العوض الجميل ❤️🩹
بدات كدور فعينينا وقالت: والى مكتاابش متلاا جربناا نولدو ومولدنااش ،كنشوف شحاال من واحد طلق مرتو غير حيت مكتولدش
حذيفة: لوليدات زينة الحياة سي متاافقيين ولكن راه ماشي هوما الحيااة كلهاا ،ربي فرق الارزااق على الناس كاين لي عطااه كلشي ومعطاهش لولاد كاين لي عطااه لولاد وعندو عشا ليلة
راه الارزاق ا ايمان مامقاداش ، خاصنا نحمدو الله ونشكرووه على كلشي راه شي مرات ربي الى حرمك من واحد الحاجة الا وفيها خير لييك ، واش يكونو لولاد ومعندكش باش تعيشهم يكبرو حاقديين شنو ستافدتيي ؟ والوو خلقتيي وليدات حاقديين على الدنياا باش تكون نتا اب ولا ام
والى معطاهمش ليك راه ماشي نهاية العالم دير الاجر غير فلوليدات لي معندهم حد
هكااا غادية الدنياا لواحد يتقبل داكشي لي عطاه الله ، كاين لي كيبدل مراتو غير حييت ولد لبناات ،كتعرفييه جااهل ومقلووبة علييه ،معارفش بلي هوا منو كلشي
وبلي دوك لبناات فاتحيين ليه بيبان الجنة كون عرف ليهم غيعييش قااايد وسط بناتوو
ايمان: الصراحة لبنات زويناات ههه يكونو عندك شي تلاتااا بابا بابا طلقك هاديي تشدك هادي ههههه
تبسم بعفوية وقال: المؤنساات
ايمان(بحب ): غتجي معاك باابا ههه
قرصهاا فحنكهاا وقال: ان شاء الله
ايمان: اليوم غتعشاا معايا وديان
حذيفة: الله يسخر غنمشي لجامع انا وطارق نقدر منجي حتى يقرب لفجر
ايمان: صافيي
جمعو لماعن عاوناتو لبس علييه جلابة وتعطر وتقاد
جات من ورااه قدات لييه القب ديال الجلابة لي فالبيج وفيها خطوط طوال فلخزي مسحات ليه النظاظر ومداتهم لييه جابهاا قداموو بايسهاا من جبهتها دخلات تحت جنااحوو وغمضات عينيها وقالت: كدعي معاياا !
حذيفة(كيلعب فشعرهاا ) ديماا
ضحكاات وبعدات علييه وقالت: الله اقبل احبيبي انا نيت غنصلي علاش قدرني الله ونختم القران
حذيفة: الى بغات تمشي وديان صوني ليا نجيي
ايمان: هههه مالي خفت ،غتبقا معاياا غير سير هاني
توادعو عند الباب ورجعاات لدار صونات لوديان باش تجيب معاها شي حاجة من برا
مشات تصلي العشا بينماا وصلات وديان دقات وحلات ليهاا وقالت: مااااميي هههه
ايمان: سكتي سكتي راني مزال مامسوعبااش
وديان: قلتيهاا لحذيفة
ايمان: مزاال ههه ياله كنبغي نهضر كتشدني لخلعة قبيلة بغيت نشوف اش تحت راسوو هنن قالياا بلااتي علينا حتى تكملي لعام ونستاقر انا فقرايتي
وديان :ههههه صدمة كبيرة …. شوفي جبت ليك السوشي لي مصدعا ليا راسي بييه سيمانة هادي دابا عاد عرفت علااش ههه ولكن راه ممنوع علييك تاكلي ديال الحووت
ايمان: اويلي وديالاش جبتيي
وديان : جبت ليك الطاايب وهدا مقلي مهيم دوقيي وسدي نفسك علييه حيت صعيب شوية خصوصا لي مطايبش
ايمان(هزات وحدة كلاتها كتبنن ) هدا مافيهش لحوت
وديان: هداك فييه لفوكا وطون زويين
ايمان: وتنقول ماليي وليت حاطة علييه ههه ممم بنييين كنت حاكراه
وديان (هزات جوج كريطينااات قدامها وقالت) شووفيييي
ضحكات ايمان كتمسح فايدها وقالت: اش داكشي
لاحت ليهاا لكرطونة اللولة وفمها مترع بضحكة عينيها كيبرييو مع حلاتها كيبان ليهاا كسيوة صيفية ديال لبنات فلغوز وفيهاا رسومات على شكل فريزات فلحمر .. كيووت وزويينة وحلات لكرطونة التانية فيها سالوبيط فلزرق وقميجة فيها بابيون صغيرة
احاسيسهاا مخربقيين ودموعها غير على سبة هزات دوك لبيسات ودموعها مقدرااتش تحبسهم جات حداهاا ودياان معنقاها وقالت: علاش كتبكي داباا
ايمان: بغيت نقولها لييه يفرح معاياا وخفت
وديان: مناش خفتي ههه يقوليك معامن تشااورتي ههه ولكن واش ديك السعات بحال داباا ؟ عقلتيي كيف كنتي راك كنتي ديك السااع مرييضة كان خاايف علييك اما دابا الحمد لله وليتي مزياانة ،وتبارك الله راكم طالعين فلعام الراابع يعني غيجي واحد النهار يبغي لوليدات وداك النهار جاا بلا تخطيط ،علاش مغاديش يفرح بلعكس انا كيبان ليا حذيفة شخص حنين مظنيتش يتقلق
ايمتن: هوا حنين وببزاف ولكن غير خفت الى يقوليياا درتي شغلك وانا والله حتى داكشي جا بوحدوو ملي تخربقات ليا لي غيكل وكنت مشغولة بالامتحاناات صافيي مركزتش معاهاا
وديان: بلعكس هادي وقتوو نتي ساليتي قرايتك تربييه علييك وخدمي بخااطرك ههه ديري ليه شي ليلة وعطيها ليه فوجهوو
ايمتن(ضحكات شادة لحوايج ) قلت غنقولها لييه فصباح العييد
وديان: احح متحمسة هههه شوفي خودي الدواا ديالك ياك و التحاليل غدا ديريهم ليا ضروري
ايمان: وديان ياك دواا لي كنت كناخد مغيأترش علييه ؟
وديان: ياك مبقيتي كتاخدي والوو
ايمان: ولكن ديال دوك نوباات الهلع شي تلت شهور هادي باش حبسو لياا باش يشوف واش باقيي كيجيوني ولا خفافو
وديان: مخفتيش ان شاء الله معندو ميوقع الدوا لي صعيب راك حبستييه ست شهور هاديي …داباا فكريي لياا فحبيب خالتوو(تلمسات كرشهاا ) فرحانة تقول انا لي غنولدو هههه
ايمان: مزال مغيبانش شنوو واش بنت ولا ولد
ضحكات وديان وقالت: لا مزال ياله عندك شهر وسيمانة منهنا 3 السيمانات جي باش تسمعي قلبو كيضرب
ايمان(لمعو عينيها ) : امتا غيولي يتحرك
زديان: على حسب كتبدا الحركة تقريبا من الشهر الرابع ،عيشي كل مرحلة بداكشي لي فيهاا
ضحكات حاطة ايدهاا على كرشهاا وقالت: داكشي لي كاااين
وديان: ونقصووو شويية من العاب القوة ،راه داك لحريق فجنبك غير بسباب درديييك هههه خليوه يشد بلااصتو
ايمان(ضحكات )هههه صافي وخة هههه
تعشاو بجوج وصلااو وايمان ختمات القراان وكلسات فخلوتها بواحد السكينة وفرحة حسات بيهاا وفاحشاائها ونيس لجسمهاا وقريبا غيولي ونيسهم فالحيااة ترحمات على مهاا وطلبات الله يطول فعمرهاا حتى تشووف فلدة كبدهاا كتكبر قدامها ومتحرمش منهاا
وجددو سحورهم ولي بقا فالسووشي كلاتوو وخة عيات فيها وديان ولكن شهوتها فييه
تسحرو صلاو الفجر بجوج ومشات نعساات اما وديان عيطو ليها من خدمتها ومشاات
دخل لبييت لقاهاا جبدات عليهاا بالنعااس بدل علييه وتخشا حداها
بدا صبااح كيفيق فيهاا وهي مغيبة حتى ناضت مدوخة مناعساش وقال: نوضي ديري التحاليل ديالك ونرجعك رتاحي نوضي
رجعات تكات وقالت: بللاتي شوية اصلا انا صايمة فينما درتهم مقداش نووض
حذيفة: ونوضي دابا براكة من لعكز لعشية راك قارية نووضي
كلساات بعيااء مشابعاش نعااس غير هزات راسهاا حساات بلارض كدور بيها ورجعات كلسات حاطة ايدها على معدتهاا كتسووط
داكشي لي كلات حسات بييه مزال ماتهضم كيطلع ويهبط فحلقها
مع وقفاات حساات بالردة دازت فييه ومشات بجري لدووش
ردات كلشيي محنيية تبعها ديك السااع شدهاا
حذيفة: غير بشويية(حس بيهاا كلها كترعد )متخلعييش ،بشوية
ايمان(كتنهج): ضااع لياا نه (رجعات كترد )اااه
حذيفة: مضاع والوو
طلق لماا وداها لفابو كيغسل ليهاا فعنقهاا وكيرش عليهاا لماا
حذيفة: شنو كليتي حتى نوضتي علييك المعدة شنوو
إيمان: تقلت لباارح فلمااكلة كليت سوشي مقلي
حذيفة(هز حجباانوو كيسوط ) والله مكتحشميي ..اجيي هنا اجيي
خرجهاا من الدوش داها لطبلة وحل لبالكوون كلسات كترعد صفرة
حذيفة: رتاحيتيي دابا ملي رديتيي
ايمان: ااه شوية (شدات راسهاا)ففف معمري ناكلو مزاال اووف ،واش ضااع لياا النهار يااك
حذيفة: مضاع والو ولكن صومييه مع دينك من بعد(سكت شوية ) مزال مفطرتي ؟
ايمان: لاا مزاال ،غير سير احبيبي انا من بعد ونخرج دابا مافيااش
حذيفة: نخرج ونخلييك هكا !
ايمان: انا بخير والله صافي ردييت ورتاحييت لكانت شي حاجة نصوني لييك دغياا
حذيفة(مسح على حنكهاا ) : متأكدة
ايمان: ممم
حذيفة: نهار نلقاك كتاكلي فداك السوشي نضبر معااك ،تحلات ليك الشهيية هاد ليامات غير على التخربييق ،بحال نهار مشينا لكورياا كالسة كتااكلي فداك الوز ديالهم عارفاه واش مدبووح
خرجو عينيهاا وقالت:داك لي مشويي (سالو ريوكهاا ) راه مدبووح ياك سولناا
حذيفة: منيتك ؟
ايمان: وديك الراميين لي كلينااا نااري كتحمق وحاارة اش كان فيها ااه اللحم ديال ل إوز و لبيض وداك لجنجيير وزنجلان كتحمق
حذيفة: غير فطري فطري
ضحكات وقالت: ونتا لي كتفكرنيي
باسهاا وقال: انا مشييت
ايمان: ودابا نتا لي بستيني ماتفطرش ههه
حذيفة: القبلة لا تفطر هههه
ياله بغا يحل لباب طلات عليه وقالت: كنبغييك
تبسم ليه وغمزهاا وقال: سعداتي بهاد الزيين كلوو كيبغينيي
ضحكات رسل ليها بوسة ومشاا مخليها كالسة مبتااسمة
ناضت بدلات عليهاا كتفكر كيفاش تقولهاا ليه مشات لسوبر ماركت تشووف اشنو تقدر دير بانت ليها واحد الرضاعة صغيرة ديك الرضاعة فلغلاقة ديالها بحال لخيط نازل ب سكاتة صغييرة قد قياس حبة ديال جلبانة فلزرق
هزاتها فايدهاا كتفكر بقات شداهاا وكدوور تماا كتشوف فحويجات لوليداات الصغار حاجة تنسيها فحااجة خلصات ديك الرضاعة وخرجات كانت وقت المحاضرة ديالهاا مشاات قرات وفبالها غير كيفاش تقولها لييه
خرجات مع الربعة ومشاات عند وديان دارت التحاليل وكلسات كتهضر معاها وقالت: معرفتش كيفاش غنقولها لييه
وديان : حطي ليه كلشي فبواطة هههه خليه يضهشر
ايمان: ههههه بغييت غير امتا يوصل لعييد ههه
وديان: شريتيي الدواا
ايمان:اه هاهوا عندي نفطر ونبداه ،انا مشييت نهضرو من بعد
كانت بقات يوم واحد على العيد واقفة فلكوزينة كتكور فلحلوة ديال ري شبوند لابسة بيجامة قصيرة وظافرة شعرهاا ..حتى سمعات لباب تحل ..تبسماات لييه وقالت: على سلاامة
جا لجيهتها باسهاا وقال: الحادݣة شنو كتبدعي
ايمان: تشهييت ديك لحلوة ديال ريشبوند عرفتيهاا لي كيكون فوقها لكوك
حذيفة: اااه اييه بصحتك الزيين ..شوية السخفة
ايمان: شوية الحمد لله
حذيفة: خاصك شي حاجة ! بغييت نمشي نتكا شوية عيييت
ايمان: ياك غداا غتكلس معاياا عننداك تمشي لخدمة
حذيفة: نكلس نص نهار معاك ونمشيي
ايمان(طيحات كتاافهاا بحزن ): لاا عيقتي علياا حتى لعييد لاا بزااف
حذيفة: ايماان حنا راه فبلاد كيعتارفو غير براس لعاام الله اهدييك نسد والسلعة لي لداخل شنو تخسر (عنقهاا )عاارف هملتك ومبقيتش كنكلس معااك بزااف ولكن غير نامن رااسي ونلقا لي يجيري لياا كلشي غنكلس فلوقت لي بغييت معااك غير صبريي
حركات راسهاا باه سااكتة كتكور فلحلوة ،شافها سكتات وقال: غندحااول ندوزو معاك كلو
ايمان: حلف
حذيفة: والله
ايمان(رجعات ضحكات): صافيي مشاات ههه
خلاها ناشطة ومشاا حتى جاتها لفكرة مشات جابت ديك الرضاعة هزات لمقص قطعات ديك السكاتة الصغيرة ودارتها وسط واحد لكورة ديال لعجينة وطرفاتهاا باش تعقل عليها
كملات حلوتهاا ودارتها فلفران فنداتها فلكونفيتير ولكوك وخبات ديك لحلوة حتى لغدا
وجدو اخر فطور رمضاان ناشطيين وكلسو فطبييلتهم كيصونيو ليهم العائلة يباركو ليهم العيد حيت غيعيدو قبل منهم ضحكو نشطوو صلاو العشااء وقال: شنو بروكرام غدا ان شاء الله
ايمان(تخشات فيه): بغيت ندوزو غير معاك باركة علياا
جرها غندو وقال: عنداك تجري علياا ههه(قرصها فحنكها وبقا مدة كيشوف فيها ) فيك شي حاجة مبدلة
ضحكات وقالت: بحالاش
حذيفة(دوز ايدوو على فمهاا ) : معرفت شي حاجة زويينة تزادت فييك
ضحكات بخجل وقالت: معرفت
جرها عندو وقال: اجي نتاكد
عصر عليهاا تقالت : بلاااتي بلاتيي
حذيفة: اشنو تااني
ايمان: خلي تالغدا
حذيفة:منهنا لغداا يكون خير اجي بعدا ،تء برزطيني هداااي
ايمان: لا لاا غير صبر عرفتي داك لحريق لي فياا منااش
حذيفة(كيجر فيهاا ): صافي غير بشوية
ايمان: ضحك عليااا بديك بشوية ،تالغدا داباا عيييت معنديش السوفل
حذيفة: معندكش ؟ حنا قلنا ليك سووطي على مجمر هههه وزيد لييك مع هد زعيبيلة ،اوى خلييك تبات لملائكة كتلعن فييك منرضهاش ليك وغدا لعواشر ،حشومة وعيب
ناض لبييت وخلاها متبعاه يوماين هادي وهي مجرجاه وكدير فالسبة
طفات التلفازة مشات عندو لقات السيد واااجد ف فراشو كيتسناهاا عارفها غتجيي كي لمديليلة ضحك وقال:اجيي اجي ههه
ايمان(بتهديد ): بلعقل
حذيفة:وغير اجيي راه صعيبة غير لبداية
نعسات حدااه كدور فعينيهاا وكضحك غير بوحدهاا تجرهاا عندو وقال: اجي راك طالبة عليهاا
ضحكات كضرب فييه وعاشو ليلتهم بهدوء وسلاام
اجواء العييد هي لمة العائلة والحباب المباركاات والتيليفونات كتمشي تحيي صلة الرحم
ولكن ملي كتكون فالغربة راه عيدك مقتاصر على دارك كتخرج لزنقة كتلقا النهار بحال أيها نهار اي مغترب كيبغي يخلق جوو ديال العيد فاي بلاد كان فيه سوا بوحدو ولا مع وليداتوو
وديان هبطات لمغرب وخلات على ايمان القنط غتعييد بوحدهاا مع راجلها فقط
ناضوو بكري دوشوو ولبسو ملابس تقليدية جديدة فرحانين براسهم
صلاو صلاة العيد غير فالدار مشا هوا البييت وهيا واقفة بقفيطين خزي وشعر مجموع كتحط لحلوة فطبسييل وكتشحر فاتااي شافتو جاي عندها وتبسمات لييه
هز ايدهاا بااسهاا وحط بواطة قدامها وهي ضحكات كتشووف لقات ساعة يدوية انيقة بسمطة جلدية فلبلو ماريين ومعاها براصليي جلد ولوسط علامة مالا نهاية غليضة وباينة فدهب وفيها احجار صغير
تقلبات عندو عنقاتوو بحب وقال : باش تحيدي هاد التقلييقة ديال العييد
ايمان(دغيا دمعو عينيها ومسحاتهم كضحك ) الله احفظك لياا
باستو فحنكو ورجعات عنقاتوو حتى شبعت عاد خلاتو و مشاا كلس فالصالون كانت حطات كلشيي خلات لحلوة اخر شيء قلبهاا كيضرب
صافي خباات عليه هاد الايام بزز وخاصو يعرف فاقرب وقت لقاتو كيقلب فاتااي حطات الطبسييل وكلساات جنبوو
حذيفة: اناا مقادرش نفطر انشرب غير اتااي بلاتي شوية
ايمان: وهدشي لي وجدت حرام علييك
حذيفة : بلاتي نفتحو الطريق هههه
شرب نص كاس ديال اتااي عاد قال: ارا ندوق لييك شي حليوة
حطات كاسهاا ومدات لييه لحلوة وبقات مراقبة ديك لحلوة حتى غادي بيها لفمو مع عض نصهاا حول العضة لبين ضروسوو تسمعاات طااق
هوا قال اححح وهي عينيها خرجو وشهقاات حاطة ايدها على فمهاا
حذيفة: اش هدشيي(شد حنكوو)اححح ناري
جبد داكشي من فموو حطو فوق كلينيكس مرفوع بالالم لي حس بييه كيكتاشف شنو وقع فضراسوو جا يقلب لقاا واحد الضرسة مشا لييها لقنت
ايمان: ماالك مالك
حذيفة: الضرسة تهرساات
ايمان: اويليي حل نشووف
ناض يغسل فموو وتبعاتوو عاضة على فمها معرفات تضحك ولا تسكت
غسل وكيشوف فلمرااية مبان لييه والوو عطاها التيليفون صورات لييه شنو وقع لقاا جنب واحد الضرسة تهرس منو شوية،،خرجات ليه على ضرسة فرمشة عيين
ايمان: واش كضرك
حذيفة: لا لا غير فاللول ، واش كانت شي حاجة قااسحة
بدات كتفتف وقالت: غير لوزة يمكن كانت فيها قشرتها
حذيفة: لوزة هرسات ليا الضرسة ! سناني راشيين على هاد لحسااب مشكيلة غيخصني نقادها
خرجات قبل منوو هزات ديك لعيبة ليطليهاا لييوم رجع كيقلب ملقا والو من غير طرف ديال ضرستوو بيض صحيح طاح باطلا
دار يوتييب معنقها عندو قدام طبيلة وقال: نديرو اجواء العيد كتفكرني فالطفولة
ايمان: اااه ديك المجموعة حدا الناافورة هههه
دار سميتهم فالروشيرش خدمهم هزات راسهاا فييه باستوو
حذيفة: هدا هوا لفطوور لي بغييت
ضحكاات لييه بخفوت كيبوس فشفايفها قلبها كيضرب
ايمان: حبيبيي
باسها فعينيها وقال: لكبيدة
حيدات ايدو من عنقهاا باستهاا شابكاتهاا مع ايديهاا
شوية بشويةة حطاتها على كرشها ياله بغا يبوسهاا ما دا ما جاب بايدو حيت مولف كيحط ايدو فاي بلاصة ماشي اول مرة تحط تما
بعدات فمها على فموو وقالت: انااا (شافت فعينين وفمها كيترعد وهوا مراقبهاا وحرك حجبانو لييها بشنوو عطاها سمعو واهتمااموو،سرطات ريقهاا وكملات برعشة وعينيهاا مقدراتش تحكم فدموعهم وقالت) اناا اناا ح حااملة
مع قالتهاا تسمعات فالتلفاازة داك المقطع الشهير: اشمس العشية امهل لا تغب بالله رفقاا
تقاد فلكلسسة بصدمة كيشوف فييها جر ايدوو لتيليكوموند طفا التلفازة وركز معاها وقال: ايماان …واش حاملة ؟
ايمان(رجعات ايدو ل كرشهاا كتبكيي ) هء هء هء اه حااملة “بتوتر” مكنتش ناوية ولك
عنقهااا كيضحك وشد وجهها كيتاكد: عرفتي تكوني طانزة نسلخ مك
حركات رااسها بلا تخلطات ليها الضحكة مع البكيية وعنقها كيضحك وقال: هدا احسن الاعيااد
عنقاتوو فرحاانة وتحيد حمل تقيل على كتاافهاا بعد عليها كيتسوعب شنو تقال لييه
جبدات ليكوكغافي من تحت لمخدة مداتهم لييه
بقا كيشوف فيهم وشدهم حاط ايديه على ركابيه كيتمعن فديك الصورة وحكات صبعها على ديك الكتلة الصغيرة لي مدور عليها حطوط وقالت:هوا هدا …مزال مبانش
حط ايدوو على وجهو كيمسح على لحيتوو وطول فالسكاات حتى دخل معاها الصهد
وهز راسوو شاف فيهاا جرها عندوو وقال: شكرا
ايمان: علاش !
حذيفة: معرفتش هه (رجع كيشوف فييه عاض على فموو ) فشكل هدشي معرفتش ،دابا اناا غيولي عندي بنت ولا ولد
إيمان: ان شاء الله
حذيفة سكت فلحظة عااطفية دمعوو عينييه ورجع عنقهاا عنااق طوييل وقال: الحمد لله على لي عطانا الله ، الله يتبتوو ويجيبو بخير وعلى خير
مسحات لييه ديك الدمعة لي لصقات فشفاارو وقالت: اميين يارب
حذيفة: شنو داباا العائلة غتكبر !
ايمان (بهدوء) ان شاء الله ،، فرحتيي
حذيفة: فرحت علاش لي مغاديش نفرح كاين شي حاجة حسن من هادي ! مكنعرفش نعبر ولكن لوكان تحليي قلبي وتعرفي شنو فيه وباش كيحس داباا غتعرفي بليي ماشي غير فرحاان ،شحال دابا عندك
ايمان: شهر ونص
حذيفة(خرج عينو ): شهر ونص ونتي مخبيااها عليا
ايمان: ههههه ويليي علاه كتعرف مع مع هههه ياله عرفت بغيت نديرها ليك مفاجأة السعااتي رونتهاا ههههه
حذيفة: ههه مزال متقدري تعرفي شنو عندك
ايمان: معرفتش ههه يمكن حتى لربع شهور ،انا عندي بحال بحال
حذيفة: تكون غير الصورة مكموولة هاديك احسن حاجة بنت ولا ولد بجوج بيهم عطية الله ورزق من عند الله ،الله اقدرنا عليهم باش يكونو درية صالحة ان شاء الله
ايمان: ان شاء الله يارب
حذيفة: نقصي شويي من
إيمان(قلبات عينيهاا وضحكات مقاطعة كلامو): كتقلب غير على السبة باش تبقا تنݣر نقصي نقصي نقصي
حذيفة: مالي كدبت نقصي من دوراان ونقصي من التيليفون
ايمان: اممم وحتى نتاا نقص منن ههه
حذيفة: لا لا هداكشي مداخلش فالنقصان
ايمان: وفاش داخل
حذيفة : فلمتعة
ضحكات وتكات علييه فرحانين كيجربو احساس الانتظار وماشي اي انتظار هدا بشووق وحب وفرحة وترقب
نهاار كلوو ظلو بجوج خرجها شويية وكل مرة يسول شنوو تشهيتي شنو بغيتيي كيتسناو وديان ترجع باش يمشيو هاد لمرة بجوج
وكيف فرحاتو فلعيد قررات تقولها ل لطيفة نهار صبح عيدهم من بعدما باركات لييهم كلسات كتجمع معاها وقالت: مي عندي لييك شي هضرة
لطيفة: الله يسمعنا خير ابنتيي
ايمان: كل خير ههه
لطيفة: اش تمااا ابنتي ههه فرحيني
ايمان(ضحكاات)
لطيفة(بفرحة ) يكما نقول مبرووك
إيمان(بخجل ): داكشي لي كااين
لطيفة: ربيي ابنتيي واش بصح حااملة !
ايمان: اه عندي شهر ونص ياله عرفت
لطيفة: فرحتييني ابنتيي فهاد لعواشر بغيت ربيي يسهل علييكم
إيمان: اميي يارب
لطيفة: الله يزرعو وينفخ فيه الروح ويجعل الصورة كاملة مكموولة اببنتيي اوى هكاك ابنتيي حتى لييين عمرو دويرتكم بشي بيجواا تعمر علييكم وتونسكم راه لوليدات زييينين
هي كاتهضر وايمان حاضية ايديهاا كي مطبزيين وبيضيين من ديما كيحمقوهاا فيها زيين الشلووح لبيااض والغلض وحداكة المراة المغربيية كيعجبها تشميرتهاا و الزيف كيفاش كترميه على راسهاا من حروفها يبان لييك بلي دوزااات الزين على حقوو فزمانها
ايمان: ميي عمرك وريتيني تصاورك ملي كنتي صغيرة
لطيفة: ههههه وشكون عقل عليهم ابنتيي مكناش كنتصوروو (بهمس)والحاج مكيبغيش داكشي متصورناا تا شرفناا
ايمان: خساارة عرفتي كيحمقوني ايدييك ههه
ضحكات لطييفة من نيتها تمسحات دموع فزيفها وقالت: هاهوماا هااه
ايمان: بيضيين وغلااض وزوينين ما شاء الله غير ديال لخواتم
لطيفة(كتهز بالضحك): وشي شرتلة هههه
ايمان: هههه الى مجاو مع يديك غيجييو مع يدي اناا معظميين هههه ولعويناات ولحنيكااات با لحااج دا الزيين
لطيفة(حشماتها): سكتيي دابا يسمعك
ايمان: ههههههه
لطيفة: والله مكرهت كون جيتوو كلستو معايا شوية ولي تشهات خاطرك نديرهاا
ايمان: انا داباا شهوتي غير فلحنة ريحتها لاصقة فنيووفيي مكرهتش نتغمس فيهاا
لطيفة: سبحان الله ،ياك عندكم تماا
ايمان: انا بغيتها بلعشووب ،غنوصي وديان تجييها لياا
لطيفة: ياك كااينة نسيفطها ليها فينمااا كاانت غير قولي ليا اش تشهيتي تاانيي ونجمع كلشي ونسيفطو لييك
برقو عينيها وقالت: مشهية بزااااف ههههه
لطيفة: لبعد الحبيبة
ايمان: ماشي مشكييل نقضيي هههه
ايمان كانت واخدة موضوع الوحم غير فشوش وكتشفشش علييه مرة تشهييت الشكلااط مرة تشهييت لكلاص حتى بدا كيدخل معاها لوحم وهنا عرفاات بلي الوحم صعييب وماااشي ساهل ترضييه
وحمها جاها على حماتها صباح وعشيية كتصوني ليها فيديو اما حذيفة ولات غير كتنكر علييه كضحك ليه ساعة وتقندش علييه نص نهاار وهوا داير اعصابو فالتلاجة
ولات كدور ف المدينة على شي مغربي كيبييع الحنة معروف لݣزارة كيجيبو سلعة المغرب كظل تجيب فلحناني كدخل لدوش كترطب فييهاا وكتشم وكتسناا وديان تجيب ليها لحنة
واحد الليلة ناعسة حتى ضرباتهاا لفيقة فيها الجووع ناضت كتااوب خلاتو نااعس زادت على ملابسها لخفيفة قبيتوو كانت محطوطة فالصالون ودخلات لكوزينة عينيهاا نااعسيين
جبدات الطوست وبدات كتصلق فلبيض تسناتو حتى طاب وخلطاتو مع لفرماج ودارتهم فطوست لي حمرت وجبدات العصير هادشي كلو وهوا مجايب لدنيا خبار كيجي عيان كيطيح دودة شادة تيليفونهاا طالعة هابطة ف انسطا
طلع ليهاا فيديو ديال الاكل الاسيوي كياكل ويتبنن وهي ريوكها سالوو غير شافت شنو كيطيب عينيهاا خرجو وتفكرات مداق ديك الاكلة لي كلات ف كوريا ديال الاوز مشوي والرامين بصوص حاارة
غسلات فمها ومشاات تكات حداه حس بيهاا نعساات حداه ورما ايدو عليهاا غمضات عينيهاا عيااات تسكت ديك الرغبة فداك الطبق بالضبط وكلساات كتسووط
من كترت متقلبات طيرات عليه نعاس ..شعل الضو وشاف جيهتها باهتمام عينيه حمريين
حذيفة: ايماان مالك ؟
ايمان: وااالو طار مني النعاس
حط ايدو على كرشها: مكيضرك والوو
بابتسامة باردة: لاا والوو
حذيفة: نطفي الضو
ايمان: سيي غير طفيه
مع طفاه جرها لصدرو كيمسح على ظهرها تقالت: ففف
حذيفة:ا ماالك
ايمان:تشهييت شي حاجة
كلس شعل الضو وقال: شنوو تشهيتي احبيبة
كلساات كتشرح ليه وتعبر : داك ل إوز لي كلينا فكوريا عقلتي عليه مع ديك الراامين لي فيها لبيض ولحاار بغيتهاا
بقا كيشوف فيها كيستوعب اش بغات وقال: ومنين غنجيبو لييك فهاد لوقت
تكاات كتسووط: مبغاش يحيد من باليي
حذيفة: صبري يصبح لحال ونمشي نسول داك الريستو شينوا لي كتاخدي منو السوشي
ايمان (بحزن): مكييديروووهش سولتهم (غمضات عينيها)صافي نعس نعس تء
حذيفة: تشهاي شي حاجة توجد فلبلاصة (تاوب) غدا نقلب ليك عليه ،نقدر نعس
ايمان: واا نعس
ضحك وقال: غير بردي برديي نهار تشهاات تشهات ل وز و مشوي مزال
ناضت كتسووط كتقلب فلبلاكارات وتنكر : شكلاط لي حطيت هنا معرت فينهواا شداتني لحرقة
لاح عليه مخدتها فوق راسو من الضو: شوفي فلكوزينة
مشات كتقلب حتى لقاتوو كلسات كتااكل وشداها الفقصة غير بوحدهاا بغات تنكدو هاد الليلة ولباس
مشات عندو شعلات عليه الضو تغمض عينييه معنكش كيسووط
حذيفة: ايمااان ففف
ايمان: انا ولييت ففف ياك
هز راسو فييها كيشوف فيها واقفة علييه وقال: عارفاني دوزت نهاار واقف على رجليي ا ايماان بغيت نرتاح شوية راه غنخرج مع 6
ايمان(كتحل فلمجورة) : نوض غير من صواب سولنيي ماليي كندور اشنو بغيتي هكا كندير لييك
تكاا على ايدييه مضهشر بالنعااس وبالنگير مع 4 تاع الصبااح وهي كدور وترجع تكلس حداه وقال: هانا فقت شنو خاصك
ايمان(بنفخة): غير نعس مخاصني والو ،مشا لحاال
رجعات تكات عاطياه بالظهر جارة عليها لغطا عنقها من اللور وقال: خاصني نكويك على الجعرة
هزات كتاافهاا وهوا سكت باش يرجع ينعس تكلسات كتنتر ناض قافز قال: مالك ايمان
ايمان: والو مجانيش نعااس تء انوض نتفرج شوية
بقا حاضيهاا تمشاات كلسات فالصالون كتفرج وهوا رجع تكاا وخة طار منو النعااس
حتى ناض كيتاوب دخل توضاا وخرج بانت ليه ناعسة والتلفازة شاعلة
مشاا كيرش عليهاا الما لي باقي فايدوو تقفزاات وتمكشات كتنين ورجع حط ايدو فعنقهاا تقالت: اوووف
ضربها لفخضها وقال: انا ولييت اوووف داباا
ايمان: وخلينيي بزز جاني النعااس
حذيفة: نوضي صليي معاايا نوضي (جرها ناضت كتاوب)
دخلات كتماايل لدوش توضاات لقاتو صلى لفجر تسناها تصلاتو وصلاو مجموعيين الصبح
ومشاا كيلبس فحوايجوو باش يخرج هياا شربات لما وغادية راجعة لبلاصتهاا تحساات بخاطرهاا تقلباات ومشاات لطوالييط كتجري سمعها وخرج عندهاا مجا فين يدخل يطل عليها لقاهاا كترد جا وراهاا شدهاا جامع ليها شعرهاا
غير كترد كتشدها السخفة وقلبها كيبغي يخرج من بلاصتوو غسل ليها وجهها وداها كلسها وجاب ليها لماا ونفراتوو مبغاتش تشربو
ايمان: محملتووش
حذيفة: واش فيه شي مذاق ؟ (داقو ) عادي
ايمان(كتبكي): مابقيتش حملت نشربو غير كنشربو كنرض ففف
حذيفة: ولكن راه لما ضروري ليك ولي فكرشك واش حماقيتي (مسح دموعهاا ) عيشة دميعة رجعي تنعسي رتاحي
شافتو لبس وقالت: غادي ؟
حذيفة: سيي نحاول منتعطلش
ايمتن: نمشي معااك ؟ ياك دابا متيكون حد فلكوزينة غير نونسك حتى نعيا ونرجع
حذيفة: وخة ياله
ناضت لبسات عليها شوميز وسروال شارليي وجمعات شعرها وتبعاتوو لطموبيل
كان لجو مزاال مظلم والدنيا خاوية والجو باارد وزويين وقف طموبيل فلبارك اللور ديال السناك ودخل من لباب ديال لكوزينة
بدا كيشعل فالضواو و الدنيا نقيية مكيخليهم بخرجوو حتى كاينقيو كلشي ،لبس علييه لبس الخدمة فلبيض طوا لكمام مجمع معاها وهياا وقفات حداه كيدير فالليكات
كيوجد ف التتبيلة فالشوارما والتتبيلة ديال الدجاج لي كيتشوا يومياا وهادو بجوج عليهم اقباال كبير وشي مرات كيساليوو بكري كيجي هوا اللول كيلقا كلشي مغسوول كيرقد الدجاج ويقاد الشوارما حتى هياا
غسل ايدييه وهي مرااقبااه بابتساامة حتى هز عينو فيهاا جااي عندهاا كيمسح فايدوو…تحنا لعندها بااسهاا ودوز ايدوو على كرشهاا وقال: امتا تبدا تكبر
ضحكات حاطة ايدها على ايدوو وقالت: انا جاتني بانت شوية !
حذيفة: كانت عندك لكرش قبل ؟
ايمان(هزات فيه حاجبهاا ) نتا لي عندك لكرش
حذيفة: ههههه مالك كتقلبي امتا تشعليي
ايمان: عنداك تنسا لياا لوزة
حذيفة(كيطنز عليهاا): لكركااع لا
ايمان: حذيفة والله حتى معاك بصح
حذيفة: هههه صافي صافي غير كوني هانية
بداو الناس لي خداميين كيجيو و لي اكتريتهم مغاربة بزيي موحد السروال كحل والشوميز زرقة
بداو كيحطو فالسلعة لي كيحتاجو لكافي ولفطوور وحذيفة واقف معاهم كيشوف فلجودة ديال ديسير وديال لحلوياات والخبز لي دخل لكوزينة على اساس السوندويش وخبز الشوارما وطاكووس والخضرة طرية كيف ديماا هدشي علاش ديما كيبدا نهارو قبل منهم باش يدوز كلشي على عينيه
وقف حدا ايمان حاط ليها هي اللولة كاس ديال العصير وكلس جنبها كيشرب فقهوتو وقالت: اش بان لييك تزيد حتى لاكل المغربي !
حذيفة: بلااتي شويية لبلان فباالي ولكن نشد بلاصتي بعدا ويدر الله خير الى درتو نقدر نديرو نهار فالسيمانة وفرمضان متلا لمهيم عطا الله ميدار
ايمان:شوية بشوية (عيات)غنمشي لدار عييت ،لعشية عندي امتحاان
حذيفة(حط كاسو )بلاتي نوصلك
سلمو على ناصر جاي داخل عينيه مبوقين بنعاس ضربوو حذيفة لكتفو وقال: جمع رااسك جمع
ناصر: هاااهوا مجمووع
مشا كيتبسم لطموبيلتوو ركبب وتسناها تركب تركباات منفخة وقالت : دزتي من حدا بابي ومحليتيهش
حذيفة (باقي بنفس الابتساامة ): ايماان طلعيي
ايمان: قدامييت صافيي
سدات لباب بجهد حتى حل عينيه وقال: وبشوييية
دارت السمطة وقالت: مبشويااش
داها لداار وقال: نهبط نحل ليك لباب
ايمان: كنعرف
حذيفة: بزعطة
هبطات كضحك عاضة على فمها وسداتو على جهدو وقال: ايمااان
ضارت حلات لباب وقالت: شنوو
حذيفة: مالك سدي بشوية واش حساب لييك باب ديال اليااجور
ايمان: وخة
رجعات سداتو بجهد تغمض عينيه ورجعات حلاتو وقالت: عنداك تنساا داكشيي لي قلت لييك
حرك راسوو بوااخة كيرمش فيهاا تعاودات سداتو بجهد هبط لييها تهرباات لعمارة وسدات عليه لباب كضحك وقال: والله متبقا فيك
طلعات لداار نااشطة مشات كملات على نعااسهاا حتى صونا تيليفونها ناضت داايخة لقات جوج
ناضت كتزرب دغياا توضات صلاة ولبسات عليهاا ومشات شداات طاكسي باش توصل دغياا دوز الامتحانات الاخيرة
دوزاتهم وفيها جووع كدمق غير بسقاطة وعقلهاا مپروگرامي على ديك الاكلة الاسيوية ومن غيرها محلات عليهاا تحااجة
دازت تقداات وطلعات لدار حتى كيصوني ليها حذيفة جاوباتو حدا لباب وقالت:ياله لقيتيني بغيت ندخل فينك ؟
حذيفة: غنتعطل شوية
ايمان: علاش ياك لبااس
حذيفة: شي دراري كراو القهوة لفوق على وديت شي عيد ميلاد وطالبين شي لعيبات فلماكلة مهييم نساليي هدشي ونجيي
ايمان(ساطت): وخة متعطلش
قطعات معاه وحطات التيليفون بملل ،كانت كتسنااه يجي ، هاد المشروع دا ليهم وقتهم كامل كيتلاقاو غير بالليل شي مرات كيسمحو فالنعاس باش يكلسسو يجمعو شوية اما ايام لفراجة ولمسلسلات ولات فخبر كان ، دابا عااد عرفات بقيمة ديك الشهرااين لي كلسو الراس فالراس فدار لا خدمة لا خرووج
ناضت بدلات عليهاا تقابلات مع لمراية كتشوف كرشهاا وتبسم
قهرها الجوع ديال بصح ومشاات توجد ليها متااكل وخة خاطرها والو واش بغات تحل على لماكلة ،جابت الرامين من لماارشي (لي معارفش الرامين هي ديك الشعرية بحال اندومي )طيباتهاا ودارت فيها لصوص حولات ترجعها كيف تشهاتهاا حاارة
كلات شويية وحاسة برااسها غير كدفع فلمااكلة بلا فائدة..بعدات عليها داكشي وكلسات كتقشر فالتفاح وديسير تعتق بييه الرووح
شوية جاتها لحالة على لحنة ناضت خلطات واحد زلافة بماء الورد ودخلاتت رقدات راسهاا بيهاا كتشم مساخياش تحيدها من لحمهاا لوقت طويل عاد طلقات لما عليهاا دارت جيل دوش وخرجاات
لبسات حوياجها دخلات ف فراشها حداها السقاطة كتفرج
تواصلات مع وديان باش تعرفها امتا جاية باش يجيو عندهاا حتى كتسمع لباب تحل
ناضت كطير لابسة غير بينوار على لحمها شافتو داخل وميكة فايدوو طارت عليهاا والفرحة فعينيهاا وقالت: لقيتييه لياا ههه
سد لباب وجاتو بحال التصرفيقة فعقلو فيقاتوو عض على فموو حييت نسااا وطارت من بالو حتى شافها داباا
ايمان(شافت فيه بدوك النظرات ديال الضعف) : واش ملقيتيهش
مقدرش يقوليها لا ويكدب عليهاا وقال: نسيت احبي والله حتى راسي مرفووع
ايمان: نسيتي !
حرك راسو باه بحزن وبقا فيه لحااال وحس بيهاا غيبقا فيها لحال ،حاول يقرب ليهاا وقال: غداا نجيبو لييك فينما كاان
حطات الصااشية وبعدات عليه وقالت: صاافي صافي مبقيتش بغيتوو
خلاتو ومشاات بقا واقف وسط الدار كيسووط حط سباطو ودخل غسل علييه وتانيب الضمير عدبو فهد اللحظة
دخل عندها البييت حتى كيتصدم من بكاائهاا قرب ليهاا وقال: ايماان ،ايماان
بصوت مخنزق جاوباتو عاطياه بالظهر كتشهق : اشنوو
حذيفة: سمحيلياا والله غداا تنجيبوو علاش كتبكيي دابااا
ايمان: صافي احذيفة غير سكت مخااصنييش مبغيتش هءهءه
حاول يسكتها يهدنها والو عقلها بغا يخرج بلبكاا وتنخصيص خاشية راسها تحت لمخدة مبغاش تشوفوو ومحملاتوش يقرب ليها فهاد اللحظة
فهاد اللحظة كيتعماو العينين مكتبقاش تفكر ليه الزويين كيحصر قدامها غير الخاايب وكتبقا ترسم ليه شي صورة خايبة فدمااغهاا باش تزييد تبكيي وتهرنن
حذيفة: انا خارج دابا نمشي نقلب علييه
هزات كتاافهاا لييه كتنخصص ندماااتو على الساعة لي نساا فيهاا هاد لوزة مشوية خرج مسخسخ لابس شورط وقبية واحد لكلاكيطة هاز الطموبييل كيدوور ف الشارع كيقلب ليهاا على هد لوزة وعينيه حمرييين باغي يطفا
كانت قرابة 12 ديال الليل كلشي سد وحتى لي مسادش حتى هوا قرب يسد ،يرجع عندها بلا وزة غدوز عليه ليلة كحلة ميحضروش فيها الملائكة
تفكر الفيرمة لي كيجيب منها الدجاج وقال نسولهم ربماا يقولو ليه شي فيرمة اخرى مختصة فهدشيي
دوز النمرة جاوبو واعتادر على الوقت فاش صونا هضرة تجبد هضرة حتى سولو بالاسبانية وقال: مكتعرفش شي حد كيبيع الاوز
_ ههه مبقاش مقنعك دجاجناا
حذيفة: ههه لا لاا الموضوع بعييييد على الخدمة
_غدا نسول لييك
حذيفة: غدا !! بغيتيني نبات فالزنقة انا بغيتها داباا
ضحك الرااجل وقال: ملي الموضوع فيه دار معرفتش شنو نقولييك (سكت شوية وقال) كاينين عندي شي 4 ولكن ديال ولادي كل واحد شاد وحدة وباغي يبعيها بالتمن ليي بغا هههه
حذيفة: بغيت غير وحدة لي بغاها نعطيها لييه غير عتقنيي
_ صبر شوية نتشاور معاهم ولكن مانظمنش لييك واش يبغييو
خلا التيليفون محلول كيتكلم مع ولادو بربعة بيهم كيسولهم شكون باغي يبييع ل وزة ديالو بالتمن لي بغاا
بقا حذيفة مكيسمع والوو وكيتسناا الرد حتى نطق لولد صغير وقال: انااا
_ غادي ندوزو ليك تفاااوض معاه ههه
الراجل واخد الامور ضحك معارفش بلي حذيفة فوضع صعب ميقدرش يدخل لدار الى محطهاش لييهاا هدشي معمرو ضرب ليه لحسااب يوليي كيتفاوض فالتمن مع دري عندو تمن سنين على وزة
واخيرا اقتاانع وبالتمن لي بغا واخة داك التمن ميستاهلش وزة ولكن لي باغاها تستاهل كتر
شد ديك السعات طريق لفيرمة لي جات خاارجة على المدينة بشي نص ساعة ديال طرييق
موصل غير بزز بلعياا هبط معاه لفلووس وشي حلويات حيت عارف عندو لوليداات تلقاوه عند الباب ومعاهم الاب كيضحك وقال: وضعك صعييب
حذيفة: بزااف
ضحك الراجل بضحكة كتعبر وقال: مزاال مشفتي والوو ،،، لوكااس جيب لوزة
(تقدم لولد وقال): والفلووس
جبد حذيفة لفلووس كيضحك ومعاهم الصاشية وقال: ياله عطيني لوزة
حرك راسوو ومشاا جابهاا لييه معنقها قدااموو ياله بغا يشدها حذيفة خافت وطلقات جنااحها حتى طااحت وغادية كتجري وكتعوااج تبعها دري وحذيفة حتى هواا دخلات وسط الربيع والشجر والظلام كلس على ركاابييه كيسووط وكيطل وكيضويو بتيليفون
_مولفة تخباا هنا صبر شوية دابا تخرج
بقاو كالسين بعاد على لبلاصة حتى بانت ليهم خارجة كضوي ب بياضهاا فداك الظلام الخفيف بداو كيتهامسوو ومشاا حذيفة بلهمس تابعها بشوية تشنق عليهاا من عنقها وهزهاا كتركل دور عليها ايدو وهي تسكت شد ليهاا منقارها صدعاتو
شكر السيد ولولد لي عطاها لييه ربطو ليها رجليهاا ودارها فلكوفر
طريق كلهم كيسمع باااق بااق فرعات لييه مخ راسوو
لوزة هاهياا و الرامين فين هياا
حذيفة: واك واك اسيدي ربيي
غادي فالطرييق كيفكر واش غيلقا شي حاجة حالة مزاال وكيفاش غيدير لهد ل وزة لي ورااه ،خاصها بزاف ديال الخدمة باش توجد وبزااف ديال لوقت باش طييب
ولسوء حظو لقاا كلشي سد بقا واقف كيشوف شنو يدير ملقا ميداار غيطلع لدار ويصبح ويفتح
سد لديك لوزة فمها وطلعها لدار دغيا مع حطها بغا يسد لباب غادية كتمييل بمشيتهاا وكتنقز هااربة تناضت لمشة مخلووعة وصوتهاا تسمع خلا ايمان تقفز من نعااسهاا بان ليها الضو فلكولوار شعل وناضت كتقاد بينوارها معرفات امتا نعساات
كمشات عينيهاا من الضوو حتى كيبان ليها حذيفة تابع لوزة وهياا جااية جيهتهاا تخلعات معرفات باش تبلاات
ايمان: حذيفة شنو داااكشي اويليي (سدات لباب عليها شوية حلات غير شوية كطل كضرب لوزة فلباب بمنقارهاا وصوتهاا كيتسمع تهزها حذيفة
داها لدووش وسد عليها الباب ديال الزااج تطلات عليه ايمان وقالت: شنو هادي وزة !
حذيفة(كيحيد فتيشورت) : موحمة عليها ومعارفااش شنو هياا
ايمان: وانا بغيت غير شويية جايب لياا وحدة نربيهاا
حذيفة: غدا نقادها لحبي كولي تيخرج لييك من ودنييك (جرها عندو ) غير ضحكيي لياا
هزات كتافها و قالت: وبقا فيا الحاال وليتي ناسينيي
حذيفة: سمحيي لياا (باسها فجبهتهاا ) درتها قد راسيي والله منويتهاا
ايمان: ومنين جبتيها !
ضحك وعاود ليهاا القصة وهوا كيغسل علييه طلات علييهاا مدات ليهاا لماا وقالت: جبتيها لياا عنداك غير نربي عليها لكبدة
حذيفة: ديال ولديي هادييك
ضحكات وقالت: ولكانت بنت هههه
حذيفة: وغير فسياق الهضرة وصافي
جوج عاد قدر يحط ظهرو يرتااح تكاات حدااه معنقهاا وقالت: غدا مغناكل والو حتى طيبها لياا وسير نساني قتلني بجوع
حذيفة(ضحك ): هادي والتووبة
تخشاات فييه كتشم ريحتتووو وقالت:مم ريحتك زويينة
ضحكاات فعنقوو كتبووس فييه وتقرص وتعوج علييه حتى طيرات منوو النعاس وناض ليهاا مناعس منااعس اللهم يتمتع بعدا
صبح صبااح خلاهاا منشوورة فبلاصتهاا مدوخة بالنعاس ناض دغياا دوش ومزال فيه النعااس كيشوف فديك لوزة كتمشي وتجيي باغة تخرج
غير صلى هزهاا تاني وخرج محد الدنيا خاوية ومشاا لعند لكزار تكلف لييه بيهاا عاد داها لدار غسلهاا وقطعهاا ورقدها فلحامض ولملحة وصايب ليهم فطوور والتيليفون فودنوو شادو بكتفوو متبع خدمتوو
حتى فاقت دايخة لبسات عليها بينوارهاا فلگرونة قصيير و الشعر مبوكلي بنعاس فلعسلي طايح على كتاافها مدرج
غسلات وجهها طلات على الدوش ملقاتهاش وخرجات لقاتو كيهضر فالتيليفون وكيحط فالطبلة مشات هزات كاس ديال لماا ودارت فييه شوية ديال نكهة لحامض باش تقدر تشربوو
بزز كدوزو كتحسو غير كيوصل لمعدتها كايتقل عليهاا
ايمان: واش ساليتي معاها هههه
حذيفة: غنبقا نلعب معاها ياله الالة تشهااي اش بغيتي بيهاا
ايمان(كلسات كتشرح ليه ): النص بغيتو مشوي والنص ممم نديرو ف رفيسة !
حذيفة: ههه واخة احبيي نديرو ايك بيه حتى لحرييرة ههههه
ضحكات وجات كلسات عندو وقالت: غدوز النهار معاياا ؟
حذيفة: سيي توحشتك
نشطااات ومشات كلسات فبلاصتهاا كتفطر حداه
من وراها هي جمعات الدنيا ودخلات لدوش دارت طقووس الحنة من جديد تشم وتقول ماشمييت من وراها دوشاات وخرجاات صلاة وجمعات بيتهاا وحذيفة فلكوزينة كيشحر ويرقد ويوجد ليها شنو بغاات جات كتعاونو والريحة شهاتها كتر مكرهاتش تاكلو دابا قبل ميطيب
خدا وقتوو فالطيااب شواه ليهاا فلفراان وكل مرة كيسقيها بلاصوص حتى طابت وطيب ليها الراميين بليصوص حط ليها الطبق كيف بغااتتوو تماما غير داقتو بغات تبكيي بلفرحة كتبنن وتنهد بحال الى عمرهاا كلاات النعمة
ايمان: لعشية نديرو رفيسة
حذيفة: نديييرو رفيسة ،امتا غتجي ودياان
ايمان: مم غداا جااية
دوزو النهار بجوج وختموها بخرجة لطبيعة دوزو فيهاا النهاار كل مرة يهضرو على موضوع الحمل متحمسيين لتجربة العائلة وخايفين من المسؤولية وصعوبتهاا ،كيلمس كرشها بايدوو وكيبووسهاا ومزال مامتيقش بلي بين احشااءها شي حاجة جامعاهم وتشارك د_مو مع د_مهاا نعمة من نعم الله زادهاا ليهمم حمدو الله وشكروه عليهاا
داز الاسبووع كيجري وصل الموعد مع وديان مشاو هاد لمرة بجوج كيف قالت ليها وديان دابا غيقدرو يسمعوو قلب لجنين حيت كمل شهرااين لوقت كتجري بسرعة
كالسة فغرفة لفحص وحذيفة جنبها كيعاونهاا عراات على كرشهاا وحلات السروال شوية
حذيفة: هاد السروال تزير علييك
ايمان: غلاضييت
حذيفة: عاادي احبيي الهرمونات كيتبدلو
دخلات وديان كضحك وقالت: عزيزي مستااعد تشوف لبيبي
حذيفة: على بركة الله ههه
شد فايد ايماان كيمسح عليهاا و ودياان كتحط لجيل على كرشهاا عينيه مرة فايمان مرة فالشاشة كيشوف وخة مفاهمين والو فداكشي كتبان ليهم الصوورة كحلة وديان مركزة تخلعاتهم
ايمان: واش كلشي بخير !
وديان: ههه مزياان مالك تخلعتيي
ايمان: كنشوفك سكتي كدخلي ليا الشك
وديان: لاا لا الموور مزيانة الحمد لله عندك تمنية اساابييع
حذيفة: يعني شهرااين داباا
وديان: اييه ،
ايمان: هههه متشوقة نعرف شنو عندي
وديان: عندك توينز
ايمان: هههه شنو(بلخلعة كلساات )شنوو قلتيي
حذيفة(حيد نظاظرو وقلبو كيضرب وقال) : واش تواام
وديان(ضحكات) : ههههه مالكم تخلعتوو
ايمان: وديان بلا طنز
وديان: اييه تواام ههه غتعطيوني واحد هههه رجعي تكاي ندير ليك لاپاراي تسمعي لقلب
حطات ايدها على فمهاا ودغياا الدمووع عمروو معرفاتش توصف احساسهاا تخشات فصدرو قريب ليهاا وعنقهاا
وديان: دابا واش فرحانة ولاا تخلعتيي
ايمان؛ هءهء معرفتش كلشي مخلط
حذيفة: صافيي متبكييش وصافي
مسح ليها دمووعهاا فرحاان وخايف ومخلوع وكلشي مخلط
رجع تكاهاا وهي مزال مامستوعبة اشنو كااين كان تخيلها فقط فجنين واحد صدق توام وهدشي خربق ليها الاحاسيس وخلعهاا
سمعو صوت دقات لقلب لي فور مدخلاات لعقل تسجلاات فالعقل الباطني مع اجمل الذكريات لي مرسخة فلبال ،شي حاجة لا تووصف احساس جديد تسلل لحياتهمم
طرف منهم كيكبر وكيتشكل على صيغة اطفال من صلبهم
مسح دموعهاا وباسها فجبهتها فلحظة لطيفة بيناتهمم خلات وديان تبسسم لمنظرهم
صوت القلب كيضرب بدورهاا حرك فيها احساس الامومة ونطقات بينها وبين نفسهاا : واش مجاش الوقت حتى انا نجرب ؟
ولكن واش اناا لقيت الشخص المنااسب لي نعيش معاه هاد اللحظة ؟
بقاو لدقاائق بين دقات القلب سجلهم عندوو وهدنهاا حيدات وديان لاپارااي مسحات ليها كرشهاا وخرجو لبيروو مزال مصدوومة خرجات ليها تحاليل وادوية والرااحة
خرجات من تماا مشووكية ولكن حذيفة كان غيطير بلفرحة بلاصة فرحة جوج فرحاات
حذيفة: المهيم خلي هدشي بيناتناا وصاافي
ايمان: ههه خايف من العيين
حذيفة: العين حق الالة حبيي ، هدا رزق عطاه لينا الله خليه مستوور حتى يتزادو على خير
ايمان: ففف شداتني لخلعة داباا (تلفات)كلشي تخلط علياا
شد ايدهاا وقال: الحمد لله لي جاك هدشي مع نهاية العام ساليتي قرايتك كلسي رتااحيي حتى تولدي على خير انا غنتاصل ب مليكة تجي تونسك ان شاء الله وتعاونك فالدار باش ماتبقاايش بوحدك (بحب) وانا معااك وخة تقل كلو علييك ولكن نطلع ليك المعنويات هههه
ايمان(تنهدات )كون غير جات مي لطيفة عندي
حذيفة: خلي حتى تقرب لولادة
ايمان: سكت سكت متفكرنيييش فف
حذيفة(ضحك كيدوز ايدو على كرشها)يكما باغة تجمديهم ههههه
ايمان: منين غنولدهم غنتقطع كليي اويلي
حذيفة: هههههه يا هاد لبنت نعلي الشيطان متخليش لوسواس يلعب علييك ربي كيفما دارهم فكرشك داير ليهم نهار باش يخرجوو ان شاء الله يعطيك الله وقفة سااهلة وربي مغاديش يخلييك سمعتيني !
حركات راسهاا بااه وقالت: ان شاء الله نشووفهم ونفرح بيهم انا ويااك
حذيفة: ان شااء الله يارب الله يجيبهم بصورة كاملة ويجعلهم ذرية صالحة
ايمان: اميين يارب (تبسمات بهدوء) مي مسكينة كانت غتفراااح كون عرفات عندي توام ههه الله ارحمها(مسح ليها ديك دمعة )
حذيفة: الله ارحمهاا اناا فيا كلشيي احبيي دعاويهاا معااك وماتت راضية علييك هدشي كافييك وموفييك فحياتك
حركات راسها بااه كتمسح فعينيهاا ،ديماا وفاي وقت تفكراتها ولا بد عينيهاا يقطرو بدمووع ،لا السنين الطويلة لي دازت ولا الطبيب قدرو يبردو شوقهاا ليهاا
نشات على عينيهاا وضحكات فرحات بشنو عطاها الله
عاد مزاد فشوشهاا و وحمهاا ولا بزز منو كيبقا معاهاا كيطل فالريستو ويرجع كيسبق كيخلي ليهم الامور مزيانة ويرجع عندهاا حتى جات مليكة وتكللفات ب الداار ولات كتمشي معاه لريستو وتكلس فبلاصتهاا المعهودة كتشوف لي غادي ولي جااي وكتقرا اونلاين شي لغة
بداو كيجيوها اعماال وكترجعهم الا القليل لي كتشد وبعدات نسبيا على انسطاغرام الى مرة مرة وشي مرات كتحط ايات قرانية او ڤيديو ليهاا كدير شي اكلة فالداار ، توري شي برودوي
والباقيي محتافظة بيه ليهاا مبقاتش نهائيا اكتيف قليل
ولوقت كيدووز وشهر ورا شهر كيدووز بدات كتقل وبداا لكرش كتباان شادة ليها من جنااب ماشي طويلة وخارجة وخة توام مكانتش كرشها خارجة برا كانت كروية كاظل دهن وترطب باش لحمها مايتشرطش ، كانت واخدة الحمل بايجابية وغير عرفات بلي حاملة بتواام ولاا الخوف لااعب عليهاا غير كتفكر لولادة كتبوورش وتخااف
وشهر على شهر بدات كتعود على وجوود روحين ف جسمهاا فوقت فراغها كتكلس تقرا لقراان وتونس بكريشتهاا تصور
بغات تفرح براسهاا ودارت شوتينݣ شخصي بلكريشة بكسوة حمرااء وسط الطبيعة مع حذيفة بزز منوو
الحمل باان على وجهها وحتى نفسهاا وخة معلناتش عليها فانسطاا كلشي لاحظها من الوزن الزائد ومن الشحوب لي ولا فوجهها من العيااء وتقل
ودخل شهرها الساابع وكرشها باانت وحتى النعاس مبقات كتعرف تنعس كي النااس بالحركة ف كرشها ونفسها لي مكتقدرش طلعها مزيان ،كانت كتسناا ف لطيفة تجي باش دير حنة سبع شهور ونييت تعرف شنو عندهاا
كتوجد مع النكافة لي نكفاتهاا فلعيد باش تاخد لبرزة ديال الحنة ختارت موديل ل تكشيطة مع اكسسوارات ذهبية عشقها للحناء مبغاش يسالي وخة لوحم سالا مزال فينما رشقات ليها تمشي طل على لبواطة ديال لحنة وخة تبقا غير تشم بلا مديرهاا
كالسة فبلاصتهاا بكسوة صيفية بيضااء بوزن زاائد عاطيهاا جماال خااص بخدود طالعين وشعر اشقر بشرة بيضاء خالية من لماكياج وعينيها الزوورق المميزيين صدر عمر. ولكرش بااينة ،كالس معاها فالطموبيل كيدوز ايدو على كرشهاا وكيتحسس الحركة لي عندهاا فكرشها عادة جديدة كيونسو راسهم بيهاا
ايمان: هههه احح (هزات ايدو لجنب ) حسيتي بيه معرفت دابا شكون كيركل
حذيفة: منوضيين لحر_ب قبل ميخرجوو
ايمان: خاصني ناخد واحد السمطة كتعاون
حذيفة: سيي عرفتههاا غتعاونك باش تهز ليك كرشك شوية
ايمان: تقلت وليت كنتحرك غير بزز
حذيفة: كون سعفتيني كون بقيتي فداار حتى نجي
ايمان: لااا غير خليني معااك شوية يضربني لبرد ديال لبحر
ضار حل عليها لباب وعاونهاا
هبطات كتقاد فلكسوة لي طويلة ولابسة معاها سبرديلة بيضاء
هازة صاكها وهوا هاز ليها لبيسي ديالهاا طلعها لطيراس فين داير واحد لفوطوي وداير ليها لپاراصول كيعجبها ريحة لبحر والريح لي كضرب مع كان شهر تسعود لجو مشمش على الجهد كلساات وبقا مدة كالس معاهاا ونااض مرة يجي مرة يمشيي وهي مونسة ب لحركات فكرشهاا وبقرايتها واللغة الجديدة لي كتقراا وكتاخد معلومات باش دير لبراند ديالها
ومراد كياخد ليها معلومات من الناس المختصة وشكون يبغي يعطيها فرصة ويعاونهاا
حتى كيفاجئها مراد وكيقوليها بليي ‘dior” بغات تعاونهاا فمشروعهاا ب خمسطاش فلمية بالربح
كلسات هي وحذيفة كيتشاورو واجلات الموضوع حتى تولد وترتااح وتجدد نفسها عاد يبان ليها شنو كااين
بعد ساعة وهيا كالسة طلع عندها حذيفة جايب ليهاا غداهاا وكلس معااها هي كتهضر وهوا سااهيي وخة متبع معاهاا
قرب جيهتها وقال: ايمان
ايمان: وي حبيبي ،مالك !
جبد من جيبو واحد الصورة مدها ليهاا غير شداتها تبسماات وقالت: هادي ميمتي الله يرحمهاا
حذيفة: ولبنية الصغيرة !
ايمان(بابتسامة دوزات ايدها على داك الوجه الطفولي فالصورة وقالت بهدوء) :هادي نور (سكتات شوية كتنهد ) ختي (هزات راسها فيه ) هاد التصويرة كانت فلالبوم عندي علاش هزيتيها
حذيفة(قرب جيهتهاا ): عارفاني كنوصل لحوايجك
ايمان:ههه عادي انا كنبقشش لييك فحوايجك
ضحك وقال: وملي نسولك على الحاجة تقولي مشفتهاااش
ضحكاات وقالت: اوى ملي مهزيتيهاش منين جاتك !
حذيفة(شاف فالدنيا حداه كانت لوقت مزال خااوية لفووق مع وقت الظهيرة لتحت لي عامر شافيها وقال): جابتها واحد لبنت
ايمان(حولات بتسامتها ل استغراب) : بنت ! شكوون ؟
مد ايدو لصورة حطها على نور وقال: ختك (شافها سكتاات وهبط راسو باسها فايدها ) تبغي تشوفي ختك ؟
تقادات فلكلسة مركزة معاه وقالت: واش نور كاينة هناا ،كيفاش ؟ شكون جابهاا
*
كان واقف فلكوزينة لداخل كيشوف الشغل كيفاش غاادي وكيوري لشي حد شي حاجة الى رونهاا كان واحد الطباخ جديد واقف تماا كيورييه شنوو يدير حتى كيجي السربااي يعيطلييه
خرج كيمسح فايدوو لحدا السنااك كيلقا شاابة صغيرة لابسة شورط دجين وتيشورت بشعر قصير دايرة كرطابل كحلة فظهرهاا
كمش عينو كيشوف فيهاا حتى قرب ليهاا قبل مينطق بالاسبانية نطقات هي بلعربية وقالت: السلاام
حذيفة(بابتسامة): وعليكم السلاام ، سولتي علياا ؟
هزات عينيها فييه كتبتااسم وقالت: ااه يااك نتا حذيفة
حذيفة: اييه هوا اناا
نور(مدات ايدهاا ليه ): انا نوور
حط ايدو على صدروو وجمعات ايدهاا وقال: سمحيليا
نور(رجعات شعرها اللور كضحك ) : ماشي مشكييل (جبدات تصويرة مداتهاا لييه
شدهاا و تلغات ابتسامتو ملي شاف الصوورة حيت شايفها عند ايماان ..هز عينو فنوور ودارت لييه طن ملي تفكر السمية
نور( تكلمات بلفرنسية ) : كانظن عرفتيني ياك ؟
حرك راسوو بااه كيمسح على لحيتوو وقال: خت ايماان
نور: ويي ،واش (برجفة) واش نقدر نشووفها(طاحو دموعهاا ) توحشتهاا
بقا ساكت كيشووف فالصوورة وتنهد وقال: ا اجي كلسي بعدا شوية ونرجع عندك
مسحات دموعها حركات راسها باه تبعااتو حتى دخلها لداخل ربت ليها على لكرسيي كلساات خلاها تما وطلع
**
حذيفة: تبغي تشووفيهاا
ايمان: شكون جابهاا
حذيفة: معرفتش كانت بوحدهاا
حركات راسهاا بااه بغات تنوض وحبسها: غير خلييك غطلع عندك
ناض خلاهاا كترجف خلاتهاا صغيررة فعمر 8 سنين دابا دازت عشر سنين على فراقهمم عمر طويل مكيجمعو غير لفم داباا راهاا رااشدة وشاابة
فهاد لعمر نييت فين لقات ايمان راسها بوحدهاا لا حنين لا رحييم و يتيمة الحييين
محنيية كتشووف فالارضية وقلبهاا كيضرب حسات بالسخفة
سمعات الحس وهزات عينيها محسات براسهاا توقفاات كتشوف قبالتهاا نور كتمسح دموعها مخلاتش ايمان تركز فيها وفتفاصيلها حتى مشات كتجري ترمات فحضنهاا كتبكي ،خلاتهاا مصدوومة وحذيفة واقف فلباب مربع ايديه كيشوف حتى بانت ليه ايماان دورات ايدها على نوور
كتبكيي معااهاا كتعنق وتبووس فييهاا وكتفكر دوك الدكريات لقلال لي عندها معاهاا كانت كتجنبهاا ولكن نور كانت كتحماق على ايماان تنعس حداها تلعب معاهاا
بعدات نور كتشهق وقالت: ايمان ختيي
مسحات ايماان عينيهاا ورجعات عنقاتهاا وقالت: حبيبة دياليي
كلساات وكلساتها حداها فوق لفوطوي مشابكيين ايدهم كتمسح ليها دموعهاا وقالت: كبرتيي
نور: حتى نتي تبدلتيي بزااف ههه (دوزات ايدها على كرشهاا ) قربتي تول ماما من سطورياتك كنت حااسة
تبسماات ايماان كتنهد وكتشوف فملامح نور ،نسخة مصغرة على نورة
ايمان: باش عرفتيني كاينة هناا
نور: سطورياتك هه متبعاك من شحال هادي ولكن مزعمتش نهضر معااك
ايمان: علااش كنخلع
نور: بسبابي وقعو ليك بزاف ديال المشاكيل مع ماما و
ايمان(قاطعاتها) : نتي معندك حتى دخل فهدشي ،وعلاش لي معمرك تواصلتيي معاهاا؟
نور(حركات راسهاا بلا): مبغيتش
ايمان: مخلاكش باباك
نور: فاللول ولكن ملي بديت كنكبر مبغيتش نهضر فهمت بزااف ديال لحوايج ،بجوج بيهم دارو شي حاجات مخاصهمش يكونو ،كيفاش انا لي غير سمعت وضرونيي شنو غيكون نتي لي عشتيهم
ايمان: نتي معليك والوو ومشاكيلي بعاد علييك ،فين كنتي
نور: كندا
ايمان: جيتي بوحدك هناا
حركات راسها بلاا وقالت: تواصلت مع خالي اميين هوا لي جابني لقيتو حاط باج فانسطا بسميتوو
ايمان: مزياان
نور: قاليا بليي جا عندك وجريتي علييه
تبسمات بهدوء وقالت: ملي وليت كنفكر بلوعيي فهمت بلي اميين مدار ليا والو علاش نكرهوو ولا نحقد علييه ،اي واحد فبلاصتو غيدير نفس الحاجة هوا مااشي مسؤول علياا بااش يحضنيي
نور: ولكن هوا بقا فيه الحال بزااف
ايمان: عاودي ليا علييك نتيي كملتي قرايتك !
نور: اه شديت لباك دياليي هاد لعام
ايمان: مبروك عليييك شنو غادي تبعيي !
نور(هبطات راسها ) : مزال معرفتش خاصني بعدا نستااقر مبقيتش بغيت نعيش مع باباا
ابمان: علاش ؟
نور: تزوج بواحد النصرانية ولد معاها وكلشي (تنهدات ) مبقاش كيف كاان ،كيضارب هوا ومرتو بزااف شي نهار يقت_لو بعضياتهم وداباا راه فلحبس حيت ضربهاا تحكم ب 6شهر
كتسمع بصدمة وقالت: يكما كيضربك حتى نتيي !
حركات راسها بلاا وقالت: ماما فلحبس وبابا فلحبس ومرتوو هزات ولدها ومشات لدارهم خلاتني بووحدي فديك الدار (كيقطرو عينيها بالدموع )
جراتها ايمان عندها بصدمة عنقااتهاا ونور كتبكيي وايمان سااكتة وقالت: سمحيليا لكنت انا السباب
نور: هءهء هوما السبب فكلشيي
ايمان: نتي ماشي بوحدك عندك اناا احبيبتي ومعمري نخلييك مزال (مسحات ليها دموعهاا )سمعتيني
نور: اناا جيت غير نشوفك مبغيتش نتقل علييك ، خالي قالي بلي غيشوف ليا شي ابارطمون حداه وغنقراا ونخدم ،انا مبقيت باغة نعرف تحاجة على دوك النااس بجوج بيهم كداابين وكيبغيو غير راسهم
ايمان: وعائلة باباك شنو كتقول فهدشي
نور: لميمة وبا سيدي طلبو مني باش نرجع نعيش معاهم ولكن مبغيتش نرجع لمغرب مزاال ،مساكن ملي قلت ليهم غنمشي نشوف ايمان فرحوو وقالو ليا نسلم علييك
ايمان: يسلم عليهم الخير
نور(مسحات عينيهاا) : با سيدي غيتكلف لييا بقرايتيي حتى نخدم هدشي كافينيي ولكن بغيت نبقا بعيدة على كلشي مبغيتش نتقل على تواحد انا كبرت وقادة برااسي
ايمان: نفس الهضرة كنت كنقول ،ولقيت راسي ضعييفة قدام المشاكيل حيت عوض نحل ديك العقدة لي عندي لداخل كنت كنهرب من هدشيي حتى تراكم عندي لدااخل وهلكني ومرضنيي ،مبغيتكش ديري هدشي لي درت ،نتي ماشي فبلاصتيي ؤك نتي عندك جداك وجدك وعمك كيحمااقو علييك ،منحقك تعيشيي بوحدك ولكن متخليش راسك بوحدك حيت غيجي واحد لوقت غتبغي معااك ناس كيبغييوك ،غتخسي براسك بوحدك وهاد الاحساس كيمرض وكيق_تل لفرحة من لدااخل كتعيشي غربة بوحدك (بحنيية )سمعتيني (ضحكات بعينين مغرغرين وقالت) شوفي راه واخة نورة مكتحملنييش وكتلومني على اي حااجة وقعات ليها ومخلات مدارت باش تكرهني فحياتي وفعلا وصلات ليها واحد لوقت ،منقدرش نكر بليي كتبغييك بزااف وبليي قلباات علييك ليل ونهار حتى من مختفون حطاتك فييه حيت حاسباك نتي البنت الوحيدة عندهاا
نور: ولكن علاش تنكرك علااش ، هدشي متقدرش ديرو شي ام واخة معرفت شنو يقدر يوقع ميمكنش ، ميمكنش شي ام تنكر بنتهها وتكدب غير باش هيا تعيش وتزوج وتهنا من المسؤولية لي عليهاا
ايمان: نور كبراات ولات كتفهم ههه جاك الشعر قصير زوين هه
نور: عاد قطعتو كان طويل ،واش قربتيي تولديي يمكن
ايمان(تكات بظهرها على لفوطوي كضحك): جاتك كرشي كبيرة ههه راه ياله عندي سبع شهور
نور: نحط ايديي !
ايمان: حطيهاا
حطاتها بشوية على كريشتهاا وقالت: عرفتي شنو عندك !
ايمان: مزااال صاحبتيي مبغاتش تقول
نور: وينو غنولي طاطا ياك هههه ،جات معاك لكريشة شنو غتسمي هههه
ايمان: عندي توام ومزال حتى نعرف اش عندي بعدا ههه
نور: واااو هههههه داكشي باش كريشة كبيرة ههههه ان شاء الله تولديهم زوينين بحالك عقلتي نهار كنت كنقولييك عطيني عينيك هه
ايمان : ههه عقااالت
هزات لكارطابل ديالها وقالت: جبت معايا واحد لحاجة كانت كتعجبك
بقات ايمان ساكتة حاطة ايدها على كرسهاا كتقاد بزز فكلستهاا تجبدات نور نونوسها لبيض وقالت: عقلتي علييه
شداتو من عندهاا كضحك وقالت: عقلت علييه
نور: كان كيعجبك بزااف ،جبتو لييك
ايمان: هههه شنو غادي ندير بيه داباا صافي كبرناا
نور: خلييه لي بيبي ديالك ههه
شداتو من عندها كتشوف فييه وكتبسم وقالت: اول كادو من خالتهم
نور: ههه
ايمان: تمشي معايا لداار
نور: خالي اميين كيتسناني لتحت وقالياا الى وافقاات تهضر معاياا
ايمان: انا سولتك نتيي ،واش تبغي تبقاي معايا
نور: وراجلك ؟
ايمان: مالو راجليي ههه
نور: منقدرش
ايمام: نشوف لييك شي دار حداياا !
حركات راسها بابتساامة وقالت: الى هكا اه
ايمان: بغيتي تعيشي بوحدك ؤك ولكن نتي ماشي بوحدك من اليوم انا فجنبك ومعااك وفظهرك وقت لي حتاجيتيني تلقايني معاك فكل خطوة فحياتك
نور: كنبغيك بزااف
عنقاتهاا وقالت: ولكن داباا غتبقااي معاياا حتى نشوف ليك دار تنااسبك وقريبة لياا صافي
حركات راسها باه فرحاانة كتمسح دموعهاا وقفات بزز منهاا كتجمع فاشياائهاا وهبطات شادة فيهاا
هابطة درجة بدرجة تهبطات بان ليها حذيفة وتبسمات ليه جا عنددهم وقال: خارجيين
ايمان: غنمشييو لداار ومن بعد غنمشي عند وديان عارضة عليا لدار
حذيفة: بلاتي نوصلك (عطاها الساروت )سبقوني
خرجو براا لطموبيل كتسنا غير امتا تكلس حيت رجليها ولاو كيضروها بتقل حتى كتسمع سميتها من اللور دورات راسها كيبان ليهاا اميين تنهداات كتشوفييه
حسات بداك الحقد لي كانت هازة من جيهتو تبخر وحناات وعينيها دمعو معرفاتش واش العاطفة ديال الحمل اترات عليها ولا فعلاا سامحااتو حيت كيفما كان لحال مصرفش فيه الشر بحال عبد الله ونورة
معرف يقرب ليهاا ولا يبعد وحذيفة جاي وراه بشوية كيشووف
امين: ايمان
ايمان (زمات فمهاا باش متبكييش ): لاش جااي لااش حتى كنبغي نسااكم وكترجعو لياا تاانيي ؟
قرب جيهتها ملي لمس رجفة صوتهاا شدها من وجهها باسها من جبهتهاا كيردد الاعتداار شافها هادئة وعنقهاا كيبكيي وقال: سمحيلياا على كلشي ا ايماان ،سمحيلياا باش ميي متبقاش غضبانة علياا حتى فلحلم
غمضات عينيها وطاحو دموعهاا على كتفوو هزات ايدها دوراهاا علييه وزاد زير عليهاا وقال: توحشتك ،توحشتك بزااف سمحيلياا ا ايماان واعدتك مليون مرة وموفيتش ،واعدت ميي باش نرد ليك لبال الى غابت وموفيييتش
ايمان: المسامح كرييم ،ربي غفور رحييم
**
كان ياله فات العيد الكبير بشي يومااين كالسة كتشوف فشرجم الشتاا كطييح لابسة كسيوة بيتيية وكتمسح على كرشها لي كانت عاد بدات كتباان وبدات كتحس بالحركة
حتى صونا تيليفونها من رقم لطيفة من لواتسااب جاوبات بابتسامتهاا وضحييكة وقال: ميي لبااس
لطيفة: لبااس ايليي كيدايرة بديتي كتقلي ههههه
ايمان: ههه(دوزات ايدها على كرشها ) شوية ضروري ههه
لطيفة: ها هااك ها بااك الحااج
ايمان(بهمس): قلتيها لييك
ليطفة: ايه اييه هاكي هاهواا
شداتوو وطلعاتها تزنيكة حتى جاها صوتو وقال: السلام علييكم بنتي لبااس
ايمان: لباس ابا الحمد لله نتا لباس صحيحتك
الحاج: اللهم لك الحمد ابنتيي ،كيدايرة امورك
ايمان: بخيير هاحناا
الحاج: الحمد لله الحمد لله ، كنت بغيت نهضر معاك شي سيمانة هادي ولكن مع العيد تشغلناا
خدات كرسي وكلساات وقالت: اييه
الحاج: حم داباا نتي ماشاء الله تبارك الله غتولي ام ،الله يجيبو بصحة جيدة ان شاء الله بصورة مكمولة
ايمان(بابتسامة ): اميين يارب
الحاج: اناا مبغيتكش يبقا فقلبك الحقد الكره من طرف دوك النااس (ماسمع حتى جواب وكمل ) سمعيني ابنتيي ،راه ربي وصى على التسامح وربي بجلالته غفور رحييم ،شكون حنا فخلق الله ليي نعصاوه ،اناا عارف ع..عارف مزيان بليي ادااوك وضرووك وقهرووك ولكن كوني نتيي حسن منهم
ايمان: انا مباغة تواحد فيهم فحياتي اباا
الحاج: ولو انا مقلتش لييك ترجع لمياه لمجاريهاا ، انا قلت صفي قلبك وخااطرك ،دابا نتيي واحلة فروحك مبغيتكش تبقاي هازة داك السم فقلبك غير سااامحيي غترتااحيي كيفما كان لحال هادوك راه بااك ومك
باك ناادم اشد الندم وباغي غير يتواصل معااك نتي قطعتي علييه حذيفة قطع عليه ،واش هكا غادية الدنياا راه ربيي كيغفر معااصي فين يبااااان هدشي !
ربما السمااحة غتبردك من جيهتهم ،الى كانو هوما خايبيين كوني نتيي حسن منهم ومرتبتك عالية عند الله
مسحات دمووعهاا وقالت: وخة نسامح اباا راه منقدرش نرجع بخير معااهم راه ضروني بزااااف بزااف فوقما كتصور
الحاج: ربما واحد النهار تلاقاو صدفة متكونوش عديان نسااي وسامحي ورمي علييك داك السم ليي كبر من جيهتهم اشنو قديتي بيه من غير مرضك وهلكك ،بغيتي حتى ولدك يتربا فييه ؟ الوقت و الزمان هداا حنا كنطلبو الله غير فالذرية الصاالحة تكون متااعناا فالدنياا ،عفا بنتيي ديري بكلاامي وعفى الله عما سلف ويخلف ليك ربي فذريتك ان شاء الله يجعلهم مرضيين مهدييين باريين بييكم
ايمان: الله يساامح الى ربي سامحهم اناا مساامحاهم
الحاج: الله اكبرك بعقلك ابنتيي
سمااحتهاا نظفات قلبها وخلاتها ترتااح هي عارفة بليي معمرها غترجع تشوفهم مزاال ولكن كيف قال ليها الحاج نظفي قلبك باش نتي ترتااحي
لقات بليي اميين ف لمرتبة الاخيرة فالضرر مهانهااش ،مخرج ليها كلام العييب ،مأداهاش ،هوا فقط مبغاش يهز مسؤولية شخص تااني علاش غتبقاا حاقدة علييه وكرهااه موضوع الدار هي متاكدة بلي عبد الله من وراه
ضارت بيها الدنيا ودنيهاا كيصفروو خواو رجليهاا وترخات تشدها اميين مزير عليهاا
جا حذيفة كيجريي شدهاا وهي عينيهاا تقلبوو كيعييط بالجهد على شي حد يجيب ليه لماا جاي ناصر كيجري جاب ليه قرعة
هزها لطموبيل كيرش عليهاا وكيضرب فحناكها بشوية
حذيفة: ايماان ،ايماان
حركات راسهاا كتنهج حاسة بلفشلة فصحتها ولارض كدور بيهاا
نور: ايمااان واش نتي بخير
حركات راسهاا بااه كيعطيها حذيفة تشرب وسااكت وامين وراه كيتنهد
ايمان: بخيير ،بخير ففف احم
بقاو واقفيين وهي گالسة فالطموبيل وحذيفة كالس قفازية حداهاا شاد فايدها حتى رتااحت وتهدنات ورجعات فيها الروح
مسحات ليها نور وجهها من لماا وتبسمات وقالت: شوية
تبسمات ليهاا وقالت: الحمد لله
وقف حذيفة وقال: ياله نديك لدار ترتاحي
تحنا اميين شد ايدها وحذيفة كيشووف باس ايدها ولاخير كيخنزر متكي على لباب كيشوف فييه غير الظلمة ومباغيش يدوي
امين: صفات بيناتنا لخاطر
حركات راسهاا بااه وتبسم ليهاا وقال: نتي ونور امانة عندي من ميي وعمري مزال نفرط فييكم ،انا هادي 3 شهر باش استاقريت هناا وخدمت فواحد السبيطار، باب داري مفتوحة لييك فاي وقت ،واش نقدر ناخد نمرتك
حركات راسها بااه ركبات ليه النمرة وصوناا حتى سمع تيليفونهاا وقال: تهلااي فرااسك ؤك
شافت فنوور وقالت: ياله معاياا
نور: حوايجي و
امين: سيري مع ختك من بعد ونجيبهم لييك تهلاو فبعضياتكم ومتفرطوش فلخاوة كيف فرطنا فيهاا حناا
حركات راسها باه وركباات اللور ،وقف اميين وشاف ف حذيفة وقال: سمحليناا
سد لباب على ايماان وتقابل مع امين وقال: لكنتي غتباان هاد النهار وتغبر تااني مكايين لاش براكة لي فيها كافيهاا
اميين: انا ماقلبت عليها الا وباغيي نصلح الغلط
حذيفة: وخة ،الله يعاونك
مشا وخلاه واقف كيشوف فايمان من ورا الزاج وتبسم ليهم في حين حذيفة دغياا ديمارا وزاد مخليه واقف
حاطة ايمان قدامها داك النونوس كتقيس فييه ودورات رااسها لجيهة نور لي تبسمات ليهاا وداعبات كتفهاا بفرحة
وصلهم لدار وهبطو مهضروش بجوج حدو قاليهاا رتااحي وهبطوو
طلعو لداار كيضحكو لقاو مليكة مصاايبة لغدا وكالسة كاتهضر فالتيليفون غير شافتهم قطعاات
مليكة: ياله بغيت نصوني لييك (شافت فنور) السلاام
نور: السلاام
ايمان:مليكة هادي نور (شافت فنور)ختيي
مليكة (تبسمات): تبارك الله لباس ابنتي بخير
سلمات عليهاا ودخلوو لصالوون وقالت: ارتااحيي احبيبة
نور: دارك زويينة
ضحكات ايمان حتى كيصوني تيليفونهاا وجاوبات: نعاام
حذيفة: هبطيي عنديي
ايمان: واخة (قطعات ) نسيت لبيسي ديالي فالطموبيل انهبط نجيبو ملييكة عمري شي كويس ديال اتاااي من داكشي
مليكة: باش يجيي حذيفة يغوت علييا ياك تمنع عليك ؟
ايمان: غير نص غير نص
ضحكات نور ونااضت لديك المشة كتلعب معاها وكضحك وايمان هبطاات عندوو لطموبيل لقاتو باقي فبلاصتوو ركباات كتسووط وقالت: نعام !
حذيفة: شوية !
ايمان: ااه بخير ،غتكلس معاياا نور شي ايام بينما لقيت ليها شي دار حداياا
حذيفة: ودااك خيناا ؟ ولخرا الى عرفاات
ايمان: مكيهمني حتى واحد فييهم لبنت ماشي قاصر راه عندها 18 لسنة واناا ملي رجعات لياا مغنفرطش فيهاا ،بغيتي نفرط فختي احذيفة
حذيفة: لاا حاشا انا غير مبغيتش توحلي فلمشااكيل
ايمان: معندي فاش نوحل متشغلش باالك
حذيفة: انا معنديش مشكييل تبقاا معاك باقة صغيرة علاش غتسكن بوحدهاا !
ايمان: رااحتهاا فين غتلقاها حاليا هاهيا معاياا، اه نسييت باها مشدود قالت ليا محكوم بشي ست شهور ضارب مع مراتو
حذيفة:دار فيه ربي خير مبانش قداامي
ايمان:باركة من الهدرة
حذيفة: ماعلينا ، هاد امين عاد بنتي لييه ولا يبوس ويعنق ؟
ايمان: راه كيفما كان لحال خاليي واش تسطييتي غرتي منو (شدها الضحك) واش هترتيي لا هههههه
حذيفة: دابا هترت اش فيهاا يسلم كيف النااس ضروري يبووس لييك ليديين والرااس ومعرت اش
ايمان: مبرزطنيي سامحي ساامحي سامحي نهار ساامحت غرتيي هههه
حذيفة: ولفتك ليا بووحدي
ايمان: على هاد لحساب حتى ولادي مغاديش نبووسهم
ضحك وباس كرشها وقال: لولدتي ليا بنت هانية هاد صاحبتك مبغاتش تقول ليناا اش عندك !
ايمان: منعرف هههه ااه غنعيط على وديان تجي فلعشية عندي
حذيفة: صافي تلاحييت لتوش تاانيي
هبطات كضحك خلاتو كيتحلف فيهاا هزات لبيسي وطلعات كتهدر مع وديان وكتعاود ليها ودارت معاها تسالي خدمتها وتجيي
دخلات لداار حطات لبيسي عيطات على نور داتها لبييت وقالت : تبدلي عليك باش ترتااحي
نور: هنا فين كتصوري يااك ههه
ضحكات ومدات ليها بيجامة مزال جديدة ملبستهاش حيت غلاضت وقالت: هوا هدا
ايمان: نمشي نتوضا ونصلي ونجي عندك خودي راحتك الدار دارك
حركات راسها هزات كندورة صيفيية ومشات لدووش توضاات وبدلات عليهاا من بعدما دهنات كرشها كتنهج اقل مجهود ولات كتسخف
مشات لبيتها صلات بزز مبقاتش كتقدر تسجد وخة تشاورات مع حذيفة والحاج وطلبو منها تصليي على كرسي او تصلي كالسة معطاتهاش خاطرهاا كتبغي تسجد لله وتخشع وخة كتعدب
مسالات حتى عرقاات ناضت كتجر فرجليها خرجات عند نور لقاتها كالسة هازة تصويرة فكادر ديال ايمان و نعيمة فلبحر ديال المحمدية نفس الصورة لي صورهم طارق
ايمان: باقة عاقلة على مي
هزات راسهاا ف ايمان ورجعات لصورة وقالت: كانت حنينة بزااف الله ارحمهاا وخة لميمة زكية حتى هي ظريفة وكتبغيني ولكن ميمة نعيمة كانت فشكل ،توحشتهاا مكبرتش معااهاا (شافت فيهاا)كانت حنينة معاك يااك
حركات رااسهاا بااه مبغاش تبكي وقالت: ملييكة فينك
حطات ليهم الصينية وحليواات وقالت: لغدا كيطييب
ايمان: لعشية غتحي عندي ودياان املييكة تقدري قبل متمشي توجدي ليا شي حاجة
مليكة: على راس والعيين احبيبتيي
ايمان: شكرا كلسي تشربي اتااي
مليكة: غير بالصحة نكمل لهضرة مع ميي (تنهدات )داك لبرهووش غير لقاها مرا كبيرة ولا كيدير لي بغاا
ايمان: غير صبريي ا ملييكة راني قلتها لحذيفة غيشوف كيفاش يسيفط لييه ويجيبو خاصو غير يشد ديبلوم ديالوو
مليكة: الله اهدييه ياربيي انا جاية
مشات لبالكون خلاتهم بجوج مدات ليهاا ايمان اتااي وكتعطيها بفرحة وسرور وقالت: ونتي كيفاش جيتي هناا
ايمان: انا ههه قصة طويييلة احبيبتيي
نور: كيفاش تلاقيتي مع حذيفة
ايمان: شفتي ديك الصورة لي فايدك ! شوفي التاريخ لي فيها هداك هوا اول مرة نشوفو فييهاا
بقات كتعاود لييهاا ودااتهم لهضرة ونور كتسمع وفرحانة بختهاا والاخيرة حتى هي كتعاود ليهاا حياتهاا وشنو داز فيهاا
حتى دخل حذيفة وحطات مليكة لغدا تغدا ومشاا يتكا شوية خلات نور ناعسة فالصالون ومشات عندوو تكات حدااه
ايمان: امتا غتجي مي
حذيفة: قاليك الالة لبغيتيها اجي ديهاا
ايمان: وغتمشي ؟
حذيفة: اوى شنوو غادي ندير ضروري نمشي نجييها ولواليدة متقدرش بوحدها فالطيارة
ايمان: اوى غتجيب ليا معاك شي حوايج من المغرب
حذيفة: لا لاا متعوليش الطيارة لي جابتني اتردنيي
ايمان: وعفاااك متعيقش كلس بعدا شوف خوتك راه عماين هادي مهبطتيي
هز فيها راسو وقال: بحال الى كتجري علياا
ايمان: لااا اخويا علاش غنجري علييك
حذيفة: خووك ! نوضيي نوضيي تݣعدي نوضيي
ايمان: ههههه وكتخرج بوحدهاا
حذيفة: ران نييت ديك لكرش قريب ترجعناا خوت، خاصني معااك ميترو يمكن عاد نوصلك
ايمان(ضرباتو كضحك ) الله امسخك سكت شوية
ضحك وحط راسو فعنقهاا وقال: 3 شهر مزاال وليت معدب
ايمان: لي سمعك يقول السيد سادة علييه ومهبطة الريدو
حذيفة: غير كنعميو لعطش وصاافيي
وقفات لايحة علييه لمخدة وقالت: كتر فيك النݣير
حذيفة: كون خليتيني نتزوج منگرش علييك
حلات لباب كضحك وقالت: تزوج بجنيية عورة
مشات لعند مليكة كتعاونهاا هوا غير رتااح ناض لخدمتوو مخليهم كيوجدو لگوتي لعشية
جات ودياان وكلسو مجموعيين كيضحكوو وكيتعرفو ودغيا نور انساجمات مع ودياان وبداو كينصحوها فشنو تبع على حسب المستوى ديالهاا فرحو بيها وعجبها لحال وعجباتها اللمة
وديان: شوفو غداا انا عاارضة علييكم يجي حتى حذيفة
ايمان: اشمن منااسبة
وديان: عراضة كي البشاار ولا نقولو على شرف نوور
نور: هههه شكراا
وديان: ياختي غير ديال لماكلة هاد ختك
ايمان: فنكوشة هههه (شهقاات شادة كرشهاا)اححح
نور(قفزات) : مالكييي ايمان
وديان(وقفات جات عندها) : حسيتي بشي حاجة
ايمان: حسييت بحال شي حاجة تخشات فياا لتحت
وديان(بهدوء ): سي نورمال راه بداو كيتقبلو ليك غيبداو يبركو لييك على فم لوالدة ،عاديي مخفتييش
بقات كتحك فكرشهاا مخلووعة مدة عاد رتاحت ورجعات نااشطة وفرحاانة معاهم تعشااو وتوادعو مع وديان
داتهاا لبييت سرحات لفطوي على شكل سرير وفرشوه وقدات ليهاا لبلااصة وتكات حداهاا نعساتها على صدرها كتحك عليها فشعرهاا كيتعاودوو
نور(بهدوء ): شحال محسييت بهاد الاحساس ،كان كيعجبني نعس حدااك
ايمان(زيرات عليها وباستها فجبهتهاا ): رتاحي انا معاك دابااا
بقات متكية حداها حتى نعساات حسات بلباب تحل ونااضت غطاتهاا وخرجات سادة عليهاا الباب لقاتو كيسد لباب مشاات استقبلاتوو باستوو وعنقهاا ونطق بهمس: نعستوو
ايمان: بااقة كنتسنااك (لمسات لحيتوو )توحشتك
جر شفايفها بقبلة وقال؛ كون شفتي اناا
ضحكاات فحضنو وقالت: راه حطيت ليك حوايجك فلبييت سير دوش تشرب معايا شي كاس ديال لويزة
حذيفة: هوا لي بغييت
مشا دوش وهي وجدات لكيساان مشات لصالون تكاات مليي حسات برجليها ضرووهاا
جاا لابس علييه فوقيية وشعرو فازݣ كلس حدا رجلهاا وهزهم فوق فخضو كيمااصي فييهم تنفخوو على حجمهم الطبيعيي وبداو كيضروهاا
ايمان(براحة ) : الله كنرتاح هكا
هز رجلها بااسهاا وقال: متبقايش توقفي بزااف
ايمان؛ وخة منوقفش كيضرونيي
حذيفة: غير صبريي احبيي شهرايين ونص دغيا دووز
كلسات حداه بعيااء كتشرب لوييزة كتحاول تجمع معااه ويدوزو وقت قبل مينعسوو بدات كتغمض فعينيها ناضو لبييت حيدات لكندورة وملابسها الداخلية ولبسات تيشورت عريض مقطن فلبيض هكا كترتااح وجدات لمخدة العجيبة لي كتعاونها فالنعااس وبداات علييه ماصي لياا ظهريي
كتبات معدبة وكل مرة يفييق معااها ،مرة مخنووقة مرة ضروها جناابهاا مرة الركيل على الجهد فكرشها مامخليهااش تنعس
عياات وبدات كتبكيي فنص الليل بتعب وكلس معنقهاا وفنفس لوقت كيدلك لييها ظهرهاا من لتحت وكيساندهاا بكلمااتوو وطيبتو وحنيتوو هدشي لي فجهدو يدير من جهتها
كلس ورااهاا دار ايديه بجوج من تحت كرشهاا هزهاا شويية تحطات راسها على كتاافوو بتعب وحسات برااحة ملي كرشها تهزاات
حذيفة: غير صبري مبقا قد لي فات
ايمان: لي فات داز سااهل ،دابا تقلت بزااف ورجلي كيحرقوني بزااف
حذيفة: نسخن لييك لماا ! ترتااحيي شوية
حركات راسها بااه بلا عكز ناض لدوش كايعمر لبينوار بلما داافي
كتخنق كتخرج ل بالكون والصهد كيزيد يخنقهاا شي مرات كتلوح حوايجهاا كلهم باش متحسش بلخنقة الملابس الداخلية ولاو كيخنقووهاا كتلبسهم غير لكانت خارجة فالدار كتبقا بلا بيهم صدرها تنفخ وكيضرهاا وكرشها كتبقا تقرصهاا
لقاهاا كالسة فلبالكوون ونوضها لدووش لقاتوو داافيي. حطات تيشوورت وهز ليها شعرها لفووق وعاونهاا حتى تخشات فلماا مرغوي كيف كتبغييه وفييه زيت لخزامة عاطي ريحة زويينة
داز ورااهاا گلس على لحافة كيمااصيي كتاافهاا وظهرهاا وهي رتاحت فلماا سخوون وحطات راسهاا على رجلوو وحسات بلخفة
ايمان: قالت ليا وديان تقدري تولديي فلما كيعااون
حذيفة: فداار !
ايماان: لاا سبيطار غير هوما ف لبلوك ديال لولادة دايرين حتى هاد لعيبة ديال الدووش مع لما دافيي كينقص علييك لحرييق
حذيفة: لي ينااسبك ديرييه
ايمان: مم مكرهتش لحنة
حذيفة: ديريهاا
ايمان: كنتسناا مي تجي
حذيفة: وغير ديريها مع صحاباتك ماحد باقي فيك الجهد لواليدة راه مزاال مخرجات ليهاا لفيزا
ايمان: ااه حتى نشوف ودياان
قرصها فحنكها وقال: رتاحيتي شويية ؟
حركات رااسها بااه وقالت: سمحلياا معذبااك معاياا
حذيفة: عذاابكم رااحة الالة ايماان
ايمان: ههه شكون حناا
حذيفة: نتيي ولوليدات ههه
بقات شي نص ساعة فلما حتى بداو عينيهاا كيتسدوو نوضها مشات تشلل ولبس ليهاا بينوارها هز تريكو وداها لبيت حسات بالرااحة و النعاس غير لبساات التريكو وقدات بلاصتهاا نعساات
نعس حداهاا حتى هوا وفالصبااح كينوض بشوية علييه مهرس فيه النعااس كيصلي ويخرج يخليها ناعسة
هكا ولات كدوز معظم اياامهم
فاقت على خاطرهاا لقاتو مشاا كيبقا فيها حيت كتخلييه بلا نعااس كيجيي مهلوك وكيحاول يريحها قدر الامكان
ناضت توضاات ولبسات عبايتهاا صلاة بشوية عليهاا صيبات فراشهاا وحلات الشرجم يتهواا هزات لقران وخرجات لصالون لقات ملييكة كطيب لفطور وقالت: صباح الخير مليكة
مليكة: صبح الخير ابنتيي كيصبحتيي ،منعستيش تانيي ؟
ايمان: بااينة فياا يااك والو كنبات بحال الى قاجيني ومدابزيين فكرشي من داباا
مليكة: هههههه اوى ابنتيي الله يزيدك فالجهد من عند الله مبقاا قد لي فات غير صبري
ايمان: اميين يارب
مشات كلسات فلبالكون ضاربة فيها شميشة ديال الصباح حلات القران على النص كانت على سورة الكهف ،قراتهاا بتمعن بصوت مسمووع شوية حتى حلات عليهاا نور لباب تاع لبالكون
نور: صباح النوور
تبسمات ايمان وقالت: صباح النوور نعستي مزياان
نور(كلساات ) : مزيااان كتقراي القران !
ايمان: اييه
نور: مزياان ،(تنهدات )فراسك معمري قريتوو
ايمان(سدات المصحف ): علاش
نور: شكون غيفهمنيي ! انا لعربية وبزز مزال شاداها غير حيت كنهضر مع الميمة وبا سيدي اما بابا راه كيهضر بلفرنسية مع مراتو و ولدوو ولا كيهضر حتى معايا بيهاا ،معمري شفتو كيصليي ولا قالي صليي
ايمان: كتصومي
نور: اه ولكن مكنصليش ،مكنعرفش وانا باغة نصليي ولكن ملقيتش لي يوجهنيي
ايمان: ياك كانت كتجي عندكم جداك معمرها نبهاتك
نور: سي كانت كتجي ولكن تقريبا هادي 3 سنين ماجات ملي ولاو لمشاكيل مع بابا ومراتو كتقوليه سيفط ليا نور ومكيبغيش كان خايف تديني ماما ،صدقو بجوجهم فلحبس
ايمان: حتى دابا باقي الحال بداي تقرااي السور الصغار ديال القران حتى تحفضيهم باش تبقاي تصلي بيهم ،ضربيها بواحد التدوييشة وتوضااي شفتي حدا التلفازة كاينين شي كتوبة تمااا ،ياك كتعرفي تقراي العربية
نور: شوية شي كلمات مكنفهمهمش
ايمان: ماشي مشكيل راه نيت مترجم للفرنسية فجهة التاانية فيه كيفاش توضااي وكيفاش تصليي ،يعنيي كلشي قداامناا وحدانا غير حناا كنسااو راسنا ومكنبحتوش
نور: اه بصح
فعلا دارت شنو قالت ليهاا من بعد لفطور مشات دوشاات وعطاتها حوايج جداد لبساتهمم وغير خرجاات لبسات لعباية ديال ايماان وقالت: وداباا اش ندير
ايمان: اجيي قرااي كيفاش تصليي وشنو تقوليي مليي تسجديي
نور: هدشي كلو نقولو
ايمان: لاا هه غير لي بيين قوسيين ،والقراان هزي داك صغيير بحال الدفتر راه فيه الايات صغار بقاي تهزيه فصلاتك حتى تعلميي لييهم مزيييان
نور(بحماس ): صاافي معمري نقطعهاا
ايمان: ملي تكون فيك لغيݣل مكنصلييوش ، وحتى الصباغة ديال الظفران ولا المكيااج مكيدوزش فالصلااة ،ورجليك يكونو مغطيين
نور: ااه صافيي اصلا مكنديرش لمكياج
ايمان: نتي اصلا زوينة بلا مكياااج ياله نوضيي صليي الصبح باش نخرجوو
نور: علاه ودن
ايمان: ههه ودن مع 6 تاع الصبااح كنصليوه مع الفجر داباا حييت صبح لحال ضاع لينا الفجر غنصلييو غير الصبح ولبغيتي تزيدي جوج ركعات اجر زيديهم
نور: صافي دونك غنصليي جوج ونسلم هكا وهكا ونعاود نصلي جوج اخريين
ايمان: تماما
وصفات كتسرح فالصلااية كتوريها ايمان شنو دير هزات لكتااب وراتها شنو تقرا وبلي الفاتحة ضروري فكل ركعة
وفعلا صلاات وايمان معاوناهاا وكتعاونها شنو تقوول فالسجود والركووع والتسبيح
سالاتهم وسلماات وبقات كالسة على الصلاية كضحك وقالت: حسييت بالرااحة
ايمان: هكاك حسييت مليي عاد بدييتهاا ومن تما عمري قطعتهاا داباا 4 سنين ومزال كنغفلو على شحال من حاجة وكل مرة كنصححو الغلط
نور(كلسات حداهاا بفرحة ) : الصلاة زويينة
بقات معاها كتوريهاا وكتعلمها لي حتى هي تعلماات سوا من طرف حذيفة او الفيديواات وحتى لطيفة شحال من حاجة كانت كتصححها لييهاا فصلاتهاا حتى بداات كتقلب وتقراا وتعلم والى مفهماتش الحاجة مكتحشمش و كتصوني لحااج وكتسول وتعرف رايو وهادشي بحد داتو لي خلااها تولي عزيزة عندو كتر وكتر
بدلو عليهم وخرجو كان عندها رونديفو مع ودياان مشات دارتو لقات الامور بخير ومشاو ل سونطر تقدات ليهاا داكشي لي خاصها كلوو مشاو كلاو فواحد لمحال اختصاصو غير لكلاص كلااوه ضااحكيين بعاد على حيااة السوشيل ميدياا مصورات حتى فلوك ولا سطوري ،رجعو لداار لقاو حذيفة فلباب وقال: هاي هايي كنخليك فالدار كنلقاك فالزنقة
ايمان: مشييت لرونديفوو سكت ولا نكدو لييك راك نسيتيه
حذيفة: صافي انا ساكت
نور: ههههه
حذيفة: هاد ختك حاكماانيي ياااك
حل لباب ودخلو كيضحكوو حطات دوك المشتريات ف لبييت غسلو وجاو يتغداو لقاو مليكة مشاات حيت لويكاند كتمشي لدارهاا
سخنو غداهم وحطاتو بينما كلشي بدل علييه وجاو لطبلة
كلساات حتى هي مرحبيين ب نور كولي كوليي
حذيفة: فاش كتقرااي
نور: كملت لباك شديتو ومزال مدرت والوو حالياا
حذيفة: مم بغيتي تكملي فشي حاجة !
ايمان: خاصك تعرف شنو بغات دير ههه
حذيفة: شنوو !
نور: التصميم
حذيفة: بصح ! الله يسخر كتعرفي تصممي ولا غير كيعجبك
نور: كنصمم فلورااق فالثوب معمريي زعمت
حذيفة: صعيبة غير فاللول خاصك تقرااي باش تعرفي تخرجي داك لموديل للواقع
نور: داكشي لي بغييت ندير
حذيفة: بغيتي نشوف ليك لمعهد لي قريت فييه مرحباا ختيي
نور: ولكن الاسبانية ههه انا ياله كنعرف فيهاا سيي ههه
ايمان: عادي غيجي وقت وتعلميهاا حتى هي
حذيفة: مشابهاش هاد كوكل طراديكسيون ديال ختك بقا ليها غير جابونية
ايمان: تعدد اللغات حسدتيني هههه ،الاسبانية سبابي فيها غير اميين هوا لي كان كيعلمنيي
حذيفة: مم مسكيين
ايمان(ضحكات ) : الله يجازيه بخير
شافت فنور لقاتها كضحك وقالت: الى بغيتي دوزي هاد العام بعدا شدي اللغة باش تقراي مرتااحة
حذيفة: وقبل كااع متقرااي نقدر نعاونك
نور: ان شاء الله واش نتاا مبقيتيش فهاد الدوميين
حذيفة: لا لا غير درت پووز شوية وصافيي
ايمان: سبع صناايع هههه
حذيفة: الحمد لله ههه
ايمان: غتجي بكري لعشية وديان عارضاناا
حذيفة: عارضاك نتي واناا ماليي
ايمان: قالت ليا واالو يجي حذيفة معااك
حذيفة: غنجي غنوصلك غنكلس معاك شوية ونزييد فحالي وخليكم مرتااحين
ايمان: ؤك
دوزو نهارهم فلعشية لبسات عليها جلابة فلبلو سياال مخزانية باش تبقا مرتااحة دارت شوية المكياج تغطي التعب فوجههاا كتقلب فنيفها ونور حداها كتلبس وقالت: نيفيي ولا قد كلونجاا
نور: شكون كلونجا
ايمان : هههه متعرفييهش واحد لكلون كبرنا معااه كلونجا وسنبلة ،فاطمة الزهراء الابراهيمي عرفتيهاا
نور: لااا
ايمان: هههه
دارت فغاجوو وتريحات شوية خلات شعرهاا مطلووق ولبسات بليغة فرجلهاا اما نور كتافات ب كسيوة حد الركبة مع صندالة وصاكها لا غير
هبطو لتحت والشمس حاارة كيتسنااو فحذيفة حتى وقف حداهم طلعو لطموبيل كيسكانيهاا مزاال مسخنات بلاصتها قال: اش قلنا على الروايح
ايمان: خلينيي نشم راه كتشدني الخنقة
حذيفة: لقيتيها سبة تنفعك ولاا ! ،ومزال ديريهاا
ايماان: ممم
حذيفة: ممم
نور اللور ساكتة كضحك على نكيرهم وشادة تيليفونهاا حتى وصلوو ل اقامة فين كاينة ودياان هبطوو وهوا متبع ليها العيين فديك الجلابة ولحمل واخة عياها واتااها وكتبان مسرارة ولݣديمات نقيين وحمريين فلبلغة حمقاتوو
جا حداها رما يدو على كتفهاا ونور جنبها طلعو فالسانسور تال طاج التالت دقو فلباب وايمان لمحات واحد لبلاكة فلباب المقابل مكتوبة فييه للبيع
حلات ودياان وقالت: تعطلتوو
ايمان؛ شي نااس
شاف فيها كيضحك وقالت: دخلوو مرحبااا هههه
كانت لابسة قفيطيين بلدي بيتي ديال الداار مع دخلات كتلقاا لكلسة ديال الحنة ف الصالون وطيافر صغار فيهم لورد ولحنة صدماتهاا وقالت: اش هدشي
وديان: نبقا نتسناااك انا حتى تبلزيهم بغيت نحنيي
ايمان: ويلي صدمتيني(مشات لحنة حفناتها كتشم)
حذيفة: كوليهاا ياله تبردي
ايمان: حضيني
حذيفة : ياله تهلااي انا مشييت
وديان: اجي اجي بلاااتي ههههه هادشي درتو على ودييت لعشيية مزال مجاو لبناات ..اجي للمفاجأة ديالكم بجوج
هز حاجبو باستغراب وقال: اش موجدة
ايمان(بفرحة ): يكماا لي فباليي
ضحكات وداتهم لسيجور فين كاينة طبيلة طويلة زيناتها ب نفاخات غوز و زرقيين وكيك بتلاتا ديال الطبقات بلبيض ومزوق
ضحكو بجوج وايماان لمعو عينيها وشداتها لفرحة ولخلعة
وديان: كلسوو هناا نور اجي هناا
كلسوو كيشوفوو وديان شعلات لكاميرا وقالت: شنو قلتو غيكوون !
ايمان: بنت و ولد
حذيفة: نفس الحاجة
وديان: ونتي انور
نور: هههه حتى انا كنقول بنت ولد ههه
ودياان: بلاااتتييي (حطات لييهم واحد لطارط قدامهم فلبيض وعطاتهم جوج كيساان باش يقطعوو لكيك قلبها كيضرب بغا يخرج من بلاصتو وهوا متحمس بغا يعرف شنو كيتسسنااو
ايمان: ياااربيي
وديان: هههه ياله واحد جوج تلاتاا الى لقيتو لون واحد يعني نفس الجنس لقيتو جوج يعنيي راه بنت ولد
ايمان: صافي صافيي نقطعوو
هز حذيفة لكااس ونور كتصور وقال: بسم الله
وديان: غمضوو عينيكم
غمضوهم كيضحكو وديان كتحسب تخشاو لكييساان وهزوهم حلو عينيهم فبعضياتهم كيضحكوو وشافوو ف لكيساان شهقات ايمان وحذيفة شدوو الضحك ملي شاف لكيك كلوو زرق وقال: بجووووج ههه
عنقاتو كضحك وقالت: مكنتش متوقعااهاا
وديان: كون جاتكم بنيتة غتكون وااعرة
نور: هههه حتى لوليدات زوينين
ايمان: هههه حذيفة مسكيين كان باغي بنت
حذيفة: مكرهتش ولكن لوليدات حتى هوما زوينين ( داعب كتفهاا )غير تكوون الصورة مكموولة
وديان: حتى داباا منخليوهاش لييك فقلبك هههه نتا غير تمناا بنت ونحضروها لييك ههههه
حذيفة: بحاال بحال عنديي
وديان: والاان مع المفااااجئة الكبرى (جبدات مفرقعاتت وطرطقاتهم فوقهم وخرج اللون لغوووز )ترااا
بداو كيضحكو بجوج بداك اللون الغوز عنقهاا بفرحة وهوما كالسيين
نور: هههه بنت و ولد لي عندكم مبروووك
وديان(شدها الضحك ) : لااا
حذيفة: وديان واش مشااربااش دواك اختي
ودياان: والله حتى عندكم جوج وليدات
ايمان: ولغوووز اودياان حرام علييك
وديان: وبنت (شافت فيهم جمدوو ومدات ايدها لييهم حلاتها قدامهم وكانو فيدها 3 التمرات ) جوج ولاد وبنت
شافت ايمان فحذيفة ورجعات شافت فايمان وقالت: ودياان ! ماشي ضحك
وديان: علاش غنضحك عليييك هههه والله مكنضحك
حذيفة: قلتي عندها تواام
وديان: ولكنن محددتش ليكم شحال
خلاتهم فصدمة ونوور كتشوف وضحك وقالت: صافيي 2 و 3 ݣغاتوي ههههه
شاف حذيفة ف ايماان وشدوو الضحك وقال: اش هاد لحلمة هههه
ايمان(مزال متيقاتش )وتيق بودياان
وديان:لهلاا تيقيي ههههه (جبدتت صورة ديال الاجنة من صاكها وقالت) :عقلتي نهار قلت ليك لانپريمونت خاسرات ومخرجوش ليكوݣغافي
ايمان:اييه شنوو
جبداتو كانو فيه جوج اكياس ،واحد فيه جوج والتااني بوحدو
شدهم حذيفة كيرمش وشاف فايماان حاطة ايدها على فمها ضحك بصدمة وجرهاا عندوو الاخيرة بدات كتبكيي وكتحرك راسهاا بلاا
حذيفة: هههه لاش كتبكيي داباا
ايمان: كنقوليها شحال من مرة هاد التقل لي فيا راه بزااف كتقولييا عااادي هءهءهء كون غير مقلتيهااش لياا كااع هءهءهء
وديان(ضارت عندها كضحك ): ههه ويلي على حمقة ،وهدشي راه عطاه ليك الله شحال غنخبي علييك ونتي كل مرة كتبغيي تشوفي ليكوكغافي صافي راه بااينين 3 مبقيتش نقدر نخبيهم ابب
ايمان: كنت خاايفة وزدت خفت
وديان: كولشي غيدوز بخيير ا ايماان متخاافييش عطي غير الراحة لرااسك وكلشي غيدوز مزييان
نور: فكري من جهة اخرى غيكونو عندك 3 ههه
حذيفة: كلشي غيدوز بخير معندك علاش تخاافيي(كيداعب كتفها)ربي معاك حنا معااك مدام ربي عطاك 3 فكرشك الا ونتي قاادرة عليهم راه ، لا يكلف الله نفسا الا وسعهاا متعمريش راسك بلولادة داباا سمعتيني
حركات راسها باه كتنخصص وكل واحد فيهم فجهة كيرطبها ويهدنهاا
وديان: فراسك غتكون اول تجربة لياا نولد 3 توام ههه انا فرحانة كتر منك
ضحكات من وسط دمووعهاا لي مسحهم ليهاا وعنقها وقال: صاافي نشطيي ياك بغيتي دار عاامرة بلوليدات ها ربي مرجعهاش لييك قولي الحمد لله
إيمان:هء الحمد لله
مشات وديان طفات لكاميرا وقطعات ليهم لحلوة كلاو منها شويية وايمان راسها عمر غير بلولادة وزاد خوفهاا وخة عيااو يبينو ليها العكس ويبسطو ليها الموضوع ولكن واالوو
توادع معاها ومشاا فرحان ومخلووع فنفس الوقت فينما يتفكر راه عندهم 3 كتشدو لخلعة والضحكة فنفس الوقت وصل لخدمتو كيفرنس عاجبو لحال
اما ايمان لخلعة دارت فيها مبغاات
وديان: ايماان هاد الدار قبالتي بغات تبااع كون غير شريتيهاا
ايمان: نفس الشكل ديالك
وديان: نفسهاا فيها جوج بيوت كبار ودريسيينݣ سيجور بحال هدا و صالون مفتوح على لكوزينة ،قريبة لحذيفة لخدمتوو وقريبة ليك نتي لكلشيي
ايمان: نور هاد السااعة لي بغاات شي استوديو معرفتش واش نلقاه ليها حداياا
وديان: هاي هاي على نور بغات تسكن بووحدها
نور: ههههه نتي مساكنااش بووحدك
وديان(ضحكات ): قنعتينيي العفرييتة ههه مزيان لواحد يتعلم يعتامد على راسوو بكريي
ايمان: ولكن بغيتها حداياا ،معرفتيش هاد الدار شحال طالب فيهاا !
وديان: يمكن 50 هداك هوا باش شريتهاا
ايمان: مم حتى نشوف حذيفة اشنو غيقوول فهدشيي ،فين لبنات بغيت نحني
وديان: صبريي
جاو لبنات ومعاهم نكاافة جايبة الشانطة غتلبسها وتنقش ليهاا
دارت لكموند وطلبات لغدا من براا دوزو نهاار زويين وحنات ايدها ونور كذالك
تعشات لعشيية وجا يديهاا خرجات عندوو ركبات ونور اللور وقال: فين ا ام الاولاد
ايمان: صافيي صافيي متفكرنييش
حذيفة: هههههه كيدوزتي العشية
ايمان(وراتو ايدهاا) مزياان
شم ايدهاا وباسهاا وقال: بصحتك ،نور حتى نتي نقشتي ؟
نور:اااه ههه معمري نقشت اول مرة يمكن
ايمان:بصحتك ،شفتي ديك الدار لي حدا وديان بغات تبااع
حذيفة:مزياان
ايمان: دابا حنا تبارك الله غيخصناا فيلا ماشي داار ههه
حذيفة: ان شاء الله نديروها مابعيد والوو عند الله
ايمان: قلت علاش منشوفوهااش هي كبيرة على هاادي لي فين كاينين
حذيفة: شحال !
ايمان: عطاتني نمرتوو حتى تهضر معااه
حذيفة: اش غنهضر ا ايمان ياك شفتي لكونط شحال فييه ياله 10 كنحاول نرجع لكريديات ديال النااس عرفتي الصلاح شحال دا ليناا
ايمان: نشريها اناا
حذيفة: سبحان الله دغيا كيتبدل لييك لبلان غير داك نهار كتحلمي عليياا نشريو فشي بلاصة بعيدة على المدينة فيين يكبرو لوليدات ويكون تواسع وزيد وزييد
ايمان: هههه باقة عند كلمتيي ولكن هاديك نتا لي غادي ديرهاا لييا
حذيفة: تستااهلي كل خير
ايمان: دابا قلت نشريي هادي لكان تمنها منااسب علاش غادي نشري فلمغرب وانا مكنمشيش لييه مع لوقت ان شاء الله نشرييو داباا الاهم حنا عايشيين هناا ،اش بان لييك
حذيفة: فلوسك شري بيهم حتى عماارة ،مبقيتيش بغيتي طموبيل ههه
ايمان: فينهوا لبيرميي
نور: معندكش ا ايمان
حذيفة(ضحك ) ساقطة فيه 3 المرات الكسوولة
نور:هههههه علاااش
ايمان:مكيبغيش يعلمنيي
حذيفة: لااا مساخياش علياا طموبيلتيي
ايمان:صافي غنولي نهز لموطور
حذيفة: طوالو رجليك شوية
ايمان(عيباتو) ممم
بقاو مناكرين توصلو لداار طلعوو ومشاو نيشان نعسوو بلعياا
بدات الايام كدووز شافو دار عجبااتهم وقريبة لكلشيي وفعلا شراتهاا ومزادها غير الله يسخر ، طيرات ديك 10 لي جمع وبدات كتصلح فيهاا وكتقداا لفراش لوليدات بلفرحة والحمااس خدات سرير كبير حطاتو فلبيت لكبير وتاني دارت فييه لفوطوي وبلكارات حتى تبدا تقاد شوية بشويية
داز شهر ومبقا ليها لتاسع غير اسبووع كانت نضاات الداار وفرشوهاا وقادو كل حاجة بلااصتهاا كانت هي غير كتجي تشووف كلشي تكلف بييه حذيفة ودراري و مليكة ستفات كل حاجة بلاصتهاا ورجعات الداار كتشعل ومجاورة مع ودياان هادي بالنسبة ليها احسن حاجة
مسبقا فرشات لبييت لنور بينما ولداات وشافت ليها دار على خااطرها وحتى هي عجبها لحال بجوج بيهم معاملينها بحال بنتهم شنو خاصك شنو بغيتيي
شهر وهي شاادة فصلاتهاا كتقرا القران والى مفهماتش كتسولهم حتى ولا حذيفة مرة مرة يراجع معااهاا العربية حتى فهمات ولات كتخدم القراان وفرحاانة بهاد التغيير الجديد وعجبهاا الجوو الهادئ والحب والدفئ لي فهاد الدار عمرهاا عاشتوو ،ولكن مصممة باش تعيش بوحدهاا لانه كل شخص من حقو يعييش حياة شخصية بانفرااد وهي مبغاتش تديق مسااحتهم ،شحال من مرة كتخرج من لبيت على غفلة كتلقااهم فلكوزينة ولا فالصالون متكي على رجلها غير كيشوفها من الاحترام كيكلس وخة عمرها سمعات منهم شي كلمة ديال العييب ،ولكن حتى هي باغة تعيش بوحدها وتلبس وتحرك فالدار براحتهاا متحشمش من شي حد ،ولكن كدوز هاد الفترة زويينة مع ايماان وفرحانة بهاد التوام لي غيتزادو
ناعسة ايمان فبيتهاا وحذيفة حداهاا كيهضر مع بااه وقال: لا راه قطعت غنشد الطريق فالصباح وبعد غدا راه ديجا مقطعيين صافي الله يسخر سلم عليهم
قطع معاه وشاف فايمان وقالت: بزاف باش تمشي فنهار وتجي
حذيفة: مالي جاي على رجليي !دغيااا متشغليش بالك ،غيبقا بالي معاك داكشي علاش غنمشي ونجيي دغياا
ايمان: ممم بالك معايا ولا مع الخدمة
حذيفة(باس كرشها كيضحك ): والله حتى معااك حشومة علييك (كيمسح على كرشها وكيبووس فييهاا ) مبقاوش كيتحركو بزااف
ايمان: تزااحموو هههه
حذيفة: حرموها علياا
ضحكاات وقالت: غير صبر
حذيفة: ان الله مع الصاابرييين
مدوزينهاا غير بووسان وتعنااق وداكشي على السرييع فقط باش ميعدبهااش
ناضو دوشو بجوج وتخشات فلماا وقالت: مكرهتش نبقا فلما سخوون كنحس بالرااحة
حذيفة(كينشف ويلبس حداهاا ) : بحال الوزة
ايمان: ههه سكت لنخليك تاني تمشي تقلب عليها فهاد الليل ،اجي اجي عاونيي
عاونها حتى وقفاات نشف ليهاا كيعيب فييها ولبسهاا سليب دهنات كرشهاا ولبسات عليهاا بيجامة حريرية بسروالهاا نشف ليها شعرهاا وهي كدهن فوجها ولحمها
عاد مشااو ينعسوو ،بعد معاناات طوييلة باش تنعس غمضات عينيها
ف ظلام الليل فيقهاا وجع خفيف بحال ديال ليغييكل فااقت حاطة ايدها على كرشهاا وقالت: ااي
حذيفة: ايماان !
شعل الضو لقاها كلساات كتسووط وقال: حسيتي بشي حاجة
ايماان : مم عاديي احبيبيي
حذيفة : باش عرفتييه نتيي عااديي ،نعيطو لودياان ؟
وايمان: لااا لاا غير كيضربني بالجهد لتحت مرة مرة هناا
حذيفة(حط ايدو تحت كرشهاا وقال): هناا !
حركات راسهاا بااه بقا كيماصي ليهاا كرشها شويية عاد رجعات تكات وهوا بقا بالو معااهاا فينما تحركات كيقفز معاها ،شاد طريق ومخلووع عليهاا
طلع الصبااح ناض كيلبس وهي كتعاونوو وكريشتهاا قداامهاا ،جرها عندوو بااسهاا وتحنا باس كرشهاا وقال: متخرجييش رتااحي فالداار ،الى خاصك شي حاجة نقولها لطارق يجيبها لييك واخة
ايمان: كوون هاانيي (قدات ليه القاميجة ودوزات ايدها على صدروو ) ممممعمرك سافرتي بلا بيياا
حذيفة: اش غادي نديرو لواليدة خوافة والحاج مبغاش مرتو تسافر بلا محرم
ايمان: هههه كيشفتي نتاا كتخلينيي نسافر بلا بييك
حذيفة: رجلي على رجلك الحب(باسها فجبهتهاا وعنقهاا ) ردي لبال لرااسك احبيي ،صبااح ان شاء الله نكون عندك
ايمان : ان شاء الله ااه نسييت
مدات لييه الصااك وقالت: عطييه لخديجة ولبناات
حذيفة: وخة
كان فيه بعض الهدااياا لخواتات حذيفة و وليداتهم من حوايج و شكلاط تقداتهم لييهم
حذيفة: انا مشيت سلمي على نور
غير صلا لفجر وخرج جاها احساس خايب غير سدات لباب وطاحو دموعها مبقاتش كتقدر تبعد علييه ولا تنعس بلا بييه
ياله راجعة لبييت حل لباب وقال : نسييت تيليفونيي
مسحات دموعهاا دغياا بقا كيشوف فييهاا ومشا جيهتهاا بهمس وقال: علاش كتبكيي (مسح دموعهاا)
ايمان: غير مسخييتش بييك هء ففف متديش علياا هرموناتي مرونين
حذيفة: متخلينيش نمشيي هاز لييك الهم عفااك راه دغياا نهار واحد
ايمان(مسحات عينيها): صافي سيير احبيبي الله اجيبك على خير
حذيفة: اميين يارب
مشا هز تيليفونو تبسمات لييه وسدات من وراه الباب دخلات لبيت عند نور تكات حداها
نور: خفتي بوحدك
ايمان: مبغيتيش نعس حداااك المشة
نور(قربات ليهاا كضحك ) ههههه بقاي ديما حداياا
ايمان(باستها ): انا ديماا حداااك ،نور تواعديني
نور: شنو اختيي
حطات ايدهاا نور على كرشهاا ملي تحركوو وقالت: الى وقعات ليا شي
نورر: هيييي مغيوقع ليك والو متبقايش تخلعينيي
ايمان: الوصية مكتقتل مكتحيي ، والاعمار بيد الله
نور: ربي يحفضك ل لي بيبيي ديالك ان شاء الله
ايمان: ان شاء الله
دوزو نهارهم غير فالداار من ورا مسالات وديان لخدمة دخلات عندهم ب بيجامة وبينوار خفيف وبانطوفتهاا
كالسين كيشربو قهيوة حتى صونا تيليفون نور وقالت: هداا خالي اميين
نور: الوو
اميين: اهلااا اهلاا غبرتيي ههه
نور: هههه غير مع رحلات ايمان من ديك الدار كنا مشغوليين
امين: دوزي ليا ايمان ابنتي
عطاتها التيليفوون جاوباات بهدوء: الوو اميين بخير
امين: امييين ! يااك مبقيتش حبيبك داباا ههه كبرتيي
ايمان: ههه اوى كبرناا
امين: جا حبيب تاانيي ههه ماشي مشكيل الالة لي جات من فمك عسل صونيت لييك بغيت نعرضكم نتي وحذيفة عندي لداار
ايمان: حذيفة هبط لمغربب بغاا يجيب لواليدة ديالوو وانا منقدرش نجي بووحديي اصلا عياانة بزااف
امين: عندك شي مشكيل الى جييت انا عندك لداار ؟
ايمان: علاش غيكون عندي مشكييل ؟ مرحباا بييك نتاا ومرااتك و ولدك
امين: مناسبك ورا لغدا ؟
ايمان: مرحبااا
قطعات معاه وقالت: بغا يجي هوا ومراتو
نور: عندو واحد لولد زوييين سميتو جاد
ايمان : الله اخليه لييه ،مليكة تعطلات اليووم
وديان(صونا تيليفونهها ): سيي ،،ؤك هاني جااية
وقفات وقالت: ياله بدلت حوايجيي بغيت نرتااح
ايمان: فين غادية
وديان: شي حالة اغجوون نمشي نشوف ونرجع
حركات راسها بوااخة ونااضت لكوزيينة مع نور كيوجدو لكوتيي لي غيحطوه ل اميين كتهدر مع حذيفة لي كان وصل لدارهم لقاهم فرحاانين بقدومو ولقا خواتاتو تما حيت جاو يتسيفطو مع مهم لي غتكلس ما يقارب 3 اشهر مع حذيفة
الحاج غضباان ومساخييش بيها ولكن مقدرش يقول ليهم لاا خصوصا انه جا وضارب الطرييق
حذيفة : خديجة سيفطات ايمان شي حاجة ليكم
خديجة:الله اعطييها الخيير ويفكها على خير
الكل: امييين
امينة: شنو عندهاا
الحاج: كدخلو حتى فامر الله
فاطمة: نطلبو ليها غير لفكاك
لطيفة: وتهلاو فمكم وفلحاج اخديجة الله ارضي علييكم
خديجة: كوني هااانية اميي بغيتي توصيني علييهم
امينة (جات حداه ): قول قول اشنو عندهاا راه مواااجديين لكادويات كلشي غتديه معااك ههه
حذيفة(ضحك) : خليها مفاجأة حتى نعيط لييكم ابييل فيديو
لطيفة: خديجة نوض ابنتيي وجدي لياا شنو ندي سكوطشي داكشيي
حذيفة: شنو غتسكوطشي
خديجة: درناا ليهاا سلوو والحلوة
ضحك حذيفة وقال: علااش سلوو امي ؟
لطيفة: اوى سبوع الناافسة اولديي هااء
حذيفة: الله اهديك اميي غير عدبتي رااسك
الحاج: ان شاء الله غير يتزاد على خير تبغي تجي مك وجييو معاها عفا ولديي ونديرو ليكم شي صدقة وشي سبووع نفرحو بييكم
حذيفة: ان شااء الله يكون خير
امينة(قرصاتو فايدوو ): ودوي ضرني رااسي والله منقولهاا
لصقوه لصقة ديال الصح ونطق وقال: عندها جوج ولاد وبنت
لطيفة: علاه ماشي جوج
خديجة: تلاااااتا اميي فعينين الحساد اللهم بااارك هههه
حذيفة: كنتي عاارفة ؟
خديجة: قااالتها ليااا ههههه مكتخبي علياا والوو (كتقلي السم لخواتاتها)
امينة: والله مصدقتيي حشومة علييك
خديجة: ههههه ياك قلت لييكم خودوو لكادوو بنت ولد اش بغيتي
فاطمة: تبارك الله ماشاء الله الله يعطيها وقفة سااهلة اخوياا تلقاها مسكيينة خايفة
حذيفة: بزاااف ،امين اختي الله احفضك
الحاج؛ خاصك ف سبوع طبق السنة فالذ_بيحة اولديي عندك تنساا
حذيفة: ند_بح خمسة ؟ ههههه بزااف اباا فلوس دوك د_بيحات نصدقوهم عطا الله ميدار بيهم 5 لحوالة بزااف
لطيفة: 3 كااافيين و2 صدقهم ولا ديرو بيهم صدقة
الحاج: ان شاء الله ،ان شاء الله
بدات خديجة كتجبد من الصاك وكتعطيي لبنات خواتاتها ولادهم ،تفكرات كلشي تاحد منسااتوو كلهم دعاو معاهاا يفكها الله على خيرر
اما هي كانت وجدات لكوتي عاد جات مليكة وقالت: تعطلت علييك كنت فطبيب ديال السنان
ايمان: ماشي مشكييل ،غير جاي اميين خالي وجدت شي حاجة وصافيي
مليكة: صافي ابنتي غير كلسي انا نكمل
مشات توضات صلات معاها نور وبدلات عليهاا كلسو فالصالون صونا ليها امين وعطاتو عنوان الداار
ماشي بزااف حتى صونا فلباب ناضت نوور ب بيجامة بيتية حلات لباب عنقاتو وبااستو وسلمات على مرتوو
ناضت ايمان بابتسامة استقبلاتهمم ..ميلات راسها فييه وجا عنقهاا بهدووء. غمضات عينيهاا فحضنو كتشم ريحة مهاا
اميين: شويية !
ايمان(تنهدات): الحمد لله
بقا شاد ايدها وراهاا مراتوو الاسباانية الاصل ولكن سلماات لابسة جلابة دافيية وشعر زعر سلمات علييها ب عربية معكلة غير كضحك والصغير ولدهم هاز لورد مدو ليهاا تحنات عندوو باستوو وعنقهاا كيضحك وقال: اناا عااارفك
ايمان: هههه شنوو تعرفنيي ههه
جاد: اا اا عند بابا ف البووم
ضحكوو وقالت: مرحبا دخلوو
دخلو لصالون ومراتو مبهوورة بلبدليي بحالا كالسة فلمغريب مع كلسات بدات كتسولها فين درتيي الصالون وشكون داروو لييك وبشحال طلع علييك
بداوها بالصالوون فاول نقااش ليهم وهي كتجاوب بهدوء ورااحة وكتشرح ليهاا ومليكة كتحط فلكوتيي مغربي بامتيااز ولمبيخرة فلقنت طالقة ريحة العوود
_واااو غيحة زوااانة
امين: ههه سارة كتعلم لعربية غير فهمو المقصود
ايمان: هداك بخور اسمو لعود
_لوود
ايمان: العوود ،نور مديه ليهاا تشوفوو
ناضت جابت ليها بواطة ذهبيية حمااقت على الرواايح صدقات كتعشق ريحة البخور
جاد كلس حدا ايماان كيدوز ايدوو على كرشهاا ونطق بالاسبانية: باباا عندها بيبيي هنااا
نور:عندها تلااااتا
جاد:وااااو
امين:بصح !
ايمان؛ااه هههه
امين: ههه جمعتي كلشي فدقة (مسح على كرشها حيت حداه ) اشنو كيقولوو
نور: الله افكك على خير
اميين: هاي هاي تسرح ليك اللسان فلعربية
نور:ههههه
امين(شاف فايمان )الله افكك على خير ان شاء الله
ايمان:امييين يارب
امين: لخصاتك شي حاجة ولا بغيتي شي اوبيطال فين تولديي
ايمان: كلشيي وااجد
ساره (كضرب فلبستاج) شحال عندك داباا
ايمان: دخلت فالتاامن
سارة: مبقا ليك والوو خاصك توجديي صاك ديال لولادة حيت تقدري تولديي فاي وقت
نور: وجدناااه كيحمق (بفرحة)خالي عندها جوج ولاد وبنت
امين: الله يبارك فيهم ان شاء الله
ايمان: شربوو اتااي سارة مرحباا
سارة(جمعات ايدها كتفكر )ااا شوكرااا بزايف
ضحكو مجموعيين دوزو معاهم لعشيية هضرو ضحكوو تحاوروو وهضرو على الاغلااط وعلى المساامحة والندم صفات لخواطر بيناتهمم وكسباات عائلة هناا من جديد وفرحاات بزااف
ملي بغات سارة تخرج مشات ايمان لدريسينك جابت ليها بااك مزال محلاتو كانو سيفطوه ليها فيه قران وتسبيح وبخور عربيية ومسك دارتهم ليهاا مع شكلااط لجاد ومداتهم فصاشية شكرااتهاا بزااف وتمنات ليها ولادة ساهلة وخرجوو
غير وصلات لعشية وظلام لحال تزير عليهاا لحال وتخنقاات بقات كالسة فلبالكون مدة
هضرات مع حذيفة مبينات ليه والوو غير قطعات مشات تنعس ونعسات حداها نور لتحتاج شي حااجة
شداتهاا السخاانةة والصهدة بغات تلوح حوايجها
مرة مرة كيشدوها دوك لوجعات لخفاف والطواليط غادية جااية وفاخر مرة بغات تمسح لقات شوية ديال الد_م
ناضت مخلووعة وبلخلعة تحرك فيها لوجع وقلبها كيضرب خاافت بزااف
سيفطات نور لعند وديان ملقاتهاش صونات ليهاا مجاوباتش عرفاتها غتكون فلبلووك
نور(بخوف): نصووني ل اميين
ايمان: صونيي صووني مممم ففف
نور: ايمان حذيفة كيصونيي
ايمان : خير خلييه (كتنش على راسهاا ) عطينيي شي حاجة نلبسها دغياا
تزرع فيهاا الخووف لوجع وقلبها كيضرب نور هضرات مع اميين ماشي بزاف تاع لوقت حتى جاا كيجريي متعطلش لقاهاا لابسة عليها ياله بغات تخرج صونات وديان
ايمان: ايمان صونيتي ياك لبااس راني فلكلينيك
ايمان: انا جااية
وديان: ياك لبااس خليتك بخير
ايمان: اخح شدنيي شي وجع و لقيت شوية ديال الد_م
وديان: وخة واخة متخلعييش انا هناا كنتسنااك
اميين: يكماا تحركتيي ولا وقفتي بزااف
ايمان(عاضة على فمهاا ) : لاا عااديي احح
امين؛ هدشي عاديي هكا سارة فدوك شهورة اللخرين كيشدها لوجع مرة مرة
ايمان: مبغيتش نولد داباا حتى يجيي (طاحو دموعها وكتمسح )فففف
عنقاتها نور من وراها وقالت: ان شاء الله متخافييش
مسافة الطريق لقاو وديان كتسنااهم بلبسة ديالها حدا الباب عيطات لشي فرملييات جابو لكرسيي ومشاات عاوناتها خرجاتهاا كلساتهاا على لكرسيي ودخلو معااهاا
فحصاتهاا وقلباتهاا دارت ليها التلفازة ودورات على كرشها السمطة دارت ليهاا كتسمع فقلبهم وبدات كتبكيي وهي متكيية
وديان: قلت لييك عطي الراحة لرااسك اصااحبتي مكتسمعييش
ايمان: مدرتش شي حاجة كتيرة
وديان:نقصي من دوش سخون ،قلتيها لحذيفة
ايمان: لااء مقلت ليه والو غنشطنو معايا
وديان: المهييم غتبااتي هناا متحركييش
ايمان: واش غنولد
وديان: حالياا مزال ولكن راه لوالدة تحلاات شوية ،تقدري تولديي فهاد الاياام ،اي مجهوود كبير يقدر يزييد يخلي لوالدة تحل
ايمان: ففف
وديان: دابا مشا لوجع
ايمان: مشاا ،نمشي لدار ؟ غيجي حذيفة فصبااح
حركات راسهاا بلاا وقالت: نوو مغتخرجييش غتبقااي هناا (شدات ايدها )متخافيش اناا معااك
ايمان(طاحو دموعهاا ): عنداك طرا ليهم شي حاجة
وديان: سمعيي لقليب كلشي عندك مزيان الى تقبلات لبنيية غتولدي طبيعيي فاي لحظة ابب اما لوليدات بجوج وااجديين يخرجو ،حيدي لخلعة راه هياا لي طيحات ليك طونسيون ،ايماان جمعي راسك اصااحبتيي
حركات رااسها بالاييجاب كتسووط لبسوها لبااس خاص بلمشفى وفشومبر صغيرة مركبين ليهاا سيرووم ، وجهاز الضغط فايدهاا مرة مرة تشدها شي وجعة تهز راسها لفوق وتسووط وجهها صفار بلخلعة
واقف جنبهاا اميين ونور مخلووعة عليهاا
امين(دوز ايدو على شعرهاا ) : ايمان بقاي بوزيتييف ؤك باش طونسيون يبقا مقاد (كيحاول يطمنها ) راه توام صعااب غير فلحمالة اما لولادة راه بحال الى غتولديي وااحد
ايمان: باش عرفتيي ونتاا طبيب ديال القلب
امين: ههه هانتي قلتيها رانيي طبيب وعارف شنو كنقول لييك ،غير خليي راسك قوية ومتخلعيش
نور: ايمان حذيفة صونا ليك وسيفط ليك مساجات
اشارت ليهاا باش تمد ليها تيليفونهاا كتسووط لقات الطناش ديال الليل وهوما عندهم لوحدة ومزال ياله صونا عرفاتو تشطن
دوزات لييه الخط فلوقت لي شداتها وجعة خفيفة عضاات على فمهاا غير فتح الخط سرطات الالم وجاوبات عادي بخفووت
حذيفة: الوو ايماان
ايمان: ويي حبيبي،باقي منعستيش
حذيفة: ساعة هادي باش صونييت لييك مكتجاوبيش
ايمان: كنت كندوش خرجت ونعست
حذيفة: علاش فقتي يكما فييك شي حريق
ايمان: لاا بحال ديما وصاافيي
حذيفة: بلاتي ندير كاميرا
ايمان: حداياا نور نااعسة احبيبي
حذيفة: صافي ماشي مشكييل ،انا غنوصل مع ل 10 ديال الصباح تماا
ايمان: ؤك الله اوصلك على خير
حذيفة: ؤك كبيدة سيري رتااحيي
قطعات معااه وحطات التيليفوون حاطة ايدهاا على كرشهاا
امين: يكما فييك جووع
حركات راسها بلاا ولكن وديان كان عندها راي اخر دخلات بلمااكلة وقالت: خاصك تااكلي باش متسخفييش
ايمان: لااا مبغيتش
وديان: ولكن لوليدات بغااو راه غير لصوب وصيت مليكة ديرهاا مشيت ليها تالدار
ايمان: وكنقول فيين غبرتيي
وديان: ياله ياله من لفشوش نور جري ديك الطبلة طلعيها راه كتهز ڤواالا
طلعاتها على السرير تكعداات كترر ضايرين بييهاا كلهم حطات ليهاا لاسوب مع معيلقة وكاس ديال العصير فلفواكه وتمر
كلات وشربات بزز منهاا بقاو معاها الليل كلوو كل مرة اميين يقرب ليهاا يلقاهاا فاايقة غطا نور وجا كلس حدا ايماان تبسم ليهاا وبداو مجمعييين
كيتفكرو شي اياام جمعاتهم بجوج كيضحكهاا وكيحاول يخفف عليهاا
امين: انا فرحان لي حضرت لييك
ايمان(بتعب): شكرا على وقفتك معاياا
اميين: كان خاصهاا تكوون 10 سنين هاادي
ابمان: ماشي مشكييل ..عاد كتابت
طوال حديثهم حتى دخلات وديان طل عليهاا كانت بيرمانونص
قدرات تنعس شوية وترتااح مشا اميين لدارو ملي شافها رتاحت باش يجيب ليها شي حاجة تفطر بيهاا ونور بقات معاهاا و وديان وصات طبيبة اخرى تبقا طل عليها بينما رتااحت باش ترجع صبااح
مع حلات عينيهاا كانت شداتهاا وجعة قااسحة تغوتاات فاقت نور مخلووعة بغات تنوض طاحت من لفوطووي وقالت: ماالك مالك
ايمان(مخلووعة ): صوني لوديااان صووني
هزات الاخيرة التيليفوون كترعد صونات لوديان لي جاوباتها دغياا
وديان: نور هاني فطريق
نور: اجي دغياا ايماان شدها لوجع
وديان: وخة وخة 5 دقايق
قطعات معااها كلساات ايماان كتسووط هزات التيليفون صوناات فنمرة حذيفة لقاتهاا طاافية عاودات صوناات وصونات ورجات حطاتوو لابسة بانطوفتهاا مشات لطوالييت لقات شوية ديال لماا هابط ليهاا
كاول ولادة ليها خايفة وخلووعة ولبكية فيهاا وحذيفة مكااينش صافي دايقة بيهاا
رجات لبلاصتهاا وقالت: خاصني نبدل
نور: ياك قلتي لوديان تجيب لييك الصااك
ايمان: ااه صاافيي
رجات لبلاصتهاا تدخلات وديان بجوج صيكان فلوردي شافتهم ايمان وقالت: علاش جبتي حوايج لي بيبي واش غنولد !
وديان: غير جبتوو ،فطرتي ؟
ايمان: مزاال
وديان (بدات كتقلب ليهاا كرشها ) فطري باش ندير ليك ليكو
جابو ليها لفطور محملاتوووش حتى دخل اميين جايب ليهاا فطور صحيي يعاونهات تقوت بييه كلات شوية وخرجات داتها وديان لغرفة الفحص قلبااتهاا ودارت ليهاا ليكوو
وديان: شوف شووف لالات لبناات تاهياا تقلباات هههه
ايمان: واش غنولد
وديان: متخاافيش واخة لوالدة تحلاات لييك وغتبقاي هنا مغتخرجيش حيت يقدر يشدك لوجع فاي وقت
ايمان: وديان ندير سيزاريان
وديان: تء واش حمقة علااش ،وش عارفة شنو هيا سيزاريان ولا سهلتيهاا غير حيت كتبنجيي داك لوقت
ايمان: ففف خفت
وديان: مامسموحش ليينا نديرو سيزارياان الى مكنتي نييت محتاجاها ،نتي تبارك الله تقبلو ولوالدة تحلاات شوية ب3 سانتييم ،نقدر نعاونك بلبرا ديال الظهر باش متحسيش بلحريق بزااف وتعاونك شويية
حركات ايمان راسهاا بااه
وديان: كووغاااج
بدا تيليفونها كيصونيي شداه نوور وقالت: هدا حذيفة كيصونيي
اميين: جاوبييه
نور: هاك جاوبو نتاا اتعرف تهضر معااه
ياله بغا يجاوبو دخلو ايماان ديك الساع نيت مد ليهاا تيليفونهاا كتكلس فبلاصتهاا جاوباات : الوو
حذيفة: ايمان ياله خرجنا من لمطاار ، لقيتك صونيتي 3 ديال المراات
ايمان: بغيت غير نقولييك انا رانيي فسبيطاار ،بلا متخلع وسوݣ بشوية عفاك راه نقدر نولد اليوم
حذيفة: كضحكيي شنو وقع
ايمان(بعيااء ) : صافيي حتى تجي متخاافش راني ماشي بوحدي معايا اميين و نور و ودييان غير جي بشوية عفاااك
حذيفة: صافي صافي هانيي جااي متخافيش هاني جاي
نسا مقطع التيليفون كتسمعوو كيهضر مع مو باش تركب دغياا فالطموبيل ،هادشي غير قالت ليه بشوية
قطعات هي وبقات مرة كتمشااا مرة كتكلس مرة تشدها وجعة مرة تمشي وتغبر حتى كتقول مكاين والو وترجع تجهد عليهاا،كل مرة جاية ممرضة تعبر ليها الطونسيوون وتشوف واش خاصها شي حااجة
حطات ايديهاا على السرير حانية راسهاا حتى كتسمع لباب تحل هزات رااسهاا حتى بان ليهاا جاي جيهتها ولطيفة ورااه غير شاافتوو تسرحو ليها الدموع
مشا جيهتهاا نيشاان عنقهاا ماشافش شكون كايين
حذيفة: مخفتييش
لطيفة: ايماان بنتيي
خرجات من حضنوو كتمسح فعينيها وعنقااتها لطييفة وقالت: غاااتفكي على خير ايليي اهوو متبكييش متبكييش،ربيي معاااك ودعوااتناا معااك
حركات ايماان راسهاا باه سخفاانة معندهاش الجهد لهضرة
شدها حذيفة من ايدهاا كيسول عاد شاف اميين ونور ورما السلاام علييهم وكيسول شنوو وقع
عاونها تكلساات جا قداامهاا مضهشر بلخلعة ،كيقول فراسوو كون جيت ولقيتها ولداات شحال خططو لهاد النهار يكونو بجوج مسااندين بعضياتهم يجي حتى لولادة ويكون غاايب عمرها تسرط لييه
حذيفة:من امتا ونتي هناا
ايمان: من لباارح مع 11 تاع الليل صونيت لامين هوا لي جا داني
حذيفة(ميل راسو جيهة اميين واقف متكية على كتفوو نور وقال) : شكراا ا اميين
امين: مدرت والوو
حذيفة: لواليدة هدا اميين خال ايمان الصغير وهادي عرفتيها نور
لطيفة: مشرفيين اولديي
امين: الله اكبر بييك اخالتيي
قرب اميين ل ايمان وقال: الى حتاجيتو شي حاجة صونييو ليياا ،خاصني نمشي ل خدمة عندي شي رونديفو ضروري
ايمان: شكرا
ربت امين على كتف حذيفة وقال: الله اعاونكم
شكرووه ومشاا خرج بقات لطيفة ونور كاالسين وهوا واقف معاها
عطا تجاكيط ديالو ل مو شداتهاا بقا غير بتيشورت خفيف مع لبيت دافيي
بداو الساعات كيدوزوو ولوجع بدا كيتزااد ..زادت ليها وديان وجع اصطناعي شوية كانت دازت مدة وهياا كتوجع جمع ليها شعرها لفووق
نعسات كيسمعو دقات القلب فغرفة الفحص ولطيفة ونور بقاو فشومبر كيتسناو صافي مبقاتش طلعاات خلاوهم تماا بجوج مرة مرة تجي ودياان تشوفها واش قربات
طاقتهاا استنزفات غير بلوجع كان مسااندهاا مطلقش منهاا ولا بعد عليهاا دقيقة وحدة عاش معاها داك لوجع دقيقة بختهاا مرة مرة تكاا علييه من لعياا كيماصي ليها ظهرها
داز وقت طوييل واقفة محنية على السرير حتى حساات بشي حاجة اتهبط ليهاا مع رجليها وسائل لزج هبط مع رجليها شوية
مشا كيجري عيط لودييان جات بجريي داوها لبلووك دكو ليهاا لبرا فالظهر باش تهمد عليها لحريق شوية وتعطي الجهد فلولادة
دخل حذيفة بلبااس خاص بلبلوك و باڤييط عطاوه كرسي جا حداهاا وكلس كل مرة يمسح ليهاا جبهتهاا عطاتو ايدهاا وزيرات علييه
وديان بلباس ازرق طلات عليها وقالت: هانتي وااجدة غير عطي الجهد شويية
حركات ايمان راسهاا بوااخة قادو ليهاا رجليهاا فلبلاصة المخصصة حسات بلوجع ولحرييق نقص شوية ولكن كتشدها الزحمة
فهاد السااعة كيمشي الخووف كتولي لوحدة باغة غير تفك وتخرجو لدنياا مكيبقا الراس يفكر فواالو
وديان دايرة معاهاا مجهوود ولفرمليات كذلك ،حذيفة بدعمو النفسيي حداهاا مخليها تعطي جهدهاا وكتحس بتحتها كيتقطع
وديان: غير زحميي ااناا غنعااونك ،اييمان ياله احبيبة دياليي ياله قربتيي ،ڤوااالاا شيغيي
هضرات مع لفرمليات باش تعاونهاا ضغطات من لفووق على كرش ايمان باش تعااون فالطلق
خرجو عينيهاا واللول مزال مخرج مرة تبكيي مرة تجمع رااسهاا حتى بدا كيبان الرااس
حذيفة: صبري اعمري صبريي
ايمان: ففففف (لاحت راسها اللور كتنهج عرقاانة وكترجع تزحم بجهدهاا كامل)
غير بان الرااس ودياان عاونااتهاا حتى تجروو لكتيفاات وخرج اول بيبي لدنيياا وقالت: بغاااڤوو هاا اللول خرج التااني حتى هوا فالطريق سهلتي علييه الطريق غير بشويية عاونيني غير بدفييعة
خدااو الفرملييات لبيبي الاول كيبكيي وبدا التااني جااي فالطرييق خدا منها خمسة الدقايق باش يتزااد حتى التااني
دارو السمطة على كرشها كيسمعو دقات القلب ل لبيي لي مزاال مخرجش
وديان: بقات ليك لبنووتة ا اييمان مبقا والوو
ايمان(بدات كتبكيي): مقاادرااش هءهءه عييت
حذيفة: ايماان ،شش ايمان سمعيني عفااك مبقا والوو غير زيديي
حركات راسها بلا بعيااء كتنهج ولعرووقاات شعرها فزااك وديان حتى هي عاطية كتر من جهدهاا باش تعااونها
حذيفة :يااك باغة بنيية ممم وهي لي بقاات سمعيي قلبهاا
وديان: ايماان ماشي وقت تعيااي داباا غتصدق شاربة لماا ونصدقو فشي حاجة اخرى ياله زعميي
كانت عياات مابقااتش قاادرة تدفع بدات كتشدو لخلعة وسترييس لفرمليية كدفع من لفووق ودياان من لتحت
وديان: ايماان دغياا لبنت غتسخف دغياا ،مبقااا والوو
عطات جهدهاا فدفعة مع صرخة خلاتهاا تخرج زالقة شداتها ودياان لقاتها زرقة دغياا شدووهاا كيجرييو بيهاا لطبيبة الاطفاال كدير ليهاا التنفس
جبدات ليها الخواض لي بقااو
حذيفة(باسهاا فجبهتهاا وهي كتبكيي ): ششش صافيي
مسح ليها وجهها كيسمعو فصوت بكااء التاالت عاد تنفس الصعدااء وهز راسوو بحمد وشكر مع دموع الفرحة
وديان حتى هي تنفساات ملي سمعات البكاء عاد قدراات تنووض تشوف
جات لبنت لي غتكلف بنظافتهاا وتخيط شي غرزاات فلدااخل مخرجوش على براا
حس بيهاا ترخات كان كيهضر معااها وكيمسح ليها فوجهها حتى تقلبوو عينيهاا ورخات ايدهاا
ناض مخلووع كيحرك فيهاا
حذيفة: ايمااان ،ايمااان
جات وديان كتجريي لقات عينيه خاارجييين بالخلعة مشات كتقلب فايماان فالنبض وعينيهاا وكطمن فييه: غير سخفااات غير سخفاات حذيفة
حذيفة فهاد اللحظة بحال الى صعقتييه بالضو واحد لخلعة فشلاات ليه الركاابي وكانت غتسكت لييه القلب معرفش امتاا رجع باللور جيهة لحييط وكلس فالضس فااشل كيحيد فلباافييط حتى ولادو مقدرش يوصلهم قلبوو غيسكت مشات ليه ودياان كتوكضوو
وديان: راها بخيير حذيفة راه غير سخفاات سي نورماال
حرك ليهاا راسوو بااه وطلبات من لفرملية تجيب ليه لماا عطاتو ليه ومشاات هي تكلفاات بلبااقي
حتى جمع راسوو ونااض لقاهم كيقادو ليها فالسيروم فايدها نطقات لفرملية كتدك ليها فشوكة فالسيروم: درتا ليهاا واحد المهدئ باش ترتاح شويية
باسها فجبهتهاا ومشا لجيهة لوليدات فين كانوو ف تحت بولة داافئة ولفرملياات كيمسحوو لييهم كيقلب بعينيه على لبنت ملقاهااش ليوم حالف قلبو حتى يسكت لييه كيسول حتى قالت ليه وديان بليي خاصهاا رعاية طبية حييت سخفاات داوها دغياا قبل ميشوفوهاا كيشوف غير فلوليدات بجوج كيبكييو صغااار بزااف ماقدرش كاع يقرب لييهم
ديك لبكيية الرقيقة ولي يدووب كتخرج حركات فييه احساس الابوة وجاتو لحظة ادراك بلي ولا اب ومسؤوول على عاائلة مكونة من ثلاث رضع فوقت واحد مهمة لي غتكوون صعييبة ولكن كتاكد بلي ربيي معطاهم هاد النعمة الا وغيقدووو علييهاا
قرب لييهم مد ايدوو لحنيكاتهم صغاار وحمريين وشعر كحل لاصق رجيلاتهم صغيوريين شاف فلورقة لي عطاتو طبيبة الاطفال وقالت: لوزن ديالهم 2 و 500 بالنسبة لبنت 2200 لوزن نااقص شوية ولكن سي نورمال متشغلش باالك غيتزادو دغياا
حذيفة: و البنيية !
_درنا ليهاا الاكسجيين حالياا الامور كلشي تحت السيطرة ،مبروك عليك اسيدي
عاطياه فلورقة شي دوايات ولحليب لي خاصو يجيب
خرج من لبلووك ومشاا لشومبر مسخسخ بلخلعة لقا مو كتسبح غير شافتو وقفزاات ناضت وقالت: اولدي تعطلتو واش مكااين بااس
حذيفة(قرب ليهاا وعنقهاا سااكت ): الحمد لله اميي تفكات على خير
قفزات نور عنقاات اميين حداها وقالت: وليييت خاالة ههه يس
اميين: حذيفة مبروك يتربااو فعزك
حذيفة: اميين يارب
لطيفة(طبطبات على ظهرو ) : الله اكبرهم فطاعة الله ورسوله
باس ايدها وكلس عياان وقال: اميين
لطيفة: ايماان! كيف بقاات
حذيفة: غير ترتااح وغيطلعوهاا لشومبر
امين: لوليدات؟
حذيفة: دراري بخيير لبنيية لي سخفاانة ونقصهاا الاكسجيين
امين: بقات هي اللخرة
حذيفة: تماما
اميين: كتوقع ان شاء الله تحسسن
تحنا حذيفة كيمسح على وجهو حتى نطقات لطيفة بهدوء كتمسح على ظهرو :مالك اولديي خرجتي صفر
حذيفة: بانت فياا (تنهد ) واحد لخلعة اميي نموت منسااهاا ،غيبات ليا ايماان فايدي حساابني غير (مسح على وجهوو ) الله يطول فعمرها لوليداتهاا
لطيفة: يااربي وداباا فاقت
حذيفة: مزال ولكن غير سخفاات تعدباات شويية
لطيفة: مساهلاش اولديي مساهلاش
حذيفة(مسح على ركبتهاا ): من الطيارة لسبيطار امي اتكوني عيتيي
لطيفة: عدابكم راااحة انا غير نشوف ايمان على خير ولوليدات ونمشي ديك الساع نرتااح
رجع راسوو على لفوطووي يرجع السووفل حتى دخل اميين بكيسان ديال القهوة شكرو حيت جات فوقتها وكلسوو كيهضرو وبدات لعلاقة كتصلح ويتفاهموو
بقاو جهد سااعة عاد تحل الباب من طرف الفرمليات جاريين سرير ديال ايماان ومشات نور قافزة طلات عليها لقاتها مغمضة عينييهاا صفرة ومغطينها من لبرد لابسة بيجامة طويلة حد الركبة من لموبرة بيضاء بدونتييل رطيطب بيجامة دياال النافساات وفيها لعقيدات فالصدر ،ناضو كلهمم قادو ليها السيرووم شافووها بدات كتحل عينيها تقاالو
نور: ايمااان على سلامتك اختيي (باستهاا)
باستهاا لطيفة وكدالك اميين وهي عينيهاا كيتسدوو باقة ديك لبراا دايرة مفعوولهاا
ايمان: حذيفة فيين لوليدات
دوز ايدو على شعرهاا: غير رتااحي راهم بخير ،رتااحي نتيي هي اللولة
غمضات عينيهاا مبقاتش حلاتهم قاد عليها الغطاا وخرج مخلي معاها اميين ونورر خرج لطيفة تشووف لولييدات غير شافتهم بكاات ولبنيية بقات فيهاا دايرين ليها الاكسجيين فنيفهاا مدخلوهمش كيشوفو غير من براا
وصا وديان وخرج دا لطيفة لداار وهوا يدوش دغياا ويبدل علييه فرحااان وبدات لخلعة كتمشيي
لبس تيشورت ابيض مقطن ولفوق قمييجة صلى الصلاة لي فاتوو كان وقت المغرب
لقا لطيفة حتى هي صلاات
لطيفة: نديو ليها اولدي شي حاجة تااكلهاا
حذيفة: حتى نشوفها اش بغاات ونرجعوو
نعسااات حتى رتااحت جاتها نعسة ولا في الخياال من زماان منعساات فاقت غير بزز ملي سمعات لهضرة حلات عينيها عليهم كلشي مجموع امين ومراتوو نور وديان ولطيفة وحذيفة حداها غير شافها حلات عينيها قرب ليهاا داعب خدها وقال: كبيدة فقتيي
ايمان: شحال نعست
حذيفة: من وقت لعصر دابا راه 9 تاع الليل
ايمان: عرفتي شحاال منعست ،جابوهم مزاال
حذيفة: بغيتي تشوفييهم
ايمان: ياك كيقولوو نشوف عويناتو ونسا وجيعاتو
ضحك وقال: وخة الالة
طلات عليها ودييان كضحك وقالت: ماااميي غيبتيي تشهيت هاد النعسة لي ضربتيي مبيتاني بلا نعااس ومشحفاني فلبلووك
لطيفة: الله احفضك ابنتيي ويسهل علييك تانتي بشي ولد اللنااس يارب
ودياان: اميين اخالتي لطيفة
تحنات وديان باست ايمان وقالت: ولدتيي لياا التيتييز اصااحبتيي مااشاء الله
امين: ايماان غزالة غتولدهم زوينين
نور: عينيهم زرقييين ؟
حذيفة: معرفتش كانو ساديين عينيهم
لطيفة: كي زرقين كي كحليين الله ارزقهم غير الصورة والصحة المكمولة
حذيفة: امييين يارب
ايمان: جيبوهم اودياان …هز لياا غير راسيي
هزو ليها جيهة راسها طلعوها شويية
جات لفرملية جارة لكونة فيهاا لوليداات بجوج بقات متبعاهم بعينيهاا بابتساامة حتى جمعاتهاا وقالت: حذيفة فيين لبنت ؟
حذيفة: غير بشوية متخلعييش غير خاصها شوية الأكسجين
ايمان: ك كيفااش حذيفة فيين بنتيي
لطيفة: غير بشوية ابنتي بشوية بنتك شفناهاا لبااس عليهاا غير خاصها النفس شوية
ايمان(تغرغرو عينيهاا): واش مخنووقة واش تخنقاات حذيفة
اميين: راه عاديي ا ايمان حيت بقات هي اللخرة ضروري غتعياا شوية
كسرات كلتمهم الفرملية وقالت: البنية راها بخير شوية وتمشي تشوفييهاا
لطيفة: شنو قالت
امين: لبنية لباس عليها شوية ويديو ايمان تشوفها
لطيفة: وشفتي ابنتي متخلعييش
عطاو اللول لايماان شداتو وقلبهاا كيضرب وعينيها غرقو فالدمووع باست ايدوو مغمض عينيه هزات عينيهاا ف حذيفة: صغييور بزااف
حذيفة: غير لحوايج لي معمرينهم اما هوما صغيييوريين
ضحكات تنقزو دموعهاا
شعر كحل ولفم صغييور ودايرين ليه براصلي ازرق نطقات لفرملية وقالت: هداا اول بيبي تزااد عندك عقلي علييه رراه كيتشاابهو ههه
امين: دابا هدا هوا البكر ديالكم ههه
هبط حذيفة باسوو فراسوو وقالت: هاك شد
لطيفة: ايه اولدي ادن لييه بلاتي نعاونك ههه
ضارت جيهتوو هزات لوليد كتسميي الله وكتوريه كيفاش يهز ونور كتفيلمي اول لحظات اللقااء وكتبكي متاترة معاهم عطاوهاا الطفل التاانيي شدااتو بااستوو كتبكيي شمات ريحتوو وحركات حنيكاتوو هزات عينيها فحذيفة لقاتو مزال مضاارب يشد الدري كلس فلفووطوي كتمدو لييه بزز باش حكم ليه الشدة حتى حيد لييها لملاية صغيرة وباان صغيييور فايديه بحال شي نونوس ومع دالك لطيفة خايفاه يقلبو من شي قنت هي لي عارفة ولدها عمرو فحياتو هز شي تربيية فايدو كان كيشوفهم وكيبعد لتيسااع هوا شاد وهي دايرة ايدها تحت منوو حتى حطوو على صدروو ولاحت عليه لغطاا
عاد حكموو وخااف علييه شدو فايدو كيشوف فييه وتبسسم لداك لوجه لملائكيي الصغير
هزو متكييه على ايديه نظف حلقو وكلشي سكت ادن لييه وكبر لييه
نور: شنو غتسمييوه
كيشوف فلولييد وقال: طه اسم ختاارو لوالييد لييه
شداتو لطيفة كتسميي الله ومدات لييه التاانيي اذن لييه حتى هوا وطلق عليه اسم : يزيد
ايمان متكية راسها ومراقباهم بابتسامة ونطقات بهمس: يزييد ،طه
نور: والبنيية شنو غتسمييوهاا
حذيفة: حتى نشوفوهاا هه
بقات شادة طه وهوا يزيد على حضنوو
حتى بدا كيحل عينيه ونور كطلل بغات تشوف لعويناات مرة تشوف جيهة ايمان مرة حذيفة حتى حل طه عينيه كانو عويناتوو بحال الى لونهم خزي غاامق مزال مصافيينش بدا كيتحرك وكيبكيي
حذيفة: شش بديتيي بكريي مالك
لطيفة: ايكون فييه الجووع مسيكين عطيه ابنتيي يرضع
ايمان(خرجو عينيهاا): داباا
حذيفة:نقادو لييه الرضاعة!
لطيفة :لااا خاصو يرضع منك نتي اللولة ابنتيي باش يتسرح ليك لحلييب
امين: اناا خاارج سارة اجيي
خرجو مخليين لطيفة شادا يزيد وحذيفة شاد طه ماسخاش يحطوو كيقولو صعيبة غير البديية
تكات على جنبهاا حطاتو على درااعها كتشوف فييه وهوا كيحل فموو باغي يرضع عجبها وضحكات لحركاتو
جبدات ترضعو اول محطها فموو هزاتها تبووريشة وجااها احساس حنين و صِلة جمعاتهمم كان الراس حساس وضروها وكتوريها لطيفة كيفاش تشد باش متخنقووش ،رضع شويية ونعس
رضعات حتى طه بحب وفرحة وقالت: بغيت نشووف لبنوتة
حذيفة: انعيط على لفرملية تجي
دخلات وديييان وقالت: السلااام (مشات لوليدات ) داباا فين طه فين يازيد
ايمان: طه هوا لي تزاد اللول
ضحكات كتقلب فلبرااصلياات وقالت : هاهوا حبيبي طه وهدا لكبيدة يازيد
وديان: اوى سمعو يلالة طبيبة لي شافت لوليدات دارت لكم كادوو وهواا عناية طبية شااملة لمدة 5 سنين فاي وقت فاابور عاد زيد مصارف لولادة حتى هياا فابور و الدولة غتبقا تعيطكم واحد لمبلغ ماااليي نيييت حتى يكملو 18 هه وعاد زيد سمعت غيوفرو ليك مربية فابور لمدة عمااين
ايمان: ديجا سمعت بهاد القضية ولكن مربية مغنحتاجهااش معايا مليكة صافي
حذيفة: احسن حااجة فيهم غير الصدااع ويشريوها لك مع الدولة لخاصهاا مربية نشوفو شي مغربية ان شاء الله
وديان: ان شاء الله خليتكم داباا
سمحو ليها تمشي تشوف لبنيية ركبات فلكرسي ودفع بيهاا لابسة بينوار بيض فوق لبيجامة
دخلوهم لشومبر كيشوفو فيها وسط لقرعة صغيييورة ليكوش كتبان كبر من رااسهاا سمحو ليها باش ترضعها وخة غير شويية، مدوها ليهاا فملاية صغيرة رضعاتهاا والدمعة فعينيهاا وحذيفة كالس قبالتهم باس لبنية فايديهاا
ايمان(مسحات عينيهاا ) : دايرة بحال شي وريدة ههه شوف الشعيير ،شحال صغييورة
حذيفة(ضحك ): كلاوها فحقهاا من لكرش
ضحكات كدوز ايدهاا على حنيكااتها وقالت: ياسمين
حذيفة: الله يجعلهم درية صالحة يارب
ايمان: امييين يارب
رتاحت على وليداتهاا اخيرا وقدرات ترتااح وتنعس وتعوض لي منعساتووش وفرو ليها شومبر بوحدهاا وتهلااو فييهاا وفلوليداات العناية الطبية والرااحة لي كانت محتاجة ليهاا
حطات بوسط فيه صورة ديال ليكوكغافي وكتبات: وتشاء انت من البشائر قطرةً ويشاء ربك ان يغيثك بالمطر
وانتهت رحلة وهن على وهن االحمد لله ❤️
حطات سطوري وبدات المباركاات من شتى الدول
كدالك تواصلات مع خولة وياسيين نجاة كلشي بارك ليهاا وهضرو معاهاا فرحاات وقلبها رتااح
لبنات لي فريستوو جابو لكادويات ولورد والجمعية لي ولات معاهم ديال الاطفال حتى هياا عبراات على فرحها ورسلات ليهاا الورد والهداياا ولي موقعة معاهم كونطرا ديال الخدمة
كلشي بارك وكلشي فرح ليهاا ،دوزات اسبووع كاامل ف سبيطار كل واحد كيدللها من قنت مفارقوهااش حذيفة مساندها بالليل والنهاار ولطيفة ونور كلشي قايم بالواجب معااها
وبحال هاد لحاجات النفيسة عمرها تنسااهم، توسع نطاق حياتها وعمر بالنااس لي يستااهلو فقط ،حسات براسها دارت حياة مناسبة وزوينة وبعيدة على الحقد والغل
جمعات وليداتهاا اخيراا ومشات لداار كان استقباال تاانيي بالتمر والحليب والصلاة على النبي
دات لوليدات لبييت حطو طه و يازييد وياسمين بقا شادها حذيفة مسخاش يحطهاا
كان الاهتماام زاايد ليهاا لانه كانت صغييورة ومكيتسمعش حسها نهاائياا كيخافو تبكي وميسمعوهاش ولا يحطوها وتخنق ليهم بقا عندهم داك الخوف وبقات ديماا حداهم
حذيفة: لواليد راه ذ_بح الييوم ،اجي تشوفي الدبي_حة
كلسات حدااه كتشوف لحاج كيد_بح ويكبر ويسميي شافتو ذ_بح تلاتا ديال الخرفاان كباار وقالت: وبزااف عليه 3
حذيفة: ماشي مشكيل هنا صعيب نذ_بحوو ،حتى نمشيو لتما ونعاود نذ_بح دابا غنجيبو مد_بوح مشا طارق يجيبو غيدير سبووع و يصدق منوو
ايمان: غنمشي ندوش شوية باش نرتااح
حذيفة: سيري احبيي انا هناا
تبسمات وخرجات لدووش دوشات برااحة باقة ليها شوية لكرش رجليهاا تفشو وايديها كدالك خرجات ولبساات عليهاا قفطان شتوي بيتيي ونشفات شعرها وشداتو بقراصة دارت مكياج خفيف وخرجات عندهم لقات نور ولطيفة فلكوزينة وقالت: هاي هاي على نوور اش كتوجدي هههه
نور: الرفييسة
ايمان: خالتي عذبتي رااسك
لطيفة: اوى صافيي فينهو لعداب لمسمن كلشي دارتوو خديجة انا غير غادي نسخن ههه راه مقطع موجوود
ايمان: ربي اخلييك اخالتي
لطيفة: حزمي راسك ابنتي راه لبرد علييك راك نافسة عضامك محلولين اجي اجيي (مسحات ايدهاا )نوور حظي ابنتي هدشي
نور(ضحكات): وااااخة هههه
جرات ايماان لبيت التااني بدات كتجبد ليهاا فشنو جابت ليها وايمان كالسة فوق لفطووي فرحانة
لطيفة: هاكي هادا قفطاان وشربيل ديالو سيفطاتهم ليك زهوور
ايمان: الله اخلف عليها لاش معدبين راسهم غير السؤال فيا كااافي والله
لطيفة: هادو جوج لبيساات من عندهاا مع مكانوش عارفيين اش عندك كلشي خدا لبيض ولا الصفر ولا لحمر
ايمان؛ ههععع ايييه زوييينين ديال لبرد
لطيفة: هاديي جليليبة خيطاتها لييك خديجة براندة بايديهاا
كانت جلابة ف لكرونة
لطيفة: وهاانتي هادي جبادور لطه و يازييد وهدا قفيطين بحال ديالك ل لالة بنتيي ياسميين
ضحكات ايمان وهييا كتقلب ف داك لقفطان كضحك: ويلي اميي فيين ياسمين لي غتلبسوو هياا كي لكمييشة
ضحكات لطيفة وقالت: وزيدك هادو شريبلاات وبليغة ليهم هادو كلهم من خديجة حيت هي لي كانت عاارفة مقالتهااش لبناات كاع
ايمان: عنداك يتقلقوو ههه حيت انا قلتها لخديجة ولكن مقلتش ليهاا متقوليش لبنات
لطيفة: اوهوو ابنتيي نتي قلتيها لمولات لععقل والسترة والحاجة لمستورة كيسهل فيها الله
جبدات ليها قتيب ديال الشعر وناضت عكفات ليها بييه شعرهاا فلكرونة ولات كتبان كيف شي سوسية ولعوينات زورق كيبرييو عطاتها شربيل لبسااتوو
ولبنات لاخريين جايبيين براصلياات ذهب ونقرة ل وليدات
لطيفة: دابا الذهب عطيه ل ياسميين والنقرة ديريها لدراري
ايمان: ولكن باقي صغار امي ماشي مشكيل يلبسوه لاا
لطيفة: لاا ابنتيي
دخل حذيفة وكلس حداها كيهز ويحط فلحوايج وقال: مالكم على هدشي اميي واش مكاين هنا والوو
ليطفة: تء وا لكادو اولديي هاك تانتاا باك راه منسااكش خيط لييك جلابة وها بلغتهاا
حذيفة: هه الله اعطيكم الخير
لطيفة: هدا لكحل ،هدا سوااك هدا شوية لبخور هدا سلو والحلوة
الخير كثير مخلات مجااابت عنقاتهاا ايمان وقالت: الله اكبر بييكم امييي غير وقفتكم معاياا كاافياانيي
لطيفة: حتى نتي راه خيرك سابق ابنتيي هدا جهدي عليكم
حذيفة(باس رااسهاا ) :الله يطول لينا فعمركم امي
ايمان(وراتو لحوايج لبلديين ديال لوليدات): شووف ههه
شدهم كيضحك وقال: هاد لقفطان زعمة تلبسوو ديك رويبعة تاع بنتك
لطيفة: اوىى حشااك داااباا تكبر وتزياان راه لبنات ديغياا كيطلعو تبارك الله
مدات ليها لكحل بلدي وقالت: هدا دݣيتو بايديي كحليي عويناتك راه ليوم عندك سبعياام
خلاهم ومشاا خرج يجيب التقديية كحلات عينيها وخرجات لصالون حاطة لكونة حداهاا فيها جوج وياسمين حاطاها فكونة فوق لفراش لبساتهاا لقفطان كضحك عليهاا حييت مبانو لا ايدين لا رجليين منوو
جات ودياان بلقفطاان وزينة
غير المقربيين تحط طبسيل كبير ديال الرفيسة مزوقة بلبيض داكشي شهوة منو وكاس ديال اتااي منعنع لحلوة وسلوو ولفاكية بحال شي سبووع ف المغرب
سلاوهاا بالشطييح ضبرات وديان على جوج طعريجات عطات وحدة لزيينة وحدة شداتهاا ولطيفة تابعاهم فهبالهم جابت الصينية والكيساان وسارة مرت اميين حمااقت بلفرحة غير كتشطح وضحك ونور كتشطح بقفيطين ساامبل
زينة: اش نغنييو
وديان: مفايتش فيا تشيااخت
ايماان: اوى منين ضبرتي على هاد طعارج
وديان(ضحكات): سر المهنة هههه ياله اخالتيي شدي معانا الطرح
لطيفة (قدات زيفهاا ): ياله سيري على الله هههه
شطحو نشطوو ناضت نور جرات ايمان كتميل فبلااصتهاا ويضحكوو
دوزو عشيية من دااكشي حتى جاب لييهم حذيفة طبسييل منوع بلحم ديال الغنميي مشوي ودوارة كداالك مغسولة مقادها خاصهاا غير تشواا وتقااد قدات ليه لطيفة طبسيل ديال رفييسة كبير داه وخرج
شواو وكلااو كلسو على الهضرة والضحك حتى ظلام الحال وتفرق كلشيي
بدلات عليها ب بيجامة داافية وگلسات فبيتها من بعدما كلشي نعس متكية حدااهاا ياسميين كتبدل ليها حتى تحل لباب تبسمات لييه وقال: تعطلت علييك
ايمان: عرفتك غتكون مع الدراري
تكا حدااها كيشوف فبنتوو وقال: جبدات عليه بنهار وبغات تسهر الليل
ايمان: ههه غير نبدل ليهاا ونعس وجد راسسك تسهر معاياا
حذيفة: ولا علييك (شد ايدها باسهاا)شكرا
ايمان: ههه علاش
حذيفة: على هد لفرحة لي عطيتيني ،مكنتش ضارب لحسااب حتى وليت مسؤول على عاائلة ومن بين لحوايج الزوينين فحياتيي
ايمان: هوما غاايكون فيهم العذااب باش يكبرو ولكن شوية بشوية نكبروهم
حذيفة: ان شاء الله ربي معانا غيعاونا علييهم
كانت اول ليلة ينعسو لوليدات حداهم غير كينوض واحد كيتبعوو لااخر كينوضو بجوج واحد يراري ولاخر يعمر الرضااعة حتى ل اشمن وقت عاد نعسوو
بداات الاياام كدووز وايمان وحذيفة ولاا شغلهم الشاغل هوما لوليداات
دخلات معاه الابوة ولا كيتشوق غير امتا يرجع لداار باش يلعب معااهم ويتعاونو علييهم
هي وقتها كلوو ولاا ديالهم رجعات بيتوتية مدوزة معاهم اوقات زويينة وخة كتعياا كتلقااه وراهاا سااندهاا ومعاونها فالصغيرة ولكبيرة
لان الحياة الزوجية تشاارك فلكبيرة والصغيرة صبر متباادل واحترام متباادل ميمكنش الطريق تكون غادية مقادة الى مكاانش التعاون ومتكونش الكفة ماايلة
تعذر باش يمشييو مع لطيفة لي كلسات عندهم تلت اشهر حيت ياسميين مرة مرة كتخنق لييهم
كان ليها اهتمام كبيير وكانت الطفلة المدللة من نهار تزاادت
اما لوليدات شدوو صحتهم وبداو كيتجاوبو معااهم بالضحكة وتوغوييغ والهضرة
ولا صوتهم طاغي فالداار حتى وديان كتجي فرحانة تلعب معاهم نور لي مسخااتش مزاال تخرج من الداار كتقرا وترجع تلعبب معاهم هادئة وساكتة وكانت عزيزة على حذيفة وايمان حيت بشوشة وكتسمع الهدرة
شهورة كيدوزوو وايمان ولات خدمتها غير فاسبانيا فقط مبقاتش كتخرج على براا معظم اوقاتها كتخدم من الدار فوقت فراغها كتزييد تقراا اونلااين باش تخلي ديما دماغها اكتيڤ
ولات كتفكر فموضوع لبارفاان لي بغاتو يكون من مستخلصاات الزهور بغات ملي تشموو تفكر لورد والطبييعة وصوت الوااد والرييح والطيوور لي حلات عليها عينيها فلغابة
بدات كتقراا وكتكتااشف وفنفس الوقت عاطية وقتها لدارها و وليداتها وكلشي معاونها
وصل الصييف وهبطو لمغرب بتلاتاا بييهم لوليدات شدو راسهم شوية ولات عندهم 7 شهر هبطات معاهم حتى نور بعد وقت طوييل محطات رجلها فلمغرب رجعات مع ايمان
وصل الصييف وهبطو لمغرب بتلاتاا بييهم لوليدات شدو راسهم شوية ولات عندهم 7 شهر هبطات معاهم حتى نور بعد وقت طوييل محطات رجلها فلمغرب رجعات مع ايمان هاد المرة
مع دخلوو لدار لقاو كلشي كااين كلشي استقبلهم بلفرحة متشوقيين يشوفوو لوليداات ويفرحوو بييهم وخصوصا لحاج مكرهش يهزهم بتلاتاا دقة وحدة
كان سبوع تااني بالشواا والمحمر والمجمر والعائلة المقربة كلهاا گالسة مكاين غير هاك ا ايماان شدي ا ايمان ،فرق كبيير بيين اول مرة جاات وهاد المرة
هاد المرة شافت حبهم ليها فعينيهم اندامجات معاهم كامليين ودارت بلاصتهاا بيناتهمم كتعاملهم بحال خواتاتهاا وكيعاملوها بحال ختهم الصغيرة
لقات محمد تزوج ومرتو حاملة تاهي رحباات بيهاا وفرحات بلولييدات لي بانو ملامحهم تشاركو فلبيووضة ولبنية لي كانت ضعييفة ولات بحال شي بطبوطة صغييورة الشعر زعر والعينين زرقيين والايدياات مطبزيين بحال لطيفة ومدوريين بذبلييج ديال الدهب صغير وبراصلي فيه سميتها والدراري كدالك عينيهم ملونين وشعر شهب غادي لكحولة مزعرينش بزاف بحال ياسميين
بعدماا كانوو تعشااو جات خديجة عند ايمان وقالت: تكلمي لباا
رمات عليها شال ومشات عندو لبيت فين تيكون ديماا وكيدير الرقية لنااس دخلات عندو وكلسات بجلابتهاا ، ضعافت بالرضاعة رجعات لفورمتهاا
الحاج: عرفتي علاش عيطت ليك
ايمان: لاا اباا
الحاج: بغيت غير نقولييك وليداتك ديما يكونو معااك ابنتيي نوصييك يكبروو يعرفو دينهم ويعرفو صلااتهم مبغيتهمش يتغروو بلغربة ونااسهاا ويتلفو لعربيية
ايمان: كون هاني اباا
الحاج: وحاجة اخرى ابنتيي طه و ياسميين راهم زوهريين
ايمان: زوهريين معرفتش
الحاج: زوهريين ابنتي وباااينين ستري وليداتك سمعتيني وياااك ثم ويااك تامنيهم لشي حد ولا تحطي تصاورهم شوفي عويناتهم كيفاش دايرين وقارنيهم ب يازيد غيبان لييك الفرق ، ان شاء الله وقت الصدقة متهبطييهمش غير يتختنوو جمعي وليداتك فلبييت انا شوية ونطلع نقرا عليهم شوية ونرقييهم العين صعييبة
ايمان: وخة اباا كون هانيي
خرجات من عندو نيشان طلعات لبيت فيين كان حذيفة هاز يزييد كيبكيي سدات لباب وجات كتقلب ف ياسميين و طه لي كالسيين كيلعبو ودايرين السكاتة
حذيفة: ا ماالك
ايمان: قالياا عميي طه وياسميين زوهريين
حذيفة(قلب عينو وقال) : امتا قالها لييك
ايمان(وقفات) : كنتي عاارف ! مقلتي لياا والو
حذيفة: اش غنقولييك ا ايماان باش تولي موسوسة بيهم بحال كيف دار ليا خلي الدراري طبيعيين راه عايشين وسط النصارة عارفيين شي زوهريي ولا رويين
ايمان: وااخة هكاكا كنتي تقولها ليا وانا مخليا كلشي مكاين غير هز هز حتى لي مكنعرفهمش هزوهم وباسوهم
حذيفة: متعمريش راسك بهدشي ولادنا راه قدام عينيناا الله اهدييك
بقاو مني منك مني منك حتى سمعو ياسميين غوتات بحر جهدهاا جاو يدورو لقاو طه فلقهاا بتيليكموند لجبهتهاا حتى لبنت زرااقت وطاحت السكاتة فمها ولاا زرق حط زيااد ومشاا مخلووع كيهزز فيهاا
ايمان: انشووف انشووف (شهقات) ويلي ويليي على ضربة
ياله شافت فييه كسر الدنيا ب بكااه معرفو شكون يسكتو
حذيفة: ششش صافيي اباباا صاففي ،انشووف
يزيد لقا كلشي كيبكي حتى هوا بداا ، حتى طلعات خديجة كتجري ونور معاهاا لقاو لغواات هزات نور يزييد وعنقهاا كيبكيي
نور: مالهاا مالها ياسميين
ايمان(كتسكت ف طه ): ضربهاا وسبقها فلبكاا
نور: بحال ديماا
خديجة: ميييمتي على ضربة عطاهاا اوكوك اجيي دير لييها التلج زرق ليها العيين
حذيفة: ففف انخرجها شويية
خشات راسها فعنقوو كتنخصص وكتبكيي قلبها طاايب
ديما حاݣرينهاا مرة ناتفينها مرة ضاربينها وملي نوضو سنيناات مخلاو فين عضوها وهي كي الاماانة باغة غير تلعب بهدوء
حتى طلق علييهم حذيفة ليلى والذئاب خاصهم غير يحصلوها بوحدهاا ويعطيوها
بقا معاها براا كيسكت فييه حتى ولات كتنخصص وبدات كتلعب بلحيتوو وتشكي علييه بلغتهاا وهوا كيطبطب ويحك ليها فظهرها حتى نعساات
طلعها لبييت لقا يزيد مع نور لتحت مولفها بزااف وطه كتنعس فيه ايمان عاطياه الرضاعة وكيلعب برجلوو غير شاف حذيفة داخل كلس كيعض فالرضاعة وقال: يااا ياا ديي
حذيفة: انا جاي لمك نتاا غير بلااتي
ايمان: نعساات حبيبة دياليي ايااي على دقة عطاها
حذيفة: غتصبح ليها زرقة زيد هادي على لقميش ،صافي مبقيتيش تحطيها حداهم كيضورو عليها كي السبووعة
ايمان: مبقاوش دياب
حطهاا كيبوس فيها وقال: بغاو يقت_لوها لياا لحنينة ديالي
هز طه رضاعتو من جلدة وسيفطهاا لراس حذيفة تسمعاات طن
حذيفة: احح نعللل (بغا ينووض وهرب طه كيضحك كيحببو تخباا عند موو)
ايمان(هزاتوو مخبيااه): هههه صافيي صافيي راه كتجيه لغيرة ههههه كتقلب على لعصاا نتاا
طه كيطل بعويناتوو كيقلب على حذيفة مبانش لييه حتى جرو من اللور كيغوت وكيضحك
شدوو كيعنكش فييه وكيعضوو من كرشوو كيبغي ينتفو من لحيتوو
بقاو كيلعبو معاه حتى نعس وهبطات تجيب يزيد لقاتو نعس
نور: ايمان واش هضر معاك اميين
ايمان: هضر معاياا
نور: شنو قلتي لييه
ايمان : شنو غنقول لييه ! اجي طلعيي اجيي
طلعات وراهاا هازة يزيد كتبوس فيه ناعس دخلاتو لبييت حطاتو فبلاصتو حدا خوتو وشافت فحذيفة وقالت: حبيبي اجي معاياا نهضرو مع نور
حذيفة: وخة الزين هاني تابعك
مشات خرجات معاهاا كلسو فواحد الصالون صغيير حتى جاي حذييفة كلس حداهم وقال: نور دابا جيتي لمغرب خاصك تشوفيي ماماك
نور: كنشوف راسي مامستاعداش نشوفهاا
ايمان: نوور شوفي يمكن ديك الانساانة مدارت تحاجة زويينة فحقي ولكن نتي كانت محرووقة علييك حيت نتي حاسباك بنتهاا ومعنديش الحق نحبسك بلعكس الى بغيتي تقدري تشوفيها تكلسي معاها شويية خصوصاا دابا خرجات
نور: ؤك
ايمان: سيري تنعسيي غدا ان شاء الله نشدو الطريق لكازا نزورو مي الله ارحمها وشوفي ماماك
حركات راسها باه هبطات معاها لتحت كلسات معاهم شويية خديحة شدات نور عندهاا عجبااتهاا وقالت: ايمان تعطيني ختك لخالد ههههه
نور: ههههه
ايمان: لا مزال مسخييت بختيي هههه
خديجة: الله احفضهاا يارب صافي غير سيري تنعسي هاهي معااياا
ايمان: تصبحو على خير
طلعاات مخلياهم ساهريين مشات لبيتها لقاتو متكي كيتسناهاا سدات لباب وجات حداه بشويية لا يفيقو الدرراري بدلات عليهاا وهوا مراقبها حتى جات عندو عنقهاا وقال: نعسوو
ايمان: مزاال خليتهم ساهريين
حذيفة: نسهرو حتى حنا شوية ؟
ايمان (دفعاتو ) : واش كيزند عليك لحال هناا ولا ماالك مزال مسخنا حتى بلاصتنا نصبحو كندوشوو
حذيفة: مالنا ناعسين عند جيراان
ايمان(كيجر فيها وهيا كتهرب لييهاا ): خليي تالغداا وحذيفة راه عيقتييي اويلي هههههه
حذيفة: راه غنشدك بالسمطة نبقا نعطييك حتى ترطاابي (ضربها لمؤخرتها تقفزاات مخرجة عينيها ) اجي غير نحاجي ليك حتى يطيب نعاسك
ضحكات وقربات لييه وقالت: حااااجي اسيديي
فاليوم المواليي شدو الطريق قبل ميمشيو لكازا مشااو طلو على الدار ديال المرحومة كانت صلحات فيها شحال من حاجة وعاودو ليها الصباغة دابا بقا غير لفرااش غتختارو ملي جاو
نور كدخل بيت ب بييت عجباتهاا وحذيفة حاضي الدراري
مشات لبالكوون وقفات غمضات عينيها وريح لبحر كيضرب فيهاا كتسمع ضحك وليداتها وراهاا تبسماات ودورات رااسهاا لجيهتهم لقات طه كيحبوو هاارب و يزيد تاابعوو وحذيفة هاز ياسميين كضحك وتابعهم كيجري عليهم ..تبسماات وضحكات لضحكتهم
بقاو شي ساعة كيخططو شنو يديروو وشنو يجي فيهاا موراها شدو الطريق لكازا بالطموبيل لي كراها
ساكتة كيرجعو معاها الذكريات الزوينة والخايبة وفينما حسات براسهاا غتحزن كتشوف فحذيفة كيتبسم ليهاا مد ليها ايدو شداتهاا وزير عليهاا ساكتيين
وصلو لكازاا ونور خايفة من هاد اللقاء كيف غيكون لقات امين كيتسناهاا سلمو عليه وخلاتهاا ليه اماانة وقالت: غنمشي نزور مي ونتلاقاو ملي تكوني واجدة بيناتنا التيليفون
اميين (بتردد ): ايماان
ايمان: متحااولش والله صعيييب بزاف هدشي لي بغيتيي نتاا تحاجة متقدر ترجع حيت مكان والو حتى قبل هدشي ، انا مسامحاهاا والمسامح كريم ولكن متسناش منيي نتقابل معاهاا ونهضروو ونكونو عائلة ، الى كانت محتاجة لفلووس انا نسيفط ليهاا ولكن البعد رحمة لينا بجوج
امين: على خااطرك
حركات راسها بااه ومدات ل نور شي فلوس وقالت: عطيهم ليهاا غتكون محتاجاهم وهي ياله خارجة من لحبس (تبسمات )فلوس الدهب لي سرقت ليهاا
حركات نور راسها بواخة وخلاتها مشات مع اميين وهي ركبات مع حذيفة وشدو طريق المقبرة
حتى وصلوو دارت شال ديال ليكراا مغطية بيه شعرها جا معاهاا زويين وبين فوجهها البراءة بقا حذيفة كيشوف فيها وتبسم وقال: زيانيتي
ايمان: عويناتك احبيبيي ،غير خلييك مع الدراري مغانتعطلش
خرجات هازة فايدها لما ودخلات لمقبرة والشمش حارة كتقلب بعينيهاا وتابعة الطريق توصلات لقبر جداها
حطات ايدهاا على الشااهد كترحم عليهاا بدات كتقرا القران والدعااء ،رشاتو بلماا ودموعها فعينيهاا كترحم عليها وتعااود وكتنقي فقبرها من لعواد حتى سمعات سميتهاا من وراها ضارت مخلووعة حتى كتشووف كرييم عاد رجعات فيها الرووح من الخلعةة
بقات كتشوف فييه كان بايينة فعينيه بليي محطم او فحالة حزن شاد فيدو اساامة تسائلات وقالت: شنو كيدير هناا
خرجات من بين لقبوور ومشات لعندو طلق اسامة من كريم ومشا عنق ايماان ،حتى هي هبطات لعندو وعنقاتو بحب مزيرة علييه وقال: توحشتك
ايمان(بدموع ): حتى اناا ، شنو كدير هناا مم
اوسامة(شير ليها لجيهة لقبر وقال)ل: ميمة مااتت
هزات راسها ف كرييم وقفات وقالت: البركة فرااسك
حرك راسو باه كيشوف فييهاا شوية جرهاا وعنقهاا زير عليها وحسات بييه كيبكيي ،محساات تهزات ايدهاا عنقاتو ودموعهاا دايزيين
شافها حذيفة تعطلات ودخل لمقبرة وعينيه على الطموبيل حتى شافهاا معانقة مع كرييم ورجع حدا الطموبيل و وقف كيتسناها مقابل مع الباب كيبانو ليه بعاد شوية
بعد عليهاا باس جبهتها وقال: مبروك علييك لوليدات
ايمان:الله ايبارك فييك
اكريم:جبتيهم معاك ؟ نقدر نشوفهم
بقات سااكتة وتنهدات وقالت: وخة
اسامة: علاش مكتحطيش تصاورهمم كنبغي نشووفهم
ايمان: حيت باقين صغاار
اسامة :لمن كيشبهوو ههه
ايمان:ليييك
شد فايدهاا خارجيين تشافهم حذيفة هاز فايدو يزيد لي فااق كيبكيي قرب ليه كريم سلم علييه ومد ايدو ل يزييد شدو كيبووس فييه ويعنق فييه
ايمان: ماتت موو
حذيفة: سي كريم البركة فراسك
كريم: مامشا معاكم بااس (شاف ف يزيد ) لخرين ناعسيين !
حل حذيفة لباب لقاهم فايقيين كيطلوو عطا يزيد ل اسامة كيبوس فييه وتحنا كرييم كيبوس فلوليدات فالطموبييل وهوما ساكتين كيشوفو هاد الشخص اول مرة فحياتهم
كريم: الله احفضهم لييكم يارب
حذيفة: اللهم اميين
اسامة :ايمان عطيني نمرتك نبقا نصوني لييك ؟
ايمان: وخة نعطيها لييك (باستوو )بوس ليا اميرة
اسامة: اميرة بقات مع ماما وانا مع باباا كنمشيو نشوفوها كل ويكاند
ايمان(تنهدات ): ملي تشوفها سلم عليهاا
عطاتو نمرتهاا وقالت: عنداك طيحهاا
كريم(مد ليه يزييد مساخيش بيه ) الله احفضهم ..تهلاي فراسك ابنتيي
ايمان: حتى نتا تهلا فرااسك وفوليداتك وخة اميرة مامعاكش متنساهاش
حرك راسو باه مهبط راسوو حتى ركباات بقاو واقفيين حتى بعدو علييهم شاف كريم ف اسامة واتبسم ليه وقال: معلييكش طلبتي النمرة لختك
اسامة: هههه غنبقا دييييما نهدر معاهاا
كريم: ان شاء الله
بقات دايرة الشاال وسااهية تشدها حذيفة من ايدها وقال: صافا حبيبتي
ايمان: بخيير اكبيدة
حذيفة: جااك لفولار زويين ماشاء الله
ايمان: الله اهدينيي عليه يارب
حذيفة: شنو كتسنااي هوا لي خااصك ،غنكون فرحاان الى درتييه عن قنااعة وعمرك تحيديه ،ولكادوو هوا نمشي انا وياك لعمرة ان شاء الله
ايمان: ان شاء الله يارب (شافت فولادها ) غير يكبروو شوية ونمشييو
حذيفة: ان شااء الله كلشي عند الله قريب
وقفوو فسطووب وجبد واحد لبواطة ديال التمر المجهول مرة مرة كيحلي بييه مد ليهاا تميرة وقال: تااكلي تميرة الزيين
ايمان: ههههه ناااكل تمييرة
داز لقااء نور ب نورة بحال الى لقاات لما وسط الصحراء عنقااتها كتبكيي تبكيي حتى كتسخف مامتيقاش بليي من بعد 11 لعام رجعات ليها بنتهاا
خرجات مريضة بالحساسية من الحبس غلااضت فوق لقيااس ولاات عايشة بوحدها وبلفلوس لي خبات قبل مدخل لحبس
جاتها نور فنقطة المنحذر رجعات فيها الامل في الحيااة ولكن نورر قلبها ضرهاا من جيهة ختهاا حيت مسولاتهاش نهائيا وهي عارفاها مؤخرا كانت معاها حيت قلب عليها امين وقالييها كاينة نور
نور: مغاتسولينيش على ايمان
بقات سااكتة كتمسح دموعها وقالت: خليني فييك نتيي توحشتك ابنتيي
نور(جبدات الظرف لي عطاتها ايمان مداتو ليهاا ): هدا عطاتو ليك ايمان وقالت لييك فلوس الذهب لي قلتي سرقاتو لييك
نورة(مسحات على شعرها ): حبيبة ديالي كبرتيي ،داك عليا وحرمني منك ومن سنين عمريي ،الله ياخد فيه الحق
نور: انا جيت نشوفك ماشيي نهضر فشي حد بجوج بيكم تبعتو الحياة لي بغيتو
نورة: المهيم رجعتي لياا ،غتبقاي معاياا يااك
شافت فيها وحركات راسها بلا وقالت: اناا ميمكنش نبقا معااك حيت كنقراا ولكن غنبقا نجي نشوفك مرة مرة
نورة: عشتي معاهاا
نور(حركات راسها باه ): ولكن قريب غنسكن بوحدي
نورة: جرات علييك ؟ مكيعاملكش راجلها مزياان هااه
نور: بلعكس راجلها من اطيب خلق الله
نور: حتى باباك هكاك كان كيبان ليا وفاللخر ضار بيهاا
نور: بيناتهم فرق بزااااف بين السما والارض ونتيي خويي قلبك من جيهة ايمان حيت ديك لبنت ضريتيها فحياتها بزاف المفرووض تقلبي عليها طلبي منها السمااحة
نورة: حتى هيا ضراتنيي
ضحكات نوور وقالت: حيت بنتك هدشي باش ضراتك
هزات صاكها بغات تنوض وناضت نورة قافزة: فين غادية كلسي معايا شوية
نور: لاا غيخصني نرجع غنبقاو نهضرو لخصك شي حاجة قوليهاا (عنقاتها) نتمنا لمرة الجااية نلقاك حسن وفكرتي وعرفتي الغلط من الصحيح ،الى شي نهار جبدتيي ايمان عرفي راسك خسرتينيي فمرة وحدة
خلاتها واقفة فلقهوة ويديها فيها الجوا وهبطاتت مع اميين وصلها ل ايماان بابتسامة ركباات كتلعب مع الدراري وايمان مسولاتهاش كيف دازت لخرجة
سمعات تيليفونهاا وهزاتو كتلقا وديان مسيفطة عرام ديال لميساجات وقالت: خاصني نقولييك شي حاجة
ايمان: مالك ؟ كي لقيتي عمي مزيان يكما عياان غير نرتااح شوية غنجي نشوفوو
وديان: خاصك تشوفي شنو لقيت كيتسناني
ايمان: خلعتينيي شنوو لقيتي !
وديان: لي ضرب لييه قلبيي من اول نظرة وحالفة بحلوفي لغيريي ماا يكوون وخة تنطابق السما مع الارض ماتديه وحدة اخرى يا اااانا يالمو_وت
**
الحيااة بزوينها وبخاايبها كدوز ، ايماان اسسات عائلة لنفسهاا عاشت معاها لحلوة والمرة كانت لوليداتها الحضن الدافئ وكان ليهم حذيفة السند لكبيير
بعد خمس سنوات من الحب والعطااء والتعاون على ديك الاسرة بداو لوليدات كيكبروو ومشروعهم كبر وعطا نتائج مثمرة فرحاتهمم ،فتح سناك فالمغرب وايمان حلات اخيرا مكاازة بالعطر لي بغاات طلقات عليه اسم ” حب love”
كان خاصها وقت طوييل ديال التروييج باش حتى هي دير بلاصتها فالسووق شقو طريقهم من شويية ولاو كيفكرو لمستقبل كبيرر وحياة مريحة لوليداتهم
تشاركو بزاف ديال الحواييج وبشوية بشوية مبقاش حاجز فلوسك ولا فلووسي تشاركو فكونط واحد ومسيرين حياتهم بشوية وبلا اسرااف حتى قدرو يحققو حلم من احلاامهمم شراو بقعة خارجة على هرج المدينة كبيييرة وفيها دار لوسط قديمة ولكن بالاصلاح غتكون من اروع ما يكوون ، الطبيعة لخلابة والجو رائع متنفس رائع لوليدات
لي عجبهم لحال طالعين هابطيين فالدرووج وكيدورو بالداار و كيلعبو بيين الشجر
وضحكتهم مسموعة، عنقها وقال: كيف بنيناا داك المشروع دقة بدقة غنبنيو هادي حتى هياا هكاك
ايمان: ان شاء الله ههه شوف عجبهم التيسااع
حذيفة: باش ميبقاوش مضاربين شكون ينعس لفوق وشكون لتحت هههه
طه: بابااا الشتاااا (كينقز ) هههههه زوييينة
ياسميين جاية كتجري لعندهم وشعرهاا كيلعب وراهاا كيغطي وجهها جايبة فايديها وريدات صغاريين مدات وحدة لحذيفة والتانية لايماان
ياسميين : مامييي وريييدة
باستها وجمعات لييها شعرهاا وقالت: حبيبة دياليي
يازييد: بابااا نطلعوو هنااا
حذيفة: بشوية لاطييح (شاف طه سبقو ) طه بشوييية
ايمان: يازيييد مدفعووش اجيي هنااا
نوضوها مدابزة فوق واحد لحيط مشاو كيجرييو فكوهم قبل ميطيحوو ، طارو من حداهم كي الزوااق غير ياسمين لي كتبقا دور بجنابهم كتخاف يضربوهاا
ياسمين :ماما انا زويينة هدو خاايبيين
هزها حذيفة على غفلة وطيرها فسماا حتى غوتاات كضحك وقال :نتيي راك لكمييشة دياليي
ايمان: هههه بشوية لاطيحهاا
جاو الدراري كيجرييو انااا اناا
ولا داير ليهم النووبة ودراري كيتلفو ليه حيت كيتشابهو كيفرقهم غير ب واحد لخالة ف ايد طه اما ياسميين بوحدهاا لي عارفة شكون طه وشكون يزيد حييت كل واحد ودقتوو ليهاا كتعرف شنو ضربهاا مكتغلطش فييهم
حذيفة: داباا شكون هزيييت داباا
ايمان: ويليي شوهتي احذيفة ملي باقي كتلف فييهم
حذيفة: دوي شكون هزييت
يازيد: هزيتيه هوا داباا نوبتيي
ياسميين: بابا هدا كداب غيعدبو الله هزييتيه هوا دابا طه
طه : يسس اجي نتصاالحو
هربات عند ايمان: ماااامي غيعضني
سخفووه عاد جرا علييهم وجا وراهاا معنقهاا
نطق كيشوف فلوليدات وقال: غمضي عينييك
ايمان: هههه واش هد لكادو مكافيش نوبتي داباا
حذيفة: هاد لكادو ديالنا بجوج ،حلي عينيك
حلاتهم بابتساامة جمعاتها من الصدمة. وهيا كتشوف جوج وريقات مكتوبة فيهم العمرة شداتهم وشافت جيهتو وقالت: غنمشييو ؟
حذيفة: غنمشييو
بلفرحة نقزات وعنقااتوو كضحك غير شافوهاا معنقاه جاو كيجرييو كلشي باغي يعنق تطيحووهم فربييع وتكاو كيضحككوو هازة لورااق بفرحة وقالت: ان شاء الله عمرة مقبوولة
حذيفة: واعدتيني بشي حاجة
ايمان: وغنوفي بوعديي احبيبي
باس ايدها وهوما متكيين فالربييع حسو بقطيرات تاع شتاا طاحت فوق منهم حسو بيها دراري وناضو بعدو عليهم كينقزو كيدورو ويلعبوو
قربهاا عندو فوق يدو باسها فجبهتهاا وخلاو دوك لقطيراات يتغلغلو مع احاسيسهم الصادقة
هزات ايمان عيونها الصاافية فسماا البيضاء بالغمام وتنهدات برااحة وابتساامة لطيفة شكرات الله وحمداتو على كاع داكشي لي عطاها ومزال كيعطيها نهار على نهار
الحياة مواقف وماشي بالضرورة تكون كاملة مكموولة ،نحمدو الله على النعم لي تعطاتناا نكاافحوو ونتفائلو خير ف القاادم اجمل
🕊️🕊️
وتشاءُ أنت من البشائر قطرةً
ويشاء ربُك أن يُغيثك بالمطر
وتشاء أنت من الأماني نجمةً
ويشاء ربُك أن يناولك القمر
وتشاءُ أنت من الحياة غنيمةً
ويشاء ربك أن يسوق لك الدُرر
وتظل تسعى جاهدا في همةٍ
والله يعطي من يشاءُ إذا شكر
والله يمنع إن أراد بحكمةٍ
لا بد ان ترضى بما حكم القدر
🕊️🕊️
_مامييي عاودي ليياا قصة
ضحكات وقالت: شنو بغيتيي نعاود لييك !
ديال الاميرات
ضحكات كتحك ليها فشعرها وقالت: كااان حتى كاان الحبق والسوساان (تبسمات) من بعد حب كبيير تزادو جوج تويمياات كيف لغزلاان
ربي عطاهم من الزيين حفنة ومن التباتة كياال وحدة كيف النواارة واسمهاا من النواار جاات ونوراات ،تقيلة ورزيينة
والتاانية سميتها من خيوط الجوهر نزلات ،رزيينة وغزالة ولكن هي على التقالة هربااات
_هههه كمليي
_ عطاهم ربيي شويية شويية ويني ف حب الرجال فولتهم تقسماات
**
غادية كتجري فالظلام هابطة من الدرووج بشوميز بيضااء والحنة ف ايدهاا وهوا تاابعهاا من اللور
_وقفيييي
_عتقووووناااي والله منكلس معاااك
خرجات على براا كانت الدنياا فازݣة بالشتاا الجردة كبييرة والدار كلها مدورة بشجر والغرس مقصداتش لباب لكبير ولكن هرباات فالجردة حتى شدها كي لفرخة قداام هيبتو سد ليها فمها بايديه لعرااض قااسحيين كيبيينوو تمارة لي دوزو باش قدر يوصل
هزهاا كترفركل دخلهاا طالع بيهاا فالدرووج كتنين وهو كيرطب : واش كاااين شي مشة كتهرب من دار العرس الهبييلة
_تسناااي حتى طيرو لييك شي وحدة
_منقدرش معاطينيش فرصة فهميي
**
_الزويييهرة راه عششتي فالقلب
سيفطات علييه تيليكمووند كتغوت: مسميتيش زويييهراااا
_يهديك الله ابنت المعلم
جمعها مع الحييط وقال: قلبيي كيمووت على جوج نتيي ولخيل
_كتقارني بحيواان ؟
**
وقف مخرج عينييه فييها وقال: اشنووو معاااجبكش بالسلااامة لي درتو معااك معااجبك
وقف باهاا قدامو وقال: احتاارم راااسك مزال متزادش لي يغوت لياا على بنتي
_واش سمعتي اعمي اش كتقوول ؟
_مكاااينش دخان بلا عافية
**
_اسمعنيي هاااه مكااينش حقك بووحدك
ضحك بخشوونة و وقف قداامهمم ترجعو اللور وقال: لي عند بووه شي حق يمشي يحفر علييه لقبر (بحدة) هداا حقيي ودمرت عليييه حتى نشف عرقيي
_هضرتك غطيييح الرواااح
زير على اييدوو وقال: روحكم نعصرها بيديي ونعطييكم لكلا_بي تكددكم
**
خبط القااضي فالطبلة وقال: بسم الله نبتدأ الجلسة ….
🕊️🕊️🕊️🕊️🕊️🕊️🕊️
الى هناا وتنتهي حكايتناا
دمتم بخير ❤️🩹❤️🩹
النهاية🕊️
(الجزء الأخير عبارة عن مجموعة تسريبات للقصة الجديدة مستقبلا )
شاركنا رأيك في هذه القصة 🌹