الفصل 3

الايام كحلة كدوز عند سكينة تحت.الضضغط من اصعب الايام اللي كتعيش فدارهم واخا ماكلات عصا ما سمعات هضرة لاكن انقلاب بناصر عليها والتهميش واللي كتعيش مرضها وكمل عليها ..زيد عليها المحل اللي سد ليها بالفقصة ديال الدار اللي شرات بلا خبارو وخلاها جالسة كتبكي صباح وعشية وتندب حضها وخايفة شي نهار تحل المحل تلقا راسها تهرسات والكليان هرب.. هادي اكثر حاجة كتخليها تحقد على بناصر وتكرهو هوا السدان اللي كيسد عليها المحل ومعارفش باللي فكل مرة سدو ليها وعاود حلو كيهرسها وكتبدا دير فبلاصة الجهد جهدين باش ترجع توقفع رجليها.. فكل مرة كتقول صافي غادي انطالق ونبدا نحقق احلامي كتجي شي حاجة اللي تقسمها وتخليها تعاود من اللول وتعطي من طاقتها وتفسيتها وجهدها .

هاد المرة الفقصة ك طعناتهم بجوج ..هوا تشل من الخبر وماصدقش وكأنه كيحلم وعمرو توقعها وهي تشوطات بالجلسة اللي جلسات فالدار والكونط عندها خاوي مافيه حتى دوهم وجلسات ماتكسابما تعلام تقول عمرها ضارت عندها شي درهم..مجرد التفكير انها مكتملك حتى فلس كيخليها تقج راسها وتشعل فيها العافية وتكره وجود بناصر وشي مرات كتمنى ليه الموت ويغبر من حياتها الى الابد باش تقدر تهز راسها وطلق الجناح.. كان موتو كيخلعها ومكتقدرش تصور المنضر لاكن فالآونة الاخيرة حسات بقلبها بدا يكحال من جيهتو وبدات تشوف فيه بنضرة خايبة ورجعات كتفكر غير الحوايج الخايبين اللي دار ليها ونسات كل ما هوا جميل ومابقاتش قادرة تتحكم فمشاعرها اتجاهه ..اما هوا نقولو حطها سطل بلا تقرقيب..كيف كاينة كيف مكايناش.. المهم تجلس فالدار وممنوع الخروج وفنفس الوقت مابقات عندها بلاصة ومابقا عندها اعتبار وكأنها منبودة .

دوزات الشهر اللول كحل وفاش دخل الشهر التاني لقات راسها ماعندها ريال وخصها تبدا تجمع للدار .. اما بناصر سكت حتى عيا وتفركع كينكر وهي كتسمع واخا مكيوجههشليها الكلام مباشرة وكيهضر مع مونية وسط الدار

بناصر: من نهار دخل علينا داك الحانوت وحنا فالهم والمشاكيل ماشفنا النهار الزوين.. ماربحنا منو والو من غير الصداع يخخ.. هاهوا مارد حتى ريال هاد الشهر

غززات سكينة دفرها فالبيت وشافت فرانيا كتفقص وقالت

سكينة: ساد عليا هنا ومطرق الحانوت وبغاه يدخل مافهمتش كيفاش كيفكر .. قالك من نهار دخل علينا ماشفنا النهار الزوين .. كل شهر كيشد فلوس الكرا وعاجبو المشروع ودابا نكر كلشي نسا كاع داكشي الزوين

رانيا: شادة تيليفون متكية) واطلقيييي ليه حانوتو وعطيه التيساع..ماحدكم مشاركين فين والله ماتهناو عطيه سوارتو وهنيونا من صداعكم هادشي طع لينا فالراس

سكينة: ياك كيشد فلوس الكرا اش بغا

رانيا: ونتي اللي مشيتي بعتي وشريتي نتي يدير فيك شيواحد التيقة؟؟ عايشة معانا ودايرة شرع يديك ماعندك واليدين بحال الى باك زعما زايد ناقص

سكينة: وا هوا اللي مابغاش ياك قلتها ليه

رانيا: صافي غير قاليك لا مشيتي درتي اللي قالك راسك..باااز… راه ولي امرك هوا المسؤول عليك ماعندكش الحق ديري شي حاجة بلا خبارو..البنت ماحدها فدار باها كتبقا تحت السلطة دباها حتى كتزوج وكترجع تحت العصمة دراجلها وعمررها مكدير داكشي اللي بغات هي واللي قاليها راسها

سكينة: صافي سكتي شداني كاع نهضر معاك .. خرا .

دورات وجهها وربعات يديها كتحاك وتخمم اش دير والشهر داز عندها بحال العام .. عيات تفكر وتبلانيباش تخرج من داك الحبس وداك الضيق فاللخر هزات تيليفون ومشات للطواليط سيفطات لانوار ابيل موا وغير عيط ليها طلبات ليه روشارج ..من بعد ما وصلاتها عيطات بسرعة ..

سكينة: الو فوز…..سمعي عطيني نمرة ديك ختنا اللي كتدي للامارات….،،،، غير عطيها ليا ولا هضري معاها قولي ليهت عليا ….صافي اختي غير تديني طلع ليا لخرا كرهت مها هاد الحياة فهاد الدار (بدات كتبكي) اختي الموت ولا هاد العيشة دالمرض …. لالالالا صافي يمشيو يتق٠٠دو كاملين من عندي انا و الله منعقل على جد امو شي واحد فيهم ….. غا دوي معاها تشوف كي دير ليا راه كاااع فلوسي حطيتها فالدار كلللها مابقا عندي حتى ريال وخاصني نجمع باش نكملها فاش نبغيو ناخدو السوارت.. وانا دابا جلسني (مسحات عينها) جلسني فالدار وسد ليا الحانوت ضد فيا…. بغيت نموت …عاطياها للبكا والمرض تفووو.. يالاه ختي شكرا

قطعات تيليفون كتنخصص وغسلات وجهها ومشات خرجات لقاتو مزال كينكر وكيقول لمونية نكريه بحوايجو الشيء اللي خلا سكينة كتشوط وهي كتسمع حتى مشا ينعس وناضت للكوزينة عند مونية كترعد

سكينة: كيفاش غيكريه وانا ؟؟

مونية: كنشات فمها) بيناتكم انا ماشي شغلي

سكينة: هضري معاه قولي ليه داك الماطيرياال انا اللي شريتو

مونية: منقوليه مايقول ليا انا بعدو مني ماتصدعونيش فراسي..طبختوني.. بيناتكم وشغلكم هاداك

بقات سكينة كتشوف فيها بنضرات الكره والحقد وكتغزز سنانها وقالت بحرقة

سكينة: عنداك شي نهار تبكي عليا.. وا عندااك .. عنداك تسخفي ليهم هنا وتبداي

مونية: شدات راسها) واقهرتووني.. ماشي شغليوا بيناتانكم بعدو مني..منقوليه ميقوليا

سكينة: واخا

ضارت جهة البيت ومشات كتتحاك وتاكل فراسها بغات تموت بالفقصة وبغات دير شي حاجة تبرد بيها على قلبها..المهم اي حاجة كما بغات تكون تكون .. طفاو الاضواءوكلشي تقلب نعس الا هي اللي مخرجة عينيها فتيليفون كتحرت فالميساجات وتكتب وصبعانها كيطيرو

سكينة: شووف. الى بغيتيني اجي خطبني من دارنا انا مابغيت لا خاتم لا فلوس اجي خطبني بعدا عاد نشوفو داكشي لاخر

انوار: مزال مواجدش احبيبة جيتيني على غفلة

سكينة: قلتي باغي المعقول ياك؟ وايالاه جيب داركم واجي الى ماجيتيش ضربعاى هاد النمرة فمرة ماعنديش الوقت اللي نجلس كنضييع معاك

انوار: وصلنا لهاد الهضرة!!

سكينة: شوف اخويا عرفتي شدير .. ضرب على نمرتي مالنا على هاد الفيلم هادا كاامل.. ماناوي زواج صافيالله يعاون .

بلوكاتو معصبة وبدات كتشطح برجلها والنعاس طار ليها بغات تفش خلقها مالقات معامن ..بقات هاكاك كتقلب وتخمم حتى ضرها راسها وبدا النهار يطلع عاد فاقت وكان يوم الاحد… الاحد اكفسايلم حياتها فيها كيجلسبناصر راحة وكيقابلهم غير هما بحال الى راهم فالعسكر.. يفيق مع التمنية ويبدا يفيق فيهم وخاصو يشوف كولشي موكض وكلشي كيتحرك باش ميقنطش ويجيه اكتآب وكأنهم بداك الحركة كيفوجو عليه. حط ليهم السطل وعطاهم يحكو السراجم وينقيو ويسيقو وخرج يجيب الحوت وخلا مونية فالموزينة كطيب الغدا مع التسعود ورانيا كتحك الزليج وسكينة واقفةكتشوففداك المنضر وتنفس بسرعة والمعدة واقفةليها كتردد بلسانها

سكينة: وااخا.. كيحساب ليه غادي يقول ليا شا شا را را.. انا نورييكم كاملين

هزات راسها وبدات كترعد ماقدراتش تردخ لداك الامر ومشات هزات القرعة دجافيل قدام مونية وهبطات عليها شرباتها بالزربة حتى طيراتها مونية من يديها وغوتات مخلوعة

مونية: اويييلي واش هبلتي

سكينة: والله حتى نخرج عليكم بيا ولابيكم فهاد الدار

مونية: كضرب فخادها ) اش درتااا ليكاش درناااا ليك

سكينة: اش درتو ليا!! وكنكرههههكم ومكنحملكوووومش نموت ومانعيش معاكم

بدات كتغوت وعينيها خارجين حتى شوية بدات تكرع وبدات تشد فكرشها ورجعات حمرا ،، مونية تخلعات بدات كتشد فيها ورانيا كتغوت وتسول اش واقع امت سكينة دفعات مونية وقالت مخرجة عينيهت

سكينة: بعدييي مني… ماتقيسيش فياااا بعدي مني خليني نموت ولا نبقا عايشة معاكم

كان مرتاح وسط الشارع بين الناس كيتسنا مول الحوت يجمع ليه الميكة حتى جرو انس من سروالو كينهج سخفان عطاه الخبر لكحل اللي خلاه جر الميكة ومشا كيجري للدار ..دخل وزطم فالماء والصابون صفر بالخلعة لقاهم شادينها فالارض كتقيا ومقلوبة على وجهها والكشاكش خارجة تقول غير ماكينة دصابون كانت كدور وتحلات،، رجع وجهها صفر وعروق عنقها خرجو ومونية كضرب فخدادها وبناصر كيسول اش واقع .. تلف بدا كيتفتف على السوارت ويلعن النهار الليفكر فيه يتزوج ويولد وهزوها كيجريو بيها للطموبيل كيتفتفو بالخلعة داوها للمستشفى غسلو ليها مسارنها وردو فيها الروح وحطو ليها الاكسيجين وخلاوها ناعسة تقول مانعساتش ميات عام،اما مونية وقفات مع الحيط مربعة يديها حدا بناصر بجلابة كلها مكمشة تحت منها السروال دالبيجامة خارج ملون والصباط والشال فالليموني وحالتها حالة

مونية: خلي للدمر الحانوت ابناصر انا مزاوكة فيك… خلي ليها هاد الحانوت اللي بغات طيح لينا عليه الروح اللهم الحانوت ولا توقع شي كارتة … عطيها الزمر وخليهت تشري الدار ولا تجلس ضبر لمحاينها ياك فلوسها ايوا خليها ضبر راسها الله يرحم الواليدين… يخ م هاد الحانوت وهاد الويل اللي من نهار حليتوه ونتوما مشادين عليه

شدات راسها ودورات وجهها كارهة الحياة وبناصر واقفةيشوف فنقطة وحدة وساكت وحجبانو فالسمى .. دوزو داك النهار فالمستشفى بلاصة ما يدوزه فالدار كيتغداو بالحوت وشي منفخ على شي ،، تفشو كاملين وكل واحد دخل سوق راسو وخرجوها فلعشية ردوها للدار وفيدها صاك ديال الدوايات ووجهها اصفر ماهضرو معاها ماتكلمو معاها حطوها فبلاصتها وحتى هي تقلبات نعسات وعينيها معقلوبين سخفانة وكتنفس بزز ..

كانت هاديك السبب اللي خلاهم يدورو وجههم عليها ماتحاسبو معاها ما جبدو الموضوع ..كل واحد هاز همو ومتكي عليه حتى بدات توقف شوية عاد مشات مونية مدات ليها السوارت ليدها دالحانوت ونزلات ليه حلاتو وبدات من جديد عاوتاني كتشوف فيه وتخمم كيفاش دير تبدا الخدمة .. حتى من الحانوت الجديد اللي خططو ليه يحلو وقفو الفكرة بسبب اللي وقع ورجعو من جديد كيخططو وناضت كتعزل التكاشط اللي يحطو فيه وتفرق السلعة بينما سارة كتخمل وتنقي .. شدات واحد الكرسي كتفكر وبدات تصوني على النماري اللي عندها واحد واحد.. ها مول القاعة ها المصور ها تريتور ودارت معاهم بيع ومقال اي الليسيفط ليها عروسة وشداتها تعطيه واحد خمس ميات درهم .. اما ليلى دارت معاها باك مجموع فيه التنكاف والمكياج والشعر بثمن مناسب باش دور الحركة من جديد.. حتى من البنات اللي كتعرف والكليان علماتهم انه اي وحدة جابت ليها عروسة دور معاها مزيان وهاكا بدات كدور الناعورة من جديد وبداو المصورين كيسيفطو ليها والسمسارة دالقاعات دالحفالات والمعارفاللي كتعرف والممولين دالحفلات والدقايقية وزيدوزيد .. اي واحد فالميدان دار يدو حسب كلمتها وفعلا بدات تهبط الاثمنة وتعمر التواريخ ودور مع هادا ومع هاداك ومكانش كيهمها الثمن بقدر ماكيهمها تشد اكبر عدد من العراسات . شقات بزاف ديال الطرقان من اجل الربح والتعويض وشعلات فيها النار وماحد الحساب ديالها مزال ما طلع للمستوى اللي يخليها ترتاح نفسيا وفكريا فمكاين لا خروج لا دروج لا حتى حاجة من غير المحل وتقابل الكليان واحد واحد وتسنا فيهم على احر من الجمر وهي كلها خوف وهم وغم بسبب قلة المال .. حتى مابقات كتفكر فحتى حاجةمن غير الفلوس وتشوف الحساب عمر وترجع كيف كانت .. اما مجرد الفكرة ديال انها عمرها ترجع كيف كانت كتخنقها وكتختر فيها الدم وتسكت ليها القلب والدماغ

الاسبوع اللول من الخدمة دازو فيه جوج عراسات واخا ماشي شي عراسات حيت غالبا فالاول كيكونو مناشبات خفيفة غير فالديور وكيكريو الماطيريال فقط بحال الحنة .. لاكن اللي مرال عاطيها امل هوا العراسات اللي مخجوزين عندها باشهر قبل ما توقف الخدمة وتعلم العرايس اللي حاجزين عندها انها متقدرش تخدم ليهم وبقاو كيتسالوها الفلوس وكان خاصها ترجع لكل وحدة فيهم التسبيق ديالها وكانو عرايسات كثار بحكم انها كانت غادية فالخدمة وفأوج العطاء وفشهر سبعة اللي كيكونو فيه العراسات بزاف وهي معروفة ..كانت شادة فداك الشهر اكثر من عشرين عرس منهم الكبار والصغار وحتى واحد فيهم ماخدماتو ومجبرة ترجع التسبيق اللي شدات .. فكان واجب عليها تخدم على التسبيق اولا باش تردو عاد تخدم على المدخول كتحاول تجلب العرايسات وخايفة تكون شاعت عليها صمعة خايبة فداك الشهر ويقولو ماعندها كلمة وتفقد المصداقية و ماتبقاش كيف كانت ..فكرات مرارا وتكرارا وبغات تدخل لباسي جداد لاكن الجهد فالمدخول قليل وعاد بدات كطلع الدروج درجة بدرجة ،، خدات الدرس من اللي وقع وتشبتات بفكرة المحل الثاني اكثر باش حتى الى وقع ليها نفس المشكل على الاقل تلقا مصدر رزق اخر وتخدم بلاصتها سارة .. والا فهاد المرة غتودع الميدان الا الابد الى عاودات نفس التعامل مع عرايس جداد ميعاود حتى واحد يدور عندها او يتيق فيها..هاد المرة لقات ليها تخريجة وتحجات بالسرقة وقالت انه دخلو عليها الشفارة وسرقو ليها المحل ومابقا عندها باش تخدم لاكن المرة الجاية حتى واحد مايلتامسليها العذر.

سبقات من افتتاح المحل هوا الاول وسارة كانت واجدة وباغا حتى دخل شريكة وتبدل من وضعها وجمعات الفلوس باش يبداو .. لاكن الخطأ كيتكرر من جديد وسكينة كانت عارفة راسها كتعاود نفس الخطأ مع بناصر وغادير شرع يدها بلا خبارو واخا تمنات تقولها ليه ويخططو بجوج باش تبعد من المشاكيل لاكن ماشي وقتو وماشي فوضع اللي تجلس تهضر ويسمع ليها ويعطيها الخاطر وهما فوضع حساس كل واحد محسوس من لاخر . فضلات تسكت ومايجيب خبار حسن ومشات هي وسارة تكاتبو مع مول المحل ودارو معاه عقد كرا بحي كريمة فسلا.. احد الاحياء المشهورة بالتنكاف والشارع طالع كامل بالمحلات بحال شي شارع ديال الذهايبيبة..تعمدو يحلو تما لان داك المكان هوا الص كيقصدو العرايس بزاف حيت فيه كاينين بزاف دالمحلات وبزاف دالاختيارات وحطو راسهم بين الريوس حتى هما وعولات سكينة دخل معاهم فمنافسة وكانت متأكدة انها غادي طيح عليهم البق حيت اللي كيصمم ماشي هوا اللي كيشري ويعلق.. وهي كانت كتصمم وتخيط بدوقها اما الباقي فداك الحي كانو كيشريو ملابس جاهزة ويضيفو عليها تحسينات بحال التنبات مثلا وكانو كاملين عيالات حرايفيات وقدامات فالحرفة لاكم الدوق ماشي حتى لهيه عكس سكينة بنت الوقت وكتعرف لعجب وحاضية غير شكون لبس شكون شرا واشمن موضة واشمن لوان وعزيز عليها الاختلاف والفصالات المميزة . دخلو على المحل مهجور على الشارع مقابلين مع جوج نكافات وعلى ليمين نكافة وتلى ليسير كذلك والشارع كما طالع عامر بالبلدي.. زربو عليه بسرعة سيقوه ولسقو ليه بابيي بان كلاسيكي عطا منضر وترية صغيرة لوسط ولسقو العلاقات فالحيوط وريدو للتبدال ومرايا فقط.. مكانش مصلوح كفاية نضرا لقلة المال لاكن اكتفاو بداكشي اللي يحتاجو ومشاو هزو من المحل اللول غير الملابس الزوينة العاطية العين باش يتشهرو حتى هما وبداو الخدمة وتفرقو كل وحدة شدات محل وجلسات مقابلاه .

الحياة صراعات وكل واحد فين كيصارع ، شي كيصارع على الفلوس وهمو الوحيد الحساب البنكي ديالو ،، شي كيصارع على شريك الحياة واللي فيه مامهنيه ومقادرش يشوف الراحة ولا يستمتع بالحياة ،، وشي يالاه يستاعد ويشق الطريق باش يدخل للقفص الذهبي بحال هشام ورانيا اللي من بعد نقاشات و اخد ورد تافقو على الخطوبة الرسمية اللي غتشد ليهم عماين عاد يديرو العرس بقرار من بناصر..وطبعا هاد الاخير متشبت شدّ التشبث بالعدات والتقاليد والاعراف ديالو وكيمشي حسب الاصول باش ميخليش الفام تتحل عليه ..وفالعادات ديالو كيعرف حاجة وحدة ووهي الخطوبة خاصها دوز بالاشهار وبالعائلة وبالطبل والبندير باش يوري للناسان بنتو راه مخطوبة وراه الداخل والخارج عندهم ماشي براني واللي هضر على بنتو يسمع خل ودنيه هادي من جهة وامام الناس اما بينو وبين نفسه فهوا لا يعترف لا بخطوبة رسمية ولا بخطوبة غير رسمية وممنوع كليا الانفراد مع الخطيب او يعتابروه اصبح فرد منهم ويرخيو العنان لبنتهم فقط لانها مخطوبة بيه والناس كلها فراسها.. بالنسبة ليه قدم للناس الواجب اللي خاصو يتقدم لاكن فالحقيقة وحسب تفكيرو هوا فالخطوبة مكتسوا عندو والو قدام العقد والزواج وممنوع على الخطيب يقرب ليه لبنتو ولو بلمسة يد.. وهادشي اللي كيضل يشرحو لرانيا ويخرج فعينيه ويهدد باش يزيح ديك الفكرة يديال الخطيب اللي كضسر شحال من بنت وكتمشي تعطي راسها تحت ما يسمى الخطوبة فالاخير كيخليها الخطيب ويمشي وكتبدا كتقلب على حل لراسها وتجمع التصاور وتجمع الشهود وطلع وتهبط فالمحاكم زائد الفضيحة والصورة كتبدل وكيرجعو اللي كانو كيقولو ليها راه خطيبك هما نفسهم كيقولو ليها واخا خطيبك ماتعطيهش راسك .. كيكون فالخطوبة كلشي زوين وكلشي جميل والامور طيبة ومباحة وبعد فك الخطوبة كترجع اللومة للبنت وكتحمل مسؤوليتها بوحدها وجميع الاصابع كتشير ليها هي فقط وزيد حتى عائلتها .

جا النهار ديال الخطوبة ومونية تالفة وراسها دايخ معارفة لا شنو تسبق لا شنو توخر .. تقول غير كسدة بلا عقل وغير كتتغبن وتشد فراسها فكل مرة مشا بناصر عندها كيتناقش معاها على شي حاجة .. مابغا لا صدع لا نقاش لا اسئلة لا حتى حاجة وكلشي داكشي اللي كيدوز فوق المبتغى ديالها وراحتها وفنفس الوقت باغا دير الخطوبة وباغا تحمع الناس وباغا الاشهار وعاجبها الحال كتزوج بنتها وكتحققحلم من احلامها لاكن ماقدراتش على التوجاد وماعارفات منين تبداه ..شدات راسها زيرات عليه كأنها باغا تبكي والضيم طايح عليها تكات على واحد الحيط وبناصر كيطير وينزل وكيتقلق على كاشي اي بمعنى فيه الزربة والخفة وكينوض الروينة فالناس وهوا غير واقف فبلاصتو

بناصر: ياك قلت ليك طحني العصير فين العصير اللي غنديو دابا للناس يالاه (رجع احمر ) من الصباح وانا كنقوليك طحني العصيير طحني العصيير طحني العصيير وحضري معايا عقلك ولا راه غنتقلب عليك شي قلبة نطليك هادالنهار قدام هاد الناس اللي. راهم برا جالسين

مونية: مزيرة على راسها) وراني دخت ابناااصر دخت كل واحد منين كيجر كل واحد اش بغا ها كاسكروط ها اتاي ها القهوى

بناصر :بغضب زعزع الكوزينة) الاللة قلت ليك طحني العصير سبقووه هوا اللول يتحط يبرد فالثلاجة ماتقولي ليا لا كاسكروط لا زمر .. قلت ليك سبقي العصيير سبقي العصيير شوف شحال فالساعة دابا واش حنا فكاسكروط؟؟؟ وهاد الدار اللي كرينا وهاد الماكلة اللي كنوجدو لمن كنوجدووهااا؟؟؟ خويو عليا الدار كلشي يخرج عليا من هنا يمشيو بلاصة الحفلة اش مزااال كيديرو عندي هنا …دااااابا يتطحن داك العصير ولا والله حتى ندير فيكم شي موصيبة

خرج من المطبخ ومشاشكشو خارجين وراسو فالسما كيبلع الريق دار قدام العائلة اللي مجمعثن فالصالة وكلشي مهبط راسو وكيشوفو فيه بنص عين ويتهامسو وشادين ولادهم عندهم وشي كينخز شي باش ينوضو .. اما مونية بدات كتبكي ودخلو عندها خوتاتو اللي هما لوايساتها وكانو نعمة اللويسات عمر عيبهم بان تقول ماعندهم عيب ،، مشاو للصنادق ديال الديسير بداو كيغسلو ويشللو ويطحنو وكانو بنات البادية حارات وقافزات ولاكن العين فالارض الا وحدة فيهم وهي الكبيرة طبق الاصل لبناصر وكبر منو وعندها وشمة تحت فمها وبيضا كتشعل وحروفها كوحل وحارة والراس فالسما ديما والنفخة فالنيف هي وجوج خواتاتها وحدين اخرين .. هزات جلايلها من الارض فالحزام كمشاتهم ووقفات مستقيمة بدات كتقطع بالزربة وكتهضر بخصام وخفوت مع مونية

يامنة: قاليك طحن العصير طحن العصير بهد من الصداع امونية اش خاصك بشي كاسكروط.. الى جينا نشوفو راه عندو الحق ياك جابهم مع الصباااح غير باش يطحنوهم..فوقاش غيبردو وفوقاش غيديوهم .. خلي عليك كاسكروط واش دابا نتي مساليا؟؟؟ شوف غير الحالة ديالك كيفاش دايرة غيشوفوك الناس يعيبو عليك .. سيري دابا غييري سيري لبس عليك وقاد راسك ها حنا غنطحنو هادشي غير سير

مونية: كتمسح عينيها) اودي شمن خاطر بقا

كلتوم:الاخت اللي مور بناصر ) ماتقوليش (بصرامة) .. شكنديرو حنا هنا واش جينا نربعو يدينا ؟؟ جينا نعاونوك ولاكن فيق شوية وكوني حاارة.. كون حارة ووقفمع بنتك قدام ناسها الى شافوك هاكا غيركبو عليها هيااا .. توكضي راك نتي اللي ولدتي وكبرتي وربتيي

يامنة: كتعصر بالزربة) نجمع راسي ونحل عيني نسبق الموهييم .. مالهم هادوك الى ماكلاو كاسكروط غادي يموتو تبقاي مقابلة غير شكون كلا شكون ماكلاش لايبقا فيهم الحال !! ها الماكلة كتوجد اللي جا يبدل عليه ويزيد مع الطريق

كلتوم: الى حطيتي ليهم كاسكروط هنا غيباقاو بسيف ميجلسو.. واش دابا نتي فالخطوبة ولا فالضياف! جمع راسك شوية وشوف اش خاصاش ناقص اراه لينا حنا ناقدوه شوف غير اشنو ناقصك وشنو نديرو نديروه

حليمة:الاخت الصغرى اللي البسمة مكتخطاهاش) ارالي نعاونك شنو بغيتي ندير ليك

مونية: بأسى) هادوك البلاطوات دالحلوى الله يرحم ليك الواليدين

حليمة: فيين؟ هادو؟؟

مونية: كتنهد) لا بنات يعاونو لا خوت يعانونو لا الاه الاه وصافي

حليمة:يامنة ) البنات مغيعرفوشاااي لهادشي .. لعروسة راه مقابلة شغلها وسكينة ياربي تعطيك التيساع .. زيدها على باها حتى هاديك كتمشي مخرجة لعينين وتجي مخرجة لعينين

كلتوم كضحك: ولاهيلا الى كتعبر على باباهم ههه.. سخرها بناصر ماعرفت اش قاليها جيبي واقيلا شي بولة ناقصة مشات جابت ليه مول ديك الفيلا قالت ليه اجي صاوب الضو عطيتينا الفيلا ناقصة خخهخخخ ..ولاهيلا ماعندك ماتسالها

حليمة: وااه اوي هي حاارة مكتحشمش

يامنة: رمات راسها) خليها.. تحشم ترجع بحال مونية..هاهما خووتها دخلو لداك البيت ماسولو فيها اش خاصها ..رااهم كيلبسو ويعاودو

حليمة: مانعرف مال سكينة مع سميرة واقيلا مدابزين

مونية: كدور راسها ويدها على فمها) هييه غير سكت راها على سبة باغا تشاد مع سميرة حسن تبقا برا بعيدة ما يديرو لينا شي فضيحة

في فيلا متسوطة الحجم مت كبيرة ما صغيرة خاصة بالمناسبات .. و اقفة سكينة بالجلابة والشعر مكمش اللور كتهضر مع شاب ثلاتيني من اصحاب الفيلا وكتوريه البولات بصبعها

سكينة: البولة ديال الطواليط حتى هي احمد

احمد: خدامة عاد السيمانة اللي فاتت بدلناها

سكينة: واسير شوف واش خدامة .. والدروج حتى هما ..غتشعل لينا لبروجيكتور ديال الضو

احمد: ماتافقتش انا والحاج عليه!

سكينة: واشعلو لينا دابا زعما تا جيت انا عاد تافقتو ماتافقتوش

احمد: كيهز الضو عرفتي شحال من واط فيه قنبووولة

سكينة: وا صافي دير زوين دير اصلا التصاور مغيجيوش زوينين.

احمد: كيحك لحيتو) وماعرفت شغنقوليك

سكينة: شافت البرزة) احمد غشيتييني

احمد: دور وجهه)فااش؟

سكينة: فين هوا الديكور اللي كيكون ورا البرزة دييما كنجي كنلقاها زعما تا جيت انا وحيدتو

احمد: في حيرة) كيتكراو هادوك اسكينة العروسة اللي كتكريهم

سكينة: امم…. ابا تكري لينا ؟

احمد: بحرج) صاافي بغيتيهم غنهزوهم لسقوهم بقاي على خاطرك

سكينة: مالك اصاحبي على هاد الحسابات ناااري كن البراني مايديرش معايا هاكا

احمد: داكشي اللي تافقت مع باك النهار اللول درتو صافي

سكينة: وصافي دابا غا نسا داك با تا هوا هضر معايا اناااا.. قاد ليا البرزة داك الديكور المدهب ماشي التوب.. عنداك دير لنا التوب!!!

احمد: صاافي صافي

كانت كتهضر مع احمد حتى دخل بناصر على غفلة لقاهم كيهضرو وقفزها مخرج عينيه قدام احمد

بناصر: شنو كديري هنااا؟؟؟

سكينة: كتفتف) والو كنصاوبو هادشي

بناصر: مخرج عينيه) الاللة سيري عند العيالات اش جابك عند الراجل لهنا سخرتك تشري البولات سيري شري البولات ماشي تجي تجمعي ليا هنا غير والراجل بوحدكم

بناصر خرجو كشاشكو وسكينة رجعات حمرا واحمد تزير هبط راسو ومشا كحز اللور اما هي مارضاتش بغات تشرح ليه وجرا عليها خرجات كتبكي من تما تالفة ودايخة كدور يمين وشمال وتسليفون كيضوني فتحات الخط كتبكي

سكينة: الو ليلى

ليلى: خالتك تا هيا قالت ليا غتصايبعلى حسابها ولا شنو؟؟ بغات مشطة ومكياج ماعرفت اش نقوليها

سكينة: بغضب ) وعلااااش تمشي معاها للصالون علااااش هاد بنت الق٠٠٠ درانيا … شكون مشا معاها؟؟؟

ليلى: جاو معاها جوج بنات وهاد خالتك ..جوج بنات صايبو وخلصو ولاكن خالتك دخلني فيها الشك اختي

سكينة: تخلص على كرها ولا تعاود راسها مع رانيا تخلص عليها ولا دور. تق٠٠٠ ود قطعي نعيط لهاد القح.

قطعات مغددة وصونات على رانيا كترعد وصوتها فالشارع كيسمعو الغادي والجاي وهي واقفة حتى خرج بناصر زربان لقاها مزال واقفة ومشا كيجري ويتفتف

بناصر: عيط عيط لداك المصور قوليه اجي دااابا .. دااااقا يكون هنا يصور الناس داخلين كيشربو الحليب والتمر دغياااا ها الناس جايين

دوزات المصور وعطاتو لبناصر زرب عليه وبسرعة مد ليها السوارت ديال السيارة وقال

بناصر: بصرامة وقلق) سير جيب كااااع هادوك اللي مسرحين ليا تما فالدار قوليهم اللي مانزلش يركب دااابا تما يبقا واجي رجع ليا الطموبيل غنحتاجها يالاه

شدات السوارت وركبات هزات الجلابة والعرق نازل مع الجبهة والشعر لاسق عليهت متكية على المقود كتهضر مع ليلى معصبة وليلى كتشرح ليها باللي سميرة مابغات حتى واحد يصاوب ليها وكتسناها حتى تسالي وتبدا ليها .. سخطات سكينة واخا دارت معاها جميع الحلول فاللخر قالت

سكينة: قالت ليا منقدرش نحضر بشعري مشعكك وووجهي زرق قلت ندوزوها لكنزة تسربي ليها مللي دابا بدات كتشرط خليها تما انا غندوز نهزكم فاش تسالي لرانيا وخليها تجلس بلاش هااي هاي هاي على تصاوب ليا ليلى زعامة كبيرة هادي..قولي ليها كنصايب بالف درهم قوليها ليها باش تجمع كرها

ليلى: نتي واش مغنصايبيش؟!!!

سكينة: انا اختي مزااالة عاد غادة نجمع داك بورباج اللي عندنا فالدار نديه للفيلا وعندي شي جوج فياجات ولا ثلاتة ماعندهمش طومبيلات عاد خاصني ندوش كنقطر وجهي حمر غيتفركع ماعرفت اش ندير وشادني ستريس تفووو كن ماكنتش كنعرف هاد القواد دهشام وخوه كاع مانتسوق لهاد اق٠٠وي

ليلى: اجي دوشي هنا ها الدوش جيبي حوايجك واجي

سكينة: انا غنشوف اش ندير يالاه تهلاي فديك لخرية درانيا قاديها واخا متبغيش

ليلى: بسسستة وستين الف كشيفة باش خلاتني نركب ليها الشفار وماشي شي شفاااار تقولي شطاطب

سكينة: ماتسوقيش ليها ديري خدمتك خليها دوي كن كتعرف وتفهم كاع متقبل على داك الكيدار دهشام

ليلى: مهم حنا دابا فالشعر قربنا نساليو

سكينة:صافي مزيان انا غنسيفط ليها النكافة تلبسها

قطعات ووقفات قدام باب الدار قبل متنزل صونات للنكافة

سكينة: خديجة صافي هزي اللبسة درانيا اللي حطيت فالصندوق ديها ليها راه قريبة تسالي واللبسة الثانية ديوها تقطع فيها الحلوة دالخطوبة .. انا غنجي نوصلك جمعي داكشي بالزربة يالاه

قطعات وطلعات للدار دفعات الباب سخفانة كتنهج كطل هنا ولهيه وبدات

سكينة: عائلة العريس جاين اللي غيمشي يهبط دااابا غنمشي مغنرجعش فين ماما؟؟ ماما؟؟

مشات كتقلب على مونية لقاتها محنية كتقلب على فردة ديال الصندالة ونزلات كتقلب معاها حتى لقاوها ودخلاتها بزز منها بالنكير والدفيع طرفات حالتها وشالات ورجعات للبيت لبسات وتقادات وطلعات مونية شنوة منها بتكشيطة بيضاء داتها ليها سكينة والشال والصابو ومقادة ومتولة وكحلو ليها عينيها حتى بدات كضحك ويدها على فمها حشمانة ..بانت عليها النخوة والهمة والشان وحتى تعابير وجهها تبدلو تقول لبسات مونية اخرى ماشي لبسة اخرى .. جمعاتهم سكينة فالطموبيل وداتهه كاملين الفيلا شدو بلايصهم واللي عندو شي طموبيل حتى هوا مشا فيها وبقاو غير العمات فالدار كملو شغلهم وكيتسناو سكينة ترجع ليهم في حين رجعات عند النكافة وصلاتها لباب الصالون وعاودات مشات للفيلا عند بناصر اللي لقاها من الجنة والناس كتسخر ليه عاود سيفطها عند الطيابة للدار ومن الطيابة مشات جايت لكيك دالخطوبة وهي غادية جايا من قنت لقنت حتى خوات الدار وكلشي مشا الفيلا عاد هزات صاكها ومشات للصالون كتجري لقات رانية جالسة كيلبسوها ويقادوها وهي كضحك فرحانة وتسول كي جيت تقول غير اميرة وكتسول على راسها

سكينة: حيدتي الفولار هه

رانيا: امم.. جيت زوينة؟

سكينة: تبارك الله واااعرة (سهات فيها)

ليلى: بتعب) سربي دخلي دوشي

سكينة: غاا بشوية عليا دابا اصلا مغندخلش معاها ومغنلحقش تا نلحقو عليها..شوفي مابغيتش ماكيااااج …داكشي خفيف ضريف ماعنديش مع الالوان راك عارفاني..وشعري سااامبل لا مشطة لا جوج جمعي ليا جناب ولا ديري ليا شي لعيبة خفيفة(شافت فرانيا(ماهضرش معاك هشام؟

رانيا: بحماس) هضر معايا قاليا راهم واجدين كيتسنا خوه غالي دا الطموبيل تغسل

سكينة: جاتها الضحكة) اممم…شحال بيهم؟

رانيا: شي ثلاتة طبلات ولا ربعة قاليا هوا وخوتو وشي خوالاتو ولا منعرف مهم عائلة بحالنا.

الصالون على كبرو وقدو عامر بالنسا شي كيبدل شي لابس وواجد وفالحمام واقفة منال وهند.. اشمنك يا دوق رفيع لا يعلى عليه .. الزين والشعور والمكياج ما قل ودل والتاويل والانوثة فكل حاجة..اليدين بالمجوهرات الرفيعة والاصابع مزينة والقفاطن عصرية شهوة منها ..منال طالقة الشعر زعر ملوي على طولو وهند موراها كتقاد شعرها اللي لاسق فالحلاقات..العيون مكحلة براقة والقد والفصالة شهوة منهم كيشهيو فديك الوقفة والكتاف التابتة ..العطور فايحة على بعد امتار وكل وحدة كتفتن على لاخرى ..خرجو عند العائلة واجدين ومركزين غير مع شغالهم وصبابطهم العالية ..وهاهيا سارة خارجة من البيت كي الوردة مفتحة ..هاد خلات الصالون دار خدمتو وماتدخلاتش ،،برزو ليها الملامح وبان جمالها وعيونها الخضرا وشفافيها الممتلئة ولبسات قفطانها المفتوح من الامام ديال عرسها المخدوم على اليد بالاتقان والخدمة الرفيعة ..مزينة بمجوهراتها وطالقة شعرها الاشقر اللي عطا فوليم اكثر مع تسريحة كنتفخة جات اية من الجمال واكثر فالحياء والخجل .. هزات صاكها ووقفات عاجبها راسها كل شوية كتشوف موراها فواحد المرايا كبيرة فالحيط بينما ونيسة جالسة فوق السداري كطل عليها بنص عين لابسة حجابها ومتولة ومقادة والدبالج فيدها وشادة بنتها غيرة فيدها ففمها سكاتة وحاضياهم بنص عين شكون لابس شكون جا حسن منها شكون جا قل منها وكدور عينيها غير من تحت لتحت ..اما اسية لخصات الوص كاملواالي شافها يحلف عليها ويعاود بالقسم ما والدة ..كتبان صغيرة والوجه مجبد والعينين محلولين وكملات بالمكياج زاد بينها احسن وخفا ليها عيوبها والشعر ضفا على جمالها ونقص من عمرها النص ..اما الوقفة ماعليها كلام ، الضهر منتصب والرقبة واقفة وكملات بالطالون العالي تقول مولفة تمشي بيه وتنعس فيه ..الراس فالسما وتابتة الحضور ديالها وحاضية الكبيرة والصغيرة والورد فوق الطبلة محطوط والهدايا مغلفة وكلشي على ما يرام .. اما الرجال كلهم لتحت قدام باب العمارة واقفين كيضحكو بيناتهم وكلهم جد عاديين مادايرينش مجهود كبير ..اناقة بسيطة واللي عمدو شي كاريزما راه باينة عليه الا سمير.. تقول غادي للقهوى ومامسوقش لا لصباطو اللي تغبر لا قميجتو اللي لابس مكمشة..شاد كارو فيدو وقالبو للور كيتجمع مع باه مولاي رشيد كما كيناديو هما واللي كان اشيك منو واحسن منو تقول ماشي باه ..السروال انيق ديال التوب والقميجة بيضاء ولافيست فالبني غامق ديال الدان والصباط مسيري والكريشة خارجة والطول والوقفة والهبة كتبان عليه شخصة واخا راسو ابيض كامل لاكن شعرو قوي ووجهه عامر مكيبانوش فيه التجاعيد عكس سمير اللي وجهه ضعيف كيقان شارف والترهلات هبطو ليه الحناك والعينين..اما مولاي السلطان مجبد تقول بوحدو اللي غيخطب .. عاقدهم وكيبان معقول وناشر الجدية عليهم وعلى عمومو وخوالو اللي شادين فيه و فغالي اللي واقف حداه بسروال بلومارين والقميجة زرقاء سماوية وسبادري بيضاء وعامر وواقف وقفة منتصبة كتبان عليه رياضي غير من الحركات ديالو وتضاريسه المتساوية ..كيضحك ويلعب بالسوارت فيدو طالق قشابتو مع عمومو واخا شادين فيه دغيا كيقلبها عليهم غير بالعقل ويضحك حتى بداو العيالات نازلين شي مور شي وفتح ليهم الابواب يطلعو بلا ميركز معاهم..بدات سارة كتسابق على البلاصة الاولى قدام غالي خوفا من اسية تشدها ليها والى شداتها تموت بالفقصة وهي باغا تبان فالجلسة حداه لاكن اسية هاد المرة مشات هازة راسها ركبات جنب هشام اللي كيسوق سيارة باه وتزاحمات مع رشيد قبل مايجلس وخاصها تبان هي ام العريس والكل فالكل..اما رشيد ماداهاش فيها خلا ليه الطموبيل ومشا ركب جنب سمير اللي مرتو هازة البنت وبزز منها ترجع اللور وبنتها فيدها .

ركب الجميع وضار غالي مع السيارة يالاه دخل شاف سارة حداه كتبسم وتكمش فمها حشمانة وكتشوف فيه بنص عين وضحك تلقائيا وقال

غالي: هايي هاي هاي..كاع هادشي حيت غاديين نخطبو!

دورات وجهها كضحك وترمش وقلب وجهه كيضحك عجباتو لاكن حتارم اللي جالسين وراه وديمارا السيارة تبع هشام حتى للفيلا اللي فيها الخطوبة ونزلو تحمعو كاملين دخلو مجموعين واسية مع رشيد فالمقدمة دايرين هشام لوسط هاز الورد لقاو مونية ويامنة وكلتوم وبناصر وميمون فالباب استقبلوهم وسلمو عليهم ودخلو مجموعين كيشوفو فالعائلة اللي جالسين وشي كيتعرف على شي في حين لاسقة سارة على دراع غالي وداخلة شادة فيه وراسها مايل كتشوف بنصعين فالناس وتميع

العريس جلس فالبرزة واخا ماشي شي بردة كبيرة ..كانت متولة عبارة عن فوطوي طويل مفرش وحداه الورد اللي جاب والهدايا والطبالي مدورين فالجناب جالسين فيهم الناس وشي كيشوف ..كانت عائلة سكينة بلديين بحكم انهم من البادية وكيحضمو وباين عليهم المعقول ودايرين مجهود لاكن مكيكريوش وكل وحدة كتلبس تكشيطتها واخا قديمة ..لاكن باينة عليهم حارين وعندهم نفس الهزة دالراس والنفخة دالنيفوالمضاهر اخر حاجة كتهمهم ومكيفهموش فيها.. اما عائلة هشام كانو مختالفين بزاف وحتى المحيط كيلعب دور يحكم مدينتهم واصولهم العريقة فمدينة مكناس كيفهمو فالتاويل والنخوة وعندهم لكنة وحدة فالهضرة متشابهة ونغمة وحدة فالحواو نسا ورجال وكيتشابهو فالطباع تقول عرق واحد شاركهم كاملين .

بقا شي كيشوف فشي والموسيقى بالطري الاندلسي وشي كيهضر على شي ويحلل فشي الا سارة اللي جلسات دارت رجل على رجل وقلبات القفطان على رجلها وشدات فدراع غالي متكية عليه ومو مقابلة معاه كتشوف بنص وتهضر مع ختها كلتوم وتعلق وتنفخ ..اما غالي تحرج وماصلاح ليه كي يدير وباغيي يتحرر من قبضبتها وبقا كيرجع باللور على الكرسي حتى تفك ونشر يديه خلاها جالسة وحاطة يدها على ركبتو وكتشوف فالحضور مابانت ليها منافسة ولا بنات عاطيين للعين حيت فالحضور دالعروسة مكانوش البنات بزاف وكلشي مزوج وكيشوف قدامو وغير شي وحدة ولا جوج لي جالسين وداخلين سوق راسهم وبدات كدندن مع الموسيقى وتتبسم حسات براسها ملكة الحفلة وعجبها الحال كل شوية كدور عند غالي ضحك معاه وحتى هوا كيهضر معاها ويضحك حتى دخلات العروسة بتكشيطة بيضاء والزغارت والنكافة حداها وناضو كلهم استقبلوها وكانو معاها البنات اللي مشاو للصالون وسميرة الشيء اللي خلا سارة تهز عينيها فغالي وتشوفو فين كيشوف

العروسة بلارة وداخلة على رجليها حشمانة والوجه مزير وهشام كيفرنس حشمان حتى وقفوها حداه وجبلسوهم وبداو السربايا غاديين جايين كيفرقو اتاي بينما سميرة جلسات مقابلة مع الطبلة ديال سارة وخواتاتو ومو وماجات عينها غير عليه بقات كتشوف فيه ساهية وكتشوف فسارة اللي حاضيا القاعة من الباب حتى للقاع لاكن مانتابهاتش لسميرة .. نضرات سميرة المطولة خلاو غالي ينتابه وبدا كيرمش بعد عينو وكل شوية يتلفت كيلقاها كتبسم وتهضر مع اللي حاداها وتشوفيه عرفها ناشرة الجمال عليه ورامية الشباك باغا تبفت انتباهه وكتقاد فالجلسة ودير حركات رزينة وتقيلة .. سخنو بلاصتهم عاد ناضو بشوية بداو كيشطحو بالرزانة والتقالة وكلنت كتتقن البروطوكولات والتباتة والنضرات والتعبير بلوجه بلا مبالغة .. كتلوح يديها بشوية وتشطح بالنخوة والشيكي وتحرك جسدها بشوية على نغمات اندلسية وكتقيس شعرها برقة وكل مرة تخطف نضرة من غالي وهي كتشطح حتى قربات من بنت خال سكينة ورانيا اللي كتشطح معاها وكانت اكبر منهم باربع سنوات وقالت

سميرة: شكون هاداك اللي جالس لهيييه ؟؟

ايناس: ماعرفتش علاش؟

سميرة: عضات شنايفها ) من الصباح وهوا حاط عينو عليا …غزاااال شفتي كي داير

ايناس: عنداك تكون مراتو هههه هاديك اللي حداه

سميرة: كيدير فيا شي شوفاااات… داخ داخ داخ

ايناس: هههه ويلي ويلي مسخوطة.. ولاكن غزال شو كيداير .

الهمس عليه وبناصر داخل خارج تالف اللي دار حداه كيوقفو

بناصر: فين سكيناااا!!؟ كاع مابانتلي

ميمون: واقيلا مزالة فالصالون

بناصر: عيط. عيط عيط ليها تجي عند هاد الحلوى اللي قالت ليك حتى تجي تقطعها عاد نفرقوها عيط ليها قوليها اجي دااااابا غنفرقو العصير

ميمون: كيصوني) فينك ؟؟ فيين غين وصلتي باك واه مكشكش راكي كتعرفيه…يالاه (قطع) هاهيا .. هاهيا قالت لك برا

خرج بناصر كيزرب شافها نازلة من سيارة مرسيديس كحلة وهازة جنب القفطام الزهري مدخلاه فالسمطة وركبتها كتبان والصندالة اعلى منها مكاين طالونها رقيق وعالي والشعر مطلوق على طولو دايرة بوندو كحل مرضع بالاحجار على راسها فارقة بيه الشعر اللوراني واقصيصة لخفيفة اللي على جبهتها وحلقات مدورين كيبريو وموراها ليلى واحلة فجلايلها ومقاتلين مع الباليزة والماتيريال كيخرجو فيه .. ماداهاش بناصر لا فالشكل لا فالزين مشا زربان كيغوت على الحلوى بينما ميمون عاونهم فالتقل ورجعات ليلى للسيارة كطير ضربات الدورة بالزربة رجعات بلاصاتها ونزلات كتجري دخلات تابعة ميمون اللي هاز الشنطة طلعها مع الدروج وسكينة قدامو كتزرب تابعة بناصر ومهبطة راسها شادة الضحكة ويدها على نيفها وليلى موراها حتى هي باغا ضحك وكتقلب بعينيها على غالي ومرتو تشوف ردة فعلو

دوزهم بناصر قدام الحضور اللي جالسين كيشربو اتاي وهما تابعينو وحدة مور وحدة والكل تلفت كيشوف شكون البنات اللي دخلو جداد ومنهم سارة اللي غير شافتهم مشا الدم من وجهها وجمعات الضحكة وعينيها تعلقو بقات متبعة ليهم العين وهما دايزين في حين كان غالي مهبط راسو على تيليفون ماهزوش كاع ..اما منال جات عينيها سكينة ودغيا هزات راسها متبعة ليها العين والقلب ضرب ماجات غير صورتها فبالها لاكن متصدقاتش تكون هي ومستحيل واشنو غيجيبها لتما ..ضارت شافت فغالي لقاتو مهبط راسو ومتكي على الكرسي ورجعات شافت فسكينة اللي ماضارتش نهائيا لا يمين لا يسار بقات كتشوف قدامها وليلى وراها غادية وكتقرا فالحضور حتى جات عينها على سمير اللي حل فمو وضار فيها نضرة اعجاب وهي تقلب عينيها وتهدو قنانفها ماحملاتوش ومشاو غبرو من امام الحضور خلاو هشام جالس مصدوم وكيشوف قدامو بحال الصنم عاد بدا كيرمش وتلفت عند رانيا بخفوت وقال

هشام: شكون البنات اللي جاو مع باباك؟ نكافات!

رانيا:بابتسامة) ههه لا اللي لابسة الغوز هاديك هي ختي سكينة واللي لابسة لكحل ليلى صابحتها اللي قادات لي مزوجة

تبلوكا هشام وبقا فبلاصتو شحال كيرمش وقال يخفوت

هشام: ختك!

رانيا: اه

باع الريق ورجه بعد وجهه تلف ونسا راسو راه عريس وتكا على جنبو فشل حتى شيرات ليه هند عاد رجع تقاد فالجلسة وداخ حس براسو مابقاش عادي وهمس فودنها

هشام:غنمشيو للطواليط ونجي صافي

ناض من حداها هاز راسو مزير غبر وبقات منال جالسة ومتكية على فكها كتخمم وقالت لهند

منال: احمم..هييند..بانت ليا واحد البنت دابا دخلات ليا الشك.. جاتني بحال البنت اللي عاود ليا غالي عليها

هند: بحماس وفضول) شكوون؟؟ فين؟

منال: مشات مشااات بلاتي الى عاودات بانت نوريها ليك..ياختي جاتني بحالها ..الشعر والوجه !!! دخلي الشك

هند: هييه حلفي..منين دازت فين مشات؟

منال: ماعرفتش دخلو من هنا …جاني غالي عادي يمكن ماشافهاش .. (بسرعة ضرباتها ليدها) هيييه هاهيا هاهيااا هاهيا راجعة شوفي شوفي

هند: بسرعة) غالي شحال فالساعة

سمع سميتو هز راسو ورجع التيليفون شاف الساعة وشاف فهند رد عليها بعفوية وهز عينيه قدامو ويالاه غيهبطهم رمش وعاود هز عينيه بلفت الانتباه شاف فيها دايزة كتبسم وهازة القفطان فيدها ومشات جلسات فالطبلة المقابلة معاهم ..كاشي داز فنضرة وحدة ورجع هبط عينيه عادي ومنال وهند كيشوفو فيه بنص عين كيحللو ويناقشو بينما سارة هادة راسها والنفس مقطوعة فيها باينة من شفايفها المكمشة

منال: هي والله حتى هي!!! اويلي ميمكنش هاد الصدفة

هند: يفضول) كن كانت هي كن بانت على وجهه متأكدة؟

منال: والللله حتى هي والله ماتخفا عليا صورتها ..نفس الشعر نفس الوجه اصلا باش تكون وحدة كتشبه ليها صعيييب لفيراج ديالها ماشي مؤلوف اصاحبتي ..هي ماتقوليييش ليا الدورة دوجهها ديال شي كورية وداك الفم حتى هوا والنيف .. عينيها ..باقا عاقلة عليهم قدام عيني بزااااف على الشبه!!

هند: كضحك)حيدي نشوف !! ولاهيييلا الصراحة ماااشي عادية نقولو كاين شبه بزاف منها ..بلحق زوينة بنت الحرام (بنص عين) سارة تقرصات ..

منال: غالي جاني عادي مادار حتى ردة فعل يكون عارفها كتجيهم ولا شي حاجة؟

هند: مكتشوفش كاع هنا

كان مهبط راسو على تيليفون وحجبانو معقودين ماهزش الراس حتى لواحد اللحضة سدو وهز سوارتو وقال لسارة وهوا نايض

غالي: انا راجع

سارة:هزات راسها شدات فيه) فين غادي؟

خرج من المجمع جهة الباب بينما منال وهند متبعين ليه العين حتى فات الباب وسارة مربعة يديها كدور عينيها

سميرة: بخفوت) مللي دخلللللت…وهوا عينو عليا والى كانت هاديك مرتو راه تكون طرطقات من لداخل.. غير حاضيني حاضيني حاضيني كندور كنلقاه كيشوف فيا السيد صافي تلف

سكينة: هازة حاجبها) ربي ربي!!

ليلى: عجبتيه المسخوطة

مونية:وقفات عليهم) اجي تكلمي لباك

ناضت كترمش شافت جهة الطبلة فين جالس مالقاتوش وتبعات مونية لبرا وسارة متبعة ليها العين وعاقدة حجبانها حتى خرجو لقات بناصر برا واقف كيتفتف

بناصر: سيري سيري دي عمك للدار راهم نساو الخبز سير وصلهم

مد ليها السوارت زرب عليها ومشات كتهز جلايلها عاوتاني وتعلقهم ركبات هي وياهم داتهم الدار بينما وقفات سارة فالباب دالفيلا شادة تيليفون فيدها كتصوني وتقلب بعينيها

سارة: غالي فينك ؟ فين مشيتي؟

في حيرة وقلق كتمشي وتجي حدا الباب وتدخل وتخرج وتيليفون فيدها كتسوط وتصوني وتعاود

سارة: غااالي…الو غااالي فين مشيتي

غالي: بنرفزة) شكاين اسارة ياك لاباس شنو خاصك؟

سارة: بتعلثم)والو غير كنسول عليك فين مشيتي وصافي؟؟

غالي: نمشي فين مابغيت نمشي مالك لاسقة فيا فين مشيت فين جيت بووحدك اللي فيك الدودة ياك لاباس!!

جمعات شفايفها لداخل وتخنقات بقات كتبلع الريق ويدها فتيليفون كترعد مالقات باش تجاوب وعمرو هضر معاها بهاد الطريقة ولا طيح معاها الهضرة ..مارضاتش وحقنات فيها النفس وقطع عليها خلاها واقفة والارض كتمشي وتجي بيها شدات الدوخة وراسها تزير والدموع هبطو مع الخدود كيجريو.. دارت يدها على وجهها خباتو وبعدات على الباب وقفات كتفتف وتشد فالحيط كترعد جاها انهيار من الدموع وبقات كتبكي وتنخصص بوحدها..اما هند ومنال جالسين لداخل متحمسين لشنو كيدور وشنو واقع والهمس بيناتهم متقطعش

منال: شتها غبرات ياكما هي النكافة؟؟

هند: عقلي مع سارة حتى هي خرجات تبعات غالي

منال: كانت كتبقا فيا وكنلقاها ليها عذر ولاكن دابا كرهتهاااااا من اعماق قلبي … تفوووو غير طالقة ودنيها وكتلقط وتسنط..وانا تا انا خصني لعصا وهانا دابا خسرت مع خاي وقلب عليا وجهه فمرة

هند: ساهيا) ماعرفت فين تبعاتو

فالطبلة المقابلة جالسة سميرة كتهامس مع ايناس وتقلب بعينيها

سميرة: خرج هوا هاديك اللي كانت حداه… بغيت غييير نعرف شكيجيهم

ايناس: يقدر يكون خوه ولا صاحبو

سميرة: كيشوف فيا وفاش كنشوف فيه كيدير ديك هاااه (كتهبط عينيها) كيحشم..هوا راااه باااغي يشوف مالقا كي يدير هه

ايناس: ياختي قولي ليا شنو فيك كيطيحو فيك غير الزين

سميرة: ههههه ولاكن الزهر مكاينش… دايرين ليا شي حاجة متقوليش ليا انا عارفة راسي.. حيت كيبغيييوني وغيخمااااقو عليا ولاكن داكشي كيشدهم مكيهليهمش يوصلو عندي… دابا هادا هانتي.. لاحضي فاش يدخل شوفي كيكيدير فيا …ولاكن باش يجي عندي ويفاتحني فالموضوع ميقدرش حيت داكشي اللي مديور ليا كيحبسهم عليا

ايناس: خاصك تجري اصاحبتي على راسك ..ماتبقايش هاكا

سميرة: راني كنحاول.

رجعات سكينة بالطموبيل عامرة بالخبر هي وعمها ووقفات خلاتهم كيخرجوه ونزلات مدات السوارت لباها اللي هاز راسو فالسمو ومكمش فمو راشقة ليه

بناصر: اودي الله يعطيك الصحة…. ايييهاااايييهييييهييييهييي كي جاتك هاد التكشييطة … كتعرفي تشنننعي بعدا

شافت فيه مصدومة وبدات كضحك بزز منها عارفاه كيتقلب ويقدر ديك الساعة يتفكر شي حاجة ولا يشوف شي حاجة ويقلب عليها ، مدات ليه الساروت وتمات داخلة مع الباب دالجردة والمصور تابعها كيجري ويعيط

عثمان: سكينااا..واسكيناااا..بلاتي بلاتي

سكينة: ضارت عندو كتفتف) بابا بابا..سير عند بابا

هربات من المصور قبل ميوقفها ومشات كتزرب تقول غادية حفيانة ماشي لابسة صندالة عالية كي برج ايفل، يالاه بغات تدخل تصادفات مع هشام خارج وتبسمات بزز منها وحدرات راسها ، اما هوا ماعرف يضحك ولا يسلم ولا يدير راسو ماشي هوا بقا كيحرك راسو بالايجاب والابتسامة كتمشي وتجي فمو وخرج كيرمش شاد تيليفون فيدو كيقلب على غالي ونزل مع الدروج مشا للطموبيل لقاه جالس تما ونزل عندو عاقد حجبانو وراسو فالسما تقول واكل الحار وعنقو مزير ..اما هشام جميع تعابير الدهشة والصدمة وعدم التصديق باينين على وجهه

هشام: بتساؤل) واش كان فخبارك باللي سكينة خت رانيا؟؟ ياك سكينة كانت سميتها

ماردش عليه غالي فال يك الساعة بقا كيحرك راسو بالايجاب ويشوف هنا ولهيه ساكت حتى عاود هشام سولو لاكن تفاجئ فجأة برد غالي اللي شاف فيه وحمر فيه مزيان وقال بعصبية

غالي: واش نتا غادي خاااطب ختها وسااكت؟؟؟ سااكت جاي كتسولي؟؟ (كمش وجهه بقرف) شهاد السؤال؟؟ شهاد …؟!!

هشام: بتعجب) كيفاش؟؟؟ واش ماكنتش عارفها زعما؟؟؟

غالي: بغضب)واش باغي تحمقني اصاحبي ولا مالك !!! واش نتا غادي تخطب البنت معارف لا شكون خوها لاشكون ختها ؟؟؟ سيير اصاحبي سيير براكة منن…

سد فمو وقلب وجهه وهشام طاح فسوء التفاهم مع غالي حتى كانو غيدخلو فمشكل وبدا هشام كيحلف باللي معارفش لاكن غالي ما خلاتش ليه لراسو نهائيا

غالي: شحااال دابا ونتا كتعرفها؟؟ عام عام ونص؟؟ ماعرفتيهاش فهاد المدة كلها !!!

هشام: واااماكنتش عاارف انا راه تشووكيييت!!!

غالي:هز يديه؟ وهي نتا ماشي طبيعي !!! هادشي اللي كتقول مكيصدقوش انسان بالغ اصاحبي!! شحال ونتا كتهضر معاها معارفش ختهااا؟؟!!! هادا راه الحماااق

هشام: يمكن هي مابغاتش تقول ليا ولا مابغاتنيش نعرفها مزال غنهضر معاها ونشوفو هادشي،،، دابا فين عندك المشكل

شاف فيه غالي شوفة ناقصة وقلب وجهه لجهة اخرى وهز يدو

غالي: ماعرفتش كيفاش كتفهم وكيفاش غنتفاهم انا وياك… غير مللي معارفهمش خواتات راه صافي مابقا عندي مانشرح ليك … مابغاتش دخل ليا هادي راسي.. تجي سكينة طلع خت رانيا!! ماشي لحماق هادا!! (شد لحيتو) مشاكييييل

هشام: صافي ماطرا والو تكون ختها ولا بنت عمها فين كاين المشكل

غالي: هز واحد اليد وقلب ضهرو)مكاين حتى مشكل .. صافي

جمع الدفلة لاحها بعيد وربع يديه كيرتاح من التوثر ويتنفس ومابغاش يدخل فنقاش مع هشام او شرح مغصل او تفاصيل .. ماعندو لاش وغيصدع راسو ويبح حلقو وداكشي اللي بغا يعرف عرفو وعرفها خت العروسة ومابيديه مايدير وماعندوش علاش يعرف تفاصيل اخرى ..اكتفى بداكشي اللي كيعرف وبقا واقف جبد تيليفون كيصوني على سارة بينما هشام رجع للفيلا

غالي: الو سارة.. اجي عندي للطموبيل يالاه انا كنتسناك

خرجات سارة كتزرب من القاعة وتنخصصمن لداخل هازة هم والدنيا والدين وزاد كملات فاش تلاقات بسكينة لوجه فلوجه فالباب وشافت فيها بينما سكينة دورات وجهها دخلات وبقات سارة واقفة مصدومة كتشوف قدامها وتشوف وراها ومشات كتجري عند غالي والقفطان فيدها مهزوز على الارض حلات الباب ودخلات لقاتو جالس ويدو على النافدة متكي وكيخمم وقبل مايهضر قفزات بلا عقل مخرجة عينيها وكتنهج ومخلوعة ومصدومة وجميع ومتوثرة

سارة: كدخل وتخرج فالهضرة) هاديك اللي كانت فالقهوى ديك المرى اللي تلاقينا لقيتها فالباب هي ..واللهيلا هياااا شكون هاديك كتعرفها.. هي اللي جات عندنا فالقهوى وانا عاااقلة عاااقلة عليها هي نفسها هي نفض البنت كتعرفك كتعرفها

شد جبهتو وسد عينيه كيتسنط لودنيه كيسوطو وعياء كيرهق كأنه دار مجهود كبير ووصل لاخر قطرة من طاقتو

غالي: حرك راسو بالايجاب ساهي قدامو) هاااديك هي سكينة

تقطع فيها الحس ومشا ليها الصوت وتبلوكات ..بقات مصمرة كتشوف فيه وهوا قلب وجهه للجهة لاخرى ودار يدو على لحيتو ومررها على فمو والحيرة والاسف على وجهه وعينيه كيرمشو ويشوفو هنا ولهيه اللي شافو يقول كيتأمل لاكن عقلو فجهة اخرى .. قبل ماتستوعب سارة كلامو وتفتح فمها بكلمة دور وجهه كيهضر بدون مايشوف فيها وقال بهدوء

غالي: هادشي علاش عيطت ليك… دابا غنهضرو نيييشااان انا ونتي … عطيني عقلك وسمعي ليا باش يتسد هاد الموضوع فمرة وحدة وميعاود يتجبد(مسح يدو) … اما الى بقينا هاكا ماعمرنا مغنساليو ومعمرنت مغنزيدو لقدام

سارة: الدموع محجرين فعينيها) دابا هاديك هي اللي كنتي كتعرف!! (كتمتم) كي كيكيفاش!! شكون ؟؟ وماقلتيلي والو فاش كنا فالقهوى وخبيتي عليا..كدبتي عليا

غالي: هز صبعو بتحدير ) مكدبتش عليك.. ماتخرجيش شي هضرة ماخرجاتش من فمي واصلا ماسولتيش..نضتي بغيتي تمشي ومشينا..دابا الى بغيتي نهضرو ونوضحو الامور غتسكتي من البكى باش نحطو النقط على الحروف ونرتاحو فدماغنا

سارة: بغيت نعرف كووولشي… كووولشي

غالي: حتا انا هادشي علاش عيطت ليك.. هاديك البنت كانت بيني وبينها علاقة ..(بهدوء وتركيز) كنا فكرنا نتزوجو وماكتابش وعرفتها قبل منك .. من بعد ماكتابش…صافي كل واحد مشا شاف شغلو وسدينا الموضوع فمرة لا انا قلبت عليها ولا هي قلبات عليا

سارة: كتنخصص) هيا اللي مابغاتش تزوج بيك ياك

غالي: ودابا سمعي من فمي اش كاين الى بغيتي تعرفي حقيقة هاد السوجي واسمعي

سارة: ربعات يديها )واخا كمل

غالي: الزواج رزق.. وكل واحدورزقو فهاد الدنيا..وهي ماشي فرزقي وانا ماشي فرزقها ودار الله الاسباب والسلااام..

سارة: بغيت نعرف علاااش جات للقهوى عندنا كنتي كتهضر معاها

غالي: الى بقيتي كترمي عليا هاد الاتهامات غنسكت ومنزيدش معاك الهضرة.. هادي قلة الاحترام ثانيا وقاحة و الى زدتي شي كلمة غندير فيك راسي و غنوليو دراري

سارة: دورات وجهها) اوكي يالاه كمل

دور وجهه حتى هوا تنهد بتعب ورجع شاف قدامو كيهضر بشوية ويعبر بيديه بتقالة والرزانة تقول راجل فعمرو ستين عام .. الطريقة باش كيهضر وكيخلي مساحة بين الجملة والجملة للاستيعاب وخروج الكلمات واضحة تقول جالس فوقشي منصة كيلقي شي خطاب.

غالي: العلاقة حبسات ..

سارة: شدات جبهتها بتعب) ماتبقاش تقولي العلاقة اغالي … صافي دوز

غالي: واخا .. مهم نهار سالينا مابقا جامعنا لا اتصال لا صداقة لا حتى حاجة والنهار اللي كنا فالقهوى وجات انا براسي تفاجئت !!..

سارة: وعلاش جات؟؟ شنو بغات

غالي: بتحليل كيخمم) يمكن تعمدات تفاجئني.. يمكن ماعارفاش راني تزوجت وقالت غير شي آمي ولا شي حاجة … متقدرش تعرف بالضبط .. ولا بغات تلعب.. (صغر عينو) فيها هاد الخصايل كتبغي تلعب وجات قاصداني انا غير باش تكوني عارفة .. ماقصداتكش نتي وبغات دير ليا هاكاك ربما بغات غير تلعب وتمشي وراه مشات من ديك الساعة ما بانت.. كن كانت باغا شي حاجة ولا فنيتها شي حاجة راه غتلقا الطرقان منين دوز ..(بتأكيد)شوفي.. بااينة كانت مع صحاباتها وتلاقاتنا وبانت ليها دير شي حركة وتزيد وهادشي اللي دارت

سارة: بحرقة) وعلاااش؟ علاش… نتا علاش ماقلتيليا والو

غالي: شغانقوليك واش انا عارفها شنو فنيتها؟؟ خاصك كولشي تعرفيه سوا يفيدك ولا مايفيدكش مالكي عزيز عليك تشطني بالك؟ الناس كيتهربو من الحاجة اللي ديرينجيهوم ونتي كتحفري عليها بيديك !

سارة: من حقي نعرف!

غالي: من حقك تعرفي اه ولا كن تعرفي المسائل اللي جامعانا انا وياك .. اما هي جات ومشات وقصة قديمة وسالات ماشي من حقك !! هاداك ماضي ديالي بقا اللور ودابا تجمعنا انا وياك ومن حقك تعرفي حاضرنا..اما هي راه تقدر تكون هي ولا غيرها .. مدام ما عاوداتش بانت ولا فنيتها شي حاجة فصافي مكاين لاش نعقدو الامور

سارة: بنفس عميق) واخا كمل

غالي: مهم…(هز صبعو)اولا ماكنتش عارف عليها بزااف وهادي نقطة مهمة غتفهمي علاش قلتها.. كنت عارف عندها واحد ختها وخوها صغير ولاكن عمري شفتهم .. دابا اللي وقع هوا هشام ماعرفتش كيفاش وفوقاش(كيحك جيهتو) تعرف على ختها وقررو يتزوجو هادشي ماقدرتش نفهمو

سارة: بصدمة) شنووو!!! دابا هي والعروسة خووت!!!(لاقات صبعانها)

غالي: ببرائة) هادشي اللي وقع ومافخباري والو!!.. (رجع للجدية) ماعرفتش كيفاش تلاقا بيها وماتوقعتهااش … هادشي علاش دابا هي كاينة تما حيت خت الخطيبة دهشام

دورات سارة وجهها وشدات راسها وتكات على الزاجة كتخمم وهوا قلب وجهه ويدو حدا فمو كيفكر وعم الصمت.. سارة قطعات الحس وغالي كذلك حتى تلفت شاف فيها وطبطب على كتفها وقال

غالي: ماديري فراسك والو..مكاين واالو وكاع هاد الصدف غيدوزو حتى حاجة مغتبدل، الله يسهل على ديك بنت الناس والله يكملعلى هشام بالخير وحنا راحنا الحمد الله مزيانين غير نتي الله يهديك التيقة واالو منعادمة عندك… اساس اي علاقة زوجية هي الثقة.. (هز صبعانو) الثقة والاحترام هادو الى مكانوش كتهدم ديك العلاقة… انا كنتيق فيك .. وحتى نتي خاصك تيقي فيا واش خايفة نخونك؟

سارة: بأسى) عييت

غالي: جرها عندو) خايفة نخونك؟؟؟ انا كن بغيت نخون علاش غنتزوج اصلا؟؟ شنو راكي كديري ؟؟كطيبي؟؟ مقابلة شي دار ؟؟ وااالو حتى حاجة من هادو مكديريها باش نقول مزوج بيك على على هاد الاساس.. وعلاش غادي نخونك؟ وعلاش مزوج بيك ؟؟ مانتزوجش بيك ونعيش كما بغيت

سارة: وعلاش تزوجتي بيا؟

غالي: كيرمش) كيفاش علاش؟؟ علاش كيتزوجو الناس؟؟

سارة:قوليا علاش؟

غالي: الانسان كيتزوج باش يتفادا الحرام ..الله يسمح لينا مكنبغيش كااع نتفكر شنو داز ولا نهضر عليه ولاكن دابا الحمد لله مرتاح واخا كتمرضيني بالغيرة ديالك .. اما الخيانة راه منخوونكش وانا فكامل قوايا العقلية غير تهناي..ماتزوجت الا ومقتانع بهادشي والانسان كيدير لحلال ويزيد يتقرب من الله عز وجل ويقوي امانو ويطلب الله يغفر ليه..ماتزوجناش عن حب ولاكن كولشي كيتبدل وكيجي مع الوقت

سارة: وعلاش كدير احتياطاتك …مابغيتيش اولاد؟

غالي: داخلت عليك بالله واش حنا دابا فالاولاد؟؟ نتي وانا واش واجدين لهاد لولاد؟ تطلقتي حتى فالفراش بقاو غير الولاد ينفخو لينا الراس نزيدو السهير على والو

سارة: عطاتو يدها) واعدني مادورش بديك خيتي

غالي: هانا لاللة كنواعدك.. وتا ونتي واعديني هادشي يبقا هنا مدوريش بيها ولا تجبدي سيرتها لشي واحد

سارة: صافي كنواعدك(عطاتو يدها)

غالي: دابا شنو ؟؟ ترجعي لداخل ولا شنو؟

سارة: انا وياك . يالاه

تهدنات الاوضاع نسبيا ورجعات سارة مع راجلها كأي زوجين متفاهمين ومعروضين لمناسبة..شادة ليه فدراعو وهوا مدخل يدو فالجيب كيشوف قدامو ، جلسو بلايصهم وسميرة كتشوف فيهم بنص عين وتهمس لإيناس

سميرة: غير هي والبغلة اللي تزوجو

ايناس: باش عرفتيها مرتو ههه

سميرة: ايوا باينة(يدها على خدها) الشدة اللي دايرة ليه ديال القعد

كانت ليلى فهاد الاثناء كتقلب على سكينة وخرجات وقفات فالباب حتى سمعات همس حدا ودنها ” الزين تبارك.. الله يحجبك ” ماجات فين دور حتى داز حداها سمير مهبط راسو وكحزات من وسط الباب كتشوف فيه بقرف ودورات وجهها لقت سكينة واقفة مع عثمان المصور وهازة جلايل التكشيطة مع السمطة وركابيهت كيطلو

سكينة: شحال قالك من تصويرة؟؟

عثمان: قاليا ربعين صافي

سكينة: صافي دابا حتى يدوز هاد الشي ونعزلو دوك الربعين

ليلى: بصوت مرفع) سكيناااا

ضارت سكينة عند ليلى وهزات يدها مشات عندها وقفات حداها كتسوط

سكينة: يخخ بغيت غا نجلس نشوف ونتشااف كل شوية سكينة سكينة سكينة الننم

ليلى: داك راس الدينامو شكيجيكم؟

سكينة: كتقلب بعينيها)شكون؟!!!

ليلى: رااه واقف لهيه شاد كارو

سكينة: معرفتش اختي يمكن من عائلة العريس.. اجي اجي ندخلو انا يالاه غنحط قزيبتي نبركك فطاسلة غالي هه

جات دور مع الدورة وشدها عمها زربان

ميمون: فين درتي الصاك دباك فيه الشارجور تيليفون طفا ليه

سكينة: اينااصاك؟؟ راه دخلو كولشي بداك البيت

ميمون: واجي جبدي ليه الشارجور راه كيقلب عليه قالك الصاك يحضر

كمشات جلايلها كتنفخ ومشات تبعاتو وعاودات رجعات كتزرب ومشات نيشان للطبلة اللي فيها البنات جلسات ودارت رجل على رجل وصبعها على خدها كتشوف فالناس وهند منال كيشوفو فيها بنص عين وهي حاضية غالي اللي محني على تيليفون وسارة حداه كتشد فيه من هنا ومن لهيه كضحك وكل شوية كدور تشوف فيها

سكينة: بخفوت ليليى) خراا كي دايرة ..تقحبين العور

ليلى: هااههاها ماشفتي وااالو…

سكينة: كتتأمل)عمتي غادية عندهم ينوضو يتصورو ..عتقيها كي كتعوج

سميرة: قربات عند سكينة) اجي شكون هاداك شكيجيه ؟؟

سكينة: هزات حاجها) هاداك،،،، خوه .. انجينيور

سميرة: ااااممم…وهاديك شكون اللي معاه

سكينة: بنص عين هازة راسها) هاديك….. مرتو طبيبة دسنان

سميرة: حلات عينيها) اااهمممم.. ايوا عينيه غير كيدورو

سكينة: غا حيت عجبتيه اما تروونكيل

جلسات سارة حدا رانيا وابتسمت ابتسامة صفرا وهزات راسها بينما غالي جلس جنب هشام وخداو صورة وبدات العائلة كتنوض تتصور وجات مونية وبناصر ختى هما واسية وراجلها وخواتات هشام وكلشي تصور بقات سكينة وسميرة وليلى ناضو بثلات ورجعو بلاصتهم حتى بداو تركاب الخواتم والحليب والتمر ومشات النكافة كثقاد ليهم الامور وكلشي على مايرام .. هند جاتها الكانة على سكينة بغات تتقرب منها وناضت كتشطح دارت راسها مافخبارها والو حتى وصلات عند سكينة ووقفات حداهم كتبسم وشوية بشوية بدات كتشطح معاهم ..هز غالي عينو وبقا متبع هند وتلفت عند منال عاقذ حجبانو وقال بخفوت

غالي: قلتي ليها شي حاجة؟

منال: بارتباك ) لاالا ..

غالي: بتحذير: ها ودني منك .

هبطات منال راسها بأسى وبقات ساكتة واسية كتشوف فيها بنص عين وقالت

اسية: شنو كيوقليك؟ مالو معاك؟

منال: لالا والو.. غير شي حاجة

اسية: ومالكم كتوشوشو جيتوني فشكل

منال: والو والو

ربعات يديها وبقات حاضية هند اللي دخلات فالدردشة والضحك مع سكينة وجبدو تيليفونات وعطاوها للتصاور وسارة متبعة ليهم العين

سارة: علاش هضر مع ختك تجي تجلس علاش مشات كضحك معاهم!! واش كتقلب على الصدع

غالي: وحنا مالنا .

سارة: لا متهضرش معاهم .. قوليها تجي تجلس.

غالي: لا رد

هي راسو ماردش عليها وتلفتات عند منال مربعة يديها وهزات حاجبها وقالت

سارة: عيطي على هند تجي تجلس

منال: هزات حاجبها) ماشي شغلي

سارة: ماشي شغلك!! كتعرفي هاديك خيتي كتعرفيها؟؟ واقولي ليها تجي تجلس حسن ليها ماخصنا صداع

منال: سيري قوليها ليها نتي انا ماعرفتكش علاش كتهضري

قلبات وجهها وعطاتها بالضهر منفخة ورجعات سارة ربعات يديها كتفرج وكل شوية تشوف فغالي كتقلاه كيشوف فتيليفون حتى رجعات هند كضحك فوجات على قلبها وجلسات على الكرسي وكحزات سارة بكتفها عندها وقالت بابتسامة صفرة وجدية

سارة: هادوك الناس ماعندنا منديرو بيهم حسن لينا بقاو بعاد هادشي فيه المشاكيل اوكي.. وهاديك اصلا ماشي من المستوى ديالك شوفي ليك بنات قاريين واعيين مثقفين ماحدك كتهبطي لتحت غير كتزيدي تغرقي فالوحل ومانسابينكش

هند: هزات كتقها) اويلي مالي شفتيني غادية نسكن معاهم غير ضحكنا شوية وصافي(بنص عين) وزايدون ضريييفة كدخل لخاطر

سارة: رتبات على كتفها) حتى نتي ضريفة االضرييفة راني عاايقة بيك

هند دخلات ليها الهضرة من ودن وخرجات من ودن وكملات ملي عاودو تصورو مع العرسان وجلسات معاهم على الطبلة كضحك وفمها محلول وكتجمع معاهم كأنها كتعرفهم من شحال هادي

هند: اوييلي مكناس مقناااط والموت ديال الرباط زوييين كتحسي براسك فالمستقبل هه

ليلى: غيير كتقولي غير حيت جديدة هنا داابا يطلع ليك فراسك وتقولي عليه مقنااط حتى هوا

هند: كتلعب بالسنسلة فعنقه) لاالا اويلي يكون كما كان ميوصلش لمكناس لا فالصهد واا فالبرد!! هنا بعدا كااين مايتشاف وفين تخرجي وفين تجلسي غير مارينا كترد النفس.. اما مكناس اش فيه؟؟ لهديم وحمرية !!! لالالا لا علاقة واخا تشري اللي شريتي ماتلقاي فين تلبسيه وتفرحي بيه وحتى القهاوي ماشي شي حاااجة

سكينة: انا بعدا منقدرش نعيش فمدينة صغيرة .. من غير طنجة والرباط وكازا ومراكش منقدرش نعيش فحتى مدينة اخرى واخا يعدموني

ليلى: و أكادير حتى هي

سكينة: ماعرفتهاش كي دايرة

هند: اكادير حتى هي زوينة وكبيرة وفيها مايدار.. مكناس راه الموت فيها الموت البطيئ

سكينة: دابا صافي غتسكنو هنا فمرة؟

هند: انا بعدا منرجعش هههه وماما حتى هي مابغاتش ترجع اما منال عندها لعرس الشهر الجاي وغتمشي لطنجة

سكينة: اااه .. الله يكمل عليها بالخير.. نتي اللي غتصايبي ليها فالعرس؟

هند: لاالا انا عااد كنتعلم..دابا مللي ولينا هنا فالرباط عاد غنكمل فشي مدرسة ديال التجميل .

ليلى: وايالاه تكملي عند حفيضة اللي قريت عندها انا وااعرة .. كتعللم مزيان ومدرسة كبيرة

هند: صافي حتى توريني فين جات .. (شافت فسكينة) حتى نتي دايرة التجميل؟

سكينة: لا انا دايرة تنكاف ..انا اللي ملبسة رانيا

هند: تبارك الله وااعر هادشي.. ماكناش عارفين دابا عطيينت لعربون لواحد النكافة فمكناس.. كديبلاصاي؟

سكينة: نمشي معاك احبيبةحتى القمر هههه وسكيييمو على قلبي

هند: هههه كيفاش سكيمو ههه هضرتكم فشكل

ليلى: لاكلاص هوا سكيمو ههه

سكينة: شحال دابا ونتي هنا؟

هند: شي ست شهور دابا .. ولاكن مكنعرف حتى واحد كنخرج غير انا وماما وندخل انا واياها

سكينة: لعلا يمحنك حنا نخرجوك ندورو بيك الازقة زنقة زنقة

هند: بحماس)فين كتخرجو كاينين بلايص زويينين ياك

سكينة: خسارة جيتي تا بعت الطموبيل

ليلى: كاينة فوز .. وانا مرة مرة نسرق طموبيل لميسيو ههه

سكينة: ااه نسيت فوز عندها طموبيل.. تا ترجع من سعودية فوقاش قالت غتجي

ليلى: غير شي سيمانة وصافي

هند: طموبيل كااتنفع الصراحة

سكينة: تنهدات)وايييه كانت هازة ليا رجليا ..بقات فيا الصراحة

هند: وعلاش بعتيها كن خليتيها الصيف دابا

سكينة: دابا نشري شي وحدة صغيرة .. دابا الدار اهم من الطموبيل

هند: شريتي دار بلاصة طموبيل؟

سكينة: بااقا فالبلان عاد كيتبناو

هند: ااه لا مزيان الدار حسن..قالك ياجورة فالحيط حسن من جوهرة فالخيط

منال حاضية هند بنص عين واسية كتفرج فيهم كيضحكو ويتجمعو اما سارة ماحيداتش نضراتها عليهم وماعاجبهاش الحال .ك كل شوية كدور تشوف فغالي اللي حاط تيليفون قدامو كيتفرج فالكورة ومربع يديه حتى حطو الماكلة وبقات هند معاهم وكل شوية يتصورو ويتجمعو داهم التعاويد والضحك وكانت هند من نفس الفصيلة عزيز عليها تلبس وتبان وتخرج وفايقة باغا تعيش باغا تفدي الحياة الكحلة اللي عاشت فمكناس وتحلو عينيها فاش بدات كتسمع ليلى وسكينة كيعاودو على الدوران والخروج وكيضحكو

ليلى: قرب لانيف ديالك اسكينة فين نديروه ليك ؟؟

سكينة: غاديرو ليا مفاجأة؟ههه …علموني باش نجي مقادة

ليلى: ضاروري ههه مهم نتي نهار لانيف تقادي لأي امر طارئ

سكينة: اجي نكريو يخت ؟(دورات وجهه) لالالا اختي انا خاصني نسد فمي تابعني لكريدي .. كنقلب على خليان دار عشي هه.. عاد قلت خاصني نشد الارض ونخدم

ليلى: دابا تنفستي شوية ماشي بحال اللول ههه جالسة تتغبني وتبكي وتشكي ونااري يااختي بااز ليك

سكينة: اختي انا الى زويت كنمرض ..الصراحة وبلا نفاق فاش طبيت كاع الفلوس شدني القلب واحق الله مابقاتش النعمة كدوز ليا وكنت غندخل فاكتآب بقيت كنقول صافي ضعت وحياتي ضاعت

ليلى: كطيريني ههه(ضرباتها للكتف)

سكينة: انا عقلي طار بغيت نجبد الفلوسمن الحيوط هههخخخ..

ليلى: دابا رتاحيتي غتبان ليه فالدهو عاوتاني

سكينة: واضاروري ههه مع مع ههه طرت لليخت نيشان

ليلى: غالي اصاحبتي .. اجي نمشيو للشمال؟

سكينة: هزات راسها) هاي هاااي!!! ميخلينيش بابا مالقيتي متقولي غير الشمال

ليلى: قولي ليه نسافر مع البنات

سكينة: والله لا فت قنيطرة ..(كتاكل الحلوى) الشمال نمشي ليه مع بابا ويكري لينا شي برتوش ونعس حدا البوطة الصغيرة وانس يدخل وفمو عامر بالرملة وبابا يتوسط شي دلاحة باااردة ههههه هادا هوا السفر اللي كيعرف بابا ويرتاح فيه

هند: دورات وجهها) يخخ كنكره السفر مع العائلة

ليلى: حتى انا .. تا حنا الى سافرنا مع بابا هادا هوا حالنا ..ندوزو على الروايح دااماكلة فالزنقة ونرجعو للدار نطيبو ههه

سكينة: خرااا حيدي عليا جبتي ليا الضيقة.. غير كنتخيل كنمرض

ليلى: انا تهنيييت اختي من سفر القوافل

هند: ولاهيلا سفر القوافل.. الدراري اللي جات معاهم كيسافرو بوحدهم ويعيشو الحياة

سكينة: ليلى: تا حنا اختي نسافرو .. الى سافرنا منديروش هاد الحالة

سكينة: اوييلي واحد المرة مشيت مع مريم واسماء للبحر وجابو خوتهم تفووو على ديكور .. دايين معاهم شوارما من الدار وجالسين كييقسموها ويتحاسبو ويفرقو بالنص والدبار يخخ على مرض

هند: حتى الرباط زوين ماشي ضاروري تسافرو بلاصة اخرى

سكينة: حنا راحنا ساكنين هنا سنين ومنين وكبرنا هنا من الاروض طلع لينا فراسنا .. نتي غيعجبك حيت عاد كتكتاشفي اما انا كتعجبني فيه غير الماكلة والحديد ههههه هبطتي لحي الرياض؟

هند: لا (يدها على خدها)

ليلى: هههه خاصك تهبطي ضاروووري

هند: نمشيو كاملين؟

سكينة: شافت فليلى) غدا عندنا شي عرس ياك

ليلى: ااه

سكينة: صافي نمشيو بعد غدا

هند: عنداكم تنساوني

قولها وضحك عليها ومن شدة الحماس والفرحة دهند دتخت متبقاتش عارفة فين كتحط رجليها ..اما العرسان بحال اي عرسان ..قطعو الحلوى ودوزو المراسم وسالات الحفلة وناض الكل يمشي بحالو وكلشي تجمع شي كيسلم على شي الا ليلى اللي بقات جالسة هي وايناس .. اما الباقي شي كيبارك لشي وسكينة كتسلم على هند وضحك معاها

هند: بالحناك) نمرتي قيديها عندك عنداكي تنساي الزين صافي

سكينة: صافي قيدتها

هند: تهلاي فراسك ولاهيلا معرفة زويينة ههه

دازت منال تسلم وكانت تقيلة ومررنة كتبسم وتشوف فسكينة عن قرب ومدات حنكها كتسلم

منال: الله يجعل كلشي مبارك ومسعود احبيبة

سكينة: بعفوية) اميين شكرا اختي

رجعات اللور وداز سمير كيمد يدو حادر راسو كيسلم ويالاه حيد من الطريق بان غالي موراه وجات عينو فعين سكينة وسارة حداه هازة خنافرها ومن شدة الارتباك دارت سكينة يدها على نيفها جاتها الضحكة ومدات يدها ليه وخرج يدو من الجيب بسرعة مرتابك وضحك وصافحها كيتمتم واكتفى حرك راسو ورجع اللور وهي دورات وجهها دغيا في حين سارة شدات فدراعو ووجهها اصفر وقفات قدامو درقاتو

سارة: يالاه نمشيو ..يالاه

رجعات سكينة حمرا وبذات كضحك بوحدها وكتسلم على الباقية ودارت اسية حتى هي تبسمات ليها

اسية: الله يوم المسرات .. خليناكم على خير

سميرة: كتسلم عليها ) امين الحبيبة الله يجعل كلشي مبارك ومسعود

مونية: بالفرحة) الله يكمل كولشي بيخير

بناصر: خارج مع رشيد مشادين فاليدين) ايوا الشي رشيد دابا وجعنا عائلة خخههخخخخخخكخكخكخكخ

السي رشيد: ضاروري تجيو تزورونا فمكناس ان شاء الله

بناصر: ندوزو شي نهار هاديك الطريق ديالنا لخنيفوة

السي رشيد: الدار راه داااركم السي بناصر خااوية اجي تمرح نتا والعائلة مرحباا بيك

بناصر: ان شا الله نجيو نجيو

السي رشيد: ايوا خليناكم على خير والله يتاويهم لي فيها الخير..

هشام : فالبيت مع رانيا) صافي.. هانا غادي.. تا نعيط ليك فتيليفون

رانيا: بسعادة وخجل) صافي

هشام: اي حاجة عيطي ليا .. خلي تيليفون شاعل

رانيا: صافي

دور عينيه يمين وشمال وقرب ليها كيفرنس باسها فحنكها وهي كتحمار وتصفار وهبطات راسها كتعرق وتبدل حوايجها وكتشوف فالخاتم فيدها بالحنة فرحانة بيه ،، خوات الفيلا وبداو كيجمعو حوايجهم وبدلو جري عليا نجري عليك عاوتاني وشي معصب على شي وشي كيوصل في حين جلسات سارة مربعة يديها فالطموبيل بينما كلشي نزل وطلع للدار وغالي كيشوف فيها ويتسناها تنزل

غالي: يالاه نطلعو غنبقاو هنا

سارة: جلس بلاتي حتى نتفاهمو

غالي: بملل) وراني عيااان باغي ندوش ونرتاح مغنبقاش هنا كنتسناك تنزلي على خاطرك

سارة: بجنون) واش يديك طوال ؟؟؟ طواااال هااا؟؟ شداك تمدها وتسلم عليهاااا

غالي: بغضب) لا نتي مريضة… نتي مريضة والله تا مريضة الى عندك شي مشكل ولا شي عقدة فحياتك سيري شوفي الطبيب

سارة: كترعد) انا عندي مشكل؟؟ انا عندي عقدة فحياتي!!

رجعات حمرا وتزيرات وتغددات وماعجبهاش الرد وجاها بحال الى فضل سكينة عليها والسلام جاه عادي لاكن هضرتها هي جاتو ماشي عادية وحسات بيه دار التمييز وحتى باش تجاوبو بالعقل ماجاوبهاش هوا بطريقة هادية ودغيا طلع ليه الدم الشيء اللي خلاها تنفاجر وبدات كضرب الباربريز بيديها بدون شعور وكتغوت بهستيرية وشعرها كيمشي ويجي وكتبكي

سارة: ها المريييضة… هااا المسطييياااااااغغغغغغغ

تفاجئء من ردة فعلها وبدا كيشد ليها يديها وهي كتنفض وهوا كيشد وتعصب وبدا كيغوت

غالي: علااااش هاد المرض هادا كااامل علاااااش اشنو وقع ؟؟؟

سارة: ماسلللللمش عليهااااا ماضحكككككش معاها علاااااش مديتي يدك ماتمدهاااااااش

دفعاتو وكتنهج وتبكي وتنخصص جاتها السخفة وبغات ضرب بجنون لاكن شد ليها يديها وكيحاول يهدنها لاكن فقدات السيطرة على اعصابها وبدات كدفعو وتغوت وسط الطموبيل

سارة: نتااااا بااقي عينك فييينا بااااقي مالك مادورتيش وجههك مالك ما جمعتيش يدك … قتلتييييني مرضايييني ااهههههئ اىء اهىء نتااا اللي مريييض ونتا اللي خصك تعااالج اناااا مابغيتهااااش متبغيتهاااااش تبقا فحياتنا ماتبقااااااش

دفعات الباب بالجهد كتبكي وعينيها حومر بغات طلع فديك الحالة للدار ترونهم لاكن نزل بسرعة وتبعها حتى شدها من اللور وقنتها كينهج وعروق راسو منفوخين وشدها كيبردها مع واحد الحيط

غالي: سمعي واسمعييي .. ديري عقلك عادي نهضرو وغنتفاهمو ماعندها حتى معنى طلعي للدار وتنوضي الصداع على والو وعلاش على السلام وسلمنا على كلشي بحال كاع الناس

سارة: كتنهج) طلق منيييي… طلق(فشلات) عيييت انا عيييت .. كيضرني قلبي

غالي: بأسى) وصافي الله يرضي عليك سمعي ليا .. (باس ليها راسها) صافي نعلي الشيطان بناااقص من شي سلام كاع .. يخخخ

ردها كتميل للطموبيل دخلها جلسات فالطموبيل وتكات فشلانة وفازكة بالدموع ويدها على صدرها مابقاش عندها الجهد تهضر .. مد ليها الماء شربات وكتهضر بزز وهوا متكي بيدو على الباب وراسو على يدو كيشوف فيها وساكت

سارة: بعد من البنااات .. واا بعد منهم ماتسلمش عليهم.. بغيتو تفقصوني ااااه (شدات فصدرها) نتا وخواتاتك كديروها ليا بلعاااني

غالي: شد جبهتو ووقف) الله يهديك اشمن بلعاني حشوومة تسيئي الضن اهاد الدرجة كااع ولا هيلا سي كغااااف

بغات تموت وتقجات ورجعات حالتها حالة والنفس تقطعات فيها .. بقا معاها بشوية بشوية حتى تهدنات و تيليفونو مابغاتش يسكت كل شوية يصوني وباه وتصوني مو وداخ بيناتهم وبقا كيحاول مع سارة وبانت عليه تعصب لاكن كيرغبها بشوية

غالي: ماشي قدام لافامي تمشي لافامي ونبقا انا وياك ونشوفو حل لهادشي

سارة: مغنطلعش(كتشهق) طلق من يدي

غالي: واديري لي خاطري يالاه حشوومة الناس عندنا فالدار ونتي دايرة هاد الحالة كولشي غيتبرزط معانا

سارة: دفعاتو)طلاااق مني

وقف وشد راسو وبدا كيدور ويسوط وهي كتبكي لداخل والتيليفون كيصوني ورد بعصبية

غالي: هانا جاااي اش كاين صافي قلت لك جاي جاي(قطع وتلفت) دابا غطلعي ولا لا؟؟

سارة: لا

غالي: مغطلعيش؟

سارة: سير عطيني بتيساع

معاودش الهضرة وطلع خلاها فالطموبيل ودخل لقاهم ضاحكين ناشطين لاكن هوا طالع ليه الدم ومو كتسول على اسية .. ماردش عليها ومشا للبيت بدل حوايجو ولبس لباس رياضي وخرج لقاها مزالة جالسة فالطموبيل كتمسح نيفها وتهضر فتيليون وداز حداها ماهضرش معاها مشا يتسخر ..اما هي طيبات تيليفون بالسخونية والبكا على بشرى كتفش قلبها وتشكي بحال عادتها حتى بردات ومسحات عينيها عاد طلعات للدار ودخلات كتشوف بنص عين مشات للبيت سدات عليها الباب في حين ونيسة جالسة متبعة ليها العين وبنتها فيدها كتمشي وتجي بيها وقالت لمنال اللي حداها

ونيسة: قلة الاداب.. الناس عندها فالدار وهي سادة عليها فالبيت

منال: ضبر راسها

ميعات ونيسة بعينيها وبقات عاسة عليها حتى خرجات بالبيجامة ومشات للكوزينة كدور ومكتهضر مكتنطق وتبعاتها كتبسم ليها وتشوف فيها

ونيسة: مالكي..واش مريضة

سارة: بلا متشوفيها) ضربني البرد

ونيسة: الصراحة كنت بغيت نقوليك شي حاجة ولاكن بنتي ليا عياانة

سارة: ضارت عندها)شنو ؟؟ شنو كاين؟

ونيسة: كدور عينيها) بلاتي بلاتي

مشات طلات من باب المطبخ ورجعات عند سارة قربات ليها وقالت بخفوت

ونيسة: بغمزة)بلحق خليها غير بيني وبينك حيت دابا غادي نمشيو تشوف تشوف فوقاش نتشاوفو عاوتاني

سارة: عقدات حجبانها) غير قولي قولي

ونيسة: فاش كنا فاخطوبة بانت ليا واحد البنت لابسة قفطان غوز شعرها كحل..

سارة:حلات عينيها )مالها؟

ونيسة: كنت شفتها فواحد التصويرة مع راجلك (كتراري ببنتها) مصورة هي وياه ودخلني الشك فاللول ولاكن متأكدة هي باقاعاثلة عليها

سارة: هزات نيفها) وفين شفتي هاد التصويرة؟

ونيسة: غيير بالصدفة فتيليفون ديالو .. المهم راه ماشي غير تصورة بعدا وحدة عاقلةعليها مصورين على برا واقيلا ففرنسا معنقها داير ليها هااكا فالشارع

سارة رجعات حمرا وتزيرات بدات كتغلي لاك حركات راسها فالايجاب وقالت بالنفخة

سارة: اااه ..اه اه عاود ليا عليها ..غير كان كيدوز الوقت وصافي ..لالا عاااود ليا كولشي مكيخبيغليا واالو

ونيسة: ااامم..ايوا المهم غير خست شفتها تما بغيت نقولها ليك تردي البال..اشنو كدير تما ؟؟

سارة: ماعرفتش

حطات الكاس وخرجات هازة خنافرها دخلات للحمام تفركعات فيه بالغدايد وكتحاك وتهز هادي وتحط هادي واغسل وجهها حتى سمعات صوتو برا كيهضر عاد خلات الباب وخرجات

خوات الدار ورجعات العائلة لمكناس وبقات غير سارة مع حماتها ومنال وهند فالدار ،. اما غالي مابقاش كيدور غالدار وكيتهرب من لقاء سارة او الحديث معاها ودار السبة بالسفر اللي غيسافر لغد لهيه وشد مو حداه كتعاونو فالباليزة بينما دخل دوش ومن الدوش مباشرة خرج يتقدا داكشي اللي غياخد معاه ومارجع حتى للحداش دالليل ودخل كيجمع ما تبقى من اغراضو فابيتو حتى دخلات عليه سارة فجأة وشدات الباب وتكات عليه باصرار وقالت هازة راسها

سارة: دابا فرحان مسافر بوحدك

غالي: ببرودة) ايوا نتي ماخلاوكش تاخدي شهر كامل شغندير ليك انا

سارة: دابا غترتاااح ودير اللي بغيتي

غالي: مافيا اللي يتشاد معاك والله.. الصباح فايق بكري وخاصني نعس.. من بعد نهضرو

وقف الشنطة فالقنت ومشا لبلاصتو عطاها بالضهر نعس حتى داز الوقت وتأكدات انه نعس عاد مشات بشوية حلات الباب وطلات عليه لقاتو ناعس على كرشو ويدو تحت المخدة … بغات تجر البابيزة بزز ماقدراتش جاتها تقيلة ومشات للشنطة الصغيرة جراتها عرفاتها فيها حوايج اكثر من الشنطة لكبيرة اللي فيها الاحدية والحاسوب والبذلات الرسمية محددين ووقفات عليه كتشوف اش كيجمع ..خرجاتها بشوية لواحد البيت اخر وسدات الباب وتكاتها مع الارض حلاتها وطلات عليها ويدها على جنبها

سارة: هاي هاي هاي غادي للخدمة ولا غادي تسارا !

هبطات عليها كتجبد وتشوف الحوايج اللي جمع وبدات تحيد تيشورطات والشورطات وكتعزل وتمتم

سارة: لا صافي برااكة.. خلي ليه هادا براكة عليه

خلات ليه دجينز واحد ورجعات البيت حطات ليه تيشورطات عاديينبلاضة الحوايج الجداد المستفين وبدات كتقلب الملابس الداخلية لقاتو شاري كلشي جديد وكلهم ديال القطن وضرباتهم بغيض وسدات الشنطة وجراتها بلا حس للبيت وعاودات جربات تجر الشنطة الكبيرة وعاضة شنايفها خايفة تحصل،،بقات كدفعها شبر بشبر حتى خرجاتها وسدات الباب ودخلات كدفع فيها للبيت وبدات كتزرب طيحاتها على الارض وحلاتها خرجات البذلات الرسمية دالخدمة اللي كانو مقادين كل وحدة مغلفة بوحدها حيداتهم من الطريق وبدات كتقلب بان ليها الحاسوب وتوب كحل ديال فراش جديد بالمخاد ديالو غير الاغلفة فقط بعداتهم وبدات كتقلب لقات كارطونة فيها صباطو وتقاشر الخدمة مجموعين وصندالة رياضية وحذاء رياضي وشي سورفيتات رياضيين وواحد لاتروس فيها اغراضو. ميكات عليها لاكن حيدات ليه الروايح خلاتو بلا ريحة وبلا زيت مولفها لشعرو ولحيتو وسداتها وناضت كدفع فيها وجعاتها بلاصتها ومشات بخطوات تابتة كتسلت دخلات حداه نعسات .

الصباح مع الفجر رما يدو لقاها حداه وتقلب عنقها من اللور باسها فعنقها و حسات بيه وضارت عطاتو بالضهر ،، ناض طل عليها كيفيقها ويبوسها لاكن هزات كتفها وقالت

سارة: ماهضرش معايا

غالي: مغنهضرش معاك غير دوري

لاحت ليه يدو اللور وهز راسو بقا كيشوف فيها ويشوف فيدو وتقلب لاح الغطا ناض منفخ هاز خنافرو ودافع صدرو كيخبط ويزدح دخل لحمام توضا ورجع لاح السجادة كيصلي ومعصب وكيزفر حتى كمل صلاتو وبدا كيوجد راسو باش يشد الطريق وكيقلب وراقيه وغادي جاي معصب وهي كتشوف فيه بنص عين ودير راسها ناعسة .. رجع للبيت شاد البزطام فيدو لقاها حالة عينيها وهز الفلوس مطويين وحاجبو فالسما وقال

غالي: هادو للضارورة ..للمرض ولا شي حاجة وقفتي عليهم فغيابي(خزر فيها) والوالدة راه غتكلف بالمصايف ديال الدار ..ماخصني صدع ولا حريق فالراس ولاشي تيليفون يجيني يطيرو ليا

حطهم وهي كتشوف في ساكتة وكطلع فيه كان فغاية الاناقة والنضافة والوسامة بدات كتزفر حتى هي وتنفخ فصمت ..اما هوا خرج الشنط ديالو قدامو وكانت اسية واقفة معاه دايخة بالنعاس شادة الفلوس فيدها مكمشاهم كدعي معاه حتى وصل للباب وخرجات عند كتجري حتى هي دايخة بالنعاس مشات عندو سلمات عليه

هند: غالي مشيتي

عنقاتو كتبحلس عليه حتى دخل يدو فجيبو جبد الفلوس فرحها عاد رجعات اللور من بعد ما عنقاتر واشثة كدور راسها

اسية: احيااني عليك

غالي: بالاه الله يعاون… بلا مشاكيل دابا..خليونا نسافرو فخاطرنا

اسية: لالا مكاين مشاكيل ان شاء الله .. غنوجدو للعرض دمنال ان شاء الله على بيدمن تجي

غالي: يالاه الله يعاون

فتيليفون وبعد حديث طويل كان كيقلب على دخلة يبدا بيها الموضوع ومن جملة لجملة وصل للموضوع اللي بغا يجبد وقال

هشام: ااه وا كنت كنعرفها ولاكن غير تدواز الوقت وصافي ماشي كنت ناااوي معاها شي حاجة .

رانيا: كتفرنس مخرجة لسانها)اه

هشام: صافيمن بعد فاشتعرفت عليك مابقات فحياتي حتى شي بنت

رانيا: امم(فرحانة) عادي

هشام: كانت سميتها نرجس… كانت باغا حتى هي غير دوز الوقت وصافي.. ولاكن الانسان كيدير الحلالغسر باش يبعد من الحرام

رانيا: ااه بصح

هشام: قلتي ليا ختك سميتها سكينة ؟

رانيا: اه ..مكانتش فالخطوبة اللولة

هشام: امم..علاش مكانتش؟

رانيا:حيت كدير داكشي تنكاف.. راني قلت ليك نكافة نسيتي

هشام: اه اه نسيت. امم كنتي قلتيها ليا… ولاكن هي متحررة شوية لا

رانيا: هي متمردة شوية وصافي ولاكن ماشي خايبة .

هشام: اامم.. بنتي ليا كتفااهمي نتي وياها

رانيا: ههه شوية

هشام: الصراحة ديك الخدمة اللي خدامة ما خدمة ما والو

رانيا: هي بغاتها ..مالقينا منقولو ليها

هشام: في حيرة) امم.. واكن جلسات فدار باها حسن .. لأن المرى ماتخلقاتش للخدمة ..المرى تخلقات باش تسعد الراجل وتولد الولاد وتخدم بيتها وتربي اولادها وطيع راجلها .. كن تجلس فدارها حسن ليها وارحم..محاولتيش تنصحيها وتوريها

رانيا: لالا مغتبغيش.. دابا راه عندها مسؤووولية وشرات الدار بستة وتمانين مليون حطات فيها النص خاصها ضاروري تكملها ..

هشام: بتعجب) علاش شحال دابا وهي خدامة ؟

رانيا: عام دابا

هشام: وشارية الدار بستة وتمانين شي حاجة ماشي هي هاديك

رانيا: لااا راه غير النص اللي حطات ولا واقيلا كتر من النص..مهم شي ستة وثلاتين اللي بقات ليها ماكملاتهاش حيت شرات فالبلان

هشام: لااالالا(بصوت تقيل) هادي ماااشي دقة تنكاافت

رانيا: بنية)لالا راه كتخدم

هشام: واش تنكافت غادي دير ليها الدار بستة وتمانين فعام ..صحابي كيكريو الطموبيلات كي داايرين وماداروهاش

رانيا: راه حيت ماشي غير تنكافاللس دايرة حتى تكاشط الكرا وكتخدم مع الناس

هشام: وشحال كااع كدخل فالشهر فهاد الدومين

رانيا: صراحة ماعرفتش

هشام: نتي بااااقا نية.. كن كانت تنكافت كدخل هاد الفلوس كلها كوراه كلشي دايرها

رانيا: اويلي ومنين غتجيبهم!

هشام: راني قلت ليك نتي مزاالة نية… وها. الخدمة ديالها كتخدمها حتى بالليل؟

رانيا: اه راه العراسات كيكونو بالليل

هشام: وهاد باك ماعندو حكام عليها! طالق البنت تخدم بالليل!! …بان ليا هادشي فشكااال عندكم

رانيا: كيفاش فشكل؟؟

هشام: غيير كنهضر.. مهم نتي خليك بعيدة عليها وعلى داكشي اللي كدير ..

رانيا: مالها شنو كدير؟؟!

هشام: هي عقلتها ماشي بحال عقليتك نتي… غتأثر عليك بأفكار سلبية من الاحسن خلي بيناتكم الحدود ماتخرجي مادخلي معاها

رانيا: لالا انا اصلا عندي صاحبتي وحدة اللي كنت عاردت ليك عليها

هشام: شوف ارانيا حبيبتي .. انا ماكنعرف لا صاحبتي لا ختي.. غتبعدي نن البنات والى بغيتي تهضري هضري معايا وشكي عليا انا غنسمع ليك.. الوقت اللي بغيتي تلقايني موجود.. وهادشي هادا من الاحسن نوقفو باش نعيشو مرتااحين

رانيا: كتبسم) ايوا صافي

هشام: تافقنا ؟

رانيا: تافقنا

هشام: اللي وقعات عاوديها ليا صافي احبيبتي

رانيا: بخجل)صافي

هنا فتيليفون كيهضرو وسكينة فالصالون واقفة ويدها على جنبها دافرة شعرها الطويل ولابسة تيشورط ابيض واسع مستيلي وسروال دجنز زرق قصير وكلاكيطة رياضية فالغوز بحال ديال الدراري ودفار رجليها طوال مصبغين وفصيعها هاتم رقيق وخلخال رقيق ويديها كذلك مزينة بخواتم فاصابعها كاملين رقاق ودفارها طوال مصبوغين ب بيبي بومبر ويديها نقيين وحمرين من لداخل جالسة كتسنى ليلى تسالي وفيدها صاك كحل مربع صغير فيه اغراضها والنكافات جالسين كيتسناو العروسة تكمل حتى سالات وناضو يلبسوها في حين بدات ليلى وكنزة حتى هي كتوجد راسها وتوجد الماطيريال باش يمشيو مع لعروسة للقاعة

ليلى: غتمشي هاكا مغتلبسيش حوايجك؟

سكينة: بخفوت) ماشي شي عااارس غير قضي وعدي

ليلى: واييه… وشغنديرو الصبر

سكينة: مسكينة ماعندهاش ونهار جات عندي بقااا ت فيا .. وزويينة قلت ماشي مشكل مسكينة بغات تفرح براسها وماعندهاش وبقاو كيرغبوني على ديك نوفيل كوليكسيون قلت ماشي مشكل صافي .. عندها ضروف وكدا نيشرو معاها

ليلى: حتى انا داكشي اللي قالو ليا مدايرينش شي عااارس غير بغاو يفرحو وصافي تقاديت معاها فالثمن

سكينة: دايرين فقاعة ياكي

ليلى: لااالا غير دار وصافي راه قلت ليك ماعندهاااش

سكينة: ااه اه نسيت .. مهم انا عيط ليا جيلالي مابقيتش غنمشي معاكم فطموبيل غنمشي معاه فالسطافيط والنكافات راه وصلهم لتما بالعمارية واااجدين.. غادي ندوز لقاعة سنتيسي هي اللولة العروسة راه قربات تركب فالطيفور باش نتخلص منها ونهزو الميادي فاش تهبط ونجيبهم ونجي نتوما اصلا عاد غتبداو .

ليلى: صافي يالاه سيري نتلاقاو تما

سكينة ورجعات للحانوت فين كانت سطافيط بيضا دالخدمة كتسناها وركبات لقدام حدا الجيلالي الراجل الستيني ومشات لقاعة اخرى فحي اهر فخمة فيها كان مقيوم عرس كبير وجات مع الركبة فالميدة مباشرة لقات العروسة كتلبس والنكافات ضايرين بيها..شدات خلاصها كضحك وتبارك وتتبسم وتهضر مع ميكاب ارتست ولد كان خدام تما دارت معاه معرفة وجلسات تسنات العروسة حتى نزلات وهزات حوايجها كلهم خرجاتهم خلات ليها غير النكافات واللبسة البيضا اللي تقطع فيها الحلوى وركبات لقدام والدرادي اللور اللي غيبداو الخدمة معاها فالعرس الثاني ويكملو طناش باش يهزو العروسة والعريس.

يالاه شدو الطريق راجعين للمحل يحطو العمارية ويكملو الطريق عند العروسة صونات عليها ليليى كضحك وقالت

ليلى: الزين ههه جايا

سكينة: فالطريق اااه

ليلى : بغيت غير نعلمك باش متصدميش وصافي

سكينة : شنو كاين!!

ليلى: مهم وجدي راسك للصدمة لكبرى

سكينة: ارييلي شكاين (كتسمع الموسيقى الشعبية) ركبات لعروسة فالعمارية؟

ليلى: ركبااات ونزلاااات على انغام المريني

سكينة: اينا مريني!!

ليلى: اويلي لمريني المغني.. العرس احبيبة لاكلاااااص دو لاكلااااص وحنا ضحكو علينا بجوج دريال

سكينة: اويلي علا ماشي فدار!!

ليلى: الفيرمة هي الدار ..واااجي دابا تشوفي الفيرمة وتريتووورر ..ح٠مي ابب والسوشي كيتفرق..والمصور ت٠زي… وعيساااوا مهم داكشي بلااا منوصف ليك حتى تجي وتشوفي بعينيك.. اه ونزيدك لابيسين سبوت لايت ههه

سكينة: بصدمة ) كتهضري بصح!

ليلى: هانتي جايا و غتشوفي بعيييينك

سكينة: عقدات حجبانها مصدومة) هانا جايا وغنشوف

قطعات وبقات مصمرة ساهية كتشوف قدامها والسطافيط غادية كتميل وكتشوق الطريق خرجو شوية على المدينة حتى وصلو لباب ديال لحديد كبير ودخلو معاه بان ليها غير النخل طالع والاضواء هنا رك ولهيه والجرادي محلقين فالجنابحتى وقفات السطافيط باشارة من العساس اللي وراهم فين يوقفو قدام واحد الباب ونزلات مخرجة عينيها كتشوف المنضر والمكان والموسيقى والسيارات مستفة هنا ولهيه .. نزلو ربعة دراري اللي معاها من اللور وشارت بيدها ليهم وعينيها فالفيرمة والشكل دالبني باينة غالية وقالت

سكينة: خليو هادشي غي هنا تا يقربو يلبسوها وندخلوه

رضى: كيتمنضر) الناس اللي عايشة

سكينة: بدات كتغلي) انا غنوري ز٠٠٠ بوها الناس اللي عايشة ..بنت لحرام ضحكات عليا..

رضى: كيضحك)وااسووكا … ههه جابو ليك شواهد الضعف هههخخ

حمزة: يديه على جنابو) قولبوك ولا

سكينة: سكينة وتيليفون فيدها) والله اولدي لا طلعات فهاد الطيفور.. عاد حطني الكار انا تجي تخورني انا غنوريهم

هزات الصاك وكتفكر وعقلها فالسما وغير ساهية كدور فبلاصتها بحال البانضة وكتخمم وتشوف المنضر ومشات دخلات بينما ناض رضى اللي يالاه تكا فالميدة وشار بيدو لحمزة غمزو بمعنى يالاه تبع . ودخلو موراها غاديين مع جناب الدخلة وراها وكيشوفو فالقاعة والجوق والعرس اسطوري وهي غادية وكتوقف وتهز عينيها ..بان ليها واحد قدام سولاتو علو بيت العروسة نعتو ليها ومشات طلعات مع الدروج لقات واحد اخر من دراري دالهزة اللي كانو تما نازل يالاه بدل حوايجو شافها وبغا يتبسم لاكن شافها مزيرة وجهها احمر

عصام: فين عاد ؟؟

سكينة: طلعو ليا الصبع.. بلاتي ندوز ..اينا باب هادا ولا هادا

عصام: مالكم اش واقع؟ (شار بصبعو للباب) رضى::هز يدو)ها حنا هنا سكينة

حلات الباب ومن وجهها باينة مقصحة ومكمداها وردات البابوراها لقات ليلى واقفة كتقاد الشعر وحتى هي طالع ليها الدم مكضحكش .. اما النكافات جالسين مستفين وحدة حدا وحدة ولعروسة لابسة تكشيطة دالرفيع وجالسة بلا حزام على الكرسي كتقاد وكنزة واقفة كتمد لليلى وتعاونها ،، لقت سكينة نضرة وصاكها مكمش تحت باطها ومشات وقفات حدا العروسة تبسمات ليها والعروسة ختى هي هزا راسها تبسمات وشارت بصيعانها بطريقة متعالية وابتسامة فالسما عاجبها راسها تقول ماشي هاديك اللي كانت خادرة الراس وكتشكي وتبكي

سكينة: بالصحة والراحة..(شافت فليليى اللي غمزاتها) اللبسةالثانيةهادي؟

كنزة: بنص عين كذور راسها) اه الثانية

سكينة: تحنات على العروسة بلطف) حبيبة ديالي.. عاجبك الحال

العروسة: ااه احبيبة هههمم

سكينة: بانزعاج) انا احبيبة ماعاجبنيش الحال .. فاش جيتي عندي شنو قلتي ليا ؟؟

نخزات النكافة نكافة وبداو يتغامزو وحتى هما مفقوصين وبغاوها فالعروسة لاكن العروسة دورات وجهها هارة راسها وشعرها كيتصاوب وقالت

العروسة: هانتي ها ماما لتحت هضري معاها حيت عيانة (تبسمات ) الى كاين شي مشكل تفاهمي معاها عفاك

هزات سكينة راسها وماعجبهاش الحال ماكرهاتش تفجر غضبها فديك الساعة لاكن كتمات الغيض وقالت

سكينة: فين ماماك؟؟ شي واحد يعيط على مها طلع الله يخليكم

اخت العروسة: عاد خارجة من طواليط) شنو كاين؟؟

سكينة: شارت بصبعها ) نتي ختها ؟؟ نتي اللي كنتي جيتي معاها ديك المرى؟..عيطي على ماماك اختي

الاخت: كتقاد تكشيطة) علاش اش. واقع ؟؟

سكينة: عيطي عليها الله يخليك.. هي اللي تجي تفاهم معايا

العروسة: عيطي ليها على بايا

سكينة: عيط اختي على باك

وقفات حدا ليلى همسات ليها فودنها وقالت

سكينة: حبسي لخرى تا يجيو واليدين هاد الق٠٠وة

كنزة: وقفات حداها) مها واااحد الشالوطية

سكينة: ربعات يديها) تعاود لمها.

دخلات الام هازة الراس ماعقلاتهاش سكينة فالاول بالذهب والتكشيطة والتكحيلة واخا بلدية والحناني فاليدين ومخرجة عينيها كتشوف باينة وصلاتها الخبار اما العروسة جالسة كتميع بفمها وكتشوف وخواتاتها داخلين ورا مهم كلهم بالتكشاط يشوفو اش واقع كيخلعو اللي ميتخلع بديك المحمية .

الام: هانا بنيتي شكون اللي بغاني.

سكينة: انا اللي عيطت ليك الحاجة(خرجات من بين ليلى وكنزة) نهار جيتي عندي اش قلتي ليا؟؟

الام: اييه اش قلت ليك؟

سكينة: قلت ليا مافحالناش وماعندناش والعرض فالدار وقلت ليك داك الثمن مكنخرج بيه انا ولاكن غنتعاون معاك على قلة الشي .. اما دابا راه هضرة اخرااا وماتافقناش كااع على هادشي

الام: دابا شبغيتينا نديرو ليك؟ فهمينا

سكينة: غتخلصيني بالثمن باش كنخرج حيت الوضع تبذل

الام: كيفاش خلصيني كيفاش نهار اللول تافقنا على الخلاص صافي الصلاة على النبي درتي نعانا الثمن عطينا العربون

العروسة دورات وحهها ضحكات بسخرية على سكينة وربعات يديها كتسمع في حين ناضو الخواتات كلهم كيهضرو دقة وحدة ويقاو عليها مكايناش هاد الهضرة ومكاينش هاد الاتفاق النهار الارل درنا وفعلنا وعطينا العروبن وهادشي مكاين فحتى بلاصة وقصحو معاها الهضرة بالامر وتخراج العينين

الاخت: دابا ديري خدمتك وشدي خلاصك وسيري الله يسهل عليك

ليلى : تدخلات) اختي ابشوية عفاك حنا تافقنا نهار اللول اه وعطيناكم الكلمة حسب الهضرة اللي قلتو لينا ولاكن كولشي مبدل

الام: هانتوما دابا خدامين ونتونا اللي رضيتو

سكينة: هزات صبعها) نرضاااو بخااطرنا … ااه ماشي بزز ماشي بالكدوب

الاخت : اااه ااه ااه مدوب كااع

سكينة: شوف اختي انا ماجيتش ندايز .. يهضر واحد يتفاهم معايا مرحبا اما باش تغوفلو عليا كااملين راه مغتقضيو وااالو انا جالسة معاكم تا نشوفو شي حل

جلسات وشدات الارض كتسوط وليلى فنقاش هي وكنزة معاهم وقوة الهضرة ،، هزات سكينة تييليفون بعدات عليهم وحطات بعها على ودنها كتهضر

سكينة: رضى حمع العمارية دخلها فسطافيط هي والميادي وكاع الحزاق لا تنوض شي كييرة يهرسو ليا الماتيريال تا نشوفو شي حل

رضى: واش ندخل؟؟ دوي ندخلو؟

سكينة: لالا غا خليكم جمعو داكشي غبروه بعدا .. هادو طلعو ولاد لق٠٠اب مافيهم تيقة

قطعات وهمسات النكافة بداو كيطويو ويجمعو حسي مسيكي كيخبعو وكنزة كذلك كتجمع فالباليزة وتسد حيت اللي داز عليهم فالعراسات خلاهم يتعلمو ويضربو الف حساب لشحال من حاجة بينما ليلى وسكينة فنقاش والصهد والزمت .. ضارو شافو كلشي تجمع وكلشي تخبا وهزو يديهم بجوج رجعو اللور

سكينة: تا حنا ماقلنا والو .. ديرو معايا حل وهانا معاكم

الام: شارت بصبعها) سيري عيطي لباك سيري

سكينة: كتسوط) عيطي اختي لباك

العروسة: واش دابا انا غنبقا هاكا باغيين تخسرو ليا عرسي

ليلى: لاالا ابب حتى واحد مايخسرليك عرسك حنا كنقلبو على حل وصافي

العروسة: تافقتو نهار الاول صافي شنو بغيتو دابا

ليلى: متافقناش اختي اللي قلتو ماشي هوا اللي كاين حتا جايين سهرانين سامحين فديورنا فحياتنا وفراحتنا وواقفين هنا .. ولاكن نوقفو بلا خاطرنا وفوق نفسنا لا اختي وسمحي لينا

دخل الاب لقا الروينة وتدخل كيكشكش وخرج فسكينة طرب عرض كيشالي بيدو وشافو بنت وصغيرة بغاو يزمتوها والاب حتى هوا حساب ليه كيهضر مع وحدة من بناتو غادي تخضع ليه

الاب: مالكي شنو خاصك؟؟ البوليس؟؟ داابا يحضرو وتخلصي الخطية دالعرس كامل

سكينة: االشريفانا ماجاياش ندابز ولابغيتي تعيط للبوليس عيط ليهم انا حقي مانتنازلش عليه

الام: عيط ليها للبوليس عيط ليها لخالها سيري عيطي لخالك كوميسير لتحت

الاخت: راه عطاتنا توصيل فيه القد والقد نفكروك

سكينة: جبدي اختي التوصيل

الاب: اريه

العروسة: راه رجعناه ليها فاش ..خداوه النكافات قبيلا قبل ماتجي هي

الاب: جبدي داك التوصيل

سكينة: هزات يديها وراسها غالارض) ماشفت توصيل اانا

الخال: دخل بصوت شجي واقف والصدر لقداممخنزر) مالكماشًوااقع هنا …ياك لاباس

دخل الضابط بيناتهم وكان شاب ثلاتيني خواو ليه الطريق وخرج عينيه بحدة واقف وقفة ضابط وقال

الضابط: اش واقع هنا ؟؟

تعلقات فيه ختو كتعاود ليه وسكينة بعيدة كتسنى وتشوف هنا ولهيه

الضابط: صافي خرجي من هنا .. خرجوها برا ترتاح

خرجو ختو اللي هم العروس وتلفت عند سكينة شار بيديه بينما الاب كشاكشو خارجة والعريس كيبردو يفك

الضابط: شنو بغيتي دابا؟

سكينة: الثمن باش كنخرج يعطيوه ليا

الضابط: بصرامة) والى ماعطاوش؟؟ اش غديري؟

سكينة: عندير نص خدمة حتى انا بحال نص كلمة اللي عطاوني النهار اللول… ها العروسة لابسة تهبط باللبسة الثانية وصافي الله يسهل على الجميع

الضابط: بحدة) سمعي مزياان.. هادشي اللي كديري ماشي قانوني وغنعيط ليك دااابا لسطافيط تجي تهزك وهاد الهضرة قوليها تما

ليلى: بتدخل) الشريف حنا راه بنات القانون وكنعرفو القانون مزياان وهضرنا غير على حقنا .. نتا دابا كتستاغل السلطة ديالك فمكان مكيمثلكش كااع كرجل سلطة باش تهددنا وتآمرنا وحنا مزالين معارفين لا سميتك ولا بطاقة تعريفية ديالك ولا بذلة كتمثلك باش نتعرفو عليك!! حنا فعرس اسيدي

سكينة: جلسات وقلبات وجهها) هاحنا جالسين تا نشوفو هادشي فين غيخرج.. كضيعو غير وقتكم دابا

الضابط: جوج كلمات منعاودوهش.. غديري خدمتك ولا سطافيت تجي تهزك

نخزاتها ليلى وقالت بخفوت

ليلى: ماتجاوبيش لخرا انا غنضرب ليه واحد جوج كودات للودن غيتكمش للحنش اللي ولدو

قربات ليلى حداه وكلشي كيغوت كلشي باغي يبان واعر لاحت جوج كود كلمات سرية ورجعات اللور وقالت بخفوت

ليلى: والله مابغينا المشاكيل راه مهبطين كوارينا وعارفين العواقب.

هز خنافرو ودور راسو وسط داك الغوات والهضرة ولخرين مزالين كيقلبو على التوصيل وكثرة اللغيط في حين الضابط بقا كيرجع اللور حتى خرج من وسط ديك المعماعة ومشاكيلها وجبد تيليفونو كيهضر فيه حتى بعد وخلاهم يعومو بحرهم وبقاو مني منك والشد والاخد فالتالي بداو يتفاوضو على الثمن من جديد ،،

ليلى: نخزات سكينة) اويلي طلعتي كاطريام!

سكينة: دفعاتها اللور بمرفقها)سكتي عندهم الفلوس

الام: كتحسب) بزاااف حتى نكافة ماقالت لينا هاد الثمن اللي قلتي

سكينة:هاداك هوا الثمن باش كنهرج وها بنتك تمسخني.. (ضارت العروسة) قلت ليك خمسطاش الف درهم ولا ماقلتهاش ليك؟ قلت ليها هاد اللباسي كنخرجهم زايدين ولالا؟؟ اما الرخاس ماجبتهمش كااع ليك

الاب: لالالا بزاااف هادشي غنزيدك ربعين الفريال

سكينة: قلبات وجهها ) لالا الشريف غير زيد حتى انا عندي مصاريف شوف شحال من واحد خصو يتخلص

الاخت: كنتي اصلا غتخلصيهم بداك الثمن اللي درتي معانا فاللول

سكينة: قلبات وجهها ) شغلي هاداك وانا اللي عارفة ليه.. كملو ليا رزقي نكمل خدمتي ونمشي بحالي

العروسة: بتوثر) مشاا الحال كتزيدو تعطلوني

بدا التوثر وجبدو الفلوس عطاوهم ليها بالنفخة شداتهم وبدات كتحسب ولسقات عليهم حتى ليلى زادوها بالنفخة والفقصة وتالفين بغاو غير يكملو لعرس وخرجو من تما في حين وقفو خواتات العروسة على راس سكينة بأمر وراسهم فالسما

الاخت: يالاه دابا كملي خدمتك داابا.. نشوفك

سكينة:بتقالة) بلااا ماتوقفي عليا ولا نوقف عليك خدمتنا راه كنعرفوها .. راكي عطيتيني غيير رزقي مازدتيني مازدتك باش توقفي عليا

العريس: كيخرج الاخت) صافي داباصافي.. خليو العرس يكمل(شاف فسكينة )كملي اختي خدمتك

سكينة: انا اصلا غنحيد من هنا اصلا

هزات صاكها خرجات مع الباب منفخة ودازت حدا الضابط ذارت راسها ماشافتوشو وهوا متبع ليها العين حتى خرجات لبرا ومشا تبعها

وقفات برا كتهضر مع رضى وحمزة كتعاود ليهم شنو وقع لداخل حتى سمعات صوت كيعيطليها وضارت تشوف والصاك تحت باطها

سكينة: هاهوا الضابط.. بلاتي نشوف شنو بغا

رجعات اللور مشاتعنذو حدا واحد النخلة وهوا مخنزر ومعبس كيشوف فيها من فوق النيفوكيهضر قاصح ..مد ليها يدو ماعرفاتو اش بغايدير وقال

الظابط: مكتسلميش ولا؟

سكينة: مدات يدها ) واخويا فماهمتكش دوختيني

الضباط: بدا كيضحك) شدي الارض الى دختي… شنو سميتك بعدا

سكينة: سكينة(قلبات عينيها)

الضابط: جواد

سكينة: متشرفين

الضابط: مالك قاصحة مع راسك

سكينة: هادشي اللي بغات الوقت وصحاب الحال

الضابط: دار يديه فالجيب) شنو درتو دابا فريتوها؟

سكينة: عطاوني رزقي.. حسابني غنلقا السطافيط هنا

الضابط: كيضحك )كااع…ههه هاد الزين كاامل ونهزوه فسطافيط

طلع ليها هرمون السعادة والانوثة وقالت كتلعب بشعرها

سكينة: اييوا الله وعلم

جبد تيليفون كيضحك مدو ليها وقال

جواد: قيدي نمرتك قيدي

سكينة: كتكتب) علاش لا .. تفكني الى شي نهار طحت فشي واحد بغا يجيب ليا سطافيط

جواد: كيضحك) كاع الكود بيسطو اللي عندك وتخافي طلعي فسطافيط… شكون عندك؟

سكينة: فاش؟

جواد: وراك عارفك علاش كنهضر ضاروري نحلو الالغاز؟

سكينة: مافهمتش

جواد: هز راسو كيتأمل)صافي بلاش…مهم غنعيطليك نديرو شي كافي..صافي؟

سكينة: ان شاء الله

جواد: يالاه منشدكشعلى شغلك

سكينة: يالاه بسلامة

حتى قرب العرس يسالي والعروسة لبسات لاغوب وخرجات عاد ناض الصدع وصدع كبير مع سكينة اللي كانو غينفتوها خواتات للعروسة وهي مكتعرفش لا ضرب ولا تجر وحدها كتهز رجلها دافع على راسها وفين ما جات او ضرب بواحد اليد واليد لاخرى شادة بيها صاكها.. كانو غياكلو لو ما فكوهاش الدراري ديال الهزة لاكن لسوء الحظ ناض خو العروسة حتى هوا دخل فالخط وتشاد مع رضى فالاول دفعني ندفعك وصوتهم كيكسر الارجاء وشوية بدات البونية بين الدراري وكبر الموضوع وتدخل الضابط كيجر وسكينة كتغوت وتجر رضى وحمزة تشاد فجهة اخرى حتى هوا وبغو يهرسو ليها الماتيريال وكملات الباهية بدات كتغوت وشي كيدفع شي وشي كيفك شي مدابز وشي فمو كيسيل بالدم شي تقطعات ليه تيشورط.. لاكن ولاد الهزة كانو كتار وبيهم شي طناش صحاب مع بعضياتهم ..فيهم المتزوج وفيهم اللي خدام وعندو حانوت وفيهم اللي كيخدم فشي شركة واللي كيبيع حوايج الدراري واللي خدام فقهوى المهم كلهم خدامين وكيخدمو فالعمارية حتى هي وكيمشيو مجموعين ويرجعو مجموعين وفبحال هاد المواقف اللي كتصادفهم دائما كينوضو يتحاماو كاملين وكيبعدو الماتريال ومكاين غير الدبزة والارض كتهز .. تفكو بمشقة النفس وفرقوهم وخرجو من تما من ديك الفيرمة مع الستة دالصباح والنهار طلع جمعو حوايجهم وركبات سكينة كتبكي مع ليلى فالطموبيل هي وكنزة وشادة تيليفون كتسول فرضى وحمزة اللي ضاربو بزاف ،،كرهات داك العرس ومايجي منو لاكن لحسن الحظ ماتهرسوش ليها حوايجها واخا المورال طاح وكلات قتلة دالعصا لاكن برداتها فاش كمدات فلوسها عندها ورجعات للدار فداك الصباح مقموشة وشعرها مشنتف دخلات بلا مدير الحس مشات لبلاصتها مباشرة وطاحت نعسات

من بين المهن الصعيبة واللي فيها مشاكيل كثيرة وخطار كبيرة هما المهن الليلة اللي كتنشط غالبا فالليل ،، كيواجهو مشاكل فالطرقان او مع الناس او مع الحديد او اوا او ، ومهنة النكافة صعيبة بزاف عكس كيف كيشوفوها الناس ..لاكن هي فالحقيقة رحيلها تقيل وكأنك كترحل كل ليلة واعمالها شاقة ومن غير التعب والوقوف على صورة العروس ومضهرها وزينتها فهي عندها جانباخر مرهق بكثير وهوا حمل الاغراض من مكان لمكان وترتيبهم وجمعهم فنهاية العرس فين كيكون كلشي عيان وكلشي باغيغير غيرتاح كتجي خدمة اخرى فين خاصهم يفكو كلشي ويحملوه فالحافلة ويمشيو بيه فداك الصباح حتى للمحل ويعاودو يهزوه ويحطوه وهادشي كيستغرق وقت ومجهود والعرس يقدر يسالي مع الستة لاكن النكافة ومجموعتها كيدخلو ليديورهم حتى للتسعود ولا العشرة وحتى كيكونو رجعو كل حاجة لبلاصتها ووصلو النكافات لديورهم والدراري كاين اللي كيمشي فالموطور ديالو وكاين الليعندو سيارة وكاين اللي كيوصلوه او كيشد طاكسي.

فاقت حتى للستة دلعشية كيف العادة فاش كتبات فشي عرس وخصوصا فاش كيكون العرس مضوبل على جوج او ثلاتة وكل قاعة فجهة كيكون الثعب مضويل. ناضت دايخة كتحط رجل هنا ورجل ولابسة شورط مقزب وديباردور ومشات حفيانة للحمام دازت على مونية اللي فالكوزينة كتصاوب طرح دالمسمن.. اللي خدم خدم واللي تغدا تغدا واللي رجع من الخدمة رجع وسكينة عاد غيبدا عندها النهار . دخلات للحمام سدات عليها وبدات عاوتاني الحرب والزديح ودورات بيها كااع المساحيق ديالها اللي كدخل معاها وتخرجهم معاها وبدات تحك فالسنان وتغسل فالوجه وتعاود ودهن مرهم تحت عينيها اللي معاونها باش ميتنفخوش عينيها او يزراقو بالسهير والمرطب دالشفاه ودهن وتعاود وتحل فالبواطة الغوز وتهاود تحل العلبة الزرقاء وتعاود تحل الصفرا ..شلا انواع ونكهات كدوز عليهم واحد واحد تحت الرشاشة وهي كدوش وتهز وطلي فالسكراب والمساحيق وتبدا فالشعر عاوتاني تحت الرشاشة ها الشمبوان ها الديميلور ها الماسك وتختمها بالوجه وبشي طاسة ديال الرغوة تعمر بيها ودنيها حتى كيخرجو البواقات ودوز ليهم فركة وتشلل وتزل للرجلين دوز ليهم موس دالحسانة الى مكانش عندها الوقت ولا خارجة ديك الساعة وشات شي زغبات طالعين.. . شللات وبدات كدور بلاصتها وتقلب على مساحيقها وتشللهم واحد واحد وتجمعهم عاد لوات عليها فوطة كترمش وتشوف فجانبها واش نسات ي حاجة وتبت الفوطة على راسها وطبطب عليها عاد تخرج وتمشي لبيتها تجلس واحد الساعة قدام الماريو ساهية فيه كتفكر اشنو تلبس وباش تخرج

مونية: ها حقك دالغداااا

سكينة: ساهية)مافياا اللي ياكل…بابا مزال ماجا من الخدمة

مونية: باك مشا للبلاد حناك مريضة مشا يشوفها

سكينة: ااه (بارتياح)

ناضت نيشان جبدات واحد الشورط قصير ديال التوب طالع فوق السرة وفين صدايف غلاض مذهبين مصافين صف على ليمن وصف على ليسر ولبسات معاه طوب غير بالسميطات على لكتاف والقصةمن الصدر مربعة والضهر كذلك وصندالة خفيفة وهزات صاك عادي فيدها فيه اغراضها وصاك اخر صغير لبساتو جنب بحزام طويل وزادت مع الطريق قبل ماتشوفها مونية.. لاكن هايهات ثم هايهات.. مونية غير كتسمع حسها داز كتنوضطل كتجري تشوفها باش خارجة باش تسنتج فين غتمشي وعرفاتها غادية لشي بلاصة ماشي للمحل..طبعا بناصر مسافر سكينة خصها تستاغل الفرصة

مونية: من النافدة اللي كطل على وسط العمارة ) اش ديك الحالة واش مخفتيش تموتي هاكاك وتمشي لجهنم

سكينة: هابطة بشوية عليها كتشوفق قدامها) غا خليني نمشي لجهنم

هبطات بشوية عليها بلا تعواج بلا والو رجليها كيلامسو بعض ويديه مخشيين فيها وشعرها ملموم فازك وكتشوف قدامها واللي بغا يربح العام طويل. هي راشقة ليها وفرحانة دخلات فالليلة الماضية جوج دالمليون وتمانين الف ريال واخا كلات فيها قتلة المهم الفلوس بقاو عندها وخدمات جوج عراسات مزيانين مكاينش دابا اللي يعصبها ولا يقلقها وكملات مالي بناصر مسافر تفحات ليها الشهية والنفس.

وصلات للمحل وكانت فيه بنت مراكشية جديدة كبيرة على سكينة لاكن فروجية وضحكها مع الناس كيوصل للزنقة . لقاتها سكينة كتجفف ودازت مع الجنب جهة المرايا وقالت

سكينة: حااادكة تبارك الله عليك

سعيدة: محنية كتجفف) واحد القلاوية دخبات برجليها خانزين تقول زاطمة على خرية تفووو

سكينة: كطلق شعرها قدام المرايا) جا شي حد ليوم؟

سعيدة: تكات كترتاح) جاو شي بنات عربنو شي تكاشط وصافي.

دارت التيليفون يتشارجا ويالاه شعلاتو لقات نمرة دهند طالعة صونات شي خمسة دالمرات والنمرة دسارة حتى هي ومخليك ليها مسج

سارة: عيطي ليا ضاروررري

طاحت ليها اليد مع الرجل فاش لقات التكاشط المعلقين كاملين مطبعين.. كيفاش وعلاش؟؟؟ فشلات وجلسات كتشوف فيهم مابقافيهم مايتشاف.. وحتى باش يتصلحو ميمكنش والمشكل انها هزات غير تكاشط الزوينين من محلها حطاتهم تما باش حتى هما يديرو بلاصتهم.. ناضت كتشوف وعاودات وعاودات باغا غير تفهم كيفاشوضارت عند سارة والغبينك على وجهها

سكينة: كيفاش وقع ليهم فين كنتي؟؟

سارة: وجهها احمر بالبكى والفقصة) ماعرفتش كيفاش وقع ليهم كنت جالسة هنا والناس كي دخلو كيشوفو وشي كيكري شي كيسول ويخرج عاااادي بحال كل نعار(هزات يديها كتنخصص) حتى جات هاد المرى وبنتها بغاو يشوفو تكاشط للكرا وقالت ليا مالهم هاكا..فاش جيت نشوف لقيتهم كاملين مطبعين حتى وحدة مافلتات لا اللي فهاد الجهة لا اللي فديك الجيهة

سكينة: شدات راسها) اويييلي غنموووت… شكون اخر واحد دخل قبل هادالمرى؟؟

سارة: واحد المرى دايرة النقاب وكضحك معايا وسولاتني على شي حاجة مستورة تحضر بيها فعرس فيه العيالات.. كتهضر وفمها فيه غير مشاء الله تبارك الله وخليتها كتشوف وجلس بلاصتي هنا كي ديما ..ضارت عليهم كاملين وقالت ليا نعاود نرجع ومشات وموراها دخلات هاد المرى

سكينة: وشنو كانت هازة فيديها اوييلي ميمكنش!!

سارة: يديها خاااوين مافيهم حتى حاجة ..صاك كحل كان هازاه على كتفها ماقاصتوش

ناضت سكينة كتجبد وتحط كيقلبوهم وسارة حتى هي كتخرجهم من بلايصهم وبداو يقلبو التكاشط والطبايع دخلهم الشك .. وحتى الشكل ديال الطبايع كيبان مرشو وبحالا فيه خطوط كاشفين الشيء اللي خلا سكينة تستنتج انها رشاتهم بجافيل ..ولاكن تكون رشاتهم بشي قرعة؟ ميمكنش حيت الطبايع غيكونو كبار فبلاصة وحدة ومعيقين وماشي مفرقين فاللبسة كلها .. بقات كتقلب وشافت الخطوط كيفاش غادين تما فهمات القالب اللي طلع معاهم مزياان

سكينة: هادي كانت هازة الشوكة فيدها … بنت الحراااام كانت هازة لبرى دالنقش شوفي كيفاش مرشوشين.. شوفي.. عادو كيغنديرو ليهم دابا صافي ضاعو ..سفيفة مشات ..ويلي ويلي شو اليدين كي ولااااو(دارت يدها على فمها ساهية فيهم) مشاااو

سارة: بحرقة) الله ياخد فيها الحق..حسبي الله ونعم الوكيل.. هادي كانت هادة شي عشرة دالشوكات تحت كماكها حيت وحدة متقدهاش فهاد التكتشط كاملين

سكينة: بأسى) تكاشط دالعرايس ماتقاسوش!!؟؟

سارة: الحمد لله حيدتهم من المانكة غير هاد الصباح قلت والله منخليهم .. جات هاديك اللي لهيييه مشات خيطات ختهاااا ديك الحمر ا وعلقاتها تما وانا نجمعهم اللي جات كنجبد ليها تشوف ونردهم بلاصتهم(سرحات يديها) والرررش الرش الرش منين ما درت كنلقا الرش فوقاشما بغيت بغيت نحل كلقا الرش هنا ولهيه وعلى الكراج قتلووني بالرررش قتلوني بالسحور كنضل طالقة القرآن ونسيق بالملحة سخفوووني قهرووني

سكينة: كن ماطيحناش عليهم البق مايديروش هاد الحالة..على زين حوايجهم اللي عندهم الشووهة ..السقلي بحال الميكة

سارة: انا بغيت ربي ياخد فيهم الحق

سكينة: بأسى) دابا صاافي خدمونا.. خاصنا كامرات

سارة: ضاروووري

سكينة: غير حيدي دوك التكاشط كلهم (كتقلبهم) صافي حيديهم وحيدي منهم العقيق جمعيه.. انا غدا الصباح غنهبط للسوق نشري تواب جداد نعاودو نفصلو وحدين اخرين جداد ونبتوهم (تنهدات) اش غنديرو .. هادشي الليعطا الله

سارة: جيبي لغلوفا.. نعلفو باباهم كااملين

سكينة: لالا غنجيبهم هادوك اول حاجة

المرى: ايوا خليت ليكم الراحة الله يعاونكم .. الله يعوضكم ياربي

خرجات وبقات سارة وسكينة جبدو الحساب ديال المدخول ديال داك المحل حيدو منو الفلوس دالسلعة وبدا كيحسبو ويقيدو فالكتاب ريال بريال وخدات سكينة القد باش تشري تواب جداد وحتى باش يديرو كامرات للمحل وبداو كيتافقو

سكينة: غدا غنجيب واحد الخمسة ولا ستة ديال اللباسي من المحل نعلقوهم بلاصة هادو على بيدمن يوجدو اللباسي .. ماترميش العقيق خليه نبتو بيه

سارة:بالحرقة والحماس) هاا شوفي (كتوري الكتاب) شوفي شحال دالعراسات شديت غير بحلاوة اللسان تبارك الله واللي دخل عندنا مكيخرجش بلاش هانتي .. شوفي التاريخ .(كدوز الاوراق) شوفي كاع التوارخ عامرين وشديت واحد العروسة فالكاموني .. شوفي تبارك الله

سكينة: كتقرا) مية وربعين!! غتمشي حتى للكاموني بسبعالاف درهم

سارة: كن مادرتش ليها هاد الثمن منشدهاش.. ولاكن كراو من عندي عائلتها كلهم

سكينة: خاصنا نوجدو تكاشط بزرب وعيطي ليهم يرجعو يختارو وهما كاع االي دافعين افونص. من الخير ماتعرف يطلعو هاد التكاشط حسن من هادو .

سارة:خاصنا موديلات وااعرين

سكينة: حدور وتشوف المحل) ماتخافيش غنضرب ليهم ستيلات مقااااودين .. انا عندي فراسي بلانات وااعرين غندير ليهم شي ستيل خطييير … مهم دابا غا جمعي هادو انا غنتلاح (وقفات قدام المرايا كتقاد) انا نعيط لرضى يجي يوقف ليك على الكامرات

الركبة فالطاكسي جاتها مقناطة وكلشي جالس وكيطل عليها ..حتى نسات على حياة للتبركيك من نهار شرات الطموبيل ورجعات ليها ولات كتبان ليها غريبة وماشي عادية مع العلم انها قبل مادبر الطموبيل كانت منين مادازت كلشي متبع ليها العين، لاكن من بعد عام كامل وهي كتمشي فالطموبيل ونسات على المشية بالرجل وعلى الاختلاط بالمجتمع مابقاتش كتلاقى بالنماذج اللي عينيه كيدورو وبلا ميحشمو كيبقا مخرجين عينيهم وحتى البشر بعدات عليه مابقاتش كتحاك بالناس فشارع ووسائل النقل كأنها عاشت فدولة اخرى .. فعلا السيارة كضيف ميزة للانسان وكتعزلو تماما على بزاف ديال الناس والاختلاطات .. قبل مكانتش كتحشم واخا كيشوفو فيها لاكن حاليا جلسات مربعة يديها وكدور عينيها يمين وشمال وجامعة رجليها لوسط وكتشوف فيهم كلهم كيشوفو فيها واللي حداها كيتحرك بلعاني باش يحركها وهي مخنوقة وكتحل فمها باش تنفس وماوصلات حتى تقجات بقوة الروايح المخلطة ، على الاقل نقزات الركبة ديال الطاكسي كبير وشدات طاكسي صغير مريح وصلها للمقهى الرائع اللي كيعجبهم يجلسو فيه وكان مقهى كبير وفخم ومصافة قدامو سيارات فخمة اللي مطيحش على البال وكان المكان كله مليئ بالمقاهي الفخمة ومقاربين مع بعضياتهم والناس راقية واقين برا وكاين اللي لابس كوستيم ودايز وكاينة اللي جاوك لكلاب ديالها وغادية والشيوخ بالشورطات قصار كيتمشاو .. جو اخر وكل واحد كيشوف فراسو وحاضي راسو . دخلات طالقة شعرها المبلل جاها رائع بداك الشكل ومشات كتقلب بعينها تبسمات للنادل اللي كان متعود يشوفهم تما فالمقهى دائما نعت ليها الطاولة دليلى ومشات لقاتها جالسة لابسة كشوة كحلة فيها فتحة فالجنب فوق الركبة ومشدودة بسميطات والشعر مقزب كاري بلونجي حتى للودن حرير ودايرة لداخل والحلقات طوال وحداها هند بقميجة بيضاء واشعة محلولة على الصدر والسنسلة كتاعب فيه ديال الذهب ودجينز وشعرها مطلوق اسود ملوي على طولو وصاكها حداها ومكياج خفيف ..حلات سكينة عينيها مصدومة وجلسات كتشوف فليلى. اخت وقالت

سكينة: لا متقوليهااااااش!!!! قطعتيه!!!

ليلى: شدات شعرها) ههه كي جاني

سكينة: كتسلم على هند ومصدومة) اويييلي صدمتيني!!! حلفي بالله !! بيروك الكدابة

ليلى: كضحك) لا والله مابيروك …جاتني زوينة

سكينة: عاضة شنايفها) نارييييي زعمتي المسخوطة!!! شنو قال راجلك!!

ليلى: تصدممم ههههه ماعلمتوش تا قلت ليه مفاجأاااا هههه

سكينة: فشلتييني !!! وعطاتك خاطرك ياختي

ليلى: عاادي كله عاااادي حبيبتشي دابا يطوال( كتلعب فيه) مشييت الصبااح عند سيمو .. قلت ليه قطع مو تحرق من لتحت ،،اييوا قطعو ليا وداز ليا طوندوز من اللور لتحت حسن ليا باش متبقاش مشتتفة.. ورجعت للصالون ضربت ليه البلو نواااغغغغ داك الكحل اللي كيضرب بالزروقية فالضو وصايبتو وطلعت السيك هيتم صدمتو

ليلى: نااري منقدرررررش

ليلى: عادي دابا كنحس براسي بييخير … واخا حرش بيا فاللول بقا كينطز ولا عادي انا عجبني كيجي كلاااص

سكينة: جاك وااعر ولاكن راه زعامة خاايبة

ليلى: هانيا كلشي يتعوض.. تعطلتي فين مشيتي

سكينة:ضارت كتشوف فهند) هليها على الله… الزين .. صافا ؟؟

هند: صافا حبيبة (كطلع فيها وتهبط)

سكينة: كي جاك حي الرياض

هند كدور راسها وتبسم) خليني ساكتة ههه… كنتفكر مكناس كتشدني السخفة.. حنا كااع ماعندنا هادشي فمكناس ولو الربع ديالو .. غير عايشين وكيحساب لينا عايشين ههه

سكينة: داكشي علاش مكناسا صبااارين هههه

هند: اللي صبر على مكناس يصبر على اي حاجة اخرى ههه

ليلى: كي بقيتي هههههه

سكينة: اوييلي انا راه يا اما فيا شي دعوة ولا شي تابعة.. مع فقت صبحت على مشكل تفوووو ..يخخخخ على حياة وعلى قوم وعلى بشاار (بدات كتعاود) المرض والله

ليلى: اويييلي على السم!!! شنو قضاو هاهما كااع خسروهم اش قضاو

هند: اوييلي!!

سكينة: باش انا نخاف ونعيا ونخوي من تم (هزات يدها فالسما) هاااا اللي نخوي

هند: شداتها الضحكة) ويلي ويلي ويلي

سكينة: معصبة) حساب لهم غادي يهربوني.. واخا يجيبو ليا الجنون منخرجش ليهم من تما

ليلى: عنداك تخطاي شي عجب المسخوطة

سكينة: يجريو طوالهم .. دابا عرفت راسي واحلة ليهم عاد غنزيييد نوحل ليهم .. (شدات عنقها) تفووو كنت بغيت نمشي شري غير شي بومادة نديرها لعنقي تلفوني الله يعطيهم العداب

ليلى: انا تهرس ليا ضفري باقي دابا كيضرني..كن مادراري كن كلاونا

سكينة: وانا عنقي!!! شوفي (دورات وجهها) الحمد لله ماجاتنيش فوجهي اما والله مندوزها ليهم تا نمشي نديكلاري بيهم .. ولاد الحراام ، غيعيط ليا داك الضابط نشبع فيه معيور

هند غير ساكتة وكتشوف فيهم كيتشكاو وبقات كتفكر واش تجبد الموضوع لسكينة ولا متجبدوش وعيات تصبر لاكن فمها كلاها وقالت مصغرة عينها وفيها الضحكة وقالت وصبعها حدا فمها

هند: عرفتي شفتك فواحد البلااااااااصة

قبل ماتكمل هند الجملة ووقفات كتسنا تشوف رد فعل سكينة اللي ضعر شبح الابتسامة على وجهها وهي كتشوف فليلى وقلبات عينيها بتتاقل كتبسم وسدات واحد العين كضحك وقالت ويدها على دقنها

سكينة: اممممم..فين شفتيني ههه

بداو كيضحكو بثلاتة فنفسهم وشي كيشوف فشي وبثلاتة باغيين الموضوع يتجبد باشكل وحدة ترضي فضولها

هند: دابا نتي فراسك شي حاجة وانا فراسي شي حاجة ههه ياك …

سكينة: شادة الضحكة) يالاه غير هضري ههه

هند: بجرأة) كتعرفي غالي هههه

سكينة: غمزات ليلى وخرجات لسناها كضحك) شكون غاليي؟

هند: بتوثر وخجل) ودابا غير قولي هههه

سكينة: واقولي نتي فين شفتيني

هند: شفتك فواحد التصويرة

سكينة: اينا تصويرة شفتي؟!!

هند: ودابا سولتيني فين شفتك قلت ليك تصويرة نتي وغالي هههه ودابا نتي كملي

سكينة: مصغرة عينها) اممم.. دابا نتي ختو غتكوني لوسة دختي خصني نخاف منك (غمزات ليلى كضحك) ههه

هند: حلات عينيها) هيييه!!! انا والله ماهاكاك ههه والله ماديك اللوسة السوسة اختي دااخلة سوق راسي

سكينة: دابا جييني نيشان هههه وقولي ليا كيفاش حتى عرفتيني حيت عااارفاك عارفااني وعارف يعرف عارف

هند: كضحك) الصراحة ههه ختي منال اللي كتعرفك وهي اللي عاودات ليا عليك حيت هي وغالي صحاب وكيتعاودو بيناتهم .. ولاكن باشزدت تأكدت من القطة اللي عندنا فالدار ههه

سكينة: بدهشة) حلفي !! باقاعندكم القطة!!

هند: باااقا عندنا وعزييزة علينا وماماكتسطاا عليها.. نهار اللول كانت كتجري عليها ودابا كتنعس معنقاها سبحان الله

سكينة: تكات اللور) ايوا مزياان ..كي داير لاباس عليه

هند: صاافا بييخير.. مشا لميريكان

سكينة: مشا فميسيو ؟

هند: صغرات عينيها) باش عرفتيه هههه عتارفي

سكينة: تفركعات بالضحك) اااههههههه لالالا والله ماعندي معاه دابا شي صلة مشا عقلك بعيييد..

هند: وباش عرفتيه يالاه؟

سكينة: هوا كيسافر داكشي علاش جاتني فبالي

هند: اه مشا فميسو.. علاش زعما تفارقتو ههه

سكينة: ماكتابش وصافي… داكشي بالمكتاب.

هند: بصح … كولشي بالمكتاب… ولاكن كنتي عزيييزة عليه

سكينة: حتى كان عزيز عليا وباقي عزيز عليا ..ولد الناس يستاهل كل خير

هند: غالي ضرييف والله .. احسن واحد فالعائلة ديالنا كلها

سكينة: لا هوا ضريف الله يعمرها دار ..فرحت ليه فاش تزوج الله يكمل عليه بالخير

هند: اميين ياربي .

سكينة: حتى مرتو زوييونة بنت دارهم تستاهلو

هند: تنهدات) اااشمن… مخرجة فيه العجب….كتغير بزااف .

سكينة: واختي من حقها تغير ههه مزوجة راجل بوكوص مابغيتيهاش تغير راه تغفل يدورو ليها بيه ..م انا براسي نلقا راجلي كيدور فعينيه نجبدهم ليه هههه عاااد غنتشاور معاه انا هههخخخ مانعلموش كاااع حتى يتفتف عليهم مايلقاهمش ههههه(رشقات ليلى)

ليلى: اوييلي والله نبين ليه واخا يبقا غا هوا فوق الارض..نسولو اه نبغي نعرف اما باش ندير فيها حاكمة الكروة وحتى وحدة مدور بيه وديااااالي بووحدي والله لاحليتها ليه

سكينة: كتقاد شعرها) حتى انا الصراحة.. غير كنضحك وصافي منحلهاش ليه واخا يبقا فيا الحال

هند: بلعكس الغيرة زويينة ولاكن فمحلها فهمتي ..تكون خفيفة كتحسي براسك مميزة

ليلى: نتي غتحسي براسك مميزة ولا رااجلك غيطيح من عينيك ويرجع يبان ليك كي الكلب.. انا هاكا .. بالنسبة ليا راجل لسقة توساوي كلب.. يا يعطي قيمة راسو ويعز راسو مايعطينيش كتر من وقتي .. الى بغا يبقا يبان ليا همة وشان .. اما يقابلني غير انا وشكون تابعني والله مانشوف فيه

سكينة: داكشي اللي كاين .. ماحدك تابعاه وهوا هارب منك .. ويزيدك يكرهك .. اوييلي انا ماما وشي مرات كتسخططني بفين مشيتي فين جيتي فين كنتي… عساك الراجل!! والله منعقل عليه ماما ومالقيت كي ندير ليها عساك هوا اللي ساهل نسوط فيه

هند: ولاكن الاهمال راه كيوصل للخيانة عاوتاني.. الى بقيتي كتبيني ليه مامسوقاااش ليه غادي يقلب على شي وحدة اللي تهلا فييه وتعطيه وقت

سكينة :عقدات حجبانها) علاش احبيبة شكون قاليك منتهلاش فيه؟؟ يطيح معايا دراع ونشوفو شكون غيتهد هههه

هند: اويلي ههه

سكينة: ومالكي!… ياك راجلي.. لعيب والعار الى قدر يوقف على رجليه

ليلى: اه .. هنا فين تبيني الاهتمام اصاحبتي.. ماشي حاضياه معامن نتا فين مشيتي فين جيتي اش كدير الو فينك .. خليه يضبر راسو تاا يرجع وجبدي الاسلحة جهد اللي متيبقاش يقشع ولا يشوف جنب هههه

هند: نااري سعدااتكم عندكم هاد العقلية

سكينة: تا نتي غضربي معانا شهر تولي عند هاد العقلية ههه

هند: والى مشا تا خان يالاه؟ فيدوني

ليلى: يخوون!!! الى خان صافي اللع يعاون دي عايزة كلام

سكينة: ولاهيلا… الى مشا مع شي وحدة غا يبقا معاها مايجيش يدور بساحتي انا .. صافث النهاية وخاصو يكون عااارفها.. يكون عارف الى مشا حتى دار هااه ولا ها بلا مايحتاج يتناقش معايا..نيشان الطلاق والله منزيد معاه قسم ومنضيعض معاه طاقتي..

ليلى: باش يكون عارف هادشي خاصك ماتحليش ليه البعرة بزااف.. حتى يضمنك ويقول صافي تسمح ليا الى درت شي حاجة.. خليه ديما كرعود وخايف وضربي الطم ماتسوليش وما تعمقيش …تعمقي فمستقبلك اه اما الدخول والخروج والى هضر مع شي وحدات خدامين معاه لا..وماتعلميهش التقلاب فتيليفون .. خليه ..هاكا كتعطي قيمة راسك وكتبيني ليه راك تايقة فيه يعني كتعطيه ديك التيقة اللي يخاف عليها ويدير بحسابها ومايرضاش حتى تشكي فيه.. اما الى بقيتي عليه شكون هادي .. معامن هضرتي .. وحاضياه ورادة معاه البال راه صافي رجع دري صغير ومابقاش مسؤول وعارف راسو الى غلط عادي تفقصي وتغضبي وترجعي تقابليه فهمتي شنو بغيت نوصل ليك..خاصو يحس بالمسؤولية والمعقول باش مايستهترش بالعلاقة.

سكينة: اصلا هاديك اللي فيها كثرة الهضرة والتابعة هي اللي كتخان وهي اللي كتبقا فاللخر مع راجلها واخا يخونها سبعين مرة ..وتلقايه كيقول ليها الله يسمح ليا منك ويبوس ليها راسها وهي كتغبن وتبثن ليه راه صابرة معاه وبنت الناس (بجدية) لااااا اخويا…بنت الحرام انا الى خنتيني … اصلا المرى خاصها دير شي حاجة لراسها اللي تخليها تفرض شخصيتها وتكون عندها كلمة والى قالت ليه باي باي يعرف باللي فيدهااا وعندها اللي يهزها وبدارها وبكلشي.

ليلى: هما حتى هما راه كيعرفو معامن .. عينهم ميزانهم (غمزات) والله ويعرف مرتو متعقلش عليه حتى يضرب ليها الف حساب.. هوا يخاف يقول بدارها برزقها مضسرها ماتعقلش اصلا عليا

سكينة: فوااالا هادشي اللي بغيت حتى انا نشرح ليها… الى مكنتيش مستقلة ماديا متقدريش تخرجي فيه عينك ااصلا

هند: وهادوك اللي مستااقلين ماديا وصابرين يالاه !

سكينة: هادوك ماكرهتش نشد مهم بشي مشويطة فشي قنت نسلخم مزياااان حيت ماحدهم كاينين والراجل مفرعن وتهضري معاه يقول ليك كاااين اللي تبغيني وتصبر معايا..يعني تصبر واخا يدخل ليها وحدة للدار فهمتي الصبر..(هزات راسها) انا بعدا نسيفطو للحبس من اللخر خصوصا الى حصل قطي باش نوري مو الخيانة والله منطلقو غا هكاك ولا اشداه يتزوج من اللول

هند: وابلاتي دابا باش نتفاهمو.. انا كنعرف الراجل الى بينتي ليه راك بدارك ورزقك عاد كيطمع فيك ويعول عليك ويبغي تصرفي معاه… اما الى مكان عندك والو كيصرف عليك بزز منو

ليلى: كيصرف عليك بزز منو اه ولاكن نهار يبغي يسوسك يلوحك.. نتي ضامنة من بعد عشرين عام ديال الزواج غتبقاو كما العام اللول؟؟ ضامنة غتموتي معاه ؟؟ عندك شي ضمان؟ اما الى كنتي عندك مستقبلك كما هوا كيبني مستقبلو راه واخا تكوني ضامنة غتموتي معاه ويطلع فاللخر شماتة على الاقل كتلقاي الراجل الثاني هازك اللي هوا مستقبلك ورزقك

سكينة: نصرف معاه عادي فين كاين المشكل(كتشرب العصير) نشري فراش الى عجبني ياك انا اللي غنجلس فيه ونعيش فيه. حتى والى متزوجتش ياك غنفرش الدار باش نعيش فيها هيا هيا

ليلى: من اللول الوحدة تعرف بيمن غتزوج .. الى بان ليها زقرام تعطيه التيساع اصلا العرب اختي كاملين عقلية وحدة تفوو .. ها التقاليد ها المرض يخ

سكينة: انا بعدا من جهة المصروف ماعنديش مشكل.. هوا يدير داكشي ديال الدار والثلاجة وانا نعرض عليه مرة مرة على برا ..حسن ما نبقا نقصص فالبصلة المهم هوا الثلاجة يعمرها مايديرش السبة باش نخلص على برا

ليلى: هادوك الكمااليات… يعني مصروفك غير خضرة فوق الطعام والاساسي خصو يقوم بين هوا .. نتي مثلا قالك نسافرو مراكش ها الامكانيات اللي عندي ونتي باغا تمشي لليونان ديك الساعة حطي قد داك البودجي اللي بغا يدوز بيه الصيف وهانتوما سافرتو فين بغيتي النص بالنص… ولدتي مثلا وبغا يقري ولدو بريفي حسب امكانياتو ونتي باغا مدرسة اخرى غاالية كتكملي باش ولدك يقرا فين بغيتي نتي.. عطاك باش تكسي راسك فالعيد كتزيدي من عندك وضربي حطة مضايراش… المهم قايم بالواجب ديالو كزوج ماشي مربع يديه مابغا يخدم مابغا يصرف

سكينة: اولا بلاصت ما تشريو برطمة شريو فيلا بجوج ولا بلاصة مايشري طموبيل صغيرة تقاسمو وشريو طموبيل كبيرة

ليلى: اولا ديرو مشروع بجوج … العوين زوين وتعاوني الى لقيتي معامن وكان موفر المسكن والمأكل والملبس حسب القدرة ديالو … حتى نتي غتجبدي وتصرفي بالقانون وتكملي..غيير غتكملي ..قنطتي ديه لشي اوتيل باتو فيه نتي وياه بدلو الحيوط .. المهم نتي مكلفة بالكماليات وهوا بالاساسيات

هند: اه بصح .. ولاكن بااااش غتعرفيه ولد الناس

سكينة: بشحال كيشد فالصالير هههه

هند: ههه ولاهيلا

سكينة: وشنو مالي كدبت!!! الى كان كيشد جوج دريال وجاي عندي انا كنشد كتاااار منو مثلا شنو معنيتها هادي؟؟؟ معناها باغيتزوج ماقديتيش جيتي نهزك وترتاح مع راسك.. كل واحد يتزوج على قدو ولا ميتزوجش ويهني راسو. ولا يشوف عائلتو يعطيوه بنتهم ويزيدو عاونوه باش يقوم بيها من لفوق ..

ليلى: اختي هادا هوا زواج المرض كيبدا من اللول بكيفاش نديرو وكيسالي بكيفاش نديرو.. من اللول مزوجين بسطارطير … اللي قادة تصبر علاش لا اما اللي ماقداش من اللول ماتقبلش تجلس فدارهم خصوصا الى كانت الحياة عند باها حسن من الحياة عند راجلها

سكينة: واييه!!.. مسكينة هدى اللي فوق منا دارهم مصلوحة والكبصرالديكورات والفراش وكياكلو ماكلة زوينة طاحت مع واحد ساكن هوا ومو وخوتو فالقرية فواحد الحي متقديش دوزي منو بوحدك وفدار حاالتها فيها جوج بيوت وطواليط وشي ساكن حداك شي فوقمنك شي تحت منك والدروج ديقييين يدوز منهم واحد ومشات سكنات مع دارهم .. خلات دار باها ومشات عند العكوزة وكانت غزاالة كتحمق غير سكنات معاهم ولات كتهضر بحالهم وصباغة كلحة فالدفار والوجه مامغسولش ودايرة فوقوالريسيل والمشية ولات كتمشى وتميق وكتلبس العبايات والجلاب مزيرين والبيجامات كتخرج بيهم وكتشمي فيها واحد الريحة بحال ريحة التنخيمة والخنونة ياربي تسمح ليا ولا ريحة سليب عرقااان…مهم ماشي طبيعية تبدلات بزاااف كن بقات فدار باها حسن ليها

ليلى: اي محيط تحطيتي فيه وبديتي تصبحي عليه وتمسي عليه كتولي بحالو عاد جدا… انا فالصالون كيقولوليا فيك العياقة!! مافهمتش اشمن عياقة واش اللي كتعرف تهضر وجامعة فمها من تكركير ومصوابة ونقية عياقة!!

سكينة: لا خاصك تجي جارة بانطوفة وهبيلة وكضحكي بوحدك واللي لقيتيه تعنقيه وتاكلي بيديك ورجليك عاد دخلي ليهم لخاطرهم ويحبوك .. حتى انا كيهزوني بالعياقة ويحطوني بالعياقة.. بنادم كيجي باغي يتصاحب معاااك ويضسر عليك نييشان..والى محليتيش ليه الباب مكيرضاش ويقوليك فيك العياقة.. بشار كي. داير

هند: بلعكس مافيكمش كااع العياقة!! انا بعدا رتاحيت ليكم

سكينة: انا يقولو عليا اللي بغاو.. بلعكس كيجعبني الحال نحدها لدوك الضاسرات

ليلى: كتبسم) عجباتك البلاصة؟ واقيلا مللي جيتو ماخرجتو؟

هند: كنخرجو ولاكن غير المدينة وكنرجعو ولا فحي الفتح صافي.. مكنعرفوش البلايص

سكينة: غالي ماساراكمش؟؟

هند: هييه هااهاا اوييلي على غالي يسارينا ولاهيلا..مسالي لينا

سكينة: راه كيعرف البلايص يوريكم

هند: بالنفي) لالا غالي ماااا….تأ.. فشكل مامطلقوش بزاف باش يجلس يتجمع معانا ولا يقولينا يالاه نخرجكم ولا نساريكم

سكينة: كيفاش مامطلقووش؟؟ عاادي قوليه خرجني يخرجك

هند: في حيرة) لالا.. ماااباسف) مايصلاحش

ليلى: ياك خوك .. فين كاين المشكل

هند: مايصلاحش مايصلاحش.. مكنبغيوشنعيقو عليه وهوا داخل سوق راسو مايبغيش اللي يصدعو

سكينة: فوقاش مشا لميريكان غير ليوم؟

هند: لا لبارح الصبااح

سكينة: مامشاتش معاه مراتو؟

هند: لا ماعندهاش كي دير مع الخدمة

ليلى: شهر كاامل ياختي

هند: حسن ليه .. غيرتاح شوية … كيفاش حتى تعرفتي عليه اسكينة

سكينة: انا كنت تعرفت عليه فعرس خوه قاليا.. كنا خدامين تما وجا عندي

هند: هوا جا عندك؟!!!!!

سكينة: اويلي مالي انا غنمشي عندو ههه

هند: حيت مابايناش عليه

سكينة: واخوك راه مغيبينض ليك كولشي !! عادي

هند: واييه.. حيت منييفخ شوية فهمتي ههه

سكينة: لا هوا من ناحية ننيفخ منيييفخ بديناها بالدباز فاللول..انا كنت خااسة بيه غيتزوج وفاش غبر عرفتو غيكون تزوج ولا مشا لبرا وحدة فجوج

هند: مشا واحد الشهر لألمانيا وصافي.

سكينة: ما زال مابغاشيدير وليدات؟

هند: باقي شوية الحال.. عاد كيستاقرو حتى هما

سكينة: الله يسهل عليهم.. ولد الناس يستاهل كل خير ..طيحو ربي فبنت الناس

هند: تنهدات) ههه … ونتي؟ مكتفكريش تزوجي؟

سكينة: انا مخطوبة دابا ولاكن العرس بااقي

حلات ليلى عينيها ودغيا قلبات وجهها هزات الكاس فمها باش تشد الضحكة ودورات وجهها كتشوف بنصعين فسكينة وكيفاش كدور فعينيها

هند: بصاااح!!! ايوا الله يكمل عليك بالخير

سكينة: اميين ياربي العقبة ليك حتى نتي

هند: اميين.. ماحسابش ليا مخطوبة؟ (كتشوف فصبعها)

سكينة: حيت لبارح وقع واحد المشكل و فواحد العرسوطاح ليا الخاتم تما حيت خطيبي فاش شراه ليا شراه كبير ماكنتش معاه..حتى يجي ويعاود يشري ليا واحد اخر على قدي

هند: ااه ايوا ماشي مشكل يتعوض ان شاء الله .

سكينة:كن كان شي مغرييي كوراه بقا كينكر على الخاتم اللي طاح مايسكتشعبدو

هند: علاش ماشي مغريبي

سكينة: لا كوري.. من كوريا

هند: حلات عينيها) بصاااح ههه… ولاهيلا!!

ليلى وحل ليها العصير وعيات تقلب وجهها فاللخر ناضت بالزربة مزيرة وخلاتهم جالسين وسكينة كتحك ودنها بارتباك

هند: كوريا دقة وحدة

سكينة: احسن حيت المغاربة مافيهم ربح.. نصحك نصيحة مادوريش بشي مغريبي..حيدي المغاربة من راسك فمرة وتهناااي

هند: واييه ايوا ان شاء الله … وفوقاش غديرو العرس؟

سكينة: باااقي باااقي..حيت هوا كوري ولاكن ماشي فكوريا فسويسرا .. كيوجد الاوراق باش نديرو العقد هوا اللول

هند: فسويسرااا!! مزياان الله يسخر

سكينة: امييين(شافت ليلى راجعة) رجعتي.. صافي نتحركو

ليلى: يالاه نتمشاو شوية

عيطات للنادل جاب لحساب وحلات هند صاكها بغات تخلص لاكن وقفات ليها سكينة بقات كتحلف عليها ويبقاو مني منك فاللخر خلصات خلصات عليها سكينة وليلى حطات فلوسها وناضو خوجو من تما كيتمشاو غير فالنواحي وكيتجمعو وهند كتشوف فيهم وطلع وتهبط

هند: منين كتقداو حوايجكم بغيت نشري وماعرفتش

سكينة: فوقاش بغيتي تشري دابا؟

هند: اه الى ماعندكمش مشكل

ليلى: ماعندناش مشكل.. يالاه نديوها عند عبدو ..كيجيب داكشي دليكسبور

هند: والاثمنة هنا مزيانين؟

سكينة: لاالا متخافيش داكشي حدو قدو مع لكاليتي والستيل..

هند: صافي مزيان يالاه نمشيو

ضربو الدورة ركبو مع ليلى فالسيارة ومشاو كيدورو وشدو الطريق للمدينة عند عبدو صاحب محلات كبيرة عندو ملابس مستوردة وماركات مقلدة وحقيقية وكل ما يحتاجوه البنات من احدية وصيكان ودخلو خلاو هند كدور عاجبها الحال وكتختاو وتوريهم وهما كيشوفو معاها .. كان عندها الدوق ومتولة لاقصى درجة لاكن احيانا كتهز شي حاجة كتصدمهم حتى كتبدا ليلى ولا سكينة يضحكو معاها ويحيدوها ليها ..

هند: ياختييي الاثمنة الصراحة مناااااسبة!!! اويلي فمكناس لغلااا وداكشي لاعلاااقة

سكينة: شوفي هاداك ونديوك لواحدك اخر تا هوا

هند: هادشيكيحمق

بدات هند كدور وتقدا والبنات كيقلبو معاها وكانت متولة بزاف فوق الوصف كتلاحض ادق التفاصيل والنقط واها شي مرات كدوخ وكيحيدو ليها شي شرويطة من يدها مازويناش ويقلبوها ضحك .. مشات لاكيس تخلص وبقات سكينة كدور قدام الصياكان وهزات صاك مربع متوسط الخجم جلدو صحيح وزوين عاطي للعين فالارونج والزيتي ديال صيف ويجي مع كولشي ،، هزاتو من ودنو كتقلبو وتشوفيه وداتو لاكيس جمعو ليها فكارطونتو وهزاتو فصاكو وخرجو حتى وصلو للطموبيل ومداتو لهند

سكينة: هاكي هادا كادو..ان بتي جيست وصافي

هند: بالصدمة) اا؟؟ ليا انا؟

سكينة: اول مرة خرجتي معانا وجيتي لمدينتنا خاصنا نرحبو بيك

شداتو هند وبرقو عينيها بقات غير كتشوف وعنقاتها باستها وضارت عنقهات ليلى حتى هي وطلعات فرحانة وعاجبها الحال حسات براسها مرغوب فيها وعندها قيمة ,, طلقو الموسيقى وشدو الطريق راجعين حطوها قدام باب العمارة ونزلات فرحانة كضحك وسنينات مستفين والحفرة دزين فالخدود المزنكين وشارت بيدها طلعات كتجري عاجبها الحال بينما كملات ليلى طريق وكانو غير جوج خطوات لمحل سكينة

ليلى: مزيان لوجيست اللي درتي معاها..فرشتي لختك منين دوز

سكينة: حتى هي ضريفة بنادم اللي مسموم كيبان .

ليلى: داكشي .. حتى جاتني حلوة ماشي تقيلة على القلب.. (وقفات السيارة وضارت عندها) اجي .. اش داكشي طلقتي على البنت ؟!! اويييلي انا مالقيت فين نخشي وجهي كون علمتيني بعدا ندير بحساب رياكشن ديالي

سكينة: ههه بغيت ندفع كبير شوية وصافي

ليلى: اويييلي على دفعي كبير نتي فرعتي الكبير !!! ماخفتيش من ديك الهبيلة دختك تفرشك ولا يسلو ليها لسناها

سكينة: لاالا مايجيو فين يسلو ليها لسانها حتى نقوليهم مابقيتش مخطوبة..اصلا مادابيها تقوليهم مخطوبة راه انجاز عندها تبيني مخطوبة

ليلى: اويييلي على قنبولة!!

سكينة: وصاافي دابا نشوف كي ندير ليها .. تمشي معايا غدا للسوق؟ خاصني نشري تواب يالاه قلبي معايا على شي تواب

ليلى: لالا راه غنمشي تا انا بغيت نخيط كساوي للصيف مالقيتش داكشي اللي بغيت

سكينة: ياك ماماك باعت الماكينة

ليلى: شريت ليها وحدة صغيرة زوييونة .. خيطات بيها طلامط لوسط الدار كاع مهم قاضية غرض

سكينة: ماتخيطش ليا شي مايو ؟؟

ليلى:تخيطو علاش ماتخيطوش

سكينة: صافي نشري ليها التوب غدا ونعطيها الموديل

ليلى: يالاه سيري انا غنطيير ندي الطموبيل لهيتم كيتسنا باغي يمشي يلعب الكورة درت معاه تمنية نكون فالباب

سكينة: صافي يالاه انا مشيت تا لغدا

دخلات هند للدار فرحانة هازة الحوايج فيديها كتقلب على شكون كاين فالدار سمعات الحس فلكوزينة ومشات لقاات سارة واقفة لابسة بيجامة بسروالها وتيشورط كطحن العصير

هند: فين ماما؟؟ ومنال؟

سارة:قلبات عينيها) ماعرفتش؟؟ (عقدات حجبانه) فين كنتي؟

هند: خرجت مع صحاباتي

سارة: شكون هاد صحاباتك؟.

هند: صحاباتي!! ياه

سارة: وفين تعرفتي عليهم؟ فين كتعرفيهم؟

هند: صحاباتي وصافي.. (عوجات وجهها) مكتعرفيهمش بنات الرباط

دخلات هند للبيت اللي كينعسو فيه وبدات كتقيس الحوايج مع الصاك فرحانة وعاجبها الحال بينما سارة كطل عليها بتخبية وكتشوف اشنو كدير وفيها الفضول تعرف فين كانت ومعامن كانت حتى سمعات الباب تحل ودخلات اسيى شادة ركبتها سخفانة ومنال وراها هازين الصيكان والحوايج دخلوهم للبيت ولقاو هند كتبدل فين وواقفة بالملابس الداخلية عاد ناوية تلبس بيجامتها . تكات اسية على جنب سخفانة كتشوف فيها

اسية:فين مشيتي؟؟

منال:سخفانة) ناري عييت.. لحوايج مابغاوش يساليو

وجعات سارة حدا الحيط لاسقة وكتسنط وهند كتوريهم لحوايج

هند: زوينين؟ كي جاوني

منال: ياكما خرجتي معااا..

هند: ههه ااه..شوفي شرات ليا هاد الصاك كادو

اسية: معامن خرجات؟

منال: غير واحدالبنت كنعرفوها وصافي

اسية: مصغرة عينها)اممم بنت كنعرفوها؟؟ غير هضري هضري عينيه فشي معقول ولا باغي غير يتفلا

شافت منال وهند فبعضياتهم وطارو بالضحك واسية كدور راسها وسارة كتزيد تلسق باش تسمع مزيان ومتفلت ليها حتى حاجة

هند: والله مكنعرف شي واحد..خرجت مع البنات

اسية: وشكون عاد مع اللي قالت منال

منال: مع واحد البنت.. ولاهيلا بنت اماما

هند: جوج بنات كيحمقووو.. عرفتي كلااااص

اسية: نايضة) نمشي لطواليط قبل ماتهبطلي

هربات سارة لكوزينة على صبعان رجليها تخبات حتى مشات اسية ورجعات كتجري كتسلت وقفات كتسنط ليهم كيهضرو بشوية

منال:عندااااك تسيق ماما الخبار ولا تقوليليها شكون وياااك غالي سولني قالي واش قلتيها لشيواحد.. ماديريييش لياالمشاكيل راه خاطبين ختها دابا

هند: واسيييري راه مخطوووبة كااع مامسوقاش .. مخطوبة لواحد الكوري عايش فسويسرا

منال: المهم ماما متسيقش الخبار لحتى حاجة ومتعرفهاش.. (بحماس) اجيكي كيدارية؟ عاودي ليعاودي

هند: هيييه اودييي… كن غير كانت مرت غالي كون حسن… الصراحة كن غيير تزوج بيها والله.. عرفتي فشكااال عقليتهاااا وكيفاش كتهضر وكيفاش عايشة… حمقاااتني..شوفي الصاك عطاتو ليا كادو…ضريييييييفة .،،، اختي بسيف مايطيح فيها دابا عدرتووو

منال:نتي راني عارفاااك الى عجباتك شي حاجة كتبداي تمجدي فيها كدوخي

هند: ندوووخ اختي ندووخ راه شارية الدار وكانت عندها طموبيل غير باعتها وعندها جووج محلات وعايشة عيشة زويينة اي وحدة تمناها وعندها عقلية وااعرة ماكرهتش نكون بحالها .. البنت كتحممممق من لداخل ومن برا ومللي جلسنا ماقالت حتتتتا كلمة دلعيب .. كتحسي بيها فرييش بحال شي ايس كريم باارد ودوقها زوين وهضرتها حلوة والجلسة معاها زوينة ولباااسة كلشي كلشي كلشي فيها زوين اي واحد تصاحب معاها يطيح فيها بلاااا نفاق بلا متقولي ليا دوخاتك

منال: اممم انا بعدا مكنقدرش نتيق بيك ..شحالمن مرة كتجي تشكري ليا شي حاجة وتبقاي عليا وااو مات واو فاللخر كتقولبي وتقولبيني معاك

هند: المهم داكشي اللي شفتو هوا اللي قلتو.. لا هي لاصاحبتها بجوج ضريفات.. صاحبتها عندها واحد المرسيديس (عضات فمها) ركبة فيها وااعرة ..الناس عااايشين ..ومشينا لداك حي الرياض عرفتي كي داير.. خاصك تخرجي معاهم باش تعرفي علاش كنهضر

منال: عرفتي الى ساق ليك غالي لخبار (عضات شنايفها) يعلللللقك

هند: عنداك!! خلي هادشي بيني وبينك ..بلاتي اختي عنداك تكون كتسنط مابقيتش كنتيق

ناضت بغات طل لاكن بسرعة رجعات سارة اللور هربات لبيتها تخبات وهند كتشوف مالقات والو وميلات الباب رجعات جلسات ورجعات سارة بشوية كطل وجهها احمر مزيير كتسنط

منال: بصوت منخفض)مقالت ليك والو على غالي؟؟

هند: مقالت ليا والو غيير لخير الصراحة.. ولد الناس الله يعمرها دار .. انا جاني والله اعلم مزال كيبغيها.. حيت بداك التعامل وكيفاش دايرة صعييب ينساها

منال: وراه مانساااهاااش غيير سكتي ..

هند: هاا .. قالها ليك؟

منال: مقاليش ولاكن حسيت بيه.. كنت واحد المرة فالطواليط كنقاد باش نخرجو وكان دايز شم الريحة ودخل عندي كيدور قالي سمية هاد الريحة اللي درتي .. هزها بدا كيشم فيها وحطها قالي زوينة وخرج .. وقولي دابا اش غيدخلو عندي ويسول على الريحة ويشمها

هند: اينا ريحة ؟

منال: عادية هاديك ديال العبار كنت شريتها بعشرين درهم

هند: اوييلي اشمن والله تشمي الريحة اللي كانت دايرة هي حتى دوخي اشمن العبار

منال: واسييري والله حتى كانت كديرها توريني ..فين عمر غالي قالي هادي زوينة ولاخايبة حتى للريحة داعبار وديال عشرين درهم… كنقيل نرش فالروايح غاليين عمرو قالي حتى صباح الخير

صبات عليها شتا من سحابة جامدة مللي سمعات الحوار اللي دار بين لوايساتها ،، الارض مشات وجات والعقل طار وبلا متشعر دفعات بالجهد والعافية شاعلة فيها وواجهات هند وجها لوجه وعينيها خارجين وكلها كترعد بالاعصاب والفقصة

سارة: حرجتي معاها؟؟؟ هاااا خرجتي معاهاااا؟؟ مشيتي خرجتي نتي وياها صااافي… علااااش خرجتي معاها ؟؟ جاوبيني علااااش؟

ناضو البنات بجوج مصدومين كيرمشو وهند مخلوعة اما منال كانت على سبة وهي سبابها حتى قطع عليها غالي الهضرة ومرضات بسببها حتى حرارت عليها النعمة

منال: شنو كاين مالكي ياك لاباس؟؟ اش واقع ؟

سارة: هزات صبعها وراسها) نتي مكنهضرش معاك حسابي معاك هوا اللخر (جرات هند من يدها) شنو بينك وبينها ؟؟؟ هضري(بصرامة) علاش مشيتي خرجتي معاها لشنو باااغا توصلي بالضبط؟؟ جاااوبيني

هند: نترات يدها) اوييلي واش سوقك؟؟؟ نخرج معامن ما بغيت نتي سوقك؟

سارة: بغضب) ااه سوقي .. فهادشي هادا بالضبط سوقي … جاوبي لشنو باغا توصلي شنو الهدف ديالك نتي وياها هضري

منال: بارتجاف وصدرها كيضرب) شوفي(بتحدير) راك كتقلبي عليا اسارة ها ودني منك سيري عطينيا التيساع كما عاطينر ليك حسن ليك براك غير المشكل اللي تسببتي لي فيه مع خويا حياتي كلها وانا وياه كي السمن على العسل حتى جيتي نتي

سارة: باصرار) انا ليوم مغنتفااكش… حتى نعرف علاااش وشنو كيدور هنا والله مغنتفاك معاكم

هند: ببرودة) ايوا على ما فخيلك ركبيه

سارة: علا مافخيلي نركبو واخا…انا الاللة غنعيط ليه دااابا ونشوف هاد الفيلم ديالكم كاااملين فين غادي… انا غنوريك( كترعد) والله حتى نوريكم

منال: جراتها من يدها) اجي لهنا… واش شغلك ؟؟؟ مالكي طالقة ودنيك غير كتسنطي واش واش …(مالقات متقول) واعباااد الله(شدات راسها) شهاد الموصيبة هادي

سارة:بتوثر) باغيين دخلو بيني وبين راجلي وترحعو ليه ديك بنت الزنااقي..داكشي علاش مشيتي نتي خرجتي معاها …انا غنوريك ..ليوم تخرجي معاها غدا تعيطي ليه يوصلك نتي وياها بعدو تجيبيها ليا هنا للدار ..مزيان تبارك الله

بدات كتفتف فتيليفون وترعد بالفقصة خرجات من البيت خلاتهم مخلوعين مشات زدحات الباب وسدات عليها وهند جلسسات كتفتف وترعد

هند: اويييلي صافي هادي اللخرة ليا معاه .. صافي هاد بنت الحرااام غتشريها ليا فالكحل اويلي

منال: بتوثر) خليييها.. ماتجاوبييهااااشالى سولك قوليه مكااين واالو ماخرجت لا مع سكينة لا مع زعطورة وهي بغات تلسق فيا..نكري فمرررة

هند: بارتباك: ناااري .. اويلي.. ناري غنشدها نقتلها كنترعد شوفي يدي

خرجات اسية كتجري من الحمام كتشوف هنا ولهيه ومشات للبيت دخلات عليهم مخلوعة كتسول مالهم وهما تالفين ماعرفو كيفاش يديرو يفلتو منها ويطلقو عليها شي كدبة وماخصهمش نهائيا يقولو ليها لحقيقة او تعرف شكون هي سكينة حيت يجي النهار اللي تنفاجر فيه على والو وتجبدها ولا يملي عليها راسها شي حاجة حتى هي وتصدق منال مشوهة وتسبب فخراب الخطبة وعلاقتها بخوتها بجوج وما خفي اعضم

منال: هادي تسطاات .. حنا كنهضرو على الحوايج ولبنات وهي جات قالت ليك وااالو مشيتي خرجتي مع ديك البنت اللي كان غالي كيعرف شحااااال هادي

اسية: شكون هاادي؟؟؟

منال: هاديك اللي هضرنا عليها فلكوزينة وشمعاتنا ومشات شراتها ليا مع الغالي.. البنت يعلم الله فين زادت واش تزوجات واش خوات البلاد وهي مزالة حاضيانا معامن كندخلو معامن كنخرجو

اسية: اويلي!! ايوا بزاااف .. بزاااف زااادت فييه.. والله غير الى ما وريتها شغلها هاد المرة

كانت واقفة فالبيت كتصوني عليه وتعاود ولا من مجيب .. من اللحضة اللي خرج فيها من الدار ما رسل ليها مسج ولا تاصل بيها .. هي كتصوني وتعاود واسية فالبيت جالسة كتصوني عليه فالواتساب وتعاود حتى جاوبها وه ات راسها معصبة كتشكي

اسية: الو مولاي الغالي

غالي: الو الواليدة .

اسية: لاباس اوليدي هاني ؟ مرتاح

غالي: الحمد لله ونتوما كلشي مزيان

اسية: منيين اوليدي .. المشاكيل المشااكيل غير الصدع والنكد

غالي: بهدوء وصوت تقيل) ياك لاباس ؟ اش واقع عاوتاني؟

اسية: هاد المرى هادي راه كتقلب على خزيت!! هند دخلات هاد العشية كانت مع صحاباتها مشات شرات شي حويجات ومع الدخلة شدات فيها مرتك قالت ليها لا وااالو كنتي مع شي وحدة ما وحدة حقا كان كيعرفها الغالي شحالل هادي!!! نوضات لينا العافية وبغات تشاد مع البنات

غالي: امم..

اسية: عيينا بالصدع عيينا بالمشاكيل بزااف علينا هادشي

هند: انا مشيت مع البنات كنعرفهوم هما اللي وراوني المدرسة ديال التجميل وهي لسقاتني قالت ليك لااا مشيتي معاها وسمعتك ..كتسنط علينا وهزات الهضرة عوجة ..علاش كتسنط علينا ؟؟

غالي: فين هي دابا حداك ؟

اسية: راها فالبيت

غالي: عطيها تيليفون

مشات اسية كدق وحلات ليها سارة وتيليفون فيدها مزالة كتصوني وقالت

اسيةءي هاكي ها الغالي بغا يهضر معاك

هزات سارة خنافرها وجاوباتو

سارة: وي غالي كنصوني عليك دااابا فتيليفون مكتجاوبش

غالي: سمعي مزياان سمعي.. غتجمعي حوايجك كاملين ماتخلي تما حتى حاجة ديالك وغتمشي لداركم .. فاش غنرجع غنديرو حد لهادشي

الجملة الاخيرة ضرباتها بحال الى ضربها شيف وقسمها نصفين .. داخت وعطات تيليفون لاسية وبدات كتفتف وتشد هنا ولهيه وهي تسخف غيبات ليهم واسية كترمش وتشوف فيها زادت تعصبات وبدات كتعيط على البنات وتيليفون فيدها كتنكر

اسية: سخفات عاوتاني جوج كلمات بااط .. اش قلتي ليها ؟؟

غالي: صافي دابا اللي نطولوه نقصروه .. غتجمع حوايجها وتمشي لدراهم عند باها حتى نجي ونشوفو هادشي

اسية: فدهشة) اويلي على تجمع حوايجها وتمشي شهاد الهضرة نعل الشيطان الغالي

غالي: سمعتي اش قلت؟ وبلا ماتنفخو ليا الراس وانا بعيد …غتمشي لدار باها حتى نجي

اسية: نعل الشيطان الله يهديك وخدمتها ؟؟ اش غدير وهي خدامة هنا

غالي: صافي دير سيرتيفيكة وتمشي تسنط لعضامها ماعندي مندير ليكم انا ومامساليش لمشاكلكم ومايبقاش شي واحد يعيط ليا يسولني شا غندير وكيفاش غندير..كل واحد يصبر راسو وسد عليا هادشي..يالاه الله يعاون .

قطع وخلا اسية كتمتم وتشوف فجنابها ودارت يدها على فمها مشات لقات البنات نعسوها فوق النموسية بالنفخة وبقات واقفة كتنكو على راسها

اسية: هااا علاش كتقلبي.. هانتي جبرتيه دابا وراسك قااصح عييت نقوليها ميكي..ميكي ..خلي عليك الراجل راه يعيا يصبر غادي ينفاجر.. هانتي مامشيتي حتى خليتي عشتك

بلعات الريق سخفانة والدموع نازلين هع جناب عينيها كتنين

سارة: بغيت مااماا.. عيطو على ماماهه.

اسية: هاني غنعيط ليها ..تجي هي وباك يشوفو هادشي بعينيهم ..

هزات تيليفون كتصوني على مها ويدها فجنبها غادة جاية بواحد لكولون قصير وديباردور ورقيقة والكرش مكمشة لداخل كتبان من اللور بنت العشرينات .

اسية: الوو .. عليكم السلام.. مكاين خير الاللة اجيو عند بنتكم الله يرحم الواليدين .. ماخصنا صدع ماخصنا مشاكيل تمشي توقع ليها شي حاجة نوليو فسين وجيم.. اويا سي تخوو هادشي.. سي تخو بزاف

المشاكيل العائلية اللي مكتساليش.. لاكن بالنسبة لسارة هوا عذاب وجهنم كتعيشها وبدات كتحس بناقصو الموت كيدق قلبها.. ماقدراتش تحمل وتقول العافية كتاكلها وبغات اللي يبردها ليها ولا يطفيها ولا تموت فخطرة وترتاح. ماوصلو واليديها حتى كانت غتموت وكتجلس بزز.. وصلات لدرجة صعيبة وصعيب على اي انسان يتحملها ..كتحس براسها غتودع روحها الى خرجات من ديك الدار والقلب لاسق تما اما العقل واقف مابقاتش كتفكر ورجعات غير كتحس .. كتحس بالنار كتلتاهمها مافكرات لا فخدمتها وكيفاشغدير ولا فحتى حاجة اخرى .. فقط كل ما كيدور فراسها هوا كلام غالي اللي قاليها وقالتا بواحد البرودة كأنه كيعني اشنو كيقول.. الام تشادات مع اسية بالهضرة مني منك والاب كيهدي الاوضاع والام مكانتش وحدة سالهة حتى هي وانما حارة ولسانها مبري منها .. واسية حتى هي كتعطي الكلام بالقنطار ومكاين غير هاك بالاك بحرف السين وبهضرة مكانسة والبنات كيسكتوهم ماتدخلوش بالدفاع حيت اسية كانو فيها عشرة ك كتلوح الهضرة ودور وجهها

زهرة: بنتي ماسي سايطا عليك باس تفقصيها ليا وتمرضيها.. صابرة ليكم وعليكم اما هي من اللول متقبلبهاد التزويزك دالويل

اسية: ايوا حتى دابا ماسديناهاس هاهيا ديرها معاكم حتى يزي ويفك معاها هاد الزرك هادي بناقص منها نسوبية

زهرا: اييه نهار اللول زيتي كتحلسي علينا باس نعطيوك بنتنا ودبا عملتي لكرون (ضارت عند سارة) نوصي تمسي بحالك ..يالاه نوضي

اسية: ولدي الف وحدة تمناه الله يحفضو وينجيه باااقي يتزوز ويعاود الصلة عالنبي عليه الله يحجبو الله يحجبو

زهرا: ايوا حتى بنتي دابا نزوزها لسييد الرزال …(شافت فسارة) يالاه تمسي بحالك ..بغاو يقتلوك بالفقايص ويطعنوك

سارة: بتعب) خليييني… مغنمشيش

زهرة:ضربات يد فيد) اويلي وحدي على منمسيس وهوا قالك بلسانو زمع باليزتك وسير لداركم

سارة: بارهاق شديد) ومغنمشيييش … صافي خليوني..خليييوني غتقتلوني

اسية رجعات اللور ومشات جلسات دارت رجل على رجل ودورات وجهها خلاتهم مقاتلين معاها فبيت النعاس وهي مريضة مكتقدرش تحرك .. بقات هاكاك كتمايل وتعذب حتى تخلع عليها باها شافها بدات كترد وتقجات وهزها داها لمستشفى فشلانة كتلوى فبلاصتها اللي شافها يقول واكلة تسمم.. لاكن الحب صعيب والربطة زغبية كتر من التسمم وسمها قوي مايجي قدامو حتى سم .

علقو ليها السيروم وعطاوها مهدئ عاد نعسات رتاحت في حين اسية بقات فالدار هي وبناتها وتاصلات بالغالي من جديد

اسية: كتنهد) مابغااتش راه بقات كترد هنا حتى خرجو مسارنها وداها باها لمستعجلات تقول البنت كلات السم

غالي: صافي خليها دير اللي بغات بغات تجلس تجلس..المهم غنجي ونشوفو شنو نديرو

اسية: وكن نعلتب الشيطان حسن ..

غالي:الله ينعلو ويخزيه.

قطع معاها وتاصل بعبد لكبير فالمستشفى اللي خرج هاز الهم والعكاز فيدو معكز على رجلو اللي عوجة عندو فيها اعاقة ووقف برا كيهضر معاه وبحال ديما كيلقا الحق مع غالي ومكيجبر مايقول

عبد الكبير: باسف) اييه فهمتك فهمتك

غالي: بانفعال) هادا هوا السبب ..ميمكنش لنا نعيشو هاكا اعمي على الاقل حتى نجيبعدا ونشوفو اش غنديرو حسن مايبقاو كل مرة مشادين فالدار مكاينش اللي يفكهم

عبد الكبير: لبى مابغاتش تخرج من دارها من حقها حتى هي

غالي: ماقلناش لا ولاكن دير عقلها شوية حتى نجي..والغيرة على والو مكاين لاش

عبد الكبير: انا غنهضر معاها بالعقل.. بغات تمشي نديها ترتاح بغات تبقا غنخلي معاها مها

غالي: الحل اللي يناسبكم نديروه المهم المهم نوقفو هاد الصدع..واخا هادشي راه خصو حل من الجدر مايمكنش وقت ما بغيت نسافر نقلبو على شكون يرد ليهم البال

عبد الكبير: الله يدير اللي فيها الخير.

مور هاد الاتصال كانت اسية فالدار جالسة طالع ليها الدم من شنو وقع حتى صونا تيليفون حساب ليها غالي لاكن كان باها ..هزاتو بالادب ردات وبدات كدور فراسها

اسية: واخا الحاج..واخا .. ان شاء الله..ان شاء الله( قطعات)

منال: جالسة قدامها) با سيدي؟ مالو؟

اسية: كدور راسها) قالك راني عياان خاصك تجي والناس كيجيو يشوفوني.

منال: امم

اسية: بلاتي نقولها لغالي (تنهدات كتصوني) الو .. اا.. باك سيدك راه عيط ليا .. قالك عيان خاصني نمشي نشوفو نوقف معاه

غالي: فوقاش غتمشيو؟

اسية: ايوا مللي عيط ماعندي منعمل خاصني غدا نمشي

غالي: دي معاك البنات مايبقاوش بوحدهم

اسية: منال اصلا كانت غادية تابعها توجاد ..ايوا دابا صدقت غنمشي معاها حتى انا شغنديير

تفرق المجمع وشدات اسية تران هي وبناتها لمكناس وجلسات سارة فالدار وجلسات معاها مها لاكن بلا خبار اسية اللي ضنات انها حتى هي دارها واليديها .

مشات الايام في سلام وتبات لاكن خاطر سارة بقا مريض ومها كتزيد تكمل عليها وكل شوية تجلس قدامها ودير يد على يد

زهرة: واش كيعيط ليك ولاواالو؟؟

سارة: جالسة فقنت الفوطوي وشادة تيليفون مقلقة) ماعيطش من داك النهار

زهرة: واش هادا بعقلو؟؟ هادا راه مسالي اللي مكيسول فمرتو لا واش حية ولا ميتة؟؟ شهاد الزواج؟؟

سارة ساكتة وكتكتب ليه مسج والدمعة حاصلة فالعين و زهرا ماعجبها حال مابغاتش تسكت

سارة: مكتسول فيا مكتعيط ليا ماعرفتيش حتى بقيت ؟ بغيت غيير نعرف اشنو درت لييك؟ شنو اناا درت ؟ واش منهضرش على حقي؟؟ واش ما ندافعش على زواجي؟؟ جاوبني وماتخليش المسج ديالي واقف عندك انا مرضت وعييت كنحس براسي كنموت اغالي..واش مكنبقاش فيك؟ لهاد الدرجة قلبك قاصح ؟ ماعطيتيني فرصة حتى نهضر وندافع على حقي وعلى راسي دغيا سخيتي؟؟ كنتي كتسنى السبة ياك؟ قلها وعادي غنتقبلها منك الى كنتي كتصنى السبة وباغي غير الفرصة فين نتفارقو صارحني وقولها ليا فوجهي .. واجهني وقول ليا صافي دابا رجعات صاحبتك القديمة وبغيتي نتفارقو باش ترجع ليها حيت من نهار تزوجنا عمرك قلتي ليا ديك الهضرة حتى بانت هي،، والدليل هوا بسببها دابا حنا مخاصمين وحياتنا تقلبات .. غالي .. انا مامستاعداش للفراق.. مامستاعداش والى تفارقنا تقدر توقع ليا شي حاجة انا متأكدة. كنتفهمني وتفهم مشاعري وتعذرني ماشي تجي ضدي.. خاصك توقف معايا انا مراتك ولاكن مع الاسف ماعطيتني حتى فرصة نشرح ولا ندافع على راسي وربي كيشوف وغيخلص كل واحد

المسج مشا والصونيط فالباب ..حلات اسية وكانت بشرى صاحبتها المفضلة داخلة بالتبسيمة والشيكي والحركات لكلاسيكية وصياغة حمرا فالدفار كتسلم بالتاويل ودقها فاللباس والاناقة والمضهر لا يعلى عليه .. بشرى من بنات الوقت وبنات دارهم ومن اصول فاسية محافضة وكما شبق وتذكر انها كتختار معارفها واصدقائها بعناية.. ماشي تكبر منها بل متواضعة وتقدر تهضر مع اي واحد جلس حداها وتقذم مساعدة لاكن حياتها مكدخلش ليها اي كان ومترضاش ترافق اي واحد وكتحتارم وتقدر العوائل والكنيات المعروفة او المناصب اللي تشدات بالقراية والدراسات العليا ..اما الناس اللي كيديرو الفلوس من مشاريع خاصة مستويات عادية فلا قيمة لهم عندها بالنسبة لها لاكن كتحتارم وتقدر مع ذلك ومكتجرحش الناس وديما كتعامل بلطافة واحتارم وكتآمن ان الانسان كما كان يستحق الاحترام وليس الاحتقار.

لقات سارة جالسة والضيم طايح عليها وهادا اكثر من لقاء تلاقاوه من بعد الحادثة.. جلسو بجوج فالصالون كيتجمعو وزهرا فالمطبخ كتخلط فالكيكة وكتسمع كلام سارة اللي مكيهمهاش مها تسمع حيت اصلا كتعاود ليها الصغيرة والكبيرة .

بشرى: ايوا وباش رد عليك؟

سارة: بوالو.. عاد شيفطتو

بشرى: لااا مكانش كاع عليك تكتبي ليه داكشي عاد ميزيد يتنفخلو الريش

سارة: بتعب) ماقدرتش ماقدرتتتتش .. عييت وعندي احساس رجع كيهضر معاها ..متأكدة

بشرى: وباش تأكدتي ؟؟ قالها ليك شي واحد؟ انا مافهمتش ختو اصلا علاش مشات كتصاحب معاها ؟؟ شنو الهدف من هاد الصحبة زعما تقاداو البنات

سارة: هادشي اللي كنتي كنهضر عليه ولاكن راكي شفتي فين وصلنا… غالي تبدل .. تبدل ورجع عندو زايد ناقص يعني كي مشيت كي بقيت

بشرى: بثقة ) من حقك ماتخرجيش من دارك.. عند عليه حقوق

سارة: مابغيتش نوصل لداكشي انا جلست حيت الى خويت داري يقدر المشكل يكبر فغيابي منعرفش اشنو كيوقع .. نبقا نتسناه انا يجي وهوا هنا كيخطط لمستقبلو؟؟ منقدرش .. منقدرش نخلي ليه الفرصة

بشرى: تنهدات) فوقاش غيجي؟

سارة: بقلق) غدااا… غدااا راجع وخايفة.. ماعرفتش شنو غادي يوقع

بشرى: ماعندو مايوقع غتقولي ليه داكشي اللي شفتي وسمعتي والسلااام… دابا تلقايه بدل الجو تما وبرد غادي يجي مبررد.. وحتى نتي برردي.. برردي اللي قال ليك قولو اه

سارة: كتنهد) كن راه شبع مسارية مع هادوك اللي خدامين معاه

بشرى: عاادي دي كولييك ! عادي راه اصلا كان كيشوفهم يوميا فالخدمة

سارة: كدور راسها) امم ودوك الكاوريات .. منساااش ديك المشية لألمانيا وشنو داز عليا فيها … ياك غير عشر يام ! جيت مريييضة عقلتي عقلتي.. عقلتي على هاديك اللي خدامة معاه شنو سميتها؟؟ حكمة ولا حكيمة ولا منعرفت .. كنا خرجنا كاملين ديك الخرجة المزففتة وفالرجوع كان شادة اوتيل حدانا ورجعات معانا فالميترو وفاش دخلنا لقيناه عامر ويالاه ثلاتة دالباايص اللي خاويين جلس هوا وحداه كانت بلاصة دغيا جلسات فيها هي وبقيت انا كنشوف جلست قدامهم .. تخيييلي كي وليت كنديير .. تخييلي بغيت نقتلهاااا وكنشوفو جالس حداها والسيد مرتاح ماعندوش مشكل ماقالش ليا اجي هنا ونجي انا حداها مثلا..حتى سيفطت ليه مسج فتيليفون وقالي راحنا فميترو فقصنييي..فقصنييي وبديت كنتررعد حتى طعني عاد ناض وقف تكا على الباب وفاش نزلنا قالك نوصلو معاها شوية الليل والدنيا خاوية… حنا مالنا سوقنا!! كن كانت بوحدها ما تكملش على رجلها زعما ! الحارس الشخصي ديالها هوا

بشرى: ماعرفتش اش غنقوليك.. ولاكن ماشفتش باش نحكم كن شفت الوضع والديكور نقدر نقوليك واش عادي ولالا .. هادي منقدرش نحكم فيها

سارة: وكيقوليا كتزييدي فيه… انا دابا مابقات كتبان لثا حتى وحدة.. هاااد صاحبتو هااادي منين خرجاات منيييين الله يعطيها الموت نتهنااا منها نتهنننناااااا(زيرات عينيها) بلعاني زوجات ختها لخوه بلعاااني باش دور بيه

بشرى: ايوا صافي.. اش جاب لجاب.. نكافة حتى هي تغيري منها ولا يديها فيها هوا كن بغاها كن بقا معاها

سارة: اويلي خواتاتو عاجبااهم كن تشوفي كي كيهضرو عليها .. قالك شرات الدار وعندها جوج محلات .. شوفي اش كيعجبهم

بشرى: ايوا صااافي .. راه كتبقا نكافة وصافي…عرفتي شنو غديري .. دابا راجلك جاي غدا خاصو يلقاك نعام الاللة برانسيس..يالاهي معايا يالاه طلعي المورال نوريك باش تسدي ليه الفم ميتكلمششش ههه

من الغبينة والضيم خرجاتها بشرى ديك العشية وركباتها معاها فسيارتها الصغيرة .. وهبطو لاكدال لصالون كبير فيه كان حمام سبا و كل مايخص النساء.. واخا سارة مابغاتش ضحي بالفلوس فالاول وبقات كتهامس هي وبشرى فلاكيس وكيشوفو الاثمنة جاوهم طالعين بزاف.. مهندسة وطبيبة ايييه لاكن ماخفي اعضم.. الفلوس عندهم فالقلب وكيخرجوهم بحال الى كيعطيو الدم تقول ماياخدو فالمقابل والو.

سارة: بزاف على هاد ليبخي حمام دوسون سيكونط اش فيه كاع

بشرى: بلاتي تجي هاد لاسيسطونط .. ليبخي طالعين

لاسيسطونط: بونجوغ جوبو فو زيدي ؟

بشرى: بتبسيمة) ليبخي هنا طااالعين ههه.. عندكم حمام واحد صافيي؟

لاسيسطونط: لا كاين ربعة

سارة: فين ؟ ماشفناهمش؟

قدمات ليهم اللائحة كيشوفو ويداو يتشاورو واخا داكشي غالي ماشي فمتناول الجميع لاكن مرة وحدة ولا مرة فشحال مافيها باس ..هادشي اللي قالت بشرى باش بردات عليها هي وصابحتها وجات المناسبة دابا او نقولو جوج مناسبات اللي خاص سارة توجد راسها فيهم.. مناسبة دغالي اللي جاي من السفر والمناسبة دمنال اللي عرسها قام .

دخلات لاللة سارة تحممات وتفششات عليهم كيف بغات.. ايوا شنو ماشي مخلصة الفلوس! قبل الحمام ضارت بالمناطق الانثوية ومكانش فيها الزغب تقول بنت عشر سنين.. اللحم ابيض حليب والشعر رقيق شيه منعدم ونوثثتها بيضا وردية فيها شوية ديال الزغب رقيق زعر دغيا زربات عليه تقولهم و كان تما . اما لحمها كامل صافي كيشعل وزاد شعل مع تحميمة تحمرات وخرجات طلقات اليدين والرجلين وبشرى حداه

وبشرى حداها مكدير والو غير جالسة وكتختار معاها اللوك اللي يناسبها باش تستقبل راجلها، صبغات الدفار بالاحمر وبان فصبعانها البيضين كيشعل وزادت ليميش لشعرها بانت بحال شي روسية ومع شفارتا زعرين مكيبانوش ركبات الشفار خفاف بانو عينيها اكثر جمال وجادبية، وصاوبات الشعر وتبدلات فقط بمجهود بسيط.

خرجات من تما عاجبها الحال ومتحمسة وفرحانة وبشرى كتزيد طلع ليا المعنويات وهما كيتشماو جهة ايطام باش تاه. شي لبسة للنوم ديازها لكلام

بشرى:اش قلت ليك؟؟ ايوا شفتي…قلت ليك غيتبد ليك المورال..دابا ديري غير شي عكيير خفيييف غوز يبان طبيعي وشي فعاجو لحنيكات حتى هوا خفيف وشي بارفااان… بارفان تكون داايزها الكلاام. عندها تأثير كبييير اكثر من المكياج

سارة: عبسات)ماتقكرييينش كنسمع بارفان كنتفكر البارفان اللي هضرو عليها دوك الخانزات.

بشرى: دابا نسااي عليك هادوك ولخرين والكرة الارضية ركزي فراسك.. ديري شي رويحة يشمها وماتفيقو من دوختو غير هي.

بدات سارة كضحك ودخلات بدات كتعوج تلقائيا لمجرد انه عجبها راسها لبساتها شخصية جديدة.

دخلو كيشوفو الملابس الداخلية المثيرة والبائعة كتوريهم

بشرى: شي حاجة مثيييرة اكثر

البائعة: تفضلي معايا مدام

وراتها انواع كثيرة نفرات منهم بشرى ودورات وجهها بخفوت قالت

بشرى: مثيرة عندها هي الشباكي وقوة التقابي والفراقر وكثرة اللوان متعرفي فين تخشي رجليك..مسكينة

سارة: منلبسش هادشي هاكا حالتو

بشرى: راه حالتو نيت .. بلاتي ها واحد

جبدات واحد احمر خفيف ضريف ناعم ورائع بدات كتخيلو كيف غيجي وقالت

بشرى: هدا اسارة.. هادا غزاال يجيك

سارة: عندي بحالو تقريبا

بشرى: مضيعيهش غيجيك غزال

سارة: اوييلي غنبان بحال شي بيت

بشرى: نوو دابا نتي مع راجلك هادشي اصلا صاوبوه للمزوجات وسرقوه العاهرات داكشي علاش ولاو معيورة

سارة: افف..وصافي ناخدوه

المجهود فالتوجاد والحماس والانتضار بحال الموت البطيئ.

رجعات بحالها للدار وزهرة طول الوقت هازة خنافرها وكتشوففيها بتص عين معاجبهاش الحال ولسانها سليط غادية بيه جايا بيه .. واش ماعندك نفس ؟ … واش قالك سييري ونتي عاد نايضة تزوقي ليه؟… واش كاين غير هوا.. مافثك نفس.. طرقتي ليا مرراتي،، جمعي راسك،،، يجي توكضي ليه ،، ماترخايش يلقاك مرخية،، راك طبيبة بعزك وشانك،، وبزااف دالهضرة دخلات لسارة من ودن وخرجات من ودن وهي واقفة قدام المرايا كتوجد راسها معارفاهش وقتاش غيوصل بالضبط لاكن ضربات الحساب لاي امر طارئ ، واهم حاجة بدات كتدرب على كيفاش تهضر وتصرف وتحرك قدام المرايا كما وصاتها بشرى باش تشوف الشكل دالحركات اللي كيجيها زوين ويجي معاها وطبقو قدامو بلا متلف . لبسات وتقادات وبانت الاثارة والجمال ومشات بالليل سدات عليها من بعد ما تعطرات مزياان ودخلات فالفراش تنعس واخا شي نعاس ما جاتا وبقات كتقلب وتشقلب حتى ضربات الربعة دالصباح وسمعات الساروت ضار فالباب وقفزات من بلاصتها ..طارت لباب البيت طلات شافتو كيسد الباب وقدامو الشنط وواقف بديك الوقفة وديك الهبة لابس دجينز باين جديد وتيشوط بولو بالكول زرقة والشعر محسن مقاد واللحية هي هاديك بانت عليه ميريكان وجاب ريحتها معاه ..لقا نهضرة فالدار وخلا الشنط حدا الطبلة محطوطين وتم غادي جهة البيت هاز فيدو صاك متوسط الحجم كحل ، شافتو جاي جهة البيت ورجعات كترعد وتفتف تالفة والقلب كيضرب تخشات فالفراش وطلعات عليها الغطا دارت راسها ناعسة وبدات كتسنط عليه .. ماشعلش عليها الضو واحتفى بضوء الفايوز وهوا كيسرح عينيه بانت ليه ناعسة مغطية كيبان فيها غير الشعر وحط تيليفون والسوارت بشوية بلا ميدير الحس ورجع اللور كيتجبد من فرط التعب حيد حوايجو وحل البلاكار جبد بوكسر وشورط قصير ودهم للحمام حتى توضا ولبس حوايجو ومشا للصالة هاز سجادة والفوقية وبدا كيصلي والنهار كيطلع بشوية ختمها بالفجر وناض مشا للبيت كيتفوه لقاها مزالة كما هي وحيد الفوقية لاحها ودخل حداها تلطلق على على ضهره باغي ينعس.. لاكن ماجا فين يديه النعاس حتى ضارت عندو مالي شافتو ماقاسهاش ودارت راسها عاد عاقت بيه وتلفتات عندو متفاجأة كتبسم

سارة: غالي!!! جيتي

غالي: ببرودة) امم (ساد عينيه)

سارة: عنقاتو) توحششتك

مارضش عليها لاكن طبطب على دراعها وتقلب لجهة اخرى وبقات مصمرة كتشوف فيه وطلع وتهبط شمات فيه ريحة السفر والطيارة مع البارفان وبدات كطلع وتهبط وهوا لايح الغطا وغاشيه بين رجليه وعريان قدامها منشور بالصهد.. سكتات حتى عيات وبغات تصالح معاه وبدات كتعيط ليه بشوية فالاخير طلات كتبسم ودور عينيها جراتو

سارة: نعسو؟؟

غالي: قلب وجهه) لا

طرشة عطاها عليها رداتها اللور مصدومة وتقلبات كتبكي فصمت وهوا مقلوب لجهة اخرى ناعس حتى صبح الحال وصبحات شادة تيليفون فالبابكو دالمطبخ كتشكي وتبكي على بشرى

سارة: عرفتي بغيت نمووت .. لبست وتقاديت وفاش قالها ليا حشيت براسي بحال شي عاهرة ….. احمم حتى لغدا ونكمل ليك تهلاي فراسك

قطعات بسرعة فاش شافت زهرة داخلة وبدات النكير هلى الصباح وطالع ليها الدم لاكن فاش تلاقاتو خارج من البيت بتيشورط وسروال سوفيت ب ات كضحك وسلمات عليه باليد واخا بينات ليه التقليقة .. اما هوا دخل للمطبخ راسو كيدور بحال عادتو مولف يصاوب قهوتو راسو بينما دورات سارة وجهها وخرجات لابسة سروال بيجامة حشمانة وماقدراتش تلاقا بيه وجها لوجه ومافطراتش معاه على نفس الطبلة من غير مها زهرك اللي جلسات معاه كتهضر مابغاتش تسكت وهوا كيحرك ليها راسها ويشرب قهوتو

زهرة: حسوومة ولاهيلا حسوومة.. ماسي سايطة باس تعاملمعاها هاد المعاملة اسيد الغالي ونتا مول العقل والدار لكبيرة تقوليها سيري فحالك .. لازم تعملو تحل لهادسي هادا .. سوف غير دابا سحال ونتونا مزوزين مازال ماعملتو وليدات ماعملتو حتى حازة واس نتوما زوافريا!!

غالي: نايض) اه .. ايوا يكون خير..يكون خير .

ناض خلاها مادخلش معاها فنقاش نهائيا وماعرفات لاشنو فراسو لا شنو باغي.. هادا هوا غالي.. مع الاقارب او الاصداقاء وحتى اعز الناس ليه كيكره اللوم والى غير خالتو ولا عمتو بقات كتعاتبو علاش ميتصال بيها ولا كيسولها ولا ما ومدازض يشوفها او بغا شي واحد يصفي معاه شي حساب كيتسل بسلاسة بلا ميدخل نهائيا فالنقاش.. خصوصا انه مكيبان ليه حتى واحد كيفهم بحالو وحسن منو وبالاخص النساء.. من ديما كيجيب ليه الله باللي تفكيرهم مختالف ولاحاجة ليه فالنقاش معاهم او خوض معركة وهوا عالم علم اليقين انه غيهدر طاقتو فيها على والو .. على عكس الاشخاص المتقفين بزاف او اصحاب مراكز عليا كيبغي يسمع ويحلل شخصياتهم منها نست كيقدر يستنتج طرق التفكير او العقليات اللي كتخلي الانسان ينجح ويكون فديك المرتبة محقق داتو

كان بناصر متكي رااشقة ليه كيهضر فتيليفون ولابس سورفيت مريحة بحال عادتو عزيز عليه النقا ويلبس الحاجة النقية والرفيعة ويكون ديما مرتاح والمورال طالع ليه

بناصر: اودي راه عرس ليلة تدبيرو عااام السي رشيد كحكخكخكخخممخ..،،،، ايوا ان شاء الله ان شاء الله السي رشيد الله يكير بيك… الله يجعل كلشي مبارك مسعود . سلم على العائلة والله يسخر .

قطع وناض جاس كيفرنس بوحدو ومونية واقفة كطل وتشوف فيه

مونية: كيضحك)شكيقوليك؟

بناصر: ههههممهم عاااود عيط كيأكد قالك وااالو تجيو تحضرنو معانا نفرحو بيكم ،، ايوا شبغيتي هاهوا عرض علينا الشهر اللي فات وعاود كيأكد دابا (شاف فيهم شاد الضحكة) ايوا شنو ضهر ليكم تمشيو؟

مونية: ويدها على فمها) لاالا ابناصر انا صافي خطيني العراسات مابغيتشنضيع الحج ديالي.. الخطوبة درانيا ودوزتها بزز ماحملت نشوف داك الشطيح وداك الرديح..غير خليني

بناصر: وشكون غيمشي؟!! هااء راه عارض علينا كااملين

مونية: حتى مو ..مت هشام عيطات لي قالت لي مرحبا بيكم ..مالقيت منقوليها

بناصر: ايوا دابا شنو ؟؟ العرس غدا وحنا مزال كنتشاورو نمشيو ولا منمشيو؟

مونية: سير غير نتا وصافي

بناصر: راه مخلطين كلشي علاش نمشي غير انا ؟؟ مالك متمشي غير نتي اللي حجيتي

مونية: الا سيدي غير خليني .. دي بناتك وخليني نتسنط لعضامي انا وانس حتا تجيو

بناصر: وايالاه سير قولها لرانيا الى يالاه توجد راسها(هز تيليفون) غنعيط لهاديك لاللة وحنّة حتى هي غتقوليك بغيت نمشي.. عزاز عليها لعراسات تبغي تمشي(كيوصني) الووو.. افينك….

سكينة: فالحانوت!

بناص: واش تمشي لعرس هادوك ديال مكناس

سكينة: اينا عرس!!!

بناصر: هادوك اللي جاو خطبو رانيا

سكينة: عرضو علينا!!!!

بناصر: وراه عرضو شهر هادا .. غدا دايرين العرس فالقاعة تمشي؟

سكينة: اهاه نمشي.

بناصر: يالاه هانا علمتك .. ماتجيش حتى نبغيو نمشيو تقولي مزال عندي هادي ولا عندي هادي ولا بلاتي نرجع من شي عرس هانا علمتك

سكينة: الا لالا صافي ..معاياش غنمشيو؟

بناصر: قالك ثمنية فشي قاعة تما

سكينة: ااه.. صافي

بناصر: ولاكن دير بحساب غنخرجو من هنا بكري ماشي حتى لتمنية..فوقاش غيسالي هاد العرس اللي غدا ليه ليوم؟

سكينة: لالا صاافي غادي غير نمشي نتخلص ونجي نخلي ليهم النكافات ..كون هاااني

بناصر: مهم هاني علمتك يالاه الله يعاون .

قطعات و جلسات كتشوف وتبرق قدامها والمراكشية كطير وتنزل فالمحل كتستف والتكاشط فالقنت محطوطين كيتنبتو ..كانت جالسة مابيها ماعليها كتكمل لخياطة باليد لواحدالتكشيظة من الجنب باش تديها لشي عرس خدامة فيه فوق شي سطح وناضت بالزربة كدور فبلاصتها دايخة وتردد

سكينة: مراكشية نتي اللي غتمشي للعرس انا معروضة غدا … ويلي ويلي خاصني باش نحضر باش …شنو غنلبس شنو غنلبس نو غنلبس(صبعها فمها) بلاتي نشوف اش غنلبس (سهات كتقلب) لالالا بلاتي.. غنلبس هادي واخا مواجداش غندرمو نكملوها دغيا؟؟

مراكشية: اليدين باقين ماتنبتو ليها خاوين

سكينة: نتعاونو دابا حيت هي اللي بغيت ..

مراكيشية: والعرس دالعشية؟

سكينة: غا نبتي معايا دغيا يالاه ندركوها نديها للمصبانة.. بابا راه والله مايتسناني عندو الوقت وقت .

تحناو بجوج كينبتو بالزربة ويعمرو وعاد بان ليها فيها التجديد وتزيد شحال من حاجة ..تشدات فالمحل عطات الجهد على تكشيطة وخلات المراكشية كتكمل ومشات كطير لسطح احدى المنازل الكبيرة وقفات على البزة وعلى الشغل حتى تهنات ورجعات كتجري وقفات على الحوايج اللي خارجين وسيفطات المراكشية وجوج نكافات معاها وجلسات فالمحل كتنبت سادة عليها حتى عيطو ليها تمشي تاخد باقي الفلوس فالهزة ديال الطيفور ومشات كتجري مع الجيلالي فسطافيط منها تخلص ومنها تجيب حوايجها .

الليلة دازت كلها جرا طاحت مهدودة في حين فاقت سارة مع العشرة على خاطرها بدات كتجمع حوايج السفر فالباليزة وغالي كيحل باليزات ديالو ويجبد حوايجو اللي جاي من ميريكان والهضرة مقطوعة بيناتهم .

بقات كطوي وتشوف بنص عين وبدات تعبس فاش شافتو كيجبد حوايج جداد ماشافتهمش عندو فاش مشا وكيحط والروايح واغراضه بلا ميتكلم معاها .

سدات على شنطتها وحطاتها جنب شنطة امها على برا ولبسات حوايجها وخرجات هي ومها لقاتو فالسيارة جالس داير النضاضر كيتسناهم وركبو معاه ساكتين والجو مكهرب شدو الطريق.

جالسة فالصالون تقول هي العروسة.. مادا يديها ورجليها كتفوه غتموت بالنعاس والفوطة على راسها وحمرا بالحكان وليلى واقفة عليها ويدها على جنبها

ليلى: عمي بناصر جاتو من الجنة والناس بغا يحضر حتى هوا

سكينة: انا تصدمت .. ومعطلتوشكاع متشاورت اصلا قلت ليه نيشان نمشي

ليلى: وشنو غتلبسي

سكينة: عضات شنايفها وقلبات عينيها) غنلبس واااحد القفطان.. وااحد القفطان يا ليلى ماشهيتك فيه.. متبان قدامو لا تكشيطة لا غوب سواغي.

ليلى: عاد خيطتيه؟

سكينة: يالاه هاد الصباح ديرو للمصبنة يتحدد.. عرفتي كي داير!!! داكشي ديال روميو اصاحبتي.. الخيال العلمي نقلتو من ديفيلي مهرجان القفطان.. واخطييير بالجججهد كتافو هاكا واقفين قصالة رومية بحال لافيست وواقفين وكامل نازل خطوط بليبيغل( اللؤلؤ) هابط حتى مخطط كله عقيقة حدا عقيقة فالابيض وهوا جا فالبيضوفيه شوووية مرشوش بالجوهر داك اللي فيه اللوان بااهتين بحال الضو.. بلا كضرب فيه الضو كيبدا داك المووف باارد صفر غووز .. لمعة وصافي مع الضو وهوا كله ابيض وفيه فتحة لقادم حد الركبة والعقاد من لفوقحتى لتحت ومجموع فصالة وحدة هابط ماشي كلوووش وماشي مزير.. مهم فصالتو خطييرة ومصرووع ااخر مكاين وعندو الكول اوفيسيي(الكول مربع طالع) فحال شي فيست وهوا قفطان والكول ڤي واقف. مهم خاصك تشوووفيه

ليلى: غيكون وااعر

سكينة: وخطيييير اصاحبتي شكتعرفي عليا.. دبا بغيتك ديريليا شي ميكاب بااااااارد كيوووت ميجيش معيق ..ميعيقش بيه بابا.. مهم وجهي يكون كيبرييي نقييي وحنيكات غوز وفمي حتى هوا طراسيهليا يبان مشلقم هه وديري ليا غوز بيبي صاافي وشفار متكترييش وايلاينر .. حجباني مشطيهم براكة مهم نتي تعرفي

ليلى: هادا هوا المكياج الكيوت اصلا اللي غيجي مع وجهك صرعيتها بالحول اوفيسيي دالقفطان ..مع نتي عند العنق واقف غيجيك واعر ..شعرك ضاروري تجمعيه حيت ميجيش مطلوق مع الكول

سسكينة: ضاروري؟؟ والو بغيت نطلقو

ليلى: مغيجيش زوين غتباني هيطوكية وسط مكانسة.. الكول كيبغي الشعر لفوق وحلقات باااينين .. غديري كوتشوفال عالية باش يبان وجهك كامل ودنيك وتخلي لقصيصةنازلة.. والشعر من اللور كامل يتهز وتجيكوتشوفال عالية وواقفة من اللور والشعر يهبط مسبسب حريير.. عرفتيكي غتجي!!! منعاودش لك

سكينة: بحماس:ك) يالاع بالاه سربي سربي.. مزال غنمشي نلبس حيت غنمشيو للقاعة نييشان .. وجهي ميخسرش؟

ليلى: لا ميخسرشليك واخا تمشي بيه حتى الناضور

سكينة: يالاه انطلقي.. اصلا نتي اللي كتعرفي ليا وشنو يجي معايا.. حتى واحد مكيطلعني بحالك فخبارك

ليلى: عنداك ديري شي زبلة قدام غالي

سكينة: متكية) والله منحلها لمو ..كي جاوك ضفاري اللي صاوبات ليا كنزة

ليلى: ناضيين.. هند كتعيط عليك؟

سكينة: اويلي دييما.. كتوصي وتعاود باش نمشي

ليلى: غير تهضريش مع غالي وصافي.. دابا وليتو عائلة

سكينة: لاالا منديهاش فيه.. ماتخافيش غندفع الكبير

ليلى: فعيه ماشي تفرعيه كي ديك الفرعة اللي درتي ليه قدام هند

سكينة: بتذكير) هيييه!! اويييلي نسيت راسي مخطوبة!! ويلي ويلي خاصني خااتم .. هاتك ضاروري منين نجيبو

كنزة: كضحك) انا نعطيك خاتمي هههه.. عنداك تلفيه

سكينة منحيدوش اصلا اري اختي.. وااعر منين خديتيه؟

كنزة: السعودي

سكينة:وااعر..كبير شوبة عليا ولاكن ماعليش قاضي غرض..جاني وااعر هههه وتاني المرياح ههخخخ

دار العرس خوات ومابقى فيها حتى واحد كيدور من غير بعض العائلة اللي كيتسناو عروستهم تلبس ويركبو يمشيو.. جات اسية مزروبة وصلها غالي ونزلات قدام الباب دالجردة كتهز جلايل التكشيطة الزرقة.. ايوا اشمن تكشيطة !! تكشيطة والى قالو تكشيطة .. الزرق سماوي ديال حرير الدودة فيها مربعات كبار مذهبين كيلمعو والثوب بحال الماء تقيسو يهرب والتحتية حتى هي فنفس اللون والخياطة باليد والسفيفة غليضة والفصالة مخزانية .. اما الشعر مجوع فالاعلى ودابرة ليه المشطة الفرقة فالجنب منفوخة والسرتلة فاليد والعنق عامر بالجوهر وتختو كوليي ديال الذهب بلدي والودنين تقال بالحوالف مدليين بلديين والساعة كتبان قديمة ومابقاش داك النوع المربع فالسوايع والسمطة رقيقة مذهب.. دايرة حداها كورميط تقيلة والخواتم كل خاتم كيبان بحال الحجرة فيدها والصندالة عالية بحال الصابو طالون مريح والمضمة والمكياج برز ليها الجمال.. الحق يتقل الزين زوينة ومزالة عاطية للعين والمشية متولة ماتلقاهاش فبنات عشرين عام .. والتقل تقيلة والشوفة بالكرام والشدة للتكشيطة وداخلة تقض غرضها علاش جات،، اما غالي نزل وطلع سروالو هاز راسو كيسوط من الصهد والحر ديال مكناس اللي ضربو فور ما خرج راسو من الطموبيل

وقف على برا وهز يدو تكا على الطموبيل بلباس كلاسيكي عبارة عن سروال توب بلو مارين كيبان بحال الى كحل وقميجة بيضاء فيها خطوط مع جناب الخياطة بلو مارين والكمام من لداخل بزخرفة فيرزاتشي بلو مارين والابيض والساعة فيدو فخمة والخاتم دالزواج واليد لاخرى فيها براسلي رقيق كحل والتيليفوان والسوارت ولقا ولد خالتو تما واقف حتى هوا ببلباس كلاسيكي ولافيست كيتسنى مرتو اللي لداخل تخرج .

غالي: كيسوط) وااا الصههد اصاحبي بفففف

يوسف: ااولااافتي الرباط اخاي هه.. ولا كيجيك مكناس سخون

غالي: ساهي) العاافية…اووفف… اش كتعاود السي يوسف.. كاين شي كونجي ولا والو

يوسف: مزال كنتسناو .. بغينا نخرجو من هاد الصهد شوية مزال ماكتاب

غالي: ودوز للرباط مرحبا بيك فاش تشد كونجي

يوسف: ترحب بيك الجنة

شاف مرتو خارجة هي ومو بالتكاشط والاناقة وحل ليهم الباب بالزربة طلعو وطل عليهم وقال

يوسف: بلاتي شوية نمشيو كاملين

غالي: يوسااف.. غي سيرر انا مزال غندوز نجيب هند وندوز على مدام.. مزال معطل شوية

يوسف: وصاافي نتلاقاو تما ..

ركب يوسف وزاد وبقا غالي برا واقف كيهضر فتيليفون مع نسيبو حتى خرجات اسية كتمايل وتزرب ركبات حداه وطلع سد عليه النوافد كلها وطلق لكليم كيشكي ويسوط مشا كيطير واسية شادة فالسمطة مخرجة عينيها

اسية: غاا بشوية علينا الحبيب الله يرضي عليك.

غالي: كيسوق بواحد اليد) واالو واش بغاو يصلحو هاد الطرقان زعما.. كتشوف الحفاري وسط الطريق وبنادم ماتعطيهش نفسو يعمرهم ويهضر شوية يصلحو هاد الطرقان( تنهد) معاامن تهضر.. الله يخلص كل واحد

اسية: عندااك ها واحد الحفرة!! هييه الحفيض الله

غالي: مشااكيل والله لعضيم.. المسؤول على هادشي نااعس.. اوديي

وصل لباب الدار دنسابو.. كانت دار فيها جوج طاج فحي نقي وهادي وبقا لتحت عيط لنسيبو وهبطو كاملين لابسين واجدين وزهرا مع الطول والضعف كتبان من بعيد.. لابسة تكشيطة باينة ديالها وشغل الكرا معروفومن بعيد كتبان الخدمة داليد اما الخدمة دالمكينة عندهم عيب وشي حاجة فوق العيب والى شافو شي وحدة لابسة الخدمة. المكينة يويلو عليها ويعيبو. نزلات وراهم سارة بتكسيطتها دالعرس كتلمع تقول عروسة ..السر طايح عليها وحشمانة مهبطة راسها وكتشوف فغالي بنصعين وحتى هوا كيختالس النضر .. داك التغيير خلاه يخطر عويناتو فداك الشعر الزهر والمشطة عالية والتكشيطة تقيلة وعامرة ومزينة بذهبها والمكياج واخا باين لاكن نقي و جاي معاها وواضح صايباتو فشي بلاصة راقية ومتحترفة. كتميل بالطالون حتى وصلات لعندو وحل ليها الباب ركبات اللور وسلم على نسابو وزاد مع الطريق غادي كيشوف قدامو ومرة مرة يهز يعينه كيشوف سارة اش دايرة وواش داكشي مزيان ولا عيان حيت كل حاجة كتبان على مرتو محسوبة عليه هوا اللي مسؤال عليها.. لي مسؤول عليها.. بان ليه العكر معيق بزاف وحمر وخلاها حتى وصل لباب القاعة الفخمة فين كاين العرسوصف السيارة وسط السيارات مقابلة مع القاعة واضوائها وتلفت عندها شار بيدو لفمو

غالي: نقصي شوية لغوج اليفغ

سارة: بدهشة) ها!! علاش؟مازوينش

غالي. اوفر..هاكي

مد ليها البكية دكلينيكس وبدات كتمسح اللور وتشوف فيه بنص عين اشنو زايد من غير المعتاد وبلا متشعر قالت قبل ميرش الريحة على عنقو

سارة: صافي صاافي راه الريحة عاااطية غتخنننق

العرس فخامتو كتبان من باب القاعة .. وعرس منال باين من الدخلة عرس اسطوري واخا عائلتها كلها ناس متوسطين وعندهم التجارة ماعندهمش مع الدراسة بزاف والوضيفة.. لاكن باها السي رشيد كان فواحد الوقت ميليونير مكناس والناس كلها كتعرفو وكلشي كيضرب ليه السلام فالطريق.. الحياة اللي كان عايشها هوا واسرتو قليل اللي كان عايشها وكان من الناس الاثرياءفمكناس.. كانو عندو منازل كبيرة فأحياء راقية بحكم خدمتو كمقاول فالبني وكانت عندو شركة ديالو بوحدو ديال البني فثمانينات والتسعينات ..وكانت عندو فيلا من افخم الفلل وكان كيستثمر فالعقار بزاف وعندو املاك فديك المدينة لدرجة كان داير اسهم فسمية كل واحد من ولادو ومرتو حتى هي وكان الوحيد اللي كيسوق سيارة مرسيديس فخمة فالتسعينات وعندها هاتف سلكي لاسق فيها ودخل لاسية سيارة ديكابورطابل وكانت فقط هي وصاحبتها زوجة احدى المسؤولين تما اللي كيسوقوهاد النوع دالسيارات وكيلبسو لباس متحرر بحكم ان ناس المدينة كانو محافيضين قليل اللي كتلبس النضاضر والكساوي وطلق الشعر وتخرج راكبة سيارة، لاكن شائت الضروف الليخلات مول تاج يحتاج ..والزمان تقلب واللي كان عندو وراس مالو تقيل اصبح ماعندوش او نقولو نقص بزااف.. واللي مكانش عندو وكان غير كيشوف ويتنهد اصبح عندو

لاكن بالرغم من كاع اللي وقع وبسبب المشاكيل اللي طرات فمكناس فواحد الوقت وتمنع البني فيها وتمنع الاستثمار لاسباب شخصية توقف البناء وتوقفو المشاريع وتوقف كلشي والناس كثيرة ضاعت وجميع المشاريع تهرسو وكاع الناس كلاو الدق وتهمشات وتنسات واصبح مننوع على شي مستشفى يتبنى تما او جامعات او مدارس وتقلبات الحياة فيها سفاها على علاها وخسرو بزاف دالناس رزقهم ومشاو ليهم الملاين وضاعو المشاريع وغرمو للناس فلوسهم ورجعو باغين غير يفكو المشاكيل.. تشتتو اسر وبداو المشاكيل يخرجو من كل جهة واللي مولف واحد الحياة مابقاش قادر على حياه الفقر وكلشي ترون وكلشي طاح فالارض وتهرس.. حتى دازو سنين وكبر اللي كان صغير وتزوج اللي كان عزري واللي ولدول و اللي مات مات وتبدلات الاوضاع وبدات ترخف على مكناس شوية عاد رجع السي رشيد كيحاول ينوضمن جديد من بعد ما تشتيت الاسرة و دخل شريك مع احد الاجانب اللي دخل على مكناس لقا العقار فيها طايح والاراضي رخيصة وبدا ينعش فيها وبداو الناس كيتحركو وترخف الزيار وبداو كيعطيو الرخص للبناء بالمعارف وماشي لاي كان .. واخا مرت سنين بقا هاد المشكل عند المقاولين ومنهم المنعش العقاري الاجنبي اللي قبل شراكة السي رشيد على قبل المعارف والناس اللي كيعرف وكيعرفهم وبداو كيطلعو مع مدرسة مرة عمارات وكل مرة يدخلو على مارشي جديد وبدات الفلوس كدور وتدخل وبسبب الاجنبي دخل السي رشيد السيارة لغالي وشراها من عند شريكو اللي اصبح صاحبو وبدا كيحاول يعاون ولادو واحد واحد قدر المستطاع حتى جا الدور على منال وقام ليها عرس ولا في الاحلام .. عرس تبقا عاقلة عليه وتعاودو لولادها واحفادها وكما واعدها يدير ليها عرس من العراسات اللي كان كيعاودهم بيهم فاش كانو صغار هاهوا ووفى بوعدو

من بين الرجال اللي واقفين كيضحكو برا كان السي رشيد بالبذلة والوقفة والكرش خاوجة لاكن طويل ومجبد كيبان حار .. كيضحك ويتجمع ومن طبعو فكاهي ودمو خفيف كيضحك مع ولاد العائلة ويشد فيهم .. دازت قدامو اسية ودور وجهه ميع فمو و ماحملش يشوف فيها عارفها وعاوف طباعها وطلعات ليه فالراس وكاع داك الزواق وداك التقزقيز مابقاش معمر ليه راسو وختو وتقال ولات كتبان ليه بحال شي فرفارة وكيضل يعيب عليها واخا دير اللي دارت .. وحتى هي فين ماتشوفو تهز خنافرها ودور وجهها وتبدا تسب فخاطرها حيت لاهي مستحملاه ولا هوا طايقها ومابقاش نهائيا توافق بيناتهم كأنهم زيت وماء. دخلات وقفات جنبهم فالباب كتسلم على عمة غالي وراجلها اللي وصلو وبنتهم وئام اللي كانت لابسة قفطان كحل واليدين بالشبيكة والفتحة حتى الفخاد والشعر كحل وكتبسم بالاداب باينة بنت دارهم واخا فخدها كيبان الاخلاق فالتعامل والتربية بعيدا على المضهر كتبان. زوينة وحتى هي فرحانة براسها بدات كتمد يديها وتسلم حتى وصلات لغالي وحمعات الضحكة هبطات راسها ومدات يدها بلا متشرف فيه وهوا كيضحك معاها ودارت تبسيمة خفيفة تفاديا للاخراج

وئام : غالي.. صافا

تبسم كيشوف فيها بنضرة اخوية وبدا كيضحك مع عمتو وشي كيهضر مع شي والناس كي خلو وشي كيشلم على شي ورشيد شادهم فالباب عزيز راجل ختو .. كان دكتور وكاتب وسيناريت فنفس الوقت.. مثقف بزافكيف سبق وتذكر وكان عزيز حتى غالي كيعجبو بالبشاشة والابتسامة وعندو غير ديك البنت كيقريها الهندسة ويكافح عليها .

غالي: وئام .. صافا مزيان كي غادة مع القراية

وئام : كتحرك راسها وتبعد نضرها لجهة اخرى) الحمد صافا

حاولات تبعد وكحزات باش مطول معاه الهضرة حتى لاحظ تصرفاتها المبدلة وتراجع حتى هوا ميك ودور وجهه بدا كيضهر مع باها ويضحك معاه وهي دخلات مع مها للقاعة وبقاو البقية برا كيضحكو واسية كتسلم وتعاودهي وخواتاتها وكيرحبو بالناس، نزلات فديك اللحضة سارة كتهز تكشيطتها ومشا عندها سد الباب دار ليها الطريق دازت كترمش بيناتهم يالاه غادي دخل مع الباب شافت سيارة كحلة وقفات قدام رجليهم صفات بين السيارات ونزل بناصر هاز راسو ودافع صدرو ومنفوخ كيحمحم وحاجبو فالسما كيخنزر ويرمش ويختالس النضر عزيز عليه يبان صارم ويبان همة وشان بين الرجال.. لابس جلابة بيضا جديدة على حقها وطريقها والتحتية وريحة الحج كتفوح منو والتقاضر والبلغة صفراا استقبلو رشيد بالزربة ماد يدو وكيرحب بيه وراشقة ليه عليه بحكم الاتصال المتواصل بيناتهم تكونات صداقة سطحية وتفاهم وكل واحد رشقات ليه على لاخر

السيي رشيد: اهلااا السي بناصر مرحباا تفضل.. مرحبا بييك

بناصر: الله يبارك فيك السي رشيد الله يكمل بلخير .. الله يجعل كلشي مبارك مسعود

وحيت بناصر نسيبهم جا ولادو كاملين ومن بينهم هشام خرج كيطير ويلوح لافيست اللور يستقبلو وسمير كذلك اللي كان برا وحتى غالي رتب على كتف راجل عمتو وتقدم عندو يالاه مد يدو كيسلم عليه ويطلق الهضرة بالكرام ومكيعرفش فالصواب منين يبدا ومنين يدوز كيقول كلمة ويرجع اللور .. تحلو البيبان ونزلات رانيا من اللور بالتكشيطة تقيلة والمكياح خفيف والشال حرير والتكحيلة كتفتن وتهبل واتاها اللون الترابي فاللبسة ومع عينيها والصاك فيدها حتدرك راسها كتبسم حشمانة وهشام كيتفتف قدامها دايخ ويفرنس

كلشي مشطون شي كيسلم على شي شكون كان متوقع بناصر غيجيب بناتو بزوج .. خصوصا سكينة عزيز عليه يديها للعراسات كتزيد تأكد ليه على الهمة والرقي والنخوة اللي كيبغي كيبان بيها.. حلات الباب ولاحت رجلها بالصندالة عالية طالونها ماضي بحال السهم لاكن كاينة المعنى والى مكان تقدير واحترام ليها تفرضو بنفسها بالخصوص فاش شافت كولشي مجموع قدامها كيشلمو على بها بلعاني شدات فالباب كأنها وحلات فالنزلة حتى شد فيها بناصر فيدها عاد نزلات هازة راسها فالسما بديك القصيصة النازلة على جبهتها مفرقة واعنق واقف والقفطان عبار تقول عارضة ونزلات ،، شدات فالمضمة دالقفطان الابيض المخدوم كامل بالابيض وشوية دالفضي بيدها قاداتها بابتسامة لامعة زهرية وقادات ضهرها فالوقفة وجرات شعرها الاسود المحموع فالاعلى باصابع يدها الرقيقة المزينة بخواتم صغيرة للامام .. كانت جامعاه كوتشوفال فالاعلى ومنسدل بحال الحرير كيبرق مع الضو من شدة سوادو واطرفو مقادة فطول واحد وسطر واحد والحوالق فضية براقة وريحتها عطات حتى وصلات لعند غالي اللي شافها نزلات بحال شي اميرة الثلج ف اك البياض والضوء وشدة النضافة .. دارت ماشافتوش في حين بان فعينيه الارتباك بدا غير كيرمش وعينو كتمشي ليها واخا كيهز راسو افع صدرو ساد فمو والنفس كدخل وتخرج من نيفو لاكن واضح انه مرتابك ، كانت سارة واقفة فالباب مع اسية فديك اللحضة اللي وقع فيها كلشي بسرعة وشافتها هبطات وغالي حداهم هوا وخوتو وباها صفارت وتلفات وداخت نسات راسها ونسات واش كيشوف فيها شي واحد تصدمات وبانت عليها الدهشة وماعجبهاش داك الاهتمام كامل اللي دارو ليهم وبدات كتعيط بغيض وارتباك على غالي وكتنفس بسرعة وزادتها اسية حتى هي اللي نزلات كتزرب ترحب بخطيبة ولدها اللي كتسلم بخجل على خوتو هي وسكينة اللي مدات يدها تدريجيا حتى بقا غالي بين باه وسمير وتقدم والابسامة مخفية على وحهو وعينيه كيبريو مد يدو وشار براسو ليها ، سلمات عليه بنفس الطريقة اللي سلمات بيها على خوتو بالخجل والعفة وشافت فيه باحترام ورجعات اللور شادة القفطان وكتقاد الخاتم فصبعها فخفاء باش يبان مزيان لاكن مع الاسف مابان لحتى واحدفيهم وكلهم كانو مركزين مع وجهها لانها فعلا كانت حد مختالفة وجد جميلة وجذابة خلات سمير كيشوف فيها بنص ويفرنس واولاد العائلة اللي واقفين كل واحد فين كلهم مشات نضراتهم ليها وتركيزهم عليها كيشوفو فيها ومتبعين ليها العين وكان اختيار هاد المرة للوك الحفلة جد موفق ضهر كل جمالها ورقتها فصورة رقيقة وبسيطة فنفس الوقت

بقات هاكاك ساكتة ماقدراتش تهضر حتى رتاحت شوية وهزات الراس بقات كتشوف فسكينة بنضرات بحال النسر والاخيرة جالسة دايرة رجل على رجل شادة تيليفون وكضحك هي ورانيا وبناصر حتى هوا كيشوف فيهم بنص عين وكيضحك باش مايحسش بالوحدة ،، دخلات هند فها. الاثناء بالتكشيطة حمرا هماوية وتقيلة مخزانية واسعة من لتحت والفتحات فالحناب داخلة وكتجرها والمضمة مذهبة والشعر عالي بالمشطة فالسما منفوخ والمكياج بازر كتفتن ومتقيلة بالذهب لابسة فعنقها كوليي طويل شوية والكورميط تقيلة كتبري عاد السنسلة غليضة فيها سميتها بالعربية عريضة وودنيها مسطرين كاملين ويديها عامرين جهد تمنية ديال البراسليات فيد وحدة كل واحد فشكل واليد لاخرى فيها السرعة والكورميط تقلمن اللي فعنقها والخواتم فالسباية كتبان من البعيد وازنة وعاطية للعين .. داخلة واللي وقفها كتسلم عليه وضحك وكتقلب بعينيها على الطبلة دبناصر حتى شافتهم ومشات عندهم نيشان فرحانة كتسلم ..وقفات ليها سكينة كضحك عنقاتها وهند كتعنق وترحب وبناصر كيشوف فيهم راشقة ليه حتى جلسات سكينة وحطات هند صاكها حداها باش تبقا ليها البلاصة عاد تلفت بناصر عاجبو الحال وقال

بناصر: عزييزة عليهم نتي

العروسة قربات دخل وخوتها كاملين حتى واحد ماجلس كل واحد مشطون فجهة اما اسية مشات دارت رجل على رجل فالطبلة اللي فيها رشيد وجلسات ترتاح شوية وخلات تريتور هوا مكلف بكولشي.. العروسة وصلات وبالدخلة المكناسية دخلوها والمباخر قدهم قداش..طبعا الاصدقاء دغالي القدامى اللي دخلوها بديك الدخلة الهمارية تقول مدخلين شي موكب سلطاني.. ها العلامات ها البخور والسواني نحاسية فوق الراس بالكيسان كيدورو بيهم والبنادر قدهم قداش .. فيهم جهة لابسة اللبسة العيسارية(الحنديرة) التقيلة الحمرا وفيهم اللي لابسين اللباس تقليدي الابيض و اخلين مصافين ومنضمين وعلى جوانبهم الاعلامات وامامهم اللي هازين المباخر بالحنديرة واللي سابقين العروس فالامام حتى هما بالحنديرة والسواني على راسهمعاد العمارية كبيرة هازينها تمنية والنكافات فالجناب ومنال داخلة بخال الملكة باللبسة البيضاء والتاج كبير ويديها عامرين بالنقش والمكياج بازر ..اية من الجمال كتشير بيديها حشمانة ومعاها عريسها كان طويل وعامر شعرو كحل وحداه مو وباه والعائلة كلها فالجناب.. ناض كلشي وقف الى بعض الرجال وناضت سكينة وقفات فبلاصتها هي ورانيا لاكن هند بالفرحة جراتها من يدها خرجاتها لقدام الطبلة وقفو كيشوفو العروسة ويضحكو.. كانو العينين محطوطين على سكينة .. سمير غير حاضيها من بعيد كيخضر عينيه اما غالي داخل بعيد ورا الموكب كيضحك ومعاه امين داخل حداه كيتفرج واحمد صاحبهم حداهم وقفو بعاد كيضحكو حتى جات عين امين على سكينة وتلفت دار صبعو على فمو وقال

امين: اجييي.. شنو كدير اشنو سميتها هنا.. فكرني سميتها؟

غالي: هز راسو كيشوف)شكون؟

امين: راها اصاحبي واش عارض على الاكس ديالك لعرس ختك !!

غالي: لمح سكينة حدا هند) ااه..لا لا راه وقع بلااان .. ختها هي اللي خاطبين لهشام

امين: واايلي!!

غالي: مكتاب.. كندا نساتك فينا ولا

اامين: واشووف سبحان الله على صدفة!

تبت تركيزو على سكينة بقا كيشوف فيها ساهي ومابقاش حول عينو لجهة اخرى .. هوا حاضي وولاد العمام حاضيين وولاد الخوال حاضيين وقوة البنات غا يين جايين وكلشي نايض والعروسة الوسط فالعمارية حتى نزلات وجلسات وجرات هند سكينة من يدها كضحك

هند: اجي نتصورو اجي

سكينة: هييه!! اويلي غطيحيني !! بلاتي

حطات صاكها ومشات شادة فهند وسارة حاضياهم حتى خرجو للجردة وناضت وقفات تبعاتهم شافتهم كيتصورو وبدات كتقلب بعينيها على غالي حتى بان ليها خاوج من واحد القنت بوحدو ووقفاتو بغضب

سارة: اجي تجلس.. مالك مابغيتيش تجلس

غالي: عقد حجبانو ) سيري تجلسي بلاصتك

سارة : بعصبية) غتمشي معاايا تجلس ولا غندير شي فضيحة فهاد العرس انا اارفاك علاش كدور

غالي: تحت سنانو) جربي .. وتشوفي الى مامشيتي من هاد العرس نيشان لدار باك .. واسيري تجلسي خلي هاد العرس يدوز على خير

قلب وجهه خرج برا لاكن اللي فيها ماهناها وكتحس بسكينة بحال العافية حداها وخرجات تبعاتو . شافتو واقف برا ويديه فجياب حتى شارت ليه هند بيدها حدا لابيسين باش يصورهم ودورات سكينة وجهها ويدها على نيفها .. مدات ليه تيليفون يالاه وقف بغا يصورهم وخرجات ليه سارة بوجهها احمر مشات نيشان عند هند معصبة خرجات فيها عينيها

سارة: واااششش مكتحميييش؟؟؟ هاا؟؟ غير قولي ليا واااششش ماعندكش الوجه علاش تحشمي

غالي من الصدمة بقا واق كيشوف فيها ماستوعبش انها قدرات ديرها وجرها من يدها بغا يديها لاكن نترات يدها وخرجات عينيها بغضب

سارة: كيفاش اجي صورنا علاامن كضحكي؟؟ اا؟ علامن؟ لشنو باغا توصلي نتي وهاد خيتي هادي(شارت بصبعها وطلعاتو وهبطات)

سكينة ضارت شافت فيها بقات مصدومة وتخلعات خافت من الصدع ورجعات اللور جرات هند اللي بغات ترد على سارة وغالي كيجرها مابغاش يكرفسها وهي لابسة التكشيطة لاكن اطفح الكيل عند سارة وخرجات طول وعرض فسكينة اللي كتبعد منها مابغاتش تجاوبها

سارة: مغندخلش اغالي حتى نعطيها واحد جوج كلمات .. حساب ليك ماعارفاش؟؟ لا احبيبة عااارفة كلشي وعاود ليا عليك هه وعارفاك شنو باغا وداكشي اللي كيدور ليكم فراسكم عاارفاه حتى هوا

سكينة:بدهشة) اويلي!! واش اختي تسطيتي فين كنعرفو وعلامن اصلا كتهضري

غالي: بغضب جرها) زييدي براكة شهادشي شهاد المرض

سارة: بغضب) مغندخلللش.. غنوريها الدوران برجال مزوجين كيف عامل.. انا غندخلك للحبس سمعتي اااه غندخلك للحبس حيت اللي بحالك خاصهم يعاودو يترباو

سكينة: رجعات اللور) اويلي مال هادي بسم الله عليك

هند: غير بغيتي تخرجي للعيب هانتي خرجتي ليه اش فيها الى قلت ليه صورني

سارة: بلا ماتقلبي لي عيني راني فااهماك مزياان ومغتوصليش لداكشي اللي بغيتي.. انا عاارفة هاد النوع هادو عزيز عليهم الراجل مزوج وواخا قضا فيهم الغرض وسالا كيبقاو تابعينهم .. انا مامولفاش نزل لمتسوى بحال هادا ونتعاير مع النكافات سمعتي ولاكن غاتفهمي هاد جوج كلمات بزز منك يا اما تعطي للراجل تبساع ولا غنسيفطك فين ترباي

الكاس تزلع وداكشي اللي شادة سارة فقلبها خرجاتو وهزات راسها عاد رتاحت اما سكينة مارداتش عليها غير سمعات وهزات جلايلها مشات وهند تابعها في حين غالي رجع اللور مابقاش كاع شاد فيها وبقا كيشوف فيها بنضرة احتقار واشمأزاز ..صافي خرجات وفضحات ودارت اللي بغات اش بقا ليه ميدير؟ يضربها؟ ماشي من النوع اللي كيضرب.. يعنفها ؟ ماشي من النوع اللي كيعنق المرى .. بقا غير كيشوف وهي هازة راسها كتنفس حتى ضارت عندو وطلعها وهبطها بنضرات اقصى من الضرب والجرح حتى ولات كتبان بحال شي حشرة وقال

غالي: ساليتي؟ دابا رتاحيتي ؟… (شار بيدو) دابا هزي حوايجك فاش تكوني غادة وسيري مع واليديك

سارة: ماعجبكش الحال؟؟ دافع عليها؟؟ لا دافع عليها وضربني انا .. اش بقا

غالي: هز يديه) مابقا والو.. (بسخرية) والله مابقيت عارف معامن كنهضر ولا بيمن مزوج اصلا. الله يعفو عليك

نفض يديه ودارهم فجيبو ومشا خلاها واقفة تما بوحدها كتسوط متبعة ليه العين وحسات بالاحتقار والتهميش والتصغير وبدات كتبكي بوحدها وتشوى فين حين مشات سكينة هازة راسها وقفطانها وهند معاها حتى للحمام ودخلات سدات عليها وشدات القفطان بين رجليها ووقفات هازة راسها فالسما كترعد ويديها كيرجفو والتنخصيص طالع مع حلقها وصدرها وكتشوف فالسما وترمش حالة فمها وال معك على طرف عينيها.. بدات كتسوط وتعاود وتسوط وتعاود وتن على وجهها بيديها وتسد نيفها باش متبكيش حتى قطعاتها لداجل وحيدات الثطرات ديال الدموع من قنت العين وتنفسات وفاتتها الحالة عاد هبطات راسها كتنفس مزيان وتحل عينيها خايفة على المكياج يخسر وخرجات لبرا شافت فالمرايا لقات البنات حداها كيتقادو . كانت الضبابة على عينيها ماقدراتش تشوف حتى وحدة وهزات قفطانها يالاه خرجات مع الباب لقات امين واقف كيتسناها وكان حاط عليها فاش دخلات للحمام ووقفها كيتبسم مد يدو لاكن دازت وخلاتو هاكاك مضارتش تشوف حتى فيه ومشات رجعات لبلاصتها لقات سارة جالسة حدا مها وهازة راسها قلبات عينيها وبدات كتشوف فيها بنص عين . حركات ليها سكينة راسها فاش بغات تجلس بنضرات توعد ودورات وجهها عطاتها بالضهر ودارت رجل على رجل وجبدات تيليفون كتراسل مع ليلى باش تفش خلقها شوية.

يتبع