“سيسدل الليل ستاره وتحل الشمس مكانه كضيف كريم ! شابة فاول العشرينات موجهة نظراتها للمرايا وإبتسامة عريضة على ثغرها الوردي راضية تماما على شكلها البسيط والأنيق بقى ليها خطوة واحدة فقط وغاتكون جاهزة على أكمل وجه هزات شالها الذهبي واضعاه على رأسها كاتقاد ليه الشدة خافي كل شعراتها عاد وقفات كاتقاد قندورتها اللي فالأسود في خطوط فالوسط باللون الذهبي لباسها مستور ان الوقت أنيق قاطع إنبهارها فنفسها صوت تصفيرة جاية من عند أمها”
سهام: “بالريفية”هاي هاي على لالة نوميديا شهااد الزين انا لي وااالدة .
نوميديا 🙁 بخجل) بصح جيت زوينة .
سهام: وماالي كانكذب حفضك الله من العين أيدجي”أبنتي”
هاجر: اميين؛ واش جاو من الجامع
سهام: لا باقي ولكن قراب يوصلو ياله طلقي راسك أجي معايا للكوزينة نقادو الطباسل
نوميديا : واخا
“تبعات مها متوجهين للكوزينة اللي كانت فيها بعض النساء منهن زوجات أعمامها وباقي العائلة تبهرو منها رغم جمالها الطبيعي ومزادت والو لكن الطريقة باش مصايبة الشال وتناسقه مع باقي لباسها المستور خلاها تبان أجمل وحدة ومشات جيهتها مرات عمها وجبدات ليها حنيكاتها “
سعاد: ويتك ويتك على الزين الريفي شهاد الجمال تواضعي معانا وعطينا الوصفة هههه .
مينة:(الجدة) ايييه يابنتي الوصفة هي السترة راه السترة هي الوقاار والزيين والوجه المنور .
الجميع شكرها ومدحها رغم أن الجلسة لا تخلو من الحسد والغيرة ولكن أكيد مايقدروش يبينو سمهم ربما هي ماشي بداك الجمال الخيالي او جمال الممثلات لكن عندها جمااال خاص يكمن فالنور اللي عطاها الله النور لي مغطي وجهها المحتشم والموقر
دائما البساطة كاتخلق السعاادة اجواء العيد فالريف معروفة حاضرة وبامتياز الأطفال الصغار لابسين ملابس العيد فرحانين بيهم ربما هما اللي حاسين أكثر بفرحة العيد الحقيقية النساء في المطبخ موجدين مالذ وطاب من حلويات وأكلات تقليدية كالمسمن والبغرير وغيره الدنيا متولة ومقادة كلشي مزيز على الحالة وأخيرا حطو أخر طبسيل على الطاولة ووقفو كاملين أمام الباب بإنتظار رجال العائلة دقائق عاد تمو داخلين عاد بداو بالمباركات والتهاني وحتى النساء عاد بداو كايتسالمو مع بعضياتهم ومع ولادهم كانت واقفة بعد ما سلمات على عماما وقف قدامها ابن عمها .
رضى: يدجيش نالرعم”بنت العم” مبرووك عيدك
نوميديا:(بابتسامة) الله يبارك فيك أوما “اخويا”
رضى: مالك هاد النهار على هاد الزين كامل ها
إبتعدات من أمامه متجهة عند مها رضى ابن عمها الاكبر من صغرها وهي كاتعاني من الغزل دياله وهادشي كايزعجها حيت هو بالنسبة ليها أخ فقط تكلمات زوجة عمها قايداهم للبيت لي كان كبير نوعا ما وتقليدي 100% دخلو الرجال مجمعين على الطاولة اما النساء جلسو فواحد البيت تايفطرو رجالهم عاد غايمشيو يفطرو حيث فالعيد الاضحى كايفطرو مزروبين ودغيا كايخرجو 20 دقيقة عيط محمد لسهام خرجات عندو ومدات يديها حشمانة .
سهام: السي محمد مبروك رعيد اينك .
محمد: عيدنا واحد هه؛ سيرو تفطرو راه الرجال خرجو .
سهام: واخا؛ وفين غاتذبحو
محمد؛ مورا الدار دبا ياله ماتشغلينيش عيطي على تيمغارين”العيالات”
حركات راسها بالإيجاب ودخلات للبيت اللي مجمعين فيه العيالات عيطات ليهم عاد دخلو للبيت اللي كانو جالسين فيه الرجال كل وحدة شدات بلاصتها وبداو كايفطرو.
سعاد: كانفكر فالروينة لي غايديروها كاتشدني تبوريشة.
سهام: اش غانديرو أوتشما”ختي” نهار ودايز
مينة: مكاينش شي حاجة سميتها التمارة ونتوما بزاااف بيكم غابوحدكم تسلخو حاولي باراكة من التبوحيط العيالات فاش تساليو فطوركم شمرو على دراعكم .
حليمة:( مرت العم) كل وحدة غاتكلف بحاوليها انا غانديه دبا لداري والكرشة ديالي غانغسلها انا غانمشي دبا خليت شي روينة فاش تبغيو تتغداو عيطولي (جمعات الوقفة)
سعاد: أيرغدا “الغدا”
حليمة:(خارجة) تكلفو نتوما
لبنى:( جرات بناتها) غانمشي نهضر مع عائلتي ونبارك ليهم العيد تهلاو.
تسرسبو كاملين بحجج وأعذار وبقاو غير نوميديا وسهام وسعاد وبنتها كايشوفو فبعضياتهم بذهول ماشي غير فالعيد فأي مناسبة فوقما هبطو للريف على قبل أي مناسبة كايسلتو بحال الضياف وحيت كايحشمو منهم خلاوهم يتماداو
الدار كانت بوحدها مملاصقاش مع منازل الجيران وجات فالوسط محاوطينها حيوط اللي بينها وبين الدار مساحة كبيرة مور الدار بالظبط كان تماك أشجار الفواكه المشمش؛التفاح؛ومننساوش العنب اللي كبر وسط الأغصان اللي معلقة تحت البالكون جابو الحاولي الاول كايذبح أب نوميديا منذ وفاة أبيه جاو الرجال كل واحد شدو من رجل حط ركبتو للارض ودارليه سكين على رقبتو؛ الله اكبر الله أكبر باسم الله؛ دوز السيف على عنق الكبش.
محمد: رجعو اللور باش مايرشكوم بالدم
سعيد: نكمل ليك؟
محمد: (رفع حواجبو) اش جاك هاد العام ياك كنتي مكاتقربش تاتشد
سعيد: ههه اوا دبا راه تزوجت وخاصني نذبح ونفرح ذامغاث”المدام”
محمد: “بجدية”ماشي ضروري تذبح ياك پاپا لي كان كايذبح لينا كاملين وخا تزوجنا قول لعقلك يطلع لبلاصتو .
امين:( شافهم كايضحكو مطمرين قرب من رضى) كيفاش عقلك يطلع لبلاصتو مافهمتوش
رضى:(همس ليه) زعما راه عقلو كاين التحت(غمزو)
محمد: امين سير جيب السطل دالما خويه من السخان
أمين: واخا
كمل الذبيح بعدما قطع ليه الاقدام الاربعة وتعاونوا عليه كاملين هزوه حيت ثقيل كانو موجدين الحبل اللي شدوه فالبالكون وعلقوه تما قطع ليه اهيضور (الصوف دالحاولي بالريفية)
عاد جا أمين هاز واحد سطل عامر بالما وكايزفر بتعب صحته قليلة حل الحاولي من الوسط عاد بدا كايجبد كانو حاطين بزااف ديال الاواني دالبلاستيك حط فوحدة منهم الكبدة ووحدة الكرشة عاد بدا كايجبد المصران اللي على شكل انابيب طوييلة وبدا كاينفخ فيهم يخرج فضلات الكبش ساعات وهو خدام بحيث ذبح جميع الحوالا ديال خوتو بوحدو حيت مكايعرفوش
محمد: أمين هز هادشي وعيط لعمتك تغسل الكرشة .
سعيد: انا غانمشي ندي هادشي لحليمة .
محمد:(بجدية) عطيه لشي واحد من الدراري باقي عندنا شغل هنا.
سعيد: راه دغيا غانرجع
محمد: سعيد الله يهديك؛خاصنا نساليو دغيا.
سعيد:(بنفخة) واخا؛رضى هز هادشي ديه لحليمة .
رضى؛ واخا أعمي.
ككل سنة كايعطيو للنساء يغسلو الدوارة يوجدوها لوجبة الغداء..من بعد يتكلفو هوما ويشويو الكبدة ياكلوها قبل مع أتاي.
كعادتهن السنوية هربو وخلاوهم وااحلين؛المعروف فالعيد كايكثر الشغل خصوصا نهار الاول شلا مواعن تابعينهم زيد عليها الغدا؛الى أخره من واجبات تابعاهم.
نوميديا: أنا غانتكلف بغسيل المواعن
سهام:(تنهدات) واخا؛يدجي “بنتي” إسراء تقدري تجمعي البيت
إسراء: معلوم أنانا”عمتي”
سعاد: ياله سيرو باش نساليو بكري ونوجدو الغدا
أمين: (دخل) سهام كايعيط ليك عزيزي تغسلي ذاعديسث”الكرشة”
سهام: واخا؛ اولدي نخليك أسعااد جيبي الطنجرة نمشي نغسل الكرشة غانديرو ديالي للغدا؛
سعاد: ولكن…
سهام: مكاين ما ولكن ياله أوتشما”أختي” نخليك.
كل وحدة تكلفات بهمتها دخلات نوميديا للكوزينة لابسة الطابلية جمعات الكيسان بوحدهم وطباسل بوحدهم وستفات داكشي عاد بدات كاتغسل كما معروف عند الفتيات كايبداو بالكيسان والطباسل عاد كايدوزو على البقية وحيت شاطرة دغيا سالاتهم ودوزات الجفاف على الأرضية وخلات الدنيا تتشعل عاد دخلات سهام هازة علبة بلاستيكية حاطة فيها الكرشة؛
سهام: صافي ذكمرذ “ساليتي
نوميديا: اه
سهام: الله يرضي عليك غانعذبك هزي الشطابة وسطل ديال الما نقي داك البلاصة فين ذبحو
نوميديا: واخا أيما “اماما”
هزات لي قالت ليها وتوجهات للخارج كان رضى جالس كايتكونيكطا ويضحك غير شافها وهو يصقر وبقا حاضيها بعينيه مداتهاش فيه وساط ومشا بعيد برا دار شاف بنت عمه الاخرى واقفة شادة تيليفون كاتضحك معاه بتاسم وقاد جاكيطتو ووقف عليها..
رضى:بسمة واقفة بوحدك..
بسمة:”رفعات فيه راسها” وي..
رضى:”كايسكانيها بعينيه”وا غبورات هادي شحال ما تلاقينا..
بسمة:”بتاسمات بزز” ههه من العيد لي فات..
رضى:غبرتي حتى زيانيتي العفريتة..
بسمة:ياك بعدا..
رضى:”حرك ليها راسو بأه” واليوم جيت زوينة بزاف..
بسمة:”عجبها الحال” شكرا ربي يخليك..
رضى:ماعندك علاش تشكريني كانقول غير لي كاين..
بسمة:”بتاسمات”ههه ياك اسيدي..
رضى:”شاف بعيد لقى نوميديا سالات جات تهز السطل وهو يزرب” اييه نخليك دبا الزين دلافامي..
رجع دخل لداخل توجه عند نوميديا ديريكت هز منها السطل والشطابة بيد وحدة مفتاخر براسو داير فيها راجل..وهي تسبقو كاتزرب فخطاويها خلاتو كايتنهد فخاطرو..عندو الى ما صدقات وحدة! تصدق الثانية المهم مايبقى بلاااش.
.
.
بيديهم قطعو وشواو وفرقو على الطباسل؛!..وجابو خبر من صنع أينور لي معروف فالمناطق الريفية الخبز لي مكايتشبع منو وصحي بفضل القمح اللي كايحتاويه….اما هما عمرو أتاي وجابو الكيسان فالصينية دالحديد وحطو زوج طبالي وزوج برارد دأتاي وتفرقو على زوج مجامع “مجمع نسوي” ومجمع رجالي..الرجال كايهضرو على مختلف المواضيع ومرة مرة كايشدو فشي واحد من اولادهم…العيد حلاوته فشكل… ومرة مرا كايشاركو معاهم النساء فالحديث…
علي:مجيد قايمرك خضمغاث اينس “مجيد راه تزوج على مرته”
عبد الرحمان”رد عليه بنفس اللهجة” يالله باش جلسنا بزوج فالقهوة مقاليا والو الناس غير كايهضرو
حليمة:وليني مكايحشمش ذامغاث إينس “مراته” الله يعمرها سلعة
سعيد:”راجلها” اتلقاه مامرتاحش معاها…وزايدون راه دار الحلال
حليمة:”ضارت فيه” لقى سبة قالاك الرجال مافيهوم تيقة..
مينة:”لولدها محمد” مين دنا أمي أوسفهيمغ “شنو قالت اولدي مافهمتهاش”
محمد:”زادها قطيب اخر ” مقالت والو أيما..
حليمة”قلباتها ريفية” سمحاي أخاتشي توغ وخا سيورغ سذاعرابث
“سمحيلي أخالتي نسيت وهضرت بالعربية”
مينة:”حركات راسها” ماعليش ايدجي”ماشي مشكيل أبنتي”
تا رجال براسهم كاينممو مامعصومينش أكيد ختالفات الاراء حول الموضوع ولكن كان العنصر النسوي قليل فين كايهضر حيت مع لوايسهم حشمو يهضرو…سالاو ماكلتهم وناضو النسا جمعو الطبلة والرجال دخلو يرتاحو هاد المرا عاونوهم شوية وتفرقو على غسيل المواعن وتسخين الغدا..حطو كوكا والخبز والكيسان عاد عيطو ليهم يتغداو فالبيت لي فطرو فيه والنساء بقاو فالصالة مع مع الوليدات الصغار كايتغداو معاهم….
سعاد:”بريفية معكلة” عجباتهم فعلة مجيد بغاو السبة
سهام: ياختي اݣاز تامغاث اينس “راجل ومرته” حد معارف شنو ضاير بيناتهم
حليمة:بتوريني فرجال راه عينيهم زايغة وماشي دالتيقة
سعاد: لا والو ماشي كورشي “كاملين” مال تارجالنا بحالو
حليمة:بحال سعيد عارفاه ميت عليا وشاداه مايديرهاش….
سعاد:’ضارت فيها” ومال رجالنا لقيتيهم مخرجين عينيهم..كل واحد وطينته
حليمة:انا هير قلت..
ياله غاتهضر غمزاتها سهام وهي تسكت..سعاد حارة ومع حليمة ماتتلاقى واخا شي مرات تدير عين ميكة ولكن فبعض المواقف كاتضور فيها…غير كملو ماكلتهم…طلعو يكملو نعاس بقاو العيالات طبعا من غير لبنى وحليمة لي تاجهو لدارهم حتى سهام وسعاد طلعو يرتاحه مخليين إسراء و نوميديا يغسلو المواعن
هكذا دازت 15 يوم على عيد الأضحى..ككل سنة غير دازت ايام العيد الاولى كل واحد رجع لشغله والمدينة لي كايسكن فيها بقاو غير أهل البيت…سعاد فالطبقة الاولى..ونوار ساكنة فالطبقة التانية… بحال كل يوم فاقت على صوت أمها لي كاتناديها تفطر خرجات من بيتها كاتفوه وتحك شعرها الاسود…
نوميديا:صباح الخير
سهام:”كاتكب القهوة” صباح نور…أراح أتسريريذ “سيري غسلي” واجي تفطري
نوميديا: واخا..پاپا مشى لخدمته !؟.
سهام:ييه اراح زيك “اه مشى بكري”
دخلات للحمام غسلات وجهها بشوية على قبل الحبوب لي عندها فحنكها…من الفتيات لي غير كاتقرب فترة الغيݣل كاينوضو ليها الحبوب..جمعات شعرها الفوق عاد خرجات كاتمسح يديها ووجها وعلقات الفوطة على الباب عاد جلسات جنب مها كايفطرو بهدوء كالعادة حرشة دالدشيشة الزبدة بلدية زيت الزيتون قطفوه بيديهم وقهوة يحليو بيها صباحهم….
نوميديا: يما هضرتي اليوم مع عز الدين .
سهام: هاد نهار لا ساد تيليفون زويثغث (توحشتو) العيد بلا ليه مر
نوميديا:ذوارا نضني أذيعيذ أكيذنغ “مرة خرا يعيد معانا”
سهام:إن شاء الله…
سكتات على صوت طرقات الباب أذنات بالدخول وهي تدخل سعاد والقت عليهم السلام…وجلست تاهي على الكنابي.
سهام: قاربت أتفضاض “قربي تفطري”
سعاد:”بريفية معكلة” فطرت عاد طلعت…
سهام:”مدات ليها كاس القهوة” واخا شربي غير القهوة بعدا
سعاد:”شداتها” مانردهاش فوجهك..
سهام:مايذدجا إءرام “فين هي إسراء”
سعاد: خليتها ناعسة..
سهام:اوا شوايشواي خس “اوا بشوية عليها”
سعاد:أقا جيغت “هاني خليتها” هضر معايا خويا العربي طلبني نجي لعرس ولدو
سهام:”بتاسمات”هي عماد تزوج
سعاد:لا مروان
سهام:اه حسابلي عماد حيت هو الكبير
سعاد:اوا ولاد اليوم زربانين ميغانݣ “شغنديرو”
سهام:اوا مبروك عليه…هي غاتمشي
سعاد:اه غانمشي من هنا لواحد السيمانة..بغيت ندي معايا هاجر..
نوميديا:”هزات راسها كاتشوف فمها ملتازمة الصمت”
نوميديا:من عندي هانية نشوف باها شغايقول
سعاد:”سكفات من كاسها” الى مابغاش نهضر معاه
سهام:”كاتهضر مع بنتها غير بالعينين” ان شاء الله..
فقرارة نفسها عجبها الحال..وباغية تزور مدينة جديدة عليها..من نهار شدات الإجازة..ماعرفات طعم السفر..نضرا لباها لي دقة قديمة ماعندوش مع السفر ومكايهتمش بهاد الامور..نهائيا
فالمساء بعدما تعشاو..جمعات نوميديا الطبلة ومشات لبيتها كالعادة كاتكتب خواطر قبل ما تنعس وفداخلها أمل وعقلها سارح فمراكش…اما مها دخلات لبيتها لقات السي محمد جالس كايشوف فشي وراق ويراجعهوم جلسات على السرير جنبه شافيها وحط نظاظرو فوق الكوافوز وحتى الوراق وتكى على السرير مجبد…..
محمد:هضرتي مع مميم “ولدك”
سهام؛”تنهدات” ييه سيور أكيذس “اه هضرت معاه
محمد:مغايجيش..!
سهام:والله ماسنغ “ماعرفت” قلتها ليه قالي عندهم الخدمة مزيرة… كون تهضر معاه يجي غير يطل علينا زويثغث..”توحشتو”
محمد:”بسخرية” نش”انا” هضرت معاه مرة وحدة ودار فيها قافز..واخليه
سهام:واصافي.. غاك رخبا “,فخبار”
محمد:أش تما؛!..
سهام: ولد خو سعاد غايتزوج
محمد:اوا مبروك عليه
سهام:وسعاد غاتمشي السيمانة الجاية
محمد:”مافهمش لاش كاتلمح”اوا طريق السلامة
سهام: صراحة ذناي “قالتلي” بغات تدي معاها نوميديا
محمد:”عقد حواجبه” يدجي أوتك ماني “بنتي مغاتمشي فين”
سهام:الله يهديك أسي محمذ أجيت “خليها” تمشي تفوج تاهي شوية وزيدون راه سعاد ماشي غريبة
محمد:واش نتي مريضة نخلي بنتي تمشي حتى لمراكش!..
سهام:ماغا مينݣس “علاش شنو فيها” ها إسراء اطاح “غاتمشي
محمد:راه إسراء هاداك ولد خالها الشريفة…
سهام: اسينيغ لا أوذعدر”نقوليها لا مجاتش”
محمد:الله يرحم بيها الواليدين وذاي صعصيبشي “ماتعصبينيش”
سهام:واخا انا غير قلت ليك كيما وصاتني مابغيتش نردها فوجهها
محمد:”تغطى” صخسي طوو “طفي الضو”
قادات ليه الغطى عاد طفات الضو وخرجات..مشات لبيت بنتها لي كان واسع شوية وفيه سرير واحد ودايرة فيه زربية فالموڨ وطبلة مستطيلة مع الزاوية فيها كتب وروايات عاد خزانة فين كاتحط حوايجها..
سهام:قلتها لپاپام”باك”
نوميديا؛”حطات القلم وتكلمات بلهفة” وشنو قال
سهام:”تنهدات” راك كاتعرفي باك مابغاش
نوميديا:”بتاسمات مخبية خيبة الأمل لي حسات بيها” ماعليش
سهام:ماتقلقيش آيدجي “أبنتي”
نوميديا:ماتقلقتش..
دفنات الحزن لي كان كتاسح عينيها مكملة مع أمها الحديث احساس خايب أغلبيتنا جربناه بحال الى تحطات ليك بطاقة أحلامك بين يديك فجأة تسحبات منك..طبعنا كبنات كانتحمسو للسفر لكن شي مرات كايجي لي يدير ليك العصى فالرويضة وهادي حالة نوميديا…وحاولات تجبد مواضيع مختالفة باش ماتحسش بحزنها
نوميديا: نانَّا “عمتي” شحال عندها دخوتها
سهام:يمكن غاس “عندها” العربي ذ نجاة ذ حميد
نوميديا:غاسن”عندهم” إيحاموشن “ولاد”
سهام:والله ماعقلت ولكن كانعرف مروان وأسية ولاد العربي كانو كايجيو مرة مرة
نوميديا:ماعقلتش عليهم…
سهام: كنتي صغيرة…دبا خليني نمشي نغسل سناني وننعس
نوميديا:تصبحي على خير أيما “ماما”
سهام:تلاقي الخير
خرجات وسدات الباب ومشات جيهة الحمام تغسل سنانها حتى عيطات ليها سعاد وطلات من الدروج..
سهام:سعاد باقي مانعستي
سعاد:لا باقي…أمدرا هضرتي مع محمذ
سهام:يوݣي اوتشما
سعاد:غدا نهضر معاه هايهاي اش فيها تمشي البنت تفوج
سهام:”بتبرير” مافيها والو غير غاتكون الدار عامرة راكي عارفة
سعاد: زعما حنا كغانمشيو عند دار العريس الا غانمشي لدار مّا الله يرحمها..
سهام،:اوا يكون خير من جيهتي هانية راكي فحال وتشما “ختي
سعاد:عارفة لي كاين الحبيبة..نخليك
سهام:ياله تصبح على خير.
سعاد:بسلامة.
فالصباح الباكر!..الساعة تشير الى السابعة والربع فيها حل فيها السيد محمد عينيه على الصوت الساعة لي كاترن عند راسه طفاها وناض..شاف فسهام لي كانت غارقة فنعاسها قاد ليها غطاها عاد توجه للحمام…توضى وخرج لبس حوايجه تمشى جيهة الكوزينة يحضر فطورو ككل صباح….فالثامنة كان كمل روتينو الصباحي وخرج كايقاد الجاكيط كانت سعاد قدام باب الدار هازة شطابة داز من حداها..
محمد:صباح الخير
سعاد:”حشمانة” صباح النور!..سي محمذ واخا ايذوشذ ايج نتقيقث “واخا تعطيني واحد الدقيقة “
محمد:”باستغراب وقال ماهاز العين فيها” اييه مرحبا
سعاد:أمري “كون” غير تخلي بنتي نوميديا تمشي معايا لمدينة
محمد:”حط يدو على صدرو كشكر” شكرا وامي ذفكاذ ݣس”شكرا حيت فكرتي فيها” ولايني مانقدرش نخليها وهي ماتعرف حد تما
سعاد:الله يهديك اسي محمد تردها فوجهي!؟..راني بمتابة مها وربي شاهد على معزتها
محمد:عارف لي كاين أوتشما
سعاد:اوا صلي على نبي..وخليها تمشي معايا
محمد:”حشماته” تالبنت عندي تقدر ماتبغيش
سعاد:ماغريباش انا ناوية ندي معايا بناتي ها إكرام والله ماتفارق معاها نساريها شوية البنت عندك درويشة ذسنت كتا زكي “عارفها كثر مني”
محمد:”تحرج ماعرف مايقول* ان شاء الله الى بغى الله
سعاد:”باصرار” ونعم بالله..هي نعلمها توجد حوايجها
محمد:”حرك راسو” واخا
مشى لطوموبيلته طبعا مكانش غايوافق ولكن سعاد كايحتارمها وربات معاهم ولادو بزوج لا عز الدين لا نوميديا..وعمرها هزات فيه العين..وتفكر حتى بنتو عمرها خسرات ليه خاطرو ولا طيحات بيه..بتاسم تلقائيا فاش تفكر فرحتها..رغم أنه متخوف ولكن حطها فيد الله…واحد سعاد غير خرج بدات تتنقز بلاصتها طلعات فالدروج تتجري ودقات كاتردد اسم سهام لي فتحات ليها مبوقة لابسة بينوار..
سهام:ياك لباس..؟!
سعاد:”بفرحة” كااين واحد الخبيبر ياخيتي بايفرحك
سهام:”بعدم فهم لهجتها” مي دنيذ؟!.”شنو قلتي؟!.”
سعاد:”ضربات جبهتها” اوتيويشي خي “ماتديهاش عليا”
سهام:زيدي دخلي يعطيك متاكلي خالعاني
دخلو بزوج وجلسو فالصالون سعاد فرحانة من قلبها من ديما عندها نوميديا عزيزة عليها…بطييتها وخجلها وداخلة سوق راسها..
سهام:باستفهام” شوشتيتي؟!.شنو واقع
سعاد؛هضرت مع محمذ
سهام:محمذ؟!.نغ” ديالنا”
سعاد:بييه اگاز اينم “راجلك”
سهام:فاش هضرتي معاه
سعاد:على قبل نوميديا!…هه قولي ليها تجمع حوايجها
سهام:اينام واخا “قالك واخا”
سعاد:ايييه بفموو قالها هههه حشمته حتى قبل..
سهام:الله ياوتشما “ياختي” بلاش والله غير سيري نتي واكرام
سعاد:شوفي ماشي وافق هو ونتي تخرجيلي نوميديا غاتمشي معايا..
سهام:اوا واخا دبا نوميديا ناعسة نفيق نقولها ليها،
سعاد:”ناضت” ان شاء الله غاتعجني اليوم عند اينور؟!
سهام:لا اوتشما..نعجن غير ذاكنيفث “الفطيرة”
سعاد:اوا واخا تانا عكزت نخليك نوجد فطوري
سهام: واخا سيري
هبطات سعاد وسهام دخلات الكوزينة توجد فطورها وتفكر فتسفيرة دبنتها …
مرت ايام…فيه شرات نوميديا حوايج تقدر تدوز بيهم يوماين تما مخصصة من والو..ولكن طبعنا كبنات خاص الجديد فاش نسافرو..شادين الطريق لي كانت طويلة عليهم..سعاد ونوميديا وإسراء سايݣ بيهم تاكسي..واكيد سعاد لي خلصات حتى على نوميديا وماخلاتش السي محمد يعطيها واخا اصر ولكن حلفات واخيرا دخلو مع الباب دمراكش وتوكضو…
سعاد:إسراااء إسراااء “حركاتها بيديها”
إسراء:”حلات عينيها”همم وصلنا
سعاد:ياله دخلنا لمراكش… حيدي عليك النعاس.”شافت فنوميديا” ياكما دايخة أبنتي
نوميديا:لا..شوية
سعاد:”مدات ليهم مسكة” هاكو تحيد عليكم الدوخة..
مول تاكسي؛”شاف فيهم من المرايا”شمن بلاصة بالظبط أختي
سعاد: غير هنا فالمدينة سير لشارع *** تما حطنا
حول نظرو للطريق..دقائق كانو وصلو لحي باينة فيه قديييم وخا نقي دراري صغار كايلعبو ..ونسا مجمعين عند الباب حطهم تما ونزل حط ليهم الباليزات ديالهم كانت خلصاته من قبل هزو داكشي بثلاثة بيهم عاد دقات سعاد الباب وحلات ليها مرا كبيرة شوية سلمات عليها..ودخلات
نجية:ختي سعاد كي وصلتو لباس
سعاد:الحمد أختي
نجية:زيدي اختي ياله جمعت دار
سعاد:اوا الله يرحم ليك بيها الواليدين سمحيلينا عذبناك معانا
نجية: الله ياختي واش تعذبت باطل راك دايرة معايا الواجب
سعاد:لهلا يحشمنا..
دخلو متاجهين للصالون التقليدي لي كان ايام زمان والدار نقية كاتشعل.. نجية من ايام المراهقة وهي مع ام سعاد كاتعاونها بعدما كتب ليها الله تزوجات دوزات عماين ومات ليها الراجل وخلا ليها دخل قليل وولات كاتخدم عند الناس لي كاتعرفهم ومنهم ام سعاد الله يرحمها..وبقات على تواصل مع سعاد مرة مرة فشهور كاتجي لهاد الدار تخملها وقبل ايام تاصلات بيها تقابل ليها دار ودوزات ليها الفلوس..
نجية:”جابت ليهم الما” شربو غانكونو شحفتو
سعاد؛بزاف ياختي… نوميديا دخلي احبيبة للبيت غاتوريه ليك إكرام وحطي فيه حوايجك ورتاحي ليك شوية
نوميديا:”ناضت” واخا
سبقات إسراء لداخل وتبعاتها نوميديا كان بيت متوسط وفيه سرير كبير وماريو وكوافوزات ومضوي حطات الباليز الجنب وبدات تحيد حوايجها لي عبارة عن كسوة حجابية طويلة فالاصفر فيها صميطة فالوسط وشال بيض وهكا ستيلها قليل فين كاتلبس سراول..ولبسات بيجماتها وسرحات شعرها عاد شداتو مرخوف
إسراء:”ترمات على السرير بعدما حيدات حوايجها” الله ياختي شحال عيييت..رجلي تورمو
نوميديا: تانا الطريق كانت طويلة..نصيفط ميساج لماما ونعس
إسراء:”تفوهات” مافياش نعاس..نعست فالطريق ولكن نغمض عيني تانا
دازو ساعات غرقو فنومهم كانو عيانين ومرهقين من السفر…ناضت سعاد هي الأولى طلات عليهم.. عاد خرجات وقفات قدام الباب كاتشوف فالارجاء ومشات على رجليها لواحد الريسطو قريب طلبات ليهم ما ياكلو وزادت لقدام حتى لمحات واحد الشاب فطموبيلته كايشير ليها وقفات مبتاسمة ونزل سلم عليها..
عاصم:سعاد هادي نتي..
سعاد:اييه الحبيب لباس عليك؟
عاصم:”بتاسم” الحمد الله مراكش نورات بيك..
سعاد:ربي يخليك نجاة لباس عليها؟
عاصم:الحمد الله؛ ياله تتعشاي معانا
سعاد:لا اولدي هاني جبت عشايا كايستناوني البنات فدار!
عاصم:واخا بلغي ليهم سلامي..
سعاد:الله يسلمك.. “كملات طريقها لدار”
واقفين قدام المرايا حاطين قدامهم ادوات التجميل..نوميديا ببساطتها الدائما مخلياها كاتبان فاجمل صورة..بقفطانها الرمادي المخيط بأحجار ثقيلة مشتتة جيهة الصدر والتحت..وبشالها لي كايلمع مناسب للاعراس وبمكياج خفيف وهادئ مكايبانش..نفس الشيء إسراء مزيزة مع الحالة طالقة الشعر..هزات نوميديا بوشيطتها فنفس لون لباسها وخرجات من الغرفة..فين كانت واقفة سعاد لي تا هي فقمة أناقتها..شافتها توجهات ليها مبتاسمة..
سعاد:هاي هاي هاي جيتي تحمقي الله ينجيك من العين
نوميديا:”بخجلها المعتاد” ربي يخليك أنانَّا..
سعاد:اسرااااء إسرااء..باقي ماساليتي
إسراء:”بصوت” عالي هاني أمَّاا جااية..
خرجات كاتمشى بشوية وكاترد خصلات شعرها اللور..لابسة طالون ومبينها طويلة ووقفات قدام مها كاتفرنس
إسراء:كي جيب
سعاد:غزالة مشاء الله عليك “بمزاح” وعليا لي والدة زين
إسراء:هه بيت نبوسك خفت نخسر عكاري
سعاد: زيدي قدامي التاكسي كايستنانا من قبيلة…هاجر حبيبة ياله
.
.
.
سبقوها وتبعاتهم مبتاسمة وعينيها كايلمعو ماكرهاتش كون حتى مها كانت معاها ورافقاتها وشدات فيها..كيما سعاد وإسراء ممكن يكونو مشادين بعفوية ولكن هي موراهم جات ناقصة شوية..ركبو فالتاكسي ونطالقو لمكان الزفاف لي كان بعيد شوية على مكانهم…اكثر من ربع ساعة كانو وصلو لقااعة كبييرة مزوقة من برا…وطوموبيلات مصفوفين للجنب دخلو للقاعة لي كانت عامرة بالناس…ستاقبلاتهم مرا كبيرة شوية ومقادة بتاسمات سعاد بزز وسلمات عليها..
نجوى:اهلااا اهلااا بالغالية كيف دايرة اش خبارك غبرتي علينا
سعاد:لباس الحبيبة ونتي كيدايرة الصحيحة مبروك مدار ولدك
نجوى:الله يبارك فيك لعبقة لاسراء..شكون هاد الزوينة لي معاك
سعاد:بنت النوطة ديالي
نجوى:غزااالة مشاء الله
سعاد: فين هو عماد
نجوى:مشى يجيب شي ناس.. ومروان كاين برا
سعاد:اوا واخا هاحنا بانشدو طبلة
نجوى:حسبو القاعة ديالكم
سعاد:ربي يخليك
شدو بلاصتهم…وشافت إسراء فمها بعتاب.
اسراء:الله يا مّا شوية وكنتي باتنقزي عليها
سعاد:مدرتشاي
إسراء: العريس كان برا لاش ماسلمتيش عليه
سعاد:هو لي كان خاص يجي عندي ..وانا جيت على وجه المرحوم خويا..شوية وكانت غاتقولي اجي تسلمي على راجلي
اسراء:شي خطرات والله متاتفهمك!..خالي العربي الله يرحمو وسنة الحياة وهاهي تزوجات اشوقع؟!.
سعاد:ماتزوجشاي نسات العشرة..صافي قلبي عليا هاد الموضوع خليني بݣانتي.
.
.
بقات كاتشوف فالاخير سكتات زادو فالموسيقى وكلشي ناض يشطح حتى من اسراء …اما نوميديا عياو معاها مابغاتش تنوض العرس كولو دوزاته مركنة جنب سعاد ماتحركاتش من بلاصتها كاتشوف قدامها مبتاسمة ومنغمة باجواء العرس العرس داز على حقو وطريقو..العريس خسر فلوسو ديال بصح..كل نوع تحط على الطبلة البسطيلة دالحوت اللحم الدجاج كل ما لذ وطاب..ناس كلاو ونشطو وكملوها بدقة المراكشية…
في أحد الأسواق الكبيرة في مراكش..كايدورو من محال لمحال سعاد حسات براسها وسط ناسها وحبابها توحشات تسمع لهجتها فكل مكان..ونويطات ديال المراكشيين..وجها نور كاتشوف الحوايج وتشوف شنو تشري هزات كسوة فالابيض طويلة وبالكمام غزالة شافت الثمن من بعد تاجهات عند نوميديا ..
سعاد:غزالة هاد الكسيوة!
نوميديا:”تتلمس فالتوب” اه بصح توبها زوين
سعاد:كنتي قلتي ليا بتاخدي شي حاجة ختاري أبنتي ماتحشميش!
نوميديا:”كاتشوف فأرجاء المحل” كلشي غزال! هادي تاخديها لاسراء؟
إسراء:”سمعات سميتها توجهات عندهم” شنو هادي؟ نو انا مكانلبسش بحال هادو
نوميديا:إذن انا غانديها! نشوفو ثمن؟
سعاد:اييه زيدي الحبيبة
داوها لمول المحل وتجطرات معاه سعاد فالثمن حتى نقص ليهم..ختارت معاها شال وسباط ..وخلصات من جيبها أكيد باها مصيفطهاش بيدين خاويين ما ديال وجهو..شراو وخداو لي بغاو وتوجهو لمطعم كلاو وشبعو كريشتهم وهبطو لساحة الفنا لي عامرة ناس..ها ولاد المدينة ها البراني..والكور مشتتين..
إسراء:ماما بغيت نتصور مع القريد!
سعاد:على مصغيراتك!
إسراء:عفااك ياله انووميدياااا نتصووروو مع القريد بلييز..
سعاد:سيري الله يعفو..
تصورو معاه ودارو الساحة تقريبا كلها..وكلاو الببوش ورجعو بحالهم عيانين باغين غير فوقاش يحطو الرأس ويرتاحو…
.
.
.
بعدما دوزو يومين فمراكش..اليوم راجعين..موجهة نظرها للنافذة مبتاسمة كانت تجربة حلوة تعرفات فيها على عادات وناس جداد زارت مناطق اول مرة تشوفهم…فجنبها إسراء لي كاتسيلفا وتحط فانستغرام بثقة عالية…رن هاتف سعاد لي كانت غفات وحلات عينيها جابداه من صاكها..
سعاد:الو..
نجاة:لباس عليك
سعاد:الحمد الله ونتي
نجاة:الحمد الله..باقة فمراكش
سعاد:لقيتيني شادة طريق
نجاة:الله يوصلكم بالسلامة..كون غير طولتي مالحقناش نهضرو
سعاد:مرا خرا ان شاء الله
نجاة:بيت نهضر معاك فواحد الموضوع
سعاد:ياك اودي شي باس ماكاين..
نجاة:بيت نهضر ليك على ديك البنيتة لي جات معاك
سعاد:”شافت فنوميديا”مالها
بدات كاتهضر معاها..ونجاة غير ساكتة مرة مرة تهضر..وتشوف فنوميديا..حطات يديها على فمها متفاجئة حتى كملات المكالمة وحطات راسها على الشرجم كاتخمم ودماغها ساهي شوية بتاسمات..
سعاد:”بخفوت” علاش لا!
حاطة ليزيات على وذنيها تتمزك وتحرك كتافها مراقبة الطريف وردات خصلة من شعرها وراء أذنها… ما إن لمحات اشعار جاها كان من الانستغرام بزاف دالميساجات فيهم قلوبة وكلمات غزل لكن واحد فقط لي جذب اهتمامها…لقات رد على الستوري لي حطات من ابن عمها..بلعات ريقها ودخلات ليه..
….:شهاد الشي أبنت العم وليتي تحطي تصاورك ومعاك دراري
إإسراء:ههه الا معايا غير صحاباتي محيدة الدراري باش مايشوفوهاش
…..:”بعد دقائق” ههه واقيلا نسيتيني انا
إسراء:”كتبات ليه بعفوية” لا مانسيتكش ههه نتا بحال خويا علاش نحيدك
طلع ليها Vu خلاها عاضة على فمها مفقوصة..فنفس الوقت متفاجءة حيت هضر معاها طبعو حدودي بزاف ومكايهزش فيها العين..ساستو من راسها ودخلات للواتساب وصيفطات ميساج لصاحبها..
إسراء:بب صافا..
عاد حطات التيلي فاش حسات بسعاد تململات وشافت فالطريق بانت ليها بلاكة مكتوبة فيها “الحسيمة” زفرات بارتياح مابقى ليهم والو يوصلو..إكرام عايشة حياتها عكس مبادئ لي تربات عليهم…حيت مها طاالقة ليها اللعب بهاد العبارة..باها متشدد ولكن امها المتحكمة وحيت كاتيق فبنتها مكاتكلفش راسها تحضيها..شي لي خلاها تعيش بحرية..كانت بحال طفلة رضيعة مغمضة عينيها..غير زارت المدينة ودوزات فيها تلت سنين ورفاق السوء دارو خدمتهم…خلاها ماتفكرش فعواقب أعمالها…بحالها بحال نوميديا فاوائل العشرينات درسو فنفس الكلية..بنفس الاصدقاء لكن نوميديا ما أثروش عليها…
.
.
.
.
وقف التاكسي امام منزلهم..وهزو باليزاتهم ودخلو مدوخين..كانت الباب محلولة كالعادة…طلعات نوميديا فالدروج..جارة باليزتها وكتافها طايحين..لقات مها كاتمسح يديها فالطابلية الواضح ياله كملات شغلها غير شافت بنتها عينيها تحلو..ومشات عندها
سهام:نوميديا ينو ذوسيد “جيتي”
نوميديا:”عنقاتها” ياله وصلنا
سهام:ياكما دختي فالطريق
نوميديا:”كاتحيد صباطها” شوية وصافي
سهام:ياله دخلي وجلسي ترتاحي
نوميديا:”تسرحات على الكنابي بتعب” جنابي طابو بالجلاس
سهام:بحال الى تعطلتو ماوصلتو
نوميديا:”تفوهات” حبسنا نرتاحو شوية.. داكشي علاش
سهام؛فيك الجوع
نوميديا:نن ݣي يضس “فيا نعاس
سهام: اوا دخلي ترتاحي تاتفيقي واجي عاودي ليا كيف كانو الاجواء تما
نوميديا:امم واخا
دخلات لبيتها مخلية باليزتها تما جبدات قندورة منزلية بلا كم لبساتها وسرحات شعرها لي كان مزير وضرها فراسها تسرحات على سرير دقائق حاولات تنعس والو وهي تنوض جمعات شعرها دار ليه زيف ديال الدار وخرجات برا كاتمشى حدا دار وهي تلمح جارتها شيرات ليها..
نوميديا:”بتاسمات” السلام..
فضيلة:”طلعات فيها ونزلات” قالت لي يماك كنتي مسافرة
نوميديا:اه عاد جيت
فضيلة: اممم وكي دايرة هاد مكناس
نوميديا:”مابغاتش تحرجها” مزيانة
فضيلة: كا هنا حسن ولا تما
نوميديا:هنا حسن
فضيلة:”قربات عندها وشوشات” اوا قولي ليا كاين شي راجل شي حس
نوميديا:ءااء !
فضيلة:”بآسف” صافي فهمتك؛ ربعة وعشرين عام عدك! وباقي ماتجوجتي ماتكوني غا متقفة انا بنت ختي نجية قدك كان عندها جوج دالعواول
نوميديا:الله يخليهم ليها..
فضيلة:أمين أبنيتي نخليك!
مشات بحالها وخلاتها واقفة شوية بتاسمات غير بوحدها..جابت ليها الضحكة حيت من نهار تزادت وهي كاتسمع من عندها هاد الهضرة..شافت بعيد ساهية كاتفكر فهضرتها
على صوت الاذان خرجات من بيتها بعدما خدات قسط من الراحة… فاش خرجات شمات الهوا ورتاحت..ودخلات ديريكت نعسات..تقادات فجلستها حاسة بعضامها مدكدكين..لبسات صندالتها ووقفات قدام المرايا كاتجمع شعرها الطويل..ولبسات تريكو خفيف على قبل دراعها المعريين…عاد جمعات بلاصتها وخرجات من بيتها كاتفوه..كان باها جالس فالصالة كايستنى الاذان يسالي باش ينوض يصلي..وتوجهات عندو…ألقت عليه السلام وباست يديه..
محمد:الله يرضي عليك أيدجي “بنتي”..فوقاش وصلتي
نوميديا:قبل المغرب بشوية
محمد:ياكما دوخذ أݣو بريذ “ياكما دختي مع الطريق”
نوميديا:لا غير شوية وصافي
محمد:دنيا كانت مخلطة
نوميديا:لا نسا فقاعة ورجال فقاعة
محمد:”ناض” واخا الله اضا عليم “الله يرضي عليك” غانمشي نصلي
نوميديا: واخا أپاپا..
غير دخل لبيته مشات هي للمحمام توضات وخرجات كاتمسح وجها ففوطة…عاد دخلات للكوزينة فين مها واقفة كاتقلي الحوت..
سهام:ذاتاحذ؟!. “رتاحيتي
نوميديا: امم نعست مزيان
سهام:فيك جوع
نوميديا:شوية
سهام؛كولي كرواصا درتها قبيلة على ما يوجد العشى
نوميديا:واخا…
جلسات على الكرسي كاتعض من پتي پان…وكاتفكر فالعرس اللي جاو منو حتى الخمسة دالصباح.. وخرجتهم فالمساء والناس وهضرتهم اللي حمقاتها..كاتتمنى تزورها مرة خرا…شافت فيها مها وسولاتها
سهام:كانت القاعة عامرة
نوميديا:شي حاجة واها “شوية وصافي”
سهام:كيدايرة العروسة
نوميديا:غزالة مشاء الله دايرة بحال الممثلات
سهام: اوا الله يكمل عليها بالخير كيجاتك مراكش
نوميديا:”بتاسمات ببريق” زويينة بزاف..زرنا جامع الفنا ههه كانت تما واحد القريد ذاباح “زوين”
سهام:سعاد تلاقات مع خوتها؟!.
نوميديا:سلمات عليهم ولكن ماهضروش بزاف.. واش عمرهم جاو لهنا؟
سهام:”بدات كاتحيد الحوت من المقلة” اخر مرة جاو كنتي صغيرة بزاف..كانو وقعو شي مشاكل وتوتر الجو من تما ماعفطو هنا
نوميديا:امم ماعاقلاش عليهم…ذسيورذ أݣ خاتشي “هضرتي مع خالتي”
سهام:ييه تاهي مسكينة غارقة مشاكل
نوميديا:شنو وقع ليها
سهام:ولدها دار كسيدة
نوميديا:”حطات يديها على فمها” محمد؟!.
سهام:”حركات راسها” ييه تما فاسبانيا جاتها خبارو بغات تتسطى
نوميديا:”بآسف” الله يشافيه
سهام:”عينيها تغرغرو مابيناتش” امين..سيوض أميسا “وصلي للطبلة
دازت الكيسان والما الطبلة عاد رجعات هزات للطباسل والباقي…بدون نفس محمد ولد خالتها عزيز عليها بزاف فمتابة خوها دائما كايعاملها مزيان..من صغرو مشا لاسبانيا مع مو وباه…كانو كايجيو كل عام لكن ما إن ماتت الجدة مابقاوش كايجيو بزاف…
ياله جلسو على الطبلة حاطين اللقمة ففمهم سمعو الدقان فبابهم ناضت نوميديا غير حلات الباب تحلو عينيها بدهشة..من الشخص لي جا وهو مقابلها بشبه ابتسامة..طلقات من مقبط الباب وهي كاتشوف فيه ممتيقااش واش هو ولا كاتحلم
ولدي توحشتك! ولدي مغاتجيش!..هاد الكلمات كان دائم كايسمعهم من مو.. لبى ليها طلبها وجا هارب من الضغوطات والمشاكل لي تلقاهم..وها هو الان جالس وسطهم كايتناولو وجبة العشاء…كايسولو فيه وعلى احواله اخدمته…حسن براسه بحال الى كان فسجن ودابا تحرر كايدوي معاهم بأريحية..كايبرد شوقو منهم ومن كلامهم الطيب ونصائحهم…
سهام:ذوحرذ أمي “عيان اولدي”
عز الدين:شوية وصافي..مع الطريق كانت طويلة..
محمد:واش جيتي ديريكت ولا ستارحتي..
عز الدين:غير حطاتني الطيارة شديت الطريق
محمد:دزتي من الساحلي
عز الدين:ييه..
محمد:الطريق ارا يعما؟! “كان عامر؟!”
عز الدين:شواي واها ودشي پزاف”شوية وصافي ماشي بزاف
سهام:اوراي يسوجاذاك اتشذ “شكون كان كايوجد ليك الماكلة”
عز الدين: ههه بوحدي
سهام: الله وياولدي كان كايقتلك الجوع..
محمد:ههه الزوافرية كايعرفو يطيبو ماتهزيش الهم
ضحكو كاملين مكملين أكلهم لي زاد حلا بالجموع…فاش سالاو ناضت نوميديا جمعات الطبلة..ورجعات جلسات معاهم..شدو السهرة حتى ل12 دالليل عاد ناضو ينعسو اولهم محمد..دات سهام ولدها لبيت ضياف..وقالت ليه..
سهام:بيتك باقي خاص نخملوه..دبا نعس هنا
عز الدين:واخا أيما ينو”واخا اميمتي”
سهام:اشجغ “نخليك” تنعس غاتكون عيان
عز الدين:راجد ايج ندقيقث “ستناي واحد الدقيقة
مشا لواحد الصاك كبير كان جنب الباليزة مشى عندها وحطو حداها شافت فيه باستفهام وأشار ليها تحلو..كان عامر بحوايج ليها عبايات قندورات فولارات روايح..تهلا فيها بمعنى الكلمة باست جبهته بحب وقالت برضى..
سهام:الله يرضى عليك الحپيپ
عز الدين:”باس يديها” أمين أيما اينو هه
سهام:”ناضت”تصبح على خير أمي
عز الدين:تلاقي الخير…عييطي ليا معاك لنوميديا
سهام: واخا
خرجات مخلية الباب محلول دازت عند نوميديا عيطات ليها عاد دخلات تنعس.. توجهات لبيت خوها باستغراب لمناداته ليها لقاتو كايبقشش فصيكان شاف فيها ماد ليها صاك كبير…وقال ليها
عز الدين:هادا ديالك..سدي الباب موراك تصبحي على خير
نوميديا:”بابتسامة” شكرا
عز الدين:”بتاسم” ياله سيري تنعسي
نوميديا:”بحب” واخا
مشات لبيتها وحلات الصاك بلهفة..حلات فمها بداكشي لي فيه..اي حاجة تحتاجها اي انثى حاطها ليها تما..ماركات زوينة وايفون اخر مخرج فالسوق..وسعاات باتسامتها وكملات شغلها كاتحط داكشي فماريوها..
اليوم غير الايام..اليوم عيد عند سهام ناضت بكري بزاف على غير العادة ودخلات للكوزينة كاتشمر على دراعها وعيونها لامعين..كاتفكر شنو كايعجب إبنها عرفاته غايكون مشتاق للاكل البلدي..ما وصل وقت فياقهم كانت وجدات ما لذ وطاب من مسمن وحرشة دالتشيشة الى اخره…حتى من زوجها بطل يوم عمله يفطر مع ولده .. مشات فيقات نوميديا تغسل وجهها باش تفيق باقي افراد اسرتها الصغيرة ،،
نوميديا:”غاسلة وجهها جامعة شعرها الفوق كاتحط معاها فالطبلة” غاتفيقي عز الدين دبا
سهام:امم نفيق پاپام اللول
نوميديا:مامشاش للخدمة؟
سهام:لا مامشاش باغي يخرج هو وعز الدين هاد نهار
نوميديا:اوا واخا…
سهام:هاني غانمشي نفيق باك
حركات ليها راسها..عاد دخلات سهام لبيتها كاتبدل حوايجها..وتفيق راجلها..غير فاق ناض جلس على السرير محيد الغطا وقاليها عاقد حواجبه…
محمد: صباح الخير
سهام:”وقفات قدام المرايا كاتقاد زيفها” صباح النور
محمد:شحال الساعة
سهام: تسعة ونص
محمد: وجدتي الفطور
سهام:امم غسل وجهك واجي
دخل لحمام لي كاين فبيته..وهي خرجات لبيت الضياف دقات شحال من مرا عاد تفتح الباب لابس غير شورط وشاف فيها بعينين منفوخين
عز الدين:”بصوت مبحوح”الواليدة صباح الخير
سهام:صباح الخير الحپيپ ينو تفطر دبا ولا تكمل نعاسك
عز الدين: غانلبس حوايجي ونجي
سهام:واخا ماتعطلش راه حطيت على الطبلة
عز الدين:واخ
دخل للبيت ساد الباب ومشى الباليز كايجبد حوايجه..غير لبسهم هز التيليفون وشعلو حقق فيه الشوفة وهو يتسمر..وقلبو خفق بعنفه وهي كايحقق فصورتها ببشرتها الغادية للسمورية وابتسامتها الجذابة وسنان كايلمعو الشعر مطلوق دايرة نضيضرات.. البارح نعس على صورتها..غمض عينيه وخشى تيليفون فجيبه وخرج.. لقاهم جالسين على الطبلة
عز الدين: صباح الخير
محمد:صباح النور اجي تفطر
عز الدين: نغسل ونجي.
سهام:”وجهات نظرها لمحمد” قهوة ولا أتاي
محمد:بحال العادة
سهام:”شافت فنوميديا” ونتي
نوميديا:أتاي
انضم ليهم عز الدين.. وبداو فطورهم اللي ماشبعش منو عز الدين وتوحشو بزاف..مرة مرة كايسقسيوه وهو كايجاوبهم بصدر رحب مبتاسم بثبات وعاقد حواجبه الكثيفين كالعادة..
محمد:زيغا ذفضاض اطاحذ اكيذي اذماث نغ “ماللي تفطر غاتمشي معايا للارض ديالنا
عز الدين: واخا الواليد..زارع فيها شي حاجة
محمد: واه فيها القمح
عز الدين:باقي خضر؟
محمد:اه باقي ماوجد
عز الدين:توحشغ امكان نني “توحشت ديك البلاصة”
محمد:باقي كيما هي ماتبدل فيها والو
غير نطق الجملة ماسمع موراها والو…حتى رد باه
…علقه سافر بعيد لقبل سنين عينيه كانو لامعين وهو كايفكر….
مراهقة كانت كاتجري وسط الحقل كبير وهو تابعها منيم عينه فابتسامتها وشعرها لي كان قصير كادور حواليها بمرح الشمس ضاربة فبشرتها السمراء لابسة كسيوة تحت الركبة..شوية مشات بيها رجليها وطاحت كاتبكي…
عز الدين:”توجه عندها بخوف” واش نتي بيخير تقسحتي
….:بغيت مااماا
عز الدين: قربي نشوف فين تجرحتي
ورات ليه مرفقها وهو كايمسح ليها الدم…بشوية..قاطع تفكيرو باه لي هدر..
محمد:البارح صونات عليا واحد النمرة ماعرفتش ديالمن
عز الدين: “دماغو مشوش” لي بغى شي حاجة غايعاود يصوني..
في البطقة التحتية..جالسة سعاد فدارها كاتنقي العدس دايرة نظاظرها مركزة كل التركيز..قدامها بنتها كاتكونيكطا وتضحك مع تيليفون مها كاتشوف فيها بلا حول.. سمعو رنة الهاتف الخاص بسعاد…
سعاد:”شافت فابنتها” نوضي جيبيه!
إسراء:”تأفأفات بملل وناضت مداتو ليها”
سعاد؛شكون كايصوني
إسراء:خالتي
سعاد:ماعت اش بات فهاد الصباح
إسراء:جاوبي وباتعرفي
سعاد:صافي سكتي…الو نجاة لباس عليك
نجاة:الحمد الله ونتي واكرام والسي علي كلشي بخير
سعاد:الحمد الله هاحنا كانعديو
نجاة:صونيت ليك نقول ليك راه صونا سي حمد على لوسك والو مجاوبوش
سعاد:والله ماعرفت اخيتي جربي مرة خرا
نجاة:يكون خير
سعاد:بسلامة سلم على ولادك
نجاة:مرحبا بسلامك
قطعات وحطات يديها على حنكها مشوشة من الموضوع شافت فيها بنتها بفضول ونطقااات بتساؤل..
اسراء:شنو بغات
سعاد:غير على قبل الموضوع ديك النهار
إسراء:علاش ماقلتيهاش نتي لعمتي سهام
سعاد:لالا انا كاع مغاندخل بيناتهم
إسراء:اللي بان ليك
سعاد:سيري طفي لي على الكوكوط
إسراء:اوك..
.
.
.
نهار كامل داز وسط الحقل…كايوري لابنه اراضيهم…والمزروعات لي عندهم البلاصة كانت على شكل لوطة كبيرة فيها بزاف دالاراضي ديالهم وديال الناس كايفرق بيناتهم الحجر والتراب كل سنة كايزرعو فيها حاجة جديدة مرة مرة كايخليوها ترتاح وهادشي كايوقف عليه محمد بيدو لي الفلاحة من الهواية ديالو لي كايفضلها ويرتاح فيها كثر..غير كياخد عطلة كايجيب الماتريال ويزرع والثمار كايجنيهم بيدو بدون اي مساعدة من احد.. الحوار بينه وبين ولده كان طويل الواضح انه سنوات هو فبلاد الغرب خلاته ينسى بعض الاشياء بحال الزراعة وو….
عز الدين:”شار ليه لارض خاوية” علاش مازرعتوش هنا!
محمد:زرعنا فيها العام لي فات هاد العام خليتها ترتاح
عز الدين:”باهتمام”شنو زرعتو فيها
محمد:زرعت پاطاطا
عز الدين:كنتي كاتزرع هنا القمح؟
محمد:ايه على حساب كل عام…تفضالغ “كانفضل” نزرع البطاطا ونفرقها على الناس اما القمح شحال غايقدني
عز الدين:ذزارعت وحدك؟”كاتزرعها بوحدك”
محمد:ييه اوتيريشي غاي رخذمث بزاف “اه مكاتكونش عندي الخدمة بزاف”
عز الدين:حنا”جدة” باقي مغاتجي من عند عندي “عمتي”
محمد:عاذ شي حاجة
عز الدين:عجباتها المدينة
محمد:شويتي واها “شوية وصافي” غير عمتك مريضة..
عز الدين:”بآسف” وايلي من ديك الوقت باقي ماتشافات
محمد:شغنقول ليك اولدي الله يمهل ولا يهمل كل واحد كايتعاقب على عمايلو
عز الدين:ونعم بالله
محمد:يالله قا نعضر “راه تعطلنا
عز الدين: واخا…..
مشاو من ديك الارض كايكملو حديثهم..كأي إبن وابنه…مرة أخرى رن الهاتف وهزو محمد فيدو لقى رقم مامسجلش..خلاه حتى قطع ياله جا يهضر وهو يوصلو ميساج..
{السي محمد الامور هانية..كانتمنى فاش تلقى الميساج تتاصل بيا محتاجك فامر مهم}..
عقد حواجبه بإستغراب كايفكر فالمتصل شاف فيه ولده باستفسار.. حاول عز الدين يشوف جهة الاتصال لقاها مراكش حرك راسو بإستغراب من هاد الموضوع لي غايكونو باغيين فيه باه
عز الدين: ياك لباس!.
محمد:والله ماسنغ “ماعرفت” هادي يوماين وهاد النمرة كاتصوني ليا..مابغيتش نجاوب تا وصلني ميساج..
عز الدين:اري نشوف ليك..
محمد:”مد ليه تيليفونه” هاك
عز الدين:”شاف الميساج” صافي مرا خرا فاش يصوني جاوب
محمد: داكشي لي غاندير..ميرا ذخدمذ ذين ݣي طاليان “شنو كنتي كاتخدم تما فايطاليا”
عز الدين:”بتوتر” غير دخلت شريك مع صاحبي فشركته
محمد:يعني عندك فيها اسهم
عز الدين:ا ااه
محمد:”بإستغراب” وجيتي المغرب ناوي تطول كيدرتي ليها
عز الدين:”زير على يدو” ناويين ننقلو الفرع للهنا..انا غانتكلف فالمغرب وهو غايكمل الوراق ويجي
محمد:”مكايفهمش فهادشي” واخا الله يسر
عز الدين:امين.
قلب وجهه لجهة خرا كايعض شفايفه بعصبية محرج..من الكذبة لي قال لباه كايستغفر مولاه فنفسو..ماقدرش يشوف فيه مرا خرا..اما باه ملاحظ والو شغلو بعيد على هادشي كل البعد..
{ المسااااء. }
بعد ما كملو عشاهم جلسو كايتبادلو اطراف الحديث ومقصرين..بينااتهم نوميديا اللي غير ساكتة حتى كايسولوها عاد كاتجاوب بحكم طبيعتها الكتومة..رن هاتف السيد محمد شاف نفس الرقم وقرر هاد المرا يجاوب ناض لبيته ساد الباب مخليهم كايشوفو وراه حك عنقه ودوز الخط..
….:”صوت رجولي قوي” السلام عليكم
محمد:وعليكم السلام..
…: السي محمد هادا؟
محمد:اييه هو هادا شكون معايا
….:لباس عليك والعائلة كلشي مزيان
محمد: الحمد لله
….: معاك السي عبد الوهاب من مراكش
محمد:متشرفين الشريف ولايني ماعرفتكش شكون
عبد الوهاب؛شرف ليا اسي محمد ياكما عيطت فوقت ماشي هو هاداك
محمد: لا خود راحتك
عبد الوهاب:باندخل فالموضوع ديريكت الى بيتي آلشريف
محمد:اييه تفضل
عبد الوهاب:بغيت ندير شي وقيتة نجيو عندكم انا وعائلتي
محمد:مرحبا يضياف الله..على الراس والعين
عبد الوهاب:الله يكبر بيك اسي محمد الى كتاب جايين طالبين راغبين فبنتك لولدنا على سنة الله ورسوله
محمد:ياكما غلطتي فالنمرة
عبد الوهاب: لا لهيا ودي ياك نتا سي محمد باين نوميديا…
محمد:اه هو هادا
عبد الوهاب: اوا راني مغالطش بيت لالة نوميديا تكون مرات ولدي على سنة الله ورسوله
_الدم تحقن فوجهه!غمض عينيه وعاود حلهم بعدم تصديق..المعنى كان واضح وفهمو مزيان…كيفاش؛! كيفاش مراكش؟!.واش هادو حماقو!من الاول مكانش خاصني نجاوب..هادو هما الكلمات لي رددهم فنفسو…رجع لوعيه فاش سمع سميته كايرددها المتصل…
عبد الوهاب:السي محمد كاتسمعني !
محمد:اييه الشريف كانسمعك
عبد الوهاب:,اوا شنو قلتي؟
محمد:”بجدية” مرحبا بضيف الله على راسي وعيني..وليني البنت عندي باقي صغيرة
عبد الوهاب:الله يهديك اسي محمد البنت كاتبان راشدة وبعقلها وحاشة واش نضروها بسوء..خلينا بعدا نتلاقاو ونتفاهمو فيما رضي الله ديك الساعة وقرر..
محمد:ماقلتي عيب…الحاصول مرحبا بيكم
عبد الوهاب:الله يكبر بيك الشريف..
محمد:مع السلامة..
قطع وحط التيليفون بالزعفة على الناموسية وجلس كايحط لحيته ويهزز برجله…دقائق عديدة دازت عاد دخلات سهام كاتشوف فيه بإستغراب كاتعرفو مزيان فاش كايكون معصب سدات الباب ووقفات عليه…
سهام:شكون صونا ليك
محمد:”جاوبها بزز ” غير واحد سيد
سهام:شنو بغى
محمد:”خنزر” كديري معايا التحقيق؟!كل حاجة خاص نعطيك عليها فاصيلة وطاسيلة
سهام:الله ياربي!شكون عصبك فهاد ليل
محمد:مامعصبش انا..غير فوتي ساحتي
سهام:عاد كنتي مقصر وناشط شنو تبدل
محمد:”ناض متاجه للحمام كايحيد قاميجه” أوݣيي ميغايسيورن”مافيا لي يهضر” عطيني غير تيساع
سهام:ايه اوا واخا هاني عاطياه ليك اولد الناس
خرجات من تما طالع ليها الدم بالمزيان…عاد كانت ضاحكة ودبا مابقات راشقة ليها من هاد الزوج المتقلب!قالت لنوميديا تجمع طبلة وهي جلسات مدوزة الخط لختها كالعادة وككل ليلة قبل ماتنعس…
نوميديا:كيبقى محمد؟
سهام:شوية دبا حسن من الاول
نوميديا:اي خاتشي؟ موخذدجا “او خالتي كيدايرة
سهام:كيغاتكون؛!وولدها مريض
نوميديا:,الله يفرجها عليها
سهام:امين..عز الدين دخل ينعس؟
نوميديا:اه ناض قبيلة فاش دخلتي للبيت
سهام:اوا واخا..غاندخل ننعس
نوميديا:تصبحي على خير
سهام:بسلامة..
“دازت عليها ثلاثة ايام!..سهام ومحمد مكايهضروش منفخة عليه وهو كثر منها منفخ من كاع الجهات!..كايبانو عاديين قدام ولادهم لكن القضية مفروشة..اليوم طلعو نوميديا وعز الدين للمدينة يشريو شي حوايج..جالسة سهام كاتنقي الفول..وخرج محمد من بيته بعدما صلا العصر..وجلس قدامها”
محمد:غاديري الفول ايرعشى؟ “للعشا؟”
سهام:امم
محمد:عز الدين باقي ماجا
سهام:اوسينغ’ماعرفت”
محمد:اففف مالك ياهاد المرا كاتجبديني كانهضر معاك جاوبني..
سهام:ماتجبدني مانجبدك عطيني تيساع!
محمد:بحال الى رفعتي صوتك لالا؟! راه مكاتهضريش مع ولد صغير..
سهام:”حطات الموس” لي درناها معاك وحلة..
محمد:مالك قالبة وجهك ياك لباس..
سهام:على فعايلك زينين!..
محمد:”بدل الموضوع” ديك نهار هدر معايا واحد سيد من مراكش
سهام:تنسيني فتنفاخك؟
محمد:ياودي جاي اذسيورغ “اودي خليني نهضر”
سهام:اوا شكون هادا
محمد:عمرني شفتو قالك حقى ما حقى بغى يجي ويجيب عائلته..
سهام:”قوصات حواجبها” علاش؟
محمد:”ببرود” قالك على قبل نوميديا..
سهام:”بصدمة” اييه شنو قلتي..
محمد: شغانقول ليه سيد لصق ..
سهام:وافقتي؟!.
محمد:ماعرفتش كيغاندير نفك هاد جرة رحبت بيه حشمني مالقيت مانقول
سهام:”تتأكد”مراكشي مراكشي؟!
محمد: تربيتهم ما هي تربيتنا كل واحد كيف تربى ما قلنا عيب ولايني انا يدجي تاريفيث اتاوي اريفي “بنتي ريفية تدي ريفي”
سهام:هاد الهضرة كانت كاتقاال ايام زمان! كل واحد كايدي لي قسم ليه الله..
محمد: انا راجل قديم ندير مدارو جدودي وصافي سالينا..
سهام:حتى نشوفو ناس ونحكمو..!
محمد:ماتعاوديش ليا زابورك حترامت سيد وصافي ! يدجي اوذشطشي “بنتي مشايطاش” دبا نشوف كيفاش نرفض بلا مانحرج تا واحد..بنتي عارف مصلاحتها مزيااان انا دوك ناس مكانعرفهومش مانعطي بنتي ليهم..
سهام:اللي كتب الله هو لي غايكون..
محمد:ونعم بالله..!
من أيام زمان مكانش اكتضاض بين ناس ريف والمناطق الأخرى..الشيء لي خلاهم يشوفو فبعضياتهم بطريقة أخرى كل شخص كيفاش تربى وكل شخص ومبادئه..ناس توب وحجر هادشي عارفينو ولكن عندهم تخوف من صغرهم ترباو على أن الناس ديال برا راه مامزيانينش وتعاهدو ريفي يدي ريفية والعكس كذلك ولكن هادشي على حسب المناطق وعلى حسب الوعي كاين لي عندو عادي كاين لي لا..عدم احتكاكهم مع ناس من مختلف المدن خلاوهم ياخدو نظرة خاطئة وعامة عليهم… هادشي كامل يبقى غير كلام اما لي مكتبو الله حتى واحد مكايتحكم بيه…
سهام:”كاتنادي على بنتها بعدما خرج الاب” نوميديااا اراحد “اجي”
نوميديا:”خرجات من بيتها تتقاد ببجامتها” نعام ايما…
سهام:”شيرات حداها” اجي جلسي هنا بغيت ندوي معاك..
نوميديا؛واخا..
سهام:”مركزة مع سؤالها” ديك نهار فالعرس لي حضرتي ليه مع سعاد هضر معاك شي واحد؟!.
نوميديا:”عقدات حواجبها تتفكر” لا..
سهام:كاع كااع مالقيتيش شي واحد كايشوف فيك ولا باغي يهضر معاك وكدا…
نوميديا:لا والو ماللي دخلت وانا جالسة مع خالتي ماشفت حتى واحد..علاش ياك لباس..
سهام:امم والو بااس..
نوميديا:واش قاليك شي واحد شي حاجة..
سهام:لا لا..”بعد صمت” امينيغ اجو واوار اذيقيم جارانغ “نقوليك واحد الهضرة تبقى بيناتنا”
نوميديا: واخا تسريغام ” كانسمعك”
سهام:”تتكلم بهمس” صونا واحد السيد لباك من مراكش قاليه حكا ما حكا بغيت نخطب بنتك لولدي
نوميديا:”دقات قلبها تسارعو” انا…
سهام:”بتأكيد” اييه نتي
نومــيديـا:”كاتعلثم فالهضرة” ششنو قاليه پاپا
سهام:بان ليا ماعجبوش الحال يخطبك مراكشي قال من سهمك ريفي بحالك تتفاهمو..
نوميديا:صافي تسد الموضوع..
سهام:لا هادشي لي هازة ليه الهم راه جايين باش يتفاهمو..
نوميديا:كون غير يجلسو ماللي بابا مابغاش حتى انا مابغيتش..
سهام:يكون خيرر..
نوميديا:هضرتي مع خالتي سعاد..
سهام:لا باقي..مابغيت عيب معاها ماعرفت شنو غايوقع هنا القدام ..
نوميديا:من عائلتها..
سهام:باينة..
كأي بنت فاش كايجيها خطيب كاتتوتر وتتخلبط دقات قلبها كايتسارعو..حاسة بالقشعريرة سايرة فجسمها احساس فشكل..نظرا لانها فتاة خجولة وكتومة هادشي زاد حدة الاعراض..بصباع كايرجفو واقفة مع مها فالكوزينة تتساعدها كاتعجن المسمن بكثرة باش يديروه فالثلاجة والام ديالها كاتقاد الحلوة رغم كلشي هم ناس الكرم و الجود ضيافهم كايهزوهم فوق راسهم..
نوميديا:غاديري الغريبة..
سهام:امم وكانفكر فالانواع لي غانزيد..
نوميديا:ديري قلوزة وكعب غزال..
سهام:كعب الغزال على حساب حيت شي مرات مكايزقدش ليا…
نوميديا: صراحة ايما خاص تقوليها لخالتي سعاد باش مايحسابش ليها بللي نكرنا منها..
سهام:ايه داكشي نسالي من هنا ونعلمها بللي سبت جايين واخا غاتكون فخبارها..
نوميديا:واخا هكاك تجي من عندك حسن..
سهام:امم داكشي..
نوميديا:فين مشى عز الدين..
سهام: واقيلا طلع المدينة يشري شي حوايج..وغدا خاص نهرسو اللوز لي غانحطو الضياف..
نوميديا:كاين فالگاراج؟!.
سهام:اه كاين تما يجي عز الدين نصيفطو يجيبو..
قادات شالها.. وهبطات فدروج عند سعاد..تعلمها بناس لي جايين واخا متأكدة انها عارفة بالموضوع من الاول..لقاتها جالسة وسط دارها كاتاكل زريعة وتتفرج جنبها بنتها مكونيكطية..
سهام:السلام..
سعاد:”هزات راسها فيها”وعليكم السلام..زيدي دخلي..
سهام:إسراء كيدايرا أبنتي شحال ماشفتك..
إسراء:الحمد الله انَانَّا “عمتي”
سعاد:”مدات ليها زريعة”تاكلي؟..
سهام:لا والو كاتضرني..
سعاد:اوا واخا..واحد عز الدين كاع مكايهبط عندي..
سهام:اوا والله مانكذب عليك نهار كامل كايدوزو فالبيت..ياله كايتجمع معانا على الطبلة..
سعاد:خليه على خاطرو…
سهام:نهار السبت جايين شي ناس..
سعاد:شمن ناس..!
سهام:جايين على قبل نوميديا..
سعاد:”طيرات البلان ولكن نكرات” اوا مبروووك منين هما؟!.
سهام:”شافت فيها مطولة”مراكش..
سعاد:وايلي مراكش..منين تتعرفوهم؟!.
سهام:مكانعرفوهومش حنا!..من عائلتك..
سعاد:”عضات فمها”من عائلتي انا؟!.
سهام:ايه سيد لي تاصل سميتو عبد الوهاب شنو كايجيك؟!.
سعاد:راجل ختي..
سهام:راك عارفة لي كاين راه دواو معاك نتي الاولة ياك؟!.
سعاد:اوا شغانقول ليك اخيتي!..دوات معايا ختي ولايني مابغيت تتدخل..!
سهام:دوي عليا على دوك ناس؟!.
سعاد:مانشكرهم ليك!..لي نقول ليك دري ترانكيل وداخل سوق راسو وراجل! الله يعمرها دار هادا ما كان!..شنو قال سي محمد فهادشي؟
سهام:مقال والو حتى يجيو ونشوفو انا غير علمتك على بكري..
سعاد:اوا واخا شكرا..منها نيت نخمل شوية ختي راه ماتجي فنهار وتمشي طريق بعيدة..
سهام:واخا الله يعاونك..
سعاد:امين را ذشم..”حتر نتي”
سهام:”ناضت” دبا غانطلع نكمل شغالي.
سعاد:واخا سيري..
“كلام سعاد كان متناقض!..واخا هكاك نيتها طيبة مابغاتش تدخل راسها لايوقعو شي مشاكل وتولي هي فنص بغات تبقى فخير مع زوج جوايه!..واخا علاقتها مع ختها محدودة ولكن على الاقل عاديين مع بعضياتهم!..نفس الشيء سهام إنسانة قريبة ليها وعزيزة مابغاتش شي حاجة تزعزع علاقتهم الأخوية…!”
إسراء:”ستنات حتى طلعات سهام”اويلي اماما جالسة تنكري!البلان مفروش!كاع متتعرفي تخبي!..
سعاد:انا مابغيت صداع مع شي واحد لي فيا كافيني..ماشي غدا يقولو سعاد قالت سعاد دارت راني شادة تيقاري..
إسراء:عرفي تهضري باش ماتبانيش تتخرمزي فالهضري بتولي ضحكة..
سعاد:وا صافي حتى نتي سهام عارفاني كيدايرا..
إسراء:”بلا مبالات” لي بان ليك
“غير كملات هضرتها طلع ليها اشعار بتاسمات حتى برزو غمازاتها وسلتات لبستها قاادات وجهها مزيان وسرحات شعرها وصيفطات ميساج ثواني جاها اتصال وجاوبات فرحانة”
إسراء:آلو ! صافا ؟
…………
إسراء:بيخير بب! انا مقلقة منك
…………….
إسراء:”بهمس” لا باينة توحشتيني! حشومة عليك جيتي تالريف ومشيتي بلا ماتشوفني!
…………….
إسراء:نصبر معاك ماشي مشكيل! الصيف هادا ولا جاي مكايهمش مهم هو نتجمعو!
………….
إسراء:باي ماي لوف..
جا اليوم الموعود نهار غايجيو فيه من مراكش..دار الطويلي كاتشعل! بالنقاا ريحة الخزامة عاطية فكل مكان…دروج كايلمعو الأرضية كذلك الفوق كلشي متول كلشي مقاد بنسبة للاكل فينما كان شي خير محطوط فالكوزينة..الطناجر على البوطة..الريحة يا سلام..حلويات متنوعة فالطباسل لوز كركاع بيسطاج كاوكاو حاضر كالعادة فكل مناسبة خصوصا اللوز..العسل والزبدة كلشي كاين…
إسراء:”دخلات” نوميديا لبسات؟!.
سهام:ياله دخلات للبيت سيري عندها الى بغيتي..
إسراء:واخا..
سهام:سعاااد وا سعاااد…
سعاد:”جاوباتها من التحت”انعاام
سهام:شنو قالت ليك ختك قريب يوصلو؟!.
سعاد:واااه واحد عشرين دقيقة يكونو هنا.
سهام:واااخا انا غاندخل نبدل حوايجي ..
“…دقات إسراء باب البيت عاد دخلات والفرحة كاتشع من عيونها..لقاتها واقفة بحيرة جنب سريها لي محطوط عليه جوج جليليبات مختالفين ..تتوزع نوظر بينهم… “
إسراء:باقي مالبستي؟!..
نوميديا:لا..ماعرفتش شنو غالبس فيهم..ختاري معايا..
إسراء:امم بزوج زوينين ولكن ديك البيضة الذهبي حسن من لي فيها الحمر تجي معاك واااعرة…
نوميديا: صافي واخا غانلبسها ..
إسراء:ياله لبسي باش نقاد ليك..
نوميديا:واخا..
“هزات الجلابة واسعة شوية وفيها طرز بالذهبي.. وبدات تتلبس..فالعادة نهار يجيهم عريس كايلبسو البيض سواء كانت جلابة او قفيطين خفيف..لبساتو مع هي رقيقة وجات شوية واسعة مخبية مفاتنها..جات غزالة كاتبان محترمة وراقية فنفس الوقت جراتها إسراء المرايا..مابغاتش نوميديا تكثر ليها.. دارت ليها فوندوتان فلون بشرتها مكايبانش وقلم فعينيها وعكر خفيف فشفايفها ومشطاا ليها حواجبها..عاد هزات شال دارتو ليها وقاداتو مزيان..بعدات وملامح الرضى على وجهها وحطات ليها بالغينة لبساتها.. “
إسراء:واااو وااو وااو جيتي كاتهبلي والله..تبارك الله عليك ههه تتلمعي..
نوميديا:”بخجل” هه شكرا ربي يخليك..
إسراء:دبا نخليك نمشي نبدل بالزربة قريب يجيو..
نوميديا:واخا شكراا بزااف سيري..
إسراء:”رسلات ليها بوسة فالهوى وخرجات وهي تتلاقى مع سهام مبدلة” نانا ها نوميديا واحدة نهبط نبدل..
سهام:واخا سيري الله يرضي عليك..
“حلات الباب ودخلات لقاتها كيما خلاتها إسراء..جالسة على الكرسي تاتلعب بصباعها”
سهام: تبارك الله ماشاء الله كاتحمقي أبنتي..
نوميديا:ربي يخليك اماما.
سهام:”حطات يديها على راسها” نقرا عليك شوية دالقرآن يحميك من العين..
نوميديا:”غمضات عينيها وترخات”
سهام:بِسْمِ اللَّهِ الرَّحْمَنِ الرَّحِيمِ
قُلْ أَعُوذُ بِرَبِّ الْفَلَقِ (1) مِنْ شَرِّ مَا خَلَقَ (2) وَمِنْ شَرِّ غَاسِقٍ إِذَا وَقَبَ (3) وَمِنْ شَرِّ النَّفَّاثَاتِ فِي الْعُقَدِ (4) وَمِنْ شَرِّ حَاسِدٍ إِذَا حَسَدَ (5)..
“عاوداتها تلاتة دالمرات وسورة الناس نفس الشيء..حسات نوميديا برااحة غريبة..الضو سرا فذاتها راسها خفاف جاها النوم..عضلاتها ترخاو..ماسخاتش بيه..كما معروف عن القرآن يبعث الراحة فالأنفس..انك تكون ضايع وخايف ومتوتر حتى كاتسمع او كاتردد الآيات القرآنية هاد كاتنسى كلشي هادا ما وقع ليها…رتاحت وحيدات الهموم..بحال شي جيل تزال على كتفها.. “
سهام:صَـــــدق الله الــعــــظــيــم..
“وقفو زوج طوموبيلات قدام باب الدار عز الدين وباه واقفين فباب دار وراهم سهام وسعاد وإكرام..الطوموبيلة الأولى نزل منها رجل ستيني لحية خفيفة عامرة شيب على ذقنو نظراته حادة ووقفات معاه مرا فاواخر الخمسينيات بملامح مبشورة..اما السيارة الاخرى من نوع نيسان خرج منها شاب فاوائل الثلاثينيات لحية طويلة شوية وكحلة بحال سواد الليل..ملامح جامدين تقاسيم وجهه وسيمة لابس الكلاس ونزل خوه لي كبر منو فالعمر “
محمد :مرحبا بيكم..نهار كبير هادا آسي عبد الوهاب..
عبد الوهاب:”بنبرة حرشة وقاسحة” ترحب الجنة..صحيحة لباس كلشي مزيان
محمد:”سلم عليه بملامح جادة” نحمدو الله مرحبا بيكم زيدو تفضلو..
“سعاد ستاقبلات ختها وسلمات عليها بحرارة وكذلك سهام كانت مبتاسمة ودايرة معاها الصواب كاتسقسي على احوالها..غير براسهم رماو سلام على الرجال لي ورا ليهم محمد طريق وطلعو فدرووج وهما كايسقسيو على الاحوال
محمد:زيدو طلعو من هنا..
“طلعهم الفوق لبيت الضيااف وجلسو حداهم..كايجبدو مواضيع بمناسبة يتعرفو على بعضهم كثر…جو كان مشحون نوعا ما خصوصا ان محمد شخص حدودي لدرجة مكايرتاحش فالهضرة مع شخص اول مرة يعرفو ولكن عز الدين..ناقد الموقف وهو لي كايجبد مواضيع مختلفة…اما النساء حطوهم فوسط الدار لي كان كبيير هادشي اثار استعجابهم حيت العروسة خاص يشوفوها مجموعين..”
نجاة:”بابتسامة خاطبات سهام” نتي هي مها ياك..
سهام:”الدارجة صعيبة عليها ولكن كاتحاول تهضر بيها” اه اانا مها نوميديا..
نجاة:الله يبارك…تبارك الله راك خلفتي الزين الله يحفظها ليك..
سهام:ربي يخليك الحبيبة..
نجاة:ماقلتيش ليا مغاديش تجيبي نتعرف على البنت لي بغيتها لولدي..
سهام:واخا أختي غانجيبها
“دخلات للبيت دقائق وخرجو بزوج ونوميديا كاتكمش فيديها بتوتر حادرة راسها..وتتمشى بشوية جلساتها مها جنب لالة نجاة لي كاتسكانيها بعينيها..”
نجاة:”عمرات ليها العين” تبارك الله والصلاة عالنبي مشااء الله…
نوميديا:”رفعات راسها لقات مها تتشير ليها بعينيها باش تجاوبها نطقات بعربية مهرسة حتى هي” ربي يخليك أخالتي..
نجاة:”حطات ليها يديها على راسها” لباس عليك..
نوميديا:الحمد الله أخالتي ونتي بخير..
نجاة:”حديثهم ولا كايتسمع غير بيناتهم”ماللي شفتك وليت بيخير يا الحبيبة..قولي ليا شحال فعمرك الكبيدة نتعرف عليك كثر..
نوميديا:24
نجاة:بطولة العمر ان شاء الله..
نوميديا:”يديها عراقو بالتوتر” امين ربي يخليك..
نجاة:شحال وصلتي فالقراية..
نوميديا:تخرجت..
نجاة:,مخداماش؟
نوميديا:لا جالسة غير فدار..
نجاة:تبارك الرحمان بنيتة ديال الزمان….
“ناضو العيالات الكوزينة مخليينها مع نجاة كاتسقسيها بفضول..اما فالبيت عند الرجال جالسين كايتبادلو اطراف الحديث..مع الجو الميمز والكوميدي لي ضايفينو اصدقاء العريس وصلات لعشرة ونص كان تحط العشى وتجمع”
عبد الوهاب:”تقاد فالجلسة وحنحن بجدية” اوا اسيادنا بعدما تشاركنا الملح والطعام تعرفنا على بعضياتنا..وجينا عندكم طالبين راغبين بنتكم لولدنا على سنة الله ورسوله..سي محمد بنتك نديروها فعينينا مانصرفو فيها عيب ماناديوها فعينينا تتحط..كانتمناو تقبل طلبنا وشرف كبير لينا تكون بيناتنا نسوبية..
محمد:”سكت مددة” كيفما قلتي اسي عبد الوهاب تشاركنا ملح وطعام..جيتو عندنا على الراس والعين والى ماهزكم هاد الكتف “طبطب على كتفو” يهزكم هادا..وشرف ليا تكون بيننا نسوبية ولكن ماكتابش..حيت انا بنتي باقة ماسخيتش بييها ومناويش نزوجها دبااا….
عبد الوهاب:سي محمد الله يهديك…كانضن را دمك خفيف وغير ضاحك معانا!! ماشي معقول نضربو طريق من مراكش وفاللخر تردنا اولا!!
محمد:”ببرود كايشرح ليه” كانضن من قبل قلت مموافقش ولكن مللي اصريتي قلت مرحبا بيك! ولكن فقط ضياف ماشي انا لي نرد ضيف..
عبد الوهاب:”ماعجبوش الحال” سي محمد واش واعي بهادشي لي كاتقول بحالا كاتلعب علينا! لا؟
محمد:”هز يديه ” شوفي الشريف حل ودنيك وسمعني مزيان تصرفنا بصواب وضايفناكم مكانتش فنيتي نهائيا نقبل!!لحد الان مساخيش ببنتي
عز الدين:”قرر يتدخل ” الواليد!..من الاحسن نتعارفو كثر ونتعمقو فالموضوع كثر ونشوفو واش نوافقو ولالا
معتصم: “تحنحن “اولا! خاص تشاورو البنت! هاد الجو ماشي ديال ضياف وصافي! جينا نخطبو ونيتنا باينة ستقبلتونا ! ماضنيتش نهائيا ماتجيبو البنت نشوفوها لا تشوفو قابلة ولالا !
محمد:”تعصب و خرج فيه عينيه” مغاديش توريني شنو ندير! انا باها ادرا بمصلاحتها
معتصم:جيبو البنت لهنا سولوها شاوروها كاتقررو ورا ظهرها؟!.فين هو اللوجيك فهادشي..
محمد:اسيدي ماسوقكش انا القرار ديالي هو هادا مغايتبدلش…البنت بنتي والشوار ليا!
معتصم:”غمهض عينيه كابت عصبيته” الضد والعناد ماعندو باش يفيد سي محمد نتا انسان كبير فالعمر وعندك تجارب كثيرة فالحياة وعارف كثر مني وعاارف الصح من الغلط..بغيت سبب مقنع علاش رافض هاد زواج! بلا ماتعرف الجوهر ديالنا ولا تسولنا. لا تسول بنتك هادا ماشي عدل رانا فالعشرينيات خلينا من أيام زمان!.
محمد:”غمض عينيه” بنتي مغانعطيهاش لمن كان…وطيرو تنزلو ريفي لي غايديها!والسلام عليكم!
عبد الوهاب: اش غادي نقول ليك! الله يسمح ليك اسي محمد؛
محمد:حاشة نقص منكم! ولكن ليا الحق نقرر فمستقبل بنتي انا عارف شنو لي مناسب ليها!الزواج قسمة ونصيب!ولي كتاب ليك هو لي غاتديه؛بنتي ممكتاباش ليك اولد الناس خلينا مانجبدو عيب اولاد الخير!
عبد الوهاب: ماقلتي عيب؛ اسي محمد! الله يعاون رجلنا ماتعاود تصطم هنا..
معتصم:”بتاسم ليه” ماحنا على فالك الواليد! خليت ليكم راحة!
خرج عبد الوهاب كايفور بالأعصاب تابعو معتصم مبرد دازو من صالون وهو يوقف عبد الوهاب كايرسل ليهم نظرات قاسية
نجاة:.ياك لباس..! صافي قريتو الفاتحة
عبد الوهاب:”بعصبية” يااله بحالنا
نجاة: كيفاش ياله بحالنا قولو ليا بعدا شنو وقع
محمد:”خرج حتى هو”شوفي الشريفة كل واحد كايدي لي مكتاب لييه..ولدك نصيبه فقنت اخر
نجاة:لحد الان باقي مافهمت
محمد:”حك راسو” راجلك يشرح ليك.
سهام:”حطات يديها على فمها فهمات البلان”
نجاة:”شافت فيهم” مغانمشي حتى تفهموني
معتصم:”شاف فيهم ببرود” زيدو بحالكم..
نجاة:لااا خلينييي نعرف شنو واقع
عبد الوهاب:ضار خارج” حنا غاديين بحالنا الى بغيتي تبقاي نتي هنا بقاي..
عاصم:”همس ليها” الواليدة ياله لطموبيل ونشرح ليك..
“بزز جرها سي عبد الوهاب كان ركب فطوموبيلته”
معتصم:”وقف على سهام باس راسها” نسيبتي أمسية سعييدة نتلاقاو قريييب….
“خرج بحاله تابعهم بعدما خرجو كااملين”
سهام:لا حول ولا قوه الا بالله…اش هادشي امحمد؟!! هادشي ماشي معقول..
محمد:الى بقاو فيك تبعيهم
سعاد: سي محمد هادشي لي درتي عيب! فحق ختي وحقي كون درتي غير بوجهي! كنت كانحتارمك ولكن باش تتصرف بهاد طريقة راك كاع ماحسبتيني منكم ولا درتي بوجهي.
محمد:”بصراامة هز صبعو فوجهها”سعااد غاتسمحي ليا غانقاطعك وتقدر تقسحك هضرتي..نتي بعيدة على هادشي جاو عندي مجاوش عندك الذنب ديالي انا لي من الاول خليتها تمشي معاك..نتي عارفة مزيان بللي بنتي غاتدي راجل من المحيط لي كبرات فيه..من الاحسن ماتدخليش.. فهادشي حيت غانوصلو لشي مواصل ماعندهاش نهاية..!
عز الدين: “مسح على راسو”الواليد! علاش من الاول خليتيهم يجيو مللي ماقبلتيش حطيتي راسك فواحد الموقف شوية ناقص! من الاول قول لادد
محمد:مادرتش سيف على رقبتهم قلت ليهم لا فالاول ولكن مكايفهموش! جاو خداو جوابهم بيديهم
عز الدين:على الاقل كان خاصك تعطيهم فرصة وتشاور البنت..نشوفو واش موافقة ولالا
محمد:”نظرته تبدلات” انا باها!! فهمتي عارف لي يصلاح ليها..
سهام: ولكن هي لي غاتزوج! هي خاصها تقرر!
محمد:”شاف فيهم وهو يشعل بغضب” تباارك الله وقاديتي ليها الحالة تيقتو رااسكم جايينكم الخطاب معاامن تشااورتي وخرجتيها؟!! كلشي من راسك لي دخلتي البنت هاد الافكار!..بنتي كاااتسمع لياااا اناااا فهمتي حياتي كاملة كاانخدم عليييها وتجيو دبا تقولو دير لي بغات!!! هادشي عمرروو غايكونن اي واحد كانصرف عليه أنا لي مسؤول عليه..
عز الدين:ماتغوتش على الواليدة! مكانش عليك تتصرف مع ناس هااكا باش يضربو ديك طريق كاملة معدبين غايكونو خبرو عائلتهم بللي جايين يخطبو!
محمد:”هز يديه” هماا لي مااابغااو يفهموو بللي بنتي مغانعطيهااش ليهم…مابغيتش نخسر معاك.. مكتابو فقنت اخر ماشي هنا الله يسهل عليه.
عز الدين:”تعصب” اها وهي؟ علاش ماخديتيش رأيها وسولتيها؟؟ فالاخير كاتبقى بنادم ماشي مونيكة تمشيوها على كانتكم!
محمد: ” ببرود” حسن شوية كلامك راك داوي مع باك ماشي صاحبك..بيني وبنتي مانحقكش تتدخل
عز الدين:الغلط لي درتيه معايا شحاال هاادي باغي تعااودو دبااا هييي عمرهااا 24 وداخلة ف 25 بعقلهااا وراااشدة ومن حقهااا تقرر تشوف لي مناسب ليها ولي لا .
محمد:اوودششيي ذشغررر اييينك”ماشي شغلك”
عز الدين:”توجه لنوميديا لي عينيها مدمعين” نوووضيي هضريييي قوللييي رااايك راااك بنااادم ماتخليهمش يقررو فحياتك…
نوميديا:”دموعها هبطو فصمت”
عز الدين:”قرب يقرع شعرو بالفقصة” اسيييديي ربيييي بااش بليتيني نتييي لييي من حقك تقرري لي بغيتي مااشي هماااا فهميييها ودخلييها لداااك نص الدماغ لي عندك قرربببت نقررع رااسي.. معاكم
سهام:”حيدات يديه من على كتفها” صاافي بعدووو منهاااا….عز الدين سكتت وسمع لباك!
عز الدين:”صدرو طالع نازل” لإمتى! غانبقاو ساكتين وحادرين الراس لامتى..الحق كايتقال فالوجه باش ناس يضربو طريق طويلة! وفهاد السخانة جايين محملين! نتوما مقادين وموجدين انا ماعرفتش اش هاد تناقض فاللخر بلا ما تشاور مع البنت ولا تعطي فرصة تتعرف على سيد يقددر يكون مناسب ليهااا رفضتييي!؛ فين هوو المنطق اش هاااد ظلم!
محمد:”هز صبعو فوجه عز الدين” ولدتك وكبرتتك فاللخر تبغيي تتفرررعنن غااتسكت ولااا….
عز الدين؛”توقف للحظة” ولا شنو!
محمد؛ خرررج لياااا من داري ماعندي ماندير بواحد كايهز صوتو عليااا! خررج ومااتعاوودش تدخل واخا تسمع بللي باك مات!
كلشي شهقوو وهو جمد بلاصته..الزمن كايعيد نفسه للمرة الثانية نفس العباارة سمعها من فمه..اول مرة غبر بسبابها 3 سنوات وهااد المرا..عز الدين انسان حقاني ماعزيزش عليه الظلم حياته كااملة كانت تحت الابوين ديالو كانو محكمين فيه بحال نوميديا تماما حتى ختار يتفك من قبظتهم..لحد الان هو مصدوم بقى حال فمو زير على عينيه وشاف فباه بانكسار..
عز الدين:عمرك غادي تتبدل آ الواليد..هه ها هو خاارج…
سهام:”قربات عندو شدات دراعو” الا الا عفااااك امي مااتسمعش ليه عفااك بقى ه هو غغير معصبب مقاالهاش من قلبو
عز الدين:”بتاسم ليها وحيد يديها وباسها تهلاي فراسك الواليدة..
سهام:”دموعها هبطو شافت فمحمد بترجي”
محمد:انااا…
عز الدين:بسلاامةة…تهلاو فراسكم
“قلب الدورة وخرج..خلا باه مصدوم حتى هو
ماقصدش يخرج هادشي من فمه وعمرو قصد طالما عصبيته كاتخرج علييه..عطاهم بالظهر ودخل لبيتو زادح البيت”
سعاد:”حطات يديها على فمها” اويلي جررااا عليه…
إسراء:”توجهات لسهام لي شادة وجهها بين يديها كاتشهق” عفااك اعمتي مديريش هاد الحالة فراسك دبا يرجع..
سعاد:مشات سعاد عنقتها ” صافي أختي صافي
ناضت نوميديا عينيها مكايرمشوش حابسين دمعة دخلات لبيتها بلا مايشوفوها سدات الباب وهي تجلس موراه حاطة يديها على فمها حابسة شهقاتها..زيرات على قلبها بيديها وهي كاتردد ” انا السبب انا ” احساس قوي معتاصر قلبها للمرة الألف لي كاتمنى الله ياخد روحها..ماشي غير ذهاب عز الدين بل حتى كلامو زيرات على ودنيها وهي كاتسمع عبارتو كاتردد داخلها… اه هي عارفة باللي فهاد المواضيع القرار ليها ولكن…شكون خلاها وأصلا فوقاش دارت لي بغات دائما باها لي كايقرر فكلشي..كاتحس براسها مخنوقة طول سنوات ولكن ساكتة وهادئة كاتبين عادية ولكن فداخلها جمرة عمرها تطفى..واحد الإنسانة لي كاتسبق خاطر الغير على خاطرها مكاتعرفش تقول لا…تفكرات شحال من مرة قرروا فبلاصتها وخلاوها تختار شعبة ماشي هي لي بغاتها..
……فلااش بااك…….
نوميديا:”بفرحة” ماما خاص ندخل التوجيه لي غانتبع فالثانوية ..
سهام:انا معارفااش فهادشي سيري عند بااك يقول ليك اش غاتبعي..
نوميديا:بغيت ندير ادبي هو لي كانرتاح فيه..
سهام:قوليها لبااك وشوفي شغايقول ليك…
“جاء الليل..وياها دخل لدار وجلس يتعشى ومشات جلسات حداه دواات ليه على توجيه وشنو بغات تتبع وكلها حماس كاتموت على شي حاجة سميتها المطالعة”
محمد: لا نتي غديري علوم فزيائية حسن ليك…
نوميديا:ولكن ابابا اناا…
محمد:صافي قررت.,..سدي الموضوع..
نوميديا:”حدرات راسها” واخا بابا لي بغيتي ..
……باااك…..
هادشي تكرر مرارا وتكرارا لدرجة غير تخرجات قاليها خاصها تجلس فدار ماعندها مادير بالخدمة حياتها كااملةة همااا لي كاياخدو قرارات بلا مايتشاورو معاها..هادشي خلاها فاش سمعات بللي غايجيها عرييس فرحااات اه فرحااات حيت غاتتهناااا…وماايبقااوش كل مرا كايتحكمو فيهااا على حساب كاانتهممم ولكن للمرة الاللف خااب ضنهااا…وقررو فبلااصتها وحطمووو قلبها رهييف…
نوميديا:”دموع ماحبسووش” ياااربيييب خووودنييي باااش نتهنااا يا ربي…
العنااد والرااس القااسح والى شد فشي حاجة مكايطلقش منهااا..خصوصا الى تعاندتي معاه فيييهاا كايبقى لااصق..المعنى الحقيقي ديال المغنان..وبارد القلب…الابتسامة المستفزة ساكنة فمو وزيد عليها مكايعرفش معنى الاحترام…شد دار فالحسيمة قاليهم ديال صاحبو..مامفاكش مناوي يمشي تايدير لي فراسو..
نجاة:”واقفة عند راسه حلقها بح بالغوات” واااسيدي واابيت نمشي لدارري مانزيد دقيقة هنا…
معتصم:”خلا ليها بلاصة حداه” جلسي جلسي هناا امي الحبيبة..
نجاة:ديني بحااالي..
معتصم:واخا غير جلسي نقول ليك..
نجاة:”جلسات بنفرزة” هاااني جلست…
معتصم:دبا هدني لينا راسك وقولي ليا علاش جيتي معايا..
نجاة:”قلبات عينيها” نخطب لييك
معتصم:براافو حنا خطبنا ولا باقييي..
نجاة:”خنزرات فيه” اييه مشييناا ورجعوونا ماعرفت شكوون يكونو فملك الله..
معتصم:هانتي دويتي اذن حنا باقي ماخطبنا..نهار نخطب نمشيو بحالنا باش نوجدو الخطابة الكبيرة..
نجاة:”شدات راسها” وااش بيتي تفقصني هيي دويي ياااك ردوونااا وموافقووش..
معتصم: ولكن غايوافقو..
نجاة؛ياااربي تصبرني واش نتتااا هبييل لا…هي قوليييا…رااااه مانرجعش لداارهم وخا يحطو سيف على رقبتي…
معتصم:لا غاتمشي حيط غايحطو زوج سيوف..الله يهديك سيري رتاحي لي مع راسك العشية نساريك فالحسيمة راها زوينة بحالك…
نجاة:”الفوار خرج من ودنيها بالاعصااب” ياااسيدي ربييي…حياااتي كااملة وانا كاانقري البرااهش ومدااروش ليا مدار ولدي..
معتصم:ااه نسيت ماسولتك..علاش ماهزيتيش نمرة مرات ولدك؟
نجاة:اشمننن مرااا شمننن مرااا واااش بااغي تقتلنييي لا هي دووييي…هاااديك مغاتديهاااش نشوف ليك لالة البنااات..
معتصم:اصلا هي لالاهم وهي مرات ولدك كل ماتقبلتيها غايكون حسن..
نجاة:اربييي علاامن طاااح حبببك مايغركش الزيين اولدييي بقات فالقلب..
معتصم:كوني هانية زوينة قلبا وقالبا..
نجاة:”حطات يديها على جبهتها” لا دبا تأكدت..راسي ماربيت حتى حااجة…اش هااد قلة الأدب رااني مك مك الدحش..
معتصم:؛”بنفس الابتسامة المستفزة”ماشي مشكيل حتى نولدو انا ونوميديا وربي ولادنا ان شاء الله..
نجاة:”بشك” اجي اجي يااكماا سحراات لييك هاادي بااينة….باقي كانسول داارتها داارتها اللفعة…
معتصم:اه سحرات ليا..بعويناتها الكوحل..
نجاة:”ميقات فيه مفقوصة” تايعطيها ليك باها
وقفات سيارة قدام دار سي محمد..خرج منها رجل خمسيني على وجهه الهبة والوقار كايحك لحيته الكثيفة..دخل الداخل باب الدار كانت محلولة..طلع فدروج ديريكت ودق جوج دقات..
سهام:”عند بالها سعاد”اذفذ “دخل”
ناضت كاتقاد شالها وهو يتحل الباب شافيها وبتاسم..لمعو عينيها وقالت..
سهام: خويا جيتي..
أحمد:السلام عليكم..
سهام:”سلمات عليه”لباس عليك اخويا..
أحمد:”تحنحن” نحمدو الله..محمد مكاينش
سهام:مشى للخدمة دبا يجي..
أحمد:”حرك راسو بثقالة” مزيان..
سهام:”حشمانة منو وفرحانة بحضورو” زيد اوما ماتبقاش واقف..
أحمد:”جلس فالصالون” مايذدجا نوميديا..”فين هي نوميديا”
سهام: فبيتها ناعسة..
أحمد:نعاس العصر ممزيانش.
سهام:دبا وتفيق..فين غبورك اخويا شحال ماجيتي..
أحمد؛اوا غير مع الاشغال
سهام:فاطمة لباس عليها علاش مجاتش معاك؟؟
أحمد:مشات عند مها..
سهام:مزيان الله ييسر..
أحمد:”شافيها” اوا سمعت شي خبيرات مالو راجلك؟جاتو ديك الحالة تاني اولا؟
سهام:اوا شغنقوليك اخويا..راك عارف طبعو..
أحمد:كايستناه حديث طويل معايا..
سهام:على الله ينقص شوية ويرجع عز الدين..
أحمد:ان شاء الله..
سهام:نمشي نفيق نوميديا..
أحمد:”حرك ليها راسو”
أ”حمد هو الاخ الاكبر ديال سهام بيناتهم سنين طويلة وهو لي رباها تقريبا حيت الاب ديالهم مات فاش كانت صغيرة..واحد الانسان لي كايحتارمو محمد بزاف وكايسمع ليه..بحكم كايعرفو من صغرو وعندو هبة ووقار اي واحد يحتارمو..عندو سهام عزيزة بزاف واكيد حتى ولادها..فاش كان الاب ديال نوميديا باغي يجلسها من الباك حيت الجامعة بعيدة عليهم هو لي دخل وقنعو.. واليوم جاي خصيصا باش يهضر مع محمد بعدما كلمو عز الدين بخصوص المشاكل لي وقعو مؤخرا..وخبرو ان العريس لي جاي طالب يديها يستاهل فرصة ويتعرفو عليه كثر..مترددش ولبى النداء وجا من من وجدة لي مستقر فيها حتى الحسيمة”
نوميديا:”خرجات من بيتها”سلام..
أحمد:”بتاسم ليها” وعليكم السلام..ا
نوميديا:”باست ليه يدو” مرحبا بيك اخاري “خالي”
أحمد:موخذݣيه مليح “كيدايرا لباس”
نوميديا:الحمد الله ايشك “ونتا”
أحمد:”ربت على كتافها” الحمد الله الحمد الله ايدجي.. “وجه نظرو لسهام” شي نركاس وامان مارا ذخسذ “شي كاس دالما الى بغيتي”
سهام:واخا ايوما..
ناضت الكوزينة..تجيب ليه الما فنفس الوقت دارت الما يطيب باش تعمر أتاي..
متكي على السداري كايطقطق فصباعو..الف فكرة وفكرة كادور ليه فراسو..مسح على وجهه تالف وحيران..ايام دازت والاتصال منقطع بينو وبين مو..عينيه كاسيهم الحزن..زفر بحدة التفكير غايحمقو..هز تيليفونه وداز للانسطا ديريكت قلب عليها لقاها حالة نيت وصيفط ليها ميساج..
عز الدين:عندك نمرة ولد خالتك؟
إسراء:”بعد دقائق” معتصم؟
عز الدين:وي..
إسراء:وي عندي..
عز الدين:صيفطيها..
إسراء: اطط..
عز الدين:”بقى كايستنى حتى صايفطاتها ليه بلا مايشكرها قيدها ديريكت فتيليفونه ودوز الخط المرة الأولى لا جواب حتى للمرة تانية عاد جاوب”
معتصم:”بصوت نعسان” الو..
عز الدين:احم سي معتصم صافا عليك..
معتصم:صافا الحمد الله شكون معايا بعدا..
عز الدين:انا عز الدين اححم الاخ دنوميديا..
معتصم:”سمع سميتها توكض” اه عز لباس عليك..
عز الدين:بيخير..راك فالحسيمة ولا هبطتي لمراكش..
معتصم:نو باقي هنا..
عز الدين:امم مزيان..اش بان ليك فشي كافي..
معتصم:واخا علاش لا..
عز الدين:يحفظك اخو هاني غانصيفط ليك لوكاليزاسيون..
معتصم؛داكوغ…
ناض كايحك وجهه..متأمل يسمع شي حاجة تفرحوا..دخل للحمام غسل وجهه وخرج بدل حوايجو وهز سوارت طموبيلته وخرج لقى مو جالسة فصالون فيديها كتاب..
نجاة:”حيدات نظاراتها” فين غادي..
معتصم:”حك لحيته” غير هنا..
نجاة:اجي بعدا بغيت ندوي معاك.
معتصم:”كايلبس صباطو ممسوقش” تانجي ونهضرو..
نجاة:”عصبها”لااااا اجييي نهضرر معااك الول..
معتصم:ياله بسلامة..
حل الباب ودردب مع دروج مخليها كاتعيط ليه مفقوصة..اما هو عندو هدف واحد باغي يحققو الحاجة كايشد بيها بسنانه..شخص عنيد والآنا هي لي كايعرف…كايسبق راسو عاد يشوف الاخرين مكايهموهش العواقب..
ربع ساعة وقف حدا الكافي..نزل وسد طوموبيلته..حك لحيته كايوزع نظراته على المكان عاد دخل الكافي كايمسع لهجة مكايفهم منها الا القليل بحكم خدمتو فواحد الوقت كانت فجوايه الحسيمة..وتعلم منها شوية ولكن داكشي قليل كايفهم ولكن مايقدرش يرد بيها..لقاه جالس عاطيه بالظهر كايخمم..جبد الكرسي لي قدامو ومد ليه يده سلم عليه عاد جلس..
معتصم:كيداير بيخير الأمور هانية…
عز الدين:كانحمدو الله!
معتصم:” طلب قهوة من عند كارسون” سي عز الدين.. الواضح انك طلبتيني فموضوع مهم..!
عز الدين:نوعا ما اه..
معتصم:”ربع يديه” اما هو..
عز الدين:”تنهد” اولا كانعتاذر منك بلاصة الواليد من التصرف لي صدر منو..
معتصم:”بتاسم بتلاعب”هانية..هادشي غير حيت خايف على بنتو من حقو حتى انا زدت فيه شوية..
عز الدين:”بامتنان كبر فعينيه” الله يحفظك اخاي شكرا حيت تفهمتيه..
معتصم:لهيا اودي…
عز الدين:”تنفس بعمق” هادشي علاش طلبتك بظبط! نسمع ليك ونشوفو شنو لي خاص يدار..و
معتصم:”حط يدو على صدرو” ..عز دين ماعندي مانخبي عليك ختك باغيها! شفت فيها بنت الناس وديال الحلال باغي نصونها وتصونني..نيتي نهائيا مكاينش فيها الخبث تانا عندي ختي! لي باغيه ليها نبغيه لبنات الناس.. زباغي نكمل ديني مع ختك!
عز الدين:هاادشي لي بين نفسك واخلاقك! زواج سنة الحياة! والاخت ديالي شحال ما بقات غاتتزوج المهم هو يكون الشخص يستاهلها.
معتصم:”حرك راسو” عارف لي كاين كيما قلت ليك كون هاني من هاد الناحية.. ولكن الواليد..!
عز الدين: “شابك يديه بجدية” شوف امعتصم..الواليد ما رفضش على قبل الحسب او النسب ولا الفلوس..هادشي مكايهموش نهائياا..ولكن نقدرو نقولو الواليد من ناس لي ترباو على التفكير لي كان شحال هادي عندو ريفية ديال الريفي والعكس كذلك!
معتصم:”حك لحيته”فالاخير كانبقاو كلنا مغاربة وعرقنا واحد! فاهم الاب ديالك..ومستوعب التفكير ديالو والخوف ديالو على بنتو..ولكن باغي فرصة لي نبين فيها حسن نيتي..
عز الدين”بهدوء” من عندي مرحبا بيك والواليد انا عارف لي يقدر يقنعو المهم عندي هي تبقى عند كلامك وختي ماتحزنهاش ولا تبكيها هي خط حمر ولا ووجهي لاخر يبان.
معتصم:كون هاني! الراجل هو لي يبقى عند كلامو..جهدي غانديرو والكمال على الله
عز الدين:هادا المضمون فيك! الواليد خليه عليا! عارف لي يلينو..نبقاو على الاتصال
معتصم:اكيد.. “بتردد” نوميديا غاتوافق؟
عز الدين:”بهدوء” مغاديش نكذب عليك معارفش فالاخير القرار كايرجع ليها تا واحد مغايظغط عليها.
معتصم:كنتمنى
عز الدين:كون هاني من هاد الناحية..
مقابل مع البحر الشمس غربات والسماء ضوات بالنجوم..نسيم خفيف كايدور كايبعث طمئنينة فالانفس الريح ضارب فيه وهو ساهي كاين لي باقي كايعوم هاللي مخيم..جبد تيليفونو ما إن سمع رنة منه..شاف اسم خاله بتاسم بأمل وردد..
عز الدين:الله يسمعنا خبار الخير..الو..
أحمد: السبع..
عز الدين:”بتاسم”الخال..
أحمد:الامور هانية
عز الدين؛”دوز يدو على شعرو” الحمد الله ونتا!
أحمد:كلشي هو هاداك الفضل لله
عز الدين:اوا شنو درتي مع الواليد
أحمد:والو يا ولدي باك راسو قاسح..
عز الدين: اودي راه قلتها ليك مكاين لي يقنعو..غايحاشمنا مع سيد وصاف
أحمد: نحاولو مرة خرا بإذن الله حتى يوافق!
عز الدين:يا ودي الهضرة هضرتي معاه اش باقي تاني..كانعرف الواليد مزيان! مستحيل يتنازل
أحمد:غدا خاص نتلاقاو مجموعين ويكون خير!
عز الدين:غير عفيني الخال لا يحفظاك راك عارف الامور بيناتنا شوية متوترة..
أحمد:باغي الخير لختك ولالا؟
عز الدين:”حك راسو تالف” اه ولكن..
أحمد:”قاطعو” كاتشوف سيد معقول ولالا؟
عز الدين:والصراحة باينة فيه ولد الحلال..
أحمد:اوا الصلاة على النبي! حد مايغضب على باه ساعة ديال الغضب وفاتت! المصالحة تجي بشوية!
عز الدين:دبا ونشوف!
أحمد: مكاين ماتشوف غدا غاتجي للقهوة فين كايجلس باك! والهضرة ماتتعاود!
عز الدين:”تنهد” واخ الخال على ود خاطرك!
أحمد:”برضى” اوا الله يرضي عليك! ياله بسلامة غانقطع دبا!
عز الدين:مع السلامة!.غير قطع وهو يرجع تيليفون لجيبو وردد مع راسو” انا نقيل كانتجرجر من قهوة لقهوة والواليدة راسو لا رطاب الله يسمح ليه وكان…
.
.
.
في اليوم التالي!
بعد العصر الوقت المناسب للرجال باش يتجاهو لمكانهم المفضل! المقهى…صلاو وخرجو متاجهين للكافي لي مولف محمد يجي ليها وفنفس الحي فين كايسكن! تما فين كايسمعو اخر الاخبار وفين ما كانت شي خبيرة كاتخص الحومة ببناتها وولادها تتوصل ليهم! فين تاينشطو ويضحكو الصحاب! والمكان المناسب لمشاهدة كرة القدم! كل واحد طلب قهيوة على دوقو وجلسو..كايتبادلو اطراف الحديث!
أحمد:”وزع نظرو على المكان” تبارك الله شحال ما جيت هاد القهوة تبدلات فيها شحال من حاجة!
محمد:”حرك راسه” فديك كانت بْسيطة وشعبية؛! وياله حلها سي سْعيد! شوية بشوية كبرها! كل عام يزيد شي حاجة ولا يبدل شي حاجة! تا ولاو يجيو ليها من بعيد؛
أحمد:إوا مزيان الله ييسر ليه!
محمد: للجميع ان شاء الله.
أحمد:”شاف موراه وهو يلمح عز دين ياله وصل الطبلة ديالهم” زيد تفضل اولدي!
محمد:”طلع راسو وهو يلمح عز دين! مدار حتى ردة فعل بل بقى مفيكسي عينيه من بعد نطق بثقالة” ناوي تبقى واقف؟
عز الدين:”تحنحن بتوتر وجلس” لباس عليكم !
أحمد: الحمد الله أولدي.طلب شنو تشرب..
عز الدين:”شار للنادل” شي قهوة الله يحفظاك..
أحمد:”كايشوف فمحمد لي قالب وجهه” ماقلتيش ليا فين كنتي فهاد المدة..
عز الدين:فاوطيل!
أحمد:اوا مزيان..
النادل:”حط ليه القهوة” بصحتك اسيدي..
عز الدين: شكرا!..”بجدية” احم جيت لهنا على قبل موضوع مهم!
محمد:”باستهزاء” تفضل اسيدي قول لينا شنو هو هاد الموضوع!
عز الدين:”رشف من كاسو بهدوء” موضوع لي نتا عارفو! نوميديا!
محمد:”قلب ملامح وجهه للجمود” مالها بنتي! واكلة شاربة ناعسة مخاصها خير..
عز الدين:اوا الحمد الله! ولكن بنادم ماتخلقش غير على قبل هادشي..
أحمد؛”مراقب الجو المتوتر” خليونا من هادشي دبا! اوا قول ليا اعز تلاقيتي مع سيد؟
عز الدين:وي تلاقيت معاه وهضرنا..وو
محمد:”قاطعو بصرامة” بحالا بنتو ليااا كاتقررو من رااسكم..
احمد:تهدن أمحمد! حنا ماقررنا والو باقي..جمعتكم اليوم هنا باش نوضحو بزاف دالامور بلا عصبية الله يخليكم..
محمد:”مخنزر” هاني اسيدي كانسمعكم..
عز الدين:”بهدوء” كيما كنت غانقول تلاقيت مع سيد هضرنا شوية! ولد ناس مافيه مايتعاب وباقي ناوي المعقول!
محمد: كاضحك علينا لا؟وشنو لي يضمن ليك بللي سيد بصح معقول؟؟
عز الدين: فنظرك لو كان ماشفتوش معقول! غانجي نهضر معاك عليه؟ ماتنساش فالاخير نوميديا ختي ودمنا واحد واش نبغي ليها الاذية؟
محمد:ها هو ولد ناس وناوي المعقول وبلا بلا..هاد الهضرة خليها عندك ولد دراهم اوا الله يسهل عليه بشي وحدة بحالو! اما انا بنتي نهار يجيها نصيبها ويكون ريفي ديك ساعة هضرة خرا!
أحمد:الله يهديك امحمد! واش حنا باقيين فهضرة هادا ريفي هادا لا؟
عز الدين:”بعصبية” كانحاول نفهم لاش مصعب الامور على والو! دبا هادي هضرة يقولوها ناس؟ يسمعك شي واحد اخر غايقول مع راسو هادا فيه العنصرية وجاهل!
محمد:”عقد حواجبه بشدة” شنو دبا بغيتي تقول انا جاهل ولا شنو؟ ماتنساش انا لي والدك ماشي نتا..
عز الدين:”تنفس بعمق كايحاول يهدئ الأمر” ايه عارف نتا لي والدني..حنا غير كانتناقشو حاول تشوف الأمر من زاوية خرا..
أحمد”بتأييد لهضرته” عز الدين عندو الحق! خلينا نشوفو الأمر من جيهات خرين!
عز الدين:شوف الواليد البارح تلاقيت مع سيد..عرفتو معقول وولد ناس باغي غير الحلال سيد بخدمته قادر يوفر لبنتك كلشي! بغض النظر على انه من مدينة خرا من غير ريف ولكن انا كانشوفو الرجل المناسب لنوميديا!
أحمد:”كايحاول يقنعو كثر” ها نتا شنو باغي كثر! ولاد ناس قلالو؛ وهادا جانا نيشان معقول؛مربي؛نقي؛خدام؛ممبليش! شنو لي فيه ماعجبكش..
عز الدين:”ممخليين ليه فين يهضر” الى كان على قضية ماشي ريفي! علاش مانغيروش هاد العادة على قبل مصلاحتنا وحنا كانشوفو راجل مزيان فيه بزاف دالحواايج لي زوينين واما الكمال الا لله! شنو فيها كااااع! هالريفية دات مراكشي ها الريفي داها سوسية.. عادي جدا ها عمي علي داها مراكشية الله يعمرها سلعة! ها خالي براسو مراتو وجدية عمرو شفنا منها عيب؟ الا اوا توكل على الله..
محمد:”بملامح جامدة هضرتهم كاتضور فراسو” من هادشي كامل نوميديا غاتوافق؟
عز الدين:”ضحك بسخرية” كاتضحك علينا الواليد لا ؟ كلنا عارفين بللي الا نتي وافقتي هي ماعندها ما تقول وراك!
محمد:حيت مربي وعارف اش مربي! مانجيش ونعطيها لمن كان!
أحمد:تاحنا راه قلنا ليك مكاين غير المعقول وأي واحد محتاج فرصة وخا يكون يهودي ماديرش لينا هاد الحالة! اوا نعل شيطان..
محمد:”شافيهم مدة” الله ينعلو ويخزيه ديرو لي عجبكم! “بتأكيد” ولكن بربي ويأذيها بشي حاجة نعرفكم نتوما سبابها؛ انا مموافقش على هادشي لي كاديرو وما عندي مانقول ! ولكن بصفتي كأب غانوقف معاها فعرسها! شي حاجة خرا ماتعرفوني مانعرفكم!
عز الدين:مايكون غير خاطرك الواليد المهم نتا ماتهضرش معاها كاع كاتحشم منك خلي الواليدة تكلف!
محمد:مغانقول والو ضبرو راسكم..
أحمد:اوا الحمد الله ملي تفاهمنا! خاصك تتلاقى مع سيد امحمد ماحدو باقي هنا!
محمد:هي دبا! لا بغاني يجي عندي..
عز الدين:”هز تيليفونه” هاني غانصيفط ليه ميساج..
محمد:بغيت نهضر معاه بوحدي!
أحمد:كون هاني اسيدي غير يجي غانوضو بحالنا..
عز الدين:”حط تيليفون وتنهد” قالك شوية ويكون هنا..
محمد:”الصمت عاقدهم”
.
.
.
“دقائق عديدة دوزوها فصمت حتى دور عز الدين عينه وهو يلمح المنتظر جا وكايبلاصي الطوموبيل..ناض وقف وغمز خاله..وهز تيليفونه.. “
عز الدين:المهم نخليوك الواليد غانمشيو دبا!
أحمد:”طبطب على كتفو” سيد وصل ماتقسحش معاه فالهضرة..
عز الدين:”تلاقى معاه فالباب وسلم عليه”هالواليد فين جالس..هو شوية قاسح فهضرتو كانتمنى متاخدش فخاطرك الى قالك شي حاجة..
معتصم:كون هاني..
“خلاهم خرجو وتوجه للطبلة فين جالس محمد..باس ليه راسو كاحترام عاد جلس..سولو على احوالو ومحمد كايجاوب بكلمة او زوج..شيء لي زعج معتصم بعض شيء ولكن مابينش..طلب معتصم كاس دالما فقط وقرر يبدا هو الحديث حيت شافو ساكت”
معتصم:المهم أعمي كانضن طلبتيني باش نهضرو فموضوع مهم…
محمد:”بنظرة حادة” كانضن راك عارف الموضوع أولدي ولا لا!
معتصم:”تحنحن” احمم أكيد…لي بغيت نقول ليك هو ان بنتك مزال باغيها..واخا وقعو مشاكل قبل تا حاجة ماتبدلات….الى وافقتي كانواعدك غانصون بنتك..حاجة ماتقيسها ولا تقلقها..والقرار كايرجع ليك..
محمد:وشنو غايضمن ليا بللي غاتطبق هضرتك؟!..
معتصم:”بثقة” بصح مكاينش دليل ملموس ولا شي حاجة تضمن ليك بللي هضرتي قاصدها من قلبي..ولكن لي خاصك تعرف هو انني على يقين ان لي درتيه كايرجع ليك سواء كان زوين او خايب..وانا عندي اخت وأم وممكن تكون عندي إبنة لي مباغيهش ليهم مغانبغيهش لبنت الناس..
محمد:هضرتك معقولة! مغاديش نقول ليك دبا واش موافق ولالا! حتى نقول ليك الشروط ديالي! قبولك كايعني موافقتي والعكس!
معتصم:”دوز يديه على لحيته” تفضل أعمي قول ليا الشروط ديالك!
محمد:”بجدية” شروطي اي واحد يقدر يطلبهم يعني من حقي نتشرط بنت وحدة لي عندي..قد ما هما ساهلين قد ما صعاب! بنتي تصونها هادي أولا ولي خاصك تديرها بلا مانشرطها عليك!
معتصم:”حرك راسو” على راسي وعيني ما قلتي عيب !
محمد:نزوروها فوقما بغينا وتجيبها فوق مابغات!
معتصم:من حقك!..
محمد:الى سكنتيها مع داركم! يديها ماتحط فالما!
معتصم:”بهدوء” هادشي عليها هي! انا لي عليا نجيب ليها مرا تعاونها الى بغات!
محمد:”بحزم” الخطابة ماتفوتش عليها شهرين!
معتصم:وي من الاحسن نعجلو الامور!
محمد:ماحدها مزال ما على ذمتك! مكاينش ديك الخروج ودخول الى بغيتي تجي خاص تانكون انا فدار!
معتصم::”ظغط على يديه بنفاذ صبر” جاتك اسيدي
محمد:الشرط الاخير لي أهم من هادشي كامل هو صداقها! بغيت جوج ملاين! بلا ذهبها..
معتصم:”عقد حواجبه” الله يهديك اسي محمد هادشي ماشي معقول راه بزاف!
محمد:ما بزاف ما والو!! مكايتزوج غير لي قاد بيها! فاش خدام اولدي..
معتصم:”تنهد بعصبية” مقاول..
محمد:”بالنفخة”مالها ماتكونش عندك!
معتصم:”شابك يديه” ماشي قضية تكون عندي ولالا! كيما كاتشوف غايكونو بزاف دالمصاريف الخطوبة! العرس دار وزيد وزيد حاجة تجر حاجة!
محمد:كلامي مغاديش نبدلو توافق على الشروط مرحبا! ماتوافقش الله يعاوني ويعاونك !
معتصم:”عاقد حواجبه” خلينا شوية معقولين! كلشي على عينيك! جوج مليون وبزاف تقدها وكثر ! الذهب راه فاش غانتزوجو دير شحال ما بغات! اما دبا راه مكاينش غير صداق وصافي!..
محمد:”برفض قاااطع” انا لي عندي قلتو بغيتي مرحبا مابغيتش الله يعرضك السلامة!
معتصم:”ناض هو سوارت طموبيلتو وخرج”
بقى محمد متبع ليه شوفة باستهزاء واللا مبالاة.. أما معتصم ركب طموبيلته معصب وطالع ليه دم تحمل نبرة الاستهزاء لي كاين كايدوي بيها فالاول لكن فالاخير ماستحملش عارفو ظاغط عليه باش ينساحب!..صونا لخوه وعاود ليه كلشي! فالاخير قاليه خليه يفكر شوية…كسيرا وجاه ميساج لتليفونه من صحابه لي سنين مشافهم! وتوجه للوكاليزاسيون لي عطاو ليه! ربع ساعة كان وصل كافي شعبية ديال الشيشة!…
معتصم:”دخل كايقلب عليهم بعينيه حتى لمحهم وتوجه لعندهم بابتسامة سلم عليهم بعناق رجولي” اش خباركم بيخير!
منير:الحمد الله هاد ساعة!
إبراهيم؛فين غبورك عاد تفكرتينا!
معتصم:اودي ضروف شحال هادي ما طلعت للحسيمة ياله كتابت..
منير:”غمزو” اوا شنو فكرك فينا ياك ما شي خدمة؟
معتصم؛”شعل كارو ببرود” زواج..
إبراهيم:”متفاجئ” هي تزوجتي..
منير:”ضحك” مبرووك عليك..
معتصم:اودي غير خليها على الله كنا ناويين..
منير:” باهتمام” علاش؟ شنو وقع..
معتصم:دنيا صعابت فهاد الوقت الصداق غلا وزيد وزيد!
إبراهيم:برب تا فهمتك! الأغلبية كايبغي صداق يكون ثقيل ووازن!
منير:وخا هاكاك خاصهم يتفهمو لبنادم! صداق كايبقى حاجة رمزية!
معتصم:”شاف لبعيد” سيد صعيب!
إبراهيم:اوا صافي ماكتابش دوز لعطلة ورجع بحالك..
معتصم:”بنبرة حادة” مانرجع بحالي تا نحقق علاياش جيت!
منير:”هز كتافو” اودي راسك قاصح! كون هنيتي راسك عطا الله بنات الناس!
معتصم:”نتر نترة طويلة من الكارو” هي لي عيني عليها تحطات! وهي لي غناخد خاص غير باها يفكنا!
إبراهيم:ما عندك مادير! هبط جيب الواليد ديالك يقنعو يقدر يحشم منو!
معتصم:”مسح على راسو” اودي ماعرفت ماندير..
منير:”حط يديه على كتفو” ماتفكرش بزاف لي بغاها الله هي لي تكون!
معتصم:”تنهد”ونعم بالله.
دوز وقت طويل مع صحابو! فالاخير ناض خرج ركب فطموبيلتو..هز تيليفونو لي كان طايح جنب الكرسي!..لقاه عامر بلي زابيل من عند خوه..مسح على راسو ودوز الخط…
معتصم:”بعد ثواني” لقيتك مصوني شحال من مرة ياك لباس؟
عاصم:ففف الواليدة طلعات لمراكش..
معتصم:”بصدمة” من نيتك؟؟ كيدارت ليها..
عاصم:الغلط مني الصراحة..كانت حدايا فاش هضرتي معايا قبيلة! ظطريت نشرح ليها..
معتصم:”غمض عينيه بعصبية” راسها قاسح! مالها مكاتصبرش..عرفتي شنو هز لي خاص شوية نشدو طريق!
عاصم:”تنهد” ركز مع طريق عارفك فاش كاتعصب كايتعماو ليك العينين!
قطع معاه وحط راسو على الكوسان كايتأفأف طالع ليه دم..كايحاول يهدئ راسو..عارف الام ديالو فاش تكون كاتفكر..دبا تجي نوبة دالاقناع ديالها تاني.. ولكن غير مزاد تشبت بفكرة زواج من نوميديا..عارف محمد تصرف معاه هكاك باش ينساحب لكن!..ماشي بهاد السهولة لي بغاها هي لي تكون..هو أقوى منهم شدان ضد معاه ماعندهم باش يفيد..أفكار ومطارق كااتضرب فراسو شاف فبعيد ساهي..فالاخير حرك مفاتيح السيارة مغادر المكان للدار لي عاشو فيها هاد الفترة..لقى خوه فالباب كايستناه معاه شانطة صغيرة..طلع فدروج جاب شي وراق حوايج لي غايحتاج! وهبط كايزرب ..ركب طموبيلتو وركب حداه خوه ونطالقوا! الوجهة مرااكش..
معتصم:”بعد مدة زفر” بغيت غير نعرف علاش عزيز عليهم يجرجروني..
عاصم:”رفع حاجبو” نتا لي كاتجرجر راسك!
معتصم:”شاف فيه ورجع شاف فطريق”الصمت.
عاصم:”تنهد” معتصم شوف اخويا! نقص من سخونية راس راها ترجع ليك بالبرودة! عطا الله البنات..
معتصم؛”عقد حواجبو” بغيت غير نفهم علاش كادخلو فيا؟ راه حياتي هادي..
عاصم:اييه عارفينها حياتك! ولكن راك غادي وكاتغرق على والو..
معتصم:”ببرود” انا مرتاح هاكا..
عاصم:”غانسولك وجاوبني بصراحة!
معتصم:”شاف فيه بمعنى تكلم ورجع شاف قدامو”
عاصم:”باستفهام” علاش متمسك بهاد البنت بظبط رغم كلشي؟ ما كنتو فعلاقة مابينكم حب عمر هضرتو شفتيها مرة وحدة! وداير هاد الحالة كلها..
معتصم:”ضحك بسخرية” الحب من اول نظرة.. من نيتك كاتسول بغيت نتزوج بانت ليا فيها صافي هادا ما كان..
عاصم:ياك باها ماقبلش وزيد وزيد لاش كاتعذب راسك؟
معتصم:”مبرد”ما خلاقش لي يشد معايا ضد..
عاصم:من نيتك امعتصم مزوجها بضد وصاف درية باينة درويشة..غير نساها عليك..
معتصم:درويشة..مالي غانعصيها ولا شنو..انا باغي نكمل معاها حياتي! ديرها فبالك..
عاصم:”حل سرجم وشعل كارو” اودي الحياة ديما مكوزة لينا..ماشي لي كاتبغي هو لي يكون..
معتصم:”ضحك باستهزاء” لالة حنان ومدارت فيك..
عاصم:الحب مع الوقت كايموت “تنهد” ولكن الجرح مايبرا..
معتصم:”دور راسو” داير لينا فيها نزار القباني..
عاصم:”عقد حواجبو” قلب عليا هاد ساعة
معتصم:كلام الحق مقبلو حد…
عاصم:”الصمت”
ساعات دازو وأخيرا وصلو لوجهتهم،خرج السيارة كايطرطق فعنقو ويحركو بعياء،نفس الشيء لعصام..شدو طريق وحدة مارتاحوش..رفع راسو كايشوف فدار السراجم محلولين عرف بللي مو كاينة فالدار…عندهم دار كبيرة وااسعة فيها تلاتة ديال الطبقات السفلي ديال والديهم..وهما كل واحد شاد طبقة بحيث فالاول كانت طبقة وحدة وتعاونوا تا كبروها…دخلو الداخل،معتصم طلع ديريكت لطبقة الفوقية كاع يرتاح..اما عاصم دخل يشوف مو لقاها جالسة مخدمة تلفازة وباينة فيها طالع ليها دم..غير شافتو وهي تقاد فالجلسة..
نجاة:على سلامتك اولدي ملي جيتي كون درتيها من اللول.
عاصم:”قبل جبهتها” الواليدة لباس عليك..
نجاة:”تنهدات”الحمد الله..جا حتى هو ولا ؟
عاصم:”جلس حداها”حتى هو جا..
نجاة:الحمد الله تهنينا وخا ممسروطاش ليا،بعدا حيدها من راسو.”قالتها باش تشوف ردة فعلو”
عاصم:”الصمت”
نجاة:”صغرات عينيها فيه” مالك..
عاصم: والو..بغيت غير نعرف كيفاش تا جيتي بوحدك؟ واش مخلياني خارج عاد بانت ليك نتي تجي لمراكش..
نجاة:”ساطت” غير قلتي ليا هاكا ماحسيت برااسي تاتهزيت من تما،ولد كرشي وعارفاه تما يبقى لهما اذا جيت غايتبعني..
عاصم:””بجدية” الواليدة معتصم ماشي دري صغير،عارف شنو كايدير ضبري معاه مللي يهبط نتي عارفة راسو قاسح،وكاتزيدي تعانديه وهو كايشد ضد كثر..
نجاة:”عقدات حواجبها” منها نيت يتفكر راااني مو،انا لي والداه ماشي العكس..
عاصم:”باس يديها”حتى حد مقاليك شي حاجة نتي غير خليه يضبر راسو..
نجاة:”ملي كايدير ليها الخاطر كاتزيدها نغزة الفشوش” اصلا حد مكايسمع ليا..كون كنت بصح عزيزة وحاسبيني مكم كون درتو بكلامي،
عاصم:شنو درت انا تاني؟
نجاة:لا أسيدي نتا مدرتي والو!,نسيتي شحال طلبت وبكيت وزاوكت ترجع ديك المرضية ونتا ماسمعتي ليا!
عاصم:”ناض واقف”الموضوع تسد شحال هادا
نجاة:وقفات حتى هي” ما تسد والو،لحد الان مابغيتي تقول علاياش تطلقتو قول ليا غير علاش..
عاصم:داكشي سالا صااافي تنسى بااح مشى..انا طالع نرتاح مايصدعني حد..”خرج من تما كايسوط”
نجاة:”رفعات صوتها” غيرر هررببب حتىى تعياا..
طلع لدار الوسطية توجه ديريكت لبيتو وسد الباب بجهد كايزفر..حيد تيشورت ورماه وتلاح على السرير..عصر عينيه بقوة من الذكريات لي زارت مخيلتو للحظة..
فلاش باك
ابعد علاقة حب جمعات بيناتهم لشهور تزوجو..وكانو عايشين فسعادة…..دازو ايام واسابيع فيهم رجعات حنان لخدمتها.. في يوم من الايام كالعادة داخل للدار فالجوج الوقت لي كايخرج فيه من الخدمة..دخل الداخل وهو يشوف الصالون مقلوب وفطورهم مزال على الطبلة عقد حواجبه حيت هاد المنظر ولا كايشوفو هاد الايام بكثره..دخل الكوزينة لقاها مطلية بالمواعن الارض موسخة الماكلة والو،بقى بجوعو ومشى لبيته لي براسو مقلوب سفاه على علاه حوايجهم مرمين فالارض..توجه لسريرو ونعس وهو طالع ليه دم..ساعات دازو حس بيد كاتحركو..
حنان:عاصم عاصم نوض..
عاصم:”ناض جالس وحك عينيه” جيتي على سلامة..
حنان:الله يسلمك فف عييت ناكل شي حاجة نمشي نعس
عاصم:”باستهزاء” من نيتك اشريفة؟ وشكون يجمع دار انا ؟
حنان:”كاتحيد حوايجها” وصافي لويكاند ونجيب شي مرا تجمعها.
عاصم:”تنهد”حنان هادشي ممسلكناش
حنان:”شافت فيه” كيفاش؟
عاصم:واش عاجباك هاد الحالة لي ولينا عايشين فيها دار ديما مقلوبة والماكلة من برا!
حنان: صافي دبا ونجيبو شي مرا..
عاصم:”بغضب” وانا لااش تزوجتتك؟؟ ملاحظتيش تصرفاتك زعما والو؟
حنان:اشمن تصرفات؟ شوف اعاصم نهار لي تزوجتيني كنتي عارفني خدامة..اذن بلا ماتخلينا نتخااصمو..
عاصم:”غوت حتى طفجها” لااااا الاالة نتخااصمو..فوقاش تفيقي وتوعاااي دويي؟؟ رااااني راجلك الآلة راجلك مااشي خووكك..حتى حقي وليتي حارماني منو..
حنان:واش داير هاد الحالة على قبل هادشي؟ باغي تفرغ شهوتك ياك؟ واش كانبان ليك آلة جنسية واش مكاتتحسش مكاتشوفنيش جاية عيانة..
عاصم:هاد الخدمة لي فارعة لينا *رنا بيها هييي سباااب كلشي.. غير جلسي فدارك لي طلبتيها تحضر حتى لعندك..انا خدام وخلصتي تكفينا العمر كلو عمرك تحلي فمك على شي حاجة وماتلقايهاش! جلسي الله يرضي عليك وسمعي كلامي..بلا ما نوصلو لحوايج مابغيناهمش.
حنان:”حطات يديها على فمها” صدمتيني فيك عمري ضنيتك من هاد نوع! ناوي تجلسني من خدمتي لي فنيت فيها شبابي عرفتي شحال قريت باش نوصل لهاد المركز لي وليت فيه..
عاصم:”دوز يديه على شعرو بنفرزة” كانحاول نفهم لاياش باغا توصلي.. نقزتي كلشي من قبيلة وانا محيد قجروطتي ونتي دايرة فيها مكاتسمعيش “كايحسب بصباعو مكشكش” الرويينة الوسخخخ كوزينة خااوية الماكلة من زنقةة مللي كنت زووفري وماااعشت هادشي ليي وليت عايشوو دباا رااه مليييت وعيييت حسييي بيااا
حنان:”نفااجرات” وانا شكوون يحسسس بياا؟؟ تانا بنااادم بحاالي بحاالك انا مااشي خدااامتتك فهمتيييي كان يحساابلييي نتا هو شخص المنااسب ليي يدعمنييي فكلشييي ولكنن كنت غاالطة…وغااالطةةة بزااااف..
عاصم:نقصيييي صوووتك…هاد الحب ولا ال*لاووي لييي يبهدلل جد بووويا بلااش منوو..
حنان:هانا نقصتو ياله شنو عندك ماضيف؟
عاصم:”كايتنفس بسرعة” اخر حاااجة نقوولييك يااا انااا يا الخدمة..
حنان:”بصدمة” ياك اعاصم وليتي تشدني من اليد لي توجعني..ولكن نتاا غاالط بزاف بصح كاانبغيك ولكن خدمتي عمري نفرط فيها..
عاصم:”بخيبة أمل” هي صافي ختاريتي خدمتك.
حنان:”بقوة الغضب مكاتفكرش جوج مرات” ويي لي بيني وبينك سالا..نتا يمكن تتعوض مي خدمتي مكاتعوضش..
عاصم:”حرك راسو” لي جمعنا يفرقنا حسبي راسك مطلقة ابنت ناس..
خرج من تما بقلب مكسور..وخيبة أمل ملاحقاه ماطلبش الكثير! والله شاهد كان كايتمنى فقط حياة مستقرة،زوجة تستقبلو بوجه بشوش فاش يجي من الخدمة يلقى دارو نقية،أكل من يديها.لي تمناه فالانسانة لي بغى قلبو مالقاهش تما عرف ان الحب مكافيش باش يكمل زواج.. اما هي انسانة متسرعة كاتقول فراسها هادشي مايمكنش هو كايبغيني متأكدة غايرجع ويندم لكن مفااقت على راسها والا عند سماع القاضي كايعلن على طلاقهم هنا فاقت من الأحلام وعرفات ان نهاية علاقتهم وصلات.
ايام دازو وايام جاو،ناض اليوم ناوي يهضر مع باه..بحيث الايام لي فاتو مالقاش فرصة..وجد فراسو شنو يقول..قد ما هو متسرع فبعض الاحيان قد ما هو شخص عزيز عليه التخطيط..على قبل مصلاحتو كايدرس هضرتو مزيان حيت لسانو أعور..ومكايتحكم فيه حتى يبغي..ستنى تا خرجات مو مع جارتها وهبط لتحت جلس فالصالة كايستنى باه يكمل صلاته..
عبد الوهاب:”طوا سجادة بعدما ردد بعض الأدعية” معتصم..ياك شي باس مكاين؟
معتصم:”تحنحن” بغيت نهضر معاك فواحد الموضوع..
عبد الوهاب:”جلس قدامو” تفضل نسمع..
معتصم:”دوا بجدية تامة” كيما شفتي ديك درية لي طلعنا لريف باش نخطبوها باها تعاكس معانا..
عبد الوهاب:”حرك راسو” ماكتابش..
معتصم:”شابك يديه” قبل ما نهبط لهنا تلاقيت مع باها وهضرنا..تفاهمت معاه ..ولايني تعكس ليا فصداق..
عبد الوهاب:صداق راه من حقو يتشرط..بنتو هاديك
معتصم:بصح حقو ولكن راه قصح معايا..
عبد الوهاب:”حك لحيتو”شحال طالب؟
معتصم:جوج مليون بلا ذهب وشي لاخر..
عبد الوهاب:باغي درية ولا لا؟
معتصم:”حرك راسو” باغيها الى كتاب..
عبد الوهاب: شوف اولدي لا بغيتيها ماتخليش شي حاجة بحال هادي تتعكس فطريقكم..ايه عارفين مصاريف كثيرة ولكن حتى نتا برزقك..وقادر عليها..
معتصم:صافي راه غير ديك المرا ماكنتش فكانتي.. ولكن راه كل مرة خارج بحاجة جديدة..متاكد لا طلعت تانا هضرت معاه غانفاريو كلشي…
عبد الوهاب:”فاهمو وحافظو” المطلوب مني؟
معتصم:”حبس ابتسامتو” غاتسمح ليا نعذبك معايا..بغيتك تطلع نتا تهضر معاه وراك عارف متاكد غايدير بوجهك..
عبد الوهاب:جاتك..ولكن حاجة وحدة وسع خاطرك وتوكل على الله حتى حاجة ماتجي بزز..وحنا لي طالبين بنتو ليك ماشي العكس فخاصك تصبر فالاخير غاتزوجها هي ماشي باها..حضر عقلك اولدي الله يرضي عليك.
معتصم:كون هاني الواليد..
عبد الوهاب:وشنو شي حاجة خرا ولا غير هادشي؟
معتصم:بغيتك تهضر ليا مع الواليدة نتا كاتسمع ليك راك عارفها ضروري دير العصا فرويضة..
عبد الوهاب: صافي على حسابي..
معتصم:”ناض فرحان باس راسو” الله يحفظك الواليد..
عبد الوهاب:”بابتسامة بشوشة” الله يرضي عليك..
معتصم:نخليك دبا غدا نقلعو الى مكانش عندك مشكيل؟
عبد الوهاب:الوقت لي بغيتي انا معاك..
هادا هو عبد الوهاب شحال ما كان صارم مع ناس..مع ولادو كايلين ومكايبقاش ديك الشخص الجدي والصعيب..كايولي شخص بشوش مكايهمو والو من غير راحة اولادو..مابغاش يجبد معاه داكشي لي وقع فاش مشاو يطلبو يديها..حيت عارف ولدو شخص كبير وواعي..مغاديش يوريه اش يدير من غير الى خطأ عاد كايوريه الطريق الصحيح…هز المصحف ديالو كايرتل آيات الله..حتى دخلات مراتو..جلسات شربات الما كاترد النفس..
عبد الوهاب:”سد المصحف” صدق الله العظيم..
نجاة:”بابتسامة” الله يقبل..
عبد الوهاب: أمين
نجاة:”حيدات شالها” عييت بدوران راسي داخ عليا..
عبد الوهاب: نتي لي خارجة فالشموشات..كاين شي واحد كايخرج قبل العصر..
نجاة:والله ماكنت ناوية غير جارتي حفيظة بغات تزوج بنتها..وطلبت مني نخرج معاها عند الخياط لي كانخيط عندو…
عبد الوهاب:نتي براسك تابعك عرس قريب بلاصة ماتخرجي تشري لراسك سبقي جارات..
نجاة:”عقدات حواجبها” شمن عرس..
عبد الوهاب:”بهدوء” غدا طالع مع معتصم باش يهضر مع الواليد ديال البنت..
نجاة:شمن بنت؟؟ ماتقولش ليا ديك ريفية لي جرجرنا باها تجرجير..
عبد الوهاب:وشنو بنادم هو لي يعز ببنتو..
نجاة:لالاالا انا مموافقاش على هادشي لي كاديرو..
عبد الوهاب:حد ماتشاور معاك..هني الوقت..
نجاة:مايحتاجش يتشاور عارفة مصلاحتو خير منو!
عبد الوهاب:”رفع سبابتو بتحذير” والله وتعكسي اولاد ديري العقدة فالمنشار حتى نتفاهم معاك..فوتي عليك الدري..ها ودني منك الى درتي شي حاجة ماشي هي هاديك..
نجاة:”فنفسها:الى بغات نخرج منها زيت العنكورية مرحبا بيها كلامي هو لي يكون” هاني ساكتة تانشوف هادشي فين يخرج..
دازو الايام عندهم بلا مايعطيهم محمد راس الخيط..دوا معاه عز الدين وحتى أحمد علاياش ضار بيناتهم..لكن لا حياة لمن تنادي حلف لا دوا ولا تكلم فديك الموضوع..طلع ليهم دم بالمزيان..وعز الدين مازعمش يصوني لمعتصم،مباغيش يبسل عليه حتى اليوم كان جالس فالقهوة مع خالو كالعادة..
أحمد:”حك على جبهته” باك ما بغى يهديه الله يقول اش كاين..تانا ناوي نمشي بحالي..
عز الدين:علاش غاتمشي راك جالس! التقاعد ديالك وشديتيه وشحال ماجيتي جلس شوية باقي..
أحمد:ياودي كون كانت دار جدك قريبة لهنا وخا ولكن نشد طريق من بني بوعياش لهنا كل يوم لا..
عز الدين:اش غادي نقول ليك! نصبرو لغدا الى ما صوناش سيد نصوني نهضر معاه! اليوم بات معانا بلا ماتمشي لبني بوعياش..
أحمد:دبا ونشوف! ماقلتيش ليا اش درتي فداكشي ديال الهيه..
عز الدين:”تنهد” داكشي تحل وخا ضوسي توسخ!
أحمد:نتا لي هبيل غادي لتما وباغي دير يديك يطلعوك يطلعوك لباس ملي عطاوك غير عام! اما كون مشيتي فيها بشي عشرين عام..
عز الدين:الدنيا صعيبة! ماعرفت بحقها حتى وصلت لتما وضربوني الحيوط..كنت كانشوف غير البحر ولهيه وباغي نتمنى من صداع راس حتى صدقت غارق..
أحمد:محمد عارف؟
عز الدين:كون كان عارفني كنت خدام فلحشيش وداخل الحبس يشوف فوجهي مزال؟
أحمد:ياك مناويش ترجع؟
عز الدين:”جغم من كاسو” نقدر نرجع ولكن لبلجيكا..
أحمد:هانتا شفتي طريق الحرام شحال فيها من شوك وفلحظة دمر ليك حياتك..كانتمنى تكون درتي عقلك هاد المرة
عز الدين:كون هاني الخال! راه غير لحظة طيش ولا نقولو مكانش عندي حل اخر..انا مافكرتش شنو ممكن ندير ولا فين نمشي الى مشيت..حتى وصلت ولقيت جيبي خاوي نعاس فزنقة وكاع داكشي لي كانشوفو ونسمعو عليه مابقاش!
أحمد:وقف عليك شي واحد هو لي وراك هادشي؟
عز الدين:انا لي دخلت لشارع مشبوه ديك ساعة كانسول على خدمة ولا شي حاجة ندور بيها الحركة..حتى سولت واحد سيد قالي الى بغيتي دير الفلوس نيت وزيد وزيد جاني فوقت كنت مخصوص وافقت بلا مانتردد صافي دوزت معاهم شي عام وتسع شهور هاكاك حتى لواحد نهار وقفو علينا.. جمعونا جملة! صافي عندهم معارف دوك ناس وكدا وضبرو علينا..كنا كانخرجوا جوج جوج تا عفى عليا الله..
أحمد:اوا الحمد الله تفكيتي! كون غير دوزتي ليا شي اتصال نضبر عليك..حسن من هاد تمارة..
عز الدين:كلشي داز وكلشي كايفوت مكايدوم غير المعقول.
أحمد:هادا ما كان..
عز الدين:”جا يهضر وهو يصوني ليه تيليفون” تت معتصم كايصوني..
أحمد:الله يسمعنا خبار الخير!
عز الدين: الو..
معتصم:”سايق وكايهضر” سي عز الدين كلشي بيخير..
عز الدين:الحمد الله اخويا ونتا لباس؟
معتصم:”حك عنقو” الحمد الله..بغيت نقوليك رانا شادين طريق انا والواليد العشية نجيو نتعشاو عندكم طبعا الى رحبتو بينا..
عز الدين:مرحبا بيكم على الراس والعين..
معتصم:الله يحفظك اخويا..انا نقطع سائق دبا..
عز الدين:الله يوصلكم على خير!
معتصم:امين..
عز الدين:راه شاد طريق مع باه! قالك جايين يتعشاو عندنا..
أحمد:مرحبا بيهم شفتي ناس دالمعقول! مشى غير باش يجيب باه..
عز الدين:”تنهد” واييه المهم الخال نعول عليك نتا تكلف لا كانت شي حاجة ماشي هي هاديك حيت مغاديش نكون.
داخل للدار كايسوط…حط ميكات فالكوزينة ودخل لداخل..علمو احمد بللي راه معتصم وباه جايين..تقلب ليه المورال فدقيقة حيت كان يحساب ليه صافي تراجع! والموضوع تسد..ماتوقعش نهائيا انه ماستسلمش..مسح على راسو حيت الأمر ولا جدي للغاية ولا مكان للهرب…دخلات سهام للبيت ما إن لمحاتو! عرفاتو ماشي على كانتو..
سهام:محمد! ياك لباس..
محمد:”تأفأف” جبت لحم طيبيه! وشدي شي دجاجة ندبحها جايين الضياف للعشا!
سهام:”بتفاجئ” اويلي على ضياف! لدابا عاد عالمني..
محمد:تانا ياله سقت الاخبار!
سهام:شكون جاي؟
محمد:”بزز نطق” دوك ناس لي كانو جاو يدويو فنوميديا..
سهام: كلهم؟
محمد:غا السيد وباه..
سهام:”حطات يديها على فمها بحيرة” مموجدين والو؛
محمد:سيري ديري العشى بعدا..تدواز أتاي راه جبتو..
سهام: مزيان،ولكن كون غير دويتي مع نوميديا بعدا!
محمد:ماعندي مانقول ليها..نتي مها تعرفي ليها حسن مني..
سهام:اوا صافي ندوي معاها “صغرات عينيها” كاتبان ليا ماشي هو هاداك!
محمد:ما بيا والو سيري كملي شغلك ماتقابليش الهضرة تايجيو ناس؛
سهام:صافي هاني مشيت..
محمد:”هز صبعو” اه نسيت، فاش نجيت مانشوفكش نتي وياها كادورو؛
سهام:صافي..خرج دبح ديك دجاجة..
خرجات من بيتها كاتزرب..مشات عند نوميديا جراتها معاها…ودخلو الكوزينة قالت ليها جايين شي ناس فقط!..جبدات داك اللحم كاتختار فيه نوميديا كاتقطع البصلة..نصبو الماكلة طيب وخرجات سهام شدات مع محمد واحد الدجاجة بلدية…ذبحها وطلعاتها حيدات ليها الريش ونقاتها..الوقت كايطير وهما من هادي لهادي..
سهام:صافي جبدي ديري شي شلادة..
نوميديا:”كاتجبد المكونات من التلاجة” ما قلتيش ليا شكون جاي؟
سهام:”يديها خدامين وكاتهضر” نسولك وجاوبني بصراحة وفالأخر تعرفي شكون جاي!
نوميديا:”بهدوء” وخا..
سهام:”شافت فيها” الى شي واحد فهاد الوقت وطلب يديك للزواج تقبلي؟
نوميديا:”قلبها نقز ربطات الااحداث شي حاجة كاينة” كيفاش؟
سهام:كيما قلت ليك الى جا شي ولد ناس طلب يديك..محتارم ولد عائلة؛ باك وافق عليه حيت عارفة راه باك باغي مصلاحتك! تقبلي.
نوميديا:”فهمات البلان ولكن مكاتسبقش الأحداث”ماعرفتش!
سهام:مكاين ما نخبي عليك! ناس ديك نهار راه رجعو! دواو مع باك..سيد على مقال شافك فالعرس لي مشيتي فيه مع سعاد! اوا شاف فيك الحلال..وجا راك شفتي ديك المرة باك رفض؛ولكن سيد ممفاكش وعز الدين قاليا سيد معقول ولد عائلة..يعني عجبو ولكن فالاخر راه القرار بين يديك..
نوميديا:هما لي جايين؟
سهام:اه جاي هو وباه..دابا بيناتنا راني ماماك ماتخبي عليا والو! لا عجبك تقبلي؟
نوميديا:”شافت فيها مدة عاد نطقات”..
الايام كايدوزو طايرين..المجية لي جاو معتصم وباه تفاهمو على كلشي واخيرا محمد تنازل شوية ولو بالنفيخ ..وعز الدين خدام كايجمع وراق ختو حيت محمد مابغاش يدخل..وتا معتصم هبط يجمع وراقيه وتفاهمو على نهار الخطبة..واللي قررو يديرو العقد والخطبة نهار واحد..منها خطوبة ومنها حفلة عقد القران…جالسين مجموعين كايصاوبو الحلوى..بالاشكال والانواع..
إسراء:”شافت فمها ” ماما حنا مغاديش تجي..
سعاد:ماسخاتش ببنتها راك عارفاها وحيدة وشحال مشافتها فهاد الايام غايجيو بزوج..
إسراء:عمتي دبا نتوما غاتجيبو العدول ماشي تمشيو ياك..
سهام:على حساب..
إسراء: الا جبتوه واش لدار العروسة ولا العريس..
سهام:عند العروسة
إسراء:وااو يعني غانصورهم فاش يكونو كايوقعو
سهام:عمك لي غايسني واقيلا
إسراء:كيفااش؟ على ماشي العروسة لي كاتسني..
سهام:على حساب باها لي يسني..وفي حالة مكاينش باها اتسني هي..ولا المهم على حسب الرغبة وصافي
إسراء:يعني باها يقدر يزوجها بلا خبارها..
سهام:”ضحكات” اهدا عليا..
سعاد:”حطات اخر وحدة فصينية” ها حنا سالينا..
سهام:شحال درنا؟
سعاد:”كاتحسب”ديال اللوز؛ديال المعلقة؛ديال الكوك؛كعب غزال؛الفقاص؛والغريبة؛وديال الهلال؛ نزيدو شي حاجة؟
سهام:نخليو تالغدا..ونديرو الصابلي من بعد ونشوف واش نطلبو من الفران..ماكنتش باغا ندير هادشي كامل..
سعاد:شحال ما نقصنا علينا مزيان..وراقهم جمعوهم ولا باقي؟
سهام:واه جمعوهم..دبا يتفاهمو مع العدول..
إسراء:فوقاش يجيو؟ العقد واش العشية ولا صباح..
سعاد:غايكونو غايجيو نهار قبل..لدار صاحب معتصم..
إسراء:شكون هاد صاحبو؟ لاش مكايجيش لدارو؟ على مغاديش يحضر لعرس معتصم ويحتاجها .
سعاد:سيري سوليه هو وانا علاش!
إسراء:اخر سؤال نهلة غاتجي؟
سعاد:قالت ليا نجاة راه فهاد اليوماين غاتجي..
سهام:عندها بنت اخرى؟
سعاد:اه عندها عاصم الكبير راه قريب يقفل 38 ومعتصم تابعو فعمرو 33 ونهلة تكون عندها 25 26
سهام:الله يخليهم ليها
سعاد:امين اختي..نوميديا ونتي أبنتي علاش مكاتهدريش؟
نوميديا:”بتاسمات” غير ماعرفت مانقول..
سعاد:ولا أبنتي عاوتاني خاصك تكوني بطبيعتك راجلك مطلوق وراك عارفة المراكشيين عزيز عليهم النشاط.
نوميديا:”ضحكات” ان شاء الله..
سعاد:اوا هاكاك..
ياله جمعو من تما وهي تدق الباب ديال برا بجههد..بقاو كايشوفو فبعضياتهم وطلو من الشرجم يشوفو شكون جا..وهوما يتصدمو نيت!
مرات لوسهم! ام رضى باينة فيها معصبة وتدق وتعاود بقلة صبر..هبطو بزوج كايزربو ماعرفو مالها دهشراتهم..حلات سهام الباب لقاتها واقفة هي ورضى غير تحل الباب وهي تدفعو ودخلات..حاطة يديها على نصها..
سهام:لبنى لباس عليك..سلمي بعدا
لبنى:ما لباس لا والو! خليتو لي يسلم عليكم؟
سعاد:”تدخلات” الله يا خيتي ياك لباس؟ اش واقع مالك؟
لبنى:”شافت فسهام” سمعت ناوية تزوجي لالة البنات
سهام:ايه ان شاء الله الى كتاب..
لبنى:اوا خوتي ماحشمتوش مادرتو بوجه الدم! ناويين تعطيوها للغريب ولا تعطيوها لولد عمها من دمها يتهلا فيها..
سهام:”صدماتها!” واش جيتي طلبتيها من باها وردها فوجهك؟ واشمن ولد عمها..
لبنى:”جرات ولدها عندها” ولدي سيدي رضى قبل ليكم ببنتكم..وقال نشاورها هييي قبل باهااا وفالأخر تخليه معلق! وتمشي للغريب امتى كان عندنا هادشي فالعائلة؟؟
سهام:”طالع ليها دم” لبنى الله يخليك شوية دالوقار! هادي لي راك تهدري فيها راه بنتي! ولي باغي الحلال كايقصد الراس الكبير..
لبنى:حسبهااااا بنااادمة وبغى يتشاااور معاها! ولكن حسبي الله ونعم الوكيل فيكم بااغيين ديرو واحد فاليد واحد فجيب! عمركمم تلقاو فحال ولدي..
سهام:بلاتي بلااااتي…نوميييدييا نوميديييا اراااحد رووخ”أجي دبا..
نوميديا:”هبطات فدروج كاتزرب” نعااام..
سهام:”تايقة فيها” أجي الله يرضي عليك سمعي عمتك لبنى اش كتقول.
نوميديا:”شافت فلبنى” السلام..
لبنى:تبارك الله على مولات العقل كنا مخدوعين فيك! سمعت بلي تخطبتي..
نوميديا:”مافهماات والو بقات كاتشوف فيها”
رضى:”زعم حيت معاه مو” اوا ابنت عمي ترضايها راسك؟ تخلي واحد من دمك وتمشي لصحاب الغرب؟ ماحشمتيش ولايني راك نار تحت تبن..
سعاد:”معجبهاش الحال”
نوميديا:”بهدوء” مافهمت والو! قولو شنو كاين..
لبنى:فاش قاليك ولدي بللي بغى يتزوج بيك وتشاور معاك علاش خليتيه معلق؟ فالاخر مشيتي لواحد اخر..
نوميديا:”شافت فيه” امتى جيتي عندي ؟ ماعقلتش
رضى:”توتر” شحاال هاادي…بغيتي تنكري
نوميديا:شنو غاننكر؟ قول فوقاش!
لبنى:بغيتي تنكري؟ راه ماشي معانا أبنتي
نوميديا:شوفي أ عمتي عمر ولدك جا وهضر ليا على شي زواج! وحتى كون قالها كون رفضت مع احتراماتي ليك هو زايد عليا بعام باقي كايقرا! مزال ساكن معاك كيفاش بغيتيه يكون هاد المستقبل ” شدات فيديها” مانلقاش بحالك تكون عكوزتي ولكن رضى يستاهل وحدة حسن مني تكون صغر منو “بمزح” حتى الى شرف هو تلقايها باقي صغيرة! ماشي قدها قدو خاص لي يقابلهم بزوج..سمحي ليا اعمتي ولكن ماشي بيدي راك عارفة كبرنا خوت! حاسباه خويا ونتي فمقام ماما! مافيها باس تدوزيها لينا هاد المرة..
لبنى:” خنزرات فولدها الغضب تلاشى هداات ورطاابت” مديريهاش مني قلة الصواب راك عارفة غير مع معزتك..
نوميديا:كوني هانية راك غالية اش بان ليك فشي كاس دأتاي؟
لبنى:”حشمانة” مانردهاش فوجهك
نوميديا:مرحبا بيك طلعي..
غمزات مها وطلعو ورضى قال لمو راه غادي وقلب الدورة…تبعاتهم سعاد كاتنهد بارتياح! عرفاتها الإنسانة المناسبة لولد ختها..حكيمة وصبورة وراقية فكلامها عمر تجبد العيب..مع عكوزة بحال نجاة.. خاصها عروسة بحال نوميديا..
طلوع والنزول..جمع من هنا وهنا عرض هادا وعنداك تنسى هاداك..جيب طيابة جيب الكوافورة..دير القاعة فرش بيت ضياف…كاع هاد الاجواء ديال التمارة عاشوهم ولكن تمارة بحلاوتها…وهما غايزوجو بنتهم الوحيدة…الدار عامرة..هالعمات ها الخالات..والعموم والخوال بولادهم وتريكتهم…لي بات تما بات ولي عندو الامكانيات شد اوتيل تكرفصو نيت..وجدو فين تجلس العروسة والعريس والهداية لي جاب محطوطين تما..اشمنك يا جلالب صبابط صيكان..تيليفون اخر مكاين وزيد وزيد بلا الحلويات والشكلاط…لالة نجاة ما عرضات غير لي مقربين ليها كاين لي جا وكاين لي لا..الموسيقى مطلوقة…وعينيهم مليوحة للباب كايستناو امتى تخرج العروسة..
فاطمة:”همسات لبنتها” سيري عندهم شوفي شكيديرو..
لمياء:”كاتلعب فتيلي ممسوقاش للبشر” اش انمشي ندير تما فف ياله دخل لعريس انتزاحم معاهم؟
فاطمة:”ليعاتها بلا ما تبين” يخليها تريكة والدة..ناس كايفطنو ونتوما كاتكلخو..
لمياء:”بدون اهتمام”
داخل غرفة العروس جالسة على سرير وحداها كوافورة كاتزيد اخر اللمسات..كي البدر المنور..والريح الهادئ جالسة حادرة راسها وجها طايح عليه سر..بتكشيطة فالذهبي ومشيطة بسيطة..جات مع شعرها لي كل خصلة ملوية وحدها ..وهو جالس قبالتها فالكرسي ما هزش فيها راس..بحضور نسيبتو ومو لي واقفة..تقول هي مولات دار متولة وشديدة..اتعطى ليها صغر من عمرها..
الكوافورة:”وقفات” صافي ساليت…تخرجوها دبا؟
نجاة:”ياله غاتهضر سهام سبقاتها” اه غانخرجو دبا معتصم.اجي قرب اولدي شد فيد مرتك! باش تخرجو..
معتصم:”توجه ليها بهدوء ومد يديه ليها بيد صغيرة كاترعد حطات يديها وسط كفه وهو زير عليها” احمم نخرجو؟؟
سهام:زيد اولدي..
صوت الموسيقى ازداد بعدما خرجات نجاة..واشارت لبنتها “نهلة” لي واقفة جنب البنت لي مكلفة بالاغاني ومشات تتزرب وقفات حدا خوها شدات فيه..والانضار توجهات ليهم..جايين بشوية لا تعكل العروسة فالتكشيطة..مواتيين..واخا هي طويلة ولكن واصلة لحد كتفو لانه اطول منها..عيون اعجاب!حسد!غيرة! والنظرات تختلف جلسو فمكانهم..تقريبا غير النساء لي موجودين مع اخ العروسة واخ العريس فقط! اما رجال فطبقة تحتية الشيء لي خلا نجاة تتنفرز..
نجاة:”بابتسامة صفراء وقفات جنب بنتها” انا مافهمتش هاد الخطبة دوالو اويلي غاناكل جنابي بالفقصة فين ولاد خويا يحضرو لولد عمتهم كيما حضر ليهم…
نهلة:”بهدوء تأفأفات” ماما ماتبدايش تاني كل بلاصة وتقاليد ديالها ما فيها باس
نجاة: قالك مافيها باس! وانا لاش جاراهم ورايا من مراكش..باش فالاخر مايحضروش ليه
نهلة:خلي هاد الخطابة دوز على خير! العرس وديري لي عجبك…ماتجبديش العيب فدار ناس
نجاة:يعطيك غبارة..عمرك تفهميني!
نهلة: شكون يقد عليك اصلا..
نجاة:”تبعات العين لعز الدين” شوفي شوفي ها هواك خوها! حضي راسك لا يلصق فيك باراكة غفقصة خوك..
نهلة: “رمات عليه العين وجمعاتها”مالي غير انا لي هنا؟
نجاة: بوحدك هنا لي طايح عليك سر.
نهلة:”بسخرية” اسبحان الله..
كانت واقفة كاتشوف فالاجواء…عاجبها الحال مقوصة فمها المنفوخ دازت على كلشي بعويناتها..ومرة مرة عينيها كايهربو ليه..عندو.هيبة فشكل وذات كاريزما خطيرة..وهو من نوع لي ما صحيح ما رقيق ومهلي فراسو من شباب اليوم..حتى لمحات عينيه لي كل شوية كايتوجهو لواحد جيهة دورات عينيها لي فين كايشوف..تالقات إسراء مع بنت من عائلتهم.. عوجات فمها كاتبرݣݣ فديك البنت حساب ليها كايشوف فيها حيت جمالا حسن من إسراء!.تنهدات بملل وتحركات باغا تمشي عند إسراؤ..ماعرفاتش علاش ولكن باغا تلفت الانتباه ديالو بطريقة لا إرادية..ياله تحركات وهي تشدها مها..
نجاة:”بهمس” فين غادة تركني..
نهلة:وامامااا طلقييي مني خطابة خويا زعما..
نجاة:قلت لمك تركني شوفي لالاياتك جالسين متبتين..
نهلة:”كاتفلت يديها وهي ممفاكاش” واماما بيت نمشي عند إسراء،،
نجاة:والله ثم والله وتغبري من عيني..
نهلة:واصافي بيت هي توريني الحمام..
نجاة:”طلقاتها كاتحذرها بعينيها”
مشات عند إسراء مفقوصة..حاسة براسها درية صغيرة وهي فالعشرينيات من عمرها…وقفات حدا إكرام كاتعبر فديك البنت لي معاها..زعورية والفسورية..طلات بنص عين لقاتو باقي كايشوف ديك جيهة…وشوشات لإسراء
نهلة:بيت نمشي الحمام..
إسراء: “بتاسمات ليها” واخا أحبيبة أجي معايا..
سبقاتها وهي تتبعها شافت فيه لقاتو متبع ليهم شوفة وخنزرات فيه..بإستغراب هز حواجبه باش تحذر عينيها…ماتفاكاتش عاد خرجاتهم فيه تا قاطعها صوت إسراء
إسراء:نااهلة أجي من هناا…
نهلة:اوك..
تبعاتها وهبطو من السطح لي فيه القاعة لطبقة تحتية ودخلاتها للحمام..توجهات لمرايا وهزات صاكها هزات البونج كاتثبت ماكياجها..وتعمق العكر..
نهلة:إسراء نسولك ماتفهميش غلط..
إسراء: ههه ويلي خودي راحتك..
نهلة:”ماراضياش” ولد عمك مزوج؟
إكرام:”استغراب” تت علاش؟
نهلة:”خرجات عينيها” هي سولت شفتو كايشوف فديك زعرة..
إسراء:شمن زعرة؟
نهلة:لي كانت واقفة حداك..
إسراء:”حركات راسها بصدمة” نجلاء؟ اهيا ناري مايمكنش..
نهلة:”أكدات ليها بعينيها” اييه..
إسراء:”ميلات شفايفها” ماسوقيش فيه اصلا ساليتي نطلعو؟!
نهلة:ياب..
يديها عراقت وهي باغا تبعدها من يدو وهو جالس ببرود..ممسوقش حرارتها رتافعات..هاد الاجواء كايتروها وزايد ليها هو لي بارك على يديها..راجلها نعم! وهادي خطبتهم لكن بوجود اخوها وهو شاد يديها وكل دقيقة يهضر فودنيها ببرود متعمد.. حشمات!..
…:”قرب لودنيها” مالكي كاترعدي بحال الفلوس العريان كايقتلو فيك؟!
نوميديا:”الصمت”
……:”ضحك بلا مايبين” واتعاملي معانا ورينا سنيك؟ مزوجينك بزز اختي؟
نوميديا:”جاتها ضحكة مع ترعيدة”
“بالكشايف طلعوه يتصور مع بنته..غير دخل وهو يلمحو … تفكر الفقصة لي كان مركب فيه وعدد القمعات لي خدا من عندو.. نوميديا بتاسمات ملي شافت باها بحركة غير متوقعة منها قرب لحنكها وباسها كايفقص بشوفاته النسيب لي جمد فحالة صدمة..بادلو نظرة بروود طلع ليه المود حس براسو نااشط ودار إنجاااز”
كل واحد كيفاش تربى وكل واحد وتربيته..الى حللنا تصرفو غانلقاو ان زوج قبل زوجته..وهو عندو عادي لكن من جهة أخرى التصرف لي دار عيب..حيت كان مقصود اقدام نسيبو ويوقع لي يوقع كاتبقى هاديك بنته اللي زواجها غير هيين بنسبة ليه..لو لقات كيفاش تحفر الارض تخشى فيها..بكثرة الكسوف والخجل..عينيها دمعو..اما هو حبس ضحكته..وابتسم بالجنب غير مبالي التصرف المستهتر لي صدر منو..ياله غايرجع بحالو وهي تشدو سهام كاطلب فيه بعينيها..
محمد:”مشى جلس جنب بنته كانفث النار من نيفه ونطق بزز وهو كايقبل رأسها ولي مكلفة بالتصويرة كاتلتاقط صور” مبروك عليك أبنتي الله يكمل عليك بالخير..
نوميديا:”حشمانة ولكن ماتقدرش ماتجاوش نطقات بخفوت ووجنتيها حمرين” أمين…
معتصم:”شافو نايض وهو يوقف كايضحك مبين سنيه” ما تباركش ليا انسيبي؟!!
محمد:”رجع شاف فسهام لي كاتوسل ليه بعينيها ما حس غير بتعنيقة من عند نسيبو طبطب على ظهرو وقال” مبرووك مبرووك بصحتك غفلتيني..
معتصم:”ضحك كثر ناشط وبصبيانية نطق” وايلي مابيناتناش اعمي..
لتافت بزربة هابط بحالو طالع ليه دم من قلة أدب الشخص لي أمنوا على بنته..اما هو بلا إكتراث جلس جنب عروسته..وهي براسها ماعجبهاش تصرفوا!..ولو أنثى خجولة ولكن فيها جانب صارم..
نوميديا:”بهدوء صارم” كانتمنى التصرف لي درتي قبيلة ماتعاودش..
معتصم:”فجأة عقد حواجبه بحدة” مالي اش درت بالسلامة؟
نوميديا:”مابغاتش تزيد معاه” راك عارف شنو درتي..
معتصم:لا معاارفش؟؛ هادشي حيت بست مرتي؟؟!!
نوميديا:”خافت يسمعوهم” صافي ما قلت والو..
قلب عينه بلا حول..ماحملش تردو غالط..من الاول كايشوفها ديك الانسانة الخجولة وقليلة الكلام ضنها بشخصية ضعيفة..وباغي يفرض سيطرته عليها باش يحس بروجلته أكثر..لا يخطر على باله ان الخجل لا علاقة له بالضعف..ولكل أنثى مصدر قوة وشخصيتها الخاصة..ضحك بحدود وكلشي عندها بحدود انسانة داخلة سوق راسها نعم!..لكن مكاتحملش التصرفات الصبيانية..ذاكرتها رجعات نهار سولاتها مها!
🔙🔙🔙🔙🔙
سهام:”شافتها ساكتة” شنو قلتي؟!
نوميديا: لو كنت انا هاديك…لا ما كنتش نقبل!
سهام:”بإستغراب”مافهمتش؟
نوميديا:عرفتي..الى شديتي كاس وهرستيه..تقدري تجمعيه بسكتوش! ويتلصق حتى الى حطيتي فيه الما مغاديش يتسرب! ولكن عمرو يرجع كي كان..فاش كايولي اي واحد فهاد دنيا بواحد شخصية ماشي ديالو..بل كايشوف راسو فشخصية اخرى..كايسكت ويتصنت ويفكر هو مكتارث أنه ما بيده حيلة نهار لول فاش حطيت مفتاح تحكم فيديهم! مبقاش من حقي نحيدو منهم..حيت كانشوف راسي انسانة مولفة تسيير..فبهاد شخصية لي وليت فيها سوارتي فيديهم والقرار ليهم..وانا العبدة لي كانطيعهم ولو كنت ديك الانسانة لي بغيت كنت غانكون وحدة كاتلقى القمع على توالي ونولي بحال ديك العصفور لي شادينه فقفص حديدي ليه اشواك كل ما قرب من النافذة كاتدخل فيه شوكة..اللهم العمش ولا العما..
سهام:”شي فهماتو شي لا” واش نتي قابلة ولالا
نوميديا: “قبلات راسها بهدوء” ماتشطنينش راسك بيا قادة براسي بابا عارف مصلاحتي حسن مني اماما
……عــودة………
“داك الوقت بظبط كانت باغا غير تخرج شنو عندها فخاطرها غير مكترثة بكلماتها ربما..هي عارفة ان أمها مغاديش تفهمها شنو قصدات ولكن كاتشوف فيها الملجئ الوحيد لي عندها فوسط وحدتها…غمضات عينيها وفتحاتها مبتاسمة راضية بقدر الله..”
الخطبة دازت كما يرام…ايام غادة وايام جاية الضياف مشاو بحالهم وعائلة العريس ايضا..الزفاف لم يبقى له الا القليل مشطونين كايوجدو..ويضربو الف حساب وحساب اما في مراكش الحمراء بالظبط فمنزل السيد عبد الوهاب .. جالسة الام كاتخمم ولو مكانش هادشي برضاها ماتبغيش تكحل وجهها مع ناس..شوية ناضت كاتنهد وطلات من الدروج كاتعيط..
نجاة:معتتتصممم موووعتااصيم اهباااط نقوولك..
معتصم:”هبط بشوية عليه شاد معاها ضد وشاف فيها بجدية” نعام..
نجاة:دخل بيت نهضر معاك..
معتصم:تت خلي لمنبعد عشراني كايستناوني..
نجاة:دخل هي خمسة دقايق مالك معكس على ود عرسك!!
معتصم:”غير سمع هاكاك دخل سابقها” قوليها من الاول! شنو محتاجة شي لعبة اولا..
نجاة:”مفقوصة بوحدها” باغا نعرف شنو ناويين ديرو انا باقي مافهمت والو..
معتصم:”بهداوة ربع يديه” بشوية لا يطرطق ليك شي عرق فراس قبل عرسي..سقسي حاجة حاجة وانا نجاوبك..
نجاة:”قلبات وجهها” لي بغيت نفهم بين مراكش والحسمية 10 تالسوايع وربع ساعة!!كيغانديرو ليها اخويا نركبو العروسة! خاصنا نهار كامل نص نهار نمشيو فيه نص نهار نجيو فيه ها هي 20 ساعة..شنو نديرو عرس هنا فساعة وعرس لهيه ساعة ولا كيفاش..
معتصم:ضربي الحساب غير فراسك آ أستاذة..غانديرو عرس تما! غانحضرو ليه “هز صباعو” خمسة بينا وزوج صحابي و..
نجاة:”ضربات ركابيها مقااطعااه” ياااك احنيني يااك يااك اوليدييي…حنا غير حشمتي وعرضتينا ويلي ويلي باغي يحططني بوجهيي قدام خوتي وعائلتي وناااسي يضحكو عليااا يقوولووو ماعندهااا باااس بزاااف عليها هاد ريفية لي بات تديك ليا وعيني محلولين.
معتصم:”ناض مخيخ” عرفتي شنو نتي ماشي ديال الهضرة غانقلب ساعة بخرااا منهااا نيييت ديري عقلك وتعرفي اش كاتخرجي من فمك وا مزيانة نيت انا لي مضسركم..
نجاة:”تابعاه” اجيي لهنااا باااقي ما كملت كلاامي…
معتصم:”الصمت ممسوقش ليها”
نجاة:مععتتتصم اجيبيي هييي اجيييييييي لهناااااا
“غوتات تا شداتها سخفة وخرجات نهلة كاتجري من بيتها مخلوعة”
نهلة: ويلي اماما مالكي..
نجاة:”طاحت الارض سخفاانة ودموع خارجين من جنب عينيها” فقصني فقصني مغايتهنا تا يصيفطني…
نهلة:”جابت ليها تشرب ويديها كايترعدو” صافي صافي هاكي شربي كاع ماتديها فيه راك عارفاه هاكا داير..
نجاة:”قلبها مقهور من جيهته وفلحظة غضب نطقات” سير الله يلݣيها ليه قرب يخرج ليا قلبي بغيت والله يسلط عليه شي مصيبة..
نهلة:نعلي شيطان اش هاد دعاوي نوضي نوضي بشوية نجيب نعبر ليك طونسيو..
نجاة:”ناضت مهدودة” خليني خليني باغا غير نعس ونرتاح..
“خرج معصب..اعدى حاجة عندو هو شي واحد يرفع صوتو عليه..ولو كانت أمه..مغنان وطايش مكايفرق بين الصح والغلط..كلامه هو لي يكون متسرع وزلة لسانه ديما ديرها بيه..مافكرش فامو وبللي فيها سكر وطونسيو…راسو قساح وعلى ما يبدو تا قلبه بدا يدير نفس الشيء..سايگ موطور خوه مع واحد ضورة حاطين تما البوليس وسط الطريق سي لعيبات صفرين مع كان جاي بسرعة جاوه على غفلة..ما جا فين يستوعب ويقلب دورة كان دخل فيهم ونقز بيه الموطور وتقلب طاح على يدو طيحة اكثر من خايبة ماقدرش يتحمل كمية الألم وأغمي عليه…”
“كايحل فعينيه كايشوف غير ضبابة..راسو ويديه عاطيين ليه صداع رهييب..كمش عينيه بقوة وعاود حلهم كاينهج كأنه كان فبير عميق..ركز نظراته على السقف كايلتاقط أنفاسه والدنيا كادور بيه.. هز يدو ثانية لي فيها سيروم معلق..وحطها على تانية حس بشي حاجة مغطياها ببطء حول نظراته ليها..لقاها مجبرة..عض على شفايفه زام فمو بالالم..واستوعب الأحداث المرتطمة لي وقعات ليه دقائق دخلات المرمضة باش تتطمن عليه لقاته فايق . .”
الممرضة:على سلامتك اسيدي باش كاتحس؟
معتصم:”زفر” اففف الصداع..
الممرضة:”بأسف” ضربة كانت قاسحة شوية..ويدك تهرسات للاسف..بنسبة للالم غانخبر الطبيب باش يشوف ليك شي مهدأ يناسبك..
معتصم:”بصعوبة” الواليدة..
الممرضة:كانضن سيدة لي راهي برا..خبروها فاش هزاتك الاسعاف..
معتصم؛”حرك راسو فصمت”
“خرجات الممرضة منادية على الطبيب اللي لبى نداء..بما ان واليديه نقلوه لاكلينيك..الفلوس دير طريق وسط البحر…اما المسكين راه شاد صف كايتألم فصمت بما يسمى مستشفى الدولة..فين الحقوق ديالو؟ صبيطار فيها زوج اطباء وممرضين قلال مامسوقينش الأغلبية الساحقة مستوعب هادشي منهم الواليدين ديال معتصم لي طلبو من الاسعاف يتوجه لشي كلينيك..مع تدويرة كالعادة..غير خرج طبيب وهي تدخل الام ديالو الدموع مجموعين فطرف عينيها لابسة جلابة معاها شال غير متناسق مع لونها ومخربق باينة خرجات على غفلة..!”
نجاة:ولدي حبيبي شنو طراالييك…اوليديي.. “كاتبوس فراسه وتعاود”
معتصم:بيخير بيخير امي..
نجاة:”بقلب ام محروق” شنو كايضررك تجييي فياااا ومااتجيي فيييك احح على كبدتيي “كاتشهق وتعاود” نتاا ماشي دهاادشيي
معتصم:”ضرو راسو” صافي الواليدة راني بيخير..كسيدة ودازت..
نجاة:”دموعها مابغاوش يتحبسو” علاش مكاتردش االبال الطريق..عرفتي فاش سقت الخبار قلبي طاح لرجليي فيااا انااا وما تجي فيك..
معتصم:”كايكره يشوفها كاتبكي” الواليدة ولا دبا ماشي هاكا..علاش كاتبكي ما وقع والو صافي..
نجاة:”كاتحاول تمسحهم بكمها” لا لا مكانبكيش برزطتك ياك..
معتصم:افف لا الواليدة غير ماتبكيش..جا الواليد؟
نجاة:”حركات راسها” اه راه برا هو ونهلة..
معتصم:”حرك راسو” مزيان..
نجاة:”ضمات وجهو وباست جبهته بحنان” نعس احبيبي ورتاح..
معتصم:تت خاصني نخرج..
نجاة:”عاودات باسب جبهته” جلس غير هاد نهار دير ليا خاطري هالعار اوليدي..
معتصم:”مابغاش يخسر ليها” واخا تقدري تجيبي ليا تيليفوني؟
نجاة؛”حركات راسها” نجيبو ليك..
“خرجات تجيب ليه تيليفون..وتشوف فين حطوه ليه..وهي تلاقى مع عاصم داخل غير شافتو مشات عندو”
نجاة:فين كنتي؟
عاصم:جبت ليه شي حوايج عاد جيت..فايق؟
نجاة:”بقلق” اه يدها عاطياه صداع..
عاصم:اندخل نشوفو..
نجاة:سير الله يرضي عليك.
عاصم:”باس ليها راسها” صافي الواليدة سيري ترتاحي انا نبقى معاه فين هي نهلة؟
نجاة:”دورات عينيها على المكان” عاد كانت هنا هي وباها ما عرفت فين مشاو بلا بيا
“مشات كاتسوط وخلاته..دخل عند خوه لقاه كايخسر سيفته بسبب الألم سد الباب وملامح الاسف على وجهه..ومشا عندو جلس حداه”
عاصم:شوية؟
معتصم:”حرك راسو” هاد اليد مبرزطاني..
عاصم:دايرها راسك فاش كنتي كاتفكر؟
معتصم:”خنزر فيه” كنت نخمم فيك؟ انا لول لي كاندير كسيدة…حادثة تكتابت
عاصم:”عارف خاطرو ضيق” اوا صافي سمحلينا..شي حوايج جبتهم فاش تخرج باش تبدل لي كنتي لابس توسخو بدم!
معتصم:”حرك راسو ثواني عاد هدر بمكر”علمتي نسيب؟
عاصم:”شاف فيه” علاش غا نعلمو..
معتصم:”بابتسامة” راجل بنتو داير كسيدة ماشي حشومة مايجيش..وقولي يجيب معاه مرتي..
عاصم:”رفع فيه حاجبه” لا لا دبا واش من نيتك؟ مرتك وهادي زوينة تاني..
معتصم:مرتي بزز عليك..صافي لي عندي قلتو تقدر تخرج برا من فضلك…
عاصم:”بقلة حيلة” دير عقلك الله يرضي عليك..
معتصم:”قلب وجهو الشرجم ممسوقش”
“في قلب الريف..بظبط منزل السودور كيما مسميين عليه..كان ياله داخل من الخدمة وجلس يتغدا قدامو جالسين.. نوميديا و سهام..مرة مرة كايتبادلو أطراف الحديث..صونا ليه تيليفون تأفأف ومسح يدو عاد جاوب”
محمد:”الو..الحمد الله اولدي ونتوما كي داير الحال تما..علاش شنو واقع!…مسكين يا كما شي حاجة خطيرة…تهرس من يديه؟..واخا الله يرضي عليك. “بزز منو” بلغ ليه سلامي قوليه الله يشافيك صافي بسلامة تهلا.”
“حط تيليفون بنترة..حاط يدو على فمو كايخمم..وهما متبعينو بأعين قلقة..كان عادي فجأة تقلب..بتردد كبير تكلمات سهام مستجيبة لفضولها”
سهام:ياك لباس شكون دار كسيدة؟
محمد:”سكت مدة” نسيبك..
سهام:”شافت فبنتها وحطات يديها على فمها” اويلي ياكما شي كسيدة خايبة..
محمد:قالك اسيدي تهرس من يدو!
سهام:لا حول ولا قوه الا بالله مسكين..ما عرفت كي جرا ليه..
محمد:”تفركع” كاتسوليني انا واش كنت معاه ولا كنت حداه؟؟ ولاد اليوم كايطيرو ها هو جابها في راسو من نهار عرفناهم وحنا فالمشاكيل ينعلها نسوبية..
سهام:”عقدات حواجبها” تهدن شوية! شنو درت ليك وسيد مالو دايرها بالعاني كسيدة وكتابت..
محمد:ايه ايه كتابت.. ما عرفناه كاان مبووق ولا سكرااان… انا تبعت رايكم ها نتوما فين وصلتونا..
سهام:نعل شيطان اسي محمد! الولد باينة فيه مامبليش لا تتشفى راه عندك ولادك؛وكسيدة اي واحد تقدر توقع ليه…
محمد:هاني سااكت الآلة..
سهام:”بخوف وتردد من الجواب” خاص نمشيو نشوفوه..راه عاقدين ولا راجل بنتنا!
محمد:الى بغييتيي تمشي هااا طريق انا مغادي فين؛
سهام:”حطات يديها على جبهتها” بغيتي تحاشمنا مع ناس! راه ضروري نطلو عليه..
محمد:”مسح وجهو تكرارا ومرارا” أستغفر الله أستغفر الله…قولي لداك ولدك فالفجر يكون هنا..
سهام:داك ولدك؟..اوا واخ اسيدي حنا نديرو غير الصواب ونجيو بحالنا..
محمد:ياكما حساب ليك راك غادة ايت قمرة ولا بني بوعياش؟ راه عشرة دسوايع والصرف الآلة..
سهام:ما عندنا ما نديرو المكتوب مامنو هروب..
محمد:”ناض” ضبرو راسكم..غير ما بغيت نتحاشم اما انا كنت حالف لا صطمت تما!
سهام:”خلاتو دخل البيت وشافت فبنتها” شي نهار يوقف لي قلبي بالفقصة هاد باك..
نوميديا:”غير كاتشوف بعينيها” اوا الصبر..
سهام:اييه صبر كايضبر يا ودي! عندك نمرة دعكوزتك؟
نوميديا:”حركات راسها” لا..ولكن عندي نمرة “ماعرفت شنو تقول” اللوسة زعما نهلة!
سهام:اوا واخ شوفي..غا تصوني ليها قولي ليها دوز ليك عكوزتك ديري صوابك معاها ودوزيها ليا..
نوميديا:بلاش والله..
سهام:”حمرات فيها” كوني تسمعي ياله نوضي..
“مشات لبيتها..وحيدات تيليفون من شارج..وقلبات على نمرتها كانت قيداتها ديك المرة فاش سالات الخطبة..مرة مرة كانت كاتسول فيها..دوزات رقمها…وهضرات معاها وهي حشمانة..مموالفاش تهدر مع العائلة..دوزات ليها نجاة لي جوابها بالعبار وكاتهدر بنبرة جافة خلات نوميديا ما ترتاحش وما تطولش مكالمتها معاها..دوزاتها لمها كذلك”
سهام:واخا اختي بسلامة..
نوميديا:شنو كانت تقول..؟
سهام:غير عادي وصافي..بيني وبينك المرا مصااوبة تبارك الله باينة فيها ضريفة ومتفهمة..قالت ليا بلا ما تعذبو راسكم غير صونيتو بحالا جيتو.مشاء الله عليها الله يخليها لوليداتها..
نوميديا:”بقات معجبة وخطبات راسها ؛واقيلا غير انا لي ما فهمتهاش مزيان؛” اه اوااخا
“مكانش فنيته يمشي نهائيا..في نفس الوقت ما يقدرش يأمن عليهم بوحدهم ولو معاهم عز الدين..ما رتاحش لدوك ناس وسلام..غير صلاو الفجر شدو طريق..دازو ساعات وساعات كل مرة يوقفو يستارحو..سهام ما قدات على طريق معدتها خواتها..تكرفسو بالمزيان وما شافو لائحة لي فيها مراكش حتى عضامهم تفصلو..وقف حدا واحد المطعم بان ليه تما ونزلو يتغداو”
سهام:”مقادرة تتحرك” الله ظهري حاسة بيه تهرس!
نوميديا:”تابعاها حاسة بتصفار فودنيها” غير مع الجلوس وصافي..
عز الدين:”دور عينه على المكان” سيرو شدو شي طابلة انا نمشي نشوف شنو عندهم هنا!
محمد:”عاقد حواجبه شاف فيه” زيد نمشي معاك
“مشاو وهما شدو طابلة فيها ربعة دالكراسا وجلسو..مدورين عينيهم بفضول على المكان لي مختالف على لي موالفين بيه..دقائق كان جاي عز الدين عندهم..قاليهم شنو يطلبو..فالاخير تافقو على دجاج محمر مع الفريت وشلاضة..لتاحقو بيهم وجلسو كاملين تا تحط ليهم الغدا وكلاو تا شبعو وناضو”
عز الدين:الى بغيتو تمشيو الحمام راهو لهيه فاش تساليو عطيو لديك المرة زوج دراهم…
“حركو راسهم ودخلو لحمام..غسلات نوميديا وجهها حاسة بتعب رهيب..وجبدات دهنات كريم دشمس..تا لتاحقات بيها مها وخرجو شافو واحد المرا واقفة تما..خلصوها وزادو”
سهام:دبا شنو المعمول حنا كاع معارفين دار؟
عز الدين:”حط يديه على عنقه كايتجبد” هدرت مع عاصم..باقي نزيدو واحد ربع ساعة دطريق ويتلقى لينا ديك ساعة يورينا دار..
“فعلا بعد ربع ساعة والقليل من الثواني..كانو وقفو فشارع كبير بقاو كايستناو حتى بان ليهم جاي على موطور ما وقفش بل شير ليهم وتبعوه..تا وصلو للدار ونزلو عاد جا عندهم مبتاسم ببشاشة”
عاصم:”سلم عليهم” أهلا..مراكش نورات بيكم..
عز الدين:كي داير بيخير صحيحة كلشي مزيان؟.
عاصم:الحمد الله اخويا الله يحفظك! زيدو دخلو ما تبقاوش واقفين..
عاصم:بسم الله..
دخلو لداخل كايساريو عينيهم فدار..لي ديكورها بادي من الباب تا الداخل ها التصاور ها الفازات..عاد تلقات ليهم نجاة مرحبا بيهم…
نجاة:أهلا أهلا شكون جا! على سلامتكم نورتونا “كا تسلم وتعاود”
سهام:ربي يخليك اختي! ونتي كيدايرا مزيان؟
نجاة:اوا شوية نقولو الحمد الله.. “شافت فنوميديا وضحكات” عروستي نورتي فدارك التانية..
نوميديا:”بتاسمات بهدوء” شكرا اخالتي ربي يخليك…
فسحات ليهم الطريق يدخلو..وفعلا دخلو الداخل وجلسو فالصالون منباهرين بيه..مفرش على حقو وطريقو ومغربي 100٪..جلسات معاهم فالاول تسول وتضحك..فالاخير ناضت الكوزينة وخلاتهم! جالسين مع عاصم..بعد قليل دخل عبد الوهاب ونهلة معاهم معتصم..لي باين فيه التعب والمرض وبعض الكدمات على وجهه..كان عارفهم غايكونو جاو حيت علمهم عاصم بلي غايتلقى ليهم..دخلو وسلمو عليهم وجلسو..
محمد:”باغي غير يدير صواب” الحمد الله على سلامتك اولدي..
معتصم:”بتاسم بخبث عارفو محاملوش” الله يسلمك آ عمي.. نيت كنت ناوي نطلع ندوي مع مراتي..ساعة المكتوب وما يدير هي لي جات
“غمزها قدامهم وخلاهم مبهورين وسي عبد الوهاب مقسح فيه الشوفة على هاد قلة الحية لي فيه”
يتبع
التعليقات 0