوع هي فقط انسانة نتجت على علاقة بين واحد جوج ديال الناس هوما لي خاصهم يهزو الذنب ويتحاسبو عليه اشد حسااب اما هي بريئة من ذنائتهم …خاصها تصالح مع نفسهاا وتحب نفسهاا ومتخليش لموضوع يبقا مأثر عليهاا حيت ما ذنبهاا والو …

*** الوقت كيدوز بسرعة على الجميع الا هي لي أيامها بحال بحال..لي عاشتو اليوم كتعاودو لغد ليه…وقت يقدر فشهراين …وصل شهر 6 “رمضان “وكان اخر يوما فالامتحان الوطني لايمان …خرجات من الليسيي ومكانتش راضية على داكشي لي دارت بالنسبة ليها دازت سنة عامرة احداث مخلاتهاش نهائيا تركز .حاولات فقط تدارك راسها وتلملم شتات نفسها…نقطها كانوو نهار على نهار كيتكفسو …فالاخير تعتق الموقف ولات فقط باغة تخرج بأقل الخسائر …موت جداهاا خلق ضرر كبيير فحياتهاا موراهاا حل فجوات كثيرة لمشاكل كبيرة هي كمراهقة متقدرش عليهم…..عرفات كمية الحقد لي كانت مغطية عليهاا نعيمة وغير تغطات بتراب باان لي كان مخبيي من زماان

شهراين دازت والحالة نفسها …نورة مكتفكرها حتى بميساج ..علاقتها بكريم عادية طالما مكتهضرش نجمة هو مغيدير والو. …مرة فهاد الاشهر وصلها مساج من حساام قال فيه ” نتمنا تكوني بخير …خليتي بلااصتك كبيرة هناا ..توحشنااك و نور كل مرة تسول فييك …متغبريش عفااك ..خلينا نهدرو ونصلحو سوء الفهم لي وقع معاك …الى سمعتيني يقدر يكون عندك رأي مختالف…تهلاي فراسك تاصلي بيا فاي وقت “

كانت رسالتو واضحة ومقززة بالنسبة ليها..مافيهاش حتى ذرة رحمة او فضول على احوالها كانت بصريح العبارة رسالة تحر_ش ملفوفة فرسالة عادية

مجاوباتوش بتاتا بالعكس زادت عافتو وشهب من عافيتها ضد نورة بدا كيطفى..كتجلس وكتفكر انه بقد ماهي تأذات نورة غتأذى وبكثرة ماتقربات من الله مؤخرا بحكم هو الملجأ الوحيد ليها ولات مستوعبة بلي غتسقى نورة واتباعها من نفس كاسها

..دازو فحياتهاا متحر_شين ولكن عمرها ظنات يكون راجل مهاا منهم …كتزيد تفقد تيقتها فالرجال نهار على نهاار

علاقتها بنجمة علاقة بورصة ..مرة طالعة مرة هابطة نقاشات بسيطة كتوصلهم لكريم بطريقة كبيرة كتخليه يدور فايمان كانها هي مصدر لمشااكل

رجعات لداار كتعاون نجمة باش تفادا الصدااع وخة كتحكر عليهاا لاخيرة ولات كتميك..حتى واحد مكلف راسو يسولها كي دوزتي!شنو دوزتي!!اش حطو ليكم!ياكما جاك صعيب!

هي أسئلة بديهية عند الكل الا ايمان..مسمعاتهاش نهائيا كانت كتسنى من كريم يسولها لكنه نسا نهائيا ..مكلفاتش مزال راسها ومغرقاتش راسها فالتفكير فحبهم لي كيعطيوه لناس خرين انما فطرات عادي وهزات الماعن كتغسل فيهم واسامة كيلعب حداها حتى دخلات

نجمة: علاش هزيتي لياا تريكو لبااج ديالي

ايمانيديها فالرغوة)شمن تريكو ؟

نجمة: باركة متسطاي علياا …تريكوو لي عاد شرييت بييج …كتخليني غير نخرج وكدوزي لياا لماريو ديما كنلقااه مقلووب

ايمان(بصدمة )علاش انهز ليك حوايجك!!!انا وياك مكنلبسوش بحال بحال

كريم(كان متكي فلبيت حتى سمعهم جاي هاز بنتوو ) اش كاين

نجمة:انا عييت اكريم …كل مرة نلقا شي حاجة مهزوزة وكنسكت ولكن راه عيقاات

شاف فايمان وقال: شنو هزيتي ليهاا

ايمان: مهزيت والوو (غسلات يديها)قالت ليا هزيت ليها تريكو..انا مكنلبس بحالها هي غليضة عليا بزااف

نجمة: (خرجات عينيها)بزاااف عليك..غليضة كرهتي نتي تكوني غليضة..كنلقاك ديما هازة حوايجي لبسااهم دابا فينهوا تيشورت لبييج صبنتوو ملقيتووش ا كريم هدشي طلع لياا فرااسي …دير لياا حل لييوم قبل غدا ولا غنهز ولادي ونزيد فحاليي

ايمان(بلغوات) كتقلبي على سبة تعيتي لقيتي غير هادي ؟ على شراوطك الزينين نلبسهم ليك..نتي كتلبسي كبير بزااف

نجمة: يااااك اختيي تحل ليك لفم راك كالسة فدااري

ايمان: بزعطة الى داارك..حتى أنا دار باا

كريم(غوت): ايمااان اش هاد قلة تربية

نجمة: بالسييف شكون مهاا

ايمان: متشبهينش بهاديك السيدة..الى نورة مزال ضاراك ومتسرطاتش ليك من اللول متزوجييش بيه..

نجمة: ضربيييني سريي كونما انا كون راك كتباتي فالزنااقي كي الشمكاارة

ايمان: سكتي ياترييكة الجووع …سقاطة مخبياها فبيتك حساب ليك جيعانة بزاااف علييك

نجمة: شفتيي شفتيي كتبقش فلبيييت البرهووشة..قلت ليك.كتهز ليا حوايجي

كريم(جر ايمان بنتيير بعدهاا )دوزي لهاد جييه (صاح فيها )دوزييي الحماارة …تعلمي تهدري مع لي كبر منك ولا غنعاود لوالديك التراابي

تنطرات منو وبنفس نظرتو الغاضبة نطقات طالقة حلوقها عليه: مربية حسن منها هي…كتلوح عليا الباطل عمرك شفتيني لابسة حوايجها؟؟على زين ذوقها فالحوايج حتى نلبسهم ليها..

كريمكيغوت عليها)غتسدي فمك ولا غنعاود ليك الترابي..علاش تقللي عليها الادب

ايمان: مشفتيهااااش كي كتلوح عليا الباطل باغيني نسكت ليها

كريم: اه سكتي ليها هاديك راه مراااتي معامن كتهضري

ايمانبصراخ وعيونها نشرو الحمورية فعروقهم) وانا بنتتتتك أ كريييم

كريم: نتتيي وتريكة مك ميديرش فيكم لواحد لخيير …كونما جبتك كانت غتلوحك لزنقة وخة هكاك محمدتيش الله

ايمان:الله يخلف عليك اولد الخير

مشا تبع مراتوو خلاها كتنهج والدموع علاين ينزلوو.. سد لباب وحط بنتو مشا لنجمة لي جبدات لباليزة كتصطانع الدموع وقالت: انا ولا هي اكرييم نهار اللول مدخلش لدااري …علم الله واش دايراها هي ومها باش يفرتكو ليك لعش ونتا جايبها على نيتك وهي ومها كيحفروو ليناا

كريم: نعلي الشيطان ا نجمة وخلينا نتفااهمو صافي رااه هضرت معاها

نجمة: مكااين لهدرة لاا عشرة ا كريم ….اناا ولا هي فهاد الداار ….(شافتو سكت)كرييييم جاوبني داباا انا ولا هي

كريم:كتسوليني بحالا معارفاش شكون غنختار الله اهديك…راه نتي معامن بديت وغنكمل

سمعات هضرتو ايمان لي كانت كتبكي فصمت وعرفات انها غتعاود تهز رحيلها وغتعاود تشتت عشها ولعلم الله فين غتصد ولمن وكيفاش غتعيش

تمتمات بينها وبين نفسها: ديما مكيختارني حتى واحد

خرجات من الكوزينة والدموع كاينزلو بدون صوت..قصدات بيت اسامة وجلسات فطرف سريرو كتشوف شانطتها كيما هي فظرف شهراين مقدرش يخصص ليها حتى بلاصة لحوايجها بمعنى اخر مزال كيعتابرها ضيفة..جا اسامة بطيفو الطفولي وقال

اسامة: ايمان …علاش كتبكيي

ايمان: والوو (باستو فراسو بحب)

هز ايديه مسح دمووعهاا وقال: صافي صافي متبكييش نعطيك شكولا جابها لي بابا ؟

حركات راسهاا بلاا كتنخصص وتمسح دموعهاا تسمعات صوتوو حدا لباب قال: اسامة سير عند ماماك

خرج وقرب كريم حدا ايمان وكلس جنبهاا نحنح وقال: كنت عارف مغتفااهموش

ايمان: راه مهزيت ليهاا والوو هدشي كلو كديرو باش نمشيي

كريم: يمكن هكا حسسن !!

ايمانشافت فيه باسى) : هاكا حسن ليك نتا !!!(شافتو ساكت وغي كيسوط )دابا ولا حتى لصباح

كريم: غنديك عند لواليدة …راه غير بوحدهاا كلسي معاها ونسيهاا وديري عقلك …ولا نعيط لييك لماماك تمشي عندها ؟ فينما بغيتي ترتااحي

ايمان: كتهمك راحتي أ كريم!!معمرها همات ولا غتهمك حيت انا غلطة بقات تابعاك حياتك كاملة(وقفات كتصطانع الشجاعة)

كريم: هاد الهضرة معندها فاش تنفع

ايمان(بصوت مرعد )كتجري علياا ؟

كريم: متفهميش هكا ولكن ا ايماان نتي دابا كبيرة …واحد النهار غتزوجي وديري حياتك …شنو نضيع حياتيي و هاد لوليدات …نجمة الى مشات مغترجعش بالسااهل ولعلاقة الى مشات حتى تزعزعات معمرها ترجع كيف كانت ..

ايمان: كضحي بياا

كريم: نتي كبرتيي ولكن اسامة واميرة محتاجين لياا واش نضيع عائلة على قبل تخربيقة !

ايمان: (حركات راسها بلاا ) حاشاا (تبسمات بحسرة)حتى انا كنت محتاجاك واحد الوقت ومضحتيش على ودي واخا انا تخربيقة

كريمتجاهل كلامها حيت غدير ليه تأنيب الضمير)نتاصل بماماك ؟

ايمان: معنديش ماما..ديني فينما بغيتي ولا خليني نمشي مني للزنقة..

كريم: خالك؟

تبسمات باستهزاء وقالت: مبغيتيش تديني عندكم لدار

كريم: ايماان …لواليدة عياانة ومقادة على مشااكيل …ديري عقلك عندها نديك

ايمان: متخافش …غنقلب على شي خدمة ونخرج نكري .. ولاكنتي بغيتيني نبات فالزنقة ماشي مشكيل

كريم: جمعي حوايجك نديك دغياا

لبسات علبها دغيا وصدرها كيطلع وينزل بالشقهات..ماشي على نجمة ولا غيرها انما على كريم لي معمرو ختارها

جرات باليزتها هازا فيها ماتبقى من ذكرياتها مع مها..مسمعاتش حس كريم فالدار عرفاتو سبقها..حدو اسامة واقف فالقنت كيدمع حيت ولفها..يمكن هو الصادق فيهم..قربات منو وتحنات باستو فحنوكو ومسحات دموعو قايلة: ملي تكبر سول فيا(باست راسو بحب وشفايفها كيرجفو)متنسااش ايمان

أسامة: كنبغيييك

بغات تجاوبو وهي توقف نجمة جراتو منها بنطرة وقاىت بنظرة انتصار : طلقي ليا من ولدي..وسيري فحالك

وقفات كتمسح دموعها ..شافت فيها بعيون كلها حقد..هزات صبعها قدامها كتضورو وقالت: حنا فالدنيا أ نجمة..وكيقول المثل الدنيا غدارة والزمان حنات..ونتي عندك الولاد ومزال غتولدي ..غتشوفيني فكاع مشاكلك.غتشوفيني فصحتك نهار تهد..وفنهار تشواي حتى نتي فيهم(بحرقة)غيعطيك ربي بحال كي درتي ليا..حسبي الله ونعم الوكيل فيك

*

فرش لولاد الناس تلقى لي يفرش لولادك تعاملو بالحسنى

*

نجمة تزير خاطرها من هضرتها ماشي حيت جاها تأنيب الضمير لكن حيت شوشات تفكيرها بكبدتها وصاحت بعصبية: خرجي علي برا نتي وهضرتك السااامة تف و وو

هبطات دارت كلشي فالطموبيل لقاتو كيهدر مع موو ركبات حداه وقطع سايݣ ساكت توصلو لحدا لعمارات هنا فين دوزات طفولتها …فديك الجردة فين لعباتها نعيمة تعياات دمعو عينيهاا توحشااتها ومكرهاتش تقطعها من لحمهاا …غير كتحلم بيها كتفيق موحشاها كتر وكتر …مشاو لعمارة لي فيها الدار …. كريم هز لباليزة مطلعها فدروج وهي وراه ساكتة صونا فلباب وحلات لييه ملييكة وقالت: السلام اوليدي (شافت فايمان)ايماان مالكم ابنتي

حركات ايمان راسها بلاا ودخلات ساكتة

كريم: هاهياا اميي معااك لدارت شي حاجة قد هكاا عيطي لياا مني ليهاا

مليكة: علاه اش وقع اكرييم

كريم: من بعد ونهدروو راه شرحت ليك فتيليفون نمشي لتهز ولادي وتزييد راه خليتها شاعلة

كيف دخل خرج ورجع وقال: ديري عقلك سمعتيني

متسناش جوابها سد لباب وخرج شافت مليكة فايمان وقالت: دخليي ابنتي دخلي …اش وقع

ايمان: لي وقع وقع لياا … كلشي كيفوت

مليكة: ونتي اش وصلك لحوايجهاا ا ايماان وهي على سبة ابنتي

ايمان: موصلتهااش هي لي باغة لياا السبة

مليكة: ففف دخليي كلسي …دخلي هاد لباليزة ل داك لبييت…مافيها باس كلسي ونسيني

ايمان: مغنتقلش علييك …غنقلب على لكراا ونمشيي

مليكة: منك لباك ابنتيي

ايمان: انا معنديش با

دخلات لبيت لي قالت ليها حطات حوايجهاا وكلساات كتكبي وترعد وفمها كيخرج كلمة وحدة”الله ياخد فيكم الحق واحد واحد “… حتى قفزها صوت الرعد لي على برا خلعهاا …كان لجو مغيم كتر من خاطرها بحالا كيشاركها حزنها ..الريح قوية والشتا تاع الصيف كتجيب معاهاا الصهد والخنقة …بكات حتى عياات شادة تصويرتها مع نعيمة فلبحر كانت اجمل ايام حياتهاا …سمعات الصونيت فلباب مرداتش لبال حتى تحل عليها لباب من طرف كرييم عينيه عامريين غضب كيشوف فيها شوفاات خلعووها وقال: فين السنسلة؟؟

ايمانبوجه باكي )اشمن سنسلة؟؟

بلغوات صاح فوجهها :السنسلة ديال نجمة تاع الذهب فينهياا ملقاتهااش

ايمان: واش نتوما مراااض شنو وصلني لزمرها

كريمشدها من ذراعها مزير عليها)غتجبدي السنسلة ولا غنسلخ طاسيلتك

دفعاتو بقوتها وقالت: مهزيييتش واش تسطيتي

مليكة: كريم اولدي جيران كيسمعوو

جر الصااك من حداهاا فلاااه كلوو وكيغوت: مخلي معاياا شفارة اميي لفلوس كل نهار يتهزوو من لبزطام كنقول غير نجمة كتقدي بييهم مكنبغيش نظلمها …شوية لحوايج شوية الذهب

كتجار معاه فالصاك طلق ما طلق …دفعها وحل ديك شكارة تطاحت بواطة حمرة هزها حلهاا ولقا السنسلة وقال: اشنو هادي ابنت الكل_بة هااه

مجاتش فين تفتح فوهة فمها بصدمة و تستوعب كان طبع طرشة على حنكها حتى حمارت فالبلاصة وزادها وحدة اخرى

ايمان: هءههءءه والله مخديت شي حاجة والله هءهءهء

كريم: فين لفلوس لي كتشفري لياا فين ديتيهم هااه (رجع كيقلب فلباليزة شتت ليها كلشي وهي مكمشة لقا شي فلووس مع تصاور وقالت: هادوك فلووسيي والله مخديت ليكم شي حاجة هءهء

‎

جرها كي لكل_بة كتنتر ليه من ايدو وقال: عطيني بالتيساااع البرهووشة خرجيي عليااا خرجيي ..درت فيك .خير وجرييييتك عندي ساعة نتي غي بنت الحرام شفارة وغتبقاي شفارة

ايمان: حرام علييك مدرت والووو والله مدرت شي حااجة

صاح فوجها دافعها لباب الدار : خرجييي علياا سيري عند لكل_بة تاع مك خرجيي

ايمانكتبكي )مدرت والووو…كرييييم كريييييم مدرت والو

بقات كتغوت ليه فلباب وكتخبط لباب عليهم: حل لبااااب حل حل عطيني حوااايجيي …هءهءهء حل لباااب

حل لباب جاهل وحمر كثر منها ..دفع ليها حوايجهاا براا وكلسات كتجمع فييهم وهوا عند راسها قال: جبتك شهراين عندي بغيتي تفرتكي لياا العش نتي ومك البرهوشة

هزات راااسها فيه بعيون باكية وصدرها كيطلع و ينزل بالنخاصي …بحرقة قلب نطقات: هءهء والله منسمح لييك لا نتاا لا مرتك لا نورة (كتبكي شافت فييه )وعند الله تلتقي الخصووم …حسبي الله ونعم الوكيل

ردخ للباب حتى تسمع صداه فالعمارة لكن بتاتا واش كان بحال صوت انكسار قلبها.انكسار طفولتها وبراءتها واختلاط اللون الاسود مع قلبها لي ديما كتقوليها عليه نعيمة: قلب الحليب

مليكة واقفة كتشوف فاهمة نص الموضوع ولكن وذنيها سمعو هضرتها….ونطقات:

مليكة: مسمعتيش الرعدة اكريم ..فين مسيفطها اولدي ..كتبقااا بنتك

كريم: الجاايحة لكلحة ضرب ديل مهم …جيت ندير لخير بغاو يرجعووني ك_لب وسطهم

مليكة: ففف معرت اولدي …عندك تكون ظالمها أ كريم(بصوت مرعود)حسبنات عليه أولدي..غتكون ظلمتها..بنتك مكنعرفهاش مزيان ولكن مديرهاش

كريم: تمشي تعاودها لمهاا ديك لهدرة

هبطات باليزتها وصاكهاا و لمخدة كلسات فدرووج كتقلب واش كلشي كااين الصندوقة لي فيها اشيائهاا من تصاور و دمليج تاع نعيمة اما لفلوس داهم وبقات على الضس..غير مبانش ليه دبليج اما كان يشدو ليهاا يقوليها تهوا شافراه لشي حد كان مخبي فلباليزة لتحت

خرجات تحت عااصفة ديال الريح كتحرك الشجر والترااب …مرة مرة ضرب رعدة حتى السماا كضوي …دموعها فعينيها كتبكيي الدراري كانو مجمعين فالزنقة او معروف فرمضان السهير حتى لاشمن وقت كانت ديك الساع 11 تاع الليل

قصدات الدار ديال نعيمة ..حطات الشانطة و الصاك تحت الدروج …وطلعات كتبكي كأنها نسات بلي المرا لي تعرض ليها وتشوف حالها ماتت ..

دقات لباب جوج لمرات عاد جاها صوت اسراء وقالت: قريب

حلات عليها هي وخولة لي شافتها وقالت: ايماان مالك فهاد الليل

ايمان: نقدر ندخل

خولة(شداتها)دخلي ابنتيي مالك …علاش نتي فهاد لحالة

لاحت ايمان وجهها جيهة لباب تاع نعيمة …حسات بحالا كتعيط ليها …مشات بخطوات ثقيلة كتجر فرجليها ونفسها ثقيل..حيلها تهد وجهدها مشا ..ومبقا عندها فين تزيد..هي تجر والدنيا تجر حلات الباب وهي تشرع عينيها بصدمة و قالت

ايمان: خولة ف فين بييت مي ؟

خولة: خوالك و ماماك ابنتي صدقو لي يتصدق …ولفراش داه عبد الله لدار ديال لمحمدية بغا يفرشها باش يكريوها حيت متباعتش ليهم

ايمان: علاااش علاش!!!مكفاهمش فرقو كلشي خداو حتى حوايجها

مشات لصندووق كتبكيي حيدات لمانط من فوقو حلاتوو لقات فيه غير لمانط نيت وتما ستوعبات فلحظات انه كاينين ناس كيمشيو علينا وكتخصنا الدنيا كاملة..

خولة: ايمان ..نعيط لماماك ابنتي

ايمان(حاضنة رجليها عندها ) متخافيش اطاطا شوية وغنمشيي متعيطي لحد

اسراء: الى شافك باباا

خولة: سكتي نتي سيري كملي لعشاا

تحرك الساروت فلباب كلشي تخلع الا ايمان لي مكمشة عند الصندوق كتبكي بحزن وحرقة وكتسمع صوتو

عبد الله : داك الضو لي شاعل فلبيت كتخلصوو مك ولاا !

خولة(كتفتف منو ) : جات ايمان

عبد الله: اش جاب اصل مهاا فهاد السااعة …معامن تشاورتي دخليهاا(دفعها على الحيط )واش ديل مك كتمشي غير بلعصاا كي لحميير

مشا لبيت هاجم جر ايمان من التريكوو لي لابسة حتى بانت كرشهاا نوضها وهي غادية معااه حل لباب وخرجها : سيري عطيني بالتيسااع انا معاك بالله و بالشرع

تنطرات منو وقالت بحقد: الايام كدور..مجيتش باش نبقا ولا نطلبك على شي حاجة جيت نقوليك جوج كلمات واحلييين ليااا(غلبوها دموعها)مزال كاينة الاخرة ومزال غيتهد حيلك متغركش صحتك أ عبد الله وغنتلاقاو فين كتلاقا الخصوووم أقسم بالله لي حسن مني ومنك منسمح ليك…والى بقا ليك بينك وبين الجنة ذنبي وشنو درتي فيا والله العظييييم منسمح ليك

كلامها بورش خولة لي هي انسانة بضمير وباحاسيس اما عبد الله راه محرك فيه والو ومدخلاتش ليه هضرتها من حتى بلاصة .رد فعلو هو انه هز يدو بغا يعطيها محس بيها غير لوات لييه ايدوو تغوت واسراء….. من الالم طاح على ركابييه حداهاا وهي تنطق : تعلم تشد ايديك اعيفت الرجال كتقواا غير على لعيالات(لواتها كثر)

عبد الله (موجع) : طلقيي اعععع

دفعاتو تطاح حدا رجل خولة وقالت: ردي لبال منوو ومن ديك خيتي لي كدخلي لداارك

خولة: ش شكون

ايمان: راك عارفة شكوون

خلاتوو كيغوت بايدوو وخولة واسراء هزوه خرجات جارة بݣاجهاا …و لوجهة معندها فين تمشي شدات كرسي فالجردة مقابل مع شرجم الدار لي طلات منو تعياات…داعبو بشرتهاا قطيرات شتاا …هزات تيليفونها سيفطات مساج لمنعم كاتبة فيه : اجي عندي انا فالجردة بغيت نهدر معاك ضروري

هزات رجليهاا عنقاتهم فزكات بالشتاا لي هدناات لجو من الرييح لي كانت …تسربوو قطرات الشتا مع دموعهاا لي حبسوو …يمكن جرعة اليوم سالات او يمكن لعروق نشفوو..او صدمة ورا صدمة خلاوها تحجر فلحظة …لي حاسة بيه حالياا هوا طاقتها استنزفاتهاا لييوم

شافتوو جاي لابس جاكيط خفيفة حيت مكانش لبرد غير شتا الصيف هادي

منعم :اش واقع مالك كتبكي …وجاية بليل

ايمان(كتشوف قدامها وشعرها كيقطر بلما ): باقي عاقل على شنو قلتي لياا …نعيشو حدا لبحر تاحد ميوصلنا

منعم : هههه جبتيني تالهناا باش تقولي لياا هدشي ؟

ايمان : ياك كتبغيني

منعم (كلس جنبهاا )بزااف واش هادي فيها شك

ايمان(شافت فيه بعينين حمريين ) : دونك مكاين لاش نبقاو هكا …نتزوجو

بقا كيشوف فيها بصدمة وقال: واش كضحكي

ايمان: باينة فيا كنضحك ؟ شنو قلتيي …نتزوجوو انا قابلة…جاوبنيي علاش ساكت(كتهضر بدون وعي)

تنهد كيشوف فيهاا وقرب جيهتهاا شد ايدهاا الساردين وقال: ايمان عارفاني كنبغييك ولكن الزواج دابا ميمكنش

ايمان: غير كضحك ياك ؟ …ع علااش علاش وقفات كتشوفيه كتسنا ردو وقالت:وجاااوب

منعم (كيبغي يهدر ويسكت ويرجع يحك جبهتوو)

ايمان: منعم دوي.

منعم: نتي عارفة دفعت لقرعة تاع ميريكان حتى عييت و مجابش الله

ايمان: او من بعد شنو دخل هدشي فموضوعناا

منعم: بنت خالتي

ايمان: صافي صافي فهمت

منعم: لاا ماشي هكاك سمعيني (وقف عندها ) تزوجت ب بنت خالتي وداباا كطلع لياا فلورااق

صدمة على صدمة نطقات : كان كيحساب لياا نتاا ماشي بحالهم ا منعم (بغصة)تفليتي علييا

منعم: انا متفليتش عليك انا صارحتك بلي كنحس بييه …ونتي مدرتي حتى خطوة لعندي …

ايمان: ههه دابا انا السبب حتى فهادشي ههه واش واش كتحماق علياا هاا واش كنبان لييكم وحدة تمسحو فيها رجليكم كي لكل_بة (دفعاتو كضرب فصدروو ) كنبان ليك بووحدي سااهلة هاا كنتي باغي تفلا علياا وتزييد كنتي باغي تخليني نبغيييك وتزيد يااك دويي

منعم: والله مكان فنيتي …انا بغيتك من قلبيي وربي شااهد ولكن ا ايمان انا باغي نحسن وضعيتي وضعيية ميي نضمن مستقبل كبر من هذا

حيدات يديها من يديه ببرود وقالت: وانا؟؟

منعم: تسنايني!!!!مغنساكش غي نضمن مستقبلي نديييك

كلساات فاشلة كتبكي ماشي علييه ولكن على لمواقف لي كتحطها دنيا فيهم وقالت: سير الله يسهل علييك امنعم …شكرا على الصدااقة لي دوزناا

منعم(شاف لباليزة ): ايمان خ

ايمان: سير امنعم …من لييوم مكتعرفني مكنعرفك …صافي سير (غوتات كتبكي )سير فحااالك امنعم

ناض منعم من حداها مراضيش على حالتها وضرو خاطرو عليها تراجع خطوات قليلة مخليها كتكمدها فقلبها..اي نعم مكتبغييهش لكن كيبقا اخر امل..تمنات كون وقف معاها وكان مساندها لكن بين الكاف والنون هناك ألف

“لا عفا الله عنكم ولا رحمكم أذاقكم الله ما أذقتموني..ستراني في عقوق أ طفالك وفي مصائبك المتكررة…في كل مرة وقعت في احدى عجائب الدنيا..لعنكم الله وكسر قلبكم عند كل امين يبوح بها المسلمين في صفوف الصلاة”

مشاا مخليهاا فالظلام بوحدهاا جامعة رجليها عندهاا عاضة على ركبتهاا …و الشتاا بداات من جديد …جوج تاع الليل وهي منها لما مكاينش لي صوناا فتيليفونها…سكتات هادئة مع قطرات الشتاا لي كطييح …سمعات اسمهاا وخطوات جايين كيقربو لعندها بسرعة …مشات بمخيلتهاا لطفولتهاا

الليل وشتاا فنفس لبلاصة واققفة نعيمة بلمضل وايمان كتنقز فلماا وكتجري وكتفزك وفرحانة بشتاا

نعيمة: ههه اديك فريخة شتاا وباركة ابنتيي شو كيوليتي

ايمان(هزات راسها لسما وحلات فمهاا كيطيح لما وكتشربو): مييي الشتا حلوة ديري بحاليي هههه

هاربة لنعيمة كضحك بين الشجر تشداتهاا ايد شهقاات ورجعات لحاضرهاا وهي كتشوف فنجااة قدامهاا

نجاة: اش كديري فشتاا بووحدك ..ايمان دوي معاياا دويي (وقفات كتشوف فجناابهاا حتى بانت ليهاا الشانطة والصاك ولمخدة..شتا كطيح والزنقة خااوية كتصفر ) نووضي معااياا اجي (جراتها من ايدها )اجي

هزات داك لبكاج وشدات ايمان بايد ..معكلاها هي الاخيرة عبايتهاا وشال كيزلق على راسهاا

طالعة ايمان فدروج ببطئ مكسوورة الحال ..ونجاة هزات كلشي طلعاتو لدار ورجعات لايمان ضماتها ليهاا

دخلاتها لصالوون حيدات ليها سبرديلتهاا ومشات لبيت جابت حوايج و فوطة نشفات ليها شعرها وايديهاا…حيدات ليها تريكوو فازك تعصريه خلاتها بسوتيان ولبساتها بيجامة

نجاة : نوضي ابنتي نوضي

نوضاتها حيدات ليها السروال ولبسات ليها سروال بيجامة جمعات ليها شعرهاا كتحاول تهدرها ولكن لا مجيب عينيها كيقطرو بالدمووع و الشهقة خارجة بلا ارادتها مرة مرة

كلسات نجاة محيدة لعباية ب بيجامة بيتية جرات ايمان لحضنها وقالت: هدشي كلو غيفوت ابنتيي غير صبري …لي مخرج من الدنياا مخرج من عقاايبها

ايمان: انا بغيت نخرج

نجاة: متقوليش هكا باقة صغيرة وبااقة ليام الزينة قدامك …شكون لي مدوزش ايام كحلة فحياتوو …كلنا دازت علينا الدكاكة …ولكن ربي كبيير قادر يبدلها فساعتهاا الكبيدة…عاودي لياا باش ترتااحي عاودي لياا اش هازة فداك لقلب لي غطرطقييه …

ايمان (بهدوء)عرفتي انجاة …غادي يخرجو منيي واحد ايمان خاايبة وحاقدة ومغترحم حتى واحد فيهم … وخة يبكيو عند رجلي مغنسمح ليهم …وخة تبقا بينهم وبين الجنة سمااحتي مغنسمحش لييهم …وكيف كرهوني فحياتيي …غنشتت لييهم حيااتهم

*

إذا أردت أن تصمد للحياة، فلا تأخذها على أنها مأساة

*

❞ هذة الحياة لن تقف لتراعي حزنك إما أن تقف أنت وتكملها رغم إنكسارك أو أنك ستبقى طريح للأبد. ❝

داز النهار كامل وايماان نااعسة بسخانتهاا …حطات نجاة فطور اليوم الموالي كيتسناو الاذان …فيقاتها بزز تفطر معاها رغم انها كانت فاطرة ولكن مطاحتش النعمة فكرشها من غير لماا …كلسو على الطبلة وبنت نجاة كتشوف فايمان وقالت: ايمان غتبقاي معاناا ديما !

نجاة(شافت فايمان كتحرك فزلافتها بلا نفس ) ايمان نطلبك طليبة

هزات ايمان عينيهاا فنجاة وقالت: شنوو

نجاة: ياله معاياا ابنتيي لطنجة نعيشو بلي قسم الله نتي قرااي وانا نخدم اش بان لييك

ايمان: وهادو يعيشو بخير بحالا مدارو ليا والو

نجاة: انا خايفة علييك ابنتيي ..هوما عاشو حياتهم اتبقااي تابعاهم صافيي كبرتي تبارك الله بني حياتك لرااسك

ايمان: حتى ندي حقي منهم ونبرد شوية …نتي سيري لطنجة (تبسمات ليها )فرحت لييك والله …لقيتي ولد الناس لي بغيتي

نجاة: ولد الناس راه متحكمي علييه حتى تعاشرييه الزين ديالي …انا غير ملي غيهزنيي ونقري بنتي فلحلال هاديك عندي الدنيا ومافيهاا

ايمان: مسولتكش فين تلاقيتو

نجاة: خرجت من ديك لخدمة …ومشيت لواحد لقهوة كنسربي فيها وكندير فيها لميناج لمهيم جايبة نهار بخير …غير صدفة تلاقينا فالطريق ملي كنت جايية …كان تالف

ايمان: زدتي تلفتييه

نجاة: اش عارفة عليا هههه هدرة تدي هدرة تجيب حتى تبادلنا النوامر (تنهدات)اوى قلت ليه قصد داري راني مطلقة وعندي بنت …واخة مزوج تما

ايمان: قلتي لياا منين ؟

نجاة: سعودي …مزوج وحدة تماا انا هي التانية انا مهمنيش والله … قلت ليه صداقي هوا تشري بارطمة فمدينة خرا ونسكنو مجموعين وتكتب ليا نصهاا

ايمان: وكتبهاا ؟

نجاة: وكتبهاا معلوم غيدير ليا شهرية بيها نعيش ونتعلم الصنعة …كنعرف نقاد لحلوة نعدي بيها وندير لخيااطة …شرطت عليه يشري فشي حي شعبي باش نكون قريبة لدرويش

ايمان: مزيانة

نجاة: منكدبش عليك كرهت هاد لمدينة … بغيت نبدا صفحة جديدة

ايمان: الله يسهل علييك اطاطا غنتوحشكم

نجاة: ياك قلت ليك تمشي معاياا

ايمان (سهات ): معرفتش ا طاطا

نجاة: واش نتي حمقة هادشي لي عاودتي ليا كامل وبغيتي نسيقطك عند داك لكل_ب لموسخ …شنو هاد لمرة يتكرفص علييك ؟ حتى من نورة صونات الصباح مبقات عاودات فين غادية فيين ….

ايمان: والله لخليتهم مرتاحيين و غيبكيو الد_م على الدموع لي حطيتهم فهاد السنين …من موراها عمرهم مزال يشوفوو وجهي

نجاة: وغتجي عندي ؟

ايمان: منتقلش عليك انجاة غنكري وزايدون انا كنفكر ندفع نقراا فشي بلاصة (تنهدات )ولكن معرفتش واش غنجيب شي نقطة تخليني نقرا فشي معهد مزيان …معرفتش

نجاة: الله اياخد فيهم لحق…ان شاء الله تنجحي وتفرحيني معاك…فطري هاهوا اذن

دازت ايام قليلة و طابلو تعلق ديال الباك كلشي كيترعد ايمان واقفة كتسنى لبلاصة تخوى باش تمشي تشووف …كان خوفها كبيير حييت مخدمااتش مزياان راسهاا عاامرر مقدراتش حتى تركز خايفة يتضرب ليها كلشي فالزيرو واملها تقرا فمدينة خرى وتبعد عليهم فخطرة

كونما الظروف كانت متأكدة بلي سميتها غتكون فالنقط المشرفة بحال كل عاام ولكن هاد لعاام تقلباات حيااتهاا كاملة …قربات لطاابلوو وصوت الدراري ولبنات هالي نجح كيغوت هالي استدراكية كيبكيي قلبها غيسكت بلخلعة …وصدمتهاا كانت فمحلهاا نجحاات ولكن غير بمقبوول

طاح كلشي فوق كتاافهاا ديك السااع شلا احلام زادت تهرساات واقفة نجااة بلعباية والشاال كتسناها فالشاارع حتى باانت ليها جاية كتمسح فدموعهاا وتشهق

ايمان: هءهءهء وقع لي قلت لييك انجاة هءهءهء نقطة مغدخلني حتى لمدرسة هءهءهءه(كلسات فلعتبة كتبكي ) خرجو لياا على حيااتي ومستقبليي هءهء(كطرش فراسهاا )ضاااع لي حلمت بييه انجاة كلشي ضااع كلشي هءءهءهء

هبطات عندهاا شدات ايدها وقالت: خيرها فغيرها ابنتي معرفتي ربي شنو مكتب لييك اويلي طرشي راسك واش حماقيتي نعلي الشيطان حشوومة

ايمان(بحرقة ): كيف خلاونيي نكرفص مستقبلي والله منخليهم فرحانين انجاة هءهءه كنقسم ليك بالله تنخرجها منهم والعائلة لي فرحانين بيها غنشتت ليهم العش كاامليين

نجاة(باسف): ايماان …ياله معاياا لطنجة وخلي علييك هدشي عفاك على وجه ميمتك الله ارحمهاا خليهم منهم لله

ايمان(وقفات كتمسح فدموعهاا وكتنخصص ) : غير خلينيي نبرد لعافية لي فخاطري انجاة عفااك غير خليني

نجاة: وغير ياله حتى تبردي وفكري بعقلك

ايمان: لاا غنمشي حدا لبحر بغيت نبقاا بووحدي…عفاك

نجاة: اجي شدي طااكسي ايمااان ….ايمااان

خلاتها وقطعات الطريق كتزرب مشافتش وراهاا ظافرة شعرها جنب عينيها طايبيين بلبكا و السخانة طرطقات ليهاا حدا فمها بلا بعض لحبيبات لي ناضو ليها بلعصااب …لابسة سورفيت صيفية وسبرديلة …قصدات البحر وبقات كالسة فييه كتخمم مشات لسيبير كتقلب على مدارس كيقبلوو ب معدل ناقص والوو كتلقا التكوين ولفااك هوما ابسط حاجة دير ..وطموحهااا كان الهندسة او الطب ولكن نقطتها لا تسمح لولوجهم

كاع الجامعات لي كانت باغة تمشي ليهم على براا ديال لبلاد طالبيين ملااين هوماا باش تقراا وحتى النقطة مامساعفهاش باش تقرا التخصص لي بغاات…داخة بيها الدنياا ومعرفات شنو دير …خداها لبحث لساعات فلجامعات حتى قرب لمغرب وخرجاات كتمشاا وعقلها خداام من بعدما دارت واحد الخطوة مناوياش ترجع عليهاا …ماشي بزااف تاع لوقت حتى سمعات صوتو وراهاا

حسام : ايمان

تقلباات لعندو كتشوف فيه بعينين ذابليين بلبكاا قرب جيهتهاا محس غير بيها معنقااه …تفاجئ ولكن دغيا دور ايدو عليهاا وقال: شنو عندك مالك …عرفتي شحال صونييت لييك

معنقاه وكترمش بملامح جامدة بسرعة قلباتها دموع وتمسكيين لييه كتبكيي وتقول مبكييت قلبها طاايب بلا تمتيل

ايمان: هءهءهءه حاسة براسي بووحدي احسام هءهءه

حسام: شنو وقع …اجي لطموبيل

مشات معاه ركبات وحتى هوا ركب من جيهتو مقابلين مع لبحر مبقات غير نص ساعة على الاذان

عاودات ليه شنو وقع مع نجمة كتبكي ومع عبد الله حتى هواا

حسام : وفين مشيتي من بعد !

ايمان: بقيت عند واحد صاحبتي وليوم خرجو النتائج

حسام: فكرتيني ..نجحتي؟

ايمان: نجحت غير ب پاصابل مقادرة ندير بيهاا والوو

حسام: ماشي مشكيل حتى لفاك ولا التكوين كاين فييه ميدار …هدرتي مع نورة

ايمان: محال تبغي تشوف وجهي من بعد دوك لمشاكيل وزدتها دابا مع عبد الله

حسام: كيفاش حتى لويتي ليه اييديه خليتيه كيتوجع ومشا دار الراديو

ايمان: هوا لي جبدني

حسام(تنهد ): شنو بغيتي ديري دابا تمشي معايا لدار

ايمان: و نورة

حسام: حالها سااهل خليها عليا …المهم نتي تكوني مرتااحة وتفاداي النقاشات معاها وخة

حركات راسهاا باه وقالت: شكرا احسام عمري نسا خيرك(حطات ايدها على ايدو هبط عينو شاف ايديهاا قلبهاا وحك صبعو مع مؤخرة ايدها وقال: مبيناتنااش

ايمان(بابتسامة ): نمشيوو ؟ توحشت نور صراحة

حسام: الصراحة كلنا توحشنااك

ايمان: متبقاش تشرك نورة فلهضرة هاديك مكتوحش حد

ضحك وهي جمعاتهاا ملي دورات راسها لجيهة الزااج ربعات ايديهاا وهوا مشاا قاصد الدار …فالطريق نورة كتصوني جاوبها بلي جااي وقطع …وصلو مع الله اكبر تمشا قدامها وهي ورااه مربعة ايديها كتشوف فهاد الداار لي مصبوغة فلبيض ولكن كتبان ليها هي كحلة فقلبهاا

مع خطوات الخطوة لداخل سمعات نورة قالت لحساام: معامن تشاورتيي ؟ مالك كدير غير لي فرااسك باغي تنكدها عليا تاني عاد رتااحيت

حسام: نعلي الشيطان رمضان هدا واش بغيتي تلوحييها …كلسوو وتفااهموو راها براا صافي

نورة: فففف

خرجات على براا مكشة على حجبانها ربعات فباب الداار وايمان لتحت بجوج دريجات وقالت: هربتي تعيتيي ورجعتي !

ايمان (كتشوف ف نورة وتمعن مزياان وكتقول فخاطرها واش نتي نيت ولدتيني وتوجعتي عليا ) : هدشي لي عطا الله

نورة: شنو نتيي زعمة مهرسة عبد الله بغيتيه يخرجها ليك طريفة

ضحكات ايمان وقالت: نهار كان كيضربني بالسمطة …نهار دفعني تجا راسي فلقنت تاع الطبلة …نهار لوا ليا ايديي حتى طرطقات هدشي كلوو مبانش لييك …بانت ليك غير دافعت على راسي وهوا مجري علياا فنص الليل وفشتا مزال !

نورة: فين كنتيي شكون هاد صاحبتك

ايمان: متعرفيهاش …دابا واش غتخليني ندخل ولا نمشيي !

نور:ايماااان (نزلات دريجات كضحك تلاحت فايمان لي هزاتها عنقاتهاا)توحشتك اطاطا هههه

ايمان(باستها وشافت ف نورة ): لحبيبة ديالي حتى انا توحشتك

حسام: ياله دخلو نفطروو غنبقاو بالجووع …ايماان دخلي مرحباا (بهمس)نورة ياله فيا لموت جوع

تجاوزااتها ودخلات هازة نور ..لا سلام لا تعنااق ناشفة بيناتهم لحنان لهاد الدرجة

كلسات فالطبلة معاهم هزات تميرة وكاس تاع لماا كتفطر حتى تيليفونها كيصوني بنمرة نجاة رسلات ليها مسااج فيه ” طاطا غدا غنجي عندك ونهدرو بلا متشوشي علي انا بخير مشيت عند نورة “

رجعات تيليفونهاا وشافت فنورة لي مخنزرة فيهاا وقالت: مالك مع باك تجرا علييك !

ايمان: متفاهمتش مع مراتو

نورة: نتي تفاهمتي حتى معايا بقا غير مرت بااك ! شنو وقع

ايمان: قالت لييه هزيت ليها سنسلة

نورة: وهزيتيها !

بقات كتشوفيهاا وقالت: عمرك حصلتي علياا شي حاجة

نورة(ساطت): فطري فطري لهدرة معاك حرام …نسيت ليوم النتيجة نجحتي

ايمان: اه

نورة: شحال جبتي

ايمان:11،95

نورة: ويلي ويليي على لقرايااا صاافي هدا هوا تنقاازك الدورة اللولة جبتي 17 والامتحان 11 قرينا بكري

حسام: نورة !

بقات كتشوفيهاا مزيرة على لكاس فيايدهاا من بعد هوما دخلو فحوارات وهي بقات ساكتة كتشوف

طلعات لبيت وقلبها تزير كتفكر ملي كتكون ناعسة وكيجي عندها يتلمس فيهاا علم الله شحال من مرة محساتش بييه

كلسات على السرير كتفرك فايديهاا …جبدات تيليفونها لقات منعم مصوني ومعاود وبزاف تاع لمسجات منو بلوكاتوو وبلوكات معاه صداقة كانت زوينة

شي مرات الحب كيكون مذاقو مر ملي كيدوز فوق الصداقة كتقول فراسها كون غير بقينا صحااب كانت غتفرح لزواجو حيت عرفاه باغي يمشي لبرا وشحال وهوا مضارب مع القرعة …

كتحمد الله انه موافقش على الفكرة الصادمة لي جات فبالها فلحضة ضعف …تزوج بياا اش من زوااح بلا حب ولا اعجاب وغير هرووب من الواقع لي عيشااه

اصعب حاجة هي تصلح غلط بغلط كبر منوو

تكات بحوايجهاا حيت معندها هنا والوو …تكورات على وضعية جنين مشتااقة لريحة ميمتهاا تعنقها وتقوليها كلشي غيفووت

ايمان(نطقات بخنقة ): هءهء تحاجة مفاتت امي

#يتبع