سررررررررررررر..سرررررر!
ناعس و كنحاول نستوعب ديالاش هاذ الصوت حيث ماشي من عادتي نفيق بالريڤاي وهذا ماشي صوت الريڤاي! مفيكسي على الثمنية و ما كنحتاج شي حد يفيقني! كان خاصني 5 دقايق باش نفهم أن شيحد كيصوني فالتلفون! شكون هذا اللي راشقة ليه عليا و ناوي يعصبني مع النبووري؟ بصعوبة حليت عيني و مديت يدي باش نهز البورطابل! شفت السمية نضت قافز من بلاصتي! لقيتو الكومسير اللي معيط ليا!! قلت مع راسي الله يسمعنا خير!
أنا : ألو وي سعادة الكومسير….؟
الكوميسير: أنتا باقي ناعس!! سربي طلق راسك باش تلحق بالمركز! عندنا قضية جديدة!
شفت فالساعة يلاه 7!!!
أنا: واخا مون كوميسير 20 دقيقة و نوصل!
الكوميسير ( كما العادة كيهضر معصب): يلاه ما تعطلش! عندنا حالة إستثنائية! إيه… عنداك تنسى السلاح بحال المرة الفايتة!
أنا: لا راه غير….
الكوميسير: صافي طوينا هاد الملف، دابا وجد راسك، القضية معقدة!
أنا: داكور مون كومسير!
ديما وقت ما كانت شي قضية كيعتبرها حالة استثنائية!
قطع و خلاني كاره حياتي و كاره هاد الخدمة! 10 سنين ورا المجرمين من كل الأصناف. 10 سنين ديال الإكراهات فيها النجاح وفيها الفشل! و كما العادة النجاح ديال الرؤساء و الإخفاق ديال المرؤوسين بحالي!
مراتي نادية سمعات الصوت وفاقت. واخا موالفة بحال هاد ليزابيل لابد تسول شكون واشنو بغا!! و جوابي ديما تايكون: لا والو غير نعسي! كتهضر و عينيها مغمضين و شادة كثر من حقها فالناموسية (مع الغلض اللي عندها). عييت معاها باش دير الريجيم و تدخل لاصال و هي غي زايدة فيه! اللي فاقسني هو الشخير ديالها اللي ما كيسمحليش نعس مرتاح!
هي: شكون اللي عيط ليك واشنو بغا؟ (ها اللي قلنا!)
أنا: لا والو! غير نعسي! (كما قلت!)
هاد السي الكومسير ديما جابد ليا داك النهار اللي مشيت للخدمة بلى سلاح وتعطبت فواحد العملية! كنا محاصرين واحد البزناز خطير و مع الزعامة اللي فيا تميت غادي عندو و نا فبالي هاز السلاح ديالي (مسدس). السيد جبد سيف فيه مترو و بدا يهددني. انا درت يدي باش نجبد الكابوس ما لقيت غير البرد! ضحك مزيان و لقى راحتو باش يخلي فيا شي علامات للذكرى. كانت غاتمشي ليا العين. البزناز هرب و النتيجة 50 غرزة في أنحاء مختلفة من الجسم و توقيف لمدة 15يوم بعدما خرجت من السبيطار!
يمكن فايت ليكم تلاقيتوني و لا عاود ليكم شي حد عليا! انا هو المفتش الملقب ب تيرانوفا! كنت مبلي بهاد السلسلة البوليسية قبل ما ندخل لسلك الشرطة و الدراري اللي كيعرفوني (صحابي) لصقوها ليا نهار عرفوا أنني أخيرا حققت الحلم ديال الطفولة و غانولي تيرانوفا ديال بصح! يعني مفتش أمن حقييييقييي!
بالزربة نضت و دخلت الكوزينة كنبقشش. مراتي العزيزة كتهلا فيا! آش منك يا مسمن واش منك يا بغرير! الزبدة و العسل و العصير بكل لشكال!!! النم!!!…
لقيت بيضة وحدة فالثلاجة كافية باش ندير اومليط. ساشي ديال نسكافي و طرف ديال الخبز باش نقمع الجوع. القص هو اللول عاد غسيل الوجه! الحسانة بلاش! ما بقاش الوقت! يلاه نمشي نشوف آش موجد ليا الشاف ديالي. باين كي غايكون هاد النهار غير من صباحو! الطوموبيل ما بغاتش ديماري عاوتاني! سبيت واحد السبة حشمت نقولها مي إمكن ليكم ترجموها ب “تبا..!”… لاباس ، عندي الرقم ديال واحد صاحبي عندو طاكسي. موالف معايا هاد الستونات و غيتفهم الوضع و يجي إدبانيني….
دازت 15 دقيقة عاد وصل. واخا ما عندي الكانة للهضرة برزطني بالماتش ديال البارصا اللي داز البارح و التحاليل التقنية اللي مجهد فيها. انا واخا ما كيربطني بالكرة غير الخير و الاحسان درت ليه خاطرو و كانعاونو بإيه و بعندك الصح! صعيب تلاقا معا شي حد مبلي بالكرة و ماتصنتش ليه! ما باقيش إحملك و لا يوقف معاك! و نا محتاج اللي يوصلني وقت ما طحت أومبان!!!
و صلت لقيت الكومسير و ليكيب كاملة! سلمت عليهم و تا حد ما رد السلام! ماشي مشكل موالف!! كانوا تالفين مع واحد البلان و الكومسير كيقدم ليهم الشروحات. بغاو إبنيو شي عمارة و لا شنو؟؟ قربت نشوف و بان ليا البلان ديال المدينة بشوارعها و زناقيها. هز فيا الكومسير عينو و قال: آه هذا نتا! عاد وصلتي! لخرين تبسموا و استمروا فالمتابعة!
كاين المفتش رفيق و المفتش عماد و المفتش علي و المفتش نسرين! (ما عرفتش علاش ما تيسميوهاش المفتشة واخا مؤنث!).
الكومسير: عندنا هنا المستودع القديم…هنا جوج زناقي كيوصلو ليه. هنا الطريق اللي كتدي للمعهد و هنا الملعب…حنا اللي كيهمنا هو نسدو جميع المنافذ اللي كتدي للمستودع و نخليو واحد فقط! باش نحاصرو الهدف ديالنا و نقطعو عليه اي فرصة للهروب! المعلومات اللي وصلاتنا كتقول انه الضنين عندو موعد فهاد المستودع. كنعلمكم بغيناه حي! عماد جمع إيدك و ما تستعمل السلاح إلا بأمر مني! تفاهمنا؟
-المفتش عماد: واخا مون كومسير!!!
عماد يدو خفيفة و عزيز عليه يبدا يتيري هو اللول واخا ما عمرو جابها نيشان! ما كنحملش اكون معايا فليكيب. ما عمرنا طفرناه و حنا ففريق واحد!
واخا ما فاهم تاوزة بغيت نتدخل و نعطي رأيي!
-أنا: و علاش مون كوميسير ما نشدوه قبل ما يدخل للمنطقة اللي فيها المستودع؟
شافو فيا كاملين و تفرشخو بالضحك!
الكوميسير شاف فيهم و جمعو الضحكة واخا تاهو كان غي حابسها!
الكومسير: فكرة زوينة غي هي جات شوية خايبة نديرو الفوضى وسط المدينة أسي تيرانوفا!!! كون حضرتي فالوقت ما غاديش طرح هاد السؤال! حنا بغينا نفضيو المسألة حسي مسي باش تا الى فلت نلقاو شي عذر… و لا بغيتي نديرو فيها فيلم أكشن!!!!
حسيت بالإهانة و ما رضيتش! زعما انا هو أحسن عنصر فالفرقة و يتعامل معايا هاكا؟ واخا دابا ليام توريكم أهميتي!
-المفتش نسرين: احتراماتي مون كوميسير، عندي سؤال!
– الكوميسير: تفضلي المفتش نسرين!
-نسرين: شحال هي نسبة نجاح العملية؟
-الكومسير: نقدر نأكد 100% حسب المعلومات اللي عندنا! عندك شي شك؟
-نسرين: لا غي سولت صافي!
دازت ساعة و حنا كنسجلو فالتفاصيل و الدور اللي مطلوب من كل واحد منا. غالبا كنخدمو مجموعين و لكن كنلقى راحتي مع المفتش نسرين نظرا للخبرة ديالها و لأنها هي أقدم عنصر فالفرقة، زيادة على أنها أكبر منا سنا! (45 سنة) أرملة و عندها بنت فعمرها 18 سنة. عماد منهار التحق بالفرقة و هو تيحاول اثبت وجودو بأي طريقة و لو على حساب ليكوليك (les collègues )…تقدرو تقولو أناني! علي و رفيق سكوتيين و لكن كيتميزوا بالعنف!!! هما من المدرسة القديمة اللي ما عندهاش مع الدبلوماسية فالتحقيق مع المجرمين! كلمة جوج…مااااق! خذاو بزاف ديال الإنذارات باش يغيروا اﻷسلوب و دوزوا سطاجات على برا و يلاه يلاه…مرة مرة يدهوم سبقاهم. كما كان الحال هما أقرب ليا من عماد!
من بعد ساعتين مع الكومسير خدينا كل المعلومات المتعلقة بالعملية و فهمنا أن اﻷمر كيتعلق بأخطر مجرم، المسمى علال و الملقب بولد الغزوانية! ملي سمعنا سميتو كان عندنا اليقين ان القضية حامضة و خاصها إعداد كبير و كل خطوها غنديروها خاص تكون محسوبة. هاد خينا عندو سوابق يعني الملف ديالو خانز!!! علاش المستودع بالضبط؟ شي معلومات كتقول أن العصابات اتفقات تجتمع باش تقسم مناطق النفوذ و دير حد للصراعات بناتها بالخصوص ملي القضية وصلات لتصفيات جسدية. نقدرو نقولو انه إجتماع مصغر ديال المافيا! إلى نجحات العملية غنضربو كاع الريوس لكبار و نهنيو المدينة من المجرمين اللي غاديين و كايتزادو! دابا اللي كيهمنا هو ولد الغزوانية. كلشي كان أوكي حتى فاجأنا الكومسير اننا خصنا نتسناو الضو لخضر من وزارة الداخلية! دونك ملي الملف داخل فيه الوزير يعني ان نسبة الفشل خاصها تكون 0%! وبمعنى أكثر توضيح الى مشينا تا فشلنا غير نمشيو نبيعو الزريعة!
اللقاء المنتظر غيكون الغد ليه مع العشرة دالليل. كل التدابير خاص تاخد و منخليو تا حاجة للصدفة! فالحقيقة حسيت بهاد العملية مختالفة على اللي فاتو و من دابا بدينا نتحمسو واخا المخاطرة اللي فيها! . الدليل هو ان الكومسير عطانا راحة استثنائية و وصانا نعسو مزيان حيتاش ممكن العملية تستغرق الليل كامل! نرتاحو ممكن و لكن النعاس مانضمليكش سعادة الكومسير! مراتي كتشخر بالليل و تضل تخمل بالنهار!
غنحاول نتلف الوقت فاش ما كان حتى يوصل الموعد…
خرجنا من المكتب ديال السيبيريور و كل واحد فين شدها. ما ترددتش باش نطلب من المفتش نسرين توصلني واخا ماشي من عادتها توصل شي حد. لكن المعزة ديالي عندها خلاتها تقبل بكل فرح (سعداتي!).
و حنا راكبين سولتها على العروسة بنتها و بحال الى ضربت الوتر الحساس تنهدات مزيان وقالت لي:
نسرين: آه كتدوي على كوثر! آش نقوليك أخويا؟ شيباتني!
أنا: مالها آش دارت؟
نسرين: والو غير مبقاتش بغات تبع فكلية الطب و غايمشي عام هاكاك! قالت ما لقاتش راسها فيها و بغات دير ستيليسم! شتي على فيراج!!!
أنا: إلى قلتي فيراج فيراج! آش غنقوليك؟ خليها تختار الشعبة اللي ترتاح ليها.الى ضغطي عليها ما غادير لاهادي لا هاديك!
نسرين: بففففف الستليسم! ما عرفتش علاش ما شبهاتنيش فلحروشية! الى شافت فار ما نقليكش! و أنا ماماها غانواجه أخطر العصابات ههههه
أنا: ههههه حضريها شي نهار فشي عملية ع الله تحراش شوية!
نسرين: هي بغيتيها تجيها سكتة قلبية! و زايداها مصاحبة ليا مع شي كليك ديال كليميني
انا: صافي إجيو كاملين و نسبقوهوم ههههه
نسرين: و الله إيلا…
ما كنتش محتاج نوريها فين مگاري الطموبيل حيث عارفاني فين كنسكن و ما كنتش محتاج نعرض عليها حيث ما عندهاش مع المدام. حطاتني و ديمارات….
باقي 34 ساعة و نبداو العملية! مكاين ما حسن من شي تحميمة فاعلة تاركة و من بعد نحاول نسرق شي نعيسة. بحال هاد العمليات كيطلبو جهد كبير و التركيز!
هادشي اللي درت! مشيت للحمام و لقيت السبة باش نسيفط المدام عند ماماها. ما كتمشي لدارهوم غير الى مها مريضة. و هاد النسيبة قليل فاش كتمرض. ما ساكناش بعيد، تقريبا شي ساعة بالطموبيل. باش تمرض خاصها شي حاجة اللي كدير ليها الحساسية و عزيزة عليها! دزت للمارشي و تقديت كيلو ديال الكرموس و ديتو ليها. عارفها كتموت ع الكرموس و عارف المفعول العجيب ديالو الى كلاتو و منعينو عليها و لكن الى لقاتو كطيح فيه طيحت العمى فالظلمة! مسكينة كتولي كلها حبوب و ماتخلي فين تحك زيادة على الكرش! الله يسمح ليا و صافي و لكن بغيت نعس!
بعدما شرحت للمدام سبب المرض ديال ماماها شافت فيا شوفة العدو و قالت: ها هي الى بقات فيك! ما جاوبتهاش! تسنيت المكانيسيان حتى صلح الطموبيل و هزتها نيشان عند نسيبتي العزيزة!
وصلتها نزلات و سطحات الباب بااااق! ماشي مشكل! المهم غانقدر أخيرا نعس مرتاح! من عادتي مكنسوقش بسرعة و لكن هاد المرة رشقات ليا ندير الرالي. لقيت الطريق خاوية و نا نورك فنننننننننن! ربحت 20 دقيقة! دخلت و مشيت كنجري للناموسية. درت البورطابل اون سيلونس و مشيت لعالم الأحلام. ما فقت تال الغد ليه. خربقت شي تخربيقات و صونيت على المدام اللي طافية البورطابل (ملخير!) و قررت نتغدا على برا. ونا كناكل جاني اتصال بأن الموعد تبدل و غيكون مع الخمسة ديال لعشية! يعني بقات 3 سوايع…. كملت خلصت و مشيت نيشان للمركز (الكوميساريا). كلهم كانوا حاضرين. خدينا الموافقة باش نبداو العملية و كان لابد إمشي معانا المصور باش تا الى فشلنا غتكون عندنا الصور ديال أفراد العصابات!! سبقناهم و شدينا مواقع استراتيجية باش البق ما يزهق. فكرنا فالتعزيزات و لكن الشاف قرر ما نلتجؤو ليها حتى لآخر لحظة. المهم كلشي يكون على استعداد. ساعة الصفر قربات و اليوم خاصنا نبرهنو اننا قد المسؤولية و نبينو للراي العام ان الشرطة في خدمة الوطن و المواطن! 10-9-8-7-6-5-4-3-2-1-0
نطالقات العملية!!!
-الكومسير: تيرانوفا كلشي مزيان؟
-انا: وي مون كوميسير
نفس النداء وجهو لخرين. و كانت نسرين قريبة مني. هاد السيدة فعلا ب 100 راجل! كتخدم بكل هدوء و ما عارفاش شي حاجة سميتها الخوف. قتارحات تلعب دور متسولة و تقرب من افراد العصابات اكثر و لكن الكوميسير لغى هاد الفكرة و الخطة اللي تافقنا عليها هي اللي غاتنفذ. بداو كيبانو لينا مجموعة من ال 4×4 جايين و متوجهين للمستودع. حسبتهوم كانو 8. و صلو لواحد الساحة كبيرة و سطاسيوناو. بداو كينزلو واحد واحد. تقريبا شي 15 فرد. ما باينش عليهم مجرمين. تقول سياح جاو اكتاشفو المنطقة! جاني واحد الحماس ما عمرني حسيت بيه من قبل! امتى نبداو الهجوم؟
مشاو جيهت المستودع اللي الباب ديالو ادخل رموك. الحديد بقى على برا. دخلو كاملين و جانا الأمر باش نلحقو عليهم مع أخذ الحيطة و الحذر. بدينا خطوة خطوة و كل خطوة فيها إما حياة أو موت…العجيب ما كانوش واخدين شي احتياطات و ما خلاوش شي حد اللي يحميهم. يمكن ما بغاوش يبينوا انهم مجموعة من قطاع الطرق. الاتصالات ما توقفاتش بناتنا و ساعة الحقيقية قربات! الله يدوز هاد النهار على خير…
20 دقيقة كانت كافيانا باش نخليوهوم ارتاحو و يقادو الجلسة و من بعد: هيا انتشروا !!!!
بدينا الهجوم و شفنا في عينيهوم تأثير المفاجأة! ضربنا الحساب و لقينا ثلاثة منا غيتكلفو بثلاثة من المجموعة و ثلاثة لخرين ابقاو ليهم جوج جوج. ما كانت تا مقاومة منهم و كنا خايفين لنوليو ف شد شد!!!
لحد اﻷن كلشي داز على أحسن ما يرام و ماشي بالصعوبة اللي تصورنا. اتصال واحد من الكوميسير كان كافي باش ايجيو ليسطافيت و يحمعوا هاد الباكاج. أخيرا حققنا النتيجة اللي كان كلشي كايترجاها! تبادلنا التهاني و ما نسيناش نفكرو الكوميسير ف البريم! و لكن القصة يلاه غاتبدا!!!
سبقونا ليسطافيت و من بعد نص ساعة وصلنا للكوميساريا. الحركة هاد الليلة ماشي عادية. كل فرد من العصابة معاه بوليسي و يدو مشدودين بالمينوط. وقفناهم فصف واحد و بدا المصور كياخذ التصاور. جاني الفضول باش نعرف شكون فيهم و لد الغزوانية! هادا اللي محير البوليس مدة طويلة و قليل اللي عارف وجهو الحقيقي! بدات عملية التعرف على كل واحد منهم حتى وصلات نوبتو! غير شفتو جاتني صورتو ما غريباش عليا! فين شفتو…فين شفتو…؟ وي هدا هو اللي هجم عليا بسيف و سبب ليا فلغرازي! أنا متيقن واخا وجهو مبدل باقي عاقل عليه! يمكن داير شي عملية تجميل ولكن ما عمرني نسى هاد الويل!!! السيكاتريس اللي فوجهو هي هي. الطول ديالو، شعرو و النظرات ديالو باقي عاقل عليهم. أحصلتي ا ولد الغزوانية! غير بيا و لا بيك! باش نتأكد قربت منو و بديت كنخزر فيه! ما لقيت منو تا رد فعل. باش يعصبني دار واحد التفرنيسة ديال اللي في يديك ديرو!!! بالنسبة ليا القضية ولات شخصية! ربع سنين و نا كنقلب و نسول علله نلقاه. ما خليت تا قنت و كنخلص البركاكة من جيبي باش نلقى لو أثر و والو! اليوم لقاتنا الصدفة و قررت ناخذ حقي بيدي واخا يمشي فيها مستقبلي المهني! غنحاول نسهل عليه الهروب و نلقى الحجة باش نصفيه! فكرة فشي شكل ولكن هي مسألة شرف! و حنا كنحطو اللمسات اﻷخيرة باش الملف يتطوى و يمشي للمحكمة (حيث ماشي المهم الاعترافات ﻷن التهم كثيرة و اللي كان خاص هو القبض على هاد الريوس)،جانا واحد الخبر بحال الصاعقة! المسطرة القانونية ما تحتارماتش و الطريقة باش شدينا هاد المجرمين حسب الخبر كانت فيها تجاوزات هههه. قاليك هاد الناس معروفين و معروفة السكنى و المهن ديالهوم و كان يكفي نسيفطو ليهم استدعاء و يحضروا بلى هاد السينما!!!! هي الوزير و الكوميسير غي كيرگعوا !!! اللي فهمنا هو أن شي حد معانا فالكوميساريا هو اللي بلغ المحامين ديال صحابنا و تكلفوا باش يلغيو الإعتقال….و مشيتي فيها بخخخخ على فضيحة!
الغد ليه الصحف كلها كتهضر و شي كيلوح المسؤولية على شي. الكوميسير ما بقاش عندو الوجه اللي يتقابل مع شي حد و عماد طلع ليه الدم حيث على حساب ما قال كان ناوي يتيري و ما تيراش!
هاد النهار داز فالصو و البريم ما بقيناش نحلمو بيه و يا ربي نساو هاد الفشل الذريع!
اللي ما درناش فحسابنا، و هادشي عرفناه من بعد، هو النفوذ اللي عند هاد الناس! عندهم قوة كبيرة و بفلوسهم كيشريو ضعاف النفوس. و كلشي ضاربين ليه لحساب. ضنينا ان العملية ملي تنجح، الباقي مسألة إجراءات و خوتنا غيمشيو للحبيسي! ساعة كلشي تضرب فزيرو!
ما بقيتش حامل هاد المهنة! جري تا تعيا و فلخر تجني الريح. بصح ما خاصنيش نكون بزاف سلبي. دوزنا شي نجاحات و لكن كنا معتابرين هاد القضية قضية حياة او موت. من بعد يمشي بنادم يرتاح. كنت فعلا كنفكر ندير استقالة و ندبر فشي أجونس ديال اﻷمن الخاص. ساعة وقيلا هادوك اللي سماوني تيرانوفا ما كدبوش. آه ما عرفتوش شكون هو هاد تيرانوفا. هدا واحد المخبر اللي تطوع ادخل للمافيا كعضو من اعضاءها باش يطيح الزعماء ديالها فلخر لقا راسو حاصل و ما تلاش قادر يتخلى على هاد الوسط. ولات عندو علاقات صداقة و أخوة مع العائلة اللي دخل ليها. هادا هو حالي! دخلت و ما يمكنش ليا نخرج حتى نشد التقاعد و لا يجريو عليا!
سيمانة من بعد ما وقع تاشي تغيير فالقضية و صحابنا ما تعرضوا لتاشي متابعة. بدينا الروتين و كل واحد تكلف بشي ملف بلى معنى. كتبقى فالبيرو من الصباح تالعشية و نتا كتنش الذبان….بحال فشي مقاطعة!
و نا خدام كنعمر الكلمات المتقاطعة، صونا البورطابل و لقيت sms جاي من عند الكوميسير: الحضور عاجلا! آش كاين عوتاني؟ لقيت ان نفس الرسالة توصلو بها عماد، رفيق، علي، و نسرين! دخلنا لمكتب الكوميسير و خبرنا اننا خاصنا نتوجهو للمستودع فين كنا من قبل!! عاوتاني المستودع!!!! و علاش بالسلامة؟ قاليك شي دراري صغار كانو كيلعبو و لقاو جثة ديال بنت مقتولة!
طلعنا بالزربة فالطموبيل ديال السرفيس و تبعونا جوج سطافيتات فيهم البوليس بالزي الرسمي و مشينا للمستودع. وصلنا و لقينا الباب محلول و عرام ديال الناس اللي ساكنين قريب مجموعين. المنطقة تعزلات بالأشرطة الصفراء و دخلنا. الكومبسير بقى مع نسرين و مشيت انا و علي نكتاشفو الجثة! بانو ليا رجلين بيضين خارجين لحد الركبة من واحد البركاسة و الباقي مغطي بميكة كبيرة. حيدت الميكة و ياريتني ما حيدتها!!! كنت غنتقيا و نطيح كوما! البنت المقتولة و اللي شوهو الجثة ديالها هي كوثر بنت نسرين!!!
حاولت ندير المستحيل باش نسرين ما تشوفش هاد المنظر و ما نجحت! جيت عندها و شديتها من كتافها و قلت ليها يلاه نخرجو من هنا. جاتها غريبة و قالت لي ماشي المرة الأولى اللي غاتشوف شي حد ميت و أنها سبقاتني للمهنة! بديت نخلط فالهضرة و الكوميسير ما فهمش آش واقع! عوض يعاوني عيط ليها و قاليها: يلاه نشوفو آش لقاو هاد السوبرمان ديالنا و ما بغوناش نشوفوه! بقيت واقف عاجز و كنتسنى رد الفعل ديال نسربن! ملي وصلات للبركاسة و شافت اللي فيها، طاحت على ركابيها و غوتات بسمية كوثر! اول مرة كنشوفها منهارة و كنشوف فيها اﻷم ماشي الشرطية اللي فنات عمرها فالسربيس!
نقلوا الجثة للمشرحة و بين التشريح انها تعرضات لﻷغتصاب و العنف! الخبر انتشر بسرعة البرق و ولى حديث الشارع. جو مشحون خيم على الكوميساريا زيادة على الحزن! اول مرة شي فرد منا تعرض لهاد المأساة. كوثر بنت نسرين كانت معروفة بيناتنا بأخلاقها و الظرافة ديالها. كانت مرة مرة كتجي للكوميساريا تزورنا و تمشي. كلشي كنا كنتوقعوه الا هادي! نسرين تصابت بانهيار عصبي و نقلناها لمصحة. العلاقة اللي كتربطها ببنتها كوثر كانت قوية و زادت تقوات ملي مات راجلها و حاولات تعوض غيابو باش كوثر ما تحس بشي نقص. الطبيب عطاها 21 يوم راحة. بصعوبة قدرات تلاقى اللي جاو إعزيوها و كانت جنازة رهيبة!
بدا البحث و التحقيقات باش اتفك لغز هاد الجريمة اللي حركات الرأي العام و كلشي كيتساءل شكون من مصلاحتو اتعدا عليها؟ انتقام؟ غيرة؟ و لا غي صدفة لاقتها فطريق شي مجرم؟ بزاف ديال الأسئلة و معندناش راس الخيط! اللي دار هادشي ما خلاش الأثر. كوثر ما عمرها تعرضات لشي تحرش أو تهديد من قبل! الغريب هو كيفاش الجريمة وقعات فالمدينة اللي عايشة فيها و هي كانت فرحلة هي و الكليكة ديالها لمدينة خرى! نسرين براسها مشات معاها للمحطة و ما فارقتها تا قلع التران! يعني وحدة من جوج: تقتلات و نقلو الجثة لمدينتها اﻷصلية او تخطفات و تقتلات فمدينتها! التحقيقات مع صحابها اكدات انهم كانو خارجين و جوايه الستة ديال العشية حسات براسها عيانة، سلمات عليهم و خدات طاكسي و مشات ﻷوطيل اللي شادين. كانت فرحانة و ناشطة و كلشي كان عادي. ما بانش عليها شي قلق او توثر! آش وقع من بعد؟ الطاكسي اللي خدات و كما أكدو الشهود وصلها لﻷوطيل و من تما تاحد ما عارف آش طرا…كان أخر اتصال بين نسرين و بنتها ليلة الجريمة.
شهر داز و ما وصلنا لوالو. حسينا باليأس و اللي زاد الضغط علينا هي الحالة ديال نسرين اللي ما قادراش تخرج من هاد الأزمة. باش كملتها، حطات الإستقالة و ما بقاتش باغا تكمل فسلك الشرطة! فاللول ترفضات هاد الاستقالة و من بعد ملي شافو ان القرار لا رجعة فيه قبلوها. من بعد 6 شهور القضية ما بقاش عندها داك الوهيج و ولات غاديا و كتنسى!
بحال فجميع القضايا، فللول كلشي متبع و اﻷخبار كتروج و كيكثارو التحاليل و التكهنات و أيامات من بعد ما كيبقى حد إهضر فالموضوع حيث تايجي موضوع آخر كيغطي عليه! نقدرو نسميوه نفاق ديال المجتمع! بحال ملي شي مرا تايموت راجلها كتلقى فمرحلة العزاء كلشي واقف معاها و كثرة الوعود على أنهم ما غايتخلاوش عليها و على ولادها و ملي كيبدا الميت إتنسى ما باقي كتلقى تا واحد من دوك اللي كانوا دافعين الجبهة! غير الله يصبرك أختي نسرين و صافي!
انا بالخصوص، هاد القضية دارت ليا الهوس و ما بقيت تنفكر إلا فيها! حطيت مجموعة من الفرضيات و قتارحت على الكوميسير بزاف ديال الإحتمالات و ما لقيتش منو تا استعداد باش يعاود إنبش فيها! اللي كان محيرني هو علاش ختارو المستودع بالضبط باش إرميو فيه الجثة؟ على قلة فين؟ واش كاين شي علاقة عند ولد الغزوانية وعصابتو بهاد الجريمة؟ و لنفرض، علاش اختارو كوثر و ما قصدوش ماماها أو واحد منا؟ الكوميسير من ديك الفضيحة اللي وقعات ما بقاش بغى إغامر و كان الموقف ديالو واضح! قاليك تا إجراء ما غيكون إلى ما كناش متيقنين 100%! .السيد ما بقى ليه والو و يشد التقاعد، حسن ليه إدوز الأمور بسلام حتى يكمل اللي باقي ليه فالسربيس!
وليت عاطيها للقهوة كحلة واخا أصلا ما كنعس غي سويعات و الليل كامل سد عليا فالصالون باش ما تفيق المدام. كنفلي فالملفات و نقارن بين التصاور و نبحث فتاريخ المجرمين المسجلين عندنا و نشوف كيفاش كانو و كيف ولاو. ما كانش ممكن ندير هادشي فالمكتب حيث بالنسبة ليهم الملف تغلق و القضية غادي تسجل ضد مجهول! من الحوايج اللي ضروني فراسي و بغيت نفهم هو كيفاش هاد ولد الغزوانية تنقل بسرعة من بزناز ما ترددش استعمل سيفو باش إواجهني لرجل أعمال بكوستيم و كرفاطا؟ مكنهضرش على الفلوس كنهضر على العقلية! ماشي ساهل تكون محارب و من بعد تحول ﻹنسان عادي مديها فليزافير!
فكرت ما نقطعش الارتباط بنسرين و كنتاصل بيها مرة مرة. على ما قالت ما بقاتش قادرة تبقى فدارها الأولى اللي كتفكرها ببنتها و شرات واحد الدار فالعروبية. و لات ملهية مع الدجاج و شي بقرة و شي معيزات. خدات التقاعد النسبي و كتحاول تبدا حياتها من جديد! شتي على نهاية! خصني شي نهار نمشي انا و المدام ندوزو عندها شي وقيت واخا ما كيتشاموش! يمكن الوقت تبدل و غايبداو صفحة جديدة. وقت ما دويت معاها كنتفادى موضوع الجريمة و كنسول على الصحة و اﻷحوال و شي مواضيع تافهة….
الملف ديال ولد الغزوانية، اللي فيه تقريبا جميع المعلومات تيقول: الإسم علال الشتوكي، السن 34 سنة، مجموع السنوات اللي دوز فالحبس 8 سنين. اول اعتفال كان ملي كان فعمرو 20 سنة. التهم: الضرب و الجرح و الإتجار فالمخدرات بكل أصنافها. آخر مرة تعتاقل هادي 6 سنين!!! باﻹضافة لمعلومات أخرى ما عندهاش أهمية! 6 سنين و السيد عايش حر كينمي فأعمالو و ما تبثوا عليه تا شي تهمة!!! هههه سبق ترشح لﻹنتخابات و نجح فيها و فآخر لحظة تخلى على المقعد ديالو! ( بشحال باعو؟). واو هادي هي العبقرية و إلا فلا! تبدا من والو و تولي بارون من البارونات تدخل فالصغيرة و الكبيرة و كلشي يدير ليك حساب! إوا خدم نتا و جري باش فلخر يخليو ليك واحد الكدبة سيمتها التقاعد!
هاد الجهد أثر عليا بزاف و علاقتي بزوجتي تأزمات و ما بقى جامعنا والو. زواجنا كما تيقولو جا عن طريق الصدفة. كنا معروضين لواحد المناسبة شفتها شافتني عجباتني تعرفت عليها و طلبتها للزواج! حاولت نبغيها و ما دارت تا بادرة من جيهتها باش نتقرب منها كثر. ولينا كندوزو الوقت وصافي. حياتنا طغى عليها الملل و الروتين. ممكن حيث ما جابش الله شي ولاد اللي يعمرو علينا، داكشي علاش الجو بقى هو هو! ما عرفتش يمكن نكون أنا اللي مقصر و تدهيت فشغلي. ربما كون كانت خدامة غتكون وحدة خرى. و لكن تا هي من جيهتها معمرها حسساتني انها كتبغيني. بون هذا موضوع آخر…
داز عام دابا و مزال ما بغيتش نتزاكل على القضية! كما قلت ولات قضيتي انا! و عندي شي إحساس بأن ولد الغزوانية عندو علاقة بها. عام يعني 365 يوم و كل يوم كياخذ مني 5 سوايع ديال البحث فالضواسا. إذن دوزت 1852 ساعة غي مع لوراق و التصاور! جمعت تقريبا ما يفوق 2000 صورة كلها متعلقة بالقضية! صحاب كوثر، عائلتها، الجيران، ولد الغزوانية و عصابتو، البلايص فين كيكون و الممتلكات ديالو كلشي موثق! ما يمكنش هاد العمل يمشي باطل واخا عارف راسي تابع السراب! وقت ما تانقول لقيتها كنعاود نتراجع….
وأنا كنقلب كما كل ليلة، شفت واحد الصورة ثارت انتباهي واللي ما عمرني رديت ليها البال! صورة جماعية ديال كوثر و صحابها فشي حفلة و على حساب التاريخ اللي فيها تخدات شي عامين هادي. يعني ملي كانت عندها 17 سنة! من بين اللي حاضرين و باين انه ما كانش راد البال ملي تشد فالصورة: ولد الغزوانية!!! ما كاينش الشك! متيقن 100% هو بلحمو و شحمو! واخا منعرف آش يدير صورتو ما تخفاش عليا. واقف جنب واحد السارية و عينو كتشوف جيهت الكروب. كان مراقبهوم و ماشي معاهم شيء طبيعي الى قارنا السن ديالو و السن ديالهوم. ولكن آش جابو لهنا؟
حطيت كل الفرضيات و اقرب وحدة فيهم قريبة للمنطق هي انه كيشوف فكوثر! حسيت بواحد الفرحة كبيرة ما توصفش! و أخيرا طحت على واحد الدليل على أن صاحبنا عندو علاقة من قريب و لا من بعيد بالقضية. ما عرفتش و لكن مجرد وجودو فهاد الحفلة عطاني أمل و إلى عاودت فتحت هاد الملف يمكن نكتاشفو وقائع جديدة اللي تعطينا راس الخيط باش نلقاو حل لهاد اللغز! شكون اللي غيسمعني و يدير ثقتو فيا؟ الكوميسير؟ ممكن! المفتش عماد؟ لا هذا منعولش عليه! كيبقى المفتش رفيق و علي و….نسرين! زعما إمشيو معايا فهاد الإتجاه؟ اللي صعيب هو كيفاش نقنع نسرين. بعد هاد المدة كلها يمكن فقدات الأمل باش تشوف المجرم اللي حرمها من بنتها، كياخذ الجزاء نتاعو! و يمكن تكون كاع كتفضل تنسى بمرة! و الى جاب الله وافقو و كانت النتيجة سلبية، كي غنولي قدامهم و شنو هي العواقب! حرت و ما غنتهنى حتى ندير شي كعية!
الساعة 12.30 ديال الليل هزيت البورطابل و تاصلت برفيق!
تيت تيت تيت….
رفيق: ألو! صافا تيرانوفا؟ ياك لباس؟ آش هاد الوقت؟ ياكما تخاصمتي مع المدام؟ إلى عولتي على نادية (مراتو) تجي تشد بخاطرها و نجيو نصالحوكوم هزك الماء! نادية مسافرة!!
أنا: مالك أ صاحبي كترطا و نا اللي كنقول عليك سكوتي! ما كاين لا خصام لا سوء تفاهم! بغيت نتلقاك دابا! الموضوع مهم و ما يمكنش نشرح ليك فالبورطابل! مزال فايق؟
-رفيق: واحد الشوية و غنعس…
-انا: تسناني 20 دقيقة و هانا عندك!
-رفيق: واخا و ما تفوتش 20 دقيقة راك عارف نعاسي ثقيل….
-انا: عارف و ما ديرهاش سبة و تمشي تخشا تحت المانطا من دابا! خدم التلفزة و لا البيسي تا نجي…
قطعت و نزلت نتسنى المفتش علي اللي دويت معاه هو الأول. ساكن قريب مني و ما لقيت منو حتى اعتراض. 5 دقايق كانت كافية باش يوصل و مشينا عند رفيق. دخلنا و بجوجهوم زربانين يعرفو لاش معيط ليهم!! دويت على الصورة و على قناعتي ان كاين شي علاقة عند ولد الغزوانية بالجريمة. فللول كان الموقف ديالهم سلبي و ما خليت ما درت باش نقنعهوم. فلخر وافقو و طلبو مني ما نذكرش سمياتهم فحالة الفشل. عطيتهم وعد و قررنا نوجدو شي خطة. بقى ليا نقنع نسرين ﻷن حضورها معانا غيفيدنا و تقدر تلعب دور كبير نظرا للخبرة ديالها و أنها هي المعنية كثر بالقضية! الى تجمعنا بربعة بينا نقدرو نقنعو الكوميسير و يعطينا الإمكانية باش نعاودو نفتحو الملف و هو يبقى بعيد…اعتمدت على إحتمال 60 % ما يوقفش ضدنا حيث ما كنضنش أنه من بعد سنين ديال الخدمة ما يقدرش يتقبل الهزيمة. الى نجحنا غايمشي مرتاح و الى فشلنا ماشي مشكل! المهم غنكونو درنا المحاولة و ما استسلمناش!
اتفقنا نتلقاو عند نسرين بلا ما يكون فخبارها والو. غنسبقهوم و ملي نوصل نتاصل بيهم باش يلحقو علينا!
ماشي ساهل نقنع نسرين، و حتى غير باش نجبد هاد الموضوع ما هي و ما لونها! اول مرة غنشارك مراتي فمشاكل الخدمة و طلبت منها تمشي معايا.
انا: نادية بغيت نقوليك شي حاجة!
نادية: أويلي! ياكما درتيها عاوتاني و شريتي لماما الكرموس؟؟ كانت غاتمشي فيها!
أنا: لا لا! هادي و التوبة! بغيتك تمشي معايا عند نسرين…
نادية: عاود عاود… كيفاش؟
أنا: تمشي معايا عند نسرين!
نادية: و كاتقولها بوجهك حمر! بغيتي تجيب عليا الضرة و نا اللي نمشي نخطبها ليك ياك أسيدي!
انا: نسيتي انها كبر مني؟
نادية: ولاو…!
أنا: شوفي ما عنديش وقت نضيعو فهاد التخربيق! انا غنشرح ليك….
فللول كان عندها موقف سلبي و بعدما شرحت ليها الهدف من الزيارة قبلات، بالخصوص انها كانت تقابلات معاها فالعزاء. خاصها تنسى اللي فات و يبداو صفحة جديدة. قريتها آش دير و النقطة المهمة هي تحاول ثير عاطفتها من جيهت بنتها و من الإحساس من الحرمان من الدراري اللي كنعيشوه. اتاصلت بنسرين و فرحات ملي عرفات أن نادية مراتي غتزورها! ها واحد الباب تحل! فالحقيقة السبب ديال سوء التفاهم بناتهم تافه! نقدرو نقولو الغيرة! من كثرة التعامل مع نسرين اللي كنت كنشوف كثر من مراتي وليت مرة مرة كنزكلها و نعيط ليها نسرين عوض نادية! السيدة شكات ان بناتنا شي حاجة و خصوصا ان نسرين أرملة! ما خليت ما درت باش نشرح ليها و لكن و تقول!!! من تما ولات ما حملاهاش و القضية تعقدات نهار تلقاو فواحد العرس. نادية ما عندها علاش تحشم و لقات السبة باش تواجه نسرين و تخوي المزود. من داك النهار ما بقيتش كنجبد سميتها! ركبنا فالطموبيل و شدينا الطريق. إلى كتب الله غنوصلو من بعد ساعتين. حاولت نخلق الجو مع نادية ﻷن كما كان الحال كتبقى مراتي! قبل ما نفوتو آخر رونبوان، بانت ليا واحد الكات كات كحلة قدامنا. براكيت عليمن و بقيت غادي فخط متوازي معاها. حققت مزيان و شفت ولد الغزوانية راكب اللور تايهدر فالبورطابل! كاين غي هو و الشيفور. ما ردوش البال، ربما نادية غطات على شخصيتي. يمكن بالنسبة للشيفور حنا مجرد كوبل خارج فجولة! نقصت من السرعة و خليت مسافة بيني و بينهم! ( رب صدفة خير من ألف ميعاد). ما كاينش حسن من هاد الفرصة باش ناخذ فكرة على التحركات ديالو واخا عندي ما يكفي من المعلومات على البلايص اللي كيعمر و الإقامات اللي كل مرة فين كايبات! كنت مضطر نعطي توضيح لنادية بخصوص هاد الملاحقة باش ما تبقاش مشطونة. بعدما قطعنا مسافة 15 كلم خرجات الكات كات من لوطوروت و شدات الطريق اللي غادية لابلاج!
لباس ما كناش غي بوحدنا اللي شادين هاد الاتجاه. الطريق عامرة و ماغنثيرش الانتباه! الكات كات مشات جيهت لشالي و خدات واحد الممر ضيق من بعد دارت عليسر و وقفات قدام واحد الشالي. هبط صاحبنا و مشى حل الباب و دخل. بقيت واقف بعيد واحد المدة و زدت بحالي بعدما خديت مجموعة من التصاور….شكون عارف؟ يمكن هادي البداية ديال الحل!
على طول الطريق نادية ما سكتاتش و قليل فاش كنتبه لهضرتها. عقلي مشغول و الحماس تزاد عندي! ما بقى والو و نوصلو عند نسرين. علله تقبل و تنضم لينا.
الدار ديال نسرين جات معزولة و داير بيها الشجر ديال الأكاسيا. دار كبيرة عندها صقف بحال اللي فالمناطق الثلجية. ملي قربنا بدا النباح ديال الكلاب و فضلنا نبقاو فالطوموبيل (ما كنحملش الكلاب!). شوية بانت ليا نسرين خارجة باش تسكتهوم و عطاتنا إشارة باش نهبطو. وصيت نادية تصرف بعفوية و تنسى اللي فات و فعلا داكشي اللي دارت. سلمات على نسرين بشكل عادي. لاحظت تبدلات بزاف بالمقارنة مع آخر مرة شفتها. باين واش مزال مأثرة بفراق بنتها. ما نسيناش نجيبو معانا كادو صغير بهاد المناسبة واللي تقبلاتو بكل فرح. دخلنا للصالون و تبادلنا اﻷخبار و عبرات على الفرحة ديالها ملي شافتنا. هاد التصرف ديالها خلق ليا مشكل! كي غايكون رد الفعل ديالها ملي تشوف رفيق و علي و تعرف المقصود من الزيارة؟ فكرت نتاصل بيهم و نلغي البروجي و فلخر قلت غنتحمل الغضب ديالها و المهم هو تقتانع! علاش ختارت نكونو مجموعين و ما تصرفتش بوحدي؟ التجربة علماتني ان فبحال هاد النوع من الملفات صعيب نحققو شي نتيجة إيجابية الى ما كانش تعاون بين مجوعة من المحقيقين و من المحتمل التعرض للخطر بلا ما يعرف تا واحد أش وقع. بعبارة خرى صعيب ندير فيها بطل و نخدم بوحدي! هادي عصابة و الله أعلم علاش قادرين!
درت بحال الى خارج نتعرف على الموقع و خليت نادية و نسرين يبداو صفحة جديدة. عيطت على صحابي فالحارة و الحلوة و كانت المفاجأة ملي خبروني انهم على بعد كلم و كايتسناو غير الإشارة! يعني لحظات و يكونو معانا. و بالفعل ما جيت فين نطفي البورطابل حتى بانت ليا الطوموبيل ديال رفيق جايا! لحسن الحظ نسرين ربطات الكلاب اللي ما وقفوش من النباح! باقي ما لحقو، سمعت نادية و نسرين تيهضرو. درت شفت نسرين كاتبكي و مراتي كتحاول تسكتها. فهمت ان نادية قصرات عليا الطريق و حطاتها أمام اﻷمر الواقع. ما ندمتش حيث جبتها معايا! فضلت نبقى ساكت حتى يوصلو لخرين.
أخيرا اجتمعنا و عطيتهم النتائج اللي وصلت ليها و الخطة اللي سطرتها. هضرنا و لقيت استعداد كبير عند نسرين اللي ما نساتش حقها الطبيعي فمعاقبة اللي تعدا على بنتها.
بقينا ساعتين فالنقاش حتى اتفقنا على الخطة و ما بقى غير التنفيذ!
الخطة هي نعتاقلو ولد الغزوانية خارج المسطرة القانونية و ناخذو منو اعتراف! من بعد الكوميسير غايتكلف و يعطي لهاد الاعتقال و التحقيق طابع قانوني!!! مادام ما قادرينش نثبتو عليه شي حاجة بشكل علني، غادي نخدمو معاه اﻷساليب لخرى واخا فيها مخاطرة! بعبارة خرى التحقيق غايكون فالشالي ديالو ( le chalet)، و الى ما قدرناش غنخطفوه و نختارو فين نحققو معاه و بطبيعة الحال رفيق و علي غيضطرو استعملو أسلوبهم باش يقر!!! هاد العملية خاصها تم فأسرع وقت وخاص النجاح إكون مضمون. الفشل كيعني نهاية الحلم! تفارقنا و كان الاتفاق نبداو بعد الموافقة ديال الكومسير. تكلفت بهاد المهمة واخا ماشي ساهل ندخلوه معانا فهاد المبادرة!
المشية ديالنا عند نسرين كانت فالويكاند و خاص نتسناو نهارالإثنين باش نفتح الموضوع مع الكومسير. بخلاف ليام الفايتة فقت بكري و كنت انا الأول اللي دخلت الكوميساريا (طبعا كاين اللي شادين البرمانونس). مرة مرة كنطل واش وصل ولا مزال. ساعة من بعد سمعتو داخل و خليتو 10 دقايق بين ما “يتنستالا” و لحقت عليه للمكتب ديالو!
دق دق!
-الكومسير: تفضل دخل!
شافني و استغرب! ما مولفاش ليا نجي بكري! -انا: صباح الخير مون كومسير!
-الكومسير (مازال حاير): صباح الخير! فين مات شي حمار؟
– أنا ( جلست): لا غير البارح نعست بكري و ضرباتني الفيقة مع الفجر!!
– الكومسير: ياك صليتي بعدا؟
-انا: الله يتقبل!
-الكومسير: دونك فقتي بكري و جيتي تقولي صباح الخير!
-انا: فالحقيقة…بغيت ناخذ رأيكم سعادة الكومسير و كنتمنى يكون إيحابي!
-الكومسير: بخصوص؟
-أنا ( كنتردد و واحد الراس تايقولي بلاش! فكرت و لقيت مشا الحال. اللي ليها ليها!): أأأ…بخصوص قضية اﻵنسة كوثر!
الكومسير (حط البورطابل اللي كان كايحاول اشعلو و تعكس): مالها؟ ياك غلقنا هاد الملف!
انا: هادشي علاش جيت! عندي شي معطيات و….بغيت الموافقة ديال سعادتكم باش نعاودو نفتحوه! (أوف ما قلتها تا سواد ليا!!!)
– الكومسير: كيفاش؟ واش باغي تجبد علينا النحل؟ حشمنا راسنا مع وزير الداخلية و ولينا ضحكة قدام الرأي العام ودابا بغيتي نعاودو من الصفر؟
-انا: لا هاد المرة غتكون الأمور سرية!
– الكومسير: وضح!!!
حطيتو فالصورة و لعبت على الرغبة ديالو باش يحقق شي حاجة قبل ما ياخذ التقاعد و ما خليت تا نقطة إلا و ناقشتها معاه. حتى كنقول صافي غايوافق و يهرب ليا. اللقاء دام شي ساعتين و فلخر نجحت فأنني نقنعو!!!! كان الشرط الوحيد هو فحالة الفشل نخليوه بعيد و فحالة النجاح غادي يتدخل باش يبرر الشي اللي درنا!
( الله يعمرها دار هاد الكومسير! ناكلو العصا بوحدنا و نقسمو الغنيمة كاملين هادا الى ما خداش كلشي!). خرجت من عندو ناشط و اتاصلت بليكيب باش نعلمهم يوجدو راسهم. نسرين قالت انها غضطر ترجع دوز شي يامات فالمدينة باش تكون قريبة منا. باقا عندها الدار اللي كانت ساكنة فيها. كلنا مستعدين و من هاد الليلة غانبداو الشغل!
كان لازم تتبع المكالمات ديال ولد الغزوانية و قدرنا بطرقنا الخاصة نعرفو البرنامج ديالو خلال 24 ساعة الجاية! عندو مقابلة و عشاء عمل جوايه السبعة، مع شي مستثمر أجني. اللقاء غايستمر ساعتين و من بعد معروض لشي حفلة فأكبر أوطيل (السهير و النشاط)! أنا و نسرين غانراقبوه فاللقاء اللول و علي و رفيق غايتسناو فلوطيل. ما بغيناش إفلت منا! الاتصال بناتنا غيبقى متواصل تا نجيبو صاحبنا فالشبكة!! خاص نعتاقلوه بالزربة و نديوه لديك البلاصة اللي عزيزة عليه: المستودع!! تما غنباشرو التحقيق بطريقة أكثر نجاعة! كنا كنفضلو تم العملية فلاشالي جنب البحر باش نخدمو مرتاحين و لكن تبين لينا انه ما كيطولش فواحد البلاصة و كيتنقل بكثرة. الى بغينا نشدوه خاصنا نغفلوه! نسرين رجعات ليها ديك الروح المرحة و بينات انها مستعدة للمواجهة!
18.37 لحظات و إبان الهدف! لحظات كأنها سنوات! تقطعات الهضرة بناتنا. كل واحد فينا كيتمنى يدوز كلشي بخير و نخرجو من هاد الكابوس اللي حطينا فيه ريوسنا! كان ممكن نلغيو العملية و كل واحد يكمل مشوارو فخدمتو و نساو ما جرى و لكن قناعتنا بأن لازم القانون ياخذ مجراه و الظلم يتمحى هو اللي عطانا القوة و الرغبة باش نمشيو تال النهاية!
18.54 اودي (ODDI) كحلة داخلة، وقفات، نزل الشيفور، حل الباب و هبط ولد الغزوانية! مستيلي مزيان و عاجبو راسو و شاد سيغار…بقات بينو و بين مكان اللقاء 10 أمتار…عطيت الإشارة لنسرين…هبطات و السلاح فيديها (الكومسير غامر و عطاها مسدس) …هبطت بالزربة و ضربناها بجرية. لحقنا عليه و كان عنصر المفاجأة صدمة بالنسبة ليه! الشيفور ما شاف والو ديمارا و مشى. الباقي مسألة خطوات. أخيرا ولد الغزوانية في قبضة الأصدقاء الأربعة! فللول حاول إقاوم و ملي شاف السلاح و يمكن فهم ان القضية ولات شخصية استسلم. اتصلت برفيق و علي و قلت ليهم باش الحقو علينا و ان ما محتاجينش نتسناوه فلوطيل. العملية دازت فأقل من الوقت اللي كنا كانتمناوه! المستثمر الأجنبي؟ ما كيهمناش شكون و منين! اللي كيهمنا هو ولد الغزوانية!
تعمدت نسوق بهدوء واخا مشتاق غي وقتاش نوصلو للمستودع! ما بغيتش توقع شي حاجة اللي تفشل كاع اللي درنا! صاحبنا كيتركل اللور يديه مشدودين و بانضا على عينيه.
نسرين بجنبي ساكتة و مرة مرة كتشوف اللور. يمكن دوك النظرات كتعبر على الكره لهاد الشخص.
اخيرا حنا فالمستودع! الدنيا خاوية و قدامنا وقت طويل باش نضغطو على السيد حتى يقر و يعترف. خديت كاميرا فيديو باش نوثق الجلسة و بواطة ديال الدواء حيث لابد رفيق و علي يخليو شي علامات…. رفيق و علي من المنتظر يكونو وصلو فهاد اللحظة. منعرف علاش تعطلو! الغايب حجتو معاه! جلسناه فوق الكرسي و ربطنا يدو اللور و حيدنا ليه البانضا! شاف فينا و حاول استفزنا!
هو: غادي نخرج عليكم! ما عرفتوش معامن لاعبين! ما غاتوصلو لوالو…
انا: شكون قاليك بغينا نوصلو لشي حاجة!
هو: عرفتك! باقي شاد الحسيفة من دوك التشريطات اللي درت ليك! كان عليا نصفيك و نتهنا منك!
حسيت بالرغبة ندير شرع يدي و لكن ماشي هادشي لاش جبتو هنا! نسرين خدامة كاتقد الكاميرا و ما نطقاتش بكلمة. فانتظار رفيق و علي حاولت نبدا التحقيق ربما يعتارف بلا ما نحتاجو للعنف. جبدت الصورة ديال كوثر و قربتها منو. شافها و بدا كيضحك! نسرين خلات الكاميرا و قربات حدانا.
هو: واو!!! هادشي لاش جايبيني؟
انا: علاش تكرفستي عليها؟
هو: ما كنعرفهاش و ما عندي تاعلاقة بيها! كلشي قلتو من قبل. غي كاتصدعو راسكم! ما غاتوصلو لوالو!
جبدت الصورة اللي بان فيها و حطيتها فوق ركابيه…
أنا: ما كتعرفهاش؟ آش كدير هنا؟ (شيرت بصبعي)
نسرين شفتها تبدلات و ما بقى فيها اللي يصبر، قربات لوذني و قالت لي: غي كنضيعو وقتنا! تاصل برفيق و علي هما اللي غادي يعرفو يهضروه!
بحال الى سمعها قال: انا ما عنديش مع البرهوشات! اللي كايعجبوني هما بحال هادي!
نسرين بدون سابق إنذار جمعات معاه بواحد التصرفيقة!
نسيت هاد الجوج! مالهم تعطلو؟ تاصلت بيهم و على ما قالو شي حد ثقب الروايض بربعة ديال طموبيلتهم!!! كايحاولو القاو اللي يوصلهم و ما لقاو تا طاكسي اللي غادية للمنطقة ديال المستودع!
انا: و مالكم ما تاصلتو؟
رفيق: كانحاولو و الريزو ما كايشدش
انا: بعدا انا من اول اتصال شد ليا!
رفيق: إوا قلها لشركة الاتصالات!
انا: بفففف و هاد الطاكسيات ما لقاو امتى إغبرو غي ملي حتجناهم! أوكي تسناوني غانجي نوصلكم!
وصيت نسرين ترد بالها و تحاول ما تديش و تجيب معاه فالهضرة بزاف. الاعتراف غانخدوه غانخدوه. هي مسألة وقت فقط! تبسمات و بانت ليا مرتاحة لهاد الشي اللي وصلنا ليه! الله شحال زوين تحقق شي هدف اللي كان حلم.
قبل ما نمشي بغيت نخليه عل الأعصاب و نرغم عليه إفكر مزيان قبل ما يفوت الفوت!
انا: اللي خاصك تعرف هو اننا معولين على كلشي. اعتارفتي يمكن يكون عندك الحظ تعيش! بغيتي تنكر ما غانخليوكش ترجع فين كنتي….
….فكر! ما عندناش الوقت نلعبو طوم و جيري!
عوض افهم و يتعاون خنزر فيا ودور وجهو و دفل!!! كنت علين نصفيها ليه!
نص ساعة كانت كافية باش نوصل لوطيل. دخلت و مشيت لباركينغ. لقيت الطوموبيل و ما لقيتش رفيق و علي! فين مشاو عاوتاني؟ يلاه بغيت نتاصل لحق عليا رفيق!
انا: فين علي؟
رفيق: جاه ابيل من عند مراتو. بنتو الصغيرة مريضة و مشا إوصلها عند الطبيب! انا اللي رغمت عليه إمشي. ما تخافش الشغل غايتم كما خططنا. انا بوحدي كافي باش نخليه يعتارف! راك عارفني!
انا: يلاه سربي طلع تعطلنا!
شدينا الطريق و هاد المرة ما بقيتش مسوق وركت مزيان باش نوصلو دغيا. عارف رفيق قلبو حجر و عارف علاش قادر غير خاصني نرد البال لا يبالغ، يقدر ولد الغزوانية يمشي فيها!
و صلنا و نزلنا بالزربة باش نفضيو الشغل هاد الليلة. دخلنا للمستودع و حسيت بهدوء ممل و بدا قلبي كيدق! حاس بشي حاجة ماشي هي هاديك! و فعلا كان إحساسي فمحلو!!! نسرين طايحة و ولد الغزوانية لا وجود له!!!! تصدمت و بديت كنسب و نغوت على رفيق. حملتو المسؤولية هو و علي. كون كانو معانا من اللول كاع ما يوقع هادشي. مشيت عند نسرين اللي خدات ضربة فجبهتها. حركتها و فاقت. على حساب ما قالت 15 بعدما مشيت غفلوها ربعة الرجال و ما جات فين تستعمل السلاح حتى حاصروها. ما بقى عندها الا الإستسلام حيث كانو مسلحين. فكو ولد الغزوانية وقبل ما يمشيو ضربها واحد منهم بالقبضة ديال سلاحو و فقدات الوعي. علاش ما قتلوهاش؟ ربما حيث كاينين الشهود اللي هما حنا! خداو الكاميرا اللي ما استعملناهاش و خلاو لينا رسالة مكتوبة علحيط كتقول: باي باي تهلاو!!!
صدق ولد الغزوانية مطور كثر منا و ساعات ديال الاستعداد و الخطط مشات فمهب الريح! أكبر الخاسرين فهاد العملية هو انا. انا اللي آمنت بنجاحها و بان عدوي اللذوذ غايكون مصيرو على يدي و فلخر دارها بيا!!! فالحقيقة ما كونتش عارف حجمو الحقيقي. دابا فهمت علاش كيتحكم فنصف المدينة! ناضت نسرين بعدما استرجعات وعيها و قالت لي: تيرانوفا! درتي اللي فجهدك و دابا الله يخليك نطويو هاد الصفحة!
انا: كيفاش؟
نسرين: خليني نعيش مرتاحة هادشي اللي بقى ليا من عمري! بنتي الله يرحمها و هاد الناس واعرين! انتا باقي صغير و ولادك محتاجين ليك. نسى و حيد من طريقهوم!
سكت ما بقيتش عارف باش نجاوب. تميت غادي للطوموبيل و طلعت. تبعوني ركبوا و ديماريت و بقينا ساكتين تا وصلنا للسونتر ديال المدينة. نزل رفيق و تم غادي بلا ما يسلم علينا. ربما تا هو حاس بالحسرة واخا ما مبينش. وصلت نسرين و تميت راجع!
نادية ما حاضراش كانت كتاصل بيا و ما جاوبتهاش. لقيت sms كتقول غاتمشي لدارهوم واحد 3 ايام حيث الوالدة ديالها مريضة. مليت من الخدمة و من كلشي. دابا عاد فهمت ديك إلعن بو العالم آش كتعني! بغيت نسى هاد النهار و نمحيه من الذاكرة. طلقت الدوش و جلست تحت الرشاشة مربع و جامع يدي و مغمض عيني! شحال بقيت؟ ما رديتش البال. سديت الروبيني و خرجت و تلاحيت فوق الكنابي تال الصباح. فقت لقيت 9.00!! ما بقيتش مسوق واش معطل و لا باقي الحال! معمرني درتها، رشقات ليا نفطر ببواطة ديال السردين! حليت و بديت نلغج! تبعت ليها نيسكافي، لبست و خرجت. كنت عارف مصارني غايكلو الدق و كنتسنى غير امتى يبدا المغص! وصلت للبيرو و 30 دقيقة كانت كافية باش يبدا الوجع! ما بقيتش قادر نبقى ساعة فالكوميساريا! خاصني شي سبب باش نخرج. حتى من الكومسير وليت كنتفاداه! ملي وصلو لخبار ديال الفياسكو (الشمتة) كشكش مزيان و كون كنا قدامو كون تيرا فينا! انا اللي تحملت المسؤولية الكبيرة. وصيت البوليسي اللي عند الباب اللي سول فيا اقوليه مشيت كاو!! ديماريت و تميت سايق حتى لفارماسيي. خديت باش نكالمي وحاس براسي شداني صريصرا! ما حاملش نمشي للدار! مشيت ديريكت لواحد القهوة و تما رناحيت….! اللي كيعرفوني كيسلمو عليا و نا ما كاينش فهاد العالم. مزال ما تهضماتش ليا!!! هادشي جا بالزربة و فيه بزاف ديال الصدف! الروايض تفشو بربعة، البورطابل ديال علي و رفيق ما شدش ليهم، بنت علي مريضة، نسرين خدات دقة فالراس و كان بإمكانهم يقتلوها….نو نو نو….القضية فيها إن!!! جاتني فكرة و ترددت بزاف و فلخر قلت نجرب ما خاسر والو! عيطت على نادية و سولت على ماماها كيف بقات و قالتلي صافا ماشي بحال اللول. قلتليها توجد راسها محتاجها ضروري! بغات تبدا فالأعذار و قطعت. 12.00 وصلت لدارهوم و هزيتها. عاودت ليها كلشي و تاهي استغربات. مشينا لمارشي و خديت بوكي ديال الورد و دزنا لدار علي. هاد الوقت مزال خدام. ماشي هو اللي كيهمني! وصلنا و صونيت. جاوبات مراتو اللي كتعرفنا. هبطات حلات الباب. رحبات بنا و دخلاتنا. باين من عينيها انها كتساءل على سبب الزيارة و فهاد الوقت بالذات و هادشي اللي زاد من الشك ديالي! ما بقي فيا اللي يصبر سولتها: فين البنيوتة؟ كي ولات؟ ياكما شي حاجة خايبة؟ ما فهمات والو!
هي: شكون؟ سارة؟ لا بخير ما بيها والو؟ علاش؟
انا: لا غير… هاد ليام كاين شي عدوى و قلت ياكما تاهي تعادات!
هي: لا الحمد لله ما عندها والو. و تا خوها الصغير بخير. راهم مقابلين الرسوم!
خاص نبرر هاد الزيارة و ما لقيت ما نقول. حيث غريبة نجيبو الورد و نجيو مع ميدي على ود بنت مريضة!
ممكن نسولو فالتليفون… لاباس، نادية كان عندها التبرير!
نادية: شحال هادي ونا تنقول نجي نشوفك أ لحبيبة، ملي كنت راجعة من عند ماما اللي كانت مريضة، ما تشوفي باس، وحنا دايزين قلت نستغل الفرصة و نجي نزورك. و الله ما كاين الوقت واخا ما كنديرو والو!
مرات علي: ربي اخليك أ لحبيبة!
هاكا فكاتني نادية من هاد الحصلة! جلسنا نص ساعة و خليناها قبل ما يدخل علي…دونك رفيق كدب عليا و بنت علي ما مريضاش! ردوني كامبو و نا اللي حاسب راسي مطور! باش يمكن يفسروا هاد الشي؟ المورال ديالي هبط و فكرت ناخذ راحة لمدة 15 يوم. حتى من الكونجي ديال العام الفايت ما شديتو! تسخسخت ما فيا اللي يزيد فيها ضربة! تاصلت بالمسؤولين و طلبت روبو فللول كان الرفض و عطيتهوم التبريرات عاد وافقوا. 3 ايام من بعد اتاصلت برفيق و قلتليه ضروري نشوفو! من داك النهار ديال الفرشا ما دوينا و حتى علي من بعد الزيارة لدارو ما هضرش معايا. كنت كنتسناه يحاول يبرر الكدبة ديال مرض بنتو و ما سولش!
و لى الشبح ديال ولد الغزوانية ساكن معايا ما قادرش نمحيه من دماغي. كنت عاقد الأمل باش تكون هاد العملية إنجاز كبير و نقدر نترقى و دابا وليت عايش فالكوابيس. حتى من نسرين ما بقيتش كنعيط ليها. خاصني نفهم آش وقع بالضبط. كنت كنحاول نحل لغز ولاو عندي ألغاز! نادية ما بقاتش قادرة تحمل هاد الريتم و حاولات معايا باش نبدا صفحة جديدة سوا معاها سوا فشغلي و ما لقات مني تا تجاوب. فلخر قررات تمشي لدارهوم وقالت الى كنت مازال باغيها راه عارف فين نلقاها!!
صونا التلفون وكان رفيق اللي تاصل!
انا: فينك؟ خاصك شهر باش تهضر معايا؟ ياك قلتليك بغيت نشوفك!
رفيق: غي مع مشاكل الدنيا! اوكي غانجي ناخدك.
أنا: كيفاش تاخذني؟ انا طلبت نشوفك بغيت نهضر معاك ماشي طلبت تخرجني نتسركل!
رفيق: من بعد و غادي تفهم!….نسرين كتسنانا فدار فلعروبية و غيكون علي حاضر!
أنا: آش كتخططوا؟ باغيين ضحكوا عليا بحال المرة الفايتة؟
رفيق: حنا ما ضحكناش عليك حنا مشينا معاك فالطريق اللي ختارتي و خرجنا من بعد ما وصلنا للهدف!
أنا: آش من هدف؟
رفيق: شوف! نص ساعة و نا عندك…يلاه وجد راسك!
قطع وخلاني حال فمي ما فاهم تا لعبة! نوجد راسي؟ مدة هادي ما شفتش راسي فالمرايا. دخلت للدوش بفففف! اللحية مشعككة !!!!! دوشت مزيان و حسنت و لبست و تعطرت. قبل ما يجي رفيق اتاصلت بنادية و قلت ليها ترجع للدار و تستغل غيابي باش تخملها راه ولات حالة! بلا ما نعطيها التفسيرات فهمات انني خرجت من الريتم!
وصل رفيق و بيبا عليا باش نخرج عندو. تبادلنا شي سلام بارد و ديمارا. الطريق كاملة ما هضرناش.
وحنا غاديين بقيت شارد و عقلي مع ولد الغزوانية! النباح ديال الكلاب علامة اننا قربنا من الدار. ما بقى والو و تبان الحقيقة و الشكوك دياولي يتبخروا!
هاد المرة نسرين موجدة طبلة و كراسا عند باب الدار. علي وصل قبل منا و غير شافني حدر راسو و كون صبت نترمى عليه! نزلت و تميت غادي جهتهم و فواحد اللحظة كنت غنرجع فحالي!
جلست من بعد السلام. بلى ما تسولني نسرين هزات البراد و كبات ليا كاس. هاد الكاس ديال أتاي هدني شوية و بغيت نعرف القصة!
-رفيق: بلا شك كتساءل علاش حنا مجموعين هنا؟
– أنا: فنظرك؟ (قلتها و نا معصب!)
-رفيق: اوكي أوكي…دابا تعرف كلشي! تكالما لي مع راسك!
– انا: واخا غادي نتكالما غير طلقوني عفاكم!
أخيرا علي نطق و بدا يحكي!
علي: القصة بدات ملي كان ولد الغزولنية فداك الموعد مع العصابة اللي فلمتستودع!
انا: هادي عارفها و من بعد؟
علي: النهار اللي كان ولد الغزوانية بين يدينا هو النهار نفسو اللي وقعات فيه الجريمة المتعلقة بكوثر!
-انا: ياك تال من بعد عاد لقينا الجثة!
-علي: حيث كان هذا هو القرار ديال نسرين! بغات الجريمة توقع من بعد القبض على ولد الغزوانية وبغات يلقاوها فالمستودع!
بقيت حال فمي و ما قاشع والو…..
علي: نسرين غاتكمل ليك الباقي…
درت راسي ما بقاش تيهمني و خديت واحد الجورنال و بديت نقرا فالعناوين: الهدنة في سوريا- انخفاض أسعار الذهب…غرق سفينة…اختفاء ابن الميليونير م.س في ظروف غامضة….
سكتو كاملين بحال الى كايتسناو مني اﻹذن باش نكملو كلامنا. حطيت اللجورنال وشفت جيهتهوم:
أنا: أها!!! هي قلي نسرين هي العقل المدبر ديال هاد الفيلم! بلاتي نفهم و نشوف الدور اللي عطيتوني واش جا معايا و لا غير كملتو بيا المشهد!
بقاو شي تيشوف فشي و نسرين باينة فيها الحيرة واش تهضر و لا تبقى ساكتة!
أنا: يلا هانا كنسمع!
نسرين (أخيرا دوات!): شوف تيرانوفا! أنتا أعز صديق ليا و مستحيل نخونوك! كلكم عزاز عليا و لكن انتا عندك مكانة خاصة! هادشي كان فوق إرادتي. غامرت بصداقتنا و ماشي بعيد نخسرك و لكن الى شرحت ليك اﻷسباب غادي تعذرني! قضية ولد الغزوانية هي قضية ثانوية بالنسبة لينا….
-انا (قاطعتها) ثانوية؟؟؟ و بنتك اللي مشات ضحية بسباب هاد المجرم؟ بلاتي كملي! مزال ما فهمتش كيفاش اختارتي وقت الجريمة و مكان تواجد الجثة! – نسرين (كتحاول تبقى هادية و مرزنة): الى بغيتي تفهم سكت و اسمع! اوكي؟
حركت راسي دليل علموافقة و قلت: كملي!
نسرين: بنتي تغتصبات و تقتلات الليلة اللي اعتقلنا ولد الغزوانية. بعد ما تفارقنا عيطات ليا على أساس نتلقاو ديك الليلة. سولتها علاش رجعات دغيا من الرحلة و قالت ان واحد الشخص ديما لاصقها و تبعها تال الرحلة. سولتها واش كاتعرفو قالتلي كاتعرفو. باه شخصية معروفة فلبلاد و عندو نفوذ كبير وقالت سميتو. ضنيت شي مراهق اللي غاينساها بعدما يمل و مايلقاش منها شي تجاوب. ولكن كوثر كتهضر معايا و هي مرعوبة. طمأنتها بأن كلشي غايولي بخير! بمجرد نسالي المهمة نرجع للدار و ما عندهاش مناش تخاف. سولتها واش صحابها فراسهوم، قالت ما كتبغيش دخل شي حد فمشاكلها الخاصة و كتفضل تحلهوم بوحدها. انا اعتقدت انها مجرد وساويس ديال بنت فسنها و ما عطيتش اهمية كبيرة للحدث! ساعة من بعد حاولت نتاصل بيها و لقيت البورطابل طافي! تشوشت و ما بقيتش قادرة نصبر. مشيت بسرعة ونزلت كنجري للدار. لقيت الباب محلول و هنا حسيت ان شي حاجة وقعات! دخلت….. ( نسرين وقفات و بدات تبكي و جا رفيق شدها من كتافها)…لقيت كوثر مقتولة و كلشي كيدل على انها تغتصبات قبل ما تقتل!!! تلاحيت فوق من الجثة و بديت نبكي. بغيت نغوت و تقطع فيا الصوت. ساعة ونا حداها و كنفكر! علاش علاش علاش بنتي كبدتي! الشي الوحيد اللي عندي فهاد الدنيا خداوه مني! شنو ذنبها و باش من حق يديرو فيها هاكا؟ حيث لاباس عليهم ويدهوم طويلة؟؟ و لكن حقي غناخدو بيدي!! فاش غينفغني الى تحبس؟ ولا حتى الى مات؟
غيخصصوا ليه جناح ملكي فالحبس ومن بعد 4 او 5 سنين باباه غيشري حريتو ويوليو بنات الناس رخاص، ادير فيهوم ما بغى! لا !!! ما يمكنش نخليه اتمتع بحياتو كما بغا. لازم يدفع الثمن ويدفعو غالي! انا فهاد اللحظة ما بقيتش فخدمة القانون لأنه توضع باش يحمي اﻷقوياء!!! شفت ولاحظت الهوس ديالك بولد الغزوانية وأنا عارفة ان ماعندو تا علاقة بكوثر وجاتني الفكرة ندير تمويه ويبقى ولد الغزوانية متهوم وهو حر حيث ما كاينش شي دليل اللي يورطو. كان صعيب عليا نحطك فهاد الموقف ولكن قلت غتحس بيا كأم وتقدر شعوري. الصورة اللي كتبين ولد الغزوانية كيشوف فكوثر هي صورة مركبة وكانت هادي فكرة رفيق. هو اللي صاوبها بالفوطو شوب وزرعها ليك بين التصاور اللي عطيتك! ملي دازت الصدمة تاصلت بعلي ورفيق. حضروا فالحين وتأثروا بالمشهد ديال كوثر غارقة فدمها لدرجة ان رفيق ما تحملش وبكى. عطيتهوم السمية ديال ولد المليونير وصدقوا كايعرفوه وكيعرفوا فين كيدوز الليالي ديالو. لقينا مجموعة من الكانيت ديال البيرة وشوية من الكوكايين. يعني انه خدا وقتو باش يتكرفس على بنتي! تصدر الحكم وقلت لرفيق وعلي بغيت نشوفو هاد الليلة قدامي حي ولا ميت!!! الثأر ديال بنتي أمانة فعنقي!!! عندنا 18 ساعة خاص كلشي يكون تقاد. اللي غتاصب وقتل كوثر خاصو يتبعها والجثة ديالها تحول للمستودع. عرفنا غادوز مدة قصيرة ويلقاوها. وفعلا دوك الدراري كان هداك هو مكانهم المفضل فين كيلعبو! الليل كامل علي ورفيق كيقلبو على المجرم ومع جوايه الفجر عرفو فين سهران. تسناو تا بغى يمشي فحالو واستغلو الحالة اللي كان فيها، سكران مخدر جرتيلة، وهزوه بلا ما يقاوم. اتفقنا يديوه لداري فالعروبية. وصلوه وسدو عليه. ملي رجعو لقاوني موجدة الجثة والميكة باش نغطيوها. جاهدت نفسي باش نتحمل هاد السيناريو ولكن الطريقة باش ماتت بنتي خلات قلبي حجر وما بقاتش عندي شي حاجة سميتها الرحمة او الشفقة.العين بالعين السن بالسن والبادئ أظلم! تعاونا حتى خبيناها فالكوف وديناها للمستودع وحطيناها فالبركاسة!
من بعد شدينا الطريق للعروبية وتم بدينا التحقيق مع اللي رزاني فبنتي! ما حاولش ينفي وبغى يبرر ان هذا كان غير خطأ وما كانش ناوي يقتلها وأنه كان تحت تأثير المخدرات. بكى ودار فحوايجو من العنف اللي تمارس عليه من طرف رفيق وعلي. انا سؤال واحد اللي بغيتو اجاوب عليه ولقيت الجواب هو: كون كانت كوثر وحدة من عائلتك ما نقولوش اختك ولا مك! آش غدير؟ وكان جوابو: نقتل اللي تعدا عليهوم!
انا ما كيهمنيش الموت ديالو بغيتو يعيش حتى يتمنى الموت وما يلقاهش!
و لكن كنا خايفين ليرجع لعائلتو و نوليو حنا اللي مقتولين او الى عندنا الزهر ناخدو شي سنوات فالحبس. ايه بنتي ماتت غايقولو ليا و لكن ما عندكش الحق ديري شرع يدك! خدينا القرار و كان هذا هو الراي ديال علي و رفيق اننا نعدموه! طلبت منهم اخليوني معاه و غانتكلف بالمهمة لأنه فآخر المطاف القضية ديالي!!! فعلا خرجو. جبدت المسدس و حطيتو فوق جبهتو. غمض عينو و بدا يبكي و يستعطف! طلقة وحدة كانت كافية نصيفتو للعالم الآخر!
نسرين كتعاود كرهاتني فهاد الدنيا و درجة اليأس اللي يمكن نوصلو ليها! حرت ما عرفتش واش نلومها ولا نجي حيهتها! اللي دارتو كيتعتابر جريمة و كيفاش قدرات من بعد سنوات ديال الدفاع على تطبيق القانون صدقات هي اللي ختارقاتو و بمساعدة من جوج تاهما فنفس الخندق! كون كنت بلاصتها كيفاش غنتصرف؟؟ اللي زاد دهشني كيفاش قدرات تقنع رفيق و علي بوجهة النظر ديالها و يسايروها فهاد الطريق اللي خدات؟ لكن من واحد الناحية تساءلت كون كان القانون كيتطبق على الجميع بحال القوي بحال الضعيف واش كانت توصل لهاد النتيجة؟ كما كان الحال حتى انا مساهم فهاد الشي. حيث تركيزي كلو كان على ولد الغزوانية! كنت باغي نورطو باي شكل من الأشكال! نسيت داكشي اللي قراونا و وليت واخدها مسألة شخصية بيني وبينو فحين كان خاصني نتعامل مع القضية بشكل اكثر واقعي! هادشي اللي سهل على نسرين الطريق اللي خدات. بسببي لقات الحل باش دير التمويه!
علي: ملي خرجنا سمعنا الطلقة و عرفنا ان الشغل سلا و ما بقى عندنا ما نديرو هنا. مشينا و خليناها تبرد نار الانتقام اللي حاسة بيها. الغد جينا و اتافقنا على كلشي باش الاكتشاف ديال الجثة يكون لينا مفاجأة بحال الجميع!
-رفيق: بالنسبة للاختطاف و التحقيق مع ولد الغزوانية كان فقط باش نخليوك تمشي فهاد الاتجاه و حنا عارفين ان ما عندو تا علاقة بكوثر. علي ما مشاش ايدي بنتو للسبيطار مشى بطلق ولد الغزوانية و ديك الدقة اللي جات لنسرين فجبهتها كانت منو (علي)!!! درنا اتفاق مع صاحبنا باش ما يبلغش و يدير شكاية مقابل انك تعطيه التساع و وافق و علي اللي وصلو….
نسرين: ربما غتسولني علاش ما لجأتش ليك ملي لقيت الجثة ديال كوثر!!! ببساطة لﻷنك، بخلاف علي و رفيق اللي كتقول ديما عليهم ان اسلوبهم من المدرسة القديمة، كتآمن بللي القانون خاص ياخد مجراه!!! أنا أم و منقدرش نشوف بنتي كيف مشات و نتسنى القانون اعطيني حقي! حسبني مجرمة و كنستحق العقوبة و لكن هادشي اللي عطا الله!
انا: و الجثة ديالو فين درتيها؟ لحتيها فشي واد؟
نسرين هزات صبعها و شيرات جيهت واحد الشجرة ديال الصفصاف. تبعت الاشارة و مشيت للبلاصة اللي شيرات ليها
لقيت قبر باقي ترابو فازك و مواطي. تبعوني و قربات مني نسرين…
نسرين: ياكما بغيتي نديرو التشريح كيفاش مات؟ راه دفنتو بحوايجو و حتى صلاة الجنازة ما تقامت عليه! بقى فيك؟
درت عندها و باين فعينيها انها مرتاحة للشي اللي دارت!
-انا: و الله ما عرفت ما نقول (صت و مشيت لطوموبيلتي). ديمارت و طليت على الريتروفيزور. بان ليا رفيق و علي تاهما ركبو و خلاو نسرين بوحدها. من بعد هاد النهار اللي كلو مفاجآت لقيت راسي فحاجة نسمع شوية ديال الموسيقى. درت على اﻹذاعات كاملين و شديت rabat chaîne inter ….
بعد 12 سنة!
علاقتي بنادية تحسنات بزاف و رزقنا الله ببنت و ولد. تبدلات حياتنا و ولينا مفاهمين. التجربة اللي عشتها هادي 12 سنة خلاتني نعاود نراجع راسي و اقتانعت ان الحياة قصيرة و الواحد خاصو ياخدها منين خفافت. تغلبنا على جميع المشاكل و وليت مفرق وقتي بين خدمتي و بين واجباتي العائلية. الكومسير خدا التقاعد و نا ترقيت و وليت كوميسير ولكن فمدينة خرى. علاقتي بالزملاء تقريبا انقاطعات و كنتواصلو مرة مرة فالاعياد و المناسبات. رفيق ما بقاش فالبوليس و دار داك المشروع اللي كنت كنحلم بيه. دار شركة ديال الأمن الخاص. علي ولى مؤطر فمعهد الشرطة. اما نسرين ما بقينا سمعنا عليها والو تا لواحد النهار تفكرتها نادية و قالت لابد نديرو ليها مفاجأة و نمشيو نزوروها. ديما تنقول واخا واخا حتى طلبوني الدراري و بغاو اعرفو المدينة اللي كبرت فيها و دوزت سنين ديال الخدمة. جا الكونجي و قررت نحقق ليهم هاد الحلم. سولت على ولد الغزوانية و قالو لي انه مات فحادث سير. كان سايق سكران و خرج من شي فيراج خطير. السفر غيكون فشهر يوليوز ملي يشدوا الدراري العطلة بشرط يجيبو نتيجة زوينة. و ما خيبونيش كل النتائج فالمستوى…
8 يوليوز كلشي موجدينو باش نمشيو ندوزو العطلة فمدينتي اللي ما بقا عندنا فيها تا حد من العائلة. نسيبتي الله يرحمها ماتت من شي 6 سنين و الدار باقا ما تبعات ما تكرات! تما غندوزو هاد الشهر! فقنا بكري و بدينا السفر…
الدراري عجباتهم المدينة و ما خليت فين ديتهوم و بالخصوص عاجبهوم البحر. كون لقاو يعيشو فيها. اتافقنا انا و نادية نعيطو لنسرين قبل ما نمشيو عندها بعد ما سولنا وعرفنا انها باقا ساكنة فدار ديال العروبية. قلت مزيان نيت نبعدو على صداع المدينة!
كان استقبالها لينا من داكشي. فرحات بينا و بالدراري اللي عتابراتهم بحال حفادها (هي بغات هاكا وخا قلنا ليها راك مزال صغيرة! فالحقيقة تغيرات بزاف و باين ان الفرحة مشات نهار مشات بنتها. شعرها شاب و مشيتها ولات ثقيلة).
تحت الإلحاح ديالها ضطرينا نحولو البكاج و نجيو نكملو العطلة عندها.
نادية كتبقى مع نسرين و انا و الدراري نضلو نجريو و نكتاشفو المنطقة. نهار قبل ما نودعو نسرين و نمشيو بحالنا و نا كنجري مع الدراري، ثارت انتباهي ديك الشجرة ديال الصفصاف. و تفكرت ان تحتها كاين قبر ديال شاب ارتكب جريمة و تعدم خارج القانون. بدون اي دافع مشيت جيهت القبر و تساءلت علاش ما تهبش؟؟؟ قبر بهاد الشكل الكلاب لابد احاولو اهبشوه!!! فكرة جاتني و قلت يمكن عمراتو مزيان بالحجر و لكن بانت ليا المنطقة ما فيهاش الحجر! واش يمكن فليلة وحدة تحفر و تدبر على الحجر!!! حطيت صبعي على فمي و كنمشي و نجي و الشك كاياكلني! شفت ياكما كاين شي حد مقابلني و لقيت راسي بوحدي. قلبت تا لقيت بالا و فاس و بديت نحفر نحفر و لقيت الأرض قاسحة ما عمرها تحفرات و ما كاينش الأثر ديال شي حجر. زدت كنحفر حتى تيقنت ان ما عمر كان شي قبر هنا. نسرين هبشات التراب و رشاتو بالماء باش يبان انه فعلا قبر! إيلا ماشي هذا هو القبر فين غتكون دفنات الجثة؟ رديت التراب كيما كان وشتت اللي شاط. رجعت البالا و الفاس لبلاصتهم و مشيت غسلت ونا راد البال يا كما يكون شافني شي حد. جبدت كتاب و مشيت جلست فالجردة! تصرفت عادي و تأكدت أن نسرين ما غيراتش من تصرفاتها. يعني ما فراسها والو من الاكتشاف اللي درت! قررت نزيد نهار على اساس ان الطوموبيل اونبان و الميكانسيان قال كيخصو نهار باش اصلح العطب. غنزيد نهار باش نراقب نسرين اللي عندها خبرة طويلة و لكن أي إنسان ضروري تكون عندو نقط ضعف. يمكن الثقة فالنفس زيادة على اللزوم هي نقطة ضعف نسرين! اللي باقي فهاد النهار ما بانلي والو ماشي عادي! حاجة وحدة ضراتني فراسي و ثارت فضولي هي علاش نسرين ماشي مرة ماشي جوج اقتارحت عليها نهنيها فماكلة الكلاب و ندي ليهم ماكلتهم مادام مربوطين و منها يولفوني وكان ديما جوابها بالرفض و بعد المرات بشي من العصبية. قررت نراقبها ملي تبغي تدي ليهم ماكلتهوم. تسنيت هاد الفرصة النهار على طولو حتى لجوايه الستة. تبعتها من بعيد و تفاجأت ملي شفتها خلات فين مربوطين الكلاب و دخلات لواحد البيت مهجور و مطرف. خطوة خطوة تا لحقت عليها. دفعت الباب بشوية و اكتاشفت المستور!!! راجل مربوط بحال الكلب من عنقو، لحيتو واصلا الأرض و موسخة و ظفارو كبر من صباعو. عينو قراب يتسدو و حوايجو موسخين و مقطعين و تايقضي حاجتو فبلاصتو.!!!! بففففف!!!دابا فهمت نهار قالت آش غندير بموتو!!! نسرين ما قتلاتش مغتصب و قاتل بنتها!!! نزلاتو الى اقل درجة من الحيوااااان!!!!
-انا: دبا رتاحيتي
نسرين اللي كانت محنية و عاطياني بالظهر و كانت كدفع الماكلة ديال الكلاب للسجين ديالها بواحد العمود من الحديد! دارت جيهتي و كأن الأمر عادي قالتلي: و نتا رتاحيتي؟
وقفات و بعدات على السجين و كتشوف جيهتي و جيهتو. انا قربت منو بدافع الفضول ربما باش نشوف ﻷي درجة الإنسان يمكن يفقد الآدمية ديالو. كنت كنتسناه يكون عدواني و تفاجأت ملي بدا يعيط ليا: عفاك….عفاك…عفاك..! بغى يقولي شي حاجة! زدت قربت منو باش نسمع مزيان قالي: عفاك قليها تبدا تهضر معايا!!!!
هدا هو الطلب ديالو!!! ما بغا والو غي تهضر معاه!
ما بقيتش قادر نتحمل. آش يمكن لي مزال نغير؟ فات الفوت!! جبدت المسدس و حطيتو قريب منها و قبل ما نخرج قلت ليها: صافي الله يجعل البركة! رحمي راسك و رحمي السيد!! خليتها و خرجت كنتمشى او بالأحرى كنجر فرجليا!. تميت غادي و ما عارفش فين بالضبط حتى كنسمع بوووووم. كانت طلقة من المسدس!!!
ما وقفت حتى لقيت راسي فالجردة. تلاحيت فوق الكرسي و كنتسنى… فيقني من هاد الشرود ظل إنسان. هزيت راسي و لقيت نسرين شادة المسدس بالمقلوب و يديها ممدودة جيهتي. بقيت كنشوفيها وضاعت مني الكلمات.
نسرين: ها الأمانة ديالك! شكرا ريحتيني!
انا: و الجثة؟
نسرين: ما يحتاج للقبر! النار ما غتخليش ليه الأثر….
النهاية
شاركنا رأيك في هذه القصة 🌹