العوض الجميل ❤️🩹
وردة(قربات لييه حتى ولات متكية على ركبتو ) : خالد ورا لامي خالي حذيفة مع مراتو فالتيليفوون قاليهاا (كتعيبوو )واش شفتي خالي بيمن مزوج وقاتليييه سكت سكت والله ويسمعهاا باباك حتى نحيد لييك التيليفون
بدا كيرمش وقال : بيمن مزوج هاه
وردة(هزات ايدهاا) : بواحد المتبرجة ابابا(قلبات عينيهاا )شفتهااا بعيني (قدات الزييف )انا اباباا غندير لخمار لان المتبرجات غيتشواو فجهنم
دور الحاج راسوو كيستغفر الله ومفكرش يكدبهاا لانه حفيدته الصغيرة كتجيب ليه الصغيرة والكبيرة فالدار بااش تكبر فعينييه ويتباهى بيها حيت كتسمع لهدرتوو ..نطق وفمو نااشف : كلمي لياا خالد
وردة(ناضت هازة كتاابهاا كتجري) : دااابا
مشات كطير لقات خالد فالزنقة قالتها لييه مشا برهبة توضى لبس فوقيتو ومشاا لدار جدو الطبقة الاولى لي مخلييها لحفظة القران والرقية
حط صندالتوو ودخل شاف جدو كيسبح وساهيي تشاافو وقال: زيد اخالد
دخل خالد حاني راسو شااب عندو 17 او 18 سنة ياله اللحية كتنبت لييه كلس مربع قدام الحاج كيتفتف
الحاج(بصرامة): حفظتيي
خالد: بقا ليا غير التمن ونكمل الحزب ابابا
الحاج: اييه عرض اولدي
بدا كايعرض وكل مرة يغلط يصحح لييه توقفوو وقال: هدا حفظ !
خالد(حنا راسو ): سمحلياا ابابا غدا نحفظو
الحاج: تستااهل الفلقة على هاد الحفظ
تحنا على ايدوو باسها وقال؛ اخر مرة
الحاج : مخبي عليا شي حاجة
خالد جاتو لحظة ادرااك بليي ختوو كانت قبل منوو وباينة خوات لمزيويدة لييه والى مشاا حتى كدب غيااكل شحطة تاع لكلااب، دور عينو لجيهة واحد لعصاا حداه تماا ودور وجهو جيهة جدو لي كيسبح وكيتسنااه يهدر
خالد: بابا رااه راه
الحاج(بصرامة ): دوييي
مقدرش كاع يهدر كتشدهم لخلعة قداامو ،لقا غير تيليفونو قدامو جبدوو شعلو ومدو ليه ،عارف غتنوض الروينة من ورا هادشي ولكن اللهم يفلت بجلدو صحيح
الحاج؛ اش داكشي
خالد(وراه لفيديوو ديال حذيفة وايمان ): خالي حذيفة ومراتوو
الحاج: نقص علياا هاد لحرام
نقص لموسيقى ديال الفيديو وخلااه كيشووف ويتمنظر تكمل لفيديو وقال: هادي مرتوو
خالد: اه مرتوو
الحاج: باش عرفتيها مرتوو
بقا كيدور فعينيه ويتفتف حتى نهض فييه وقال: ك كتباتها هياا
الحاج(هز لعصاا): واش غدوي ولا نمحطك هناا
طاكا بايدوو وقال: مرتوو مغنية وعارضة ولا منعرف المهييم
عقلو بغا يخرج من بلاصتو وقال: راه نحصلك كتكدب نبييتك فزييت اخالد
بدا كيسرسب لييه كتر من ختو وراه تصاورهاا وكل مرة الحاج يبعد عينيوو ويستغفر الله وراه اخر بوسط حطات كاتبة فييه انت السند انت الوطن انت العوض
الحاج: اش هادشيي اه اش هادشيي
خالد: م معارفش ابابا
الحاج: هاد لحرامة منين اصلهاا ! مبايناش فيها عربية
خالد: مغربية وسميتها ايمان
الحاج: اااه اييمان واشنو كتغني هاد ايماان
وراه لباج ديالها فيوتوب شد من عندو التيليفون ونزل علييه لقرفادة كيعطييه ولاخر كيبعد ويطلب فييه وقال: غدا ومتجي حافظ الحزب نشوويك اخالد
خالد(شاد عنقوو): غ غنحفظ والله تغنحفظ
الحاج: خرج علياا وهادشيي نسمعو فشي قنت نفنيييك سمعتيي
خالد: كون هاني
الحاج: تاااحد ميسق لخبار بلي انا عارف
خرج كيجريي والحاج شاد التيليفون وقال: مزياان تبارك الله خرجتي ليهاا نيشان ولكن بلااتي مزال متزااادش هدا لي يخرج على كلااميي وعلى طووعيي وعلى اصليي
فاليوم الأخير ليهم ف قطر اتافقو باش يخرجو لاحد الاسواق تماا يتقداو لي خاصهم
بقا لتحت من بعدما فطروو كان الجو كيشوط بالسخونية داير نظاظرو وكالس كيشرب فقهوتو وكيكميي على تصويرتو لي ولات مزلعة فلكروباات النهار اللول خدا الامر ببساطة ولكن من بعد كتر القيل والقال وتعصب وندم كاع علاش خلاها تحط لفيديو
جبد تيليفونو لقاه كيصوني بنمرة بااه قفز من بلاصتو وتردد يجااوب جاتو غريبة ومدة هادي مهضر غير فالاعيااد كيبارك بالنفخة باقي هاز من جيهتو قطع علييه الهدرة مع موو ومخلاهش فين يتنفس
طاحو افكار سلبية عليه ،يكما واقعة شي حاجة ،
جاوب فلواتسااب وقال: الو السلام عليكم
الحاج: حم وعليكم السلام بخير !
حذيفة: لبااس اباا نتا بخير ماليين الدار كلشي لبااس
الحاج: اللهم لك الحمد ..مابقيتي تسول مابقيتي تكلم
حذيفة(خرج عينوو ): باا راه نتا لي مبقيتيش كتجااوب حتى من مي منعتي علياا الهدرة معاها
الحاج: وكتهدر من عند خواتاتك معاهاا ،مناعسش على ودنيي يكما حساب لييك ضربت ف السبعين راني شرفت وهترت وليت ندخل ونخرج فالهدرة
حذيفة: حاشاا اباا الله يطول فعمرك
الحاج: مناويش تجيي ؟ ولاا درتي حياتك تماا صافيي نسيتينا
حذيفة(طفا لكارو ): بغيت غير نشد لكونجي غادي نجيي اباا سوا هاد الشهر ولا الشهر المااجي ان شاء الله
الحاج: ان شاء الله في اماان الله ، باقي مواظب على الحفظ ولاا
حذيفة: بااقيي الحمد لله
الحاج: فين وصلتيي ؟ اخر مرة كنتي ف 25 حزب
حذيفة: دابا 28
الحاج: 7 سنين حفظتي فيهاا 3 الاحزااب ؟
حذيفة: الخدمة والحياة كتلهي الله يسمح لينا
الحاج: لهاااتك نيييت ولد ختك 18 لسنة قرب يختم 40 حزب اسي حذيفة
حذيفة: الله يبارك
الحاج: ياله متنسااش مرة مرة سجل لياا شنو حفظتيي
ضحك حذيفة بلا ميبيين وقال: ان شاء الله اباا
الحاج: ايو جي خلاص مك راه مريضة
حذيفة: كون هاني اللهم يسر
قطع معاه كيضحك ورجع لكارو كيكمل فييه لاح عينو لجيهة السانسور ورجع هبطهم ورجع طلعهم فجأة كيشوف قدامو فيهاا جاية كتعوج بسبرديلة بيضااء طالعة ورجليها عريانين لابسة كسوة خضراء صيفيية بتوب باارد فيها وريدات صغار فلغوز مكيبانوش بزاف بكمايم وصدر كيتجمع بلاستييك ولكمايم منفوخيين وبيااضهاا وشهوبيتها نصعات وسط داك الخضر اكسسوارات دهبية فايدها وعنقهاا وخاتمهاا دايرة صاك بااج فكتفها ومكياج خفيف
بقدما عجباتوو جمع حجباانو مباغيش شي حد تعجبوو حيت بانت ليه كتفتن وملفتة للنظر قبل متوصل عندو وقف طافي لكارو جامع حجباانو كيشووف فبنادم يكما عينو فيهاا وقال: معامن تشاورتيي لبستي هادي
ابمان(برجاء) : مالها مستوورة ،شوف لبسها مرة وحدة نحيد غير شهوتي فيهاا ونحطهاا نلبسها غير فالداار
حذيفة: ايمان راه بقا ليا شوية تصبر غتسالييه لييا مع هاد قسوحية الراس لي فييك
ايمان: عفااك احذيفة راه لموت ديال الصصهد بقا لينا هاد النهار وبالليل شادين الطريق اصلا عفااك خليني بخاطري اعمري
حذيفة: ايماان راه متلومي غير رااسك على هاد اللبس لي كديري واش دوييت معاك ولا لا علاش مكتسمعيش هدرتي
كلسات منفخة وقالت: صافيي بلااش سير بووحدك
كلس حداها كيسووط وقال: واش غنبقاو هكا ؟ مطلبت منك والوو لبسيي حاجة مستوورة
ايمان: حذيفة راه مستورة
خرج عينو فيها وخبط ايدو مع الطبلة بقلة حيلة وقال: ياله زيد معاها ، رجليك واش مداخليينش فالسترة ايدييك عنقك
ايمان: وراه الصهد
حذيفة: بلاتي لوالدييك تشوفيي الصهد كيف دااير
ايمان: هانتا شوف والله منبقا نلبسها براا گاع داكشي لي جبت لبستو وتوسخ وكلشي سخون محسابشش لياا غايكون الصهد هكاا ..دابا هاحنا خارجيين ونتقدا ماحسن عفااك متكونش هكاا احذيفة حرام علييك
خدا منها الامر نص ساعة ديال الطلييب والغضبة والتبعكيك حتى ناض وقال فنفسو منزيدش نعكس الامور بقا نهار هنا ونمشييو
خداو طاكسي لقلب العاصمة مبهوريين بكلشي تصورات وكدير سطورياات وايدها فايدوو داير نظاظر ولكاسكيط والشمش ضاربة فييهم
رجعات التيليفون لصااكها ودخلوو لمول كبيير شربو قهوة فييه تقدااو منوو شي حاجات بسااط وخرجو تغداو براا بمأكولات محليية كيهدرو ومدوزيين نهارهم
فجأة وقفو علييهم جوج بنات من شكلهم ولبااسهم باينة اجنبييات تكلمو بالانجليزية معااها كانو فان ديالهاا طلبو منهاا صورة ورحباات وقفات دارت معاهم سيلفيي …توادعو ورجعات كلساات
من بعد لغداا مشا يجيبو دورة اخيرة فاحد الاسواق تماا كانت شادة فايدو شويية ولات كدخل تشوف شنو تماا لي تقدر تااخدو وهوا بدوروو كيكتاشف الزرابي و الجلد والقمااش اي حاجة كثير انتبااهوو فجأة عاود تااني قلب عينو جيهتها لقاهاا مع مجموعة ديال لبنات لابسين عباياات وكيهضرو بالعربية قطرييات
طلبو منها صور كل وحدة تصورات معاها بوحدهاا وهي فرحاانة انه كاين اشخااص مكتعرفهمش ولكن هوما كيعرفوها وكتعجبهم وكيفرحو ملي كيشوفوها هادشي بحد داتو كاتسد بييه شوية من فرااغ عاطفي عاشتو فطفولتها انه واخيرا كايين لي كيبغييهاا
تفرقات معاهم وتبعات حذيفة لي واقف كيتسناها ايديه فجييب كيشوف فيها وقال: گاع عباد الله تصورتي معاهم
ايمان: هههه ومتحكرش شنو ندير نجري علييهم
حذيفة: زيدي قداميي متبقايش وراياا زيدي
فعلا تمشات معاه شوية هوا وقف جنب محل تحنى يهز واحد لمجسم صغير مكتوبة فيه قطر بغا يشوف فينهاا كتبان ليه قداموو واقفة شادة التيليفون لفت انتباهو ظهرها لي مغطي بلكسوة لي دايزة فالظهر غير بالخيوط هوما لي مزيرينها من القداام كيبان شوية من ظهرها عرياان رجع داك المجسم حطوو وغادي ليهاا تعصب ديال بصح
مزال كاع موصل عندها وقفو عليهاا جوج شاب وشاابة باينين توريس حتى هوماا سمع ضحكتو وهدرتو وفرز بلي ايطاليين جمعاات معااهم وهوا اللور طلعات لييه الگنااويية، كيتسناها تساليي باش يصبنها على داك الظهر حتى كيجبد الشاب التيليفوو دايرين ايمان لوسط بلا حشمة بلا حياا كايحط يدو فظهرها وايمان كتفرنس لكاميراا منتابهاتش ومحسااتش شكون فيهم حاط ايدو واش الرااجل ولا المرا المهيم تجي زوينة فسيلفيي
مع ودعاتهم تجراات من دراعها تشهقاات ورجعها منين كانو جايين وقال: زيدي قداامي
ايمان(خلعهاا ): ماالك شنو وقع حذيفة مالك
حذيفة: زيديي قبل مندير فيك شي موصيبة نلقااك كتصوريي مع شي واحد غنشتف علييك قداامهم (بحدة) زيدي
طلق منهاا خلاهاا شادة دراعها حمر خلاها كترعد بلخلعة سبقهاا وتبعاتو ساكتة كدور فعينيهاا وهوا الخطوة ولاو فيها عشرة مبقاش تسوق واش وراه ولا خلاها فشي قنت خرج شير لطاكسي ركب لقدام وهي ورااه سخفاانة ولاو حناكها حمريين
وصلو لاوطيل وهبطات هوا خلص وتبعهاا شدو السانسور ودارت فيها مقلقة مهدرااتش حلات باب الشوومبر دخلات وخلاتو ليه محلول دخل وسدوو وقبل مطلع النفس جرهاا من دراعهاا بقوة حسات بيه تنصل من بلاصتو وقالت: اش كدير
حذيفة: هانيية عندك يشدك وااحد من ظهرك دويي هاانيية
ايمان(قلبها كيضرب خلعها): طلق منيي شكون شدنيي
حذيفة(كمش على الخيووط لي فظهرها حتى قمشهاا ) : هاد الظهر لي عرياان ماالوو (صاح فوجهها ) كيتااانباان ليييك ،ساكت لييك ،داير لييك الخااطر ،ماشي معنيتها انا مونيكة ولاا د_ميي باارد مغاديش نشنق على طاسيلتك قداام عبااد الله
ايمان: ضريتييني حذيفة طلق منيي (كدفع فييه ) طلق
طيحها على السرير جات على ظهرها وكلس على ركاابييه مجابد معااها شد ديك لكسوة قطعها من الوسط تقالت غيق_تلنيي بدات كتغوت وتبكيي خلعهاا كدفع فييه بلا متحس وهوا مكرهش يقطع ليها اللحم لي تقااس ويشتف عليها وشووف واش يبرد
خلاها بسوتيان وشوورط كتبكي دفعاتوو وناضت وهوا مزال مبردش لاح لبالييزة وبدا كيلوح فحوايجهاا وحوايجو وعروقاتو بانو فالتيشورت لزرق لي لابس
ايمان(صاحت بلغوات كترعد): واش نتاا مريييض مكتعرفش تهدر كيف بناادم علاش كدير لياا هكاا
حذيفة(جاي ليها كينهج ) : حيت انا مريض يااك ، واش محتاارمك حتااارمينيي مطالبش بزااف باش يجيي ك_لب يحط علييك اييدوو ولابسة لياا هاد لخراا شكون باغاه يشوفوو ماعيتيش من لعراا مبغيتيش تووبيي
ايمان(كتمسح دموعها وراجعة اللور ) : اجيي نتااا خنقنيي مانشوفش حتى الشمش مغطية بشعريي مبااينااش نتاا موسوس كلشي كيبان ليك كيشوف فياا شنو ندير لييك
حذيفة: غتسديي فمك وغتجي تجمعيي شرااوطك وزيدي لداار
بعدات منوو كتشهق : مجامعاش شنو غادي دير ضربنيي هادشي لي بقاا لييك
حذيفة: ملي مشتفتش علييك قام النااس راه مدرت والوو
ايمان: كون درتيهاا علااش حبستيي علاااش
حذيفة(قرب ليها مخرج عينو فيها ) : باقة كدويي
ايمان(خرجات فيه عينيهاا ) : ديما كتنكد علياا فرحتيي ديمااا كتسناني غير نغلط باش تمرضنيي ،انااا هكاا داايرة ماشي نتا لي غتبزز علياا شي حااجة
حذيفة: نعام عاوديهاا نسمع مغنبززش علييك شي حااجة ، لحد السااعة كنهضر معااك زويين مضبريش على وجهيي فهاد البلاد ا ايماان زيدي تلبسي
جرهاا من ايدهاا والشيطان دخل بينااتهمم كتغوت وهوا كتر بدات كضرب وتزلع ومشات لحوايجو حتى هي كتقطع وضربو بييهم تجرها بزعفة تزحات مع لبلاكار وهز ايدو بتهديد ليهاا
حذيفة: لبديهاا راه مغتخرجش هاد الليلة بخير
ايمان(صدرها كيطلع ويهبط كتنهج وكتشوف فايدوو ) : بغيتي ضربني احذيفة بغيتيي ضرب (ضرباتوو لصدرو باستفزاز كتغوت وشعرها تشعكك )ضربب ضرب …لسميتك راااجل ضرب
عيااو باش قدرو يوصلو لبرشلونة كان صبح الصبااح قرابة العشرة ديال الصبااح خرجو من لمطار كيتاوبو
تبعااتو لطموبيل فسكاات مامولفينوش واخة يكونو مخاصمين طبعاا زوجيين ضروري من ملح الحيااة ولكن لاول مرة الهضرة كتقطع لمدة ساعاات
ركبات جنبوو فالطموبيل من بعدما دار لبگاج فالكوفر ولحد الساعة حتى هي منفخة علييه كتسنا حزارتوو ولكن فهاديي مقفراهاا معااه
داتها عينها تسمعات صوتو فعقلهاا وحلات عينيهاا شافتو وقف حدا الدار شافت فييه داير نظاظرو كيهز فتيليفونو معرفاتو واش نيت عيط ليها ولا غير عقلها الباطني
هبطات مدكدكة باغة غير تنعس راسها غيتفركع بالشقيقة وشادها لحريق فكرشهاا تكفسات عليها من كاع لجوانب
هز لباليزات وخلا ليها الصااك بلا كلمة بلا جوج هزاتو وطلعو لدار مع حلات لباب لقات لمشيشة كدور بيهاا حطات الصاك وهزاتها
ديجا مخلية ليهاا بلاصتهاا وماكلتهاا شارية ليها واحد اللعيبة كاتعمر فيها بزاف ديال الكروكيط كاينزل ليها غير شوية فالزلافة و كلما تقادة كايعاود ينزل و مخلية ليها ليتيير بوكس ديالها تقضي فيه حاجتها وخلات ليها الطواليط محلولة حتى هي حيت معلماها حتى الطواليط
دخل بكاجها لبيت وخرج هاز لفوطة ديالو دخل لدوش مسخسخ يدوش
قادات لمشة ماكلتها ونقات بلاصتهاا و دوزات على الطواليط بالزربة ، شربات كينة ديال الرااس سمعاتو خرج من الدوش ومشات حتى هي دوشاات تحيد لعياا مشات صلاة الصبح لي فاتهاا ظلمات البييت وتكات فبلاصتهاا الصداع ضرها فرااسها كتسمع فييه فلكوزينة كيطحن شي حاجة تكات على كرشهاا دارت البانضة على عينيهاا وغمضاتهم كتقلب على النعاس
شرب العصير ولبس علييه مشا الخدمة مسخسخ ولكن شد غير 3 ايام وخاصو يمشيي
موصلش كاع جيهتهاا لبس و هز سوارتو وخرج مباشرة لخدمتو
داز وقت طويل فاقت مخنوقة وطافجة حيدات لبانضة من عينيهاا كتنهج شدات فصدرها وجبدات ايدها شعلات لفيوز حدااهاا معرفاتش مالهاا حاسة بخووف ورهبة مدة طويلة محساات بييهم من خوفها بدات كتعيط على حذيفة بالجهد حتى مجاوبهااش عاد نااضت حلات الباب لقات الظلام طااح بدات كتشعل فالضواو وراسهاا غينفااجر ودنيها كيصفرو وفيها الرعشة بحال الى شي حد خلعهاا
مشات لكوزينة شربات شحفاانة وبدات كدور عينيهاا فالدار حسو مقطوع شافت جيهة فين كيعلق السوارت مبانوش ليها مشات كتقلب على تيليفونها لقات 9 تاع الليل من لعياا طاحت كااو حيت خدات نص كينة ديال النعاس من ورا كينة ديال الراس
مشاات غسلات وجهها لي تنفخ بالنعاس توضاات ومشات صلاة لي فااتها مع كملات ادن العشا وصلاتو وبقات كالسة فوق السجادة ساهية فبلاصة وحدة كترمش والصمت ضاير بيهاا
حيدات لعباية ومشات لكوزينة نافضة عليهاا الافكار السلبيية وقالت نصالحوو ونرطب خاطرو مقدراتش على سكاتوو وخصامو لهاد الدرجة
مشات لكوزينة وجدات الصلاد لي كتعجبو جبدات لي ستييك من لفريكو خلاتهم حتى طلقو و رقداتهم فلعطرية حتى يدخل وتبدا فيهم وكلسات معندهاا كانة لوالو ولاا ضحكها ونشاطها مرتابط بحذيفة كان ناشط راه حتى هي ناشطة كان مقلق من جيهتها كتمرض وترون فخارطها
مشات بدلات عليهاا بشوميز ب بينوارو حريري وقصيير ريحات ودارت مكياج خفيف وكلسات فالطبلة كتسنااه مرة مرة تمشي طل من السرجم ولا تشوف فواتساب معاش خرج منوو تقلب السااعة لي ضربات تسعود ونص
رجعات لطبلة شادة حنكهاا كتلعب بتيليفونهاا مقابلة مع الباب
حتى وصلات لعشرة عاد سمعات الساروت كايدور ربعات ايدهاا
داخل مهدود جوج خدمات وبايت شاد الطريق مساهلاش ولكن حتى هوا عندو إلتزاماات ميقدرش يغفل عليهم
دخل عاض على فموو حط السوارت ونطق بالسلام بلا مايشوف جيهتهاا
رداتها علييه وكملات: تعطلتيي !
مجهااش الرد وعاودت نطقات : تعشا ؟
رد عليها وهوا غادي لجيهة لبييت كيحط فالتيشورت: تعشييت
خلاها بلاكة كانت جاية عندو ملي شافتو مشاا بقات واقفة فبلاصتهاا والبكيية فيهاا ولا كيتعشا بلا بيها هادي بحد ذاتها جديدة خصوصاا فحياتهم العملية وهي لي رجعات كتقرا ولا كيجمعهم غير لعشاا من غير لويكاند دابا لا عشاا لا هضرة
ضغطات على راسهاا ومشاات عندو لبييت لقاتو كيلبس فالشورط عينيه حمريين بالنعااس قربات بتوتر مدات لييه التيشورت وقالت: سمحلياا لهد
حذيفة(قاطعها) : خليني طرونكيل عفااك
ايمان(بعينين مدمعين ): غتخاصم معاياا ! مغنهضرووش كااع
حذيفة: ديريني مكااينش كملي على حياتك وخة انا غير مونيكة ولاا شي باب فحياتك
ايمان(طاحت دمعتهاا) : حذ
حذيفة(بنرفزة حط صبعو على فموو ونطق معصب): شششششت نهاري داز مزمر بلا متزيدي علياا
خرج وخلاهاا دموعهاا شلال كلساات كتنخصص فبلاصتهاا وهوا قصد بيت النعاس هز مخدة وايزار ومشا لصالون كان الصهد حل لبالكون يتبرد وطفا عليه الضو
مكانتش متخيلة الوضع غيوصل لهكا بكات حتى شبعات ونااضت حلات لباليزات كترجع لحوايج لي نقيين ولي يتصبنوو هزات الجائزة ديالها حيداتها من لبواطة وحطاتهاا حدا المجسم ديال مانكان فدهبي لي تعطا لحذيفة فلمسابقة لي ربح فيها ديال التصميم ستفات لبييت وكلسات مخدمة الطابلييت كتفرج عند بالها كاين فلبييت مبغاتش تمشي تماا حتى ينعس
كلات شوية من شكلاط تقداتو من قطر مواكلة والو من الصبااح حاسة بالسخفة ومعندهاش الشهية تاكل
ضربات الطنااش تاع الليل وناضت خرجات من لبيت مشات شعلات ضو خفيف فلكوزينة خدات كاس ديال لماا وتميرات فقط ميلات راسهاا وهي مقابلة مع الصالوون كيبان ليها شي حاجة تحركات تما شعلات الضو حتى كيبان ليهاا ناعس خدات وقتها كتشوفييه ورجعات طفات الضو ومشات لبييت لقاتو هاز لمخدة
كمداتها فقلبهاا وتكاتت فبلاصتهاا النعااس صعيب يجيها وهي ناعسة النهار كلو بقات مشعلة التلفازة كتفرج ولعقل مخطووف حلقة تديها لحلقة وغادية هكاك تنعسات والتلفازة شاعلة
دازت تلتياام ونفس الحاال كيخرج قبل متفييق ومكيرجع تال 10 ولا 11 تاع الليل كيدوش كيصليي كينعس
فاللول ميكاات وسكتات حتى تشوف شنو باغي يوصل كتحس بيه قرب كتمشي تبدل عليهاا وتلبس حوايج زوينين وترييح راسها بريحة لي كتعجبوو وتكلس حتى من الورد لي مولف يجيب ليهاا تقطع فهاد الاياام كتجمعهم غير السلاام لي كيرمي عليها من الباب ويدخل
هادشي بدا كيضرها وكايأزم نفسيتهاا لي غير على سبة والى كاع دخل بكري وهي فالصالون كيكلس بعيد عليهاا شاد تيليفونو وكل مرة واصلو مسااج طرن طرن ضراتها فراسها وحركاات غيرتها ورفعات حرارتهاا
معظم وقتها ساهية ولا باكية ولا جاتها الحاالة كتخنق وتبدا ترعد
اليوم الراابع حلات عينيهاا كترمش لقات راسها بوحدها فلفراش ولمخدة ديالو فبلاصتها يعني ناض الصباح طوا فراشو ورجعها حداهاا تغرغرو عينيهاا وجمعات النووضة دخلات لدووش بغات تغسل سنانهاا والشيتة الكهربائية عكسات ليهاا بقات كتخبط فيها مع لاڤابوو وقلبات گاع لبرودوياات لي تماا ولي كان زاج تهرس فلارض وكلسات كتبكيي وكتنهج حتى بردات وناضت كتجمع فلي تهرس ويديها كيترعدو لاحت كلشي فالسطل كتمسح نيفهاا ورجعات غسلات بشيتة عادية كتنش على عينيها باش يبردوو حتى كتسمع الدقاان و الصونييت كيتعاود
لاحت على الشورط وديباردو بينوار حريري طويل وقالت بالاسبانية: شكووون
حلات الباب حتى كيخرجوو عينييهاا بالصدمة وغوتات: ودياااان
وديان: اولاااا سينيووورا ههه (عنقاتهاا عند الباب كيغوتوو بالضحك )
فراق داام سنة ونص ماتشاوفووش مكرهوش يدخلو فبعضيااتهمم بالشوق
ايمان(كتبعد): لا متقوليهااااش ك كيفااش (رجعات عنقااتهاا)متخيليش شحال فرحتيينيي
وديان: هههههه مفاجأة هههه توحشتك اصااحبتيي
دخلاتهاا وسدات لباب وبعدات كتشوف فييها وكضحك وقالت: متبدلتييش ههههه
وديان كانت بكسيوة بيضة قصيرة من سبرديلة وشعرها لاسود ظافراه جنب وهازة باليزة صغيرة وصاك فايدها صغير
وديان: ههه اتاصلت بحذيفة مسكين لبارح وطلبت منو لادريس باش نجيي
ايمان(تبسمات فور دكر اسمو وتنهدات ): احسن حاجة درتيي …شكون جابك من المطار
وديان: جابني الشيفور ديال كريسس … لبارح بليل كنت فلوطييل
ايمان: العفريييتة هههه مقلتي والوو دخلي دخليي. ههه
جرات الشانطة كتحط فسبرديلة وقالت: وااو صرعتي ديكور الداار اصاحبتيي نيييت تليقيي مهندسة ديكوور ،التصاور وخة هكاك مكيبينوش كلشيي فن وااعر
كلسوو فالصالون مبهوورة غير كتقلب وتشوف فديكوراات وقالت: دابا صاافي غنرجع لفرنسا بلا بييك كيفاش ندير ليهاا
ايمان: عرفتي وخة هكاك اسبانياا مفوجة اختي باريس جابت ليا الخنقة هههه
وديان: ايوى ايوى جمعيي رااسك لجالية ديال اسبانيا تاهي ولات كتهدر
ايمان: قالتها لجالية ديال ما كغوند ميغ (ماركة ديال القهوة )
وديان(ضرباتها لكتفها كضحك ): حسيت بحال الى تحشاات لياا
ايمان(ضحكات) : ههههه وراه نيييت تحشاات لييك ههه ..فطرتيي ؟
وديان: بلااتيي شوفي شنو جبت ليك وشنو سيفطات ليك ماما زعمة لكادو ههه
ايمان(تفاجئات): شنو سيفطات ههه
هزات لفاليز فوق الطبلة حلاتهاا كلهاا وبدات كتجبد فالصاشيات وتحط
وديان(شمات واحد لميكة ): هاديي العطريية حتى انا جبتها معاياا عرفتي وااعرة ومعاهم قهوة معطرة
هزاتها كتشم فييهاا بواحد الشهوة والعشق وقالت: الله شحال زويينة،الله اعطيها الخير
خدات ليهاا كندورة مغربيية الشهيرة بجوج تاع اللواان وبليغة سوسية مع عكسة حمراء ملونة او كيف كيقولو ليهاا (القتيب) كيكونو فييها الهدوب
وكحل مدكوك بالايد بلدي مع مكيحلة فيها مرااية
هدشي بسييط ولكن اتر فيهاا بزاااف كتشم وتبكيي وتمسسح وضحك تخلطو عليها الاحاسيس وهي كتشوف بواطة فيها سلوو و الحلوة ديال اللوز
ايمان : شكراا بزااف والله (بدات كتبكيي )هء الله احفضهاا ويشد فصحيحتها لي تفكراتني
وديان(مسحات ليها عينيها ) : تانتيي اصاحبتيي غير دوقاتك ههه شوات ليك حوليي
ايمان: قيمة هادشي كتر والله
وديان: وليتي غير كدمعي يكماا زبلتيها بشي كريشة
ايمان(حركات راسها بلاا كتمسح فعينيها ) : زمرت سيري سيري
وديان: شوفي شنو جبت لييك ههه شوفي هدا راه تفصل وتخييط
بدات كتحل كان جبادور سروال وجيلي فلبيض بسفيفة خضرااء وفوقو جبادور محلول وهابط حتى لتحت مع مجدول فنفس اللون ناضت كتقيس وتمسح فنيفهاا عينيها تنفخو بلبكاا
ايمان: واا واعر والله
وديان: حتى انا خيطت ليا واحد فلكحل
ايمان: هدا نخرجو بييه
وديان: راه بحال جلابة يعطيك لمسخ راه فيه القب راه جلابة محلولة
عنقاتهاا كتشكر فيها وقالت: شكراا ودياان هدشي بزااف عدبتي رااسك
وديان: هانياا احبيي
ايمان: داباا لكادو دياليي ههه جبتو ليك من قطر
مشات لبيت جابت لباك لي خدات ليهاا فييه عطر عربي فااخر و عباية وبعض المواد المحليية
فرحو بالهدايا وقالت: بلاتي راه مااانسييتش عزيزي هههه
جبدات جبادور بسروال كلوو خزي وفيه عقاد فلقداام بكول طالع
ضحكات ايمان وقالت: بغيتي الرضى ههههه
وديان(كلسات كضحك): باش ميجريش علياا شريت السلاام هههه
ضحكاات ايمان وحطات كلشي ودات العطرية ولحلوة لكوزينة نساتها فهمها شويية دخلو يعمرو اتااي ويحطوو الحلولة وكويس ديال اتااي ويجمعو علييه
هزات تيليفونها تشوف واش صوناا والوو …اليوم الجمعة عارفاه كيكون عندو بووز كيجي يصليي ويرجع لخدمتوو ومزال مجاا هدا وقتوو
مشاو لصالوون لابسة لكندورة الصيفية لي جابت ليهاا وديان هضرة تجبد هضرة حتى نطقات وديان وقالت: كنبغي ندخل سوق راسي ولكن وجهك مكيبشرش …واش مازال مخاصميين
ايمان(كدور فكاسها شادة حنكها ): مزاال وخة طلبت السماحة مازال قالب علياا
وديان: والبارح هضر معاياا عاادي ،هانتي شوفيي
عطاتها تقراا لكونڤيرساسيون بيناتهم
وديان: السلاام خوياا حذيفة بخير عفااك انا جيت لبرشلونة ياله كلست وبغيت نفاجئ ايماان متقوليها والو عطيني غير لادريس ديال الداار
حذيفة: سلام ودييان مرحباا اختيي انا غنسيفطها لييك غدا نيت مغنكونش فالدار تونسيهاا
ايمان: كيفاش مغنكونش …فين غيكوون
وديان: مقاليش
جبدات تيليفونها وصونات لييه وديان كتشرب فكاسها وقالت: تحلوني علييه فينك احبيبيي نساي التخاصيمة
ايمان(كتصنت لتيليفون كيصوني حتى يتقطع وترجع تصونيي ) : مكيجاوبش ،مامفاكاش حتى يجااوب ياله
وديان: الزوااج مصيبة ههه
ايمان: سكتيي دابا يحل على غفلة
بقات كدور فكاسها تخرجات عينيهاا وقالت: الوو حذيفة …الوو …حذيفة
جاها صوت غير صوتوو ولي طيح ليهاا النقطة صوت بنت :اولاا
شافت فتيليفونها باستغرااب كتاكد واش ليه كتعييط ياله بغات ترجعو لودنهاا تقطع لخط
ايمان(برعشة): جاوباتني بنت
وديان وحل ليهاا اتااي وقالت: ويليي كح كح عاودي صوني غيكون غير تخالط لييك
وقفاات كتمشي وتجي وكتصونيي : كنقولييك صوت بنت واش انا كنتخييل اصااحبتيي والله حتى صوت بنت
وديان: ماتسبقيش الاحداات غير تهدني
شداتهاا الديقة فصدرها وكلساات مزنكة ولبكية على طرف عينيها وقالت: يكما بغا يديرها لييا بلعاني
وديان: ايمان واش صافا باا ؟ كنهضرو على حذيفة ماشي برهووش
صونات تطابت وكلساات حتى بدا كيصوني تيليفونها هزاتو قافزة لقاتو هوا وجاوبات بصوت مرعد: الوو
حذيفة(بهدوء ): ويي صونيتي
ايمان: فيينك
حذيفة: واش خاصك شي حاجة انا فلخدمة مامساليش
ايمان: وشكوون جاوبنيي قبيلة ؟ معامن كااين
حذيفة: شكون جاوبك ؟ مجاوبك حد ياله دخلت لبيرو ،سيري من بعد ونهضرو
قطع عليهاا خلاهاا كتهز وتحط فبلاصتهاا وشافت فوديان كتاكد : جاوبااتني بنت ودابا كينكر
وديان: وغير تهدني اصااحبتيي
كلساات وقالت بتشكيك : يكون مصاحب مع شي وحدة ؟
وديان: مشيتي بعيييد منييتك صبري حتى يجي وتفهمي شنو كايين
ايمان: والله تندير فراسي شي حاجة وخلاني اودييان غنحمااق معرفتش شنو ندير باش يسمح لياا
وديان: نعلي الشيطان(شداتها من ايدهاا ) ساعة غضب دابا دوز هدشي كيوقع نوضيي نخرجو نتلفو النهاار انا ويااك ونجددو الطااقة والحبس لي كنا فييه
مافيهاش لي يعطي الراس لزنقة ولكن مبغاتش تخسر ليها خاطرها ناضو جمعو الروينة مشات لبسات علييهاا سروال لارجل مع تيشورت بيض لاصق وفوقو جيلي من نفس لون السروال دارت اكسسواراتها وشوية لمكيااج وتفكيرها كلو غير ف الصوت ليي سمعاات
جاها مسااج ومشات بزربة كتقرا فييه
حذيفة: لبنت لي جاوباتك راه غير تخالط ليها تيليفوني مع تيليفونها ،هدشي لي كاين .
مشات لعند وديان لي كتماكي فالدووش وراتها لمساج وقالت: شفتيي غير زربتيي
ايمان: تيقتيي هادشي
وديان: واش باغاه يخونك بزز اصاحبتيي هادشي ماشي ديال التيليفون حتى يجيي وهدروو
حركات راسها باه ومشات تكمل وعقلها مرفوع مجاوباتوش
خرجو من الداار مشاو تغداو براا ودوزوها شوبينغ ودوران فارجااء برشلونة عرفاتها على المدينة وزاد عاونهم الشيفور لي كيديهم فين بغاو
ايمان: بينك وبين كريس شي حاجة ؟
وديان: طلبني يلالة لزوااج ولكن قلت لييه تنفكرر
ايمان: ههههه واش بصح
وديان: والله هههه اش بان ليك نزعم معااه
ايمان: وبغا يسلم !
وديان: غيسلم بطبيعة الحال ولكن (تنهدات)بابا راه ميبغييش اصاحبتيي وخة نعواج
ايمان: وشنو غادي يديري
وديان: معرفتش والله مزال دابا مكنفكر نتزوج حتى نعرفو مزيااان
ايمان: يكون خير (كدور فلخاتم فصبعهاا وكتنهد عقلها مشوش كتفكر غير فييه )
من بعد نهار كلوو ديال الدوران قررو يتعشااو فالريسطو فين كايين حذيفة
ماخداوش طبلة ديال الشاف خداو طبلة عادية فالريسطو ولكن مقابلة مع لكوزينة لي كيكوون فييهاا
مع گلسو بدات كدور فعينيهاا علييه حتى غطاها السرباي ملي حط قدامهم لمونيي
ايمان: شكون الشاف اليوم
_ الشاف امين
حركات راسها باه وطلبو منو يمشي حتى يعيطو ليه
وديان: شي حاجة عندو سبيسياال !
ايمان: الحوت ،طلبيي الحوت
عينيهاا كيدورو علييه حتى لمحااتو ب طابليية كحلة لي كتعني هوا الشاف ديال ليكيب لي لابسين بلوزات بيضين ..داير نايفيية وليكات كحليين كيحرك فلمقلة ياله بغات تقول لوديان راه حتى بانت ليهاا واحد لبنت حداه بلا شك هي المساعدة ديالو من ورا ما زينة ولدات وكلساات بقات ملصقة فيهم عينيهاا كدوور علييه وكتهضر معااه واحد لوقت ضحك معااهاا وهوا كيورييهاا شي حاجة فلبووطة
شافت وديان فين لصقو عينيهاا وقالت: شفتي زمانك
ايمان: شوفي لي واقفة معاه
رجعات كتشوف وقالت: عادي كوليݣ اصاحبتيي
ايمان: شوفي كيف كتكركر حداه
بقات كتشوف جيهتوو بحالا كتعيط لييه بعينيها ولكن كان مشغول حتى لوقت ليي بغا يحط لپلا وهز عينو على غفلة حتى كتجي فيهاا كمش حجبانو باستغراب وهي كتشوفيه بعتااب دغيا دورات وجههاا علييه وديان تكلفات وشيرات لييه بابتساامة وحتى هوا بادلها الابتساامة ورجع لشغلوو
ايمان: جاني نفس الاحساس نهار جينا هناا اول مرة
وديان: نهار حساب ليك مزوج هههه دابا حساب لييك مصاحب والله حتى هرب لييك نتيي غيحمقك هاد حذيفة هههه متسوقييييش ديري راسك باااردة ومتسوقييش تعاملي كي اللفعة كضرب غير بلبارد …ضحكيي وتي ضحكيي
ايمان: ودييان منيتك
وديان(كضحك): غير ضحكيي ،ضحكيي
ضحكات بشويية وقالت: الله يهدييك
وديان: زيدي زيدي هادي باينة ضحكة صفرة مكافيااش تخلييه يضرو راسو علاش كنضحكو بيني لييه بلي مامسوقااش باش يرجع بوحدو
ضحكات ايماان وشوية بشوية كيتزاد الريتم بالضحك حتى دمعو عينيهم ،رجع عندهم السربااي خداو شنو بغااو وماشي بزااف حط ليهم لپلاا ديالهم مع كيسان رقاق فيهم كوكتيل بحال هاواي مشروب خاص بريستوو ومافيهش لالكول
كيتعشااو مرة مرة تشوف جيهتوو مقابلة معااه كتلعب فطبسيلها وحاضيية مع لبنت الزعرة لي كدور جنبوو شادة لكااس كتشرب لعصير وعينيها لاصقيين فيهم تحركاتهم عادية بحكم هي المساعدة ديالو ضروري تواصل بيناتهم ولكن ايمان العافيية شعلت فيها كيهضر ويضحك وهي منكدها عليها فالدار مرضهاا
بقات كتزير على داك الكااس بلا ماتحس وديان هزات عينيهاا فيهاا ملي شافتهاا سكتات كتعيط ليها مجاوباتهااش شافت فصبعان ايدها مزيرين على لكااس ياله بغات تهز ايدهاا تشافت لكااس طرطق بيين صباعهاا حتى شهقوو بجوج وحدة من الصدمة والتاانية من الالم لي حساات بييه
وقفات وديان مخلووعة شدات ايد ايمان الشيء لي خلا كلشي يشوف شنو كااين حتى هز عينوو كيلقااها كاتألم حط لموس من ايدو وخرج من لكوزينة كيجريي عندهم
بداو يديها كيترعدوو وكتبكيي بالالم ماحساااتش ماحسااتش ايمتى ضغطات لدرجة يتهرس فايدها لكااس رقيق و الضغط خلاه يتفرتت فايدهاا
شدها من دراعها جار ايدهاا ودياان كتحاول تحيد ليها الزااج
ايمان(كترجف): غير طلقووو ا اناا بخير بخير
عطاها السرباي كلينيكس وقالت: نغسلها دغياا
تخطاتهم والانظار علييها شادة ايدهاا لي كفها كلو دماياات
تبعها حذيفة و وديان لي هزات صااكها بغا يشدها وقالت: غير خلييني نغسل
حذيفة: بلاااتيي غير نشووف مالك هكا صبريي
نترات ايدها منوو ودخلات سدات عليهاا حتى خبط فلحييط شاف وديان جاية وقال: مالهاا
وديان: معرفتش
تقابلات مع لمراية كترعد ولاڤابو تحت ايدها عمر د_م وديان كدق عليهاا من بعدما جاب ليها السرباي الاسعافات داوي ليها ايدها
ايمان: بلاااتي ودييان بلاتيي
كبات لما على ايدها عاضة على فمهاا وعينيها دايزين بالدمووع كتحييد فالزااج وتشهق
وديان: غير رجع لخدمتك احذيفة حتى تخرج
سااط النفس كيمشي ويجي فلحمام حلفات لا حلات عيطو ليه من لكوزينة ومشاا..غير مشاا دقات وديان عليها وقالت: بب حليي …حذيفة راه مشاا
معطلتهااش دغيا حلات ليها ورجعات ايدها تحت لماا رجعات سدات لباب حطات لبواطة وسكتات فحيرة ربتات على ظهر ايماان وقالت: صافيي
تقلباات ايمان لحضنهاا كتبكيي وتشهق بحال شي بنت صغيرة
وديان: ايمان راه مواقع والو علاش دايرة هادشي كامل
ايمان: هءهءه مقادرة نشوف توحدة حدااه مقادرااش نفكر بليي يقدر يكون مع غيري
وديان: السيد خدام ونتيي كديري فقصص من خيالك راه مكااين والو (بعداتها من حضنها شدات ايدهاا ) شوفي شنو درتيي ،شووفي واش محسيتيش
حركات راسها بلاا كتبكيي
غسلات ليها ايدهاا وحاولات تنقيي الزاج لي بقاا ..داوات ليها الجرحاات فكفها وصباعهاا وقالت: نمشي لداار
وديان: ؤك يياله
مسحات ليها وجهها وجيلي لي قاسوو الد_م عطاتها صاكها وجمعات كلينيكس لي مسحات ليها بيه رماتوو خرجاات حتى لقاتوو فوجهها مشوش وقال: شوية واش لكاس كان مهرس شنو وقع ،وا جااوبي
وديان(خرجات وراها ) : حذيفة خليها دابا غنوصلها لدار حتى تجيي وهضروو لمهيم راه بخير غير تجرحات
حذيفة: بلااتي نسالي خدمتي ونوصلكم
ايمان: لا بغييت نمشي داباا ياله اودياان
زادت خلاتو متبعها بلعيين تقالت وديان: الهرمونات مخربقيين ليها متديش عليهاا تاتجيو لدار وهضروو
مجاوبش خلاهم حتى مشااو ورجع لخدمتو ،بغاو يخلصو لقاو لحساب تخلص ديجاا خرجوو لشيفور لي كيتسنااهم مع طلعو نطقات وديان وقالت: متأكدة محاملااش !
ايمان(حركات راسها بلاا ) : ياله سالييت لكينة علاش
وديان: وليتي حساسة بزااف غيكون غير لهرمونات مع ليغيكل
ايمان: تباتي معاياا ؟
وديان: لاا انا شادة اوطييل غير قريب لييك نتي عارفانيي فهاد الصهد ميصلاحش ليا ومغناخدوش راحتناا النهار كلو كندوزوه مجموعيين دابا بهاد الخلعة ليوم تصالحو وديرو الحفلة الليلية هههه
جاوبات بابتساامة وسكتات شادة ايدهاا وصلاتها لداار ودعاتها وطلعاات لدارهاا
مشات بتعب لبييت كتحط فحوايجهاا وكتفكر ديك لبنت كدور حدااه كتشعل ولي زاد شعلها كتر هوا الضحك لي كيضحك معاها وهي حتى مليي تجرحات كيسول فيها ومخنزر بحال الى كيقوليها مزيانة فييك تستااهلي
زاد الوضع مرضهاا وضااق صدرهاا ورجعات لاكفس وضعيية فحياتهاا الخوف والهلع خايفة يضيع منهاا خايفة تبقا بوحدهاا
خايفة
خايفة
خايفة
هاجس ولا كيتعاود فرااسهاا وهي كتمشي وتجيي فقلب الداار عقلها غيخرج ، ايديها كيرجفوو وعقلها خدااام مبغاش يحبس بالافكار لخاايبة لي كطييح علييهاا دقة وحدة
كل مرة طل واش جااي وترجع تمشاا لمعدة زيراتهاا ومشات كترد ولات كتشدها لكرييز كلما تعصباات كتبغي لمعدة تقطع بلحرييق
رجعات كلساات فالطبلة قدامها كاس ديال لما وكينة ديال المعدة كتشوف فيهاا وكتشوف فديك الباكية وتفكرات نهار شربات داك الدوا دقة ونطقات بلا متحس
ايمان: كون غير شربتو ومت وتهنيت
ولات كتبان ليها الحيااة سوداويية وكان واحد ضو شوية طفاا وظلمات عليهاا ،مابقاتش قادرة تكمل حاسة بطاقتهاا تسالات وعياات فكل مرة كاتهز فيها راسها لضو كترجع طيح فالظلمة كتر
سمعات الساروت كيدور وحطات لكااس قدامها عاطية لباب بالجنب حتى دخل وهز عينو فيهاا كانت هادئة وسااكنة بحال الجو قبل متجي العاصفة
سد الباب حط السوارت وقرب جيهتها وقال: شوية كيف بقات يدك
جرات ايدها عندها وقالت: شوية (بدون مقدمات) شكون جاوبني فالتيليفون قبيلة
حذيفة: كان تيليفوني فلاتولي ولبنت حسباتو ديالها وجاوبات
ايمان: مكتعرفش تكدب
حذيفة: ماعنديش علاش غانكدب
هزات فيه عينيهاا فيهم تعب وطافيين وقالت: كتعرف غير ضحك ومعاياا تنكدو لياا
حذيفة: قبل ماتحاسبي شي حد شوفي نتي راسك شنو كديري …غنبدل ساعة بخرى حيت مافيا لي يمرض راسي معااك
ضار بغا يعطييها بالظهر حتى تبعااتوو وجراتوو خلاتو مصدووم فييها مخرجة فييه عينيهاا حمريين بالدموع وقالت: فين غاديي عندهاا بغيتي تخليني وتمشي عندهاا دوييي
حذيفة: هبطيي صوتك راه مساكنااش فشي خلاا
ايمان: مسااكتااش غادي نغوت حييت مرضتينيي هءهء بغييتي تمرضنيي بغيتي تق_تلنيي …علااش قاطع عليا الهدرة هءهءه علااااش (كدفع فييه )علاااااش
حذيفة(مص شفايفوو معصب ومكالميي نفسوو كيحاول ميطلعش معاها فريتمهاا ولا غيصدقو مفرتكيين هادشي كامل ): ماعندي مانقوول وساليتي ليا الهدرة
ايمان: طلبت منك السمااحة حراام عليييك (بضعف كتبكي) واش غير مرة خليتيني ومرة قاطع علياا الهضرة هءهء واش هدا هوا كتبغيني
حذيفة: نتييي لي لابسة وكتصوريي مع لحماار نتيي كتبغيني ؟ نتي باغة غير رااسك هاد السااعة مكتفكريش فيااا حسباانيي كانييش حداك ماشي رااجل يغيير ولاا
عطاتو بالظهر كتبكيي وشادة رااسهاا : هءهءهءه
حذيفة: تسالاو لييك دابا عرفتيها حق فييك مكانسااامحش صاافي انا مكانسامحش اناا حااقد الى كنتي نتيي مكتسمعيش الهدرة فراه تا انا من حقيي منسامحكش حتى يقولها لياا رااسي
ايمان : لقيتيي شي وحدة من غييريي غير قولياا (قربات لييه بترجيي ) كتعرف شي وحدة هاا ،ياك كتبغييني شوفيااا كتبغيينيي حذهءءه (شنقات علييه وعينيها كيقطروو ) والله والله ونلقاا شي وحدة معااك (فمها كيرجف) غنق__تلهاا ونق__تلك ونق__تل رااسيي
حذيفة (شد ايدها كيسووط ونطق بهدوء): ماكايين توحدة وخة خليني نبدل ساعة بأخرى ا ايماان بلاماا نوصلو لشي حواييج خايبييين
ايمان: لااا والله ماغتخرج والى خرجتيي غنق_تل رااسيي والله متخرج سمعتيي
حذيفة(عصباتو وصاح فوجهها ): ايماااان بااركة من هاد الزمر ديالك اش باغة فهاد الليل واش انا مساليي لهاد الزبل ديالك ولا شنوو ، مصاحب كنبان لييك داير عشرة ورااك ولا كيفااش داك النهار ماشي رااجل وادااباا متايقاش فياا
شبكات ايدها تحت فمها كتبكيي بضعف وهوا عطاها بالظهر كيقلب على السوارت فين حطهم
لقات قدامهاا ڤاز رماتو حتى نقز جا حدا رجلوو وبداتها هستيرية ديال لغوات ولبكاا وكترميي لي قداامهاا ديكورات كراسة ڤيزان ومشاات لجيهة لبالكوون بغات تحلوو حتى جرهاا بالجهد عندوو بداات كضرب فييه وتغوت معرف يشد ليها ايدها ولاا فمهاا مبقاتش عارفة شنوو كدير
ايماان : شكون هااديي هءهءهء بغيتي تخليينيي احذيفة بغيتي تخليينيي اعععععع وااااااع وااااااع
حذيفة: صافييي سكتيي سكتيي
ايمان: خليينيي بغيييت نموووت بعد منييي بعد بعد(كضرب فييه )واطلق منييي
هزهاا كتركل حتى ضرباتو براسهاا لنيفوو طلقهاا غادية كتجريي لييه محس برااسو غير جارهاا وجمعها معاها بتصرفيقة عطاهاا ليهاا لوجه حتى دوخهاا
طاحت فلارض شعرهاا مزلع ولكسوة طاحو كتاافهاا ولعرق هابط معاهاا شدات حنكهاا كتنهج وتشهق
كلس حداهاا مشووكي من اشنوو داار بداا كيقلب فوجهها بهستيرية وجرها لحضنوو كيردد سمحي لياا وكيبووس فرااسهاا بحال الى طاح فالمعصية ويضربهاا بالنسبة ليه معصيية كبيرة فحقهاا
زير عليهاا فحضنوو گالسيين وسط الرويينة
حذيفة(بضعف): سمحيليا ،سمحيلياا (كيبوس فراسهاا )ماقصدتش
لقات ملاذهاا وسط حضنوو ودقات قلبوو العاليين هدؤو جنونهاا تكمشات فييه كتبكيي هي فواحد الوضع لي الطرشة غير فيقاتها من واحد الهيجان كانت فييه محساتش بيهاا ومعرفاتش واش طرشها ولا جرهاا ولا شنوو وقع بالضبط حتى ولات معنقااه
كانت محتاجة لهاد الدفئ والتعنيقة ولمستو اللطيفة على كتاافهاا
حس بديك الطرشة طفاتهاا وهادشي ألموو من خوفو عليهاا ومن الهيجان لي كان فييه ضربهاا باش توكض مكانش فنيتوو يأدبها بالعصاا او شي حاجة اخرى عمرو فحيااتو حط ايدو على مرا
بقا كيتعود من الشيطاان متكي راسها على صدرو گالسيين فلارض كايردد بعض الآيات عليهاا
ايمان (بصوت باح كيرجف): حتى نتاا حقدتي عليا واش واش انا خاايبة احذيفة
كان حاط جبهتو فوق راسهاا وتنهد كيدوز ايدو على لحنك لي جات فيه الطرشة وقال: محاقدش علييك ،ديك الهدرة قلتها باش نخلييك تفكري شنو درتيي (تنهد ) غلطت سمحيلياا
ايمان(بضعف شدات فايدو تهبطو دموعها على ايدوو ) : ندير اي حاجة على قبلك غير ماتخلينيش مانقدرش نعيش بلا بييك هءهءهء مانقدرش
حذيفة: حتى انا مانقدرش نعيش بلا بييك …نتي وليتي حياتيي كلهاا ..صافي عفااك ماتبكييش اجيي…اجي معاياا
وقف و وقفهاا هزهاا عندو كيحيد داك الروينة لي مزلعة فلارض دخل بيها لدووش طلق الرشاشة بلماء باارد حط حوايجوو وجرها غير قاسها لماا شهقاات بلما بارد لقا داتها طايبة لوا عليه فوطة ومشا جاب ليها بينوارهاا لبسو ليها حاس بواحد الذنب خاايب من جيهتهاا
داها لبييت خلاها متكيية ومشا كيجمع فديك الروينة ياله بغا يلوح داكشي فالسطل لقا ديجا قراعي مهرسيين كلس حدا السطل كيشوف لقاهم پرودويات ديال الدوش ،تنهد وخوا كلشي وجمعوو
حس براسوو تخنق مشا لبس شورط وتيشوورت ومشا لعندها لقاها باقة كيف خلاها عينيها حمريين قرب ليها وقال: ياله معاياا
ايمان: فيين
حذيفة: يضربنا لبرد شوية
مزادتش معاه لهدرة ناضت لبسات عليهاا وحاسة بجسمها مرخيي مامطاوعهاش .. لبسات عليها اونصومبل صيفي مع كلاكيط ديالها وخرجو من الداار ساكتيين خرج الموطور من بعدما دارت لكاسك وحتى هوا وشدو الطريق غاديين كيضرب فيهم الرييح
حيد واحد لايد وحطها على ايدهاا لي حاطة فجنبو مساافة الطرييق وكانو جنب الشااطئ
حطو لي كااسك وتنفسو لهوا ديال لبحر قربو لحدايد لفوق كيطلو على لبحر ولمواج لي كيضربو فلحجر
سكتوو كيسمعو صوت لمواج وريحة لبحر…بداو كيتهدنوو جرها عندو ساكتة كيجمع ليها شعرها على وجهها جهد ساعة لي بقااو واقفيين مقابلين مع لبحر حتى عياو ورجعو لداار مهدوديين كتهزها ديك التنهيدة ملي كتشبعي بكاا حطات حوايجهاا وبدلات بملابس قطنية خفيفة ديال النعااس ومشات لبييت طاافيية كاتحرك بحال شي جمااد
مكانش انهيارها ساهل فتح بيبان صعيب مزال تسد بوحدها
دخلات لبيت لقاتو كيصليي تكات كاتشووف فييه ودموعها دايزين بوحدهم مابقاتش متحكمة فييهم غير شافتو سلم غمضات عينيهاا تشوفو فيين غيمشي …حتى حسات بييه كلس حداهاا دوز ايدو على راسهاا وهبط ايدو لعينيها مسح شفارها لفازكيين
جرات ايدو حضناتهاا مكان منو غير يتقلب لبلاصتو من فوق منها ويحضنها عندوو مزير عليها
هي نعسات و هوا بقا الليل كلو حال عينوو مرة مرة يدور وجهو جيهتها ويسهى فيهاا وكيفكر واش كنت غالط ملي قطعت لهدرة واش التصرف لي درت هوا سبابهاا
واش ردة الفعل ديالها عاادية
عقلو مبغاش يحبس من التخمام ودازت عندو الليلة مافيها نعااس
صلى وكلس فلبالكون كيكميي وكايتسنى طلوع الشمس
غير بدل علييه وخرج لابس حوايجو يمشي يتقداا
سمعات لباب تسد وحلات عينيها قافزة وخرجات بالزربة كتعيط باسموو لقاتو خرج هزات تيليفونها كتعيط حتى بدا كيصوني فلبييت قطعات ومشاات لبييت النعاس لقاتو حداهاا
كلسات مهدودة كتمسح فوجهها ورجعات تكاات هزات تيليفونو ديجا عارفة لكود حلاتوو دخلات لتصاور كتشوف مصور شي تصاميم فلخدمة
مشات لواتسااب شدها لفضول ولقات لوجيبة كتبركك لقات اسم نتاليا اخر مساج من عندها لباارح كاتبة فيه بالفرنسية
_كنعتاادر بزااف قبيلة بالغلط جاوبت فتيليفونك حسابليا الزوج ديالي لي تاصل مرديتش لبال للرقم طلعات ماڤي جاوبت كنتمنا منكون درت ليك حتى مشكييل
بدات كترمش و واحد لجانب رتاح شوية دخلات لمسجاتو مع خديجة كلهاا شلحة ولكن فهمات حيت كيعلمهاا ولات كتفهم شنو كيتقال غير متقدرش تجاوب بيها لسانها تقييل فيها ياله شي كلمات بسااط كتستعملهم معاه صافي
حطاتو وكلساات مكمشة فوق فراشها توصلها ميساج من وديان فييه : بب نديرو شي وقت نتغداو مجموعين حيت عندي الطيارة فلعشية
ايمان: اويلي على الطيارة ماگلستي معايا والوو
وديان: خاصني نمشيي جيت نطل علييك وصافيي خاصني نبدا خدمتي ونشوف الروينة فالداار ،مايخليكش عزيزي تمشي معاياا ونييت تشوفي حوايجك لي بقاو تما غير سبة
ايمان: معرفتش
وديان: تصالحتو ههه
تنهدات وكتبات : حتى هادي معرفتش (سمعات لباب تحل )من بعد ونصوني ليك
حطات تيليفونها موسدة راسهاا على ركابيهاا و ضاماهم كتشوف جيهة لبالكون عاطية لباب بالجنب
حتى تحل لباب وهزات راسها جيهتوو وتبسمات وعينيها برقوو ملي شافتوو مغطي وجهو ب بوكي ديال الورد فلحمر ،توسعات ابتسامتها وتقادات فلگلسة حتى گلس حداهاا ومدو ليهاا شداتوو غاطسة وجهها فييه كتشم فييه وقالت: شكراا زويين ههه
قاد ليها شعرها ورا ودنهاا وقال: عجبك
حركات راسها بااه وتحنا باس جبهتهاا وايديهاا وعينيه كينطقوو بطلب السمااحة بلا ميهضر
حذيفة: مابغييتش انا وياك نوصلو لهادشي مرة اخرى
هبطات عينيهاا وقالت: ماتبقاش تقطع عليا لهدرة مرضتيني
حذيفة: والهضرة لي قلتي سااهلة ؟ نتقبلها بجغمة ديال لماا
ايمان: سمحلياا معرفتش كيفاش خرجاات ومقصدتهااش والله
حذيفة: حتى اناا كنطلب منك السمااحة وعمر هادشي يتعااود
ايمان(بابتسامة) : المسامح كرييم …فين غنحط هاد الورد (كدور فعينيهاا ) كلشي تهرس لباارح
حذيفة: نفطرو ونخرجو نشرييو حوايج جداد ،كلشي كيتعوض
ايمان: ماشي كلشيي كاينين شي حواييج فالدنيا الى مشااو مكيتعوضوش
حذيفة(داعب خدها) : بصح
حطات لورد وعنقااتو باسها فعنقهاا وتنهداات مغمضة عينيها ميلات راسهاا عندوو وخدا شفايفها بقبلة اعتدار طوييلة كيهمدو بيها الجرووح ويغلقو بيها ورقة الخصاام
من قبلة حميمية لعنااق لطييف وهوما فحضن بعض
تنهداات براحة وهي ناعسة على صدرو مشابكة ايدهاا معاه وطيف ابتسامة على وجههاا
*
أنت قصة العشق الوحيدة التي لا نهاية لها في قلبي
*
رجعات المياه لبلاصتهاا وناضوو كلهم نشااط وحيوية ليومهم لي عاد بداا بدات روتينهاا كتجمع فدارها وهوا ليوم لويكاند كيطيب ليهاا لفطور وهي كطيب ليه لعشا اما لغدا كيتغداوه براا
من بعدما جمعاات الصالون ورتباات كلشي جابت لييه لكادو لي عطاتوو وديان وقالت: جابتو ليك لبارح
حذيفة: زوييين شكريهاا نفطر ونقيسوو
ايمان: غيجيك عباار
مشاو يكلسو فطبلة وقالت: دارت معاياا نتغداو براا نمشيوو !
حذيفة: بغيتي تمشيي سيري خودي راحتك معاها
ايمان: ونتاا
حذيفة: انا غنكلس شوية مع الدراري مدة ماگلست معاهم وجا حتى عثمان نمشي نشوفو
ايماان: اااه ههه سلم علييه ،مقلتش لييك كريس طلب من وديان الزوااج
حذيفة: معقوول ! وقبلات
ايمان: مزال كتفكر
حذيفة: من شروط الزواج بعدا خاصو يسلم ،هوا مسلم
ايمان: مكانظنش يقول لاا حيت ملي كنا فميلانو مرة مرة كايسولنيي على شي حاجة كتخص الاسلام وشي مرات كيعجبو يسمع لقراان
حذيفة: الله يسخر
فطرو ومشات لبسات عليهاا وخرجوو بجوج شادة فايدو ركبو فالطموبيل وصلهاا لفين دايرة مع وديان حدا لي مكازان لكباار ديال لي ماارك ولمول
وديان : تصاالحتوو هههه
ايمان: هههه اه
وديان(جبدات حناكهاا ): اختي كاين فرق لباارح كنتي طافيية ههههه كتبغييه اصااحبتيي
ايمان: شي حاجة كتر من كنبغييه والله
وديان : ماتنسايش تبغي راسك كتر
ايمان(شدات ايدهاا كضحك ): باركة علييا يبغينيي هوا
دخلوو كيدورو بنفس جديد كضحك وتهضر بوسطاات سطوري فين كااينة مصورة مع ودياان هاهوما كيشربو العصير هاهوما فريستو كيتغداوو ،كيتقداوو ،كيضحكوو
مدوزيين نهاارهم ونساتهاا ملي جاات
تفارق مع صحاابو مع جوايه العصر ركب فطموبيلتوو كيكميي وكيدوز فسطورياتها مرة مرة يوقف سطوري بايدوو ويشووف فيهااا ويتمعن فصورتهاا
كايسهى قداموو كيتفكر ليلة الباارح كيتنهد وشي حاجة لداااخل كتقولييه بلي شي حاجة ماشي طبيعيية وعمرو احساسو خاب ولكن دابا كيكدب وكيقول عااديي الغيرة وزيد وزييد
مشا صونا لييهاا جاوبات وسط الصدااع وقالت: حبيبيي
حذيفة(مركز فالطرييق ) : الزيين فيينك نجيي
ايمان: ااا صاافيي اجيي عندي اناا ف **
حذيفة: صافيي
وقفوو فالطرييق فايديهم صيكان ديال لماركات نطقات وديان كضحك : حبيبيييي يعطيك حبة
ايمان: شبغيتيني نقولييه زماني
وديان: اختي حبيبك الله يجيب لمن نقولوو حبيبي
ايمان: هههه كريس هههه
وديان: خراا مانغمنيش هههههه
ايمان: هههههه انا متشووقة نعرف هدا لي ينغمك ههههه غايشطحك غير بلاتيي
وديان: هههه سكتي راه الاقدار تأخد من الافوااه
ايمان: هههه مصاااب (شافت ورا ودياان بالصدمة لاحت الصيكان والضحكة مشاات )
وديان: مالك (شافت وراهاا لقات شااب فاواخر التلاتيناات لابس مزياان انيق وملامح وجهو عربيية شافتو كيقرب بتردد وعينيه فايماان ) ش شكون هدا ايمان
ايمان (قلبها كيضرب وهي كتشووف الشخص لي كان قريب لقلبهاا المنقد لي تخلى عليها وهي محتاجااه ) : ام امييين
وديان: شكون اميين
رجعات شافت فيه ونطق بهدوء وابتساامة: ايمان
جمدات فبلاصتها كتشوفييه كيقرب جيهتهاا وديان غير كتشووف حتى قرب جيهتها شافها مدارت حتى ردة فعل وهز ايدو جرهاا وعنقهاا عندو
*
انا اميي عزيزة علياا نتيي (كتعد بصبيعاتها الصغار ) وياااسين
نعيمة: زييد
ايمان: وحبيبي امييين ،كيجيب ليا دانون وشكلاط وكيخرجني معااه فييييين مامشاا كنبغييه قد قد هكاااا
*
غمضات عينيهاا ودموعهاا طااحو على كتفوو
فالجانب الثاني من الطريق كيوقف الطموبيل ميهز عينو غير فيهاا وهي وسط حضن رااجل
كمش حجبانو مامتيقش شنو كيشووف
حط الطموبيل وعقلو بغا يخرج مع خرج مع شافها دفعاتوو هنا زاد جعر وحابسوو غير الطريق عامرة كيتسنا السطووپ
ايمان: بعد بعد بعد (دفعاتو) فيين كنعرفك شكون نتااا
امين: ايمان خلينا غير نهضرو (حط ايدو فصدرو )شنو درت لييك اناا علاش انا حاقدة علياا
ايمان: حييت نتا اول واحد صدمنيي ورا موت ميي (كتنخصص ضرباتو لصدرو )نتااا نتاا مصنتييش الامانة لي خلات لييك مييي (شافت فوديان لي واقفة كتشووف ) هداا خاليي ،خاليي لي لي كنت حاسبااه كلشيي خلانيي ومشاا ودابا (بلغواات ) بغاا يهدر معااياا …سير سير فحاالك (كتغوت) سير فحالك واش عطيتكم التيسااع نسااونيي
وديان(شافت حالتها وشافت فييه مبعداه عليها ): مشا لحال على الهضرة معاها
قرب ليهاا شدها من كتاافهاا وهي كتبكيي بصوت عاليي كتنتر لييه بغات تمشي وهوا كيطلب فيهاا
تجرات من ايدهاا ترجعات اللور تشافتو وقف قداامهاا شنق علييه فلبلااصة دفعو حتى طاح غوتات وديان ومشاات كتجر فييه وهوا شنق علييه هاز ايدو بغا يعطييه
ودياان (شدات ايد حذيفة ) : خااالها
تجرات من ايدهاا ترجعات اللور تشافتو وقف قداامهاا شنق علييه فلبلااصة دفعو حتى طاح غوتات وديان ومشاات كتجر فييه وهوا شنق علييه هاز ايدو بغا يعطييه
ودياان (شدات ايد حذيفة ) : خااالها،خااالهااا حذيفة نوووض غيشوفك شي حد نوووض
جراتووو من فوقو مخنزر فأمين لي وقف كيقلب على نظاظرو لي طااحوو
ماردووش البال لايماان لي شدات فرااسهاا كتنهج وقصداات الطريق سادة ودنيهاا كتبكيي
دور راسو جيهتها لقا ايدو والرييح معرفوهاا فيين زادت ،تخلع عليها وقال: فين مشاات (بصوت عاليي )فييين زااادت
وديان (قفزهاا ): ماشفتهااش (كدور فعينيهاا ) ماشفتهااش كنتي غتق_تلوو
شاف فأميين واشار ليه بايدوو : تكون خالها ولاا جدهااا مادورووش جيهة مرتيي (بتهديد ) ولاا غيكون تصرف اخر
اميين: انا بغييت غير نصلح
حذيفة: كون كنتي باغي تصلح غتصلح طاسيلتك هي اللولة اما ايماان مكتعرفهااش …مادورش حدا وجهيي هانيي علمتك
عطاه بالظهر كيقلب عليهاا وديان هزات الصيكاان كتشوف جيهة لمحالات
قلبو غيخرج كيقلب معرفها فيين زادت معارفش حتى حالتها كيفاش دايرة
كيدور بجناابوو وكيشووف قطع لجيهة الطموبيل مع وقف فالجهة التانية بانت لييه كاللسة فلارض متكية على الطموبيل وشادة راسها كتبكيي ..مشا عندها تحنا لعندها وقفهاا عنقهاا وقال : خلعتينيي كنقلب علييك مالقيتكش
هز راسو كيشوف فوديان شير ليها بايدو وقطعات عندهم
حل الطموبيل ركبهاا بلاصتهاا وسد الباب ركبات وديان اللور وقربات لايماان وقالت: صافاا
حركات الاخيرة راسها بالايجااب وسكتات كتلعب بالفاصمة لي فايدهاا
حط ايدوو على ايدهاا وقال: مايستاهلووش تبكيي عليهم نساايهم تاحد مايستاهل تفكرييه وتبكي علييه فيهم سمعتيني
وصلو لدار ساكتيين طلعو بتلاتة حطات ليها الصاشيات ديالها وبقاات معاهاا حتى تهدناات
وديان: نجيب لييك شي حاجة تشربيها
ايمان: لااا انا بخير مالكم ! صافيي غير تشوكيت ملي شفتو هدشي لي كااين
وديان: مايستااهلووش تفكري فيهم
ايمان: نغسل وجهي ونجيي
ناضت مخلياهم شافت وديان ف حذيفة لي متبع ايمان بعينيه وقالت: نطلبك واحد الطليبة احذيفة
حذيفة: مرحباا
وديان: تخليها تمشي معاياا ترتااح
حذيفة: فيين لفرنسا ؟
وديان: مم غير سيمانة وترجع
حذيفة: غير سيماانة !
وديان: عفااك
حذيفة(حرك راسو بالنفي ) : منقدرش مغنبقااش هانيي من جيهتهاا
وديان: مكتيقش فيا
حذيفة: حاشاا ماشي هكاك (دوز لسانو على فمو مزاعمش يعبر ) فهميني منقدرش والله كلسي معاها فالداار معنديش مشكيل مرحباا بييك
وديان(بابتسامة ): عارفة لي كاين اخويا الله اكبر بييك ،تهلى فيهاا راها نيية وقلبها صاافي وكتبغييك لواحد الدرجة كبييرة
سكت كيلعب بالساروت فايدو وقال: ماتحتاجيش توصي
وقفات كتهز فصاكهاا تخرجات ايمان وقال: نوصلوك لمطار !
وديان: لا لاا بلا متعدبو راسكم غايوصلنيي كريس (عنقات ايمان ) جيووو عنديي شي مرة الدار داركم ..اختي بغييت نهرب بييك وماسخااش عزيزي
تبسمات ليها وقالت: مرة اخرى ان شاء الله
توادعو معاها عند لباب غير سد لباب جات عندو تخشاات فييه مخبية وجهها فحضنو بحال لبنية الصغيرة بغا يضحكها وقال: عرفتي شنوو توحشت
هزات راسها فييه وقالت: شنو
حذيفة: لبسي لياا ديك اللبسة وجي شطحي على ام كلتوم
ضحكااات وقالت: لا داكشي مخلياه ل المهام الصعبة
حذيفة: كتشرينيي خهههه
ايمان: الاغراااء يا حبيبي خهههه
حذيفة: نديرو شي فيلم ؟
حركات راسها باه وقالت: نبدل علياا ونجيي
دخلات لبييت بدلات عليهاا ولبسات كسيوة خفيفة مشطات شعرهاا ومشات لكوزينة قاداات بلاطوو فييه ديسير مشكل مقطع وحطات زلافة فيها الشيبس ،البيسكوي، فروي سيك منوعيين فزلايف ،مع سقااطة طبسييل كيشهيي صايبات عصير بلا سكر لييهم زوقات كلشيي وحطاتو مكرهاتش تصوروو وتحطوو ولكن مانع عليها هدشيي الشخصي يتحط حطاتو فپلاطو فييه رجلين كيتحط فوق السرير مشات لبييت لقاتوو مقاد لكلسة حطات لبلاطو وكلساات حداه منعازليين على تيليفوناتهم فجو لطييف وهادئ مرة يتبع مع لفيلم مرة ياكل من ايدهاا مرة يقلبوهاا هضرة وقُبل
والحيااة غااادية مرة مايلة مرة مقادة مرة كتعواج مع الاحدات
دازو اياام قليلة واقف فطموبيل كيتسناهاا تخرج كدوز امتحان السياقة لتاني مرة هز عينوو وبانت لييه خارجة ولتاني مرة خارجة كتبكيي
شد جبهتو وقال: لااا حول ولا قوة الا بالله هههه
تحنا حل ليها الباب دخلات كتهرنن وهوا مقادرش يحبس الضحكة وقال: منجحتيش فييه تااني
حركات راسها بلا وقالت: لكود صعييب مصعبيين داكشي بزااف وكنبدا نترعد فالصوگان هءهءه معرفتش شنو كيوقع لياا قلت ليك ماندوزوش نتا لي بقيتي مرضنيي علييه
حذيفة(جرها عندو كيضحك ) : صافيي صافيي بنااقص منو صوگيني غير اناا هههههه
ايمان: حيد علييا من الضحك لباسل حرام علييك
حذيفة: كتسبقي لخلعة ا ايمان الله اهدييك تء
ايمان: اجي نخرجو على براا ونصوگ وشوف
حذيفة: لا لا ماكاميش
ايمان: ياااك احذيفة
حذيفة: هههه وبغيتيني نكدب علييك كتعصبيني ،كتعاملي الطموبيل بحالا باغة تعضك
ايمان: صوگ غير نتاا مخاصنيش مكبر فينا طموبيل
حذيفة: مكبر فيك لبعر لهدرة كيدايرة
ضحكات وضرباتوو لايدو تمالت ليه الطموبيل وشهقات
حذيفة: شفتيي ،شفتيي راه مكنظلمكش
ضحكات ضاربة الطم توصلو لدارهم مع دخلو بدا تيليفونو كيصونيي وقال : لواليدة هادي
ايمان(بابتسامة ) : سلم علييها
خدا كرسيي وكلس وايمان فلكوزينة كتشرب لما وكبات ليه حتى هوا ودارت لقهوة يهرسو بيها النهار
عاود صونا لموو لي جاوباتوو ديك الساعات وقالت: الوو حذيفة
حذيفة: لباس امي اش خبارك
لطيفة: لباس اولدي الحمد لله كيدايرة ايمان
حذيفة: كلشي بخيير ،صوتك عياان
لطيفة: شوية اولديي غير لعياا وصافيي
حذيفة: مخاصك والو اميي
شافت فيه ايمان بابتساامة كتحط ليه القهوة وكلسات جنبو كيعجبها ملي كيهدر مع مو وكيعاملها بواحد اللطف زويين
لطيفة: مخاصنيي غير نشوفك ،طولتيي احذيفة كلشيي ورا هاد كورونا دخل الا نتاا واش حلفتيي على هاد لبلاد
حذيفة: غير مع الوقت والله راه ناويي نجيي
لطيفة: حتى لييين حتى يقولو لييك الله ارحم
حذيفة: ها لهضرة لي مكتعجبنيش
لطيفة: الموت علينا حق وتمن سنين اولدي راه بزااف مداروها حتى لي بلا وراق ونتاا 4 سنين هادي ونتا بوراقك ،ياك كنتي هارب على الزواج ياك تزوجتيي
حذيفة: ميي راه بغيت نجي ولكن باا
لطيفة: باك معندو ميدير دابا نتا تزوجتي الله يسهل على الجمييع باك لكان قاسح نتا كون مرضي وجي صالحو
تنهد وقال: ايكون خير اميمتيي نقاد اموري ونجيي
قطع معاهاا وايمان ساكتة كتشرب فقهوتها حتى هضر هوا : اش بان لييك ؟
ايمان(سرطات ريقهاا ): فاش
حذيفة: نمشييو! (مد ايدوو زير على ايدهاا ) الصراحة بغيت ناخد كونجي وفكرت قلت نهبطو لمغريب واحد خمسطاش اليوم ونرجعو ونكملو لكونجي فشهر 12 فسويسرا حتى نتي مازال شلا مواعدتك بييه ومزال ماوفيتوش
حكات جبهتهاا بقلق وقالت: ماعرفتش
حذيفة: راه مانقدرش نمشي بلا بيك غيير حيديها من بالك
ايمان؛ وخة لي بان لك ،عنداك عمي يجري علياا
حذيفة: يجري عليا وميجريش عليك غير كوني هانية هههه انسبق ليه لي كيعرف ليه
ايمان: ان شاء الله (بدات كترمش فيه وقالت )بب
حذيفة: مناوينش تخليوني نشرب هاد القهوة بخاطري
ايمان: تء وغير سمعنيي عيطو لياا من روما باش نمشي نصور يومااين ونرجع
حذيفة(تنهد ): مغنساليوش ا ايماان
ايمان: علاش احذيفة شنو كندير خاايب حتى فهادشي ؟ الحفلات لغيتهم غير فشهر جاوني جوج ومابغيتش جاوني عروض فبرامج ومامشيتش، مايمكنش نحبس كلشي فدقة
عندك شروط فالتصوير وافقة علييهم شنوو نسالي خدمتي راه ميمكنش حتى انا مرتااحة وعاجبني دوميين لي كندير من غير لغناا وماتنساش راني سانية معاهم عقد ومزال مسالاش وفكورونا كاملة مصورتش خاصني ضروري نمشي
حذيفة: ايمتى تاني
ايمان: الجمعة خاصني نصبح تما باش نصور والسبت اعلاان ،عفااك والله مندير شي حاجة تقلقك
حذيفة: هيهااات ،واخة غنشوف كي ندير
ايمان: الى مكنتيش
حذيفة(حط لكاس بزعفة): ايماان
ايمان: وخة
اعمالهاا والاعمال ليي كاتوصل بيها ولات كثيرة وتعرفاتت بلي ولات كترد بزااف ديال الاعمال
معارفيينش بليي حتى داكشي لي كتشد بزز وتحت الرقاابة ديال راجلهاا
دوزات التصوير على خيير والاعلان كداالك ورجعو تانيي لروتينهم مبقا ليها والوو وتبدا قرايتهاا شهر حتى كيفاجئها حذيفة بلي قطع ليهم لمغرب من هنا لسيماانة
خاصها تسالي خدمتها باش تفرغ لهاد المشية لي غير كتفكرها قلبهاا كيبدا يترعد
مخلط فيها الخوف و الرهبة و الستريس كيخرجو يتقداو لي كادو للعائلة كيتقداو ليهم حوايج جداد كيدورو بلحالة
خمسطاش اليوم كيفاش غادي دووز الله واعلم مبقاتش كاع كتنعس كتفكر غير فاخر نهار فالمغرب شنو دارت وكيفاش دابا غترجع
سيمانة دوزاتها غير تفكير ونفسيتها مخربقة معارفاش شنو كتحس
معمرها فكرات غتهبط مزال لدييك لبلاد ولات ديما مها فبالهاا قبرها حوايجها ريحتها دارهاا كلشي فبالها تجدد كتكلس ساهية وكتحاول متبيينش ليه ولكن عينيهاا فاضحيينهاا
فطبلة العشااء الاخير قبل السفر شاد التيليفون كيوريها فبلاد سوس الاصل ديالهم ايت باعمران كيوريها الجباال والعيوون وكيوريهاا فيين غيمشييو كيحاول يحمسهاا بليي مغيبقاوش كالسين غيخرجوو ويضورهاا اكادير كااملة بلي فيهاا
حذيفة: السيمانة التاانية ندوزو ليها شنو بان لييك (كان كالس جنبها لايح اييدو ورا كتفها هي كتلعب بلفرشيط فطبسيلهاا تحركهاا وقال): ايمان
ايمان(هزات راسها فيه ): ممم
حط تيليفونوو وتقابل معاهاا وقال: مالك احبي معجبتنييش
حركات راسها بلا شوية بداو عينيها كيتعمرو بدموع وتكات على كتفوو كتبكيي وقالت: هءهءه
حذيفة(هز ليها راسها عندو ) : ايماان
ايمان: ماعرفتش هءهء ماعرفتش غنمشي غنلقا غير قبرهاا خايفة نمشيي نشوفوو وباغة نمشيي حاسة براسي غنمووت مخنوقة وقلبيي مزيير علياا
حذيفة: اعود بالله من الشيطان الرجييم ، راه الموت علينا حق ا ايماان خاصك تقبلي هدشيي تامني بالقدر خيره وشره …نتي ماشي بوحدك احبيبة ديالي عندك اناا (كيمسح ليها دموعهاا )عائيلتي هي عائيلتك
ايمان: والى مابغاونيش !
حذيفة: علاش مالك لي مايبغيوكش ،الى مابغاوكش راه حتى انا مغاديش يبغييوني هادوك واليديا على راسي وعيني ولكن نتيي راه كمالة حياتي ولي ضرك غيضرني (تبسم ليهاا ) ميمكنش يعاشروك ويكلسو معااك ومدخليش ليهم لخاطرهم ، شوفي غير لواليدة كتسول فييك قبل متسول فياا كتقولي عليا حنين هي راه حن منيي ،غير تيقي بيااا غدوز الوقت طاايرة ودغيا غنرجعو لدار ناشطيين ضااحكين ونكملوو حياتناا
تطمنات بكلاموو وتنهدات وقالت: ملي نبغي نمشي نزور مي تمشي معاياا
حذيفة: رجلي على رجلك فينما مشيناا ؤك حبيي (باسها فعينيهاا) مانبغيش نشوف هاد الدمووع
حركات راسها بااه ورجعات كتعشاا حدااه وراهاا جمعات لماعن وضربات دورة فالدار مسحات لغبرة باش تخليها نقية مشات لبيت لي فيه دريسينك لقات حذيفة كيقاد فشي شكلاط تقداوه
ايمان: غيكون عندنا لوزن زاايد نييت
حذيفة: سيي بااينة
كانت عندهم باليزة لواحد فيها حوايجوو وجوج باليزات متوسطيين خاصيين بهداياا لعائلة
كطوي ليه حوايجوو وكتخلي شنو يلبس وحتى هي مكتراتش بزاف حيت بغات تقدا من تماا لبلدي
جمعات برودوياتها مكياجها والاضاءة ديالهاا حطو كلشيي حدا الباب هز المشة مع ماكلتهاا وبلاصتها هبطها لطارق يقابلهاا ورجع طلع تخشا حداهاا فبلاصتهم بقاو كيهضرو شوية حتى طاحو كاو بالنعاس دغيا ضرباتها الفيقة وبقاات حالة عينيهاا كترمش وراسها عاامر والتوتر غالب عليهاا
تقلبات جيهتووو كداعب لحيتو بشوية باش متفيقووش ناعس محاس كاع بداك الرااس لي حداه شحال عاامر غيطرطق
ماجاهاش النعاس وناضت خرجات لبالكون وكلساات لابسة بينوارهاا مقابلة مع الطريق لي مرة مرة دوز شي طموبيل
حتى عيات بلكلسة وناضت للبيت التااني جمعاتو باش تخليه مجمووع طوات لحوايج لي ترونوو قادات صيكانها وصبابطها فواحد الركن فلبلكارات مسدودين بزاج
حتى حل عليها الباب مكمش عينو حمرين وقال: ماجاكش النعااس
ايمان: طاار
قرب ليهاا حط ليهاا تيشورت من ايدها وقال :اجيي تنعسيي حداياا مزال لحاال
جرها ورااه طفا الضو وداها لبييت عنقهاا كيحك ليها شعرهاا وكيغمض ليها عينيهاا فالظلام وهي كضحك
مع صلاو الفجر شدوو طريق لمطار لابسة كسوية طويلة فلبييج مستورة وستيلها زويين وشعرهاا هازاه لفووق لابسة سبرديلة وهازة صاكهاا
حذيفة: زويينة لكسوة هي لي خديتي مؤخرا من روماا !
ايمان: ااه زويينة ومبردة
حذيفة: ومستوورة ههه ركزي ليا على مستوورة
ضحكاات شادة فايدوو حتى وصلوو جبدو لباگااج ديالهم الاجراءاات ولباگاج يتعبر وقلبها كايضرب كل مرة كتشدها واحد الصهدة وكتبدا تسووط وكتخنق بعد وقت طوييل ركبوو فبلاصتهم متكية على كتفو شادة تيليفونها وقال: متحطي والوو بلي نتي فالمغرب
ايمان: لا مغاديش نحط
ماحد الطيارة فسما وعقلها وقلبها معلق بلخلعة وهي غتحط رجليها من بعد سنين طويلة فبلادها وفلمدينة فاش دوزات تمنطاش لسنة الدار البيضااء
خرجو من الطيارة وضربات فيها الشمش وبقات مدة واقفة حتى حط ايدو على خصرها وقال : هبطي حابسين النااس
هبطات فدريجات وقلبها كايضرب لجو كان سخون عكس كيف خلاتو سنين هاديي
مسقط الراس،الوطن ، دائما كيبقا حنين لييه خصوصا لكانو جدورك وحبابك كيتسنااوك ولكن هي مكيتسناها حد
عكس حذيفة لي كيبان فرحاان ومتحمس ومبغاتش تهرس فييه فرحتوو وكطلب الله يدوز كلشي بخير
بعد الاجراءاات المعتاادة شدو لكروسة ديال الباگااج وحذيفة كيقلب بعينيه على شخص معيين وسط النااس حتى شاافوو
رجل اربعينيي بملامح مسرارة وزويين طولة وتجريدة ولابس مزيان سمر وشعرو مخلط بالشيب ولحيتو كدالك عينيه ملوناات مايليين للاخضر والعسليي
وسيدة معااه فاواخر العشريناات بحجااب انيق مواتيي لبسها بكسيوة حجابية باينة مراتو حيت شادة فايدوو
سبقهاا وحضنوو بعض عنااق حاار ديال فرااق السنين تبسمات حيت عرفاتو هوا ولد عموو الشخص لي وقف معاه بزااف وخة عن بعد كان ديما كيعاود ليها علييه بليي هوا المقرب لييه وكانت تواصلات مع مراتوو ولكن هوا عمرها هضرات معاه شخصياا
سلمات على الزوجة وعطاتها الورد فرحانة وقالت: مرحبا بييك فبلادك
ايمان(بحب ): شكرا اختي زهوور الله احفضك
حذيفة: ايمااان ،هدا مجييد ولد العم
مجيد: مرجباا والف مرحباا ب بنت بووتين
حذيفة: ختي زهور هاد الزهواني ماربيتي فييه والوو
زهور: ههههه شهمني
ايمان: ههههه الله اكبر بيك اعمي شكراا
ضحك حذيفة كيشوفيهاا حتى نطق مجيد كيضحك وقال: اعمييهم لعدووك اخالتيي
شاف فمرتو كيضحك وقال: شرفات ليك الراجل ونتي كتفرنسي
زهور: ههههههه ومالها كدبات راك كتلعب فالربعيين
ايمان: هههههه سمحلياا والله حتى (تلفات فلهدرة )هههه شفت الشيب
مجيد: وراجلك شوفي شيباتوو خاصو يظفرهم
شافت فحذيفة وضحكات وقالت: متديش عليا هههه
مجيد: شريتي لعداوة معاياا وخةة وخة
ضحكوو جمييع وقال: ياله مرحباا بيكم فلبلااد
حذيفة: ترحب بيك الجنة امول الضريبة
ضربو لكتاافو كيضحك جارين لبكاج وقال: كبرتيي وضربتي فياا اش كيعلفوكم تماا
سبقات ايماان وزهور مخليينهم وراهم كيهضرو ويضحكوو وحولو كلامهم لشلحة
ايمان كدور فعينيهاا وضربها هواء سخوون فوجهها كتفكر كيفاش دخلات لهاد المطار قبل تمن سنين وكيفاش دابا خارجة منو مشات لناحية طموبيل من نوع رونج فلكحل حلات ليها زهور باب اللوراني وركبات وحتى هي ركبات حداها من الجهة التاانية
زهور: حتى نتي مدخلتييش مدة هادي
ايمان: اه تمن سنين
زهور: مدة طوييلة غتبدل علييك الوقت ههه
ايمان: بنادم وتبدل بقا غير لوقت
طلعو رجال لقداام شدو الطريق حتى دخلو لمدينة شي غادي شي جااي الطريق عاامرة وايمان عينيها لاصقين غير براا كتشوف فطرقاان وكتستحضر داكرتهاا فشي بلاايص حتى وقفو قدام اقاامة كبيرة هبطو وعينيها لااصقيين فالطرييق سمعاتو كيعيط ليها وشافت جيهتوو لقاتو ماد ليها ايدو مشات عندو شدات فييه وهي سااكتة
طلعو لطاج التااني بغا يحل بالساروت لقاه مسدود من لداخل وبدا كيدق حتى كيسمع صوت طفلة كتجري الباب بغات تحل وكيسمع فصوت طفل اخر كيجر فيهاا وقال: شكوون
مجيد: حل اولدي
ضار الساروت وخرجات بنيية كطل من لتحت بشعر رطيطب زعرة وبيضة وعينيهاا بحال باهاا وطل الطفل لي كانت عندو 12 لسنة نسخة طبق الاصل لزهور لبيووضة ولملامح الحرشة من عينين وحجبان وشعر كحليين
سلم بحيااء عليهم وسلم على لبنية وهزها عندوو
زهور: مرحبا بيكم دخلوو
شكروها وفعلا دخلو لصالون كبيير وومتول
حذيفة: الزيين ديال العالم لباس علييك
كالسة عندو وكضحك حشماامة مولفة تهدر معاه غير ابيل فيديو اول مرة تشوفوو وقالت: لاااباس الحمد لله ونتاا
حذيفة: الحمد لله عرفتيي هاادي شكوون
شافت فايمان لي كلسات جنبوو وقالت كضحك : واااو زويينة واش مرااتك (مشات بااستهاا كتشوف فعينيها ) واااو عينيك زوينين تعطيهم لياا
ايمان: هههههه حتى نتي عينيك زوينين احبيبة
زهور: امنيية خلي طاطاك ترتااح ابنتي سيري مع ادم تلعبي معاه
حذيفة: فينهوا ادم حل علينا وهرب
نطق مجيد كيضحك وقال: هداك لفريكونص ديالو كتشد مرة مرة
زهور: ههههه هكاك طبعو اخوياا كاع الحشمة لي عطاها ليه الله حيدها من هادي
البنت لصقات على ايمان كالسة عندها مبقاتش بغات تحييد شنو سميتك شحال عمرك هادو عينيك هدا شعرك
اسئلة بريئة ومضحكة بالنسبة ليهم
حطات زهور الصينيية ودوازهاا شكلات الطبلة ورحباات بييهم جا ادم تشارك معااهم اتااي كالس حدا مجييد
حذيفة: ادم فاش كتقرا هاد العام
ادم: هاد العام غنطلع لتامنة ان شاء الله
حذيفة: تباارك الله ونتي ا امنية
امنية: هاد لعام اندخل المدرسة ل سي بي
ايمان: عندك ست سنين
امنية: وييي
مجيد: اوى اسي الطبااخ جاي باغي تكحلها مع السوسي
حذيفة: نبقاو مخبييين والسخط سااخط من ديماا
زهور: الله يهدييه عمي كيتسرع
مجييد: والله ويسمعك
زهور: ههههه انا عزيزة علييه ميهضرش معاياا
حذيفة: بااركة يسخط غير عليناا هههه
مجيد: هههه الله يهدييه اوكاان، علمتيهم بعدا بلي جاي
حذيفة: اش اودي نعلمهم يجمعو عليا كلشي ههه اندخل مسلت بالليل
مجيد: هارب بالليل وراجع بالليل كي الشفار
ايمان:ههههههه كتخلعو فياا واش صعيب عميي
مجيد: دقة قدييمة ههه
هبطات امنية من عند ايمان ومشاات كتجري جابت مونيكتهاا والعاابهاا وكلسات حدا ايمان مبرزطاهاا كتلعب معااها والاخيرة دغيا ندامجات معاها فاللعب
زهور كطيب فلغدا و الدري فبيت اخور كيلعب ومجيد وحذيفة كيهضرو بيناتهم وعينيه عليها مرة مرة ملي كضحك منييتهاا شادة لمونيكة كتمشط لييهاا وامنية عاجبها لحاال
حتى شافت حذيفة ناض جاي عندها وقال: غنمشي انا ومجييد نشوف شي طموبيل نكرييهاا خاصك شي حاجة
ايمان: لا لا متعطلش
حذيفة: مالك خفتي ههه ها امنية مونسااك
امنية: خليها تلعب معايا متديهاش
ضحك وعنكش ليها شعرهاا وقال: حتى نهبط لييك شي بالييزة
ايمان: وخة هه
خرجو وبقات كتلعب معاها تجات زهور جامعة شعرها الاسود بقراصة ولابسة كنضوورة مطروزة ديال الدار وقالت: مخلاتكش ترتاحيي هاد الجنيية
ايمان: لا بلعكس مونسااني ههه سمحيليا عدبنااك
زهور(كلسات): هاانية اختي
ايمان: واش نتوما ساكنين هنا نييت
زهور: لا لا غير ملي جيتوو حنا ف اكادير
ايمان: واش الحاج صعيب لهاد الدرجة ههه كتعرفيهم ياك
زهور: ماشي صعييب هوا مع البراااني راه انساان طيب طيب بزااف ولكن قاسح مع ولادوو
ايمان: خصوصا حذيفة
زهور: انا الصرااحة محاضراش لحذيفة ولكن كيعاود ليا مجيد بلي تااا حذيفة مكانش سااهل ههههه راه كان مجهلوو والحاج مكيصبرش هوا معندوش هدا ولديي وهدا ولد خوياا كيعامل كلشي نفس المعااملة راه دوزها على مجيد فالصغر على مقاال متهناا حتى مشاو لمرااكش وموراها جاو للمحمدية ههه غير خرج طوعو وهوا يخرج لطريق ههه
امينة(شافت فيها ): شكون خارج ! باباتي
زهور(خرجات عينيها فيها ): نوضي عند خووك نووضي
ايمان: ههههه تحطك بوجهك ، و ماماه وخواتاتو
زهور: عرفتيي لا مي لطيفة ولا مي ربيعة لحلااااوة شخصيا عرفتي واحد لحنان فخالتيي مسكيينة متعرف فين تحطك و اميينة مزوجة حدايا ف اكادير وفاطمة حتى هي ولكن اسية وخديجة تزوجو فلمحمدية بلخوت ،لبنات لي حدايا كنعرفهم مزيان الظرافاات ولكن خديجة شوية قاااسحة شابهة عمي واسية بين وبيين هههه
ايمان: خفت غير ميتقبلوونيش
زهور: علاش زعمة ميتقبلووكش حيت كتغني
ايمان(شافت فيهاا كضحك وقالت): ااه
زهور: هههه عند بالك معرفتكش ولا شتك تزنكتي ههههه راه خواتات حذيفة كلهم عارفيينك من غير خالتي وعمي ههههه
ايمان(ضرب قلبها): وشنو قالوو
زهور: مقالو والوو شوفيي كل واحد كيعييش حياتو مكاين لاش يعيش حياة النااس ، حتى انا ملي عاد تزوجت عائلة مجيد من جيهة الام ماعجبهمش الحال وخة خالتي تورية عكوزتيي
ايمان(بفضول): علاش زعمة مبغاوكش
زهور: حيت مطلقة وعندي ولد
ايمان: واش بصح ! واش ادم نييت
زهور: اه
بقات ساكتة كتشووف وقالت: ومجيد مكانش عندو مشكييل
زهور(بابتساامة): لاا بالعكس حنين فييه كتر منيي وكيربيه حسن مني ،عاوني فييه بزاااف ادم تربيتو مكانتش سااهلة ولدابا نييت مزال طبعو صعييب وكيتفااهم غير مع مجيدد
ايمان: شحال كانت عندو ملي تزوجتي
زهور: ربع سنين ولكن كان فااهم وعارف كلشيي دوزنا حروبااات يا ايماان(ربتات على ايدهاا)تحاجة مكتجي بالسااهل احبيبتيي
حركات ايمان راسهاا وسهات فدوامتها وقالت كون حتى اناا بحال ادم شدات فياا نورة بايديها وسنانهاا كنت غنكون عايشة مزياان
ايمان:كنت سمعت حذيفة كيبارك لمجيد ،واش حاملة !
زهور: كنت ههه ولكن دوماج مكتاابش طاح
ايمان(باسف)الله يعوضك
زهور:اميين ياربيي ..نوضي تكااي ترتاحي بينما جاو
ايمان: وخة
دازت على ادم كالس فسي جور كيلعب فلبلااي تبسمات ليها ورد ليها الابتساامة بلطف كملات طريقهاا لبيت مفرش ومقاد عطاتها زهور بيجامة تبدل بيها حتى تجيب حوايجها وتكاات حتى جات امنية كتسلت عندها وقالت: طاطا نكلس حداك منصدعكش
ايمان(بعدات دارت ليها بلاصة كضحك) :اجي احبيبة هههه
طلات زهور براسها وقالت: امنية شنو قلت
ايمان: غير خليها عفااك ههه
تكات حداها كتعاود ليهاا بلا اسئلة
ايمان: امنية باباك عزيز علييه ادم
امنية: ااه
ايمان: مكيضربووش
امنية: لاااا بابا مكيضربناش كيدير لينا العقووبة
ايمان: شنو كيدير لكم فلعقوبة
امنية: هههه واحد نهار ادم ومجد خرجو بلبيكالات
ايمان: شكون مجد
امنية: مجد هوا حبيبي الصغير خو بابا صاحب ادم قلت ليك خرجوو بلبيكالات وتعطلو وبابا تخلع كايقلب عليهم ملي لقااهم بيتهم فالجردة حدا لكلب
ايمان: اويلي ههه
امنية: والله اطاطا لميمة طاح ليها السكر وتقلبو عينيها بحال هك
بدات ايمان كضحك وقالت: وهضوور عندك ههههه مشة صافي
امنية: نتي زوييينة تبقاي معاياا
ايمان: وخة ههه
بقات كتحاجي ليهااا حتى نعساات ايمان حاضنة امنية لي تاهي نعساات عيات بلهدرة طلات عليهم زهور لقاتهم ناعسين وردات لباب
مفاقت غير على اذان العصر تسمع مجهد كيعني بلي جامع غير حداها بقات ساكتة كتسمع للادان بهدووء وكيدخل صوتو مع ودنيهاا بورشهاا مدة هادي مسمعاتوو توحشات هاد الصوت توحشات بلاادها وتوحشات نعستهاا مع ميمتها ورا الغدا فلعطل حتى كتفيقها تشرب لقهوة ولا اتااي وتخرجها لجردة تلعب شوية
هادي هي عطلتها فطفولتهاا لاصقة فجناب نعيمة مكتحركش وكانت بالنسبة ليها احسن اياام
هاد التعنيقة لي دايرة ليهاا امنية داباا نفسها كانت كدير لنعيمة ناعسة على اديها ومخشية فيها معنقاهاا
ماقدراتش تحبس دموع عينيهاا وهي كتشوف فلبرائة قدامهاا مهازة هم عندها كاع الناس زوينين ومهازة فقلبها من جيهتهم والو هكا كانت، مكتعرف حقد مكتعرف غلط كلشي عندها زويين وكتفرح بلقليل قبل لكتير ،ولكن هوما نفسهم رجعو قلبها قااسيي ونفسيتهاا مهرسة صعيب تجمع
حيدات ايدهاا من تحت راس امنية وكلساات كتمسح فعينيهاا حتى تحل الباب ومسحات عينيها بالزربة ، شافتو داخل تبسم ليها وكلس جنبهاا وقال: رتاحيتي
ايمان: نعست ههه
تبسم ليهاا وعينيها مركزيين فعينيهاا وفملامحها وقال: كريت الطموبيل غير نتغداو نرتاحو ونشدو الطريق ..جبت ليك الشانطة لابغيتي تعطي لدراري شي حاجة
ايمان: اااه (شافت ف امنية ناعسة ) شحال زوينة تبارك الله
حذيفة: تولدي ليا شي بنية بحالهاا
شافت فيه هازة حاجبها وقالت: ومعامن تشاورت
حذيفة: مابغيتيش تنسااي
ايمان: شي حوايج مكيتنساوش
حذيفة(صدماتوو ): حشومة علييك
ضحكات وقالت: غير ضاحكة معاك
بتشكيك فكلامها بقا كيرمش وقال : ؤك
ايمان: حذيفة
حذيفةباس ايدها) نعام احبيي
ابمان: ماحدنا فكازاا ، ن نمشي نشووف ميي ونخلييو تالغدا ونمشييو لدارركم غير نرتااح
حذيفة: وخة لي بغيتي نتغداو ونمشيو اكبيدة فينما بغيتيي
باستو فحنكوو وناضو بجوج خدات الشانطة جبدات منها العباية ديالهاا تصلي بيهاا وجبدات لي كادو عطات صاك لحذيفة بغا يعطيه لمجيد وادم وجبدات صاك اخور فييه صاك ماركة وباك ديال الريحة من كوتشي من الحوايج لي كيجيوهاا فابوور فلخدمة ديالها كتخبيهم حتى تعطيهم كادويات هوما والهدايا لي كيوصلوهاا و الاشهاراات حيت الى خلاتهم غير عندها كلشي غيضيع ميمكنش دير كلشي
وجبدات كاادو ل امنية لبيسة وسبااط من ديزني ومعاهم ميني ماوس غوز صغيرة …حطاتها حداها وهي نااعسة
حتى دخلات زهور وقالت: ايمان اجي تغدايي …اووه (شافت لحوايج ولمونيكة) علاش عدبتي راااسك اصاحبتيي
هزات الصاشية ديالها مداتها ليهاا وقالت: بلعكس كنفرح ملي كنتقدا لوليدات هههه
زهور: شكرا الزين(باستهاا ) الله افرحك
ايمان: اميين هه عندك بنية حلوة الله احفضهاا
زهور: هههه البنات مشاااغبات ولكن زوينين ..ياله اجي باش تغداي
ايمان: غير نتوضى ونصلي
زهور(تبسمات ليهاا ) وخة صافيي ها دووش
من بعد صلاتهاا مشاو لطبلة فيقاات امنية لي فرحات بلحوايج لبسات لكسوة والسباط ديك السعات ولبونضو ديال ميني ماوس وبقاات كتنقز ليهم فالدار خالقة ليهم جو زويين
من بعد لغداء المغربيي ولكلسة المغربيية ولجو كدالك ناضت لبسات عليها عبااية وهزات الفولار وقلبهاا مقبووط وكيضرب خافت تضعف ولكن توحشاات تشم تراب ميمتهاا وتهدر معاهاا
لصقات فيهم امنية ولكن مخلاوهاش وخرجو بجوج ركبو فطموبيل لي كراا ،ركبات ساكتة ونفسيتها على سبة غير كتنهد ،بغا يقوليها من بعد ولكن ميقدرش عارفها غترجع وحدة اخرى بقا غير ساكت شاد فايدهاا
هي عينيها فالطرييق كتشوف فالنااس وتشوف هنا وهناا دارت الشال و النظاظر هبطوو وقطعو الطريق شاد فايدهاا
غير قراات “كل نفس دائقة الموت” فباب المقبرة حسات بايديها كيرجفو وقلبها كايترعد مبغاتش تبين ليه ولكن ربي لي عالم بشنو واقف لدااخل فاحاسيسها وعقلها وقلبهاا
على اخر مرة جات هنا تبدلاات الدنياا وتزادوو ناس اخرين تحت الترااب والصف لي كانت فييه عمر وعمر حتى قداامهاا
وقفات قدام اسمهاا “المرحومة نعيمة ” سنة 2014
دارو ليها رخاامة فلبيض ودورو على جنابهاا سور من الزلييج
قرا الدعااء ..طلقات منو وشداات فالرخاامة وفمها كيرجف وحاسة بلهدرة مقادراش تخرجهاا هبطات حتى ولات كالسة قدام لقبر وحطات راسهاا على اسم مهاا وخلات دوك الدموع المحبوسيين يهبطوو شلال
حسات بييه تحنا حداها وطبطب على كتاافهاا وقال: دعي معاهاا دعوتك توصل اما دمووعك غادي غير يمرضووك
هزات راسها كتمسح فنيووفها وقالت: واش غتسمعنيي غتعرفني راه جيت عندهاا ! توحشتهاا احذيفة ،حتى فلحلم مبقاتش كتجي ليا فراسي خفت نساا صورتهاا وانا قلبي كيتقطع عليهاا مكرهتش نعطيها عمري باش نرجع نعيش معاها غير شويية ونشم ريحتهاا ،
حذيفة: بغيتي تعاندي مع الله ا ايمان راه الموت علينا حق تاحنا واحد النهار غييجب الله لي يترحم عليناا
شافت فييه وقالت: كنطلب ساعتي تكون قبل منك باش مانعيشش نفس الحاجة مرة خرا
كتقوليه شي مرات شي حواييج مكيعرف باش يجااوبهاا كيبقا غير كيشووف فييها وكيزيد يتاكد بليي البنت مصاافيااش وخاصها استشاارة طبية هادشي ماهوااش ،بقا سااكت حتى قالت: خليني واحد شوية عفااك
حرك راسوو بواخة باسها فراسهاا وناض مبعد مشا وسط القبوور كيقلب على قبر جدااه دعا معااهاا ونشر الرحمة على جميع الموتى وخرج من وسط القبور كيتسناهاا مقابل معاهاا كيشوف غير كتافها كيتهزوو وقلبو كيتهز معاهاا وسهى كيفكر
وكيرجع بعض الاحداث دازو وكالس كيجمع وكيحلل ،كيتفكر نهار بغات تمشي لشرجم وترمي راسها شعر راسوو كيشوك علييه ولا خاايف يخليها بوحدهاا حتى من لجيبي اس ركبو فتيليفونهاا بلا خبارهاا شحال من مرة جا ومالقاهاش وكتقولييه تخنقت وخرجت فاللول مكانش كيعطي الموضوع اهمية ولكن من بعد ولا كيشووف بليي الحالة لي كانت قبل الدوا بدات كترجع ليهاا
وهادشي مابقاش مريحوو وماعرف شنو يدير معاهاا خاف هادشي يتزاد مع الوقت
طولاات حدا القبر حتى قرب جا وراها وكلسس وقال وهوا كيقاد الفولار على شعرها : نمشييو
ايمان(بضعف ) : مقادراش نمشيي ،واش بصح كاينة تحت الترااب نااعسة محاسااش بياا (كيطيحو دموعها )مكتشوفنييش قلبيي كيتقطع كيتقطع
حذيفة(وقفهاا ساكت وعنقها مدة ) : ياله نمشييو
ايمان: غير شويية
حذيفة: لاا ياله نمشييو لحال غيظلاام بااركة ترجعي مرة اخرى داباا باركة عفاك سمعي لياا
سكتات جارهاا وراه حتى خرجها من وسط لقبور غادية وكتشوف فنفس لبلااصة حتى خرجو من لمقبرة كتبكيي داها لطموبييل شرا قرعة ديال لماا وشكلاط حيت شاافها اتسخف بلبكاا
حل الزاج ديال الطموبيل وجاب بيها دورة فلمدينة لي كانت ديك الساعة عاامرة مع 6 بقا كيدور بيهاا حتى تنفساات مشاو لحدا لكورنيش كيشوفو فلغرووب وهوما فالطموبيل مبغاتش تخرج
حتى كتصوني ليهاا وديان فلواتسااب جاوباات وهوا استاغل الوضع وخرج على براا كالس على لكابو ديال الطموبيل كيكميي
ايمان: وي بب
وديان: فيين السااطة
ايمان: فلكورنيش كيضربنا لبرد
ودياان: مشيتو لمحمدية
ايمان:لا مزال مشيت زرت ميي هاد لعشية تالغدا ونمشييو
وديان: ان شاء الله شفتيي واحد لفيديو راه سيفطو لييك
ايمان: ديالاش
وديان: واحد لبرهوشة مصوراك نتي وحذيفة فلمطار
ايمان(خرجو عينيها ): اويليي مشفت والو
وديان: والله ،مصوراك فلمطار كانت راكبة معاك فالطيارة
ايمان: ففف مكنتش بغييت نبين بلي انا هناا
وديان: مالك هاربة من البولييس
ايمان: بزاف ديال البرامج معيطين لياا من المغرب وانا مبغييتش مبغيتش كاع نبان كاينة هناا
وديان: ايماان راك تعرفتي احنينتيي وضروري غتلاقاي مع شي حد تماا معندك علاش تخبيي الخدمة مبغيتيش تخدمي من حقك
ايمان: انا بغيت غير الامور دوز مزيان مع عائلة حذيفة وغنرجع فحاليي
وديان: ايكون خير
قطعات معاهاا وبقات كتسنط لعظاامهاا مقابلة الشمس حتى غرباات رجع عندهاا كلس حداهاا وقال : تبغي نشدو شي اوطيل فكازا ولا نباتو فالمحمدية اليوم
ايمان: لي بغيتيي
حذيفة(باسها فنيفها): بغيتك نتي
ايمان(دفعاتو كضحك ): عطيني بالتيسااع طيبتيني
حذيفة: عقلي عليها
كدير فالسمطة كضحك وقالت: عااقلة مكانساش
رجعو لدار لقاوهم موجدين كاسكرووط وقال: برزطناكم معاناا
مجييد: كول لباغي تااكل مبرزطني مطيب لييك عجل
حذيفة: ههههه مداويش معاك نتا راه غير كتسرط المدام لي كطيب
زهور: ههههه والله مرحبا بيكم اخويا بلعكس
امنيية: طاطا شنو نسميي هاديي !
ايمان: سميها شنو مابغيتيي احبيبة دياليي
امنية: ادم شنو نسمييهاا
ادم (بهدوء): وانا مالي
من بعد مكلسو مجموعيين زهور كتهدر مع ايماان على خدمتها لي حتى هي فمجال الخياطة والتصميم
ايمان: وعلاش ماكملتييش
زهور: دايرة لمحال دياليي ف اكادير مرحباا بييك ههه
ايمان: دابا نتي كتخدمي غير لبلدي
زهور: غيير لبلدي العشق ديالي التكاشط والقفاطن وجلالب همااويين
ايمان: غاانضرب شي دويرة عندك حاطة فانسطاا
زهور: ااه ديري بوتييك الزهرة
دخلات كتقلب داكشي لفريييع فالتكاشط والجلالب ولجباادور وقالت : واش دايرة حتى تنݣاف ؟
زهور: لاا هاد لكوليكسيون خدمتها لواحد نݣاف ف اكادير راه معرووف
ايمان: مكديريش الروومي ؟
زهور: الصراحة لا ركزت فلبلديي كتر،كنشوف داكشي لي كتلبسي مااشاء الله حذيفة عندو صنعة وتصميم زويين
ايمان: ااه بزااف وليت كنرتاح غير فالتصاميم ديالو كتر
زهور: انيقين ومستوورين معرفتش علاش مكيحطش انسطا كان غيدير بلاصتو دغياا
ايمان: راسو قااسح مزال مبغاش ولكن الفكرة كااينة ههه
زهور: اللهم يسر
حذيفة: ايمان مشيناا
مجييد: فيين احبيبي ؟ كلس اواا اللرض
حذيفة: لا لا بلا منزيدو عليكم تالغدا ونتلاقااو
امنية: لاااا متمشييوش عفااكم (مشات عنقات ايماان) عفاااك اطاطا
زهور: مادرتو فيها والو تخليو دار كبيرة وتمشيو لاوطييل اليوم ندوزوه مجموعيين
مجيد(هز كاوكاو كينقب وكيضحك): غير كلس مرتاااح دااابا تمشي لاوطيل احنيني
حذيفة(شاف فايمان وضحك ورجع شاف فمجيد ): مالك فهاد الضحك
مشات زهور لكوزينة وتبعاتها ايمان بقات كتحلف عليها حتى عطاتها تعاونهاا باش يوجدو لعشاا
بقات ايمان سااكتة شوية كتفكر وقالت: زهور نسولك
زهور: اهااه
ايمان: كتعرفيي حنان بنت عمهم
ضحكات زهور وقالت: اييه كنعرفهاا مالهاا
ايمان: علاش ضحكتي
زهور: حيت عرفتك شنو بغيتي تقوليي …داكشيي كان قديم
ايمان : وهيا دابا تزوجات
زهور: لا لا مزال مبغاتش
ايمان: باقة صغيرة !
زهور: تكون عندها 31 تقريباا باقة صغيرة
ايمان: وعلاش زعمة مبغاتش تزوج ،يكما كتسنا ف حذيفة
زهور: ههههه الاا مضنييتش ولكن مبغاتش وصافي
ايمان: ساكنة فاكادير
زهور: لااا ساكنة حدا عمي مع خوها ومرت خوهاا ملي مات خوه سكنهم معااه وملي تزوج دري لكبير خرج ومشات معاه ختوو حيت كانت مخطوبة لحذيفة مكانوش بغاو يخليوهم فدار وحدة حتى يتزوجو السعاتي قاليهم لاا ،انا هدشي عاودو ليا مجيد حيت محاضراش لييه ملي تزوجت كان حذيقة ف تركيا لمرة اللخرة
صافي سكتات مبقاتش سولات فالموضوع تعشااو مجموعيين وبقاو مجمعيين حتى نعسو الدراري داتهم زهور لبيت وبقاو كالسيين بربعة بيهم على كاس ديال اتااي عيااو نساا وكل وحدة فيهم دخلات البييت
بدلات حوايجهاا وطاحت فلفرااش ومع الصيف الزنقة عاامرة والطريق حتى هياا حتى بداو كيتسدو لمحالات عاد بدات الدنيا كتخوا..فراش مبدل وهواء مبدل مخلاش النعاس فين يجيهاا سمعات لباب كيتحل وتقلبات جيهتوو تشافتو دخل تبسم ليهاا وقال: فيقتك
ايمان: لاا مزال منعست تعطلتيي
تكا حداهاا بقبلة طويلة على شفايفهاا وقال: محسيتش بالوقت
دخل لدوش لي كاين فلبيت نييت غسل من ريحة لكارو وبدل علييه عاد جا حداها متكي جرها عندو طافي الضو
حذيفة: ريحتك زويينة
زادت تخشات فيه كضحك: ممم تصبح على خيرر نعس
ضحك وزير عليها تقمشاتو فايدو كضحك وقال: قلت شي عيب
ايمان: ههه لا لا
ضحك كيحك ليها فشعرها بلطف فسكون الليل حتى نعسوو
حتى كتحلم براسهاا كتجري وسط لقبوورة فالظلاام وصوت لكلا_اب كتجري ورااهاا حتى مشات لقبر مهاا وكتسمع صوتها جاي من لتحت كتبكيي وكتغوت وبغات تبداا تجبد فلحجر شوية ناضت بغات تهرب من لكلا_ب حتى لقات وراهاا شخص اسود لبشرة وكلو د_م بداات كتغوت
حتى فااقت كتنهج عرقانة وحذيفة مشعل الضو مخلووع
حذيفة: بسم الله علييك (قرب عندها )غير كتحلميي قولي اعود بالله من الشيطان الرجيم
مد ليها قرعة دال لما تشرب مقدارتش تشدها بايدها كيترعدو كتنهج وعرقانة شدات جناب راسهاا كتبكيي بلخلعة وقلبها غيسكت
حذيفة: ششش ايماان تهدني …غير حلمة
ايمان: هءهءهءه ماشي حلمة ماشي حلماااا هءهءهءه حياتي عذااب ونعاسي عذاااب هءهءه اااه
قرب ليهاا وقال: مواقع والوو ايماان ،ايماان شوفي فياا نعلي الشيطان
بقا معاهاا كيهدنهاا كيرطب خاطرها واخا الرعدة والخنقة شداهاا نوضها لدوش رشها بلماا مسح على عنقها وكتاافهاا ورجع كلسها كيسول فيهاا شنو حلمات وهي كتحرك فراسهاا بلا ودموعها هابطيين ماباغاش تعاود
النعاس طار مابقاش بغا يزور عينيهاا وهوا كالس حداهاا وشاد تحت فموو كيخمم كيقرا عليهاا ويرجع يسكت يفكر حتى سمعو الاذان ديال الفجر
كان ناوي يمشي مع مجييد لجامع ولكن ميقدرش يخليها فهاد لحالة
هز تيليفونو سيفط مساج لمجيد ملي شاف الضو برا شعل كاتب لييه * غير سير اباا مجييد عيااان *
جاوبو فلبلاصة وقال: مممم عيان الله يجيب الشفااء
حط التيليفون وبقا كالس حداهاا معنقهاا
حذيفة: نتوضاو نصلييو وخة
حركات راسها بااه سبقهاا وخرج ناضت بزز توضات والدمعة فعينيهاا كتشوف فايدهاا ودموعها كيطيحوو نهار على نهار كتزييد ضييع مبقاتش قاادرة تزيد دقيقة فهاد لعذاب لي عايشااه
خرجات طافية كيف دخلاات لبسات عباايتهاا وجات وراه كيصلييو والعقل غاايب بلا خشووع تفكيرها منحصر فاحلامها لي ولات كتحلم هاهي كتجري ها لكلا_ب تابعيينها هاهيا فلقبوورة هاهيا طايحة من شي علوو كل مرة حلمة فشكل
سلموو وتقلب جيهتها لقاهاا على وضعيتها كالسة وساهية قدامها تقرب جيهتها شد ايدها وتبسم ليهاا رجعات ليه الابتساامة بهدووء وقال: شوية
ايمان :شوية
ولكن فلداخل ديالهاا ماشوية ما والوو هي كلمة كطمن الناس عليها ولكن هي لي حاسة بالجهد وحاسة بخاطرها ونفسيتها كيفاش دايرة
حذيفة: غير تبدل علييك لفراش يمكن
حركات راسها باه وتكات مقابلة معااه بغا يطفي ضو وقالت: خلييه
رجع لبلاصتو مخلي الضو شاعل تكا حداها مقابل معاهاا
غمضات عينيهاا على اساس بدا كيشد فيها
نعاس وعطاتو بظهرهاا مكان منو غير يحضنها لعندوو و ينعس عكسها هي لي دموعهاا هبطو بهدوء وكل مرة تمسحهم وكتنفس من فمها باش ميحسش بيهاا
طلع الضو وغفات شويية عينيها منفوخيين بلبكا ماشي بنعااس
سمع امنية كتبكيي فدار فاق من النعااس مكمش عينو فالضو تقلب جيهتها لقاها ناعسة شاف الساعة لقاا 10 ديال صبااح
قلب فتيليفونوو دخل لانسطا حتى كطلع ليه واحد لباج مغربية كاتجيب غير لخباراات لايحة فيديو فييه هوا وايماان فلمطاار تعصب ومسح على وجهو كيسووط
مشا كيطل من السرجم على الشاارع بقا مدة واقف لابس حوايجوو ومقابل معاهاا ولا هاز ليها واحد الهم ربي بوحدو لي عالم بييه ،هدشي ولاا كيضرو فخاطرو وكيبدل ليه موراالو
حلات عينيهاا وهزاتهم جيهتوو فلحظة بدل ملامحو وتبسم ليهاا وقال: زعيبيلة فقتيي
تبسمات لييه وكلسات كتااوب ناضت عندوو مخشية فييه وقالت: عاد فقتيي
حذيفة: غير شوية هداا
ايمان: نمشي ناخد دوش دغياا ونخرجو
باسهاا وقال: مبقاش داباا شعرك غيفزك ههه
ايمان: هههه مغاديش نقيسوو
حذيفة: وخة المسمومة ههه
ضحكات ومشات هزات لفوطة من الشانطة ودخلات تدوش
خرجات لاوية عليها فوطة ودايرة لبوني لبلاستيكي على شعرها باش ميقيسوش لماا غير خرجات حيداتوو
جا من وراها عنقها وهي كتجبد فلحوايج وقال: بصحتك دغيا راه تعطلنا عليهم ههه نساوناا
جبدات حوايجهم لي مستفيين لحوايج لي غيلبسو، هوا لبس عليه قميجة زرقااء ودجيين تريح ودار ساعتوو و الستريس شادو لحرارة اللقاء بميمتو اكتر شيء بغاها تشوفو زوين وانيق كيف تعودات علييه
ايمان: حذيفة
حذيفة : وي حبيبي (تقلب عندها لقاها شادة فمها )
ايمان: نسييت الجلابة لي بغيت نلبس
حذيفة: كنتي جامعاهم شنو وقع لك
ايمان: والله معرفت شنو ندير دابااا ؟ نخرج نتقدا شي حاجة ! ولا نلبس شي كسوة من هادوك لي شرييت
حذيفة: لي بغييتي ولبيضة لي جيتي بيها حتى هي زوينة
ايمان: لااا لبستها لباارح نعاود نلبسها اليوم (كتغبن)شنو نلبس
حذيفة: لبسي علييك لي كان ونخرجو نشوفو شي محال هنا
ايمان: ؤك
لبسات اونصومبل مبرد بقميجة نص كم وسروال فضفاض مشطات شعرهاا هزات لي غتحتاج فواحد الصاك من مكياج وريحتهاا حتى تلقا شنو تلبس
جمعات لبيت عاد خرجات كان حذيفة خرج سبقهاا لقا كلشي فااييق
دخلات ايمان على زهور لكوزينة لقاتها كتحط فلمسمن فطبسيل وقالت: صباح الخير
زهور: صباح الخييير نعستي مزياان
ايمان: الحمد لله ربي يخلييك اختي
جات امنية كتجري عند ايمان هزاتها كتبوس فيهاا وقالت: حسابلي مشيتيي
ايمان: باااقة ههه قولي ليا ازهور كتعرفي شي محال ديال لبلديي هناا جلابة لي كنت غنمشي بيهاا نسيتهاا بالتلفة ههه
زهور (ضحكات ) : عيب وحشوومة نوريك شي حد وانا كااينة هههه
ايمان: وشنو دابا نمشييو تال اكادير نتقداو من عندك
زهور: ههههه لهلا يحوجك الزيين غير نفطروو نوريك محال متنقل هههه
ايمان: صافي وخة
فعلاا فطرو جمعوو الروينة ودخلاتها لبييت جبدات شانطة صغيرة وقالت: هادشي لاش جايباه
زهور: كازا عندي فيها كلياناات وطلبوني ملي كنت جاية باش نجيب لييهم لكوليكسيون اللخرة
جبدات بلاستيكة شفافة كتبين جلابة باللون الكراميلي مخدومة ومطروزة كدالك بنفس اللون ولتحت قفطانهاا بكول طالع اوفيسيي فلبييج باارد حمقاتها ديال بصح وقالت: تباارك الله غزالة يا زهور
زهور: هادي احبيبة ديالك
ايمان: ههه بصح (عنقاتها) شكرا فنة ياختيي وليت كلياانة ديالك فلبلديي صافي هههه
زهور: بالصحة والرااحة لقالب غاالب غتجييك واعرة
ايمان: ههه ياك نقدر مليي نحطها شي مرا فانسطا نطاكيك
زهور(بمزاح): طاكيني يااختي نولي نبييع لݣور ههههه
ايمان: هههههه راه كيحمااقو على هدشي ،شكرا احبيبة مرة اخرى ،نمشي نلبس باش نمشييو
زهور: حتى انا نبدل لدراري
ايمان: مزيان لي غتمشي معاياا مكنعرف حد تماا
شدات جلابتها وقصدات لبييت لبسااتهاا ،جلابة بتوب لكرييب باردة جاتها عباار لبساتها مع سباط كحل وصاك كحل ماكات وجهها بمكياج خفيف ورشات ريحتها جبدات لبلاك بوكلاات شعرهاا وشدات الزغيبات الاماميين اللور بفليلات شفافيين دارت سنسلة ديال الذهب ديال مهاا خاتمها ساعتهاا وخواتم رقيقة ذهبيية فاصابعهاا لي صبغاتهم بلون باج باارد مناسب لون بشرتهاا..كانت فدوش كدير اللمسات لاخيرة تسمعاتو دخل لبييت
حذيفة: ايمان وجدتي راه 12 هادي
ايمان(كتسد فلفغاجو): صافي سالييت
حهز لكاسكييط دارهاا كيقاد فلقاميجة تخرجات قداموو بداك اللون لي كيجيهاا زويين وشعر زعر ولقفطان بيج كتبان انييقة ورااقيية فلبسهاا بدا كيقرب ليها وعينيه حشمووهاا وقالت كضحك : نتا فعار الله مالك
حذيفة(قرب شم شعرها وجرها عندوو غاطس وجهو فعنقها حتى بورشها بلحيتوو وختم قبلة تحت ودنيهاا حتى تعوجات لييه وقال): دابا نتي دياليي
ايمان: ممم شنو بان لييك
بغا يبوسها من فمها وهربات وجهها كضحك وقالت: عاد صايبت لعكر
عض على فموو وقال: نبوس انا بعدا ونشوفو لعكر (ركز مع وجهها) مسحييه شوية ديجا فمك حمر
ضارب معاها حتى مسحوو بايدوو شدها فلقنت ديال الدووش يبرد الزعطة لي شداتو عليها عاد برد شوية وطلقهاا خلا فمهاا حمر وعنقها كذالك وقالت: ويلي انخرج هكاا
تقلب جيهة لففابوو كيمسح فاتار لعكر على فمو كيضحك خلاها كتعاود فوجهها حتى رجع من بعد مدة عندها ضاربها لمؤخرتهاا تشافت فييه لقاتو كيوريها فالطبعة فلكول تاع لعكر وضحكاات : ونهار هدا مع لحواييج ههههه
حذيفة: زيدي زييدي عطيني شنو نلبس تحاشمنا مع السيدة
خرحات كضحك حلات لبالييزة جبدات لييه تيشورت لاكوسط كحل وجمعات لقميجة ..هزها داها وهوا كيوصي باش مديروش وفعلا غير مسحات فمها دارت كلوز شفاف كيخلي غير اللمعة
لقات زهور حتى هي بجلاابة همااوية و امنيية كدمع لابسة صالوبيط سروال
ايمان: مالهاا
زهور: بغات تلبس لكسوة لي جبتي ليهاا وخوات عليهاا الصباح لحلييب مزال منشفاات
ايمان: مشاات تغضب علييك
زهور: ههههه
امنية(كتبكيي ): مبغيتش السروال هءهءه لبسيني شووورط
زهور: لاااا راه هضرت معااك اش قالييك بااباك
ايمان: جاها الصهد يمكن
زهور: راه لعفريتة مولفة التقزااب وعمي مكيعجبوش لحال كيبقا يخاصم على مجييد كيقوليه غتفششها
ايمان: باقة صغيرة اصاحبتي
زهور: كايقوليه علاااش مكبراات معلينا غير نديرو بكلاموو قداموو
ايمان: كتزييدي تخلعيني منهم
ضحكات زهور كدور فراسها وقالت: ويلي ويلي ههههه
ضحكو وخرجوو امنية غضباات على باها ومهاا مبقاتش بغات تركب معااهم ولصقات فحذيفة
مجيد: سيريي سيري يالمدلولة دابا تجيبك لياام
هزات كتاافهاا وعينيها حمريين وحذيفة هازهاا غادي بيها لطموبيل ركبها اللور وعطاها مونيكاتها وشاف ف ادم هابط وقال: ادم ياله غضب لييهم
جروو مجيد من عنقوو بااسو وقال: هدا يمضغني ميسرطنييش
ضحك ادم حشماان وقال: لا صافي انمشي مع باباا
تبسمات ايماان كتركب فبلاصتهاا وبقات كتشوف فييه من لمراية غادي معنقوو تالطموبييل كيعنكش فييه وباسوو بزز وادم كيضحك حتى قرصها من حنكهاا وقال: فين سهيتي ازيين
ايمان: عجباتني علاقة ادم مع مجييد
حذيفة: علاه مالو كيبغاات تكون ههه الصراحة وعلى قولتو راه مكيفرقش بيناتهم داكشي لي كيديرو اي اب دايروو معاه وكتر كاع
تبسماات وتحركوو على طريق المحمدية ، سايك داير لكاسكيط والنظاظر شمش حارة ضاربة فييه
ايمان: راه خاصك تعلم خالتيي
حذيفة(ضحك) : مقدرتش خفتها تجمع عليا عباد الله كنعرفهاا
ايمان: راه الى دخلتي عليهاا هكاك بغيتي تسوطييهاا ههه
حذيفة: دوزي ليا نمرتهاا
هزات تيليفونوو دوزات نمرة موو ودارت المكبر حتى جاوبات وقالت: الوو
تبسم لصوتها وقال :مي لبااس
لطييفة: لباااس اولدي الحمد لله
حذيفة(شاف فايمان وشد ايدها باسها ) : اوى موجودة تفرحي بشي ضيااف عزاز ؟
لطيفة:ههههه الضيف على راسي وعينيي اولديي وسيدنا رسول الله وصاناا على اكرام الضيف
حذيفة: عليه الصلاة والسلام ،
لطيفة: شكوون اولدي ؟
حذيفة: انا هههه
لطيفة: ياك مكضحكش عفا ولديي مكضحكش واش واش جااي
حذيفة: جاااي اميي مبقا والو ونوصل عندك شي ساعة وانا عند ميمتيي
لطيفة: و ايماان ياك جااية
حذيفة: ضرووري
تبسمات ايماان وكملات لطيفة كلامهاا بصدمة ولات كدخل وتخرج فلهضرة: وح وخ هانا كنتسنااك بسلامة
قطعات عليييه وبقا كيضحك وقال؛ صدمتها
مزال كيهضرو فلموضوع حتى صونا محمد و جاوبو حذيفة وقال: محمد بخير
محمد: الحمد لله واش وصلتيي !
حذيفة: قربت شي نص ساعة وندخل المحمدية
محمد: لواليدة دااخت ههه مامتيقااش مسكيينة
حذيفة: هاهيا نيت كتصوني بلااتي
جاوبها وقبل مايهدر قالت: الوو ،الو حذيفة
حذيفة: نعام اميي
لطيفة: ياك جااي مكضحكش عفااك اولدي مضحكش معاياا رااه
حذيفة(قاطعها بمزاح): لمبغيتيش نجي نرجع من طريقي
لطيفة: لا لا لا اولدي مرحباا بيييك(كتبكيي)صافي بسلامة انتسنااك بشوية فالطريق
قطعات معااه وتنهد تنطقات امنيية وقالت: عمو دير لياا اودادن
ايمان: شنوو هدا ههه
حذيفة(ضحك ): كيعجبك (شاف فايمان) طابي اودادن فيوتيوب يطلع لييك
دوزات لبلوتوت لطموبيل وطلق ليها اودادن النغمة السوسية وبدات كتشطح اللور وتغني معااه وحذيفة معاونها باشهر اغاني اودادن “على ربي الزين”
هزات ايمان ايدهاا كتعاونهم فريتم الشطييح وحذيفة كيشرح ليها الكلمات لي مازال مفهماتهمش
شوية تانيي بدا كيهضر مع امنية بالشلحة وتاهي مشاداهاش بزااف
حذيفة: نتي سوسية مزورة ههه
امنية: ههههه كيقولها ليا باباا ههه
متلفيين الستريس حتى دخلوو للمدينة داز من وراه مجبيد كيكلاكصونيي علييه بحالا مروح عروسة هه
وسبقوو كيكلاكصوني ونطق حذيفة كيضحك: هاد باباك كيموت على الشووهة
امنية: لاااا بابا كيموت على الزيين
ايمان(ضحكات بالجهد وشافت فيها): كيفاااش ههههه اديك لفارة شنو قلتي
امنية: بابا كيموت على الزيين هههه ماما كتقولييه زهوااني
حذيفة(ضحك): احح على باك اش دوز قبل مايتووب
ضرباتو ايمان لكتفو كضحك وقالت: وكنقول علاش نتا وباه سمن على عسل قول دوزتوو لعجب
ضحك وقال: متلومينيش على الماضي ههههه
بداو كيدخلوو بين الزنااقي وقالت: قربنا !
حذيفة: مم اييه لقدام شوية
ايمان (سكتات سوية وقالت): عنداك تشوف العائلة وتنساني
مركز فالطريق وضحك: نساااك كيدرتي ليهاا
ايمان: معرفتش
حذيفة: انا معاك الزين مناسيكش
لوو لحي كاالم وهادئ فيه ديور كباار بجراادي بلاصة نقيية وقت الجوج والشمش حارة كلشي داخل لداروو ،نعت ليها الدار كانو حداهاا وليدات صغار كيلعبو قدام باب جردة لدار كبييرة ومصلووحة و الجردة لداخل فيها شجرة كبيرة تاع لحامض بقات كطوال حتى تلاحو لعراش فوق السور
سطاسيونا مجييد قريب لدار لي غير سمعو حس الطموبييل خرجو كيتسابقو الدراري الصغاار
تخرجاات سيدة ستينية بقفطان بيتيي ولايحة عليها خمار كتقلب بعينيهاا
الاخير غير شاافهاا من الطموبيل بحال الى شااف الجنة قدااموو خرج مخلي ايمان متبعااه
الام رمات عينيها لجيهة طموبيلتوو وبدات كتجري عندو وتخبط على صدرهاا كتغوت تلاح فيها حذيفة بحال الطفل مزير عليهاا هي كتبكيي وهوا كيبكيي
كيبوس الرااس والايديين ،خرجات ايمان والدموع فعينيهاا من منظرهم بقاات غير كتشووف بعييدة عليهم شوية مقدراتش تقرب خلاتو يعيش لحظاته المؤثرة مع عائلته
الام مكانتهاا عند الرجل ولا المراة شي حاجة عظيمة وهي فلحيااة وتحرم منها لسنين فمساهلااش علييه حرارة اللقااء كانت قوية مفرقو داك لحضن حتى جاو خواتاتوو كيجرييو اكتر فرحة والدموع فعينيه كيعنقوو فييه ودموعهم كتجري كل وحدة تجرو لقنت حتى طاحت لكاسكييط فلارض
باقي حاضن مو باييد ولايد التاانية كيعنق فخواتاتو بربعة كلهم تجمعو ولوليدات الصغاار كلشي كيشووف ومعاهم خالد الحفيد البكر لي عارف خاالو مشاا عنقوو حتى هواا
وشكون بقا بعييد ايماان كترمش تشافت مجييد جايي لجيهتهاا شاد فايدو امنية وقال: مالك واقفة هنا بووحدك
ايمان(مسحات عينيهاا ): لاا غير (غلبات عليها لبكيية)
رما ايدو ورا كتاافها وقال : زيديي لهناا راه عائلة وحدة داباا
تمشات معااه وهوا هز بنتوو توقفات حدا زهوور
والكلمة لي فرحاتها كتر سمعاات سميتهاا من فم لطيفة كتسول: فيين اييماان ؟
مجيد: علاه نتوما باقين تفكرتو شي حد
ضحكات لطيفة والدموع فعينيهاا جاية تسلم على ايماان لي غالبة عليها لبكيية وتخلطو عليها المشااعر تقدمات عند حماتها بخطوات خفيفة حتى عنقااتها مع غمضات عينيهاا فحضنهاا طاحو دوك الدمعات لي تحبسو فالعيين
حسات بواحد الدفئ وحنان فلمسة لطيفة على ظهرها كتهضر بخفووت وكتقول: الحمد لله على سلامتكم ابنتيي
ماسخاتش بداك الحضن وعرفات حذيفة علاش طول فييه
شدات فايدهاا فرحانة بيهاا وقرباتها لبناتهاا كتسميهم ليهاا وكتعرفها علييهم قدام باب الداار سلمات علييهم وكلهم كيسلمو بالتنخصيص وعقلهم غير فخوهم
دخلو من باب الجردة شادا فايد ايمان بحال البنية صغيرة كترحب وتعاود : دخلي ابنتيي مرحبا بيييك
كانو جوج بيبان واحد ديال السفلي والتانية كيطلع لطبقات والسطح طلعو فالدروج حتى لطبقة لاولى مبردة ومصلووحة وفيها رييحة طيااب والفرح بحال شي عرس بانت ليها مرا شوية كبيرة فلقنت معصبة رجليهاا مشات بابتساامة سلماات عليها والاخيرة كتعنق وترحب بصوت رقيق مغلووق بالشلحة
غير بان ليها حذيفة بغات تغوت معرفاتت تنووض معرفات تكلس تجاا عنقهاا وكضرب فظهرو بالصدمة ولبكية مامتيقااش كلس حداها كيبوس فايدهاا وترجع تجرو تعنقوو
حتى بدات كتسخف ومشاو كيجيبو فلما والسكر ويشربوه ليهاا
ايمان كالسة حدا حماتها وحذيفة بقات شداه مرت بااه لي بالنسبة ليه الام الثاانية كبرو على ايديهاا بحال الجدة لييهم
دخل محمد حتى هواا خدا حقوو من العنااق والوحش لابس فوقيية بييج وبلغة فرجلييه
بدا حذيفة كيقلب عليهاا بعينيه حتى بانت ليه حدا مو وتبسم ليهاا
رما عليها محمد السلاام بلا ميعطيها ايدوو وكلس حدا خووه كيعنق فييه ويضحك
حذيفة: فيين باا
محمد: خليتو فلمحال مع مجييد شوية ويجيو
تبسم لييه وبقاو كيضحكو بالصدمة والفرحة كلشي مخلط زهور كالسة جنب ايمان شادة امنيية وخواتات حذيفة عاد ضرباتهم لفطنة وبداو كيحققو ف ايماان ويفليوها بعينيهم ولطيفة كترحب ب ايمان وبزهور وبحذيفة معرفات مسكيينة شنو ديير
ناضت من حدااهم خرجات كتزرب حيدات داك لخمار وبقات بزيف عاادي طايح على كتاافها شوية دايرة طابليية بيضاء مطرووزة فوق القفطان وجامعاه من لكمام بلاستييك وخة كبرات باقي الحرووف والبيوضة والغلض لايدين مطبزيين وفييهم جوج دبالج من النقرة الحرة القدييمة وخاتم نقرة مشات جابت بلاطوو فيه التمر ولحلييب نساتو بلفرحة وقالت : سمحولياا نسييت نسييت هء(كتهز زيفها تمسح بيه عينيهاا )هاك ابنتي بسم الله
هزات ايمان تميرة وشربات من لحليب وعطات لحذيفة حتى هوا وزهوور ومشات كتعنق فولدها مساخياااش ومامتيقاش بليي قدرات تصبر 8 سنين كاملة بلا متشوفو
ملي خوات لبلاصة كلسات امينة لاخت لوسطى لحذيفة بشوشة و كاتشبه ل لطيفة حطات ايدهاا على ايمان وقالت: مرحباا بييك ايمان
ايمان: الله يكبر بييك اختيي
امينة: واخة عليك ازهور معلمتينيش ياك غير لخميس جييت شفت ايناا مقلتي ليا والو
زهور: والله مكانت فرااسي حتى شديتي الطريق حسابني واش فراسكم
امينة(ضحكات): والله مفراسي مزيان بعدا ملي جييت ههه حنا راه حلو عليناا عاد فرحناا تاحنا كنا فلغربة
زهور: ههه والله مكدبتيي
بدات الطبلة كتعمر بماا لد وطااب لحلوة تقدواها حيت جاهم على غفلة والطباسل ديال لمسمن ولبغرير ودوازو بقاو كيحطو حتى ملقاو فيين
حتى تمات جاية خديجة مخطووفة وشافت ف حذيفة ونطقات بالشلحة: با با جااي (اشارت ليه بايدها )نوض عندو
مزال ماكملاتهاا حتى طل الحااج بلبااس تقليديي فوقية بيضة وفوقها جلابة ، تقاشر بيضين وبلغة كحلة وطاݣية فراسوو جامع تسبييح فايدو وداخل فلكولواار غير رما السلام قبل ميبان ليهم بناتو تقادو فبلايصهم وعم السكاات حتى باان قدامهم وراه مجييد فايتو بالطوول كاع الضساارة و التكركير كيهرب ليهم قدام الهيبة والصرامة لي عطاه الله بلحية بيضااء كثيفة و بشرة بيضااء نظاظر فعينيه
وقف حذيفة باحترام و هبط لييه على ايدوو كيبووس فييه وجرو الاب لحضنوو مزير علييه وقال: على سلامتك اولديي
شافت لطيفة ف ايمان وحركات ليها راسها وفعلا ناضت كتفتف وتبعاتهاا حتى زهور
ياله فصلو لعناق كتباان لييه ايمان قبالتو تلغات ديك الضحكة وهز عينو فمجيد وف حذيفة لي عينو فايماان
خافت فهاد اللحظة يجري عليها ولا يقول شي كلمةة مقدراتش حتى تشوف فيه فااص عينيها فلارض مدات ايدها ومد ليها ايدو باستهاا وقال: مرحباا ..مرحباا
جات زهور بابتساامة وبادلها لابتسامة وقال: مرحباا بنتي مرحباا
باست ايدو حتى هي وجابت امنية تهرس ليهم لوضع وفعلا هزها كيضحك وباست ايدوو وكيهضر معاها بالشلحة وهي كضحك كلمة تفهمها وجوج لاا حشمانة وكتلعب ليه بلحيتوو
توجه لصالون لمقابل وتبعو محمد وادم وكلسو منفارديين على بعض
لطيفة: خديجة عيطي على مرت خووك
اسية: حشماات ملي شاافت مجيد وحذيفة مقدراتش تسلم
ربيعة: وعيطي ليهاا عيطي
شي مرات الصدف ولاا القدر كيخليناا نتعجبوو ف قدرة الله وبلي الدنياا صغيرة وتقدري تصاادفي فالطريق واحد الانساان لي كنت كتقوليي عمر طريقيي غتجي فطريقو ،قدام قدرة الله يقول كن ف يكون
جاية كتمشا بخطوات بطيئة بكسيوة حجابية وفولار طويل مغطي كتاافهاا رمات السلام عليكم من الباب تهزات ايمان عينيها من بعدما كانت كضحك مع زهور ،وضحكتها بدات كتلاشاا شوية بشوية محدها كتقرب جيهتهاا محسات براسهاا توقفات وعينيهاا فييها مطلعاها من رجليهاا تاستاقرو عينيها فوجهاا لمدور بيضااء وعينين كحليين حناكها مزنكين وباين عليهاا التوتر لي مخبياه تحت شبح الابتساامة…هي نفسهاا إسراء بنت عبد الله
قبل متنطق بحرف كانت الاخيرة عنقاتها كضحك وباستهاا كترحب بييهاا وحدا ودنها نطقات بالزربة وقالت: مكتعرفيني مكنعرفك ههه مرحباا بييك
گلساات حاسة بلارض كدور بييها بقات متبعة ل اسراء العين كتاكد واش هي ! كيفااش اشنو وااقع
واش هدشي صدفة كيفاش لعمر داز ،كيفاش خلات عندها 16 لعام دابا لقاتهاا مزوجة
حسات بلي العمر داااز وهي باقة كتفكر فنفس لحاجة بحال الى العمر توقف بالنسبة ليهاا بدات كتسهى غير لبارح كانت عندها 18 لعام وداباا 26
كيفاش داز هاد العمر بهاد الطريقة كيفااش العشرينات دازت بهاد السرعة
ومزااال كتبكي على نفس الحاجة مزال كتالم من جرح قدييم لي مزال جديد فقلبهاا
معمرها فحياتها توقعاات غطيح فهاد العلاقة
حسات براسهاا صهدات وتزنكاات وقلبهاا غيخرج من بلاصتو وكيفاش غتبقا تبان عادية وسط هاد النااس كامليين ،هزات عينيها فاسرااء كتأكد ليكون احساسها كاذب وعينيها كيكدبوها لقاتها هي وخة كبراات متخفااش عليهاا ولات طبق لاصل لمها خولة دات بيوضتهاا وكحوليية الحرووف وزاد لحجاب نور وجهها كتشوفيهاا بحال بنات الشيشان بداك اللبااس المحتشم
مدات لطيفة اتااي لايمان شداتوو ونفسها مسدودة وزادت تسداات
اما عند حذيفة فدخلو لصالون بلديي سوسي بامتياز من الزربيية الحمراء لي داخل فيهاا رمز “تيفينار فوسط الزربية وطلامط مخدوميين ومنجوجين بلاييد مع مخااد صغاار من طبع الحاج مكيبغييش لبوونج ،حيت معظم وقتو كيبغي يكلس مربع يسبح ولا يقراا
كلس فطرف لبييت فبلااصتو واحد الركن فليسر فييه مجموعة من الصلاياات مطويين والركن الايمن فييه تسابيح وكتب القران وقرعة ديال الحبر مع عود فقرعة محطوطين فالجنب وكتااب كبيير من الاورااق
طبيلة دائرية ديال العود وسط الزربية والباب مسدود عليهم وشي كيشوف فشي
هز الحاج عينو ف حذيفة كيعبرو من ساسو لراسو شنو تزاد شنو نقص علييه
الحاج: امورك مزيان كيجيتي مع الطريق ..جيتي فلباطو ولاا الطيارة
حذيفة: الحمد لله ،لا لا جيت غير فالطيارة الباطو مزال محبووس هاد الساعة
مجيد: بابا تحركات الحركة عندك شوية
الحاج: اوى اولدي الحركة نقصات مع كورونا شوية والحج مزال حاابس السلعة بدات كتنقص الله يجعل ربي يدير تاويل ديال الخير
الكل: اللهم اميين
الحاج: علاش مجبتيش ايناا جاي جاي
مجيد: عياانة شوية
الحاج: وضروري نمشيو نشوفوهاا الله اهديها مبغاتش تجي عندي شوية
مجيد: هههه ولفاات تما
الحاج؛: خلييها الراحة هي كولشي (شاف فحذيفة كيهضر مع محمد حداه )ونتاا مرتااح
حذيفة: مرتااح اباا
الحاج: باينة على وجهك الرااحة اولديي ،مامشيتي حتى جبتيهاا ضربتي بكلاميي للارض
حذيفة: انا متزوجتش بيها باش نخبييهاا
الحاج: ههههه (كيسبح ورجع طلع راسو فيه )على هي بعدا مخبية رااسهاا باش تخبيها نتاا
شاف حذيفة فمجيد لي هز لييه راسو وكيدوروو بممعنى كحالت علييك
محمد: بابا راه ماشي وقت هاد الهضرة ياله دخل
الحاج: لي دخل لداري مرحبا بييه ،ولكن قوولييه راه ماشي لي دخل لداري دخل لخااطري
مجييد: باباا
الحاج: سكت نتاا(شاف فيه ) نتا غير سكت الطريق لي خليتي بغا يكملهاا هواا
مجيد: مدايرش شي حاجة حراام تزوج فلحلال
حذيفة: واش اباا نفس الهضرة داباا قولياا ديهاا والله اعاونك وحتى داباا باقي لحال الدار داارك ولمبغيتيهااش نهزها ونزييد فحاليي ،خايبة ولا زويينة مرتيي
مكملوش الهضرة دخل خال حذيفة و ولدوو كلسوو والهضرة تبدلاات مع المواضييع
حتى عند ايمان كان الصالون عمر كلشي داخل كيباارك ويفرح لفرحهم العائلة و الصحااب والمباركاات
القطباان واللحم بالبرقووق ديسير واتااي حتى طاح الظلام عاد بدات الدار كتخوا من الزواار مشافتووش مرة اخرى حيت هبطو لدار لتحت ملي دخلو الرجاال وبقاو هوما فالصالون لكبير كالسيين حتى قهرها لعياا
زهور(شافت فتيليفونها ): ايمان غنمشييو دابا مهيم بيناتنا التيليفون
ايمان(خرجو عينيها وشداتها كترغب فيها): عفاك كلسيي معااياا
زهور: والله مكرهت ولكن والله ميخليني راه من قبيل وهوا مبرزطنيي نوضي خلااص وغدا اصلا عندي داكشي لي وريتك خاصني نوصلو لنااس مهيم نسالي ونتلقاو بينما رتاحيتي
ايماان: اوك الزين منشدكش
ناضت تسيفطات معاهم وبقات هي گالسة جنب حماتها وضرتهاا والبنات شي داخل شي خارج لكوزينة كيجمعو فالرويينة
لطيفة: ايماان عيتيي ايليي ياك
ايمان: شوية اخالتي هه
لطيفة: بلاتي نعيط على مرت محمد تديك لبييت رتااحي شوية وبدلي علييك
حركات ايمان راسها ولطيفة كتعيط :اسراااء …اسرااا اجي ابنتي
جات اسراء كتمسح فايدها وقالت: نعام ا مي
لطيفة: طلعيي مع ايمان وريها لبيت ديال حذيفة الله ارضي علييك
اسراء: وخة
وقفات ايمان كتهز فصااكهاا تابعة اسراء
ربيعة: كتبان دريويشة وزيينة تبارك الله
لطيفة: الله يسعدهم يارب
طلعات ايمان ورا اسرااء حتى دخلو لطبقة التاانية وجراتها من ايدهاا قالت: اسرااء
شافت فييا وسدات الباب وراهم وقالت كطلعها وتهبطهاا : تبدلتيي
ايمان: فهمييني فين كتعرفي محمد
اسراء: ههه واش نتيي لبااس ،بغيتي دخلي حتى فالارزااق (ضحكات )لعجب شنو وصل مغنية لولد لفقييه
ايمان: متبدلتييش وخة كبرتيي باقة برهوشة فعقلك
اسراء: ونتي هي نتيي باقة كديري فيها درويشة ولكن مخبية من وراك شلاا حواايج
ايمان: شنو مخبية بالسلامة
اسراء: اناا مشغليش خبي ولا متخبيش المهم خليني بعييدة علييك مكنعرفك مكتعرفينيي لا نتيي لا نورة شوهتووناا وفرتكتو ليناا عشنا عمري نسمح لييكم
ايمان: ا انا فرتكت لييكم العش
اسراء: نتتيي ااه نتيي بسبابكم بابا وماما تفارقو شي 3 سنين ولا حيت نتي ماعندك واليدين بغيتي كلشي ترجعييه بحالك باك وطلقتيه على مراتو مك وطلقتيها من رااجلهاا وضرتي ليها بالرااجل ودابا تسلطتي على هاد العائلة لي كتعرف غير الصلاة والديين ..ادخلي عليهم مبااركة مسعودة بااينة فعينيك
ايمان: اسرااء صبري محدوود وماعندي سوق فطاسيلة بااك كااملة ،داباا نهبط نقولييهم وانا كنضحك اسراء راه بنت خاليي هههه ونزيدكم باهاا خائن ومسخووط
اسراء: سيري ونشوفو شكوون لي غضييع ويجريو عليها كي الكل_بة ..ملي نوريي لعمي فيديواتك كتشطحيي فلبيراان ب نص ميتروو ولا نقوليه كانت مصاحبة مع راجل مها وحصلتهم فبييت النعااس شكون غيكدبنيي فمي ونقول بيه لي بغييت عندك شي دليل هههه عطيني بالتيسااع ومكيشرفنييش تكوني من عائلتيي ونزيدك بابا رجع ماما وتاااب وربي غفور رحييم ،وشنو نقولو فطينتك نتي ومك ؟
ايمان(بقات كتشوفيهاا وفلحظة جاها الضحك وبدات كضحك ): لحنش مكيولد غير طول منو هههه صدقتي بنت عبد الله
اسراء:ههه ونتي بنت نورة
بقات كتشوفيهاا وكتبسم وقالت: علاش مكتحملينيش ،شنو درت لييك بغيت غير نفهم
بقات اسراء كتشووف فيها وهبطات عينيها لعنقهاا بانت ليها السنسلة وقالت: شنو فيك ميتحمل عاجبك زينك وصوتك من نهار عقلت على راسي وانا كنشوفك انانية مكتبغيش لخير لبناادم
تبسمات ايماان فوجهها وقالت : فين لبييت امرت لوسيي
مجاوباتهاش دفعات لباب لي وراهاا بعصبية ومشات فحالها
دخلات ايمان لبيت لي كان تفرش هي وحذيفة نيت لي ختارو لفراش من لكطالوݣ ومحمد تكلف وقادو عند النجار باقة لماطلة بلميكة ديالهاا وراس الناموسية لي مغلف بثوب انتي طاش فالگري ماريو كلو مرايات و كوافوز بلمجورة وفوقو مراية فجنابها بولات صغاار حطات صاكها وكلسات فوق لماطلة
كتشوف فقنات لبييت بهدوء جاتها فنيفها ريحة طيبة وزويينة ومرييحة
بقات كالسة فهدنة مع نفسهاا كتعاود فكلام اسرااء فراسهاا
حتى سمعات لهضرة على براا هزات عينيها فلباب لقات حذيفة جار الشانطاات ومحمد وراه مطلع التانيين وحطهم ليه عند لباب وهبط مخلي حذيفة يدخلهم لداار
تبسمات لييه سد الباب وناضت عندو معنقااه بادلها العناق وقال: مالك
ابمان: والوو منعنقش ،صدق لبيت زويين
عاد انتابه مشا كيقلب فييه وقال: زويين خارج انا ومحمد دابا نضربو شي دويرة
ايمان: داباا
حذيفة: سيي مغنتعطلش بدلي عليك وهبطي لتحت حتى نجي خاص شي مخااد و فراش نجيبو معاياا
حركات ليه راسها باسها وخرج رجعات كلسات بهدوءها فبلاصتهاا
مبقاتش عندها قابلية تجمع وضحك مع ناس جداد حاسة بغراابة بلا بييه ولفات يكون هوا محور حياتها مبغات تاحد اخور غير هوا تهضر معاه تالصباح بلا ملل ولكن وسط النااس كتحس براسها مبقاتش قادرة تندامج
ناضت حلات لماريو دوزات ايدهاا على لغبرة ملقات والو لقاتو نقيي
ستفات حوايجهم سبابطهم وكلشيي يتعلق ولباليزة لكبيرة جامعين فييه كاع لي كادو للعائلة
خلاتها حتى يجيي وجبدات 3 ديال لقفاطن بيتية خياطتهم ساامبل جوج بالراندة والتاني بنص طوق كل واحد فلون خدماتهم ليها زينة
لبساات اللول توب كريب و يدييه من ثوب اخر مزوق مخدوم بنص طوق ديال الرااند. لونوو خزي
مسحات وجهها من لمكيااج ومسحات لفيرني من ايدها وخرجات كتقلب على الدوش لقات الدار التانية كبييرة فيها 3 البييوت وصالون لوسط صغير ودوش وطواليط مجهزيين ومقاديين
هاد الطبقة ياله تصلحات من ورا ماحذيفة ولا كيسيفط لييهم فالاعوام الاخيرة اما فاللول كان مصلوح غير الطبقة لاولى والسفليي والطابق التاني كان مبنيي فقط مكانش مصلوح
توضات و دهنات وجهها بلمرطب و وخلاتو على راحتوو
ياله بغات ترجع لبييت طلات عليها الاخت الاخيرة فااطمة وقالت: اجي كلسي معاناا حساب ليا نعستيي
ايمان: بغيت غير نصليي ونجي دغياا
فاطمة: خودي راحتك ..بلاتي نجيب لييك سجادة
ايمان: شكراا
مشات ديك الساع جابتها ليها شكراتهاا وصلاة صلاتها وبقات شحال كالسة على سجادة حتى طاحت فبالهاا لباليزة لي كانت سيفطات لنجاة ودارت فبالها غتهضر معاها تسيفطها ولا تمشي تجيبهاا
هبطات عندهم كلسات جنب ربيعة ساكتة الاخيرة كانت كتصلي كالسة
دخلات لطيفة وقالت: بدلتي ايليي
ايمان: اه اخالتيي
سلمات ربيعة وهزات تسبيحها وقالت: سبقتو داركم عاد جيتو !
ايمان: لاا اخالتي
لطيفة: اصلك غير من الدار البيضاء نييت
حركات ايمان راسها ب اه بابتساامة ديال بزز وسكتات
جاو لبنات كلسوو فالصالون ومعاهم اسراء لي لاحظاتها كضحك وعاجبها لحال وباغة تبيين لايمان بليي فرحانة واهتمامهم كلو ليهاا
وهي سااكتة غير كترمش وكضحك معاهم
لطيفة: بشوية من الضحك ا اسراء راه الحاج لتحت ابنتي غيبقا يخاصم
اسراء: واخة امي
بقاو كيهضرو بشوية جات اميينة كلسات حدا ايمان وقالت: مالكيي سااكتة
ايمان(تقادات فلكلسة كضحك): لا لا كنسمع ليكم ههه
امينة: وشاركيناا ههه
خديجة: اسية غتمشي ولا تباتي
اسية: غنمشيي …راسي غيتفركع بغوات لبز
فاطمة: اوى مالكم على حالتكم لي ولدات جوج تجمع راسها كل وحدة مفرخة 3 4
اسية(هزات ايدهاا قدامها ): قل اعوود برب الفلق
امينة: لولاد رزق
فاطمة: مقلناش العكس هههه اوى داباا ساليتو نوبتكم جات نوبت لعزارات يديرو لحفاايد
اسراء: ان شااء الله هههه
اسية: اسراء باااغة تولديي داباا
اسراء: لوليدات زوينين ههه كيعجبونيي
خديجة: ونتي ا ايماان شحال باش تزوجتو نتي وحذيفة داباا
ايمان: شي عام و تمن شهور دابا
اسية: تبارك الله العمر كيدووز مكتفكريش تولديي
ايمان: ههه لا مزال
لطيفة: علاش ايلي لوليدات تولديهم صغيرة يكبرو معااك
ايمان: ملي يكتااب ان شاء الله وصافي
خديجة(وقفات كتلبس فخمارهاا): اسية جمعي براهشك ياله …وردة وردة ياله
امينة: خليها موانسة مع جناات
خديجة: راه تجنات غاادية غير خلييهم
يمشيو موانسيين تالصباح ونجييو ياله تصبحو على خير
توادعو معاهم وبقات غير فاطمة وامينة هوما لي مزوجيين فمدينة اكادير وجاو ضياف
عينيها بداو كيطفاو بنعااس كل مرة تسدهم ولاو حمريين شادة تيليفونها فايدها كل مرة تسولو فين واش جاي
طلعات وطلعات موراها امينة عطاتها ايزور نقيين ولغطا شكراتهاا ومشات صايباات لبيت وحيدات لميكات مشات جابت مخدة من الصالون وخة عالية لمهيم تحط راسها
خدات نص كينة ديال النعااس تكات سادة لباب ومخلية الضو شااعل حتى نعساات
معقلاتش مزال على راسهاا حتى حلات عينيها قاافزة مع ديك 7 تاع الصباح والبيت مظلم شوية عاد رجع معاها الحال وعرفات فين هي لقات ايدو فوقهاا وتقلبات جيهتوو ناعس غير بشورط وهي نعسات بلقفطان عرقهاا ناضت حطاتوو وشافت لمخدة رطبة علاش نعساات
محساتش بيه امتا دخل وبدل ليها لمخدة معرفاتو معاش دخل
رجعات تكات جارة كاشميرة خفيفة مخشية جيهتو ومخلية بلاصتهاا ماشي بزاف ورجعات نعساات
حتى سمعوو الدقان فلباب حل عينيه كيتااوب وقال: نعاام
جاه صوت طفلة كتقول : خاليي قالت ليكم لميمة اجيو تفطرو
رد عليها بواخة وتقلب جيهة ايمان لقاهاا فاقت شاف فييها وقال : صباح الخير
ايمان: صباح النوور ،محسيتش بيك لبارح امتا جيتي
حذيفة: شربتيي الدوا معلوم مغتحسيش بياا
ايمان: هاد ليامات مبقيتش كنعس مزيان داكشي علاش
حذيفة: كنت جاااي لييك غير لقيتك ميتة ههه
ايمان: هههههه معاش دخلتي
حذيفة: مع ديك 11 هكاك كيدوزتي نهارك لبارح
ايمان: مزياان ،داركم زوينة كتشم فيها ريحة زوينة
حذيفة: ماشميت والو اشمن ريحة
ايمان: انا شميتهاا ريحة ديال الهدووء ريحة ديال اللمة والعائلة ،معمري شميتها فحيااتي
حذيفة: صافي نبقاو هناا
ايمان: هههه اويلي لا وفين غنشطح لييك ههههه
حذيفة: هههه نوضيي راه غنفطر بييك
ناضت كتشوف شنو تلبس جبدات بينوار رطب لبساتو وقال: اجي اجيي راه الطبقة مشاركين فيها مع محمد ومراتو
رجعات حيدات لبينوار وكلسات حداه وقالت: بب
هز عينو فيهاا وقال: نعام احبي
ايمان: مرت محمد
حذيفة: مالهاا ؟
ايمان(تنهدات مغمضة عينيها وشادة فايدوو ): واعدني تبقا هاد الهضرة بيناتناا ميسيقش ليها محمد لخبار
حذيفة: ايماان شوشتيني وخة كنواعدك كلامنا يبقا هنا شنوو
ايمان: بنت خالي
حذيقة(كمش عينوو كيسمع): كيفاش بنت خالك (خرج عينوو)واش معقوول
ايمان: اش بان ليك غنضحك فهادشي
ايمان: وعلاش مباغاش محمد يعرف هادشي كيتخبا ؟
ايمان(تبسمات بحزن ) : مباغا تاحد يعرف بلي انا من عائلتها حيت بالنسبة ليها غنحشم بيهاا وغطيح ديك الصورة الزوينة لي عاطية لداركم ،واش بصح احذيفة وحدة بحالي غتحشم بيهاا
حذيفة: هوما لي خاصهم يحشمو على داكشي لي دارو لييك داباا مرضت ملي خوياا مناسب مع شماا_تة ومنافق وخويا دروييش
ايمان: عفااك مبغيتهمش اصلا يعرفوني هناا مبغيتش الصدااع
جرها عنقهاا وقال: متعمريش راسك بهدشيي نوضي توضاي وصليي ونهبطوو
حركات راسها بااه ناض لبس عليه وحل السرجم تدخل الشمش تسناها حتى جاات صلاة ولبسات قفطان بيتي ظفرات شعرها اللور وهبطوو كيشمو فالرواايح الزويينة ريحة لمسمن دخلو لصالون فين كالسة لطيفة كتقلب فاتاي وحداها ربيعة سلمو عليهم وكلسو حداهم
حذيفة: خرجو ؟
لطيفة: باك راه لتحت عندو شي نااس تء جناات باركة ابنتي من تنقااز ،محمد راه مشاا لمحال
جات جنات كلسات حدا ايمان كضحك وقالت: واش دايرة العدساات اخالتي هههه
ايمان: هههه لا احبيبة عيني هادو
جنات: بصح (كطل عليهاا ) زوينين حتى شعرك زويين
لطيفة: ولفتوو لعينين كحليين جاوكم الزرقيين عجب ولا
جنات:ههههه عجبووني كون غير عيني تا انا زرقيين
حذيفة: اجي نزرقهم لييك
مشات عندوو كضحك على نيتهاا شدهاا عندو كيعنكش فيهاا تجات حتى وردة كلسات عندوو
وبداو كيضاربو شكون تكلس
جاو لبنات صبحو عليهم وكلسوو دخلات اسراء بحجابها وقالت: السلام علييكم خوياا بخير
هز عينو فيهاا وهبطهم ونطق ببرود مشغول مع لبنات كيلعب معاهم حدا مو وايمان كالسة حداه : السلام
فطرو بسلاام طلع وعيط لمو يعطيها الشاانطة باش تعطي لكل واحد حقو تبعاتو ايماان وجبدات من باليزتهاا بواطة حمرة وراتها لييه وقال : ديالمن هدا
كان دبليج عرييض وازن نيت كيتسماا بعصير الصابون عند المغاربة
شداتو بابتسامة وقالت: خديتو لخالتي لطيفة زويين
شدو من عندها كيشوف فيها وقال: ماقلتي ليا والوو وديجا تقدينا ليهاا
ايمان: هداك لكادو ديالك ،وهدا دياليي غيعجبها ياك (سدات لبواطة ) انا معندي لمن نجييب وشريت لخالتي حيت طيبتها معايا تستااهل
تنهد وجرها عندو بايسها فجبهتها وقال: عندك اناا
دقات لطيفة لباب وقال: دخلي اميي
دخلات لطبفة كتنهج وقالت: هاد دروج سخفوني عيطتي اولديي
حذيفة: بغيت نعطيك غير هاد الشاانطة عطي لبنات كادواتهم راه كل واحد بوليداتهاا بسميات باش ميضاربوش لييك ولي بقا فرقيه للعائلة
لطيفة: هههه الله اكبر بيك اولديي خيرك ساابق لاش معدبيين رااسكم
ايمان(حشمات ): خ خالتيي هداا ديالك
حذيفة: هدا ديالهاا ههه داكشي لي جبت انا باقي فالشانطة
لطيفة قربات كضحك وقالت: الله اعطيك لخير ابنتيي عدبتي رااسك
عطاتها لبواطة حلاتهاا وبقات كترمش وقالت: لااش ابنتيي هدشي اوووكوك ابنتيي متء
ايمان: على الله يجي قدك ههه معرفتش عباارك
حيداتو من لبواطة بفرحة وحديفة كالس فوق الشانطة مربع ايدو وكيشووف بهدوء فيهاا وهي كتركب دملييج فايد لطيفة الاخيرة جاها حساب مع ايدها وبيااضهاا وتاهاا عنقات ايمان كترضي علييهاا وتعاود
لطيفة: والله مكنتي تعدبي راسك
ايمان: بصحتك تستاهلي كل خير
شافو فحذيفة وتبسم ليهم وناض هاز لباليزة: انا نهبطها لييك لبييتك لتحت
لطيفة: وخة اولديي
حذيفة: ايمان هابطة
ايمان: شوية ونجيي
تبسم ليها وخرج ساد لباب ورااه وتلغات ضحكتهاا وكلسات على طرف السرير
كتفكر لوكان ميمتها مزال فالحيااة كانت غتبرعهاا وغادي دير على قبلها لي ميداار
مسحات دموعهاا وبقات كالسة حتى رجع دخل عندها وبتاسمات لييه كلس جنبهاا وقال: مولات العينين الزرقيين
ضحكاات وقالت: نعطيهم ليك حتى نتاا
حذيفة: انا عاارفة شنو كيعجبني تعطيني
ضحكات وباستو وزيرها عندو بتعنيقة ديال الخااطر وقال : هبطي عند لبنات متبقايش بوحدك غنخرج شوية عند محمد ونجي
هبطو بجوج ومشاا لعند موو باس ايدهاا ونطق بهمس : امانتك اميي
**
ملي هبط ليها الشانطة لبييت الخااص بيها سد وراهم الباب وكلسها قداموو وهو محني عندها شد ايدها كيبووس فييهم وهي كترضي عليه وقال: بغييت نطلبك واحد الطلب وانا عارفك مولات القلب لكبير وحنينة فالصغير والكبير
لطيفة: على عيني ورااسيي اولديي
حذيفة: تهلاي لياا غير ف ايماان راه معندها حد من غيري اميي
لطيفة: وعلاش اولدي كتقول هكا واش درنا شي عيب يكما لبنات قالو شي هضرة
حذيفة(غمض عيينييه ): لا لاا مقالو والوو ومدرتو حتى عيب انا غير بغييت نوصييك عليهاا (باس ايدها )وخة اميي عنداك الحااج ينقص منهاا ولا وحدة من لبناات ،انا قاابل بييها هكاك مكديرش الزيف قاابل وقاابل وقابل غير ميغيروهاش
لطيفة (مسحات على شعروو وقالت بهدوء ): وخة اولديي لحاجة لي تغيرك وتغيرها والله متكوون وربي شااهد
باس راسها وعنقهاا وحتى هي كترضي علييه وتعاود *
خرج وطبطبات على لبلاصة حداها باش تكلس ايمان كلسات جنبهاا وقالت: خاصك شي حاجة ابنتيي
ايمان: لاا اخالتي
لطيفة: علاه انا خالتك ههه راك فمتابة بنتي داباا قولي مي
ايمان: ههه وخة
بقاو كالسيين ومرة مرة كتجي عينيها فاسراء وتخنزر فيهاا كتبقا ايمان غير كتشوف مال هادي
شوية سمعو لحااج جااي كيلوحو واحد الريدو من لقنت تالقنت على الصالون حيت محلول
غير وصل حدا لباب بدا كيعييط : لطييفة ، لطييفة
لطيفة: نعم الحاج
الحاج: اشكييد
حطات لكاس من ايدها وخرجات عندو تبعاتو لبييت النعااس لقاه مقلوب بلحوايج وقال : اش هدشي
لطيفة: داكشي لي جاب حذيفة ياله فرقتو على لبنات راه جاب لييك شي بركة حتى تشوفهاا
الحاج: كلسي نهضر معااك(شاف فايدها )اش داكشيي
لطيفة: جابتو لياا ايماان دهب
الحاج: معلوم لفلووس كي الرووز لااا حول ولا قوة الا بالله
لطيفة: وعلاه تما بحال هنا وراه خداميين
الحاج: وعارفة فين خدامة
لطيفة: لاا معارفاش قاليا كتقراا
الحاج: اييه كتقراا “قرب ليهاا” كتقراا لعراا والتبرج وتغنيي لرجاال وتشطح لييهم
لطيفة: اش كتقول كيفااش
الحاج: راك سمعتيني …ولدك الالة خلا زينة لبنات بلفعل والقلب وحتى بالجمال وتبع شهوتوو فهاد خيتيي معارفيين اصلها من فصلها منين طاييحة علييه
لطيفة(بقات غير سااكتة ): وهدشي نتا منين عرفتييه
الحاج: سوليي لالة خدييجة لي ساكتة على اش كيدير خوهاا وضاربة الطم ومخلييااه غرق فلمعصيية
لطيفة: لا لاا راك فااهم غلاط الحاج البنت يتييمة وباقة صغيرة
الحاج: انوضي قلاك باقة صغيرة ..بلاتي بلاتيي
جبد واحد التيليفون وكلس جنبها معرف منين يدخل مامولفش كيخربق فييه لواتسااب بوحدوو لي كيعرف ليه مشا ليوتوب كتب سميتهاا وميطلع غير لفيديو كليب اللول ديال ايطالياا
خدمو وعطاها تفرج ومرة مرة تهز عينها فيه وتقول: راه الزعورية مشاركين فيها كاع لكور
الحاج: باغة تفقصيني الطييفة وخ وخ، مشا كيقلب على لفيديوات الجداد فلقناة الجديدة وسمعهم ليها وهي كتشوف وشادة حنكهاا كترمش فييه
ومع دالك متيقااتش وعطاها لتصاور فكوكل حتى طلعات تصويرتهاا مع حذيفة وقال: هدا ولدك
لطيفة: ولديي
الحاج(حط التيليفون بزعفة ): ونوضي على سلامتك
باقات ساكتة حشمانة من داكشي لي شاافت معاه وخة راجلهاا معمر فاتوو الخط وهضرو اولا تفرجو فشي حاجة ماهيااش
الحاج: عجبك لحال بغا يديرني ضحكة وسط النااس ،فينما مشييت كنمشي ونخلي بلاصتي زيينة ،الناس كتجي عندي من اخر الدنياا حيت سمعتي سابقاني وعارفيين بلي بيني وبيين الله ميثاق عظيم ،يجيي لولد لي عنديي وترجييت فييه يهز سميتيي ويهز براسيي ونتباهى بييه ييجيب لياا وحدة قاسوها ايديين او او استغفر الله العظيم
لطيفة(تنهدات ) : واش خايبة ولا زوينة ديالوو خلييه منو لييهاا
الحاج:الالة خايبة ولا زوينة راه تا حناا غتجبد سميتنا معاه راه ولدي هدااك ملاقيهش فالزنقة باش يمشيي يتزوج ليا بهاد قليلة العفة والاصل ،هاديك حالة باش جاية لباارح ؟ الريحة كتعطعط سلمات علياا خلات ليا لعكر كيتلصق فيدي هدشي علاش مشاا لديك لبلاد باش يجيب ليا وحدة من الكاسيات العارياات
الحاج: شوفي الالة ،كلمتيي عمرها طاحت وعمرها غطييح للارض ولي يطيحهاا معندي مندير بييه ، السااكت عن الحق شيطان اخرس وانااا ماشي كنصح النااس باش يجي ولديي يضرب لياا كلشي فزيرو
بقات لطيفة كتسمع وتنهد وشادة حنكهاا وقالت: عفاك الحااج الله يزيدك فصحتك مييك وخلي لما منين يدوز ،ان الله يهدي من يشااء
الحاج: وقاال تعالى ولا ترمو بانفسكم الى التهلكة هادي غيولد معاها ولاد مهديين ومأصليين لي يهزو بسميتي لقدام هااه اناا مغنسكتش سمعتيني مغنسكتش
خرج مخليها شادة حنكها غير خرج وخديجة دخلات عندهات وقالت: مالو معصب
لطيفة: فراسك بلي مرت خوك كتغني
كلسات على لكرسي فااشلة وقالت بهمس : وصلاتها لييه وردة، اش قالييك اميي
لطيفة: وليتو كتخبيو علياا
خذيجة: كون فراسك ومقلتي ليه والو غادي يغضب علييك حتى نتي اميي شوفي كي ولا كيهضر معاياا مؤخراا العفريتة ونشدهاا ،ففف هدشي فييه كيتقااا هامناش كنت خاايفة حساب ليه غيدوزها بجغمة تاع لما واش معارفش بااه اميي
لطيفة: واش ربي فرق الريووس واش كل واحد وقبرو وشغلكم مدام هوا عاجباه الا ولقا فيها الخير
خديجة: ميييي راه كتغنييي كتغنيي وخدمتها غير مع الرجال اشمن خيرر راه ولدك عينيه مغمضيين متلفوو الزييين نهار تبرد بييه غيقولييك علاش ليي منبهتونيش
لطيفة: البنت دروييشة كتباان واش نحررو فيهم لعيشة حتى يمشيو بلا رجعة بغيتي تشوݣوني فولديي اخديجة
خديجة: انا منوصل منقرب وصيت لبنات تاوحدة متدخل فهدشي الا باا وافق وسكت شكون حنا باش ندخلو فييه راه بعقلوو حنا غير مبغيناهش يضييع وينساا راسوو ودينو …. الجيران لي دخلاات تدي خباارنا ولد لفقييه جايبهاا كتغني موصيبة صافيي والله اميي حتى هدشي لي كايدير فييه ولدك مغاديش يخرج ليه خير وقولي خديجة قالتها
******
كان حذيفة كالس فلمحال لكبير ديال الحاج ومعاه نيت محمد
بوتييك كبيير فيه انواع المسك والبخوور العبايات صلايات لبس رجالي جلالب وبلاغيي وقراعي ديال ماء زمزم صغاار فواحد الرف خمارات بالالوان باك القران والعبااية
شاف واحد لپاك فلغوز فيه صلاية وعباية قران وتسبييح وهزو وقال: محمد شحال كديرو لهدا
محمد: كنديرو ليه 250 حتى ل 300 على حسب هداك لي فايدك 300 حيت فيه حتى المسك
حذيفة: زويين (حط ليه 300 قداموو)
محمد: شد شد فلوسك واش بعقلك والله منشدهم
حذيفة: انا غير شاريي شدهم وسكت
رجع حطهم ليه فلمجر وسدو دار لكرطونة فصاك وحطها وبقا واقف وقال: اجي نسولك مرتك ماشي شلحة !
محمد (ضحك ): لا لا كاع جبنا لبرانيي من الدار البيضاء
حذيفة: ونتا اش داك حتى لكازا
محمد: ماامشيت فيين ،البنت كانت مع مهاا عند جدهاا حدا السوق منين كنتقدا شفتهاا عجباتني طلبت نمرة باها ،السيد الله اعمرها داار مخسرش ليناا بلعكس رحب بيناا ،عندو غير هي و واحد الدري كبر منها عسكري …زعمة ناس معقوليين معمرنا شنا منهم كلمة العيب عام هدا
حذيفة(تنهد ): الله اكمل بالخير
دخل الحاج حاني راسو حتى بان لييه مشا حذيفة باس ليه ايدو وقف شاد تسبيحو وقال: مزيان لي لقيتك هنا باغي ندوي معااك
حذيفة: نعام ابابا الله اسمعنا خير
الحاج: الخير فينهوا الخيير فهادشي لي كدير
حذيفة: نفس الموضوع
الحاج: مقاريش نقولو مقاريش أُميي نتا قاري وفااهم وعارف الصح من الغلط وجاي بوجهك حمر جايب لييا مغنية فلبيراان وحاطها لياا قدام وجهيي شنو زعمة ضد فياا ولاا شنوو
حذيفة: معنديش علاش نشد معاك الضد
الحاج: شنو قاليك راسك … با فدار غفلون مكاينش منين تجيه لخباار ندير لي بغيت ومعامن مابغييت
حذيقة: حاشا اباا ولكن راه كل واحد كيدي لي مكتب لييه انا ديك لبنت بغييتهاا وديتها فلحلال مدرت حراام معاشرتها فحراام نهار بغيتها قصدتهاا
الحاج: وداكشي لي كدير رااضي علييه نتاا ؟ (بصرامة )واش انا والد ديووو_ثي احذيفة
كلمة ديو_ثي بقات كتعاود فراسو وهوا سايݣ والوجهة كازا غير غادي وكيكميي
مزادش من ورا ديك الكلمة شي حاجة خرج من عندو بلا ميجاوبوو خلاهاا واقف ومحمد مصدوم من ديك الهضرة
كتصوني ليه ايمان ومكيجاوبهاش ماوقف حتى لقدام لبحر كانت واقفة رونج تما ديال مجبيد غير وقف حل لباب وطلع عندو لطموبييل وقال: مالك عاݣدهاا
حذيفة: بان ليا غنهز مرتي ونزييد ضيافة النبي تلتيام والواليد بزز كمل يومايين
مجيد: اش وقع !
حذيفة: قالياا ديوو_ثي
مجبد: وتااانتاا واش غتدي على الحاج اصااحبيي ،وقالها ليا انا حتى طبت كنزمها ونسكت اش وقع والوو
بقا حذيفة سااكت كيكميي ومجيد حداه شاد لكارو وحالين السراجم
مجيد: شوف شفتي خواتاتك بااك هز الواليدة ديالك ودوزو لاكادير شوف جدااك لموت ولحياا هادي جيب دويرة ومك معاك وخويي، علاش غتصعبها اصاحبيي علييك ،واش لبنت عاد غادي تعرفهاا
حذيفة: مكيوزنش هضرتوو مكيقولش راه فلان غيبقا فيه لحاال
مجيد: بااك دقة قدييمة احبيبيي معندووش ياما ارحميني كيجيك فااص ،نتا ملي كنتي جاي راك وجدتي ظهرك لعصاا دوزها مع خوتها بكاس ديال الماا وصبر فوجه ميمتك شبع منها وديماريي
حذيفة: داكشي اصلا لي ناوي
بقا معااه النهار كلوو حتى يبرد وايمان تغدات وطلعات لبييت كتصوني علييه تعياات وخسر عليها مسااج كاتب فيه: انا مع مجييد لعشية نجيي
سرطاتها وسكتات وكلساات طالعة هابطة فانسطاا حتى شافت واحد لبووسط كاتب شفتو سطوريات *** واش بصح تشداات داكشي باش غابرة
تقادات فبلاصتها كتقرا التعاليق ومشاات كدير روشيشر على هاد لبااج لي لكونسيبت ديالها كلو غير اعرااض الناس وراكبين على الموجة مع عباد الله مع دخلات لسطوريات لقااتو كاتب : من مصادر موثووقة تم القبض على ايمان(بيانكا) فمطار الدار البيضاء داكشي علاش غابرة وكيقولو لقاو عندها البيضة مون امور هدشي كياكد كلام مها ملي قالت بليي حركات لطاليان وخدمات مع الما_فياا
بلخلعة وقفات شادة فمهاا قلبها كيضرب وصفاارت كتفتف مشات بجري سدات لباب ورجعات كتاكد
سيفطات لباج لمراد وصونات علييه كترعد جابوهاا وقال: وي ايماان
ايمان: شوف شنو سيفط لييك واتسااب دغياا
مراد: بقاي معايا فلخط
دخل لواتساب دخل ليان حتى كيتصدم بشنو مكتووب وقال: مكيعيااوش …شافوك غبرتي بغاو يطلعو لكونط على ظهرك صافي انا غنتكلف داباا ..نتي ديري سطوري ولا لايف عادي
ابمان: منقدرش انا مكايناش بووحدي
مراد: ديري اي حاجة لمهييم بانيي انا غنتكلف بهادو مقلتش لييك غندخل لمغريب غداا
ايمان: مزياان ،مابغيتش هادشي يتعرف كتر ا مراد
حطات فيديو صوراتو ملي كانو جايين شادة فييه غير راسها فطموبييل وكتغنيي
دازت 10 دقايق رجعات لسطوريات ديك لباج لقاتو كاتب : خرجتي محيحة !
جبدتي على راسك النحل ابنت الز_نا
طاح ليها التيليفون من ايديها وشدات فصدرها كتنهج وترعد وتيليفونها كيصونيي من طرف مراد ..جاوبات كتبكي
مراد: نجبدو نجبدوو وغيشوف لحبس كيفاش داير
ايمان: هءهءه علاش كيديرو ليا هكا علاش شنو درت ليهم
مراد: كيقلبو على الشهرة متخليش هدشي يمرضك ديري راسك مشفتي والو
قطع عليهاا وبقات كتمشي وتجي فلبييت كترجع تصوني لحذيفة وتكلس مخنوقة وخايفة من خيالها
حتى رجع صونا ليهاا من جديد وكان راجع لدار
حذيفة: الو ايمان
ايمان: علاش مكتجاوبش
حذيفة: كنت مع مجييد هاني جاي داباا ،مالك
ايمان(سرطات لبكية ): والوو
قطعات معاه ناضت مسحات وجهها وسكتات ادن العصر وناضت صلاتو وبقات كالسة حتى شافت لباب تحل وكلسات شافتو مدخل الصاشي فايدو وقال: تعطلت علييك سمحيليا تشديت بلهضرة
ايمان: ماشي مشكييل
مد ليها الصاشية وقال: شوفي
هزاتو بابتسامة ديال بزز حلاتوو وعجبهاا لحال فرحها لجيست واللون كان زوين فلباك كامل
حذيفة: تمشي تجيبي دويرة !
ايمان: واخة ههه
ناضت لبسات عليهاا كسوة من لكساوي لي خدات مستوريين وصيفيين جمعات شعرها ،لقاو تقريبا كلشي متكيي كيدير القيلولة وهبطو
مشاو جابوو دويرة فلمدينة حتى ولات كتقوليه دوز منهنا ومنهنا حتى لقاو راسهم قدام ديور المحيطة بلبحر ولي فييهم دار المرحومة مصبوغة فلبيض وفيها فيزان ديال الغرس فلبالكوون
حذيفة: هادي هي الدار !
حركات راسها بااه وقال: نشوفو واش فيها شي حد
ايمان: شوف
تسناتو فطموبيل خرج قاصد دوك الديور لقا قدامو واحد الرااجل وبقا كيسول فييه جبد تيليفونو كيركب فالنمرة شكر الشخص ورجع فحالو عندها
ايمان: شنو قال
حذيفة: مولاها كيكريهاا فالصيف لنهار
ايمان: مبغاش يبييع
حذيفة: ايمان الدار راه قديمة غتشريها بتمن وغتصلحي بكتر
ايمان: ولكن بغييتها
حذيفة: الى بغيتي نكريوهاا
ايمان: غير صوني سولوو واش يبييع
تنهد ودوز الخط تجاوبو عبد الله بصوت قوي وغليض: الو السلام علييكم
حذيفة: وعلييكم السلاام عبد الله ياك
عبد الله: ايه مرحبا شكون معايا
حذيقة: شفت الدار ديالك لي كاينة فلمحمديية واش مدايرهاش لبييع
عبد الله: الصارحة باغي نبييع ولكن وراقها فيهم شي مشاكيل
حذيفة: اشمن مشاكيل لكانت شي حاجة بسيطة نتسنااوك معندي حتى مشكيل
عبد الله: لاا لا الى بغتي تكري مرحباا 300 درهم لنهار اما البيع شوية معكس
حذيفة: وخ شكرا (قطع) سمعتييه
ايمان: غيكونو منوضينها على الورث
حذيفة: بغيتي دخلي ليهاا ؟ راها خااوية نطلبو السمسار يحلهاا حيت عندو الساروت
ايمان: وخة
تسناوه حتى جاا حل ليهم الباب ودخلو لدار كانت مصبوغة فلبيض مكانوش فيها اصلاحات بزاف مزال بني قديم وزلييج كدالك
دخلات لبيت حاطة ايدها على السنسلة كتفكر كل لحظة دازت زوينة فهاد الدار خرجات لبالكون كيبانو ليها الناس فالرملة والبحر بارد وقف جنبها وقال: الطلة عندها زوينة
ايمان(تخنقات ): ياله نخرجوو تخنقت
خرجات كتجري لطموبيل وهوا تبعهاا بكات حتى عياات وسكتات وقال: من الاحسن نشريو فبلاصة حسن تيقي بياا
حركات راسها بااه كتمسح دموعهاا وكملو جولتهم حتى ظلام الحال وعاود تعشاو براا ضحكات وبدلات الجو شوية وصلات لعشرة عاد رجعو وقف تحت الدار وسيفط مساج لختو امينة هبطات بهمس حلات باب الدار والجردة سلمو عليهاا وطلعو كيضحكو لبيتهم كيتسلتو كي الشفارة تدخلو لبيتهم
دازت اربع اياام خرا خرجو فيها ل اكادير زارو العائلة وعجبها الجو تماا كيخرجو برااحتهم كيسهرو فمارينا تال اشمن وقت هوما و مجيد وزهور خرجو فلبحر فلباطو دوزو اياام زوينة مابغاتهاش تسااليي من وراها رجعو ورجعات معاه غير مو فقط وخواتاتو رجعو لديورهم لانه شهر 9 بدا الدخول المدرسي تسيفط معاهم ورجعو باش يدوز واحد 4 ايام اخرى ويمشييو حتى هوماا
كانت ايمان راكبة اللور ولطيفة القدام حدا ولدهاا لاح ايدو اللور شدهاا من رجلهاا كيتلمس وهي كضحك
لطيفة: ياك مزال اولدي متمشيي ؟
حذيفة: غير شي اياام ونمشييو اميي لكونجي غيسالي خاصني نرجع وايمان تبدا قرايتهاا
لطيفة: الله يسخر
سكتات وايمان وراها شادة تيليفون حتى بدا كيصوني مرااد شافت قدامهاا وقطعات علييه حتى سيفط ليهاا اوديوو دارت لكييت وسمعاتوو
مراد: ايماان وقت لي كنتي مسالية صوني ليا ضروري نهضرروو
ايمان(جاوباتو): شنو وااقع منقدرش نهضر كاينة مع عائلة حذيفة
صونات ليهاا ودياان ديك السااع وجاوباتهاا وقالت: الوو وديان
شاف فيهاا حذيفة من لمراية لقدام ساكتيين
وديان: ايمان بخير
ايمان: بخير الحمد لله صوتك معاجبنييش ؟
وديان: شفتي ديك لبااج اش حطاات عليناا
ايمان: كيفاش
وديان: دخلي دخلي
قطعات معاها وشاف فيها حذيفة وقال: هانية
ايمان(بتوتر): هانية
دخلات كترعد لبااج لقات مجمووعة من سطوريات باديهم
“وكيفما كتعرفوو كل مرة مع فنان ودابا مع هاد بنت الز_ناا وصحيبتهاا الطبيبة لي ماخلاو لا حاحة لا ملااحة مع لگور غنجبد ليكم تصاور من قااع الخاابية “
“شدو السهرة ليوم مع هاد خيااتي ليي كيبانو كيووت وهوماا لگور دازو عليهم “
تحت الكتابة حاط لكرونو ديال الوقت لي مزاال
سيفطات لمراد وقالت: مرااااد شنو هدشيي
مراد: هدشي علاش بغيت نهضر معااك ،ماتبيني والوو تصرفي عاديي غناخدو الاجراءات بالقانون ضدو كوني هانية
ايمان: هضر معااه ولا معاهاا غيدير ليا المشااكيل امرااد
مراد: هوا راه داكشي لي بغاا غير نتفاوضو معاه
وديان: هضرتي مع مرااد
ايمان: غندعيوه
وديان: عرفتيي سيفطاتو ليا ختي الصباح
ودياان: شكون غيكون هداا تانيي !
وديان: هدا معرووف ولد لحراام كيجبد غير ضواسا ديال الفنانة ولكن شنو عندو ميجبد عليناا شككني فرااسي اصااحبتي المشكيلة كلشي كيتيق شنو كيحط
ايمان: مزال مقلت ل حذيفة والوو الى شاف هدشي تاني مغيعجبوش الحال
وديان: ياربي يتضمس هدشي بلا مشاكيل
حذيفة: ايمان هانية الوقت ؟
جمعات التيليفون وقالت: هانية
حرك راسو بالايجاب بينما كانو قربو لدار بقات ساكتة والخلعة شاداهاا وقفو قدام الدار
هبط دغياا عاون مو تهبط كترضي وتعاود وايمان عقلها مخطووف طاح ليها الصاك وهبطات كتجمع فييه مع هزات عينيها لقات واحد لبنت بحجااب شرعي وهازة صااك عطاها ربيي من الزين العربي الحجبان عرااض والعينين كبار كحليين و شامات على وجهها الدائري طويلة وعامرة شوية
قربات ل لطيفة وتحنات سلمات عليهاا
لطيفة: لباس ابنتيي كيدايرة بخير
حنان: لبااس اميي ، شفتو اينا كيف بقاات
لطيفة: لبااس ابنتي لبااس
حنام(شافت ف حذيفة وهبطات راسها بخجل ملي قرب جيهتهم كيشوف فيها باستغراب معرفهاش فاللول حتى عيطات علييها مو) حذيفة على سلامتك
حذيفة: الله اسلمك حنان بخير !
حنان: الحمد والشكر لله …خالتي نهارك مبرووك
هبطات عينيهاا وزادت وايمان متبعاها بلعيين تهزات عينيها فيه فجأة لقاتو كيشوف فيها وكيهضر مع موو خنزرات فييه نيت وقربات جيهتو
حذيفة: والله معرفتها
لطيفة: اوى كبرات ولات مرشدة اولدي كتقري لعيالات القران فجامع تبارك الله بعقلها
حذيفة: مزياان ،مزيان
دخلات لطيفة لجردة وجراتوو من ايدو تشاف جيهتها وقالت: ابشوية علييك غتاكلها بعينيك
حذيفة: ههه واش فيك السخانة الله اهديك
ايمان: الله اهدينا ويهديك غير شفتيهاا فمك غيتقطع بالضحكة! تنادم معااك لحال
جرها جيهة الطموبيل وقال: دوي بشوية مالنا اش كااين
ايمان: متشوفش فيهاا علاش كتشووف فيهاا عجبااتك
حذيفة: راه معرفتهاش اصلاا
ايمان: اااه مسكيين خليتيهاا فشكل ولقيتيها فشكل تصدمتيي
حذيفة: ايمان مديريش لينا من لحبة قبة
خلاتو واقف ودخلاات مخنزرة دازت ف اسرااء فدروج صرباتها فكتفهاا وزادت
اسراء: لكرض
طلعات لبيتهاا والغيرة شاعلة فيهاا ديك الضحكة لي دار والشوفة فيها شعلات فيها لعاافيية ،لاحت الصااك والبكية فحلقهاا محبووسة والمشكيل حسباتو غيجي يحزرهاا ولاا يتببعهاا مشات طلات ملقاتوش كاع حدا الدار تطلعات اسراء وقالت: مزال مغتمشيش
ايمان: واش كالسة على قلبك ولاا جمعي راسك !
اسراء: معندي بيك سووق …بابا وماما بغاو يجيو عندي
ايمان: يجيو ولا يكلسو انا ماليي
اسراء: ضرگيي وجهك هدشي لي بغييت
ايمان: نتي وتريكة باك كتغداو بالسم لي فقلبكم كتبغييو تخرجووه ولا متكونوش طاسيلة وحدة خصايل خولة داهم ياسيين اما نتي بااك بخ لييك فيدك
سدات باب بيتهاا وكلسات
لقاتها فرصة وكلسات كتهضر مع مراد والاجراءات لي غيتبعوو والشكاية لي غتقدم عطياه كامل الصلاحية
بقات كالسة كتفكر سطوريات كتخلع كتفكر ضحكتو كتعصب
جبدات شنو تلبس ومشات لدوش دوشات من الطريق ولعياا لبسات عليهاا وهبطات لتحت تسلم على ربيعة فالصالون سلمات وكلساات معاهم كيهضرو على اكادير واجواءهاا والكرم والضيافة ديال عائللة مجييد
لطيفة: اسراء واش داركم ابنتي بغاو يجيو ؟
اسراء: اه امي ولكن مزال مقالو ليا امتاا
لطيفة: اوى على خاطرهم ابنتيي
اسراء: مي شنو نطيب لعشا !
لطيفة: غير خلييك انا نطيبوو عييت بلكلسة
فعلا ناضت لكوزينة اسراء طلعات لبيت وايمان بغات تشغل راسها وتبعات عكوزتها لكوزينة وقالت: خالتيي شنو بغيتي ديري لعشاا
لطيفة: شنو بغيتي ههه نطيبو لبنتيي
ايمان: علميني كسكسو ديما كيتعجن مكيصدقش لياا
لطبفة: بلاتي نشوف خضرتو واش كاملة
قلبات التلاجة لقاتها وجبدات كلشي وايمان كتجمع فشعرهاا عطاتها طابلية دارتها وعكفات راسهاا كضحك وبدات كتوجد فكسكسو ولطيفة كتوريها اش ديير
فرحانة ونساات كلشيي حسات بحال الى نعييمة جنبهاا كضحك معاها منيتها وتعلمهاا
شوية حتى شدات فلبوطاجيي بايدينا وطلعات تنهييدة قوية وشدات على قلبهاا
لطيفة: ايماان مالكي
ايمان: و والو اميي (كدوز يدها على صدرهاا وقلبها كتحس بيه كيترعد وصدرها مزير وحاسة بالصهدة وفيها بحال الخلعة) ففف
لطيفة(مدات ليها كاس ديال الماا ) كضرك شي حاجة
حركات ايمان راسها بلاا حتى دخلات اسراء وبقات كتشوفيهم وقالت: مالهاا
لطيفة: معرفت ابنتيي خلطي شوية لما وسكر
دازت من وراها خلطات ليها لكاس مداتو ليها وقالت: دراما كويين
حركات راسها بلا مبغاتش تشد لكاس هي عارفة شنو بيها وعارفة هاد لحالة لي رجعات لييها ومرة على مرة كتزيد تقوا
كلسات فلكرسي وايديها كيرجفو حتى بدات كتهدن عاد هضرات وفهماتها بلي بخير غير السخفة شوية
ناضت كتكمل فكسكسو ولطيفة كل مرة تسولها واش بخير والاخيرة كتجاوب باه كتقطع فخيزو تضربات صبعهاا ضربة خاايبة تغوتات خلعاتهم وبدات كتبكيي بشكل ماشي طبيعيي وفمها غير غادي نمووت غادي نموت بقات اسراء كتشوف وكتقول: ويلي هادي مالها
لطيفة تخلعات ولات كتكب عليها فلماا والد_م مابغاش يتحبس وايمان كترعد وتبكيي
كلسوها فلكرسي كيرشو ليها وجهها وهي كتشهق وقالت: مكاين والو ايمان ابنتي رجووع الله …دوزي لياا نمرة حذيفة ا اسرااء
شدات تيليفون دوزات ليها النمرة ايمان كالسة ولطيفة جنبها جرتها حاضناهاا وراسهاا على جنب لطيفة وتيليفون فايدهاا وايمان شادة صبعهاا
ايمان: متقولي ليه والوو عفااك هءهء مبيا والوو
اسراء: عطيني نشوف صبعك اويليي كاع كنتجرحوو لحمك عزيز علييك
قطعات لطيفة ملي مجاوبهااش وجرات كرسي كلسات حداهاا كتشوف ليها فصبعهاا لوات عليه لفاصمة واسراء عاوناتهاا وايمان دموعها كيقطرو
حتى قفزهم صوتو كيعيط على موو بدات كتسمع عينيهاا بلخلعة وقالت: متقولي ليه والوو عفااك
لطيفة: علااش هاناا هانا اولدي
سمعاتو جاي كيقرب وبدات كتمسح فوجهها وايديها كيرجفوو وقال: صونييتي ليا كنت سا(خرجو عينيه فالد_م لي فحوايجها وقرب ليها مخلووع )اش وقع ماالك دوي مالك
لطيفة: والو والو غير تجرحات بلموس
كيقلب فايديها كي لحمق وقال: هاد الد_م كلوو غير جرحة اميي
ايمان: صافي موقع واالوو راه غير قست حوايجيي
حذيفة(كلس محني حداهاا ): اراا نشووف حيدي الفااصمة بلااتي هداااي
ايمان(هزات راسها بنفاد صبر كتسوط وعاتو ايدها حل على صبعها ولقا الضربة غارقة شوية )
حذيفة: واش عورة ولا ماالك
لطيفة: بشوية على لبنت مالها دارتها بلعاني
حذيفة: امي راه كتشد لموس مستووهة تء
رجع سدها ليها بفاصمة جديدة وقال: انمشي نجيب لييك شي دوا على شي ميكرووب
حركات راسها بااه وخرج كيسووط خلا لطيفة واقفة وقالت: اسراء كملي الخضرة بتنقيية انا جااية
اسراء: يمكن مكطيبيش فدارك ههههه
ايمان(هزات عينيها فيها ) كنطيب
اسراء: شي نهار طيبي ليه شي صبع هههه
ايمان(تنهدات كتمسح فعينيهاا )ففف
اسراء(شافت فييها وبدات كضحك ) ياختي اش كديري لتبوحيط نبشة بديتي كتقولي غنموت
ايمان: اش قلت !
اسراء:غنمووت غنمووت هءهءهء مي غنمووت
بقات سااكتة كترمش وقالت: مقلت والوو
اسراء: واش نتي شوية تريلي هههههه ياربيي
سكتات تدخلات لطيفة وقالت: ايمان نوض ابنتي بدليي حوايجك
ايمان: وخة اخالتي انا نايضة
جمعات الوقفة ومشات طلعات لبيت حيدات لقفطان لي كانت لابسة وكلسات على طرف السرير كتشوف فصبعهاا حتى تحل لباب قفزاات غير شافتو ورجعات لبلاصتهاا ،هاز فايدو صاشيدة ديال الدوا قرب جيهتها وقاال: اجي نداويها ليك باش متبرااش ليك على لوسخ
كلس قدامهاا شاد لفاصمة كيحيدها ليهاا جبد دوا داواها وعقمها ودوز عليها لبوماضة عاد دار ليها فاصمة جديدة زيرهاا فصبعهاا تلمس ايدهاا وباسها فراحة اليد وقاال: ديما هاد اليد واكلة لعصاا قهرتيهاا
تبسمات بزز كتنهد ورجعات جمعاتهاا وسهات فييه وقالت: كتبغيني !
حذيفة(هز عينو فيها وضحك ) لاا كنضحك علييك ،معلوم كنبغييك
ضحكات بلطف وناضت لبسات عليها وهبطو لتحت دخلات لكوزينة بشبح ابتسامة لقات لطيفة كتدير فتفويرة وقالت: شوية صبعك
ايمان: ااه شوية كيخلعني الد_م
لطيفة: هههه هشيشة
وراتها شنو دارت وبقات واقفة حداهاا كتعلم
سمعو حس الحاج كانت مدورة على شعرها بلعكسة قداتو وبقات حدا لطيفة حتى قالت: خرجي سلمي على لحااج
خرجات لقاتو كالس حدا ربيعة وحذيفة جنبو رمات السلام ومشات باست لييه ايدو ساكت غمزها حذيفة كيضحك ورجعات لكوزينة كيهضرو حتى دخل محمد وموراه اسراء لي جات بدورها تسلم على الحاج غير هاد المرة ضحك ورحب بيها وخة راه ياله شافها
الحاج: لبااس ابنتي الله ارضي علييك
حتى هي سلماات ومشاات وحذيفة قلب عينو جيهة بااه كيشوف فيه وسكت مقرووص منبعدما كان مجمع معاه
تنهد وبقا سااكت ناضو صلاو العشاا ورجعو كلسوو وايمان مجمعة مع لطيفة فلكوزينة وكيضحكوو واسراء كالسة حداهم
حتى سمعو الصونيت فلباب التحتانيي
اسراء: غتكون خديجة
لطيفة: لا لا خديجة راجلها فدار متجيش هاد الوقت
طلات براسها وقالت: صافي راه مشاا محمد يحل
سمعات الهدرة فالدرووج والضحك وناضت اسرااء عينيها خارجيين فايمان قبالتها وقالت: ياسيين
لطيفة: داركم جااو (ناضت كتقاد فزيفها) معلموناش
اسراء: لا يمكن غير ياسين
خرجو بجوج خلاو ايماان واقفة مبنجة
هنا حذيفة حتى هواا كيشوف حتى دخل ياسين لي ولا رااجل كبر وتكضر وموراه عبد الله بكندورة صيفية وهاز فايدو صاشية كبيرة طول اللحية شوية ونظاظر ديال الشووف
محمد: مرحباا دخل يااسيين ،عمي مرحباا
عبد الله: الله اكبر بيك اولدي
شهقات ايمان ملي سمعاات صوتوو عينيهاا خرجو وقلبهاا غيسكت
حذيفة مد ليه ايدوو وحجبانو تݣرنو وخنزر فيه مطلعو ومهبطو بعينيه
بانت خولة حتى هي وراهم مراة كتمشى جنب الحييط ساكتة وكتبان محكومة ودرويشة مهزاش عينيها من لارض رمات السلام على الجميع حيت عارفة كلهم مكيسلموش سلمات على لعيالات ونطقات اسراء كترجف: علاش مقلتوش ليا جايين
خولة: جينا عند جداك وخوك بغا يمشي وجا يتسيفط معاك ونمشييو مالك !
اسراء: و والو مرحباا اماما ..
ياسين(تبسم لختو وقال ) : لباس علييك ههه
اسراء: لباس اخويا واش دغيا سالا لكونجي
ياسين: اوى العمل كيعييط
ناضت لطيفة كتعمر فلمقراج وقالت: ايمان قادي ليا ابنتي الصينية ..ايماان وا ايماان
نتابهات ليها وقالت: نعام اخالتي
لطيفة: قاديي ليا الصينية
وراتها لبلكار جبدات ليها شنو دير بدات كتزيف وتحط فلكيساان وكتسمع فصوتو كيضحك وكتزير على لفوطة فايدهاا
لطيفة(انتابهات ليهاا ولعينيها لي جايين بالدموع ): ايماان مالك
شافت فييهاا وحطات لكااس سادة فمهاا كتبكيي وكتحرك راسها بلاا
دخل حذيفة وسد لباب ورااه وجاي لعندهاا ولطيفة كتسول
حذيفة: ايماان شوفيي فيااا
لطيفة: ياوديي اش وااقع
ايمان: هء هء بغيتي نمشيي بغيت نمشيي هءهءه
حذيفة: اجي كلسيي هناا اجيي ميي واحد لكاس ديال لماا
لطيفة مبقات فاهمة والو هناا مدات ليها لما وهي كتنخصص وترعد شاف فموو وقف عندها وقال: ميي نسيب محمد راه خال ايمان ومرت ولدك مبغاتكمش تعرفو حيت مرضاتش بمرتي فهمتي داباا
غفلاتوو وخرجات حاقدة حتى تبعها مجا فيين يشدها توقفات قداامهم ملقا ميشد والحاج خنزر فيهاا وهي واقفة قدامهم
وقف ياسيين بالصدمة وتبعااتوو خولة اما عبد الله خنزر ف اسرااء تحت الصدمة شي فاهم شي لاا
حتى نطق ياسيين بشك : ايماان
ايمان(شافت فييه وطاحو دموعهاا بحسرة) : ايماان اياسيين
قرب جيهتهاا وعنقهاا مزير عليهاا وقال: ختيي
لكلمة لي سمعها غير حذيفة لي ورا ايماان اما الحااج وقف من الصدمة وعينيه خرجوو من التعنييقة وسط داروو ،الحاجة لي عمرها كانت فسنين حياتوو
الحاج(بصرامة )اش هادشييي
نطق عبد الله حداه و قال:اش كدير هاد خيتيي عندكم اسي الحاج
حذيفة قلب عينو جيهتو وقال: كيفاش خيتيي (جاي لييه تحبسوو محمد )شكون نتا باش دوي على مرتيي (شنق علييه من ورا محمد )تعلم تهضر
عبد الله :ايي ايخ اش هاد قلة التربية جمع ايدك جمع اييدك
بلغدايد جبدها معااه لوجهو تطااح الاخير مصدووم متوقعهااش وبغاا يمشي لييه بداا كلشيي كيتجاار ياسين كيجر فحذيفة ومحمد الوسط
كتسمع غير لغواات لحااج جر خذيفة وهز ايدوو عطاها لييه لوجه بطرشة شوكاتوو
الحاج(بلغوات ) : جمع رااسك اش هاد قلة التراابي ولات فيك الرااجل قد بااك نعلة الله وعليييك ،هز علييا مرتك وطلع فحاالك
حذيفة: مكاين لي غيخرج داباا قد هااداا ولا غندير فيه شي موصيبة جيتيني راجل كبير اماا نعطييك علاش كتقلب ،شماا_تة
محمد: حذيفة براااااكة اش وااقع هنااا
حذيفة(شاف فبااه): هدا هوا الاصل لي كتفهم عليا بييه ونزيييدك حاجة هاد الشما_تة لي ورااك رااه خاال مرتيي ،خاالهاا لي غير ماتت جداها كركبها مع الدرووج ماحنش فيهاا
عبد الله : عاودات لييك غير لي بغاات ،معدووور اولديي تلوات علييك كي الحيية
ياسين: باااا سكت شوية واش معيتيييش دزتي من المو_ت ومتبتييش
حذيفة: جر بااك خرجوو منهنا قبل مانرجعو لهاد الموو_ت لي خرج منهاا (جر عبد الله من لفوقيية )خرج عليااا
الحاج(ضرب ليه ايدوو ): نتااا لي غتخرج عليااا نتااا
اسرااء طلعات لبيتها كتجري بلخوف كتبكيي وخولة لي عنقات ايمان لي مغيبة كالسة فالطرف ولطيفة وربيعة كي لبكمات غير كيشوفوو
بعد حذيفة وجر ايماان نوضهاا مطلعها لفووق خلاهم منوضينها لتحت
جرو ياسيين بزز خرجوو وتبعاتهم خولة غطيح بلخلعة غادي وكيغوت حتى ركب فالطموبيل
وبقا الحااج كيغوت وصوتوو واصل تالعند حذيفة لي كيمشي ويجي فلبيت وايمان مكمشة فوق السرير كالسة وسادة ودنيهاا
الحاج: شفتي هاد قلة العفة لي جااب ولدك ولا لاا ،ولا يتهجم على ضياافي مرتو تعااانق مع لعزارة قداام عيونيي الديو_ثيي وهواا حال فموو مضبع (كيمشي ويجي قدامها ) مزيان تبارك الله ،مزياااان هادشي. ياك كانت يتييمة هااه دابا ولات عندها عائلة وعلم الله اش مزاال مخبيي …اسرااااا
محمد: انمشي نعيط ليهاا
الحاج: ريييح اللرض ربييت فيكم لخلااا مقادرينش تجمعو عيالااتكم ،إسرااااا
جاية كتجري كتعتر فجلايلهاا توقفات قداموو كتبكيي وقالت: نعام اباا
الحاج(خنزر فيهاا ) اش هدشيي واش عارفة اش درتيي ولا معارفاش حطانا فداار غفلوون راجلك هوا اللخر مساايق خباار لهدشي
اسراء(كتبكي): مقدرتش نقوليكم والو هءهؤهؤه بابا منهار خرجات من الدار وحنا مقاطعينهاا وملي مشات لبراا قطعنا معاها فخطرة وتبرا منها باباا ،حشمت نقولييكم كتجينيي
لطيفة: علاش تحشميي مالهاا ،هادشي لي درتيي ا اسرااء مكيداارش
الحاج: عندها الحق ،هديك مكاين لي يرضا بيهاا قد الدمدووم ديال ولدك
محمد:باا نعل الشيطان
الحاج(هز ايدو لفووق ): راهم موانسيين لفووق هوا ومرتوو
داك لعشا تقلب سم هااري كلااوه
حذيفة: نووضي جمعي حوايجك
ايمان: سمحلياا احذيفة سمحلياا هءه كون غير م_ت كندير ليك غير المشااكيل
حذيفة: صافي ايمان ماشي وقت هادشي
جبد الشوانط وحل المارييو بغا يجبد لحواييج حتى بدات كتبكيي وتنتف فرااسهاا وكتغوت وراه طاحت لارض كتركل وكتغوت عيا يحكم ايدهاا وفمها تزيرها عندو كترد فلارض شداتها كرييز فلمعدة وبدات كتعصر وتبكيي
حيد ليها حوايجها ولبسهاا كسوة كتنهج ومتكية كتنين ومزيرة على لفرااش وصبعهاا لفاصمة ولات كلها د_م
متكيية وهوا حداهاا مجنب على ركابييه شاد راسوو حتى بدات كدق علييه لطيفة فالاول مجااوبش بقات كدق تحلات الباب وكانو عاطينو بالظهر بجوج
غير شافت لباليزات تهز خاطرها وقالت: حذيفة
تقلب جيهتها وقاال : نعام امي ،بغاني نخرج ؛هانا غادي
لطيفة: لااا اولديي الله ارضي عليك واش ديما تخرج من داركم غضباان
حذيفة(عطاها بالظهر كيتنهد ): هادي هيا حالة لمسخوط، الى هزيت كفوفي لسما اميي راه مغنسمحش لييه لحد الساعة داير بحق الواليدين
لطيفة:عفا ولدي الله يرضي علييك(شافت فايمان ومشات جنبهاا )ايماان ايماان …حذيفة اش داكشي خارج من فمهاا
تقلب جيهتها كيلقاا كشاكشها خارجيين
بدا كيفيق فيهاا وهي مغيبة وقف هزها كي لحمق مرخيية وجسمها تقال
هبط فدرووج حفياان ومو تابعااه كتعيط على محمد والحااج
لطيفة: كشاكشها خرجوو (كضرب فوجههاا) مااتت مااتت
ركبها فطموبيل حتى تبعو محمد بكلاكيطة مدها ليه ماخلا تواحد يمشي معااه دارها اللور ومشا لاقرب كلينيك قداموو دخلها لمستعجلاات جثة هاامدة وهوا قلبو غيسكت بلخلعة
لقا محمد ولطيفة بنقابهاا المغربي بجلابة وزيف ابيض على نيفهاا مهضروش معاه كيبان ليهم بحال جمرة الشاعلة كايمشي ويجي فلكولوار
خرجات الممرضة وقالت: طبيب معاهاا داباا كايدير ليها الفحص
دازت نص ياعة اخرى وخرج الطبيب وقال: جاها انهياار عصبي ،اول مرة يوقع ليها هكاا
حذيفة: اول مرة تغيب لهاد الدرجة ودكشي لي خرج من فمهاا
د_ هادوك الفقعات نتيجة كرييز فلمعدة عندها الاعصاب فالمعدة خاصها تشوف اختصاصي فالمعدة وان شاء الله يكون خير
حذيفة: داباا فااقت نقدر نخرجها
دك: دگينا ليها واحد لبراا تكالميها بغيتي تخرجها مكاين حتى مشكييل غير ضروري من الطبيب لانه المعدة ديالهاا طاايبة بزااف
حذيفة: ضروري شكرا
لطيفة: اش قاليك الطبيب احذيفة
حذيفة: غير لعصااب (تنهد )
محمد: واش مغتقولش ليا شنو واقع احذيفة ! كنتي عارف بلي هوما عائلة وحدة وسكتي
حذيفة: راه مرتك لي مبغاتش شي حد يسيق لخباار حيت حشماات من ايمان (بلفقصة ) يحشم بااهاا يحشم داك الشماا_تة قليل الاصل وكلمة راجل بزااف علييه اما مرتي مايوصلوهااش ومزاال لحساب عند الله على داكشي لي دوزو عليهاا قولييه لا فلتي فالدنيا مزال عند الله تشد حسابك
محمد: انا اخويا راه مفراسي ميتعاود عفاك متهزش من جيهة اسراء راه غير نية وباقة صغيرة
حذيفة: محمد انا معندي مع مراتك حتى مشكيل ، كل واحد حر فداكشي لي باغي وانا امي باغي هاد بنت النااس بغيتووها ولا كرهتوها راه ميفرقني معاها غير ربعة الشبورة فلارض
لطيفة: بطولة العمر اولديي ،حنا مقلنا والوو وباك راك عارفوو كييهضر ويتنادم معاه الحال
حذيفة: حنا مابقيناش امي صغاار باش ندوزو طغيانو عليناا بجوج دمعاات ، السخط وهازني بييه شنو مزال باغيي ! ياك منهار حليت عيني فهاد الدنياا يمكن جاية لخامس مرة يجري علياا واش انا ديما غنساامح اميي راه رااجع غير على قبلك وقبل خوتيي اما راه نحلف حلفة وحدة عمري مزال نعتبها فهاد لبلاد
لطيفة(خرجو عينها وهزات ايدو بغات تبوسها وجرهاا ) : لا اولديي نبوس تراب رجلييك مديرهااش نموووت نمووت
حذيفة(جرها حضنها كيتنهد): حاشة اميي نتيي النوور لي غادي بييه فالدنياا(باس راسهاا )رضااك هوا باش غاديي
لطيفة: انا مغطياك بيه ليل ونهاار راضية عليكم كامليين وتواحد فيكم مامسخووط بااك الله يهدييه
محمد: باركة من الهضرة خرج مراتك وياله اخويا لداار
حذيفة: غير دي ميي وسيروو معنديش لكانة ندخل داباا
لطيفة: عفاك اولدي دير ليا خاطري وبات فداركم
حذيفة: ميي ميي عفااك غير نتسنط لراسي ونجيي
محمد: صافي امي خلييه على خاطرو
لطيفة: وخة ونشوف غير ايمان كيف بقاات
لقاتهاا كالسة صفرة وسخفانة دارت ليها لممرضة لصقة فلعرق وهبطات كم لكسوة تهزات عينيهاا ف لطيفة الاخيرة هبطات نقاابهاا وقالت : ايمان بنتي كيف بقيتي شوية
ايمان: شوية اخالتي …سمحولياا عفاك درت لكم الرويينة اخالتيي ماشي لخاطري ،داك السيد اداني بزااف (تنهداات )بزاف
لطيفة(مسحات على ظهرها ): ربي فوق كلشي ابنتيي ولي ظلمك اليوم عند الله يجي حااني رااسوو
ايمان(ضحكات وعينيها مغرغرين ): غيجييو بزااف
لطيفة: ربي مغيضيعكش ابنتيي
هبطات راسها كتمسح فدموعهاا وعنقات لطيفة حتى دخل حذيفة هاز فايدو صندالتهاا كانت فالطموبيل تبسم ليها وقال: هاكي صندالتك
لبساتها وتمشات مع لطيفة وهوا سابقهم هوا ومحمد حتى هبطو الطموبيل بغات تركب اللور وقال: ركبي القدام ..لواليدة غادية مع محمد
حركات راسها بااه ومشات لبلاصتهاا مهدودة شدو طريق مغايرة على طريق الدار ومع ذلك بقات ساكتة وقف قدام فارماصي خدا كين ديال المعدة كتبو ليها الطبيب ورجع عطاها تشربو وقال: حبيبة فيك الجووع ؟ ناخد ليك ش حاجة
حركات راسها بلا بابتسامة شاحبة : مفياش
شد ايدها ورجع لسياقتو كيتنهد وساكت شافتو قاصد طريق لبحر ،بقات هادئة حتى وصل لبارك وقف حالين الزاج وندا كيوصلهم ولجو بارد نوعا ما
حذيفة: نخرج نكميي ونجي
حركات ىاسها باه خرج مخلي وراه تيليفونو هزاتوو ومشات لانسطاا مشات لديك لباج تشوف شنو حاط لقاتو داير صونداج فيه * شكون لي ضرو راسوو *
مفهماتش شنو بغا يدير واش غير بووز ومطلعها على الناس ولا باغي لفلوس ولاا باغي يضحك غير فصباح كاتب التوقيت ودابا داير التصويت
حطات التيليفون بينما حذيفة كماا دغيا ورجع عندهاا هز لما شرب منوو وحطو
حذيفة(مد ليها ايدو شابكوهم وزير عليهاا): شوية !
ايمان؛ الحمد لله (تنهدات)بغيتك تسمح لياا مكانش قصديي ندير ليك مشكيل مع عمي
حذيفة(زير على ايدهاا ): ششش باا كيقلب على اي حاجة يشدني منها ماشي بالضرورة علييك ،نسااي وخلينا نهضرو فالمهيم
ايمان: شنو
حذيفة: لماكسيموم واحد السيمانة ونشدو الطريق لدارنا ،هاد المرة غنقولها لييك فوجهك ومغنديرش ليك ليها طرييق سمعيني مزياان ، خاصك طبيب حالتك مبقاتش عاجبااني ونهار على نهاار كنحس بيك مبقيتيش ايماان
ايمان: كيفااش اشمن طبيب
حذيفة: عارفاني علاش كنهضر وشمن طبيب قصدت ، حالتك بدات كترجع كفس من اللول وهادشي راه ميمكنش نكملو بييه هكاا خاصنا نشوفوو طبيب نفساانيي
هبطات عينيها بالدموع وقالت: طلعت لييك فراسك !
حذيفة: خايف علييك ، هادشي لي نتي فيه ماشي ساهل ،خاصك طبيب وغنبقا نعاودهاا تاتمشي لييه ،على قبلناا على قبل علاقتنا وزواجناا بغيتك تمشيي(قرب مسح ليها دموعها )عفااك فكري فصحتك ،فكري فحيااتك منهنا لقدام مم فكري من بعد الى بغينا نزيدو لحياتنا شي بيبي صغيير واش نتي مستاعدة نفسياا همم كتشوفي راسك قادرة وعندك طاقة زويينة وايجابية زوينة باش تربيي ولد
ايمان: مانليقش نكون ام هءه نقدر نكون انانية بحالها هءهء انا مبغيتش نولد شي ولد ويكرهني من بعد
حذيفة: نتيي غتكوني ام زوينة وظريفة وحنينة وانا عارف هدشي ومتاكد منو ملييون فلمية ولكن خاصك اولا تكون نفسيتك ايجابية وزويينة وانا غنقولها ليك بلا زوااق وخة تكون قااسحة علييك…. انا بااغي منك وليدات ولكن مقادرش نزعم معاك فهاد الخطوة ونتي فهاد الحالة خايف علييك
بكات تعياات فحضنو وقالت: ماشي لخااطري اهء هءهء عييت احذيفة عيييت
حذيفة(كيمسح على ظهرها ) : كلشي غيدوز تيقي بياا،الوقت كتنسي كلشي ولكن نتي كتخبي فقلبك ومبغاش تنسااي مقادراش تقبليي هدشيي ،راه ماشي نتي اللولة ولا اللخرة لي يوقع ليها بحالك ،ولكن نتي احبي شديتي كاع داكشي لخايب لي عشتيي وخليتيه يعشش فخاطرك حتى مرضك..انا مبغيتش ايمان ليي كتشوف الدنيا كحلة بغيت ايمان ليي كنشوفهاا كنفرح حيت هي فرحانة ومرتااحة ،فهمتيني
حركات راسها فحضنوو ملاذها الوحييد
بقات كتبكي حتى رتاحت هز ليهاا وجها وباسهاا ومسح وجهها وقالت بصوت باكي: كنواعدك غنمشي لطبيب هاد لمرة غنكمل معااه
حذيفة: هدشي فمصلاحتك اولا انا غنفرح الى شفتك فرحانة ومرتاحة ومستااقرة
حركات راسها بااه ورجعات لحضنوو كيشوفو قبالتهم ساكتيين
حذيفة: غدا ناخدو شي رونديفو مع الطبيب ،تبغي ترجعي عند داك الطلياني نيت ؟
بدات كدور فعينيها فحضنو وقالت: بغيت نقوليك شي حاجة
حذيفة: بحالاش
ناضت من حضنو وقالت: بلوكيت نمرتو من عندك باش ميتاصلوش بييك
بقا كيشووف فيها مدة وقال: لي فات مات صافي
حركات راسها بااه، بقاو ساكتين كيسمعو لمواج حتى مشات بيها عينيها ..هز تيليفونو كيتلف بييه حتى وصلو مساج من محمد
محمد: حذيفة كيف بقات لمدام
حذيفة: الحمد لله اخوياا
محمد: اتاصل بيا ياسين خو اسراء وطلبني باش نعطيه نمرتك
حذيفة(قندش) : اش بغاني
محمد: معرفتش قالياا متقولهاش حتى ل اسراء ،هضر شوف اش بغاا جري فالصلح اصااحبيي قسوحية الراس معندو ميدير ليكم
حذيفة: وخة عطيه نمرتي نشوفو هادشي ديالهم
حط التيليفون كانت الطناش ونص ديال الليل داتو عينوو تحس بيها قفزات زير على ايدها وقال: مالك
رجعات غمضات عينيهاا وحركات راسها بوالوو من وراها منعستتش حتى بدا نهار كيطلع قرب لفجر يادن وقال: نمشييو لدار غيكون لحاج خرج لجامع نلبسو علينا ونخرجو
رجعو لدار مع ادان الفجر لقاو الضو شاعل فالدار ديجا وصا محمد يخلي ليه الباب محلول دخلوو وطلعو نيشان لبيت ساكتيين وبلحس
مشاو توضاو صلاو وتكااو فبلاصتهمم حتى يصبح لحاال كانو فجو هادئ غير كتشوف بعينيها وسااكتة وهوا وراها كيلامس شعرهاا وقال: نعسيي باش غدا نشوفو شي طبيب ديال المعدة ونشوفو شنو نديرو من بعد
حركات راسها باه ساكتة مع طلوع الضو بدا تيليفونو كيفيبري تقلب هزو كيلقا رقم جديد …نضف صوتوو وكلس
حذيفة: الوو
جاه صوت شااب وقال: السلام عليكم سمحليا يكما فيقتك
حذيفة(شاف فايمان وغير من صوتو عرفو ياسين ) : ياسيين !
ياسين: اييه قوليا واش نقدر نشوفكم دغياا
حذيفة: علاش
ياسين: خاصنيي نهضر مع ايمان ضروري هدشي مكيتقالش فالتيلفون ،الله يجازيك بخير احذيفة غيخصني نشد لكار مع 10 الى كان ممكن نتلقاو داباا
حذيفة(شاف الساعة كانت السبعة ونص ) : وخة اشمن بلاصة نجي عندك
ياسين: معرفتش واش ايمان قالت ليك على واحد دار كاينة هنا ديال المرحومة
حذيفة: اييه عرفتهاا
ياسين: غاتلقاني فلبارك حداهاا متعطلش اخويا الله احفضك
يتبع
شاركنا رأيك في هذا الفصل 🌹