خرجات حمرا من لحمام والفوطة على راسها ومكمشة فالبينوار عاد رجعات فيها الروح وضحكات ليها الحياة . مشات حلات الباب لقات المرى دلميناج فالباب وتبسمات ليها ورحبات بيها ودخلاتها
سكينه: خالتي عيشة سمحي لينا على هاد روينة
عيشة: ماكاين مشكل ابنتي ونتي بحال بنتي حتى بنتي سميتها سكينه
سكينه: الله يخليها ليك
مشات للكوزينه كدور تالفة ورجعات عند عيشة قائلة
سكينه: الى بغيتي تفطري فطري كلشي فالثلاجة ما تحشميش .
رحبات بيها ومشات للبيت جبدات واحد السوشوار فيه الموت ديال غالي وصغير كينشف بيه غير شعرو فالدار وبدات كتنشف بيه وتعاود حتى طاحو يديها ودارت بناقص حطاتو ولبسات سورفيت بلو مارين كتحمق وواسعة من لفوق ولوات شعرها ودازت على بانطوفتها ومشات للصالون لي حداها كتنشف شعرها وتيليفون فيدها كتهضر مع غالي وتكتب ليه فالواتساب
سكينه: ماسوشوار ما تالعبة سخفني جالس كيعطس عليا
غالي: ههههه
سكينه: شعري ماشي ديال داك سوشوار انا خصني تنين يسوط عليا ههه
غالي: دابا خليتي لمرى فالدار بوحدها؟
سكينه: اه. خليتها وغندوز للحانوت راه عطيتها الساروت غير تسالي دوزو ليا للمحل
غالي: وبانت ليك مزيانة ؟ تيقة ؟
سكينه: لا باينه اصلا بعقلها دوريشة باغا تخدم على راسها ومعروفة ديك المرى زعما حتى فوجهها باينه
غالي: نتي تعرفي
سكينه: سديت بيت نعاس وصافي صونيت ليك قبيلا ماجاوبتينيش
غالي: كنت ف اجتماع شوية ونعيط ليك
سكينه: اوك حتى انا غندخل دابا للاجتماع يالاه تهلا الزين بيزو
حطات تيليفون وناضت دازت دفرة دسبولة ومشات بحالها للمحل وهازة معاها زيتون مشرمل والخبز وبتيبان والحرشة فيها الفرماج ودخلات على المراكشية لقاتها متكية كتسنط لعضامها ومغطية بواحد الكاشة خفيفة
سكينه: هييه !! ناري غتجيبي لعكز للحانوت بهاد النعاس اصاحبتي نوضي نوضي
مراكشية: اختي المرت تلبرد مكاين لي غيعرس فهاد السم
سكينه: وانوضي ديري اتاي هانا جبت باش نسخنو
مراكشية: لبرد داخل دابا مكاين غير نعاس
سكينه: الله ينجيني اختي اش بغيتي عندي!! الله يجيب ليا شي رزييق سااهل ماهل ياربي
المراكشية : امييين ..لينا كاملين
ومع النوضة اللي غتنوض المراكشية لقات واحد ميتين درهم طايحة فالحانوت وطارت عليها
مراكشية: هييه!!! ميتين درهم
سكينه: فيين!!!(كتقلب) انشوف
مراكشية: رزقييي اختي رزقي هههه
سكينه: ااري لمك راه انا لي مرزاقة هههه قسميها
تشادو على ديك ميتين درهم بالضحك وغالبا طاحت لشي وخدة دخلات عندهم وبحكم سكينه ماعندها كامرات والمحل عادي ماعرفوهاش دايالمن شدوها وقسموها وجلسو كيضحكو حتى دخلو شي كليانات كيدورو فعينيهم شي جلس وشي كيشوف تكاشط وسكينه كتجمع معاهم بحمكم معرفتها بيهم حتى دخلات عيشة لاحت السلام كضحك وناضت سكينه مشات لاكيص جبدات لفلوس خلصاتها وخدات السوارت ورجعات جلسات
لكليانه: عيشة الله يعمرها دار كتجي عندك ؟
سكينه: اه
لكليانه 2: ومالك نتي ماعندك يدين اويلي؟
سكينه: ههه عندي غير رجلين كيدورو
كليانه 2: اوييلي انا مندخلش مرى لداري تشقا ليا مالي ماعندي دراع
سكينه: دار راجلك اصلا واش دارك كاتبها ليك؟
كليانه1: دارها مراتو كتسما دارها
كليانه 2 : حتى انا حتى واحد ميبرد ليا الشقا قد يديا
سكينه: اختي يبرد ولا يجلس انا مافياش ومامسالياش اصلا
جاوها فالمحل وكليانات وماصلاحش ليها ترد عليهم كما ينبغي وسكتات خلاتهم كيهضرو وكان حوارهم كامل كيدور على شنو طيبو شنو وجدو وجري عليا نجري عليك حتى خرجو بحالهم وبقات غير سكينه والمراكشية جالسين متبعين ليهم لعين
المراكشية: زعما راني حادكة
سكينه: شو غير كي دايرة يا ربي السلامة .. واش هاديك هي انا!! شو حالتها مسكينه كي دايرة كيحساب ليها عاادي وصبعها ملوية عليه فاصمة
مراكشية: زعما داز فيا موس
سكينه: بطلة ههه ناري على بشار .. قالت لك مكيبقاش ليا الوقت حتى نحك راسي.. الدار نقية وراسها فيه القمل وطوابگها يدوخو مدينه بريحة الصنان ديال الشقا
المراكشية: هههه يخخخ
سكينه: دايزة على جلابة وصندالة وجايا كتجر زعما نقضي غراض ..مسكينه ماعندهاش الوقت دوش وتحيد موسطاشها وزغبها وتمشط شعرها .. عندها الوقت تسيق وتغسل ماعن وهي هانيا ماشي مشكل..ماشي شي حاجة راه نقية واخا ينوض فيها الدود ههه
مراكشية: عيفتيني يخخخ خلينا نشربو هاد كاس داتاي
سكينه: فيها واحد ريحة بحال الكافور ياربي سلامة موحال واش كتشم ريحتها ، كتعطي منها واحد الريحة فشكل..ويديها طايبين بجافيل صبعانها منفوخين ..تسلخ الجلدة وماتجيبش لي يعاونها الله يستر
مراكشية: واحد جارتنا كتقول لراجلها عطيني باش نجيب مرى دلميناج تخمل ليا وفاش كيعطيها مكتجيبهاش ومكتخملش وكتشد لفلوس وتسكت حتى مابقاش كيعطيها دابا واخا مرضات مابقاتش كتقدر توقف بالضهر وكتقوليه عطيني نجيب لي يعاوني كيقوليها ديري داكشي علاش قديتي
سكينه: واخا تبغي تجيبها بصح ميعتقهاش دابا
مراكشية: واييه.. حيت كانت كتفلا عليه كيحساب ليه غيلقا بصح الدار مخملة .. فاللخر مكتخمل ما والو كتشد لفلوس وتبقا تخسرهم غير فالماعن كل مرة شارية طبسيل فشكل
سكينه: فلحضة ادراك) فخبارك عمري شريت شي كاس ولا شفت جهة الماعن
مراكشية: انا كيسطيوني الماعن عرفتي شحال كنشري
سكينه: انا عاوتاني كيسطينوني الحوايج وهاد المرة عمرت واااحد الشاريو لغالي من واحد الموقع خلصو هوا كاامل
مراكشية: انا لا كنشري الماعن بزاف
سكينه: شنو كديري بيهم؟ كتلبسيهم؟
مراكشية:لا ههه كنحطهم وصافي كيعجبني نحطهم فوق الطبلة
سكينه: انا اختي واخا ناكل فبابي اليمينيوم ماعنديش مشكل..نسالي ونكمشو نلوحو فزبل المهم عندي لحوايج ماكرهتش يكون عندي محل ديال لحوايج
مراكشية: علاش مادرتيش شي حانوت ديال لحوايج ؟؟
سكينه: حانوت!! ماعرفتش مااا..!! مافكرتش فيه
مراكشية: كن درتي شي محل واخا غير صغير فالقيصارية
سكينه: اويييلي خاصو لفلوووس!! ولي يقابلو
مراكشية: ايوا صاافي تا نتي موجود لي يقابلو ..راه راجل كريمة الجبلية بغا يطلق المحل ديالو لي فالقيسارية طالب فيه سبعين الفريال ، جا الوسط
سكينه: هاداك هوا ثمن الكرا اصلا
مراكشية: واسيري دخلي عليه .
عمرها فكرات فشي مشروع ديال لحوايج او طاح فبالها وخصوصا فهاد الازمة لي كتمر منها والدار لي خصها تكمل خلاصها فاش يعيطو ليها وكتحمع الريال على خوه . لاكن بعد نقاش عميق وامثلة دازو قدامها ديال بنات كيبيعو ويشريو فكرات تشوف هاد المحل وتعرف التفاصيل واخا ماتكونش باغا تشدو لاكن حبها للمشاريع والفلوس دفعها تعرف ، ناضت هي والمراكشية مشاو لهاد القسارية اللي كانت معروفة وكلشي كيتقدا منها وفيها من كل نوع طرب ، ها الحوايج ها المكياج ها اللباس ها الماكلة المهم تقول سوق والكل كيمشي ليه . وبحكم معرفتها بهاد القسارية اللي فيها الرواج اكثر من اي مكان اخر فقالت علاش لا نعرف وصافي
وصلو للقسارية وداتها المراكشية عند راجل كريمة ، كريمة كانت بنت الحومة حتى هي وراجلها عسكري وفنفس الوقت فاتح محل داير فيه السوايع والنضاضر وكان المحل ديالو مقابل مع الدخلة اللي كتكون ديما عامرة . وقفات عليه كتسول وتستفسر لاكن هايهات ثم هيهات ماشي اي حاجة كنسمعوها كتجينا ساهلة فهي فالواقع ساهلة. لقات المحل فعلا بسبعين الف ريال للكرا لاكن باش يخويو ليها المحل وتشدو هي خاصها تحط واحد الخمسة دالمليون حلاوة للشخص اللي كاريه عاد يخرج ليها من تما وديك الساعة تعمرو هي وتشد بلاصتو .. وبما ان القيصارية عامرة ومابقاوش فيها المحلات للكراء وكلشي شاد فيها بيديه ورجليه وعليها اقبال كبير فكان صعيب باش تبيع وتشري تما الا اذا بغا شي واحد يخرج من المحل ويسلمو ليك وهادشي طبعا عندو ثمنو. بقات كتشاير وتناقش والمراكشية مصدومة فيها شافتها دخلات فالشطارة تقول غتكريه من غدا وكتزير مع مول المحل وشادة ليه فثلاتة دالمليون حلاوة لاكن هوا شد فثمنو وخرجات من تما متحمسة ودخلات ليها الفكرة للدماغ وعجبها الموقع و حتى المحل وشعلات فيها النار عاوتاني كما كتشعل فيها فاش كتبغي شي حاجة كتبدا طير وتزرب بلا متخمم . المهم هوا انها عاجبها وباغاها وباغا تخشا معاهم فالقسارية حتى هي وكان بالنسبة ليها حلم صغيب يتحقق خصوصا فاش كانت باغا محل وكتقلب دير فيه تنكاف ديالها ولقات انه المحل فالقسارية مستحيل حيت عليها العين والطلب والعرض اصلا مكاينش ولي دخل كيلسق مكيبغيش يخرج . زائد خايفة يبان شي واحد ويسبقها ليه حيت من السهل انه يبان كليان اخر ويعطي ما اكثر المهم يخويو ليه محل تما ويدخل يخدم لانه الرواج كاين واي مشروع تحل تما كيتمشا خصوصا البيع والشرا .
مشات كطير والمراكشية تابعاها كتجري وتعيط وسكينه العقل مشا ومابقاتش كتبت وزربانة باغا تشدو بأي وجه كان
مراكشية: اااجي بلاتي.. وا ش باغا بصح تشدي المحل
سكينه: على عجلة) اويلي عاد كتسوليني كن طلب ليا سبعة كن مشيت نموت ليه فيها ونجيبها واخا نحيدها من فلوس الدار .. واش بحال داك المحل كيضيعوه الناس اصاحبتي وانا مامتيقاش لقيتو باغي يخرج
مراكشية: منين غتجيبي ليه خمسة دلمليون؟
سكينه: غنضبر فيها واخا نبيع كلوتي سيري للحانوت نا غادية لدار سيري تا نجي
مشات كطير طلعات للدار بلا متحسب الدروج ودخلات كتجري لقات غالي يالاه حط لبيسي والكتوبا يقرا شوية ساعا بعتات عليه من السما كتنهج جايبة ليه لخبار سخونه ولسقات حداه كي لمسكة
سكينه: شنو دابا ؟؟ شنو بان ليك فهاد البلان ؟ والله ال واااعر
غالي: صبري راسك الله يسخر
سكينه: ندخلو فيه انا وياك؟؟
غالي: انا ماعندي باش ندخل معاك دابا بغيتي دخليني نتي الله يكتر خيرك
سكينه: باصرار) هاد المحل انا راه مغضيعوش واخا نعرف نهز كريدي من لبنكة
غالي: ريبة حرام
سكينه: سلفني خمسة دلمليون نعطيها ليه حلاوة يخوج يق٠٠٠د عليا من تما
غالي: ههه كيضحكو عليك الهبيلة.. زوينه هادي عطيني خمسة حلاوة ونخوي ليك
سكينه: لا غير عطيني ولا يالاه معايا اصلا غتكون معايا نتا باش نقادو داكشي قانوني ميضحكش عليا
غالي: وباك قلتيها ليه؟
سكينه: اوييلي لا !! با مكيعرفش هادشي غيسبني اللهم خليني الى خسرت نكمدها ماساق ليا حتى واحد لخبار
غالي: ايوا الله يسخر
سكينه: سلفني خمسة دلمليون
غالي: فين هي خمسة دالمليون؟؟ ههه حساب ليك راه عندي لفلوس مطوية فالبنكة
سكينه: اوييلي ماعندكش؟؟
غالي: واش كتهضري بصح؟؟
سكينه: وفين كدير فلوسك؟؟
غالي: كناكلوها فين غنديرها(دار يدو على فمو مستغرب فيها) حساب ليك الماكلة فابور ولا؟
سكينه: اويلي الصالير كله كناكلوه ميمكنش!!
غالي: هادا هوا لي كاين كامل كيمشي فهاد تخربيق هادا.. ها شريليمن علي اكسبريس ها خرجني ها كل مرة جايبين ماكلة من برا مكطيبيش كااع فدار .. لويفي لابونمو زيد لكرا ثلاتالاف درهم كتمشي هاكاك غير فالكرا .. بلا جيب جيب جيب والشاريو كيعمر بسقاطة غير ديالك نتي فاش كنمشيو لمرجان .. نزيدك ؟ هاد الشهر جبنا ليك الشوفاج قلتي كنموت بالبرد .. زيد المازوط حتى هوا .. الماء. والضو منهضرش عليه كيبقا شاعل ليل كامل وتلفازة خدامة
سكينه: مكيشيط ليك والو؟؟
غالي: واخا يشيط كااع شحال كيشيط؟ خمسة دلمليون؟ هههه اوديي
سكينه: دابا شحال عندك قولي الصراحة
غالي: واحد خمسطاش الف درهم راها فلكونط بوحدها قلنا نديوها لفرنسا فهاد السفر ندورو بيها
سكينه: ايوا عرفتي شنو عطيها لي حتى نردها ليك
غالي: ياك جامعة لفلوس مزال مكملتي فلوس الدار؟
سكينه: لا كملت صافي غير مزال ماجامعة والو دابا واصلا غنحيد منهم هاديك لخمسة (هزات يديها ) اويا ماعندي مندير ماعندي حتى حل
غالي: وا نتي تعرفي
سكينه: صافي خلي ليا ديك خمسطاشالف درهم حتى ندير ونعطيها ليك.. اصلا غنردها فجوج عراسات ولا شهراين كااع غنخدم فيها نردها هيا وماحسن منها غير دابا شطبت كلشي باش نكمل ديك الدار تا هيا شحفاتني.. مابغاتش كاع تجمع
بيتات غالي كيخمم ويحسب ويقلب فتيليفون على معلومات لي متخليهش يطيح فالنصب . اما هي ضرباتها بنعسة حداه فوق واحد الفوتوي .
الصباح ناضت ركبات حداه زربانة هازةبزطامها ودايرة نضاضر مربعين كبار ولابسة كولون وتريكو رقيق ولايحة عليها كاي كحل كبير وحداء رياضي وهوا كان بكوستيم عوال من بعد يمشي للخدمة ، داها للبنكة خرجات خمسة دلمليون شدها غالي حسبها ليها ومشا معاها يريكل ليها امورها اما هي تابعها وساكتة لي قاليها ديريها كديرها معولة عليه فكلشي .
طلع وهبط معاها على داك المحل وكاليزا ليها الاوراق وداز ليها الساروت قانونيا وشدات وراقها عندها كضحك بوحدها ومشات جلسات فطموبيل حتى رجع غالي من بعد طلع حداها لقاها كتفرنس وتنهد بتعب
غالي: فرحانة
سكينه: لهلا يوريك قداش هههه
غالي: ايوا مبروك .. قاليك هاداك واش تشري منو ديك السلعة لي تما بالجملة بغا غير يتفك منها
سكينه: اويلي. باش غنشريها وانا كنسعا لي يسلفني
غالي: ايوا صافي غنقوليه يخوي ليك الحانوت ديالك.. دابا شنو غديري فيه لحوايج نيت؟
سكينه: بارتياح) اه اخويا هما لي غيتمشاو ليا تما
غالي: وعارفة بعدا منين تجيبيهم وكيفاش
سكينه: عندك شي فكرة مثلا
غالي: دور وجهه) انا ماعندي باش نفيدك من غير داكشي دالاوراق وشي حاجة متعلقة بالبنكة .. اما داكشي لاخر ديالك مكنفهمش فيه
سكينه: غنمشي لكازا ونقلب تما … ها هيا مليون ونص ديالك يالاه خلصات ليا ثلت شهور دلكرا شتي لفلوس كي كطيير
غالي: راه هادشي فيه الفلووووس اسكينه واش كيحساب ليك غير اجي ودير مشروع ! المشاريع ساهلين
المحل ها هوا خوا ليها ،، ايوا فين فلوس السلعة وفين وفلوس الاصلاح وشنو غدير وكيفاش تبدا ومنين غتجيب لفلوس والى حصلات غطب في فلوس الدار كاملين. كمداتها وسكتات وناضت كتقلب على السلف ومنين تجيب لفلوس وبدا تسلف من سارة لي شاركة معاها التنكاف خدات منها واحد الف وخمس مية درهم وتسلفات من ليلى واحد الفين درهم وتسلفات من المراكشية حتى هي واحد الفين درهم ومشات هي وغالي فالويكاند لكازا كدور وتقلب وتسول على محلات الجملة فالاخير حطات كاع لي عندها فالبيجامات ورجعات بحالها لداك المحل فالقيسارية بليل هي وغالي وبداو يلسقو علاقات ديال بلاستيك فلحيوط وعلقات فيهم البيجامات كلهم ومشات سخفانة هي وياه للدار مع الفجر طاحو نعسو .فالصباح فاقت قبل منو نزلات حلات المحل ودوزات الجفاف وبقات كتشوف فيه وراضية بيه واخا مبهدل ومازوينش وما عامرش ومافيه لا مانكات لا زواق من غير صباغة عادية غوز ضربوها للحيط كامل فقط وزينها السقف لي كان بالجبص وليسبوط. وقفات كدور فيه وبدات تصوني على كاع لي كتعرف وكتصر عليهم باش يمشيو عندها للمحل حتى جابتهم وبدات بصحاباتها هما للولين لي كانو ناويين غير يشوفو
سكينه: كي جاكم ؟
فوز: كتسرح عينيها) مابيهش مهم فالبدية قضي حاجة وصافي..ولاكن الموقع زوين خطيير
سكينه: فوز هاكي قيسي هادي
فوز: شدات البيجامة) شنو هادي؟
سكينه: قيسيها غير قيسيها راه مرايا لور وريدو
مشات فوز كتقيس وشدات ليلى كتوريها لبيحامات حتى هي وبدات تجبدوتمد ليها
سكينه: شدي اصاحبتي شدي راجلك غيخمقوه هاد الالوان
ليلى: واناااري باغا تبيع ليا صحة
سكينه: اويييلي علاش نتوما متشريوش من عندي؟؟ نتوما لولين خاصكم تشريو مني اصاحبتي.. غنقص ليكم شي عشرة دراهم غير قيسو
ليلى: بقات غير كتشوف) زوينين الصراحة غير انا عندي يالاه شريت جوج بيجامات
سكينه: ماشي بحال هادو هادو راه اخر مكاين هه..قيسيها تانتي
مشات ليلى هازة جوج فيدها دخلات على فوز كضحك لقاتها لابساها وكتشوففالمرايا
فوز: جاتني زوينه؟
ليلى: جاتك وااعرة واقيلا شرات طاية و خدة شفتهم كاملين نفس لاطاي مافيهمش لكبار
فوز: جاتني هي هاديك عجباتني
ليلى: واعرة غير خوديها
خرجات فوز كدور فجنابها وتشوف وسكينه واقفة وكتجبد وليلى لداخل كتلبس
سكينه: عرفتي كيًبيناتك !! عبااار
فوز: جبتي طاي وحدة ؟؟؟
سكينه: اه ختي جبت طاي وحدة حتى الى ماتباعوش نلبسهم انا بعدا منوحلش فيهم
… قيسي حتى هاد الكحلة غتجيك وااعرة
ليلى: خرجات بالبيجامة) كي جاتني
سكينه: هيييه!! جاتك نق٠٠٠٠دة اليلى الى ماخديتيهاشغير سيري تخراي.. بينااااتك اصاحبتي
ليلى: سكتي نتي مسولتكش غا سكتي..فوز هضري نتي كي جات
فوز: زوينه والله تا زوينة
سكينه: ماتقتيشبيا؟؟ نتي عارفة دوقي زعما كي داير
ليلى: صافي يالاه شحال هادي
سكينه: غير ثلت ميات درهم
ليلى: هاد بنت لق٠٠٠ هادي باغا تكزرنا قالتلك غير ثلت ميات درهم مسبقامنا حنا لولين
سكينه: وصافي دابا كتحكرووو بزاف انا نقص ليكم شوية
باعت ليهم البيجامات هما لولين بزز منهم ودازت لسارة والمراكشية حتى هما دات ليهم لبيجامات حتى لعندهم وبقات عليهم هادي زوينه هادي واعرة حتى شراوهم ورجعات للمحل جلسات كتصوني وتعلم الناس يمشيو عندها ولي حطات رجلها تما كتخرج هازة بيجامة من قوة ما كتشكر فيهم سكينه وتعاود وباغا تبيع كلشي فنهار وتعاود تجيب سلعة جديدة باش تقدر دور الحركة .
دوقها كان زوين وباعت الخير والبركة ومشات بحالها فلعشية جمعات فلوسها من المخل ودازت للدار عند غالي لي يالاه دخلات عندو بدا كيشد فيها
غالي: بنتي ليا مابعتي والو جيتي بكري
سكينه: اممم.. بااااعت النص فراسك
غالي: واسيييري شكون غيديها فشي بيجامات والقيسارية عامرة غير بيهم
سكينه: نتا لي سير اما انا جبت لكليان تا للمحل وكل وحدة شرات ليها وها لي شرات لبناتها ولي شرات لخوتها .. بقات عندي غير شي حاجة
غالي: ربع يديه) وشحال باش بعتيهم؟
سكينه: كل وحدة بشحال
غالي: شحال كااع؟ شحال دابا جمعتي؟
سكينه: دابا جمعت ثلاتالاف وسبع مية وخمسين ليوم
غالي: باستغراب)كي درتي ليها؟؟ شحال بعتي من بياسة بسلامة؟
سكينه: شي عشرة ولا طناش دبياساات
غالي: شارياهم ب تمانين درهم وبايعاههم بميتين وخمسين درهم؟؟؟
سكينه: هزات كتفها ومشات كتنفض) وشنو غندير راه مزييرة خصني نتفك راه كيسالوني ناس
غالي: بقا مصدوم ) اجي اجي
سكينه: عييت فيا جووع متهضرش معايا دابا
غالي: اجي لهنا اشمن متهضرش معايا.. اااجي
رجعات عمدو كتسوط وربعات يديها
سكينه: هاني
غالي: حرام هادشي لي درتي راه رابحة فيهم كتر من نص
سكينه: خليني نصبر راسي نتا مالك
غالي: عادي معندكش مشكل؟؟؟
سكينه: غير خليني حتى نفك حريرتي ونقاد الثمن دابا مزيرة
غالي: هز يدو) وا شغنقوليك.. نتي تعرفي
دخلات لكوزينه كتقلب على ماتاكل وطلات كتسول عليه
سكينه: تعشيتي؟؟
غالي: مزال
سكينه: شنو نديرو؟
غالي: ديري لي عجبك
سكينه: نديرو انا ؟!!!
غالي: وا غير ديري لي درتيها قابلين عليها
بقات كتشوف في حيرة ودور فعينيها ومشات كتقلب ودور فلكوزينه دايخة ولحسن حضها الدنيا نقية ومجموعه كتفتح النفس وعيشة كتجي نهار اه نهار لا كتجمع ليها وتمشي بحالها .
بدات كترون حتى قلبات لكوزينه ، اما غاليكان جالس كيقرا ما بيه ما عليه حتى تفكر واحد طابليط عندو فالبلاكار وناض كيقلب عليها وعلى الاوراقديالها ومارطونتها وجمعها وداها لسكينه للكوزينه كيوريها ليها
غالي: اجي ماتبيعيش ليا هادي؟
سكينه: شنو هاديك؟؟
غالي: طابليط كنت شريتها وما خدمتش كاع بيها
سكينه: عطيها ليا
غالي: شديري بيها؟؟ انا بغيتك تبعينيها. زعما
مسحات يديها ومشات عندو كتشوف كي دايرة
سكينه: وااعرة بشحال شريتيها؟
غالي: شي ربع ميات درهم برومو كديري سبع مية
سكينه: شحال باش بغيتي تبعيها؟
غالي: هز يدو ورجع لور تكا على حرف الباب كيشوف فيها
غالي: جيبي ليا غير باش شريتها براكة عليا.. بقات محطوطة تما من الاحسن بعيعا الا تبعات ليك
سكينه: صافي خليها حتى لغدا
جمعها وقادها وعطاها ليها ورجع يقرا بينما رونات واحد المقلة ماباين ليها الراس من رجلين وداتها ليه حطاتها كلاوها ساكتين ماعيبوها ماشكروها ومشاو ينعسو .
صبحات الصباح هازة الطابليط وغادية بيها كتفكر لمن تبيعها حتى جات فبالها سارة شريكتها ومشات شدات الطريق عندها ودخلات كتفرنس وتسلم
سكينه: فيين.. كاين شي خدمة
سارة: اوييلي اصاحبتي نشفات
سكينه: حتى حنا .. شوفي جبتليك واحد طابليط وااعرة جابها غالي من برا باش تخدمي بيها.. تجبديها قدام ناس وتحطيها يشوفوك كتحسبي فيها وكدا.. وخدامة بيها تباني كلاص
سارة: كتشوف) جديدة؟
سكينه: هاهي بميكتها ليكخون ديالها جديدة.. فيها كامرة لور كتصور وكلشي ..ديال برا اصاحبتي راه عندي بحالها كنخدم بيها فالمحل كنبينها قدام بنادم كيزيد يحتارمك ويقدرك ..كتباني هاي كلاص
سارة؛ برضى)امم واش بغا يبيعها
سكينه: اه كان غيبيعها لصاحبو وقلت ليه لا غنديها لسارة خصها طابليط..حسن ماتمشي تشريها بثلاتالاف درهم يزدحوك خودي هادي دايرة غير الف درهم ودوينه وبيبضة كلااص بقاي تخدمي بيها قدام لكليان باش يزيد يحتارمك ودخلي فيها تصاور اللباسي بقاي توريهم فيها ..بنادم راه غيبغي هاد لعيبات وكدا كيقدرك ويعطيك قيمة ويقدر ميتشطرش كاع معاك ..انا فكرت فيك نتي لولة حيت اصاحبتي خصك تباني كلااص قدام بنادم حيدي عليا هاد الكتاب من هنايا متبقايش تبينيه كاع هادا ..خبيه لتحت قيدي فيه غير بينك وبين نفسك وحطي طابليط قدام الناس بيني ليهم بلي كتقيدي فيها التوارخ وكلشي وفاش تكوني بوحدك عاد قيدي فالكتاب..الناس واه عندهم بيسي دابا مابقاش هادشي هادا ديال روجيستر مكمش كامل محفر بالكتابة وداكشي عشوائي..شدي شدي هاكي
سارة: وريني كيفاش نخدم بيها
سكينه: اجي يالاه نوريك باش نمشي دغيا راني تعطلت … فراسك راه كدير شي الفين درهم ولا كتر غير مابغيتش نشحطك ههه.. كن مكنتش مزيرة نعطيها ليك فابور تخدميها على عينين الناس مي جيتني يالاه حليت داك المحل..
واصلا بلا متخلصيني اصلا راك مسلفاني الف وخمس مية قطعيها منها حتى نعطيك خمس ميات درهم
طرقات المسمار ديال طابليط ومشات بحالها للقيسارية تبيع ماتبقا من لبيجامات ولي دخلات عندها كتلسق ليها بياسة حتى قربات تكمل السلعة لي عندها وحسات براسها تزيرات وتقيدات من يديها ورجليها ومامولفاش تبقا مقابلة حاجة وحدة وبدات كتقلب على شكون يشد ليها لحانوت
خرجات ديك لعشية مهمومة كتفكر فشكون يقابل ليها لمشروع ودازت عند لمراكشية للحانوت وجلسات كتخمم ساهية
سكينه: بغيت شي واحد يقابل لحانوت… هانا غادية غدا لكازا شكون غادي يقابل ليا لحانوت
المراكشية: تباعت ليك السلعة بعدا
سكينه: تبااعت ولاكن انا خصني لي يقابل ليا ويبيع ويشري
مراكشية: ويكون تييقة (تنهدات) القضية نشفات كانت على الاقل كنبان كليانة ولا جوج وسط سيمانة دابا والو كيخليو حتى لويكاند ويتمو جايين يتخاطفو
سكينه: وا حيت البرد دابا شوفي شحال كنا كنخرجو فالصيف نخدمو وشحال ديال اللباسي كيخرجو .. كتقلااال الخدمة فالبرد راه سينورغمال ماشي غير حنا .. حتى ليلى هضرت معاها لقيتها كتشكي تل هيا وسارة نشيت الصباح عندها لقيتها مكمشة فواحد المونطو متكية
المراكشية: سارة تبارك داارت من داك المحل
سكينه: وا سلا هاديك ابنتي راه الاكتضاض عندهم تما خدامين شتا وصيف تبارك الله
مراكشية: وتيقة زعما سارة ؟
سكينه: انا كنتيق فيها بعدا وحتا الى خدات شي حاجة راه غيير شي حاجة قليلة المهم انا نصيبي كااين عمرها قالت ليا مكاين والو.. الحمد لله كل شهر كنشد حقي وكنحسبو داكشي بالستيلو والورقة وديما جايبين راس المال باش ندخلو سلعة جديدة وديما رابحة انا وهي رابحة ماشي مكاين والو فمرة
مراكشية: حيت اختي شفتها مزرزرة بالذهب تبااارك الله واحد الخاتم بعدا دايرة ضربك بيه تغيبي
سكينه: هههه مبلية بالذهب راه ماعندهاش غا هاداك عندها شي ثلاتة اخرين
مراكشية: مكتخافش يتعرض ليها شي شفار يكريسيها
سكينه: اوييلي على يكريسيها راه شرات واحد طوينيبيلة مابقاتش كتمشي على رجليها ..ومشات سافرات ليك لتركيا حتى هياااا ههه وباغا تحل محل ديالها ديال تنكاف
مراكشية: لعااار!!!!
سكينه: ايييه قالها ليا المصور ههه عنداك تقوليها ليها صافي غا خليها بغات تحل اللع يسهل عليها
مراكشية: وشكون يشد المحل لي مشاركين؟
سكينه: عطا الله تا نتي لي يشد اصلا مغطلقوش حيت كيدخل هاداك فلوس صحيحة ومعروف بسميتي انا كاشي كيعرف غير سكينه واخا زادت حداه فالبلاكة سميتها هههه طيراتني فاش لقيتها زايداها ولات سميتو قفطان سكينه عند سارة كتباتها تحتو
مراكشية: ايوا هانتي بدات من والو شوف فين وصلات
سكينه: شوفي انا معنديش ديك القضية ديال بديتي من زيرو خصك تبقاي فيه راه من لول كنت ضاربة حسابي عارفاه غدخل معايا وغتحمع فلوس وغتبغي تا هيا دير ديالها واي واحد كيبغي يزيد لقدام المهم هوا كلينا وشربنا وجمعنا منو وراه غادي خدام ولي كنشدو انا كتشدو هي غير انا كنحطهم فالدار وهي كتشري الذهب وترقع حياتها تا هيا بشوية بشوية وحنا غادين.. راه كتخدم ماشي زعما ناعسة راه كطيير تا هيا فالصيف مكتسافرش كتبقا من عرس لعرس وتقابل لكرا وتقابل العراسات واخا قبييحة كتسيف على البشار ولاكن فلداخل مزيانة
مراكشية: هي الصراحة صعيبة اختي كان كيحساب ليا سويسهلة
سكينه: كااانت درويشة دابا راه ضربك تلوحك دغيا كتسخط والبنات مكيجلسوش عندها فالمحل كيهربو ليها ..ولاكن لعرايس كيمشيو عندها ..واخا هاكاك عندها الكلمة واخا مصعورة، انا بعدا سارة كتعجبني قد لسانها قد دراعها
مراكشية: وانا ؟؟
سكينه: تا نتي بدراعك راه الناس كيشكروك وعزيزة عليا..كن ماكنتش مرتاحة معاك كوراه فرتكناها شحااال هادي… الله يسهل عليك تا نتي ديري مشروعك
مراكشية: انا اختي بغيت هي نتزوج داك ولد عمي ولد لحرام مابغاش كاع يجي كل مرة كيقوليا غنجي غنجي
سكينه: قلبي على اخرا قوليه سير تتت… انا غنمشي لدارنا نشوفهم راه قررت نقوليهم على المحل الجديد.. غنقولها ولي ليها ليها
دخلات لدارهم كدور فعينيها فالوقيتة لي كيكون فيها باها فالدار باش تخبرهم بالحانوت الجديد
سكتات فالاول حتى عيات فالاخير طرطقات ليهم الرمانة وقالت
سكينه: ايوا راني حليت واحد المحل فالقيسارية انا وغالي نجربو فيه البيع والشرا
تافت بناصر لي كان متكي وهبذ النضاضر شاف فيها
بناصر: اشنو؟؟
سكينه: حليت واحد المحل صغير انا وغالي نجربو فيه البيع والشرا
بناصر: رجع تكا كي كان) الله يكمل بلخير
سكينه: بتعجب) ما عجبكش الخبر ؟
بناصر: وا الله يكمل بلخيييير المهم ديرو شي طايلة
سكينه: بخفوت) اميين
سكتات وماعاودش سولها وحتى هي ماعاوداتش هضرات .. لاكن السكوت ماطالش وعيا ساكت شافها معاودات ما جيدات هضرة وناض كيبحث ويسول وهي كتجاوب بالعبار خايفة من شي قمعة وكضحك وتلطف الجو حتى جلسات مونية عاجبها الحال وقالت
مونيه: مزياان مزياان الله يسخر البيجامات كيتمشاو
سكينه: ااه ولاهيلا جربتهم دغيا تباعو
بناصر: كيرمش) دي معاك مك تقابل لك لحانوت غير حالسة جالسة عطيها واحد عشرين الف ريال وتجلس ليك تما
سكينه:بدهشة)بصح؟؟؟؟(شافت فمونية) بصح تقابلي المحل؟
مونيه: بخجل وقبول ) ايوا نقابلو علاش منقابلوش
بناصر: ولاكن تخلصيها ماتجلسش ليك تما فابور
سكينه: غنخلصها
مونيه: الى كنتي غتعطيني بصح نمشي نقابلو (قالتها وكتفرنس حشمانه) شكون لي كره الفلوس
سكينه: صافي غدا سيري
بناصر: سيري تعلمي وخدمي براكة عليك من النعاس كيجيب غير المرض… خدمو خدمو راه الخدمة كطول لعمر
سكينه: فين رانيا؟؟
مونيه: فالبيت كتحفض
سكينه: انا غنمشي دابا حتى لغدا
مونيه: هاكي دي معاك لحريرة لغالي بلاتي
ناضت مونيه عمرات ليها واحد سوبيرا بلحريرة ورغايف معمرين ونزلات بحالها للدار .. جات تحل الباب بالساروت مابغاش الساروت يدور حيت سوارت غالي من لداخل ساد بيهم الباب وبدات كدق وتعاود حتى بغات تفرع الباب..عيات تصوني ودق وتصوني فتيليفون وضرب الباب تقول العسكر لي كيدقو وحتى رد مكاين .. عيات تحاول مع السراوت باش يدورو مابغاوش وعرفاتو سد الباب من لداخل وخلا سوارت معلقين فبلاصتهم ومابغاش ساروتها هي يدور وسخطات على الحالة وتعصبات و عيات دفع وضرب وتزدح فالباب ولاكن والو مع العلم كاين لداخل .. فالاول تعصبات وضنات يكون كيدوش وقالت نجلس نتسنا شوية ومن بعد رجعات كدق وزادت تعصبات اكثر وبدات تشك يكون سخف ولا دوخو الشوفو وطاح ولا وقعات ليه شي حاجة.. تخلعات وتزاد معاها الزايد وعيطات على باها جا كيجري عندها مخلوع وكيتأكد واش بصح كاين !! ميمكنش يكون لداخل وهما دارو حالة ومسمعهمش اذا كاينة شي حاجة واقعة مافيها شك .
تخلعو عليه وزدحو الباب وماخلار مادارو حتى جيران خرجو كيسولو اش واقع وجربو يحلو الباب بكاع انواع السوارت الميكانيكية
مابغاتش الباب تتحل فالاخير طلع سيكيريتي هاز لامون باش يفرعو الباب وكل واحد كيلغي بلغاه والخوف والهلع راكب سكينه وباها وعندهم عقدة من الشوفو خايفين يكون طاح بالغاز . يالاه ديمار لامون بالجهد وهوا يتحل الباب من لداخل قبل مايقيسو لامون وخرج غالي كيحل عينيه بزز ويشوف فيهم مصدوم لقاهم مجموعين عند الباب بالجيران والمعدات وكلشي وسكينه صفرا وباها مخلوع حداها كيشوفو فيه حتى هما مصدومين وكيطلعو ويهبطو باش يعرفو مالو من حالتو بان ليهم بلي كان غير ناعس ومزال دايخ وكيتبسم وفنفس الوقت منفاجئ من دوك العرام لث لقا فالباب ومافاهم والو ، دغيا تفرقو الناس ودخلات هي وباها هازة السوبيرة والرغايففطبسيل مغطي وكتشوفيه بنص عين بغات ضربو بديك سوبيرا ومالقات كي دير قدام باها من غير تسكت وتحها على الطبلة وقالت والنفس مرعودة بالغدايد فحلقها
سكينه: واش مسمعتيناش كنفرعو فالباب
غالي: مشح على شعرو باحراج) لاء!!
سكينه: وكي درتي عقتي ؟؟ اوييلي اخا تكون مييت !! القياامة ناضت ونتا ناعس
بناصر: المهم هانا مشيت الحمد لله غير على السلامة
غالي: جلس اعمي جلس
بناصر: لالا راني كنت مشغول خليت شي وراق ديالي عبى الطبلة وجيت المهم هانا نشيت تصبحو عىلى خير
خرج بناصر باش ميحضرش للنكير ويتحط فشي موقفغير محترم وزاد مع الطريق وخلاهم يتناقرو . مع خرج وسد الباب ضارت عندو سكينه مخرجة عينيها وهزات سوبيرا وقالت معصبة
سكينه: والله كن ما با اللي دخل معايا كن خويت هاد الحريرة على راسك قدام دوك الجيران
غالي: ههه والله ماسمعت شي حاجة
سكينه: الشروووهة!!! اوييلي نتا الوحيد لي مغينوض يوم القيامة .. تشعل لعافية ولا يدخلو الشفارة ولا يضرب الزلزال نتا اصلا مييت
جلس كيمسح على راسو وكان فعلا نعاسو تقيل بزاف وكيغلب عليه وحتى سكينه لاحضات فيه هادشي من نهار تزوجات بيه كينعس وكتبقا هي كتجمع فتيليفون حدا راسو الليل كامل ولا طلق الموسيقى فالبيت ولا تشعل تلفازة ولا تنوض للصندوق ديالها تقدا تفصل وتصمم صفحات جداد من داكشي لي كدير وكيعجبها وكتبقا سهرانة بوحدها غادية جاية واحيانا كتنوض دير عرض الازياء والمكياج فنصاص الليل والضو مصعصع وهوا مكاينش فداك العالم وناعس وسط روينتها تقول شارب البنج .
حطو العشا كيتعشاو وكل شوية يشوف فيها بنص عين وهي مخنزرة قدامها وكيضحك
سكينه: كضحك… حثت ماشي نتا لي تشنايريزيساتش
طارت ليها الماكلة من فمها ومابقاتش مفهومة هضرتها وهوا كيضحك حتى سخف ويلعات ماكلتها وقالت كتمسح فمها وتمسح الطبلة
سكينة: نشرتيني ساعة ونص وانا برا والبررررد قلت صافي هادا وقعات ليه شي حاجة ، واش درتي لكيت ؟؟
غالي: كنت دايرو ولاكن فاش نعست طاح من ودني
سكينه: بزاااف والله حتى بزااف!!! عرفتي شحال ضربنا فالباب حتى بغينا نقلعوها !!!! وا ما سمعتي حتا حاااجة ؟؟؟! ميمكنش!!
غالي: كيضحك). ماوصلني حتى صوت
سكينه: فين كنتي ناعس فبيت نعاس؟
غالي: بالنفي) لا هنا
شار بعينو لبلاصتو فين كلن ناعس وزاد صدمها دارت يديها على حناكها مصدومة وهوا رجع حمر ومهبط راسو كيضحك ويشرب لحريرة
سكينه: مقابل مع الباب وماسمعتي والو!!! هيييه!!!!(تيليفونها كيصوني) ماما(فتخات الخط) الو ماما
مونية: لاباس كلشي بيخير ؟؟ ياك مكاين باس؟
سكينه: لالا والو مكاين والو
مونيه: ماب غالي واش ياكما كان طاح ليه طونسيو
سكينه: شافت فيه بنص عين) لالا غير كان داير لكاسك والصوت مجهد وناعس مسمعناش
مونيه: ااه يوا على سلامة بعدا ..سلمي عليه تصبحو هلى خير
سكينه: مباغ تصبحي على خير
قطعات وشافت فيه كتسوط
سكينه: حتى واحد مادخل ليه لدماغو كنتي غير ناعس.. با يقوليا زيدي ابنتي بحالك زيدي عولتا عليه بكري يشد الشفار!! الشفار يهرب بيا وانا كنغرت حداك ونتا نيبا لا
غالي: خبا الضحك بالجدية) راه كنت فلاصال تسخست ودوشت طحت سخفان
سكينه: وااابلااااش من لاصال الى كنتي غتجي منو وطيح كاو ويجي الشفار يجبد ليا انا كلاوييا حدا راسك ونتا ناعس.. غا بلاش منو مغيزيدنا حتى حاجة
هبط راسو كيضحك حتى مابقاش قادر يهضر وبقات هي كتنكر حتى عيات فاللخر تكمشات لور بغا تشد بلاصتو ويالاه بغات تكا تلاح مور ضهرا سبقها وقال كيجر الكاشة
غالي: بلاصتي
سكينه: ناضت ) والله لا نعستي فيها
غالي: كيجر) بلاصتي انا كنت ناعس فيها كيفاش والله نعستي فيها
سكينه: حييد انا لي كنعس هنا راها بلاصتك لهيه
غالي: لااااا انا لي سبقت ليوم مكاينش بلاصتي وبلاصتك دابا انا لي سبقت
بقاو مني منك مدابزين على ديك البلاصة لي جات مركز زوين قدام تلفازة نيشان وسخونة وبقاو كيتجارو فالاخير تخشار بجوج تكمشو فالكاشة وهوا موراها كيحيد الشعر من فمو وهي كتجر شعرها وتنكر
سكينه: نتفيتني راه كتكا ليا على شعري
غالي: جمعيه دخل ليا ففمي
سكينه: غير بشوية
غالي: هبطي راسك مكتبانش ليا تلفازة
يالاه بدا لفيلم مور لكتابة بدا كيشخر ليها فودنيها برزطها وبدات كتنخزو وتحركو كل شوية فاللخر ناضت قادات ليه المخدة وهوا غايب وناضت جاها الحماس عاوتاني ديال لليل وتوكضات وعاد بدا كيبان ليها البلان فالمكياج . جبدات كلشي حطاتو فوق الطبلة وشعلات اليوتوب وبدات كتبع معاه وتماكي وتجرب فراسها وناضت جبدات اغراضها كلهم على الطبلة وبدات كتلعب فشعرها وهي مربعة والشوفاج حداه قزيبتها شاعل حتى جاها الصهد وحيدات تريكو وجلسات بديباردور وبدات كتصور كل مرة بلوك وكل مرة بتسريحة وكل شوية تجرب شي مشطة فشعرها ومكياج على وجهها .. شافت راسها ملات من القصة على عينيها وطلع ليها راسها فراسها وققرات متقطعهاش هاد المرة وتخليها طوال وترجع لور ..شوية بدا كيبان ليها دير ليميش لشعرها وبدات كتقلب على البنات الزعرات وكتصور بسناب شات وتجرب الالوان على شعرها وكل مرة طيح عليها فكرة حتى تحرك غالي من بلاصتو وراها وهز راسو حالين عينيه شافها قدامو مدورة بيها الماطيريال ومزوقة تقول ماشي هي . شاف ورجع تقلب نعس عرفاتو مادا ماجاب وياما حل عينيه لقا ماكفس وعمرو سولها ولا بقا عاقل. وحتى فاش كتسولو الصباح كتلقاه ما شاد والو.
ضربات الربعة دالصباح وناضت خلات كلشي محطوط فبلاصتو ودخلات تخشات حداه نعسات كما بقات بداك المكياج وعكزات تغسل وجهها .صبح الحال وناض يمشي للخدمة وماشافهاش واخا ناض ولقا ديك روينه قدامو وسوتيامات مليوحين والطالون والمكياج والكساوي مشتتين والمقابط وكاع اغراض البنات .. دفع لاتروسة لي فالارض برجلو ومشا .
رجع لابس لكوستيم وماشط ومريح باش يبوسها فالصباح بحال ديما ويقول ليها فودنها راني مشيت ويالاه وصل عندها بان ليه وجهها مطروز بكاع الالوان وعقد حجبانو بقا كيشوف فيها وباسها فودنها وقال
غالي: سكينه) هانا مشيت
حركات راسها بالايجاب فقط وتلفت بغا يدوز رجلو على دوك الاغراض وبان ليه بزطامها مرمي والفلوس مدكسة خارجة منو وهزو كيرمش خدا ميتين درهم ورجع عندها حدا ودنها
غالي: هانا خديت ليك ميتين درهم صافي؟ مافيا لي يدوز للبانكة تا لعشية
خرجات يدها من تحت المانطة كتشير ليه يمشي يبعد منها وشدها باسها وقال كيأكد
غالي: صافي؟؟ هانا خديتها..يالاه جوتيك
صبح الحال وصبحات كتغسل وجهها وتجمع روينتها ومادات ماجابت فالفلوس واش نقصات ولا منقصاتش .. لبسات خوايجها ومشات دازت على مها وداتها للحانوت وراتها كيفاش تبيع وبشحال وخلاتها تما ومشات تشوف شغالها، كان عندها بزاف مايدار ومابقاتش كتحك راسها ووقتها عمر وخصها تاخد شوية من الحاجة باش تقدر تنحز كل المهام، كان عندها موعد مع الخياط ودات ليه شي تكاشط باش تبدا توجد دفعة جديدة لي تخرج فالربيع وجلسات كتحفي دماغها مع التصميم وتعصر باش تهرج بشي كوليكشن زوينة وجديدة تخدم بيها فالمحل ديالها وفالمحل لي مشاركة هي وسارة ولي كان فال الخير على سارة ودارت منو الزرع والزريعة حتى هي، شرات طوينيبيلة صغيرة ودارت الذهب التقيل ومشات سافرات لتركيا ورجعات حتى هي همة وشان وعندها الثقة فالنفس وشربات الحرفة ورجعات كتخلي البنات فالمحل وتبع الخياطات والطرازات حتى هي.. مشات سارة الدريويشة الحشومية وجات بلاصتها سارة لي حكها الزمان والحرفة ناضية وماضية فين تبان سكينه، على الاقل سكينه كتراعي ومكتبغيش تخصر مع لكليان اما سارة كلمة جوج تجري عليهم ومدوزة على البنات لي عندها دكاكة وكاع النكافات لي كيخدمو معاها كيخافو منها ولحد الساعة مزال مافاهمينش كيفاش كتفاهم مع سكينه!! سكينه فالشرق وسارة فالغرب!! سارة بلدية وگارحة بحال شي عونية ولا شيخة اما سكينه كتبان كيوت من لبعيد وخاطيها المرايشات والمضاربات وتاشلواطيت. كيفاش هاد جوج تفاهمو لعجب!! وكيفاش سارة كتهز الكلمة لسكينه وكيفا سكينه صابرة على سارة وكَروحيتها .
نهار كامل مكاين غير جري عليا نجري عليك في حين مونية فالحانوت جااالسة كتبيع وتشري مع لكليان وعندها واحد الخاطر لي ماعند حتى واحد وبانت شخصيتها المخبية.. مونية لي تقول كابرة فشي عائلة هاي كلاس واخا مكتعرفش تلبس ولاكن كتعرف تهضر ومصوابة وكضحك مع كولشي وكتبيع غير بطيبة قلبها ولسانها لحلو والخاطر والثمن لي عطاتها سكينه متنزلش عليه هوا لي باعت بيه
ضربات لخمسة دلعشية وبناصر هاهوا راجع من الخدمة مكرفط وداز على لقيسارية لي حداهم يشوف هاد المحل لي كراو كي داير وبقا كيدور ويتسارا بلا ميعلمهم حتى لقاه ولقا مونية لداخل بالجلابة كطوي لحوايج وتردهم بلاصتهم ردخل كيسرح عينيه
بناصر: سلام عليكم.. لاباس
مونية: باست ليه يدو) لاباس لحمد لله
دخل كيسرح عينيه ويحرك راسو وقال
بناصر: مزيان مزيان.. مابيهش واخا صغير
مونية: هااء!! راه غير قيسارية هادي كلشي فيها صغير
بناصر: كيلقي نضرة) وكاين شي رواج رلا والو
مونيه: كتبسم)لالا كاين كاين الحمد لله راه مابقا عندها هنا والو ها شنو بقا غير هادشي
مشا كيشوف اش كتبيع وقلب دوك لبيجامات بيدو كيشوف توبهم وقال
بناصر: كي والو هاد لبيجامات رهااف.. خصها تجيب شي حاجة سخوونة للبرد وملونة (كيتحسس بيدو) ناس كيبغيو لوان ..شوية دالصفر شوية دزرق وشوية دلفانيدي
مونية: خليها ضبر راسها المهم كيتباعو
بناصر: واخا هاكاك خصها تنوع شوية باش يرجعو عندها الناس ماتبيعش بالدوق ديالها ماشي هي لي غتلبسهم….(تنهد ) مهم الله يسخر(سكت شوية كيتمنضر) فين مشات ؟؟
مونيه: مشات قالت لك عند لخياط دفعات ليه شي تكاشط
بناصر: عاوتاني لخياط وطراز ؟؟ نخزيها شوية تديها فالدار ديالها وطيب وتجمع حالتها .. راه ماكايناش غير لخدمة ولفلوس … راه غير صابر ليها لغالي ،،، عندها الزهر لقاتو ولد الناس..ولاهيلا الى عندها الزهر … كنبقا شي مرات نسول راسي كيفاش دارت ليه جابتو وفين طاحت عليه (كيهضر ويتسرح عينيه فالمحل ) انا كنت خايف يضحك عليها شي واحد ولا تجيب شي مسخوط الواليدين..ساعا ربي وقف معاها
مونية: ايوا صافي دابا نعل شيطان خلي عليك البنت
بناصر: انا لوكان تهلا فالدار ديالها غتزييد تعجبني.. لقات وبد ناس دريوييش مكيهضرش بغات تركب عليه
مونية:ي اسيدي خليهم بيناتهم
بناصر/: نخز نخر شوية راك مها .. وريها شدير
طاحت رعدة ديال الشتا جرات على كلشي ومنهم سكينه مشات بحالها للدار فازكة كتقطر ودخلات نيشان هازة بيجامة فيدها من لحانوت طرطقاتها ولبساتها سخنات فيها وهزات تيليفون عيطات ليه
سكينه: غالي فينك تعطلتي؟؟
غالي: عندي لونكلي نسيتي؟
سكينه: جيب ليا ماكدو معاك
غالي: واخا
سكينه: طاحت علياااا وااااحد الرعععدة منقووولكش
كبرات الصوت وحطاتو كتهضر معاه غادية جايا
غالي: فين كنتي؟؟
سكينه: كنت كندور على تكاشط. ااه حقا خصني نتقدا عاوتاني السلعة طارت تباارك لله
غالي: ااه مزيان وديك طابليت بعتيها؟
سكينه: هههه بعتها اا
غالي: ماعندي منتسالك
سكينه: تا تجي ونعطيك فلوسك
غالي: غتعطيني غير ميتين درهم
سكينه: علاش؟؟ بغيتي تقسم معايا
غالي: لاا راه قلت ليك غناخد ميتين درهم الصباح
سكينه: واش من عندي خديتيها؟
غالي: زعما كديريها راسك نسيتي
سكينه: والله ماعقلت !!
غالي: وراني قلتها لييك غير كنتي دايخة بنعاس
سكينه: ماشي مشكل تا تجي تاتجي
غالي: وا وجدي ليا شي حاجة لكاسكروط
سكينه: شنو غنوجد ليك؟؟؟
غالي: لي درتي
سكينه: نصايب ليك قهوة؟؟
غالي: صااايبي قهوة يالاه
سكينه: يالاه تهلا
غالي: مشات ليغيكل؟؟
سكينه: ههههه كطيرني ههه
غالي: ههه… باش نجي نتهلا فيك
سكينه: مزالة
غالي: واا. ماعندي مندير لك غير شوفي كي ديري
سكينه: تا تجي ننن نضرب ليك. مص٠٠٠٠ ههههاااااااههههههه
هبطات كتموت بالضحك وهوا كيضحك من تيليفون
غالي: تا هادي زوينه ههه..
سكينه: واقول ليا شكون اللي كيريحك ويسكن ليك لآلاام. ممم؟؟
غالي: ماعنديش الآلاااام
سكينه: يااااك!!!!!!
غالي: انني مؤمن بالله
سكينه: الله يقوي ايمانك.. سير سير مكتعرفش تتعامل مع النسوان
غالي: تا نجي ونوريك
سكينه: اسييير
غالي: غندخل دابا يالاه جوتيم
سكينه: الله يعطيني وجهك هههه
قطعات
مع ديك الشتى والقنط ماكرهاتش شي سهرة ولا شي قصارة بحال دوك لقصاير لي كيعجبوها .ضارت ليها طن فالراس وناضت لبسات جاكيط ديالها ونزلات كتجر بانطوفتها للحانوت لي تحت العمارة فين ساكنة ودازت عند مول الزريعة شرات التقاوت والعواصر حتى عمرات واحد الصاك ودازت للباتيسري خدات واحد الحلوى وطيرات واحد جوج وردات وهي طالعة للدار ومشات لديك الطبلة ستفات داكشي ووشعلات الشمع ولاحت الورد ومشات طرفات بالماء دافي وشعلات الشوفاج ولبسات واحد ليبك مشبكة كحلة وكسوة من لكساوي لي كانت كتخرجم بيهم مقزبة كحلة والصدر كيطل وصباط عالي هزاتو فيدها ومشات تخشات فالكاشة كتسناه حتى سمعات الساروت كيدور وناضت بالزربة لبسات صباطها وطلقات شعرها وتعرضات ليه حيدات السوارت من لباب باش يقدر يفتح الباب من برا وطفات الضو حتى دخل ويلاه بغات طرطق المفرقعات على وجهه تشعل الضو وشافها قدامو وهوا فالباب فدهشة هاز صاك ماكدو والبيسي تحت يدو ولافيست منقطة عليها الشتا ونيفو حمر. شافها كتعصر مابغاتش ديك القنبرلة طرطق وهي كتمايل بالطالون وضحك وكتقاتل معاها ..دخل كيشوف فيها ويضحك وشاف الطبلة مزوقة والشمع شاعل وحط داكشي لي هاز حتى هوا عليها وعنقها وهي مزالة متكركر وتميل بالطالون وتقرقرب .. باسها فعنقها وهي مزنكة زعما درت ليك مفاجأة
سكينه: مابغاتش طرطق ههه بغيت نخلعك
غالي: اييوا شتي على نية عندك
خداها من عندها وبقا كيزير عليها حتى طرطقات فالسما وتشتتات عليهم بجوج وهي كضحك
غالي: عنقها من خصرها) دابا كيفاش غندير ليك هاا؟؟
سكينه: شنو غدير ههههه ناري كتهربنيي
غالي: فيك ليغيكل
سكينه: واخا فياا ومن بعد
غالي: وكي غديري؟؟ كننن.. علمتيني نجيب معايا بريزيرفاتيف
سكينه: ولاا واش كيحساب ليك درت ليك زعما هادشي حيت باغا ننن
غالي: وشنو؟؟
سكينه: اويلي لاا.. نبدلو الروتين ماشي عليا انا
غالي: اااه
جرها من يدها ومشا جلس كيرتاح قدام ديك الطبلة وهي كدور بيه
سكينه: غنلعبو واحد اللعبة اغالي عندها ربعة وعشرين ساعة من دابا حتى لغدا بحال هاد لوقيتة اش قلتي
غالي: وشنو هي هاد اللعبة؟
عنقاتو من لور وهوا جالس: وا قوليا بعدا متافق تلعب .. هاد اللعبة سميتها تاج وبلغة
سكينه: احممم هههه غتجيك فشكل ولاكن غير فالاول مع المدة غتولف وتجيك عااادي
غالي: بفضول ) ي قولي نشوفو هاد اللعبة؟
جلسات حداه كضحك وتشدها بزز وقربات من الطبلة كتشرح ليه وهوا كيحيد لافيست عليه
سكينه: هانتا .. تاااج.. وبلغااااا.. تاج هوا الملك.. وبلغا هوا العبد ولا لي كيخدمو،، الى جات فيك نتا تاج غادي تكون تا هوا السيد ديالي وانا لهادم ديالك وغادي نفد ليك كاااااااع داكشي لي كتآمر بيه وممنووووع كلمة لا .. يعني انا لمدة ربعة وعشرين ساعة غنكون ديااالك نتا عيييش مع راسك .. بغيتي تكايس معايا ودير معايا زوين شغلك هاداك .. وانا عاوتاني الى جات فيا تاج نتا اسيدي غتكووون لخااادم ديالي واراا برررع عاوتاني
غالي: بشقاوة) صافي..سيير.. (هز صبعو) غير متقوليش ليا شري ليا شي حاااجة ما عرفت منين راه للخر دالشهر هادا
سكينه: مافيهاش الماديات فيها تقديم خدمة الزين ماتعطيني فلوس منعطيك فلوس غنحرت عليك وتحرت عليا رتاحيتي ؟؟ شنو قلتي دابا؟
غالي: واخا سيير
سكينه: يالاه جبد درهم نشوفو
جبد من جيبو درهم كيشوف فيها بنص عين بشقاوة ويضحك ولاحها فالسما ولسقها مع الطبلة حاط يدو عليها وهما كيفرنسو بجوج
غالي: قلتي راس؟
سكينه: اه ونتا تاج يالاه نشوفو
غالي: غندكدك مممك ضبرتي عليها ههه
سكينه: دورات راسها) هممم ما انا ساهلة ليك طلع طلع نشوفو فيمن جات
غالي: ياربي تخسر
هز يدو وجات فيه هوا الربحة وهي خسرات!!
ناض من بلاصتو جمع بونية بالقوة تعبير على الفرحة وضار عندها كيوجد لها
غالي: كحلتيييييها ،،، بلانااااتك ههه متقولييش كنضلمك هادو كلهم افكارك
سكينه: بنص عين) جاتك على قلبك غير بين بين شنو مخبي فداك القلب عليا
غالي: شد راسو) وا ناااري علاش ضبرتي اسكينه هههه كنتي بيخير
سكينه: ههه.. كنتي كتسنا هاد الفرصة
غالي: فتح القميجة) اولا بعدا غادي نصلي قبل متلاقا ليا المغرب مع العشا.. (طرطق صبعانو) نوضي نوضي شعلي ليا الشوفو نرضي يالاه
ناضت كدور عينيها فشلانة باحباط: تكايس عليا باش حتى انا فاش تجي نوبتي نتكايص عليك
غالي: وانوضي يالاه تحركي متزيديش الهضرة تكعدي
وقفات غتمشي وكان كيدور فبلاصتو كيحيد صبادو وعطاها واحد الدقة للمؤخرة مشات كتحك ها
غالي: سربي راسك
سكينه: من بعيد) وا بلاتي نحيد حوايجي غيفرعني البرد
مشات لبسات بيجامتها لي كانت لابسة بالقب وعندها لودنين طوال فالرمادي ودازت للمطبخ شعلات ليه الشوفو وسمعاتو كيعيط من البيت مشات عندو طلات عليه معبسة
غالي:شار بعينو ) جبدي ليا توني الازرق ديه علقيه فالدوش وواري ليا الفوطة ديالك الحمرة
سكينه: وعلاش فوطتي؟؟! كاينه الفوطة معلقة
غالي: مابغيتش هاديك اري ليا فوطتك
مشات كتسوط جبداتها من المجر مطوية نااعمة شهوة منها داتها ليه بالغبينة وبدات كتسخر عليه غادة جايا حتى دخل للدوش وجرها كيآمو ويخرج فعينيه دوشات ليه وهوا جالس على الكرسي وغسلات ليه راسو ومدات ليه الفوطة وهوا كيشوف فيها ويضحك
غالي: لله شحال رطباااااا
سكينه: دابا تجي نوبتي غير بلاتي
غالي: سكتي ماتهضريييش..سيري سخني ليا القهوة تكون بردات
مشات كتهبط كمامها فازكة ومشنتفة تقول كانت مع لقطوط وغسلات فمها بسينيال وسخنات ليه القهوة حطاتها ليه وجلسات كدوز يدها على حلقها وهوا كيدير كاسكروط
سكينه: درتي ليا لحلاااقم
غالي: شووو متنكرييش .. تانتي تا جاوك ليغيكل عاد طاحو عليك الافكار
سكينه: نيت باش تبان على حقيقتك نعرفك شنو مخبي ليا
غالي: شار بيدو) غتمشي تسخني تسخني زيت لعود وتجي دلكي ليا عضامي
بدلات حوايجها من جديد وحالتها ومشات هازة الزيت سخونة فالمقلة داتها ليه حطاتها فوق الطبلة وهوا وجالس متكي كيشوف فالتلفازة ويفرنس
غالي: زعما ماتكونيش هاكا مطيعة بلا قوالب
سكينه: بعبوس)غادي نسبك اغالي
غالي: على هاد الهضرة جري الطبلة لهيه وفرشي ليا فراش مقااد فالارض نتكا فالارض ودلكي ليا عضامي فالارض وقربي الشوفاج
سكينه: تنهدات كتخزر فيه
غالي: كنتعدب فوق هاد الوطوي باغي نتسرح
سكينه: غتبقا طير حتى تقلب عليك هاد المقلة دزيت ايوا غير نقز
جرات الطبلة بزز وفرشات ليه وقادات ليه البلاصة بين الفوطوي والتلفازة وحطات ليه المخدة وتلاح ختى تكواناسا شاد جنبو وتقلب على ضهرو
غالي: مسدي ليا ضهري مزياااان وعنقي … تهلاي فيا … اه متحبسيش حتى منبقاش نتحرك كاع وغطيني
زفرات كتشوف فيه وجمعات كمامها قربات الزيت وجلسات حداه كتمسد والشوفاج حداها حتى قالت صافي واقيلا نعس ونطق قال
غالي: والله تا خصني لعصا كنمشي نخسر لفلوس فالمساج وانا عندي فيليبينية فالدار
سكينه: كتمشي دير المساج!!!! فين؟
غالي: كنت كنت مابقيتش
سكينه: حلف مابقيتي كتمشي ديرو ؟!!
غالي: شي مرة وحدة صافي
سكينه: اييييييه !!!! كتمشي دير المساج وانا لا؟؟ ماعمرك ديتيني!!!
تلفت شاف فيها مصدوم وبدا كيرمش ورجع ضحك وتكا مخبي وجهه
غالي: واش باغا تمشي؟؟
سكينه: ومالي منمشيش علاش ماقلتيهاش ليا كتمشي بتخبية زعما
غالي: ماكانش فراسك
سكينه: عرفتي ديال لي ضربك بهاد المقلة والله… يا نعيشو بجوج يا نموتو بحوج نتا دير المساج وانا عمرك فحياتك درتيها ليا تا بضحك
غالي: كندير ليك انا المساج
سكينه: انا بغيت نمشي لسونطر عندهم فوق البياص ويديروه ليا فيليبينيات
غالي: وصافي دابا تا لشي نهار اصلا مغنبقاش نمشي كاينة نتي
سكينه: لق٠٠٠وي على عينيك قالك كاينه انا غنمشي انا وياك
غالي: صافي سكتي باغي نعس (بعد صمت) لسانك شحاللل…
عقدات حواجبها مارداتش عليه وهزات تيليفون حطاتو فوق مؤخرتو دارت اليوتوب كتفرج وجالسة كتمسد وتعاود حتى بدا كيشخر وعفا عليها الله ناضت غطاتو وطاحت كاو حداه فوق الفوطوي تغطاا بالكاشة ونعسات لاول مرة فحياتها مع لحداش
غالي حسبها غيرة لاكن فالحقيقة مكانتش غيرة.. او مكانتش مدركة لشنو كيوقع فداك السن وبداك العقل لي كان عندها والثقة الزايدة فراسها بزاف ، مكانتش كتفكر بزاف او تلاحظ او تغير ! كان كتشوف راسها غير هي لي كاينة ومن المستحيل غالي يشوف بنضرة اعجاب لشي وخدة غيرها وهادشي خلاها ترتاح وتعيش بلا حس الغيرة وكانت كتلقا مبرر صادق لكل افعاله بالرغم من انه مكانش كيدير شي تصرفات صبيانية وكان بعقلو كيعرف اش كيدير عكسها هي.. كان كيغير لاكن فالحقيقة عمرو عبر ليها او خلاها تحس،، وكان كيشك ويبحث وراها لاكن عمرها لاحضات شي حاجة او حسات بيه مراقبها واخا مكانش بنيتو يسيء فيها الضن لاكن حسب معرفتو بيها كيقول ربما تغلط ومزالة طايشة ومزالة مامستوعباش انها تزوجات وخصها تحدف شحال من حاجة من حياتها كانت كديرها، كان متأكد انها متقدرش تخون خيانة مقصودة لاكن عندو تخوف طيح فشي فخ او تمشي فالهاوية ويتضحك عليها وتخرب حياتها بيدها . هي حانت كتشوف تيقتو فيها عمياء.. بحكم الحرية المطلقة لي كان مخلي ليها،، تخرج ودور وتمشي فين بغات من غير دخول لديور الناس واخا يكونو صحاباتها كان شرطو الوحيد باش يرتاح فدماغو وكان كيأكد عليه فكل مرة سمعها كتعاود على صحاباتها وشنو دارو وفين مشاو. لاكن واخا كانت عايشة الحرية ومكانتش حاسة بمسؤولية الزواج بثاثا والفرق اللي وقع فحياتها زاد بيها للافضل. رتاحت نفسيتها وسكنات بوحدها وكدير لي بغات وكتسهر كما بغات وكما كان كيعجبها وحتى واحد مكينكر عليها.. كان النكير منعادم عندهم فالدار وكان همو الوحيد متعطلش بليل ودخل فالوقت وتفوت عليها ديور الناس وتلبس محتارم ولو غير شوية. مسألة اللباس رتاح من جهتها بحكم دخلو فالشتا وكتلبس حوايج غلاض عليها لاكن التعطال بليل كان كيخلق ليهم مشاكيل بعد المرات .
بدون علمها كان لعب بتيليفونها ودماغها شوية باش تفهم والو وهاكا يبقاو الرسائل كلها اللي كيوصلو ليها والمكالمات كلها كتوصل ليه حتى هوا فتيليفونو وكان كيتجسس عليها وعمرها لاحضات هادشي ولو غير شوية، وحسب خبرتها فتيكنولووجية قليلة كان كيدوز عليها شحال من حاجة بلا متحس ولا تفهم بحال مو اللي بلوكاها ليها من لفايس ديالها باش متكونش تحت المراقبة دمو وهي عزيز عليها تنشر تصاورها وتبان فالفايسبوك .. بلوكا بزاف من عائلتو هاكا يتهنا من رياحهم حتى هما وكان من لحين للاخر كيراقب تيليفونها وحساباتها كلها بلا ميخليها تشك ولو صفر ، واحد فالمية. وهادشي خلاها ترتاح وتعيش وتصرف باريحية وكتشوف تقتو فيها عميا وعمرو واجهها او بين ليها انها تحت المراقبة واخة واخدة حريتها فالتصرف.
عكسها هي كانت كطل على تيليفونو وتقلبو
صبح الحال ومابغاش يفيقها من النعاس.. داز الروتين ديالو كما العادة ومشا لخدمتو وبقات هي ناعسة حتى فاقت على خاطرها.
كان تابعها شلا ميدار بالخصوص مللي ولاو عندها المشاريع وغادية فالطريق الصحيح لي خلاها دخل فلوس كثيرة بمضوبلة وسهال عليها تحقق شحال من حاجة كانت كتمناها وكتشوفها وباغا توصل ليها بحال الذهب
اه الذهب اللي مكانتش كتفكر فاش كان عندها غير محل واحد وحتى فاش دارت المحل الثاني حيت كانو عندها اولويات وخصها الركايز الصحاح علاياش تكا وكانت كتشوف راسها ماعندها والو وماعندهاش ساس صحيح وخصها عاد تكونو .. والحاجة الوحيدة لي كتحس بيها ديالها ومرتاحة من جيهتها هوا المحل ديال البيجامات لي كرات بسميتها بوحدها ودارتو من عرق كتافها ومكيتسالها فيه حتى واحد شي حاجة. اما المحل اللول ديال باها وحاسباه غير مشروع مؤقت وفأي لحضة ترد المحل لباها وتخرج منو واخا كتخلصو ففلوس لكرا كتشوف ان خوها كيكبر وشي نهار تخوي ليه المحل وتعطيه يعمرو او ياخدو بناصر في حالة ما سالا سربيسو مع الخدمة وبغا يدير شي حاجة يلهي فيها راسو، اما المحل اللي كارية هي وسارة هاداك حتى هوا شركة والوجه المشروك عمرو مكيتغسل الحاجة لي ماشي ديالها بوحدها عمرها تفرح ليها ولا ترتاخ من جيهتها. هادا علاش كانت ديما كتجري وتقاتل باش تبني لراسها ساس علاش توقف.
شحال من واحد كيدفع فشي دار وكينعس مرتاح كيتسنا فوقاش ياخد سوارتها ،، ولاكن سكينه عمرها رتاحت ولا شافت الراحة من نهار حطات فيها يدها وهي النعاس كيطير عليها وكتبات تخمم غير بينها وبين راسها وتألف قصص وتبقا تفكر .. عنداك تريب مثلا؟؟ او تجي شي حاجة طير ليها لفلوس لي جامعة !! او البنكة تسرق ليها فلوسها!! او ينصبو عليها!! الحاصول كانو غير الافكار السلبية لي كيطيحو عليها وتربطات ربطة زغبية وفين ما تفكر راسها دافعة فيها كتشدها الخلعة وامنيتها تكمل التكاتيب وتعطيهم فلوسهم وتشد دارها قبل مايهرب ليها الفرخ بالخلعة . وكيزيد يكمل عليها واخا غير بالضحك ويبقا يشد فيها ويخوفها حتى كتبدا تصفار ودوخ بيها الدنيا
تحرك عندها المحل والبيجامات كيطيرو! كانت كتقول مع الرقت ندير الرومي ولاكن ملي شافت الربح فالبيجامات خلاتهم وبقات كتبيع فيهم والفلوس داخلة خارجة وبناصر مقابلها كل مرة يطل عليها تقول الحانوت ديالو ! حط ليها تما البيدوزات دزيت لي كيجيب من البلاد يبيعهم وزادها حتى العسل الحر وكملها وجملها مشا شرا حتى هوا البيجامات من سوق الجملة فسلا وحطهم ليها تما فالحانوت عند مونية تبيعهم ليه. و واخا شافتهم غجبها الحال حسات براسها دارت انجاز وباها بلا ميمدحها راه باينة غير ملي تبعها ودار بحالها حتى هوا وقلدها وفهادا فحد داتو نجاح . زيد عليها غالي لي شافها باعت طابليط فنهار واحد شرا من موقع صيني بزاف ديال الاشياء اليكترونية وعطاها ليها بغا يجربها وبحال العادة طلب فيهم ثمنو وخلا ليها الحرية تصرف وتبيع باش ما بغات واخا صدماتو فالطالبليط خلاتو غير كيشوف وعطاها درس فالاخلاق مادا منها لا حق لا باطل .
بقا اسبوع للسفر لفرنسا وغالي كيوجد راسو ، اما كيوجد السلعة لي تخلي موراها وكتجري ورا السلعة لي دافعة عند الخياطا وجمعات رزقها وكتاب فداك الاسبوع تجيها الدار وعيطو ليها فتيليفون فاجئوها ! غير سمعات المكاتبة رجعات من المدينة. كتجري وتعيط لغالي وتعيط لباها وجابتهم من الخدمة قبل الوقت لي كيخرجو فيه ومشاو معاها بجوج فرحانين متحمسين تقول هما لي غيشريو الدار . غالي تكلف ليها بالفلوس والمحاسبة ومشاو كيجريو لقاو الناس واقفين حتى هما فرحانين وباغين ياخدو سوارتهم . بدات التقليقة عند بناصر عاوتاني بحال ديما فاش كيبغي يدير شي حاجة كيبدا يتفاف ويزرب وكلشي بالزربة وكيطير ليه العقل مكيبقاش كاع مركز من شدة الحماس . اما غالي غير كيشوف فيه مربع يديه خلاها حتى سكت عاد هضر مع النوطير وبدا و الاجرائات بشوية عليهم وشدات سكينه سوارتها فرحانة وهي كتوقع وضحك وتفرنس وكان عندها النهار الكبير اللي عمرها شافتو فحياتها
وبعد عناء طويييييييل … اخيرا خدات دارها وعم الفرح والسرور ونفخ بناصر صدرو بحال الديك ويديه فالجياب وهوا لابس جلابة غليضة فالبرد والشتا .. من الفرحة دار ليهم الزردة ،، اييه الزردة حيت بناصر عندو العقار كيسوا شي حاجة.. الدار لي مكيديروها الرجال حتى كيشبو دارت بنتو فالعشرينات .. وحتى وحتى وحدة فالعائلة ديالو ولا ديال مها من الطرف حتى للطرف مادارتها وما وصلاتها ، ايوا ارا معندك ابناصر هاد العام ديالك .. ارا ما تعنا وتجبد وتبان وتنفخ الريش .. هاد الحدث ماشي عادي وكيتحقق غير فالحلم اما الواقع صعيييب.. وفلوس الدار مكيجمعهم غييير الفم اما الدراع ما معطيش لكشي. هوا هاكا كان كيشوف حيت نشأ وسط عائلة ممحنة من اولها لآخرها وواخا هاكاك النفخة عندهم فالنيف والى غير شراو غير معزة يديرو بيها بوق.. هوا حاس بعضمة هاد الحادث هوا ومونية بطبيعة الحال ، اما سكينه كان كيبان ليها عادي حيت ديك الدار نقطة فبحر من الاهداف لي باغا تحقق ولي مزال ماعارفهمش بناصر،، وغالي كذلك ماجاتوش شي حاجة لي عجب حيت ماشي بنت عائلتو وعمرو حكرها باش تجيه الصدمة قوية بحال لي وقع لبناصر ومونية رالعائلة كلها، بل كان مهيأ نفسيا ومن نهار عرفها كانت عندو ديك النضرة ديال البنت الطموحة لي تقدر توصل ماشي صعيب عليها او مستحيل وعندها طاقة رهيبة لي مكتخليهاش تسنى ولا تأجل لغدا، تقدر دير كولشي فنهار واحد بلا متاكل ولا تشرب وبلا متعيا ولا تشكا وكأنها كتتغدا من ديك الحركة والارباح .. خطيها غير شغل الدار والطياب وداكشي مكتقدرش عليه ولا ديرو والى قاليها غالي عمري غير قهوى تقوليه عييت اما الى قاليها نوضي دابا مع الثلاتة دليل نمشيو لمازا باش الصباح نصبحو فكراح علال مع الستة تنوض كطير تلبس ويرجعو فيها عشرة واخا تكون يالاه حطات راسها فرق المخدة. التحديات هي مولاتهم ونهار ومطال وهي كتخطط بلا توقف وبلا متخلي عقلها يرتاح.. او ربما مكتقدرش تبقا بلا بتفكير وعقلها راسو كيخطط ويبني ويعلي ربعة وعشرين ساعة على ربعة وعشرين ساعة وحتى فنعاسها كتبات تحسب وتعاود وتخطط وغالي كيسمع وينخز فيها تقلب
جات نوبة الدار عاوتاني وشحال فرحات بيها وفرحتها ماتعطيها لحد ، دار ليهم بناصر العشا والزردة وعارفهم مايعرفو فصواب بجوج وواخا يعيا يتسنى الزردة ديال الدار مغاديش يوصلها وهوا مولف بالزرود واخا يشري لولدو بيكالة كيشري معاها دجاجة لمونية تحمرها ليهم والموناضة، المهم هادي هي الزردة والزردة لي بلا موناضة مايعتابرهاش من الزرود
الحاصول زردو وفرحو بالدار وماكان عندهم مايصلحو فيها، كانت مصلوحة من داكشي الرفيع ومجهزة غير اجي ودخل فرش نيشان .
جلسات هي وغالي فالقهوى كيتجمعو ويبدلو الجو وبداو يهضرو على الدار وشنو يديرو فيها
سكينة: نكريها حسن .. خليها هاكاك منفرش ميفرشني
غالي: شحال كااع غتكريها مترد فلوسها حتى يخرجو عليها الكرايا
سكينة: ديك خمسييين الف مزيانة.. والعمارة زوينة عندها اسانسور وباركينغ لتحت
غالي: واش خمسين فلوس اسكينة واش نتي ماشريتها حتى كنتي غتسطاي ليل كامل ونتي كتحسبي فيهم
سكينة: المهم ربحت دار حسن ما كنت غنسخرهم فالخوا الخاوي
غالي: اييه وفاش يلسق فيها الكراي ميبغيش يخرج ليك منها ويفرخ ليك فيها ديك الساعة شكون لي رابح نتي ولا هوا ؟ خمسين الف اريال لي غتجيب ليك ديال الكرا راه مغتكمل ليك فلوسها على ثلاتين عام .. ثلاتين عام وتلقاي راسك شارية بايعة دار للكراي بالتقسيط وكيعطيك فيها خمسين الف ريال فالشهر ويسكن فيها ثلاتين عام وميبغيش يخرج ليك منها
سكينة: بتخمين) اوييلي ولاهيلا بصح!!!
غالي: على الاقل خاصها ترد فلوسها فخمس سنين باش تسمى بيعة مربوحة اما ثلاتين عام بناقص منها اشمن ربح فيها
سكينة: والى بغيت نرد فلوسها فخمس سنين شحال خاصني نكريها؟
غالي: مليون ونص باش خاصك تكريها الى بغيتي تردي فلوسها ..هادا هوا الربح تيكون على خمس سنين كيبان البروجي الناجح من الفاشل
سكينة: هيييه!! اويلي على مليون ونص والله لا كراوها
غالي: اييوا الحل لي عندك هوا تفرشيها وتحطيها ف ايربي ان بي وكريها للنهار ونهار تبغيها ماتكريهاش
سكينة: شنو هوا هادا ؟؟
غالي: سيت كيكريو فيه الديور
سكينة: ايوا ديرها ليا
غالي: بتخمين)يقبلووها لك خاصها غير فراش يكون نقي ..غير شوية وصافي ماشي فراش بحال الديور فين ساكينين
سكينة: ايوا كريها نتا يالاه هاهي تكلف انا غير نفرش وصافي ونتا كريها
غالي: ايوا فرشيها ويحن الله
سكينه: كدور عينيها)احمم.. غالي سلفني ااا غالي: خرج عينيه) وااالو نشفات.. ماعندي مانسلفك اري نتي داكشي لي مزال مارديتي راه غنسافروهاد سيمانة.
الوقت كطير!! غمض عينيك حلها ها السفر وصل والمشكل ماموحدة ليه حتى شرويطة جديدة وماعندها حتى ريال بقات على الضس وخصها عاوتاني تحرك الخدمة والبيع والشرا باش تبدا تجمع واخا تنفسات ورتاحت والدار لي كانت واخدة ليها فلوسها كلهم ومكانتش مستمتعة بيهم وهي عزيز عليها تشتت هنا ولهيه وملهوفة على الحاجة ولي شافتها ديالها ولي مشافتهاش حتى هي ديالها. جاها الحماس واخا زاوية ولاكن دابا من هنا لفوق مكاين ارا برا تفدي القديم والجديذ وضربها بواحد الكسية من داكشي الرفيع وتبرد جنونها فالشرواط لي شي نهار تموت عوجة فشي حانوت ولا فشي مول بسبب لهفتها للحوايج.
عيات باقي تابعها شحال وباقي خصها تجمع باش تفرش الدار هي اللولة وماكرهاتش شي واحد يسلفها وتفرش فمرة باش تبدا تكريها ولاكن والو مكاين لي يعتقها بشي درهم، عيات تقلب وتسلف ولي هضرات معاه كتلقاه مقجوج وهوا براسو خاصو ليا يسلفو. ضارت حتى عيات فاللخر شدات الارض وقلبات الاتجاه جهة حوايجها بدات كتجمع باليزة السفر وتطوي وتخمم .. واحد شوية دارت ليها طق فالراس وناضت قالت اش ندير مندير ارا دوك الحوايج دالخروج لي كانت كتلبس واشمنك يا كساوي اشكال انواع وصبابط عالين وتقزاي وشورطات لعلك ترضى ومحرم عليها تلبسهم ولا تخرج بيهم وهي عندها حوايج كتار وكانت كتشري بالعرام وتكيل بالمكيال.ناضت سمحات فباليزة السفر وهزات باليزة اخرى وجبدات حوايجها لقدام بذات تعزل وتعمر وتنهد وتتحسر على داكشي ماكرهاتش كن يقوليها لبسيه تنوض تلبسو ديك الساعة وتخرج بيه واخا تكون الشتا خيط من السما،، مايقهرها برد ولا تلج قدام بوشرويط والعرا .
عمرات واحد الباليزة مزيان مزيان وداتها للمحل لي فيه لكرا حطاتها وجلسات بدات دور تيليفونات لكاع بنات الخروج لي كان الشيفور كيهزهم معاه من دربهم وحتى البنات لي كتعرف حتى هما ويقات كتسنى فيهم ختى بداو كيجيو وحدة مور وحدة وحلات ليهم الباليزة يعزلو وجلسات تبيع فيهم شي تبيعو رخيص شي ضربهم فيه حتى ينقزو وتبيعو مضاعف اضعاف على ثمنو، وماخفاكم بنات الخروج مكيضربو حساب للمصروف وعزيز عليهم الاصراف بداو يهزو بلا ميتشرطو وكلشي زوين وكلشي جديد وكاين لي عمرو تلبس او وصلات نوبتو ، باعت كلشي مابقات ليها حتى شرويطة وجلسات كتحسي وتعاود عاد تهنا وقالت الله جمعت فلوس باش ندور بعدا ونتحرك على بيدمن يوصل اللول دالشهر وتتخلص كما موالفة وموعدة نفسها مكتقيسش المدخول ولا دور بيه حتى يتخلصو كاع الناس وتجبد تحسب حتى هي بالورقة وستيلو والخوشيبات بشوية عليها وتحيد فلوس الكرا دباه هما اللولين باش ميطليهاش شي طلية تموت ماتنساها وهوا كيشوفها بعينيه كتشتت الفلوس فالشراوط وشي حوايج مايطيحوش على بنادم فالبال بحال قوة الفناجن .. دور دور وتشري فنجان حتى عمر واحد البلاكار عندها فلكوزينة وبغا يريب بقوة الفناجن دالقهوى لي كتشرب فيهم نيسكافي ولا لحليب بالشكلاط وكل فنجان وكيف داير الشكل ديالو وحتى واحد ماعادي.. ها لي كيشبه لشي راس وها لي داير بحال الكرش وها اللي بحال نونوس وها لي عندو الودنين ها لي عندو اليدين
الحاصول لي قرب منها اكثر وتعرف عليها اكثر كيزيد يستغرب لشخصيتها وطريقتها فالعيش. بلا الاشياء القديمة لي عندها معاها هوس وكتموت على دوران فالاسواق دجوطية وتبقاش وهادشي ماقدرات تسيطر عليه وكل مرة غادية برجليها دور وتبدا تجمع فكل حاجة قديمة وتديها للدار وخصوصا ملي دابا ساكنة بوحدها مكيهضر معاها حتى واحد ومكيشوفوهاش واليديها ولقات حريتها ودارت مابغات
جا الوقت ديال السفر وصبحو الصباح شادين الطيارة مع الفجر، غير غادية تابعاه ماعارفة لا فين تجلس لا منين دوز وكتفوه وفينا الموت دالنعاس وحتى حوايجها كانو عاديين ، كولون وسبرديلة وعليهم جاكيط طويلة وشال غليط وشعرها مجموع كعكة وغادية بزز وهوا قدامها كيقاد المسائل حتى جلسات فبلاصتها وكانت الطيارة عامرة بالناس فوقت البوناني والدابزات لعلك ترضى ، اما هي غير شدات بلاصتها وجبدات عليها بواحد النعسة ما حلات عينيها حتى فيقها قاليها وصلنا عاد ناضت توكضات وضرباتها ريحة فرنسا وسم البرد سرفقها عاد تكعدات مزيان .
هاد المرة كرا سويت صغير وكان خاصو يتقدا كلشي ، خلاها كدور فالدار وتشوق ومشا تقدا كاع لي يخصهم للماكلة ورجع بداو يقادو داكشي وتكا من بعد رتاح خلاها فالشاط هاك بالاك دارت بيها بوم فالفايس بوك .ضرب دويرة خفيفة غير تما فالعشية باش ماتفرعش ليه راسو بالخروج وردها للدار عاد شد البييسي وبدا يقاد بروكرام بالتفاصيل باش ميضيعوش الوقت لانه اصلا مكاينش وماعندوش وقت بزاف وكل نهار فرماسيو وغيرجع معطل وهي خصها تخرج وفكها يامن وحليتها .
داكشي لي كاين نيت لاكن من الزهر لي عندو خرج الصباح خلاها ناعسة ورجع مع الخمسة دلعشية لقاها مزالة ناعسة حيت سهرات ليل كامل مرهونة مع واحد القصة حتى صبح الحال ومافرعاتش ليه راسو بتيليفون .
غير دخل بدل حوايجو وصلى ولبق واحد اومليط بزربة وخرجو داها تسارا وتتصور شوية مع الشجر والاجواء دراس العام
نفس للروتين داك الاسبوع كامل حتى للويكاند عاد عفا عليها الله وداها لديزني لاند مع النبوري شافت الاحتفالات دراس العام وبقات كدور من بلاصة لبلاصة ومن لعبة للعبة حتى صافي مابقاش الوقت لي يزيدو يجلسو تما والا متيلقاوش فاش يرجعو .
النهار فدات فيه جلاس السيمانة كلها لي دوزات فالدار ناعسة
هاد تسافيرة خرجات ليهم ناقصة وناقصها الفلوس باش تزيان وهما مشاو خاويين دوزرها مملة وهنا عرفات سكينة زينة الحياة واخا كانت عارفاها من شحال هادي ولاكن فاش كتحط وتجرب مواقف متنوعة كتزيد تفهم اكثر، ولي بغا يعيش الحياة الدنيا خصو ليها فلوسها سوا كنتي فبلادك ولا فبلاد اخرى راه مكيتبدل والو والبلاد ماعندها ماتزيدك من غير المنضر ،، اما النشاط والمتعة خصها الصرف الصحيح
وواخا هاكاك حمدات الله بعدا شافت ديزني لاند وتسارات شوية اما حتى الحوايج لي باعت ديالها وجابو لينا شوية دالصرف يالاه قدوها باش تشري حوايج جداد ليها وحتى غالي مابخلش وشرا ليها الباروك وشرا حتى لعائلتها كادوات بحال عائلتو .. والسفر مع الكدوات خصو مصاريف كثيرة خصوصا الى ولفتي تمشي وتجيب.
النهار اللخر ختموها بجسر المحبة دازو حداه كيدورو وقالو اجي نشوفو القفل لي علقنا هنا واش باقي وفاش مشاو مالقاوهش وكانت الدولة نقصات منو فين يزيدو قفولة اخرين
ايوا دازت التسافيرة ورجعو بحالهم مسخسخين وكانت ناقصة شوية هاد المرة .رجعو بحالهم ويالاه حطات حوايجها مشات ملهوفةللخدمة باغا تجمع الفلوس وباغا دير هادي وهاديك وماولفات تبقا بلاش رجاات الى خوا ليها الكونط كتشدها الرعدة والخلعة وكتبدا دور وتخمم بحال الحمقة! اما الى خدمات وطلع ليها الجوك ودخلات الفلوس صحيحة كيرجع عندها واخد الحماس رهيب وتبدا ضحك واخا تكون فالعزو! كتنشط وتفرفش ومكتبقاش باغا تشوف شي واحد معصب ولا مقلقل.
وداك النهار لي جات فيه لقات عرابن العرايس معمرين المجر وطلع ليها الادرينالين وفرحات حيت عندها مايدار وعندها علاش تجري عاوتاني ماشي بخال قبل.. مكاينش فلوس مكاينش تحركات وها الاكتآب بدا يطل.
غير جمعات الخصيصة وبذات تبان ليها كازا والسلعة للحانوت والتكاشط جداد وبدا التخطيط وبدا الراس يعمر والسعادة تعم ومابقاش الهم والغم والوساويس فالراس ورجعات للنشاط هاهوا شاط والخدمة
كان كتسناهم عراضة على غفلة لم تكن في الحسبان ، وكالعادة ديما كيجيهم الخبر فآخر لحضة وهاد الاتصال جا من الشي رشيد لغالي وهوا فالحمام واقف شاد طوندوز كيدوز على الزغب لي نازل ليه مع العنق . كمل المكالمة وخرج كيمسح بالفوطة ويقلب عليها ولقاها فالبيت طالة واحد التوب فالارض وكتخمم كيفاش دير ليه فشي تكشيطة ديال العروسة حتى وقف عليها فالباب وقال
غالي: با عيط ليا وعارض علينا للعرس
سكينة: هزات راسها) ديالمن؟ ختك ؟
غالي: دهشام
سكينة: بصدمة)ها؟؟
غالي: قالي دايرين العرس فكازا فدار البنت سكينة: رجعات للتخطيط) ايوا مزيان الله لا يسخر
غالي: مهم وجدي راسك باش تمشي
سكينة: شنو!! فين غنمشي؟
غالي: للعرس راه با غيجي لهنا وباغي يمشي معانا حنا
سكينة؛ رجعات لشغلها) انا مغنمشييشششش
غالي: حشومة غير على وجه با لي جاي حتى لهنا وكيدير الخاطر وكيدير ليك خاطرك وكيتهلا فيك وعزيزة عليه
سكينة: فوقاش بعدا هاد العرس؟
غالي: السبت
سكينة: ايوا غفلونا اش بقا نهار ؟؟ واش انا غنوجد فنهار؟؟ وزايدون السبت حتى انا عندي العرس خاصني نوقف على شغلي
غالي: حتاااا تسالي شغلك ها كازك غير فالدورة
سكينة: وخاصني نمشي للحمام وخاصني نوجد شحال من حاجة ونوقفعلى الخدمة الروينة عندي ويالاه جينا من فرنسا كلشي مرون
غالي: واغير قضي شغلك ووقت ما ساليتي نمشيو صافي؟
سكينة: كن غير مشيتي وخليتيني
غالي: وصاافييي راه قلت ليك على وجه با واش شتيني انا طايح جثة على العراسات راه تا انا ماعنديش معاهم وغادي ندير الواجب ونجي بحالي
سكينة: ايوا ان شاء الله
دوراتها فراسها مزيان وناضت عيطات لرانيا هي اللولة علماتها وشدات معاها الخديث فالمحل كتجمع وتعطيها التفاصيل وتحلل صوتها باش تعرف احساسها لاكن مالقات حتى تحليل ورانيا كانت كتبان باردة ولا على بالهاا
سكينة: انا الصراحة عندي زايد ناقص قلت له منمشيش
رانيا: لا سيري انا صافي ساليت مع هادوك نتي لي صبعك تما ماتخسريش مع غالي ومع بان ونتي لي غطولي معاهم وقريبة ليهم انا انا دابا نبدا حياة اخرى
سكينة؛ الى كان غيبقا فيك الحال والله منمشي
رانيا: لالا سيري انا دابا لي كنقولك سيري مع غالي متخليهش بوحدو وباه جاي وباينة علاش جاي غير باش نتي تمشي معاهم وداير ليك حساب.. بعدا بعدا راه ضاربين ليك الحساب حتى نتي ديري بحسابهم باش يبقاو دايرين ليك حساب
سكينة: مهم راه بعدا غدا قالك دايرين عند البنت
رانيا: ومو حتى هي غتكون؟
سكينة: باينة مالو غيعرس بلا مو باش تسخط عليه المسخوط
رانيا: المهم نتي سيري على قبل غالي اما داك فرس النهر الله لا يكمل عليه ولا يربحو الله يجب ليا خباراتو
سكينة: المهم انا غادي نقطع قوليها لماما شوفي شنو تقوليك ، انا غنقطع نمشي لحمام دغيا راه ماموجدة تا خرية معارفة حتى اش غنلبس وشنو لي خارج وشنو لي داخل والعرس السبت روينة
قطعات وناضت كتقلب بين تكاشط على شنو تلبس ساعا والو كاع الحوايج الزوينين مكريين لنهار السبت ومعربنين وبقات هي كدور وضرب حنكها عاد ضرباتها لفيقة لقات راسها الله كريم ولي بقاو ماعجبوهاش ، عيطات لسارة تشوف اش باقي عندها لقاتها حتى مخرجة التكاشط الزوينين لنفس النهار وعندها غير العاديين وسكينة الى بغات تحضر خاصها ماهي ومالونها
جمعات قشها دغيا ومشات لحمام الحومة حيدات عليها الحمام بعدا واخا بقات هي اخر وحدة فداك الحمام هي والطيابة لي كتحك ليها وضرباتها بفركة ماتنساها لاكن شكون خلاك نبقا نقي وترتاح وتخمم فخاطرك
شدها فليل شدة العما فالضلمة واخا عيات تتخبا وتتكمش ولبسات اغلض بيجامة ودارت زيف حياتي وتخبات حيت عارفاه متيفلتهاش وهوا داها وجابها فالطموبيل وموجد ليها العشا ماهزات ماحطات وكانت عارفة داكشي كامل وراه شي طرح دالمسمن مغمس فالزيت وميبغيهاش تقوليه لا ولا تخطر ليه الخاطر والمجهود حتى هوا . عطاتو بالضهر مكمشة ودورات راسها قائلة
سكينة: بالزربة راه غيضربني البرد وانا سخونة
غالي: لا عير حيدي داكشي قطنطني
سكينة: البرررد البررد غيفرع مي
غالي: ناض) انا غنجيب مو داك الشوفاج نحطو حدا طرمتك والى زدتي هضرتي غنجلسك عليه ماتمرضييينيش اسكينة
سكتات بقات كدور فعينيها وناض كينفخ ساخط مشا جابو وقربو ليها حتى شمو ريحة الحراق وناض بالزربة من بلاصتو لقا الغطا دناموسية من الجنب تحرق وبعدو شوية ورجع كيسوط
غالي: خاصنا باش ن٠٠٠ نشعلو العافية ونوضو الروينة وتقوم القيامة وشوووف واش ن٠٠٠فخاطرنا .. دوري
سكينة: هاني وناشفة
غالي: ها زييت
سكينةء: بتدمر) واسربي عييت راه مسخسخك اصلا والله حتى عيييت
غالي: وقادي راسك من لفعايل دوالو غنخسر الهضرة اصلا كتمشي بتخصار الهضرة نتي ماشي بالخاااطر والحب وداكشي
سكينة: دورات وجهها) ااه ااه هااه بشوية عليا قالاك مالك ياك لاباس ؟؟؟ بشوية ولا نوض نمشي فحالي كااع
غالي: وديري ليا خاطري مرضتي دييلمي هاد الليلة
سكينة: وصافي صافي يالاه
قلبات وجهها وهوا كيشوف فيها معصب
غالي: كيفاش صافي صافي واش كاري مونيكة وافيقي معايا اسكينة ديري شي لعبة مانقوليي ليا هانا وتنعسي
سكينة: متأ هههننن وشنو غنقولييييك؟؟
غالي: براكة من تق٠٠٠ راه عااارفك فاش كتنوض فيك كتحوالي وعاارفك فاش كتبغي حاجتك كتجي تمتلي عليا وتبداي عليا هانا هادا هااه ودابا حفاو ليك زعما …ونوضي تقادي معايا
سكينة: غالي واش باغي تقصر !!! بنتي ليا باغي تفييشط ماشي تفش الحنش وتنعس
غالي: خورها ختى غوتات ) راه غنفش مك وا قلبي عليا والله تا نجبد لك مسارنك
سكينة: صافي صافي يالاه غير طلق واحد ووحلنا معاه
غالي: قوليها راسك شحفتيني عليه
صبح الحال وصبحات كتجري وبدات من التدواش عاوتاني وخرجات كطير نشفات الشعر ورجعات حلات الباب لفام دميناج تجمع ليعا الروينة قبل ميوصل شيخها ،، لاكن طارت حتى عيات فاللخر عيط ليها غالي وهي كدور وتقلب على شنو تلبس ومزال واحلة ومالقات حتى حاجة من داكشي لي باغا
غالي: الو سكينة
سكينة: الو غالي
غالي: اجي لدار دابا اجي راه با جا
سكينة: جا!! ويزة باقا تما ولا مشات؟
غالي؛ باقا كتجمع شي حاجة فلكوزينة واحي دابا راه بغيتك
سكينة: واخا بلاتي غير نشوف شي حاجة لقيتيني فواح. المحل كنقيس التكاشط
غالي؛ واغير اجي يالاه .. اجي دابا عاد رجعي شوفي شغاتشوفي
سكينه: تنهدات) واخا يالاه هانا جايا
حطات التكشيطة لي كانت غتقيس ومشات للدار بالسورفيت والقب على راسها وشعرها غير منشف من الماء ومجموع اللور دخلات لقات باه جالس مزال بحوايجو ولافيست حداه وتبسمات مشات سلمات عليه كضحك وحتى هوا بادرها نفس الابتسامة كيضكك ويقشب معاها بحال عادتو حتى عيط ليها غالي من وسط الدار وخرجات من البيت لي كانت جالسة فيه مع شيخها ومشات لقات غالي واقف حدا الطبلة وقدامو واحد البواطة كبيرة مستطيلة مدهبة
غالي: جابهم ليك با شوفيهم
سكينة: برقو عينيها كتشوف ) شنو هادشي؟
حلات البواطة لقات فيها تكشيطة فلغوزانديان ديال الساري كلها منبتة بالنحاسي كتسطي وحلات عينيها مصدومة هزاتها من تما مافاهمة والو وقالت
سكينة: بخفوت) حابها ليا
غااي: بنص عين) وانتي لي كنقوليك ديري لخاطر ديري بوجه با هاهوا جا وجاب ليك تكشيطة يالاه .. وراه تما حتى شي توب ديري قفطان
سكينة: باعجاب) ناري كتحممق
هزاتها كتجري داتها لبيت النعاس وكانت تكشيطة واشمن تكشيطة بحالها مكانوش بزاف وكيلبسوهم غير شكون وشكون وديال لعرايس ماشي دلكرا والخدمة من داكشي الرفيع والتنبات تروا دي يال التضخيم واللون فالغوز فوشيا مع داك النحاسي كياخد العقل وحتى السمطة ديالها رقيقة والشكل ديالها جديد كتسطي .لبساتها جاتها هي هاديك ويدات دور وتصورها مكانتش فالحسبان نهائيا ، جمعاتها وطلقات التوب حتى هوا كان بروكار ديال تبراد القلب رطب وديال شي قفطان بزواق المعلم ختى هوا .ظ جمعات داكشي حطاتو فوق النموسية ومشات حشمانة جلسات حدا السي رشيد وقالت
سكينة: شكرا على التكشيطة والتوب ههه
السي رشيد: كيف جاتك واش هي هاديك؟
سكينة: هي هاديك تقول قيستها عاد شريتها ههه
السي رشيد: ايوا لاباس انا كنت خايف متجيش عليك وصافي
سكينة: لا هي هاديك جيتي فالقياس ديالي ههه منين خدتيتيها من مكناس؟ حيت ماكرهتش شي وحدين طالعين للخدمة
السي رشيد: من فاس مشيت انا ومريم و وقيسناها على ويآم حتى هي مشات معانا
سكينة: ااه وآم بنت ختك ياك
السي رشيد: وآم عرفتيها؟؟ نتي وياها تقريبا بحال بحال
سكينة: اه عقلت عليها
السي رشيد: راه كتقرا غير هنا حتى هي مساكناش بعيدة
سكينة: مافخباريش الصراحة ساكنة هنا فالرباط
الشي رشيد: كتقرا هنا بقا لها عام واحد وصافي
غالي: بصوت عالي) انا جاي اباا غنمشي غير لهنا ونجي
خرج خلاهم بجوج وغير مشا قرب السي رشيد لسكينة وقال
السي رشيد: راه انا براسي غادي لهاد العرس غير بزز عليا اما انا كاع الجماعة لي تكون فيها مهم ماعندي مندير بيها
سكينة: ااه ههه .. انا عندي الخدمة غدا والله غير غنشوف كي ندير
السي رشيد: هوا تابع مو خليه دااابا نشوفو فين غيخرجو ،، شتي ختك مرضية والله لعضيم الى مرضية وانا كنت شحال هادي ضد هاد الزواج دلخوت على هادشي هادا وهاد المشاكيل هادو .. انا مكانش فخباري والو حتى جا قالي بغيت نتزوج ودغيا خطب دغيا داز للعرس
سكينة: شتي هادشي كااامل يدوز وماشي مشكل ..ولاكن الغدر لا..غدرنا ماجاناش نييشان
السي رشيد: واختك تهنات والله مايليق ليها هشام
سكينة: دابا هادشي ماشي هوا المشكل المشكل ماخلا ماقال فينا سمعت داكشي بودنيا ماخلاش فينا ردنا مكنسواوش وجب د العيب كون غير بقا ساكت ، اما هادشي. دزواج راه مكتاب الله ها غالي تزوج وطلق وعاود تزوج
السي رشيد: البلانات دمهم حتى الزواج دالغاالث اللون من الفهامة ديماه وانا قلت لو جلس ماتزربش وتبع يماه حتى طلق وهشام هاهوا تابع يماه حتى تخرج عليه(هز صبعو)عننننداك شي نهار تقول اجي نتصالح معاها ولا تبغي تهضر معاك وتفتح ليها الباب والللله حتى تجبد عليك جنهم لي عمرك شفتيها،، والله كن كانت معاك لا ضحكتي ولا ضحكتيييه وتشوف العداب ديال بصح لي غيدوز عليك ..خليك هاكا مهنية حسااان ليك وسمع اش كيوقع للمرا ديال سمير وكيفاش عايشة السراط معاها وهادي حتى هي لي عندها العرس غدا هانتي غتشوفي اش غدوز عليها حتى هي
سكينة: لالا انا مانهضرش معاها
السي رشيد: ايوا دير بالنصيحة ديالي الى بغيتي تعيش هانيا مع الراجل ديالك ومهنية فدماغك ..خليهم يقولو لي بغاو ماديهاش فالهضرة(هز حاجبو) الغالي راه راسو قاصح بالحق ميدوزكش انا عارفو وانا مربيه من الصغر ديالو كنعرفو شنو كيسوا .. تعيش الهنا وماتلقاش بحالو بلحق الى بعدتي على يماه .. كن مكانش عارفها مخلوضة بنت لحرام حرة كاع مايدير لي فراسو ويتزوج واخا عيات عليه ها السخط ها الرضى زاد وماداهاش فيها
رجع غالي جايب تقدية دلعشا لباه ودخلها للكوزينة فين كانت يزة مزال كتجمع ، اما سكينة كانت مزالة جالسة مع السي رشيد لاكن غير سمعو السي رشيد دخل بدل الموضوع وناضت سكينة تبعاتو لقاتو حاط الدجاج وقالت مهرجة عينيها
سكينة: هيييه!!! شكون غيطيب هاد دجاج؟؟
غالي: واغير طيبيه كيفما درتي ليه ناكلوه
سكينة: اويلي مامنقيش وحالتو شكون غينقيه
غالي: غمزها ) تعاونك يزة غير قضي قضي راك كتعرفي غير سيري
سلت وخلاها كتشوف فداك دجاج عايفة تقرب منو وقالت كطل عليه من بعيد
سكينة: نقي عفاك داك الدجاج قاديه مزيان باش نطيبوه للعشا
يزة: انا غير غنرقدو ليه ونقيه ونمشي باش منتعطلش راني دابا ومعطلة
سكينة: مهم نقيه مزياان باش يصلاح ليا نصايبو
خلاتو ليها وخرجات سيفطات غالي جاب ليها ليكات ووحللت فيه فالمطبخ بوحدها كطيب وتعاود شداتو شرملاتو بليكات متبعة اليوتوب وخشاتو فالفران بقا كيدور ويعاود حتى شبع وقادات المرقة يغرق فيها جمل حتى دخل السي رشيد بسررفيت والبانطوفة طل عليها لقاها واحلة وقال كيتبسم
السي رشيد: سكيناا..كتوجدي لعشا
سكينة: هه اه
السي رشيد: نعاونك؟؟
سكينة: لا صافي قريت نسالي
طل على الكوكوت لقا المرقة سقي فدّان وهزها دورها لقاها سقي حتى جردة وقال
السي رشيد: شعل عليها تزيد تعقد شعل
سكينة: غتحرق
السي رشيد: لا غير شعل ونقص ليها..زيد ليها شوية دزيت وخلييها
هز الزيت زادها راسو وشاف الفران لتحت شاعل طل عليه كيسول وحلو طل على الدجاج وقلبو مزيان ورجع اللور كينصحها
الشي رشيد: الدجاج دييما صلقو فالبصلة والعطرية عااد حمرو دابا غيدييي ليك الوقت
سكينة: صافي تحمر
السي رشيد: لا مزال خصو شوية غير خليه يدور
خلاها وخرج مشا صلى لعشا هوا وغالي فالجامع في حين شافت الدجاج محمر طفات عليه وغير دخلو حطات كلشي وجلسات تعشا
السي رشيد: تبارك الله عليك جاك هوا هاداك
سكينة: ههه شكرا
بداو كياكلو وحر غالي واحد العضم طرطقو وهوا يطوش للدم وقال مصدوم عاف ورجع اللور
غالي: هادشي خضر اسكينة !!! شهادشي
رجعات حمرا وتزيرات وكانت غترد كلشي داكشي لي كلات اما السي رشيد بقا ساكت وغالي ساح الدم قدامو فالمرقة ماقدرش يكمل
غالي: اري شي فوطة نمسحو يدينا اري
قالها وهوا عايف المنضر وناضت بالزربة تجيب الفرطة وتلفت السي رشيد وقال بشوية
الشي رشيد: صافي كتوقع صاافي ..
حرك ليه يدو كيهدن الوضع في حين سكينة وصلات للكوزينة وتلاحت كتبكي مارضاتش وتقجات حتى مابقاتش قادرة ترجع عندهم
داز اكفس عشا فحياتها وماعاوداتش رجعات عندهم بمرة حتى جمع غالي الطبلة وفرش لباه عاد بانت سكينة خارجة من بيت النعاس لابسة بيجامة بيضا دافية وفيها اوراق الخريف وبانطوفة بنية طلات عليه كتبسم وقالت
سكينة: بابا رشيد خاصك شي حاجة
السي رشيد: لاالا شووكرا اسكينة تصبحي على خير
سكينة: تصبح على خير
ردات عليه الباب ومشات دخلات للبيت لقات تما غالي جالس قدام البيسي عاطيها بالضهر ، ماهضراتش معاه مشات جلسات قدام المرايا وجبدات الصباغة ديال الدفار وجلسات تصبغ راسها كيما موالفة باش تختاصر وتربح الوقت غدا ودير شحال من حاجة باقا ليها . اما هوا ماهضر ما نطق كمل على شنو كيدير وسد داك البيسي وتكا سد عينيه خلاها جالسة ماداتهاش فيه حتى نعس وهزات راسها فالمرايا شافت فيه بكره وبدات دعي فيه فخاطرها وتشمأز منو حتى كرهات نهار عرفاتو فيه ونهار تزوجات بيه وبقات كتسول راسها انا شنو كندير هنا مع هاد الق٠٠اد هادا جالس كيبكي فيا ويتنفخ اوييلي اشكاين !! شكون هوا كاع
حقدات عليه رجع كيبان ليها كحللل مافيه مايتبغا وماحملاتوش وباش تبرد على راسها مشات هزات البيسي لي كان عطاها حلات الفايس لقديم ديالها لي كان سد ليها نهار قررو يتزوجو وقتح ليها واحد جديد . رجعات للاصدقاء القدام بقات كدور طالعة نازلة حتى وصلها مسج على غفلة ودخلات تشوف شكون.
شكون غيكون!!! هادا القطري لي كانت تصاحبات معاه شحال هادي وعاونها فالعلاج ديال التوكال وسيفط ليها ادوية من برا . تبسمات وتفكرات ديك الايام ودخلات قرات المسج ديالو
درغام: اهلين كيفك
سكينة: اهلا وسهلا ههه كيف حالك نتا
درغام: تمام وانتي؟ قالو لي تزوجتي صح؟
سكينة: اه صح
درغام: مرتاحة فزواجك ؟
سكينة: يعني…مسؤولية. وداكشي
درغام: يعني يعني…وليس تسرعتي؟
سكينة: مكتوب ههه
درغام: لا هادا اختيارك وقناعتك
سكينة: داخلين فالمكتوب
درغام: مبروك عليك
سكينة: الله يبارك فيك
درغام: تمينت يكون في نصيب بس …
سكينة: بس شنو؟
درغام: المكتوب.. على العموم تهانين المهم تكوني مرحاتة
سكينة: وانت ؟مكتفركش تتزوج
درغام: حاليا لا … بس اعترف ليك بشي مهم ماكان ودي اقولو لك فيوم
سكينة: شنو هوا؟
درغام: انا قطعت وعد على نفسي ماراح اتزوج الا لما انتي تتزوجي قبلي.. وطول ما انت يعني حرة ماتزوجتي راه ييقا عندي امل فيوم من الايام اني اتزوجك برضى الجميع
سكينة:بصدمة) بصح!!
درغام: والله .. ليش اكذب الحين وانتي خلاص تزوجتي
سكينة: ماقلتيشليا هادشي!!
درغام: انا ماكان ودي انك تعرفي بس حسيت انو مافي نصيب قررت انسحب بهدوء بس يشهد الله مانسيتك وكان عندي امل وماتوقعت تتزوجي بهاد السرعة هاذي.. يعني حسب معرفتي بيك كنت افكر انو انتي مو مستعدة للزواج اصلا
بقات مصدومة غير كتشوف واخا كانت عارفة ان درغام كان كيبغيها فعلا وكانت كتشوف هادشي فعينيه والعيون دائما كيفضحو مولاهم وحتى نهار مرضات كان اول واحد واقف معاها من بعيد ومكانتش كتمثل عليه وسيفطات ليه تصاورها فاش خرج داكشي فوجهها وكانت حالتها حالة وتما تأكدات انه فعلا تجاوز مرحلة الاعجاب وكان باغيها هي كروح وكإنسانة وكان ديما معاها على اتصال وهي كتتعالج خطوة بخطوة وبغاها تتعالج وواعدها الى مابراتش يديها لبرا حتى تبرا ومايتخلاش عليها..هي فالاول كانت كضن انه ضريف وكيتعامل لاكن ديك المعاملة مكانت فقط ديال واحد ضريف ولا باغي يدير يزوين وانما ديال واحد مهتم اهتمام شديد وحريص على العلاج ديالها وكانت كتشكي عليه ومعتابراه كصديق مكيهمهاش تعجبو ولا يبغيها .. ولاكن فالحقيقة درغام كان كيبغي سكينة وماشي حب عادي.. حب كبير وصامت وقضروف مستعصية واسباب شخصية لي هي معطاتهمش اهمية بزاف ومكانتش كضن ان داكشي جزء من حياتو كيدوز وقصة كيعيشها بوحدو وحب من طرف واحد
بقات ساهية كتشووف وتخمم وبدات فكرة الطلاق كلور ليها فراسها.. وعلاش لا ؟؟
سكينة: اذا مكانش حل واخا نبغيو نتزوجو واليديك مايبغيوش
درغام: رفضو ومصيري يعني اتزوج من بلدي وهادا شرط اهلي والحل لي كان حكيت ليك عنو ما رضيتي بيه
سكينة: يعني اكون زوجة ثانية او زوجة اولى واهلك ما يعرفو بزواجنا نهائي يعني انا تتزوجني فالسر
درغام: هادا الحل الوحيد لي عندي وانا كنت اردي اتزوجك بس اهلي مايدرون بزواجنا ولازم فيوم من الايام اتزوج زواج مل الكل قدام عيونهم
سكينة: انا طبعا منقبلش هاد الزواج هاكا
…بس اجي نسولك مثلا مااااثلا طلقت تعاود تفكر تتزوج بيا؟
درغام: حتى لو جبتي معاك اولادك انا ودي اكرن معاكي..بس لا تفكري بالطلاق الحين اذا كنتي مرتاحة مع جوزك لانه ما يرضيني اخرب حياتك .. هاذا مجرد حكي كان ودي اقوله ومايفرق شي بسس ارجوكي بلييز لا تتطلقي اذا كنتي مرتاحة
سكينة: لالا حنا غير بنحكي وبس.. اصلا الطلاق شي مو بهاد السهولة انا بس كان بدي اعرف شعورك اتجاهي فقط
درغام: والله اتمنى لك السعادة من كل قلبي وكان ودي اشوفك اشتقت لك كثير بس دا حين ما ينفع .. انا مرتاح لانو حكينا وانتي الله يهنيكي بحياتك .. انا طالع برا ابي بالسيارة يستناني
سكينة: اوك المهم هادا الحساب راح افتح بعدين اذا كان بدك تخلي لي رسالة خليها راح افتح بعدين باي
خرج درغام وخلاها جالسة كتخمم وتدي وتجيب.. شافت فغالي ساهية لقاتو ناعس على كرشو وبدات كتخمم حسات براسها زربات وتزويجة لي تزوجات ماصدقاتش واصلا مكتحس اتجاهه بحتى حاجة .. مكاينش حب.. اعجاب كاين ولاكن تبخر حتى هوا مابقاش كيبان ليها كما النهار اللول وبدات تفكر فالطلاق وترجع تعيش حياتها بلا هاد الهم والغم لي عايشة فيه والضغط ها العشا ها الزمر ها العرس ها العراضات دوالو لي ماعندهاش اصلا معاهم. باهتصار الحياة الزوجية وداكشي لي بعقلو جاها كبير عليها وماشي ديالها ومابقاتش باغا تستمر وبغات ترجع لحياتها الطبيعية لي كتنتمي ليها وتمثلها ولي هي الحرية ثم الحرية وترد الروح الطفولية بعيدا على لقب المتزوجة وعيب هادي وعيب هاديك .
بلوكات الفايس مرة اخرى من الاحسن باش مايطيحش فغالي ومشات تكات كتخمم حتى داها النعاس
صبحات حاقدة على الوضعية واخا مافيقهاش وماقربش ليها كاع ودار الفطور ووجد كلشي كأنها مكيناش حتى ناضت على خاطرها لقات الفطور محطوط وكحز باه دار ليها بلاصة كأنها هي الضيفة جلسات فطرات وقالبة وجهها مكتهضرش معاه .
خلاتهم من بعد ومشات خرجات للمحل كان عندهم عرس وبقات طالعة هابطة حتى ضربات الخمسة دلعشية وعيط ليها غالي فتيليفون وهي فالقاعة
غالي: الو سكينة ساليتي باش نمشيو؟
سكينة: لا ماساليتش ومزال مغنسالي غنوقف على العرس بيدي حتى يسالي
غالي: والعرس معاياش غيسالي با خصو يكون تما
سكينة: حتى يسالي هادشي لي كاين
قطعات عليه ورجعات لشغلها ومعاودش عيط عليها حتى ضربات طناش دليل وكانت كتوجد راسها فالمحل وكتلبس تكشيطة لي جاب ليها شيخها ومصايبة المكياج كان طبيعي وشعرها ويفي مدرج جاها حسن من السامبل بانت كيوت بحال شي اميرة من مسلسل بريطاني قديم تاريخي
هزات صاكها ويالاه كتجمع راسها وتتعطر صونا ليها مرة اخرى
غالي: طناش دليل هادي وبا مشا وكل شوية كيصوني يسول فين وصلنا حشوومة كاع
سكينة: عاد ساليت اجي عندي
قطعات ليه فوجهه وماهي غير جوج دقايق حتى كانت قدام المحل طموبيل كحلة صغيرة وقديمة وهوا لداخل بالكوستيم كيصوني ليها خرجات كتقلب لقاتو فديك الطموبيل مافهمات والو !! طلات عليه بتكسيطتها والمونطو بالفرو كامل على كتافها وقالت
سكينة: فين طموبيل؟
غالي: داها با راه سبقنا غير طلعي دابا طلعي
سكينة: هييه!!! والله منمشي فهاد الخرشاشة هادي والله فيها لا ركبت
غالي: بنفادالصبر) طلعي دابا راحنا معطلين الناس غيحطو العشا كيتسناو فينا غير حنا
سكينة: والله منركب فيها بناقص مغاداش كاع
بغات ترجع ونزل دغيا حل الباب طلعها بزز منها وسد عليها ورجع جلس كيسوط معصب
سكينة: والله منمشي فهاد الخرشاشة واخا تمووت سمعتي جيب ليا طموبيل نمشي فيها حسن من هادي
غالي: وراه غير كريتها ليلة وغنردها ونجيب طموبيلتي غدا مالكي
سكينة: والله منمشي فيها شو كي دايرة مشوهة .. بلا ماتحاول مغنمشيش فهادي
بقا جالس معصب كيقلب على شنو يدير فاللخر حطها قدام باب الدار وعيط لكريم جاتو طموبيل نقية وزوينة ونزلات ركبات فيها كتنفخ ماهضراتش معاه حتى وصلات لكازا وحطهم قدام باب القاعة وحط ست ميات درهم على قلبو عاد نزلات كتقاد خوايجها وشعرها
خلات مع الباب لقات السي رشيد كيتسناهم تبسم ليها ووراهم منين يدوزو ، شدات فدراع شيخها وخلات غالي ودخلات كدور عينيها حشمانة والشعبي شاخد والناس كلهم كيحنززو فيها وهي غادية بداك الطالون فيه ميترو حتى وحدة ماتقد عليه ومرتاحة تقول لابسة بلغة ، داهم حتى للطبلة فين جالس وكانو بلايصهم خوايين خلاوهم ليهم بينا لسي رشيد وختو مريم وجلسو مع عائلة السي رشيد فالطبلة في حين مشا غالي بوحدو للطبلة دمو وخواتاتو بجوج لي لا يقلن عندها اناقة ونخوة والحق يتقال عندهم مايقولو فالنخوة والهمة لاهما لا مهم لي كانت بحال الاميرة يحلفو عليها فالسادات ما والدة تقول مغنية بد اك الشعر مصاوب قالباه للجنب كامل والتكشيطة ديال الرفيع وعاد الدهوبات يا سلام مكاين غير الدك التقيل والتناسق والشيكي بقات سكينة غير كتشوف فيها بنص عين وهي كتسلم عليه حتى جات عينها عل
الطامة الكبرى وبانت ليها سارة معاهم فالطبلة بين خواتاتو باينة عليها طبيبة ولا شي مهندسة وحشمانة وحتى هي عاطية للعين وهاد المرة المكياج باين مخدوم عند ماليه صحاب الحرفة وجات زوينة ، شافتها سكينة كتسلم عليه باليد وتبسم وقلبات عينيها وعطاتهم بالضهر وبدات كضحك غير بوحدها وكتردد وتقول هه وشوووف الايام سبحان الله كيفاش تقلبات الادوار !! عاد كانت برانية عليهم وكان بيناتهم الحدود ودابا رجع العكس!!
قرب السي رشيد عندها مصغر عينيه وقال
السي رشيد: شفتي اللفعة جايبة معاها الطليقة دالغالي بلعاني.. بلحق ماديرش فراسك هادشي غير تخربيق انا كنعااارفها شكتسوى .. قلت لك راه ماتسواش واحد اللفعة دابا غيبان ليها الغالي هوا المخير فولادها ..عرفتي(كيدور راسو) كن كنتي مامقاطعاش معاها !! والله مسبدك كتشوفي هاديك خيتي كل نهار عندك فالدار بلعاني والله حتى تخرج ليك لعقل
سكينة: كتقاد تكشيطة على ركبتها) ههه لااالا والله ما حركات فيها شي شعرة واخا يجلس معاهم .. انا نيت بغيتو يجلس تما معاهم
السي رشيد: يخلي المرى ديالو ويجلس مع الطليقة بعقلك ولا والله حتى نمشي نجرو من تما ونعطي ليماه واحد الطرشة .. شحال ما طررششتها كانت شابعة طروش
السي رشيد: بحقد) داك الدهب لي لابسة كاامل انا شريتو لها وباقي كتلبسو ، عرفتي شكنت كنشري ليها ديال للدهب بنت الحرام داكشي غير شوية من لي عندها .. الصندوق دعلاء الدين مخزن عندها كامل شريتو ها الشرتلة ها الكورميط دلعنق ها الخواتم هاااكا ها الكوليي دالجوهر والمضمة هاديك لي لابسا حسابك مشلللة!! هاديك لقليلة شي ربعين مليون كنت شريتها ليها بتمنية دملاين هادي ربعين عام فالسابع دسمير (هبط كيشوف فتيليفون ويسوط) بنت لحراام الكلبة
بقات سكينة كتشوف فيه ماعرفات ضحك ولا تبكي على زهرها الناس كيجيوهم المضام ديال الذهب وهي لي تستاهل الديامو يالاه عندها طقم واحد شراتو بزز ، بقات غير كتشوف بنص عين فأسية كيفاش كتهضر باينة داكشي طبع عندها ماشي تصنع وماشي بلدية ولا مرى من العيالات لقدام بلعكس مختالفة كليا وحتى بنتها حداها منال كتشبه ليها بزاف فكلشي وجالسة متقلة حدا راجلها وكتشوف فسكينة اما هند ناضت هزات تكشيطتها وبادرات مشات عند سكينة غفلاتها وتبسمات ليها كضحك وحتى سكينة من الشوك تبسمات وضارت سلمات عليها
هند: كي دايرة لاباس اش خبارك ؟؟
سكينة: الحمد لله ونتي لاباس عليك؟
هند: الحمد لله مرحبا بيك
سكينة: شكرا
مالقات هند متقول بقات غير كتبسم اما رشيد ماضارش كاع تلفت عند و ئام كيقشب عليها بحال ديما في حين مشات هند رجعات بحالها وغالي شداتو مو بالهضرة جرات ليه كرسي جلس بالجنب كيهضر معاها هي وسمير وكلشي مشارك فالحوار ، ناض السي رشيد من بعد ما سيفط ليه هشام مسج يمشي عندو وجلسات سكينة بلاصتو قربات من وئام كضحك وبداو كيجمعو كأنهم صحابات
سكينة: قاليا ساكنة حدانا !!
وئام : اه بقا ليا هاد العام صافي نسالي
سكينة: ايوا شي مرة اجي عندنا ولا نخرجو انا وياك لشي بلاصة
وئام: بتردد) اه علاش لا .. جاتك تكشيطة زوينة بالصحة
سكينة: الله يعطيك الصحة شكرا قاليا قيسوها عليك
وئام: ههه واييه عرفتي شحال قلبنا حتى عيينا باش نلقاو لقياس دالكتف
سكينة: الصراحة زوينة خصني نهبط لفاس ناخد للعرايسات التكاشط
وئام: فييه عااامر تبارك الله (شافت بنص عين) سارة من الصباح وهي كتشوف فيك
سكينة: بنص عين) خليها تشوف تصاحبات مع مت غالي
وئام: مكتحيدش عندهم من الدار
سكينة: مرييضة ها ديك
وئام: قربات) واحد المرة سيفطات ليا مسج من تيليفون دغالي قالت ليا ماتعاوديش تسيفطي ليه.. وانا كنت كنسيفط ليه غير داكشي دالقرايا حيت متبعة داكشي لي قرا عليه هوا وكان معاااوني .. وعمرو قال شي حاجة واصلا كنهضرو على القرايا
سكينة: ههه ويلي ويلي
وئام: كرهت الموقف منكدش عليك بقافيا الحااال مارضييتش
سكينة: فالاخر طلقات
وئام : تنهدات) ولاهيلا وعمري قلت ليه دارت ولا خلقت ليها مشكل درت بناقص
بقاو كيهضرو حتى سمعو النكافات والعروسة داخلة فالعمارية وكلشي وقف كيسفق ويرش الا سكينة بقات جالسة عاد رجع غالي وقف حداها دار يديه فالجياب كيتفرج والعروسة داخلة وهشام قدامها بجلابة كيدور عينيه حشمان وتالف ومو كتعوج حداه وتبسم عاجبها الحال وقفات جنبو .. هزات سكينة تيليفون ودارت ابيل فيديو مع رانيا بدات كتصور ليها وكضحك على هشام لي بدورو قشعها كتصورو وكضحك وتزير .. كانو العينين على سكينة لان وضعها فداك العرس كيثير فضول العائلة كلها بحكم كلشي عارف كان خاطب ختها وفرتكو الجوقة وتلاوها بخزيت وتعادات مع العكوزة وكملات حتى مع هاد العروسة لي من العمارية شافتها ودارت فيها شوفة فشكل ومنها بان انها فراسها الخير والبركة من الاخبار العالمية
كانت رانيا ومونية بجوج مخرجين عينيهم كيشوفو ورانيا كتشير ليها توريها لعروسة وسكينة من الحماس ناضت وقفات مع الناس فالصف الامامي بلعاني كتقول لهشام هانا كنصورك وباش نيت تهز تيقتو فراسو وفعلا تمكنات منها وكضحك عليه حتى تلف بقا كيدور فبلاصتو وشدها الفوغيغ هي ورانيا ووئام موراها كتسفق وتشوف فتيليفون حتى سالات ديك الدورة لي كانت بحال الدورة فجهنم عند هشام وحمار وجهه وسكينة كتزيد تشوف فيه وضحك حسساتو انه كلون ديال الضحك وانه داير شي حاجة ماشي هي هاديك عاد جلسات وخلات كلشي كيتصور . جات ام العروسة على غفلة سلمات عليها ورحبات بيها وكذلك مع غالي وجا الاب حتى هوا دار الصواب ورجعات للمساجات مع رانيا كتكتب وضحك بوحدها والعينين مزالين عليها تقول ديك العروسة مكايناش وماداها فيها حتى واحد
رانيا: شفتيه داخ هههه
رانيا: حيت كان كيقوليا لعرس حرام ولد لحرام
سكينة: هييه حلفي!! ههه انا غنحشمو ليك ولا عليك والله حتى نعصر موووو مزيان
رانيا: خلييه مزياان هزي تيليفون قدامو وصوريه راه كيكره لي يصورو ويشدو مكيبغيش الاضواء
سكينة: تسناي تسناي انا غادي ندير ليه فعايل لقوادات هههه
خلات حتى كلشي جلس وناضت هازة تكشيطتها كتبسم وقفات الوسط قدامو بلا حشمة بلا حيا وكلشي كيشوف فيها وهزات تيليفون قدام عينيه وهوا كيدور وجهه حشمان ماباغيش يتصور وخصوصا قدام الناس وبدات كتصورو وضحك من عينيها ضحكة سخرية وهوا كيسوط وينفخ ماضحكش ، شبعات فيه تصاور قدام عينيه وقدام كلشي بكل جر أة ورجعات جلسات عاطية لغالي بالهضر
سكينة: شوفي كمارتو رجع زرق نضت صورتو ههه
رانيا: عبرتي علييه بقاي تصوريه وتعاودي غيدوز العرس كحل مكيبغيش يتصور وعارفك غتنشريه
سكينه: والله حتى نبهدلو غير تسناي حساب ليك غنحشم منو ولا من شي واحد انا عاد تحمست عجبني الجو ههه تشنشييييط هههه
رانيا: سلمتي على مو ؟
سكينة: لا واخا ندوز حداها ، جابت معاها طليقة غالي
رانيا: اويلي!!! حلفي!
سكينة: والله اصلا جات العائلة كلها جاو منهم بزاف
رانيا: هادي تسطات
سكينة: خليها اصلا انا عندي زاايد ناقص مكنحسش هههه عديمة الاحساس
رانيا: وغالي؟!!!
سكينة: مالو؟ هاهوا جالس حدايا
رانيا: واعااااارس نييت واشمن عرسها ها الطليقة ها مو ها اللوس عا الزمر
سكينة: اوييلي بلعكس انا عاد عجبني الحال الحماس والنشاط.. بلاتي بلاتي بعدا شوفي كي جيت انا غنوض لشي طواليط نصور ليك راسي
ناضت مشات كتجر تكشيطة وتبسم لكلشي هازة راسها لقات باب كبير ديال طواليطات فيهم المرايات ووقفات كتصور حتى شبعات وخرجات لقات غالي واقف كيتسناها
سكينة: شنو بغيت؟
غالي: يالاه ..ساليتي؟
سكينة: عطاتو تيليفون) صورني
رجعات لور وقفات وجمعات يديها لقام قربات اصابعها مع بعض ووقفات وقفة انثوية مايلة براسها شوية كتبسم صورها وقربات تشوف شافت الصورة ماقنعاتهاش وقالت
سكينة: عاود صورني كاملة
غالي: لمن باغا تسيفطي هادشي؟
سكينة: غنحطها فالفايس
غالي: هاا؟؟؟
سكينة: بغيت نحطها صورني
صورها وخدات تيليفون مشات رجعات بلاصتها جلسات سيفطات لرانيا ودخلات للفايس ديالها يالاه غتحطها حيد ليها تيليفون بشوية وقال
غالي: علاش غتحطيها؟
سكينة: كيفاش علاش؟ بغيت مالها عريانة
غالي: راه غضربك غير العين وتطيحي شي طيحة وتبداي تبكي
سكينة: خدات ليه تيليفون ) غير خليني.
غالي: رد تيليفون وراه) غير سمعي سمعي.. الفايس راه فيه من هب ودب غتحطي تصويرتك يبقاو يشوفو فيها شنو غتستافدي
سكينة: انا بغيت (هزات كتفها) غير عطيني حتى لعرس فيه من هي ودب
غالي: هي الى جلستي ماتبقايش تنوضي راه عين بنادم خايبة.
سكينة: غنديرو الشوهة هنا عطيني تيليفون
غالي: بتحدير) ماتحطيش تصويرة
سكينة: ارا دابا تيليفون
خدات تيليفون ورجعات للمساجات عند رانيا كضحك
سكينة: كي جيت ؟ هادي هي تكشيطة لي جابليا. واعرة حمقاتني
رانيا: كن تشرطتي فالعرس ميجيبهاش حيت متشرطيتش جابها ليك . جا معاك داك اللون
سكينة: وشعري هاكا
رانيا: جيتي فنة تبارك الله قالت ليك مي قراي المعودات
سكينة: فرس النهر جالس تقولي جالس على الشوك الله يستر
كانت كتهضر وتجمع وضحك ماهزاتش عينيها حتى ناضو عمات غالي كيشطحو ووئام حتى هي وجرو سكينة من يدها ناضت عاجبها الحال تبان وغالي جالس كيشوف فيها بنص عين حتى لواحد اللحضة وقف كيقاد حوايجو من لور وقال فودنها
غالي: البنت..تقلي شوية براكة عليك
سكينة: دفعات كتفها) سير سير (بصوت منخفض قلبات وجهها) بعد مني غير لاسق فيا حاضيني يخ
غالي: جرها بقرصة) معاك كنهضر صافي براكة تبتي شوية
سكينة: ضارت جيهتو) خليني ماشي سوقك كلشي كيشطح واش شفتيني كنردح راه غير كنميل
غالي: جرها ) دوزي تجلسي
سكينة: شدات فيه ) غطيحني طلق طلق
جرها غير بالريط للكرسي جلسات وحيدات الصندالة غطات رجلها بتكشيطة عاطياه بالضهر وهوا ووراها جالس
سكينة: بعدي مني بغيت نشطح راه عرس هادا
غالي: عرس الناس برانيين تا للدار وارا متشطحي
سكينة: واسير سير ، مالي بوحدي لس كنشطح
غالي: وماتشطحيش الاللة جلسي تكمشي فيلاصتك
سكينة: ها باك حتى هوا كيشطح بووحدك لي معقد
ماردش ومشافش فيها كاع بقا كيتفرج وهي كتنكر مابغاتش تسكت حتى بداو كيجلسو والعشا كيتسربا فالطبالي
تحط العشا وتعشاو الناس ورجعو يكملو السهرة ورجعات سكينة للتصوير من جديد كضغط على هشام حتى مابقا فيه مايكمل العرس و واصلا داك العرس كان بحال شي ساحة التبركيك لكلشي وخصوصا فالطبلة د ام غالي لي كانت كضحك وتشوف فسكينة بنص عين وكتنمر عليها
اسية: ايوا هانتي كتشوفي مانعرف اشنو عجبو فيها مخلي بنت الشان والهمة وتابع ليا النكافات ،،ويلي وحدي على المهندس تلات بيه الايام يعلم الله اش دارت ليه تلف ..مكانش الغالي هاكا تبدل
سارة: منسمحش ليها لا دنيا لا اخرة هي السبب فكلشيي
فالطبلة دالغالي كان رشيد جالس طالع ليه الدم وسكينة كتسمع حتى هي ويعلم الله مالو شنو معصبو مع هشام ..من الساعة لي ناض عندو ودازت بيناتهم شي هضرة وهوا طالع ليه الدم وكل شوية يهضر على الموضوع ويشوف الساعة
السي رشيد: موصييبة كحلة
غالي: علاش خلاو حتى لنهار العرس عاد دارو لاكط كانو يديروه شحال هادي
السي رشيد: هوا حمار تابع ليا هادي مانعرف اش عاملة ليه دوخاتو ..دوخااتو وتلفاتو ناض كيزرب بغا يدير كلشي دغيا
بقا غالي ساكت رجع مستمع .. اما سكينة مكايناش كاع فداك العالم الهضرة كدور على ودنها مكتفهم فيها والو وغاطسة فتيليفون ماخلات حتى طرف فهشام ماتنمرات عليه ونسات العكوزة لي اول لقاء ليها معاها وموضوع هشام غطا على جميع المواضيع وماداتها ل افطليقة غالي لا فغيرها وبقا تركيزها مع هشام وفمها محلول كضحك وتعاود حتى سالا داك العرس وناضت هزات الفرو ديالها لبساتو وغالي وراها كيعاونها ويهز ليها شعرها وهي شادة تيليفون كتهضر فالاديوهات
سكينة: ودنيه حمارو اصاحبتي تقولي بارز بزز ومزنك خرااني بالضحك
رانيا: واش سالا العرس؟؟
سكينة: صافي كلشي غينوض يدردب فحالو ههه يالاه باي حتى نجي
قطعات عاد وعات براسها لقات راسها واقفة حدا سارة وشادة تكشيطتها فيدها وكدور عينيها وتقلب على غالي وتشير بيدها
سكينة: اويلي صاكي!!
غالي: شادو فيدو) هاهوا
سكينة: كتقلب) ااا اسميتو ..شارجور
السي رشيد: هاهوا عندي هاك شارجور ديالك انا مغنمشيش معاكم
غالي: ايوا صافي؟!!
السي رشيد: عندي الشغل اولدي غنمشي مع سمير هاك السوارت ديالك دي الطموبيل ديالك
مد ليه السوارت فيدو وسكينة سابقاه غادية حدا وئام في حين رجع عند مو وشداتو بالهضرة وهما مجموعين كاملين قدام الباب دالقا عة كيتسناو العروسة تخرج . شاف سكينة غادية جهة الطموبيل وفتح ليها البيبان من البعيد مشات طلعات فبلاصتها وبقا واقف كيهضر وسارة شادة فمو واقفة جنبها كتبسم وتسبل فعينيها بالحياء
تسنات حتى عيات وبدات تسوط وهوا مزال واقف كيهضر ولايح المونطو كحل على كتافو حتى خرجات العروسة بالزغارت عاد قطع الشانطي مشا للطموبيل ركب وبدا كيسوط من التعب
غالي: العراسااات.. موفيزافيغ
سكينة: يالاه نمشيو بحالنا فيا النعاس
غالي: قالك با نمشيو معاهم نوصلو لعروسة لاوتيل
سكينة: اه يالاه نباتو فلاوتيل اغالي حتا حنا
غالي: اللخر دالشهر اسكينة والطموبيل فيها البلان
طل عليه واحد من ولاد العائلة مد ليه كوب قهوة من النافدة
غالي: شكرا اخاي محسن خدمناك معانا
شد القهوى حطها حداه وديمارا الطموبيل تبع الصف غادي فالسكات وكلشي غادي بطيط طيط الا هوا شاعل الاضواء ومافيه لي يكلاكسوني وسكينة متكية كتفرج حتى وصلات لعروسة للاوتيل وقلب الدورة شار لباه بيدو وكسيرا بواحد الصوت تقول هارب من المافيا ، طار وكان كيتسنا غير يشد الطريق ويزطم ونيت زطم زطمة وحدة حتى وشد الفران قذام باب العمارة
حل الباب ودخلات كتحيد المونطو سخفانة وهوا وراها غادي وجار الشوفاج معاه حتى للبيت شعلو ومشا عندها نيشان يالاه حلات السمطة عنقها بغا يبوسها وهربات وجهها
سكينة: فيا النعاس
غالي: حتى انا فيا النعاس ولاكن تانتي حسن منو
سكينة: بنفور) لا عيانة مافياش
غالي: عنقيني مافيك لي يعنق
عنقاتو كتسوط وقالت
سكينة: راه الصباح هادا بغيت نحيد هادشي ونعس
غالي : هزها هانا غادي نحيد ليك العيا
نفرات ومابغاتش بدات كتتهرب وهوا مابغاش يطلق منها فاللخر نوضوها سباط بتخراج العينين
سكينة: وا مابغيييتش واش مكتفهمش بعد منييي
غالي: هز حاجبو) نبعد منك !!
سكينة: قلبات وجهها) اه بعد مني مادورش بيا
حرك راسو بالايجاب ووقفات ليه فالحلق مابغاتش دوز وخلاها مشا للبلاكار بدل حوايجو كيسوط ويزفر بغا يتفركع ومازاد حتى كلمة .. مشا توضا صلى الفجر وهي حيدات حوايجها وغسلات وجهها ومشات تخشا فالفراش حتى سمعات حسو تقطع وناضت بشوية كطل لقاتو ناعس فالبلاصة فين كان باه كينعس فالبيت الثاني وعوجات وجهها بميوعة ورجعات فحالها نعسات ، صبح الحال وماقربش ليها ماباسها كيف موالف ما غطاها ..وحتى هي فاقت معبسة مافطرات معاه ماقالت ليه حتى صباح الخير.. نيشان لبسات حوايجها ومقالتش ليه حتى فين غادا زدحات الباب بالجهد ومشات لدارهم نيشان مع وقت الغدا لقاتهم يالاه حطو كسكسو وجلسات معاهم فرحانة كضحك حتى لودنيها تغدات وتخشات هي ورانيا فواحد البيت ومونية كل شوية طل تدي الخبار
سكينة: ماحملنيييش فاش بديت كنصورو واحد اللقطة بدا كيدور فبلاصتو تلف
رانيا: كان كيقول ليا منديروش العرس وانا منبرزش وانا منلبسش الجلابة ومتحيديييش الدرة وشحال دالشروط وانا كيييي لحمارة كنقوليه واخا لي قلتيها هي لي تكون
سكينة: ايوا لعروسة راه دارت المشطة كااع وقنطار دالمكياج ولاكن باينة فيها لاللة ومولاتي ماشي شي هبولة ودرويشة باااينة مقررصة حارة من هادوك ديال الزمان لي كيشدو المصروف ههه
رانيا: شتي فاش برزاتو حداها راه خرجات فيه وهوا فرحان خليه داكشي لي يصلاح ليه
سكينة: اوا راه جات لي فايقة كتبان فيها قويصحة تكون عندها ديك ستة وعشرين عام
رانيا: ساهيا كتخمم) انا مامتيقاش هادشي لي كيوقع ليا بحال شي فيلم .. والله !! فيلم وانا هي البطلة المصدومة مزالة مامتيقاش
سكينة: شتي هادي غادي تبدلك عقلي فين قلتها ليك وماشي دابا سيير امتى ..حتى يدوز على هادشي شحال وماتبقايش تفكري فيه عاد تعرفي تأثيرو عليك
رانيا: انا دابة تالفة كنحس براسي وسط البحر ماعارفا فين نمشي.. بحال الى فقت من شي غيبوبة ومافاهمة والو
سكينة: دابا شنو احساسك اتجاه فرس النهر
رانيا: كنكرهو.. عرفتي كنصلي وندعي الله يبين فيه العلامة وكاندير قيام الليل منها نبرد ومنها ندعي فيه وكنبكي ونطلب الله يبين فيه العلامة
سكينة:هييه!!! نارييي ياربي السلامة ياربي تنجيني من لي بحالك
رانيا: انا مابغيت واااالو(مسحات يديها) بغيت ربي ياخد ليا حقي منو صاافييي.. مابغيتو لا يرجع ولا يتزوج بيا وواخا يجي يركع قدام رجلي منتزوج بيه.. انا دابا حليت عيني ولاكن كليت درس منستاهلوش حيت مكنآدي حتى واحد وهاداك جا آداني وصدمني ..بحال الى شي واحد جا وراك ودفعك فالبحر خلاك تما كتخنقي وتموتي بوحدك ، انا درويشة وانا عارفة راسي درويشة لا فنيتي ولا فأفعالي ولا فكووولشي ومكنهضر فحد ككنضحك على حد ومأمنة بالله وهادشي خلاني نزييد نتقرب من الله اكثر ونقرا القرآن ونصلي بزاف ونقلب فالدين وعرفت شحااااال من حاجة ماكنتش عارفاها وزاد اماني قوى اكثر وحسيت براسي قربت من الله بزاف وكنقوى بيه ونتخبا فيه سبحان الله، هادا هوا للربح لي عندي من هادشي لي وقع ليا ..ومستحيل نقطع الصلاة ومستحيل نحيد الفولار وكنحاول نعالج نفسي حيت انا لي عارفة شنو كنحس وشنو كنعيش دابا وعندي ايمان انني غادي ندوز هاد المرحلة واخا صعيبة ولاكن غادي ندوزها ونبرا ،، دابا الهدف هوا نبرا من الصدمة فقططط وهاداك الى خذا الجزاء ديالو غينقص عليا واحد خمسين فالمية من العلاج
الدقة بانت على رانيا وخرجات فوجهها وكلات من صحتها فوقت وجيز ! رجعات ضعيفة كتموت حتى ملامح وجهها تبدلو مابقاتش كتبان زوينة كما كانت وبهات لونها وصفارت والخوا بين رجليها رجع كيبان وهي كتتمشى من كثرة الضعف، تساست صحتها وكتعاني فصمت ومن طبعها كتومة حتى واحد معارفها مناش كدوز ومكتبين لحتى واحد ،، لاكن فالليل كتخرج حقيقتها وكتبكي للي خالقها وكدعي دعوة وحدة وهي ربي ياخد حقها
اما سكينة كان صعيب عليها تحلل حالة رانيا وكتاخد باعتبار غير شنو كتسمع فقط ولا هي من الفاهمين المعاني ولا من لي كيعرفو يضربو المعاني والى ماسبهاش شي واحد فالوجه نيشان ماتفهموش واخا يبات يحشي ليها فالهضرة ويضحك عليها ماتدي ماتجيب وكثرة المطارق مكيخليوهاش تركز فحاجة. غيا كتنقز من هادي لهادي والشطنة سالات معاها وغير غادية .. لي بغا يبقا فيه الحال يبقا ولي بغا يغضب يغضب وكست لي هاز فخاطرو من جيهتها وكيتسنا تراضيه وهي مافراسها اصلا مايتعاود وكتقلب الصفحات بسرعة كبيرة بلا مترجع للور او توقف وتقول بلاتي خليني نقكر فهادشي وتحاول تنتابه .. واخا عارفة راسها كتزبلها كتزيد وتخلي كلشي وراها ومافيها لي يهز الهم ولا يضرب لحساب لشي واحد ، ومافيها لي يضيع الوقت فتخمام ولا فالخاطر تقول الوقت عندها محدود وكأنها كتجري فشي لعبة وماعندهاش الوقت تشوف الخطأ فين كاين.
مهنية فراسها والقلب بارد مكيبقا فيها حد ما كتعطف على حد الى فاش مكتلقا مايدار كتبدا فالدراما وتقلب علامن تعيش الحزن والتعاسة وتخوي قلبها .. البكا عندها بحال التسافيرة والتفوسيخة كيفوج عليها كتر من الرياضة والحمام والعراسات ..نهار كتقنط كتنوض للدراما تبكي وتندب وفين ما كان شي مشكل ولا هم ولا غمة تجبدو تقول كدير لميزاجوع لنفسها وتنضفها من كاع السموم وتنوض كأنها تشارجات وعندها الجهد للحياة
رجعات فلعشية للدار وكان تحت عمارتهم كزار وعندو الشواية والريحة كتعطعط كل عشية ،، دازت خدات الكفتة مشوية فالايميوم وكبدة مشوية وطلعات بحالها للدار مالقاتوش ولقات غير الضلام ، مشات جلسات كلات داكشي وناضت عاودات خرجات لابسة مونطو هبطات للقيسارية عند واحد العطار بدات تشري فلعشوب وشي اغراض ورجعات عاوتاني دخلات كان مزال ماجا ومعرفاتو حتى فين زاد ، ولاكن المتعة هي انها بوحدها وهادي اجمل حاجة عندها فالحياة هي الوحدة فالدار وميدور حداها حتى شي بني ادم .. جاتها الكانة والنشاط وطلقات الموسيقى وطلقات العود ومشات لواحد البانيو كان عندهم فالحمام قليل فين كتخشا فيه ومعندهاش اصلا معاه حيت ديما كيتبعها ويدخل يجلس معاها وهي اعدا حاجة عندها هوا يتلاح عليها شي واحد بلا خاطرها ويضيع ليها اللحضات. ايوا ديك النهار نهارها سمحات فكلشي وعمراتو بالماء سخون تقول مغلي ميقدرش شي مخلوق يدخل فيه بالحر والفوار كيشنشط ،، ولاكن سكنية تقدر دخل فيه وتغسل فيه واخا تكون شاعلة فيه العافية. لاحت فيه العشوب وعمراتو رغوة ودوراتو بالشموع وبدات تدخل شوية بشوية كتكمد وترعد حتى وصل ليها للعنق وتسرحات كتفرنس شادة تيليفون وكتهضر مع ليلى وتعاود ليها
سكينة: الله ..شوفيني شوفيني .، السعااا دا
ليلى: بوحدك؟
سكينة: بوووحدي اختي فالدار مكرهتش واحد الشهر ندوزو بوحدي
ليلى: هههه استمعتي هههه
سكينة: كان محرم عليا هاد البانيو فين مانجي ندخل يبعت عليا غالي من السما يندمني
ليلى: عاادي حكي ليه ويحك ليك
سكينة: اختي يعطيني غا تيساع واش فين ما ترشق ليه ينوض يتلسق عليا انا بحالا شاريني من شي قيسارية،، مرة مع الفجر مرة فنص الليل مرة فلكوزينة ..تفووو كرهت هاد الخرا
ليلى: نتي لي كنتي طالبة عليها مالكي نسيتي
سكينة: هااء اييه طالبة عليها ولاكن بكانتي ماشي مفروض عليا!! واش انا ناعسة وهوا كيهبط ليا سروالي مفيقني فزك ليل اشمن احساس ولا نم فداك الليل راه العداب اختي .. مكيقولش لا خليها تنعس منفيقهاش.. هوا كيخليني نعس فكلشي الا هادشي هادا
ليلى: هاداك هوا الزواج يخ منو وعيني فيه
سكينة: بناقص اختي.. اف تهنيييت بعدا قمعتو لبارح واحد القمعة حتى مشا نعس فالصالة
ليلى: اوييلي!! غيولف ينعس فالصالة
سكينة: غا بصحتو يخلي ليا النموسية نتمرح فيها
ليلى: اويييلي ماخفتيش يمشي يقلب على داكشي فشي جهة اخرى
سكينة: انا نقوليه سير والله تا مسامحة ليه غا يبعد مني انا ميعدبنيش فحياتي.. غا يمشي يقضي والله تا كنهضر بصح
ليلى: شي نهار يديرها ليك على قد فمك
سكينة: هزات كتفها) اييوا صافي تانتي.. راه كانو الببنات طايحين فالسواعدة طيحة عمية وكطلع معاه هي ليوم غدا كيطلع مع صاحبتها مالها عاادي تا نتي
ليلى: ماشي عادي دابا راكي مزوجة
سكينة: وهادوك لي كنا كنشطحو ليهم مامزوجينش!! هههه ياما شطحنا ليهم وكلهم مزوجين غا زهو وصافي كيزهاو ويمشيو بحالهم
ليلى: بلاتي شي واحد كيعيط قطعي قطعي
سكينة: اوك بب
قطعات وعيطات لريم لقاتها خارجة سهرانة وصوت الزديح والرديح وكانت ريم مبلية بالسهير مكتفوت حتى خرجة وراجلها كتر منها وكتخرج كتر من جوج مرات فالاسبوع تسهر وتشرب وكانت هاديك هي المتعة عندها والسعادة واخا تصبح فالعيادة مع السبعة دالصباح المهم تمشي تسهر
سكينة: هاديييك
ريم: ههه كتكمدي عضامك
سكينة: شهتيني فشي سهرة
ريم: الدنيا عااامرة ليوم حتى لهنا مازويناش
سكينة: فين ؟
ريم: ريزيرفوار .. لقيتينا غنبدلو البلاصة نخرجو نمشي نشوفو بلاصة اخرى حسن هنا الدنيا عامرة بزاف
سكينة: سعدااتك انا والو ياختي بغيت غا ليلة ساعا والو الجفاف…رجع كيقوليا راسي سيري شري شي قرعة جيبيها للدار وحطي لعيبات وقصري غا بوحدك ..تفووو
ريم: هههه كتهربيني .. تلاقيت فوز والبنات فالباب هما خارجين وحنا داخلين حتى هما رجعو قالك ماعجبهمش الدنيا عامرة
سكينة: صافي اختي كتفقصيييني.. نتوما قصرو ونشطو وانا مخشية هنا بين العشوب بحال شي شارفة يخخ.. عند بالي دايرة شي مزية طززز
ريم: واسيري سيري تا نعيط ليك انا خارجة
سكينة: سيري اختي سيري..الفقصة تفوو تا هاد الخرا كان مسطي تزوج بيا ودار عقلو .. المرض ..اش غندير انا بشي عقل
تخشات كتكمد عضامها وتلعب فديك الرغوة ساهيا حتى عيات وناضت شللات ومشات لبيت كدور مالقات مادير.. كاع الماسكات دارتهم والشعر مزال اصلا مصاوب من لبارح عاجبها وكاع لكريمات دازت عليهم والدفار مصاوبين وكلشي دايراه مالقات فين تلف الوقت ، جهدات فداك الشوفاج حتى حما البيت ومشات كتقلب على البيجامات الناعمة وعاد جاتها عليهم الكانة وجبدات وحدة عسلية اللون لبساتها ودارت بابيون فراسها وجلسات فالارض طلقات واحد الطبلة صغيرة كتطوا وحطات حداها واحد الكوب على شكل قطة بالودنين دلحليب بالشكلاط سخون وجبدات اللوازم ديالها ولاتروسة ديالها والصندوق ديال الاغراض وحلات الكتاب وبدات تركب لوحة وتقطع وتلسق وتيليفون حداها دايرة اليوتيب كتفرج فرمانة وبرطال وتلسق. سمعات الباب تحل وداز حدا بيت النعاس لاح الصاك دلاصال ومشا للدوش ماهضرش معاها تقول كاري هوا وياها وفاصلين البيوت.حتى هوا دوش ومشا للكوزينة عمر اتاي ونزل داير طاقية وجاكيط وبانطوفة جاب كاسكروط وجلس بوحدو داير الماتش وهي فالبيت كتلسق وتعاود حتى عيات وقالت ارا نتبع واحد المسلسل تركي وبدات تفرج فحب للايحار
جلسات حتى شبعات وناضت كتنهد لبسات بينوارها وبانطوفتها ورقفات قدام المرايا رشات الريحة وبرداتها وقادات شعرها اللور وخرجات نيشان بلا مطل بلا ما تنقص الصوت مشات حتى لفين كان جالس متكي بيديه على ركابيه كيتفرج فالماتش عاقد حجبانو ماهزش فيها العين لاكن قصداتو نيشان وحيدات ليه يدو على ركبتو ودفعاتو بكتفها وجلسات على رجلو وتكمشات معنقاه ومكمشة قاطعة الحس ..اما هوا مافهمش مالها واش شي واحد دار ليها شي حاجة ولا شي مشكل عندها ولا مالها؟؟ عنقها بدا كيمسح على ضهرها حتى بعدات وجهها وقال
غالي: مالكي؟
سكينة: بعفوية)والو !
رجعات عنقاتو وبقات وحتى هوا ماعاودش سول وماهضرش ..عنقها وسكت كيشوف فتلفازة وباسها فعنقها وشوية شوية باسها على شفايفها وحتى كان غيتيكها وهي تنوض وقالت
سكينة: انا ماجيتش عندك على هادشي
غالي: انا توحشتك
سكينة: ولاكن انا جيت بغيت غير نعنقك نحسو بالحنان مابغيتش نعاس
جرها ردها جلسها على رجليها وعنقها
غالي: يالاه اجي نحسو بهاد الحنان
خدات من الحنان لي يكفيها ولاكن جات نوبتها تخلص عليه وبدات تتغين وتتهرب لاكن معامن
غالي: كيقلدها) لالا وااالو مغناكلكش غترخاااي ونعسي كاع
سكينة: كنبغي نجي نعنقك كتندمنييي
غالي: كيشوف فيها بلهفة) وانا تلاجة نبقا كنعنق فيك ونشم ومندوقش ههه تلاحي
دفعها كيضحك وردخات للامر الواقع وها التدويشة الثانية عاوتاني وهاد المرة من راسها لرجليها وشعرها المدرج لي كانت فرحانة بيه مشا ونزل وخرجات لاوية عليها زيف حياتي فوق جبهتها ولابسة البيجامة والبينوار والتقاشر وتحولات من المثيرة الفاتنة لزيف حياتي لاكن ماشي اي زيف حياتي .. الزيف على النقا والبيرضة واللمعان والحناك كيبريو والضو ضارب فيها .
وقفات لكوزينة كتسخن اتاي وغالي حداها كينقز ويتريني فيها وكل شوية كتقول غيجيب فيا شي دقة وحتى كتشوف البونية وصلات لودنها وكيرجع يجمعها
غالي: شوفي شوفي.. راسك الى درت ليه بحال هاكا يطرطق ههههه
سكينة: سير سير
غالي: بلاتي نجرب
شد راسها بشوية ومثل انه كيردخو على ركبتو وكيدير اصوات تمثيلية ومؤثرات صويتية وهي واقفة كتعمر الكاس
غالي: ترااااخ … بف بف بااااق بف بف
بقا كينقز ويعاود حتى قاس الكاس داتاي طيحو تهرس وهرب كيجري ويضحك خلاها واقفة كتشوف ويدها على جنبها مسخسخة مادارت حتى ردة فعل .. حطات ديك الفوطة من يدها ومشات كتعيط
سكينة: سير جمع داكشي والله منجمعو
غالي: صافي صافي مشكل انا اصلا كنت ناوي نجمعو
سكينة: وهيا دابا
مشات تخشات فالكاشة ودخل هوا للكوزينة جمع داكشي وتم جايب ليها براد جديد
غالي: هانتي شكون بحالك عمرنا ليك براد اتاي جديد
سكينة: شكون بحالك خلينا ليك حقك دالشوا والكبدة مشوية
غالي: وايلي!!
سكينة: راها فالفران سخنها
غالي: بنشاط)صرعتيييها
هادي هي الحياة مرة ضحك مرة خصام عند غالي وسكينة وكتستمر بحال بزاف ديال المتزوجين
دخل الربيع وبداو العراسات على الجهد نزلو على سكينة وضحكات ليها الايام بالمعقول وتحلو بيبان الرزق عليها حتى تعجبات .. دخلات السلعة جديدة والحركة كثرات ومكاين غير العراسات دالفريع والفلوس داخلة حتى مابقاتش كتحسب رجعات كتشد وتحط فالبنك
كانت فالمحل ديال التكاشط متبيها ما عليها خدامة وناشطة فرحانة كدخل فالفلوس والخير باين عليها حتى دخلات بنت بعباية وستيل خليجي دايرة نضاضر ويديها عامرين بالذهب الاحمر وغزالة فوجهها وغليوضة شوية شادة تيليفون قدو قداش فيدها كتبسم وقالت بصوت دلوع
سووكييييتاااا
ضارت سكينة تشوف شكون وبقات مستغربة واخا حيدات البنت نضاضر على عينيها ماعرفاتهاش سكينة حتى زادت قربات كضحك عاد دارت سكينة يدها على فمها مصدومة وقالت
سكينا: رحمااااا!!!!!
طارت عليها واحد تعنيقة وشدوها تعناق بجوج وبوسان مابغاوش يتفارقو وجلسو فالاخير على واحد الفرطوي بجوج وحدة كتشوف فالاخرى وطلع وتهبط من طول الغياب
سكينة: ريموووو !!! ياختي تبدلتييييي اش الغيييبااا
رحمة: ههه وايييه غيير سكتييي
سكينة: اوييلي فين مشيتي واش رحلتي ولا شنو !!
رحمة: دورات راسها وحيدات الشال طلقات شعرها) قيصااااا طويييلة هههه ونتي قالو ليا تزوجتي بصح!!!
سكينة: شي عام ونص دابا
رحمة: وكاين شي وليدات. ولا باقي؟
سكينة: اويلي لا هههه اشمن ولاد من نيتك !! من دابا!
رحمة: عندك الحق عنداك تزربي مزااال الوقت ماتعرفي الزمان اش مخبي ليك
سكينة: ايوا ونتي اش دار بيك الزمان هههه
رحمة: دورات راسها) انا طلااااقت وعاود تزوجت وشحاااال من حاجة دوزت
سكينة: لعااار متقوليهاش؟؟؟ ماتقوليش ليا طلقتي نتي ومراد!!! اويلي؟؟؟ وولادكم
رحمة: معايا دابا ههه طلقناا ياختي صافي سالا الرزق معاه
سكينة: وعلاش!!! زعما الحب وداكشي وعشتو شحال من حاجة زوينة !!
رحمة: واييه عشناااا الصراحة ولاكن صافي الانسان كيكبر كيتبدل وانا اختي مقدرتش نبقا معاه صافي طلقت وتهنيت
سكينة: بأسى) بلعكس اصاحبتي كان كيبغيييك وكان ضرييف وشحال صبر ليك ونتي كنتي حمقة
رحمة: اييوا اختي الانسان كيتبدل ..مابقاااش عندو داك الخاااطر وكتر فيه النكير وحسيت براسي رجعت كنأدي غير الواجب وصافي مابقاش داك الاحساس.. فاللخر رجعت باغاه غير يبقا برك ميدخلش عندي.. غير قرب الربعين عام بدا كيشرف فعقليتو ورجع كلشي تافه عندو وبغا يشرفني حتى انا وكتر عليا قوة النكير وكتر الصداع وقلت ليه بسلامة اخويا هادشي بسال ومابقات حياة وهزيت ولادي وزدت فحالي واخا عيا يرغب مابغيتش نرجع .. واخا نرجع غيرجع لداك النكير والطاقة السلبية حيت اصلا هوا هاكاك رجع غير معبس كيزعف والحاجة كيطلبها بالزعفة وعلى سبة ..قلت ليه سيير اخويا الله يعاون صافي كنتي زوين فاش كنتي شباب اما دابا بديت تخرف ومابقا عندك خاطر للحياة سير الله يعاون هههه وزدت فحالي هزيت ولادي ومشيت لدارنا
سكينة: ناااري صدمتيني!!! ومالو مراد مالو رجع هاكا!!
رحمة: بنادم اصاحبتي كيتبدل والدراري مصاريفهم كترات وزدت ولدت الثالت هههه جا على غفلة ههه هاداك لي فيض الكاس كتااار
سكينة: صدمتيني!!!
رحمة: مزال غنصدمك ههههه ونقوليك علاش جيت ههه المهم مابقاتش الحياة حلوة بيني وبين مراد وحتى انا هملت راسي بزاف مالقيتش معامن والو .. حتى الضروف والوضعية خلاتني نكتائب وكنبغي غير نشط كنشوف راسي فحالة ماديالاش النشاط وهوا اصلا نشاطو رجع غير داكشي طقطق صافي وحتى داكشي رجعنا كنديرو بالخف ..مكاينش احساس وكلشي تبدل مابقاش كما اللول.. عيييت اختي وانا يالاه عندي ربعة وثلاتين عام باااقا باغا نعيش باغا شي واحد صغير فيه الجهد والنشاط نجدد معاه الشاباب.. وحتى فاش كنبغي نتقاد وداكشي كنبدا نقول لمن اعباد الله لمن ؟؟ مكيجينيش كااع ندير شي خرية ليه وهوا غا معبس مابقيتش حاملة كاع شي نشاط معاه وليت باغاه غا يدرق عليا كمارتو
سكينة:هيييه!!!! ايوا ؟؟ وداركم شدوك بثلاتة دراري!!
رحمة: داز عليا السراط فالاول ودرت راسي صمكة مكنفهمش باش نكمل معاهم!! فين غنمشي اصاحبتي فين بثلاتة دراري وهما كانو كيزيدو يضغطو عليا بلعاني ..شي كينتاقم مني حثت انا لي طلقت وشي كيضغط عليا باش زعما نشوف كي ندير نرجع ساعا لقاوني مقطعة حد آمهم الاوراق ومساااليا كري ههه قلت ليهم ماتعرفو وااالو معامن نتوما تا نتوما
سكينة: ناااري على صكعة ايوا زيدي زيدي عاودتي تزوجتي؟؟ زيانيتي ابنت الحرام وتبدلتي ماعرفتكش فالاول
رحمة: هوا انا غير جيت وزيانيت وعاود تزوجت !! ههه راه داز عليا الويل فالعام الاول ديال الطلاق بديت كندور ونقلب على شنو ندير وفاش نخدم ساعا واالو ديك ربعة دريال متجيب ليا تا خرية ماتعون ليا حتى فالماكلة ..شفت تا عييت ومشيت عند الواليدة قلت ليها غنمشي لتركيا نخدم وانا نسيفط ليك فلوس لي بغيتي غا شدي ليا ولادي ولي بغيتيها توصلك وبقيت عليها حتى قبلات وانا نوض هزيييت شاكوشي شخلاوها ههه وزدت مع الطريق تجلوقت تما شوية ولعبنا من هنا ومن هنا وشوية ديال تقح تقح بديت نسيفط ليها تهلا ليا فولادي حتى ضبرت على مشية للامارات وانا نزيد عاوتاني مع الطريق .. خدمت فواحد الصالون وكنت كنشيفط لماما كتر من خمسالاف درهم تخييلي .. كتر باش تهلا فيهم وكنعيط نسول ولدي لكبير يوميا وبنتي حتى هي واش كيتهلاو فيهم سااعا لقيتهم مهليين فيهم وتا البرهوش الصغير حاضيينو..الفلووووس اختي دوات
سكينة: ايوا يوا ههه كي درتي جبتي العريس ههه مسخوووطة
رحمة: علاه هوا غا جا وجا هههه غير اجي وجيبي الراجل كامل مكمول..ختك راه تعاودات من اللول دزت على كاع اطباء دبي عاد باش ولد لق٠٠٠ دزت على السنان درت الهوليود هي اللولة ومشيت درت النحت عرات نصها) عاودت هاد البارتي كاااملة وحيدت الكرش ومشيت زيرت الصدر كان مدلدل ليا بالرضاعة مرضعة ثلاتة تبارك الله كان واصل حتى لهنا .. عاودت هزيتو بالعملية ودرت التقشير لوجهي وشحال دالعلاج والفيلر نتي مولات الخير ومشيت مع واحد العراقية بنت الحرام للعراق داتني عند واحد الطبيب مسخوووط جننن جبد ليا وجهي كاامل والجبهة حيد كاع الجلد لي كان مرهل بالعيا والفقصة ودزت عاوتاني درت ليك العملية المههيييييمة ههه نقصت من المهبل وعاودتو كاامل من برا من داخل حيد ليا منو طرف قد هاكا شفتو فاش فقت تخلعت ..كاع كوا عشر سنين حيدو تقول كنت كنكدب رجعت حسن من الاول وزير ليا الشغل وقاد ليا المنضر ورجعت فحالي لدبي عاااد بديت نبان لناس الواعرين حتى طحت فهاد المستشار قانوني وشديت فيه للزواج واخا مزوج
سكينة: ويييك ويييك هههه شحال فعمرو ؟
رحمة: باقي صغيير اصاحبتي صار منين بربع سنين واخا انا دابا كنبان صغر منو هوا كيبان كبير عليا ومزوج اللولة امارتية
سكينة: ههههه ناري غامرتي هههه
رحمة: كن مغامرتش منعيش فهاد العز دابا لي انا فيه
سكينة: هاااا هههه اذا كاين علاش
رحمة: وشنو !! اويلي واش انا ضربت هاد الطريق كلها باش نجيبو مزلوط ولا نجلس نحب ونتحاب مع شي مغربي زرگ.. لا اختي صافي دوزت المغربي عشنا معاه الحب والشباب دابا ارا ليا الخليجي يدلعني ويتهلا فيا
سكينة: ماعندوش مشكل عندك الاولاد
رحمة: لاالا داكشي عندنا غا حنا هنا مع المزاليط. اما هما لا ماكيتسوقوش.. اصلا انا غنرجع لهنا دابا غنعيش مع ولادي ..خدا ليا دار كبيرة فالرباط رحلت ليها انا وولادي وفرشتها وقاديتها وكل واحد درت ليه بيتو وداكشي لي كيبغي وانا بيتي وكلشي مقاد باش نعيش فيها هاديك هي صداقي اللي تافقنا عليه وخدا ليا رانج روفر ودرت عمرة انا وياه وسفرني ماخلا بيا لندن تركيا ماليزيا كاع اسيا تساريتها وفرنسا والطاليان وهداني الاطقم ديال الذهب كل مرة هدية.. المغريبي يهديك؟؟ والله لا هداك تا وردة
سكينة: لالا كاين كاين على حسب انا راجلي هداني الصراحة الورد وحويلقات الذهب والسنسلة كل مرة كيجيب لا هدية حسب النيفو المهم كيهديني
رحمة: تا مراد كان هاكاك فالاول غير وصل ربعين بدا يتماوت ليا
سكينة: وتاايوصل هادا لعندي للربعين ويبدا يختر تا انا نقوليه تشاو اصلا شريت دار مغنضربش هاذ المراطون كاامل هههه
رحمة: احسسسن مادرتي عرفتي كن يرجع بيا الزمان اللور كن درت شحاال علاش نرجع ولاكن حتى دابا الحمد لله
سكينة: اه بصح لا انا اختي كنديير نكدب عليك.. مافيا ليا يهز هبال شي مخلوق ياربي نهز هبالي انا من دابا كنفرش فين نعس مرتاحة تا الى ماصدقش بعدا منتكرفصش ..كي قلتي نتي كيكبرو ويتسطاو
رحمة: والله اختي تا كيتبدلو انا مابقيتش قادرة نستحملو بغيت غا نهرب
سكينة: ايوا زيدي زيدي واقيييصا
رحمة: واييه هههه المهم اختي دابا عايشة السعادة عروسة ههه والحياة تجددات والنشاط والحماس والنشوة .. كلشي تبدل وكاين معامن .. كاين علاش ومرتااحة واخا مزوج هانيا
سكينة: والى جاب عليك الثالتة ههه
رحمة: غيزيد الحماس والمنافسة مكاينش الملل ههه غتزيد تزياان كتااار ويبدا اللعب يكبر كتر من دابا ..احسن حاجة تديه مزوج ولا على الاقل الى بدا يشرف يمشي يتزوج وحدة تهز ليه هبالو وتوكلو وتشربو وتقابلو هوا ونكيرو وهي فرحااانة عاجبها الحال ومزال عاد بدات فهاد التخربيق غتصبر ليه..اما انا اختي هادشي طلاع ليا فطنطون راسي ماعندي ماندير بشي شارف باغي ياكل وينعس ونهار ومطال يتشكى وينكر وحالتو ويامو مقاتل غا مع شنو يعجبو شنو ميعجبوش وحتى حاجة ماتجي معاه.. (تنهدات) الراااحة دابا والسعااذة والحب والدلع وكنعيش الرمنسية والحياة وعروسة جديدة..حتى التقة رجعات ليا وكنشوف راسي فالمرايا كيعجبنييي الحال ولي لبستها تجي معايا دابا مكاين غيير طق امارش كنخليه حال فمو كيشوف هههه نوريه لق٠٠ب على حقو ههه قاليا واحد المرة كان يحسابني مزوج وعايش الحياة ساعا دابا عاد عرفت شناهرا الزواج والحياة دبصح كنت مقولب ههه(رشقاتها)
سكينة: عطيني الدرس راه خاصني تا انا نتعلم
رحمة: عنداك يقوليك فين تعلمتي هادشي راه المغاربة ماديالش السيكس والابداع غا ديال النكد والحكام والنفخة دلخرااا عفتهم انا
سكينة: لالا هادا عندي اووبن ماتخافيش خاصو غا نبدا ينوض يتعاون معايا هههه
رحمة: ايوا عنداك ..(كتقلب تيليفون) بلاتي نوريك راجلي
سكينة: كطل) انشووف… هيييه ياختييييي شحال غزااال !!! وهادي هي الضربة ولا حيد عليا
رجمة: ههه كي جاك
سكينة: اويلي بوكوووص انا حسابني شي خويييب
رحمة: اوييلي وما انا نقبل عليه راه شحال عرفت من خيبوا مابغيتش نتزوج بيه واخا عندو الفلوس.. هاذا اختي الزيييين هوا لي يليق ليا انا .. انا ماكنبغي الزيين اختي وندير عليه المجهووود ههه
سكينة: تا نتي زيانيتي وتبوكصتي والشعر طوال ورطابيتي هههه
رحمة: كلشي اختي بالفلوس يكدب عليك الكداب يقولك حقا يقبل عليك كما نتي..يقبل عليك غير لي نتي مقابلاش عليه اما لي بغيتيه نتي نوضي خدمي عليه وتبرعي مع راسك ..الفلوس كتجيب الفلوس وتبدل ليك حتى العضام ماشي غير الجلد
سكينة: ومراد تزوج؟
رحمة: تزوااج واحد الوحدة بحال تا هي باغا غا راحت البال مسكينة ماكرهوش يموتو بحوج ويتهناو مافيهم لي يعيش
سكينة: كوراه ندم علاش طلقك عمرو شافك دابا فاش وليتي هاكا؟
رحمة: علاه هوا لخاطرو طلق بزز من مو تا منكونش انا رحمة عاد يتحكم فيا نبقا ولا نمشي.. وطلاقاني وهددني قاليا الى تزوجتي ناخد ليك الاولاد
سكينة: اويلي!!
رحمة: قلت ليه فخاطري سييييير تق٠٠٠ من دوك الافلام الحازقة قالك الى تزوجتي ندي ليك الاولاد هاي هاااي هااي هه
سكينة: ايوا وشدرتي؟
رحمة: درت ليه خاطرو اش ندير قلت ليه صافي مغنتزوجش لي بغيتيها هي لي تكون ودرت فيها عجبني الحال زعما وبقيت هازة ليه هبالو وكنقوليه انا محترمة وكدا وكما مكنهضرش مع واحد اخر منقدرش نبقا نهضر معاك وانا رااااني كنجري فالاوراق وطلع وهبط حسي مسي ماقلتهاش حتى لخوتي ودارنا وكطيح ونوض حتى جمعتهم وجا ضربت العقد سكوتي بلا حس ومشيت بقيت تما عام ودرت لعقد تما وبقيت كنمشي ونجي وكنقوليه خدامة تما وكنعاون مالين الدار وعيشتو الوهم حتى لدابا عاد وصلاتو الخبار تزوجت حيت غندير العرس كبير كلشي ساق الخبار .. نوري مو شناهيا الى تزوجتي ندي ليك الدراري هه دوك الافلام ماشي عليا انا يمشي يديرهم على شي مترترة بابا عجينة باغا غا لي يركب عليها تعيش معاه داك الحب الحازق لي ورا الطلاق اما انا داكشي ماعنديييش معاه مكنشوفش اللور وماعنديش الوقت لي نضيعو .. دابا يجري طوالو تا يشبع ماعندو مايصور (تنهدات) قولي ليا الزين جيت عندك على حوج حوايج اولا نعرض عليك ثانيا تنكفيني نتي
سكينة: ناضت وقفات) مرحباااا جيتي مع الجديد نيشاان فسن عندك العرس؟
رحمة: فقاعة نعمة وبغيت شي حاجة تفرع ليا بنادم راه دايرة عرس كبيير جايبا طاهور يغني ليا فعرسي ودايرة داكشي ديال الفرييييع وغتجي مو وخواتاتو وتريكتو بغيت نلبس شي حاجة تسكت ليهم الحس
سكينة: موجوووود الخييير (كتعيط) مراكشية ارييي دوك الصنادق جداذ لي جبت .. جبت اكسيسوارات جداد ديال الفريييع وكاين حتى النقرة مشللة بالذهب وتكاشط ديال الخدمة داليد ماااشي المكينة
رحمة: لا انا عارفة عندك الدوق داكشي علاش جيت وكنت دايرة فراسي غنجي عندك نيشان مافكرتش الصراحة فشي واحد اخر
سكينة: ايوا راه كااااين موجود الخير داكشي لي نبغي نلبسو انا فعرسي نبغيه للعرايسات ديالي هانتي شوفي .. كاين البلدي والرومي وكاع لي بغيتي وحتى الى فراسك شي موضيل عجبك نجيبو ماشي مشكل ..نكفك بيه ويبقا ليا حتى انا نخدم بيه
رحمة: كتشوف)الصراحة هادشي واااعر
سكينة: بااااقي باقي الخير غتحيري ههه .. راه الموضيبات انا خادماهم على دوقي ماشي زعما مشرييين طالعين ولا مطليين.. خدمهم ليا المعلم على دوقي انا ومزال حتى وحدة ما تنكفات بيهم يالاه مشيت جبتهم .. هاد جوج اطقم بجوج من المضمة على للتاج كلهم موضيل ديالي .. وعاد تكاشط راه حتى وخدة مامشرية طالعة كلشي مخيط على اليد وموضيلات دياااولي متلقايهمش فحتى بلاصة
رحمة على نيتها عطات معلومات العرس لسكينة باش تهلا فيها ساعا معارفاتش راسها راه طاحت فجيليط غتهلا فيها فالتنكاف مزيان وحتى فالثمن مزيان نييت . وسكينة غير سمعات طاهور وعارفاها كيخدم بالملاين عرفات الفلوس ضايرة وشعلات بدات تخمم اشمن ثمن تعطيها ودفعات عليها شبابها غالي وضرباتها بثلاتة دالملوين وزادت عليها كلمة قائلة
سكينة: غيير ليك اما كن عروسة اخرى والله ماتديهم قل من ربعين الف درهم وكلهم فضة وجداد اول لبسة ليهم
رحمة: ماشي قصحتي شوية اسكينة
سكينة: نكفك فابور كادو مني انا بكل فرح اصاحبتي كن ماكانوش غيخرجو فهاد التاريخ هادا .. غنخيدهم لعروسة كانت دافعة فيهم العربون دابا غنعيط ليها تشوف حاجة اخرى والى مابغاتش نرجع ليها عربونها المهم نتي اللولة واللع مادوز قدامك شي وحدة واخا ماعرفت شحال تعطي
رحمة: ايوا صافي غير قيدي عندك انا غنمشي للبنكة نتيري ونجي
سكينة: حتى انا نيت غنمشي لقتيني غنمشي نحط شي حاجة قبل ما نطب فيها ونجلس يالاه نتوانسو
خرجات معاها سكينة خافت تراجع ولا تعيط لشي واحد فتيليفون تشاور معاه ويجرها بالهضرة يديها لشي نكافة اخرى او يبقا عليها غلات عليك تنقص عليك وقالت اجي نمشي معاها ومشات معاها تيرات الفلوس ورجعو للمحل شدات النص الثمن في العربون عاد بردات وتنفسات اما النفس كانت مقطوعة فيها . ايوا نشطات وفرحات وحتى رحمة مكانتش ضاربة لحساب للفلوس وقبل ماتمشي دوزاتها سكينة عند ليليى وربطات ليها الخط معاها باش يخدمو بحوج عاد طلقاتها مشات وجلسات تنشرات كتنفس. كانو قدام رحمة سخان غير زادت مع الباب خرجات خلو عرايسات اخرين لقاو الحوايج مزاال منشورين محطوطين بغا يشوفو ويقيسو وناضت سكينة ليهم جمعات النوضة بدات عليهم بحلاوة اللسان وشحال كيجي معاها البيع والشرا، عطا الله واحد القبول فوجهها وواحد البرائة كلشي كيتبعها ويطيح فيها ويرتاح ليها واخا من لداخل زيزوارا طالعة واكلة نازلة واكلة كتردخ بنادم وتلوحو من السما فالثمن حتى كيرجع يشوف راسو كيسوا بصلة قذام دوك الحوايج والى منكفش عندها راه ماتنكاف ما والو وخصوصا لي عرسهم كبير ..كانت فعلا جايبة لحوايج دالفريع والخدمة داليد ولاكن راه الاثمنة حتى هي مافيهاش يما رحميني كتخليهم كيشوفو ويرمشو وكتبدا تبدع ليهم فالوصف وتوريهم التفاصيل وعندها السوفل ديال التقلاب وهزان التكاشط وعاد الهضرة من الفوق مكتسكت ما كتشرب الما ..دوزات مور رحمة جوج عرايسات حتى هما ماطلقاتهم حتى حطو العربون عاد خرجات مشات للبنك تحط الفلوس وحطاتهم صحاح لوحدة جالسة كتحسب ليها وتهضر معاها بالفرونسي حتى طلع لسكينة الدم وقالت ليها وكلشي كيسمع
سكينة: اختي.. انا هضري معايا العربية عفاك هضري معايا بالذرهن والريال حيت انا ماعنديش مع شكونط دو سواسونط.. اتا عاطياك الملاين تمشي ليا شي مليوم غنوليو فييين وفين انا غير هضري معايا بالعربية وقلتها ليك شحال من مرة حسبي معايا بالخوشيبات… سمعتي اختي… تاا تكوني نتي باغا تحطي رزقك ولا تصرفيه عاد دوي باش مابغيتي اما انا درجي معايا راك مغربية بحالي بحالك… واعافا اختي بلا منبقاو نعاودوها وكل شوية نقوليك شحال هي بالعربية.. راه الفلوس هادو مانبقاش انا كل مرة نطرجمها فمخي على عام …. وغير بشوية عفاك بلااا متزربي عليا سيري معايا دقة دقة نعرف راسي اش كندير وشنو كنحط ماتزربيش عليا بحالا حاطا عندكم الحجر ..راه فلوس هادي… ومليينات اختي ورزقي وخايفة عليه اما نتي ماعندك علاش تخافي(دورات وجهها كتسوط) وا غير بشوية عفاك وحيدي عليا هاذ الفرونسي ماديريهاش معايا انا
خرجات من تما حمرة ساخطة كتجمع الاوراق فالبزطام وجات مع اتصال غالي مباشرة لقاها شاعلة على سبة وهوا كيهضر بشوية ومهدن ما ناقصو خير
غالي: بشوية بشوية عليك ياك لاباس؟؟ واش شي مشكل فالبنكة ؟
سكينة: تفوو على بشاار عييت صابرة ليها وهي والو مابغاتش تحيد الحساب بالفرونسي من فمها وانا كنبقا نتقاتل فدماغي بوحدي باش نحولو للعربية حتى سخطااتني وسمعتهم ليها .. اااو !!شحال قدني نحشم !! وفاش تمشي ليا شي درهم فاش غتنفعني الحشمة ديك الساعة وتقول ليا راه قلتها ليك نتي مافهمتيش… مافهمتش انا اعباااذ الله وا انا فبلااااديييي وحايرة اشمن لغة نهضر بيها مع شعبي… ما انا فميريكان ولا الشينوا ولا الهند نقول حقا بلاد الناس لوووغتهم مغيفهموني منفهمهم نتقاتل معاهم !! وانا فبلادي ومغربية بحالي وكدوي معايا بديك الفرونسي المحززقة ديالها وانا فالحساب كتجيني بحال الجابونية خصني نشقمها فالسما دغيا وكتزرب بحالا كتسالني
غالي: ههههه واغي بشوية بشوية
سكينة: المرض كي داير… ودينا كنقوليها ختي نهضرو العربية وكترجع تهضر معايا الفرونسي وانا كنعطيها الفلوس بحال الضبعة وكنترعد وراسي مبولوكي باقا كنطرجم الرقم اللول لي بدينا بيها فاش يالاه دخلت بناقص كاع رجعت كنكره نجي للبنكة بهاد الفعايل وتعفار دنم
غالي: دابا شنو ؟ قاديتي مسائل ديالك؟
سكينة: بسطارطير تا تشوهنا فالبنكة كلشي عرفني زرقة فالفرونسي
غالي: عادي عادي المهم كلشي هوا هاداك
سكينة: كن مكانش هوا هاداك كوراه لقيتيني فلكوميسارية هه
غالي: ايوا مزيان ..تغديتي؟
سكينة: باقي عاد غنمشي عند ديك ختنا لي كدير داكشي بلدي تشهيت لكرعين ..ونتا؟
غالي: انا تغديت راجع دابا للبيرو
سكينة: بالصحة ..اه حقا راني معروضة لواحد العرس ونيت خدامة فيه ديال واحد صاحبتي. . تمشي معايا؟
غالي: وااتاانجي ونهضرو فهادشي تانجي
سكينة: اوكي الزين يالاه تهلا. انا غنهبط نتغدا ونضرب للقيسارية للمحل تما عند ماما
غالي: شفتي الطموبيل لي سيفطت ليك؟؟
سكينة: لا ؟سيفطتي ليا شي حاجة؟
غالي: وااايلي؟؟ راه سيفطت ليك الطموبيل دخلي شوفيها باش الى عجباتك ندوز فلعشية نشوفها
سكينة: واخا انا ندخل نشوف
عولات تشري طموبيل وبدات تقلب هي وغالي وكل مرة تبان ليها شي وحدة للبيع تمشي تشوفها وتقلبها ومككتابش ليها تشري وكترجع بحالها
بقات هاكاك وملهية فالخدمة وحتى غالي رخا ليها اللعب فاش بدا يشوف الفلوس صحيحة كدخل وخلاها تمشي للعراسات ورجع كيديها ويجيبها واخا يكون خدام مع التمنية دالصباح .
الربيع عندها داز مزوهر ديال بصح والفلوس كتنزل فالكونط بحال الشتا اما الصيف كان فين يبان الربيع.. مع دخول الحرارة جاتو سفرة هاد المرة للصين ومن الزهر دسكينة لي كانت باغا تمشي تمشي للصين ماكتابش ليها وكانت عندها الخدمة على الجهد فوق راسها وغالي كان عندو شهر على قدو غيجلسو تما وهادشي كامل ماشي فصالها والصيف فيه يالاه شهراين ديال العطلة والناس كتبدا تعرس فيه.
اضطر يسافر بوحدو وخلاها المصروف لي يكفيها ويوفيها داك الشهر ومشا سافر وبقات على اتصال هي وياه ابيل فيديو كل ليلة وكل نهار وحتى فاش كتمشي لشي عرس تهدم فيه كيكون على علم .
دوزات العرس درحمة بيخير وعلى خير وورجعات صداقتهم من جديد وبحكم رحمة بقات بوحدها وراجلها مشا وسكينة كذلك رجعات رحمة كتبات مع سكينة بعد المرات وسط السيمانة فاش مكتكونش الخدمة ، اما بناصر غير شد الكونجي وزاد مع الطريق هوا وعائلتو للبلاد يفوج على راسو بالعراسات
كان كلشي غادي مزيان وعلى احسن ما يرام والوقت مزوهرة من كل جهة .. حتى لواحد الليلة كانت رحمة جالسة مع سكينة فالدار مابيهم ما عليهم بالليل وهادشي بلا خبار غالي طبعا لي كل مرة كيعيط كتسكت رحمة حتى كيقطع
رحمة: اجي راجلك دابا هضر معاك مغيعاودش يعيط
سكينة: يقدر يعيط حيت عندهم النهار
رحمة : قلتي ليه غنعس
سكينة: يقذر ميعيطش ممكن
رحمة: وايالاه نمشيو نسهرو جالسين جالسين
سكينة: ههه خفت
رحمة : عاادي ياك جالسين جالسين
سكينة: نرجعو دغيا
رحمة: وانمشيو غير نبدلو الحيوط تا نتي مفافية غا بوحدك
سكينة: يالاه زيدي
ناضت لبسات دجينز وواحد التيشورط. وخرجات شدات طاكسي هي ورحمة لواحد ديسكو ودخلو جلسو فالاول غير تعشاو لاكن شوية بشوية بدات تزيان وحطات رحمة الشراب وبدات وحدة تزعم وحدة حتى شربو
شربات ومامولفاش بيه دغيا نشطات وشد فيها ونسات راسها هي ورحمة وعجبهم الحال ، تلاقات رحمة مع شي واحد كتعرفو من زمان مشا جلس معاهم غلى الطبلة وكان معاه صاحبو واحد العروبي باينة فوجهو عاد اول مرة حتى هوا يحطو الكار تما وقال انا سبع وحط العين على سكينة بقا كيدور بيها من هنا ومن هنا وهي مادات ماجابت .. واحد اللحضة بدات رحمة كترد وأثر عليها الشراب وخرجو من تما بدات ترد على برا حتى سخفات وقتارح عليهم لي معاها يمشيو بحالهم وركبو فالطموبيل لاكن داوهم للدار وتما دارت رحمة كنازة بالبكا والنحيظ بدات تفكر حياتها وحالتها وتقيا وتبكي ورونات الدنيا بالبكا وسكينة جالسة كتفرج فيها .. خرجها لي معاها واحد اللحضة للبالكو يضربها البرد شوية وبقات سكينة وسط الدار جالسة مع الشيطان نفسه لي ستاغل الفرصة وبدا كيقرب ويهضر معاها بشوية بوشية ويقيسها فشعرها ويعنقها وهي عينيها حومر حتى باسها ففمها وبعدات لور عافتو وناضت مشات غسلات وجهها ولحسن الحظ ما وصلاتش لمرحلة اللا وعي فمرة بسب الشراب وبقات شادة شوية ورجعات جلسات بعيدة كتسنا رحمة ترجع حتى داها النعاس جالسة معدبة وشي نعاس مانعساتو مقاد
ضرباتها الفيقة الصباح مع الثمنية وحلات عينيها لقات راسها جالسة وراسها مايل عوج وداك المسخ قدامها ناعسها بعيد على واحد السداري كيتلسق .. دورات عينيها فالدار لقات راسها فخربة ماشي فدار وكلها غاملة والعفن والوسخ وريحة التقاشر والفراش كيتلسق والطبلة مسخة بالماعن .. خرجات عينيها واستوعبات وناضت كتجري قلبات صاكها وهزات تيليفونها لقات شحال من ابيل دغالي ، ماتسناتش لا رحمة ولا غيرها ولا سولات فيهم ومضات كتجري يغات تخرج لقات لباب مسدود بزكروم وبدات تقاتل باش تحلو حتى فاق دعاوي البلا مشا عندها كيضحك معاها ويسايس زعما باش تجلس حتى يوصلوهم واخا شي خرشاشة ماعندو وخاشي نيفو..عافتو نترات ليه يدو ماقدراتض حتى تشوف كمارتو وخرجات تعرضات لطاكسي ترمات فيها اللور مصدومة راجعة بحالها وعينيها خارجين وكلمة وحدة كتردد فراسها بدون تصديق” خنت غالي”
ضارت بيها الدنيا حتى بغا يقلبها يسكت ولاول مرك تعيش الاحساس الاسوء كأنها فثدات عقلها ومابقاتش عاقلة على فين هي وفين غادية وتصدمات صدمة خلات مبلوكية لدرجة مول الطاكسي رد ليها البال. كيفاش وصلات وكيفاش طلعات للدار الله واعلم المهم حتى لقات راسها شادة تيليفون كتشوف مكالمات غالي وكتصوني على ليلى ويديها كيرجفو وفمها كيترعد
سكينة: الو..ليليى اجي عندي للدار دابا عفاك
ليلى: بااقا ناعسة
سكينة: بلعات ريقها) غير اجي عفاك
ليلى: مالكي ؟ مال صوتك ؟
سكينة: اجي عندي اليلى
قالتها والصوت كيترعد وقطعات وشدات واحد المخدة عضات فيها والدموع محجرين فعينيها كتقول ياربي نكون كنحلم ياربي يكون هادشي حلم ياربي بغيت نفيق . بدات كتقولها وتعاودها وتيليفون كيصوني وكانت رحمة وسكينة كتشوف فالسمية وتجننات وضربات داك تيليفون مع الارض حتى مابقا فيه ميتجمع ورجعات تكمشات فبلاصتها.. دوزات اسوء اللحضات وهي بوحدها حتى كانت غتسطى وكشتد راسها باغا تفيق ومابغاش يكون داكشي بصح لاكن والو ، بقات على داك الحال بحال الى ضربو ليها شي ابرة دلحماق وخلاوها جالسة كدوح فبلاصتها . وصلات ليليى وناضت طارت حلات ليها الباب ودخلات الاخيرة كتشوف فيها وطلع وتهبط
ليلى: شنو كاين
خلاتها سكينة فالباب ورجعات بلاصتها جلسات كما كانت كتنهج مصدومة حتى سدات ليلى الباب ومشات جلسات حداها كتسول
ليلى: مااالكي اوييلي اش واقع؟؟
سكينة: ماقدراتش تقولها) مشيت سهرت لبارح انا ورحمة .. شربنا ومشينا مع واحد جوج كتعرفهم …لعب عليا الشراب ووو
صفار وجهه ليلى ورجعات اللور كتشوف فيها وقالت مخرجة عينيها بتوسل
ليلى: نااري متقوليييييش خنتي غالي اسكينة !!! غنضرب عليك ضربة وحدة
سكينة: كتبكي) ماعرفتش مالي خليت واحد الكلب معفون باسني ولعب فشعري وعنقني (شدات راسها) ماعرفتش علاش خليتو ماعرفتش
ليلى: وقفات ) اويييلي!!! حبستو هنا ولا زدتو درتو شي حاجة اخرى؟
سكينة: لا عفتو وهربت لواحد الكرسي نعست جالسة.. اصلا واحد الخانز ماعرفت من اينا دوار جاي ريحتو خنز من ريحة الشراب …وماسكرتش بزاف غير بحال الى تزعز ليا عقلي شوية وصافي ولاكن راه غالي… راه خنت غالي
ليلى: معلووووم خنتيه(جلسات قدامها) عرفتي دابا ابنتي حراميتي عليه فخبارك .. راك محرمة عليه ومتشميش ريحة الجنة نهااائيا .. دابا رجع هوا بينك وبين الجنة والله لا دخلتي ليها واخا تحجي سبعي حجة .. الى ماسمحش ليك مادخليييش واخا ماعرفت اش ديري (دورات راسها) حرمتي على راسك الجنة وحطيتي دابا غالي بينك وبينها وبلا ربي لي ساخط عليك !!! اش وقع ليك اااش علاش خرجتي مع رحمة واش باغا تولي بحالها واش نتي قدها
سكينة: اويلي؟؟
ليلى: ويلك بووحدك نتي مشيتي برجلك
سكينة: انا حاسباك بحال ختي جيت شكيت عليك وانا دابا ماعندي عقل تالفة مازيديش تكملي عليا انا بغيت لي يخرجني من هاد الدوامة غادي نموت
ليلى: انا ماعندي مندير لك ملي نتي مزالك بغا الزهو والنشاط ماتزوجييش بقاي ديال راسك جمعي فالدنوب وبينك مع لي خلقك ما تهزيش دنب واحد بنادم تا هوا والى ماسمحش ليك هوا ميسمحش ليك الله.. مبروك عليك تهنييتي من الجنة دابا غير سيري ارا ما تزهاي
سكينة: بجنون) لالالا لالا غادي نقولها ليه ..غنقوليه اش درت ولي بغا يوقع يوقع
ليلى: اش غتقولي ليه ؟؟ ياختي عندك الوجه!!! ماخفتيش يمشي يقتلك ولا هوا نيت تعيشيه الويل حساب ليك ساهلة غير اجي وقولي ليه وطلبي السماحة؟؟ والله لا بقيتي معاه دقيقة
سكينة: منقدرش نبقا معاه صافي اصلا منقدرش حتى نشوف فيه غير يطلقني المهم منبقاش معاه فلحرام ونولدو الولاد حتى هما فالحرام
ليلى: جلسات) اختي سخفتيني…سيري شوفي شي فقيه ولا شي بولحية ينصحك يوريك اش ديري انا صافي قهرتيني
صونا الصونيت فالباب وناضت كتجري حلات لقات الكونسييرج شاد تيليفون فودنو وكيردد
كونسيرج: واخا السي الغالي .. ها. ها هااهي كاينة هاك
مد ليها تيليفون مافهمات والو وردات حسات بنبرة صوتو ماهياش
سكينة: الو
غالي: مالك مكتجاوبيش من لبارح وانا كنصوني عليك
سكينة: بارتباك) داتني عيني نعست وصافي
غالي: واسيري شعلي داك تيليفون سيري. يالاه
سكينة: واخا انا نديرو يتشارجا
رجعات تيليفون للكونيسسرج ودخلات تالفة هزات تيليفون خدات الكارطة وخرجات شرات واحد تيليفون عادي دارت فيه الكارطة ويالاه شعلاتو صونا ليها لقاها فالطموبيل حدا ليلى
سكينة: الو
غالي: الو ..مالكي شنو كاين؟؟
سكينة: والو غير كضرني كرشي فيا ليغيكل
غالي: ليغيكل ؟؟ ياك كتجيك فخمسطاش
سكينة: ماعرفتش مهم جات دابا وصافي .. يمكن مع الستريس
غالي: ايوا بشوية عليك ..فينك دابا؟
سكينة: خرجت غير لهنا نفطر ونمشي للحانوت
غالي: يالاه نخليك .. شوية ونعيط ليك
قطعات ورجعات لحالتها السيئة
سكينة: هضر معايا فشكل ..يمكن حس بشي حاجة
ليلى: هاء سينوغمال يحس نتي كن خانك غتحسي
كانت هانية مهنية وبين ليلة ونهار شوف اش وقع ليها! لحاجة لي عمرها فحياتها تخيلات ديرها او توقعات ترقع ليها وطيح فيها وكانت ضد الخيانة وماهي من طريقها ما هي من سهمها واخا كانت دايرة فبالها ان الرجال مافيهمش التيقة وشي نهار يقد غالي يخونها لاكن هادشي مكانش كيأثر عليها ويخلعها .. ولاكن عمرها توقعات العكس وتكون هي الخائنة
خرجات مع ليلى مشاو كيقلبو على شي فقيه ودخلو لواحد الجامع بجلالب وشي شيلان ماعندهم وسكينة خرام واش ميدور عندها الفولار فالدار ، تخباو قالقب وبداو يخبيو دفارهم فالكمام ودخلو للجامع كيدورو فعينيه ويسولو على الفقيه وجلسو معاه كيشوفو فيعضياتهم شكون تهضر وحتى وحدة ماقدرات تزعم قدام ديك الجلابة واللحية وتخنزيرة
ليلى: بتلعثم) بغينا غير نسولو ..اا.. احم واحد صحبتنا راجلها سافر وخلاها فالدار بوحدها وخرجات مع واحد المرى بالليل بلا خبارو مشاو لواحد البار سهرو فيه وشربو ولاكن ماشي حد السكرة حشاك، ايوا وتلاقات ديك المرى شي راجل كتعرفو وكان عندو واحد صاحبو ومشاو كلهم للدار وداك صاحبو تحرش بهاد صاحبتنا وهي نص واعية نص لا وبدا كيقيسها حشاك فشعرها ويعنقها وو..وووباسها ففمها ولاكن هاد البنت دغيا هربات بعدات منو وهربات بحالها مادارتش معاه الحرام
قالتها ودورات وجهها حشمانة لجهة اخرى وسكينة كتسمع وتتخبى وافقيه كيسمع حتى قفزهم كيلعن
الفقيه: اعوووذو بالله من غضب الله هادي زاااانية ملعونة في جهنم خااالدة ابدا ولن تشم رائحة الجنة والملائكة كتلعنها ..ملعوونة والله مغيشوفش فوجهها لا دنيا ولا اخرة
بدات سكينة تترعد وتبكي كانت غتغيب واخا عمرها فحياتها غابت ولا عرفات السخفة كي دايرة ولاكن هاد المرة داخت وبدات تفتف فين تشد وليلى كدور فعينيها بقات كتقوليه غير شكرا شكرا وخرجو من تما كيزطمو فحوايجهم حتى لباب الطموبيل وبدات سكينة كتلطم وجهها وتبكي وتولول وليلى كتشد فيها باش تهدا
ليلى: وصافي صافي غنعاودو نسولو شي فقيه اخر غير صبري
سكينة: اويييلي اويلي ويلي اش درت اربي اش درت (كترعد) غنقولها اختي لغالي ولي بغا يطرا يطرا واخا نطيح ليه على رجليه يسمح ليا ونمشي بحالي منقوليه لا نبقا معاك ولا شمح ليا ونسا اصلا صافي مابقا مايدار
ليلى: واغير صبري صبري
سكينة: بغات تعيط ليه) لا اختي غنعيط ليه نقولها ليه ولي بغا يوقع يوقع اش داني لشي زواج اختي ندير بيني وبين ربي وسيط .. اش داني اختي الى مسمحش ليا غنمشي جهنم
ليلى: حيدات ليها تيليفون ) وابلاتي ماتزربيش خلييي حتا يجي بعدا ماشي نتي هنا وهوا لهيه وتجي تقوليها ليه
سكينة: لا اختي لا غنقولها ليه مانقدرش نعس منقدرش غنتسطا ،، غنقولها ولي بغا يوقع يوقع مايقولهاش غير لبابا وانا غنسمح ليه فكلشي مايعطيني والو غير يسمح ليا ويمشي
تفافات فداك النهار المشؤوم وضلامت الدنيا فعينيها وشعلات فينا النار لولا ليلى لي كتهدنها كن عيطات ليه ديك الساعة ، ولاكن هايهات هايهات سكينة ماشي من النوع لي يقدر بيقا يترعد وخاصها تخرج ما عندها عاد تهدا كي الناس.
خلات حتى كانت ليلى سايقة الطموبيل نازلين للمدينة يبدل يحيدو الستريس وبدات تكتب مسج فالواتساب لغالي وكتبكي
سكينة: سلام غالي صافا.. انا بغيت نقوليك شي حاجة درت خطأ ماشي فوعيي وانا غلطت مشيت مع واحد البنت بليل لبواط وشربنا وكان واحد تما كتعرفو معاه صاحبو وداك صاحبو تحرش بيا وباسني فممي، ولاكن والله مادرت شي حاجة غير هادشي لي طرا ومكتتش فوعيي وبغيت نصارحك تسمح ليا والى بغيتي نطلقو نطلقو المهم هوا تسمح ليا على هادشي لي درت و…
شافتها ليلى كتكتب وطلات بواحد العين لقاتها خدامة كتعبر وتشرح وتنخصص وطيرات ليها تيليفون من يدها حتى كانو غيديرو كسيدة فالطريق وصفات ليلى للجنب قرات داكشي مخلوعة ومسحاتو وقالت ليها معصبة
ليلى: واش تسطيييتي؟؟ اويلي واش باغا تزيدي تغرقيها حساب ليك زعما الى قلت ليه باسني وحقا كنت ماشي فوعيي غيقوليك صافي بنت الناس صرييحة!!! راه والله لا تاااق بيك وغيقول ليه راسو مشات دارت ودارت ودارت وباتت حالة رجليها حتى صبح الحال وانا كنعيط ليها وهي نيبا لا وماشي فوعيها واخا تعياي تحلفي ليه مايتيييقش والله لا تاق واخا يتيق بيك كتقولي الصراحة غيقول نسات على كلشي وراه شبع فيها كوا وهي اصلا ماشي واعية.. واحيديها ليه من راسو وهنا كيشكو فالخوا الخاوي عشااك الى قلتي ليه سكرت ومشيت!! والله يابني لا تاق بيك (صغرات عينيها)اجي بعدا..واش عاقلة على كلشي متأكدة ما ماوقع والو من غير هادشي ؟ ولا طرات شي حاجة ومابقيتيش عاقلة
سكينة: خرجات عينيها) والله مادرت شي حاجة اقسم بالله حتى هادشي لي وقع صافي .. انا عاااقلة على كلشي حتى اللحضة لي جلست فيها فلكرسي عاقلة عليها وحتى نعاس منعستش مرتاحة ونعست جالسة غير باش نرد البال لراسي وققت لقيت راسي كما جلست باقا واش انا غادي طرا ليا شي حاجة ومنحسشمن نيتك !! واخا نفيقراه غنحس غنعرف
ليلى: ايوا الله واعلم راه الشرب هادا
سكينة: ماتكمليش عليا لي فيا كافيني .. انا قلت ليك ماشربتش بزاااف غير شويية وعاقلة على راسي مزيان
ليلى: وراه انا مازال شاكة اما غالي لي راجل راه والله لا دوزها ليك والله ابنتي واخا ضلي تشرحي مايتيق
سكينة: انا اختي غنحيد على رقبتي والله شاهد عليا ..غنقوليه لي كاين وهوا شغلو هاداك المهم نحيد على رقبتي مابغيتش نمشي لجهنم
ليلى: واتسناي يعدا يجي تسناي
سكينة: مرضت مرضت مرضت
شدات راسها بدات كتخمم وتلفات وداخت ماعرفاتش اش غدير باش يسمح ليها..بقات شحال كتخمم وجلسات فواحد القهوى فالقنت ساهيا وقالت
سكينة: غندير ليه عمرة كادو..ينعل بو الفلوس ، رمضان هاهوا جاي غنقوليه نمشيو انا وياك العمرة وكادو من عندي ..منها ربي يسمح ليا ومنها تما غادي نقولها ليه فديك البلاصة ونحلف ليه تما ..هادا هوا الحا لي عندي..اما باش نسكت بحالا مكاين والو منقدرش اختي
شلا بلانات بداو ينزلو عليها بغات تسطى وراسها بغا يتفركع كل مرة تشرب كينة دالراس والنهار دار كحل .
حطات راسها بالليل على المخدة وسط الدار والتفازة ق دامها وكان موضوعها هوا الخيانة ..طالعة نازلة كتقلب فداك تيليفون لي شرات واخا ماشي شي تيليفون نيت ولاكن قاضي غرض ودايرة اليوتوب كتقلب وتسنط للفقهة زادو كملو عليها بغاو يسطيوها، هادا كيقول ماتحرماتش عليه وهادا كيقول خصك تحللها عاد تحلال عليك وشلا تناقضات ماشدات فيهم حتى حاجة .صونا ليها لقاها متكية عينيها حومر وهوا متكي عريان ويدو ورا راسو كيشوف فيها
غالي: امالكي واش مريضة؟
سكينة: مرييضة … كيضرني راسي
غالي: وا شربي شي حاجة يفوت عليك
سكينة: دابا يفوت
غالي: بنتي ليا ماخدمتيش ليوم؟
سكينة: خرحت غير فطرت ورجعت بحالي
جر واحد الصاك ورقي حداه فيه شي حوايج وقال كيوريها
غالي: ماعرفت هادشي واش يجي يقدك
دور عنقو وشافت واحد الطبعة صغيرة وقربات كتحقق وقالت
سكينة: مالك فعنقك؟؟ شنو داكشي ؟؟
غالي: حط يدو) فين؟.. هنا؟
سكينة: هاديك بوسة
غالي: هز حاجبو)واسييري تلعبي شمن بوسة
سكينة: ناضت جلسات) بوسة والله تا بوسة
غالي: تقاد فالجلسة) واش هرب ليك نتي ولا مالك ؟؟ هادي بوسة هادي؟
سكينة: باينة واش العنق كيتضرب
غالي: وراه قصت راسي مع باب الطاكسي داز حدا عنقي بغيت نسدو بزربة وقاسني..اشمن بوسة(طلع ليه الدم) هاحنا عاوتاني غنوضوها
سكينة: باب الطاكسي؟!!
غالي: اشوفي بلاااا. ماديري ليا هاد لفعايل قلت ليك باب طاكسي باب الطاكسي
سكينة: انا غنعس تصبح على خير
قطعات عليه ويدات طلب الله يكون حتى هوا خانها ودار شي فعلة تاخد حقها منو ولا غدا قدام الله ماتاخد ليه ماياخد ليها وتهنى من هاد الدنب ، طلبات الله من الاعماق يكون خانها ومابقات كتحس بحتى احساس من غير الندم والذنب والحرقة شاعلة فيها ، اما هوا بقا كيصوني ويعاود ماحبسش حتى فتحات لخط وشافتو وا قف قدام واحد الحيط دزاج فشي ناطحة السحاب كتبان غير السما ومعصب كان غيخرج ليها من تيليفون. وبلاصة ما يبرر ويشرح طلاها طلية على داك الاتهام بقات ساكتة
سمعهم ليها حتى قالت اعوذو بالله من الشيطان الرجيم ورجعات اللور كتمتم
سكينة: اصلا مسامحاك واخا كاع تخون ..الانسان كيغلط
غالي: مخ هز حاجبو بقا كيخزر فيها ) مكاينش الغلط فهادشي واش عارفة راسك اش كتقولي؟؟
سكينة: واغير قلت زعما حيت بحالا مارضيتش..زعما مكيتحرشوش بيك البنات ونتا تبارك الله مبودر ومسدر ومزغب وتما كلشي ملي والشينوا بحال الجلود ضاروري مغتحرش بيك شي وحدة
غالي: نعلي الشيطان نعليه براكة من تخربيق واش انا كنخرج نستعرض راسي ..شكون هادي اللي غتزعم تقرب من واحد الى كان جامع راسو ومكتعرفوش اصلا
سكينة: غير قلت وصافي.. المهم المسامحة
غالي: والله يستر ! سيري سيري تنعسي بنتي ليا تسوطيتي هاد النهار
سكينة: يالاه بسلامة
تفوهات وقطعات طاحت نعسات واخا النعاس دوزات كوابيس وضرباتها الفيقة فليل و البولة كتنزل ماقدراتش تشدها وتقاس الفراش شوية واخا ناضت كملاتها فالسروال ومشات بدلات عليها فداك الليل ودخلات كملات نعاسها فبيت النعاس.
هاد الحالة حتى كانت تهنات منها ورجعات ليها من جديد ورجعات كل ليلة ضربها الفيقة كتبول وتعتق الموقف فاللخر خرجات مشات شرات فراش للنموسية خاص بالماء بحال الجلد من لتحت ومنلفوق ترب رطب مقطن فرشاتو عليها عاد طلقات الباقي فوق منها وبدات كتنعس لاكن دخلات فحالة كئيبة بسبب لي وقع معاها وعتاكفات فالدار وغير كتخمم ورجعات بحال الغولة وحتى الخدمة كتمشي ليها بلا خاطر وتخدم بلا كانة حتى قرب غالي يرجع وبدات ليلى تنخزها تتحرق ودفعها تبدل عليها داك الحالة لكئيبة لاكن هي ماعندها شهوة ماعندها غرض وهدفها تعتارف ليه وحتى فكرة يشركو الفراش رجعات عندها حساسية منها . لاكن لحسن حضها لقات لي دفعها باش طلع المورال ومشات للصالون عند ليلى سلخوها مزيان حتى مابقاتش كتقول ديرو ليا رحعو كيديرو ليها لي خاصو يدار حتى ردوها بنادمة كي كانت ومشات للحمام ورجعات صاوبات شعرها ودفارها ديديها ورجليها وتبدلات وشافت راسها فالمرايا وقالت
سكينة: يااااه!! شحال تبدلت
ليلى: هاكا كنتي.. شتي شحال ونتي هاملة راسك حتى ولفتيه رجع كيجيك عاادي والتغيير جاك فشكل غيبان ليك اورفر
سكينة:جيت بحال شي عروسة..غيشوفني غيقول قاتلة راسي عليه وموجدة ليه راسي وموحشة فداكشي
ليلى: غتجيه عااادي راه كنتي كتر من هاكا نفكرك؟؟ نجبد ليك تصاورك ؟ راه نتي رجعتي اللور حتى بدا كيبان ليك هادشي عيب وحشومة وتحشمي يشوفوك الناس زوينة وشعرك مصايب ونقية وعاااطية للعين..ولفتي الخمول وتغولتي اصاحبتي راه هوا لي كان غيتصدم كن رجع على غفلة ولقا هاكاك..عيطي على ديك يزة تمشي ضرب شي جمعة لديك الدار لكوزينة حالتها من نهار نهارك ماغسلتي شي كاس ولا جمعتي الدنيا
سكين: ماعرفتش علاش خايفة
ليلى: سوسي عليك الطاقة السلبية دابا خصك ترجعي للدار تلقايها كتشعل بحالك وطلقي رويحة ووجدي ليه شي ماكلة زوينة ولا سيري شريها يجي موحش الدار يلقا استقبال زوين يرتاح، راه مدار لك والو هوا ماعندك علاش تنفريه
بلا خاطر وبلا كانة خرجات من الصالون بعباية طويلة واسعة جميلة وبلغة وتقاشر رقاق باش يبقاو نقيين ومشت فالطاكسي رجعات بحالها كدور فعينيها وكتقول راه كلشي كيشوف فيها وغير انا لي مصاوبة الشعر ومصارية الدفار ومقادة فالدنيا والحمام باين عليها واخا كانت كدير كتر من داكشي وتخرج بشورط بحال السليب وعندها الدنيا هانيا.
وصلات لحومتها ومشات لواحد المطعم خدات واحد الدجاجة محمرة بقوامها والشوا وديسير مصاوب والعواصر وطلعات بحالها للدار كتسوط لقات تما يزة كتمسح الار ض والدار عاد رجعات فيها الروح
حطات داكشي لي جابت فكوزينة ومشات للبيت كتقلب على شنو تلبس واخا ماباغاش تلبس باغا تبقا عادية باش متبينش ليه راه واجدة دايرة داكشي على قبلو، لبسات كسوة سامبل مافيها لا فرافر ولا والو فوق الركبة بسميطات على لكتاف مجموعة كاملة والصصهد كيشوي على برا ولداخل. جمعات شعرها بمقيبط لور وبدات ترش فالريحة وتلبس مجوهراتها وخصوصا واحد السنسلة بخريششات كان جابها ليها كادو وقاليها متحيديهاش لاكن فاش وقع الواقيع حسات بيها بحال الى كتقجها وحيداتها.. لاكن عاودات رداتها ورجعات كي كانت وشوية بشوية بدات كتحس براسها عادية وتولف لانه فالاساس هاداك هوا طبعها وهاديك هي حقيقتها ودغيا تأقلمات كان خاصها غير شوية الوقت .
صونات عليها ليلى تشوف فين وصلات وطمنات عليها وخلاتها كدور فالدار حتى مشات يزة ومشات هي دارت واحد الكاس دلويزة شرباتو على الله ماتبقاش فيها الرجفة والخلعة لاكن مادار ليها والو وتبعات ليه واحد دوليبران وموراه واحد فيتامين سي حتى سمعات الساروت كيدور فالباب والباب تحل ومعاه شداتها واحد البكية ماعرفاتها فين كانت مخشية وتزيرو عينيها وبدات ترعد عاوتاني. اما غالي دخل حط الخلفة اللولة لداخل وطلق ودنيه وعينيه كيشوف فين كاينة وواش حسها كاين فالدار والشنط قدامو والشكارة على كتفو كان لابس تيشورط بلو مارين ودجينز وريحتو وصلات حتى لعندها للكوزينة . بلعات ريقها وعيات ماتمسح فعينيها وكان خصها تخرج عندو تعرض ليه وخرجات من لكوزينة كضحك بزز وغير شافتو تحولات ديك الضحكة للدموع ومالقات فين تخبيها ومشات كتجري عنقاتو وبدات كتبكي
دارت ليه تعنيقة وداك الحضن شحال حنين وريحتو زوينة توحشات الحنان والدفئ وديك الريحة كتفكرها فالايام اللولة لي كانت كتلاقا بيه بتخبية وعندها دوك الايام مميزة كتفوج على راسها بيهم فاش كتقنط وترجع تبدا تتذكر وبقات ديك الريحة عندها عزيزة كتخليها تبقا عايشة الذكرايات على طول الوقت، اما هوا كمشها وطلقها من الباليزات وعنقها حتى غبرات وغير شافها كتبكي تبسم ودار فيها واحد الشوفة عطوفة وحنينة بانت فعينيه شحال عزيزة عليه وكيبغيها وشحال هي قريبة منو واخا ماكتشوفش هادشي ديما
غالي: تنهد) حتاااا انا توحشتك
مابغاتش تسكت من البكا والبكا تحول لعطاب كاع ماشي بكا عادي ..بدات كترعد وتنخصص وتشهق مابقاتش قادرة تسيطر على راسها وواخا كيضحك معاها شاد فيدها لا تعتر وجلسها على الكرسي وعطاها الماء حتى رجعات فيها النفس وهبطات راسها كتمسح عينيها وهوا كيجمع ليها شهرها اللور
غاليي: مالكي ؟ قولي ليا مالكي ، واش شي واحد دار ليك شي حاجة؟؟
سكينة: الصمت
غالي: غير قولي واش وقع ليك شي مشكل؟ ..تعدا عليك. شي واحد؟
حركات راسها بالنفي وجراتو من يدو عنقاتو
سكينة: لا.. غير بقيت بوحدي..وتوحشتك
غالي: عنقها) خلعتيني.. اصلا مغنبقاش خليك بوحدك دابا من هنا لفوق،، حتا وصلت لتما عاد فقت قلت مع راسي شكادير اغالي وندمت على ديك المشية بوحدي ما انا مهني ما انا خدام فخاطري(زفر بتعب) مقبوط ومزير ماقدرت حتى نرتاح كاع (شافت فيه مصدومة) والله لعضيم.. صدري ضاق عليا كنقول غير فقاش نرجع بحالي
سهات ساكتة وتصمرات وشافتها لحضة مناسبة تقوليه شنو كاين لاكن لسانها تربط ونفسها بغات تبوح وكتجمع الشجاعة والقوة وقررات تهضر وبدا لسانها كيدخل ويخرج على وشك الكلام لاكن فاجأها بقبلة وزير عليها وتراجعات شوية بشوية مابقا ليه فين تهضر وهوا هازها داها نيشان للبيت ما ضار لا هاكا لا هاكا وحيد تيشورط ونزل بلهفة فرحان وموحشها وكيبوس هنا وهنا ويعنق ويضحك وكاع الكلمات قالهم فديك اللحضة واخا عمرو عبر ليها عبر بزز منو.
اما هي البكية فيها وساكتة وطول الوقت كترمش ماقدراتش تنساجم وفنفس الوقت مابغاتش تبين ليه وتحسسو بشي حاجة
يتبع
شاركنا رأيك في هذا الفصل 🌹