الفصل 2

فنفس المقهى جالسين البنات.. واشمنك يابنات الزين كيقطر من ديك الطبلة وكلشي عينو عليها.. وفاش كيتجمعو البنات كتكمل الباهية وكيربع الشيطان بيناتهم ويضحك لضحكتهم وفرحان لفرحتهم .. مع الصهد والحرارة كلهم عريانات حتى وحدة مامستورة.. ها اللي لابسة كسوة قصيرة بالخيوط موردة وطالقة الشعر وها اللي لابسة الشورط قصير كلاسيكي والطوب من لفوق والكرش عريانة .. ها اللي ضهرها عريان وها اللي رجليها عريانين.. مجمعين غير بيناتهم فواحد القنت كيطل على اليخوت من لفوق وفيهم اللي شادة شيشة اليكتريك وكيتعاودو ويضحكو حتى جات عينها عليه بالصدفة وكانت دايرة النضاضر كوحل كبار !مدورة وجهه جيهة كتفها وهي عاطياه بالجنب ..هبطات النضارات بضفرها كتأكد واش هوا وكتشوف سارة معنقة ليه دراعو وسارحة فالناس .. حتى تأكدات ودورات وجهها بسرعة ضربات الطبلة اللي عامرة بالماكلة والعواصر وقالت

سكينة: البنااات… ناريي غالي ..عتقو

تلفتو كاملين كل وحدة فين كتشوف كيقلبو بعينيهم وهي كتقاد فالكرسي كانت لابسة سروال مشدودعلى كرشها الديقة مزيان ديال دجينز وطويل عريض شوية بوي فراند وحداء رياضي اديداس باقي جديد والطرب مشدود ع بخيط ضاير على عنقها ابيض والضهر عريان الوشمام كيبان والشعر كحل زربية محموع كوتشوفال والقصيصة خفيفة على جبهتها ..العوينات محبدين والخدو. موردين والكرش عريانة والبيرسينغ مدلية فالسرة .. دايرة مابغات فراسها ومزينة بالساعة فاليد وخويتمات رقاق كما العادة وعقيق فاليد الاخرى رقيق وسنسلة مكتوب عليها سميتها و ودنيها مسطرين بالطوانگ.. لحمها كيبري نقي بلار وججها بحال الحليب واثار المايو والبرونزاج على كتافها هي وصاحباتها وكل شوية كدور تشوفيه بحماس والبنات كطلو معاها ويشوفو

ليلى: سكينة زيري السمطة

سكينة: كضحك بحماس) مرتو مرتو

فوز : كتحلل بتمعن) هاديك هي مرتو ؟؟ هادي هي الطبيبة ؟؟ مالها على داك السروال اويلي والسراول فزارا. كيدااايرين

ليلى: قانية عليه تا هي

سكينة: كتشوف فيه) بغيتو يشوفني.. البنات عتقو شي حركة

ليلى: شداتها من معصمها على الطبلة) جلسي والله متحركي.. هههه غتهربيه ليا

فوز: مزالة كتحلل) وييلي ضربو على القميجة .. الصاك ويلي على الصااااااااااااك(سرحات فيها)

ليلى: وتلقايها شارياه بالف درهم

سكينة: مانعطيش فيه حتى ميات درهم .. (بحماس) دابا شنو غيمشي بلا ميشوفني!!! عتقو دغيا شي حركة

فوز: الزين زويينة .. وهانتي عرف يختاار

ليلى: نخزاتها) منييين !! اويلي حالتها(خرجات عينيها) واش داك الشعر داك ليميش

سكينة: حاضياه) ولد الحراااااام جا معاه الزواج

ليلى: صافي دار عقلو.

سكينة: ناضت ) ها حنا غنشوفو واش دار عقلو

ليلى: جراتها ) اجي والله ..

بغات تشدها لاكن فلتات ليها من ليد ولقات يدها والريح كتشوف فسكينة مخلوعك هي وفوز ومدرقين وجههم حشمو بلاصتها بقاو كيشوفو بنص عين فيها ويولولو فين مشات هي جيهتو شادة الضحكة ولاحت شعرها لور حتى وصلات وهبطات عينيها بكياتة وقالت

طولات يدها قدام عينيه لكلينيكس اللي على الطبلة وهوا شاد تيليفون وسارة مخرجة عينيها كتشوف فيها

سكينة: ماعلييش ناخد واحد مابقاوش لينا

جراتو ومشافتش فيهم كاع وهز عينيه بسرعة بخفة وعفوية شاف فيها وبغا يهبطهم لاكن رجعهم بسرعة وتخطف اللون فوجهه وبانت الدهشة فعيينيه بقا كيشوف فيها خدات كلينيكس ومشات بشوية عليها عطاتو بالضهر كتمشى بكياتة وكضحك مع البنات اللي حادرين راسهم كلو حدة على تيلفونها حشمو حتى وصلات عندهم جلسات عاطياه بالضهر والكتاف واقفين كتفرنس وحطات كلينيكس على الطبلة

فوز: ويييلي منقدرش ناااري على جرأة

ليلى: شافت فيه بنص عين) هيييه شعلتيها ويلي ويلي عرفتي كي دار فيك بحالا ضربتيه

سكينة: ههه .. باقي كيشوف

فوز : اوييلي هوا غا كيشوف.. السيد بحالا نزلات عليه السما تورررق فوجهه

سكينة: طوات كلينيكس) خليييه.. نشوفو احساسو دابا قدام مرتو

ليلى: برد ليه الماء فالركابي بااينة

فوز : ناض

سكينة: مابغيتش ندور

فوز: بلا مدوري كيشوف هنا .. يخ يخ قودتيها مرتو جايا (درقات وجهها)

سكينة: لعااار !!

ليلى: نارييي والله تا جايا

سكينة: رجعات صفرا) عنداك طير عليا

حطات سارة البكية دكلينيس على الطبلة حتى قفزات سكينة فبلاصتها من الخلعة عاد ضارت شافت فيها وتبسمات بزز منها متوثرة

سارة: بالصحة والراحة

قالتها والنفس محقونة فيها ووجهها اصفر ومشات خلاتهم جالسين كيضحكو بزز رجعات عند غالي عاد ضارت سكينة شافت فيها خاوج من لكافي وبقات متبعة ليه العين حتى ضار شاف فيها وتبسمات لا اراديا وشيرات ليه بصبعانها حدا كتفها وهوا كيرمش حدر راسو ومشا وبقات هي كتفرنس رجعات حمرا

فوز: طززز.. خريييتي اصاحبتي

سكينة: خلعاتني ههههه

ليلى: كضحك) ناااري غنبول..

سكينة: ههههه علااام

فوز: والله حتى وجهك قاصح .. عرفتي كي دارت فييييك… نارييييي ميمتي بغات تاكلك بعينيها

ليلى: لياى بلعاني جابت ليك البكية بغات تشرف فيك مزيان

سكينة: خليها

فوز: من اللول قلنا مزوج اصاحبتي بعدي من الزمرر ..

ليليى: تلفات ليه المشية ههه

سكينة: غيكون خاف من مرتو.. الخواف لاخر دغيا هرب.. اودي اودي

بردات القضية شوية عند سكينة ومشات الخلعة بدات كضحك وبدات فوز وليلى يحرشوها باش تعطيه التيساع وماتبقاتش تسرع وتنسا راسها فاش تلاقاه وبداو عليها ..

فوز: انا بلاصتك والله منحاشيه ليه اصاحبتي.. ندوز من حداه ونقوليه تفو

ليلى: ولاهيلا.. خليها هي الحمارة قاليها بسلامة ودار ليها احسن تصديرة ومشا تزوج وعااايش حياتو ..وهي غادية كتفرنس كتقوليه هانا ..بغيت غيير نشدك اصاحبتي نقوليك والو ا وييلي

فوز: كدور لاباي فالعصير) ماخلا فيها مايصلاح… قاليك باي باي هاكاك بيرووودة .. زعما نتي غير ق٠بة ديال الدوران وتخوار اما المعقول والزواج يتزوج وحدة اخرى اللي فمستواها ..ومشا داها طبيبة

ليلى: ليلى. عورتيها اصاحبتي.. صاافي تزوج عرفتي شناهيا تزوج..بيدقك علاش مزالة غادية عندو اش بغيتي تبيني ليه؟؟ هانا؟؟ ومن بعد؟ شكون نتي؟ مشااا تزوج اللي ودار بيت ونساااك .. جتي دابا صغرتي راسك.. تا مرتو باينة ماشي وحدة سااهلة اللي غتفقص.

فوز: مابغيتكش ديريها نقولها ليك نيشان اسكينة.. ماحملتكككش تصغري راسك بحال شي بائعة الهوا .. كن كان ضارب ليك حساب ميخليكش اصلا ..

ليلى: حطها سطل بلا تقرقيب

فوز: انا بغيتو يشوفك اه ولاكن ماشي بديك الطريقة .. يشوفك بعزك… هاهوا هز قلوعو ومشا مع مرتو ونتي بقيتي مقالك تا كي دايرة..بحال الى مكيعرفكش ولا عمرو عرفك

ليلى: دار ليك بحال شي فيلم لعب فيه شي دور وسالا مشا لحياتو الحقيقية وكيبني مستقبالو.. عااايش حياتو

كانت جالسة مربعة يديها وكتسمع وكتشوف فنقطة وحدة.. تشحنات وتبدل لون فوجها وعقلها كيدور حتى عمرات وضربات الطبلة بغضب وصدرها كيطلع ويهبط بحرارة وقال ت بتوعد

سكينة: والله لا زكلتو… هانا غنوري لمو .. كااع هادي عياقة فيه زعما هاحنا غنشوفو(نسات القهوى) انا صاااافي(هزات يديها) غنوقف مها هاد الحياة غنقابلو غا هوا الى خليتو مرتاح انا مشي سكينة (سخنات) والللللللله حتى نخرج على باباه

بدات تمشي وتجي فبلاصتها كتنهج وتشوف هنا ولهيه غضبات وتوثرات والبنات مهبطين راسهم حشمو بداو كيتخباو وليلى منزلة راسها كتشد فيدها باش تجلس لاكن العافية شعلات فسكينة بدات تسوط وتنهج وحناكها حمارو وعقادت حجبانها بغات تموت حتى جاتها البكية وشارت لصدرها بصبعها

سكينة: اانا دابا ردني بنت الزنقة تسارا معايا وداني وجابني ولاكن وحطني وسخ ومشا تزوج .. صااافي حيااااتي غتوقف عندي غا هاااداك هاداك وغنبقا وراه الى مشتت لباباه داك الشمل هوا وياها انا نييييت بنت لق٠٠٠

فوز: مدرقة وجهها بيدها ) هيييه !!!! ويلي ويلي ويلي كيتفرجو ليليى عتقي

ليلى: كتشوف بنص عين فالناس وتجرها) ولاا .. وماشي هاكاك اجي نقولك

سكينة: نترات يديها ) حيدي… (بصوت مرتفع غاضب) فاااش كيخرج معايا ويتشركل عااحبو الحال دابا دار راسو مكيعرفنيش .. وسخ انا .. ماراضيش بيااا هااااانا غنوري قحح مو القح٠٠٠ اش كيسواو (طاحت دمعة من عينها)

فوز: بخفوت) سكيناااا

ليلى: كتجرها وتشوف فالناس) اجي نفهمك اجي مالك دابا كتبكي

سكينة: هزات راسها ) علاش غنبكي !! هه… بزاف على مو .. صااافي سطوووب.. تا نسالي باش نوريه يضحك عليا ااانا .. انااااا ولد لكلبة تابعيني كي لكلاب يجي هوا يخورررني وغااادي زعما خايف مرتو تقلق دار راسو مكيعرفنيييش.. مكنشرفوووش هانا نوريه

شعلات النار فسكينة وشعلات كذلك فسارة اللي ركبات حداه وزدحات الباب والصدر بغا ينفاجر حتى بدات كترعد بوحدها وهوا سايق وكيسد عينيه بصبعانو ويحلهم فصمت

سارة: كتعرفها…. كتعرفها ياك

غالي: الصمت

سارة: ماشي هي نفس البنت اللي عاودتي ليا عليها لبارح؟ جاوبني

غالي: بهدوء) قلتي نمشيو .. مشينا.. شنو بغيتي دابا؟

سارة: بتوثر) عندي احسااااس البنت اللي عاودتي ليا عليها البارح هي هادي.. ماعرفتش المهم عندي احساس ومتأكدة

غالي: الصمت

سارة: هي.. (حركات واسها بتوثر؟ هي.. (غلبوها الدموع) ميكنش شي وحدة تجي غير هاكاك .. مستحيل

غالي: هضرنا فهاد الموضوع ياك… ديجا وقع لينا نفس البلان ومكان منو والو ولسقتي فالبنت كاع وهي غير كتسول.. دابا وقت ما خرجنا غتبداي تنكديها علينا ؟؟

سارة: باصرار ودموع؟ متقووولش ليا اغالي.. هاااد البنت هادي كتعرفك .. انا شفتك…. شفتك فاش شفتيها كي رجعتي نستيني انااااا اللي مراتك وجالسة حداك .. شفتك كي رجعتي وشفتك كيفاش كتشوف فيها

غالي: بنرفزة ضرب المقود) صاافي زدتي فيه… باااركة مابقاش الواحد يعرف يخرح معاك كاع .

قلب وجهه للجهة لاخرى ومسح على وجهه وهي دورات وجهها وعضات صبعها كتبكي فصمت.. كل وحد قلب وجهه حتى وصلو للدار ووقف قدام باب العمارة كيشوف قدامو كيتسناها تنزل وهي كتسناه ينزل حتى تلفت شوية بلا ميشوف فيها وقال

غالي: مغتنزليش؟

سارة: نتا مغطلعش للدار

دور وجهه شاف قدامو فصمت مطولا وهي كتشوف فيه وتنخصص

غالي: طلعي نتي ..

حلات الباب خرجات كتشوف فيه واش غيطلع لاكن ديمارا السيارة وزاد بينما هي شاعلة كترعد فبلاصتها ومتبعة العين ماهمها لا ناس كيشوفو لا والو .. طلعات للدار كتجري وتبكي بغات تموت وبدات كدفع الباب ودق حتى فتحات ليها منال كتجري وكتشوف فيها مافهماتو والو .. دارت فيها سارة ودخلات لاكن غير زادت جوج خطوات سخفات ولاحت اليد على الارض ، خرجات هند من البيت كتجري واسية من لكوزينة بواحد البيجامة قصيدة ديال الدار وبانطوفة واخدة راحتها فاش مشا باها وهشام وطليقها وبقات غير هي وبناتها .. شافوها سخفات وتحنات عندها هند ومنال في حين اسية بدات تسوط وتمص الحامض بملل كتشوف فيها وهما كيفيقوها وهزوها لبيتها حطوها سخفانة كي الشرويطة وبداو يرشوها بالماء واسية كتنفض يدها وتهضر بالاشارت طالع ليها الدم ومشات خلاتهم حتى تبعاتها هند حتى هي بكندورة ديال الدار مزيرة على مؤخرتها ورجليها بيضين مثيرين والصباغة حمرا

هند: نعيطو لغالي؟

اسية: حيدي عليا اشمن نعيطو لغالي.. عطيها البصلة توكض .. هادشي اللي باغا غير نعيطو ليه .. كل شوية الو الغالي اجي راها سخفات.. كلمة جوج باط تجي فالارض

هند: وشنو دابا غنخليوها هاكا؟؟

اسية..شمي ليها البصلة.. هادي باااينة نوضاتها هي وياه على بنت ولا شي سروال

هند: اففف تاهيا زااادت فيه.. غير هي اللي مزوجة

اسية: حيداتها من طريقها) حيدي عليا راني مامسالياش لهاشي هادا وماااعندي خااطر .. حيدي

كحزاتها بيدها من طريقها ومشات كتعوج للبيت لبسات جلابتها لقصيرة وصندالتها العالية وبدات تحسب الفلوس فالبزطام حسي مسي وسداتو دارتو فيدها وقادات الحالة الحالة وخرجات من البيت طلات عليهم

اسية: انا مشيت للقيسارية مع حنان .. الى سول عليا قوليها ليه

شارت بيدها وخرجات مشيكة كتمشى بالتاويل والشعر مجموع بالمقبط دقات على الجارة اللي تحت منها وخرجو

مشات اسية للقسارية كتجمع هي و حنان جارتها اللي كانت من نفس النوع ديالها وتصاحبات هي وياها بقات كتعاود ليها وفنفس الوقت كيدورو وداخلين خارجين من حانوت لحانوت واسية كتعزل وتتخير فالشورطات والسليبات اللي ترتاح فيهم وتقلبهم وتتعزل فالبيجامات الزوينين ديال الدار والملابس الداخليك المقطنة على خاطر على خاطرها

بينما سارة مجبدة فالبيت مابغاتش تنوض من السخفة وعياو معاها تفيق والو ، حشمو يخليوها بوحدها واخا عارفينها دايراها بلعاني باش يعيطو لغالي يجي عندها ويراري بيها بحال كل مرة وبداو يوشوشو فوق راسها وشادين ليها فيدها حتى طلع ليهم الدم وهزات منال تيليفون حدا راسها بدات تصوني ليه وتعاود

منال: اففف… طافي.

شهقات سارة وهي سخفانة وشافو فيها بجوج وبداو يتغامزو عليها ودايرين الخاطر حتى فاقت ونوضوها جلسوها كتبكي وعطاوها الماء تشرب..جلسات قدامها منال ثانية واحد الرجل فوق النموسية كتسولها واخا عارفة السبب بلا ماتحتاج تشرح ليها وبدات راسها كتحاول تفهمها وهند واقفة متكية على الحيط كتسمع ويدها على جنبها

منال: كولشي كااع الازواج كيتناقشو .. مكاينش شي دار مكيتناقشوش فيها ومكاينش شي واحد مثاااالي.. نتي مزال ماولفتي على طبع غالي وهوا مزال مارلف على طبعك ومابغاش تفهمي باللي مكيعرفش يرغب ويحزر .. انااا ختو وكنا كاندابزو وكيهضر معايا عااادي عمري عقلت على شي نهار حزرني فيه

سارة: المشكل ماشي هنا..(كتنخصص) ..كنا جالسين فالكافي فمارينا وجات واحد البنت خدات من عندنا كلينيكس.. المشكل هاد البنت حاسة بيه كيعرفها

ضربات هند يد مع يد وقلبات وجهها كتسوط بالجهد بغات دخل فالحيط ومنال شادة جبهتها وشادة عينيها

سارة: دابا عاارفاكم مغتيقونيش.. ولاكن والله حتى كيعرفها وكتعرفو عندي احساس.. (بتوثر) انا شفتو كير رجع داخ وتلف وعينو كتمشي ليها .

هند: غييير كيجيب ليك الله .. هوا كاع هادا كبت فيه

منال: بشوية) هانتي سمعيني.. خرجي عاد الافكار من بالك.. قولي ليا شنو اللي مخوفك بالضبك.. خايفة يسمح فيك

هند: قاطعاتها بكل ثقة) مايديرهااااااش .. غالي والله مايديرها .. كن هشااام ولا لاخر ااه نقوليك يديروها .. انا غالي لا .. مهدااان كيفكر ميات مرة قبل مايدير شي خطوة

سارة: بحرقة) حسو بيا.. راه مكنقدرش.. مكنقدرش نشرفو كيشوف فشي وحدة.. عاد تجي هي عندو

منال: ياك جات عندكم بجوج ماشي عندو غير هوا

سارة: لالالالالا هه… انا متأكدة بيناتهم شي حاجة… كتعرفو معامن كان قبلم مانتزوجو؟؟غير قولو حيت عاود ليا كوولشي

منال: هزات يديها) معارفينش

هند: وباااش غينفعك كااع الى عرفتي.. حسابليك هي زعما

سارة: متأكدة هي

منال: كي دايرة هاد خيتي

سارة : بغيرة) قدك فالطول شي ميترو وثلاتة وستين تقريباشعرها كحل هازاه لفوق ولباسها مشهوه مفضوووه ضهرها كامل كيبان واشمة فيه وكرشها عريانة .. عندها شبه اسيوي وجهها مدور وحروفها كوحل.. هي والله حتى هي .. كنزييد نتأكد

منال: ايوا لا احبيبة.. اللي كان كيعرف ااخر وحدة كانت محجبة .. ماشي بحال هادي اللي قلتي وغالي مستحيييل يعرف هاد النوع

سارةب بفضول) دايرة الحجاب؟ شفتيها؟؟؟

منال :مرة وحدة صافي

سارة: بغيرة: فخباركم نعسات معاه

هند: ضحكات) شلااا ماكتاشفتي

سارة: قالها ليا بفمو

هند: ايوا راه زرفري كان

سارة: راه كان كيبغيها (بغيض)

منال: هضرة خاوية.. متعمريش راسك بهادشي .. نوضي نوضي غسلي وجهك لبسي شي لبيسة وتقادي يدخل يلقاك وحدة اخرى .. غتبقاي تفكري فهادشي تحماقي

سارة: بتعب) لالا غير خليني والله مافيا اللي يتحرك .. غنرتاح

تقلبات للجهة لاخرى وهزات تيليفون كتصوني عليه وتعاود وهوا طافي حتى حمات وناضت عاوتاني متوثرة كتسول علاش طافي وكدور من قنت لقنت باش يصوني عليه وكل ما لقاوه طافي كتزيد نسبة الترثر تعلا

عشية كحلة.. ماقدرات تبدل حوايجها ولا دير حتى حاجة.. كتمشي للصالة تجلس تصوني وتعاود تدخل للكوزينة وترجع للبيت ويدها على صدرها ، اما هند خرجات ومنال شدات عليها فالبيت كتهضر مع راجلها ،، بغات سارة تموت وراسها تزير بغات تعرفو فين مشا والتخيلات بداو كيلعبو براسها وماقدراش تخيلو شاد شي وحدة كيبوس فيها ..غير كتجيديك الصورة قدام عينيه كتسدهم وتزير عليهم.. مشات فالاخير للبيت معصبة كتقلبعلى الريحة اللي كيرش وتردد بعضب

سارة: للى عاودتي درتيها انا ماشي سارة.. والله لا عاودتي رشيتي منها قطرة

ضربتها مع الارض حتى تهرسات وعطات الريحة فالبيت قوية وجلسات كتنهج وتسوط وتشوف فيها ومشات للبلاكار ديالو بدات كدوز القاميجات اللي كيلبس وكتعض فيهم وتكمشهم بغات تقطعهم لاكن مالقات ليهم جهد . حتى بدات كتبرد وجع ليها الوسواس من جديد و سمعات الباب تحل ديال باب الدار وطلات شافتو داخل ورجعات للبيت كتجري بدات تجمع فالزاج بسرعة دالريحة حتى دخل عليها لقاها محنية كتجمع فيه وقال كيشوف فيها بنص عين

غالي: هرستيها؟

سارة: بارتباك) لالا غير سوكي نقزات من هنا وطيحاتها وفاش دخلت لقيتها هاكا

عقد حجبانو وقلب عينيه مغوبش بدا كيبدا قدام المرايا وواقف حال رجليه ودافع صدرو وراسو مهزوز كل شوية يسد عينيه ويبدا يفسخ فالسمطة دالسروال كأنه ناعس وهي كتمسح وتشوفيه بنص عين كتفليه وتتمعن فداك الضهر المزدوج والادرع القوية وبقات ساكتة حتى عيات وقالت

سارة: فين مشيتي

رد عليها وهوا على نفس الوضعية

غالي: بغيت ندخل شي نهار ومانسمع حتى سؤال زعنا ميمكنش؟

قلبات عينيها وسكتات ..جمعات داكشي اللي هرسات ومشات رماتو ورجعات كتقلب بعينيها شافتو هاز حوايجو وداخل يدوش، خلاتو حتى سد عليه ومشات لحوايجو اللي حط كتشم وتقلب ومشات للتيليفون بغات دخل ليه لقاتو داير كود جديد!! طاحت ليها اليد مع الرجل والقلب وقف بين الركابي وهي كتتأكد انه فعلا بدل ليه الكود،،بقات كتجرب باش تحلو حتى بلوكاتو وحطاتو فبلاصتو غادية

جاية حتى سمعاتو خرج من الدوش ومشات بسرعة دخلات لفراشها نعسات وعطاتو بالضهر كتسنط عليه.. حتى بدل حوايجو بغا ينعس ودقات عليه اسية يتعشى لاكن بغا يرتاح ومشا نعس حدا سارة في حين جالسة اسية كتعشى هي وبناتها

منال:سارة مغتعشاش؟

اسية: غنعرض عليها؟ طيبناه ليها تنوض ليه .

هند: بخفوت) زادت فيه.. اويلي كاع هادا حب.

اسية: كتاكل ببرودة) شتيه هوا غا مسوق ليها

منال: ياختيييي الله يعطيني الصبر اللي عندو.. (بخفوت) مشيت نرمي الزبل لقيت زاج دالريحة ضمرمي

اسية: هرساتها ليه بنت لحرام

هند: فمها عامر؟ تكون سباتها فسوكي عاوتاني

اسية: والله ومابعدات ليا من بنيتي.. سوكي غطلع ليها فوق لاكومود..ولات طارزان

صبحات فايقة بحال العادة تمشي للخدمة ولابسة ملابس انيقة حسب دوقها عبارة عن دجينز ازرق وقميجة بيضاء طويلة شوية من اللور ومجوهرات خفيفة.. شعرها الاشقر مطلوق واذافر نضيفة وصاك فيدها وخارجة معاه حتى هوا كيف العادة كتشوف فيه بنص عين ركبات حداه و احد مكيهضر مع لاخر وصلها للخدمة وكمل طريقو لخدمتو .

كان عندها موعد مع صاحبتها من الدراسة ..

بشرى من اصول مكناسية .مهندسة خدامة فتيكنو بوليس قدها فالسن ..طويلة وعندها حقها من الزين وحروفها كحل وشعرها قوي كحل زغبتو غليضة لاكن ناعم ورطب..بشرى متحررة فلباسها ودواقة وتقيلة فضهرتها ومرزنة وديما الابتسامة على وجهها ..سكنات بوحدها بحكم العمل اللي بعيد على مدينتها ومتواضعة مع الجميع او نقولو لطيفة مع الجميع لاكن كتختار بعناية الاشخاص للي دخل لحياتها واللي طبعا عندهم مكانة اجتماعية، هادشي علاش كتلقاها مصاحبة مع مهندسات بحالها او طبيبات او بنات دو المستوى الثقافي والمادي.

تلاقاو بعد العمل فلعشية فمقهى فالمدينة وجات عندها بشرى بكسوة موردة من زارا حد الركبة وسميطات فالكتاف والشعر مطلوق ..انيقة ودواقة وكتبرز الحمال ديالها بالطريقة الصحيحة .. تبسمات وهي كتسلم عليها بشوية وبالشياكة وجلسات دارت رجل على رجل وحطات صاكها قدامها وبدات كتجمع هي وسارة اللي كانت مهمومة والضحكة معدومة

بشرى: صافا ماشيغي…شخبارك…شكاتعاود.. ولاهيلا توحشتك

سارة: تنهدات) هانا … الخدمة والدار

بشرى: كيف ماشيا مع لخديمة .. السي غالي لاباس عليه

سارة: اييوا كما ديما

بشرى: برزانة) دابزتوووو!

سارة : ربعات يديها) هاد المرة القضية حماضت بزاف

بشرى: عاادي… كااع ليكوبل كيدابزو

سارة: بتعب) لاا… هاد المرة مرضت…فغيمو مرضت ابشرى .. صافي دو جوغ منعست

بشرى: وييلي صاحبتييي…

سارة: بارهاق) والله .. ول لبارح عاود ليا على وحدة قالك كان كيبغيها .. ونسااا راسو فاش بغا ينعس وبقا كيعاود ليا .. متخيليش كيفاش رجعت ..دبت دبت دبت

بشرى: متأ(تنهدات) كتهزي فخااطر بزاااف احبيبة… واش نتينا سولتيه باش عاود عليك عليها؟؟

سارة: شدات جبهتها) سولتو ولاكن ماحسابنيش غيكون بغا شي وحدة..كيعاود ليا عليها بحال الى هي اللي كاينة فوق هادالكون (رجعات حمرا)

بشرى: بتركيز) وكيفاش دايرة هاد لاكس هادي زعما شي زييين شي نيفوووو

سارة: بسخرية) نييفو!!! هه … والو قالك الراحة والسياحة

بشرى: تكات ونشرات يديها) وا هادي راه غيكون سايط ليها الريح فراسها

سارة: كيبغيو غيير بنات الزنقة.. هادوك كيموتو عليهم (دورات وجهها بغيض)

بشرى: بتركيز) غتكون شي زييين

سارة: بحرقة) كتكملي عليا ابشرى

بشرى: لاالا ماعندو منكمل عليك..لوكان بغاها لوكان راهوا مزوج بيها وحاضيها من الشمس والشتا… هادي باينة دار مافيها مابغا .. مايجيش ويبغيها …كيوقلو ليك نعس معاه باش يولي يبغيني

سارة: تماما.. حتى هادي نعسات معاه يالاه

بشرى: هاا… هه.. دونك ماشي بنت الدار بنت الزنقة

سارة: ولاكن ماشي فاجينال..

بشرى. ااااامممم..داكشي سطحي

سارة: اللور

بشرى: دورات وجهها) ايييخ يعطيهم الويل.. الله يقطعهم

سارة: بحرقة) ياااربي يموتو ياربي .. ياربي مايبقاوش نرتاحو منهم مرضونا فحياتنا.. اي وحدة كتشوف فراجل مزوج ولا كتخرج الله يعطيها لك..سير

بشرى: تنهدات)خرجو على ناس… صافي

سارة: لبارح خرجنا لكافي..جالسين ..

بدات كتعاود وبشرى كتسمع مخرجة عينيها ومصدومة حتى ختماتها سارة وقالت بانتقام

سارة: هرستها ليه.. يالاااه.. الصباح خرج بلا ريحة .. ولاكن كيفقصنيييييي كيقتلني… علاااش داك اللباس وداكشي كامل وهوا غادي غير للخدمة !! صافي تزوج شنو بغا لمن كيتقاد .. الى موقفش قدام المرايا ومشط ليك اللحية ودهنها ومشط ليك الشعر وتفركس مايخرجش!! دابا شنو ندير معاه يالاه بقا ليا نحسن ليه داك الراس ونتهنا

بشرى: بلطافة) حتى نتي صاحبتي ديها فراسك .. ميكي عليه خليييه..مدام ماحصلتي عليه وااالو وكاع داكشي اللي عاود ليك فات صافي.. خليه وبدلي حتى نتي ستايل ديالك..ديري شي صبيغة فيديداتك وشوية دالمكياج ولبسي ليه شي لبيسات وشي شميعات وخليه يدخل يتصدم ..بيني ليه صديير ورجيلات

سارة: هييه!!! اوييلي صافي.. قحيبة

بشرى: كضحك) وييلي يعطيك الخير ههه قتلتيني بالضحك قاااتلك قحييبة ههه ولاهيلا

سارة: جاتها الضحكة) داكشي اللي بقا ليا.. غير نوجد ليه الشمع بحال الى كنقوليه اجي ….. صافي كملات

بشرى: ههه ومالكي..راجلك.. حتى الى ماعجبتيه ضحكيه هههه… يموت غير بالضحك بعدا

سارة: ويلي والله مندير فيا الضحك

بشرى: لالا دابا كنهضر معاك بصح،، حتى الى مابغيتيش تحطي الشميعات وداكشي غمونتيك لبسي شي شوميج وديري رويحة ودهني كريم يديداتك ورجيلاتك مووور ما تحممي ودخلي فالفراش .. لعبي معاه وضحكي معاه ..كيبغيو هادشي كيفوجو حتى هما

سارة: سوميج كاانلبسها غير انا كنرجع عياانة مافيا اللي يبقا عااد يتقاد.. خدمة اخرى وكنرجع سخفانة كنبغي غير نرتاح

بشرى: وراه حتى هادي راحة!!! اويلي!! ماتفكريش بديك الطريقة ديال غتبدلي مجهوووود .. حيت الى رجعتي من الخدمة ومشيتي دوشتي ماشي راحة؟ دهنتي كريمات ورتاحيتي ماشي راحة؟ لبستي شي حاجة رطيطبة ترتاحي فيها ماشي راحة؟؟ ديرو مساج لبعضياتكم وضحكو .. ماشي غادي تجري

سارة: اممم.. غيير كيبان ليك دابا تزوجي وتشوفي.. راه الخاطر ماعنديش ابشرى.. داكشي خاصو الخاطر والبال هاااني.. خاصو راجل كيشوفك غيير نتي.. ماشي مدوز العجب وكيخرج مكيرجع حتى لحداش.. مكيجلسش فالدار كااع غيير كيوصلني كيهز حوايجو ويزيد ..هاهوا فلاصال هاهوا فالكافي ليوم مشا لتيران قالك يتفرج فالكورة هاهوا فالجامع هاهوا كيقرا القرآن هاهوا شاد تلفازة من ماتش لماتش الى بقا جالس.. وهادشي قليييل فين كيجلس.. دابا كملااات شتو جبد لكتوبة والدفاتر قالك غيكمل على الدكتورة اللي حبس ومشا حتى لمكناس تلاقا بالبروف ديالو وزاد نخارط فشي كروب ما كروب دالخدمة كيقرا لونگلي ..مكنشدوووش مكنعرفوش فين مخشي ولا شنو كيدير معمر وقتو لواحد الدرجة ماتخيليهاش كيدوخني .. وكل عيشة كيمشي يلعب لكورة مع صحابو كيرجع حتى كيقولها ليه راسو مرة مضروب مرة مقشر من شي رجل مرة كيعرج .. كنبغي نعرفو غيير فين مخشي مكنقدرش..وكيسد عليا تيليفون ! ماتحماقيش ! وديما التدوااش.. دييييمااااا… وكيسد عليه فالبيت كنسمعو كيهضر فاش كيحل ليا كيقوليا عندو فورماسيو فلونكلي

بشرى: علاه مالو عاد غيقراها؟

سارة: كيقرا فشي نيفو عالي داكشي مجهد زعما .. مكيخلينيش نجلس حداه

حاولات بشرى تقنعها وتخفف عليها نار الغيرة شوية وتخرجها من الهم اللي هازة ونجحات اخيرا، قنعات سارة واخا الاخيرة باقي عقلها مشطون وماتهنات حتى صونات على غالي من بعد ما وصلاتها بشرى حتى لباب الدار وودعاتها .

طلعات للدار وحلات الباب بخفة دخلات كدور عينيها مالقات حتى واحد.. عارفاهم كيخرجو فلعشية وحت واحد ماكيبقا فالدار واستغلت الوضع مشات دوشات بسرعة وخرجات لبسات جليليبة خفيفة وخرجات لاقرب صالون حداهم كان صالون كبير وواسع خدامين فيه بنات ودراري..جلسات دايرة رجل على رجل ساكتة وكتسنى نوبتها حتى وصلات ومشات صايبات الشعر وجلسات كتصاوب الدفار وعطاوها الصباغة تختار مشات لواحد اللون ماهوا رمادي ماهوا خزي.. عياو يقنعوها تركب الدفار لاكن مكانتش من عشاق تركيب الاذافر ومامولفاش بيهم ومامتعوداش طول دفارها ..دارت مانيكير وبغات تصبغ بداك اللون واخا جربوه فيديها مع الدفار مقزبين ونصحوها بغاتو وباش تقنعهم قالت

سارة: غنلبس واحد اللبسة فهاد اللون هادا

حدرات العاملة راسها وصبغاتهم ليها وخلاتها جالسة كتشوف فيهم وتشوف فرجليها اللي كانو اكثر جمالا من يديها ومشات من بعد دير المكياج وتكات كتشرح

سارة: مكياج يكون باين ماشي بحال للى مادايرة والو.. ديري ليا شفار وديري ليا هاد لاكولوغ ..حيت غنلبس لبسة بحالو

قدمو ليها السمع والطاعة ودارو ليها مكياج بارز وعيون مكحلة واحمر شفاه بارد شوية لاكن العيون بارزة ومع لونهم الاخضر زاد سطع بانت اكثر وجات جميلة وعجبها راسها مع الشعر وبدات تبسم بوحدها بحياء وترمش وجمعات حوايجها مشات للدار بسرعة لقاتها مزالة خاوية ودخلات نيشان للبيت كتقلب على السوميج اللي تلبس وكانت فلون الاذافر والمكياج وكلها شبكة كتبين الداخل والخارج ..لبساتها وحشمات تشوف راسها فالمرايا..تخيلات فديك اللحضة غير بائعات الهوا دالافلام المصرية ورجعات اللور

سارة: هيييه!! لالا لا ويلي ويلي لا شهاد الحالة !!

حيدات ديك السوميج بسرعة واكتفت بواحد البيجامة حد الركبة نصكم فيها بابيون فالصدر وطلقات الشعر وبدات ترش فالريحة وتشوف فالمرايا عاد قتانعات شوية وزادت شوية دالعكار باش يبان ودارت بلاصتو واحد احمر ومشات جلسات دارت رجل على رجل كتصوني عليه وتسول فين وصل

حمات فيها البيضة حتى سمعات الباب تحل وبدات تحمار بوحدها وتمشي وتجي كتفتف وتقاد لاكومد والاغراض ديالها حتى دفع الباب دخل كيتنهد من التعب هاز لافيست ويالاه بغا يهز الراس يسوط شافها بالجنب وقطع النفس بقا على نفس الوضعية كيشوف فيها وهي كدور وتخبا ودور فعويناتها .. عقد حجبانو وبقا كيشوف فيها بنص مستغرب ومعجب ماهضر مانطق وهي كدور فبلاصتها

سارة: تعطلتي! كاع هادا ماتش

طل على وجهها من البعيد كيشوف ويفسخ السمويج حتى ضارت عندو وشافت فيه كترمش ودور وجهها للجنب عاد قال

غالي: مالك على هاد المكياج كامل؟؟ فين غادا ؟

سارة: تزنكات) خايب؟؟

غالي: شار بيدو) بزااف!! معروضة ولا ؟؟

سارة: لااالا .

سكت يقا غير كيشوف فيها ومشا جنب البلاكار كيبدا وكل شوية يشوف فيها بنص عين ويطلع ويهبط وشي مرات كيبقا حاط يدو على حوايجو ومصدوم كيشوف ،، اما هي غادية جايا كدور عنقها وتميع بفمها زعما الاغراء وتشوف فيه بنص عين وتحني راسها حتى مافهم مالها .. خلاها ومشا للكوزينة كيزرب كيعمر اتاي وبخفة بدا كيجبد لكيسان ويحط فالاخير حط البلاطو على الطبلة جنب ساشي ديال الحلويات دخلو معاه من الزنقة وجلس كيدير كاسكروط وتيليفون قدامو كيتفرج ..دارت من حداه بلعاني باش يشوفها وبدات تلعب بشعرها حداه وهوا كيشوف فيها بنص عين والكاس ففمو بنضرات التعجب حتى كمل ماكلتو وناض بسرعة دخل حك سنانو وهي غادية جايا كدور حداه ومشا للبيت بسرعة لاح الصاك فالارض وبدا كيبدل ليس شورط وتيشورط وهز سبرديلتو خشاها فالصاك مع الفوطة وشامبو وداز مع الباب غادي زربان

غالي: انا مشيت لاصال.

جات كتجري تلحق عليه مخرجة عينيها وجات فاسية نيشان داخلة مع الباب هي وبناتها سخفانين وزادو سخفو فاش شافوها وبلا ميشعرو بداو كيضحكو بالجهد وهند شادة فمنال وفكرشها كتميل والترمة كتميل معاها والدموع هابطين ماقدروش يوقفو واخا عياو يصبرو وهي حشمات مارضاتش رجعات للبيت وزدحات الباب في حين اسية عاضة شنايفها ومتكية على الحيط ويدها على كرشها كضحك وبناتها كلهتو ووحدة كتشد فالاخرى حتى تقجو وتقطع فيهم النفس

من بعد الشبعة ديال الضحك اللي دارو عليهاجلسو يرتاحو كل وحدة فين سخفانين وكل شوية يتفكروها يبداو يضحكو، اماهي بالفقصة بدات كتبكي على طاولة المكياج وتمسح حتى كانت غتسخف.. طيبات وجهها بالمسيح وحمارو عينيها وبدا نيفها كيسيل بالماء وصدرها كيتنخصص ويديها كيترعدو ..مافهماتش شنو المشكل او فين كاين المشكل بالضبط؟؟ ياك المكياج اللي دارت زوين وجا معاها ومصايباه فالصالون اذا علاش هاد الضحك.. وواخا هاكاك ماهموهاشبزاف بقدر ما همها غالي وردة فعله اللي صدماتها وخيبات ضنها ومقالها حتى كلمة تفرحها كما كانت متوقعة ، تقبط صدرها وتخنقات حتى مابقاتشقادرة تنفس ومشات للنافذة كتشم الهوا ومتكية على الحيط كتفرج فالزنقة وتخمم وتبكي بوحدها حتى سمعات الدقان فالباب وضارت

سارة : بصوت مخنوق) شكون؟

منال : حلي انا منال

سارة: واخا عيانة شوية منال ماقدراش

نوض

منال: وا حلي نهضر معاك غير حلي

سارة:بصوت مخنوق كتمسح نيفها) ناعسة ماقدراش

منال:وا اللي بغيتي.

دورات وجهها ورجعات للنافذة كطل وتشوف سارحة لفترة وماهناتش حتى هزات تيليفون صونات عليه وتسناتو يجاوبها لاكن بدون جدوى.. زادت مرضات اكثر وخاطرها ترون وبدات كتقلب فحوايجو من جديد وتشم لاكن مالقات حتى حاجة ورداتهم بلاصتهم ومشات تكات حاضية الساعة حتى سمعات صوتو فالدار وناضت كتجري حطات ودنها على الباب كتسمع اسية كتهضر معاه وضحك بحال عادتها وصوتو كيقرب للباب ورجعات كتجري لبلاصتها دارت راسها ناعسة ومغطية كتسنط ليه كيبدل ومشا حتى لعندها طل عليها وهي توثر دارت راسها فسابع نومة حتى خرج وتسد الباب عاد ضارت بسرعة كتشوف فأرجاء الغرفة ومشات للصاك ديالو ديال لاصال قلباتو بالزربة ورجعات بلاصتها تقلبات ، دخلمن بعد الدوش كيمسح شعرووتقلبات بلعاني جيهتو دارت راسها ناعسةوبقات كتشوف فيه مخنزر فالمرايا كيشوف القشرة واش باقا ورجع كيدور وجهه ويشوف لحيتو والصدر عريان وهوا كيتحرك بارهاق ويتعصر مع كل حركة بحال الى مقطع فيه اللحم . هز سبراي دالعرق دوزو على صدرو وتحت يدو ولاح عليه تيشورط مع الشورط وخرج طفا عليها الضو مشا جلس مع مالين دار يتعشا وهنا كيحطو وتجمعو كاملين على الطبلة بغاو يبداو وشاف فيهم

غالي: سارة مغتعشاش؟

اسية:هزات يديها كتشوف فالطبلة) وا كن بغات تعشا كن ناضت.. واش نبقاو نعرضو؟

غالي: شاف فهند) سيري عيطي ليها تجي تعشا

ناضت هندكتلوز وتمضغ مشات حتى لعندها كتفيقها مابغاتش تنوض ورجعات جلسات

هند: مابغاتش قالت لك عيانة

غالي: صافي خلي ليها حتى تنوض

تنهدات اسية وشافت فيه بنصعين كيهز ويجنب للحنب ونوض هند للكوزينة جابت طبسيل حطو فيه الماكلة عاد بداو كيتعشاو بينما سارة مخشية فالغطا كتبكي فصمت

دخل من بعد ماصلى العشا لبيتو وسد عليه الباب خلاهم مزالين قصارين كيتجمعو ومشا لبلاصتو لقاها ناعسة وعاطياه بالضهر .. طل عليها بانت ليه كترمش مغمضة عينيها وعنقها من اللور كيهمس فودنها

غالي: علاش مابغيتيش تعشاي؟

سارة: مافياش

غالي: طبطب على كرشها)نوضي تعشاي يالاه.نوضي

سارة: مافياش اللي ياكل

غالي: غنتقلق منك دابا الى منضتيش..يالاه نوضي

جر عليها الغطا نوضها كترمش وتقلبعلى بانطوفتها وشعرها مطلوق مدلي على وجهها ومشات خرجات للكوزينة قصدات الفران نيشان كما العادة.. مولفة تغضب على الماكلة ومولفة تلقا حقها مخبي فالفران.. اما اسية غير سمعاتها نخزات منال وشارت بعينيها جهة الكوزيينة زعما ناضت.

تعشات وكملات وخلات ليهم الماعن محطوطين تما بعد ما غسلو وممسحو ونشفو حطات ليهم وحدين اخرين ومشات غسلات يديها وفمها ورجعات لبيتها سدات عليها وقصدات بلاصتها كتسبلل فعينيها جلسات حداه كتبسم بوحدها وبدات كتقرب ليه وتلسق عليه وهوا ناعس على كرشو مكيتحرش..طلات عليه لقاتو غارق فالنعاس وتيليفون حداه طالق الرقية بصوت منخفض ..ربعات يديها كتسوط وعبسات لان بسرعة طلقات البشرة فاش شافت تيليفون محلولواليوتوب خدام وهزاتو فيدها بحماس وارتياح وتقادات فالجلسة بدات كتقلب فيه وتقرا المساجات فالواتساب وطالعة نازلة حتى طلع ليها واتساب مكتوب عليه وئام .. انها وئام بنت عمتو المهندسة الصاعدة اللي ساكنة غير. حداه وهوا اللي عاونها فاش بغات تكري وقلب ليها على دار قريبة باش تلقا العوين فالحزة ومزال كيعاونها كل مرة سولاتو ولا رسلات ليه مسج ولا طلبات منو شي درس سبق ليه داز منو ،، لاكن من بعد زواجو بسارة بدات كتضايق من موضوع وئام وفالداخل ديالها مابغاتوش يعاونها او يعطيها وقت لاكن عمرها تجرآت واجهاتو لاكن أسئلتها كثييرة وكتبحث وباغا تعرف اي حاجة ،بداو عينيها كيقراو الحوار بسرعة البرق لقاتها كطلب منو درس من الدروس اللي دوز ورد عليها باللي مزال محتافظ بالكتب واي حاجة قرا فيها لاكن بقاو فالدار عند باه وفاش يمشي يجيبهم ليها .. ومور هاد التاريخ حوار اخر كتشكرو على اوراق عطاهم ليها وكتصور ليه وهوا كيشرح ليها والحوار كان شوية طويل وهوا كاتب ليها جريدة حرتاتها سارة بعينيها والنار شاعلة فيها كتشول فوقاش وكفاش تلاقا بيها وفين وبزاف دالاسئلة خلاوها تفقد صوابها وهزات تيليفونها خدات النمرة وسجلاتها ودخلات عليها للواتساب كتكتب بغيض

المسج بالفرنسية

مساء الخير. انا سارة زوجة غالي . الله يخليك دابا غالي مشغول مع الخدمة والدكتورة ومكيلقاش باش يعاون فالقراية ديالك وحشم يقولها ، الى بغيتي مسعادة طلبي مني انا نساعدك مي غالي دابا يالاه مكافي مع قرايتو وخدمتو وشكرا.

رسلات ليها المسج عاد بردات وطاحت حداه نعسات .

الشمس كتحرق واللي خرج ياكوى .. دخلات للمحل لابسة قميجة كحلة طويلة حد الركبة والشعر مدفور والوارت فاليد كتمشى بالخناث وتحيد النضاضر من فوق الراس..وجهها مزيين كيبري كامل واللي تعرض يسلم عليها كتقوليه دايرة الدوا .

لقات الحانوت عامر بالبنات اللي كيكريو التكاشط وسارة مقابلاهم اما هي بايتة فعرس الليل كامل وصبات ناعسة وغير واخد العروسة اللي هبطاتها من الدار باش تفاهم معاها .

الابتسامة مكتخطاهاش وكاع الناس كيحماقو عليها واللي دخل ميخرجش واخا يكون عندها فالربح خمس ميات درهم ..المهم متخليش الحوايج محطوطين بلا خدمة .

كانت عروسة كتسناها ومعاها طبقة ديال العيالات جايين يشوفو معاها ومنها نيت يغلبو على سكينة بالهضرة وك والثمن وهادا هوا الهدف من داك العدد الكبير دالناس اللي كيرافقو العروسة. لاكن اللي فراس الجمل فراس الجمال .. وسكينة من كثرة ما كتقابل ناس كثار باعت وجهها وحيدات البلاكة ورجعات عندها السنطيحة كبر من مقدمة الطوبيس.. خصوصا الى شمات ريحة الفلوس فشي كليان وباغي يقوليها .

وقفات متكية على المكتب كترحب وبلا متجلس بدات تسول وتدي وتجيب فالهضرة

سكينة: الله يكمل بالخير .. تبارك الله غزالة اللي لبستيها تواتيك

العروسة. شكوا احبيبة.. حتى فكرنا فيك نتي اللولة وجينا نيشان

سكينة: مرحبا على راسي وعيني

ام العروس: قولي ليا بنيتي بشحال كتنگفي

سكينة: فوقاش عندها ؟؟

الام: تسعود وعشرين .. هاد الشهر هادا

حلات لكتاب ضربات على النهار لقاتو بالسيت وفيه جوج عراسات شاداهم لداك النهار اللي كيكثرو فين العراسات بلخصوص

سكينة: امم مزيان الله يكمل بلخير

الام : واتصاوبي فالثمن راه غا على قد الحال ابنيتي

سكينة: ان شاء الله فين عندها. العرس؟

العروسة. قاعة نعم ة

سمعات سكينة قاعة نعمة عرفات العرس كبير والفلوس تما والقاعة كترا بالملاين فالصيف وبدات تشوف فيهم وتخمم الدخلة اللي دير ليهم وبدات تجبد وتوريهم فالتكاشط وتهز وتطلق كيتفرجو

عجبوهم اللباسي وخلاتهم حتى شافو وقيسات العروسة واقتانعو مزيان على قالت

سكينة: هادا الباك اللول.. بلااتي نوريك نوفيل كوليكسيون

بقاو كيشوفو فبعضياتهم كي دايرة هاد التشكيلة الجديدة وبدات كتجبد وخدة مور وخدة وتحلهم وتطلقهم داكشي الهبال .. ها الروميها البلدي والخياطة كي دايرة والالوان كي دايرين الحاصول التشكيلة ملكية مابقار كيشوفو موراها حتى شي تشكيلة اخرى وبدات كتبان ليهم اللولة لا علاقة واخا عجباتهم فالاول واقتانعو لاكن جات التشكيلة الثانية غطات على كولشي ومابقاو قاديرن سقنعو بوالو من مو داكشي اللي شافو وتقلبو كيشوفو فبعضياتهم ويتهامسو باش يزيروها فالثمن

الخالة: ودابا عطينا الثمن اللي عليه العمدة

الام: وتقادي معانا راه تزيرنا ابنيتي ها تريتور ها المصور ها الجوق باقي ليها عاد الصالون تنتفنا والله

سكينة: ماشي مشكل المهم هادو اللولين اللي شفتو سبعالاف درهم باش كيخرجو وهادو الثانيين عماريتهم بووحدها حتى هي كيخرجو بمليون ونص.

الام:فدهشة) اريلي ابنيتي على مليون ونص!!

العروس)بزااف اختي.. صدمتيني

الخالة: ماقلتيمية ماقلتي مليون كااااع !! مليون ونص

سكينة: هادو جداد باقيين ما خرجوش وحيت جاني وجهكم عزيز جبدتو ليكم اما راه مكنجبدوش لاي واحد..كن مكان العرس فقاعة منجبدهمش .. لبسي بعدا وشوفي عاد خودي قرار

الام: شغتلبس اويلي غاالي

سكينة: شوفي هادو اللي شفتي فاللول وعجبوكم نتقاد معاكم ماشي مشكل

العروسة: عقدات حجبانها كتشوف فمها) لالاا بغيت هادو قولها تصايب تنقص

الام: وانا بنيتي جهدي ميات الف

سكينة: خودي هادو ميات الى بغيتي منخسرشليك ولاكم هادو لا .. طالعين بالثمن عليا حتى انا وكن عقلتهم هنايا كوراهم كيخرجو بمليون ماشي غير بمية ..ولاكن خليتهم للعرايس والزوينين بحال بنتك اللي غتلبس وتبان عليها اللبسة ..ماشي اي عروسة نعطيهم ليها

العروسة: كتنخز مها) بغيتهم بغيتهم

الخالة: وغا زيدي نقصي الله يرضي عليك

سكينة: مافيهمش ..كن فيهم ما يتنقص مانخليكشكاع تقوليها نقص ليك من عندي.. وراني نقصت ليك فلخرين حتى هما عجبوكم !

العروسة: شوفي تصايبي معايا وغنجيب لياك صحاباتي

الام: ولاهيلا باقي عندنا البنات تا لهنا فالعائلة اللي بغات تعرس نجيبوها ليك

سكينة : مرحبا بيهم كاملين.. مرى واخرى ونتصايب معتكم فالثمن يكونو ضروف حسن من هادو

شي زير شي فاللخر بقاو كيطلعو معاها فالثمن وهي لاسقة فكلمتها حتى ستسلمو وجلسو معاها على المكتب مقاتلينعلى العربون ..بغاو يعطيوها خمسميات درهم رفضات وطلبات ليهم النص باش ضمن العرس وتهنا وماقطعات ليهم التوصيلحتى خدات منهم نص الثمن عاد ناضت الام عرقانة

الام: قصحتي ابنيتي والله تا قصحتي.

سكينة: هانتي ختاري التكشيطة اللي عجباتك من هنا لبسيها كادو .. (شافت فالعروسة)عندك شي ختك؟

العروسة: هاهيا(شارت بيدها )

سكينة: تانتي خودي تكشيطة كادو

برداتهم شوية من الشوية اللي شواتهم فالثمن واخا يستاهلو لان الحوايج اللي ختارو همة وشان وخرجات من المحل خلاتهم كيختارو ويقيسو تكاشط الكرا ومشات جلسات فطموبيل بوحدها كتحسب الفلوس وتعاود وتحسب فلوس لاكيس وطلع ليها النهار زوين من بعد ما سيفطاتهم عند ليلى حتى هي وجلسات كترتاح وتصوني عليها

سكينة: فين الزين

ليلى: هانا حبي.. انا فتامسنا قطعي دابا نعيط ليك

سكينة: يالاه تهلاي

قطعات وبدات تفكر اشنو دير وتتأمل قدامها وعيطات لفوز دارت تلاقاها فحي الرياض وشدات الطريقحتى وصلات ومسحات وجهها وقدات راسها وتريحات وطلقت الشعر عاد نزلات كتبومبة هزات صاكها ومشات كتدلل فالمشية والدنيا عامرة وكثرة السيارات الفارهة غادية جايا دخلات لمقهى واصوات الضحك والهضرة وبدات كتقلب بعينيها لقات فوز كتشير ليها بيدها وجالسة مع واحد البنت اخرى ومشات حتى لعندهم كضحك سلمات وجلسات

سكينة: فيين..صاافا.. زوينة هاد الكافي

فوز: جايا ليها على قبل واحد الكيك كوري دخلوه .. ناريييي اسكينة دوخي

سكينة: فيا جوع متغديش.. كيديرو الماكلة؟

فوز: اه اصاحبتي.. كيديرو ليبلا وااعرين هزي الموني تشوفي

سكينة: انشوف

فوز: شارت لصاحبتها) صاحبتي ياسمين .. سكينة صاحبتي

ياسمين : متشرفين احبيبة

سكينة: متشرفين

بقات كتشوف فيها سكينة كيفاش دايرة ولابسة الدهوبات والشعر كحل ستايل خليجي واخا اللبسة رومية زوينة . بقات كتقلب على شنو تاكل وتسول النادل هادي شنو فيها وهادي شنو فيها وهوا كيشرح ليها فالاخير قدمو لفوز الكيك الموري الابيض مدردر بشكر كلاسي بحال البونج وسكينة طبق مشتطيل فيه الرولو مقطع ديال الدجاج معمر بكروفيت وشومبينيو من لداخل بحال السوجي ولاصوص ومقبلات مع سلطة دائرية وعالية بحال الكيك وبدات دوق وتبنن وتشكر وفوز كتاكل ودوب فديك الحلوى ..داقت منها سكينة ودابت حتى هي وهبطات مداقها بعصير اكثر لذة وقالت

سكينة: اختي مكاين لاحب لابيكالا كاينة الماكلة حيدي عليا

ياسمين: واللهيلا هههه هاحنا باقيين فيه هادشي علاش كنا كنهضرو

سكينة: شنو كنتو كتقولو ههه

فوز: غا الرجال علامن كنا داويين

ياسمين:شافت ففوز) نشوفو كيخووني والله منهضر افوز .. نقولها ليك نيشان..صافي معيشني فواحد النيفو عمري كنت كنحلم بيه وجايب ليا الخدامة من اندونيسيا و عايشة كي الاميرة ومرة مرة كندير عمرة .. كيعاملني مزياان وكيهيديني ..صافي اشنو بغيت نكدد!! ولفتووو دابا صاافيقنعت وشبعت .. مغنوضش معاه الصداع على شي وحدة نهائيا ونرجع انا لخربتنا ونخلي العز كاامل فين كنت عايشة

سكينة: نااري ياختي باز ليك انا منقدرش… يخوني!!! والله منزيد معاه

ياسمين: برزانة) غيير كتقولي… فاش كتزوجي كيتبدل التفكير .. انا كنت كنقولهاد الهضرة ديما ودافعة بيها كبير.. وفاش تزوجت واستاقريت وليت كنقول هضرااا اخرى

سكينة: ياختي بنااقص كااع من شي زواج

ياسمين: وعلاش؟ الى لقيتي اللي يهزك ويدير ليك كوولشي.. علاش لا.. انا كنت بدرااعي وكنضرب تماااارة ديال بصح..ولاكن داكشي ماغيديرش ليا داار وطموبيل وكدا..

فوز:حيت هي مطلقة وعندها بنت

سكينة: بصااح!!

ياسمين: اه احبيبة راني مجربة الطلاق.. كنت مزوجة بواحد الكلب تفووو.. طامع ليا فقلوس القرعة ويتمسكن ويتبحلس وانا كنت خدامة غير فواحد الصالون فكازا.. غير كيحس بيا شديتها كيبقاعليا. حبيبة كبيدة ويتبحلس مكنحس براسيحتى كنعطيها ليه..

فوز: عرفتي اسكينة دارت ليه قالب يهرب ليك

سكينة: واايلي

ياسمين: حشيت ليه اكبر صبع .. نوضناها وقاليا خرجي علياا..تقولي عندو قصر وهي غابيت وكوزينة وانا مفرشة الصالون بفلوسي وحاملة وكنخدددم ونعععرق وغادة جايا فالشموشات.. جرا عليا ومشيت جلست فدارنا قلت لباباها اللي كاين ها اللي كاين وبقيت وهوا كيقول لمو وخواتاتو خليها تربا.. جات الاللة واحد صاحبتي خلاتني لكرووووب هه ايوا وداك الكروب وداك الكروب مافيهش كااع مغاربة و دخل عندي راجلي دابا للخاص بدا كيهضر معايا وبغا يتعرف عليا وقلت ليه مزوجة وكدا عندي مشاكيلوها كاين وها كاين ..فاللون بدا كيواسيني عادي وشوية قالي نتزوج بيك غير طلقي

فوز: عبرتي على مو

سكينة: اهاه!!

ياسمين:صافي قاليغير طلقيالى بغيتي انا نديك..ومشيت ديك الساعة دفعت الطلاق وبقينا طالعين نازلين والكلبكيتفرررعن عليا وعلى بابا.. الشماتة وقاليهم نطلقهااا حيت ديجا مطلق وحدة عندو عادي. صافي نهار طلقني فداك الشهر جا السعودي خطبني

سكينة: مزوج؟

ياسمين: لا انا اللولة .. فالقانون ممنوع ولاكن هوا باه كان مشلول ومشا دخل حتى لعند الشيخ قاليه بغيت نتزوج وبا مشلول وحتى وحدة ماقبلات وبغيت نجيبها مغربية هي اللي تقبل ليا على باوعايش معايا وداكشي عاد عطاوه الموافقة ورجع ودرت العرس كي دااااااااير ..الكلب تصدم جا دار ليا الشو هةفالحومة بغا يدي بنتو ولاكن نزل ليه بابا وعميعطاوه قتلة ..موراها مشيت ورجع كيسيفط ليا كيقول ليا سلفيني وكيشكي عليا ودرت معاه المزيان غير على قبل بنتي باش مايعكسش ليافيها وبقينا معاه كنسايسو وهضر معاه راجلي وكيسيفط ليه الفلوسحتى عطاني الموافقة ديت بنتي معايا فمرة وانا نقلب على مو وريتو الوجه لاخر … ودابا بيخير ساكنة ففيلا كيصرف عليا ساراني شحال من دولة حليت ماكلة عمرني تخيلتها ودخلت لاماكن ماكنشنحلم بيهم..سبع سنين وانا معاه ولفتو منقدرش نتفرق معاه دابا وبردت ولفت الجلاس والراحة .. داكشي علاش قلت لفوز واخا نشوفو كيخوني نسد فمي ونمشي نعس..مقادرة على طلاق والى واجهتو صافي غير نطلق ولا نبقامعاه بلا كرامة وحتى هوا كتبدل نضرتو ليا ومايبقاش محتارمني ومقدرني..اللهم نسد دلقوشي ونتكمش..عندي معاه الولد وكيصرف على بنتي صافي الحمد لله نبوس يدي..هزني من تمارة خليه يدير اللي عجبو ..كيجي يبوس ليا راسي ويقول لي نور عيني وحبيبتي ويتهلا فيا… غا الى بغيت نخرج على راسي نوض ندير فيها مقودة اللهم خليه..يعرفني ماعارفاش ومقدرني وضارب ليا حساب ولا نجهل نحرمها عليه وعليا كي دارت وحدة تما فالسعودية كنعرفها ساقت الخبار نوضاتها معاه وتخربقات العلاقة بيناتهم ورجع كيخرج فيها عينيه فاللخر طلقو وراها كتهز رجليها دابا من واحد لواحد..رجعات هي اللي كتهز الرجلين ولخرى اللي حصلاتو معاها تزوج بيها وجلسها فالدار قاطعة الحس

لاالا منقدرش..نسيفط الزمر بحالو ونكمل بوحدي ولا نتزوج واحد اخر وهي غادة.. تا نموت(تيليفون كيصوني) الو خالتي كريمة… لاباس عليك؟؟ كولشي مزيان ..اه قالت ليا ماما..شنو؟ اااه ان شاء الله .. صافي ان شاء الله لالا كوني هانيا.. يالاه بسلامة (قطعات) العائلة دالخرا

فوز: مالكي؟ واحد خالتي غدير العرس هاد السيمانة ودابا معيطة ليا تخايلياش قالت ليا

فوز: شقالت؟!!

سكينة: قالت ليا فاش تكوني جايا جيبي ليا التكاشط نعزل ..بغات تكاشط كاااملين نجمعهم انا ونديهم ليها هي تختار مع راسها وباش عصباتني قالت ليا جيبي للبنات حتى هما يلبسو راه كيوصيوني.. وخالتك سميرة حتى هي كتوصي..مافهمتش انا بنادم منين كيفكر واش صافي حيت نتي عندك العرس خاصنا نسدو ونجيو واللي خدام يجلس والليعندو محل يطرقو حيت نتي عند العرس

فوز: عاادي اصاحبتي خالتك ..دي ليها ياك غا ليلة

سكينة: كون كانت عمتي ولا وحدة من عماتي ندي الفاركونيط

كلها ونمشي.. اما هادو لا … عممرهم عطاوني شي شرويطة.. تخايلي فاش كنا صغار مكانش بابا كيشري لينا وكنا كنشوفو عندهم شي حوايج كيجيونا وااه .. عمررهم مدو لينا شي حاجة واخا غير نقيسوها.. والى قسنا شي حاجة كيبداو يتبعكوو لالالا ماتقيسوش.. لالا حطو .. لالالا الحبس. اما خالتي كانت كتمشي للكوزينة طيب شي حاجة وتسد عليها باش حنا منشوفوش.. عمررررييي نساها واحد المرة حطات طبسيلفيه دجاج مقليوالبيض مصلوق وكاس دلعصير وجلست قدامها كنشوف فداكسيوحنا ماعندناش فدارنا ديك الحرية المطلقة اللي نديرو داكشي حتا حنا وكنا صغار .. ماقالتش ليا اجي تاكلي..مدات ليا فرتوووتة تخايلي !! فرتوتة قد هاكامن البيض وحزيقة ديال الدجاج وقالت ليا هادشي قليل انا متغديتش نتوما تغديتو..وحنا تغدينا المرقة وهي لا كتبغي داكشي مبعكك ..كرهنا فيه حنا اللي موكلينا المرقة باللفت والكرعة

فوز: ههههه ناري اسكينة علام

سكينة: عرفتي طبعهم خااايب.. كيبغيو راسهم بزاااف ..الى كانت عندهم غير شكلاطة فالصاك يبقاو مخبيينها تما حتى تغمل ..باش ميجدبوهاش ويقسموها معانا.. ولا يتخباو ويبقاو ياكلو ويديرو ليها عاه وهاه بالزربةيخشيوها باش منشوفوهاش حنا. ودابا بغاونا نتهلاو فيهم مليي يجيو عندنا ونعطيوهم اي حاجة شافوها.. بااز…عمر شي وحدة فماتي دارت لينا هاكا..بلعكس كان كلشي ديالنا وحنا اللولين واللبسة يكونو يالاه شراوها يعطيوها لينا نلبسوها واخا معندهمش وغير فالبلاد.. هادو العياقة والشيكي والبخ والسم .. قالت ليك جيبي ليا تكاشط نعزل ندي ليها الخرا طليه..كانو كيحتاقرونا حيت كنا هركاويين معارفينش… مافراسهمش غنكبرو ونتعلمو الليمتعلموش ليه هما

فوز: غا دوزي دوزي.. كولشي كيفوت

سكينة: والله مانهز انا تكاشط وتم غادية بيهم كي الجمل.. غادة نحضر ولا غادا نكف!! لخرين تا هما مامركوش قالك تجيب كولشي وتجي..جيبي كاااع داكشي كاامل نشوفوه!! ياختيييي بنادم وجهو قااصححححح انا عمري لسقت شي واحد على شي حاجة ولا قلت ليه جيب ليا عطيني..واخا كنت صغيييرة كنبغي نشوف وصافي ماكنطلبش وماما ماولفاتشلينا نطلبو كاااع وبقات فينا طبع غير كنشوفو ونتكواو من لداخل ماكرهناش ولاكن ماعندنا منديرو ..وعارفين بابا الى قلنا ليه بغينا يقولينا هاي هاي على التقحبين .

فوز: العائلة دلخرا.. تاحنا هاكاك .. ماعاجبينهمش وماكيرضاوش بينا حيت ماما فالسعودية وانا ساكنة بوحدي انا وخويا وكنحشمو بيهم ..ولاكن حتى واحد ما جا قالينا نصرف عليكم وجلسو فداركم والحولي يجيحتى لداركم

سكينة: اااه فكرتيني..واحد السيدة مسكينة راجلها مات خلاها حاملة وغير فديور الكرا وولدات .. تساهمو معايا نشريو ليها حولي تسمي عليه؟

فوز. اهاه مافيها حتى عيب

سكينة: عيطت ليلى نقولها ليها قالت ليا انا فتامسنا تا تعيط

فوز: اه راه هضرنا لبارح مشات غدفع فواحد الدار .

سكينة: حلفي!!

فوز:ااهيه.. داكشي اصلا اللي غينفعها

سكينة: ياختي كتغفل

فوز: غير خمسة وعشرين مليون وباقا فالبلان من هنا خمس سنين عاد يطلعو ..قالت ليك غدفع فيها شي بركة جمعاتها وغتبقا تعطي كل شهر شوية حتى تكملها ..واقيلا غتبقا ليها شي خمسطاش غتخدم عليها وتكملها من هنا خمس سنين

سكينة: بصاااح.. مقالتهاش. ليا.. كيتحمعو ليها الفلوس سعداتها

فوز: القورعااات احبيبتي.. كدير القرعة هي باش غدفع التسبيق

سكينة: وادخلوني فيها حتى انا نجمع التسبيق هههه

فوز: خلي تجي تشرح لينا بعدا على البلاصة.. راه قلت ليها جمعي المعلومات والى كانت مسلكة تا انا ندفع فيها.. نبيع داك الدهيب اللي عندي ونزيد عليه شي بركة مخبياها وندفعها واخا غا نكريها تصرف عليا

لعشية دازت زوينة والمورال زوين هاني.. مكذخل حتى لحداش طناش فاش كيخوت الشارع ويتسدو المحلات ونيشان كتمشي تنعس مابقات كتهضر مع مالين الدار ولا تجمع معاهم ولا تعرف اش واقع عندهم ، كانها شبح وعايش معاهم بلا عقل وبلا روح .

صبحات هازة سطولاتها وغادية للحمام دالحومة .. فرشات الجلدة وشدات الطيابة فركاتها حتى سلخات ليها الجلدة وخرجات من الحمام لاوية الفوطة على راسها ولابسة بيجامة نص كم بسروالها ومشات ركبات سيارتها وجلسات كتسوط سخفانة وكدهن يديها الناشفبن عاد شدات للطريق للصالون عند ليلى مع جوايج الربعة وفيدها صاك صغير وبلاستيكة فيها العصير وبتيبان وكراواصا والرايب ودخلات كتجر صندالتها وتفرنس لقات الصالون عامر واللخر واقف فالباب والصهد والموت وليلى مخشية فالبيت مع العرايس خدامة وكطير وتقول ماطرتش . مشات سكينة لبلاصة البيديكيو وجلسات سخفانة ومزنكة وجبدات الرايب وكراواصا كتاكل ومتكية راسها كتشوف بعينيها وتمضغ تقول طلعوها من البير .

مالقات معامن تهضر ولا شكون تسول وكاع البنات خدامين قدامها كيزربو وشي لابس تكاشط شي داخل شي خارج والروينة .. شافت حتى عيات و عيطات لكنزة

سكينة: كنزة.. اري ختي شي مبرد .. نحك هاد الصباغة علا بيدمن تسالي

كنزة: الزين ههه..بالصحة والراحة ..سخفتي

سكينة: بارهاق) الموت .. تصلقت اختي.. باقا معطلة

كنزة: شنو بغيتي تصايبي؟

سكينة: بيديكير ويديا.. غدا مسافرة عندنا عرس…ليلى بانت ليا مشغووولة

كنزة: عندها اكومبانيمو ليوم غتسالي تبع لعروسة

ناضت سكينة كتنهد حتى لعندها ووقفات كتشوف فهاديك اللي كتصايب الشعر وساهية

سكينة: بخفوت) بغيتيها توريني كي ندير لمكياج مكنعرف منين ندوز ليه!!… خصوصا داكشي فوق العينين وانا غادا ماعارفة حتى لمن نعطي وجهي

كنزة: هههه ..وغتوريك فدقيقة !! ميمكنش

سكينة: غاا توريني غنشد غا توريني كي ندير… ايلاينر اللي كنعرف ندير وفوندوتان صافي.. حجباني هاني طبيعين ..من عند الله مكنطاريسهمش..كنعرف ندير فاغاجو صافي هادشي اللي كنعرف

كنزة: وا هادا هوا المكياج!

سكينة: الااا.. بغيت ندير اصاحبتي هايلات وكونتوغ وداكشي دهنا اللي كيبين الوجه وفوق عيني وتحت عيني والشفار .. كي غندير لهادي؟؟ غنتشوه

كنزة؛ الشفار انا نركبهم ليك وتهناااي

سكينة: ايوا وفوق عيني!!ًندخل فحيط باش يبانو

كنزة: انا نوريك غا تسناي نسالي

سكينة: وشحال باقي ليك من وحدة

كنزة: هادي ووحدة اخرى .. صافي

سكينة: تنهدات) عطيني نشف شعري عطيني.

هزات واحد السوشوار وبعدات على الناس بدات تقلب وتشقلب فالشعر وكولشي حاضيها حتى طلع ليها الدم ومشات ردات الريدو معصبة و نشفاتو نص تنشيفة ولواتو ومشات عند كنزة دارت يد على يد كتشوف اش كدير وقالت

سكينة: على بيدمن تسالي غنهبط عند سيمو نشري المكياج ..قولي ليا اش نشري

كنزة: طلي على ليلى طلي هي تقوليك

سكينة: مابغيتش نصدعها عندها عروسة خلها مكونسونطرية

كنزة: غير خت لعروسة اللي كتصايب لعروسة خرجات مشات.. لخرين باقا متبدات ليهم

طلات سكينة براسها على البيت فين خدامة ليايى وبدات كضحك وليلى حالتها بالمكياج كتخدم وتهضر

ليلى: ماشتكش..بالصحة

سكينة: الله يعطية الصحة . قولي ليا … بغيت نشري مكياج نديرو فالعرس غدا شنو نشري..ضربي وقيسي راه مكنعرفش فداكشي

ليلى: سيري وعيطي ليا من تما

سكينة: سيمو عندو زوين؟

ليلى: قولي ليه الماركة اللي بغيتي..غا سيري ودوزيه ليا نقوليه يجمع ليك

سكينة: اييوا صافي تا هادا بريكول هه..جبت ليك العاصير وكرواصا

ليلى: صافي شكوا الزين

سكينة: هانا مشيت( دازت على كنزة) هانا راجعة ديري بحسابي يدي ورجلي غنعاود دفار عنداك تنسايني

كنزة: متعطليش وصافي

سكينة: خفا زربا

جمع ليها السيمو كلشي فصاك بالحرف من داكشي اللي ملات عليه ليلى ومدو ليها رجعات كتمشى بشوية عليها دارت حدا مخبزة يالاه خرجو الحلوى بنينة ومشات وقفات كتشوف وتبنن بنفس البيجامة خدات الحلوى فكارطونة ورجعات للطموبيل داتها للصالون ودخلات عند ليلى اللي خدامة من حد عقلها حطات ليها الكارطونة وهزات وحدة وقالت بهمس

سكينة: كولي ونتي غطيحي.. كولي العرس راه مغيطيحش

لاحت ليها الهضرة فالودن وخرجات عند كنزة تصايب يديها ورجليها وكتاكل فالحلوى حتى كملات وناضت عند ليلى كتوريها المكياج وقالت

سكينة: ها السلعة شريناها…ايوا كي غنديرو ليها

ليلى: صبري قريبة نسالي

سكينة: بأسف)متأ غاسمحي ليا غنزيدك تا انا ونتي عيتي

ليلى: لالا عاادي ..مولفيين

سكينة: غنرجع عاوتاني عند كنزة تلسق ليا الشفار

مشات عاوتاني ركبات الشفار وحدة وحدة وعاودات ناضت عند ليلى كتوريها اللي تقد عليه وكان عقلها خفيف وحتى ليلى وراتها الساهلة الماهلة وكلات معاها الحلوى عاد مشات جلسات صايبات الشعر وخرجات بحالها للمحل ديالها جمعات اللي تلبس هي ورانيا ومها و وشطبات لاكيس ومشات بحالها دوزات الليلة فالتقياس هي ورانيا ومونية كيجريو ويعاودو ويجمعو الحوايج ومونية مربعة كطوي

مونية: ايوا ماجبتيش لخوالاتك داكشي علاش وصاوك

سكينة: خاارجين..كولشي خارج هادو وخبيتهم بزز

مونية: غااايبقا فيهم الحال(كطوي فرحانة)

سكينة؛ غااا عرسي فالسطح تا نتي اللي سمع العرسي يقول فقصر القباج .

رانيا: واخا هاكاك راه العائلة غتكون

سكينة: وصافي صافي مني ليهم غا خليني.

جمعات وطوات ومشات نعسات..والصباح مع الفجر شدو الطريق كاملين مع بناصر فالطموبيل وهوا غادي طالق ليهم الامداح وهما اللور شي مخشي فشي بالنعاس حتى سخف ووقف فالجنب عطا لسكينة كملات الطريقة وهوا حداها حتى قربو عاد نوضها وجلس بلاصتها

وصلو لحي شعبي.. بين الدروبا ووقفو فواحد الزنقة اللي كان باين فيها الطموبيلات دالعائلة مصافين والاطفال كينقزو والرجال حاطين الكراسا برا كيتبردو وشي داخل شي خارج ..كانت دار من جوج طبقات وقفو جنب الحيط ونزلو والناس خارجين كيطلو يشوفو شكون اللي وصل .. اما بناصر نازل بالجلابة والصدر لقدام كي الديك والراسما كيفرنس ودافع كبير .. كيسلم وهاز راسو وكل شوية يخشييديه فجيابو ويبدا يتجبد تقول غير هوت اللي كاين زعما راني وصلت.

اما رانيا نازلة وكضهسس فالارضمن الحشمة وكتقوس ضهرها وضحك بخجل لابسة الجلابة وتحتها الكولون والبلغة والحجاب ويديها بيضين والدفار مقطعين..كات طول من سكينة بشوية ..اما مونية نازلة وكتعوج راسها للجنب وتسبلل فعينيها بحال المضلوم اللي كيستغيت حتى نخزاتها سكينة اللي نزلات وراها بدجينز وقميجة طويلة دايرة اخاطر لباه فاللباس باش تاقا شرو..

سكينة: نخزات مونية)هزي واسك وضحكي ونتي مدلياه بحال لا جايا لعزو

صارت عندها مونية دفعاتها حتى كانتغطيح وقالت

مونية: سيري الله يحرق والديك..بعدي مني شبغيتي عندي

دورات وجهها معصبة رجعات حمرا كتغلي ودغيا رجعات للأسى والنضرات الحزينة فور ما تعرضو ليها يسلمو عليها وهي كتسول على الاحوال وتردد ” الحاامد لله حامدينو وشاكرينو” وبدا الحوار بالامازيغية وهما داخلين مع الباب، كان النهار والقيطون على برا يلاه كيوقفباش يوجد لليلفين يديرو العرس وكانت الدار عامرة حتى للفم بالعائلة وقوةالعيالات والبنات بكثرة شي لابس بيجامة وشي لابسة كندورة وكله بنات بسيطات جدا كيشوفوغير بنص عين. مكانوش بنات مونية مضاسرين مع عائلتها ابدا بل كانو ديما بعدا وقليل فاش كيمشيو الا للضرورة فقط .. هادشي علاش مكيتلاقاو حتى كيبان التغير والسن على الجميع.

يالاه وصلات للدروج اللي كيطلعو للفوقي داز فيها شاب نازل على غفلة وهزات راسها شافت فيه ضهشرها بالصدر وتيشورط المزيرة للي لابس ودجينز والشعر كحل رطب والزين والحروف كوحل دار فيها شوفة صارمة ومعقولة ونزل عينيه قاليها “سمحي ليا ” ومشا.

غير هوا داز خرج وهي دور بقات كترمش وتسائل شكون هادا؟؟ عمرها شافتو يكون صاحب خالها مثلا!! ولاكن بوكوص شكلا وكاريزما بحال شي بوليسي وديك اللحية مطراسية .!

دغيا قلبات الدفرة للجنب وعواجت فالمشية وبدات تسبلل فعينيها وتتبسم من بعد ماكانت داخلة وكدور فعينيها بملل وقرف

تعرضات ليهم سميرة كتسلم وترحب وتعنق ورانيا وسكينة كيفرنسو ليها..سلمو وطابو بالتسلام وطلعو لفوق للبيت يشوفو خالتهم العروسة اللي جالسة وسط واحد البيت مقلبو بالروينة، السطولة لتحت دالخلوى والصيكان والشوانط والحوايج مكركرين وجالسة كتاكل فالكبدة والموناضة فواحدالطبسيل..سلمات عليهم وفرحات بيهم وقالت فالاخير

كريمة: سيرو ديرو كاسكروط

ناضو بعفوية خلاوها جالسة لاكن هي مكانتش باغا حتى واحد يبقا جالس ليها فالبيت من غير شي بنات منهم صاحبتها .

احيانا كنشوفو طفل صغير او مراهقكيدير تصرفات كيخليونا نكرهوه تلقائيا ونحتاقروه ونفروه والخاطر يهرب منو واخا يكون نية ومعارفش احساسك من جيهتو كيفاش داير وكيبغي يجلس معاك واخا غير يشوفو .. لاكن كنجريو عليه ونبعدون بطرق مباشرة او غير مباشرة.. وكاين اللي كيدير فيه شوفات خايبة كيبغيي يحسسو بأنه دون المستوى ومكره وصغير.. وكتبقا ديك الصورة فالعقل واخا يكبر واخا يتبدل شكلو لاكن داك الاحساس الغير مريح اتجاهه كيبقا خصوصاالى بقا بنفس الشخصية وكيشوف وساكت ومكيهضرش وكيكتم الغيض وعمرو عاملك بالمثل. لاكن نهار داك الطفل كيوعى ويبني شخصية لراسو ويحط حدود لنفسه ويحتارم مشاعره وشخصه وكيانه ونفسه وكيوقفك عند حدك ويواجهك او يعاملك بالمثل ومكيبقاش يهمو رأيك .. هنا كتحس باللي نتا اللي رجعتيصغير وماشي فالمستوى وعندك عيوب كيرد عليك بيهم وكيشوفوهم ويوريهم ليك وكتبدا تصغار وتقلال ثقتك فنفسك وكترجع تعاملو باحترام وتقدير وترد معاه البال وترد لبال حتى لراسك قدامو باش مايحتاقركش ويصغرك قدام نفسه .. وكترجع يا اما باغي تصاحبو وكتجاملو او تعطيه التساع فمرة وتحشم حتى تشوف فيه ودوز من حداه.

هادشي اللي واقع مع رانيا وسكينة وخوالاتهم .. لاكن رانيا وسكينة لحد الساعة كيشوفو ويفهمو ويتسوعبو الامور لاكن بدون رد.. كيدوزو ويميكو لانه بيساطة مزال ماكتاملاتش الشخصية اللي غتاخد كل وحدة منهم باشحتى هما يتخاد برأيهم وتسمع كلمتهم .. وهاد الميزات كيجيو يا اما بالقرايا والمستوى العالي او المادة . اما باش تقوا شخصيتك فالمجتمع بدون هادو بجوج فيستحيل لان الناس كتحتارم فقط هادالثنائي اللي بسلاسة كيخليوك تحس براسك موجود وتزادك الثقة فالنفس واحترام الدات. اما من غيرهم فشخصيتك غتقوى الى خدمتي عليها. لاكن قدام نفسك فقط وماشي قدام الغير . وسكينة قوات شخصيات ودارت لراسها كاريزما واخا كانت عندها وكانت تحت القمع لاكن المال زادوها الثقة فالنفس لاكن الرد عاد حان وقتو باش تكتامل شخصيتها وتحدا نفسها واخا عندها تخوف من الرد قدام اللي مصغرها وباشتبادل معاه الادوار خصها شجاعة قوية اللي تخليها تحيد داك القناع القديم وتوريهم القدام الجديدة .

جلسات بين الناس فواحد الطبلة دارت كاسكروط هي ورانيا وحدا وحدة وعينها غير كيدورو ..ماعندها معامن تعاند ولا معامن تسابق..كاع البنات اللي تما بسطاء وعفويين واخا كتعرف كل وحدة بنت من لاكن ماعندهاش علاقة بيهم.

شدوها العيالات الكبارات كيبسطو معاها ويراريو بيها ورانيا كذلة شادينها فجهة اخرى كيبوسو فيها ويراريو بيها حتى قنطو وخرجات سكينة كتقلب بعينيها على داك الوسيم اللي تلاقات فالدروج وبقات كدور من قنت لقنت كتقلب لاكن غبر ليه الاثار، طاح عليها الضيم وتلاقات مع بنت خال امها ..انها اماني.. كانت فالوجه والشبه والشعر مثل هيام..الخالق الناطق وكأنها هي ..نفس الابسامة ونفس اللون والشعر..كانت اماني بريئة ..نية لابعد الحدود وكتبان فنضرة عيونها كانت اكثر شخص كتبحو سكينة فعائلة مها وكانت كتموت عليها لدرجة كبيرة لا توصف..غير شافتها طارت عليها بالبوسان والتعناق وعاد حلا ليها الجو وفرحات اماني بسكينة وسكينة باماني وجلسو برا على الكراسا كيتجمعو ويتعاودو ويضحكو

اماني: تبدلتي العفريتة..قالو ليا درتي الطموبيل والحانوت ديال التكاشط..ايوا مبروووك

سكينة: الله يبارك فيك هههه

اماني: جبتي لينا بعدا شي تكشيطة ولا والو

سكينة: جبت وحدة سوكور كنت غنبدا بيها ولاكن لبسيها

اماني: صافي انا نيت نعطي تكشيطتي لمي ماحابتش معاها مالقااتش واالو داكشي خايب

سكينة: صافي هانتي غندك تكشيطة

اماني: درت الحلاقة انا ..كنتعلم

سكينة: مزياان حسن من الجلاس فالدار

اماني: لالا حسن.

سكينة: ايوا كاين شي خطاب ولا والو

اماني: ويلي موجوووودين ههههه .. مابغيتش..فراسك عزيز ولد خالتي بغا يتزوج بيا..بلحق نقوليك حلفي ماتقوليها لشي واحد

سكينة: غير قولي راك عارفاني

اماني: سميرة خالتك حرشاتو عليا.. هوا فالصحرا سولها عليا حيت مضاسرة معاه وقالت ليه اييوا بنات المدينة متعرفاش كيديرو!!و دابا هادي هضرة؟؟؟ شنو شافتني كندير؟

سكينة: تفوووو… المرض

اماني: بقاااا فينا الحال.. قالها ليا بقيت غير كنشوووف!! علاش زعما شنو درت ليها انا؟ كتعاود ليه عليا شنو شافتني كندير؟ واخا هاكاك بغا يتزوج بيا ومابغيتوش ومي قالت لي لا ..ومزال لاسق فيا

بقات سكينة غير كتشوف مالقات متقول حتى رجع الشاب الوسيم ومع الدورة دوجهها شافتو جاي مع خالها وحادر وراسو كييسرق. منها النضر ..توكضات وتقادات فالجلسة كتشوف فيه بنص عين وتبسم مع اماني حتى دخل وضارت بسرعة

سكينة: شكون هاداك الزين ؟ عمرني شفتو

اماني: هاداك واقيلا كيجي لجداتك ..مت مك (اللي ربات مها) راه كاينة ختو هنا وخوه مو وباه .. حتى شفتو فاللول وسولت عليه سميرة قالت ليا ولد شي خال مها ولا منعرف..المهم من عائلة خالتك من جهة مها

سكينة: وسميتو؟؟

اماني:سميتو انوار

اماني كتهضر وهوا يتم خارج مع الباب هوا وسميرة كيضحكو وهي لابسة قميص خفيف ديال الدار وصغير عليها يكون فأواخر فالعشرينات.. كيهضر ويشوف بنص عين فسكينة وهي كذلك والنضرات كتمشي وتجي وتم الاعجاب بيناتهم وبان من خلال الابتسامة المريحة اللي كانت غادية جايا فكل مرة كيتلاقاو.. حتى هوا رجع غادي جاي جهتها باش يشوف فيها وهي كذلك مناضتش من الكرسي اللي جالسة عليه باش تشوفو حتى لواحد اللحضة من بع. ماتعاشات لعشية ووقفات لخيمة وتحطو الكراسا جلسات سميرة فواحد الجهة وسط ولاد العائلة وكان هوا معاهم ودارت الجلسة ديال الاخت اللي كولشي كيتفاهم معاها وربعات وشارت بيدها لسكينة تجيب ليها كاس دالماء..

ناضت سكينة كتفخ بينها وبين راسها مشات جابت ليها الماء ورجعات مداتو ليها وكانت غير وياه اللي جالسين فديك اللحضة..مع غتمد الما هز حاجبو وعينو فيها وقال

انوار: تبارك الله على بنات ختك ..عندكم البنات بقا ليكم غير تزوجوهم ومافخبارناش

سكينة عجبها الحال بقات كضحك وترمش وسميرة كتشوف فيها وتبسم وكطلع فيها وحركات راسها وقالت

سميرة: باااقي الحال شوية باقي..العقل الله يجيب

جمعات سكينة الضحكة وهزات حاجبها شافت فيها وقالت بلا متشعر

سكينة: نتي تبارك الله مولات العقل.

ضارت بالنفخة مابقاتش حملاتو لا هوا لا خالتها ويالاه بغات تنسي سمعات سميرة كضحك معاه وقالت

سميرة: خروب بلادي وراني عارفاه ههه فلفلة تبييتك فالزنقة

انوار: بتعجب)كاع!

سميرة:كتبسم وتشوف فسكينة اللي كتسمع وعاطياها بالضهر ) مزال مزاال..باقي خصها واحد ست سنين ولا سبع سنين دير عقلها

ضارت سكينة شافت فيها وقالت بالضحك

سكينة: ايوا يالاه امولات العقل ديري لينا شي عراسية حتى نتي بالعقل اللي عندك

وسط الضحك كاينة المعنى وسميرة بقات غير كتشوف وفمها مجبد بالضحكة اللي بقا اثرها ومصدومة فسكينة وكتبسم ليها وتهضر معاهت بعينها كأنها كتقول ليها نتي هاكاا!!

لاكن سكينة دورات وجهها ومشات واماني تابعاها مجايبة للدنيا خبار .. اما سكينة وجعات لبلاصتها جلسات وعطاتو بالضهر كتعاود وتلعب فشعرها حتى بدا الليل يطيح وكلشي ناض كيلبس ومشات سكينة واماني للبيت لقاو مونية جالسة مربعة حالة الباليزة وسميرة واقفةعليها هازة تكشيطة وكتشير بيدها بنية

مونية: هاانتي..بلاتي..هااادي اللي غنلبس انا .. وهادي دسكينة وهادي درانيا ..الى عجباتك هادي اللي غنلبس خوديها وعطيني ديالك نتبادلو

سكينة غير شافت الباليزة محلولة ورانيا كتلبس وكولشي مجموع عليهم تما باللي كتعرف باللي مكتعفرش كيتسناو التكاشط خرجو عينيها ورجعات حمرا ..مشات تخشات لداخل كتنفخ وسميرة دايرة يد على جنب وكتشوف فيها وتتحاسب معاها

سميرة: فين التكاشط اللي قلت ليك جيبي؟؟؟

سكينة: كتجمع الحوايج) لقيتهم كاملين تكراو حتى وحدة مابقات والنص فالمصبانة

سميرة: حلات صبعانها) دابا خليتينا كاااملين فهاد الليل بلا حوايج وعاد دابا كتقوليها !

سكينة: ببرودة) انا حسابني غتكونو كرييتو !!

سميرة؛ كتشير بصبعها)كريتي نتي؟؟ نتي كريتي؟ًنتي كريتي؟

حتى واحد فيهم ماكرات وسكينة فالارض هازة راسها كتشوف وكتجمع وسميرة بحال فرعون كتحاسبها قدام كولشي بجرأة وراسها فالسما وتكشيطة فيدها شاداها ..هنا ناضت سكينة وقفات وتحدات نفسها واخا القلب كيضرب واول مرة تخرج الشخصية اللي كولشي كيعرفها بيها فحياتها المهنية وقالت

سكينة: ونتوما مراااض ولا مالكم كتسناوني انا نجيب تكاشط من الرباط لاكادير ماعندكمش تكاشط هنا ولا شنو؟

مونية : كتجرها) اييوا ..متهضريش مع خالتك هاكاك

سميرة: هازة حجبانها ومبسمة) مابقيتيش كتحتارميني؟؟ هاكا كتهضري معايا؟

سكينة: دابا شنو خاصك؟؟ تكشيطة ؟ هاهيا خوديها

بقات سميرة كتشوف وطلقات تكشيطة اللي عطاتها مونية فوق الباليزة وقلبات وجهها مشات هازة راسها وتفرق المجمع وشي كيوشوش لشي خارجين كيتسابقو

شنو غنلبسو دابا..قالك بنت ختها غتجيب التكاشط بزاف.. فين هنا دابا تكاشط.. ناري شنو غنديرو .

مونية لداخل كتنكر ماعجبهاش الحال وشدات راسها لاكن رانيا وسكينة دغيا دوروها بالهضرة وتقلبات جيهتهم عاوتاني

سكينة: شوفي هي كي دايرة علينا صعصع ..هاد التزعزيع مكديروش عندنا فالدار

رانيا: خليييها.. عرفتي شنو. انا دابا نسيت الصباط ومشيت قلت ليها عطيني صباط نلبسو ولا بلغة كما كانت قالت ليا كريه من عندي

سكينة: علاه مالها كتكريهم!

رانيا: ااه راه الحانوت اللي لتحت دايرة فيه قفاطن للكرا ولاكن داكشي عرروبي وحاطة حداهم شي صنادل حالتهم..شفتو غير بالصدفة مشات كتقلب على شي حاجة وفاش قلتها ليها قالت ليا هادوك كنكريهم.. قلت لها بشحال قالت ليا خمسين درهم ومشيت عند بابا عطاني خمسين درهم عطيتها ليها عاد عطاتني ديك الصندالك

سكينة: هييييه!!!ً ايييياه(شافت فمونية) وازيييدي دافعي على ختك.. لالا زيدي زيدي عطيها حتى حوايجك وزيديها راجلك باش تباني عزيزة ويحماقو عليك كتاااااار يتسطاو عليك .

سميرة لبسات عليها جلابتها والشال وخرجات كتجري مع العشا زربانة مالقات غير انوار برا واقف شاد شوارت فيدو وشارت ليه بيدها كتزرب مشا تبعها وقالت على عجلة

سميرة: سربي سربي ديني نشوف ما لبس بقيت بلا حوايج.. ها اللي يدير عقلو فالبز

بدا كيضحك فتح ليها الطموبيل ركبات حداه كتنهد وهوا كيسوق

سميرة: يالاه.. تسحر مع البراهش تصبح فاطر

انوار: غيير بشوية عليك..مزال الحال ، فين بغيتي نديك

سميرة: دور من هنا (كمشات صبعانها بالنخوة) انا بغيت ليك شي بنت النااااس..الشان ..والهم … والعقل اسيدي والرزانة

انوار: شحال فعمرها بنت ختك ؟

سميرة: لااالا منصحكش انوار الله يهديك،، هي بنت ختي وكولشي وعزيزة عليا ولاكن منزرفكش حيت باقا صغيرة ومغتصبرش ليك ونتا خاصك وحدة بعقلها وغادي غييير دابزو وتعايبو ونتوما عائلة اللهم بلااش عليك هاكا مزيانين

انوار: واغير قولي شحال فعمرها

سميرة: يالاه عشرين.. مايغركش الزين راه العقل الله يجيب

بدات السهرة بالليل والعرس وكولشي عتق راسو ، لاكن سميرة قلبات وجهها على سكينة وكدوز من حداها هازة خنافرها كأنها مكايناش باش تحسسها بالاحتقار .. اما سكينة فين ماتشوفها تقلب وجهها ودير راسها عورة ..ضحكات ولعبات وماخلات مادارت وغير كدوز حداها سميرة كدور وجهها ..سميرة كتعاقب بالنضرات والضمت والبرود والابتسامة.. عمر شي واحد ما تجرأ يرد عليها من شدة الخجل

الليلة شاعلة وكلشي كيشطح .. رانيا كتنوض تنقز شوية وتميل وترجع تجلس، اما سكينة حاضية غير انوار فين جالس منين داز ويتبادلو النضرات حتى صبح الحال وكلشي واقف حدا سيارتو باش يمشي بحالو ومنهم بناصر اللي مكيبغي يبات فحتى دار وماعندوش شي واحد فأكادير من الاصل. شافت سكينة حتى عيات وانوار واقف كيهز الصاك فالسيارة لمو وكيشوف فيها حاضيها لا تفلت ليه ودخل للدار وعينو عليها باش تبعو وتبعاتو فالدروج ويالاه جا يمد ليها النمرة قشعاتهم سميرة وهي هابطة وهزات راسها كضحك دارت راسها ماشافت والو، اما سكينة مارضاتش تشوفها سميرة وطلع فيها بنص عين وخدات النمرة وقلبات وجهها سلتات مشات ركبات حدا بناصر ودورات وجهها باش ميجيش وجهها فوجه سميرة اللي غير كدور على برا وكتودع الناس.

شدو الطريق ورجعو ناعسين كاملين حتى طاب بناصر وسخف وسمع لكاع الاغاني والامداح اللي مسجل عاد وقف فالجنب قدام باحة استراحة كتشعشع بالدخاخن دالشوا والكيران حداها والسيارات مصافين وتلفت عند سكينة اللي جالسة حداه كيميع ويجيد شلاغمو وقال

بناصر: هز عينو فالمرايا) هاهيا سكينة غادي تعرض علينا ناكلو الشوا

شاف فيها بنص عين كيضحك وهي تهز راسها مضهشرة بالنعاس مزال حتى ماتوكضات ناضت وقالت بعينيها مقلوبين

سكينة: يالاه نزلو

بناصر: كيدور راسو) احياااني عليك .. كرشك ماتعكزيييش عليا ..واخا تكون فيك الموت (تنهد)ولاكن عجبتيني.. واي واي واي كي جاتها ديك التكسشييطة.. ترررر اوليدي يقولو بنت الوازيييير

ضارو على الطبلة كاملين وناض بناصر كيتجبد ويطلع للسما فرحان وراشقة ليه

بناصر: شنو بيغيتو تاكلو؟

سكينة: ويديها على الطبلة) كفتة ..لحم ..كوتليك شنو ماكان عندهم (شاقت فمونية) شنو بغيتي؟

حنات مونية راسها كتمسح على الطبلة وقالت بأسى

مونية: اللي قسم الله

سكينة: واهضري قولي قولي اش بغيتي تاكلي غنخلصوووه مكنسعاوهش

مونية: بالغدايد) بنااقص ماخصنيييش .. كولو غي نتوما

ما بناصر كاع ماداهاش فيهم ورانيا جالسة ساكتة وسكينة قالبة وجهها ومونية مدورة حتى وجهها

مونية: كتقلبي عليا نسخط عليك ..بقاي دوري بيا

سكينة: انا بغيت غي نفهم!! مالك كتهضري هاكا مسكينة واتا دوريشة وشفقو عليا وكتسناي العطف والشفقة !!! مالكي !! مرضتيني واش مخليك با بالجوع ولا كيبتك فالزنقة!!ًاللي شافك يقول هاد المرى معديين عليها

مونية: هزات يديها بنفاد الصبر) وعطيني التيساع ماشغلكش فياا..بعدي مني فوتيني عليك ..مكنسبكش مكنضربكش وابعدي مني

سكينة: واغاضربي سبي وماتبقايش هاكا مايلة جنب كتهضر وخايفة تهضري !

رجع بناصر جلس كيسرح عينيه وراشقة ليه حتى حطو ليهم الماكلة والشرا واتاي والزيتون والطبلة عمرات وكلشي حل فمو لاكن مونية غضبات ليهم وقلبات وجهها وربعات يديها وبناصر كيجر القطبان يديه ميدمين

بناصر: اكولي ي هاد المرى مالكي مقلقة

مونية: بعدو مني.. خليوني عليكم انا بغيت غير راحة البال

بناصر: مالك دابا باش معمرة هاد البال!! لااااالاه الا الله

سكينة: واكولي

مونية: بغضب)بعدي مني

رانيا: واصافي خليونا ناكلو..مي كولي مالكي دبا

مونية: كتفتف فلهضرة) ه هأ هيه هيا اللي غير حاضياني..يخخ تفو

ضارت للطبلة كتاكل وتسوط وبدات شيئا فشيئا كتميل عاوتاني ومدات لكاس تقول حشمانة باش يخويو ليها وسكينة كتاكل ويدها على جبهتها كتشوف فيها وتنهدحتى كملو ماكلتهم وناض بناص كيتجبد ويتعنطز

بناصر: اري ثلتلاف .. يالاه نقسم انا وياك

سكينة: مدات ليه ثلت ميات درهم) لالا غير خلصها

بناصر: بجدية) لاااا قلت ليك غنخلص معاك نخلصمعاك الصلاة على النبي(شدها ورد ليها الصرف) هاك شدي يالاه .. عااارفك غتهلصيها غير بغيت نقشب معاك

شدات الفلوس دارتهم فجيبها وناضو هزو قرعة دالموناضة وخلاها تسوق وجلس حداها شاد واحد الغلاف وكيقلب فيه على شي وراق وهي سايقة وكلشي اللور ناعس حتى هز عينيه بعفوية شاف الطموبيل كطير وزطم برجلو من هول الخلعة وغوت

حتى فيق اللي ناعسين اللور

بناصر: نقاااص نقاااص نقاص اش كطيييري واش هادي ولات طيارة فين كطيري فين شو فين وصلتي علاين مية وربعين بغيتي تقتينا(بغضب) يا تشدي السرعة نيشان يا نزلي من تما نسوق راسي

سكينة: كتفتف) هانا هانا غير سهيت

بناصر: سهيتي!!! الى كتسهاي سيري تكمشي اللور اللي كيسوق مكيسهاش(بحدة) ايوا هاااك على سهييت ولاهيلا!!! شديييتي الطريق بكري وديتينا للبلاد وسافرتي بينا!! نتي تسالي معانا فالدخلة دلوتروت

وصلاتهم للدار ومن الباب زادت وخلاتهم طلعو باش تشدهاش الخنقة ديال الدار اللي خلاو مسدودة واكثر حاجة كتكرهها هي ترجع للدار من بعد شي تسافيرا تقول عمرها عاشت فديك الدار اول مرة تشوفها ..الخاطر كيتزير عليها وكتشدها الغمة فالنهار اللول عاد كيفوتها الحال وترجع لحياتها الطبيعية.

وصلات التكاشط للمحل ولقات الناس تما دارت معاهم الواجب وشطبات لاكيس عاد مشات عند ليلى للصالون طل عليها ولقاتها خارجة .. سولات عليها كنزة ماعرفات ليها جهة ومشات رجعات لسيارتها جلسات وصونات ليها لقاتها فالمدينة هي وفوز كيتقداو ومكانتش من العاكزين حتى هي شدات الطريق كتجري لعندهم حتى لقاتهم وبدات تسلم ومشات كدور معاهم كيقلبو على فيست ليلى ولافيست اللي بغات عندها معايير خاصة ..طابو بالدوران فاللخر مشاو جلسو فواحد السناك شعبي مع الدورة كيقدم الرويزة،هي اكلة شعبية كتكون من خضر مرقدة والحار كتقدم فالزلايف وكتكون عند محالات الزيتون بكثرة .

فوز: افيست اللي بغيتي نتي كاينة فزارا .. دوك ليفيست احبيبة متلقايهمش هنا واخا دوري تا تعياي

ليلى: نشريها بألف درهم من زارا مالي تسطيت

فوز: تمنميا وخمسين باش شريتها…هانتي شارية توني من اديداس بالف وصلت ميات درهم

ليلى: ماشي انا راجلي اللي شراه ليا.. شرا لراسو وشرا ليا حتى انا اما انا والله محطها

سكينة: اختي الله يعز البال..حيدي عليا اري ديك القرعة دالحرور

فوز: لاش بغيتي هاد لافيسيت ؟

ليلى: غنمشي واحد ليفينمو مع هيتم وخاصني شي حاجة كلاس

فوز: وصافي انا نجيبهم ليك عندي جوج وحدة موف وحدة نواغ

سكينة: دزارا

فوز: اه ..واعرين

ليلى: ااصلا زويييت ..مابقاعندي رياال

سكينة: ااه حقا شنو درتي فالدار؟

ليلى: لاااعلاقة دوك الديور اللي فتامسنا..مايطلعو وتعمر على عشرين عام

فوز: وشنو درتي؟

ليلى: درت بلان اخر ههه…واقولو ليا مبروووك

سكينة: خرجات عينيها)شريتيها!!!

ليلى: ههه اه

فوز: ياااك اختي!!

ليلى: ولاكن ماشي فتامسنا فسلا جديدة.

فوز: اوييلي اصاحبتي باقيين الديور فسلا جديدة بخمسة وعشريين؟

ليلى: كدور عينيها وضحك) ستة ومانين

سكينة: كترمش)ستة وتمانين اش!!

ليلى: منيول ههه

فوز: هبطات راسها غير مصدقة)قولي والله

ليلى: ماتقتوش

سكينة: مصدومة) نتي ولا راجلك!!

ليلى: بجدية) انا نفهمكم .. فاللول كنت غادا نشري ديال خمسة وعشرين.. ماعجبونيش ومشينا كنقلبو بغيت الصراحة شي دار نخبي فيها فلوسي..شفنا وحدين جداد وااعرين تحتهم قيسارية وصافي لسقت عليهم..قلت لراجلي ضمني زعما يهز كريدي وانا نخلصو ونشريها وكل شهر نحط ليه ..قاليا الى كنت غنهزو اجي ندخلو فيها بجوج ..داكشي اللي درنا دخلنا فيها نص بالنص ..وكايني حداهم بلان جديد هادوك واااعرين كاااع يالاه كيطلعو .. وقلت اللهم فالدار ولا يمشيو

سكينة: ديني اختي نشوف هادو اللي فالبلان !!!

كثرة الهضرة على الدار والتعاويد وفلانة شرات كريدي فلانة قسمو الورث فلانة وبداو يبانو البنات اللي شاريين الديور بدات حتى سكينة كتسمع وطالقة ودنيها والفكرة كدخل ليها للراس وكتخمم من بعد ما كانت كتشوف السيارة والحوايج والدوران هما كلشي طلعو حوايج اخرين اهم كيتبهاو بيهم الناس فين يبان داكشي اللي مزالة هي حاصلة فيه..لقات راسها باقا اللور والناس تجاوزو المرحلة اللي هي فيها ونقزو لمستوى اخر وبدات الفكرة دور ليها فالراس وكتخيل راسها بدارها والى غضبات تمشي ليها واللي هضر تقوليه شريت الدار وتكون هي اول وحدة فالعائلة كلها شرات الدار ..تحمسات وبدات تنفس بحماس ولسقات فليلى تديها توريها فين شراو.. من المدينة تفارقو مع فوز اللي كان عندها موعد غرامي فبلاصة اخرى وطلعو لسلا لجديدة مباشرة للعمارة اللي تحتها قيسارية ومكانش عند ليلى السوارت لاكن وراوهم شقة نموذجية مفرشة وجاهزة وعجبات لسكينة لاكن ضروفوها مكانتش كتسمح باش تشريها وماعندهاش فلوسها ..لاكن من جهة اخرى شافو موقع قريب وارض خاوية فيها مكتب البيع فقط والناس داخلين خارجين كيسولو ..دخلو بجوج كيشوفو وراهم الرسم على الورق وبدات ليلى تشرح لسكينة طريقة البيع اللي معتامدين فالبلان وبأنها تقدر تدفع اللي عندها حاليا حتى دوز صلات سنوات وتكمل الباقي ويكونو العمارات طلعو عاد تستالم المفاتيح، جاتها الفكرة مزيانة لاكن كانت كضن ان خمسة وعشرين فالمية اللي غتعطي هوا ثمن فيكس.. حتى غمزاتها ليلى وقالت ليها باللي ماشي كلشي كيدفع نفس الثمن وهاديك غير هضرة طالقينها فاللافتة على برا..اما فوق المكتب هضرة اخرى ويديرو ليها تسهيلات.

عجب الحال لسكينة وتحمسات ورجعات هي وليلى فالطموبيل كيهضرو ومتشوقة تخبر باها ..طلعات بالليل للدار لقاتو متكي ومشات حدا راسو كتشرح ليه وتعاود ليه وهوا كيرمش بتتاقل ويشوف قدامو حتى سالات وقالت ببرودة ويديه ورا راسو

بناصر: كاااع هادشي اللي كتعاودي تخربيق

سكينة: تصدمات)علاش!

بناصر: مكاين لا تسبيق لا يديك لا يخليك.. هما جالسين تما كينصبو على الناس ولقاوك هبيلة ..وواخا كاع مايضحكوش عليك ماتنجميش تخلصي تسعين مليون غير هني بالك…واش عارفة شحال هي تسعين مليون ولا خرجتيها غير على فمك

سكينة: بأسى: وا من دااااابا ثلت سنين!!!

بناصر: جلسي بحالك ابنتي ..بديتي كتبعي ليا ديك ليلى عاوتاني ولبلانات ديالها الخاويين..هي مشات شرات دارها جلسات فيها ونتي بغات تجرك ضحك عليك

سكينة: والناس اللي كيشريو فالبلان وكاع هادو اللي شراو ضحكو عليهم

بناصر: بررودة وابتسامة) سيييري الى جامعة شي فلوس سيري تسنطي عليهم..قالك ندفع خمسة وعشرين .هادوك اللي كيشريو فالبلان عندهم باش يخلصو ..شوفي لتحت ونتي باغا طيري ..شوفي اللي قل منك مالقاو ماياكلو ..وصلتييي للديور وليتي باغا حتى نتي الدار هااي هاي هاي

هضرة بناصر ماعجباتش سكينة والهضرة اللي مكتعحبهاش مكتحملش مولاها ..مشات لكوزينة كتنفض عند مونية وكتنكر ويديها وراها متكية على الحيط وكتبكي وترد

سكينة: باغا نطير باغا نطير باغا نطير دييما كيقلل مني مالي انا باش حسن مني لخرين.. انا مالي ومال اللي تحت مني مالي كنصبح خامرة راني كتبات سهرانة كنحري ونخدم على راسي ..نبقا نشوف انا لتحت باش نبقا لتحت مندير والو حيت اللي لتحت مادارو والو .. (بالغدايد) والللله حتى ندير اللي قالي راسي

مونية: مبردة) الله يهدييييك..وااا اللع يهديك..نتي وباك غادي تسطوينا

سكينة: هانتي غتشوفي.

نفخات ومشات للبيت ضرباتها بنعسة كتبلاني كي دير ومنين دوز واشمن طريق تسلكها وشحال تكون كاع جمعات.. الصباح مع العشرة .. حتى مشا بناصر للخدمة عاد خرجات بالجلابة وليكخو دالوجه ونضاضر والقب على راسها من الشمس هبطات للبنكة تشوف شحال عندها فالمجموع لقات ستة وثلاتين مليون .. كانت متوقعة اكثر لاكن فاش جلسات بوحدها فالطموبيل كتحسب وتعاود لقات راسها صرفات بزاف وشرات الطموبيل والماطريال جديد والتكاشط جداد والفلوس تحطات صحيحة وماشي بزاف باش بدات المشروع ..الناس راه ضربو خمس سنين ومادارو والو باقين كيصرفو على المشروع . تحزمات وزيرات راسها وحلفات حتى تجمع وتكمش يدها .. لاكن كي دير دابا تكمل فلوس الدار اللي حطات فراسها؟ عيات دورها فالدماغ بانت ليها فالطموبيل .. تبيعها وتهني راسها واقتارحات هاد الاقتراح على فوز وليلى فالكافي فلعشية وهي قدامها كاس قدو قداش ديال باناشي بديسير وطبسيل ديال لكريب حتى هوا بديسير كتاكل وتناقش

ليلى: وتقدري تبيعي طموبيلتك!! فاش كتحركي؟؟

سكينة: هزات كتفها) نمشي فطاكسي كي الناس..اصلا هي اللي مضسراني مكنحطش زكي..نبيعها باش يالاه نجلس نخدم ونجمع لفلوس

فوز: هزات ليها كاسها) هااا اللي مغيخليكش تجمعي ابنتي الفلوس هادشي..كل نهار واكلة شاربة برا كضربي ميات درهم مية وخمسين درهم فالنهاااار غير فالماكلة!! سهلتيها!! ضربيها فالشهر شوفي شحال غطلع ليك ..راك غير مكتحسيش

سكينة: واييه.. وهادشي علاش غنبيع طموبيل باش نجلس.. ها ليلى باعتها مالها ناقصها شي رجل

ليلى: لاالا ولاكن كتنفع .. هي الصراحة كضسر بزااف .. ها المازوط ها الضريبة ها لاسيرونص ها هادي ها هاديك… ماكنتش كنجلس كاااع ولا نعمر الصالون تا بعتها وانا نتشد الارض

سكينة: تكرعات) صااااافي..ركبت وشبعت ماابقاتش عندي ديك الشهوة واللهفة.. عااادي نمشي فطاكسي نمشي فطوبيس بيييخير يكون غا جيبي عامر نركب حتى فتريبورتور

فوز: والى حشاو ليك ودار ليك رزقك ومكان لا عمارات لا قل٠وي

سكينة: عاادي.. نص تخويرة ولا تخويرة كاملة بااقا صغيرة نعاود من اللول.. بغيتي تعيشي بلا مادوز عليك

فوز: اختي باااز ليك على هاد التفكير

سكينة: ومالكي.. المهم هوا الصحة اختي.. نبقا صحيحة باش نعاود ندور العجلة .. انا راه كنخدااااام مكنبغيش نبقا جالسة .. نضرب واحد العام نعوض

ليلى: اصلا مول الارض معروووف.. هوا مول واحد المعرض كاين تما وكولشي كيعرفو.. تلاقينا بيه فاش بغينيا نشريو .. الصراحة انا كنت غندفع تما ولاكن فاش قاليا راجلي ندخلو بجوج قلت ليه ايوا نشريوها واجدة نيت..علاش نتسناو

سكينة: غنجرب .. اللي ليها ليا .. علقت لمها للبيع

فوز: صاافي!!!

ليلى: شحال تجيب ليك؟

سكينة: عطاني فيها واحد طناش.. قلت ليه ربعطاش.. موديل جديد اصاحبتي

ليلى: فخبار باك؟

سكينة: تا لعشية ونقولها ليه .. (دورات وجهها) تفوو غيبدا عليا بالكسور عاوتاني..المرض

اقتانعات بالفكرة ومابقاش كيبان ليها الحماس فحتى حاجة من غير الدار.. اما بناصر فاش سمعها بغات تبيع الطموبيل دخلو الشك ووقف ليها فالدار مخرج عينيه

بناصر: علاش؟ علاش بغيتي تبيعيها شنو خاصك ؟

سكينة: بغيت وصافي مابقيتش باغا طموبيل

بناصر: بعصبية) علاش قولي ليا علاااش؟ اشمن هدف عندك باش تبيعيها ؟؟

مونية شدات راسها وتكات على لحيط كتشوف فرانيا وتنهد

مونية: قهرونا ولاهيلا عيينا.. بغينا غي نعيشو كي الناس هما من نهار حلو داك الحانوت وحنا فالمشاكيل

رانيا: كن غير خرجات ليه من تما وهناونا من المشاكيل.. كل نهار لحسابات كل نهار مشكل.. تعطيه سارونو وتهنا ونتهناو حتى حنا

سكينة: فالصالون ) وياك ديالي

بناصر: تحبد وخرج عينيه كيضحك) هااااا دابا وليتي حتى نتي بديالك وحتى نتي وليتي همة وشان وكتهزي علينا فخنافرك.. راك غيييير بنت بناصر انا اللي درت ليك داك الحانوت وكم ما درتو ليك ماديري حتا حااجة .. ماتقدري حتى تجمعي خمسين درهم .. ونهار يقولها ليا راسي نجلسك فالدار غادي نجلسك سمعتي.. ايوا سيري تكمشي لهيه بحالك بحال مك وختك كولي وشربي ونعسي

سكينة: بتمرد) دابا شنو دخل الحانوت ياك كنهضرو على طموبيل

بناصر: حيت هاداك اللي مضسرك..عندااك يحساب ليك دوك جوج دريال اللي كتعطيني من الشهر للشهر هما اللي معيشيني.. راني عااااايش بيهم ولا بلا بيهم ونهار يقولها ليا راسي نسد باباه ونخليه هاكاك مسدود.. ماشي درنا ليك الخاطر صافي بغيتي جلسي لينا فوق الراس.

هز خنافرو ومشا خلاها جالسة مربعة يديها كتنهج وتتحاك بوحدها وتغدد حتى بدات كتبكي .. غير سمعات الباب تحل وحسات بيه خرج بدات كضرب فالمخدة وتعض حتى طلات عليها مونية مخلوعة هي ورانيا

مونية: امالكي علاش دايرة هاد الحالة ..صافي عطيه الساروت ديالو وفكو علينا هاد الزمر مرضنا

ناضت كتجدب على مونية وضرب فالمخاد وتنهج بغات تاكل لحمها

سكينة: يدور يدور ويمن عليا…يدور يدور ويبقا عليا ماتسواي ما ديري ما تفعلي ..

رانيا: واخلي ليييه الحانوت واش نتي يا اما تبقاي فداك المحل ولا تموتي!! خليه ليه حانوتو وهني راسك مايمن عليك ما تمني عليه.. انا منك منبقاش كااع فهاد الدار نمشي نتزوج ونتهناااا

كانت شاعلة جهد اللي تهز رانيا وتحطها وداكشي اللي دارت وبالغدايذ بدات عليها

سكينة: نتي بعدا ما تهضريييش.. سمعتي.. نتي غير سكتي وسيري شوفي داك هشام ديالك واش كيبغي يغسل رجليه بالصابون ولا الما .. اما هادشي كبييير عليك ومتفهميش فيه ومتعرفيش ليه حسن ليك سيري ديها فالخاطيب ووجدي راسك تبوسي الرجلين..حيت اللي بحالك نتي كيعرفو غير الزواج والنعاس

مونية: ضرباتها لفمها ) الله ينعل اللي ميحشم والله حتى نهرس ليك داك الفم

سكينة: رجعات اللور) وا نتوما مسالييين.. اش كاديرو فهاد الحياة ؟؟؟ اااش كديرو؟ الماكلة والطواليط وتنعسو .. مابغايين صدع ولا مشاكيل باغين غا تنعسو.. ماشي سوقكم فيا ديوها غا فراسكم شوفو غير خالتكم

مونية: الاللة ديري اللي عجبك الله يجعلكم تقاتلو.. حنا اللي خصنا العصى كنهضرو

رانيا مشات كتبكي فالبيت ومونية تبعاتها تواسيها انا سكينة شدات واحد المخدة ومشات للبيت جلسات كتخمم وتهندس..اجي علاش منميكش واحد سيمانة.. اش غيدير كاااع يقتلني؟ يجلسني فالدار ويسد الحانوت.. هوا كيخاف من الحبس وكيطبق القانون.. ميقدرش يخلي بنتو دخل للحبس.. غادي نبيع باباها ونمشي نتكاتب.. وديك الساعة واخا يطييير حتى عيا ميخرجنيش من الحانوت.. بلعكس غيخليني نخدم باش نكمل الدار.. الصراحة هادشي اللي خصو باش نيت مايبقاش يهددني كل مرة نسد ليك الحانوت..ندخل فشي معماعة اللي متخليهش كاع يسدو ليا واخا يوقع اللي وقع

اسبوع وشي هاز الهاطر من شي وشي مكيهضر مع شي .. حتى فتت ديك الموجة شوية عاد ناضت سكينة توالات الطموبيل وكانت كدور بيها معلقة ليها للبيع وفاش كتحطها قدام المحل كتحيدها باش كيدوز بناصر يشوفها، جا الشاري وتفاهمات معاه على البيع وخلات لنهار لاثنين يخدمو الادارات ويخدم حتى بناصر عاد مشات تلاقات الشاري ودوزات النهار كامل فطلع وهبط هي وياه وشدات فلوسها وتكاتبات معاه ومشات حطاتهم فالبنكة ورجعات كطير عند ليلى تعاونها وتوريها ، اما بناصر مولف كيدوز حدا الحانوت يوميا فاش كيكون راجع من الخدمة يطل على سكينة اش كدير ويدوز وكان فدوك اليوماين كيدوز مكيلقاش السيارة وفاش كيطل على الحانوت كتخبا ليه سكينة وتقوليه سارة مشات تشخر وتجي.حتى لنهار اللي غادي يتحلو بيبان فوجهها وغطل على المشؤولية ويتزاد فرصيدها ملك وتولي حتى هي عندها عقار، داك النهار مشات معاها ليلى وراجلها باش يشوفو معامن وشكون غيتكاتبو.. وقفو معاها وسولو على المشروع وطلع المشروع ديال احد البدويين اللي فديك المنطقة واللي عندو اراضي فلاحية باعها ودخل فالعقار .. جا عندهم برجلو بواحد السروال ديال توب وقميجة بالية وصباط كحل تقول ماعندوش القاع وتوني كيطل من تحت سروال التوب .. الكن دالقميجة مشخ والكول رجع فيه خط ديال الوسخ مع النعنق وحالتو بالشمس كامل مكمش لاكن كيبان صحيح وشاد فراسو، غير شافوه نزل على البيكالة تصدمو .. اما راجل ليلى دار يدو على فمو وقلب ضهرو كيضحك وهبط راسو وليلى شادة فيه كتموت بالضحك

ليلى: واش هوا ؟؟ اويلي ميمكنش!!

هيثم: بنص عين ) واييه.. هوا هادا

سكينة: اوييلي!!

ليلى: حسابني شي حاااجة

بقاو مصدومين ودخلو للمكتب وهنا زعمات عليه سكينة فاش شافتو فديك الحالة بدات كتشكي وتبكي عليه ينقص ليها وهيتم كيحاول معاه يهبط شوية فالدفعة وبقاو عليه حتى تعصب وقلب وجهه منرفز ونقص ليهم عاد بردو وماداوهاش فردة فعلو ، دغيا دازو للاجرائات ودفعات الدفعة الاولى بقيمة تسعة وربعين مليون وبقات 37 تدفعها بعد الاستلام وكان هادشي قرارها وقد ما نقصات قد ما مزيان وتجيها ساهلة تكملها.. لاكن بعد البحث ولاسئلة عطاوهم تاريخ بدئء البناء وكان على شهر ..بمجرد مايجمعو لقدر الكافي يبداو لبني مباشرة .

تمت الصفقة وخرجات كتفرنس وهيتم كيوصيها تخزن وراقها ومشات ركبات اللور معاهم غاديين وكيتناقشو

ليلى: شنو بان ليك راجل معقول؟

هيتم: انا بان ليا معقول ماشي شي واحد اللي يشد ويهرب.. بحال هاداك كيكونو عندهم الاراضي وكيبيعو ويدهلو لهادشي دالعقارات..سولت عليه فدار الضريبة قالو ليا راه سميتو تما وديك الارض اللي غيبني عليا مقيدة بسميتو ودايز عندهم …ماشي دعما كدب..داكشي اللي قال هوا اللي كاين

سكينة: اففف..الخلعة شاداني

ليلى: ضارت عندها) ايواا هانتي يالاللة تانتي وليتي بالدااااار هههه

سكينة: منفرح تا ندخل ليها ههه

هيثم: عااادي عادي..تخاف الى مكانش معروف وجا تما ودار مكتب البيع..هادا كولشي كيعرفو !! هوا اللي مول داك المعرض وباقي كيبيع للناس الحوانت

ليلى: اااه حقا فكرتيني..فراسك كيبيع بواخد الطريقة فشكل!!! سمعت قالك كيعطيك الحانوت ويدير معاك الوعد بالبيع وكتبقا تخلص ليه كل شهر شوية حتى تكمل وكيتكاتب معاه!! الناس مافحالهمش عوض مايكريو عندو شراو .. قالك كيعطيوه الفلوس ليدو وعمرو نكرهم

هيتم: هاهوا مانكرش والى مات؟ اشمن دلبل عندهم باللي كانو كيعطيوه!

ليلى: واييه.. كيعطيهم غير واحد توصيل عاادي

هيتم: معارفش مفاهم والو غير باغي حتى هوا يبيع ويشري فالعقار.. المهم راجل معقول ماشي رعواني

سكينة: دورات راسها) دابا نشوفو بابا اش يدير

ليلى: عضات شنايفها) عنداك تجبديني ههه

سكينة: اوييلي لا . غا سكتي خليه تا يسول

حطوها ورجعات للمحل مافيدها حتى ريال ..شطبات كاع الفلوس اللي فالبنكة . شداتها الدوخة فاش لقات راسها ماعندها لا ريال لا جوج وتخلعات وكملات فاش استوعبات باللي مابقات عندها طموبيل.. مشات مباشرة لاكيس طلات عليه لقات ميتين درهم هزاتها دارتها فالجيب وناضت بالخلعة للخدمة قالت صافي هاكا غنبقا لا ريال لا جوج عمرني نرجع كي كنت . نوضات فسارة الشياط حتى ولات كتسولها شكون اللي جاي،، اما سكينة خملات التكاشط كاملين عاودات ليهم تستاف وبدات

سكينة: هادو ديري ليهم مسات درهم ..المهم يخرجو مايبقاوش معلقين.. اللي جات كري ليها ماتردي حتى وحدة

سارة: ميات درهم بزاف!!

سكينة: لا غا خليهم.. علقي هادي لقدام تبان لبنادم . اري دوك تكاشط. العرايسات تا هما نشوفو مالهم

جبدات عليها الروينة وجلسات تعزل وتستف حتى سخفات وشدات جيهتها وجلسات على واحد الحرسي كتخمم وتقول..كون غير كانو عندي جوج محلات حسن.. كون غير درت شي حانوت اخر فحي اخر واخا ندير فيه غير تكاشط لكرا .. يكون عندي مدخول على جوج حسن من واحد

ربعات يديها كتخمم حتى جلسات قدامها سارة كتبسم وقالت

سارة: مالكي ؟

سكينة: كنفكر كنقول زعما كون غا درت حانوت اخر .. عندي ماتيريال مضويبلنقسو عليهم بجوج حسن

سارة: واييه ولاهيلا قكرة زوينة

سكينة: يااكي.. اصلا عندي العمارية اللولة وهادي الجديدة..نحط وحدة هنا ووحدة فحانوت اخر وحتى تكاشط نقسمهم على بيدمن نجيب وحدين اخرين..بشوية بشوية

سارة: بحماس) واجي نشرك انا وياك!!

سكينة: طلعات وهبطاتها) نشركو؟؟ عندك الفلوس؟

سارة: جامعة شي حاجة وصافي.. نضبر

سكينة: وبشحاا دخلي معايا؟ انا راه عندي الماتيريال عندي كلشي

سارة: نص بنص

سكينة: خلصي نتي غاا ثلت اشهر ديال الكرا اللولة وصلحيه وانا نجي نعمرو ..نقسم هادشي فالنص.. حسن كاع مايبقا مكركر عليا هنا

سارة: صافي.. (بالفرحة) فوقاش نبداو؟

سكينة: غا بداي وقتما بغيتي.. نتي قابلي تما وانا نقابل هنا

سارة: صافي.. والله تا نديروها.

سكينة: قلبي على شي محل.. سيري لسلا حسن.. الرباط هاهوا فيه محل سلا دابا فين نحلو.. حي كريمة فين كاينين كاااع النكافات ..تاحنا نمشيو نتزاحمو معاهم مالنا

سارة: صافي غدا مع الصباح نفيق نمشي..ونتي شكون غيقابليك المحل؟

سكينة: نقابلو راسي مالي انا شكندير؟ راااسي اختي

سارة: صافي مشات.. الصباح نهبط لحي كريمة

ماتحمساتش بزاف للمحل الجديد اللي خططات ليه هي وسارة لانها ببساطة مغتوجدش ليه غتمشي تحط فيه الماتريال وصافي. جلسات فالدار مهمومة كتقشر فدفر رجلها وساهيا وبناصر غادي جاي كل مرة يلوح ليها عضرة ويقول )مالكي ساهيا غرقين ليك البابر…. يا درتي شي زبلة يا عندك شي مشكل ، ويدور ويرجع يقوليها ” غير هضري هضري دابا اللي عطا الله عطاه” ويصغر عينو فيها يتبحلس حتى تنهدات رقالت لي ليها ليها

سكينة: بعت الطموبيل

قالتها ودخلات فيعضياتها دورات وجهها كمداتها وهوا كيشوف فيها بنص عين كيستوعب

بناصر: عاود اش قلتي؟؟

سكينة: بعت طموبيل

ضار عندها وتبدل فسيفتو ،، هادا هوا بناصر اللي طول حياتو صارم وحاد باش حتى واحد ميضسر عليه ويخرج على سيطارتو ،، لاكن سكينة بهاد الفعلة اللي دارت بينات ليه انه للشيء وهدات ليه الرجولة وخلاتو كيشوف حتى تخطف فيه اللون ووقف عليها بحال قبلط الارواح ومونية كطل باغا تبكي وكتشطح فبلاصتها من الخلعة هي ورانيا .. اما سكينة وقف ليها القلب ملي قالتها وشافت وجه باها لاكن كمداتها وسكتات وقالت لي ليها ليها

بناصر: كيضحك) بعتيييي طموبيل!!! درتي شرع يديك!!! دابا انا زايد ناقص فهاد الدار.. ونوضي يالاه..نوضي تكعدي جمعي عليا حوايجك وخرجي عليا .. مابقا عندي مندير بيك

رجعات صفرا وبغات تبكي ويالاه بغات دمع قطع فيها الحس وهز رجلو حتى كان غيركلها

بناصر: مانسمعش حسك… اري دوك السوارت …ارا لهنا..(بقلق وخفة) ارا نوري باباك خرجات الطوع كي داير بقا ليك غير تربيني

حيد ليها سوارت المحل ومونية بالخلعة لسقات فالحيط ومشات شدات ليه فيدو بغات ترغبو لاكن هز رجلو كان غيعطيها وبدات ترغب وتفكرو بالحج ديالو وتعاود تقوليه الحاج ..لاكن هوا قصاح تقول ركبو شي جن وخرج سكينة فالليل ومشا تكا فرق السداري هاز راسو كيتنفس بحدة ويبلع الريق و عروق عنقو كيبانو .

بقات برا واقفة وبقا فيها الحانوت والى جات تقوليه ماتيريالي ينوض بالغدايد ديال ردان الهضرة يشعل فيه العافية. خصو يقول الكلمة وتمشي وسكينة عارفاه الى بينات ليه باللي محتاجة فشي حاجة كيشدها منها باش يضغط عليها اكثر. قالت خليه نبين ليه مامهتماش لامر المحل باش مايركزش عليه اكثر ونزلات مشات عند سارة للدار جلسات وبدات تشكي عليهم ومونية كتعيط فتيليفون وتآمرها ترجع للدار . مكان عليها غير ترجع حصت عارفة الآمر جاي من بناصر ماشي مونية اما مها ماعندها رأي ولا كلمة..وعارفة راسها غترجع وغينوض ليها ديال بصح نوضة فين يبرد غدايدو.. ماشي على الطموبيل وانما على الكلمة اللي ظيحلت ليه مادارتش بحسابو ولا عبراتو .. كان خاصها تكون مستاعدة لاي حاجة .. ودارت فراسها الى هددها بالبلاد بحال اللي موالف وبغا يحبسها فالدار غتهز راسها وتزيد وهاد المرة مغترجعش عندو واخا يوقع اللي وقع حيت عندها مسؤولية متحملاها وخاصها دير المستحيل باش تكمل فلوس الدار فضرف ثلات سنوات ولو ادعى الامر ضرب الجفاف ولا ضبر على شي واحد يصرف عليها

وجعات للدار جاهزة لنضرات الاستعلاء والتصغير والمذلة والاحتقار من بناصر باش يكسرها ..لاكن دايرة حاجة وحدة فراسها ..غير ميضرباهاش ويبوس السقف الى بغا . المهم مايقيسهاش اما الباقي يدخل من ودن ويخرج من ودن وغتصارحو بكل حاجة بغا ولا كره .

دخلات ومونية كدوز على صبعها على فمها كتعلمها تسكت واخا يقول اللي قال ..اما سكينة غير كدور فعينيها ومشات لقاتو جالس كيمشي ويجي فبلاصتو وعيط ليها بصرامة بحال شي شاف عيط لشي عسكري.. كان كيعاملو تماما معاملة العكس. فالقشلة وكان باغيهم يمشيو على اللوامر ديالو وكان متأثر بداك الاسلوب ومكيعرفختى طريقة من غيرو وباغيهم يقدمو ليه السلام والطاعة مع كل كلمة بلا مايعطيو رأي او رد..يسكتو ويسمعو ويحدرو الراس. لاكن هم مكيعرفوش هاد الاسلوب.. ومن المعالمة السيئة خضعات ليه رانيا ومونية لاكن سكينة تكون عندها الحقد والضد والغل والبغضوكترد عليه بالافعال وقدامو كتقدم ليه الولاء والطاعة

جلسها وهز خنافرو فالسما وقال كيشوف فيها زعما غسل عليها يديه وكلاصها للجنب

بناصر: غنقوليك جوج كلمات.. داك الحانوت من اليوم ما تعتبي فيه… سمعتي.. من اليوووووم.. الى بغيتي تعيشي فهاد الدار غادي دخلي لديك لكوزينة تعلمي الطياب مع مك .. ومابقا لا دخول لا خروج ..درنا معاك الخاطر مشيتي بغيتي طيري وليتي كتفهمي وكتعرفي..دابا غتشدي الارض .. نهااااار تزوجي وتمشي عند راجلك ديك الساعة ديري اللي قالك راسك ..اما دابا ماحدك تحت مسؤوليتي غتمشي على الهضرة اللي كنقول انا

حركات راسها بالايجاب ويالاه بغات تنوض شار بيدو جلسها

بناصر: بلاتي..مزال مسالينا (دار يدو على فكو )علاش بعتي الطموبيل(قطعها فيها) جااااوبي بصراااحة نحضلك كتكدبي ياويل باباك

سكينة: بحدر) دفعت فواحد الدار

قالتها وبلعات الريق كدور عينيها وراسها فالارض ومونية شهقات ورانيا فشلو ركابيها وكملات الباهية..اما بناصر وقفو ليه مابقاش قدر يهضر.. بقا كيشوف فيها وهي واقفة مهبطة راسها

بناصر: دفعتي فدار؟؟ كيفاش دفعتي فالدار

سكنية: بحذر) فالدار اللي قلت ليك

رجعات ليه الابتسامة الشيطانية كأنه تلبس وقال

بناصر: دفعتي فالدار!!! ياااك ههه.. سمعتوها اش قالت..قاتليييييك دفعت فالداااار .. كبر لباباك الشان ولاكن انا اللي كبرتو ليك.. انا هزيتك حتى درتي لكرون

كانت الصدمة قوية .. لاكن بالنسبة لسكينة كان سيف غرساتو فبناصر كانها كتقول ليه عندي فين نمشي وحتى انا بداري . خلاتو كيغوت شعلات فيه العافية وحاضية معاه لا يضربها لاكن من شدة الفقصة مشا ما بغاش يزيد دقيقة دخل لبيتو وجلسات مونية ورانيا حداها كيسولوها مخلوعين وغير مصدقين

رانيا: شريتي دار بلا متقوليها لبا!قدرتي!!

مونية: يابنتي باااز ليك.. باز انا عييت ..عييت ، مالكي ماتعطي الراحة راسك وتجلسي فداركم ااااش ناااقصك؟؟ ااا خاصك

رانيا:شدات راسها ) ياااربييي… انا عيييت.. صافي..مادوز هاد العماين حتى يسكت ليا القلب فهاد الدار

مونية: مافهمت انا علاااش؟؟؟ السيد بغا يتزوج يمشي بحالو علااش اسيدي هاد عماين ؟؟؟ معكس

رانيا: غدرتي با ..فراسك..هادا سميتو الغدر..حيت عايشة معانا وواكلة معانا ومشيتي درتي اللي قالك راسك بالتخبية!

سكينة: لاااا.قلتها ليه .. علمتووو هوا اللول قلت ليه ها اللي كاين ها اللي كاين مامشيتش درت لي فراسي..هوا مابغاش عاد انا درت ..ماشي غفلتو وماقلتو ليه والو

مونية: يدها على راسها) وقدرتي ديري داكشي اللي قالك راسك وباك مابغيش

سكينة: الصمت

رانيا: انا والله مامتيقا!!

مونية: حتى انا ….وبشحال شريتي هاد الدار

سكينة. ستة وتمانين مليون

شهقو بجوج ورجعو اللور شادين راسهم جاتهم الدوخة وكملات ليهم الجملة

سكينة : دفعت فيها تسعود وربعين ..بقات شي سبعة وثلاتين

رانيا: ومنين جاتك نتي تسعود وربعين؟؟؟؟هااا!! اويييلي واش نتي سكينة ؟؟ واش نتي ختي؟

مونية: منين جاوك هاد الفلوس

سكينة: كيفاش منين جاوني!! خدمت فيهم

رانيا: لااالالالا متقوليش ليا هادشي من الخدمة وصافي.. غيير نكافة وجمعتي هاد الفلوس كلها

مونية: هضري منين جبتي الفلوس.غير هضري دابا درتييها

سكينة: واش تسطيتو!! راه بعت طموبيل باش كملت

رانيا: واخا تبيعي ماعرفت شنو!!عرفتي شنو هي تسعووود وربعين مليووون!!! موضفين وماقدروش يجمعوها ونتي فعام زعما جمعتيها !!!! مستحييييل

على براد اتاي وطبسيل الحلوة جالسين فشقة اتيقة واتاتها خفيف، دار بشرى المهندسة طبعا اللي كتجمع هي وسارة وماعاهم بنت اخرى رقيقة ولابسة كسيوة طويلة كيتجمعو وشي كيشكي على شي..طريقة الهضرة كلها بالاصابع والاتيكيت واخا واصلة فيهم للجدر خداو داك الطبع اللي ربما مكانش طبعهم من الاول لاكن بمجرد ما كيتحطو فواحد الطبقة كيرجعو من نفس الطباع ونفس التفكير ونفس الحركات

ايمان: شادة كويس اتاي بصبعانها) والله احبيبة ماخط معايا ريال.. فالولد اللول ولدت على حساب بابا هوا وقف معايا..اما هوا مشا غير برجليه واقف على اللوراق وماخلص حتى ربعة دريال من غير داك شويوش ديال الدوا اللي جاب ليا، ايوا فاش بغيت نختن ولدي قالي ماعندي!! قلت لو والولد فوقاش غيتختن!! غيبقا هاكا!! قالي المهم دابا ماعندي باش فاش يكون عندي ديك الساعة نختنو .. خليتو الشهر اللول واالو الشهر الثاني والو الشهر الثالت واالو الولد دار عام ومزال ماختنو وكنهضر معاه كيقوليا ماعنديش وانا كنشوف الدري كيكبر وخصو يتختن!! جيت انا هزيت ولدي قلت ليه انا نخلص غير زيد ..ديناه ختناه شريت لو الدوا قابلتو وهوا عااد مازاد عليا حا عندي قالي الدري تختن خاصني نعرض على العائلة ومو غيبقا فيها الحال وباه حتى هوا وخصهم ولااابد العشا..مللي قلت ليه دير اللي عجبك جاب الدورة وقالي مامعاكش شي حاجة راه ماعندي حتى ريال!! فقصني وبقيت غير كنشوف فيه!! كيفاش هادا باغي يعرض عائلتو وماعندوش!! والى ماعطيتوش يقوليا ماحملتيهمش!! قلت ليه حتى انا ماعنديش قالي واغير سلفيني!! سلفتو الفين درهم ومن نهار شدها مابقا هضر عليها وعرض عائلتو وعائلتي معاهم للعشا. ايوا احبيبة عاوتاني حملت بالثاني وجابني حتى للولادة قالي ولدي فسبيطار عادي انا ماعنديش باش نخلص لكلينيك، قلت ليه نتا عارفني غنولد وتسع شهور وانا حاملة ماقدرتي حتى تجمعها!! قالي ولدي بحالك بحال الناس مالكي نتي ماشي ضاروري لكلينيك وكاع الناس ولدو ولكلينيك غير كيسرقو الفلوس. مابغاااش وفين ما نقوليه كلينيك كيقول ليا ماعنديش فاللخر خلصتو على راسي وولدت وجا السبوع بقا كيدور حدايا ويسوط ماعنديش ماعنديش ماعنديش وبدا كيعرق وينشف باغي يشري الحولي!! ضار حتى عيا ورجع عندي قالي عطيني نخليهم ريزيرف الى ماخلصش با فلوس الحولي نرجعهم ليك المهم منتحشمش قدامو حيت باه اللي شرا الحولي اللول ودابا طامع يشري ليه الثاني.. ايوا الاللة من الرهر جا بابا طل عليا عطاني الفلوس قالي هادو ديال الدبيحة دالولد بيهم تشري الحولي.

نضت على نيتي قلت ليه بابا عطاني فلوس السبوع قالي مزيان اريهم وخداهم ومشا شراه فاش رجع قلت لقه اش درتي اسيدي قالي الحولي دابا راه خلصو باك وبا ماخليتش با يخلصو بوحدو وخلصت معاه النص..فاش قلت ليه فين الفلوس اللي عطيتك انا ريزيرف قالي تقديت بيهم السلعة وداكشي اللي خاص وها ليكوش ها هادي ها هاديك راه نفعووني .. بقيت كنتنهد ونتغدد وساكتة ..عاوتاني بغينا نختنو الولد قالك حتى يكونو عندي وعرفتو غيجرجرني عيطت لبابا قبلت ليه هضر معاه يختن الدري..اش قاليه بابا!! قاليه يالاه نختنو الدري انا اللي غنختنو !!! يالاه دابا صدق بابا مختنو وهوا داير فالعشا جوج دجاجات محمرين ومرتاااح مع راسو ما عرفت كيفاش غندير معاه عيييت..عيييت عيييت حل مرة سلفيني كل مرة طموبيل خسرات كل مرة ماعنديش باش نكمل الشهر وانا مكاين غير هاك هاك هاك باش نتفادا الصدع ويرجع على سبة خاصو غير مشكل بسيط ينوض معايا عليه الصدع وماحملني ما باغي يشوف وجهي..رجعت خاصني نعطيه باش مينشرش ليا الطاقة السلبية فالدار وحصلت فجوج ولاد ومامعاوني فوالو الى مرضو انا نخلص الى تعراو انا نكسي..هوا كيجيب التقدية للدار صااافي واللي سنع التقدية يقول هنا نبات..مرضت ومابقيتش عارفة شنو ندير ..كنشوف راسي خدامة وبحال الى ماخداماش مجامعة حتى ريال واللي شديتو هاد الشهر كنخسرو وهوا كيشكي عليا بالطريطا ديال الدار فين ما نهضر يقول ليا كيقطعو ليا فين ما نشكي يقول ليا مكيبقاش ليا ..عيييت تقهرت واش غير انا ولا كاع الناس .. كنجيب الخدامة كنخلصها انا ولاكخيش مخلصاها انا والو هضرت كيقوليا ماعندي مندير ليك نتي الام ..وعمرو شرا ليا شي حاجة ولا كساني وانا اللي كنكسي راسي انا اللي الى بغيت نسافر خصني نحط الفلوس ونجرو معايا كنصدق مخلصة عليا وعليه !! ولا منسافرش!! ممنوع السفر بوحدي!

بقاو كيشوفو فيها ويتنهدو وبقات سارة كدور عينيها وقالت

سارة: حتى انا مكيعطينيش!! ما عممرو خلا ليا شي ريال ولا قالي هاكي شري هادي ولا هادي!! كيجيب الماكلة وداكشي ديال الدار صاافي

بشرى: هادشي اللي كديروه غلط..(شافت فإيمان) نتي بعدا منهضرش عليك راك نتي الراجل.. باش زايدك هاد الراجل طلقي الزمر ياك هازك غير بالدار والماكلة سيري جلسي مع باك حسن ليك ولا شري شي دار صغيورة كريدي اللهم فالدار بعدا تبقا ليك ولوليداتك.. اما الماكلة حتى واحد ما كيموت بالجوع ..الى مابغاش يتبدل وبغا يبقا هاكا غيير طلقيه نقولها ليك نيشان حيت الدور ديالو فالحياة دايراه نتي.. مدام كداوي وليداتك وملبساهم راكي قادة حتى توكليهم..على الاقل تسافري وترتاحي وتعيشي كما بغيتي نتي ماشي كما فارض عليك هوا .. الحكام يعرف يحكم بعدا باااز

سارة: اوييلي!! وانا؟؟ حتى انا مكيصرفش عليا

بشرى: الى مكانش كيصرف عليك حتى نتي قولي ليه بسلامة مالكي على حالتك ..ك بناقص من شي زواج

ايمان: كتنهد بهم) ماعرفتش شنو ندير..واحد الراس كيقوليا كركبي الزمر.. هانا بغيت نسافر دابا وهوا قالي ماعنديش.، يالاه خاصني نديه نخلص ليه المازوط ولوتيل وختى الماكلة واي اكتيفيتي نخلص منها جوج!!! بزاف عليا!!! ولا نجلس فالدار حيت هوا ماعندوش

بشرى: وانتي طلقي لخراااا..غادي نتعصب

ايمان: ماعرفتش ..مخلوعة

بشرى: البدية اللي كتخلع ا ايمان …متااافقة معاك ..غاادي تخلعي فاللول وتجيك غريييبة والوضع غيتبدل عليك..ولاكن مع الوقت غتعرفي تاخدي قراراتك بوووحدك وهوا غيبدا يعطيك فلوس النفقة بزز منو بغا ولا كره وغترتاحي ماديا حسن من هاد العيشة..والى مابغاش يخلص النفقة خليه حتى تجمع عليه مزيااان ودعيه يخلصها ليك بزز منو ومن اللي قراه

سارة ساكتة وكتسمع وكتخمم وعقلها سارح كتفكر فالاخير قالت بتردد

سارة: انا بغيت نولد .. متقولوش ليا الطلاق واخا ميعطينيش منطلقوش.

ايمان: ولدي شكون اللي حبسك؟!

سارة: باحراج) ماشي اناااا.. المشكل هوا

شافو فيها صحاباتها باستغراب وقالت ليها بشرى

بشرى: كيفاش هو؟؟ مكيولدش؟

سارة: لاا.. راه مكيديرش داكشي تما

حلات فمها ايمان ورجعات اللور

ايمان: اااااه … ياختييييي!!! )صغرات عينها) عندك الراجل خطاااار قاري صواريه وعارف اش كيدير.. مابغاكش تولدي

سارة: بنية) يااك. ! حتى انا هادشي اللي قلت.. ماعرفتش علاش كيدير هاكا

بشرى: ايوا احبيبة خاصك تهضري معاه ويعطيك تفسير لهادشي.. تقولي ليه اجي الشريف لهنا علاش كدير هاكا و هاكا شرح ليا شنو هادشي… متسكتيش هادشي خاصو يتوضح..مكيصرفش عليك وزايدها بالاحتياط علاياش ناوي؟؟ هادا نيتو غااارقة وساكت.. جاني فشكل ماشي عادي

سارة: نزيدكم حاجة اخرى غتصدمكم

ايمان: نااري نتي كتر مني !! زيدي زيدي

سارة: كيمشي يدير المساج

بشرى:تقادات فالجلسة) كيفاش كيديرالمساج!!! (شافت فإيمان)

سارة: كيمشي لشي سونطر مرة مرة يدير المساج !

ايمان:مساج !!

بشرى: هزات صبعها) لالالالالا هادا ماشي حتى لهيه

سارة: بحرقة) غننمووووت غنطررررطق ومكنقدر نقوليه واالو.. مكيخليش ليا فرصة نهضر كلمة جوج كيغبر ولا يسلت

سارة:واهادا مابقاش راجل!!! مللي رجع كيمشي للصونا ويدير المساج ومقابل راسو !! صافي خلات

ايمان: اشمن مساج اللي كيديرو راه كيمشيو يديرو المساج لااااخر مع البنات…غير دايرين السبة بالمساج

سارة: اويلي!!! قالي راجل اللي كيدير ليه المساج

بشرى: ويييلي راك غير هبيلة… سيري شوفي راجلك اش كيدير.. كتفقصي راسك بوحدك وهوا عايش حياتو بالطول والعرض..هاي هاي هايعلى المساج

شحنات زايدة انضافت على التراكمات والشحنات دسارة..رجعات لدارها من بعد اللقاء مع صحاباتها وراسها عامر والخاطر هارب وأول ماقامت بيه هوا البحث عن غالي،، كما العادة كانت متوقعة ماتلقاهش فالدار وحتى حماتها وبناتها فلعشية خارجين بالخصوص فالأونة الاخيرة ومع التخضيرات دالعرس ما بقاوش كيلقاو الوقت الكافي وخاصهم يكملو دهاز منال العروس.. نعم منال اللي طبعها ماشي اي طبع ومشترياتها خاصهم الخاطر والوقت والبحث وكتعيش الستريس والقلق والاعصاب فالتسوق بلاصة السعادة والمتعة ..والسعادة والمتعة عندها فاش تجمع مشترياتها قذامها وتلقا راسها راضية عليهم عاد كتبدا الفرحة والاستممتاع ..اما فاش كتكون كتشري فالضحكة مكضحكهاش وماشي اي حاجة كتعجبها ومتقدرش تشري شي حاجة وهي مامقتانعاش بيها.

لقات سارة نضرة فالدار ومشات هزات التيليفون كتصوني عليه بتوثر وكيف العادة ماجاوبهاش وجلسات كتغلي والنار كتحرق فيها ومعالم بيها غير اللي خلقها ،، احيانا كتوصل بيها الحالة البكاء وكتمرض نفسيا ومكتبقاش قادرة تفكر فشي حاجة من غير غالي والتفكير فيه وفين هوا او راه جالس مع شي بنت و لا ناعس مع شي مرى.. هاد الافكار كيخليوها تسخن وتوصل للتعرق والخوف والحيرة حتى الجنون.

دخل من بعد ساعة على الاتصال ديالها وكانت اكفس ساعة دازت عليها ديال الانتضار حتى صفارت فوجهها وتخطف لونها وتعرضات ليه وهوا داخلمع الباب هاز فيدو الصاك ديال الرياضة كحل ولابس شورط رياضي وتيشورط وحداء رياضي ، بقات كتشوف فيه من راسو لرجليه والنار كتزيد تحرقها وذهنها مشوش بقوة التصاور والتخيلات ومترددة تقول اشنو عندها

غالي: بعفوية) صافا؟؟ شفتي صحاباتك؟

قرب سلم عليها وبدات كتشمشم بلا متبين وقالت

سارة: تعطلتي فين كنتي؟

غالي: قلت ليك غادي لاصال مابايناش عليا!

سارة: امم..

حط الصاك على واحد الطبلة ومشا جلس كيفسخ سيور الحداء وهي جالسة قدامو كتشوفيه عاقدة حجبانها، خرج رجلو بألم كيوجع وشد فالعضلة اللور وقال كيقلب وجليه

غالي: جيبي لي دوك المكعبات ديال الثلج اسارة

ناضت للكوزينة حلات البرا د خرجات جوج مربعات كبار عبارة عن سوائل فالازرق لداخل خاصة بالرياضة كيجمدو ويشدو البرودة مدات ليه وحدة وسرح رجليه كيبرد العضلات بألم ويرجع راسو اللور وهي واقفة كتشوف فيه والغيرة كتاكل فيها

سارة: كانو معاكم البنات فلاصال

غالي: لا ..كنت بوحدي

سارة: شافت فالساعة) هاد الساعة هادي وكنتي بوحدك

شاف فيها ورجع راسو لور بتعجب) ونتي سولتيني واش كانو معاك البنات!! هادا سؤوال

سارة:علاش فين ما نسولك كتستاخف بيا؟

غالي: دابا هادا سؤال!!!واش كانو معاك البنات!! شغيديرو معايا البنات انا؟؟؟ جايين لاصال ولا جايين عندي

سارة: ومكتهضرش زعما معاهم كاع الوقت كدوزو ساكت

غالي: هاانتي بديتي فالهضرة الخاوية اللي كنكره وغنوضو عاوتاني هاك وارا

ناض بزز كيشد فالطبلة حتى غوت ماقدرش يتحرك ورجع جلس كيتوجع

غالي: اااااح… برد فيا الدم… شعلي الشوفو شعلي ندخل نذوش

سارة:ضارت )نوض شعلو راسك

مشات وخلاتو مقاتل كيحاول ينوض ويتعصر حتى شعل الشوفو ودخل الدوش دوش وخرج ما للبااكار قالب وجهه عاد وقفات عليه وعوالة تهضر معاه نيشان .

سارة: بغيت نفهم هاد الاهتمام هادا كاامل علاش؟؟ فهمني حيت هادشي مابغاش يدخل ليا راسي

غالي : قلب وجهه بتعب ) سيري بدلي الساعةبأخرى خلينا هانيين هاد الليلة

سارة: لا غتجاوبني) لمن كدير هادشي كامل

تلفت شاف فيها) اش كندير؟؟

سارة: هاد المرايا كل شوية وهاد الشعر اللي كل ساعة تمشطو وهاد اللحية اللي مقابل غير هي وغادي جاي لاصال كتقاد فلاطاي والدوش صباح وعشية واللباس كل مرة بلبسة وكثرة الزواق ىالروايح!! كيحساب ليك مزال سيليباطير؟؟ …انا عندي خويا وماعممممري شفتو داير هاد الحالة اللي داير نتا !! كيهز جلدة ويمشي للحمام والى فاق الصباح كيغسل وجه صافي

غالي: بجدية) واش كيحساب ليك كاع الرجال كيغسلو بالتيد ولا شنو!؟ شهاد التخربيق كتخربقي؟

سارة: نتا فتي العيالات !! بزااف كاع

غالي: بصرامة) سيري حيدي من قدامي…سيري ماتهضريش معايا حيدي

داز من حداها وهي تابعاه والغضب كيزيد يسيطر عليها حتى وقفات وسدات طريقو

سارة: لااا جاوبني..لمن هادشي؟؟ تزوجتي؟؟ صافي لمن كتزوق راسك؟

غالي: حيدي من قدامي اسارة…

سارة: جاااوووبنييي

غالي: تعلمي تهضري الى بغيتي نجاوبك

سارة: لا غتجاوبني

غالي: دابا غتحيدي من قدامي ولالا؟

سارة: ربعات يديها) مغنحيدش

رجع اللور لبس تيشورط بسرعة وطلع سروالو ويالاه ضار يشوف سوارتو ضارت كتجري مشات سورتات الباب ووصل عليها وهي تحط يديها وراها وسوارتو فيديها ووجهها احمر وقالت كتنهج

سارة: والله ماتخرج …يالاه

غالي:رجع اللور) اري ليا سوارتي

سارة: مغنعطيكش

غالي: وا ارييي ليا سواارتي!!! اري السوارت

سارة: والله ماتشدهم

غالي: قلب وجهه كيسوط) مافهمتش انا اش غندير مع هادي دابا؟؟( شاف فيها) غنهزك من تما غنلوحك فشي قنت وغنخرج …ساااهلة… واري السوارت حسن ليك

حركات راسها بالنفي وكانت عارفاه ميحطش يدو عليها او يستقوى ومتأكدة مليون فالمية داكشي علاش بقات تابتة فبلاصتها وماخلاتوش يخرج وكلها كترعد وصدرها كينهج وهي فالمواجهة معاه

بقات واقفة فالباب اما هوا رجع كيسوط نسا ماصلى ومشا طلق السجادة كيصلي وهي كتشوف فيه حتى سلم وناض لقاها مزالة حدا الباب ، مشافش جيهتها ورجع المطبخ حط الماء يغلي وحط للقطة الماكلة وبقا كيتحرك حتى شوية رجع كيعرج لاكن كان عمر البراد ديال اتاي وداه حطو قدام التلفازة وقلب لاداعة ل بي ان سبور كيتفرج وهي كتشوف فيه وتغلي ومشات البيت خبات السوارت ديال اللي فيهم مفاتيح السيارة حتى هما ، حتى هوا تكا وهز وجلو على المخدة كيتفرج وشوية جر البيسي عندو حطو على كرشو حتى سمع الساروت كيدور والباب تحل ودخلات اسية سخفانة دافعة الباليزة بيضاء جديدة ومعاها بناتها هازين الصيكان المشتريات وعمرو الدار وعمرو الصالون وجلسو سخفانين

ااسية: سااارة… ساااارة .. اري ليا نشرب..سخفت(نخزات هند)تكعدي جيبي ليا الماء

جات القطة كتجري فاش سمعات صوتها نقزات عليها وشداتها اسية كتمسح ليها وتبوسها تدلعها

اسية: جات عندي كبيدتي جات عندي بنيتي سمعاتني.. كليتي اميمتي عطاوك تاكلي

عنقاتها وبدات تبوس فيها وتكمش

منال: ميوصل العرس حتى نضعاف..الفقصة !! اويلي مكاين ما يتشرا غير الشرويط

غالي: ناض جلس) ااه فكرتوني.. موحال نحضر معاكم العرس عندي فوغماسيو فنفس التاريخ

اسية: اويييلي!

منال: شنووو!!! وانا غندير العرس بلا خاااي!!! ميمكنش ماتحضرش

غالي: وانا براسي عاد سقت الخبار اليوم

اسية: وفين جات هاد الفواماسيو؟؟

غالي: كيحك رقيتو) فمييريكان

سمعاتو سارة كيهضو وخرجات كتجري طلات عليهم وشافت فيه بانزعاج

سارة:ماقلتي لي والو!!! فوقاش غتمشي

دور وجهه ماردش عليها وشاف فمو وقال

غالي: في حيرة) والله ماعرفت شنو ندير

منال: باصرار) االالالالا منديوش انا العرس بلا خاي.. واخا نعرف نأجلو

غالي: لاالا ماعندك متأجلي ديري العرس ديالك ونشطي مع راسك

هند: ويلي على بلاان!!

مشات سارة جلسات بيناتهم كتشوف فيهم وبدات تحمار وتشوف فيه وقالت

سارة: ضاروووري ضارووري هاد الفوغماسيو تمشي ليها!!

غالي: لا رد

اسية: مريكيان…بزااااف بعيد الحال

سارة:شاف فيها)كيفاش ميريكان!!! شحال غتجلس؟؟(ضارت عندو)

غالي:قلب وجهه جهة مو ) غا دوزو العرس ديالكم ..حسبوني حضرت وصافي

منال: لاااالالا كندوزووووش بلا بيك.. مالك رخيص عندنا ..نأجلوه اش غيوقع كاع انا خاصني خاااي يحضر ويكون معااايا ..شحال وانا نأجل فاللخر ميحضرش خاي لاا

اسية: وشحال غتجلس؟

غالي:شهر نقريبا

سارة:خرجات عينيها؟اويلي على شهر!!

اسية: تنهدات)وشنو عنقولو مروان ؟

منال:صافي نهضر معاه نقوليه شنو كاين..منقدرش ندير العرس بلا ميحضر غالي

هند: وداكشي اللي عربنتي؟

منال: غنهضر معاهم يبدلو ليا الموعد وصافي

اسية: من الزهر ماعرضناش الناس ولاهيلا… على هاد الحساب ندوزو الخطوبة ديال هشام هي اللولة ويحن الله

الكل كيهضر وسارة كتفهم من الحوار الي كيدور بيناتهم اما غالي قالب وجهو مكيشوفش فيها ومكيهضرش معاها وهي كتزيد تسخن وتعصب حتى ناض بغا يوقف وماقدرش ورجع جلس وبداو كيسولو مالو وشنو واقع ليه وعرفو باللي عضلة رجلو مقطع فيها اللحم ومكيقرش يتكا عليها عاد ناضت منال بسرعة مشات سخنات الزيت ولبسات بيجامتها ورجعات عندو جلسات حداه بدات كتدلك المكان المتشنج وهوا ناعس على كرشو طالق وجليه وسارة جالسة كتشوق فيها بنص عين تتنفس بضيق فالاخير ناضت عندها وقالت

سارة: اناغنكمل عليك غير خليك نتي عيتي

منال: لالا ماشي مشكل

سارة:كتكحز وتدفعها) واغير اري كنعرف ندير مساج غير سيري رتاحي

بقات كتكحز وضايقها حتى نوضاتها من بلاصتها وناض حتى غالي جالس وهبط رجلين قدامو وقال كيشوف فمنال ويضحك

غالي: صافي برااكة.. شكرا

تبسم كيشوف فيها وهي كضحك فرحانة وسارة كتشوف فيه بنص عين..هزات منال طبسيل ديال الزيت داتو الكوزينة حطاتو وقالت بخفوت لاسية اللي كتسخن اتاي

منال: غتاكلو غتاكلو.. ياااربي السلامة ماخلاتو حتى يرتاح مسكين

هند: كتجبد الكيسان) عمرني شفت شي وحدة كتغير على راجلها من خواتاتو!!! اويلي ديك المرة شافتو كيضحك معايا تبدل فيها اللون فوجهها ماعجبهاش الحال وبقات غير كدور عينيهااا!!!

اسية: والله حتى نتوالاها نوريها الغيرة من خواتاتو كيف دايرة

منال: بخفوت)بزااف!! بغاتو ميضحك مع حد ما يهضر مع حد!!

هند:بغاتو ليها بوحدها الله يستر

منال: مكيديرش كااع بهضرتها..كن هشام والله ميعقل علينا تقوليه قلب وجهك يقلب وجهه وعمرو يدور

هند:ولاهييييييلا… كنقول انا يعلم الله هشام فاش يتزوج كيفاش غيدير.. اما سمير هاداك خلاص

اسية: ماتبقايش تجبدي ليا داك الكنس الناقص .. بقا ليه غير يبوس الرجلين لمرتو حتى كتندمو عاد كيشكي ويبكي علينا

منال: بنص عين) هادي بعدا الى بقات هاكا غادي تسطا.. تشوفو كيف دارت فيا وانا كنمسد ليه! ناااري!… وخااااي عباد الله خااااي مكتفهمش!

هند: كتغير من البنات كاملين واخا تكون مو .. هي هاكاك الله يستر تشوفو مال على شي جهة تشعل فيها العافية

منال: هيييه!! يعلم الله الى ساقت الخبار كان باغي يهبل على صاحبتو اللي قبل منها شغدير

اسية:حلات عينيها) اشنووو!!!… اجي لهنا اجي عاودي شقلتي

منال: بادراك) هاا!! والو غير ..غير كنخربق

هند:شداتها كضحك) اجي لهنا والله لامشيتي هههه عاودي شقلتي ههه علامن كان كيهبل ههههه

اسية: هضري غير قولي ..قولي قولي اش عارفة دابا خرجتيها غير اري ماعندك..

منال رجعات حمرا بيناتهم ومالقات منين تهرب اما اسية عصراتها حدا الثلاجة كتسايس معاها هي وهند وعارفينها كتحط عليه الراس ويحط عليها حتى هوا وكتكن ليه معزة خاصة وعارفة عليه اللي ماقدروش يعرفوه هما

اسية: دابا صاافي تزوج وسالا بقاد داكشي غير تعاويد

هند:ولاهييلا تلقايها مشات تزوجات حتى هي..دابا غير عاودي لينا ياك داكشي دااز

منال:وماتما مايتعاود هه(تزنكات) كلشي داز

اسية: متأ ودابا عاودي لينا غيبقا غير بيناتنا ..شكون هادي علامن كان غيهبل

منال: ههههه ناااري نتوما خطار

هند:نخزاتها) واهضري ههه

منال: وصاافي دابا ياك تزوج

اسية: ااه وااكن غير بغينا نعرفو وصافي

منال: وا غير واحد البنت وصافي

هند:عرفناها بنت مالها ولد!! شنو سميتها

منال : سميتها سكينة.. احممم(شافت فيهم) هي اللي جابت ليه القطة

هند:شدات حناكها) هيييه!!! سوكي!!! هيه ويلي ويلي

اسية: خرجات عينيها) هيييه!!! ويل باااك شوووو… صافي صافي قطع حسك

هند: بحماس) خليها تهضر… ويلي على قنبولة هههه …زيدي زيدي

اسية كانت بغات تخرج لاكن رجعات كلاها الفضول وفنفس الوقت بغات تسكتهم لايتسمع حسهم لاكن خضعات لفضولها ووقفات تعرف

هند: هااانتي على غالي والحب هههه

منال: قولي المرض ماشي الحب.. غير سكتي راه ماخرجها من حياتو حتى خرج ليه العقل

اسية:ايوا لاباس.. ياك خرجها

منال: لا صافي مابقاش كيذكرها.. ولاكن راه كان كيهبل عليها.. بغاها ومالقا كي يدير ليها

هند: وكيفاش مالقا كي يدير ليها ؟

منال: مابغاتش تزوج

هند: هيا اللي مابغاتش!!! هاي هاي هاي

منال:ااااايه الاللة هياااا اللي مابغاتش السيدة دايرة لراسها الشان.. باغا تعيش الحياااة مابغات زواج

اسية: لالالالا حسن ليه حيدها عليه..اش غيدير بيها باغا دور فالزناقي هادي

هند: وكي دايرة بعدا زوينة مازويناش اش بغا بيها.. ياكما هاديك اللي شفنا معاه فطموبيل لحتحت

منال: ايييه هيااا

اسية:لحيجاب يا حسرة

منال: اشمن حجاب ههه السالف كيضرب حتى لهنا ورقييوقة وعندها داكشي…كااينة المعنى

هند: هاااي هاااي هاااي على الفقيه ديالنا ..تيقناه فاش شفناه من محجبة

اسية:هييه احيااني توريني انا فيهم..زيدي زيدي..شفتيها ؟

منال:وراها ليا زويييينة

هند:حسن من سارة!!

منال: لاااااالا لامجال المقارنة كاااع مكاينش تشابه بيناتهم …كل وحدة وزينها وبعاد بعد السما على الارض

اسية:يدها على دقنها) هوا قاليك كان كيبغيها؟

منال: يخفوت) هيييه واحد الليلة فالسطح انا وياه حتى بكا

هند:اويلي!!

منال: واحححححححق ربي الحبيب حتى هبطو ليه … فاش صااااافي قرر يقطع علاقتو بيها عطاني تيليفون قالي مسحي كاع التصاور من تما..مرض ..بقاااا فيا ولله

هند: كون تزوجها مالو على هاد العذاب

منال: في حيرة)مايصلاحش.. مغيتفاهموش..ماشي وحدة اللي دوز ليه الكلمة… تفووو الحب ولاهيلا غييير المرض ..مرض نفسي وجسدي يخ

كانت سارة مور الباب وطالقة ودنيها كتسمع،، هادي عادتها ديما وعزيز عليها تعرف كولشي وتعرف اشنو كيتقاا مور ضهرها،، ياكما كيهضرو فيها ولا كيعيبوها وشنو كيقولو عليها فغيابها وباش كيعمرو ليه راسو من جيهتها،، لاكن هاد المرة الهضرة كانت قاصحة وخطفات ليها اللون من وجهها و عينيها خرجو من بلاصتهم وبسرعة دازت فاش حسات باسية خارجة من المطبخ، دخلات سدات عليها فالبيت وبلا شعور جلسات كتبكي وعنقات واحد المخدة وعضات عليها والدموع نازلين والهضرة كتتكرر فودنيها ، بغات تموت والقلب كيتقطع اجزاء والنفس تحقن فيها ومابقاتش قادرة تتحمل اكثر،، كانت غتوقع فيها شي حاجة لو ماناضتش بسرعة ودخلات للدوش حيدات حوايجها كترعد وتبكي دخلات تحت الرشاشة وطلقات الماء بارد وبقات واقفة كتلفق النفس والقلب كيضرب طير ليها داك الاحساس اللي زمتها وخلاها تشهق من البرودة وداتها سخونة طايبة حتى بدات كتكنزز وتشنج تحت الماء وطفات شوية عاد خرجات من الدوش ملوية عليها ملوية على شعرها الفوطة ولابسة بينوار دازت للبيت مباشرة مكمشة لبسات بيجامتها وجمعات شعرها وبدات كتنخصص ..ماقدراتش تزيد تصبر وهزات تيليفون ومشات للنافدة وقفات كتصوني على بشرى حتى ردت عليها وسمعات صوتها كتبكي

بشرى: سارة!! مالكي؟

سارة: ماعرفتش مالي..بغيت نموت ابشرى قحح قح قح..حاسة براسي كنهار

بشرى: قولي اعوذ بالله من الشيطان الرجيم

سارة: بسرعة)قطعي قطعي..قطعي

قطعات بسرعة ولاحت التيليفون جاتها نوبة عصبية على غفلة وبدات كتنين وجلسات على طرف النموسية مزيرة على الفراش وكتعصر وشيىئا فشيئا بدات كتشنج وغوتات غوتة وحدة خلات منال تدفع عليها الباب وتبعاتها هند كتجري ودخلو عليها لقاوها مكمشة فديك الحالة..ماصدقوش انها فعلا جاتها نوبة عصبية وضنو انها كتمثل لاكن مع ذلك دارو الواجب ، اما اسية فالاول تخلعات لاكن فاش دخلات طلات بدات كتفخ وخرجات مشات كتسوط عند غالي جلسات ودارت يد على يد

اسية: ايواا صافي.. كل مرة مياااااو

تلفت غالي شاف فيها وهوا متكي وقال

غالي: اش واقع؟

اسية: بالنفخة) راهيا عاوتاني تحبدات فالارض

عقد حجبانو وناض يشوف اش واقع. وايلاه جا يوقف شداتو الارض ورجع بلاصتو متشنج من رجليه وعاود ناض بشوية مشا مع الحيط حتى للبيت لقا هند ومنال شادينها وجههم صفو

منال: ضارت عندو) ماعرفت مالها هاد المرة اغالي عينيها تقلبو

غالي: حيدي حيدي..بلاتي

داز بيناتهم كيشوف فيها وبدا يقيس ليها وجهها ويفيقها

غالي: سارة!! سارة؟ (بعد عند) بلاتي

ناض هزها كيتعصر من الارض حطها على النموسية وطاح حداها كيفيقها ويرشها بالماء وكيحاول يفتح ليها يديها وبدا يقرا فالقرآن عليها شوية بشوية عاد بدات كترخى وترجع كي كانت ورجعو عينيها لبلاصتهم وشافت فيهم لقاتهم ضايرين بيها مخلوعين وبدات كتبكي

سارة: بغيت نمشي بحالييي

غالي: شنو كاين مالكي ؟؟

هند: اويلي مالها؟

سارة: دورات وجهها كتبكي) بغيت نمشي لدارنا (شداتها السخفة) عيط على بابا

غالي: قولي ليا مالكي بعدا إش ؟

بعدات وجهها وبدات تبكي وتنخصص وهما كيسولو مالها فالاخير وقف بقا كيشوف فيها في حيرة وهز تيليفون كيتنهد غادي جاي كيفكر ، صونا على باها وتفتح الخط وبدا كيهضر ويدو ورا رقبتو ماعرف مايقول ولا باض يبدا

غالي: اعمي.. الحمد لله نتوما مزيانين… الحمد لله.. وااا..شغنقوليك ماعرفت انا بعدا منقول والله لعضيم.. جالسين تخونكيل واحد الشوية سارة ماعرفتش اش وقع معاها طاحت ..واش جاتها كريز ولا شنو …مهم كتقولي غير عيط لبابا بغثت نمشي بحالي………والله ماعرفت بحالي بحالك ماكتقول والو من غير نمشي بحالي عيط لبابا…..واخا ها هاهيا

مد ليها تيليفون وخرج من البيت مشا جلس على كنبي شابك يديه وكيشوف فلارض والجو مكهرب وهي فالبيت كتبكي وتستغيث بباها والبنات واقفين غير كيشوفو حتى واحد مافاهم شي حاجة..اما اسية ناضت عاقداهم مشات للبيت طلات عليها جات معاها يالاه قطعات وحطات تيليفون ووقفات عليها بغات تنكر لاكن عيط ليها غالي ردها اللور ورجعات جلسات حداه كتنفخ طالع ليها الدم

اسية: هادا العجب!!! البهلان هوا هادا… كل شوية باط كل شوية هانا سخفت اش عندها هاد المرى ماعرفتش!!! معديين عليها قاتلينها كاويينها بالعافية اش دايرين ليها

غالي: بنفور) صافي دابا بلا بلا منتتت…

دور وجهه للجهة اخرى سكتها وقلبات حتى هي وجهها كتنفخ

العشية تقلبات وكحالت تقول الروح خرجات..كل واحد شد قنت وبقات سارة فبيتها كتبكي وتنخصص مابغات تشوف حتى واحد ولا تهضر مع شي واحد.. اما غالي نعس وسط الدار ودازت الليلة كحلة زحلة حتى صبح الحال وصبح عليهم باها فالباب هوا وامها كيدقو .. الام كانت طويلة ومجبدة تبارك الله وباينة عليها حارة ، اما الاب كان كيبان عليه درويش وكيعرج بواحد الرجل وديما فيدو عكاز . لقاو غالي فالخدمة وسارة مريضة فبيتها اما اسية فباينة عليها ماعندهاش مع زهرة ام سارة وزهرة حتى هي حاسبة ميترو لأسية.. استقبلوهم فالدار وحتى واحد ما هضر اما هند صبحات ناعسة ومنال فقط اللي فاقت باش ترد البال لاسية والضياف .شافتها هازة خنافرها وغادية جاية وعرفاتها بغات تقول شي حاجة وجراتها للكوزنية وقفاتها وقالت بخفوت

منال: ما دخليييش راسك.. واه وصاك قبل مايمشي وغادي وكيوصيك .. ماتهضري ماتنطقي

اسية: كيفاش منهضر منطق مالي شايطة هنا

منال: قالك ماتهضريش صافي ماتهضريش هوا عارف شغلو وهضر مع باها فتيليفون ..صافي

كانت فهاد الاثاء زهرة وعبد الكبير فالبيت مع سارة وهي ناعسة وجهها اصفر وطالعة ليها السخانة

زهرة: جلسات حداها وهزات صبعها بصرامة) قولي ليا شنو وااااقع بالحررررف.. والله ودارو ليك شي حاجة حتى نغززهم بسناني

عبد الكبير: نعلي الشيطان مادرو ليها والو ..نعلي الشيطان اهاد المرى

زهرة: البنت شو كي صفرا وكتغلي بالحرارة وكتقولي مادرو ليها والو .. والله منتيق

عبد الكبير: صافي دابا ماديرو لينا المشاكيل..جينا نحلو المشكل ولا جينا نزيدو عليه(شاف فسارة) قولي ابنتي مالك ؟ شنو وقع ليك غير قول

سارة: بتعب) كنحس براسي مرييضة..ماعرفتش شنو كيضرني

زهرة: بالفقصة) الغدااايد هادو .. قهرو ليا البنت اويلي وحدييي

عبد الكبير: يااا الله … سكتينا شوية(شاف فسارة) بغيتي تمشي معانا للدار؟

سارة: الصمت

زهرة: غتمشي .. انا مانمشي من هنا حتى مديها فيدي..مالها شنو ناقصها حتى يوقع ليها هاد شي

سارة: بتعب) شنو قالك غالي ابابا

عبد الكبير: ماقال وااالو قالي جلس الدار دارك غنخرج من الخدمة نجي عندك.

زهرة: اممم ماجاه يخدم غير اليوم زعما

عبد الكبير: نعلي الشيطان عيب هادشي اللي كتقولي..راني هضرت معاها قالي عندو اجتماع هاد الصباح وغيخرج مع الطناش يجي (تنهد) دابا شنو واقع قولي باش نعرف باش نجاوب السيد

سارة: بدموع ) انا عييت وصافي

عيد الكبير) ومناش عييتي واقولي؟

زهرة: نفضات يديها) عيااات عيااات بالسيف اللي ماتعيا مع هاد الخلق (حركات ليها سارة راسها بالايجاب). راني عارفة واش عاد توريني مناش عيات راني فاهمة بنتي

عبدالكبير بغا يفهم من سارة لاكن سارة ماعرفات ماتقول وكيفاش تعبر بشنو كيضرها وبقاو على داك الحال حتى صونا ليه تيليفون وناض وقف جر عكازو وقال

غبد الكبير: الغالي كيعيط(فتح الخط) الو غالي… انعام .. ايييه مرحبا (قطع) هانا غنهبط راه جا كيتسناني لتحت قالك نمشيو للقهوى… اناغنقوليه كاع هادشي اللي قلتو نشوفو شنو نديرو

شدات زهرة على راسها فالبيت مع بنتها بينما خرج عبد الكبير عند غالي لقا سيارتو قدام الباب واقفة، نزل غالي كيتبسم ليه ويرحب ليه وفتح ليه يديه سلم عليه وركبو معاه داه للمقهى . اما زهرة عاد نفتردات هي وبنتها بوحدهم وعاودات ليها كل شيء من اوله لاخره بقات زهرة غير جالسة كتحاك وتفقص وقالت

زهرة: مزيااان تبارك الله.. بكا عليها هه!! ولاهيلا جديدة هادي..وهوا علاش كيقوليك ديك الهضرة زعما علاش؟ هاا؟ كاين شي راجل كيشكر مرى اخرى قدام مرتو

سارة :بتعب) صافي عييت .. كنحس براسي كنموت

زهرة: بيغض) ماتققسيش راسك.. صافي ياك كنا وكنتو وايوا صافي سالينا كن بغاها كن تزوجها

سارة: هي اللي مابغاااتش

زهرة: هي مابغاتش تجي تسكن مع تريكتو باااينة … نتي لقاك بنت الناس درويشة من الدار للمردسة من الخدمة للدار وجابك هنا يلعبو عليك … غتمشي معايا صافي

سارة: هييه!! لالا غير خليني انا غير (كتفتف) غا غ ير مرضت شوية هوا مادار ليا واالو

زهرة: كيفاش مادار لك والو وهوا جالس كيشكر فيها قدامك دابا يجي نقولها لو

سارة: خرجات عينيها) هااا!!! لالالالا عندااااك تقولي ليه شي حاجة والله حتى نموت ليك ..ماتقولي والو من عادشي اللي عاودت ليك

زهرة: ومناش خايفة هاا؟ مالكي شايطة!! بنت الاصل والنخوة والهمة وطبيييييبة يقولها ويشلل بيها فمو … وريني شكون الطبيب فيهم ولا فعائلتهم .. باش حسن منك ياعبو عليك ويضحكو عليك.. صافي درتي شوية دالمكياج ردوك كلون بيناتهم مزيان تبارك الله ..باو يسطيوك

سارة؛ بتحدير) والاه وقلتي ليه شي حاجة ولا جبدتي شي هضرة حتى ندير شي حاجة فراسي

زهرة:شدات راسها) غتقتلييني.. بغيتي طعنيني.. ومناش خايفة مناش؟ هاا؟ مناش

هما فالبيت مشادين وغاليوعبد الكبير فالقهوى جالسين كيناقشو نفس الموضوع بالعقل

غالي: ماعرفتش شنو واقع بحالي بحالك اعمي..داكشي اللي وقع قلتو ليك ونعاودو ليك..دخلت من لاصال عادي هضرنا عادي سولاتني جاوبتها ماوقع حتى مشكل… زعفات شوية فاش هضرنا وميكت عادي ..موراها جلسنا كناقشو عرس منال قلت ليهم عندي فوغماسيو فميريكان مغنكونش.. موراها بقيت جالس حتى سمعتها غوتات نضنا نشوفو مالها لقيناها فديك الحالة وعيطت ليك ..وهي قالت لي عيط لبابا ماكنتش كتع غنعيط لك نشطنك

عبد الكبير: امم..الله ينعل الشيطان .. دابا كيف كتعرف اولدي راه ديما فالبداية ديال الزواج كيوقعو بحال هاد النزاعات وهادشي عادي..ولاكن كن دير ريي تسكنها بوحدها حسن ليك وليها ولينا كاملين

كحز غالي قدام الطبلة تنهد وقال

غالي: ها الموضوع راني ناقشتو معاها نهار اللول اعمي..وضحت ليها كولشي ..الوالدة ماعندهاش دار ديالها عندها غير ولادها وخواتاتي كذلك..شرحت ليها باللي يقدرو يعيشو معايا واخا دار جدي كاينة ولاكن منقدرش نخرج الوالدة واش كاين شي واحد كيجري على واليديه؟ هي عارفة الضروف الديالي وتافقات معايا وقالت ليا ماعندهاش كااع مشكل..دابا ختي هايها غتزوج تمشي وغتبقا الوالدة وختي لاخرى الله يسهل عليها حتى هي وتزوج مغتبقاش معايا طول حياتها ..ولاكن الوالدة راه منقدرش نخرجها ولا نخرج نخليها ..هضرنا فهادشي وتافقنا عليه..مابيدي ولا بيدها

النقاش الرجال مختالف على نقاش النساء… كان كلام قليل..ما قل ودل فقط بلا تفاصيل وبلا شرح كثير،،غالي وضح بعض النقط والاب حتى هوا وانتهى الحوار ورجعو بجوج للدار ودخل غالي للمطبخ مباشرة وعيط لمو دخلات عندو

غالي: مادرتوش لغدا!!!

اسية: اشمن غدا حنا دابا فالغدا؟

غالي:زفر ودور وجهه )شنو خاص دابا غنمشي نجيبو دغيا

اسية: ماعرفتش(هزات يديها) بقا لينا حنا دابا غير الغدا

خرج ما زادش معاها الهضرة مشا عند منال جرها سولها على اللي ناقص وعطاتو المعلومات وخرج بسرعة بينما دخل عبد الكبير عند سارة كيهضر معاها عادي ويبسط ليها الامور

عبد الكبير: مكاينش شي مشكيل كبيييير علاش كبرتو الموضوع؟؟ هضرت معاه مقالي وااالو غير نقاشات بسيطة صافي!! ونتي عاوتاني نقصي شوية من الاسئلة..فين مشيتي فين جيتي فين جلستي بسيف مايهرب منك!! الراجل كما كان نوعو بصبر حتى عيا ويطج

هزة: راك مافراسك مايتعاود

عبد الكبير: اش غيتعاود عاوديه

سارة: ماما!!

زهرة: هانا ساكتة(دارت يدها على فمها)

عبد الكبير: شنو واقع قولو اش كاين ؟

زهرة: كان كيعرف شي وحدة قبل مايتزوج وكيفقصها بيها

عبد الكبير:كيفاش كيفقصها؟؟

سارة: ماما!!! (نخراتها) لا ابابا انا سولتو وصافي

زهرة: لا عساك هوا كيفقصها قاليها حضن منك ومن الف وحدة

عبد لكبير: بنرفزة) وعلا تسوليه اش كتخربقي نتي وياها؟؟ واش هادشي كيوسولوه الناس ؟؟ عيشي الحياة ديالك مع الراجل ديالك اش داك لمعامن كان ولا مكان علاياش كتقلبي…لحماق هادا

ربعات سارة يديها ودورات وجهها وزهرة دارت يدها على فمها ماعجبهاش الرد وقلبات وجهها اما عبد الكبير طلع ليه الدم

عبد الكبير: دابا شنو خاصك ؟؟ بغيتي ترجعي معانا يالاه ماحبسناك ما خليناك. بغيتي تنعلي الشيطان وتجلسي فدارك مع راجلك جلسي وخوي راسك.. ياك نتي اللي بغيتي تسكني معاهم النهار اللول

زهرة: النهار اللول داااز صافي.. دابا نهار اخر … هما فالاول كانو كيشكروها ويضحو ليها فرحاانثن بيها ودابا تبدلو عليها ايوا حتى هي تبدل كلامها ويسكنها بوحدها

عبد الكبير: الاللة راه الزواج هادا واش حنا كنلعبو هنا.. كلمة جوج صافي نجمعو نطويو .. علاه انا ونتي هاكا كنا نهار اللول ؟؟ كاع الناس كيدابزو وكاع الناس كيتبدلو وراهم تعاشرو وساكنين مجموعين ..داك الضحك والمجاملة صافي نسايها للى بغات تبقا مزوجة تجمع راسها ودير كي كيديرو الناس والى مافيها اللي يصبر ها الطريق ترجع معانا ماجرا عليها حد

سارة: لالا انا ماعنديش مشكل معاهم غير الضغط وصافي

عيد الكبير: ورخف فيك النفس ابنتي شوية مالك ؟ واش مابغيتيش يمشي لميريكان؟ سيري معاه! ديري شهادة طبية وسيري

سارة: غنديرها اصلا باقي مغيمشي باقي الوقت نقاد وراقي

زهرة: عاد كنتي غضبانة!!

سارة: وصافي السعاة لله اماما يااه!!

ناضت من الفراش وحيدات الزيف على راسها وجمعات شعرها اللور بمقبط ومشات غسلات وجهها ورجعات عندهم واقفة بزز منها

سارة: صافي ما مالي والو فاتني الحال

زهرة: انا اللي خصني العصى كنفقص فراسي

سارة:وصافي اماما زدتي فيه

فاتت العاصفة تقول غير عجاجة ودازت ، طاب الغدا ودارو الواجب وجلس غالي مع باها كيتجمعو فالصالون وزهرة جالسة دايرة يد على يد ، اما اسية غير ساكتة وفحضور غالي كتربط لسانها وكتخاف منو ..ماشي حيت غيزعف او يدور فيها.. ولاكن كيقلب وجهه بالايام والشهور حتى وكيبدل التعامل حتى كتمرض وماكتبقاش قادرة على داك الوضع، هادشي كيخليها ضرب الحساب حيت كتعرف طبع كل واحد فولادها وعارفة غالي ضبعو صبار وكيصبر بزاف وصبرو كيوضفو فكلشي حتى فطول البال ..وماشي من النوع اللي كيدور يدور ويبوس الراس ولا يبوس اليدين او يطبطب على الضهر بحال خوتو ..وانما الرضى عندو بالمنطق حتى هوت وكل ما تعمق وتثقف راسو كيلقا راسو على صواب وعندو الحق وحتى واحد مايقدر يبدل ليه الفكرة او يخرجو من الطريق اللي سالك،، كيصرف كيسمع كيعطي وقت مكيزعف ماكيغوت مايكتعصب وكيحتارم ويوقر وعندو اساليب وطرق خاصة يضبط فيها اي واحد فيهم ويوقفو عند حدو ويفرض عليه الاحترام بلا ميرفع صوتو ولا يكسر الدنيا بالصدع، اما خوتو فالعكس ديالو تماما وكيشبهو لاغلب الرجال اللي بالنسبة ليهم الرجولة والصوت والحدة والغضب هي القوة والكاريزما وفرض الاحترام .. ديما كيدورو باسية وواحد يبوس الراس من هنا واحد يعنق من هنا ويضحكو معاها ويقشبو ويشكيو عليها ويعاودو لاكن الريال مكتشوفو وحتى واحد ماهازها بسنيتم وعاد كيجيو يسلفو من عندها ويشكيو عليها والى كان شي مشكل كتنوض فيهم الشعلة ويكسرو الدنيا بالصوت الغليض او الحدة والغضب حتى كيفزنو كاع مالين الدار ويجريو الجيران يفكو .. لطاما كان سمير وغالي كيتشادو فالنقاش ومكانش غالي كيطول فالهضرة وكينساحب قبل ميدخل فعراك مع سمير اللي كان ديما كيندافع للضرب والقوة لاكن مكانش كيلقا فرصة .. اما غالي فكان كيسكتو بالهضرة حتى مكيلقاش باش ي افع على راسو الشيء اللي كيخليه يهاجم لاكن مكيلقاش الرد او الفرصة وكيهز راسو ويستقوى ويهدد ويرجع اللور دافع صدرو ..لاكن المشكل بالنسبة ليه وقف هنا وكيرجع لغد ليه عادي كأنه شيئا لم يكن حتى كيتفاحئ بتعامل غالي معاه والحدود الحمراء اللي قدامو وكطول المدة على داك الحال حتى كيمل وكيعيا وكيرجع يطلب السماحة

تغدا الجميع فامان الله ودوزو النهار معاهم وفلعشية رجعو بحالهم وبقات اسية فالدار مع بناتها فالبيت اللي كينعسو فيه كيتجمعو

ويعاودو الحديث غير على سارة ،، اما الاخيرة جالسة فناموسيتها غضبانة والضيم طايح عليها وقالبة وجهها في حين غالي واقف كيصلي العشا حتى كمل صلاتو ويالاه جلس على طرف الناموسية هز تيليفون ضارت عندو وقالت

سارة: هازة راسها) شكون جاب ليك سوكي؟

تلفت من ضربة السؤال شاف فيها وعاود سولها وقال

غالي: شنو؟

سارة: منين جبتي سوكي؟ شكون عطاها ليك؟

غالي:دور وجهه قدامو رجع للتيليفون ) الليل هادا بغيت تسولي شي سؤال خلي حتى للصباح.

لاحت لغطا تقول قرصاتها شي حاجة وناضت عندو وقفات قدامو وقالت

سارة: غادي تجاوبني دااابا.. منين جبتي سوكي

ماجاوبهاش ويقا مبهط راسو على تيليفون وهي كتشوف فيه وتشطح برجلها مخرجة فيه عينيها حتى فجأة طيرات ليه تيليفون من يدو وهز راسو بسرعة شاف فيها وعقد حجبانو وناض وقف هز صبعو وحاجبو

غالي: بتحدير) غتخلي الليلة دوز على خير ولا لا؟

سارة:شدات تيليفون وراها) جاوبني بعدا على سؤالي

غالي: مغنجاوبك على حتى حاجة ..دابا اري تيليفون حسن ليك

سارة: مغنعطيكش تيليفون .. جاوبني منين جات سوكي؟

سد عينيه بنفاد الصبر وحل فمو تنفس بعمق ورجع مد يدو وقال

غالي: اري تيليفون

سارة: لا حتى تجاوبني

غالي: مغتعطينيش تيليفون؟

سارة: لا

لاح المخدة وخرج من البيت خلاه ليها وخلاها واقفة كتغلي فبلاصتها وكتغدد وخرجات تبعاتو كتقلب لقاتو ناعس فالصالون وبالفقصة مشات عندو حيدات ليه لغطا على وجهه وقالت بخفوت

سارة:رجع لبيتك

غالي: بغضب) جمعي يدك (ضربها ليدها) واش مريضة ولا مالك ؟

سارة:مصدومة) كضربني؟؟ كضربني اغالي ؟

غالي: بعصبية) نتي خليتيني نضربك

سارة: ياك!!

لاحت ليه تيليفون ومشات للبيت سدات عليها ورجعات لبلاصتها كتبكي وتنين بينما رجع تكا ودار يدو على جيهتو كيتنهد ويشوف فالسقف وطلق القرآن فتيليفون ونعس .

صبح الصباح السبت والعطلة ولقاتو اسية ناعس وسط الدار ودارت يد على يد وبدات كتحمار وتصفار ومشات للكوزينة مققوصة دارت ليه الفطور ورجعات لقاتو ناض من بلاصتو اما سارة مانعسات ماشافتو واللي فيها مامهنيها .. نعسات نصف نعسة وغير سمعات الحس وقفات حلات الباب وبدات كتسمع وسمعاتو كيقول

غالي: مافيا يفطر دابا ..غنمشي للسونطر

اسية: اااه ..ايوا صافي حتى ترجع

غير سمعات السونطر رجعات كتجري هزات جلابة لبساتها ودخلات فالفراش نعسات وطلقات ودنيها كتسمعو كيهز ويحط فالحوايج حتى خرج وخلا الباب محلول عاد ناضت لاحت الغطا وطلات على اسية سمعات الحس فالدوش ومشات كتسلت جهة باب الدار خرجات تبعاتو كتجري وكطل عليه … كان موقف السيارة عكس باب العمارة فجهة اخرى الشيء اللي خلاها دوز بلا مينتابه ليها ومشات كطير تعرضات لطاكسي ركبات فيه وتبعاتو ..كان كيطير فالطريق والطاكسي وراه كيجري وخايف يدير حادث وهي كتنخزو يتبعو

الطاكسي: كطير الاللة واش الميرسيديس هي الدسيا!! راني داير اللي عليا

سارة: غير تبعو نعطيك اللي بغيتي غير متفلتوش

الطاكسي: ها حنا تابعينو تا نشوفو هاد التابعة فين غتخرج

تبعوه حتى وقف قدام فيلا صغيرة فيها لافتة كبيرة ديال التداوي بالاعشاب ومكتوب عليها اسم الدكتور وحداها لافتة مكتوب عليها جميع الخدمات من بينهم الحجامة والمساج والحمام والرقية والتدليك الصيني الى اخره .دخلات كتجري موراه وترجع باللور حتى شافتو وقف قدام مكتب فيه مرى واقفة بالحجاب كيهضر معاها وهي كتبسم وبدات كتزير وتحمار فبلاصتها .. ماعرفات تدخل ولا تخرج ولا شنو دير لاكن دخلات ومشات كتبسم للمرأة اللي فالاستقبال وقالت

سارة: سلام ..انا اول مرة نجي قالي هاد الراجل اللي دخل دابا كتخدمو حتى ليفام ياك

السيدة:اييه الاللة مرحبا بيك

سارة: بغيت ندير مساج كديروه؟؟ حيت سولتو فالباب قالي كيديروه وحتى هوا كيديرو ههه

السيدة: اييه مرحبا .. اشمن مساج بغيتي؟

سارة: اشنو انواع المساج عندكم؟

السيدة: هانتي ها الوريقة ديالك ختاري فيها المساج اللي عجبك

سارة:بتوثر) اه احمم ههه مكنفهمش فهادشي الصراحة ..امم..هاد الراجل اشمن مشاج كيدير

السيدة: التدليك العضلي هاهوا عندك هنا

سارة: امم..كيفاش داير هاد التدليك العضلي؟ شرحيلي

السيدة: كيديروه الرجال اللي كيترينيو بزاف .. اللي كيتقطع فيهم اللحم ولا العضلة المرخية كيدار بالعافية وقاصح شويةفالتدليك مكيديروهش العيالات امدام

سارة: امم.. هه. وكيداو للجسم كامل

السيدة: اه كولشي الضهر والرجلين الصدر الكرش كلشي

سارة: مهم بعدا عندكم هادشي مفرق ياك ههه العيالات بوحدوهم ورجال بوحدهم ماشي بحال ليسونطر لخرين هههه

السيدة: لاا لا. كل جنس بوحدو اصلا هاد التدليك العضلي كيديرو دكتور التمامي حيت فيه شي بلايص حساسين ..العيالات كيخدمو ليهم العيالات و الرجال كيخدمو ليهم الرجال

تبسمات وشدات الورقة وقالت

سارة صافي ميغيسي انا غنشوف وناخذ قتي ونرجع ليك ..ميغسي بوكو

خرجات من تما وبقات السيدة متبعة ليها العين مستغربة من تصرفاتها ، اما سارة شدات الطاكسي رجعات لدارها ومع الدخلة لقات اسية هازة البلاطو فيدها شافت فيها وخرجات عينيها كتمشطها بنضراتها

اسية: فين مشيتي؟؟ منين جيتي

؟

سارة: كنت عند مول تيليفونات تهرس ليا تيليفوني

اسية: قولي هرستيه ماشي تهرس ليك… واش دابا نتي مرى نتي؟؟ تخلي راجلك ناعس وسط الدار مالو كلب؟؟

سارة: هوا اللي بغا ينعس تما اما انا مشيت عندو قلت ليه رجع بلاصتك مابغاشيرجع

اسية: بنص عين) بااز ولاهيلا بااز

مشات للكوزينة خلاتها كدور فعينيها حتى عيطات ليها

اسية: ايوا اجي دوزي على هاد الماعن هادو

سارة:طلات عليها) منال وهند مزالين ناعسين؟

اسية: جاتها الضحكة) دوزي دوزي هه.. دوزي غسلي ميعناتك واش البنات خدامين عندك .. مانعسو لبارح حتى جمعو الكوزينة دالعشا اللي درنا لباك ومك عاد نعسو..دوزي عليهم يالاه ودوزي الجفاف لارض

شافت فيها سارة بنص عين وبدات كتنهد ومشات للكوزينة كتشوف فداكشي..مكانوش اواني كثيرة دغيا زربات عليهم ودوزات على الارض لاكن اسية ماخلاتهاش تجلس بغات توريها حق النعاس اللي نعس ولدها وسط الدار وهي فبيت النعاس.

اسية: الى ساليتي اجي نخملو هاد الصالة هادي.. تبزطات بالجلاس

سارة: لاالا غير خليها حتى تجي شي مرى تخملها

اسية: وحنا شنو كنديرو هنا ؟؟

سارة: انا كنبغي نرتاح لويكاند

اسية: غير اجي انا نعاونك ..يالاه اجي راه حتى الطبيبة كتشقى وتخمل

قالتها وخرجات لسانها كضحك وتسناها حتى تمات جايا بالبيجامة كدور فعينيها وبدات اسية تهز سدادر ودفع ليها وسارة كدور وسط الروينة داخت لاكن سكتات وطبقات داكشي اللي قالت ليها اسية بالحرف واخا سخفات وعرقات .. كانت غادية مزيان مابيها ماعليها حتى بانت ليها سوكي نقزات على الطبلة وهي تخطف ومشات عندها دفعاتها حتى جاتها فالارض وبدات كتجري عليها ولسوء الحظ شافتها اسية وناضت ليها نوضة خيالية على القطة وناض الصدع والغوات وناضو البنات كيجريو لقاو الدار مقلوبة واسية دايرة حالة وسارة كتبكي مابغاتش القطة تبقا فالدار.. بداو يهدنو الوضع حتى دخل غالي لقا الروينة فالدار ومع الدخلة قطعات اسية الحس تقول ماشي هي اللي كانت كتجدب ..اما سارة كتحلف ماتبقا ديك القطة فالدار كدور ومشات للبيت وزدحات الباب.. زاد غالي جوج خلفات لداخل كيشوف فيهم وقال

غالي: اش كاين؟.

اسية: واالو.. ناضت قالت ليك سوكي ماتبقاش فهاد الدار.. اش دارت ليها هاد البكمة بغات تخرجها مع الباب؟؟

منال جات تهضر وضار هز صبعو وخررج فيها عينيه حتى دخلات فبعضياتها مافهماتو والو وقال بنضرة قاسية عمرها شافتها عندو ولا عرفاتها

غالي: نتي غتسكتي ومانسمعش صوتك

اسية:مادارت والو هي اش دارت ؟

هند: اوييلي غالي!! راه مادارت ليها والو

منال تحقنات فيها النفسيقات كتشوف فيه عمرها توقعات منو يقمعها او يدور فيها بحال ديك الدورة وغرغرو عينيها بقات ساكتة وهوا قالب وجهه وهاز راسو مشا للمطبخ ووقف كيشعل الشوفو وتبعاتو منال كتشرح ليه باسى وحزن وهوا ساكت عاطيها بالضهر

منال: والله مادرت ليها شي حاجة اغالي تيق بياونعل الشيطان.. واش انا غندخل فيها انا جيت غير نفك

غالي: ضار عندها كيحرك راسو بالايجاب) نتي كنت غاالط فيك..

منال: علاش اشنو درت؟. (كتبكي) غير قولي شنو درت

غالي: بغضب) مايجيش صوتك على صوتي.. منشوفش خيالك قدامي

منال: شدات فيه) غير قولي اشنو درت والله ماتشوف وجهي

غالي: بغضب قلب وجهه) ماعرفتيشاش درتي. سيري شوفي اشنو كتخرجي على فمك ولمن …لواحد يأمنك على اسرارو

منال: والله متفهمت علاش كتهضر والله متقلت ليها شي حاجة

غالي: شكون عارف سوكي من غيرك؟ لمن قلتها من غيرك؟ يالاه جاوبي(داز من قدامها) صافي سالينا… (ضار شار بيدو) خليك تما وبقاي بعيدة هانا علمتك

غالي دخل للدوش ومنال جلسات مع الحيط فلكوزينة بغات تحماق وشدات راسها كتبكي واسية ومنال كيدورو بيها ويسكتوها بقات فيهم وقطعات ليهم فالقلب

منال: انا شداني حتى نفتح فمي شدااااني…باش هي عرفات القطة جات من هنا ولا من تما ياسيدي ربي الحبييييب

اسية: وصافي تعرف ولا نجلس ماتققسيش راسك العرس قريب ونتي كتمرضي راسك ..اللي بغا يوقع يوقع

هند: وا مديريش فراسك هاد الحالة عرسك قريب

منال: ماخصني عرس ما بغيت والو انا باشمن وجه غادي نشوف فغالي مابقااااش عندي الوجه ياربي كن مت قبل ما نفتح فمي… شكون قاليها شي حاجة باش غتعرف باااش؟ هوا عاود ليا غير انا وانا اللي خماتاًة انا انا انا (كضرب فراسها) انا اللي حمارة

جاتها السخفة بالبكا وهند كتشد ليها يديها واسية مفقوصة ..مشات دفعات الباب على سارة لقاتها كتهضر فتيليفون وناضت ليها

اسية: مالك مع القطة نتي واش خرج ليك العقل ؟؟؟ اش بغيتي عندها ؟؟

سارة: يا انا يا ديك القطة فهاد الدار

اسية: ها الباب وها الطريق يالاه تبعي مك

سارة: غادي تخرج ديك القطة

لاحت الهضرة وربعات يديها واسية كتغدد وتشوف فيها حتى خرج غالي عاوتاني الصدع و دخل للبيت خرج مو وشد الباب وخرج عينيه والفوطة على كتفو كحلة شاف فسارة

غالي: بغضب؟ شكاين؟؟ مالك على هاد الروينة اشمن مشكل عندك؟؟

سارة: دورات وجهها ) هاديك القطة تخرج ماتبقاش هنا

غالي: علاش غتخرج جالسة ليك على راسك؟ مالك قلبتي لينا الراس هاد السيمانة ياك لاباس

سارة: منين جبتي القطة؟ جاوبني

غالي: بغضب) نهار جيتي لقيتيها هنا قلت ليك كادو علاش كتنبشي دابا ؟ فين باغا توصلي؟

سارة: القطة عطاتها ليك صاحبتك كادو ياك..صاحبتك اللي سميتها سكينة وكنتي غتسطا عليييها ياااك(بدات كتبكي) علاش تزوجتي بيا اناااا ؟؟؟ علااااش؟

غالي: بغضب) واش نتي مريضة ولا مالك؟؟؟ منين جبتي هادشي

سارة: بالبكا والغوات) ودني كيسمعو.. انا ماشي حمقة غاتحطني فالدار وتخرج دير اللي عجبك ونبقا نتفرج فيك.

غالي: دابا فين عندك المشكل؟؟؟؟ ورييسني المشكل فيين كاين؟!!!

سارة: تخرج القطة من الدار

غالي: ماعندهاش فين تمشي..نرميوها !!

سارة: ماشي شغلي المهم ماتبقاش هنا

غالي: زفر بغضب) مابغاش تفهمي؟ ،،، شكون ما كان عطاها لياااا شكو ما بغا يكون راه صافي داااز(لاح يدو وراه) داااز ودابا الهضرة كووولها على حيوان… واش كتفهمي ماشي على شكون جابو ولا شكون عطاه ليا.. حيوااان هادا عاش فهاد الدار وسط هاد الناس مكيعرف لازنقة لا كيفاش يصيد ومربي فدااار فدااار فهمني فدااار مغنرميهش ويوثع االي بغا يوقع..عجبك الحال مرحبا ماعجبكش اللي عجبك نديروه..هادشي هادا طلع ليا فالراس والصدع نايض من والو ..واااالو مكاين والو (نفض يديه) داكشي كامل اللي كيدور ليك فالراس من الصباح حتى للعشية مامنو حتى حاجة غير فريع الراس

سارة: كتمسح عينيها)ماشي حيت عطاتها ليك ديك البنت

غالي: بملل) بففففف… اخر مرة غنجاوبك وندمت اللي هضرت معاك عليها وحسابني بعقلك غتجاوزي هضرتي ونعيشو بيخير… حلي ودنيك مزيااان.. هاديك مشاات.صاافي سالينا ومكاينش مشروع للرجوع ولا تخطيط سالينا كتفهمي سالينا.. صااافي فاات اللي فات ومشا اللي مشا

سارة: كتنخصص)باقي كتبغيها؟

غالي: مسح ع وجهه وشاف فالارض ساد عينيه مطولا بتعب ورجع مسح يديه)مكاين لا كنبغيها لا تا وزة..صافي؟ دابا نقدرو نعيشو مرتاحين وتخلي عليك ديك القطة تعيش

سارة: عطيها ليا نديها لدارنا حسن

غالي: سمعتي اش قلت ليك…هضرت بزاف وراسي ضرني..هاذ الموضوع مانعاودش نسمعو ..ولا غنوصولو لشي حوايج خااايبين

لاح الفوطة وقلب وجهه خرج وزدح الباب خلاها كتمسمح عينيها وتفكر وتعاود هضرتو فراسها

يتبع