– حلات باب البيت ودخلات ، لقاتها لابسة جلابتها وكتجمع فحوايجها فواحد الساك بالي .. عرفاتها دارتها بصح ونوات تمشي فحالها ..
– صفية هي نويتي ؟
– صفية (مكتشوفش فيها) : واش كيبان ليك أختي ، أنا صافي نويت .. أختي مابقا ليا مزال مندير هنا .
– وشنو أديري فالبلاد ، تݣابلي سريح البهايم تاني ؟
– صفية : اللهم البهايم ونݣابل جدة وميمتي ، ولا هاد تجرجير أختي ، شفتي أنا ماشي ديال المدينة .
– تحل الباب ودخلات واحد البنت ، جامعة شعرها سفنجة وهازة واحد الساك فيدها ، لابسة بلغة فالكحل وجلابة فنفس اللون ..
– بديعة : ساليتي ؟
– صفية : قربت .
– أويلي بديعة أنت فين غادية ؟
– بديعة : شنو ݣلنا لبارح أنجاة كتحماقي عليا ؟
– نجاة : واش من نيتك أصݣعة ، وسيري ياختي حتى تشيري أنا ماشي شغلي ..
– بديعة : براكة من الخريف ، وانا غادية على هاد الهضرة ديالك الخاوية ..
– صفية : نجاة شفتك أختي كتهضري بحال الى دارنا فيها لي مايندكرو ، انت نعلي شيطان ..
– نجاة : وعلاش أختي داكشي لي عاودتي لينا قليل ، والله كون أݣلستو ..
– صفية : عاودت ليك شيحاجة وقعات زمان هذا ، ماشي شيحاجة لي تخلع ولاواه ، مابقى عندي مندير هنا ودابا وصل وقت جميع الزعفران ، يلاه يلاه أختي راه صعيب الحال ..
– نجاة : شحال فيك ، شكون حسن أݣادير ولا تم؟
– صفية : تالوين أختي ، الطبيعة زينة ومهوية الوقت ماشي بحال المدينة وهاد الفارم ، يديا طابو عليا ..
– بديعة : براكة عليكم من الحتيت الخاوي ، نمشيو نشوفو هاد الخبير لي طالقة علينا صفية (ضحكات) ..
– صفية : وغير خليكم كتفرنسو ، اوحدة كتحيب من راسها ولوخرا غادية تجرب ، راه مغاتلقاي شاي ..داكشي مشا مع زمان ، هداك زمان وهذا زمان وكل واحد كيعيش زمانو ..
– بديعة : ويلاه أمو زمان .. راه خاصنا نشدو طريق حتى لتارودانت وعاد نشدو طريق لتالوين ..
– صفية(وقفات) : صافي أنا ساليت ، يلاه على بركة الله ..
– خرجات صفية هي وبديعة ، كل وحدة هازة ساكها … 3 ديال لبنات لاقاهم ربي فخدمة ديال الفيرمات ، باش يجمعو شوية فليسات .. يترزقو الله ، صفية كانت قارية ودارهم ميسورين ساكتين فتالوين ، بعيدة على تارودانت ب90 كلم ، وجات على طريق الرئيسية لي كتدي لورزازات ، صفية واخا دارهم ميسورين وعايشين من الذهب الأحمر لي معروف بإسم الزعفران الحر ، ولكن تبارك الله عليها حادݣة ، كتبغي تخدم ودمر .. قرات وفالعطلة خدمات فهاد الفيرمة مع البنات ، طلعات كتشبه لجداها ، قوية تبارك الله مايتخافش عليها .. وفاشما حطيتيها تلقاها ، وبنسبة ليها الخدمة ماشي عيب غير تكون حلال وصافي ..
– شدات صفية هي وبديعة الطريق ، الشمس مطنطنة ، وراس كيتبخ … إيوا وكل واحد باش مغطي راسو ، شي مغطيه بترازة ، وشي مغطيه بحوايجو .. الشمس ديال هاد الوقت كضر فالراس ، صفية داتها عينيها بحال كل مرة .. حدها طلع الكار صافي كتنعس ، أما بديعة مقابلة طريق والڤيراجات ، بدات كتشدها الدوخة ورضة … ماقداتش مزال تبقى مقابلة الطريق .. خدات واحد الشال لواتو على راسها وعلى عينيها ، غمضات وحتى هي داتها عينيها حتى وقف الكار فتارودانت ، بدا الݣريسون كيفيق فناس باش بنزلو .. فاقت صفية هي وبديعة ، خلاو القراعي ديال الما فبلايصهم .. هوما والقواعط ديال بيمويات فجيب الكراسة ، نزل ليهم الݣريسون سيكانهم ، وكمل الكار طريقو .
– صفية (عاكفة راسها ودايرة واحد طربوش) :
– أش بان ليك نتغداو عاد نشدو طاكسي لتلوين؟
– بديعة (خسرات سيفتها) : أوهوي أختي .. أنا مصارني بغيت نرجعهم لالا ، بغيت نشد أواحد مونادا نتݣرع ضراتني المعدة ..
– صفية : إيوا صافي الى كان هكاك .. أنا انجيب واحد جوج مونادات وغادي نجي ، خلات بديعة واقفة ومشات لواحد القهوة .. خدات منهم واحد جوج مونادات ديال زاج .. حلهم ليها تماك ، خلصاتو ورجعات عند بديعة .
– صفية : هاكي .. يلاهي بعداك لبلاصة تاكسيات ، يلاه نشدو بلايصنا وشربيها تماك ..
– هزات بديعة ساكها على كتفها ، وتبعات صفية من اللور .. غادية وكتشرب فالمونادا ، وصلو لطاكسيات ديال تلوين او وقفو .
– الكريسون : شحال واش اجوج بلايص ؟
– صفية : أه غير جوج ..
– الݣريسون : 600 دريال ..
– صفية (خرجات فيه عينيها ) : اويلي على 600 .. كنت كنجي غير ب ربعمية دريال .. دغية زدتو ميتين ريال ..
– الكريسون : انت وقيلة شحال هادي ماجيتي ، داكشي باش .. راه الوقت تبدلات مابقاتش كيف كانت ..
– صفية (حلات بزطامها وكتبغم) : هاك هاك براكة من الملاغة .. شحال فيكم بغيتو تاكلو الحجر .
– تخلص من عندها الكريسون ،وهز ليهم سيكان دارهم فالكوفر ديال الطاكسي ، طلعو بجوجات شدو البلاصة وكيتسناو فطاكسي يعمر باقي البلايص ..
– بديعة : الحال سخون ياختي ..
– صفية : مزال ماشفتي والو .. ياكما ندمتي حيت جيتي ؟
– بديعة(شافت فيها) : لاواه .. علاياش اندم هاد شوية دشمس ايخلعني ؟
– صفية : وانا غير ݣلت ليك وصافي ..
– نبا الشيفور الناس لي جاو .. يلاه أسيادنا سربيونا ..
– طلعو باقي الناس .. ديمارا الشيفور وشد الطريق لتالوين ..
– بديعة الطريق كلها حاطة راسها على الزاج وكتمنضر .. تبارك الله الدنيا كانت زينة ، الجبال خضرا ومع هدا هو الموسم لي كيݣلعو فيه الزعفران الدنيا مبهجة .. صفية رتاحت حيت ولات للبلاد ، مكاتحس براحة من غير الى كنتي وسط ناسك وحبابك ، دازت ساعتين او طاكسي وصل لتالوين ، وقف فالمحطة ديال الطاكسيات .. نزلات صفية هي وبديعة ، هزو الساك وتمات صفية سابقة بديعة ..
– بديعة (تبعاتها كتعيط) : واش دار قريبة ولا بعيدة ؟
– صفية (ضارت عندها) : لا راه مزال انشدو الكروصة لي أتدينا ..
– بديعة (ضربات فخضها) : علاش أختي ماشي جات هنا دار ؟
– صفية : واقيلة راه ݣلت ليك ساكنين فجبال ؟
– بديعة (شدات على راسها) : الله ياربي الحبيب وفين كان مخبي ليا هادشي ، واش داني حتى جيت ..
– صفية (تبسمات) : داروها ليك رجيلاتك .. ودابا زيدي قدامي قبل لا شمس تغرب .. رجعات صفية كملات طريقها وبديعة تجر فرجليها وتباعها ..
– خداو كروصة جارها واحد الحمار مسكين عيان بحال مولاه .. كل شوية كيوقف ليهم فطلعة ، ماوصلو حتى غربات الشمس وراح الليل ، السما كانت صافية والݣمرة كانت ضاوية .. ودار صفية كانت مضوية وريحة الطياب كتعطي منها .. خلصات صفية مول الكروصة مسكين ومشا ..
– بديعة (سخفانة) : بغيت غير نشرب ونعس ، مابقاش عندي العظم الصحيح لي نزيد بيه ، فين هي داركم ؟
– صفية (تبسمات) : هاهيا قدامك ..
– بديعة (هزات عينيها وشهقات) : واش كتهضري من نيتك ولا كضحكي عليا ؟
– صفية (ضحكات) : علاش ماعجباتكش؟
– بديعة : علاش ماقلتيش ليا عندكم رياض ، أشمن رياض اختي هدا راه قصر تبارك الله ..
– صفية : إيوا نهار كنت كنݣوليكم جدي كان سلطان ، حتى وحدة متاقت بيا ، درتوني نية وغشمية وغير هبيلة وكنخرف ..
– بديعة : لاواه ياختي أنا لي هبيلة دابا ، وكنطلب منك السماحة .. وهوما كيهضرو تحل الباب الكبير ، لي كان معمول من الخشب ، وطلات منو مرا تكون فديك 60 من عمرها .. ملامح الزين كيبانو على وجها ..
– شكون تم؟
– صفية (حطات ساكها ومشات عندها ) : مي ..
– (تحققات منها وحلات ليها يديها) : صفية بنتي ، الله ابنيتي الله اكبيدتي الله ..
– صفية (كتعنق فيها ) : توحشتك امي والله حتى توحشتك .. بعدات عليها شوية ) مي هادي صاحبتي بديعة .. بديعة هادي مي الغالية ..
– بديعة(سلمات عليها) : سلام خالتي لاباس عليك ، سمحيليا جيت مع صفية ..
– الغالية : لاواه أبنيتي ، مرحبا بيك .. زيدو وانتوما واقفين على برا .. دخلات الصفية ومعاها بديعة لي زادت حلات فمها .. الدار تكوليها هاربة من شي فيلم تاريخي ، الخصة ديال الما .. والورد وجوج نخلات معرشات فسما ، واحد المنظر غزااال بزاف ..
– تسمع صوت حنين ولبيب ..
– شكون تما الغالية ؟
– الغالية : هادي غير صفية أمي هي او واحد صاحبتها ..
– تحل الباب وخرجات منو مرا كبيييرة .. تكون فتسعينات من عمرها .. لابسة قفطان مخدوم بصم .. وراسها مغطياه بزيف طويل فالبيض ومطروز ، أما رجليها لابسة شربيل حتى هو مطروز بصم .. وجها لي عمر بتكماش ، ولكن واخا هكاك حروف الزين مزال واضحة عويناتها لي كانو مشفرين وصغار .. واخا فتسعينات ولكن تبارك الله كتمشى بلا عكاز .
– صفية (غير شافتها مشات عندها تجري وتعطر فجلايلها) :
– حنة ..(عنقاتها تبوس فيها وفيديها وراسها)
– شداتها وقرصتها ..
– كتسلتي فنصاصات الليل بحال شيطان الحرامي .. ياك لاباس ، هادي وقت يجيو فيها بنات الناس لديورهم ، الݣمرة هبطات وضوات والليل راح وغابو نجومو ..
– صفية : والله أحنة الى مول الكروصة هو لي تعطل ..
– لي بغا يوصل بكري راه كينوض فسروية ، ويوجد مسايلو .. ويحزم راسو ويشد طريق ..
– بديعة (همسات لصفية) : مال جداك كتهضر محال رمانة وبرطال ؟
– صفية( نغزاتها تسكت) : حنة هادي صاحبتي بديعة ..
– مدات ليها جدات صفية يديها باش تبوسها ليها ..
– صفية (نغزات بديعة) : سلمي عليها بوسي ليها يديها ..
– بديعة (تحنات على يديها باستها) : سلام أخالتي ..
– صفية : كيفاش خالتي ؟
– بديعة : وعلاش شنو أنكوليها ..
– (جاوباتها هي) : عيطي عليا حنة خميسة .. عطاتهم بظهر ودخلات
– بديعة (شافت فصفية) : واش جداك سميتها خميسة ؟
– صفية : أه سميتها خميسة ، ومتبقايش مقابلة هضرتها هي راه هكاك .. من بكري بقات بحال هكا ..
– الغالية : صفية ودخلي صاحبتك لداخل وانت ما بقيتو هنا ..
– صفية : زيدي ندخلو خلي الهضرة حتى لمن بعد ونهضرو ..
– الغالية فرحات ببنتها .. ماخلات ماحطات ، كملو العشا ومع العيا ديال طريق ، دخلات الغالية فرشات ليهم فالبيت ، دخلات صفية هي وبديعة .. البيت كان بارد وكبير متيسع ، فرشات ليهم الحنبل والمانط .. حطات ليهم لي زور والمانطات حتى الى ضرهم البرد يتغطاو ..
– بديعة : فيا واحد النعاس منعاودش ليك ، بحال الى منعستش هادي شهور وأعوام ..
– صفية (تقادات فبلاصتها) : حيتاش هذا شحال ماشديتي طريق طويلة ، داكشي باش .
– بديعة : عندك الصح ، إيوا تباتي فراحة الله .
– صفية : حنا وأنت وجميع المسلمين .
______
– شمس الصباح ، سطعات ونورات .. وريحة الحسوة بالحليب وزعتر عطات … فاقت صفية وخرجات على برا مخلية بديعة مزال ناعسة ، ناس المدينة هذا هو حالهم ،، مكايفيقوش بكري ماشي بحال الناس ديال البلاد … كينعسو بكري ويفيقو مع نبوري ، وخصوصا هنا فتلوين ، الناس كينوضو باش يحيدو الزعفران .. الدنيا كتكون زينة بزاف ، الطبيعة خضرة ومزينها الورد فلون البنفسجي ، او وزغيبات الزعفران ليمونيين كيبانو ، الذهب خلاوها ماليها ، واخا فيه العذاب وتمارة كيضربوها العيالات ، ولكن ماعندهم مايديرو .. هدا هو الباب منين كيكسبو لقمة عيشهم ، طرف ديال الخبز صعيب وخاصك تضرب عليه تمارة .
– صفية (جات عند مها باست ليها راسها) : صباح الخير أمي ، كيصبحتي ؟
– الغالية : الحمد لله أبنتي ، وانت رتاحيتي فين صاحبتك ؟
– صفية : مزال ناعسة ..
– جاها الجواب من وراها ..
– هذا هو طبع ناس المدينة ، ينعسو هوما الاخرين، ويفيقو هوما تاليين ..
– صفية (باست ؤاس جداها) : مي حنة كيصبحتي؟
– خميسة : لي صاب صحتو يحمد الله ويشكرو ويدعي بتيسير ، لسانك حار ابنتي حار ..
– صفية (مافهمات والو) : علاش أمي حنة؟
– خميسة : انت عارف وانا عارف ، مكاين لاش يسيقو الخبار حتى المغارف ..
– صفية (ݣلسات حداها وربعات) : مافهمتش قصدك احنة !!
– خميسة (زݣات فيها الشوفة بعينيها لي واخا الكبر ، مزال محتافظين بزينهم) :
– السر لي خرج من فمك ، دورتيه وفرتكتيه ..
– صفية (ضحكات) : مي حنة ، مزال مافهمتش راكي عارفة ماعنديش مع المحاجية ..
– خميسة : سر البندير لي خرجتيه ، ولصحاباتك بيعتيه وتعنيتي بيه .. ݣلستي تعاودي وتحاجي ليهم على سرو ، وانت زعمة عاقلة على كلامي … بلي سر البندير الى عرفوه كتر من 3 شنو كيوقع ..
– جات بديعة من البيت كتمسح فوجها بالفوطة :
– خالتي داكشي راه غير خريف ديال ….
– خميسة (خنزرات فيها وقاطعاتها) :
– سمعي مزيان إديك الفضولية ، دوك العينين دازو عليا منهم كثير … وعارفة لي بحالك علاش مطويين ، مخلية لمدينة وديورها ضيقين … وجاية حتى لجبال زعمة غير حب فصفية ، جايبك سر البندير وقلت نيتك هي لي اتخرج عليك لا انت ، لا هادي لي ماحفضاتش السر … ايوا دابا ضبرو لمحاينكم وتسناو شنو يوقع ليكم ، يا تخرجو منو سالكين … يا تبقاو معاه محبوسين .
– خلاتهم ومشات خرجات .. صفية سهات وندمات حيت باعت سر جداها باش تبان .. أما بديعة ماعجبها حال تقرصات من كلام خميسة ليها ، وندمات حتى خلات المدينة وخدمتها وجات ، ولكن قلت عقلها وفضولها هوما سبابها .
– صفية مابقات عندها ݣانة ، خشات رجليها فصندالة ديال الميكة وخرجات قدام الباب .. ݣلسات وسرحات رجليها .. بانت ليها واحد القصبة مهرسة هزاتها كتلعب بيها وساهية .. خرجات عندها بديعة وکلسات حداها .
– بديعة (كتشوف فيها) : سمعتي جداك كيفاش عايراتني وبهدلاتني ،أنا لي هبيلة جايا معاك .. كون ابقيت فدارنا ..
– صفية (هزات فيها عينيها) :
– ماكدباتش عليك ، فين عمرك بغيتي تجي معايا ؟ حتى عاودت ليكم على البندير ، وانت تحمى فيك البيضة وبغيتي تجي معايا …
– بديعة : دابا انا لي غالطة ياك ؟ وهذا هو سري ..
– صفية : بديعة الله يرحم بيها الوالدين ، راه مافيا لي يبقا يتقابح .. انت عارفة وانا عارفة بلي انت غالطة وحتى انا معاك ، دابا الحريرة لي حنا فيها كيفاش انسلكو منها ..؟
– بديعة : أشمن حريرة ؟
– صفية : ماسمعتيهاش شنو ݣالت ؟ ݣالت لينا بلي منين كيتكشف السر غادي نوليو فمشكيل كبير ..
– بديعة (ضحكات) : وانت تيقتيها ، خرايف ناس زمان .. مزال كتدي على جداك راها كبرات وخرفات .
– صفية (غوبشات فيها) : بديعة راه مي حنة هاديك ، وعقلها يوزن قنطار … كتفكر حسن مني ومنك وجمعي راسك شوية ..
– قاطعاتهم الغالية :
– صفية نوضي أبنتي الله يرضي عليك ، هبطي لسوق تجيبي ليا شي سخرة خصانا ..
– وقفات صفية وشافت فبديعة :
– لبسي جلابتك ويلاه معايا ، تشوفي نست السوق كيف داير ..دخلو بجوج بيهم لدار ليسو جلالبهم ، وبلاغي فرجليهم ..
– الغالية : جيبي ليا السواك ، وغادي تجيبي ليا العطرية ، شوية شوية من الحاجة .. وجيبي معاك العكر الفاسي وريحان والورد البلدي (بدات تعيط) مي شنو بغيتي من سوق ؟
– نباتها من داخل :
– قوليها تجيب ليا معانا الحنة ورقة ، وتكون ورقتها خضرا بحال الورق لي طايح عليه الندى وعنداك تكون غاملة ولا غامقة ، تبان خضرا من شوفة بحال الأرض لي صابة عليها الشتا .
– الغالية : والكحل ؟
– خميسة : فين عمر خميسة بنت التاجر ، شرات الكحلة الى مدݣيتها بيدي ومصيتها بصباعي وشميت ريحتها ، وعرفت شنو دايرة فيها عودها مايمس عينيا ..
– الغالية (شافت فصفية) : صافي غير هادشي أبنتي سيري الله يرضي عليك .
– هزات الصفية الݣفة وخرجات هي وبديعة ..
– صفية : بلاتي نجيب الحمار من الحوش ..
– بديعة ( بخوف) : أنا اختي منركبش عليه ..
– صفية (ضحكات) : إيوا تمشاي أختي على رجليك ، عارفة السوق فين كاين ولا ؟؟ … خلاتها ومشات جاي الحمار ديالهم ..
– صفية : أطلعي ولالا ؟
– بديعة (كتغبن ) : ياربي سلامة ، دارت أمرها فيد الله وشاركات البهيمة هي وصفية وشدو طريق السوق … الدنيا زينة والعيالات راجعات محملات بزعفران ، الجبال خضرة وزاهية وبنوار الزعفران الحر ضاوية .. منظر كيفتح النفوس وكيبهج الصدور ، يخليك فرحان ومرتاح … غاديين وصفية واخا عينيها على طريق ، ولكن عقلها سارح مع كلام جداها .. كتخمم فيه ودوزو فعقلها والى جينا لصراحة ، تنادم معاها الحال خفت عقلها ولسانها داروها بيها ، وخافت لا يرجعو عليها بندامة وهي قليلت العقل ونية ..
– الغالية : مي بحال إلى قصحتي مع البنات ..
– خميسة (مفرقة شعرها ، لي واخا الكبر مزال تبارك الله محتافظ بقوتو ورطوبيتو ، رجع بحال لون العافية بالحنة لي كدير ليه) :
– بنتك لي دارتها ليها خفت اللسانها( زݣات من المشيطة بمشطة العظم ديالها) عقلتي شنو كنا ݣلنا ولا نسيتي ، ياك ݣلنا سرنا مايعرفو غيرنا وهي مشات ديع بيه ..
– الغالية : وباش عرفتيها امي؟
– خميسة (تنهدات) : فعمري 90 عام ديت وجبت فزمان ، خالطت شلا ألوان وشلا ناس .. عارفة الصالح وطالح ، بنادم نعرفو علاش مطوي غير من الشوفة .. يا فين عمر صفية جابت معاها شي بنية .. ياك كانت ظل دݣولينا كتعرض على البنيات لي معاها وغير كيسمعوها فين ساكنة كيقلبو الدورة .. الفضول لي جاب هادي العافية مع بنتك ، باغية تعرف واش بصح كلامها طاين ولا غير خضرة فوق طعام .
– الغالية (شافت فيها وطولات الشوفة دورات كلامها فراسها وعرفات عندها الحق ) : مي بغيت نسولك ..
– خميسة (رجعات كتمشط شعرها) : أممم
– الغالية : فين مشا البندير ؟
– خميسة (زݣات وهزات عينيها فبنتها وسهات) : نهار دفنتو دفنتو بين العيون (رجعات تمشط) منين سر تكشف عرفي البندير مابقاش مخبي ..
– الغالية : كيفاش؟
– خميسة : حتى نشوفو واش لبنات راجعات ، وعاد تفهمي كيفاش ..
– الغالية مافهمات والو ، بقات ساهية فكلام مها وكدورها فراسها ، متنكرش بلي شيطان بدا كيلعب ليها براسها ..
– الغالية : دارتها صغيرة وانا ݣالسة نغزل ونفتل فللومة ، يديروها صغار ويوحلو فيها الكبار ..
________
– بديعة (طاح عليها واحد سؤال كان خارج من بالها) :
– صفية دابا أنت جدك سلطان ياك ؟
– صفية(كتنغز فالحمار باش يزرب) : اااه
– بديعة : مات مسكين حيت ماشتوش !!
– صفية : إيه
– بديعة :وباك ؟
– صفية (تنهدات تنهيدة طويلة) : با خلاني صغيرة ، يلاه تزاديت ومشا مع الݣافلة ، كانو كيمشيو يجيبو السلعة ، إيوا من تما مابقى رجع ماعرفناه حي ولا ميت ..
– بديعة (بإستغراب) : أويلي واش عمرو رجع ولا شفتوه ، ياختي موحال واش يكون حي ، فهاد الخلاوات راه يتلݣاو ليهم الدياب يفرسوهم ..
– صفية (طلعات ليها الدم) : ماحنا على فالك ، واش مغاديش تسكتي شوية ، مكتعرفيش تهضري خضرة وكلامك خضر .. هنينا شوية .
– بديعة (ماعجبهاش الحال) : بشوية عليا أنا مݣلت ليك حتى كلمة دالعيب ..
– صفية : الفم لي يݣول الزمر ، يݣول التمر وخلينا نوصلو على خير ، هاد الخرجة الله يخرجها على خير ..
– بديعة دورات وجها لجهة لوخرا ، ماعجبهاش الحال تهضر معاها هكاك ، زعفات وهزات خنافرها لسمة وتقلقات .. أما صفية ، ندمات على نهار لي هضرات فيه ولا جابت فيه معاها بديعة ة، فضولية ولسانها باري منها ومكتعرفش تهضر خضرة فكلامها ، ولكن دابا لي عطا الله عطاه ، جات معاها ولي كان كان ..
– فساحة كبيرة ، عامرة بناس وتجار ، الحوانت محلولين .. الناس غادية جايا ، اليوم السوق كتكون الدنيا عامرة .. لي بغيتيها كتكون اليوم حاضرة ، نزلات بديعة وصفية من فوق البهيمة ربطوها مع واحد الشجرة حتى يرجعو ليها منين يساليو … تمو غاديين كيتساراو مع بعضياتهم ، بديعة غير كدور فعينيها بحال هاد السوق عمرها حضرات ، صحاب النقرة والخضرة والحلايقية .. العطارة مالين الحوايج وطلامط ، مالين الزرع والفاكية كولشي كاين ..
– صفية : ندوزو بعدا على العطار ، ناخدو لي بغينا ونكملو المسارية ..
– داكشي لي كان دخلو عند العطار ، تقدات صفية كاع داكشي لي بغات ، وعلاش وصاتها جداها ومها .. دارتهم فالݣفة خلصاتو وضارت عند بديعة ، لقاتها مشات عند صحاب الحلقة واقفة .. تبعاتها الصفية ولحمها مبورش عليها ماعرفاتش علاش .. حسات بحال شي عين تابعاها من اللور ، وقفات وضارت مالقات حد ، نعلات الشيطان وكملات طريقها .. كلام جداها ركب فيها الوسواس ، وقفات على بديعة جاراها :
– لاش واقفة هنا ، بقاو ليك الحلقات زيدي نمشيو فحالنا ..
– بديعة : بلاتي شوية مالكي زربانة غادي نطيرو ، أجي تسمعيه أش كيݣول أجي .. جراتها معاها او وقفو كيسمعو ..
– الحلايقي : سمعو ياحضاار ، هاد النهار جبتليكم معايا حكاية .. حكاية قديمة على المرا الفاهمة اللبيبة ، مولات الدار الكبيرة ، هذا شحال أسيادي كانت واحد المرة زينة وكان خاطبها ولد شيخ لقبيلة ، غارو منها الكبار وصغار ، كل وحدة توشوش ورا الباب علاش الشيخ المختار ختار عيشة مولات السالف مرا ليه .. إيوا الشر غلب الناس وناضت الجارة ام لبنات .. المشرارة ، حلفات حتى تفرق الحباب .. شدات الطريق البعيدة وعند الشوافة نوفيسة دارت ليهم لي دار ، ايوا هنا عيشة ، بنت الشان والمرشان ولات هبيلة مسكينة ، هازة واحد البندير ودور بيه فالقبيلة ، حتى كتاب المكتوب وعيشة تهدات وتوسدات الأرض ولروحها سلمات .. مشات أيام وجات أيام وݣالو بلي بندير عيشة تسكن وتمكن ، ولي خبط فيه 10 الخبطات فعشر ليالي .. كيتسجن وبين سوارو كيتحكم (شاف فعينين بديعة وصفية وهو يتبسم رجع اللور وحل صندوق وجبد منو بندير بجلد الحر مغلف) .. وهاهو بندير عيشة مول الحكمة .. بوابة العجب والفتنة ..
– صفية (قلبها ضرب ورجليها بردو عليها ، بعدات على الحلقة وجرات بديعة) يلاه تعطلنا ..
– بديعة (كضحك عليها) : شفتك أشفتي البندير وأنت تخلعي ..
– صفية : واش سمعتيه ولالا ؟
– بديعة : تخربيق ، كتيقي بصحاب الحلقة ، غير نصابة والكذابة ، كيبغيو يجلبو الناس باش يصورو فليسات .. لقيتك هبيلة ، الي ݣالو تيقي بيها ..
– صفية : براكة من البهلان ، ويلاه نرجعو فحالنا قبل ماتغرب علينا الشمس فطريق ..
– بديعة (جراتها) : أجي نشوفو مول البالي ، كيكون عندو داكشي زوين ..
– صفية : بديعة راه غادي نتعطلو ..
– بديعة : وغير زيدي شحال فيك .. جراتها وعند مول البالي وقفاتها ، كدور فعينيها وتشوف داكشي لي حاط .. حتى طاحت عينيها على واحد الصندوق صفير وزوين وباينة فيه ديال العرعار ..
– بديعة : أشريف بشحال هذا ؟
– عزلي وتخيري .. ولي حبات خاطرك الالة تحضر مرحبا بيكم ..
– صفية (كدور فراسها حتى بانت الصدمة على وجها، جرات بديعة من كتفها كتحرك فيها وتأشر ليها براسها للقدام) :
– شوفي لهيه ..
– بديعة (متبعة يدين صفية ) : شنو كاين ؟
– صفية (كتأشر بصبعها ) : شوفي لهيه .. البياع شافها فين كتأشر .. تبس ومشا لنفس للجهة ..
– تبارك الله عليك زين ماختاريتي ، هاد البندير راه بندير حر .. متلقايش بحالو .
– بديعة (كضحك) : أمالكي خايفة ياك لاباس ؟
– صفية : واش شفتيه ولالا ، بحالو بحال البندير لي كان هاز الحلايقي ..
– بديعة : أويلي على هاد الهبيلة انعلي شيطان .. عرفتي انا عجبني هاد البندير ، ناخدو نبقاو من ليل ليل نخرجو قدام الباب ونغنيو ..
– صفية (خرجات فيها عينيها) : اويلي وحدي ، واش انت هبلتي ولا مالك ، زيدي فحالك راه مكاينش لي ايخرج علينا ، قد فضولك وهاد طيران ديالك ..
– بديعة (جراتها) : اجي تشوفي الحلايقي وبنديرو واش بحال هذا ، براكة من ضحك .. راه عطا الله البنادر ، الشريف وجد ليا هاد البندير شوية غادي نجي نديه .. جراتها وداتها للحلقة ..
– بديعة : إيوا وريني دابا فين هو هاد البندير يلاه ..
– صفية (ولات كتحس بلبرودة هابطة عليها) :
– الحلايقي مكاينش ..
– بديعة (دورات وجها كيبان ليها حلايقي أخور ، ماشي داك لي شافو عاد شوية ) :
– أيكون غير مشا فحالو ، ولا مشا يتغدا ..
– صفية (جراتها) : انا غادية فحالي بغيتي تبعيني مرحبا مابغيتيش ، خليك هنا ..
– سبقاتها صفية للحمار ، فكات ليه الحبل .. ضارت باش تشوف بديعة لي كانت وراها لقاتها جاية مبسمة ، وهازة فيديها البندير لي كان عند مول البالي ، تفقصات وتعصبات ولفخاضها ضربات .. ماعجبهاش الحال ، معارفاش بلي بديعة راسها قاصح .. ومكتسمع لحد ، كون كانت كتسمع لاباس عليها ..
– صفية : درتي لي ݣاليك راسك ياك ؟
– بديعة (كضرب فالبندير وتغني وضحك) : هالاواه هالاواه ، هامصحاب جازي يداوي هالاواه هامصحاب الموت تابعاني هالاواه ، هالاواه هالاواه ، رورورورورورورورورورورويييييييي .. شحال ݣاليك نضربو 10 ضربات (كضحك) هاواحد هاجوج هاتلاتة هاربعة .. ݣلسات تغني وتعدد ، وصفية شادة فراسها وتخمم .. خلاتها حتى كملات غناها ..
– صفية : ضحكي ضحكي انت لي واتاك الضحك ، دابا تشداݣيه ابديعة ، طلبي السلامة لي تعجب يتبلى ولي ضحك ايمسحهم بشوك ..
– بديعة : ماهو فالي ياختي ، الله يستر شحال فيك ديال الملاغة والحتيت الخاوي ، زيدي بحالنا .
– ركبو على الحمار وشدي طريق الرجعة ، وبديعة ضاحكة فرحانة ، حيت ضربات 10 ضربات وماوقع والو .. وهنا حنتات صفية ، وبينات ليها بلي كاع دوك الخرايف ، غير كذوب وخريف ..
_________
– الغالية واقفة عند باب الدار ، كل شوية كطل وترجع دخل ، قلبها مامهنيهاش .. خايفة وكبدتها محركة من جيهت بنتها .. الشمس غربات وهوما مزال مارجعوش لدار ، الشيطان كيوسوس ليها .. خافت غير يكون تلݣى ليهم شي حد .. ولا يكون الحمار عيا ولا تلوات ليه رجليه وطيحهم فشي واد .
– خميسة : الغالية ݣلسي الأرض ، وأنت كدوري عليا بحال حمار طاحونة .. درتي ليا جلالة على عينيا ..
– الغالية : تعطلو امي ، تعطلو بزاااف خفت غير كلام يصدق ، وتكون وقعات ليهم شيحاجة ..
– خميسة : لي قلب على شيحاجة يلݣاها ، الفهامة الزايدة كترجع على مولاها بندامة ، المرة الفاهمة نقمة … وصفية غير نية لسانها دارو ليها بحالها بحال البرة بلا عين إلى ماشكات ماتخيط ، اما هاديك لي معاها قليلة العرف ، عند بالها كلامنا مزاح وملاغة ..
– الغالية : مي كيبان ليا نمشي نقلب عليهم ..
– خميسة (تنهدات ، وهي من الداخل ربي لي عالم بيها ، كانت حاسة وعارفة بلي الحكاية أتعاود .. مكانش عليها تعاود لحفيدتها وتحكي سرها ، كون غير سكتات ولا دوات ، ولكن حفيدتها لي سمعات الحكاية من مها وجات تسول باش تعرف ، خايفة بزاف لا يكون داكسي لي فبالها هو لي واقع لحفيدتها ..) :
– بلاتي شوية ، تسناي تبان الݣمرة وداك الساع نخرجو بجوج بينا نقلبو ..
– الغالية (هازة كفوفها لسما ) :
– ياربي ، ياربي انا طالباك وكنترجاك تحفظ ليا بنتي ، براكة عليا أباها لي مابقيت شفتو ولا ريتو ، لا ترزيني فكبدتي ياربي الحنين .
_________
– فغمضة عين ، حلو عينيهم فبيت عالي .. ريحة فيه بحال ريحة الكافور ، قبالتهم كان طبلة من خشب قديم .. وريحة الطياب جايا من ورا الباب البالي ، شدو فبعضياتهم والخوف راكبهم من ساسهم لراسهم ..
– بديعة : فين حنا ؟ واشنو جابنا لهنا ؟ ياك كنا فسوق وكنا راجعين (كتهضر وصوتها مرعود كلو خلعة) ..
– صفية (كتشوف بعينيها ، وقلبها قرب يطيح فكمها) :
– زعمة تكون هضرة حنة صدقات ! ويكون سر البندير لي تكشف خرج فينا ؟
– بديعة (بدات تبكي وتندب) : انا لي مكنسمعش وراسي قاصح ، وفيا كثرت الفهامة حتى هاهيا اترجع ليا بندامة ، كون قبلت بفقيه الجامع ، ݣاعما نجي معاك ولكن فضولي خرج عليا وأنا غير وليا (كتبكي) ..
– تسمعات ضحكة ديال مرا مالية المكان ، بورشات اللحم وخلات شعر الراس يوقف ، خلاتهم يسكتو ويلبدو ويتخشاو فالقنت حدا سارية .. الضحكات وقفات وصوت النطق ..
– انتوما فتحتو باب وانا سديتو ، وقفل بابي من حديد ماينفع معاه لا فاس من حديد ولا راجل شديد ، إيوا حدا حال لي لسانها مبري منها سليط ، ولي الفضول كلاها وخلاها غادية مكفية بحال فار دݣيݣ ..
– صفية هي وبديعة تخلعو بزاف ، وحدة كتشوف فوحدة .
– صفية (تشجعات ونطقات) : شكون انت ؟ وفين حنى ؟
– (صوتها ضحك تاني وعلا) : أنتوما فداركم الجديدة ، حتى يحن عليكم الله ، ويفك ربي وحايلكم ..
– بديعة (نغزات صفية) : كيفاش دارنا جديدة ، صفية بغيت نمشي أختي فحالي ، عمر داود مابقى يعاود ..
– (صوتها ضحك وعلى ) : فات الفوت ابنت لفقيه ، أنت بيديك حبستي راسك فقاع البندير ..
– بديعة (دموعها هابطين كترعد ) : كك ك كيفاش ؟
– أنتوما دابا خدم عندي ، فداري فبندير عيشة .. بقيتو فيا وقطعتو ليا من قلبي ، ولكن ماعندي مندير ، رجليكم جابوكم لهنا ، وخميسة بنت تاجر حمان حدراتكم وفقهاتكم ، ولكن ماعندي مندير ليكم ..
– صفية (كتبلع فريقها ) : بغيتي تݣولي حنا محبوسين فبندير جدة ؟
– صوتها غوت وتسمع :
– بندير عيشة قبل مايكون بندير جداك ، جداك لي فيقت الميت من قبرو ..
– صفية (تشجعات ودوات) : إلى سميتك مرا باني عليك الأمان ، أما جدة بزاف عليك باش توصليها وتكوني بحالها مرا لبيبة وحكيمة ، ماتوصليها لا فهامتها ولا حداݣتها ، انت لي كنتي مسيفطة الحلايقي ياك ؟ هو لي عاود حكايتك لناس ، ولكن نسا مݣال بلي انت سليطة ومامزياناش ..
– شششش ، ماتبقايش تهضري على حاجة معارفاهاش .. جداك مابيني وبينها غير الخير والإحسان ولكن دارت معايا لي موحال النساه ..
– صفية (بفضول ) : شنو دارت جدة ..؟
– جداك حررات حبيبي السلطان مني، كنت ساكناه ومالكاه وسالباه ، خشات نيفها فتراب وعتقاتو مني ، خلات البندير يتلاح بين 7 عيون ، ماكلفاتش راسها تخلص روحي من هاد البندير ، وروحي ترتاح وتهنى ..
– صفية : وحنا شنو دنبنا واش درنا ؟
– (ضحكات) : الفضول كيخرج على مولاه ، وجداك عارفة بلي السر الى تفضح وعرفوه كثر من 3 الناس ، البندير كيرجع يبان ، وسحورو كيتجدد .
– بديعة (كتبرق فعويناتها) : و و وانبقاو محبوسين هنا ؟
– (ضحكات) : 10 ديال الݣمرات ديال 10 ديال الليالي ، الليلة لي مابانت فيها ݣمرة ماشي محسوبة ، وكل ليلة كتوزن بزاااف ، أتبقاو خدم عندي ، طيبو لي وتفرشولي وتوكلوني ، بحالكم بحال واحد المسكين هنا .. (صوتها تبدل ولا قوي) وفكل ليلة البندير أيرجع بيكم لزمان غير زمانكم ، وتشوف عينيكم لي متيقوهش ودانكم ..
– بديعة (لسانها مبري منها) : طلقينا براكة من الهبال أشمن زمان ، عمري شفت شي واحد كاين فقنت وأيرجع لشي قنت ، ديك الشعودة ماعندنا منديرو بيها طلقينا براكة من الهبال ، ربي فوق منك وغادي يخلصك ، حسبي الله ونعم الوكيل ، اللهم إن كان سحر فأبطله .
– مجات فين تكمل كلامها ، حتى سمعو غوتة صمكات ليه الودنين ، كولشي بدا كيتحرك تݣولي غير زلزال ، الحيوط كلهم كيتحركو .. البنات شادين فبعضياتهم وكيغوتو ربي لي خلقهم ، حسو بشيحاجة تحركات تحتهم .. الغوتة خرجات منهم منين جراتهم شيحاجة ونزلاتهم لتحت بحال شي اعصار جرهم ، تخبطو مع شيحاجة رطبة ، كولشي زݣا ورجع كيف كان .. هزو راسهم قلبهم كيضرب كيبان ليهم بيت أخر ماشي البيت لي كانو فيه .. هزو راسكم كيبان ليهم واحد الراجل كبير فالعمر ݣالس فالقنت ، الثوب لي لابس بالي وقديم ، لحيتو طويل وزين ..
– صفية : ف فين حنا تاني ؟
– عند الغالية ، دموعها نازلة وكتسمع لخميسة ..
– علاش امي معاودتيش ليا هادشي ؟
– خميسة : خبرتك وݣلت ليك هاد السر لي أنكوليك متعلمي بيه حد ، ولكن انت بحال بنتك ، غير سمعات حديتنا خويتي ليها المزيودة .. الفقيه لي لي عرفني شنو ندير ، ݣاليا نرمي البندير بين 7 عيون .. ومنتلفتش ورايا ، والسر منخبر بيه حد ، وإلى مشا حتى تكشف السر لكثر من 3 الناس ، مفعول البندير غادي يرجع .. وروح عيشة غادي تفيق ..
– الغالية (كتبكي) : دابا بنتي مرهونة فالبندير ؟
– خميسة (تنهدات وهزات راسها فسمها وفالݣمرة المضوية) :
– عيشة متقدش تأدي حد ، دايرة بحال البݣرة المجدامة ، لي حلبوه منها كيدهوناها بيه ، روحها بقات معلقة فقاع البندير .
– الغالية : واش بنتي صافي مشات مابقاتش غادي ترجع ليا ولا كيفاش أمي ، حلي هاد الوحلة الله يرحم بيها الوالدين ..
– خميسة (تنهدات) : جوج حلول مامنهم واحد ، صفية ولا بديعة مايقدو يخرجو من قاع البندير ، حتى يشهدو على لي وقع .. 10 ديال الليالي تكون فيهم الݣمرة ضاوية ، وثاني هو نلقاو البندير ، ويتغسل 10 ديال المرات ، بما 7 عيون ..
– الغالية (كتمسح دموعها) : وفين غادي نلقاوه ؟
– خميسة : يصبح ويفتح ، دابا ماعندنا منديرو ، لي حرت شي كيحصدو .. خلاوها ناس زمان البيض لماليه ولبزق لمول دجاج ، صفية وبنت المدينة .. ايعيشو داكشيلي عشتو هادي سنين ، عالله غير يخرجو بيها بفايدة .. وهي وياك تغر وتضحك وتعجب وتبلا بلوة صحيحة ، وياك تعاند وتكبر والفضول يركبك من ساسك راسك ، سمع لوالدين ولي كبر منك وحل ودنيك تربح .. نوضي نعسو نوضي .
– الغالية (بترجي ) : وبنتي ؟
– خميسة (شافت فسما) : هادي اول ليلة ليها اترجعها لزماااان ، ترجعها لزماني زمان حناها وجدها مولاي ناصر السلطان .
___________
– راجل كيشوف فيهم وهوما كيشوفو فيه ، ماعرفوه واش من الإنس ولا من الجان ، هوما مابقاو فاهمين والو .. لدرجة شكو لاتكون أشمس ضرباتهم وغيباتهم وكيحلمو ..
– (الراجل نطق) : حتى أنتوما جابكم فضولكم وقلت حيلتكم ؟
– صفية : و و واش أنت من الإنس بحالنا ولا من …(ماقداتش تكمل كلامها)
– الراجل (تنهد وݣال) : أنا بحالي بحالكم ، دارتها ليا قلة حيلتي وصغوريت عقلي ، وتحبست فهاد البندير ديال الويل .. مابقيتش قاد نطلع منو ولا نشوف نور سيدي ربي .. وليت خدام وتراس عند هاد عدوة الله .
– صفية : ݣالت لينا بلي خاصنا نبقاو محبوسين 10 ديال الليالي ..
– الراجل : أنا محبوس هنا السنين والمنين .. ومزال ماجاش لي يقد يخرجني ، خليت عائلتي لي يحسابليها دابا بلي راني ميت ، الحاصول الله يسمح لي كان حيلة وسباب .
– صفية : قالت لينا ، بلي غادي نشوفو شيحاجة لي عمرنا شفناها ولا ريناها ولا سمعنا بيها ، وبلي انرجعو لزمان غير زمانة ..
– الراجل (تبسم) : هادشي كتݣولو هذا شحال ، ماعرفتش إيمتا ايجي نهار لي ترجع بينا لهاد الزمان ؟
– جاهوم الجواب من الفوق ، هزو راسهم كاتبان ليهم مرا زينة وسالفها طويل وكحل .. وجها مكايبانش عليه الشر ، لي شافها مايݣولش هادي هي لي حبساتهم فهاد المتمورة هادي ..
– شوية ديال الصبر ، وكولشي بيد الله مكتوب ومقدر ، لي زربو ماتو .. وليالي طوييييلة ، غادي تشوفو كثير وتعيشو كثير .. غير صبرو على خبزتكم حتى طيب ..(ضحكات ومشات ) .. الحيط تزلزل وتحل ، وضو النهار دخل ، شي كيشوف فشي مفاهمين والو ، بديعة كترعد ودموعها تخلطو مع خنونتها … ولات طلب وتزاوݣ وتحلف حتى دخل سوق راسها وعمرها تعاود ، أما صفية مافهمات حتى حاجة ومابقات عارفة راسها من رجليها ..
– بديعة (وقفات فرحانة ، عند بالها بلي ربي فك سراحهم وغادي يخرجو ، وقفات زربانة غادية جيهت الحيط لي تحل ، وقفات قدامو الهوى كيضرب فيها ، جات باش تخرج منو ماقداتش محبوسة مقاداش تخرج) :
– علاش ماقداش نخرج ؟
– عيشة : فين غادية أبنت الفقيه ، هادي أول ݣمرة ليكم ، عتابرو راسكم من هاد الساعة فزمان غير زمانكم ، ماعليكم غير تشوفو بعويناتكم ، وتهنيونا بسكاتكم ..
– الراجل : كيبان ليا بلي تهزينا لزمان غير زمانة ، وهاد عيشة مغاديش تطلق سراحنا .. ماعندنا من غير نݣلسو ونسمعو ونشوفو بعينينا ، وربي معانا ..
– ناضت صفية هي وراجل قربو لبديعة .. صفية بقات ساهية فداك الحيط لي تحل ، داير بحال شي زاجة كبيرة ، من برا كتبان ليها الطبيعة وديور ديال الطين وناس غادة وجايا بالحايك ، هنا عرفات بلي فعلا قلات حيلتها وماعندها غير تݣلس وتشوف هاد الحريرة فين غادي تخرجها .. سهات شوية علات راسها فداك المنظر لي قدام غينيها ، لي مالقات ليه جهد باش تخرج وتفك راسها ، حتى هزات حجبانها بصدمة مقربة راسها مامتيقاش شنو كيشوفو غينيها … منين شافت وحدة دايزة بالحايك ، كتشبه لجداها غير هادي باقي صغيرة كتفتن بزين ، لا هادي ماشي كتشبه لجداها خميسة ، هادي راها نيتت خميسة .
– تسمع صوت عيشة همس ݣال :
– مرحبا بيكم فزمان غير زمانكم ، فأول ليلة من زماني وزمان جداكم ، خميسة اللبيبة مولات الحكمة ولكلمة الزينة .
____________
دايزة هازة ݣفة بيد وليد لوخرا شادة بيها الحايك ، عيونها الكبار مشفرين ، نيفها منݣاد وفمها زين .. بيوضيتها صافية بحال الما ديال الشلال ، أما شعرها كان مغطي ومخبي من عينين الناس ، وصلات عند الواد حطات ديك القفة ، وجبدات منهم الحوايج لي جات باش تصبن ..
– صفية (كتغوت بحر جهدها وكتعيط على وعسى جداها تسمها حتى نباها الراجل لي مشدود معاهم) :
– مكاينش لاش تعيطي وتغوتي ، مغاديش تسمعك واصلا مكتشوفكش ، انت دابا ماكيناش فزمانك .. حنا دابا رجعنا لور بسنوااات أبنتي ، ولكن ݣولي ليا اش كتجيك هاديك الولية ، وجها مخافيش عليا .. ماعرفتش لمن شبهاتها ليا ؟! ..
– تسمع صوت عيشة زلزلهم ، وخلاهم يقطعو اللاغى ويݣلسو ويتبعو هادشي بعينيهم.
– إلى بغيتو تعرفو سر البندير ، براكة من الملاغة وشوية ديال السكات ، ولا 10 ديال الليالي ترجع 10سنين (ضحكات بصوت عالي ، زرع فيهم الرعب وخلاهم يسكتو وماينطقو بحتى كلام ، هنا تأكدو مزيان بلي فعلا طارو وعلاو ورجعات بيهم الوقت لأيام زمان) ..
______________
– بدات كتصبن وتفرك بالحجرة ، ليدين خدامين وحتى صوت خدام ..
– أراو الحنة وشعلو الشمع أراو الحنة وشعلو الشمع لالة العروسة نجمة كتلمع ، لالة العروسة نجمة كتلمع ..
– تم خارج عندها كيحك فراسو ويفرنس :
– وصوتك زوين أبنت عمي حمان (كيفرنس ويحك فراسو) ..
– هزات راسها كتشوف فيه :
– مزال مابغيتيش تحيد منك هاد الفعايل أ مسهوت ، راه انݣولها لمي حادة ..
– مسهوت (كيحك فراسو) : وانا ماقلت غير لي سمعت ، صوتك زوين … حسن من ديال مي .
– سير سير يالهبيل ، دابا تسمعك مي حادة وتخليك مربوط مع بهيمتكم .
– مسهوت (ݣلس على شجرة كيشوف فيها كتفرك بابحوايج مع الحجرة) :
– خميسة ، ݣولي ليا بغيت نسولك ..
– خميسة : سول سول ..
– مسهوت : أش بان ليك نهضر مع مي ، تولي تديك معاها لعرسات القبيلة ، شفتها بعويناتي لي ياكلوهم الدود … كتجيب بزاف ديال الݣروش مدهبين ، وكتجيب لينا لحيمة ودجيجة ، والله العظيم ومع أنت صوتك زين ، اتصورو بزاااف ديال الݣروش ..
– خميسة (شللات الحوايج وعصراتهم ونشراتهم على الشجر وعلى الحجر) :
– مسهوت ، سير لخيمتكم .. منديش عليك راه قليل العرف وغير نية سير .
– مسهوت (ماعجبو حال) : انت ومي ، كطيحو مني وراضيني غير هبيل وغشيم … وانا راه دكى منكم بزوج ، وعقلي فيها أخميسة ابنت عمي حمان … خطيتك والله لا مزال دويتك وهاني مشيت .
– شافت فيها عطاها بظهر وغادي ..
– خميسة : أجي أداك الهبيل أجي نهضر معاك .
– ماتلفتش ليها ولا دواها خلاها عاطيها بظهر داير فيها مقلق ومشا ..
– شدات حايكها وطوات بحال المخدة وحطات عليه راسها ، لابسة قفطان شاداه بمضمة مخدومة باليد قديمة ، لاوية عليها يزار بيض وشربيل ديال الصم فرجليها ، أما شعرها عاكفاه بزيف باين اشوية من شعرها … ساهية فسما ومرة مرة كتدور السواك ففمها ، كان خاصها فينما جات تصبن حوايجها وحوايج جداها ومها وباها ، تݣلس وتسناهم حتى ينشفو عاد تشدهم وطويهم وديرهم فالݣفة عاد كترجع لدار .
– غمضات عينيها ، مافيقها غير صوت توشويش وضحك ، هزات راسها بانت ليها مرجانة بنت الشيخ جاية هي وخواتاتها .
– مرجانة (بنت سمرة وملحة وسنها بحال الجوهر) :
– خميسة ، انت هنا هادو هوما فعايلك … شحال هادي ماتلاقينا ولا شفناك ، دايرة بحال الݣمرة كتباني أمرة فشحال ..
– خميسة (تقادات فالݣلسة وضحكات) :
– إيوا لي بغاني يقلب عليا ، ويدق بابي .. ولا باب تاجر حمان ماشي قد المقام ؟
– مرجانة : ولاواه أخميسة ، متخليش الوسواس يلعب براسك … غير هو كنت مشغولة شوية .
– نقزات ختها خناتة) :
– مرجانة تخطبات لولد الشيخ لقمان ..
– خميسة (وقفات والفرحة بانت على وجها) :
– إيوا تستاهلي من عندي تزغريتة فاعلة تاركة ، رورورورورورورورورورورويييييييي .. مبارك ومسعود بدراري والهراري ..
– مرجانة (كضحك) : العݣوبة ليك ياربي ونفرحو بيك ، هانتي الخميس جاي أجي مرحبا بيك ، أتكون عندي الحنة إن شاء الله ، وݣاع حبابي أيكونو معايا وحتى أنت خاصك تكوني ..
– خميسة (ضحكات) : إيوا نشوف .
– مرجانة : والله ومتجي يا خميسة ، حتى نسيفط ليك لامين هو يجي يجيبك ، والله لا تفاكيت معاك بغيتك انت تحني ليا .
– خميسة : إيوا لهلا يحاشمنا .
– تسمع صوت وراهم كيغني :
– يا مولاتي ، زينت السمية ، الخدود كيف الوردة .. والخالة بحال الشهدة ، يا خميسة حني عليا قلبي مكوي كية ، غارق فحبك عطشان ، لله سقيني من جنانك ، دايب عاشق وطالب راغب ، لله جودي عليا .. راه ماعندي غير أنتيَ .
– خميسة (جمعات غوباشتها وباينة ماعجبها حال) :
– جيتي تاني ولا جابوك ، واش مافخباركشاي بلي كترة الهضرة كتهرب المرا ؟..
– مرجانة(كضحك) : يلاه البنات ، منين جا مسعود مابقى لينا ݣعاد ..
– خميسة : عندك الصح اختي مرجانة ، إلى حضر الشيطان كتغيب الملائكة ..
– مسعود (كيتمسكن) :
– ياك أنوارة القبيلة ماشي حشومة عليك ، فرحي هاد المسكين غير بكليمة ..
– مرجانة والبنات تحركو وخلاوهم ..
– خميسة : سمع ياولد العطار ، فوت عليك ساحتي ، راه كيبان ليا كبرتي وانت يحفى ليك القرشال ، كتبيع القرد وضحك علامن شراه .
– مسعود : خميسة ، كنبغيك أغميسة وغارق فغرامك حتى لودنين … كنبات هايم ونحسب نجوم الليل ، غير إمتا تولي حلالي وعمارت داري .
– خميسة(حيدات شربيلها وشيرات عليه) :
– قسما بالله وباش كيحلفو العيالات ، الحرات الغرات لي مزغرته عليهم مهم ميات تزغريتة ، ومزال دور بجنابي ، حتى نعرفك مقامي … راه مزال مكتعرفنيش ، وفوت عليك جرتي ولا مايعجبك حال ، والله حتى نضرب ليك الطر بالبندير وسط القبيلة وتجيني قليلة … وسير حسن ليك والله انوصلوها لدار القاضي .
– مسعود (ݣاع المعيور لي عايراتو ، على قلبو بحال الشهد) :
– دار القاضي وحنا مزال مادرنا فطاجين مايتحرق ، ماشي حشومة عليك … بغيت انعرف شنو فيا لي يتعاب ..
– خميسة (تبسمات وبانو سنيها لي بحال الجوهر مستفين) :
– أنا بحالي بحال طاوس ، مقامي مقام حاجة غالية وزينة كنبغي الراجل يكون راجل ، بهيبتو وقصوحية لسانو ، وانت بحالك بحال السلعة الدليلة … مرخص راسك ومهبط من مقامك ، داير بحال كلب السراح ، تباع البهايم وماد لسانو بحال العطشان ..
– مسعود : وليت كنتهان حيت كنبغيك ..
– خميسة (ضارت كتجمع فالحوايج لي نصهم ناشف ونصهم مزال بارد) :
– أنت لي رخصتي راسك وهبطي منو ، ماتبقاش دور بيا مزال … ولا مغايعجبك حال .
– رمات عليها الحايك وهزات دوك الحوايج فالݣفة بلا طويان ، هزات بلغتها من الأرض لبساتها … ضربات فمسعود ومشات ، خلاتو كيتحصر على حبو ليها … ماخلا مدار باش تبغيه ولكن والو … قلبها قصح من الحجر ، شافت حتى هي تنهد تنهيدة طويلة … دار يديه ورا ظهرو وكمل طريقو
________
من ورا الحيط لي كان طريق بين زمان وبين دابا ، صفية دايرة يديها على خدها ومتبعة جداها وهاد شي لي داز قدامها ، عمرها ݣلسات مع جداها ولا عاودات ليها على زمان وعلى شنو دوزات ، وهادي غلطة كبيرة دارتها … حيت مكانتش كتسولها وتحاول تعرف جداها شنو دوزات فصغرها ، العائلة مهمة بزاف نخصصو ولا ساعتين او ساعة ونعطيهم وقتنا ونسمعو ليهم ونعرفو والدينا شنو دوزو وشنو دوزو والديهم .
_________
– وصلات خميسة لدارهم ، دفعات الباب ودخلات كانت مها شمس الضحى ، كتطيب الخبز فأفارنو ..
– خميسة : مي هاني جيت ..
– شمس الضحى (علات فيها راسها) :
– شفتك جيتي بكري ياك لاباس ؟
– خميسة (كتنشر الحوايج لي باردين على واحد السلوم ديال الخشب) :
– والو باس ، غير كترت المشي والمجي .. هزيت قشي وجيت ..
– شمس الضحى :
– جيتي فوقتك ، يلاه تدي لباك غداه وشوية ديال الخبز سخون ..
– خميسة : فين حنة ؟
– شمس الضحى : مشات عند مرات المختار ، الى ساليتي ابنتي سيري دي لباك غداه ايكون جيعان ..
– خميسة : واخا امي ، دابا نيت ..
– هزات خميسة الغدا ، ركبات على حمارها وشدات الطريق عند باها ..
________
– فسوق ، قدام باب واحد الدكان … فيها شي دبيلجات قلال ، ݣالس فدكانتو راجل كبير فالعمر ، الشيب مخلل شعرو ولحيتو … قدامو شي دبالج كيشلل فيهم وكيمسحهم بواحد الكتان … كان ساهي حتى ظلم عليه المحال .
– جعفر : هاواحد السلامو عليكم أشي حمان ..
– حمان (حط داكشي من يديه وتبسم) :
– اهلا اهلا بسي جعفر ، زارتنا البركة ..
– جعفر (عنقو وݣلس) :
– عاش من شافك أسي حمان ، لاباس عليك صحيحة ؟
– حمان : إيوا نحمدو الله ونشكروه ، هاحنا السوق ميت والحال مابقا يعجب ..
– جعفر : أودي كولنا بحال بحال ، السوق طايح بزاف ، كنتمناو غير يبقاو دكاكنا محلولين ومايتسدو شاي ..
– حمان : بيني وبينك اسي جعفر ، كونما دوك البهيمات لي معاونين بيهم على الزمان ،، واهلي يالخبار ..
– خميسة (وقفات عليهم) :
– السلام عليكم ( تحنات على يد جعفر باستها) ..
– خميسة : عمي جعفر لاباس؟
– جعفر : الحمد لله أبنتي وأنت ؟
– خميسة : نحمدوه ونشكروه (باست لباها يدو وراسو) با لاباس ؟
– حمان : الحمد لله ، الغدا جا فوقتو .. سي جعفر مد يديك بسم الله .
– جعفر : لاواه اسي حمان ، يلاه يكفيك انت هداك غداك ..
– خميسة : دوز اعمي جعفر ، راه الطبسيل لي تحط فيه يدو يتحطو عشرة .. هدا راه رزقك دوز ..
– جعفر : ماقلتي عيب أبنتي يابسم الله .
– خميسة : خليت ليكم الراحة هاد الساعة ..
– حمان : سيري يابنتي الله يرضي عليك .
– ركبات خميسة على حمارها ورجعات من طريق لي جابتها ..
_______
– ورا الحيط فين كانت ݣالسة صفية وبديعة ، لي بدا كيديها النعاس ، أما الراجل لي معاهم توسد يديه ونعس … من غير صفية لي بقات كتكمع بغات تكمل مابغاتش تغمض عينيها ولكن مع العيا وهادشي لي داز عليها ، غمضات عينيها وحتى هي نعسات … تسد الحيط ورجع كيف كان كيعلن بلي الليلة الاولى سالات ..
______
– صبح صباح جديد ، خميسة من الفجر مانعسات ولا هدا ليها البال وحفيدتها غايبة على دار ، بقات شحال وهي كتسبح وكتفكر أيام الزمان ، تنهدات تنهيدة طويلة … رجعات حطات راسها على الخدية .. حتى بان ضو الصباح وشمس طلعات ، ناضت دارت عليها واحد الجلابة قديمة ، فوقها واحد ليزار ، شربيلها فرجليها وخرجات من بيتها ..
– الغالية (كتحط الحسوة ، هزات عينيها فمها لي خرجات لابسة فين غادية الله أعلم) :
– مي ، فين غادية ؟
– خميسة : نمشي نشوف بنتي صفية ، الى حلات ليك انت الحسوة انا مغاديش دوز ليا ..
– الغالية (بلهفة) : أنمشي معاك ..
– خميسة : مكاين لاش ..
– الغالية : اويلي أمي ، راها بنتي من كبدتي ، انبقى حاطة يدي على خدي ونغزل فصوف .. انا جايا ، دخلات لبيتها هزات جلابتها وزيفها وتبعات خميسة يقلبو على البندير ..
– فاقت صفية ، عنقها ضارها من ديك النعسة لي كانت ناعسة ، وقفات كتشوف فبديعة مزال ناعسة ..
– صباح الخير ، والخمير .. تبارك الله على الحادݣات … فيقو عليا خلاص يلاه .
– فاق الراجل لي معاهم مخلوع هو وبديعة ، يحسابليها راسها غير كتحلم ..
– عيشة : وحدة تعجن وطيب ، ولوخرا تشطب وتجمع … وأنت عفيتك هاد نهار ، بقيتي فيا قليل الحيلة وصحة … ومابقيتي قاد على والو يا مسكين …. نبغي قبل ماتبرݣ الشمس كولشي يكون واجد ، مع أنا كيشدني جوع وجوعي خايب (ضحكات ضحكة مستفزة وغبرات هي وصوتها) .
– صفية : فين غادي نلقى باش نعجن ونطيب ..؟
– الراجل : أجي ابنتي معايا نوريك … صفية تبعات هاد السيد الطيب ، لي من كلامو وتصرافو باين قلبو طيب .. دخلها لواحد البيت فيه الدقيق والخضرة ، كاع لي تحتاج كاين تما ، هز واحد الشطابة ورعطاها لبديعة باش تجمع ..
– بديعة (كتغبن) : مغاديش نفطرو ؟
– الراجل : أبنتي حنا مغانكلو حتى تاكول هي ، عاد يحق لينا ناكلو ونرتاحو ..
– صفية (مكلماتش بديعة ، حيت هي سباب المصايب … أش داها تهز وتشري داك البندير ) ..
– جبدات صفية القصرية ، حطات فيها الدݣيك وبدات كتعجن وهي ساهية ، علم الله حالت مها وجداها كيف غادي تكون دابا ، تنهدات تنهيدة طويلة ، وهي بالها غير مع قصة جداها تكملها وتشوف شنو غادي يوقع وشنو سر البندير .
– سلات العجينة وبدات كتوجد فالغدا ، أما بديعة جمعات الدنيا كتشطب وتنݣر ، ماعجبهاش الحال … على أخر يامها تولي خدامة عند لي مايدكرو ، مابغات دخليها لعقل ، شطبات وجمعات داك الزبل وجففات ، ماسلات حتى حسات بظهرها غادي يتقسم على جوج ، طاب الغدا وهزات منو صفية شوية حطات ليهم بأمر من عيشة هو والخبز ، وداكشي لي بقا حطاتو ليها عند العتبة ديال الباب ..
– تجمعو على طبلة ب 3 يتقاسمو داكشي لي سخى بيه الله ، عاد رجعات ليهم الروح ..
– صفية (موجهة كلامها لداك الراجل) : عمي واخا نسولك ؟
– الراجل : سولي أبنتي ..
– صفية : كيفاش حتى دخلتي لهاد البندير ؟ حيت علاما حكات ليا جدة بلي البندير سرو ماعارفو حتى واحد ، وإلى مشا حتى تكشف السر مفعولو عاد كيبان ، هادشي لي مابغاش يدخل ليا لراس ..
– الراجل (رجع اللور وحط ظهرو على الحيط ) :
– هادي 18 عام أبنتي ، كنت مزوج وعايش مع مرتي ومع نسيبتي ونسيبي ، واحد الراجل طيب الله يعمر ليه الدار لا هو لا نسيبتي … أنا كنت كنخرج مع الݣافلة الرحال ، وكنمشيو نجيبو السلعة من باقي المدون ، إيوا أبنتي حتى واحد ما كامل الكمال لله سبحانه … كانت فيا طبيعة خايبة بزاااف ، الله ينجي كل واحد منها هي الفضول أبنتي ، كنت فضولي وهذا طبع خايب فيا وهاني كنخلص فيه دابا ..
– صفية دخلها الشك على حد علمها بلي قضية البندير فخبار جداها بوحدها بغات مزال تعرف شنو كاين وشنو واقع ..
– بحالاش اعمي شرح ليا ؟!!
– فجهة اخرى ، وبضبط عند الغالية وخميسة ..
– الغالية (سخفات) : عييييت أمي عييييت ، واش بغيتينا نهبطو حتى لسوق على رجليها ، وزايدون السوق اليوم مكاين انت عارفة كيكون غير نهار التلات ..
– خميسة (ضارت عندها) : ماݣلتها انا لي كبة من شيب ، شوفي ياغادي تزيدي معايا وتسدي عليا فمك ، يارجعي لخيمتكم ختاري وحدة فزوج .
– الغالية (ݣلسات على واحد الصخرة كترتاح) :
– وبلاتي أميمتي غير نرتاحو ، وديك الساعات نكملو الطريق .
– خنزرات فيها خميسة وحتى هي ݣلسات ، الشمس كانت حارة العيالات غاديين جايين، ولي داز كيرمي ليهم السلام ..
– الغالية (تنهدات) : كون عرفت هادشي غادي يوقع ، مكنتش نعاود السر لصفية وديع بيه ..
– خميسة : لي كان كان ودابا ماتنفع ندامة ، هي سمعاتنا كنحكيو ، وانت كلاك لسانك وعاودتي ليها ، كون كدباي عليها ورضيتي كلامنا غير خبير ديال الزمان ، ماكناش ندورو فشموسات ونبريو عليها ..
– الغالية : صافي أمي لي فيا كافيني ، بلاما تزيديني ..
– خميسة : وقفات ) زيدي نكملو طريق قبل لا يشدنا المغرب حتى حنا ..
– الغالية : عندمن انمشيو والسوق خاوي ؟
– خميسة (سهات وتنهدات ) : باك الله يرحمو كان عندو واحد الصابي كيحفظو القرآن ، تبارك الله دابا راه ولا فقيه وحكيم ، انمشيو عندو نعاودو ليه ، باك كان منين ضيق بيه ، كيعاود ليه وهو لي كيعطيه راس الخيط ..وزيدي وبراكة من كترة الملاغة وشد لي نقطع ليك .
– تبعاتها الغالية كتجر فرجليها وعقلها غير مع بنتها وبديعة لي أمانة عندهم .
ـــــــــ_________
– الراجل : مراتي واحد النهار كانت هي ومها مجمعين فالمصرية … وانا كنت عاد داخل من برا ، كنت غايب على دار شهر هكاك ، دخلت بلاما ندير الحس ، إيوا تما سمعت نسيبتي كتعاود لمرتي على شي بندير وعلى شي حكاية ماحكاية .. رجعات بيه الداكرة لور نهار لي سمع نسيبتو ومراتو كيتعاودو ..
///////
– فالمصرية ديال واحد الدار كبيرة ، ݣالسة وكطوي فالحوايج ، دايرة نصاص ديال الدهب ودبالج …
– الغالية : مي راني واقيلة شاكة فراسي حاملة ..
– خميسة (هزات فيها العين) : وباش عرفتيها ..
– الغالية (تبسمات وحشمات ) : حرمان الصلاة كان خاصها تجيني 15 يوم ومزال مجاتنيش ، وكنحس بنفسي مروعة عليا … ومشهية غير كسكسو بالگديد ..
– خميسة : إيوا أبنتي الى كان هادشي بصح ، الله يتبتو فكريشتك أبنتي … ويعطيك وقفة ساهلة ماهلة مافيها عذاب ..
– الغالية : أمين امي أمين ، مغاديش نݣولها لعبد الرحمان ..
– خميسة : وعلاش ؟
– الغالية : نمشي بعدا غدا عند لالة تاجة ، نتأكد واش كاينة شي حمالة ولالا ، وعاد نخبرو بلي كان ..
– خميسة : إن شاء الله أبنتي (رجعات كاتسبح) ..
– الغالية (حطات الحوايج من يديها وتقابلات مع مها) :
– مي بغيت نسولك ؟
– خميسة (مشافتش فيها) : همممم سولي ..
– الغالية : اليوم وانا فسوق ، سمعت واحد الحلايقي … كيبرح ويعاود ، إيوا قلت مافيها باس ، بينما وجد ليا اسي طيب الدقيق نݣلس نتفرح ونسمع للكلام … إيوا بدا كيعاود على واحد المرا كانت هذا زمان ، سميتها عيشة مولات البندير … خميسة حطات التسبيح وشافت فبنتها بإمعان ..
– خميسة : كملي كنسمعك ..
– الغالية : ݣال بلي كانت بنت الشيخ ، وتسحرات وبلي كانت زينة وكان خطبها ولد الشيخ لقمان ، وبلي شي وحدة دارت ليها شيحاجة باش متزوجش بيه …. إيوا وفرقوهم واش بصح هادشي ؟ انا منين سمعت بلي كان ايخطبها شي واحد اسمو لقمان ، تفكرت غير جدي الله يرحمو لقمان ..
– خميسة (سهات وسكتات شحال عاد نطقات) :
– عيشة ، كانت واحد البنت زينة ، السالف والحاجب والعين ، كيف القمرة المضوية … واخا كانت ظريفة وداخلة سوق راسها ، ولكن كانت كتبغي راسها على الناس ، وكانت كتشوف راسها على بنات القبيلة خلاوها ماليها مرا ومحزمة بإبليس واخا هكاك كانت قليلة العرف ، معارفاش بلي داكشي لي دارت ايخرج عليها ..
– الغالية (زادت تقادات فالݣلسة) : اهاه أمي كملي ..
– خميسة : الشيخ مختار كان مشوݣ فالولاد ، مارزقوش ربي بالولاد … ماخلاو طلبة ولا فقهة ، ماخلاو عشوب ولا رقية ولكن ربي مجاوبش ، مراتو بدات تكبر عاد فك ربي حزامها ، رزقهم ربي ببنية … باها كان كيدير ليها بحال الما القليل ، مامخليها مخصوصة من والو ، كتجيها الحاجة حتى لحدا راسها … بدات عيشة كتكبر وكتزيان وكتفتح بحال شي وردة وسط الجنان ، الشعر بحال الليل ، وبياضها بحال الحليب … هي كانت شانتة وحاسة بزينها وخير باها لي غارقة فيه ، عيشة كان حديثها معنى تݣود العمى وتوريه الطريق فظلمة ، داكشي باش كانت عزيزة على كولشي ، ولكن عيشة كانت فيها خصلة خايبة وغير زايدة ، حب النفس أبنتي وشحال خايبة حب النفس ، حب لغيرك لي تحبو راسك وهي مكانش عندها هاد الخصلة ، عيشة كبرات او وصلات لسن زواج ، كالسة فدار باها مادة يديها للحنا كتمنى وكتسنى …
– الغالية : كملي أمي ، مكنشبعش من كلامك ..
– خميسة : حتى لنهار لي ولد الشيخ الكبير لقمان ، طلب يدها لزواج ..
– الغالية : وهي زين والكلام الحلو اللبيب يبغيها أي واحد ..
– خميسة : أبنتي ، حتى زين ماخطاتو لولة … وحتى واحد مخاطي من العيوب وهذا كان حالة عيشة ..
ــــــــــــــــــــــــ
– خميسة : ولد الشيخ كان بحالو بحال قرانو ، وكان معروف بزينو وبرجولتو ، ݣاع بنات القبيلة كانو كيحماقو عليه ، ويتمناو منو غير نظرة ولا كلمة طفي ليهم الجمرة ، وهو قبل مايولي هو شيخ القبيلة كان كيخرج مع العيان ديالو ، وبحال بحال اي شاب كيتكلم وتغزل ببنات القبيلة ، واخر بنت كان دوا معاها ، هي شافية بنت زهور الطيابة لي كانت خدامة عندهم فالقصر ..
– الغالية : وشوف ليك كملي ..
– خميسة : وبطبيعة الحال ، واحد فمقام لقمان مغاديش يتزوج ببنت الطيابة لي عندهم ، منين وصل لسن الزواج وباااه عيا وغادي يتولي هو الحكم ويكون فمقام باه كان خاصو يتزوج بشي وحدة بنت القاع والباع ، لي تكون زينة وتشوف وتسكت … وفهامتها تكون على قدها ، باه ختار ليه بنت الشيخ ، حيت فداك الوقت لقمان ولا سلطان ، ايوا عيشة ماقداتها فرحة عجبها الحال … ومسكينة شافية بغات تحماق وكانت اتلوح راسها فالواد ..
– الغالية : ولكن أمي الزواج راه قسمة ونصيب ، علاش غادي دير هاد الحالة ؟
– خميسة (تنهدات) : أبنتي لقمان الله يسمح ليه كان طايش فصغرو ، وضحك على شافية بالكلام المعسول حتى خدا لي بغا ، ايوا شافية عاودات سرها للمها وهنا زهور كفرات على لقمان وعلى عيشة .
– الغالية : ولكن عيشة مدارت والو ، رزقها جا حتى لعندها واش ترضو مجاتش امي .
– خميسة : عيشة كانت عندها الخادم ديالها ،وكانت كتوصل ليها خبار لقمان، وعارفاه بلي كاين مع شافية … وحلفات حتى تديه ليها ، وفاش خطيها لقمان كل نهار كتمشي جنب الواد ، وتحشي لكلام لشافية وتضحك على حالها ، وبسباب كلامها لي بحال السم كيتخشى فلقلب بحال الخنجر ، كانت اتلوح راسها فالواد وتنهي حياتها غير ربي وقف معاها ، منين عاودات لمها لي كان حلفات حتى تفرق لقمان وعيشة … وختارت الطريق الخايبة وساهلة ، مشات لقبيلة ايت بن داوود ، كانت تما واحد المشعوذة قاطعة يدها من رحمة الله ، طلبات ليها بندير يكون جديد ، ويكون جلدو حر غور ، وداكشي لي كان مشات زهور ورجعات للبلاد وبدات شحال وهي كتقلب ، حتى لقات داك البندير لي كان فقصر السلطان ، شفراتو وخزناتو … حتى لفجر وشدات الطريق ورجعات عند مسحوتة عطاتها البندير ، إيوا داكشي لي كان دارت فيه داكشي لي دارت ورجعات لزهور وكالت ليها بالحرف ترجع البندير للقصر ، وداكشي لي كان رجعات البندير لقصر بحال الى مكاين والو ،،، لقمان قرر يعطي هدية لعيشة ، وختار يعطيها داك البندير لي جاه هدية من عند سلطان قصر مولاي داود ، سلطان قبيلة المرجان ، وهنا عيشة مابقات على حال ، ولقمان مابقا حامل سميتة عيشة ، حيت مسو بجوجهم البندير وصابهم سحورو ، عيشة بقات غادية وكضيع وزينها كيمشي ماخلاو مدارو ماخلاو رقات ولا فقهة او والو ، ولات دايعة فالقبيلة وكتشالي ببنديرها وسالفها مجرجر التراب ..
– الغالية (بقات فيها واخا هكاك) :
– مسكينة ، وشنو وقع من بعد ؟
– خميسة : عيشة بقات على داك الحال ، حتى لقاوها واحد نهار ميتة حدا العوينة ، أما السلطان تبع القرآن حتى ولا بيخير وعلى خير ، تزوج او دار الولاد ، أما زهور ماتت وبناتها هزهم باهم وداهم لواحد القبيلة .
الغالية : والبندير ؟
– خميسة : البندير أبنتي مدفون بين سبع عيون ، وممنوع شي حد يمشي لتم يقيسو ولا يخبش عليه ، وعنداك تعاودي هادشي لراجلك هاد السر خاصو يبقى مخبي ، هو وسر لاخور لي عاودتو ليك .
– الغالية (بقات كتشوف فمها) :
– مي وأنت منين عرفتي هادشي ؟ واش عاوداتو ليك جدة الله يرحمها ؟
– خميسة (تبسمات للغالية) :
– لا عاوداتو ليا جداك مت باك أبنتي .
– الغالية :كانت حاضرة فداك الوقت ؟
– خميسة : لا ، ولكن أبنتي جداك هي مرات السلطان لقمان الله يرحمو لي هو جدك .
– الغالية (خرجات عينيها مامتيقاش ودنيها شنو سمعات ) :
– واش واش جدي لقمان ، هو لي دار هادشي كامل ؟
– خميسة : إيه أبنتي ، وفاش كان على فراش الموت … سيفط عمك هارون يقلب على شافية ، باش يطلب منها السماحة على مدار فيها ، ولكن لقاها ماتت راجلها من بعد موتها جاب المرا لي يقابلو ليه ولادو ومايبقاش وحيد ..
– الغالية : سبحان الله ، كنت نشوف فجدي داك الراجل الحقاني ، لي فمو مكانش فيه كلمة العيب ولا يقدر يأدي .
– خميسة (تنهدات) : الشيطان أبنتي ، وصغر وبنادم كان شانت جدك ، كان عاجبو زينو ومالو ومكانو … إيوا الله يرحمو ويرحمهم جميع .
– الغالية (تنهدات) : آمـــين .
_______ الواقع__________
– ماجا عبد الرحمان فين يكمل كلامو ، حتى كيسمع تنخصيص وبكا صفية لي ݣالسة حداه ..
– عبد الرحمان (ماعرف باش تبلا) : مالك أبنتي ؟ ياكما قلقتك فاش عاودت ليك الحكاية ؟
– بديعة (كتشوف فصفية وهي مفاهمة والو ، عاد كانت فحالة وتبدلات لحال) :
– علاش كتبكي؟
– صفية (موجهة كلامها لعبد الرحمان) :
– وأنت كنتي عارف بلي مراتك الغالية كانت حاملة ؟
– عبد الرحمان (تنهد وسرط ريقو بغصة فحلقو غرغرو عيونو) :
– أه كان فخباري ، وكنت فرحان بزاف … ولكن الطمع والفضول عماني ، ݣلت نمشي نقلب على البندير … ونبيعو الجلد الحر كيكون غالي ، ونستافدو منو ونتهنى من داك المشي والمجي مع الݣافلة .. ولكن ربي كانت عندو كلمة أخرى ، بحت وقلبت ودرت مع الغالية بلي سيمانة وغادي نرجع ، لقيت نبحت حتى لقيت سبع عيون … وبضبط النعت لي قالت نسيبتي لمراتي الغالية ، دوزت يوماين ونهار ثالت كنت ناوي ندير بناقص ، وأنا نلقاه جبدتو وأنا فرحان … وكنردد لقيت الكنز ، حتى كتاب لي كتاب وصرطني البندير ، ومن داك الحين وانا محبوس هنا ..
– صفية (دموعها شلال ) : فضولك وطمعك ، خلاونا نتحرمو منك أبا ..
– عبد الرحمان (بحال الى كبيتي عليه سطل ديال الما بارد ، ماعرف باش تبلا ، مامتيقش شنو كتكول صفية) :
– ك كيفاش أبنتي مافهمتش ؟
– صفية (كتأشر لصدرها ودموعها خانقينها) :
– أنا أنا صفية بنت الغالية ، وحفيدة خميسة مرات ناصر ..
– عبد الرحمان جاتو اللقوة رجليه فشلو عليه ، كيحس بصهد مامتيقش بلي هادي بنتو ، بلي محبوس فهاد البندير مع بنتو لي من دمو او لحمو ، رجليه ماقدش يزيد بيهم ويوقف عندها ، حدو مد ليها يديه وهي بلاما تسنا تماطات ليه وتلاح فصدرو كتبكي ، حنان البو لي كانت محرومة منو هادي 19 سنة ، مشا وخلا مها حاملة بيها … حلات عينيها فجداها وجدها ناصر وفمها ، دارت 5 سنين جدها مات وبقات غير هي ومها وجداها خميسة لي كانت فيها البو وجد وكولشي …
– كانت كتشوف بنات الدوار مع بواتهم وكيبقى فيها الحال ، وفاش كبرات وبدات تعرف عرفات باها بلي من نهار خرج مابقى رجع ، ولكن بقا عندها داك الأمل بلي راه غادي يجي واحد النهار ، وغادي يرجع … وهاهيا لقاتو وفين محبوس فبندير عيشة ..
– عبد الرحمان (كيبكي ، وجهو مسكين تكمش الزمان هدو ، وهاد الحبس لي عاش فيه ، ماقتل ماسرق باش يستاهلو ، ولكن فضولو وطمعو دارهوم ليه ) :
– سمحليا ابنتي سمحيليا ، أنا السباب وانا لي درتها بيدي … دارها ليا الطمع وفضولي ، خليت مك حاملة بيك ، الوقت لي كان خاصني نبقى معاها ونقابلها وتكوني بين يدي ..
– صفية (كتنخصص وكتمسح ليه فدموعو) :
– صافي ابا ماتبكيش ، بنادم كيغلط هادي هي حال الدنيا ، مي عمرها مانساتك كل ليلة تجبد حلابتك وتشمها وترجعها لبلاصتها ، كنا حاسين بلي أترجع شي نهار ، (تبسمات) وانا كنݣول لمن كنشبه صدقت زينة بحالي بحال با .
– عبد الرحمان (باس ليها راسها) : حتى الغالية زينة ، وأنا كنكول لمن شبهات ، فاش شفت خميسة وهي صغيرة تشابهات ليا مع شي حد ، راكي عارفة ابنتي بنادم كبر ، وشوف قلال ماديت ماجبت ..
– (قاطعاتهم بديعة ) : عمي عبد الرحمان ، ولكن عيشة كالت لينا بلي من ورا 10 ديال الليالي نقدرو نخرجو ، كيفاش لي بقيتي مسجون هاد الأيام كلها ، ومارجعاتش بيك لزمان ، وماخرجتيش من هاد الحبس ، وعلاش لي حنا لي تحبسنا وشفنا الزمان ، شنو الفرق بينك وبينا ؟
– قاطعهم صوت عيشة لي كضحك :
– تبارك الله ، الحباب تلاقاو … بغيتي تعرفي علاش تحبستو وعلاش رجعت بيكم لزمان ، وعلاش هاد الشيباني بقا محبوس ، ساهلة ماهلة … حيتاش هو ماشي من دم خميسة ، ماشي بحال صفية من دمها ولحمها ، وانا خاصني دم ولحم خميسة ، وصراحة عجبني هاد الشيباني ونسني وانا قنطانة كنتسنى فخميسة دير شي خطوة وتعاود السر ، الفرق هو هاد الشيباني ، سمع وطمع ، أما انت اصفية من دمها ولحمها وزيد عليها عاودات ليك بفمها ..
– صفية (تقادات فالݣلسة ) : شفتي انت داكشي لي وقع ليك تستاهليه وكثر ، ومزال طاغية حتى من روحك كحلة بحالها بحال قلبك ، أما حنة بزاااف عليك توصليها .
– عيشة (ضحكات ) : واخا دابا نشوفو أبنت عبد الرحمان ، الليل مابقى ليه والو ، كيبان ليا توحشتي جداك وتوحشتي نرجع لزمان (غبر خيالها وضحكتها مزال ملعلعة المكان ) .
– بديعة (شدات على راسها) : بقينا هنا هادي هي أخرتنا .
– صفية (هضرات معاها بواحد النبرة عمرها سمعاتها منها ) :
– أنت بدات غادي تقطعي الحس ، حيت مكاين لي خرج علينا قدك ، قسما بالله ومزال تزيدي الكلام ، حتى نخشي ليك راسك قديك الحفرة لي حداك وأنا علمتك .
– بديعة سكتات مابقاتش دوات ..
– عبد الرحمان : خليها ابنتي ، حشومة .
– صفية : أنت معارفهاش أبا ، انا لي عارفاها هي لي شرات البندير من عند مول البالي ، وانا علمتها ومابغاتش تسمع ليا ، رضات كلام حنة وكلامي غير خرايف .
– عبد الرحمان : مي خميسة باش عرفات سر البندير ؟
– صفية (شافت فيه) : علاش ابا معارفش بلي حتى هي كان عندها ؟
– عبد الرحمان (مافهم والو) : لا حيت انا غير سمعتهم دكرو البندير وقصة عيشة ودخلت عليهم ، تما صافي وقفو الكلام .
– صفية (تنهدات وجاها النعاس) : دابا تشوف كولشي بعينيك أبا ، مدام رجعنا لزمان حنة ، غانعيشو كاع داكشي لي عاشتو وشافتو … توسدات الخدية حداه ونعسات .
– خرجو كاع الناس من جامع لي صلاو العصر ، وخميسة والغالية كيتسناو على برا ، حتى تم خارج راجل يكون فالسبعينات من عمرو ، على وجهو واحد النور ، لحيتو بيضة وراسو مغطياه رزة فصفر ، خارج وهاز واحد التسبيح فيديه حادر راسو .
– خميسة (عيطات ليه ) : سي موحا ..
– موحا (سمع سميتو او وقف ضار) : نعام ، مشات لعندو هي والغالية ، وقف كيشوف فيها هز حجبانو مصدوم .
– موحا (بفرحة) : لالة خميسة ، هادي أنت ؟
– خميسة (حدرات راسها وضحكات) : هي انا ، إيه هدا زمان مابقينا تلاقينا ؟
– موحا : إيـــه من موت المرحوم الله يرحمو … انت لاباس الصحيحة ، الغالية هادي لي معاك ؟
– خميسة : إيه بنتي الغالية … تحنات الغالية باست ليه يديه .
– موحا : الله يرضي عليك ، لالة خميسة غبور هادي أسمحيليا مكنجيش نطل عليك ، راه مرة هنا ومرة فالمدينة .
– خميسة : عارفة بلي المدينة كتلهي ، وكاتنسي لي ماينسى ، الدنيا عامرة بحال عش النحل ، سي موحا قصدناك والمقصود الله .
– موحا : مرحبا لالة خميسة ، نمشيو عندي لدار ، توجد لينا حبيبة واحد البراد دأتاي ونتكلمو على خاطرنا ..
– داكشي لي كان ، مشاو معاه خميسة والغالية لدارو ، رحبات بيهم حبيبة مراتو وفرحات بيهم ، حطات الصينية وأتاي ، وخلاتهم بوحدهم ومشات للكوزينة باش يهضرو على خاطرهم .
– موحا : الله يسمعنا خبار الخير الالة خميسة ، كنسمعك .
– خميسة (تنهدات) :
– منين السر تكشف تكشف وبان انا انعاود ليك أسي موحا .
– خميسة بدات كتعاود كولشي من نهار تعطا ليها البندير ، فيديها وݣاع لي وقع حتى للبارح لي طارت فيه صفية هي وصاحبتها ..
– هادشي لي كاين اسي موحا هانتا سمعتيه .
– موحا سكت وسهى كيفكر :
– بنادم مكايخافش من الله ، قاطعو يدو من الرحمان ، يوصل بيه يأدي بنادم ، هادشي صعيب يتيقوه الحكماء والعقال ، ولكن على حساب قولك عيشة بقات مرهونة فداك البندير ، وباغية تنتاقم منك … حيت انت لي عتقتي ناصر من يديها ، ودابا حبسات وحدة من لحمك ودمك باش ترجع ليك الضربة تانية ومتلية ، شنو كان ݣاليك الفقيه هذا شحال ؟
– خميسة : كال بلي خاص البندير يتغسل 10 ديال المرات ، بالما ديال 7 عيون ، وفاش تكون الݣمرة ضاوية ، 10 دليالي ، كل ليلة يتغسل حتى نكمل 10 ديال المرات .
– موحا (أشر براسو بالايجاب) : بهكا سحر لي دار لعيشة غادي يتبطل ، وهي روحها غادي ترتاح .
– خميسة : هادشي لي كاين .
– موحا : إيوا على هاد الحساب الالة خميسة ، خاصنا نقلبو على البندير ، ونشدو ترحال ل 7 عيون هذا هو الحل لي عندنا باش نقدو نخرجو صفية .
– خميسة : فين انلقاوه أسي موحا ؟
– موحا : شوفي ، انتوما دابا غادي ترجعو لدار ، وأنا غادي نكون عندك غدا إن شاء الله من صباح ، وإن شاء الله مغادي يكون غير الخير .
– خميسة (وقفات) : الله يعلي مقامك ، تربية المرحوم مامشاتش غير هكاك .
– موحا : لهلا يخاشمنا الالة خميسة ، لي دارها الله هي لي غاتكون .
– خميسة : ونعمة بالله .
– أنا فهمو ندادي وهو فتقليع وتادي ، أنا فيه كنبني وهو فيا كيفني .
– انا كنوريه الشمس وهو كيوريني الݣمرة ، الجرح يبرا وكلام العيب صعيب يبرا ، شحال من مريض برا ولي زارو فالمقبرة ، رحم الله من مات وخلا الميدة عامرة بالفتات شري تمضغ كري تبات ، ومايجمعها بالعذاب ويديها الكذاب .
– أنا ضيفكم الظريف ، هنا نفتي وهنا نضيف ونزيد كرضة من الخريف ولي نݣلس معاه على المايدة وماندي منو فايدة رفاقتو غير زايدة .
_____________
– رجعات خميسة هي والغالية لدار ، دايرين رجاهم فالله ومتأملين يكون خير ، وترجع ليهم بنتهم على خير وبيخير .
– دخلات خميسة لدار ، توضات وصلات وركعات وطلبات الله ، تكون حفيدتها على خير وبيخير ، وترجع ليهم سالمة غانمة .
______________
– الليل سدل رواقو ، ونجوم زيناتو والݣمرة ضواتو … صفية موسدة كتف باها وكتسنا الحيط يتحل وترحع تشوف حكاية جداها .. تحرك واحد البرد قاصح ، تحل الحيط ودخل منو واحد الضو قوي ، مبين بيت قديم … تقدات صفية فالݣلسة وعرفات بلي دابا رجعات لزمان حناها .
______________زمان_____________
– فبيت خميسة ، مفرشة زربية او واحد الحنبل ، مع مخيدات ، الرواق (خمية) مغطية سرجم فيه الحديد صغير ، قدام طرف ديال المرايا نصو مهرس واقفة خميسة لابسة قفطان فليموني مع مضمة دهبية ، ماشطة شعرها طالقاه وجمعاتو بزيف فيه الموزون ، هزات الكحة كحلات بيها عينيها ، مع الوشام لي فجبتها كتبان زينة كتسر العيان ، هزات شوية من السواك سوكات بيه ، ورشات شوية من الزهر .
– دخلات عليها مها شمس الضحى :
– سيري يابنتي يا خميسة بغيت ميمونك يتݣعد هاد العام ونشوفك فدار زمانك ياربي الكريم يالي كتبيتها في شان وتصبحها في شان ..
– خميسة : مزال عليا الحال ، بغيت امي نغنيكم ونكسيكم ومن توب الحرير نلبسكم .
– شمس الضحى : الحمد لله حنا لابسين ومكسيين ، شوفي غير قفطانك ابنتي شحال زين .
– خميسة : قفطان مرجانة امي باش ماكسية ، الله يخلف على من جاد ويكتر ولاد الجواد .
– شمس الضحى : عييتيني بنبايزك اهاد البنت ، خرجتي لحناك ملنسيتي فيها والو .
– نباتها ميمونة جدات خميسة :
– ومالها كيجاتك بنتي ، زين وطول والقامة بحال الحمامة .
– شمس الضحى : ماقلنا شاي أمي ميمونة ، انا بغيت انشوفها فدارها ونفرح بنتي بحالي بحال الناس .
– ميمونة : خلي عليك بنتي ، غالية على قلبي … والى مكان هدا لي ايديها حكيم ولا سلطان والله لا عطيتها .
– خميسة (كضحك) :
– مي سلطان ݣاع ، عمرك شفتي سي سلطان كيدي بنت تاجر بسيط ، الله يهديك أمي .
– ميمونة : لاواه أبنتي ، عمرك تݣولي هكاك باش فايتينك بنات القبيلة ، ومرجانة باش فايتاك لي غادي تدي ولدالسلطان لقمان ، علاش هو كان سلطان ياك كان غير شيخ القبيلة ، وماهي حتى بحالك الوجه مرايا والݣفا مقص .
– خميسة : لاواه أمي حشومة عليك ، مرجانة بنت الناس وظريف تستاهل ، وكل واحد كيدي لي مكتاب ليه ولي فرزق .
– شمس الضحى : وسيري أبنتي ماتعطليش على البنت .
– هزات خميسة حايكها ضوراتو على راسها وخرجات ، غادي وكتمختر شحال هادي مافوجات ولا حضرات لشي فرح وهادي هي الوجيبة تدي وتجيب فالكلام مع بنات القبيلة .
– وصلات لدار مرجانة لي كانت كبيرة على دارهم بشحال ، علاش لا وهي بنت اكبر تاجر فالقبيلة ، مرجانة لي واخا مقامها عالي ولكن مأدبة ومصوابة ، وكتبغي الخير لكولشي قلبها بيض ، مافيها لا حقد لا سم ، لي تبغيه لراسها تبغيه لغيرها ، لقات الباب محلول … وصوت الزغاريت والبنادر مالية المكان ، من دخلة داخلة تعلي وتصلي على النبي … حتى كيتلقى ليها مسهوت داير يديه وراه غادي جاي ، غير شافها وقلب وجهو ..
– خميسة(ضحكات عرفاتو مقلق منها) :
– مسهوت ياك لاباس ، شفتك قالب عليا وجهك ؟
– مسهوت (شاف فيها) : ياك انا غير هبيل وغشيم ، ايوا مامعاك كلام ابنتي عمي حمان ..
– خميسة : وصافي أمسهوت لا تزيدش فيه ، تقلق مني انا خميستك الهبيل ..
– مسهوت : ايه ايه كوليني بكلامك وضحكي عليا ..
– خميسة : حادو لداخل ؟
– مسهوت (كيفرنس) : واه ماسمعتيش صوتها لي بحال دعدوع فين واصل ؟
– خميسة ( خرجات فيه عينيها) : اويلي على هاد الكلام ، وراه مك زعمة يالمسخوط ، وهاعلاش كنكولؤك راك بهل بحالك بحال بالعمان الحمورية وقلة الريحة ، حيد من قدامي راه اتخرج ليا العقل .
– دخلات خميسة ، كتغني وتزغرت من الباب ، كولشي بنات القبيلة كانو حاضرات ، لي عندها شي قفطان ديال الحرير جبداتو او لبساتو فرحانة بيه وبراسها ، وهدا حال العويتقات لي مادين يديهم للحنة .. مرجانة كانت لابسة قفطان فالخضر ديال حرير الدودة ، شعرها مديور ليه تلبيهة ظيال الحنة بالعشوب ، مادة يديها او رجليها محنيين بالحنة على شكل بليغة ، مدورين بيها الشمع والحنة ورݣ وسواك ..
– مرجانة : وأخيرا جيتي ، مرحبا بيك الالات البنات ..
– خميسة (حطات حايكها كتضحك) :
– وسمتي سكتي لا يسمعوك بنات القبيلة ، ويقولو هادي غير هبيلة وحفا ليها القرشال ، لي كتقارن بنت حمان التاجر الصغير بينا حنا ..
– (جاوباتها حادة من بعدما سكتات من الغنا) :
– ومالها غلطات ، تبارك الله الزين هو هداك ، ويتمناك اي عزري تكوني مولات دارو ..
– خميسة : ودابا يسمعوك امي حادة ويجريو عليا بالحجر ، واخا انا مادرت لا بيدي لا برجلي السبع متهوم واخا يبات بلا عشا ..
– (أم العروسة) : ودوزي أخميسة حني لمرجانة ، راه حلفات ماتحني يديها ليمنية الما حنيتي ليها ، ومتعرفي أنت تبعيها .
– مرجانة : ماتعرفي يشوفها لوسي ناصر ، ويبغيها وتعجبو ويبغيها ويختار تكون مراتو ، وتولي انت هي السلطانة خميسة .
– خميسة (ضحكات وطنزات) :
– كضحكي عليا يا مرجانة ، السلطان ياخود بنت تاجر حمان ، لالا اختي انا عارفة مقامي وحدودي … كل يبرد اللقمة على قد فمو ويفصل الكسوة على قد كمو … اري ديك الحنة لهنا ، خدات الزلافة وحنات لمرجانة يديها ، أما شي بنات ماعجبهمش الحال كيفاش مرجانة هازة علام خميسة ، واش هوما ماشي زينات ولبيبات ويستاهلو يكونو عيالات السلطان ..
– خميسة : الله يحن عليك ابنت خالتي يامنة ، ويدخلك على خيمتك جديدة مباركة مسعودة ، ويكون قدامك قدام الربح وماشي الخطية ، بالهراري ودراري ، وعمر دموع يعرفو ليك طريق ، نوصيك وصية كوني فاهمة ولبيبة … ومايكونش لسانك سابقك ويݣولو عليك مرا محزمة بإبليس ، وانت عارفة بلي فهامة المرا نقمة … الى هو دوا حلي ودنيك وسمعي ليه ، ومتعطي رايك حتى يسولك عليه ، كوني انت هي البير وغطاه … والى كان هو عمى كوني انت هي عصاه ، ومنحتاجش نوصيك ..
– يامنة (عاجبها الحال) :
– هاباش كايعجبني كلامك وفهامتك ، تبارك الله على سي حمان ولالا شمس الضحى رباو وكبرو وعرفو اش رباو .
– مرجانة : ودابا بغينا خميسة تسمعنا صوتها ..
– خميسة : ولاواه تاني .
– مرجانة : هدا فرحي ومن حقي نتمنى ونتشرط كيف بغيت ، ويلاه سمعينا صوتك الحنين الرزين الحلو لي مايتشبعش منو .
– حادة (لاحت لخميسة البندير ليديها ونطقات ) :
– ويلاه أخميسة ، سمعينا صوتك او ورينا شطارتك .
– خدات خميسة البندير ، وبدات كتطبل وحادة ولي معاها متبعين غناها .
– خميسة : مدي يديك للحنة يامرجانة والحنة من الجنة يا مرجانة ، مدي يديك للحنة يامرجانة … والحنة من الجنة يا مرجانة ..
– حادة : مدي يديك للحنة يا مرجانة ، والحنة من الجنة يا مرجانة ..
– خميسة : الالة مدي يديك مدي للحنة لا ترضي العزيزة عليا ..
– حادة : الالة مدي يديك مدي للحنة لا ترضي يالعزيزة عليا ..
– خميسة : الالة جاو الخطاب يخطبو بالحنة وتمور والورد فصينية
– الالة مدي يديك مدي للحنة لا ترضي يالعزيزة عليا ..
– خميسة : الالة مدي يديك مدي ، الليلة نغني للي عزيز عليا .. الالة مدي يديك مدي للحنة لا ترضي يا العزيزة عليا ..
– بقاو على الغنا ، وبنات القبيلة كيشطحو ويتمايلو نع صوت خميسة ..
– حادة : تبارك الله على خميسة ، علاشما جيتيها تلقايها ، ربي علاش لي ماتخدمي معايا ، تولي تمشي معايا للفراح ..
– مرجانة : عندك الحق الالة حادة ، علاش لي ماتولي تمشي معاها اخميسة ..
– خميسة : كضحكو عليا ودايريني ملاغة بيناتكم ..
– حادة : حاشا يا خميسة ، بالفرحات عليا تكوني معايا ..
– خميسة (كضحك) : إيوا نشوفو ، يحن مولانا ..
_________
– دازت الحنة على خير وبيخير ، والغد غادي يكون هو النهار الكبير ، نهار ديال عرس ولد سي لقمان مولاي هارون بمرجانة ، رجعات خميسة لدار ، من بعدما وعدات مرجانة بلي أتكون حاضرة ناضرة الغد ، أول مرة فحياتها غادي تزور قصر السلطان لقمان .
_________
– صفية حطات راسها وعلى صورة جداها سدات عينيها ونعسات ..
_________
– عيون الناس كلها تنعس ، ولكن عيون الوالدين كاتبقى فايقة ، وهذا حال الغالية ، لي على كبدتها مشوية ، معارفة حالها كيداير واش واحلة ولا ناعسة ولا مكرفصة ، شحال تمنات كون كان راجلها عبد الرحمان مزال كاين ومعاها وبجنبها ، ماعرفاتو حي ولا ميت ماعرفات راسها واش ترملات ولا مزال ، كل ليلة كتكول دروك يدخل مع الباب … ولكن دازو عوام ورجوعو ولا موحال ..
____________
– صباح نهار جديد ، صفية مسكينة هي وبديعة صبحو على نفس الموال ، فيديهم الشطابة وجفاف ، أما خميسة هي والغالية ، ݣلسو يتسناو فالفقيه موحا … حتى جا ودق الباب ، مشاو معاه وشدو الطريق لي مالفة صفية كتݣود فيها الحمار وتنزل لسوق ، خداوها طوالة ، وعينيهم على الارض وجنب الشجر مرابانا يبان ليهم البندير ، مدامو طلع وبان إلا وغادي يكون مليوح فشي قنت ، بقاو على داك الحال حتى أذن الظهر ، دخلو لواحد جامع غير تماك صغير صلاو ، وكملو التقلاب .
– الغالية (نغزات مها) :
– مي واش ماشي هداك حمارنا لي مربوط حدا ديك الشجرة ؟!
– خميسة (دورات وجها هي وموحا ، كيبان ليهم الحمار مربوط عند الشجرة سخفان مسكين وݣالس مابقا ليه جهد يوماين وهو فيه الجوع ماواكل ماشارب ) :
– الله ياربي هو مسكين ، وزعمة مشافو حد ماقرب ليه حد ..
– موحا : بلاتي اودي نجيب ليه شوية ديال الما غير يبل ريقو بعدا ، مشا لجيهة واحد البير كاين تما بعيد غير شوية ماشي بزاف ، دايرينو ناس ديال تما حتى لي شدو العطش يشرب ، خدا الغراف ديال الخشب لي كان محطوط هز الما وتم راجع ، حطو قدام الحمار ، شرب مسكين حتى مابقاش قاد .
– موحا : الغالية بقاي أبنتي أنتي معاه هنا ، انا ولالة خميسة نكملو تقلاب ونرجعو عندك لهنا .
– الغالية : واخا سيرو .
– كمل موحا وخميسة التقلاب او والو ، مالقاوش البندير مكاينش ليه الحس وغابر ليه الأثر ، العصر قرب يأدن وهوما مالقاو والو ، وهنا كان خاصهم يرجعو فحالهم ، حتى لغد ويكملو تقلاب ، واخا موحا دايرها فيد الله ، حيت صعيب الحال تلقى البندير فشي قنت ، غير توكل على الله ويحلها سيدي ربي .
– رجعو لعند الغالية ، وخبروها بلي مالقاو والو ، الغالية مسكينة بقا فيها الحال … وكل نهار بلا بنتها كيدوز عندها بحال عام ، جرو الحمار ورجعو لدار وسي موحا مشا لدارو داير معاهم الغد يجي عندهم فنفس الوقت .
___________
– ضو الݣمرة علا ، ونجوم السما كتبان ملئلئة ، وفالبلاصة ديال ديما ݣالسة بديعة هي وصفية وعبد الرحمان ..
– بديعة : عمري فحياتي نسا هادشي لي وقع ليا ، كانت هانية مهنية ، خدامة ومرتاحة ، كون غـــير قبلت بالفقيه لي خطب فيا ، كون انا دابا مادة يديا للحنة .
– صفية (هزات فيها العين) :
– إيوا اش شدك ، كون تزوجتي ، لاش جايا معايا ولا كنتي بغيتي منين ترجعي ضحكيهم فيا ، تݣولي ليهم راها كدابة وراها عايشة غير فعشة ، وݣاع لي عاودات لينا كذوب فكذوب .
– بديعة (تقرصات ، حيت كلامها فعلا صحيح … صفية من نهار سكانت معاها وهي شاكة تقار راسها مكانت كتجبد حتى واحد ، وحتى كلامها قليل ، وكانت فينما يوصل الوقت ديال ݣليع الزعفران ، تسيفط ليها مها بواطة ديال زعفران والعسل ، واخا هكاك كانت كدوقهم من أي حاجة ، وفاش تقربو من بعضياتهم هي ونجاة وصفية ، بدات كتعاود ليهم على حياتها ، وبلي ساكنين فقصر ، وهادشي مدخل لبديعة لراس حݣرات صفية ، ومتقبلاتش بلي صفية لي خدامة معاهم فالفيرما كتحيد ماطيشة ، يكون عندهم قصر ، اما فاش عاودات ليهم على قضية البندير ، كملات هنا بديعة حلفات حتى تمشي مع صفية ، وتصور ليهم بتيليفونها لي يلاه خداتو فيه كاميرة صغيرة لور ، اعلى قبل تصور لبنات وتوريهم بلي صفية غير كدابة وترجعها شفاية قدام البنات ، ولكن ربي كبير وهاهي كتخلص على قد نيتها) :
– علاش كتݣولي بحال هكا؟
– صفية : انت عارفة وانا عارفة مكاين لاش نبقاو نكترو الكلام ، الى أنت ندمتي حيت جيتي ، أنا ندمت على نهار لي عاشرتك وعطيتك نيتي وعاودت ليك سري ، ندمت لي شاركت معاكم الهضرة وكنت غادية معاكم بنيتية، ولكن مول النية يغلب .
– عبد الرحمان : صافي أبنتي ، حشومة .
– صفية : با أنا لي عارفة أشنو كنݣول ، ولكن هانية سير مع خوك غير بنية يحصل يحصل ، وماحدنا مجموعين هنا ، عفاك اختي غير فوتيني حتى نخرجو من هنا ، وديك الساع كل واحد يشد طريقو .
– بديعة : ماقلتي عيب أصفية ، مايكون غير خاطرك ، دابا تبورضي عليا كيف بغيتي ، حيت كاينة عندكم هانية مكاين باس ، وشهد عليها أعمي شهد .
– صفية : قيلي عليك با وخليه فتيساع ، ماشي هو لي عاشرك أنا لي عاشرتك .. قاطعهم نفس الريح لي جا فالمرة الفايتة ، والضو لي خرج من الحيط عامي ليهم عينيهم ، ومرجعهم لزمان .
___________
– هزات خميسة قفطانها لي كان لونو بحال لون الورد البلدي بارد ، والبلغة لي كان ديال الصم .. تحزمات بمضبمة مطروزة ، وشعرها عطراتو بزهر ، ودارت عليه زيف كان ديال جداها ديال الحرير وحتى مطروز ، حلات واحد الصندوق الصغير وجبدات منو اللوبان الحر دارتو فعنقها ، ودبليج ديال النقرة مدݣوݣ الدݣ الحر ، رمات عليها الحايك ديالها ، وتمات خارجة من بيتها ..
– خميسة : مي وا مي ، ويلاه خلاص .
– خرجات شمس الضحى كتقاد فحايكها ، وميمونة وراها هازة عصا فيديها كتعكز عليها ، مدوزة كحلة فعينيها ومسوكة ودايرة حايكها ، وجوج دبالج ديال نقرة فيديها ، والحنة ..
– ميمونة : مالنا على هاد الغوات ، لا زربة على صلاح … بشوية علينا واه
– خميسة : ومي راه بنات القبيلة ، شفتهم قبيلات مشاو راه بقينا غير حنا ..
– ميمونة : هوك غير لمدودات على ختها ، زربانات تكول هوما لي عريسات الله يتبقي ستر ..
– خميسة (كضحك) : واخا امي ويلاه خلاص … خرجو من الدار وشدو الطريق لدار السلطان ،اما حمان مشا مع جماعة الرجال بكري ، السلطان لقمان عيط على القبيلة كلها علاش لا وهو فرحان بولدو الصغير هارون ، لي لبا ليه رغبتو وتزوج وختار مرجانة ، لي سمعتها تبارك الله سابقاها .
– وصلو الناس قدام قصر السلطان ، لي كان سورو عالي ، وبابو كبير ديال النحاس ، كان محلول لناس … أعوان السلطان واقفين بلباسهم البيض ، الدخلة ديال القصر ، مبهجة وزينة ، مزينها الشجر ونخل وداليات ، وسواري والورد ، وفالوسط كانت خصة كبيرة خارج منها الما ، خميسة ، عمرها شفات بحال هاد الجمال ، لبنات كانو فأبهى حلة علاش لا ، والعرس فيه خوت هارون لي باقي بلا زواج ، ولدو الكبير لي ايتولى العرش مولاي ناصر ، او ولدو المتوسط مولاي الغالي ، وصغير مولاي هارون العريس ، وعاد ولاد عمام العريس ، يعني هادي هي الوجيبة ، باش لبنت لي مزال كتسنى فزهرها او مكتوبها تبان ، ماتعرف تحط عليها عين واحد فولاد سي لقمان .
___________
– فواحد من البيوت ، متوسط فراش زين … نموسية كبيرة ، وخوامي ديال الحرير … واقف بطولتو كيقاد فسلهامو ، تدق الباب وتحل ، ودخل شاب طويل يكون طول منو وكيبان كبر منو ، شعرو رطب مرجعو اللور ولحيتو الطويلة لي زايداه عبة وروجولة ، لابس لباس تقليدي فالكحل ، عينيه الكبار بحال الصقر ، وضحكتو لي بينات على سنان بحال الجوهر ، بصوت رزيق وتقيل نطق :
– مولاي سلطان ، وجدي راسك ولا مزال ؟
_______
– هارون : هاني كنوجد راسي,(تبسم) هاد نهار كبييير بنسبة ليا
– ليلة ليلتك امولاي سلطان مبروووك عليك
-هارون : الله يبارك فييك انااصر , هههههه وهانتا شوف ليك القصر كولو عمر هادشي ماشي غير باش يشوفوني غير انا ,ولكن راه جايين على قبلك تانتا
-ناصر : آش كتقول أخويا الله يهديك ههههههه
-هارون:هههه كنهضر بصح كاع لعويتقات وزوينات دلقبيلا جاو اوا هادي هيا اوجيبة باش تشوف ليك حتى نتايا شي بنت ناس , تكون زينا ,ولبيبة , وفهيمة ,وكريمة ،
-ناصر : هههههههه اخويااا أنا ماشي بحال لحمام ومكتعجبنيش ماكلة دزحام ولي زربو ماتو
-هارون:(تبسم) كيف بغيتيها تكون أخويا
-ناصر: (شاف فيه وهضر برزانة) لبنت لي نبغيها تكون مولات داري ومت عيالي ،نبغي نختارها بلمهل ولي تشوفها عيني على برا ماشي لداخل ، لبنات لي جاو هنا القصر يقدرو يعطيو وجه وبرا وجه،تقدر تشوفها فحلة وتعجبك ولكن على تشوفها على برا متعجبكش وانا لمرا لي نبغيها وتكون تاج راسي وتاج قلبي وتاج عرشي خاص نشوفها على برا باش نعرف علاش مطوية وميكونوش عندها وجوه بزاف
هارون : ختيارك صعيب أخويا ،اوا الله يجيب ليك هاد بنت ناس لي تفهمك وتقدرك وتكسب قلبك وتگلس على عرشك
-ناصر : ختياري ماشي صعيب ولكن حكيم ،مانبغيهاش تكون لفعة تحت تبن وتشوف الجاه والمال وتطغا ،نبغيها تكون حادگة وحنينة وفاهمة باش نلقا معامن نتشاور مانبغيهاش غشيمة نبغيها لبيبة ولي تسمع لكلامي ودير بيه ماشي تلوحو مور ضهرها .. مابقاتش فزين ولكن بقات فلعقل وشنو هاز أما زين لوجه راه كيدبل
-هارون : من ديما ونتا كلامك معقول وفمحلو وكيف كيقولو زين إلا زين لفعال
– ناصر: داكشي لي كاين ،مهم يلاه نهبطو لتحت تعطلنا …
نهبطوو لتحت فلقصر لي كان كولو زينة وضوايات شاعلين كان المنضضر فيه رووعة ،وفواحد جيهة كانت لالة لعروسة گالسة فوق واحد توب فلخضر فوق سداري وطالقين ليها شعرها وفارقينو ليها على جوج ضفرات ومغطين ليها وجها بواحد ليزار ديال لحرير مطروز …
ضايرين بيها حبابها وصحاباتها وناس القبيلة شي فرحان ليها وشي حاسدها وشي كيتمنى يتسكد زهرها ويتعجب بيها مولاي ناصر …
كل وحدة حاطة عنيها على واحد من القصر ،ودايرين فيها الحشمة والوقار …
شوية دخلات من لباب واحد البنت هيا وباها ومن مها باها تاجر كبير دلحرير فقرية أيت بن داوود كاين فقبيلا خراا كلها حرير من ساسها لراسها ومزينة بدبالج ديال دهب ولكن وجها مكيدخلش لخاطر وسميتها #عود_لمسك
____________
نرجعو عند خميسة لي كانت باقا مبهوضة بزينة لي فالقصر ولأجواء ديالو حمقوها بقات كتقلب بعينيها لا علة وعسى تبان ليها لوبانة صاحبتها ،بقات كتقلب حتى بانت ليها وسط مجمع ديال نسا كيضحكو وتقدمات عندها ..
-خميسة : لوبانة فين كنتي اختي عيت منقلب عليك (شافت فلبنات لي كانو تما ) سلام البنات آش خباركم
-لوبانا : هانا اخميسة كنت غير هنا كنتسنا فمولاي سلطان يهبط هوا وسيدي ناصر راه قالو حتى هوا كيقلب على شي بنت لزواج
-خميسة : اوا باينة هاد سي ناصر ايبغي لبنت تكون لحديثها معنا تگود لعما وتوريه طريق فضلمة وتحك ضبرة وتگلب الحجرة تكون شاربة عقلها وتعرف طريق الله هادي هيا لي تجي مع مولاي ناصر وتسمى مرت السلطان
-لوبانا : وخلاص عليا ماتعرفي نعجبو أنا واخا لساني سليط ولكن كلامي حلو نهزو فوق راسي ومتخصو من جيهتي حتى حاجة هههههه ياربي يتسگد سعدي ويختارني أنا
(لوبانا صاحبت خميسة من صغر حنينة ومبهجة وضريفة وغير نية الله لي فقلبها على لسانها مكتعرف تنافق لواحد عندها حقها من زين والعقل ولكن مكتلجمش فمها وديما سابقها )
– خميسة : إن نشاء لله اختي متعرفي الخير فين كااين
وحدة من لبنات كانت كتشوف فخميسة وتقدمات قالت ليها : اوا أخميسة وآش جاية تحضري لعرس صاحبتك ولا جاية حتى نتي تقلبي لعريس راسك ههههههه
-خميسة:(شافت فيها وهضرات برزانة) أنا ماشي سلعة رخيصة باش نقلب فيها لعريس راسي أنا جيت لهنا باش نفرح لعرس صاحبتي وختي
لوبانا : (حاولات تبدل لموضوع )خميسة ياكما نسيتي بلي واعدتي مرجانا بلي اتغني فعرسها ، مامعروفش عليك مكتوفيش بهضرتك عفاااااك غني ليهاا اتفرح بزاف ..
خميسة : غنيت الالة فالحنة وماحضرتيش ..
– لوبانة : وهاديك حنة وهذا فرح ، وبلاما تهربي منك مامفارقين ..
جات حادة كتزرب فلمشية وشدات خميسة فيديها وقالت ليها
حادة : وااالو اخميسة ضروري تسمعينا صوتك وطربينا بيه وتخلي هاد الفرح كولو بهجة
– شافت خميسة بلي كلشي كيطلبها باش تغني تنهدات و خدات خميسة البندير ، تقدمات لعند العروس وبدات كتطبل وحادة ولي معاها متبعين غناها .
– خميسة : مدي يديك للحنة يامرجانة والحنة من الجنة يا مرجانة ، مدي يديك للحنة يامرجانة … والحنة من الجنة يا مرجانة ..
– حادة : مدي يديك للحنة يا مرجانة ، والحنة من الجنة يا مرجانة ..
– خميسة : الالة مدي يديك مدي للحنة لا ترضي العزيزة عليا ..
– حادة : الالة مدي يديك مدي للحنة لا ترضي يالعزيزة عليا ..
– خميسة : الالة جاو الخطاب يخطبو بالحنة وتمور والورد فصينية
– الالة مدي يديك مدي للحنة لا ترضي يالعزيزة عليا ..
– خميسة : الالة مدي يديك مدي ، الليلة نغني للي عزيز عليا .. الالة مدي يديك مدي للحنة لا ترضي يا العزيزة عليا ..
– بقاو على الغنا ، وبنات القبيلة كيشطحو ويتمايلو مع صوت خميسة ..
اراو الحنة وشعلو الشمع لالة مرجانة نجمة كتلمع لالة مرجانة نجمة كتلمع
_____
بقات خميسة كتغني بكل جوارحها وكل لي فلقصر فرحان وغافلة على واحد شخص غير سمع صوتها هز راسو وبقا كيقلب عليها بعينيه وهيا كانت عاطياه بضهر كتشطح مع بنات القبيلة كيبان غير شعرها لمسبسب بلا مايحس لقا راسو كيقرب بشوية باش يشوف شكون مولات هاد صوت الحنين بقا كيتقدم حتى شوية ضارت كاملة لعندو وقف وبقا كيشوووف فيها ويتمعن فوجهااا فضل هاد تأمل جات عندو بنت شابة غير شافها حنات شوية رأسها كتحية احتراما ليه
-عود المسك : سلام مولاي ناصر مبروك عليكم والله يجعل قدام العروسة قدام ربح والله يجعل هاد القصر كولو افراح ومسرات
-ناصر : الله يبارك فيك ألالة شكرا بزاف
-عود المسك : (بصوت حنين ومحلون ) سميتي عود المسك وبلاش من ديك لالة أمولاي
-ناصر : مشرفين عود المسك كنتمنى تكوني مرتاحة وفرحانة
-عود المسك : (بمويوعة )شرف ليا أنني نوقف حداك أمولاي (حنات رأسها وعاود طلعاتو ) ، بلمناسبة أنا با هوا تاجر علال، تاجر ديال لحرير لي كتاخدو منو لحرير أمولاي
-ناصر : اه مشرفين ومرحبا بيكم فلقصر ومرحبا بسي علال وعائلتو ، نخليك دابا عندي شي شغال
_____________
– تحطات الماكلة ، والميدات كلهم عمرو بما لذ وطاب ، الماكلة كانت ماشاء الله بنينة ، ميدة العرسان كانت بوحدها ، مرجانة مزال دايرة ليزار على راسها ، حداها هارون وحداه باه السلطان لقمان ومراتو ، او ولادو الغالي وناصر ، او ولاد عمامو والعائلة ، هز ناصر راسو ومشات عينو نيشان لطبلة لي كانت ݣالسة عليها خميسة ، كيشوف فيها ويدوز يديه على موسطاجو ولحيتو ، عينيه لي كانو كبار مصغرهم وكيتأمل تفاصيلها ، من شعرها لعينيها لكبار لي مزينهم لكحل ، لوشام لي كان بين عينيها وتحت شفايفها لي بحال توت ، خدودها الحومر لي بحال الرمان … نظرات إعجاب لي ماخفاوش على عود المسك ، متبعة عينيه لفين كيشوف وماعجبهاش الحال .
– عود المسك (همسات وحدة كانت ݣالسة حداها) :
– شكون هاديك لي ݣالسة على ديك الطبلة ؟
– أاااه ، هاديك الالة خميسة بنت تاجر حمان ، باها واحد التاجر على قد الحال ، هي من صحابات العروسة ، عاجبها راسها وكولشي مكبر ليها الشان … وهي متيقة راسها وعلى ماسمعت بلي عينيها على شي واحد من ولاد السلطان(ضحكات) مسكينة عند بالها بلي ولاد السلطان أيشوفو فوحدة بحالها ، أش جاب نعالة متقولة لشربيل الصم (كضحك) .
– عود المسك (ضحكات وعاجبها الحال) :
– بحال هاد الشكال ، كنديرهم غير خدم عندي ، كيغسلوني ويلبسوني … وبلاصتهم فالكوزينة ماشي على طبلة مع السياد .
– إيوا بالي ازين الغالي ، وماحدك هنا دوري بسلطان ناصر ، وخليني انا ندور بسي الغالي (تنهدات) ..
_________
– لوبانة : فخبارك واحد اللفعة من قبيلات وهي حاضياك تفولي غير قاتلة ليها روح ..
– خميسة (ماكلفاتش راسها حتى تشوف شكون) :
– حتى انت وانا مالي بشوفتها ماكساتني ماعراتني .
– لوبانة (كتضحك) : خميسة علاش لي ماتولي تخرجي مع حادة ، صوتك زين وحنين وحلو ، يتروا من الكبير وصغير .
– خميسة : انت كيبان ليا هرب ليك العقل ، ومابقيتي تفرقي بين ضحك وصح .
– لوبانة : والله ياخميسة حتى كنهضر معاك من نيتي ، جربي انت مخاسرة والو وتوكلي على الله .
– خميسة (مدات يديها للمرة لي جات باش تغسل ليهم يديهم) :
– من تما لتما يحن الله.
____________
– جا الوقت باش الناس يبداو يمشيو ، خميسة مشات لعند مرجانة ، عنقاتها … جبدات كموسة توبها موبرة فالحمر ، وجبدات منها جوج حوالق ديال النقرة ديال اللويز ، كيبريو .
– خميسة : مبروك عليك ، وكنتمنى الهدية تعجبك واخا ماشي شيحاجة لي هي كثيرة .
– مرجانة (عنقاتها) :
– متقوليش هادشي أخميسة ، بنسبة لي انت من العاطي أحسن هدية .
– خميسة : الله يسعدك ومتنسايش الوصية ، أنا مشيت ..
– مرجانة : عنداك متزورينيش امرجانة ، باب القصر مفتوح ديما فبابك … أنت عارفة بلي صاحبة وحدة لي عندي هي أنت ..
– خميسة : إن شاء الله ، لهلا يحاشم وأنا مشيت .
– مرجانة : بسلامة يالغالية العزيزة .
– عطاتها خميسة بظهر غادية لعند مها وجداها ولوبانة ، ومعاهم حتى حادة كلهم ساكنين فبلاصة وحكة وطريق وحدة هي غادي ديهم ..
– عود المسك : بشوية مكتشوفيش ولا معمية ؟
– خميسة (وقفات هزات فيها عينيها) :
– الى جينا نسولو خاصنا نسولوك انت الالات لبنات ، حيت انت لي دهلتي فيا ماشي أنا .
__________
– عود المسك : جمعي راسك ، راكي كتهضري مع لالاك عود المسك … لزمي حدك وعرفي راسك انت شكون وأنا شكون .
– خميسة(ضحكات) : حاشا الالة مقامي يكون من مقامك ولا ريوس تساوى ، كل برحبتو الالة العيب على الفروج الى طلع لراس الصمعة اما بلارج هاديك هي رحبتو الالة ..
– عود المسك (بغات تبخ الدم) :
– انا دابا بلارج ؟
– خميسة : لا الالة انا لي بلارج ، ماسمعتيش كلامي مزيان ، قلت ليك العيب على الفروج الى طلع لراس الصمعة اما بلارج هاديك هي رحبتو ، والى كنتي كتشوفي راسك انت هي بلارج ، ماعندي منݣول كل واحد وكيشوف مقامو يالالة ..
– عود المسك (ماكرهاتش تقتلها ) :
– أنت خاص يتعاود ليك ترابي ، مامربياش .
– خميسة (ضحكات) :
– لالة بنت سيدي، تحتارم اسمية لي عاطيينها ليها ، اما انا ماشفت لا عود المسك ولا العنبر ، كيبان ليا غير عود القرشال ، لي كنغزلو بيها الصوفة … ومزال هو منو الفايدة والكاينة (طلعاتها ونزلاتها) مجاتش بالقدود ولا بحمورية الخدود ، بحال بلعمان الحمورية وقلة الريحة ، خليت ليك الراحة .. جات تعطيها بظهرها وهي ترجعها ، بيديها هزات يديها حتى لسما بغات تنزل عليها لحنكها ، يد قاصحة شداتها ومخلاتهاش تكمل لي كانت باغة دير .
– جا وقف بين خميسة وبين عود المسك ، لي عينيها حمرين ، على شوية وغادي يطرطق فيها شي عرق ..
– ناصر :
– شكون انت ، لي تهزي راسك على مرا فداري ؟
– عود المسك (كلها كترعد) : م مولاي ر راه هيا لي عايراتني ونقصات مني ..
– ناصر : العافية مكتشعلش بوحدها ، الى مكان شعال العوافي لي يبوخ فيها سمو ، مكتلسعوش بنارها … وانا شفت كولشي وسمعت كولشي ، وبحال هادشي مامقبولش عندي … بحالك بحال ايها ناس هنا ، الى كنتي شان وهمة فداركم ماشي هنا ..
– خميسة (نطقات ورا ظهرو ومشافتش فوجهو) :
– غير خليها امولاي ، سمعي مزيان الالة عود المسك ، سولو الجمل باش كتاكول الشوك ݣاليهم بلسان الحلو ، اللسان الحلو (خلاتهم ومشات ) .
– ناصر دفع عود المسك وضار ، كتبان ليه دارت حايكها على راسها وخرجات من باب القصر .. ضار عند عود المسك خنزر فيها عاطيها بظهر وتبع خميسة ، فباب القصر وقبل لا يخرج وقفو مولاي الغالي ..
– كنت كنقلب عليك ..
– ناصر (عينيه على برا) :
– شنو واقع ؟
الغالي : با بغاك .
– ناصر (بانت ليه خميسة صافي خرجات ومشات الفرصة لي يتبعها ويعتادر ليها على شنو دات معاها عود المسك ضاعت منو ، شكون هي وفين ساكنة ماعرفش اول مرة غادي يشوفها هي هاد الليلة ) .
– واخا أنا جاي .
_______________
– لوبانة : أش كانت كتݣوليك هاديك خيتي ؟
– خميسة : لي ݣالتو راه خدات جوابو ..
– حادة : خميسة راه هضرت مع حناك ومك عليك ، هوما مشافو حتى عيب باش تولي تخرجي معايا ..
– شمس الضحى : باك أبنتي ، عندو الحركة عيانة هاد الأيام ، وكونماشي دوك البهيمات ، كون هزنا الما ومانلقاو حتى عشا ليلة ، مافيها باس ابنتي ، والخدمة ماشي عيب ..
– خميسة (سكتات وسهات فحالة باها ، لي الحال عندو بدا كيرجع ، ومابقا كيصور غير ݣروش قليلة تنهدات وهزات راسها فحادة) :
– غادي نهبط لسوق ، ونشوف شي بندير يكون مزيان ولحلا يحاشمنا .
_____________
#القصر
– قدام سرجم كبير .. كان واقف داير يديه ورا ظهرو ومقابل السما ونجومها ، مرة مرة كيجيه وجها قدام عينيه ، وكلامها لي كلو رزانة وتباتة .. ما حاولات حتى تشوف فيه ولا تهز فيه العين ، تبسم بلاما يحس وتنهد تنهيدة طويلة ، تدق الباب ودخل خوه مولاي الغالي .
– الغالي : كنت عارفك مزال مانعستي .
– ناصر (ضار عندو مبسم) :
– مزال مجانيش النعاس ..
– الغالي (ݣلس وتقابل معاه) :
– ياك لاباس ؟ شنو شاغل بالك .. ياكما شر وحدة خطفات عقلك وقلبك .
– ناصر (تنهد وݣلس على طرف النموسية كيفكر ويحك فلحيتو) :
– لا ماشي هادشي ، غير مشا عقلي مع داكشي لي كان وقع لهارون هذا شحال ..
– الغالي (شاف فخوه مزيان مانساش داكشي لي داز على خوه) :
– ماتفكرش فداكشي ، الحمد لله بقدرة الله هارون تفك .. وهاهو دابا لقا البنت لي يبغيها وتخطف عقلو .
– ناصر : عقلتي على كلام الحكيم وشنو ݣال ؟
– الغالي (وقف) :
– خوي راسك من داك الكلام ، مايصدقوه لا حكماء ولا عقال ، داكشي مشا وتدفن … ومايمكنش يرجع مكاينش شي واحد لي يقدر يهبش عليه وينبش .
– ناصر : ويلى طلع وبان ، أتكون يانوبتي يانوبتك .
– الغالي : با دار دنب هذا زمان ، وربي كيسامح وكيغفر وزايدون ماعندو حتى ذنب فداكشي لي وقع لديك المرا .
– ناصر (غوبش) :
– مندرقوش الشمس بالغربال ، كونما ضحك على بنت الخدامة مكانتش غادي دير داكشي ليه ولا لديك السيدة ، خلاتها حماقت حتى ماتت .
– الغالي :
– حنا معارفين والو اناصر ، حنا غير سمعنا ربي بوحدو لي عالي وعلم ، وهو لي عارف شنو كان وقع ،، شحال من مظلوم مات وشحال من ظالم بايت بلا نعاس ، قول الله وأعلم .. ونعس براكة من تخمام .
– خرج الغالي ، وخلا ناصر ساهي .. رجع راسو للور وحطو على المخدة ، وصورتها لي جات فبالو عليها غمض عيونو ونعس .
________________
– من بعدما حيدات حايكها وحوايج الحضور ، حطات راسها على الخدية كطلب الله يسر ليها ، ويرزقها من عندو باش تعيش دارهم مزيان ومايحتاجو حتى حاجة … مابغاتش تبقى مكسية بحوايج صحاباتها ، المكسي بديال الناس عريان ، وهكا كتحس … بغات كسوتها تكون من فلوسها ، تفصل وتخيك على دوقها بلاما يشيرو عليها اهل القبيلة ،ويݣولو بنت حمان مكسية بكسوة مرجانة ولا ختها ، ماشي نقص منهم وماشي غرور منها ، ولكن كلام الناس كيضر وكيهرس الراس .
________________
– تسد حيط العجب هكا سماتو صفية ، حيت وراه فهاد الايام لي ݣلسات ، شافت منو العجب … توسدات نفس المخدة لي كتنعس عليها ، وستسلمات للعيا ديال النهار وفراجة الليل .
– أما بديعة ، منين حطات راسها على المخدة وهي كتخمم وكدور فسينتا ، وتسول راسها … واش كانت غالطة فحياتها ، واش فعايلها وتصرفاتها هوما السباب حتى كيهربو منها الناس العزاز ؟..
– خافيين على مولات البندير لي دفناتهم فقاعو وخلاتهم تحت جناحها ورحمتها ، وعلى السباب حتى خلاتهم هنا ، سباب الحقيقي ، إيه هي فعلا بغات تنتاقم من خميسة لي بعدات عليها السلطان ناصر ، وحراراتو من يديها ، ماخلاتش نارها الطفا وتبرد ، ولكن كاين سباب أخور … بغات ترتاح ترتاح وتحرر روحها من هاد بندير العجب لي سكانت فيه هادي سينين وسينين .
___________
– وصل النهار الرابع ، والى وصل الليل اتكون الليلة الرابعة ومغايبقا قدامهم غير ستة ديال الليالي .. فاقت الغالية وجدات الحسوة … وخميسة مزال فبيتها ، كتشوف فحيوطو وسواريه ، ففراشو لي شهد على اجمل حب … سلطان قلبها ناصر ، هكا كانت مسمياه ، خلات الصندوق وجبدات منو الخنجر والكمية ديالو وسلهامو كتشم فيهم … حسات بغصة فحلقها ودمعة سخونة نزلتو من عينيها ، حب نقي عاشتو معاه … كان هو القلب الكبير والصدر الحنين ،، فينما دوخ بيها تلقاه معاها واقف … واخا كانت لبيبة ودكية ولكن كان كيوجها ، والى غلطات كيفيقها ، بحال حب الزمان مكاينش ، قليل حب الزمان النقي راجل مايفرق جنب مراتو واخا يكون عندو 100 عام ، مايݣولش ليها كلمة العيب كيكبر بيها ويحتارمها ومايخصرش معاها الهضرة ، مايقللش منها وكيخاف عليها ويا ويلها تبان للغريب ، ولا طرف من داتها يشوفو شي حد اخور ، كتنوض القيامة ، المرا ديال زكان كيبانو فيها غير العينين ، مكتعرفها علاش مطوية متعرفها غليضة ولا رقيبة ، تشها غير تشوفها كيدايرة ، اما الى قللتي عليها العفة تهز الحجرة وتفلقك لراس ، كانت المرا غالية وتاج فوق راس … دابا تبدل الحال او ولات المرا كتعري كتر متغطي ،… مابقاش الراجل كيتمنى شوفة منها ولا يكون ملهوف عليها ، كدوز قدامو بشوفة وحدة ليها كيعرفها واش غليضة ولا رقيقة ، واش بيضة ولا سمرا ولا كولشي باين ، وتجي تكلم يقوليك الزمان تبدل ودابا عصر العولمة وتكنولوجيا ، انت متخلف ومزال راجع لور ، الحشمة ورزانة وتباتة رجعات عندهم تخلف وجهل ، المرا هي لي تكون بشانها ومرشانها ، تكون بعزها متجيبش على راسها الذل ولا ترضاه هادي هي المرا الحرة الغرة ، وهاد الكلام خميسة كانت ظل تقري بيه حفيدتها عزها تعزك ديما كوني بعزك ومعزوزك الحاصول الله يدير شي تاويل ديال الخير ويخرجنا من دار العيب بلا عيب .
– تنهدات خميسة ومسحات دموعها رجعات دوك الحوايج لقلب الصندوق وخرجات عند الغالية ، تلوح لقمة لفمها ويتسناو فموحا ، على وعسى ربي يشوف من جيهتهم ويلقاو البندير لي قلب حياتهم سفاها على علاها .
_____________
– موحا كيعيط قدام باب الدار :
– مالين الدار ا مالين الدار .. خرجات الغالية او وراها خميسة ..
– الغالية : سير موحا ، مرحبا دخل .
– موحا : لاواه جيت غير نݣوليكم واحد جوج كلمات وغادي نمشي ..
– خميسة : سي موحا دخل ، مقاداش نوقف رجليا كيضروني ، لي بغيتي تݣولو ݣولو لداخل ، أنت ماشي غريب ولا براني انت راه ولد هاد الدار ، سبقاتو وهو وراها ݣلسو فالمصرية جميع حتى نطق موحا ..
– لالة خميسة ، عقلتي فاش عاودتي ليا على البندير ، وݣلتيلي بلي خاص يدوزو 10 ديال الليالي وتكون الݣمرة مفتحة ؟
– خميسة : أياه عقلت شكون لي يسهى ولا ينسى على حاجة بحال هادي ..
– موحا : وهنا الالة خميسة فين غلطنا ، مدام البندير مفعولو رجع ولعنتو بانت ، إلا وخاصنا نقلبو عليه فليل ، يكون ضو الݣمرة باين ، منقلبوش عليه فعز النهار وشمس كتهرس الحجر .
– خميسة : عندك الصح ، انا هادشي مافكرتش فيه … مدام مكيرجعهم لزمان حتى الݣمرة اتعلي وتبان ، إلا وحتى هو مكايظهر ويبان عليه الأمان حتى ليل ، هادي فلتات ليا .
– موحا : داكشي لي فكرت فيه ، حنا طريق السوق مشينا وجينا فيها جوج مرات ، ولقينا الحمار وحس البندير مكاينش ، إذا الالة خميسة البندير مكايبان حتى ليل ..
– خميسة : بصح ، نهار لي تلاقيت مع بياع البالي وخديتو من عندو ، كان جوايه المغرب الشمس كانت غربات ، وخا الليل ماراحش والݣمرة مزال باهتة ، ولكن مكانش ضو النهار وشمس قاسحة .
– الغالية : وشنو المعمول دابا اسي موحا ؟
– موحا : خاصنا ابنتي ، نخرجو فليل ونقلبو على البندير ، نديو معانا الشمع باش نضويو او عندي نيت واحد لامبة فدار حتى هي نديوها معانا ..
– الغالية : كاين حتى واحد الپيل كانت جابتو صفية معاها من المدينة ..
– موحا (وقف) : صافي مزيان ، نتلاقاو من ورا صلاة العشا إن شاء الله ، لهلا يحاشمنا ، خفنا الا نعيو معانا لالة خميسة وهي مرا كبيرة .
– خميسة : فكر أفراسك انت ، اما انا مزال ندك وندردك فراس الجبال مع المعيز والغزال .
– ضحك موحا وݣال :
– ولهلا يخطي علينا صحة الالة خميسة ، ويزيدك من عندو انا مشيت ..
– خرج موحا من عندهم وخميسة والغالية ، ݣلسو كيخمو ويفكرو كيفاش يفكرو حريرتهم .. النهار غادي وكيتناص ، والشمس غادة وكتهرب ، خلات وراها سما حمرة صافية … من داز المغرب ، والغالية لبسات جلابتها وكتسنى وتمنى هاد الخرجة يجعل ربي فيها الخير ، من ورا صلاة العشا بضبط ، جا موحا وخرجو بثلاثة ليهم محملين بجرات ديال الما وبشمع ولامبة والپيل ، كولهم ثقة وإيمان بالله بلي يلقاو البندير ..
____________
– بحال كل ليلة ، وهادي هي ليلة الرابعة ليهم فقاع البندير ، من ورا ماعيوا بشغال والخدمة على عيشة ، ݣلسو لأرض كيتسناو فحيط العجب يتحل ويكملو الحكاية ، وماهي الى ثواني قليلة ، بحال كل ليلة هب الريح وبان نور وتحل ..
____________
– من بعدما قامت خميسة بشغال للدار وسالات ، عجنات وطيبات ، وصل العصر صلات وهزات قفتها وقصدات السوق ، موراضها تقلب على بندير يكون زين وصحيح وسماع ..
______________
#فالقصر
– خارج ناصر من من بيت نعاسو ، حس بدوخة وعينيه كيتراقصو الغمة على قلبو ، حالو خلاه يشد فالحيط ويغمض عينيه ويوقف ، خرج الغالي من بيتو ولمحو ، جا عندو كيجري ..
– الغالي : ناصر ياك لاباس مالك ؟
– ناصر(من بعد مدة حل عينيه ونطق) :
– ماعرفتش ، حاس حاس براسي ماشي مزيان ، وبحال الى شي حاجة بيا غاتوقع ..
– فسوق ، خميسة واقفة عند مالين الجلد هازة بندير فيديها كتقيس فيه وطبل تشوفو واش سماع ولالا ؟
– خميسة : سي جعفر اش هادشي ؟ زعمة ماشي من عوايدك … هاد البنادر مافيهم حس ولا صوت ، وحتى جلد ديالهم مرخي ..
– جعفر : ايوا أبنتي هادي هي السلعة لي بقات ، حتى انت ماجيتيشاي فالوقت لي كانت جات فيه السلعة ، ماعليك غير تصبري حتى لشهر جاي ، ادخل سلعة مليحة .
– خميسة ( حطات داك البندير ) :
– لاواه أسي جعفر ، زربانة واحد الشوية … المهم خليت ليك الراحة والله يجيب ليك التيسير .
– جعفر : أمين ابنتي .
– خميسة خرجات من المحال ، كتقلب على مول البالي لي مالفة كتاخود عندو ، هو تبارك الله كتكون عندو سلعة زينة … ومكتكونش فسوق ، ولكن هاد السبت مكاينش … عيات التقلب وتݣول ماقلبات أو والو ، مالقاتش داكشي لي بغات وعلاياش كتقلب … ݣالت تݣلس تحت الشجرة حتى يأدن العصر مارابانا يجي مول البالي وتاخود لي بغات ، وداكشي لي كان … مشات تحت الشجرة لي كانت راخية ظلها وݣلسات ، جبدات طرف ديال الخيز كان فالݣفة ديالها وسدات بيه جوعها .
_______________
– فالقصر ، وفبيت ناصر متكي والحكيم عند راسو ..
– لقمان (والقلق على وجهو) : أمضرا ؟
– الحكيم : مكاين حتى حاجة كتخوف امولاي ، غير ضغط نزل ليه شوية ..
– الغالي : زعمة مكاين حتى حاجة أخرى؟
– الحكيم : لا مكاين والو ، غير يرتاح وغدا أيولي على خير ..
– خلصو لقمان ومشا بحالو ، القلق باين على وجهم وخصوصا لقمان .. خلى معاه خوتو وخرج ، تبعو الغالي ..
– الغالي : با مالك ياك لاباس ؟ شفت حالك ماعجبنيش ؟!!.
– لقمان ( وقف داير يدو ورا ظهرو وكيفكر) :
– بحال هكا وقع لخوك هارون ، عقلتي ولا نفكرك ؟
– الغالي (كيتفكر وفعلا كلام باه كان على صواب) :
– الغالي : با هادي غير صدفة ماعندك مناس تخاف ، غير ريح بالك داكشي راه مات هدا زمان ..
– لقمان ( تنهد تنهيدة طويلة) :
– كنتمنى ، كنتمنى أولدي .
– خلاه لقمان واقف ومشا .
______________
– أدن العصر … هزات خميسة حايكها ورجعات لسوق ، بقات شحال وهي كتسنى ومول البالي مبان ليه أثار ، قررات ترجع وتݣولها لحادة ، باش حتى الى كان شي فرح تعطيها شي بندير الى شايط عندها ، الى بغات تاخود واحد خاصها على سوق الماجي عاد تقدر تلقى شي واحد كيف بغات هي ..
– بحال هاد الاجواء الدنيا دغية كتخوى ،كيكون البرد والشتا … الشمس بدات كتغرب والظلمة بدات كطيح ، حدا جنب الواد جاي راجل فالخمسينات من عمرو ، جار كروسة بحمارها … فجأة الحمار وقف ، وحلف لا هو يزيد او يتحرك … بحال الى رجلو وحلات ليه ..
– زيد يهديك الله يا هاد الخليقة ، واش انا عيان وجاي جارك من القبيلة لوخرا باش توقف ليا هنا ، راه والله مابقات ليا صحة معاك … كيبان ليا خاصك تبدل بواحد صغر منك وصح عليك ، اما الى بقيت كنتعافر معاك هنا … غادي تولي كل نوبة ديرها ليا ..
– حمارو حلف لا يتحرك وحتى هو تعصب ومابقى عاجبو حال ، هز واحد اللمبة فيدو وقربها لرجلين الحمار ، كيبانو ليه وحلو مسكين فالغيس ومقادرش يحركهم .. هنا السيد حط ديك لامبة و كيحاول يحفر باش يحيد رجلين الحمار ، خدا حجرة راسها مقلم وبدا كيحفر بيها ويحرك فرج الحمار يحفر ويحرك فرجلين الحمار ، حتى قدر يخرج رجلين بهيمتو وتحرك ليه ، يلاه باغي يتحرك حتى لفت إنتباهو شي حاجة مدفونة … بعد حمرو او كروستو ورجع لداكشي ، كمل الحفير وجبد لي كان مدفون ومخبي كيقلب فيه بين يديه فرحان وعينيه كيبريو ، هاد انهار نهار ديال زهرو ، ومو داعيا ليه ، ودنيا ضاحكة ليه ..
______________
– شمس الضحى :
– وتعطلات هادي ، ومامالقاش ليها .. باها مابقا ليه والو ويجي وهي مزال مادخلات ولاواه هادشي بزاف ..
– ميمونة :
– أري ليا عكازي نوض نبري على بنتي ، عنداك تكون طرات ليها شيحاجة ؟
– شمس الضحى :
– الله يحفظها ياربي ماهو فالها ، شوية الى مجات انوض نقلب عليها ..
– ميمونة : الله يدير شي تاويل ديال الخير ..
______________
– خميسة ضروها رجليها عيات بالمشية وبالوݣيف ، البرد تحرك ونقيط ديال الشتا بدا ، كتمنى غير توصل لدار قبل لا تدركها الشتا وأجى مايوصلها لدار .
– زربات فالمشية وحايكها على راسها ، حتى كيبان ليها جاي ..
– خميسة (تبسمات) :
– عمي محمود ، الله ياعمي فين كنتي غاطس ، عييت نبري عليك ونتسناك ، وتݣول واش بنتي ولا بان ليا ظلك ؟!..
– محمود : أبنتي كنت فالقبيلة لي حدانا إيوا دركني العصر تما ، وهاد الخليقة وقفات ليا فطريق ، ماقدات لا توخر ولا تقدم ، بقيت نتجابد معاها يلاه يلاه قدرات تحرك ، وهانتي تشوفي أبنتي ، المغرب هدا والحال مغيم وكيبان ليا غادي تشدني شتا قبل مانوصل لدار ..
– خميسة : وعمي يلاه يلاه تزصل لدار ، الله يديك فنجا ..
– محمود : أمين أبنتي ، وأنت لاش بغيتيني خاصك شيحاجة ، يلاه لقيتيني جبت شي سلعة زينة ومليحة .
– خميسة : ماشي دابا اعمي ، مجاتش نشدك دابا وانت يلاه خاص توصل لاواه ..
– محمود : عارفة معزتك ومقدارك عندي أبنتي ، واخا تكون الشتا خيط من سما ، وتوقفي على عمك محمود تلقايني .
– خميسة :
– عمي محمود كنت كنقلب على شي بندير ، يكون صحيح ومتين ، وكيسمع ..
– محمود (كيفكر ) : وهو الصراحة أبنتي ماعنديش ، ولكن شوفي زهرك وميمونك شنو جاب ليك ، باش تعرفي سعدك وقدامك قدام الربح ، خشا يدو فسلة ديال السلعة لي كانت على ظهر الحمار ، وجبد منها بندير باينة فيه قديييم ومصورة فيه يد ديال الحنة ..
– محمود : فاش كنت جاي ، وقف ليا حماري فطريق او وحلات ليه رجليه فالغيس ، بقيت كنحفر حتى كتبان ليا شيحاجة مردومة ، بقيت كنحفر حتى لقيت هاد البندير .
– خميسة ( كضحك) :
– أويلي اعمي محمود ، راه باينة فيه قديم ولاحوه ماليه ، واش كاين شي بندير جديد كيلوحوه ماليه ، وتلقاه تحت الغيس ، لاواه اعمي تلقى حتى جلد ديالو رشد ضربة وحدة يݣرع ..
– محمود : لاواه ابنتي ، أنا لي كنعرف فالجلد ، وجلد لي مغلف بيه هاد البندير جلد حر وزين … وعندو أعوام أبنتي ، ومهما طال الزمان عمرو مايبلا ولا يخسر ، هاكي جربيه و ردي عليا ، الى ماعجبك مكاين باس أش ݣلتي ؟
______________
– شمس الضحى : لالا ، وهادشي بزاف ، البرد تحرك والشتا قربات تصب انا غادي نحرج نشوف هاد البنت فين تعطلات ، مامالفاش ليها ، عارفة باها غير كيصلي العشا فجامع وكيجي .
– ميمونة : انا جايا معاك .
– شمس الضحى : لاواه امي اخليك ، انمشي ونرجع .
– لبسات شمس الضحى حايكها وبلغتها فرجليها ، وخرجات تشوف خميسة واش جايا فطريق ولا شنو واقع ليها ..
______________
– خدات خميسة من عند محمود البندير ، كتشوف فيه وتقلب فيه ، خشات صبعها فتقبة لي فجنب ولي لوخرا ، ضربات بيها جوج ضربات … تحرك واحد البرد كيطير ، ورعدات دوات كتخلع ، اما البرق طرطق مزين السما بنورو .. مخلي محمود وخميسة قفزو من بلاصتهم ، عارفين بلي مغاتكمل دقيقة وتصب الشتا ..
– محمود : امضرا كيف جاك ، وبالي ابنتي قبل لا دركني الشتا ..
– خميسة : ماعندي مانكول اعمي محمود ، بندير زين ومتين ، شحال تخليه ليا اعمي ..
– محمود : 20 ݣرش
– خميسة : ولاواه أعمي ، 20 ݣرش وانت عارف الحال ، انعطيك 10 ديال الݣروش ..
– محمود : شوفي انخليه ليك ب 15 ݣرش ، عطيني 10 دابا وخمسة دوزيهم ليا السبت الجاي لسوق أش ݣلتي ؟
– خميسة (جبدات كموسة من حزام الحايك ) :
– ماقلتي عيب اعمي ، هافلوسك الله يخر والله يعاونك ..
– محمود : الله يسهل عليك أبنتي ..
– خميسة : أمين أعمي ، تحركات خميسة وفيدها البندير غادي وكتجري ونقيطات الشتا كيصبو عليها ، ماعرفاتش راسها علاش وقفات وضارت وراها حسات بحال شي تابعها ، نعلات شيطان ، وكملات طريقها حتى كتبان ليها مها جايا ، وقفات معاها كتبرر تعطالها حتى لهاد الوقيتة ..
– شمس الضحى : الهضرة ماشي هنا ، حتى لدار زيدي قبل لا يجي باك هادي هي رجليه سربي ، مجات فين تكمل كلامها حتى دوات الرعدة وشتا صباط خيط من السما ..
– على هاد المنظر تخطف الضو من الحيط ورجع تسد وبحال كل ليلة ، صفية توسدات الخدية لي جنب باها او نعسات … أما خميسة والغالية وموحا ، رجعو لدار ويديهم خاوية عياو يقلبو حتى رجليهم طابو ومالقاو والو ، خاب ظنهم ورجعو لدار ، على أمل الغد بليل تاني يلقاو شي راس الخيط لي يوصلهم للبندير ..
____________
– صبح نهار جديد
– بمدينة تارودانت ، فواحد الدار لي كانت بحال شكل ديال رياض ، وقفات طوموبيل على شكل من نوع مرسيدس قدام باب دار ، خرج منها واحد الشاب تكون فاول الثلاثينات من عمرو ، ملامحو زوينة وكيبان عليه الوقار والهبة ، اللحية مزينة وجهو ، لابس فوقية وداير ساعة رياضية فيديه ، سد باب الطوموبيل ، ونزل من الباب اللوراني واحد القفة كبيرة عامرة بتقدية ، رجع سد الباب … هز السوارت وحل باب ديك الدار … من الداخل دايرة بحال شكل رياض وفعلا هذا راه رياض .. الخصة فوسط الدار ، وفيها الفوق وتحت وكترت البيوت .. مع الدخلة عيط .
– الواليدة الواليدة ..
– جاوبو صوت من الداخل :
– أنا فالكوزينة .، مشا نيشان للكوزينة ، كانت واقفة واحد المرة بطابلية ، تكون فالخمسين من عمرها ، نور على وجها وتبسيمتها كدخل الخاطر .
– أنت كتيعط وعارفني غادي نكون فالكوزينة.
– (باس ليها راسها) : فين مشاو لبنات ؟
– (تنهدات) : واولدي حفصة راها قارية ، أسية عندها ستاج كاينة غير أنا ..
– وفين مشات مرات عمي وعيالات ولادها ؟
– مرات عمك مشات تشوف والديها ودات معاها عريساتها ، بحالي انا لي مزال مابغاش يسعل الله وتجيب ليا شي عروسة لدار ..
– الواليدة : لدينا عاوتاني الله يهديك ، انمشي نشوف مي ونجي ، جدي مكاينش ؟ فدار حيت بانت ليا دنيا ساقلة ؟!
– لا خرج صباح هو وباك ، بغاو يشوفو شي ارض ماعرفتش داكشي ديالهم مكنفهمش فيه انا .
– واخا انشوف مي ونجي نعاونك .. خرج من عندها ومشا نيشان لواحد الباب ، لي كان محلول وخمية بيضة رقيقة مغطياه .. قبل لا يدخل عيط هو الأول ..
– مي واش ندخل ..
– وبااز مزال عاد كتشاور .
– تبسم وحيد ديك الخمية ودخل ، البيت كان كبير تبارك الله ، سقفو كلو بالݣبص ، ونص فالحيط كلو زليج ، وضاير كلو بصدادر ملمطين ، بتوب بيض وفيه الذهبي والخضر بالموبرا ، دوك تواب الزينين لي كانو شحال هذا ، الزربية كانت فالبيج والخضر ، سداري واحد لي كان مختالف ، كان محدور وحتى هو فيه نفس التلميط ولكن لي زايد عليه ، هو الهيدورة لي مفرشة فوقو ، فوق منو ݣالسة واحد المرة فتمانينات من عمرها ، شادة تسبيح ولابسة قفطان ديال حرير الدودة ، وراسها مغطياه بخمار فالبيض ، نور على وجها لي واخا تكماش كيبان زين ، عزيناتها دايرة فيهم كحلة ، رجليها مغطيين صبع الاخر مباينش بتقاشر لي لابسة .
– مي الله يقبل(باس ليها راسها) ..
– أميييين اولدي ، فين تعطلتي ؟
– دزت للجمعية هي لولة ، كانت عندي واحد الندوة وراها دزت للجامع صليت وجبت تقدية وجيت ..
– الله يرضي عليك أحبيبي ..
– أمين ياربي .
– ماعرفتيش فين مشا الواليد وبا ، سولت الواليدة دابا ݣالت ليا خرجو ..
– دورات وجها ماعجبها حال) خرجو يشوفو شي أرض يمكن ..
– مالك امي شفتك ماشي هي هاديك ، باك لاباس ؟
– ياك لاباس امي مالك ، ياكما تخاصمتي مع با تاني ؟
– باك كونما اولدي شبت كون وامشيت انا وياها لدار القاضي ..
– اويلي وعلاش ياك لاباس ؟ الحمد لله كتبانو ليا بيخير ، ولدتو وليداتكم وعندكم حفايدكم شنو واقع ؟
– أنت معارف والو اولدي أخليها على الله وصافي ..
– وراه نيت مابقيت فاهم والو ، عاودي ليا ياك انا ولدك لقمان لي كتبغيه ، وكتخبي عليه والو ، ياك ألوبانة ديالي الفنة الغزالة ..
– لوبانة (ضحكات وضرباتو لكتفو بيدياتها المكمشين لي فيهم الحنة) :
– احيانة اولدي شحال قدي نعاود ونهضر ، وباك مغانݣول فيه حتى عيب ، فعلا كايبغيكم وبغاني ولكن أولدي باك دار واحد الحاجة خايبة ومزال لدابا كنحاول معاه وحرام واش قلبو باغي يلين ..
– لقمان : وانا دابا انبقى هنا حتى تعاودي ليا ..
– لوبانة (تنهدات) :
– فخبارك اولدي بلي باك عندو جوج خوت ؟
– لقمان (بإستغراب) :
– واهداي عليا ، ياك عندو غير عم الواليد هارون الله يرحمو ..
– لوبانة : ألا ، عندو جدك عندو جوج ، كان عندو الغالي جدك كان هو الوسطاني أولدي وهارون الصغير كان هو وجدك مفاوتين بعام ، وعاد كان ناصر هو الكبير مالكبير غير الله سبحانه ..
– لقمان (مافهم والو اول مرة يعرف هادشي) :
– أول مرة غادي نعرف هادشي ، وعلاش خباها علينا ؟
– إيوا جدك لي مكايبغيش يهضر على هادشي ، حيت قاطع اللغا مع خوه زمان هدا ، غير جينا اولدي حنا وهزينا رحيلنا وجينا لهنا خلينا حبابنا وناسنا ، الله يسامح لي كان حيلة وسباب .
– لقمان : وشكون لي فرتك الشمل وخلاهم يتفارقو ؟
– لوبانة : العيالات اولدي العيالات ، ديرها فرجال وترجاها وديرها فنسا ولا تنساها ، قالو لسم باش كتقتل ݣاليهم بتقالة أولدي .
– لقمان : وعاودي ليا اش وقع بتفصيل اميمتي ، ماتنساي والو ، راه كيبان ليا قلبك هاز ماهز الجبل على ظهرو ..
– لوبانة (غرغرو عينيها لي ولاو صغار وكمشين بدموع ) :
– بعدني اولدي على دارنا فين كبرت وتربيت ، بعدني على حبابي وعلى صاحبتي وختي لي واخا كانت كبر مني ، عمرها نقصات مني ولا من سلاطت لساني ، كنا مكنتفارقوش ، خميسة ختي فرقوني عليها الله يسمح ليهم ، جدك كان بو ودينا ، ولعبات ليه بعقلو مرات خوه إيه ..
– لقمان : وعلاش هو دري صغير لي تلعب ليه بعقلو ، وزايدون اش بينو وبينها مرات خوه عليه غير بتقار والإحترام ، وصلو هوما حتى لهدرة ولكلام وزديان السلوكة ؟
– أولدي ديك ساعات بكري ، كنا تلاتة ديال الصحابات ، انا با كان على قد الحال انا وخميسة ، ومرجانة كان باها تاجر تبارك الله بخيرهم ، إيوا اوليدي وكنتي تلاقانا فأي مجمع حاضرين ، أشمنك يا ضحك ويا قوافي … غير ݣولها وضحك عليها ، إيوا مرجانة سهل عليها الله ، وتزوجات هارون ولد عمي لقمان الله يرحمو ياربي فهاد النهار .
– لقمان : داكشي باش سميتوني عليه ؟
– لوبانة (حتات على عكازها بغات تخبطو بيه) :
– حنة دابا واش فتعاويد ولا فسمية لبوك ، واش بغيتيني نعطيك بهاد العكاز تاني ؟
– لقمان (كيضحك) : صافي امي صافي كملي كنسمعك .
– لوبانة : والله يالحمار ديال بوك ، تبقى تقطع فيا بحال داك المنشار ، حتى نوض نبرد فيك غدايد داك شارف ديال جدك ، لي كبر ومزال ماباغي يحشم ..
– لقمان(حابس الضحكة غير بزز) :
– صافي واخا مغايكون غير خاطرك ، والله لا هضرت مزال غير كملي ..
– لوبانة(حطات العكز كتخنزر) :
– المهم هي هاديك تخطبات مرجانة لهارون خو جدك ، وفرحنا الصراحة وماقداتنا فرحة ، حضرنا ليها انا حضرت غير للعرس الحنة ماقديت نجي ، كانت غير خميسة ، فرحات ليها وغنات ليها وشطحات ، وماخلات مدارت … إيوا اوليدي كاين واحد النوع ، غير كيدوق الجاه والمال كيتبدل وهادشي لي وقع لمرجانة .
– لقمان : ياك هي مامحتاجاش ، باها تاجر ومسك عليهم الله ، زعمة مغاديش تكون مشتاقة ، راه كيقوليك ياويلك من المشتاق إلى داق ، وهي كيما ݣلتي ليا ماعندهم وماخصهم ..
– لوبانة : واخا هكاك اوليدي ، مرجانة طغات … كنا فالايام اللولة كانزوروها انا وخميسة ، كترحب بينا ومتخلي ماتحط ، ولكن غير دازو دوك شهراين لولة السيدة تبدلات ، مرة كتجي تشوفنا مرة كتݣول لخدم يݣولو لينا بلي مكاينة ، وهي راه كاينة ، شوية بشوية بدات كتنقص منا … حيت هي زعمة ولات تلبس الحرير ، ولا عندها الذهب ولوبان ، ولاو عندها الخدمات وحنا الله كريم ، وحتى حنا اولدي سدينا رجلينا عندنا … سبحان لي بيتها في شان ويصبحها في شان .
– لقمان : ناري سبحان الله ، لهاد الدرجة بنادم كيتبدل ؟
– لوبانة : أياااه اولدي ، بنادم من برا دهب ومن داخل حديدة مصدية .
– لقمان : وشنو وقع امي من بعد ؟
– لوبانة : فداك الوقت جدك كان شافني عجبتو وبغاني ، وصراحة ديال الله عمي الله يرحمو وخالتي بغاو واخا كان مقامهم غير مقامي ، ولكن بغاوني ولكن مرجانة ماعجبهاش الحال ، وبقات على هارون ويلي خوك باغي يبهدل بينا ، وباغي يتزوج وحدة باها حمال ، بقات تحفر وتحفر ولكن ماصورات والو ، جدك الله يرحمو ݣاليهم هي لي بغيت وضار فخوه وتزوجنا ، وعشت معاهم فالقصر … كانت خميسة كتجي عندي ، ايوا اوليدي هنا خميسة كانت كتجي عندي ، ومرجانة كانت كتحاول تعمرني عليها ، ولكن ماقداتش النفوس البيضة اوليدي عمرها مكتكحال واخا تحشيها فالحموم وتحك ليها الفاخر ..
– قاطعاتهم مليكة أم لقمان :
– هادي هي غادي نجي نعاونك ..
– لقمان : أسمحي ليا الواليدة ، انا غير نسالي مع مي ونجي عندك ..
– مليكة : خالتي شربتي دواك ؟
– لوبانة : أه ابنتي ، الله يرضي عليك .. خلاتهم مليكة ورجعات للكوزينة .
– لقمان : كملي أمي ..
– لوبانة (تنهدات) :
– إيوا أولدي ، خو جدك ناصر هو الكبير … بغا خميسة ، اش غانݣوليك اولدي خليني من هاد الحب ديال هاد الجيل ، مافيه لا ملحة لا سر ، إيه لي دوزو بجوج مايعلم بيه غير الله ، ومايتيق بيه لي بعقلو ، هاديك قصة بوحدها أوليدي من بعد ونعاودها ليك ، إيوا ناض عمي لقمان عجباتو ليه وخطبها من عند عمي حمان الله يرحمو ويواليه برحمة الله ، إيوا هنا مرجانة غادي تشعل فيها العافية … وندمات علاش ماتزوجات هي بناصر .
– لقمان (ضحك بصدمة) :
– وايلي لهاد درجة ، الحماق هذا وخرجان العقل .
– لوبانة : واياااه أوليدي ، خرجان العقل وسكتي ، حيتاش كيشتي ، ناصر كان هو الولد الكبير ، وفاش مرض عمي لقمان هو لي ولا سلطان ، ومتسرطاتش ليها علاش ، خميسة بنت حمان لي كانت ماتكشاب ماتعلام ، ياخودها سلطان بقدو وقامتو ، وهي لي باها تاجر معروف تاخود غير خوه الصغير منو ..
– لقمان : وراه كل واحد وشنو كتهز ليه مغرفتو ، وخميسة هذاك هو رزقها ..
– لوبانة : ايوا اوليدي معامن تهضر ، قلت العقل القلب معمي وعما حتى لعين ، والله ينجيك من عمى القلب اوليدي ، اما عمى العين ليه الدوا ، مرحانة أوليدي ، ماوقفاتش هنا … وبدات كتعمر جدك على ناصر وبدات تزدي فسلوكة وتخلوض ، اما فاش مات عني لقمان مسكين ، هنا زادت وبدات تخلوض بين الخوت … وناضت بلا حشمة ، ݣالت لجدك بلي خوه ناصر حاول يقلل الحيا والعفة عليها … وجدك دابز مع خوه مخاصمة كبيرة ، وهزني وهز راسو وجينا لهنا ، ومن داك الوقت اولدي عمرو مزال مارجع ، حتى لنهار لي ساق فيه الخبار بلي خوه مات ، مشا دار الواجب ورجع بحالو .
– لقمان :
– وديك مرجانة اش وقع معاها ؟
– لوبانة :
– كانت بغات الولاد بريق ناشف ، مجابش ليها الله .. ماخلات فقها ماخلات موشعودين الله يسترنا ياربي ، وكانو يعطيوها فالعشوب ، ظل اوليدي تخلط وتشرب او والو ، وداكشي لي كانت كتشرب اوليدي ، دار ليها المرض الخايب … وداك الوقت مكانش بحال هوكاكينا الطب تطور ، بقات على داك الحال وكل نهار كدبال ، وخميسة بنت الأصل اوليدي بقات مقابلاها ، حتى دا مول الأمانة أمانتو … وعمك مسكين هارون واخا كانت ماتسواش كان كيبغيها بزاااف ، وماصبرش على فراقها ، وراها بشي 5 سنين هكاك حتى هو مات مسكين .
– لا حول ولا قوة إلا بالله ، وجدي مالو على هادشي وهاد عمي ناصر خلا شي ولاد ؟
– لوبانة : داك الوقت أوليدي فاش مشا يعزي خميسة فناصر ، ݣاليا بلي عندها شي بنت ..
– لقمان : وأنت مامشيتيش معاه ؟
– لوبانة : علاش هو خلاني ، وهادشي لي فاقصني وقاتلني ، بغيت نمشي نشوف صاحبتي … ونصيل معاها الرحم ، توحشتها أعباد الله ، 50 عام اولدي ماشتها 50 عام عند باك خرجت من القصر وهو فكرشي ، 50 عام توحشتها وتوحشت حتيتها ، فرقني مع دوارنا ومع حبابي ، بغيت انشوفها قبل مايدي مول الامانة أمانتو ، الله ياخود فيه الحق .
– لقمان (باس ليها راسها) :
– متدعيش عليه امي ، راه حتى شيطان وهاديك خيتي الله يرحمها ويسمح ليها ، لي عمرات ليه راشو ودخلات بين الخوت وفرتكات ليهم الشمل ..
– لوبانة :
– غير الى كان عمى مكايشوفش قدامو ، ومعارفهاش شنو كتسوى … خلا خوتو لي تربا وكبر معاها وتاق بلفعة محزمة بأبليس ..
– لقمان :
– مي كتيقي فيا ياك ؟
– لوبانة :
– كون اولدي مكنتيق فيك ، كاعما نعاود ليك هادشي ..
– لقمان :
– أنا غادي نديك اميمتي ، أتهناي ونعسي على جنب الراحة ، اناوياك انديرو واحد الخطة مزيانة ، والى بغا با يتبعنا مرحبا مابغاش هو يعرف ..
– لوبانة(ضحكات وضحكتها واخا كبرات مزال زينة) :
– شبهتي ليا اوليدي ، حتى انا كانو فيا تحريميات … وكيفاش ادير ليها وشنو غادي نݣولو ليهم ؟
– لقمان :
– انا سيمانة جايا غادي ناخود كونجي ، غادي نݣولو ليهم بلي عندي غراض فأݣادير وغادي نديك معايا تفوجي شوية ..
– لوبانة : والى جدك ݣاليك ديوني معاكم ؟
– لقمان : لاواه مغاديش يݣول أمي ، كنعرف جدي مزيان انا ، واخا هكاك مابقاش قاد على طريق طويلة ، أنت غير تيقي فيا ، ياك بعدا عاقلة على فين جات الدار ؟
– لوبانة : علاش لا اوليدي ، واخا عمري لحݣتها ولكن كان كيديني نشوف دارنا وخوتي ..
– لقمان : إيوا يالالة مزيان ، انا نيت تمنيت نشوف تالوين ، ونشوف فين كنتي عايشة الواحد هو لي يزور بلادو فين كبرو جدودو ، يشوف أصلو وفصلو وهادي هي الوجيبة اميمتي .
– لوبانة : سير أوليدي الله يرضي عليك ، انا راه كنݣولها لمليكة كنݣوليها لقمان هو لي فولادك ..
– لقمان (كيضحك) :
– اح عليك امي ، وأسية وحفصة ساك ضلي تخاصمي على الواليدة باش ماتشقيهمش ؟
– لوبانة(عوجات فمها) :
– أحيت كيبقاو فيا مع القرايا ، اما هادوك واحد الفريفرات ، يظلو خاشيين وجهم فداك المشقوف ، مايݣلسو معانا مايشبعونا حتى كلام الله يستر على جيل كيداير .
– لقمان(وقف) :
– انا انمشي نعاون الواليدة فالكوزينة ، تكاي اميمتي رتاحي .
– لوبانة : سير اوليدي يا لقمان ،بغيتك عمرك ماتخيب ، ويجيب ليك ربي شي نقرة فاش يغبر النحاسك ، ويرقك من فظلو وحسانو ياربي الكريم (تكات كتقاد فقفطانها ، هزات تسبيح حداها كتسبح ) الله ياربي ، الله أكبر الله أكبر ..
– خلاها لقمان ، ورض الخامية كيف كانت ومشا للكوزينة عند مو يعاونها .
– لقمان هو حفيد لوبانة الكبير من ولدها سي محمد تابعاه أسية وعاد حفصة ، وعاد عندها ولدها أحمد او ولدها عبد الكبير ، هادو حتى هوما مزوجين وعندهم وليدات ، كلهم ساكنين فدار وحدة ، كان هذا هو الشرط ديال الغالي باهم ، يتزوجو ويبقاو معاه فدار مايتفرقوش ، وحتى الى دا مول الأمانة امانتو ، شرطو يبقاو مجموعين ومايتفرقوش ، بنسبة ليه هو العائلة مهمة ، داكشي باش شرط على ولادو يبقاو مجموعين وعمرهم يتفرقو ، مايفرقهم لا غيار ولا ورث .
#يتبع
شاركنا رأيك في هذا الفصل 🌹