الفصل الثاني: بين يد القدر

ايمان: هء هء بغيت نمشي عفاااك خلعتيني

_راه غادي نديك متخافيش بغا يدير ايدو تحت الصااية وهي طير علييه بقمشة لوجهوو كانت غتجبد ليه عينيه ايد فلباب وايد فعينوو تزيد تبرك شوية تقبها لييه…مع حلات لباب مع هربات ..خرج بغا يتبعهاا ورجع شاد عينوو لي دمعات بالد_م ….اما ايمان معالم بقلبها غير الله كتجري وتقول مجرييت كي الهبيلة تلفها على الطريق لي عاارفة .. الطاكسي لي بان ليهاا تهرب منوو وتخبا حتى يدوز كتبكي وتنخصص وعينيها كيقلبو فالطرقان لي عاد بداو الاصلاحات فيهم ولمدينة كتكبر وهي عارفة من لمدرسة لدار لسويقة لي حداهم حتى لبحر كتمشي ليه بطوبيس ولا طاكسي عمرهم مشاو برجل باش تشد الطريق

جاها صوت نسائي وقالت :ابنتي يكماا تلفتي

ايمان: ااه نءهءء هء

قربات ليهاا كتهدن فيها : عارفة فين ساكنة

ايمان: هء هء هء اقامة *** حدا سبيطار لحومة ءءهء

_ (كمشات عينيها فيها) واش نتي بنت نورة !

ايمان: ااه هءهءهء

_اش جابك هناا…فين ماماك ولا جداك

_فالدار هءهء بغيت نمشي لدار فيين الطريق عفاك اخالتي

_ياله نوصلك ياله(شافت فراجل كيتسناها )من بعد …من بعد

نطق الراجل _ وايلي انجاة تء

مداتهاش فييه شدات ايمان من ايدها كترعد وقالت: اناا راه جارتكم فلعمارة سميتي نجاة …مالكي مخلوعة

ايمان: والوو هءهء

غادية مع نجاة لي كتقرقب بطالون مقمقم فلكحل وعباية كحلة وريحة كتشمها من لبعييد

نجاة: فاش كتقراي

ايمان: السادس

نجاة: قرااي قراي باش تخرجي شي طبيبة ولا مهنديسة بحال خالك امين …اما عبد الله غير جلاخة

ضحكات ايماان بعيون متورمة بلبكااء

نجاة: يكما كيضربك داك الضبع

ايما(حركات راسها باه ): اه

نجاة: عطيه ضربة لجدارة لودن …مكنحملو مكيحملني عنداك تقولي ليهم نجاة وصلاتنيي لا يخاصمو عليك

ايمان:لااا منقوولش(بانت ليها الطريق ) صافي بانت لييا الطريق

نجاة : بلاتي نقطعك الشانطي

قطعاتهاا وبقاات مقابلة معاها تدخلات لعمارات من الباب الرئيسي عاد وقفات طاكسي ومشات

الاخيرة كانت صفرة بلمرض وزادت بلخلعة ماكتر كتجري وتقول مجريت و الدموع كيهبطو غير بوحدهم

طلعات دروج كدق فلباب كتنخصص حلات عليها خولة …دازت من حداها بجري ومشات لبييت تاع جداها تكمشات فوضعية جنين كتنخصص وتبكي بصوت مسمووع …تبعاتها نعيمة وخولة مخلوعين

نعيمة: ايمان ماالك ايمااان دويي معايا مالك

ايمان(بحرقة): هءهءهءههءءه انا مكنحملش ماما ….ومكنحملش بابا هءهءهءهءه مكنحملهومش بجوج هوما مكيبغيونيش هءهءهءه حتى انا مبقيتش نبغيييهم هءهءء

نعيمة(قطعات فقلبها): علاش اكبيدتي اش دار لييك باباك

ايمان(كتحرك راسها فوق لمخدة و عاطياهم بالظهر ونعيمة كطل وطبطب عليهاا): هءهءهءهء كح كح

بقات كتبكيي حتى ناضت قافزة كتقيى فلارض حدا الناموسية من كترت مبكات

خولة كتشوف بتأسف وساكتة هي من ديما كتشوف قساوة نورة من جيهة بنتهاا ولكن عمرها شافت تصرف كريم معاها …معرفات شنو لي ضرها لهاد الدرجة

نعيمة: بسم الله علييك ابنتيي (كتبكي معاها)انا هي مك وانا هي باااك ومحدي عايشة مكاينش لي يطيح دمعتك ابنيتيي ….كنت انا لي نديييك اكبيدتيي انااا صافي ابنتيي صافي …مسحي فيا اش دار لييك

ايمان(كتنخصص فحضنها): هءهءهء مبقيتش بغيت نشوفوو الميمة

نعيمة: صافي ابنتي صافي

مسحو ديك لحالة وتكاتها تنعس ركب فيها لخلعة والخوف وكل مرة تنعس تنوض قاافزة ومخلوعة خاصمات نعيمة على كريم واكد ليها غير ركبها فطاكسي بوحدها هدشي علاش تقلقات

مرت اياام وايمان فينما نعساات تنوض كتبكيي ومخلووعة بوحدهاا ديما مخشوشة فنعيمة ليل ونهار

في ليل من الليالي لي كتبقا سهرانة بزز كيتغمضو عينيها

نعيمة: ونعسي ابنتي هانا حداك متخافيش

ايمان: ميمة نطلبك طليبة

نعيمة: نعام ابنتي اش خاصك

ايمان(كتاوب ) : بغيت ندخل لاصال ديال تكوانضو

هز ياسين راسو ناعس حدا رجليهم : حتى انا الميمة

نعيمة: وعلاه نتي ولد

ايمان: لاااء انا بنت ولكن بغيت نتعلم ندافع على راسي باش شي نهار لي بغا يضربني ندݣ مو عصا

ضرباتها لرااسها بلطف: تنݣولييك مبقيتيش تعايري

ايمان: لميمة راه ياسين لي كيعلمني السبان

ياسين(ضربها لرجلهاا): الله يمسخك

نعيمة: هدا على ختك اداك هاه وشحال هاد تكوانضو

ايمان: تالغدا ونسولووه

نعيمة: صافي ان شاء الله

ياسين: حتى اناا

نعيمة:حتى نتااا ياله ونعسوو طناش هادي هاااء

ايمان(تاوبات): تصبحي على خير مامييي هههه

🦋🦋🦋

الوقت شي مرات كيدوز بلا منحسوو بييه كنلقاو العمر داز فلحظة

ايمان الطفلة الجميلة كبرات ولات شابة بعمر 17 لسنة ونصف

واقفة وسط صال كبيرة وكاع الحاضرين كان لباسهم هوا الزي الرسمي للتايكواندو الاختلاف فقط فنوع الحزام على حسب المرحلة فين وصل …كانت تصفيقات كثيرة لشابة لي واقفة لوسط ايمان لي كانت حفيانة لابسة لباس ابيض بلا حزاام …جامعة شعرها لفووق دهبي جارة عينيها بكحل اسود بارز زرقتهم الفاتنة لي مكاينش لي متمنضرش فيهم وقال سبحان الخالق

حناكها مهزوزيين بابتسامتها العريضة وهي كتشوف لكوتش هاز الحزام الاسود اخر مرحلة واخر حزام

_الناااس الجداد بغيت نقوليكم خاصكم توصلو لهااديي تبتو انكم كملتو فالهواية لي كتعجبكم علاش لا تولي مهنة تمارسوهاا ف المستقبل كيفما انا وكيفما بزااف

حظ سعيد لوليدات لي متمكنوش ياخدووها هاد لعام ومبرووك لبنتيي ايمااان على المثااابرة ديالهااا

ركب ليها السمطة وحزمها لقدام تحت تصفيقات …نقز واحد من دراري وقال: هي بنت جيران غتولي ضرب بنادم لكود سيزو هههههه

ايمان: لي دوا يرعف

ضحكو وتبادلات مع لكوتش ديالهاا تحية التكواندو لمعرووفة بحالها بحال لكراطي

بعد ما سلات الحصة ديالها قصدات لفيستير جمعات مسائلهاا لبسات كلاكيط فرجليهاا و الظفيرات مصبوغين …فكات شعرهاا يرتااح وخرجات مبدلاتش اللبسة فرحانة امتى توصل توريها ل نعيمة …

الحياة عبارة على مسافة صغيرة كتغمض عينيك كتحلها كتلقا العمر طاار فرمشة العييين

حياتها باقة عاادية مكاينش فيها تغيير كتير

ايمان شابة بغات تخلق سعادتها بنفسها مغتسناش الناس يفرحوهاا اهم انساان فحياتها هي جداتها عينيها باش كتشوف والبااقيي معندهاش سووق فيهم

نورة فهاد الاعوام تزادت عندها بنت وحبسات اما كريم راه تزوج او عندو جوج وليدات

الحياة غادية وايمان كتحسب ف الايجابياات وشي حاجة تخليهاا تشفع ليهم شوية مكتلقا والوو وانانيتهم غادية وكتزاد دارو دار جديدة عائلة جديدة

ولات ايمان انساانة يتيمة بوجود الطرفين بجوج ..

الطرف التالت لي معدبها فحياتها كتر وكتر هوا خالهاا هاد تلاتة تاع الناس خلقوو واحد الحقد كريييه فقلبها من جيهتهم ذرة حب مبقاتش كتملكها ليهم

خرجات من لصال رافعة راسهاا كان ظلام لحال كتزرب لتصادف مع خالها فالطريق الاخير لي ستاقر معاهم فالدار مدوز عليها العداب مكترجعو اللور غير نعيمة

طلعات لدار بكلاكيطة فرجلها لمصبوغين فالاحمر جا مع بياضهاا

حلات لباب كتعيط لنعيمة

ايمان: ميييي وا مييي خرجي خرجي

طلات عليها نعيمة بابتساامة السيدة لي مزادها العمر غير تجاعيييد خفيفة وزادها نور وبشاشة فوجهها

نعيمة: هاااه مبروووك ابنتيي

ايمان(كدور براسها ): تراااا واخيرا ههههههه

خولة ( خرجات من لكوزينة بابتسامة ): هنية علييك ابنتيي

ايمان: شكرا اطاطا ربي يخلييك

نعيمة: ودخلي ابنتيي بدليي باش نتعشاو

ايمان: ندوش ونجي

قصدات لبيت حلاتوو هزات عينيها فالسرير لمقابل ليهاا كتلقا اسراء بنت خالهاا شابة حتى هي مراهقة 15 لسنة

ايمان(عطاتها بجنب كدندن وتغني بالاسبانية ): همم

اسراء: صافي شديتي السمطة

ايمان: سييي سينيوريتااا

اسراء(كتعوج): سي سينيوريتااا …حافظة جوج كلمات بالسبنيولية جاية فاضحانا بيهم

ايمان(ميقات): نننن اوى كوني لالة وقولي لياا اشنو هي دخلي سوق راسك بلفرونسي الغبيية المجلجة

اسراء: بعرة كيدايرة

ايمان(هزات برودويات ديالها ): طليهاا

هزات تيليفونها معاها لدوش شعلات اغاني اجنبية وبدات كتحيد فحوايجهاا …جسم انثوي رشيق كريشة داخلة ومعالم فطور النموو مع سنها ..حلات شعرها طويل لي قرب لمؤخرتهاا كتخلل اصابعهاا بين شعرهاا وطالقة عليها لما سخوون كتردد كلمات الاغنية حتى قفزها الباب طاحت ليها القرعة من ايدهاا و شدات على قلبها من الخبطة …سمعات صوتو وسمطات

عبد الله: لماا كتخلصوو مك دغياا بغيت نتوضاا

نعيمة: وصبر تبرد فيك النفس ياله دخلتي

عبد الله : اخر مرة نجي نلقاهاا داخلة وطالقة علياا داك لحلق كي الشيخاات

حبسات لماا كتسووط حتى سمعات صوت نعيمة كيقول: سربي ابنتيي …ايمان

ايمان(بتذمر): واخة اميي

كملات الدوش ديالها بالزربة وخرجات لبييت كتلبس كل وحدة فيهم بناموسية فلقنت فاصلهم جوج كوافوزات صغار حاطين فييه مستلزماتهم

لبسات بيجامة بسروال وخلات شعرها على راحتو مطلوق هزات تيليفونهاا كطلع وتهبط كان ديك الساع مزال الانسطا متعرف وحتى الفيس كان عاد تشهر من بعد الايميسين ملي تسد ولا كلشي كيستعملوو

كلشي كان مصيف ومبحر ولبارطاج تاع تصاور مكاين غير هوا

عيطات ليهم نعيمة يتعشاو ونااضو لصالون …كالس عبد الله ب كندورة وسط الصالون وفايديه التيليكموند غير شاف ايمان بدا كيطلع و يهبط فيها بتخنزيرة وهي جاية جيهتوو عطاها ايدو باستهاا ومشات كلساات حدا نعيمة ساكتة كيف الضيفة

عبد الله: مال مك نتي على ديك فر فر فلما يكما عند بالك كيجينا فابور

ايمان: لااا اخالييي غير

قفزها بجوابو وقال: ترادي معايااا نيت

نعيمة: زيد تعشاا باركة

خرجات عينيها فايمان باش تسكت …تجمعو كلهم

تنهدات خولة حتى شاف فيها : مالنا اش كااين

خولة: والوو…توحشت ياسيين

هزات ايمان عينيها بحقد فخالهاا وهي كتفكر فلعصاا لي كلا يااسين نهار منجحش فلبااك مخلاهش تيعاود الاستدراكية فلبلاصة سيفطو لعسكر بلمعرفة

نعيمة(نغزاتها): كوولي

ايمان: كناكل

عبد الله : ولدك مشاا يترجل معندو ميبقا يكجدر فدار فيها لعيالاات ….ونتي “مخاطب اسراء “متجمعي راسك ندب_ح مك حية

اسراء (بخوف): كون هاني ابابا

طلع وهبط ف ايماان حتى بانت ليه الصباغة فصبعانها حمرة كانت غادية بدغمة لطاجين حتى شدها فوق الطاجين : اش هدشي

ايمان(سرطات الدغمة لي فمها ): خ خاليي راك قسحتيني طلقني

عبد الله: نهاار “كيزيد يزير ومع بيضة ولات ايديها مزيرة وحمرة” تكلسي معايا فنفس الطبلة دايرة هادشي فايدك ….ندوز عليهم بموس حاافي

نعيمة: طلق البببنت ا عبد الله

عبد الله : مييي لبرهوشة تاع مهااا رخيتو ليهاا حيت مكنتش ….هادي برب تندوزها من السراط المستقيم ….ولي معجبووو الحال يعطيني بالتيساااع راه باها ومها ديورهم قد لخلاا…..نوضي فحالك نوووضي

طلق من ايدها بلكشيفة ناضت وهوا متبعها بلعيين تاتخبات وقال : تفووو تريكة لحراام كطير معاهم البركة

حطات نعيمة الخبز بزعفة وقال : تعشاو

نعيمة: رجع سم

دخلات لبيت الدمعة فعينيهاا وقالت: هاد بنت لحراام هي لي غتخلييك لا تالي لا واليي ” شهقات بلبكاا “ياااربييي يااربي شنو دنبيي فهاد الدنيااا شنوو هءهءهءه

حكات ايدهاا كتمسح فنيوفهاا وتكمشات هازة تيليفون كتنخصص …دخلات لفيس كتلقاا راجل مهاا مبارطاجي صورة ليه ول نورة وسطهم بنتهم صغيرة لي سماوها نوار كاتب عليها نور الحياة

ايمان(كتمسح فدموعها): بغيتهم يطفاو ليك فدقة

دخلات نعيمة بعد مدة لبيت ورداتوو كلسات حدا ايمان وقالت: لاش تبكيي

ايمان: ديما كينكد علياا حياتي امي شنو درت انا هءهءه شنو دنبي لكنت بنت جوج تاع النااس خايبيين ومبغاونيش واش ختاريت نكون بنت لحراام هءهء

نعيمة: نتي بنتي وضو عويناتتي ….هوا مدابز مع حوايجوو واش ولدوو ومحنش فيييه غيحن فييك نتيي هااه ..

ايمان: متفكرينيش امي قلبي محروق على ياسيين

نعيمة: ياسيين راااجل والعسكر غيقسحوو ونتي عارفة ياسيين ااااخر همو يقراا اللهم يدير لي تنفعوو

ايمان: خفتو غير يولي حتى هواا بحالوو

نعيمة: ياسين حنين مخفتيش علييه

هزات ايمان ايدين نعيمة باستهم وقالت: ميي

نعيمة: اش كايين اشويطينة

ايمان: نسافرو انا وياااك عفاك امي نمشيو غير لمحمدية

نعيمة: وشنو نديرو تماا

ايمان: ياك عندك دار صغيرة تماا ! نمشيو نصيفو فيهاا شوية عفاك اميي بغيت نمشي لبحر شوية نتنفس …غير انا ويااك منديو معاناا لا اسراء لا حتى واحد

نعيمة(بهمس): غيبقا فيها الحال

ايمان: هاديك راه ودن وعين خالي اميي لمشات غير نديوه تهوا ينكدها عليناا

نعيمة: هاااء متء وخة يكون خير

ايمان(كتغبن ): ميييي

نعيمة : وصافي الله يرضي علييك ….غدا نمشيو فيقي بكري باش نمشييو والله ومنضتي راسك لنوضتك

بلفرحة نقزات على نعيمة بتعنيقة وقالت: كنموووت عليك اضو عويناااتي

نعيمة: اهيااا مو عويناات تلبدي فعينيك هههه

ناضت ديك الساع جبدات الصااك وحلات لماريوو كتجمع …جبدات لمايوو ولكااش خشاتهم لتحت تاع الصاك وحطات فوقهم لحوايج وكريمات تاع الشمش مرة كتجمع باش تشري مرة نعيمة كدور معاها من لانتريت تاع المرحوم او تاع لمحال لي كيعطيها عبد الله …اما كريم فراه مدة مشافت ريال منوو او نورة قرزازة ريال مكتحطوو كتخسر عليها لفلوس فاول لعام بنفاخة وكتخليها تعوم بحرهاا

دخلات اسراء كتجمع فشعرها : فين غادية غضباانة هههه

مجهاش الرد بقات كتشوف فلحوايج لي كتجبد غير لكساوي الصيفية نصهم قصير وقالت: هانتييي على لكساوي منين جاوك !

ايمان: دخلي سوق راسك

اسراء: بففف معقدة

ايمان: طلقي لكيت دياليي

اسراء: منعرف

ايمان: شوفي والله تنريشك (بهمس )والله تنديرها طلقي زمري

جبداتو من تحت لمخدة ولاحتو ليهاا…جمعات الاخيرة صاكها ومشات لبلاصتها هازة تيليفونهاا …معندهاش الصحاب بزااف من غير جوج تاع الاشخاص …ماريا كتقرا معاها و منعم استاد فالقسم وجارهم وفنفس الوقت كان معاها فلصال ونقاطع من بعد ملي تحل لصال تاع الحديد تماا

لقاتو كاتب ليها ميساج قال: تلميدتي

ايمان : العام جاي نتا لي غتكون

منعم: على حسب القسم فاش غتجي …قلت هاد العام نبدا نزيد سوايع

ايمان: مزياانة

منعم: نتي منخافش عليك متحتاجيش ولكن جيي فابوور الالة

ايمان: بفلوسي منسعاش اجاري

منعم: ههه‍ه الزلطة والنفس حارة

ايمان: ياله بونوي نمشي نعس غدا غنمشيي لمحمدية نتبحر

منعم: مال بحر كازا كيدير الرواح

ايمان: مكيعجبنيش ديال المحمدية زويين ولميمة عندها واحد دار على لبحر وخة قديمة زوييينة

منعم: بصحتك

خدات نفس عمييق حلات عينيها على لبحر كان خاوي والجو مضبب لابسة مايو شورط ولفوقي سميطات و الظهر عريان ساتراه بكاش مشبك حد الركبة …هازة صاك ادو ودايرة كاسكيط ونضارات شمسية …ونعيمة وراهاا بجلابة هزاها وسروال قنضريسي حد الركبة هازة صابو فايديهاا دايرة نضارات تاع الشوف وشابو على الشمش

نعيمة: هاد الرملة كتعيي ا ايمااان فين غادية

ايمان: وااامي غتشوهيني بلغوات تاني راني كنعرف نعوووم هههه

نعيمة: ولابيسين عند مك لاا وهادا لي غارق ايه

تلغات ضحكتهاا وشافت قدامها ونفضات الافكار من راسها وقالت: كيعجبني ريحة لبحر امي شوفي كي صاافي وزوين

نعيمة: اجي نقادو بلاصتنا بعداك

حطو لكراسة وقادو لبراصوول كان الصباح والبحر عاد بدا كيعمر فطرو تما نيت وجمعوو الروينة وبقاو كيتسناو يدفا الجو و تحيد الضبابة ونعيمة حداها جابدة تسبيحهاا كتسبح

ايمان(ملات): مييي غنمشي نعوووم اصلا الشمش كتحرقني

كملات التسبيح وقالت: عومي قدامي عفا بنتي

ايمان(كتحيد فلكاش ): نعوم فلكشكوشة امي

نعيمة:ديك زعامة لاا الله يرضي علييك

نعيمة مهناتهاش نفسهاا هزات الصاك لي فيه التيليفونات وكلشي دارتو فعنقهاا وعقدات جلابتهاا لفووق وناضت وقفات حدا لبحر حفيانة كيضرب فيها لماا وهي كتبرح …اجي هنا عنداك لموجة عومي حداياا

لخرا كتقلب وتشقلب وسط لماا ونعيمة كيتقلب قلبها معاهاا

نعيمة: وااا ايمااان دخلتي بزااف

ايمان(وقفات فلما): وااا مي سكتي غتشوهيني هههه

تلاحت من جديد فلماا باغة تبعد من لموجاات لي كيضربوها بقوة وصلات لبلاصة مواصلينهاش لمواج ورجليها كيلعبو فلما مبقاوش واصليين الرملة …حسات انها تحررات شيرات لمهاا وتقلبات على ظهرهاا مسرحة ايدها ورجليها فلماا كترمش فسما البيضااء بضبابة االصباحية لي كتكون فلبحر …الناس قليلة فلبلاصة فين دخلات …لقات رااحتهااا و غمضات عينيهاا كتستنشق لهوا نقي وريحة لبحر دخلات مع نيووفهاا

منها لسماا وتحتها لماا شعورها وهي مغمضة عينيها كأنها طايرة فالسماا كتحس بهزات خفيفة تاع لمواج …نسات راسها فديك الوضعية مخلية لماا يلعب بيهاا

للحظة نعيمة مبقاتش كتباان ليهاا تقدمات شوية لبحر تولا واصل ليها لركابيها وقاس ليهاا السروال كدور راسها هنا وهناا مبقاتش بانت ليهاا ايمان وبنادم قليل فلبحر فديك جيهة

نعيمة: ايماااان ….وا ايمااان الله ياربي فين زادت

بانو ليها جوج تاع الشباب جايين باقي بحوايجهم

نعيمة: اوليداااتي عفاا ولديي بنتي دخلت لبحر مبقااتش بانت لياا

حيد واحد فيهم النظاظر كيشوف فلبحر وقال: عاد داباا !

نعيمة: غير داباا (بخوف )دخلات لداااخل

بلا عكز حيد تيشورت ولبزطام من الشورط عطاه لصاحبو وقال: شنو لابسة اميمتي

نعيمة: لابسة لكحل شورط عيط غير ايماان عفا ولديي الله يرضي علييك

تكلم الشاب لاخر معلق فعنقو كاميرا وقال: متخافيش اميمتي

تلاح الشاب فلبحر كيقلب بعينيه عليهاا حتى فات لمواج لعالين وبانت لييه مكسلة فوق لماا بلا متحرك خرجو عينييه وغطس تحت لماا غادي ليها بكاع قوتوو ظنا منو بليي غرقات وطلعها لماا

هي كانت غارقة فسهوتهاا وتفكيرهاا مرخية تحسات براسهاا تجرات من قاع احلاامهاا شهقاات تاتقلبات تحت لماا معارفة باش تبلات غير شي حاجة جراتها بقوة مجات فين تفطن تبان ليها جسمو قبالتهاا غير هزات راسها فلماا جمعاتها معاه بطرشة من الخلعة

ايمان:كح كح واش نتااا مريييض

مصدوم من الطرشة ولا من الخلعة تاع انها غارقة ولا من عينيهاا…لي بمعنى لكلمة سها فيهم

نطق بصوت لطيف مبعد عليهاا وقال: سمحيلياا راه عيط ليك ومسمعتينيش

كتكحب وكترجع شعرها اللور وتمسح وجهها : منين كتعرفني باش تعيط لياا

_لواليدة ديالك خافت علييك

ايمان (شهقات تخرجو عينيهاا ): نااري مييي

تجاوزااتوو باش تخرج و رجعات شافت فييه : سمحلياا اخوياا على الطرشة خلعتيني هههه

_هههه هانية اختي

ضحكات وكملات لبراا وهوا وراهاا …خرجات من لماا وهوا متبعهاا تبعد عينوو وخرج من لبحر كيرجع شعرو الاسود اللور … كان صاحبوو مقابل مع البحر كياخد صور لجو زوين من بعدما شافها خرجاات ونعيمة كتحلف

نعيمة:اجي هنا اجي

ايمان(جاية كتنقز فلماا ): مالك امي

نعيمة : ماليي !

حطات الصااك و تبعاتها فجناب لبحر وايمان كتولول تشداتهااا كتليع فيهاا كي الدرية الصغيرة

نعيمة: هادشي لاش جااية تقتلينييي

ايمان: اويلي امي اويلي شوهتيني ععععع مييي هنن

تقدم الشااب حط ايدو على نعيمة كيبعدهاا عليها وقال:مطرا والو اميمتيي صاافي

نعيمة: لوي عليك لفوطة اللفعة

تزنكااتت بلحشمة مراهقة فسنها مترضااش قدام شي حد هكا محسااش بلاخر ليي دمعو عينيه بالضحك بلاصت ميصور المنظر الجميل صور لقريص وجري فلبحر تاع نعيمة وايمان

لوات عليها لفووطة ورا لولد لي كيهدر بصواب مع نعيمة تبردت من الخلعة

نعيمة: سمحلينا اولدي الله ارضي عليك

قرب منهم لولد ونطق بهمس وهوا حاضي ايمان ورا صاحبو: با با با على الزييين

وخفية صورهاا وكتف صاحبو باين فالصورة كتبان بحال المشة لي خايفة من البراني

نعيمة: صافي زيدي

ايمان: مضربيش !

نعيمة: والله منضربك

تخطات الدراري هاربة ونعيمة وراها خلاتهم كيضحكوو ونطق الشاب: عالااام دخلت نعتقهاا صرفقااتني “شاف صاحبو مكاينش هنا وجرو” والحمار

_مالوو

_جمع عينيك وباركة من تشك تشك

جرو مبعدين عليهم

فرشو لفوطات وكلسوو وايمان مكمشة فلكرسي فلفوطة جاها لبرد

ايمان: مي جاني الجوووع

عطاتها الصاك هزات شيبس كتااكل وتمنضر فلبحر بعدما بانت الشميسة و الدنيا بدات كتعمر

نعيمة(مقابلة مع الدراري وحضياهم ): شو دوك الدراري تبارك الله نقيين ملي كلسوو مكمااو موالو الله يرضي عليهم فكروني غير فاميين مسيكين

ايمان: مسيكين مالو هههه ميي هداك لي دخل لبحر طرشتو ناري على شوهة هههه

نعيمة: هااا حي هههههه الله يعطيك عقل

ايمان: محسيت بيه تشقمني من لماا خلعني والله حتى شربت لما …مي نبقاو نجيو كل صيف هنا واااعر ياااك

نعيمة: ان شاء الله ياربيي …معرت شكون كيصووني (جبدات تيليفونها وهي تفرح) هااا اميين

بدات كتهدر معااه ودوزات ليه ايمان وقالت: هولااا

امين : بيلااا

ايمان(بالاسبانية ) : افين ادكتوور

امين (بالاسبانية ) : فين كيكون الطبيب فالسبيطار ههههه

ايمان: توحشتك احبيبي

امين: ان شاء الله العطلة تاع الربيع غنجي ….قربات لمدرسة ولباااك بغيتك تجيبيي نقطة زوينة بحالك

ايمان: ضروري ههههه نجي نزاحمك

امين: غير شدي لباك وغنجيبك هنااا عندي

ايمان: ان شاء الله

قطعات معاه من بعدما طولو الهدرة وقالت نعيمة : اش كتقولوو وليتي تشدي معاه سبليونية ميتسالكش

ايمان: قاليا امي الى شديتي لبااك نديك تمااا …داكشي علاش كنتعلم اللغات باش لمشيت تما نكون فاااهمة

نعيمة: بلفرحات علييا ابنتي تمشي تما وتقراااي

ايمان: غير نخدم اميي انديك لحج

نعيمة: ان شاء الله ابنتيي انا غير تقراي وتوصليي ونشوفك عرووووسة

ايمان: اوى صافي داكشي لي بقااا

نعيمة: اوى ابنتي الزواج هم ميفوت بحالو بحال المووت (جبدات تفاح وبنان من الصااك ) نعيطو لدوك لوليدات

ايمان(كتقلب بعينيها على لوليدات): فين امي

نعيمة: هادو هادو

ايمان(شهقات ): اويلي اميي هادو وليدات كل واحد قد السخط او وليدات ناري تي راه بزااف ….هااا ها وتي سكتييي واااومييي ناااريي (خسرات وجها بغات تبكي )اويلي بغات تعطيهم التفااح مراض بلمصران اميي

نعيمة: تي سكتي ….اااا لولد اااه

ايمان كتولول ونعيمة كتعيط حتى تقلب عندها مول لكاميراا وجاي عندها وقال: نعام الواليدة شي بنت خرا غرقات ولا

غطات ايمان وجهها كضحك و نعيمة ضحكات وقالت: لا لا وحيدة لي عندي هنا

_الله اخليها لييك

نعينة: هاك اولدي شوية تاع ديسير نتا وصااحبك …والله حتى تشد ….بلاتي هاك بيمووو

ايمان(كطل بوجهها من لفوطة) : زيديهم دانون وقولي ليهم الله يجيب الشيفاء

نعيمة(كتقلب فالصاك): سكتي اللفعة

مامشا حتى عطاتو بيموو ورجع عند صاحبو كيضحك الاخير شافو شنو جااب و ضحك وتقلب فنعيمة حاط ايدو على صدرو بامتنان وقال: الله احفضك الواليدة

نعيمة: بصحتكم اولدي

بعد مدة حبساتها من لعوم تصدعات ليها راسهاا وناضت معااهاا …جبدات تيليفونها بكاميرا عادية مزال مخرجو تيليفونات بكاميرا عالية الجودة …حتى سمعو الشاب من وراهم قال: يكما نصوركم !

ايمان: بلكاميراا ولبغيتهم

_عندي لمحال تاع التصاور …عرس ختانة خطبة لي كاان كاميراا مان نااضي

ايمان: حنا من كازاا

_هاكي لكارط ديالي فيها النمرة والفيس الى مقديتيش تجي نسيفطهم لختيي فلفيس هااانية على وجه لواليدة لي تهلات فيهناا

ايمان: صاافي شكرااا (بهمس )مييي نحيد لكاش

نعيمة: تحيديه نحيد ليك عينيك

ساطت كتصور مع جداها بحب تبووس وتعنق خدات صور ليها بوحدهاا مع لبحر

شكراتوو ومشات لبلاصتهاا

تعشات العشية وايمان دوزات نهارر زويين نفسات فيه على رووحها وقلبهاا ناضو كيجمعوو فحوايجهم تعكسات ليهم لبراصول وجا عاونهم لولد بكل ادب …هز عينيه فايمان وتبسم ليهاا وحتى هيا بادلاتوو الابتسامة معجبة بشفار عينيه لفازكين بلماا في حين نعيمة كتهز فالصااك

_ (تكل بكل ادبب )شنو سميتك

ايمان:ايمان ….ونتاا !

ياله بغا يجاوبهاا هدرات نعيمة وقالت: ايمان فين صندالتك

ايمان(بدات كدور بجناابهاا كتقلب ): هاااهيا امي صافي انمشي نغسلها من الرملة

مشات غسلاتها لقات نعيمة شدات لبراصول ولولد راجع لبلاصتوو تبسمات ليهم وقالت: بسلامة

ردو عليهم بايديهم …مشات لعند مها تابطات دراعها وعاوناتها فتقل وقالت: مي هاد لولد عينيه وااعريين

نعيمة:يمكن الى زوهري

ايمان(دورات راسهاا عندهم )ماشي بعييد ههه(عنقاتها ) فراسك اميي دوزت احسن نهار فحياتيي (باستها )الله احفضك لياااا

نعيمة: مزال ليام زوينة ابنتيي فطريقك الله ينقيهاا من الشوك

ايمان؛امييين امي

دخلو لدار لي كطل على لبحر دار بسيطة فوق ولتحت عندها طيراس محلول داير بلعوود …واقفة ايمان كيضرب فيها لبرد وقالت:ميي علاش عمرك جبتيني هناا

نعيمة (كتحط الصاك فوق سداري)اوى ابنتيي عاد كتااب …هاد دار كان عليها صداع تاع لورتة

ايمان:غزالة …دابا تاعمن هادي

نعيمة:دياليي جات فحقيي

ايمان؛ وااعرة امي عرفتي تصلح تجي وااعرة ديريها بحال شي اوطيل صغير هههه عرفتي هاد طلة على البحر ساوية التمن …ديري هنا شي كراسة تاع لعوود(كتمتل بايدها )وهنا شي ناموسية بلدية وشي زراابيي ولتحت حتى هواا تهلاي فجريدة اتجع واااعرة

نعيمة: اوى تااااتخدمي وفرشيهااا كيبغيتي

ايمانن: ههههه ان شاء الله ونسكنو فيها بجوج

نعيمة:ياله ياله دوزي دوشي حيدي لملحة نسوس لغبرة شوية منها

فعلا مشات لدوش بلدي عمرات سطل جبدات لتروس ديالهاا دوشاات وحيدات لملحة عليها…لبسات كسيوة قصيرة وخرجات طالقة شعرها ينشف مشات عاونات نعيمة خملو البيت شوية …حتى بدا كيطيح ضلام

نعيمة:ايمان نمشيو نتقداو لعشانا

ايمان:ميي نتعشاو براا

نعيمة؛عرفتي اش ديري ياله نطلعو لمدينة بغيت نبيع شي حاجة ….ولبسي الله ارضي علييك شي حاجة مستورة

ايمان؛ميي عفاااك كيعجبوني كسيوات

نعمية:غتجيبي لينا غير لعيين ابنتي

ايمان:متخافيييش لي دوا يرعف هههه

لبسات سبرديلة مع لكسيوة حد الركبة طلقات شعرهاا وضفار مصبوغيين بلون بييج كيتمشاو مع لكسوة لملونة بالوان صيفية

شدو طاكسي لمدينة شادين فايد بعض كتوريها فلمحلات تاع لحواايج

نعينة:ايمان شوفي ديك لقميجة زوييينة جربيهاا

ايمان؛مجبتش سروال

نعينة:شوفي ليها نيت شي سروال دخول جااي

فعلا قيسااتهاا عجباتها مع سروال تشاطرات نعيمة حتى خداتهم ليهاا وزادتها صندالة

توجهو لمحل دهب جبدات سرة فيها دبالج قداام جهد 7 او لويزات 3 تاع دهب

ايمان:ميي غتبيعيهم

نعيمة:رشاو وقداموو

ايمان(بمزاح)هاي هاي على نعييمة عندها الشرتلة …انا نرزاق غير طوانݣ تاع لبوولة وغير شوف كيفااش تجابتهم لياا

نعيم؛سكتيي ههههه حسدتيني …عفا ولديي بغيت نبيع هاد البركة

هزهاا عبر كلشي وقال:3 الالف درهم

نعيمة:هيا شحال بريال

ايمان:60 الف

نعيمة:اييي وراه شريتهم ملي عاد بااانو وعطاوني فييهم تمانين

_لا لا رشاااو شوية غادي غير ندوبووهم …70مزيانة

نعيمة:غير زيد

_وتقوول هدشي لي كاين الحاجة

نعيمة:وخة الله يسخر (كدور فعينيها فدهوبات)جبد ليا ديك السنسلة

_هدا كورميط الالة

نعيمة(شافت فايمان لي متبعة معاها )زويين

حركات راسها بلاا وقالت: شوفي ليك شي حاجة خرا

نعيمة:ختاري لياا ياله

هبطات عينيها لفيتريناا وقالت:شوفي هادي ….ولكن تاع لبنات اميي

نعيمة:مالي بنت ليك بوشعيب دكالي ….جبد اولدي نشوف

ايمان(بضحكة عاضة على سنانها) عزيز عليك تشوهيني امييي

_كاينة هادي وكاينين موديلات زويني الحاجة

جبدا ليها سنانسل رقيقة لغليضة ايمان لصقو عينيها فوحد السنسلة غليضة شوية كيتوسكها قفل صغير وسنسلة مربوطة بقلب خاوي من لوسط

ايمان:شوفي اميي هادي واعرة

نعيمة:شحال هادي

شدها عبرها من عندهاا وايمان كتشرح :تجيك فنة مع نتي بيضة ولعنق عامر تجيك لاصقة

_جابت لييك 66 الف

نعينة:وغير قول بغيتي ترجع 70 ديالك وصافي

ضحك وكلسات كتشااطر معااه وايمان حشمات كل مرة تقرصهاا خافت تبقا تشاطر معاه فاللخر تحطها وتزيد كيفما كدير شحال من مرة السعاتي فالاخير خداتهاا ودارتها فصاكهاا

ايمان:اوى داكشي لي بقا غتعشينا بيييه امااي

نعيمة:زييييدي ليوم نتبرعوو مالنا شرفناا

دخلو لواحد الرسيطو صغير مخدمين الشعبي وجايبين فرقة موسيقية كتغني النشااط كلشي كايين …خداو طبيلتهم وكلسوو من بعدما جا السربااي طلبو شنوو بغااو وهوما شاطحبين

ايمان؛ونتي ونتي …واونتي جمعي شطايطك متبااتيش هناا

نعيمة:هي هي هههههه واللهيلا فوجناااا ههه

ايمان(باست ايدها )الله احفضك ليااا هههه

نعيمة:لكبيدة

ايمان:انا جااية

من بعدما الفرقة كملاتت ياله بغا يبدا من جديد قربات منوو ايماان هدرات معاه فودنو وعبر على انو مواافق عطاها لميكروو وهيا كتشوف الانتباه كلشي لييها ونعيمة كتحلف ضحكات وقربات لميكرو عندها وقالت:حمم س سمحولياا غنهرس ليكم الشعبي شوية هههه غير سمحوليا ….معاياا واحد الانساانة زوينة وغزالة (عينيها ف نعيمة ) لي كون مكانتش هيا كانت غتكون حياتيي ضلمة والله …هياا (غرغرو عينيها )حم هياات بالنسبة لياا كلشيي …معرفتش شنو ندير باش نوفي ليهاا داكشي لي كدير معاياا من غير نغني ليهاا …واحد الاغنية كتعجبهاا (بغصة )وكتعجب اي ام

صفقوو بعض الحضور ومشاات عند الفرقة هدرات معاهم و رجعات تقابلاات مع نعيمة

بدات لموسيقى وبعد ثواني قليلة تسمع صوتها والبحة الجميلة لي فييه …خلات لي كان مهبط راسوو يطلعو يشوف صاحبة الصوت

غمضات عينيهاا وبدات غناءها باغنية

ست الحبايب ياحبيبه

يااغلى من روحي ودمي

ياحنينة وكلك طيبة

يارب يخليكي يا أمي

زمان سهرتي وتعبتي وشلتي من عمري ليالي

ولسه برضه دلوقتي بتحملي الهم بدالي

انام وتسهري وتباتي تفكري

وتصحي من الآدان وتيجي تشقري

تعيشي لي ياحبيبتي يا أمي

ويدوم لي رضاكي

أنا روحي من روحك انت

وعايشه من سر دعاكي

بتحسي بفرحتي قبل الهنا بسنة

وتحسي بشكوتي من قبل ماأحس أنا

يارب يخليكي ياأمي

يارب يخليكي ياأمي

لو عشت طول عمري أوفي جمايلك الغاليه علي

أجيب منين عمر يكفي

وألاقي فين أغلى هدية

نور عيني ومهجتي وحياتي ودنيتي

لو ترضي تقبليهم دول هما هديتي

يارب يخليكي ياأمي ست الحبايب ياحبيبة و حبيية

حلات عينيها على تصفيقات الحضور وكاين لي كيصفر انتابهات لنعيمة كتمسح عينيهاا بزيف وقالت: شكراا …سمحوليا مرة خرا على الازعااج …بصحتكم

لمغني بغا ياخد لميكروو وقال: صوووتك كتر من زويين

ايمان(بمجاملة): شكرا حتى نتاا تبارك الله علييك كدير الحماس ههه

مشات عند نعيمة كتجري بطفوولية وعنقااتهاا كاين لي كيقول سعداتها بمهاا شو كي دايرة علاقتهم شوف وشوف

كيشوفو غير لي بااين معارفينش اشنو مخبيي

كلسات بلاصتهاا كتمسح دموعها وقالت: مخرجناش باش نبكييو

نعيمة: صوتك عادما غادي وكيزيان

ايمان: مي نشارك ف استوديو دوزام ولا نشارك فستار اكاديمي

نعيمة: والله العوجة ومتديها فكنانشك تانجبد ليك بلحوحتك

ايمان : وا زعما عاد غنيت ليك وتاترتي اوه

نعيمة: غني غير ليااا ..واش باغة عبد الله يق_تلك …ماعندك مديري بديك طريق ابنتيي قراااي …سمعتيني قراااي سيري عند حبيبك قراي ودمريي وجيبي لعز …طريق لحرام

ايمان(قاطعاتها ): ولغنا حرام اميي

نعيمة: اييه لخديتييه طرف لخبز راه حرام ابنيتي

ايمان. : وصافي تعشاااي شفتيني غادية دابا ههههه دابا نتي شنو بغيتيني نكون

نعيمة:بصراحة بصراحة ههه

ايمان:ااه هههه

نعيمة:داباا امين طبييب …بلا شعليك ابنتي غيهلكك ونتي هشيشة متقديش على دماياات …ديرييي مهنديزة عفا بنيتيي

ايمان:الصراحة تانا كتعجبني الهندسة اميي شي مهندسة قد الدنياا هههه ولكن بشرط

نعيمة: لي هوا

ايمان:نحقق لييك حلمك ووفنفس لوقت نحقق حلميي ونغني

نعيمة:صافي ان شاء الله

ايمان:مشاات ههههه

تعشااو فجو زوين مكملين سهرتهم الغنائية ومولات الغنا حرام كتشطح وتغني معاه خرجو تا قربات طناش ضرب

تمشاو كيضحكو ويتعاودوو شنوو شافوو وشنو مشافوش خدات گلاص مكملة بيه الطريق توصلوو لدار

غسلات حالتهاا ونعيمة صلااة باقة فوق السجادة وايمان متكية شادة التيليفون وقالت: سيفطت انفيطاسيون لداك لولد لي صورنا باش يعطيني التصاور

نعيمة: ايمان هاك

هزات ايمان عينيهاا ولقاتها شادة لبواطة تاع الذهب وهي مزال فوق صلاية وقالت: شنو امي

نعيمة: وشدي

قربات لعندها حلات لبواطة وقالت: نركبها لييك دوري

نعيمة(هزاتها ): دوري نتي نشوف كي جاتك

دارت عندهاا هازة شعرهاا وقالت: غزالة يكما تنادم معاك لحال هههه

نعيمة: تي سكتي شوية دوري عندي (دارت كتشوفيها )جاتك زوييينة…زيدي قاديها صافي براكة ….بصحتك

ايمان: الله اعطيك الص “سكتات كاتستوعب ” كيفاش

نعيمة: متحيديهاش .. هادي ديالك

ايمان(شهقات )لااا اميي لاا شدي ديالك واش حماقيتي

نعيمة:ايماان نبقاو نهدرو ! شريتها لييك …كنت باغة نخليي تاتشدي لبااك ونجيب لبنتي الهدية ونعطيها الذهب ويني انا عاارفة بنتيي تجيب لباك وفوق لبااك …ودابا جابتها لوقت داز عيد ميلادك ومجبت ليك والو ودابا شادة ليا السمطة لكحلة ومنشري ليك …ومنهنا لبااك يجيب الله رزق نشري لييك دبليييج وغير تنجحي عندي ليك واااحد لمفاجئة غتعجبك

ايمان:حلفي !

نعيمة: والله العضيم ابنتي

تلاحت عليها كتعنق وتبووس وقالت: ناري كنحمااق علييك نتي راه اسم على مسمى ربي عطاك ليا بحال النعمة فحياتي …الله يقدرني ونرد لييك شوية من هدشي لي درتيه معايا اميي

نعيمة: بغيتك غا تكوني مرضية ابنتي ومتمشيش فطريق لخايبة ومتيقيش فمن والا

ايمان: تربيتك امي

نعيمة: ربيتهم ابنتيي وخرجو كل واحد يفكر لراسوو …ميكونش ابنتي قلبك قااسح وساامحي وبغي النااس وعاونيهم وضحكي فوجههم الى مربحتي منهم والو …تربحي غير صدقة تاع ضحيكة لي درتيها فوجههم …سمعتيني

حركات ايمان راسها باه

نعينة: ياله نوضي تنعسيي

ايمان: شوية ونجي حدااك

طفاو الضواو وخرجات لبالكون كتشم ريحة لبحر ولمواج كيتسمعو حداها مع ريح باردة كتهز شعرها وكسوتها …حطات ايدها على عنقها كتحسس السنسلة باعجااب وطلعات نفس قوية و هبطاتها كأنها كتقول هدا احسن نهار فحيااتي

***********

فليوم التاالي كالسة كتفطر حتى وصلها ميساج

نعيمة:شكون

ايمان(فمها عامر كتقلب فالتليفون طلع ليها مساج فلمسنجر من اسم طارق ) : ممم لولد ديال تصاور لبارح

طارق: السلااام ايمان ياك !

ايمان: وييي صافاا

طارق: صافا اختي الحمد لله …قولي لياا لكنتي مسالية هاد العشية نجيب ليك التصاور

ايمان: صافي واخة

طارق: العشية تلقايهم واجدين

نعيمة: اش قاليك

ايمان: العشية نلقا التصاور واجديين

كملو فطورهم وهبطو البحر دوزو فيه النهار تاانيي عامت تشبعات طلعو لدار دوشو وخرجو لمدينة فطريقهم بقاو كيتسناو فطارق يجيي وفعلا بان ليهم جااي كيتبسم ناحيتهن وفايديه جوا

طارق: السلام عليكم …ياكما تعطلت عليكم

ايمان: وعليكم السلاام…لا اخوياا هانية

طارق: ها تصويرات راهم 5

ايمان: بشحال ؟

طارق: لا لا مكاين لاش

نعيمة: لااا اولديي عفااك شحال

طارق: والله اميمتي منتخلص بصحتكم

ايمان: شووكرا اخويا الله احفضك

طارق: خليت ليكم الرااحة

خلاهم ومشاا حلو جوا كيتفرو فتصاور وايمان كضحك عجبووها رجعاتهم لجوا دارتهم فصاك وكملوو خرجتهم

ايمان:كعما جا معاه الزوهري تاع لبارح

نعيمة(ضحكات )اش بغيتيه

ايمان:عينيه امزيناتهم امي ههههه

نعيمة:هههه ياك الزهوانية

ايمان (ضحكات من قلبها) ههههههه الزين بغاه الله

**

وهكا دازت السيمانة كطير اخر اسبوع قبل متبدا المدرسة من جديد …رجعو ادراجهم وماحد ايمان كتقرب لدار ماحد ضحكتهاا كتغيب وقلبها كيتزير

هبطهم الطاكسي حدا الباب لكبير هزات ايمان الصاك داخلة كتهبط فتيركو قصير حد الصمطة تاع السروال توب لارج

انتابهات لطموبيلة خالها مكاينااش ولكن ساطت ملي شافت طموبيلة نورة واقفة

ايمان: كاينة نورة

نعيمة: وقالت ليا غنجيي

عوجات شفايفهاا وهزات عينيهاا بملل طالعين فالدرووج حتى دخلو لدار كيسمعو لهدرة من الصالون جات اسرااء سلمات على جداها وشافت فايمان وقالت: السلااام

تبسمات ايماان ابتساامة صفرة وجمعاتها دغياا

اسراء: كيدايرة

ايمان: كي بناادم

جاية بنية صغيرة فعمر 5 سنوات كتجري عند ايمان وحضناتها من رجليهاا شبه نورة تماما وقالت: ايماااان

ايمان(بقات كتشوف فيهاا وتبسمات ليهاا ): لبااس

نوار: لباس …هزيني

هزاتهاا باستها فحنكها وكملات لصالون سلمات على خولة ودازت ل نورة سلمات عليها من حناكها وكلسات

نورة: جيتو حمرين بالشمش جات معاكم التبحيرة هههه

نعيمة(كتحيد الشال): واللهيلاا خرجة شهوة منهاا

اسراء : وعلاش مديتينيش

نعيمة: وميخليكش ابنتي باااك طلبناه قليل شحال من مرة

خولة: بصحتكم امي نعيمة …ايمان جيتي مزنكة هههه

ايمان: نشدو اللون شوية

نورة: وعنداك متجيوش غداا

نعيمة: علاش

نورة: ويلي عيد ميلاد نور امي نسيتي

نعيمة: هاااه لخوينزة كبرااات

ايمان(ك شافت ف نورة شادة نور كتبووس فيهاا

نورة: وبنتيي غتبقا صغييورة امي (بصوت طفولي)قوليهاا لانيي كبلت اميمة

نور: هههه كبرت الميمة وغنقلا فلاكغونض

نعيمة: وبطولة العمر الحبيبة

نورة: ايمان غتمشي معاياا …غدا غتجي عكوزتي وبنتها مع صبااح سعاد لي كتعاوني مسافرة عند بنتها

ايمان: لا عيااانة

نورة: عيانة كنتي كتهزيي لملحة من لبحر

ايمان: شنو بغيتي ندير لييك !

نورة: والوو نقادو غير الدار شوية راه كلشي مصبن اما كلشي غنشريه طالع من غير الغدا

نعيمة: غير سيري معاهاا

ايمان: كنحسابها جاية تشوفنا السعاتي كتجي غير على حاجتهاا

نورة: كبرتي وليتي ترادي معاياا فالهدرة

نعيمة: ايمااان كون تحشميي …اش قلناا

ايمان : تء نهار كندوي كنتسما خايبة باااز

ناضت كتخبط لبيتهاا تبدل عليهاا حتى تبعاتها نعيمة وقالت: ايماان راه دويت معااك

ايمان(شافت فيها وعينيها فيهم الدموع ): مييي هاد لبنت عندك راه باغاني غير على حاجتهاا شوفي شحال فعمري تفكري واش عمرهاا عيطات ليا غير هكاك ولا تفكرات عيد ميلادي شي مرة ولاا حيت كنفكرها فاكفس نهار فحياتهاا (طاحو دموعها )كون غير بقينا فلمحمدية غير كنجي هنااا كنتعدب اميي

نعيمة: بغيتي ولا كرهتي راه مك هاديك نتي كوني زوينة وهي ضبر لراسها (مسحات دموعها )اللهم نورة ولا نكير عبد الله علييك ابنتي …سيري كلسي وشبعي عومان فلابيسيين نهار مدا مجااب دغيا يدووز ابنتي

مسحات بقايا دموعهاا وجمعات شنو تلبس ومشات كلسات حتى شربو اتاي مجموعين ورتاحوو وناضت دارت كرطابل فيها حوايجهاا فكتفهاا تابعة نورة وشادة نوار فايدها

ركبات القدام ونور فلكرسي ديالها اللور شدات التيليفون مبقاتش هزات راسهاا حتى وصلوو لدار كانت ميني ڤيلا بجوج طوابق وجردة قدامها

دخلات ورا نورة لي حلات لباب دار زوينة ومفرشة زوين لتحت كانو جوج صالونات وكوزينة كبيرة وبيت حداهاا ولباب تاع جردة لي فيها لابيسيين

نور:ايمان اجي نورييك نونوس لي خديييت زوييين

جراتها مطلعاهاا فدرووج وايمان كتشووف شنو تزاد من اخر مرة جات هنا شي شهر دابا او اكتر كانو لفوق 3 تاع لبييوت وطيراس لوسط كيطل على الجردة لتحت جراتها لبييت كان فلبيج ولغوز لحيط بورق الحائط فيه ماشا وبعض الرسومات سرير وبيرو صغير ماريو فلبييج فيه ستيكرز ديال الاميرات ولفوق كانو ملصقين نجووم كيشعلو مع كيطفا ضو متوسط السرير نونوس كبيرر فلبيض مشات نور عنقاتو وقالت:شراه ليا بابا

ايمان(تلمسات الدب )زوييين

نور: سميتو ميشكااا بحال دب لي مع ماشااا

ايمان : زوين …زويين

خرجات مخليا نوار معنقة الدب مشات لطيرااس حطات ايدها على الزاج كاطل لتحت فين كاين لابيسين وحداه رولاكس محطوطة فالظل

هزات تيليفونهاا …خدات سيلفيي وهي عاطية لطيراس بظهرها بابتساامة وشعر مغطي عنقهاا خدات صورة وبوسطاتهاا ديك السااع…مكاين غير جيم وبليز باص بريڤي

هبطات لتحت لقات نورة كتعيط ليهاا وقالت:ايمان فين نوار

ايمان:فبيتها

نورة: دخلي لكوزينة خرجي لياا لماعن من لڤيسييل ورجعيهم لپلاكار نبدل علياا ونجيي (بغات دوز من حداها او وقفات ) ديالمن السنسلة

ايمان(حطات ايدها على عنقهاا ): ديالي خداتها ليا مي

نورة(بتعجب): ذهب ولا

ايمان: اه ذهب

نورة: واللهيلا نتي لي طلع ليك الزهر مع ميي ههه بصحتك الالة …ياله سيري انا جاية

دخلات ساخطة على الوضع كتجبد فلماعن من الغسالة كتسمح وتستف فالپلاكارات ردات كلشي بلاصتو …. دخلات نورة بكسوة قصيرة بلا سوتييان وقالت:قهرني الصهد …جمعي ليا تماا غنقاد التلااجة ونمسحهاا شوية باش نعمرهاا

كل خطرة تعطيها هاك غسلي هادي لوحي هااديي معظم الهدرة كانت غير نورة كتهدر وايمان كتجاوب بنص كلمة

نورة : ايمان حسام جا …سيري دخلي معاه التقديية منخرجش هكاا

ابمان(مسحات ايدها من لماا )واخة

خرجات كتجر فلكلاكيطة لبراا لقاتو واقف حال لكوفر كيحط فالساشيات كبار تاع مرجان داير نظارات شمسية وقال؛ لاليست لي سيفطي كلها تقديتها شوف واش خاص شي (هز عينو وتبسم )اهلا اهلاا ب ايماان مغتسلميش ولا

بغات تمد ايدها وجرها باسها من حنكها زيرات على فمها واصطنعات البسمة وقالت: لباس

حسام: اش هاد لغبوور مبقيناش كنشوفووك

ايمان(رجعات شعرها وراها )غير مع الوقت

هزات صااك معافرة معاه وهوا هز جوج وراها دخلوهم لكوزينة ومشاا باس نوورة وقال: الزين ديالي

نورة:مزيان لي جيتي احبيبة قاد لينا العشاا هههه

حسام: بكل سرور ههه فين وصلتوو … إيمان مبروك لاسانتيغ نواغ

ايمان: شكرا

حسام: نمشي نرتااح ونجي نوجد شي حاجة

خلاتو نورة خرج ودارت لايمان: مالك نتيي لهدرة كتخرجيها غير من نيفك ياك لبااس

ايمان: عياانة و مافيا لي يهدر شي مشكيل

نورة (كتبركم ) : نتي كلك مشكيل

زيرات ايمان على سربيتة فايدهاا وزفرات نفسهاا ببطئ ضابطة اعصاابهاا لي تصلبات مع هاد الثنائي

قادو التقديية فبلاصتهاا ومشات ايمان كلسات ترتاح شادة التيليفوون ودايرة لكييت اما نورة كالسة فلكوزينة كضحك وراجلهاا كيطيب ومجمعيين …تحبسات الموسيقى لايمان مع طاح فودنها حوارهم

حسام: مال ايمان شتها غير ساكتة

نورة: فين عمرها هدراات … معقدة كتجيني كتشبه غير لعبد الله الله يستر

حسام: تسمعك تقلق

نورة: دايرة لكيت نهار وليل

حسام: سلكيي معاهاا

نورة: راه غير ميي لي بقات علياا رطبي معاها اما معندها متجي دير هناا …مكنتفاهمش معاها مصروفها كنسيفطو ليها

حسام: سلكي راه فلمراهقة داباا

نورة: ممم وسربي فياا جوع احسام

رجعات لموسيقى و جهدات ليهاا حتى طبال ودنيها غيطرطقوو …غمضات عينيها رافضة شي دمعة تنزل والبكية كطلع وتبهط فحلقهاا بحال شي غصة

طلعات بجري لبيت لي مخلينو مفرش ومقاد غير لضياف كان لحال ظلام غمضات عينيهاا وتكورات على راسهاا ولموسيقى مجهدة فودنيهاا مسمعاتش كاع اسمها كيتعاود مرة على مرة من حساام لي هاز بنتوو وهي عاطياه بالظهر قرب ليهاا تقاس كتفها عاد قفزات محيدة لكيت

حسام: مسمعتينيش

ايمان: خلعتيني

حسام: نوضي تعشااي

ايمان: لااا عيانة بغيت نعس غير بالصحة

حسام: لي بغيتي …بونوي

ايمان(رجعات لكيت ) : بونوي

خلاتو حتى مشا وكلسات جامعة رجليها كتشوف قدامهاا …ناضت حلات لباب كتمشا حفيانة جيهة دروج كتسمع هدرتهم ونوار كضحك ..بقات هابطة حتى كتشوفهم كالسين فطبلة او نور وسطهم حسام هاز لفورشيط وكيوجهها ل نور :حلي حلي فمك جاية طيااارة

نور: هههههه وشبعت ابااابا

نورة : حبس نتا طيارتك خايبة هادي لي زويينة اوووووو حلي لباااب حلي ههه اوبااات

حسام: بغاافوووو

نور(كتصفق وفمها عامر ): شبعت اماما صافي

نورة: واخة اكبيدة …شربي لمااا حيت الصهد

حسام: غدا جاية مامي

نور؛ غتجيب ليا كادوو

نورة: وييي كادو زوييين ابنتي

رجعات ادراجها لبييت لاحت المخدة على راسهاا وغمضات عينيهاا

ساعة على ساعة حتى استسلمات لنعاسهاا مفاقت غير على شمش سخونة داخلة من الشرجم ..تاوباات وهزات تيليفونها لقات 10 تاع صباح ناضت مسخسخة مشابعاش نعااس

دازت لدوش غسلات وقضات حاجتها حلات شعرها ورجعات جمعاتو لفوق بمقبط …جمعات فراشها وهبطات لتحت كتسمع هدرتهم فدار بانو ليها نفاخات كتار فلارض وسطهم نوار كتلعب بيهم والصالون فيه نورة او حسام كيعلقوو فنفاخات بحماس وكينفخو فحروف سمية نور ورقم 5 كذلك كاي عائلة سعيدة …هز حسام عينوو وقال: صباح الخيير

ردت بهدوء :صباح النور

نورة: سيري تفطري راه فطورك فلكوزينة لقيتك ناعسة مفيقتكش

توجات لكوزينة هزات كاس تاع اتاي وحليوات فقط وكلسات صدعوها باصواتهم ودارت لكيت راجعة لعزلتهاا مع تيليفونهاا حتى فطرات ..دارت لماعن فلغسالة وجمعات الروينة تماا …خلاتهم فالصالون وخرجات لحدا لابيسيين كلسات فرولاكس حتى جات عندها نورة مبدلة بكسيوة حد الركبة دايرة دهبهاا ومكياج خفيف

نورة:ايمان نوضي بدليي جايين ناسي داباا

ايمان(ببرود) : مالي كي جاوك حوايجي

نورة: واش هادو حوايج تاع عيد ميلاد ! زعمة (بهمس )راه ختك

ايمان: تء بنت ختيي

نورة: ايماان راه شرحت لييك علاش متبقايش شادة فهادشي

ايمان: مشاادة مطاالقة انا خليوني غير طرونكييل …عيد ميلاد بنتك لبسي لي بغيتي وانا مرتااحة فحوايجيي

نورة: نتي مي لي كتعرف لييك هاهي جااية (شافت لباب تحل)هاهي نييت وصلاتت

مزال عاد كتحل فلباب بدات نورة كتعيط على مها حتى تبعات الصوت لجيهة الجردة لقات ايمان كالسة براحة على لكرسي ونورة على راسهاا

نورة: مييي هدري مع البنت راه غتعصبنيي

نعيمة: قولو غير السلام مالك ياك لبااس

نورة: واش النااس جايين وهي باغة تقابلهم ب بيجامة اميي واش ماشي العصااب هداا

ايمان(شافت فيهاا ): شريتي لياا منلبس فعيد ميلاد (باستهزاء )ختيي

نورة: عرام تاع لحوايج عندك

ايمان: اه سمحيلي

نعيمة: ايييمان نوضيي اجي ندوي معااك

خرج حسام من بعد مسمع نكيرهم توجه جنب نورة وقال: هانية !

كانت ايمان تبعات نعيمة ونطقات نورة بالفقصة : نهار كنجيبها كنمرض فصحتي

تبعات ايمان نعيمة لبيت سدات لباب ونطقات ايمان معصبة :علااش اميي علااش ….نتي لي قلتي ليهاا ديهاا

نعيمة: انا بغيت تحيدوو هاد نكير لي بيناتكم

ايمان: ميي سمعيني واخر مرة غنقولها شفتي هاد السيدة لي لتحت راه مغنسمح ليها لا دنيا لا اخرة …ولا نجيك من اللخر باش تهنيني من ديك الهدرة تاع السخط و الرضى …الى السخط من عندهاا انا قابلة بييه ….مبغيتش نبقااا هنااا ولا نشووف فهاد التريكة كيتبعكوو علياا …عايشيين لحيااة زعمة !

نعيمة: ابنتي راه بنادم كيغلط

ايمان: فعلااا وانا اكبر غلط دارتوو نورة …17 لعام امي دازت هاد السيدة عمرها بينات لياا عكس لي حاسة بيه انااا …علاش تالدابا عاد بغيتي تجمعينا …(بدموع )مبقيتيش بغانيي حداك اميي

نعمية(شدات وجها كتمسح عينيهاا ): لا ابنتيي انا غير بغيت نشوفك مرتااحة وتحيدي داك الحقد من قلبك غيقتلك غير نتيي

ايمان: ميي شفتي الى معشتش معاك نتيي نتوسد الزنقة ومنكونش معاهم (عنقاتها )

نعيمة: صافي الله ارضي عليك ندوزو هاد نهار باشما عطا الله ونمشيو عفا بنتيي …بدلي علييك كيفما كان لحال حشومة يجيو الناس ويلقاوك ب بيجامة تاع النعاس …ديري ليا خاطري

شافت تعيات مشات لبسات عليهاا كسوة ضفرات شعرهاا رشات شوية من الريحة وهبطات بزز مع نعيمة لي جات كتجري عندها نور ..كان الصالون مقاد على حقو وطريقو

مدازش بزاف تاع الوقت حتى جاو عائلة حسام باه ومو وختوو كبيرة مع ولادها تلاتاا …جاو بعض الاصدقاء ديالهم مع وليداتهم كان الاستقبال فالصالون لاخور مخلين لي زوقوه على تيساع

ايمان ونعيمة كالسين فلكوزينة ..كان حسام تكلف بلغدا جابو واجد جوج بسطيلات ولحم بلبرقوق طباسل تاع ديسير مشكلين ولموناضة

واقفة ايمان عاطية بظهرها لبوطاجي حتى جا قبالتها حسام بابتساامة حط ايدو على دراعهاا لعاري وقال: متديش على نورة مرة مرة كتعصب مكتعرفش شنو كتقول

ايمان: منديش عليهاا …كتبقاا ماما (شافت فعينيه فلا مترمش)

شاف فباب لكوزينة ورجع تبسم ليهاا وحيد ايدوو وقال: شوية وغنحطو لحلوة ياله كلسي معاناا لواليدة كتسول فيك اجي

بعد اصرار تبعاتوو …تبسمات ام حسام لي لقاتها كتشوف فيها وقالت: لالة نعيمة ايمان تبارك الله كبرات نهار جينا نخطبو نورة كانت غير صغيورة ما شاء الله

نعيمة: العمر كيطير

_شنو عندك هاد العام ا ايمان

ايمان: الباك

_تبارك الله لقراية زوينة الحبيبة

نور: مامي انا نقراا ونكبر ونولي زوينة بحال ايمان

_ان شاء الله الغزالة بنتي …

تكلمات عمتها وقالت: حشومة عميتوو قولي طاطا ايمان

نور: طاطا وعلاش

_حيت هيا طاطاك خت ماماك

نور:اااه داكووغ …(شافت فايمان )نقولييك طاطا ؟

ايمان: قوليي احبيبة

تبسمات ليهاا وشافت ف نورة لي كتحاول تشتت تفكيرها ومتركزش مع ايمان …بعد مدة تجمعو على طبلة فالصالون حسام ونورة لوسط هازيين نوار ولحلوة كبيرة فلغوز ضاير بيها لورد وشعالات كيردد سنة حلوة يا نور

كانت ايمان كتصفق ماشية مع ترديدهم كانت مرفووعة وهي كتشوف صورة مثالية قدامها

كان فدماغها دايز حوار بينها وبين عقلها ونفسهاا “

يااه لوكانت الدنياا كتنصف كلشي …معرفتش كيفاش حياتي كانت غتكوون …واش كنت غنكون فرحانة ! كنت زعمة غنكون عايشة حياتيي بحالي بحال اي بنت …كيفاش كانت غتكون حياتي كون كبرت بين اب وام غنكون مرتااحة ولا غتكون حياتي هي هي

منظنش وخة توصل فيك فلمشاكيل فينما بغات ملي كتحطي راسك على لمخدة كتكوني عارفة بلي لبيت لي حداك كاينة مك وباااك وخة يكونو عرام تاع لمشاكيل نهار كتكوني نتيي الموضوع كيتحط كلشي فجنب ويطبطو على جرحك

العائلة ودفئها نعمة ماشي كلشي كتكون عندوو …انا حرموني وسلبوها لياا وشكوون ! …مي وباا لي كان خاصهم يحطو مشاكلهم على جنب ويحضنوني …يا خسارة حطوني انا على جنب وكملوو بلا بياا “

من داخل التانوية من بعدما بدا عام جديد فدرااسة شي فرحان شي معاود العاام وكاعي على الوضعية شي كيقرا غير باش يتلف الوقت وكاين لي قدامو حلم كبير باغي يوصل لييه وخاصو يقرا ويعااود يقرا …كان شهر 12 على ابوابو بااش يدخل …شوية شتاا منعاات التلاميد يلعبوو الريااضة..كل واحد فيهم فين مجلي فساحة السبور لبنات فلفيستير لعكورة ورواايح ودراري خرجوو قدام ليسيي وكاين لي بقاا

كالسة ايمان على جدع شجرة وحداها صاحبتها مارياا فتاة محجبة وسمراء بملامح جميلة

ماريا: الجو وااعر

داررت ايمان ايديها فلكويرة لي لابسة فوق الطابليية ظافرة شعرها جنب ودايرة حلقات كبار ضايرين

ايمان: باز لدوك دراري فالزنقة والبنات(باسف ) عرفتي كندوز من حداهم …كنقول بليي حياتي يمكن فيها شوية تاع الضوو عليهم ولا يمكن بيني وبينهم غير مي

مارياا: الله يحسن عوانهم

ايمان: ديري معايا واحد لبليزير

مارياا: الله يسمعنا خير

ايمان : لبارح مشيت مع مي لمرجان لقيتهم دايرين بروموصيون ف لكاش كول

ماريا: هدا نيت لي دايرة

ايمان: اه شريتو لبارح …. عندي شي صريف بغيت ناخد منهم

ماريا: فكرة زوينة الصراحة …نخرجو مع لخمسة نمشيو

ايمان: صافي مشاات

فعلا من ورا سبور قراو حصة وخرجوو جبدات ايمان تيليفونها ونص وجهها خاشياه ف لكاش حيت كان لبرد كتصوني لنعيمة مجاوباتهاش ..رسلات ميساج ل اسراء باش تقول لنعيمة غنتعطل والاخيرة قالت ؤك

شدو طريق مرجان على رجليهم حيدات ايمان الطابلية خشاتها فلكارطابل وكدالك مارياا ورجعات ايدها لكويرة من لبرد دخلوو لمرجاان كيقلبو فلماعن ويضحكو

ماريا : ملي غنولي ربة بيت غنحتااج هاد لماعن ياك

ايمان: غتحتاجي زوج بعدا

ماريا(تابطات ايديها كضحك): فعلا هوا لي خاص فهاد لبرد …شوفي التيليفونات ا ايمااان اجي اجي

مشاو لجهة التيليفونات لي كانو خارجين جداد خدمو لكاميراا كتصايب ماريا فزيف وايمان فلكصة لي دايراها فجنب

طفاوه ومشاو كيضحكوو كل مرة فين دايزين حتى مشاو لجيهة لحوايج لقاو لكاش كول خداتهم كلهم فلكحل سخاان ب ستة بيهم وجراتها ماريا لجهة لمكيااج كيجربوو فداكشي لي حاطين تيست

ماريا: لبوردو فن

ايمان: شوفي هاد لغوز وااعر

ماريا: ميجيش معايا انا سمرة يجي معاك نتي

ايمان: فمي صغيير مكيعجبنيش لعكر فيه

ماريا: بلعكس واعريين …هدا وااعر جربي

جرباتو ايمان مع فمها كانو شنايفها بارزين ولكن صغار دارت كلوز خلا شفايفها كيبريو

ايمان: واعر اصاحبتي ولكن غالي اختي

ماريا: خلصي النص وانا النص كل نهار عند وحدة

ايمان: كنعرفك نتي بديك كل نهار فاللخر تاع لعام غيبقا عندك هادي باااينة

ماريا: دابا واش نشرييوه ازمر ههه

ايمان: صافي زيدي

غادين ضاحكيين حتى كيسمعو بكاء قدامهم هزو عينيهم كيبان ليهم طفل صغير كيدور راسوو هنا وهناا وكيعيط ماما…مشات عندو مارياا وتحنات عندو كتسول فيه…في حين ايمان بقات واقفة على وضعيتها وايديها فجياب

ماريا:ايمان اجي تشوفي شحال زويين (شافت فيهاا ) عينيه بحالك اصاحبتي …صافي احبيبي اجي نشوفو ماماك … شنو سمييتك

ايمان(نطقات ببرود قبل منو) : اساامة

شافت فيهاا وحتى لولد حتى هوا باقي كيشهق نطقات ماريا وهي كتشوف فلولد وتشوف ف ايمان وقالت: واش ..واش

ايمان: دييه لموو انا كنتسنااك

مارياا ؛ايم

سمعات صوتو من وراها كينادي على اساامة …داز من حدااهاا منتابهش كاع ليهاا هز ولدوو وعاطيها بالظهر

كريم: علاش طلقتي من ايدي وشفتيي

جات مراتوو دايرة ركاب تاع بيبي قدامها بلون وردي كيدل على انها بنت

نطقات موجهة كلامها لمارياا:شكرا اختي

ماريا:ماشي انا لي لقيتوو(كترمش )صاحبتي …ايمان

ضارو بجوج وراهم مكيلقااو حد طلات ماريا حيت كانو مغطينها مبان ليها حد ورجعو شافو فيها

كريم: بانت لياا واحد لبنت واقفة منتابهتش ليهاا

ماريا: اه هي… ايمان اعمي كريم

نطقات مراتو بتسائل: كتعرفيه !

ماريا: اه اخالتي …بابات صاحبتي

سكتات مراتو وشافت فيه ونطق وعينيه كيقلبوو :واش كانت معاك

ماريا: كانت هن

نطقات مراتو مقاطعاهاا :ياله اكريم كون بغات تشوفك كون بقاات ..شكرا مرة اخراا احبيبة

نساحبات مارياا ومرة مرة دور تشوفييهم وكتقلب على ايمان …حتى كتبان ليها فلاكيص كتخلص ومشات عندها ومن بعد تمو خارجيين …كانو ملامح ايمان باردين بحالا هداك لي شافت ماشي بااها

ايمان: شفتك سكتي ماشي من عادتك

ماريا : واش بااك وسمحيلياا عليها كلمة ملقا غير ديك لعقيصة يتزوج بيهاا …قلت ليه ايمان كاينة هنا ياله قاليا فينها قاتليه زيد زيد كون بغات تشوفك كون جات

ايمان: مكدباتش علييه كون بغيت نشوفو كون بقييت

ايمان: ومنين عرفتي اسامة بلي خوك

ايمان: كيضل لايح تصاورو فلفيس بحالا غير هوا لي والد…شي مرات كيجيني هوا ونورة مضادين شكون يحط تصاور ولادوو كتر من لاخر

ماريا: ميكونوش باقين كيبغيو بعضياتهم و كيديرو الضد لبعضهم

ايمان: متكونش شداتك السخاانة وبديتي كتهتري لاا …هادو بجوج مكيبغيوش حتى ريوسهم باش يبغيو الناس براكة عليهم يبغيو غير ولادهم الزوينين

شافت فيها مارياا باسف كتبغي تهدر وكتقرر تسكت ..ايمان واخة صااحبتهاا عمرهاا فتحات ليها قلبها كامل وقالت ليها معاناتهاا مع عائلتها ولا حتى شنو عاشت فلماضيي ..فقط عارفة نص من واليديها انهاا بنت غير شرعيية وعمرها فتحات هاد الموضوع معااهاا ..مارياا انسانة حساسة وحريصة فهدرتها مع ايمان لتقول شي كلمة تنقص منهاا حتى انها عمرها قالت كلمة بنت لحرام لي منتاشرة بين لبنات كانها كضحك معاها او كتعاتبها كتخاف تجرحها بيهاا وخة متكونش قاصداهاا

ايمان: ندوزو من الشاريع لي اللور

ماريا: كون غير شدينا طاكسي

ايمان: لاا هي لا طاكسي منقدرش نركب فيه بوحدي

ماريا: معاياا

ايمان:لاا زيدي وسكتيي ..الجو زوين منها خارجين منها لي بان ليناا نعطيوه لكاش كول وخة حاجة بسيطة …لبرد هدا

غادين كيتمشاو بانت ليها مرا كالسة فوق الكرطون شادة تربية قدامها

ماريا: ايمااان عقلتي على هاد لمراا هي لي كانت حاملة ..مسكينة ولدات فهاد لبرد

ايمان: غير فالشاريع وشوفي كي شادة التربية ملاحتهااش

ماريا: ولكن راه غتموت ليها غير بلبرد اصاحبتي

ايمان: شحال باقي عندك

ماريا(جبدات الصرف) 20 درهم

ايمان:انا بقات خمسة دراهم كلشي صرفتوو …صافي نعطيوها ليها ومع شي كاشكول راه تقدر تلوي فيه تربية

فعلا عطاوهاا وطلو على تربية كيتبسمو ليها وقالت: وينوو شنو سميتيها

_فاطمة الزهراء

ايمان: عفااك عنداك شي نهار تلوحيهاا خليهاا حداك تبقا مونسااك

هبطات لمرا راسها مجاوباتش والبنات كملو طريقهم لي بان ليهم ملابسش مزيان كتعطيه كاش كول كاقصى حاجة ممكن ديرهاا ..سلات ستة لي خداات وكملو لدار تفارقوو وكملات ايمان لداار دايرة لكييت هزات راسها لشرجم تاع دارهم ونتابهات لطموبيلة عبد الله شداتها لخلعة من كرشها منو خصوصاا قربات السبعة

حلات بالسارووت …هزات عينيها كتبان ليهاا نعيمة كتحلف فيها بهمس من لكوزينة وكتقول بهمس

نعيمة:فين كنتيي

ايمان:مالك كتدوي بشوية

قفزها صوتو من وراهاا جاي من الصالون بفوقية تحتها سورفيت بيتية وقال: فين كنتيي البرهووشة

لصقات مع الباب وقالت: كنت فمرجان مع صا

جاتها طرشة ميلاتها كاملة وجرها من الظفيرة زادها لخراا ورجع خبط ليها راسها مع الباب

نعيمة(جاية كاتغوت ): وهدر بفمك وشد ايدك اعبد الله طلق منهاا طلااااااق

عبد الله (بلغوات موجه سبابتو لموو): خرجتي على مهااا بغييتي تخرجي على هاديي ولاا ياك خارجة مع الخمسة فيين كانت

كتسمع صفير فودنها من الطرشاات جاوباات والدموع فعينيها :راه قلتها لايسرااء باش تقولها لمييي

عبد الله :خرجتي من قرايتك غتجي لداار (زير على شعرهاا تغوتات)ااااش قلت

ايمان: غنجي لداار هء هء عفاك ضريتيني

عبد الله: معامن كنتيي(زاد طرشهاا)دوييي الحريمية

ايمان: مع مارياا والله مكدبت هءه

دفعهاا حتى جات طايحة حداا نعيمة لي نوضاتها دغياا دارتها وراها وقالت موجهة كلامها لعبد الله : باقي تحط ايدك علييها نسخط علييك

عبد الله : مبغيتينيش نضربها وندخل فيها سيفطها عند مهاا ولا باهاا (بتحدير)محدها معايااا فهاد الدار …غنحكم وغنضرب وغنق_تل لي يخرج على كلامي ويديرهم برهووووش فهاد الاقاامة(خبط لباب بايدو تقفزات ايمان مزيرة على نعيمة )فهمتييي …اجي هنا طلقي دوك الروايض لي معلقة فودنك طلقييي (شاف فموو )هادشي لي كتشري ليهاا هاا باغة تعلميها كي تسييب ياااك طلقي خلاااص

نغزاتها باش تعطيهم..كتحيدهم من ودنها وعطاتهم ليه كترعد ..شدهم فايدوو بغجهم وقال: غبري عليياا وجهك …وجه السخط وزلط الله يلعنو كنس تفووو

دخلات لبييت لاحت شكارة وكلسات كتبكيي وكتعض فلمخدة بلعصااب تدخلات عندها نعيمة وقالت: علاش متعلميش هاا

ايمان: هءهءهء والله اميي تقلتهاا ل اسرااء

كلسات عيانة على لفراش وقالت:ابنتيي راه مبقا عندي لييه جهد وهوا غير مزايد فلعصييان …تهديت وهوا مبغا يتهد واش شي حد غيفكك منو خولة لخوف ساكنها منوو وخة تكوون …

ايمان:هءهءه هوا امي كيقلب غير على سبة باش يبرد فيا مال بنتوو مكيضربهاا

نعيمة: هاديك حيت كترعد منوو عارفة لمشويطة كتسناهاا

ايمان: والله متبقا فيهاا اميي فينهياا

نعيمة: سكتي داتها مها لسوايع

ايمان(مسحات نيوفهاا): دارتها بلعاااانيي مقالتهاش لييك غير بلاتيي هءهء

خرجات مخليااهاا غتااكل راسها بلفقصة جبدات كتوبتهاا كتحفض مرة مرة تهز تيليفون ضرب طليلة فلفيس وتخرج تكمل حفاضتها عيطات ليها نعيمة تعشً ولكن رفضاات ..حتى شافت لباب تحت كانت مهبطة راسهاا دايرة لكيت فوق فراشهاا وسط لكتوبة لقات اسراء داخلة كتحط فشكارتها وكتحيد فلفوولار كتسوط

ايمان: جيتي ازوينة

شافت فيها اسراء وقالت: شي مشكيل

ايمان: علاش مقلتيش لمي فين كنت

اسراء: مامسالياش لييك اولا وماشي خدامة عندك تانياا

ايمان: اه سمحيلياا

الاخيرة مجاوباتهاش بدلات عليها ب بيجامة وجمعات شعرهاا خرجات تعشاات غسلات وجات لفراشها طفات الضو وايمان كتحفض

ايمان:نعل…(شعلات الضو من حداها )ولباكورة مكتشوفينيش اش كنرون

اسراء(كتقاد فلمانطة )لي بغا يحفض مكيمشيش ل مرجان

ايمان: اطفي ضو مزال وانا كنحفض انوض انطفي لمك ضو عينيك وكلسي تركني البرهوشة

اسراء: بغيت نعس اويليي نوضي لصالون كاين شي حد كيحفض فوق الناموسية

مجاوباتهااش رجعات كتكتب لخرا قالت تفوو وغطات راسها بلمانطة

داز وقت بسيط او جمعات ايمان كتوبتها خرجات لكوزينة كان كلشي نعس هزات تفاحة ومشات لبيت طفات الضو واسراء شادة تيليفونهاا كلسات حتى كملات ديك التفااحة وناضت مبردة موقفات غير شانقة على اسرااء من عنقهاا قاجاها

ايمان : شوفيي وسمعيني مزياان شنو غنخرج من فميي البرهوشة

اسراء(مخلوعة): واش مريضة نتييي بعديي منيي (كضرب فيدها)ايماان بعدي منيي

ايمان: زيدي غوتي باش نحطو لمك فسطل ويجي بااك يطل …غتجمعي رااسك وغتفوتينيي ونهار باقة توصلي علياا قد هكا لداك بااك غنقول لي فييك ولي مفييكش سمعتيني وااااش سمعتيي البرهوشة

حركات اسراء راسهاا وقالت: صافيي طلقينيي طلقي

طلقاتهاا وقفزات اسراء مكمشة مبعدة على ايمان لي واقفة عليهاا شادة عنقهاا كانت على شوي تشنق عليها ديال بصح

اسراء: دابا تاكدت بلي راك مريضة

ايمان: مزياان باش تعطيني شبر تاع التيسااع …برهوشة مزال مامسحات سليبهاا جاية تلعب معاياا وداباا طفي ضوو

معاوداتش معاها لهدرة طفات الضو وتكمشات خايفة فالاخير هزات مخدتها وغطاهاا وقصدات الصالون اما ايمان تلوات ففراشهاا وغمضات عينيها كتقلب على نعاس …حتى طاح فبالهاا باها ملي داز من حداها وكيفاش عنق ولدوو خايف عليه وتفكرات بلي هوا نيت لي ركب بنتو فطاكسي بوحدهاا ومشا تبع خطيبتو لي هي نفسها مراتو دابا

غمضات عينيها مستسلمة لنعاسهاا

يوم جديد لقاها فليسيي حصة الانجليزية مع دخلة تبسمات للاستااد وقالت:صباح لخير استادي وجاري

ضربها بمسطرة صغيرة لراسهاا وقال: good morning

ضحكات وكلسات فالطاولة لي مقابلة مع لمكتب ف انتظار التلاميد يدخلوو

كيتمشا بيين الطاولات حتى وصل عندها وقال: لصال ضربتي علييه !

ايمان: لاا غير مبقيتش كنلقاا لوقت لييه كنحاول نراجع ونفهم دروس على تيساع هدا مكان

منعيم :good

تبسمات ليه وكمل خطواتو فاتجاه الطاولات لاخرين ايديه فجيب

دخلات مريا رمات ليه السلام هوا لي كان خرج كيتسناا كلشي يدخل كلسات حدا ايمان وقالت: هادي هي تسناي حدا دار

ايمان؛ وصلني داك زبل ديال عبد الله

مريا :علاش

ايمان:مي بغات تمشي تبدل نضاضر وطلباتو يوصلني فطريقهم

هوما كيدويو حتى وقفات عليهم مريم بنت جميلة كطلع وتهبط فايمان

ايمان: خاصك شي حاجة !

مريم: هادي راه بلاصتيي يمكن

شافت ايمان فمريا كضحك وقالت: حسابها راسها فلحمام …سيريي راه عطا الله لبلاايص الزييين

مريم: دوك لبلايص كلسي فيهم نتي هادي بلاصتيي

ماريا: مريم اويلي راه بلااصة بلاصة واش حنا كنقراو ف الروض

مريم: مداوياش معااك

دخل منعيم قاطع نقاشهم وقال: اييه ايه اش كااين !

شافت فيه مريم وقالت: كلسات فبلااصتي

منعيم: مريم ها بلاصةة خاوية وراهاا …راكم بعقلكم غدابزوو على طبلة !

مريم(مرضاتش قدام الدراري لي كلشي كيشوف ) : وخة

مشات كلسات فطاولة التانية ورا ايمان ونطقات بهمس : برهوشة لخرا فرعنتي

ايمان: سيري شكي بياا اسميمو

مريم(قربات ليها ): عنداك حساب ليك انا اسرااء تشنقي علياا بليل …ملقيتي شكون يربييك

ضحكات ايماان كتشوف ف مرياا وقالت: شي نااس كيتقلاااااو فالسم

دازو حصصهم في سلام القسم كلو عارف بلي ايمان و مريم خطاان لا يلتقياان خاصهم غير علاش ينوضوهاا مع بعضياتهم

خرجو مع 11 كيضحكو بيناتهم غادين لدار دايرين لقب تاع تجاكيطة من قطرات شتاا

ماريا: شي حد كيعيط ليك

ايمان(كدور فعينيها ): فين

دارت وراهاا بتسائل حتى كتشوف قدامهاا كريم هاز فاييدو ولدو بلكارطابل دورات عينيها منين جاي كانت مدرسة خصوصية

ماريا: نمشي؟

ايمان: تسنايني هناا

قربات ليه وايديها فجيب تجاكيط هوا قرب وتبسم ليها حط ايدو على كتفهاا وجرها سلم عليها من حناكهاا وقال: مسمعتينيش ؟

ايمان: لاا

كريم: حم لبااس اش خبارك

ايمان: لبااس …ونتاا

كريم: الحمد لله …واش بدلتي نمرتك ؟

ايمان(سكتات شوية كترمش فيه) : اه طاح ليا تيليفون بنمرتو شي ست شهور داباا

كريم: داكشي صونيت لبارح مجاوبتيش …علاش لبارح مشيتي

ايمان: شفتك مع مرتك مبغيتش ندير ليك شي مشكيل وصافي

كريم: مشكيل ! هههه شنو بان ليك تمشي معايا لدار وتشوفي اميرة

ايمان: شكون اميرة

كريم: ختك وهدا اساامة ديجا شفتيه

ايمان: ااه …منقدرش مقلتهاش لمي

كرريم: صوني ليهاا قوليها غنمشي مع بابا

سكتات وقلبها كيضرب مع ديك لكلمة وقالت: نسولهاا…او مرتك مغتقول والوو

كريم: لاا معندها متقول ياله صوني ليهاا

بعدات عند صاحبتهاا باندهاش وقالت: قاليا تمشي تغداي معاياا

ماريا(فرحات ليهاا ) سيري اصاحبتيي مع باباك موحشة فنطير خالك على لغدا

ليمان(بتردد) لاا منقدرش

ماريا:ايمان واش حماقيتي غادية مع لبراني راه باباك …صوني ل خالتي قوليها ليهاا

جبدات تيليفونهاا بتردد صونات ل نعيمة لي جاوباتها: ب فينك

ايمان:ميي …عرفتي شكون جا عندي

نعينة: شكون ابنتي

ايمان(بخفوت )كرييم …عاودت ليك على لبارح ..ودابا جا وقاليا تمشي معاياا تغدااي

نعيمة: سيري ابنتيي معاه شوفي خوتك وعرفييهم

ايمان: او عبد الله

نعيمة:سيري مع باباك ابنتي خالك راه مع ولادو

قطعات معاها وقالت: نمشي

ماريا: سيري وبيناتنا تيليفون

مشات عندوو تبسم ليهاا وجرها من كتفها وقال :كيف غادية مع قرايتك مزيان

ايمان:مزيان هاحناا غادين

حل طموبيل ركبات لقدام وركب لولد اللور كتفرك ايدها بتوتر وقلبها كيرفرف معرفاتو خوف معرفاتو فرحة

وقفو فحي زوين وفيه عمارات كبار بجردة ولابيسين لوسط اقامة نقية …طلعو فالسانسور لطاج الرابع وقف قدام باب خشبي كيحل فيه وهي ورااه كترمش

كريم: نجمة …نجمة

جاية من لكوزينة كتجر فلبانطوفة وكتمسح ايدهاا كانت مخنزرة فيه غير شافت فيها ايمان ابتاسمات ابتساامة صفراا بلا حتى متحل فمها وقالت: السلااام زارتنا البركة دخليي

سلمات عليهاا وقالت: حطي سبرديلتك هنا ولبسي بانطوفة لارض باردة …لبااس ؟

ايمان: لبااس الحمد لله

لبسات لبانطوفة وتبعاات كريم فين كان صالون كبير مفرش على حقوو وطريقو بلدي وتلفازة فلحيط كبيرة …مع كلساات مشا اسامة كيجيب ليها فاللعب وقال: كتشبهي لعميتوو واش نتي ختهاا

ايمان(شدات من عندو الطموبيل ) : فاش كتقراا

اسامة؛ لاكغونص ونتي

ايمان: لباك

مشا هز تيليكموند شعل التلفاازة وبقات هي كالسة كتبرق فعينيها اماا كريم مشا يبدل عليه …

نجمة سدات وراها لباب : كتحطني امام الامر الواقع زعمة ولا شنوو

كريم: فف هاد الاسطوانة غندوزو بيها سيمانة تاني !

نجمة: جاوبني على قد سؤالي

كريم: زعمة كون تشاورت معااك غتقبلي

نجمة(بانفعال) : مغنقبلش وهكا شرطي من اللول بغيتي تصرف عليها صرف بنت مرا خرا مدخلش لداري صاافي تافقنا على هدشي 5 سنين هادي دابا شنو تبدل

كريم: متبدل والوو …جبتها تشوف خوتهاا صافي فين المشكيل

نجمة: المشكيل هوا ليي بغيتي تجبد علياا داباا …اخر مرة تجيبهاا بغيتي تغدا معاها عطا الله سناكات

كريم: سكتي راه غتسمعك

نجمة: تسمع

ايمان سمعات كلشي ولي عطا الله عطاه فلوقت لي كتقلب على الدوش سمعات اش تقال …رجعات ادراجهاا لجيهة لباب كتلبس فسبرديلتهاا وعينيها مضببين كترمش كيطيحو دموعها فوق السيور لي كتعقد فيهم …حلات لباب وردخاتو بجهد لي عطاها الله وهبطات فالسانسور كتمسح فدموعهاا وكتسب فراسها انها ضعفااات قدام كلمة بابا وقالت يمكن كلشي يتصلح …مع هبطات كتسمعو جاي فالدروج وكيعيط باسمهاا خرجات كتزرب كتقاد فلكارطابل وشعرها كيضرب فيه الرييح تجرها من ايدها

كريم: ايمان اجي اجي

ايمان: شوف خليني نمشيي

كريم: شنو مالك

ايمان: مشاا لحال على هدشي صافي غير عطيوني التيساع درتو حياتكم الله يسهل عليكم

كريم: ايمان نجمة ماقصدات والوو غي

ايمان: وصااافي (شفايفها كيترعدوو ) معرفتش علاش جيت معاك اصلاا …عام مسولتي فياا ولا كتر وجاية معاك كي لحماارة …خلينيي عفاك

عطاتو بالظهر غادية او وقفها : صبري راه كاينة الشتاا نوصلك

ابمان: وصلتيني حتى ملي كنت برهوشة بقا غير داباا …قادة براسيي

خلاتو ومشاات وهو وراهاا كبحات رجفة شفايفهاا بايدها وخرجات من الاقامة بخطوات سريعة كتنخصص وكتبكيي كتمسح دموعها باش يهبطو لخرين

خداوها رجليهاا لجهة لبحر جهد 40 دقيقة وهي غادة نيفها ولا حمر بلبرد ولبكا اما عينيها ولاو نقطة حمرة موقفات حتى لرملة كتنهج لبحر هايج مع لجو لي كان مضبب ومرة مرة كطيح شتا خفيفة …. شعرها كيديه الرييح ، كلسات على حجرة كانت تماا فشاات قلبهاا وخاطرهاا …نهار على نهار كتزيد تحقد وتقول شنو دنبي فهادشي كلوو …حسات براسهاا تنفساات وتهدناات بقات على وضعيتها مقابلة لبحر على الله يدي همهاا وترتاح …صونا تيليفونهاا ..طلعات نمرة منعيم شافت فالساعة لقات 2 وشي حاجة تنفساات ببطىء وجاوبات

منعيم : ايمان فينك …تعطلتي

ايمان: مغاديش نجي

منعيم: حداك الريح بزااف واش كاينة فلبحر

ايمان : ممم

منعيم: طاري شي مشكيل …ايمان نجي عندك

ايمان(برجفة فصوتها )بلاش امنعيم نولي مزيان نجيي …بسلامة من بعد ونهدرو

رجعات لوضعيتهاا مكرهاتش تغوت …. داز وقت قليل حتى كتسمع صوتو وراهاا دورات وجهها بجنب وقالت: شنو كدير هناا

حط حداها لكاسك وقال: بان ليا لجو زوين قلت نمشي يضربني لبرد (تبسم ليها )شنو وقع مالك

ايمان: باش كتحس ونتا وليديك مطلقين

فاجآتو بسؤالها وقال: عادي جوج تناس ماتفاهموش و كل واحد شد طريق

ايمان: ولكن كاين فرق …بين كابر مع واحد فيهم وكتشوف لاخر فلعطل …وبين كتلاوح بيناتهم وتاحد مقابلك

منعيم: ايمان علاش معمرة راسك بهادشي عاشو حياتهم الله اعاونهم نتي غتبقااي هكا ؟ عيشي حيااتك ونساايهم

ايمان: علاش هوما كملوو حياتهم و ولدو الولاااد واناا مكيسول فياا حد (شهقات )ولا انا بنت لحرام ياك

سكت منعم كيشوف فلبحر وكملات: شكون خافي عليه هدشي حتى ماريا راه عارفاا ودايرة راسها متيقة بلي وليديا مطلقيين

منعيم(قاطعها ): ايمان راه غير كتمرضي راسك وصافي …خرجي من هاد لازون وعيشي حياتك ك ايها الناس واش مكتوبة فجبهتك بنت لحرام ؟ مكتوبة فجبهتي با حبااس ؟ راه اي واحد عندو شي حاجة مباغيش الناس تعرفها ولكن الى عرفات راه ماشي بالضروري نقهرو راسناا خاصنا نكملوو ونزيدو لقدام (حط ايدو على ايدها وزيرهاا حتى شافت فيه بعيون مدمعة وحمرين ) نتي نقيية وزويينة وبنت لي متاكد غتوصل نتي قوية …مضعفيش على هدشي …تفاهمناا ..ياله شنوو

ايمان: وخة (مسحات نيوفها )شنو قلتي ليهم تاجيتي

منعيم(تبسم ليها ): مشاكيل عائلية هههه.. نوضي نوصلك لدار ولا ليسي

ايمان: جبتي لموطور …انا نسوݣ

منعيم: كلشي ديالك ههه

هز لكاسك وتبعهاا كتقاد فلكارطابل…. توجهو لبارك فين كان سكوتر ديالو صغير عطاها ديماراات وركبات كدير لكاسك ودار هوا ديالو ديما كيكون عندو جوج مولف كيعطيها مرة مرة تسوݣ كانت عارفة لييه

منعيم : عنداك تقلبينا مزال ماشفت ماتشوفت

ايمان: شد راسك كلشي ممكن ههه

شدات طريقهاا مرة مرة كتفكر هدرت مرت باهاا ووكتحس بالاحبااط حتى قربوو لبلاصة تاع السكنة و هبطات عطاتو لكاسك

ايمان: صافي حدي هنا لنصدق مضاربة حتى مع عبد الله …انا راه عندي مغناطيس تاع لمشاكيل

منعيم: سلكي هاد لعام و شدي نقطة زوينة بزاف تاع لمعاهد كيتسناوك كري مع لبنات وهانتي مهنية راسك

ايمان: الى كانت مي غتعيش معاياا نكري حتى فتلت الخالي ..صعيب عليا نبعد عليهاا …هي الضو وسط ظلامي امنعيم

منعيم: الله اخليها ليك ياربيي ..ياله هاني مشييت

شدات طريقها لدار راسها كيضرهاا بكترت ما بكات والجوع زادها مكلات والوو من فطورها لخفيف ..سمعات تيليفونها وجبداتو كتلقاا نمرة نورة لي دايراها بلا اسم مسجلة هكاك ..قطعات عليهاا ورجعات تيليفون لجيب وجبدات سوارت ديالها باش لكانو ناعسين متفيقهمش …حتى كتسمع لهدرة جاية من لداخل مفرزاتش شكوون …حلات لباب وطاح فودنها صوت نورة قالت: ساابت هاديك

حطات سبرديلتهاا وحيدات تجاكيطة .. مزال محطاتهااش تقفزاتهاا نورة من وراهاا

نورة: علاش مكتجاوبيش

شافت فييها وجهدها مبقااش وقالت: مفيا لي يجااوب

نعيمة: علاه مقاريااش ! عيت ابنتي نصوني لييك

نورة: علاش اتجاوبك …شافت لحرامي تاع باهاا ونساتك فساااعة غضرب علييك …طوالو لجد مك الرجليين وليتي غادية تالداروو

ايمان(بغات تستاافزهاا ) : هوا بعدا داني على اساس بنتوو ماشيي كدب وقال ختيي

خولة جرات نورة وقالت: نورة كلسي اختي بدلي ساعة بخراا

كان فالصالون حسام كالس مبغاش يدخل شاد بنتوو وكالس ومعاه كانت جميلة ام مريم

جميلة: خارجة ليهم من جنب هادي

حسام: الله اهدي ما خلق

نورة : وليتي ترادي معاياا السلكوطة هاا …فين تيعرفك هاد باااك ..كاسيك ولا موكلك ولا مشربك معارفك حتى شحال كتلبسي فرجلييك

ايمان(لاحت الشكارة ): نتي شنو عارفة علياا بسلامة هااه فين كنعرفك لا نتي لا هواا محطوطين حداياا ف لحالة المدنية مكرهتش كون قطعتكم من حياتيي وتهنييت …لا نتي لا هو مكتسواو عندي بصلة خاامجة بزاااف علييك تكوني ام وبزاف عليه يكون اب كتعايريه بشماتة نتي اش تكوووني (جهلاات ونعيمة كتجرها) نتييي وحدة انااانية نتي مكتبغيي تابنتك لي من لحمك ودمك تبغي شي حد !

تلاحت عليهاا نورة بنتييف وايمان كدفع فيهاا وكتجار معااها هنا ناض حساام كيجرر نورة صعرات ولاو فيهاا عشرة اما ايمان كاع لي فقلبها جيهتهم حطاتوو لنورة فوجهها

نورة(بلغوات )سمعتيهااا امييي طلقنييي طلقنيي احسااام نربي السلكوطة

ايمان: ربي غير رااسك كون كنتي مربية مكنتيش تولديني فلحرااام ودابا جاية تلوميني انااا هاا انا لي قلت لييك حلي رجلييك لداك الشماااتة

نورة: اااااه طلقناااي ….خرجييي عليااا الكلبة خرجييي

بدات كتجر فيهاا ونعيمة كتجر حلات لباب ولاحتهاا وقالت: سيريي ابنت لكلبة الزنقة هي لي تليق لييك

ايمان (كتنهج )شفتي الزنقة وحن منك

نعيمة: وسكتووووو ويعطييكم مصيبة مشوهيني مع الجيرااان

سدات نورة لباب على ايمان لابسة بيل قصير حد السمطة تاع السروال ودجين وشعر مشنتف …كتنهج ودموع هابطيين

كلسات فدروج كتجمع فشعرهاا وسمعات لبيبان تاع جيران كيتسدوو

ايمان (رجعات لباب دار وخبطاتو فين كانت نعيمة ونورة مغاوتين بغات تحل عليها ): لبلاصة لي تكوني فيهاا منحطش رجلي فيهاا قاتليك شماتة نتييي شنووو شنووو

سمعات صوت خولة من ورا لباب كتقوليها بدلي ساعة بخراا

خرجات كتهبط لكمايم تغطات ايديهاامع كتهز ايديها تجمع شعرها كتبان كرشها شوية

وقفات وسط الجردة وغوتااات بحرها حتى طارو شي طيور من الشجرة لي جنبها وبدات كدور بجناابها كتنهج وكلساات

ايمان:علااااش انا اربي كيوقع ليا هدشيي هءهءهءهءهءهه شنو درت هوما لي خاصهم يعانييو ماشي انا هءهءءه انا مدرت تا حاجة اربييي اربييي علاش كتعدبنييي هءهءهءهء علااش راني عيييت هءهءهء

ناضت كتبكيي قصدات عمارة اخراا بعيدة على دارهم طلعات فالدرووج والدموع فعينيها كتنخصص ..وصلات لباب الحديد كدق وتعاود حتى تحل لباب من طرف سيدة مخلوعة من الدقان

ايمان: نجااة هءهء

هي نفسها السيدة لي جابتها نهار تلفات على دارهم من تما بقات علاقتهم زوينة وماحد ايمان كتكبر ولات كتشارك نجاة معناتهاا اليومية

عنقاتهاا كانها كتقلب على حضن دافيي متردداتش نجاة وحضناتها بايد وهي كتسد لباب وقالت: مالك ايمان …ويلي شحال باردة وكرشك عرياانة…اجي اجي

كلساتها فالصالون ومشات جابت ليها بينوار سخوون لبسااتو ليهاا وقالت: مالكي شنو وقع

بعد مدة تهدنات من بعد مخوات قلبها على نجاة وهي كتسمع ليهاا وكتواسيهاا

نجاة: شي مرات ابنتيي لواليدين هومااا سباب هم ولادهم ..كتبقا فيا غير لالة نعيمة جات وسطكم محيلتها لبنتها ماحيلتها لييك

ايمان: هءهء حاسة براسي ضاايعة ا نجاة معارفاش طريقي كيدايرة

نجاة: تاحد معارف الطريق شنو اخرتها ا ايمان …

ايمان(سكتات شوية كترتاح ) : فين منى !

منى : ميميي (عنقاتها )كنت ناعسة

ايمان: حبيبة ديالي مامشيتيش لمدرسة

منى: ضاربني لبرد ونتي مال عينيك حمرين

ايمان: حتى انا ضاربني لبرد

منى: حتى ماما كيكونو عينيها حمرين وكتقوليا ضاربني لبرد ..ولكن انا عارفاها كتكدب علياا كتكون كتبكي

نجاة: سيري سيري لبسيي بانطوفتك سيري (تنهدات )سمعيني ا ايمان راه لي معندو قليل عندو كتير…نوصيك على قراايتك شدي فيها هي لي غتخرجك من هدشي كلوو دابا تكبريي وتولي خدامة ومستااقرة متوصلك لا هي لا غيرهاا … مديريش بحاليي لاقراية لا ديبلووم …خرجوني واليديا لخدمة فالديور صغييرة نظل نصبن ونجفف للعيالات لي قرااو … تلاقيت بولد الناس قلت غنرتااح تزوجت كيف النااس مزال ملحقت نرتاح قاليك بغيت نمشي براا نخدمو بليل وبنهار حتى جمع باش يمشي يحرݣ فاللخر تقلبات بيهم لفلوكة وربي لي عالم واش مات ولا قطع ونسانيي … لقيت راسيي بوحدي تااني لا حنين لا رحييم وحاملة وكنضرب تمارة ولكرفي شكون رحمني ؟ تااحد…كنتلاح ونووض بوحديي

ايمان: او داركم

نجاة: يا بنتي يا ايمان فهاد لوقت ميهزك غير راسك وكتفك مشا داك الزمان لي دغمة تاع لخبز ندورو عليهاا…هاد لوقت باغي بزااف …وانا منكدبش علييك عييت صحتي كطيح نهار على نهار تزادت منى نركبهاا ونمشي نجفف ونسيق تعييت وتهدييت ويدي كرمو بلما وجافيل …كنت زويينة

ايمان: حتى دابا راك زوينة

نجاة: الزيين كيدبل والى غرك زينك هزك لما

ايمان: ههه انا عاجبني زيني ويني مقادية بيه والو بلا زهر ههه

نجاة: الزين لمخدمتيهش فلحاجة لمزيانة ايديك لخلا عشتك وداكشي لي درا لياا ..داني لرفقة لخاايبة تصاحبت مع سلكوطات رجلي خرجو الشواري وليت نخلي بنتي عند الجيران ونخرج لبيران نخدم ولي عندو شي هم يبات يغنيه لياا تاطلع شمش ونجي نتلااوح …منكدبش علييك تغريييت وغروني لفلوس لبااردة وليت نلبس ونلبس بنتي ناكل لي تشهييت نمشي فين بغييت وليت تا اناا كارية دويرة على قدي ونجيب لمرا تخملها لياا مرة مرة …(تنهدات) ولكن واش عمرك شتي شي وحدة عاطياها لحراام وتجي تبكي على صلاية ! لاا حيت انا بيني وبين راسي عاارفة بلي واحد نهار اتجيني دقة صحيحة من عند ربي حيت طريق لحرام مكتوصلك غير لجهنم …انا باركة عليا غير بنتي نشوفها واكلة شاربة مرتااحة مهزاش لهم شنو غتاكل غدا …اما انا غرقت دنوب ومعاصي

نجاة: وفينهياا التوبة ؟ واش انا كرهت شي خدمة حلال تعيشني انا وبنتي مرتاحين …والوو لا صنعة لا صحة بقات لتقل ..بردو علياا كتاافي ولاو كيعرفو يسربيو غير الشراب ويقادو لفاخر لشيشة (تنهدات بحرقة )مزال كنتسنا داك ولد الناس لي يخرجني من هاد الزوبية فين رميت راسي

ايمان: ههه كحل الرااس انجاة ملقيتي متسناي

نجاة: كنطلب الله ليل ونهاار ا ايمان تيقيني …شوفي ماحد ربي فوقناا كلشي ممكن كاينين ولاد النااس ..حتى انا بغيت نكلس ونطيب ميكلة زوينة ونتسنا راجليي يدخل …وفرمضان نصليو التراوييح ولفجر فجامع يحجبني فدار يقوليا متشوفيش الشمش حتى من شق الشرجم والله منقرب ليهاا ….غير يكون ولد الناس ويهزني ويهز بنتي من لحرام

ايمان(بتنهيدة ): الله يدير شي تاويل ديال الخيير انجاة

نجاة: امين ياربي (ضرباتها لكتفها مبدلة لحوار)شكون داك مول سكوتر لي مرة مرة يوصلك هننن

ايمان: نجااة منيتك ههه هداك ولد خالتي فاطمة

نجاة: شكون فاطمة ؟

ايمان: طيابة اصاحبتي

نجاة: هييي حلفي بالله!..تبارك الله كبر وزياان مسكينة تاهيا وليد واحد لي عندهاا منداك سكاايري داخل خارج لحباسات متهنات حتى طلقات منوو …جاب الله عندها لواليدين هزو بيها وعاونوها فداك دري وعاطينها فين تسكن

ايمان: كل وهمو والله …نخلييك نمشي

نجاة: كلسي بلاتي

ايمان: اتكون مي مشطونة خاصني نمشي

حطات لبينوار لبسات سبرديلتهاا وخرجات بعدا تنفساات ملي شاركت الحديث مع نجاة

فعلا كل وهمو ولا سمعتي هم الناس تقول الحمد لله على همي … حيت هادي هي الدنيا كل مرة وكيغاتخرج نهار تبكي ونهار تفرحي وغادية هكاك حتى تفنى

جمعات ايديها من لبرد ومشات كلسات فلكرسي لي مقابل مع دارهم فالجردة …كتفكر نهار كيخرجها جدهاا تلعب هناا قدام الدار وجداها كتشير ليهاا من الشرجم تاع الصالون…تبسمات وهي كتجدد عليه الرحمة ..كتقول كون كان باقي فلحياة مكانش شي حد غيطاول عليها كيف داباا ..عبد الله من جيه او نورة من جيه

بانت ليها نعيمة كتقلب عليها وفايديها تجاكيط تاعها حتى قشعاتها وجاية لييها

نعيمة: فييين كنتيي فيين عيت نقلب علييك

ايمان: هاني امي غير هنا …فين غنمشي ؟ عندي شي حد علامن نحط راسيي من غيرك امي ؟

نوضاتهاا من ايدها وقالت: لبسيي غيدخلك لبرد لبسيي

لبساتها تجاكيطة وجراتهاا من ايدها وايمان ماشي من لعاكزين حضنات دراع نعيمة وحطات راسها على كتفهاا وقالت: ماعندي حن منك امي

طلعات لدار شادة فجداها لقات نورة مشات غير خولة لي مخرجة تشطيبة من الصالون شافت ف ايمان وقالت: ايمان فين كنتي

ايمان: فالزنقة فين كنت

خولة: ابنتي هاديك ماشي هدرة تقوليها لماماك حشومة

مجاوباتهاش حدها لبسات بانطوفتهاا ومشات لكوزينة جبدات البيض ومشات كطيب فمقيلة تعتق راسهاا

وقفات عليها نعيمة وهي كتاكل فوق الطبلة: متغديتيش عند بااك

ايمان: غداني السم هو ومرتو

نعيمة: وهاديك هدرة تقوليها لمك قدام رااجلها ..هااه

ايمان : بقات فييك ؟ مبقيتش فيك انا لي كنتلاح بيناتهم كي شي واحد فيه الجربة

نعيمة : يكون لي يكوون هاديك مك ا ايمان وماشي هدشي علاش كبرتك …نتي ربي غتحاسبي ولاا ..خوي قلبك من لحقد خووييه

ايمان: مبغيتيش تفهمي بلي بنتك لي حاقدة عليا بلا والوو شنو دخلني اناا فداكشي لي دوزات

نعيمة: ايمااان سمعيني متهدريش معاياا الى معرفتي غلاطك ومشيتي طلبتي السماح من نورة

ايمان(بصدمة ): شنووو واش اميي كتسمعي شنو كتقولي والله لكانت لييها

نعيمة: ضبري لرااسك

ايمان: مييي وا مييي فين …فين غادية

ناضت على ديك لمقلة تبعات مها لي كتلبس فجلابتهاا وقالت : فيين غاادية ودوي

نعيمة: انا عند نورة تاتبردي وتبعيني …ليوم غدا من هنا شهر …ولواليدين ابنتي خليهم منهم الله ماشي نتي ربي لي تحاسبي كل واحد على فعلوو …هاني مشييت …متعطليش راه مكنحمل نبات فديك لفيلاا ولكلاب يتنابحو عليا

سدات لباب وخلاتها مبهوضة متوقعاتهاش بتااتا منهاا شافت فخولة لي كتشوف وساكتة

ايمان: شفتي اطاطا !

خولة (داعبات كتفهاا ) : شوفيي ا امونة وسعي خاطرك وكيفما كان لحال هاديك راه ماماك ومديش عليهاا راه لوحم جاها عليك وصافي

ايمان: ل لوحم

خولة: اه راه حاملة …هانتي بردي دابا وخلي حتى لصباح وسيري هضري معاهاا سمحيليا مدات مجابت عفاك

بقات مبلوكية ورجعات لكوزينة كلسات جامدة

مشات لبيتها تكمشات على سرير مقابلة مع شرجم ..دخلات اسرااء لاحت لكارطابل وكلسات كتحيد فلفولار وعينيها ف ايمان

اسراء: ايمان نطلبك طليبة

قلبات ايمان وجهها لعند اسراء بلا متهضر

اسراء: عطيني تيليفونك شوية …تيليفوني شدو بابا تاني

ايمان: بقيتي ليا غير نتي

اسراء: عفاك

ايمان: هزيه

مشات بزربة هزاتوو حلات لفيس ديالها فكوكلل وعينيهاا على ايمان لي رجعات لوضعيتهاا دخلات لميساجات تاع ايمان كتقلب على نمرة منيعم لقاتها ودخلات كتقرا لميساجات لي بيناتهم خرجات من تما ورجعات لفيس ديالهاا طلعات كونط باسم مريم ميمي وكتبات ليها : هضرتهم نصها باللونكلي اصاحبتي مقشبلت والو …لمهيم مرة مرة كيقوليهاا *darling * اش كتعني

جاوباتها الاخيرة وقالت: وهي اش كتقوليه !

اسراء: كتقوليه فين الحب

مريم: اويلي

اسراء(كدور فعينيهاا ): هدشي لي كاتبة ليه فاخر ميسااج

مريم: بنت لحراام السلكوطة..صافي مسحي هدشي

دازت عليها ليلة كحلة مجهاش نعااس مولفة ديما قبل متنعس تخش ف نعيمة وشي مرات كتنعس حداهاا .. مكتنعسش حداها ديما حيت نعيمة كتوض لفجر وكتبقا تقرا القران تالصباح وكيبقا ضو شاعل

مع صبااح وتقريبا 8 واقفة وايديها فتجاكيط ولكارطابل دايراها فكتف واحد ضربات الطريق نيت على رجلها باش وصلات لدار نورة واقفة كتشوف فلباب ومحاملاش دق ولكن على وجه جداها معندها ما ديير سااطت وتقدمات لناحية لباب تاع الجردة صونات وعاودات حتى جاها صوت من لانتير فون قال: شكون

ايمان: ايمان …كلم ليا نورة

سمعات لباب تحل وقال: دخلي بعدا

ابمان: لا لا كلمها لياا

جاوبها بواخة وبقات كتسناا تسمعات باب الدار تحل والخطوات كيقربو حداهاا حلات عليهاا نورة هازة نيفها لسماا ربعات يديها على لباب وقالت: اشكاين ..نسيتي شي حاجة لباارح ولا. ؟

عينيها فالارض وقالت: سمحيلياا على لهدرة لي قلت ليك لباارح

نورة (تكات على الباب كتشوف فيها ): ممم زعمة ندمتي عليها ولا غير حيت ميي خاصمات عليك

ايمان: لبارح دابزت مع كريم ونتي ملي غوتي علياا مصبرتش هذا مكان

نورة: شنو كنتي كتسناي منوو لي غادية كتجري عندوو عمرو عقل عليك ؟ عمرك شفتي حتى دارو طووول هاد 18 لعام لي فعمرك ! مكانش كيحساب ليا نتي نيية

ايمان(شافت فجيهة لخرى كتنهد ) : خاصني نمششي

نورة: دخلي تفطري

ايمان: لااا شكرا … عندي فرض مبغيتش نتعطل سلمي على مي

دارت مخليا نورة كتشوف حتى بعدات وايمان شدات طريقهاا ليسي دايرة لكيت كتمزك وتغني معاها ..حتى دازت طموبيل من حداها او وقفات قدامها حيدات لكيت من ودنها وقربات لزاج لي هبط وتبسمات ليه

ايمان: حسام لبااس

حسام: مالكي مدخلتي ؟

ايمان: غنتعطل وعندي فرض مع 9

حسام: ركبي نوصلك

ايمان: لا لاا غير خلييك نتمشاا

حسام: طلعيي واش طلبها منك لبرااني …ديجا هاديك طريقيي ياله

تحنا حل ليها لباب …طلعاات سدات لباب كدير السمطة وهوا ديماراا

حسام: تموسقي ؟

ايمان: ستيلي ماشي هو ستيلك

حسام(ضحك): انا عاارفك من عشاق الرااي ..او الاغاني لكلاسيكية المصرية

ايمان: شي حاجة لي زوينة

حسام: ولكن شهادة حق بصوتك حسن

ايمان(شافت فييه وتبسم ليهاا )

حسام: كوني هانية ماماك مفراسهاش

ايمان؛كي شفتيها هي غير مسوقة باش تعرف شنو كندير

حسام: مديش عليهاا ماماك معصبة ولحمل راك عارفة …نتي غير متهمليش قرايتك وصافي

ايمان: كل حاجة فبلاصتي دايرة ليها بلاصتهاا

حسام: مزيان

وقف قدام ليسي ياله بغات تنزل شدها من ايدها وقال : بلاتي

جبد 400 درهم من لبزطام مدها ليها وقال: هاكي هادو

ايمان: لا لاا معندي مندير بيهم

حسام: ايماان الله اهدييك معطاهمش ليك شي حد غرييب …وقت لي حتاجيتي شي حاجة قوليها لياا

ايمان: شكرا ا حسام عارفة لي كاين .ولكن شكرا والله

جر تجاكيط ديالهاا دارهم فجيبها وقال : غتحتاجيهم غير خليهم على الوقت (حط ايدوو على فخضهاا ) متغبرييش وخة

تسلات بلخف وقالت: ان شاء الله

هبطات ودماغها تبلوكة بديك لحطة تاع ايدو واش عادي ولا غير هي موسوسة من جيهة رجال كلهم …بقا قلبها كيضرب وهي كتخمم …كان مزال لحال مشات لساحة تاع السبور وكلساات كتشوف فيهم لاعبين وهي سااهية فعالمها بوحدو دايرة لكييت حتى تغمضو عينيهاا دوزات ايدها على عينيها وتبسمات

ايمان: مارياا ..البرهوشة

ماريا: ههههه باش عرفتيني

ايمان: فيك هاد لفعايل من صغر …شتك كتفرنسيي

ماريااا: ايمااان غنطير بلفرحة والله

ايمان: طيري كاع سعداتك ههه فرحيني معاك

مارياا(بلمعة فعينيهاا ) : عرفتي شكون تعشا عندنا لبارح !

ايمان: شكون

ماريا(بتنهيدة فرحة )ولد خالتييي (ناضت كتنقز ودردك )

ايمان: والشووهة كلسيي اللرض فيك لفارة ! راه عندك طاشمة تاع ولاد خالتك (ضحكات)متقوليش لياا اللحية ؟

ماريا: ههه هواا بشحمه

ايمان: وفوقيته

ماريا: وراائحة المسك المعطرة اختاااي

ايمان: هههه اوى هاهوا تعشاا

مارياا:او مشاا (سكتات شوي وغوتات كتزعزع فايمان )وصونا لبابا قالييه بغيت بنتك على سنة الله ورسوله

ايمان ا: خفا زرباا هكا

ماريا(بافتخار): الحب من اول نظرة لي صابني هادي عوام صابو هواا من جيهتي …تخيلي غيخطبني حب قلبيي لي كنتوفى عليه غير مع راسي راه مامتيقاااش ا ايماان

ايمان ا: امتا بغا يخطبك الزين

ماريا: غييجيو ليوم فلعشية نهدرو وداكشي راك عارفة

ايمان: او قرايتك

ماريا: راك عارفااني مع لقرااية ا ايمان وزايدون سوا كملت سوا لاا الخدمة مغنخدمش هي نيت

ايمان: علاش مغتخدميش

ماريا: باا ضد الفكرة ديال نخدم ..ها خوتاتي قراو تطابو وتزوجو ولمشيت حتى تخطبت محال نكمل

ايمان(كتستوعب ): بلااتي بلاتي مفهمتش …بغيتي تقوليي بليي الى تخطبتي غتخرجي ولا شنو

ماريا: بحال والو

ايمان: واش بكامل قواك العقلية كتهدري واش دماغك لحسوه لييك اش هاد ايخان

ماريا: ايماان الزين حنا هكا تريكتناا لمرة لمزوجة ولي مخطوبة صافي مكتخدمش كتقابل دارهاا وليداتها وبس …نتي لي كدوي على لقرااية …شنو باغة ديري ملي تكملي وتشدي لبااك ! داكشي لي فدماغك عندو علاقة بقرايتك

ايمان: القراية فجيه ونحقق حلمي فجيهة خرا معلووم غنكمل وغنحقق حلميي لي بغييت

ماريا: ولا حطيناهم ليك بجوج وقلنا ليك عندك غير اختياار واحد يتقرااي يا تغني وتوليي من لمشاهيير شنو تبغي

ايمان(سكتات كتفكر ): معرفتش صراحة

ماريا: حيت راه ميمكنش ديريهم بجوج …وانا هدا راه كنحمااق علييه ا ايماان وانا عارفة راسي قرايتيي مغتديني لتامنصب علاش نضيع حلم حياتي

ايمان: منيتك داباا ولد خالتك ولا حلم حياتك شفتيه جوج مرات

ماريا: مغتفهمينيش حيت مزال مجربتي لحووب

ايمان(ضحكات): عطيك حبة

ماريا: لعااار ا ايمان عمر شي حد اتيغاك وعجبك شوية

كتفكر و قالت : لا لا (كمشات عينيها وتبسمات ) ولكن ملي مشينا لمحمدية واحد لولد عجبني سطري عليها عجبني ماشيي تنموت عليه

ماريا(تبسمات ببلاهة ): هانتي ومخباها علي

ايمان: هههه معمري تفكرتو غير دابا ملي قلتي اعجاب ….قولي اعجاب فلحظة صافيي …ولكن زينو فشكل صرااحة

ماريا: ههه قولي ونرسموو ليك

ايمان: ترسميه ههه منيتك

جات ستيلو ودفتار : نجرب حضي

ايمان(هزات راسهاا لسما كضحك وقالت ): نتبعو هباالك وجهو مدور شوية لحية قوية شوية

ماريا: شحال تكون فعمرو

ايمان(بتفكير): ماشي بزاف غيكون فلعشريناات …نيفو مقاد والعينين ممم العينين متوسطين وشفارو طوال و كتار لدرجة كايبان بحالا مكحل عينيه و ميي قالت لياا زوهري وفعلا عينيه كيجدبووك تبقاي تشوفي فيهم ” سرحات بلا هواها ” لونهم عسلي و حجبانو عرااض وكحلين وشعرو رطيطب وزويين سنانو كان يمكن داير ليبااݣ لسنان لفوقانين

ماريا: امكن ؟

ايمان: معقلتش واش هوا ولا صااحبوو لمهميم واحد فيهم كان دايروو معلينا فوتي السنان …انا حمقوني عينيه فنين …حيت ضربات فيهم الشمش ملي كان فلبحر ولاو كايبريو بداك اللوين لي عندو …خسارة معرفتش سميتوو

ماريا: طز فييك ههههه

ايمان: هههه نوضي الرساامة تابعك فرض ومن بعد انديك معايا

ماريا: فيين ..غنسلتو ساعتيين اصاحبتي

ايمان: معندها مدير ليك زيدي هههه

دخلوو دوزو فرض بلخف وخرجو بعد ساعة من لوقت

غادين على رجليهم سالتين وماريا كتشوف فجنابها لتشوف شي حد من دارهم وقفو قدام واحد التجمع ديال الشباب بنات او ولاد مكتوبة فاحد الشاحنات تماا استوديو 2m

ماريا: ناريي بغات طلع مباشرة واش منييتك !

ايمان : ههه الى تقبلت يعاودوهاا لجيهة ضاراهم ….سلام

_وعليكم السلاام

ايمان: باقي التقيااد اخوياا

_اييه باقي نتي من كازاا نيت (شاف فيهاا )شحال فعمرك !

ايمان: بقات ليا شهراين على 18

_ ممم لااا ابنتي بلا مضيعي نوبت شي حد

ايمان: على شهراين

_اييه خاص تكون 18 …نتي راه باقة قاصر وخة قربتي تمنطاش هههه سيري تالعام جاي ان شاء الله وجي مرحباا

ايمان: وشكون غادي يعرف ميجي فين يدوز حتى تكون عندي 18

_هادو هوما لقوانين ابنتي

ماريا: صافي ياله ا ايمان

ايمان: تفوو عارفة زهري كيداير عارفاه

ماريا: كيعكسوو تانتي شوفي شحال تاع بنادم ضمنتي راسك غيقبلووك

ايمان: علاش ميقبلونيش …صوتي واعر والله تغنوصلوو لشهرة

مارياا: الغرور اصاحبتي ههه

ايمان: تسمعييه ويعجبك ههه

كملو طريقهم حتى وقفو قدام واحد الدار كدق فلباب وفنفس لوقت كيسمعوو العزف

ايمان: تعطلت على لبروفا

ماريا: ونتي لي مشيتي

حل لباب شااب داير كاسكييط وقال: حسابني واش مغتجيش

ابمان: جاو دراري …معليش دخل تصاحبتي

_ياله دخلو مرحبا

دخلات ايمان او وراهاا ماريا كتقاد فزيفهاا وكتسمع لصوت لݣيتار جاي من لداخل

دخلات ايمان كتسلم ومارياا كتحرك غير راسها ليهم عطاها لولد كرسي بعيد على الدراري ..لي كان واحد شاد لݣيتار او لاخر شاد الاورݣ..وجوج ميكرو واحد فوق الطبلة والتاني فلعود قدام لكيتاريست …عاد لولد لي حل ليهم شاد كاميرة ملصقهاا قدامهم

_ عرفتي كشون تاصل بياا

نطق صاحب لكيتار وقال: شكوون

_ واحد خونا سمع لديو اللول لي درتي مع ايمان وقاليا ديرو ديوو اخر وهاد لمرة غيضبر لينا فاستوديو عرفتي كيغيتسمع صوتكم ناااضي

ايمان: شي منتيج ولا شنو

_عاد بادي وكيقلب على وجوه جديدة يدير بيه بوم …اش قلتوو

_بشحال

ايمان: واش غيدير فيديو كليب على هاد لحسااب

نطق وقال: هادي هي الفرصة ديالك اش بان لييك

ايمان: حتى نتلقاو معااه دراري معايا صاحبتي ليوم نسمعوهاا العشق ديالهاا

_ههههه مرحبااا شنو حب لخاطر

ماريا حشمات كضحك

ايمان: شكون لي قال ل شاب عمرو

نطق الشخص التاني موجد لأورݣ وقال : مرحبا …تغني ديو مع مراد ولا

مراد: لاا ايمان الطبقة لي فصوتها كتصرعهاا

ايمان هزات لميكروو والموسيقى بدات …شكون لي قال نتلقاو من بعد فرااقناا

كنت نݣول محال نلقاك وتلقااينيي الساعة دار لحال وربي راه جمعناا تلقات عمري عينيك مع عينيا

كتميل راسها مع الاغنية وقالت: فخاطر صحايبتي مارياا والاخواني

ايمان(غمضات عينيهاا بخامة صوت عالية بورشاتهم) : اااه شفتك سهيت ولرض دارت بيا تفكرت نهار لي فيه خدعتيني ديما فلبال وخيالك بين عينيا لابد علياا نخمم علاه غدرتنيي

دازت ساعة من لوقت وهوما فتدريب خامة الصوت ..كيديرو كوفر لاغاني الصاعدة وكيحطوهم فيوتوب

خرجو فطريق الدار ونطقات ماريا: ناري. تعطلناا اصاحبتي

ايمان: كنسا رااسيي هنا ههه

ماريا: ولكن صوتك وااعر ا ايمان

ايمان: غير تسنااي هاد لمرة غندير لحبي ديديكااس من شي كليب عالمي هههه

ماريا: هههههه ان شاء الله …واش هداك خالك …ايمان !

شافت ايمان فطرف لاخر من طريق بان ليهاا بغا يركب فطموبيل وكيضحك شافت جيهة الطموبيل لاخرا لقات جميلة بغات تركب

ماريا: واش مامات مريم هديك شنو كدير معاه

بقات ايمان كترمش وساكتة وقالت : زيدي زيدي غيشوفني يضرب ليا الطر هناا

ماريا قصدات دارهم او ايمان حتى هي كملات لدار طالعة فالدروج كتسمع لهدرة فالدار صونات وحلات عليها خولة وتبسمات فوجهها من ديما خولة عزيزة عليها مراة درويشة مكتجبد صداع مكدخل فبنادم

ايمان(باستها ): طاطا لباس

خولة: تعطلتيي فين كنتي

ايمان(كتحط سبرديلتها ): تمشيت شوية …جات مي

خولة: جات راها فالصالون مع جميلة

هزات ايمان راسها وقالت: اش كدير هناا

خولة: سكتيي ..دخلي سلمي

دخلات دايرة كارطابل فكتف واحد مشات باست نعيمة وشافت ف جميلة بضحكة صفراء سلمات عليهاا ورجعات حدا نعيمة

جميلة: ايمان لبااس

ايمان: الحمد لله ونتي

نعيمة: مخاصمة مع مريم تاني

ايمان: تشكات عليكم تاني ههه

نعيمة: اوى لاا ا ايمان مريم راه فمتابة بنت خالتك وكتقراو بجوج فقسم واحد

جميلة: الله اهدي مخلق

ايمان(شافت ف جميلة ونطقات مبتاسمة ): عاد شفتك ف ***

جميلة شافت ب ارتباك ونطقات : ااه كنت كنتقداا …تلاقيت نيت مع عبد الله كيتقدا فلݣرو

خولة: ايييه تما منين كيجيب السلعة

جميلة(ناضت ): خالتي نخلييك نمشي ديري ودوزي عندي

نعيمة: كملي كاسك بعدا اش هاد لمجية لمزروبة

جميلة: اللهم نطل ولا بلاش ههه خولة بسلامة اختي

سلمات عليهم وخرجات مخلية ايمان متبعة ليها لعيين تقرساتها نعيمة وقالت: اش وصلك نتي لشاريع لفوق

ايمان: اححح مييي راه ايديك مسمومين

خولة: وكون شافك خالك تما ا ايمان ! عفا بنتي ديها فقرايتك فوتي داك التخربيق

٠

ايمان: ماشي تخربيق اطاطا هداك حلمي وغااادي يكتاب ويتحقق

نعيمة: ياله غني غني ليا ديك لي كتعجبني

ايمان: وتغنيو معايا اراي لكيسان او صينية

خولة: هههه واللهيلا هاك ههه

ايمان: ااا لولد الواد اوا الواد اوا ..الواد لواد خايفة من حملاتو

نعمية: اااه والليل الليل ها الليل اواا ها الليل اواا اوالليل الليل خايفة من ظلماتوو

ايمان: اا والزين الزين الزين اواا الزين اوا ..او زين زين خايفة من غمزاتوو

نعيمة: اااه درج لياا خويتموو ياناا …خويتمو ياناا ..ياو درج ليا خويتمو فالصينيية

ايماان: اااه ودار الساروت فلقفل ياناا فلقفل ياناا ويعيطي امي حلي لياا

نعيمة: اااه الليل الليل اوا والليل اوا ..ياو الليل الليل خايف من ظلماتوو

ايمان(ضحكات مكملة الاغنية): ااه والروج ا الروج اوااه اناا والروج الروج خايفة من سكراتوو ايا ميي

نعيمة: نوضي نعل حسك

خولة: ههههه ملي وصلنا لسكرة مبقا غناا ههه

ناضت ايمان كضحك دخلات لبييت بدلات عليهاا ومشات لكوزينة تشرب لقات خولة مزال كدندن بهمس فالاغنية وقالت: طاطا نسولك

خولة: نعام

ايمان: كتيقي ف خالي !

شافت فيها ورجعات لشغلها مبتاسمة وقالت: الرجال مافيهم تيقة ابنتي

ايمان: الرجال خاصهم يتحضاو

خولة: شحال جهدي نحضي !

ايمان: و ملاحظتيش ملي مات راجلها كل مرة جاية هنا علاش زعمة …مكتخافيش دور ليك ب عبد الله

خولة: هاهي ضارت بييه غيتزوج بيهاا ؟ لاا الراجل يدور يدور ويرجع لولادو ومرتو واش نجبد شريط ا ايمان انا مبقيت ديال راسيي باش نحاسبو فالشادة ولفادة …انا دابا باغة نكبر غير وليداتي ..اما هوا لدار شي حاجة منو لله

ايمان: مبغيتكش تكوني نية بزااف وتيقي فاي وحدة …

خولة(ضحكات): فراسك جميلة كانت مع عبد الله ملي كانو باقين صغاار

ايمان(خرجات عينيها): وكضحكي

خولة: وهدشي راه ملي كانو صغار وقبل ميمشي لعسكر

ايمان: وشكون قالها ليك

خولة: غير صدفة تقالهاا زماان هدا وتفارقوو وكبر وتزوجنا وتزوجات تاهياا كون بغاها كون تزوج بيهاا

ايمان: حيت كيعجبو لحرام

خولة: ممم ؟

ايمان: لي كييبدا حرام كيسالي حرام …نعاونك

دخل عبد الله وبنتوو لقا ايمان متكية على ركبة نعيمة كتحك ليهاا شافتو وكلساات مقادة

عبد الله : مي لباس (باس ايدها)

نعيمة: الحمد لله اولدي

ايمان (باست ايدوو ورجعات كلسات شافت فيه وضربها بتخنزيرة وهي تبسم ليه باستفزاز) : لباس اخالي

عبد الله(تجاهلها ): خولة كاين ميتكال

خولة: غنحط دابا

عبد الله (بتخنزيرة لايمان): اش كالسة نتي محنية ! نوضي جيبو لغدا

نغزاتها نعيمة تنااضت ساكتة ولكن داخلهاا شبعو سبان

داز نهارهم بسلام دوزاتو فلبيت وسط المراجعة لاخر فرض بقا ليها فهاد الدورة اللولة ونفس لوقت شادة المحادثة ف لكيت مع منعييم الى مفهماتش شي حاجة كتسولو حيت الفرض غيكون عندو

ايمان: تخيل قاتلييك غنتزوج ونخرج هههه

منعيم: ماريا عاارفينها سطلة ههه مبغاش تقراا عيت معاها

ايمان: ولكن تكمل لباك بعدا شنو فيهاا …عرفتي لمشات حتى تزوجات بهدا مغتعقل لا علياا لا عليك ههه اتنكرنا مدى الحياة

منعيم: عاادي تانتي لواحد كيمشي فين مشاه الله …الله يسهل عليهاا درويشة وتستاهل غير لخير

ابمان: داكشي لي كااين …العقبة ليك هههه

منعيم: ضبرتي ليا فعروسة

ايمان(كتكتب وكضحك ): موجود الزين خاصك غير تحل عينيك

منعيم(سكت شوية) : خاص الزين لي يحل عينيه ويشوفني ههه

سدات الدفتر كضحك وقالت: سير تلاح نمشي نشوف ميي ونعس

منعيم: تصبحي على خير

قطعات معاه كضحك تنطقات اسراء شادة كتاب فبلاصتها وطالقة ودنيها مع ايمان وقالت: مصاحبة مع منعييم ياك

شافت فيها ايمان ببرود وقالت: سيري دعيني

اسراء: كان مصاحب مع مريم

ايمان: بقاي تابعة ديك مريم تادير ليك شي موصيبة

اسراء: نتي مسمومة داكشي باش مكتحملكش

ايمان: ناريي بقا فيا لحاال (كتعوج )مكتحملينش مريم هنن تي سيري …دابا نقولها قد خنوششك البرهوشة

حلات لباب كتزيد عليها بينوار مشات قاصدة بيت نعيمة دخلات لقاتها كالسة كتسبح فبلاصتها سدات لباب وطلعات على سرير لي نوعا ما ستيلو قديم بيتها عمرها بدلاتو كتشم فيه ريحة شبابهاا ملي كانت باقة مع راجلها فلحياة

ايمان: مزال منعستي اميي

جمعات التسبيح وطبطبات لايمان تخشا حداها جرات لغطات وتخشات فحضن نعيمة لاقية الحنان و الدفئ

نعيمة: كيغاديا مع لقراية

ايمان: مزيان امي …واش بان ليك نمشيو لمحمدية فهاد لعطلة

نعيمة: نشوفو ان شاء الله (كتحك ليها فشعرها )

ايمان(تبسمات مغمضة عينيها): عرفتي اميي لحلم ديالي نمشي انا وياك العمرة

نعيمة: ان شاااء الله ا بنتي داك لمقام تاحد ميرفضوو(تنهدات)لهلا يحرم شي مسلم منوو

ايمان: مشيتي نتي وبا سيدي

نعينة:اييه فلعام اللخر ليه …الله يجازيه بخير عليها…ديك لوقت قليل لي يدي مرتوو معااه مالو هبيل يخسر لفلوس ولكن هوا مكبرهمش فياا

ايمان: حيت شافك تستااهلي

نعيمة(بحنين ) : الحاج يا الحاج عمري سمعت منو كلمة العيب

ايمان(بابتسامة ): كنتي كتبغييه

نعيمة: كون تحشمي …هاد كنبغيك عاد ولينا نعرفوهاا

ايمان: هههه وملي كتبغي تعبري لييه ولا يعبر لييك شنو كان يقولييك امي هههه متكدبيش

نعيمة: هههههه كان يقوليا لحميمة ديالي

ايمان(بضحكة): حلفي ههههه واللهيلا جات معاك لحميمة امي ههه

نعيمة: هههه …ونعسي نعسي هدشي مزال صغيرة عليه

ايمان: راني غنكمل 18 امي اشنو تشري لياا

نعيمة(ضحكات): رااجل

ايمان: اش بغيتوو بغيت طموبيل ههه

نعيمة: انشري ليك كروسة بيعي فيها الديسير

ايمان: هههه ليجات منك عسل هههه

نعيمة :مخلية ليك مفاااحئة زويينة …نهار توصل وقتها نعطيها لبنتيي

ايمان:ههه صافيي ان شاء الله

خشاتهاا كطبطب عليهاا وتغني ليهاا بصوت خافت حتى نعسوو

من غرق نعاس سمعات نعيمة كدعي وطلب الله عرفات انها كتصلي الفجر حلات عينيها وهي على وضعيتها كتبان ليها نعيمة هازة ايديها وكدعي “ياربي تسهل عليها وتنجحهاا ” “ياربي بعد عليها شر لخلق ورزقها الناس الصالحيين ” “ياربيي دير ليها خرجة من كل ديق”

مسحات على وجهها وحطات ايدها على صدرها تنطقات ايمان بصوت ناعس وقالت: الله على دعيوات منك امي

نعيمة:قوليي امييين …نوض ابنتيي صليي نوضي راه الصلاة زويينة

ايمان: الله اهديني امي دعي معاياا

تكات حداها وقالت: ايمان جيبي ليا ابنتي كاس تاع لماا

ناضت بلا عكز جابت لمها لما وقالت: وااجي نعاود ليك على واحد لحلمة

ايمان : خير وسلام امي

نعيمة: طفي الضو اراي ليا تسبييح ديالي

وداكشي لي دارت مشات لحضنهاا شدات بلاصتها كتشوفيها كدوز فحبات التسبييح تكملاتوو وشداتو ايمان كدحرج بيه فايدها

نعيمة: عليها نوض نصلي ابنتيي حلمة خير وسلام بداك دري لي تلاقينا فلبحر

ايمان (شاد فيها نعاس ) : لي عطيتيهم بيمو ولبنان

نعيمة: هوا معرت اش طيحو فبالي

ايمان: يمكن ملي قلت ليك نمشيو لمحمدية تفكرتيه

نعيمة: ما عليناا …حلمت بحالا تلفتي علياا وكنعيط واا ايماان وا ايماان نقلب فهاد دار ونقلب فهاد دار روحي بغات تخرج وهوا يبان لياا وااقف زيين و قمحي جاي كيضحك جيهتي وقالياا هااا ايمان معاياا غير رتاحي قلت لييه وتهلا فيهاا عفا ولدي قالياا دايرهاا فعيني وبحالا شوية تااني كنت فسووق كنتقدا فتمر وهوا يبان لياا وانا نقولييه هاك التمر هااك جبدت تلاتا تاع تمرات جيديين ومديتهم ليه فايدو وبدا كيضحك

ايمان: اوى

نعيمة: صافي ضرباتني لفيقة على لهلال

ايمان(تاوبات): حلمة واشمن حلمة ههه

نعيمة: اوى لعقل كيسرح بليل …نعسي ابنتي …تنعسي فراحة الله

بصوت ناعس قالت: امين امي

نعسات من جديد على صوت تسبيح نعيمة ..

على صوت لفريخات والضو لي دخل من شرجم كيعلن على بداية يوم جديد حلات عينيها ببطئ قبالت نعيمة لي ضايرة جيهتها والتسبيح مزاال فايدهاا ناعسة مرتااحة بقاات شحال كتأمل فيهاا وكتقول الحمد لله لي لقات فالطريق انسانة حنونة رعاتهاا وفضلاتهاا وديما كطيب بخاطرهاا …تبسمات ببطئ وقالت: لحميمة ديالي هه

قربات ليهاا طبعات قبلة على جبهتهاا بقات متكية على ايدهاا وقالت: ميي نوضي فطري معاياا داخلة مع ل 10 ودعي معايا راه عندي فرض …مي مييي وا النعاسة نوضي

سكتات شوية تشوف فيهاا لقات صدرها مكيتحركش بالنفس …كلسات على ركابيها قافزة كتحرك فيهاا بشوية

ايمان: مييي ميي شوفي ميي مي (بدات كتزاد وتيرت تحرااكهاا حطات ودنها على صدرهاا كتلقاا السكوون فزكات صبعهاا لي كيترعد ودارتوو تحت نيف نعيمة محساتش بالنفس جراتها لحضنهاا كتزير ليها ايديها على التسبيح

ايمان: نووضيي سبحيي مييي ميي (بصرخة عالية زيرات على نعيمة فحضنهاا ممتيقاش )ياربي نكون كنحلم يااربي ياربيييي هءهءه وا ميييييي

*ذهبت الروح لخالقها

ثم انطفأ شيء بداخلي

إلى فقيدي النائم في بطن التراب، أعتذر إن أوجعتك بدموعي، دعوت الله كثيراً أن يرحمك، ونلتقي معاً في الجنة💔*

قبلة باردة على جبين شخص عزيز ..شخص غالي عمرها كتنسا ولا كتحيد من لباال

ديما الجدة كتكون حنينة كتكون غالية …كتفكرك بطفولتك بلفرحة ملي كدخل لدار ..فينما حطات رجليها كتحسي بلفرحة ..نهار كتمشي كتحسي ب طرف من طفولتك مشاا كتحسي بلي الجدة الحنونة مشات عند خالقهاا ونتي بقيتي عايشة على ذكرياتها ..بلاصتهاا ..ضحكتها…تسبيحها … وهي مقابلة مع القبلة كتصلي وكدعي بداكشي لي حافظة وداكشي لي عارفة …

كتعرفي بلي مشات ديك الركبة لي كنتي صغيرة كتوسديها مكتحسي غير بايدين حناان دا منهم الزماان شبابهم وكتساهم بالتجاعيد …كيدوزو وسط شعرك ونتي مغمضة عينيك …رائحتها وطيبتها مكتفارقكش ♥️

*اللهم الرحمة والمغفرة لامواتناا واموات المسلمين*

الموت صعيبة …ولكن لي صعب منها هو لفرااق …داك الانسان صافي تسالات سااعتوو فالدنيا معاك مشا يلقى الله باعمالوو …مكتعلمش ومكتعطيناش فرصة باش نقطعو وحشناا من حبابناا ..حيت لموت مكتعلمش

نعيمة ..مكانتش مجرد جدة عادية ف حياة ايمان ..كانت كلشي ..ام و اب واخت وعائلة كانت نفسها..كانت عشقهاا

مزيرة عليهاا خايفة روحها تمشيي وهي فعلا مشات بقا فقط جسد بارد فحضنهاا …الدموع هابطيين على خدهاا وهي كتبووس فراس نعيمة وكتبكيي …طلقات غوتة خلات عبد الله يدخل هو وخولة و وراهم اسرااء … فلحظة تقلبو عينيهم لدمووع كل واحد منين شاد نعيمة…مبقات كتسمع والو غير طنين فودنهاا كيبانو ليهاا كيتبكااو وعبد الله كيهدر فالتيليفون بعرض بطيء قدام عينها دورات ليها خولة وجهها عندها كطرش فيهاا باش توكض…لكن دماغهاا مكانش مستوعب لهدرة …من هول الصدمة قررات داتها تستسلم للاغماء ورخات من نعيمة جارة التسبيح تطاحت الاخيرة على وجههاا

حلات عينيها من جديد هاد لمرة فبيتهاا ناضت قافزة ظنا منها بلي غير حلمة حتى كتلقاا لغوات فالدار ، اسراء فبلاصتها كتبكيي …ناضت بالجري حفياانة حلات لباب كتلقا لكولوار عامر بالنااس شي كيبكيي شي كيصبر فييهم قصدات بييت نعيمة حتى كيجرها حسام من وسطها

حسام: ايمان اجي كيغسلو فيها لعيالاات

ايمان: وا مييييي مييي هءهءهءه بغيت مييي طلق مني واااع خليوني ندخل هءهءهءه عفاااك

بكاتهم اه حيت الاكترية هنا عارفيين شنو نعيمة بالنسبة لايماان

تركلات وغوتات تخرجات لغسالة هزاتهات وقالت: غدخليي ولكن منسمعكش كتبكيي …بغيتي تحرقيهاا ؟ ايمان بنتيي تقاااادا الاجل ولبكاا غيحركهااا خليها تمشي مرتااحة ابنتيي

ايمان: بغيييت مييي هءهءه بغيت ميي

_اجي ابنتيي وسكتي متبكيش طلبي ليها الرحمة

دخلوها حيت غواتها كان قوي بزااف ..لقطو جيوبها الانفية ريحة لعطور …قرنفل ورد وبعض الاعشاب المنسمة …فوق المغسل ناعسة نعيمة مغطين ليهاا عوراتهاا فقط …سدات ايمان فمهاا باش متخرج حتى شهقة منهاا …تحنات على ركابيهاا وقربات لايديها الدافية بلما ..باستهاا وباستهاا ومقنعااتش…شعرهاا لي تخللو لماا …خفيف وفيها الشيب …رجعات اللور ساكتة على ركابيهاا …حاضياها كل مرة تغطيهاا وحدة وهي كتهز فايد نعيمة وتغسلها

_الله ارزقنا حسن الخاتمة

_امين

_كانت مومنة وبنت لخير لمسكين ودرويش ياكل فايدهاا…شوفي كي منورة (شافت فايمان ) متبكييش عليهاا.. مك حمامة لفجر

لقطو ودنيها غوات نورة برا ولكن كانو عينيها معلقين فنعيمة فقط …لوجه لي اخر مرة غتشوفوو

نعيمة تغسلات وتكفنات ومجات لحضاش توصل حتى تدفنات …لي كيبكي راه كيبكي ولي سخف راه سخف ولكن تواحد مغيرجعهاا لحياة …ناعسة فلارض ضامة زيف نعيمة وتسبيحهاا كتشم اخر نسمة منهاا…معارفاش شحال تاع لوقت و هي مليوحة فلارض ملي غادين مخرجينهاا وبقات كتغوت تسخفاات

لي تهز هبالها مشاات …لي تحس بيها وتنصحها مشاات

حركاتهاا ايد مارياا كتبكيي كالسة على ركابيهاا عنقاات ايمان وقالت: الله يصبرك اختي هءهءه ايماان مديريش فراسك هكا كلنا ليها اختي نوضي اختي عفااك هءهءه

خولة(بصوت باح وعينيها منفوخين ): غير خليهاا حرقتها محاس بيها غير هي

بقات مارياا كداعب فشعر ايمان لي مغيبة غير عينيها لي محلولين متكية فزربية وضامة ما تبقا من مها على صدرهاا حاسة ب مارياا

ولكن فمها مقادرش ينطق

بقات معاها مدة وخرجات سادة وراها لباب مخليااها بين دكرياتهاا

تمتمات بشفايفهاا ورجفة صوتهاا كتخنقها : لواد هء لواد ا لواد اوى هءهء لواد لواد خايفة من ضلماتو هءهء

دخلات عليها نجاة شادة فايدها بنتها لابسة عبااية وكتبكيي تحنات على ايمان كتواسيهاا :عفا بنتيي مديريش هاد لحالة فراسك

ايمان: هءهءهءه مشا لحنينة علياا ا نجااة هءهءه مشات لمونسانيي ولهزانيي انجاة

نجاة: كاين الله مكينسا حد ابنتيي…براكة متحرقيهااش

ايمان(ممتيقاش ): هءهءه ميمكنش تموت ..لمن خلاتنيي هءهءه غير فلفجر كدعي معاياا هءهء

نجاة: مدايم حد ا ايماان عفاك احبيبتي نوضيي …شوفي ماماك حتى هي حالتهاا نوضي واسيو بعضياتكم

ايمان: انا مي وبا ماتو وتدفنو تحت تراب مبقا عندي حد هءهءه …حياتي مشاات انجاة ه،هءه مشات مع ميمتي

تنهدات نجاة باسف وبنتها كتشوف وساكتة …

نوضوها بزز فوق سرير ضمات لمخدة وكملات لي بقاا

ناضت لوات شعرهاا ودارت زيف تاع نعيمة وهزات عباية من ورا لباب لبساتها ورجليها كيخويو بيهاا حلات لباب وسداتو بالساروت … منتابه لييها حد خرجات مع لباب والدروج شي طالع شي هابط لي بغا يشدها يعزيها كتبعد منوو بوجه خالي من التعبير غير لعينين كيقطرو…غادية بلبانطوفة فجناب طريق كتبكي لي داز كيشووف حتى لقات راسها قدام الروضة…ضارت بيها دنياا وهي كدور فجنابهاا وكتبكيي

ايمان: مييي فييينك اميي هءهءهء وااا مييييي

كتقلب حتى بان ليها قبر جديد مزال فازك مكتوبة فالشاهد نعيمة *** مشات بلهفة تلاحت على ترااب مغيس كتبكيي

ايمان: جبت ليك تسبييحك امي هءهء مزال لحاال اربي مزال لحال هءهءهء ننن

ساعة وساعتين وهي فوق داك تراب متحركاتش نشفو دموعهاا وبقات غير ساهية ومتكية شادة تسبيح فايدها …حتى غفاات ..حسات براسها ناعسة فحضن مهاا ورتاحت …جراتها ايد نوضاتها قافزة ظنا منها نعيمة حتى كيضرب فيها ضو لپيل ولحال مظلم …جاها صوت خالها اميين وقال: ايماان

ايمان: هءهء اميين مشاات مي

امين(بحزن شديد) : الله ارحمها نوضي

ايمان: لا لا غنبقا معاهاا

تكلم شخص اخر جاي منوضها كتفرزهم غير من الصوت مع الظلام : نوضي اختيي نوضي

ايمان(تلاحت عليه ): هءهءه ياسين كانت موحشاكم هءهء علاش مجيتوش شفتووها

شدوها بجوج بزز مبغاتش كيطلقوهاا وكترجع ويرجعو يشدوها …هكاك تدخلوها لدار حالتها بالتراب

خولة: ايمان اش كديري فراسك واش غترجعيهاا …اجي بدلي حالتك

دخلاتها لبيتها هزات عينيها فبلاصتها كتبان ليها نورة ناعسة وحسام حداها شاد جبهتو ومو حداه لي غير شافت ايمان ناضت عنقاتها كتواسيها : لبركة فراسك ابنتي من جيهة ماماك…الله اعوض محبتها صبر

حركات ليها ايمان راسهاا جبدات ليها خولة متلبس شداتها وقالت: نمشي لبيت مي

خولة: عفا بنتي اجي هناا

ايمان: بييت ميي

_خليوهاا تاتبرد غير خليوها

مشات كتجر فجلايلها حلات لباب ورجعات سداتو بدلات ب بيجامة وبينوار ومشات تكمشات فبلاصتها فالظلام

داز يوم او يوماين وهي ديما على حالتهاا كتغفلهم وتمشيي لحدا لقبر وتبقاا تماا حتى عياات ومبقا عندها جهد و لماكلة لي مكتاكلش …ولاو ليام كيدوزو ببطئ وبدا بنادم كيتعود على الفكرة وكيقول كلنا ليها ..الا ايمان باقة عايشة فالصدمة بوحدها

فالصالون كالسين لخوت بتلاتة ساكتيين

امين: انا منهنا يوماين غنرجع

عبد الله : ان شاء الله

امين: عارف ماشي وقتهاا ..كنت كنتسناا نجي ونقولها لواليدة السعاتي مكتابش

هزات نورة عينيها فيه وقالت : شنو

امين:انا راه تزوجت

عبد الله: ايمتى هدشي ؟

امين: شي تلت شهور داباا …ب كاورية طبيبة حتى هي وقررنا نديرو كابيني انا وياها تماا فمارسيليا

نورة: ياك كنتي كتقول غتجي هنا وديرهاا

امين: معندي منجي ندير هناا بديت حياتي تماا

عبد الله: الله اكمل بلخير

امين: بغيت نصيبي من لورث لي خلاو لواليدين ا عبد الله

حط عبد الله لكاس ورمش : ممم … نصيبك من لمحال كيوصلك لا نتا لا ختك

امين: لواليد خلا ارض وفموقع زوين او لواليدة راه ديجا عندها دار فلمحمدية نقسمو هدشي …وحقي فالدار نسامح ليك فيه انا بغيت غير باش نبدا خدمتي

نورة: مي مزال ترابها منشف بديتي كتحسب شنو عندهاا ؟

امين: نورة هدشي حللو الله وانا مطلبتش شي حاجة ماشي حقي

عبد الله: وخة مقلتي عيب … كل يدي حقو…لوراق وتيترات فين كاينين

نورة: فالصندوق فبيت مي

عبد الله : نوضي جيبيه

ناضت لبيت شعلات الضو على ايمان لي ناعسة ومشات كتقلب فالصندوق …تكعدات ايمان كتشوفيها وقالت: دغيا بديتو تفرقو

نورة: امين لي بغا حقو

جبدات شلا وراق ورجعات سدات الصندوقة وشافت ف ايمان لقاتها كتلبس فبينوارها وقالت: فين غادية

ايمان: نشوف منعيم ونجي

خرجات او نورة مشات لعند الدراري عطاتهم ل عبد الله مخنز كيقرا

عبد الله: هادي تاع الدار ..هادي تاع لمحال

كيدوز ورقة بورقة لامين

*

هبطات لتحت لقات منعيم واقف حدا لموطور تقدم عندها باسف وحضنهاا وقال: البركة فراسك الله ارحمهاا ويصبرك على فراقها

بتنهيدة حارة قالت: امين ياربيي

منعيم: كيف بقيتي شوية

ايمان: تحاجة مبقاات كيف كانت امنعيم حياتي ظلامت والله (حركات ايدها ف صدرها )قلبي شاعلة فيه لعافية

منعيم: سنة الحياة الله ايبدل محبتها صبر…وقت لي حتاجيتيني صوني لياا وخة

ايمان: عارفة لي كاين شكرا

مشا خلاهاا جارة رجليها لجيهة جريدة وسط الديور كلسات فشمش مقابلة مع الدار كتفكر ملي كانت صغيرة وكتخرجها تلعب وسط السااحة وتبعهاا ملي طييح …كتبسم بلا ارادتها ملي كتفكر ذكرى زوينة ليهاا كانت معوجة راسهاا وعينيها تغرغرو هزات عينيها فلباب لي كيدخل وسط لعمارات حتى بان ليها مدرع مو من كتافها مشاركين لحديث وكيضحك دغيا هبطات راسها كتمسح فعينيها

انتابهو ليها كالسة ومشاو لجيهتها مبدلين ملامحهم لي عاد كانت ضاحكة ربت على كتفهاا وقال : ايمان

هزات فيهم عينيها مكمشاهم من شمش دورات عينيها فيهم بجوج تجراتها جداها وقالت: البركة فراسك ا ايمان

كريم: الله ارحمهاا.. نتي مزياان

ايمان: لباس

كريم: كنتاصل بييك تليفونك طافي

ايمان: مافياا لي يهدر …بغيت نبقا بوحدي عفااك

شاف فموو وقال: وخة

مشاو وخلاهاا كأنها جارتهم ماشي بنتوو تبعاتو بعينيها لثواني ورجعات هبطاتهم جبدات تييليفونها كتقلب فالاتصالات كطلع تعياات ملقاتش حس كريم او شي نمرة معارفهاش حركات راسهاا بتنهيدة ..دخلات لفيس ديالهاا بدلات صورة لبروفايل لصورتها هي ونعيمة فلبحر وكتبات عليها

*الفراق هو القاتل الصامت والموت هو الجرح الغائر الذي لا يُشفى أبدًا. رحمك الله يا حمامة قلبي🕊️*

**

عبد الله: هاهوا تيتر تاع لارض

عطاه يقراه وقال: و الدار

نورة : دار لي فلمحمدية كون نكريوها حسن

امين: انا باغي راس لمال صحيح انورة بغيت باش نبدا ..لا لمحال ولا هاد الدار مبغيتهم يتبااعو نشمو فيهم ريحة لواليدين ولكن داكشي لي زايد نقسمووه ونبقاو مرتاحين

نورة: شغلكم هداك

امين(شاف فعبد الله مخنزر فلورقة )لقيتيها

عبد الله:صبر شوية صبر

بقا عبد الله كيقرا فديك لورقة مخنز وشاف ف نورة : مكتسمعيش لباب كيدق وعيطي لخولة تعمر اتااي

فعلا ناضت ولاح عبد الله لورقة لامين قال: قراا

امين: شنو

هبط عينو فلورقة تيقرا تبانت لييه سمية ايماان وشاف ف عبد الله بذهول

امين: امتى كتبات ليها الدار فسميتها !

عبد الله : معرفتش …ولكن والله لكانت لييهاا

امين: ولكن راه فسميتها …زعمة نورة معارفاش

عبد الله: كون عارفة كون فراس حتى السلكوطة …والله لحلمات بيهاا …جمع عليا هدشي

‎:لا أعرف المعنى وراء كل ما

‎يحصل الان

‎فقط أنام وأنا متعب

‎واستيقظ وأنا متعب

‎شيئاً ما أريده ان ينتهي

‎ولا أعرف ماهو الان 💔

‎نعيمة نهار خوتها قسمو لورت جات فيها دار صغيرة جنب لبحر …فكرات تعياات وسولات وشافت بعينيها بليي ايمان نهار تخطاها نعيمة غيبقاو لحيوط يشيرو بيهاا …فكرات وكتبات ليها الدار ملي كانت مزال صغيرة معارفاش …الغلط لي دارت هو مقالتهاش وكانت كتسناا فرحة البااك وتعطيها ليها هدية …السعاتي ديما الاقدار كتمشي عكس لي كنتوقعوو…هادي هي سنة الحياة …الحمد لله ♥️

‎وفكل عائلة ضروري لورث يسبب تشقق فلعائلة الاا لقليل …كتلقا الاخ مضارب مع خوه على طرف تاع ارض تقدر شي مرات مصالحة لوالوو ولكن كتسماا ورث ومن حقوو …المحاكم نصفها عامر مشاكل الورثة …شحال من اخ كلا رزق ختوو ..وشحال من عم كلا رزق بنات خووه …االانثى حشا واش ربي دار حقها يتهضم …ولكن نكارين العشرة او لي مكيخافوش الله كايحسبو لمرا حيط قصير ساهل تنقزو…ولكن لا …ربي فوق كلشي ولاابد يجي نهاار والحيط لي بغيتي تنقز علييه يريب علييك وماشي ساهل تنوض من تحتو *

‎رجعات ايمان ادراجها لداار فطريقها فدروج لقطو ودنيهاا صوت عبد الله نازل مع امين كيقول: والله متكون لييهاا وخة يسكنو فيها غير الشمكارة

‎تلقات العين بلعين وقال: تريكة الزلط …حيدي علي

‎تجنباتوو وبقات تابعاهم بعينيهاا كملات ادراجها مهمومة دخلات لبيت مهاا حتى كتبان ليهاا نورة كتبكي وهي كتقلب فالصندوق وحداها بنتها الصغيرة او خولة وبنتهاا

‎ايمان(كلسات فقنت السرير ايديها فجيب لبينوار ) : ساليتو مع الديور دزتو لدهب …حلفتو تخليو بركتهاا مجموعة

‎نورة(شافت فيها ): مالك ديما هكا قلبك كحل واش محسااش بلعافية لي فياا ! راه مييي هاديك

‎خولة: ايمان عفاك …هدشي راه شرع الله ابنتي واحد النهار كل يدي نصيبوو …ملي كيمشيو لواليدين صاافي لخاوة كتوليي نتي وزهرك

‎جبدات نورة دمالج تاع ذهب كتبوس فيهم وقالت: مي قبل متموت قالت لياا السرتلة تاع الذهب كل عطيه واحد …وهنا خمسة وحنا خمسة

‎عطات لخولة جوج ليها ولبنتها

‎نور: وانا اماما

‎نورة: ديالك وديال ايمان غيبقاو عندي

‎ايمان: واش قالت ليك عطيه لايمان(مدات ليها ايدها )عطيه لايمان

‎نورة: ايمان بديتي كديري شي فعايل ميعقلش عليك لواحد

‎ايمان: حتى انا بغييت حق ميي

‎مداتو ليها بزعفة وقالت: نهار توضريه جي بكي عليا

‎ايمان: فين عمري بكيت علييك …لي كنت نبكي عليها توسدات الترااب (باست الدملييج ساهية فيه …كتفكر نعينة شحال كان عزيز عليها الذهب) ..

‎نورة: عقلتي اخولة هادو (طوانݣ لفروج)شحال كانو كييحمقوني

‎خولة(باسف): كانت تاتقول تكبري وتلبسيهم

‎نورة: الله ارحمها فراقها صعييب علييا والله هءهء

‎خولة: كلنا هكاك اختي …مدايم حد الدوام لله ..شدي فراسك وفبنياتك ولي فكرشك مشات فين نمشيو كاملين الحمد لله ربي عطاها موتة مستورة ففراشها متعدبات معدبات

‎خلاتهم ايمان داوين ومشات تكات ..شادة دبليج كدور فييه وعينيها كيقطرو الدموع على لمخدة …هزات تيليفونها كتلقاا بزاف تاع نوتيفيكاصيون من اخر بوسط حطات كلشي كيترحم ف التعاليق …وصلها مساج فلخاص ودخلات كتشوف بان ليها اسم طارق عرفاتو لولد ديال المحمدية كاتب ليها ؛ سلام ختي ايمان عظم الله اجرك فلواليدة الله ارحمها ويصبرك على فراقهاا حاس بيك لواليدين تحاجة متجي بلاصتهم

‎جاوباتو : اميين الله ارحمها ويرحم امواتنا جميعا

‎طلع ليها مساج كذالك من شخص ب اسم h.art

كاتب ليها : لله ما اعطى ولله ما اخد..اللهم تبتها عند السؤال …انسانة طيبة بشوشة باينة فوجهها …الله ارحمها اختي والهمك الله الصبر والسلوان …معاك صديق طارق من لمحمدية انا لي تلاقيت بيك فلبحر

‎جاوباتو بدموع كلمة الله ارحمها ويصبرك مزال مبغاتش دوز ليها :امييين ياربي شكرا

‎حطات التيليفون غاطسة راسها فالدمووع وهكدا داز يومهاا ..

‎دازت يومين اخرى وعافيتها مزال مطفات …فاقت مع لعشرة راسهاا غينفاجر عليها بلحريق قلة النعاس ولماكلة …ناضتت بتتاقل من بلاصتها لبسات بنطوفة وغادية لجيهة لباب لي غير مردود مامسدودش …كتسمع لهدرة جاية من الصالون عرفاتهم كيفطرو…جرها لحديثهم صوت عبد الله وهوا كيقول

‎نورة: غنمشي لدار ليوم فلعشية

‎امين: حتى اناا طيارتي بليل

‎عبد الله: دي معاك بنتك

‎شافت فيه خولة وسكتات حيت لهضرات ترعف نطقات نورة حاطة كاسها : مالها تقلات عليك ا عبد الله

‎عبد الله : نتي مهنيية واناا نتبعهاا ولا يكما عاݣر معندي ولاد …صافي لي كانت هازاهاا وحاضنة ودير فلخاطر الله ارحمها بنتك تكلفي بيها لوحيها ولا ديهاا معندي مندير ليهاا

‎امين: ماشي وقتو هدشي ا عبد الله لبنت مغتزيدك متنقصك

‎عبد الله: ديها معااك نتاا

‎امين: هزيت ترااسي انا باقي مضارب نبدا حياتي ودابا تزوجت مباغيش مشاكيل

‎ نورة: ومفكرتيش فياا انا مغيكونوش عندي مشاكيل ملي نديهاا ونقوليه هاهياا

‎عبد الله : نهار اللول فكريي سمعتي فكري …مكاين لاش نجبد ليك ماضيك

‎نورة(بحدة): دابا شنو وصلنا لهدشي ا عبد الله انا كنغلط نتاا زعمة ملائكة ولا حيت كنشوفو ونميكوو

‎عبد الله بغا ينوض ليها وحبسوو امين: ايييوا تحل لجد مك لفم ولا شنوو …واش شي يولد ويلوح وانا نربي خنزك ياك هكا مزياان … الالة عندي عزري فالدااار مدورش لياا سلكوطك وسط ولادي …تا زيف مبغات ديروو تريكت تسلكيط معلوم تشبهك …منخليهاش توسخ لياا وجهي منك ليها ضبري لرااسك انا عندي هنا غير بارطمة اما نتي راه فيلا يجري فيها لخيل فين تبان لييك

‎نورة: دابا بغيتي تخرج علياا ..وعائلتو شنو نقوليهم

‎امين: نتي من اللول مفهمتش علاش كادبة فبنتك ا نورة هدشي مكيدارش …حنا غير خوالهاا ماشي ملزومين نهزوهاا …نتي وباهاا خاصكم تكلسوو وتعرفو شنو ديرو …بنتك ربيها حداك

‎نورة(صدمها ): ياك ا اميين يااك هادي هي تشد لبااك ونديهاا

‎امين: حتى دابا مقلت والوو منهنا لواحد 5 سنين ولا سبع سنين نديها ديك الساع نكون درت بلاصتي …انا حاليا منقدرش نصرف ونقابلهاا انا عاد تزوجت وبغيت ندير كابيني ديالي شنوو نتحمل مسؤولية ماشي دياليي ؟

‎عبد الله : معندك متهز …لي ولد شي يقد بيه لي كنغمضو عليها عينينا الله ارحمها

‎نورة(كتبكي ): ونعمة لخووت لي خلاو ليا لواليدين

‎امين: نورة متقوليش هكا حنا خوت ولكن هدا موضوع مفيهش اصلا النقاش ايمان بنتك ومسؤوليتك نتي وباها

‎خرجات قدامهم نفسها كطلع وتهبط وقالت: هادي دار ميي ومغنخرجش منهاا ولي سميتو راجل يخرجنيي

‎عبد الله: سكتي نتي (موجه هدرتو ل نورة)جروو لمرض وسيري لدارك قبل مندير فيها ايدي

‎ايمان(دموع هبطو ): مغداش نخرج والله بيت مي لخلييتو لشي حد تواااحد فيكم ميستاهل ميي تواحد فيكم مقدرهاا …كلكم منافقيين

‎معرفاتش كيفاش جاتها تصرفيقة من عبد الله وكيفاش حتى وصل ليهاا …دفعهاا بالجهد تطاحت كتبكيي

‎خولة: عفاك اعبد الله جيران كيسمعوو مك عاد ماتت عفااك

‎عبد الله: اتمشي تجمعي علياا خراهاا منشوفش طرف من زغبهاا عندي فالدار

‎نورة: قلبتي وجهك اعبد الله هادي راه دار بااا ماشي دارك

‎عبد الله : حقك غيوصلك ساليناا ماشي حيت دار باا نبقا نشوف كمارتها صباح وعشية …ياله نتي اش كتسنااي جمعي عليا شطايطهاا داباا

‎خولة نوضات ايمان لبيت وقالت: ايمان علاش كديري فيهم راسك علاش

‎ايمان: شفتي عبد الله يبقا بينو وبين الجنة سماحتي ..والله منسمح ليييه …حيت معمري درت شي حاجة لي ضرو …شنو ذنبي شنوو ذنبي الى ختو ولداتني فلحرام هءهءه شنوو ..

‎خولة: هادي داركم ابنتي رااه غير الشيطان كيدخل ف بنادم

‎ايمان: الشيطان هوا لي كتنعسي و تفيقي معاه اخولة …عتقي راسك من هاد لحبس حيت فاول فرصة غيلووحك …راه مكيبغي حد كيبغي رااسوو ولخنزات بحالو

‎خولة: شمن خانزات

‎ايمان: تجيبو لياام ويطيح كي لكلب قدام رجلييك اخولة غير صبري …السمطة كدور ولبزييم حااار

‎نورة(دخلات لبييت ): مالك نتي فمك باري منك مااالك

‎ايمان: حتى دابا الزنقة عريضة

‎نورة: جمعي قشك العشية نجي ندييك …نمشي نهدر مع حسام

‎ايمان: سيري شدي الموافقة باش تجي ليه ربيبتو اه نسيت نسيبتوو

‎خولة(تنهدات بحزن): ايمان …نورة عفاك بدلو ساعة بخرا

‎فعلاا مشات كتجمع او وسط حوايجها جمعات صلاية وتسبيح وعباية وشال تاع مهاا ودمليج حتى هوا بدلات حوايجهاا وخرجات كتبكي وتشكي لبحر …صونات ل مارياا لقات تيليفونها طافي …قلبها غيطرطق عليها رجعات ادراجها حتى ضروها رجليها وجهتها لمقبرة فقط عينيها شبعو بكا وتحت منهم باين فيهم لحزن والالم …سمعات صوت سيدة من وراهاا كتقول: أ لبنت …ابنتي

‎دارت ايمان كتشوف فسيدة ستينة بجلابة عريضة فلكحل ودايرة لحجاب على عينيها بثوب ابيض كانها جاية من الافلام المغربية القدام كيبانو عينيها والقب مغطي شوية جبهتها …كتحرك ببطئ حيت كانت غليضة شوية

‎ايمان: معاياا

‎قربات ليها كتنهج : سمحلي وقفتك ابنتي واش لمقبرة هنا ؟

‎ايمان: اه هاهوا السور ديالها

‎_ تلفت مامولفاشي نخرج بوحدي معرفت منين نجي ولا منين نمشي …شكرا ابنتي الله يسهل علييك

‎تجاوزاتها ببطئ جرها التسبيح لي فايدهاا…تمشات وراها ايمان بشوية ولمرا قدامها تدخلو لمقبرة وقفات لمرا وقالت مدوزة ايدها فلخوى: السلام عليكم …الله ارحمكم ويوسع عليكم انتم السابقون ونحن اللاحقون

‎تمشات شوية وبقات واقفة تدورات راسها بانت ليها ايمان جاية وراها كتشوف فلقبورة وقالت: تانتي جاية تشوفي شي حد

‎ايمان: مي

‎_حتى انااا جيت نشوف لمرحومة مي ويني تلفت على لقبر ومكنعرفش نقرا

‎ايمان: شنو سميتها ؟

‎_ الراضية بنت حمد ..قبرها كان ضاير بيه زليج زرق

‎ايمان؛ زرق بان ليا شي قبر زرق

‎_وريها ليا ابنتي الله ابيض سعدك و يرحم ميمتك …نشد فيك الحبيبة رجلي كضرني

‎ايمان: شدي فياا اخالتي

‎دخلاتها لوسط لقبور وصلاتها لقبر لي بغات خلاتها وقصدات قبر ميمتهاا ملهوفة تكلس جنبهاا تهدر وتشكي همهاا بان ليهاا وبانو دموعها فعينيهاا …كلسات فتراب حداها كتنقي فلحجر من فوقو توسدات تراب حاضناه بايدها لوقت حتى حسات بايدين على شعرهاا ..حلات عينيها على وضعيتها كتبان ليها لمرا مهبطة الزيف على وجهها وقالت: نوضي ابنتيي نوضي …لكلسة بين لقبور معندها باش تبرد همك …عند بالك غيبرد ؟ …عمر عافية لميمة تطفى

‎ايمان(بتنخصيصة ): هءهءهء عندي هي كلشي اخالتي هءهء بقييت كي لحنش لمقطوع

‎_ وربي مينسااكش ابنتي ربي بغا يعرف صبرك قدااش

‎ايمان: هءهءه كون غير مجربش صبري بيها هءهءه

‎_قولي اعود بالله من الشيطان الرجيم…ربي عارف وقادر على كلشي …مغتنسايهاش ولكن غتولفي بلا بيهاا … دعي وصليي وطلبي ليها شفاعة النبيي راه دموعك غير كيعدبوها معااك …زوريها صدقي عليهاا ويني تبكي كل خطرة عند قبرهاا ماشي هدشي علاش وصانا سيد النبي صلى الله عليه وسلم …ياك كتقراي ؟

‎ايمان: اه هءهء

‎_أجرنا واجرك واحد ابنتيي الله يصبرك عليهاا ..الله افتحها فوجهك ازوينة (طبطبات على خدها )ما شاء الله

‎ايمان: اميين ياربي

‎_انا مشيت ابنتي تهلاي فراسك وفصحتك

‎رجعات لبكاها وكتقول اخر مرة نبكي معرفات امتاا داتها عينيهاا فوق تراب …حلات عينيهاا دايخة وراسها كيدوور …دورات راسها لجيهة لقبر فين خلات لمرا وكتشوف فلباب تاع الروضة وكتقول واش جات هدرات معايا ولا غير كنتخيل

‎خيال او علم قنعاتها باش تجمع راسهاا ولبكى ورا لميت خسارة معندو ميزيدو

‎ابمان: الى كنتي باقة حاسة بيا امي …انا بخير انا ايمان شلا مداز على راسي ومزال ليام تزيدني متخافيش علياا مساهلاش لمنوالا …الله ارحمك اميمتي …غنوصل لداكشي لي بغييت وغنشوفيهم واحد واحد كيطلبو من نسمح لييهم …وانا امي والله منسمح لواحد فيهم

#يتبع