الفصل 4

طاح المورال لسكينة ومابقاتش كتشوف لاشكون كيشوف فيها ولا شكون كيشطح قدامها وحتى الحلوى اللي كتفرق مانتباهاتش ليها حتى نخزها بناصر تهز الحلوى، اما سارة البلاطو اللي حداها كتشير بيدها ليه مابغاتوش وكدور وجهها مربعة يديها ودايرة رجل على رجل ، على الاقل طفات واحد الجزء من النار اللي شاعلة فيها وبقات كتشوف فسكينة بانتصار .. اما هند حدور دور وتمشي عند سكينة ضحك معاها باش ينساو اللي وقع وبدات كتجرها باش تنوض تشطح وبناصر جالس هاز راسو وكيرمش بالنفخة بقوة ما ماراضيش يسرف فالناس وفنفس الوقت كيشوف فيهم كيبان ساد عينيه دعما واه معقول.. لاكن بناصر من صغرو وهوا عزيز عليه الفرح والنشاط وكان فصغرو كيطير دوبل ديال الطيران ديال سكينة ومكان عندو اللي يحكمو ولا اب يتبعو بحكم مات وخلاه صغير وتحمل مسؤوليتو ،، لاكن الحياة رباتو واللي داز عليه بسبب الخفة ديالو بقا ليه درس فحياتو لاكن ماعمرو عاود اش دوز ولا اش عاش.. حتى مونية عمرها عرفات عليه شي حاجة وخلا لكل يحتارموه ويقدروه .. بقا كيطير حتى سبع وقنع لاكن اللي فيه شي حاجة طبيعة فيه،، باغي يحافظ على الحج ديالو وفنفس الوقت باغي ينشط وباغي يبركك شوية وباغي سكينة تنوض تشطح ومابغايش يبين ليها راه باغي وباغيها تشوفو باللي ماباغيش وبقا كيشوف فيها بنص عين وهي كتشوف فيه عرفاتو دافع كبير وصافي وغيقوليها جلسي لاكن ماكرهش تنوض ويدير راسو رعما مابغاش يتصادع معاها. اما فاش كيكون ماباغيش شي حاجة فالوجه اللي كيعطي وجه ااخر كيبان لسكينة من القمر انها الى تحركات يهلي عشتها اما الملئ .

ناضت كتفرنس وضارت فرنسات ليه وقلب وجهه هاز خنافرو دار راسو مكيشوفش .. كيقول على الله يجي شي عريس فالمستوى يتزوجها حتى هي ويتهنى فدماغو شوية مدام العرس اسطوري اكيد غيكونو فيه شبان فالمستوى اللي يرضى عليهم .

ناضت وقفات كتمايل هي وهند وشوية بشوية ب ات كتسخن وتحمس وكتبغي ديماري لاكن فين ما تشوف فرانيا كتخرج فيها عينيها كتركن وتوجع تنقص الوثيرة .. رجعات بغات دوز تجلس وجراتها واحد المرى من واحد الطبلة جالسين فيها واحد الطبقة ديال النساء كبار وشدوها كيضحكو ويسولو بنت من هي وهي كيعجبها الحال فاش كتعجبشي واحد كيطلع ليها هرمون السعادة والثقة فالنفس كتحس براسها وصلات للمريخ وخلات كولشي لتحت وحتى واحد مايحد ليها قناعتها بنفسها انها نجمة هي الضو وهي الشعاع اللي مزين المكان .

كتسمع غير تبارك الله الصلاة على النبي الحجوبات عليك من فم النساء اللي شادين فيديها وهي محنية عليهم كضحك معاهم في حين بناصر كيطل عليها بنص عينوفمو مايل جنب ساهي كيشوف وعارف اش كيدور تما وعقلو وازن جامع كاع التحاليل الصحيحة . هزات راسها وقفات باش ترجع وقلب وجهه دغيا لجهة اخرى كيرمش وهاز خنافرو حتى كشا عندو السي رشيد جر واحد الكرسي يرتاخ عليه وجلس حداه كيضحك دار رجل على رجل باش يبدا الحموع هوا وياه على خاطرهم

قولها وضحك عليها بين بناصر ورشيد وضراسهم كيبانو بالضحك ، اما رانيا جالسة شادة تيليفون كتراسل هي وهشام وكضحك فخاطرها عاجبها الحال كيتغزل فيها وفنفس الوقت واقف بعيد حدا الباب كيضحك ووجهه احمر فرحان حاضيها وداير راسو ماحاضيهاش ، اما سكينة فمن المستخيل تبقا جالسة.. عزيز عليها تمشي وتجي وتبان وغير دخلة خارجة هي وهند حتى دازو قدام ولاد العائلة اللي كانو واقفين مجموعين وبداو كيهضرو مع هند ويمعنيو على سكينة وهي كضحك كملات طريقها وغادية كتشوف بنص عين فواحد فيهم كان اقف تما هوا اللي ساكت وباينة كيحشم وقالت

سكينة: شكون هاداك اللي واقف معاهم لابس قميجة زرقا

هند: ااه اشرف ولد عمي خو بابا

سكينة: ااه كيبان ضريف

هند: اه عمي مسكين ماات خلاه هوا ومو استاذة دالرياضيات .. خدا الباك العام اللي فات ودابا كيقرا الطب فطنجة

سكينة: اوييلي باقي صغير !! كيبان كبير

هند: اه كيبان كبير تبارك الله .. كيحشاام هاكاك كان غالي فاش كان قدو مكيهزش عينيه

سكينة: اجي بعدا فكرتيني..اجي اجي

جراتها جنب الكراسا حدا لابيسين على برا وجلسات جامعة جلايلها

سكينة: واش مرت خوك شوية صافا؟؟ فين كتعرفني واش حمقة؟؟

هند: تا نتي ماتديش عليها هي هاكاك

سكينة: لا اختي هادي مريضة فراسها.. قين كتعرفني اصلا؟؟ حات قصداتني نيشان !! شكون عاود ليها عليا واش ختك ؟

هند: لاا اوييلي بغيتي الصدع ينوض.

سكينة: وفين عرفاتني انا باش عرفاتني كنت كنعرف خوك اذا هوا عاود ليها

هند: لالا راه هي كتسسنط كطلق ودنيها بزاف

سكينة: هي بمفها قالت ليا عاود ليا عليك .. عااود ليها اش عاود؟ !! وجالسة كتقولي لاسقة فيه واش هبيلة ولا مالها

هند: وماتديش عليها صافي نساي .. اجي معايا دغيا شداتني بولة سربي سربي..

مشات هند كتزرب باش سكينة تبعها لاكن يالاه ناضت هزات جلايلها بان ليها غالي خارج وهزات يدها كتشير ليه

سكينة: هييه هيه هيه..مشات عندو نيشان كتشوف يمين يسار ودور عينيها حتى وقفات قدامو هزات صبعها

سكينة: اااش بيني وبينك؟؟ فين كنعرفك؟؟ نتا كتعرفني؟؟؟ هاا كتعرفنييي؟؟

بقا ساكت كيشوف فيها تطوا ليه اللسان وهي مخرجة عينيها فيه

سكينة: مكتعرفني مكنعرفك ااش معاود لمرتك عليا؟؟ فين عمري شفتتتك اصلا (هزات صبعها) شووف والله ودارت ليا شي مشكل منعقل عليها.. سمعتي.. (طلعات فيه وهبطات) الرجال د آخر الزمان اخخ

شافت فيه باحتقار ودخلات خلاتو كيشوف وزادت مشات بحالها جلسات كتنفخ وتسوط وضارت شافت فسارة لقاتها مزالة كتشوف فيها بنفس النضرات وقلبات وجهها جات مع العشا نيشان وكلشي دخل وكلشي تجمع واللي عندو شي بلاصة شدها وهشام جلس مع رانيا فالطبلة وغالي مشا جلس حدا مو وسمير حدا مرتو فطبلتهم وبقات سارة هازة راسها كطل على غالي وتشطح برجلها

سارة: علاش دابا ماجاش يجلس معانا كل واحد مشا جلس حدا مرتو الل هوا قولي ليا دابا انا كنضلمو

زهرا: شفتووو.. خليه بغا يجلس حدا مو خليه ماتخليهش يستافزك .

سارة: بغيض) لااا يجي يجلس هنااا ها بلاصتو (طلات على باها) بابا عيط لغالي يجلس معانا

عبد الكبير: بجدية) نعلي الشيطان وجلسي السيد جلس مع واليديه مافيها عيب

رجعات اللور ربعات يديها كتنفخ وتشوف فيه وبدات كتصوني عليه فتيليفون .. جبدو طل عليه وردو للجيب وبقات كترعد فبلاصتها ولسوء حضها جلسو وئام حداه فالطبلة باش بطلب من الشي رشيد اللي شاف كلشي جلس وشد بلاصتو مع العروسة وبقات بلاصة خاوية شار ليها بيدو وناضت كضحك بخجل جلسات بينو وبين غالي

سارة شافت وئام جلسات شخدات فيها العافية وزادت شعلات فيها نار الغيرة بغات يعيطو ليها هيا يجلسوها تما وماشي وئام اللي تجلس.. رجعات كتبان ليها هي وغالي بحال الى مزوجين وبحالالى غالي ماكرهشكن كانت هي مرتو وكأنه سارة لاشيء قدام كاع البنات خصوصا ملليبدا كيضحك معاها ويهضر وهي كضحك حشمانة وطوي المنشفة على حوايجها والسي رشيد محني جيهتها كيضحك معاها وكيعجبو الحال فاش كتزير وتحشم

السي رشيد: كيخاطب غالي) وئام غنعملو ليها العرس فالكلية … باش يحضرو كاع صحابها والدكاترة حيت القاعة مغتفيناش كاملين

وئام : بخجل) اوييلي ههه

غالي: وئام بقا ليها عام وتمشي لفرنسا هه تبعوها ديرو ليها العرس تما

السي رشيد: صاافي هي غتجيب شي نصراني عينيه زورق

وئام : خايبين العينين الزورق احبيبي

السي رشيد: لونوهم ليه بالخضر

وئام: خاصو بعدا يسلم

غالي: كتهضر من نيتها

السي رشيد: غمزو) خصنا نختنوه على عاد الحساب

دورات وجهها مزيرة ويدها على نيفها شداتها بالضحك وغالي كيشوف فيه بدهشة ويشالي بيدو

غالي: شكتقول ابا؟؟ تحمستي ولا !!

السي رشيد : ايوا شنووو باش يدخل للاسلام

غالي: واابااا وانعل الشيطان !(دور وجهه كيضحك) وايلليييي سطوري

وئام شداتها الضحكة وحشمات بقات كضحك والسي رشيد كيهضر معاها فالودن وغالي كيشوف فيه بنص عين حتى سمع وئام قالت وهي كتقيس فمها

وئام : تمسح لي كااع العكار

السي رشيد: عاادي يتمسح الى بغيتي تعكري ها العائلة كلها عامرة غير بالبنات دتقحبين

تصدمات وئام دارت يدها على فمها وهوا كيضحك وغالي حل عينيه شاف فيه وقال

غالي: شكتقول الواليد واش عارف راسك فين جالس؟؟

السي رشيد: ههخخخ مالي كدبت !!

غالي: ديك الكلمة ماتقالش اصاحبي!! كتخلط الجلسة بين صحابك وبين العائلة !! حشوومة اصاحبي

دور وجهه كيسوط وعلى تعابير وجهه الضحكة مخفية ووئام ساكتة وكضحك حتى هي عارفة خالها كيزبلها مرة مرة وعندو عادي بحكم حياة العزوبة اللي كيعيش من زمان تعود على واحد النوع من الحياة وماعندو غرض كيقول لي بغا ومهاز الهم لحتى حاجة ولا حتى واحد، اما غالي عارف باه زهواني .. زهواني ولاكن حسي مسي داكشي كيعرفوه غير الرجال بيناتهم بلا ميسلطو عليه الضوء لاكن الاحترام بيناتهم واجب واخا الطبع كيغلب التطبع وضاروري ماتفلت شي كلمة ولا حركة ولا شي حاجة قدامهم واخا يعياو يفرضو الاحترام بيناتهم كتزهق شي حاجة لا من جهة الدراري ولا من جيهتو هوا اللي عاش معاهم فدار وحدة وعاشو تازوفريت مجموعين تحت سقفواحد بدون وجود اي امرأة معاهم فالدار.

كانو ضاحكين مرتاحين حتى سمعو الهضرة اللور وتلفتو لقاو زهرا واقفة والناس اللي معاهم على الطبلة ضايرين بسارة اللي سخفانة على الكرسي كتنخصص بوحدها وكيرشوهت بالماء وها اللي كيقول العين والبنت شهوة منها ها اللي كيقول العيا والسهير ها اللي كيقول فيها لمسلمين .. اما اسية دورات وجهها دارت راسها مشافت والو هي وهند من غير السي رشيداللي ناضو وناض معاه حتى غالي كيسوط بملل مشاو يشوفو اش واقع .. هز عينو بعفوية في حيرة من داكشب اللي كيوقع جات على سكينة اللي مدورة وجهها اللور كتشوف اش طاري وغير جات عينو فعينها دورات وجهها وقلبات عينيها عطاتو تعبير الاشمأزاز والاحتقار بشفايفها وهزات راسها

رانيا: بخفوت) مسكينة سخفات نااري بقات فيا

سكينة: الله يشافيها

رانيا: شفتي شحال زوينة تبارك الله.. كتحمممق بحال شي اميرة

سكينة: بنص عين) امم

اسية: فالطبلة مربعة يديها كتسوط) يالاه هاهي ماتخليه حتى يتعشا .. حسبيالله ونعم الوكيل.. مايتعضا فخاطرو مايجلس فخاطرو خرجات ليه فعودو هاد الويلة هادي

هند: تفووو يخخخ .. انا صافي قتلتو ليا القلب.. ماعيشة ما حتى حاجة اويلي واش الراجل ميجلسش يتعشا!!

اسية: هاهوا غادي معاها .. يالاه ولاهيلا مشا

هزو سارة سخفانة ماتعشاو ما داقوه داوها لواحد البيت خلاو معاها مها وشي عيالات ضايرين بيها في حين غالي بقا برا مع باها تما انفاجر عليه خرج كاع اللي عندو بالاعصاب وعينيه خارجين ، عمرو وصل لداك المستوى يهضر بديك الطريقة العصبية واخا تابت الاحترام فيها مع نسيبو

غالي: اعمي راني عييت من هاد التصرفات وعلاااش علاااش؟؟؟ (فتح صبعانو) مشافتني فشي بلاصة ما حصلات عليا شي حاجة ما والو!!! منعيشوش كي الناس غير المشاكيل وصدع الراس

عبد الكبير: كيرتب على كتفو ) الزواج خصو الصبر اولدي العام اللول كيكون صعيب .. غير صبر صبر

غالي: بجدية) شوف اعمي.. مااعرفت اش غنقوليك .. المهم ماشي وقتو من بعد ونهضرو .. خلي هادشي من بعد

قالها ودور وجهه معصب وعبد الكبير كيسايس معاه جرو للقاعة وخلاو سارة مع مها .. تم راجع قدام كولشي معصب وحجبانو مضاربين وطالع ليه الدم واشية كطل عليه ويدها فالسلطة دالحوت

اسية: عصبااتوو..ولاهيلا عصباتو

هند: يدها فالشوكة) نتي اللي جبتيها ليه .. بقات فالطبيبة.. ها الطبيبة عماها الحب يخخ

اسية: كن حساب ليا هاكا والله مندور بساحتها بناقص .. الى طبيبة طب على راسها غتنفع راسها باش غتنفعني .. غير الفضيحة والفشوش الخاوي

هند: ايوا قوليها راسك.

اسية: دابا نتوالاها غير بلاتي عليها يدوز العرس ونرجعو بحالنا ونتقاد معاها .. والله حتى نربيها

هند: كن طلقها وتهنى الزين موجووود.. هانتي شوفي خت رانيا تبارك الله شفتيها … غزالة

اسية: كطل) اييه غزاالة تبارك الله .. كاع ماحسابني عندها ختها مكانتش نهار الخطوبة؟

هند: كانت غير مارديتيش البال

اسية: كتشوف فيها وتبلاني) تبارك الله عليها غزالة .. فاش خدامة؟

هند: نكافة

اسية : دبلو ملامحها) نكافااا!! هييه..حيدي حيدي عليا

هند: اوييلي اماما حكرتي النكافة!! راه شارية الدار بستة وتمانين مليون

اسية: اسييري

هند: كتمضغ وعينيها على سكينة) وعلاش غنكدب عليك .. سولي رانيا .. سولي غير هشام

اسية: لالا واخا هاكاك.. النكافة ماشي شي مستااااوا

هند: وشنو المستوى عندك؟ البرلمان اماما؟

اسية: ومالو البرلمان راه خوك حتى هوا منخارط فيه

هند: واا اصلاااا مغتقبليش عليه(قلبات عينيها) مخطووبة لواحد الكوري عايش فسويسرا .. قالك نكافة.. انا ماكرهتش كن كنت بحالها

اسية: ومالك جاتك النفس عليها

هند: بنرفزة) ونتي كتعايريها

اسية: ماعيرتهاش

هند: هزات كتفها) طيحتي منها

اسية: لااالا غير قلت ليك نكافة متناسبش خوك مهندس

هند: حتى يلقاها بعدا (قلبات وجهها بضيق) براكة عليه غير الشوهة اللي مزوج شوهات بالاطباء وبالطب .. اللي سمع الطبيبة يقول هنا نبات .. طبيبة دلكارطون

اسية: ومالكي كتعايري فيها وصلتيها؟؟ كوني غير فرماية بعدا ونتي ماعندك حتى الباك وغادية تقراي الحلاقة وكتعايري فالطبيبة وصلتيها بعدا

هند: المهم ماشي بحالها تكون طبيبة ولا فام لا كما بغات تكون الله ينجيني حتى نكون بحالها.. هاهماك طبيبات ودايرين العز لراسهم نيفهم مكيوصلش لارض.. هي غير لاسقة فيه مرضاتو

اسية: وصافي سكتينا

هند: ماعرفتش اشنو مصبرك عليها

اسية: ببرودة) ماشي شغلك.. كولي كولي.. هزي لك كروفيتك سدي بيها داك الفم

كان باغي يتعشى واخا كاع اللي وقع كيعجبو الحوت وجلس تعشا واخا معصب كلا حتى شبع وتكا اللور حط يدو على كرشو وباه حداه كيمد ليه

السي راشيد: زييد.. كول ياك عزيز عليك الحوت

غالي: لا واالو ماعنديفين نزيد..كليت بزااف

السي رشيد: واغير زيد زيد

غالي: كيشهق) والله ماعندي فين نزيدو .. كول اوئام كتحشمي ولا؟

وئام: لالا انا كناكل… بااركة عليا

مسحات يديها وناضت بقا غير غالي والسي رشيد حداه كياكل وقال

السي رشيد: عزييزة عليا وئام.. كن درتي ريي نهار اللول وتزوجيتها حساان ليك من ديك خيتي محررة فيك العيشة

غالي: وصاافي دابا داكشي كان فالمكتاب

رشيد: بانزعاج) مكتسمعش الهضرة.. نهار اللول قلت لك خود وئام هي تصلاح ليك وبنت العائلة وبنت كبرات قدامنا كنعرفوها .. تبارك الله قارية وغتخرج مهندسة .. نتا تبعتي مك جابت ليك ديك نص مرى مسكونة

دور غالي وجهه بتحمل فوق نفسو مكيحملش يسمع ديك الهضرة ولاكن السي رشيد واخا مزيام ومعقول مع الناس ومع ولادو والله يعمرها دار وضريف لاكن فيه التعياب فاش كيشوف شي حاجة مكتعجبوش متعقلة بحياة ولادو وبراحتهم .

رجعات وئام لبلاصتها كتبسم وقاد ليها غالي لكرسي بيدو جلسات لاكن نقصات معاه الهضرة وقالبة وجهها واخا مافهم والو تصرف عادي حتى فجأة قالت

وئام: زعما مافهمتش علاش ..

وئام زعما مافهمتش علاش الواحد كيقولك نعاونك الى حتاجيتي شي حاجة وفاش كتقوليه عاوني كيردها فوجههك زعما العجب

غالي: باستغراب) علاش ؟ شي واحد دار معاك شي حاجة ماشي هاديك؟

دورات وجهها بدات كضحك ودارت يدها على فمها بسخرية ورجعات قالت ليه

وئام: لا لا غير تفكرت شي حاجة وصافي

هبطات راسها كتشطح برجلها كانت مترددة تواجهه وبقات فيها قلة التقدير كأنها تهمشات وسكتات حتى عيات وقبل ماينوض من حداها تجرآت واخا حشمات وحمارت لاكن قالتها باتسامة خجولة

وئام:نايضة معاه) قلتي لي نعاونك قلت ليك واخا زعما مكانش تعطي مرتك هي تجاوبني كن قلتيها ليا عادي نتفهمك مكاين حتى مشكل..

حتى ضار بعفوية ورجع تلفت شاف فيها عقد حجبانو بتعجب

غالي: شنو؟ مافهمتش

وئام حساب ليها كيتهرب من الهضرة وبسطات الامور كتبسم وتقلب علينيها وقالت

وئام: ماشي مشكل.. عاادي

غالي: شنو اللي عادي ؟؟ راه مافهمتش اوئام علاش كتهضري

ترددات فالاول كتشتت النضر والناس كل واحد نايض كيبدا بلاصتو واللي نايض للحمام وهي واقفة معاه متوثرة كتبسم وتشتت النضر حتى شافت فيه مباشرة وقالت

وئام: نهار سيفطت المسج باش تعاوني ماعجبنيش الحال قلتي لمرتك تجاوبني راه ماشي منضر حسيت براسي متسلطة عليكم فالصراحة ..هه ولاكن كولشي كيدوز عادي

غالي: دابا شي نهار سيفطتي ليا مسج جاوباتك سارة عليه؟؟ اشنو فهاد المسج

وئام: هزات تيليفون كتمرر لسانها على شفاهها بتخجل) ماعرفتش واش باقي عندي نورييه ليك ..(كتقلب) حيت يمكن مسحتو .. ااه هاهوا بااقييي

غالي: بلاتي نشوف!

شد تيليفون قرا المسج وعض شفاهه السفلية لداخل وضلامو عينيه بقا ساكت ورجع ليها تيليفون

غالي: مسحي هادشي مسحي..نساي هادشي هادا (وقفات عليهم هند) نساايه اوكي فاش تبغي شي حاجة عيطي ليا هادشي متديش عليه .

تبسم ومشا خرج لبرا خلاها مع هند اللي كتشوف فيهم وقالت

هند: مالكم؟؟

وئام. والو غير كنهضرو على واحد المسج كنت سيفطتو ليه على لقرايا وجاوباتني مرتو عليه.. الصراحة ماحملتش راسي والله .. كنت كنقول نقولها لو منقولهاش ليه حيت مالي تلاقنا وانا وجههي مكيجيش فوجهو ماعجبنيش الحال

هند: اينا مسج وريني

وئام : صافي مسحتوو

هند:شنو فيه؟

وئام: فيه مراتو قالت ليا ماتبقايش تيسفطي ليه يعاونااك وراه عياان وراه مامساليييش وشي هضرة

هند: اوييلي !!! والله غالي ميديرها ؟؟ اوييلي

وئام: قلتها ليه باش يعرف حتى حسيت بشي حاجة ماشي هي هاديك … الصباح كنا فداركم كنتغداو ومكانش بابا اللي يوصلنا انا وماما وفاش بغا يدينا للدار ماخلاتوش وشافت فيا واحد الشوفة مارضييتش.. سمعتها كتقول واش غير غالي اللي كاين غير غالي اللي حاضيين.

هند: ناااري الاعصااب

وئام: علاش غنحضيو غالي راه بحال خويا بيناتنا الاحترام كانت ولا مكانتش

هند: متديش عليها راه مزنزنة.. قبيلا ناضت لخت رانيا خطيبة هشام على تصويرة .. داز قلت ليه صورنا واجي تشوفي(عضات شنايفها)

وئام: وييلي والله حتى شووهة نااري بااز ليه… مايستاهلهاش اختي والله

هند: ايوا شغنديرو دابا طاحت الفاس فالراس.

وئام: بقات فالزين.. طبيبة ياحسرة خصو هوا يخاف عليها ويغير عليها

هند: اجي اجي..اجي نجلسو

جراتها للطبلة دسكينة وجلسو كيهضرو ويضحكو ويتجمعو ونساجمات وئام معاهم فالهضرة والضحك وفاش عرفاتها سكينة سكانة فالرباط حتى هي بوحدها تبادلو الارقام وتواعدو يبقاو على تواصل وسالات الحفلة وخرج بناصر وبناتو قبل مايخرجو الناس سلم على رشيد وتوادعو وخرجو ركبو سيارتهم فداك الصباح مباشرة لدار يامنة اخت بناصر اللي كانت ساكنة فويسلان عندها باتو واستقبلاتهم بالفرحة والسرور حتى صبح الحال وفطرو على خاطرهم وتعاشات لعشية عاد شدو الطريق راجعين للرباط

العرس ساالا وغالي شدالطريق الصباح رجع بوحدو للدار ماعلم حتى واحد من غير مو اللي خلاها تما تكمل طقوس ما وراء العرس.

وصل للدار و دخل كينفخ بالعيا.. يالاه تكا يرتاح بدات سارة كتصوني وهز راسو تما على ركابيه جاوبها

غالي: بصرامة) الو مزيان ملي عيطتي

سارة: عيطت لخالتي قالت ليا مشيتي ؟؟

غالي: اييه ونتي غتبقاي فداركم .. كاع حوايجك غادي يوصلوك كاملين والورقة ديالك حتى هي تفاهمنا.. يالاه الله يعاون

قطع عليها وهي كتصوني وتعاود حتى بدات النمرة دنسيبو كتصوني عاد رد عليه وهوا خارج من الدوش كيسوط بارتياح

غالي: متكيعلى البالكو) الو عمي عبد الكبير

عبد الكبير: كي داير اولدي لاباس

غالي: لاباس الحمد لله اعمي

عبد الكبير: ايوا مكاين باس وماشي لهاد الدرجة راه كاع الناس كيدابزو ويتصلاحو .

غالي: لا صافي اعمي غير سمح لي من الاحسن كل واحد يشد طريقو بالحسنى .. انا مغنخرجش معاها لا لعيب لا حتى حاجة كما تلاقينا بالحسنى غنفرقو الصبر بالحسنى والله يسهل على الجميع

عبد الكبير: صافي اخر قرار ؟ متنعلوش الشيطان؟

غالي: الله يجعل البراكة اعمي غير سمح ليا

عبد الكبير: ماقلتي عيب. الله يعاونك

كان كيضن انها بهاد السهولة صافي غادي يرتاح .. لاكن مع الاسف تيليفون مابغاش يسكت .. فكرة الطلاق انتاشرات بسرعة ورجعات اسية كتعيط والسي رشيد كيعيط وخوتو كيسولوه مالو لاكن مابغا يرد على حتى واحد من غير باه اللي فتح ليه الخط وجلس فالصالون كيضهر معاه بجدية مابغاش يتنازل وصدق السي رشيد شاد الطريق حتى لعندو باشيقنعو يتراجع على فكرة الطلاق.. مهما كان راه الطلاق ميبغيه حتى واحد وواخا كان باغي ليه بنت ختو لاكن كلشي فات وبنا حياتو مابغاهاش يردمها ويخرب عشو .

جلس هوا والشي رشيد اللي مزال بصباطو عاد دخل فالصالون وواقف كيهضر معاه بشوية وبالعقل ويرد ليه عقلو زعما

السي رشيد: شنو السبب شنوو؟؟ علاش بغيتو طلقو شنو اللي خلاك تفكر فالطلاق

غالي: بنرفزة ) واش خاصني نعطيك التفاصييل ابا؟؟؟ راه الخصوصية هادي شغلي هاداك انا عارف شكندير

السي رشيد: ام.. وصافي غير بشوية علاش معصب؟ ياك كنتي مزيان لبارح اشنو وقع

غالي: بنفاد الصبر) وانا هضرت معاك متزيد تحمقني صافي.. اللع يسهل عليه كانت بنت الناس كنت ولد الناس الله يعاون ( تيليفونو كيصوني) مشااكيل.. شنو عاوتاني خاصك حتى نتا ..الو هشام .. اشنو ؟؟ وصاافي راه مناقصكش اهشام حتى نتا كلكم رجعتو تفهمو عندكم العقل زعما .. ديها فراسك اصاحبي من الصباح وانا كنقوليك وقرني عليك واش بغيتي تسمع شي هضرة متعجبكش.

قطع طالع ليه الدم ومابقا لسي رشيد فين يزيد معاه شافو معصب والولد رجع راجل ماشي نفس الربد الصغير اللي كان ساهل عليه يتحكم فيه .. صوتو رجعات عندو نبرة حادة يخلي الواحد يسكت غير باش ميا يدخلش راسو فالصدع.

السي رشيد: وايلاه يالاه نخرجو نشمو الهوا شوية يالاه.. يالاه لبس حوايجك انا لتحت فطموبيل كنتسناك

ماشي جميع الرجال كيخرجو بالطلاق من فمهم وهادشي اللي بزاف دالنسا مكيفهموش.. كاين الراجل اللي كيهز المرى ويحطها فدار باها مافراسها والو ويعيط لباها يقوليه طلاقها يوصلها بهاد الكلمة وهاد العبارة.. وكاين الراجل اللي كيدير افعال مستفزة وهوا باغي الطلاق وباغي الفراق لاكن ميقدرش ينطقو بالفهم وكيلتاجأ للتصرفات المستفزة والافعال اللي كيبغي يكره المرأة فيه لاكن مع الاسف المرأة مكتفهمش وكتبقا تصبر وتقول انا صابرة ليه وهوا كيدير ليا ريفعل ليا وتبدا تعاود على افعالو العضيمة الكارثية اللي كيدير ليها وتقول “اااه ومع ذااالك صبيبرت وتجاوزت ” كتقولها وكأنها دايرة انجاز وحققات نجاح عضيم بصبرها على ديك الكارثة اللي دار راجلها واللي عند طريقها كيقولها سيري فحالك طلبي طلاقك .. وما حدها كتزيد تصبر لأفعالو كيزيد هوا كيرهها اكثر واكثر ويعيفها ومييقاش يشوفها كإمرأة وكيجيوه كان نساء العالم زوينات وجذابات الا مرتو كيشوفها عالة وهم وغم وشمطاء وتقيلة كي الحجرة على قلبو واقفة ليه فحلقو ومكتف كأنه كيشم شوية. الهوا ويغرق. .. واحيانا كتوصل بيه الدرجة يخونها ويتسناها تحصلو لاكن فاش كيحصل وتسمح ليه كيزيد يحقد ويكرها ويكره راسو اللي نهار اللول نزل لمستواها وقبل بيها حيت كتبدا تبان ليه لاشيء ودون المستوى وكأنها قمامة بلا قيمة مهما كانت جميلة او فمرتبة عالية فحياتها العملية.. لاكن فعينيه كيشوفها غير فالمرتبة المنحطة فالحياة الزوجية مكيبان ليه لا نجاحها ولا مكانتها ولا جمالها كتبان ليه فيروس وميكروب خاصو يتفك منو وكيزيد فالافعال ديالو باش يهربها منو وكتزيد هي فالصبر ديالها والتسامح باش تقربو منها وكتسنا فيوم من الايام يهديه الله او يقنع ويشبع ويرجع ليها او يكبر ويدير عقلو

والسي رشيد حاول يعطي النصائح لغالي لاكن غالي ماشي من النوع اللي اصلا كيتقبل النصائح .. وكشخصية عنيدة مكيتأثرش بالهضرة او بالنصيحة ومكيحطش راسو فالكرسي مع الثلاميد ويسمع ويتعلم..بل هوا المعلم وهوا اللي كيشوف راسو الواعي والفاهم وكيمشي بمنطق ان حتى واحد مكيشبه واحد وكيتعامل مع الناس بكل انواع الاختلاف فالتعامل وكيسمع لاكن الى غير بانت ليه شي نقطة ماشي هي هاديك كيلغي السمع ديالو وكيبان ليه داك الشخص ماشي اهل للنصيحة اصلا خصوصا الا ماقدرش يقنعو.. نوع الرجال اللي بحال غالي وكما سبق وتذكر مرات عديدة كثير الانتقاد وكيلاحظ العيوب قبل الميزات ويصعب اقناعه وسريع الانزعاج ودقيق الملاحضة.. لاكن كل هاد التفاصيل كتعكس تماما على صورتو الخارجية ومن الصعب جدا على الواحد يعرف عاد التفاصيل لانه احيانا كينتقاد غير بينو وبين نفسو وكينزاعج بينو وبين نفسو لاكن كيبان من الخارج كيصبر ودقيق الملاحضة لاكن كيبان انه غير مهتم ومكيلاحظ والو كيأيدك فالرأي ديالك وهوا ابدا مامقتانعش بكلامك فقط لانهم كتومين وخجولين .. هي شخصية معقدة وصعب التعامل معاها والتفاهم معها لانهم كيتعمقو فتحليل وكيمشيو بعيد احيانا وكيقدو الامور واخا كتكون ساهلة لاكن كتلقاهم بقوة التحليل كيضربو حساب لكلشي وكيتعمقو فالتفكير عاد كياخدو القرار فالاخير. لاكن من اهم النقط اللي كيتميزو بيها وهوا المنطق.. مكيخلطوش الامور وماعندهمش مع الخيال وكيقسمو الافعال والتصرفات مكيرميوش كلشي فالشبكة ويلقيو احكام فارغة فقط .

ومشكل الطلاق حصرو غالي بينو وبين نفسو بعيدا على الاب والام واللي جات حتى هي من بعد وبغات دير ليه عقلو تحت سلطة الام لاكن فاجأها بالرد

اسية: وسط الدار) كولشي فالعام اللول كيتناقشو ويتصلاحو حتى كيتفاهمو مالك راسك قاصح

غالي: بانفعال) كيفاش راسي قاصح مافهمتش واش شفتيني كنضربو مع الحيط!! هاحنا عاوتاني على راسك قاصح

هند : جراتها ) خلييه مالكي كدخلي راسك بعدي علييه وبعدي منو

اسية: بأسى) مالي شنوقلت ليه راسك قاصح حتى هييتعصبو عليها الناس !!

سمعها ورجع ليها من الباب حاط صبعو حدا ودنو وقال

غالي: علاش تقولي ليا راسي قاصح واش كندير شي مكايناش ؟؟ بغيتي تبيني ليا انا اللي غالط ولاشنو؟؟ نتوما عندكم الحق وهي عندها الحق انا هنا اللي كنخربق وراسي قاصح ؟

اسية: لااا ماشي هاكاك غير زعما دير للماء منين يدوز وصافي

غالي: بنرفزة) خليني من الهضرة الخاوية واش عندي مشكيل خصو الحل يجي واحد يقوليا كير عقلك لا خلي الماء منين يدوز .. هادا راه الكلاااخ هادا.. بنادم عندو فحياتو مشكل خصو يحلو هادشي اللي كنعرف انا ديك الهضرة الفارغة الليكدور بالجناب ماعندي مندير بيها

من بعد الشعلة ديال الطلاق ورد غالي على عائلتو كلشي سكت مابقاش كيهضر وبقا الاتصال بينهم وبين سارة وعائلتها باغيين يعرفو السيب الرئيسي اللي وصلهم للطلاق.. لاكن هاد المرة سارة سكتات ماخرجات حتى كلمة دالعيب وعندها امل ترجع وكتسنى الغضب يفوت .. مسألة وقت ومن بعد يرجعو العائلات يتدخلو بخيط ابيض وغادي يرجعو .. مرضات وتهدات والتعب والارهاق وقلة النوم نالت منها .. اصعب ايام حياتها كدوز منها وتعيشها والماكلة وقفات ليها فالحلق وحرارت عليها.. هضر عبد الكبير مع جد غالي على امل يدير بوجهه ومايخليوش الطلاق يتم وماردهاش الجد فوجههم وشد الطريق هوا وهشام حتى للرباط عند غالي اللي كان رجع يستأنف العمل ومابقاش موضوع الطلاق كيتذكر فالدار وكل واحد دخل سوق راسو وحتى واهوا كيجلس ياكل ويشرب عادي وفاش كيكون شي ماتش فالتلفازة كيتبعو من جد عقلو وكتلقاه واقف متوثر وشي مرات حتى كيهز اسية بصوتو

غالي: بحدة) زيييد

هزها من بلاصتها وهي متكية شادة الواتساب والمسكة فالفم حتى هزات راسها شافت فيه ورجعات تكات .. بقات شوية واقف مربع يديه كيمشي ويجي متبع الماتش ورجع تهز بتفس الحدة بحال الباف

غالي: سييير…. (ضرب يدو) ولا لالالا ولاااا هااهيا قدااامك ابنادم على مااااارض

اسية: شادة صدرها ) استغفر الله راه غير الكورة

ربع يديه وحرك راسو كيشوف فالتلفازة اير باش تسكت متزيدش تهضر وبقا كيشاهد التلفازة حتى تمركا البيت وضرب يدو بقوة

غالي: معاااالم.

اسية: هناااد حلي الباب غيكون باك سيدك وصل هوا وهشام

اشتقبلو غالي بحرارة كنا موالف يستقبلو وضحك عادي مع هشام وهشام كذلك كأن شيئا لم يكن لاكن رجع للماتش كيتفرج كما كان هوا وهشام

هشام: جاي متبعو فالطريق اصاحبي والله. مالعب ضيع عليه جوح دالبيوت !! واخا يكون حول

غالي: هه!! وهوا هناااا وباغي يدخلها صحاا!! شي مرات بنادم كيبغي يدي شي بزز كيصدق واالو ما هوا قضى غرض ماهوا خلا واحد اخر يقضيه..الانانية اصاحبي

الجد تكا على ضهرو شافهم ملهيين مع الماتش عرفهم مغاديش يركزو معاه ولا يجلسو وحافضهم واحد واحد بحال جميع الشباب مع الكورة كتسري ليهم فالدم.. حتى كمل الماتش عاد نتابه لراسو كيتفتفعلى بزطامو ونزل كيجري مشا جاب كاسكروط ورجع لقاهم حطو البراد داتاي وحطو داكشي اللي جاب ليهم وجلس كيشرب كاس ديال اتاي ورتاحو عاد ناض الجد بسروالو التوب وقميجتو وسمطة وهوا رقيق كيتمشى بشوية بحال الدري الصغير طلب منو يخرجو يتمشى على برا وخرجو غالي كيتمشا بيه مع الشارع على رجليهم بشوية عاد جبد ليه الموضوع بعيدا على الدار وعلى الدتخلات اللي تقدر دير اسية وتخسر ليه المورال.

الجد: وصوتو فيه نبرة مرعودة ضعيفة) مالك اولدي؟؟ مالك مع مرتك اس وقع ليك

غالي: ايواا قدر ونصيييب ابا سيدي.. ياكما عيني تبغي تجلس شوية؟

الجد: اييه ماسي مسكل (شار بيدو كيتفتف) فسي قهيوة غير هنا

شد فيه غالي قطعو الشانطي بشوية عليه ودخلو جلس فمقهى على برا عندها جردة بالخضورية وحط ليه براد داتاي كما طلب وقدا كيتناقش معاه بشوية وبالعقل وكيعطيه فالنصيحة وغالي كيحرك ليه راسو بالايجاب وبالهداوة عاطيه الخاطر

الجد: سمعتيني اوليدي… الطلاق مافيه خير .. وهادا العام اللول وكاع الناس كيدوزو من هاد المساكيل .. صبر سوييس حتى يفوت هاد العام بعدا راكم مزال جداد.. وفهاد الوقت الى لقيتي بنت الناس اللي تصونك وتصون العرض ديالك وسرفك حمد عليها الله..سمعتيني

حرك ليه غالي راسو بالايجاب وكيتمنع فالناس ويسمع ليه والجد كينصح بشوية والهداوة وغالي ساكت ماهضر مانطق بقا كيسمع ليه حتى داز الوقت وختم كلامو باغي ينوض وشد فيه وقال

الجد: والله يتاويكم ودير ليكم اللي فيها الخير.. الزواج خصو الصبر .. ماساهلس ضاروري خصو الصبر وخصو الواحد يكم عقلو وميتسرس . (لقا نضرة) كيتحرك عندكم البرد فلعسية

غالي: غيو ولفتي صهد مكناس ابا سيدي ههه

الجد: واقيلا.. غربات السميسة .. يالاه نمسيو بحالنا وارا ديك ليديدة نسد فيها

مد ليه غالي يدو شد فيه ورجع هوا وياه للدار دخلو يرتاح ومشا سد عليه فبيتو تعرا وجلس بالشورط وحط البيسي حداه وتكا على جنبو

كان هشام فهاد الاثناء فموعد غرامي مع رانيا لاكن برفقة سكينة اللي سيفط معاها بناصر.. كانو هما جالسين فطبلة كيهضرو فالمقهى وسكينة فالطاولة المجاورة جالسة بوحدها كتشوف فيه ويدها على خدها لابسة كسوة طويلة بلا يدين في حين كانت رانيا مكحلة العينين ولابسة الجلابة ومتولة مع بلغتها اللي جابو ليها فالخطبة وكيبانو بحال جوج عشاق كل مرة يشد ليها فاليد حشمانة كتشوف فسكينة بنص عين والاخيرة كتبسم ليها ابتسامة بزز

سكينة: على خرااا… البرتقالة المرة .. (جاها اتصال) فين احبي.. جيتي ؟؟ طولتي فديك السعودية .. انا حبيبة جالسة غير فواحد الكافي بحال شي شيان بوليس كنتسنا رانيا وخطيبها .. وايييه ههه.. صافي نتلاقاو غدا الزين .. خاصنا نتيحرو مابقا لشهر تمنية والو ويخرج غيدخل البرد … يالاه الزين بيزو.. باي

قطعات ورجات كتشوف فيهم بنص عين ودور لاباي فالكاس دالليمون وهما كيتمعشقو حتى صونا ليها بناصر وغثر شافتو بدات كتفتف بالخلعة بلا ميدير ليها والو

سكينة: الو بابا

بناصر: فين وصلتو؟

سكينة: غير جالسين وصافي فالقهوى

بناصر:صافي ودنات المغرب نوضو رجعو بحالكم

سكينة: واخا هاحنا جاييين دااابا

قطعات وبدات كتشوف فيهم وهزات صاكها مشات عندهم وقفات كتبسم باحترام

سكينة: بابا عيط دابا

شارت ليها براسها يمشيو لاكن رانيا ستحلات الجلسة بقات جالسة كتشوف فيها وقالت

رانيا: باقي الحال مزال الشمس ضاربة

سكينة: ولاكن بابا عيط

رانيا: قلبات عينيها) امم.. صافي

هشام: ماشي مشكل يالاه نوصلكم.. بالليل نعيط ليك فتيليفون (مسح على خدها )

رانيا: بسعادة) سبم على خالتي اسية

هشام: مبلغ

هما كيهضرو ويتحابو وسكينة كتشوف فيهم بنص عين وتابعتهم من اللور وحتى واحد مداير ليها حساب كأنها مكايناش.. ركبات اللور وكتشوف فيه شاد ليها فيدها وهي فرحانة عاطياه يدها كيلعب فيها ويتجمعو حتى وصلو ونزلات سبقاتهم خلاتهم فالطموبيل جالسين كيهضرو وحاضياهم بنص عين حتى نزلات رانيا ومشات عندها كضحك وجهها حمر

سكينة: اممم.. الحب

رانيا: اممم هه براكة عليك نتي غير تصاحيب

سكينة: بسخرية) واسييري شلا ماديتي.. كن بغيت بحالو كوراه دايرة التعدد

رانيا: غادية كضحك) ايوا حتى تلقايه

سكينة: غا بحال هاد الحب الله يخطيني منو.. كي دايرييين لا نتي لا هوا.. شوفو راسكم فالمرايا بعدا

رانيا: غادية كتلعب فالزنقة) خلييينا اختي بصحتنااااا(هزات يديها فالسما)

سكينة: سيري سيري.. سيري دوشي

دخلو للدار ومشات مونية كتجري للكوزنية متحمسة كيعجبها الحال تسمع التعاويد على الخطيب ورانيا كتعاود ليها شنو دار بيناتهم فحدود ومونية كتسول عاجبها الحال.. اما بناصر متكي ويدو ورا راسو ورجلو على المخدة اللي حداه شاف سكينة دايزة وعبس مخرج شلاقمو كيمص فيهم حتى كتسمع من باب الدار

بناصر: سوكاينااعععع

سكينة: رجعات طلات بالزربة ) نعام؟

بناصر: اجي لهنا

مشات حادرة الراس كتشوف فالارض جلسات حداه وهوا كيمص فشلاقمو وقال

بناصر: ايوا راه جاو فيك الخطاب.

حلات عينيها مصدومة ورانيا ومونية طارو من بلايصهم طلو عليهم مخرجين العين قالو بثلاتة فدقة

شكووون؟

شافو فبعضياتهم وشداتهم الضحكة وبناصر خاشي راسو وسط عنقو كيضحك

بناصر: هههعغغغهههعغغ .. خخخهه… مالكم حيتو كتجريو؟

مونية: قول قول اش قلتي؟

بناصر: جاو الخطاب عند سكينة مالكم ههههعهههههععع

مونية: اهههححح شكون قول؟

جاو من ديك الجييه

سكينة: بلا متشعر) اينا جييه؟؟

بناصر: لهيييه لهيييه(مخرج شلاقمو جهة رانيا) شافت فرانيا وبحال الى فهمات وضارت مصدومة وفنفس الوقت شداتها الضحكة

سكينة: مافهمتش

بناصر: من اهل مكناس اللي كنا عندهم لبراح

مشات مونية عندك كتهز بيجامتها والمغرفة فيدها جلسات حداه باغا المعقول وعاجبها الحال وباغا تعرف وكيلعب ليهن على الاعصاب باش يشوف واش ملهوفين ولا لا

مونية: ايوا قول ابناصر ماتبقاش دير هاكاهادشي مافيهش تفلية

بناصر: احممم(خرج شلاقمو) لبااارح اسييدي.. فاش كنا جالسين جا هضر معايت واحد السيد هوا والدو .. قالك اسيدي بغاو سكينة

سكينة رجعات اللور بعدات كدور فعينيها وشوية بشوية بدات كضحك حتى بانو ضراسها عجبها الحال وحشمات تسول خلات مونية طرحات جميع الاسئلة اللي فالبال واللي فالقلب

مونية: اييه وازيد زييد عاود لينا شرح لينا ..فاش خدام شكون هادا شكون هما

بناصر: مزال معاارف واالويالاه هضر معايا باه وفاش جينا خارجين جا الولد سلم عليا وقالي باه راه هوا ..

عقدات سكينة حجبانها كتفكر وترحع السينتة اللور شكون هادا اللي جا سلم على باها وهما خارجين؟؟

عيات تفكر ماعقلات على والو وراسها كان مرفوع والصباح طلع ومع السهير كاشي دايخ

بناصر: خدام اسيدي فلامارين .. ضابط بلحق مزال غنسول شكون هوا وشنو كيدير .. راه قاليا سميتو

مونية: شنو سميتو؟؟

بناصر: اسامة ناصيري

عقدات سكينة حجبانها وصبعها فمها كتتفكر شكون غيكون واش شافتو واش داز حداها واش سمعات سميتو… لاكن والو الطيف ديالو مابانش

بناصر: عندو ربعة ستة وعشرين مزال صغير ولاكن قالي تخرج من اللول من الضباط الصف (هز عينو شاف فسكينة) اااش قلتيييي اديك سكينة

بقات سكينة ساهيا كتفكر وهزات كتفها مالقات ماتقول ومونية كضحك فرحانة

مونية: وعندو شي خوتو شي خواتات .. هاا؟

بناصر: مانعرف انا ماطولتش معاهم الهضرة..جا قالي اللي كاين قلت ليه ما على الرسول الا البلاغ الى كتابو الله يسخر ..

سكينة: انا مباغيتش نتزوج دابا

مونية: هييه!! هاء وفوقاش بغيتي تدوجي حتى ديري ثلاتين عام!! الهبال

بناصر:شوفيهم بعدااا ونعرفوهم كيف دايرين ويحن الله .. ايوا شنو نقوليهم يجيو؟

سكينة: هييه لالالالا

بناصر: ومالك تخلعتي..غير غيجيو بحال الضياف وصافي.. نشوفوهم نتعرفو عليهم ..والى مابغيتيش حت حد ما بزز عليك

مونية: ومالها ماتبغيش بغات تبقا كدور فالزناقي

سكينة: واخليني ساكتة امي ..ماشي شغلك فيا

بناصر: اهيا اويوا ايوا (بهدوء) حتارمو وتنضمو

مونية: ناضت زاعفة) لهلا يزوجك .. جلسي تبيري ليا هنا الله ينعلها ولدة

بناصر. اهيااا .. اغير بشوية هاد كنتنتقشو

مونية: قولها لهاديك اللي مكتعرفش تهضر

سكينة: واغير خلييني

بناصر: حتارمي مك شوية

سكينة: وهي كدعي فيا!!

بناصر: واخا دعي مك هاديك… (بالسياسة) دابا شنو نعيط ليه ؟؟ نقوليهم يجيو نشوفوهم ؟ انا بانو ليا موووحترمييين

سكينة: المهم غيير نشوفوهم

بناصر: غييير نشوفوهم

جات تنوض ورجع شدها وقال مصغر واحد العين بحال حديدان

بناصر: اجييي لهناااا.. اعع.. اييييععع ماالك زربانة ..تسناي شوية

سكينة: هاني(جمعات يديها قدامها)

بناصر: فين جات هاد الدار اللي دفعتي فيها؟

حلات عينيها بدات كدور فيهم وقالت بحذر

سكينة: ف فف فسلا جديدة

بناصر: ايوا غدا فيقي بكري نمشيو نشوفو هادشي اللي درتي.. واخا كنقول عمررني نعاود نهضر معاك ولاكن كنعاود نرجع نهضر معاك .. واخا راه كان خاصني نعلقك غير كيفاش طرا ماسلختش يماك هاد المرة ..منعتي ليا

تكمشات فبيتها تحت الضغط ديال رانيا ومونية كيتجمعو ويتناقشو والكلام حلو خصوصا الى كان على شي خطبة ولا زواج كيبقا يهضرو ويجيدو حتى كيلسقو عينيهم بالنعاس، صبح الحال وصبحات واقفة لابسة سورفيت كحلة ديال اديداس ستيلها كيجي واسع ومهزوز على المؤخرة وهي رقيقة بانت فيها كتحمق وباينة عليها نقية ولحمها بيض صافي وحتى هي غير كتشوف راسها بديك الصورة كيضرب قلبها من الراحة والفرح والسعادة.. خرجات عند بناصر ركبات معاه وهوا كيشوف فيها بنص عين ويطلع فيها وقال

بناصر: بعدا النضافة ماعندي منقول شي مرات كتلبسي شي لباس كنقول سبحاان الله بنت شي واازييير وشي مرات كدير داك التبديلة كتعصبني.. شوف دابا كي جيتي .. من داكشي الرفيع .

بقات كضحك عجبها الحال ودارت نضارضرها دالشمس وشعرها مدفور كامل بالسبولة .. الهوا دالصباح فاش كتفيق بكري كيناسبها خصوصا الى كانت الشمس وفصل الصيف.. كترتاح نفسيا وتتحمس اكثر لاي حتجة بغات تقضيها

مع الدخلة دسلا لجديدة اللي اول مرة يدخل ليها بناصر وهوا متشائم بقا كيشوف ويعلي عينيه بانو ليه غير العمارات فقط حتى دار مستقلة مكاينة والشوارع كبار والبني منضم بالورقة وستيلو وجميع العمارات كيتشابهو وبقا كيطل ويشوف وقال

بناصر: واقيلا غير العمارات اللي فيها

سكينة: اه مافيهاش الديور

بناصر: زيد نشوفو هاد البني هادا كي داير

قالها وعينيه كيشوف هنا ولهيه عاد كتعرف على المدينة وماهي الا خطوات قليلة حتى وقفو قدام ارض كبيرة وسط ا الحي ضاير بيها الحديد من اجل الامان وفيها الرافعات والبني بدا كيطلع وقدامو مكتب البيع صغير وقالت

سكينة: هي هاديك

نزل عاقد حاجبنو ونزلات معاه بحذر كتشوف فيه بنص عين وهوا كيسرح عينيه فالبنيات الكبار الجداد والديكور اللي على برا مختالف على البقية

بناصر: يالاه زيدي

تبعاتو دخل لمكتب البيع بغا يتسفسر بنفسو وهي حداه قاطعة الحس لاكن اطمأنات شوية فاش شافت البني طالع وجلسات كتسمع ليه كيهضر ويبحث والسيد اللي فالبيرو كيوريه نماذج على الديور والبني وعطاه اسم مول المشروع ووراه مشاريع اخرى سبق ليهم خدمو عليها وباعوها ومن بينهم بنايات غير حداهم وحاليا دارو الشطر الثاني.. قتانع بناصر بالهضرة وتهدن عاد بدا كيضحك شوية وخوج كيهز عينيه ويهضر ساهي

بناصر: بعدا هانتي درتي الطايلة .. عندك الزهر طحتي فالناس مزيانين… هاهما بداو بعدا كيبنيو ..

سكينة: كي جاتك هاد البلاصة ههه

بناصر: مزيانة مزيانة …نقية واخا بعيدة شوية

سكينة: شفتي كي دايرة من لداخل وااعرة ياك .. فيها بالكو كبييييير قد البيت بالزاج من برا

بناصر: لا مزيانة (بجدية) فاش تكون الحاجة مزيانة راه غنقوليك مزيانة… اري نشوف داك الوراق اللي عندك

مدات ليه الوراق بدا كيشوف ويقرا مبعد وجهه ومجبد فالوقفةوالنضاضر فوق النيف شاف شحال سبقات وشحال باقي واشمن برطمة واشمن طبقة وشحال من ميترو حميع التفاصيل وهز عينيه فيها معجب

بناصر: تسعود وربعين اللي عطيتي !!!!

سكينة: بحذر) اه !!

بناصر: دقة وحدة!!!!

سكينة: بخوف)اه

بناصر: ومنين جاتك ؟؟؟؟

سكينة:بخذر )كيفاش منين جاتني!!!

بناصر: تسعود وربعين هادي منين جبتيها ياك ماشي بزاف بديتي الخدمة ! علاه شحال كدخلي !!!!!€

سكينة: كيفاش شحال كندخل؟؟ للنهار ؟

بناصر: للشهر كااع

سكينة: كل مرة وشنو على حسااب .. عمري حسبت

بناصر: كيفاش عمرك حسبتي كتخدمي غير فًولونطي !!

سكينة: ولاهيلا عمرني حسبت شحال كتجي للشهر .. المهم كنمشي نخرم فشي عرس كنشدهم كنخبيهم فالبنكة صافي

بناصر: زيد معايا نشوف هاد الحساب ديالك كي داير

طلع معاها للطموبيل جلس وتقاد ليها وحتى هي جلسات حداه حدور فعينيها خايفة يقمعها

بناصر: حيد النضاضر ) دابا جيني نيشان بلا مدوري عليا.. خليتي شي حاجة عندك ولا عطيتي كولشي فهاد الدار

سكينة: عطيت كولشي بقات مية درهم

بناصر: هااا… دابا شحال باش حطيتي فيعا الفلوس

سكينة: شي شهر ..والصراحة عندهم الكلمة قالو ليشهر يبداو البني بداوه

بناصر: دابا خليني من هادشي .. هاد الشهر هادا اللي داز وماعندك فيه حتى ريال من غير ميات درهم.. من تما لهنا شحال وصلتي دابا؟ ياك شهر

سكينة: ساهية كتفكر) ماعرفتش

بناصر: كيفاش معرفتيش هانتي غتعصبيني

سكينة: وااا حيت مكنحسبش فهمتي.. مرة كدخل ثلت ميات درهم فالنهار مرة غير مية درهم مرة والو. مرة الف درهم على حسب الناس اللي كيجيو يكريو التكاشط.. بحال البارح راه تبارك الله الف وخمس ميات درهم اللي دخلات خرجو براف ديال التكاشط حيت السبت وجات واحد العائلة تقريبا كلها كراو من عندها .. ها اللي كرات بميات درهم ها اللي كرات بثلت ميات درهم .. وها اللي كرات معاها الصندالة بثلاتين درهم ها اللي كرات الصاك .. شوية من هنا شوية من هنا كتجمع ديك البركة وكنجمعها فلعشية والصباح كنديها للبنكة صافي ومكنبقاش نحسب

بناصر: اييه واخا خلي هادو بووحدهم نقولو تلفتي فالحساب.. والعراسات حتى هما كتمشي تحضري وتنساي؟

سكينة: لا هادوك كنعقل

بناصر: ايوا دابا جبدي نشوفو شحال من عرس دوزتي هاد الشهر يالاه

جبدات تيليفون شدو هوا وهي كتتفكر وتملي عليه

سكينة: المهم هاد الشهر فاللول بعدا فلويكاند .. كنت خدمت شي ثلاتة داعراسات نهار السبت هادو عاقلة عليهم.. واحد فواحد السطح بربعين الف ريال..حيت عطاوني تسبيق هادي شهر ديال ربعين الف اللولة

بناصر: زيد ها ربعين الف

سكينة : واحد بستين وعطاوني النص حتى هوا يعني غير ثلاتين

بناصر: زيد ها ستين الف ريال

سكينة: واحد فواحد القاعة بخمسالاف درهم حتى شديت فيه تسبيق بشهراين

بناصر: ها مية وستين

سكينة ونهار الجمعة كنا كنا كرينا داكشي ديال الحنة المهم جوج عرايسات بعشرين عشرين فيها كولشي

بناصر: ها ربعين هي مية وتسعين

سكينة وخدمنا فواحد العرس بسبعين كتنو ديجا عطاوني تسبيق

بناصر: سبعيييين(كيقيد) ها مليون وثلاتين.. بلا داكشي دلكرا للي كديرو بوحدهم نديرو ليهم واحد ثلاتين الف كااع فديك سيمانة كلها

سكينة: لا كتااو كتار واقيلاا.. راه مكتبقا لينا حتى تكشيطة فلويكاند

بناصر: هي شحال نديرو؟

سكينة: دير واحد ستين الف

بناصر : ها ستين.. هي هي مليون وتمانين.. ها السيمانة اللولة دخلتي فيها مليون وتمانين الى غير ضربناها فربعة غتجي للشهر ستة دالمليون وتمانين الف (عقد حجبانو) كدخلي ستة دالمليون وتمانين الف!!!

سكينة: ولاكن كنخلص الناس ماشي كنديها كولها

بناصر: واخا تكوني كتخلصيهم بالدولار راه ستة دالمليون وثلاتين الف وطيري حتى تعياي متقسميهاش معاهم فالنص .. القليلة كتبقا ليك ربعةولا خمسة..هادشي الى ماكنتيش كااع كتشدي لعراسات وسط السيمانة واخا راني عااارفك كتشديهم ومكتباتيش فالدار وكنطل على المخل كنلقا السلعة خرجااات … غير السيمانة اللي دارت نعستي يوماين فالدار والايام لخرى كلها خدمتي فيها… فين كديري هاد الفلوس كاملين؟؟؟ الرياااال مكيبان عليك

سكينة: ماعرفتش!!… كنحمع وصافي

بناصر: ايوا عليييها جمعتي تسعود وربعين مليون فعام !

سكينة: لا كتر .. راه كنشري الحوايج وعاد كنب ل الماتريال وندخل تكاشط جداد.. كاينين مصاريييف

بناصر: كيرمش) ايوا… دابا نتي كارية عندي بتمانين .. والحوانت كيتكراو بمية لفوق !! ماشي الضلم هادا!

سمعات حس الكرا وربعات يديها وعقدات غوباشتها ماعجبهاش وبقات ساكتة وبناصر كيهضر هاز الهم مقلق وكيفهمها وغادي الطريق كلها مابغاش يسكت

بناصر: ماتشوفينيش داير معاك المزيان تاكليني .. راه الحوانت تما كيكراو غااالين كن ماكنتيش كتربحي ندوزوها .. ولاكن راك كتربحي وكنسكت مكنقوليك والو واخا كنشوفك كتمشي وتجي كل ليلة .. واش عمري قلت ليك مالك خارجة كل ليلة؟؟ لا .. حيت الخدمة هادي .. ولاكن حتى نتي فهمي راسك بلا ماتحتاجي عاااد نقولها ليك .. مكنقوليك عاونيني فالمصروف ولا خلصي معايا ضو ولا ما. مع العلم بنات الناس فاش كيتوضفو كيعاونو واليديهم.. نتي كتجي كتاكلي وتشربي ومرتاااحة خدامة وباقي انا كنصرف عليك …

سكينة: الصمت

بناصر: ماتحتاجيش عاااد نجي ونعلمك ونفهمك .. هادشي خاصك تفهميه راااسك.. تقولي با راه عندو عااائلة مزال كيصرف عليها اجي نعاونو حيت بااا.. وتساهلت معاك فاللول ودرت ليك المشروع وزدت بيك القدام حتى وقفتي على رجليك ورخيت ليك…… انا مكنهضرش معاك باش نعصبك ولا ندابزو… انا كنفههههمك .. باش تحلي دماغك .. ،، وشتي انا كااااع ماواقف عليك ولا على الكرا اللي كتعطيني عنداك يحساب ليك منو كنعيش هه!! لااالا هادوك غيير خضرة فوق الطعام اما انا عاااااايش بيك ولا بلا بيك .. انا كنقريك ونوريك ..

سكينة: الصمت

بناصر: راك عزيزة اييه.. ولاكن حاصك تعرفي (صغر عينو فالطريق) راه واخا تعزاااازي عليا حتى تسدي بيبان المعزة على كوولشي فهاد الدنيا،، راك ماتعزازيش عليا بحال نفسي.

هاد الكلمة هادي ،،، هادي بالضبط اللي عليها طفاو عينين سكينة وتسدو ودنيها وبهات المنضر والدنيا كحالت،، هاد الكلمة كان ليها وقع كبيير وكبير جدا فمشاعر سكينة لتجاه باها وفتغيير شخصيتها عامً.. ربما بناصر قصد بيها شي حاجة اخرى مثلا.. لاكن سكينة فهماتها كما تنطقات وتصدمات وكأن عينيها تحلو نغرة على الدنيا وعلى فهمها للحياة ..بناصر خلا سكينة تشوف وتفهم بطريقة اللي يمكن كيشوف بيها هوا الحياة ،، بمجرد مانطق بداكشي بلسانو خلاها تراجع حسابتها ومشاعرها وخلاتو كيهضر مابقاتش مركزة معاه ،، هاديك الجملة الاخيرة قفلات الحوار وسهات كتشوف قدامها وهوا كيهضر وهي كتفكر ودماغها كيتحل واكتاشفات نقط مهمة ..ومن بينهم باها اللي عايشة معاه وكان كيفششها ولاكن معدبها ومعدب نفسيتها بالقمع من الصغر.. كان كيبرد فيها جنونو وكيندم ويصالحها بالاشياء اللي كتبغي باش يدير ليها خاطرها.. وكانت من صغرها كتشوف انها هي النور والضو دباها وخصوصا فاش كتوقع ليها شي حاجة وكيتخلع،، كانت متأكدة انها عزيزة عليه وبالرغم من العذاب النفسي وحتى الجسدي اللي كانت كتعرض ليه من طرفو كان ضنها بمعرتها عندو كيلغي كولشي وينسيها فالضرب والسموم النفسية اللي كتلقاها.. فعلا كانت باسلة وكدير علاش..لاكن ماشي لدرجة تعاقب عقاد شديد واكبر من شنو عملات. ومع ذلك التعناق والمدح اللي كيمدحها ويشكرها ويعلي بيها كان كيحسسها انها عزيزة عليه.. انها الرقم واحد فحياتو وتعودات على داك الفشوش وعودها على ديك المعاملة ورجع انسان مهم فحياتها وكتشوفو نعم الاب، لاكن مع الاسف… مع الاسف الشديد والشديد جدا اللي كيتأسف ليه القلب وتتأسف ليه الروح خرجات من فمو ديك الجملة اللعينة .. زلة لسان او ربما صراحة او يمكن وقاحة .. وهادا علاش الانسان يحاول ميكونش صريح لدرجة التجريح.. ربما بكلامو يغير القلوب اللي كانت تابتة على حبو وعلى عشقو .. يقدر يزعز مكانتو عند اقرب الناس ليه واعز الناس عندو، لاكن للاسف الشديد بناصر مكانش واصل لمستوى الوعي اللي يخليه يفكر فعواقب ديك الجملة لي قال وللشخص الخطأ..للشخص اللي مهما عانا بسببه كان مشتاعد بينو وبين نفسو يقسم اعضائو معاه لو حتاجهم .. الشخص اللي كان كيكن ليه مشاعر خاصة وكان كيحس معاه بالوناسة فالحياة والصور اللي يسند عليه.. ماكانش واعي نهائيا بخطر الجملة اللي قال وسط الحوار واللي قالها وكأنه كيأكد عليها ،، ربما الانسان فاش كيكون فمكان قوة وسلطة مكيهموش اشنو كيخرج من فمو وكيضن ان الكلام مغيأثرش بالشكل سلبي وينطابق عليه حتى هوا داك التأثير.

لاكن لاسف الشديد.. الهضرة خرجات من الفم ووصلات وجرحات القلب وسيلات الدم .. وفتحات العينين وحركات نقط كانت تابتة فأماكنها

جلسات بينها وبين راسها فالمحل وبقات كدور وتعاود فالهضرة اللي قال والقلب كيضرب ..فعلا بقا فيها الحال وحسات بقلبها تقلب ومشاعرها تقلبو تلقائيا

فكرات وعاودات وشافت حتى عيات وخضعات لمشاعرها فالاخير وقال

فعلا وعندو الحق.. مالو واش كدب؟ علاش غنكون اعز ليه من نفسو ؟؟ ،،، ولاكن لا كاين اللي كنسمعوه كيقول ولادي اعز ليا من نفسي. اييه ومن بعد كل واحد حر فحياتو.. وبا عندو الحق كل واحد يعز نفسو.. واش ضاروري خاصني نكون عزيزة على شي واحد؟؟ ضاروري ومأكد!!! نعزاز على راسي نيت علاش هاد التبادل اصلا،، حتى انا عزيزة عليا نفسي ومن اليوم مكاين غير نفسي نفسي ومغنصبرش على قبل شي واحد ونرضي نفسي قبل من شي شخص اخر.. هما يتنازلو علاش انا نتنازل.. كيما بابا عزيزة عليه نفسو باغي كلشي يرضيه حتى انا غنديرها هي اللولة ومنرضي حتى واحد..وأولهم بابا.. من اليوم يتنازل هوا ويرضيني انا مغنبقاش نتنازلش.. وهادا اخر كلام .

وأكدات على نفسها وأيدها قلبها ومشاعرها وجلسات جلسة بينها وبين نفسها كتفكر الطفولة وكتقول مع راسها كان كيخلعني بالغوات باش هوا يرتاح… كان كيضربني باش منديرش علاش ونصدع ليه دماغو.. كان كينوضني من الماكلة وانا كناكل ويقول ليا نوضي براكة عليك وهوا يبقا فالطبلة.. هلاش زعما؟؟ باش نبان قدام الناس مربية؟ باش نبان شابعة فدارنا!! باغي يبان على ضهرنا ؟ وكيضربني قدام الخلق باش يبان كيربي.. حتى حاجة مادارها فصالحنا.. وفصالحي انا بالضبط باش نتعلم ولا باش نتربى..كولشي كان فصالحو هوا باش يبان مثالي قدام الناس ويوصلهم الصورة اللي هوا باغي.. فين عمرو اصلا رباني!! وكيمن عليا ويقول ليا كنت كنتهلا فيك!! وعلاش اصلا والدني الى ماتهلاش فيا؟؟ وباش تهليتي فيا؟؟ الكساوي ؟ كتخرجني شوية وتبكيني نهار كامل؟؟ علاش مكانش كيصبر عليا الى درت شي حاجة؟ كان كيفضل يضربني باش هوا يرتاح! علاش مكانش كيدوز ليا افعالي!! واش انا كنت فوعيي!!ًواش انا كنت عارفة؟ واش شدني وعلمني وقالي هادي علاش وهادي علاش وها كيفاش وها علاش!! لا ،،، كان مباشرة كيشدني يسلخني حتى كيفكوني منو باش منعاودش نديرها.. ولاكن كنت كنرجع نديرها حيت كنت صغيرة وكنسى ومعارفاش اصلا علاش ،، كان كيضربني الضرب دالعكسر ويرفسني باش نشوف الرعب والدعر وقلبي يوقف ونوصل لاقصى درجات الدعر وكيبين ليا اقصى درجات الرعب بالنوضة اللي كينوض ليا غيير باش نبقا نضرب ليه الحساب!!! هه(مسحات دمعة من عينها) كنت كنشوفو واقف عليا بحال الوحش باغي ياكلني.. واش كنعرف انا وانا عندي ربع سنين !! ست سنييين.. تمن سنيييين .. وانا طالعة ! اش غنفهم من غير انه وحش وكنشوفو كنخاف منو وبزز مني خصني نتالصح معاه وكيحگرني ويتكبر عليا الى ماغضبت ومابغيتش نتصلاح معاه.. وكنراضيه واخا مزالة غضبانة منو غير باش ميتنفخش عليا..ويبقا يحگرني قدام الناس ويشكر والولاد لخرين قدامي.. اش غنفهم من دوك التصرفات وانا صغيرة اصلا من غير انني والو وأنني لاشيء،، وبقيت هاكاك كنجاملو غير خجل منو وخوف حتى صدقت انني فعلا منقدرش نعيش بلا بيه ههههه… لا والزوينة بقيت هاكاك حتى ليوم عاد فقت هههه…. ناريييي شحال انا حمارة !!،،، ونقولو كنت نية والبرائة فالصغر ولاكن كيفاش حتى بقيت مطمسة ومتأثرة!! لالالا بلاتي اشنو كاااع غيطرا الى واجهتو شي نهار!!! اويلي انا مالي مخلوعة غير بوحدي وكنحس براسي مزالة قدام داك الوحش الكبير!! لا لا لا الحماق هادا و عادي نتخلص من هاد التأثير… غادي نتخلص منو حيت صااافي كبرت .. كبرت ومابقات حتى حاجة غادي تخلعني… وماعنديش مناش نخاف..وحتى دوك العينين اللي كيخرج فيا غادي نقاومهم …انا اصلا مافهمتش علاش مرعودة منو وعلاش كنهضر معاه كنترعد!!! علاش هاذ العقدة فحياتي وعلاش غادي نعيش عليها وبزز مني نتحملها ونتقبلها!! غنعيش حياتي كلها حانية راسي وكنرجف حيت عندي انسان فحيااتي قوى مني! وهوا اصلا يفضل نفسو عليا وياكل قبل مناكل!! اذا انا علاش غنعطي وندير حساب؟ يك المكانة الوهمية اللي كنت كنتهيلها ف ماغي عندو مكايناش اصلا وكان عندي عزيز حثت عزيزة عليه وكنراعي وندير بحساب التربية والعشرة.. شكون يراعي ليا انا ويدير بحسابي؟؟ شكون؟؟ هههه حتى واحد..اذا سالينا من اليوم نفسي ثم نفسي ويموت اللي بغا ويحيى اللي بغا

سدات الحوار كتبكي على ليلى فالقهوى والاخيرة كتشوف فينا وتنهد وشدات فيدها وقالت

ليلى: هاد باك خصو عقل ..حتى هوا شحال مبلوووز شي مرات كيبداو غير كيخراو

سكينة: عرفتي مابقيتش كندور بساحتو.. كنت كندور ندور ونمشي نعنقو ولا نبوسو المهم خاصني نتعلق فيه.. دابا ديك الرغبة مابقاتش عندي

ليلى: دابا تبردي .. هوا مبلوز وصافي بغا الزيادة زيديه واحد خمس ميات درهم

سكينة: من نيتك !!! راه الكراج غير صغير هاداك هوا تمنو اما الكراجات اللي كيهضر عليهم هوا راه كبااار عرفتي قداش..قياس برطمة هادوك هما اللي كيتكراو بستلاف سبعالاف درهم!!

اما الكراج اللي عاطيني هوا ديال تلاتاف درهم ،، غير حيت على الشارع زدتو وصلناها لربعالاف درهم

ليلى: وشنو دابا غديري ؟

سكينة: هزات كتفها) ماعندي مندير الى بغاني نخرج نخرج ..بعدا بعدا نكري محل كبيير ومتيسسع

بينما جالسين جالسين كيهضرو صونا تيليفون لسكينة وطلعات ليها نمرة جديدة قالت شي كليانة ولا عروسة لاكن بمجرد ما جاوبات كانت النبرة قاسية وصارمة خلاتها تحل عينيها فدهشة

سكينة: الو !!

سارة: غادي نقوليك جوج كلمات.. غتبعدي من راجل مزوج ولا متعرفي الضربة منين تجيك سمعتي

سكينة: شكون معايا !! اويلي!

ليلى: شكون؟

سارة: سمعتيني مزياان ياك … ايوا هادا اخر انذار ليك وراني مكنتفلاش معاك

سكينة: بلاتي احبيبة بلاتي هادي نتي المسطية! ههه سمعي انا دابا اللي غنقوليك واحد جوج كلمات ديريهم حلقة فودنيك سمعتي.. نتي كن كنتي معمرة لراجلك العين ميعاود ليكش عليا سمعتي.. مااا الحب الا للحبييييب الاولي (كتغني) اييوا شغندير ليك اختي راجلك مزال كيبغيني ويتسطى عليا ،،،(تنهدات) القلب وشكون بغا

سارة: حيت نتي شايطة ومتاحة للجميع،،ماعندو ميبغي فيك شبع وقنع ولاحك سيري سيري عالجي راسك شوفي المخرج ديالك ك بقا

سكينة: كضحك) وييلي ضحكتيني ههه مسكينة بقيتي فيا ..ايوا شغديري صبري صبري راه ميحس بيك غير اللي مشوي بحالك…اه بعدا كي بقيتي قالو ليا سخفتييي هههه

سارة: الهضرة مع باك الحمارة اللي ماعرفش يربيك ماشي معاك

سكينة: تصصصب.. يالاه جري عندو قوليها ليه

قطعات عليها وحطات تيليفون كضحك وقالت

سكينة: عرفتي شكونهههه!!…مرات غالي ،،، معيطة ليا كتهددني زعما

ليلى: اوييلي واش مريضة فراسها! كوراه نوضاتها هي وياه

سكينة: يعطيه الدل حتى هوا ،،طاح من عيني

ليلى: عنداك دير ليك مشاكيل مع باك هاد المسلسعة هادي

سكينة: هادي مرييضة شكون غيتيق بيها ،، واخا تحلف ليهم فالجامع

ليلى: وتصاورك؟؟ باقين عندو ؟ عنداك تكون عندها شي تصويرة

سكينة: هيييه!! اويلي نسيييت اويييلي بلاتي والله تا نعيط ليه دابا نييت.. انشوف نمرتو واش باقا.. مامسحتهاش اصلا غتكون باقا فشي مسج قديم (كتقلب) هاهي.. بلاتي نصوني ليه غادي نكدو ليه مزياااان غير بلاتي..نوريها حتى هي حلان الزك كي داير(تفتح الخط) الو غالي( بأسى) غالي؟؟

غالي: بصوت مستغرب) وي شكون معيا!!

سكينة: كتبكي) انا سكينة،،، شوف اغالي انا مابغيت لا صدع لا مشاكيل عفاك اصلا ندمت حتى هضرت معاك وخرجت معاك …

غالي: قاطعها) بلاتي تسناي(تسمع صوت السيارة) الو .. اش واقع ؟

سكينة: بدموع حنينة) دابا عيطات لي مراتك كتهددني… قالت ليه غتمشي عند بابا تبرا مني،، انا ماعرفتش مالها معايا كتهددني تورين تصاوري ،، غدير ليا مشكل كبير يقدر نخرج فيه من الدار وبابا صعيب والباسبور ديالي عندو ديجا مطبوع يعني عندو دليل،،، حياتي انا اللي غضيه

دورات ليلى وجهها ويدها على فمها شادة الضحكة وسكينة كتشكي اللي شافها يحلف عليها مضلومة ومقهورة وعندها مشكل ، اما غالي كان فالطريق سايق سيارتو وعاد خارج من الخدمة داير مكبر الصوت فالطموبيل كيسمع ليها كتشكي وطالع ليه الدم ووجهه مضلام زام فمو وماعجبوش الحال

غالي: امم..

سكينة: راه غدير ليا مشكل !! مالها معايا اشنو درت ليها انا ؟ الى درت ليها شي حاجة تقولها ليا نيشان علاش معيطة ليا كتهددني قالت لي الى مابعدتيش من راجلي متعرفي الدقة منين جاتك !! غتخلق ليا مشكل مع رانيا وهشام وبابا !! بغات ترون ليا حياتي ولا شنو؟؟ واش وصلتها ؟؟

غالي: صافي فهمتك انا غنشوف هادشي

سكينة: واش هي فين ما دور ليها فالخوى تبدا تسبني .. اش معاود ليها اخويا عليا؟؟؟ اش بيني وبينك حتى نتا علاش جبدتيني كااع ! هي فين كتعرفني اصلا ،، كن ماعاردتي ليها عليا مغاديش تعرفني! ،،، انا حمارة درت فيك الثقة حسابني راجل ديال بصح وغتكون مسحتي تصاوري كااع !

غز سنانو وضرب المقود بيطو كيتعصر فصمت ويزفر بقوة وهي كتهضر وتنخصص عليه ورجع مسح وجهه وقال بهدوء

غالي: بصرامة ) ماعندها حتى تصويرة وماشافت حتى حاجة وغير كتهضر انا غادي نتفاهم معاها

سكينة: ايوا مللي ماعندها لا صورة لا والو مشافت والو اذا هادي راه حمقة خصها تشوف الطبيب ،، دي مراتك للطبيب اخويا ماتخرجش ليا انا كل مرة تهددني

قطعات وربعات يديها كتشوف فليلى

سكينة: ياالاه.. نوريه لا هوا لا هي الكيدار لاخر

ليلى: قلت ليا غادي نكدو ليه قلت هادي غادي تخرج ليه من تيليفون صافي

سكينة: لاالا اويلي لااا!!… نبقا نبح كي الكلبة مكيعجبوش داكشي ،، هوا انا عارفااه (صغرات عينيها) مكيعجبوش الصدع والغوات و تاشالوطيت .. داك تقح٠٠ين لعور ماعندوش معاه كن جيت نغوت ولا نبدا نرعرع يقدر يدور فيا كاع يقول ليا غا هضري بشوية والا سيري تخراي

ليلى: ناارييي كاين واحد النوع راه مييييمكنش!! تلقا راجلها كيخونها تمشي للبنت ضرب ليها نتفة وترجع فرحاااانة زعما دارت انجاز

سكينة: هاداكشي غي التقليد العمى .. كوولهم كيديروها وكتعجبهووم ديك القوة والدباز والشوهة كيحساب ليها راه وااعرة .. غا صحاب الرموكات والخضارة اللي كيعجبهم داكشي .. يقولها ليها فرحاان عبرتي عليها هي لاسقاني…ولا يقولها نحرش عليك مرتي نااري شنو دير ليك الى شداتك .. انا بعدا فاش كنشوف شي واحد كيهضر هاكا كتجيني مرتو بحال شي كلبة مصعورة .. اويلي !!

ليلى: فوز كتعيط( فتحات الخط) الو فوز… وصلتي؟؟ خرجي للجردة خرجي حنا تما

وصلات عليهم فوز ومشافوهاش مدة هادي سلمو عليها بالاحضان والتعناق والبوسان وريحة العود كتفوح منها والزين كيتشتت رطبة بحال الحلوة جلسات معاهم كضحك وبداو يتعاودو بيناتهم ويضحكو حتى حبدو نفس الموضوع وعاودو ليها شنو وقع بالتفصيل من نهار العرس للديك اللحضة اللي جالسين فيها وهي كتسمع ويدها على حنكها

فوز: اويلي ويلي ويلي. الغيرة صافي هبلاتها!!! ناااري الله ينجينا ياختي من شي غيرك (حطات يدها على صدرها) تكوني بعقلك تولي حمقة والله

ليلى: اويلي ياختي ماشي كولشي ماشي تا لهاد الدرجة

فوز. خرجات عينيها) اويييلي قولي الله يستر ا ليلى راه الغيرة خايبة والله تا كتمرض ،،، عقلك يخرج ليك بالوسواس تبقاي تفكري ربعة وعشرين ساعة على ربعة وعشرين ساعة (شافت فسكينة وطلعات فيها) ونتي الق٠٠يبة متقوليش ليا ماجبدتيهاش

سكينة: حطات يدها على صدرها بحنان) اويلي انااا!! والله ماجبدتها!! فيين مسالية ليها بعدا باش نجبدها لا هي لا هوا الرويجل لاخر ،، يمشي يخرا .. تفوو

فوز :كدور راسها وتشوف فيها) شافتك وعرفاتك دابا مللي شافتك ميديهاش النعاس.. الطبيبة غتولي ضرب بالحجر

ليلى: اختي شكيكو ياربي تنجينا .. شحال من وحدة كتكون كتفتن غير كتحس بالخطر مكتبقا تعرف شنو كدير كتبدا تزيد فالاجتهاد باش تبان تبدلات وحسن من لخرى حتى كتلقا راسها فاللخر كتخربق..مكتبقا تعرف شنو كدير

سكينة: انا بعدا كن بلاصتها وكن كنت طبيبة والله منشوف لتحت فشي وحدة.. نمشي نعييش حياتي نشبع دوران من بلاد لبلاد وندير الفلوس والمشاريع و هوا يعاود لمخو الى بغا المسخات يهبط عندهم ..والله تا نسوسو قالك نغير ونضرب بالحجر ..والله منتناتف مع شي وحدة على عقبلو كيتو

فوز: نتي بعدا غيشدوك ينتفوك تقدي على المناتفة

سكينة: لاالا اختي اصلا مكنعرفش ندابز خصوصا مع الق٠٠٠ اب .. هادوك راه ديناصورات مولفين المرايشات ،، انا وليت كنكره الشوهة فالزنقة والغوات والفضيحة ،،، دابا تخايليني مدابزة غادي نتناتف يالاه!! وجهي خاصرة عليه زبالة دالفلوس عند ديغماطو ولحمي حتى هوا قشرتو كامل الجلدة رجعات حساسة عندي من نهار دارو ليا التوكال ،، وخادمة على لحمي ودايرة عليه اللي مايدار باش يولي هاكا ونمشي انا ندابز يقمشوني ويخسرو ليا وجهي!! وشعري جالسة كنربي فيه ونعطيه فالتغدية تجي الكلبة داخلا تنتفني منو !! ودفاري اصاحبتي يمشي يتكرض ليا شي دفر من الجدر ولا يطير وسناني عاد حيدت ليهم ليباك ربع سنين وانا دايراهم باش يشدو بلايصهم وها التبيض على ماعرفت شنو وطيحني شي وحدة على شي طروطوار طيح ليا شي سنة !! لاالا اختي الله ينجيني .

فوز: فكراتني فواحد خيتي فالسعودية هي اصلا سعودية باها لاباس عليه ومها لاباس عليها ودكتورة يا حسرة،، ايوا راجلها تزوج عليها وناضت لمرتو عرفتي عدبااتها تشوفيها متقوليش هادي دكتورة،، قالت ليها يا انا يا نتي ماخلاتهاش تتهنى فحياتها عرفتي كانت دروييشة كتبان غير تزوج عليها راجلها تسيفات رجعو فيها عشرة،، دابا المشكل ماشي فبنت من وشكون نتي وشنو كديري فحياتك،، المشكل كاين اللث كيفقد اعصابو وكيدير اللي عمرو دارو فحياتو خصوصا دابا هاد سارة هادي الى كانت طايحة فيه شي طيحة راه صافي تقدر تولي بحال الزومبي.. متعرف راسها اش كدير

سكينة: انا احبيبة غييير تبعد مني تعطيني تيساع .. الى ماعطاتنيش شبر ديال. تيساع غادي نوريها وجهها فالمرايا،،خليها تقلب عليا

ليلى: ماتكونيش نتي سبب فتشتيت الشمل راك متشميش ريحة الجنة

سكينة: لااالا غادي فير نتفك نيت من واحد البروصي(كتحرك العصير) غادي نستافزها ايوا نعيط لراجلها نقوليه دارت ليا مشكل مع خطيبي وتفارقنا بسببها ،، منها نيت نتفك من الخطيب وكلهم غيسيقو الخبار ونخرج بكرامتي.. متأ انا بغيت غير نعرف اش معاود ليها عليا!! وعلاش؟

فوز: يقدر يكون كان طايح فيك

سكينة: هزات راسها كضحك) اويييلي غالي!!! فالاحلام،،، من نيتك

ليلى: وعلاش مالو ياك كان باغي يتزوج بيك

سكينة: لااالا غير كنعجبو … ماعممرو دار شي حاجة تبين راه كيبغييييني.. ولا على الاقل يقولها ليا ولا يقول ليا كليمات زوينين!! اللي كيبغي اصاحبتي واه كتكون باينة فيه هوا كان غير اعجااب وصافي

فوز: ونتي عمرك بغيتيه زعما

سكينة: صراحة كان كيعجبني .. مهم ماحدي انا وياه راني عاجبني الحال ولاكن صافي فاش كنتفارقو كنساه سبحان الله لعضيم…دابا كيبان ليا كي الزبل عرفتي الراجل فاش كيتزوج كطيح قيمتو اختي

ليلى: لااالا هههه لا اختي مامتافقاش معاك .. شحال من وحدة كتلسق غير غالرجال المزوجين

فوز: هادوك كيكونو باغيين يتزوجو راجل مكيلقاوهش للمعقول وكيمشيو عند الرجال المزوجين حيت باين كنا تزوج غادي يتحمل مسؤوليتها ..اما واحد سيليبلطير لا يقد يتزوجها يقد يكركربها

سكينة: لا اختي لا كنكره دوك المزوجين كيجيوني فات فيهم الفوت بحال الى مسخين فافهمتش كيفاش نشرح ليك.. هوا عندو مرتو وباغي يتصاحب خرا كي داير

ليلى: اوييلي ياختي نسيتي نهار قالك كنبغيك وبقا كيعير ليك اويلي قالها ليك!!

سكينة: كتمشط شعرها بدفارها) فوقاش قالها ليا ياختي ماعقلتش!!

ليلى: ايوا هادي هي نسي الكداب وعاود سولو ههه .. نتي قلتي ليا واه قاليك كيبغيك وغير قالها ليك طاح من عينيك!!

سكينة: ساهيا) ماعقلتش!! عاودي ليا شنو قال وفوقاش

ليلى: علاش شكون اللي خاصو يعقل انا ولا نتي!!

سكينة: ماعقلتش اختي واش كان قالها ليا ولا لا نسيت

قلبات فوز وجهها كضحك وقالت

فوز: هادي هي الكلمة الوحيدة اللي مكتسناهاش المرى هي ديك كنبغيك وكتبقا مسكينة تخمم فيها حياتها كاملة،، اذا ماقالهاش ليك

سكينة: لا لا موحال … والله اختي ماعقلت

ليلى: قااالها ليها انا متأكدة هي بفمها قالتها ليا … دوخك الكوى

سكينة: اينا كوى !!

ليلى: هزات يديها ) لا صافي انسحب

سكينة: لالا عااقلة عاقلة على الكوى ولاكن ماعقلتش اش قاليا ..قالها ليا وحنا كنديرو تيكتيكة!!

ليلى: واختي نسولووك نتي كتسولينا؟؟

فوز: ونااري صافي بدلو الموضوع بناقص،،

سكينة: كتشم) الله عل ريحة ،، وااعرة سميتها

فوز: هادو عطور عربية

سكينة: انشوف.

بدلو الموضوع بينما غالي غادي فالطريق كيهضر فتيليفون وتعابير وجهه غاضبة

غالي: بغيت نعرف شحال هادشي غيشد ديال الوقت؟؟ ،،،، شحال ديال الرقت باش توصلها الدعوة؟؟ ،،، (مسح جبهتو) هادشي كيتعطاال.. واغي نفكو هاد الحريرة هادي اما حقوقها غنعطيهم ليهم والله يعاون كل واحد. يالاه اسيدي شكرا الله يجازيك بيخير

قطع وكمل طريقو طالع ليه الدم ماعيط ليها ماسول فيها مابغا يهضر معاها ما بغا يرد عليها فتيليفون، زربان على الطلاق وباغي يطرق المسمار فأقرب وقت وماباقا كيهمو لا شكون يتقلقلا شكون مايتقلقش، صونا ليه التيليفون فجأة وهوا يالاه وقف فباب الدار بغا ينزل وكان ورقم غير معروف فتح الخط ورجع جلس بلاصتو

غالي: وي. شكون معايا؟

بشرى: معاك بشرى لامي ديال سارة (بالاداب) صافا مسيو غالييي،، كلشي مزيان

غالي: مستغرب) وي صافا الحمد لله ؟

بشرى: غناخد دقيقة من وقتك الى جات على خاطرك .. واخا ماكتابش لينا نتلاقاو ونتعارفو مي سارة كتعاود ليا عليك ديييما ومتشرفة بمعرفتك

غالي: بجدية) ايه شكرا،، كاين شي مشكل ؟

بشرى: لالا غيا ديتووو.. بغيت ندخل بخيط ابيض صافي … والله سارة ماتستاهل وعندي عزيزة حرقني قلبي عليها .. هي مسألة ديال الغيرة والغيرة كاينة فأي مرى بلعكس خاصك يعجبك الحال ،، زعما سارة بنت الناس ومعقولة ماتساهلش طلقو

غالي: بتدخل) سمعي امدام الله يخليك هاد الموضوع بعيد عليك .. بعييد عليك وماعندكش علاش تدخلي لا بخيط بيض لا بخيط كحل واش غيجي البراني يبدا يقرر ليا اشنا شنو اللي يصلاح ليا واللي مايصلاحش.. الله يعاونك الالة

بشرى: بتدخل سريع ) لالالا شوف راه انا بعيدة اصلا ماكنتش غنعيط وعمري فكرت نتاصل بيك هي قالت لي عيطي اما انا من اللول مانرضاش نعيط ونتدخل..

غالي: قاطعها) المهم الله يسامح مة اخرى متعاوديش

عطاها للودن وقطع عليها وطلع بحالو لدار باغي غير يرتاخ باغي غير يسمع شي موضوع من غير موضوع الطلاق وسارة اللي مابقاش متحمل يسمعو. لاكن غير دخل للدار لقا اسية واقفة تعرضات ليه مخلوعة وتيليفون فيدها

اسية: غالي جيتي!!! سارة هزوها ايغجونص قالك رجل فادنيا رجل فلاخرة بغات تنتاحر

هز يديه ورجليه مزالين فباب الدار شاف فيها بتعب وتيليفون فيدو مزال شاعل وقال

غالي: يالاه وصلت… صافي براكة راه عييت وهادشي طلع لي فراسي.. براكة مابغي لا نسمع لا نعرف

داز قدامها وهي كتشوف فيه مصدومة ويدها على خدها تباعاه

اسية: واش انا كنقوليك المرى طايحة ونتا هاكا دايز ماعندك سوق؟؟ راه مراتك زعما

غالي: بغضب) واش قلت ليها نتاحري؟؟؟

اسية: راه بسبابك على الاقل ضميرك يأنبك

غالي: بعصبية) راه مرضتو وباغيين تمرضونا ،، وحدة نعسات وفاقت قالت ليها راسها نتاحري اش دخللللنيييي انا .. اناااا ماقلت ليها نتاحري ماقلت ليها سيري موتي.. خليتها فدار باها وكيما كيطلقو كاع الناس غطلقو حتى حنا .. دابا علااش انا نسمع بحال هادشي؟؟

اسية: زعما يحن قلبك ..

غالي: قاطعها بغضب) لا مكاينش يحن قلبك هادي مغاديش يداويها الرجوع خصها تشوف حل راسها واش غنرد وحدة مريضة بغات تنتاحر !! الانسان اللي كيفكر فالانتحار ويوضع حد لحياتو خاصو يتعالج.. هادشي اللي كنعرف غير مؤهل لا للزواج ولا لتربية لابناء ولا بناء مستقبل … الانسان اللي باغي يموت خاصو يبقا بوحدو حتى يبرا عاد يفكر فشي حاجة اخرى،،، (هز يدو) ماعرفتش معامن غنهضر ومعاامن كنتفاهم مافهمتش منين كتفهمو صافي عييت

دخل وسد الباب عليه خلاها واقفة ويدها على يد مالقات ماتقول بينما هند كطل عليها من البيت بواحد البيجامة مقزبة حد الركبة والخلخال فالرجل والصباغة حمرا قالدفار بيضا كتشعل منورة عليهم ديك الدار

هند: وانتي مااالك ؟؟ قالك الصح علاش غيردها اشمن نفع فيها ؟؟ اش غيدير بيها ماعندو مايكجدر بيها

اسية: دخلي سوق راسك وشدي تيليفون ديري يتشارجا

شدات هند تيليفون داتو يالاه حطاتو يتشارجا هزاتو كدور عينيها وودنيها على برا كتسمع اسية كتقرقب فالكوزينة ودخلات ليه كتقلب بغات تعرف مها لمن معاودة وواش عندها شي. اتصال مع سارة حتى لقاتها كتهضر معاها صباح وليل وبدات تقرا البعض من المحادثات الفايتة

اسية: ايوا الله يهديك الغيرة الزايدة غادي غير تهدك وتشرفك قبل الوقت

سارة: انا واه ختى حتى حاجة مكتهدني اخالتي ولدك اللي كيهدني.. بغا يقتلني وكيستافزني واخا مكنبغيش نهضر كيخليني نهضر.. لمن كيتعطر ويتقاد لمن ؟ ديما خارج مزوق تقول مامززوجش

اسية: اشمن زواق واش بغيتي يخرح عريان؟ كيلبس كيفو كيف الرجال

اسية: اااشمن اخالتي راه الراجل فاش كيبدا يتعطر ويتقاد كيبان للعيالات كيبداو يطوفو بيه

اسية: ايوا الله يهديك هادشي اللي غنقولي.

سارة: خليت ليك ديك خمس ميات درهم لقيتيها ؟

اسية: اييه الله يعطيك الرضىىى .. نيت كنت باغا نكمل داك الخويتم عند. هايبي باقي كيتسالني فيه الف درهم

سارة: ماشي مشكل الشهر جاي نمشيو ناخدوه

اسية: الله يرضي عليك ابنتي

كان عرقان بالضهد وضهرو فازك والقميجة لاسقة عليه.. حيدها وجلس على طرف النموسية كيرتاح ويحيد صباطو وساهي كيخمم ويتأمل بحال عادتو حتى حيد حوايجو ودخل للدوش وقف تحت الرشاشة وطلق ضهرو وصدو والماء هابط سخون عليه مدة طويلة حتى حس براسو خرج التعب عاد عاد قلب للماء البارد نعش راسو وتقلب كيشوف فالارض والماء هابط مع راسو بالرغوة .. كان محتاج لحمام منعش بحال هاداك يحيد ليه التعب والارهاق النفسي والبدني وخرج مشا صلى العصر وتكا على الناموسية يرتاح حتى صدق ناعس مافاق حتى للحداش دليل ، مشا نيشان توضى وصلى العشا ساكت مكيهضرش لا مع اسية لا هند .. دخل هز ماكلتو داها لوسط الدار وشعل فيلم وجلس كياكل وتكا قدام التلفازة شحال كيتفرج وهز تيليفون طالع نازل فيه ورجع للرقم دسكينة بقا كيشوف فيه مطولا ودخل عليها للواتساب .

فهاد الاثناء كانت هند واسية شد ليا نقطع ليك فالبيت ديالهم مناكرين

هند: كنت حااسة بيك

اسية: شغلي هاداك وزايدون ماقالت عيب كدور معايا مرة مرة وصافي فيها شي عيب

هند: ولاكن اماما نتي كطمعيها ونتي عارفة غالي ماغيردهاش

اسية: غير كيهضر دابا يردها

هند: والله مايردها هانا قلتها ليك ،، صافي دفع الطلاق غير كوني هانية وهاديك دعوة ديال الطلاق اللي وصلاتها هي اللي خلاتها تنتاحر زعما باش يردها، ساعة معامن هي

اسية: انا شي مرات كيجيني مافقلبو رحمة .. ماعيط حتى يسول كي بقات بااز

هند: اا خااايفة اماما تبقاي تلعبي من موراه وهوا صابر ليك حتى شي نهار ينفر منك شي نفرة .. القلب راه كتبدل وكيتقلب عنداك تغري

اسية: حتى واحد مكيكره واليديه .. زايدون مادرت ليه حتى حاجة

هند: غير هاد الميساجات اللي بيناتكم راه حاجة .. عنداك غيير يكون سايق ليك الخبار وساكت،، ماتعرفيه واش عارف ولا ماعارفش حتى شي نهار يصدمك

اسية: الاللة ماشي شغلي يطلق ولا يجلس.. انا بقات فيا مالقاش حسن منها

هند: علاه مالها اش فيها ؟؟ الزين موجوود والبنات كاينين الطبيبات وكاينين مهندسات وكاين محاميات .. وحتى غتلقا حسن منو وهوا غيلقا حسن منها اما ديك الهضرة ديال مايلقاش حسن منها اير هضرة خاوية.. نعار يخرج وتشوفي

اسيىة: انا خايفة غير يجيب ليا شي شاطة ماطا .. هادشي مناش خايفة

هند: حتى وحدة مكتبغي تخرج على زواجها، سارة غيير ماعرفاتش ليه وشافتو كيصبر وساكت قالت راني حاكمة وبدات كتزيد فيه شوية بشوية …تعقلييي نهار قاليها فيقيني نلعب الكورة ونعس مشات هي غطاتو وسدات عليه الباب خلاتو ناعس حتى فاق لقا الحال مشا ..فاش قاليها علاش مافيقتينش قالت ليه شفتك مرتاح خليتك ! دابا هادو فعايل؟ علاش كدير ليه بحال هاكا وعاد بدا هوا كيعيط لصحابو ويبرر ليهم بحال الى ماعندو كلمة .. تحشم ومارضاش . بغات تحكمو هي فمرة هادشي غير ماحصلات عليه واالو!

احيانا الطلاق كيكون راحة ،، والراحة اللي كيحس بيها غالي الآن عمرو فحياتو حس بيها،، ربما لانه ماجبرش الالتزام فشي علاقة جدية او يمكن كان كيدير مافجهدو باش يتجاوز ويصبر وعلاش لا يكون ضاغط على تفسو لاقصى حد او ماكانش مقتانع مئة بالمية وكيدزب نفسو على تقبل الامر الواقع،، بعض الاحيان مكنكونوش عارفين واش نقدرو نعيشو ونصبرو ونكملو واخا نتزوجو عن حب.. حتى حاجة مكتكون باينة فالاول حتى كندخلو فالمعقول وكأننا داخلين لدار معارفينش اشنو فيها وعاد كنبدار نكتاشفو ونعيشو الحياة اللي كنلقاوها مفروضة علينا وخاصنا مجهود باش نقدرو نغيروها ووقت كثير واش نوصلو لديك النتيجة المرضية او لا .

غالي شاف الزواج كواجهة وبحالو بحال غيرو سمع عليه الكثير والكثير وخدا فكرة فالاول ، لاكن فاش بدات قصتو لقاها مختالفة تماما على باقي القصص اللي سمع وعرف وحتى فكرة الزواج اللي خدا فالاول كانت عكس توقعاتو واخا كان متوقع غيلقا الصالح والطالح لاكن عمرو ماتوقع يشوف الويل كما صنفو هوا اللي كان عايش فيه.. نعم سماه الويل ماشي الزواج ومكانتش عندو ذرة راحة او طمأنينة وفرض حياة ماشي ديالو على نفسه وكان مكمل على امل شي نهار تستاقر الاوضاع وزواجو يسلك الطريق اللي كان كيتمناها ، لاكن مع الاسف كل واحد راسم فبالو حياة باغي يعيشها وفاش كيتلاقاو تحت سقف واحد يا اما يتافقو ويقسمو الصبر فالنص يا اما واحد يصبر ويعيش على احلام الثاني يا اما كل واحد يشد طريقو ويتهنا فراسو.

اما سارة العكس تماما .. كانت عايشة فراحة وهناء من واحد الناحية .. خدات الزوج المناسب ليها واللي شافتو فارس احلامها واللي وقعات فحبو من خلال صوتو فايليفون وزادت غرقات اكثر فاش تزوجاتو .. كانت كتشوف حياتها معاه الى الممات ونفات فكرة الافتراق او الطلاق بصف نهائية ومكانتش حاطة فبالها انها فيون من الايام يطلقو، حبها لغالي خلاها تتصرف بدون تفكير .. تلغى تفكيرها وبقات مشاعرها كتحكم فيها وكان هوسها كامل ها البنات.. عنداك يشوف فشي وحدة وتجيه حسن منها ، عنداك يكون ندمان بينو وبين راسو، عنداك يعطي وقت لشي واحد عنداك يتعامل مزيان مع الموضفين فالخدمة.. مكانتش كتقدر تتحمل ابتسامتو مع شي حد اخر او يعطي وقتو لشي واحد ولا يبان مرتاح فشي مجمع او كيساعد شي واحد.. بغات تشرفو واقف مكيهضر مع حتى واحد بغيد على الناس بعيد كولشي ومعزول هاكا ترتاح وتفرح وتبسم وتحسو ديالها هي فقط . اما فاش كيوقع العكس كتحس باللي كان الناس مشاركين معاها فيه وهادشي اللي خلاها تخلق مشاكيل وكل مرة تنكر علاش تعاون فلان علاش كتشرح لفلان علاش عاطي قيمة لفلان .. وفاش بانت منافستها زاد جنونها وماتقبلاتهاش فوق ارض الواقع واخا حاولات تنسى الكلام اللي تقال عليها لاكن باطنيا مكمداها وصافي.

الدعوة ديال الطلاق مكانتش فالحسبان، كانت كتقول غير خصومة وغنرجعو بحال ديما وماشي اول مرة يعني عادي.. غادي نتخاصمو ونعاود نمشي وكانت كتسناه غير فوقاش يديها او يتاصل بباها يردها ، لاكن بلاصة ما يردها وصلاتها الدعوة ومن شدة الصدم والفقصة اللي ماقدرتتش تتحمل سخفات بالحرقة واخا الاغماء فالحقيقة ماشي ساهل وباش الانسان يفقد الوعي ديالو كاع هصو شي ضربة صحيحة فراس.. اما اغلبية اللي كيسخفو غير مابقا ليهم جهد وفضلو يتجبدو باش الكل يرضيهم ويخاف عليهم وحتى لي محاملهمش بزز منو يدير الواجب ديالو معاهم ويخطفو الاهتمام . سارة سخفات ولقات غير واليديها حداها وبغات منهم بداك التصرف يتخلعو ويخافو ويديرو شي حركة باش يرضيوها وترجع ليهم تنوض، لاكن السي عبد الكبير ملي مارضاش يتواصل وشاف القضية وصلات للمحكمة وهضر فالاول ودار الواجب وماكانت حتى نتيجة .. رفض رفض قااطع يدير شي محاولة ويتنازل على كبريائو ويذل راسو وهادشي خلاها تنوض ودير محاول انتحار فاشلة باش تزيد تضغط عليهم يتحركو وتضغط على غالي بدورو ويأنبو ضميرو ويردها والى مكانش حبا فيها على الاقل خوفا من الله وهي من بعد دير محهود تصلح اللي تكسر وكانت كتسنى ترجع هاد المرة وتصلح اخطائها وماتعاودش نفس التصرفات اللي مانفعوها فحتى حاجة من غير تشتيت الشمل

جميع الاساليب بائت بالفشل،، بل كان فاهم ومتأكد من هاد التصرفات وغذرها وبقات فيه ،، كان عارفها غادي دير محاولات باش تستعطفو ودير مجهود وهادشي اه عادي لانها انسان وبغات تبقا معاه مابغاتش الطلاق فعادي جدا تخلق ليه مشاكيل او تستعطفو ويقدر تترجاه ويقدر تعايرو ..حسب المزاج ديالها وخلاها بعيد عليها مابقاش كيرد على حتى مكالمة غير معروفة وعرفها كتتمحن فهاد الطلاق وكيرحع ويقول فكل مرة. لا يكلف الله نفسا الا وسعها ” مدام لقا راحتو فالفراق فيمكنش يرضي شي شخص ويسبقو على نفسه .. علاش يتعدب ويعيش حياة ماراضيش عليها والحل فيديه!! علاش يتحمل باش انسان اخر يرضى؟ على سبيل شنو؟؟ لو كان فالامر شي حاجة مريحاه او شي جانب مرضي بالنسبة ليه كان ممكن يرضيها ويتحمل العناء فسبيل داك الجانب اللي مرتاح فيه، لاكن الامر مختالف تماما وفاش جرب البعد زاد تشبت بقرارو وكملات الباهية فاش وصلات للمحكمة وعجل بالطلاق باش يكمل ومايتراجعش. وباش يتهنى ويهرب من هاد النيران المشتعلة حتى تبرد دفع للفوغماسيو الجاية فدبي مدتها شهر على بيدمن تهدا الاوضاع، لاكن موعد الفوغماسيو كان مزال عليه ثلات اشهر يعني حتى يكون تم الطلاق .

من جهة اخرى كانت الاوضاع غير مستقرة عند بناصر من الساعة اللي عرف مداخيل سكينة وهوا مكيهضرش وطالع ليه الدم .. مكيطلقش البشرة وهاز خنافرو وكيحاول يضغط عليهم بديك الطاقة السليبية والصرامة ويقلق راحتهم كلهم ويضغطو على سكينة تزيدو فالفلوس وباش ترتاح حتى هي من الضغط اللي جايها منو ومن مها وختها اللي نفخو ليها راسها كل مرة طالع ليهم الدم وكيكررو لها نفس الجملة” عطي المحل ديالو وهنيونا من هاد الصدع.. صافي عيينا.

بقوة مكتسمع هاد الكلمة كل مرة تقبلاتها وكانت جالسة فبيتها كتخمم طايح عليها الضيم وطالع ليها الدم والجو فالدار مكهرب.

سكينة: صافي الى بغا ينخوي ليه محالو نخويه قوليها ليه.. ويكريه لمن ما بغا نمشي انا نقلب على حانوت

مونية: برضى) ايوا هاكاك .. حسن نرتاحو فدماغنا

رانيا: حطات يدها على قلبها بارتياح) الله على راااحة.. عرفتي الى درتيها نعرفك مرى ونص.. نرتااااااحو

سكينة: واقوليها ليه ..قوليها

مونية: هانا نايضة

مشات مطمأن مرتاحة عندو البيت وهوا يالاه تكا بغا ينعس شعلات عليه الضو وراسها مايل جنب بحال ديما وقفات عند راسو وقالت بخفوت ونبرة زعما لقات لحل

مونية: قالت ليك صافي غادي طلق ليك المحل.. حسن كااع نتهنااو … شحال ونتوما كدابزو عليه

بناصر: بانزعاج) كيفاش غطلق المحل؟

مونية: هزات يدها) ايوا صافي ياك بغيتي الحانوت؟؟ صافي راه غدا غتمشي تقلب على شي حانوت تحط فيه داكشي ديالها وتعطيك السوارت ديالك

ناض جلس كيشوف فيها والنار شاعلة فيه. كلاها بعينيه وقال بغضب

بناصر: تباارك الله عليك… اودي اشش غنقوليك راك مرى واشمن مرى … صافي لقيتي الحل تعطيني الساروت وتمشي تكري صافي لقتي ليها الحل!!! مكاينش اللي كيجبد المشكايل قدك نتي سمعتي( شار بجوج صبعان) نتي مولات هاد تنوعيير وهاد المشاكيل عند بالك دابا درتي مزية!!

مونية: بدهشة)وياك قلتي قوليها تزيدك الفلوس ولا تخوي ليك المحل

بناصر: الاللة عطيني تيساع كن كنتي كتفهمي كن هضرتي بلاتي هي احسن واش انا واقف على فلوسها!! واش غنكري للبراني يلسق فيه ميخوج ليا منو ونخرج بنتي تكري عند الناس!! واش عند باباك شي دماغ ولا متكسابيهش. الناس كيتعاونو مع رجالهم على الزمان ونتي مسلطك عليا ربي معاونة نتي وزمان عليا.. سيري بعدي من قدامي غندير فيك شي موصيبة فقصتيني هاد الليلة الله ياخد فيك الحق مجبد البلا يخخخ

طلع رجليه تغطا بعصب وخرجات هي كتشوف فالارض والدمع فعينها ويدها على فمها مشات مساق ليها حد الخبار للكوزينة سدات عليها

هادا حال مونية مع بناصر من نهار عرفها، كتبان ليه هبيلة وسادجة وكأنها ماعندهاش دماغ تخدمو وحتى سكينة كتكرهها كره شديد لانها مكتنفع مكضر وحتى فتربيتها ليهم مكانش عندها رأي ، يعني الى بغاو يسافرو عند جداتهم بناصر اللي كقرر وهي من المتفرجين ، والى بغات تسافر عند شي واحد فعمومها كترجع في مونية لور وتقول ليهم شوفو مع باكم انا معندي مندير ليكم ، وحتى الى رفضات كيكون رفض سطحي فقط مكدير عليه حتى مجهود.

لاكن سبب كره سكينة الحقيقي لامها هوا راجع للطفولة، بحيث كتشوف الاب ماشي واعي كفاية بحال الام والام اللي مفروض عليها تخاف على بناتها وتنبه الاب،، لاكن مونية باش متسمعش سم بناصر وصداعو كانت كتبعد من الصدع وترجع اللور باش ترتاح فراسها ويتحمل هوا المسؤولية.. الشيء اللي خلا سكينة تتعرض للتحرش مرارا وتكرارا فالصغر وهادشي بسبب الاهمال وعندم الانتباه واستهتار الام .

فعمر الخمس سنوات مللي بدات سكينة كتعقل كانت تعرضات لتحرش جنسي من النساء.. نعم النساء منهم مراهقات بنات الجيران ومنهم امرأة وصلات سن اليأس ومتزوجاتش وحاولات تفرغ الكبت ديالها مع سكينة فسن التسع سنوات. لاكن الله كان واقف معاها فكل محاولة تحرش ونعم عليها بالفطنة اللي خلاتها تفطن وتستوعب شنو كيدور قدامها بدون ماتعلمها ام او ينبهها اب.. وبحكم تجربتها مع النساء اللي بداو بالتحرش خدات فكرة الشيء اللي خلاها تدرك وبسرعة التحرش الجنسي من طرف الرجال وتفهم انه شيء مخل للادب والحياء وماشي طبيعي او عادي مهمى حاولو يغويوها بالفلوس ويغويوها مغريات اللي تقدر تستدرج اي طفلة كانت كتتهرب وتبعد وتخاف وعمرها تاقت او سمحات لشي مخلوق يوصل ليها .

فلاش باك.

كانت اول محاولة ليها فسن الخامسة.. اللي قدرات تعقل عليها وتسجلها فراسها وكانت يالاه جات من الصين وكان بناصر عاد دخل بيهم اول مرة ومزال ماعندو حتى دار قالمدينة ويالاه بدا كيأسس ليهم حياة يستقرو فيها. وهادا علاش مشاو نيشان للبلاد لخنيفرة للفيلاج فين عندهم الدار .. وفهاد الاثناء كانو جميع خواتات بناصر تزوجو الا الصغيرة فالبنات فيهم وخوتو الدراري.. وكانت هي ومو والصغير فالدراري فديك الفترة طلعو للجبل بسبب المشاكل اللي كانت وقعات بين مونية والعكوزة وكان الشمل كيتشتت واضطر بناصر يفصلهم وخلا مونية فالفيلاج فالدار هي وبناتها قبل مايتزاد انس ورجع للرياط لخدمتو وتما بداو القصص..

كانت سكينة خفيفة ومكتبغيش تبقا جالسة ومسدود عليها ومونية كانت كتعيا تبعها وكطلق ليها فاللخر وتقوليها سيري يالاه بعدي مني وكتمشي تكا تنعس .. كان كيغلب عليها النعاس وكدوخ مور الغدا وراسها كيتقال وكتديها عينها ومكتبقاش تعرف اش كيطرا فبناتها.. كانت الدار مقناطة وسكينة ولفات الحياة فالصين والمجتمع عندهم مكانش كينعس اي يقدر تبقا فايقة نهار كامل والدار كانت فبناية كبيرة فيها سكان كتار والرواج عكس الفيلاج دار حدا دار والارض غير التراب والشمس كتشوي والصهد ومور الغدا كولشي كينعس تقول المنطقة مهجورة ! الى داز غير شي واحد مع الطريق ومات ميعرفوه باش مات حتى كتأذن العصر عاد كفتحو البيبان ويخرجو لبرا يتبردو حدا ديررهم وكل واحد كيحط الكراسا قدام دارو وهادي هي الحياة عندهم.

كانت سكينة عندها صديقة عزيزة قدها فالسن ساكنة حداهم ..والوقيتة اللي كتشد عليها مونية باش تنعس بزز منها مور الغدا كانت كتكا وتخليها حتى تنعس وتنوض تخرج وتمشي عند صاحبتها للدار تلعب معاها .. هاد صاحبتها كانت عندها ختها مراهقة .. والمراهقة فالبنات كانت كتبان على بعد امتار وخصوصا هاد النوع دالبنات.. الريحة دالعرق وريحة السليبات ميدمين وريحة الشعر كانت كتعطي ريحة خانزة كيشموها كاع الناس الا ماليها.. بلا الحبوب المطرطق فالوجه والافرازات الكثيرة اللي كيديرها المهبل والجسم حتى هوا .. البنت كتكون طفلة مامتعوداش على واحد النوع من النضافة الشخصية وفاش كدخل المراهقة كتبقا على نفس الريتم وحتى واحد مكيعلمها وكتبقا هاكاك حتى كتعطي منها ريحة السمن الحايل.

وهاد الريحة هادي كانت سبب فإنقاذ سكينة من الاعتداء الجنسي.. بحيث استغلت المراهقة لعبة العروسة والعريس وبغات تمارس الجنس على سكينة تحت واحد الكاشة شكلوها على شكل خيمة وتكات عليها بغات تحيد ليها سروالها لاكن بمجرد ما قربات نفرات سكينة من ديك الريحة وماقدراتش تحملها وحبسات التنفس وبغات بسرعة تخرج من الخيمة والضيق اللي فيها ورفضات تكمل اللعبة واخا مكانتش عارفة شنو جاي مور داك اللعب وشنو فنية المراهقة اساسا.

فقط رفضات بسبب الرائحة الكريهة . لاكن تكررات المحاولة مرات عديدة الا ان طفشات سكينة من ديك اللعبة ومابقاتش بغات تلبعبها بسبب الخنقة والريحة وداك الاقتراب اللي كيوكون تحت ديك الخيمة ومابقاتش كتبغي تمشي عندهم الدار.

مونية كانت عارفة سكينة عزيز عليها تمشي تلعب معاهم فالدار وفاش كتبغي تجلس مع الجيران وتتهنى من صدع سكينة كانت بنفسها كتقوليها يالاه سيري تلعبي غير سيري.

عكس رانيا اللي غير غادي ولاسقة فمها ومكانتش كتفرق عليها وفين ما جلسات كتبقا كي الامانة مكتنقز مكتغوت مكتدير حريق الراس لمونية .

لاكن المرة الاخيرة اللي بغات مونية تخرج للباب تجلس مع العيالات تجمع فخاطرها كانت كتلبس سكينة حويجاتها باش تخرج تلعب وكتهضر معاها عادي وجات تطلع ليها السروال

مونية: غير سيري تلعبي مع جيهان .. وعنداك ضربي شي واحد ولا ديري شي صدع

سكينة: لالا منمشيش عندهم كيلعبو عروسة وعريس خانزة

مونية: كيفاش خانزة ؟ فاش كنقوليك سيري حتقولي ليا لا وفاش كنقوليك لا عاد كتفرعي ليا راسي بالغوات!

سكينة: لا حليمة كدير ليا هاكا

(زعما كتنعس عليها)

مونية: بادراك) كيفاش كدير ليك هاكا؟؟

سكينة: هاكا هاكا

كتوريها بالحركات

مونية: تخلعات) ياكما دارت ليك شي حاج؟؟؟ عنداك تكون حيدات ليك السروال ؟

سكينة: لا

بالخوف والشك هزات مونية البريكة باش تخوف سكينة متعاودش تلعب داك اللعب او تخلي شي واحد يقرب ليها حلات ليها رجلها بلعاني وشعلات البريكة عم بعد بتعديد

مونية: والله حتى كنويييك هناااا سمعتي… والله وخليتي شي واحد يقرب ليك حتى نكويك بالعافية

بالخلعة كانت قلب سكين غيسكت وبدات كتحلف ماوقع ليها شي حاجة وكانت هاديك اخر مرة تصارح فيها مونية او تعاود ليها وكتمات كل ما تعرضات ليه وماشافت فنفسها بدون علم حتى واحد

كانت هاديك او محاولة تحرش تتعرض ليها سكينة لاكن من بعدها بداو كيبانو ليها محاولات اخرين وبدات كتفهم وبسبب خفتها وقلة المراقبة تعرضات لعدة محاولات لاكن نجات منهم بقدرة قادر. الا محاولة تحرش وحدة كانت تعرضات ليها عند احد الاقارب من عائلة مونية..بحيث كانت مشات مع مها وبقات رانيا مع عمتها داتها معاها للمدينة وكانت غير سكينة فزيارة هي ومها لعمت مونية .. وكانت عمتها مونية عندها ولد مراهق معاها فالدار وخلات سكينة كتلعب معاه فبيت معزول وجلسات كتجمع هي وعمتها عل براد اتاي و، بدا ولد العمة كيضر على سكينة فسن الثامنة تخليه يقربها لاكن بقوة الرفض شدها بزز وبغات تغوت خافت من مونية تسمعها وقطعات الحس وسدات عينيها وهي معارفاش اصلا شنو كيوقع وشنو كتعيش .. ولد العمة بغا غير يزرب باش ميحصلش وسكينة غير شاد عينيها وكترعد وقاطعة الحس كتشوف سروالها هبط والسليب حتى هوا ولحسن الحظ ولد العمة مبتدأ ومكان لا تيليفون لا حاسوب يتعلم منو ماعرف اش يدير وهي مكنززة بقا كيمشي ويجي عليها مرة على رجلها مرة فوق فخدها وهي كدفعو وهوا كيخلعها باللي الى سمعوهم غيمشيو فيها. كانت تجربة مدتها مكاملاش خمسة دقايق ناضت كتبكي تما فهمات مزيان معنى التحرش وخا ماعرفاتوش اشنو كيعني ككلمة لاكن كفعل عرفات اشنو هوا .. لبسات حوايها مطليين بالماء وقاستو بيدها ماعرفاتش منين جا وشنو داكشي اصلا .. مسحاتو بيدها ضنا انها قاست شي بلاصة فازكة ومكانش عندها ادنى فكرة انه مني وكيخرج من انسان بالغ .

مشات جلسات حدا مونية وتركنات وكرهات ديك الدار وديك المرى وديك الجلسة وبقات كتخزها يمشيو بحالهم من تما لاكن مونية مافراسها مايتعاود بقات كتزعف وملات من تصرفاتها كل مرة وكتشوفها كطير وتفرطط وباسلة لا غير. لاكن هادا من وجهة نضر موني لانها لا علم لها بشنو كيوقع موراها وكتحكم فقط من شنو كتشوف وكتعرف على بنتها .

لاكن ماشي سكينة فقط اللي تعرضات للتحرش. وانما حتى رانيا.. لاكن رانيا ماتعرضاتش ليه من طرف راجل وذكر بصفة عامة. لاكن من طرف بنت قدها فالسن وكانت صغيرة وكانت عزيزة على عمتها وكتديها معاها ديما لدراها وكتهلا فيها ، لاكن العمة كانت عندها بنت لوستها حتى هي كتمشي دوز العطل عندها فالدار وتما تلاقات رانيا بديك البنت وكانو كيسدو عليهم ويلعبو بجوج كيأي بنات مع بعضياتهم، لاكن البنت بدات كتصرف تصرفات غريبة وحتى قتارحات لعبة العروسة ولعريس على رانيا ومارسات عليها الجنس سطحيا من من خلال احتكاك الاعضاء مع بعضها وكانت البنت اللي متحكمة فالمعاشرة ورانيا غير كتشوف مافهما والو لانه ماوصلها لا احساس لا حتى حاجة حتى ناضت البنت وبقات رانيا فديك البرائة مافهمات اشنو وقع اصلا حتى كبرات وقرات واستوعبات عاد جاها الغثيان من داكشي اللي وقع ليها وعرفات راسها تعرضات لاعتداء جنسي نسوي والمشكل ان البنت قدها فالسن !! لاكن فين تعلمات داكشي وفين عرفاتو الله واعلم.

كانو هادو من اسباب كره سكينة لمونية ولشخصيتها وكانت كتمنى تكون عندها ام من نوع اخر،، ام عندها كلمة وقادة وماشي خوافة واهم شيء. ذكية، لاكن مونية كانت خوافة بشكل كبير وسادجة وكضن انها كتحمي بناتها حيت فاش كتنعس فشي بلاصة من غير بلاصتها كتعنقهم بيديها خوفا من شي واحد ينوض ليهم فالليل وكتمنع عليهم المبيت عند صحاباتهم او فشي دار من غير ديور المقربين .. المهم عينهم ميزانهم . كانت كضن ان بناتها ماوصلتهمش اليد لاكن كع الاسف ما خفي اعضم ولا هي لا بناصر حساب ليهم راهم حاضيين ورادين البال مزيان وهم اكثر واليدين كيخافو على ولادهم فالدنيا.

الوضع رجع كيستاقر من جديد والخطيب اللي بغا يخضب سكينة جاي فالطريق، لا هي كتسناه ولا هازة ليه الهم وباش مايزيدش بناصر يحقد اكثر قبلات عليهم يجيو باش ترجع الاوضاع كي كانت وينساو موضوع الزيادة دالكرا والمحل .

استقبلهم بناصر بحفاوة ومونية مقاداها فرحة عاجبها الحال وكيحساب ليها صافي اي واحد مشا خطب غاي يتزوج. مكتآمنش بالنقاش والرفض ومدام سكينة قبلات يجي يخطب صافي بداو كيفكرو فالعرس ويبنيو ويعليو .

اما سكينة مكانتش كاع فداك العالم ومابغاتش تكون عروسة وتعيش دوك الطقوس ..كانت فالمحل جالسة هي وليلى وفوز كيتجمعو ويضحكو على الخطبة

ليلى: واسيري اوييلي عمرني شفت عروسة مزالة برا والخطاب عندها فالدار

سكينة: خليني اختي مافيا اللي يحضر لداك لخرا ديالهم .. تا يعيط عليا ونمشي نشوف شكون هاد كحل العفطة اللي جاي يخطب بلا ميتشاور معايا

فوز: ولاا لا السيد راه جا من الباب ..شنو بغيتي يدورك وينومروك الناس ويبقا مجرجك عاد يجي

سكينة: وماباغاش اختي ديك الحياة ديال الزواج ولخرا عرفتي كي كيبانو ليا جوج مزوجين .. كي لخرا ياربي تسمح ليا ..مشاركين الفراش والحزاق والاكسيجين والزمر .. علاش اختي مالنا على هاد الزربة نتخيط من دابا!

ليلى: سبحان الله كاين اللي مكيعجبوش الحلال

سكينة: بااغا نعيش داكشي والحب والرمنسية ولاكن ماشي بالتزام اختي! باغا بكاانتي

فوز. دابا شنو ؟؟ غتمشي ولا لا من اللخر

سكينة: بلعكز نايضة) نااري مافياش والله،، تفوو ماقاداش على ديك الدخلة دز* شوفوني داخلة جاني سيد الرجال .. شوفوني كي حشمانة والشر طايح عليا وانا هي الاميرة وبحالي مكاين !! وانا غا مخورة وغادا نتخور.. ياربي تسمح ليا راه بقوة مكنشوف العرايسات عايشين ديك اللحضة مساكن وهما مقولبين اكبر تقوليبة .. ليوم هاهي اميرة غدا كتصبح خادمة.. زعما الرجال سعداتهم كيجمع حزقة ياخد بيها مرى ويتكا وتبقا هي خدام عندو طول حياتها بلا المشاكيل والحسد اللي حاسدينها شي وحدين على زواج.

فوز: دورات وجهها) ونااري التشائم .. غا اللي بغا يكره مو الزواج يجي يجلس معاك ..سيري سيري قبل ماعيط باك يبدا يسبك قدامهم

بحال اي عائلة فرحانة للخطوبة وعندها عقلية وحدة .. هوا ان الخطوبة هي بداية الزواج وهادشي صعيب يغيروه او يفكرو بتفكير اخر كما كتفكر سكينة وهوا ان الخطوبة لا تغني ولا تسمن من جوع وهي فقط تعارف ومن حقها تقول اه ومن حقها تقول لا .. لاكن فمعضم العائلات كلمة لا عندهم عيب وفك الخطوبة عار عليهم وعلى بنتهم واللومة كترجع دائما للمرأة ، لاكن فعاد الحالة كلشي تغيير .. وسكينة مكانتش اصلل مهتمة لهاد الخطوبة وخداتها من باب التجربة فقط، تجرب احساس الخطبة وتعيش اللخضة وتشوف باش حسو جميع البنات اللي دازو قدامها ،، لبسات قميص جد خفيف لا زواق لا حتى حاجة فقط انيق تقدر اي امرأة تلبسو فدارها او تستقبل بيه ضيوفها مع بلغة خفيفة ديال الجلد فالزهري وجمعات اطراف شعرها لور وحطات مكياج خفيف كأنها غتجلس فالمحل تخدم فقط.

دخلات بديك الحطة للدار وسمعات الصوت فالصالون ديال الهضرة والضحك وبناصر كيتجمع مع الضياف ويضحك فرحان واول ما جا فودنها

بناصر: ان شاااء الله مزااال الايام جايا غتعرف بزاااف دالحوايج .. ماشي حيت بنتي كنشكرها ليك لاالالالا ولاكن والله ماتسالني حلوف.. الى مراااا ونص.. كنقول ليك مرا ونص وديها من عندي صحيحة مانزيد عليك منقص عليك ولا كدبت ربي راه شاهد…. ايييه هي ناقصة شي شوية فداكشي ديال الدار ولاكن واقفة يتحزم بيها الواحد راه فير مابغيتش نجوجها والله الغضيم الا راهم معايا فالخدمة صدعولي راسي كل مرة هههخخخخخخخخخ

دارت يدها على جبهتها ومشات للكوزينة عند مونية اللي مانت كضحك وعاجبها الحال وراشقة ليها مكحلة لعوينات ولابسة قميص حتى هي وحداها رانيا فرحانة ومزنكة عاجبها الحال تعرضات ليها عنقاتها

رانيا: ياختي فرحاااانة تقولي انا اللي غنتخطب ههه

سكينة: وصافي صافي اويلي هادشي كاع على بوركابي هي متقلة عليكم

مونية: وييلي متقوليش هاكاك !!

رانيا: سيري سيري ههه حنا اختي فرحانين اخيييرا اخيييرا غتزوجي

مونية: كن لبستي شي قفطان بلحزام تباني فرحانة وباغاهم يجيو .. غيقولو غير مبززين عليها ماقدرات حتى تلبس شي قفطان زوين

سكينة: لاالا هاكا باااركة عليا .. كي داير بعدا هاد بوراس زوين؟

رانيا: كضحك ) زوييين عرفتي كيحمممق

سكينة: حلفي!

مونية: حناكها حومر بالفرحة ) ماعندك مااااتعيبي فيه .. مافيه ححاتتتتا عيب

سكينة: ايوا دابا نشوفو

عطاتهم بالضهر كضحك ومشات كطل بتخبية بانو ليها خمسة دالناس جالسين بيناتهم جوج قد قد واحد فيهم عاطي للعين شكات فيه يكون هوا عريس الغفلة بديك التحسينة اللي داير للراس واللخية خفيفة شبه منعدمة لاكن من الجلسة والشوفة قرات شخصيتو حسات بيه راسو قاااصح وسيدي مولاي واها كيضحك ماتحت السواهي دواهي وغادي تشوف العجب العجائب مع هاد العريس ، وحسب خبرتها مع صحاب المخزن اجمعين كلهم شخصية وخدة تقريبا .. السلطة والنفخة والجبهة وعزة النفس اللامنتهية وعزيز عليهم يحكمو ومتأثرين بالسلطة.

سكينة: كدور راسها بخفوت) زوين ولاكن باااينة فيك ثور ابوراس.

رجعات اللور كضحك بوحدها ووقفات كتسنى يقولو ليها دخلي ودايرة يد على يد ومتكية على الباب حتى خرج بناصر كيفرنس عاجبو الحال وقال هاز راسو وخنافرو شاد الضحكة

بناصر: بخفوت) مونياااعع.. ايوا يالاه طلقينا

شاف فيها بنص عين كيميع زعما دخليها ومشا رجع بلاصتو من بعد طلع وهبط فسكينة بتص عين وهي قالبة وحهها حشمانة تشوف فيه، خرجات مونية من المطبخ وشدات فيها حشمانين بجوج ودخلو للصالون عند الضياف اللي حتى هنا وبدورهن كانو متشوقين يشوفو العروسة اللي عجبات ولدهم وعلى قبلها مشاو ضياف بلعاني حتى لعند الجد للفيلا وبغاو يتفرجو فالسيدي دالعرس غير باش يشوفوها كي داير ويعرفو شكون فالبنات فداك العرس اللي ختار ولدهم وشكون فيهم بنت بناصر وخت رانيا خطيبة هشام. طبعا كان حوار ونقاش وتفكير واخد ورد بيناتهم عاد تافقو وقررو يمشيو يخطبوها رسميا من عند واليديها .

بدات السلام من الدخلة على بنت كبيرة شوية تكون ثلاتينية متولة وزوينة ابتسمت ليها بوقار وسلمات عليها ومن بعد مدات يدها للاب اللي كان حشمان ووقف دغيا مد يدو ليها ورجع جلس وجنبو الام اللي جات تخطب لولدها .. بالحجاب والتاويل والجلابة على حقها وطريقها .. مكناسية مأصلة دوك مكانسة الاحرار اللي كلشي عندهم بالعبار .

منها تسليمة ومنها شمات الريحة وشمات البنت وقراتها بعينيها عاد دازت سكينة كملات السلام على الولد اللي حداها .. انه عريس الغفلة ، بدجينز زرق وقميجة زرقا وقف مد يدو باحترام وخجل سلم عليها ودارت مدات يدها لي حداه حتى هوا كيشبه ليه وغالبا خوه . سلمات عليه ومشات حدا مونية جلسات حشمانة ومعاوداتش ضارت جيهتهم فمرة .. بقا شي كيشوف فشي ونقاش وحوار خافت بين العائلة وبين الام وبنتها اللي حداها في حيت سكينة كتعرق وتنشف حسات براسها محطوطة تحت المجهر وراهم كيفليو فيها من راسها لرجايها لجميع تفاصيلها بنن فيهم ولدهم حتى هوا . كلشي دابا واضح وباين قدامهم وعن قرب ماشي بحال العرس واخا شافوها وكانت ضوء القمر فداك العرس لاكن كان ولابد يقربو من الصورة اكثر باش يعرفو اش غياخدو

مالحقات تشوف ولا تبركك غير جلسات شوية ونخزات مونية وناضت خرجات من قدامهم مشات خلاتهم كيتشاورو بيناتهم.. شافت فقط شكل العريس كان زوين وداكشي اللي كتبغي وكيعجبها نيت ومن الاول عارفاه غيكون طويل ومكدر حيت عارفة كاع تقريبا رجال السلطة الشباب كيتختارو بعناية وحسب حوارها مع فوز وليلى عطاوها تلميح على انه غيكون طويل ومتريني داكشي نيت اللي كتبغي حيت لامارين كتفرض عليهم البنية الصحية وغيكون سباح ماهر وعندو العضلات وغيكون عاجبو راسو وفرحان فيه، داكشي اللي بقات بالحرف تقول وصفوه ليها قبل ماتشوفو واقتانعات بيه شكلا لاكن ماشي الشكل هوا الاهم عندها والله يجعلو يكون شارف فيه بوتفتاف المهم يكون كيهز ليها هبالها وداير ليها الخاطر ليها ولمزاجها المتقلب فكل ثانية ويخليها تعيش كيف بغات ويتهلا فيها هادا اهم شيء عندها فشروط الزواج .

اما العريس شروطو كانت غابرة وحتى فاش كانو كيهضرو مقال عيب بقا غير ساكت ما حط لا نقطة ما قطع ورجع السطر.

حتى لواحد اللحضة تحولات ختو من مكانها وجلسات حداه كضحك وبقات كتهضر هي وياه بيناتهم وقالت بخفوت

سناء: كي جاتك؟ عجباتك

حرك ليها راسو بالايجاب ووقال

اسامة: مزيانة؟

سناء: زوينة تبارك الله… ولاكن الزين ماشي معيار اسامة

حرك راسو كيسوف قدامو وقال بثقة

اسامة: دابا نشوفو شنو مور الزين

سناء: بمزحة) عنداك تغر هه

حرك راسو مع غمزة وضحك وكان واثق من نفسو عارف اش كيدير .. نخزاتو من من الجنب وقالت بخفوت

لاللة غيتة: ايوا شنو بان ليك ؟ مقتانع ؟

اسامة:بالايجاب) صافي مزيان

لاللة غيثة: كن سمعتي كلامي وديتي بنت خالتك حسن ليك

اسامة: بملل) صافي دابا ماشي وقتو

لاللة: غيثة) ايوا شنو دابا ندوزو الخطبة ؟

اسامة: صافي توكلو على الله

كحزات لاللة غيثة كتنهد جهة راجلها همسات ليه فودنو وهز راسو كيضحك لسي بناصر وقال

مولاي علي: ايوا دابا حنا طالبين راغبين فبنتكم المصونة لاللة سكينة الله يحفضها ويرعاها ويجعلها من نصيب ولدنا اسامة .. الى قبلتو علينا حنا راحنا قابلين نفتحو باب عاد الخطوبة لوليداتنا ويتعرفو على بعضهم والى تفاهمو وتوالمو الله يسهل عليهم وعلى جميع وليدات المسلمين

بناصر: انا بعدا من عندي مرحباا بيكم منلقاش حسن منكم ونهار كبير هادا .. ولايني نشوفو بعدا مع البنت ويدير الله الخير

مولاي علي: اييه السي بناصر ماقلتي عيب الري اللول اللخر ديالها

ناض بناصر هاز خنافرو ودافع صدرو كيحنحن خارج من الصالة وهنا بدا التوتر كيبان على مرلاي السلطان من رجلو اللي كتفيبري على الارض بدون شعور وختو كتناقش هي ومو وباه بيناتهم وهوا كيسمع لاكن مكانش مستاعد يعطي شي رأي ، كان فقط كيتسنا يسمع الرد حتى رجع بناصر بنفس المشية وتحنينة جلس وسكتو من الوشوشة كيشوفو قدامهم

بناصر: ايوا اسيدي الله يسخر .. الله يتاويهم للخير ويكمل عليهم بالخير

السي علي: ايوا الله يسخر .. معرفة الخير السي بناصر .. وان شاء الله موعدنا فالخطوبة الجاية نقراو الفاتحة الى توالمو وتفاهمو ما بيناتهم

بناصر: ان شاء الله السي علي الله يسخر .

هز بناصر البراد فالسما كيعمر اتاي وارتاحت العائلة بعد سماع قبول العروسة وشربو اتاي وخداو الحلوى وناضو بغاو يمشيو وعيطو على سكينة رجعات مبسمة بخجل كترمش بدات كتسلم عليهم وشداتها ختو كضحك معاها خدات من عندها النمرة وسلمات عليها ومدات سكينة طرف صبعها لاسامة سلمات عليه ودورات وجهها بسرعة في حين وقف قدامها كيشوف بنص عين ويسلم على اسرتها الصغيرة وخرجو وخرج معاهم بناصر يوريهم الطريق منين يدوزو و مشاو خلاو ليهم الفرحة الدار وسكينة كضحك غادي تب ل حوايجها

سكينة : وا حتااااا نشوفو هاد بوراس هادا اش تحت راسو غير متفرحوش هههه

الخطبة دازت بسلام وسكينة رجعات فعينيهم مخطوبة نيشان مافيها لا ان ولا حتى اما هي نسات واش قبلات او رفضات وماولفاتش تحس بداك الارتباط وتحط شي راجل فراسها ورجعات لحياتها الطبيعية عادية .. لاكن الغريب فالامر السيد ماعيط ماسول ما قال والو!! جاتها عجب وهي بيدها عطات النمرة لختو يعني ماطلباتها ليها ختو الا وسيفطها هوا نيت باش تجيبها ليه !! ولاكن ها ثلت ايام دازت على داك اللقاء والسيد ما عيط ما سول ما والو .

ربعات يديها مستغربة فالقهوى قدام فوز وليلى وقدامها بناشي فوقو كلاص وقالت

سكينة: فشكل!! زعما ماجاه فضول يسمع صوتي ما تحمس يعرف كيفاش كنهضر اش غنقول اش غيقول!! ياك البنات ماشي عجب!

ليلى: يقدر يكون خدام ولا ماسالاش ولا الريزو الى كان فالبحر لداخل ميشدش ليه الريزو

فوز: ولا باغي يكبر فعينيك وضربي ليه حساب قال اجي نطيحها

سكينة: مافهمتش؟؟ زعما نووغمالمو نقولو كاع غيخدم ولا يدخل للبحر كااع كاع راه خرج اصلا من عندنا من الدار وكان يقدر يعيط بالليل ولا كاع كاع يعيط قبل مايدخل لهاد البحر هادا!! اويلي واش مخطوبة لشبح !

ليلى: هاي هاي على مخطوبة ههه

سكينة : لاخت الشعر اللور) ايوا اختي بغينا نحسو براسنا نشوفو كي داير هادشي.. ساعا مكاين معامن سر ديلمي انا اللي قلت ليه اه اما نقوليه لا لراس لحديدة .. راسو يهرس ليك حيط ههه

فوز : اوييلي ههههه

سكينة: عرفتي دوك العسكر الكَاااارحين كيبانو كَاارحين .. وبحال هاكاك داير كيبان فيه كَارح البرهوش باقي عاد عندو ستة وعشرين تعطيه ثلاتين بديك الفورمة وديك القلدة

ليلى: هي شي قلدة نييت ههه حسن من غالي(غمزات فوز)

سكينة: غالي واعر عليه

فوز: انااري باقي منسيتي هاد غالي

سكينة: لااالا غا هي قارنات واخا مكيتقارنوش اصلا ..ولاكن بالرجولة غالي طيااح يطيح اي وحدة هادا يقدر يطيح ولاكن ماشي اي وحدة طيح فهمتي.. انا ماطيحنيش من الشوفة اللولة ولاكن اعجاب اه كاين زوين غزال حجرة كتحسي بيه قاصح تاهوا حجرة .. ولاكن التعامل هوا كلشي يقدر يطيحني غير بالتعامل واخا رقييوق

ليلى: دابا من اللخر الى رجع غالي شي نهار ترجعي هه

سكينة: لق٠٠٠وي اللي غنرجع يمشيو يت٠٠د.. واخا يبقا غا هوا ما نرجعش ليه .. غبر من حياتي غبرة وحدة حطني سطل بلا تقرقيب ومشاااا تزواااج ليك وضحك ونشط وكوا مع راسو تااا شبع ودار الدخلة وتعشا وتغدا وبنا حياتو ومشا فيها وانا عاود عليا اللي بغا لمرتو بحال شي ق٠٠٠ دوز بيها الوقت وكيعاود عليها ويرجع فاش ترشق ليه ويلقاني كنتسناه واجدة لق ٠٠ وي على عينيه واخا يرجع التراب ذهب هاداك هوا اللي عمرووو يحلم شي نهار نشوف كمارتو الكيدار لاخر .. صدق شماتة بقات فالزين والكاريزما طززز.. الحمد لله اللي متزوجتش بيه .. شتي علاش الزربة خايبة… هاهوا صدق شماتة جاب الله طلاتو وحدة اخرى ماطليتوش انا

فوز: عادي اي راجل كيعاود لمرتو( غمزات ليلى)

سكينة: بغيض) يعاود ليها على لق٠٠٠ ماشي عليا(قادات شعرها) الله ينعل ز٠٠٠بوه .. انا اللي خاصني لعصا عطيتو وقت اما حتى هوا كان خاصني نبروفيتي فديلمو ونسفطو بحال خوتو

ليلى: وهادا اللي خطبك زعما ماقبلتيش بيه باش تفقصي غالي؟ امم(شدات فكها) غيير عتارفي ..ياك شحال من واحد خطبك مابغيتيش وجا هادا من عائلتو بغيتي

سكينة: بدهشة) هيييه!!! واللللللله ما بغيت نفقصو ومكنفكرش فيه اويلي نن نيتك ا ليلى تا نتي نخرج على حياتي كوولها باش هوا يتفقص!! يتفقص ولا يجلس يعاود لمو … حياتي جالسة كنقاد فيها شبر بشبر بززز وياربي تقاد ليا كما بغيتها نجي نردمها على قبل واحد وسط ملايييير ديال البشار،،، غا هوا اللي سميتو غالي كيتو . (قلبات وجهها كتلمس شعرها) هوا اللي خاسر اصلا … يطير وينزل مايلقاش بحالي ولا حسن مني انا اصلا مكاينش بحالي ( شافت فيهم معجبين فيها ) والله ! (هزات كتفها) انا مخاسرة وااالو .. منو عدااد.. ، هوا اللي ضايع ودابا يندم دابا تشوفو .. انا مكنتوعضش ومكنرجعش

قلبات وجهها هازة خنافرها وفوز وليلى دايرين يديهم على خدهم وكيشوفو فيها معجبين وهي كتقاد شعرها من جهة لجهة وكدوز بداك الكاس اللي قدامها ..بقات ساكتة شحال مدورة وجهها وهزات كتفها

سكينة: دابا تشوفو الى ماعيط شي نهار (بعد صمت) والله تا يعيط ،،، انا عندي احساس.. احساسي كيعلمني بكولشي ،، (بعد صمت) غيرجع يعيط عقلو .. غير عقلو

وهي كتجمع مع صحاباتها وتنقز من موضوع لموضوع صونا تيليفون وهزاتو شافت فيه مطولا وقالت

سكينة: نمرة جديدة .. يكون داك بوراس ؟

ليلى: انشوف؟ (طلات عليه) جاوبيه

سكينة: ويلا كان هوا؟

فوز: مابغيتيش تجاوبيه؟

سكينة: ماعرفتش واش هوا .

ليلى: اينا نمرة عطيتيه الشخصية ولا العملية

سكينة: عطيتهم الشخصية(كتشوف فتيليفون بتفكير)غيكون غا هوا مليار فالمية

فوز: تخليه كيصوني؟

سكينة: برواق) وشنو غنقوليه؟ يااالي مشا ماجا!

ليلى: شوفي اش غيقول؟

سكينة: انا غنشوف

خرجات لسانها وناضت من حداهم هازة تيليفون مشات جلسات فطبلة بوحدها وبقات ليلى وفوز كيتجمعو ويهضرو بيناتهم

اما سكينة سرحات الصوت باش تهضر وفتحات الخط وردات بصوت حنين خافت

سكينة: االو ؟؟

جاوبها بصوت غليض بحال شي كوميسير وبدا يحنحن وغير سمعات الصوت عرفاتو هوا وعجبها صوتو فتيليفون عضات شنايفها كتفرنس فصمت وتقادات فالجلسة باش تشد الهضرة وتركز عليها

اسامة: فين صافا؟

سكينة: صافا الحمد لله ونتا؟

اسامة: الحمد لله، عرفتيني بعدا؟

سكينة: ايوا مكنعرف حتى واحد من غيرك

اسامة: امم.. ايوا هانيا؟ شكتعاودي؟

سكينة: صافا الحمد لله

دورات ليلى وجهها بعفوية والعصير بين شفايفها شافتها كيفاش كدوب وتمايل عاجبها الحال وضارت كضحك وقالت كطل من فوق النضاضر دالشمس اللي على نيفها

ليلى: نموت ونعرف اش كتقوليه دابا ههه

فوز: (كطل) والله تا عاجبها الحال .. شو كي كدير

ليلى: ناري بغيت غي نعرف.. عاد كانت دافعة كبير ومابغاتش تجاوب..

فوز: عجبها الكوماندار هههه كوماندار ياك ؟

ليلى: لا ضابط صف.. يالاه تخرج قالك باقي في بريهيش .. تكون عندو ديك ستة وعشرين ولا سبعة

فوز: اييوا باقي بريهيش

ليلى: ماتعرفي يكون بعقلو.. كاين اللي كبير فدماغو

فوز: عنداك تمشي دير عليه داك تق٠٠بين ههه تنسا راسها يحسابها كتهضر مع صاحبها

ليلى: واييه المسخوطة اول مر تخطب ههه كنتخيلها كتقوليه كنتقهوا مع صحاباتي ، يبات مايصبح

سكينة: بدلع) والو جالسة فكافي مع صحباتي

اسامة: نعام؟ شنو كديري؟

سكينة : جالسة فكافي مع صحاباتي

اسامة: ااه .. وهانيا ؟ً مالين دار لاباس؟

سكينة: لااباس كولشي مزيان

اسامة: قولي ليا اسكينة شحال فعمرك دابا بالضبط؟

سكينة: واحد وعشريين وربع شهور بحال هاكاك ، ونتا؟

اسامة: تسعود وعشرين

حلات عينيها من الدهشة بقات كدور فيهم قدامها وقالت

سكينة: ماشي ستة وعشرين؟

اسامة: لا تسعود عشرين..شكون قالك ستة وعشرين؟

سكينة: بابا!

اسامة: باينة عليا ستة وعشرين

سكينة: الصراحة لا ولاكن علاش قالي بابا ستة وعشرين؟؟

اسامة: لاالا تسعود وعشرين غير يمكن غلط

سكينة: يمكن.. قالي عاد تخرجتي

اسامة: لالا طلعت فالكراد هاد العام ماشي تخرجت

سكينة: ااه .. حيت مافهمتش مزيان

اسامة: شنو بغيتي تفهمي نفهمو ليك

بعدات تيليفون على ودنها بقات كتشوف فيه وحولات عينيها كتعيبو ماعجباتهاش الطريقة باش كيهضر .. كان شوية قاصح تقول مكيهضرش مع الخطيبة كيهضر مع شي عسكري حتى دارت بناقص مابقات بغات تعرف والو ورجعات تيليفون لودنها وقالت

سكينة: هادشي كاافي

اسامة: لا سولي ماحدنا دابا يالاه فالفترة ديال التعارف سولي الى بغيتي تعرفي شي حاجة اخرى

سكينة: كترمش) ايوا نتا عاود على راسك بلا منسولك ندير ليك استنطاق!

اسامة: عاادي غير سولي

سكينة: واخا وعلاش ختاريتيني انا للزواج ؟

بقا ساكت شوية عاد رجع قال

اسامة: كيفاش؟ اش قلتي؟

سكينة: قلت لييييك علاااااششش ختاريتيني انا بالضبط

اسامة: هوا داكشي نفسو اللي خلاك تقبلي حتى نتي

هزات راسها كتحول عينيها وتخرجهم وقالت كتبسم بزز

سكينة: ااههممم…(بعدات تيليفون) زمطني هاد القوا٠د… (ودات تيليفون لودنها) اوكييي

اسامة: بنتي ليا مافيك مايهضر يمكن

سكينة: لاالا ماعندي حتى مشكل ،، نتا اللي يمكن مشغول

اسامة: الشغل مكيساليش، كيعجبك تجلسي فليكافي بان ليا

سكينة: ربعات يديها بميوعة) امم مللي كنبغي نجلس مع صحاباتي كنجلسو فكافي

اسامة: مزياان.. شنو كديري فحياتك من غير الكافي وصحباتك؟

عصبها بدات كتسوط وتنفخ ورجعات اللور تقلبات عليه وقالت

سكينة: كندير اللي بغيت ، و كنبدل الكافي ونشرب العصير .

اسامة: مالكي تعصبتي.. غير كنهضر معاك ياك لاباس

سكينة: هه لالا بلعكس انا مكنتعصبش .. غير رتاح

اسامة: فينك دابا بالضبظ اشمن كافي؟

سكينة: مارينا

اسامة: شنو سمية الكافي

سكينة: ****** بغيتي تتأكد !

اسامة: مزالة تما ولا غتمشي ؟

سكينة: يالاه جلسنا

اسامة: ونخليك حتى تسالي ونكملو هضرتنا

سكينة: اوكي بسلامة

قطعات وناضت كتنفخ باينة على وجهها ماعاجبنا حال وحتى صحاباتها عاقو بيها وغير جلسات بدات كتسوط وتنفخ

سكينة: اييخ شحال باسل.. وااالو مكيعرفش يهضر داير بحال شي كوميسير.. حسيت براسي من جالسة فكوميسارية

فوز: وشنو يحساب ليك .. نتي اللي بغيتي رجل سلطة ايوا ها السلطة .. هاكا دايرين كااملين

سكينة: ااه حقا!! واعندو تسعود وعشرين ص دمني!! هاد با شي نهار يجيب ليا شي حمق.. مكيركزززش ديما مقلق ومزروب

ليلى: وراه بعقلو هادا حسابنا برهوش… اجي ماقلتيش ليه جالسة فالقهوى

سكينة: علاش؟؟ سولني وقلت ليه مع صحاباتي فكافي

فوز: الله يرضي عليك ابنتي راكي غادة

ليلى: اوييلي من نيتك!! كاينة شي وحدة كتقول لخطيبها انا فالقهوى !! راه خاطيبك الخرا

سكينة: وفين انا !! مالي جالسة مع شي راجل ! مع البنات عاادي مالو هوا غيتزوج بيا ويسد عليا منخرجش لكافي ما ندور ما نتسارا !! اصلا ماعجبنيش مغاديش نتفاهو انا وهادا

ربعات يديها معاجبها حال وعاقدة غوباشتها كتجمع مع البنات حتى سمعات

اسامة: السلام عليكم

هزو راسهم كاملين وهي وحدة منهم دغيا ضارت بالعرض البطيئ كدور عينيها هزات راسها لقاتو حداها ،، تشابه ليها فالنضرة الاولى لاكن دغيا تقاد تركيزها وبقات كتشوف فيه مصدومة ويدها فالعصير والرجل على الرجل والشورط مقزب والصدر كيطل والبودي غير سماطي ابيض والشعر مطلوق كامل مزلع وراها وعلى كتفها ومطراسيا كلها باللون الاسمر مع الابيض من قوة السباحة فالبحر والشمش ، كان لابس تيشورط بيضاء ودجينز زرق وريحتو عاطية حيد نضاضر شاف فيها بابتسامة مسطنعة وهي مصدومة بقات جامدة كتحرك غير عينيها اتجاه البنات اللي كيشوفو فيه ويشوفو فيها عاد سرحات الابتسامة بزز ومدات يدها ليه سلمات عليه وسلم على صحاباتها حتى هما اللي بقاو كيرمشو ويشوفو فيه وناضت وقفات قدامو وهوا كيشوف فيها بنص عين من راسها لرجليها

سكينة: باحراج ) انا غنرجع البنات.. صافي .

شارت بيدها من وراها وهزات صاكها مشات وراه كدور عينيها مازال ماستوعباتش في حين فوز وليلى مصدومين

فوز: ناارييي ياختي… شتي ، كان كيقلقلها فيينك وكدا ومعامن ..

ليلى: ناري ياختي الرجال خطاار، كن كدبات عليه! كانت غتفضح.. كن قالت ليه فالحانوت ولا ومشا عندها

ليلى: ناري على بلااان .. تفووو كنكررره هاد البلانات كان كيديرها ليا امين كنكره راسيييي.. مللي اخويا جاي عوال تلاقا بيها من اللول علمها قولها ليها..علاش زعما هاد البعثات بحال هاكا زعما كيتيستيها ! خراا خايف يتزوج بيها ومتصدقش زعما ! على مرض

ليلى: حتى هي خصها تيستيه تعرف راسها معامن .. كيما هوا دار ليها هاكا تا هي تجرب تعرف راسها معامن ماتبقاش حاضية منو غير هوا خلعني تفو ، بوراس خلاتها هي ،، داخل مجهد من الديبار اناري

سبقها قبل متوصل عليه مشا لمقهى اخرى حتى هي كطل على اليخوت وجلس هز رجل على رجل حتى وصلات عليه وتبسمات بمجاملة وجلسات قدامو بخجل وهوا شاد تيليفون كيشوف فيه ،، رتابكات بقات كتقاد الجلسة وتشوف فيه بنص عين وهوا ساكت دوز ابيل قدامها كيهضر مع شي واحد .. كانت كتوثرة لاكن تدريجيا فاش بدا كيهضر خدات راحتها وحطات يدها على الطبلة قاليك وجهها لاكن عينيها عليه كتشوف فيه وهوا كيهضر وكطلع وتهبط فيه وكتفليه بنص عين ويدها تحت دقنها وصبعها ففمها كتغزدو فسهوة ، بان ليه النادل وشار بصبعو مشا عندو وتيليفون مزال فيدور

اسامة: سبيسيال

شاف النادل فسكينة وشارت ليه بالنفي وابتسامة مابغات والو ومشا بقات هي على نفس الوضعية كتشوف فيه كيهضر مامساليش وحط علبة ديال السجائر على الطبلة قدامها حمرا وبريكة عاد قطع تيليفون وهبط بشوية عليه حطو على الطبلة وهز السجائر بلا ميشوف فيها بحواجب مقطبة وقال كيجبد سجارة

اسامة: ايوا لاللة سكينة.. مالك ساكتة

تبسمات من عينيها بمجاملة صغراتهم وبقات ساكتة كتشوف فيه وهوا كيشعل كارو بين شفايفو ويهضر

اسامة: كتجي بزاف لهنا

سكينة: بنفس التعابير كترد بالايجاب) امم.. تقريبا

بعد السجارة فمو شاف فيها من فوق مناخرو كيطلع ويهبط فيها

اسامة: هادوك هما صحاباتك؟

سكينة:حركات راسها بالايجاب ) امم ،

بقات غير ساكتة كتشوف فيه بنص عين اما هوا جالس بحال السلطان كيطلع فيها ويهبط .

اسامة نوعه كثير وكنشوفوه بزاف فالكوميساريات وفالمحاكم وعند جميع رجال السلطة ، اغلبيتهم كيكونو متأثرين بالسربيس ومشا ليهم فالدم وطبعهم موحد غندهم نفس التعامل ونفس القصوحية وحتى فالضحك كتكون نبر الجدية .. كيكونو صارمين ومكيعرفوش ياخدو اللامور بالخاطر وعندهم كلشي بالقوة والنعف والصرامة ، واغلبهم كيكونو معصبين نتيجة عملهم والجدية اللي كيعيشو يوميا والانضباط اللي كيبغيو يفرضوه حتى على الناس خارج اطار العمل، نوع اسامة عندو عشاقو ومعجبينو كتار واغلب الفتياة والنساء كيعجبهم النوع الصارم العصبي كيحسو فيه بطعم الرجولة والفحولة ، لاكن سكينة سبق ليها عرفات عدد كثير بحالو وطلعو ليها فراسها وخرجوها منها فاش كانت عندها الطموبيل وكانو كيوقفوها بلعاني ويخلعوها بديك النبرك القاسية فالتعامل فالاخير كتفاريها معاهم بنمرة تيليفون وتزيد. لربما عاشت هاد الطبع مع بناصر ومكيجيهاش جديد او مميز.. بحال باقي النسوان ، بل كتشوفو ما فيه ربح فالحياة الزوجية من غير الصرامة والجدية والقسوة .. اما الحنان والحوار والتفاهم يستحيل يتلاقاو مع هاد النوع .. والرومنسية والدلال بلا متحلم بيهم حيت مكيعرفوش منين يبداو وباش يساليو وغادي تنازل على شحال من حاجة باغاها فالزواج مقابل ديك الجدية والصرامة اللي كدل على الفحولة. ولاكن ماتعرف هاد اسامة يكونو مجموعين فيه كاملين خليها تعطي فرصة لهاد لعلاقة وتشوف مدام عاجبها شكلا

سهات كتخمم وتشوف فيه بنص عين في حين هوا كيشوف فدفارها الطوال وصدرها المطراسي وكتافها العريانين وطالع نازل مع شعرها كيشوف فيه وقال

اسامة: شعرك هاداك ؟

فيقها من سهوتها حتى جاتها الضحكة وجمعات شعرها عندها كدوز يدها عليه بنعومة وحنان وقالت

سكينة: وديالمن!!

اسامة: طويل داكشي عمرني شفت شي شعر طويل بحال هادا

سكينة: ااه هه تبارك الله ( كدوز على شعرها بدفارها )

اسامة: زعما كتلسقو داكشي ولالا؟

سكينة: ااه كاين اللي كيلسقو ولاكن انا شعري هادا الحمد لله مكنقطعوش

اسامة: بجدية) دابا اللي غنطولوه نقصروه ،، انا مابغيش المرا اللي كتلبس بحال هاد اللباس هادا ، بغيتي المعقول غنقولو ليك، الى بغيتي ديري الحجاب وتجلسي فالدار معززة مكرمة مرحبا مغيخصك خير ، انا خدام فطنجة وعندي الدار تما نتي مغتخدمي ما ديريو الو غتجلسي فالدار واللي بغيتيها تجيك المهم تكوني معقولة وبنت الناس

بقات ساكتة كتشوفيه بنضرات عادية وكتسم ويدها على شعرها كتلعب فاطرافو فصمت حتى كمل هضرتو وحط يديه على الطبلة كيشوف فيها ويتسنى الرد وقال

اسامة: اش قلتي؟

سكينك:حركات راسها بتتاقل بالنفي ) منقدرش على عاد الشروط هادي الصراحة

اسامة: قطب حواجبو) علاش الشروط هادي متشي معقولة

سكينة: لا من حقك ولاكن انا منقدرش عليهم

اسامة: وشنو اللي تقدي عليه؟ دابا ولا الحجاب والسترة والمرى تجلس فدارها صعيبة عليكم ولا شنو؟

سكينة: بهدوء) لاالا انا عندي بروجي ديالي عندي حياتي ومستقبلي منقدرش نقبل هاد الشروط هادي غير سمح لي

اسامة: بانزعاج ) وعلاش قبلتي تزوجتي؟

سكينة: كتلعب فشعرها وتتأمل) لاالا غير تعارف دابا

اسامة: شوفي فياا شوفيا فاش تكوني كنهضري باش نفهم اش كتقصدي ، انا بنتي ليا واقيلا ماديال معقول

مدات يدها لصاكها بتتاقل بلا متشوف فيه هزاتو عندها وبغات تنوض قائلة

سكينة : ايوا الله يسهل عليك فبنت الناس .. سمح ليا

يالاه بغات تعطيه بالضهر رجع اللور عقد حجبانو كيشوف فيها وقال

اسامة: بلاتي بلاتي.. جلسي مزال مسالينا

ضارت شافت فيه وصاكها على كتفها

سكينة. صافي راه باين كولشي

اسامة: واجلسي راه كنهضر معاك

جلسات بالجنب وصاكها فيدها شافت فيه وهوا يضحك وقال

اسامة: مالك تخلعتي جلسي رتاحي .. ماعندك مناش تخافي

سكينة: لالا مخايفاش!

اسامة: اشنو باغا نتي فهاد الزواج مللي مابغاش تحجبي وتجلسي فالدار ؟

سكينة: هزات كتفها) عادي كل واحد كيختار اشنو بغا وفين يرتاح! انا مانقدرش ندير الحجاب ونجلس فالدار.. عندي مستقبلي كنخدم عليه

اسامة: مستقبلك مع واجلك.. ولا نتي عندك مستقبل وراجلك مستقبل ! اشمن زواج هادا؟

سكين: كترمش فيه) لالا مغاديش نتفاهمو .. غير خليني نمشي حسن

اسامة: دابا جيت من طنجة لهنا باش نوضحو الامور ونتي باغا تمشي؟؟

سكينة: حيت مغنتفاهموش .. قلت ليك شنو عندي .. منقدرش نخلي خدمتي

اسامة: دابا نكافة حتى هي خدمة ؟؟ كن كنتي بعدا موضفة ولا .. نشوفو كي ندوزوها

ناضت وقفات وهزات خنافرها فالسما شافت فيه بنص عين وقالت

سكينة: ايوا هادي هي خدمتي وعاجباني .. ماشي ضاروري تعجبك ولا تعجبك شي واحد اخر المهم انا كتعجبني ومرتاحة فيها . بسلامة اسيدي

خلاتو جالس ماعاوداتش ضارت جيهتو ومشات رجعات للقهوى عند صحاباتها جلسات بشوية عليها ودارت وجل على رجل ويديها على الطبلة منفخة

سكينة: هادا مرييييض هادا .. جايب ليا شوروط من عهد الفراعنة باغي يطبقهم عليا … بحال الا انا دافعة طلب للزواج وواقفة عليه

فوز: علاش شنو قاليك؟

سكينة: قالك متخدميش وتجلسي فالدار معززة مكرمة

ليلى: قوليه نوض ت٠ود هههه معززة مكرمة غيشري ليك بي ايم ويديك لمالديف ويحط ليك الفلوس بالصنادق مكيمركوووش

فوز: وراه هوا دابا كيحساب ليه اقصى احلامها هوا الزواج وتاكل وتشرب وتنعس.. اغلبهم كيجيب ليهم الله هادا هوا حلم كل وحدة كن كان عارف ا كيدور ليها فراسها وشنو كتخطط كن حشم على كمارتو

سكينة: واييه والله مامركَ! انا عندي كريدي ديال الدار كنجمع ليه وكناكل فالزنقة يوميا وكنلبس اي حاجة تشهيتها ونرش الروايح من الف درهم لفوق وباغا نشري طموبيل وباغا نسافر برا وباغا نطير فالسما وهوا كيقوليك معززة مكرمة رئيس دولة ومقالهاش

ليلى: قلت ليه عندك الدار طور الانجاز؟

سكينة: ماقلت ليهش صافي غا سمعت داكشي اللي سمعت سديت فمي ماعندو علاش يعرف ، انا خاسرة على راسي اصاحبتي خااااسرة الفلوووس على راسي يجي هوا يقطع عليا هادشي .. ماقلت لحتى واحد عطيني ولا شري ليا كنحطهم على راسي من جيبي .. مايشري ليا مايتهلا فيا ما يخليني نشري راسي ونتهلا فراسي.. عصبني.

بدلات الموضوع ودوزاتو بالماكلة حتى شبعات وناضت هي والبنات رجعات بحالها للحانوت جلسات تقابل شغلها حتى للعشرة دلليل وهي ملهية مع الكليان صونا عليها وطلعات ليها نمرتو وهزات تيليفون خرجات وقفات برا وردات بملل

سكينة: ويي ؟؟

اسامة: مالك على سبة ياك لاباس؟

سكينة: واش باغي دابز؟

اسامة: كنهضر معاك عاادي واش هضرتي ماعجباتكش؟

سكينة: لا ماقلتي حتى عيب .. وانا قلت ليك شنو عندي حتى انا وشروطي

اسامة: ماقلتيش ليا شروطك !

سكينة: ايوا راه باينين

اسامة: قوليهم دابا نسمع

سكينة: اولا انا منخرجش من الرباط خدمتي وكلشي مستقبلي هنايا.. مكنجلسش فالدار ومنديرش الحجاب وانا نكافة كنخدم بالليل بالنهار اي وقت ماعنديش توقيت محدد ومنجلسش نهائيا فالدار وعندي لتزامات ومانقدرش نتنازل على حتى وحدة فهادو

اسامة: بزاااف كاع!! شمن زواج هادا نرجع للدار مانلقا لا ماكلة لا مرا كتسناني لا واالو

سكينة: من حقك انا ماقلتش ليك لاا هادشي كاامل اللي بغيتي حقك ولاكن انا منقدرش على هادشي وهاد المسؤولية كوولها والله منقدر عليها

اسامة: وعلاش بااغا تزوجي مافهمتش شنو باغا بالضبط؟

سكينة: كترمش) بب باغا نخدم .. ندير مستقبلي عاادي بحالي بحال الراجل ، كما انا خدامة وغادي ندير داك الواجب فالدار حتى هوا يدخل من الخدمة يدير اللي عليه .. يوجد راسو مايتسناش حتى نجي انا نطيب ليه … اصلا مكنعرفش نطيب مكتقلي حتى بيضة

اسامة: اهاه ونطيب ليك انا ونحط ليك انا ، دابا انا شنو غنستافد من هاد الزواج؟ فين اللوجيك؟

سكينة: اييوا هادشي اللي كاين .. انا دابا اصلا مامقتانعاش ماشي هادا هوا الزواج اللي بغيت

اسامة: غيير فكري .. جلسييي وفكرييي مزيان قبل ماتندمي

سكينة: ههه فاش غنفكر؟؟ فالشروط ديالك!

اسامة: فالمعقول.. هادشي اللي كتقولي حتى واحد ميقبلو ليك

سكينة: عاادي ماشي ضاروري.

اسامة: كيفاش ماشي ضاروري؟؟ الزواج عندك زايد ناقص؟

سكينة: لااا ههه بلعكس ، الا كان شي واحد غيفهمنيي ونفهموو علاش لا

اسامة: وا بان ليا ماا غنلقايش … غير فكري

سكينة: ايوا عطيني واحد اليوماين نفكر ونرد عليك.

اسامة: وافكري مزياان.. قبل ما تاخدي شي قرار ، حيت هاد الهضرة كوولها اللي قلتي غيير هضرة ديال الصغر وغتكبري وتندمي

سكينة: ايوا انا غنفكر ويكون خير

قطعات كتنهد وهي متأكد من قرارها مية فالمية غير مابغاتش تقصح وجهها وبغات تخلي صورة زوينة بحال عادتها ورجعات لمحلها ولحياتها

فبداية الطلاق كيكون المشاكل النفسية كثيرة والانسان كيكون منهار ومحطم ومدمر بزاف

وسارة وحدة من النساء اللي دخلو فحالة الموت البطيىء ونتقبلوش الطلاق والفراق بصفة نهائية . وباش ترجع راجلها عندها دارت جميع المحاولات. حاولات تغير شكلها وبدلات لباسها وقادات شعرها وبينات انوثتها وجمالها لاقصى حد باش تخلي راجلها يرجع وهادي قاعدة كتاخدها جميع النساء بصفة عامة كوسيلة باش يرجعو داك الزوج وكأنهم كيقولو ليه غتخسرني وشو انا كي دايرة وشوف شنو غضيع من يدك وغتندم عليه. جربات ترسل ليه العائلة على الله يسمع من شي واحد ويهديه الله وحاولات ترسل ليه رسائل وتشكي على مو وحتى خواتاتو وكلهم دارو معاها الواجب وهضرو معاه ودارو اللي عليهم لاكن بدون جدوى .. وصلات بيها الحالة تتأكد أنه رجع مع صاحبتو وهادشي اللي خلاه ميشوفش جيهتها حيت بزاف على المحاولات اللي دارت وحتى وحدة ماشدات .بكات حتى شبعات مور اخر لقاء فالمحكمة واللي دارت اقصى مجهودها باش تبان زوينة وغزالة وتبان فعينيه ،، بردات قلبها بالبكا فتيليفون وهي كتهضر مع خالت غالي.. كلتوم اللي هازة باها فالفيلا وعايشة معاه وكتعطي الخاطر لكلشي وتسمع من كلشي وتواسي كولشي.. شكات عليها سارة حتى شبعات وختماتها قائلة

سارة: غير كتبان هاكاك بداك الاداب زعما اما هي واحد بنت الزنقة .. متأكدة بطبيعة الحال هي راه قالها لبا بفمو

كلتوم : في الهاتف) هشام عارف هادشي؟

سارة: عيطت ليه وقلتها ليه قالي مافراسوش اول مرة يسمع هادشي .. ماتاقش بيا واها عييت نحلف ليه

كلتوم؛: هييه!

سارة: الله ياخد فيها الحق

كلتوم: انا نسمعت والله اعلم الى واااقيلا هضرو فيها شي ناس من العائلة ديال با ه د الغالي.. حيت جاو عندنا وبغاو يتفرجو فالسيدي دالعرس وكيسولو عليها ويعاودو .. واقيلا الى بغاو يهضرو فيها لولدهم وعندهم واحد الولد الله يعمرها دار عنداك غير يتزرف

كلتم العار دغيااا كيوصل، والهضرة مدام فراس كلتوم ماعطلاتهاش ومشات تاصلات بلاللة غيتة ام اسامة كتسول وتسقصي على الحال والحوال ،، وبلا متسول واش خطبو تفاديا للاحراج بدات كتجمع معاها حتى جراتها لموضوع الخطبة وجبدو الهضرة على سكينة وعلى النهار اللي جاو عندهم يتفرجو فالسيدي دالعرس،، ايوا هضرة تجر هضرة وحديث الناس مكياقاداش وكلتوم لسانها تبرا منها وبدات كتعاود على سكينة على اساس كانت كتعرف شي واحد زعما ومادكراتش سمية الغالي ولدهم .. غير باش تنبه لاللة غيثة ونسات ان ولدهم هشام راه خاطب ختها وكانت فنيتها غير تنبه لاللة غيثة فقط. لاكن الاخيرة جاتها النفس على ولدها وهزاتها فقلبها وغير قطعات فركعات الرمانة فالدار وسط عائلتها وبقات عليهم . ياك قلت لييييكم بنت خالتو حسن ليه اش داه للبراني.. راه ماتصلاحش ليه وراه كانت كتعرف شي واحد وفرقاتو على مرتو .. ياك وصيتو ببنت خالتو مكيسمعش هاهوا طاح فبنت الحرام كانت غتديه

هزات تيليفون بديك الحرقة شاعلة عيطات ليه ومع السلام عليكم بدات عليه راه ماتصلاحش ليك وشعلات معاه حلفات عليه مايديها حتى تعصب ماقدرتش يتفاهم مع مو وقطع وفالبلاصة عيط لسكينة بديك الحالة اللي خلاتو فيها مو وحرمات عليه يتزوج بيها

جاها الاتصال من عندو اخيرا من بعد صلت ورا اللقاء ديالهم فالمقهى ، كانت فهاد الوقيتة جالسة على رولاكس بالمايو كحل وشعرها مجموع عشوائي فالسما ورجليها قدامها كدوز عليهم بالزيت دالبرونزاج ولابسة نضارات كبار مربعين وحداها فوز على الفوطة فالارض ومخلية الرولاكس ديالها خاوي وناعسة على ضهرها كتشمش والمايو خيط دايز وسط مؤخرتها ، كانو فمسبح كبير وراقي ممنوع فيه الاطفال وفيه كتفرق الشيشة والكحول والموسيقى مطلوقة واماكن كثيرة ومتعددة للاستجمام ونضاقة وستايل جد راقي ومريح. كانت قدامهم الشية محطوطة فاللون الزهري ويالاه مدات سكينة يديها ليها صونا ليها تيليفون اللي كان محطوط حداها وهزاتو كتشوف فيه وحولات عينيها من تحت النضاضر ومكمشة شنايفها وردت قائلة كتلوي راسها بملل

سكينة: الوو(تبسمات) اسامة

اسامة: بصرامة) الو سكينة صافا؟ كولشي مزيان

سكينة: صاافا ونتا

اسامة: صافا الحمد لله .. مهم سمعت شي هضرة ماشي تا لهيه روناتني

سكينة: عقدات حجبانها) اشمن هضرة؟؟

اسامة: شي هضرة ما هضرة قالك فرقتي شي راجل على مرتو ووصلو للطلاق وعندك علاقة مع شي واحد ..

حلات عينيها شداتها الضحة وحطات يدها على صدرها مصدومة

سكينة: اناا!!!خههه والله مافراسي ههه

اسامة: بصرامة) مكنتفلاش ، دابا واش عندك شي علاقة بشي واحد ولا لا؟؟

سكينة: بلاتي بلاتي بلاتي… شكون قالك هاد الهضرة بعدا؟؟

اسامة: كاينة ولا مكايناش؟ راه هادشي مافيهش اللعب

سكينة:بنرفزة) واقوليا شكون هاد فاعل خير اللي قاليك هادشي باش نعرف من اينا جيهة تابعيني وعارفين عليا اللي انا براسي معارفاهش على راسي!! قولي شكون ..خايف ولا شنو؟

اسامة: لالالا ماعنديش مناش نخاف.. الهضرة وصلات للواليدة من خالت هشام خطيب ختك .. يعني مكانيش شي نار بلا دخان وطون كو خاطبين ختك فراه سامعين شي حاجة ولا علاش غيطيحو عليك هاد الباطل

هزات راسها فصمت وبتتاقل بدات كتحركو بالايجاب وتزيرات بدات كتنفس بسرعة حسات بشي حاجة كدور وسط ديك العائلة عليها ويقات ساكتة

اسامة: جاوبي مالك سكتي

سكينة: سمع اخويا انا غنجيك من اللخر ،، انا مكنعرف حتى واحد وماعندي حتى علاقة بشي واحد اوكي، وبلاا منشرح ليك ولا نبرر اصلا انا رافضة هاد الزواج وزدت رفضتو مليون فالمية دابا حيت ماعندي مااااندييير بالمشاكيل وداكشي دالعائلات ماعندي مانديير بيه .. مزيانة ولا عيانة انا بعييدة عليكم ونتوما بعاد عليا وهاد قال قلتي الحمد لله اللي بانت دابا وبان شنو كان غيوقع من هنا لقدام فزواج العائلات.. سير اخويا الله يسهل عليك نتا انسان معقول ماقلتي حتى عيب وجيتي من الباب وانا كنحتارمك ونقدرك الله يجيب ليك بنت الناس والله يسهل على كل واحد فينا . برااكة حد هنا الله يعاونك بسلامة

قطعات عليه دغيا قبل ميهضر وحطات تيليفون بدات كترعد وفوز كتشوف فيها من تحت الطبوش

فوز: مالكي؟ معامن كنتي كتهضري؟

سكينة: شدات وجهها) غنطرطق .. غنطرطق افوز غنطرطق

ناضت فوز يالاه بغات تجلس حداها فتحات سكينة يديها عنقاتها وبدات كتبكي وفوز مصدومة مافهمات والو وشنو واقع وكتسولها لاكن سكينة كانت مخنوقة بالبكى وكتنخصص وتمسح عينها وصبعانها كيترعدو وكتهضر وتشرح والهضرة خارجة مع البكية بزز باش قدرات فوز تفهم

سكينة: ماعرفتش انا شنو درت ليهم ؟؟ شنووو؟ كولشي دابا عارفني مكنسواش فديك العائلة وكيشوفو فيا وفبابا وماما شوفة ناقصة وكيضحكو لينا فالوجه .. يعلم الله شنو كيقولو عليا .. زعما انا ماصالحاش لاسامة .. خالت غالي مشات قالتها لمو .. الهضرة وصلات حتى لخالتو ويعلم الله شكون اخر وفين وصلات وشنو اصلا سامعين وعارفين.. شتي الكلب شنو دار ليا..كون غير مكانوش خاطبين ختي وكيعرفو دارنا وبابا ..(شدات وجهها) بابا طاحت قيمتو قدامهم دابا … دابا كولنا ولينا مصالحينش .. وماراضيينش بينا

فوز: بغضب) عيطي لداك القواد عيطي ليه الله ينعل لق٠٠ دمو عيطي ليه قولي ليه غتمشي نديكلاري بيك على هادشي اللي خرجتي عليا..قولي ليه انا مشيت دابا درت شهادة طبية وغادية بيها عند البوليس والخبار وصلات لبابا وخرجت من الدار كبريها باش نييت ينوض يا اما يسد ليهم الفام ويقوليهم مكايناش هاد الهضرة كااع ويدير ليك اعتبار ولا كبريها .. تفووو اويلي كنترعد

سكينة: وختووو… حتى ختو عارفة كنت مصاحبة معاه

فوز: عاودتيها ليها نتي

سكينة: لا (مسحات عينيها)

فوز: صافي قوليها كان تابعني وكدا وصافي انا اللي مابغيتش

سكين: اسامة كيعيط

فوز: خليه يصوني تما .. هاد ولاد لق٠٠٠ حتى هما عزيز عليهم النبيش خلي مو تما يمشي يعاود لكرو دابا

سكينة: كتنخصص) كنتغددد كنتغدددد.

فوز: صوني عليه على داك الق٠٠٠ د الى فيه شوية دالرجلة ينوض يديرها على عائلتو الله يلكيها ليه

دارت تيليفون فودنها كتصوني وتنخصص متوثرة وفوز حداها موكضة وحالة عينيها كتشجعها حتى تفتح الخط ودارت مكبر الصوت باش حتى فوز تسمع وتعاونها باش تخفف التوثر

سكينة: الو..

غالي: بهدوء) الو ..

من ديك الو الهادية كان باين عرفها لاكن هي دغيا دخلات فالموضوع بانفعال كتبكي وفوز كنزيد تشجعها كتر

سكينة: الله ياخد فيك الحق .. الله ياخد فيكم الحق كااملين حسبي الله ونعم الوكيل فيكم انا ماعرفتش شنو بغيتو مني؟؟ شنو درت ليك انا حتى تشوهوني وسط عائلتك ؟؟ شنو ؟؟ شنو درت ليييك مرضتيني الله يعطيك شي موصيبة كنكررررهك كنكررررهك

غالي: قاطعها بانفعال) شنو كاين ؟؟ اش واقع ؟ مالنا على هاد الدعاوي ياك لاباس

سكينة: مالنا انا غادي نوريك مالنا هانتا غتشوف..نشوفو واش كتعرفني ولالا هاد الهضرة كوولها قولها ليهم فالكوميسارية

غالي: اشمن كوميسارية اش وصلنا لهادشي هادا

سكينة: مرتااح فحياتك وانا حررتي عليا حياتي.. شوهتيني وضيعتي ليا خطوبتي . اش بيني وبينك علاش كتجبدنييي علاش؟ علاش

غالي: بانفعال: مافهمتش علاش كتهضري اش كتخربقي؟؟ الى عندك شي مشكل هضري بشوية نفهم شنو كاين..اش دخلني ؟

سكينة: سولك خالتك اللي مشات عند عائلة اسامة وقالت ليهم هاديك فوقات راجل على مرتو وكتعرف واحد ودارت معاه ودارت ودارت وماتصلاحش ليكم .

غالي: شكون خالتي وشكون هاد اسامة ..

حيدات ليها فوز تيليفون من ودنها شداتو ردات عليه وخلاتها كترعد وتنخصص مفقوصة ووقفات كتهضر باش تشرح ليه بشوية

فوز: الو السلام عليكم انا صاحبتها هي دابا فواحد الحالة هستيرية ولاكن انا غنشرح ليك مزيان .

غالي: باهتمام) واخا شرحي كنسمعك

فوز: هادي شي اسبوع دابا باش دارت خطوبة مع شي واحد كيجيك من لافامي..مور ما دوزتي عرس ختك هضر مع باها وتافقو وجاو وتخطبو وكولشي كان مزيان حتى مشات شي خالتك قالت لام هاد اسامة خطيبها راه ماتصلاحش ليكم وراه كانت مصاحبة مع شي واحد وماعرفتش شنو بالضبط قالت ليها اخر وقالت ليها فرقات الراجل على مرتو يعني فرقاتك نتا على مرتك .. هاد خالتك مقالتش ليها شكون ومعامن تفارقات بالصبط شوهاتها هي وستراتك نتا وخلات سكينة دابا مشوهة قدام خطيبها ومو وعائلتو وبسبب هاد الهضرة فرتكو الخطوبة وباها دابز معاها حيت سمع السبب وقاليها شكون هادا وبقا كيغوت وهي خرجات من دارهم ودابا هي معايا .. وقع ليها مشكل كبير بزاااف وبسبب هاد الهضرة مشينا لطبيييب درنا شهادة طبية دابا غندفعوها عند البوليس باش حتى هي دافع على شرفها ودافع على راسها وصمعتها واللي قالي شي كلمة يتحاسب عليها ..كما وقع ليها اللي وقع حتى نتا اخويا غادي تخلص على كل كلمة خرجتيها من فمك

سمع اللي سمع وخبر ماكانش عوال عليه وهوا وسط الخدمة ومشغول وسامح فالبيرو وواقف فالبالكو وجميع الالوان تلاقاو فوجهه ،، ضلامو عينيه وسدهم دار صبعانو بيناتهم وتيليفون فودنو وقال

غالي: اري سكينة اري

دازت سكينة فالخط وهوا غادي جاي ويدو فالجيب كيهضر بالسياسة وتبات

سكينة: شنو؟

غالي: دابا الهضرة ماشي فتيليفون انا خارج دابا من الخدمة فينك ندوز عليك ونشوفو هادشي فاص افاص

سكينة: لاالا ماعنديش علاش نتلاقا بيك تزيد تبت عليا التهمة نولي خطافة الرجال

غالي: متأ وصافي من الهضرة الخاوية .. تنفسي دابا ونعلي الشيطان انا خارج ونشوفو كل حاجة عندها حل

سكينة: لا مغنتلاقاكش

غالي: صافي ستعيدي بالله وقولي ليا فين نتي .. نجلسو ونهضرو ونشوفو حل اما تيليفون ماعندو ما يحل

سكينة: كتقلب على الساعة) حتى للسبعة انا دابا عياانة مقادراش نشوف شي واحد

غالي: مااااشي مشكل السبعة نعاود نعيط ليك صافي؟

سكينة: مهم .. يالاه باي

قطعات وحطات تيليفون كتنفخ وفوز واقفة دايرة يدها جنبها

فوز :اش قاليك ؟

سكينة: قالك الهضرة ماشي فتيليفون يمكن عندو شي هضرة قلت ليه عيانة حتى للسبعة

فوز: مزيان.. نيت ترتااحي تعرفي اش ديري، طلع حمارر والله تا طلع حمار مايسواش

سكينة: يمكن هاديك مرتو اللي دارت ليا هاد الشوهة بنت الكلبة..قلبات عليا هانا غنوري والديها الكلب الى ماطيرتوش انا بنت لحرام ، زعما هي وااعرة

فوز: و اوسامة؟

سكينة: اسامة صافي سالينا غنرجع فلعشية نقولها ليهم ماعندي مندير بيه ومن اللول راافضة غير مابغيتش نتعامل معاه شي معاملة خايبة ولا نقصح كمارتي وهوا كيجي لهشام بغيت زعما نخلي ديك الصورة الزوينة .. ولاكن انا دابا طلعت اكبر خطافة الرجال وبنت الحرام ومافخباريش

فوز: صافي نساي دابا .. ياك قاليك عاد الخرا تا هوا نتلاقاو ايوا سمعي اش غيقول ليك بعدا

سكينة: كتجمع كريماتها) اش عندو ميقول الز٠٠ ل. لاخر تفووو على حياة وعلى تريكة كلهم ولاد لق٠٠٠

ناضت كتمسح وجهها والنخصة باقا فصدرها مشات مع فوز هبطات فلابيسين بشوية معنقة درعانها حتى ولفات الماء شوية بشوية وبدات تطلق وتعوم هي وفوز ومشا قدام واحد الكونطوار وسط الماء وقفو والما واصل ليهم للصدر وخداو كوكتيل للوحدة كيشربو ويستمتعو بالجو والمنضر والهدوء وشيئا فشيئا بداو كيضحكو ويهضرو ويقرقبو الكيسان حتى دازت العشية ومشاو بجوج لفيستيير دوشو وخرجو كيقادو شعرهم قدام المرايا

سكينة: اوييلي والله مانخرج ليه مخلصة سطاش الف ريال هنا ونخرج على قبل مشكل .. بتسنا المشكل حتى نفدي فلوسي اختي

فوز: نااري سعدااتك ياختي انا كنتمنى كن كنت بحالك، دابا كن انا اللي وقع ليا هادشي يتضرب ليا النهار كامل فالزيرو والله مايعطيني خاطري حتى ندوز كلوز على فمي

سكينة: كدوز ملمع شفاه) ياختي باز ليك انا منقدررررشششش … فاش كيوقع ليا شي مشكل كنبدا نقلب فين نعطي بالراس الى بقيت فبلاصتي نموت خاصني منزيدش نفكر .. نتسطاا ياختييي

قالتها ومررات شفاهها مع بعض قادات الملمع وحطات قدامها لاتروسة حدا فوز وبدات كتجبد وترش استعداد للموعد.. ها المرطب داللحم ها السبراي المعطر ها السبراي الملمع ها المشنف دالبيطان ها المرطب داليدين وطلعات للوجه هبطات عليه غسالاتو مزيان وهوا حمر ونيفها كتر وحناكها مزنكين برداتو وبدات دوز عليه فتريتمو اللي سبق وخرج ليها الطبيب وبدات تدهن واحد مور واحد، ها المرطب لكونتور دلعينين ها ليكخو والبلاشر الملمع والحواجب مشطاتهم مزيان وقاداتهم بصبعها وقالت

سكينة: مقادين؟؟

فوز: اه هما هادوك

سكينة: حيت غنجمع شعري اللور كامل مغنديرش لافخونش.. كي كديري لديك اللعيبة كتجيك واعرة كتخلي شوية فرقة الرسط وحتجبدي شعرك اللور وتجمعيه مكتبقا حتى زغبة خارج .. بغيت نديرها

فوز: ااه ساهلة دوري نوريك

جبدات فوز قرعة صغيرة فيها متبت ومرطب من صاكها رشاتو ليها على شعرها كامل ومشطاتو اللور فور رقبتها شوية وجبداتو ودارت ليها فرقة لوسط بحال شي برازيلية بداك الشعر كحل لامع والبروزانج فاللحم والشعر بقا الور مطلوق كأنه مبلل بفضل البخاخ اللي رشات ليها ويبقا هاكاك واخا ينشف يبان على انه مبلل شوية. لبسات حلقات مربعين متوسطي الحجم وسنسلة رقيقة فعنقها ولبسات كسوة مزيرة عليها فالارونج غامق مايل للبرونز تربها رطب ومجموعة كاملة حتى للاسفل طويلة وفيها فتحة فالجنب طالعة حتى الفخد مشدودة بخيوط رقاق على لكتاف ووقفات كتشوف راسها عاجبها الحال ومقتانعة وفرحانة وبدات تجبد فالروايح وترش وتخلط بينما فوز كتلوي شعرها اللور

فوز: وااعرة كسوتك منين خديتيها؟

سكينة: من زارا ديك السيمانة اللي فاتت.

فوز: خطييييرة ورطبااا .. من بعيد كتبان مزيرة وتوبها واقف فاش كتقيسها رطباا..شحال خديتيها؟

سكينة: سبع مية وخمسين درهم خديت هادي فهاد اللون وخديتها فالابيض بحال الى باج كيريمي شوية.. هاديك حتى ناري كي كتبان عافية

فوز: وااعرة شي نهار تخليها عندي

سكينة: الى عطيتها ليك غا خوديها .. صافي

فوز: ونااري باقا موسوسة

سكين: كتجبد شفارها) انا راه ولات عندي عقدة ماشي قضية وسواس.. ولاكن هانيا خوديها الى عجباتك (تيليفون كيصوني) الكيدار كيصوني ..السبعة هادي فين نقوليه نتلاقاو

فوز: سيري اكدال حسن بدلي البلاصة

سكينة: صافي انا نقوليه تسناني تما تا نوصل ..خليه يتنشر الحلوف.. غندم طاسيلتو على كاااع داكشي اللي دار ليا

وصلاتها فوز حتى لحي الرياض من بعد ساعة ديال التأخر وكل شوية يتاصل تقوليه قريبة غير وقفات قدام الكافي وقبل متنزل جبدات الريحة عاوتاني وبدات ترش وهبطات المرايا كتشوف شعرها وتقاد الخيوط على كتافها وحلات فمها كتشوف سنانها واش نقيين ودوزات لسانها عليهم وضارت عند فوز اللي كتحل شعرها وتقادو وقالت

سكينة: هانا هبطت ،، ديري واحد خمسة دقايق عاد نزلي (غمزاتها) جيتي فنة كيصرع الشعر مطلوق

فوز: حتى نتي.. بلا منهضر عليك

سكينة: يالاه نشوفو هاد البلان واش غيصدق.

فوز: مايشكش؟

سكينة: ماشي شغلي يشك ولا يجلس غير ميتأكدش… يالاه هاهوا كيعيط ..لخرااا مزروب تفو

حلات الباب نزلات كتقاد الكسوة وشافت الدنيا عامرة كلشي مقزب كولشي مصيف . مشات هازة صاكها فيدها والنضاضر فعينيها واخا الثمنية دلعشية كانت الشمس مزال ضاربة وساطعة .. دخلات كتهضر فتيليفون وتقلب بعينيها حتى شافتو جالس على برا من الجهة لاخرى فالطبيعة لابس تيشورط رمادية فاتحة كول v وفاتح رجليه ولايح واحد اليد على ضهر الكنبي مرتاح وداير نضاضر كيشوف فتيليفون فالهواء الطلق على كنبة رمادية مريحة والطبل قدامو كحلة مربعة ومشات شادة نضاضر فيدها وقفات عليه بتعابير متعجرفة مابغاش كاع تشوف فيه وكتقلب وتشقلب بعينيها

سكينة: سلاام

هز عينو وحيد نضاضر طلعها وناض وقف حتى هوا بلا ميتبسم .. دغيا بعد عينو ومد يدو سلم عليها وجلسات قدامو بثقة فالنفس حطات الصاك حداها وخدات راحتها على الكنبي ودارت رجل على رجل كتشتت النضر هنا ولهيه وهوا كيشوف فيها بنص عين

غالي: صافا ؟ كولشي مزيان؟

سكينة: كن كان كولشي مزيان كاع منجي نتلاقا بيك .. انا مابغاتش تدخل ليا راسي علاش درتي هادشي؟؟

قرب من الطبلة باهتمام هز يدو وقال

غالي: شوفي بلا منتعصبو بلا منجبدو الصدع.. دابا اللي فهمت من صاحبتك هوا خالتي تسببات ليك فمشكل.. اولا انا مافراسي واالو..

سكينة: قاطعاتو) ماشي شغلي يكون فراسك ولا ماشي فراسك.. انا علاش تشوه ليا صورتي وسط عائلتك.. شنو قلتي عليا بالضبط؟

دور وجهه بقا ساكت شاد فلحيتو مطولا وهز يدو وقال في حيرة

غالي: مافهمتش انا براسي..كيفاش حت وصلنا لهادشي والله مافهمت.

سكينة : شنو قلتي علياا ؟؟ علاش انا علااش علاش انا ماشي شيماء ماشي هادوك اللي عرفتي؟؟ علاش انا ونتا عارف خوك خاطب ختي؟ متبغيتيش خوك يتزوج ختي؟

غالي: لالالالا ماعندي حتى دخل فهادشي وكل واحد حررر يتزوج اللي بغا

سكينة: ايوا وعلاش؟

غالي: في حيرة ) فلحضة واحد المرة كنا كنهضرو عاادي انا ومرتي وسولاتني شكون اخر وحدة عرفتي قلت ليها واحد البنت هاكيفاش دايرة .. الله يسمح ليها هي كبرات الموضوع وماكنتش عارف واش هشام ديجا فعلاقة مع ختك ، صافي قلت هاد الهضرة قبل مانعرف. والمشكل بدا نهار جيتي عندنا للقهوى شافت بقات عاقل عليك ونهار الخطوبة عاودات شافتك صافي تأكدات هادشي اللي كاين..من تما وهاد الموضوع مابغاش يتسد

سكينة: يعني هي اللي مشات عاودات عليا لعائلتك ومشوهاني .

غالي: شوفي والله ماكنت عارف غنعاودو نتلاقاو شي نهار آمني بالله (شد ليها فيدها بعفوية) سمعتي.. والله مكانت عارف وماحسابش ليا غيرقع هادشي وانا غلطت الصراحة مكانش عليا نجبد كااع شي هضرة.. ولاكن حتى نتي غلطتي فاش جيتي وقفتي علينا بديك الطريقة وعاودات شافتك فالعرس صافي تأكدات .. ونزيدك

سكينة: ايوا جمع مرتك تجمع فمها حسن ليها انا المهم عندي الصمعة ديالي ترجع ليا

غالي: واش اسامة الناصيري لمن مخطوبة؟ نهضر معاه ؟ الى بغيتي نهضر معاه نقوليه راه مكاينة حتى حاجة غير اشاعات نهضر معاه دابا وقدامك

سكينة: ههه .. صافي كملات… وخالتك اصلا ماجبداتكش.. قالت ليهم شييي واحد.. يعني شي احد اخر شوهاتني انا ونتا ماعارفك حد اصلا

غالي: دور وجهه) مشاكيييل.. شكون خالتي؟؟ واش خالتي كلتوم؟

سكينة: ماعرفتش المهم شي خالتك

غالي: خاصني نعرف شكون هاد خالتي فيهم باش نتفاهم معاها وهي اللي هضرات هي اللي تمشي تصلح الوضع

سكينة: ماعندها ماتصلح انا شتتو ليا الخطوبة ديالي والسيد دار حالة رجع كيشوفني زانية.. قلبتو ليا حياتي كولها

غالي حشم وحار ماعرف ميدير فهاد الموصيبة ، بقا غير ساكت وحادر راسو وشاد جبهتو بصبعانو وكيسمع ، اما هي دايرة رجل على رجل ويديها مرخية على رجلها كتشوف فالناس وطالع ليها الدم وكل شوية تجر شعرها عندها بعفوية دوز عليه في تفكير

سكينة: خوك حتى هوا مابانت ليه غير ختي من وسط بنات الرباط كاااملين!! اوييلي!

غالي: تنهد) والله مابقيت عارف اش كيوقع .. فوقاش اصلا عرفها وهضر معاها وقرر وطبق ماعارف حتى حاجة من هادشي .. مافهمت وما عارد لي معاودت ليه

زفر ودور وجهه كيشتت النضر في حيرة وتفكير

سكينة: دابا غتشوف ليا حل نتا اللي تسببتي ليا فهادشي كامل.. كنت بيخير مرتاحة كنخطط لمستقبلي جيتي نتي والحمقة دمرتك شتتو ليا كولشي ، (مسحات يديها) مابقا خطيب ولا والو بردو دابا ورتاحو هاهوا طجج كاع

غالي: تلفت كيطلع ويهبط فيها ) ونتي بااغا تزوجي؟!!

سكينة :شافت فيه بنص عين من فوق نيفها) ومالي انا كي جييتك؟ هاا!! ماعلياش الله !

غالي: لالا غير فاجأتيني حيت ماكانتش عندك زعمة فكرة دالزواج

سكينة: اييوا اخويا سبحان مبدل الاحوال ، دابا خليني فالمشكل اللي درتي ليا راك غرقتيني.. هاد عائلتك ماعندهم اللي يحكمهم ؟ اجي واش هاد مرتك غلباتك كااع لهاد الدرجة حتى وليتي هاكا!!

شاف فيها مارضاش وعقد حجبانو ورجع اللور تكا على ضهرو

غالي: كنطلق دابا اااصلا… ماعندي منقوليها ولا تقول ليا صافي سالينا هاد الزواج هادشي علاش دايرة هاد الروينة ،، باغا دير اي حاجة باش تبرد عاادي .

سكينة: وانا مالي هي تبرد وانا تخرج عليا!

غالي: شنو بغيتي ندير نمشي نربطها؟ حتى هاد خالتي اللي مشات كتحل فمها ماعرفتهاش شكون هي..شكون اللي كيهضر فعائلتي باش نعرف شنو ندير معاه فيينن غنشد .. هاد اسامة جا وقالك قالو ليا سمع نص هضرة وناض كيجري فيه الصعرة .. حتى نتي مالقيتي معامن

دور وجهه لجهة اخرى هاز خنافرو وهي سكينة:كطلع وتهبط فيه بنص عين ) مالو غزال فن تبارك الله

غالي: بالايجاب) اه فنن .. هاهوا خلاك

سكينة: بسخرية) بسبابك نتا اللي تزوجتي وتحليتي لمرتك خوراتك فاللخر

قلبات وجهها وهوا يدور فيها هاز حاجبو تسيف

غالي: احتارمي راسك الحاجة واش كتوزني هضرتك ولا غير كتجي وطلقي

سكينة: ونتا وزنتي هضرتك ولا حتى نتا جيتي وطلقتي علاش اسيدي معاود عليا علاش مافهمتش..مابغاتش دخل ليا لراسي

زفر بملل وودور وجهه مالقا ميقول بقا ساكت وبدا كيشطح برجلو وهي كتلوح كلمة ودور وجهها حتى حط ليها النادل كاس قدو قداش ديال الفريز طويل ورقيق وشداتو فيدها والكورميط مدلية على معصمها كتشرب وتمنضر كأنها جالسة فهواي في حين جالس جنبها فزاوية الكبنة قالب وجهه وكيشوف فيها بنص عين ويطلع ويهبط .. بقات كتمنضر حتى جات عينها على بنت جالسة مع صحاباتها كضحك وتدلع راسها وكل شوية كدور وتشوف فغالي باعجاب وتلعب فشعرها وصحاباتها كيهضرو معاها كان واضح كيهضرو عليه وكيحللو ويناقشو بيناتهم واش صاحبتو ؟ لا تقدر تكون غير امي .. باغيين يجروه لصاحبتهم وكيحللو الجلسة اللي جالس هوا وسكينة وهي حتى هي حاضياهم بنص عين حسات بيهم كدورو عليه وكيقلبو على الفرصة المناسبة فين يلاقيو صاحبتهم بيه

بمجرد ماشافت عينيهم كيدورو بدات تعوج تلقائيا وضحك بوحدها كتفقسهم وبغات تزيد تفقصهم كتر لاكن مالقات كي دير مارضاتش تقرب حداه حتى ميعات فيها وحدة فيهم بنضرات زعما شو كيدايرة ” عاد كحزات ضد فيهم حداه كتفكر اش تقول ووطلات عليه وهوا متكي على ركابيه بيديه كيخمم وقالت كتبسم

سكينة: دابا شنو غنديرو( كدور عينيها فالبنات)

شاف فيها لسقات حداه وحل عينيه بقا كيرمش مافهم والو وقال على نيتو

غالي: غنشوف شي حل .. المهم باك شنو عارف

سكينة: عينيها فالبنات) اه.. دابزنا

غالي: نتي دابا مع صاحبتك فالدار؟

سكينة: عينيها مزالين فالبنات) اه

غالي: رجعي لداركم حسن ليك كما كان الحال راه كيبقا باك

سكينة: صافي عنسكن مع صاحبتي.

غالي: كيفاش غتسني مع صاحبتك وباك يخليك تسكني مع صاحبتك

سكينة: اه

غالي: ماعندوش مشكل؟!!

سكينة: شافت فيه) شنو ؟؟

غالي: باك ماعندوش مشكل تسكني مع صاحبتك؟

سكينة : بادراك ) اويلي لا حماقيتي با سميتو جورج!!

غالي: قلتي غتسكني مع صاحبتك

سكينة: لا غنرجع بحال هاي هاي..اصلا بابا غيسافر يمكن فميسيو يالاه نيت نساو شنو طرا .

غالي: كيمشطها بعينيه) فين غيمشي على برا؟

سكينة: اه .. هادشي اللي سمعت ماعرفتش فوقاش

غالي: وشحال كيجلس؟

سكينة: كيجلاااس.. شي ست شهور ولا سبع شهور ..شي مرات عام على حسب

غالي: امم… والخطوبة ديالك؟ (باهتمام) كيفاش حتى عرفتي اسامة؟

سكينة: هوا شافني فالعرس ومشا هضر مع بابا انا عرفتو نهار الخطوبة يالاه غنتعارفو

غالي: هي صافي درتي عقلك وبغيتي تزوجي؟

سكينة: ان شاء الله

غالي: بنص عين) مزيان .. الله يسخر

سكينة: اميين.. شوف دابا زبلتيها ياك وشوف كي دير تصلحها انا تشوهت فعائلتك دابا.. اجي هند كاينة ؟؟

غالي: هند ختي؟!

سكينة: اه ختك راه ولات صاحبتي.. ياكما حتى نتا غتمنعها عليا حيت انا مامزياناش وبنت البيران

غالي: واسيري براكة من الهضرة دوالو

سكينة: ايوا مانعرف

غالي: نتي والله تا مريضة

سكينة: دابا نشوفو ، انا غنهضر معاها هي اللي غتقولينا شكون هاد خالتك اللي خرجات عليا هاد الهضرة .

غالي: وهي عارفة بهادشي؟!

سكينة: بتعجب) واش من نيتك!!!وباك وكوراه وصلات ليه واش نتا معايش معاهم

غالي: واش حساب ليك كنصبح نقي معاهم العدس ؟!! ماعرفتش راه هادشي بززاف .. شكون قالها ليك نتي؟

سكينة: تلاقيينا وجلسنا وقالتها ليها

غالي: مسح على لحيتو) صافي حتى الواليدة غتكون عارفة.. مية فالمية

سكينة: اييوا خسارة طحتي معايا انا حشمت بيك

غالي: والله حتى مريضة فراسك.

سكينة: ومالك تخلعتي.. مك دابا نقولو عرفاتني.. مارضيتيش ولا مالك؟

غالي: لالا ماشي هاكاك .. والله ماهاكاك

سكينة: دابا مالك كدخل وتخرج فالهضرة

غالي: وصاافي عييقتي.. تعرف ولا ماتعرفش ومن بعد

سكينة: ايوا نتا راجل غتفرح بيك انا اللي تفضحت .. عرفتي طحتيييي من عيييني دوماااججج

غالي: ايييوا شتيي.. ماربطتينيش مزيان

سكينة: مع الاسف.. عيني فيها الصابون.. (حطات الكاس) ايوا دابا غادي نمشي .. هاد الخطوبة مافيها خير بان ليا

يالاه جات تنوض صونا تيليفون وجبداتو قدامو وهبط عينيه شاف فيه طلعات ليه سمية اسامة ودور وجهه في حين شافت فيه بنص عين وقالت

سكينة: غنشوف كي ندير نصلح اموري

بقا ساكت مدور وجهه وهزات صاكها شافت فالبنات كتلوح شعرها اللور وتنهدات كضحك وضارت عندو

سكينة: يالاه بسلامة تهلا فراسك

شاف فيها وحرك راسو بلا ميهضر مد يدو صافحها ومشات شادة تيليفون فيدها خرجات لبرا مباشرة لسيارة فوز ركبات لقاتها جالسة تما وقالت

سكينة: مافيدوش صافي يمشي يت٠٠٠د

فوز: تعطلتي اصاحبتي تا نتي ستحليييتيها

سكينة: يخ غالي

هبطات راسها قبل ميدور وهوا خارج من المقهى شاد السوارت فيدو ولبس نضاضرو مشا جهة صف ديال السيارات فين موقف سيارتو ركب وخرج باللور مشا عاد هزات راسها بشوية

سكينة: مشا؟

فوز: اه مشا.. الصراحة بوكوص اسكينة ضيعتيه

سكينة: واه كيطلق ههه

فوز : لعار!!

سكينة: والله.. قالها ليا

فوز: علاش؟؟

سكينة: ماسولتوش (كتشوف فتيليفون) قاليا كيطلق وصافي

فوز: واهانتي هاهوا غيطلق رجعي معاه

سكينة: اوييلي من نيتك!! شغندير معاه يعاود يسوسني كي دار ليا المرة اللولة

فوز: ااه اه نسييت

سكينة: انا بغيت حااجة وحدة .. يجي يخطبني حتا هوا ويجي لداارنا .. المهم يجي ..نتخطبو ومن بعد نقوليه بسلامة حتى هوا وديك الساعة اللي بغا يشرع فمو يشرعو وديك مرتو حتى هي طيح بالفقصة ، نوريها شريان الصدع كي داير.. وحتى هوا كي دار ليا غندير ليه

فوز: وناااري ياختي وعندك الجهد لهاد المسلسل

سكينة: ماعندي شغل دابا من غير هاد الفضيحة .. هادشي اللي معمر ليا راسي هاد الساعة .. دابا خاصني نجيبو باي طريقة .. تفوو هاد الخراا تا هوا سر فر سر فرر.. عصبني (بلوكاتو)

فوز: صافي عبرتي عليه

سكينة: واقلت ليييه صافي سالينا وباقي كيعيط… صورتينا؟

فوز: ههه درت ليكم تصاور ناااضيين. داكشي ديال الافلام.

سكينة: حلفي ههه انشوف

فوز: هانتي

جبدات تيليفون كتوريها التصاور وهما جالسين وسكينة كتشوف عاجبها الحال

سكينة: جيت وااعرة .. الصراحة ماكرهتش نقطع شي وحدة فيها غير انا تبقا عندي.. جيت فنة.

فوز: تا هوا زوين

سكينة: شافت فيها)كًرنتي فيه تا نتي

فوز: سيري سيري(هزات كتفها) هاديك هي اللي منديرهاش اوييلي اسكينة ..

سكينة: اوييلي نتي دخلتي ليا تناوي

فوز: صافي اختي خايب جووع .. صارحناك بغيتي تلبسينا وناااري على كنييمة

سكينة: وايالاه زيدي ( قلبات عينيها) زيدي زيدي الصريحة نخرجو تصاور ونشوفو هاد البوكوص اش غيدير

فوز: ونااري لعفوو.. انا عييت بااز ليك باقا فيك مايزيد يمثل

سكينة: غا خليني دابا نتي صافي سالات مهمتك اري ليا تصاور وكحزي لور

فوز: هانا اختي كحزت .. كون كان كلشي عندو هاد الخاطر والجهد اللي عندك كوراه كاع الرجال لاسقين حدا عيالاتهم

سكينة: وتبارك الله تبارك الله

التصاور خرجو وخرجات منهم بزاف وجمعاتهم ومشات بحالها، دخلات لدارهم بالعباية وكتفكر اش غتقوليهم وكيفاش تجبد معاهم الموضوع وكتحاول تستاعد باش ميلسقوش فيها ويمرضوها بالهضرة.

دخلات للكوزينة كدور وتمشي وتجي على جناب مونية اللي كتسول وتبحت كيعجبها الحال تسمع اش قالت ليه اش قاليها .يالاه سولاتها عليه تكات سكينة على الحيط وقالت

سكينة: مكاين والو اماما صافي ماتفاهمناش

ضارت مونية مصدومة شاف فيها

مونية: شنوو؟ كيفاش ماتفاهمتوش؟

سكينة: ماتفاهمناش وقالي ماتخدميش وغتجلسي فالدار وتمشي معايا لطنجة وانا قلت ليه لا وهوا مابغاش صافي قلت ليه بسلامة

مونية: ضربات فخادها) قلتي ليه بسلاااما!!ًصافي مشااا؟؟ ويلي ويلي ويلي !! عاد كنا فرحانين وكنهضر انا وختك وكتقوليا نعرضو على فلان ونعرضو علا فلااان ونلبسو هادي ونديرو هادي وفرحاانين حنا زعما قلنا صاافي هداها الله جا ولد الناس وغنتهناااو

سكينة: باش عرفتيه ولد الناس ولدتيه؟ ربيتيه؟

مونية: بنرفزة) بعدي مني مايهضر معاك حتى واحد .. يخخ ضبري راسك بينك وبين باك سيري عندو قوليها ليه

سكينة: مغنقولهاش ليه قوليها ليه نتي..

مونية: مانقوليه متيقوليا (عطاتها بالضهر كتقطع الربيع) قوليها ليه نتي نييت

سكينة: ايوا خليه هاكاك كيتسنا ، انا قلت ليك شنو كاين بغيتي تقوليها ليه قوليها مابغيتيش شغلك هاداك

مونية: وابعدي مني ماشي شغلي بيناتكم علااش كدخليني فالزمر ديالك..

سكينة: ايوا ضبرو راسكم.. المهم الخطوبة مكايناش سالينا

بقات مونية كتشوف فيها شادة الموس وكتغدد وقالت بغضب

مونية: سيري بعدي مني غنخشي فيك هاد الموس.. سيري خرجي عليا تفوو

هربات سكينة ورجعات مونية كتقطع الربيع وتنكر وتضهر بوحدها معصبة في حين مشات سكينة لبيتها يالاه حطات راسها تكات وبدا تيليفون كيفيبري ..نمرة جديدة عليها فهاتفها الشخصي ترددات ترد عليها فالاخير دارت بناقص نيت متيصلاحش ليها تهضر وهي فالدار وطاحت نعسات بلا عشا غير باش ماتجمعش معاهم فطبلة وحدة ويبقاو يشوفو فبعضياتهم قدام بناصر اللي يعلم الله واش راشقة ليه ولا طايرة ليه ويبقا ياكل ويميع محامل حتى واحد فيهم وهما حادرين الراس تقول كياكلو ليه فلحمو .

صبح الصباح وبحال العادة مشات للمحل.. وهاداك احسن صباح عندها تفكات من الخطوبة وصبحات راشقة ليها واللي بغا يضحك يضحك واللي بغا يبكي يبكي.. المهم هي فرحانة وعندها شورط جديد شراتو بالشهوة كانت كتسنى غير فوقاش تلبسو وفاش لبساتو زاد طلع ليها المورال ونزلات بيه من الدار مقزب ومقطع من الاطراف باقي جديد ولبسات معاه تيشورط وااسعة ومايلة على لكتف وكلاكيطة هافايناس يالاه قطعات ليها تيكيتة ، هادو هنا اسعد اللحضات هما فاش كتلبس شي لبسة يالاه شراتها وفيها ريحة الجديد كتحس براسها جددات كلشي فحياتها داخليا وخارجيا وهادك هوا النهار الكبير عندها.

طلقات الشعر ونزلات فرحانة وسعيدة غادية فالشارع على رجلها بمشيتها الجميلة معنقة بوشيطة فيدها كبيرة فيها تيليفون وراشة ريحتها القديمة اللي كانت كدير ورجعات ليها لاكن هاد المرة شراتها اوريجينال ماشي مدرحة ، “لاكوسط “هوا عطر مميز عندها جدا جدا جدا ،، مميز حيت كيفكرها فذكرايات ولحضات جميلةمعطرين بداك العطر عاشتهم ومن بينهم الليالي السهر فالاكراميات مع البنات وكانو بالنسبة ليها لحضات جميلة واجواء زوينة ماكرهاتش تعاودهم لاكن فكرة الخروج والعودة من اجل المال محاتها ، لاكن علاش لا الى خرجات شي خرجة باش تعاود تعيش دوك اللحضات ودوك الاجواء بين البنات ودوك السهرات وسط الفيلات الضخمة والقصور العملاقة.. من اجل المتعة فقط . عطر كان كيفكرها فالنهضة ديالها الاولى واللي استمر معاها فترك طويلة فديك النضهة اللي جربات فيها كولشي هوا نفسه العطر اللي كتشم دابا وهي غادي للمحل وكتفكر وضحك غير بوحدها حتى وصلات وجلسات وركزات مع نفس النمرة اللي كتصوني ليها وفتحات الخط

سكينة: الووو.. شكون معايا؟

سناء: معاك سناء خت اسامة صافا حبيبة كلشي مزيان

سكينة: صافا اختي الحمد لله شكرا

سناء: هه مالين الدار لاباس

سكينة: الحمد لله

سناء: غضبانة علينا ههه؟ اسامة راه مارتاحش وقالك ضاروري بغا يهضر معاك

سكينة: اااه.. ولاكن راني هضرت انا وياه وصافي شرحت ليه يعني مابقا ليا منقول

سناء: شوفي الى كان على داك المشكل ماديري فراسك والو حنا اصلا ماتقناش والهضرة راه مكتساليش والناس كيخرجو اشاعات على اي بنت بغات تزوج .. حنا اصلا ماعمرناش راسنا بديك الهضرة ونتي من حقك تقلقي ويبقافيك الحال..ولاكن هادشي كيدل على ان اسامة هزاتو النفس عليك داكشي علاش فهمتيني شنو بغيت نقول، غير هوا عصبي شوية وصافي اما راه مكاين والو غير هضرة خاوية ماتستاهلش زعما نوصلو لهادشي..نتي زعما مولات العقل مغتخليش هادشي يأثر اولا

اللي فراسها فراسها وهضرة سناء اخت اسامة دخلات من ودن وخرجات من ودن وبقات سكينة متشبتة بقرارها ، اما بناصر مافراسو مايعاود ومونية قاطعة الهضرة مع سكينة وكتشوف فيها غير بنص عين ماراضياش عليها.

الضهرة وقفات هنا لاكن من لم يكن فالحسبان هوا الخطيب الثاني. شكون قال غيجيها خطيب اخر فهاد الوقيتة هادي بالضبط والقضية مزالة مرونة ومن نفس العائلة عاوتاني.

اييه من نفس العائلة غير المرة الوضع مختالف وعلى وضوح .

هاد المرة الخطبة من جهة رشيد.

رشيد اللي مكيشد الارض وديما خارج ديما مشغول ديما مع صحابو حتى جاه اتصال من عند عبد السلام خوه اللي مشا تلاقاه فممقهى ديال واحد البومبة كبيرة مولف رشيد كيجلس فيها وتما فاتحو فالموضوع

رشيد: اش كاين اعبد السلام ياك الامور مزيان بعدا

عبد السلام كان راجل طويل ورقيق وداير بيرية كحلة على راسو وشاد كارو فيدو ورجل على رجل

عبد السلام: واا كريم قالك بغا شي بنت لسق عليها قالك خطبوها ليا..

رشيد: ااش غتزوج الولد خليه قولو اش بغيتي شي زواج من. دابا ونتا مزوج

علد السلام: ساط الدخان ) قلتها ليه مكيسمعش قالك ها غالي تزوج تا هوا باقي صغير

رشيد: قولو غالي شفتيه غير وهوا كيتزوج ماشفتيهش وهوا كيطلق

عبد السلام: غالي كيطلق؟

رشيد: اامرضاااتو ديك المصيبة الله يخليها سلعها فوقاش غير يتفك منها ..كان عزري مهني مشا جاب الهم راسو

عقد السلام: دخلنا عليك بالله

رشيد: ياودي خليها على الله وصافي.. اللي شاف الطبيبة يقول هنا نبات.. زادتو غير بالهم والمشاكيل …قلتو طلق عليك الزمر مكيسمعش عاد دابا وقف على هضرتي..توريني فالعيالات .

عبد السلام: لا حولة ولا قوة الل بالله العلي العضيم

رشيد: قوليه سير عند الغالي يعاود ليك.. الى باقي جبد الزواج على فمو هانا هانتا

عبد السلام: ودوك العائلة دهشام اللي تناسبتو معاهم مزيانين ؟

رشيد: تقاد فالجلسة) لااااا الله يعمرررها داار… كاااملين مزيانين مهم مرى محترمة دووك العيالات اللي كيحشمو ويحدرو الراس ماعندي منقول فيهم .. حتى النسيب الله يعمرها دار ماتسمع منو غير كلام الخير

عبد السلام:يااك(كيحك دقنو) لالا كتباان على الواحد من وجهه

رشيد: بااااينة..شوف بنادم اللي ولد السوق راه كتباان عليه .. الحمد لله اللي طاح فالنساب مزيانين

عبد السلام: وعندها شي ختها يمكن قالك عندها شي ختها ها؟؟

رشيد: عندها واحد ختها وخوهم صغير(دار ليه القياس بيدو)

عبد السلام: وديك ختها شنو كدير كتقراا ولا غير جالسة؟

رشيد: عندها داكشي دالحفلات كتزين العرايس وداكشي.. تبارك الله مااشيا راه شرات الدار بالثمن علاين تسعين دالملاين (سكت ساهي) بنات الناس اللي عندهم العقل .. (لاح يدو) بناتنا حنا فالحين فالتق٠٠٠بين تابعين ليا مهم .. خرجات عليهم بديك الترابي الناقصة

عبد السلام: مكيديرو والو اش كيديرو ؟؟ راهم عايشين بحال كاع البنات

رشيد: بإكراه( كيشتت النضر) اهمم.. عايشين … واراه هادا هوا المشكل عايشين مكيديرو والو..فاش كتسمع على بنات الناس بحال هاد الانجازات.. هادي كتقرا شادة فقرايتها وهادي خدامة بعرق جبينها ودايرة الدار ما داروهاش الرجال بشلاغمهم.. ها الغالي مهندس طالع فعماين مزال فالكرا.. بلاصة ما يمشي يدير الدار ويدير الساس مشا تزوج بديك الكارثة كملات عليه.. ماتمرضش دابا؟ كتسناه هوا يدير ليها الدار هي كتخدم وتخشي فالبنكة وقالت ليه بغيت الفيلا .. حيت طبيبة بغات تسكن فالفيلا

علد السلام: هاي هاي

رشيد: ايييه.. كان باغي يدفع فواحد البرطمة من البرطمات المزيانين ..شاف وحدة تما فالرباط دايرة مية وعشرين هاكا كدييير.. هاكا وسط المدينة والبلاصة نقية وقالت ليه نصبرو حتى نديرو الفيلا .. زعما زيد جمع ولا موت باش تشري الفيلا.. هي تجمع الفلوس وتخبي وتشرط وهوا يشري ليها فين تجبد وتمرح ويغرك فالكريديات ..

بقا عبد السلام غير كيشوف ورشيد كيشكي ويعاود ليه مفقوص على ولدو وشنو عاش وشنو كيعيش بحال اي اب ختى تنهد عبد السلام سارح فالناس شي غاديشي جاي وقال

عبد السلام: واكريم قاليك شوفو ليا هاديك… خت الخطيبة ديال ولدك

رشيد: شكون؟ خت الخطيبة دهشام؟

عبد السلام: اييه.. قالك بغا يجمع راسو .. بغا حتى هوا يتزوج..الى كانت مزيانة نشوفو مع باها

رشيد: مزيانة .. البنت مافيها مايتعاب ولاكن قوليه بعد العائلة اصاحبي واش مالقا غير ختها ؟؟ موجودين البنات غير يقلب .. تزوج ختها وينوض الصدع عند هادو ينوضو حتى هادو(كيشير بصبعو) هادو دابزو هادو حتى هما ينوضو يدابزو.. قوليه بعد من العائلة راه زواج العائلات مافيه مايتلبق.. واش مكيعرفش هشام والعقلية دهشام والزمر معصب بوحدو والى .. كيقلب على الصهد هاد كريم حتى هوا

عبد السلام: وهاد الهضرة هياااااا اللي قلت ليه اسيدي ..واقالك غييير خليني انا عارفاش كندير .. وقوليه اش كدير

رشيد: ااش عارف اااش.. كلهم كيبداو هاكا كيساليو مافهمت والو مابقيت عارف والو.. طزز

عبد السلام: قالك هوا غيديها معاه لبلجيكا ميخليهاش هنا ويجيو من الصيف لصيف ضياف.. زعما يبعدووو على العائلة ما يوصلو لا صهد لا والو ..

رشيد: هاكاك قلنا حتى حنا فاللخر راك شفتي اش وقع.. كولشي طلق كلشي تشتت والصبر مكاينش

عبد السلام: قلتهااا ليه.. عييت معاه ..شتي ماجيت كنسول عليهم حتراه طيبني وطيبتو .. قالك ماشي بحال ..بلجيكا ماشي هي المغرب واشرح ليه

رشيد :الله يسخر ليه حنا غير مابغيناش ليه الصدع والمشاكيل.. من هنا كنقولها ليك ماتجي تشكي عليا منجي نشكي عليك

عبد السلام: وصافي يالاه غير عطيني النمرة دياها ولا هضر معاه نتا نيت.. جبد معاه الموضوع نسمعو اش غيقول وديك الساعة يكون خير

التيليفون وصل لبناصر وهوا متكي قدام تلفازة هاز يديه تحت راسو ومسرح داير رجل فوق رجل كيشطح بيها وكيغني ويدندن بالشلحة . سمع تيليفون وناض جلس هزو من فوق الطبلة فتخ الخط كيضحك فاش لقا السي رشيد ورجع اللور مرتاح كيهضر ويتجمع معاه ومونية طالقة ودنها من الكوزينة حتى سمعاتو قال

بناصر: اييه .. اه .. ااه ايوا دابا جاو شي ناس من عندكم طلبوها وعطيناها …… ها؟ اسميتو اسامة … ايييه اسامة الناصيري . ،،،، الله يبارك السي رشيد ،،،، ايه اييه مكاين حتى مشكل الله اودي.. امين امين.. ايوا هاحنا كنعاودو الايام وصافي مكاين ما يتعاود…… ان شاء الله السي الرشيد ..الله يعاونك

هز راسو كيضحك ويشوف فتيليفون كيتأكد واش قطع وحطو هز راسو لقا مونية متكي على الحيط كطل عليه فيدها المغرفة والعكس على راسها ملونة ومايلة الربطة للجنب ونواضرها كيططلو

مونية: شكوون؟؟

بناصر: بافتخار) رشيد باين هشام..قالك خوه بغا يخطب لودو وبغاو يجيو يخطبو سكينة… شوووف سبحان الله هاد البنت اللي شافها مايعطيهاش بنت المعقوووول.. وتقوووول (قطع الهواء بيدو) بداك اللباسوديك تبهديلة ولاكن تابعينها الخطاب فين ما مشات … لعجب ولاهيلا لعجب

مونية: واش قلتي ليه؟؟

بناصر: قلتي ليه عطينها لهاداك وراه جا خطبها

مونية: كمشات فمها بغيض ) وراه مابغاتوش قالتليه لا

بناصر: عقد حجبانو) كيفاش لا؟؟مااا م مافهمتش؟ جاوباتهم؟

مونية: بعدم رضى)قالت ليك اسيدي مابغيتوووش قاليا تمشي معايا طنجة ماتخدميش تجلسي فالدار قالت ليه لا صافي الله يعاون صافي

صغر بناصر عينيه فيها ورجع حمر كيتسنا يسمع التتمة

بناصر: فوقاش هادشي؟

مونية: شي سيمانة هادي

تزير بناصر وعروق عينيه حمارو وقال كيشوف فمونية

بناصر: ونتي جاوباااتك وبقيتي ساكتة ؟؟

كمشات فمها بنرفزة بدون رضى وضارت للكوزينة معصبة كتكمل على الغدا ، اما هوا ناض عندها تبعها للكوزينة سخون كيترعد عليها حتى شداتها الخلعة وخرجو عينيها تقول ضربها بتسرفيقة فيقاتها

بناصر: واش بغيتيني ندير شي موصيبة يا هاد المرى مالك ماشي بحال العيالات تطليت بيك اش درت فحياتي حتى طليتك نتي،،، البنت جاوباتك قالا ليك مابغييييتش اااجي قوليها ليااااا .. اجي قولي ليا هاشنو كاين هاشنو كاااين السيد عيط دابا كيهضر على ولد ختو قلت ليه عطيناها وحنا ماعطينا والو غيقول كنكدب عليه… واش باغا ضحكي فيا الناس يا هاد الموصيبة

مونية: عينيها خارجين كترعد ) خفت ماعجبكش الحاال ابناصر

بناصر: واش كاين شي حال مايعجب بحال هاد الحال ،،، شفيها الى قالت لا …(بغضب) قالت ليك لاااا نتي مهااااا خاصك تجي عندي تقولي ليا ها شنو قالت البنت..باش نعرف انا واااش عاطي البنت ولا ماعااااطيش… وباغا تسطيني واش باغا نقتلك ونمشي عليك للحبس … واش ماعندكش العقل غير عايشة

مونية: زيراتها البكية) مادخلونيش فهادشي انا اللي كنسمع الهضرة ابناصر

بناصر: شكووون غندخلووو شكووووون؟؟؟ واش نتي غير عايشة (كيطلع فيها باحتقار) واش عايشة تاكلي الخبزي وتخراي هادا علاش عايشة؟ هاد البنات معامن غيتشاورو ولمن غيعاودو للجيران؟؟؟ نتي مهاااا نتي اللي خاصك تسمعي من البنت وتجي عندي ااانا باها تقولي ليا داكشي اللي متقدرش تقولو ليا هيا فوجهي.. ولاكن نتي مكايناش فهاد العالم كديري غير المشاكيل… اش غنقول دابا لسيد وهما عائلة وحدة غيسول يقولي ليه ماقبلاتش يقول مع راسو انا كداب ؟؟ الله ينعل اللي ميحشم هادشي اللي غنقوليك.. اللي فيك راه كافيك يخخ

خلاها فالكوزينة كتبكي وشكون يحس بيها ، معالم بيها غير الله وكتشوف راسها ماعندها زهر وكأنها مغطيس للمشاكيل، كما دارت وحلة وكأن عليها تعويدة شيطانية كتجلب ليها غير الهم والصدع .. بكات حتى شبعات وبديك النفسية المدمرة مشات للبيت باش تكمل جميع الحوايج لبناصر قبل مايرجع عاوتاني ويسمعها الهضرة، كان على اهبة السفر وداخل خارج كيتقدا شنو خاصو وشنو يدي معاه وهوا ماشي من النوع اللي حتى كيسافر عاد كيبدا يشري.. عزيز عليه يشري من الاماكن اللي كيعرف ويتهنا ويبقا مرتاح ماخاصو والو وماناقصو والو وبالثمن اللي يناسبو، كسا راسو حتى لساسو ..صباط جديد للخدمة وشي كوستيمات خيطهم على قياسو جداد.. اما القوامج عرم منهم حتى قال براكة من الجوطية وتصبنو وتحددو وتحطو تقول جداد.

تلهى مع السفر وجميع الحوايج وماجبدش كاع موضوع الخطبة ودار بوجه الحيا مع بنتو وبأنه وصلاتو الهضرة وصافي ميك وسد على الموضوع مطمأن ومرتاح خصوصا من عدد الخطاب اللي بداو كيزادو على سكينة واحد يحنث لاخر .. عليها الطلب وحتى هوا ولات كتبان ليه ميزربش بزاف ويخليها تزيد تخدم وتبني مستقبلها وقد ما علا شانها راه الخطاب غيكثرو وتتخير كي بغات..المهم تكون فالمستوى فالباقي كيجي بوحدو .

بناصر غيبتو غطول شوية وماكرهش يدي معاه مونية ،، لاكن الولد عندو كيقرا والبنت فلافاك وسكينة خدامة خاصهم مهم تقابلهم وتحضيهم ،، جمعهم فاجتماع عائلي فوق الطبلة مور العشا وبدا المحاضرة الجدية ديالو وكلشي كيسمع وكيوصي بناتو ومونية حادر الراس كتسمع وفكل مرة كتسمعو قال ماتفقصوش مكم وسمعو ليها كتزيد تميل راسها باسى كتبان اكثر انها كتفقص ومابغاتهمش يفقصوها .. قطعو الحس ولقا بناصر المحاضرة ديالو عليهم بالسياسة وكيوجع كلامو بالخصوص لسكينة اما رانيا بلا ميهضر معاها غير ريحة الهضرة كتخلعها.

ختمها كيرضي عليهم ويعنقهم ويبوسهم باش يمشي ينعس عارف راسو مغيشوفهمش الصباح وهوا غادي مع الربعة لان سكينة مزال تابعها العرس اللي سيفطات ليه النكافات تمشي حتى لعندهم باش تشد فلوسها وضور على لعراسات اللي خادمين عليهم ديك الليلة وغير سلتات ورجعات للدار تعشات معاهم وجلسات تسمع كما وصاها بناصر. شافها نايضة غتمشي ترجع بديك العباية اللي عليها والشعر مجموع عشوائي وشاف حتى عيا مهدن ومد ليها سوارت السيارة وقال

بناصر: يالاه هاك خلي عندك الطموبيل حتى نجي..قضي غرض وتسخري ليهم والى مرض شي واحد ديه للطبيب .. وديرو عقلكم راكم كبرتو دابا .. خاصكم نتوما توريونا ماشي حنا نوريكم .

شدات سوارت ومشات باست ليه راسو ونزلات للطموبيل وشوراع خاويين وفكل شارع فالرباط دايزة سطافيط كدور من اجل الامان

بدات المتعة الحقيقية عند سكينة واللي شحال وهي كتمناها وتحلم بيها هوا شفر بناصر ، اخييرا غادي تعيش واحد الجزء من الحياة اللي تمناتها واللي لاطالما تسناتها ، واخا عطاها مفاتيح السيارة لاكن بشروط وهوا انهم غيبقاو فيد مونية وغتبقا تعطيهم ليها للضرورة فقط وفاش تكون غادية لشي عرس بالليل. لاكن هادشي كانل مكيهمش المهم خوات الدار وبناصر اللي كيدير لونكيط مشا وبقات غير مونية نية ومادات ماجابت فالزمان قالت دغيا غادي ندوخها بكل سهولة، وداكشي اللي دارت نيت من بعد ما ما طارت الطيارة ودات بناصر وخلاتهم فالدار .

من جهة رانيا دارت بكلام بناصر وكما قال ليها طبقات، قال مننوع الخروج او اللقاء بهشام هي ممنوع الخروج معاه او اللقاء به وهاد الكلمة حسمات ليها الحوار وقطعات لياس لراسها وبطبعها مكتنزلش الكلمة لبناصر مهما وقع او بغا يوقع.

لان هشام كان ليه وأي اخر وعيا يحاول معاها باش يقنعها غير تخرج دير راسها غادية للحانوت لاكن والو اللي فراسها فراسها واخا عيا يوريها شنو دير لاكن هي عاد مكتزيد تخايل راسها تلاقات بيه وباها حكم عليها بعدم اللقاء كتزيد تخلع وتقفقف بوحدها وفيدها تيليفون واقفة فالسطح لايحة الشال على راسها وكتهضر معاه مع جوايه المغرب والشارع عامر شي غادي شي جاي

رانيا: لالالا منقدرش والله

هشام: شتي دابا هانتي غتقلقيني وانا جاي من مكناس باش نتلاقا بيك ، شنو دابا غنرجع على والو

رانيا: ماقلتي لياش راك جاي كن علمتك وقلت ليك شنو كاين!

هشام: واباك دابا سافر ومشا شكون شافك ؟ غنقولي لمك خارجة للحانوت وصافي عادي

رانيا: اوييلي!!

هشام: غتمرضييني.. صافي بلاش بناقص كاع

رانيا وشحال غنبقاو ؟

هشام غنجلسو شوية ونردك للدار فين كاين المشكل؟

رانيا: في حيرة) واخا يالاه هانا خارجة

قطعات وبدات كطل من اعلى العمارة بانت ليها سكينة خارجة من الباب شادة بوشيطة فيدها تحت باطها كحلة ولابسة شورط مقزب وتيشورط سماطي اكس من اللور وغاديا طالقة الشعر وشادة التيليفون فيدها هازاه بحال المرايا وكتعكر وتمشي جوج خلفات وتوقف كتشوف وجها .. بقات رانيا كدور راسها وتشوف فيها وميعات ونزلات لبسات حوايجها وقادات راسها ولبسات جليليبة وبليغة داكشي متول بعقلو ديال بنات ديورهم اللي مكيهزوش العين . مشات تلاقاه ووقفات كتهضر معاه فتيليفون كتنعت ليه حتى وقف قدام رجليها وشد الفران لاكن كانت هناك مفاجئة اللي خلاتو يزم فمو ويكحل بالعما هي مونية اللي واقفة بالجلابة والشال ورانيا لاسقة فيها كتبسم .. نزل حشمان مفركس والروايح عاطية تبسم بزز منهم ومد يدو حشمان حادر راسو

هشام: خالتي كي دايرة لاباس كولشي مزيان

مونية: الحمد لله اولدي يسول فيك الخير مالين دار لاباس عليهم

هشام: الحمد لله اخالتي.. طلعو مرحباا

طلعات مونية لور جلسات وركبات رانيا حداه وهوا سايق وحادر عينو كيرمش ماعرف فين يمشي ولا منين يدور ولا فين يديهم حتى بقا كيسول ولقاهاهم حتى هما ماعارفين حتى بلاصة من غير الشوارع دالمدينة والقيسارات.. شاف حتى عيا ووقفهم قدام واحد المطعم ونزلو بجوج ملاسقين جلسو فواحد الطبلة حشمانين وهوا قدامهم كتر منهم

هشام: شنو بغيتو تاكلو ؟

مونيةي بخجل ويدها على فمها) اللي بغيتي اولدي اللي كان

رانيا: بخجل كدور عينيها) حتى انا اللي كان

هشام: كيشوف معاهم اللائحة)غير شوفو اللي بغيتو

بقات رانيا كتشوف معارفة منين تبدا ولا فين تسالي وهي عمرها فحياتها جلسات فشي مطعم وحتى سناك كدوز غير من حداه ، اما مونية ماعليها هضرة كتر من رانيا وفايتاها لهيه وحشمانة غير من الناس مقادراش تنفس وكيحساب ليها كولشي كيشوف فيها . من غير الشوا فالطريق اللي كلات جوج مرات فحياتها كلها هي ورانيا والباقي كتشوفو غير فالتلفازة. شي كيشوف فشي وهشام من قوة ما ماعجبوش الحال ومكمدها ماقدرش يهضر بقا غير ساكت وكل واحد فين كيشوف حتى حطو ليهم الماكلة لاكن من شدة الخجل او يمكن ماعارفينش ياكلو على برا واخا كيعرفو ياكلو لاكن فديك اللحضة تقول عمرهم كلاو ولا شدو الشوكة بيديهم .. تلفو ليهم الحركات وبقاو كيشوفو فداك الطبق و كيقيسوه غير بشوية من الجناب باش ميخسرش ليه الديكور وكينقبو ويرمشو حشمانين فصمت .

اما سكينة كان ليها موعد هي وفوز ومشاو يسهرو فاحد المطاعم الكبيرة الشبابية وجالسين وسط الموسيقى الصخبة والاضواء الحمراء والدنيا عامرة بناس نقيين بعقلهم جالسين وكاين اللي كيشطح . ناشطين وكيتعشاو مع بنات اخرين معاهم فالطبلة وقولها وضحك عليها

سكينة: هزات الكاس فيدها) ناااري وندوخ

جاوباتها بنت اخرى اسمها ريم

ريم: ماشي بزااف.. غير شووووية حتى تشوف لونيفو اللي بغيتي توصلي ليه

فوز: اوي لحرام لهنا المسخوطة باغا تسكري

شداتو شرباتو كضحك وسكينة كتشوف فيها وترمش

سكينة: اوييلي شربتيه

فوز : حرام اصاحبتي

سكينة: نااري الله يعطيني وجهك .

هزات القرعة من الوسط عمرات شوية فالكاس وبقات كتشوف فيه وضحك مزيرعلى شنايفها

سكينة: لي ليها ليها، والله تا نجرب

سدات واحد العين كتحاول دوق وكمشات وجهها وجرجات لسانها وشدات حلقها

سكينة:ييييعهععع شهاد لخرا

فوز : مدات ليها الخيار) حيدي بهادا داك المداق هههه

ريم: ماشي هاكاك سدي عينيك كووومساااا وشربي دغيا

سكينة: ماعرفتش اوييلي كيشوط

فوز: هاكا هاكا .. هبطي بزربة

سكينة: بلاتي نعاود… هههه ماعرفت فين غنوصلر هاد الليلة .. مهم حضيو معايا

فوز: ههه غير سيري

زيرات عينيها بقوة وهبطات على جغمة ودغيا خرجات لسانها كانت غتقيا لاكن فوز حشات ليها الذرة فالفم

فوز. مضغي مضغي ههه شدات لشي فان اصاحبتي خليك فريدبول تعطيك جوانيييح ههه

سكينة: عينيها دمعو) ماحسيت بوالو!!

ريم: باغا تحسي بجغمة !!ههه

ريم هي بنت من الطبقة الغنية .. الام محامية كبيرة والاب طبيب اسنان وتخرجات مؤخرا حتى هي فطب الاسنان وفتحو ليها عيادة وتلاقات بسكينة بالصدفة فاش كانت كتقاد سنانها وكملات التقويم مع ريم حتى حيداتهم ودارت ليها التبييض وردات ليها سنانها مرايا جات العقلية على ختها وتكونات بيهم صداقة لاكن ريم وبحكم عملها مكتجلسش فالمغرب بزاف وكل مرة خارجة على برا وبالصدفة تلاقات مع عيد ميلاد سكينة وخططو لسهرة جماعية يحتافلو بعيد ميلادها .

على صوت هابي بيرز اي تويو جابو ليها كعك صغير فطبسيل على شكل قلب زهري فيه شمعة وحدة شاعلة وناضو وقفو كاملين مع السربايا اللي ضارو بيهم كغنيو ليهم ،، وقفات سكينة وحسات براسها بغات تميل وشدات فريم واكتشفت انها داخت وبدات كضحك دايرة يدها على فمها وهما كيضحكو وبدات كدير تصرفات لا اراديا نتيجة الشراب اللي شربات . بغات طفي الشمعة ونسات كانت غتشدها بيدها وجراتها فوز كضحك وعنقاتها من اللور شداها

فوز: ناري سكرتي هه

سكينة: كتميل) حلفي ههه .

ريم: طفي الشمع

بعدو ليها شعرها وطفات الشمع وبقات واقفة كتشوف بعينين معسلين وكتسفق بيديها ورجعات جلسات بلاصتها كتصور مع الكيك

ريم: شادة تيليفون) عرفتي عينيككي كيبانو ههه

سكينة: تا لغدا ونشوف .. دابا مكنقشع وااالو .. غنبقا هاكاك؟؟

فوز: اويلي يالاه شاربتي جوج كيسان .. جوج جغمات

سكينة: تقاليت البنات ههه

قولها وضحك وعليها وتقالت واخا شربات جوج كيسان لاكن اللي ماولفش غير بالريحة يسكر.

نشطات ونشطو البنات بيناتهم وبداو الشباب كيتلاحو عليهم كل مرة ها اللي باغي يتعارف ها اللي عارض ليهم للعشا ها اللي باغي يوصلهم حتى وصلات العشرة دالليل وفوز كانت معروضة لعرس وهي الوحيدة اللي تقدر توصل سكينة اما ريم فكانت مزوجة ودايرة مع راجلها يدوز عليها بحكم سيارتها اللي دارت حادث مؤخرا حطاتها تتصلح .

اضطرت سكينة باش تمشي حتى هي وناضت بغات تهز صاكها لاكن جاها مسج فالواتساب ودخلات كتشوف وترمش

غالي: جوايزانيف فيغسيغ ..

ضحكات وشدات تيليفون كتكتب ليه وتميل للجنب واقفة

سكينة: صافا ؟؟

اش كتقاود؟

غالي: صافا ونتي؟!!

غالي: كيفاش؟؟

سكينة: عضات على شافيها بابتسامة ) انا م بناات كنحتغالً

غالي:شنو ؟ ..

سكينة: شكرا.

خرج من المحادثة وصونا ليها وهي كتسوح النضر وتفتف على صاكها اللي حطات حداها وردت بصوت ماكانش باين فيه التغيير بحكم طريقتها فالهضرة اللي ديما تقيلة وملوية وفيها البشاشة قالت

سكينة: الووو

غالي؛ وافين؟

سكينة: مع البنات ههه

غالي : اش قلتي ليا؟؟

سكينة: شنو قلت لييك؟

غالي: شنو داكشي كتكتبي

سكينة: وا اجي اجي عندي… صافي حنا سالينا

غالي: فين غنجي؟؟ دابا؟

سكينة: دابا الى بغيتي

سكينة: اجي عندي اصلا سالينا

غالي: وصحاباتك؟

سكينة: صافي خارجين كلنا غنمشيو بحالنا

غالي: امم..اوكي يالاه فين نتي دابا؟

سكينة: فحي الرياض

غالي: ااه.. واحد ساعة لاربع مزيانة؟

سكينة: اوييلي بزااف

غالي: ياالاه نسالي ونوصل عندك

سكينة: وييلي بزاف(شافت فوز جايا) اجييي اجي توصليني لحي الامل

غالي: فتيليفون) بلاتي ..غير سمعي سمعي

فوز: ويالاه اصلا غنوصلك اويلي دختي!ههه

سكينة: صافي

غالي: واسمعي..

سكينة: هانا هانا

غالي: توصلك حي الامل وتتلقاك صافي؟ باش منتعطلش عليك

سكينة: يالاه واخا ..بسلامة

وصلاتها فوز حتى للحي الامل ونزلات كتقاد شعرها المطلوق للجنب بدلع وفوز كطل عليها

فوز: ماسكرتيش ؟؟ متأكدة؟

سكينة: لالا عارفة شنو كندير ههه غير دخت شوية

فوز: واقيلا هوا هاداك ؟؟ راه موراك كيضرب الفار

ضارت سكينة موراه بانت ليها سيارتو البيضاء واقفة فالجهة لاخرى والضو كيغمز وقالت

سكينة: اه هوا ..يالاه تهلاي .. تا لغدا

فوز: شنو دابا غترجعي لداركم؟؟

سكينة: قلت ليهم خدامة فعرس

فوز: يالاه تهلاي ابب باي باي

سدات الباب على فوز ومشات كترش الريحة فاتجاهو قدامها وهوا لداخل وسط الضلام جالس باليتشورط كحل ودجينز والستعة فيدو حدى فمو كتبري وسط الضلام و وكيشوف فيها جايا عندو كترش وتعاود حتى وصلات ودارتها فالصاك عاد طلعات حداه كضحك وعينيها كيتلسقو

سكينة: فيين ؟؟ صافا ؟

مالت عليه كتبسم سلمات عليه من الوجه وهوا كذلك عنقها بواحد اليد بانت ليه راشقة ليها

غالي: صافا ؟؟ (كيطلع فيها) وافين كنتي شاداها؟

سكينة: مع البنات .. توحشتيني ههه

غالي: دور وجهه كيضحك) نتي اللي بنتي ليا توحشتيني

سكينة: وايييه هههه صراحة توحشتك..واخا كتبان شااارف

غالي: عقد حجبانو شاف فيها بتعجب) انا شاارف؟؟

سكينة: والله حتى كتبان شاارف.. مع تزوجتي كتبان كبييير

غالي:بقا كيشوف فيها مستغرب ) جيتك شارف؟؟

سكينة: والله !! حسيت بيك بحال الى شرفيييي

جاه العجب مافهمش من اينا ناحية شرف واش شكلا ولا عقلا وقال

غالي: كيفاش شرفت فين بنت ليك شرفت ؟؟

سكينة: كطلع فيه وتهبط) متعرفتش.. المهممم شي حاجة فشكل حسيت بيك كبرتي بحال الى عندك خمسين عام

كحز اللور ودار وتكا على الباب كيشوف فيها مستغرب

غالي: خمسين عاام كااع؟؟ (دوز يدو على لحيتو) خمسين عام دقة وحدة؟؟

سكينة: اااه عرفت (شارت ليه بصبعها) مابقيتيش نشييط.. متبقيتيش شباب وليتي. وليتييي(كتقلب على الكلمات) وليتي تقييييل خترتي خترتي فهمتي

غالي: لااالا غير كيبان ليك.. هاد العشية كلها دوزتها فالغابة جرا (صغر عينيه) عرفتي شحال جريت ؟؟!!

سكينة : شحال؟ ساعة؟

غالي: طناش كيلومتر .. ضربت الطريق البحر كلها على رجلي حتى للتيران وضربت دورة فالغابة ورجعت على رجلي .. ستة فستة(شار بصبعو) الي وروتور .. كتقولي ليا شرفت! هانتي بلاتي تشوفي

بغا يأكد ليها مزيان وجبد ساعة اليكترونية من الطموبيل كانت وحطوطة فواحد العلبة وشعلها كيشوف فيها ويشرح

غالي: اجي تشوفي.. هاهيا (كيشير بصبعو للرموز والارقام) هادو دقات القلب وهاهي طناش كيلومتر ماوقفتش كااع مللي بديت كنجري حتى رجعت وهنا التوقيت اللي ضربت فيه هاد المسافة كلها .. (هز حاجبو) الشارف ميضرب حتى ثلاتة كيلومتر

سكينة: ولاكن ماشي شي حاااجة طناش كيلومتر

غالي: واضربيها نتي نشوفوك واش تكمليها بلا متوقفي

سكينة: والله تانقدر

غالي: ابا نشوفو.. هه قالك ماشي شيحااجة .. كن شرفت كوراني سخفت

سكينة: ولااا .. مافهمتيييش.. زعما دماغك اللي شرف فهمتي.. دماغك ..جيتيني كبرتي

غالي: واخا هانا كبرت .. ونتي مزالة هي نتي نفس اللباس نفس الحماق

سكينة: ايييوا الله يخلينا فصباغتنا

غالي: الى كانت بحال هاد الصباغة غير بدليها

سكينة: دااابا نييت

ضارت بغات تحل الباب وتنزل وطار على يديها ردها كيضحك

غالي: وااجي فين غادة

سكينة: بنص عين)نبدل الصباغة ..حيد حيد يدك .. حيد راه قلت ليك شرفتييييي ماغتقدرش تفاهم معايا

غالي: جلسي وسدي الباب .. جلسي براكة من الخفة

ردها وطول يدو سد الباب ورجع بلاصتو برك على زر طرق البيبان وديمارا الطموبيل

غالي: فين نمشيو؟ فين بغيتي تمشي؟ باك سافر؟

سكينة: اه

غالي: الله يوصلو على خير

سكينة: اميين.. يالاه نمشيو نجلسو فشي بلاصة زوينة ..شي جردة

غالي: جردة؟؟

سكينة: شي جردة اه مافيهاش البشار

غالي: هههه… يالاه تمشي تجلسي معايا فالدار ؟

سكينة: لاالا

غالي: مكاين حتى واحد.

سكينة: مابغيتش الحيوط بغيت الهواء الطلق

غالي: اللي بغيتي.. وشنو دابا كتعرفي شي بلاصة فيها الهواء الطلق؟

سكينة: يالاه نمشيو ل ام ايل

فكانت m l عبارة عن فيلا كبيرة جدا واسعة فيها اماكن مختلفة فكل زاوية بحال خيمة بلدية بالسدادر والزربية وجلسة رومية بسقف من اعواد الخشب وفوطويات وطبالي و جلسة فالهواء الطلق فالارض على بونجات مختلفة الالوان او كراسي بالطابلات فزاوية اخرى وكانو كلهم هاد الجلسات المتنوعة كيشوفو فمسبح واسع لوسيط وضايرين بيهم الاشجار والديكوار الخضراء والاحجار البيضاء والاضاءة بكل انواعها زائد خشبة مقابلة معاهم كتكون فيها احيانا موسيقى واغاني للترفيه والنشاط والرقص، كان كيتسربا فيها جميع انواع المشروبات من غير الكحول وكتفرق فيها الشيشة بشتى انواعها وكتوفر على حراس امنية وساحة كبير لصف السيارات والدخول ليها بالمجان لاكن كانت بعيدة على الحداثة وجات فجناب المدينة وسط الفيرمات والطبيعة وحتى وسيلة نقل عامة مكتوصل ليها من غير السيارات الخاصة وهادشي اللي كان كيخليها فوقتها مميزة حيت كيوصلو ليها غير اصحاب السيارات واللي مرتاحين ماديا شوية وعشق للعديد من الفتياة واولهم سكينة بحيث كانت مريحة ونضيفة واجوائها مميزة وحتى زوارها نقيين وبعاد على الصدع والمشاكل.

غير وصلات بدات كتبسم عاجبها الحال ولقاتها خاوية شوية ماشي مكتضة بحال اخر الاسبوع اللي كتكون فيها السهرة .. داخلة وكتشير للبنات اللي كتعرف بيدها وغالي حداها حتى تعكلات فالكازو كانت غطيح وجبد يدو من الجيب بسرعة شدها من دراعها وقفها وكملات طريقها كتفرنس بعيون معسلة حتى وصلات لوحدة من ديك الجليسات اللي كانت رومية بالكنبات وكيصلاح للواحد يجلس او يتكى وجلسات وجلس حداها غالي ماعاجبوش الحال او مامرتاحش ومن زمان ودع دوك الاماكن ومابقاش كيرتاح فيهم بمرة . كان مساعف وكيحاول يتأقلم حتى للحضة اللي حطو ليهم الشيشة وبقا كيشوف فيها ويشوف فسكينة

غالي: باستغراب) غتشيشي

سكينة:حركات راسها بالايجاب) امم

قلب وجهه سكت في حين بدات كتشيش مركنة حداه فالقنت وطاوية رجلها على الكنبي بنصندالتها وشادة مخدة عندها ساهية وهوا ساكت متكي على ركابيه كيشوف فتيليفون .. طولو فالسكات حتى عيا وتلفت شاف فيها مرخية

غالي: فيك النعاااس نتي

سكينة: تنهدات) عجبني الجوو

غالي: شنو درتي مع حسام ؟

قالها ودور وجهه كيتأمل

سكينة: ساليينا .. (ضرباتو للكتف) فكرتيني.. شنو كيجيك كريم؟؟

غالي: باستغراب) شكون كريم؟

سكينة: كريم اللي فبلجيكا

غالي: كريم اللي فبلجيكا؟ ولد عمي ! مالو؟

سكينة: باباك هضر مع بابا قاليه داك عمك بغا يخطب سكينة

هز غالي حاجبو ودفع صدرو كيطلع ويهبط فيها وقال

غالي: كريم جا خطبك ؟

سكينة: ااه.. سير سول باك

غالي: رجع تكا قالب وجهه) مزيان.. ..(سكت مطولا) وشنو قلتي ليه؟

سكينة: متقلت ليه والو.. غير ماما اللي عاودات ليا هي ورانيا.. با غلط قاليه راه خطبها حسام

غالي: شاف فيها عاقد حجبانو) شكون حسام؟

سكينة: هاداك اللي فرتكتي ليا معاه الشمل

غالي: شنو؟؟ (عطاها ودنو)

سكينة: وهاداك اللي ناض عليه الصدع كيجيك حتى هوا .. انس… واش جواد؟؟

غالي: شاف قدامو كيحرك راسو وبقا ساكت

غالي: دابا نتي ناوية تزوجي؟؟

سكينة: بنص عين)وعلاش مالي كي جيتك؟

غالي: هادي ماشي حالة ديال وحدة باغا تزوج

سكينة: قلبات عينيها) نتا باااركة عليك غا طبيبات والمحاميات والمهندسات بحالك هادوك ديال الزواج .. حنا اخويا خليينا نزهاو بداك العقد ونتوما ديرو عقلكم وحضيو معاه لا يهرب ليكم

غالي: دابا هادي هضرة هادي؟

سكينة: بنص عين كتشوووف فيه) راك شرفتيييي واحق الله.. نتا خاصك شي وحدة عندها ربعين عام .. المهم تكون كبر منك يالاه تفهمك وتمشي معاك فداك الخط … صااافي سالا وقتك والله

غالي: دابا هادشي اللي كديري زوين ؟ هادا هوا الصحيح عندك؟ الشيشة والتقزاب والسهير هوا الحياة ؟؟ بلاصة ما تمشي تصلي وتوبي وديري عقلك تشوفي علاقتك مع الله وتحاولي تصلحي راسك عاجبك هادشي

دار ليها تأنيب الضمير وحطات الشيشة بقات كتشوف قدامها مربعة يديها بارتخاء وفراسها كدور جملة وحدة ” عمرني نا معاود نخرج معاه ” وفعلا نفراتو فهاد اللقاء الاخير جاها تبدل بزاف وماشي من النوع اللي غترتاح ليه وحتى ديك الراحة اللي كانت كتلقا معاه مابقاتش ، جاها النعاس وعيات بقات كتشوف قدامها حتى عيات ومابقاتشعاجباها الجلسة وقالت

سكينة: يالاه نمشيو بحالنا .. البرد

ناض هز سوارتو حتى هوا ومشا تبعها غادية وكتشرب فالماء حتى وصلات للطموبيل ويالاه طلعات قبل حتى مايخرجها من الباركينغ داتها عينها ونعسات ومالقات راسها حك غير قدام باب عمارتها وناضت دايخة وراسها تقيل شداتو بزز كتفتفعلى صاكها

سكينة: فيا الدوخة … عيييت

غالي: طلعي لداركم ولا تمشي معايا؟

سكينة: شافت فيه بواحد العين) شنو غندير معاك؟

غالي: هز يدو كيتنهد) غير قلت وصافي الى مابغيتيش طلعي للدار فهاد الوقت

سكينة: ااه..لالا غنطلع (حلات الباب) اصلا كنجي فهاد الساعة فاش كنكون خدامة

غالي: صافي؟؟ غتمشي؟

سكينة: عييت .. بسلامة

لاحت يدها باللور ومشات دخلات دايخة وكتشد فراسها طلعات وحلات الباب دخلات بشوية لقات ضو اللي حدا الطواليط شاعل ومونية ناعسة وسط الدار بلا غيا باينة كاينة كتسناها .. دخلات بشوية تالفة مشات حطات الشورط فالارض خلاتو هاكاك ودخلات بالسليب طاحت كي الميت نعسات

الراس صبح مشقوق بغات تموت بالحريق لاكن مع ذلك شربات ليه دوليبران وبانت ليها فمونية اللي غير جالسة فالدار وقالت كتبسم وطل عليها من باب الكوزينة بواحد السروال مدلي كيتجرجر فالارض ودوني رقيق

سكينة: ماما نمشيو نتغدا برا؟

ضارت مونية مخلوعة قافزة وقالت

مونية: هيييه!!! خلعتيني الله يخليك بلخلا.. فوقاش فقتي؟

سكينة: دابا

مونية: واسيري غسلي غير وجهك شوفي فديك المرايا بعدا

سكينة: كتفوه) قبل ماديري لنا ديك المرقة نعومو فيها .. خاصنا باراسولات ونجلسو على الطبلة

مونية: وبااااز

سكينة: واش دابا غنخرجو ولالا؟

مونية: واسيري بعدا ماتوقفيش قدامي بديك الحالة

سكينة: صافي انا غادية

دخلات للدوش كانت ناوية تغسل وجهها صدقات طالقة الماء بارد من الرشاشة ودخلات تحتو كتقفقف وتشهق والقلب كيتنفخ وتلهت حتى بدات كتولف عاد ترخات وعجبها الحال وبدات كتغسل ودهن وطلي وتشلل وتعاود حتى ولات كضوي ولوات عليها فوطة فوق راسها وخرجات ملوية فالفوطة كطل على مونية فلكوزينة

سكينة: الله على تدويشة وااعرة

مونية: ضارت وراها كتشوف فيها) هييه!! دوشتي بيهم باردين!!

سكينة: واااعرين

مونية: هيييه.. ايما لحبيبة باز ليك

سكينة: واش نخرجو دابا ولالا؟

مونية: واخا يالاه سيري ولاكن انا مااارخرجيش معايا بداك اللباس اللي كديري.. ماتشوفينيش كنغمض عيني تقولي صاافي .. راه شحفت بالهضرة حتى عييت

سكينة: وصافي صافي.. يالاه وا لبسي حتى نتي شي لبسة زوينة باش الى تلاقيت الناس فالزنقة يشوفوك

مونية: احياااني.. كن جات باللباس واهلي فين كنا غنوصلو

سكينة: وااختي انا غا لبسي ليا تجي باللباسولا بالعرا المهم لبسي..انا ماباغا نوصل فين راه بنادم غيتلاقاني وانا دافعة كبير خاص ماما تكون فالمستوى… واش هما كيعرفوك باش يقيمو اخلاقك ولا دماغك.. !!!

مونية: الهضرة بعدا كطيري فيها

سكينة: واطيري فشي حطة حتى نتي التواضع ديالك غا خليه بعيد عليا انا ديريه مع با ورانيا.

مونية: كتمسح يديها) يالاه حيدي نشوف بالاه(بحماس) فين غنمشيو؟

سكينة: غنديك لواحد البلاصة وااعرة

مونية: فيها الماكلة؟

سكينة: واييه فيها علاشحنا غاديين اصلا

مونية: يالاه حيدي نمشي نبدا .. فين انس نديه معايا ..منخليش ولدي انا فالدار ونمشي ناكل ميدوزش ليا

سكينة: واديه تاهوا غا يالاه

هاد النهار ومن اروع الايام عند مونية حلات عينيها على جانب من الحياة اللي مكانتش عارفة.. جلساتها سكينة فإحدى المطاعم الكبيرة فمارينا ولابسة عباية كحلة جديدة والشال وانس متول وجالس معاهم على الكرسي عاجبو الحال واول مرة فحياتو غيخرج خرجة بحال هادي، اما سكينة كانت لابسة كسو طويلة حتى للارض بحال شي اميرة بسميطات على لكتاف ومشدودة بالحزام من الخصر وفضفاضة من الاسفل وصندالة خفيفة وطالقة شعرها نازل مع كتافها وضهرها ولقصيصة كتبان بحال سي اميرة فديك الكسوة الصفراء الناصعة اللون وكلها ورود ملونة مفعمة بالحيوية والانوث وكتوريهم الموني

سكينة:هادا فيه الحوت ..

مونية:وشحال داير؟

سكينة: مية وتمانين درهم

مونية: لالا صافي.. خودي ليا هادا ديال سبعين درهم باركة.. هادشي غالي

سكينة: واغير خودي اللي بغيتي اويلي

مونية: براك ابنتيالله يرضي عليك غتخسري فلوسك وصافي

سكينة: واميي.. راه هادشي مافيييهش خسران الفلوس ..باك ولف ليكم خسران الفلوس هسران الفلوس حتى رجع قلبكم كيضركم على خسران الفلوس فالماكلة فشي بلاصة… انا غنتعصب الى ماخديتيش داكشياللي بغيتي اما الفلوس مكيبقاوش فيا

مونية: بزاف عليك ابنتي

سكينة: واخليييني … خليني على خاطري

مونية: بتردد) ايوا خودي ليا بحالك وصافي

سكينة: وشنو غتشربي؟

مونية: بلااش بلاش

سكينة: كتشوف الموني) عندهم عواصر وااعرين ..تاخدي هادا؟

مونية: كطل) شحال داير هاداك؟

سكينة: حولات عينيها وكمشات شنايفها) عشرين درهم .. رخييص

مونية: هادا عشرين درهم !! كضحكي عليا مالي ماقارياش

سكينة: واخوديه (شافت فأنس) ونتا شنو بغيتي؟

انس: كيشير بصبعو) هادا وهاداوهادا .. وهاد العصير وهاد سلاد.. وهادا ديسير؟؟ حتى هوا

مونية: هيييه!!! فين غادي فين فين غنحطو هنا شي عشرين الفريال!! لاعساك براكة عليه غير حاجة وحدة غنشرب انا وياه داك العصير وصااافيالله يجعل شي بركة

سكينة: وصااااافي !! جايين من زك اخّنة باشنشمو العصير.!كتفقصيني

مونية: كضحك) واديري اللي عجبك انا والله منهضر ههههه

عمرات الطبلة كلها بما لذ وطاب.. اطباق ماشي كأي طبق وانما اطباق تشهى تبقا غير تشوف فيهم والكيسان دالعصير اشكال انواع ومونية كتشوف فداكشي وعينيها كيبرقو مصدومة مامتيقاش.. حتى باش تاكل حشمات وكتشوف فالناس بينما سكينة وانس كياكلو ماعقلو على حتى واحد.. شوية بشوية بدات مونية تاكل وتولف وسكينة كتقرب ليها حتى شبعات وختماتها بديسير دايزو الكلام ومسحات فمها شبعانة وشافت فيها وقالت

مونية: الله يعطيك الخير.. الله يعطيك مناش تعطي زردة واشمن زردة

سكينة: ههه عجباتك؟

مونية: والله ماعمري شفت بحالها .. نبقا عاقلة عليها حتى للموت (شافت فأنس) عجبك الحال ا انس؟

انس: واااعر نبقاو نجيو ديما هنا

سكينة: نجييو مالنا اش خاصنا.. صافي سالات ايام الزلط والمزيرية واخا تكون عندي مي درهم نخرج ناكلها ماكلة ههه

مونية: كدور راسها) احياااني عليك عليها مكتبغيش تاكلي فالدار .. ولفتي هادشي حتى ضربتي على الماكلة ددرا… دابا هادشي كتاكليه يوميا؟؟

سكينة: اه ههه

مونية:احياااني عليييك.. شنو جاك هاد النهار حتى عرضتي علينا زعما ههه

سكينة: والله منعرف.. غير ماقالي راسي

مونية: باك اللي عارفك ..معدروو كيقوليك تابعة كرشك غتخرج عليك

سكينة: ياك فلوسي كيخلص عليا

مونية: لاا حشومة تقولي هاكاك على باك…نتأ.. بقات فيا رانيا كلينا وهي ماكلاتش.. ضرني خاطري…مكنبغيش ناكل ونخلي شي واحد فيكم

سكينة: هي اللي مابغاتش تخرج خليها

مونية: خرجنا لبارح هشام دانا جلسنا فواحد البلاصة حتى هوا .. كليينا

سكينة: ايوا مزيان .. ماتخليهاشتلاقابيه بوحدها… عندااا راه نية وهبيلة

مونية: لا ويلي والله ماتلاقاه

سكينة:انا غير قلت ليك.

مونية: واه الخطبة دايزة علينا تقيلة والله لعضيم..فوقاش تزوج تمشي لدارها نتهناو … هاد الخطوبات اللي كيطولو كيوقعو فيهم المشاكيل بزاف .. شحال من وحدة سالات مابقازواج

سكينة: مهم ماتلاقاهش يدوخها يضحك عليها وهي

بقاو كيتجمعو ويتمنضرو حتى عيات مونية وبغات نرجع وناضت سكينة وصلاتها فالطموبيل دباها اللي مشاو فبها وطلعات معاها للدار لقاو رانية جالسة فقنت السداري كتفرج وكتشوف فيهم وتعيب

سكينة: عرفتي فلتات ليك واااحد الخرجةً. واحد الزرد واعرة

رانيا: بميوعة ) اممم ايوا صاف الماكلة دزنقة كطلع فالراس

سكينة:هازة حاجبها) الماكلة دزنقة كطلع فالراس!!سيري سيري تريكة شوارما وسوندويتش هههه قالك كطلع فالراس،،، لي بلااااا ابنادمة وا بلاااا .. ليبلا اشكاااال انواع لا تعد ولا تحصى ها الطبخ الايطالي ها الفيبيني ها الهندي ها الصيني ها سبليوني ها العربي ها الخليجي.. سيري سيري شكتعرفي …هاكاديال لي بلا( الاطباق) الملاييير مايكفيكش عمرك حتى دوزي ربعهم قالك ماكلة الزنقااعع.. طرر

رانيا: ايوا بالزعط … ماعندي مااندير بداكشي غير بالصحة

سكينة:ايوا بصحتي هههه. ماماااهانا مشيت للحانوت

نزلات هازة بوشيطتها بديك الكسوة غادية جهة المحل حتى صونا ليها تيليفون وطلع غالي ..غير شافت النمرة بدات تميع وخلاتو مارشقاتش ليها تهضر معاه ولا تسمع ليه وكملات طريقها بشوية عليها حتى تلاقات بوحدة من بنات حومتها وقفات كتحمع هيا وياها وسمعات لكلاكصون حداها وضارت لقاتو هوا اللي كيكلاكصوني وتبسمات ليه بحموضة ومشات عندو طلات عليه كترد شعرها لور

سكينة: فين صافا؟

غالي: كيتبسم ) صافا طلعي

سكينة: لالا عندي شي شغل غادية للحانوت

غالي: معاياش غتسالي؟

سكينة ماعرفتش على حسب

غالي: نعاود نعيط ليك فلعشية.. غادي لاصال دابا

سكينة: كطلع فيه) امم يالاه باي باي

تبسمات بمجاملة ومشات فحالها للمحل ديالها في حين كمل غالي طريقو مشا لاصال تريض مزيان ورجع مدوش نقي كيشعل بدجينز وتيشورط وحداء رياضي دالخروج والشعر كيبري والروايح راجع فالطريق وكيصوني عليها لاكن ما من مجيب حتى دخل حي الامل وداز حدا المحل ديالهاطل من السيارة مابانتش ليه وكمل طريقو للدار كيصوني لاكن بدون ردحتى طلع ليه الدم وكان عوال يخرج معاها لاكن البركرام تبدل وتلف مابقا عارف شنو يدير مور لاصال. دارت ساعة وعاود صونا لاكن والو .. طالت المدة وعاود صونا وعاوتاني والو .. حتى ضربات لحداش داللي وجلس فالدار بوحدو قدام البيسي بغا يبدا الخدمة وقال اجي نصوني ليها لاكن والو في حين كانت جالسة مع فبيت العروسة فواحد العرس بوحدها متكية والعرس لتحت نايض وشادة تيليفون كتشوف فيه كيصوني وكتخلين حتى يقطع وترجع للالة حاسبة تحسب فيها الفلوس حتى لشوية وصلوها جوج تصاور ديالو فالواتساب مصور راسو بصدرو عريان ومتكي على مخدة . بقات كتشوف فيهم وتحقق وتعقد حجبانها كتميع وتخرج لسانها وتردد

سكينة: يااعلى تزوميييل هاد الخراا هادا … هرب ليه ولا مالو.

يتبع