الفصل 1

🔸الموسم الأول : ميدنايت

– كتسمع ديما الحاجة الغلط فالمكان الغلط ، ماتردداتش واخا ݣاع داكشي لي سمعات وداز على ودنيها ، مداتهاش فيه ، داكشي لي باغية دير ولي كانت ناوية ، هادشي لي سمعاتو مخلاهاش تراجع ، جوج خطوات كانت واقفة قدام باب ديپو ، عاقدة غوباشتها وطالع ليها واحد الدم مكتشوفش قدامها ، ركلات الباب برجلها او وقفات كضرب فيها ريحة الدخاخن ديال الحشيش، ريحة الشراب كتكوخ ، وصوت الستاتي صمك ليها ودنيها ، مع السكرة مأترة عليه ماعرف باش تبلى ، كيحقق فيها واش هي ولا ماشي هي، كان هو وراس الحربة ، والرقاص ديالو كينش ليهم على الفاخر ديال الشيشة ، هالݣارو ، هالحشيش هاشراب وزايدينها بشيشة ، شكون بحالهم فرحانين بفلوسها ، كان كيحاول يوقف وهو كيتمايل ولا بحال الخنونة(بصوت تقيل) :

– ح ح حبيبة ، ش شنو كديري ه هنا ، أ(مجا فين يكملها حتى كانت قدامو ، مابقاتش كاتشوف قدامها ، ماعرفات شنو كدير ، لي كتعرف هو هاد الغدار لي قدامها ضحك عليها، عينيها كيشوفو فيه ، ويدها مشات للقرعة ديال الشراب لي كانت قدامها ، هزاتها نزلات عليه بيها لراسو ، طيحاتو خلات راسو كلو دمايات ، غفلها راس الحربة ، الراس الكبيرة ، مول الراي والشوار ، واخا كان حتى هو سكران ، ولكن ماشي بحال الغدار المنونخ، جرها من شعرها بجهد، ماتبان ليها غير جنوي لي محطوطة على طبلة ، هزاتها خشاتها ليه فجنبو، بكترت الحر ، طلق منها شاد فجنبو وطاح ، الرقاص منين شاف داك المنظر ، لاح لي فيديه وهرب ، لا حتى هو تبالي بيه ، بدم بارد دفلات عليهم بجوج ، حلفات متنزل دمعة وحدة، عطاتهم بظهر وتمات خارجة ، شوية وقفات بحال إلى تفكرات شيحاجة ، رجعات بخطوات سريعة ، وهزات واحد البريكة ديال النحاس منقوشة، خشاتها فجيب تجاكيط لي لابسة، شافت فدوك للجوج لي طايحين ٱخر شوفة ، وخرجات مخلية الباب محلول من وراها ….

#قبل_5_أشهر

#الدار_البيضاء

حلات باب الدار، عاكفة راسها بزيف حياتي ودايرة طابلية ، حطات السطل وشطابة ، خصلات قلال من شعرها ليكان فلون العسلي خارجين من تحت الزيف ، لون البشرة ديالها كان عسلي بحال شعرها ، عينيها الكبار كتبان فيهم واحد الشراسة، وشفايفها كيبانو عليهم الحزم والقوة ..

– هزات داك السطل وبدات تكب فالما وضرب بشطابة ، سمعات صوت لي كتندم حتى كتلاقى بمولاتو ، خاصها ساعة وعاد تفك معاها :

– واا كيدايرة اهاد البنت كيبقى باك شوية ؟

– (بضحكة صفرة ) :

– زوهرة ، بااا غير قيليه عليك شتي والله مايصلاح ليك ، شفتي كاع دوك الفلوس لي كتجيبي من الحمام ايطب فيهم فالقمر ، أشوفي غيرو والله ..

زوهرة (ماعجبهاش الحال ) :

– وسرو نيت ، لي دفن شبابو عليك ، فالاخر تكولي عليه هاد الهضرة جيل قيمش، مايحشمم مايريمش ..

– هزات ديك الشطابة فوجها :

– أ ااا جيل قيمش ، فوتيني الله يرحم باك راه جنية طالعة ليا لسطح وعندي مايدار ، أنا وبا وانت اشر حرق شطاتك ، وزوينة هادي ، سيري يلاه توصلي ، تريكة كيدايرة مقابلين اتبرݣيگ بقاليك ابا دزتي من راجل محجوبة ، بقا ليك هو ، وسيري الى عندك شي شغل قضيه ، جاها صوت من سرجم لي قبالتها :

– أمالك أشامة ياك لاباس ؟

– هزات فيها عينيها :

– هانتي تشوفي أمي جمعة ، بنادم حاضي اتبرݣيݣ فهاد الدرب الله يجعل السلامة ، فينما دوز تسول على با ، وغير مقابلاه ودور بيه ، سلات منهم بقا ليها غير هو ، زوهرة حدرات راسها ودردبات بحال الكليبة لدارها ..

– جمعة :

– أساعفي أبنيتي الله يعطيك الرضى، الزوهرة عارفاها مكتسكتش ، ولكن واخا هكاك راه قلبها بيض، صفى من الحليب ..

– شامة :

– أحيانا امي جمعة أشمن حليب، علاش لي قلبو بيض ، كيخطف الرجال لعيالاتهم ، أنت مزال غشيمة ..

جمعة :

– وراه اوقفها السيد على دار ديالها بغات تكريها ، وناضو الناس الله يستر شادين فيها النميمة ، وخرجو فيها العجب ..

شامة :

– علاش زوهرة عندها دار ديال الكرا؟

جمعة :

– أيااه علاش مافخباركش ؟! عندها دار كتكريها..

شامة(بإستغراب) :

– ومالها خدامة فالحمام، مالها ماتݣلس الأرض ..

جمعة :

– إيوا أبنتي والفات الحمام، وداك الهيت ديال العيالات ، وبندام حط عليها الباطل أكتبان ليك هكاك ..

شامة(تنهدات) :

– إيوا الله يخرجنا من دار العيب بلا عيب ..

جمعة :

– أمين ، ݣولي ليا إيمتا أيخرج عماد ولد مليكة؟

شامة :

– انسالي ونمشي نسولها ، هاد المرة كاعما مشيت نطل عليه ، كالت ليا هاد الجلسة الأخرة أيشوفو واش يحكمو عليه بالبراءة ..

جمعة :

– اغير نزلو عليه الباطل بغيت ربي يفرق ليهم الجلدة على العظم ..

شامة :

– توريه ليا راه عشيري هداك ، انا لي عارفاه نزلو عليه الباطل بغيت ليهم الغراق من عندي أنا الله ياخود فيهم الحق، (قاطعها صوت للعياط ) :

– مي جمعة با كيعيط نخليك هاد الساعة، هزات سطلها وشطابتها دخلات ورضات الباب …

– دخلات الشطابة وسطل لطواليط ،سدات الباب ومسحات رجليها فجفاف عاد دخلات لدار لداخل ..

– نعام ابابا مالك ؟

– جاوبها واحد السيد كالس ، داير نضيضرات ضايرين صغار ديال الشوف، يكون فستينات من عمرو، شعرو بيم الرمادي والكحل ، بحال أنشتاين كيشبه ليه ، كيشوف فيها بشوفات بريئة ..

– واشانت فينما خرجتي خاصك تجمعي مع ديك جمعة؟

شامة :

– با بديتي تاني ، واش نخل المرا حشومة ، وزايدون هادوك جيرانا هوما لي كنلقاو، ماشي بحال فاميلتنا الزينة ، حتى واحد مكايسول فينا حتى بتيليفون ..

– الكبيدة الحبيبة ..

– وقفات كتشوف فيه بنص عين :

– الحاج علي ، اجيني نيشان لطريق وشتي والله ماعندي الريال ..

علي (كيصغر فعينيه ويتبلحس) :

– والله أبنتي حتى غادي نربح ، انوليو لاباس علينا ..

شامة(خلاتو ودخلات الكوزينة) :

– مامرة ماجوج كتگولها ليا ، وماكتربح حتى وزة اخسران الفلوس ، الله يهديك ابا دير عقلك اويلي على غدايدي، ولكن ماشي انت السباب ، داك راس تيمومة ديال الناجم لي بلاك ، بغيت ليه دقت مي لي مشات فعز شبابها ..

علي(بدا كيدمع) :

– إيييييه كون بقات ليا فوزية مسيكينة، كاعما تكرفصي عليا بحال هكا ..

– خرجات من الكوزينة مخرجة عينيها ، مصدومة فيه، شافها وحدر راسو كيدور فعينيه :

– انا با با كنتكرفص عليك ، غير حيت نصحتك وليت نتكرفص عليك ، وا والله ابا لا درتيها بيا ، بقا دور فعويناتك بلعاني باش نعطيك ، وراه ماعنديش ، مزال ماتخلصتش لا انا لا لبنات ، وخليني أبا نحط الغدا ناكلو ، نمشي راه عندي مايدار …

– (عوج سيفتو) :

– معيط ليك الحاج مول الفارم تاني ؟

شامة( من الكوزينة) :

– واشنو ندير ، كاين شي حل أخور ، داكشي لي كتشد من لانتريت وخلصتي مكافيش، بعدا فلوسو كنسدو بيها واحد الباب ..

علي :

– وعنداك الصݣعة لا تحصلي شي نهار أودني منك ..

شامة :

– ماعندي منحصل اكون هاني ، تدق الباب

شامة :

– با شوف شكون ..

علي :

– مايكون أداك راس طارو ديال ولد خالتك ..

شامة :

– ويلي با حشومة ، خلي عليك الدري مسكين ، مشا باها حل الباب وفعلا كان ولد خالتها ..

علي :

– الله يستر ماعندك شغل، ديما جاي وقت الماكلة ..

– ياك أعمي ياك ، وانا كنكول زعمة نطل عليكم ..

– شامة خرجات من الكوزينة هازة طاجين حطاتو :

– ݣلس أيوسف زعمة راه عارف عمك ، اتديها فيه ..

– بدا علي كينݣر ، تجمعو على الطبلة ، تغداو ، هزات شامة الطبلة عاونها يوسف ..

– يوسف :

– شفت عريس الغفلة واقف مع هدى ..

شامة(هزات حجبانها وعقدات غوباشتها) :

– شكون هدى، هدى الباطرونة ؟

يوسف(دور وجهو) :

– علاش كاين من غيرها فدرب، كانو واقفين حدا نجاة الكوافورة ..

شامة :

– ولد لحرام ، وانا كنسوني على بوه مكايجاوبنيش ، لقاني دابا مامسالياش، من بعد ..

يوسف :

– غادية لفيرما تاني ..

شامة (كتغسل الماعن) :

– بحال إلى عندي شي حل

يوسف :

– وختي حاولي تقلبي من جديد ، اويلي أصاحبتي ، ماقرياتش وشادين بوسطات واعرين ، وانت ياحسرة جايبة الباك بنقطة واعرة ، و خريجة المعهد العالي لتسيير والإقتصاد ، وخدامة فمعمل ..

شامة(ضارت كتخنزر فيه) :

– واش انت مضروب بفردي خاوي، اتبقى كل ماجيتي تنݣر عليا بهاد جوج كلمات ، على اساس أنا لقيت الباديل ، وفيييق وعيق البريق فيق ، (أشرات لراسها) كتشوفني مزيان ولالا ، واش تلى مشيت لشي شركة بحال ماهوكا ايقبلوني ، وخاصني اقل حاجة نخسر على راسي واحد المليون الى بغيت نخدم ولا ندوز استاج ، ذتي واخا نكون واخدة الإجازة وماعرفت فين واصلة بقرايتي ، الى مكان المظهر غلاب والله لا ضربت فيها ضربة ، وبلاتي كيجاوك بنات المعمل المهم كنجيبها من عرق كتافي ، ماشي كنمشي نعطي قاعي لي يسوى ومايسواش ، وندخل الحرام على با ..

يوسف :

– ياربي العفو هضرنا معاك ندمتينا ..

شامة :

– إيوا ربط تلقى ماطلق، وهني الشعب ..

#أمريكا

#نيويورك

#المقر

– دخل لبيرو وجهو كلو مجروح ، يدو مهزوزة لعند عنقو ، وعلامات الأسف باينين على وجهو ..

– للأسف الشكوك ديالنا فمحلها، كان واقف قبالتو رجل فستين من عمرو بقاو ليه يوماين على التقاعد ، كانت هادي أخر عملية غادي يترأسها ، يرتاح ويتسارى العالم هو ومرتو، كان عاطيه بظهر داير يديه ورا ظهرو ، ضار عندو وملامح الحزن على وجهو ..

– متأكد، تأكدتو مزيان ؟

– تأكدنا مزيان ، هادو لي لقيناهم فالباطو لي كانو عليه، عطاه بطاقة او سنسلة ديال الذهب شدهم من عندو كيشوف فيهم، بلع ريقو بصعوبة ، مقادش يحبس دمعتو ..

– أنا السبب ..

– علاش كتݣول هكا(بتساؤل) مالك أنت، حنا اي عملية خرجنا ليها ،كتكون حياتنا فخطر ، كنديرو الموت قدامنا ، علاش انت السبب ..

– (هز عينو شاف فيه، تنهد تنهيدة طويلة ، مشا لورا المكتب ، وهز عينو فيه ساهي عاد انطق ) :

– أنا لي من الاول بززت على النمرود يكون ففرقة الإستخبارات، هو كان ضد هاد الفكرة ..

– (بإستغراب) :

– علاش ماشي هو لي طلبها منك من اول عملية؟

– لا ماشي هو ، بنسبة ليا كان غلط فحقو وفحق الذكاء لي عندو ، كان خاصنا نستافدو من عقلو ، من ثاني عملية كان باغي يتراجع ، ولكن انا ستخدمت أساليب وطرق باش نبزز عليه ، وفهاد العملية ديال موتشيرو ، جا عندي المكتب ولأول مرة النمرود يتحكمو فيه العواطف ، داك القلب القاصح والإستهزاء لي معروف بيه، عنقني ، جاتني فشكل ديك المحنة لي طاحت عليه، وݣال كلمة وحدة مايمكنش نساها ، إلى وقعات ليا شيحاجة متݣولوهاش لعائلتي ، مابغيت حتى واحد يتحمل المسؤولية ، أنا سبب أسيزر أنا السبب أنو نمرود ماات ..

سيزر :

– شفت تأكدتي شنو خلاك تݣول بلي نمرود صافي مات ؟

– هادي(هز السنسلة لي كان فيدو) :

– النمرود من سابع المستحيلات يتفارق مع هاد السنسلة، حيت كان موجدها لولدو لي مات ، كان يموت ألف مرة ومايخسرهاش ..

– سيزر (تنهد تنهيدة طويلة) :

– شنو غادي نديرو دابا ؟

– أنوجدو جنازة تليق بالمقام ديالو ، يتدفن معاه هاد سلسلة وهاد لاكارط ..

سيزار :

– الجثة مكايناش غرقات فالبحر ، شكون أندفنو بضبط ؟

– أندفنو النمرود ، دكرياتو ، وراقو ، أي حاجة كتخصو ، الملف ديالو فالإستخبارات ، كولشي غادي يتدفن تكلف أنت ..

– عطاه سيزار التحية وتم خارج، شوية وقف ورجع شاف فيه ..

سيزر(بتساؤل) :

– شاف عمري ماسولتك شنو سميت النمرود ؟

– (هز فيه راسو كيشوف فيه) :

– النمرود ، سميتو النمرود ، سيزر فهم راسو عطاه التحية وخرج …

– فحي من الأحياء الفقيرة فأمريكا، الكل كان محتافل بالكريستماس، كولشي مشغول بتحضيرات ، الشوارع فازݣين بشتا ، فكل زنقة مجموعين فيها مجموعة من المتشردين ، عرب ، افارقة ، وحتى السكان الأصليين ، شاعلين العافية وكيسخنو عليها ، لي هاز طرف ديال الخبز كياكل فيه من بعد نهار طويل ، داز فتسول ، كيتجمعو بليل فهاد البلاصة ، كيحاولو يسخنو مع بعضياتهم ، من وراها كيدخلو لواحد البيت فسطح ، مخليه ليهم واحد العساس خزنة من مول العمارة، هزو عينيهم فشخص لي كان جاي ، باين عليه طلاب بحالو بحالهم ولا كثر كاع ، وجهو مابينش من اللحية طويلة موسخة لي على وجهو، وشعرو لي نازل على جبهتو من تحت الطاقية، شعرو طويل واصل لكتافو موسخ ، ظفار موسخين هاز بيهم طرف ديال الخبز كياكل فيه ، واحد الكبوط لابسو واسع عليه بزاااف ، وصباط فرجليه كلو موسخ ، كانت حالتو حالة ، مداهاش فدوك لي كيشوفو فيه ، وصل حدا واحد الرجل كبير فالعمر ، ماد يديه لعافية كيسخن فيهم وقف قدامو ، جبد واحد البلاستيكة كحلة ، خرج منها واحد سوندويتش عطاه ليه ..

-(صوت كيترعد) :

thank you

– مجاوبوش ، حرك ليه راسو وكمل طريقو حتى لآخر الشارع، ودخل مع واحد الزنقة ، جبد واحد الساروت من سروال ديالو ، خشاه فالباب ، حل ودخل …

– البيت كان كلو مظلم ، وريحة الغمولة كضرب منو فيه سداري واحد ، او واحد الساك محلول، حيد ديك طاݣية حطها فوسط الساك ، جبد واحد الساك أخور حلو طل على لي فيه دارو على ظهرو سد الساك لاخور ، دار فيه شي حوايج موسخين كانو محطوطين ، سدو وهزو حتى هو ، طفا الشمعة لي كانت محطوطة خرج وسد الباب وراه ، حط الساروت فلبوات ديال الفاكتور وخرج من ديك الزقة وصل عند دوك المتشردين ليكانو واقفين كيشوفو فيه بنفس النظرات، رما ليهم داك الساك لي فيه الحوايج وكمل طريقو …

////

خرجات من البيت لي كتنعس فيه ، بيت ديال الݣلاس فيه السدادر او واحد الطبلة قديمة ، الجديدة هزها باها وباعها باش يلعب تيرسي، خرجات كتقاد فشعرها ، كانت لابسة ݣاط خداتو من جوطية ، مع سروال كحل ديال الجلد ، تيشورت فالبيض، وتجاكيط ديال الكوير فالخزي والبوردو ، جمعات شعرها على شكل ذيل حصان ، هزات السكادو ديالها دارت فيه تيليفونها ، دارتو على ظهرها ، ومشات جيهت بيت باها دخلات وهزات جويجة فالقهوي ، دارتها فبوشيط ديالها وهازتها على ظهرها ..

علي(حاضيها بنص عين، وكيهضر بالهمس) :

– الله يعفو عليك من هاد الحالة ..

شامة :

– علاش مالها حالتي ؟

علي :

– ودنيك بحال الصرافق ديال رادارات ..

شامة :

– ݣول لي بغيتي الحاج ، مامسالياش وانت مكتساليش الله يستر بجماعة ، وعندك تنسى ماتصلي العصر ..

يوسف :

صلى بعدا حتى الظهر ، بقى العصر، مجا فين يكملها حتى جاتو صندالة جيهت وجهو ..

علي :

– نوض غبر عليا كمارتك لحمار ديال بوك نوض ، هرب يوسف لحدا الباب كيضحك ..

يوسف :

– وسربي خلاص انا كنتسناك على برا ..

شامة (باست لعلي راسو) :

– با أنا مشيت ، ورد البال ونجي تاني نلقاك هزيتي شيحاجة بعتيها نجي نضور معاك ..

علي(بحال دري صغير كيفرنس) :

– بصح زعمة زعمة؟

شامة (شدات على راسها ) :

– وخااايت وبا الله يهديك دويت معاك وانا مشيت ، خرجات شامة هي ويوسف ..

– شامة كيدايرة أبنتي ؟

شامة :

– الحمد لله اخالتي كيدايرة انت ، شي خبار على حميد ودراري ؟

– يسول فيك الخير والله يعاونك

شامة :

– أمين ياربي ..

يوسف :

– مايمكنش مندوزوش ومتسلميش .

شامة :

– وحتى واحد ماضربك على يدك وكاليك وصلني ، سمعات سميتها ضارت لقات دراري ديال الحومة واقفين كيعيطو ليها ..

– وشامة وصاحبتنا وفين غبرتي علينا توحشناك ..

شامة :

– دراري من بعد ونهضرو عندي ليكم بلان واعر ، حتى نرجع خدامة دابا ..

– (كلهم دقة وحدة ) :

– والله يعاونك …

– تسمع الدقان فالباب ، مجا فين يهز يدو حتى تحل الباب ، ويد جراتو لداخل ، من بعدما سدات الباب ، ضارت عندو كتشوف فيه ، دايرة يدها على جنبها ، لابسة كسوة قصيرة فالبيض، صندالة ديال الصبع ، صباغة فرجليها كحلة ، شعرها كلو صفر من لتحت والفوق كحل دايرة ليه بانضة عريضة فالحمر، ظفارها طوال صابغاهم فالحمر ، وجها كلو مكياج، دايرة ليلونتي فبلو سييل ، وكطرطق فالمسكة وتعوج فحجبانها :

– فين احبي ، مالك مرعود ، ولا خايف يوصلوها لشرف الذين (ضحكت ضحكة ديال شيخات) ..

– أشمن الله يهديك أهدى، عارفة ناس ديال الحومة وصافي ، انا مكنخاف من حتى واحد ولي كيعرف با يدعيه ، وحتى با راه دفنتو ..

هدى(طرطقات بضحك) :

– هاي هاي على حبي ، وليتي راجل ..

– انا ديما راجل ، ياكما تجربي ؟

هدى(جراتو لداخل ) :

– ههههه عاد اتوريني ، كونما ديك عصا ديال الشطابة ، كون ولادك كيجريو وراك ..

– جايباني لهنا تجبديها دابا ؟

هدى :

– لا احبي ، جاية نشطعو ونولوعوها انا وأنت يا بعد عمري ، جراتو لبيت مفرش فراش واعر ، بحال الفراش الخليجي ، متوسطاه طبلة طويلة ، محطوطة الحلوة فواكه جافة ، مسمن كولشي محطوط ومزينة الطبلة ، محطوطة الشيشة كانت ݣلسة هي هاديك دايزها الكلام ، دفعاتو ݣلس ، مشات برونشات يوتيوب مع التلفازة ، خدمات موسيقى خليجية، تحزمات ، وݣلسات كتشطخ ليه وهو كيشيش ، عينيه تعسلو بحال شي مكبوث فيه جوع ، عمرو مشاف البنات ..

– تيليفون كيسوني ليه وهو مكاينش فهاد العالم كاع ، مرفوع ..

////

فوسط كات كات كحلة ، ݣالسة لور هازة تيليفونها وكتسوني او والو حتى واحد مكايجاوبها ..

– ديرها فين تجيك أعويمير ، أبلاتي حتى نشوفك ..

– شاف فيها من الزاجة :

– ياك ݣلت ليك مايصلاحش ليك ..

شامة :

– ماعندي مندير أعمي أحمد، القلب مايشاور ، واخا شماتة وفنيان ومليسواش، كنبغيه هادشي لي عطا الله ..

احمد(الشيفور) :

– هانتي وهانة ابنتي ، شي نهار غادي يصدمك شي صدمة ، متنوضيش منها ..

شامة (ببرودة) :

– نهار يصدمني اعمي ، أنصفيها ليه. .

احمد :

– نعلي شيطان أبنتي ، دوزي حياتك فالحباسات ، وأنت لي عندك باك ، على واحد مايسواش ..

شامة :

– تنهدات تنهيدة طويلة) أعمي منين كتعمى ليك البصيرة ديري أي حاجة، خلينا منو ، الحاج علاش مخاطر هاد المرة ؟

أحمد (كيضحك) :

– على أرض الحاج تهامي ..

شامة :

– العاااار ، الناس لي عندها كيشيطو عليهم الفلوس الله يستر مايعرفو مايديرو بيهم ، زريعة القنب مكايحشموش ..

– أحمد :

– إيوا بنتي صحاب الفلوس هوما هادو ، أنت رضي البال لراسك ، عارفة هادشي لي كديري ماشي قانوني ياك ؟

شامة :

– عارفة أعمي عارفة ، وحتى طرف ديال الخبز راه صعيب ..

أحمد :

– عمرك ماݣلتي ليا فين تعلمتي الصيد ؟

شامة(تبسمات وبانو سنانها لي مستفين وبايضين ، ضحكتها بحال الشمس الى شرقات) :

– بابا شحال هادي فاش كان فالعسكر ، وكان كيجيو كونجي ، كان كيديني لغابة وكيعلمني كيفاش نشد الجويجة ، وكيفاش النيش، وأنا بزربة كنتعلم ، من تم وانا كنهز الجويجة بحال الى كنهز ريشة ..

أحمد :

– تبارك الله عليك وعلى علي لي رباك ، تبسمات ليه ودورات راسها لجيهت الزاج كتفكر ذكرياتها مع باها ومها الله يرحمها ..

//

علاش شامة هزات جويجة ؟ شنو اتكون كدير بيها مثلا ؟ وعلاش باها كيوصي فيها وخايف عليها؟

– وقفات طوموبيل قدام فيرما بعيدة على كازا ب 20 كلم ، نزلات شامة هزات عينيها فالڤيلا لي كتجي ليها هادي عام دابا ، تفتح الباب وخرج منو، راجل ف60 من عمرو داير واحد الرزة فصفر ، مع واحد السلهام فالقهوي ، خاتم ديال الذهب وساعة مذهبة ، باين عليه الفلوس ..

شامة(فخاطرها، أنت لي واتاتك راسك بحال الكبالة ياربي تسمح ليا ، أشمن نهار يعفو عليا ربي من وجهك ) :

– الحاج ناصر كيصبحتي ..

الحاج :

– امرحبا بقدام الربح ، شوفي بغيتك اليوم تحمري ليا وجهي ، مابغيتكش تزلݣي شيحاجة ، الطايح كتر من النايض ، ونايض حتى هو طايح نعول عليك ..

شامة (فخاطرها) :

– فصالتك بحال الصاروخ وبغيتي طايح يكون كتر من نايض، واخا الحاج كون هاني ..

الحاج :

– ودخلي لكوزينة تقوتي بعدا نص ساعة تكوني واجدة بااما نوصيك ..

شامة :

– الله أودي كون هاني الحاج ، دخلات من الباب لوراني لكوزينة ، حطات ليها الخدامة تاكول ، الفخامة باينة على الدار وعلى الماكلة ، كلات واخا ديجا كلات فدار، ولكن علاش طاجين ديال الخضرة ، هو اللحم مبخر مع شلايض ، شبعات وعمرات كرشها ، خرجات لبلاصتها ، حطات السكادو هزات جويجة عمراتها ومسحاتها ، خلاتها كتبري ، وكلسات كتسنى الأوكي من عند الحاج …

////

خرج علي من دار ، بواحد الكوستيم ، كيبان بحال شي أستاذ ديال الفلسفة ، كيشوف على ليمن وليسر ، جر واحد طبلة ثغيرة هزها فيديه، سد الباب من وراه وتم غادي مبسم ، ݣاع لي كيدوز من حداه كيسلم عليه ، مكاين غير الحاج علي فسما الحاج علي فالأرض، حاج بسمية وهو كاعما حاج ، بلية فيه مقدراتش تحيد من طو من نهار شد التقاعد ، التيرسي كل نهار كيݣول أيربح وهو الربحة لي شد فحياتو شد فيها ، 200 درهم ورجع خسرها نيت ، ماوقف حتى عند واحد السيد كيبيع الأثاث القديم ..

– الحاج علي ، جيتي تاني ..

علي(كيضحك ضحكت البراءة) :

– كي شتي بنتي تبارك الله ، كتفرش فراش جديد ، وݣلت بلاما يتلاح ويضيع اللهم نبيعو، وأنت حسن من البراني ..

-(خدا ديكالكبلة كيقلب فيها) :

– شحال كتݣول فيها؟

علي :

– 50 درهم ليك أنت ..

– مخساراش فيك الحاج ، جبد الفلوس من جيبو مدهم ليه ..

علي :

– الله يعاونك ، خشى 50 درهم فجيبو وشد الطريق عند بليتو …

تجمع الحاج ناصر وصحابو ، غير الفلاحة الكبار ، بدل داك السلهام لي كان لابس ، كان لابس لبسة فالخضر بحال ديال العسكر ، وكاع لي معاه لابسين بحالو ، كل واحد فيهم هاز جويجة ، ضار ناصر وراه غير بالفن ، وشاف جيهت الشجرة العالية لي بعيدة عليه ، بانت ليه واقفة كتسناه يعطيها الأوكي ، تبسم بخبث وبراحة ، ورجع كيهضر مع صحابو ..

– وهاد المرة أناصر ، أعوا عليها تخسر مكاينش تخرشيش ..

ناصر (كيضحك) :

– أنت وزهرك ، يدي مغيسة بذهب ، ݣول وكان أترحم على ديك الأرض لي عندك ..

– ههههه ودابا نشوفو، تبدا انت ولا أنا ..

ناصر :

– كيعجبني نشوف الخسارة فعينين لي معايا ، داكشي باش بدا انت ..

– ماطلبتي أسيدي غير الموجود ، بدا شريك الحاج وصاحبو هز جويجة وتسنا تطلق الحجلة اللولة ، نيش على اللولة ، تزݣلات ليه ، الثانية وكذلك ، الثالثة جابها نيشان. ..

ناصر (كيضحك عاجبو الحال ) :

– كنشم ريحة الأرض فنيفي، من دابا كنبلاني شنو ندير فيها ، ودابا تفرج على عينيك ، هز ناصر جويجة ديالو ونيش ، شامة فهمات من الحركة لي دار بلي عطاها الأوكي، غمضات عينيها وطلقات السمع ديالها ، سمعات الحجلة طارت مع طلق الحاج فالخوى طلقات هي وجابتها فالحجلة نيشان طيحاتها ، تبعاتها الثانية وتالتة ورابعة ، وهكا خلات الحاج يربح الرهان وياخود الارض لي عينو عليها من شحال هادي ..

////

– وقفات على برا هازة سكادو ديالها كتسنى ،جا عندها ناصر مبسم ..

– عفريتة انت ، عَوْدة عَوْدة ماعندي مانسالك ، محزم براجل ..

شامة(ماكرهات تشدو تقجو) :

– الله اودي الحاجة، حنا عسكر ولا زمر ، وعصرتي ليا الحاج ..

ناصر(كيضحك) :

– باش يتعلم يتراهن مع الحاج ناصر، يلاه هاكي وسيري دغية ..(عطاها واحد الجوا فيه خلاصها شداتو ودارتو فسكادو ديالها) :

– الله يخلف الحاج ، والله يزيد الخير ، عطاتو بظهر وركبات مع الشيفور لي ايوصلها فين هزها …

أحمد :

– الله يعفو عليك منو ..

شامة (تنهدات) :

– أمين أعمي علينا بجوج ، نهار ندير لاباس والله أعمي لا خليتك عند هاد الشارف الهارف ..

أحمد : ناري ويسمعك ناري

شامة : ويسمع ݣاع والله مكايهمني، كونما هاد الفلوس لي كنعاون بيهم وتشوف ، ندفل ليه على وجهو حشاك ، قلبوها ضحك كيف مالفين حتى وصلها لفين هزها ..

شامة : صافي أعمي غير هنا ، يلاه أعمي انا مشيت سلم على خالتي سعدية ..

أحمد : بلغ الله سلامك أبنتي تهلاي فراسك ، شيرات ليه شامة ومشات ، فطريق هزات تيليفونها ، كتسوني او والو مزال مكايجاوبش ، رجعات سونات لنمرة أخرى ..

– ألو ودخلت عليك بالله كاين لي كينعس حتى لهاد الوقت ، شوفي شوفي نتلاقاو مع 9 فنفس البلاصة ، وسيري فحالك بعدي مني أشمن انا مشيت ..

– تمات راجعة لدار ، لقات دراري مجموعين فين خلاتهم ، جات قاصداهم نيشان ..

– واش ادراري ..

– ختي شامة عندنا ليك واحد الخبار وااااعر ..

شامة (كضحك ) :

– بغيتي تهضر على عماد ياك ..

– العار باش عرفتيها ؟

شامة :

– كنت اندوز عند خالتي مليكة لدار ، ساعة مع الخدمة مامشيتش ، توفيق كانشوف فيك باغي تكول شيحاجة وساكت ..

رفيق (كيضحك) :

– وعندنا ليك قنبولة واعرة ، عماد تحكم عليه بالبراءة ..

شامة(غوتات ونقزات طارت على رفيق بتعنيقة) :

– العاااار ، واش بصح العااار ..

رفيق(هزها كيدور بيها ) :

– وحق الرب المعبود ، أصباح كنا مع خالتي حدا المحكمة ..

شامة( باللهفة ) :

– ناري ناري خاصنا نوجدو ليها ..

أشرف :

– وراه داكشي باش بغيناك ، بغينا نݣادو ليه شي حفلة تكون واعرة ، حنا او ولاد الحومة ، مصطفى ورشيد دابا فالخدمة ، البلان نقادوه بيناتنا بعدا، يجيو دراري ونعلموهم ..

شامة :

– مشات ، اجي رفيق مقالوش لخالتي مليكة اشمن نهار ايخرجوه ؟

رفيق :

– نهار الثلات ..

شامة :

– مزيانة ، انكون خدامة فصباح ، العشية عندي خاوي ..

رفيق :

– صافي ، دابا نقادو البلان بيناتنا وكل واحد يتكلف بحاجة ..

شامة :

– سير عالله ..

//// //// ////

قادو البلان بيناتهم ، خرجو دراري من الخدمة وخلطو عليهم ، ماسلاو حتى لورا المغرب عاد سلاو ..

شامة :

– دراري انا خاصني نمشي ، دابا كولشي هو هداك ، أنتوما تكلفو ..

رفيق :

– صافي أختي مشات ، سيري أختي راه اتفيقي بكري لخدمتك ، سلمات معاهم ومشات لدار

////

خرج من البيت كيقاد فحوايجو ، تبعاتو بشوميز قصيرة دايرة يد على يدها وكطلع فيه وتهبط :

هدى :

– مالك زربان وخايف ، ولا خايف منها ..

عمر :

– مخايف من حد ، عندي مايدار وخاصني نمشي ..

هدى(ضحكات بإستهزاء) :

– هاي هاي على عندي مايدار ، سبحان الله أشريف حتى منكون كنعرفك، شنو عندك مثلا تفرق الحشيش على ولاد الدرب ، مع لبس تريكوه ضار عندها كيخنزر فيها .

– هدى ماتخلينيش نوريك الوجه لاخور ..

هدى : ويتي على حبيبي باغي يوريني لوجه الثاني اوووف منك تخلعت أنا، أكبيدة ماتنساش راسك ماتنساش بلي كتاكول من خيري وتكمي وتشرب من خيري ابعد عمري ، ولا نفكرك الحب (هزات بزطامها من فوق طبلة حلاتو هزات منو شي فلوس ومداتهم ليه) هاك أحبيبي باش تقاد مجاجك وتراجع حساباتك ، حيت كيبان ليا بديتي كدوخ وتنسى راسك ..

– شد من عندها دوك الفلوس دارهم فجيبو ، لبس سباطو ودار القب ديالو ، خلاها وراه وخرج كيتسحب بحال الحرامي …

– غادي خاشي يديه فجياب القبية ، كيشوف فجنابو ، حتى خرج فيها ..

عمر(متفاجئ ومصدوم) :

– حبيبة ديالي ، ݣاعما شفتك ، شحال توحشتك ..

شامة(هازة حجبانها كتشوف فيه) :

– سبحان الله ، توحشتيني ݣاع ، ومالك كتݣولها وانت كتقفقف، بحال الى واقفين عليك البوليس ، وفين كنتي ؟ ماشي هادي هي طريق داركم ..

عمر : لا احبيبة كنت أمع دراري ؟

شامة(ربعات يديها ) :

– شكون هاد الدراري ، وانا بعدا يلاه جيت من عندهم ، كاينين شي دراري مكنعرفهمش؟

عمر : أحبيبة كنت مع دراري فقهوة ، كنضبر مرابانا نلقى شي بريكول ..

شامة (مامتيقاهش) :

– اااه ياكما ناوي تخوي وتمشي لإمارات ؟

عمر : أشاندير فالإمارات الله ييك مالي مسطي نخلي زين ديالي ..

شامة : إيوا أش وقفك مع ديك صفرة الكامرة ديال هدى ؟

عمر :

– أنا كنت واقف معاها والل….(قاطعاتو) :

– خلي عليك الله فتيقار وبلاما تبقى تحلف بالكذوب ، ديرها ازوينة توصل توصل ، جيني نيشان مكنحملش داك دخول ولخروج فالهضرة مكايعجبنيش ..

عمر :

– والله أحبيبة اقاليا نبيل صاحبي بلي كتعرف الناس ، وݣلت نسولها على شي خدمة أحبيبة، هدا مكان بغينا نحمعو راسنا ونتزوجو نديرو وليداتنا ، حتى لإيمتا أنبقاو هك انت عندك 24 و أنا عندي 30 براكة وحنة طالعين ف 4 سنين وحنا معارفين …

شامة(هضرتو سمعات ألف مرة ) :

– عمر سمعني مزيان أكبيدة ، سيمانة جاية اتجي أنت ومك مفاهمين ياك ، اتجي وتخطبني ، ولا قسما بالرب الكعبة ، أتشوف مني لي عمرك فحياتك شفتيه ، ودير هكا ولا هكا ، إلى ماقتلتك بيدي ومشيت عليك الحبس مانتسماش شامة شرف الذين ، عطاتو بظهر وتمات غادية ، تبعها وجرها من يدها ..

عمر : حبيبة أحبيبة ، دابا أحبيبة كيفاش انجي نخطبك انا متخدام كاردام وماعندي حتى باش ناخود قالب ديال السكر ..

شامة(ضارت خنزرات فيه ، جبدات 200 درهم من جيبها ودارتها ليه فيدو ) :

– السبت الجاي تجي ، أنتسناك انا وبا ، أنتسناوكم سمعتيني ياك ، خنزرات فيه ، عطاتو بظهر ومشات ..

– عمر 200 درهم فجيبو بزعاف ومشا لدارهم كيبغم ..

/ / / / /

وصلات شامة لدار مع 9 ، حطات سكادو ديالها وجويجة ، خرج باها هاز موس من الكوزينة ..

علي :

– تعطلتي !!..

شامة :

– مساليتش بكري ، أش كدير فكوزينة ؟

علي :

– كنوجد العشا ..

شامة :

– بلاش أبا اخلي لي فيديك ، أنجيب معايا شي دجاج، شوية ونجي نشوف أحلام ونجي ..

علي :

– أحلام تاني ، بقينا بلا عشا ..

شامة :

– صافي ابا ، انجي بكري ، مغاديش نتعطل نجيب معايا العشا وغادي نجي ، حيدات صباطها لبسات بانطوفة وخرجات …

– خارجة حادرة راسها ، حدامن ما دازت كيرميو ليها السلام ، وصلات لواحد العمارة يلاه كتبنا شاعل فيها الضو كيخليوه الخدامة ، حيت كيرجعو بليل يبات تما واحد فيهم ، طلعات نيشان لسطح لقاتها واقفة كتسنى فيها ، أحسات بالحس وراها وهي ضور، كانت قصيصرة عينيها صغار شوية وشعرها قهوي مموج ..

– ياختي علاش مانتلاقاو فدارنا، كتموتي على السطوحة ..

– ماجوبتهاش شامة ، مشات جهة الصور او وقفات ، طتشوف فالقمرة ونجوم ، تنهدات تنهيدة طويلة ، وقفات حداها صاحبتها كتشوف فيها وساكتة بغاتها هي تنطق ، مابغات تكوليها والو ..

شامة (ساهية) :

– أحلام بحال والو عمر كيخوني ..

أحلام :

– ماشي جديدة أصاحبتي، راه باينة انت لي معمية ليك البصيرة وصافي ..

شامة :

– كنبغيه ..

أحلام :

– ديري عقلك ، واش لهاد الدرجة الحب عامي قلبك ، واش غير هو لي كاين فهاد الدنيا ، ياربي تسمح ليا ماتشوف فيه لا موحمة لا لي شادة فحبل ، باش زايدك ، حشايشي سكايري ماتعرفي شنو تحت راسو كاع البلاوي مجموعين فيه ، فصايري وزهواني ، كبري عقلك شوية ، عيينا نصحو فيك ،اعماد قبل مسكين مايتشد شحال عيا فيك ، او والو تݣولي داير ليك تاكتوبو ..

شامة :

– نهار السبت ايجي يخطبني ..

أحلام(بعدم إهتمام) :

باين انت لي عطيتيه باش يجي يخطبك ..

شامة :

لا ماشي انا ..

احلام :

– حتى متكونيش صاحبتي وكنعرفك عاد ضحكي عليا ..

شامة :

– صافي الله يرحم باك ، انا جيت اباش نعلمك ونكولها ليك ، وبغيت نعلمك بلي عماد ايخرج بعد غدا ، وانديرو ليه حفلة ..

أحلام :

– فخباري كالها ليا رفيق ..

شامة :

– وانت بعدا لي كتهضري إيمتا اتحني على دري ..

احلام : حتى نكون اختي بحالك ، السيد ماخدام ماردام ، يضل نهار ومطال فدرب مايفيق حتى لعصر ، ويتسنا خوه لكبير يصرف عليه ، اش طلعني انا ، باش ايوكلني ولا يشربني ، نكونو واقعيين حنا ماشي طماعات ولكن اختي كنشوف الى مرضت، الى حملت ، باش غادي يدوز ليا يلاه ، وها تحاليل هالماكلة هالمصاريف ، ونهار نبغي نفتح نمشي لميريزݣو يلعبو ليا فكرشي ويخرجو يكولو ليهم الله يرحمها ، لا اختي سمحيليا اخليني فدار با حسن ، وهادشي ݣلتو ليه نهار الاول ،يخلينا خوت حسن انا كنجي لبنادم نيشان مكنبقاش نتخوا عليه ، مامبغيش لي يتفلى عليا ومنتفلاش على ولاد الناس وسالينا ، وانت اختي خلي عمر ينفعك ، نهار اتقتانعي حتى تشوفيه طااار مع شي وحدة وديك الساع بكي ، لي شاف تصرفاتك مايكولش الحب مطيح عليك الذل ..

شامة (تنهدات تنهيدة طويلة ، عارفة هضرت احلام بصح ولكن القلب مكايبغيش يقتانع ، كيف كيقولو لهلا يطيح حبك على حجرة ) :

– جينا نهضرو معاك ندمتينا انا مشيت فحالي راهني فايقة مع الفجر ، خلات أحلام ، ونقزات لسطح لاخور ولي تابعو ..

أحلام(نباتها ) :

– مافهمتش انا علاش ناس دارو الدروج ..

________

تقدات شامة العشا ، تعشات هي وباها ، مازال مافخبارها مايتعاود بلي باع الطبلة ديالو ، سلات جمعات الطبلة وقدات بلاصتها ، كتفكر فكلام احلام حتى داها النعاس ..

– فاقت شامة مع 4:30 ، حيت 5:30 خاصها تكون واقفة مع البنات يتسناو ترونسبور ديال الوزين يجي يديهم ، لبسات حوايجها لي ديما كتلبس كتبدل غير اللوات ، سروال كحل مع سبرديلة تيشورت كحلة وتجاكيط كوير كحلة ، جمعات شعرها بالبانضة ، فطرات بالواقفية ، هزات سكادو ديالها وخرجات ، الشارع مظلم وحتى واحد مكاين ، خاوية دنيا طيح روح ومايسيق حد الخبار ، غادية وكتقرا فأذكار الصباح ، شداتها طوالة حتى قربات لبلاصة فين كيتسناو ترونسبور ، نقزات من بلاصتها بصوت الغوات لي كتسمع ، صوت بنت كتغوت ربي لي خلقها ، مافكراتش جوج مرات كتجري ، جبدات مقص كان عندها فسكادو دارتو فيدها وتمات غادة كتجري ، وصلات لفين كيوقفو كتبان ليها إلهام ، البنت لي خدامة معاها ، قميجتها مقطعة ومحموعين عليها جوج ديال دراري باينة فيهم شمكارة مقطعين ..

شامة (غوتات) :

– حيدو عليها أولاد الكلاب ، ضار واحد فيهم لابس كيطما كحلة وصندالة اديداس ، وݣورميط ديال النقرة فعنقو :

– ساط هاد دجاجة وحدة جات ، أمالك الق**ة ديال مك ، ياك مكاين باس ..

شامة :

– ياكما سخنو عليكم جنابكم أشمايت ديال جدريال ، الى سميتك راجل طلق منها وقرب والله حتى نحش لمك ركباتي ، زيد يلاه بالي قبل لايسالي ..

– هزات المقص قدام عينيه ..

– يلاه زعم ، زعم تاكول اللحم زيد قرب ولا كتحرݣىو اعلى لي ضعف منك يلاه بالي زيد ، تم جاي قاصدها ، ضرباتو بالقص ليدو خلاتها كتشرش دمايات ، صاحبو شافو ، طلق من إلهام وهرب تابعو لاخور شاد فيدو كيجريو ..

– شامة :

– ورولي وضور ، مشات كتجري لعند إلهام هزاتها ..

– إلهام ختي مزيان ماوقع ليك والو؟

إلهام (كتبكي ) :

– كانو اختي غادي يتكرفصو عليا ، الحمد لله ربي جايك ليا فطريقي اختي لهلا يخطيك ..

شامة ( طلع ليها الدم سخطات ) :

– بزااف هادشي ، سيمانة لي فات فتيحة تݣريسات ، شهر ليفات اربي جات من جيهت وجدان ، اما كون خطفوها وݣزروها ، ودابا انت ، وشي نهار أنا ، بزااف هادشي ، عرفتي خاصنا نهضرو مع الباطرون يبدل لينا ساعة ، ندخلو مع 7:30 بحالنا بحال عامة الشعب ..

إلهام : أحيانة أختي اسكتي ماعندنا منديرو ، بنات المعمل كلاو عزاهم ، حنا لي واكلين الضق ، أما الموظفين بطوموبيلاتهم بتوقيتهم مخير ، اما حنا مشات على عينا ضبابة ..

شامة (بإصرار) :

– شوفي انركيو كاملات ونهضرو مع البنات ، خاصنا نوضوها معاهم ، نديرو ليهم الإضراب ، بغاونا نكملو يقادو لينا توقيت ، وانت خليك هكاك ، باش يشوفو على عينهم ، قاطعهم صوت البنات لي تجمعو كيشوفو فإلهام وحالتها ، شرحات ليهم شامة كولشي ، منين جا ترونسبور ركبو ، وكملو هضرتهم وتافقو على هضرة شامة ، من نهار تزادت ساعة ، وهوما فالمشاكيل ، كيفيقو مع الوقت لي ناعسين فيه الناس ،كيتعرصو لݣريساج السرقة ، الإغتصاب ݣاع ، وحتى الاختطاف الى وصلات بيهم ..

///______

وصلو لمعمل ديال الحوايج لي كاين حدا عين السبع ، نزلو ودخلو لمعمل ، شامة كانت مختصة بتغليف ديال الحوايج ، لبسات الطبلية ديالها وبدات كدور على باقي البنات ، علماتهم بشنو كاين ، كولشي كان موافق على هضرتها ..

– كولشي البنات زݣاو وݣلسو وهي منهم ، من غير الدراري لي واقفين كيشوفو تصرف البنات مافهمو فيه والو ..

/////

– طلع واحد من دراري عند المدراء ، بحال اي شركة كاين فيها البرݣاݣ لي كيوصل الهضرة للمدراء ، نزل واحد فيهم لقى كاع البنات ݣالسات ، حتى وحدة فيهم مكدير. حاجة وشامة ݣالسة هي اول وحدة على الكرسي كتشوف فيه ،مكتحملو مكتقبلو ، ديجا مايسواش وشحال من وحكة فالبنات تحرش بيها ..

– شنو واقع هنا ؟

– شامة بلاما تهضر وقفات وجرات إلهام وقفاتها قدامو، حوايجها مقطعين ، وحدا فمها ولا حمر بالكدمات حيت كانت كدافع على راسها ..

– إلهام شنو واقع مالك ؟

شامة(ببرودة) :

– والو أسي نور الدين ، غير إلهام كانت أتعرض للإغتصاب هاد نهار ، كل مرة ضحية جديدة ..

نور الدين : الله أكبر ، الى مقدرتيش تخدمي سيري ترتاحي ..

شامة (خرجات فيه عينيها) :

– اويلي وحدي هادشي لي اتخسر عليها ، سيري ترتاحي ، أياه وغدا وبعدو وبعد بعدو شنو غادي يوقع فنظرك ، شي نهار وحدة فينا تموت ، أنت ماعندك ماتخسر ولكن والدينا لي غادي يديو كيتنا فقلوبهم ، اما انتوما من غدا تجيبو البديل ..

نور الدين (بصرامة) :

– دخلي نيشان فالموضوع ، وزايدون انت مالك ؟!

شامة :

– كيفاش مالي ،لي مسهم كيمسني ، يا دير ليما حل وتزيد لينا ساعة ونوليو نجيو بحالنا بحال عباد الله ، ولا مغاتشوف حتى وحدة فهاد المعمل مزال ..

نور الدين (خنزر فيها) :

– تقادو الكتافة أشرف الدين ، ولا ݣد القب قد السطل ..

شامة(خنزرات فيه وخرجات فيه عينيها) :

– إيوا الحمد لله منين عقتي وفقتي وعرفتي راسك سطل ..

– هز يدو حتى لسما بغا ينزل عليها لوجها، شدات ليه يدو وخرجات فيه عينيها، ولات بحال شي وحدة مسيفة ولا ممسوسة ..

شامة (مزيرة على سنانها) :

– قسما بالله وتعاودها ،حتى تشوف هاد اليد كتلعب قدام عينيك ، قسما بالله حتى نضرب ليك الطر ، وخبارك توصل لمول شي وشنو كدير فاش كيخرجو البنات من المعمل ، لا يحساب ليك راسك مفاخباريش وبدليل ، وجمع راسك معايا حسن ليك ..

– نور الدين بلع ريقو ، كيرمش ماعجبوش الحال غير كيتفتف ..

نور الدين(كيقاد الكومبلي ديالو) :

– كولشي كيتحل بالعقل ، ارجعو لخدمتكم ويكون خير ..

شامة(رجعات فوق الكرسي دارت رجل على رجل) :

– حتى حنا مازربانينش ، منين تقاد الامور نرجعو لخدمتنا (ضارت عند البنات) ياك البنات ..

الكل : اه عندها الحق حققو لينا مطالبنا ، ونبداو خدمتنا ..

نور الدين :

– هادشي ماشي معقول اتخرجو على ريوسكم وبلايصكم ..

شامة :

– ياكما خدامات كادرات فالبنك الشعبي ، اه لا نسيت خدامين فالبروصة بلا بينا الإقتصاد غادي يهبط ، راه غير معمل هدا ، فين مامشيتي كاينة تمارة ، ولكن حتى لكرامتنا وخط حمر الله يرضي عليك ..

– بقا نور الدين ساكت وكيخنزر ماعجبوش الحال ، ولكن ماعندو مايدير ، السلعة خاصها تسلم فالوقت مايمكنش يخرجهم ويضبرو فالجديد وتعلمهم أصول الخدمة ، خاصك معاهم بزااف ، وتقدر الخدمة ضيع من يدهم ، خنزر فشامة وعطاهم بظهر وكلع لفوق باش يبلغ المدير بالي وقع …

– تجمعو البنات على شامة ..

– الله يعطيك الصحة ، عطيتيه علاش كيقلب

– ختي شامة لهلا يخطيك علينا وحق الله ، كونما انت ماعرفنا منديرو ..

إلهام :

– سعدات باك بيك أختي عندو راجل ، الله يرضي عليك ..

شامة (كضحك) :

– غير اجي وحݣر المرأة ، والله حتى نعميو ليهم العين ، قلبوها ضحك بيناتهم مجموعين ، كيتسناو القرار ديال المدير ، واش ايقبل بالمتطلبات ديالهم ولالا ..

//_______

قدام باب كبير ديال الحديد، وقفات pick-up Ford F-150 فلون أزرق ، جا العساس حل الباب وهو مبهوض ومصدوم ، وقفات الپيكوب قدام الدار الكبيرة ، نزل منها ، زول نظاظرو وكيشوف فدار وفطبيعة لي حداه، تنهد تنهيدة طويلة ويتنشق الهوا النقي، بحال شي واحد كان مسجون وعاد رجع للحياة …

– جا العساس كيجري :

– سيدي هدا أنت ..

______

– رجع نور الدين عندهم ، علمهم بلي داكشي لي بغاو اياخدوه وبلي تزادتهم ساعة ، قبل مايرجع لخدمتو، عطا شوفة لشامة ديال الشر ، وديال شي إنسان لي محلف حتى ينتاقم منك ، شامة مداتهاش فيه ، فرحانة وكضحك مع البنات ، ماعلى بالهاش لا بيه لا بغيرو …

_____

مع 6 ديال العشية خرجو البنات من الخدمة ، وصلهم ترونسبور حتى لبلاصة فين كيهزهم ، شدات شامة طريق لظار بانو ليها دراري كيقادو فالخزانة لي ايستقبلو بيها عماد ، جات عندهم نيشان ..

شامة :

– دراري فين وصلتو؟

رفيق :

– حتا غاديين مزيان ..

شامة :

– صبرو عليا نحط سكادو قدار ونجي عندكم ، مشات حطات سكادو ديالها فدار عند الباب ، كان باها قدام الباب ݣالس مع شي رجال تبعها بالعين ، منين دخلات حتى خرجات ، رجعات عند دراري يدها بيديهم قادو طولشي باشيتلقاو ليه ، وقفات عليهم مليكة مامات عماد ..

شامة(عنقاتها) :

– على سلامتو أخالتي .

مليكة :

– الله يسلمك ابنتي لهلا يخطيك ، الله يخلي ليك صحيحتك ، لهلا يخطيكم كاملين أوليداتي ، مانرجعها ليكم فساعة الفرح ياربي ..

أشرف :

– وايلي اخالتي مليكة ، وراه عماد خونا مالنا برانيين ، راه حنا ولاد حومة وحدة ..

مليكة :

– عارفة اوليدي ، حتى جيران مامخليينش من جهدهم ، ماخلاوني ندير والو تكلفو بالحلوة وبكولشي ..

شامة :

– أخالتي غير إلى مابغاوش ، عماد قليل عندنا ولا ، وهنا فين كاتبان الجورة ديال بصح ..

مليكة : عارفة ابنتي الله يرضي عليكم والله يسامح ليكان حيلة وسباب ياربي ..

/////

– سلاو الدراري وماعهم شامة قادو كولشي ، كانت فرحانة ومقاداها فرحة ، علاش لا وعماد لي جلات عينيها فيه فايتها ب 4 سنين من صغرها وهي معاه جنبها لجنبو ، تلعب الكرة معاه تخرج معاه يكون مع دراري تكون معاه ، ختو لي ماولدتهاش ليه مو، يغوت عليها لدرجة يضربها وماتهضرش بنسبة ليها هو الوحيد من ورا باها لي ماتقدش ترفض ليه حتى طلب ، عزيز عليها كتر من راسها ، نهار لي تشد غير حيتاش مسكين كان واقف حدا واحد المدابزة طاحت فيها الروح ، وشي ولاد الحرام مكيحملوهش جبدو سميتو ، تشد فيها 4 شهور ، عاد بانت واحد السيدة شهدات بلي مكانش معاهم وبلي عاقلة مزيان شكون تعرض ليها هي وخطيبها ورشݣو فيه موس وهي ضربوها ، جاب الله ماماتش كان غير فغيبوبة ،أما كون ماتت كون مشات على عماد وتختخ فالحباسات ، شحال من مسجون مسكين غير مظلوم ، وشحال من مجرم خارج كايلعب ومزال كيمارس فالإجرام ديالو ، وحتى واحد مكيݣوليه كلمة وحدة راخيين ليه اللعب …

////

#على_العشاء

– شامة :

– با بغيت نݣوليك شيحاجة ..

علي(شاف فيها بنص عين) :

– ݣولي

شامة :

– عمر أيجي يخطبني نهار السبت ..

علي(حط الخبز من يدو وخنزر فيها) :

– حتى داك الفنيان ، نص راجل يتزوجو بيه الناس ، انت مالك هبيلة وعمية ، واش داير ليك تاكتوبو عند شي فقيه ولا كيفاش ، هداك راجل هداك ، ماندهلو من شتى حشايشي ديال الخلا، فنيان كياخود امن عند العيالات ..

شامة (شافت فيه) :

– با انا هادشي عارفاه ، واش عجبك سنين وهو مجرجرني نجي دابا باش يعيبو عليا يكولو حقا ما حقا خدا لي بغا وساسها ..

علي (خنزر فيها) :

– كيفاش خدا لي بغا؟

_______

– شامة :

– غير رتاح ابا اويلي اويلي نعل شيطان مالي خرج ليا لعقل ، بغيت نݣول شحال كلا فيا وشحال سخسخ فيا ، نجي دابا نخليه ليهم بارد ، والله أبا الى مدوقتو المرار مانتسماش ، وداك ساع نضرب بيه الطر ونكركبو ، عاد نرتاح ، مانبقاش فيا ديك الكية والعافية شاعلة ليا فقلبي ..

علي :

– مايجي عندي ماحملت كمارتو مانشوفو ..

شامة : با غادي يجي وغادي تشوفو وغادي تقبل(بإصرار)

علي : شماتة لي ولدو ، انا نهار تزوجت عمري خليت مك تصرف عليا درهم واحد الله يرحمها ، كنت كاسيك ومسبطك وقريتك أحسن قراية، كنعتارف بلي كنقمر يااااه وكنلعب تيرسي ، ولكن حتى شديت لانتريت وكبرتك ، ماشي بحال داك الشماتة الله يغبر ليه الشقف فينما كان ،(وقف دخل لبيتو وخلاها) ..

– تسدات ليها الشهية حتى هي ، هزات طبلة وجمعات الكوزينة ، ومشات تنعس ..

_____

– قدام باب ديال الخشب منقوش ،وقف راجل ف 80 من عمرو لابس واحد السلهام وهاز عكاز فيدو ، كتبان عليه الهيبة والوقار ، دفع الباب لي كان مبسم بالعكاز ديالو ودخل ..

– الفيلا من الداخل كان عندها طابع مغربي بسيط ديال الفيرمات ، تقدر ترتاح فيها وتنسى راسك ، بقى واقف كيشوف ويشمشم، حتى نباه صوت رجولي ..

– توحشتي طاجين ديالي ياك ، ضار عندو مبسم هز حاجب وهبط الثاني ، حل يديه ليه ..

– توحشتك يانمرود (جا عندو بخطوات سريعة وعنقو كيضرب ليه على كتفو ، تحنا وطاح معاه شعرو لي كان بحال الحرير فلون عسلي على عينيه) :

– توحشناك الحاج ..

الحاج :

– جدك الحمار مزال ماتعلمتي تݣولها زريعة القنب، طلع براسو وشاف فيه ، بعينين كبار قهويين كيسحرو ، مغطيينهم رموش طوال ، ضحكة ساخرة على وجهو ، فك قوي ، سنان بحال جوهر كيطل من ورا إبتسامة كتخبل ، رجولة طاغية شرسة ، كتحس بيه سوڤاج ، وسامة من نوع الوسامة القاصحة ، لي كتخلي فيك أثر ومايمكنش تنساها بسهولة ..

-(بصوت ساخر) :

– ماحدك كتعيط عليا نمرود ، انݣوليك الحاج ..

الحاج (بغا يضربو بالعكاز وخوا ليه) :

– يحسابليك اطواليتي وكبرو كتافك أتغلبني لحمار ديال بوك ، واخا تولي ݣدك ݣد النخلة نجرك نجرك ..

النمرود :

– وسمعني مزيان ، طاجين قرب يوجد نحطوه ونتعشاو ، ونجيبو أنا وياك فالهضرة ..

الحاج :

– كاينين شي بيردات بعدا ؟

النمرود(ضحكتو زلزلات الدار) :

– أنعل الشيطان ، واشأنت مزال مابغيتي توب، انا حفيدك وقطعت شحال هذا ، خلاه كينݣر ورجع لكوزينة يطفي على الطاجين ..

_______

– ݣلسو على برا فجردة ، مسرحين ، الحاج حاط طربوشو والعكاز ديالو ، وحداه حفيدو معنق مخدة وساهي ..

الحاج (بصوت رجولي قوي) :

– هداك هاه ، مغاديش تݣوليا أش جابك لهنا ؟

– علاش مكانش خاصني نجي؟

الحاج : وتا نوض راه انا لي مربيك ماشي أنت ، مخلي المدينة وباينة بلي باك ومك وخوتك مسايقين خبار ، وجاي نيشان لهنا كيفاش طرا وجرا ..

– وأنت فين كنتي نهار كامل ؟

الحاج (ضرب بيديه) :

– شبهتيني فقصوحية الراس وتضوار الهضرة، كنت كندور على الخدامة ، وݣلست شوية مع الحاج تهامي وجيت ، ݣاليا العربي بلي جيتي ، كان مخلوع مسكين (كيضحك) ..

– (بصوت بارد) :

– توفيت ..

الحاج (كيشوف فيه مفاهم والو) :

– تا كيفاش متي ، الى كنتي ميت شكون انت ، لالا كيبان ليا بدلتي شراب بشيحاجة خرى ..

– مكاينة حتى حاجة كنݣوليك ليكاين ، النمرود مات ..

الحاج :

– الى كان النمرود مات ، شكون انت أبلحمار ديال بوك واش كضحك عليا تا هضر مݣاد ..

– مات نمرود ولكن ماماتش جُنيد الهاشمي أجدي ، شفتي البلان كيف داير(غمزو) ..

الحاج :

– دابا غير بالعقل فهمني غير بشوية راه مافهمت والو ..!!

_______

فاقت شامة بحال ديما لخدمتها ، وصلات بدات الخدمة وهي كتسنى غير الوقت لي تسالي فيه وتمشي ، 3 سلات شدو الطريق ، وثلات كتجري لقات الظراري مجموعين ..

شامة :

– أمضرا جاو ولا مزال؟

– رشيد : لا مزال مجاوش

شامة : فين دقايقية ؟

رفيق : أبشوية عليك كولشي واجد خاصهم أيجيو ..

______

قدام السجن المحلي عين السبع ، واقفة الخلعة راكباها من راسها لرجليها ، يديها كيترعدو غير بوحدهم كتفتف مسكينة ،قلبها كيضرب ، مخلط عليها كولشي الفرحة الخلعة كولشي مخلط عليها ، شادة فيها الجارة ومصطفى ولد الجيران ..

– تحل الباب وتحطات رجلو هاز ساك على كتافو ، لابس تيشورت فالݣري وسروال دجين كحل ، مطلع شعرو شوية محسن وجهو ، أول وحدة شافها هو وجها ، لاح ساك ديالو ومشا كيجري تلاح عليها …

_____

– مليكة (غير شافت وجه ولدها ، هزات بقلبها غادي يزهق ، دموعها تمو جايين بحال الشلال ، مشات كتجري عندو عنقاتو) :

– وااا وليدي حبيبي ، وافرحي بكبيدتي وسعدي بحبيبي وتاج راسي وفرحي بحبيبي (طاحت هي وياه لأرض، كتبكي وتعنق فيه ، تشد فوجهو وتبوس فيه ودخل نيفها فعنقو وتشم فريحتو) ..

عماد (كيبكي) : مي الحبيبة ، ثافي أميمتي صافي ، أنا معاك أميمتي أنا معاك ، دازت الحمد لله دازت(كيشد ليها يديها ويبوسهم ، ترما على رجليها كيبوس فيهم ) ..

– لهلا يحرمنا من حنان الأم ، القلب الحنين ، لي واخا تغلط مكتلقاش من غيرها من غير صدرها وركابيها لي توسدهم ،توقف معاك وتنوض معاك ، تعذب معاك فصغر وحتى فكبرك ، مكاينش بحالها ، فمرضك تمحن ، تزوج تمحن ،تغرب تمحن ،تشد تمحن ، الأم شي حاجة كبيرة مكاين بحالها ، لهلا يحرمنا من أمهاتنا ، ولي توفات ليه الله يرحمها ياربي ، عماد ماعندوش باه مات الله يرحمو ، غير مو لي عندو هو المعيل الوحيد ليها ، وفاش تشد تعدبات وتسخسخات وغير الناس ليعاونوها حتى شدات محامي وقف على الدعوة ،هي لي تدي ليه الݣفة ، وهي لي تواسيه وضحكو وتفرحو ، فيها الأم وفيها الأب ، هي كولشي قراتو او وقفات معاه حتى خدا ديبلومات لي عندو ، ولكن بحالو بحال أي شاب ، كيخدم فالمكان الغير مناسب لواحد بقرايتو وبديبلوماتو …

– مصطفى :

– صافي أخالتي مليكة ، براكة خلينا نعنقوه حنى راه توحشناه ..

مليكة ( وقفات كتقاد فزيفها ) :

– أوليدي راه بحال الى كنحلم وحق الله ..

مصطفى (عنق عماد) :

– على سلامتك أصاحبي ، مرحبا بيك ، على سلامتك أخويا توحشناك ..

عماد :

– حتى أنا توحشتكم، سلم على الجارة لي جات معاهم ، هز مصطفى الساك وخلى عماد معنق ميمتو ، غاديين فطريق وكل شوية كيبوس فيها ، كيستنشق الهوا ديال الله ، وكيحمد الله لي خرجات على خير وظهر الحق ..

_____

– الدرب كولشي واقفين عيالات ودراري صغار ، كولشي واقف كيتسنى ، شامة واقفة واحلام صاحبتها كيتسناو بفارغ الصبر إيمتا يوصلو ، حتى بانت ليهم طوموبيلت مصطفى داخلة لزنقة ..

– شامة ( كتغوت) :

– هاهوما جاو جاو ، بداو الدقايقية كيضربو والعيالات كيزغرتو ، كولشي فرحان ، وقفات طوموبيلت مصطفى فتح عماد الباب وخرج ، مشات شامة كتجري على خر جهدها ، عمرها بكات على شي حد ولا نزلات دمعة وحدة حتى لهاد النهار ، الدموع ديال الفرحة ، حل عماد ليها يديه وستقبلها ، طارت نقزات عليه ، هزها كيدور بيها معنقها تكمشات عليه بحال شي بنت صغيرة ، مابغاتش طلق منو ، رجعات براسها شافت فيه كتبكي ..

عماد : دابا لاش دموع ؟

شامة : حيتاش ريحتك بحال الݣط عماتني(تكرشخ بضحك وهي هكاك رجعات معنقاه حتى فارقوهم الدراري) ، كل واحد كيسلم على عماد ويبارك ليه البراءة ، والعيالات ماوقفوش من الزغاريت نهائيا ، دخلوه لخزانة، كانو الطوابل ، مشات مو كتجري هي والعيالات كيحطو الحلوة والحليب والتمر ، باش ياكلو الناس لي كانو كيتسناو ، رحبات بيهم وشكراتهم واحد بواحد ..

شامة(لرفيق) :

– كحز بغيت نݣلس حداه ..

رفيق : ها البعلوكة بدات تاني ..

عماد (كيضحك) : أنوض أخويا خليها راك عارفها ، ياك ݣلتي ريحتي بحال الݣط ولاش جايا مخشية حدايا ..

شامة (ݣلسات حداه ) : حيت بغيت وانت شغلك نيفي ولا نيفك ..

عماد : غبرت 4 شهور وانت هي أنت ..

شامة : واخا تغبر عليا 100 عام عمري نتبدل ، قلبوها ضحك الحومة كلها فرحانة وناشطة حتى لورا المغرب وهوما على داك الحال خالقينها وفرحانين برجعو عماد وبالبراءة ديالو ..

_______

تجمعو الدراري على برا ضايرين بعماد ، رفيق هز شامة فوق كتافو ، ضايرين على عماد بحال شي لاعب ربح الكاس ، خدمو أغنية موح ميلانو(ماشافوهاش) وجهدو ليباف ، وبداو كيغنيو كلهم صوت واحد مع عماد :

صغري جايز زنقة

نايض والو ما نلقى

ما زال ما خلاصت الحلقة

اللي ضيَّع هاد الموند

عند الله الملقى

جاع نروحو واحد ما يبقى

في ظلام الليل نسير

نافيغي زماني

نزدم وندير ندير

نحقق الأماني الكور يميل

والقلب يقول واش الداني

مجاهد صغير أنا هكذا بابا خلاني

ماشافوهاش هذي ماشافوهاش

ديبار صعيب واحنا الزيرو ماعندناش

ماعاشوهاش هذو ماعاشوهاش

دوزنا باصي نوار مايتنساش

على بالي الديفو فيا

ماشي غير فيك انتيا

هذا زهري وهذا مكتوبي

نايض في la guérilla

خاطيني الرومانسية

ومن الثقة عندي لافوبي

نتيا روحي في لامان

وانا في همي لاتي

قراني هاذ الزمان نجرِّي ياماتي

خلي اللي يقول يقول

الحقيقة جواتي

واللي هدروا ما شافو

ما عاشو حياتي

ماشافوهاش هذي ماشافوهاش

ديبار صعيب واحنا الزيرو ماعندناش

ماعاشوهاش هذو ماعاشوهاش

دوزنا باصي نوار مايتنساش

رافد جبال محان

صاحبي ونبالك فرحان

المظاهر هذي خداعة

ولا خلعوك الألوان

الهوا وقعدة النسوان

كي تفيق تتكسر لك الساعة

الوقت صعيب صعيب والدنيا غدارة

والسبع يا حليلو ولا طاح

يديرو فيه الزكارة

معاك اليوم وغدْوا يرموك من الطيارة

أما لا زيد روح بعيد وخليك من الهدارة

ماشافوهاش هذي ماشافوهاش

ديبار صعيب واحنا الزيرو ماعندناش

ماعاشوهاش هذو ماعاشوهاش

دوزنا باصي نوار مايتنساش

_____

ماسلات الحفلة حتى ل 12 ديال الليل ، مشات شامة لدار مسخسخة ، خلات عماد مع مو حتى لمن بعد وتشوفو …

_____

دوز النهار كلو فالفيرما ، هاز واحد الفاس وكيحفر بيه ، رجع لدار كلو عرقان ، عامر بتراب ، طلع لفوق دخل لبيتو ، ختارو بعشوائية ماعندوش مع البروتوكول ، ولا يختار أحسن بيت ، أهم حاجة عندو هو يرتاح ،دخل لدوش دوش ، خرج نشف راسو لبس سروال ديال التوب كحل ، ووسوفيطما كحلة ، نزل لتحت يشوف يصايب ليه مياكل ليه ولجدو ، حتى قاطعو صوت التيليفون كيصوني ..

______

– وسط ديبو كبير ، ݣالس داير رجل على رجل فرحان ، كانو بزاف ديال الرجال قدامو كيهزو شي كراطن وكيخرجوهم لبرا كيحطوهوم وسط واحد الرموك كبير فالبيض ، جا عندو واحد من دوك الرجال وشوش ليه فودنو .

– خليه يدخل ، وقتما جا بلاما تجي تشاورني خليه يدخل ..

مشا هداك ، وتم داخل كيفرنس مابحالو حد :

– القضية مزوهرة ..

– وفين أبا عمر ، توحشناك غبرتي غبرة وحدة

عمر(ݣلس تنهد تنهيدة طويلة) :

– أودي أخليها على الله وصافي ..

– ياك لاباس ، اش قلق شريكنا وحبيبنا ؟؟

______

– دازو يوماين ديال الروتين ، شامة من داك نهار مشافتش عماد ، مابغاتش تشوفو حيتاش خافت لا يغوت عليها على قبل عمر ، بقا نهار واحد لنهار السبت ، وصل نهار الجمعة ، كانت مخداماش فصباح ، فاقت بكري جمعات الظار وهزات الفراش ، سيقات وقدات الدار، بقات 5 دقايق على الخدمة ، حيدات حوايج الدار ولبسات حوايجها ، هزات سكادو وخرجات كتجري ، تلاقات مع عماد واقف ليها عند الباب كيخنزر فيها ..

عماد :

– شفتك غابرة ، من نهار دفنوه مابقاو زاروه ..

شامة : والله حتى كنت باغية ندوز عندك ، غير الوقت ..

عماد(بشك) : شامشوم ماشي عليا أزين(غمزها) شنو كاين ؟

شامة : هانتا نجي من الخدمة ونهضرو راه خاص نكون دابا فالخدمة ، تخطاتو ومشات كتجري ، خلاتو وراها متبعها بالعين .

______

– وصلات شامة لخدمة ، دخلات معطلة بزاف حتى مشا عليها ترونسبور ، شدات غير طاكسي لخدمة، مع دخلات كيبان ليها الكل كيشوف فيها ، مافهمات والو مالهم كيشوفو فيها بحال هكا ، جات عندها إلهام كتجري :

– فين كنتي أصاحبتي ، تعطلتي بزااف ، ماعرفتيش اش…(صوت نور الدين مخلاهاش تكمل كلامها) :

– شفت البرݣاݣات ديالك وصلوها ليك(كيشوف فإلهام وكيضحك بإستهزاء).

شامة (كتخنزر فيه) : علاش أنت خليتيها بعدا توصل ليا ، وأنت داير بحال قباض الرواح ، أشكاين راه تعطلت ا 5 دقايق ماشي شيحاجة ..

نور الدين(كيضحك) : تعطلي قدما بغيتي مابقاش كيهم ، حيت خدمتك معانا سلات ..

شامة (مصدومة) : كطنز عليا ياك ؟ كيفاش سلات ؟ وشنو السبب؟

نور الدين : لقينا شحال من بياسة ناقصة من السلعة وجوج ديال الناس شهدو بلي شافوك انت لي هزيتيهم ، ولقيناهم فالڤيستير ديالك ..

شامة (كضحك تعصبات) : كتريݣل عليا ياك لا كتريݣل ،الڤيستير كنحط فيه طبلية ديالي وساكي ، وكنهزهم فاش كنخرج أشمن بياسات واش أنت مضروب بفردي خاوي ولا كيفاش؟

نور الدين : هادشي لي كاين مابقاتش بلاصة عندك معانا ، اتهزي حوايجك وتمشي بحالك ، وهاد القرار من الفوق ، وحسابك اتلقاي عند العساس ، يلاه برا برا ، ماعندناش الوقت كاين لي ارومبلاصيك، نجوى أجي دوزي لبوسط ديالك الجديد ، جات نجوى كتعوج قدامها ، شافتها شامة بدات كتضحك :

– ماغريباش ، الخنز مكايقبل عليه غير الخنز ، غير هو داك يطوال ويعجبكم بجوج ، دابا تشوف اسي نور الدين الى ماندمتك على نهار لي تزاديتي فيه ، مكنتسماش شامة شرف الدين ، أه نسيت بلغ سلامي لمدام نوال ولوليدات ، هزات سكادو ديالها وحطات ديك اطبلية بزعاف ، شوية رجعات شفت فنجوى ، جمعات دفلة كدها كداش ودفلات ليها على وجها ، خلاتها كلها كترعد وخرجات …

______

– رجعات شامة كارها الدنيا ومافيها طالع ليها واحد الدم ، مكاتشوفش قدامها نهائيا ، هزات تيليفونها وسونات لعمر بقا شوية عاد جاوب ، مقلوب بنعاس ..

– عمر : ألو حبيبة ياك لاباس خاصك تكوني فالخدمة دابا ..

شامة (ببرودة) : بلاما تجيو غدا ..

عمر (بأستغراب فرحان) : علاش احبيبة وانا معول ، وشريت كولشي حشومة عليك ..

شامة : مغانكونش مسالية ، مابقيتش خدامة جراو عليا وماعنديش المورال لي يشوف شي قندوح ، وشوف الفلوس لي كنت كنخبي عندك ، الشعر الجاي بغيتهم اندوز ناخدهم ، الساروت عندي بلاما تعيي راسك ، أنشوف الى لقيت خدمة هو هداك ، مالقيتش اندير كروصة نبيع فيها خرينݣو ، وأيخصوني دوك الفلوس ..

عمر( توتر ) : أهاه واخا أحبيبة إن شاء الله صافي، قطعات معاه ومشات لدار ، دخلات باها كيشوف فيها ..

علي : ياك لاباس؟

شامة : جراو عليا أبا من الخدمة ، صافي وليت بيطالية ، وأنا أش بغيت ليك يا نور دين ، انا بغيت ليك الحكة وقلت الظفار وظفارك يكونو حرشي ، تجي تحك يتندبو ليك الحناك وتنبل كلوك ، تولي بحال بوعبولة ياربي، وانا بغيت ليك دقت مي لي مشات فعز شبابها ماشبعت منها ماشبعات مني ياربي لحبيب ..

علي(كيشوف فيها) : باينة درتي شي مصيبة باينة لعما فظلمة ..

شامة (ضارت كتشوف فيه) : با دابا انا أبا كندير ياك أبا هدا هو المضمون فيك تجي على البراني مني ..

علي (كيضحك) : اديك العافية ديك الحراقية حتى متكونيش بنتي كتشبهي ليا وعاد نتيق بيك ..

شامة : اه درت ومن بعد دافعت على حقي ،مندافعش على حقي نشوف الظلم قدام عينيا ونسكت عليه ، الله ينعل طواسلو هو وديك الخدمة ..

علي : وداك راس لوقيدة مزال جاي وهو ومو غدا ؟

شامة : قلت ليه من بعد ماشي دابا

علي : الما وشطابة حتى لقاع لبحر ..

شامة : انوض ابا نرتاح ، نعس واحد الساعة

علي : سيري ، دخلات شامة لبيت الكلاس حيدات صباطها وتكات ،كتفكر بلي مابقات عندها خدمها ، كتفكر فالفلوس لي مخلية عند عمر ، بسباب باها خباتهم عند عمر ، كون خلاتهم فدار كون وداز فيهم ، وهي ناوية تجهز بيهم دويرتها وتفتف عليها ، دابا لحقات عليهم الى مالقات خدمة ، اتاخدهم دير بيهم مشروع صغير تسترزق بيه الله بينما حن فلي حسن ..

______

بليل فوق الصور ديال الشطح ، ݣالسيت بثلاتة ، شامة عماد وأحلام ..

عماد : وليتي بطالية بحالك بحالنا

أحلام : كون ادرنا شي فقة ديال الشعبي

شامة(كضحك) :

– صافي عماد يغني وحنا الشيخات ..

عماد : عندكم بعدا الفصالة ديال الشيخات ، وانتوما عسريات ..

أحلام( كضحك) : لا أخويا هضر عليها هي بحال عزري الدوار ، أما أنا لا ..

شامة(كتعيبها) : أما انا لا سيري سيري ، وانت حتى تحزيمة المضمة ماعندك قاتليك شيخة انت نهار لول يضربوك بمطيشة ..

عماد(ساهي) : واحد الشركة واعرة طالبة موضفين لديبوسط واعرين ..

شامة(تنهدات ) : أودي ألالاف الشركات كيطلبو موظفين ، ماشي لينا ..

عماد (مزال ساهي) : عرفتي شنو تخدم فشركة الهاشمي راه الخيال وحق الرب ، عرفتي شنو هي شركة الهاشمي راه شيحاجة والله ..

شامة (بإستغراب) :

– أشريف فيق وانت بديتي كتسرح بخيالك ؟

أحلام (بإستفهام ) :

– أجي نݣوليك ، هاد الهاشمي ماغريباش عليا أش كيجيهم توفيق الهاشمي؟

عماد (شاف فيها ) :

– هداك هو مول الشي ، عرفتي شحال من أتوليي عندو فكازا وبرات كازا تابعين لشركة تمو فين كيحط التصاميم ديالو ..

شامة : شكون هاد توفيق ؟

______

أحلام شافت فيها بإستغراب :

– أنت موحال واش عايشة ، توفيق الهاشمي كان مطرب معروف شحال هادي ماشي غير فالمغرب حتى فشرق الأوسط ، كنسمع ديما ماما مخدمة أغانيه ، صوتو كيحمق ، وشحال ياختي غزال واخا كبر ، وكانو دوزوه فواحد السلسلة كانت كتجي فإيمبيسي سانك نسيت عليها ، خطيير وعندو اكبر شركة هنا فكازا ديال تصميم المجوهرات ، وتصاميمو ماتلقايهمش عند شي ذهيبي، كيتباعو غير فليزاتوليي ديالو ، غير لناس الألبة ، وتشوفي الفيلا لي ساكن فيها ويلي ويلي دوخي ، شفتها فمجلة لالة فاطمة ناري عرفتو فين جات ف بولڤاغ دو لا لاڤاند، حدا قصر ألسعود قريبة من انفا وسينما ميݣاراما (تنهدات تنهيدة طويلة) وتشوفو ولادو وبناتو كيدايرات باخ باخ باخ ، كل واحد فيهم بشركة يلالة ، سعداتهم عايشين الحياة ..

شامة : إيوا كل واحد الله يعاونو وحنا مالنا ، وأنت بعدا من إيمتا كتبعي المجلات ؟

أحلام : من زمان أبب ، علاش أنا بحالك ..

عماد : كنحلم نخدم فديك الشركة والله

شامة (وقفات) :

– وأنا أنمشي بحالي باش نفيق بكري نقلب على خدمة، نقابلكم انتوما وشركات ديالكم ، زريعة القنب ماتحشمو ماترمشو ، مشات كتجري ، كتنقز سطح بسطح باش طيح فدارهم ..

عماد : قردة صافي ..

_______

دازت الأيام وشامة ماخلات قنت ماقلبات فيه على خدمة ، فينما دخلات يرضوها ، أخرتها وقفات قدام واحد القهوة ديال الشيشة ، طلباتهم الى كانت خاصاهم لي تغسل الماعن ، فلاخر قلباتها مدابزة بونية فيا وفيك ، حيت قالو ليها خاصهم وحدة لي تشعل لكليان الشيشة وقلباتها سباط ، ماخلات قنت من الصباح على ليل كتجي مهدودة ، حتى عماد قليل فين كتشوفو هو وأحلام ، كتجي كتنعس حتى الماكلة مابقات تاكولها بحال بنادم ..

______

كان ورا الدار كيشرب قهوتو الصباحية ، حتى حس بيدين باردين على عينيه ، وريحة بحال زهرة الياسمين دغدغات ليه الحواس ديالو ، شعر طويل طاح على كتافو ، تبسم تبسيمة بينات سنانو ، جرها من يديها وجابها ݣالسة على رجليه ..

جنيد (بصرامة) : كنت عارفك غادي تجي ، مايمكنش يبردك تيليفون ..

( مدات شواربها وضحكات) : واش انت حمق يبردني تيليفون مايمكنش ، (شدات وجهو بين يديها كتمعن فملامحو ) ناري أخويا وحق الله حتى توحشتك بزااااف ، عنقاتو بجهد :

– سعيدة بلا جنيد كتعيش الكأبة ..

جنيد (كيعيبها) : سعيدة بلا جنيد كتساوي الكأبة ، حتى منكونش كنعرفك ، عنداك تكوني ݣلتيها ليهم ، مافيا لي طلع ليا الواليدة والواليد من الجنب ..

سعيدة :

– علاش اخويا حتى لإيمتا اتبقى مخبي هنا ،كلنا توحشناك وبغينا نشوفوك ، وانت لي ضاربك ضاربك على هاد الفيرما مكتفارقش معاها ..

جنيد (بصوت رجولي) :

– ماشي على شيحاجة ، حتى انا توحشتكم ، ولكن بغيت نعطي لراسي الراحة ، انت عارفة الواليدة عاوتاني دير شي حفلة بلا مناسبة وتعيط على صحاباتها فالجمعية ، وتݣلس هادي فلانة وهادي بنت فلانة ، وانا مافياش لي يسمع هاد الهبال ، راسي خاوي دابا ..

شافت سعيدة فعنق خوها بانت ليها السنسلة :

– مزال مانسيتيه ؟

جنيد(تنهد) :

– عمرو مغادي يتنسى ، عمر شي واحد كينسى روحو هكاك أنا ، تبسمات سعيدة وعنقات خوها تمخشات فيه ، عنقها بجهد كيبوس ليها فراسها ، مكانتش كتشبع ليه من غير لون الشعر لي كان عسلي وطويل ، عنها حفرة الزين فدقن ديالها ، رموشها طوال شفايفها عامرين بشكل مثير ،كان فيها مزيج بين البراءة والشقاوة، وهي دلوعة ديال الدار وخصوصا جنيد أقرب وحدة ليه كيحسبها بنتو كثر ماهي ختو …

_______

– الشهور كانو كيجريو ، شامة عيات تقلب يأسات مالقات خدمة والو ، وكان ضروري تخلص الما وضو غير داك شوية كيشيط فلانتريت كيكفيوهم واحد الشوية، باش يسدو واحد الباب ..

أحلام : هاكي هادو عدي بيهم بينما ربي جاب تيسير وفتح عليك بيبان الخير ..

شامة : لهلا يخطيك الحب ،كونما انت كون مشيت خلى ، وحتى بالحمار ديال عمر مسافر قلت ليه على الفلوس مالقيتوش ..

أحلام (بإستغراب) :

– ياك عندك السوارت دخلي وهزي فلوسك!!

شامة : فخبارك لقيتو بدل القفل ، فاش ݣلتها ليه كاليك حقا انا مسافر وخفت يدخلو الشفارة ويهزو الفلوس ..

أحلام (كدور فعينيها) :

– شوفي انا مابغيتش نجبد الصداع ،ولكن راه من نهار لي غبر هدى مابانش ليها الاثار ، عنداك غير يكون هز ليك الفلوس ومشا بيهم معاها ..

شامة بحال الى ضربتيها بموس لقلبها :

– وايلي لا مايمكن بفلوسي لا مايمكن..

أحلام :

– شوفي أنا غير ݣلت وصافي ، من نهار ݣلتي ليه على الفلوس وهو غابر ، لا عندي خدمة لا مسافر ، أقل حاجة يسيفطهم ليك فوافاكاش ،ياك ݣاليك مشا خدام ، يسيفطهم ماشي غبر غبرة وحدة انا اكلت والله أعلم .

شامة (سكتات كتفكر مغوبشة ، قلبها كيضرب بجهد واحد الرعدة شداتها عمرها حسات بحالها ) ..

أحلام : شوفي المغرب قرب يأذن وتحرك السم ديال البرد خاصني نمشي قبل لا ترجع ماما ، المهم لي كاين ݣوليه ليا صافي أنا مشيت ، شامة مجاوبتهاش حدها ساكتة وساهية .

_______

– دخل الحاج عبد الرحمان بعكازو كيقلب على جنيد ..

جنيد (طل عليه يديه عامرين بالغيس) :

-الحاج حسيت بيك كتقلب عليا سبحان الله ..

الحاج: بغيت غير نعرف لمن خرجتي طناز، فيك تريݣيل بزااف ، اجي بغيتك ..

– قرب ليه جنيد هاز حاجب ومهبط الثاني) :

– أشواقع أش تم ؟

الحاج(ݣلس) :

– باك ساق ليك الخبار بلي 5 شهور وأنت هنا..

جنيد (ببرودة):

– سعيدة ݣالتها ليه؟

الحاج :

– بهاء خوك سمعها كتهضر معاك وعرف بلي أنت هنا، الله يرضي عليك براكة من الراحة راه خاص تهبط تشوفهم مجاتش عاوتاني ..

جنيد (وقف) :

-كنت كنفكر فيها قبل لا تݣولها ..

الحاج: إيمتا؟

جنيد : بحال والو غدا ، علاش طلعت ليك فراس ولا ،مع ݣالها هرب من عكازجدو لي جا فالباب ..

جنيد (كيطنز) : كبرتي الحاج مابقيتيش نياش كيف كنتي(غمزو) ..

الحاج : خلاوها ماليها ، شحال القوس امول القوس ،كاليه دابا تشريه بلا فلوس ..

______

– القمرة كانت مضوية بزااف فهاد الليلة ،والقمر كان مكتامل النور ديالو هو ليكان مضوي السما لي كانت كحلة ، الجو كان بارد فهاد الليلة بضبط ، واخا شهر 5 كايكون الجو سخون ولكن هاد الليلة كان الجو بارد بزاف على غير العادة ، كانت فظار ݣالسة على نار غادية جايا ..

علي(حاضيها) :

– داخلت عليك بوجه الله لاما ݣلسي ،تكول فيك طيكوك ،دوختيني ..

شامة :

– علي فوتني هاد الساعة الله يرحم مي فهاد النهار، قاطعهم صوت الدقان، مشات كتجري ، حلات ، خرجات ورضات الباب وراها ..

شامة(بتوتر) :

– أمضرا رفيق شوف بلاما تكذب عليا جيني نيشان ..

رفيق : لاش انكدب عليك اصلا وحنى شحال وصينا فيك ،الالة حب قلبك هاد الشهور كاملة، كان مع لالاهم هدى فسعيدية ، ويلاه جاو هي وياها ، هي فدار دابا ، وهو كاليا رشيد بلي كاين واحد الديبو حدا المرصى تماك فين شافو داخل ..

شامة (النار شعلات فيها مابقاتش كتشوف قدامها نهائيا ) :

– فين رشيد ؟

رفيق : فراس الدرب..

شامة : واخا تسناني أنا جايا، رجعات لدار :

– با انا جايا ..

علي : عاد كتشاوري ديما كديرس لي فراسك ، دايرة بحال سيحت الليل دار مكتشدك ، مداتهاش فكلامو هزات سوارتها وخرجات ، مشات مع رفيق لعند رشيد ، حتى وقفو عليه ..

شامة : رشيد بغيتك توصلني لديبو فين شفتي عمر ..

رشيد : منيتك فهاد الوقت !؟؟

شامة(بإصرار) :

– يا غادي تمشي معايا ولا نعت ليا فين نمشي بوحدي ..

رشيد : صافي صافي ، انا نديك ..

شامة : قبل أجي معايا بغيتك ، خويا رفيق شكرا بزاف شوف الى سولك عماد عليا ماتكوليه والو ، حلفتك بغلاوة خالتي نعيمة عندك ..

رفيق : كوني هانية مغادي نكول والو ، حدرات راسها وتمات غادية هي ورشيد ، والوجهة كانت دار عنر ولا نكولو البيت لي كاري ، الغضب كان عامي عينيها 4 سنين ديال الذل والهضرة من عند باها وعماد وصاحبتها ، كتسمع الهضرة ويلي اش بغات فيه ، ويليياكما ساخر ليها ، ويلي ياكما دا ليها شرفها داكشي باش مالقات عليه لين ، تحملاتو وتحملاتو ، ولكن توصل بيه يدي فلوسها لي عرقات عليهم من الفوق ولتحت ، والله حتى تنفيه ودفنو بيديها ومتبردش نارها، وصلو لقدام الباب .

شامة (شافت فرشيد) :

– انحسبو 3 وندفعو انا وياك واخا ؟

رشيد(بإستغراب) : واش عارفة اش كديري؟

شامة : صافي انفرعو بوحدي

رشيد : صافي صافي ، حسبو حتى ل 3 وفرعو الباب لي كان بابو راشي ، البيت خانز بريحة الحشيش ، وموسخ بحال مولاه، كان كاري هاد البيت احيت مو كانت جرات عليه واحد ليلة ، كيجي يتنشوى فيه ويمشي يبات عند مو كان مفرش سداري وطبلة تلفازة صغيرة وناريو صغير، شعلات الضو ومشات لماريو لي قاليها راه مخبي فيه الفلوس ، هو لي كان تما أصلا، حلاتو وقلباتو كلو ساستو مكان فيه والو ، قلبات الدنيا والو ..

رشيد : الى كتقلبي على الفلوس ، راه كاع لي عندو خسرهم عليها ..

شامة (شافت فيه) :

– باش عرفتيها ؟

رشيد (ببرودة) : سمعتها كتهضر فتيليفون فاش كنت تابعها هي وصاحبتها ،وكتكول بلي فلوس شرف الدين تخسرو عليها من ساسها لرسها ، شحال نصحناك أشامة ولكن راسك قصح منو مكاينش ..

شامة(صافي مابقاتش كتشوف قدامها كتحس براسها كلها شاعلة وكترعد أبوحدها) :

– ديني لديبو ..

_______

رشيد : شامة شوفي لي عطى الله عطاه ، دابا نساي مكاين لاش تمشي لتم ، أصلا أصاحبتي علم الله أش أتلقاي وفهاد الليل ..

شامة( بإصرار) : رشيد أتديني أه لا ، مغاديش تديني أنمشي انا واخا نمشي على رجلي، بقا رشيد واقف كيشوف فيها ، كيشوف الإصرار فعينيها ، هي أصلا راسها قاسح ، وإلى ماوقف معاها هي بنت حومتو مايتسماش راجل ..

– صافي واخا يلاه، خرجات هي وياه مخلية داك البيت محلول ، ركبات معاه فوق الموطور ، دار الكاسك وعطاها واحد دارتو هي ، شد الطريق لمرسا، شامة غادية ومرفوعة كولشي تخلط عليها كولشي ، كتشوف هاد الغدار لي عطاتو كتر من قيمتو ، دارت ليه الشان وهو الكلبة ماتقبل عليه ، حشايشي فنيان ݣرام ديال الرجولة مايكسابوش ، ݣاع البلانات لي كان كيدير ليها كايتعاودو معاها ، ماحساتش بطريق حتى وقف رشيد ، عاد نتابهات ، غير طوموبيلات لي كانو غاديين جايين ديك المنطقة كانت خاوية شوية ..

شامة(زولات الكاسك) :

– فين الديپو؟

رشيد : انخليو الموطور هنا ، نقطعو شانطي نشدوها رجل شوية عاد غادي نوصلو ، حط الموطور فواحد الدخيلة مكايبانش وسورتو ، ومشا هو وياها قطعو الشانطي لجهة لوخرا ، كانو بزااف ديال ديپويات تماك، دخلو مع واحد الزنقة خاوية محطوطين فيها شي طراكسات وكاميوات ديال السلعة ، وقف رشيد وشدليها يدها .

رشيد(كيأشر بعينيه ) :

– شوفتي حدا دوك الكراطن لي تم هداك هو الديبو ، كان بعيد عليهم بشي خطوات قلال، حداه جبل ديال الكراطن ملاوح ، وسراجم عاليين كيبانينو الضو لي شاعل لداخل .

– شامة : أنت بقى هنا ، مكاين لاش تجي ..

رشيد : أنت مريضة لا ، وإلى مكانش تما وكان بوحدو ، أش ضمنك بلي كاين ؟

شامة : رشيد ݣلت ليك بقا هنا ، شكون كال نكون الداخل ويكون شي حد جاي ، انت بقى هنا، كتجيش الله يرحم جدك متجيش ، مخلاتوش فين يهضر وتمات غادية ، لابسة الكحل من ساسها راسها ، كتحس بواحد العافية شاعلة فيها، وقفات قدام الديپو ، كانو غير المشاش كيدوروتم كيشمو ريحة الحوت لي جاي من المرسا ، وصوت الماج ، كتشوف واش يبان ليها الباب ، مبان ليها حتى باب يقدر يكون من جهة لوخرا ، ضارت من ورا ديك العرمة ديال الزبل ديال الكراطن ، كتسمع صوت الموسيقى وشيخات ، وريحة الحشيشة وشيشة كضرب من دوك السراجم، يلاه غادي دور وهو يوقفها الصوت لي سمعات ، وقفات ، غمضات عينيها وكتسمع ..

– وكيجاتك السعيدية؟

(صوت عمر دايخ) : وا واعرة واعرة ..

الناس فرحانين بيك ،السلعة وصلاهتهم فالوقت ..

عمر : بغيت انعرف شنو فدوك الكراطن ؟

(لاخور بصوت مرخي) :

– ماتخافش ، ماشي الكوك وماشي الحشيش..

عمر : أنا ماشي خواف سمعتي ولا نسمعك، أنا راجل ، أنا راجل واااعر وأحسن واحد فهاد العالم(سكران وصوتو تقيل) ، ودابا شركنا الشراب بغيت نكول طعام ولا شراب حسن(كيضحك بجهد) شنو فدوك الكراطن، واش هاد السلعة لي تخلي الناس الكبار يتاجرو فيها أخويا حتى حنا نديرو لعاقة ..

– هادشي كبير عليك أبا عمر ، وباش ترتاح ، دوك الكراطن لي هزيتي ، او وقفتي عليهم ، غير دوا ..

عمر (كيضحك) :

– وااا ساط تا أشمن دوا من نيتك تقولبني، على دوا كيدار فالمراطن ويتهرب وزوينة هادي عدك ..

– شفتي أساط فهاد زمان ، كولشي كيتهرب ، حتى من بنادم كنهربوه بقى غير دوا ..

عمر(كيضحك) :

– داكشي باش مشيت نجيب لمي دوا دسكار ݣالو ليا تقادة مابقاش فسطوك، ههههه ݣول فعايلكم هادو أولاد العبد ، ولايني مجرمين ، كتخويو سطوك وتخليو بنادم بلا دوا، وطلعو العمارات والشركات ولايني مساخيط ..

– وشتي الذكاء كيف داير ، وشتي هادشي داخل فيه الريوس الكبار، سير أولدي قرا ليك شوية على السوق السوداء ، باش تعرف معامن كتخدم وكتلعب ، وبربي وكلمة تخرج ، حتى يدفنوك حي العشير ، ا ا اطط طط نوريك صبااااار صبااااار ..

– شامة جبدات فبلاصتها ، قلبها كيضرب ، تفكرات السيمانة لي فاتت ، جارتهم فاطمة عندها وليد فعمرو 10 سنين وفيه مسكين السكر ، كتاخدو بالكارني من السبيطار ديال الحومة ،مشات تاخدوليه ݣالوليها مجاش ..

#فلاش_باك

فاطمة(كتبكي) :

– الدري الصغير ، واخا ندير ليه الريجيم حتى نعيا ، ضروري كياكول الحلاوة ،ودابا سيمانة ماخداش دوا ، فينما نمشي نبغي نجيبو ليه مكنلقاهش ، كيݣولو ليا مجاش ،أش غاديندير لمكتوبي ياربي ، إلى طلع ليه السكر ودري صغير ..

مليكة : كوني هانية اختي ماتبكيش شحال كيدير الفانيد ؟

فاطمة : 400 دريال وكيخصو جوج باكيات، وانا يلاه يلاه كيتفتفو عليا العيالات لي كنصبن ليهم أختي ..

شامة : كوني هاني اخالتي فاطمة ، جوج ديال البكيات نجيبوهم أماتبكيش ، الله ياخود فيهم الحق ياربي ، بغيت ليهم دقة مي لي مشات فعز شبابها ماشبعت منها ياربي ..

#نهاية_الفلاش_باك

-سامة(فخاطرها) :

– يا ولاد لحرام ياكروس لحرام ، الله يغرق لجد بوكم الشقف، الناس كتموت وأنتوما ݣالسين على لالة ومالي ، كاع لي تݣال لداخل سمعاتو هيا من برا ، ديما كتسمع الحاجة الغلط فالمكان الغلط ، كون غير تزادت عندها ودن تسمع او ودن لا ، وهي ودنيها بحال رادارات تسمعك من راس الزنقة، زادت تمشات شوية بان ليها سريجم صغير ، وقفات ومدات راسها بشوية ، كيبان ليها عمر سكران، واحد طبلة محطوطة فوقها قراعي ديال الشراب ، واحد خونا ݣالس داير بحال شي مرا كيقاد فشيشة وماقبلهم ، وشخص الثالت سمعات عمر كيݣوليها راس الحربة ، قرع وفيه البرص فيديه، وجهو ديال تبزنيز ، ماتشوف فيه لا موحمة لا لي شادة فحبل وجهو زرݣ بحال المرارة ديال العتروس ، حاضياهم حتى جبد شي وراق بحال الشيكات ، حطهم على الطبلة ، وجبد واحد البريكة فالقهوي ديال النحاس منقوشة ..

_____

– عمر (دايخ) :

– مزال عندك هاد الشيكات ياك قلتي قطعتيهم؟

راس الحربة : باش تخورني، وزايدون أنت شغلك ، مالك انت لي ساني عليهم ، ياك حبيبة القلب لالة هدى لي سنات عليهم ودخل سوق ك….ك ..

عمر : هاهو ساكت ، واش ديك البريكة ، بحال الى جايا من عهد الموحدين ..

– هادي ماشي بريكة الحلوف ، شفتي هادي حامياني ، مغاتخلي حتى واحد يأديني فهمتيها ..

– عمر : برب مافهمت شيحاجة، تا ݣوليا أشهاد البلان تاني؟

– راس الحربة : شفتي هادي فيها ݣاع السميات ديال الناس لي خدامين معانا، من كبيرهم لصغيرهم ، واحد بواحد ، شفتي هادي والله وطيح فيد البوليس تاغاديتنوض ديال بصح، ونهار طيح فيد شيحاجة انحفرو قبرنا بيدنا ، فهمتيها دابا ، ولكن سمعني تا حنا راه مطورين ،مايقدرش أي واحد يحلها ، وشتي هاد اللعيبة الراس لكبيرة ، كيقلب عليها ومالقاهاش، عرفتي علاش ، حيت هو مكلخ(تكرشخ بضحك) أنا نݣوليك علاش مكلخ، حيت هو لي جمع فيها هادشي كولوو، ياك سمعتيني ، إيوا وخباها باش مايقيسو حد ونضت انا اشنو درت خونتها ليه بكل سهولة، مع هو زهواني كيموت فالبنات ، كريت واحد الساطة طيحاتو ، وخونتها ليه ، ولكن مسكينة ماتت حيت قتلها بكل سهولة، ولكن كان فات الفوت ،حيت كانت وا عطاتها ليا ،وشتي الأغلبية ديال هاد تجار مكلخين كيبقاو تابعين الفلوس وكينساو راسهم ، كينساو بلي الخدامة الصغار لي كيجرجروهم ويمرمدوهم ، مطورين كثاااار منهم ، وانا دابا بيخير ، كنتعامل مع من مابغيت والوقت لي بغيت وبربي وبربي دين مو شي واحد يقدر يأديني ، ترا بكلمة وحدة مني نفي بنادم من الخريطة ..

– عمر : وناااري شحال واعر أنت خطير مع راسك ، وشكون ݣاليك تعاود ليا أنا ومنغدركش ..

– ماتقدرش ديرها ، حيت أنت أكبر مكلخ وخواف ، وبلا بيا ماتقدر دير والو ، انت بنسبة لي أخديديم صغيور ندير بيك مابغيت وقتما بغيت بحال دابا ، اش بان ليك فشي واحد خفيف ظريف .

– بقات شامة واقفة وكتشوف، شوية خرجات عينيها بصدمة منين بان ليها راس الحربة بدا يحيد سروالو ، وبغا يزول سروال عمر لي احال فمو بحال الى كيتحكمو فيه، جاتها الرضى ماقدراتش تشوف ، بقات واقفة تم كتسمع أصواتهم المكبوتة لي عيفاتها، بقات 15 دقيقة حتى سمعات الضحك ديالهم ، وصوت الشياخ ، بلعات ريقها كلها كترعد ، قلبها كيضرب ، كيفاش كانت بهاد الحماق ، واحد شماتة مايسواش وماشي راجل كلب مدلول ، والملب حسن منو هدا حاشا يكون حيوان ، هدا الحيوان حسن منو ، هزات راسها وتمات غادية قاصدة الديپو ، لحسن حظها الرجال لي كيكونو مع راس الحربة مكاينينش ، خبطات الباب برجلها ودخلات عليهم ، هزو فيها راسهم كيشوفو فيها ..

– كضرب فيها ريحة الدخاخن ديال الحشيش، ريحة الشراب كتكوخ ، وصوت الستاتي صمك ليها ودنيها ، مع السكرة مأترة عليه ماعرف باش تبلى ، كيحقق فيها واش هي ولا ماشي هي، كان هو وراس الحربة ، والرقاص ديالو كينش ليهم على الفاخر ديال الشيشة ، هالݣارو ، هالحشيش هاشراب وزايدينها بشيشة ، شكون بحالهم فرحانين مخاصهم خير ، كان كيحاول يوقف وهو كيتمايل ولا بحال الخنونة(بصوت تقيل) :

– ح ح حبيبة ، ش شنو كديري ه هنا ، أ(مجا فين يكملها حتى كانت قدامو ، مابقاتش كاتشوف قدامها ، ماعرفات شنو كدير ، لي كتعرف هو هاد الغدار لي قدامها ضحك عليها، عينيها كيشوفو فيه ، ويدها مشات للقرعة ديال الشراب لي كانت قدامها ، هزاتها نزلات عليه بيها لراسو ، طيحاتو خلات راسو كلو دمايات ، غفلها راس الحربة ، واخا كان حتى هو سكران ، ولكن ماشي بحال الغدار المنونخ، جرها من شعرها بجهد باغي يحكمها، ولكن الجهد لي فيها كان عامي ليها عينيها ماتبان ليها غير جنوي لي محطوطة على طبلة ، هزاتها خشاتها ليه فجنبو، بكترت الحر ، طلق منها شاد فجنبو وطاح ، الرقاص منين شاف داك المنظر ، لاح لي فيديه وهرب ، لا حتى هو تبالي بيه ، بدم بارد دفلات عليهم بجوج ، حلفات متنزل دمعة وحدة، عطاتهم بظهر وتمات خارجة ، شوية وقفات بحال إلى تفكرات شيحاجة ، رجعات بخطوات سريعة ، وهزات البريكة ديال النحاس المنقوشة لي كان حاط ، خشاتها فجيب تجاكيط لي لابسة، شافت فدوك للجوج لي طايحين ٱخر شوفة ، وخرجات مخلية الباب محلول من وراها ….

_____

– خرجات عند رشيد ، لقاتو واقف كيتسناها متوتر ، غير بانت ليه جا عندها كيجري ، كيشوف فيها مخلوع شاف جيهت يديها كان كان فيهم دم ، وشعرها خاسر:

– أش وقع أش هاد الدم فيديك؟

شامة (بملامح جامدة) : ديني عفاك جيهت البحر، خلاتو وتمات غادية ، قطعات شانطي وقفات حدا الموطور حتى لحق عليها ..

رشيد : شامة شنو درتي، أش وقع وداك دم لي فيديك المسخوطة اشنو درتي ..

شامة : ديني لحدا البحر ونعاود ليك، ركبات من بعدا دارت الكاسك ، ديمارا وشاد الطريق للبحر ، مع وصل نزلات وخلاتو ،هبطات لرملة وتمات غادية حتى وصلات حدا الما غسلات يديها ، او وقفات كدوز على وجها ، تنهدات تنهيدة طويلة ، طلعات راسها كتشوف فالقمر ، ضارت عند رشيد لي وراها ، رجعات عندو وقفات حداه ، عاودات ليه ݣاع لي وقع ..

– رشيد : واش انت مريضة واش باغة دوزي حياتك فالحبس ، واش يلاه خرج عماد بغيتي ترجعي انت فبلاصتو ولا شنو واش باغيين تحمقوني وتصعروني تجهلو ملتي(تعصب وكشاكشو خارجة) خاصك تهربي خاصك تخوي ..

شامة (ببرودة ) : مكايهمنيش انا أصلا ناوية نسلم راسي غدا ،مطالعة مطالعة ، الفلوس مشاو بااااح ، الخدمة مالقيتهاس، أش بقى(بدات كتغوت على حر جهدها) قريييت وشادة الباك بأحسن نقطة ، (كضحك) بقات فخريجة المعهد العالي ، ولا بقات فديبلوم المعلوميات ، ديبلوم الأليمنيوم، ديبلوم فالتجارة ، وااااا فرررررررررر واااااا فرررررررررر ، لي عندها هادشي كامل ،ومزال الديبلوم الاخير ديال الحلويات لي خليتو تم مشمش ومجبتوش من عندهم ، وفالاخر خدامة فمعمل ، وكنمشي نخدم صيادة عندشلاهبي على ظهري يشد الملاين وانا يعطيني 2000 درهم ، والى حصلت مشيت فيها ، ومامرة ماجوج كاليك شبانليك تكوني صاحبتي تصحبو عيشة مولات المرجة وتعوجو على القبلة،إيوا وتايقة فغدار شلاهبي ماشي حتى راجل ، دا ليا فلوسي انا شامة يضحك عليا عريوة ، با قمار عييت معاه مابغاش يتوب ، إيوا أش بقى لا شيء الحياة السعيدة ، اللهم ندوزها حبس نعس ناكول نشرب وهانياتون ، حتى نظفر الشيب هانية ، أصلا انا مغانتزوج مغانتزوج ، الله حبس اش أيوقع ݣاع ، وا فرررررررر(كتغوت على حر جهد كتخرج كاع الطاقة السلبية لي فالظاخل ديالها كتحس بجمر شاعل فالداخل ،ولكن داك الجمر طفا طفا ) كان عليا نقطعو ليه ونحطو ليه قدامو ، باش يلاه يولي يمشي مع رجال مزيان نيت ..

رشيد (كان كاعي وجابت ليه الضحك) :

– مسخوطة صافي ، ضحكتيني ، وتقدري ديرسها اموراس ..

شامة (كضحك) : نديرها اهو منلوحوش ، نديه عند سعيد مول الكيوسك لي كيبيع السوسيط ، يطحنو مع لحم الكلاب ويوكلو لشعب ، قلبوها ضحك ، حتى بردات شامة .

رشيد : يلاه لدار دابا، يصبح ويفتح ، عنقها رشيد لعندو ، حتى وصلو لشانطي ركبات معاه ورجعو لدار ، حطها حدا الباب ومشا ، دخلات لقات علي وا نعس ، جاب الله نعس مافيها لي تهضر وتعاود فين كانت ، دخلات لبيتها ، جابت كرسي ، طلعات فوق منو جبدات واحد الصندوق كان ديال مها الله يرحمها منقوش ، وكيبان بحال إلى جاي من عهد الموحدين ، حطاتو ، ومشات لفوق السطح ، كتبقشش فواحد البيت ، فيه كترت الدخشيش ، هزات ميكة وهبطاتها ،جابت طاسة وشوية ديال الما ،ودخلات لداك البيت وسدات عليها .

_____

– حطات البلاستيكة قدامها حلاتها ، كانت فيها السيمة البيضة ، خلطاتها مزيان ، وجابت واحد القريعة كان فيها واحد الملون ، كانت عندها شحال هادي ملون حمر ، زادت نقيطة وحركات مزيان ، خشات يدها فتجاكيط وجبدات ديك البريكة، كتقلب فيها ، بانت ليها بحال الى فيها غطاية ، جراتها وهي تحل ، بقات كتحقق فيها ، حيتاش مكانتش بريكة كانت عبارة ، على كليوسبي، تفكرات كلام راس الحربة لي كال هادي ماشي بريكة عادية ، رجعات سداتها ودارتها فواحد البلاستيك ، وقفات حابت سكوتش من الڤيترينا ولاواتو عليها، رضاتهت بحال شي بكية ديال الحشيش مهرب ، خشاتها وسط داك الصندوق وكبات عليها ديك السيما ، حتى غبرات مبقاتش كتبان كاع ، حركات الصندوق باش السيما تاخود العبار ديالها حتى تقادات او ولات كتبان بحال شي طبقة ديال الخشب من الصندوق ، حطاتو على الطبلة ، وبقات عاسة عليه ، كتلعب برجليها وتشوف فيه حتى حسات بيها بدا ينشف ،هزاتو ورجعاتو لفوق بحال إلى شيءً لم يكن ، هزات راسها لسقف كتفكر فهاد الليلة لي وقعات فيها شحال من حاجة ، شافت فيديها لي يلاه شوية هدا لطخاتهم بدم ، سهات وتفكرات عمر لي عطاتو قلبها ودمرها ، ولكن تستاهل حيت هي لي عطاتو كثر من حجمو وعسف عليها ، تجبدات فبلاصتها بحوايجها وطفات الصو ولكن النعاس جفاها ماقداتش تنعس كتفكر فكاع لي وقع وفحياتها وفالقرار لي تاخدات واش لصالحها ولالا ..

#يتبع

_____

أعلّمه الرماية كلّ يومٍ فلمّا اشتدّ ساعده رماني وكم علمته نظم القوافي فلما قال قافيةً هجاني أعلّمه الفتوّة كل وقتٍ فلمّا طرّ شاربه جفاني .

دُمُوعٌ مِنَ الأَجْفَانِ قَدْ حَرَّقَتْ خَدِّي وَنَارُ أَسَىً فِي القَلْبِ كَمْ هَيَّجَتْ وَجْدِي تُجَرِّعُنِي الأحْلامُ كَأْسَ مَذَلَّةٍ غَصَصْتُ بِهَا إِذْ يَنْتَشِي خَائِنُ العَهْدِ تَنَاثُرُ أَشْلائِي يُصَوِّرُ فُرْقَتِي وَتَلْوِيثُ أَفْكَارِي تَمَادَى عَلَى رُشْدِي فَفِي صَمْتِ أَبْنَائِي ضَجِيجُ خِيَانَةٍ وَفِي صَوْتِ أَعْدائِي تَرَانِيمُ مِنْ حِقْد وَأَرْضِي رَثَتْ أطْفَالَ غَزَّةَ حِينَمَا بِهَا وُئِدَتْ أَجْسَادُهُمْ وَهْيَ في المَهْدِ وَمَازَالَ وَمْضٌ مِنْ بَقَايَا كَرَامَةٍ يُعَانِقُُ آمَالاً شَكَتْ لَوْعَةَ الفَقْدِ يَسُوقُ إِلَى الأَبْطَالِ فِي سَاحَةِ الوَغَى بَشَائِرَ نَصْرٍ قَادَهَا مُرْهَفُ الحَدِّ إِذَا خَالَطَتْ طَعْمَ الحَيَاةِ مَرَارةٌ فِإِنَّ مَذَاقَ المَوتِ أَحْلَى مِنَ الشَّهْدِ فَهَذَا شِعَارِي مِنْ صَمِيمِ عَقِيدَتِي وَقَدْ ثَارَتِ الهَيْجَا أُصَارِعُهَا وَحْدِي .

إذا لم تجد من يسعدك فحاول أن تسعد نفسك، وإذا لم تجد من يضيء لك قنديلاً، فلا تبحث عن آخر أطفأه، وإذا لم تجد من يغرس في أيامك وردة، فلا تسعَ لمن غرس في قلبك سهماً ومضى.

______

نهار الجديد ،نهار لي الاقدار أيتبدلو فيه .

– قدام ڤيلا كبيرة شكلها من برا كان كيبهر ، على جنب الباب بلاكة مذهبة كتحمل إسم عائلة الهاشمي ، وقف فالپيكوب ديالو ، تحل الباب ودخل ، بلاصة طوموبيل ديالو ، ونزل ، تحل الباب الكبير وخرجات سعيدة كتجري ترمات بين يديه عنقاتو ..

– كنت عارفاك غادي تجي ، جاه صوت رجولي من اللور :

– ولدي شهور وهو هنا وماشفناه ، زوينة هادي!!..

______

– حرك جنيد راسو وتبسم ، ضار عندو كيضحك :

– الواليد الله يهديك ، مكتبدلش نفس الدراما ديال كل مرة ، كان واقف راجل فستينات من عمرو ، ولكن مزال كسبان جون شعرو فاللون قهوي وكتير ، ݣويديمة خفيفة بزااف مكانش طويل كان شوية قصير ، لابس سروال دجين شوميز بيضة ، سنسلة مدهبة نازلة من عنقو ، مع ساعدية ذهبية فيدو ..

– أه على أساس ولدي راسو ماشي قاصح ، بحالو بحال جدو ، طلع جنيد الدريجات وعنقو بحال صاحبو ..

جنيد (كيطنز) : توحشناك أسي توفيق ، فينما غبرت عليك كتزيان..

توفيق (جبد ليه حنكو) : وأنت فينما غبرتي كتزيد تولي طناز كتر وكتسمار ، اش هاد الحالة ..

جنيد (بتدمر) : هاهو بدا عاوتاني ، جينا الواليد تاني ، رخ عليا الله يعزك ..

سعيدة : ماما توحشاتك كلنا توحشناك الصراحة ، أتبقى هنا دخل ..

– الفيلا من برا كانت عصرية وراقية بلون أبيض كيتوسطها بيسين كبير ، ݣليسة بجنبو بليفوطوي ، أما من الداخل كانت بحال الخيال ، رائعة مع دخل هبطات مرة فنهاية الخمسينات ،قصيرة ومسرارة جامعة شعرها بمشيطة خفيفة ، فمها صغير وعويناتها متوسطين ، الإبتسامة على وجها وكدخل للخاطر ، غير شافها جنيد طلق من سعيدة ومشا عندها عنقها وهزها كيدور بيها ..

– هههههه حطني أويلي غادي طيحني ..

جنيد(حطها ) :

– أش هاد زين كامل أمدام زينب، واش انا نغبر غير شوية نلقاك زيانيتي ..

زينب : أح عليك وعلى حلاوة لسانك ، ولكن انا مخاصما معاك ، ماشي حشومة 5 شهور وأنت هنا وحنا اخر من يعلم لا تيليفون لا والو أولدي ، حنا والديك ولا الاعداء ديالك ..

جنيد : الواليدة واش انت وسي توفيق الدراما كتجري ليكم فدم ..

زينب( ضرباتو) : مابقيتيش كتحشم غير كبرتي وانت دير لݣرون(جراتو ) اجي عاود ليا أولدي راه توحشتك ، ݣلسة على الفوتوي مقرباه حداها معنقاه ..

جنيد : عارفك شنو بغيتي تعرفي ، ماتزوجت ماخطبت مامصاحب غير رتاحي ، وهادشي عمرو مايكون ..

زينب (قرصاتو) : بغيتي تكول بلي أنا فضولية ياك ، وماشي من حقي نعرف بلي ولدي مرتاح وبلي رما الماضي ورا ضهرو ..

جنيد (غوبش) : الواليدة الماضي نسيتو ، ولكن ولدي عمري مانسيتو ..

زينب (تنهدات تنهيدة طويلة) : حبيبي هدا كايبقى غير وليد صغير فريخ ديال الجنة ، بغاه الله وداه الله ..

توفيق : ماماك عندها الحق أولدي ..

جنيد ( ببرودة ) : عارف ولكن الذنب الكبير ديال الأم لي ماعرفاتش كيفاش تحمي ولدها ، أم أخر همها هو ولدها ..

زينب : إيوا أولدي انت لي ختاريتي وحدة اجنبية ، كون خديتي وحدة بنت بلادك ..

توفيق (بصرامة) : زينب ماشي وقت هاد الهضرة ، وزايدون ماشي بقا فبنت بلادو ولا برانية ، كاينات عربيات ومستهترات مكيرضوش البال لولادهم ، قاطهم صوت الطالون لي هابط من دروج ، تسمع صوت مغري وبارد :

– اااوه سي جنيد زارنا ، مرحبا وألف مرحبا …

______

– ݣالسة على الطبلة ديال الفطور هي وباها ، حاطين زيتون كحل زيت البلدية براد ديال أتاي والخبز ، وساهية ..

علي : اديك الغراب الكحل ، ياك لاباس ماشي عوايدك ساكتة اش تحت راسك ؟

شامة (شافت فيه) : شكون انا والو بالعما مكاينة شيحاجة ..

علي : مكاين والو ، شفتك داك الخفاش ديال سي عمر مابقاش بان !!

شامة : نساه ابا هداك مابقا بيني وبينو والو ..

علي (كيضحك) : أسعدي ويافرحي بنتي عاقت براسها ، على سلامتك أكميشتي ..

شامة (وقفات ونزلات على راسو باستو ليه) :

– شفتي انت ابا مكاينش بحالك ، الله يخليك ليا ويطوليا فعمرك ، أنا انخرج نشوف واحد القهوة طالبين شي بنت ، انا مشيت ،هزات تيليفونها وخرجات ،خلاتو كيشوف فيها مصدوم ..

علي (بإستغراب) : هادي مالها ، أش طرا حتى حبات على راسي ، لعجب ، لالا هاد البنت فيها شيحاجة ..

– خرجات شامة لشارع ، شيرات لطاكسي بانزليها عماد جاي جيهتها كيجري ، عرفات رشيد وصل ليه الخبار ، مجا فين يوصل عندها حتى كان طاكسي ديمارا ، من زهرو كان طاكسي اخور جاي ، أشر ليه كالو يتبعها ..

– شامة : عفاك ديني لكوميسارية الكبيرة، شد بيها الطاكسي الطريق كيطرطر ماسكتش من الهضرة ، وهيكتجاوب ودايرة ليه الخاطر ، حتى وصلو لقدام الكوميسارية ، نزلات هزات الفلوس من جيبها خلصاتو غير مشا وقفات كتشوف فالكوميسارية الكبيرة ، والبوليس لي فالباب ، حسات براسها تجبدات لجهة لوخرا ، ضارت صاعرة حتى بان ليها عماد ،عروقو خارجين ومعصب :

– اش هاد الخرا لي كديرس فيه ، واش أنت مريضة ولا مصرفقة فراسك ..

شامة : وصلها ليك رشيد ؟

عماد : يوصلها رشيد ولا زبل ، واش بعقلك واش مريضة ، ديك ساع جي بلغي بيهم ماشي تقتليهم ، واشواش انت مريضة اتخرجي ليا لعقل ، واش وليتي شمكارة مقطعة الوراق ولا مافهمتش أنا ، وكتلعبي ورا ضهري وجهك هداك ولا مسلفاه ..

شامة(بإصرار) : عماد شوف راه طير تنزل ، مغاديش تمنعني ، واش انت بعقلك نسوني لبوليس أيتيقو بيا ، ياك هوما مكايجيو حتى تقوت ساعة ، ويسولوك أ حقا واش كاينة مضاربة ، مكايناش ومكاين دم سيري تلعبي مع قرانك ، واش انت عايش فهاد العالم ولالا ، لا يمكن معايش، عماد سير رجع فحالك انا عارفة أش كندير ..

عماد : مكتعرفي حتى زفتة وراسك قصح منو مكاين ، ودابا جوج كلمات اتزيدي معايا ، ولا انخلي دار عستك من الاخر ..

شامة : وانا مغاديش نمشي ، والى مامشيتيش اندير صباعي فودنيا ونكوليهم باغي يتعدا عليا ، بلاتي ݣلتيها حتى لأحلام ، علاش جبتيها معاك ، ضار عماد يشوف أحلام ، زهقات كتجري قطعات الشانطي ، جاي يلحق عليها حبسوه الطوموبيلات ..

عماد (كيعاير) : تفو على مرض شامة شامة، مداتهاش فيه ..

_____

وقفها البوليسي : ياك لاباس عندك شيحاجة؟

شامة (بتحدي) : بغيت نشوف الكوميسير ..

– الكوميسير ݣاع ، وعلاش؟

شامة : قتلت جوج ديال الناس وجيت نسلم راسي ، لحق عليها عماد ، بغا يجرها دفعاتو ..

– إيه واش بان ليكم عندنا سيرك هنا ولا، ياك لاباس ، الى مامشيتو اندخلكم تݣلاصاو بجوج ..

– شامة انا مغانتحرك من هنا حتى نشوف الكوميسير ، شوية تبدلو ملامح البوليسي منين وقف عليها واحد الشاب فأواهر العشرينات ، عطاه السلام ، لاخور رض عليه براسو يلاه أيدخل ورجع خطوة لور :

– (بصوت رجولي) : شنو واقع هنا؟ ، شافت فيه شامة :

– بغيت نشوف الكوميسير ، جيت نقدم راسي ، وهو كالس يتريݣل عليا يحسابلو كنضحك..

عماد : تاعنداك راه هاد البنت مسكينة عندها زهايمر مبكر ، وطبيب كالينا مرة مرة اتولي تفقد الذاكرة ودير شي حوايج ماشي فوعيها ..

شامة(كتغزز سنانها) :

– عماد بغيت ليك الهدم فداك الفم ..

– واش جايين تريݣلو هنا ولا كيفاس ، هذا كيتسمى إزعاج السلطات ، وكيعاقب عليه القانون ..

شامة : وانا مجاياش نتفلى ، جايا نسلم راسي ، واشانا قاتلة جوج ديال الناس أعباد الله ، تيقو بيا أويلي ..

– (بقا كيشوف فيها مطول فيها الشوفة) :

– تبعوني ..

_____

#فالڤيلا

هز حاجب وهبط الثاني كيطلعها ويهبطها :

– أووووه مدام صوفيا ، كاع الناس كيزيانو وانت كتغلاضي، قرصاتو مو باش يسكت ..

صوفيا (بإستهزاء) :

– هاهاهاها جنيد أنت هو انت متبدلتيش..

جنيد : كيݣول واحد المثل الله يخلينا فصباغتنا ، ولكن دوماج انت مكتعرفيش لهاد الأمثلة ، حيت جداك كبرات فنرويج وجدك كان كيعاشر غير الأمراء للأسف ..

– سعيدة خبات وجها ورا مها جاتها الضحكة ..

صوفيا (ببرودة مادتهاش فهضرتو) :

– كون غير قلتي لينا جاي نوجدو على حسابك ..

جنيد (بضحكة صفرة ) : صوفيا يمكن نسات بلي هادي داري ،وبلي أنا حر ندخل ليها وقت مابغيت ونجي وقت مابغيت ومانحتاجش شي واحد لي يرحب بيا ولالا ،رحبي غير براجلك وبعائلتك حسن ليك غادي تهني الشعب(غمزها) .

زينب(وقفات وجراتو) :

– أجي أحبيبي تشوف شنو وجدت ليك ، جراتو معاها ، وصل حدا صوفيا لي وجها زراݣ منين تعامل معاها بهاد الطريقة خنزر فيها وطلعها من رجليها لراسها بإستهزاء ، مكايحملهاش ومكدوزش ليه من نهاردخلات لهاد الدار وهي كتفايش بعائلتها ، كتحسب راسها هي الكل فلكل ،مكديرإعتبار لحتى واحد وفاش يكون راجلها كدير راسها هي الحمل الوديع لي كتراعي مصالح العائلة خصوصا هي مرات الإبن الأكبر ، ولكن بحال أشكالها كيعرفهم جنيد مزيان غير من شوفة والتصرفات …

_____

#المديرية

– منين دخلو لكوميسارية كولشي كيعطيه السلام ، حتى لوصل لباب البيرو كان مكتوب عليه بدهبي عميد شرطة، بقات شامة غير كتشوف ، كيحسابليها غير شي بوليسي عادي ، وعي راه هو لي قاصداه ، دخل ونطق :

– رضي الباب معاك ..

سدات شامة الباب ، وجات وقفات قدامو ، ݣلس ورا البيرو هز التيليفون ، وشامة مقابلاه ، فوق البيرو محطوطة بلاكة صغيرة مكتوب فيها سيف الدين الحجام ..

– سيف الدين : جيب ليا قهوتي ومتخلي حتى واحد يدخل عليا ،حط التيليفون وشاف فيهم ، أشر ليهم براسو باش يݣلسو ، ݣلس عماد هو الأول ، وݣلسات شامة كتشوف فيه ..

سيف : كنسمعك ..

شامة (ببرودة بحال الى كتعاودشي نكتة) : أنا اسيدي قتلت جوج ديال الناس ..

سيف (بإستغراب) :

– كيفاش قتلتيهم عاودي من الاول ، قاطعهم الدقان فالباب ،دخل واحد البوليسي بالبسة حط ليه القعوة ومشا، ستغلات شامة الفرصة كتشوف فيه ،شعرو رطب وحاي على عينيه بشكل عشوائي اللحية يلاه نابتة باينة نسى ماحسنها ، لابس تحاكيطة ديال الكوير مع تريكو كحل وسروال كحل ، مع ݣاط كحل قشعاتو فاس كانت تابعاه من اللور ..

– سيف : كملي ،عاودات ليه شامة كولشي من طاق طاق حتى لسلام عليكم ..

سيف (شرب من قهوتو كيشوف فيها بإهتمام) :

– شنو سميتك ؟

– شامة شرف الدين

سيف :شحال فعمرك وفين كتسكني وشنو كديري فحياتك؟

شامة : 24 سنة و4 شهور و5 يام او ساعة ، كنت خدامة ولكن دابا كونجيت .

عماد(لبرودة ) : بغات تكوليك جراو عليها ..

شامة(صغرات عينيها وخنزرات فيها) :

– بغيت انا يجريو عليك الكلاب فشي زنقة مكتخرجش .

سيف (تبسم نصف إبتسامة رشف من قهوتو وشاف عماد غمزو) :

– انت شنو كتجيها ؟

عماد (ببرودة) : بحال ختي ، لا ختي وبنت حومتي ..

سيف : مزيان مزيان ، لالة شامة عاقلة على البلاصة لي كنتي فيها البارح؟

شامة : أه عاقلة ..

سيف (وقف) :

– داكوغ أجي معايا ، اه حتى انت تقدر تجي ، كان كيهضر بواحد البرود وبواحد الاستهزاء مامسوقش ، تكول ماشي عميد ، تكول اشي واحد جاي يصايب لاكارط ناسيونال وراجع بحالو ، مع خرج تلقى بوحد باينة فيه ضابط ، مالبسش اللبسة ، جرو وبعدو ماعرفت شنو كاليه ، أشر ليه لاخور براسو ، وتبعو ..

– خرجو على برا ، فتح طوموبيل ديالو كانت من نوع رونج فالكحل ، أشر ليهم براسو باش يطلعو ، بان ليها لاخور طلع فسطافيط مع 4 ديال البوليس واحد فيهم حتى هو سيفيل ، ولوخرين باللبسة ..

____

– وقفات الطوموبيل قدام ديبو ، وراها السطافيط ديال البوليس نزلو وقفو قدام الباب .يال ديبو ، هبط سيف الدين ، جبد من جيبو واحد المسواك دارو ففمو ، نزلات شامة او معاها عماد :

– ابلات على الحمار لي ݣالها ليك ، حتى لمن بعد ..

شامة (مداتهاش فعماد سولات سيف ) :

– مغاديش ندخلو؟

سيف الدين ( هز حاجب وهبط الثاني كيشوف فيها بإستغراب، ماحشمات منو ومحدراتش عينيها كتشوف فيه) :

– ݣلتي ليا جراو عليك ياك ، دابا عاد عرفت علاش، مداهاش فيها ، خرجو الضباط لي جاو معاه ..

– مكاين حتى واحد لداخل ..

شامة (مصدومة) : اويلي انا بيديا قتلتهوم ..

الضابط 1 : لقينا الأثار ديال الدم وزاج ، قراعي ديال الشراب ، ولكن الديپو خاوي، مداتهاش فيهم شامة تخطاتهم ومشات كتجري دخلات ، ماتسوقاتش للبوليس لي بغاو يحبسوها ،دخلات وبقات واقفة مصدومة ، بحال الى داكشي لي عاشتو البارح غير كانت كتحلم ، الكراطن لي كانو مكاينينش ، من غير طبلة ديال الشراب ، وزاج وأثار ديال الدم ، جوج قطرات ، لا عمر ولا لي معاه مكاينينش ، ماعرفات واش كتحلم ، ولا بصح ولا شنو وقع ، سكون شي حد هزهم ولا دفنهم ولا يكونو هوما ماماتوش ، واحد الجزء فيها الرتاح ، حيت مغاديش التسمى قتالة ..

سيف (من وراها) :

– تقدري تشرحي ليا شنو واقع ؟

شامة(ضارت عندو) :

– أقسم لك يمينا أنا قتلتهم ، راس الخربة ضربتو بجنوية ، وعمر خبطو بقرعة …

سيف (شاف فيها بإهتمام وصغر عينيه) : كيفاش شكون ݣلتي؟

شامة : عمر وراس الحربة قتلتهم بيديا ..

سيف(كيعيط ) :

– سمير سمير ، جا عندو داك الضابط لي جا معاهم :

– خود جميع البصمات لي فهاد الديپو ، وخود عينة من الدم وجد ليا تقرير بغيتو يكون عندي ..

سمير : داكوغ ..

سيف (ساف فشامة بنص عين) :

– أنت تبعيني، مزال مساليناش، عكاها بظهر خرج ، بقات واقفة ضارت لقات عماد كيفرنس :

-, عبرو عليك ، اطلعي كدابة قدامو ، باش تعلمي دخلي سوق راسك وماتبقايش ديري لي ݣاليك داك طارو لي متقلة بيه ..

شامة (مغزفة عليه) : نتفاهمو من بعد اوجه البركاسة ، ضربات فيه دفعاتو ومشات كتجري ..

_____

– زينب(فالكوزينة ، شادة لحنيد فيدو كتشوف فيه) :

– حبيبي انت بعدا مزيان ، غادي مع الخدمة مزيان ؟

جنيد (تبسم وباس ليها يدها) : أنا مزيان الواليدة ، ماتشوشيش من جيهتي ..

زينب : مكايناش أولدي شي أم مكنشوش من حيهت ولدها، ضروري راه أنت كبيدتي، أتبقى معانا ياك أولدي ، مغاترجعشي لديك أمريكا عاود ؟؟

جنيد :, غير رتاحي ، مابقيتش راجع ، ديك البلاد مابقا كيربطني بيها والو ؟ .

(جاه صوت من عند الباب) :

-وخدمتك، هز راسو فصاحب الصوت وتبسم :

– مابقاتش عندي خدمة ، ولا ياكما خايف نتشارك معاك المنصب ديالك فشركة ونطيرو ليك ..

– باسل

جنيد : حامض(جا عندو وعنقو) .

– أحسن قرار تاخدتيه هو هدا .

جنيد : صافي اخويا الراحة وسياحة ، براكة 32 سنة وصلنا ليها ، خاصنا شي حاجة لي نرتاحو فيها ولالا ؟

– تماما ، وقفات عليهم صوفيا كتعوج .

– جواد حبيبي ، جيتي ماشفتكش، من إيمتا كتحي وتدخل لكوزينة هو اللول ..

جنيد (همس لزينب فودنها) :

– هاعلاش مكنبغيش نجي لهنا .

جواد (كيدور فعينيه بنفاد صبر) :

علاش مالها الكوزينة ، كيجاتك؟

صوفيا (كتعوج هضرتها) : بب الكوزينة غير للخدامة لي هنا ، تعلم شويوش تكون راقي ..

جنيد (كيعيبها بإستهزاء) :

– جواد تعلم ليك شويوش تكون راقي ، أنا وماماك مارقييش ..

زينب (بصرامة) : جنيد

صوفيا (مداتهاذ فيه) : حبيبي أنا أنخرج انا ورفيف ، أوك بيبي سي يو مواح ..

مع خرجات شاف جنيد فخوه :

– أخويا ماعرفت فين كانو عينيك حتى خديتيها، واو انا بحال هادي تكون مراتي ، كون قتلتها شحال هدا ودوزتها حبس وتهنيت ..

جواد (جرو ) : اجي لهنا معايا براكة من الملاغة ، خرجو الخوت بجوج وزينب متبعاهم بعينيها، مبسمة وفرحانة ..

_____

رجعها للبيرو ، لي كانو فيه قبل ، هاد المرة مكانش ݣالس ، هي لي ݣلسة وعماد واقف حداها ، وسيف الدين فوق راسها ، كيحقق فيها:

– أنسولك وجاوبيني بصراحة ، عمر لي كتكولي خطيبك ، شحال وانت كتعرفيه؟

شامة : دابا 4 سنين وانا كنعرفو؟

سيف : مزيان ، فاش كان خدام ؟

شامة (عوجات فمها) : كان مرة مرة كيبريكولي ، مرة فالݣبص مرة صباغة ..

سيف (كيشوف ليها فعينيها نيشان) :

– كان كايستعمل المخدرات ؟

شامة: أه الحشيش ..

سيف :وشراب ؟!

شامة : لا عمري شفتو شارب حتى للبارح .

سيف :وراس الحربة شفتيه ؟

شامة (مكززة على سنانها) :

-منقدرش نساه ، واخا نبغي مغاديش نسى المنظر لي شفتو بين عينيا ..

سيف (صغر عينيه) :

– شنو وقع؟

شامة (بلعات ريقها) :

– راه عاودت ليك كولشي ..

سيف : شامة ، راه إلى ماعودتي والو أتغرقي، دابا جينا نيشان وݣولي شنو وقع؟

عماد : أنا نعاود ليك ، حيت هاد خيتي مكاتحشمش، وباغية تغرق راسها براسها ، الموضوع ومافيه هاداك خونا ، غدار ومايسواس ، شحال وهو مجرجرها ، وفالأخر كلى ليها فلوسها ، ومشا كيتفطح بيها فسعيدية مع رساتو ، وهاد المنطيحة ، بلا حشمة مشات وسخات فيه يديها ..

شامة (خنزرات فيه بغات تاكلو) :

– أجي هضر بلاصتي أنت ݣاع وهضر ، أجي تكون انت ورشيد لي هزيتوهوم من تم ؟

سيف(بزعاف ضرب البيرو) : واش يحسابليكم راسكم كاينين فسوق ولا شنو، كيبان ليا أنكولو هنا بزااف .

– ݣلس فوق البيرو منزل رجليه وكيشوف فشامة :

– دابا أتهضري ولالا؟

– قاطعهم صوت الدقان

سيف (بزعاف) : دخل ، دخل سمير ، همس ليه فودنو بشيحاجة .

سيف : فين؟

سمير : على برا ..

_____

– سيف (شافيهم) : أنا جاي ، مع خرج مع طارت شامة على عماد قجاتو :

– دوي ياحنطويل ،. جهك ولا مسلفو ياك يلاه كنتي كتكول ليا ماتسلميش راسك ، شفتك بديتي تخوي لمزيودة للبوليس ، أدوي، بالخف ضورها وخشاها بين رجليه ، داير ليها يدو فعنقو ، فيكساها مامخليهاش تحرك .

– عماد : باش تعلمي ديرس لي فراسك ، ومتشاوريش بان ليا هاد الكوميسير أيعاونا مزيان ، داكشي باس عاودت ليه ، يقدر يعاونك وأنت باغية تغرقيني انا ورشيد ، دوي دوي الدودة لدودة انص بلاصة ، أشبر ونص ..

شامة (عضاتو من يدو ، وتلاحت على شعرو هبطاتو ليه) :

– أنا شبر ونص أنص شبر ، أنا أمكمش الوجه، وجهك بحال الكرشة ديال العتروس ، جرها من تجاكيط وهي جاراه من شعرو حتى قفزهم الباب لي تحل، تقادات شامة فالوقفة وجها حمر .

سيف (كيشوف فيه مخنزر) :

– فين ݣلتي ليا ساكنة ، وشنو كنيتك؟

شامة(بهمس ) : هذا واش فيه الزهايمر ، شامة شرف الدين ..

سيف (بإستغراب) : شنو كيجيك علي شرف الدين ..

عماد ( جاتو الضحكة) : العائلة كلها تجمعات

شامة (بشك) : با علاش

سيف (هز راسو لسما) : هاد النهار باين من صباحو ، خلاهم وخرج ، ضرات شامة عند عماد بان ليها كيضحك طانز، هزات مرفقها وضرباتو لجنبو حتى تزوا ..

شامة : باش تعلم تسد ضرقوشك شوية، رجع سيف وهاد المرة معاه باها، غير شافها باها وقف مصدوم .

هلي : أش كديري أبنت الهم هنا .

شامة (نفس السؤال) : علي أش كدير هنا ..

سيف : غير بغينا نطحنو شي زرع عندنا هنا، ومع طحناه وشاط كنفرقو دابا على عامة الشعب ، وبدينا بعائلتكم شنو بان ليك ؟

شامة (كطنز كتار منو) : لي جات من عندكم سمن وعسل ..

سيف (عصباتو) : واش كطنزي ولا جاب ليا الله ..

شامة : شي كيطنز على شي ..

سيف : شنو ݣلتي ؟.

شامة : شي كيطنز على شي .

سيف : جاني بحال الى مكتخافيش، لسانك ماضي ..

شامة ( بتحدي ) : كنخاف من الله لي خلقني وخلقك وخلق كاع الكون ، من غيرو مكنخافش .

سيف (طول فيها الشوفة وساكت) :

– هجمو على داركم هاد الصباح .

شامة (بإستغراب) : شكون كيفاش؟

علي (شافيها) : مع خرجتي ، بشوية خرجت قضيت واحد الغراض ، لقيت جوج ديال الرجال كيكبو ليسانس حدا الدار وشعلو العافية ، كونما جيت فالوقت كانت كانت العافية اتشد فدار كلها ، جاب الله شدات غير فسرجم واحد .

سيف : ݣلس، حيت شافو كلو كيترعد ..

شامة : شكون هادو أبا واش شفتيهم ؟

سيف (قاطعها ) : بحال الى انت معارفاش شكون !!

شامة (شافت فيه) : وباس غادي نعرف انا شكون هوما ؟

سيف (حط الستيلو لي فيدو وشاف فشامة) :

– گلسي(أشر ليها براسو) ، بقات كتشوف فباها او وعلى وجها شحال من سؤال ، جرات الكرسي وݣلسات ، ضار سيف بالكرسي لجهة واحد الخزانة وراه ، حلها ، وجبد منها واحد الملف ، حطو على الطبلة قدامو ، هز عينيه كيشوف فيها ، وهي كتشوف فباها ، وباها ساكت وكيشوف فيها بدورو ، شي كيشوف فشي ، وحتى واحد مافهم شيحاجة من هادشي لي واقع ..

_____

#فوحدة من الفيرمات البعاد على القنيطرة ب 20 كلم ، وبضبط فوسط ڤيلا واسعة وعريضة ، فراشها بلدي ، وفواحد من بيوتها ، ناعس على النموسية عريان من الفوق وضايرة ليه الفاصما على كرشو ، راسو عرقان ، ضايرة بيه مرتو ، ݣالسة على الكرسي وكتشوف فيه ، بدا يحل عينيه شوية بشوية ، شاف فيها وبقى ساكت .

– واش غادي نبقاو فهاد الحالة هادي ، حتى ليمتا وغادي نبقاو هك ،حتى شي نهار يجيبوك ليا أنا او ولادك ميت .

– (بصوت بارد وصارم) : بديتي تاني ، مكتصيبيش تسدي فمك ،كان خاصني نقتلك شحال هادي ونتهنى منك ، الناس واخدين العيالات الزينين ، وانا واخد نݣارة مكتعرف حتى تهضر ولا تلبس بحال العيالات ..

(ضحكات) : ياك أسيدي ، راه أنا لي ندمت على النهار لي شفت كمارتك فيه ، ولكن مانسمحش لبا ، لبا لي عماه وغرو الطمع ، وعطاني لواحد بحالك ، شلاهبي نصاب مايسوا الريال ، وكبر مني ، هو لي لاحني هاد اللوحة وماخلانيش نكمل قرايتي ، انا لي كان عليا نهرب ، اللهم الموت ألف مرة ولا العيشة مع واحد بحالك ، وشتي هدا لي دار فيك هاد الحالة ، كون غير كمل على أجرو وقتلك ، حسن اللهم نلبس عليك البيض ، ولا نبقى عايشة معاك فهاد الجحيم ، وعرفتي شنو ، شي نهار أنا لي غادي نقتلك ونتهنى منك ..

– غادي تق…دي من حدايا ولا غادي نوض نشتف على بوك الكلب ، وقفات كتشوف فيه بإحتقار وخرجات .

– شاف جيهت الكوافوز لي حداه ، هز تيليفون بصعوبة ، دوز نمرة ، شوية والحل تخط .

– درتو داكشي لي ݣتليكم

– اه أسيدي مشينا لبلاصة لي كلتي لينا دخلنا وقلبنا الظار مالقيتا والو ، خرجنا وشعلنا العافية كيف ݣلتي ولكن جا باها وجاو البوليس ، ماكانش عندنا الوقت بزااف ..

– أولاد الق……ب ديما خدمتكم اللاروب ، سد عليهم التيليفون ، ورجع دوز نمرة أخرة :

– كيبقى ، مزيااان خليوه معاكم هاد الأيام ، ولي خصاتو حضروها ليه ، طفا التيليفون ونار شاعلة فيه ، كيفاش ݣاع الخدمة ديال سينين وداك تطواريت ديالو تجي وحدة فنص الليل وتضربها ليه فزيرو ..

– برب العالي لا دوزتها ليك الق…….ة ، إلى مادفنتك وانت كتفركلي مانتسماش راس الحربة ..

يتبع