الرجوع إلى القصة
عبق الياسمين
الفصل 7 • 116 دقائق تقريباً • 13/10/2026

الفصل 7

قصة عبق الياسمين بقلم Aya Oulaaidi على Qisatok
قصة عبق الياسمين الفصل 7

تعصب بزااااف و تنيرفا….. عرف راسو عورها بهضرتو و بعصبية ضرب الكرسي برجلو تتلاح….. لبس جاكيط و سبرديلة و نزل للاستقبال طلب منهم يصونيو لرجاء تنزل و فعلا مكانتش عشر دقايق تا هبطت بلباس ديال الرياضة بارز طايتها المنحوتة هابطة ضاحكة…..

وصلت عند محمد اللي كان جالس فلفوطوي كيهز فرجليه و يقشر فشنايفو معصب وصلت عندو يله بغا يمد ليها يدو زربات عليه بلابيز…..

رجاء: صباح الخير كيف صبحتي

محمد:(بضحكة صفرة) مزيان شكرا نتي صافا

رجاء:سوبير مغسي

محمد: دايمة ان شاء الله المهم بغيت نقولك بيلا مغنقردش نمشي معاك انا و ياسمين

رجاء:(جمعت ضحكتها) ولكن علاش ياك لاباس

محمد: غير ياسمين صبحت مريضة شوية مقدرتش تخرج

رجاء:(صرطت ريقها بفقصة و دارت ضحيكة صغيرة اما فداخلها محاملاش) ايوا صافي ماشي مشكل نعوضوها مرة اخرى قوليها الله يشافيها

محمد:(ابتاسم ليها) ان شاء الله اي بون جوغني (نهارك مبروك)…..

مشا و خلاها جالسة تتمص فالحامض و تلعن فياسمين اللي عرفتها ما مريضة ما والو غير دارتها بلعاني و حرمت عليها الخرجة بالحق حلفت فيها حلفة ماتخليها فيها ولا تخليها تهنى…..

طلع محمد طالع ليه الدم لحد الآن مازال مفاهم المشكل اللي عند ياسمين مع رجاء كيشوفها بنت مزيانة ضريفة و بغات غير معامن دوز الوقت…. دخل للبيت لقاها مخشية ففراشها تيتسمع غير صوت نيفها….

عرف بيلا بكات تاني تا قنعت….. عزت عليه و عرف راسو قسا عليها بزاااف مشا لعندها ريح حداها و جر الغطا تا بان ليه وجهها سارد بالدموع و العوينات حمرين منفوخين بلا الشعر اللي لصق على وجهها….. نزل لعندها باسها فخدها و خشا وجهو فعنقها كيطبع قبل و يهضر…..

محمد:سمحي ليا حبيبتي مقصدتش نقولك ديك الهضرة راك عارفا راسك تتهميني و بزاااف و متحتاجيش تسولي وااا صافي سمحي لحبيبك

ياسمين:(تهزت شوية حتى جلست شافت فيه دموعها دايزين و بغفلة منو تلاحت عنقاتو بجهد خاشية وجهها فعنقو تتبكي و تهضر) اهئ اهئ تا انا سمح ليا اهئ انا معمرني شكيت فيك انا مابغيتش يدخل بيناتنا شي واحد بغيت نكونو غير بجوج بينا سمح ليا

محمد:(خدا وجهها بين يديه) شششش صافي سكتي من البكا موقع والو دابا نوضي لبسي حوايجك نمشيو انا و حبيبي نديرو اللي بغااا انا منقدرش نخلي حبيبي مقلق

ياسمين:(تبشر وجهها و ضحكو عويناتها) كنبغيييك بزااااف كنموت عليك (قربت لشنايفو و كانت البادرة هاد المرة منها فقبلة رقيقة مليئة بالمشاعر)….

تبادلو قبلتهم بالشوية و بكل حب و مكاين ماحسن البوسة اللي بعد مخاصمة او بكا تتكون بوسة رقيقة و فيها بزااف ديال المشاعر كيحاول كل طرف يوصلهم للثاني…..فصل محمد قبلتهم و عنقها عندو تيحاول ياخد منها الطاقة و يمحي شوقو ليها لأنها كانت ليلة بألف ليلة….

لبست حوايجها عبارة على كسيوة فوق الركبة بالشوية سخونة فالبلو مارين عندها كول بيض مع ليبا موس كحلين و بوط قصير فيه دي ديتاي فسيلفر….. طلقت شعرها و جمعت غي زغيبات من القدام…. دارت ايكرون و عكر خفيف دارت منو شوية فحنيكاتها يزنگهااا مع نظيظراتها ديال الشمش و ساك صغير……

سالات لقات محمد واجد كيتسنا فيها بجينز زرق و شيرت بيض و كويرة كحلة و سبرديلة بيضة حتى هو داير نظاظرو….. خرجو ضاحكين من البيت فرحانين….. هبطو و خرجو نيشان معولين يفطرو برااا غافلين على العينين اللي شافوهم ملي نزلو حتى خرجو…. و العافية شاعلة فيهم…..

فاقت شيماء هاد المرة بكري معولة دوز نهارها براا ماعندهاش الخاطر اللي يتحاك مع زبيدة….. لبست و تقادت و خلات ايوب ناعس و خرجت تطقطق فالطالون….. مشات للكوزينة تشرب لقات زبيدة واقفة على الفطور…. قلبت وجهها و قالت بغير نفس…..

شيماء: صباح الخير اخالتي

زبيدة:(دارت عندها) صباح الخير (طلعت فيها و هبطت) شفتك لابسة و مقادة فين غادة على الصباح

شيماء:(عقدت حواجبها مرضاتش تسولها فين غادة) خارجة عندي شي غراض

زبيدة:مممم و راجلك علمتيه ولا الراجل ناعس المرا خارجة دور

شيماء: شنو بغيتي تقصدي (هزت حاجبها)

زبيدة:(دارت عندها حاطة يديها فجنابها مخنزرة فيها) اللي بغيت نقصدو راك فهمتيه داك خيطي بيطي بلاش منو جلسي و قابلي راجلك و دارك مناش زوجتو باش نشقا علك و عليه

شيماء:(رمات ليه ضحكة استهزاء) واخا صافي (دارت غادة)

مشات شيماء تتمختر مخلية زبيدة غتاكل جنابها بالفقصة…. كتغلي و تدوي غا بوحدهااا كتسنى فيه غايفيق….. و فاق سي السيد ملقاهاش عند بالو غيلقاها فالكوزينة….. ناض على خاطرو دوش و تقاد و خارج كيتفطح تا لقا مو فالكوزينة جالسة تتفطر مخنزرة و خاصها غا معامن….. نزل باس ليها راسها و ريح حداها….

ايوب: صباح النور الوالدة فين واحد شيماء

زبيدة: نسولك نتااا اللي واخدها مالي انا اللي واخداها

ايوب: كيفاش تاني هاد الهضرة

زبيدة: ايوا راه صبحت على بونبير لابسة و مقادة و قاتلك خرجت عندها مايدار….

ايوب: كيفاش تاني هاد الهضرة لاش معلمتنيش اش هاد الخرا على الصباح تاني

زبيدة:گاااع اللي كان لك حكام و قبح رجع لك فزيرو مع هاد خيتي اللي جبتي تتجيب غا المصايب تا الزواج متعرف تزوج اوليدي والو (دارت ليه بيدها زيرو)

مجاوبهاش ناض كيغلي جبد تيليفونو هابط فالدروج كيصوني حتى جاوباتو….

ايوب: الو فينك

شيماء: هاني فالصالون علاش شكاين

ايوب: ربع ساعة نلقاك قدامي فكافي ****

شيماء: اويلي حماقيتي مازال ماساليت

ايوب: هضرت سالينا ربع ساعة منلقاكش عندي نتفاهم مع عدو ربك (قطع عليها)

بقات مصدومة كتشوف فتيلي…. كانت تتصاوب فظفارها شافت فالبنت قدامها و قالت بعصبية….

شيماء: سربيني الله يخليك خرج ليا واحد الغونديفو عندي دي مينيت

نجلاء:(صاحبتها و البنت اللي مقابلة الصالون كانت جالسة حداها) مالك اصاحبتي شعندك واش راجلك

شيماء: اه اختي قالك ربع ساعة نكون عندو مشكلني

نجلاء: ايييه يا صاحبتي گاااع اللي كان لك قصوحية و قفوزية جا عند هدا و حدهم ليك هههههه

مجاوبتهاش شيماء لأنها اصلا مكانش عندها باش تجاوبها و هضرتها ضربت فالصميم….. سالات ليها البنت ظفارها و خلصت عاد خرجت مفقوصة تا شعرها ما صاوباتو…..

عرفات مو غتكون قادت ليها الدقة مزيان و تيقنت انها مكتلعبش مع شي وحدة ساهلة بالعكس عرفت ان زبيدة عارفا و حافظة سواريها…..مشات للكافي اللي قاليها اللي مكانتش بعيدة على الصالون لقاتو جالس فطيراس اللي على برا….. وقفت عليه يله بغات تريح وهو ينهض فيها….

ايوب: تگعدي ماعندك فين تجلسي غنتحركو (حط الخلاص و ناض لطوموبيل تسناها تا ركبت عاد ديمارا حاط يدو تلى فمو)

مشاو فصمت فجيهة البحر حتى وصل لواحد البلاصة حدا الصخر خاوية فيها بعض الصيادة بعاد عليهم…. وقف الطوموبيل و دار لعندها…..

ايوب: ضسرتي امدام و وليتي تديري لي قالها لك طانطو ديالك كيصحاب لك انا خوتك ولا باك

شيماء:(خرجات فيه عينيها) كيفاش ثاني هاد الهضرة اشمن ضسارة و اش وصل خوتي و با للهضرة باش تجبدهم

ايوب:(مد يدو شدها من فكها و زير عليه تا حست بيه غيتقطع) نجبدهم و نعايرهم و يدك فوق راسك كون كانو رجال متلعبيش ورا ظهرهم ولكن انا ماشي هوما باش تخليني ناعس بحال **مل و تخرجي ***بني نقتل عدو ملة شعب مك و نمشي فجنازتك

شيماء:(دمعو عينيها بالتزيرة و قالت بألم) صافي غير طلق عفاك حرقتيني

ايوب:(طلقها بالزعفة حتى مشات و جات) مي عليك بالاحترام تقولك موتي فأرضك تموتي سمعتيني ياويلك و نسمعها كتشكا منك الخرا ديال والو حمدي ربك حاملة اما نهلك حياة مك عصا **وين ديال والو…..

ديمارا الطموبيل و زاد تيسمع فشهقاتها تيخرجو….. ايه شيماء تتبكي و شكون اللي بكاها الراجل….. للحظة تمنات ترجع ليلة وحدة من ليالي منير….. ترجع معاملة منير ليها اللي كان تيحتارمها و يبغيها و عمر كلمة العار سمعتها منو…..

وهي باش كانت كتجازيه….. المعيور…. قلة الاحترام….. فالطلعة و النزلة مك مك مك….. بالرغم من ان مو مرة صحيحتها على قد الحال و كانت غير ساكتة…. عطاتها تاكل هي هاديك معطاتهاش متسمعش اه من فمها….. لكن للأسف الانسان بطبيعتو هكا….. مكنبغيوش هداك اللي كيحتارمنا و يبغينا و يقدرنا….

هذاك كنحگروه و نعفطو عليه….. تنبغيو هداك اللي تيبهدلنا و يقمعنا و يمرمدنا….. هداك تنموتو عليها….. و كيما خلاها الملك الراحل الحسن الثاني الله يرحمو “جوع كلبك يتبعك” مقولة تتلخص واقع العلاقات بين الناس……

فاق يوسف على دقات خفاف فالباب دار جيهة حنان لقاها ناعسة و خاشية راسها فعنقها تتبان مهدودة…. بالسيف وهوما الليل كلو خدامين عزت عليه يفيقها قاد عليها الغطا و ناض حل الباب بالشوية لقاه محمد امين كيشوف فيه بعويناتو بريئين….. هبط هزو بالزربة باسو و زاد بيه لجيهة الكوزينة…..

يوسف: صباح النور البطل ديالي نعستي مزيان

محمد أمين: اه ابابا نعست مزيان و حلمت بيك و بماما حنان فيناهيا جعت (دوز يدو على كرشو بطفولية)

يوسف:(ضحك و باسو بقوة فخدو) اححح على البطل ديالي ماما حنان ناعسة غنمشيو انا وياك دابا نجيبو الفطور عاد نفيقوها ياك…..

مشا لبس حوايجو و لبس ولدو مزيان على البرد عاد خرجو يقلبو على شي باتيسري يشريو منها الفطور…. فديك الاثناء فاقت حنان مهدودة تتحس بعضامها تيحرقوها….. مع بغات تقاد فالجلسة ضربها الضو فتحتها خرجت عينيها بألم…..بزز باش ناضت المشي ماقردتش تمشاه فينما تحركت كتحرق…..

كمشت وجهها بألم و استغراب….. لاحت عليها بينوار و جمعت شعرها عاد دخلت بزز لطواليط….. قلبت كيلوطها لقات فيه نقيطات ديال الدم صغار باينين ماشي ديال الدورة…..عرفت راسها تحردت…..

جبدت جيل انتيم تغسل بيه…..يله دارتو شعلت فيها العافية حرقها بزاااف فالبلاصة غسلت و خرجت تتعكز محاملاش راسها…. عيطت عليهم بصوت خفيف مجاوبها تا واحد و حتى الخروج مقدرتش تخرج….. رجعت لبلاصتها و العافية شاعلة فيها كرهت الساعة اللي نعست معاه فيها…..

ملي كان دمها سخون محستش كانت مستمتعة تال دابا عاد سرا معاها القالب….. تكات تتبرد على راسها بعضان شنايفها حتى رجعتهم گاع دم….. بقا ليها غا البكا تاهو دمعو عينيها…. دخل يوسف محمل تابعو محمد امين كيشرب فعصير…..

حط داكشي فالكوزينة مستغرب من حس حنان اللي مقطوع….. شغل لولدو الرسوم و مشا للبيت….. بانت ليه متكية عند بالو ناعسة تا سمعها كتشخشر….. حيط عليها الغطا لقاها مكمشة وجهها بألم و الدموع دايزين مع يوسف…..

عبدالله: مالك احنان لاش كتبكي واش مريضة (ريح حداها)

حنان: غنموت الألم بزاااف

يوسف: علاش مالك فين الألم نوضي جلسي بعدا (بدا تيقاد فيها باش تجلس تا غوتت)

حنان: اااااااه مقدرتش مقدرتش (حطت يدها على تحتها)

يوسف:(شافها فين حطت يدها) واش كيضرك تحتك واش ليغيگل

حنان:(هزت عينها فيها بشوفة أليمة) تحردت ايوسف مقادراش تا نتحرك كنتحرق

يوسف: فورصيت عليك احبيبة سمحي ليا (نزل باسها فجبينها) غنمشي دابا نجيب لك شي دوا بقاي مرتاحة…..

مشا هز محمد امين مقدرش يخليه ليها و هي مريضة….. مشا لأقرب فرماسي لقاه شرح ليهم الوضع و عطاوه بومادا و كينة….. رجع تاني للدار قاد قهوة بحليب و قاد داكشي فبلاطو داه ليها لقاها تقادت فالجلسك و تتبان مألمة جالسة عوجة….. جلس حداها و حط لبلاطو فوق رجليه باش يفطرها….

يوسف:(حط يدو على خدها بحنان) سمحي ليا احبيبة محنتك (خدا يدها باسها اما هي مقدرتش تجاوبو بقوة الحشمة) يله فطري باش تاخدي دوااا…..

عطاها فطرت بديك الجلسة نيت هي اللي ارتاحت فيها تا سالات و نوضها بشوية لطواليط..

حنان:(شافتو داخل معاها) فين غادي ايوسف صافي هاني نكمل بوحدي

يوسف:(شاف فيها هاز حاجبو) منيتك زيدي ندير لك الدوا زيدي…..

مخلاهاش تهضر ضربت الطم و وجهها بحال شي مطيشة…..دخلت نصلت سروالها حشمانة درقت عليه تا غسلت بالماااا باااارد واخا عارفة راسها غتمحن ولكن الما بارد هو اللي برد عليها العافية اللي شعلت فيها…..

كتنشف تا دار عندها بلا حشمة بلا حيا نظراتو عادية جبد البومادا….. جلسها و فرق ليها رجليها….. جبد تيليفونو دار البيل يله بغا يشوف وهي تجمع حنان رجليها بصعوبة…..

حنان: لا ايوسف ويلي لا عفااااك مديرش هكا

يوسف:(شافيها لقا وجهها حمر و عينيها مغرغرين بقوة ما حشمت) الله يهديك احبيبة واش حنا دابا فالحشمة خليني ندير لك الدوا (بغاات تهضر) شششش تا كلمة….

ضوا بالبيل على مهبلهااا بان ليه حمر بزااااف و باين مسلوخ….. عرف راسو كحلها و فورصا عليها بزاااف و حتى هي محساتش ملي كان مازال الدم سخون فيها حتى بردت و نشف اللحم عاد تشكرف عليها…..

ناض غسل يدو مزيان بالصابون و الما حتى تعقمت عاد خدا البومادا….. حطها عليها باردة حتى قفزت غير بدا كيدوزها وهي تولفها و ستحلات بروديتها….. شافت فوجهو لقات نظراتو عاديين بحالا كيداوي ليها غير فيدها….. مداير حتى حركة بوجهو او شي حاجة هكا…..

ابتسمت بلاما تحس و حست بقلبها كينبض بعنف….. يقدر يبان لينا جيست عادي و دايز بحال خوتو…. ولكن بالنسبة ليها هي حاجة كبيرة و عميقة…. بالنسبة لإنسانة محرومة من الحنان….. انسانة محرومة من الحب…. انسانة كان عندها نهار واحد فالشهر تتحس بيه راسها بنادم هو النهار اللب تتجي فيه واحد الجمعية كتجيب ليهم حوايج و ماكلة و تيحنو فيهم شوية……

انسانة عاشت فالجحيم و حتى ملي خرجت ظنت ان معاناتها سالات لكن كانت عاد بدات….. انسانة بالنسبة ليها الحب و الحنان غير خرافة و قصة خيالية كاينة فالقصص و الافلام…. انسانة عاشت مع كلب ماكان كيفلت حتى فرصة باش يذلها و ينقص منها و يطيح بيها……

جاتها غريبة معاملة يوسف ليها….. ولكن زاد كبر فعينها و زاد قلبها بغاه و ارتاح ليه….. رجعت للواقع ملي سمعت صوتو داوي معاها..

يوسف: تنشف شوية البومادا و لبسي حوايجك….

حركت ليه راسها بالايجاب و مشا هو غسل يدو مرة ثانية فحين هي بقاات تا حست بيها بردت شوية وهي تلبس…. ناضت عادي مع ديك البومادا مبقاتش كتحس بالألم لبست و بدات خارجا تا لقاتو كيقاد فالسرير ضحكت و قربت تال عندو و بغفلة منو تلاحت عنقاتو بالجهد…. تصدم فاللول لكن ضحك و بادلها الحظن هاشي نيفو فشعرها كيستنشق ريحتووو….

حنان: شكرا بزاااف حيت بنتي فحياتي و ضويتيها عليا معرفتش شنو غنقولك ولكن هدشي اللي كدير معايا عمرني ننساه

يوسف:(باسها فراسها و قال) نتي راك حمقة دابا نتي طرف مني و مسؤولة مني مرتي و بنتي و حبيبتي و كولشي…..

جوابها كان قبلة طبعتها على صدرو بحب…. ضام عناقهم لمدة حتى خداو كمية من الطاقة الإيجابية الكافية لكل واحد عاد بعدت عليه…. مشات بدلت حوايجها بسيرفيط سخونة و خرجت لقات محمد امين كيتفرج مشات عندو عنقاتو حتى هو و لعبت معاه شوية عاد ناضت دير الغدا….

كتفكر شنو غدير تااا ضربت ليها فراسها الرفيسة…. تشهاتها و تفكرت وحمها اللي جاها عليهااا و عمر زبيدة مادارتها ليها ولا خلاتها ديرها…. طردت دوك الأفكار من دماغها و قلبت على المقادير لقات شي حوايج ناقصين…..

عيطت على يوسف اللي كان جالس مع ولدو….. مشا لعندها لقاها كتقلب فالبلاكار لصق عليها من اللور و عنقها عندووو…. لصقت مؤخرتها على عضوو تا حست بلمستو…. حط يدو على كرشها و دفن راسو فعنقها كيطبع بوسات دافيين…..

عارف راسو مغايدي منها لا حق لا باطل بحيت مقصحة و ميمكنش لكن مقادرش يمنع نفسو عليها….. كل انش فيها كيغريه و تفاصيلها كاملة تتعجبو و تخليه طالب فيها و باغيها….. تهرت و ضحكت ناسية اش باغا تقول…. حتى مد يدو لثديها حط يدووو علييه من الفوق و ضغط….. حشمت و تلجم لسانها مدة عاد قدرت تهضر…..

حنان:يوسف سمعني (كيعنكشها فصدرها) ههههه وااا هدااا (قرصها حتى غوتت) اااااه هدااا يوووساااف راااه واللهما ملصقاه

يوسف:(ضحك و يديه خدامين) هههههههه عندك الرطوبية العفيريتة (حل السنسلة ديال السيرفيط) دوري لعندي بعدا نشوف.. (دورها لعندو وجهها غيطرطق بالحمورة و حابسة الضحكة بالسيف هبط السنسلة و بانت لابسة غير الديباردو و السوتيان تيبانو طالعين و فرقتهم تتشهي) اش هاد الحلاوة فيك غا قولي ليا دابا نشد كونجي ولا كيفاش….

حنان:(ضحكت تطلع فالسنسلة) ههههه هادشي اللي عطا الله (طلعتها كاملة خلاتو غير كيبرقق فعينيه)

يوسف: طلعتيها غاااا بلاتي تبراي و غتنزليها بيديك حرمتينا اودي و حنا جيعاااانين

حنان:هههههه شوف هانتا تلفتيني (دارت تتقلب) بغيت نصاوب الرفيسة ولكن مكاينينش المقادير ههههههه هدا (تطرطى بحيت تيهر فيها)

يوسف: ابتي زهري كافر شدي وكان قيديهم فالميمو (عطاها التيليفون و مشا يلبس)….

شعلت التيلي لقاتو داير فالفون ديكخون تصويرة شداتها ليهم نسرين فاللقطة اللي باس ليها جبهتهاا…. عجبتها الصورة ضحكت و مشات كتبت ليه المقادير كاملين…. خرج جابهم ليها و بدات خدمتها مخلياه هو و ولدو خرجو للثلج يلعبو…..

عند ياسمين و محمد اللي خرجو فطرو برا شوية تا وقف محمد فواحد الشارع فيه الحوانت و البوتيكات بزاااف…. استغربت ياسمين و لكن نزلت ملي نزل…. قبط يدها و بدا غادي و شاد تيليفونو حتى وصلو للواحد الحانوت صغير شوية…..

مع الدخلة تيبانو ليها التصاور فالحيط ديال ناس واشمين بزااف و بحال دوك عبدة الشياطين….. و وبنات و ولاد جالسين…. عقدت حواجبها باستغراب و بقات غير ساكتة تتشوف اش باغي يدير….. مع دخلو وقف عليهم ولد لابس بيل نص كم كلو واااشم مكاينا حتى شي بلاصة مواشمهاش….

دوا مع محمد بلونغلي شوية عاد تبعوه…. و هوما غادين دارت ياسمين عند محمد اللي غادي و داير ابتسامة زوينة على طرف شفايفو….

ياسمين: محمد فين جبتينا اش هاد البلاصة

محمد:زيدي و غتفهمي…..

دخلو لواحد البيت حتى هو بحال المحل عامر تصاور فيه بيرو و كرسي محطوط فوقو بيسي امبريمونت و شلا وراق…. و كرسي بحال ديال الدونتيست حداه بزاف ديال ليزاباراي و عاد باياس حتى هو حداه طبيلة فيها شي معدات…..

دوا الولد مع محمد بلونغلي باش يجلس….. جلست ياسمين فالكرسي ديال البيرو تدور فعويناتها جاها المكان غريب و معرفتش ديالاش ولاش جاو و حتى محمد مشبعش فضولها…. بان ليها محمد جلس فالكرسي اللي قادو ليه الولد حتى جا متكي…. حيد الكويرة و تبعها التيشرت و بقا سفاحي….. لحد الساعة ياسمين غا تتشوف ما فاهمة والو….. شعل الولد واحد البولة و خدا قطن و قريعة عمر داك القطن مزيان و مسح بيه صدر محمد من الجيهة اليسرى فوق القلب نيشان…..

مسحها مزيان و عاد خدا ورقة مكتوبة فيها شي حاجة مع رسم….. حطها على البلاصة و دوز فوقها بقلم حتى طبعت فصدرو….. حيدها و بانت لياسمين كتبة و رسم لكن مفرزتش…. جاتها فكرة لبالها ولكن طردتها حيت قالت ميمكنش يديرها….

خدا الولد بحال ستيلو كحل غليض شوية مبرونشي مع ضو…. دارو فواحد القريعة كحلة صغيرة و بدا تيعاود فوق ديك الكتبة….. كتسمع ززززززز و الولد مركز مع خدمتو اما محمد مرخي لكن ملامح وجهو كانت كتبين الألم….. شافت ياسمين حتى عيات و جبدت تيليفونها كتقلب فيه حتى سمعت الولد داوي مع محمد…..

هزت راسها لقاتو حط داك الستيلو و هز قريعة تتخرج الرغوة دارها ففاصمة و حطها على هداك…. خرج الولد مخلي محمد متكي فبلاصتو مغمض عينيه حتى وقفت عليه ياسمين….

ياسمين: شنو داكشي درتي امحمد شنو كان تيكتب ليك

محمد:(ضحك ليها و خدا يدها باسها) دابا تعرفي يا روح محمد

ياسمين:(شافت البلاصة لقاتها دايرا بيها الحمورية) علاش هاد البلاصة حمرة قوليا دابا عفاك

محمد: و صافي هانتي غتعرفي غير ريحي…

رجعت لبلاصتها تتسوط مكاملاش خمس دقايق دخل الولد هاز قريعة اخرى بحال الجيل…. حيد ديك الفاصمة و مسح ديك الرغوة حتى بانت ديك الكتبة بوضوح…. هز قطن دار فيه داك الجيل و عاود مسحها مزيااان عاد بانت بوضوح…..

ناضت ياسمين قربت حتى كتبان ليها فصدرو و فوق قلبو مباشرة رسم زوييين او وشم عبارة على اسمها “ياسمين” مكتوبة بخط عربي جميييل بزاااف و زايد مزينها التاج اللي جا فوقها من الجنب….

وسعت عينيها و حلت فمها تتشوف فالوشم اللي كان كبير و شاد الجهة اليسرى ديال صدرو تقريبا كاملة و الاكثر إسمها….. طريقة زوينة باش يعبر على حبو ليها اللي فاق كل التصورات….. توقعت حتى عيات و متوقعتش منو هاد الجيست….اللي قدما بقا فيها و عارفاه حرام ولكن مقدرتش تنكر انه حمقها و خلا قلبها ينبض بعنف……

عينيها كينتاقلو من وجهو اللي راسم على محياه ابتسامة جامعة حب و فرحة و شوق…. للوشم اللي طير ليها العقل…..

ياسمين:(حاطة يدها على فمها من شدة الصدمة) زوييين امحمد بزاااف ولكن…

محمد:(قاطعها قبل ما تكمل) عارف شنو غتقولي احبيبة ولكن مقدرتش منديروش هادي اقل حاجة نديرها….خاصك ديما تبقاي حدا قلبي

ياسمين:(دارت ملقاتش الولد) مخليتيش ليا منقول والله واش زعما تتبغيني لهاد الدرجة

محمد:(بغفلة منها جرها حتى طاحت جالسة فوقو حاطة يديها على صدرو العريان و عينيها فعينيه قال بصوت هامس) وكثر اياسمين تيقيني ايلا قلت لك مبقيتش كنبغيك وليت كنعشقك مريض بيك نقدر يلا مشفتكش ولا مدوزتش معاك نهار ميدوزش معرفتش شنو درتي فيا تا وليت مدمن عليك و هادي قلييييلة معرفتش شنو ندير باش نبين لك حبي….

ياسمين:(شافت فعينيه بواحد النظرة عمييييقة شوية حتى لمع خشاوة فوق عينيها كانو دموع كيعبرو على مشاعرها و على نفسيتها فهاد الحالة) انا معرفتش والله معرفتش واش نستاهل هادشي كامل منك

محمد:(حط صبعو على شفايفها) ششششش نتي تستاهلي تعاملي كيف الملكة نتي راه نور حياتي و قلبي الشميعة اللي جات و ضوات عليا…..

جوابها مكانش بكلمات بل قربت ليه و كانت البادرة منها هاد المرة باش تاخد شنايفو بقبلة رقيييقة تتعبر بيها على جوابها…. فالبلاصة حط يد فخدها و بد فخصرها و جرها ليه كثر طالب فجرعة عسل ريقها اللي متيشبعش منو واللي تيرجع فيه الروح….

سمعو حركة حدا الباب و بعدو كينهجو ضاحكين….. ناضت من فوقو مخلياه كيلبس تيشرت ديالو حتى نقزت و قالت….

ياسمين: محمد حتى انا بغيت

محمد:(دار عندها كيهبط فالتيشرت) شنو بغيتي

ياسمين:(سبلت عويناتها) بحالك حتى انا نوشم

محمد:(خرج فيها عينيه) كيفااااش

ياسمين: عفااااك احبيبي عفااااااك حميمتك

محمد:(كيلبس فكويرتو) هبلتي نتي زيدي قدامي

ياسمين:(جلست) والله ما نوض لك من هناااا تنديرو عفاك غير حرف

محمد: انا اللي ضاربني الله تا جايبك معايا يله زيد تي نوضي راه لا هي لا (ربعت يديها و عقدت حواجبها و عطاتو بالظهر) واااا ماعندك ماديري بيييه احبيبة

ياسمين: بغيتوووو مسوقيش مسوقيش عفاااك امحمد طلبتك

محمد:(دوز يدو على وجهو) لا حول ولا قوة الا بالله اش باغا توشمي يله الالة قولي نشوف

ياسمين: انوريك (حيدت شعرها دوزاتو للجنب و حط يدها مور وذنها بين عنقها و وذنها) هنا بغيت ندير قليب وسطو M عفاااك زوينة

محمد: لا زوييينة باش اللي داز يشوفك يقولو ياسمين وشمت نوضي نوضي تگعدي مبقيتيش باغا تمشي دوري

ياسمين:(غرغرو عينيها و دوات بصوت مخنوق) حرام عليك طلبتك

محمد: واااا ياسمين واااا حبيبة واش غتبكي تا على هادي راااه خايب علك احبيبتي

ياسمين: عفاك احبيبي غا حرف غاااا حرف حميمتك

محمد: واخااااا الالة واااخاااا بالحق الغلط مني (ضرب يد مع يد) نمشي نشوف واش كاينة شي بنت….

خرج و خلاها غطير بالفرحة حتى هي بغات تعبر ليه على حبها بأي طريقة…. جلست تسناتو شوية حتى تمت داخلة معاه بنت كتبان صغيرة تكون ديك تمنطاش و زويييينة بزاااف لكن مخصرها الوشام اللي واشمة كولهاااا و محسنة شعرهاااا…

بالفرحة سبقتها ياسمين للبلاصة و جلست…. ضحكت البنت و دارت عند محمد تيشرح ليها داكشي اللي بغات….. بدات معاها تاهي تدير ليها فليبرودوي اللي دارو لمحمد حتى بدات كتوشم بداك الستيلو….

هناااا مقدرتش ياسمين تصبر ميصحابش ليها كاين ألم هكاااو هادشي غير دارت ليها بنج موضعي….. صبرت و عضت على شنايفهااا حتى سال الدم…. مسالات ليها تا حست بالروح خرجت ليها و لكن فالنهاية كانت النتيجة زوينة….

ابتاسمت ليهم البنت و خرجت مخلياها تتشوف فيها فالمرايا حتى جا وراها محمد و نزل طبع عليه قبلة خفيفة….

محمد: (حاط يديه على خصرها) بردتي دابا امدام تصحابي داكشي ساهل

ياسمين: صعيييب و كيضر ولكن جات زوينة شوووف شوف

محمد:(هبط وجهو كيشم فريحتها) زوييين احبيبي زوين يله نمشيو…

خرجو مشادين ضحكة ياسمين واصلة تال وذنيها فرحانة و عاجبها الحال و حتى المورال طااالع ليها…. خلص محمد و خرجو و هوما غادين للطوموبيل بان ليهم محل ديال الگلاص…. سالو ريوگ ياسمين و حمرت فيه جرت محمد من يدو و قالت…..

ياسمين: محمد بغيت گلاص

محمد:(شافيها مستغرب من الطريقة باش تدوي) فهاد البرد عنداك يضرك

ياسمين:(كدوز لسانها على فمها) لا لا ميضرنيش عفاك بغيتو

محمد: زيدي الالة أمري لله…… مشاو للمحل خدا ليها گلاص بثلاثة ديال ليبول وحدة شوكولا وحدة فاني ووحدة بيسطاش و عمرهم بالصوص ديال الشوكولا مزيان….

خداتهم و دارت ضحيكة بحال ديال شي دري صغير خلاتو غير كيشوف و يحرك راسو يمين و شمال….. دوزو نهارهم برااا مشاو لأيا صوفيا دارو فيه و خداو صور و دازو للمسجد الأزرق اللي قبل مايدخلو ليه لبست ياسمين بحال العباية و زيف عاد دخلو ليه…..

بهرهم بتصميمو و ديكورو…. تصميم عثماني كيخليك تحس براسك عايش فمسلسل حريم السلطان او السلطانة قسم من شدة دقة التصميم و الديكور…. شبعو تصاور و خرجو مع الوقيتة ديال الخمسة…. رجعو للأوطيل بطلب من ياسمين اللي عيات….

و هوما داخلين تلقى ليهم واحد من العاملين فالاوطيل علمهم انو كاين حفل الليلة على شرف واحد من الناس اللي جالسين فلوطيل و اللي كان شخص مشهور….

شكروه و طلعو للبيت مع الدخلة لاحت ياسمين الساك و البوط و تلاحت فوق السرير عيانة…. ضحك محمد و دوا وهو كيطرف داكشي اللي لاحت…..

محمد: عيتي امدام.

ياسمين: رجليا حاسة بيهم ايتقطعو (مدت يديها تحت الكسوة كتحيد فليبا حتى بقات غير بالكيلوط شافت رجليها لقاتهم حمرين) ناري شوف امحمد شحال حومر

محمد:(ريح حداهم و هزهم حطهم فوق فخضو كيمسد فيهم) عطيتيهم الدق تنفخو

ياسمين:المشي هو اللي محني رجعت كنعيا (جرتهم حتى جلست و دارت عندو) غنمشي لسبا ندير ماساج و شي حمام تركي ياك غنمشيو لصواري

محمد:(تقلب على كرشو) نمشيو علاش لا صافي سيري انا غنعس شوية

ياسمين:واخا حبيبو (طبعت بوسة على خدو و ناضت)…..

بدلت حوايجها بسيرفيط خفيفة جمعت شعرها و ضربت طليلة على الوشم اللي باين زوين مع بيوضيتها خدات صورة ليه و فالبلاصة دارتها فالبروفيل ديال الواتس…

هزت ساك دارت فيه حوايج جداد و برودوياتها و نزلت بعدما هبطت الريدوات على محمد اللي خمر….. سولت وحدة من البنات اللي خدامات تما على السبا و وراتها ليها….. نزلت لقاتها عامرة ولكن كبيرة….. بدات بماساج هو اللول حطت حوايجها ففيستيير و دورت عليها فوطة…..

تكات فوق الباياس حتى جات بنت باينا فيها اسيوية بدات كتمسد ليها بالشوية و غادة و كتقصح…. ترخاو اعصاب ياسمين و جاها النعاس حتى سمعت بنات داويين فيقوها….. دوزت ساعة ديال المساج رخات عضامهاااا و ارتاحت مزيان….

شكرت البنت و دازت للحمام التركي اللي كانو كيدخلو ليه بالفوطة نيت…. لقات فيه شي بنات دخلت شدت بلاصتها حدا بريمة صغيرة عامرة بالما فيها جوج قوادس زوينين منقوشين و فيها طاسة فضية…..

ديكور عثماني قديم عجبها حدا البريمة محطوط الصابون ديال زيت الزيتون اللي معررفة بيه تركيا و تحديدا منطقة الأناضول اللي جابت هاد العادة او هاد الطريقة ديال الصابون من مدينة حلب السورية….. شمت فيه الريحة ديال زيت الزيتون الحقيقية…… دوزاتو على لحمها كامل و غسلاتو بالما سخون…..

خدات ليفة كانت محطوطة جديدة بميكتها….. مكانتش بحال الليفة او الكيس ديالنا كان بيض و رطب شوية….. بدات تدوزو على لحمها و كيخرح معاه وسخ رقيق بيض بحالا كدير غير گوماج….. سالات و شللات بالما عاد هزت گوماج ديالها ديال لافوكا دارتو حتى هو عاد غسلت شعرها….. ملي بغات دير الصابون و تشلل كانو دايرين بحال الدوشات صغار دخلت ليه دارت باندوش و شللت عاد خرجت لبست حوايجها…..

جمعت شعرها ففوطة و طلعت من اللور ديال الأوطيل للبيت…..دخلت لقات محمد مازال ناعس و كان الحال ظلام….. حطت داكشي و مشات حداه تتفيق فيه…..

ياسمين: محمد…. فيق احبيبي محمد (مدت بدها لعنقووو تتقرص فيه) واااا محمد نوووض راه مشا الحال

محمد:(حل عينيه نص حلة وجهو مزنك و شعرو مخربق قال بصوت مبحوح) مالنا فهاد الصداع

ياسمين:(هبطت عندو تتبوس فعنقو) وااا نوض احبيبو فات الحال مغتنعسش بالليل

محمد:(تقاد فالجلسة بزز حال عينيه) وشكون قالك انا باغي نعس فالليل (شافيها لقاها مزنگة و طالعها السر) طلعك السر ازين واتاك الحمام….

ياسمين:(تكات مقابلة معاه) وااا عرفتي شحال زوين ترخاو عضامي بالماساج و الحمام خاصك تجربو

محمد:(ضحك ليها) تال غدا و نهبط نيت نكونو درنا علاش و نشوفو لكانت شي زين دير لينا مساج

ياسمين:(ضرباتو بالوسادة) باااسل نتاااا

محمد:(هز تيليفونو كيخربق فيه) اش تيدير الولاد عااا البسالة (دخل للواتساب شاف الصورة اللي دارت) هاي على المرة مصورة عنقها فرحانة

ياسمين: ايوا ايلا مافرحتش بسمية حبيبي بيمن غنفرح

محمد:(شافيها بعمق شوية حتى تلاح فوقها) اححح على والديك شحال حلوة و معسلة (تلاح على شنايفها كيبوس و يعض بقبلة عنيفة مقدراتش حتى تجاريه فيها حتى خنقها عاد بعد خلا شنايفها كولهم دم) ديال الماكلة احبيبي

ياسمين:(كتقلب شنايفها و تألم) عيقتي امحمد شوف شنايفي كيف رجعو

محمد: داكشي مكرهتش نديرو ليك فالطوطة ديالك ابيبي (ناض للطواليط كيضحك)

ياسمين:(شافت تا عيات و ضحكت) هههههههه الله يعطيك عقل….

ناضت حيدت السيرفيط بقات بشورط و ديباردو بيضين شبكة…… نشفت شعرها بالسيشوار و عاوداتو ببابيليز على طولتو….. بدات مكياجها اللي ركزت فيه على العيون بألوان ترابية و ايلاينز القطة جبد عينيها كثر ماهوما مجبدين….. فراجو مشمشي مع عكير نيود خلا شنايفها يكبرو و عطاهم فوليم….. خرج محمد لقاها خدامة دور راسو و مشا ريح…..

جبدت كسيوة كانت شراتها مع الحوايج فاللون الأصفر الغامق….. من الفوق جاية لاصقة ثوبها مدوبل بشبكة الفوق و فالكمام اللي كانو طوال و حتى كولها طالع….. و التحت كانت تاهو مدوبل بالفوقي ديال الكخيب خفيف فيه لي بلي….جاي مفرفر على ثلاثة…… جاتها ملبوسة و كتحمق عليها مع لونها و الماكياج اللي دارت…..

دازت لشعرها جمعت نصو الفوق و بقا التحت مطلوق مع مبوكلي عطاها فوليم زوين و بين وجهها…… دارت حوالق كبار شوية مع براسلياتها و ساعتها…… دارت عند محمد لقاتو كيتفرج فشي ماتش ماهواش هناااا……

ياسمين: اويلي امحمد شفتك باقي جالس

محمد:(هز راسو فيها) على مالنا فين غادين

ياسمين:(خرجت فيه عينيها) اويلي و الصواري اللي قلنا غنمشيو ليها

محمد: اشمن صواري مفخباريش خنتفرج اختي

ياسمين:(خبط البوشيط اللي كانت هازة و قالت) بغيتي تفقصني دابا نتااااا ياك تيعجبك تشوفني معصبة

محمد:(وقف مخنزر و تم جاي عندها جرها من خصرها حتى لصقت معاه و قال بصوت هامس) تيعجبني نشوفك عريانة و ذايبة بين يديا احبيبي…..

ياسمين:(تزنكو حنيكاتها و حشمت هبطت راسها خشاتو فصدرو بقوة ما حشمت)

محمد: نموت فالزين الحشمان اناااا…..

طلقها و زاد تيلبس فالكومبلي اللي حطت ليه ياسمين….. اللي بقوة التلفة البارفان قدامها و هي تتقلب عليه….. هزت بوشيط ذهبية مع صنيديلة طالونها رقيق حتى هي فنفس لون البوشيط….. دارت بارفانها و تسنات محمد حتى كمل….. محمد اللي مكانش اقل منها جمالا بكومبلي فالأسود مع شوميز بيضة و صباط اسود…. ساعة فخمة مع خاتمو ديال الزواج….. و فاليد الثانية براصلي من تصميمو بإسمي محمد و ياسمين…..

مشط شعرو لور كيبان رطب و كثيف و مشط حتى لحيتو الخفيفة…. دار برفانو اللي مع شماتو ياسمين ذابت و بدون ما تحس غمضت عينيها و استنشقها….. جاتها رغبة كبيرة فأنها تعنقو و تشم الريحة من عنقووو…. استغربت فنفسها و ضحكت فداخلها….. دار عندها لقاها بديك الطلة داخ و عينيه حوالو….. كل مرة كتبان ليه حسن من المرات اللي فاتووو….. كل مرة كتبهرو و تخلي لسانو مشلول معارف ميقول فجمالها الخلاب……

قرب ليها و خدا يدها برقي حتى ناضت….. دورها بين يديه كيملي عينو بشوفتها….. حط يديه فخصرها و عينيه كيدورو فوجهها و لأول مرة ماعرف مايقول…..

محمد: تحدو ليا معاك ابنت مصطفى…. مابقيت عارف مانقول هادشي بزااف عليا

ياسمين:(حطت يدها على كول الفيسط كتقاد فيه) حتى نتا جيتي زوين

محمد: نتا اللي زوين احبيبي…

دورها حتى عطاتو بالظهر و عنقها…. كانت مقابلة معاهم مراية…… خدات ياسمين تيليفونها و خدات ليهم صورة بجوج معانقين…. نزلو يديهم فيد بعضهم كيبانو كوبل زوين…… دايرا بيهم هالة ديال الحب و باينين قداش تيبغيو بعضهم من عينيهم و ضحكتهم…..

دخلو مع باب القاعة اللي كانت كبيرة….. بانت ليهم الدنيا عامرة بالناس و غير الطبقة الغنية….. النسا من جميع الأعمار كل وحدة كتقول للثانية متبانيش قدامي…. و الرجال حتى هوما الزين غير كيتشاير…..

خداو طبيلة وقفو فيها كيشوفو بجوج بيهم واخا كيتعتبرو من الطبقة الغنية او المرتاحة ماديا لكن عمرهم حضرو فشي حفل هكا ولو محمد حضر فبزاف الحفلات فالمغرب مع مشهورين لكن ماشي بهاد الشكل اللي كان راقي و رائع من الديكور للبيفي للموسيقى للحضور…..

داز السرباي خداو عصير بجوج كيتبادلو اطراف الحديث حتى طلبات ياسمين من محمد يصورها….. فالجهة المقابلة داخلة رجاء فكامل اناقتها بروب بيج قصيرة بسميطات رقاق كولها حجر كتبان كتلمع مع شينيون خفيفة مخلية عنقها يبان مزين بعقد الماسي….. طلة راقية زادت برزت جمالها…..

مكانتش بوحدها كانت شادة فيد ولد فمقتبل العمر حتى هو مكانتش حسن منو فكوستار ازرق غامق داخلين و الأنظار عليهم لأنهم بزوج كانو واحد احسن من الثاني….. مع الهزة اللي غتهز ياسمين راسها بانت ليها داخلة…..

متنكرش انها فداخلها اعترفت بجمالها الخلاب و حست بشوية الغيرة منهااا بالرغم من ان ياسمين بملامحها البريئة و طلتها البسيطة و الراقية تتبان حسن منها و فعيون محمد مكايناش شي وحدة غتقاد معاها لكنها غارت حتى من ديك الشوفة….. حدرت عينها و كطلب من الله انها متهضرش معاهم هاد المرة لأنها مغتسكتش ليها….

شافت فمحمد لقاتو كيشوف جيهة الفرقة الموسيقية….. قبطت يدو حتى دار عندها مبتاسم….

ياسمين: حبيبي انا جوعانة (بدلع)

محمد: اميمتي على هاد البنت باغا تفيقو تاني تي تقادي معانا

ياسمين:(ضحكت بصوت عالي كتقلي السم لرجاء اللي تقابلت معاهم) هههههههه ضحكتيني وااا يله ناكلووو

محمد:(دار عندها شدها من خصرها) زيدي الحب زيدي…..

تعمدت دوز ياسمين من قدامها و ترمي ليها شوفات شبعانين قليان ديال السم مع انها عمرها مكانت هكا و عمرها ظنت انها غدير هكا…. حتى انها استغربت فراسها و مفهمتش هادشي و هاد التصرفات منين جاو….

فالمقابل رمات ليها رجاء نظرات نارية كتوعد ليها بالشر….. مشاو للبيفي اللي كان متنوع و من كل فن طرف….. خدات اللي حب خاطرها و رجعو للطابل ديالهم كتاكل بشوية و محمد كل مرة يمسح ليها جناب فمها….

اللي كيشوفهم من بعيد كتبان ليها الكهرباء اللي غادة بيناتهم و كمية الحب الظاهرة فأفعالهم….. وصل ضيف الشرف اللي كان هو المغني و الممثل التركي مراد بوز…. دخل تحت تصفيقات الحضور…. بدا الحفل بأغنية غناها و نزل كيهضر مع الناس اللي كيعرف و مرة مرة يجي عندو شي واحد يتصور معاه……

حتى محمد و ياسمين تصورو معاه واخا محمد معارفوش اصلا لكن بطلب من ياسمين تصور….. و هوما راجعين مشات ياسمين للحمام و مشا محمد للطابل ديالو كيقلب فتيليفونو حتى وقفت عليه رجاء بدلع مصطنع….

رجاء: اهلا محمد لاباس عليك عاد جيتو

محمد:(دار ضحكة صفرة) الحمدلله اختي (ورك على ديك ختي مزيان)

رجاء:(سرطت القمعة بجغمة دالما و كملت) فين ياسمين مبانتش ليا ياكما مازال عيانة

محمد: لا لا جات هاهيا موراك

رجاء:(دارت لقاتها موراها ضحكت بفقصة و قالت) سلام ياسمين كي بقيتي

ياسمين:(دارت وقفت حدا محمد اللي حط يدو على خصرها) الحمدلله احبيبة و نتي صافا

رجاء: الحمدلله هي شي مومو هدااا معييك

ياسمين:(حطت يدها على كرشها بلعاني) بحال والو يكون شي وليد بحال باباه ياك احبيبي

رجاء:(حست براسها غطير عليها بالغيرة رمات ليها غنزة وقالت) مبروك علك و طلبي ربي يتبثو احبيبة (دارت عند محمد) نخليكم دابا بون صواغي

مشات و خلات ياسمين غير كتقلى فسمها دارت عند محمد لقات ملامح وجهو عاديين شافت حتى عيات و هزت يدها قرصاتو فيدو…. شاف فيها باستغراب…..

محمد: اتي مالك تاني على هاد القرصة

ياسمين: بغيت فيك كثر مي معندي جهد تتقتلني بعدا بلا مبالاة ديالللك ياخويا قلبك بااارد

محمد: واااا يله زيد اشنو درت تاني ياك جوج كلمات مقادين ماقلتهمش ليها

ياسمين: واااا متهدرش معاهاااا تا السلام متشركوش معاها انا اللي عارفة بحالها

محمد: واش شوية لاباس شفتك بديتي تتلاشي اياسمين واش هادي كاملة غيرة

ياسمين:(شافت فيه و شحال وهي ساكتة حتى بداو عينيها تيغرغرو قالت بصوت مخنوق) يااااك امحمد انا بديت تنلاشي حيت مبغيتكش تهضر مع شي وحدة اخرى صافي دير اللي بغيتي (هزت ساكها و زادت مخلياه غير تيشوف)

محمد:(تبعها تيحرك راسو بلا حول ولا قوة الا بالله معرفش مالها ولات هكا و ماعليه غا يشد ليها بالخاطر وصل عليها كتسنى فسانسور شدها من خصرها و دورها عندو بتملك) مال حبيبي غضبان مالو….

ياسمين: شوف نتا شنو كدير (كتمسح فالدموع)

محمد:(تحل السانسور و مع دخلو دفعها على الحيط و لسق معاها) شنو درت اناااا وايني راني ممزيانش مكنسوا منصلح نقلق حبيبي

ياسمين:(حتى ساحت معاه و رجعت خصرت سيفتها) اييف يا محمد فيك بحال ريحة ديال البيض

محمد:(هبط كيشم فراسو) واش لاباس راني دوشت و غرقت فالريحة عاد خرجت منين غتجيني ريحة البيض

ياسمين: معرفتش (كتبعد فيه) عفاك دخل و دوش خنقتيني

محمد: ايوا صافي هادشي اللي كان ناقص كملتيه…

تحل السانسور و خرجو هي مبعدة عليه وهو تابعها كيشم فراسو دخلات ليه الشك فراسو…. دخلت للبيت جلست تتحيد فالطالون مخسرة سيفتها غا بوحدها….

ياسمين: عييت و ضرني ظهري و كنشم شي ريحة مهياش اوووف تعصبت

محمد:(تيشوف فيها تتضارب غير مع راسها) ياسمين حبيبة واش صافا ياكما غتجيك لي غيگل

ياسمين: متكون غااا هي (عاودت شافت فيه هازة خنافرها) محمد دخل دوش عفاك خنقتيني بريحة البيض واش كتاكلو خضر

محمد:(هز صباط فيدو) والله و ما سكتي تنصورو ليك فوجهك ناكل البيض خضر حنش انا (زاد تينصل فحوايجو) هاني غندوش و نشوفو الفشوش الخاوي….

دخل للدوش مخليها تضحك وراه…. حيدت حوايجها و لبست شوميز كحلة و طلقت شعرهاا اللي كان فيه واحد الفوليم خطير…..

ديماكيات وجهها و رطباتو هو و يديها و تلاحت على السرير شادة ظهرها اللي غيتقطع عليها بالألم…..واحد اللقطة جاتها فنيفها ريحة الحريرة بالكرافس…. ناضت للباب كتشم و ماحدها تتقرب و الريحة تتقرب…

سالو ريوگها و تشهات ديك الحريرة….. جلست فالأرض حدا الباب تتسنى فمحمد يخرج….. خرج لابس بينوارو و ريحة باندوش منو تتفوح زوينة….. دور عينو فالبيت ملقاهاش يله خارج للبالكون تا سمع صوتها من حدا الباب دار لقاها جالسة بديك الحالة تتشوفيه بعويناتها مسبلاهم بحال القطة….

ياسمين: متخرجش للبالكون غيضربك البرد

محمد: اش تديري تما واش هبلتي راه غطلع معاك البرودة

ياسمين: محااامد (بدلع) نطلبك احبيبي

محمد: ياربي السلامة من هاد الطلبات ديالك قولي نشوف…

ياسمين: بغيت الحريرة من قبيلة وانا كنشم ريحتها

محمد:(تصدم و فنفس الوقت طلقها بضحكة عالمية) شنو ههههعهعهههههههههه واااا ميمتي الحريرة فتركيا هههههههه و تتشمي ريحتها من الفوق ميكون هذا غير الشاف بوراك شاد شي بيت هنا تيدير فيها ههههههههههه ضحك عندك زوين بحالك

ياسمين:(وقفت و زادت عندو تا بدات تيطح فيهم كيف الحجر) حرام عليك اهئ اهئ اهئ انا هئ هئ كنقولك بغيت الحريرة ونتا هئ هئ هئ كضحك عليا

محمد:(خرج فيها عينيه) البكااا گاااع اياسمين وايلي تال هاد الدرجة وا منين غنجيب ليك الحريرة انا دابا واش تتوحمي

ياسمين:(هزت كتافها) ماسوقيش الحريرة هي اللي بغيت ولا عمرني مازال نهضر معاك (زادت و خلاتو غا تيشوف)

محمد: لا نتي تتوحمي مافيهاش (مشا لبس حوايجو و تم خارج) هاني غادي الالة على وعدي و سعدي نشوف هاد الحريرة…..

خرح و خلاها مكمشة فوق السرير مرة مرة تخرج لسانها تلحس شي دمعة عجبها مذاقهم….. مستغربة فنفسها تتقول مالها وكيفاش تدير هكا و كيفاش وصلت لهاد الحالة مافهمت والو….

هبط محمد لريسيبشن قالهم على المشكل قالهم انها مريضة باش يتفهمو الموضوع…. بزز باش خلاوه يدخل للكوزينة عند لي شيف فعلا دخل لقاها عامرة و الطلبات على الجهد….

دوا مع واحد تركي لكن مفهموش حتى نقز واحد كان عربي و تحديدا من تونس قاليه انه عارفها لكن معارفش كيفاش كتصاوب…. خبرو باش يجيب مرتو توريه كيفاش او تصاوبها شكرو محمد بزااف و رجع طلع عندها كيلعن النهار اللي سمع لهضرتها و نزل و حط نفسو فموقف بايخ….. دخل لقاها هازة شيبس تتاكل فيها و تفرج فالتيفي…..

محمد: مرتاحة دابا امدام منين غنجيب لك هاد الحريرة فقرطة حنا غا قولي ليا

ياسمين: ماسوقيش بغيييتها امحمد حرام عليك

محمد: وااا حرام عليا نيت اما نخلي والديك حدا سميرة و ديك الساعة قولي ليها دير ليك تا فتات الشطبة نوضي لبسي نوضي

ياسمين: علاش غنلبس فين غنمشيو

محمد: غنهبطو لكويزين ديريها لراسك جاب الله تلاقينا مع واحد التونسي سوفانا….

مشات ياسمين لبست سروال و قبية واسعة عليها اوفر سايز….. نزلو فداك الليل الناس ها اللي ناعس ها اللي سهران و هوما نازلين يطيبو الحريرة…. دخلو لكويزين لقاو داك الشيف كيتسنى فيهم….

قالت ليهم ياسمين المقادير كاملة جبدوها ليها و بدات تتنصب بمساعدة داك الشيف و محمد غير تيشوف و مرة مرة تيضحك…. عمرو تخيل غيتحط فبحال هاد الموقف او غتوصل بيه الدرجة لهكا لكن من نهار تلاقا بياسمين وهو مستغرب و جرب شحال من حاجة جديدة…..

دازت الوقت و حريرتهم وجدت….. حطت داكشي فطبيلة تما نيت…. حطت التمر و واحد الحليوة بالعسل ديال تركيا….. جبدت الجبابن و بدات تتعمر ليهم دوقات كولشي…… بداو تيشربو و ديك الحريرة شحال جات بنينة كولشي شكرها ليها…. عرگاتها و ضربت جوج جبابن و طارط سيطرون عاد طلعت تتگمع باغا غا تحط راسها….

محمد:(غادي معنقها) شبعتي ليا الكريشة احبيبي

ياسمين:(دوزت يدها على كرشها) اححح الحمدلله كنت مشهياها

محمد:(قرب لوذنها و قال) تا انا مشهيك اخويا بزاف گاااع

ياسمين: ناري لا امحمد مافياش والله ظهري غيتقسم

محمد: نتي انا مفهمتكش وليتي غير مهدودة و باغا غا تاكلي و تنعسي اش هاد الحالة….

زاد كاعي خلاها وراه تتعض بشنايفها عارفك راسها زبلتها و ثلث ايام و هي مانعة عليه راسها تا ولا تيطلب العداو…. جرات شوية و تعقلت ليه فظهرو تاضحك….

مقدرش حتى هو يصبر و ضحك و ركبها فظهروور…. مع دخلو للبيت هبطت لوذنو جراتها ليه بعضة تا غوت و حطها….

محمد:(دار عندها شاد وذنو) اححح القطة تتعض

ياسمين:(قربت ليه بشقاوة) القطة بغات القطيط ديالها تهنشرو عضان

محمد:(شدها من خصرها راجع بلورانية حتى تلاح على سرير وهي فوقو) جاتك حالتك احبيبي…..

خلات شنايفها يجاوبوه بقبلة عنيفة بحال شي واحد كان مشهي شي حاجة ولا مشتاق فيها وجاتو….. من قبلة لعضيضة للمسة لنصيل الحوايج…..حتى بقاو سفاحيين تيعيشو الحب على اصولو….. حتى صبح عليهم الحال فأحظان بعضهم تيحك ليها فشعرها و تتعاود ليه على أيام الصغر….

إني أحبك لليوم، للغد، للعمر الذي لا يعد. 🥀

فالرباط و تحديدا دار ايوب…. الطناش ديال الليل و مازال شيماء فالكوزينة جالسة فوق كرسي صغير و مدورة بيها جيش ديال المعان…..

كوكوطات و طنجرات كبااار….. جامعة شعرها الفوق و خدامة تتحك فيهم بالجيكس و الصابون البلدي و تعاودهم بالحامض و السقلة حتى مبقاتش حاسة بيديها اللي رجعو حمرين و صباعها داميين….. جنب فمها زرق و باينا واكلة شي دقة هي هاديك…..

تتحك و الدموع فعينيها لكن مراضينش يخرجووو….. تتقول مع راسها فين كنت و فين وليت…. كنتي زواق السباسة وليتي رفاد النكاسة ادعاوي البلا….. هي ديال شيماء مرضاتش بداكشي اللي عندها و كانت ديما تتقلب على المستحيل حتى طاحت فيد ايوب و مو اللي حلفو تيطيرو ليها ضسارتها….

و نيت ملي دخل ايوب شداتو زبيدة تتعمر فيه و تشحن حتى خرح عندها مزنود بحال المجمر مع اه مع التسرفيقة حست براسها مشا و جا…. ما عار اهتمام لا للولد اللي هازة فكرشها و لا حالتها…. تفكرت ياماتها مع منير و كرهت احساس الندم و الحنين اللي جاها…..

تفكرت حملها بولدها اللول و كيفاش دوزاتو بحال الأميرة….. الخدم و الحشم و طلب شي حاجة تلقاها قبل ما تكملها….. كون لقى يهزها فوق كتافو و ميخليش نسمة الهوا تقيسها…. لكن القط بيحب خناقو…. و مرضاتش بداكشي حتى طاحت فصاحب دعوتها….

زيدها لتمارة و تقاد و تريح و خرج يقلب على راسو….. بقات العدوزة واقفا عليها حتى تهدات و مشات….. مخلية بنت تاج الدين تتحك فالقشوع على قلبها…. للحظة اعترفت و كرهت تعتارف بخطئها….. و قالت مع بالها حتى لوكان نرجع دابا حد ما يقبلني….. و ماخليت بلاصتي زينة مع حد….. الوحدة ديال الليل داخل سي السيد ناشط و الضحكة واصلة ليه حتى للوذنين…

ايوب: خليتك واحلة لقيتك واحلة متتعرفيش طلقي يدك شوية

شيماء:(بغيض) ممولفاش بهادشي باش نزرب فيه الله ياخد الحق فاللي كان حيلة و سباب (سباتو فخاطرها).

ايوب: مغنديرش فك راسي دابا راشقة ليا كملي هاد الخرا و دوشي و تقادي باغي حقي الالة

شيماء:(بصدمة شدت ظهرها) واللهما قادة اأيوب ظهري غيتقسم

ايوب:(زاد غادي كيصفر) جوج كلمات قلتهم نص ساعة لا مكنتيش قدامي عولي على خلا عشتك (مشا كيصفر)…

لاحت داكشي اللي فيدها بفقصة…. حارت و الأرض دارت بيها و ماعرفت مادير كون كانت فظروف اخرى تمشي لدارهم بالحق مابقى عندها فين…. شللات داكشي و زادت تطل على ظفارها و تحسر عليهم…..

دخلت للبيت لقات السلطان سليمان القانوني معري صدرو و متكي فوق السرير ناشط و الضحكة واصلة ليه للوذنين….. دخلت دوشت بتعب و خرجت عاد طاح عليها شي نعاس ولكن ملي لقاتو مشعل الفييوزات عرفت راسها ماعندها هروب….. تكات فوق السرير….

دار عندها تيشوف فيها بشهوة…. بدا تيبوس فيها بحال الملهوف وهي مقدراش تتفاعل معاه…. تتحس براسها ميتة و مقادة تحرك حتى عضم….. لأول مرة من نهار تزوجت بيه تتمارس معاه بحالا كيمارس مع مونيكة….. بدون ولا ذرة مشاعر….. بقا حتى كمل و شبع رغبتو عاد ناض عليها بحال الكلب….

ناضت عاودت الدوش عادفة راسها و تتشم فراسها شي ريحة خايبة…. رجعت لقاتو نعس هكاك بخنزو…..تكات فالجيهة لوخرى كتحزر فغمضة تجيها واخاااا الراس كيدي و يجيب…

صبح الصباح على الأبطال ديالنا….. كل كوبل و باش مدوز صباحو…. عند حنان و يوسف اللي خرجو يتغداو برااا فوحدة من المقاهي العائلية عندها طيراس تيطل على مساحة كبيرة بيضة بالثلج كيتزلجو فيها و فوقها منظر رائع ديال الشجر مغطي بالثلج…..

منظر كيبعث فالنفس الراحة و تيهدن النفسية….. حنان بجينز لاصق مع مونطو طويل شوية و بوط قصير….. طالقا شعرها كيطيرو البرد و دايرا طاقية تتبان بحال شي بنت فالكوليج….. واخدين غدا متكامل تغداو فجو من الضحك و الشقاوة ديال محمد أمين…..

تهز الغدا و طلبو شوكولا شو لمحمد أمين و براد ديال اتاي معشب ليهم بجوج….. كيدويو حتى صونا تيليفون يوسف….. هزو قرا الاسم حتى تبدلو نظراتو الشي اللي لاحظاتو حتى حنان لكن محكرتش….. جاوب و نقص الصوت باشما تسمعش….

يوسف: الو سلام….. الحمدلله…… مكاينش انا فالرباط….. هاهو حدايا….. واخا صبري…. (مد تيليفونو لمحمد أمين) هاك اولدي ماماك…..

خدا من عندو أمين التيلي كيهضر بحماس…. هز عينو فحنان لقا اللون تخطف من وجهها…. طبيعيي انها تصدم و ميعجبهاش الحال لأنو أي مرة كيفما كانت متبغيش راجلها يهضر بأي شكل من الأشكال مع او على طليقتو عاد حنان اللي معارفاها لا كيدايرة ولا والو عندها فضول و غيرة و تخوف….

جملة من المشاعر تتدور داخلها…. كمل أمين الهضرة مع مو فرحان و عطا لباه التيلي اللي قطع بلاما يجاوب….

م.أمين: وااااو ماما قاتليا غديني عندها و تشري ليا ألعاب بزاااف توحشت ماماا زوينة

حنان: ياااك و أنا لمن تخليني و باباك مبقيتش ماماك حنان

م.امين:(ببرائة) ماما قالت ليا غنكونو غير انا وياها وبابا ولكن نطلبها تمشي معانا….

تصدمت حنان و ضربت الطم…. وجهها تزنك و ماعرفت ماتقول فضلت تسكت…. يوسف مكانش حسن منها….بالخف هز تيليفونو و ناض بعد عليهم عاد دوز مكالمة…..

أميمة:(جاوبت فالبلاصة بصوت مايع) ألو نسيتي شي حاجة

يوسف: من اللخر شنو غراااضك نتي

أميمة:(ببرائة مصطنعة) كيفاش مفهمتش

يوسف: وااا فاش عينك ابنادم ايلا عينك فخزيت قوليها نتخارا مع جدك ولكن باش تبداي تعمري للولد فراسو بديك الهضرة نحسب ربي عمرو خلقك

أميمة: ولكن انا معنيت والو غير بغيتو يحس بينا كواليديه

يوسف: هادشي فكري فيه شحال هادي ماشي تا شفتيني بديت كنعيش حياتي و كنقاد ليه فجو مزيان فين يكبر سمعيني لحد الساعة مازال كندوي معاك مزيان داك التمكريب ديالك ديريه فقنت اخور (قطع عليها)…..

جبد گااارو كماه بالزربة سفو بالأعصاب اللي شدوه…. سالاه و رما حلوة ففمو عاد رجع عندهم للطبلة لقى أمين مازال تيدوي على مو و حنان تتشوف لبعيد و غير ساكتة…..

حس بيها مغيرة ريح حداها و رما يدو عليها مقربها ليه حتى عنقها عندو حاط راسها على صدرو….. نزل بوجهو طبع بوسة على شعرها و قال بحنان…..

يوسف: مديريش فبالك أحبيبة هديك هضرة خاوية و راك عارفة محمد أمين مازال صغير و الواد اللي جا يديه

حنان:(مسحت دمعة نزلت فوق خدها و نطقت بصوت مخنوق) لا عادي راها حتى هي ماماه ولكن عندي طلب (تقادت فالجلسة حتى تقابلت معاه عويناتها حمرين و شنايفها كيرجفو) متبقاش تهضر معاها نتا عفاك

يوسف: شوف الهبيلة تتبكي(مد يدو مسح ليها دموعها) والله الالة منبقى ندويها و حتى أمين غناخد ليه طابليت بالكارط سيم تهضر معاه فيها يلاه وا سكتي

حنان:(مسحت وجهها و بعدت شعرها على وجهها) شكرا ايوسف

يوسف: ويلي على شكرااا و هاد يوسف مازال مابغا يعفو عليك الله منها بدليها شوية (شافها ضحكت و حدرت راسها) هكاك المغيارة ديالي ضحكي ليها تضحك ليك (وجه كلامو لمحمد أمين) نمشيو ابابا نتزلجو فالثلج….

م.أمين: اه اه اه ابابا كاملين….

يوسف: يله مشينا (خلص و خرجو)…..

هبطو للبلاصة فين كاينين الناس اللي تيكريو ديك السكي…. خداو فاللول هاديك اللوحة اللي تيجلسو فيها جوح ركب فيها هو و أمين و نزلو و حنان تتصورهم و ضحك….. حتى تشقلبو بجوج و صوتهم واصل معرت فين بالضحك….

رجعت ركبت حنان و نفس الحاجة ضحك و غوت….. تزلجو حتى شبعو عاد ركبو فالخيل… دوزو عشية رائعة و الأروع منظر الغروب مع الثلج منظر خيالي يخليك تفهى فعظمة الخالق سبحانه……رجعو للدار عيانين ديال بصح محمد أمين نعس ليهم فالطوموبيل غير دخلو حيدت ليه حنان غير الحوايج الفوقانيين و دفاتو مزيان و خلاتو ينعس….

مشات للبيت لقات يوسف مكاينش…. بدلت حوايجها بسيرفيط سخونة و مزيرة عليها بارزة معالم انوثتها اللي زادو برزو مع الغلض اللي غلاضت….. بانت عليها الراحة من وزنها اللي زاد حتى رجعت فورمتها واعرة….. لشعرها اللي ولا صحي اكثر و طوال….. لبشرتها اللي رجعت احسن من قبل و صفات و حتى من حناكها رجعو تيتزنكووو بعدما كانت تتعاني من فقر الدم….

جمعت شعرها كوت شوفال و خرج فاتجاه البيت حتى لقات يوسف موجد جليسة زوينة و رومانسية…..

مشعل الشوميني بالعواد و حاط قدامها خدادي كباااار و كاشة….. طبيلة صغيرة فيها تخربيقات بحال الشكلاط و الشيبس و الفواكه الجافة….. مبرونشي التيفي مع التيلي و مخدم فيلم….. مشعل شي شميعاات لقاهم فالدار و جالس كيتسنى فيها…..

ابتسمت بسعادة و حست بفراشات تيلعبو فكرشها….. فعلا بهرها و فرحها خصوصا انها ممولفاش هكا ابسط حاجة من عندو تتفرحها و تخليها مرتاحة و فرحانة….. تمشات حتى وصلت حداه و قالت…..

حنان: هادشي زوين ايوسف واااو

حنان:(جرها من يدها حتى ريحت و لاح عليها المانطة) ميكونش حسن منك اعوينات يوسف (طلع و هبط فسها) هانا تاني على السيرفيط مزيرة و الفيرمة زيانيتي العفيريتة عههههه

حنان:(ضحكت) هههههههههه الزين زيانيت و العفريتة لاش ههههههه ضحكتينييي

يوسف:(كيقرب وجهو ليها) الله يجعل يامك كولها ضحك فضحك (خدا شنايفها ببوسة خاطفة و بعد وجعو منيم عينيه) العسل بشهدو عندك اجي درتي الدوا

حنان: اه درتو كون مدرتوش منقدرش حتى نتمشى راه كضرني

يوسف: اي سمحي ليا حبيبتي فورصيت عليك بالحق اللي لقى الحلاوة فين غيبقى عاقل

حنان: هههههههه وا صافي تتحشمني اجي نتفرجووو….

خدم الفيلم اللي كان رومانسي….. تكات عليه و بقاو تيتفرجو و مرة مرة ينقبوووو من شي حاجة….. واحد اللقطة حس بيها تقالت…. هبط علينو لقاها نعسات بحال شي بيبي صغير….. حنيكاتها مزنكين بالسخونية و فمها محلول شوية…..

بعد زغيبات على وجهها حتى بان ليه….. نزل طبع قبلة سطحية على شفايفها و بعد….. هز تيليفونو خدا ليها صورة هكاك عاد هزها داها لسرير و تبعها هو بعدما جمع داكشي….. ❤️

كل واحد فالأحبة ديالنا ناعس فحظن حبيبتو حتال شيماء مزغوبة ليام اللي قلبها كان مقبوط عليها ديك الليلة و مانعست ماشافتو و عاد شخير ايوب اللي كيتسمع فين و فين طيرو عليها…..

الوحدة ديال الليل….. الجوج….. الثلاثة….التيليفون كيصوني….. ناضت حنان طافجة…. مدت يدها للتيليفون يوسف لقاتو سعيد تيصوني مع الثلاثة دالصباح استغربت….. دارت تتفيق فيه…..

حنان: ياربي السلامة ياربي السلامة يوسف (تتحرك فيه حتى حل عينيه) هاك سعيد خوك تيصوني….

يوسف:(خدا من عندها الفون و تقاد فالجلسة عينيه ملصقين بالنعاس) ألو وي خويا….. مالك ياك لاباس….. كيفااااااش….. واش من نيتك داوي….. الله اكبر (طاح ليه التيليفون من يدو و هو تيشوف قدامو مصدوم)….

يوسف:(خدا من عندها الفون و تقاد فالجلسة عينيه ملصقين بالنعاس) ألو وي خويا….. مالك ياك لاباس….. كيفااااااش….. وا من نيتك داوي….. الله اكبر (طاح ليه التيليفون من يدو و هو تيشوف قدامو مصدوم)

حنان:(قلبها تقبط عرفت راسها غتكون شي خبار ماهياش حطت يدها عليه) يوسف ياك مكاين باس شنو قالك (تتحرك فيه) الله يهديك قوليا راه قلبي غيسكت….

يوسف:(دار عندها وجهو مسقطر من الدم و عينيه حمرين)……

فتركيا عند الكوبل ديالنا اللي بعد علاقة حب طويلة ختموها بدوش سخون و نعسو فحظن بعضهم….. كانت الخمسة ديال الصباح بحكم فارق التوقيت….. صونا تيليفون محمد…. مجاوب حد بحيت غارقين فالنعاس…. عاود صونا مرة اخرى عاد فاق محمد….. هزو لقاه يوسف…..

استغرب من المكالمة فهاد الوقيتة خصوصا انه عارف انه بيناتهم زوج سوايع و يله غتكون عندهم الثلاثة….. ناض من حدا ياسمين اللي بدات تتحرك و جاوب….

محمد:الو وي….. كيفاش….. تا اش تتقول اصاحبي…… لا حول ولا قوة الا بالله…… صبر اصاحبي و كون راجل هاني غنتحرك دابا للمطار…… صافي المهم تسناوني تانجي….. الله اكبر (قطع التيليفون و بقى كيردد ففمو) انا لله و إنا إليه راجعون الله يرحمها…..

تصدم من الخبر و مكانت لا على البال و لا على الخاطر…… مشى فجيهة ياسمين مصدوم و محطم….. طبيعي ما اسم الموت فقط تيهد الواحد عاد ايلا كان الشخص قريب….. الموت مصيبة و شر لابد منه….. و كيما قال الله عز و جل في كتابه العزيز….

“كُلُّ نَفْسٍ ذَائِقَةُ الْمَوْتِ وَإِنَّمَا تُوَفَّوْنَ أُجُورَكُمْ يَوْمَ الْقِيَامَةِ” ﴿١٨٥ آل عمران﴾…..

توجه لعند ياسمين اللي كانت غارقة فالنعاس كيفيق فيها…..

محمد: ياسمين….. ياسمييين فيقي خلاص….

ياسمين:(فاقت دايخة) مالك امحمد خليني نعس

محمد: نوصي راه خاصنا نمشيو

ياسمين: فين غنمشيو راه مازال الحال

محمد: غنرجعو للمغرب حفيظة ماتت

ياسمين:(بالصدمة تهزت و خرجت عينيها) الله اكباااااااااار الله ياربي على خبار سمعت (حطت يدها على صدرها) شكون قالها لييك الله ياربي الله يرحمها (غرغرو عينيها)

محمد:(كان تيجمع فالحوايج و تيدك فالباليزات) يله صونا ليا يوسف حتى هو باقي فإفران غيضطر يبقى تال الصباح….

ياسمين:(ناضت تتجمع معاه و دموعها دايزين) اححح ياربي و فراق الواليدين شحال صعيب هضرتي مع سعيد….

محمد:(وقف داير يديه فجنابو) تيقيني واللهما عارف راسي اش كندير بالدوخة هاني غنصوني ليه….

ياسمين:(تتجمع فالحوايج و تبكي) ياربي تصبر ولادها ياااربي تغفر ليها و ترحمها اهئ اهئ ياربي ياربي…..

محمد:(مدوز لابيل لسعيد) الو خويا…. البركة فراسك اخويا الله يصبرك….. واش غير فالدار…. شوف اخويا اي حاجة احتاجيتوها سيرو للمحل هاني غنتحرك دابا للمطار الليلة نكون عندكم….. الله يصبركم اخويااا….الله يصبركم رد بالك للبنات تنجيو….. (قطع معاه عينيه مغرغرين) الله يرحمها يارب……

الموت مصيبة…. الموت تتفرق الحباب على حبابهم…. تتفرق الواليدين على ولادهم….. و الولاد على واليديهم….. تفرق الصديق على صديقو و الخو على خوه……الموت تتهد الساس و تطيح الظهر و تهدمو…..

موت الواليدين و الولاد مكاينش بعد منو صعيب….. ايلا ماتو الواليدين ماتت شمعة الدار و ضوها….. وايلا ماتو الولاد ماتت الرغبة و مات الأمل….. موت الأب كيكون قاصح حيت تيمشي السند و لكن موت الأم كثر و كثر….. موت الأم تيكون كارثة…..

الأم اللي تحن و تربي و تحمل و تولد و تمحن و تسهر و تدمر نهار تتموت تيموت معاها كولشي…. تتمشي الوريدة و الشميعة اللي تضوي على ولادها حياتهم…..

حفيظة واخا كانت خايبا لكن مع ولادها كانت و نعم الأم….. تقطع من لحمها و تعطيهم….. تحيد الدغمة من فمها و تعطيهم….. تبغيهم يكونو حسن من اي واحد….. دارت المستحيل على ودهم….. سمعت الهضرة على ودهم….. و كان ياويل اللي يقرب ليهم ولا يمسهم…. تغززو بسنانها…. و اليوم هاهيا مشات بحالا عمرها كانت…..

بقى غا فعلها كي زين كي خايب…..

خلات فنفوس اهل الرياض و ولادها فراغ كبير….. خصوصا ملي تبدلت كانت دارت بلاصتها وسطهم كاملين…..الله يرحمها و يغفر ليها…..

{فَتَمَنَّوُا الْمَوْتَ إِنْ كُنْتُمْ صَادِقِينَ}…. 💔

شيماء ما نعست ما شافتووو….. عظامها من تمارة اللي دارت و اللي ممولفاش بيها تفصلو و الليل كلو وهوما كيزدحو عليها…. و من جيهة ظهرها غيتقطع شادها فيه واحد الوجع مقدرتش تنعس ولا تشوفو تتحس بكرشها غطيح و خايفة على اللي فكرشها و فينما هزت راسها تتلقى ايوب تيشخر….

و من جيهة اخرى واحد الضيم طايح عليها حاسة بشي حاجة خايبة غتوقع و تتحس بنفسيتها مريضة….. الثلاثة ديال الليل ناضت للطواليط وهي خارجة سمعت تيليفونها كيصوني…. مشات تتجري هزاتو لا يفيق داك الجمل….. استغربت من الرقم ديال سعيد و الاغرب الوقت….. رجعت للحمام و و جاوباتو مخلوعة و قلبها تيضرب فالتسعين….

شيماء: الو خويا ياك لاباس….. لا لا كنت فايقة….. غا قول اسعيد راني غنسخف…… اويلي…… ميمتي اخوياااا….. الله ياربي….. (قطعت معاه مصدومة)…..

شدت فمها مصدومة و عينيها محلولين على اخرهم….. ضربة جاتها فالصميم و عمرها مكانت تتفكر فيها…. واللي بقى فيها مشافتهاش من نهار جات لهاد الدار الكحلة…..

ضلامت الدنيا فوجهها و ماحسات تا طاحت جالسة دموعها دايزيين و ملامح وجهها مصدومين….. حست بقلبها خوا….. حست بظهرها ما بقى عندو حيط علاش يتكى……مها اللي كانت و بقات عندها مشات…. و شكون يواسيها و يسولها….. شكون يديها فيها…. شكون تحط عليه الراس ملي تضياق بيها….. جاتها دقة صحيحة و مالقات الجهد باش تنوض…..

كيخرجو شهقات كبار منها شوية حتى تحول لغوات….. فاق ايوب على داك الصوت….. تبعو حتى للحمام….. حل لباب لقاها جالسة فواحد المنظر يذوب الحجر…… جامعا ركابيها عندهم و معنقاهم….. تترعد و تتبكي و تتغوت…..

بحال شي مريضة نفسية….. تصدم و مافهمش مالها….. يله بدا غادي عندها تا غوتات بكل جهدها…..

شيماء: بااااااعد منيييييي (تترعد) متقربش لياااا خليك بعيد

ايوب:(خلعاتو بداك المنظر) شششش هاني هاني غير قولي مالك

شيماء:(هزت فيها عينيه مدمعين) مي مااااتت اهئ هئ هئ اللي كانت عندي مشات و خلاتني مشات

ايوب: لا حول ولا قوة الا بالله وا شكون قالها ليك

شيماء: عيط سعيد اهئ اهئ اهئ مشات بلاما نشوفها اهئ

ايوب:(قرب ليها حتى شدها من ذراعها) نوضي بعدا من الأرض نوضي…..

ناضت شيماء محطمة و هادي اول مرة كانت غتبكي فيها شيماء قدام شي واحد من صغرها…..عمرها بينت ضعفها لشي واحد….. عمرها رضات تبكي قدام اي كائن كان….. ديما كانت ديك المرأة الحديدية……

كانت ديك المرأة اللي متتگر فيها حتى حاجة….. واخا كانت تتوصل فيها لعظم ولكن كانت تتبقى ديما راسها مرفوع….. لكن دابا جاتها الضربة القاضية….. جاتها فميمتها…… مهما كانت قبيحة و خايبة و كل الصفات الخايبين مجموعين فيها….. لكن ملي تتجي فالأم….. تترجع بحال الحليب…..

هكاك شيماء….. مقدرتش حتى تزيد…. لبسها ايوب جلابة وهي غير تتبكي….. مشا فيق مو اللي حتى هي تصدمت…. ركبو فالطوموبيل و البرد وهي حالة الشرجم كلو باغا غير تبرد النار اللي شاعلة فيها…. وصلو للرياض اللي كانو قدامو الطوموبيلات بالعرام…..

الناس شي داخلين شي خارجين….. مع نزلت كن الطوموبيل جاو عندها شي ناس…… معرفتهمش شكون ولا والو….. عقلها ممعاهاش….. دخلت تتقلب بعينيها وسط الناس تا بان ليها باها واقف….. وجهو مظلم و عينيه حمرين…..

طايح عليه الحزن و الكآبة…… مهما كان تتبقى مرتو الأولى….. شريكة حياتو….. اول انسانة عاش معاها الأبوة و ذاق معاها الطعم ديالها….. وقفت فبلاصتها فمها تيترعد و عيطت ليه بحال شي بنيتة صغيرة…..

شيماء: بابا اهئ اهئ

حسن:(هز فيها راسو بأسى و حل يديه حتى مشات عندو عنقها ليه و قال تيدوز يدو على ظهرها) صبري ابنتي صبري بغاها الله و داها الله

شيماء: كوااااتني ابابا و غفلاتني اهئ هئ هئ كون غا شفتها

حسن: الله يهديك ابنتي صبري صبري ام الله مع الصابرين واش توقفي قدام امر الله

شيماء:(هزت فيه عينها) وا راه مي هاديك مي مشات و خلاتني عريانة دات معاها كولشي….

سميرة:(كانت حتى هي تتبكي جات جراتها من حظن باها) لله ما أعطى و لله ما أخد ابنتي صدمتناااا كاملين الله يرحمهاااا

شيماء: واااا خالتي مشات ميمتي مشات الحنينة مشات اللي كانت تتقرى همي خلاتني وحدي مشات

سميرة: انا معاك ابنتي انا معاك انا ميمتك دخلي شوفي ابنتي خواتاتك راهم غيحماقو راك نتي الكبيرة صبريهم…..

خداتها من يدها مزيداها اما هي مابقا عندها الجهد باش تمشي….. دخلت للصالون لقات كولشي كيبكي تعرضو ليها شي وحدين وهي سخفانة الحمل من جهة و العيا من جهة و الصدمة من جيهة وصلت تال عند جداها اللي كانت جالسة حتى طاحت عند ركابيها تتبكي و تقول مابكيت…..

شيماء: وا مشات اجدة مشات اهئ هئ مشات ميمتي مشات الحنينة فيا مشات القارية همي هئ هئ هئ بقيت بوحدي اجدة لا من يسولني ولا يحن فيا

ح.كلثوم: نوضي ابنتي نوضي استغفري مولاك و دعي ليها بالرحمة و حناااا گااااع معاك…

حكيمة:(مشات نوضتها تا جلستها فالكرسي و جلست حداها عنقاتها لصدرها) حنا گااااع ماواتك ابنتي دعي ليها بالرحمة و متحرقيهااااش……

الحاصول ساعة الحق توصل توصل و الموت مكتابة على كل واحد….. مكايقتل لا مرض و لا داء كيقتل العمر لا تقادا و الأجل لا وفى….. و حفيظة أجلها فالدنيا كمل و الله اللي خلقها بغاها و خداها….. خلات فنفوس اهل الرياض صدمة و حزن و حسرة كبيرة….

خلات بناتهاااا مشويات فميمتهم الحنينة فيهم و القارية همهم و الركبة اللي موسدينها….. خلاها المثل ( يلا مات باك توسد الركبة و يلا ماتت مك توسد العتبة)….. خلات ولادها حتى هوما محطمين من جيهتها….. خلات الكل حزين و متألم من فراقها….. خصوصا طبعها اللي تبدل كليا قبل ما تموت…..

واخا البعيد تيقولها فيها غير خايبا ولكن القراب عرفووووها و عرفوووو معدنها و شخصيتها التانية….. لله ما أعطى و لله ما أخد…..

الأجواء فالرياض كئيبة….. مسدود عليها فبيتها و القرآن مطلوق…. الناس كلا يبكي على همووو…. و كاين اللي جاي غيطل…. واخا الليل و البرد لكن الدنيا عمرت….. سعيد و أمين داقت بيهم الدنيا و ملقاو جهد و طلبو كون غير كان محمد ولا يوسف يتقاسمو معاهم الشغال…..

صوناو لطريطور اللي تيتعاملو معاه اللي بلغ ليهم تعازيه….. وصاوه باش يوجد فطور من مجاميعو للناس اللي جاو….. اللي عيا راه نعس….. و كاين اللي نعاس جفى عينيه….💔

كان الحنان أمي، والراحة أمي، والهناء أمي، والأمل أمي، وكل جميل في حياتي كان أمي، بل كانت الحياة أمي وها قد رحلت.💔

يوسف:(دار عندها وجهو مسقطر من الدم و عينيه حمرين) مي ماتت احنان…. حفيظة ماتت و مشفتهاش

حنان:(وسعت عينيها و حطت يدها على فمها و غوتت بلاما تحس) اوييييلي اش تتقول ايوسف

يوسف:(دفن وجهو فيديه متتيقش) مشات مي و مشفتهاش و متسامحتش معاها (نزلو دموعو فصمت)

حنان:(تلاحت عنقاتو تتبكي) الله على خبار ياربي ترحمها ياربي ترحمها….

عنقها يوسف و بكا فحظنها….. محشمش و مقالش لا الرجال مكيبكيوش بالعكس بكا بحرقة….. بكا و طيح دموعو على ميمتو…. كذاب اللي يقولك الراجل متتحطموش موتة مو….. كذاب اللي يقولك الراجل متيحتاجش لمو….. الراجل كتدمرو موتة مو يمكن كثر من البنت…..

الراجل الام بالنسبة ليه اول حب فحياتو….. اول مرة تيحل عليها عينيه….. و منها تيتعلم شحال من حاجة….. منها تيتعلم كيفاش يتعامل مع المراة….. كيفاش يعرف المراة….. يوسف مو كانت بالنسبة ليه ملاك….. واخا كان كيشوف تصرفاتها الخايبين شي مرات لكن تتبقى ديك الصورة ديالها كملاك متتزعزش…… حيت كانت حنينة فيه و كانت تتعزو…..

كانت تتبغي الحاجة الزينة ليه و كون تصيبو يكون هو احسن واحد….. حتى ملي شافت حبو لأميمة ناضت بلاما تفكر زوجاتها ليه….. و دابا اللي حز فخاطرو موتها المفاجئ….. و اححح على كية موتة الغفلة و شحال تتهد الكتاف….. مازال ملي تيكون الواحد مريض و حالتو ميؤوس منها نتي تتولي تقولي كون غير دا مول الأمانة امانتو و رحمها…..

الواعرة هي الغفلة اللي متتكونش داير ليها الحساب…. اه حفيظة عيات و مرضت لكن ماشي مرض اللي غيبغيو غير راحتها….. ماشي مرض اللي غيقتلها….. ولكن كيما قلت مكيقتلش العمر ولا المرض…. تيقتل الأجل الى وصل…… بكى يوسف فحظن حنان اللي بكات معاه و صبراتو….. فشت قلبها و بكات على حرقتها….. تتصبرو بكونو شاف مو و تبارك الله بقات معاه تا شافت وليداتو…..

اما هي و كيما كتقول”انا كون صبت غير نشوفها كيفاش دايرا”….. بكى حتى فش قلبو و ناض تيقلب على حل….. اول حاجة جمعت الحوايج كاملين قادت الدنيا واخا مافيهاش و السخفة ديال الصدمة و البكا لعبو عليها….. وصلت الخمسة هاهوما جالسين فالصالون كيتسناو الحال يصبح….. حتى حد مكيهضر مع حد…..كل واحد حادر راسو و كيخمم فهمو…. يوسف كيتو مازال جديدة و دمها باقي تيسيل…..

اما حنان كيتها عمرها برااات و عمرها قدامت ديما تتنزف….. اذن الفجر و ناض كل واحد فيهم توضى و اتجه للقاء مع الخالق سبحانه…… الله سبحانه و تعالى هو اللي تتقدر توجه ليه ونتا فرحان و نتا مقلق و نتا غضبان و نتا حائر…… يكفي تسجد و تفوض امرك ليه عمرو يخيبك و كيما قال تعالى في كتابه الكريم…

﴿ وَإِذَا سَأَلَكَ عِبَادِي عَنِّي فَإِنِّي قَرِيبٌ أُجِيبُ دَعْوَةَ الدَّاعِ إِذَا دَعَانِ فَلْيَسْتَجِيبُوا لِي وَلْيُؤْمِنُوا بِي لَعَلَّهُمْ يَرْشُدُونَ ﴾….. صدق الله العظيم…..

يوسف سجد و بكى و طلب ربي يرحمها و يغفر ليها و يبرد نارهم و يصبرهم و يعطيهم القوة باش يكملو….. حنان مكانتش احسن منو….. حنان كانت فينما شافت شي منظر هكا ديال موت الواليدين او الموت بصفة عامة…. تيرجع ليها فيلم حياتها كامل اللي عاشتو محرومة من نعمة الواليدين…..

حنان اكثر شخص حاس بحرقة يوسف….. حتى ان حرقتو متوصلش حرقتها…. حتى بكات و دعات ربي يرزقو الصبر اللي صبرت….. كملو الصالة و رجعو جلسو كل واحد و عقلو فين مسافر…… يوسف طفى تيليفونو ماقدر يسمع والو اساسا مازال ماتيق….. حتى دوات حنان ملي تفكرت….

حنان: يوسف (شافيها ببرود) صونيتو لمحمد واش فخبارو….

يوسف:(تنهد) هاني غنوض نصوني ليه…..

محمد و ياسمين داخت بيهم الارض و جاتهم تا هما صعيبة خصوصا انهم بعاد و ملقاو جهد….. جمعو حوايجهم كاملين و نزلو فالساعة اللي ميعقلو…. اضطرو انهم يلغيو الحجز فلوطيل بلاما يردو ليه فلوسو و مع ذلك طلب غي السلاكة…..

خرجو مع السبعة خداو طاكسي نيشان لمطار اسطنبول الدولي….. دخلو قالهم محمد بيلا ديجا مقطع آلي و روتور و البيي ديال الروتور مازال عليها اربع ايام…. بالسيف باش حولوها ليه لأول رحلة اللي كانت مورا جوج سوايع… صدق مخلص كولشي من اللول…..

جلسو فلمطار و مابطا عليهم غير امتى يوصلو….. متكية ياسمين على كتف محمد خاطرها مغير و طايح عليها الضيم….. من ديما متتحملش الموت و جوها و ديما تطيح و تمرض فيه….. لكن هاد المرة غير معرفتش علاش حاسة براسها باغا غير تبكي و مكتحس بدموعها حتى كيديرو فرررر فوق خدودها…… محمد مكانش حسن منها واخا اللي دوزت عليه مكانش قليل…..

دوز صغرو محارب معاها و عمرها بغاتو حتى انه شي مرات وصلت بيها ضربو و تحرقو….. لكن بقاو فيه خوتو و مابغاش ليها الموت خصوصا ملي شافها كيفاش تبدلت للأحسن فهاد الفترة الأخيرة….

صونا تيليفون محمد هزو لقاه يوسف جاوب فالبلاصة…..

محمد: الو خويا كيبقيتي عظم الله اجرك اخويا الله يصبرك

يوسف: امين الله يعزك اخويا واخا جاتني قاصحة كون غا شفتها

محمد: گاع بحال هكاك جاتنا على غفلة و دارها تا البعد عندرا نتا مشيتي كنصوني لسعيد و الواليد مشغولين

يوسف: مازال مامشيت كنتسنى الحال يصبح نرد لسمسار سوارتو و نزيد راني جالس على العافية

محمد: تهدن اصاحبي و سير بالشوية البرد هدا و الطريق عامرة ما و تما راك عارف الثلج تمشي دير شي كسيدة الله يحفظ

يوسف: الله يستر اودي

محمد: المهم انا قطعت غدا مع الجوج دالصباح نكون عندكم كنتو تسناوني هي هاديك منجمتوش تسناوني ديرو الواجب و اللي حتاجيتوها سيرو عند علي حتى لا بغيتي تمشي للدار ترتاح ولا راه السوارت عندك

يوسف: الله يحفظك اخويا الله يوصلكم على خير….

قطع معاه و رد تيلي لجيبو حتى تهزت ياسمين تتسول فيه و العينين حمرين مقنبلين…..

ياسمين: كيف دايرا حالتو مسكين

محمد: كيفاش بغات تكون اياسمين ايلا كانت حنا هكا وهو اللي مو و مشافهاش راه متبردش ليه

ياسمين: الله يصبرهم ياربي…..

بقاو جالسين مرة يدويو مرة يسكتو و غالب وقتهم كانو ساكتين حتى حد فيهم ماعندو الخاطر باش يهضر ولا يقول شي حاجة….. نفسية كل واحد فيهم زفت اكثر من الثاني و حد مغيستحمل حد…..

جلسو ما يعادل واحد جوج سوايع و نص بعدما دارت الطيارة روطار ديال نص الساعة اللي هوما فغنى عليه جات و طلعو…. مع طلعو ياسمين جاتها الترويعة مشات لطاليط ردت حتى كانت غترد مصارنها….. خرجت كيف الشرويطة بالسيف باش تتحرك ريحت حدا محمد اللي كان مخلوع عليها….

محمد: حالتك مبقاتش عاجباني اياسمين واه وليتي اللي كليتيها ترديها نوصلو نمشيو عند الطبيب

ياسمين:(شربت كاس ديال الما كطبطب ليه على يدو تا سالات) لا امحمد راه الطيارة و البكا اللي بكيت و اصلا انا مكنحملش الموت و داكشي غير تنسمعها كنمرض مازال تشوف ملي نوصل

محمد: مشكلة هادي ايلا كنتي هكا سيري لدارك نيشان ماعندك فين تمشي تمرضي

ياسمين:(خرجت فيه عينيها) اويلي حماقيتي امحمد متعاودش هاد الهضرة من الصواب و الواجب نمشي نوقف مع البنات

محمد: راه خفت عليك شوفي وجهك كيف ولا

ياسمين:(تكات على كتفو) صافي احبيبي هاني غنعس و غنولي بيخير…..

فعلا تكات مكانتش ربع ساعة حتى مشات نعست و تبعها محمد بحيت مانعسو تال الثلاثة و فاقو مع الخمسة……

الأجواء فالمغرب مازال هي هي….. الرياض عمر و الناس جاو من كل بلاصة….. الطوموبيلات برا عمرو الدنيا و كيبينو المكانة الاجتماعية ديال الناس اللي كاينين…. الوثاق بالرزبة تبنى شاد ربعة الزناقي يجريو فيه الخيل كلو طوابل و بيفي ديال الفطور….. الناس جالسين كاين اللي كيفطر كاين اللي مقادش و ماعندو منين يدوز ليه…..

فالباب واقف حسن و خوتو و سعيد و امين و ايوب و اب ياسمين اللي شد الطريق هو و ثورية مع السبعة….. حسن بين ليلة و ضحاها وجهو ولا حالتو عينيه دخلو و حمرين و بانت فيه…. تأثر بموتها بزاااف و واخا مكانش كيبغيها لكن كان كيعزها و كانت سندو و يدو ليمين….

بحيت واخا سميرة حب حياتو لكن ملي كان كيبغي ياخد شي قرار فشي حاجة كان كيقصد حفيظة مولات العقل….. بقات فيه و تمنى ليها الرحمة و المغفرة و يوصلها عليه مؤمن….. سعيد المطارق عليه من كل قنت… من جهة ميمتو اللي مشات و اللي كان آخر واحد يشوفها و يكتاب تموت بين يدو هو…..

بقا داك المنظر من عينيه ملي خرجتها الروح و وسعت عينيها ملي ولا عندها البصر الحديد او البصر الحاد و هو البصر اللي كيكون حاد بعدما كتحيد ديك الغشاوة او الغشاء اللي عندنا واللي كيمنعنا من اننا نشوفو بزاااف الحوايج منهم الجن و الملائكة و الشياطين…… توسعو عينيها و زيرت على يديه و هزت سبابتها شهدت….. الروح كطلع و عينيها كيتوسعو حتى دا مول الأمانة امانتو….. عنقها و بكاااااا فحظنهااا حتى فش غليلو و مسح دموعو….

عرف ديك الساعة انه مخاسوش يبكي قدام واحد اخر و خصوصا خوتو….. خاصو يبقى ممثل ديك القوة باش يقويهم هوما…… عيط على سميرة و حكيمة اللي بمجرد ما دخلو و لقاوها جثة هامدة مكتنفسش غوتو و بكاو….. تجمعو عليها فالبيت و بداو كيتخبطو فوقها حتى غوت سعيد و خبط سرجم ديال الزاج بيدو محاسش…..

اللي عارف انه خاف عليها منهم….. خرجهم و طلق القرآن و سد عليها….. بقى هو كيجري و يجاري و تصاب امين عاونو و لكن مع ذلك كولشي كان منووو و صدق قد المسؤولية فأقل من جوج سوايع تبنات الخزانة و فطرو الناس و الأمور كلها تقادت……

فالوثاق ديال النسا كيف ديما الهضرة على الجهد و النميمة مع انه كاينين نساء من المجتمع الراقي الا ان النميمة فطرة و غريزة فالمرأة مكتعرفش السن او الطبقة الاجتماعية…..

اما فالرياض اللي كانو جالسين فيه اقرب الناس….. مفرقين كل واحد عينيه منفوخين و قلبو مفطور على فراق حفيظة….. صوت القرآن مسموع….. جالسة الحاجة كلثوم و متكية فوق فخضها تيسير بجلابة كحلة و شال بيضة…..

تيسير اللي كانت كيف الوريدة اللي كذبال….. الوجه صفر بقلة الماكلة بحيت من عشاها طلبك الدغمة طاحت فكرشها….. العينين جغمة من الدم و الفم كرم….. متكية فوق ركبة جداها اللي كانت تدوز يدها على راسها….. دموعها هوادين بصمت…..

اه على تيسير….. الصغيورة ديال حفيظة……اللي مازال محتاجاها فحياتها….. مازال محتاجا حنانها و نصائحها….. مازال محتاجاها توريها و تگيدها….. تحطمت و حست براسها بقات وحيدة….. متكية فوق ركبة جداها محاملا تهضر مع حد….. جالسين حداهم عيالات الاعمام و شيماء اللي حالتها تتشفي العدا….

عمر شي واحد شافها فديك الحالة…… ديما مولفين بشيماء القاصحة اللي دايرا فحال شي حيط مستحيل يريب….. لكن اللي كيشوفو فيها دابا شيماء اخرى…..

شيماء الضعيفة و المهدودة…… جنبها جالسة ثورية ام ياسمين و حكيمة مرة يدويو مرة يسكتو….. سميرة و احلام و مرات سعيد تيتجاراو و يوقفو على شغال ماجلسوش گاع…..

يوسف مابطى عليه غير ايمتى توصل ديك التمنية و يحل السمسار…. فعلا هز محمد امين حطو فالطوموبيل ناعس غطاه و طلعو هوما مشاو للسمسار شرحو ليه الوضع و صدق ولد الناس رد ليه الفلوس ديال الايام اللي باقيا واخا مابغاش لكن اصر عليه…..

ردو ليه السوارت و شدو الطريق للرباط….. غير وصلو للدخلة جاتو بحال الغمة على قلبو…. ولات تتبان ليه الرباط كحلة و مغممة و نفسو داقت…. فاق ولدو معارف والو كيسول فين غادين…..

م.أمين: بابا فين حنا و فين غادين

يوسف: رجعنا للرباط اولدي

م.أمين: و علاش انا مازال ماشبعت

حنان:(دارت عندو) هانتا احبيبي باباك عندو شي شغال غير يكملهم و نرجعو واخا (هز ليها راسو عاد دارت عندو حطت يدها على ذراعو) يوسف شوية

يوسف:(شافيها) غنكون كذبت ايلا قلت لك اه قلبي مقبوط و محاملش ندخل للرياض وهي مافيهاش

حنان:الله يصبرك و يطفي نارك الموت راه لابد منها الله يرحمها و يجعل مثواها الجنة…..

كملو طريقهم ساكتين حتى وصلو….. قلبها وقف وهي تتشوف فدوك الأجواء….. الطوموبيلات مصافين و الخزاين مبنيين و الدنيا عامرة….. نزلو حنان هزت محمد امين و يوسف سد الطوموبيل مخلي كولشي تما….. مع نزلو بداو الناس كيجيو عندو يعزيوه….. حتى بان ليه باه واقف مع الرجال مشا عندو…..

عنقووو و زير عليه حسن و خبط على ظهرو….. كيهمس ليه بكلمات كيحاول يصبرو بيهم….. صبر يوسف و داز بوجه بارد سلم على الآخرين….. عنق خوه ولكن حتى حد فيهم مابكا ولا بين على ضعفو حيت صافي دابا خصهم يوقفو و يكونو رجال و يقومو بالواجب…..

حنان توجهت عند حسن عنقاتو حيت تتحس بيه بحال باها عزاتو و دازت لسعيد حتى هو عزاتو….. وهي غادة مخفاوش عليها نظرات ايوب ليها….. كيطلع و يهبط فيها بلا حشمة بلا حيا و كيمعن فيها الشوفة كأنه كيعبر فيها شبر بشبر…..

الناس فالناس و القرع فمشيط الراس…..الناس مدهيين فهمهم و مكوين وهو مشاغل بالو غير حنان…. مراضيش يشوفها غادة و حالتها تتحسن و تتزيان….. دخلت حنان و يوسف….. مع الدخلة غرغرو عينيها و نزلو الدموع مع خدودها….

تسسمع القرآن شعر لحمها كيوقف و كتشوف البنات كيبكييو مكويين على مهم… للحظة قالت مع بالها ان همها اهون من همهم …..هي على الاقل مشافتش مها و معاشتش معاها …..مذاقتش حنانها و حبها و جات لحظة و تحرمت منوو…..

بقاو فيها و شفقت على حالتهم…..مع دخل يوسف هزت فيه تيسير عينها غير شافتو و عرفاتو هو ناضت قافزة و جرات حتى ترمات فحظنو تتبكي…..ضمها ليه و خلاها تبكي على خاطرها…… مقدرش يحبس دموعو…..خلاهم ينزلو…. جات شيماء تاهيا و تعانقو بثلاثة حتى بكاو گاع اللي جالسين…..

عنقت حنان تيسير و بكاااات معاها و لأول مرة عنقت حتى شيماء اللي بقات فيها مهما دارت فيها لكن كيبقا هذا ظرف خاص….. محمد أمين تخلع من الاجواء و داك البكا بدا تيبكي حتى هو مسكت حتى طلعاتو للبيت….. هبطت جابت ليه مياكل وكلاتو و خدمت ليه الرسوم و خرجت خلاتو بعدما لبست جلابة كحلة و دارت شال على راسها…..

نزلت تعاون البنات و توقف معاهم….. وهي غادة تعيط ليوسف من براا ينزل ليها الساك من الطوموبيل تعرض ليها ايوب….. ماحسات بيه حتى وقف عليها كيفرنس متقولش راه فموت…. رجعت بلور غادة بالجنب تبدل الطريق لكن كان سرع منها….

و خداها من ذراعها مدخلها لقنيتة مورا الخزانة مزيرة حتى حست بيه لصق عليها….. خرجت فيه عينيها و قالت بغضب….

حنان: شنو كدير طلق مني خليني نمشي فحالي واش حماقيتي

ايوب:(عاض على شنوفتو تحتية بشكل مقزز كيطلع و يهبط فيها بشهوة) سمانيتي العفيريتة و بان عليك الخير وليتي غير ديال الفراش

حنان:(صدمها ما حسات تا هزت يدها صرفقاتو بحر جهدها) نعلة الله عليك الموسخ راني مرات الراجل دابا الحيوان تفوووو واش مكتذعر لا من موت ولا مرض الله ياخد فيك الحق(دفلت فوجهو)

ايوب:(ضحك بصدمة و مسح الدفلة من وجهو) تعلمتي تهزي يدك و دفلي ههههه لا برااافو (بسرعة قلب وجهو لتخنزيرة) ضسروك الفلوس الموسخة كنتي ملقياش تا دار فين تسكني….

حنان:(بقد ما ضراتها هضرتو و حطمتها جاتها واحد الشجاعة انها توقف فوجهو) اه لقيت دار و الحمدلله حسن من الف شماتة عرفتو قبل اما نتاااا شماتة و رعواني و غتبقى هكاك حياتك كاملة(تنفضت منو) طلقني ولا غنجمع عليك عباد الله طلاااق…..

ايوب:ايييه تحل ليك اللسان امريعيدة سيري دابا بالحق ليام بيناتناااا طويلة (بعد كيحك فلحيتو تا دازت تتجري….)

مشات حنان بقوة الخلعة نيشان للرياض مبقاتش عيطت ليوسف….. واخا وقفت فوجهو و تجابهت معاه لكن فداخلها مازال خايفة منو….. ريحت فواحد القنت فالكوزينة وجهها صفر و كترعد بالخلعة…..

خلعة ديالو و الخلعة لا يشوفها شي واحد…. دخلت عليها شيماء بالسيف باش تتحرك لقاتها هكاك قالت وهي تتشرب….

شيماء:(بصوت مبحوح) مالكي جالسة تما بوحدك خرجي جلسي معانا

حنان: ها لا غا قلت لا تبغيو شي حاجة واش بغيتي تاكلي شي حاجة راك حاملة و خاصك تقوتي

شيماء: لا لا ماعندو منين يدوز

حنان:(قربت ليها و معنت شوفة فيها شافت جنب فمها باين مضروب و عينها من واحد الجيهة زرقة) شيماء نسولك….

شيماء: اه سولي شنو كاين

حنان:(بتردد) مالكي حدا فمك و عينك واش ضربك شي واحد….

شيماء: ها لا لا غير تصطحت مع الباب انا مشيت…..

خرجت شيماء تتهرول مراضياش تشوفها حنان او اي واحد اخر هكاك…. شيماء و عزة نفسها مستحيل تسمح لأي واحد يعرف انها تتعنف و من عندمن من عند الشخص اللي خسرت علاقتها مع خوتها على ودو….. بقات حنان موراها كدور راسها و تحسر على الزغبية ديال شيماء اللي عارفة انها غدوز ايام سودة مع ايوب و مو….

حتى هي دازت من داكشي…. العصا بالليل و بالنهار و خاصها غير تقول اه….. تمارة و الشقا متتساليش منو….. الجوع و قلة الماكلة….. القهرة و الحگرة….. كولشي هادشي داز على حنان و كيفاش باقا ديك الانسانة واقفة على رجليها….. خارجة لعند لعيالات ريحت فجنب ام ياسمين تيهضرو مرة مرة……

جات المراة اللي غتغسل حفيظة و طلبت يدخل معاها شخص او جوج من عائلتها….. حتى حد ماقدر يدخل…. قررات سميرة تدخل و جرت معاها شيماء بما انها بنتها….. تكاوها فوق السرير و بداو تيحيدو ليها حوايجها بعدما سترو ليها عورتهااا اي المنطقة بين السرة و الركبة اللي مخاص حتى حد يشوفها….

لبست المرة اللي كانت على وضوء قفاز و خدات ماء دافي نجات بيه حفيظة و غسلت عورتها مزيان و رجعت ليها غطاها…. سمات الله و نوات تغسلها و بدات تتوضي فيها الوضوء ديال الصلاة من غير فمها و نيفها اللي دوزت عليهم توب سارد….. بدات ليها الغسل التاني…..

غسلت ليها شعرها بماء السدر……و جمعاتو عاد غسلت ليها الشق الأيمن ثم الأيسر….. خوات عليها الماء كولها و بدات تتعاود ليها الغسل لخمس مرات….. و فالأخيرة استعلمت الكافور الأبيض…. كان مدقوق خلطوه بالما و شللوها….. نشفو ليها لحمها و ظفرو ليها شعرها على ثلاثة و جمعوه مور راسها…..

قطعو ليها ظفارها و نقصو ليها من شعر بيطانها….. و هنا جات مرحلة التكفين اللي كفنوها بخمس قطع….. خمار و ازار و قميص و لفافتان….. بعدما حطو عليها اللفايف اللي فيهم و الحنوط و حطو قطع من القطن حتى هوما فيهم الحنوط على فمها و نيفها و اذنيها و عينيها و تحت بيطانها و فسرتها و ركبتها و اماكن السجود……

كملو تغسالها و تكفينها و طول هاد الوقت سميرة و شيماء دموعهم ماحبسوش….. كيفاش لا وهوما كيشوفو اخرتهم….. كيشوفو كيفاش الإنسان بعدما كيكون قوي و شامخ تتجي الموت فلحظة و كتديه…..

خرحت سميرة شيماء متكية عليها تتبكي و دخلت تيسير مع يوسف….. مقدرتش تيسير تصبر فبلاصتها خرجت و بقا يوسف….. هاد الأخير اللي جر كرسي جلس عليه حداها و حط راسو على كتفها و بكا….. بكا و شكا للخالق و طلب منو يبرد نارو و يقويه حتى تفوت هاد المحنى…..

عاتبها علاش زربت و مشات قبلما تشوفو…. حتى دخل عليه حسن لقاه هكاك…. صبرو و تسناه حتى خرج عاد جلس….. هو الثاني دموعو نزلو….. قلبو تقهر على شريكة عمرو….. دعا معاها و طلب منها السماحة….. تفكر شحال من حاجة و ندم عليها….. دعا من قلبو ربي يرحمها و يصبر أهلها…..

خرج و كان خاصهم يديوها يدفنوها….. خرجوها ولادها و امين و علي فوق كتافهم هازين تابوتها…… تابعينهم رجال كيرددو لا إله إلا الله….. بداو شي نسا كيغوتو لكن فالبلاصة منعوهم….. هنا مقدرو لا بناتها ولا سميرة ولا اهل الرياض يصبرو و هوما تيشوفو فيها غادية و بلا رجعة…..

بكاو و بكاو و بكاو….. ماعندهم مايديرو من غير البكا….. شيماء بالسخفة طاحت على وقفتهاااا….. ماهزوها غير شي نسا….. اما تيسير فتبعاتهم حفيانة حتى خرجو ما شدها غير باها تيعنق فيها وهي كطرطا باغا تمشي…… طلعوها فسيارة نقل الأموات و كل واحد ركب طموبيلتو…..

منعو على النسا يمشيو للمقبرة و مشاو غير الرجال….. صف ديال الطوموبيلات غادي…. دوزوها للمسجد صلاو عليها صلاة الظهر و صلاة الجنازة و كملو طريقهم للمقبرة..

فالرياض جا الطريطور جاب الغدا اللي كان عبارة على كسكسو بالتفاية حطو كولشي و قادوه فانتظار الرجال يرجعو…..

حنان فالكوزينة مقابلة العيالات اللي كيغسلو الماعن حتى جات عندها سميرة تتجري…..

سميرة: حنان تسخري ليا عفا بنتي للفرماسي مالقيت تاواحد

حنان: واخا اخالتي شنو خاصك

سميرة:(مدت ليها ورقة و الفلوس) هانتي ابنتي هادو الله يرضي عليك…..

خرجت حنان للفرماسي تجيب لسميرة شنو خصها…. غير خرجت بشوية وقف طاكسي قدام الرياض….. نزلت منو اللي مكانش متوقع انها تبان….. بجلابة مخزانية فالأسود و شال غير لايحاه على شعرها اللي مطلوق….. صباط طالون بصاكو..جارة فاليز متوسطة… نظاظر ديال الشمس باينين غاليين….

تحلف عليها مجاية تعزي غادة كطقطق بصباطها و ريحتها كتشم منين….. دخلت تتبان ليها الدنيا عامرة حتى قشعت تيسير…. مشات عندها حتى وقفت عليها محيدة نظاظرها باش يبانو عيونها السود كيبريو….

اميمة: تيسير (هزت فيها تيسير عينيها بصدمة مكانتش متوقعاها تجي نزلت هي عنقتها تتواسيها زعما) كيبقيتي اختي و كيف بقا الخاطر البركة فراسك

تيسير:(بادلتها العناق) الحمدلله اختي اش غنديرو حكم الله جلسي بعدا…

اميمة:(جلست و حطت الساك و النظاظر حداها) داكشي الله يرحمها ياربي واش كانت مريضة….

تيسير: اه مرضت اختي ولكن ماشي لدرجة الموت تعشينا مجموعين مشات لبيتها شوية عيطت لسعيد دخل عندها حتى كتاب تموت بين يديه….

بقاو كيدويو حتى جات سميرة…. تصدمت ملي شافتها….. كحلت بالعما تا كانت راجعة و قشعتها هي ناضت سلمت عليها و دارت معاها الصواب….. دارت على اهل الدار كاملين سلمت عليهم عاد قالت ليهم غتمشي تشوف ولدها….. فعلا دخلت عليه لقاتو كيتفرج غير شافها طار بالفرحة….. نقز عندها كيجري معنقها و كيضحك…..

م.أمين: مااااامااااا جيتي وحشتك بزاااف

اميمة: احححح على رويحة تا انا اولدي وحشتك بزاف و جيت نريح معاك شوية

م.أمين: تا بابا غيفرح بحالي

اميمة:(توسعت ابتسامتها) من فمك لربي اولدي عرفتي جبت لك بزاااف الشوكولا و الالعاب

م.أمين: يااااي شكرااا مامي غنبقى نلعب بيهم انا و ماما حنان

اميمة:(تبدلت ابتسامتها لنظرة غضب) كيفاااااش اش تتقول

م.أمين:(قفزاتو ملي غوتت حتى تخلع) ما قلت والو والله

أميمة: شكون هاد ماماك حنان (شافت راسها خلعاتو حتى رجع صفر) ياك مبقيتش انا ماماك بوحدك صافي بدلتيني

م.أمين: لا لا نتي ماما و هاديك ماما حنان عزيزة عليا حيت تتلعب معايا و تتنعسني فالليل و كطيب ليا لي باط و تا بابا گاليا نبغيها حيت هو تيبغيها

اميمة:(خرجت فيه عينيها بصدمة من هادشي اللي تتسمع حست بالخطر و حست بهاد حنان غتشفر ليها ولدها و تا الراجل اللي جاية زعما تصلح معاه الأمور) شوف ابابا هاديك المرة راه خايبة و ماشي هي اللي تطيب ليك راه الميمة سميرة اما هاديك دايرا بحال مرات بابات سندريلا و بغات ديلك باباك

م.أمين: واش بصح اماما ولكن هي تتبان ضريفة

اميمة: غير تتمثل باش دي ليك باباك اولدي و تمشي تولد معاه دراري اخرين و ميبقاش يبغيك يولي بابات ولادها صافي

م.أمين:(حبساتو البكية) لا لا بابا ديالي بوحدي هي خايبة منبقاش نهضر معاها

اميمة:(ضحكت بانتصار) صافي و ايلا قربت ليك قوليها عندي ماما وحدة يله اجي بوس مامي….

تلاح عليها الطفل البريئ اللي معارف والو فالخبث و معارف من الصح من الكذوب….. كذبت عليه و وهماتو بانها غدي ليه باباه و طبيعي ولد فعمرو يتيق و يكره حنان…. و هذا هو اكبر غلط كيديروه او كنديروه فمجتمعناااا…..

ملي تتحرش دري صغير سوا يضرب شي واحد او يعاير شي واحد او يكذب على شي واحد او او او….. فتأكد انك واخا متكون قاصد والو لكن بداك الفعلة راك زرعتي فيه ديك الخصلة الخايبة بديك التحريشة و كيما دارها لواحد اخر غيديرها ليك نتااا…. حنا اللي كنزرعو فالدري الصغير الحقد و الكراهية و السم…..

كتشوف شي دري صغير و بينك و بين نفسك تتقول شوف هاد الدري مافيهش البراءة شوف هاد الدري مسموم شوف هاد الجيل مكيحشمش…. مكتحطش فبالك ان داك الدري مجاش و طلع هكاك….. ماحد الولد و البنت كيكبرو وهوما كيكابتيو و كياخدو من المجتمع اللي عايشين فيه شخصية و التصرفات…… كتشوف ولاد اللي لاباس عليهم كتلقاه مأدب و مربي و كيحشم و حنين…..

طبيعي حيت البيئة فين عايش هكاك….. مكيهضروش على شي واحد قدامو…. متيعيروش شي واحد قدامو…. متيعلموهش يكذب….. حتى انهم متيتناقشوش حتى قدامو….. و اش كتسنى من شعب كيغوت قدام الولد يتعاير قدامو يضارب گااااع قدامو….. اكيد غيمشي على حساب الوسط فين عايش…..

و هكا وقع لمحمد امين اللي طيلة هاد المدة اللي مكانتش فيها مو كان يوسف تيحاول يطلعو مزيان و يبعدو على اي حاجة تتخص الكبار باش ميخصرش ليه طفولتو….. ولكن جات اميمة و فأقل من ساعة قلبت للولد دماغو و كرهاتو فحنان…..

حنان مسكينة اللي غير نية و خبر ربي فطبگو ماعلا بالها بوالو…. عاشت مسكينة تكرفيس و تمرميد اللي متقدر تاوحدة تعيشو و ملي قالت الله الدنيا ضحكت بيها و وأخيرا غتعيش حتى هي بحال البنات فسنها….

بداو تيخرجو ليها المشاكل من كل قنت…. غادة فالطريق و عقلها شارد…. تتفكر فأيوب اللي كرهها فعيشتها و خلاها ماتعرف مادير….. تخاف متقولش ليوسف و شي نهار يحصلهم فشي موقف هكاك وهي مدايرا لا بيدها لا برجلها…..

تقوليه يصدق قاتلو و عارفاه يديرها و اساسا مع هاد الاجواء ماتقدر تقوليه والو….. تقولها لياسمين حتى هي ماعندها مادير…. قالتها لمحمد مشكلة مقالتهاش غادة غير تشغل ليها بالها….. مخها وقف و الطريق كولها وهي كدعيه لمولاه ياخد فيه الحق و يكرهو عيشتو كيما كرهها عيشتها…..

خدات اللي بغات من الفرماسي و رجعت وهي راجعة بانو ليها شي رجال جاو….. عرفت بيلا رجعو…. دخلت مع الباب نيشان للدروج عطات لسميرة السخرة….. دازت لبيت محمد أمين طل عليه ملقاتو لقات باليزة محطوطة فوق الفراش محكرتش قالت غيتكون ديال شي مرة…..

نزلت تتقلب تا كيبان ليها ظهرو جالس فوق شي وحدة كيضحك و فرحان….. معرفتهاش من ظهرها حيت گاع مالين دار ملابسينش هكاك….. مشات فتجاهها هزت فيها عينها لقاتها اميمة….. طبعا معرفتهاش حيت عمرها شافتها و مجاتهاش على بالها گاااع تكون مو….. عيطت بصوت حنون…..

حنان: محمد أمين هاني جيت…. (مداهاش فيها دار و خشا وجهو فعنق ماماه خلاها غير تتشوف) مابغيتيش تشوف شنو جبت لك معايا

م. أمين:مابغيتش سيري فحالك لدارك نتي خايبا

تيسير:(كانت جالسة سمعاتو اش قال غوتت عليه) أمييين حشووومة اش هاد الهضرة تاني

اميمة: ايوا اختي راه غا دري صغير مديش عليه (ميقات فحنان اللي بقات غير تتشوف)

حنان:(جبدت من جيبها شكلاط اللي كيعجبو حطاتو ليه و قالت بحنان) تخاصمتي معايا يله اجي نتصالحو شوف جبت ليك الشوكولا اللي تتبغي

ن.أمين:(يله بغا يهزو وهي تقرصو اميمة حتى لاحو فالأرض و قال بالغوات) مابغيييتوش ماما جابت ليا بزاااف ديالك نتي خايب و نتي خايبة و سراقة سيري لداركم

حنان:(تصدمت و غرغرو عينيها شافت فأميمة عرفاتها ماماه وقفت و قالت) دابا جات ماماك وليت خايبة…..

زادت تتزرب عينيها مغرغرين بالدموع….. يقدر اي واحد تجيه هضرتو عادية و غيقول غير ولد صغير و معارف والو لكن بالنسبة لحنان اللي هي نيت محتاجة للحنان…. كان محمد امين بالنسبة ليها ولدها اللي مات….. بغاتو و اعتبراتو بحال ولدها…..

و الفعل ديال التبديلة اللي تبدل عليها ملي جات مو اللي عارفة و متأكدة انها غتكون حرشاتو حيت اساسا ديك الهضرة ماشي ديالو و لكن ضرها خاطرها….. تسطحت وهي غادة تتمسح فدموعها مع يوسف اللي كان داخل هو و سعيد…..

جاي محطم و مصدع باغي غير يخط راسو…. سمع نص الهضرة و سمع هضرة محمد امين اللي عصباتو و يله كان داخل ليه تصطحت معاه حنان….. هزت عينها فيه باكيين….. عقد حواجبو بغضب و حزن عليها عارفها شحال رهيفة و رقيقة و ابسط حاجة كتأثر فيها….. شدها بالزربة و محار فحتى شي واحد ضمها عندو…..

خرجت شهقة و تبعوها خواتاتها وهو كيطبطب على ظهرها….. اميمة كترمقهم بنظرات نارية و كون كانو عينيها كيخرجو القرطاس كون صارو غرابل…..تفقصت و شافت كيفاش معنقها و خايف عليها بحال شي بيبي صغير….. ملقات قدامها حتى شي حيلة اخرى من غير انها طبق خبثها على الولد الصغيرة….. فالبلاصة نزلت لوذنو و قالت بصوت سمعو غير هو…..

اميمة: شفتي قلت ليك بغات تدي ليك باباك هاهو عنقها و نساك نتا

م.أمين:(غوت بالجهد) لا بابا ديالي

يوسف:(سمعو غوت دار خنزر فيه و صهل) امين اجي لهنا (بقا فبلاصتو مخلوع عاود غوت) قلت ليك اجي لهنا….

مشا عندو امين حادر راسو مخلوع شدو من يدو و شد حنان من الجهة لأخرى و زادو طالعين للبيت….. يوسف ماشي من النوع اللي كيبغي بنادم يعرف مشاكلو…..

مكيبغي لا يتخاصم ولا يتناقش ولا يحل المشكل قدام بنادم….. كيقول انه قدما دخل بنادم قدما غيكبر المشكل و غيصعاب حلو…. فعلا دخلهم للبيت و سد الباب…… دار عندهم مخنزر….. ملامحو مشدودين لكن التعب ظاهر عليه…..

تحت عينيه كحل بالسهير ديال هاد الأيام…… شعرو مخربق و وقفتو مهدودة……طول فيهم الشوفة بجوج و قال بصرامة…..

يوسف: دابا واش بنت ليكم انا فحالة مزيانة ديال تبداو مضاربين ليا

حنان:(بغات تهضر) ولكن انا (قاطعها كيغوت)

يوسف: ششششش مكاين لا انا لا هو واش غديري راسك فدري صغير واش بعقلك ولا متكسابيهش راه دري صغير…

حنان: انااا ماشي هكاك غير هو (معرفت ماتقول الهضرة تصرطت ليها)

يوسف: هو هي تتهجاي سمعيني احنان الولد باقي صغير و ماعندو عقل و ايلا درتي عقلك فيه راه ماعندك عقل كثر منورر

حنان: هادشي اللي قدرك عليه الله

يوسف: حنان (خنزر فيها) متبدايش تمرضني عليا حالتي الله عالم بيها مغنبداش واحل معاك نتي و الدري وانا المشاكل فوق راسي

حنان: واخا ما قلتي عيب سمح ليا…..

خرجت و خلاتو تيصوط….. قلبها ضارها من هضرتو….. من جهة عذراتو و عرفات حالتو ماشي ديال الملاجة ولا قال قلتي و من جهة بقى فيها الحال خصوصا انها مازال جديدة و حتى شخصيتها الحساسة تتخلي اي حاجة تأثر فيها…..

نزلت راسمة الضحكة على وجهها واخا قلبها ضارها….. لقات اميمة معنقة ولدها و تاضحك معاه…. نعلت الشيطان و مشات للكوزينة تشوف اش دير حتى دخلت عليها سميرة….

سميرة:(دوزت يدها على ظهر حنان) ماديش عليه ابنتي راك عارفة حالتو دابا عذريه راه كولشي من ديك اللفعة…

حنان:(غرغرو عينيها) عمراتو اخاالتي تا نفرني الولد

سميرة: سكتي ابنيتي سكتي دوك الفعايل متعرفيش ليهم بالحق ما بقى قد ما فات شحال قدها دوز معاه گاااع و غيرجع لك

حنان: حسبي الله و نعم الوكيل…..

كملو هضرتهم على الناس و العزاية حتى سالاو الناس الغذا و القراب جلسو و البعاد كل واحد مشا لدارو….. البنات حالتهم حالة….. شيماء تبكي و ترد لقلبها…. من جهة الحمل و من جهة العذاب اللي عايشة فيه مع ايوب و مو و من جهة فراق ميمتها….

تسكت دقيقة و تبكي ساعة….. تيسير مازال محتاجة لمها…. تتفكر فعرسها اللي قريب و شكون غيوجد معاها و يدهز ليها و يوصي راجلها عليها…. اما الدراري فحالتهم بوحدها…. كل واحد كيبكي فالداخل ديالو لكن من برا ملزوم عليه يبقى جامد و جبل مايهزو ريح…..

محمد و ياسمين مازال جايين فالطريق مرة ينعسو مرة يفيقو….. ياسمين تمحنت غي بالتقيا ملي طلعت وهي كتقيا حتى طلعت الدم لمحمد ما رتاحت حتى خدات مهدئ و نعست….

تعشاو الناس و بقى الخير غير شايط و كيما كنقولو و استغفر الله عليها كلمة بالحق تتقال و بصح (كية اللي عطا خدو للتراب) و فعلا هاد المثل كيجسد الواقع المعاش….. بحيت مع كيتدفن الميت كيرجع كولشي غير ماكلة و زرود….. حتى انه بعض الناس رجعو كيديرو العشاوات فالقاعات بالكاميرا و فرق الانشاد……

تعشاو الناس و اللي قريب مشا و اللي بعيد بقااااا فالرياض…… التواسع موجودين و بنادم لاقي راحتو….. اللي نعس نعس….. و اللي فشي مجمع عاطيها للضحك مهاموش….. اللي داير الموت قدامو و كيقول ليوما هادي غدا انا…… ولادها و بناتها تيفكرو كيفاش مبقاوش غيشوفوها مازال……

الوحدة و نص خرج يوسف فعز البرد و الشتا….. متوجه للمطار يجيب ياسمين و محمد اللي كانت طيارتهم غتنزل بعد نصف ساعة…… غادي و تيسف فگارو مور لاخر محاسش براسو تيهلك فصدرو….. وصل و بقا كيتنسنى فالطوموبيل حتى وصلت الجوج عاد دخل….. فعلا الجوج و ربع و صلت طيارتهم……

نزلو و ضرب فيهم البرد ديال المغرب وگضهم واخا ياسمين حاسة براسها ماهياش و شاكة فشي حاجة لكن كتسنى يفوت هادشي باش تتأكد…… كملو الاجراءات و خداو باگاجهم عاد تمو خارجين حتى كيبان ليهم يوسف……من الشوفة اللولة تتبان فيه هاز الدقة…..

وقفتو مهدودة….. لحيتو مخربقة…… عينيه دخلو….. فمو بيض بقلة الماكلة…..و عينيه حومر بالبكا…… حط محمد الفاليز و عنقو بقوة تيخبط فظهرو….

محمد: البركة فرااااسك اخويا الله يرحمها و يصبركم

يوسف:(كيخبط فظهوو بدورو) امين اخويا واخا جاتنا غفلة….

محمد: الحمد لله على كل حال اصاحبي طلب ليها الرحمة و كون واجل و دعي معاهاااا….

ياسمين:(قربت ليه تاهيا عنقاتو و دموعها تينزلو) البركة فراسك ايوسف الله يعظم اجرك و يحسن متواها

عبدالله: امين اختي امين…..

خرجو للطوموبيل و البرد تيخبط فيهم…… طلعو عاد دفاو….. شدو الطريق خارجين من المطار غير فالخلاوات….

محمد: دوزنا اخويا للدار هي اللولة

يوسف: علاش اصاحبي مالك

محمد: نحطو هادشي و نبدلو و نتبعوك…..

فعلا دوزهم للدار عاد مشا هو للرياض يرتاح شوية و يوجد نفسيتو للعزايا اللي كيجيو….

طلعو للدار عيانين جسديا بالسفر و الطريق و معنويا بخبار الموت اللي كتهد الواحد…..

ياسمين رجعات بحال الشرويطة الطريق كولها وهي كترض و نفسيتها مرضت تاهيا….. دخلو للدار اللي كانت مخنوقة مع كولشي مسدود حط محمد لي فاليز و مشا حل الشراجم كلملين يتبدل الهوا فالدار و يدور البرد….. دار جيهة ياسمين لقاها مليوحة فوق واحد الكنابي سخفااانة و وجهها صفر هارب من الدم….. مشا عندها كيتلمس حنيكاتها بخوف…..

محمد: بانت ليا حالتك ماشي هي هاديك خليك نتي ترتاحي نمشي نقوم بالواجب و نرجع عندك (جلس عند رجليها)

ياسمين:(قفزت و جمعت الجلسة) اوييلي متقولهاش تا بالضحك حشومة گاااع انا نشرب شي فيتامينات و نرجع بيخير

محمد:(دوز على فخدها بحنان) خفت عليك راه حالتك معاجبانيش غذا نصبحو عند الطبيب سيمانة هادي و نتي ماشي على برجك

ياسمين:(تنهدت بصوت مسموع) مكنحملش الموت امحمد و أجواءها كنمرض ولكن الغالب الله مجاتش منمشيش

محمد:(تحنى عليها مكالي تقلو بيدو باش ميرميهش عليها خاشي وجهو فعنقها كطبع بوسات متقطعين) الله يخليك ليا العمير ديالي….

بقاو على ديك الوضعية كينقل شفايفو بين عنقها و فمها و ذقنها طابع عليهم بوسات…. كياخد جرعتوووو اليومية او بالأحرى اللي كياخذ كل ساعة و كل ثانية…. جرعتو من الحب و العشق و العسل و الامل….. حالو حال المدمنين اذا مخداش كميتو الكافية من رحيق شيايفها يجهل…..

ناضو بعدما ارتاحو و سرى فياسمين مفعول الفيتامينات اللي خدات مع بعد الحلوى حتى رجعات شوية من طاقتها….. خدات دوش خفيف توگضت و خرجت لبست ملابس سخونة فوقهم جلابة مخزانية بثوب المليفة الغليضة ديال البرد فاللون الاسود و شال سخون لاحتو على راسها بعدما نشفاتو احتراما لحرمة العزاء و الناس….. خرج محمد تاهو مكبط و شدو الطريق فطموبيلة ياسمين….

وصلو للرياض لقاو شي طوموبيلات قلال مازال قادم الباب و الباب محلول…. دخلو معاه شادة ليه فيدو مزيرة عليها…. قلبها مقبوووط عليها وهو كثر منها…. الضو ديال الباحة مطفي لكن ديال الصالونات مازال شاعل…. توجهو لواحد سمعو فيه الهضرة….

مع دخلو طاحت عينو على باه اللي مكمش فقنت السداري بجلابة رجالية سخونة و الطاقية فوق راسو…. عينيه داخلين حمرين و تحتهم السواد و من جلستو باين مضيوم….. حداه سميرة اللي مكانتش حسن منووو…

سميرة اللي مدوزتش هي و المرحومة قليل من مناوشات و حروب لكن دابا حالها حال مالين الدار و كثر تكوات على غراقها و حز فخاطرها موتها المفاجئ…. دخلو لصالون و بدات جولة ثانية من العناق و البكا…. ياسمين دموعها محبسوش و تنخصيصة طالعاها عنقات تيسير و بكات معاها و تألمت لألمها حتى ما بقات قدات…..

مسالاتهم حتى كانت سخفت و عينيها تقلبوووو لونهم الابيض رجع احمر و البؤبؤ الاخضر زادت حدة لونو اكثر…. وجهها تزنك و النفس تحقنت فيها حتى تكاتها سميرة عليها تتبسمل عليها و تقرا فالقرآن حداها محمد اللي حتى هو نزلو دموعو اللي واخا تكون جبل ينزلو دموعك فهاد اللحظات و خصوصا ملي عنق باه و حس بحرقتو…..

جالس حدا ياسمين كيشوف فيها مخشية فسميرة… من جهة طلع ليه الدم ر محملش يشوفها فهاد المنظر و كره الساعة اللي جابها فيها…. و من جيهة بقات فيه و زادت حزت فخاطرو حنيتها الزايدة تيشوف فيها تتسكت حتى تسكت و غير تسمع تيسير شهقت و ترجع تبكي…. شاف تا عيا و خلاها متكية على مو عاطيها مساحة فين تنفس و توجه عند باه محاول يواسيه و يوقف معاه…..

إن كل نفس ذائقة الموت….. الا ان الحياة لا تتذوقها كل الأنفس…💔

نرجعو للوقيتة فين وصل يوسف محمد و ياسمين للدار و رجع للرياض….. مهدود و مخلية عشتوووو…. حاس براسو بحالا فبير غارق فيه غير الظلام…. حاس براسو محتاج لشمعة تونسو و ضوي عليه عتمتوووو…. سطاسيونا الطوموبيل و نزل كيحك فعينيه و ذقنو….

دخل مع الباب متوجه لبيتو يدوش و يرتاح حتى سمع صوتهاااا من الكوزينة….عقد حواجبو باستغراب و استنكار…. كيقول مع بالو شنو مازاال كدير تما فهاد الوقت من الليل و الاغرب لاش مجالساش فالصالون مع مالين الدار….. دخل مدرم حتى كيلقاها واقفة بجلابتها الكحلة نيت جامعة شعرها الفوق….

عينيها حمرييين و صغارو بالبكا و منخرها احمر و مرة مرة كتجر النفس مخنوقة…. واقفة قدام لافابو كتغسل فالماعن ديال اتاي اللي بقا كيتسربا للناس حتى لأشمن وقت…..

حداها تيسير اللي حالتها عالم بيها غير الله مدورين الهضرة بيناتهم كل وحدة فيهم محاولة تنسى همها…. حنحن حتى نتابهو لوجودو….

تيسير:(بصوت مبحوح بالبكا و الغوات) جيتي اخويا كيف وصلو من السفر

يوسف:(قرب ليها تيحك على ظهرها بدفء و عينو على حنان اللي خطفت فيه الشوفة و كملت شغالها) الحمدلله دازو للدار يحطو رحيلهم و غيجيو ماعيتيش نتي (حركات ليه راسها بايجاب مع تنهيدة قاااصحة) ايوا نوضي ترتاحي نعسي ليك شوية مازال ايام الصهير جاية

تيسير: انكمل مع حنان بعدا حشومة من الصباح وهي واقفة ماريتاتش

يوسف: غير سيري اختي انا نكمل معاها ياك غا كتزيفي (كتمسح الماعن بزيف)

تيسير: واخا انا نمشي للصالون….

يوسف:(تبع ليها العين تا خرجات عاد دار عند حنان اللي مدارتش گاااع عندووو) شنو نتي ماعيتيش روبو ولا خدامة بالضو

حنان:(ردات بهداوة) يلا مادرتش انا هادشي مكاينش اللي يديرو

يوسف:(عقد حواجبو بانزعاج) علاش فين العيالات اللي مكلفين بهادشي

حنان: كل وحدة تيسرت لدارها راه الليل هذا

يوسف: صافي خلي هادشي و دوزي لبيتك ترتاحي (كمل بتساؤل) محمد امين نعس مشفتوش من قبيلة

حنان:(بغصة رجعت تفكرت الواقعة) حتى انا مشفتوش ملي شفتيه ناعسة معاه ماماه فالبيت

يوسف:(عض حنكو من لداخل) صافي خليه تا تمشي متخالطيش معاها بزاف البلاصة اللي تكون فيها خويها مقاد على مشاكل

حنان:(سدت الروبيني بعدما كملت الماعن و دارت شافت فيه بعويناتها حومر طايبين باينا بكاااات حتى ماقدات و الاسباب عدة) ماشي انا اللي بغيت ولا غنبغي نجبد لك الصداع ايوسف

يوسف:(تنهد و استفر الله) عارف احنان و حياة ولدي حتى عارف ولكن قدما قديتي تجري راسك للتيساع جريه اميمة نتي معارفاهاش وهي مجات الا وا دايرة فبالها شي حاجة (سكت بعدما سمع الحس ديال رجلين كيخلفو جيهة الكوزينة)….

سميرة:(داخلة حادرة راسها كتمسح نيوفها بكيلينكس عند بالها مكاين حد حتى لقاتهم واقفين بيناتهم مسافة) هاء يوسف نتوما هنا عند بالي مكاين حد كيبقيتي اولدي شويةةة

يوسف:(عنقها بجنب محاول يعمر ولو شوية داك الفراغ اللي بقا عندو) الحمدلله اميمتي اش بيدي مندير اي حاجة جات من عند الله مرحبا بيها الموت حق البركة فيكم (باس على راسها بحزن)

حنان:(غرغرو عينيها من المنظر اساسا قلبها طاااايب من گااع الجوايه محست بدموعها حتى نزلو)

سميرة:(عنقت يوسف) الله يرحمها اولدي فهاد الليلة و يتبتها عند السؤال و يوصلنا عليها مؤمنين سير اولدي ترتاح (هزت عينها فحنان لقاتها كتبكي) الله يابنتي طيبتي دوك العوينات من الصباح ونتي على الشقا و البكا (مشات خداتها فحضنها كدوز على ظهرها بحنان)سكتي ابنيتي سكتي راك نتي خاصك توقفي بجنب راجلك و تقويه الله يرضي عليك

يوسف:(طول فيها الشوفة معنقة سميرة و فقرارة نفسو عارف انه تاهو عندو يد فهاد البكا خصوصا انه فالايام الاخيرة عرف طبعها و حساسيتها الزايدة)

حنان:(بكات تا تفشات عاد بعدت من حضن سميرة راسمة ابتسامة باهتة كتمسح فدميعاتها) الله يحفظك اخالتي و يطول لينا عمرك سيري حتى نتي ترتاحي

سميرة: امين ابنتي امين جيت غير ندي واحد الكينة لعمك (خداتها هي و الما و خرجت)

يوسف:(قرب لحنان حاضن وجهها بين يديه كيشوف فعينيها اللي معمرهم الحزن على غير عادتهم فالايام الاخيرة بعدما كانو كيلمعو و يشععو بالسعادة و الفرح فلحظة بهاتووو و طفاو) ما عاش ولا كان اللي يطفي النور اللي فعينيك (طبع قبلة على جبينها معبر بيها على اسفو) يلاه ترتاحي و مولاها ربي

حنان:(ابتاسمت ليه و شدات فيدو تابعاه و هو قدامها)….

قصدو بيتهم طالعين حبة حبة كل واحد فيهم هاز فوق ظهرو حمل ثقييييل و كل واحد فيهم خاطرو مرييض و خاصو يرتااااح…. محاولش يمشي لبيت ولدو كيف موالف كل ليلة من جهة محاملش يشوف كمارة اميمة اللي غترجع ليه ديك العاصفة ديال الاحداث و المشاعر اللي هو فغنى عليها….

و من جهة احتراما لوجود حنان…. دخلو للبيت كل واحد ساكت و جامع الكية فقلبوو….توجه لحمام خدا دوش دافي يعاونو يرتاح و حنان بدلت حوايجها ببيجامة سخونة و تخشات فبلاصتها كتقلب على النعاس اللي جافاها هاد الليلة و حلف ما يزاور جفونها لا هي ولا هو…..

بكات ياسمين حتى ماقدات……طاحو عليها عضامها و رجعت غير سخفانة و العينين طايبين بالبكااا…. معنقاها سميرة عندها و هي خاشية وجهها فيها كتشم فريحتها و حاسة بواحد الراحة عجيبة واخا الالم اللي فراسها كيزيد لكن حاسة براسها ماباغاش تحيد من داك الحضن…

بقات على داك الحال شوية حتى نعسات…. حنات فيها سميرة عينيها ملي سمعت تنفسها انتظم لقاتها نعست….ابتسمت لبرائتها ودارت عند محمد اللي كان داوي مع باه….

سميرة:(بصوت منخفض) محمد نوض اولدي طلع مرتك تنعس راها مسكينة عياات

محمد:(شاف جيهتها لقاها نعسات الحنيكات مزكين و تحت عويناتها حمر) راها الطريق كاملة وهي مريضة (ناض عندها بشوية جلس قدامها قفازي و هضر بهداوة) ياسمييين…. يسمين فيقي تمشي للبيت فيييقي (بقا محاول معاها بالشوية باش تفيق مجاتش يهزها قدام بااه)…..

بقا معاها بشوية حتى فاقت عينيها حمرين و شفيراتها مخيبلين كتشوف غير الضبابة كتهمهم بصوت مبحوح حاسة انها نعسات مئة عام و هي مكايناش حتى خمس دقايق…..

ياسمين: ن نعام (كتحرك راسها محاولة تستوعب فين هي) نعست هنا (هزت راسها فسميرة) محنتك اخالتي سمحيلي

سميرة:(دوزت على خدها بحنان) متقوليش هاكدا ابنتي مادرتي والو غي طلعي لبيتك ترتاحي

محمد: اه يله تنعسي فبيتك ميصلاحش تبقاي فايقا (دار مخاطب مو) الواليدة تيسري تانتي ترتاحي و جري معاك الواليد مكاين لاش تبقاو هنا محنين…. تيسير سيري لبيتك يلاه….

فعلا كل واحد قصد بيتوو ينعس و يرتاح بينما صبح الحال و بداو يجيو الناس…. طالع شاد فيها من خصرها وهي على عادتها فهاد الاواخر حاسة بواحد السخفة شديدة حتى مكتقدش تا تزيد…. غادي معاها حبة حبة تا وصلو للبيت دخلها تا جلست فوق السرير…..

ياسمين:(لاحت الشال من فوق راسها مخلية شعرها يتنفس) الله ياربي خنقني و انا سخفانة بلاش

محمد:(مقابل معاها فوق الفوتوي كيحيد صباطو) نتي هاد الحالة ديالك معاجبااانيش السخفة ولات ديما شاداك

ياسمين: غير قلة الماكلة و النعاس و مازال تجي ماما الصباح و سولها ملي غتكون شي موت فالعائلة مكنمشيش حدي نمشي و نبكي كيطيحو عليا عضامي (حيدات الجلابة و بقات باونسومبل سخون فالاسود)…

محمد: احسن حاجة تانا مكنحملش جو الگنايز الله يحد الباس (شافها نايضة) فين غادة تاني دوزي تريحي

ياسمين:(بضحكة صغيرة) راني ماشي زحفت غادة غير لطواليط… محمد عفاك دوك الفيتامينات فساكي صاوب ليا واحد مقديتيش ننزل

محمد:واخا غير ملي تخرجي نيشان بلاصتك تغطاي تانجي…..

مشا للصاك ديالها خدا دوك لي فيتامين و نزل للكوزينة بشوية….. دخل كيقلب فبلاصة الكيسان جبد جوج واحد دار فيه فيتامين مع الما و واحد كب فيه عصير ليمون يحيد عليها شوية السخفة….

قادهم فبلاطو و مع غيهزوو و يدور سمع صوت دوا من وراه….. الصوت اللي ليه شحال ماااا سمعاتو وذنو حتى انه قرب ينساه لعدم اهتمامو بيه….

اميمة: محمد هذا نتي

محمد:(دار نص ضورة بلاما يشوف فيها حادر عينيه بصوت بارد) شكون غيكون من غيري

اميمة:(قربات ليه اكثر ماسحة المسافة بيناتهم) لا غير حيت مشفتكش ملي جيت (مدت يدها تسلم عليه) البركة فراسك من جهة مرات باباك الله يبدل محبتها صبر

محمد:(شاف يدها ممدودة مقدرش يخليها هكاك سلم عليها بطرف صباعو و بالخف هرب يدو) عزانا و عزاؤكم واحد اختي (هز البلاطو و دار غادي حتى سمعها تاني قالت)

اميمة: واش ياسمين مريضة

محمد:(هز فيها عينو بشوفة ناقصة) لاش تتسولي موالفة كتسولي عليها

اميمة:(حكت ورا عنقها باحراج و عيونها السود مكحلين رغم الظرف دياا الموت الا انها متخلاتش على كحلها كيدورو من قنت لقنت) لا غير حيت شفتك مقاد بلاطو و مموالفاش ليك زعما عمرني شفتك درتيها

محمد:(فهم شنو بغات تقصد و بدات كطلع ليه القنديشة) لا دابا ولات موالفة ليا (بصوت قاصح) طلعي لشي بيت تنعسي مكاين لاش تبقاي ضوري وسط الرياض و الدنيا مخلطة…

لاح ليها هاد الكليمات و زاد خلاها كتحسر من وراه على شنو ضيعت من بين يديها فعينيها لمحة حزن و غضب سرعان ما تبدلت بضحكة ماكرة و الله بوحدو اللي عالم سبب ديك الضحكة…..

خرجت كتكسول فمشيتها بشعرها كيلعب فظهرها طالقاه على راحتو كأنها معروضة لعرس و ماشي گنازة……

اصبحنا واصبح الملك لله والحمد لله…. ❤️

صباح كئيب صبح على رياض تاج الدين فحال الجوج اللي قبل منووو….فاقو اهل الدار او بالأحرى خرجووو من غرفهم لأن اغلبيتهم النعاس حلف ما يزور جفونهم ديك الليلة….

نبداو من عند يوسف و حنان اللي دوزو اول غمامة فعلاقتهم هاد الليلة و هوما فاحضان بعضهم لكن واش القلوب صفات…. حنان بقاااات شادة فخاطرها ولو انها حاطة ليها بدل العذر ألف لكن بشخصيتها الحساسة حز فخاطرها الطريقة باش دوا معاها و بقا فيها الحال على محمد امين و اللي زاد الطين بلة مجية مو اللي عارفة انها غتزيد توعس الامور كثر ما هي سووودة…..

نقولو غارت هي بصح غارت منهااا…. ملي شافتها و شافت الفرق بيناتهم و طبعا الفرق شااااسع و هوما بعاد على بعضهم بعد السما على الارض….. وحدة جمالها رقيق…. بريئ…. شخصية حساسة…هادئة.. هشيشة…. ساهل تتهرس بكلمة….طالبة غير عيشة مستورة….. مع وحدة جمالها حاد….. عيونها السود رمز للغرور و العنفوان…..انفها اللي ديما مهزوز……

شخصيتها القاصحة و المغرورة….. طالبة انها تعيش عيشة الملوك و اكثر….. مطلبها تكون مركز الاهتمام و الكون داير كلو عليها….. طبعا مختالفين و داك الاختلاف سبب غيرة حنان….

هو خوف اكثر مما هو غيييرة….. خايفة يكون يوسف مازال كيحمل مشاعر من جيهتها…. خايفة يشوفها و يرجعو ليه الذكريات….خايفة يدير بينو و بين نفسو مقارنة بيناتهم….. خايفة تخرج خاسرة من المقارنة و تخرج خاسرة من اللعبة كاملة….. غتقولو علاش لعبة….. هي فالاساس لعبة كيلعبها معاها القدر…..

كيختابر صبرها فكل مرة….. كيعطيها فكل مرة فرصة تضحك و تفرح فيها و مكتحتال تحس بفرحتها و تشبع منها حتى كيهزها بنص باش تفيق…… هذه كانت ليلة حنان….. جميع هاد الافكار كانو كيدورو فبالها حتى هرب النعاس عليها و بقاااات فايقة حتى صبح الحال و سمعت الحس لتحت عاد ناضت من بلاصتها كتحس كأنها غارقة فشي بير……

البكا و قلة النعاس و المورال طايح….. مكرهتش تسد عليها فبيت بوحدها حتى ترتاح ولكن للأسف تمشي الرياح بما لا تشتهي السفن….. 💔

مكانتش حنان بوحدها اللي منعستش فداك البيت….. حتى يوسف نال حقو من الارق….. حتى هو هرب عليه النعاس كيما هرب على حنان و حلف ديك الليلة مايزور بيتهم ولا يوصل ليه…..حتى هو كان دماغو كيدي طرقان و يجيب طرقان….

من جهة التقصيحة اللي مقصح و قلبوووو تيبكي الدم من فراق ميمتووو اللي مازال محتاج ليها و غيبقى محتاج ليها ولو يوصل معرت فين و معرت شحال يولي عندووو…. ومن جهة مشكل حنان و ولدو اللي حز فخاطرو و عرف راسو قصح معاها لكن ديك الساعة مكانش بإيدو…..

هو خاص اللي يشد ليه بالخاطر و يسايس معاه و ماشي العكس……عارف ان مجية اميمة ماشي عادية و معوالاش تجيبها للبر….. معولة تبدا لعبة من العابها الخبيثة و اللي فعلا بداتها و حركت اول بيدق فيه و اللي للأسف كان ولدها…..

بكل برودة دم حرشات ولد صغير معارف والو فخبث الكبار و قباحتهم….. حرشاتو و عمراتو و زرعات فيه حقدها و كرهها و الله اعلم شنو قالت ليه حتى نفر حنان اللي دايرا معاه فوق ما يمكن دير مو معاه…..

هاد الاخيرة اللي حاس بيها مقصحة بزاااف….. عارفها انثى هشيشة قشة تهرسهاااا…… و عرف ان هضرة محمد أمين ضراتها و كمل عليها هو ولكن معارفش شنو يدير……حاس براسو مكتف الوسط…..و من جهة ثالثة مجية اميمة جابت معاها مجموعة من الذكريات اللي كان و لازال كيحاول يمحيهم من بالو……

مغينكرش انه مازال كيحس بشي حاجة من جيهتها….. مغينركش انها مازال كتحرك فيه شي حاجة فداخلووو….. و هادشي اللي محاملوش……محاملش يحس بهاد الاحاسيس اللي كتجيه….. محاملش يفكر فدوك الافكار اللي معمرين مخيلتوو…..

محاملش يذكر دوك الذكريات اللي كيجيو على بالو….. كيحس انه كيظلم معاه ديك بنت الناس اللي ثاقت فيه….و اللي شافت فيه داكشي اللي مشافتوش عند اي واحد ثاني…….فديك الليلة اللي كانو فايقين فيها بجوج و كل واحد عارف الثاني فايق لكن تاحد ماعندو الجرأة الكافية يهضر او يتحرك……

اكتفى انو يضمها لصدرو و يطبع قبل كثيرة على راسها كمحاولة غير مباشرة للاعتذار…..

عند الكوبل ديالنا الثاني محمد و ياسمين…..بعدما خدات الفيتامين و شربت عصيرها….. تكات فالسرير كتسناه حتى يجي هاد الاخير اللي بدل حوايجو و كما گاروه عاد حا تخشا حداها واخدها فحضنو….

مرة ياخد قبلة من شفايفها…. مرة من عنقها…. مرة يخشي نيفو فشعرها الحركة اللي كتحمقووو…. مرة يهرها ولا يقرصها محاول يخرجها ولو شوية من داك الجو ديال الحزن و الغبينة اللي داير بيها و خانقهااا…..

و مكانش شوية حتى نعسو بزوج بيهم معانقين راميين هموم الدنيا ورا ظهورهم و مكتافيين ببعضياتهم….. هي كتقول حياتي بلابيك ظلام….. وهو كيقول الحياة ايلا مكنتيش فيها ماعندي ما ندير بيها…..

حتى صبح عليهم الصباح و فاقت ياسمين كتشبح حاسة براسها مزيانة شوية و حسن من الليالي اللي فاتو و رجحات داك العيا لقلة النعاس و الارق….. توجهت للدوش غسلت و قدات مسائيلها و خرجت بدلت الاونسومبل بواحد بحالو فاللول الازرق الغامق مع نفس الجلابة ديال البارح….

لا الزمان ولا الحدث كيسمح ليها تبدا تبدل فاللباسي و تقاد….. لبست اللي جا قدامها و جمعت شعرها عاد لاحت فوقو شال مرخوف….. دارت عند محمد لقاتو مازال ناااعس مشات بالشوية كتفيق فيه و عاز عليها تفيقو عارفاااه عيااان ولكن خاصو يفيق يوقف مع الرجال لتحت…..

مدت يدها لشعرو غلغلتها وسط خصلاتو كتماسي ليه و تحك (السيدة باغا تفيقو و تتحك فشعكاكتو المهم ماديوش عليها السبب راكم عارفينو😂) و بدات كتعيط ليه بصوت مسموع حنين…..

ياسمين: محااامد حبيبي (حطت يدها على ذقنو كتجر فيه) فيق احبيبي راه الدنيا عمرت لتحت فيييك (شافتو بدا كيحل عويناتو و يرجع يسدهم مدت يديها لحناكو كيتقرص) واااا نوض امحمد نووووووض (مع طولات ديك نوض مع لجم شفايفها بديالو داخل معاها فقبلة فرنسية صباحية بقا كيجر فيها شفايفها حتى قال باراك عاد طلقها)…..

بعدت عليه مزنكة و عويناتها محدورين و الفيم حميمر وهو قدامها كيشوف فهاد الكتلة ديال اللطافة اللي قدامو…..

محمد:(بصوت مبحوح) مال جدك صابحة مصدعاني ياك شي باس مكاين

ياسمين: وا نوض راه الناس بداو كيجيو

محمد:(كيتشبح) وايلا جاااو تفيقيني انا زايدون هكاك كيفيقو النسا رجالهم (مد يدو قرصها) ادوي

ياسمين:(بعدت كضحك) ههههه وا قلت لك حبيبي و مفقتيش يااااه

محمد:(جلس فبلاصتو شعرو مشعكك بالنعاس و عينيه منفوخين) واااا اجي عند حبيبك سلمي عليه

ياسمين:(كتلبس فصباطها) حماقيتي امحمد مافيهاش… لبس و هبط توقف مع عمي و ايلا بغيتيني صوووني ليا (مشات لجهة الباب) موااااح…..

محمد:(بقا كيشوف فيها من تحت شفارو) واللهيلا مشات (دار ضحكة جانبية) حلوة بنت اللخ…..

نفض عليه الغطا و ناض للدوش دوش و خرج لابس حوايجو اللي كانو بقااو فالبيت عبارة على جينز ازرق غامق و شوميز كحلة مع جيلي ازرق و سبرديلة بيضاء و نزل بعدما سد البيت بالسوارت بحكم الدار مخلطة….

نازل فالدروج كيسمع صوت اللغا فوسط الدار كثير و صوت القرآن مسموع من الصالون.. حتى وقفووو صوت شيماء مخاطباه….

شيماء:(بصوت مبحوح) صباح الخير اخويا شنو مغتعزينيش

محمد:(تلفت عندها تا كيتصدم بالحالة اللي هي فيها الوجه صفر مسقوط من الدم و شنايفها كارمين جنبهم ضربة زرقة عينيها حمرين و لايحة عليها شال مغطية بيه شعرها) كنت هابط نشوفك (قرب حتال عندها و جرها عنقها كيطبطب فظهرها) كيف بقيتي شوية

شيماء:(عنقاتو بدورها بقوة و دموعها نزلو بغزارة) تهرس ليا جناحي اخويا تعرييييت و بردت اهئ هئ هئ

محمد:ششششش (بعدها عليها شوية حتى تقابل معاها) متقوليش هكاك حنا جناحك و حنا ديما معاك و هي الله يرحمها و يغفر ليها

شيماء:(شافت فعيونو بنظرة عميقة) مخلاتش ليك فين تقول عليها كلمة زوينة ياااااك

محمد:(تنهد بحزن و رجع مبدل الموضوع) مالك بنتي ليا عيانة بزااف و اش ديك الضربة فيك

شيماء:(هربت عينيها بتوتر) لا والو غير خرجت فالباب

محمد:(شاف الفوق ضاحك باستهزاء و رجع شافيها) قدامت ابويا بدليها (عنقها بجنب و دار غادي معاها نازلين)

شيماء:(شافت فيه بنص عين) دير فبالك هادي راه غير هدنة….

محمد: سمك مكيبردش….

كملو طريقهم على ديك الحال…..كيما قالت هي عاقدين هدنة بسبب الحدث الاستثنائي اللي جاري….. لا الوقت و لا الحالة النفسية ديالهم بجوج بيهم ديال مناوشة و لا صداع بيناتهم….. بالعكس فبحال هاد المواقف عاد كتعرف عدوك من صديقك…..

خوك من اللي باغي ليك الشر….. فالشدة و الغبينة عاد كتعرف اللي واقف معاك واللي واقف ضدك…. و هكاك محمد…. خلا اي خلاف وقع بينو و بين شيماء ورا ظهرو و وقف معاها فحزتها….. نزلو للتحت فين كانو جالسين بعض النسا فالباحة….. سلم على اللي كيعرف و خرج لعند الرجال لخزانة ديال الزنقة يقوم بالواجب…..

فاقت او نقولو ناضت من فراشها حنان بكري كي سمعت شي تقرقيب خفيف…. دخلات للحمام قضات حاجتها (حشاكم) و خرجت معولة تلبس جلابتها و تنزل بلامام تفيقو حتى لقاتو قدامها واقف تيشوف من الشرجم اللي كان كيشوف لبرااا…. دوات بصوت هادئ كعادتها….

حنان:صباح الخييير (شافتو تلفت عندها) كيف صبحتي و كيف صبح خاطرك

يوسف:(بابتسامة عذبة قرب ليها و جرها عندو حتى مابقا كيفصل بين شفايفهم الا بعض الانشات القليلة) الحمدلله على كل حال

حنان:(شافت فيه بنظرة حنينة وقالت) الله يرحمها و الله يصبرك….

قال امين فخاطرو و جوابو ليها كان قبلة رقيييقة طبعها على شنايفها و طول فيها حتى حس بنفسها ضاقت عاد بعد عليها شوية حاط جبهتو على ديالها و قال بصوتو الجهوري….

يوسف: عمرني قلت لك كنبغيك

حنان:(ابتاسمت بخجل وقالت) لا انا اللي قلتها ليك ههههه

يوسف:(طول الشوفة فضحكتها و بعد منها شوية كيحك فعنقو من اللور) اخخخ اربييي اخخخ سيري شوفي شنو باغا ديري متفيقيش عليا المواجع….

امتاثلت لطلبو كتبتاسم و احسن شعور كيحسو بيه اي ثنائي هو شعور القبلة و الفرح بعد شي مخاصمة او نقاش…. كتكون حلوة و عندها طعم خاااااص…..

ولا ندري أكان الحب حلواً، أم الأحلى من الحب الحبيب؛

تناص النهار و الناس غير كيجيو كاين اللي كيجلس و كاين اللي كيمشي واخا كيعياو يشدو فيه….. الصواني ديال اتاي صينية مور صينية كيتسرباو الخزانة برا فيها الرجال و لداخل غير النسا….

الغدا كانو مكلفين بيه خوت حسن صدقة على روح المرحومة اللي كان عشاها غيدار ديك الليلة….. دارو مع طريطور يجيب كولشي واجد من عندو….. جات ام ياسمين و باها و دعاء و جات معاهم حتى نعيمة مرات عمها تعزي و تقوم بالواجب…..

ريحات معاهم و عطاتهم ياسمين صوابهم واخا حالتها حالة و مصبرة راسها غا بالفيتامينات…. هادشي اللي مخفاش لا على دعاء ولا ثورية….. رضو البال ليها و شطنتهم حالتها….

ثورية:(بقلق) مالك اياسمين حالتك معاجبانيش

ياسمين: لا لا بيخير غير راك عارفة الجو ديال الگنايز اش كيدير ليا

دعاء: اويلي اصاحبتي واش نتي وجهك صفر مسقووووط من الدم بحالا فيك فقر الدم اشمن جنازة

نعيمة:(كانت جالسة جنبها عنقاتها) خلعتو البنت اويلي مالها شوفو وجهها كيف منور راه غير مع البكا (غمزت ثورية)

ثورية:(عاقت بيلا غيخلعوها بهضرتهم) ايه ايه راه ديما هكا فالجنايز

دعاء:(بقات تتشوف عارفة ختها عندها شي حاجك و شاكة ولكن خلاتها تايكونو بزوج كتشوف فيها تا زلق ليها الشال من فوق راسها و قشعات الوشمة ورا وذنها شهقت بلاما) هيييييييه خلاااا عشك

ثورية:(دارت مخنزرة فيها) ماااال جدك على هاد الغوتة اش كاين الناس تيتسنطووو

دعاء:(كتشوف فياسمين بصدمة و تشوفيها) لا لا والو غير تفكرت شي حاجة وصاني عليها ياسين (قربت بشوية عند ياسمين و همست فوذنها) بقا ليك غا الوشام الكلبة خرجتي ليها نيشان

ياسمين:(شافت فيها مخرجة عينيها و قالت بنفس نبرة صوتها) شششش تانشرح ليك راه تسيق ثورية الخبار تولي فبلاصة الجنازة زوج….

ضمست بينها و بين دعاء القضية حتى صونا تيليفون نعيمة…. جاوبات لقاتها بنتها رانيا اللي كانت جات حتى هي تقوم بالواجب تجاه بنت عمها بحكم حفيظة كتعتابر حتى هي عدوزتها ولكن معرفتش الطريق….

نعيمة:صافي هانتي دخلي نيشان مع داك الشارع تال القنت غتلقاي واحد القهوة (سولت ياسمين على اسمها) قهوة****** وقفي تما هاني نجي ولا نصيفط لك شي واحد…. (قطعت معاها و دارت عند ياسمين) رانيا جات ولكن دازو من اللور معرفتش منين دوز واخا تصيفطي شي بنت

ياسمين:اخالتي انا نمشي راسي لعندها واش جابها راجلها

نعيمة:ايييه الله يرضي عليك غايكون غا هو..

خرجت ياسمين تتعرض لبنت عمها…. قلبت على محمد تا هيات تعلمو مالقاتوش دارتها فيد الله تاترجع و تمشات شوية حتى بانت ليها كاط كاط مسطاسيونيا قدام القهوة عرفاتها هي…. مشات فاتجاهها حتى سبقتها رانيا و خرجت تعرضت ليها….

تسالمو بحرارة بحكم مدة مشافو بعضهم سولو على الاحوال عاد ضارت ياسمين باغا تسلم على احمد حتى لقاتو اللي عمرو جاها على البال ترجع تتلاقا معااااه….

نجم الدين بشحمه و لحمه و تبوگيصته و حطته….. نزل حتى هو من الطوموبيل ضاحك جنب كيمعن فيها الشوفة بلاما يحشم ولا يمرگ…. مد ليها يدو يسلم عليها و بدورها بادلاتو واخا مبغاتش لكن من باب الصواب مجاتش…. سلمت عليه بالخف و خطفت يدها….

نجم: عظم الله اجركم من جهة ديك السيدة

ياسمين: شكرا اخويا مامشا معاك باش (عاد فاقت) زيدو معايا مرحبا بيكم…

نجم: لا لا غير عفيني عندي شي مشاغل

ياسمين:لا حشومة مجاتش تجي حتى للباب و تمشي

رانيا:غير زيد انجم نديرو الصواب تانا خاصني نرجع راني خدامة….

دارها فيد الله و خلاهم تمشاو قدامو وهو وراهم….. و طبعا ميكونش نجم الدين اذا مشافش و معن الشوفة و شبع فيها و عبر اللي قدامو شبر بشبر…. و داكشي اللي دار مع ياسمين من راسها لرجليها…

للحظة قال مع بالو هذا هو الزواج اللي رفضتني على ودو…. الوجه صفر و الجلابة عريضة و الشال…. هذااا علاش خلاتني….. معارفش ان هادي غير حالة خاصة عند بالو هكا عايشة….. شفق عليها ولكن بينو و بين راسو قال ضبر راسها دابا هي مراة مزوجة بيني و بينها السلام و انتهى الكلام……

جايين رانيا و ياسمين كيديويو و نجم الدين قرب ليهم و مرة مرة يتشارك معاهم الحديث حتى وصلو قدام الرياض…..هزت راسها مع محمد خارج من الخزانة مع شي رجال…..

هز راسو بعفوية حتى تلاقا مع داكالمنظر قدامو…. عقد حواجبو باستغراب و غضب طفيف بعض الشيء…. مفهمش كيفاش خلاها فالدار حتى رجع لقاها خارجة مع بنت و راجل و المشكلة بقات فشوفات الراجل ليها….

اللي بغير قصد هو شوفاتو للنسا هكاك….. عندو الشوفة زهواااانية و العينين خضرين….. قرب ليهم محمد بعدما استأذن من الرجال اللي كانو معاه…. وصل عندهم و دوا بنبرة قاصحة شوية محاسش براسو شنو كيقول….

محمد: ها واحد السلام عليكم… ياسمين اش كديري هناااا

ياسمين:(خرجت فيه عينيها على النبرة باش دوا) محمد هادي بنت عمي رانيا معرفتش الطريق و خرجت عندها و هذا لوسها

رانيا:(باحراج حسات انها سببات ليها مشكل مدت ليه يدها) السلام عليكم اخويا البراكة فراسك من جهة السبدة اللي ماتت

محمد:(سلم عايها بدورو عاطيها صوابها) شكرا اختي مامشا معاك باس (يلاه غيكمل هضرتو سمع الشاب اللي كان جاي معاهم مخاطب ياسمين)

نجم: معرفتيناش اياسمين على السيد

محمد:(طرطق فياسمين عينيه بشوووفات حارين حتى تفافات و عرفت راسها ضبرت عليها من عندو عاد جاوبو) انا راجلها الأخ نتا اللي شكون

نجم:(بضحكة مستهزئة) متشرفين انا نجم الدين خو راجل رانيا و ياسمين معرفة قديمة ديالي (كملها بغمزة)

ياسمين:(عضت على شنايفها بغضب عارفك راسها اليوم غتسمع خل وذنيها و هي اللي ذايقة تقليقتوووو و عارفاها شافت فمحمد بتبرير) هذا لوس رانيا شفتو غير فالعرس ديالها صافي

محمد:(كيشوف فيها بمعنى صبري على رزقك و رجع شايف فنجم بنظرات حارقة) مشرفين الاخ تفضل معايا للخزانة (كلم ياسمين بنبرة قاصحة) دخلو لعند النساا….

شدت فيد رانيا و دخلووو وهي غير تتخمم مع راسها عارفة اش كيتسناها من عندووو و فنفس الوقت ماعجباتهاش الطريقة باش دوا معاها قدامهم…. فعز سهوتها حركاتها رانيا بلطف باش تنتابه ليها….

رانيا: فين سهيتي من قبيلة وانا نعيط

ياسمين: ها لا لا والو انا معاك شنو قلتي

رانيا:(بأسى) قلت ليك سمحي ليا خلقت ليك مشكل مع راجلك كون عرفت هكا منجيش گاااع باينة معجبوش الحال

ياسمين:(بتبرييير) اويلي اش كتقولي بالعكس مرحبا بيك راه غي مقلق شوية مع جينا غفلة و عاد الموت مخربقاه بالعكس مجيتك فيها كل خير

رانيا:(ابتسمت ليها) الخير عندك احبيبتي….

دخلت ياسمين مع رانيا و واخا خاطرها تغير لكن عطاتها صوابها حتى جاتها الحالة تاني و ناضت بزز شادة نفسها باشما تبين لحتى واحد حتى دخلت للحمام و بقا كترد حتى حست بمصارنها غتردهم عاد ناضت السخفة شاداها من صباع رجليييها….

غسلت وجهها بالما بارد حتى فاقت شوية عاد خرجت وجهها صفر… مشات للكوزينة تاخد شي حاجة تحيد ليها الترويعة…. لقات سميرة واقفة مع المرأة اللي مكلفة بغسيل الماعن…. مشات لعندها حتى نتابهت ليها و قالت وهي كتشوف فيها بواحد النظرة غريبة…..

ياسمين:(بعيون لامعة و صوت ضعيف) خالتي بغيتك

سميرة:(شافت وجهها و حالتها قربت عندها بقلق كتسولها) هانا ابنتي مالك اش عندك وجهك مسقوط من الدم

ياسمين:(كتشم ريحتها طالعة معاها بالرغم من انها مدايراش شي بارفان لكن ريحتها لصقت فنيفها) معرفتش شاداني ترويعة و السخفة و بغيت (بتردد) بغيت نعنقك

سميرة:(شافت فيها باستغراب) تعنقينييي اجي بعدا جلسي (جلساتها فوق كرسي و دارت كتكب ليها فعصير) خودي شربي بعدا (جلست فكرسي حداها كتشوف فيها باستغراب حتى فجأة بدات البسمة كتشق محياها كأنها فكرات فشي حاجة و مع بالها كتمنى يكونو ظنونها صحيحة) قولي ليا ابنتي ايمتا بديتي كتحسي بهادشي

ياسمين:ملي كنا فتركيا وانا هكاا فنيفي لاصقة شي ريحة خايبة و الترويعة مابغاتش تفوتني

سميرة: كتشربي البيلول ولا قطعتيها

ياسمين: قطعتها قبل ما نمشي(سكتت بعدما عاقت شافت بسميرة بصدمة و قالت) زعما نكووون….

سميرة:(بضحكة) مكرهنااااش ابنتي يوم المنى

ياسمين:(بنفس اللمعة فعينيها) محمد غيفرح بزاااف (هزات كفوفها للسما) ياااربي يااربي (شافت فسميرة) واقيلة اخالتي ايلا كنت نتي حاملة راه وحمي جاااني عليك

سميرة: اويلي عليها ملي جيتي تخشيتي فيا هههههخ (ناضت عندها عنقاتها) الله يفرحك ابنتي و شكون فحالي يخرج حفيدي ليا غير هو متقولي لمحمد والو تال غدا و ديري طيسط و نمشيو للطبيب عاد نشوفو

ياسمين: واخا اخالتي (رجعت عنقتها) ريحتك تتحمقني….

عنقاتها سميرة كضحك و نخشتها فيها حتى مشات منها الترويييعة عاد ناضت كل وحدة فيهم لشغالها ياسمين لعند عائلتها و سميرة تتقوم بالواجب مع العزايا…..

فالخزانة ديال الرجال جالس محمد و يوسف و حسن مع نجم الدين….. هاد الاخير اللي بغا يمشي بعدما عزا حسن لكن رفضو و اصرو عليه يبقى حتى يتغدا و فعلا داكشي اللي دار….

جالس معاهم كيتبادلو اطراف الحديث كل مرة على حاجة عاطينو صوابو من غير محمد اللي غييير ساكت و محاملوش معرفش علاش اللي عارف انه مرتاحش ليه و محملوش و زاد كمل ملي شاف الطريقة باش كيشوف فياسمين و كيفاش كيهضر معاها…..

اما نجم الدين فكان تفكيرو فحاجة أخرى…. تيشوف فمحمد و على ما بان ليه ان شخصيتو قاصحة و صعيب……ربط الاحداث بينو و بين راسو و قال مع بالو ان ياسمين عايشة عيشة خايبة و اكيد انها معايشاش مزيان مع محمد…..

طريقة لبسها اللي تبدلت… و وجهها اللي رجع صفر و فقد البريق ديالو…. الطريقة باش دوا معاها و النظرة القاصحة اللي كانت فعينو….. هادشي كلو خلاه يظن انها معايشاش مزيان و مكرفسة معاه…..

بينو و بين نفسو شفق عليها و مابغاش ليها داكشي….تيقول انها تستاهل تعيش ملكة لأنها بغض النظر على جمالها الخلاب عرف معدنها و طينتها و عرفها بنت الناس و تستاهل كل خير و عاوتاني فقط بينو و بين راسو قال هذا علاش رفضاتني اذن ضبر محاينها….

الحاصول نجم شخص متناقض بينو و بين راسو…. مزاگيييش و معارف اشمن طريق يشد….. رجع كيدوي معاهم حتى ناض حسن و محمد لعند شي ناس عاد جاو…. بقا معاه يوسف حتى صونا تيليفونو و ناض يجاوب و بقا بوحدو فكرسي حدا الباب ديال الخزانة اللي كيشوف للشارع مدرق الباب ديال الرياض….

هاز فيدو كاس ديال اتاي مرة مرة كيرتشف منو حتى دازو من قدامو جوج بنات….. شوية وقفووو وحدة كتقلب على شي حاجة فصاكها و لوخرى كنتسنى فيها تزيد….. معن الشوفة فالبنت مزيااان كيحاول يستعقلها….

حتى ناض قاصدهم و الابتسامة فوجهو دليل على انو عرفها…. وقف عليهم حتى نتابهت ليه البنت اللي واقفة و الثانية حادرة راسها مشغولة مع الساك ديالها….

نجم:سلوى (شافت فيه) نووووواي سلوى تاج الدين

سلوى:(حققات فيه مزياااان) متقوووولش ليااا لا لا واااش…

نجم:(حرك راسو بالايجاب ضاحك) سي سي هوووو هذاااا

سلوى:(بصدمة و ضحكة فنفس الوقت) نجم الدييييين

نجم: بشحمه و لحمه الالة

سلوى: مي كيل مانيفيك سوغبخيز (اش هاد المفاجأة الرائعة) وااااو (زادت عندو سلمات عليه بلابيز بتعنيقة خفيفة كيضحكو بزوج) والله ايلا الدنيا صغيرة شنو كدير هنا

نجم:(خطف شوفة للبنت اللي معاها و رجع شافيها) جبت مراة الخوادري تعزي و بقيت كنتسناها نتي اللي شنو كديري هنا

سلوى:وايلي هادي راه دارنااااا و راه مرات عمي اللي ماتت

نجم:(بأسف) اه البركة فروسكم انا مافخباريش (شاف فالبنت اللي سالات و بقا كتفرج فيهم زي الاطرش فالزفة) معرفتيناش على الزين اللي معاك

سلوى:(شافت فيه كضحك) مكتبدلش نتا هو نتاااا (دارت عند البنت لقاتها مزنكة) واااشفتي هانتاااا حشمتيييها ههههه المهم هادي أمنية بنت عمتي أمنية نعرفك هذا نجم الدين صديق قديم ليا

أمنية:(بتزنيكة من شوفاتو ليها مدت يدها تسلم عليه) متشرفين اسي نجم الدين

نجم:(بادلها السلام بشوفاتو المعتادين و قال) غير نجم بلا السي اي اوسي غافي (و حتى انا متشرف بيك)….

ابتسمت ليه أمنية و زادت مخلياه مع سلوى واقفين كيسولو على احوال بعضهم وهو عينو مرة مرة تمشي جيهتها كيعبر فيييها من الفوق للتحت…..

جا الطريطور جايب الغدا معاه اللي كان عبارة على دجاج محمر و كسكسو بالتفاية…. تسربا للناس اللي كلاو و شبعو و بدات الدنيا كتخوى واخا البعاد مازال خصوصا ان هاد الليلة غيكون عشاء او صدقة المرحوومة…..

عائلة ياسمين ناضو بغاو يمشيو لكن تحت اصرار سميرة و حسن بقاو من غير رانيا اللي كان خاصها ولابد تمشي تشوف راجلها و حتى نجم الدين مصلاحش ليه يجلس مازال…. بعدما تبادل هو و سلوى ارقام الهاتف باش يبقاو على تواصل و كونما حشم يطلب حتى رقم أمنية اللي عجبااااتو و عمرات ليه عينو…. بجمالها اللي كان طبيعي ولكن فاتن….

ببشرة خمرية و عيون بنية كلون القهوة…. شعر فلون عيونها و ملامح بشوشة ديما الضحكة مزينة ثغرها بحال مها….. كتبتسم فوجه الكبير و الصغير و شخصيتها المرحة زايداها جمال على جمال….. مشا مقرر انه من بعد و يقول لسلوى تصيفطها ليه كيقول مع بالو علاش منجربش شي حاجة جديدة يا تصدق يا متصدق….

اساسا هذا هو نجم الدين و هذه هي حياتو….. كياخد كولشي علاقاتو على اساس تجارب…. صدقت مزيانة…. مصدقاتش يلعب شوية و يهني مخووو….. عمرو دخل فشي علاقة بنيتو…. عندو العلاقات و البنات مجرد وسيلة كيرفه بيها على نفسووو و يقضي فيها وقت فراغو…..

خلات ياسمين دارهم جالسين و طلعات هي و دعاء لبيتها ترتاح شوية…. دخلت للبيت ملقاتش محمد… دخلت وراها دعاء اللي مشات جلست فالفوتوي تسنات ياسمين تا غسلت و جات جلست حداها و بداو رحلة الحتيت ديالهم اللي مكيساليش…..

دعاء: اجي نتي شحال باش مجاتكش لي غيگل

ياسمين: جاتني فوقتها و لكن شكيت انا و خالتي سميرة فشي حاجة غدا ندير التيست

دعاء: ايوا عالله تجيبي شي كتيكيت ولا كتيكيتة تفرحي محمد حگااا شفتو مبانش ليا

ياسمين: غير سكتي اصلا هو اللي قاليا نحيد الكينة باغي قالك طاشمة بحالا غنحزقهم هههههه (ضحكات دعاء) منعرف غيكون مع الرجال

دعاء:(بعدما ضحكت تنهدت واحد التنهيدة قاصحة) اش غنقولك الله يجعل سعدك خير من سعدي….

ياسمين: مالكي شنو عندك اصلا شحال و نتي كتبانيلي ماشي على برجك جارية شي حاجة بينك و بين ياسين

دعاء: اش بغا يجرا حالنا هو حالنا راكي عرفتيه وانا حرت معاه جميع الطرق جربتهم والوووو طبعووو قاصح قهرني ديك النهار شافني مشربتش الكينة قالي معامن تشاورتييي تخيلي

ياسمين:(تنهدت بحزن) و خالتي رحمة شنو كتقول

دعاء:(ضحكت باستهزاء) اش عندها متقول تانتي نعز عليها تانعيا و منكونش حسن ليها من ولدها عاد قالت ليك نساعف معاه وانا شحال قدي عيييت من الخاطر (نزلت دمعة سخونة من عينها) لا زواج فرحت بيه لا حمل فرحت بيه لا خروج معاه لا كلمة زينة الفلوس موجودة و الذهوبات و الحوايج و اللي حليت عليها فمي توصلني قبل ما نكملها (تنفست عاد كملت) ولكن فين الحب فين الاحترام فهادشي فالح غير متلبسيش متهضريش متخرجيش ملي گااااع تتغير دير ماتايديرو الرجال…

ياسمين: واللهما عرفت مانقولك و ذنبك معرفتووو علامن غير حاولي حاولي…

دعاء: ذنبي نتي عارفاه علامن ذنبي على مي اللي لاحتني ديك اللوحة و منكذبش علك ما بقا عندي فين نزيد ولا نحاول ولدي راني نهزوووو بسناني و نخدم عليه الله يجعلني نخدم فالديور و حسبلاك راني بشواهدي من نهاري نخدم (شافت فيها بشوفة عميقة و حزينة) بغيييتو من قلبي و ضحيت بكولشي على ودووو و مستاعدة نفديه بروحي ولكن صاااافي دابا خاطري عياااا و قلبي طاب (طاحو دموعهاا) من الخاطر اياسمين…..

عنقتها ياسمين و بكاااات معاها…. خلاتها تبكي على خاطرها و تخرج داكشي اللي فقلبها…. كتبكي على زهرها و مكتوووبها اللي لاحها مع راجل قاااصح…..

جماد ميعرف لا حب لا احترام…. عندو بلارة و معارفش بقيمتهاااا….. بكات هي الأخرى على زهر ختها و اللي متستاهلش اللي كيجرا ليها…. بكاو حتى شبعو و مسحو دموعهم عاد نزلو لعند مها يجلسو معاها…..

محمد بعدما تغداو الناس بغا يطلع يرتاح و يشوف ياسمين….. داز حادر راسو على النسا اللي جالسين فالصالة و الباحة و داز طالع مع الدروج….. دخل للبيت لقاها مكايناش عرفها غتكون مع دارهم….

للحظة جا لبالو نجم….. من الشوفة فيه محملوووش و متصرطش ليه….. عارف نوعو مزيااان و مدايزش عليه قليل منووو…. عاشر مداااا بحالوووو…. بشوفاتو اللي كيعبر فيهم البنت من الفوق تال التحت بجميع تفاصيلها…. عاد هضرتو الباسل و وقاحتو اللي مكيقدرش يستحملها……

غير تفكرو و تفكر شوفاتو لياسمين و هضرتو معاها بدا كيتعصب و كيتزير….. ماباغيش يتعصب على الخوا ولكن جاااه شك و فضول يعرف شنوووو بيناتهم او شنو كان بيناتهم حتى يقول ليها ديك الهضرة….. و زاد تعصب منها ملي معلمااااتوش و خارجة بلا خبارو و عاد جاية مع راجل اخر ماشي من المحارم ديالها….. تعصب و طلع ليه الدم ديال بصح….. قلب الدورة و خرج مابقاااات بانت ليه راحة…. خرج من الرياض كامل بلاما يشوف وراه ولا يسول فيها…..

ديك الساعة كانت هي مقابلة مع الباب فالصالة…. شافتو ملي كان خارجين….. طلت على تيليفونا على و عسى تلقاه مصيفط ليها شي ميساج ولا مصوني ليها ملقات والو….. حز فخاطرها و قلبها تزير عليها…. عرفها مريضة و حالتها وغير كتكابر و مكلفش نفسو يصوني ليها…. مموالفاش ليه….. ولفها كل مرة يصوني يسول كيف مريضة كيف صحيحة….. و كيما كنقولو لا تولف عادة لا تقطع عادة لا تعادا…..

هي ديال محمد… ولفها الاهتمام و التسوال كل دقيقة لدرجة ايلا مسولش كتقلق و تسد فخاطرها عليه…. و ماشي غير هادشي اللي مقلقها منوووو…. معجبتهاش الطريقة باش دوا معاها قدام رانيا و نجم…..

محملتش راسها تهان بداك الشكل قدامهم واخا هو مانوا فيها والو و غير من اعصابو لكن مبغاتوش يبان بداك الشكل قدامهم…. ديما كتفضل تحل مشاكيلهم بينها و بينو بدون تدخل اي واحد و بلا ما يسيق ليهم اي واحد الاخبار…. و الجيست اللي دار قلقها منو و زاد كمل ملي مسولش فيها…..

رمات دوك الافكار من بالها و رجعت كدوي مع دارهم كتلف سوايع….. فحين هو خرج و قصد المحل ديالو يطل عليه…… دوز فيه ديك العشية كاملة واخا عيا يصوني ليه يوسف و باه و حتى مو لكن مجاوب تا واحد….. معصب و محاملش راسو و عارف راسو ملي كيكون معصب اذا مشا حتى دوا مع شي واحد كيعورها…..

بقا حتى لتسعود ديال الليل عاد خرج مشا لدارو بدل حوايجو ب جينز اسود و شوميز زيتية مع سلهام طويل فالاسود بثوب المليفة الغليظة الرجالية….. لبس مع الصباط اسود…… مشا للرياص لقا معظم الرجال بداو كيجيو للصدقة اللي دايرين…… دخل للقاعة نيشان سلم على اللي كيعرف و رجع وقف حدا باه فالباب يستقبلو الناس…..

حسن: فين مشيتي اولدي خليتينا كنصونيو ليك

محمد: غير للمحل الواليد كانو شي مشاكل كان خاصني نفكهم

حسن: ايوا صافي مافيها باس…..

هكاك كان الحال حتى فالرياض كيجيو النسا حتى عمرو الصالات بزوج و الباحة و حتى الخزانة عمرت….. بدا المقرئ اللي جابوه يقرا ما تيسر من القرآن كيقرا ايات من القرآن الكريم بصوت اكثر من رائع كدخل مع الذات كيخليها تبورش و اللي معمرو تخشع يتخشع معاه….. الصوت كان واصل تال عند النسا بفعل البيفان اللي كانو دايرين فالخزانة…..

فالصالة ديال النسا اللي مخشعة مع القرآن و اللي بكاها و اللي ممسوقاش و بالها فالتحنزيز و التبرگيگ و الحاصول بنادم حجر و طوب و كل واحد و كيف دار ليه الله…..

جالسة ياسمين حدا سميرة منخشة فيها ريحتها حمقاتها و كل مرة كتهز عينها تشوووف فوجهها و عينيها كون لقات تبقا غا حاضياها و معنقاها…..

سميرة بدات كتأكد حيت ميمكنش تخفى عليها حالتها و فعايلها و باينة من الطيارة كتوحم و وحمها جاها على سميرة اللي شادة ليها الخاطر و دايرا ليه كيف الما القليل و مرة مرة كتعطيها حليوة من جيبها تحيد بيها التروعية…. و هادشي ماخفاش على الجالسين معاهم اللي كل وحدة و اش تتقول مع بالها و فاش تتفكر….

شي كيقول شوف التلحبيد و التمحليس اللي فيها گاااع هذا حب فعدوزتها…. و شي عاجباه العلاقة بيناتهم و تيدعي ليهم بالخير….. و شي حاسدها على عدوزتها و على العلاقة بيناتهم…و هي ممسوقاش يكفيها انها لقات راحتها عندها مبقات داتها فحتى واحد…..

كالنور على قلبك ما ألطفك🤎

تعشاو الناس و دارو الدعاء داعاو فيه مع حفيظة بالرحمة و المغفرة…. بكاااو بناتها و بكاااو معاهم النسا كاملين اما ولادها مصبرين ريوسهم صحة….. توكل كول واحد لحال سبيلو من غير البعاد اللي مصلاحش ليهم يمشيو….

عيات ياسمين فدارهم يبقاو و يمشيو يباتو فدارها لكن رفضو و تافقت مع دعاء باش غير تخفاف القضية عندهم و تمشي عندها…… الزوج ديال الليل عاد خرجو اخر وحدين و جا الطريطور جمع الخزانة و الكراسة و الماعن….. بقاو معاه الدراري حتى سالا عاد طلعو كل واحد لبيتو يرتاحو بحيت الغد كان خصهم يفيقو بكري باش يمشيو للروضة فالنهار الثالث ديال الموت…..

طلع يوسف للبيت لقا حنان عاد خارجة من الدوش لابسة بينوار و الفوطة على راسها الوجه مزينك بالسخونية ديال الحمام….. هزت عينها فيه بان ليها مسخسخ و عياااان….. قرب ليها مهدوووود و عيااااان حتى خداااها من خصرها لعندوووو معنقها و خاشي وجهو البارد فعنقها اللي كان سخون حتى بورشت و شهقت بخفة….. قرب لوذنها و قال بصوت خفيف بحال الفحيح خلاها تقفز و تعض على شنايفها….

يوسف: توحشتك

تعليق Qisatok

من بعد الدفء والرومانسية فـ تركيا ومحاولة كيد رجاء، نزل خبر موت حفيظة كالصاعقة على الكل؛ فاجعة هدمات ساس الرياض وخلات الحزن يعم العائلة، ورجوع محمد وياسمين مستعجلين باش يتقاسمو حرقة الوداع، فمشهد هد كبرياء شيماء وبين شحال قاصح فراق الأم. 💔🕊️

وسط هاد الحزن، بانت قساوة العيشة اللي طاحت فيها شيماء تحت عصا أيوب وحكرة عدوزتها، فمقابل شجاعة حنان اللي صدات تحرش طليقها ولقات السند فـ يوسف وخا سم أميمة حاول يشحن عقل محمد أمين. وفنفس الوقت، شعلات غيرة محمد من جديد بظهور نجم فالباب، بينما فتحات ريحة سميرة باب أمل كبير بتأكيد وحم ياسمين. ✨⚡

واش تأكيد حمل ياسمين غيكون بلسم يخفف حزن الرياض على فراق حفيظة؟ وشنو العواصف اللي غتنوض فاش يكتشف محمد سبب وقفة ياسمين مع نجم؟ 👀

الكاتبة Aya Oulaaidi جمعت بين هيبة الموت اللي كتفكر بنادم بقيمة الحباب وتكسر كبرياء القلوب، وبين شعلة الأمل والحب اللي كتنبت من جديد وسط أصعب الظروف. 🌹🍂 شاركونا رأيكم وتوقعاتكم لهذا الفصل ولبقية فصول «عبق الياسمين» على Qisatok. 💖📖

شاركنا رأيك في هذا الفصل 🌹

التعليقات 0

اترك تعليقاً

لن يتم نشر بريدك الإلكتروني. الحقول المشار إليها بـ * إلزامية.