الفصل 1

تاج العرائس الفصل 1

كيقول المثل ،كزاو ومعشي باللفت.

هاد المثل هادا كينطابق على جميع المهن .. تقدر تلقا الخياطة وفراش مالها غير جلابة ، او كوافورة وشعرها كي النوالة فالسما ، نقاشة ويديها كوحل ومطليين بلحنة ، وتقدر تلقا نكافة و عمرها فحياتها عرسات .. لاكن هاد النكافة هادي بالضبط ماشي عمرها عرسات او تزوجات

بصوت قوي بداو الصلاة على النبي.. القرجوطة كترعد والحلاقم كيشطحو والعروسة نازلة

اما النكافة مولات الشكارة جالسة فالبيت وجنبها صاحبتها .

والصحاب فبعض الاحيان كيزيدو بيك القذام وشي مرات يقدرو يردوك اللور ويدفعوك الثمن غالي. هادا علاش الانسان يفكر قبل مايختار صحابو ويشوف هاد الصحاب كيفاش دايرين ،، كيفاش كيفكرو. وكيفاش عايشين وكيفاش باغيين يعيشو. حيت تأثيرهم على حياتك كيكون بنسبة خمسين فالمية.. وغالبا كتكونو مشابهين فكلشي ومتبعين نفس الستيل ونفس الاختيار واخا تكونو مختالفين فالاولكتافقو على طريق وحدة فالاخير .. ويا اما تبعو ولا يتبعك المهم كتكونو سالكين نفس الطريق وبنفس العقلية وبنفس الدوق وهادشي اللي كيخلي ديك الصحبة تتكون او الصداقة تتولد بيناتكم واللي كيخليها تتولد من الاساس هوا الراحة اللي كيلقاها كل واحد فيكم فلاخر والتفاهم والانسجام . ودائما كتكون عندهم نفس الخدمة وقليل فين كتلقا شي اختلاف بيناتهم وهادشي اللي كيخلي الصداقة الدوم

كانو جالسات بجوج وحدة حدا وحدة عيانين بالسهير ومافيهم اللي يهضر .. حتى لباسهم كان عادي وكيتشابهو تقول خواتات وهما فالاصل غير صحابات وحدة دافرة شعرها بالسبولة وشعرها كحل طويل والفرقة لوسط مرخوفة ومتكية على واحد الكنبي ورجلها مدلية لابسة بانطوفة بيضا ديال لوتيلات وسبرديلتها حداها والبابيليز فالارض والباليزة دالمكياج حداها محلولة والصاك فالارض وتيليفون كيتشارجا ، من جهة اخرى لاسقة سكينة حدا البريز خاشية تيليفون كيتشارجا لابسة كولون حتى هي كحل وتيشرط واسعة فيها كتابة بيضاء الوسط والشعر مجموع عشوائي ومتكية بالجنب الخوخة مكورة فداك الكولون وخدامة كتحسب وتعاود وشادة لفلوس فيدها والبيت مزموت بالصهد كتهضر غير بوحدها

سكينة: ناري ياااختي على عكوزة كن كانت عندي انا كن قتلت مها .. العروسة مسيكينة دريويشة

ناضت صاحبتها كتنهد دايخة وعينيها حومر كتحكهم

ليلى: كتشد فالفوطوي) نااري ربي راسي.. شحال باقي ليها ديال اللباسيي

سكينة: كتحسب) جوج .. دابا غطلع تلبس ديال العشا

ليلى : شدات فراسها) ناري غنموت بغيت نعس وغدا لحد غتصبح عاوتاني فالصالون عندي الخدمة

سكينة: غدا عندي عرس .. كن غا تصايبتي اصاحبتي مع العروسة دغدا كن مشينا انا وياك

ليليى: لالا اختي لا .. انا براسي كنتهلك .. وباغا اكومبانيومو فابور باغا تخلص خدمة دالصالون صافي وتجرني معاها .

سكينة: راجلك غيجي يديك ولا نوصلوك للدار؟

ليلى: راه مسكين لتحت فطموبيل ناعس ..كيبقا فيا والله(كتمسح عينيها) ماواقفش كااع على هاد الخدمة غير داير معايا الخاطر وصافي وانا تا انا لاسقة ليه فهادشي

سكينة: ماشي غا الخاطر اللي ديري. ليه حمدي الله ماعندك عكوزة ما عندك لوايسات ولا لوايس وشيخك برا كتشوفيه مرة فالعام

ليلى: كتفوه ) واييه .. شتي ماتكونش عندك لعكوزة ولوايسات اما الراجل تلقاي ليه الحل تلقاي

سكينة: ماعندي ماااا نكجدر اصلا بشي راجل.. تعقلي على هاداك اللي عاردت ليك عليه كنت مصاحبة معاه وكان باغي يسكني مع مو ؟

ليلى: غيير ماعرفتيش ليه .. اما هوا ماتلقايش بحالو .. ماعاودش عيط ليك ؟

سكينة: جمعات لفلوس) صونيت ليه واحد المرة ماجاوبنيش ..صافي ماعاودش صونيت عليه.. اصلا كان باين غيمشي

ليلى: كمشات عينها بتمعن) مندمتيش زعما

سكينة: ماشي مندمتش.. ماسخييتش..ولاكن اصاحبتي ماقدرتش نتزوج باقي الحال.. نتي اللي صدمتيني ماكانش كااع كيحساب ليا غتزوجي من دابا واحق الله

ليلى: وتا انا ماكنتش باغا نتزوج (كتفوه) ماقلبتش عليه اصلا هوا قلب عليا وكنت بحالك كااع مامدخلة الفكرة لراسي اصلا

سكينة: عرفتي فاش قالوها ليا .. تصدمت . بقيت كنقول واهااانتي بنت الحرام ماجاتش عرضات عليا كااع

ليلى: ونتي قلبتي وجهك وواخا هاكاك جيت حتى لعندك.. اصلا ماكنتش باغا ندير العرس هوا بقا عليا يالاه معايا يالاه معايا وجا بابا قالي وااجي ابنتي مللي بغيتي تمشي معاه اجي لهنا نديرو ليك العرس وكولشي يسيق لخباو وديك الساعة سيري نتي وياه حتى للقمر

.. وصافي زربنا على داكشي خفا زربا وماحضرتش ماعرفتهمش اصلا اش كيديرو كنت فالدار معاه حتى لهنار الحنة عاد جيت حيت عائلتو حتى هما جايين وخويت الدار ..صافي جمعنا وطوينا وزدت مع الطريق ماقلت ليهم حتى بسلامة ومن تما وانا كندور وفاش رجعت جيت عندك

فلاش باك.

نرجعو بالوقت اللور .. من قبل مايرجع بناصر من الحج ويلقا الكارثة كتسناه.

فديك العشية وقفات سيارة مرسيديس كحلة قدام باب الحانوت ديال سكينة ونزلات منها ليلى مترددة ..باغا دخل وماباغاش. ضارت وراها عند راجلها كتبسم وطلات عليه قبل متزيد خطوة والشتا خيط من السما والمضل فيدها

ليلى: صافي غير سير للقهوى حتى نعيط ليك

دارت ليه باي باي ومشات دخلات للحانوت كدور عينيها وتكتاشف محل سكينة وسارة جالسة كتشوف فيها

ليلى: مكايناش سكينة؟

سارة: لاء بغيتي شي حاجة؟

ليلى: بغيت سكينة مغتجيش؟

سارة: مكتجيش دابا

ليلى: فوقاش غتجي؟

سارة: ماعرفت بغيتي نقولها شي حاجة

ليلى: قولي ليها جات عندك ليلى..(كتبات ليها النمرة) عطيها نمرتي

من بعد ما خلات ليلى نمرتها فالحانوت ومشات رجعات سكينة من بعد. يوماين تتفقد المحل وتشوف واش دخلو سي فليسات ولا والو بحال العادة ومزال الحال كيتدهور خصوصا فالبرد الخدمة كتقلال وزيد عليها الاشاعة اللي طلقو عليها حتى هي كملات ليها الباقي. كانت جالسة مهمومة كتشوف فديك تلت ميات درهم اللي فالمجر واللي كانت قليلة بزاف كمدخول ديال ثلت ايام وكتفكر اش دير حتى وقفات عليها سارة بحال العادة التفرنيسة مكتخطاهاش وكتبان بحال الى بهلة شوية لاكن هي طبعها هاكاك .

سارة: جات عندك واحد البنت كتسول فيك

سكينة: شكون عاد البنت عاوتاني؟؟

سارة: قالت ليا قولي ليها بيلى صاحبتك

حلات سكينة عينيها فدهشة ولهفة وقالت

سكينة: ليلى!!! فوقاش جااات؟؟؟

سارة: عا يوماين دابا خلااات ليك نمرتها

سكينة: ناضت) اري اري.. فيناهيا (كدور فبلاصتها)

سارة: هاهيا هنايا .. صاحبتك؟؟؟ كتبان ضريفة

سكينة: اري نمرتها اري

خدات النمرة وبالحماس مشات كطير للتيليبوتيك كتصوني وتعاودوتصوني وتعاود حتى بدات تنفخ عاد تفتح ليها الخط وعقدات حجبانها بكبرياء وخفضات صوتها وتبدلات

سكينة: الو… ليلى

ليلى: الوو؟ شكون؟

سكينة: انا سكينة

ليلى : شكون سكينة؟

سكينة: قالت ليا البنت البنت اللي معايا جيتي سولتي فيا ..بغيتي شي حاجة؟

ليلى: اممم… فير جيت نسول فيك.. نتي صافا؟

سكينة: الحمد لله.. ونتي؟

ليلى: صافا الحمد لله.. كنت دايزة وقلت ندوز قالو ليا حليتي محل ديال تكاشط وصافي

ليلى: امم.. ايوا نتي هانيا بعدا؟؟ ماماك وباباك؟

ليلى: صافا صافا وباباك مزيان قالي بابا ما للحج هوا وماماك

ليلى: اه مشاو

ليلى: حتى بابا وماما مشاو .. مشاو مجموعين

سكينة: غيتقطع الخط دابا حيت انا فتيليبوتيك

ليلى: مهم .. الى كنتي مساليا نتلاقاو

سكينة: مسااليا ماعندي والو(كتقلب فعينيها)

ليلى: وصافي نتلاقاو فمارينا؟

سكينة: قيدي نمرتي….

تلاقاو فمارينا .. كل وحدة لابسة مونطو وكان اول لقاء من بعد خصام دام سنتين بسباب البنات .

ليلى صحبة قديمة هي وسكينة وسبب معرفتهم بناصر.. لان السي يوسف اب ليلى معرفة قديمة هوا وبناصر وجامعهم نفس القطاع فالعمل.. وتقريبا نفس العقلية، ونفس المحيط ونفس المتستوى المعيشي.. وبناصر اللي وصل بنتو فأحد الايام للصالون عند ليلى وتنا خبرها ان بنت صاحبو عندها صالون باش تقاد وتبان فعرس خالها ووصا السي يوسف باش يقولها لليلى ودير بحساب بنتصاحبو، مان بناصر متعمد يعرفها على ليلى حيت بحال ديما وبحال العادة كيبانو ليه بنات صحابو مربيين الا بناتو وهاد الفكرة مابغاتش تحيد ليه من راسو.. وكملات فاش سمع من السي يوسف انه باع واحد الدار لبنتو ليلى اللي كانت باغاتشري برطمة وشراتعا من باها شخصيا وسمع انها عندها فقط مشروع صغير لاكن عندها الدراع وبفم السي يوسف اللي كيعاود عليها كماكيعاودو كاع الرجال على ولادهم.. عا اللي كيشكي ها اللي كيشكر وتقريبا شي كيعرف ولاد لاخر وهنا بدا كيبان لبناصر يخشي سكينة مع ليلى على الله حتى هي دير النفس وتبعد من البنات اللي عيا يغوت ويجدبعليهم طول حياتو وهي اللي فراسها فراسها.

تعرفات سكينة على ليلى اللي كانت حتى هي بنت الوقت ولا تقل شيئا عن سكينة لاكن الفرق اللي بيناتهم هوا ليلى مضروبة على الفلوس وكتخدم وكيبان ليها غير الدرهم وباغا طير وتحققكاع داكشياللي تمنات فوقت وجيز وفاقت وعاقت على بكري وعرفات انه الحوايج والشراوط والبنات ماعندهم فاش ينفعوها وصفات كولشي وصفات معاهم حتى سكينة اللي كانت هي وياها كي القط والفار فاللول بسبب مشاكيل الصحابات وكملاتها ليلى مور ما تزوجات ضربات على الجميع حب وتبن وقلبات عليهم قلبة وحدة بحال كاع العرايس اللي كيباتو مايصبحو . تما شعلات العافية فسكينة وضربات على نمرتها واخا كانو مدابزين قبل لاكن ماتوقعاتش من ليلى تقلب عليها وماتعرضهاش للعرس او على الاقل تعرف غير مخططات ليلى اللي ماحتى واحدة فصحاباتها ماعرفاتهم وماساقو لخبار لا لخطبة لا عقد لا حتى حاجة ومكانوش عارفينها حتى واش كتعرف شي واحد للزواج ناوية تزوج حتى صدماتهم وخلاتها ليهم متورخة.

بكات فيها سكينة حتى شبعات وعيا فيها بناصر تمشي معاه للعرس مابغاتش ومارضاتش واخا عرض عليهم السي يوسف لاكن رفضات تمشي ومشات بلاصتها رانيا ومن تما وهي ضاربة على ليلى وعلى سميتها ومابقاتش كذكرها لاكن فالخفاء تابعاها فالفايسبوك حاضياها فين غادية وفين جايا ومنين دازت

كانو منفخين لاكن فاش تلاقاو غلباتهن الضحكة وبداو كيضحكو وتعانقو بالقوة وبقاو بوس فيا نبوس فيك عاد جلسو فمقهى على الجنب كطل على الماء واليخوت فمارينا وبداو يتجمعو ويتعاودو وشلا مايتعاود حبدو المزيودة ديال عماين اللي جامعين..عاودات عليها سكينة على تخت حياتها من نهار تفارقو وعاودات ليها ليلى حتى هيعلى قصةحياتها من نهار دابزو، لاكن الحق كان عند سكينة والغلط دارتو ليلى فاش ماعرضاتهاش للعرس واخا عيات تبرر ليها مكان حتى تبرير كافي ودارت الخطأ فساعة غضب من سكينة ومالقات متقول.. بقات فير ساكتة وعرفات راسها غلطات واخا معاتباتهاش سكينة لاكن واضح انها بقا فيها الحال بزاف بلخصوصان باها مشا وانها ساقت الخبار وعارفة العرسديك الليلة وهي جالسة كتبكي فالدار، ندمات ليلى فاش سمعات من سكينة كيفاش دوزات ديك الليلة حتى بغات تبكي وبقات كطلب السماحة وتسامحو لاكن بقا الحمل تقيل على ليلى وماعرفات كيفاش تخلص الحق باش ترتاح.. الهضرة كثيرة وتعاويدهم مابغاش يتقادا وخاصو ايام وشهور وسكينة بغات تعرف كيفاش طاحت الفكرة على ليلى حتى قبلات تزوج وهي كانت رافضة الفكرة تماما وكارهة سيرة الزواج ، وبغات تعرف كيفاش عايشة الحياة من بعد الزواج واش تبدل شي حاجة واش ماتبدلش وليلى كتعاود

سكينة: مافهمتشكي طرا حتى بغيتي تزوجي؟؟ سخيتي بطوطيح؟؟

ليلى: انا راه مامزوجاش داك الزوااااج اللي كتعرفي.. راه غير بدلت السكنة وصافي

سكينة: مافهمتش؟؟ كيفاش اصلا حتى قبلتي مابغاتش هادي دخل لي راسي… حيت حتى انا كنت كنعرف واحد باغي يتزوج بيا ومابغيتش خفت من الزواج

ليلى: وهادشي اللي كنعاودلييك حتى انا من الصباح، ماكنتش باغا نتزوج ولاكن فاش قاليا سولومينتي لا ديديلا حب ملوك قلت هداااا.. اش غندير مندير هوتة .. اجي نتزوج اختي ونشوف هاد الزواج فين غيخرج . حساان ليا وندور على خااطر خاطري.. مدام هوا عندو عقلية اوروبية

سكينة: باسف) لاالا هااداك اللي كنت كنعرف ماعندو لا عقلية اوروبية لا هندية.. مكاين غير ماتلبسيش هاكالا لبسي هاكا كي عاودت ليك

ليلى: هااء!! وا حتى انااا!! علاش نتي كيحساب ليك عقلية اوروبية هي الطاسة وتقزاب!! كنهضر ليك على العقلية المساوات اصاحبتي.. والوعي وكل واحد يديها فكرو .. اما راجلي انا متدييين .. عنداك يحساب ليك عقلية اروبية كيضرب الطاسة.. مكاين غا السجادة والقرآن وتافقنا نهار اللول فين حدي نلبس داكشي اللي يقدر كاع يصبر عليه تا يهديني الله .. ولاكن فشكل فعقلو ماشي متدين ويطرطق فيا عينيه ويبقا عليا بالأوامر..صافي كل واحد يعاود لمو كيلمح ليا كينصح بالحسنى وكينهي بالمعروف صافي .. حساب ليك انا غير جيت وقلت ليه قابلة نتزوج!! حتى عرفتو كي داير وكيفاش غيتعامل معايا وكيدايرة عقليتو وطاسيلتو وعرفت راسي اااه مستاعدة نتزوج عااد قلت ليه بسم لله .. نهار اللول صافي وضحنا الامور عرفني اش باغا وعرفتو اش باغي تفاهمنا زدنا مع الطريق اما كن كان شي متسلط ولا شي قبيح باغي يفهم عليا ويبدا يزعزع عليا كااع مانضرب معاه كن راه شحاال هادي قلت ليه باي بايامونامور ..وهاد النوع اصلا دالرجال اللي كتلقايه عاش برا ولا مو كاورية ولا باه كاوري كتلقاي عقليتهم فشكاال لااا علاقة مع هاد و اللي هنا وباغيين غا يعيشو هااانيين بلا صداع بلا مشاكيل صااافي ميقوليك ماتقولي ليه مايتسنا منك توجدي ليه فطور ولا توجدي ليه طواجن .. كيوجد راسو ومكتلقايهش كااع مسالي ديما مشغول مكيجلسش فالدار ومن هادي لهادي مايفرعشليك كااع مخك

سكينة: زعما زعما

ليلى: ااه .. كاين اصاحبتي اللي عايش هاكا.. غا حنا مجتمعنا رابط الزواج مع الصبر مع الهم مع المشاكيل.. كيجيهم زواج بحال هادا ماشي زواج ومغيدومش وكيدوم غا الزواج اللي فيه الدق والصبر ويشوفو المشاكيل والمرى صبارة كيقولو صافي غيدووم حيت واخا يوقع اللي ويوقع المرى تصبر والزواج يكمل . مامولفييينش بهاد النمط وهاد الستيل فالزواج والله.. انا كيقولو ليا غطلقي!!! كيحلفو عليا

سكينة: اوييلي الله يستر!

ليلى: والله !! حيت فعائلتنا اللي تزوجات كتطوا على ربعة كتبدل .. جيت انا بقيتكما انا جيتهم فشكل..طيبوني بالنصائح تفوو.. عمتك تنصح خالتك تنصح مي مرعودة وبا منهضرش علييييه.. كيشوفني مكيطلقنييش بالهضرة والنكييير النكيير النكيير طيبي زمري خرااي.. السيد كاااع مامسوق مكيفهم لا فدجاج لا فطواجن هما جالسين عليا طيبي ليه .. ديري ليه السفة.. ديري المرقة ياكل.. عجني خبز الدار.. عجني مسمن دابا نتي مزوجة ماتشرييوش داكشي من الزنقة.. الراجل معارف والو وماعندو لا ام لا اخت اللي توريه ومكابر وسط مراقي ووسط طواجن بغاوني نعلمو ونوريه حتى يتبلد ليا ونوحل فيه . خليه اختيكي لقيتو كي نخليه .. هما كيحسابهم راه محروم ومييت بالجوع ومن نهار تزوج ما غمس.. بحال الى كان كيضل يغمس قبل الزواج

سكينة: وشكاديري ليه ههه

ليلى: كيعرف الحوت وصافي.. مكيعرفش داكشي دشهيوات والبنة والطياب اللي علاااا حقو وطريقو.. اي حاجة كيقول عليها زوينة تكون ماكلة نقية وصافي موسوس شوية بالتقية(بخفوت)شتيمن اللخر..مكاين لا طيابلا تا وزة كاين غا سييكس..فوتي العرب تعيشي

سكينة: ههههه اويلي وفين كاينينوانا فدولة فيها عريبان

ليلى: سيري لاصالالى بغيتي تلقايهم.. صحاب راجلي نفس العقلية نفس كولشي كيترينيو كاملين فحي الرياض..فوتي ليصال ديال الشعب الى بغيتي تلاقايهم ودخلي بيناتهم انا نقوليك حيت مكاينة حتى بلاصة اخرى تجمعكم معاهم شي جمعة صحيحة من غير ليصال وليزوطيل لغالين .. كاع سليباطير كيمشيو يتبرعو فليزرطيل ونصهم كيمسيو بسبب الخدمة كيعطيوهم احسن اوتيل سبعة دالنجوم الى كانو خدامين خدمة زوينة كيباتو فيهم بقيمة خمسالاف درهم ليلة..باقي كدوري ليا هنا فالشارع وفمارينا حسابك غتلاقايهم هنا

سكينة: واللي اختي مزلوطة هههه باش غنمشي لهاد لاصال وهاد لوتيل،، حتى داك غالي اللي كنت مصاحبة معاه كان كيمشي لواحد لاصال فحي الرياض ياختي.. مطاحتش عليا هادي

ليلى: هاهيا طاحت عليك دابا.. شتي مللي ضيعتي هاد خونا راك مكتعرفي لواالو.. عند بالك الرجال مشتتين.. هاد الستيل تلقايه مرة فالحياة والى راضية عليك ام الدنيا غتعاودي تلقاي واحد اخر .. مكاين ابنتي غا بوشلاغم بوسمطة يسبقليك مو ويحسب ليك المصروف والله لا شفتي شي اوتيل ولا شي عشا برا.. حدو السناك يوكلك بيتزا ويقوليك تهليت فيك وتولي كي مو وخواتاتو ولا راكي ماشي بنت الناس اييه ابنتي

سكينة: بحرقة) والفلووووووس.. باااش بغيتي نمشي لاصال بالدعاء

ليلى:عندك بروجي!!! اويلي

سكينة: ومااات ..طزز

ليلى: علاش مادرتيش تنكافت(قربات عندها) اااه حقا علاش مادرتيهاااااش!!!وييلي كنعرف نكافة يالاه بدات خرجات طموبيل دوبلفي.!!! نتي معروفة كي الدرهم ماشي غير طموبيل اللي ديري..بداي بدايانا نسيفط ليك الكليان فين ما كانت شي عروسة نسيفطها ليك والله

سكينة:وباش غنبدا!! والو ديرو درهم

ليلى: اويلي ماعندك حتى ريال؟

سكينة: واالو.. بابا كيجمع ليا ماعرفت شحال جمعت .. غنكون يالاه وصلت شي مليون

ليلى: بتفكير) امم.. واديري قضية.. دفعي داك المليون وعطي الشيك وهزي السلعة وبداي ومن بعد بقاي تخلصي بطريطة

سكينة: مافهمتش

ليلى: جراتها من يدها) اجي نفهمك..زيدي نوريك كي كيبداو الناس

سكينة: بحماس) يالا يالاه وريني وريني

ليلى: حلي عقلك ههه ساااهلة غا نتي مصعباها

سكينة: كتحاك معاها بحماس) ناااري توحشتك ابنت الحرام

ليلى: كضحك) حتى انا امسخوطة .. حيت عندك نيشان مادزت لا حداك لا فوقك غا كدبت عليك

سكينة: بكتفها) متأ وراني عاارفة .. زيديزيدي كملي نخليوها انا وياك

ليلى: بتركيز) هانتي دابا الصعيبة راك حيدتيها ياك عندك دابا محل مقاد وتكاشط،، غادي تجيبي غيير عمارية وطيافر وشي برزة وميادي وديك الجلسة دالحنة صااافي..حسبيهم شراوط غتشريهم باش مايخلعوكش

سكينة: اهااه زيدي وكي غندير نجيبهم بلا فلوس

ليلى: اشمن بلا فلوس لواه …!! جبدي واحد المليون ولا شحال ما كان كي كيديرو النكافات كااملين ..عطيها افونص وهزي السلعة والباقي غادي تقيديه فالشيك وتعطيه لمول السلعة يبقا عندو وبداي ديك الساعة الخدمة ومرة مرة عطيه طريف حتى تكملي.. وفكل مرة كتعطيه شي حاجة كتبدلو الشيك وصافي حتى كتكملي..هادشي اللي كيدرو فهاد الضومين كاع النكافات

سكينة: ومنين دابا غنجيب الشيك !! والله مايبغي بابا

ليلى: ونتي حلي كونط اصاحبتي وطلبي دفتر شيكات ديالك علاش تسناي باك يعطيك!

سكينة: اااه ولاهيلا!!

ليلى: خاصك كونط ماعندكش؟

سكينة: لا

ليلى: وراه خاصك كونط اصاحبتي مالك دايرة القلوشة

سكينة: وماباقا عندي منحمع اصلا

ليلى: وها انا معاك فالضومين غنسيفط ليك العرايس والكليان كامل وبداي..الصعيبة هي متكوني كتعرفي حتى واحد اما نتي راه ديجا عندك كليان وعندك انا عندي صالون ..سيفطي لي ونسيفط ليك ونخدمو انا وياك مالكي مصعباها

طارت عليها سكينة خلعاتها عنقاتها كتشطح بيها بسعادة وحماس وضحك وتفيبري بحال الى فيها البولة

سكينة: زيدي زيدي .. نتي احسن صاحبة ههه كملي

ليلى: هههه تا نتي كتااار مني كنفرفر غير على الفلوس هههخخ

سكينة: عرفتي غنضهشر بابا الى طفرتو

ليلى: طفروه اللي مكيعرفو يكتبو حتى سميتهم ودارو الديور والحوانت غير بالتنكاف فوق السطوحة ماشي حتى فالقاعات..اما نتي منخافش عليك ديريها وتفوتيها

سكينة: انا نخدم حتى فلغيران ماعنديش مشكل

.. المشكل هوا ماعنديش افونص وداكشي شحال كااع غيتقام.

ليلى: غا ثلاتة دلبريكات تبدا ليك من داكشي

سكينة: رجعات اللور) اويييلي ماتقوليش ليا تنكاف دالميكة راني مشيييت حتى لفاس ولقيتو ومابغيتش.. لالالالا

ليلى: جراتها) واشرييييه قديييم قدييييم ومستعمل بداي بيه ماشي جديد ومقزدر .. كاينين نكافات الواعرين كيبدلو كل عام شري من عندهم داكشي وااعر شكون عرفو قديم ولا جديد اصلا واخا يكون جديد تخدمي بيه غا ليلة صافي هاهوا قدام.. مااالكي كطيري

سكينة: اهاه!! زيدي زيدي تا هادا بلان مقود وتبغي هاد النكافة تشد شيك

ليلى: كاااينين باغين غا يخويو كنعرفهووووم .. ماعندهمش مشكل اصلا خدااامين ميحبسوش كيدخلو الملاين غير كيبغيو يبدلو وينقصو فين زيدو الجديدوكيخدمو فالقاعات كلشي كيبقا نقي.. غا تبغي ندورك عليهم كاملين بوحدة بوحدة

سكينة: ولافونص

هنا تاحت الفرصة ليلى تصلح الدعوة مع سكينة دالعرس وقالت بابتسامة

ليلى: انا نسلفك خمسلاف درهم يالاه .. نهضر ليك مع النكافة تصبر عليك

وتافقو وفرحات سكينة وعجبها الحال ومشاو من بعد الاتفاق للبنك وفتحات سكينة الحساب وهي فرحانة وليلى تابعاها ، بعد ايام صبح الشيك فيد سكينة وفير شداتو شداتها الخلعة وبدات ترعد وضحك وتفتف بوحدها وليلى غادية حداها فطاكسي راجعين بحالهم

ليلى: مالكي ههه

سكينة: خفت اختي خفت هادشي صدق بصح،، كنخاف من شيكات

ليلى: غا ماتعمريش شي شيك وتعطيه وصافي

سكينة: بابا ركب فيا الرعب كيهضر على الشيكات ويتبع ليهم الحبس .. عرفتي حاسة براسي هازة لحبس فصاكي

ليلى: دابا تولفي هههه حتا نهار درت الشيك حسيت براسي مهمة وشي لعبااااا زعما حيت عندي زعما الدفتار

سكينة: ياكي ياكي.. حتى انا ههه كنحس براسي زعما كبرت وشي حاااجة

ليلى: بلاتي تسناي نعيط ليك لواحد نكافة خدمنا فواحد العرس غير هاد الشهر انا وياها وقالت ليا غتبدل لماتيريال (كتصوني) ششش..كيصوني. الو بديعة ..صافا ..معاك ليلى ..صافا حبيبة نتي صافا كولشي مزيان.. راكي فالمحل؟ بغيت نسولك واش باقا باغا تبيعي لماتريال ؟؟ (كمشات فمها) اممم.. صافي ..غير سولتك وصافي. يالاه حبيبة تهلاي فراسك(قطعات) قاتلك باعتو

سكينة: على زهر

ليلى: غنعيط لوحدا اخرى تسناي(كتصوني) مكيجاوبش.. ناعسة ولا ماعرفت ليها

سكينة: شتي دابا ،، مللي حنا واجدين عاد مابقات بانت حتى وحدة

ليلى: دابا تبان انا غنقلب ليك .. غا دابا تالفين ليا حتاااا نجلس ونبدا نجمع فيهم وغيبانو ..

وصلو للصالون عند ليلى وكانت حالاه فشقة اللي كان خلا ليها باها وشراتها منو من بعد فترة زمنية .. كان مع ليلى بنات بعقلهم وحدة فيهم سميتها كنزة ومزوجة سعودي وهوا فبلادو وهي فبلادها وكدوز الوقت على بيدمن تمشي عندو.. كنزة كانت مزوجة ومطلقة لاكن بنت الوقت والراس عامر تجارب وكانت هي وليلى قراب لبعض وتما عرفاتها على سكينة فاش دخلو للصالون .

سكينة غير دخلات بانت ليها فالصالون وبقات تمشي من قنت لقنت .. بغيت هادي .. بغيت هادا .. صايبي ليا هادي .. لاياش كتصلاح هادي.. ديري ليا هادي .قادي ليا هادي. وليلى مكانتشمن لعاكزين جاها وجه سكين من الجنة والناس شداتها فواحد البيت وبدات تجرب فيها المكياج وكنزة جالسة معاهم وخدامين وفنفس الوقت كيتجمعو ويشربو القهوى

ليلى: واحد مريم واسماء فين شدوها ؟

سكينة: سادة عينيها) مانعرف لجد باباهم الكلب

ليلى: هههه دابزتو

سكينة: قلبت على بوزبال كامل

ليلى: وكوتر ؟ فين غبرات ؟

سكينة: حتى هي شحال ما شفتها .. انا دابا واحلة باغا نبرا من التوكال كنزة : اوييلي واكلة التوكال؟؟

سكينة: ايييه اختي

ليلى: شتي بنات الق٠٠ اب

كنزة: شكون وكلو ليك ؟

سكينة: ماعرفتش اختي تا كليتو … دابا كنتسنى واحد القطري قاليا غيجي غيجيب ليا معاه شي دوا وشي عشوب

ليلى: ضعافيييتي اصاحبتي

سكينة: حمد الله باقا حية

كنزة: ضربات فخدها) وييلي … اقود حاجة هي توكال

سكينة: وكليتو اختي.. ك الله ياخد الحق

ليلى: فين عرفتي عاد القطري عاوتاني؟

سكينة: غا فالفايس

ليلى: طلبي الله تبراي .. حتى شيماء كلات توكال

هزات سكينة راسها بسرعة شافت فيها وقالت

سكينة: اويلي!!! شيماء شيماااء!!!

ليلى: ايييه شيماء.. جات عندي كتسولني على شي خياطة كتخيط الرومي تخيط ليها كساوي طوال باليدين .. حتى هي تبرقعات كووولها

سكينة: شدات وجهها) هيييه!!! حلفي!!!

ليلى: والله لعضيم … شفتها بعيني مسكينة ودابا كتشرب شي دوا كتجيبو من تركيا.. دابا مشات فمرة لتركيا داها شي واحد هوا تكفل بيها وباغي يتزوجها

سكينة: ناااري مسكينة .. شي تركي هادا ؟

لياى: مغريييبي.. عايش تما وقاليها نديك ونتزوج بيك ونبداو صفحة جديدة ومشات

هضرة غادية وهضرة جايا حتى جبدو الموضوع ديال التنكاف والماتيريال وتدخلات كنزة قائلة

كنزة: واش باغا ديري تنكاف؟

سكينة: كتمسح وجهها من المكياج) اه

كنزة: كاينة واحد النكافة كنعرفها عندها داكشي واااعر صراحة

ليلى: شكون هاد النكافة؟؟

كنزة: ربيعة اللي فالمنال ..باغا تبيع وحاطاهم فالفايس بوك

ليلى: بتذكير) اااااه نسييييت ربيعة .. بصح بصح اسكينة ربيعة غتبدل الماتريال بلاتي بلاتي نعيط ليها .. على الله متكونش باعتهم .. عندها داكشي خطييييير اسكينة عرفتي تبداي بيه طلعي طلعة صاروخية

سكينة: بلهفة)عيطي دغيا عيطي

صوناو لربيعة وناضو بالزربة استغلو الفرصة مشاو عندها بثلاتة ختى للمحل فالمنال وغاديين وكيتهامسو بيناتهم باش يدوروها تنقص فالثمن . دخلو وكان الماتريال كامل محطوط مقاد وكانت مزالة خدامة بيه لاكن كانت ربيعة واحد الباطرونة مقالو عليها نكافة باطرونة حتى نيت باطرونة ، عزات سلعتها وتكبرات وتجبرات وسكينة لسقات ومابغاتش طلق وكتنخز فليلى من الجنب باش يضغطو على ربيعة .. اما سكينة فبحال هاد المواقف كتحشم ولقات راسها مزالة ما تجبدات فاش تحطات بين ليلى وربيعة و كنزة بقات غير كدور فعينيها وهما عطيني نعطيك الجبهة تنطح ختها وسكينة كدور فراسها وضحك من لداخل واقول .. طزز اولدي عند بالي تحكييت زعما مع الكليان ساعة واالو .. لقات راسها مع خوتها فالحرفة بحال ديك الحوتة الصغيرة اللي وسط الحيتان ، اما ليلى وكنزة كانو مولفين القاصح فالبيع والشرا ومجبدين وحكاتهم الوقت حتا احتارفو ومابقاو لا كيدوخو لا يدهشو قدام البياعة . ربيعة مابغاتش تنزل على خمسة دالمليون وليلى عيات طيح ليها من قيمة السلعة وكتقلب غير على شي وسخة ولا تقطيعة توريها ليها وتعيبها وبقات عليها هادشي مكرفس هادشي ماشي ديال خمسة دالمليون كاين ماحسن بخمسة كن بغيناه كن مشينا عندو ونتي مادرتي بوجه معرفة ولا والو والفلوس غا وسخ الدنيا وال تعامل هوا كولشي . وربيعة من جهة اخرى شادة فثمنها حيت عارفة ليلى غير غتاخد الماتريال غتقلب عليها وماتبقاش تسيفط ليها العرايس مدام صاحبتها حتى هي غدخل لمجال فما عندها غلاش تعامل معاها نت هنا لفوق. بقاو عليها بالهضرة وليلى حتى هي فاهمة وعايقة بيها كدبات عليها وقالت ليها باللي غتمشي لكازة تخدم بيه وغير ضيفة وكنزة حتى هي كتنخزها ويشجعوها باش تبيع وديك الساعة يسيفطو ليها كليان تعوض بيه كاع .

دوروها وديروها حتى بقات هازة حاجبها وكتشوف وااحت يديها وقالت

ربيعة: يالاه هزوه .. اش غنقوليكم ماخليتو ليا منقول.. قباحيتي معايا ليلى وصافي اما داك الثمن اللي عطيتي والله ماديال العمارية

ليلى: حاطة صبعها) وشوفي اصاحبتي دابا كي مقشرة غا هادالقشرة غنخسرو عليها الفين درهم وزيد عليها الف درهم ديال ترونسبور من هنا لكازة .. والحنة قاست ليك النطع .. و تانتي ماتقباحيش عاوتاني ديريها مع البراني اصاحبتي ماشي معانا

ربيعة: وصافي يالاه .. سيرو

ليلى: صافي؟ بخاطرك؟ الى ماكنتيش بخاطرك مانديرهش

ربيعة: وصافي.. غاديه

ليلى: تعطيك خمسالاف درهم والباقي شيك

ربيعة: لااا ولا ماتافقناش على هادشي

ليلى: بسرعة) انااا نضمنها ليك اناااا .. كتعرفيني انا وايسري معانا ماتخليناش نخرجو من عندك اصاحبتي

ربيعة: ماقدتوش ليا غتكملو بالشيك

ليلى: وانتي عارفة هادشي حنا قلنا راك فاهمة زعما (شافت فسكينة اللي كتنخزها تقبلت ليها الكلوة وغمزاتها) صافي.. واشدي..(مدات ليها الشيك) قولي بسم الله ويسري…

ربيعة: لا ليلى ماتقوليييش ليا

ليلى : بضغط) توكلي على الله ويسري ربي يسهل عليك راه فشهراين تكمل ليك رزقك .. شدي ماترديش

بقات كتخشي بيا الشيك فيدها حتى شداتو كتسوط ومشات ليلى تيرات ليها تسبيق خمسالاف درهم ودغيا زربو على داكشي بغاو يخويو السيكتور وهزوه فهونضة داوه للمحل عند سكينة اللي راكبة اللور هي وليلى وسط الماتريال كيضحكو

سكينة: بيه فيه!!!! مامايقاش واحق الله

ليلى: هانتي وليتي نكافة.. خاصك ليزاكسيسوار … كريهم من المدينة راه كيتكراو حتى تشري ديالك

سكينة: حلفي!!!

ليلى: راه هاكا كيبداو اصاحبتي مالكي!! كيبداو يكريو من هنا ومن هنا عمارية من هنا ميادي من هنا حتى كيديرو ديالهم .. صافي دابا عندك الماتيريال(تكات عليه) دابا كري ليزاكسيسوار صافي وبداي باش تردي لربيعة فلوسها دغيا.. ختى نتي من بعد بيعيه وشري الجديد

ليلى ورات لسكينة الطريق باش تبدا ودخلو السلعة للحانوت اللي كان صغير .. ماهزش ليهم داكشي كامل وحصلو فيه حصلة ماعرفو كي يديرو ليه..رونوه كامل واضطرو يفسخو العمارية ويحطوها اللور مع الحيط على بيدمن يلقاو حل.. خرجات ليلى كتشوف المحل بانت ليها مساحة كبيرة قدام الحانوت واقتارحات على سكينة تزيد لقدام كما كيديرو القهاوي وتكمل بالحديد من الجناب والباش بحال ديال القهوى من لفوق باش تلقا فين تزيد .. واخاعندها فين تحط العمارية لاكن الميادي دالخشب والطيافر والصندرقوزيد الطبلة دالحنة والباقي خصو مكان فين يتحط. عاودات بان ليها بلان اخر واقتارحات عليها دير السدة وتحطفيها كلشي وتخلي غير المارية فالجنب احسن باش تبان دايرة تنكاف وكان هادا الاقتراح الامثل اللي عجب سكينة ومن الفرحة داخت ماعرفات منين تبدا.

كان هادي اول خطوة اللي موراها بثلت ايام صونات ليها ليلى فتيليفون كضحك فيقاتها من النعاس

ليلى: نوضي نوضي نوضي.. جايينك الضياف

سكينة: كتحلعين وتسد عين

شكون؟

ليلى:هانا ضبرتليك على عروسة للصيف .. ووحدة اخرى عندها ضريب الصداق عطيتها نمرتك غتعيط ليك تكري الحنة

سكينة: بحماس) حلفي.. جايا دابا؟

ليلى: كونفيغميت معاها انا وراه غتخرج من عندي تجي عندك

سكينة: اجي معاها… ويلي اناراه كنحشم

ليلى: مشغولة انا

سكينة: هيييه!!! لالا اجي اجي معاها

ليلى: مشكيييلة… نوضي دغيا قادي حالتك مزيااان .. فيها شوية تبركيك

سكينة. ماتخافيش مهم اجي معاها

قطعات وناضت كتجري كتلبس ورانيا كتشوف فيها ويدها على خدها وحداها سميرة غير كيشوفو ماعاجبمش الحال .. حتى جات تخرج وناضت رانيا كتسوط معصبة شارت ليها بصبعها

رانيا: والللله هادشي اللي كديري حتى غتشوفي اشغيدير ليك با فاش يجي.. مشيييتي ودرتي الليقالك راسك وجايبةالعمارية ؟؟؟. بغيتي تفقصينا.. هااا با مشا الحج ونتي هنا كديري اللي بغيتي مشا خلاك كتكري التكاشط نضتي نتي درتي التنكاف..

سكينة: اااه.. وغنمشي نخدم بالليل مع العروسة زيدك حتى هادي

رانيا: بغات تنفاجر) واش بغيتيتحمقيييني… واش نتي بنت نتي؟؟

سميرة: بدون رضى دورات وجهها) رانيا رانيا اجي.. صافي خليها فاش يجي باباكم تفاهم معاه هي صافي.. مابقا مايتكَال

رانيا: شدات راسها) يااااربي…يااااربي ياااااربي… منين خرجات هاد ليلى منين ياك دابزتي نتي وياها … منين جاوك الفلوس باش جبتي داكشي!!!!.. واباااا.. بااا وجاه داكشي غالي وماقدرش عليه ونتي مشيتي جبتيه مين جاوك

سميرة: بهدو) رانياااا.. صافي .. خليها حتى يجي باباك ومنو ليها ماشي سوقنا كل واحد يتحمل مسؤوليتو

الهضرة دخلات من ودن وخرجات من ودن ومشات تبدا اول موعد ليها مع اول عروسة ، اما رانيا مرضات وتقهرات وشدات راسها مابغاتش المشاكيل والصدع وعارفة هادشي اللي دارت سكينة غادي يفجر فيهم شي قنبولة وخايفة من ردة فعل بناصر وماقادراش حتى تتخيل وجهه وشوفاتو .. اما سميرة كما عادتها ديما متكية وطالقة رجليها قدامها ومع طويلة بزاف كتشد ا السداري كامل ودير رجل على رجل ولا تهز رجل فوق شي مخدة وطلق شعرها وتشوف غير من فوق النيف. ذكية وكتفهما طايرة لاكن كدير راسها مكتعرف والو .. واللي سولها على الزواج كتقوليه مكنعرفش اشناهوا الزواج .. اما فاش كتقولها قدام سكينة ورانيا وكتبغي دير فيها راه نية ومطمسة زعما ومكتعرفش اشنو هوا الزواج كيبقاو غير يشوفو فيها .. العضو دالراجل كتقولليه بيبيا وكتبغي تبين البرائة والسداجة حيت فمفهومها هث والمحيط اللي داير بيها ان البنت اللي مكتعرفش شنو هوا الزواج هاديك هي المطلوبة بنت الناس واللي يعلمها الراجل على يدو. وديما كانت سكينة كتهضر فغيبتها ومابغاتش تدخل ليها للراس ديك الهضرة اللي كضل تمضغ وسط العائلة وتقول جملتها الشهيرة ” اممم زعما حنا اللي كنعرفو شناهوا الزواج وحنا اللي كنعرفو النعاس وكنعرفو داكشي وهي بوحدها اللي مكتعرف والو واااالو… زعما راني عمرني سمعت ولا فهمت وهي كتقيل مخشية وسط العيالات مزوجين كيهضرو على هادشي، كاع اللي كيقوليك مكنعرفش مكنفهمش اويييلي واش بصح ويدير فيها مصدوم عرفيه عارف القرامد ويمكن مجرب.. ربعين عام كاملة وماعارفة التب كي داير وباز

شحال خايبة تكون راسم على راسك صورة ومتيق ان الناس كيشوفك كما كتشوف راسك او كما بغيتي راسك تكون لاكن يوقع العكس والكل عارفك على حقيقتك ونتا كتزيد فالتمثيل وبناء الشخصية الوهمية ونهار على نهار كتزيد تصدقها غير نتا بوحدك وكتزيد تأكد ان الناس حتى هما مصدقين ،، والخايبة انه مايصارحك حتى واحد ومايواجهك حتى واحد وكيخليوك كما نتا وكيمثلو عليك حتى هما انهم مصدقينك وراسمين ليك حتى هما نفس الصورة اللي نتا راسم ليهم وكيدعيو السداجة والغباء والنية فتصديقك لاكن فغيابك كيضحكو عليك ويستخفو بيك ودايينك على قد عقلك..والاسوء انك كيحساب ليك راسك ذكي ودزتيها عليهم.

هادشي اللي واقع بين سميرة ورانيا وسكينة.. واخا مكياجهوهاش لاكن مخليينها احتراما لديك القرابة باش ميبقاش فيها الحال اذا تصداو ليها، واخا شحال من مرة كتبغي سكينة تحطها بوجهها وعندها رغبة قوية تبين ليها كيفاش كتشوف كتشوفها لاكن كتراجع فكل مرة وكضرب وتقيس. ولحسن الحظ سكينة كتنسا دغيا وكترجع تهضر مع سميرة كأنها اول مرة تعرفها ، اما رانيا الصبارة فهي صبارة فكلشي..حتى مع الناس وهادشي واضح مع سميرة اللي كتحملها وتميك على شحال من حاجة من بينهم حوايجها اللي كتلبس ليها وبيجاماتها اللي كتوسع ليها وتجبد فيهم وتنعس فيهم وشحال من حاجة عند رانيا منضماها وشارياها بالشوق وبزز كتلقا سميرة لابساها ليها ومتكية بيها ماخصها خير بحال واحد السورفيت مخلياها للخروج لقات سميرة لابساها ومتكية بيها وطالقة الشعر .. تفقصات رانيا فنفسها وماقالت والو وكمداتها فقلبها وعيات ماتخبي من بعد كتمشي ليها سميرة للماريو وكتلقا داكشي مطوي ومقاد وكتبدا تجبد على خاطرها، عكس سكينة اللي جيهتها فالبلاكار ديما مرونة ومقلوبة سفاها على علاها كتجبد السروال من رجلو وتجرو .. وحتى سميرة مكتزعمش تلبس ليها حوايجها حيت عارفاها فيها الصدع والمشاكيل وكتفاداها ..زغبها الشيطان واحد النهار ودوشات ومالقات ما تلبس حيت ديما كتسافر ودابرة فراسها غتمشي والبنات عندهم الحوايج غتلبس معاهم ومكاينحتى مشكل ومرتاحة . مكتهز تقل مكتهز روينة كتمشي طويلة وهازة غير باش تخرج وتبان وحوايجها الزوينين ديال الخروج وحبذا الى لقات شي حويجات جداد وزوينين عند بنات ختها حتى هما تلبسهم علاش لا. هاد القاعدة ولفاتها فكولشي ماشي غير فبنات ختها وانما حتى عيالات خوتها كتمشي وتبدا تقلب ليهم البلاكارات وتلبس ليهم حوايجهم بلا ري ولا شوار زعما راه الدنيا هانيا وراه عزيزة عليهم ميخسروليها الخاطر .. وكما هي ماعندهاش مشكل تلبس ليهم وترون ليهم حتى هما ماعندهمش مشكل وكتقول زعما مكيدويش عليا انا وهاد الكلمة كتخليها دير مابغات.. صافي تعيش الحياة ودير اللي عجبها وهما راه مكيديوش عليها ولقات راحتها.

غير ما قال ليها راسها!! خرجي من الدوش وسيري قلبي على لحوايج وماذاحت غير على تيشورط ديال غالي الليكان عطا لسكينة تلبس هي والشورط نهار باتت عندو.. بانت ليها واسعة وعريضة وهي طويلة جاتها مفضفضة ومريحة ولبساتها تحت الحوايج ودارت عليها البيجامة وسخنات عضامها وجلسات بيها خمسطاش ليوم حتى بغات تعاود دوش ومشات كتقلب على باش تبدل وكانت سكينة فالبيت جالسة كتفصل واحد التوب وشافتها كتحيد الحوايج وتنقص عليها باش دخل دوش ،،بقات تحيد بشوية عليها ومرتاحة حتى وصلات للتيشورط لكحلة دالنايك اللي ساوية تمنميات درهم مكمشة وعامرة خملة وتخمجات تحت الحوايج .. شافتها سكينة وبقات كتحقق قيها دخلها الشك كتقول وييلي!! هادشي بحال تيشورط دغالي!.. كتشبه ليها؟؟ جاتني بحالها!! بقات كتشوف وقالت يمكن تكون لقاتها فالبال وشراتها حثت حالتها ماشي ديال الجديد ديال البال وشابعة خملة . بقات كتشوف فيها وضحكات معاها وقالت

سكينة: واعرة ديك التيشورط منين خديتيها؟

ردت سميرة وهي محنية على واحد الشبكة دالحوايج كتقلب وقالت بطريقة زعما كتقضي حاجة وصافي

سميرة: راني غير كنشري اللي سمع كنشري يقول هنا نبات… ديااالك هادي لقيتها مرمية وسط الحوايج هزيتها نسخن بيها عضامي رشاو عليا بالبرد

بمجرد ما سمعات سكينة اش قالت سميرة طلع ليها الطونسيو وخرجو عينيها من الصدمة بقات كتشوف فتيشورط كي كانت وكي رجعات وطامعة تلبسها فالصيف مع الكولونات وفوق هادشي تذكار زوين وعزيز عليها .. وقفات كتشوف فيها حالة فيها فمها ومشات حتى لعندها كطلع فديك تيشورط وتهبط وقلبها كيتحرق عليها وقاستها بيدها

سكينة: وييلي وييلي وييلي!!! وييلي على نايك اويلي

حيداتها سميرة فالبلاصة عطاتها ليها كدور فعينيها

سميرة:ماحسابنيش اما منلبسهاش هاكي

شداتها سكينة فيدها كتشم فيها ريحة العرق مع ريحة مضاد العرق مع ريحة البرفان دسميرة اللي كتكره ورجعات كتبان ليها بحال الجفاف.. اما سميرة خسرات عليها دوك جوج كلمات وببرودة رجعات كتقلب حيت صافي قضات الغرض ولاحتها ليها والدور على حاجة اخرى . بالفقصة والخر كمشاتها سكينة فيدها كتنخصص وتشوف قدامها ومشات جرات الشبكة للجنب وقالت ليها بصرامة بلا متشرف فيها

سكينة: ماهنا حتى حاجة ديالك غير حوايجي.. وهاد تيشورط كدير سطاش الف ريال.. وماشي ديال الدار ديال الخروج وشوفي كي رديتيها… واش ماعندكش الحوايج؟؟؟ جايا بلا حوايج عمرني شفتها هادي عارفة راسك غتجلسي شهر جيبي ماتلبسيولا ماتجيش

وقفات سميرة مخرجة عينيها كتشوف فيها زعما ماتوقعتش منك هاد الهضرة، ديك الشوفة اللي كيديرها الضالم للمضلوم الى هضر على حقو وكيبغي يقوليه بيها بنتي على حقيقتك هادا نتا!هي نفسها اللي دارت سميرة فسكينة لاكن الاخيرة من الفقصة قلبات عليها وجهها وبدات ضرب الحوايج اللي فالشبكة مع الماريو وتخبط فيهم لداخل وتكمش وزدحاتو حتى كان غيطيح سدات على حوايجها ومشات رقدات تيشورط وبدات كتصبن فيها بيدها في حين سميرة قلبات وجهها وهزات فخاطرها ومابقاتش كتهضر معاها وغير هازة راسها وكتشوف ومنفخة . هبطات سكينة من السطح للكوزينة نيش لقات رانيا قابطةشعرها بقبط اللور حتعمر اتاي وبداو توشوش هي وياها

سكينة: باش نافعانا كن غا مشات بحالها زايدانا بالفشوش ديالها حتى هي خاصنا نديرو ليها لخاطر لا تقلق

رانيا: بحرقة) انا راه لبسات توني ديالي باش كنخرج خرجات عليه السروال رجع بحال الشواي جيت من لافاك لقيتها ناعسة بيه وتحبب كامل من هنا وتتقب(بين الرجلين) مايصلاحش للخروج ومابقاشكاع قدي..يالاه لبستو مررة وحدة

دورات وجهها ورجعات حمرة كتهضر وترعد بالفقصة وسكينة كتستف لكيسان وتوريها بيديها

سكينة: تمشي تق٠٠٠د منفخة كيحساب لها غنمشي نحزرها .. خراا طلعات ليا فراسي وكولشي كنيدوره بيديينا .. اش كدير هي؟؟ كتفيق حتى للوحدة وتقلب على متاكل .. وكتسناني نخرجها ونخلص عليها الماكلة خلصتها تا على راسي ..كيحسابليها خدامة غادي نصرف عليها

رانيا: سولاتني واش كيعطيوني فلوس المنحة قلت ليها اه قالت ليا هي غتعرضي علينا .. انا باغا نقاد سناني وهي طامعة فيا نعرض عليها كتنسا غير شكون يديها يوكلها الله يستر .. وكل مرة تجي هازة شي حاجة وتقوليا ديالك ؟؟ عجباااتني فنة ..باش نقوليها اناغير خوديها

سكينة:هاااكاك!! عليها كل مرة تجي تقولي منين خديتي هادا منين شريتي هادي؟؟ فنة بشحال .. ايوا انا ماعنديش انا كيعجبوني ولغالب الله.. انا بكري الغالب الله .. الى مارجعات ديك. تيشورط كي كانت النهار اللول ديك الساعة غتشوف وجهه عمرها شافتو

رانيا: ماتجبديش الصدع داب اللي عطا الله عطاه نصبرو حتى يجي با

سكينة:والله وهزات ليا شي حاجة

هاد المرة حتى نوريها

رانيا: مغدورش بيك راه مطااورة قاستليك النبض .. عارفة راسها الى ضارت بيه غتنوضي ليها .. انااللي دارت فيا ما بغات ولاكن خليها حتى تجي مي وغنعاود ليها هادشي كامل باش تعرف اشنو واقع

الحاصول قصص ومواقف طراو فداك الشهر وماتهناو وتفرقو حتى قرب العيد الكبيرعاد مشات سميرة بحالها لدارهم اللي كانت كتكون من امها وخوها ومرتو فقط. ورانيا وسكينة وانس جا عندهم عمهم من خنيفرة داهم يعيدو مع جداتهم وعمامهم حتى للنهار لي غادي يجيو فيه الحجاج ورجعو بحالهم للدار ومعاهم الصغير فعموهم “ميمون” اللي تزوج فداك الصيف وحضرو ليه فعرسو ومرتو اللي طلعات مرى ونعم المرأة ، كانو متوقعين غيكونو غير هما فالدار لاستقبال الحجاج لاكن تصدمو حتى لقاو سميرة فالباب كدق!! جات من اكادير كضحك بغات ديرها ليهم مفاجأة حيت كيحساب ليها غيفرحو وخصوصا رانيا اللي ماخرجاتش معاها للعيب..ضنت ان حتى رانبا غتكون جد سعيدة برجوعها .. سبحان الله كاين شي خلق كيكونو سعدااءع على ضهر شي واحد وكيحساب ليهم غير حيت هوا سعيد ومرتاح حتى داك الشخصبحالو وكيعيش نفس الاحساس.. معارفشان داك الشخص تحملو ديك المدة كاملة وضحك ليه خلاه على خاطرو ماشي حيت فرحان بيه ومرتاح وعاجبو الحال ولاكن حيت ماشي وقح وماعندوش الجرأة يواجهك بشنو كيحسمن جيهتك .. وكيبقا فديك المعاملة الزوينة والضحكة حتى تمشي.. وكيحسابليك نتا واه مساخيش بيك وكترجع عندو مرة اخرى طلع ليه الضغط ديالو ضنا منك انه فرحان بيك وانك مكتسببليه حتى ازعاج بل جلوسك عندو كيونسو وراحتك من راحتو. وهادشي اللي وقع لرانيا.. بالضبط. وحتى سميرة مكانتش من النوع اللي كيدخل سوق راسو، جايا باغا تفوج وتستقبل حتى هي وهاربة من القنط ومن دارهم اللي كانت فحي شعبي بزاف ومقناطة لدرجة لا تتصور ، باغيا تعرفاشنو جابو ولمن عطاو ولمن ماعطاوشوكانت مهتمة جدا بهاد النوع ديال التفاصيل ومابغات تفوتها حتى حاجة ، لولا العيد لكبير لما كانتش غتمشيبحالها اصلا.

مداوهاش فرجوعها واخا صدماتهم فديك الدخلة اللولة لاكن كانو مشطوطين برجوع واليديهم .. مشاو للمطار مع ليلى وراجلها اللي دازت عليهم حتى هي وختها باش تستقبل واليديها وخلاو سميرة فالدار واخا عيا تدور باش تمشي معاهم لاكن حشات ليها سكينة لهضرة بأن راجل صاحبتها غادي يوصلهم والبلايص قلال وفالرجعة غيرجعو مع عائلة باها اللي هم بنات عمو اللي كانو وصلوه ومشاو معاه حتى للمطار وهم نفسهم اللي غيجيبوه ويالاه يتكافاو

الدخلة بالحليب والتمر والزغارت واحساس غريب.. مونية وجعات سمرة بالشمس وجهها سخون وبناصر قرع مافيه حتى زغبة وسمر لاكم النور ساطع فوجههم والبشاشة والضحكة والفرحة لابسين الجلاب فالابيض والشنط.. قبل مايوصلو للدار كانو مصافين كاملين على برا فالمطار دسلا كيتسناو فالحجاج حتى خرجو ومشات سكينة ورانيا كيجريو عند واليديهم وليلى وختها حتى هما كيجيرو عند واليديهم وتم السلام بيناتهم وعاد الوداع ومشات ليلى مع واليديها فسيارة راجلها ورجعات سكينة مع واليديها فسيارة الاقارب ديالهم.

النهار كان حافلوالغدا موجود وخوات الدار فلعشية بقاتغير العائلة اما بنات عمو ورجالهم الليكانو معاهم ورابطين علاق ة قويةمع بناصر ودعوهم ومشاو على لقاءثاني لغد ليه فالصداقةالليغيدير بناصر فالدار باش يمشي يدير صداقة اخرى فالبلادمع حبابو ومو وخوتو فدارو .

بالليل بداو الشنط يتجبدو ويتحلو والكادوات يخرجو .. كانت سكينة فالطرف جالسة واخا بنتو انا رانيا هي اللولة فالمقدمة جنب الشنطة وحداها سميرة جالسة وبناصر بيدو مربع وكيجبدويعزل اللي غيعطي للناس واللي غيفرقفالصداقة . مكانتش سكينة ملهوفة على الكادوات كان عندها فضول تشوف فقط شنو كيجيبو الناسمن الحس.. وحتى بناصر ومونية كان عندهم واحد ك الدوق على قد الحال وباين غير مشترياتهم لبناتهم فالاعياد هادا علاش بقات سكينة كتفرج فالطرف ورانيا كتخاطف هي وباها واللي جبدها تعجبها وتقول ديالي.. مونية عند بالها ختارت ودارت مزية زعما حيت بناصر اللي كيقول ليها ختاري للبنات، عطات لسكينة عباية كحلة فيها واحد الصف ديال النمر قدو قداش بقات سكينة غير كتشوف فيه وترمش وكتسنى يجبدو شي عباية اخرى حسن طري عليها وبقات حاضيةعباية رانيةحتى سمعات هادي ديال رانيا ونقزات عليها خطفاتها لرانياحتى كانو غيدابزو وحلاتها تشوفها ومونية حاطة يد على يد وكتردد

مونية: بحاال بحال غير ماصدعيش راسك

بناصر: امم.. هه درنا بحسابها شي غير باش مادابزوشلينا على الحوايج

طلقاتها سكينة لقاتها بحال عبايتهاولاحتها لرانيا على وجها شداتها بزربةكتفرنس عجباتها .. اما مونية بقات كتشكر فالعبيات وتردد. هادوك احسسسن عبيات اما الشي لاخر غيير ديشي.. هادوك هما اللي زوينين ماعجباتنا حتى حاجة عيينا ندورو رجعنا غير لهادالعابيات

هبطات سكينة راسها كتمم ومرت عمها حداها وشادة العباية رضات بيها وقالت

سكينة: مي وباتساراو السعودية كلها كاع العبايات خايبين عجبهم غير النمر .

مريم:مرت عمها) ولاهيلا زويينة ماعجباتكش اريها

سكينة: لالا خليها

مريم: كضحك ببرائة) فاش طلع ليك فالراس عطيها لي هههه

سكينة: بحب) غنعطيها ليك ههه غير دوز الصداقة

مريم: بصح!!

سكينة: والله.. باشم مايبقاش فيهم الحال

مريم: ايوا الله يعطيك الخير ههه(رجعات حمرة )

الكادوات تفرقو وكل واحد اش جاه فحقو وسميرة جاها دبليج عادي منبت بالعقيق عطاتو ليها مونية ، شداتو لاحتو فالصاك وماقنعاتش بيه وشافت التوابات فالباليزة وبناصر كيفرق وبقات ساكتة حتى دازت الصادقة اللي دارو فالدار مع جيران ودازت الصداقة اللي دارو فالبلاد مع العائلة والاقارب وانفاردو فواحد البيت غير بثلاتة كيتجمعو كأنهم عمرهم تخاصمو. هزات سميرة يدها بتكبر وراتهم الدمليج وقالت وهي كتنقص من قيمتو

سميرة: شنو عاطتني انا.. طمليج كيدير هنا عشرين درهم

رانيا: وهي كتعضم قيمته) لااالا ماشي عشرين درهم هاداك عشرين درهم! والخاتم اللي عطات ليك نسيتيه

سكينة فير كتشوف فيها بنص عين عارفة قيمة الدمليج ساوي عشرين درهم والخاتم خمسة دراهم من الخواتم التقليدية اللي شرات منهم مونية وعمرات واحد الميكة وبدات كتفرق.

سميرة: علاش عمامتك عطاهم توب توب توب للوحدة وشيلان

سكينة: متكية فالارض وهازة رجل على رجل) اصلا ماتلوميش ماما حيت هي براسها غير داها معاها ومكتقدرش تقوليه شري شري شري.. بابا اللي شرا لمن بغا اما ماما غير غادية معاه

سميرة: ماقلت والو ختى انا شديتو وسكت .. نتوما شوفي شنو جاب ليكم عباية عباية للوحدة وتواب

سكينة: شتي انا والله ماقلت ليه جيب ليا واصلا التوب اللي جاب ليا عطيييتو لماما ماعندي مندير بيه مكنفصل جلالبولا قفاطن وما نديروش للكرا اللهم فماما والعباية عطيتها لمريم مرت عمي

حلات سميرة عينيها وشافت فيها مصدومة وقالت

سميرة: اياااه!! سبقتي مريم عليا انا عطيتيها ديك العباية

رانيا: ماغاتجيش قدك نتي طويلة

سكينة: هي اللولة طلباتها ليا .. بلاا مايبقافيك الحال هانا وليت بحالي بحالك حتى انا مابقا ليا والو

حركات سميرة راسها وشدات فخاطرها وكمداتها واخا تحاسبات معاهم ومتعجبهمش حتى هما الحال بقاو كيدورو فعينيهم ويشوفو فيها بنص عين .. هي فالحقيقةعزيزة عليهم لاكن افعالها كيهربوهم منها .

دازت روينة الحج وجات ساعة الحقيقة. بقات سكينة ضاربة الطم ماهضرات مانطقات حتى نزل بناصر يشوف ال حانوت بحال عادتو ويقلب وينبش ودخل كطل لقا العمارية والطيافر والسلعة جديدة وبقا مخرج عينيه كيدور فيهم وسارة كتشوف فيه وحادرة راسها

بناصر: دالمن هادشي هادا؟

سارة: ديالنا اعمي

بناصر: كيفاش ديالنا ؟؟ دسكينة؟

سارة: اه اعمي جابتو من عند واحد النكافة صاحبتها ك عطاتو ليها قدييم .

بناصر: وعطاتو ليها فابور ؟

سارة: لا راه قالت لك غتبقا تعطيها شوية شوية حيت كتعرفها

بناصر: كيدور عينيه) اممممم… ايوا زاحمتو هادشي رونتوه

سارة: بنص عين) كن درتي لينا السدة اعمي حسن

بناصر: السدة؟؟(هز عينيه فالسقف) فين سكينة بعدا؟

سارة: مشات دات حوايج الحنة لواحد العروسة غير هنا

بناصر: خدام ليكم هادشي بعدا ولا والو

سارة: عاد جبناه اعمي سيمانة دابا

بناصر: كيقيس بيدو ويقلب) اممم… (كيهضر بوحدو) باقي صحيح هادشي..بان ليا واقيلا مزال جديد(بصوت مرتفع) مقالتش ليك شحال دارت معاها؟

سارة: لا مقالتش اعمي

بقا كيسول ويبحث وسارة كتعاود غير داكشي اللي حفضاتها سكينة وكدور فعينيها وهوا كيدور بالماتيريال ويقلب فيه ويهز ويحط وبدا كيدور على التكاشط والحوايج ويدور عينيه كيهندس وقال كيتمم

بناصر: هوا فالحقيقة خااصكم السدة.. طلعو ليها لحوايج باش ميتكرفسوش ليكم… حيد لهيه نشوف

كحزها وبدا يعبر برجليها والحانوت كان مستطيل اي يقدر يدير غير نص المحل سدة كافي.. خرج برا وبقا كيشوف فالحانوت ويهندس وكان من النوع اللي كيطير ماكيعرفش يأجل ولا يصبر وكلشي عندو بالزربة . مدام الحانوت ديالو فيقدر يصبح كيف بغا . جاب المعلم للمحل وجلسو يشدو العبار وبداو يهندسو للسدة ويبلانيو حتى رجعات سكينة سخفانة هازة الطبلة دالحنة ومعاها واحد النكافة تابعاها هازة صاك كبير دالفراش دخلو ولقاو المعلم وبناصر كيهندسو ومخشعين ماداوهاش كاع فيهم حتى كملو ومشا المعلم عاد وقف بناصر هاز خنافرووحاجبو وقال

بناصر: درتي داكشي اللي قاليك راسك

سكينة: كضحك) كي جاك زوين؟

بناصر: مزيان.. منين جاوك الفلوس؟

سكينة: ليلى سلفاتني خمسالاف درهم عطيتها وبقات النكافة كتسالني جوج صافي حيت قديم خدمات بيه وقلت ليهابابا اللي كيجمعلياحتى يجي ونقولها ليها.. باش مايديهش شي واحد.. وغير حيت كتعرفني وصافي

قالتها وغطسات راسها كدور عينيها ويدها على نيفها عاضة لسانها وبناصر كيعاود يقلب فداكشي وقال يكتمم بعفوية ويشوف السقف

بناصر: جبدي اش جمعتي هاد الشهر نشوفو .. نديرو لهاد الحانوت السدة بعدا …خدمتي بهاد الماتريال؟

سكينة: كنسيفط النكافات صافي(كدور عينيها) مشيت معاهم غير بالنهار

بناصر: ايوا فيه شي مدخول؟

سكينة: شوية (بنص عين) غدير ليا السدة

بناصر: يالاه اري داكشي نشوفو شحال جامعة بعدا .. غدا غيجيالمعلم يطلعها يالاه سبري راسك

هاكا استقبل بناصر الخبر وماقال والو .. بلعكس عجبو الحال فاش شافها زايدة بالمشروع لقدام وخدامة مكدورش فزناقي كيف كانت ، واخا مكيعرفش فالدومين مزيان لاكن كيتيق فسكينة واخا كيحلف مايعاود يتيق فيها ، وحتى الحج لعب دور كبير فحياتو هوا مونية وتبدلو بنسبة خمسين فالمية، نقص فيه النكير شوية ومونية شدات فالصلاة والدين والقنوات الدينية واللباس الشرعي اللي بالالوان لاكن بدون خمار واحيانا كتلبس العبايات مع الفولارات الواسعين اللي كيغطيو الصدر وحيدات الوقوف والجموع مع العيالات وعزلات راسها وحتى ولادها رجعو كيحتارموها.. وبلاصة مايعيطو ليها مونية حرفية رجع كلشي كيعطي ليها الحاجة وكبرات قيمتها فالعمارة وفالعائلة وحتى بناصر رجع كيوقرها، سبحان الله العضيم تقول كبرو بعشرين عام اخرى فالعقل ديالهم بسبب الحج اللي حجو رجع كل واحد فيهم راد بالو باش ميضعيش الحج ديالو ، حتى الغضب والاعصاب نقصوحتى الصدع فالدار نقص والاوضاع تهدنات نوعا ما تقول كان شيطان فديك الدار عايش معاهم وخرج .

من جهة سكينة كلشي هوا هاداك كلشي مزيان وماجبد ليها لا حسابات ولا والو وكأنه وجعات عندو قناعة ومابغاش ياخد الروجيستر ديال المحل وخلاه خليها ماجبدش عليه الهضرة. حدها عطاتو الفلوس بينات ليه فلوس الكرا بوحدهم والربح كان قليل فديك البدية ومكانش كافي باش يبني ليها سدة. بناها بناصر من حر مالو واخا مكيعجبوش يصرفعلى شي حاجة اللي كيتسنا منها هوا الربح والمدخول لاكن زطم وقال نبنيها لعل وعسى القادم غيكون افضل واحساسو كيقوليه الاوضاع غتقاد والمشروع غيرجع يوقفعلى رجليه كما كان وحسن مادام سكينة نزلات ليه ومابقاتش حشمانة من الناس ومخشية فالدار بسبب التوكال.

كانت كدوز كل نهار وهي فطريقها للحانوت على واحد العمارة فيها دار ديال واحد المدرسة ديال التصاميم صغيرة لاكن عصرية . . وواحد النهار قالت ندخل نسول وكانت معاها رانيا اللي تلاقاتها فالطريق وداتها تونسها ، لحد الان مافخبار سكينة والو على قصة رانيا مع هشام واي كلمة كتقولها رانيا كتربطها سكينة بالدين اللي تدينات رانيا . مشاو بجوج شافو المدرسة لاكن الثمن مكيشجعش !! كانو فيها غير شي ربعة كيتعلمو البلدي وكثرة الهضرة والشيكي على والو وحتى الموضيلات اللي معلقين خادمين عليهم ماشجعوهاشباش دير مجهود وتدخل وشافت راسها كتصمم حسن من داكشي اللي معلقين فالعلاقات ديال الفاين وجوج . خرجات بحال وكتميع بفمها وشادة فرانيا وقالت

سكينة: ندخل نتعلم باش فاللخر تعلمني كيفاش نصمم ديك الدربالة اللي معلقة وجالسة تشرح ليهم عليها!!.. وغالية من لفوق مالها على داك الثمن

رانيا: بضياع) الصراحة حتى انا بغيت تدير الخياطة.. كيقوليا راسي شدي المنحة اللي غيعطيوك وتقيدي بيها تعلمي الخياطة حسن ليا.. ( بحماس) الصراحة البنت ولا المرى احسن ليها دير حرفة وماتخدمش خدمة تبقا تفيق ليها مع النبوري بحال الراجل ويولي عندها توقيت متحكم فيها… الى درت الخياطة وتعلمت نخدم غيير من الدار ونقدر كااع نصايب بزااف ديال بياسات ونبيعهم ونفيق فوقاش بغيت ونعس فوقاش بغيت

سكينة: بحماس) نخدمو انا وياااك!!! الصراحة ماعندك ماديري بلافاك اجي نتعلمو الخياطة ونخيطو رااسنا ونقابلو الحانوت بجوج

رانيا: حتى الو تزوجت بعدا ومشيت لشي مدينة اخرى نلقا راسي فيدي حرفة نخيط رااااسي نتبررع حوايج

سكينة: لاالا باقي الحال على الزواج

رانيا: غير قلت ليك زعما .. تخيلي دابا تزوجي وتبقاي تفيقيمع النبوري توجدي الفطور وتفطري بزربة وتمشي كتجري للخدمة ونهار كااامل ونتي برا وترجعي للدار عاوتاني كتجري وطيبي العشا وتعشاي وتنعسي ماتشوفي راجلك ماتجلسي معاها مايجي يلقاك فالدار .. خرجنا على الفطرة ديالنا حتى ولينا عايشين الستريس ومابقيناش عايشين السعادة كااع وكتفكرو غير فالفلوس .. مكنستكتعو بالحياة مكنعيشو الطبيعة البشرية.. المرى بلاصتها فدارها ترتاااح وتشبع راحة والراجل واجب عليه يخدم ويجيب ليها تاكل ويلبسها ويسعدها .. هادا واااجب عليه .. هي تبقا غيير جالسة فدارها وكولشي يجي حتى اعندها

سكينة: بمزحة ) الواعرة هي تزوجي ونتي فارضة هادالفكرة هادي على راسك وعلى داك الراجل فاللخر ماتلقاي لا ماتاكلي متلبسي هههه

راينا: أ لااا.. واااجب عليه خصو يديرها شي

سكينة: الى مادارش؟

رانيا: لالا خصو يدير هادا هوا الزواج الصحيح

سكينة: انا اختي مانطيب ما نوجد ما نسيق مانزمر .. نفيق اختي بكري ونمشي نخدم وندير الفلوس ..الفلوووووس احبيبة انا الى مادرتش لاباس نتسطا ..

رانيا: طلعات ليا لقرايا فراسي كن كنتي بلاصتي عاد غتفهميني… حتى لعشية ونقول لبا ندخل نتعلم لخياطة .

هما راجعين من للدار ودازو حدا المحل شافو الماء خارج من الحانوت والماتيريال على برا كامل.. قربو كيطلو لقاو بناصر لداخل بوحدو وداك النهار كان نهار العطلة ديال سارة وسكينة اللي كتجلس بلاصتها .. كان بناصر مكفض سروال سورفيت وصندالة دالميكة كيعفس فالماء وشاد واحدالحلفة وكيحك المرايا . غير شافهم كان غيبزق عليهم وحشم ورجع شاف فيهم شوفة مقرفة كيحك وقال

بناصر: ماتقدرو حتى دوزو على هاد المرايا حالتها مايشوفش فيها الكلب

رجعات سكينة اللور ورانيا كترمش وهوا كيسيق ويخيو الماء

سكينة: انعاونك

بناصر:غير بعدي مني ماتعاوني مانعاونك ساليت

رجعات اللور ويدها على فمها كتشوف فيه كيخرط رجع المحل كيشعل والسدة مبنية ودار ليها الدروج فالجنبحدا الحيط وكيمسح درجة بدرجة ويقاد ومكفض تقولغير مرى حادكة .

بناصر: والله كن انا بلاصتك حتى تشوفي شندير فهاد الحانوت ..

سكتات سكينة بقات غير كتشوف فيه وهزات كراطة جرات الماء من قدام الحانوت للقادوس وعارفاه ماكرهش هوا اللي يخدم .. عزيز عليهم المحل وعاجبو وقاد ليه الطبقة الثانية من داكشي وكينقي وماكرهتش هوا اللي يخدم بلاصتها من شدة حبو للعمل والمال الحلال وكسب للزبناء وكيوريها اش دير وينكر

بناصر: بحماس وجدية) جات عندك لعروسة قالت ليك بغيتك تصاوبي لي.. قوليها مرحبااا.. شحال ما عطاتك ماترديهاش .. عطي لمها شي تكشيطة تلبسها اللهم فمها ولا تبقا معلقة هنا عا كيفاشكيديرو الناس باش يديرو كليان ويربحو الفلوس..ونقي محالك ونقي الماتريال( تحنا كيمسح الطيافر) خاصهم يكونو كيشعلو مادورش هنا الغبرة يبان هادشي مكرفس يتقيا منو الكلب

سكينة: تغبر مع الاصلاح وصافي

بناصر: بخفة وغضب) هااا الميكااات.. هانا شريت الميكات قد السخط لويهم عليهم مايبقاوش عريانين بلا ميكات .. منهم يبانو جداد للناس ومنهم يبقاو نقيين ماتخلي حتااااا حاجة عريانة راني مسحتهم والله ونعاود نجي نلقا هادشي مرون حتى نضبر معاك

دخلهم كينكر ويهزو معاه الماتريال فالدروج طلعوه للسدة ستفوه مغلف بالميكات وبقات العمارية بوحدها حتى هلي خلفها بغلاف شفافيحال بحال الورق بانت جديدة وضرب ليها مسحة من داكشي وقادوها بلاصتها وبداو يعلقو الحوايج وهوا كيفلي ويقلب داكشي واللي لقاها مسخة كيسمعها الهضرة وينكر بالغوات

بناصر: مالامحدددش ماتعلقيييهش.. مورروسخة؟؟؟ نديها للمصبنة … مانعلقش انا اللبسة محيداها شي وحدة خانزة بالعرق ونعلقها.. اش كديرو هاا كتقيلو جالسين ديك سارة الى مابغاتش تخدم وتقابل شغلها تمشي عليا بحالها

حدرات سكينة راسها ساكتة وهوا كينكر ويقلب فجيابو على الصرفلاحو على رانيا وقال

بناصر: سير جيبيشي معطر من لحانوت نرشوه هنا

شدات رانيا الفلوس ومشات كطير وبقات حدا باها واقفة حادرة الراس كتمسح المجوهرات وتستف فطاسات ديال البلاستيك وهوا كيدور عينيه من بعد ما برد ورتااح نفسيا وهوا كيشوف فداكشي نقي ومستف وراحة نفسية فالمحل عاد ضار هاز حاجبو شاف فيها وقال

بناصر: طلقي ودنيك دابا مزيااااان ..

سكينة: بتركيز)هانا

بناصر: المحل راني شريتو من عندو مولاه.. ولاكن ماتفرحيش بزااف.. غادي تبقاي تعطيني تمانين الف ريال فالشهر بحال الى راكي كارية.. وضبري راسك ماتقوليليا لا خدام لي لا ماماخدامش.. ياك فلوسك اللي جمعتي عندي عطيتهم ليك.. والسدة درتها ليك ماتحاسبتش معاك فيها.. وكولشي دابا واجد عندك… ايوا فاللول الشهر تخلصي اللي عليك ..غنجربك هاد العام نشوفاش غاديديري

سكينة:بحماس) ههه ان شاء الله

بناصر: الى بديتي كتهاوني غنرجع نهز داك الكتاب ونخلصك كيفك كيف الناس

سكينة:لالالا منتهاونش

بناصر: غير باش تعرفي.. الى كريتو راه يجيب كتر .. دابا مابغيت منك والو بغيت تخلصي لكرا بحال الى راك راك كارية عند البراني.. البراني ومغاديش يصلح ليك الحانوت ويعطيه ليك واجد

دخلات رانيا لقاتو مبرد وسكينة كضحك فرحانة وتحمسات بقات كدور فالمحل عاجبها الحال وقالت كتفرنس

رانيا: حتى انا بغيت ندير الخياطة حسن من لافاك

ابتسمت فاش قالتها وسكينة عاجبها الحال ،، اما بناصر حرك ليها راسو كيضحك ويدور عينيه وقال

بناصر: اييه ديري الخياطة … مالك مايديريها

شافت فسكينة وعجبها الحال وبناصر غاد جاي كيشوف الحوايج وتلفت ببرودة وقال

بناصر: علاه نتوما وجه القرايا؟

جمعو الضحكة بجوج ..رانيا طلعات ليها الحمورية دغيا اما سكينة هبطات ورا البيرو دارت راسها كتقلب وبناصر كيتحرك ويقيس الحيوط والحوايج ويراقب

بناصر: نتوما ماشي وجه القرايابحال ولاد الناس.. نتوما ديال الجفاف، الى مادرتش ليكم علاياش توقفو وباش تزيدو ماتزيدوش.. اما باش تمشي تقراي لقرايا ديالك اللي فاااابور وتشدي. يبلوم وتخدمي بحالك بحال سيادك ..وبحال البنات اللي راهم كي خلو بالبادج سايقين الطموبيلات والبو٠٠٠ليس فالباب كيضربو ليهم السلام ..والله الباريير ما تهز ليك دوزي وماكنتي بالبادج ديالك وباللبسة كي سيادك اللي شادين البيروات وكيتخلصو . نتي بغيتي ديري لخياطة ديريها .. وجهك نيت ماشي وجه شي خدمة وشي صالير .. (دور وجهه باللور شاف فيها) بزاااف عليك باش تكوني موضفة..سمعتي..بزااااف عليك ..ديك الخدمة كيدخلو ليها غيير اللي كيعرفو ليها اما نتي سهمك ضربي الجفاف..وحتى ديك الخياطة بزاف عليك(جا خارج وكمل كلامو) غدا منشوفكش غادية لافاك كتسمعي.. غتشدي الركنة حتى يجي شي راجل خاصو المرى طيب ليه وتعجن ليه ونعطيوك ليه يديك ديك الساعة ديري الخياطة ولا ديري اللي عجبك عندو ..انا بعدا عندي غديري داكشي اللي بغيييت اناااا.. سمعتي..يالاه الله يعاون

نهاية الفلاش باك.

ليلى: للنادل) شكرا (شافت فسكينة) اهااه!! ورانيا شنو دارت ديك الساعة؟

سكينة: كتحرك العاصير) صافي غرقات فحوايجها ..شي مرات كيجيني بابا عندو الحق .. كنحس بيه بحال داك المعلم اللي شاد لينا العبار فاش كنميلو.. فراسك عمرو غسل لودنين لراينا مولف يغسلهم ليا انا وهي كتسمع.. هاد المرة غسلهم ليها هي وغسلهم ليها مزيان.

ليلى: بقااات فيا… (تكات على ضهرها بالمايو) كتجيني ضريفة وداخلة سوق راسها وكتحشم بزاف..كن غير جبتيها لابيسين اصاحبتي بقايتخرجيها معاك غتعقد هاكاك

سكينة: كدهن شعرها) مكتبغييش.. شاافتني كنجمع صاكي وعارفاني غادية بلابيسين وبقات كتميع فيا كنجيها فااجرة هههه.. مكتفتاخرش بيا ههه حسابني غتفراااح فاش نشري طموبيل. زعما وتفتااخر بيا ساعك هي لا مكترضاش بيا هههه ..كطيرني

ليلى: مالها على حالتها اختي !! صافي دارت لحيجاب ماتشوفش الشمس

سكينة: ايييوا ياختي هادشي اللي عطا الله.. مابقيتش كنتجمع كاع انا وياها .. هي فجيهة وانا فجيهة .. كل واحد كيعوم بحرو

ليلى: على الاقل دير صحابات !! تخرج معاهم تنفس.. بقاي تخرجيها معانا لكافي تطلق شوية ماتبقاش منطاوية

سكينة: مابقاتش كضحك!!! فراسك !! حتى حاجة مابقات كضحكها كولشي كيجيها تفاهات!! معقولة لواحد الدرجة ماتصورش

ليلى: الله ياختي لابيسين خاااوي ليوم … احسن حاجة تمشي ليه وسط سيمانة

سكينة: زادو فيه اصاحبتي صلت ميات درهم للدخلة مالهم عليها

ليلى: بلعاني دايرينها باش ميدخلش ليه بوزبال .. عليها ديما خاوي فيه غير صحاب العياقة ..شوفي هاديك كتعرفيها.. انفليونسور ..كديرهم اشهار زعما ..خدامة كتعوج وداك لاخر حتى هوا كيصورها

سكينة: دورات وجهها ) اااه… عرفتها

ليلى: كتأمل) كنزة تا هيا كتعووم من نيتها

سكينة: فرمتها واش مقاداها؟

ليلى: لاالا هي مبطبطة ههه

سكينة: كتبان بحالا معمراها

ليلى: هي هاكاك .. هاهيا جايا..ضربي على الطرف كي كتهز فيه وتحط مسخوطة

كنزة:وقفات قدامهم كضحك) كتنممو فيااا هههه

سكينة: والله تا كنممو فيك

كنزة: عرفتكم .. (تكات حداهم) الله اختي على عومة .. ماسخييتش.. قاليا مننوع دخلي بالكاش فلابيسين قلت ليه هي اللي ماتعاود

ليلى: سكينة تعلمتي تعومي؟

سكينة: من ودنيا!! انا يالاه صفا ليا لحمي الحمد لله ياربي

ليلى: شتي.. كن ما دوا القطري كن بقيتي مبرقعة

سكينة: واييه… دار معايا زوين.. بريهيش حتى هوا قالك جاي سالت .. مقالش لدارهم غادي للمغرب قاليهم غادي لتركيا

كنزة: اااه اه بصح كيديروووها هه

ليلى: واايلي!؟؟ وعلاش؟

كنزة: عندهم ديك الفكرة ديال المغربيات ما المغربيات .. يجي يطيروه ولا يسحرو ليه ..خصوصا العيالات ديال الخليج كاملين .

سكينة: داكشي اللي قاليا حتى انا باه مابغاش قاليه حتى تكبر ومو قالت ليه نون كحل لعيون .. جا هوا دار ليهم خاوية فعامرة وداز على تركيا وجا ..عندو واحد عشرين لبريهيش .. باغي غا يزهى

ليلى: ونتي دوزتيه لبيبيش هههههه

سكينة: وعجبوووو الحال.. احسن كادو عطيتو ليه قاليا عجبني البروكرام هوا وصحابو

كنزة: الى عمرو جرب داك الهيت غادي يعجبو .

ليليى: بيبيش كوراه دعات معاك تا شبعات

سكينة: جيتها من اللخر..قلت ليها الباي ديالي تعطيها ليا ..كما كانت كدير لينا هي ..قلت ليها غتعطيني كدا وكدا .. تاانا نيت باغا باش ندوز الصيف علاش نخسر فلوسي فالخاوي

ليلى: من حقك .. كي كدير ليكم ديرو ليها مالها فاش جاتها

سكينة: داكشي..تا انا شريت تيليفون بعدا ناااضي واخا خسرتهم فالتخربيق مهم هانا مدوزة الصيف..تكسيييت بعدا غرقتها شراوط وضربا ليك تيليفون اخر مكاين وفين مابغيت نمشي نمشي

ليلى: بمزحة ) خفتي تكسي طموبيل بفلوس لحرام وتخشا بيك فشي حيط هههه

سكينة: واييه… طير البركة .. هاديك شيري كيكي اللي كانت عندي فالارل كنطلق فيها يدي ماكنت كااع كنتسوق ليها دخل حتى فشجرة… هادي لا كنخاف عليها اختي حبي هاديك

ليلى: ضارت عند كنزة. كضحك) وقفات بينا واحد المرة فواحد الهبطة والشتا اااا حصلنا حصلة دالكلاب وهادشي كامل حيت سكينة مكانتش كتعرف امتى دير ليها ليصونص وامتى مديرشحتى وكحات وبقينا حاصلين

كنزة: ويلي ويلي وشنو درتو

سكينة: داز واحد الدري بالموطور شيرنا ليه هوا اللي مشا جاب لينا ليصونص وجا عندنا عمرو لينا وكملنا الطريق

ليلى: وطلب ليعا النمرة بغا يتصاحب هههه

سكينة: حشمت نردها فوجهو حيت دار زوين وعطيتها ليه

كنزة: حتى وقفات بيا واحد الخرشاشة انا وواحد البنت فالليل فالخلا بقيت كنترعد قلت ليها الى وقف علينا شي شمكار بلا مايدوي غنضور ونتقاد ليه ونقول ليه هانا غا متخصرش ليا وجهي

ليلى: ناااري اقود حاجة توقف بيك طموبيل اموبان وبالليل وفالخلا ونتي بنت من الفوق.. (ضارت عند سكينة) عقلتي نار وقفبينا الموطور فعين عودة فالطريق مع لحداش ليل …هيييه البولة طلقتها بالخلعة كنقول دااابا غيجي شي واحد يتوزنيانا وياها مع شي شجرة .. ماعندناحتى فين نتخبار

سكينة: والبرد والصميقلي.. تفووو.. الحمار اللي عطاه ليا مقالش ليا فيه غا قطرة ويسكت ..حساب ليه انا ملعقة غنمشي نعمر ليه ليصونص

ليلى: وانا تابعاك وتعطلت لقيت باباكيتسناني فراس الشارع .. بالخلعة ماتعشيتش ديك الليلة بغيت غا نعس

سكينة: انا كليت فيها قتلاااا.. ركلني بابا فالزنقة وكاع الشماكرية ديال الدرب مقنتين فالليلكيتفرجو فيا كناكل العصا ههه.. مانساهاااش

قالتها وتكات كتستمتع بالجو دلابيسين اللي من بين المسابح الفخمة اللي خارجين شوية على المدينة ومننوع فيه الاطفال والمحجبات ومخليينو للسياح واللي كيبغي يشرب.

كانو جالسين على سرير كبير من وحي الطبيعة تفارضو فيه باش يشدو احسن بلاصة يجلسو فيها ويشبعو تصاور ومايحضيهم حد ..البيتزا محطوطة والمشروبات وجالسين كيتجمعو ويضحكو

ليلى: راجلك ماعندوش مشكل تمشي لابسين مع البنات؟

كنزة: قلتها ليه .. قلت ليه غير سكينة وليلى

سكينة: ونتي ماكيقوليك والو ؟

ليلى: كنجيو لهنا غير هوا قاليا زعما نمشي انا وياك

سكينة: شكون كيخلصنتي ولا هوا ؟ ههه

ليلى: كل مرة شكون .. ماعندناش ديك القضية ديال وااحد اللي يخلص.. الى عرضت عليه كيعرضعليا والى عرض عليا كنرجع ليه عراضتو وهي غادية.. هاكا باش منتقهر لا انا لا هوا حيت باش تخلصي ست ميات درهم فكل خرجة بجوجنا بزااف على واحد.. مرة نتكا عليه مرة يتكا عليا

كنزة: انا ماتجينيش نخلص على راجلي

ليلى: انا عادي.. حيت شي مرات كنبغي نخرج لشي بلاصة مكيكونش عندو فديك اللحضة .. وانا بااغا نخرج!.. يا اما نتسنا حتى يتخلص ويكون عندو ونبقا جالسة فالدار ولا نخرجو ونخلص انا ولا نخلصو بجوج.. نميزي غير فليزاكتيفيتي..اما المصروف وداكشي لاخر هوا اختي كيدير كولشي ..الما الضو لويفي الكرا كاع داكشي

سكينة: فراسو الدار فين عندك صالون ديالك؟

ليلى: فرااسو.. واحد بنت عمتو شرات دار وعرضاتنا وجلسات تفوح عليا وراجلها جالس كيقول لهيتم مكاين ما حسن من دارك الكرا ما الكرا وكيعبر ويعيق عليه ..واحد الجلاخة كيموت على الفوحان وخدام غا فسنوطر دابيل فتيكنو بوليس هوا مرتو .. بقات عليا زعما كتفقصنييي

سكينة: قولي ليها راه عاااندي داري

ليلى: بالنفي) مانقوليها ماتقوليا حياااتي نعاود لكري

كنزة: وراجلك مالو ماشاريش دار؟

ليلى: لا.. معارفينش فين غنجلسو كل ومرة مسافر شي مرة يصدق مستاقر فشي بلاصة ..ختى نشوفو اش نديرو ..حنا يالاه باديين معارفينش فين نرصيو عايشين وصافي

سكينة: حسبو راسكم مصاحبين ههه

ليلى: داكشي اللي كاين .. فلحلال هههه (شافت كدور راسها) ايييه البنت الحرام مشييتي كليتي الحلوة ماخفتيش يفرعك

سكينة: كتأمل قدامها ) اأااننأ.(بالنفي) المهم عشت الحياة

كنزة: كتجمع شعرها ) هااديك.. عيشي اختي عيشي.

ليلى: ماعارد عيط ماتوحشك زعما !! حطك حطة وحدة!!

سكينة: يحطني ولا يهزني انا تصاحبت معاه جربت وعشت وتبرررعت .. واخا ولد الطحبة مق٠٠٠٠د هادي اللي غاتديه غطيح فيه عمية

ليلى: على ماعاودتي اختي غطيح فيه هههه ..يعطيها واحد جوج طحنات تقال تعقل عليهم صافي تقوليه نتا الحياة .. ولااد الحرااام كيعرفوووو يطيحو البنات .. كل وحدة كيجيوها من الجهة اللي كتبغي

كنزة: واييه.. الى كانت شي وحدة كضرب الحلوة مجربة كيجيوها من جيهة النعاس.. فالنعاس يبرررعها تا تقول لموت هادي والايام العادية يدفع عليها كبير ويتعفر ويتنفخ

سكينة: وابحاال كي كان غالي بغا يدير ليا.. ساعا طاح مع افريقيا ..الجفاف ..واخا كنت كنقوليه تقب تقب هههه

ليلى : ااااهههههه غنبول

كنزة: كن تقبك!!!

سكينة: المهم هوا المشاركة ههههه اصلا مغنتزوجش يتقب ولا يجلس..كورااااني كندق عليه مرة مرة نقوليه خويا شي كوية عفاك … ولا نبقا مصاحباه معاه منتفارقش معاه

كنزة: والى بغا يتزوج ؟

سكينة: الله يسهل عليه ديك الساعة… الصراحة كان عزيز عليا قلال اللي فحالو .

كنزة: بتذكير) ناررييي شنو تفكرت.. (كحزات عندهم بحماس) سمعو سمعو نعاود ليكم هادي.. فاش يالاه طلقت تصاحبت مع واحد الكربوع عرفتي تشوفين تقولي هنا نبات.. مهم ضبرنا واحد الشهير مشيت نبات معاه دخلني واحد الدخلة نارييي.. عيفنييي ..

ليلى سكينة:بحلاش هاد الدخلة ..نتعلمو

كنزة: حل عليا فمو مع السلام عليكم ماشي قرب ليا قاسني قاليا كليمة .. السيد شلقني ولبزني مع الحيط السوو ديال السيكس .. اللهفة مع الجوع مع ماعرفت اش نعسنا السيد باغي يجيو دغيا وتلف كيزرب فاش بدا يمشي ويجي بدا كيضروب فالناموسية هههه ساط ساط ساط عينيه تقلبو وحل فمو عيفنيييي… تفووووو…

ليلى: قلبات وجهها)تفووو

سكينة: يعععق..اوييلي هادا تسطا

كنزة: ليلى بالرجولة عمرك شفتي فعينين راجلك فاش كتكوني ناعسة معاه ؟ مكيتقلبوش عينيه؟

ليلى: ارييلي لااالا والله مكيتقلبو كاع اويلي

سكينة: باستغراب) حتى غالي مكانش كيقلب عينيه

كنزة: ضرباتها الفخد تتوكض) وراه كاين اللي كيقلب عينيه.. وكاين اللي كيعطي على مو وعلى عمتو وعلى جداه تفكو .. كيبقا مي مي مي مي هههه

ليلى: ديك الساعة قولي ليه مك لا مك لا مك لا هههه

سكينة: ناااري على مكاريب

كنزة: والله تا كنتهضر بصح.. دابا هادا اللي تزوجت بيه كيبعبع ولاكن ماشي بديك الطريقة الخايبة..عايش وصافي.. اما كاين اللي كيبدا يقطر عليك العرق.. كينسااااو راسهم كيبان ليه غا جاي كيجري .. ها اللي كيعطيك على الصاليحين ها اللي كيقول الله الله… هههه

ليلى: هاوييييلي ههههه غادي تهربو ليا

سكينة: اويييلي!!

كنزة: كل واحد وحالتو قليل تلقاي شي واحد عارف اش كيدير

ليلى: تما فين كيبان طبعو الحقيقي ههه اصلو وفصلو وشخصيتو ههه

كنزة: فوااالا دابا فهمتي لبلان

سكينة: تفوو عيفتوني(رجعات دورات وجهها) ولاكن الصراحة بنين.

ليلى: بمزحة) خاصنا نعبرو ليك الدودة اسكينة

سكينة: والله ماكرهت شي جلسية مع الاكس.. اختي شي بييسة وشي تشلقيمة من دوك شنيفاتتت امممم ياسلام

ليلى: بمزحة) بدلو بدلو الموضوع غتسخني ماعندناش تا كنديرو نبردوك

سكينة: غنمشي للدار نضربها بشي تكفيتة وطيح نعس وبيييخير ههه

تقلبو بالضحك وهي كتمسخر عليهم حتى تفشو وهزات كنزة الراس وقالت

كنزة: عليييها بدرتي من جيهة الدراري المسخوطة

سكينة: اختي هادا هوا الحل(تجبدات على ضهرها كتفرنس)

ليلى: عضات شنايفها )عرفتي الى ولفتيها المسخوطة .. غتكلخي

سكينة: ماشي دييييما ..مراا مرا .. حسن ما نتصاحب مع الكلاب

كنزة: فراسك شنو غيوقع ليك.. غتقصاح ليك الكرش وغتهز ليك الترمة ويتشدو الفخاد غتزياان ليك الفورمة ولاكن عولي على الضهر غيبدا يضرك ولبى تزوجتي غتلقاي مشكيل .. ماتقديش تعيشي الحياة الجنسية بلا ماتحركي يدك ولا تخايلي بدماغك حيت غتعودي عقلك على لخيال

سكينة: مغنتزوجش اصلا(دارت النضاضر)

ليلى: ها حنا غنشوفو

سكينة: برااكة عليا نلبس العرايس ونحط ليهم التاج على راسهم ونفرسكهوم ونحضر فعراساتهم..(حيدات النضاضر وتكات على جنبها) والله منكدب عليكم البنات.. فاش كنشوف شي عروسة مسكينة فوق العمارية فرحانة كتشالي كتبقا فيا

كنزة: دابا نتي ماكرهتيش زعما تكوني فبلاصتها

سكينة: انااا!!! لااالالا اختي عمرررني تخيلتها.. خاصكي تشوفي الصباااح فاش كيصبحو جايبين ليا الكسوة دالعرس .. هوا مخنزر وهي مبوقة بالنعاس .. ولا فاش كتجي شي عروسة عندي دييجا نكفتها وجايبة مسكينة ختها ولا صاحبتها ومردفة ولد ولا بنت ولا دافعة كروسة وحالتها ويامها .. خلييني اختي ساكتة .. كنشوف العرس كيفرحو فيه غا العائلة ..مسكينة خاسرة فلوسها ومسلفة باش تجمع عليها البشار وطلع فالعمارية وتشالي بيديها .. هادا هوا الحلم ديالها ..نركب ونشالي بيدي!!

طزززز… نشالي بيدي من طموبيلتي والريح كيضربني حساان ليا ما نشالي من العمارية لبوزيال مكجكج عليا..ولا نشالي من شي دولة بشي تصويرة مقودة من شي جبل ولا شي اوتيل

ليلى: فهادي معاك .. الصراحة كيتكرفسووو مكيحسوش بالعرس.. بلا منهضرو على الستريس دالعرس والزربة ..لعروسة مسكينة كتوجد لليلتها العام كامل .. وكتجي العكوزة مزروبة تقولينا سربيو دغيا ندوزو هادشي نمشيو بحالنا .ماضربيش مها هادي

سكينة: واييه.. خاصهم غا يدوزو .. المهم دوزو دوز ودوز ماشي يعيشو اللحضة يتمتعو بيها.. دوزو العشا دوزو الحلوى دوزو اتاي.. جري عليا نجري عليك السلامة ياربي..كتسن شي عراسات كيدوزو بحال السربيس.. وكاااين شي عراسات عاوتاني كيدوزو زوييينين مهدنين بييييخير..العريس فرحان العروسة فرحانة على خاطرهم وبشوية عليهم ..

ليلى: دابا رانيا غدير المكياج ولا حتى ماديروش؟

سكينة: رانيا باغا طير.. لسقات على هاد هشام هاحنا غنشوفو هاد هشام كي داير

ليلى: كي دار باك قبل ليها؟؟؟ لعجب

سكينة: بابا شافها باغاه قال نسايس .. مانديش دنوبها .. ولاكن شرط عليها ماتعقد حتى دوز عماين .. عاد يديرو لعقد هادا هوا الشرط ديالو .. يخطبها ويديرو خطوبة كبيييرة بغا بابا يكبببر الخطبة حيت غطوول المدة ..حتى تكمل من لافاك عاد يديرو العقد.. راك عارفة بابا كي داير بلا منوصف ليك (كدور راسها)

ليلى: وهانتي راه مسايس مع رانيا.. عزيزة عليه واخا هاكاك

سكينة: دابا غادي يجيو يخطبوها وصافي نشوفوهم ويشوفونا .. عاد نديرو خطبة كبيرة..كان قاليه يسكنها بوحدو ..ايوا دابا راه وافق يدير ليها دارها بوحدها

ليلى: هضر مع باباك؟

سكينة: غير فتيليفون ..حتى وافق عليه عاد غيجيو ..بلا متعولي تماكي لرانيا ههه

ليلى: ناااري كتبقا فيا…واش مكتشوفش راسها فالمرايا؟؟ ااااية من الجمال اصاحبتي يتمناها اي واحد

سكينة: بنت عم بابا اللي كانو جابوه من المطار فاش من الحج عقلتي عليهم .. لابااااس عليها شي لعباااا حتى هي من المسؤلين زعما.. كانت لمحات لبابا على رانيا بغاتها لولدها وهضرات مع رانيا بغات تشوف ردة فعلها وصافي ماشي هضرات معاها نيشان.. لمحات ليها ..ولاكن رانيا ماعطاتهاش وقت ..بينات ليها باللي مابغاتش واخا جابت ولدها المرة الثانية عندنا باش زعما نتعرفو عليهم وكدا ..وطلب النمرة من رانيا باش يشوف واش حتى هي مستاعدة بلا ميعضرو مع بابا ويرفض ولا رانيا متبغيش ويصدقو مرفوضين وهما عزيييز عليهم بابا مقطر من عينيهم واخا بنااات عمو ..وبابا كيموت عليهم ورجالهم كيديرو ليه كي الما القليل..كيدورو يدوزو ويقولو لينا باباكم هوا الاخ الكبير ديالنا مانساوش اش دوز معانا فالجبل.. عاااقلين على الخير حيت كان كيحملهم وحدة وحدة ويقطع بيهم الواد فالشتا فاش كانو كيمشيو يقراو فالجبال.. دابا عندهم علاقة قوية معاه ..ولاكن الحمارة درانيا تنفخات وحتى هما تراجعو ونساو الموضوع ومشا تزوج واحد البنت اخرى

ليلى: ناااري الفقصة

كنزة: انا ختك كن كانت ختي نصفيها ليها

سكينة: عندو ختو وحدة فميريكان صافي ولاباس عليهم ومن العائلة..وهي لاسقة فهاد هشام د٠٠ب هاحنا غنشوفو شكون ..باغي يسكنها مع باه ..كن ما خرجش فيه بابا عينيه.. انا بلاصة رانيا نكفت كل نهار ومانفكرش فالزواج

من جهة رانيا غطير بالفرحة وكتوجد للخطبة ديالها من قلبها هي ومونية اللي مشاركاها فرحتها ، ماشي شي توجاد ولاكن النفسية كتيهأ راسها قبل كل شيء ، الاجواء فالدار زوينة وبناصر شرا الزربية جديدة على قبل الخطوبة والتلامط جدادوالريدو وداكشي مورد فالموف واللوينات وداكشي اللي كيجيه على قلبو ، اما مونية مضروبة على اللون الاحمر ،، هوا اللون المفضل عندها ماكرهاتش ترد الصالون كامل فالاحمر مشعشع عكس بناصر اللي عزيز عليه قوة الالوان والتخلاط وكيتخدل فالصغيرك والكبيرة حتى من فراش الدار و ماعن الكوزينة .

شهر تمنية وشهر لعراسات،،وكانت ديك السنوات من اجمل السنوات اللي عاشتهم سكينة ،، الحرارة كولول والعام جا سخون والعراسات على الجهد فالقاعات فالخيام فالديور فوق السطوحة . وكانت سكينة فعز العطاء وكولشي ساق ليها الخبار دارت التنكاف، وباش تعاود تكسب كليان وتنفي ديك الاشاعة ديال السيدا ناضت لبسات خاتم رقيق وطلقات اشاعة الخطوبة ومع كانت معروفة كي الدرهم وسيرتها ديما على كل لسان عاردات الاشاعة الجديدة نتاشرات وكترو عديانها فالحرفة اللي دايرين مجهود يقتلوها فالميدان وينفيوها .. كانت ديما كتلقا الرش حدا باب الحانوت والحروزة فالركاني. عاشت مع محاولات السحر قصصلا تعد ولا تحصى حتى ولات حافضة القاعدة لاكن اللي كانت كضربليه حساب اكثر وتخاف منو هوا التوكال ..لدرجة مابقاتش كتاكلمع حتى واحد وفقدات الثقة فالقريبوالبعيد ..فالصاحب والعائلة، مابقاتش كتيق بثاتا ورجعات عندها فوبية من الماكلة مع شي واحد وكتبدا تاكل وتقفقفه خايفة دوز ليها شي حاجة عاوتاني وهي مزال معدتها ماستاقراتشبلاصتها واخا لحمها برا ورجعات كي كانت وربات الصحة براحة البال والفلوس والخدمة والنشاط رجعات ليها صحتها ونضارة وجهها وخدودها ورجع فيها الدم كانها كانت ارض جافة وروات . رجعات من عرس لعرس و والعروسة اللي جات عندها مكتردهاش واخا يكون البرح عندها خمس ميات درهم فقط المهم تشدها .. كانت كتخدم بجميع الاثمنة مرة تخدم حتى بمليون حسب الكليان ومرة تخدم بستين سبعين الف .. اما بنهار الجمعة والسبت كيتلاقاو ليها حتى لخمسة دالعراسات فضربة وحدة وكتبدا ضيباني راسها بالعماريات كل وحدة منين كتريها وكتبدا تنقز من عرس لعرس وتفاوت العرايسات بالسوايع باشاللي نزلات من شي عمارية كيطيرو بيها للعرس لآخر للعروسة لاخرى وهي غادية.. الفلوس بداو كيدخلوها بطريقة سريعة وكثيرة عمرها توقعاتها الشيء اللي خلاها تلف ودوخ وهي مامولفاش الفلوس بزاف والمشروع نجح ليها بامتياز حتى مابقات عارفة مادير بالفلوس، فالاول شرات طموبيل صغيرة بمليون ونصف حالتها حتى طلقات يديها وباعتها وطمعات فالحديد لكبير، لطالما كانت عينها كبيرة وحلمها فسيارة كبيرة وعالية .. وهوسها بالسيارة ماتوقفش وفاش شافت الفلوس كينزلو عليها بكثرة حتى رجعات كدخل فالويكاند احيانا اربعة دالمليون فالمجموع ديال العراسات اللي كتخدم بلا ايام الاسبوع اللي كل نهار عندها عامر والتكاشط دالكرا ..وزادت كملات فاش جابت عمارية جديدة وتكاشط جداد كيدوخو تما شدات عراسات كتار ورجع بناصر باغي يمشي معاها ويوقف على شغلها وجاه الفضول يعرفها شحال كتصور بالضبط..رجع كيسولها غير بنص عين وعارفاها كتقوليه غير النص وكتسكتو بديك اربعالافدرهم اللي قاليها تعطيني فالشهر . كملات

وجملات فاشب ات كتشوف جهة الحديد الكبير وبناصر كيهز خنافرو ويقوليها مايصلاحش ليك.. كبير عليك.. وكان كيحاول يخليها قد يدو ماتعلاش بزاف باش ماطغاش لاكن هي اللي فراسها فراسها، الحديد الكبير وربي يرحم ،، بقات على داك الحال ومعاندة مع واحد النكافة قدها حتى هي عندها كاط كاط وبغات تشري ختى هي كاط كاط وبناصر ماخلاهاش تحط فيها فلوسها كاملين وناضت الحرب.. كيشوفها بحال الى غترميدوك الفلوس وصافي وعيا فيها تشري وحدة صغيرة قدها بشي ستة ودفع فشي برطمة لاكن والو بحال الى كيخوي المافرملة، بغات تركب على الحديد الكبير ومولاه ربي.. لسقات ليه على واحد فولزفاگن كاط كاط مستعملة لاكن باقاجديدة ، بغات تشريها وعكس ليها ودابزو وناضت عاوتاني كتبكي ومونية طلع ليها الدم عيات فيه خليها ضبر راسها لاكن والو، كل واحد كيجر من جهة فالاخير طاحت على واحد جيب رمادية لونها رمادي شوية غامق نادر ومولاتها بنت لاكن ماشي كاط كاط، هي الشكل ديالها زوين وعالية وكلاسيكية وكبيرة انيقة لاكن مافيهاش خاصية الدفع الرباعي وعجباتها بغات تموت فاش شافتها وتخيلاتها ديالها وهي كانت غير فاحلامها فقط وفجأة صبحات فواقعها.. ناضت القيامة وغضبات وتنفخات وتشادات هي وبناصر وداكشي اللي خاف منو طاح فيه. غير استقالات ماديا ودارت الفلوس وكبرات الشان لراسها وزادو كبروه ليها حتى الناس رجعات باغا تمشي كلمتها حتى على بناصر وبغاتو يحتارمها ورجعات تقولها ليه بطاي طاي.. حتى ندم علاش خلا ليها حرية التسيير ورجع بغا يشد المحل لاكن فات الفوت .. ديك الوردة الصغيرة الضعيفة تروات وكلات وشربات وتغدات على المال والمدح ديال الناس ودارت مكانة وكبرات ورجع من الصعب يقلعها من الجدر.. ولفات الاستقلالية ورجعات كتهضر ومابغاتش الوضع يتغير وترجع تخدم عندو .. حطاتو امام الامر الواقع وقالت ليه نزيدك فالكرا وبقات عليه مغتفهمش مغتعرفش انا اللي كنمشي للعراسات انا اللي عارفة الكليان انا اللي عارفة الخدمة . طوال ليها اللسان عليه وكثرات عليه بأنا وأنا وأنا كما حتى هوا كيدير ويبقا عليهم انا اللي كنصرفانا اللي كنديرو ليكم انا كنفعل ليكم .. كيردعها نهار ويوماين وكيترجع لنفس الموال بلا متشعر وتبقا عليه متعرفش متقدرش متفهمش وكيرجع يردعها ويحرم عليها تمشي باليل للعراسات ويدير بناقص لاكن داكشيحدو يوماين صافي كتنوض وبقا داكشي كيتكرر وحتى واحد فيهم مابغا يعيا ومزالين على نفس الحال.. جامعهم حانوت ولا هي بغا تنازل تخليه يسير الامور باش يظبطها ولا هوا بغا يصبر ويميك عليها ويخليها تشرياللي بغات ردير اللي بغات وتعوم بحرها . لاكن فالاخير وبعد صراع مشا داير الكرون باغي معامن ومشات هي معاه فرحانة كتفرنس شرات الطموبيل بالفرحات عليها وركبات وركب حداها كيشوف ويميع وهي غطير بالفرحة

بناصر: صافي؟ هادشي؟ هانتي شريتيها هانتي ركبتي شا درتي؟ وااالو فلوس مشاو فقحقاجة هاحنا غنشوفو اش غتصنعي بيها ..بغيتي تباني ك وباني راسك

واخا هضر وبغا يطيح ليها المورال لاكن فرحتها بالطموبيل كانت كبر من اي اعصار او موجة كلام ، بغات غير فوقاش ينزل وتبقا بوحدها دور بيها وتبان ، لاكن واخا هاكاك خدا الطموبيل وداها بدل ليها جوانط ودار ليها جوانط جداد وقاد ليها شحال من حاجة وصاكها وتسارا بيها عاد عطا ليها وكيوصي ويعاود ترد البال، اما حتى الدوران فراه مابقاتش كدور بزاف والمحل شادها وكتبغي تحاسبمع الكليانة بنفسها ورجع كيدوز فرقت ما قالها ليه راسو كيلقاها فالحانوت واقفة مع الناس خدامة وكيمشي مطمائن

عمر بناصر توقع من سكينة غدير الفلوس،، كان عارفها كتزطط راسها لاكن باش تكتر عندها الفلوس وتبدا تلعب بيهم هاديك اللي متوقعهاش،، ولو يرجع بيه الزمان اللور كان يدير ليها تنكاف اللي هي غتسطا عليه واخا يحط فيه عشرين مليون ،، لاكن مكانش عارف الميدان كيف داير ومكانش عارف غاديدخل منو الفلوس الصحيحة اللي فين يبان شي موضف ولا مهندس ولا محامي، بالخصوص الستيل دسكينة جا مع داك الميدان وتواتاو وعطات فيه الجهد بالفرحات عليها وحتى هوا عطاها من خيراتو جهد اللي تحسب حتى تعيا .

اول فرح عند الحاجة مونية.. وكأي ام مغربية اول مرة تستقبل ضيوف الخطاب كتوثر ومكتعرف مادير ومكاين اللي يعاونها ولا اللي يوريها شي حاجة، خاصها هي توجد وهي تستقبل الناس وهي تسيير الضيافة ومع الاسف ماكتعرف لحتى حاجة من هادشي، وحتى بناتها كتر منها مكيعرفو للصواب والتاويل والعادات اللذي بعث، لولا العم ميمون ومرتو مريم اللي كانو معاهم فالدار ومسخنين الحو ومنوسينهم لا يعلم الله بحالهم وكيفاش يخرجو راسهم مع البراني اللي اول مرة يتعرفو عليه ولك على عائلتو ، واخا ميمون ومرتو حتى هما كيحشمو ومكيعرفو لختى حاجة لاكن على الاقل حضورهم خلا واحد التوازن فالدار وطرد الوحدة و قلل من الثوتر. كلشي متوثر الا بناصر، زايداه الثقة فالنفس النغزة وغادي معلي راسو وجاي كيتجبد ويتمختر تقولماعندو ضياف، لاكن الميزة اللي فيه ومكتخليه ميرضاش قدام الناس ماشي فقط بالفم والتخنزيرك ، وانما بالتكبيرة حتى هي، صاحب الدار الكبيرة ومضياف من الناس اللي الا جاهم الضيف كيحط ويقول ماحطيت .. يكرم ويقول ماكرمت .. وشاد الدين حسب داكشي اللي كيعرف ومتأكد منو شادو على كما ينبغي..ولو يكون غالط فيه وماعارفش كتلقاه كيطبق الشريعة حسب علمو .

حضر ليهم كل ما ماهوا مكتوب فالورقة وزاد منو ودار بحسب اصله وخلاهم فالكوزينة مقاتلين كيوجدو كاسكروط اللي تافقو على انهم بتلاقاو فيه يتعرفو فيه العائلة على بعضهم ، رانيا فهاد اللحضة تقطع بيها الحبل مللي خطاتها سكينة ،، ماعرفات مادير ولا اقدم ولا توخر وتركنات فالبيت كتنوض كل شوية تشوف فالمرايا وترجع تجلس كتسوط وتعاود تنوض وترجع تجلس. بالقفطان ديالها لخفيف فالموف ديال جوهرة اللي جابو ليهامن الحج والشال وتكحيلة فالعوينات والوجه مزنك صافي مرايا بلا حتى نقطة مكياج . السر ديال العرايس كامل نزل عليها ووفيت يبانو الاميرات قدامها.. الجمال رزق و والله يرزق من يشاء بلا ماتحتاج تكون اميرة ولا من سلالة ملكي٠ة.

البياضكي الشمعة والعيون عسلية كي اللوزة والشفار محبدين والفم حدو قدو بينو وبين النيف شعرة رقيقة والنيف منقاد ولاطاي منحوتة ما ناقصها حتى حاجة.. تعيا فيها على الغيوب ماتلقاش نن غير سنانها اللي صغار والفلجة عندها الوسط كبيرة وواسعة هما اللي مشكلين ليها مشكل فحياتها بالنسبة ليها هي ومامكتقدرش تضحك على خاطرها وديما كتحط يدها على فمها .

اما سكينة فهاد اللحضة فماقدراتش تحك راسها .. عيات طير مالحقاتش تسالي خصوصا الخطبة جات بالسبتوالسبت كيكون عامر عندها بالعراسات والصيف كامل حجوزات ومن قبل تحديد موعد الخطبة كان عندها التاريخ عامر . كانت كتزرب باش تدخل العرايسات ديالها بكري شوية وترجع للدار لانها كانت كتوقفعلى ديك الدخلة دالعرايس بيدها حتى كدوز عاد تقدر تتحرك على خاطرها.. كان جامعها مع ليلى واحد العرس من العراسات بربعة اللي كانت خدامة فيهم نهار السبت.. وكانت ليلى كتعطيها الخبارات فالتيليفون بما ان العرس بالنهار فإحدى القاعات فمكان لاش تمشي وليلى تما شادة العروسة وخدامة والنكافات كيعرفوها دايرين بحسابها لا كأن سكينة اللي واقفة ليهم على الراس. اما الاخيرة كانت واحلة فالهونضة قدام واحد للدار فيها عرس فالسطح كتشوف فيهم كيطلعو الماطيريال مع الدروج وكتغوت على طيافرها اللي مع الدورك شافتهم حطوهم فالارض وسخطات حتى خرجو حلاقمها وطلعات للسطح كتشوف البرزة كتصاوب والمسائلة كتقاد باش يبدا العرس مع التمنية ، من تما نزلات كطير من بعد ما حطو كلشي بلاصتو ركبات طموبيلتها الجميلة تابعة الهونضة كتسوق بيد ومتكية على المقود بيدها كلها كتحركو وكتجاوب رانيا فالمساجات

رانيا: فينك؟؟ تعطلتي دابا غيدخلو عيط ليا قالي راهم غير هنا عند خوه فالدار خلفة ديال الطريق صافي

سكينة:تسجيل صوتي) واهانا هانا كنطييير كنطيير صوري ليا كي جيتي نشوف

رانيا: تسجيل صوتي متوثر) اوففف سكينة زعما نهار الخطوبة ديالي نهار شادة ربعة دالعراسات هاد النهار ماتخدميييش فيه

سكينة: كانو مريييزيرفيين الزين قبل ماتحددو النهار نتوما مانحرنسرش العرايسات ديالي انا ونطلع معاههم الصبع

رانيا: واسييري ماقديتيش تردي ليهم العربون كتموتي على الفلوس

سكينة: جيتيني عروسة اما نجاوبك .. ولاكن هانيا غا قولي اللي بغيتي دابا عبري كي كما عجبك .. مهم انا شوية ونجي

رانيا: هيييه!!! شخااال هاد شوية؟؟؟ الى جاو غندخل نسلم بغيتك دخلي معايا .. على الاقل نتي موااالفة هادشي ماعندكش مشكل ماشي بحالنا حنا هنا دايخين كلنااا

سكينة: وصافي صافي انا جايا غنرجع للمحلنهز شي قفطان ونطلع .

كانت كي الطيارة رجعات كي الصاروخ .. طارت نزلات رجعات فالوقت مكمشة القفطان تحت يدها ودخلات للدار بواحد السورفيت كحلة مجموعة من لتحت كتلهت ووجهها احمر لقات مونية قدامها

سكينة: مزال ماجاو!!!؟؟

مونية:على عجلة)زيدي زيدي زيديعلى سلامتك شوفي ختك من الصباح وهي كتسناك

مشات سكينة للبيت كتجري لقات رانيا معلقة مع دخلات وقفات ليها كتزرب

رانيا: حطات يدها على قلبها)اوووف ناااري ناريكنت غنسخف .. تغطلتيييي

سكينة: على عجلة) جيت كنطيرررررر عرفتي شنو هي كنطييير. وغاندير معاكم الواجب ونرجع راه غير الله يحضر السلامة ما توقع شي كارتة ولا ينوض ليا شي صداع مع شي عروسة.

رانيا: على عجلة) دغيا دغياااا وصلو وصلو .. قاليوصلو للعمارة

سكينة: كتفتف) هييه!!! عطليييه اصاحبتي عطلييه قوليه تعطلو شوية يخخ. .. كاع العرايسات فاش كيكونو معطلين كيقولو ليه تسنا

رانيا: ودابا صافي جا

سكينة: واجلسي تسناي يسخنو بلايصهم عاد ندخلو .. تفوووو( كتقلب فالصاك) نسيت الصندالة يخخخخ ها اللي كنكرررره الزربة دالخرا هانا نسيت الصندالة

رانيا: لبسي اي حاجة دابا مهم لبسي

سكينة: يخ يخ يخ ..(تيليفون كيصوني) بلاتي بلاتي..(فتخات الخط) الو دريس.. كيفاش نساو الصندوق؟؟ انا ديتو بيدي ماطلعتوهش؟؟ … ها الخرااا دوالو صافي قطع (قطعات) ها حنا بدينا تمرضين الحبس (كتصوني) الراضي .. رجع عطي لدريس الصندوق اللي بقا فالهوندة مطلعوهش…. صافيعيط ليه قولها ليه دابا قوليه حتى تبغيو دخلو الدفوع وديه ليه…ونسااااونسااو نسااوه ….اويليعلى بلاش!! فاش غدير العروسة الذهب سير سير عيط ليه دااابا (قطعات) يخخخخ (كتصوني) ربيعة .. أكدي على دريس على الصندوق راه نساوه فالهونضة يجيبو ليك قبل مادخلو الدفوع ..دابا مشا يوصل الطيافر ( دوبل ابيل) قطعي من عندك دغيا( فتحات الخط الثاني) الو ليلى … رجعت للدار انا شوية ونجي كلشي. مزيان؟ صافي مزيان فين وصلتو ؟ الهودج ؟ صافي خلوها ؟ ايوا صافي تا تسيفطي ليا كي طلعات .. يالاه تهلاي.

بقات كتهضر وتغسل وجهها فالطواليط وشعرها مجموع حتى سمعات الصونيت فالباب وحلات الباب كطل سمعات صوت الترحيب وحس الضياف وبقات كتشوف شكون بفضول وباها كيستقبلهم بالفوقية والبلغة ومها وعمها حتو هوا ..بانت ليها اسية هي اللولة داخلة .. الام الدواقة اللي تقول غير استاذة ديال الفرنسية بديك الشياكة والاناقة والتاويل.. ماغليضة مارقيقة الفصالة ديال الامهات العادية اللي كينقصو الدهون على حسب صحتهم . لابسة صاية كحلة من النص ديال الكرش حتى لتحت كاملة مطوية بحال الورقة اللي نصفاليلاد دار منها فرفارة على الصهد… تحتها ليبة موس كحلة وصباط عالي كحلونن لفوق بودي كامل شبة ومكرش من العنق ومبطن مكيبان تحتو والو باليدين ومفرفرمن لكمام مجموع بالخيوط وكذلك من العنق والشعر زعر مصاوب على حقو وطريقو والمجوهرات والساعة فاليد والمكياج اخف من للشيء والصويك فاليد .. الوقفة والمشية ماتبانش عليها والدة الرجال.. سبحان الله كاين واحد النوع من النساء مكيبانش عليهم العمر نهائيا،، وكاين اللي باقا صغيرة وشارفة تقول عاشت عصور .

وراها دخل باها .. الوقار شخصيا.. سروال رمادي ديال التوب والمشية بشوية وتابتة وقويميجة بيضاء ضعيف من العنق والجلذة مدلدة والشعر ابيضممشوط بحال عبد للحليم حافظ. ومعاه الاب البيولوجي هاز الراس والسروال ديال التوب والقميجة زرقا ولافيست ديال الدان بنية انيقة والشعر مشوط والسمطة الكرش عندو خارجة والابتسامة .. جايين تبارك الله كتار ومعاهم هشام بالكوستيم هاز الورد كيفرنس وحشمان وكيسلم ويحدر الراس، غير شافتو سكينة خرجو عينيها ورجعات اللور دايرة يدها على فمها من الصدمة شهقات وعاودات رجعات طلات بسرعة كتشوف فيهم داخلين ….

داخلة منال بالجلابة والفتحة فالجناب كحلة والصباط عالي كحل والصاك فاليد والشكلاط والشعر مطلوق والذهوبات تبارك الله اخر مكاين كيبان من بعيد والمكياج نقي وناعم والبيوضة كتشعشع كتبان مرزنة وخاترة .. وراها كانت سارة كذلك بكسوة رطبة طويلة زرقاء عندها توب زايد جهة الكتاف بقصة جميلة مدلي على اليدين ختى للاكواع وبحزام فالخصر وحداء عالي والشعر زعر مطلوق مبسمة تبسيمة خفيفة ومكياج خفيف والصويك بقات سكينة غير مركزة كتشوف فيها ماعقلاتهاش .. شكات تكون حتى هي وحدة من خواتاتو وواخا سبق وشافتها. فالصورة مابقاتش عاقلة على الملامح ومع مورو الايام والاشهر والتغييرات الليطراو فحياتها ماخلاوهاش توقف وتبدا تتفكر باش تبقا عاقلة. حتى بان ليها غاليها داخل حادر راسو وكانت كتسناه يبان والقلب كيضرب والعينين كيبريو عاضة على شنايفها كضحك وتخلطات عليها الصدمة مع الدهشة مع الحماس .. غير شافتو عقلاتو .. وهل يخفى القمر ! بقات كتحقق فيه غير هوا وكيفاش كيسلم على باها باحترام وبالادب باقي كما هوا واخا عيات تفلي وتشوفشنو تغيير فيه؟ ماتغير والو كما خلاتو كما باقي.. تغيير بسيط ماعرفاتوش فاش بالضبط لاكن باين فالاجمال.. كان لابس دجينز وسوميج بلو مارين وساعة فاخرة فيدو وسوارت السيارة اللي قدرات تقشع ..

غير دازو دارت يدها على فمها عاد استوعبات ومشات كطير للبيت عينيها سابقينها عند رانيا اللي حمرا كضحك بوحدها متوثرة وكترعد

سكينة:اجي.. هشام الي جا يخطب هوا خو غالي؟!!

رانيا: عق ات حجبانها معجبة) شكون قالها ليك؟؟ فين كتعرفيه؟

جلسات سكينة حداها مصدومة وشدات وجهها كتستوعب ماعرفات تجلس ولا توقف ولا ضحك ولا اش دير.. تلفات

سكينة: وراني كنعرف خوووووه

ضارت عندها رانيا بالزربة جمعات الضحكة وتخطف اللون من وجهها وقالت

رانيا: حلفييي!!! قولي والله فين كتعرفيه؟؟؟(هزات صبعها) شوفي متكدبيش … كتعرفي سميتو اذا كتعرفيه

سكينة: جاتها الضحكة) اجي واش قولتيليه ختك

رانيا: تخطفات) قوليفين كتعرفيه اسكينة. .. قولي

سكينة: واقولي بعدا واش قلتي ليه عليا؟؟؟ (شداتها) اجي بعدااا فين عرفتي نتي هشام ؟؟؟

ناضت رانيا ورجع وجعهها اصفر تخلعات وخافت تكون سكينة كتعرفهم

رانيا: هضري والله حتى تهضري..

سكينة: ناضت كتطلع فيها ببرودة ) بشوية عليك مالكي قفزتي!!! ياك لاباس؟ مالك ماراضياش بيا ولا شنو؟؟ فين عرفتيبعدا هشام باش نقوليك فين عرفتهم ..وقولي بعدا واش عارفني ختك ؟

رانيا: شوفي..انا قلبي غيسكت..قيسي قلبي.. قيسي.. والله حتى غنسخف جاتني السخفة.. قولي ليا فين كتعرفيهم؟ فين كتعرفي غالي؟

سكينة: تقرصات) غيير بشوية عليك حتى واحد مامثاااالي.. بلا ماتبيني ليه راكي مثااالية باش زعما تبقاي كبيرة فعينيه .. كاع هادشي حب بشوي ةعليك

رانيا: اه ودابا قولي فين عرفتيهم ؟ فيين كتعرفيهم؟ كيعرفوك ؟ ياك كيعرفووك يااك؟

سكينة: وانتي اللي مابغيتيش تهضري دابا.. اما انا الا ماجاوبتكش سيفطيليه مسج هوا غيجاوبك

رانيا: بتحدي) ماقلتيهش كاع سميتك عارف عندي ختي وصافي وعمرني جبدتك

سكينة: بقا فيها الحال ) ااه .. ايوا مزيان.. ( دخلات عليهم مونية) يالاه سربي نوضو يالاه

سكينة:انا مزال ماوجدت صافي غير خليها هي دخل

ناضت لاخت داك القفطان فالجنب ومشات جهة المرايا كتجمع شعرها

مونية: علاااش؟ دخلي مع ختك ؟؟ غدخل بوحدها ؟

سكينة: صافي اماما ماساليتش

رانيا: صافي دخل معايا مريم

سكينة: شافت فيها بنص عين) انا غنرجع للقاعة اماما للقاعة كيتسناوني

مونية:على عجلة) تخربيق. ولاهيلا كتخربقو

مشات وردات الباب وضارت رانيا عندها بجدية وقالت

رانيا: غتعاودي ليا كلشي … سمعتي كوولشي غتعاوديه .. والله مغنتفاك معاك

قالت كلمتها وضارت كتقاد الفولادر بصرامة وجدية باش تخرج وسكينة كتشوف فيها بنص عين يديها تقالو عليها ولات كتهز وتحط وضحك بسخرية حتى خرجات رانياوجلسات شادة تيليفون كتشوفيه ساهية مطولا حتى ب ات كتبكي

دخلات حشمانة وزاد التوثر على حدو وراسها كيغلي باغا تعرف علاقة سكينة بهشام وخوه وفين عرفاتهم وشنو مخبية عليها .. اش كيعرفو عليها حتى هما وكدعي الله ماتكونش دايرة شي حاجة تخسر ليها هي صورتها قدامهم وتردم ديك الصورة المثالية اللي عاطية على راسها والمجهود كامل اللي دارت باش تجمع هي وهشام.

غير دخلات الصالة حشمات وبدات كتفتف ومكتعرف فين كتزطم من فرط الخجل واخا معاها مريم .. بدات كتسلم وبناصر كيشوف فيها بنص عين وكيرمش فالارض حتى سلمات على كلشي ومشات جلسات حشمانة حدا مها ..عم الصمت فواحد اللحضة والعينين كلهم عليها كيشوفو فيها بحال اي عروسة كيمشيو يخطوبها ناسها كيحطوها تحت المجهر باش يرضيو فضولهم ويعرفوها كيف دايرة …ماقدراتش تهز الراس وغير كدور عينيها وتقاد الفولار حشمانة بينما منال كتبسم وتوشوش هي وسارة اللي جالسة حدا غالي

منال: زوينة تبارك الله

سارة: امم.. اشمن نيفو عندها؟

منال:باقا كتقرا فلافاك

سارة: هزات راسها كطلع فرانيا) اممم ( دارت شوفة زعما ماشي شي حاجة )

منال: ولاكن الزين تبارك الله زوينة

سارة: امم

ضارت عند غالي كضحك ودخلات يدها فيدو كتوشوش هي وياه وهوا عاطيها السمع وجالس مرتاح بعيد على الاحراج ماهوا عريس ولا وزير .. متكي وحال جليه وسارة فرحانة بيه كتهضر معاه ولاسقة حداه شوية بالشوية جبدو الهضرة بداو كيهضرو ويطلعو فالنيفو وكان بناصر فيه عشرة واخا حاضر اب العريس وخوه وجدو ماقدروش ينزلو من كاريزما بناصر وثقته فنفسو.. اما اسية غير جالسة وكتسمع وساكتة وكتشوف بعينيها والكل مشارك فالحوار

بناصر: بعد حديث طويل ممتع ) عماااين دغيااا كدوز..غمض عينك حلها هاهيا دازت

تدخلات اسية بالادب: ماشي بزااف؟ تعمل العقيد ديالها وتكمل لقرايا ديالها.. حنا معاها من جهة القراية الى بغات تقرا ولا تخدم نزيدو نشجعوها

شاف فيها بناصر وضحك ليها ورد عليها بالنبرك دالعسكر بين الضحك والحديث كان القاصح

بناصر: يالاه يالاه دخل معاها الفكرة دالزواج وتوجد راسها.. هه ايوا باش نكون معاك معقول زواج الصغر عامر حجر .. ياالاااااه تهيأ النفسية وتستاعد .. على بيدمن تستوعب تكون سالات هاد القراية …(شاف فيهم كاملين كيضحك) اناا قلتها ليها هاهي كتسمع .. تجيب الدوگ ولاليصونص والله يسخر ههه… واشقلت شي عيب؟

غاليي: كيمسح على لحيتو) كااينة

الجد: من حقك السي بناصر

بناصر: اييوا باش تعرف حتى هي راسها من رجليها… هي راه مغتلقاوش معاها المشكل كتمشي غير مع الحيط الحيط .. مكتهزش الراس كااع ..غير باش نبين ليك باللي ماشي كنشكر فولادي..ولاكن هادشي اللي كاين راني قلتو

الجد: تبارك الله.. كيقولك عنوان الدار كيبان على باب الدار السي بناصر.

بناصر: ايوا هادشي اللي كاين.. اش بغا الانسان من الحياة غير يمطن على ولادو

اسية: ان شاء الله مايخصها معانا حتى خير .. حتى حنا عندنا العرايسات الحمد لله بقا غير مولاي هشام .. نتمناو ليهم الخير

بناصر: هز حجبانو بتأكيد) انا كنضمن ليك من هنا قدام كلشي.. ماشي حيت بنتي.. حيت عارفها وتربية يدي.. والله مايلقا بين البنات بحالها.. كنهضر على هادي بعدا .. راه عندها ختها ماعنديش غير هي.. ولاكن هادي بالضبط تحطها على الجرح يبرا ..(رجع تكا اللور) اما ختها راه فيها قاصحة عليها حقها تديه من فم الديب اما هادي كتسمح فيه

مونية: بأسى)والله لعضيم ماساخيين بيها..(كتمسح على قفطان رانيا) مالي بغاها وبغاتو منزيديوهم غير الخير

الجد: ان شاء الله تفرح بوليداتك كاملين السي بناصر .. دابا حنا غاديين وكنبرو ..وكيقوك دار البنات خالية

بناصر: داكشي اللي كاين السي الحاج) شار بصبعو) غير هي وختها اللي كاينين. وخوهم مزال صغير شوية

الجد: هيو البكرة تبارك الله؟

بناصر: هي البكرة اه .. مابغيتش نزوجها واخاعياو فالعائلة عمتاتها كاملين ..ولاكن مابغيتش.. الى كتابو لبعضياتهم مانزيدهم غير الخير

الكل:امين

الجد: بالضحك)واقيلا اول مرة تزوج وحدة من بناتك السي بناصر.. اللولة كتجي صعيبة ههه

اسية: حتى كيتفتح دا الباب اللول دالزواج عاد كيولف الواحد حت حنا نفس الشيء وقع لينا مع منال فاش تخطبات هه

بناصر: هز يدو) هي اللولة هاد الساعة.. كن بغات ختها تزوج كن كانت الثانية هههه..باش نقوليك الصراحة .. خطبو فيها مابغاتش مللي مابغاتش خليناها على خاطرها واخا صاحبي صدعني عليها لولدو قالت ليك لاصافي خليناها ..حتى هي مزال شوية صغيرة ماعندهاش العقل دزواج ..هاهياك خدامة بعدا العقل اللي يخدم راه عندها راه هازة راسها

الجد: ايوا ضاروري مايخرج واحد من الجنب السي بناصر هههه

بناصر: بعفوية) لاالا هاديك حااا مكنخافش عليها .. هاديك اللي صعيبة عندي شوية راسها ههه راك عارف كتجي دير الفشوش كتندم ..مفششة شوية من الصغر باش طلعات شوية صعيبة ايوا هاياك كنسايسو ..نسايسو حتى يدير الله الخير مع هاد الدراري ..دااابا يكبرو يديرو عقلهم بزز منهم

خلات الخطبة واقفة ومشات حلات الباب خرجات وعينيها حومر ونيفها حمر مابغاتش تشوف حتى واحد ومابغاتش حتى واحد يشوفها،، او بالاحرى مارضاتش ومكترضاش بالضعف ، نزلات للطموبيل يالاه بغات تطلع لقات نضرة للجنب لقات سيارة غالي البيضاء محطوطة قدام باب عمارتها وبقات كتسائل ونيفها كيسيل من حزن ما وقع بينها وبين رانيا وكتقول واش عارفني خت العروسة؟؟ يكون عارف زعما ؟؟

حلات عينيها بغات تبسم لهاد الصدفة لاكن جمعاتها فاش بان خيال رانيا قدام عينيه وهزات خنافرها وطلعات فالطموبيل مشات بحالها سبقات من الصندوق اللي تالف للنكافات طرقات مسمارو ومشات للقاعة فين كاينة ليلى دخلات بالسررفيت ديالها نص كم والسروال طويل واسع من لحتحت ومحلول من الجناب فيه الصدايف كحل وحداء رياضي وشعرها مجموع كوتشوفال والنضاضر دالشمس في ها والساعة والخواتم رقاق فاصابع يديها كما كانت كما باقا حلاقات فالودنين صغار وجوج تيليفونات والاذافر بيبي بومر دازت حادرة الراس للجنب وطلعات مع الدروج نيشان للبيت دالعروسة حلات الباب وشادة البكية فنفيفها لقات غير ليلى متكية على واحد الكنبي شادة تيليفون فيدها وسدات الباب ومشات نيشان بعينيها مارغرين خلعات ليلى وناضت مخلوعة شافتها مشات جلسات كتنخصص فصمت وشادة الدموت

ليلى: سكينة؟!! اويلي مالكي!!!

هزات سكينة راسها كتسوط على وجهها وتنخصص والدموع كيقطرو وليلى حداها كتشوف فيها باغا تفهم

من بعد ما هزات كاس دالعصير من البلاطو المحطوط ديال الحلويات والعصائر وتنفسات عاد ضارت عند ليلى شافت فيها بنيفها حمر وقالت

سكينة: تخيلي شنو طرا مادخلش ليك للراس

ليلى: خلعتيني اصاحبتي شنو كاين اش وقع؟

سكينة: يدها على نيفها) خاطيب رانيا اللي سميتو هشام .. هوا خو غالي .. تخايلي

فالاول ماستوعباتش ليلى الجملة لاكن شوية بشوية فهمات اش قالت سكينة لاكن مالقات جواب والاسئلة مزاحمين فلسانها مع الدهشة مع عدم التصديق وسكينة كتنهد وتشوف قدامها وقالت

سكينة: الدنيا شحال صغيرة

ليلى: وكيفاش .. وشنو. ( هزات يديها ) مافهمتش.. دخت

تنهدات لياى وبدات كتعاود ليها اش طرا بالتفصيل الممل وليلى كتسنط ليها ويدها على خدها مصدومة

ليلى: اوييلي جالسة وكنتصدم!!!

سكينة: من هادشي كااامل دابا بقا فيا الحال من رانيا،، بقيت كنقول واش هادي ختي اللي كنعرف!! لهاااد الدرجة كااع ومخلية خدمتي والصدع نايض ليا وغادية كنطير فاللخر دخلات مريم مرت عمي.. زعما مادخليش ماتبانيش حتى تعرف اشنو بيني وبين غالي وهشام وفين كنعرفهم.. ماحملاااتنيش نكون كنعرف خطيبها ولا هوا يكون كيعرفني.. بغات تموت خاصك تشوفي وجهها كي ولا

ليلى: رجعات اللور بنفور) اختي رانيا مكتبغيش تفهم ليا.. والى طلعتي كااع كتعرفيه اش غاديري ليها كتاب ليكم تكونو كتعارفو

سكينة: كتشوب العصير) مقالتش ليه حتى انا ختها يالاه!!! ماراااضياش بيا ،، قايلة ليه غير عندي ختي نكافة واقيلا وصافي هادشي اللي خسرات عليه … (بسخرية) شوفي ربي فاش طيحها ياختي على عياقتها باغا الحياة المثالية فاللخر ضارت تا عيات وطاحت فخو غالي!! يالاه دابا تعاوديها لشي واحد والله ميتيق

ليلى: بتعجب) وغالي شافك!!! ماتقوليش ليا مشافكش !!! غيكون عارف

سكينة: لالا موحال حيت هشام براسو معارفنيش ختها يعني غالث ماعندو منين يعرف( جاتها الضحكة) انا هادي اللي عجباتني فهاد الفيلم كااامل.. كنت باغا نخرج ليه نقوليه مفاجأة ساعا حرماتها عليا بنت الق٠٠

ليلى: ياك شاف باك!! زعما ماعقلوش

سكينة: اش غيعقل تا نتي.. انا عرايساتي خادمة ليهم بيدي ونسيت على وجههم اما هوا شافو من الطموبيل من البعيد غادي للجامع

ليلى: والعمارة !!!

سكينة: غيقول صدفة .. حيت وجهه وهوا داخل ماشي ديال شي واحد كيتسنى شي وااحد كيعرفو فهمتي.. باينة فيه داخل عند البراني.. يعني داك الوجه ديال اول مرة نتعارفو

ليلى: ناااري( شدات وجهها) غنطييير

سكينة: كضحك) وايييه هههه.. خليها بصحتها بغات غا هشام دابا طليه.. صدق هوا اللي واكل ليها مخها حتى ولات مغولة وجدية بلا قياس وحتى الضحك ولا عندها منعادم الله يستر … كن تعرفو اش كيدير طيح بالعضام

ليلى: غتقولي ليها كدا وكدا

سكينة: منقوليهاش اختي… تعوم بحرها. ماتجيش تقرليا نتي السبب ..

ليلى: ولاكن حتى لامتى كااع تبقاي مخبية زعما مغيعرفكش

سكينة: انا ماعنديض مشكل عااايشة حياتي كيتهم هما بجوج .. انا باغا نشوف غير وجهه غالي دابا فاش يعرفني ختها (هزات الكاس كتشرب وضحك)

ليلى: دابا يمشي يسبقها ليها يعاود ليها كااع داكشي اللي عارفة عليه نتي هههه

سكينة: يعاودوخا لمهم بجوج .. انا غنجلس نتفرج عليهم وصااافي

ليلى: رانيا تاهيا…(بحسرة) والله حتى خاصها عقل!! واش هادي هي الحياة مجاهاش اكتآب!! نقولو كاع دارت الحجاب وتدينات! ماتخرج تجلس فكافي ماتمشي مع البنات تسارا ما تسافر ماتجمع ماضحك ما تنشط!! دابا مالي درتي الطموبيل خاصها تلسق فيك .. العمر والفرص كيفوتها وهي كتشوف وشادة الركنة غتشرف اصاحبتي والله تا تشرف

سكينة: بسخرية) كتقوليا داكشي اللي كدخلي من ديك الخدمة حرام .. كتقولها ليا وتقولي ضبري راسك انا غير قلت ليك

ليلى: علاش حرام!! وهي الهضرة اللي كتهضر مع هشام ماشي محرم ليها حلال!!! نساات راسها واقيلا فكريها مرة مرة

سكينة: ولاهيلا ههه .. هاداك حلال حيت هاداك الحب.. (ميعات) اوييلي على حالة ومعامن طزز.. تعرفو كان مصاحب مع ديك نرجس بايت يخبط هه

ليلى هااي هاااي هه واخا تقولي ليها كان كيبيع الحشيش دابا ماتديهاش فيك .. صاافي دابا اي كلمة قالها ليها تقوليه عندك الحق وغيزرب عليها بالماضي ما الماضي والانسان كيتبدل وديك الهضرة دلكيلو وصافي هاهيا قتانعات.. غتجي تقوليك كاان ههه والله التقولها نتوقع منها اي حاجة

سكينة: غير الطائون التوابون ههه

ليلى: تقولها ليك.. منها عدد اسكينة بلا متبقاي تصدمي فيها من هنا لفوق حيت عولي عليها غتزيد على هادشي اللي دايرة معاك

سكينة: ببرود) عاادي دير اللي بغات .. كيعجبني فيها غير بابا بعدا.. والله ماتا يقادها مع الطريق.. نهار قالت ليه الخياطة خيط ليها الفم من تما ما عاودات دوات كتمشي وتجي لافاك بحال الطوبيس..لاصحابات لا وااالو وحيييدة ..كتجلس فواحد الركنة فالدار وكندخل كنلقاها شادة تيليفون وكتحك فشعرها من لقدام ساهية

ليلى: نااري ماعرفت نضحك ولا نمرض.. المشكلة ماشي غير اصاحبتي راه هاااكا. البنات بحالها وكتر .. كن كانت خدامة كوراه كرات الدار وخلصاتها هي غير باش يجي يخطبها !!

سكينة: الدللللل تفووو.. انا كنشفق عليها حيت كتبان ليا ماشي عادية ومدلولة وهي كتشفق عليا حيت كنبان ليها ماعندي عقل وحالة فمي بحالا واكلة التبن

ليلى: بحماس) دابا شنو غديري مع غالي!! نتوما دوزتو خرا وضرا وعاودتو تلاقيتو

سكينة: غندفع عليه كبير (هزات راسها) غنبين ليه التغيير ماشي كي خلاني يلقاني..هانتي غتشوفي . .

ليلى: ماحسيتي بوالو اصاحبتي فاش شفتيه؟؟

سكينة: اوييلي برد ليا الما فركابيا بقا قلبي يضرب تقولي خويتي عليا ما بارد،،، تسرفقت. اصاحبتي ودخت …ماشي حيت دعنا كنبغيييه!! لالا احساس اخر ماعرفتش كيفاش نوصفو ليك.. حيت انا كنت نسيتو عمرني درت فبالي غنتلاقاه شي نهار

ليلى: ودابا؟

سكينة. اريييلي الحمااااس… القادم اجمل

الخطبة دازت والفاتحة تقرات وتحدد النهار فين يديرو الرشيم او الخطبة الكبيرة اللي يسيق ليها الخبار الكبير والصغير، معلوم راه بناصر هادا اللي كيسد الفم قبل مايتحل ، وبنتو تبقا فالحفظ والصون حتى الى هضرات معاه او شي نهار مشا ضيف او بنتو تلاقاتو واخا هوا ضد اللقائات لاكن مكتيقشومن الاحسن كولشي يسمع ويشوفوالخطبة دوز بالتصاور وكلشي هوا هاداك ، بناصر عمرو تاق فكحل الراس كما كيقول وماشي من الناس اللي اذا ضحك معاهم شي واحد او دار الصواب صافي كيرخي راسو ويترخى ، بلعكس عندو الحق حق واللي مابغاش الحق فراسو العجينة ، وشحال من بنت تخطبات والخطبة طالت ووالديها كانو مرتاحين مناويينش الغدر وماناويينش فبنتهم تصدهم حتى كطيح الفاس فالراس وكياكلليها الخطيب الدماغ بالخطوبة والوعودحتى كيقضي الغرض ويبرد ويمل منها ومكيبقاش مستاعد يكمل معاها حياة اخرى ولو ميكونش ناوي يضحك عليها لاكن الخاطر كيتبدل وكيهرب ليه من الزواج فمرة وكيدير بناقص ويخلي بنت الناس الليكان كيحساب ليها الخطبة شي حاجة ورابط قويحتى كتصدق بلا حق بلا كرامة لواليديها ، هادا علاش بناصر كيضرب الحسابمن جيهتو ويربي ويوصوي ويقري ويهدد كاع الى اقتضى الحال،، المهم يحمي راسو وبنتو بجميع الوسائل وبشتى الطرق والى كتابت عليه شي حاجة وخرجات على سيطرتو يكون عندو الاسلحة باشياخد حقو . اما رانيا ناعسة مكتفكرش كاع فهادشي وفاش سمعاتو كيهضر على خطوبة كبيرة حساب ليهابغا يتهلا فيها .. وبحالها بحال بزاف دالبنات بحالها كيحساب ليهم الخطوبة هي الزواج.. صافي خطبها رجع راجلها وكيخافو يتقلق عليهم او يغضب وكيبداو يديرو فالخاطر بلاصت ما هما يندار ليهم الخاطر والعز .

خرجات العائلة مع الباب واحد واحد واحد بسعادة وهناء حتى نزلو عاد طلعات الروح مع هشام ووقفو لتحت كيتشاورو بيناتهم قبل مايطلعو فالطموبيل

هشام:يدو على صدرو) اش ضهر ليكم فهادشي؟ قالك عماين عاد نطيحو العقد

اسية : يد على يد)بزااف.. مالو غير هوا الليعندو البنات عطا الله بنات الناس

غالي: ساهي) الواليد طلااع فالطموبيل.. عيان

الجد: دابا طيحتو الكلمة مع الناس صافي..الى قادر تصبر عليها عماين مرحبا ..واخا هاكاك باها راجل معقول..تحمد الله طحتي فالعائلة نقية ماشي مهمجين.

هشام: صاافي دابا دوزنا الكلمة مغنبقاوش كنلعبو

سارة : كتجر غالب من يدو) يالاه.. يالاه نمشيو

اسية: بنرفزة ) مالكي زربانة راه كيهضر .بغيتي تمشي سيري (قلبات وجهها) قلة الحيا

طلع الصهد مع سارة مارضاتش وبدات كدور فعينيها وختى واحد ماهتم ولفو طبع اسية رجع كيجيهم عادي وكأنها كاع ماهضرات ، اما سارة وك تحقنات فيها النفس وبقات كتشوف فغالي واش غيهضر في حين هوا واقف ويديه فجيابو ساهي عقلو كاع محاضر معاهم وهما كيهضرو بيناتهم حتى تفرقو ركبو سيارتهم وركبات اسية معاه هي اللولة لقدام وسارة اللور ورجعو قالبة وجهها وساكتة في حين جالس بناصر فالصالون مع عائلتو وحداه رانيا كيوصي ويعاود

بناصر: مكا عنديش انا خيطي زيطي .. راك شفتي خواتاتي كلهم حتى وحدة ماخرجات مع الخطيب بوحدها ،،،، باش نعلمك من هنا وتردي بالك هادا مازواج ما والو غيير هضرة دوزناها مع الناس الزواج هوا العدول والورقة اما الاشهار والزدننننداقزدنن بالبندير مااشي زواج ..الزواج هوا العقد بلا عقد راك محسوبة عليا وانا ولي امرك وليوم ولا غدا يريد بحالو ويخليك .. يجي واحد اخر يبغي يتزوج بيك يلقاك والو اش غنقولو ليه. مخطوبة؟ باش مخطوبة ؟ ماعندها مادير لينا الخطوبة العقد هوا المهم سمعتي

رانيا داقت القاصح وحشمات بقات حادرة راسها وهوا كيهضر ماسكتش حتى سخف عاد شتت النضر وقال بوعي

بناصر: فين سكينة ماجاتش؟؟

مونية: جات ومشات دغيا مالقات كي دير

بناصر: بارتياح) خليها تقابل الخدمة ديالها اللي غادي تنفعها

حشاها لرانيا باش تفهم راسها وميك على سكينة من جهة الخدمة مابقاش كيصوني عليها كل شوية بالليل فاش كتكون خدامة ،، تعودو على الوضع ورجع عندها ساروتها، حلات الباب من بعد يوم متعب وشاق لاكن بحقيبة مليانة فلوس .. كان الفجر وكلشي ناعس وحس بيها بناصر فاش دخلات ورجع ينعس كأنه بالو معاها بح ال ديما ..مشات بلاصتها حيدات سورفيت وحطات الصاك تحت الناموسية وطاحت على الفراش بالبيجامة واسعة وقصيرة بلدية ديال الاعياد نعسات وغطات فالنوم حتى صبح الحال وصبحات رانيا كتسناها تفيق باش تفتح معاها محضر

داكشي اللي وقع غير ناضت وغسلات وجهها وفطرات مشات للبيت تبدل باش تخرج للمحل لقات رانيا جالسة شادة تيليفون بين يديها كتشوف فيها بنص عين وناضت عاقدة حجبانها

رانيا: تسناي.. متمشيش ..جلسي نكملو هضرتنا

سكينة: قلبات عينيها بأفأف) شنو بغيتي؟ سولي خطيبك يقولك

رانيا: دابا انا سولتك .. (بالهداوة) جاوبيني

سكينة: واخا واقولي ليا فين عرفتيهم ونقوليك فين عرفتهم … عاودي ليا الدطاي الى بغيتي حتى نتي تسمعي الديطاي

راينا: انا عرفتو غير هنا فالحومة وصافي تعرفنا وعاود ليا على عائلتو .. وانا عاودت ليه على عائلتي وما جبدتكش

سكينة: انا ماعرفتوش هرا عرفت خوه غالي

كنت مصاحبة انا وياه

رانيا: بصدمة ) اويلي!! اويليي !!!…..وكيفاش كنتي مصاحبة معاه وهوا مزوج !!!

سكينة: مزوج!!! هه. كيفاش مزوج ؟ علاش غالي تزوج ؟

رانيا: تزوج طبيبة

سكينة : بدهشة) وينوو!!!! غالي تزوج !!!

رانيا : بغيض) فين كتعرفيه؟؟ جاوبيني داابا

سكينة من قوة الصدمة والدهشة ماعرفات باش تجاوب ودغيا زربات عليها وقالت

سكينة: مكنعرفوش حيت غير كان مصاحب مع واحد صاحبتي وصافي

رانيا: هزات صبعها) حلفي بالله

سكينة: والله تا كان مصاحب مع شيماء.. هي كتعاود ليا عليه قبل مايتزوج

رانيا: ماخرجتيش معاه؟

سكينة. لااالا اويلي

رانيا: بارتياح) صاافي هادشي هوا اللي بغيت.. حيت شحال وانا كنكر ليه فختي وجالسة كنعليك فالسما حتى قاليا خاصنا نعرفو هاد ختك. وجالسة كنقوليه خدامة عندها مشروع ديالها وبطموبيلتها وخدامة كنفوح عليه

سكينة: بنص عين) ااه لا مزيان …. وماقلتيش ليه سميتي

رانيا. ماسولني ماقلت ليه

سكينة: ايوا صافي .. مزيان .. كيعاود ليك كولشي مكيخبي عليك

رانيا. شدات تيليفون) كولشي بديطاااي

سكينة: ااه.. ايوا الله يكمل بالخير … وخوه فوقاش تزوج ؟

رانيا: شي ست شهور ولا سبع شهور

سكينة: حيت كان مصاحب مع شيماء كانت كتخرج معاهم وتعاود ليا عليهم بزااف

سكينة: ايوا هاهواك تصاحب معاها وشبع فيها ومشا تزوج بالطبيبة دسنان كي دااايرة

سكينة: بنص عين) امم.. ايوا الله يكمل بلخير … ساكنين فمكناس؟

سكينة: لا غير هنا حدانا فالشارع اللي مع الدورة

سكينة: اممم.. قرااب !

رانيا: بعجرفة) خوه ااانجينيور .. شيماء كانت طامعة يتزوج بيها مسكينة؟

سكينة: لااالا غير مصاحب معاها وصافي

رانيا: اصلا بااينة … كيعاود لي على خوه قالك متديييين داخل سوق راسو مكيدخللللش تقول ماشي خوهم .. ومرتو طبيبة دالسنان كلااااص

سكينة: عاارفة داك الكلاص ديالكم نتوما (كدور راسها)

رانيا: سيري سيري شكتعرفي.. حساب ليك بحالك نتي ودوك صحاباتك.. هادوك راه نيفو ديالهم عااالي كيهضرو غير الفرونسي

سكينة. بسخرية) اللي كيهضر الفرونسي نيفو ديالو عالي ههه… ايوا مبرووك عليييك طحتي فالعائلة همممة وشان ياختي… سعدااااتك شكون بحالك غتولي حتى نتي هماااا وشان

رانيا: بسعادة) ياااربي امييين ياربي كمل عليا (تنهدات)

سكينة: العائلة كلللها غتخسدك ياختي… خصك ديري الرقية وتبقاي دخلي وتخرجي بالاذكار ومرة مرة ديري قيام الليل باش ربي يكمل عليك تزوجي بمولاي هشام.. باااينة غيحطك فوق راسو

رانيا: بحماس) ناااري هههه

سكينة: وتصاحبي مع ديك الطبيبة وديرو الراس على الراس (كتكتب مسج ل ليلى) ايوا فيين نباانو حنا قدامكم .

رانيا: لاالا قاليا العائلة نعطيوهم التيقار مكنمشبو عندهم مايجيو عندنا وخواتاتو حتى هما نعطيهم التيقار..نعيشو غير انا وياه صااافي حسن من البشار

سكينة: مزالة كتبت المسج) ايوا هانتي كيفكر ليك مسكين .. مابقا باغي لا عائلة لا والو

رانيا: تافقنا مانمشيو لا عند عائلتو ولا عائلتي نبقا نجي لدارنا نهار ولا يوماين صافي ونمشي بحالي اما باش نبقا ندور على العائلة لا

سكينة: اصلا ماعندك ماديري بشي مخلوق دابا نتي،،، هشام غيعوضك على كلشي .. الراجل اهم شيء فالحياة الزين

رانيا: ااه .. مكاينش احسن من تزوجي وتسكني بوحدك نتي وراجلك السعادة يااختي.. المرى المزوجة ماشي بحال اللي مامزوجاش بحالها بحال ديك الحلوة اللي مكجكج عليها الدبان .. اما الراجل راه كيسترك حتى واحد ميحل عليك فمو

سكينة: كاااايسترك الصراحة وكيدير ليك القييمة حسن كاااع من شي خدمة ولا شي فلوس … الراجل اهم حاجة فالدنيا

رانيا: وعلاش نتي مابغيتيش تزوجي؟ كوراكب دابا جبتي شي راجل ومزوجة ومرتااحة فدارك حسن ليك ما تبقاي تخيطي الزناقي وتباتي خدامة وتصبحي مبوقة بحال الى واكلة المعجون وتقيلي كتجري مور لخدمة… كوراكب سديتي داك المحل وعطيتي لبا السوارت وتهنيتي وتمشي ترتاحي مع راجلك تعيشي معززة مكرمة فدارك

سكينة: وايييه … المكتاب وصافي الصراحة وليت بحال الراجل كنضل نتجارا ومادايرة والو اما كن تزوجت كوراه دار ليا كولشي (كتكتب مسج

ليلى غدا الصباح غنجي للصالون عندك نعاود لاسيغ ونصارب دفاري ونعاود ليك اش طرا قنبولة

مشات سكينة مع رانيا فالهضرة وهما متكيين حتى نعسات رانيا وبقات سكينة طار ليها النعاس ..الصدفة اللي وقعات ماخلاتهاش تشوف النعاس وباينة كيتخيال وتخمم ومرى مرى تبسم تلقائيا فاش كتفكر غالي تزوج حتى صبح الحال . صبحات رانيا مخطوبة ومبدلة عليهم تقول علقو لها الوسام .. حتى هي ولا باغا تحس بقيمتها فالدار ودخلات للكوزينة بغات تعلم الطياب ومونية فرحانة ليها تقول غير هي اللي غتزوج بنتها وكتعلمها من جد عقلها ومتحمسة كتزيد تشجعها على الطياب والحداكة وكترسم ليها الحياة الزوجية اللي كيعرفو جميع الامهات .

اما سكينة مع الفيقة مافطراتش ومابقاتش كتفطر معاهم الا الى لقات داكشي اللي كتبغي ..اما الى لقات الطبلة فيها اتاي والقهوة والخبز وداكشي اللي مولفين بيه كتخرج تفطر برا وهادشي اللي كيكره بناصر وكيضل يغوت عليه وينوض عليه الصداع هوا الماكلة فالزنقة اللي كتخسر فيها فلوسها.

الشمس كتشوي وهي طالعة فالسيارة بنضاضر كبار مربعين وسروال توب عادي عريض وديباردور ضهرها كاكل عريان بني ولا على بالها بشي مخلوق يشوف ولا يجلس.. لابسة صندالة خفيفة عادية وهازة صاك مربع فيه اغراضها باش تمشي للصالون ..ركبات ومع الركبة شواتها الطموبيل على نقزات من بلاصتها ونزلات سخرات واخد من البراهش اللي كيدورو حداها مشا جاب ليها قرعة دالماء باردة وبدات كتفزك كلينيكس وتمسح الكوسان دالجلد والضهر اللي غتكا عليه حتى برد شوية عاد طلعات سدات عليها وطلقات لكليما تبرد السيارة وهبطات المرايا على بيدمن يسخن شوية الموطور وتمشي. جبدات ليكخون وبدات دهن وجهها ودوز على عنقها واللي بقا مسحات بيه يديها مزيان وهزات سبراي داللحم بات تسوط على داتها وتبرد راسها ورشاتو فالسيارة ..هادشي كانت كديرو فالدار قبل متنزل اما منبعد ما شرات طموبيل ولات حتى كتهبط عاد كتاخد راحتها ومنها تشوف الناس والزنقة وتبقا جالسة عاد كيبان ليها تقاد الى لقات مايتقاد. جمعات شعرها فالاعلى عشوائي والقصيصة نازلة على الوجه كتقادها بدفارها والدفار طلعو خصهم يتعاودو وبدا كتلبس هادي ساعة يديوية هادو محوهرات خفاف وتيليفون حداها كيتشارجا والموسيقى ناقصة مطلوقة حتى صونا تيليفون وكانت وحدة من صحاباتها .

انها فوز .. فوز من ام مغربية واب سعودي.. تزادت فالسعودية لاكن بعد وفات الاب رجعات بيها الام للمغرب وعاشت بين امها وجداتها فقط ..وبعد زواج الام من غريبي ولدات ولد وطلقات ورجعات للسعودية باش تصرف غلى ولادها وخلاتهم فحضن الجدة كترعاهم .. من بعد وفاة الجدة لقات فوز راسها مظطرة تبقا فالمغرب وتتحمل مسؤولية خوها اللي اللي صغر منها ببضع سنوات بينما الام فالسعودية .. قرات مع ليلى من الابتدائي حتى لليسي وتعرفات على سكينة عن طريق ليلى ..من بعد ما خرجات من القرايا ولات عايشة بين السعودية والمغرب وكيبقا المغرب البلد المفضل اللي كتفضل تعيش فيه وعندها فيه كامل الحريات والانشطة عكس قاوانين السعودية .

فوز من البنات الجميلات جدا شعر وجسم وعيون لوزية لاكن مبلية بالتجميل بحال الهوليود سمايل والفيلر ونحت الخصر لاكن كلشي على المستوى الطبيعي بعيد على المبالغة . شخصية رزينة وتقيلة ونسبة الثقة فالنفس جد عالية والريزو المعريفي ديالها كبير وواسع فحياتها العديد من الناس الايجابين وكتكره الاشخاص السلبيين اللي خصهم على من يشكيو وفيمن يبقاو .. ومن صحابات المفضلات سكينة وشيماء وليلى وسكينة وبنت وبنات اخرين من نفس الطبقة غير كل وحدة فين كتديها الوقت وتعاود تردها .

سكينة: حبينو ههه يالااه لقتيني ركبت غادية عند ليلى للصالون

فوز: فين احبي.. انا مشيت صاوبت واحد الورقة مع النبوري.. باقا كاع مافطرت .. نفطرو بجوج ومن بعد مك نمشيو عند ليلى

سكينة: غتكعا درت معاها العشرة اصاحبتي.. انا نيت مافاطراش غنديه معايا فيدي

فوز : قطعي نعيط ليها تا هيا كتفيق معطلاااا ماتفيقش ليك دابا غا تهناي

سكينة: يالاه عيطي

فوز: صافي نتلاقاو فقهيوتنا… انا نعيط ليلى تجي

سكينة: يالاه سيري.. جابكم الله نخوي عليكم قلبي ههه

تلاقاو فالباب دالمقهى كل وحدة نازلة من طموبيلتها كضحك والزوينة هي فوز نازلة وكانت لابسة كسرة تحت لكتاف دايرة على الصدر وهبطات ليها من واحد الجهة اللي هازة بيها الصك وبزولتها كاملة خرجات بلا متحس بيها بدات كتبان وهي كضحك حتى خرجات شافتها سكينة وطلقات واحد الضحكة قدها قداش قدام الباب

سكينة: بزورلتك هههههه ا ويلي بزورلتك

تشتات بالضحك عاد نتافبهات ليها فوز وبيرودة غطاتها كضحك ومشات كتسلم عليها

فوز:توحشاتك هههه بغات تسلم عليك

سكينة: كتسلم ) ناريييي بالدموووع كنضحك فشلتيني..(شافت جهة القهوى) هادوك كيضحكو ههههه

فوز : تا هنا شافوها هههه..ماحسييتش

فوز كتهضر وسكينة كتميل بالضحك ودخلو دازو حدا الطبلة ديال الدراري اللي كانو كيشوفو فيهم ويضحكو ومشات فوز حتى لحداهم وقالت كضحك

فوز: عاادي كتقوع فأحسن العائلات هههه

كملات طريقها كضحك ولا على بالها هي وسكينة وخرجو من الجهة اللهرى للجردة وجلسو كيموتو بالضحك وروايحهم كتعطعط حطو الصيكان والسوارت على الطبلة حتى تفشو ورتاحو عاد كل وحدة طلبات فطورها

سكينة: شافت الساعة) سخفتيني بالضحك وانا حزينة هههه

فوز: مالك اختي حزينة اش حزنك

سكينة: الاكس ديالي تزوج

فوز: اينا اكس

سكينة: غالي لانجينيور اللي كانت مصاحبة معاه .شكون من غيرو

فوز. ااه حسابني القطري

سكينة.: ويلي !! هاداك غا بعيليك جابليا التمر هههه

فوز: مسخووطة… وباقا مانسيتيش هاد غالي

سكينة: نسييتو راه هوا دابا رجع من العائلة. هههه… ليلى جايا؟

فوز : ليلى اه قالت ليا انا جايا

تحط ليهم الفطور بداو كيفطرو ويضحكو حتى دخلات ليلى حمرا بالسورفيت والشعر مجموع فالسما كضحك ومدات يدها سلمات

ليلى: بلا منعطيكم وجههي سخوونة(جلسات ترتاح)

فوز : جلسي جلسي تفطري

ليلى: فطااارت مع الميسيو … خرجنا الصبااح جرينا فالغابة ومشينا فطرنا

سكينة: سعداااتك والله ماكره ت نمشي لشي غابة نبقا نجري حتى نسخف

ليلى: شدرتي مع ختك ههه

سكينة: شغنديير.. غالي طلع مزوج اصاحبتي (جاتها الضحكة) مامتيقااش!!! ياختي غالي تزوج!!

ليلى: هييه!!حلفي !! هيييه!

فوز: شوحو ليا شنو واقع

ليلى: صاحبها تفارقات معاه شحال هادي خوه خطب ختها لبارح مكانتش عارفاه وختها حتى هي معارفاش وحتى واحد فيهم معارف

فوز:كيفاش!! مافهمتش؟

ضارت عندها سكينة بدات تعاود ليها وتفهمها وفوز مصدومة ويدها على فمها

فوز: اوييلي فيلم هيندي ي هنهه

سكينة. شتي على بلان!! وا الطبيبة اللي كانت خطبات ليه مو ومابغاش هي بيمن تزوج واقيلا دابا بااينة

ليلى: ناريييي كن دخلتي عندهم للصالة لبارح كنتي غتصرعييها

سكينة: غادي نصرعهوم فالخطبة لكبيرة غا تسناي

فوز: ماتقوليش بيا غترجعي دوري بيه دابا وهوا مزوج!!!

ليلى: اويلي لاا .. ديريها نعرفك حمارة

سكينة: لعبو شوية هههه

فوز: لاااا(بجدية) تا للزواج اصاحبتي لا حرااام الى تفرقو بسبب ماتشميش ريحة الجنة.. شتي هاد اللبس وهاد الحياة وهادشي كامل يقدر ربي يغفرو ليك شي نهار ولاكن دخلي فبحال هادشي ضبري عليها

ليلى: اش غدير بيه دابا هوا صاافي ع تزوج كوراه عايش حياتو

سكينة: ختو تقدر تعرفني ..واخا شافتني اول مرة بالحجاب زعما

ليل: لا محال .. الحجاب كيبد ل منضنش

سكينة: مهم ها حنا غنشوفو هاد الفيلم فين غيخرج

فوز: واش كان كيبغيك؟

سكينة: ماعرفتش .. موحال ..كنا غير مصاحبين ولاعبين

فوز: باغا تفقصي مرتو ههه..انا عارفاك

سكينة: كضحك) لااالا

ليلى اييي(كدور راسها) حتا منكونوش كنعرفوك.. كتكسييري ههههه

سكينة. عرفتي شنو هي يدخل لافامي اصاحبتي !! راه فيلم هندي خلاتها فوز.. غتشبك

ليلى: جمعي كرك .. دفعي كبيير ديري راسك مكتعرفييهش كااع

سكينة: منقدرش اوييلي غنشوفو غتجيني الضحكة .. اصلا غير بان ليا تفكرت كااع داكشي اللي دوزنا

فوز: حتى هوا غير غتباني ليه غيتفكر كاع داكشي اللي دوزتو هههه كنتو كتنعسو المسخوطة

سكينة: ويييلي عشنا لافي هههه الى كان تزوج ديك دونتيست بعدا اللي وراني عندها واااحد الصدر كيبان مكركر هههه

فوز: صااافي لقا الخير مدفك غيتبررع

سكينة: ويلي لااا مكيبغيييش الصدر كان كيقول ليا هاد هوا الكيوت ههه على صدري زعما

فوز: مرتو دابا كيقول ليها هادا هوا الحياة هههه

سكينة: ناااري جاتني الغيرة هههه والله … زعما يعاملها كيما كان كيعاملني

ليلى: اوييلي سكينة من نيتك!!! راه مرتو هاديك مابغيتيش يعاملها مزيان

فوز: والله تل كاين شي رجال كيعامل مرتو بحال وخدة من العائلة عادي ماعندوش داك الحنان وميعرفش يعاملها اكثر من ديك المعاملة وكيعامل صاحبتو بخال الاميرة خايف لا تقلق.

سكينة: انا كان كيتعنطططز عليا المسخوط ويترجل… تلقايه كيغير ويموت بالغيرة يلبسها الطويل

ليلى: زعما اللي لبس مرتو الطويل راه كيغير

فوز: ولاهيلا.. حتى خوك وباك دابا لا لبسوك الطويل وحبسوك راه كيغيرو!! كاين اللي كيبغي يبان واجل مكيرضااش ماشي غيرة .. المرى مسكينة غير كيقوليها متهضريش مع شي راجل ولا غطي شي بلاصة ولا شي حاجة كتقول ليه ااااه كيغيييير اكتشاف عضيم

ليلى: ههههه واييه ..وهوا ولد الحرام كيبغي يبان حاكم ومكيرضاش .. كتجيه النفس على راسو. … اودي الغيرة صعييبة عليهم وماشي اي راجل كيحكم كيغير.. المهم كيقول راني حاكمها

فوز: خخ تفو على حياة ديلمهم عقلية مخرية

سكينة: اتا كان كيغير عليا اختي قالها ليا بفمو مامزوج بيا ما ستى دريال وكيغير ..كان كيمشي معايا وينكر

فوز: هادي اه غييرة.. غادي بزز ماعاجبو حال ومشنشط غييرة ماشي باغي غا يحكم ..

ليلى. شي وحدين يتصاحبو معاك نهار لغد ليه يقوليك ماتخرجيش ماتهضريش ما تخرايش متسلميش

فوز: بقرف) وييلي خلي عليا داك النيفو هاداك منهضروش عليه.. كنهضرو دابا على اللي بحال غالي شي طبيب شي ااانجينيور راسو عامر متختخ ماشي واحد راسو اصلا خاوي مافيه تا معلومة صحيحة وباغي يحكم .. حنا نهضرو على هادو نييفو اصاحبتي كتلقاي دكتور قااري خاتر وزايد المصاحبة خضرة فوق الطعام اما داك النوع عندو المصاحبة هي كولشي وماعندو مايدار نهاو ومطال وهوا شاد الحيط لا طيح

سكينة: نموووت ونشوف كيفاش عايشين ..كيفاش داير معاها …عرفتي والله وبغيت نطيرو ليها تا نطيرو

ليلى: هاانتي طيرتيه غتزوجيه؟؟ ماباغاش نتي اصلا تزوجي صافي خليه اش ضارك دابا

فوز: جاتها الغيرة هههه

سكينة: واييه..بقاو فيا ليالي الحلمية اصاحبتي كوراه مكعكعااااها كوت مع راسها مبررعة.. غتشد فيه بيدها ورجليها والله

فوز: مكتابها ماعندك ماديري.. هزي فران امان .. حيدييه من بالك كن مان غير مصاحب معاها اه نقولو ليك دييه وناعبو معاك تا حنا اما دابا مزوج بيها لااا .. تشوطيها اصاحبتي وتكون كتحماق عليه وتحيديه ليها

ليلى: غتمرض والله تا تنقص لها من صحتها ..ونتي غدور ليك الايام حتى نت.. خليها فرحانة بزواجها وبراجلها وتسناتو تا شحفات ههه مسكينة ههه

فوز: واايلي!!! شحفها

ليلى: دوزها عليها نشرها نشرة عالمية كَددها عاد تزوج بيها ..

سكينة: كاانت كتسيفط ليه مسج وكندير راسي عورة مكنشوفش عنرني قلت ليه لا وعلاش .. كتا كنكونو بجوج حتى كيوصلو مسج من عندها

فوز: مالها على حالتها

ليلى: كتبغيه اصاحبتي الحب عور ههههه

سكينة: تسناتو حتى طابت

فوز: ايوا صااافي تدل راسي ونتسنا واحد باش يجي يركب عليا!!! شناهو الزواج ؟؟ هوا يركب علك سالينا

سكينة: ماعرفت واش عاجباه الركبة ولا لا

ليلى: ميلقاش حسن من الركبةديالك نتي

فوز: عطيتيه كولشي

ليلى: ل باقا بنت …قلبتها ههههههه

فوز: حلفي!!

ليلى: بغات تحماق وقلتليها اجي نقلبك

فوز: كتعرفي؟؟

ليلى: بالايجاب) امم

فوز. قلبيني حتى انا هههه

ليلى: شاكة فراسك

فوز: واييه اختي الشك قتلني.

ليلى: حتى نمشيو للصالون

فوز: دابا رتاحييتي فاشعرفتي راسك بنت

سكينة: مرتااحة بييخير

ليلى: فاش كتشدها السخانة كضرب السانكة

فوز: ولاهيلا. حسن من ولاد لق٠٠٠ عبرتي

سكينة: داتو لينا دابا منحلمو تا بقبلة

فوز:ضارو كيضحو ويتراشقو ) نااري كتهربني.. كان عاااجبك المسيخيطة

سكينة: تنهدات) واييييه(تفكرات) ااه حقا ليلى كنت بغيت نقوليك وشمي ليا هنا

الهضرة دالبنات مكتساليش فيها المعقول وفيها الطنز .. حتى فطرو وشبعو جلاس عاد خرجو مشاو للصالون تما كملو الجموع بينما سكينة متكية كتحيد ليها كنزة الزغب .. من لحمها كامل ومشات جلسات عاودات دفار رجليها ويديها ودخلات مع ليلى لغرفة خاصة تكات على ضهرها وليلى لابسة قفازات وقدامها الماتيريال ديال الخدمة وورقة خرجوها من المكتبة قبل مايدخلو الصالون قطعاتها سكينة وخدات الكتابة الل فيها حطاتها على ضهر سكينة مع طول السلسولمن فتحة المؤخرة حتى لبداية الرقبة وطبعاتها بمسحوق على اللحم وحيدات الورقة عاد بدات تعاود بالالة على الكتبة بشوية وتمسح حتى قربات تكمل ودخلات فوز كدهن يديها مصايبة دفارها وقفات عليهم كتقرا

وتمعن فالكتابة

فوز: ثم رمت قلبها ومشت حرة سكينة … شنو بغيتي تقصدي بيها

سكينة: وراسها بين يديها ناعسة) كتمثلني

فوز. هي زوينة ولاكن غيفهموها فشكل ..يحسابهم. غا شي واحد طلع معاك الصبع وعطاك درس

سكينة: راه عطاني درس مالهم كدبو

ليلى: وصاافي تا نتي يعاودها لمت مووو .. تزوج الله يعاونو

سكينة: لاالا والله مادايراها بسببو غير حيت كتمثلني درتها وكنعري ضهري فالحوايج بغيتها تبان

.. دايراها راسي اللي بغا يفهمها عوجة يعاودها لمو

فوز : كتأمل) هي غتجي فننة صرعاتها ليك .. جبداااتها مغيبانش شنو مكتوب حيت الخط. العربي اللي درتو زويين ..مزوق هاكا ورقيق ماباينش

سكينة: انا اختي ماعندي قلب.. من شحال هادي رميت مو

فوز: ايوا بالصحة .. جاتك واعرة

ليلى: صاافي كملنا .. نوضي تشوفي

مشحاتها ليها بالرغوة وناضت سكينة مغطية صدرها بيديها وقفات قدام المرايا كتشوف ودور وتبسمات

سكينة: زويينة .. عجبااتني

فوز. نهار طلع ليك فالراس حيديها بالليزر

ليلى: تقدر تمحى راسها مع المدة ماغرقتش ليك بزاف .. عام ولا عماين تبدا تبهات وتنقصوالى بغيتي تعاوديها عاوديها (شافت ففوز) هي دابا شهوتها فيه دابا يطلع ليها فالراس

سكينة: عجبااتني بقات كدور وتشوف فيها مع المرايا ومرة ترمي شعرها من هنا مرة لهيه كتشوف كيفاش تبان فاش تمشي لابيسين ولا تلبس كساوي وحوايج كيبينو الضهر في حين ليلى غادي جهة لافابو تغسل يديها وفوز تابعاها

فوز:بخفوت) والله تا بقا فيها الحال

ليلى: خليها دابا تبرد… مابغاتش تبين

فوز: كانت كتبغيه؟

ليلى: والله ماعرفت .. كتعاود عليه بزاف

فوز: طاحت فيه صافي.. خاصها تقلب عليه حسن ليها مادخلش راسها بينو وبين مرتو ..يزنزن ليها راسها دير شي زبلة

ليلى: غنبقاو معاها بشوية بشوية حتى تكالما

فوز: بانت ليا حامية اصاحبتي من جيهتو

رجعو للبيت لقاوها باقا واقفة عاجبها الحال كتشوف راسها فالمرايا بالخنات والتقالة وكدور تشوف ضهرها بكياتة وتلعب بشعرها

سكينة: يالاه نمشيو لا بيسين البنات

ليلى: سكينة دارت طواطواج خصها ضرب المايو ههه

فوز: يالاه نمشيو من دابا مكاين مايدار ..

ليلى: ماتبحرناش كااع غير لابيسين

فوز: مكاينينش بحورا زوينين هنا غير عريبان .. البحوراالواعرين فكازا ليبلاج بخيفي حسن

ليلى: وايالاه نمشيو

سكينة: كتشوف فالمرايا) غنمشي نجيب حوايجي من الدار

ليلى: انا نعطيك مايو غا يالاه

سكينة: شي مايو زوين؟

ليلى: من نيتك !!! معارفاش ميواتي غنشري شي حاجة خايبة

سكينة: جيبيهم كاملين نعزل ههه

ليلى: يالاه تسناو.. نعلم بعدا ميسيو .. غيقول ليا غادية تا لكازا باش تبحرو

فوز: انا غنهبط نجيب حوايجي نتلاقاو ماتعطلوش

شي فالبحر كيتبحر ويتبرونزا وشي فالقهوى جالس فالقهوى مور العاصر كيتبرد.

كانت عائلة بن عيسى كاملين .. حجة وزيارة حاو للرباط وخطبو مافيها باس يشمو الهوا دالبحر قبل مايمشيو يسخنو فمكناس.

جالسين فالهواء الطلق كاملين عائلة

كيهضرو ويتجمعو بحال جميع العائلات حتو وصل لغالي مسج فتيليفون ونااض كيهضر ويتمشى حداهم والصوت مامسموعش ..يدو فالجيب وسارة متبعة ليه العين ودايرة رجل على رجل لابسة كسوة طويلة نص كم وشعرها مطلوق حتى رجع جلس بلاصتو وحط تيليفون فوق الطبلة وربع يديه وحل رجليه كيتسنط ليهم .. بقات سارة ساكتة ومدات يدها بسلاسة للتيليفون ديالو

سارة: نشوف شحال الساعة

غير هزاتو فيدها نخزات اسية منال تشوف وقلبات وجهها بقات كتشوف فيها بنص عين في حين سارة دارت الكود اللي حاط فتيليفونو ودخلات بسرعة طلات على المكالمات لقات سمية صاحبو ورجعات حطاتو وربعات يديها

الجد: العرس دختك هادا وشحال هادي دايرة العقد بغات تمشي لدارها من حقها تعمل وليداتها

هشام: صبرو صبرو يزيدو يصبرو شوية .

اسية. ماعندها ماتزيد متصبر هادا هوا الجهد.. غنديرو ليها عرسها وتمشي

منال : بخفوت فودن اسية) مافيه اللي يعطي شي ريال فالعرس هادشي علاش كيتهرب

اسية. نخزاتها) والله حتى يحطهم ..الخطوبة زربان عليها باغي يخطب ويتزوج وختو مايعاونهاش مزيان تبارك الله..دابا نعيط لاخر حتى هوا نفكرو شفتو ماقال حتى كلمة .. ساكت جاتو من الجنة والناس

منال: براكة عليا غالي قاليا نتعاون معاك ديري العرس

اسية: واخرين اش كيديرو؟ كيعرفو يصرفو على عيالاتهم وخواتاتهم لا .. مزيان .

هما كيهضرو وسارة كتسمع وغالي ماهضرش والحوار طوال كيهضرو على عرس منال وقوامو .. باها حتى هوا ساكت خصوصا فاش كتحضر اسية مكيبغيش يهضر حيت مكيصبرش ليها وعلى سبة فأي لحضة ينوضها معاها وولادو جالسين

داكشي اللي كاين نيت عيا يسكت وفاش هضر ردات عليه حتى هي

رشيد:بحدة) هادشي شغل الرجال اش داك ليه ؟ خليك فشغل العيالات مالك

اسية: قالبة وجهها) كن كانو الرجال مايهضروش العيالات

رشيد:شد الكاس) والله كن ماحشمت حت نعطيك بهاد الكاس للوجه نوريك

دفع غالي الكرسي ناض بعد الكاس وطبطب عليه ينعل الشيطان نوضو بعدو على الطبلة والجد ضار كينكر عليها وهي مربعة يديها هازة خنافرها ..اما هشام همو كامل فشحال غيعطي فهاد العرس اللي هبط عليه بحال الخطية وهوا تابعاه الخطوبة اللي خرجات ليه من الجنب

تفرق المجمع ورجع الكل عند غالي للدار يباتو وكلشي نتاشر .. اسية وبناتها فالبيت وهشام وباه وجدو فالصالون .. اما غاليدخل لبيتو كيحسد القميجة بارهاق وعلى وجهه القلق وسارة كتشوف فيه باغا تعرف مالو وياكما هي السبب.. بقات تابعاه بعينيها منين ماداز ، خرج للكوزينة حط الماكلة لسوكي فالبالكون وجلس القرفصاء قدامها كيمرر يدو على شعرها وهي كتاكل وعقلو مسافر حتى وقفات عليه صارة بالبينوار والسروال طلات عليه

سارة: غالي!! مالك جالس هنا

غالي: تلفت حدا كتفو ) صافي دخلي لبيتك هانا جاي..

قالها بطريقة نوعا ما غير مرضية خلاتها تمشي نيشان للبيت ودخلات للفراش حيدات لبينوار وبقات بتيشورط وسروالها وتكات مقلقة حتى دخل وسد الباب وقال بصوت منخفض

غالي: علاش كتبعيني فين ما مشيت مالكي ؟

سارة: وشنو فيها؟؟؟ عيب؟

غالي: حشوومة قدام لافامي تبقاي غادية جايا مورايا كل شوية .. يمشيو وديري اللي عجبك

سارة : ناضت جلسات وربعات يديها) ومالك مقلق ؟؟ شنو كاين

غالي: دور وجهه بانزعاج ) مكيعجبنيش تنوض الواليدة والواليد قدامنا ..صافي الخاطر كيهرب ليا

سارة: عاادي كاع العائلات كيتناقشو

غالي: لا انا مكيعجبنيش نشوف داكشي

سارة: دابا غتعاون منال فالعرس؟

غالي. تلفت شاف فيها) بيان سيغ

سارة: بتردد) شحال باش بغيتي تعاون

غالي: داكشي علاش قديت

سارة: متأ وعلاش كتهضر معايا هاكا؟

غالي: وصافي متحكريش.. قلت ليك الخاطر ماعنديش وقلت ليك السبب صافي الساعة لله

دورات وجهها للجهة لاخرى كتنهد وبقاهوا جالس عاطيها بالضهر لابس شورط قصير والكتاف واقفين عراض والضهر مستقيم شاد تيليفون ومشغول فيه فالاخير حطو حدا راسو ودخل للفراش تكا على ضهرو ساد عينيه لمهلة عاد تقلب جيهتها عنقها من كرشها ودخل يدو تحت تيشورط طلعها حتى للصدر وعنقها برجلها بدا كيبوس فعنقها وهي كتبسم عاجبها الحال عاد قلبها عندو حل ليها السوتيان بلمسة يد وتكب الصدر كامل قدامو قدو قداش كيمشي ويجي يمين يسار وهي مستمتعة ماكتعرفش تنين او يمكن كتحشم تبين وكتخرج منها ردة الفعل بحال شي واحد بغا يتقلب للجهة لاخرى وماقادرش

غالي: بهمس) علاش مكتلبسيش ليسوميج دونوي

سارة: غير لعكز ههه

غالي: بشيح الابتسامة الجانبية ) لعكز… واحيدي لعكز وعيشي معانا

دورات وجهها كتبسم وهوا كيتسناها تجاوبو على الحوايج اللي مكتلبسش فوقت النعاس وقالت بحياء

سارة: الصراحة كنسى .. وصافي غير كنبغي نعس ماكتجينيش عاد نبدا نبدل ومع العيا لخدمة

غالي: اممم.. وفالويكاند(قاس مؤخرتها) مالك على هاد السليبات دايراهم للحراسة

سارة : كضحك) مرييحين هههه

غالي: فيقي شوية راه كاين حوايج النعاس .. نتي دابا مزوجة ماشي ديال راسك

سارة: عندييي شريتهم فالدهاز

غالي: تقلب للجنب) يالاه نوضي بدلي حوايجك

تكا على جنبو وشدها من يدها نوضها كيشجعها مشات جبدات واحد الباليزة خازناها وعاد بدات تحل وتجبد وهوا كيشوف جاتو الضحكة

غالي: وماالكي لمن جامعاهم؟

سارة: واغير جمعتهم هنا وصافي

بقا كيشوف اش كتجبدبان ليه واحد كحل مكمشوبقا كيشير ليها بصبعو حتى هزاتو حشمانة .. شد ايليفون مابغاشكاع يشوف فيها حتى لبساتو والصدر كيبان كامل فالشبكة وهي مغطياه بيديها مشات كتجري للفراش تخشات عاد حط تيليفون فالجنب وضار جهتها بغا يشوف

سارة: طفي الضو

غالي: عاوتاني!

سارة: مامرتاحاش والله

غالي: شنو اللي مامريحكش؟؟ امم

تحنا عليها كيتلفها بالبوسات وكل بوسة كتخليها تقلب وتشقلب عينيها ويديها فالهوا

غالي: ترخاي مالك مخلوعة.. ماشي اول مرة

سارة: اك هاا انا يالاه ههه اشنو بغيتي دير هه

بقا كيشوف فيها وهي كضحك مزنكة وعيا يراعيلديك لحشمة لاكن طلعات ليه فالراس بغا المشاركة من الطرفين لاكن هي مامتعوداش ومعارفاش او مامدخلاش داكشي لراسها باشدير بحالو ..معرلك غير عليه وهي ناعسة كي الامانة كتعنق وتبوس صافي.. والى قلبها كتقوس ومكتعرف دير حتى ردة وهوا كيقلب على ديك المتعة الجنسية معاها ويشوف طبعها الحقيقي وحلف حتى يخرجها منها ديك الليلة .. شدها طيبها مزيان حتى ساحت وعينيها تقلبو وفمها تحل سيفتها تبدلات وبدات تعيط ااربي

سد ليها فمها بسرعة ماحسابش ليه غتبدا تركل وتشالي برجليها وتنهق حتى هي لاكن فالحقيقة اغلب النساءكتصدر اصوات غليضة اثناء المعاشرة وكأنه فيلم بورنو وهادشي اللي وقع حتى لسارة مع غالي.. الاحساس عندها خرج بالصوت القوي الشيء اللي خلاه يتراجع وتهدن وحط ليها يدو على فمها و دار بالو عنداك تعضو ويرخيها وتغوت بالجهد وعلمها فودنها

غالي: عنداك تعضي

حلات عينيها جاتها الضحكة وقالت

سارة: اويلي

غالي: ايوا مانعرف فير علمتك ولا تغوتي.. تخوا الدار وشبعي غوات

بدات كضحك ورجع حتى كملو ديك المعاشرة بسرعة وتكاو وتكات عندو كتمسح على صدرو وتخمم

سارة: غاليي..نسولك

غالي: مال جهتها )سولي

سارة: عمرك عاودتي ليا على راسك

غالي:مغمض عينيه) شنو بغيتي نعاود ليك

سارة: بتردد) امم.. زعما واش عمرك بغيتيشي بنت قبل مني

غالي: بعد صمت) فاش غيفيدك هادشي

سارة: بغيت نعرف .. فضول وصافي

غالي: ونتي بغيتي شي راجل قبل مني؟

سارة: نوو جامي

غالي: غيير شوفي وكان

سارة: بدات كحلف وراسها) اول واحد فحياتي هوا نتا

غالي:جرها عنقها) تيقتك (باس راسها)

سارة: ونتا؟(بحماس)عاود ليا .. اصلا عادي تعرف شي بنت ..ماشي غير وحدة يقدر يكونو بزاف..ولاكن انا بغيت نعرف غير شكون بغيتي فيهم ؟(تبسمات)

غالي: خلينا دابا رتاحو عاد جاك تجبدي الارشيف

سارة؛ هااا. دونك كاينة ..يالاه يالاه عاود ههه فضفض

غالي: غلباتو الضحكة) اشنو غنفضفض

سارة: عاود ليا شكون هاد البنت ..بغيت نعرف.. بغيت نسمع قصة

غالي: رمش بتتاقل بعد صمت) وااحد البنت

سارة: اهممم.. شنو سميتها ؟؟ز غندير ليك بسيكولوگ ههه فيا الفضول نعرف كولشي

غالي:مهم… كانو بزاف ..مي وحدة كانت ديفيغوو عليهم وصافي.

سارة:كنتي كتبغيها؟

غالي:كنت كنبغيها مي ماطولناش.. دغيا سالينا

هنا فاقت الغيرة فقلب سارة وتشوطات .. مدام عتارف بفمو انه كان كيبغي وعلاش يكون كيبغي اصلا..جبدات عليها الصهد والقلق لاكن مابغاتش تبين ليه وبدات كتبسم

سارة: وشنو كدير فين تعرفتي عليها.. عاود ليا

غالي: دوز يدو على شعرها) تعرفت عليها فعرس خويا الكبير وونيسة

سارة:اهمم..وكيدايرة

غالي: بحالاش؟

سارة: اشمن نيفو عندها ؟ فاش خدامة

غالي: لااالا مزاالة صغيرة ..كانت عندها عشرين عام ولا تسعطاش وطالعة فالعشرين

سارة: اوييلي .. بصح!! وشحال كانت فعمرك؟

غالي:ثلاتين

سارة: بقات مصدومة) يعني ماشي بزااف غير العام اللي فات ! وشنو عجبك فيها وهي عندها عشرين

غالي: غيير حيت دايرة ..(مالقا ميقول)

شعل الحماس عند سارة وبغات تزيد تعرف وغير كضحك من برا لاكن العافية شعلات من لداخل

سارة: اااش دايرة ههه

غالي: جاتو الضحكة)والله ماعرفت.. لقيت راسي كنبغيها وصافي

سارة: باينة شي زعرة حتى هي

غالي: لا شعرها كحل

سارة: امم بصااح!!

غالي: كيتفوه) شعرها كحل وطويل تبارك الله

سارة: طويل زعما قد ديالي

غالي: لا طوييل

سارة:حد هنا

تلفت بعيون تقيلة) زيدي هبطي

سارة: معجبة)هنا!

غالي: زيدي

سارة: اوييلي هنا

غالي: ههه زييدي

سارة: وهادا مابقاش شعر

غالي: لااالا كان عندهااا الشعر زوين(حط يدو على مؤخرتها )حتى لهنا

سارة: بزااف.. بلدي

غالي: غير كيبان لك .

سارة: الشعر الى فات هنا كيرجع عروبي بلدي.. واش بنت العروبية ؟!!

غالي: الاا.. بحال شي شينوية .. بيضا بحال داك الكاس(نيش بعينو ) رااه

سارة: ايوا وفاش كانت كتقرا؟

غالي: مكانتش كتقرا.

سارة: بميوعة)جاالسة!

غالي: الراحة والسياحة (حاط يدو على فمو كيتفوه) فيا النعاااس

سارة: واكمل ليااااا.. نااري بغيت نعرف

غالي: اش غتعرفي

سارة: غليضة رقيقة كيفاش دايرة كوولشي

غالي: ماغليضة مارقيقة فصالة ديال الدراري الصغار ..عرفتي الشينوا.. بنات كوريات وداكشي.. ضعاف شوية وعامرين من ليزون سيكسوييل .. بحااال هاكا تهنيتي

سارة: ههه مزال .. زوينة؟

غالي: ساد عينيه) زوييينة

سارة: حسن مني(تبسمات)

غالي: جرها عنقها ) لا

سارة: هزات راسها ) وكي كانت دايرة زعما شخصيتها

غالي: تقيييلة.. عقلها اللي كان خفيف.

سارة: بحالاش تقيلة زعما ) غالي: والصراحة كانت زوينة .. عندها واحط الشخصية سبيسيال .. مفششة ولاكن ماشي ميالغ فيه فهمتي.. (سرع الهضرة) طبعها فشكل ..يمكن حيت باقا صغيرة يالاه قالت بسم الله

سارة:بلعات الريق) اممم… (بتردد) اووو عمرك درتي معاها شي حاجة

غالي: هز عينو فيها) شنو بغيتي تعرفي من اللخر

سارة: عاود هه .. خاصني نعرف ياك دابا تزوجتي وساليتي

غالي: رجع تكا) ااشنو دابا بغيتي

سارة: نعرف…(دارت بيدها على فمها) عمرك وصلتي معاها للفراش

حرك راسو بالايجاب

تزنكات وحمارت وصفارت تخطف فيها اللون وبلعات ريقها بقات ساكتة حشمات تسول وهوا ترخا وسد عينيه ،، بقات كتشوف فيه مطولا وقالت

سارة: كيفاش قدرات نمشي معاك وهي مامزوجاش بيك

غالي: الصمت

سارة: غاالي..حركات ليه وجهه) جاوبني عارفاك فايق

غالي: ضبر راسها داكشي فاات وسالا

سارة: يعني مكانتش بنت

غالي: خلينا دابا نعسو

سارة: وجاوبني.. بغيت نعرف.

غالي: عاودت لك كولشي واعيقتي

سارة: كمل ليا غير هادي

غالي: بااانت ..

سارة: بنت!! ومشات معاك !!

غالي: تأ(تنهد) جا داكشي بووحدو مااا..خططناش

رجع بغا ينعس وشدات ليه وجهه

غالي: وصافي مازيديش فيه

سارة: شرح ليا انا معارفاش وريني

غالي: (تنهد) شنو غنوريك؟؟ بااين داكشي اللي غنوريك كتعرفيه

سارة: زعما خلااتك .. زعما واخا بنت !!

غالي: زهقات ليه) خطييرة حسن من ميات مرى

سارة:بحالاش؟

ضار للجهة لاخرى وناضت كطل عليه وتجرو لاكن مابغاش يدور .. بدات كضحك بزز منها تفاديا للاحراج وناضت حيدات السوميج لبسات بيجامتها ومشات للحمام بشوية دخلات وسدات عليها عاد خدات راحتها وجلسات فشلانة شادة تيليفون كتعاود هضرتو مع نفسها وراسها كيزنزن مكانتش متوقعة غالي الليبقدو وقامتو وتقالتو وشخصيتو وكاريزمتو يكون سبق ليه بغا شي بنت.. على هاد الحساب كيفاش كان معاها؟ واش كاين شي غالي اخر مكتعرفوش ؟ شدها القلب وتبعاتو المعدة والهضرة فراسها كتكرر حتى ناضت معدتها وتعصبات وبدات كترد فالطواليط حتى خرجو مسارنها وشداتها السخفة، اما النعاس طار وتفكرات فاش كان شاد تيليفون وجالس حداها ومشات بشوية لقاتو ناعس على الجهة الاخرى وهزات تيليفون دخلات ليه الكود وبدات كتقلب ليه الواتساب وجي مايل والمكالمات ماخلات حتى مكالمة لقاتو كيهضر مع صاحبو على الخدمة ورجعات حطاتو بشوية حداه ومشات تكات حداه قاطعة الحس حتى بدات كتبكي فصمت سادة نيفها .. تقجات ودازت عليها الليلة كحلة حتى صبح الحال وبزز منها صبحات ضاحكة باش ماتبينش ليه ..صبح كولشي ناعس الا هما اللي صبحو غاديين للخدمة.. نزلات بسوال توب وقميجة وصباط مقاعدة مسطحة حاطة شوية دالمكيتج وهوا زربان لابس البدلة ديالو وريحتو عاطية والساعة فاليد والشعر بقات كتشوف فيه بنص عين وطلع فديك الاناقة اللي كتجي راسها بلا ميبدل عليها مجهود.. من ديما مكيعجبهاش الحال يمشي للخدمة مقاد لاكن ماعندها مادير ولا تنقص حيت مزايد حتى حاجة.. الفرق هوا انه لباس واللي لبسها كتواتيه وبلا مبالغة كيلفت الانتباه . ركبات حداه مربعة يدها ساكتة حتى جلس واستعد يشد الطريق عاد قالت

سارة: علاش مكترش من ديك الريحة اللي جبت ليك كادو حسن هادي قوية

غالي: بعفوية) كنديرها.. شوفي شحال بقا فيها

سارة: حيت هادي ريحتها مجهدااا.. مازويناش

غالي: وااايلي على مازويناش.. كانت كتعجبك

سارة: لالا مابقاتش كتعجبني قوية .

غالي: غتفطري فالكابيني

سارة: اه

حطها حدا الكابيني اللي خدامة فيها وباستو بابتسامة مسطنعة ونزلات مغوبشة دخلات للعيادة لقات الاطباء عاد داخلين .. كانت عيادة فأكدال وبحكم الوزارة اللي خدام فيها غالي عندهم انخراط معاهم لقا ليها بلاصة تما وتحولات لتما واصبح عندها غرفة خاصة حتى هي بين الاطباء دالاسنان اللي خدامين تما وعندها كذلك صديقة قدها فالعمر تعرفات عليها ومشات مباشرة عندها زعفانة سلمات عليها قبل مادخل لمكتبها

سارة: بونجوغ

الهام: بونجوغ ماشيغي .. مالكي زعفانة

سارة: داخلة للمكتب) مع غالي بحال ديما

الهام: تابعاها كضحك) مالكم عوتاني

سارة: على البارفان.. ديك البارفان مكنبغيهشيديرها..اااتيغو اصاحبتي بزااف.. غير الى سلم على شي واحد تبقا فيه والى وقففشي بلاصةكتبقا ايرا بزااف

الهام: عاادي

سارة:جلسات شادة راسها) معاديش اصلاانا من البارح مرييضة الشهيةتسدات ليا … بقا كيعاود ليا على صاحب كنت غنطيح كاردياك ..وقالك كان كيبغيها

العام: وييلي سي بابوسيبل دابزتوحتى قاليك هادشي

سارة: لا. لا ..(بضياع) كنا كنتجمعو عادي وبقيت كنسولو وعاود ليا عليها(بخوف) زعما تكون حسن مني

الهام: ساارة نعلي الشيطان !

سارة: كدق فالبيرو بتوثر) بغييت نشوف كيدايرة(عضات دفرها) قالك زويينة (بغات تبكي)قاليا زوينة وبقا كيوصفها حمقنيبغيت نشوفها نشوف هادياللي كان كيبغي

الهام: جلسات قدامها على الكرسي) واش هاد المواضيع كيتحبدو هادشي فيه غير المشاكيل

سارة: بمكر)عمرو ما عاود ليا وكنسولو كيتلفني.. خليتو حتى ترخا بغا ينعس وبقيت كندور بيه كندور بيه كندور بيه حتى عاود عليا.. عرفتي شنو قاليا(بدات تبكي) قاليا نعس معاها.. كنتخايلو ا الهام (سدات راسها) قاليا حسن من ميات مرى حيت بنت ..بنت وكان كينعس. معاها كي كيديرو لهادشي؟؟

الهام: ماعرفتش احبيبة.. يمكن اللور

سارة: ماباغاشنهضر عليها ولاكن باغا نعرفكولشي…

الهام: بفضول)وكي دايرة ؟؟

سارة: شدات قلبها) مابغيتش نعاود سيرتها.. قلبي ضرني.. صافي فاش بدا كيوصفها ماقدرتش نتخيلها اصلا كي دايرة عطانيواحد الوصف مخربق

الهام: ماسولتيش شنو اللي بغا فيها

سارة: بتوثر) ماعااارفش.. هوا براسو معاارفش وفاش سولتو على النيفو ديالها قاليا جالسة!! تخايلي!! مقارية ما حتى حاجة اش بغا فيها ماعرفتش..غاااالي.. غااالي نتيراك عارفة راجليبلا منقولك.. غااالي بغا وحدة مكدير حتى حاجة فالحياة.. لاقرايا لل سعاياكي كيقولو.. وقالك كانت عندها تسعطاش لعام ولا عشرين.. كيفاااش دايرة هاد خيتي وشنو بغا فيها.. كون كانت قدو نقولو المستوى الفكري الثقافي.. ولاكن عشرين عام او وااالو!! مابغاتش تدخل راسي.. وقالي مفششة

الهام: سينوغمال تفشش باقا بريهيشة .. تقدر تكون بنت شي واحد لاباااس عليه

ليلى: بتعب) متكملييش عليا

الهام:وهادشي اللي كاين!.. قالك صغيرة زوينة مفششة غتكون بنت شي واحد نيييت .. هاكاتخايلتها بنت شي عائلة لاباس عليهم كابرة فالخناث ..ماسولتيهش واش مغريبية بعدا

سارة: بااينة حيت شبهها بالكوريات عطاها تشبيه .. قاليا تقيييلة ولاكن عقلها خفيف شنو زعما قصد ماقدرتش نتخايل

الهام: وصاااافيبنت الفشوش.. بااينة ..كابرة فالخناث كلشي كيديروه ليها بزز باش كتحرك يديها

سارة:انا مرضت…خصوصا فاش قاليا حسن من الف مرى

الهام: من بعد!!تزوج بيها؟ تزوج بيك نتي ايوا تمشي تعاود راسها

سارة: يكون مزال كيبغيها؟

الهام: لااالا كن بغاها كنبقا معاها ..يربيها على يدو نيت

من قوة التوثر ماقدراتش تخدم وماقدراتش تركز ..كان محتاجة الراحة لاكن مالقاتها فحتى بلاصة.

صوت الالة كيزنزن فيديها والماسك على وجهها والقفازات والوزرة وخدامة فسن احد الفتياة اللي بغات تشرح ليها شنو خاصها دير لاكن الصبر عند سارة قليل او شبه منعدم هزات يدها بنفاد الصبر وقالت

سارة: واش غتوريني خدمتي؟؟

البنت: باحراج) لاا

سكتات وحلات فمها بقات ساكتة وسارة خدامة حتى كملات خدمتها وناضت بلا متقوليها حتى راك ساليتي .. لولا الممرضة اللي قالت ليها بابتسامة بالصحة عاد ناضت عند سارة اللي كتبات ليها الدوا وقالت بلا متشوف فيها

كلشي غيشرحو ليك الفارماسيي فاش يعطيك الدواء الله يشافي

شدات البنت الورقة وسارة سدات راسها وحناتو سادة عينيها ومكانش عندها مبرر نهائيا ترد شي مريض وهي خدامة مع اطباء مشتركين في عيادات ديال كنوبس والمرضى جالسين شادين الصف كل مرة يدخلو عند واحد . يالاه شربات كاس دالماء فيه مهدىء للراس وهزات تيليفون كتصوني على غالي لثالت مرة ويدها على حبهتها كتحكها

سارة: وي غالي .. صافي خارج؟

غالي: غندوز لكافي نجلس شوية مع احمد حتى تسالي وندوز عليك

سارة: بعبوس) اينا كافي؟؟

غالي: شي كافي كما كانت

سارة :بقلق) غير نتا واحمد؟

غالي: غيير انا وياه

سارة: اممم..اوك .. انا غنسالي نعيط ليك ..

ودعاتو وقطعات بقات كتشوف فتيليفون مطولا وكتخمم حتى دخل عندها مريض كان شاب فثلاتينات باغي يقلع الدرسة دالعقل .. غير سمعات الدرسة دالعقل ضربها الضوء وانحازت كتشوف بنص عين وقالت

سارة: غنشوف ليك واش تصلاح تقلعها وصافي الى كانت في الامكان عاد نقلعوها

جلس الشاب وجلسات كتفحص ليه الدرس اللي مكان فيه حتى مشكل جاهز للاقلاع لاكن هي كانت كتكره تقلع الدروس دالعقل وكيعرقوها ويعدبوها حتى كتبدا ترعد من قوة الشد والاقلاع وخاصها القوة والجهد والصبر والخاطر والوقت فوق هادشي كامل، تراجعات كتبرر ليه وقالت

سارة: عندك الضرسة مريضة شوية اللحم منفوخ آبسي خاصو على الاقل نهار ولا يومانين يتفش داك النفخ عاد نقدرو نحيدوها ..دابا منقدرش نحيها ليك وهي هاكاك

الشاب حتى هوا كان ولد الوقت ماشي من العاكزين كيهضر وقاري وواعي قال ليها

الشاب: النفخ هادا ماشي شي حاجة وعاطياني الحريق صبرت عليها بزز وماشي شي نفخ كااع بان ليا اللي يستدعي هاد العلاج والخوف

سارة: غتعرف حسن مني؟ انا اللي طبيبة وقارية على السنان كنقوليك مايصلاحش دابا ..بغيتي تحيدها حيدها كيبقا قرارك ولاكن ماشي عندي انا منقدرش ندير فيها يدي

الشاب بقاغير كيشوففيها ونعل الشيطان بانت ليه مرى مابغاش يتزايد معاها وخرج بدل الطبيب عطاوه رقم عيادة اخرى ومشا جلس كيتسنا يشوف واش بصح داكشي اللي كتقول ولا مافيها لي يخدم عاد يرجع يتفاهم معاها ، اما هي جالسة كتشطح برجلها وتصوني على غالي حتى رد عليه وناضت بسرعة كتهز الصاك

سارة: صافي ساليت واجدة انا خارجة دابا دوز عليا

غالي: وانا دابا فالكافي قلت ليك غنجلس مع احمد بلاتي شوية وندوز عليك.. ولا شدي طاكسي للدار حتى نجي

سارة: في حيرة) كرشي كضرني ماعرفت مالي.. داز ليا النهار كحل وعيانة منقدرش نمشي فطاكسي

غالي: متأ…(تنهد) فينك دابا فالباب؟ خرجتي؟

سارة: خارجة كتزرب) ااه

غالي: غنجي نوصلك للدار ونرجع يالاه

وقف بسيارتو قدام رجليها وهي كتشوف فيه جالس مرتاح الصدايق محلولين وصدرو كيبان والسنسلة رقيقة شبه غابرة فعنقو مكتبانش.. السوميج نص كم زرقاء والسمطة فالسروال والجلسة جلسة والنخوة والهبة والكاريزمة ويدو متكية على النافدة .. اما العطر شماتو مع الحلة دالباب وهي كتشوف فيه بنص عين وطلع فيه عاقدة حجبانها مكضحكش حتى طلعات ونسات متسلم وحتى هوا بقا كيشوف فيها وفحالتها اللي قالت ليه مريضة

غالي: مالكي عيانة ؟

سارة: بألم) اه كضرني كرشي.. فيا السخفة.. كنترعد

غالي: باستغراب) ومالكي شنو واقع ليك معارفاش ؟

سارة: ماعرفتش؟

تلفت كيتأمل وتنهد بالتقالة وديمارا السيارة

غالي: يالاه نوصلك للدار .

سارة: لالا بلاش ديني نجلسفشي بلاصة نشم الهوا حسن ليا فالدار غير غنزيد نمرض

غالي: قلتي باغا ترتاحي مريضة

سارة: لا غير ديني لشي كافي

بقا غير كيشوف قدامو وقال

غالي: اصلا حتى السيد صاحبي مشا .. بغيتا نشربو معاه غير كاس دالقهوى ماكتباش

سارة: هاد صاحبك مزوج ؟

غالي: سد عينيه وحلهم بتقالة ) مزااوج..عندو بنت كتقرا فالسادس

سارة: اهههمم.. (مدات يدها لعنقو) تحرك البرد غيضرب البرد

غالي: لا خليها هاكا كتخنقني

سارة: سد غير وحدة .. خرجتي هاكا من الخدمة؟

غالي: دور وجهه كيشوف الطريق يخرج ) نعلي الشيطان.

سارة: لالا غير سولتك حيت قلتيليا لكخافاط ضارورية

غالي: رااها اللور

ضارت شافتها ورجعات ربعات يديها ساكتة حتى وقف قدام مقهى فمارينا والجو زوين ناعم ونزلات شدات ليه فدراعو غادية معاه بشوية عليها والبنات كيدوزو حداه كيشوفو فيه ويشوفو فيها.. حتى هي زوينة وعاطية للعين ومافيها حتى عيب .. لاكن مغوبشة وغير كتسوط ومتكية ليه على يدو كتخزر فالبنات وتقلب عينيها وكل شوية تهز راسها تشوف فيه حتى جلسات على الكرسي وجلس قدامها وناضت كحزات حداه فالهواء الطلق والدنيا عامرة وكلشي مقزب وكل شوية تشوف فعينيه فين كيشوف.. اما هوا محني راسو على تيليفون وحال رجليه حتى تبسم بوحدو وحلات عينيها لا عليه بلا متشعر

غالي: هز تيليفون) غير صاحبي صاحبي كيهضر على الكورة … باغي نمشيو غدا للتيران نتفرجو فالماتش

سارة: معيدوزش فالتلفازة؟

غالي: عينيه فتيليفون ) واخا يدوز

كانت كتهضر معاه وتبحث في حين وقع ما لم يكن فالحسبان.. وكما قال المثل ..الصدفة خير من ألفوألف معاد.

يتبع