الفصل الأخير: زواج مصلحة

جالس حدا راسها مخلوع الثوثر واضح على الملامح ديالو شي حبات العرق كيبانو على جبهتو

محمد: كان لازم غادي يجي شي نهار و غادي تفضح كلشي

جلال: انا عارف هدشي و لكن كنت بغيت تعرف بطريقة خرى ماشي هكا وشد على راسو

محمد: هدشي لي عطا الله زيدون راه معروف نهاية هدشي هو ط…

جلال: قبل ميكملها دار خنزر فيه هي مرتي انا أول واحد فحياتها و غادي نكون لخر

محمد: لول منظنش و لأخير مستحيل خاصة الى سمعت هضرتنا و غمزو

هاجر: بدات كتسترجع الوعي ديالها راسها كيضرها بالطيحة فين انا؟ حاولت تنوض

جلال: رتاحي راك سخفتي شي نص ساعة و نتي مغيبة

هاجر: وقفت هههه نرتاح من نهار دخلتي لحياتي مشفت راحة

جلال: الصمت

هاجر: أنا سمعت كلشي عرفت حقيقة زواجي بيك انو زواج مصلحة بالنسبة ليك انا والو نتا كنتي بغيتي تنتاقم من بابا على طريقي

جلال: موجه هضرتو لمحمد ممكن تخلينا بوحدنا

محمد: انا على برا خرج من البيت

جلال: شاف فهاجر خليني نشرح ليك من بعد حكمي

هاجر: الصمت

جلال: كنت فكل فرصة كنبغي نصارحك بطبيعة زواجنا ولكن مكنقدرش ولكن كوني أكيدة مكنتش بغيتك تعرفي بهاد الطريقة

هاجر: واو نتا راك ستغليتيني و عطاتو بظهرها

جلال: اي حاجة طرات بيناتنا كنتي راضية عليها مجبرتكش جلس فطرف نموسية انا ملي جيت هاد المرة باباك قالي انو ولد شريكو بغاك لزواج ولكن هو سكيري و كل نهار مع بنت معول على باه طلب مني نتزوج بيك لمدة معينة و الى تفاهمنا نكملو انا كانت غايتي كلها نتاقم من باك على طريقك حيت خدى مني الأم ديالي أنا كبرت بلا حنان أم حيت باك طمعها و خدا ليها الورث ديالها سمحت فيا انا و بابا صعيب تكبر بلا ام كفرت على البنات علاقتي بيهم غير الفراش ولكن نتي.. وسكت خليت أب ديالك يوقع على وراق كيتنازل فيهم ليا بحقو فالشركة أنا عارف حياتو هي شركة قررت نهرسو بهاد طريقة وبيك

هاجر: الصمت غير كتبكي حسات براسها رخيصة باعو و شراو فيها كيما بغاو

جلال: مغاديش نقوليك كنبغيك و حياتي بلابيك جحيم حيت انا أول نهار كنت واضح معاك الحب معنديش فحياتي و حتى الارتباط

هاجر: علاش قصتيني ملي انا مكنعني ليك والو

جلال: شاف فيها ونطق مجرد نزوة بحال لي سبقوك و زيدون نتي مختالفة عليهم نتي حلالي من بعد هاد الكلمة حس بقلبو درو و تزير عليه خاطرو

هاجر: شافت ليه فعينيه مباشرة طلقني

جلال: غادي نطلقك

هاجر: هههه كضحك و كتبكي عرفتي ندمت حيت بغيتك ولكن كون أكيد هاد القلب لي بغاك بنفس القدر كرهك عمري عرفت شنو الكره حتى عرفتو دابا

جلال: انا مكيهمنيش تبغيني او تكرهيني المهم حقي رجعتو ماشي مهم الوسيلة غادي خارج من البيت

هاجر: جلال

جلال: وقف وعاطيها بالظهر

هاجر: الى شي نهار عرفتي الحقيقة و انو هدشي لي عودتي ليا ممنو والو اش غادي دير!؟

جلال: الصمت

هاجر: بابا راجل كيعرف بينو و بين الله عمرو ستغل شي واحد او وحدة انا كنتيق فيه

جلال: مكنضنش اي واحد عندو جانب مكنشوفوهش

هاجر: غادي نجمع حويجي و نمشي لدارنا

جلال: مكيهمنيش حياتك ونتي حرة فيها من بعد متكشف كلشي ورقة طلاقك غادي توصلك

هاجر: شكرا على كلشي طلعت لبيتها جمعت حويجها و اي حاجة كتخصها نزلت شافت نظرة أخيرة فالدار و خرجت قبطت طاكسي توجهت لمحطة خدات أول كار لمتوجه لكازا.

طول الطريق حاطة راسها على الزاجة كتفكر فحياتها ملي كانت صغيرة و باها لي كيقرر عليها عمرها خدات قرار بوحدها حتى ملي تعطاتها فرصة تقرر فزواجها كتصدم بأنو كان مخطط ليه من قبل أب ديالها شخص لوحيد لي عطاتو قلبها و جسدها ستغلها تحت مسمى زواج مصلحة باش يوصل لاش بغى هرسها اصعب حاجة تبني و ترسم خطط في الأخير كلشي يتهدم على راسك دموعها محبسوش خيبة امل حسات بيها كبيرة معقلاتش على طريق حتى لقات راسها واقفة قدام باب العمارة هازة لفاليز ديالها طلعت لشقة ديالهم و صونات حتى تحل الباب

عزيزة: عنقتها بأبتسامة على سلامتكم فينو جلال وكتقلب بعينيها

هاجر: دخلت و حيدت الخمار على وجهها

عزيزة: غير شفت وجهها صفر و عينيها منفوخين ضربت على فخادها ويلي مالك😲

هاجر: ولدك أماما ولدك ستغلني

عزيزة: عنقتها وبكات معاها هي كانت خايفة من هاد نهار فعلا صدق بحال باه ششش أبنتي متبكيش ميستاهلكش

هاجر: فينو بابا؟

عزيزة: راه فالبيت حتى شركة مأخرا مبقاش مشى ليها

هاجر: عيطي ليه

عزيزة مشات عيطت لعبد الرحمان لي خرج مخلوع غير شاف بنتو تصدم جرها لصالون جلس حداها و باس يدها سمحي لي أبنتي انا لي وصلتك لهدشي

هاجر: غير كتبكي هو هو راه خدا ليك أسهم شركة باغي يبيعهم لشريكك

عبد الرحمان: انا عارف أبنتي

هاجر: كيفاش😲 وعلاش ساكت هداك راه حقك تعب سنين

عبد الرحمان: راني ماشي دري صغير راه ديت و جبت فليام أبنتي نهار عطيتو تنازل وقالي منقولها لحتى واحد عرفتو منويش يرجعهم شركة مكتعني ليا والو انا لي ضرني أنو مصانش أمانة لي عطيتو لي هي نتي قلت يمكن تغيريه مع الوقت ولكن وقع العكس المهم أنك نتي بخير ورجعتي ليا اي حاجة كتصلح مع الوقت

هاجر: انا ماشي بخير صعيب شي حاجة تهرس و ترجع تصلح انا بغيتو من قلبي و هو حطمني لي بقى فيا كثر أنك داير معاه زواج مصلحة خفتي عليا من ولد شريكك و لكن يمكن كون تزوجت بيه كون يصدقلي على جلال

عبد الرحمان: من ليوم ديري لي بغيتي عمري بقيت ندخل فحياتك نتي حرة خوفي زايد عليك خرج على حياتك غير متبكيش دموعك كينزلو على قلبي بحال العافية وعنقها كيواسيها.

عزيزة: جالسة مصدومة وسطهم عمرها ضنت أن ولدها توصل بيه الحقارة يدير هدشي كامل.

دخلت لبيت نعاس بملامح ممحية كتحس براسها مقدراش تستوعب هدشي لي سمعت ولي دار جلال في أعز ناس عندها جلست على طرف سرير كضرب على حناكها أنا لي كان عليا نربيه نجيبو معايا بزز منو محمد رباك غير على الحقد و الكره نزلو دموع حارين من عينيها دموع أم خدلها ولدها وحتى على راسها لي مساهمتش فتربيتو حست بالعافية شاعلة فصدرها كان أحساسها فمحلو تفكرات ملي كانت كتوصي فيه يرد البال لهاجر دخل عبد الرحمان شافها فديك الحالة وجلس بجنبها حط راسها على كتفو متبكيش نتي ماليك ذنب

عزيزة: ولدي خذلني أمتى كنتي ناوي تقوليا راه خدا ليك أسهم شركة

عبد الرحمان: هز راسها و شاف فيها ماشي مهم الفلوس مهم نتي و هاجر تكونو بخير ديك شركة شكون دارها انا بديتها من صفر لي دار شركة يقدر يدير عشرة

عزيزة: ولكن هداك راه جهدك ديال سنين هادي خداه ليك فرمشة عين كيفاش وفقتي من لول على هادشي

عبد الرحمان: انا ملي وافقت كنت متأكد هاجر غادي تبدل جلال وغادي يكمل هاد زواج مصلحة ولكن مكتابش كيف قلت ليك المهم عندي هو نتي و هاجر و احنا عايشين الحمد لله مخصنا خير

عزيزة: سمحلي

عبد الرحمان: حتى نتي مالك ذنب شوفي محمد اش قال لولد لي خلاه يتصرف هاكة

عزيزة: هاجر كيف بقات

عبد الرحمان: راه مشات لبيتها تنعس خليها ترتاح واخة هاد التجربة غادي تبدلها بزاف مكانش عليا نسد عليها مور داك الحادث كان خصني نخليها تعيش حياتها بحال أي بنت فالسن ديالها حتى أنا غلطت و الغلط راكبني من ساسي لراسي😞

عزيزة: مقالت ليك والو اش طرا بيناتهم

عبد الرحمان: لي عودت لي انها سمعتو كيدوي مع باه وعود ليها أش قالت ليه هاجر الحوار لي دار بين محمد و جلال

عزيزة: حطت يدها على فمها هادشي كامل واقع حسبي الله و نعم الوكيل.

عبد الرحمان: نوضي وجدي لينا شي حاجة ناكلوها وغادي يكون الخير ناضت عزيزة غسلت وجهها دازت على بيت هاجر لقاتها مكمشة فوق نموسيتها على وضعية الجنين شعرها مخربق ودموع مفزكين وجهها غطاتها و خرجت لكوزينة توجد شي حاجة خفيفة يسدو بيها جوع أما شهية راه مكيناش عبد الرحمان ملي خرجت عزيزة ناض توضا وصلى زوج ركعات باش ربي يفرجها عليهم.

في جهة خرى🤳

محسن جالس فالمكتب ديالو حتى صونا ليه تلفون جاوب: ألو حياتي

ماري: حبيبي توحشتك

محسن: أنا كثر

ماري: كيف غادي فالخدمة؟

محسن: مزيان هاد الساعة ونتي؟

ماري: خصني غير نتا☺

محسن: وينو حبي

ماري: كيف داير جلال و هاجر

محسن: جلال هادي يومين مشفتوش

ماري: انا ليوم كنتصل بهاجر مكتجوبش تشوشت عليها

محسن: متخفيش تكون مشغولة او شي حاجة

ماري: ممكن

محسن: فخبارك كتبقى فيا ديك البنت

ماري: وي خاصة انو جلال يمكن يكون ميبغيهاش أتكون صدمة ليها الى عرفت دكشي لي عودتي ليا

محسن: متنظنش جلال يقرب ليها ودير دوك تصرفات الى ماكان كيبغيها صاحبي و انا عارفو غير خصو يعرف حقيقة مشاعرو قبل ميفوت الحال

ماري: انا شاكة فداك باه عمري رتحيت ليه كيبان لي فشكل

محسن: ممكن ولكن جلال خاص يبحت فالموضوع انا غادي نكمل شي شغل عندي و ندوز عندو لدار نشوفو هو و هاجر

ماري: قوليها تجاوب على تلفونها

محسن: واخة الالة يالله أري شي بوسة راه توحشت داك الفم عندك

ماري: باسل

محسن: هي نمشي نبوس شي وحدة خرى

ماري: جرب و تشوف

محسن: قلبي بغاك مستحيل نفكر فغيرك

ماري: 😘 يالله نخليك راه تا انا عندي جتماع

محسن: اك حياتي باي و قطع حط تلفون فوق المكتب كمل دوك لوراق لي قدامو حتى داه الوقت شاف فساعة لقاها 18h00 ليل هز كونطاك طوموبيل خرج من شركة ركب فسيارتو و الوجهة دار عند جلال مسافة طريق حتى كان قدام باب الفيلا دق حل عليه جلال بوجه ممحي.

محسن: دفعو فين العود

جلال: الصمت سبقو داخل لجليسة لي فالمرح جلس على الفوطوي مفرق رجليه وحادر راسو

محسن: سد باب و تبعو جلال مالك🤨

جلال: كلشي تفضح ورجع راسو لور

محسن: كيفاش وضح كثر

جلال: عود ليه كلشي عاد شاف فيه

محسن: عرفتي اجلال غادي تندم على هدشي لي درتي غادي تندم على مرتك لي ضيعتي بسباب نتقام ديالك هاجر كتعشقك بزاف و نتا هرستيها و محشمتيش كتقول ليها غادي نطلقك واش قادر دير هاد الخطوة و طلقها

جلال: معرفتش معرفتش دكشي لي جى ففمي ديك لحظة قلتو

محسن: ديك ساعة تاصل بيا نوصلها متخليش البنت معارفة منين دخل أو تخرج راه أمانة عندك عاد مرتك الى تلقى ليها شي واحد

جلال: عاد عرف الخطأ لي دار أنو هاجر ديما الدار و حتى الى خرجت فمدينتها كتخرج مع باها او مو تخلع عليها هز تلفون كيصوني مكتجوبش

محسن: كنسمع بحال صوت شي تلفون

جلال: دور راسو كيسمع الصوت جاي من الكوزينة دخل هو يلقى تلفونها محطوط فوق البوطاجي هزو وحلو مع مديراش ليه كلمة السر لقاها دايرة تصويرتو زير على تلفون ولي زاد على مبيه مدخلاه بحياتي رجع عند محسن راه نسات تلفون حتى ماري متاصلة بيها.

محسن: أش غادي دير دابا

جلال: معرفتش

محسن: فين هو باك

جلال: جاه شي تصال ورجع لأمريكا على مابان لي شي حاجة مستعجلة

محسن: عرفتي أش غادي دير نوض بدل حويجك نخرجو يضربك البرد و نفكرو فهاد الحريرة ديالك.

جلال: اك طلع لبيت لبس شورط و تريكو وصندالة بيتية وهبط عند محسن سد الباب و تحركو على رجليهم.

جالسة فبيتها من بعد مافاقت من نعاس محطت حتى حاجة فمها دخلت عندها عزيزة كتشوف فيها و كتحسر على حالتها مغاديش تاكلي شي حاجة؟

هاجر: مافياش والله

عزيزة: جلست حداها دوزت يدها على شعرها سمعي اهاجر انا كنحسبك بنتي وربي شاهد عليا عمري عاملتك على اني مرت باك بلعكس ديما كنت نشوف فيك طرف مني انا بغيتك تعودي ليا كلشي متخبي عليا حتى حاجة واش طرات بيناتكم شي حاجة راك فاهمة علاش هضرت

هاجر: شافت فيها و بتاسمت بانكسار هو خدا مني كلشي أماما حطت يديها على وجهها بدات تبكي

عزيزة: عودي ليا من نهار مشيتي نتي و ياه من دار حتى رجعتي متخبي عليا والو

هاجر: ملي مشيت من الدار سكنا في فيلا …… حتى سمعتو كيدوي و هو باباه عودت ليها كلشي مخبات والو.

عزيزة: أشنو ناوية ديري!!

هاجر: انا كنبغي جلال بزاف هدا أمر مفروغ منو ولكن منقدرش نكمل معاه هو مكيبغينيش حتى ملي تزوجي مبغانيش ولا حتى يقدر يبغيني هو قالها بفمو الحب معندوش فالقاموس الحقد و الانتقام لي تربى فيه من صغر عمى عينيه و ألى كملت معاه غير غادي نتعذب و نذل راسي غادي نطلب طلاق

عزيزة: الى عرف راسو راه غلط فحقك و في حق باك أش ديري واش غادي بقى نفس القرار؟

هاجر: جلال هرسني من الداخل منقدرش نكمل معاه حتى الى بغيت نكمل خصني مدة طويلة بينما دويت جروحي خصني نتعلم نعيش بوحدي و نقرر لراسي عيت فكل مرة واحد ياخد القرار فحياتي

عزيزة: هادي اول تجربة ليك فالحياة فعلا كانت فاشلة ولكن ماشي نهاية الدنيا باباك خدا قرار غادي يخليك على خاطرك تعيشي حياتك كيف باغة نتي و تقري المصير ديالك من هنا القدام انا مرضياش على اش دار معاك ولدي و اي قرار خديتيه انا معاك فيه وعنقتها.

هاجر: عنقتها الله يخليكم ليا

عزيزة: نوضي توضاي و صلي ربي غادي فرجها من عندو خرجت من بيتها.

ناضت هاجر توضات وصلاة صلاتها رفعت كفوفها لله عز وجل ياربي عوني … مسحات دموعها بكفها …خصك تكوني قوية أهاجر لأيام جاية غادي تكون صعيبة.

في الجهة الثانية عند الدراري👬

جالسين فالقهوة حتى كيصوني تلفون جلال: ألو الوليدة واش هاجر عندكم

عزيزة: هههه عاد كتسول عليها فين كنتي ملي خليتيها جاية بوحدها

جلال: هي لي بغات تمشي

عزيزة: مزال خصنا نهضرو أولد كرشي غدا صباح تكون عندي

جلال: هي كيف بقات😟

عزيزة: فاش كيهمك غدا تكون عندي باش نقادو هاد المشكيل

جلال: واخة

عزيزة: قطعت عليه دارت عند عبد الرحمان و هاجر لي كيشوفو فيها غدا غادي يجي و نحلو هاد المشكيل.

عبد الرحمان: هاجر بنتي انا مغادي نقوليك والو القرار دابا بين يديك ديري لي بغيتي وانا و ماماك راه فجنبك.

هاجر: انا بغيت طلاقي صافي اي حاجة خرى مسامحة فيها.

عبد الرحمان: لي بان ليك.

محسن: الوليدة ديالك

جلال: اه بغاتني غدا نزل عندهم صباح

محسن: هادي هي الفرصة باش دوي معاها متخربش زواجك عرف أش طاري بعدا

جلال: الصمت

محسن: زعزعو واش كتبغيها

جلال: انا عارفني مكنبغي حد

محسن: كيبان لي العكس غير متسرعش نوض يالله تحرك لدار باش ترتاح وتعرف غدا أش غادي دير في حريرتك

جلال: وقف دكشي لي غادي ندير خلص القهوة و خرجو.

صباح جديد حامل معاه أحداث كثيرة

واقف قدام الباب بلباسو الرسمي قميجة بيضة و كوستيم في الاسود كيبان من برا هادىء ولكن من لداخل بحر هايج متردد يصوني عليهم تنفس مزيان و صونا فالباب رجع زوج خطوات اللور بغات تنوض عزيزة تحل الباب عبد الرحمان: غير خليك انا لي غادي نحل حل الباب لقاه قدامو تبسم ليه دخل أولدي

جلال: خنزر فيه واقيلة عندي الوليد ديالي مزال حي اما نتا غير راجل مي

عبد الرحمان: تقدم عندهم لصالون فين جالسة هاجر و عزيزة

جلال: سد الباب و تبعو لصالون بغى يسلم على عزيزة حبساتو بيدها

عزيزة: حبس متسلم عليا منسلم عليك

جلال: شاف فيها و بتسم بسخرية من صغري كتفضليهم عليا

عزيزة: عندي شي هدرة معاك تبعني لبيتي

جلال: تبعها لبيت بلا كلمة

عزيزة: علاش درتي هكا؟ شنو ذنب هاجر فهادشي؟

جلال: خاشي يدو فجيب سروال كنظن هاجر عاودت ليك كلشي انا نتقمت حيت خليتيني انا و بابا و تزوجتيه حيت كبرت بلا أم عشت بوحدي أما هاجر كانت وسيلة

عزيزة: بملامح ممحية كملتي و سمع اش غادي نقوليك مزيان باك محمد كان سكايري كان كيضربني نهار حملت بيك قالي نزلك وأنا مبغيتش نقتل روح ماليها ذنب باك كان كيدخل عليا لعيالات لداري و كيجيب حتى صحابو يقمرو نهار شديت ورثي طمع فيه قالي عطيه ليا بعت كلشي و فلوس درتهم فالبنكة واش نعطيه فلوس يلوحهم فالقمر موفقتش وطلقني بلا ميشوف موراه ملي تزوجني عبد الرحمان بغيتك تجي تعيش معايا مبغيتيش كانت عندك ديك ساعة 15 عام قررتي تعيش معاه جيت عروسة لهاد الدار لقيت بنية عندها عام و مكملش هي هاجر عملتها بحال بنتي و ربيتها فهاد الدار لقيت لاحترام لي معطاهش ليا باك عرفتي علاش عمامك مكيسولوش فيك هوما و جدك حيت باك باع ليهم نص فالأراضي ديالهم بملكية مزورة باش ميدخلوهش لحبس هرب لأمريكا وداك معاه نزيدك باك أش دار اغتصاب هاجر فالصغر باك لي مسؤول عليه ملي ضربتي راجل وطاح غيب قبل ميجيو لبوليس يديوه قالها لينا قالينا محمد لي مسيفطني بغيت نقولها ليك عارضني عبد الرحمان قالي بلا منشوهو صورة الاب مثالي فعينيك باش تزيد تأكد هاك نمرة عمك عيط و سول و تأكد الى كذبت انا عليك هوما مغاديش يكذبو كن جيتي واجهتيني من اول مكنتيش غادي توصل لهنا

جلال: كل مكانت كتقول حاجة كان كيحمار و كيزير على يديه وصدرو كيطلع و نزل من كمية الغضب لي حس بيها

عزيزة: كن قلبتي ظرف لي عطيتك كادو فعرسك غادي تلقى شيك فيه فلوس لورث قصمتهم بينك و بين هاجر حيت نتوما بزوج ولادي ولكن خسارة نتا متستهلش ديك البنت حطمتيها ملي مباغيهاش مكانش عليك تقيصها

جلال: الصمت وحادر راسو

عزيزة: شفتك سكتي دوي جاوبني

جلال: دابا شنو المطلوب مني

عزيزة: طلب سماحة من الناس لي أذيتي أولهم هاجر

جلال: واخة يالله نخرجو عندهم خرجو عندهم لصالون لقى هاجر بحال كيف معود كيشوفها لابسة خمارها و مغطية وجهها جالس حداها سي عبد الرحمان

هاجر ممكن نهظرو شوية بوحدنا

هاجر: سمح لي منقدرش اي حاجة نقولوها قدامهم زيدون راهم عارفين كلشي ماشي غراب علينا

جلال: وجه كلامو لعبد الرحمان عمي انا كنعتذر منك على كلشي فعلا انا كنت باغي نبيع نصف فالشركة ديالك ولكن منقدرش ناخذ شي حاجة تعبتي فيها بديتيها من الصفر جبد من جيبو ورقة تنازل وعطاها ليه هاك حقك رجع ليك.

عبد الرحمان: كنت متأكد المعدن ديالك صافي من الداخل واخة كلشي.

جلال: بشبه ابتسامة مكنظنش رجع شاف فهاجر اش قررتي

هاجر: بغيت طلاقي انا متنازلة على حقوقي كاملين

جلال: هدا أخر كلام عندك

عبد الرحمان: عزيزة واحد الدقيقة

هاجر: بابا غير خليكم كلامي واضح

جلال: طلاقك غادي وصلك معاهم حتى حقوق ديالك وثم خارج رجع شاف فيها كنتمنى شي نهار تقدري تسمحي ليا تبعاتو الام ديالو.

عزيزة: جلال

جلال: دار عندها نعم

عزيزة: ملي توحشني وتنزل المغرب تصل بيا ونجي نشوفك فينما كنتي

جلال: مكنظنش غادي رجع شي نهار حتى نتي الوليدة سمحي ليا حتى نتي راه غادي نبقى نتاصل بيك مرة مرة

عزيزة: نتا ولدي غادي تبقى ولدي باستو فراسو

جلال خرج من الدار شخص اخر حس براسو تشمت وكان وسط كذبة كبيرة حل صدايف لولين ديال قميجة وحيد لفيست ضرب فلون شد طريق لوجهة غير معلومة.

جالس حدا البحر جامع كمام القميجة كيشوف بعيد حتى جاه اتصال

جلال: الو محسن

محسن: فينك

جلال: حدى البحر فبلاصتنا

محسن: خليك تما انا جاي عندك

جلال قطع تلفون هز عينو لسماء كيبانو ليه نجوم مزينينها تنهد ورجع شاف قدامو دازت شي ربع ساعة وصل عندو محسن حط طوموبيل و جلس حداه

جلال: الواليد كان كاذب عليا فكلشي

محسن: أش طرا ملي مشيتي

جلال: عاود ليه كلشي

محسن: و غادي طلقها

جلال: ظلمتها بما يكفي أصلا هي ماليها والو فهدشي

محسن: مكانش عليك تقرب ليها ملي باغي طلقها

جلال: حدر راسو

محسن: هاجر كتبغيك من أحسن عطيها شوية الوقت لي كيبغي عمرو يحقد

جلال: معرفتش واش غادي يجي شي نهار و تسامح ليا

محسن: شفتي نتا والله حتى كتبغيها غير عترف عادي راه مرتك فين عمرك ضربتيني على شي وحدة 😉

جلال: هدوك راه راك عارفهم ديالاش ولكن هي مرتي لي قرب ليها نقتلو ماشي غير نضربو

محسن: ههههه والله حتى كتبغيها المهم طلاق مطلقش

جلال: معرفتش خصني نفكر مزيان راه غدا غادي نطلع لأمريكا خصني نقاد أموري باش نعرف أش غادي ندير ونشوف الواليد خصو يفسر ليا هدشي.

محسن: الله يديك على خير.

جلال: امين كملو جلسة ديالهم من بعد كل واحد توجه لدارو غير وصل جلال لدار حلها ودخل اي بلاصة داز منها كيتفكر فيها هاجر دخل لبيتهم مزال ريحتها فيه مشا بدل حويجو و هز تلفونها كيشوف تصاورها حتى داه نعاس فاق صباح مخربق جمع حويجو فالصاك طاحت عينو على ظرف لي عطاتو عزيزة حلو لقى فيه شيك بمبلغ خيالي لاحو مع حويجو شاف فالدار نظرة أخيرة و هبط بحالو متوجه لمطار الوجهة امريكا.

بعد ساعات في امريكا⬅️

وصل جلال لدارو حتى كيسمع دقان فالباب حل لقاها ماري وجها باين باكي

ماري: جلال عيت نتصل بيك مكتجوبش

جلال: من لبارح ملي كنت مع محسن تلفوني طافي دخلي متبقايش فالباب

ماري: لا غير خليني خصك تمشي معايا

جلال: شاف فيها فين مالك اماري

ماري: باباك فالمستشفى في حالة حرجة وباغي يشوفك

جلال: حس بدنيا دارت بيه كيفاش

ماري: لبس ويالله فطريق نعود ليك

جلال: انا يالله وصلت هاني لابس غير يالله سد باب دارو وتوجه مع ماري لسيارتها

ماري: عمي ملي جا اخر مرة من المغرب تعرض لافلاس لعب القمر و خسر كلشي مستحملش وجاتو ذبحة صدرية على لي كيقولو الأطباء معندوش فرصة للنجاة

جلال: وذنيه تصمكو معقلش على طريق او لهضرة لخرى لي قالت ماري حتى لقى راسهم وصلو لمستشفى من بعد ماخدا رقم الغرفة من عند ماري توجه لغرفة عند باه كيبان ليه ممدد فوق السرير و ضيرين بيه سلوكة ملي حس بيه محمد حيد القناع على وجهو وشاف فيه ولدي جيتي

جلال: بابتسامة كيف بقيتي

محمد: مبقاش ليا بزاف خفت لتجي و تلقى مول أمانة دا أمانتو

جلال: ششش متجهدش راسك

محمد: انا ولدي ظلمت بزاااف ناس أولهم عائلتي و ماماك و حتى هاجر

جلال: انا عارف كلشي المهم تكون نتا بخير كلشي غادي يتصلح غير نتا تولي بخير.

محمد: هادي لخرة ليا خسرت كلشي كنت غادي نخسرك حتى نتا بغيتك تقول لماماك تسمح ليا و حتى هاجر

جلال: واخة قبط يدو و باسها كنواعدك كلشي غادي يتصلح الواليد

محمد: سامحتيني

جلال: انا مسامحك

محمد: واعدني غادي تكمل مع هاجر مطلقهاش هي الوحيدة لي قدرت تغيرك مبقيتيش جلال لي كنعرف كح كح

جلال: منقدرش نربطها معايا حياتها كاملة هي باغة طلاق

محمد: عطيها الوقت واعدني

جلال: غمض عينيه حابس دموعو كنواعدك على اثر هاد الكلمة تسمع جهاز كيدير أنذار على توقف القلب ناض جلال مفزوع عيط لطبيب جاو كيجريو خرجوه و دخلو عندو بعد دقائق خرج طبيب موجه كلامو لجلال كنتأسف ولكن فقدنا المريض طبطب على كتفو و تخطاه.

جلال دار عنق ماري رغم كلشي كيبقى الأب ديالو يازوين يا خيب داز أسبوع تدفن فيها محمد بطريقة أسلامية عيط جلال لعزيزة و خبرها انو باه مات بقى فيها ودعات معاه بالرحمة و سامحاتو على كلشي حتى هاجر واخة ماكنتش عندها خلطة بيه ولكن بقا فيها عبد الرحمان تصل بجلال عزاه بدورو قاليه انا راه باك وقتما حتاجتيني انا معاك حاول جلال يتخطى هاد الصدمات المتتالية لي تعرض ليها و دفن راسو فالخدمة.

بعد مرور شهر هاجر قدرات تخطى أزمتها وتوقف على رجليها اكيد عزيزة و عبد الرحمان مساندينها و حتى ماري فهاد شهر نزلت لمغرب تشوف محسن و مشات عندها زارتها دوزت معاها اسبوع ولفت عائلتها ولفوها بحكم ضحوكية كدير بلاصتها علاقة ماري و محسن مزال مستمرة واحد جلال مقابل غير الخدمة مرة مرة كيتاصل بعزيزة كيسول فيها و فهاجر ملي كتجبد ليه موضوع طلاق اش غادي يدير فيه كيقوليها طلاق ممطلق مخلي هاجر على راحتها و حتى هي من اخر لقاء بيناتهم مرجعتش دوات معاه.

صباح جديد فاقت بحال كل نهار دخلت قضات حاجتها و خرجت لبست أسدالها توجهة للقبلة كتصلي و كدعي الله من قلبها يعونها على القرار لي خدات كملت جمعت صلايتها و حويجها في فاليز و خرجت عند ماماها و باباها لقاتهم كيفطرو في صالون

هاجر: بابتسامة مشرقة صباح نور

عبد الرحمان/عزيزة: صباح الخير

هاجر: جلست خدات كاس اتاي احم بغيت نفاتحكم فواحد الموضوع

عبد الرحمان/عزيزة: الله يسمعنا خير

هاجر: انا قررت نسافر لشي مدينة نبني فيها حياتي و مستقبلي محتاجة نبعد و نعتامد على راسي أكيد غادي نبقى في كل مرة نتاصل بيكم

عبد الرحمان: ولكن ابنتي باش غادي تبني مستقبلك ونتي معندكش فلوس

هاجر: عندي فلوس لي عطاتني ماما كادو لعرسي وحطت يدها فيد عزيزة

عزيزة: وراجلك خصك تقوليها ليه مدام هو ماباغيش يطلق راك مزال محسوبة عليه

هاجر: نتي غادي تكلفي و غادي تقوليها ليه نهار يمل راه غادي يطلقني بوحدو كنظن وصل لداكشي لي بغى ماكاين لاش نطولو فهادشي

عزيزة: بزوجكم راسكم قاصح ابنتي

هاجر: ماشي مسألة قصوحية راس غير انا مبقيتش باغاه لا هو لا غيرو في حياتي

عبد الرحمان: فين غادي تسافري واش المغرب ولا خارج المغرب

هاجر: غير المغرب اش داني لشي خاريج غادي نمشي لافران فبالي واحد المشروع باغة نطبقو ولكن بغيتكم تواعدوني متقولوش لجلال فين انا ملي نتوحشكم نجي عندكم و حتى نتوما.

عبد الرحمان: الله يرضي عليك

عزيزة: اوا امتى السفر

هاجر: ليوم غادي نتحرك الى بغى الله

عزيزة: اش غادي ديري في الكراء واش وجدتي راسك

هاجر: ههه اه وجدت كلشي متخافيش ماماتي راني وليت مسؤولة على راسي.

عبدالرحمان: اكيد نوصلك

هاجر: لمحطة اه بغيت نعتمد على راسي كنتمنى تحتارم قراري.

عبد الرحمان: لي بان ليك انا واعدتك مبقيتش ندخل في حياتك كملو فطورهم عونتها عزيزة في جميع الحويج توادعت معاها بالبكى وصلها عبد الرحمان لمحطة كيف قالت ليه ودعها ورجع لدارو طلعت لكار خدات بلاصتها ولكن هاد المرة و هي مبتاسمة أبتسامة كلها أمل.

من بعد ممشات هاجر عزيزة تاصلت بولدها🤳

عزيزة: ألو ولدي لباس عليك

جلال: الحمد لله و نتي و هاجر و عمي عبد الرحمان

عزيزة: كلشي بخير هو تصلت بيك بخصوص هاجر

جلال: شنو طاري ليها

عزيزة: هاجر سافرت قررت تبدا حياتها من جديد و قالت ليك نهار غادي تعيا راك غادي طلقها

جلال: كيفاش سافرت بوحدها معامن تشاورت واش نسات راني راجلها داك طلاق لي عمرها تحلم بيه هي مرتي و غادي تبقى سميتها مرتابطة بسميتي حتى نموت قطع على عزيزة و هو مغدد بالعصاب.

عزيزة: الله يهديكم على بعضياتكم حطت تلفون و مشات تكمل شغل الدار.

بعد ساعات وصلت لأفران كرات فيلا صغيرة متكونة من صالون كبير و بيت ضياف و لفوق فيه بيت نعاس كوزينة مشات لبنكة حلات حساب فاسمها و دفعت شيك لي غادي يتصرف من هنا 3 أيام بينما رتبت أمورها رجعت لفيلا ديالها نظفتها و قاداتها ستفت حويجها تصلت بعبد الرحمان و عزيزة طمنتهم عليها وتكات ترتاح بعد يوم شاق بجري جري .

صبح صباح جديد فاقت دارت روتينها صلاة و فطرات و خرجت كدور فالمدينة اي بلاصة كدوز منها كتشوف فيها جلال و أسبوع لي دوزو فهاد المدينة مشات عند سمسار لي شاف ليها الفيلا و صاتو على شي ريسطو يكون بسيط و حتى مبلغ ميكونش كبير لكراء أو لبيع فعلا قتارح عليها عدة محلات عجبها واحد جا في وسط المدينة لذلك قررات تفاهم مع مولاه هو غرضو غير يكريه و ديجا المحل مصلوح تفاهمت معاه على حساب الغد تجيب الفلوس و تكتب معاه العقد باش تبدا مشروعها صغير هاجر قررات انها دير مطعم حيت مولوعة بشي حاجة سميتها الطبخ اغلب الوقت لي كانت كدوز فالدار جالسة كدخل فيه المطبخ.

في الجهة الثانية جلال جالس مع ماري فمقهى☕

ماري: على معودتي ليا خصها شوية الوقت عطيها وقت

جلال: تاصلي بيها و حاولي تعرفي ليا فين هي ياك حنا اصدقاء عونيني بليز

ماري: اك رولاكس خدات تلفون من صاكها وتصلت بهاجر هاي بب كيف دايرة لباس عليك

هاجر: مزيان و نتي و محسن

ماري: مزيان تلاقيت بجلال قالي راك سفرتي تواحد معرفك فين مشيتي

هاجر: اه بغيت نبعد و نبدا حياتي من جديد و نبني مستقبلي

ماري: واش برا المغرب

هاجر: شكات انها معاه وي سافرت لبرا

ماري: فين مشيتي

هاجر: ماري مبغيت حد يعرف بلاصتي بغيت نصفي ذهني و رتاح

ماري: اك على خاطرك المهم تكوني مرتاحة

هاجر: حاليا كنحس براسي مرتاحة المهم تهلاي في راسك و سلمي على حبك هههه

ماري: اك 😘 حتى نتي ردي البال لراسك قطعت معاها دارت عند جلال كيف كتشوف مبغاتش تقول فين هي عطيها شوية الوقت.

جلال: الصمت

ماري: جلال واش هدشي لي كدير حب و لا غير تكفير على أش درتي فيها.

جلال: معرفتش

ماري: لي بان لي كتبغيها

جلال: شاف فيها بقا ساكت

ماري: هاجر كتبغيك من صغر عمرها فكرت فشي واحد أخر أصلا نتا عارف كيف دوزات المراهقة ديالها حسن مني انا صعيب تنساك غير عطيها لوقت بينما عرفتي حقيقة مشاعرك جيهتها.

جلال: الوقت كلو ديالها.

تسريع الاحداث بعد مرور سنة و ثلاث أشهر في هاد المدة هاجر تبدلات بزااااف زادة جمال على جمال ولاو عندها مؤهلات بارزين خاصة ملي تسجلت فلاصال باش تعمر وقتها ولات أهم حاجة عندها هي المطعم ديالها لي لاقة نجاح كبير خاصة في منطقة سياحية بحال أفران دوزت بيرمي ولات عندها سيارة خاصة بيها و حتى الفيلا شراتها من مولاها اما المطعم مزال كرياه دارت صداقات داخل العمل خاصة مع شاف نبيل شخصيتو قريبة لشخصيتها بزاااف ولد زوين في مقتبل العمر عندو 32 سنة من وسط متوسط ملامحو مغربية 100% فورمتو عادية كيعتبر هاجر بحال ختو خاصة ملي عودت ليه على ظروفها دائما مساندها حتى هو خاطب بنت خالو كيموت عليها هاجر ولات جتماعية بزاف ديما هي وماري في تلفون.

عزيزة و سي عبد الرحمان متغير عندهم والو مرة مرة كيزورو هاجر حيت ملي تشغلت مع المطعم مبقاتش لقات الوقت فين تجي عندهم هي عبد الرحمان رجع يكمل خدمتو عادي فشركتو وشرى نصف ثاني من شريكو بمساعدة جلال.

ماري و محسن علاقتهم طورات بزااااف مشى لأمريكا يخطبها و عائلتها رفظو بحكم ديانة مختلفة لقات ماري في أول مشكيل مع عائلتها باش تقنعهم بعد أصرار محسن عليها وبان ليهم انو كيبغيها قتانعو وافقو على الخطوبة لي كانت فأمريكا ولكن العرس يكون مغربي و فالمدينة فين بدات قصتهم عروس الشمال ودابا راه كيوجدو لعرس💞

جلال زاد تفورما و قصاح بعد على جنس النساء عتارف لراسو بلي ولى كيعشق هاجر دائما كيتفكرها حتى ملي كيتصل بعزيزة كيسول عليها كتقوليه راها بيخير وراه مزال باغة طلاق كان كيتمنى يربطهم شي ولد او بنت باش تبعد فكرة طلاق من راسها مي مكتابش هاد المدة لي دازت رجع جلال من اكبر رجال أعمال في امريكا وقتو كيضيعو في بوكس كيفرغ طاقة سلبية او الخدمة مبقاش كيجمع كيف كان ولى كيصلي و كيعرف بينو بين الله بعد على كل المحرمات دائما كتجي ماري طل عليه وحتى محسن مرة مرة كيسول فيه بتلفون.

أصبحنا و اصبح الملك لله 🌄

محسن كيدق فالباب ماري فيقي لغادي نحل الباب حل لباب لقاها ناعسة و كل رجل فجيه ضحك عليها و توجه عندها باسها فراسها و هرها فيقي النعاسة

ماري: باقي الحال😐

محسن: نوضي باش يالله تاصلي بهاجر تجي تعونك راه باقي لينا أسبوع على العرس ووريني شطارتك كيف غادي ديري حتى ترجعيهم.

ماري: جات جالسة و كضحك بشر و شنو غادي تعطيني الى درتها😏

محسن: نفكر🙄

ماري: نو بب انا نفكر في بلاصتك احم بغيت نخدم معاك

محسن: تنظن خصك تفرغي لدارك 🤔

ماري: غادي نوفق بين خدمتي معاك و الدار

محسن: اك

ماري: عنقاتو يس😘

محسن: احم نوضي هبطي تفطري لنصدقو مصبقين الدخلة راه الوليدة لتحت كتسناك هي و مامات جلال و متنسايش تاصلي بهاجر راه ملي كتبدا الخدمة كتلوح تلفون وضيعي نهار على والو😉.

ماري: جلال غادي يجي؟

محسن: شاف فساعتو تكون نزلات طيارتو انا نوجد راسي باش نمشي نجيبو من المطار

ماري: اك سيفطات ليه بوسة في الهواء بينما هو خرج من البيت ديالها مشى لبيتو بدل و نزل و الوجهة المطار يستقبل جلال.

ماري من بعد مدوشت لبست سروال واسع و تريكو نص كم هزات تلفونها و تاصلت بهاجر🤳

هاجر: الو الزين

ماري: 😢😢😢 نتي صحبتي الوحيدة و عارفة عرسي بقات ليه سيمانة مجيتيش تعاونيني و توقفي بجنبي هادي هي صحبة

هاجر: علاش كدمعي دابة غادي نجي ليلة الحنة و زيدون راه ماما معاك و حتى بابا

ماري: واش ماماك هي نتي و باباك راه كيبقى مع رجال

هاجر: انا نشوف نخلي نبيل يقابل ليا المطعم و نجي

ماري: ثاني نبيل واش بينكم شي حاجة كدوي عليه بزاف

هاجر: هو صديق لا غير

ماري: بديت كنغير منو المهم امتى غادي تجي

هاجر: غالبا غدا عشية نكون عندك

ماري: يس و اخيرا غادي نشوفك و نشبع منك توحشتك

هاجر:ياك ديما معاك فتلفون اجي بعدا ياك متأكدة لاخر ماغاديش يكون🙄

ماري: متفكرينيش جلال صدق كثر منك ملي رجع اكبر رجل اعمال مبقاش عندو الوقت لصحابو مجايش عرض عليه محسن و عتاذر.

هاجر: مزيان المهم انا غدا نكون عندك يالله حبيبتي خليني نمشي نقاد اموري لندير بناقص😏

ماري: اك اك باي قطعت و هي كضحك بشر هبطت لتحت لقات عزيزة و مامات محسن جالسين غمزة لعزيزة بعربية معكلة نطقت تمت المهمة بنجاح😈

عزيزة: واش غادي تجي😲

ماري: وي

عزيزة: و جلال

ماري: مشى يجيبو محسن من المطار

عزيزة: باست ماري ان شاء الله يرجعو لبعضياتهم

ماري: اكيد خلي كلشي عليا قدامنا أسبوع خصنا نستغلوه

مامات محسن مافاهمة والو وسطهم حتى عودت ليها عزيزة كلشي وقالت ليها تعاونهم حتى هي.

واقف قدام المطار كيتسنا جلال متكي على الطوموبيل حتى كيبان ليه جاي صحاح على اخر مرة شافو فيها ملي مشى يخطب ماري توجه عندو و عنقو عناق رجولي خدا من عندو لفاليز

محسن: على سلامتك

جلال: الله يسلمك مبروك امولاي سلطان

محسن: هههه اوا باقي مطلعنا فالعمارية حط لفاليز فالكوفر وركبو متوجهين لدار.

جلال: اوا كيف غادة امور تحضيرات

محسن: الحمد لله راه ماماك وراجلها عندنا جاو يعونو الوليدة

جلال: وهي كاينة؟؟

محسن: مالك مقدرش تقول سميتها راها مرتك زعمة🙄

جلال: مرتي هههه نتا عارف كلشي هي باغة طلاق ليوم قبل غدا تبدلات بزاااف كنظن حتى داك حب طفولة مشى

محسن: قلت ليك شحال هادي راك كتبغيها

جلال: اه كنبغيها ومن بعد انا دمرت كلشي

محسن: غمزو باقي مفات الحال قدامك شوية الوقت ستغل فرصة ديال لعرس

جلال: هههه هادو افكار ماري اما نتا خبز ربي

محسن: جمع راسك متعيرش المدام

جلال: هز يديه كنعتذر المهم كتنفع واخة هبيلة

مسافة طريق حتى لقاو راسهم وصلو لفيلا فين ساكنين دار محسن مع تحضيرات قررو يجلسو فالفيلا و يديرو العرس فيها لقاو دنيا عامرة جاو عائلة محسن لي بعاد خوالو و عمامو و ولادهم و بناتهم.

جلال: بانت ليه قضية مرونة ناس كثار كن عفيتيني خليتيني نمشي ابارطمو ديالك يكون حسن

محسن: زيد دخل شوف بعدا الوليدة ديالك من بعد نوصلك تما.

جلال: العز مع داخل تلقى مع عبد الرحمان تحنا على يديه باسها ليه

عبد الرحمان: الله يرضي عليك أولدي

جلال: كيف داير اعمي

عبد الرحمان: الحمد لله حنا مع الوقت على سلامتك دخل عند الوليدة ديالك من صباح هي كتسناك

جلال: واخة دخل لقى ماماه جالسة مع شي بنات من عائلة محسن غير شافوه تقادو فالجلسة و حلو فمهم فيه

عزيزة: ولدي على سلامتك و عنقاتو

البنات: شفتو شحال زوين

البنت 1: باينة فيه زماكري

البنت 2: هادا هو راجل

عزيزة سمعت هضرتهم هي تقوليه بصوت مجهد شوية باش يسمعوها مرتك غدا غادي تجي.

جلال: بصح

عزيزة: ساخراتو شوية على بنات لي كانو غادي ياكلوه بعينيهم اه غدا عشية تكون هنا وحاول تصلح امور بيناتكم.

جلال: غادي نحاول الوليدة هنا دنيا عامرة غادي نمشي ابارطمو ديال محسن و نجلس فيها.

عزيزة: واخة ولدي الله يرضي عليك خرج باش يمشي يرتاح فدار محسن مشات معاه ماري و محسن وصلو طلعو لدار حل محسن لباب.

ماري: اول فوطوي تلاحت عليه واااع عيت تماك ناس بزاف

محسن: نتي لي باغة عرس مغربي اوا هدا هو العرس المغربي

ماري: غدا غادي تجي هاجر كتشوف في جلال

جلال: اه قالتها لي الوليدة

محسن: مرتي زوينة معليكش المهم دار دارك حنا مشينا

جلال: كن غير بقيتو تونسوني

ماري: متخافش غدا جايا لي تعمر عليك ابارطمو غير هو وجد راسك تسمع الهضرة😉

جلال: غبر نتا و مرتك من قدامي خرجو و سد الباب من موراهم.

فنظركم جلال واش مستعد للمواجهة مع هاجر؟

في جهة خرى بعد منتصف الليل واقفة هاجر مع نبيل من بعد مقفلو المطعم هاجر: نبيل كيف وصيتك رد لبال راك عارف عرس ماري منقدرش نخليها بوحدها

نبيل: كوني هانية نيت فوجي مع راسك

هاجر: هاك سوارت بعدا الى حتاجيتي شي حاجة بيناتنا تلفون.

نبيل: ضروري ختي الله يوصلك على خير وردي البال لراسك فالطريق.

هاجر: امين ودعاتو مشات لفيلا ديالها حطات طوموبيل ودخلت نيشان لبيتها جمعت حويجها لي غادي تحتاج فلافاليز دخلت دوشت وخرجت نعست.

أصبحنا و أصبح الملك لله فايق دايخ وجد قهوة كحلة باش يصحصح شربها دوش وصلى صلاتو بدل حويجو كيتسنا ماري و محسن يجيو عندو باش يشوفو ممول الحفلات و الجوق … دوز نهار معاهم غير من هادي لهادي.

جلال:عيت

محسن: حتى انا

ماري: كتسمع تلفونها كيصوني كانت جويه 17h00 ليل هزاتو لقات نمرة هاجر جوبت بزربة الو حبي

هاجر: انا راه وصلت كنتسناكم ف*** عيطت لبابا باش يجيبني مكيجوبش يكون كيصلي

ماري: اك انا نجي عندك

جلال: واش وصلت

ماري: اه محسن خلينا نتحركو لبنت متبقاش فزنقة

محسن: اك

جلال: انا حطني غير هنا نشد طاكسي غدا و نشوف شي لوكاسيو نكري شي طوموبيل

محسن: يالله معانا

جلال: ماشي دابا

ماري: معكس كثر منها

جلال: عارف نزل وسد طوموبيل تحرك محسن و ماري لفين قالت ليهم هاجر حتى و قفو عليها لقاوها جالسة فطوموبيل للعلم فقط ماري و محسن عرفو هاجر بقات في المغرب ودارت مطعم ولكن مبغاتش تقوليهم لمدينة

ماري: دقت فزاجة

هاجر: خرجت من طوموبيل عنقت ماري توحشتك سلمت على محسن من البعد

محسن: على سلامتك ختي

هاجر: الله يسلمك

ماري: يالله نتحركو من صباح و حنا جري جري

هاجر: اوا ركبي معايا دارت عند محسن نتا سبقنا انا غادي نتبعك دخلو بنات لطوموبيل كيهضرو و تابعين محسن.

ماري: اوا كيف غادي امورك

هاجر: مزيان

ماري: ممليتيش الوحدة

هاجر: عرفتها لاش كتلمح لا هكا أحسن مكرهتش طلاقي

ماري: تبدلتي بزاف اصحبتي

هاجر: ضروري الواحد كيتغير خاصة مورا تجربة فاشلة

ماري: احنا وصلنا نزلو لبنات من طوموبيل لقاو رجال جالسين فالجردة معاهم عبد الرحمان ناض ملي شاف بنتو سلم عليها ورجع عندهم دخلو لبنات

هاجر:عندكم ناس بزاف

ماري: اه اجي لبيتي

هاجر: بلاتي نشوف ماما

ماري: راها فبيتي مع مامات محسن كيقادو شي كادويات طلعو لغرفة عند ماري لقاتهم كيقادو

عزيزة: بنتي توحشتك

هاجر: حتى انا حيدت خمارها من على وجهها و حتى لي كانت لابسة بقات بكسوة صفرة مزيرة بالكمام فيها شبكة من جيهت الصدر مع فورمتها عاد بانت جات كتحمق

ماري: واقيلة نتي هي العروسة😲

هاجر: قل اعوذ برب الفلق

مامات محسن: ماشاء الله كتحمقي

هاجر: باست على يدها ربي يخليك خالتي مبروك مغادي ديري لمحسن اوا اكيد غادي نجلس معاك فلبيت الهايشة

ماري: لا راه كينعس معايا فيه محسن

هاجر: 😲

ماري: غمزاتهم نتي غادي تعشاي و نمشيو لأبرطومو ديال محسن تجلسي فيها.

هاجر: يكون أحسن ولفت لكالم

ماري: اك بب دخلي دوشي بينما جابت لينا خالتي شي حاجة ناكلوها داكشي لي دارت هزات فوطة و دخلت دوش.

عزيزة/مامات محسن: تبارك الله عليك كيف طاحت فبالك هاد الخطة.

ماري: هههه راه حتى هو فدار محسن علاش قلت ليها راه محسن كينعس فالبيت ولا غادي تبقى لاصقة ليا هنا 😉

دوشت وخرجت ملوية فوطة و فوطة على راسها هزات حويجها من لفاليز لبست حيت كانت ماري هبطت لتحت توجد ليهم شي حاجة مياكلو لبست شورط و دوني ديالو باج من ستان لاحت بينوار فوق منهم حتى تحل عليها الباب ماري: مدخلة بلاطو فيدها انا جبت عشانا

هاجر: حاطة يديها على صدرها غير ديري الحس اختي خلعتيني خفت ليكون شي راجل

ماري: ههه لا غير انا و اجي تاكلي جلسو فوق نموسية كياكلو سندويتشات لي وجدت ماري

هاجر: كنت ميتة بالجوع

ماري: و كولي راه محسن شوية يصوني عليا باش نديوك لدارو

هاجر: لوقت تعطل راه نص ليل خليني نبات معاك

ماري: الا ولفت نعنق بليل محسن حب قلبي

هاجر: هههه مازال كيما نتي هبيلة

ماري: نتي لي تبدلتي خاصة شخصيتك هزيتي بنت و حطيتي بنت

هاجر: لوقت كيبدل لي ميتبدل زيدون لي دزت منو راه صعيب احسن قرار خديت في حياتي هو عتامدة على راسي

ماري: و شنو سر هاد الفورمة

هاجر: هههه بديت كلعب sport كنهتم براسي

ماري: هاي هاي وعاريتي و نوضي لبسي راه تعطل لوقت محسن راه كيصوني عليا غدا و نكملو هضرتنا ياك غادي تمشي معايا نعزل لخواتم

هاجر: اه نمشي معاك شحال عندي منك

ماري: باستها شكرا

هاجر: مابيناتناش شكرا راك في مقام ختي ناضت هاجر لبست خمارها حطت بنوارها فلفاليز نزلت هازة بليزتها و ماري سابقاها قبطها من عندها محسن دارها ليها فطموبيلتها قالت لماماها و مامات محسن بسلامة و توجهت لطوموبيل.

عزيزة: كظني غادي توافق على هادشي

ماري: كنتمنا دابا كلشي بين يدين جلال

عزيزة: معكسين بزوج

مامات محسن: صراحة شفتهم بزوج جاو مع بعضياتهم

ماري: نوصلوها ورجعو انا مشيت باش متشك فوالو ركبت مع محسن فالسيارة وصلوها قدام باب العمارة بلاصات طوموبيل ديالها ونزلت جارة بليزتها.

ماري: هاكي السوارت شقة رقم ** الطابق الثالث.

هاجر: مغاديش طلعو

ماري: شافت فمحسن لا تعطل الوقت نخليوك حتى نتي ترتاحي.

هاجر: واخة جرات باليزتها وطلعت لشقة اول بيت دخلات ليه حيدت خمارها و تلاحت فوق نموسية ترتاح.

اصبحنا و اصبح الملك لله صباح جديد جايب معاه عدة احداث غادي تغير مجرى الاحداث فاقت بطلتنا صباح كتكسل كتحس بعظامها مدكدكين دخلت توضات خرجت صلاة صلاتها جمعت صلاية حيدت خمارها وخرجت من البيت يالله حطت رجلها هزت عينيها كيبان ليها جلال خارج من البيت لي حداها هو تصدم هي كثر منو😲

هاجر: بان ليها صحاح على اخر مرة شافتو ملامحو جامدة وزاد كبر لحية و شعرو تمت جاية عندو نتا اش كدير هنا

جلال: بقا كيطلعها و هبطها زيانت و تفورمات و ديك لبسة لي لابسة ديال نعاس جات معاها صباح الخير مدام

هاجر: تفكرت أش لابسة هي تحط يدها على صدرها جرية وحدة لبيتها و سدت عليها بالساروت.

جلال: دق عليها الباب

هاجر: اش باغي😡

جلال: لبسي وخرجي خصنا نهضرو توجه لكوزينة صيب قهوة قاصحة حط كاس ليه و ليها وجلس فالفوطاي كيخمم اش غادي قول ليها منين غادي يبدا

هاجر: الصمت لبست خمارها خلات وجهها باين و خرجت عندو هزات كاس القهوة دارت رجل على رجل وشافت فيه تبدا و لا نبدا

جلال:خلينا نهضرو بعقلنا و نفكو المشكيل فين كنتي هاد المدة واش نسيتي راك مزوجة خصك تعلميني بتحركاتك

هاجر: لا منسيتش و لكن نتا لي نسيتي اني طلبت وراق طلاقي و نتا رفضتي

جلال: فين كنتي؟

هاجر: بنيت حياتي بعيد عليك انا كنت فالمغرب لمدينة مكيهمش المهم عتامدت على راسي ووقفت على رجلي من بعد مهرستيني ولا نسيتي.

جلال: لا منسيتش ممحتاجش كل مرة تفكريني شنو المطلوب دابا🤔

هاجر: طلقني لاغير

جلال: طلاق هو لي عمرك تحلمي بيه حتى تشوفيني تحت القبر

هاجر: الى رفعت دعوة غادي ربحك متخلينيش نستعمل القانون مزيان ليك وليا حيت ماشي فصالح ديالك😊

جلال: وقف و خشى يدو فجيابو شاف فيها تبدلتي بزاف

هاجر: وقفت شافت فيه بتحدي الفضل كيرجع ليك😉

جلال: مور عرس محسن وماري غادي لقاو حل لي يرضينا بزوج

هاجر: مكاين حل من غير طلاق أجي كنتي عارفهم غادي يجيبوني لهنا كنظن فكرة ديالك

جلال: كنت عارفك غادي تجي ولكن ماشي لهنا عارفك معروضة لعرس وتجلسي مع ماري

هاجر: اك وتمت غادة لبيتها دخلت و زدحت عليه الباب الى مندمتك أماري منتسماش هزات تلفون و تاصلت بيها

ماري كانت جالسة مع عزيزة وراتها تلفون هادي هاجر كتاصل يكونو تلقاو

عزيزة: جوبيها

ماري: وي هاجر

هاجر: كنت كنظن حنا خواتات ماشي غير صحابات ساعة جيباني تال عندو انا نسيتو و بديت حياتي من جديد و هاد الدار انا غادي نخليها ليه بلي فيها عطا الله لوطيلات ممستعداش نصبح و نمسي عليه هاد اسبوع لي غادي نجلس هنا.

ماري: هاجر كالم عادي ياك كل واحد فبيت و زيدون راه راجلك هداك.

هاجر: أشمن راجل ولا زبل انا معندي راجل مكنعتبروش راجلي هداك راه ستغلني باش ينتاقم من أب ديالي الى نتي نسيتي انا راه منسيتش الى كنت كنكره شي حد راه شي حد سميتو جلال مع الدورة تلقاه واقف قدامها وجهو حمر بالعصاب و ضاغط على يديه نتا أش كدير فبيتي خرج عليا برا معندكش لحق تكون فبيتي و لا فحياتي خرج

جلال: سمحي ليا وخرج من البيت

هاجر: قطعت على ماري التلفون كتجمع بليزتها بعصبية في اخير جلست فوق نموسية كتبكي.

اما جلال ملي طلب منها سماحة خرج من الدار بقى كيدور على رجليه حتى يبرد وهو مقرر يرجع منين جا.

ماري: تنظن خصنا نمشيو عندهم

عزيزة: تسناي لبس جلابتي و نمشي معاكم طلعت ماري كتجري لبست و قالت لمحسن انو الخطة منجحتش زادت أزمة الوضع بيناتهم لبس حتى هو تلقاو مع عزيزة كتقاد الفولار فوق راسها ركبو مع محسن و الوجهة دار عند ابطالنا

فنظركم غادي رجع جلال لأمريكا؟

كيف جاتكم ردت فعل هاجر؟

جالسين فالصالون شي كيشوف فشي عزيزة شافت فهاجر فين غادة بديك فاليزة🙄

هاجر: غادي نشوف شي اوطيل نجلس فيه منقدرش نبقى معاه فدار وحدة

جلال: موجه هضرتو لعزيزة الوليدة انا لي غادي رجع منين جيت انا ليوم نقطع لبيي ديال طيارة متحتاجش تخرج من الدار انا راه كنبقى راجل نشوف شي أوطيل ندوز فيه هاد ليلة.

ماري/محسن: كيشوفو فهاد زوج لي مفهمو فيهم والو

عزيزة: سليتو اوا سمعوني بزوج هاد الهضرة معندي مندير بيها نتوما مزوجين غادي تجلسو فهاد الدار تحضرو لعرس ملي يكمل عاد تكون الهضرة غير هدشي تواحد مينقشني.

هاجر: ولكن انا…

عزيزة: نتي غادي تسكتي اول مرة غادي ندخل فحياتك حيت بنتي ليا غير كتروني غادي تركني فهاد الدار حتى يفوت العرس ولقاو حل لهادشي ديالكم

هاجر: حنات راسها و هي كتغدد مبغاتش تكسر كلمت ماماها قدامهم.

عزيزة: جلال وياك دير شي حاجة تقلقها او تجي جيهتها.

جلال: كوني هانية انا أصلا نولي نجي حتى ليل متبقاش تشوف كمارتي

عزيزة: نوضو لبسو ياك خارجين معاهم ياخدو الخواتم

ماري/محسن: فدقة اه

عزيزة: باش توصلوني معاكم فالطريق ناض جلال دخل لبيتو لبس سروال دجين و قميجة بيضة و سبرديلة دار ساعتو و رش ريحتو عند هاجر فبيتها كتقاد خمارها حتى دخلت عندها عزيزة

هاجر: شافت فيها انا كملت ياكما عطلتهم

عزيزة: سدت لباب و جرتها لنموسية جلسو انا مجيتش منو انا بغيتك هاد أسبوع تخليه تحت عينيك و تشوفيه واش تبدل فعلا هو غلط حتى نتي غلطتي ملي خرجتي من الدار بلا متعلميه مكاينش شي راجل يصبر لهدشي

هاجر: انا مكيهمنيش

عزيزة: متأكدة

هاجر: اه مشافتش فيها

عزيزة: واخة يالله نخرجو راه كيتسناونا خرجو بزوج عندهم لصالة هبطو لتحت

هاجر: موجها كلامها لمحسن ماما و ماري يركبو معايا

محسن: لي بان ليك

هاجر: توجهت لطوموبيلتها ركبو فيها

جلال: شاف فطوموبيلتها وركب بجنب محسن هادي أمتى دارت طوموبيل

محسن: معرفتش حرك طوموبيل و هاجر تبعاه وصلو عزيزة و تحركو هوما عند ذهيبي باش يعزلو لخواتم ديال لعرسان.

بعد ساعتين⬅️

ماري: حبيبي شوف هادا و لا هادا 💍

محسن: بزوج زوينين

ماري: هاجر فين لي زوين راه حرت بيناتهم

هاجر: بزوج و جاو معاك و هي عينيها على واحد الخاتم ديال مرياج زوين وراقي هزاتو و بقات كتشوف فيه رجعت حطاتو دارت لقات جلال كيشوف فيها.

ماري: صافي ناخد هادا

محسن:توجه لعند مول المحال وراه اش بغاو خلصو تمو خارجين

جلال: انا سمحو لي عندي شي غراض نقديه

ماري: يالله تغدا معانا عاد سير

جلال: مرة خرى دابا مشغول

هاجر: الصمت

محسن: غمزو زعمة شنو صافي خليوه على راحتو هاك سوارت طوموبيل باش تحرك.

جلال: لا غير خليهم تبغي تقضي شي غراض

هاجر: دوات فوذن ماري هاكي عطيه سوارت انا نمشي معاكم

ماري: مالك متعطيهم ليه نتي زيزونة

هاجر: خنزرات فيها احم هاك سوارت طوموبيلتي انا نمشي معاهم

جلال: تفاجئ من هاد الجيست لي دارت خداهم من عندها شكرا بليل ندوز موراك.

هاجر: الصمت

محسن: صافي بان عيبك انا لا وهي اه

جلال: ضربو على كتفو نتقاشعو تحركو مشاو و هو رجع عند مول المحال سمحلي بغيت الخاتم لي عجب لبنت لي لابسة الخمار.

الراجل: جبد ليه الخاتم فعلا دوقها زوين

جلال: مبتاسم اه

الراجل: واش خطيبتك؟

جلال: لا مرتي بغيت نفاجئها

الرجل: الله يكمل عليكم اولدي

جلال: أمين جمع ليه راجل الخاتم في بواط راقي ودعو وخرج توجه لطموبيل غير ركب شم ريحتها ضحك بينو و بين نفسو مزال نفس ريحة ديمارا والوجهة لبحر بقا جالس ودوا مع نائب ديالو سولو على الخدمة و قاليه الى كانت شي حاجة مستعجلة يتصل بيه

قطع معاه ورجع كيشوف فالبحر تفكيرو كامل مع هاجر.

هاجر و العرسان و صلو لفيلا ورات خاتمها لحماتها و لعزيزة و بنات العائلة ديال محسن هي غادي طير بالفرحة😍

عزيزة: فينو جلال

هاجر: عندو شي غراض

البنت ١: خالتي واش هداك البوكوص ديال لبارح ولدك

عزيزة: اه ولدي وهادي مراتو

البنت ١: شافت فهاجر ميقت فيها دوات مع لبنت لي جنبها يختي هو زوين شوفي كيف مغطيا تكون شي خيبوعة

البنت ٢: والله متستهلو

هاجر: هدشي كامل داز على ودنيها مع كانت قريبة ليهم معجبهاش الحال مبغاتش تخسر ليهم الجلسة داز الوقت تغداو و طلعت ماري و هاجر لبيتها رتاحو وصل ليل جالسين مجموعين فالجردة كيهضرو حتى كيبان لهاجر لبنات حالين فمهم شافت فيهم ورجعت شافت فين كيشوفو بان ليها جلال داخل كيلعب فتلفون حتى وقف عليهم

جلال: سلام عليكم

الكل: عليكم السلام

ماري: جيتي تدي المدام

جلال: اه دار عند هاجر واجدة نتحركو

هاجر: خدات صاكها سلمت عليهم

ماري: متنسايش غدا حفلة ديالنا حنا البنات

هاجر:واخة مي نجي لابسة من الدار

ماري المهم 16h00 تكوني عندي

هاجر: اك تمات غادة حدا جلال حتى خرجو على برا ركبت حداه في صمت وصلو بلاصة طوموبيل قدام العمارة و تمو طالعين فالدروج حل الباب ودخلو تمت داخلة لبيتها حتى وقفها

جلال: هاكي سوارت طوموبيل

هاجر: خليهم عندك غدا نتا لي غادي توصلني عندهم دخلت لبيتها دوشت خرجت صلاة لعشا و حتى جلال دخل دوش و صلى صلاتو وتكا يرتاح.

أصبحنا و أصبح الملك لله ليوم فاقت هاجر ناشطة دخلت توضات و صلاة لبست خمارها و دارت فولارها على راسها بلا متغطي وجهها دازت من حدا بيت جلال لمحتو من شق الباب كيصلي و كيجود القرأن دمعو عينيها شحال دعات ليه بالهداية دخلت لكوزينة وجدت لفطور حطاتو على طبلة بان ليها خارج من بيتو

جلال: صباح الخير

هاجر: صباح الخير حطت القهوة وجلال منزلش عينيه عليها

هاجر: الى بقيتي كتشوف فيا هاكة مغاديش نفطر معاك جلال قرب ليها علاش ممنحقيش نشوف راك مرتي شد وجهها بين يديه

هاجر: بعدت منو بلباقة حطت ليه القهوة

جلال: انا عارفك مزال كتبغيني

هاجر: ضحكت فأحلامك انا تبدلت بزاف مبقيتش كنتيق فيك او فغيرك فطرو بزوج جمعت الطبلة وجدت طاجين للغدا جلال دخل لبيتو مبقاش خرج حتى دقات عليه يخرج يتغدا و قالت ليه مع 16h00 يوصلها عند ماري دخلت لبيتها دوشت خرجت نشفت لحمها لبست ملابس داخلية ديالها فلبيض وبدات كتنشف شعرها لبسات كسوة صواري فالبيض بحكم الحفلة يكونو فيها البنات جاتها لاصقة مع لحمها دارت مشطة لشعرها و ماكات ركزت على عينيها دارت عكر حمر ماط جا مع بشرتها البيضة و حلقات بيضين ولات كتبان وحدة خرى مع مكديرش مكياج بزاف لبسات خمارها و غطات وجهها لبست طالون كحل عالي لقات جلال لابس كوستيم كحل مع شوميز من نفس لون شاف فيها

جلال: نمشيو

هاجر: اه ولكن بلاتي نشد فيك لنطيح

جلال: بشرط

هاجر: شنو

جلال: تشدي فيا العمر كامل كنواعدك عمرك طيحي

هاجر: صافي بلاش

جلال: قبطها من يدها غير بشوية عليك سد الباب و عونها حتى نزلات توجهو لطوموبيل ديمارا حتى كانو قدام الفيلا سمعو موسيقى مجهدة يمكن بداو

هاجر: شافت فساعة وي باين

جلال: نزل من طوموبيل حل ليها الباب و عونها حتى دخلات بينما هو مشى عند محسن جلس معاه

محسن: شفتكم مشادين يكما تصالحتو

جلال: لا غير لابسة طالون

محسن: المهم كاين تقدم بقاو كيضحكو مقشبين مع بعضياتهم.

دخلت بانت ليها ماري لابسة كسوة بيضة مزيرة حد الركبة و جامعة شعرها كعكة و مكياج خفيف وبنات العائلة شي كيشطح شي جالس.

ماري: تعطلتي

هاجر: يالله ساليت

ماري: لبستي لبيض بحالي

هاجر: اه كيف وصيتيني لبارح نسلم على ماما و حماتك مشات سلمات عليهم

البنت ١: هههه قلت ليك خيبوعة شوفي اش لابسة الحفلة فيها البنات

البنت ٣: هههه ليوم نضحكو مزيان توجهت عند هاجر ختي حيدي الخمار متحشميش حنا بنات مع بعضياتنا

هاجر: غير نرتاح يالله وصلت

البنت: غمزت صحبتها

عزيزة: فودنها نوضي حيدي خليهم يشوفوك

هاجر: جوبتها فوذنها ليوم نفقصهم هههه

ماري: وااااع وليتي شريرة حيدات هاجر خمار لبنات حلو فمهم فيها مبقاوش دارو بيها كل وحدة شدت قنت لالة عزيزة كتقرى عليها القرأن فخاطرها

ماري: راه نتي هي العروسة

هاجر: ربي يخليك حتى نتي جيتي كتحمقي

عزيزة: فخباركم هاجر مدارتش لعرس غير نهار بين العائلة و طيحت العقد فالدار.

هاجر: هههه اصلا راه زواج مصلاحة أشمن عرس انا نوض نشطح مع لبنات

ماري: وشوشت فوذن عزيزة

ام محسن: شي خطة

ماري: غمزتها يس

ماري: هزت تلفون سيفطت فيه مساج لمحسن شوية و دخل نتا و جلال باش نتصورو يبقاو عندنا ذكرى.

محسن:اك حبيبتي ناض و جر جلال

جلال: فين غادين

محسن: نتصورو مع عيالاتنا

جلال: محشوماش ندخلو على لبنات

محسن: راه بنات لعائلة وكل واحد فينا عندو مرتو

جلال: اك

واقفة كتمايل على ايقاع الموسيقى مع ماري بثباتة حتى بانو ليها بنات كيشوفو فجيهة وحدة و القلوبة فعينيهم عرفت جلال دخل

هاجر: قربت لوذن ماري جلال دخل

ماري: اه سيفطت لمحسن ميساج باش يدخلو نتصورو مجموعين مي اجي باش عرفتيه ونتي عاطية بظهر.

هاجر: نعتت ليها براسها لبنات لي حالين فمهم فيه باش عرفت😏

ماري: حضيه ليطيرو بيه انا غادة عند حبيبي طلقت منها و مشات عند محسن قبطت فيه سلام جلال

جلال: كتفى بابتسامة كيقلب بعينيه على هاجر

ماري: راها و شيرت ليه فين واقفة هاجر على ماماها كتقاد ليها حلقة تحلت ليها

عزيزة: ديك ساعة خلي ماري تسدهم ليك

جلال: شاف فين شيرت ليه وتوجه عندهم حتى وقف عليهم لوليدة مالكم🙄

عزيزة: حلقة ديال هاجر مبغاتش تسد

هاجر: دارت عندو

جلال: مع دارت مع حل فمو فيها لكسوة جاتها كتحمق و المشطة و المكياج دور راسو بانو ليه البنات عاد رتاح قرب ليها بزاف ميل راسو و قاد ليها حلقة

هاجر: حست بسخفة من قربو بعدت شوية شكرا 😊

جلال: ماشاء الله جيتي كتحمقي

عزيزة: قاطعتهم جيتو مع بعضياتكم

محسن/ماري: مقابلينهم من البعد و كيضحكو محسن جرها اجي نشطحو عاد نتصورو

ماري: اك ولكن خص حتى جلال و هاجر يشطحو راه ليوم عرفت بصدفة مدروش لعرس و ناخدو ليهم صور يبقاو ليهم لذكرى

محسن: عجبتني الفكرة مشى عند ديدجي طلب منو أغنية رومانسية جر ماري كيرقصو لوسط ولبنات كيصفقو عليهم

جلال: شد هاجر من يدها

هاجر: اش كدير

جلال: تحنى عند ودنها غادي نديرو بحالهم

هاجر: مع ابتسامة سطحية و جاوباتو متنساش راسك

جلال: نعيشو لحظة لي حنا فيها عاد نفكرو لمن بعد😉 أمراتي لغزالة قبطها من خصرها مقربها ليه وقفت ماري و محسن كياخدو ليهم صور عزيزة فرحانة بولادها تصورو مجموعين خرجو دراري و خلاو لبنات مجموعين كيضحكو كيشوفو فتصاور شي بنات أيموتو بالسم حيت جلال كيبغي مرتو و طلعت زوينة ماشي خيبة كيف كانو متوقعين.

جالسة كنضحك أنا و ماري من بعد ماسلات الحفلة حتى وقف علينا ولد عم محسن هاز فيدو كادو عطاه لماري عندو شي خدمة خصو يمشي شكراتو ماري مع هزيت راسي كيبان لي واحد الثور واقف قدامي باغي فيمن يبرد سمو أنسحب الولد من بعد مودعنا باحترام

جلال: هاجر واحد دقيقة

هاجر: ماري سمحي انا راجعة

ماري: قربت لي ليوم تاكليها

هاجر: توجهت عندو نعم قبطني من دراعي حتى قصحني وجرني لجردة

جلال: واش محشمتيش مبينة فورمتك و شعرك لي يسوى و لي ميسواش واش باغية تجهليني

هاجر: طلق مني راك وعتيني زيدون راه البنات بيناتنا

جلال: مدويتش على لبنات دويت على داك خينا لي كان كيحنزز فيك

هاجر: دارت فرسها طن واش دري جاي يعطي لعروسة كادو نقول ليه لا و زيدون مشفتش فيه معرفتو كيف داير

جلال: هداك كيبقى راجل غريب ملي كملتو لبسي خمارك حيت تاراجل ما من حقو يشوفك من غيري نتي ديالي بوحدي ضربها على راسها دخلي هضرتي لراسك.

هاجر: كنت ديالك و خسرتيني شحال هادي

جلال: مغدد من هضرتها لي بحال سم وجدي راسك باش نمشيو طلعت هاجر لبيت كتلبس بالنفخة حتى دخلت عندها ماري كضحك عليها

هاجر: مالنا حتى نتي

ماري: ليوم تأكدت جلال كيبغيك

هاجر: هداك مكيبغي حد هداك عندو شي حاجة سميتها حب تملك غادي ندمو غير بلاتي

ماري: ردي لبال تبغي تندميه تصدقي نادمة

هاجر: المهم انا نمشي غدا و نتشاوفو باستها

ماري: اك ردي لبال لراسك بسلامة هبطت هاجر ودعت ماماها و عبد الرحمان لقاتو فالصالة كيدوي مع جلال و محسن خرجو ابطالنا ركبو فالطوموبيل تواحد فيهم مادوى مع لاخر غير وصلو دخلو لشقة كل واحد لبيتو دازت يومين على هاد الحال هاجر كتفيق كيوصلها جلال عند ماري و فليل يرجع يجيبها كيتشاركو سلام و وجبة الفطور كل واحد فيهم نافخ ريشو على لاخر.

جالس في القهوة مع محسن من بعد ماوصل هاجر عند ماري بحال كل نهار محسن: فين وصلتي مع هاجر؟

جلال: والو راسها قاصح كل ما حولت نقرب ليها او نهضر كتنفرني و تبعدني

محسن: بقات 3 ايام على العرس و كل واحد يرجع لحياتو متنساش ماماك واعدتها تلقى حل ملي يسالي عرس حاول تصلح أمور ممكن حل ميكونش فصالح ديالك.

جلال: ان شاء الله نحاول

محسن: هاكة نبغيك شاف فساعتو يالله نتحركو نتعشاو مجموعين وصلو لفيلا لقاو عبد الرحمان جالس فالجردة لقاو عليه سلام

محسن: سمحو لي نمشي نبدل و نرجع

جلال: خود راحتك

عبد الرحمان: اوا ولدي كيف غادي مع الخدمة

جلال: الحمد لله عمي ونتا؟

عبد الرحمان: مزيان احم

جلال: واقيلة باغي تدوي فشي حاجة

عبد الرحمان: صراحة ولدي فعلاقتك نتا وهاجر

جلال: بشك واش قالت ليك شي حاجة

عبد الرحمان: قبيلة دوات معايا انا و ماماها بغات طلق وقالت لينا ندويو معاك حبيا باش بلا مترفع دعوى

جلال: بحالا تخوى عليه سطل ديال الماء واش باغة ترفع دعوى

عبد الرحمان: للأسف اه و حنى راسو

جلال: نتا عمي أش بان ليك؟

عبد الرحمان: أنا سمحتك شحال هادي وعدتها عمري ندخل فحياتها حاول تصلح أمور بيناتكم

جلال: الصمت كتردد ليه فوذنيه باغي ترفع دعوى طلاق لتحق بيهم محسن بان ليه جلال مخطوف منو لون حط ليهم لعشا تعشاو جلال تقريبا مكلاش كملو خرجت عندو هاجر من بعد متوادعت مع ماري لقات جلال سابقها لطوموبيل ركبت حداه و الوجهة الدار وصلو دخلو لشقة.

واش هاجر فعلا باغة طلاق ؟

دخلت لبيتها صلاة لعشا لبست بيجامة عبارة على سروال و الفوقاني ديالو بالكمام فستان بالباج خلات شعرها مطلوق حطات ودنها على الباب سمعت صقيل فالدار خرجت توجهت لكوزينة شربت الماء غادة راجعة لبيتها حتى لقاتو واقف قدامها لابس سروال كيطمة فالكحل و من الفوق عريان بقات حالة فمها فيه زاد صحاح

جلال: مرتي زوينة مكنتش نصحب راسي زوين تال هاد الدرجة😏

هاجر: عاد عاقت براسها دوات معصبة بدا تلبس وسط الدار راك معايش بوحدك

جلال: قرب ليها علاش معصبة ياك مرتي عادي تشوفيني هاكة

هاجر: لا ممعصباش يالله غادي تخطاه جرها من خصرها بحال شي كمشة و بقا مقرب منها حتى بدات كتحس بحرارة أنفاسو على وجهها حط شفايفو على شفيفها وبقا كيبوس فيها بحب حيت توحشها بزاف فهاد العام لي تفارقو فيه زاد فوثيرة لقبلة ولكن بلا متجاوب معاه حتى حبس كيشوف فيها

هاجر: دفعاتو من صدرو متبقاش تقرب ليا أخر مرة و كتمسح فمها بعصبية وليت كنعيفك نتا أكبر شماتا شفتو فحياتي انا كنكرهك كنكرهك فهمها و دخلها لراسك

جلال: تبلوكا من رد فعلها بقى كيشوف فنقطة وحدة و كلمة كنكرهك كتردد فوذنيه رجع شاف فيها بنظرة فشكل

هاجر: لوقت لي بغيتك من قلبي كنتي دايرني لانتقامك اه ولا نقول زواج مصلحة عطيتك لحمي كان كيحسابلي بديتي تبغيني ساعة طلعت غالطة نتا دوزتي بيا الكونجي ذيالك بحال شي قح… قبل متكملها جاتها واحد تسرفيقة لوجه

جلال: مغدد و صدرو كيطلع و هبط بالعصاب نتي مرتي حلالي عمرك تقارني راسك بيهم عمرك أهاجر قبطها من كتافها بعنف ولاغادي تشوفي وجه عمرك شفتيه

هاجر: طلق الحيوان من بعد مطلق منها دخلت لبيتها جلست فوق نموسية هئ هئ هئ

جلال من بعد مدخلت لبيتها جلس فوق الفوطوي كيفكر فهادشي لي كيطرا ليه هو لي وصل راسو لهادشي كيفاش ولات كتكرهو و كتحداه من فوق هدشي باغة ترفع دعوى لطلاق دخل لبيتو كيخمم حتى داه نعاس.

شنو رأيكم في ردة فعل هاجر؟

ليل كامل و انا كنتقلب ففراشي نضرتو المكسورة مبغاتش تحيد من بالي

الله أكبر الله أكبر

مع صوت الاذان لي ولفت نفيق عليه شحال هادي حليت عينيا توجهت لحمام توضيت لبست أسدالي و توجهت للقبلة نصلي و دعيت الله يدير تاويل ديال الخير قريت شوية القرأن جمعت صلاية لبست بيجامة ديال الدار حد الركبة و سميطات فالغوز بيبي جعت شعري ديل حصان خشيت رجلي فالبانطوفة خرجت من بيتي بان لي بيت جلال مسدود دقيت زوج دقات مجوبنيش حليت لباب لقيتو جالس على صلاية كيصلي دمعو عينيا واش فعلا يكون تبدل رجعت سديت لباب دخلت لبيتي هزيت تلفوني و مشيت لكوزينة نوجد لفطور حتى كيصوني درت هوط بغلوغ وجوبت

هاجر: الو نبيل

نبيل: صباح الحب زين ديالي

هاجر: ههه باسل مع جيت ندور لقيت جلال قدامي مخنزر حيدت هوط بغلوغ كيف غادة الخدمة؟

نبيل: الحمد لله بحالا نتي كاينة عيطت نسول فيك ملي مشيتي مبقيتي تصلتي نسيتي خوك

هاجر: غير مكنتش كنسالي بقات لي يومين ورجع

نبيل: الله يجيبك على خير

هاجر: أمين

نبيل: امضرا راجلك شي خبار عليه

هاجر: المهم عشية و نهضرو نيت بغاك فشي حاجة

نبيل: اه فهمت يمكن حداك شي حد انا عشية رجع نتاصل بيك بسلامة

هاجر: قطعت تلفون و شفت فجلال لي غير كيخنزر خاصاك شي حاجة؟

جلال: شكون هذا؟!

هاجر: فاش كيهمك

جلال: متختابريش صبري و تخليني نعطيك مبرر اقوى باش تكرهيني بصح و تحقدي عليا خرج من الكوزينة.

هاجر: ههه مغيار كملت توجاد الفطور حيت ليوم عارضة على ماري و محسن يتغداو معانا كملت حطيت كلشي فوق الطابلة جلست كنفطر و جلال مقابل معايا يالله بغيت نهضر و هو يقاطعني

جلال: حتى تشوفي المحامي ديالك باش نبداو أجراءات طلاق حبيا مكاين لاش نزيدو نطولو

هاجر: تصمكو عليا ودنيا مكنتش متوقعة منو يبغي يطلقني و هو لي طلبها مني أحساس خيب جوبتو و انا منزلة راسي واخة ويدي كيترعدو كملت لفطور ديالي بزز

جلال: ناض من على طبلة انا خارج مرجع حتى ليل خودي راحتك فالدار هسوارت طوموبيل ديالك لتبغي تمشي عند ماري.

هاجر: ولكن انا عارضة عليهم يتغداو معانا

جلال: دار دارهم بصحتكم مسبقا

هاجر: واش مغاديش تكون😲

جلال: لا رمى هاد الكلمة و دخل لبيتو بدل و خرج من الدار.

هاجر: سد الباب و انا نبدا نبكي بقيت كنتفكر كل مجرى البارح واش فعلا صافي كلشي سالة هنا؟! نضت جمعت طابلة و جمعت الدار بديت كنوجد الغدا حسيت براسي مخنوقة تصلت بنبيل

هاجر: الو نبيل

نبيل: صوتك معجبنيش مالك

هاجر: بديت نبكي و عودت ليه كلشي

نبيل: هاجر انا بحال خوك أي راجل ميبغيش مرتو تصرف معاه هكاك عايرتيه بديك كلمة سيد قدم اعتذارو نتي راسك قاصح

هاجر: معرفتش كنحس براسي مخنوقة

نبيل: هاجر نتي مزال كتبغيه مكاين لاش تنكري صعيب حب من الطفولة يتنسى بسهولة حاولي تصلحو الوضع بيناتكم

هاجر: هو لي ظلمني لول

نبيل: متافق معاك ولكن نساي الماضي متفكريش فيه ديري راسك يالله عرفتيه النسيان نعمة

هاجر: شكرا حيت سمعتي ليا

نبيل: متقوليش هكاك حنا خوت المهم سيري رتاحي من بعد غادي نتصل بيك قطعت تلفون مع نبيل نضت نوجد لغدا و انا عقلي ممعياش.

ملي خرج من الدار و هو كيدور كيتفكر مكالمة لي سمع قرر يجلس فالقهوة و يريح بالو باقي منساش ردة فعلها ديال البارح و كلمة حيوان لي قالت ليه.

اما عند هاجر كملت كلشي دخلت لبيتها دوشت ولبست قميص خفيف ديال الدار فالخضر ملكي مع فولار باج و شربيل من نفس لون سمعت صونيت فالباب مشات حلات على محسن و ماري بابتسامة مصطنعة مرحبا دخلو واخة دار داركم

ماري: باستها فحنكها شكرا

محسن: مد ليها ميكة فيها ديسير و كرطونة فيها الحلوة ربي يخليك ولكن حاليا داركم

هاجر: علاش معذبين راسكم دخلو لصالون جلسو و هاجر دخلت لكوزينة حطات دكشي لي عطاوها صيبة اتاي و حطت كيكة كانت صيبتها و شوية مملحات جلست معاهم

ماري: عرفتي مخلوعة من العرس

هاجر: ههه حمقة كلشي يدوز بخير

محسن: كيقلب بعينيه مبانش ليا جلال

هاجر: حنات راسها و هي حابسة البكية خرج صباح مغاديش يجي لغدا

محسن: شاف فيها بشك واش كلشي مزيان!

هاجر: بقات غير كتبكي كان خاص غير لي سولها باش تنفاجر مشات حداها ماري عنقتها

ماري: مالكم ثاني و كطبطب عليها

هاجر: معرفتش لبارح …. عودات ليهم لي طرا و لكن مقالتش ليهم باسها

ماري: غلطتي سيد ملي جا و هو كيحاول يصلح أمور و نتي ممعبراهش عاد عيرتيه جلال نفسو خيبة موحال يدوزها ليك

هاجر: صافي سكتي متزيديش عليا

محسن: هاجر مسحي دموعك

هاجر: مسحات دموعها وشافت فيه

محسن: واش مزال كتبغيه

هاجر: معرفتش كنحس براسي مخربقة مقادراش نسمح ليه مقدراش نبعد عليه

محسن: جلال كيبغيك كوني متأكدة

هاجر: كلكم كتقولو كيبغيني ولكن عمرو قالها ليا بفمو

محسن: ضروري غادي يكون حسسك بيها

هاجر: سرحات بتفكيرها ملي كانت جاتها الدورة الشهرية و نهار كانت واقفة فالبالكون و غار عليها و نهار قاليها نتمنى يجي شي نهار و تسمحي ليا … حتى ملي كتقوليه طلقني و قيوليها لا

محسن: حنا الرجال كاين فينا واحد نوع صعيب يقوليك كنبغيك ولكن من تصروفاتو كيبين الحب ديالو

ماري: عطيه فرصة راه تبدل ملي تزوج بيك مبقاش جلال ديال شحال هادي

هاجر: الصمت

محسن: انا غادي نتاصل بيه باش نتغداو مجموعين دوز نمرتو الو الكلب فينك عرفتينا جايين لدار ونتا تهرب ماشي فعايل هادو

جلال: كان جالس كيفكر حتى قاطعو تلفون بنمرة محسن و جاوبو لا غير بغيت نرتاح شوية ليوم

محسن: اوا حنا مغاديش نتغداو حتى تجي

جلال: بصحتكم من بعد و نتشاوفو

محسن: ههه راه بقات ليا يومين و نتزوج زعما جي نحتافلو بيناتنا و زيدون ماري راه جات هاربة من الفيلا معولين نباتو معاكم ليوم.

جلال: واخة شوية ونجي قطع تلفون ناض خلص القهوة و خرج.

ماري: موجهة كلامها لمحسن اش قاليك

محسن: شوية و غادي يجي 😊

هاجر: انا نوض لكوزينة نقاد شي حاجة اجي معايا نتي

ماري: شنو نجي لا انا عروسة نبقى حدا حبي شحال مجلسنا بوحدنا😉

هاجر: ههه اك خودي راحتك مشات لكوزينة و بقاو دوك زوج راس فراس

ماري: شنو قديت نباتو منين جاتك هاد الفكرة🙄

محسن: قبطها من خصرها وحطها على رجليه جات مفرقة رجليها على حجرو تعلمت منك 😉 بغيتيهم يبقاو مخاصمين

ماري: دورات يديها على عنقو لا حبيبي

محسن: وتاك المغرب و شهيوات دربها لمؤخرتها بديتي كتربي طرف

ماري: نزلني حشومة

محسن: تبتها شحال مدرت شي حاجة وانا كنجمع ليك عام و صرف نبقا محروم انا

ماري: قربت ليه و باستو فعنقو كنبغيك

محسن: لعبت ليه على الوثر الحساس بدا كيبوس فيها وكيحل ليها صدايف الكسوة لي لابسة اما الماسخة حيدت ليه تريكو نساو راسهم فصالون.

هاجر سمعت صونيط حلت لباب لقاتو جلال طلعها و هبطها سلام

هاجر: راهم فصالون اجي هز معايا طبسيل ديسير هز جلال طبسيل و هي شبكة فيها الخبز مع دخلة لي داخلين لصالون هاجر غوتت وطيحت لخبز وتخشات فجلال عطياهم بظهر اما جلال بقى شاد طبسيل كيضحك ماري و محسن عاد فاقو من القلبة بدات كتسد صداف الكسوة و نزلت من بين رجليه هو كيلبس تريكوه

جلال: مسح مسح اولدي العكر ديك ساعة دخلو البيت و سبقو نتوما الدخلة كاع جلال قبط هاجر من يدها ورجعها لكوزينة خليك هنا انا نمشي نجمع الخبز لي طيحتي و نسيفط ليك ماري

هاجر: الصمت وحادرة راسها

جلال: هز راسها لقاها كيف مطيشة عادي كيوقع بحال هدشي زيدون راهم مطيحين العقد بقا ليهم العرس

هاجر: صافي انا غادي نكمل توجاد

جلال: اك خرج لصالون جمع الخبز لي طاح حط الشبكة فالطبلة و سيفط عندها ماري.

دخل جلال لصالون جلس حدا محسن ملي بلاك الله دخل بعدا غير لبيتي فالصالون أصاحبي ولكن فكرة زوينة

محسن: لاش جاي دابا تفو خسرتي عليا لحظة

جلال: هههه جمع راسك أشريف راه هاجر كتحشم خليتها فالكوزينة كيف مطيشة كون مجيتش🙄

محسن: صافي طلق مني

جلال: عطاه مخدة هاك ستر فضيحتك

محسن: قبط من عندو المخدة و حطها على رجليه

جلال: شنو قضيت تباتو عندي فندق أنا

محسن: فيلا عامرة و نتا عارف مكيخليونيش ندخل لبيتها قلنا ليهم جايين عندكم

جلال: هي معول دخلة دوزها فدارك😉

محسن: مكرهتش اصاحبي راني واصل لطوب لمدام عندي مجهدا

جلال: ههه الى خلاتكم ديك المعكسة عندي دابا تجر صحبتها تبات معاها فالبيت راك عارفها

محسن: اجي بعدا نتا مالك مبغيتيش تغدا معانا🙄

جلال: والو غير مبرزط الله يدير تاويل الخير المهم انا نوض نتوضى نصلي بينما حطو لغدا

محسن: واخة الله يقبل

عند هاجر كتقاد شلايظ ماري واقفة عليها اف اف لاش دخلتو نتي وداك راجلك

هاجر: كوني تحشمي و تبتي

ماري: نحشم علاش راه راجلي

هاجر: شفت تعلمتي لعربية تحل ليك الفم لا كن تعريتو حسن

ماري: اح عليه كيعرف يبوس

هاجر: جمعي راسك

ماري: صراحة باز لجلال معاك

هاجر: علاش اختي مالي

ماري: بيناتنا فديك 3 شهور شحال من مرة قاصك

هاجر: زوج مرات حيدي من قدامي

ماري: صابر ليك منو انا كن طلقتك شحال هادي

هاجر: الصمت

ماري: سمحي ليا مقصدتش و الله مي رجال كيبغيو لبنت لي متكونش تحشم و تجي المبادرة منها هادي نصيحة مني ليك راني خبرة😉

هاجر: هاكي دي شلايظ رجعي باش تدي طبسيل

ماري: هزات لي قالت ليها دخلت لقات دراري كيهضرو حطات شلايظ و جمعت صينية

محسن: واش قرار نهائي

جلال: اه هدشي لي قررت

محسن: واخة

جلال: حتى تشوف لي محامي يكون مزيان راك عارف معنديش لوقت بزاف باش رجع مع هاد الهضرة داخلة هاجر و ماري حسات بدنيا دارت بيها عرفاتو قالها لمحسن يشوف محامي على حساب الطلاق جلسو تغداو فجو من الضحك بينما هاجر كضحك غير بزز سلاو جمعو لبنات الروينة.

محسن: بغيت رتاح

ماري: حتى انا

جلال: عرفتي اش غادي دير سير لبيتي رتاح راه هو بيتك سابقا

محسن: جر ماري يالله معايا نرتاحو

جلال: بلاتي ناخد شي حاجة دخل خدا أش بغا وخرج خلاهم على خاطرهم مشى لصالو تكى كيلعب فتلفون حتى دخلت عليه هاجر: واش غادي تنعس

جلال: اه

هاجر: واخة بقات جالسة

جلال: مالك

هاجر: كتحك عنقها والو

جلال: متأكدة

هاجر: مبغيتش نمشي لبيتي خفت لنسمع شي حاجة متعجبنيش

جلال: ضحكاتو ههههه هو فعلا غادي تسمعي

هاجر: تزنكت بقات كدور فعينيها

جلال: نفسي عليك ورتاحي

هاجر: حيدات فولار و طلقت شعرها وتكات فسداري لي مقابل مع جلال

جلال: كيلعب فتلفون شعرك طوال على أخر مرة

هاجر: اه كنقول غادي نقص منو

جلال: الصمت

هاجر: بقات كتشوف فيه كيبقشش فتلفون حتى داتها عينيها.

جلال: دار شافها ناعسة ضحك وحط تلفون غمض عينيه حتى هو.

ماري & محسن 👫

ماري: غادة لنموسية

محسن: جرها فين غادة

ماري: نرتاح

محسن: شحال ونتي مرتاحة علاش متريحيش هاد المسكين لي قدامك

ماري: 🙄

محسن: كيجيك لكلاخ غير معايا نكملو دكشي لي بدينا فالصالون جرها عندو و بداو في سفالة ديالهم مطلقها حتى مرمدو بعضياتهم.

ماري: حطت يدها على حنكو سمح لي حيت ماشي نتا اول واحد

محسن: جرها عندو باسها فراسها ولكن نكون أخر واحد شكرا حيت حفظتي على راسك فهاد الفترة لي عرفتك.

ماري: شافت فيه باش عرفتيها

محسن: دكشي خاص بيا يالله نعسي رتاحي راك سخفتيني بقاي ديما هكا ديك حشمة معندي مندير بيها.

ماري: عنقاتو الله يخليك ليا و نعست.

دربتها الفيقة مع 17h00 لعشية جمعت شعرها شفنجة و صيبت فولارها طلت على جلال بان ليها باقي ناعس توجهت لكوزينة صيبت مسمن و بغرير وجدت قهوة و حليب حطت حلوة لي جاب محسن و ماري فطبسيل حتى كدخل عندها ماري كتعكز و مدوشة

ماري: الحادكة عدبناك معانا ليوم

هاجر: حشومة منوجدش ليك فطور صبحية زيدون عذابك راحة كيف داز دكشي

ماري: اح دكشي زين اختي

هاجر: هههه حمقة مبروك عليك

ماري: 😘 كتعونها فالتوجاد

محسن: دخل لصالون جلال فيق اصاحبي

جلال: لاش غادي نفيق مثلا شي يح… وشي يكمدها فقلبو خليني ناعس

محسن: حلالا طيبا نوض اصاحبي

جلال: ناض مسح على وجهو مكينش ماحسن من لحلال عرفتي كنفكر نتزوج ملي نطلق انا وهاجر

هاجر: مع هاد الكلمة بدات كتكحب حتى عطاتها ماري الماء

ماري: مالك

هاجر: غير ريقي وحل ليا

جلال: بشوية عليك ابنتي

هاجر: خنزرات فيه مشات تجيب صينية قهوة و حليب

محسن: قلتيها بلعاني باش تعصبها

جلال: كندوي بصح أصاحبي عام و صرف مزوج و ما مزوج طلبنا منها سماحة والو سيدة كتبني حياتها وانا واقف فنقطة وحدة مجاتش تا انا نشوف حياتي سكت ملي بانو ليه لبنات داخلين حطو كسكروط و كلاو دراري خرجو و هوما بقاو هاجر: باغي يطلق و يتزوج

ماري: انا بعدا دوختوني الى كنتي بغاه دوي معاه راه راجلك ماشي صاحبك

هاجر: والله لكانت ليه يطلق الى بغى

ماري: هاد قصوحية راس فيكم بزوج هي لي خارجة عليكم كملو لبنات جماعتهم بليل ملي رجعو دراري تعشاو مجموعين ماري و محسن دخلو لبيتهم هاجر دخلت لبيتها دوشات و صلاة و جلست فوق نموسية كتلعب فتلفونها حتى دخل عليها جلال بغيت ندوش ممكن نخدم دوش ديالك

هاجر: دخل خود راحتك مشا دوش ولبس فالدوش شورط كحل و تيشورط رمادي

جلال: شكرا توجه لصالون صلى صلاتو و تكى فوق سداري

هاجر: هدا فين مشى خرجت كتسلت بحال شي شفار كيبان ليها متكي فصالون اع والله تندمك هكا نعسو ابطالنا شي ناعس فحب و شي كيفكر لمستقبل المجهول و بطلتنا كتغدد بوحدها.

بعد مرور يوم اخر لي كان روتيني ماري دوزت فيه نهار الحناء كأي عروس مغربية و ليوم هو ليلة العرس واقفة هاجر قدام المرايا كتقاد قفطانها لي ختاريتو راقي قاديت ميك اب شوية ثقيل شعري خليتو على طولتو و درتو بوكلي لبست كعب عالي فالأسود خرجت من بيتي لقيت جلال واقف بهيبتو بكوستيم كحل و قميجة بيضة كيبان زوين و مغري في نفس الوقت قبط يدي وتحنى على وذني

جلال: كتحمقي

هاجر: بابتسامة خفيفة حتى نتا

جلال: نعتابرو أطراء و لا غزل

هاجر: ههه لي عجبك يالله غادي نتعطلو

جلال: بلاتي شدني من يدي و ثبتني في بلاصتي شافلي مزيان في عيني انا عارفك ماحاملانيش و لكن هادشي مكيهمش دابا جبد بواطة من جيبو و حلها كان فيها خاتم زوين

هاجر: بينها بين نفسها اه نفسو الخاتم زواج لي عجبني في المحل داك نهار قبط يدي ركبو ليا فصبعي شنو هدا؟

جلال: كان خصني ركبو ليك شحال هادي.

هاجر: شافت فالخاتم رجعت شافت فيه أبسط حاجة مكنتش عندي لي هي خاتم زواج.

جلال: باس يدها كلشي غادي يتصلح ستحمليني غير ليوم كنتمنى تحتافظي بيه ذكرى مني.

هاجر: حست بقلبها تقبط عليها ملي قال هكاك كنحس بيك بحالا كتودعني

جلال: يالله راه غادي نفوتو العرس

هاجر: واخة قبطت فيديه وخرجنا من باب العمارة ركبنا فطوموبيلتي جلال لي سايق مسافة طريق كنا قدام الفيلا دخلت انا لجيهة لي فيها لبنات و جلال توجه عند رجال داز لعرس زوين لبست ماري خمسة لبسات و بكات فالكسوة البيضة هاهي واقفة كتودع فيا باش تمشي لشهر لعسل هي و راجلها

ماري: غادي نتوحشك

هاجر: حتى انا ملي ترجعي غادي نتشاوفو

ماري: اكيد ان شاء الله راه جلال غادي نشوفو قبل منك

هاجر: مفهمتش

ماري: راه غدا عندو طيارة راجع لأمريكا انا غادة شهر لعسل لتما

هاجر: الصمت سلمت على ماري و عقلي مرفوع اذن كان كيودعني أحساسي في محلو.

اما عند دراري واقفين كيضحكو و معاهم عبد الرحمان

جلال: تهلا فيها

محسن: متخافش راه فعيني

عبد الرحمان: زواج أولدي اساسو صبر الله يرزقكم الذرية الصالحة

محسن: امين المهم جلال بيناتنا تلفون راه دويت مع المحامي غادي قاد ليك أمور

جلال: شكرا

توادعو مع العرسان لي توجهو نيشان لمطار عزيزة كدوي مع هاجر لي غير ساهية حتى حركتها فين مشيتي

هاجر: اه لا غير هنا

عزيزة: انا و باباك ليوم نمشيو واش غادة معانا

هاجر: لا مزال عندي شي حاجة غادي نقضيها عاد نطلع لافران

عزيزة: لي بان ليك ابنتي حتى وقف عليهم عبد الرحمان و جلال

عبد الرحمان: عزيزة هدا هو الوقت يالله نوصلو راه لفاليزات فالكوفر هاجر تمشي معانا

عزيزة: لا غادي تبقى عندها شي شغل

عبد الرحمان: جلال ولدي تهلا فراسك و باب دارنا ديما محلول ليك

جلال: باس على يديه عارف لي كاين سلم على ماماه ووصلهم هو و هاجر حتى لطوموبيل يالله حتى حنا رتاحو راه تعطل الوقت.

هاجر: الصمت ركبت حداه فالطوموبيل.

وصلو لدار دخلت لبيتها دوشات لبسات بيجامة صيفية في الغوز بارد بقات غادة جاية كتحس براسها مخنوقة خرجت من بيتها و توجهت لبيت جلال لي كان كيجمع شنطة سفر ديالو باقي لابس حويجو لي كان بيهم فالعرس محيد كوستيم حال صدافي ديال قميجة و تاني كمام القميجة حتى كيسمع دقان فباب بيتو حلات لباب بشوية و طلات

هاجر: دخلت شافتو كيجمع لفاليز ديالو

جلال: محتاجة شي حاجة مزال كيقاد حويجو

هاجر: بغيت نهضر معاك

جلال: دار عندها الى كان نفس الموضوع راه دوينا

هاجر: انا كنكرهك

جلال: ضحك بستهزاء ماشي شي حاجة جديدة ملي جيت و انا كنسمعها

هاجر: جات قدامو و قبطاتو من كول قميجة حمار أنا كنبغيك واخة كلشي لي درتي فيا واخة تزوجتي بيا زواج مصلحة مقدرتش نكرهك و لا نساك حيت بغيتك من صغري بدات كتبكي

جلال: مصدوم من ردت فعلها جرها عنقها شششش متبكيش

هاجر: تسللت مبين حضنو يالله بغيت نخرج هو يهزني جلس على نموسية و جلسني فوق رجليه معنقني

جلال: كنبغيك كنحماق عليك ماعرفتش امتى و لا كيفاش بغيتك ممكن حيت صبرتي ليا في شهور لأولى لزواجنا عمرك تشكيتي مني ملي عرفتي لحقيقة و خليتيني كنت غادي نحماق سهرت مع بنات و حاولت نساك ولكن مقدرتش ملي توفى الوليد انا واعدتو عمري نطلقك ولا نخليك واخة يطرا لي طرا وليت كنصلي بعدت على الحرام دعيت الله يجمعنا مرة خرى نتي ملي تخلقتي و نتي ديالي مستحيل نفرط فيك

هاجر: تصدمت مكنتش متوقعة نسمع منو هاد الهضرة الصمت قرب مني باسني و طول فالبوسة غير كمل رجع عنقني هزني بين يديه حطني فوق النموسية باسني فراسي و فعنقي غمضت عيني جات فبالي هضرة ماري انو الراجل كيبغي لبنت المتحررة فالفراش قررت نحيد الحشمة هاد لمرة نضت وتكيتو على الفراش جلست فوق حجرو نيشان كنت مترددة و انا كنزول ليه قميجة مكنتش كنتصور غادي نوصل معاه لهاد الجرأة مع جلال كسرت كل الجواجز و حيدت مصطلح حشومة لانو كيبقى راجلي استمتعت بالجسد ديالو و حتى هو درنا وضعيات مكنتش نتخيل شي نهار نوصل ليهم معاه وصلنا لطوب ديال لهيجان لا انا لا هو بعد ساعات طوال كل واحد فينا متكي على ضهرو كيتنفس بصعوبة من الممارسة لي كانت كلها شغف و حب خاصة مدة مقربش ليا جلال: دار على جنبو و جبدها عندو كنبغيك

هاجر: انا كنعشقك

داز أسبوع على باش تصلحنا انا و جلال حنا دابا فافران فالفيلا عندي اه جى معايا نبدلو الجو تعرف على نبيل و عرف طبيعة العلاقة بيناتنا و انو معتابرني بحال ختو خبرنا محسن و ماري بالصلح ديالنا فرحو لينا بزاف وعرفت انو كانو راسمين خطة عليا لي هي موافقة جلال على طلاق حتى السفر و مشاركاهم حتى ماما و بابا ولكن محقدتش عليهم بلعكس بيهم باش انا دابا مع راجلي حبيبي مجموعين.

في مكان مظلم جالسة مربوطة شعرها موسخ و حويجها حتى هوما ظل راجل كيقرب ليها كتحاول تعيط بسميت جلال و لكن صوتها مقجوج ناض على انينها بانت ليه عرقانة و شي قطيرات ديال لعرق فجبهتها

جلال: كيحرك فيها هاجر فيقي هاجر

هاجر: ناضت مفزوعة شادة على قلبها

جلال: كنتي كتحلمي

هاجر: اه حلمة خيبة

جلال: عنقها و قرى عليها شوية القرأن رتاحي راه غير حلمة

هاجر: حسيت انو حقيقة ماشي حلم

جلال: شهر و نتي فالدار يكما توحشتي المطعم ديالك

هاجر: لا انا واثقة فنبيل و خصني نتفرغ ليك حتى نتا ضحيتي و نقلتي خدمتك لمغريب

جلال: ماشي مشكيل المهم نكون معاك

هاجر: الله يخليك ليا شافت فساعة قرب الفجر نوضو نصليو

جلال: اه نيت داير مع محسن عندنا صفقة مهمة مع واحد رجل اعمال جاي من المانيا

هاجر: الله يوفقكم

جلال: امين

هاجر: نيت نوجد لماري مسمن راك عارفها كتوحم تبخ ليا راسي ثاني الى ملقاتوش

جلال: هههه

ناضو صلاو داز حاليا شهر و صرف على باش رجعو ابطالنا لبعضياتهم ماري رجعت كتوحم من شهر لعسل جلال نقل اعمالو لمغرب ستقر هو و هاجر فعروس شمال تحت طلب ديالها باش تبقى قريبة لصحبتها حتى جلال دمج اعمالو مع محسن شرا الفيلا لي كانو سكنو فيها اول مرة فاش جاو لهنا هاجر خلات تسيير المطعم لنبيل و ارباح كيقصموهم على نص هو بالخدمة ديالو في المطعم هي براس لمال فيلا ديالها تما خلاتها مسدودة ملي يبغيو يبدلو الجو يمشيو ليها عزيزة و عبد الرحمان عاد تهناو على ولادهم هادشي لي طرا فهاد شهر و صرف.

في جهة خرى:

نازل من الطيارة بلباسو الرسمي الاسود هاز كارو فيديه و موراه زوج رجال

…..: اخيرا رجعت لبلادي بعد غياب طويل

كارد:سيدي كلشي واجد

……: كنتمنى يكون كلشي مضبوط

كارد: اكيد

……: اخيرا رجعت ليك وغادي نجيبك عندي ماشي انا لي نبغي لحاجة و تخاد من بين يدي كملو الاجراءات و خرجو من المطار و الوجهة مجهولة.

شكون هاد شخصية لي بانت وغادي تقلب موازين القصة؟

واقفة فالكوزينة كتوجد لفطور حتى حسات بيدين دارو على خصرها عرفاتو غير من ريحتو جلال: باسها فعنقها قربتي تكملي

هاجر: غير سبقني لطابلة انا غادي نبدا نحط

جلال: نعونك بدا كيهز معاها وحط فوق طبلة لي فالمرح جلسو فطرو فجو من الضحك حتى كيشوف فساعتو باسها فراسها هدا هو الوقت يالله نوصل لشريكة راه ليوم صفقة دعي معانا.

هاجر: الله يسر ليكم

جلال: امين وخرج من الدار متوجه لشركة بينما هي بقات كتجمع الدار حتى جات عندها ماري معذبها لوحم مكتحمل حتى حاجة عطياها غير لنعاس و مقابلة هاجر.

في شركة عند دراري🏨

سكرتير: راه وصل ..

جلال: قاطعها دخلي سيد متخليهش يتسنا

محسن: دكشي لي دوينا فيه هو لي غادي يكون واخة ولد عمي مي الخدمة خدمة.

جلال: كون هاني

منصف: شاب فعمرو 34 سنة ولد عم محسن هو نفسو لي كان عطا لماري الكادو ديال لعرس كانت معاها هاجر من داك نهار و هو كيبغيها متحيدتش صورتها مابين عينيه حتى هو عندو حقو فزين رجل اعمال معروف فالخاريج سلم على دراري و جلس مقابل معاهم ندخلو فصلب الموضوع من بعد ماكملو الهضرة تافقو و عقدو الصفقة.

جلال: موجه كلامو لمنصف مبروك علينا

منصف: شكرا شرف لي نخدم معاكم😊

محسن: اوا بهاد المناسبة انا عارض عليك تغدا معانا

جلال: ماري عندنا فالدار يالله تغداو معانا خرجو دراري من الشركة متوجهين لفيلا عند جلال.

رجعو عند لبنات👭:

ماري: لبسي هادي

هاجر: عيقتي أختي واش لوحم جاك غير عليا

ماري: بغيت بنتي تكون كتشبه ليك لبسيها عفاك😭😭

هاجر: قبطات لكسوة كانت كحلة كم ديال جلد عريانة من الظهر جابتها ماري صباح هي و شي كساوي و ريحات ليها باش تبدل فالدار لبستها هاجر جاتها لاصقة مع فورمتها كيف جيتك🙄

ماري: فنة غادة و كتزياني اختي

هاجر: يالله خليني نحيدها

ماري: شنو واش لبستيها باش تحيديها لا اجي جلسي لبسي هاد صندالة تجي معاها عطاتها صندالة كحلة طالون مشبكة و جلستها قدام المرايا قادات ليها وجهها و دارت ليها عكر حمر جمعت ليها شعرها ديل حصان على طولتو من بعد مكملت ليها واو جيتي فنة😍 ليوم تهبلي جلال

هاجر: ويالله نشوفو ماكلة فين وصلت باش يقرب يجي نحيد هدشي

ماري: راه راجلك مالو صاحبك عادي تلبسي هدشي و تغيري لوك مرة مرة حتى تغيير زوين

هاجر: تغداي معانا ليوم

ماري: لا شوية و نمشي دخلت هاجر شافت لغدا و ماري تكات نعسات فوق لفوطوي ولات ناعسة فهاد الوقت وصلو دراري قدام باب الفيلا حطو طوموبيلات دخلو مجموعين حتى كتبان ليهم ماري ناعسة

محسن: مدام عندي عذبها لوحم ولات نعاسة

منصف: مفخباريش مبروك

محسن: الله يبارك فيك

جلال: معرت فينها هاجر مع هاد الكلمة كيسمعو صوت تقرقيب طالون كانت هاجر خارجة هكاك دارو دراري بثلاثة حلو فمهم اما هاجر معرفت باش تبلات تبلوكات محسن: احم ودار عطا بظهرو

منصف: كيطلع و هبط فيها بنظرات ممفهومينش

جلال: ملي شافو كيشوف فيها مشى عندها حيد لفيست ديالو و لبسها ليها دوى معصب بيتك

هاجر: الصمت تصدمت طلعت كتجري لبيتها و كتويل

جلال: دار عندهم دار داركم خودو راحتكم وطلع تبع هاجر

محسن: كيفيق ماري لي مجايبة لدنيا خبار حبيبتي فيقي

منصف: شكون ديك لبنت كنت ديجا شفتها فعرسكم🙄

محسن: بطنز ختو مزال كيحاول يفيق ماري

منصف: عاد تنفس و ارتاح ( بينو بين نفسو كنت معول نقلب عليك ساعة جيتي حتى لعندي كتحمقي فكل حالاتك).

هاجر مزال كدور فالبيت و تويل انا لي سمعت هضرتك اماري خرجتي عليا حتى كيتحل الباب داخل عندها جلال معصب

هاجر: عفاك غير سمعني راه ماري لي لبستني زيدون متصلتيش بيا باش غادي نعرف راه جاي معاك لبراني

جلال: الصمت غادي و كيقرب ليها حتى كلاها مع الحيط

هاجر: الله يخليك غير سمعني شوية و تبكي

جلال: قبطها من يدها و جرها عندو حتى تخبطت معاه خشى و جهو فعنقها و باسها

هاجر: جلال غير سمعني راه…

جلال: ششش قبطها من خصرها طلعها و هبطها جيتي كتحمقي و عاض على فمو

هاجر: سمحلي ..

جلال: قاطعها بقبلة و كيتحسس جسمها ماحس براسو حتى جرها لنموسية و هو فوقها كيقبل فيها بعنف

هاجر: قطع فيها نفس نوض راه ناس لتحت

جلال: مكالي بيديه و ناض من فوقها جر شعرو بالنفخة وضربها لفخاضها لبسي خمارك و هبطي لتحت راه جا معانا منصف شريك جديد

هاجر: واخة نبدل بعدا هاد الحالة

جلال: شدها من يدها لا غير خليك هاكة ولبسي من فوقهم خمارك راه مزال غادي يمشيو😉 نفارد بيك

هاجر: واخة☺ لبست هبطت لتحت كتوجد ليهم الغداء لقات ماري فاقت كتصيب سلطة

ماري: تعطلتي يكما…

هاجر: لا ماشي دكشي لي فبالك

ماري: عجبو لوك

هاجر: اه

وجدو لبنات الطبلة و حطو دكشي فالطبلة ديال صالون تغداو فجو زوين منصف منزلش عينيه على هاجر اما هي ممصوقاش ليه كملو غداهم جمعو لبنات طابلة منصف عتاذر ليهم و مشى بحكم عندو مزال ميتقدا و محسن مشا يوصل ماري لدارهم من بعد مخبرو جلال انو مغاديش يرجع هاد لعشية لشركة طلع لبيت لقاها يالله حيدت خمار طواتو و كتحطو فالماريو

جلال: كيطلع و نزل فيها عرفتي أش بغيت

هاجر: شنو🙄

جلال: مكرهتش تشطحي ليا بهاد الكسوة

هاجر:😲

جلال: قرب ليها و قبط يدها عمري طلبت منك شي حاجة او فرضت عليك شي حاجة مي بغيتك تشطحي ليا بيها

هاجر: امم واخة مشات جابت فولار ديالها عقداتو على وسطها عندك شي اغنية ديال رقص

جلال: اه بلاتي قاد تلفون مع تلفازة لي عندهم فالبيت و خدم اغنية شرقية مشى جلس فوق نموسية كيشوف فيها

هاجر:بينها بين نفسها تنفسي و رقصي عادي راه غير راجلي حيدت طالون و حيدت لباندة لي فشعرها بدات كترقص على انغام موسيقى نسات جلال راه كاين فالبيت كانت غادة مع أيقاع بحال راقصات المحترفات

جلال: 😲 مكانش كيظن كتعرف ترقص بهاد البراعة بقى حال فمو فيها سلات موسيقى هو مزال كيشوف فيها

هاجر: تقدمت عندو كتنهج جلست حداه كترجع نفس كيف جيتك

جلال: كتحمقي فين تعلمتي

هاجر: ملي كنت مسجلة فلاصال خديت دورات فالرقص الشرقي حيت كيعجبني

جلال: قربي نقوليك

هاجر: قربات على نيتها حتى جرها جات مقابلة مع وجهو بدا كيبوس فيها و سافرو لعالمهم الخاص.

بعد ساعات جالسة فوق الكرسي كتنشف شعرها كيبان ليها جلال خارج مدوش حتى هو

هاجر: بصحة

جلال: الله يعطيك صحة

هاجر: انا نزل نوجد ليك قهوتك

جلال: انا تابعك لبس حويجو شوية و كان كيشرب قهوتو و هاجر متكية عليه عرفتي مرتحيتش لداك منصف

هاجر: علاش

جلال: معرفتش ولكن انا لي كيجمعني بيه هو شراكة

هاجر: دكشي لي كاين زيدون نتا ممحتجوش شركة أصل مزال فأمريكا

جلال: حط يدها على كرشها كنتمنى شي نهار تفرحيني تحملي مني

هاجر: كنت بغيت نفاتحك فالموضوع بغيت نشوف طبيبة مكنشربش مانع وباقي ربي مرزقنا

جلال: لوقت لي بغيتي نمشيو

هاجر: مكرهتش ليوم قبل غدا

جلال: غدا صباح نمشيو نشوفو طبيبة

هاجر: ان شاء الله هاكة دوزو نهارهم.

أصبحنا و اصبح الملك لله فاقت هاجر بحال كل صباح دارت روتينها اليومي و من بعد صلاة كملات هبطت وجدت لفطور حتى كتشوف جلال نازل بلباسو رسمي

هاجر: صباح نور

جلال: باسها فراسها صباح الخير حبيبتي

هاجر: صليتي

جلال: ضروري غير نكملو وجدي راسك نمشيو لعيادة راه خديت ليك موعد من عند دكتورة لي متبعة عندها ماري

هاجر: امتى!!

جلال: غير دابا و هو كياكل تصلت بماري و عطاتني رقم الهاتف ديالها

هاجر: واخة انا نطلع لبس

جلال: و الفطور

هاجر: من بعد طلعات لبسات خمارها و نزلات عندو تسناتو حتى فطر خلات طبلة بلا جميع خرجو ركبو فالسيارة و الوجهة عيادة طبيبة نسائية بعد نصف ساعة و صلو صباح طريق عامرة دخلو عطاو المعلومات وجلسو كيتسناو نوبتهم

جلال: مالك بنتي لي متوثرة بزاف

هاجر: لا

جلال: يكون غير الخير

هاجر: الصمت شوية جات المساعدة دخلتهم عند طبيبة لغرفة الفحص من بعد اسئلة روتنية شحال مدة زواج واش كيعنيو من شي مرض مزمن دخلت هاجر لغرفة المعاينة بعد نصف ساعة خرجت دكتورة كتحيد قفازات طبية و هاجر كتقاد خمارها

طبيبة: كتشوف فجلال و هاجر كنظن تأخر الحمل واضح المدام ديالك أتكون عارفة علاش

جلال: هز راسو كيشوف فهاجر لي حادرة راسها وكتفرك فيديها بتوثر سمحي لي و لكن مفهمتش

طبيبة: مدام قبل كانت تعرضت لاجهاض كانت هاملة صحتها هدشي لي غادي يخلق ليها مشكيل الى بغات تولد مرة خرى

جلال: تصمك مفهم والو اجهاض كيفاش و قتاش هادو كلهم أسئلة طاحو فبالو شاف فهاجر واحد شوفة كتخلع

هاجر: مازال حادرة راسها دموع على طرف عينيها

طبيبة: قاطعت صمت لي دام دقائق انا غادي نكتب ليها شي تحاليل و غادي نعطيها موعد اخر يكون فأقرب وقت نتمناو يكون خير ميكونش تضرر كبير فالرحم.

جلال: شكر دكتورة وخرج من المكتب ديالها هبط لطوموبيل كيفكر كيفاش كانت حاملة و خبات عليه واش اجهاض دارتو هي و لا مجرد حادث يالله هز راسو بانت ليه جاية حادرة راسها ركبات دارت سمطة و غادين راجعين لدار فجو مكهرب وصلو دخلو تمت طالعة لبيت حتى وقفها صوتو فين غادة بسلامة

هاجر: الصمت

جلال: امتى كنتي حاملة و علاش مقلتي ليا والو

هاجر: انفاجرت بالبكى مكنتش عارفة راسي حاملة ملي مشيت افران نأسس حياتي كان جاني نزيف حيت جهدت على راسي و ملي هزوني لطبيب عرفت راسي درت أجهاض

جلال: علاش سكتي و مقلتي ليا والو انا من ديما كنت كنتمنى يكون عندي ولاد منك خيبتي ظني فيك

هاجر: مقدرتش نقولها ليك و نواجهك حنا يالله صلحنا أمور بيناتنا

جلال: الوليدة فخبارها

هاجر: تواحد مفخبارو

جلال: كون قلتيها قبل كنت غادي لقى ليك ألف عذر ولكن دابا …و سكت

هاجر: قدر موقف ديالي ممكن منولدش كاع منكونش أم حياتي كاملة شدات يدو خصك توقف معايا ماشي تقولي هاكة انا غلطت و لكن مقدرتش نقولها ليك

جلال: طلق من يدها كنتمنى كن قلتيها ليا حيت داك لبيبي لي كان فكرشك كان يكون ولدي أو بنتي شحال كان عندو

هاجر: كتنخصص شهرين

جلال: شهرين معرفتيش راسك حاملة

هاجر: مكنتش عارفة راه اول حمل ليا وحتى عادة شهرية كانت كتجيني عادية

جلال: ياكما درتي اجهاض حيت كنتي حاقدة عليا ديك ساعة

هاجر: هزات عينيها فيه حمرين و جوباتو بصوت عالي مستحيل نفكر نقتل روح بريئة ولو مخاصمين بلعكس كان ممكن هو لي يقدر يصلح بيناتنا أمور ديك الوقت

جلال: الصمت ثم خارج بحالو

هاجر: فين غادي

جلال: تخنقت خارج نشم لهوى و نفكر خرج من لفيلا مخلي هاجر موراه كتبكي

هاجر: انا كنت باغة داك لولد كثر منك اجلال ديما كتعاملني خيب لوقت لي محتاجاك عطيتيني بظهر و مشيتي لثاني مرة ناضت من أرض و طلعت لبيتها تكات بحويجها كتبكي عالله تبرد العافية لي شاعلة فيها من ناحية خايفة لمتوليش ام و من ناحية ندمت حيت مقالت ليه والو و حتى ملي خرج و خلاها رغم مبررات لي قالت ليه متفهمهاش.

فنظركم شكون على حق جلال و لا هاجر؟؟

جالس فالقهوة كيخمم فهادشي لي طرا هاد صباح هز تلفون تاصل بمحسن قاليه يجي عندو لقهوة لي كيجلسو فيها كان محتاج معامن يهضر و خوي قلبو كيحس براسو مخربق شوية بان ليه محسن داخل سلم عليه وجلس بعدما طلب قهوة كيف عادتو

محسن: مالك

جلال: والو غير هاجر ملي تفارقنا كانت حاملة و مفخباريش

محسن: شنو كيفاش هنتا عود لي غير بشوية

جلال: عود ليه كولشي

محسن: الخطأ ماشي ديالها دكشي ديال الله معندك لاش تلومها فعلا غلطت ملي خبات عليك و حتى نتا غلطتي شحال من مرة فحقها

جلال: هههه واش فخبارك ممكن عمرها تحمل لا هي تولي ام لا انا نولي أب

محسن: علاش كتسرع حتى دير تحاليل كيف قالت ليها طبيبة و يكون خير هدا بتلاء من الله راك كتصلي و عارف بينك بين الله

جلال: الصمت

محسن: نوض سير عند مرتك تكون حالتها مكانش خصك تخليها وتخرج من دار حاليا هي محتاجة ليك

جلال: كن بقيت فالدار كنت ندير شي كارثة لي ندم عليها فضلت نخرج نبدل الجو و نبرد

محسن: معندك مدير حاليا من غير توقف معاها هادي اول ازمة فحياتكم الزوجية مخصكش تواجهها هاكة زيدون لي كيبغي كيسامح.

جلال: يالله نوض نتحركو ناضو خلصو و خارجين متاجهين لطوموبيلاتهم

محسن: اه فكرتيني راه منصف غدا غادي يجي يتعشا عندك باغيك فشي حاجة خاصة

جلال: مقاليكش شنو

محسن: بيناتنا داك ولد عمي معنديش معاه مسولتوش كتجمعنا بيه الخدمة فقط

جلال: قولها لماري وجيو نيت تفوج شويا على هاجر

محسن: واخة يالله تلاح توجهو لسياراتهم كل واحد ركب زاد لدارهم.

عند محسن & هاجر👫

داخل مع باب الفيلا جايب بيتزا و مونادا و سقاطة لماري تلاقا مع ام ديالو باس على راسها

ام محسن: على سلامتك

محسن: الله يسلمك الوليدة فينها ماري

ام محسن: راه من صباح و هي ناعسة مبغات تاكل والو

محسن: انا جبت ليها هدشي

ام محسن: شد بخاطرها راك عارف هاد الفترة صعيبة عليها

محسن: انا داير كثر من جهدي نطلع نشوفها طلع بانت ليه ناعسة بدوبياس فلكحل و مكمشة حاول يفيقها بشوية حتى فاقت كتكسل

ماري: كتحك فعينيها جيتي

محسن: كيشوف فيها اه قبيلة نوضي تاكلي

ماري: اح ريحة بيتزا 😍

محسن: اه هي لي جبت ليك هاكي

ماري: خطفتها من عندو بقات كتخشي فوجهها و محسن مقابلها حتى كملات

محسن: شبعتي

ماري: اه الحمد لله

محسن: راه ديك ميكة فيها سقاطة ديالك حتى تاكليها باسها فراسها

ماري: كتبكي شكرا سمح لي معذباك معايا

محسن: راك مرتي اه غدا معشيين عند جلال و هاجر عارض علينا

ماري: يكما شي مناسبة

محسن: لا غير منصف باغي جلال فشي موضوع وطلب مني نحضرو معاهم

ماري: باستو فمو اك بب عرفتي توحشتك

محسن: ياك انا خايب و ريحتي مكتعجبكش وزيد و زيد

ماري: لا دابا عاجبني جراتو من كول قميجة بدات كتبوس فيه حتى خرجاتو على طوعو و دخلو فعلاقة حميمية.

داخل لفيلا حل لباب بانت ليه طبلة ديال لفطور باقة كيما خلاوها عرفها تكون مزال فبيتهم كتبكي جلس كيخمم فهاد المشكيل لي رونو موصل لحتى نتيجة تفكر هضرت محسن انو خصو يوقف معاها دابا ستغفر الله و طلع لبيتهم حلو بانت ليه ناعسة مكورة على راسها و عينيها منفوخين باينة بكات بزاف

جلال: كيحرك فيها هاجر فيقي

هاجر: فاقت شافتو ترمات عليه معنقاه سمح لي الله يخليك مبغيتش نخبي عليك ولكن هدشي لي طرا

جلال: عنقها حتى هو ششش متبكيش انا معاك مغاديش نخليك

هاجر: واش مزال مقلق مني

جلال: مع ابتسامة خفيفة كاين شي حد كيتقلق من روحو

هاجر: بدات كتبكي و رجعات عنقاتو.

جلال: وانوضي وجدي لينا مناكلو راني ميت بجوع

هاجر: هي لولة ناضت جمعت روينة ديال صباح ووجدت ليهم لغدا كانو كيكلو حتى قاطعها جلال راه غدا جاي منصف و محسن و ماري يتعشاو معانا حتى تشوفي اش غادي يخص باش ناخدوه عشية

هاجر: واخة كملو غداهم و خرجو تقداو اش خاصهم دارو و حاولو يتنساو المشكيل لي عندهم رجعو لدار صلاو صلاتهم و توجهو لسرير هاجر كتخمم

جلال: مالك

هاجر: غدا غادي رجع عند دكتورة باش ندير تحاليل و الفحوصات غادي تمشي معايا؟

جلال: ان شاء الله ضروري نكون معاك كلشي يكون مزيان متفكريش بزاف.

هاجر: كنتمنى

جلال: جرها عندو معنقها نعسو في انتظار الغد.

اصبحنا و أصبح الملك لله صباح جديد فاقت هاجر هي و جلال هاد المرة دقة وحدة صلاو صلاتهم من بعد مدارو روتينهم الصباحي وجدت لفطور ليه و لبست حويجها و الوجهة عيادة طبيبة وصلو هوما لولين دخلاتهم لقاو عليها تحية

طبيبة: تفظلي بنتي باش نبداو الفحوصات

هاجر: مشيت معاها خدات العينات و كل متحتاج دارت ليها تلفازة لبست حويجها و توجهو لمكتب.

طبيبة: كيما كنت متوقعة

جلال: شنو

طبيبة: مدام هاجر اجهاض اول ديالك خلى اي بويضة متكونش مستقرة باش يوقع تخصيب وكنتمنى مع ادوية لي غادي نعطيك يكون خير هادشي الى موقعش اجهاض.

هاجر: كتبكي واش بغيتي تقولي ليا مغاديش نكون ام بطريقة غير مباشرة

جلال: قبط من يدين هاجر

طبيبة: كلشي بيدين الله حاولي تبعدي على سطريس و ضغوطات و تبعي دواك يكون خير.

جلال: ان شاء الله خداو من عندها ورقة ديال دوا و خرجو مشى جلال جاب لي خصها من صيدلية ورجع عندها لطوموبيل وصلو لدار و دخلت هاجر لبيت سدات عليها كتبكي مباغاش تحرم من كلمة ماما

جلال: هاجر نتي راك كتعرفي بينك بين الله هادا ختبار و بتلاء منو

هاجر: انا ممكن منكونش ام و لا حتى نتا تكون أب

جلال: مكيهمنيش لولاد لمهم حنا و الى مكانش فيهم خير لينا

هاجر: الصمت

جلال: مزال حياة قدامنا حتى الى قدر الله و مكانش امل نديك لخاريج و العلم راه طور ممكن نتبناو و نديو أجر

هاجر: الصمت

جلال: أتبقاي ساكتة نوضي نعلي شيطان ولي مكتبها الله مرحبا بيها

هاجر: مسحات دموعها و نعم بالله.

في المساء واقفة قدام المرايا لابسة قفطان خفيف فالبوردو مع فولار بيض و شربيل بيض وجهها خالي من مكياج وقف موراها لابس سروال أسود و قميجة بيضة مع ساعتو ضمها من خصرها جيتي كتحمقي كيف ديمة بسيطة و لكن مميزة دارت عندو هاجر و عنقاتو من خصرو حاطة راصها على صدرو ربي يخليك ليا سمعو جرس لباب

جلال: يمكن جاو

هاجر: قبطت من يديه و هبطو ستقبلو محسن و ماري و منصف لي جاو مجموعين من بعد سلام بقاو دراري جالسين فالصالون ووقفت ماري هي وهاجر غادين لكوزينة ماري كتقاد الحلوة فطبسيل مرة مرة تخشي فوجهها

هاجر: كيف غادة فالحمل

ماري: معذبة وليت غير كنعس معنديش لخاطر

هاجر: الله يكمل عليك عرفتي انا محال نولي ام مع هاد الكلمة ضارت عندها ماري لي مصدومة

ماري: مفهمتش

هاجر: عودات ليها كولشي

ماري: ولكن راه عطاتك أمل شربي دواك متفقديش امل و زيدون بنتي ولا ولدي لي فكرشي حسبيه ولدنا بزوج

هاجر: ضحكت فعز بكاها هههه أكيد راني انا لي موحماك زعمة

ماري: نساي لهم يالله هزي صينية و تبعيني

هاجر: مسحت دموعها ودخلو عند دراري حطو صينية لقاوهم كيهضرو

منصف: موجه هضرتو لجلال احم انا صراحة جيت ليوم بغيت نفاتحك فواحد الموضوع

جلال: تقاد فالجلسة كيشوف فيه بتشكيك نوعا ما

منصف: كيما عارف انا راجل معقول و عندي غير نيشان صراحة جيت ليوم بغيت نطلب يد ختك لزواج بغيتها من اول نهار شفتها فعرس محسن و حتى ملي جيت اخر مرة زاد اعجابي بيها سولت محسن قالي ختك انا عارف اب ديالكم متوفي علاش جيت عندك نيشان

جلال: تبدلو ملامحو فرمشة عين شاف فمحسن لي لقاه مفاهم والو كيبرق فعينيه ورجع شاف فمنصف شكون ختي

منصف: نعت ليه فهاجر لي غير شافتو نعت فيها شهقت

ماري: حلت فمها و هي حابسة ضحكة

جلال: ناض وقف قدامو شريف واش عارف شكون هاديك ولا غير داوي

منصف: وقف قدامو انا درت ابحات ديالي عليها ولكن لقيت معلومات بسيطة بحكم مكتخرجش بزاف

جلال: قبطو من كول كوستيم درتي ابحات مزيان الزامل هاديك راه مرتي لي كتبقشش نتا من موراها

منصف: كيفاش مرتك محسن اش كنسمع

محسن: فرق بيناتهم فعلا مرتو نهار قلت ليك ختو انا ضحكت معاك

منصف: شاف فجلال كنظن غلطت

جلال: غلطتي بزاااف عتابر شراكة بيناتنا لاغية من ليوم

منصف: ماشي تال هاد درجة انا كنطلب منك سماح معرفتش راه مرتك كون عرفتها منحطش راسي فهاد الموقف ولكن غلط ديال كارد لي جاب لي معلومات غالطة

جلال: عاود قبط منو نتا معارفش شكون جلال الوردي لي شاف فشي حاجة كتخصني نقتلو بلا منفكر انا دوزتها ليك ولكن تشوف جيهتها مرة خرى نشرب من دمك.

منصف: حيد يديه عليه و عتاذر بلباقة و خرج من الفيلا.

جلال: دار عند محسن كيفاش نتا تقوليه ختي

محسن: انا قلتها بضحك برد اصاحبي زيدون صافي سيد عتاذر و مشى

جلال: جلس كيسوط هز عينو فهاجر لقاها مكمشة فماري لي غير مترعة فمها كضحك اجي حدايا

هاجر: جلسات حداه

ماري: وااااع صحبتي تخطبت ههههه اح ولكن راك توت

محسن: خنزر فيها هي تجمع ضحكة

ماري: بان ليها الجو مكهرب هاجر اش بان ليك نحطو لعشاء راه بدا كيجيني نعاس ناضو لكوزينة ماري دور و تشد فهاجر حطو لعشاء تعشاو فجو شوية مكهرب.

محسن: ماري وفيلة هدا هو الوقت يالله نتحركو بحالنا

جلال: معندكم فين تمشيو و زيدون غدا غير الويكاند باتو معانا

ماري: اه نباتو عفاك

محسن: اوا نعلم لحاجة و نبقاو تاصل بأم ديالو باش متشطنش عليهم من بعد ما ضحكو و نشطو وبدلو جو لي كان مكهرب

ماري: كتفوه جاني نعاس

محسن: حتى انا تعطل لوقت راه 2h00 صباح هادي

جلال: نوض نوريكم لبيت وراهم بيت لي ينعسو فيه جا لتحت قريب لصالون و طلع هو و هاجر لبيتهم.

فالبيت عند ماري & محسن👫

ماري: متكية فوق نموسية كتشوف فالسقف كتخمم

محسن: فاش كتفكري🙄

ماري: فهدشي لي طرا ليوم

محسن: معندك لاش تشغلي بالك عادي

ماري: دارت عندو تكات جنب مكالية بيدها كتلعب فلحيتو ضحكت بخفة شفتي وجه جلال كيف تبدل

محسن: راه كيبغيها الحمد لله ملي مقتلوش

ماري: عاود عبسات عرفتي هاجر صعيب تحمل

محسن: شاف فيها فخباري ولكن يكون خير جلال راه يوقف معاها

ماري: كنتمنى هاجر عانات بزاااف

محسن: جرها عندو نعسي رتاحي ليا نتي وبنتي

ماري: ديما كتقول بنتي و الى كان ولد

محسن: أحساس فقط ولي جابو الله مرحبا جرها عندو غطاها و نعسو.

فالبيت عند هاجر & جلال👫

من بعد مدخلو حيدت فولار طلقت شعرها حيدت قميص بقات بيرميدة و سوفيطما ديالها كيبان ليها جلال كيحيد قميجتو مغوبش و معصب عرفت انو باقي هاز فقلبو على موقف ديال قبيلة تمشات عندو حطات يدها على كتفو

هاجر: جلال

جلال: شاف فين حاطة يدها و شاف فيها

هاجر: محسات براسها غير مجرورة و شادها من شعرها بعنف عفاك راك قصحتيني

جلال: تقصحتي انا راه تقصحت هنا كيضرب على صدرو العاري كيفاش تجرأ يشوف فيك

هاجر: كتحاول تفك راسها منو و هي كتوجع سيد راه عتاذر

جلال: كيفاش يخطبك مني يعلم الله شحال من واحد كيشوف فيك مرتو

هاجر: هادشي مكاينش انا ديما كنخرج معاك

جلال: بقى كيشوف فيها كيفاش مزنكة و كتوجع كتعض على شفيفها محس براسو حتى تحنا على شفيفها كيبوس فيها بنوع من العنف باغي وصل ليها انها ديالو رخف من شعرها هزها بين يديه دون ميفصل القبلة ورماها على سرير ونطق نتي ديالي ما من حق تواحد يشوف فيك انا لي منحقي نقيصك و نشوفك كانت هادي اول مرة جلال يعامل هاجر فيها بنوع من العنف فالفراش صبرات ليه و خلاتو على خاطرو حيت عرفات انو محملش منصف يشوف فيها و عاد زيد جاي يخطبها منو ملي كمل تكى جنبها كينهج دار شاف فيها لقاها كلها مطبعة بزروقية اثار واضحة على لحمها خاصة هي بيضة و مزنكة بقات فيه و ندم علاش قرب ليها و هو معصب جرها عندو

جلال: باسها فراسها و كفوف يدها سمحي ليا

هاجر: الصمت تخشات فيه معنقاه

جلال: من هاد الحركة لي دارت عرفها مخداتش موقف منو باسها على راسها و همس حدا ودنيها كنبغيك ضمها ليه كثر.

هاجر: بتاسمت ابتسامة خفيفة و نعست حيت فعلا كانت محتاجة ترتاح سخسخها ليوم زيادة على تمارا لي ضربت باش تجهز لعراضة.

دازو ايام و شهور بالضبط عام اخر على زواج جلال و هاجر مزال متبعة مع طبيبة ديالها و كتشرب دواها باقي مجاب ليها الله وليدات شهر باش مبقاتش كتشرب دوى خلاتها فيدين الله علاقتها بجلال مزيانة محتارمين بعضياتهم ضروري من مشاكيل ولكن كيفكوها بالحوار جلال مساعف معاها بزاف حيت ولات حساسة على ابسط حاجة كتشعل عاذرها حيت دايرة بالها مع الحمل محسن و جلال مشروعهم غادي مزيان ماري ولدت بنية كتحمق فيها شي حاجة من هاجر سماتها مريم منصف من بعد معاود عتاذر من جلال على سوء تفاهم لي وقع كمل معاهم شراكة حتى هو تزوج شي بنت من عروس شمال عبد الرحمان ولالة عزيزة حياتهم روتينية مافيها جديد الى توحشو ولادهم كيطلعو يزوروهم هاجر خبرات ماماها بمشكل لي كتعاني منو و نصحتها تصبر ماشي أي حاجة كنبغيوها كنوصلو ليها ديك ساعة و راه مازال صغيرة مع علاج يكون خير.

واقفة فالكوزينة كتوجد لفطور بحال عادتها حتى دخل عندها جلال

هاجر: صباح نور

جلال: صباح الحب

هاجر: كتشوف فيه بشوفات ممفهومينش

جلال: مالك

هاجر: قربات عندو و عنقاتو من عنقو حبيبي

جلال: بتشكيك هاجر مالك

هاجر: كتبان زوين فمك عينيك لحيتك

جلال: ضحك حتى تغمضو عينيه و قبطها من خصرها واش راك بخير؟

هاجر: قربت منو و تعلات سرقت قبلة من شفايفو وخشات راسها فعنقو كتشم ريحتو حتى غفلاتو وعضاتو

جلال: اح مالك

هاجر: تشهيت نعضك

جلال: يالله نفطرو باش نخرجك ليوم راه الاحد نمشيو عند محسن و ماري

هاجر: لا خلينا غير فالدار عفاك

جلال: لي عجبك المهم نخرج نقضي شي غراض ورجع

هاجر: واخة فطر بعدا فعلا فطرو جلال خرج و هاجر بقات كتجمع دار سلات وجدات ليهم الغداء شي حاجة خفيفة مع عصير طلعت لبيتها دوشت لبسة شوميز دونوي مزيرة عليها فالحمر فيها فتحات كبار فالجناب دارت مكياج صاخب طلقت شعرها وجدت باف و موسيقى شرقية حتا تم داخل جلال لبيت كيحيد فساعتو شافها حل فمو

جلال: تمشى عندها مفاجئة زوينة هادي

هاجر: جلساتو على كرسي و حطات ليه عصير مع مكسرات طلقات موسيقى بقات كترقص ليه حتى بدات كتحيد قدامو حويجها جلال تلف بحالا هزيتي بنت و حطيتي بنت عمرها كانت جريئة معاه بحال هكا دوش مكتبغيش دوش معاه سيد سخن عليه راسو ناض عندها حتى لقاو راسهم في خضم ممارسة حميمية المتحكم فيها هاد المرة هي هاجر هو عيا و هي معياتش ناعسة فوق منو هو مدور يديه عليها

جلال: عرفتي كنحسب هادا ثاني أحسن نهار ليا معاك

هاجر: عاود عضاتو من فمو بنين

جلال: مستغرب من تصرفاتها الجريئة معاه

هاجر: جاني نعاس

جلال: حتى تاكلي عاد نعسي

هاجر: لا مبغيتش

جلال: انا نوض ندوش رتاحي نتي

هاجر: بدات كتبكي ليه ندخل ندوش معاك

جلال: زاد صدمة على صدمة واخة هي لولة هزها بين يديه مدخلها لدوش تقليتي شوية ولا جاب ليا الله

هاجر: معرفتش كنحس براسي فيا نعاس

جلال: ندوش ليك و خرجي فعلا دوش ليها لواها فوطة و خرجها بقى هو كيدوش كيتعجب من تصرفاتها ليوم خرج لقاها ناعسة عرفها عيات داز اسبوع هاجر كل نهار موجدة لجلال مفاجئة ولات مطلوقة معاه بزاف هي لي كتبادر باش تكون بيناتهم علاقة حميمية دور وتعنق و تبوس فجلال لي عاجبو الحال و فنفس الوقت مستغرب منها جاي من الخدمة حل باب الفيلا كيسمع صقيل

جلال: هاجر هاجر مكيلقى حتى جواب طلع لبيتهم حتى كيتصدم لقاها سخفانة ووجهها بيض مخطوف منو الدم هزها داها لكلينيك و تاصل بمحسن قالها ليه لي لحق عليه هو و ماري غير وصل لكلينيك خداوها ليه دخلوها لغرفة معاينة

ماري: جاية كتجري و مخلوعة مالها أش قاليك طبيب

جلال: مزال فغرفة المعاينة انا جيت لقيتها سخفانة

محسن: يكون أرهاق أو نزل ليها ضغط دم

جلال: الصمت حتى كيبان ليه طبيب خرج من عندها مشاو عندو كيجريو أشنو عندها

طبيب: شكون راجلها

جلال: انا

طبيب: واحد دقيقة فالمكتب ديالي

ماري: واش ممكن ندخل نشوفها

طبيب: اه ممكن يكمل سيروم و تقدر تخرج دخل محسن و ماري عند هاجر لي مزال ناعسة بينما جلال دخل مع طبيب لمكتب ديالو جلال: واش كلشي مزيان

طبيب: متخافش كلشي مزيان غير هو خصها الراحة فهاد الفترة أحم و تقلل من الممارسة بينما ستقر الجنين

جلال: بصدمة جنين

طبيب: اه مدام ديالك حاملة فشهرها أول واش مكنتوش عارفين

جلال: بفرحة لا شكرا شكرا فرحتيني

طبيب: هادو فيتامينات يعاونوها و تبعد على ستريس غير يكمل صيروم ممكن تخرج

جلال: شكر طبيب مرة خرى توجه لاكيس خلص و مشى لغرفة عندها لقاها مزال متكية

محسن: يكما كاين باس

جلال: عنق صاحبو غادي نولي اب

محسن: مبروك عليكم

ماري: فرحات و باركة لجلال

محسن: جلال حنا غادي نمشيو غدا راه نجيو عندكم لدار خلينا مريم مع الوليدة مكتبغيش تسكت ليها من البكى

جلال: صافي غير سير راه خلصت شوية تا حنا نتحركو بحالنا بينما كمل ليها سيروم و فاقت ودعهم جلال بقى جالس بجنب هاجر كيشوف فيها و كيضحك و أنا كنقول علاش مشهياني تال ديك درجة جاك لوحم عليا باس راسها و حط يدو على كرشها.

كتحل عينيها بشوية كتلقى راسها فغرفة بيضاء و حداها جلال حاط يدو على كرشها هاجر: أش واقع

جلال: والو احبيبتي جيت لقيتك سخفانة و جبتك لسبيطار

هاجر: كتحاول تجلس

جلال: خليك انا نعاونك عونها وقبط يد و يد حاطها على كرشها من هنا 8 شهور غادي يجينا وليد او بنيتا صغيرة

هاجر: كتضحك و كتبكي واش سمعت بصح ولا مزال طيحة مأثرا عليا

جلال: عنقها لا غادي تولي ماما و انا بابا شكرا ليك احسن حاجة طرات فحياتي

هاجر: عنقاتو بقات كتبكي

جلال: علاش دموع دابا خصك تفرحي

هاجر: دموع الفرح هادو الحمد لله ربي مخيبناش

جلال: الحمد لله خصك راحة يالله باش نمشيو لدار فعلا عونها حتى و قفات على رجليها خرجو ركبو فالسيارة مشاو لصيدلية هي لولة خدا ليها مقويات و مشاو لفيلا ديالهم خبرو عبد الرحمان و عزيزة لي فرحو بزاف انو غادي يجيهم حفيد شهور الحمل خرجتها هاجر من جلال بالمعاشرة الزوجية جاها لوحم عليه دور تعنق و تبوس ماري كل مرة كتجي عندها تقابلها و تشوف اش خاصها ملي بقات ليها سيمانة على موعد الولادة جات عزيزة و عبد الرحمان عندهم هاجر كانت كرشها كبيرة مبغاتش تعرف جنس الجنين كتاخد مقويات و عاطية لراسها راحة و حتى جلال كيحاول ما أمكن عليها كيمشي معاها كنطرول لعند طبيبة ديالها تقداو ملابس خاصة بدراري و لبنات وقادو بيت خاص بلي بيبي هاجر مؤخرا ولات كتحس بحريق بزاف ولكن عزيزة ديما كطمنها انو عادي حيت قربت تولد ليوم متكية حدا جلال كيضحكو

هاجر: عرفتي كنحس بالحريق

جلال: عادي راه باقة ليك سيمانة

هاجر: شوية كتحس بفزاك تحت منها جلال وليتي كتبول فالفراش

جلال: واش حماقيتي كيقلب حتى كيلقى فراش فازك تكرشخ عليها بضحك هاد المرة بلتي مرة جايا ديري.. قبل ميكملها كانت هاجر شانقة عليه و كتغوت ربي لي خلقها

هاجر: نوض الحمار راني كنولد

جلال: ضهشر و صبقاتو الخلعة واخة تنفسي مزيان انا غادي نزحم

هاجر: صرفقاتو راه انا لي غادي نولد ماشي نتا عيط لماما خرج عيط لعزيزة لي اكدت ليه سقية تفركعت و خصهم يديوها لسبيطار هزها نيشان لسبيطار و خلا عزيزة تابعاه بحويج لبيبي هي و عبد الرحمان لي مخلوع على بنتو مع وصلو كيبان ليهم جلال فلكولوار كيمشي و كيجي حتى سمعو غوت بيبي

عزيزة: الحمد لله

عبد الرحمان: دار عند جلال عنقو مبروك ولدي

جلال: الحمد لله

تمت خارجة فرملية فيديها زوج ديال وليدات صغار مداتهم لجلال مع ابتسامة مبروك عليكم تزاد عندكم زوج ولاد توأم المدام راها بيخير غير يغسلو ليها و ممكن تشوفوها.

جلال: قبط وليداتو بين يديه كيشوف فيهم و كيبكي بالفرحة عطاهم لعزيزة و عبد الرحمان و دخل عند هاجر يطمن عليها لقاها ناعسة عرقانة باسها على راسها

هاجر: بصوت عيان شفتي ولادنا

جلال: اه زوينين و صغيورين

هاجر: مسحات ليه دموع من عينيه شنو باغي تسميهم

جلال: معرفتش لي بان ليك نتي

تمت داخلة عزيزة و عبد الرحمان و موراهم ماري و محسن حتى مريم صغيورة فيديهم باركو ليهم زيادة

محسن: شنو ناوي تسميهم ضرب على كتف جلال

جلال: ليث و أسد دار عند هاجر عجبوك سميات

هاجر: بابتسامة اه

جلال: قبطهم و اذن ليهم فودينهم و سماهم.

ماري: يالله تقادو ناخدو صورة مجموعين عبد الرحمان وقف حدا عزيزة و جلال قابط ليث و هاجر قابطة أسد هبط حدا وذنيها كنبغيك هاجر شافت فيه كنموت عليك نتا وليداتنا الله يخليكم ليا محسن قابط مريم بين يديه وقف حدا ماري

ماري: يالله 1 2 3 تشيز خدات ليهم صورة عائلية

—- النهاية —