ارتوى وتكا يرتاح من عناء السفر حتى داتو عينو ونعس ، اما هي ناضت مشات دوشات وبدات تبكي وتخمم فشنو غدير وعقلها كيقوليها شفتيي اسكينة حتى تنقيتي وصفيتي كتر من الحليب ودرتي الحلال وربي بارك فيه ودابا قلبتي كلشي وكديري الحرام وغطستي فالدنوب .. واخا تنقاي حتى تعياي غتبقاي تحسي بالوسخ لاسق فيك طالما مازال ماصارحتيهش وبقيتي ساكتة غتزيدي تدي دنوبك ودنوبو وهوا كيضن انه مزوج فلحلال
بغات تسطا وبغات تتنقى لاكن احساس الوسخ مابغاش يفارقها ومرضات وكفاست عليها الحياة ورجع فيها الوسواس وعافت الدنيا ومالقات ليها مخرج . مشات لابسة البينوار حتى للطبلتها وبدات تدهن وتعاود تمسح ..وكانت بشرتها صفا من الحليب ونقا من القطن لاكن داك الاحساس الداخلي قهرها وبدات ترش الريحة وتعاود حتى تعصبات وبدات كضرب داكشي بيديها وتغوت حتى فاق مدعور وناض كيجري كيقلب على شي حاجة يلويها عليه وشدها من يديها وهي كتفركل وتغوت بجنون وكلشي مشتت ومزلع وبدات نترت يديها وناضت مشات للحمام سدات عليها وجلسات كتبكي وتغسل من بدا وجديد وضرب الرشاشة مع الارض حتى تهرسات وغالي من برا كيدق ويهضر
غالي: سكينة… حلييي.. حلي الباب متبكيش فطواليط
مارداتش عليه وهوا كيسمع الرديخ لداخل وبقا عليها باش تحل ومابغاش يخلعها عارفها كتخاف من الجنون وقالها بشوية وبطريقة ماتفرعهاش
غالي؛ خرجي متبكيش غيضربك شي جن
يالاه كملات سمع الرديخ بالجهد والباب تحل وهي كتعتر خرجات كتجري وشدات فيه ولسقاتو كتغوت
سكينة: علاش كتقوليا هاكاك ماتقولش ليا هاكاك
رجع اللور كيضحك وهربات من الباب مشات كتبكي وتنخصص وهوا وراها كيشوف فديك الروينة
غالي: مالك اش واقع؟؟؟
سكينة: والو عصباتني واحد القرعة
تنهد وسكت بدا كيجمع داكشي وهي كتلبس خوايجها وباغا تقول وماقادراش .. لبس واحد الشورط قصير ومشا لدوك الشنط ديالو كيجيد منهم لحوايج وهي متكية وسط الدار ساهية فتلفازة كتخمم حتى خرج من بيت النعاس لعندها شاد تيليفونات جداد فيديه واحد ابيض واحد كحل وقال
غالي: ختاري واحد
من كثرة استهتارها وافعالها الغير مسؤولة مابقا حتى واحد كيدي عليها او كيتيق فيها حتى تيقة،ومنهم ليلى لي واخا سمعات منها القصة لاكن بقا عندها الشك انها تكون طاحت فالزنى ومابغاتش تعتارف ليها او حشمات تقولها ليها او ربما يكون وقع شي حاجة وسكينة ماقادراتش تصدق وكتقول انه غير تهيأ ليها ،، وبحكم معرفتها برحمة وديجا خدمات ليها فعرسها تاصلات بيها كتسول فيها وتجمع معاها فتيليفون ودارت معاها يخرجو هما بثلاتة ومعاهم سكينة ويديرو شي كافي مجموعين وحتى رحمة مكانش عندها مشكل وكانت مسالية وفعلا دارت عليها ليلى بالطموبيل حتى للحي ديالها كضحك معاها
رحمة: فين سكينة؟ ههه
ليلى: قالت ليا غنلحق عليكم راجلها رجع من السفر
رحمة: ااه ايوا صافي تا تلحق علينا
ركبات حداها ومشاو لمقهى جلسى كيتجمعو وكانت رحمة كتكمي ومدات ليلى حتى هي الكارو وشاركاتها ليلى حتى هي وقالت
ليلى: شحال بيني وبين هاد المرتال ههه
رحمة: مرة مرة وصافي
ليلى: واييه… اجي قالت ليا سكينة مشيتو خرجتو سهرتو كن غير قلتوها ليا
رحمة: ماشي مشكل نعاودوها
ليلى: ولاكن اصاحبتي علاش مشيتو بتو مع الرجال ونتوما مزوجين
رحمة: مشينا غير حيت انا طلعات ليا بالبكا والردان ورجعت حالتي حالة والدري كنعرفو كان ولد حومتي وصافي ماشي مشينا على شي حاجة
ليلى: وهاداك لي معاه قالت ليا سكينة تحرش بيها
رحمة: متأ. تانتي .. هاداك غي واحد الخماس جابو ايوب سكنو معاه باش يخدم معاهم فالشانتيو .. غا هركاوي ماشي حتى صاحبو
ليلى: وواخا اصاحبتي راه تحرش بيها
رحمة: غير تحرش ماشي شدها بسيف راه كنا كلنا جالسين وسط الدار ماشي دخلنا للبيوت نهزو رجلينا..راني قلت ليك ولد حومتي باقي غا صغير عندو ربعة وعشرين عام
ليلى: ياكما لعب عليك الشراب ارحمة. تانتي
رحمة: ههه سييري اصاحبتي انا نلعب عليه من نيتك !! واش عاد حطني الكار انا .. (تنهدات) راه كنت جااامعة باغا غا نفرح على قلبي ..عرفتي شحاااال بكييييت ياختي بكيت لي عمري بكيتو ..وسكينة نااعسة على واحد الكرسي كااع ماحاسة بيا..بقيت هاكاك حتى صبح الحال ومشا ايوب مسكين جايب ليا قهوة ودخلت لطواليط وفاش خرجت لقيتها طارت مشات، شنقت على داك الخماس كنت غنقتل مو قلت ليه اش درتي ليها هههه حسابني دخلها لشي بيت ساعا قلبت مالقيتهاش قاليا راه مشات مابغاتش تسنى
ليلى: غير ميكون دار ليها والو وصافي
ليلى: واش اختي انا كنهضر معاك زعما بنت الوقت ونتي تقولي جايا من شي كوكب.. مالو غيدير ليها هي مونيكة !! راه ماشرباااتش شي شراب راه مشات على رجليها وكتهضر وعادي ماتقوليش شارية غير ديك تزنزينة دشراب وصافي
ليلى: واييه فهمت غير قلت زعما
رحمة: هوا فين كيعرفها اصلا باش يقرب ليها لخماس لي قالها ليه مالهم داونا بالفلوس
ليلى: راه هركاوة كيشوفو بنت كيحساب ليه غير اجي وتلاح صافي غير حيت سهرتو راه كل واحد يدي لي بغا
رحمة : لاالا حنا خرجنا نفوجو وصافي وكن مكانش ايوب ولد حومتي واصلا ولذ دارهم راه دار معايا مت زوين .. واش غنجيو ونمشيو هي اصلا ماشي بزز منها تهضر مع لاخر مالنا حنا خدامين فذار الدعارة مسيفطينا نجيبو كليان
ايوا هادي ريحات ليلى لاكن سكينة ماقدراتش ترتاح .، واخا كانت كتقول الحقيقة ومجربة الشراب وعارفاه كي داير ومكدويش من فراغ لاكن ديك البوسة المقرفة من واحد غريب عليها ماقدراتش تنضفها وتمسحها من دماغها .
لهاها غالي بالكادوات وناضت كتشوف اشنو جاب ليها وخدات تيليفون فرحات بيه نساها الهم والغم ويدا كيجيد ويفرق هنا وهنا وكيعيطيها حوايجها ويعزل حوايج خوتو وحتى عائلتها مانساهمش ..تهلا فيها بالمعقول وماخلا ماجاب ليها وغير باليزة وحدة كانت عامرة بحوايجها..فرحات وعجبها الحال وابذات تناسا وحتى الاحداث بدات كتلهيها وغالي جا مع رمضان نيشان ورمضان جا فالصيف وبغا يشد الكونجي باش يرتاح فيه ويصوم على خاطرو .
الروايح فالزنقة عاطيا دشباكية ومكاين غير جري عليا نجري عليك وثاني رمضان لسكينة مع غالي وغتبدا توجد عاوتاني واخا شي توجاد مغتوجد وغالي هوا لي عارف اش خاص وشنو ماخاصش اما هي حايرة غير فشنو تلبس وباش تخرج وبوحدها من دون الناس والعيالات لي مقاتلين مع السخرة الا هي لي واقفة عند الخياط كتقيس الجلابة وتشوف من الجناب كي دايرة .. خيطات جلابة جديدة حمرا وخرجات لابساها من عند الخياط ونزلات شرات ليها بلغة دالجلد عاد صونات لغالي
سكينة: صافي صليتي العاصر؟
غالي: صافي واش ساليتي نتي؟
سكينة: صافي غير دوز عليا
قطعات وبقات واقفة كتسناه حتى وصل عندها بسورفيت نص كم وشروال وحداء رياضي وطلعات كتقاد حوايجها وتشوف فالمرايا
سكينة: جاتني زوينة؟
غالي: امم جاتك زوينة بالصحة
سكينة: فين غنمشيو؟
غالي: غتمشيو لمرحان راه غدا غنصومو
سكينة: فرحانة بحلابة) ااه صافي صافي (صونا ليها تيليفون) الو ماما
مونية: واش تمشي معايا نتقداو داكشي لي خاص لرمضان ؟
سكينة: صافي انا غادية مع غالي
مونية: اااه ايوا صافي ..حيت انا تقدييت كلشي غير بغيت نمشي معاك وصافي
سكينة: صافي ماشي مشكل شكرا
مونية: ايوا يالاه الله يعاون
قطعات مع مونية ومشات هي وياه لمرجان هوا دافع الشاريو قدامو وهي سابقاه كتمنضر وتشوف هنا ولهيه معارفة اش كيشريو الناس غير كيبان ليها غالي كيهز ويحط وكل مرة يوقف يبقا يقرا ويزيد وهي تابعاه حتى وصل جهك الماعن ووقف كيقلب وقال
غالي: هادو كيدخلو للفران ناخدو شي واحد
سكينة: خودو
غالي: ديري لينا فيه كراتان ولا فلو دالبيض
سكينة: هييه!! كي داير هاد الفلو دالبيض!!
غالي: مهم خليه هنا
حطو فالشاريو وبدا يهز الماعن والزلايف والكيسان حتى طلع داك الشاريو للسما وخرجو للطموبيل وركبات حداه شادة تيليفون وقالت
سكينة: غالي عطيني تيليفونك لقديم لي غير محطوط ياك خديتي هاكا جديد لي جبتي من الشينوا
غالي: فكرتيني.. اجي ديك صاحبتك
سكينة: شكون ؟
غالي:فوز
سكينة: مالها
غالي: جاتها شي ورثة
سكينة: حلف؟؟ باش عرفتيها!!
غالي:داز عندي الضوسي ديالها
سكينة: وباش عرفتيها هي؟
غالي: كاينة تصوريتها تما
سكينة: وشحال جاتها؟؟
غالي: وجااتها الخير والبركة شي سبعين مليون فحقها
سكينة:وغبرااات!!! ضرباتها بغبرة
غالي: هه ايوا راه كتوجد للورثة
سكينة: غالي عندي ليك مفاجأة
غاليي : الله يسمعنا خبار الخير
سكينة: عمرة كادو ههه
غالي: عمرة؟؟ بغيتي تمشي للعمرة؟
سكينة: انا وياك وكادو هادي نمشيو فهاد رمضان ..ياك خديتي كونجي ترتاح فيه نمشيو
غالي: اييه مرحبااا ههه.. ولاكن كن قلتيها قبل
سكينة: حتى للخر ونمشيو ونعيدو تما لعيد شنو قلتي
غالي: نمشيييو ..هي ضربتي يدك هاد الصيف
سكينة: وصافي صافي .. دابا نمشيو ولا لا ؟
غالي: نمشييو علاش..غنشوف مع شي اجونص ونمشيو ، المعروضة من الخير
سكينة: يالاه نتا عرف المهم هوا نمشيو
غالي: هي الصراحة مخييرة العمرة فالعشر الاواخر ..دوز ليلة القدر تما مكاين ما احسن منها
ايوا شكون بحالك غالي هادي مكانتش على البال!! وهادي هي المفاجأة وهوا نيت كيبغي يتقرب من الله جاتو على قلبو بحال العسل وخصوصا فرمضان وغيدوز ليلة القدر تما. من شدة الحماس دغيا جرا لاجونص دغيا رصا الامور وقبل ميديها النعاس ديك الليلة حط تيليفون حداه وقال بجدية
غالي: صافي قاديت الشغل مع لاجونص خاصني نقطع جوج بلايص لينا .. غير هوا عندهم بزاف ديال الاختيارات وكل ااختيار والثمن ديالو
سكينة: وشوف نتا ياك نتا عارف
غالي: ها شنو سيفطو ليا (كيوريها) انا قلت هادا زوين شنو بان ليك
سكينة: صافي مزيان غدا غندوز ليك الفلوس للكونط ديالك صافي
غالي: ان شاء الله
عنقها وباسها ونواو الصيام ونعسو ..كان فنص الليل ناعس ويدو من اللور بين فخادها حتى فيقاتو شي حاجة لزجة مافهم والو وجر يدو لقاها فازكة وبقا كيرمش عرفها بالت .. تصدم ومافهم والو وفيقها بشوية كيهمس فودنها
غالي:سكينة..سكينة..
نوضي تصحري نوضي
فيقها ومشا لدوش بدل حوايجو كاملين وهي فبلاصتها عاد وعات وتبدل لون وجهها ناضت بغات تنتاحر بداك لعنة البول..ملات وعيات وشحال قدها تخبي وكل مرة تفيق فنصها وكل مرة تبدل فنصاص الليل ، وقفات نصلات حوايجها ساخطة وجرات الغطا كامل لاحتو للجنب وطلقات واخد جديد بغلافو الواقي من الماء ولبسات واحد شورط قصير ومشات ساخطة هازة داكشي دارت من حداه وهوا خارج مهبط راسو كيحك نيفو ويرمش داير راسو ساهي.. بالغدايد بدات ضرب الماكينة وتخشي الحوايج ورجعات للفراش نعسات وخلاتو كيوجد الصحور حتى حط ومشا لقاها مقلوبة على وجهها وبدا يفيقها تصحر
غالي: وانوضي نوضي دابا نعلي الشيطان نوضي..نوضي وتوضاي وصلي الفجر راك غتمشي للعمرة
سكينة: لي فيا كافيني غا خليني
غالي: جرها)واغيير نوضي نوضي..راه مكيبولو غا الابرياء
نوضها بزز وهي ساخطة على راسها كتر ما حشمانة منو ..دغيا بدل الموضوع وبدا يهضر على لخبز سخون وهي كتصحر حتى كملات وبدا ينخزها توضى واخا عكزات شعل ليها شوفو ومشات غسلات غسلة خفيفة ولحقات بيه وهوا كيكبر صلات معاه ومشات نيشان طاحت نعسات نعسة من احلى النعسات فحياتها .
وها اول يوم فرمضان طل وربي خفف على عباده حرارة الصيف وهبت واحد الريح دافية وزينة والجو رائع كيبعث الحيوية والنشاط.
بذا كيفكرها فالصلاة كل شوية عاد كتمشي تصلي ويفكرها لا تفطر ولا تنسى ،ك وفكرها فالعمرة حتى هي ومشا معاها لابسة جلابتها الجديدة الحمرا للبنكة دوزات الفلوس لي مطلوبة من حسابها لحسابو ومشاو بجوج لاجونص خداو المقاعد ديالهم ورجعو فرحانين متحمسين عاجبهم الحال .. قبل العصر تاصل بناصر بغالي عرضو للفطور وحتى سكينة لقاتها من الجنة والناس مادخلش لديك الكوزينة الناحية لي كتكره من اعماق قلبها واخا شي فطور مكتوحدو ورمضان اللول كله دوزاتو بالبيتزات وغالي لي كيصارب العصواصر ومونية كتعطيها الحريرة وشي مرات كتسيفط معاها شي حاجة مطيباها ، اما الشي لاخر غير قضيان حاجة والبيتزا الواكحة هي المساند الرسمي .
مشات للدار السعادة تغمرها مكانش عارفة انها غتفرح بهاد العمرة لهاد الحد وتتحمس.. ومنها نيت دير شي حاجة جديدة ماتبقاش غير جالسة مربعة يديها وصافي.
نزلو غاديين غير على رجليهم يفطرو عند باها قبل المغرب بشي عشرة دقايق ودخلو جلسو وريحة الماكلة عاطية وهي متشوقة تخبرهم بالخبر. اما غالي غير كيدخل عند نسابو كيسكت ويحدر الراس ويحشم وكيهضر غير الى هضر معاه شي واحد
.شد بلاصة فالصالون بالدراعية درمضان وخلا في حين دخلات سكينة للكوزينة كي الضيفة كتشوف اش كيوجدو لقاتهم مستفين كلشي فالصواني وغيبداو ينزلو وقالت
سكينة: عندي ليكم واحد الخبر
رانيا: سخونة بالفران) شنو؟
سكينة: انا وغالي غنمشيو للعمرة
ضارو بجوج
رانيا: حلفييي!!!
سكينة: والله مكنكدب هه
مونية: بصح؟؟ وفوقاش غتمشيو؟
سكينة: حتى لعشر ايام اللخرة
مونية:هي غتعيدو تما
سكينة: ان شاء الله
مونية: قربات منها ) والاولاد ابنتي واش مابغيتوش تولدو؟؟ عام ونص ومزال مابغيتو تولدو ؟؟ هاديك جات موراك وولدات تبارك الله من الشهر اللول ولدها عندو عام وزيادة
سكينة: وشنو ! غير هي ولدات نوض انا نولد اش بيني وبينها تولد تا عشرة
مونية: واديري ولادك ابنتي انا حسابني غا ي تولدي زعما فاش تزوجي .. بقا فيا الحال والله العظيم ديك مرت هشام كي جات دغيا ولدات
كالعادة ..الاسطوانة المتكررة لي كل نهار فاش كتشوف مها كتبدا تسمعها .. لا واكثر رجعات كتسمعها حتى من الجيران والكليان وكاع لي كيعرفوها .بلااااا منهضرو على واحد السي رشيد هوا النامبر وان فهاد الموضوع وكيهضر فيه ويعبر فيه بطااي طاي. ولاكن دمها كان بارد والهضرة كدخل من ودن وتخرج من ودن كيت لي كيهضر ويسخف راسو .
تجمعو على طبلة الفطور وبناصر مزال مافراسو مايتعاود ومزال شاد فالمشية دغالي لصين حتى فاجآتو سكينة كضحك وقالت
سكينة: بابا …غنمشي انا وغالي للعمرة
بناصر: فرح من عينيه) العمرة!!!
سكينة: اه غنعيدو تما
غالي: بخجل) ايوا عيط لينا داك المقام هاد العام
بناصر: واللهيلا هادي هي الخبار ..الله يقبل
غالي: امين
بناصر:شاف فسكينة)هي وليتي كتصلي
دورات وجهها رجعات مزنكة ماعرفاتو حشيان لهضرة ولا طنز ولا كيهضر من نيتو وبقات ساكتة كتفطر وبدا عليهم بناصر بالنصائح والفهامة حتى شبعو ورجعو بحالهم ..وفالطريق وهما راجعين والدنيا بدات تعمر تلفت غالي وقال
غالي: غنمشيو ندوزو هاد الايام اللولة مع با راه بوحدو .. الى كنتي غتوجدي شي حوايج وجديهم دغيا قبل منمشيو لمكناس
سكينة: صافي غدا نخرجو نشريو داكشي ..حيت ماعندي وااالو لا حوايج مستورين لا حتى حاجة
غالي: عارفة راسك بعدا … ايوا سيري انا غنمشي نصلي تراويح
قلب الطريق مشا للجامع وهي مشات حلات الحانوت فالقيسارية وجلسات فيه كدوز الوقت مع العيالات لي حالين حداها ، كانت حداها مرى منقبة كتبيع الملابس دالمنقبات ودخبات سكينة عندها كضحك وتجمع معاها وبدات تقلب بين الحوايج وتوريها علاش بغاتهم ومالقاتش اللون لي بغات كلشي جاها مغموق وخدات ليها المنقبة القياس ديالها وكاع متطلباتها وخلاها سكينة غتوجد ليها العبايات ديالها ورجعات بحالها للدار
لا معنى للروتين فحياة سكينة ومكاين غير جري عليا نجري عليك وهادي الحياة لي كتبغي، لومبيونص وكاين مايدار وكاين الحماس والتنوع فالاحداث. من العبايات لي دفعات للباليزة مشات تجمع حوايجها لي تمشي بيهم لمكناس عاوتاني وهادي حتى هي زوينة وغتبدل فيها الروتين والجو شي يامات وتوق الجديد .. بدات كتعزل فالحوايج الزوينين والبيجامات الرطبين مع داك صهد مكناس لي كيلتاهم بنادم وهي اول مرة تمشي لمكناس فعز الصيف وعاد غتعرف الجو تما كي كيداير.. انا غالي دخل معطل وهاز صاك فيه حوايجو داهم كاملين للمصبنة يتطواو كما العادة .. بحكم لا هوا لا سكينة كيجلسو يطويو الحوايج وكليان عند المصبنة لي حداه كيشوفوه كل سيمانة فقرر يبدا يدي ليهم الحوايج يتطواو ويرجع يجيبهم وماعليه غير يحطهم فالبلاكار وهاهوا مهني والبلاكار منضم .
جبد الشنطة حتى هوا وبدا يجمع حوايجو فواحد القنت وسكينة فالقنت لاخر حتى كملو الجميع وتلفت قاليها
غالي: واش صافي ساليتي؟؟
سكينة: اففف..ساليت كلشي جمعتو ياربي منكون نسيت والو ..اجي قلتي غندوزو شي نهار افران
غالي: غنضربو دورة وصافي مهم غنتحركو
سكينة: باش نعرف شحال من لبسة ندي
غالي: ايوا للى ساليتي يالاه نتحركو دابا نيت باقي لحال مكاين لاش نتسناو للصباح
سكينة: دابا دابا؟
غالي: دابا دابا
سكينة: واعيط لباك شوف شكون لي معاه مافيا لي يلبس غنمشي بهاد الكنيديرة مبررردة وخفيفة …ندير معاها شي كلاكيطة زوينة وصافي
غالي: غير يالاه راه بوحدو عاد هضرت معاه
سكينة: قول نتايا داااير بلانك عوال تسافر دابا وانا جالسة كنسول.. وادوز على ماكدو ناخدو معانا شي حاجة
غالي: تعرضي عليا نتي؟
سكينة: نعام؟!
غالي: ويا لاه يلاه غير كنضحك
شدو الطريق بالليل والجو غزال كيحمق كل واحد شاد مشروب والكليمة مطلوقة وغاديين بجوج بالكنادر هي بكندورة مخططة مطلعاها تا لفخاد وطاوية رجليها متكية وشادة تيليفون وغالي كذلك كندورة زرقة رجالية هازها تا للشورط ومتكي طالق الموسيقى كيغني معاها حتى وصلو للدار لقاو السي رشيد فالباب بالقشابة والصندالة دالوضوء غادي جاي كيتسنى على برا فرحان وناشط كيسلم ويعاود ، اما سكينة صهد مكناس صمقلها مالقاتش الاكسيجين فاش نزلات كان يحسابليها الجو زوين حيت الكليمة مبردة ااطموبيل لداخل . خرجات شادة صدرها مخرجة عنيها وقالت
سكينة: ناااري العافية
السي رشيد: قالك الله ينجيك من صهد مكناس
سكينة: كتسلم) نااري الموت عندكم
غالي: زيدي تشواي شوية هههه
خلو للدار وكانت كتشوي بالضهد ولقاو السي رشيد موجد ليهم العشا ومصايب ليهم طاجين دالحوت بقاو غير كيشوفو فيه ماقدروش ياكلوه بالصهد وبزز دارو يديهم معاه وتكاو كاملين كيتجمعو فالصالون والضو طافي والتلفازة شاعلة والسراجم محلولين على الله وعسا يشمو شوية دالهوا مبرد
غالي: كيحك راسو )ايواا ان شاء الله راحنا غاديين للعمرة ابا الى كانت فالمكتاب
هز السي رشيد عينيه متفاجأ وقال
السي رشيد: العمرة؟؟ نتا وسكينة؟
غالي: كيتبسم) اييوا عرضات علينا . قالت لا واالو نمشيو للعمرة ..ايوا قلنا نمشيو العشر الايام الاواخر
السي رشيد: مزيااان ولاهيلا مزيان..غتعيدو تما ؟
غالي: اه انشاء الله
السي رشيد: بمزحة) سكينة غتمشي غير طوف وتجي المهم تعتامور واخا بالشعر مطلوق ههههخخ
سكينة: دوزات يدها على شعرها) لا راه غنلبس داكشي طويل وندير الزيف راه دفعتو للخياطة تخيطو
الشي رشيد: ااه ايوا مزيان الحجاب غتبدايه من تما
سكينة: جاتها الضحكة) وايييه هههههه
السي رشيد: هادي العمرة مودييرن خههه
سكينة: المهم نغسلو الدنوب
السي رشيد: مزيان الواحد يخفاف ماحدو صغير
غالي: مافطر معاك حد ليوم ؟
السي رشيد: قالك غدا غيجيو يفطرو هنايا
رتاحو ديك الليلة غير تما فالصالة كل واحد فين نعس واخا ماشي شي نعاس..نعاس ديال الصيف معروف حالو ،،سهرو حتى قربات الربعة وكل واحد داتو عينو فجهة حتى صبح الحال وصبحات سكينة ناعسة حتى للوحدة لايحة عليها ليزار وفاش فاقت مالقات حتى واحد ، بوحدها فالدار غسلات وجهها ومشات للكوزينة لقات الدنيا نقية وصونات لغالي لقاتو خرج مع باه وجلسات كتفرج حتى اذن العصر ودخل غالي و معاه باه هازين شلا سخرة داوها للكوزينة حطوها وسمعاتهم كيقولو
غالي: اصافي غير هادشي كافي ياك ياك قلتي عمتي مريم صاوبات ليك لحريرة..ايوا صافي براكة الواحد يفرق الصيام وصافي
ناضت دير الصواب لقاتهم مجموعين فلكوزينة والسي رشيد تالف ماعرف باش يبدا
وسخرها تحط الزلايف وكلهم بداو يحطو وكاشي شراوه واجد حطوه فوق الطبلة حتى مابقا للمغرب غير شي ساعة وناضت مشات لبسات كندورة اخرى كحلة ودفرات شعرها دفرة خفيفة وغسلات وجهها مزيان ودهناتو ومشات كملات معاهم التوجاد ولي قالو ليها كديرها حتى بدا الدقان فالباب ومشا السي رشيد حل الباب وبدا يستقبل شي مور شي بولادو وعيالاتهم واولادهم وبناتو حتى هما وراجل بنتو ،، خرجات سكينة كتسلم وتبسم دارت الصواب معاهم وكلهم جايين بالجلالب تقول معاندين شكون طلع حسن من لاخرى .دخلو كلهم جلسو فالصالون وعمرات الدنيا وخلاهم السي رشيد حتى شدو بلايصهم وهوا واقف مكفض يديه وقال
السي رشيد: زعما معروضين عند النسايب ولا؟؟ جايين حتى لهاد الوقت
بداو كيضحكو وشي كيشوف فشي وبدا يسخر فيهم وبدا من بناتو بجوج نوضهم يحطو الباقي ..اما سكينة مشات جلسات بحال الضيفة وعاد جات الفرصة فين تتعرف على كولشي عن قرب وتشوف وجوههم ويشوفو وجهها وبدات الحضية غير من تحت لتحت وهما كيفطرو والرجال كيتجمعو والسي رشيد عزيز عليه يشد فسكينة خصوصا ملي جابت ليه معاها واحد الدراعية درمضان ببلغتها لبسها وجلس بيها كيقشب عليها قدام كولشي
السي رشيد: دابا غنبقاو نقولو ليك الحاجة سكينة الموديرنة
سكينة: شداتها الضحكة)وايييه ههههه الحاجة الحمداوية
السي رشيد: واعنداك غير تمشي و تنسا راسك وطوف بالشعر
سكينة: هههه لالا راني وجدت لحوايج ..المرة الجايا نمشيو بثلاتة انا ونتا وغالي
السي رشيد: انا الى مشيت منرجعش ..نتزوج شي اندونيسية من تما تديني معاها اندونيسيا
تدخل سمير وهوا جالس محني على الزلافة : شكون غادي يطوف؟؟
السي رشيد: بمزحة) غالي غيدي سكينة يدير ليها عقلها
رجعات اللور كتموت بالضكحك والكل كيشوف فيها ويضحكو من القرجوطة مكانش كيحسابليهم ضاسر عليها تا لديك الدرجة وحتى هوا مكيخلي فيها لي نسا بالضحك وهي كتكركر عندها زايد ناقص وهادشي لي كيخليه واخد راحتو ..مكتغضب مكتشكى مكترد عليه بطريقتو وعارفاه حتى هي كتقبل المزاح وطنز على راسها خصوصا فاش كيجيبها ليها فالصميم .
سمير: غاديين للعمرة اخاي غالي؟
غالي: ان شاء الله الى كتاب
هشام: ولاهيلا مخييرة فوقاش غاديين ؟
غالي: للخر درمضان ان شاء الله
هشام: هي مغتعيدوش هنا
غالي: لعيد الصغير تما ان شاء الله
تدخلات منال : مادايراش الحجاب وغتمشي للعمرة؟
السي رشيد: ماشي مشكل حتى تمشي وديرو تما .. ماعندهاشي المشكل
شداتها الضحكة بدات كضحك حتى تقجات ومد ليها غالي لما شربات وبدات كضحك ماقالت ليهم لا طابت لا تحرقات غير جالسة وكضحك ومرت هشام كتشوف فيها بنص عين ومرت سمير حتى هي عاصرة شنايفها لتحت وشادة ولد اخر ولداتو فوق البنت كتوكلو ودور عينيها بنص عين وحادرة راسها .. كلهم دوزاتهم سكينة بجغمة دالماء وحتى مرت هشام ولاكن مرت سمير ماحملاتهاش وكتكره داك النوع الحادو الراس ومادخلاتش ليها لخاطرها وكرهاتها تقول قاتلة ليها كينيدي
الانسان سبحان الله كيحس بلا ميوصيه شي وحد غير الى بغا يتعاما وكيفهم من العنين ..العينين كافيين انهم يقولو الحقيقة..وخواتات غالي كانو عفويات مافعينيهم لا سم لا حقد بلعكس كيبانو حشمانين من عينيهم كأنهم دايرين شي زبلة وباغيين يصلحو الامور مع سكينة..خصوصا انها من نفس طينتهم بجوج وكانت باينة عليها حتى هي شادة فخاطرها من جيهتهم واخا ما ميعات ما بينات ليهم .. هي براسها ماعرفات كيفاش تعامل معاهم وشنو تقول، جات تجمع الطبلة وخداو البلاطو من يديها
منال: غير جلسي انا نجمعها
سكينة: ماشي مشكل بحال بحال
هند: لالا غير جلسي حنا غنجمعو الطبلة
جمعو بنات السي رشيد الطبلة اما عيالات الخوت كل وحدة دورات وجهها جهة ولدها دارت راسها ملهية معاه زعما ، ومن الصواب بغات سكينة تبان مربية قالت اجي نغسل الماعن وهادشي نيت مناش هربو العرايسات والبنات عاقو بيهم ، بدات سكينة كتجمع الروينة وفخاطرها كتردد
كن كنتو غير نتوما يا الشيخات وتفرجو اش غندير فيكم ولاكن عندكم الزهر ماشي بوحدكم اما كن وريتكم غسيل لماعن بمومو دعينيكم
كانت كتقد العرايسات اما البنات كانو كيجمعو ما تبقى من الطبلة ولحقات عليها منال بجلابتها درمضان والطالون قدو قداش جمعات كمام يديها وقالت
منال: اري نعاون باش نساليو دغيا
تبسمات ليها سكينة وكحزات وبدات وحدة دوز الصابون وحدة تشلل ودخلات هند حتى هي كانت لابسة لبسة كتحمق بلدية عبارة عن سروال توب ولفوقاني ديالو بحزام فالاسود والطالون كحل بدات كدور حداهم متوترة وهما ساكتين وحتى وحدة ماقدرات تكسر داك الصمت بشي كلمة وتبادر حتى دخلات مرات سمير فيدها رضاعة وهازة ولدها كتراري وقالت كضحك معاهم
ونيسة: ايوا غير سمحو لينا ههه حنا دابا عندنا التربية
هند :بتهكم)اممم لاباينة التربية على وجه السعاي
ونيسة :بنص عين) اييوا الله يهدي ماخلق
قلبات عينيها وهند كطلع وتهبط ولخرين عاطيينها بالضهر مشغولين مع الماعن .. من ديما كانت هند متسرعة وكتعطي فالوجه نيشان وفالبلاصة وعندها زايد ناقص
هند: يهدي من يشاء ويضل من يشاء وسبحان الله الضلال كيبان على الكمارة دالواحد
منال: هزات كتفها) صاافي..واش غنبداو نضاربو هنا
مشات ونيسة هزات الكاسرونة دارت فيها الماء يدفا وهند كتشوف بنص عين وقالت
هند: غسلي ديك الكاسرونة ملي تسالي
دورات وجهها وخرجات بينما ونيسة مارداتش عليها دارت لي فراسها وكدور غير عينيها من تحت لتحت خدات الماء وخلات الكاسرونة فوق البوطة وهزاتها سكينة فالبلاصة بلعاني قدام مناال غسلاتها الشيء لي خلا منال طفج ومشات كتمسح يديها عندها لواحد البيت معزول كترضع فيه ولدها وقالت مخرجة عينيها
منال: خدامين عندك هنا ولا ؟؟؟ والله كن ما حشمت حتى نشطب بيك الارض فهاد العواشر ايوا قلبي عليااا
زدحات الباب وخلاتها جالسة وبدات ونيسة كضحك بوحدها فصمت مهبطة راسها وهازة عينها فالباب.
تلاقات هند مع منال راجعة للكوزينة وقالت
هند: مالها عاوتاني؟
منال: هاديك ماما لي كتعرف ليها غييير بلاتي كتقلب دوز هاد رمضان فالمرار ايوا بلاتي عليها ..هانتي غتفرجي
هند: اجي اجي..يالاه نخرجو شوية هما غيمشيو يصليو تراويح وحنا نمشي لشي بلاصة خلي دوك لكرطيطات يوجدو لعشا
منال: اا؟؟ واخا ..ومنعرف واش يبغيو
هند: نخزاتها بخفوت) قولي لسكينة نخرجو
منال: قوليها ليها نتي
هند: اجي اجي.. نجيدو لهضرة بعدا
رجعو للكوزينة كيدورو بجناب سكينة لي اصلا سمعاتهم اش قالو ودارت راسها صمكة وكتسناهم غير يجبدو معاها الهضرة وعجبها الجو ديال السم وفعايل المساميم وريحة الافاعي لي شمات وجاها الحماس حتى هي وماحملاتش ونيسة مابغاتش دوز ليها مع القرجوطة وشماتها من الشوفة اللولة وضرب قلبها بالنفور من جيهتها تقول قاتلة ليها شي واحد عكس مرت هشام واخا عندها معاها حساسية لاكن ماشي لدرجة تخس بالكره من جيهتها بقدر ما حساتو من جيهة مرت سمير .
بقاو كيدورو ويشطبو ويهضرو غير بيناتهم على الخروج وضارت منال كتبسم وقالت
منال: نشوفو سكينة واش تبغي تخرج حتى هي
سكينة: اه ماشي مشكل
هند: صافي سالينا يالاه نخرجو
سكينة: يالاه
مشاو مسحو يديهم وهزو صيكانهم وهزات منال سوارت طموبيل راجلها بينما سكينة كتلبس فواحد البيت وغالي واقف عند راسها
غالي: فين باغيين تمشيو؟؟
سكينة: غير غنتمشاو نهضمو هادشي ..عطيني سوارت طموبيل
غالي: شنو؟
سكينة: سوااارت بغيت نسوق
غالي: واش كتهضري بصح؟؟ سيري اسكينة سيري اشمن سوارت
سكينة: ارا سوارت بلا شوهة
غالي: كيتفتف فجيابو عليهم) فين باغا تمشي نوصلك.
سكينة: لا عطيني نسوق انا يالاه ارا متحشمنييش
غالي: اش غنحشمك واش نتي بنت هنا ؟؟ وها نتي على عطيني طموبيل
سكينة: ياااك!!!
غالي: ونوصلك فين غادين ونجي نجيبكم كتر من هادشي؟؟؟
سكينة: لا بغيت نسوق عطيني
غالي: راه مغنعطيكش طموبيل بلا متفرعي ليا راسي …. خلينا هانيين
سكينة: يااك!!! ايوا دابا نشريها وتجي دور بيا عقل عقل
غاالي: خلي ليا غييير طموبيلتي والله يسخر شري حتى رموك
سكينة: خارجة كتنكر )ايوا عقل فييها هاهيا
مسحاتها فالباب خارجة ولقات البنات فباب الدار كيتسناوها لحقات عليهم مشافتش وراها ونزلات مع الدروج ركبو مع منال وزادو
نزلو للهديم وكانت الدنيا زوينة ،، جلسو فواحد المقهى كل وحدة حشمانة من الاخرى وداروها الوسط وهما كيشوفو ليها فجلابتها الحمرا ويتبسمو
منال: منين شريتي جلابة؟؟ زوينة
سكينة: خيطتها
هند: جاتك فنننة كتحمق بالصحة
سكينة: الله يعطيك الصحة شكرا
هما كيشوفو الجلابة وهي كتشوق الذهب لي لابسين وماعندهاش مع الذهب ومكتشريهش اصلا ويالاه داك الطقم لي شرات فالعرس وخاتم المرياج لي مكديروش اصلا وواحد جوج شنسلات رقاق فالعنق جابهم ليها كادو وشي طوينكات فالودنين حتى هما كادو اما البقية من الخواتم الرقاقلس فيديها مصافين غير بلاكيور..
سكينة: كتشوف فمنال) هادو دهب؟
منال: اه
سكينة: واعرين.
منال: عندي انسومبل كامل
سكينة: زويين.. انا معنديش مع الذهب بزاف
هند: هييه!! انا كنتسطا عليه
منال: حتى انا كنموت على الذهب الى ماشريتش الدهب منحسش براسي فالوجود
سكينة: كيجيني غير تبدير
منال: بلعكس كايرد الفلوس ..قولي ليها هند الطقم لي كنت بعت بشحال خديتو وشحال بعتو
سكينة: انا منقدرش..كنخاف نضيع فيه
منال: خصك غير تعرفي تشري وصافي حتى الذهب فيه وفيه ..انا كيعجبني بزاف
سكينة: لاالا انا منقدرش نشريه المشاركات الصراحة الا الى جاني كادو يعجبني الحال هه..ولاكن منشريهش عطا الله منشري
منال: ماولفتيش وصافي اما هوا تخبي فيه فلوسك
هند: راه اذمااان ..عرفتي تبداي فيه يبقا يبان لك غير هوا ..انا كنت بحللك فالاول دابا رجعت كنشوفو غير هوا
سكينة: اجي شنو درتي كملتي فالحلاقة والتجميل؟
هند: سالييييت وخدمت فواحد الصالون …
كانت غتهضر وبدات تتغامز هي ومنال وسكينة كتشوف فيهم وقالت
سكينة: مالكم هه؟؟
هند: دابا انا تقدم لي واحد ياك ..عندو كووولشي الفلوس موجوووودة ولاكن المشكل الوحيد غليض
سكينة: كيفاش غليض؟؟
منال: دابا هوا غليض بحال البيغ ..ولاكن راه لابااااس عليه حنا قلنا ليها راه عااادي فين كاين المشكل وهي قالت لا غلييض
سكينة: الى كان اختي غيتهلااااا فيك واخا يكون ديناصور .. انا بلاصتك فين ما نحير نتفرج فالجميلة والوحش وناخد العبرة
هند: ههه واييه..هوا الله يعمرها دااار وكولشي ولاكن خفت يضحكو عليا
سكينة: مهم نتي عيشي بيخير ولي ضحك ضحكي معاه اصلا من بعد الزواج مكيبقاش يبان لك واش زوين ولا خايب كيبقا يبان غير كيفاش عايشة صافي
منال: هااااا لي قلت ليك شتي نفس النضرة
هند: انا راه مزال ماقلتها لحتى واحد..غير ماما ومنال ودابا قلتها ليك نتي…كن كنتي فبلاصتي تزوجي بيه ؟
سكينة: ومالو؟؟ المهم السعادة نكون فرحانة ومرتاحة وبيخير الغلض كيجيب الهيبة
هند عجبها رأي سكينة تقول كانت كتسنا غير شي واحد من ستيلها يعطيها رأيو اما سكينة باغا تعرف غير علاقتهم مع العرايسات كي دايرة وترضي الفضول شوية
سكينة: ماقلتيهاش لعيالات خوتك ؟؟
هند: دورات وجهها بقرف) اويييلي لا
منال: حتى هي) اش غيعرفو هادوك غير الهيطوكيات تت..لالا ماعندهم مايعرفو ولا يفهمو
هند: ولاهيلا داكشي ليبقا هههه(بسخرية) غير ونيسة تقولي لي يصلاح لي وتوريني لي معارفاش..ولا لخرا تاهيا عاد حطها الكار
سكينة: بلعكس كتبان ليا ضريفة
هند: حتى حد ماضريف .. هزات حاجبها)عنداااك ضسريهم عليك راه يكشطوك ..انا ماخليت ماعطيت لديك المعزة دونيسة يبان فيها الضو ووااالو
سكينة: اوييلي زعما كيبانو ضريفات
منال: لا هاديك شوية داخلة سوق راسها..ونيسة لي لفعااااا
سكينة: ايوا الله هدي ما خلق.
هند: دابا غتمشي للعمرة وديري لحجاب؟
سكينة: ان شاء الله علاش لا
منال: صافي قتانعتي
سكينة: مهم نمشي للعمرة ويحن الله
هند: عضات شنايفها كضحك) ناااري تعرف سارة ههه
سكينة: شنو؟
هند: سارة مزالة كتقول لينا الراجل عمرو ينسا مرتو اللولة واخا ماعرفت شنو يطرا
بقات سكينة غير كتشوف مالقات متقول
سكينة: اممم قوليها عمرو مانساك كيبات الليل كله يعيط بسميتك وكيغلط ليا فالسمية ! وعلى قبلك غيمشي للعمرة باش يقدر يعيش بلاا بيك
عشية واشمن عشية تحل لهند الفم وكانت من هادوك لي غير كيجلسو كيحطو السريرة كاملة وبدات هاك بلاك لسكينة كتعاود ليها على غالي وسارة فاش كانو مزوجين وسكينة كضحك ومنال غير جالسة وكتشوف
سكينة: شتي هادي مزاااالة تفيق واحد النهار وتندم على هاد الضحك لي مزالة دايرة فراسها عقلي ودابا تشوفي
منال: واييه نهار تحل عينيها متلقا فين تحط وجهها ..الله يستر الحب كيسطي والله…عرفتي الى مشيتي حتى طحتي شي طيحة خايبة مكتبقاي تعرفي ماديري والضحك فيك ونتي محاساش بيه ولي قاليك شي حاجة تيقيها
هند: انا اختي ماباغاش نتزوج عن حب ..واقيلا غانقول لهاد الغليض يجي لدارنا
سكينة: اصلا داك زواج الحب والزمر كيطيح مولاه غير فزوبية حيت مكتعرفش اصلا بيمن تزوجتي حتى كتفيق من داك الحب عاد كتعرف راسك واش عندك الزهر ولا عندك الزمر ههه
هند: واييه.. تا انا دابا كنشوف راسي كيفاش غنعيش من بعد ماشي شنو كاين دابا.. يعني نكون زوينة وحسن منو هوا غادي يدير عقلو معايا حسن ما نبقا انا لي تابعاه بلا عقل
سكينة: ايييه هاكا حسن.. تعيشي حياتك وحتى فحيااتك غتعرفي راسك اش ديري وشنو ديري وغتفكري بعقلك ميغلبكش هوا
منال: دابا نتي اسكينة تزوجتي غالي عن حب؟
سكينة: انا اختي تزوجت بعقلي نكدب عليك
هند: زعما زعما مابغيتيه حتى شوية
سكينة: ماشي الحوووب الحوووب.. راه فرق بين الحب وبين الرااحة .. انا رتاحيت واش فهمتي.. نفسيا وجسديا مرتاااحة مع غالي واصلا دابا ولفتو وحفضتو وحتى هوا عااارفني..وهادشي لي مرحيني كتر هوا انه كيعرفني مزيااان وكنا غير اصدقاء وعارف عليا كولشي وكنحس بيه بحال شي صديييق بحال مثلا باابا فهمتو فالبلان ..كيدير معايا داكشي ديال اولياء الامور هه
منال:بحالاش مثلا؟
سكينة: يعني كيدير معايا بحال شي بنت صغيرة خاص لي يقابل ليها قرايتها يراقبها يتابعها..فهمتو..هاكاك كيدير ليا مع داكشي ديالي حتى من ليغيكل عارفها وانا معارفهاش وقتاش تجي كاع. .. كيجي يقوليا راه عندك رونديفو مثلا مع الطبيب كيشد ليا رونديفو بتيليفون وانا كنعرف غير نمشي وندخل.. والبنكة كييسيفطني وكنعطيهم تيليفون هوا كيقاد ليا كلشي انا غير مسخرة .. الدواء الى مرضت كيفكرني فيه.. كيخلص ليا الضو والاوراق هوا قااد بيهم انا مهازة هم لحتى حاجة..مهم عايشة وصافي كنعرف نمشي نخدم نقيد رونديفو نشد لفلوس نجي بحالي وداكشي لقانوني هوا هازو عليا ومكنعرف راسي فوقاش مسافرة ولا معاياش ولا فين بايتة ولا فين واكلة..تابعاه والسلام هههه وكيعطيني لحلول وكيعقل تبارك الله عرفتي الذاكرة عندو منقولكش
منال: لا هواتبارك الله كيعقل وكيشد دغيا حتى نوامر تمليها عليه غير مرة يشددها
سكينة: اه بصح تبارك الله انا واااالو اختي شي نهار نسا سميتي
هند: دابا نتي واش كتحسي بيه راااجلك راجلك ولا غير بزز كديري داكشي
سكينة: شوفي فاش تكوني مرتاحة مع شي واحد كيعزاز عليك واخا تكون فيك الموت ديري ليه خاطرو غا تهناي وتزوجي بالبيك ديالك راه كيكونو حنان هههه الى لاباس عليه زيريه يدير الشفط وغيرجع بحال الغزال
هند: هييه احيااني راه مابغاااش ومكنبغيش نهضر معاه فهاد الشيء يقول راه مشكل ليا مشكل ولا شي حاجة .. نتي راك مزوجة بغالي خفيف ضريف ساهل ماهل
سكينة: هاي هاي على ساهل ماهل هاداك هوا لي تحيري معاه ..راه تبارك كيوزن قالك خفيف ضريف..هوا غير دقة بالضحك كتقسم ليا الضهر
هند: تنهدات) اوييلي ياصاحبتي متقارني غالي بهادا.. غالي راه كن جاني بحالو منعطلوش ههه .. نتي واخدة الزين المسرار والعقولات وباغا تزرفيني
سكينة: فين اختي كنت عارفاه عقولات راه غير كان ضريف وصافي
هند: في حيرة) لالا واخا هاكاك..دابا كن جاك واحد كيوزن مية وخمسين كيلو تزوجيه؟
سكينة: الى كان غيدير ليا بحال غالي ويهز ليا هبالي..نتزوج بيه اختي والله تا نتزوجو
هند: حرت
منال: راه مغيبقاش يبان ليك العيب اهند والشكل من بعد الزواج غير تهناي ..غيبان ليك غير التعامل ولفلوس
سكينة: ولاهيلا … ااه واهم حاجة يكون بعدا قريب من الله .. وناقص عليه الدنوب واخا ميكوووونش متدييين ولاكن على الاقل ملتازم شوية.. بحال غالي ملتازم بالصراحة مكيكدبش ومكيبغيش يزيد دنوب الكدوب ودنوب اخرين محيدهم عليه..والى دار شي مزية لصالحي انا فراه غير على قبل الله ماشي زعما على قبلي ولا على زيني.. مكيحلفش بالله واخا تقجيه الااا الا فلتات ليه ومكيبغيش لكدوب ولا الرشوة والله ميرشي شي بوليسي واخا يعرف يخلص لخطية بتريبل وشحال من مرة كيتقج بالفقصة ولاكن ميعطيش الرشوة نهاائيا وفخدمتو مكيشدش الرشوة وعارفينو تما مكيقبطش الفلوس ختى واحد مكيدور بيه ويصدق محشمو ..وبزااف بزاااف دالحوايج كيجيو لصالحي انا مكيديرهم على قبلي وانما على قبل ربي وماكرهتش يزييد يلتازم بحوايج كتار ..المهم لي قد يوصلها راه كيطبقها وانا دابا مهنية دايرة فيه تيقة عمية
هند: وااختي نتي راه تحمدي لله راه ديك سارة كاااع مكانت شايفة هادشي ماعرفت فيين كانو عينيها
منال: صافي نساوها خليوها الله يجيب ليها ما احسن
هند: كانت شانقاه وهوا مكيدير والو .. كي قلتي نتي لي وصلها وقدر يديرها كيديرها
سكينة: بيييخير اختي..احسن حاجة حسن من لفلوس هوا تزوجي واحد ملتازم وايمانو قوي ..لهناوات غير ميكونش متشدد يطبقو عليك نتي ويخلي راسو ..شحال من واحد ملتازم غير على مرتو الله يستر وهوا ناااسي راسو وهي خانقها .. يخليك نتي فتيقار ويشوف راسو هوا
تحل ليها الفم حتى هي وعجباتها الهضرة وتطلق ليها اللسان وبقاو هاك بالاك شي كيعاود لشي حتى مشا الحال وصونا ليها غالي فايليفون ترجع عاد ناضو هزو صيكانهم ورجعو للدار ومع الدخلة لقاو الكوكوت كتسفر وريحة الطياب والضو فلكوزينة شاعل والرجال فوسط الدار كيلعبو الضامة وصوتهم عالي فالسما ..دخلو كيضحكو ويفرنسو وشافو الضو فلكوزينة شاعل مشاو يشوفو اش واقع تما لقاو لعرايسات كل وحدة شنو كدير وهازة شوكتها فالسما مكيضحكو مكيهجروه . كمل عليهم السي رشيد دخل ناشط زربان باغي يرجع يكمل اللعب وقال على عجلة
السي رشيد: دير دير تما واحد للبراد داتاي يعمر اونيسة
ونيسة سرطات النفس بزز مهبطة الراس بدات تعمر اتاي في حين سكينة كدور والجوع كيدور فيها وعاد تحلات ليها الشهية بانت ليها فشي بريوات كانو شاطو من الفطور ومشات كتقلب عليهم وتسول ..ولاكن شكون غتسول وحتى وحدة مكتهضر هازة شوكتها .. الحاصول لقات غير يديها والسما مكاين ما يتكال والعشا دايرين المرقة وهي جنها وجنونها فالمرقة وتغماس خصوصا بالليل،، مالقات لا بيتزا لا مملحات وحتى جعمة دالغصير مكيناش.. وكاع لي شاط من الفطور تبخر وغبر
شافت حتى عيات وبدات دور عينيها وقالت
سكينة: انا حسابني غنرجع نلقا شي حاجة من داكشي لي شاط فالفطور ساعا الجراد داز من هنا ..كن حسابني كن تعشيت برا حسن
ونيسة بنص عين:ها لعشا كيطيب
سكينة: ماعنديش مع المرقة اختي
خرجات من لكوزينة بدلات عليها ومشات سخنات لحريرة شربات واحد جوج زلايف وهزات التمر والحليب ومشات لبيت فين كينعس شيخها سدات عليها وجلسات مقابلة تيليفون حتى تحل الباب وطل غالي عليها
غالي: متعشايش؟
سكينة: دورات وجهها) لالا مابغيتش المرقة غا بصحة
غالي: هز يدو) ايوا هادشي لي كاين..تعشيتي برا؟
سكينة: منين!! كن حسابليا غنلقا يدي والريح كن تعشيت عاد جيت
غالي: شنو دابا؟؟
سكينة: صافي غنقضي ونعس
سد الباب خلاها كتفرج فتيليفون ومشا ورجع من وراه شيخها عيط ليها تعشا وتحججات ليه بالمعدة وقال هادي متكون غيير حاملة وداكشي لي بغا وداكشي علاش كان مصدعها فين ما تجي عندو ولا يمشي عندها وعارفهم ماباغيين ولاد ومحيديين الفكرة من راسهم وخالعينو بداك القرار وكيقلب غير منين يدوز ليهم باش يولدو . غير قالت ليه المعدة ما المعدة مشا كيطير عصر ليها العصير وجبد ليها الحوت من لفريكو وجاب ليها البلاطو والكل كيتسناه للعشا حتى تم مدخلو ليها صدمها ناضت مدهشرة
السي رشيد: شرب شوية دالغصير باش تخفاف شرب راني خرجت ليك للخوت درتو فالما يرطاب ديري بيه شي حاجة ولا نديرو ليك انا ماشي مشكل
حشمات وتزنكات بقات كتفتف ودور عينيها خافت من غالي يجي يلقاه كيوجد ليها ويدور فيها هي على الفشوش وتبوحيط يوريها الشيكي والبينيكي لي ماشي فساعتو ، ساعة ماجا ماطل عزيزة عليه المرقة وتغماس خصوصا الى كان لحم وهوا انسان لاحم عزيز عليه اللحومات ، جلس ومعاودش ناض حتى دخل عليهم السي رشيد كيمسح يديه بالفوطة وهند كتسول على سكينة
هند: فين سيكينة متعشاش؟
السي رشيد: عيانة عيانة غير خليها .
اما واحد غالي مداهاش لا فيها لا فغيرها جالس هوا سمير قولها وضحك عليها شاد فيه وكيتسنا يبدا .
تعشاو وعركوها وشمو ريحة الحوت وتقرقيب.. مشا غالي هوا لول للكوزينة لقاها كدور فواحد لكروفيتات مع مطيشة خلعها وجاها من اللور كيطل حتى قالت دابا وهوا طلاني لاكن طاحو عينيه على داك طاجين بيل بيل وقال كيدور راسو
غالي: اييه هااي هاي… اري ندوق لك داكشي
عطاتو طرف دلخبز دار ليها نص الطاجين فدغمة ومشا كيضحك خلاها مخرجة عينيها شاهقة وطارت بيه دغيا قبل ميجي كلشي يبغي يدوق وكلاتو بزربة ومسحات السما بليكة ومشات جلسات كي الناس معاهم مكمشة فواحد القنت شادة تيليفون وماناضت ماتحركات من بلاصتها حتى جلسات هند حداها كتوريها الروايح لي فصاكها وكل ريحة يا ريحة ، وقدامهم العرايسات لخرين كل وحدة شادة ولدها فجهة كترضعو والرجال منفاصلين عليهم وسط الدار كيلعبو
كانت كتفاهم هي وهند بزاف اما منال تعشات ومشات بحالها مع راجلها وبقاو غير للاولاد واولادهم تقلو فالماكلة وتكاو حتى داتهم عينيهم وانفاردات هند وسكينة فبيت الشيخ وجلسو كيتجمعو وجبدو الملفات القدام وشكون يسكتهم ديك الليلة، مع الصهد والحر تقزبو وكل وحدة فين تجبدات وبداو من هشام وزواجو
سكينة: اه اه اه ياختي مع مع !!
هند: واييه فالشهر الاول ماعطلاتوش ياختي،، خصك تشوفي كيفاش كان يشكر فيها وشانت نفخ لينا راسنا بيها .. غير يجلس يبدا علينا كتعرف الطيب كتعرف تزمر ونقياا نقيا نقيا .. قهرنا ياختي حتى بديت كنقول انا واقيلا معيفينة
سكينة: جاتني بلدية اويلي باقي شي واحد كيدير للعكسة
هند: عي هاكاك دايرة ..ااه قالك عندها الاجازة فالقانون الفرنسي
سكينة: فاش خدامة؟
هند: فرملية ولاكن صافي جلسات..شرط عليها تشد الارض ماتخدمش ودارت الدرة ..دابا غير الدار وهشام مكيخرج مكيدرج تحجب تا هوا
سكينة: الزلط اختي لي كيحجب
هند: اختي هشام مكانش هاكا ..كان اللبس والكاريزما..غير تزوج هزيتي واحد وحطيتي واحد
سكينة: ااه مسكين جاني ضعاف بزاف
هند: ضعاف وسكتي! راه تدعق وحتى لخاطر مابقاش عندو كااع ..الحرب كتنوض عندهم هي وياه دييما ،، انا كنكره المشية عندهم اختي كتجيني الغمة (غمزاتها) فاش جلسات كنعاود ليها عليك قالت ليا لعجب خوك طلق طبيبة وتزوج نكافة
سكينة: اممم..اه اختي كان خاصني نكاف
هند: وهيا دابا كيجيب ليها الله راه وااعرة عليك وحسن منك مزالة ماعارفة والو ومعاوديين ليها وصافي
سكينة: انا ياختي تعطيني غا بضهرها ماتعرف عليا منعرف عليها براكة عليا عينين لي حدايا نزيدها حتى هي.. قهرووني قهروني
هند: بتردد) اجي نقولك..دابا زعما ..زعما لي فات مات ..خليو المياه ترجع لمجاريها نتي وماما صافي دابا راكم عائلة وحدة
سكينة: كدور عينيها) انا اختي مادرت والو نتي عارفة.. ما درت لا بيدي لا برجلي كل واحد اش واخد عليا وكل واحد يخلصو الله
هند: ودابا صاافي تسامحو هادي هي الفرصة فين تسامحو ونتي غادية للعمرة
سكينة: وراه انا ما غضبت حد ما درت دنب مع حد اختي.. انا يدي فوق راسي ونتي عارفة كلشي
هند: ودابا غير شدي تيليفون عيطي ليها وباركي ليها رمضان وكدا
سكينة: هييه!! منقدرش منقدرش بابا راه شرطها اختي نهار الاول ..راه خصهم يصفيو لخواطر هما ماشي انا،، بابا لي هاااز فخاطرو حيت مامشاتش عندو وانا منقدرش على سخط با وهوا نهار الاول شرطها وحط ليها شروط
دورات عينيها فجنابها كتتهرب
مسحات سكينة كلشي فباها وحسات ان العكوزة بغات تصلح الوضع ولاكن يتصلح من جهة سكينة لي صغيرة وتحني الراس وتمشي تصالح مع عكوزتها كما كتقول الاصول والعادات واخا تكون لعكوزة غالطة،، لاكن هايهات على سكينة ماتحمل تتبع حد وكاع العادات وداكشي عندها تخربيق خلاوه الجهلاء للاجيال يمشيو عليهم.. وغالطة ولا مغالطا مابغااش حس العكوزة يدور فحياتها نهائيا وفين ما تخايل راسها كتصالح معاها كتفكر جلستها هي ومها ورانيا لي كيديروا ديما فالدار وتتفكر حوارهم
مونية: كتجمع روينة فدار سكينة) واحمدي الله لي فرقك مع العكوزة اما كوراه فضيحتك فمكناس كلهااا متخلي لمن تعاودها
رانيا: كتسيق) هيييه!! كنتخيل كن ماتفرقتي نتي وياها وتبدا تجي تجلس عندك هنا وتشوف هادشي!!! ها سليب فين مرمي ها الشورط فين محطوط وتفيقي تا لطناش ماعندك حتى نضام
سكينة: الله ينجيني براكة عليا غير نتوما
مونية: ايااااه!!! ولاهيلا مزيان..غزيتي فينا
سكينة: ايوا نفس الهضرة لي غتقول كتقولوها نتوما
رانيا: حنا كنجمعو ليك روينتك اما هي راه تصورها وماتخلي لمن تسيفطها ..وعااااد هي وحدة من هاد الوقت تلقاها عندها الواتساب والفايسبوك وحتى ليوتوب ضرب ليك الطررر
سكينة: وراه غير السيدة مسكينة مريضة ماجاتش سيمانة دابا وانا مشغولة كنجي سخفانة
مونية: صافي غير المرى مريضة تخلي الدار ينوض فيها الدود..ايوا واه ماعندك دراع ابنيتي ومعيفييينة تخطاك هاديك لي هازاك ومنقية ليك وسخك تعطي ريحتك
سكينة: ايوا الحاااامدو لله بعدا كنجاهد على لي يجاهد عليا وقاضية حاجة راسي مامربعاش يديا .. ما انا من الشاقيات ما انا من المسخات..
رانيا: ايوا بااازز..باز لغالي لي عايش معاك
سكينة: غا خليوه راه عايش فوق السلك لي فوق الروينة
مونية: واش هاداك وجهك ولا قفاك.. واش عادي عندك يجي يلقا هاد الروينة هاكا
سكينة: عاادي راه دارو واش انا خدامة عندو مالو الى كان بوحدو مغيجمعش.. هوا بعدا مكيقول والو كيسول غير على الكاملة واش برات مكيقولش ليا نوضي شقاي عليا
مونية: يدها على فمها) ايوا الله يمسخك انا بعدا حشمت فبلاصتك..انا بعدا نهار قالينا راني كنتسنا المرى توجد ليا لكيكة ديالي حشمت مالقيت فين نخشي وجهي
رانيا: فوقاش؟
مونية: نهار كنا جالسين هنا قلت ليه مابقاش الخبز باش دير كاسكروط قاليا راني كنتسنا المرى تصاوب ليا لكيكة ديالي
رانيا: كضحك) ولاهيييلا
سكينة: من البيت كترد) وراه كتصاوب ليه كيكة حسن من هادوك لي كيتابعو واجدين وانا مكنكلهاش داكشي علاش قالك ديالي حيت كياكلها بوحدو
مونية: بصوت عالي: ونتي ماعندكش الكتاااف توجدي ليه كيكة اش غيدير بيك الاللة اش رابح معاك
سكينة: واكن بغاني على كيكة كوراه تزعط فهادي نيت لي كتصايبها شهوة منها ..واخليني ساكتة خليني
شحال قدها تفكر وهي عام دوزاتو سيراط فالنكير مع دارهم لي كيديرو المستحيل باش مايطلقهاش وتبقا فدارها ..باها تابعها فتيليفونات فين ما كانت كيسمعها خل ودنيها ويدخلها للدار بحال العيالات وحاضيها لا دير شي زبلة ، اما مونية ورانيا دايرين لي فجهدهم باش دارها تبقا نقية وزوينة وتابعينها بالمنخاز طيب ودير كي كيديرو المزوجات وخايفين طلع ليه فالراس ويحط هبالها ويسيفطها ليهم حيت فعينيهم ماتنفع لوالو وزادتو غير بالهم حتى هي وكن مكانش مزوج كان غيكون مهني من صدعها..لا طياب طيب لا شغل تقضيه وعلاش غيصبر. عليها؟؟ غيصبر تا عيا ويكركبها وهادشي مناش خايفين وكيخدمو فبلاصتها وياربي تبقا مزوجة وميخسروش داك النسيب لي طاحو عليه بحال ريال لحلال ومباغيينش يفرطو فيه ولو على زنافر سكينة .وهادشي كامل وهاد الجهاد كله الى مشات حتى تصالحات مع العكوزة غادي تفضحها وماشي غير غتفضحها واخا الفضيحة كافياها وانما غتزيد تحرر فيها العيشة كتر ما محررينها فيها عائلتها وكيتدخلو فالصغيرة والكببرة وماخلاو العكوزة غير السوط تسوط بيه وتزيد بيها بالتحراظ وتبدا عليها واكلة رزق ولدي دايرة ليه سيزي خارجة عليه وتخرج فيها الشيب وينوضوها ومتكملش السيمانة حتى يفرتكوها.. لالالالا سكينة ماشي ديال شي عكايز وشي زواج حار .. ماتليق لشي عكوزة ولا شي عكوزة تليق ليها وحسن ليها تكمش واخا تجي لعكوزة تصالح تنوض تهرب
دارت براسها كتموت بالنعاس غير باش متجبدش ليها هند الصلح مع العكوزة وقلبات وجهها للحيط حتى نعسات . اما الصحور شكون فاق ليه يوجدو كن ما لعرايسات لي حشمو من الشيخ وناضو وجدوه ..اما سكينة وهند ماناضو حتى ياكلوه ومابغاوش ينوضو حتى صبح الحال وصبحو ناعسين مافاقو حتى لطناش لقاو غير غالي وباه
هند: كتمسح وجهها) فين مشاو لخرين؟
الشي رشيد: صافي مشاو بحالهم الصباح
هند: ااه
قلبات الدورة جهة سكينة وبقاو غير بجوج داك النهار مالقاوش مشكل بيناتهم وتوانسو وتلاقاو نيت.
حط ليهم السي رشيد اش غيديرو للفطور وكل شوية يسول فسكينة كي بقات ويدور بيها حتى نفارد بيها فالكوزينة كيدور عينيه وقال
السي رشيد: مشيتي للطبيب؟؟
سكينة: ههه لا راه غير البرد ضربني للمعدة
السي رشيد: باحباط)امم.. ونوضو ديرو ولادكم اش كتسناو؟؟
سكينة: بلاتي بلاتي بااااقي لحال
السي رشيد؛ اش بااقي؟؟؟ شو تبارك الله (غمزها) المرا دهشام ولدات وعاواتاني حاملة
سكينة: خرجات عينيها) تبااارك الله
السي رشيد: وجات غير من وراك وعملت الاولاد
سكينة: ايوا الله يسخر ليها..انا بعدا انا وغالي متافقين منديروش لاولاد حتى نديرو الدار
السي رشيد. والدار راكي درتيييها اش متخربقي ..نتوما مناقصكم خير اش كتسناو
سكينة: مزال مزال شوية
السي رشيد: ونوووض نوض..نوض عمل ولادك واخا غير واحد راه يزير لك الراجل ..علاه كن ولد مع اللولة كان غيطلقها
سكينة: ههههه لالا غير كوني هاني ماعندو فين يمشي..
دخل عليهم ودغيا بدل السي رشيد الهضرة وقال
السي رشيد: درتي الربيع؟؟
سكينة: اه ههه
خلاها وخرج بقا غالي كيدور فاكوزينة كيشوف اش كيطيب
سكينة: راه غير لاسوب ..سير جيب شي حاجة اخرى للفطور
غالي:ماشي دابا تا للعاصر كيكون داكشي مزال سخون..اجي لكروفيت باقي؟
سكينة: باقي
غالي: غمزها)ديري ديري ديري شي طاجين بحال لي درتي راسك لبارح يالاه.. يقولو مرت غالي حادكة يالا يالاه
خرج كيدور لابس واحد الشورط وتيشورط خلاها كدور عينيها فلكوزينة وبدات فيه هي وهند تا اذن الاذان وكما العادة فطرو وخرجو غير البنات تمشاو شوية وموراها توا دعو وشدو الطريق رجعو فحالهم
رمضان واجوائو الرائعة حتى واحد مكييسخا بيهم، وسكينة واخا معيكيزة ودراعها طايحين فشغل الدار للكن امها فالدمة والحمد لله جات غير حداها ومن ثلت ايام لثلت ايام كتدي ليها لحريرة وشي ماكلة من الفطور واجدة.. اما هي كتعرف دير حاجة وحدة وهي البيتزا لي اصلا لاباط كيجيبها غالي واجدة وكتشدها دهنها ودردر عليها شوية دلفرماج ودخلها للفران ..اما الغصير من تخصص غالي لي من لي كيبدا رمضان وهوا يطحن ويعاود حتى لنهار لعيد.. ومن الزهر جاب ليها ماكينة دلماعن اما كوراه رجع عندها جبل اجا ميفكو وخصوصا فهاد الفترة لي مامساليا لا لطياب لا جميع الدار ..مقابلة سير واجي للخياطة واقفة على حوايجها ومن لعشية لعشية كتخرج هي وغالي باش يشري لوازم العمرة حتى هوا وكيختموها بشي فطور على برا وترجع هاانية مهنية بحالها.
ايوا وصلات الساعة دالسفر ودق القلب دقات عمرو دق بحالهم فالحياة..احساس غريب وحماس ودفئ فالصدر ماليه مثيل.. واخا سافرات مع غالي على برا ماجاهاش بحال هاد الاحساس..خصوصا وهي واقفة قدام مونية ورانيا لابسة عباية بيضا ناعمة ومصاوبة ليها رانية الحجاب طويل ونازل حتى لصدر وتحت الجبهة شبيكة بيضاء وتسلط على وجهها واحد النور وواحد النضارة عمرها شافتها فحياتها واخا ماخلات مادهنات لداك الوجه عمرها وصلات لدتك الشعاع والحمورية فلخدود الطبيعية..لبسات التقاشر بيضين والدفار مقطعين فاليدين والشنط محطوطين عند الباب وهي غير كضحك فمها متجمعش وكتشوف فدوك الحوايج لي لابسة وتالفة معارفة راسها مالها
سكينة: حاسة براسي بحال الى غادية للجنة
مونية: قوليا راسك نتي لي كتموتي على التقزاب..عاد عفا عليك الله شديتي الطريق الصحيح
رانيا: والله اسكنية الى جيتي فننننة هاكا حسن من دوك السوالف
سكينة: كنقفقف
مونية: كدوز على الخوايج)تبارك الله تبارك الله
خرجات مونية خلاتهم فالبيت وعاودات رجعات دايرة يدها على فمها والفرحة كتفرفر من عينيها وحشمانة
مونية: تبااارك الله غالي كي جا معاه داك اللباس سبحان الله العظيم الله يعمي عين الشيطان..ربي راه رزقك براجل كاااع بنات الناس يتمناوه ونتي ماقلتي حتى الحمد لله ..واخا رجليك خارجين الشواري مزال الله كيشوف من جيهتك وباغيك ترجعي ليه
سكينة: راه حيت انا كحلة غير من برا ..وداكشي كتشوفوه غيير نتوما اما انا قلبييي بيااض شحال من وحدة مالقاتش باش دير سبوع شريت ليها الحولي وشحال من وحدة مالقات باش تكسي ولدها فلعيد و ..
سكتاتها رانيا: صافي صافي صافي ضيعتي داك الاجر غير عاودي ديري اجر اخر وسكتي عرفنااك قلبك هشيش ولاكن فمك مكيتسدش كضيعي كاااع داكشي لي كديري راه الرياء حرااام
سكينة: شنو هوا الرياء؟
رانيا: هوا ديري الخير وتوريه لكلشي باش تبيني راسك مزيانة ..
سكينة: انا راه موريتو لحتى واحد
رانيا: ضربتي ليه الطر دابا
سكينة: دابا الاجر مشا؟
رانيا: ماتبقايش تعاودي صافي درتي ستري
سكينة: صافي منبقاش نعاود انا ماكنتش عارفة
بناصر: كيعيط) يالاه زيد. سكينااااا
خرجات هازة واحد الصاك صغير لقات غالي واقف بجلابة رجالية وموكاسان وكيبان عليه النقا والوقار والقبول اكثر من قبل وفرحان ومتوثر كيضحك ويعاود وكيعاملها بحال الحاجة ماخلاها تهز ولا تحط
مشات سكينة وغالي للعمرة ..وبقات مونية ورانيا حاطين يد على يد على برا غيير كيشوفو ساهيين متأثرين
مونية: شوووف سبحان الله شكون كان يقول غادي يجي شي نهار حتا هي تزوج وتمشي للعمرة ..سبحان مبدل الاحوال
رانيا: انا بعدا قريتها كاع الدعاوي لي دعي معايا عنداك غير تمشي تنسا كلشي(هزات يديها) ياااربي…يااااربي يا السميع يا العليم سهل عليا حتى انا بشي خدمة حسن من كاع الخدامي كلهم وسهل عليا بشي طوموبيل ونكون لفوق لفوق
مونية: وشي ولد الناس حتى نتي
رانيا: الخدمة هي اللولة ولد الناس الى مجاش المهم كاينة بنت الناس
بقات بلاصتهم عند بناصر ومونية تقول خواو عليهم الدار.. اما واحد بناصر فبحال هاد المناسبات كيرجع سخي من داكشي الرفيع..مللي مشاو وهوا كيخمم ليهم فالاستقبال وكل مرة يدور ويقول لمونية
بناصر: يديه وراه. كيدور) غندير ليهم الصدااااقة على حسابي(دور راسو) غندير ليهم واااحد الاستقبال مدااايرش.
رانيا: من البيت) ايوا سبحااان الله ههههه
بناصر: علاش سبحان الله!
رانيا: غير قلت وصافي
بناصر: هااا سكينة لي قلتو عليها خايبة ماتصلاح لا لزواج لا خدمة.. والله متوصلو لها
مونية: كدور لحريرة) ايوا تبارك الله صلي غير على النبي نتا الاول غتشحط معاها بالعين
بناصر: بميوعة)امم..عيني انا والله ماخايبة..راه بالرضا ديالي واقفة وناجحة
رانيا: شدات راسها) الله يكتر رضاك ههه
بناصر. لي بغا الرضا يخدم عليه… عمررر شي واحد فيكم جا باس ليا راسي؟؟؟ ولا سولني مالي؟؟ هي بعدا راه كانت فين ما نبان ليها ماشي هوا هاداك كتسولني مالي وتجي تبوس ليا راسي وتضحك معايا … انا عزيز عليها واخا كنوضو دوك النوضات ولاكن عزيييييز عليها وعزيزة عليا غير كنفاجيو على ريوسنا
مونية: هييه ايوا تفوااااااج واشمن تفواج نيييت
بناصر: ضاروري من شوية دالصدع(كيخمم ) عيطات ليا حليمة الصباح كتسول وقالت ليا شخبار سكينة واش شمرات شوية على دراعها قلت ليها (كيشنت) سكينااااا مشاااات للعمرة (كيدور راسو)امم
مونية: كتموت بالضحك عليه) ايوا ؟
بناصر: كيتسارا فالدار) قلت ليها مشااات اشمن تشمار ولا دراع…هي بعدا عندها الدراع لي يغسلو الدنوب واخا شي ماعن مكتغسلهم قاضية حاجة فهاد الدنيا… دابا كلشي غيسيق لخباااااارررر
رانيا: وراه مامزيااانش ههه
بناصر: شنو لي مامزيانش؟؟ ياك سولوني اش كدير واش دارت عقلها ..نكدب عليهم؟؟ راه دارت لعقل لي مايديروهش هما..ايوا قولو ليا شكون عندنا فالعائلة لي شرات الدار بتسعين مليون وعندها جوج حوانت و مشات للعمرة وجابت الراجل مكود
رانيا: ثلاتة دلحوانت
مونية: شدات راسها)والله مكاين لي غايخرج عليها كدك نتا … واخلي عليك البنت اسيدي الله يهديك ودعي معاها
بناصر: دااااعي معاها والله مكندوزها فشي صلاة راه الدعاوي ديالي كيتصرفو (كيعيب) عياو يعيبو فيها كي دايرااععع سكيناااعع واش حداكت سكيناااعععع واش دارت عقلها سكينااااهعع…ها سكينة ايوا ديرو بحالها الى نسميكم عيالات
رانيا: بنص عين) صافي صافي
بناصر. ضار عندها) تحركي حتا نتي راه ماعندي ما عدا من بنادم الفنيان.. مايخدم مايردم ما يدير الطايلة فحياتو..ها مك تا هيا بعدا بعدا تخشات فداك الحانوت كتعلم البيع والشرا.. الواحد هوا لي يتحرك مايرزمش ويخدم ويمشي ويجي ويفيق بكري ويدير الزردة ويدير الخير ويشوف الحباب ويصل الرحم ويعيش قبل ما يدخل للقبر يشبع نعاس
ارا ماعندك ابناصر كتقلب على غير على الوجيبة للزرود وشحال كيعجبوك الزرود والجيب كيتحل وكيقوى عندك الحماس ، تنا الا عولتي على سكينة وغالي تما بقيتي تسنا فالصداقة حتى تموت .
ناض دار شرع يديه .. ايييه وجد وتكلف ولاكن كووولشي فدارو هوا ولي بغا يجي يبارك يجي عندو لدارو .
وجد كولشي وماقصرش من جهدو، ماخلا حلوى ما خلا ماكلة وتقدية وكلشي وقف عليه وخدم مونية ورانية بلهلا يطريه ليهم ودار بحساب الصداقة نهار لي يوصلو فيه المعتمرين وماخلا لمن قالها من عائلتو من عايلتو ولي بغا يحضر مرحبا بيه ،، اما غالي تواصل معاه فتيليفون علمو بالصداقة باش يقولها لعايلتو وداكشي لي كان نيت وزاد تواصل بناصر مع باه لي كان واجد باش يحضر طبعا .
هز طموبيل ناشط فرحان ماناقصو خير مشا كيجري فداك الضهر تعرض لسي رشيد هوا الاول قدام باب العمارة دغالي..كان يالاه وصل هوا وسمير فطموبيل وكيتسناوه باش يمشيو مباشرة لمطار الدار البيضاء يتعرضو للمعتمرين.
ركبو فسيارة بناصر وشدو الطريق بكري للمطار ووقفو كيتسناو حتى بداو المعتمرين كيخرجو فرحانين وبانت ليهم سكينة جاية كضحك وجهها صفحة بيضا وغالي وراه كيجر الشنط
كانت فرحانة وباينة على وجهها .. دايرة الحجاب ولايحاه على كتافها ولابسة عباية كحلة وغالي وراه دافع الشاريو لابس عباية حوايج عاديين سروال وقميجة حتى وصل عند خوه كيسلم وقاليه سمير بمزحة
سمير: فين الجلابة السي الحاج؟
غالي: بالضحك )والله وماكنتي لابس سبادري والسروال لا لحقتي شي طيارة ولا جريتي شي باليزة هه
السي رشيد :بمزحة) هاي هاي على الحاجة جات معاك السبنية
سكينة: ههه واييه
السي رشيد: وبااانت عليك العمرة
سكينة: كضحك) كي كنت كنبان قبل. كحلة؟
السب رشيد: لالا بانت عليك درتيها من نيتك ومسحتي كاع الدنوب ..كنتي كتباني متقلة
شد فيها عاوتاني وهي كضحك حشمات قدام باها تهضر وكن ماكان كن ردات عليه حتى هي وجلسات تجمع وتعاود..ولاكن باها حاضر دارت راسها درويشة حشمانة خلات العمرة تبان على وجهها على الله يقول سبحان الله تبدلات ويوقرها عليه شوية وينسا سكينة لي كيعرف ولي ربا واخا راه سكينة لي مشات هي نيت لي جات ماتبدل فيها غير اللباس والسترة والعقل هوا هوا غير الدنوب لي تنقصو
وصلو لدار لقاو الاستقبال بالحليب والتمر نعام اسيدي وكلشي فرحان .. كان داير ليهم بناصر لعشا داك الليلة غير بيناتهم وتعشاو وجلسات مع دارهم تبات بينما غالي مشا للدار هوا وباه وخوه وعاد حلات الفراجة والتعاويد وبدات تحل الباليزات لي جابت معاها ديال دارهم وديالها وباها جالس مربع رجليه قدامها حلف مايمشي ينعس كيشوف اش جابت والفضول مسهرو كيسول ويعاود
بناصر: حناك شنو جبتي ليها؟
سكينة: ماجبت لحد انا جبت وصافي ماختاريت لا لحنا ولا لجدي جبت شوية شوية من لحاجة ونتوما فرقوهم
بناصر: ياك قلت ليك جيبي تسابيح والسجادات فين راهم؟
سكينة: راني جبتهم فديك الباليزة لخرا
بناصر: ارا ليا هاديك الباليزة لهنا نشوفو اش فيها يالاه دغيا.. غدا الصداقة وغيجيو الناس نعرفو شنو نعطيو وشنو نخليو ارا عندي داكشي لهنا
جر لباليزة عندو وربع مزيان بحال لعكوزة ومونية جالسة كي الامانة غير كتشوف ماتعطي رأي ..ولاكن الصراحة تهلات فيها سكينة مزيان حق ما يتمكن كساتها كسية بحال لعروسة ماخلات من جهدها من الشراوط لا ديال لحضور ولا ديال الخروج.. ها عبايات الحضور بالالوان ها عبايات الخروج بالاشكال والشيلان والروايح وبناصر كيشوف ويدور راسو
بناصر: ولاهيلا عبرتي براكة عليها غير وحدة مالك على داكشي كامل ارا ليا لهنا نشوف
سكينة: طارت عليهم جمعاتهم) لااا هادو دمي حتى واحد مايدي منهم راهم لخرين عطي منهم لمن ما بغيتي
بناصر: ولكن داكشي بزااف
مونية: وصافي ابناصر خليها دير لي بغات
رانيا: لا لا لا ابا راه مها هي اللولة واخا تجيب ليها حتى عشرين خصها تبان مميزة راه مها الى ماجابوش ليها ولادها شكون يجيب ليها؟ كل واحد كيتهلا فواليديه عاد الشيء لاخر
بناصر: اممم دابا تحاميتو..فاش كتبغيو تافقو مايقد عليكم حد..ارا ليا شنو جبتي لحناك
سكينة: وااا ها حنااا ها حناااا راه جبت ليها تفاصل عطيها تفصل وتخيط واش حنا غتلبس العباية ؟؟ ها تفاصل (طارت على واحد الميكة)ارا هادو
جراتهم بزربة عطاتهم لمها وبناصرتابعها بعينيه بغا يعرف اش فيهم
بناصر: خربقتيني
مونية: راه تما لخير والبركة
بناصر: نتي غير سكتي.. خديتي الحاجة المخيرة بسيف ما تهضري
مونية: دورات وجهها )الله يستر
بناصر وجد الصداقة وتجمعات العائلة وحضر السي رشيد وسمير فقط اما البقية كل واحد عندو حساسية مع شي حد ، ودازت الصداقة بحال جميع الصداقات المغربية ومن بعدها فاليوم الموالي شد غالي الطريق هوا وباه وخوه لمكناس يشوف عائلتو ويدير صداقتو مع مو واهلو وحبابو وبقات سكينة فدارها شبعات نعاس عوضات الفياق بكري شبعات راحة واستراحة عاد خرجات لشغلها بواحد العباية والشال ملفوف على عنقهااحتراما لديك العمرة لي مزالة جديدة والناس لي غتلاقا ويباركو ليها ، يالاه دخلات للمحل بدات تسلم والناس تبارك وطلع وتهبط وتبركك ، دارت الصواب وخلات حتى خوا المحل وجلسات كدور عينيها والمراكشية كتعاود ليها الخبارات وتنفنف بنيفها
مراكشية: بنادم خطاار ياختي جات هاد خيتي ليلة سبعة وعشرين كنا كنلبسو البراهش وسولات عليك قلت ليها سكينة فالعمرة وضارت قالت لصاحبتها هاانتي كنا نتسناوها طلق زادتها بعمرة
سكينة: خليها تسنا عمرها ضايع فالحضية اما انا قاضية غرض طلقت ولا مطلقتش راني حاضية لي ينفعني كيتها هيا
مراكشية: لي سول عليك وقلت ليه مشات للعمرة كيطرطق عيينيه بحااال هاكا الله يستر
سكينة:شمرات يديها ) ارييي ليا المفييييد واش كاين شي عراسات شي عرايس شي تسبيييق شي فلوووس راني واقفة عليهم دااابا تابعني شلا مايدار نخمم فيه والصيف هادا ، هادو هما الخباراات لي تجيبي ليا اختي … اري ليا البلانات الصحاح لي يفرشو ليا الدار الجديدة ويشريو ليا الكاط كاط نركب عليها اري اري اري جبدي داك روجيستر نحسب واري دوك الفلوس لهنا
مشات المراكشية جبدات كلشي حطاتو ليها بدات تحسب وتحاسب وجمعات الضرف والكتاب ودازت مع الباب مشات شدات طاكسي كورسة نيشان عند سارة لقاتها مع واحد العروسة كتقيد ليها ووقفات عليها حتى هي ، لاكن سارة لقديمة مااشي هي سارة الجديدة لي ولات بالطموبيل والذهوبات والفلوس والسفاريات لتركية ، مبقاتش ترضى والنفخة والنيف فالسما وغير كملات مع العروسة ضارت لسكينة وكانت على سبة وجاتها مع الحساب نيشان ويالاه غيبداو يتحاسبو نوضوها
سكينة: غا بشوية عليك ستاوييل شفتك باغا دابزي
سارة: اختي هاد الشركة طلعات ليا فراسي نتي راك كتجي تدي لفلوس وتمشي اما انا راه كنتقاتل باش نجيبهم ونقسمهم معاك
سكينة:وقفات) ايااااه!!! وباني باني يالاللة عري على نيابك نسيتي فاش بديتي تبكي وتشكي وشركت معاك وانا لي كنضرب الطريق لفاس وندور ونجيب تكاشط ونبقا نجري وراهم من خياط لخياط ومن معلم لمعلم ونعرق ونتفقص ونجيب ليك الموديل وااااجد حتى كتحلي فيه فمك وتعلقيه ماعرفتيه كي وجد ولايمكن نزل عليا من السما
سارة:كتشالي بيديها) اييوا يوايوا راه من مصروف المحل كتشري ما كتشريش من الربح ديالك ولا تجبديهم من جيبك
سكينة: واسيري عرقي عليهم تا نتي حساب ليك الشنعة فالجلسة فالمحل ولا تلبسي العروسة!! كن ما ااانا لي كانوجد الموضيل حتى واحد ما يدور بيك فهاد المحل،، وتا دابااا مكاااين مشكل اختي انااا قااادة بشغلي،، فلوسك لي صرفتي نهار الاول غنعطيهم ليك والله يعاوننا ويعاونك
سارة:خرجو كشاشكها) هاااا؟؟؟ مزيااان تبارك الله ، اشوفي هاااه اااديك شطيطيبة راه عياقتك سيييري ديريها على وحدة اخرى وانا هي لي غنعطيك فلوسك وسيري نتي وموديلاتك تق*** اما المحل انا لي مقابلاه وانا ربيتو وربيت كليانو
سكينة: هاااكاك!! واااخاااا ايوا هي دااابا جلسي نتحاسبو
جلسو تحاسبو وكل شوية حتى كينوضو يبغيو يتناتفو وكيكملو لحساب لي ماكمل حتى شطح الشيطان فحسابهم عاد فراوها وشركو داك العقد لي بيناتهم وكتبات ليها سكينة ورقة بأنها صافي لغات معاها الشركة والكرا وناضت
سارة: هافلوسك كااملين حسبيهم
سكينة: بالفقصة) ااري لهنا …. حساب ليك غتفكي مني… دااابا نوريك اسريسرة النملة منين كتبول غا بلاتي حساب ليك شربتي الحرفة
سارة: على مافخيلك ركبيه ياالاه
سكينة: ايوا هانتي غتشوفي،، ديك السمية حيديها ولا غنرجع نطيح مها على راسك
سارة: ديها كوليها راه البانو قلعيه غنجيب حسن منو وبسميتي
سكينة: واخا دابا نوريك
سارة: الفلوس يبقاو فيدي حتى تكاليزي ليا لورقة لي كاتبة بيديك عاد تشديهم
سكينة: زيدي معايا دااابا نييت للمقاطعة
مشاو كيتنتكرو للمقاطعة وكل وحدة وقفات فقنت هازة خنافرها
سكينة: مع غالي فتيليفون) الوو غالي انا فالمقاطعة دابا نوضتها انا وديك سارة شريكتي الله يشركها فعضامها وفاريناها مابقات شركة وغتعطيني فلوسي كلهم باش دخلت وقالت ليا خصك تكتبي ليا ورقة بأنك صافي متبقيتيش شريكتي وخديتي نصيبك وسمحتي ليا فكلشي باش تجدد عقد الكرا ودير فيه سميتها و و و و وداك تخربيق كامل غتفكو ليها ورقة وخاصني نكاليزيها واش بصح؟
غالي: مصدوم ) ااه اه ااه اه مشيتو بعيييد مالكم عاد كنتو مزيانين
سكينة: اخويا تمشي تتتت راني معااصبة دابا غير وريني اش ندير نفك هاد بيعة وشرية
غالي: واايلا كان هاكا غير عطيها ديك الورقة والله يعاونها
سكينة: يعني ماعنديش مناش نخاف
غالي: لاالا مهم شدي فلوسك عاد عطيها ليها
سكينة، انا اصلا ناوية نعطيها ليها فالبنكة فهمتي، تعطيني فلوسي نحطهم نعطيها ورقتها والله يعاون
غالي: صافي تا هادا نضر، مهم ماتعصبيش راك زعما يالاه جايا من العمرة … مع مع
سكينة: بلاتي نعاود نعيط ليك وصلات نوبتي،، انا نصور ليك اش مكتوب فالورقة قبل منكاليزيها ورد عليا
قطعات وقضات الغرض من بعد ما رد عليها وشدات الورقة خشاتها فصدرها ومشات عند سارة كتنفخ
سكينة: ها الورقة عندي،، عطيني فلوسي نعطيك ورقتك وفالبنكة يالاه زيدي
خرجو من تما مناكرين مشاو للبنك ودخلو كل وحدة شنو جبدات وكل وحدة كيفاش كتبان ، سكينة لي شافها يالعباية يحلف عليها من صحابات دبي وسارة بداك الدهب و الجلابة منمرة وتكحيلة كتبان كي شي ق**،ادة كلشي كيشوف فيهم وكيجدبو الناس ليهم وعاد حوارهم لي مثير للاهتمام ماعرفوهم مدابزين ولامفاهمين كل شوية كيفاش كيبانو
سكينة: زيدي اختي عطيها لفلوس تحطهم فديك الفرفارة تحسبهم وها ورقتك هااهيا غتاخديه اداابا(شافت فالموضفة) ختي بغيت نحط شي فلوس فحسابي
الموضفة: شحال؟
سكينة: ثلاتة دالمليون ونص(شافت فسارة) عطيها
حطاتهم سارة بالعنف والموضفة شداتهم مصدومة يالاه حسباتهم لقاتهم كاملين وكما لاحت سارة الفلوس حتى سكينة لاحت عليها الورقة وناضو بغاو يترايشو كن ما دخل الامن فكوهم وخرجات سارة كتسب وسكينة لداخل كتسوط وتخزر وتحلف فيها .
حطات فلوسها فالكونت وخرجات مغددة كتحلف فسارة وغير جلسات فالطموبيل عيطات لغالي كتشكي
غالي: صافي ساليتو هه
سكينة: والله لابقااات فيها ايواهانتا غتفرج
غالي: شديتي فلوسك بعدا؟
سكينة:شحااال راه غير ثلاتة دلمليون وواحد خمسالاف درهم كنت عطيتها فالاصلاح
غالي: بأسف) وا الله يعوض
سكينة: بحرقة) ااناااا غااادة دااااابا نحل محل ديالي بووحدي حححداااا زكها ، مشارياش انا كااع هاد الطموبيل.. اصلا مابغاتش كاع تكتاب ليا فين مانبدا نقلب نشري طنوبيل تخرج ليا شي حاجة من الجنب
غالي: ماتزربيش ماتزربييش جلسي دابا تكالماي حتى نجي ونشوف معاك
سكينة: منهداش حتى نلقا المحل قدامها تصبح عليا وتمسي عليا بنت لحرام نسات ايامها
غالي: وصااافي صافي تهدني انا غدا جاي
سكينة: يالاه يالاه تا نهضرو بليل
قطعات معاه المكالمة ورجعات لنفس الشارع كتقلب على المحل وتسول وتتخبا من سارة حتى طاحت فسمسار ما داها غير لواحد المحل مقابل مع سارة نيشان الباب فالباب وغير شافتو طارت بالفرحة وبدات تتختل وتتخبا لاتشوفها سارة وقررات تشد المحل وترجع ليه لغد ليه تفاهم مع مولاه
كلشي بالضد والعكس والمحل مكانش لا فالحسبان ولا فالتخطيط وداك المحل اللي لقات كون كان من ضمن مخططاتها موحال تلقاه وفموقع زوين وسبق كان فيه مشروع ديالحوايج الدراري وبقا مصلوح وفيه الجبص وعندو باب الزاج والاضواء وماتعاودليه لازليج ولااصلاح ، غير صباغة جديدة وبابي بان وتجيب علاقات تحط حوايجها وشي بلاكار صغير تستف فيه ليزاكسيسوار وهادشي زاد حمسها وزاد فرحها اكثر ومن الفرحة. مشات لدارهم تبات معاهم وتقولها لبناصر لي كان يحساب ليها غيفرح ليها ساعة غير قالتها ليه نكدوليها
بناصر: ومااالك نتي على هاد الحوانت ياك لاباس؟ والكراوات وحتى حاجة ماديالك راه لي باغيك غيجي عندك واخا ماعرفت فين تكوني
سكينة: بإحباط) سلا فييها الخدمة انا عارفة اش كنقول
بناصر: بنص عين) عرفتي شنو خاصك ديري دابانتي؟؟ نتي راك مرى مزووجااا خاصك تنوضي ديري ولادك ماشي تعيشو بحال زوافرية راه الزواج هوا الاولاد هوا العائلة ماشي نتي كتخططي فالشرق وهوا فالغرب حياتكم بحال الزوافرية،، واش دابا هادي حياة مرى مزوجة براجلها؟ شوف غير لعيالاتلي مزوجين كيبان عليهم الزواج ها لي حاملة هالي جارة الكروسة ها لي غادية للسوق تتقدا الخضرة هااللي جالسة فالدار طيب لغداوالعشا
سكينة: هالي موضفة غادية للخدمة هالي سايقة رانج هالي خارجة داخلة للبنكة
بناصر: زفر) دابا نتي غير نهضرو معاك فالمنفعة شوفي لفووووق وتعلقي فهادوك لي قرااو وراهم شادين البيروات،،، رااك وااالو،،، بلا متعلقي لفوق هادوك راه قرااو وشادين الوضيف امانتي غير الزهر ورضات للواليدين واقفة معاك كن ما داك المحل لي عطيتك النهار اللول كن مزالة كدوري
سكينة: عطيتيني المحل وكنخلصو وحتى اناشريت الدار كاااااش حتى موضفة ماتقدر ديرها ومزاااال تشووف مازال نفوت دوك الموضفات ونفوت غالي براسو
بناصر:تنهد) ضبر راسك،،، اناعييت نهضر ، الزواج ديالك راهما زواج ماوالو نوضي بعدا ديري غير واحد ها مك تشدو لك ماحدك حدانا
سكينة: واماشي غير انا لي مابغيتش راه غالي مابغااش مابغااااش
بناصر: بغضب)مكاينش مابغاش كن بغيتي تولدي كن ولدتيييي كي كيديرو لعيالات
سكينة:بانفعال)واماعندي ماندير ليه واش نشدو بزز
عيا بناصر يمعني وهي تمعني فاللخر فلتاتليها وحتى واحد مافاهم لاخر اش كيقصد منغير مونية لي واقفة ويدها على فمها حشمانة
بناصر: غادي يجي غنهضر معاه يا اما ديرو ولادكم يا اما رجعي بحالك هادا راه الهبال ماييقاش مجرجرك حتى ترشق ليه يفوت عليك الفووت
سكينة: مهم انا راه غنمشي دابا
قررات دير لي فراسها وتسنات غالي حتى رجع من مكناس وجلسات كتشكي وتبكي نفخات ليه راسو وماقدراتش تصبر وبغاات تكري داك المحل ليوم قبل غدا وماتهنات حتى خرجاتو معاها ومشا شاف المحل وعيا فيها تصبر متزربش وتخمم وتفكر وتشوف راسها واش مستعدة لمحل اخر ومسؤولياتو لاكن هي لي فراسها فراسها وخلاها على خاطرها ضبر راسها معاه
شدات المحل ووقعات العقد لكرا وعطات ثلت اشهر تسبيق وبدات تجري وتجاري عاوتاني وغالي تابعها من فاس لكازا ومن مدينة لمدينة ومن حانوت لحانوت كيهز ويحط معاها وعمرو عرف البيع والشرا حتى رجع حتى هوا كيفهم ويتشطر .
اربع ايام فسير واجي رجعو فالطريق منفوخين كل واحد فين حاط الراس تابعين سطافييت لي هازة السلعة بالطموبيل من اللور
غالي: راه زبالة دلفلوس محطوطة فهادشي واش متأكدة من شنو كديري
سكينة: حازمة راسها بشال العباية) واييه اخويا صافي براكة سخفتيني كل مرة دور تسولني،، انا باغا نشووف كمااارة ديك خيتي فاش نعلق ليها البانو قدام كمارتها نوريييها سكينة اش كتسوا
غالي: ضيعااتك راه كان خاصك تشدي كتر راك خليتي ليها تما السلعة كلها بالربح وراس المال الجديد
سكينة: خليها ضبر راسها ياك قالت ليك كضرب تمارة ايوا هانا خليتهم ليها تربح بيهم اصلا قداام (خرجات عينيها) هااا الجديد غادي نحطو ليهم جديييد ومزااال ندفع ليك الموضيلات اسيدي ديالي سينياتور دياااالي ماشي كااع بحال هاد تكاشط لي شريت طالعين
غالي: دابا ينقلو منك
سكينة: والله لا شافوهم ولا شموهم اصلا منعلقهمش تا تجي لعروسة ونجبدهم ليها
غالي:مسح على وجهو) ولاهيلا سعداااتك عندك الجهد تربحي وتخسري ماعندك غراض،، انا دابا باغي غير الارض تا حنا نديرو دار ونديرو وليدات
سكينة: واالو مالقيتيش زعما هاد الناس كلهم لي كيشريو الديور فين كيلقاو هاد الهوتات
غالي: واقلت ليييك نشريو برطمة قلتي ليا لا انا باغا فيييلا مابقاتش البرطمة معمرة ليك العين
سكينة:ربعات يديها) لاخويا بغيت الفيلا نتا راك ااانجينيووور خصك دير فيلا
غالي: شنوو؟؟ اياااه اااانجينيوووور علاش شحال يحساب ليك كيتخلص هاد لاااااانجينيووور بالسلامة؟؟ راه غييير زاطم معاك فهاد البيعة وشرية وصاافي اما انا مااعندي جهد لشي فيلا باااركة عليا برطمة وبلكريدي عااد ،، زيييدك نتي على اللولة لي كانت باغا الفيلا تاهيا،، غا لي تزوجات شي طبيب ولا انجينيور كتبان ليها فالفيلا
سكينة: ايوااخويا باش غتشري برطمة شري الارض وخليييها ماتبنيهاش دابا تاااا تنفس مالنا زربانين
غالي: لا مازربانينش غير غنبدا نخلص طريطا دالارض ونزيدها عليا الكرا تاهوا لي كاريين دابا ماماتش
سكينة: دابا لقيتي شي ارض ولا مزال بنتي ليا فكعان بحال الى لقيتي شي حاجة ومالقيتي ليها جهد
غالي: مسح وجهه كيضحك)وايييه هههه بحال الى علمك الله
سكينة: وفيين؟
غالي: الى بغيتي تشوفي فين نديك تشوفيها
سكينة: فين بعدة فيين؟
غالي: فسلا ماااشي فالرباط
سكينة: وعلاش ماشي فالرباط شداك لسلا
غالي: سلا لي مزال فيها العقار مناسب شوية بالنسبة لفيلا اما الرباط متحلمش دير فيه فيلا فهاد الوقت
سكينة: وفين فهاد سلا؟؟؟
غالي: سلا جديدة
سكينة: ههههههه تا نتا مشيتي لسلا جديدة ههه ولاهيلا واعرة هادي،، بلاتي بلاتي واحد صاحبتي تاهيا كانت تما ودابا شراو شي ارض فشي بلاصة ماعرفتش فين بلاتي نعيط نسولها فين
غالي: بلاش بلاااش غضربي لنا الطرر على والو الناس تا كيشريييو ويستاقرو عاااد كيقولوها
سكينة: الصراحة عندك الحق تاهي ماتقوليا تااا كضرب الحديد غنسد فمي وياربي نبقا ساداه تا انا تا نقضي غرض
وصلو على خير وبيخير بالماطريال وستفو كلشي بحضور بناصر طبعا لي فكل كبيرة وصغيرة خصو يحضر ولاميديهش النعاس ويغضب عليهم، البانو تعلق والمحل تجهز وفداك النهار نيت بداو الكليان يدخلو وغالي وبناصر مزال حاصلين مع السلوكة وعلى عينيهم شدات سكينة اول عروسة وخدات العربون وخرجات عندهم تمشي معاهم فرحانة
سكينة: ها اول عروسة ههه مع مع
غالي: ايوا الله يسخر (فرحان ليها)
بناصر: كيسرح عينيه فالموقع) لالا غاادي يخدم ليك هنا واقيلا حسن كااع من لهيه
سكينة: يااك قلتها لك
بناصر: ايوا الله يسخر الله يسخر ارا غير ديري الطايلة خاصك لي يقابل ليك هادشي
سكينة: مراكشية غنجيبها لهنا ونجلس انا تما
بناصر: ايوا الله يسخر
دورات وجهها وبانت ليها سارة يالاه نزلات من الطموبيل قدام حانوتها وضارت تشوف المحل لي ضاوي بداك البانو لكبير لقات سكينة قدامها واقفة كتجبد وتعوج وضحك حتى كيبانو ضراسها، وكتشالي بداك الشال لي كل شوية يزلق وكضحك بانتصار
كانت سارة غتعواج بانت فوجهها ونضرتها عينيها الخارجين ودغيا دخلات لحانوتها
بقات سكينة كضحك عاجبها الحال وغالي فهاد الاثنااء دخل للطموبيل كيهضر فتيليفون وبقا غير بناصر واقف وهاز يدو كأنه شاد شي حاجة وحداه سكينة
سكينة:شنو داكشي
بناصر: حل يدو ) هادا الزواق هوا هادا
سكينة: يااه كي داير ههه اول مرة نشوفو
بناصر:كيسرح عينيه)بلاتي بلاتي نشوف فين نديرو راه مزياان يبعد عليك السحر ويجيب ليك الناس(دورراسو كيضحك) يبقا شي داخل شي خارج عمرو يخوا(هز يدو فالسما )بجهد الله سبحانه وتعالى
مشا حطو ليها فالباب تحت العتبة فواحد الحفرة ونفض يديه وناض
بناصر: ارا شي سطيلة نخوض فيهاشوية دسيما نسدو هاد الحفرة
مشات كتجري فرحانة جابت ليه الغرض وقضا الغرض وطمر ديك الحفرة جمع وطوا
رجعات بحالها للدار وبدا غالي يريكل ليها تيليفون مع الكامرات لي عندها فالمحل ومدو ليها وقال
غالي: هانتي الاللة ها المحل قدام عينيك كلشي كيبان
سكينة: اااه ولاهيلا ايوا دير ليا هاكا حتى فالمحل دالقيسارية والمحل دبابا
غالي: حتى للصباح دابا عييت فوتيني باغي نعس
سكينة: بدلع )واجي نلعبو شي ماتش ههه
غالي: تا نفيق ديري ليا شي مساج
تسرح قدام تلفازة وقبل مايسد عينيه نعس وبدا يشخر .
صبح الحال ،، والدنيا زهات عند سكينة وسبحان الله المحل الجديد عليه واحد الاقبال رهيب لا يصدق سبحان الله،واش بصح من داك السبب لي دار ليها بناصر وفتح ليها الله بيبان الرزق بالقنطار حتى تعجبات وصدقات هي لي جالسة فيه فعوض المراكشية،، ولاكن الحق يتقال مور العصر كيبدا ينغل عندها بالناس والزحام حتى كتبدا تقطر بالعرق والماء مكتلحقش تشربو من كثرة هز حط جبد هادي وحط هادي وقيد هنا ولبس هنا لدرجة الناس بغاو يدخلو مالقاوش منين يدوزو وكيتسناو برا يخرجو الناس باش يدخلو حتى هما، ماقالت اح ولاعييت ولاسخفت بلعكس بقات كطير بحال الروبو حتى مشا غالي يجيبها لقاها واحلة وجلس كيتسنا حتى للوحدة دليل ومع الصيف الشارع عامر والمحل مروج خرجات من تما فشلانة مقسومة وجهها صفر ومكمدة تحتها لفلوس لي عاطيينها القوة حتى وصلات للدار وشدات فالحيط طلعات بزز مع الدروج وغالي وراها راشقة ليه عاد جاتو على الدلع والنشاط
غالي: اجي اجي
سكينة:هزات يديها فشلانة) مادويييييش معايا انا مفكوووكة كنتلسسسق
غالي: صافي صافي انانشعل ليك الشوفو دخلي دوشي
سكينة: غندوش وناكل ونعس
غالي: يالاه غير سيري سيري
مشات نيشان للبيت هزات حوايجها ودخلات تحت الرشاشة دارت الصابون وماجات فين تحل عينيها حتى لقاتو قدامها عريان كيفرنس
غالي: غاندير ليك غير مساج لضهرك هههه
عيانة ومقسومة وباغا غير تنعس ولاكن كن يخرج ليها بشي بلان فيه الخروج تحل عينيها ويرجعو فيها عشرة ولاكن حيت عارفة مكاين والو والنهار سالا ومابقا مايدار داكشي علاش حسات بالكسل والنعاس، وديك الليلة نعسات نقية ولاكن فيقاتها البولة لقات راسها فزكات الفراش وحوايجها وفاقت مكسورة شدات وجهها وبغات تموت بالفقصة وبدات تبدل تلوح فطواليط ورجعات للفراش كتجر وتبكي حتى حل غالي عينيه وناض كيشوف اش واقع مافهم والو .. كيشوف الفراس كيتجر وهي كتبكي معصبة وبدا يحك راسو ساكت فهم اش كاين لاكن ماهضر مانطق بقا ساد فمو حتى رمات فراش جديد عاوتاني وبدا يلمط من جيهتو وطفات الضو وتنفضات فوق الفراش مففوصة عطاتو بالضهر حتى حسات بيه عنقها وبدا يحك ليها بحنان وهوا ناعس عاد نعسات ، ومكانتش هادي اول مرة مع الاسف بل رجع كيتعود على بحال دوك المواقف المتكررة من حين لآخر بدون تعليق او حرف ، وشي مرات كيتقاس وينوض حتى هوا يبدل ويرجع ينعس فصمت وكيشوف الحالة لي كتولي فيها فاش كتفزك الفراش ناعسة وكيفاش كتنهار ومكتلقا لراسها جهد وكتنوض فنصاص الليل مكرفسة ومهرسة بالنعاس وترجع تنعس مريضة .
لاكن بالرغم من هاد المشاكل النفسية الا انها كتنسى كلشي بالخدمة وكتاخدها الحياة وياخدها الشغل وخصوصا مع ثلاثة ديال المشاريع رجعات كدور بيناتهم مكتساليش .
كان غالي بدوره مشطون مع الارض او بالاحرى كدير فيه سكينة الحماس والنفس وكيبدا حتى هوا يخطط واخا ماعندوش باش لاكن رجع كيناقش معاها طموحات جديدة ولات كتبان ليه مكانش كاع كيهضر عليها من قبل ومن قوة سير واجي وطلع وهبط مع سكينة قاسو الفيس ديال الخدمة الحرة وبدا يتحمس ويقتارح عليها يكونو شركة هوا وياها فشي مشروع
غالي: فالسيارة) كنهضر معاك بصح اش بان ليك
سكينة: حتى انا كنهضر معاك بصح فاش بغيتي نتشاركو
غالي: داكشي ديال تنكاف ديالك
سكينة: هههه ماعندك ماتشرك معايا دابا ساليت
غالي: نديرو بروجي ااخر
سكينة:صغرات عينيها) البروجي لي غنديرو هوا الدار دابا ،، غنمشيو نشوفو هاد الارض هادي والااااا ايييييلاااا عجباتني عندي ليك واحد الاقتراح
غالي: باستغراب) شنوهوا؟
سكينة: غنهزو رحيلنا ونمشيو نسكنو فالدار ديالي حدا البقييعة وبنيها على خاطرك،، هانا هنيتك من لكرا
غالي: تنور وجهه) ااا!!! اييه مزياانة كاع
سكينة: ايوا غير طلقنا نديرو دارنا انا راه ولاو يعيطو ليا لعاكرة
غالي: لهضرة لخاوية
سكينة: ايوا بااك وبا فرعو ليا راسي بلا ناس لي خاشيين نيفهم فالمهبل ديالي
غالي: هانتي قلتيها،، كل واحد يديها فالمهبل ديالو ياك مامشاركينو معاك ؟
سكينة: وصافي دابا شميت ريحة المهابل،،فين هاد البقعة راه وصلنا
غالي: ضرب الدورة) هااااااهيااا
وقف قدام منطقة خاوية فيهاالاراضي ومقابلة مع العمارات نزلات كتشوف، فالاول ماقتانعاتش بيها جاتها الدنيا خاوية لاكن ملي بدا يقنع فيها شوية بشوية عاد بدات ترسم مستقبل فمخيلتها وقبلات عليها وبدات تصور فالمكان ورجعو بحالهم من بعد ما قتانعات وجا الدور على باه ونسيبو حتى هما يشاركهم الخبر؛ سيفطها لسي رشيد غير فتصاور اما بناصر من قوة الحماس بغا يمشي يشوف
بعينيه تقول هوا لي غيشري وفاش سمع بتجزئة الفيلات كملات الباهية تقول قاليه ربحتي فالقرعة ، مكانت لاعلى البال ولا على الخاطر وكان كيشجع غالي على الشرا لاكن عمرو توقع تكون عندو فكرة البني ولا الخاطر ليه
هزو داه وراها ليه ومن تما وبناصر كيزيد ليه فالتشجيع ويسهل البني فعينيه حتى قتانع غالي وجات الساعة لي قرر يشري فيها وبدا كيقلب كي يدير ليها واخا بلكريدي صعيب يشري بقعة ويزيد حتى البني، حسبها لقاتو مامسلكاهش وجلس هوا وسكينة فالقهوى كيتناقشو
غالي: بفففف واش غير اجي ودير لفيلا
سكينة: مهمومة) تفووو حتى علقنا آمال(فكرة) ااجي،، بيع الطموبيل وزيدها على على لكريدي لي غتهز
غالي: حاط الورقةوستيلوعامرة حساب) وا واخا تبيعي كلوتك راه ضرااابت ليها الحساب
سكينة: هزات كتفها) وصااافي تا نتا راهم كيبنيو غير بالشيكات ولكريديات ويهزو من ديبوات بلكريدي، حساب ليك كلشي كيخلص كاش طزز،، راه كلشي بشيكات
غالي: اسييري باغا تسيفطيني للحبس
سكينة: نتا لي غتسيفطني للقبور،، عرفتي شنو ،، بيع الطموبيل وهز كريدي وشري الارض صافي وتركن ياك الدار موجودة مغنخلصو كرا راها غير خاوية
غالي: وا كن بعتيها وتشاركنا انا وياك ونبنيوها علاش غنبنيها بووحدي
سكينة: وكتبها فسميتي انا وياك
غالي: اايه علاش لا الى درنا نص بالنص دخلي بسميتك
سكينة: رجعات اللور) لالا غير خلي ليا دويرتي زايدة فيا ضلعة كنحس بيها بحال با مسخنة ليا كتافي
غالي: اهااه وهادي لي دابا كنتقاتلو عليها ماشي دارنا بجوج
سكينة: كن كان عندي باش ندخل معاك بالنص كن دخلت بلا منبعي الدار ولاكن ماعنديش باش ومنقدرش نبيعها ، نصبر معاك تا تبني
غالي: وا نتي تعرفي
سكت وحتى هي سكتات كل واحد فين كيخمم وفكرة بيع الدار وتقول واش كدور عندها فالراس، اما غالي عطا رأيو ومن تما ماعاود جبد الموضوع .
بدا كيفكر يبيع طموبيل وحتى سكينة بدات تقلب ليه على الشاري وجابت ليه الناس لاكن كان لقا الشاري ودار معاه ومشا باع الطموبيل ورجع للدار على رجليه، وما إن قاليها بعت الطموبيل حتى تصدمات وبدات كتبكي عليها وبقات فيها قداش وضرها قلبها ولقات حتى غالي قلبو طاااايب هوا لي مولفها كتر منها جاتو قاصحة واخا عيا يخبي لاكن كانت باينة فعينيه ، لاكن هادي هي الحياة،، ناس كتمشي ناس كتجي طموبيل تمشي طموبيل تجي وهي غادية والحياة تستمر وحتى الدار راه مهمة وشطناتهم على كوية الطموبيل وفرحو بالارض حتى هي وبدات كترسم ليهم حياة جديدة ومستقبل جديد وزوين خصو غير الصبر
بالصبر والعمل والتعاون تقدر تحقق نجاحات كانت كتبان كبيرة ومستحيلة ، رحلو للدار الجديدة وبدات الحياة الجديدة والزيار وبناء المستقبل عند غالي وسكينة وكانت مرحلة مرهقة ليهم بجوج خصوصا بلاطموبيل الوضع تبدل وصعاب
قبل نهاية 2019 كانت سكينة جتاهدات وعطات لاطاك مزيان وضربات يدها فلعراسات والبيع والشرا وكان عام زين مزوهر واخا عياو يرشو ويسحرو بقا الاقبال والوفرة فمحلاتها حتى وصل راس العام وجمعات الحساب ولقات راسها جمعات لي جمعات وبدات تفكر فشنو دير عاوتاني؟؟ واش تشري شي طموبيل لي فعلا واقفين عليها ومحتاجينها ولا تفكر ف شي مدخول اخر ولا شنو دير؟ جلسات فواحد المحلبة كتفطر والشتا خيط من السما والقب ديال جاكيط على راسها وعيطات لغالي كضحك
سكينة: فين البوكوص
غالي: هااانا منشور كنتسنا فطاكسي
سكينة: واجي اجي عندي ليك واحد الخبر
غالي: الله يسمعنا خبار الخير
سكينة: انا غنمشي للدار تاتجي،، غنضربها بواحد تدويشة طايبة فهاد الشتا على بيدمن تجي ،، اه جيب معاك شوية دالكبدة مشوية مشهياااها
غالي: وراني كنقطر وغنزيد نتشوجر قدام الكزار حتى يشويها
سكينة: والي بغيتي يالاه اجي اجي
قطعات معاه ومشات بحالها دوشات ودخلات فواحد الكاشة كتصوني فتيليفون
سكينة: اختي،،، سديتو ولا باقي ؟ باقي الحال تالديك العشرة القيسارية مزال مكتخوا ،،، مشات ماما؟؟،،، يالاه يالاه ردي البال(تيليفون كيصوني) قطعي شي حد كيعيط ،، الو مراكشية هانيا
مراكشية: هاديك لي خليتي هنا بغات تكشيطة الموف مشات وعاودات جات عندها راني شكيت فيها عروسة
سكينة: ماتعطيهاش قوليها دوك القوالب راه طلعولينا ففف كرنا
مراكشية: صافي
سكينة: يالاه تهلاي
مع قطعات مع دخل غالي بجاكيط فازكة حطها فالباب ومشا حط ليها الكفتة قدامها
غالي: هاالكفتة الاللة
سكينة: ههه جبتييها قلت ليك الكبدة
غالي: تما حتى لكبدة
سكينة: ايواشوووكرا هههه
غالي: عوج كتافو) وااااااميمكنش،،، تماااارة هاد طاكسيات المرض صافي
سكينة: اجي اجي نقوليك
غالي: ماتقولي لي منقوليك حتى نبدل عليا ونصلي وناكل عاد غيتحلو ودنيا
خلاها ومشا دار الروتين ديالو بينما سخنات عاوتاني داك الشوا وداز عندها عمر براد اتاي ومشا صلى وجلسو ياكلو عاد بدات
سكينة: قول ليا الزين شحال باقي ليك من داك لكريدي لي هزيتي على الارض
غالي: انا درت كريدي ارض وبني ولاكن مايبني ليا تاا طبقة
سكينة: شحاال كااع
غالي: شي عشرين وصافي
سكينة: وشحال يخصك باش تكمل
غالي: دور راسو كيضحك) بفففف
سكينة: ربعين مليون تبني ليك
غالي: كيحسب فدماغو) لااالا اشمن ربعين مليون،، يالاه دير لا كاف وطبقة والصور هه
سكينة: ماشي مشكل شوية بشوية
غالي: بلا فينيسو وداك دالشيكي وكدا هادي يالاه دير ليك فين تخشا
سكينة: واصافي انانعطيك باش تبدا ،، عشرين عندك ونزيدك عشرين وبدا البني (قربات حداه) مااالنا حنا على فييييلا نسكنو فيها بووحدنا ،،، اجي نديرو لاكاف وديك الطبقة واخا ماتكونش مفييينيا مهم مقاادا عادية ،،، داك لاكاف اسيدي بدا بيه هوا الاول ياك صلحو ودير ليه دخلة بوحدو ونديرو فيه شي روض يكون زويين ونتا تبارك الله قاااري تبدا دير المراجعات السبت والاحد وكريه بليل لاساتذة تا هما للمراجعات وهوا يكمل ليك البني وهاحنا ساكنين فهاد الدار مهنييين اش قلتي ؟ ياك بغيتي نشركو انا وياك فمشروع ايوا هاالمشروع،، لقليييلا كاع يدخل مليون ونص فالشهر .. شكون عطاها ليك وشكون بحالك تزادك مليوون ونص على صاليرك همم
بدات تملي عليه فالبلانات وتشجعو وبقات عليه نتعاونو وانا معاك واناهادي حتى قنعاتو وبدا يتخايل حتى هوا ورجع كيقول ليهاعندك الحق عندك الصح فكرة زوينة وصبح الصباح هوا وياها فالبنك دوزات ليه الفلوس من الحماس والفرحة عيط لباه كيجري جابو من مكناس باش يوقف ليه على الشغل لاكن كانت الشتا وكانو كيتسناو حتى تفوت باش يبداو الحفير ودوز هاد الفترة فطلع وهبط على البلان والرخصة والبلان لي جاب كتقوليه سكينة بدل هنا وبدل لهيه حتى كينوضوها على البلان وكدور جهة باه لي كيفهمها ويمشي معاها فالخط ويدخل بيناتهم بالحل بما انها حرفتو عاد قتانعو بالبلان وتافقو عليه بشروطها وشروطو وكل واحد اش باغي هالي باغي البيرو هالي باغادريسينك ما تفاكو حتى كانو غيضاربو قدام السي رشيد
السي رشيد: صافي صافي نعلوالشيطان راه كلشي عندو الحل
غالي: واشرح ليها بلخوشيبات قوليها ممنوع تخرج كتر من هاد القياس قانوونيا
سكينة: ماشي ممنووووع انا عااارفة اش كنقووول اناسولت الناااااس وقالوليا تقدر واخا ماشي قانووووني مية فالمية غير دور مع المقدم غيسد فمو
غالي: خرج عينيه) اياااااه نبدا نرشي فبنادم هاي هاي على دور مع المقدم حتى وليتي تعرفي المقدم
السي رشيد رجع اللور شد واحد المخدة كيضحك وهما عطيني نعطيك قدامو
سكينة: واسيير سير ضرب دورة تما شوفش شحال من واحد مخرج الباب قدو قداش فالجنب بحال المحل من الصور ديال برا وهوا داخل فالارض حتى لاكاف وراابحين ليسباص ونتا باغي تبدا الهبطة من الحيط ديال الدار تاكل من الدار النص ولاكاف النص
غالي:كيشالي بالورقة) واممنوووووع منووع واش كتفهمي العربية ولا ل اراه ميعطيونيش الرخصة على هاد البلان الزين باش ندير انا دخلة للكراج من الصور لي على الشارع وعندك الحق تحل باب منين دخل الطموبيل وتزييييد لدااخل عااد تبدا هابط لاكاف راه بلان ديال دار ماشي مدرسة البروجي لي نتي كضربي عليه هما كاااع مكيهمهم. كيهمهم بلان السكنة
سكينة: وادير ليهم بلانلي بغاو ونديرو حنا لي بغينا ياالاه
غالي: ايوا (ربع يديه) ايوا ملي يجي الشيخ يقول ليا شكتخور اش نقوليه
سكينة: عطي للمقدم الف درهم يتعاون معاك فلي بغيتي غير تيق بيا راني سولت هاااكا دالناس راه هادا هوا البني كوولو قوالب سول باك
السي رشيد غير جالس وكيضحك ويساوي معاهم اما غالي من النوع لي عزيز عليه يصفي ويشرب ومايحل عليه حتى واحد فمو ومايحني الراس لحتى واحد عكس سكينة المخلوضة لي مكتنازلش على شنو بغات ومولفة بزيكزاك عمرها مشات نيشان وعلى قبل حاجتها دير المستحيل، بقاوهاكاك حتى فراوها وناض غالي بدا الحفير ومن الحفير بدات الضالة اللولة وهي تابعاه كتسول فين وصل فين كمل حتى قاليها بدا فالطبقة الارضية لي فوق لاكاف وناضت بدات كل شوية غادية طل تشوف واش بصح بدا الدخلة دلاكاف كماقالت ليه ولا سواها معاها وصافي ولقاتو مافتحش الارض من الباب الكبر لي على الشاريع وناضو فيها الجنون سليمانية ومع كان هوا فالخدمة وغير باه لي حاضي الخدامة وهي دايزة غير بتخبية مشات مكشكشة كتصوني ليه وغير جاوبها طلو عليه جنونها وكتغوت للي خلقها
سكينة: قلتي غتحاااال البااااااب من الدخلة دلكاراج علااااااااش مافتحتيش الارض انااااا شفت بعييييني الارض مامحفورااااااااش مكايناش الهبطة من الجردة دبرااااااا اااااجي داااابا ولا والله تا تلقاني تما قدام ديك الخدمة ندير ليك فضييييحة
غالي:بغضب) ونتي شداااك لتما عند الرجال كطلي قلتيهااليااا؟؟؟ فين كطوطحي من قنت لقنت هادي هي انا فالحانوت شداااك لعندهم
سكينة: بغضب كترعد) واااخا ،،، درتي لي فراسك ،، واخا انا غنورييك والله تا نوريك تاتجي خليك انا غنوريك
وصلو الصهد ومافيه لي يتشاد معاها ولاتغضب عليه وناض خرج من الخدمة ومشا نيشان عند باه هاز تيليفون ودازت ليه لابيل بلا ماينتابه وسمعاتو كيهضر معصب
غالي: صافي حفر ليها فين بغات وداك المقدم الى جا لوح ليه واحد خمس مية درهم يقلب الدورة … والى مقنعش عاد زيدو
السي رشيد: انا كن كنت نعرف الناس هنا كون راني درت ليك شحال من حاجة
غالي: صافي حفر ليها تسكتنا مقادش على تزنزينها عيييت منشرح عييت منهضر والو السيدة طرشة مكتفهمش
السي رشيد: هي دابا علاش لسقات فهاد البلان ؟
غالي: باغا دير شي حاجة وباغا الدخلة بحال الحانوت ماعرفتش اناواش كنبني دار ولا قيسارية
السي رشيد: صافي الى كانت عوالة دير المشروع لتحت راه مزيان ليها تبدا الدروج من هنا ولفوق وغتجي لهنا تبني حيط وتسقفو وهانتا عزلتي لكراج مع لاكاف نيشان
غالي: راه هادشي فيه المشاكل ابا واش غنبقا نساوي مع بوزبال
ايوا هي غير سمعات ديك بوزبال وشعلات فيها النار وبقا فيها الحال وبدات كتبكي وندمات على ايامها ونهار فكرات تعاونو وجلسات كتسناه عرفاتو غيجي للدار وناضت جمعات ليه حوايجو كلهم فباليزة وحطاتهم ليه قدام الباب وغير دخل هجمات عليه بحال الكلب المسعورفالباب كتغوت ودفعو لبرا ودفع ليه حوايجو
سكينة: اناااابووزبااااال هااا انا بوزبااال يابوزبال ديال بصح دايرة معاك عقلي وجالسة كنبني معاك فالمستقبل وكنضحي معاك ونتا ورا ضهري جااالس كتسب فيا وحاسبني لااااا شييء
غالي:مصدوم) شنو كتقولي اش كتخربقي واش مريضة فراسك
سكينة:لاحت ليه حوايجو) خرج عليا،،، سير فحالك سير الله يعطيك موصيييبة دااابا غتمشي للبنكة تجيب ليا فلوسي يالاه سير تق٠٠د عليا سير عند لي ماشي بوزبال اما انا بزااااف عليك بزااااف عليك اناااا
زدحات الباب ومشات جلسات كترعد بالفقصة وعقلها كيقول ليها رتاكبي فيه شي جريمة ماتخليهش يمشي هاكاك خفيف، لاكن لحسن حضها عيطات لمها مشات عندها للدار كتجري وبدات سكينة كتجدب عليها وتبكي وتغوت وتشكي ومونية بحال عادتها كتجلس مصدومة فيها ومربعة يديها مكتعرفها امتى وفوقاش وكيفاش وكتعرف اسرار سكينة غير فالخصام والدباز والمشاكيل
مونية: هيييه!!! عطيتييه عشرين مليون ماقلتيهاش لينا ناري ويسيق ليك باك لخبار
سكينة: كضرب يدها) واعشرييين مليون الصيف جااااي نعوضها واش ديك عشرين مليون هي لي غتغنيني ولا تقاد لياعقلي راااه هواااااولد لحراااام لعب بيا خلاني كنشوفو بحال الملااااك بحال الى مابحالو حد وجالسة كنخطط معاه حتى عقلي تبرمج كااامل عليه أثر عليا وااا اثر علياااوعلى عقلي رجع كيبان ليا حسن من با وكنشوف حياتي كاملة فيها هوا واي حاجة معاه هوا وكلشي بيه هوا تسحرت تسحرت وهواولد لحراام غير كيمثل عليا وانا متيقاااه متيقاااه تا كن قالي تبرعي ليا بكلوتك نتبرع بيها ،،، علااااااش حيت كنشوفو بحال الملااااك وكنقول اناااا لي بنت لحرام طيحو ربي فيا باش يزيد يختابرو ويختابر صبرو وصابر معايا. ساعا اناااا لي ضبعااااا(تيليفون كيصوني) بابا … (مسحات وجهها)الو بابا
بناصر: لاباس كلشي لاباس
سكينة: كتنخصص) لاباس
بناص: مالك ياك لاباس؟ مالك مع غالي
سكينة: جا شكا عليك
بناصر: نعلي الشيطان نعلوالشيطان راه غير لعيين،، لعين ضرباتكم
سكينة: كاتمة الغيض) بلاتي شوية ونعيط ليك راه معايا ماما
بناصر:انا جاي من الخدمة غندوز عليك
قطعات معاه وبدات تاكل جنابها
سكينة: ول دلحراام مشا قاليه دابا راه رمات ليا حوايجي باش يبان ملاك وانا شيطان ويزيييد يغررق ليا الوتد مع با
مونية: ها باك كيصوني ليا
خلاتها سكينة ومشات لواحد لبيت صونات لغالي لاكن بدون رد وبدات طير وتنزل ملي ماوصلاتوش وبردات جنونها ورجعات عند مونية كتنهج
سكينة: مابغاش يجاوب
مونية: هضر معايا باك كيسول اش واقع قلت ليه شنو قالك قالي راه عيط ليه قاليه راه تناقشت انا وسكينة وماشي شي حاااجة وخليتها معصبة ومادرت ليها والو الى كان ممكن اجي ،، تجي نتا تهضر معاها حسن اما انا مغتسمعش مني
جا بناصر لي كيعرف ليها بلا مقدمات وبلا مؤخرات وغير حضر قطعات الحس ولات خايفة يعرف غير بقضية الفلوس لي عطاتو وماتشاوراتش كاع معاه كأنه مكاينش، قطعات الحس ماعرفات باش دافع على راسها واخا بناصر مقال والو بغا يسلك معاها الجرة ونصحها شوية وخرج خلاها هي وموينة جالسين ومشا يشوف البني فين وصل حتى وصلات العشية ورجعو كاملين للدار بالسي رشيد وبناصر وغالي ولقاو غير مونية كتوجد العشا اما سكينة مكايناش ، دخلو كأن شيئا لم يكن كيهضرو عادي وتوضاو وصلاو وجلسو كيشربو اتاي فالصالون بثلاتة
بناصر: بغير رضى) علااش حتى بديتي طلع القوالب عاد رجعتي حفرتي
مسح غالي يديه كيضحك ويحك لحيتو وكيهضر ويقيس فاش كيبغي يجبد سكينة لايمشي يخرج شي كلمة ولا يوصل ليه المسج غالط وهواعارف بناصر كيشعل وسكينة كتأثر منو وكلمة جوج ينوض يطليها وترجع هي عندو طليه وتنكدها عليه
غالي: واا شغنقولك اعمي نسينا (شاف فباه ) كنا ناويين نبداوه مع الحفير (تنهد ) اشغديير
السي رشيد : لااالا سكينة لي قالت ليك من داك الباب نخلاق نضنا حفرناه قالك باغا تحل تما منجم ديال الذهب تبدا تصدرو للبرتغال هههخخخ
هوا كيهضر وغالي كيضحك بزز ويشوف فيه بنص عين اما بناصر حتى هوا كيضحك وعرف بلانات سكينة واخا فإطار المزح فهم بلي اي حاجة سبحان الله كتكون غادية عوجة او فيها قوة المعاودة كتكون من بلانات سكينة العوجة هادي حتى هي متخفاش عليه وماشي جديدة عليه،، ضاروري من العصا فالرويضة
بناصر: مالقا ميقول) ايواا شغدير معندك مدير
السي رشيد: قلنا نديرو ليها اش بغات لا تمشي تجي تحمدش لينا تما هه
غالي: رااه شعلت ليك الشوفو ابا سير دوش سير
السي رشيد كان غير كيضحك معارفش سكينة فيها نيت دوك المواصفات اما بناصر لي عارفها حساب ليه بصح تحمدشات ليهم وراها دايرة فيهم مابغات
اما غالي دغيا نوضو داه للدوش ويالاه غيدخل بدا يتمتم بخفوت ويعاتبو
غالي: شكاتقول اباا اشكتقول راه غيحسابو بصح يمشي يلسق فيها
السي رشيد: غير كنضحكو
غاالي: غيحساب ليه بصح اصاحبي راك معارف لاسكينة ولاباها(كيدور راسوك) دخل دخل دوش دخل
دخلو ومونية كتسمع جاب ليها الضحك ، امابناصر دفع صدرو وتضخم وجبد تيليفون عيط ليها بصرامة
بناصر: فييينك
سكينة: فالحانوت
بناصر: شمازالة كديري تا لهاد الوقت الضياف عندك فالدار ونتي مزالة فالزتقة… يالاه طلق راسك اجي بحالك
قطع وتجبد كيتفرج فتلفازة حتى دازو الاخبار ونقلو ليهم اخبار الشينوا وشنو طاري فيها وتفوه بناصر كيتفرج وقال
بناصر: قالك شي فيروس ما فيروس راه كينتاشر عندهم تما الله يستر
غالي: واش كتيق اعمي بهادشي هههه راه غيير كيبغيو يخلعو الناس باش يبنيو لعالم القوة ديالهم وصافي
بناصر:واقالك الناس كطيح فالزنقة داكشي كيتشم فالهوا
غالي:امكاين واالومن داكشي غير التمثيل،،، اثرو عليك الافلام ولا
بناصر : لاراه بصح سمع مني اش كنقوليك،، مكاين لا افلام لا تمثيل راه تماشي حاجة كطرا داكشي غادي وكيزيد قالك موميييت ،، غير مزال مابان اشنو هوا
غالي: الله يهديك اعمي هههه راه مكاين والو الشينوا والاوهام ،، اصلا من عندك الصين اليابان كاع دوك الجوايه شبعاانين فيروسات ،،من داك الصاروخ دلهيرو شيما وهما كيعانيو مع الطقس ومع الفايروسات ومزاال لدابا كيعانيو من كثرة الامراض والعدوا،، علاش ديما كتلقاهم لابسين لبافيط فالزنقة ،، راه بسبب الفايروسات لي خلفاتها ليهم الحرب ،،،،هادشي ماشي جديد وكيتعايشو معاه عادي
شكون داها فشي اخبار ، كل واحد وهمو وكل واحد باش عامر راسو ، دخلات سكينة لقاتهم جالسين وتبسمات حشمانة ومشات نيشان للكوزينة لقات مونية قضات الغرض ووجدات العشا وبدات تعاود ليها ،،حطو العشا وكلشي تعشا وناض بناصر هوا ومونية زادو مع الطريق من بعدما نصح سكينة غير بالمعنى وخلاهم الراس فالراس والسي رشيد ناعس فالصالون شخيرو واصل حتى لعندهم بالعيا والارهاق ، اما غالي ماهضر مانطق ماضار جيهتها ، لبس بيجامتو ومشا لبلاصتو نعس وتكمش بقات هي بقات جالسة كتشوف فيه بنص عين وبقا فيها وندمات على داكشي لي دارت ومامولفينش ينعسو منكدين ولا شي واحد فيهم هاز فخاطرو،ماقدراتش تنعس من شدة تأنيب الضمير وناضت عندو حيدات عليه الغطا كما موالفة دير فاش يغضب ودخلات تخشات حداه وتكمشات قاطعة الحس، عنقها وسكت لاكن انفاجرات بالبكا والدرايم وبدات تنخصص واخا عيا يقوليها صافي الله يسامح لاكن تخنقات وبغات تموت وبداو الحساب وبدا التسامح غير بالخاطر
غالي: واش نتي كضني انا نقول عليك بوزبال؟؟ دابا نتي شحال ونتي معايا نوغمالمو تكوني صافي حفضتيني
سكينة: كتنخصص ) حلف ما قلتيها عليا
غالي: والله ماعليك ، انا معصب من دوك السمسارية لي كل مرة يجيو ينبشو ويقلبو اشنو يديو،، واش بعقلك دابا غنقوليك عليك بوزبال؟؟
سكينة: مسحات نيفها)انا سمعتك حسابلي عليا
غالي:وكيفاش حتى سمعتي وكيفاش عرفتي؟؟!!
سكينة: لابيل دازت ليك وسمعت الهضرة
غالي:هبط راسو ) لا حولة ولا قوة الا بالله،،، انا مشيت كنجري غيير باش ندير ليك اش بغيتي وماخصني صدع ماخصني حريق فالراس
سكينة:(عنقاتو) سمح ليا صافي(باست ليه راسو) انا ماعرفت مالي هاكا ماعرفت مالي علااااش انا هاكا علاش؟؟؟ واش انا مامزياناش:؛
غالي: عنقها) مزياانة نقصي شوية من العصبية …. راك عزيييزة عليا وكنبغييك وتبارك الله ذكية وكتعجبيييني فشي حوايج ولاكن هاد الاعصاب بزااف ومكاين لااش اصلا… واش انا كنتعصب عليك؟
سكينة: لا
غالي: ايواهضري معايا كما كنهضر معاك مكاينش علاش تعصبي وسوليني عادي غنجاوبك،،، لمن انا كندير هادشي كااامل ؟؟ كنحاول ندير مستقبل لي يرضيك ويرضيني ويجيو وليدات يلقاو فين ويلقاو حنا بعقلنا وبخاطرنا .. اما العصبية والغضب والغوات راه غير كيزيدو يرونو الامور
سكينة: سمحليا منبقاش نعاود انا ماشي بخاطري وتعصبت فاش مالقيتش الحفرة وزدت كملت فاش سمعت ديك الكلمة تجمعو عليا ماعقلتش على راسي كلشي تخربق ليا
غالي: عنقها) صافي ماشي مشكل انا اصلا ماديتش عليك داكشي علاش عيطت لباك يهضر معاك.. وما قلت ليه وااالو قلت ليه تعصبات وصافي
سكينة: كتنخصص) فين هما حوايجك؟
غالي: حطيتهم فلكوفر د با حتى للصباح ونجيبهم
صفات الخواطر وهدات النفوس ورجعات المياه لمجاريها لاكن تمشي الرياح بمالا تشتهي السفن
بدات الاخبار كتنتاشر كتر ومن الضحك والسخرية للتصديق والخوف من لي جاي. الموضوع اصبح جدي والوضع لا يبشر بالخير، وكملات الباهية فاش تعلن فالاخبار باقفال صالات الرياضة والقاعات دالحفلات والطرقات بعد ايام قليلة ، وقفات سكينة مصدومة فداك الليل والاخبار قدامها وشافت فغالي وقالت
سكينة: اوييلي هادشي بصح
غالي: راه فالطاليان دايرين الحجر واش مافراسكش
سكينة:اوييلي؟؟ والعراسات والبني
غالي:ناض جلس) غنعيط لداك المعلم يجي يطلق راسو غداالصباح يسربي السلعة لي تما غتروون دابا فالطريق وفالمطارات
سكينة: واا انا لي عندي لعراسات اش ندير غيسدو لينا اويييلي(بد اتيليفونها كيصوني) ها هي غتبدا دابا(فتحات الخط) الو سلام عليكم
لعروسة:الوختي سكينة سمعتي الاخبار
سكينة: اه اختي غير الله يستر
العروسة: ختي شوفي انا مابقيتش غندير فداك التاريخ غدا غندير العرس راجلي قاليا نمشيو قبل مايديرو الحجر حتى علينا وراني غنعيط دابا لمول لقاعة وتريتور ندوز العرس وربي كبير
سكينة: غدا راه عندي عرس خدامة ماعندي كي ندير
العروسة: شوفي كي ديري ليا الله يرحم لواليدين اختي راه انا ضايعة شوفي من حالي
سكينة: هانتي عيطي بعدا للخرين ونعاود نهضرو انا نشوف كي ندير(تيليفون تاني كيصوني) الو سلام
ام لعروسة: سلام سكينة انا مامات نوال لعروسة لي ديال سطاش فشهر شوف ابنتي غدا ان شاء الله غدير عرسها راكي شفتي الاخبار اش طاري دابا وحنا دافعين لعرابن
سكينة: غداا؟؟
ام لعروسة: شوفي ابنتي غاسلكي راه ربي لي عالم سلكي سلكي(تيليفون كيصوني) بلاتي نعاود نعيط ليك
المراكشية: الوسكينة سمعتي الاخبار قالك غيسدو
سكينة: غتكحااال علينا
المراكشية: تيليفوني ماسكتش قالك بغاو عرابنهم
سكينة: بغضب) منين غيجيني انا هاد لعربون انا شطططبت لكونط وعندي لبني راسي كيتفركع مكاينش لعربون يأجلوه ولا ينكفو فديورهم
مراكشية: بلاتي بلاتي تيليفون كيصوني
قطعات و ماجات فين تنفس حتى دخل شيخها زربان ناوي يمشي وتيليفون كيصوني ماسكتش والسي رشيد خاف يخرج شي قرار اخر يشدوه تما ولا تعمر الطريق وقال ارا نمشي دابا قبل منوحل فالطريق و اجا ماوصلني
ترونات القضية ومابقا نضام وكلشي تخربق وتيليفونات ماسكتوش ، كانت ناوية تكا شوية ساعا ناضت هي وغالي شدو طاكسي حطو قدام الفيلا لي كيبني وهي كملات الطريق، كفض غالي كمامو وبدا يهز فالياجور لي جاب ويهبط لداك لاكاف ومضوي غير بتيليفون خوفا من اي قرار مفاجأ وتبقا ليه سلعتو مشتتة على برا ، اما سكينة وصلات لحانوتها الجديد وحلاتو ويالاه حطات رجلها بداو الناس كيدخلو مخلوعين ها لي كيأجل هالي باغي يعرس قبل الحجر وراسها تنفخ وتيليفون غيتفركع والقاعات كلشي عمر وكلشي بغايدير العرس ومابقات حتى قاعة خاوية والاثمنة عاد ما تزادو من تغيير التواريخ ورجعو غيديرو جوج عراسات فالنهار فكل قاعة ، اي عرس بالنهار ويسالي مع السبعة وعرس باللي من تسعود ، رجعات غتخدم مع لي سبقو وقربو التواريخ فالقاعات وبدات تعيط لهادي وهادا وتشد غالنكافات ودراري الهزة وطلب هنا وطلب لهيه وبلاصة عرس غترجع تخدم ربعة الصباح وربعة بالليل فنهارواحد وهادشي بووحدها بلا المراكشية كطيح وتنوض تاهي وكيقلبو على نكافات كتار ، وحلات وعيطات لباها عاودات ليه اش طاري ليها وناض هز مونية داها للمراكشية تعاونها و جاب رانيا لسكينة للمحل توقف معاها فديك المحنة ولحق على غالي لقاه مقاتل كيوصل فالياجور ، كانت ليلة كحلة زحلة بقات حاصلة فالمحل كتفاهم مع الناس. شي كتقلب ليه فين يعرس وشي بالفقصة دار بناقص غيعرس فدارو
ليلة واشمن ليلة وماشي غثر عليها هي وكان فهاد الاثناء تريتور كتااار منها بدا يتقدا باش ما كان فداك الليل ياربي غير توصلو السلعة يبداالخدمة لي يسربي لغد لييه ، تهججات القضية وباتو الناس بلا نعاس خدامين ، من بعد ما خوا المحل بدات هي ورانيا يجمعو الحوايجو ويستفو ويرقموهم وقوا الضغط عليهم وعلى المصبنة لي بزز باش شدات الحوايج تصبنهم فالليل وبداو يخرجو الماطيريال ويعلقو عليه النوامر والاسامي دالقاعات والتوقيت ، باتو ليل كلو فالمحل حتى رجع غالي وبناصر داوهم دايخين للدار مع الربعة دالصباح
بناصر: نعسي شوية الصباح غادي يقوا عليك الضغط كتااار والناس مضغوطين غير سلكي وصافي
سكينة: كتصوني على المراكشية) غنعيط لخرين يعلم الله اش دارو
بناصر: عيااااط تليهم راهم مرونييين حتى هما بغاو يحددو تكاشط حتى واحد مابغايشدهم خليت مك كتحدد فيهم
صباح الحرب والجهاد بمعنى الكلمة ، ناضت مع النبوري دوشات وشللات بالماء بارد وخرجات لقات غالي فالكوزينة كيقرقب ، لبسات واحد سورفيت ودفرات شعرها ودارت سبرديلتها ووجدات راسها للمراطون
غالي: اجي اجي فطري فطري
سكينة: غنمشي غنمشي
غالي: ااجي فطري راه غتسخفي ،، جلسي الفطور واجد ضربي الكومير باقي سخون
جلسات متوترة فطرات هي وياه ولبس سورفيت ديالو وسبرديلتو وخرج سد الباب مشا معاها حتى للطاكسيات ركبات ومشا هوا عند المعلم ولحسن حضو خدام اديسطونس من دارو فديك الوقيتة ؛ غير حلات المحل شمرات على دراعها وكتافها وهبطات على واحد الكاس ديال سوبرادين وتقادات مع الموجة وبدات توجد حتى لحقات عليها رانيا دايخة بدات كتسخر وتعاون وبداو تيليفونات والنوامر كيخرجو وحصلات فالهوندات صدق غالي مخلي المعلم مع العساس كيكمل ومشا عندها جمع ليها الهوندات وبدا يرتب معاها الامور
قبل مايطلع مع مول الهوندة وقف قدامها دق فالطبلة وقال
غالي: هادو كملو ليك فلوسك؟
سكينة: لا مزال !!
غالي: واشدي فلوسك هما اللولين … هانتي كتشوفي شواقع فاللخر يقوليك ماعندناش راه ماضربناش لحساب لهاد الروينة والعرس ماطلعش كي بغينا وغير ضيبانينا،،، اللهم بلاش هاد التخلويض وشدليا نقطع ليك شدي فلوسك قبل ماتحطي هادشي وكملي ماتعرفي فاللخر دلعرس اش غيطرا ونتي غير هاد الصباح عندك ربعة وربعة بالليل واخا يكون عندك عقل الجن
سكينة: واسير انا نعيط ليهم يعطيوك الفلوس ما تحطوش حتى يكملو الباقي
غالي: مهم انا غنتسنا مسج فالواتساب عطيني ليديطاي
سكينة: مهم غير تشد الفلوس رجع مع الهوندة خليهم هما يستفو حيت انا غير غنسيفط هادشي مع الهوندات غنمشي ندور نشوف اش طاري
ركب مع الهوندة من بعد ماكان كليميني ماعندوش مع دوك الاعمال الشاقة وكيعرف غير ستيلو والورقة والادارات ومكيمشيش على رجليه،، بدات تحكو الايام حتى هوا ويحراش ويتحربن شوية بشوية ، ركب فالهوندة وبقات هي كتشارجي الهوندة الثانية من بعد ماستفات الباقي فالباب للهوندات لخرين يعمروهم ومشات مع الهوندة على قبل كمالة الفلوس واخا مابغاوش يخلصو فالاول لاكن بتخراج العينين والخاطر لي مابقاش والخدمة لي على راسها مابقا كيهمها حتى واحد ، فلوسها ولا دير بناقص ترجع منين جات
كذالك ومثال مع باقي العرايسات حتى بلاصات شغلها ورجعات للمحل لقات غالي حدا الباب مد ليها الفلوس فالجوا
غالي: عرفتي شقاليا باها ولا منعرف شكون هه،، قالي استغلاليين ماستغلاليين قلت ليه سمع الشريف راه ولاد الناس لي وقفنا معاك فربعة وعشرين ساعة ماكملاش اما حنا كااع منشعلو داك تيليفون كاع، وسكت
سكينة: ولاهيلا، نرد فلوس الكرا بعدا ويحن الله ، غير خلي هادوك عندك وهاك هادو تاهما حيت انا ماااغنردش البال دابا
عطاتو الفلوس وبدات طير وتنزل غادية جايا وتوجد لعراسات الليل وكاين القاعة لي جاوها فيها العراسات دنهار والليل غير خوات خلات ماطيريالها تما واخا ماشي نفس العمارية لي كانت طالبة لعروسة واضطرات تدي وتجيب عاوتاني وغالي كيوصل ليها فاللخر عطاه بناصرالطموبيل ورجع غادي جاي من محل.لمحل كيبدل ليها الماطريال ومن قاعة لقاعة وتهنات من سير واجي كل شوية وعاد عرف صعوبة الخدمة والتعب البدني والمجهود لي كيبدلو والليل لي كيسهرو ولغد ليه كذلك نفس الشيىء بدون توقف واليوم الثاني والثالت كذالك بدون توقف حتى نال منهم التعب والارهاق وجا قرار الحجر وكلشي توقف وبدا الرعب كيجول الشوارع والازقة والناس كتموت والسبيطارات كيعمرو والعدوى كنتاشر والخوف والهلع وكل واحد سد عليه وشي خايف على شي والوسواس هلك عباد الله ومنهم سكينة لي تأثرات وخافت ومرضات نفسيا
فالاول كان يحساب ليها حشرة كتشم فالهوا وكتكاثر فالصدر واخا عيا غالي يشرح ليها بللي ماشي حشرة راه غير بحال السعال وقوي وكيموتو اغلبية لي مراض بالقلب ولا عندهم مشاكل فالتنفس،، لاكن واخا عيا يشرح ليها مرضات وشافت الويل وكتشوف الناس فالاخبار كيخرجوهم مغلفين وخافت ولي مات كيدفنوه بعيد بطريقة مخيفة الاطباء لابسين لباس بحال رواد الفضاء زادت تأزمات وشدها المسران و احد العشية بسبب القلون الناتج عن الاعصاب لي معصبة مع داك الوضع وشدات جنبها كتغوت مقادراتش طلع النفس
سكينة: غالي… غنمووت غنمووت عتقنييييي
خرج من طواليط موضي لقاها مخرجة عينيها
غالي: مالك ياك لاباس؟؟
سكينة: كنمووت صافي،،، صافي كنموت
شد فيها وغوتات حتى خرجو عينيها وناض عيط لباها جا عندهم بالطموبيل ونزلها لابسة القفازات والبافيط هي وياه ومكتقيس لا فبيبان ولا فحيوط وكتعرج حتى وصلات عند بناصر لي كيخاف على راسو كتر منها شاف فيها بنص عين وقاد الكمامة كيسول مالها وزاد مع الطريق كيعاود لغالي على شحال من بوليسي وقفو فالطريق عاد وصل عندهم ، كانت شادة جنبها كتموت وفاش دخلات للرباط وشافت الدبابات ديال الحرب وحدة مور حدة كيجولو الشوارع فالمدينة والعسكر والدنيا خاوية كلشي ساد وحتى سيارة مكدور تقول الحرب ولاشي فيلم ميريكاني .. زادت تخلعات وشافت الحقيقة قدام عينيها فين تبان شي تلفازة قدام داك المشهد المريب ، وزادت كتر ملي وصلات للمستشفى ودخلوها تقول جرتومة خايفين منها وخايفة منهم ودخلوها دارو ليها تيست لقاوها مزيانة و دوزو ليها لقاو عندها المسران منفوخ مزيان وخرجو ليها الدوا وناضت خارجة كتشوف يمين يسار مخلوعة شافت الناس مجبدين فالبياصات وكاع القاعات حولهم لمخيمات الكوفيد مشبحين فيهم الناس مراض والاطباء والممرضين بداك اللباس كيزيد يخلع،هربات من تما مرعوبة رجعات بحالها كتقول اش داني لاش مشيت كن بقيت فالدار حسن ليا دابا عاد غنجيب لراسي لمرض ومشيت حتى لبلاصتو ودابا غنتطلاو كاملين ونموتو كاملين
تخلعات وخافت ورجعات للدار نصلات كاع خوايجها فالباب هي وغالي ومشات نيشان للدوش دوشات وكتندب على خروجها من الدار وغالي كيدوش حداها ويكمل ليها
غالي: مزااال مزال راه على خمسطاش ليوم عاد كتبان النتيجة واش فيك كرونا ولالا ماشي من دابا
سكينة: بتعب) انا عييت اغالي عييت كنحس براسي كنموت وصدري ضيق وكنتنفس بزز
غالي: هاداك غيير الوسواس راك درتي تيست طلع نيكاتيف
سكينة: ولاكن انا متأكدة غنكونو تقاسينا يا انا يا نتا يا بابا (شدات وجهها) اش داااني اش دانييي مشينا برجلينا عندهم والعدد كيطلع كل مرة كيزيد
بدات تندب وتسدات ليهاالشهية ورجعات كتحس براسها مريضة وشنو يصبرها حتى دوز خمسطاش ليوم باش تتأكد .
اما غالي هلك راسو بالتعقيم وهي بلهلايطريه ليها كتبعو كتمسح لبوانيات موراه واخا كيحلهم بالمرفق فاش كيدخل السخرة وكيديهانيشان للحمام يعقمها ويتعقم حتى هوا وريحة لالكول ولاتكتعطعط عندهم فالدار بالليل وبالنهار.
بقا الوسواس كيهلك ليهانفسيتها تدريجيا وكل صباح وعشية تعيط لدارهم من خوفها عليهم وبقا داكشي كيطور حتى الموضوع كبر ورجع مشكل كبير اكبر من المرض نفسه وبدا كيبان عليها فالنعاس وهي ناعسة بالليل وحتى نافدة مابقات كتحل عندهم فالدار من شدة خوفها ، كانت ناعسة شوية بدات كتنين وشوية بدات تكحب وشوية بشوية بدات كتفركل حتى حس بيها غالي وناض شعل الضو فيقها لقاها زرقا وجلسها مخنوقة كتغوت وعينيها خارجين
سكينة: مقاداش نتنفس،،، مقاداش
غالي: كنقوليييك متبقااااايش تفرجي فدوك الفيديوات هانتي دابا جبتيها فراسك،،شربي شربي الما
سكينة: صدري صدري تزير عليا ديني طبيب مكنتنفسش…عيط لبابا عيط .. انا كنموت
غالي: حلي فمك حلي حلي
شدليها وجهها بزز وحط فمو على فمها بدا كينفخ سرح ليها التنفس تقول كان مقفول بقفل عاد شهقات وبدات تنهج وتبكي
سكينة:كووولنا غنموتو،،، كلنا غتقتلنا هاد الموصيبة غنموتو مخنوقين
غالي: بداي تصلي رجعي للصلاة مغيبقاش عندك هاد الوسواس ومتبقايش تفرجي فالفيدوات الخايبين راه كيأثرو عليك
سكينة: سخفانة)كنحس بحالا الحشرات مجموعين ليا فصدري وكيولدو وكيتكاثرو وباغيين يخرجو ليا من نيفي وفمي وكنحس بحالا كيتنفخو باغيين يتفركعو فيا لداخل
غالي: مكاينش هادشي مكاينش غير دماغك كيصور ليك هاد تخربيق، نعسي داباونعلي الشيطان يالاه
تكات كتنخصص وخايفة وهوا كيحك ليها وبقات على داك احال كتفيق كل ليلة على نفس الحالة وتبداتعاود نفس الهضرة فالاخير قلب ليها على طبيب نفسي من الاطباء لي كانو خدامين وكيعاونو بزاف ديال لحالات لي بحالها وكتر منها عبر الهاتف وبدا كيشرح ليها بلي بزاف ديال الناس وصلات حالتهم النفسية للحضيض وماشي غير بوحدها وهادشي عادي لانه غريب وجديد وضاهرة مامتعودينش عليها ومرحلة وغدوز وبدايشرح ليها مفهوم الكوفيد وشنو هوا وكيفاش الناس كيموتو وكاين لي جاه وماحسش بيه اصلا وغالي حداها كيسمع حتى هوا وويسول عاد بدات تدريجيا شوية بشوية كدخل الفكرة لدماغها وكتحاول تتأقلم مع الوضع وتستوعب الامور وبداو كيتعايشو مع الوضع شوية بشوية حولوه لموضع سخرية وكوميديا بينها وبين غالي وبداو كيدخلو للكوزينة يطيبو وعطاوها للماكلة والشهيوات والبليستيشن كل يوم حتى بدات تغلاض وبدات تخرج ليه هوا الكرش عاد ناض كيدير الرياضة فالدار قدام التلفازة
فهاد الفترة ديال الحجر لي دوزوها بجوج تعلمات فيها شوية الطياب ودارو النوبة مرة تشقا هي مرة يشقا هوا ومتعايشين مع بعض حتى بدات تخفاف القضية شوية بشوية وبداو يقدرو يخرجو تدريجيا وبدات الاوضاع كترجع لاكن ماشي بحال من قبل، كلشي تضرر كلشي تهرس وماشدات فيهم كرونا حتى طلق الله سراحهم عاد طاحو مرضو ودوزو المرضة منشورين فالدار كل واحد فقنت وعرفو شنو هي كورونا وبلي مجرد نزلة واخا حادة شوية لاكن ماشي بديك الدرجة المخيفة والمميثة لي كان كيحساب ليهم .
تحلو البيبان والطرقان وبدات الحياة كترجع وقدرو يمشيو يطلو على السي بناصر وكل واحد كيعاود قصتو مع هاد الجائحة بالضحك ؛ كانت سكينة فهاد الاثناء مع مونية ورانيا فالكوزينة فمشاورات مهمة وحوار شييق نزلات عليه بيهم رانيا فجأة
مونية: ايوا مرحباااا بييييه مرحبا
رانيا: راه كيتسنى غير تفوت هاد الروينة ويتحلو الطرقان ويجي
سكينة: وفين تعرفتي عليه ؟
رانيا: فالفايس بوك
سكينة: اهاه وفاش خدام؟
رانيا: ضابط شرطة وباقي صغير عندو شي تمنية وعشرين ،،بوكوووص
سكينة: ومزال ماتلاقيتيه تعرفيه بعدا غير كي داير
رانيا:غدا قاليا غنجي نشوفك
سكينة: ايوا حتااا تلاقايه بعدا ماتحكميش على الواحد من تيليفون
سكينة: عندو مو
رانيا: عندووو وباه وخوه واحد
مونية: ونتي والو مزال مابغيتو تولدو حنا قلنا غادي تولدو بعدا فهاد كورونا
سكينة: اشمن ولاد اماما انا ماباغاش اصلا نولد ماعندي مندير بيهم
مونية: هييييه!!!ستغفري مولاك اش هاد الهضرة
سكينة: مابغيييتش والله ماباغا لولاد علاش باغيين تغرقوني انا لي غنوحل فيهم
مونية: واغير واحد بعدا
سكينة: مابغيتوش حتى داك الواحد ماعندي مندير بيه وبمسؤوليتو انا هاكا مرتاحة ماعندو مايزيدني
خرجات من تما لقات غالي واقف باغي يمشي وتوادعو معاهم وخرجو وقفو كيتسناو الطاكسي
غالي: باك راه كااعي جات الضريبة ديالك ديال المحل وخلصها هوا
سكينة: راه ماعنديش راه عارفني
غاالي: تا هوا ماقال والو قال زعما يخففو على الناس راه ماخدموش اصلا يعفيوهم هاد العام
سكينة: دابا حنا صحاب الحفالات مابغاش كااع يطلقو لينا نخدمو ؛؛ جالسين كنكريو الماطيريال للناس كيعرسو فديورهم
غالي: راه خاصك تخلصي جوج ضرائب لخرين للحانوت لي فالقيسارية ولاخر لي فسلا وباك راه حط مليوون عليك فالضريبة ديال المحل ديالو
سكينة: وراه كاع ماخلصتوش فالكرا غا خليها على الله راه من الحجر الصحي ماخلصت ليه
غالي: واشوفي كي ديري فكي حريرتك دابا
سكينة: ماعندي منديير ماعندي حتى حل هانا زاوية حتى درهم ماعندي، دابا غنمشي نحل داك المحل لي عندو شي مناسبة يديريها فدارو نخدمو معاه، اما الدبان راحنا كنشو فيه وحتى الحوايج مابقاوش كيتباعو دابا والمحل واقف وحتى واحد ماقادر يشري كلشي كيشكي
غالي: مهم ، انا غادي نشوف داك الدار فين وصلات نكملو بعدا غير الاصلاح راه داير مع النجار يجي يركب البيبان
ركبو بجوج كل واحد شد طاكسي بوحدو مشا لبلاصة ، حلات المحل مهمومة ومقهورةوجلسات كتخمم وتجمع الروينة ودور بيه والناس كيدخلو يخرجو وهي كتسلك مع كلشي المهم لي دخلات ربح حتى دخلات واحد المرى كتشوف ودور باغا غير تفريشة لبنتها ولدات ولدات وبدات تشكي وسكينة تشكي
سكينة: غا ديها قضي بيها عطي فيها لي بغيتي
المرى: وا الله يدير ليكم لي فيها الخير ابنيتي
سكينة: اميين، مهم غدا رديها
المرى: الله يفك وحايلك على خير
سكينة: اميين شكرا
المرى: اجي نقوليك علاش ماتجربيش زهرك مع المبادرة الوطنية راه ولد جارتي عطاوه باش دار مشروع
سكينة: شنو هي هادي
المرى: غا سولي على المبادرة الوطنية وغتفهمي
بقات سكينة ساكتة كتخمم وتفكر ولسقات ليها فالراس وهزات تيليفوت دخلات ليوتيوب باش تفهم وبدات تفرج وتعلم حتى فهمات لي خصها ومشات فلعشية للدار تسنات غالي حتى دخل عامر غبرة دلخشب وناضت وقفات عليه
سكينة: غندفع الطلب للمبادرة الوطنية يعطيوني عشرة دالمليون
غالي: شنوو
سكينة: نتا غتجمع ليا الاوراق وكلشي وغدفع ليا الطلب نتا لي كتعرف
غالي: وراه خاصك بطاقة المقاول الداتي وخصك دفعي وتسناي وشوف تشوف راه غير لكدوب واش من نيتك غيعطيوك عشرة دلمليون فابور
سكينة: ماشي شغلك نتا قاد لياالضوسي وتبعني انا غنمشي عندهم ونشوف
غالي: وراه مغيعطييوكش غير حلمي هه ولاهيلا قالك نمشي يعطيوني واش عارف. شحال من واحد باغي لفلوس كن كانو كيفرقو لفلوس انااللول تلقايني تما
سكينة: واخلييييني انا باغا نعيييش التجربة الشخصية ديااالي ماشي شغلي فتجارب الناس
غالي: عيييشي الاللة التجربة شكون شدك سيري صاوبي بطاقة المقاول واجي عاد نتفاهمو
سكينة: ايوا وشنو ندير باش نصاوبها؟؟ ورييني
غالي: حتى ندوش ونرتاح عاد نشوف معاك انا من الصباح وانا مع النجار هاك بالاك كنركبو البيبان
ترفعات مع هاد المبادرة رجع عقلها غير معاها غادية جايا كتخمم ولاسقاه وتابعاه من بيت لبيت كتتغبن حتى عطاها وقت وراهااش دير وناضت مع الصباح مشات كتجري توجد البطاقة دالمقاول الداتي ودازت لدارهم فلعشية لقات رانيا يالاه دخلات لابسة ومقادة حناكها حومر بالشمس وجلسات تعاود ليهم على اول لقاء
رانيا: جاب معاه واحد صاحبو
سكينة: علاش،!!
رانيا: اييوا بقا عليا خويا حقا اقرب الناس ليا وجالس كيتغامز معاه زعما كي جاتك واش ديال المعقول ولالا
سكينة: ايياااه دابا خاص حتى يعطيه صاحبو الاوكي عاد يتقدم هااي هااااي
رانيا: ناض داك صاحبو خلاني جالسة غير انا وياه وجلس كيعاود ليا عليه قالي هما صحاب من الصغر بحال لخوت مكيقدرش يتفارق معاه وكيتشاركو بحال هاكا اي حاجة بغاو يديروها وحتى داك صاحبو خاطب ومشا معاه نهار بغا يتلاقاها وبقا كيهضر انا ماعجبنيش الحال واخا هما محتارمين بجوج ولاكن انا ماحملتش علاش ياخد رأي صاحبو
مونية: ربما خايف راه الزواج هادا حتى لبنات كيشاورو بعضياتهم ، ماشي مشكل المهم يكون محتارم دابا جيبيه عندنا للدار بعدا نشوفوه باش منحكموش ونضلمو السيد
سكينة: جييييه ارانيا جيبيه لبا هوا يقلعو ليك الى كان صالح ولا مصالحش
رانيا: قالي غنعيط ليك فتيليفون باش يشوف رأيي فهاد اللقاء الى تفاهمنا يجيب واليديه
سكينة: صافي حسن
رجعات سكينة بحالها ودازت عند غالي للدار لي كيبني وهزات راسها لقاتو طلع الطبقة الارضية ودور الصاور وكيصلحو السراجم ويركبو الاليمينيوم للبالكو وبقات ليه غير طبقة لفوقانية ولفينيسو واخا طالع غير بالياجور مزال ما دار لاديكور لا والو لاكن الخدمة تقيلة دازت، طل عليها من البالكو وشار ليها بيدو دخلات فرحانة كتجري ولقات نضرة على داكشي كضحك وقالت
سكينة: هانتا غادي
غالي: كي جاك هادشي:
سكينة: تبااارك الله زويييين ، الفصالة بعدا وااعرة متييييسعة
غالي: لفوق فين غيكون البيوت ولاكن راه خصو لفلوووس ومن بعد ماشي دابا
سكينة: ماشي مشكل من بعد ،، اجي نشوفو لاكاف لي مهيييييم عندي دابا
غالي: اجي بغيتي تشوفي لاكاف
هبطات معاه سرحات عيينيها لقات لقوادس مزالين كيطلو من الارض ومن لفوق
سكينة: عنداك تمشي تبدا تزلج لفوق وتخلي هنا راه هادا خاصو يتفيينا والارض يدار ليها لاموزيك والسقف يتكبص
غالي: يديه فجيابو مهموم) وراه با جاي مسكين هوا لي غيجي يدير هادشي اما كااع الفلوس لي كانت عندنا حطيناها فالبني
سكينة: حتى لفلوس لي تسلفتي من عند داك صاحبك؟
غالي: هما باش درت الباب لكبير لي لفوق للكاف وريدوات دلحديد للواجهات بقيتي عليا مابغيتش السراجم بغيت الزاج من لفوق حتى لتحت والزاج خصو الريدو واش حساب ليك الفيلا ساهلة
سكينة: عضات شنايفها ودورات راسها) هيييه بااقي لابيسين وباقي لفوق وباقي الرخام والحمامات وباقي وباقي هادشي لي وصلنا ليه نقطة فبحر،، يعلم الله فوقاش نكملوها
غالي: قولي الحمد لله ها السيد حدايا دار هادشي لي درنا وسكن فيها هاكاك غير المرطوب وساكت
سكينة: تنهدات) لاكاااف اغالي والواجهة خصها تبان زوينة هادا هوا المهم اما لداخل ماتزيد فيه تا ضربة دابا مغنسكنو فيها مغنكريوها غير خليها هاكا وهبط لتحت فينيه بعدا وكتر ليها الاضواء … عاااد مزال يتقسم عاد مزال ليه البيبان والطواليط … والجردة خصها تقاد على الاقل يديرو فيها البزاوز ستيراحة
غالي: واالله يدير لي فيها الخير راه غاديين غير بالبركة انا كنت كنقول موحال كاع نوصل هنا
سكينة: الى تحركات عاوتاني عندنا شي خدمة غنزيدو شي على شي ياربي غيير يطلقو لينا عيقو كاااع الناس مشااو مصيفييين وكلشي تطلق الا حنا قجونا يخخخ
اصعب الاوقات كيعيشو والحزة فالفلوس وقلة الشيء ، ماشي ماعندهمش باش يعيشو ولاكن البني خدا بلاصة كلشي ، مابقاو كيشريو لا شراوط لا حتى حاجة وكاع الناس سافرو يرتاحو ويتنفسو من الضيقة لي دازت عليهم الا هما. شد غالي الكونجي ديال الصيف ودوزو كيضرب فلاندوي لداك لاكاف وباه كيدوز لاموزيك مع الخدامة وسكينة كطير وتنزل من دار لدار رجعات كتمشي بلاصة النكافات غير باش توفر فلوسهم وتخلص الكرا واخا المدخول رجع محدود لاكن كافيها ومصاريفها وزاد كملات ملي هز غالي من فلوس الاصلاح خلص ليها جوج ضريبات على بيد من تجمعهم بشوية وتردهم ليه يخلص الخدامة ولا يكمل الاصلاح.
فلعشية رجعات معطلة لاكن فيدها بطاقة المقاول وغطير بالفرحة ، لقاتو هوا وباه جالسين كيتسنطو لعضامهم ومشات كتجري مافهمو مالها طارت على غالي خلعاتو
سكينة: هاااهي،،، هاالبطااقة يالاه نوووض نوووض صايب ليا داك الجدول باش ندفعوه
السي رشيد: شي جدول ديال الفقيه هاادا ههه
غالي: ناض طالع ليه الدم ) واا دراسة الجدوى باغا طلب الفلوس من المبادرة نفخات ليا راسي
السي رشيد: حرك راسو بارتياح) بلااا ماتعدب راسك راه مكاينش داكشي غي لكدوب
غالي: واعيييت نشرحليها (شا، بيدو)اري داك البيسي
حطات ليه البيسي وجلسات حداه كتشوفيه كيعمر
سكينة: قاد ليا داكشي مزيان ماتجيبش مسبتهم عليك وتسبب ليا فالفشل
غالي: وهاكي كاديه راسك
سكينة: لاقااادو ولاكن بالخااالطر بشوية باش غدا نمشيو انا وياك عندهم نشوفو
شد راسو وفيه النعاس جلس كيعمر ويسول اش غدير وشنو مديرش وبقا عاصر كيتفوه حتى كملو وخرج ليها الورقة من لامبريمونت لي عندو وبدا يقاد الضوسي لي دفع وحطو ليها
صبحات عليه بلا عكز جراتو وهوا مشغول داتو معاه وشداتو النهار كامل وباه كيعيط ليه حتى نوضوها ودابزو ورجعو مدابزين حطها فالمحل ومشا بطموبيلت باه لدار لي كيبني .
كانت خدامة فالمحل حتى صونات ليها مونية فرحانة كتعرض عليها للخطوبة درانيا واخا غير تعارف؛ تلهات مع الخبر ورجعات للدار فلعشية لقات حتى غالي فراسو الخبار وصلها ليه بناصر باش يكونو حاضرين معاهم الا السي رشيد حشم يحضر وكان نيت خصو يوقف على الخدامة لغد ليه وخلاهم مشاو غير بجوج
لقاوهم موجدين كاسكروط وبناصر بالفوقية ورانيا فالبيت حشمانة تخرج عندهم
سكينة: مزال ما جاو؟
رانيا: راهم وصلو سيفط ليا مسج قالي وصلنا
سكينة: امم
خرجات فاش سمعات الصونيت برا ومشات استقبلاتهم مع مونية ، دخل لعريس تبارك الله الطولة والتكلضيمة شهوة منو وزويين ومع مو مزالة صغيرة بالحجاب وباه نفس ستيل بناصر ، تسالمو وبدا الترحيب وجلسو فالصالون شي كيشوف فشي
العريس كيبان ولد الناس وبعقلو ورزين وشخصية ونقي مافيه مايتعاب وحتى واليديه من عائلة بسيطة بحالهم ونقيين ونفس المستوى، بناصر رتاح ليهم ملي شاف الناس بحالو والولد نقي باينة فيه ماشي مبلي وصحيح دايها فصحتو ووجهه نقي طمأن من هاد الجانب بعدا وجلس كيتجمع مع باه لقاه خضر وعلى نيتو
كان غير كاسكروط وماجلسو بزاف غير سلمات عليهم رانيا وجلسات شافتهم وشافوها وسالا اللقاء حتى يرجعو يديرو خطبة رسمية على حقها وطريقها
مابقاش ليهم الوقت فين يحللو ويناقشو وناض غالي وسكينة ورجعو بحالهم كل واحد وهمو ونفس الروتين في انتضار ترجع المياه لمجاريها وكان السي رشيد غادي جاي من مكناس لسلا وكل مرة معاونهم بشي حاجة ومساهم فداك البني على الله يوصلو غير لداكشي لي محتاجين
كانت واحد الصباح ما عليها ما بيها ماعليها كتوجد راسها تمشي للمحل تستفتح حتى جاها اتصال من رقم جديد نداوها باسمها الكامل وردت مستغربة
سكينة: ايييه شكون معايا
– معاك المبادرة الوطنية للتنمية البشرية
سكينة: خرجات عينيها) اه اسيدي مرحبا
– الطلب ديالك تقبل خاصك دوزي عندنا باش تكملي الاجرائات
سكينة: بالفرحة) اه اه غندوز شكرا اخويا شكرا بزاف
قطعات المكاملة وعيطات لغالي كتجري وتفتف بالفرحة باغا تأكد ليه انها هي لي على حق وهوا لي ديما كيعطي احكام مسبقة فقط من خلال تجارب الناس
سكينة: غلاوتي ههههه عيطو ليا من المبادرة الوطنية قالو ليا راه تقبل الضوسي
غالي: اييوا مزياان هه غيعطيوك لفلوس ولاغير تقبل وسير حتى نعيطوليك
سكينة: قالو ليا خصك تجي
غالي: واش حساب ليك غيجيو ويعطيوك لفلوس؟ راه مزاال شحاال ديال البحث وشحال ديال طلع وهبط ودوزي من المنصات التعلم وتبداي ديري ليكوغ معاهم ويدرسو معاك البروجي عاااد شووف تشوف
سكينة: ماشي مشكل المهم هاد المراطون غنضربو اش كندير انا دابا اصلا ، انا غنمشي دابا نييت نسبق منهم هما اللولين
غالي: ايوا الله يسخر
شاف غالي حتى عيا فبنات الناس وفعائلتو ولا عمر ووو شاف بحال سكينة بداك الجهد لي عندها سبحان الله واللي ماكرهش منو غير شوية كوراه بنا دار لراسو ، من الصباح وهي غادية جايا من طاكسي لطاكسي وماكيسخفوها مشاكيل مكيسخفوها ناس ولاكليان ولا اوراق ولا دروج ولا حتى حاجة سبحان الله يفوت عليها غير شغل الدار والحيوط ديال الدار تقول جنية مكتحملش الدار والجلسة بلا شغل ؛ هداتو وهدات باه وهدات بناصر وهدات الكليان ديالها ولي جا فطريقها كيتهد وهي غادية عينيها محلولين والدماغ مكيهداش من التخطيط وبناصر نهار ومطال وهوا يقوليها خلي راسك يرتاح راه غتجيك شي جلطة وهي والو كتقوليه اه وتمشي تبدا تبلاني وكل شوية خارجة لغالي ببلان بحال هاد البلان لي طاح عليها وهوا كيصلي
غالي: السلام عليكم ورحمة الله ،،، السلام عليكم ورحمة الله
سكينة: مشيت ليوم لديك المنصة عاوتاني دارو لينا درس فالتسيير سولوني واش روض ولا غير لاكريش قلت ليهم كما درتي ليا فالاوراق غير لا كريش
غالي: ايوا غير ردي بالك تغلطي راه كيقلبو على السبة
سكينة: تلاقيت واحد البنت كنعرفها قارية ديك عماين ديال تعليم ومازال ماجابش الله قلت زعمااا غيير زعماااا نجيبوها تعطينا ديبلومها ناخدو بيه الرخصة زعما باش نقرييو ديك لابتيت ولا مويان ولا كغونض اش بان ليك
ناض كيقلب عينيه سخفان وتنهد وقال
غالي: وا نشاااء الله نشاء الله شدي بعدالفلوس فيديك ويحن الله
سكينة: صافي اناغادي نقولها ليها وواخا كاع طلب الثمن ماشي مشكل مهم الرخصة
غالي: عييت اسكينة ودني طابو خليني نرتاح ،، هانتي فكري فصمت ولي،بغيتي ديريه ونهار نوصلو الرخصة يحن فيها الله
تنهدات ومشات خلاتو جالس ودار الكاسك على ودنيه وجر لبيسي ديالو كيخدم في حين مشات تركنات فواحد القنت شادة تيليفون طيباتو بالمساجات فواحد الكروب ديال المبادرة وكملات فطريقها ما عيات ما نشفات والورقة لي قالو ليها جيبيها كتصبح واقفة عليها
البني حبس وتنضفات الدنيا وصاوب غالي الواجهة على حسب البحث في حالة ما جاو يقلبوعلى الموقع وفعلا مشاو باش يتأكدو من ان لوكال كاين ودارو مراقبة وراهم غالي البلاصة وكانت عندها دخلة زوينة وكبيرة ودروج واسعين من لحيط للحيط فالهبطة بحالشي مدرسة ومصلوح مصبوغ نقي خاصو تجهيز فقط ، كانت هاديك اخر خطوة يااما يعطيوها الفلوس يااما يردو ليها الطلب، واخا كان عندهااحساس انها غادي تاخد الفلوس لاكن كانت خايفة يعطيوهاغير شوية وهزات الهم والغم مابقاتش كتنعس وكل ليلة تنفخ لغالي راسو بالاسئلة حتى عفاالله وجاء الفرج وعيطو ليها توقع الاوراق وخرجات كطير وتهضر مع غالي فتيليفون لي و تقول واش كيصدق داك تخربيق كامل وكيقول راه غير كيديو ويجيبو فيها .
دخلات للمكتب متوثرة كتسنا وكطلب الله تكون عشرة دالمليون كاملة اما فكرة ميعطيوهاش كانت. منعادمة عندها ، مد ليها الاوراق تسنيي وبدات تصور لغالي وهوا كيرد عليها وكتوقع وعطاوها الورقة لي تاخد بيها الفلوس وباركو ليها وخرجات معا الباب كتشوف شحال عطاوها وطارت بالفرحة فاش لقات الرقم كامل منقصوش ليهامنو
سكينة: غلااوتي هههههه صافي غادي نمشي نجيب الفلوس الزين من لكونت دالبنكة لي عطيتهم
غالي: وايلي؟؟
سكينة: والله انا غادا دابا
غالي: بلاتي ماتزربيش ماتزربيش انا جاي وراه معايا طموبيل دباباك نمشي انا وياك باش ميتعرضش ليك شي واحد
سكينة:انادابا غنمشي نضربها بواااااحد مولاي الباناشي وشي حلوة نبرررررد بيها على قلبي
غالي: انابعدا تا نشوف الفلوس عاد نتيق
سكينة: واشتي نتا كااع لاتيق مهم اجي عندي للقهوى المعلومة انا غنمشي نجلس تما يالاه تلاح ههههههه
فرانا قدام القهوى وقبل ماينزل خرجات عندو كضحك وطلعات حداها
غالي: اري داكشي نشوف
مدات ليه الوراق كضحك ورجع للور براسو بدا كيتمعن وقال مصغر عينيه
غالي: عشراااا دلمليون!!
سكينة: صافي فتانعتي
غالي: مزال ،، الوراق هاهما ولاكن حتى نشوفو واش بصح دوزوهم ليك فسميتك ولا لا ، يالاه نشوفو
خلعها وتلونات وتروعات وقفات ليها الماكلة لي كلات في فم المعدة ومشات معاه للبنك دخل هاز دوك الاوراق فيدو مزال بحوايج الخدمة وهي بسورفيت غادية حداه ،قابل المدير لي كتكرهو سكينة وخرجها منها فهاد الفترة وهي ساكتة باغا غير الاوراق لي طالبين ليها من البنك وما عطاهم ليها حتى عصر عليها مزيان ورجعات كتكرهو وتشوف فيه وضحك ضحكة صفرة وهادشي كامل حيت مكتفهمش فداكشي ومكترفش وتابعة غير تعليمات غالي ومكتعرف باش تجاوب، شافتو كيفاش رجع كيهضر ملي دخل عندو غالي وكاع ديك العياقة والتقة فالنفس هبطات وعاد رجع كيتعامل معاهم كاكليان ويدير الخاطر ويضحك
سكينة: بهمس) راه واحد ولد القردة هاد المدير دوزها عليا شو دابا كي كيهضر يعطيه موصيبة
غالي: عاد دابا عاد كتقوليها علاش ماقلتيهاش ليا نجي عندو انا
سكينة: ولد لحراام
غالي: دابا الى بغيتي نسدو مو هاد الكونت نسدوه غنشدو الفلوس نقوليه يسد مو
سكينة: سد مو اصلا فيه غير واحد مية درهم
غالي: سيري للكيشي خرجيها واجي
ناضت خرجاتها ورجعات لقات المدير رجع كيطبع الاوراق وشدات صبعها بصمات وسينيات وناض غالي مقاليه حتى شكرا مشا وراها وهي قدامو لقاو الفلوس محطوطة ودازت تحسبات وجمعوها ليهم فضرف كبير هزها غالي وقاليها
غالي: شدي لاكارط ديالك واجي سدي لحساب
داكشي لي دارت غير خدات لاكارط ومشات للبيرو الثاني صدماتهم وسدات الحساب وخرجات كضحك فرحانة
سكينة: ولد لحرام كاع ما خرج
غالي: عارف راسو حساب ليك معارف والو هه
سكينة: ها عشرة دلمليوووون هههه ايوا ودابا
غالي: وشكون لي قاد ليك الجدوى وغيز ليك الامور وعطاك الافكار؟؟؟ كن كنتي بووحدك كااع مديري هادشي وتقنعيهم بالبروجي
سكينة: وصافي صافي صافي المهم فلوس الروض جبدناهم من تحت الارض عقبة لفلوس اخرين نهبطوهم من السمااا ههههه دابا نوبتك دير طلب تاخد نتا عشرة اخرى
غالي: ماعرفتش واش كيعطيو لكلشي ولا غير لي ماخدامش
سكينة: ايوا جرب ماتبقاش كتجبد من مخك كن تبعتك كن كاع منشدوها،، هااا نتا لاكريدي لا وااالو واخا طلعت وهبطت المهم نسيت داك المراطون ، دابا التجهيييز احنيني عرفتي شحال فرحاااااانة متحمسة للتجهيز عاوتاني ههه ها الصبورات ها طوابل ها ها لكراسا عرفتي غنصرعووووووه غنديرو ليه داكشي موووووديغن والوان ورسومات داكشي انا لي نعرف ليه نتا غير تسخر حيت كتحبطني
غالي: دابا هادشي كاين ماشي مكاينش ولاكن بصعوبات وبنادم مافيه لي يجري على الفلوس ويصبر كيدير بناقص كااع وكيقول غير كيتفلاو عليا
سكينة: انا والله منعيا نبقا وراهم تا نشدهم ههه
غالي: غير عشرة بحالك ماتبقا لا مبادرة لا معاونة نتي من الناس لي كيندم الواحد
ها شغل ااخر خرج ليها عاوتاني من غير التنكاف وماقدراتش حتى تصبر واحد اليوماين غير ترتاح، عيطات لباها قالتها ليه ماتاقش ومكانش عارفها اش كتخبز حتى عيط لغالي هوا لي فهمو وشرح ليه عاد ناض كيدفع رانيا وكيتقاتل ويسول من تجربة دسكينة باش رانيا دير شي مشروع اخا يعرف يكري ليها حانوت حسن ماتبقا جالسة والاجازة فيدها ما خدامة ماردامة وعيات تدفع والو وجات مع الجائحة مالقات فين تخدم من غير واحد المخبازة دخلات كدوز فيها الوقت ، اما سكينة داتها الوقت وبدات التجهيز ، شي عراسات مكاينين اللهم دير شي حاجة اخرى تنفعها، اما غالي تقهر بغا طموبيل وبقا كيزنزن ليهافراسها حتى عطاتو جوج دالمليون منها وزاد عليها جوج ديال البريم وشرا واحد لكليو مازوط حالتها ويامها ودخلات معاه سكينة صحة فديك الطموبيل سميتها حدا سميتو وركبو فيها يتساراوشوية فالمدينة ، يالاه جات تحل الباب طاح كامل للارض بقا شادو غا المسمار لفوقاني
سكينة: اوييلي لباب هبط
غالي: نزل بسرعة) اهاه راه كيطيح عاد خصني نصاوبو ولاكن ماشي شي حااااجة المهم هوا الموطور
غير ديك الطموبيل المحرتكة قصتها قصة بوحدها بانو فيها شلا عيوب وبدا يصرف عليها حتى هي ومكتخرجش من لكراج دلميكانيك وفالسيمانة اللولة لي داها للخدمة قلباتو فالطريق وتهرس من رجلو ، عيط لسكينة قالها ليها وناضت طافجة مخلوعة عيطات لباها ومشاو كيجريو للكلينيك لقاوه جالس وداير لجبص وجهه صفر جبهتو فيها فاصمة ، بناصر ربط يديه وراه مفقوص وتعصب وبقا غادي جاي
بناصر: هاديك الطنوبيل صافي بيعها ماااعندك ماااادير بيها ، هاهي قلباتك دار الله الخير جاتك فالهرس ماطرا ليك والو الحمد لله
سكينة: انا من نهار جاب ليا ديك الموصيبة وانا مامرتاحاش ليها كوولها بياس دي طاشي ها الفران حافي جاب الله ماقتلتي تا واحد
بقا غالي ساكت رتاح شوية ومشا بناصر شرا العكاكز علاش يتكا ونوضوه كيعرج على رجل وحدة مشا للدار سخفان ماهضر ما نطق طاح نعس نيشان ورجعات رجلو مسرحة قدامو صباح وعشية كيشوف فيها ، شد الارض مابقاش كيمشي للخدمة شحال ولي فيه مامهنيه مشا شاف الطموبيل وصلحها وجلس يرغب فسكينة تجييها وهي كتحلف وتعاود لا جابتها فلاخير مشات دارت ليه خاطرو ركبات كتزدح وضرب وهوا حداها مسرح رجلو ورداتها كتنكر للدار ، لاكن بالرغم من كاع المشاكل كتضطر تركب فيها وتمشي تقضي غراضها وحتى غالي بالرغم من الهرس كيمشي يتسخر هوا لي مكلف بالتقدية والسخرة ورجع كيتكى غير على عكاز واحد وولف الوضع ووقف وكيركب حداها ويمشيو يكملو التجهيز حتى عفا الله عليهم وجاء الفرج دقة وحدة سبحان الله
فشهر واحد حيد غالي الجبص واخا بقا كيعرج شوية وكملو التجهيز للروض وقسموه لاقسام وعلقو اللافتة والديكور ديال وطلقو القاعات والعراسات وناضت الفراجة وجهلو العراسات ضربة وحدة ومشات سكينة مع الموجة دالعراسات ورجعات لعالمها وخدمتها من بعد عماين ديال سد حل المشاكيل وقلة شيء لدرجة طلقات المحل لباها من كثرة ما صبر عليها فالكرا حتى ماقداتش فاللخر عفاتو ورجعات للمحل ديالها فسلا هي والمراكشية حتى توقف على رجليها عاد تعاود تفتح واحد اخر فالرباط ، اما بناصر كراالمحل بالضوبل وسيفط رانيا تخدم فالروض اللهم فيها هي بعدا بلا ميقلبو على البراني يقري ليهم ،
مع الدخول المدرسي كانو خايفين مايجي عندهم حتى واحد لاكن وقع العكس ،، كثرة البراهش على الجهد والثمن مناسب خلا الروض يعمر وشدات رانيا قسم وجوج بنات الاقسام الاخرى وغالي وصاحبو معاه فالخدمة كيديروو المراجعات فالويكاند وباقي ايام الاسبوع كيديرو تما المراجعة الاساتدة للتلاميد ديالهم واللغات الفرنسية والانجليزية ، الحاصول المركز مكيخواش لا بالليل لا بالنهار لاكن المداخيل كلها كتشدها سكينة الا السوايع لي كيدير غالي سمحات ليه فيهم بشرط ما تقسم معاه المداخيل حتى ترد العشرة ديالها لي حطات تما وتجيب معاه التعادل عاد يدير ليها صالير كأنها خدامة معاهم ويرجعو ليه المداخيل باش يكمل باقي البني . شدها غالي دار ليها عملية حسابية شاف على شحال تقدر ترد فلوسها لان المداخيل باينة على حسب عدد التلاميد الشامل لقاها غتردها فأقل من عام وقبل الاتفاق
استقرت الاوضاع وكل واحد عارف شغلو ومابقاوش كيتلاقاو بزاف من كثرة المطارق .
ضار العام وردات فلوسها والسلم طلع اخيرا من بعد ما كان نازل ودازو من ازمة ورجعات ضحكات ليهم الايام وبدات تخرج شوية وتتنفس وبدات حتى رانيا كدور الحركة حتى هي وكتخرج مع سكينة فديك لخريشيشة وجلسو فكافي فمارينا كيتجمعو ويردو النفس
سكينة: اخيييرا رجعت فلوسي
رانيا: انا ماعندي زهر ماعطاونيش
رانيا: واش كدفعي ليكونكور؟
رانيا: راني عولت على بابا ساعا والو مكيدخلوش دابا حابسين ،، هانا غنعول على غالي راه دفع ليا للكونكور فالخارجية الشهر الجاي غنمشي ندوز واخا يعطيوني غير خمسالاف درهم (هزات كفوفها) ياااااربي يا السميع سهل عليا حتاانا ندير شي دار وشي طموبيل يااا ربي
سكينة: الله يسهل عليك يا ربي،، غالي فرحااان دابا هاد الشهر شد فلوس المركز راه ناشط ماشط
رانيا: شنو غديري دابا بدوك لفلوس؟
سكينة: غنعاود نسلفهم ليه باش يرد السلف لصاحبو وانا غيبدا يعطيني من الشهر للشهر،، خيلووطة بحال ديما هههه
سكينة مزيان الله يسهل عليك
رانيا: انا راه كنحفض بالنهار ونصلي بالليل هادا هوا املي الوحيييد باغا نجح فيه ونسبة الفشل عندي فدماغي منعادمة، زاد كمل عليا غالي قالي غيهزو غير عشرين وحنالي دافعين شي خمسالاف تخايلي ، عرفتي كنطلب الله صباح وليل نجح
سكينة: ضعافيييتي عرفتي وجهك رجع صفر
رانيا: واياربي غييير نتقبل الضعف ماكيهمنيش
كتهضر وتنخصص فنفسها وتقاد حجابها باينة فيها تكتاءبات ومابقاتش كضحك بصح ومالقاتش راسها مزالة تايهة ومهمومة ومافرحاناش وغير كتنهد وبدات كتدبل
سكينة: داك الخطيب من نهار قطعتي عليه ما عاود سول؟
رانيا: لا وتقوول هه، ماعندي مااندير بيه اختي حتا ماما قالت ليا غادي يكرفسني،،، واش انا راكبة معاه فطموبيل مرجعني لدارنا غادي وكيسب بالهضرة الخاسرة ومعصب مع الطريق!!! وفاش مشيت نتلاقاه تعطلت غير شوية ولقيتو واقف فالشارع طالع ليه الدم غير شافني جايا عطاني بالضهر وتم غادي كيتمشى حتى تبعتو عاد ضار عندي دار لياضحكة صفرة ديال زعما تعطلتي،،، وكل مرة يقول لياعيطي لمي سولي فمي مالك مكتسوليش فيها خاصك تقربي منها ،، لاالالا اختي بناقص منو ومن كادواتو واخا يكون ولد الجواد ماشي غير ولد الناس
سكينة: الصراحة نتي دروييشة وهوا كان كيبان سكوتي
رانيا: هيييه!!! اشمن راه كيتعصب فالسوقان كيبدا يخصر الهضرة، تخايلي نكون راكبة معاه انا وولادي ويبدا يخصر الهضرة كي غيكبرو هاد الاولاد ويتعصب عليهم يبدا يغوت عليا وعليهم!! وفاش قلت ليه صافي لي بيناتنا سالا قاليا نتوما كتبغيو لي يتفلا عليكم ماشي لي معقول
سكينة: كضرب فالعصير) قوليه سير تخرا نتا وداك المعقول ديالك غا زيدو فيك
رانيا: مافهمتش شنو بغا يوصل ليا بديك الوعورية ودوك التصرفات زعما راه شخصيتي قوية كيحسابو غنطيح فيه عورة وغيعجااابني الحال
سكينة: اصلا لبنات كيعجبهم لي يدير عليهم هاكاك ويتعفر ،، مشا غالط مسكين حساب ليه كلشي بحال بحال
رانيا: خصك تشوفي داك النهار لي تعطلت وكان كيتسناني شافني شفتو ودار يديه فجيايبو وضار كيتمشى ويتمنضر زعما هانتي جايا عندي بلامنزيد نبقا واقف ، ديك اللعبة تبعيني راه اصلا طريقنا!!!
سكينة: ملي مافيه ما يتزوج مالو شكون دافعو
رانيا: اناخاصني شي واحد يفهمني يحس بيا ويضحكني ويدير ليا الخاطر واخا انا اصلا ماشي شي وحدة صعيييبة يلقا معاها مشكل، بغيت غير راحة البال
سكينة: وا الله يسهل عليك فشي خدمة راه والله وتخدمي ارانيا حتى تبدل حياتك عقلي على هضرتي،، شتي نتي دابا محدووودة مزااال ماحليتي عينيك وعمممرك ماغتحليهم حتى نهار تخدمي ويهزوك فلوسك وضمني صاليرك الى الابد عاااااد غادي تولي تفكري فشكل وتعيشي حياة فشكل ودخلي لمجتمع فشكااال.. حيت دابا واخا تبغي ديري هادشي متقدريش حيت الخدمة لي غتخدمي هي لي غدخلك للحياة لاخرى على حسب نوع خدمتك، اما الى خدمتي فالخارجية ويييلي باااا
رانيا: هههه ياربييي
سكينة: عااااد غتقولي انا عايشة اما قبل راه كنت غير كنتنفس
رانيا: بشوق) عاودي ليا ههه نتحمس باش نمشي نزييييد نكرررد مزيان ونصلي بلا منعيا
سكينة: غادي غيير نفقصك ولا تقولي كنكدب ونزوق ليك
رانيا: واغيير هضري
سكينة: اففف،، اححح ايوا لاللة الى مشيتي حتى دخلتي خدمتي فالخارجية اولا صالير واصل مليون،، تخايلي نتي بنت ماعندك مسؤولية وكنجي نعطيك كل شهر مليون كل شهر كل شهر ، ماشي مليون وحدة ملااااين هما
رانيا: اهاه ههه زيدي
سكينة: غترتاحي بعدا ماتبقايش هازة الهم حيت الفلوس غتكون عندك وهاد الحاجة كترييييح النفس بزاف واخا متشري بيهم والو،،،، تانيا الاللة. غتبدلي روتين ديالك تولي تمشي للخدمة وتصبحي على ناس مكاين غير بونجوغ بونابيتي ،، غتعرفي على ناس فشكااال عامر راسهم وعندهوم الفلوس وكيهضرو فمواضيع فيهم ريحة الفلوس وغيوريك اش ديري وغتعلمي منهم بزااااف ديال لحوايج وتشوفي كيفاش كيفكرو وغيبان ليك ديك الساعة لفرق بين المحيط ديالك والمحيط ديالهم وغتفهمي بلي ديك الهضرة ديال تواضع ما تواضع غاااا خدعة وبلي لي كيشوف شي واحد متكبر ويقول عليه متكبر راه هوا لي اصلا صغير وماااشي قد المقام ههه حيت كن كان قد المقام مغ يحسش كاااع بداك التكبر،،، وباللي ديك الكلمة ديال فلان متوااضع وشوف على تواضع وبلا بلا راه احتقااااار منك لراسك حيت نتا كبرتيه فعينيك وفاش ضحك معاك ولاكيدوي العربية ماشي فرونسي صافي راه بهرك وجاك متواضع،، ونتا اصلا فالحقيقة لي خاصك تعلي نيفو ماشي الناس يهبطو عندك باش يعجبك الحال، داك الهضرة دوالو لي كدور فهاد الطبقة مكرووهة ومرفوووضة فداك المحيط ويا اما تعلي شانك ولا دور تق. من اللخر رجع فين كنتي،،، ديك الساعة نتي غتبداي تقاتلي باش تولي بحالهم كما هما مقاتلين باش يبقاو فنفس النيفو والحبة والبيرو هما ليكيخليوك دخلي بيناتهم ،،،علاش انا بغيت نموت ونشري الاودي ديك لكبيييرة ،،، حيت انا باغا نخشي راسي فداك المحيط صحا على مهم وباغا نولي وحدة منهم ماعاجبنيش هاد نيفو مابغيتووووش باغا نطلع لفوق وخاصني دابا علاش نركب شي حاجة واو حيت هي لي غتمشي وتجي معايا ويشوفوها .. ولا ندير بناقص ونشد الارض ونشوف ونسكت منقولش سعدات فلانة وسعدات فلان،، لااااا انا باغا نطلع عاجبيييني عاجباني حياتهم مغنفرضش كاع عليهم يتواضعو معايا. ااانا اختي غنتنفخ بحالهم وغنولي نخدم وسطهم ونتصاحب معاهم منبقاش نشحف راسي مع بنادم ونولي نخدم بالضوووبل نديير لاباس ونتعلم ونشوف شنو لي فايتني باش حسن مني فاش ينفعوني ونبدل هاد العقلية دلخرا لي عندي طلعات ليافراسي ونقص من لغوات ونهضر للغات
رانيا: ومالك ماتعيشيش عااادية وتهني راسك؟
سكينة: ضربات الطبلة) أ لاااا انا عزيز علياا العداب ، باغانحضر لعراساتهم باغا نعيش بحالهم باغا نبان للي بحالك واعرة ومتكبرة واخا انا ماشي متكبرة نتي كن مكنتيش ختي كن قلتي عليا متواااضعة غاحيت هضرت معاك
الهضرة دسكينة وتفكيرها لاا يتواقف نهائيا مع رانيا ، رانيا هي العقل والتباتة شخصيا لا تدعي القوة وسبحان الله مرضية ومهدية من عند الله وأملها فالله كبير ولي داز عليها مااشي ساهل؛ واخا هوا درس مهم باش تكون متساوية ماشي نية وماشي سيئة الظن ، كتسمع لسكينة وكتاخد منها لي يناسبها فقط والباقي كترميه وحسها مكيتسمعش وحتى غالي كيعجبو يتناقش معاها ،، راسها تبارك الله عامر وواخا كتبان عديمة الوجود بيناتهم فديك العائلة لاكن هي اكثر وحدة مثقفة من بعد غالي دينيا وفنيا وعلميا وطول الوقت كتقرا وتبحث ومنغامسة فالمفيد ، فالاونة الاخيرة رجعات تقريبا ساكنة مع سكينة وغالي لان الدار دباها بعيدة وهي خدامة فالروض فكانت كتجيها قريبة وكتعاون حتى سكينة فالدار واخا كتجي المرا لي تجمع لاكن كان وجود رانيا بيناتهم مهم، على الاقل كترد لسكينة عقلها مرة مرة وتنصحها وتهندنها وفنفس الوقت مونساهم ومعمرة عليهم الدار
رانيا: راجعة مع سكينة فالخرشاشة) واقيلا غا نرجع ندير حتى انا السوايع بالليل
سكينة: غتعياي مكيسخفوكش البراهش
رانيا: انا كيسخفني الزلط ، راه طالب طبيب دسنان جوج دلمليون باش يزرع ليا ماعندي منين نجيبها، باغا نقاد غير سناني عشت المعانات مع هاد السنان
ىانيا: واديريهم شكون حبسك
رانيا: قوليها لغالي فلعشية
سكينة: غالي معروض لواحد العرس
رانيا: مغتمشيش معاه؟
سكينة: مابغاش قاليا غيمشيو غير لي خدامين معاهم حتى واحد مغيدي مرتو
رانيا: صافي حتى لغدا وقوليها ليه
سكينة: خليه يمشي يخضر عينيه شوية هههه كوراه رجع كيشوف غير ابيض وكحل
رانيا : انا غنمشي ندوش ونعسسس فيا الموت دالنعاس
سكينة: انا خدامة الليل غنحطك ونمشي تابعني شلا ما يدار
حطاتها حدا باب العمارة ويالاه غضرب الدورة شافت غالي جاي من المصبانة هاز اللبسة ونزلات كتفرنس زدحات داك الباب حتى تقرقب وطلعات معاه كضحك
سكينة: هاي هاي موجد البيييدلة فرحاااان غادي للعرس غييير نتا وصحابك ارا ما تحنززو ،،، شلا ترامي امولاي التهامي
غالي: ااسييير براكة من الهضرة لخاوية
سكينة: تعلقات فكتفو) دابا برجوووولة الى شي نهار درتي لاباااااس تزوج الثانية؟؟ حيت الفلوس كيحلو العينين
غالي: ببرودة) لا
سكينة: ااايهاي هاي هاااي زعما الفلوس مترررشة متبغيش تعدد
غالي: علاش غنتزوج الثانية؟؟؟ … غنتزوج الثالتة والرابعة
سكينة: هااا؟!!!
غالي: ههههه وعلاش الثانية صافي نتزوج ربعة هه ياك الفلوس كي الروووز
سكينة: هييييه هخخخخخخههه ياااك اولد لحرراااام اجي لهنااا ههههه
غالي: كلا وجهه بيدو) ومالكي مانتبرعش الفلوس كاينة
سكينة: بتخمين) لاااا تبررررع ههه اصلا ماتجي فين دير لاباس حتى تكون شرفتييييي مايبقا عندي ماندير بيك انا نزوجك
غالي: ايااااه!!!! دابا عندك ماديري بيا؟؟؟ !!!
سكينة: دوزات يدها على شعرو ) دابا باقي بوكوص نتمتتتع ماحدك شباب اما فاش تشرف غيبقا فيك غير النكير اللهم سير تزوج دوك الربعة يهزو لك هبالك
غالي: ايييه هاادا هوا الحب
سكينة: نهار تفكر تزوج عرف راسك هترتي وغنعرفك انا مابقيتي لا كتحب ولا تا لعبة منديش عليك ديك الساعة الشرررف صعيييب هههه
طلع للدار بدا كيلبس ويبدل وتفكر تقول عريس ووقف قدام المرايا دافع صدرو كيقاد الصدايف ويرش الروايح،، طلات عليه من الباب شافتو واخد راحتو كيتقاد وصغرات عينيها كتشوووف فيه وقالت
سكينة: اداك بوراس شكون باغي تعجب؟؟؟
حشم وجاتو الضحكة جمعها بزز وقال
غالي: ماااباغي نعجب حد انا انا باغي غيير تيقار
سكينة: لاااالا نتا مااابنتيش ليا باغي غييير تيقار ، نتا باغي تبااان (دورات راسها كطلع فيه) اممممم وريييييحة،،، زيد زيد(غلباتوالضحكة) هاي هاي هاااي الشعر كيبري والمكاانة ،،، ايوااا السي ماتنساش راك غتمشي فخرشاااشة ههههههههههه
تشتتات بالضحك وبدا كيضحك
غالي: واييه هههه
سكينة: كنتخييلك نازل مع السانسور كتعطعط هاز خنافرك حتى لتحت كتبان عليك غادي تركب فشي بي ايييم ولا اودي ماعرفت كي دايرة فاللخر تركب فكليوة مصدية كتخرخر
غالي: جمع الضحكة) لالا غيدوز عليا واحد الدري صاحبي
سكينة : هزات حاجبها) هاااااا،، غيدوز عليك صاحبااااك!!
غالي: جاتو الضحكة) سيري وقريني عليك هاد الساعة
سكينة: خاصني نيييت نوققققرك كنبان حداك دابا كي القردة !!،، غتمشي اسيدي وتلقا التكاشط ها السفر ها الخخخخضر الشعووور غادي لبلاصت الزين مكاين غير لجيهاد ،، لي مامزوجاش جايا دايرة مجهووود مضااعف اراك للديفيلي سير واجي
غالي: اباااراكة من الخيااال واش كيحساب ليك غير لي مشا للعرس كيخرج منو مزوج !
سكينة: خرجات عيينيها) هييييه سكت سكت نتا غاا سكت نفكرك ههههه
قلب وجهه كيضحك وهز تيليفون كيهضر مع صاحبو وقطع بغا يخرج
غالي: الدري جا كيتسنا لتحت يالاه ،،
باسها فحنكها ومشا وهي كتشوف فيه مشات للسرجم كطلق لقات واحد كاط لكاط فيها واحد مخرج يدو من النافدة مفركس حتى هوا وركب حداه غالي وسد الباب حتى جلس وخرج راسو شاف لفوق ضحك وهز ليها صبعانو ومشا .
رجعات بحالها هزات تيليفون كتنهد وتصوني
سكينة: الو مراكشية صافي كلشي واجد ؟
المراكشية: كلشي واجد الدراري لابسين العمارية فالباب كنتسناو غير لعروسة واش واجدة ؟
سكينة: مزال قالت ليك حتى تقرب تسالي تعيط ليا غنمشي انا لبسها مهم انا فالدار غنبدل حوايجي ونجي
قطعات ومشات لبسات دجينز واسع من لتحت وحداء رياضي وسترة بالكول والجياب وسنسلة خفيفة باش تتحرك مرتاحة ودارت شوية دالمكياج بانت الاناقة فالبساطة ،، ساعة يدوية وشعرها دخلاتو تحت السترة للجنب مرخوف ونزلات ركبات فالطموبيل كتزدح فيها مشات للاوتيل حطاتها بعيدة خباتها وطلعات عند العروسة لقات النكافات كحطو الحوايج ولبسوها وخرجوها داوها فطموبيلتها وسكينة مركبة النكافات كمشاتهم اللور كل وحدة قدها قداش غاديين للقاعة حتى صونات ليها المراكشية
المراكشية: سكينة جايين؟
سكينة: فالطريق وجدو راسكم
المراكشية: بان ليا غالي هنا شفتو داخل هوا واحد
جاها الفوغيغ ماتوقعاتش تلاقا هي وياه فنفس العرس وبدات كضحك ومشات للقاعة وقفات الطموبيل ورا الطنوبيلات ماراضياش بيها ونزلات وسط صلى وسلام على رسول الله ديال النكافات ديالها والدقايقية والاضواء فالدخلة دالعروسة بقات غير حاضية داكشي حاضية الشغل في حين كانت المراكشية فالصف اللول بالقفطان مع النكافات كيصليو على النبي ودخلو العروسة فالعمارية وبقات سكينة اللور كتصور مادخلاتش الوسط بقات غير فالجناب بحال ديما وبدات كتقلب على غالي بعينيها حتى بان ليها مع صحابو كيضحك ناشط وسيفطات ليه مسج
سكينة: فرحاان الزين
جبد تيليفون من الجيب ورد عليها
غالي: عاادي الواجب وصافي
سكينة: ايوا الله يكتر من امثالك الزين
سيفط ليها قلب خلاتو وطلعات تشوف الحوايج تشوف الشغل وجلسات شادة تيليفون كتشوف العروسة كي طلعات .
بقات تما جالسة حتى طلعوها ليها بدات الخدمة وللتغيير وناضات كتقاد ليها التاج والمجوهرات وكضحك هي والمراكشية
م : شاافني ماعرفنيش ههه مولف يشوفني بالفولار عمرو شافني هاكا مادا ماجاب
سكينة: معارفنيش هنا
م: مامشيتيش عندو ؟
سكينة: اويلي على نمشي عندو هوا جالس مع صحابو ونتم انا غادا عندو زعما هاانا لباطرونة ويييلي لا
م: ايوا قوليه راني هنا
سكينة: ماعندو مايدير بيا غا خليه نشوف نيت فين كيدورو عينيه
لبسو العروسة وفهمات بلي راجل لعروسة هوا صاحب غالي والعروسة بالصدفة نكفات عندها وكملات شغلها حتى هبطو العروسة ونزلات حتى هي كتشوف غير من بعيد وتصور لقات البنات على براعلى الجهد بالشعور هاك بالاك عينيهم غير كيدورو داخلين خارجين والعرس مزوهر تيتيز وتيتيزات وسمعات بالصدفة واحد جوجات كيهضرو برا
١: بلهفة)هاداك هاداك لي سميمر شوية ناااري شحال بووكوووص
٢:مزوج مزوج داير الخاتم
١: غيكون غير دايرو وصافي راه كيديروووه!
٢: واحد اخر معاهم فديك الطبلة مدايرووش
٢: شتي الى مضبرناش مع دوك صحاب لعريس والله ما فيدنا ما واالو غير نمشيو نموتو اويلي اصاحبتي جاو حتى لعندنا وعارفينهم فاش خدامين و على طبق من دهب ونفلتوهم مالنا حنا زرقات
كيهضرو ويتغبنو حايرين وكيتشاورو وسكينة كتسمع وبحال دوك الحوارات ياااما دازو قدامها فالعراسات حيت كتكون غير فالطرف كتراقب وكتسمع وتشوف عجائب وغرائب لا تحصى ، كملات وجملات فاش طلعات تلبس للعروسة وكانت معاها وحدة زوينة بتكشيطة كياكلو الحلوة ويشربو العصير ويضحكو خلاتهم سكينة وبدات كتجمع السماطي والحوايج ديال التبدال دالنكافات لي كيبدلو وبدات كتسمع حوارهم حتى هما وتجمع
العروسة: هاداك مزاااوج هههه وراه كيبني الفيلا يالاللة
البنت: كتلعب فشعرها معجبة) بصااح؟؟ مابانش ليا مزوج
العروسة: مزووج مزوج عاود ليا مراد على صحابو كاملين … جوج لي مزال مامزوجينش هاداك لي قصيور شوية ولاخر مول الازرق
البنت: متأ كااع لي زوينين ياختي كيطيرو دغيا فين ماتلقاي شي واحد فيه الضو كتلقايه مزوج ،،، وكيتزوجو غير لخايبات
العروسة: هزات حجبانها) لاخر لي عجبك راه مزوج وحدة باقا غير صغيرة صغر منو بشي عشر سنين وقالك مو مابغااااتوش يتزوجها وبزز من مو تزوجها وفايت مزوج طبيبة ومطلق .. وهي مو مقاطعين كيمشي عند مو بوحدو
البنت: واايلي!!!
العروسة: قالي مراد كيسافر بوحدو وواحد المرة سولو قاليه كتمشي بوحدك وكدا وقاليه راه ها كيفاش ها كيفاش بغا يتزوج مابغاتش وهوا بغا يتزوج وبقاو هاكاك مو فجهة ومرتو فجهة
البنت: اختي بغيت نعرف هاد البنات كيفاش كيديرو انامافهمتش ،، كيفاش كيخليو واحد يتعلق بيهم ويضحي وكياخدو الزين والخدمة وكلشي
لعروسة: كدور راسها) والصلاة والمعقول
البنت: كتخحك راسها) واييه ياختي ماهزش راسو يشوفنا حتى حنا غير كي دايرين كن راجلي انا كوراه جاي شارب وعينيه كيدورو زهري عارفاه ماشي بحال بنات الناس واليديهم كيصليو عليهم قيام الليل
ايوا شلا ماسمعات حتى بدات تقرا المعودات ودارت راسها طرشة ونزلات ورا العروسة لي مدخلينها بالتنكاف لقات نضرة بان ليها شاد اتاي وقدامو الحلوة كياكل وبدات ضحك بوحدها عارفاه عزييزة عليه الماكلة مركز معاها وكيتجمع مع صحابو وسيفطات ليه مسج
سكينة: خلي ليا حقي
غالي: دوزها ب اتاي ورد عليها) حقك فالجنة احبي
سكينة: وفالارض احبي ههههه بنينة ديك الحلوة ماكرهتيش كون حطو ليك البراد كامل
شافتو عقد حجبانو بقا كيشوف شحال فتيليفون واللقمة في فمو وردعليها
غالي: كيفاش مافهمتش
سكينة: حنا ساهلين ولا
غالي: شي واحد فهاد العرس كيسيفط ليك خباري؟
سكينة: كضحك) لاااالا مالي انا مسالية راسي ندير ليك العسة؟
غالي: وباش عرفتيني؟؟؟
سكينة: احساسي ، مالك تخلعتي سرط سرط بعدا
هز عينيه بقا كيشوف داها وجابها حتى للباب وشافها واقفة شادة تيليفون كتشير بيه وضحك وتصدم مارمشش ، بقا كيشوف فيها شحال وناض شافتو جاي جهتها وخرجات لبرا حدا الطموبيلات وقفات حتى وصل عندها مصدوم
غالي: شنو كديري هنا؟
سكينة: ببرودة) واالو خدامين هه ،، خدامة ما بيا ما عليا حتى لقيتك جالس مبند نتا وصحابك فداك القنت
غالي: علاش هادا هوا العرس لي خدامة فيه؟!
سكينة: هوا هادا لعروسة جات ريزيرفات عندي ماعرفتهاش كاع حتى جيت
غالي: علاش ماقلتش ليك القاعة فين كاين العرس؟؟
سكينة: ماقلتيش ليا كن قلتيها كن قلت ليك راني خدامة فيها
غالي: شاف الساعة) وادخلي شفتك خارجة داخلة طويلة
سكينة: راه قشاوشنا داخلين خارجين تابعين قشاوشنا نخليوهم مشتتين
غالي: اه ويالاه ردي بالك ،، بغيتي الحلوة؟
سكينة: لاالا طلعات ليا فراسي غا بالصحة
دخلات هيا وياه كيهضرو حتى للباب ومشا رجع لبلاصتو ورجعات طلعات عند العروسة جلسات و ما نزلاتش حتى وصلو للطيفور عاد نزلات باش تشوف حوايجها لي كيطلعو فالسطافيط وجمعو كلشي تعاونو عليه الدراري كما ديما وبقات غير لاغوب خلاوها ليها حتى تردها ، فهاد الاثناء كان غالي صافي ودع صحابو والعريس مور العشا مباشرة ومشا عندها صونا ليها سيفطات ليه السوارت مع مراكشية وسبقها للطموبيل تطلق ونعس فديك الركنة فين خباتها مع ما مولفش السهير والعراسات بزز باش شد راسو حتى للعشا ومشا حتى سالاو عاد مشات دقات عليه وطلعات معاه وخلات المراكشية فالسطافيط دات الحوايج للمحل
غالي وسكينة قليل بزاف فين كيتخاصمو لاكن الى تخاصمو خصامهم كيكون خايب بحال القنبولة وتفركعات ، لاكن عمرهم وصلو للمحكمة ولا وصلو للطلاق لانهم مشاركين بزاف ديال الحوايج من غير الماديات وانما مشاركين الخير مشاركين العوين وكيشفع ليهم فأي خصومة كيخلي الضمير ديالهم يأنبهم ومامتعودينش على الخصام الطويل،، حدو نهار واحد صافي كيرجعو عادي كل واحد كيرجع بلاصتو ، عندهم فكرة وحدة متافقين عليها بخصوص الاولاد انهم ميولدوش حتى يسالي داك الحساب لي باديين ديال عطيني نعطيك والسلف والبني وتستاقر الاوضاع واخا كانت سكينة مسامحة ليه فعشرين مليون لي عطاتو فقرارة نفسها لانها ولات شريكة معاه فالروض واخا ردات فلوسها لاكن كتاخد نصيب بحالو واخا ماخداماش فيه لاكن عندها فيه حق .
صبح الحال واتصال جديد فتيليفون رانيا وخبار جديدة .. شنو مازرعتي تحصد وقد ما صبرتي وتمنيتي وترجيتي تنال والله لا يضع اجر من احسن عملا
ورانيا حسنات العمل بينها وبين العبد وبينها وبين الله واصدق منها قلال بزاف ، الاتصال لي جا كأنه جاها من عند الله كيقول ليها ابشري جاك اللي تمنيتي ولي طلبتي وتسنيتي وغتاخدي حتى تقنعي واكثر كاع من لي طلبتي
كان اتصال من وزارة الخارجية وهاد الاتصال كانت فيه حكمة ربانية سبحان الله ، بحكم الشعبة الادبية لرانية فكان احتمال تنجح فالكونكور قليل بزاف لان بحال دوك الوضائف كيطلبو الناس لي قاريين اقتصاد ولي عندهم اللغات والمنافسة كتكون قوية بزاف بحكم كيدوزو ناس واعرين عندهم دكتوراه والماستر فكان من المستحيل تعزل رانيا لي ادبية وعندها فقط الاجازة!! وبين الالاف من كل المدن يهزو فقط عشرين كلهم نوابغ ورانيا الوحيدة الادبية المجازة ، ممكن لي بحالها يخدم فالخارجية لاكن البوسط ديالو كيكون على قد الحال وخلصتو قليلة واصغر منصب لاكن الكونكور لي دفعات ليه والوجهة لي تهزو فيها دوك العشرين وكانت عليها القتيلة وعصر الدماغ كانت مناصب كبيرة وعالية ودفعو فيهاحتى لي خدامين فداك القطاع نيت وباغي يطلعو لفوق، وداك العام بالضبط سبحان الله كان خاصهم ناس (arabophone) اي ناس عربيين محتاجين ليهم فداك الادارة وكانو العربيين لي دفعو قلال بحكم انهم مكيطلبوهمش فمكانوش كيزعمو بزاف وكان من حظ رانيا واجتهادها تهزات معاهم وماتهزاتش فقط من الكونكور وانما من المحيط كاامل وكانت هاديك نقطة التحول والبداية للحياة لي كتسناه ولي بغا ليها الله ولي كانت افضل ليها من الزواج لي بكات عليه الوضائف لي سعات ليهم وكان ربي مخبي ليها ما هوا اجمل وافضل واكثر مما كانت كتوقع
فرحات وماصدقاتش حتى غالي وسكينة باركو ليها لاكن هي مكانتش عارفة ان المنصب لي تقبلات فيه يعادل منصب غالي لي مهندس فالصالير وفالوضيفة، كانت كضن انها غتوضف وتخلص على حسب السلم ديالها لاكن مكانتش عارفة ان البريمات طالعين على الصالير وعندها بزاف ديال المزايا ،، حتى مشات دوزات المقابلة وبدات فليزانفوغماسيو كتعلم تقرا وشدات اول صالير عاد سرات معاها لاهي لابناصر وهبط عليهم الرزق من حيث لا يحتسبون ضهشرات ماعرفات اشنو دير لولا بناصر لي تبتها وزيرها تجمع راسها ،، كان حلمها تشري طموبيل وكانت يدها مجموعة ماشي بحال سكينة مضروبة على الشراوط ،، كانت باغا تحقق اول حلم ليها وكتمشي للخدمة فرحانة وترجع فرحانة وكلشي جا بالزربة ما جلساتش حتى تستوعب وتاخد وقتها ،، دغيا بدات الخدمة وبين ليلة ونهار لقات راسها غادية جايا حتى هي وكتقابل ناس جداد وبعاد عليها وكلشي بالمضاهر والكلام قليل وغير فلان وفرتلان بدات كتحس براسها اقل شأن منهم ومارضاتش بدات كتهز راسها كلامها قليل ماباغاش تصاحب مع حتى وحدة باش حتى واحد مايعرف عليها شي حاجة .
كانت عندها فترة قصيرة وتترسم وكانت كتسناها بفارغ الصبر ومكانتش عارفة انها ملي غترسم غيسيفطوها على برا والخرجة كتقام بالثمن غير سفرية صغيرة غتجيب منها الملاين !!
هزات راسها واندمجت مع عقول جديدة وهضرتها تبدلات وحتى شكلها تبدل!! شافت الناس بالطموبيلات ورجعات من السفر وخرجاتها جديدة، شافت الناس شراو الديور ومشات شرات فاحسن بلاصة احسن برطمة وهادشي كله فوقت وجييز قصير ورجعات عندها قيمة وسط العائلة وكلشي كيسول عليها والخطاب كتارو وبداو كيبانو لاكن العقل تبدل والنضرة تبدلات ورجعو عندها شرووط ومابقاش الزواج محور حياتها ، عطاها الله صحابات مهليين فيها فاعياد الميلاد بالمفاجآت ، وعطاها الله عائلة متشبتة رغم الضروف ملتاحمين خدمة يتمناها اي واحد فيها الفلوس حتى ترضى وفيها السفر لشحال من دولة والاقامة فشحال من اوتيل وكلشي فابور وميزات مكاينينش عند كلشي وشبعات وقنعات واعتامرات والراجل رجع ثانوي .. يا اماتاخد واحد لي بغات وكما بغات ويجي الوقت لي بغا يا إمابلاش من شريك الحياة راه لي عندها كافيها وموفيها ومغمض ليها عينيها على شحال من حاجة وحتى الى ماجاش شريك الحياة ماشي مشكل ، مآمنة انا الله عطاها ورضاها وماشي ضاروري تاخد كلشي وطمع فكلشي المهم النفسية لقات بلاصتها واستقرت ورتاحت والباقي فيد الله ،، مابقاتش غتبكي ولا تحزن ولاتشبت بشي حاجة من هنا لفوق لان الخير فيما ختاره الله وهي لقات لخير فداكشي لي عطاه ليها الله لحدود الساعة وكلشي بيديه وهوا فملكه يتصرف وهادشي لي كتحاول تفهمو لسكينة باش ماتبقاش ملهوفة على الحياة والفلوس ، حتى هي كدير اسباب وربي مكيضيعهاش ومزالة فعز الشباب وفطور البناء وغادية هي وغالي دقة دقة بعيدا على المشاكل العائلية، لقات راحتها فتيساع وبقات فيه واخا النهار الاول فالخطبة حكرات راسها وبقا فيها الحال لاكن من بعد عاد عرفات الخير فين كاين، ومن خلال ما كتسمع على المشاكل لي راها كدور بين العكوزة والعرايس من التفاهات والخوا الخاوي لي فاقصين بيه راسهم كترجع تحمد الله وتشكرو وكتزيد تعلي السد بينها وبينهم مخليا الراجل منو لمو عمرو جا قاليها الصلح ما الصلح وحتى العائلة لي دخل بخيط ابيض مالقات فين تدخل ورجل سكينة تقطعات فمرة ومابقا لا اعياد لا مناسبات لا حتى حاجة تلاقيهم بحكم الشغل لي عندهم رجع السي رشيد لي كيمشي عندهم ويعيد معاهم .
كانت هادي قصة سكينة والعبرة بين السطور والباقي غير ثانوي ،، الحياة مكتوقفش وماشي نهاية قصتها هنا ، وانما بداية لقصة اخرى ،، بداية لمستقبل جديد وبداية النضج وتحمل المسؤولية والاستعداد لتكوين اسرة والتعاون على تحقيق الاحلام وتحقيق الاهداف والاستمرار بالتضحيات والعمل والصبر والعزيمة ❤️
النهاية
شاركنا رأيك في هذه القصة 🌹