الفصل 2

🔸الموسم الأول : ميدنايت

سيف (حل الملف وجبد منو تصويرة حطها قدام شامة) :

– شوفي هاد التصويرة وكولي ليا واش كتعرفيه ؟

– هزات شامة التصويرة ، غير شافتها وغوبشات :

– هذا هو راس الحربة لي قتلتو بيدي

علي(ضار شاف فيها مطرطق عينيه) :

– أشناهو ! قتلتيه تي كيفاش قتلتيه ..

سيف : سي علي واخا تسكت شوية ..

علي : وݣاتليك قتلاتو أسيدي ، بنتي ولات قتالة ، أنا اصلا مدخلات ليا لراسي ديك المحنة الوايدة لي طاحت عليك الصباح وبوسان دراس ..

سيف (ضرب البيرو) : وااا شعب وهنينا هنينا ولا غادي نخرجك على برا .

– سكت علي شاد على راسو وكيحرك فيه بحال الى باغي يجدب .

سيف ( رخف صوتو ) : شامة شفتي هداك لي قدامك ، أكبر بزناز عرفاتو البشرية ، واكبر نصاب ، وهو المونيكة لي كيلعبو بيها الشلاهبية الكبار ، هاذ خونا لي قدامك ، داير يد مع منضمة كبيرة ديال التهريب .

شامة (بلاما تحس) : عارفة ..

سيف (بإستفهام) : كيفاش عارفة ؟ شامة فخبارك بلي تهجمو على داركم ، وكانو كيقلبو على شيحاجة وعينهم فشيحاجة ، حيت مايمكنش ناس على قد الحال بحالكم فحي شعبي ، هاجمين عليهم وقالبين الدار سفاها على علاها ، غير هكاك ، شنو يكون من سماوي وگالو ليهم مدفون الكنز تحت داركم ، شامة راه الى ماعونتينا وعاودتي لي كاين ، لا انت لا باك لا لي معاك اتبقاو عايشين اديريها فبالك .

– شامة : مال سيبة كاينة فالبلاد ، مكاين مخزن ؟

سيف : لا كاين ، وخاصك تعاونينا الى بغيتي حنا نحميوك ، هادشي راه كبر منك ، بلاما تغرقي الله يرضي عليك ، شنو وقع لبارح ولاخر مرة انعاودها ،ولا غادي نضطر نحبسك 24 ساعة على ذمة التحقيق ، ونعرضك على نيابة العامة ، وهنا أيكون القرار خرج من يدي شنو ، شنو بان ليك ، تهضري ولا لا؟ (غمزها)

علي (شاف فيها) : هضري هضري يا بنت الهم بغيتك تنعسي متنوضي ، يالمشيباني هضري ، يابنت لحرام ، يا منخار السلوݣي هضري ..

سيف (شاف فعلي بمعنى هنينا) ، وهو يسكت .

شامة (تنهدات تنهيدة طويلة) : لبارح ..

_____

#ڤيلا_الهاشمي

– تحل الباب ، ودخلات منو بنت زوينة فكامل الأناقة ديالها ، كانت كتشبه لسعيدة بشعرها الطويل وملامحها البريئة والجميلة ، حطات ساكها على الطبلة ، هبطات الدريجة كتسمع الهضرة ، حتى وقفات فصالون ، غير شافتو خرجو عينيها بصدمة والفرحة ، كولشي تخلط عليها .

جنيد (شافها وهو يوقف) :

– اوووهو ليدي سامية ..

سامية(كضحك عنقوتو بجهد) : حبيبي توحشتك ، طلقات منو كتشوف فيهم ) علاش ماسونيتوشليا وعلمتوني ، حشومة عليكم ، ناري مامتيقاش ، بلات بلات نشوفك واش رقاقيتي ولا غلاضيتي ، بعدات عليه شوية وغمزاتو .

– لا ماعندي منقول ، بوݣوص ، خاصك غير واحد سوان دفيزاج ، او(قاطعها) .

– هاهيا بدات تاني

توفيق(ݣالس مفطح داير يديه على يدين الفوطوي ، فرحان بولادو) : كنكولو ليها نساي الخدمة ، وهي راسها قاصح ، هكا كظل توت لاجوغني

– سامية(رمات شعرها لور ) :

– بكل إفتخار ، خاصكم تفتاخرو بلي عندكم وحدة بحالي فالعائلة ، خويا غادي تݣلس معانا ياك ؟

جنيد ( برزانة) : من بعد ونهصرو فهادشي ، إيوا سيادنا مغاضيفونا والو ، فين الحليوات ، فين شي براد اتاي معتبر ..

زينب ( وقفات ) : هي لي نتعاودش ،مشات زينب لكوزينة ، وتخشات سامية فخوها من جيه وسعيدة من جيه ..

سامية : فينو بهاء؟

جواد( داير رجل على رجل) : من لبارح مكاينش فدار ، علم الله فأشمن مدينة كاين تاني .

توفيق (بصرامة) : خوك كيعيا فالخدمة من حقو يرتاح .

جواد : كيعيا غير هو ، الواليد بلاما ندرقو الشمس بالغربال ، انت عارف وأنا عارف .

سعيدة : بابا راه غير قدامك كايبغي يبين راسو واعر ، من غيري انا وجواد لي كنكلعو ونهبطو وخدامين 24 ساعة على 24 ، الحمد لله لي زياد مقابل لي زاتوليي ، وانت تبارك الله الساس ديالنا .

توفيق (بصرامة) : كل واحد فيكم داير جهدو ، لا انا لا نتوما لا خوتكم .

جواد ، سكت حيت عارف بلي توفيق مكايحملش شي وحد فولادو يهضرو على خوه بالخايب ، كيبغي المحنة تكون مع بعضهم ، وشي ماياخود نظرة خايبة على الثاني، وكل واحد يبغي الثاني كتر من راسو .

جنيد (عارف باه مزيان، وعارف بلي هاد الحوارات مكايبغيهمش، حاول يلطف الجو بسخرية ديالو) :

– حمدتك ياربي وشكرتك ، معندي مع تصاميم ، ماعندي مع ذهوبات ولا مع شركات وبيخييير .

توفيق(بجدية) : وصلني إيميل بلي دارو ليك جنازة فأمريكا .

سعيدة وسامية (بخوف ودقة وحدة) : كيفاش؟

______

– #المديرية

شامة : هادشي لي وقع ..

سيف (مامتيقش بلي هادشي لي كاين) :

– مايمكنش يكون هادشي لي وقع ، شامة فخبارك الى كنتي مخبية شيحاجة راه ماشي فصالحك، راه مايمكنش يدخلو عليكم الدار قالبين الدنيا سفاها على علاها ، باش يقلبو عليك اتكوني تحت السدادر مثلا ولا فالماريو نكونو لوجيك شوية .

– شامة( بإصرار) :

– أنا لي عندي راني ݣلتو ، بغيتو تحبسوني مرحبا ، لي بغيتو ديروه مرحبا .

رجع سيف بكرسيه اللور، مقابل معاها كيشوف فيها بإهتمام ، لحد الساعة مݣالت والو ، وختارت أنها تسكت ومتعتارفش بكولشي ، كيشوف سر فعينيها ، عارفها مخبية عليه شيحاجة ..

سيف : ياك ݣلتي بلي عارفة شنو خدمة راس الحربة؟

شامة : أه عارفة الحشيش بحالو بحال غيرو من البزنانزة ، سيف تعصب وحاول يبرد السوق .

سيف : واخا تقدرو تمشيو .

شامة(بإستغراب) : مغاديش تشدوني؟

سيف(حل واحد الملف كيقلب فيه ومامسوقش) :

– لا ، الأدلة مكافيينش باش نشدوك ، دي باك وغبري عليا كمارتك منشوفكش هنا ، بقات كتشوف فيه مامتيقاش ودنيها علاش ماشدهاش .

علي(جرها) : نوضي تهزي تسحابي راسك فعرس ، خرجها وخرج وراهم عماد تحت أنظار سيف لي متبعهم بالعين ، غير هوما خرجو هز تيليفون ديال الخدمة :

– سلام سيدي ، بخصوص الملف لي عطيتينا ، واش ممكن ندوز عندك لبيرو ،داكوغ سيري ، قطع التيليفون ، ناض من البيرو لجهة السرجم وقف كيطل عليهم وحاصيهم بالعين حتى غبرو .

____

علي : حتى لدار الحمار ديال بوك ونتفاهمو ، غير حتى لدار ، الهضرة ماشي دابا ..

شامة : با لي كاين راه سمعتيه ، مكاين حتى حاجة خرا ..

علي(قرصها حتى غوتات) : لالا انت خاصني نعاود ليك الترابي من أول وجديد ..

– قربو للحومة كيسمعو الغوات ..

شامة(شافت فعماد وباها) : شكون كيغوت ؟ جري نشوفو جري ، مشات كتجري ، لقات الجيران كلهم خارجين ، وحليمة جارتهم ݣلسة فوق طروطوار ، مفرقة رجليها كتغوت ربي لي خلقها ، وتبكي وتخبط فوجهها ، الجرات كلهم مجموعين عليها شادين فيها ، ولوخرينات واقفات ، مشات كتجري عند جمعة لي كانت واقفة مع زوهرة ..

– خالتي جمعة أشواقع مالها خالتي حليمة؟

جمعة : يلاه جيت ابنتي من الحمام يلاه لقيتي زوهرة كتعاود ليا ..

زوهرة : سميرة بنت حليمة لي فالسعودية مسكينة ، وا ماتت ..

شامة(مصدومة) : أويلي ، كيفاش ماتت مسكينة ؟

زوهرة (مغزفة) : ديك بنت الحرام ديال هدى ، بغيتها عمرها تشوف النهار الزين ،كتضحك على البنات وكتوهم ،بلي اتديهم للخليج يخدمو كوافورات ومربيات، وهيا كتسيفطهم لواحد الق…..ادة تماك ، كتشدهك وتحيد ليهم الوراق والبسبور ولاكارط ، وكتخدمهم فدعارة وليالي الملاح، ومنهم سميرة مسكينة ، وعمرنا سيقات ليهم الخبار ، كل شهر كتسيفط ليهم الفلوس ، وكتسيفط لختها باش تقرا ، وفاش ختها بغات تمشي عندها عاودات ليها كولشي ، إيوا مسكينة تقطعات خبارها هادي شي شهر ، ودابا جاتهم الخبار ، بلي لقاوها ميتة فوسط شي بركاسة ديال زبل ماعرفت أشمن بلاصة هاديك ، وحشاك لقاو فديالها الدود والما ديال الكلب ، مسيكينة كانت عندها 25 سنة باقي صغيرة ݣاعما تستاهل .

شامة(تأترات وهبطو دموعها بقات فيها بزااف) ..

جمعة (بقات فيها وبصوت متأتر) : هالي كيبغيو يخويو بلادهم ويمشيو الخليج ، راه والله ومكنتي قارية وشادة ديبلومات ، او واصلة فالقراية لماعرفت فين ، وعارفة فين غادية وفين اتخدمي بوراقيك بكولشي ، راه تعولي تخدمي فالفساد ، يبيعو ويشريو فلحم البنات مساكن ويربحو على ظهرهم الفلوس ، اش ذنب هاد المرأة مسكينة لي ترزات فبنتها ، الباب لي كان كيجي ليهم ننو الفلوس هاهو تسد .

زوهرة : شحال نصحناها ياختي ، وݣلنا ليها ظيك هدى راه غير بزنازة مافقلبها لا رحمة لا شفقة ، سمحات فقرايتها راه مشات عندها 20 عام 5 سنين وهي تم ، وقبل لا تغبر كتبات لختها برية وكطلب فيه سماحة من دارهم ، وكالت ليها بلي ماشي لخاطرها كتعاود لينا حليمة ، شوفي كبيدتي ختها كيفاش مصدومة ، الله ياربي الله ، الشباب كيعرضو راسهم لبحر ، ياكلهم الحوت ، والبنات كيقطعو السما ، باش فالأخر يديرو فيهم الشمايت مابغاو .

– شامة ماهضراتش ، نقزات من بلاصتها بخطوات سريعة غادة كتحري لفين اللهم أعلم ..

_____

– وقفات قدام بابها كتنهج دقات جوج دقات متابعين ، جاها الصوت من الداخل :

– بشوية ياك لاباس ..

– حلات الباب ، غير شافتها هزات حجبانها بإستهزاء .

– هاهاهاي هادي انت أزين ، علامن جايا تقلبي ، عليه ، والله احبيبة ماشفتو ، بلاتي نقلب واش مخبع هنا، كتقلب فصدرها(وضحكات بمياعة) لا مكاينش ازين ، حتى لغدا بحال هاد الوقت واجي ، يلاه جات تسد الباب، وهي دفعو عليها، جراتها من شعرها ، ولوخرا كتغوت ..

– شامة : أجي المارجة لهنا نتفاهمو، يديها يبسو على شعرها ، ولوخرا كتغوت ربي لي خلقها ، خرجو الناس كيطالو من سرجم ، خلات ليها الباب محلول وجرجراتها غادية بيها .

هدى (كتغوت) : طلقي طلقي والله حتى نربيك ، طلقي معارفاش راسك معامن كتلعبي طلقي ، وعتقوني اجيران شهدو ، حتى واحد ماقرب ليها ولا حداها ،كولشي كيتفرج ، وكاين لي هاز التيليفون وكيصور ، بقات غادية بيها مجرجراها حتى لحومة ، لي كانو الناس مزال مجموعين على حليمة ، غير سمعو الغوات كولشي ضار ، شافتها حليمة او وقفات جاية مكشكشة ، بحال شي حمقة .

– الله ياخود فيك الحق أبنت الحرام ، رزيتيني فبنتي، جراتها من يد شامة من شعرها ، نتفاتها وكتضرب فيها ، حتى واحد محا يفرق ، حست عارفين هذى أش كتسوى ، مخنزة الحومة ، وشحال من بنت خرجات عليها ، وحتى عائلة مكانت كتهضر كيخافو منها ، وحيت كطلع منها بحال الشعرة من العجين .

– بنت حليمة الصغيرة جراتها من سعرها كتغوت وتبكي ، كاع داك السكات لي كانت ساكتة ومصدومة ، خرجاتو .

شامة : صافي أسارة صافي ، خليها ماتوسخيش فيها يديك ، جروها العيالات ولوخرا طايحة راسها منتوف وجها كلو مندوب .

– هدى(كتبكي وتشوف فيهم بكره) : دايرين فيها الشرف والعفة وانتوما اتريكت ال97وب ، بانتكم سايبات ، بناتكم هوما لي بغاو ، من هاديلي قدامكم ، خيط بيك الدروبة حتى شبع ، وكان كيجي عندي أنا ، لالاك ماتوصلي ليا حتى رجلي ، اشياطة علم الله اش دا منك من غير فلوسك وخصرهم عليا ، مع كملاتها جراتها شامة من شعرها وقفاتها مقابلة نعاها .

شامة (تحت سنانها مابقاتش عارفة شنو كتكول ) : داك الز…..ل لي كتعناي بيه ، لي كيزيدو ليه الرجال ، قتلتو ، باااااح مشاااا ، علم الله الكسدة ديالو فاشمن زبل تلاحت، مدا مني باش ينقي سنانو ريحة فمي معارفهاش كيف دايرة ، ماشي بحالك المارجة ، الي جا يبول فيك بحال القرقارة ديال المحطات ، عمري ماشفت وحدة كتخلص لي يكويها ، الى على الذل راه غارقة فيه ، اتريكة بني 79بون ، بغيتي تردي كاع بنات الحومة بحالك ، حاشة وبزاف عليك المدودة ، اتريكة السيليكون ، مشيتي لإمارات بالو فيك كاع الحوالة حتى ربيتي التروم ، وحاية كتقولي لناس سويت تجميل عند جويل يابعد ݣلبي ، وشتي وبربي لا درت فيك يدي ،انخليهم هوما ينهشوك ، رماتها على حليمة بردات فيها كاع الحرقة ديال بنتها ، خلاتها كلها مشمرة وجها ودرعانها دمايات ، مالقات باش تغطي راسها ، غير كتحر فرجليها ، غادية وكولشي كيشوف فيها وكيتنخمو عليها ، مابقاش عندها الوجه لي تشوف فيه فناس ، والى بقات فهاد الحومة غير ماغادي تجبد عليها النحل .

– بقات شامة واقفة كلها كترعد وصدرها كينهج .

– الزوهرة : الله يعطيك الصحة عبرتي على والديها..

جمعة : عبرتي على طاسيلتها ، غير الى بقا عندها الوجه دور بيه هنا .

-شامة(حسات براسها بردات غدايدها) : الى زادت الضربة هنا مغادي دي غير النعلة عند الناس .

– الزوهرة : ياربي طيرها بلا ميجال .

علي(وقف عليهم) : ساليتي امحمد علي كلاي، كسجاتك المبارة واعرة ، دوزي قدامي دوزي .

____

– #طنجة

– قدام ريسطو فخم ، نزل من طوموبيلتو من نوع كات كات ، بكل أناقة عطا لسيكيرتي السوارت ، دخل لريسطو لداخل بكل أناقة ونخوة ، الموظفين لي تم كولشي كيرحب بيه ، بصوت رجولي :

– كولشي مزيان ؟

– كولشي مزيان أسيدي كون هاني ، شاف فريسطو بكل فخر ، طلع مع درجات مصنوعين من خشب العرعار ، كيبريو فتح الباب لي كان من الزاج ودخل ، مشا نيشان للبيرو ݣلس، ضار بالكرسي لطبلة لي حداه خداه كاس ، وكب فيه الكوكتيل الخاص ديالو ، رشف منو رشفة بكل حب ، هز طابليت ديالو ، شعلها وكيشوف فيها بكل إهتمام ، فتح الرسالة لي جاتو قراها وضحك ، حط طابليت من يديو وكمل شرب الكوكتيل ديالو …

_____

فحي راقي من أحياء الرباط ، وبضبط فشقة أقل مايقال عليها رائعة بإمتياز ، الهدوء من غير صوت أهات قوية كتسمع ، أصحابها غايبين على الوعي ، وعلى العالم كلو .

– تقلب على ظهرو مبسم ، شعرو الرطب مغطي عينيه لي رموشهوم طوال ، اللحية كانت نابتة ليه بكثرة ، صدرو عريان ، حطات عليه يديها كتلعب ليه فلسلة لي مدلية من عنقو .

– حبيبي بغيت نكوليك شيحاجة ومتقلقش مني ..

– أممممم كنسمعك ..

– باهوئتي ، إيمتا انتزوجو أحبيبي

– شاف فيها شوفة إستهزاء :

– شفت فالكلاخ حتى شفت، ولكن بحال ديالك احبيبة عمري شفت(زول عليه ليزار ، ودخل هكاك لحمام ، دوش سالة وخرج لاوي عليه الفوطة ، مامسوقش ..

– كيفاش كلاخ ، علاش حنا مغانتزوجوش؟

– بهاء(كيصفر ، ضار عندها) :

– الزين ، نهار الأول شنو ݣلنا ، متع وستمتع ، وهادشي لي كان ، ديك الهضرة ديال الزواج ، مكاتاكولش معايا اماما ، شوفي شي واحد تلعبي عليه غيري ، جيتي حتى لولد الهاشمي وبغيتي تلعبي ، ندفنك وندفن وحدة غيرك ، وباش منكتروش الهضرة بزااف ، اتخرحي على برا أتلقاي شيك ، او واحد الكولي فوقو كادو .

– سكتات بقات كتشوف فيه ، عند بالها هاد 3, شهور لي دوزات معاه كلهم عسل ، غادي يتزوجها فالأخر وتربح قلبو ، شافت حتى عيات ، وقفات لبسات حوايجها ، وخرجات على برا لقات الشيك وبواطة حداه ، هزاتهم بزعاف وخرجات ، من ورا ماخرجات لبس حوايجو وساعتو ، هز تيليفون شعلو ، لقى بزاف ديال ليزابيل من خواتاتو ، وميساج فيه بلي خاص يجي لدار وبلي جنيد خوه جا ..

– بهاء : ناااري أش درت ناري ، هز سوارت طوموبيلتو وخرج طاير ..

____

فݣليسة فوق سطح ، ݣالسة شامة وأحلام وعماد ، أحلام غادة جاية وݣضرب ففخاضها ..

– اويلي وحدي أويلي وحدي كانت أتخسر حياتها على شماتة مايسواش ، أويلي وحدي بغا دوز حياتها كلها فالحباسات.

شامة : صافي ماتزيدي فيه ، وانت تعددي تكولي ميت ليك الميت

عماد (كيشوف فشامة) : شامة علاش ماكلتيش لكوميسير على البلان ..

شامة : ماعرفتش ، جاني فشكل داك الكوميسير ، كايتعامل بواحد البرود فشكل .

أحلام(ݣلسات كتشوف فيهم) :

– علاش كاين شي بلان بلا هدا ؟

عماد (مداهاش فأحلام كيخنزر فشامة) : عرفتي الى شي نهار حصلت عليك الكذوب بربي بربي لا شفتي كمارتي مزال ، جيني نيشان، علاش دخلو عليكم لدار ، ماضحكيش عليا وتبقاي تنقزي عليا بحال القردة ، راه عينيك فاضحينك اش تم ..

– شامة(شافت فيه ساكتة ، شافت فأحلام لي عينيها عليها حتى هي ) :

– دخلو لظار حيت كانو كيقلبو على بريكة ..

أحلام(بعدم تصديق) : كيفاش.

____

– #الڤيلا

– توفيق (بجدية) : مكايهمش شكون ݣالها ليا ، لي مهم علاش درتي هكاك ؟

جنيد (بإستغراب) : الواليد ، شفت فعينيك بحال الى ماحرك فيك والو هادشي!!

توفيق (شاف ليها فعينيه) : حيتاش عارف بلي داك تخربيق مامنو والو .

سامية(مفاهمة والو) : واخا تفهمونا راه مافهمت والو !

توفيق(شاف فيها هي وسعيدة لي دايرات بحال الأطرش في الزفة) :

– خوك يالالة دارت ليه ݣنازة فأمريكا ، بلات نزيد نشرح ليك باش تفهمي مزيان ، خوك بنسبة للإستخبارات ديال امريكا ميت .

جنيد(مامسوقش، ماد رجليه وكيلعب فلحيتو) :

– الواليد النمرود لي ميت بنسبة ليهم ماشي انا ، وحتى لدابا ماعرفتش شكون وصل ل…. صافي ضافي عرفت شكون ، رايمنت ياك؟

توفيق : يكون لي بغا يكون بغيت نعرف علاش؟

جنيد (ببرودة) : حيت عييت ، إيمتا أصلا انا كنت عميل فالإستخبارات ، انا وانت عارفين مزيان بلي دخلت ليها غير بزز وغير حيت طلبني هو .

توفيق(بصرامة) : ولكن ماشي لدرجة دير راسك ميت ،وطلع شهادة وفات بإسم النمرود ، على اساس مغايعيقوش بيك فالمطار .

جنيد( دار رجل على رجل) : كوني هاني من ديك النحية ، كاينة طريقة معاق بيا حتى واحد ، واول واحد عاوني هو رايمنت .

توفيق(بإستغراب) : رايمنت فخبارو بلي انت حي؟

جنيد : اه فخبارو ، وكولشي فراسو وهو لي سلك ليا الطريق (غمز باه) غير رتاح من هاد النحية .

سعيدة : ولكن علاش أخويا؟

جنيد : مكنحملش ندير شي حاجة بزز مني ، عيت من ديك الحالة انتوما براسكم عارفين كيف داير ، ومكاينش شي واحد يقدر يبزز عليا شيحاجة انا مابغيتهاش .

توفيق : شنو المقابل لي عطيتيه لرايمنت حتى عاونك ؟

جنيد (مامسوقش) : شيحاجة بيني وبينو الواليد، مكاين لاش شيواحد يعرفها ، ومن الأحسن نسدو هاد الموضوع ، سدهم بهاد الهضرة ، وحتى واحد مكايقدش يتقابح معاه ، ولا يجبدو منو الهضرة ، دخلات زينب هازة الصينية ، والخدامة هازة بلاطو فيها حلويات مغربية .

جنيد : هوهو ريحة اتاي كتعطي من دخلة، الله يعطيك الصحة الواليدة ، ݣلسات زينب وكبات ليه ، هز كاسو والحلوة ، عض منها .

– اممممم الله ، واتاي الواليدة الله يعطيك الصحة، خدا كاسو ورجع بلور ، كيشرب ومبرد حتى حاجة مهاماه من غيرو راحتو او راسو .

_____

– عند شامة –

عماد غادي جاي بعصبية ، كيدوز يديه فشعرو … كيحس بواحد العافية شاعلة فيه … كون كان شي واحد مكيحملوش قدامو … كون خسر ليه وجهو .

عماد(جا لعند وجها) : دابا أنت انت عندك شي خمامات ولا والو ، دابا انا ياك انا … بغيت نفهم حيت مزال لحد الساعة مافهمتش … واش انت عندك عقل ولا مكتكسابيهش … ولا يمكن انا لي حماقيت ياك هادشي؟!!

أحلام (كتحاول تهدئو ) : عماد ، غير بشوية عليك كولشي كيتحل بالعقل .

عماد(شاف فيها) : أشمن عقل خلات ليا هادي …. كتݣول ليك سمعاتهم كيهضرو على منصمة التهريب … واش عارفة اشنو هي منظمة التهريب ولالا … واش عارفة التجارة السوداء ولالا ؟… لا يمكن معارفاش واخا انا أنكوليك شنو كيكون فيها .

شامة (هزات فيه عينيها) : عما(قاطعها)

– انت منسمعش حس طواسلك ، انت غادي تلبدي وغادي ديري خمسة على فمك… وغادي تسكتي …(شاف فأحلام) دابا أنكوليك لالة شامة فاش دخلات راسها ، السوق السوداء داخل فيها تهريب الدوايات، وداخل فيها الحشيش وداخل فيها الكوك (قاطعاتو أحلام) ..

– علاش حتى لكوك كيتاجرو بيه ، واش كيصايبو بيه الحلوة ..

عماد(مابقى عارفة شنو كايݣول ) :

– كيصايبو بيها الق….ة مخضة بلوز إيفيلي ولبيستاج مزيانة دابا ، الكوك الغبرة الكوكايين ، وكيتاجرو بالبنات وكيبيعوه بثمن غالي ، وأي حاجة ممنوعة تجيك فالبال كيتاجرو بيها ، وعادي عندهم يقتلو الواحد وعادي ، وتاجر مكايعرف تاجر ، كيتواصلو غير بلي فو كونط ، واش عارفة الحريرة لي داخلة فيها الأخت ولالا ، وباش قفراتها هاد الكعبية ، جايبة كليو سبي فيها كاع سمياتنا ديال خوتنا فالله ، والى مشاو حتى ساقو ليها الخبار ، قفراتها بالبيان .

– جاوبهم صوت من اللور :

– ياك أسليليوة … ياك ابنت الهم … وليتي تجمعي عليا المافيا … خرجتي ليها طاي طاي… دايرة فيها عادل إمام ففيلم اللعب مع الكبار … يحسابليك راسك انت هي جون تراڤولتا فأفلامو … لا لا انت هي رأفت الهجان .

– تفاجئو بعلي لي وقف عليهم ، كيشوفو فيه مصابو مايݣولو ، حيد علي صباطو شدو فيدو .

– أنت أداك سلوم المخارة انت وديك نص بلاصة غبرو عليا ..

عماد : عمي علي … ماشي هكا كيتحلو الامور ..

علي (كيتحلف) :

– عليا بليمين ، ومتخرجو لا انت لا هي … نحمعكم معاها.

شامة (وقفات) : با واش من نيتك باغي ضربني نعل الشيطان ..

علي : مزال كتهضري يابنت لحرام من فعايلك ، وجهك هداك ولا مسلفاه … ضاربة ليا العريوة وراس الحربة ولا لبوية ولا ماعرفت لجد بوه الكلب ، ياك أتشيتة … اجي غير نهضر معاك والله ابنتي مانقيسك … أجي غير نسولك كيفاش درتي ليهم .. اجي

شامة : لا ابا مغاديش ديرها بيا ..

علي(شد قلبو) : أميمتي ياربي ، ياربي .. الله ياربي قلبي الله، جا عماد كيجري شدو من ظهرو واحلام، جات شامة عندو مخلوعة ..

– شامة : با با مالك …علي علي مالك باش كتحس ؟

– جرها من عنق التجاكيطة خشاها تحتو ..

– ياك ابنت الهم ،.. ياك وهااااا لي يدخل راسو فشبوقات لبعاد … نزل عليها بسباطو كيضرب فيها ، عماد كيفك هو وأحلام ، خلطهم معاها ، ضربة فيها وضربة فيهم ، وغواتهم واصل لعند الجيران …

_____

– #المديرية

– قدام باب كبير ديال مبطن بجلد واقفين جوج من حراس الأمن ، شافو سيف عطاوه التحية ، دق الباب … غير سمع الإذن وهو يدخل … رض الباب من وراه …ضار كيقلب بعينيه عليه … البيرو كان كبير وعندو جوج سراجم كبار كيطلو على برا … المكتب حتى هو كان كبير حداه واحد الڤاز ورايا اما فوق المكتب كانت متربعة صورة الملك … فوق من البيرو كانو شي ملفات … وحداهم بلاكة مكتوب فيه والي الأمن جلال الغالي .

جاه صوت من جهة الحمام .. أنا هنا ..

– ضار عندو سيف وتبسم ليه … عطاه التحية وحدر راسو إحتراما ليه … كان راجل فنصف الخمسينات … شعرو بيض وموستاجو بيض … داير نظارات إطارهم فالكحل ديال الشوف … لابس كومپلي فالݣري … كتبان عليه واحد الهيبة والوقار ..

جلال : سي سيف … شنو تما ؟

سيف : سيدي بخصوص البنت لي (قاطعو جلال) … شامة شرف الدين .. الاب علي شرف الدين متقاعد وقمار … الأم فوزية شاكر توفات وفسن شامة 10 سنوات .. نزيدك شامة خدامة عند واحد الفلاح معروف … واحد النصاب سميتو ناصر ..

سيف(بإستفهام) :

– فاش خدامة عندو؟

جلال : باها كان كيخرجها لصيد ،وتعلمات لجويجة وكيفاش تنيش … وهاد ناصر كيجمع صحابو وكيتراهنو على الاراضي وعلى الفلوس … كيختارو نهار دصيد وهو مع كان تضرب فيدو … مابقاش كيتحكم فيها ..

سيف : فهمتك فهمتك .

جلال (شاف فيه) : شفتك مزال واقف اسي سيف ..!!

– ݣلس سيف كيشوف فجلال … كيتسناه يكمل كلامو..

جلال (جبد ساعة من جيبو مذهبة عندها سنسلة طويلة مبرومة فذهبي … شاف فيها مسحها بواحد الزيف صغير ورجعها لجيبو) :

– فخبارك المضاربة لي وقعات هاد الصباح؟

سيف (بإستغراب) : لا مفخباري والو .. اشمن مضاربة أسيدي ؟

جلال (شاف فيه من تحت نظاظرو) :

– شامة شرف الدين وشي وحدة عندهم فالحومة.. كتسفر لبنات الخليج … كتبزنز فيهم وتبيعهم لفساد ..

سيف (مافهم والو) : ولكن اسيدي باش عرفتي؟

جلال : وقيلة انت مزال مكتعرفنيش مزيان … منين تاصلتي بيا درت خدمتي .. (هز ملف فالزرق) هنا كاع المعلومات على شامة وعائلتها… مكاينش شيحاجة مميزة الصراحة … عمامها متنكرين ليهم هوما وخالاتها .. من نهار توفات مها .. مابقى حد كيعرفهم … جراو عليها من الخدمة … بسباب واحد خينا خدام تم … ونزيدك بنت كاپابل واعرة ومكتخافش ..

سيف (ضحك) : بزاااف عمري شفت شي بنت بحالها .. فاش جات تعتارف على راسها بلي قتلات … مافكراتش للحظة تهرب .. ولكن اسيدي مخبية شيحاجة تحت راسها …. ماعرفتش شنو هيا … حيت راه مايمكنش يقلبو الدار عليها هي بضبط … داك التقلاب ديال شيحاجة موضرة ليهم … ولا يمكن سرقات خونا ..

جلال : متخافش … خليت لي يتبعها ويوصل لينا الخبار ،(قاطعو صوت التيليفون ديال سيف) ..

سيف(جبد تيليفونو) :

– سمح ليا أسيدي ..

– وقف ومشا بعد كيهضر .. ماطولش بزاف ورجع :

– سيدي علي شرف الدين .. كاين هنا .. وكيݣول بلي عندو شيحاحة بغا يݣولها ليا ..

جلال(وقف) : أنا جاي معاك ..

_____

– #الڤيلا

– وجدات الطبلة بكل ما لذ وطاب… زينب ماخلات ما وجدات هي والخدامات … فرحانة بولدها لي جاية ل عامين مشافتوش … يلاه وقفو يتجمعو على الطبلة … تحل الباب ودخل بهاء … وقف جنيد ضار بان ليه خوه … نقز عليه ..

– بهاء(معنقو) : اوووه خويا العزيز .. على سلامتك ..

جنيد(معنقو وهمس فودنو) : سبع ولا ضبع؟

بهاء ( فهمو .. ضحك ورض عليه) : ضبع ودبحناه ورميناه ..

جنيد (هز حاجب ومهبط الثاني كيشوف فيه) :

– ياك العود .. مغاديش توب ودير مدار خوك ..

بهاء(مصدوم) : أنا .. أنا وزواج .. اووه نووو مايمكنش لي عمرها تكون .. خصوصا إلى كانت بحال صوفيا … غير الله يربح ..

زينب(وقفات عليهم) : أتبقاو بزااف هنا .. يلاه اولدي زيد تغدا ديها فيه .. هو راه ݣاعما كيعمر معانا ولا ياكول ماكلتي أجي أحبيبي ..

بهاء(كيضحك وتابعهم من اللور) : سير أحبيب ماماه … تعطيك ميمي وشيشي ..

– تجمعو على الطبلة كاملين ..

جنيد (كيسول) : سعاد مكايناش؟

سامية : لا مسافرة لسبانيا … كاين واحد المعرض تما ديال التصاور .. ومشات .. السيمانة الجايا غادي تكون هنا ..

جنيد : وزياد ؟

بهاء (بدون تفكير) : زياد خليتو فرباط .

توفيق(بإستغراب) : شنو كنتي كدير انت فرباط ؟

بهاء(عرف راسو قفرها تاني) :

– كنت مع زياد كنشوفو لاتوليي الجديد ابابا … جيت أنا وهو بقى مع الخدامة راك عارف ..

توفيق : خوك كون فخبارو خوه هنا كون جا … علم الله انت فين كنتي ..

جنيد (عرف خوه فين كان ) : الواليد غير خليه .. انا هاد الليلة كاين هنا .. غادي نشوفو غادي نشوفو ..(بهاء سيفط ليه بوسة فالهوى بلاما يشوفو حد حيت عتق الموقف) ..

سعيدة : بابا اليوم مغانمشيش لخدمة … بغيت نخرج مع خويا توحشتو وشحال ماشفتو ..

توفيق : أنت تعرفي أبنتي ..

سعيدة (باستو) : لهلا يخطيك عليا .. (شافت فجنيد)

– انا وياك أنخرجو اليوم .. مكاين لا لا لا من بعد والله مانتفاك معاك .. أنا قوتليك ..

جنيد (هاز حجبانو بسخرية) : عارف راسي تاني ماعندي فين نهرب منك .. ومن صحاباتك التافهين .

سعيدة(مصدومة) : أنا صحاباتي تافهين؟ بالعكس صحاباتي غزالين وألف واحد يتمناهم ..

جنيد : وانا ماشي منهم ، ايبقى 999 واحد .

سعيدة (كتضحك) : باسل وحامض ..

جنيد (غمزها) : بحالك أزين ..

– كول دغية باش نخرجو ..

زينب : خلي خوك ياكول على خاطرو ..

توفيق : لالة زينب … شفتك نسيتينا ..

هز جواد راسو كيضحك شاف فخوتو غمزهم ..

سامية(كتغني) : كيفاش وعلاش ياخود قلبي معاه ويل ويل الصعيب انا مانقدر ننساه ..

زينب(حشمات) : أنمشي نجيب ديسير نسيت ماجبتو ..

جنيد : شتو هانتوما حشمتو لينا الواليدة … زينب ولا وجها حمر دارت العدر بديسير غير باش تهرب ..

– 36 عام ديال الزواج .. ومزال الحد الآن الى تغزل بيها توفيق كتولي حمرة وكتحشم .. العشرة ديال الزواج القديمة … كتكون على المحبة والإحترام .. كيكون الساس ديالها صحيح … هي لي كدوم وزريعتها كيكون الخلف ديالها زوين وتمارها نقية .. بحال عائلة الهاشمي ..

– خرجات من الدوش … نشفات شعرها ولبسات عليها بيجامتها … ضرها ظهرها بدقة لي عطاها باها … دخلات البيت وتكات … كانت فاتت العصر ،، منين خرج علي فاش عطاهم طريطحة ديال العصا مابقى رجع عرفاتو ايكون تاني مشا لنفس البلاصة ..تنهدات تنهيدة طويلة … غمضات عينيها كتحاول تنعس ، حتى غفزها صوت الباب ، والعياط ديال احلام ..

– شامة كتزبل وتعاير : متخليوش شي واحد يتسنط لعظامو .. يجمع معاهم يعرف اش ضارهم اش بيهم ..لا والو (حلات الباب) دخلي وسديه معاك ، رجعات لبلاصتها ..

أحلام : مالكي هازة عليا قنوفتك .. مالي انا لي قلت لعمي يدݣك ..

شامة : أحلام ݣولي اش بغيتي ورولي ..

أحلام (دارت فيها مقلقة) : عندك الصح ، انا لي جايا وجايبة ليك معايا همزة .. سري نيت .

شامة (كتشوف فيها بنص عين) :

– أتݣولي ليا شنو كاين ولالا؟

أحلام (بلهفة) : شوفي ضبرت ليك على واحد الخدمة واعرة ، عرفتي فين فعين الذياب .. واحد الريسطو واعر .. بنت خالتي ݣالت ليا محتاجين شي بنت تسربي تماك ..

شامة (بإستغراب) : ياك بنت خالتك خدامة فبار ؟

احلام : أزبلة بلاصة البار بوحدها … وبلاصة الماكلة بوحدها … راه بلاصة هاي كلاص … وعرفتي شحال يخلصو تماك ولالا .. راه ازبابل ديال الفلوس .. خلي تضويرة ديال الكليان ..

شامة (مدخلاتش ليها لراسها) : ياك بنت خالتك مسمومة .. ومكتحملنيش .. أش جاها حتى ضبرات ليا فالخدمة ؟!!

أحلام (شدات راسها) : واش انت دابا لقيتي البديل … تكون كيفما بغات تكون .. حنا مخاسرين والو غادين نمشيو ونشوفو … بلاما ضيعي الوقت .. يلاه نمشيو ونشوفو متعرفي شنو كاين .. ومتعرفي بنت خالتي المسمومة ديرها مرة وحدة مزيانة فحياتها .. يلاه نوضي لبسي عليك .. وهالعار ماتلبسيش دياك اللبسة الكحلة ..بدلي شوية … خنزرات فيها شامة وناضت تلبس عليها ..

____

– خرجات عندها لابسة تيشورت فالبيض يديه قصار .. مع سروال دجين … وسبرديلة فالكحل … هازة تجاكيط ديال الكوير فيدها … هازة شعرها للفوق … هاد المرة دارت أيلاينر خفيف .. مع عكر حمر خفيف ..

– دابا مزيان عحبك الحال ..؟!

أحلام (كطلع فيها وتهبط) : على سلامة داك الايلاينر وداك العكر مدرتيهم من نهار جبتهم لبك كادو .. كوراه سلات مدة الصلاحية ديالهم ..

شامة (بتهديد ) : والله حتى نمسح بوهم دروك ..

احلام (جراتها) : صافي هنينا زيدي .. وأخا هاد تجاكيطة مابغيتيش تفارقي معاها لكن كوميم بعدا .. يلاه قبل مايجي عمي علي … يلاه نشدو طوبيس ..

– شامة : بلات نهز تيليفوني وسوارت .. هزات تيليفون وسوارت دارتهم فجيبها وخرجو ..

_____

سعيدة (كتعيط) : جنيد ويلاه انتعطلو … خدمات الموسيقى فطوموبيلتو وجهداتها شوية … تم هابط لابس سروال دجين فالكحل … مع ݣاط كحل ..تريكو طالع بالكول فالكحل .. وكويرة فنفس اللون .. ساعة رياضية فنفس اللون .. وخاتم فسبابة نقرة وفيك الكحل .. مع سنسلة طويلة هابطة من عنقو … واخر حاجة نظارات الإطار ديالهم كحل .. طلع لطوموبيل كيشوف فختو :

– مالنا انت مصدعة الوقت ..

سعيدة (كتشطح) :

– حيتاش فرحانة او بزااف .

جنيد (لعب ليها فشعرها .. ديمارا الطوموبيل وشد الطريق ) .. فين بغيتينا نمشيو ؟

سعيدة : أول حاجة ديني المول .. ونتمشيو نديرو كافي .. وننشيو لعين الذياب … بغيت نضور نضور نضور … ومكرهتش نمشيو لديسكو شنو بان ليك ..

جنيد : ياك الالة … هي معولة مدخلي حتى لفجر ادار ؟

سعيدة (كضحك وفرحانة) : أه مندخلو حتى لفجر ..

جنيد (كسيرا) : اهاه مطلبتي غير الموجود مشينا ..

سعيدة(كتغوت) : مشينـــا ..

_____

– شامة : اليوم مغانوصلو حتى لعشا .

أحلام : غير صبري أصاحبتي … وݣاع الى وصلنا مع العشا عادي … يحاسبليك هوما كيسدو مع 8 .

شامة : ماشي هكاك … ولكن الى وصلنا معطلين وبغينا نرجعو تما بقينا … والله لا لقينا ترونسبور .

أحلام : داك الساع تعيطو لمصطفى يجي يدينا بطوموبيل … غير أنت هنينا .

____

#المول ..

– سعيدة جارة جنيد من محل لمحل … تلبس وتقيس وتوريه … لي عجباتو ياخدوها .. لي ماعجباتوش كيحطوها .. ماخلات بيه محال مدخلوش ليه … خدات ݣاع لي بغات .. أي محل دخلو ليه العينين عليهم .. عند بالهم غير راجل ومراتو .. جنيد داير ليها الخاطر ولي بغاتها كياخودها ليها .. سخفاتو ماخرجو من المول حتى بدا يظلام الحال … ختموها مشاو يتقهواو بجوج على جنب البحر ..

جنيد (بتدمر) : آخر مرة نخرج معاك .

سعيدة : شكون بحالك خارج مع وحدة زوينة بحالي .. شفتي الناس كيفاش كيشوفو فينا … جيناهم بحال زوج مزوجين ههههه .

جنيد (كيشرب قهوتو) :

– مزال فيك مايسهر ويدور؟

سعيدة (بحماس) : عندك الشك فهادشي ، اليوم حلفت مندخل لدار حتى لصباح ..

جنيد : أياه الالة مرحبا ، عندك غير تلواي ليا ..

سعيدة(بإستغراب) : شكون أنا؟ وقيلة اخويا مكتعرفنيش !

جنيد (بإستهزاء) : أياه الالة دابا نشوفو (كيشوف فيها وكيضحك بسخرية).

– سعيدة(وقفات) : أنا جايا ..

جنيد : سيري ..

____

شامة(كتلبس تجاكيط ديالها) : شفتي جاب الله جبتها معايا … راه بالعشية كيتحرك البرد ..

أحلام(واقفة كتحاول تفكر العنوان ديال الريسطو لي قالت ليها بنت خالتها) :

– شامة اش بان ليك نتمشاو شوية ، عاد نمشيو لريسطو ..

شامة(كتشوف فيها بإستغراب) :

– كتهضري من نيتك … ياك ݣلتي مخاصناش نتعطلو؟

أحلام( مابقاتش عقلات على العنوان ونسات الورقة فين كتباتو) :

– لا راه أسماء ݣالت ليا حتى ل 9 عاد غادي يكون مول شي ، نضربو ضويرة بينما جا ..

شامة : لا لا دابا واش من نيتك … واش مخرجاني مجرجراني من دار يلاه يلاه ايمشي الحال …ودابا كتكولي ليا راه مغايجي حتى ل9 … وكون خلينا حتى لغدا فصباح ..

أحلام(جراتها) : واش انت يحسابليك هدا عبد الرحيم مول المحلبة كيحل مع 8 … راه هاد البلايص الهاي كلاص … مكايحلو حتى ليل … وكيبقى حتى لفجر عاد كيسدو أصاحبتي .

شامة : قسما بالله باك علي الليلة يجري عليا .

أحلام : باتي معايا أصلا ماما وبابا بايتين مع خالتي … وداو معاهم حتى خويا طه … اتسوني لعمي وݣولي ليه بلي غادي تباتي عندي ..

– شافت فيها شامة وسلمات امرها لله … جراتها أحلام غادية بيها فالكورنيش … خداو الزريعة وجوج قراعي ديال الما وغاديات كيتمشاو … أحلام ساهية وكتحاول تفكر العنوان لي عطاتها أسماء قبل ماتوصل 9 ..

– شامة (بشك وقفات) : أحلام ݣولي ليا .

– أحلام(وقفات كتشوف فيها ) : نعام !

– شامة (بإستغراب كتشوف ورا أحلام جهة الشانطي) :

– مالحظتيش منين خرجنا من الدار … او وقفنا فلبلاكة …واحد طوموبيل تابعانا .

أحلام(ضارت ضورة ديال الشوهة) : فين ؟

– شامة : ديما كنݣوليك دوك الدورات ديال الخطافة … ماتبقايش ديريهوم … بشوية أشوهة بشوية ..

– أحلام : واش ديك الكاط كاط الزرقة … انت راه الوسواس ولا عندك فداك الراس …. كتفرجي بزااف فالأفلام ديال الاكشن … نقصي منهم شوية أيخرجو عليك زيدي زيدي … انت هي ساندرا بيلوك .

– شامة : أحلام كنݣوليك ليكاين ماكنتفلاش ..

– أحلام : كازا كلها فيها كاط كاط وحدة زيدي براكة من البسالة راه هبلتي … يلاه تحركي، جراتها احلام من دراعها …. شامة ماقتانعاتش بكلام أحلام .. عمر إحساسها ماخيبها … وإحساسها كيݣول ليها بلي ديك طوموبيل منين خرجو من الدار وهي تابعاهم .

_____

فواحد من ليديسكوتيك ، شادة فيه كتشطح فرحانة ، هو واخا مكايحملش هاد الاجواء داير ليها خاطرها … كتشطح حتى عيات جراتو وهمسات ليه فودنو :

– يلاه نݣلسو عييت ، سبقاتو وتبعها لبلاصتهم .. رشفات من العصير ديالها كترتاح .

جنيد (بإستهزاء كيضحك) : شفتك عييتي ؟ … ياك ݣلتي أتبقاي حتى لفجر ؟

سعيدة (كتحس برجليها مابقاوش هازينها عيات وجاها النعاس) : وقيلة غي نرجع فهضرتي … أخويا عييت .. خليني انا هنا وسير انت كمل السهرة … شفتي شحال من عينين عليك (غمزاتو) .

– جنيد : كبرتي البعلوكة … وليتي أنت كتوريني .. كملي العصير ديالك ويلاه نمشيو فحالنا … 10 هادي يلاه تنعسي باش تفيقي لخدمتك .

– سعيدة : غادي تعوض ليا هاد الليلة مزال انسهرو.

– جنيد : واه واه أنسهرو أكملي العصير ديالك ويلاه ..

– هز جنيد راسو فالبنات لي تم … كيف ݣالت سعيدة شحال من عينين عليه … شحال من وحدة غمزاتو ولمحات ليه … ولكن والو ماخداو منو لا حق لا باطل … كيدير راسو مفاهمش ومكاينش فهاد العالم … حاسبهم بحال الى ݣاعما كاينين .

____

– شامة(طالع ليها الدم) : داخلت عليك بوجه الله غير ݣولي ليا … واش ساحرين ليك بمخ سلوݣي حيت هادشي بزاف على مخ الضبع … اويلي وحدي جايباني لهنا وناسية العنوان … وحتى نمرة بنت خالتك مامقيداهاش … واش كاين شي واحد فهاد الدنيا مامقيدش نمرة بنت خالتو فتيليفون … مجرجراني العشرة ديال الليل هادي يا أحلام .

– أحلام (كتغبن) : وحق الله أختي بالفرحة نسيت … قسما بالله وكنحاول زعمة نتفكر … ولكن والو سميتو غريبة .

– شامة (كتحاول تمالك راسها ومتعصبش .. كدوز يديها فشعرها غادية جاية … وقفات كتسوف ورا أحلام بإهتمام وشك ..) : أحلام ماضوريش تاني ديك الدورة ديال الخضارة … الكوموبيل لي ݣتليك كانت تابعانا … مزال تابعانا ونزيدك .. منين حطينا رجلنا هنا وجوج رحال تابعبنا ومتݣوليش ليا كنتخايل … كنقسم ليك بالله مكنتخايل .

– أحلام( طلعات معاها البرودة من رجليها ، ولات كتقفقف) : و و واش دوك الرجال الطوال لي كانو … لابسين الكحل قبيلات ؟

– شامة : أه هادوك .

– أحلام (صافي البولة بغات تطلقها ) : شفتهوووم أختي .. ويحسابلي أتابعينا باغيين نمرة .

– باغييني أنا ماشي النمرة … شوفي الليل هذا مكاين لي غادي يديها فينا … وبحالنا راه فديورهم مخشيين .. ولكن شنو أنكوليك اوجه البلا .. حسابنا من بعد … عند روشارج فتيليفونك؟

– أحلام (كتقفقف) : أه عندي .

شامة : سوني لمصطفى … ݣوليه يجي لعندك .. سيري معاه وخليك حاضية تيليفونك واخا ..

– أحلام(بإستغراب ) : أويلي وأنت؟

– شامة : أنت ديري غير لي ݣلت ليك ماشي شغلك دابا ، جبدات شامة تيليفونها سونات على علي ،، مخلاتوش يسولها زربات عليه بلي اتبات عند أحلام وغدا اتجي لدار .

– شامة : سونيتي لمصطفى؟

أحلام : اه هاهو جاي .

– شامة : مزيان ، دابا أنتمشاو عادي انوصلك فين اتسنايه ، وياك تبعيني اديري لي ݣلت ليك صافي ؟

– أحلام واخا صافي ؟

____

– هبطو لجيهة الشانطي ..

– شامة : ديري راسك كاضحكي ومامسوقاش صافي… ماتبينيش راسك مخلوعة وبلي عقتي بيهم …دسري راسك مكاين والو ..

– أحلام : صافي واخا … انت جبادت النحل … بسبابك وليت كنحس براسي ففيلم ديال رشيد الوالي أصدقاء من كندا ..

– شامة(مامبيناش كضحك) : والله العظيم ياختي … اجي علاش حياة إيمتا تزوجات … وشوفي ليك ياختي حرام واش ݣالت غير دوزها علينا ..

– أحلام (بإستغراب) : شكون حياة؟

– شامة : حياة أحبيبة … حياة بغيت ليك العݣر

– أحلام : الله ينجيني أختي … أه فهمت فهمت أختي متديش عليا راني تالفة … شامة شنو غادي ديري اختي انا سباب جبتك لهنا أنا كاعما نسوى ياك أختي ..

– شامة (بصرامة) : أحلام جمعي راسك شوية وأنت مخنة … انت راه مغايوقع ليك والو هادو باغييني أنا … انت اتمشي مع مصطفى يوصلك … حيت الى مشيت معاكم ايتبعونا … ويصدقو مأديينا كاملين اللهم سيري غير أنت … أنا قادة براسي وعارفة شنو غادي ندير . ،وصلو لبلاصة فين اتسنى أحلام مصطفى وقفو بجوج ..

– شامة( كتسد السنسلة ديال تجاكيط ، حلات شعرها ورجعات جمعاتو مزيان على شكل سفنجة . دخلات تيليفونها مزيان فجيبها وسوارت الدار ، كتشوف حداها مرابانا تلقى شيحجرة .. ولمن فين وهي فبلاصة نقية ) :

– أحلام بلاما نوصيك ياك … اتسلمي عليا عادي بحال الى. كنتسيفطو صافي ؟

– احلام : صافي واخا .( عنقاتها شامة) :

– يلاه احبيبة تهلاي فراسك نشوفك من بعد سلمي على عمي وخالتي … التيليفون بيناتنا .

– أحلام : واخا تهلاي فراسك ، أحلام مطاوعاش خاطرها تخليها ولكن عارفة شامة راسها قاصح … ضارت شامة ورجعات من طريق لي جات منها ، دارت يديها فجيوب التجاكيط ديالها ،، حدرات راسها وتمات غادية مرة مرة كتهز عينيها كيبان لو ضواو ديال الطوموبيل وراها ودوك جوج الرجال مزال تابعينها… تنهدات تنهيدة طويلة وبدات كتزرب فالمشية … ماحدها كتزرب وهوما كيزربو وطوموبيل كتزرب ..

– شامة : هادو باينة هاد الليلة مغاديش يتفاكو معايا ، ياااربي تعاوني وتكون معايا ياربي … بدات كتحسب 1/2/3 وبدات كتجري بكل ماعطاها ربي من جهد … لوخرين لي وراها غير بانت ليهم كتجري ركبو فطوموبيل لي وقفات ليهم وتبعوها … ضارت بانو ليها تابعينها … كملات فجري ، نقزات لواحد الصور كتجري الطوموبيلات غاديين جايين ، قليل لي كان كيشوف فيها … بان ليها واحد السلوم … طلعات فيه كتجري نقزها لصور لي من الجهة لوخرا … كانت كتبان بحال شي طير طاير فسما … طلات برسها بانو ليها مزال تابعينها ..

– شامة( كتعاير) : تفو ، وقفات كتشوف كيفاش غادي دير تنقز ، من هاد جيه غير الخوا وهاد الجيه الشجر ، وهاد الجيهة شانطي وجيهة … داخت كتفكر شنو غادي دير … كانت فوق سطح ديال ليغيسطو … شافت حتى عيات وكملات الجري ديالها حتى تشوف فيه اتخرج ..

___

ركبات سعيدة فطوموبيل عيانة شادها النعاس… دار ليها السمطة وسد الباب وراها غير حطات راسها مشات .. طلع لبلاصتو دار السمكة وديمارا … كسيرا وشد الطريق … مع غادي يدور لطريق الدار كيسمع حس بطوموبيل تزعزات … بحال الى شيحاجة طاحت عليها … كان ممنوع عليه يوقف فديك البلاصة حتى فاتها بشوية او وقف … زول السمطة مغوبش ونزل .. وقف ورا طوموبيل … كتبان ليه واقفة قدامو بحال شي قطة مستعدة طير على الفريسة ديالها ..

جنيد(بإستغراب مغوبش) : شكون أنتي ؟

– شامة مغوبشة كتشوف فيه منطقاتش … قلبها كيضرب بجهد … صدرها كيطلع ويهبط ..

– جنيد (أشر ليها بيديو) : أشريفة معاك كندوي شكون انت؟

_____

– شامة (جاها على غفلة … مافكراتش للحظة انها تنقز لطوموبيلتو … دارتها فيد الله يا ربحة يا دبحة ) :

– شامة : انا عارفة راسي نقزت على طوموبيلت بحال شي طوبة … ولكن دابا ماشي وقت الهضرة الله يرحم باك ديماري وزيد .

جنيد (مستغرب من الجرأة ديالها) :

– ياكما خدام عندك… شنو بان ليك نضرب بيك شي ضويرة … اتنزلي ولا غادي نديك فين ترباي .

– شامة (بعناد ) : والله لا هبطت وكنقسم ليك بالله … الما زدتي انجمع عليك أمة لا إله إلا الله ونݣوليهم خطفتيني شنو بان ليك ؟

– جنيد (تعصب) : يلاه بيني ليا … يلاه غوتي .. زيدي .

– شامة( حسات بلي قسوحية راسها مغاديش تنفعها وفاي لحظة أيوقفو عليهم) :

– شوف انا سميتي شامة … ماناوية ندير والو غير بعدني من هنا غير دورة حطني … الى مشاو حتى شافوني راه مشيت فيها راهم تابعيني … شوف دير فيا هاد الخير الله يعزك … شافت وراه كيبانو ليها ضواو ديال طوموبيل جايين ..

– شامة : شفتي هاهوما جاو … نقزات من طوموبيل بزربة دفعاتو ومشات كتجري … ضار وراه بانت ليه طوموبيل زرقة وفيها رجال وجهم مكايبشرش بالخير … غوبش وتأكد بلي فعلا كانت كتقول الحق … طلع لطوموبيلتو .. ديمارا وكسيرا ..

– ماعرفاتش فين اتمشي ولأشمن زنقة غادي تدهل ليها … ماحسات غير بطوموبيل وقفات حدا رجليها وصوتو كيأمرها :

– طلعي دغية … بزربة نقزات للطوموبيل اللور وتكات مخبية … كسيرا مخلي وراه غير الغبرة … ولوخرين وراه … مقابلهم بعينيه من المرايا … زاد مكسيري … سعيدة فاقت كتبان ليها الطوموبيل طايرة .. كتحك عينيها وكتشوف فيه بإستغراب :

– خويا شنو واقع ؟ مالك طاير بشوية ..

– جنيد (بأمر مشغول بدوك لي وراه ) :

– ماشي وقتو دابا … رجعي لنعاسك وشدي فراسك مزيان ..

سعيدة (مافهمات والو … وغير كتشوف ) ..

– كتبان طوموبيلت جنيد بحال الى دايرة رالي وسط المدينة … كدور من هنا ومن هنا كيحاول ما امكن يدوخهم … شد طريق مظلمة وطفى الضواو ديال الطوموبيل … خلاهم يتلفو ماعرفوه منين داز … هز راسو فالمرايا وتبسم بخبث … داكشي لي كان باغي وصل ليه ..

– سعيدة : ناري يا خويا … اخر مرة مزال نركب معاك نخاف على حياتي… شكون هادوك اخويا .؟

– جنيد : حتى نوصلو وتعرفي … رجع شعل الضواو وخرج من ديك البلاصة لشارع … رجع السرعة لمستوى ديالها الطبيعي … وقف فواحد الزنقة قريبة لڤيلا … وقف ونزل … نزلات سعيدة كتحاول تشم الهوى وتحيد الخلعة لي حيات بيها … ضار جنيد وقف عليها ..

– تقدري تنزلي مابقاوش تابعينا ..

– نزلات شامة كتقاد حوايجها … سعيدة جات بزربة كتشوف فيها ..

– سعيدة : شكون هادي؟

– شامة(كتشوف فيهم) : سمحوليا بزااف برزطكم فهاد الليل … شكرا بزااف بسلامة عليكم ..

– جنيد : اشريفة … كيفاش بسلامة وشكرا … نازلة عليا بحال الرعدة .. مخلياني كنرولي فشوارع وزناقي … باش تݣولي ليا شكرا واش متأكدة بلي بعقلك !!

– شامة : شنو بغيتي نݣوليك نخلصك مثلا … ياك نزلت فحالي انت لي تبعتيني وركبتيني … كنت قادة بصوالحي .. وزايدون ماشي شغلك مامضطراش نعاود ليك شنو كاين درتي خير ايوا الله يرحم بيها الوالدين ݣلنا ليك شكرا .. شوف دابا غير مرتك راه باغية ترض كيبان ليا مامالفاش بجرا(ضحكات ومشات كتجري) .. جا يتبعها وهي تبدا سعيدة كترض ..

– جنيد(تعصب) : مريضة ..

_____

– وقفات عليها طوموبيلت مصطفى … حلات الباب وطلعات .. حطات راسها على الكوسان مغمضة عينيها كترتاح ..

أحلام : شنو وقع ؟ فين كنتي ماقدرتش نمشي لدار بقيت انا ومصطفى كنتسناو فيك تسوني ليا..

– شامة : مصطفى شكرا اخويا لهلا يخطيك سمحلينا عدبناك معانا هاد الليلة ..

– مصطفى : هانية اختي مكاين لا عذاب لا والو ..

– شامة : حتى لدار ونعاود ليك دابا عييت … رجعات احلام شافت قدامها كتسنى غير إيمتا يوصلو باش تعاود ليها شامة على لي وقع ..

____

فالبالكون ديال ڤيلا الهاشمي … ݣالس داير رجل على رجل وكيفكر فهاد الليلة … كيفكر فهاد البنت لي وقفات فطريقو هاد الليلة … فكراتو بشي حاجة كيحاول يتفكر شنو هيا حتى سونا ليه التيليفون … هز تيليفونو وفتح الخط ..

– جنيد(تبسم) : كنت عارفك غادي تسوني … الله يسلمك … (سكت وهز ساعة كتدلى من سنسلة فذهبي كتبان قديمة … ساط عليها ومسحها فسروالو حتى ولات كتلمع ورجعها لجيب ديال السروال) … وانا كنتسناك … قطع التيليفون حطو على الطبلة وضحك ..

_____

– أحلام : ناري ياصݣعة … هادشي راه غادي وكيصعاب وحق الله … أختي لاش دخلتي راسك .

– شامة : لي عطا الله عطاه دابا … وأنا مندماش على داكشي لي وقع … وكون يرجع الزمان للور نعاود نفس الشي على داك الشماتة عيفت الرجال … وقسما بالله ويكون حي ويوقف قدامي وجهو ندبو ليه …

– أحلام : كون اعلمتي البوليس بكولشي وتهنينا وحق الله .

– شامة : البوليس هوما لي مادكريش .. على أساس أيعاونوني زعما فايقين ليا من النعاس انا ولا با … يسرسبة مني المعلومات ويݣولو ليا سيري الله يعاونا ويعاونك .

– أحلام : أنا أختي ماعرفت مندير معاك وحق الله .. هذا لله .

– شامة : صافي عفاك طفي داك الضو .. انا عييت بغيت غير النعس .

– شافت احلام حتى عيات … عرفات شامة مامعاهاش هضرة .. طفات الضو ونعسات ..

_____

شرقات الشمس … الجو من صباحو باين ايدوز سخون … فطرات شامة هي وأحلام وخرجات باش تمشي لدار … فطريقها لدار كتبان ليها طوموبيلت سيف وقفات قدامها … وقفات مستغربة … نزل من طوموبيلتو وقف عليها .

– صباح الخير

– شامة : صباح النور

– سيف : فطرتي ؟

– شامة : اه فطرت علاش ياك لاباس ؟

– سيف (عطاها بظهر ) : ركبي .. ، ركب وخلاها كتشوف ضرها راسها بغات تعرف شنو بغاها ، تبعاتو ركبات .. غير سدات الباب ديمارا … وقف عند باب دارهم … نزل ونزلات … كتشوف فيه دفع الباب ودخل بحال الى الدار دارو .

– تبعاتو ودخلات كتسمع الهضرة ديال الزايد كاين فدار … دخلات لمراح كيبان ليها باها ݣالس هو او واحد السيد لابس كومپلي … كتبان عليه الهيبة … داير نظارات ديال الشوف وكبير تقادة ديال باها هكاك ولا صغر بشي عامين هكاك ..

– سلام شامة لاباس عليك؟

– شامة(مفاهمة والو) : الحمد لله بيخير

– سيف : لالا راكي بيخير … وحدة يكون وقع ليها ما وقع ليك البارح وتكون فبلاصتك … مغاتكونش بحال هكا ..

– علي (بإستفهام) : علاش شنو وقع ليها ؟

– جلال : غير شامة تبعوها شي ناس لبارح … ولكن سلكات راسها .. شفتي أشامة لي مكايبغيش يتعاون وكيدير لي فراسو شنو كيوقع ليه … شفتي كون ݣلتي لي عندك ݣاعما يتبعوك لبارح .

– شامة : كنتو تابعيني ياك؟

– سيف : ضروري … وكونما هربتي كانو رجالنا غادي يعاونوك ويهربوك ..

– شامة : انا بغيت غير نفهم … شنو بغيتو عندي ؟ ياك جيت وعتارفت ليك وماشديتينيش … دابا شنو بغيتو بلاتي وشكون انت ؟

– جلال : معاك جلال الغالي والي الأمن ..

– شامة : شوف أسيدي انا لي عندي راه ݣلتو لسي العميد راه هو لي مشدنيش ..

– جلال : شامة باك عاود لينا كولشي … مكاين لاش تخبي راه معارفاش راسك معامن طحتي ابنتي .

– شامة : داكشي لي وقع لبارح عرفتي معامن طحت .. مشيتي اعلي عاودتي ليهم كولشي خويتي ليهم المزيودة ياك اتبارك الله عليك .

– علي : لا غير بغاو يحرقو ليا داري … وتهجمو عليها وتابعين بنتي بلا حشمة بلا حيا لي كادبة عليا وكتكولي ليا كنت مع احلام ابلاتي على بوك حتى نكونو بوحدنا ..

– سيف : شامة سمعيني مزيان .. راه بحال هاد الامور خاصك ديري يدك فيدينا … متقصحيش راسك راه اتخسري انت وحنا ..

– شامة : شوف اسي الكوميسير .. انت ماعندك ماتخسر .. واش انتوما عاد اتفيقو لينا من نعاس انا ولا با … تاخدو من عندي المعلومات وداكشي لي بغيتو تعرفو … ومنك الموت لمولاك … على اساس غادي تعاونونا داك الساع … منضرقوس الشمس بالغربال ..

– جلال (بدا كيضحك .. كيضحك بجهد بشكل هيستيري … كولشي كيشوف فيه ) :

– سي علي بنتك عحباتني .

– خرجات فيه عينيها : كيفاش عجبك ؟ اويلي على عجبتك راك قد بابا … بلا حشما وفدارنا … مع سلات كلامها جاتها بانطوفا لراسها نيشان .

– علي : اللقوة العسرية يافليفلة اللقوة … واشانت مكتسكتيش مكتحتارميش … اسيدي متديش عليها راه لسانها مبري منها ..

– جلال (كيضحك) : ماشي مشكيل … شامة أنا مزوج اينتي او ولادي عزارة … شخصيتها عجباتني بزااف عرفتي باش كتفكريني … بالماو .

– شامة(كتحك راسها) : شنو هو هاد الماو تاني ؟

– جلال(تقاد فالݣلسة وبإهتمام شاف فيها) : الماو هو قط مصري … كان فالحضارة المصرية شحال هادي وكيعتباروه مقدس .. وكانو كيأمنو بلي كيبعت الروح والقوة فالعيالات داك الوقت … هاد النوع من القطط مكايخافش ماشي بحال المشاش ديالنا … لا مكايخاف من حتى واحد .. وكيدافع على بني جنسو … حتى شكل ديالو مختالف مكايشبه ليه حد … هكاك أنت .. مكتخافيش وكديري لي فراسك .. وحتى حاجة مكتخليك تراجعي وكدافعي على الناس كيف درتي مع جارتكم ومع إلهام … وسباب لي جراو عليك بيه من الخدمة .. نزيد ولا براكة ؟ ..

– شامة : دابا انت ابغيتي دوخني بهاد الماو ولا مياو .

– جلال : شامة كتيقي فباك ؟

– شامة : كتر من راسي ..

– جلال : عتابريني بحالو .. مغاديش نبغي ليكم الأدية … وفخباري قضية الصيد الغير مرخص .. (شافها تزنݣات) .. ماشي موضوعنا دابا .. تعاوني معانا نعاونك … كوني متأكدة راه مايمكنش نبغيو ليك المضرة راه بالعكس مغاديش تعاوني غير راسك وتعاونينا حنا … راه اتعاوني بلادك .. عاجبك لي كيوقع لناس .. شحال من واحد مات حيت مالقاش الدوا لراسو ولولادو … شحال من مريض مسكين كيسيفطو بحجة الدوا سلا من الستوك … فين مشا هاد الدوا مشا لناس لي مامخصوصينش نهائيا … باش يربحو على ظهور الشعب .. والقائمة طويلة لادروك لي كيقتل الالاف الناس … الحبة لي بسبابها الناس كيقتلو والديهم وعائلاتهم بغتاصبو ينهبو يخطفو يديرو لي متخايليهش على بالك … الى سكتي اينفيوك من فوق الأرض لا انت لا حبابك أيحسبوك بحال شي دبانة عسفو عليها … وضميرهم مرتاح … شنو بان ليك ؟

– شامة(كتفكر فݣاع الكلام لي كيݣول .. كيبان ليها راجل معقول مافيهش التخرشيش) :

– تواعدني تعاونا وماتخلي حد يأدينا .. ماشي انا حيت انا قادة براسي .

– جلال : عتابري راسك لا انت لا عائلتك فالحماية ديالي من هاد النهار … وغادي ندير فوق من جهدي باش منخلي حتى حاجة تاديكم ..

– شامة : ݣاع لي ݣاليكم با صحيح (كتهضر بعصبية) سمعتهم بودنيا كيفاس فرحانين وضاحكين وناشطين … وكيعاودو على الريوس الكبيرة… وكيعاودو بلي البريكة لي هزيت تقدر تدي بزاف ديال الناس ورا الشمس … وبلي فيها شيحاجة لي مايقدر حتى واحد يحلها نهائيا … انا فاش ضربتهم كنت راجعة فحالي ولكن تفكرت ديك البريكة وهزيتها … وفاش قلبتها لقيت كليوسبي ..

– سيف (بإهتمام) : متيقنة من داكشي لي سمعتي ؟ حيت انت كنتي بعيدة ؟

– شامة : نقدر نسمع اي حاجة واخا تكون بعيدة … داكشي لي خلاني نكون صيادة واعرة وبشهادة با وناصر .

– جلال : ماكدبتش منين ݣتليك كتشبهي للماو … زيدي كملي .

– شامة : الصراحة خبيت الكلي على با … خفتو يبيعها (شافت فباها كيخنزر فيها) بلاما تخنزر فيا ابا الصراحة نكولونا اتبان ليك البريكة منقوشة اتمشي تبيعها ..

– جلال : تقدري توريها ليا ؟

– شامة (وقفات ) : واخا انا جايا …

– دخلات لبيت فين كتنعس … شوية بدات كتغوت وتعيط :

– بــــــا …

____

– وقف باها وجلال وسيف .. خرجات عندو شامة مكشكشة .. عينيها خارجين :

– با فين الصندوق ديال مي الله يرحمها لي كان فوق الماريو ..

علي ( ولا يبيض بيضة هنا وبيضة فالعش) :

– أشمن صندوق؟

– شامة ( كتحاول تكالمي راسها) : با الصندوق ديال مي .. لي كان فوق الماريو الصندوق ديال العرعار المنقوش … كان مغطي بلحاف بيض … علي علي جيني نيشان فين هو الصندوق راه انتشلل ..

– علي ( كيتبلحس) : دابا هو لبارح فاش هجمو علينا قبل مايهجمو .. داز عندي سي أحمد إيوا ݣاليا بلي اليوم انربحو مافيهاش … وكان خاصني نبيعو وكان دايز واحد السيد كيبيع لافيراي .. وانا نبيعو ليه ..

– شامة (بدات تجدب وضرب فخاضها وتغوت) :

– وصندوق ماما هداك .. خلاتو ليا نشم فيه ريحتها حرام عليك اش درت ليك بيع اي حاجة حتى ليه (كتغوت وضرب فخاضها شدها سيف كيحاول يهدأها ) ..

– سيف (بصرامة) : شامة شامة صافي شامة

– شامة : اشمن صافي أشمن صافي هاد القمر خرج علينا خرج علينا اعباد الله .. وراه الكلي كاينة فوسط الصندوق بنيت عليها بسيما .

– سيف(بصدمة) : كيفاش؟

– شامة : كيف كتسمع … الكلي وسط من الصندوق بنيت عليها بسيما وصبغتها حتى ولات كتبان بحالها بحال الصندوق … باش حتى لي فتحها يحسابلو الصندوق خاوي مافيه والو .

– جلال (ݣلس وشد راسو ماعرف مايدير) ..

– علي : انا ..(قاطعاتو) :

– مانسمحش ليك ابا … لهاد درجة وصلك التيرسي تبيع الحاجة زوينة لي كتفكرني بماما … الحمد لله لي الكادر ديال تصويرتها مخبياه ..كون بعتيه حتى هو (شافت فجلال) ..

– دابا الكلي مشات مابقى عندي والو .. مزال اتحمينا ولالا حيت كايبان ليا تصدمتي .. اه ولا دابا مابقى عندكم بينا غراض ياك ..

– جلال (شاف فيها ) : الكلي أنقلبو عليها .. وهضرتي مكنرجعش فيها … كيما انا غادي نحميك لا انت لا عائلتك حتى انت اتعاونينا ..

– شامة( بلاما تفكر بإنفعال) : انا قابلة ولكن بشرط .

– جلال(شاف فسيف) : شنو هو؟

– شامة (شافت فباها) : تخلي با يقطع التيرسي وعمرو مايدور بيه … واخا تهددو بالحبس واخا تنزلو لبنيقة ينعس فيها واحد الليلة .. غير هو عمرو مزال يدور بالقمر ..

– علي : ياك ابنت الهم !؟

– شامة : يا انا يا داك القمر ابا .. يا بيا يا بيك حتى نشوفو انا وياك فين غادي نوصلو ..

– جلال : جاتك .. مغاديش تسولي فاش غادي تعاونينا ؟

– شامة : مكايهمنيش .. انا فينما بغا شي حد نعاونو نعاون مكايهمنيش نعرف فاش .. وأصلا مابقاش كيهمني ..

– جلال : اول حاجة خاصنا نلقاو الصندوق .. وتاني حاجة مخاصكمش تبقاو هنا؟

– شامة : فين غادي نمشيو ؟ انا منخليش دارنا ولي مزغرتة عليه امو يقيسني

– علي : بغيتيهم يصفيوها لينا انا بعدا مع سي جلال (شافت فيه شامة محاوباتوش مغزفة عليه حيت ضيعها فأحسن حاجة بقات من ماماها) .

– سيف : يقدرو يبقاو عندي؟

– جلال (كيفكر) : لا مايصلاحش يبقاو عندك … انا عارف فين غادي يكونو(وقف) غدا فصباح نلقاكم واجدين جمعو الحوايج لي غادي تحتاجو .

– شامة : فين اتدينا ؟

– جلال (جبد الساعة ديالو مسحها على خاطرو ورجعها فجيب ، هز عينو لقاها كتشوف فيها بإستغراب) :

– حتى لغدا وتعرفي … تما غادي خارج زهي توقفو بهضرتها .

– علاش باغيني نعاونكم ؟ فاش غادي نفيدكم انا ؟ عاهدي بالواحد كيعاون البوليس الى شاف شي مجرم .. ولا الى سمع سميت شي مجرم …ولا سمع بزااف ديال المعلومات لي مكايعرفهم غير هو .. وانا سمعت غير شوية ولي كاين ݣلتو ليكم … وحتى الكلي مابقاتش عندي مافهمتش هاد البلان ..

– جلال(تبسم) :

– ماتحݣريش راسك … شفتي كاع هادشي لي دكرتي تما فين كاين البلان .. من بعد وتفهمي .. نتلاقاو غدا … خرج هو وسيف وخلاها حايرة فهاد الراحل الغريب … كايهضر بالألغاز لي كتحاول ما امكن تحللهم فدماغها وتفهمهم …

______

– ديك العشية ماخرجاتش ݣاع … كتجمع فحوايج فساك وصورة ديال ماماها دارتها فساكها بين الحوايج باش ماتهرس ليها … حمعو احوايجهم ولي ايحتاجوه … ماكتهضرش مع باها منين مشى جلال وسيف … بقى فيها الحال بزااف حيت باها باع ليها الصندوق لي دفع دم جوفها وترجعو … سمعات الدقان فالباب .. خلات داكشي لي فيديها ومشات تحل .

– شامة(مصدومة) : إيمان !

– (عينيها مغرغرين بدموع) : واخا ندخل … خوات ليها شامة الطريق ودخلات هازة واحد الساك فيديها … كانت بنت قصيرة وملامحها زوينين شعرها فشكلاطي بوكلي .. خرج علي من بيتو يشوف شكون :

– إيمان … مالك ابنتي باك لاباس ؟

– إيمان (ݣلسات) : مالقيت فين نمشي من غيركم … واش واخا نبقى معاكم … غير بينما لقيت سي خدمة وغادي نخرج نخدم .

– شامة (ݣلسات حداها) : شنو واقع بعدا ؟ وكيفاش خالتي خلاتك بعدا تجي عندنا … ياك مانعاك وقاطعة عليك الرجل …حتى يوسف مابقينا كنشوفوه ؟

– إيمان (كتمسح دموعها) : يوسف وا حرݣ لسبانيا .

– شامة (مصدومة) : اويلي على حرݣ ! فين وعلاش وݣاعما ݣالها لينا !

– علي (كينݣر) : يديرها هداك السفريط … كنت عارفو شي نهار يديرها ..

– إيمان : دابا هو كان كايعرف واحد البنت … وكان كايبغيها عندها 18 سنة … وسيدة كانت كتوهمو بلي كتبغيه وكتموت عليه … وجا شي واحد من عائلتها لاباس عليه عندو شي 40 عام … البنت مشات سمحات فقرايتها وسمحات فيوسف وتزوجات بلاخور … ويوسف مسكين كان جامع شي فلوس … بالفقصة مشا .

– شامة(تعصبات) : انا بغيت نفهم هاد البرهوشات … هاد هاد الحمارات لي كيسمحو فقرايتهم علاياش … باش تاخود واحد لاباس عليه … اليوم ولا غدا يجيه السيزي يخرج والديها لزنقة ولا ضرب الجفاف عند العيالات … فبلاصة ماتكمل قرايتها و وتخلي هدفها فهاد الدنيا هو راسها اولا عاد الراجل … ويوسف لي غادي يتجارا غير حيت خلاتو اويلي … كون سقت ليه الخبار قبل والله لا خليتو ..

– علي(شاف فإيمان) : وأنت مالكي ياكما بغاو يزوجوك حتى انت ؟

إيمان (سهات وضحكات بإستهزاء … سالت دمعة سخونة من عينها) : أنا أعمي حريرتي حريرة … مي ياحسرة لي تيق بيا وتوقف معايا .. والبو لي ينصفني ويجي فصفي ويدافع عليا ويحميني بسنانو … هلكوني عصى …

– شامة (قلبها كيضرب) : ودوي خلاص وانت تلوكي فالهضرة هضري ..

– إيمان : عرفتو عمي نجيب … خدم فواحد البزار حدانا … ومع قريب ݣاليه بابا بقا دوز تغدا معانا وتبات بلاما ترجع لدارك … وداكشي لي ولا كيدير .. فاش كنكون ݣالسة كيشوف فيا شوفات فشكل … وفاش كندهل لبيتي كيدخل عليا بلاما يدق … وانا قلبي كان حاس بشيحاجة ماهياش … داك نهار ماما مشات للحمام وخلاتني نصبت الغدا .. وبابا كان فالݣرو وجا هو دخل … حطيت ليه الغدا ودخلت لبيتي قلت نعس شوية …. يلاه غمضت عيني كانحس بشي واحد كيتملس فيا … تخايلي معايا عمي عمي اعباد الله شاد فيا باغي يغتاصبني … دابزت معاه وهزيت الجنوي جرحتو ليدو … وهرب مشا ومنين جات ماما وبابا وݣلتها ليهم ماتيقونيش … وبلا حشمة رجع فالعشية لدار وفاش واجهتو قدامهم وقلت ليهم غادي نديكلاري بيه … حك عليا باطل بلي كنت بغيت نسرق ليهم الفلوس من جيب تجاكيط وبلي انا مصاحبة مع شي واحد … وكنعطيه الفلوس … وفاش بغيت نخرج نديكلاري شدوني ب 3 بيهم هلكوني عصى (عرات ليهم على يديها كلهم زرقين ) …

– شامة وقفات غادية جايا … تعصبات تعماو ليها العينين ..

– أقسم لك يمينا وديني ويماني وما أعبد لا بقات فيهم قسما برب الكعبة … الما جرجرت بوهم فالحباسات منتسماش شامة … وأنت هنا أتبقاي معندك فين تمشي وماعندك فين غادي تكري .. واخا نعرف يبقى فيا عرق واحد لا خليتك فزنقة بالله ..

_____

على بعد كيلوميترات قليلة من مطار محمد الخامس وقفات طوموبيلتو … بلاصاها ونزل تكا عليها داير رجل على رجل … هاز حاجب ومهبط الثاني مكاملاش دقيقة على الوصول ديالو حتى وقفات قدامو طوموبيل كحلة … تحل الباب ونزل إبتسامة على وجهو كيشوف فيه وكيضحك .

– جنيد (حل يديه ومشا لعندو عنقو ) : توحشناك أخالي ..

– جلال : باش تعرف خالك … واخا تغبر حتى تعيا نلقاك نلقاك (بعد عليه كيشوف فيه ) وفين انمرود ..

– جنيد : بدينا عاوتاني العود .. أش تما وكبرتي

– جلال (جرو من عنقو) : واخا كبرت نطيحك نطيحك .. مكاينش اللعب .

– جنيد ( بإستهزاء غمزو) : أش تما … شي بلان هذا لي مخلينا نتلاقاو فلبلاصة لقديمة ..

– جلال : علاش خاص ضروري يكون شي بلان باش نشوف ولد ختي ولا كيفاش ؟

– جنيد : خالي نعل شيطان … حتى منكونوش دافنينو بجوج .. ولد ختك كون بغيتي تشوفو كون جيتي لدار وبنهار … ماشي بليل وفالخلاوات الله يهديك العود حتى منكونش عارفك … أش تم ؟

– جلال : مزالين عندك ؟

– جنيد (ضحك) : مالك مسطي نسمح فيهم (جبد الساعة ونظارات ) …. كونما هوما ماتعرفنيش جيت ..

– جلال : ومنعرفش البلان لي درتي … مطور مع راسك شهداة وفاة حقا والواد … متي شهيد وجهك صحيح .

– جنيد (صغر عينيه ..كيشوف فيه بشك) : خالي .. ديك الخدمة نسيتها … حيدتها من حياتي سالينا … جيني من اللخر شنو تم ؟

– جلال (جبد ݣارو شعلو وتكا على طوموبيل حدا جنيد ) : الملف القديم رجع تحل ..

– جنيد : الحشيش؟

– جلال (كينتر من الݣارو ويبخ لبعيد) : هاد المرة كثااار ..

– جنيد : الدوايات ؟

– جلال(شاف فيه بإستغراب) : باش عرفتيها؟ مجاوبوش جنيد … سكت وتبسم …

– نسيت بلي راك نمرود ..

– جنيد (بجدية) : ماشي شيحاجة لي جديدة …. هادي 3 سنين دابا باش بداو فيها .

– جلال : الناس كتموت نهار على نهار … شحال من واحد مالقى حتى دوا ديال السكار … وبنادم دين مو الكلب متع مع راسو مكايهموش لي بغا يموت يموت .

– جنيد : مكملتيش ليا … منين جاتك الخبار … حيت بحال هاد الموضوع الخاتر أيكون جابو ليك شي واحد لي خاتر ..

– جلال (رما لي بقا فالݣارو عفط عليه بصباطو ) :

مكانش عندنا شي خبار على هادشي … وصلاتنا تنقنيقة على شي بزنازة .. واحد فيهم شحال وحنا كنقلبو عليه … راس الحربة .

– جنيد (ضحك) : داك الشيطان .

– جلال : هو هذاك .. ولكن لي وقع طاح علينا من السما ( عاود ليه ݣاع لي وقع ) ..

– جنيد : خالي جيتي نيشان .

– جلال ( تقابل معاه ) : تعاوني .

– جنيد ( ضحك) : ودابا عجبتيني .. فاش ؟

– جلال : خاصنا نلقاو لكلي … وأنت بوحدك لي تقدر تحلها ..

____

– جنيد (كيهضر ببرود) : علاش أنا زعمة … عطا الله لي يعاونك مغاديش توحل ..

– جلال : مكاينش بحالك … مكانتيقش فشي واحد من غير ولد ختي وتربيت يدي .. وأهم حاجة تعلمتي على يدي ولا نسيتي العود ؟

– جنيد(هاز حاجب ومهبط الثاني … ضار عندو) :

ها أنت لي علمتيني … علاش متحلهاش انت نيت ومتݣولش ليا كبرت مابقيتش وداك زعت … الكراكاس كيكبر ولكن العقل مكايكبرش العود ..

– جلال : انا علمتك وخليتك مهندس معلوميات … ولكن لي خلاك أحسن هاكر هو انت … الى نسيتي انا نفكرك شنو بان ليك ؟

– جنيد (غوبش) : خالي واقيلة نسينا هادشي ودفناه ولالا … ولي خلاني نخلي الماضي وندفنو هو هاد البلان .

– جلال : ماݣلتش ليك رجع تفكرو … ݣلت ليك تعاون معايا حاجة بسيطة … جنيد راه ضروري خاصنا نعرفو شكون ورا هاد البلان … مكنتيق فحتى واحد من غيرك أنت وسيف … راك عارف بلي هاد القماقم اي بلاصة حاشيين واحد منهم … هاد الخبار مابغيت حتى واحد يسيق ليها الخبار ..

جنيد (ربع يديه ماعجبوش الحال) : واش أنا راجع نرتاح مع قبي … يطلع ليا هاد البلان لمق…د ، خالي من لخر هدا مابلان ما حتى قل..ة من لخر .

– جلال (خبطو لظهرو) : خالك هذا الحمار … جمع وطوي ..

– جنيد (شاف فيه) : نحشم منك … نسيتي يامك اخالي انا وياك دافنينو بجوج العود .

– جلال : نهضرو فالمفيد عندي ليك جوج بلانات ؟

– جنيد (تعصب ولكن خالو مايقدرش يرفض ليه طلب كيعتابرو كثر من باه … خصوصا فترة طفولتو والمراهقة ديالو دوزها معاه هو يعني هو لي مربيه كتر مارباوه والديه .. ومرتابط بيه بزاف عليهم هوما ) :

– عرفتي شنو كان خاصني ندير … كان خاصني نقا…د بحالي ونغبر كمارتي من على هاد الكرة الأرضية ݣاع … منتهناش انا مع ك…..ي والو .

– شنو البلان سرسب ليا أخالي كولشي من للخر ..

– جلال : البنت لي عاودت ليك عليها … دابا تحت حمايتي وخاصني نعاونها … ولاو تابعينها ويقدرو يهجمو عليها فأي وقت …. بغيتك تخليها عندك .

جنيد (شاف فيها بصدمة) : كتريݣل عليا العود …. مني نيتك كتهضر ولا كتمرݣل من للخر .. كيفاش نخليها عندي وانا مالي أصلا … شوف شوف بغيتي انعاونك انت على راسي … باش تلصق فيا مونتيف كحل انسى .

– جلال : شوف لحمار ديال بوك … قسما بالله ومدير داكشي لي كنݣوليك لا عمرك تشوف كمارتي مزال ..

– جنيد : قديمة هاديك أخالي وا قديييييييييمة مابقاتش كتاكول معايا شيشي ، فين اندي انا هاد البنت هيا وطاسيلتها لعند جدي مثلا ؟

– جلال(ببرود ) : لا لڤيلا .

– جنيد : من نيتك ؟ واش انت باغي تحمقني ولا كيفاش البلان ؟

– جلال : هاديك هي البلاصة لي مايقدروش يوصلو ليها ؟ ومغاتجيهمش على بالهم اصلا يكونو فيها … غير شي يامات بينما لقيت ليهم شي بلان ..

– جنيد : اياه وشنو انݣول لختك ولنسيبك ؟

– جلال : خليهم عليا هادوك … انكون معاك متخممش

– جنيد( صافي وصلات ليه لافان) :

– كنسمعك بقا ليك بلان خور كمل ..

– الكلي كاين فوسط الصندوق كيف ݣلت ليك … وبات البنت باعو لمالين لافيراي … بغيتك تقلب عليه أنت وهي .

– جنيد بقات ليه شوية وغادي ينفاجر … بعد عليه داير يدو على جنبو وكيدوز يدو لوخرا فشعرو … كيوافق على حوايج ضد إرادتو وماباغيهمش اصلا بنسبة ليه صافي دفن الماضي ورماه ورا ضهرو … علاش الماضي مزال تابعو مابغاش يخليه … حتى كيݣول أيبدا حياة جديد كالم مرتاح فيها …. مافيهاش صداع الراس حتى طلع ليه هاد البلان ..

– جنيد : لاش اتخشي معايا هي قمقومها … ولاش خاشيها معايا أصلا نقلب عليه لك….ي

– جلال : باش اتعرف انت الصندوق كيداير إلى مكانت هي معاك ..

– جنيد : رسموه

– جلال : براكة من تخربيق نبقاو نضيعو الوقت حنا فرسيم … اتكون معاك حيت هي لي عارفاه كيف داير … والبنت واعرة أتنفعك بالبيان ..

– جنيد سكت ماجاوبوش … ضار جيهت طوموبيلتو جا يركب وقفو :

– فين غادي ؟

– جنيد : نق…د بحالي ݣلتي لي عندك سمعناك … ركب ديمارا وكسيرا مخلي جلال كيشوف فيه مبسم …

_____

– خرجات شامة من الدار دايرة يديها فجيابها … لقات العقيق لي كان على شكل سبحة فالكحل … كانت خلاتو ماماها وشحال وهي كتقلب عليه … حماقت بتقلاب ومالقاتوش ..

– شامة(فرحانة) : أنت هنا وانا كنقلب عليك .. الحمد لله لي لقيتك وماباعكش با بحال الحوايج لوخرين ..

– لواتو على يديها جوج لويات ورجعات خشات يديها فجيابها .. وبين عينيها بلاصة وحدة مغادي ترتاح ولا تهنى … حتى دير هادشي لي فراسها وتوصل ليه .

____

كان واقف خدام مقابل الكليان … النرا لي دخلات يتبعها بالعين … كيبقى حاضيها كيفاش كتمشى وكيف كدير تهضر … مكبوث بحالو بخال عدد بحالو … بلاصتو فشي كاڤ تسد عليهم وتشعل فيهم العافية … مكايفرقو لا بين الحلال ولا الحرام ولا المقربين … والو كيهمهم يلبيو الشهوة ديالهم فقط شيحاجة أخرى مكايهمهمش … وقف مع واحد الكليانة كيشوفها شنو بغات ماحس بيد حتى جراتو ..

– شامة(عينيها شاعلة فيهم العافية … السخونية كطلع من داتها … جراتو من القميجة حتى ضار عندها وشداتو من الكول .. ماهمهاش يكون يطول منها ولا صح منها .. حالفة حتى تشوهو قدام العادي والبادي وضرب بيه الطر وخبارو توصل لمراتو او ولادو ..

– نجيب(مصدوم ) أشكاين شكون أنت ؟

– شامة(مغزفة عليه) : انا قباط الرواح انا … انا لي انخلي دار عشت بوك الكلب يالمكبوت … ماحشمتيش الحمار أعيفت الرجال تعدا على بنت خوك الكلب(كتغوت وتسمع لناس … وقف الباطرون خرج وجا عندهم) ..

– الالة اش واقع .. راه محال محترم هذا .

– شامة : الى كان محترم … هاد ولد الكلبة لي كتشوف قدامك ايوسخو ليك … عرفتو شنو دار هاد الكلب وبزاف عليه يكون كلب وبزاف عليه يكون حيوان .. موسخ ديال الخلا بلا حشمة حاول يتهجم على بنت خوه … حاول يغتاصبها وحط عليها الباطل .. كولشي تجمع عليهم شي كيدفل عليه شي كيستغرب كل واحد وشنو كيݣول ..

– نجيب ( كيترعد) : أسيدي راه كذابة .. باغية تحط عليا الباطل اصلا مكنعرفهاش انا ..

– شامة : انا بنت فوزية .. فوزية خت مرات خوك الشماتة الرعواني … قسما برب الكعبة الما خليتك تعفن فالحباسات … وكاع لي فالحبس يدوزو فيك واحد بواحد ..منتسماش انا شامة عقل على هاد السمية مزيان لا يحسابليك انا إيمان … والله ياجد بوك الكلب الما خليتك تمنى الموت ومتلݣهاش منتسماش … دفعاتو حتى جا على واحد الكرسي وطاح وخرجات ..

– الباطرون (معصب) : منبقاش نشوف كمارتك كدور هنا ، ولا غادي نجيب لي يربيك ..

– نجيب وقف كيسوس حالتو ، حدر راسو وخرج ..

_____

– شادة حناكها كتخمم وساكتة حتى نباها .

– فين غادي تكون مشات زعمة ؟

– الله اعلم كتسولني انا … بحال الى انا عارفة تمشي فينما بغات … وصلات بيها تنزل ااباطل على عمها وتسرقو . (قاطعهم صوت الباب كيتدق بغا يتهرس).

– أبشوية هرسوه … مشات لباب حلاتو وهي دفعها .

– (بإستغراب) : شامة أش جابك ياك لاباس؟ ومالنا على هاد الدقان ..؟

– شامة (ماعطلاتهاش) : ياكما يحسابليك جايا موحشة فيك ولا جايا على زينك وكخل عينك لا انت لا رعواني ديال راجلك ..

– (بغات تهز عليها يدها) : أيوا جمعي فمك الى داك القنار ديال باك .. ماعرف يربيك انا نربيك(شدات ليها شامة فيدها زيرات عليها حتى كانت اتلويها ليها ..

– شامة : وسيري ربي غير راسك … وربي راجلك وربي لوسك واجي نتفاهمو .. با واخا قمار بكرامتو ورباني أحسن من وحدة بحالك .. ياكما يحسابليك راسك هادي إيمان لي دݣيتوها عصا … راه ندوز فيكم بجوج ومنعقلش عليكم ..

– (راجل خالتها) : جات عندك ديك الكلبة شكات عليك .. بنتي وانا حرة فيها ونقتلها ݣاع أش مشا ليك ؟

____

– شامة (كشكشات) : أشريف .. بنتك دارت 22 عام مابقاش عندك حق عليها .. عندها لاكارط قادة براسها .. دوي جيتي على خوك وماتقتيش ببنتك .. فين عمر إيمان جابت ليكم العار .. وانتوما تربيتكم ماتيقينش فيها باش تعرفو راسكم زيرو .. بنتكم لي ربيتوها 22 عام كدبتوها وتيقتو واحد خور مكتسمعوش على زنا المحارم … على الاب لي كيغتاصب بنتو والخال والعم والجد والخو والجار وزيد وزيد ولا انتوما مكاينينش فهاد العالم … مكرفصين على بنتكم فبلاصة متكرفصو على الشامة … قسما بالله لا دوزتها ليكم وبربي وراس ميمتي لي مدفونة تحت التراب … الى ما ربيتكم بتلاتة وخليتكم تعفنو فالحبس اجيو حتى لفوق راسي وخراو واحد بواحد … قسما بالله حتى نخرجكم من عين البرة وإيمان أضربو عليها شفتو دابا اتبراو منها … واخا يبقى فيا عرق واحد لا خليتها ترجع لهاد الدار ولوالدين بحالكم حاشا أصلا تكونو والدين (شافت فخالتها) وانت اللفعة زلمومية .. تفكري تهزي عليا يديك … قسما بالله حتى نقطعهم ليك فادك فادك نجردهم ليك(ضربات فيهم وخرجات .. خلاتهم غير كيشوفو فبعضياتهم … كيشوفو هنا ولهيه ) ..

____

خرجات شامة مكتقشعس قدامها .. شيرات لطاكسي ركبات ..

– الكويسارية الكبيرة عفاك .. شد بيها الطريق .. كتحس براسها كلها كتغلي .. وصلها نزلات وخلاصتو طلعات مع دروج وقفها البوليسي :

– شامة : بغيت نشوف الكوميسير سيف الدين .

– خلاها الدخل طلعات مع الدروج .. وقفها بوليسي عند الباب .. كالت ليه نفس الشي خلاها ودخل علمو .. رجع عندها البوليسي وأدن ليها باش دخل ..

– مع دخلات هز فيها سيف راسو (مستغرب) شامة شنو وقع ياك لاباس؟

– شامة(ماتسناتوش يكوليها ݣلسي ݣلسات) :

– ياك انتوما ݣلتو بغيتو تعاونوني؟

– سيف : اياه ݣولي شنو كاين دوي كنسمعك!؟

– شامة (عاودات ليه ݣاع لي وقع) ..

– سيف (غوبش) : شامة المشكل مكاينش حالة إغتصاب .. وزيد عليها خاصنا دليل ملموس بين يدينا ..

– شامة : كاين أتار الضرب على داتها كلها .. وبلاصة يديه فاش قجها وقميش ديال ظفارو على عنقها ..

– سيف (حرك راسو) : داكوغ(هز التيليفون وسونا لسمير .. وي سمير شوف اتاخود الدراري وغادي تمشيو (سول شامة) لادريس ؟

– عطاتو شامة لادريس ملاها على سمير ، سمير جيب المرأة وراجلها بجوج … وݣول لدراري يجيبو نحيب من دارو أكيد غادي يكون مشا لظارو مغاديش يرجع لدار خوه يلاه سيرو ..

– سيف(قطع تيليفون) : غادي تمشي ديك بنت خالتك … ديري ليها شهادة طبية باش ندفعوها مع الضوسي … وحتى هيا خاصها تحي باش ناخدو الأقوال ديالها .

– شامة( وقفات) : صافي واخا شكرا ، خرجات شامة ورجعات لدار كتحس بنارها بردات ، ومتزيد تبرد كتر … حتى يشدو خالتها وراجلها وشماتة لتخور … عاد غادي ترتاح .

______

إيمان شادة حنكها وكتشوف فشامة مصدومة ..

– إيمان : مابقيت فاهمة والو وحق الله ، هادشي كنشوفو غير فالأفلام ، ختي عرفتي شنو اخليني نمشي عند واحد صاحبتي نبقى عندها شي يامات بينما لقيت الخدمة ..

– شامة (كتخنزر فيها) : علاش زعمة ياك لاباس؟ مالك خايفة لا يقتلوك ؟

– إيمان : من نيتك ، اختي انتوما ايديكم السيد ونزيدكم حتى انا ، اللهم بلاش .

– شامة : تخربيق ، هاد الهضرة عاوديها لراسك ، فينما كنا اتكوني انت ،وفينما تحطات يد ايتحطو 10، سمعو الدقان ، ناضت شلمة حلات كان عماد ، خلات الباب محلول ودخلات، سد الباب ودخل عندهم .

– عماد (بإستغراب) : إيمان انت هنا !

– شامة : ݣلس ݣلس ، حتى هي حريرتها حريرة ، نوجد ليك شي كاس ديال أتاي؟

– عماد : واخا فين عمي علي؟

– شامة (أشرات ليه براسها لبيت) : من ݣبيلة وهو فالبيت ساد عليه ، داير راسو كاعي ،ماعرفت شكون خاصو يتقلق انا ولا هو ..

– عماد : صافي ميكي ، عاودات ليا احلام كولشي ، سيري وجدي لينا كاس ديال أتاي من يديك توحشناه .

– مشات شامة للكوزينة وبقى عماد مع إيمان .

– عماد : مال ختيتو الصغيرة ؟ شنو وقع ليك ؟

– إيمان( تبسمات ليه بضعف ) :

– بلاما تعصب حتى انت بحال شامة .

– عماد : دوي شنو كاين ؟

____

– فصباح بكري .. كولشي كانو واجدين كايتسناو غير جلال يجي لعندهم ..

– شامة : قبل مايوصل السيد ، انا وإيمان غادي نخرجو شوية على قبل داكشي ديال البارح .. شافت فباها مجاوبهاش مݣلب عليها وجهو ..

– شامة : با هاحنا مشينا ،، بقى مݣلب عليا وجهك راه انت لي داير الفالطة ماشي أنا ، إيمان يلاه اختي .

– خرجات شامة هي وإيمان على قبل شهادة طبية ، وباش من وراها يدوزو لكوميسارية .

____

#الڤيلا

– #على_طبلة_الفطور

– دخلات الخدامة ومعاها جلال ..

– زينب : جلال (وقفات عنقاتو) توحشناك اخويا ..

– جلال : ايوا هاني جيت حتى لعندكم ..سلم عليهم وعلى ولاد ختو .. جنيد غير كيشوف فيه وساكت .

– توفيق : دوز تفطر

جلال : لا مكاين لاش ، مزال تابعني مايدار جيت غير نهضر معاكم ..

– سامية (وقفات) : انا أخالو اتسمح ليا عندي مايدار ..

– سعيدة : وحتى أنا ، جنيد من بعد ونهضرو انا وياك اخويا .

– جلال : صبرو شوية خاصكم تكونو مجموعين ..

– بهاء : خالو ياكما كتودع (كيضحك)

– زينب(خنزرات فيه) : برات الباس عليه

– جلال : غير خليه والفنا الحموضة ديالو ، فين زياد ؟

– جواد : كاين فرباط

– صوفيا : انا مافيا لي يسمع ، عندي رونديڤو مع طبيب ديالي .

– جلال(ببرود) : انت اصلا مامحسوباش، كيف بقيتي كيف مشيتي، صوفيا مارضاتش ضربات بالسربيتا لي فيدها وناضت ..

– جواد مغاديش توصلني؟

– جواد(ببرودة) : عندك طوموبيلتك، زراه سمعتي خالي بغاني ، تنرفزات وماعجبهاش الحال ، خلاتهم ومشات .

– توفيق (بإهتمام) : شنو واقع أجلال ياك لاباس؟

– جلال : منطولش عليكم وندخلو فالموضوع نيشان ..

_____

– إيمان : هادشي لي وقع ؟

– سيف : إيمان ، داركم كاينين هنا من لبارح محبوسين ومعاهم حتى عمك ، ومراتو كاينة هنا جات الصباح ، واش مستعدة تشوفيهم ؟

– إيمان(فخبارها شنو كاين) : اه مستعدة ماعندي مناش نخاف ، نݣولها ݣدامهم وݣدام ألف واحد غيرهم .

– سيف (هز التيليفون) : جيب ليا نجيب الحماس ونور الدين الحماس ، ومراتو … داز واحد شوية ديال الوقت وإيمان على نار كترعد والخلعة شداها .. تدق الباب ودخل البوليسي مدخلهم قدامو … مها غير شافتها بغات ترمى عليها تنتفها غير شامة لي وقفات ليها ..

– سيف(ضرب المكتب) : الالة ياكما يحسابليك راسك فالحمام ، راه نقدر نحبسك ماتخرجيش منها .. خليني محتارم سنك ولا غادي نسا بلي أنت مرأة .

– نور الدين : على اخر يامي توصليني لكوميسارية ..

– سيف : حمد الله وشكرو وصلاتك لهنا ، اما انتوما بلاصتكم كتݣلاصاو وضربو فيها واحد 20 عام ديال الحبس يلاه ترباو ليكم شوية .

– إيمان (كتبكي) : فضلتو تيقوه هو عليا أنا لي بنتكم ، واش عرفتو شحال بكيت وشحال عيط بسميتك ابابا باش تعتقني من يدين خوك، عرفتي شحال عيط ليك اماما باش تعتقيني منوو، كان هكا كيمس فيا وعينيه حمرين ، وكيݣوليا ندير معاك مابغيتي ونعطيك مابغيتي ، كاينة شي وحدة اتحط الباطل على عمها ، ولكن انتوما لي تشدو بيا وتكونو معايا تكرفصتو عليا ،، لي لقيت فشامة مالقيتو فيكم ، داكشي لي كان خاصكم انتوما ديروه دارتو هيا لي سينين ماشفتهاش، اما أنت أشماتة الحيوان حاشا واش تكون عم ، الله ياخود فيك الحق (كتبكي) .

– وقف سيف حط الستيلو لي فيدو ، زول دجاكيط ديال الكوير حطها على الكرسي ، طلع كمام التريكو ديالو ، وضار على المكتب وقف قدام نجيب كيشوف فيه وهو يأمر ، دخل مرات هذا ، عطاه البوليسي التحية ودخل مرتو ، رد عليهم الباب وبقاو غير هوما ، هو يدو جابها ليه فوجهو حتى رعفو ، جرو من الكول ديال تريكو دخلو فالحيط ونزل عليه بالبونية الثانية ، خلا ليه وجهو كلو غادي بدمايات ، شد ليه راسو وخشاه ليه فزاج ديال السرجم خلاه دايخ كولو دمايات .

– سيف : مغزف) هادشي غير شوية من داكشي لي كيتسناك لداخل، نزل كمام يديه وعيط على البوليسي ..

– رجع هاد الشماتة حتى يتحول على نيابة العامة .

– سيف : إيمان مزال اتشبتي بالقضية ديال الاعتداء عليك من طرف والديك؟

_____

#الڤيلا

– زينب سكتات كتشوف فتوفيق ، ماتقدرش تخسر لخوها ونفس الوقت الرأي رأي راجلها ..

– توفيق(بفضول) : شنو ݣلتي الأسم ديالها؟

– جلال : شامة شرف الدين ، سكت توفيق كيحك فوجهو وسهى .

– بنسبة ليا ماعنديش إشكال داري مفتوحة لأي واحد من طرفك اجلال ، مغاديش نسى الفضل ديالك على ولدي ، وعلى ولادي كاملين كنتي اب ليهم ، بطبيعة الحال الى معاوناك حنا عائلتك ، ومدينا يد المساعدة باش كنتعتابرو عائلة .

– سامية : خالي مخاصش ݣاع تشاور معانا ، هادي دارك حتى انت ولالا أجواد ؟

– جواد : بطبيعة الحال أخالي ، مرحبا بأي واحد من طرفك ، جنيد ماهضرش غير كيشوف وساكت .

– توفيق (بفخر) : وزايدون مزيانة لينا ،بسبابك ولدي أيبقى معانا اطول فطرة ولالا اولدي .

– جنيد : امممم ..

– زينب : خاصني نݣول لليلى توجد بيوت الضياف ، سمحوليا . ناضت زينب تعلم ليلى وراها سامية وسعيدة مشاو ..

– بهاء : بعدا دار اتولي فيها شوية ديال لومبيونص ، خنزر فيه جنيد :

– نوصيك من هنا ، اتجمع راسك العود ..

– توفيق (بصرامة) : بهاء ديك البسالة ماعندي ماندير بيها فداري ، نعلمك من هنا .

– جلال (وقف ) : أنخليكم دابا ، خاصني نشوف الناس ، توفيق شكرا مرة أخرى .

– توفيق : بالعكس هذا واجب ، خرج جلال وجنيد غير ساقل مݣال والو ..

– جواد : جنيد ياك لاباس شفتك ماشي حتى لتم ؟

– جنيد : لا مكاين والو ، خاصني نمشي لفيرما نجيب حوايجي ، مجبت معايا والو.

– بهاء : نخرجو انا وياك تقدا ليك شيحاجة .

– جنيد : الى على دوك الحوايج ديال المديعين ديالك ، ماعندي مندير بيهم بصحتك(وقف) انا مشيت . طلع جنيد لبيتو لي كان دو طابع رجولي بسيط ماشي من النوع الفاخر ، كانت كتعجبو البساطة مكايعجبوش داك البدخ ولا الفراش الراقي ، أي حاجة بسيطة كتعجبو ، هز سوارت طوموبيلتو وتيليفون نزل ديمارا طوموبيل ديالو وشد طريق للفيرما ..

_____

– إيمان : هداك السيد عمري نسمح ليه ، تكرفص عليا وكان غادي يهتك عراضي ، اما والديا كيبقاو والديا مكايناش شي بنت تحبس دارهم ، ولكن أسعادة العميد مابغيتهمش يقربو مني ، ومابغيتش نشوف وجهم حيت منساش تكرفيصة لي تكرفصو عليا ، مابقاو عندي والدين ، أصلا الخو الحنين لي كان عندي راه حتى هو خوا البلاد ،من هاد الساعة عائلتي هي هاد البنت ، شي حد اخور مابقيتش كنعرفو(هبكو دموعها سخان) ..

– سيف (شاف فيهم) : حمدو الله لي تنازلات ليكم على الدعوة ، كون كانت بيدي انا نحبسكم معاه ، اتسنيو على إلتزام عمركم توصلوها ولا تقربو ليها ، ولا هاد المرة وديني وما أعبد انا لي غادي نحبسكم بيدي ، بقاو كيشوفو فبنتهم وخرجو مع سمير باش يسنيو على الإلتزام .

– خرجات مرات نجيب وفراسها تدفع لطلاق ، عندها عائلتها فالعروبية تمشي عندهم تما وتمبر ولادها ، مايشرفهاش يتسمى عليها مزوجة بواحد كان باغي يتكرفص على بنت خوه .

– سيف : شامة تقدرو تمشيو دابا

– شامة : شكرا بزااف موسيو سيف

سيف : سيف بلا موسيو ، زعمة راه انخدمو اونسومبل .

– شامة : كيفاش زعمة ؟ يلاه ايجاوبها سونا ليه تيليفون ، طلعات ليه نمرة جلال .

– سيف : وي سيدي ، واخا واخا صافي انا دابا نكون تم واخا ، قطع التيليفون وقف لبس تجاكيط ديالو .

– سيف : سي جلال شوية وأيكون عندكم ، وخاصني نكون تم .

– شامة : انمشيو معاك؟

– سيف : إلى بغيتي ؟ شنو بان ليك ، حرك راسو بنفاد صبر خرج سبقهم وتبعوه ، خرجو على برا قبل لا يركبو معاه شافت إيمان والديها واقفين كيشوفو فيها ، حسات بغصة فحلقها دورات وحها وركبات حدا شامة وزادو للدار .

——

– وصلو لدار لقاو طوموبيلة جلال واقفة … والبرݣاݣة كيطلو من السرجم مستغربين، شكون هاد طوموبيلات لي ولاو غاديين جايين عند علي وبنتو ..

– نزلات شامة وسيف وإيمان ، شافت شامة فسراجم وحركات راسها بنفاد الصبر ، من شوفات الجيران الفضولية ، دخلو كاملين لدار كان عماد وأحلام وعلي ومعاهم جلال .

– جلال : كيبان ليا واجدين باش نمشيو ؟

– شامة : أه واجدين ، واخا ماعرفناش فين غادي تدينا ..

– عماد : ماتنسايش تعلميني ، وتݣولي ليا شنو كاين

– شامة : ضروري بلاما توصيني..

– أحلام ( جاتها البكية ) : واش دابا مابقيتش أنشوفك؟

– شامة ( بصرامة) : جمعي دموعك وبراكة من البهلان ، غادية لݣوانتنامو ، راه غير حداك نعرف راسي فين أنكون ومرحبا بيك (شافت فجلال بمعنى الى عندك إعتراض ݣولها).

– جلال : بطبيعة الحال ، غير هو ماشي دابا يقدر يتبعو شي واحد فصحابك باش يلقاوك .

– عماد : هادشي عارفينو مزيان ، والى بغينا نشوفو شامة راه ضروري مغانقادو البلان ..

– جلال : سي علي ݣاليا على قبل بنت خالتك ..( قاطعاتو)

– علاش كاين شيحاجة؟

– جلال( ضحك) : لالا مكاين والو ، نقدرو نمشيو دابا الى كنتو ساليتو؟

– شامة : واخا نقدرو نمشيو ..

______

#مصر

#الأقصر

– فڤيلا كبيرة أثاتها فاخر بشكل جميل بزاف ، مجموعين بزاف ديال الرجال ، جا الخدام حط ليهم مشروبات باردة حيت الجو كان سخون ، كان لابس لبسة بيضة وسمر ، حط ليهم الصينية ومشا ..

–

– الرجل 1 : البضاعة وصلت وكل تمام التمام وفي السليم ..

– الرجل 2 : كلمو دلوقتي حالا ، الݣدع ده انا مش مطمن لو خالص ، وبفكر أنو لازم نتخلص منو ، ومافيش حدابدا يجيب خبرو ..

– سونا الباب ، مشا الخدام حل ودخل واحد الرجل طويل سمر وقرع ، لونو مخطوف :

– في كرسة وقعت ، انتو هنا مش ݣايبين خبر أبدا ..

– الرجل 1 : في إيه يا عادل مالك ؟

– عادل : تمثال الملكة الصغير ضاع ، وقفو كاملين لونهم تخطف ..

– الرجل 2 : إزاي ، إنت بتأول إيه إزاي ضاع وفين ، ده لسه مرتضى بيقولي إنو البصاعة وصلت وكلو في السليم ، إزاي .

– عادل : كلو من وجه الإخص أحمد ، أنا مش عارف إزاي شغلتوه معاكو ، بقولي أنو في حد إتهجم عليهم ، وسرأو كل حاجة ومعاها الملكة ، إحنا رحنا فستين ألف دهية ، إنتو عارفين إيه الي هيحصل لو البيه الكبير خاد خبر ، هنحفر قبرنا بيدينا ، إحنا خلاص خلاص روحنا فيها ݣميعا …

______

– وقفات طوموبيلت سيف او جلال قدام الڤيلا ديال الهاشمي، علي نزل حال فمو عند بالو يمكن راه كيحلم ، وقف غير كيشوف ، عمرو ماوصل لبحال هاد القنت ، مالف غير بالأحياء الشعبية ، كييشوف الناس فين عايشين وهادشي كامل ومزال مدخلش لداخل ، نزلات شامة هزات راسها فالڤيلا ، كتساءل شكون ايكون ساكن هنا ، وعندمن هوما جايين ، وشكون هاد الناس ، او واش ايقبلو بيهم ولالا ، خصوصا باينة فيهم هوما من الطبقة الغنية .

– جلال ( حس بتساؤلاتها من عينيها) : غادي تكونو عند ختي ، هادي دارها ، دورات راسها للبلاكة كيبان ليها إسم الهاشمي ، كتحاول تفكر فين سمعاتو شافت فجلال :

– واش هاد الفيلا ديال الهاشمي ، لي عندهم شركة تصميم المجوهرات ولا انا غالطة ؟

– جلال : أه هي هادي ، نسيبي راجل ختي وهنا فين انامن عليكم ومايقد حد يوصل ليكم .

– شامة (كتفكر اداك نهار عماد تمنى يخدم عندهم واليوم هاهيا اتسكن عندهم ) : علاش زعمة ، لي يوصل لدارنا يقدر يوصل حتى لهنا ..

– جلال : لا هنا مايقدروش يوصلو ليه ، مجهز بأحسن أجهزة الامن ، وغادي دخلي وغادي نهضرو وتعرفي كولشي ، دابا ممكن ندخلو … إيمان كدور عينيها فجردة كيدايرة ، والݣليسة لي حدا لاپيسين ، وشكل ديال لاپيسين تعشقي أتعومي فيه .

– إيمان (مبهوضة) : واش حنا انسكنو هنا ؟ ݣاعما عندهم ليݣارد بحال هتدو خاصهم يخافو على راسهم ..

– سيف (سمعها وقاطعها) : مابقاش دامشي دابا، ولاو أجهزة حسن من ليݣارد ..

– تحل الباب وخرجات زينب ، ضارت شامة شافتها … جات عندهم ..

– زينب : سلام مرحبا بيكم ، قاتلي ليلى بلي وصلتو ، مرحبا بيكم تفضلو ..

– علي(كيفرنس) : ربي يخليك الالة ، ترحب بيك الجنة ونعايمها ..

– شامة (جراتو) : تجمع اعلي شفتك تحليتي، السيدة راه مزوجة ، ومتنساش راسك التعهد لي ستيتي عليه ، نهار تقرب لتيرسي تمشي تݣلاصى فالبنيقة بلاما نݣوليك ..

– علي(خنزر فيها) : عمري نساها ليك أسليليوة ، حتى نكونو بوحدنا ..

– زينب : دخلو بعدا ماتبقاوش على برا ، مرحبا بيكم ، سبقاتهم زينب وتبعوها من اللور ، مع حطو رجلهم لداخل كيدورو بعينيهم فالڤيلا ، كانت مصبوغة بالبيض ، كتحسي براحة كبيرة ، الفراش كان خليط بين الفراش التقليدي المغربي، وبين فراش عصري ، كل حاجة فبلاصتها وكل حاجة متناسقة مع ختها ، تخاف غير تقيسها توسخها ..

– زينب : ݣلسو مرحبا ، ليلى ليلى ، جات الخدامة :

– وي مدام زينب .

– زينب : جيبي أبنتي داكشي لي وصيتك عليه ..

– ليلى : واخا مدام ، مشات ليلى ، وزينب كتحقق فيهم وتشوف فيهم .

– زينب : ماتبقاوش واقفين ݣلسو ، ݣلس علي وحداه إيمان وشامة ..

– جلال : فين توفيق ؟ مجا فين يكملها حتى سمع صوتو ..

– هاهو توفيق ، نزل توفيق كيزرب فدروج بحال واحد ، عندو 30 سنة ماشي 60 ..

– توفيق ( وقف عندهم شاف فيهم بإبتسامة ) :

– سلامو عليكم ، مرحبا بيكم (دور وجهو عليهم حتى وقف عند وجه شامة كيشوف فيها مصغر عينيه بإهتمام) ..

_____

#الفيرما

– جنيد فبيتو كايجمع حوايجو حتى وقف عليه جدو ، شفتك غادي ياك ݣلتي المدينة مانݣلسش فيها ، أش طرا وجرا ..

– جنيد : راك عارف الواليدة … بغيت ندير ليها خاطرها ، مغانبقاش تماك بزاااف ، مزال غادي نرجع ، نزلا لاڤاليز ديالو وشاف فجدو ..

– كون غير مشيتي معايا ..

– الحاج : أنا لالا الله ينجيني ، منقدش نتفارق مع للفيرما، الجو ديال المدينة كيخنقني ، غير سير اولدي الله يربح ..

– جنيد (باس ليه راسو) : أنا مشيت ، وخلي تيليفونك معاك وانت ديما ناسيه ، باش نعيطو عليك ..

– الحاج(ضرب ليه ظهرو) : سير سير غبر ، يلاه نتهنى من كمارتك شوية ومن طواجنك الباسلين ..

– جنيد (ضحك وغمزو) : عارفك اتوحشني أشيباني ..

– الحاج : الشيباني هو باك ، نزال ندردك على بوك لا انت لا هو …

– جنيد : وهاني مشيت ، هبط جنيد دار لاڤاليز ديالو فطوموبيل ، طلع لطوموبيلتو ديمارا وقبل لا يخرج من الدار رما السلام بيديه للعساس ، كسيرا وشد الطريق ..

_____

– جلال : شامة وعلي وإيمان أيبقاو معاكم ، تحت الحماية ديالكم ، يعني امانة عندكم كيف تافقنا ..

– توفيق : دار دارهم مرحبا بيهم ، ماتحسبوش راسكم غراب ..

– زينب : شامة ، مرحبا بيك أبنتي سبحان الله ، كتشبهي ليا لواحد السيدة بزااف ..

– توفيق (كيشوف فشامة) : فعلا كتشبه لواحد السيدة كانت عزيزة وغالية علينا انا وزينب ، عقلتي ازينب ؟

– زينب : أه عقلت راه منين دخلات وانا كنقول ، لمن كتشبه وبيمن فكراتني ، قولي ابنتي ، قالي جلال بلي ماماك ميتة ياك ؟

– شامة : اه الالة ميتة منين كانت عندي 10 سنين وبابا هو لي رباني ..

– زينب : قولي ليا غير زينب ولا خالتو زينب ، حيدي ديك لالة مديريش بحال ليلى لي مابغاتش تزول كلمة مدام من فمها ..

– توفيق : سي علي كنتي عسكري علما قالي جلال؟

– علي (كيبان بإفتخار) : أه كنت عسكري ، إيه كنا صحاح او واعرين ، دابا صحيحة غير على قد الحال ..

– توفيق : لالا مزال الصحة تبارك الله ..

– علي(بإهتمام) : سي توفيق لا ديرهاش مني قلت صواب ، بغيت غير نسولك ..

– شامة(ضارت شافت فيه غمزاتو ، ومن تحت سنانها نطقات) : بااااا ..

– علي(خنزر فيها) : مالنا مانهضروش ..

– توفيق : غير خليه ابنتي ، خود راحتك اسي علي ..

– علي : ماشي انت هو ، توفيق الهاشمي كنتي كتغني شحال هادي، بالامارة عندك واحد الاغنية أسمها ماخلى هاسمرة ياك ؟

– توفيق (ضحااااك) : أيااااه اسي علي هو هذا ..

– علي(ضحك وضرب ركبتو) : أغانيك مكانوش كيخطاو الظار ، انا والمرحومة نعار تزوجنا ، كانت كتݣول ليا شحال عزيز عليا ، ومن كترت المعزة مسكينة ، كانت كتݣول ليا راه قريتي معاها ، مسكينة الله يرحمها كنت كندير راسي متيقها وكنديها على قد عقلها ..

– شامة (ضارت كتشوف فيه) : علي ماما عمرها مكانت كدابة ، متكون انت لي كنتي كتݣول ليها هادشي ..

– توفيق(بإهتمام) : شنو كان سميتها الله يرحمها ؟

– علي : فوزية شاكر ..

– توفيق (تصدم وبانت دهشة على وجهو) : فوزية شاكر ؟..

_____

– زينب (شافت فتوفيق بدهشة) : فوزية شاكر ، واش متأكد؟

– علي (كيضحك) : واش كاين شي واحد مامأكد من سميت مراتو ..

– شامة(بإستغراب) : علاش، بنتو ليا بحال الى جاتكم عجب ..

– توفيق : عندكم شي تصويرة ديالها ؟

– شامة : اه عندي … حلات الساك وجبدات تصويرة ماماها ، كانت زوينة وملامحها بريئة ، مداتها لتوفيق لي غير هزها وشافها ݣلس لأرض ، جات حداه زينب دايرة يدها على فمها ..

– زينب( غلبوها دموعها) : فوزية ماتت ..

– شامة ( ضرها راسها) : واش كتعرفو ماما؟

– توفيق ( متأثر ) : كنا كنقراو ب3 بينا ، وو

– زينب(قاطعاتو بحال الى مابغاتوش يكمل) : فوزية ماكملاتش قرايتها … كانت كتبغي باك بزااف … كانت ݣالت لينا بلي تعرفات على واحد الولد عسكري … وبلي غادي يتزوجو …مكناش فكازا داك الساع كنا فمكناس كنقراو فالباك … انا وتوفيق كملنا قرايتنا فكازا … وهيا تقطعات الأخبار ديالها من داك الساع … مابقينا عرفنا عليها والو … حتى عائلتها كانو رحلو ..

– توفيق(وقف) : بلاتي أنا جاي ، مشا طلع لفوق وخلى شي كيشوف فشي … جلال وسيف كيشوفو فبعضياتهم مستغربين من هاد الصدفة … إيمان وشامة مكانوش قل منهم مافهمو والو .. نزل توفيق فيدو صورة بواحد الإيطار مذهب عطاه لشامة، هزاتو كتبان ليها مها جامعة شعرها وضاحكة هازة ساك ودايرة بونضو فالحمر ، كتبان بريئة تكون عندها ديك 17 سنة هكاك ، وحداها توفيق باقي صغير يكون عندو 20 ..

– زينب : هادي كنا عند المدير … خليناه حتى خرج وصورتهم .. عمرها ماتنسى ليا(غلبوها دموعها) .. شامة بقات شادة فتصويرة كتشوف فيها وكتحاول ماتبكيش .. ماماها شحال زوينة وبريئة ..

– توفيق : كتشبهي ليها بزاف ، مكانتش كتخاف وغير ضاحكة وزعيمة، من هضرت جلال عليك طلعتي ليها ..

– شامة (هزات عينيها فيه) : واخا نخرج عليها ؟

– توفيق : ياه أبنتي راهي عندك حتى تخرجي عليها .

– زينب (ماقداتش تبقى واقفة وتحبس دموعها .. حدرات راسها ومشات للكوزينة طلقات لدموعها الطريق ) .. فوزية كانت صاحبتهم الروح بروح وكانت شاهدة على الحب لي بين زينب وتوفيق … كانت واحد الروح زوينة وسط منهم كولشي كان كيبغيها .. ماقدراتش تقبل بلي ديك البنت الزوينة لي كانت الحياة بنسبة ليها شي حاجة كبيرة بحال شي طير فسما .. تكون ماتت ..

– زينب (مسحات دموعها) :

– ليلى وجدي الغدا ابنتي الله يرضي عليك ، وسوني لنوال حتى هي تجي راه سالة الكونجي ديالها ومزال مانعلات الشيطان باش ترجع … وجدو الغدا على حقو وطريقو راه عندنا الضياف أبنتي ..

– ليلى : واخا كوني هانية مدام زينب ..

– زينب (خارجة) : الله يهديك هاد مدام مزال مابغيتي تحيديها من فمك ..

____

– علي : سبحان الله على صدفة ، وفاش كانت مسكينة كتهضر عليك ماكنتش كنتيق بيها ..

– توفيق : الله يرحمها ، صدفة زوينة حسبو الدار داركم ، ماتحسبوش راسكم برانيين نهائيا ، فوزية كانت ماشي غير صديقة لينا انا وزينب كانت الأخت ديالنا ، وشامة دابا بحال إلى بنتي ماشي غير بنتك حتى انت اسي علي ..

– شامة(تبسمات) : لهلا يخطيك أسيدي ..

– توفيق : واشتي هالبسالات كيفاش سيدي ، شوفي ابنتي هنا مكاين لا سيدي لا لالة ، حنا كلنا بشر لا فرق بين هدا وداك ، عمك توفيق وخالتك زينب ، وحتى انت أبنتي مرحبا بيك ..

– إيمان : شكرا أعمي ..

– زينب : طلعو نوريكم بيتكم ترتاحو شوية بعدا ..

– جلال : فين جنيد ؟

– توفيق : مشا لفيرما باش يجيب حوايجو ..

– جلال : مزيان ، خاصني نهضر معاه ونوضح معاه شي حوايج ، هو وانت اشامة ..

– شامة : واخا ..

– زينب : نوريهم بعدا البيوت ديالهم وارى ماتهضر معاهم ..

– سيف : سيدي انا خاصني نمشي ..

– زينب : ويلي بلاتي حتى تغدا معانا ..

– سيف : لا مرا اخرى ، خاصني ضروري نكون فالمديرية .

– جلال : تسنى مني إتصال بنسبة لداكشي لي هضرنا عليه ..

– سيف : داكوغ ، اشر ليهم براسو وخرج …

_____

– طلعات زينب معاهم توريهم البيوت ديالهم ،، بيت شامة كان زوين انيق ومرتب بلوينات دافية البيض ووالغوز بيبي باردين مع البيج ، اول مرة غادي يكون عندها بيتها .. واخا بيت مؤقت ولكن اول مرة غادي تحس بالأستقلالية ..

– زينب : هدا بيتك أبنتي نخليك ترتبي حوايجك ، خلاتها ومشات توري لعلي وإيمان بيتهم .. بيت إيمان كان ملاصق لبيت شامة .. وجداتو ليلى بزربة حيت مكانوش عارفين بلي إيمان غادي تكون معاهم .. أما علي كان بيتو فاخر الكولوار .

– رتبات شامة حوايجها فالماريو ديالها .. بيتها كان فيه بالكون كيكل على الجردة .. مع مكتب وكرسي على شكل مرجوحة … ديكورات فلون البيض والكحل .. هزات صورة ماماها وصورة لي عطاها توفيق .. حطاتهم فوق المكتب وݣلسات فوق النموسية كتشوف حداها وفجنابها .. كانت فقنت وصبحات فقنت ، تنهدات تنهيدة طويلة ورجعات باللور كتشوف فسقف ..

_____

دخلات طوموبيل لامبرغيني من باب الڤيلا ، بلاصات ، تحل الباب ونزل منها شاب فالعشرينات من عمرو ، شعرو كحل ورطب اللحية خفيفة وكحلة سد الباب بشوية .. ملامحو كتبان عليهم الرزانة وتبات … سونا فالباب حلات ليلى وخلاتو يدخل ..

_____

– توفيق : حتى انت كنتي عارف قضية الشهادة لمزورة ياك ؟؟

– جلال : وي كان فخباري كولشي ، هضر معايا رايمنت .

– جاهم صوت من اللور :

– خالي جلال !… صار جلال وقف وتبسم حال يديه ..

– زياااد العفريت (عنقو) ..

– زياد : إيمتا جيتي وعلاش مݣلتوهاش ليا ؟

– جلال : مزال ماشفتيش المفاجاة الكبيرة ..

– زياد (ضحك وبانو سنيناتو البيضين مستفين) : فخباري ݣالها ليا بهاء ..

– جلال : هذاك العفريت مكايسكتش ..

– زياد : ݣاليا حتى على الضياف لي أيبقاو معانا ..

– توفيق : اولدي راه صدفة وقعات ، من بعد ونݣولها ليكم فاش نتجمعو على الغدا ،، خوك تعطل من صباح فاش خرج مزال مجاش ..

– زياد (ݣلس) : حتى انا جاي على قبلو ، مزال خاصني نرجع لرباط غدا ، مزال عندي مايدار .

– تسمع صوت طوموبيل وقفات على برا .

– توفيق : هذا مايكون غير خوك ، سونا الباب جايا ليلى تحل حتى وقفها زياد .

– اسيري اليلى انا غادي نحل ، مشا حل الباب ، مع حل مع نقز على جنيد طيحو جا فوق منو .

– جنيد (كيضحك) : وتقاليتي أساط ، اش كتاكول الحجر ..

– زياد (كيضحك) : وانت شرفتي حتى مابقيتيش قاد تهز التقل ..

– جنيد (قلبو) : التقل فيه وفيه ، الى على تقل ديالك بلاش ، كان شي تقل اخور مرحبا ..

– زياد (كيضحك) : باسل ، نوض اصاحبي أتقتلني .. وقف جنيد وجرو عنقو ..

– جنيد : لالا كنشوف تقدم كبير فعائلة الهاشمي غاديين وكتزيانو ، حيد منهم غير ديك شيخة طراكس ديال مرات خوك

– زياد ( ميت بضحك) : ناري أصاحبي وتسمعك ، ايجيها نهيار عصبي ، دخلو بجوج لداخل معانقين ..

– جنيد(هز راسو فخالو) : انت هنا العود خلينا غير نتوحشوك ..

– جلال : مكانقدرش نبقى بعيد عليك ، الحب لي بيناتنا كبير ..

– زياد : وانا كنݣول طنز لي فجنيد منين جايبو ..

– جنيد (ضرب خوه لظهر) : وفين أصاحبي(غمزو) كيغادي مع العمل صاڤا مزيان ..؟

– زياد : حنا غاديين كنكبرو فإمبراطورية الهاشمي ..

– جنيد : منخافش عليك العود (شاف فخالو) الناس جاو؟

– جلال : أه الفوق ، شوية ونزلو باش نتفاهمو ..

– جنيد كتفى غير حرك راسو بالإيجاب ..

____

#مصر

#الإسكندرية

– فدار قديمة فحي شعبي ، ݣالسة مرا كبيرة فسن لابسة عباية فالقهوي ، يديها كلهم دبالج ديال الدهب من عنقها نازلة سنسلة طويلة ديال الذهب فيها عين زرقة ، يكون عندها ديك 80 سنة ، تدق الباب جوج خبطات على شكل لحن موسيقي ، تبسمات وحلات الباب ..

– كان واقف راجل سمر قرع ، لابس الكحل دخل وسد الباب وراه ..

– البضاعة وصلت المغرب عند أخت حضرتك .

– مزيان الله يرضي عليك اولدي حسن ، تسناني هنا انا جايا .. دخلات لداخل وبقات شوية عاد خرجات … هازة فيديها كارطونة او واحد جوا ..

– هاك خود .

– حسن : إيه ده يا مدام ، إنت عارفة كويس إنو كل ده عملتو عشانك ، وعشان الخير إلي عملتيه عشاني وعشان أهلي ..

– شوف اولدي هذا راه حقك ، وهادشي لي بقى ليا اللهم تاخدو انت ، أنا وانت عارفين مزيان الى طاح فيدين دوك الناس ، مغايرحموناش اولدي ، اللهم خودو انت ، انا عارفة راسي ميتة ميتة سوا اليوم ولا غدا ، لي عليا انا درتو وهذا اولدي راه حقك ، دير بيه مشروع وتزوج بنورة ، والى تزادت عندكم بنية سميوها عالية على سميتي ..

– حسن(غرغرو عينيه بدموع) : انا مش عارف أقولك إيه ، أنا انا مش عارف حاعمل إيه أقسم بالله أفديك بروحي ..

– عالية : لا اولدي أنت درتي كتر مني لي خاصو يدار، دابا خود هادشي وخود هاد الجوا راه فيه شي فلوس ، وهادشي لي فالكارطونة ، يفوت 5 شهور عاد تبيعو تافقنا ، غادي تمشي عند الجوهرجي موسيو فرانك راه وصيتو عليك ، دابا تقدر تمشي أولدي ..

– حسن باس ليها يديها وراسها ، وعنقها تعنيقة طويلة حتى ساحو دموعو ..

– حسن : ياريت لو كنت إبن ليكي والله العظيم ، مافيش أحن منك أبدا ، أشوف وشك بخير ، بتمنى انو أشوفك يوم من الايام يارب يارب ..

– عالية : تبسمات إبتسامة بريئة وحزينة ) إن شاء الله اولدي ، واخا مكنظنش ولكن يكون خير ، يلاه سير اولدي ، هز حسن الكرطونة وجوا دارو فالجيب تجاكيط وخرج وهو متحسر حيت ايخليها .. ردات الباب وراه دخلات لبيتها ، هزات صندوقة حلالتها ، خرجات منها تصويرات كتشوف فيه مبسمة ، عنقاتهم لقلبها وباستهم ، وقفات ومسات للكوزينة شعلات البوطة وبدات كتحرق فيهم وحدة وحدة …

_____

– نزلات زينب. :

– زياد جيتي ..

– جنيد (كيطنز) : لا مشى هههه معلوم جا ..

– زينب(عنقات ولدها) : باااز مكاتساليش ..

– جنيد : علاش أنا زبدة باش نسالي؟

– جلال : سكتيه دابا ، مكيسكتش ..

– توفيق : وريتي لضياف بيوتهم ؟

– زينب : اه ݣبيلة … شوية وغادي يهبطو (شافت فتوفيق) توفيق بغيتك واحد الشوية ، ناضت توفيق وتبعها لجهة لوخرا ..

– زياد(وقف) : أنطلع نبدل عليا ونرجع ..

– بقى غير جلال وجنيد الراس فراس ..

– جنيد (شاف فجلال) : فخبارك أحالي وليت كنتشائم منك ، مافهمتش علاش تابعني بحال الزلط ..

– جلال (كيضحك) : الحب أولد ختي ، انا وياك بيناتنا واحد الطاقة خطيرة تقدر دمر لي حدانا ..

– جنيد : بيناتنا خرية خطيرة ، داك طنز ديالك مابقاش كيشد فيا ادور تلعب ..

– جلال (شير عليه بمخدة) : اضسرتي العود ، تجمع لا نخلي دار عشتك، قاطعهم صوت المشية فدروج ، وقف عليهم علي .

– سمحوليا ، كنت باغي نهبط والله حتى تلفت كنت اندخل فواحد السطح (كيضحك ويشوف فجنيد ) ..

– جلال : سي علي ، هذا جنيد ولد ختي ..

– علي(مد ليه يدو) : مشرفين ..

– جنيد (حرك ليه راسو) ..

– علي (ݣلس) : الدار عندكم مفوجة ومهوية ، داخلة ليها الشمس ، واخا الكالم عندكم بخال الى ميت عندهم الميت ..

– جلال(جاتو الضحكة) :

– هاد جوايه هكا كيكونو ، مكيكونش كتر الصداع والهراج ..

– علي : وايه بصح ماشي بحال، إيوا الله يرزق غير الصحة والسلامة ..

_____

خرجات شامة من بيتها هي وإيمان ݣد ݣد ..

– إيمان(مبسمة) : عرفتي اشامة بيتي كيف داير واعر ياختي ..

– شامة : ومتولفيش ، راه غير يامات وترجعي لسداري عمك علي(كضحك)

– إيمان(جراتها) : صافي صافي ، يلاه نهبطو راه حشومة الناس ايكونو التحت وحنا هنا مجمعين ..

_____

– علي : تبارك الله أنا لي علمتها كيفاش تشد جويجة ، حتى ولات واعرة .

– توفيق : تبارك الله عليها ، حتى فوزية مكانتش كتخاف عقلتي أزينب شنو كانت كدير ؟

– زينب (ضحكات ) : عقااالت ..

– جنيد(بإستغراب) : شكون فوزية ؟ قاطعهم صوت توشويش جاي من الدروج ..

– علي : هاهيا نيت شامة ، يلاه ابنتي كنا كنهضرو عليك ..

– شامة(كطلب الله باها مايكونش زبلها) : علاياش أبا؟

– جلال : شامة ، مزيان منين جيتي باش (قاطعاتو شامة لي عينيها كانو على شخص واحد لي ݣالس تم جنيد ) ..

– أنت هذا !؟

– جنيد(وقف الدهشة وصدمة على وجهو) : أنت هادي؟!! ..

_____

ضائع أنا .. ك أحمر الشفاه في بيت أرملة .

_____

#طنجة

– قدام ڤيلا صغيرة وقف بطوموبيلتو الكاط كاط ، نزل بكل أناقة او وسامة كان لابس سروال كحل مع قميجة ملونة فاتح ليها الكول ، كتبين على صدورو العريان لي فيه العديد من الشعيرات مزين بسنسلة طويلة… هاز فيدو بواطة ديال شوكولا معاها بوكي ديال الورد فلون الأحمر .. وقف قدام الباب سونا ، شوية وحلات الخدامة الباب :

– موسيو نزار تفضل ..

– نزار (بإبتسامة ساحرة ) : مدموزيل فدوى ، كلما كنشوفوك كتبدلي ، أش هاد الجمال كلو ؟

– جاه صوت من بعيد :

– دخول وخلي عليك فدوى وبراكة من البسالة ، خلاتو فدوى وهربات لكوزينة ، دخل لصالون لقاها ݣالسة بأناقة بفراشة فزرق ، دايرة رجل على رجل كانت زوينة بشعرها لي مقطعاه على شكل ديݣراضي لون بشرتها بحال الحليب ، وجها مبشور وكيدخل الخاطر

– نزار (تحنى على رجليه وباس ليها يدها) : ورد لأجمل وريدة واجمل أم فدنيا كلها ..

– شدات عندو الورد والبواطة ديال الشكلاط ..

– أحياني عليك ، كتعرف راسك دايرة قدها قداش ، وكتحي تبحلس ..

– نزار : ماما حشومة تݣولي هكا فحقي ..

– حتى منكونش عارفاك اولدي ، راه شمس هادي ماشي شي وحدة برانية ، انا لي ربيتك وكبرتك ، دوي شهر هدا ماتزورش ماماك ..

– نزار : والله الواليدة الى غير مع الخدمة وصافي ، مع ريسطو وضغط مكنساليش ..

– شمس : باباك مقلق عليك بزاف ، كون لقيايه هنا وتشوف شنو غادي يدير ليك ..

– نزار (بإستغراب) : علاش فين مشا؟

– شمس : كون كنتي كتجي ،كون عرفتي بلي ختك جايا اليوم بليل ..

– نزار : وايلي ديما كنهضر معاها ،ماݣالت ليا والو .

– شمس : واهيا فخبارك دابا ، ودير بحساب اتبات معانا هاد الليلة ، ماشي بحال المرة لي فاتت ، ساعة ݣلستيها معانا. ݣلستي علينا عيطولي من الخدمة ، هضرت وهضرتي متعاودشاي ..

– نزار : صافي يالالة شمس مايكون غير خاطرك ..

_____

فالعروبية ، تحل باب واحد الدار سفلية ، عندها سراجم على برا مصبوغة بالبيج ، تحل الباب لي كان ديال الحديد وخرج منو كيتشبح ، لاوي على راسو واحد الفاصمة ، هز راسو كيشوف فشمس لي عمات ليه عينيه ، خرج كيجر فرجليه بواحد الصندالة ديال الصبع ، وقف قدام واحد الواد ، رمى عيتيه كتبان ليه واحد البنت سارحة البهايم زوينة ، وقف مقابل معاها وكيحقق فيها … حتى قفزو صوت وراه ..

– شنو كدير انت هنا ، ياك ݣلنا ليك ماتخرجش ..

– عمر : واش منخرجوش يضربنا البرد ولا شنو ؟

– دخل مقادين على مشاكيل مع الرايس، فاش يبغيك تخرج راه غادي تخرج ، دخل وعطي تيساع لناس ديال دوار، مقادين على مشاكيل ..

– عمر (كيضرب بزنطرات) : صافي هاحنا داخلين ، خنقونا وتهناو ييخ …

_____

– #الڤيلا

– جنيد (واقف كيشوف فيها وعلى وجهو نظرة إستهزاء) : أممم وانا كنݣول ، دابا عاد فهمت ..

– توفيق : واش كتعرفو بعضياتكم ..

– شامة(كضحك طانزة كتر منو) : أه اعمي فايت شفتو فشي قنت ..

– جنيد(هز حجبانو) : فايت شفتيني اممم، على حسب معاقل انت لي نقزتي لطوموبيلتي يمكن ؟؟

– شامة : أه انا نقزت ولكن انت لي تبعتيني وعاونتيني، أه فكرتيني كيف بقات مراتك شوية ، دازتها صدمة حيت داك نهار مسكينة وجها كان صفر ومخطوف ..

– زينب(مافهمات والو) : كيفاش؟ أشمن مرأة ؟

– جنيد (وعينيه على شامة) : مديريش فبالك الواليدة غير الاخت تخالطو عليها العرارم ..

– جلال : الى ساليتو تعارف نقدرونهضرو على برا شوية ..

– جنيد (طااانز) : الله اودي بكل سرور، تفضلي أمدموزيل .

– شامة (تحنات ليه بشكل مسرحي) : منتفضلوش قدامك . دار جنيد يديه فجيابو وسبقهم لبرا

– شامة جرات جلال بحال الى صاحبها :

-لاش باغي تهضر معانا انا وياه ، أجي والكوميسير سيف لي كيݣوليا انخدمو اونصومبل كيفاش انخدمو، اش هاد البلان ، اجي ياكما ناوي دخلني نخدم معاكم ، انا كون بغيت نخدم فالبوليس كوراه دفعت من زمان ..

– جلال (كيشوف فيديها) : لي شاف هاد الشدة ديالك مايݣولش مكتحمليش البوليس(طلقات منو) هاد زربة ديالك هي سباب المشاكل بشوية وغادي تعرفي كولشي ..

– تبعاتو لبرا خلات العينين متبعاهم ..

_____

– تجمعو حدا لاپيسين ، جنيد واقف وجلال ݣلس ..

– جلال (كيشوف فيهم واقفين بحال الى عندهم السربيس) ݣلسو

– جنيد وشامة (دقة وحدة) : بلاش ..

– شافو فبعضياتهم ورجعو شافو فجلال ..

– جنيد : دابا واش جايبنا هنا تشوف فينا ، أتينا ..

– جلال : بلاما ندخلو فتفاصيل ، جنيد عارف شنو كاين غراضي فيك انت أشامة ، باش نتفاهمو ..

– شامة (مربعة يديها وكتشوف فيه) : حتى لدابا مزال ماݣلتي حتى جملة مفيدة ..

– جنيد (دور وجهو جاتو الضحكة) ..

– جلال : قضية الصندوق ، انت وجنيد اتقلبو عليه ..

– شامة(بدون تفكير) : وعلاش لي مانقلبش عليه بوحدي ، مالي صغيرة مكنعرفش الطريق ..

– جلال : شامة ، جنيد هو لي غادي يتكلف يحل الشيفرات لي فالكلي ، داكشي باش انت وياه اتكلفو بتقلاب ، سيف غادي يعاونكم بالمعلومات وغادي يكون معاكم فأي حاجة ، وانا بطبيعة الحال غادي نكون معاكم ، خاصكم تعاونو بيناتكم، انت وعائلتك اتكونو بأمان هنا ، خصوصا جنيد كاين هنا ..

– جنيد(ضور وجهو شاف فيه) : علاش انا بيبي سيتر؟

– شامة : حتى واحد مݣاليه يقابلنا ، حنا قادين براسنا الحمد لله ، وانا قادة بعائلتي ..

– جلال : أنا ݣلت لي عندي ، واي حاجة مديروها حتى تشاورو معايا (مشا وخلاهم) .

– شافتو شامة مشا يلاه اتبعو حتى وقفها صوتو :

– دابا عاد عرفت لمن كتشبهي ..

– شامة (وقفات وضارت عندو) : كيفاش؟

– جنيد (ضار شافيها) : الـــمــاو ..

______

– شامة : كيفاش الماو ، واش انت نا خاسرين عندكم الڤيزيبلات ديال البصلة السيسائية ديال راسكم ولا كيفاش ؟

– جنيد (مقابلها ، تخطاها وتم غادي ) :

– بحالك بحالهم ..

– شامة : وانت داير بحال شي نمرود ، وقف وضار كيشوف فيها مخنزر ، تخطاتو مخلياه وراها ودخلات ..

_____

مجموعين الداخل، رجعات شامة لبلاصتها تبعها جنيد وݣلس مقابل معاها ،داير رجل على رجل وكيشوف فيها بنص عين .

– تم هابط زياد من الفوق حتى وقف عليهم .

– زياد : السلام .

– علي : السلام أولدي ..

– إيمان هزات راسها فيه وهبطاتو حشمانة ، كتحس براسها مامرتاحاش كولشي محموع عليها الحشمة الخلعة ، تكول غير جايين يخطبو فيها ..

توفيق : ولدي هادي شامة وسي علي الأب ديالها او إيمان ياك ؟

– إيمان(بإبتسامة بريئة) : اه اعمي ..

– توفيق : هذا ولدي الصغير زياد ..

– شامة : مشرفين

– زياد : مرحبا بيكم ، ݣلس حتى هو ، تحل الباب ودخلات سعيدة وسامية دقة وحدة ، مع دخلو لداخل وقفو كيشوفو ..

– سعيدة(كتشوف فشامة) ..

– توفيق : هادو بناتي سامية وسعيدة ..

– شامة(هزات حجبانها بإستغراب) : هادي بنتك؟

– جنيد : أه بنتو

– شامة : وعلاش ماݣلتيهاش؟

– جنيد : علاش كان خاصني نݣولها ؟

– سعيدة (بإستفهام) : انت هي لبنت لي كانت داك نهار فطوموبيل؟

– شامة : اه هي أنا ، ماقتش نخلعك داك نهار ..

– سعيدة : لا ماشي مشكيل ، مرحبا بيكم عندنا .

– علي (كيضحك) : الله يرضي عليك أبنتي ،(بدا تيليفون شامة كيسوني , جبدات التيليفون طلعات ليها نمرة عماد :

– وي عماد بلاتي صبر بقا معايا ، خلاتهم وبعدات شوية متبعها جنيد بالعين ..

– سامية : مرحبا بيكم سمحوليا ، طلعات تبدل عليها وتبعاتها سعيدة .

– شامة : صافي كون هاني ، دابا أنت راه فخبارك كولشي ، غير دابا راه منقدروش نتشاوفو حتى ترصى الامور واحد الشوية …. صافي أحلام أخليها حتى نݣولها ليها أنا ، تحل الباب الكبير ودخل جواد معاه صوفيا ، باين على وجها ماعجبهاش الحال ، ضارت شافت فشامة بإستغراب وشافت فجواد ..

– شامة : شنو غادي نكوليك ، هاد الفيلا دايرة بحال شي موسم ههههه، وحق الله اكترت الولاد تكول افرقة ديال الكرة ،، وسير الله يمسخك شوف ݣلب هاد الساعة حتى من بعد ونهضرو تلاح (قطعات تيليفون ورجعاتو لجيبها ورجعات لصالون) ..

– صوفيا(بإستفهام) : وات ؟ كيفاش ضيافك أعمي واش انا ماشي من هاد الظار ولا كيفاش ، متشاورتوش معايا نهائيا ..

– جنيد (كيخنزر فيها) : ياكما انت لي بانية هادالدار وحنا مافخبارناش ،هاد الدار ديالنا كلنا نعيطو حتى على عيساوة ..

– جواد(بصرامة) : صوفيا ، أنا فخباري مكاين لاش كولشي يكون فخبارك ..

– صوفيا : كيفاش زعمة ، علاش انا ماشي مرات الولد الكبير لهاد الدار ، ومن حقي نعرف شكون داخل وخارج ليها ، واش من مستوانا ولالا(كتخنزر فيهم) ..

– شامة(كطلع فيها وتهبط) مابغاتش تهضر وهي عند الناس ..

– صوفيا : خاص اعمي تعرف الناس لي كيدخلو لهاد الڤيلا شنو اتقول علينا الصحافة والناس ، ماتعرف هاد الناس طامعين ولا سراقين كولشي ممكن ..

– شامة(صافي بدات كتفقد الصبر) : مكايعرف الواحد غير لي بحالو ..

– صوفيا (ضارت شافت فيها) : سمحيلي شنو قلتي؟

_____

– شامة : ݣلت ليك ، مكايعرف الشفارة وطماعة غير لي كابر بيناتهم (وقفات وشافت فتوفيق) سمحليا أعمي انت على العين والراس ، وشكرا حيت رحبتي بينا انت وعائلتك ، ولكن الى بقيت هنا غير اتوقع شي محزرة ماهياش ،غلط فأي حد ولكن لي يغلط فشي واحد من عائلتي ، ناكلو بسناني ، اللهم نمشيو بحالنا حسن ، كنفضل نتعاشر مع شمكارة ديال دروبة ولا نسمع شي واحد كيغلط فينا وانا لساني مبري مني ..

– توفيق (بصرامة) : ماعندكم فين غادي تمشيو، كيما هاد الدار دارنا داركم ،ولي ماعجبو حال البلب وسع من كتافو ، حتى واحد ماضربو على يدو .

– صوفيا : عمي كتجي عليها وانا لا ، كتقصد انا نخرج سيپا ڤغي كتهضر بصح ؟

– توفيق : شنو بان ليك ، هاديك السيدة لي ولادات هاد البنت لي قدامك ، كنت كنعرفها وكانت كتقرا معانا و(سكت كيستغفر مغمض عينيه ، حطات زينب يدها على يدو زيرات عليها) جواد طلع مرتك هضرمعاها ، مابغيتش نغلط فيها ..

– جواد(بصرامة ) : صوفيا بيتك ..

– صوفيا (ولات كترعد مارضاتش) : كك….

– جواد(غوت) : صوفيا ، ݣتليك بيتك … ضربات بزنطرات وطلعات لبيتها ..

– جواد : سمحو ليا ، متديوش عليها ، خلاهم وطلع ..

– شامة(لجلال) : كون فخباري هاد تبهديل ، كون طلعت لراس شي جبل مع المعاز ، ولا نسمع كلام هاد خيتي ،غير دير فبالك قسما بالله وتغلط فيا ولا فعائلتي ، أقسم لك يمينا حتى نفشها وانا علمتك ..

______

– واقف فبيتو شاد جنبو وكيطل ، كيتسنى بفارغ الصبر يجيبو ليه خبار مزيانة ، تدق الباب جوج دقات .

– دخل ..

– تحل الباب ودخل واحد ،طويل وعريض داير واحد اللحية لابس تجاكيطة ديال الكوير فالقهوي ،مع سروال دجين باهت او واحد السبرديلة ..

– سي رايس (راس الحربة) : سبع ولا ضبع؟

– غبر ليهم الأتر ، طارو ماسماو …

– الرايس(ضار عندو) : كيفاش طارو ، دبان هوما باش يطيرو ، واش كضحك عليا ولا اش ݣاليك طونطو ديال راسك ؟؟!

– جوج طوموبيلات جاو داوهم ، تبعانهم وقفو فواحد البومبا ديال ليسانس ، بقينا واقفين حتى حنا من بعد ..

#فلاش_باك

– جلال : سي علي اتنزل انت اللول ، ادخل لطواليط وشامة هي وإيمان أدخلو لسوبير مارشي تافقنا ، وراها انا وسيف غادي نتبعوكم ، بغيتكم تصرفو عادي بحال الى مكاين والو ..

– علي (خايف) : بغيتي تݣول اسي جلال بلي تابعينا ..

– شامة : الى حققتي اشوية ابا فالمرايا ، اتبان ليك الطوموبيل الزرقة لي مقنتة ، منين خرجنا وهي ورانا …

– جلال : سي علي دير لي ݣلت ليك ..

– علي (تنهد وكيستغفر) : على بركة الله ، نزل من طوموبيل ،ومشا نيشان لجهة الطواليط .

– جلال : اتسناو 3 دقايق وغادي تنزلو ادخلو لسوبير مارشي ، الباب لوراني اتخرجو منو اتلقاو طوموبيل طويلة فالكحل زاج فيمي كتسناكم اتركبو فيها ، بينما خلطنا عليكم انا وسيف وسي علي صافي ؟

– شامة : واخا

– إيمان : واخا كون هاني ، هبطات شامة هي وإيمان ..

– إيمان : وليت كنحس براسي بحال ال ، كنمثل فشي فيلم ميريكاني ..

– شامة : ماتبقايش كتفتفي ، ديري راسك ماعلابالكش ..

– دارت شامة وإيمان داكشي لي وصاهم جلال عليه ، فعلا لقاو طوموبيل كاتسناهم مدازش بزاف ديال الوقت حتى خلط عليهم باها وسيف مع جلال ، تولى سيف السوݣان ديمارا وكسيرا بزربة خارج من تم ..

#نهاية_الفلاش_باك

– دابا بغيتي تݣول بلي ضحكو عليكم وزهقو بلاما تردو البال ، واش انا محزم برجال ولا ب ز…..ل ، رعاوين ، (غمض عينيه كيهدن فراسو) ..

– سي رايس كاينة واحد الحاجة عرفناها ..

– دوي ودوز ق…د من قدامي ..

– دوك طوموبيلات لي كانو فيهم ، ديال البوليس ..

– الرايس (حل عينيه مغوبش) :

– متأكد؟

– اه أسيدي متأكد ، القضية دخل فيها البوليس ..

– الرايس(تعصب) : خرا على بلان مق….د ، جمع دراري وغبرو مابغيتكم تبانو حتى نݣولها ليكم ..

– وعمر ، راه مصدعنا حيت مخليينو محبوس ..

– الرايس : مايفرعش ليا ك….ي ، خليوه يخرج ياعة فنهار وفصباح بكري ، بينما هدات الأمور ..

– (حدر راسو) : واخا أسيدي كون هاني ..

– رجع داير يديه ورا ظهرو كيشوف فزاج ساهي ، ومراتو مقابلاه من الشق ديال الباب حاضياه بإهتمام ..

يتبع