كنزة الأجيال

تقديم بقلم ✍️ Qisatok
كان يا ما كان... حكايات زمان عمرها ما كانت غير سلاطين وقصور، مرات كتكون فيها أبواب ما خاصهاش تتحل، وأقدار كيتلاقاو رغم أن بيناتهم زمان وجيل كامل.

وحكاية اليوم «كنزة الأجيال» بقلم هروين جوهر، غادي تدينا لعالم فيه ريحة حجايات زمان، أسرار القصور وهيبة السلاطين، الحب والصراع، وقدر قادر يجمع بين حاجات كان باين من المستحيل شي يوم يتلاقاو.

ولكن واش كل باب تحل نقدروا نسدوه ونرجعو منو كيف دخلنا؟ ولا كاين أبواب منين كاندخلوها... كتولي هي اللي كتختار لينا فين غادي تكمل الحكاية؟

القصة بعنوان: كنزة الأجيال
بقلم: هروين جوهر
قراءة ممتعة على Qisatok 🌹

بقلم الكاتبة ✍️👇
غدا زمان جدي فيه الصدا يرشي الحديد السوط يذبال جلده
و الظلم يلقى حده
و تبقى وحدك جرتيلة
لا خادم رحيم لا خليلة
كان يا مكان حتى كان لحبق والسوسان، والملك مالكو الرحمان ونصليو على نبينا العدنان،في قديم الزمان كان الخير في كل مكان كانت الريشة تقهر الميزان وكان العمى يتخطى الاسوار والحيطان وكان الشيخ يقطع الويدان والعرصة كانت تغدي القبيلة وتزيد الجيران كان وكان حتى كان....
وفي دوار بعييد مكان عندو عنوان عاشت كنزة في اسرة معندها ما خاصها..راس على راس هي والميمة المريضة مسكينة الى فطرو ما يتغداو والى تغداو ما يتعشاو ..باختصار كان الفقر خوهم وصاحبهم بالليل والنهار...
كنيزة...كنزة ميمتها كانت زينة كي زين جيلها لا فقر خلاها غبينة ولا الجوع خلاها حزينة، الشعر كي الليل كحل وطويل والعينين بالفرحة منغامرين...
اما مولاي السلطان الرجولة والفحول ..شانو عالي ومقامو بين السلاطين حاضر وباين...ما هاز الهم لعدو..اللي بتنحنيحة منو ينزل راكع عند رجليه...كلمتو عالية واغصانو تحث لرض منبت وحامية..
ايوا اسيادي اش لاقة سلطان السلاطين ب بنت سبع الرجال لا زمان يجمعهم ولا جيل شاركهم هي من قرن وهو من عهد ..!!!
بس:احذاث القصة كلها من محض الخيال فقط 🖤🌙
عنوان القصة: كنزة الاجيال 🥀
بقلم: هروين جوهر