أنوار: (خلاتو كيفور مشا لطموبيلتو بقا كيزدح بالاعصاب فلفولون ممتيقش واش هاديك أمال واخا كان باين فعينيها الخوووف ولكن لساانها مبقاااش مجموع ككان تحلف فيها مزياااان ولكن دابا صعااب ينتااقم منها حيت شيماء والعائلاات دخلو فالخط.. شاف فتيليفونو كانت شيماء جاوب معصب) وييي
شيماء: مالك؟؟
أنوار: وماالكي نتي شنو باغا
شيماء: (بقا فيها الحال) علاش كتهضر معايا هااكا
أنوار: بففف مبرزط مع الخدمة شنو باغية؟؟
شيماء: غير بغيت نكولك راني جيت لوجدة ودابا انا فالسيتي كنجيب شي حوايج ونجيو كاملين
أنوار: امم مرحبا
شيماء: مالك انوار؟؟
أنوار: واالو احبيبة غير مبرزط شوية انا نسالي شي حاجة ونجي عندكم امم مغتكونش معاكم ديك اا****
شيماء: لا موحال
أنوار: حسن يبقاو هي وخوك دايرين فيها عصافير الحب
شيماء: اممم بسلامة (قطعت.. وفنفسها مزياان يمشي غاالط وميعرفش راه عمو للي باغيها لجواج ماشي كيف كان متخيلها مع وليد حيت غير يعرفها مع زهير غيمشي يعمرلو راسو وترجع دور بأنوار ولا هو يرجع يحن ليها.. جمعت شنو كانت باغية دازت لشومبر تشوف هند كان لباب مطرق هبطت لتحت لقات أمال مزالة واقفة معاهم..) واا ياله راه مشا الحاال
نعيمة: (خنزرت فيها على طريقة هضرتها) اوا أمولة تجي غدا يااك؟!!!
أمال: (شافت فمها للي كتخضر مع ختها) ان شاء الله امرت عمي (سلمت على مرت عمها ومشات من حدااهم أما لوخرين مشاو خرجو ركبو مع نبيل وزادو لسونتر فين يتلقاو وليد للي غيديهم يوصلهم للدار…)
~~~~~~~~~~~~~~~
مريم: (واقفة كتقاد لعشا اول بالاحرى صلاد خفيفة حيت محمد غيجيب عشا من برا وكتفلتلها التبسينة وترجع تجمعها هادشي للي كتعيش مع محمد كبر من داكشي للي كانت كتحس بيه من جيهتو شحال هادي كولشي كبر لدرجة رجعات كتعرا وتلبس ديباردورات وشورطات حداه عادي وهي فرحاانة حيت هو عاجبو جسمها ومرة مرة كيلفت انتباهها انه شعرها زوييبن عاجبو حتى من رطوبية لحمها هادشي كيزيد يخليها تقاد ليه وتلبسلو احسن ما عندها حتى من لمكياج بقات كديرو على قبلو.. دخل وعيطلها وشحال كيعجبها الحال يعيطلها بسميتها غسلات يديها مسحاتهم وخرجات عندو كان حايب ساشيات هزاتهم من عندو) نحط داابا
محمد: للي بغيتي ازين
مريم: هههه
محمد: مالك؟؟
مريم: واالو (مشات للكوزينة فرحانة بهاد الزين عاود شافت راسها فكسرونة واخا مبيناش) كاالي الزين خخخخ (حطات كنتاكي شبعها ماكلة ديال الزنقة كل نهار جايب حاجة ولا مخرجها واكلة حاجة وحتى هو كيكتاشف بقات كتحط وهو شاف فتيليفونو هاد نهار بريفي مصوناتش لييه وحتى هو مبقاش كيجااوب حطات وجلسات حداه كتاكل حيت مبقاتش حشمانة فلماكلة ككانت فاللول)
محمد: مريم تبغي تسكني هنا دييييما؟؟؟
———————–
أمال: حتى نجي ونعاود ليك (قطعت مع هند وخرجت شدات تاكسي كتنكر على مها زعما دارت باش تحصلها خاارجة واخا تكون عدوتها مديرش هاكا وصلت للحي فين ساكنة مع هند خرجت ومشات نيشان طلعت دخلات) بفف عييت
هند: مالكي على هاد التعطييلة
أمال: ششت بلاتي
هند: مكيناش مي لالة
أمال: علاش فين مشات
هند: ديتها عند الحاجة حلفت متبقى مي لالة هنا وصلتها هي وسميرة لتماك ووصيت مي لالة باش متقول والو على السكنة معايا خصوووصا قدام مك
امال: (عاودات ليها على مها وعلى انوار) كولشي كيتعكسلي اهند
هند: برافو عليك بعدا عطيتي للكلب هو مفيدو واالو وخوااف ميقدر يديرلك واالو
أمال: تفوو كرهتو وحتى مجية ماما كرهتها
هند: صبري وصاافي
أمال: زعما بغات تقولبني نخرج وتجي هي وميلقاونيش باش دير شهوود
هند: صاافي اصاحبتي متعصبيش رااسك راك شفتي حتى انا ماما كداايرة وكاع مكنسوق ليها
أمال: نتي حتى مك كتجي تهضر وتناقش معاك شوية أما هادي باغاني غير فين طيحني باش رجع عندها وياا ريت وكان كانت تعاملني مزيان والله حتى نخدمها صبااح وليل وانا فرحانة ولكن (رجعت كتبكي) بزاااف والله حتى بزاااف (بقات كتواسيها هند الليل كامل ناضو طيبو طاجين وجلسو مجمعيين علييه.. أما فمجمع دار (الشرقي كنية ديالهم) كانت دار لكاملة عامرة نسابها كاملين جاو ومنهم نعيمة وفتيحة للي كانو تمااك.. فتيحة كضور عينيها فالدار للي كانت زوينة ومفرشة مزيان اصلا مع الدخلة عجبها شكل ديال 3 ديور كبار ملاسقين وفالوسط نافورة عاد جنان للي كيبان زويين وحيت ربيع قرب بدا كولشي ينور)
فتيحة: زويييينة الدار يا ختي من سعدها شيماء
نعيمة: اوا دابا راها مزالة غير خطييبتو اختي فتيحة
فتيحة: هااء وتلكى حسن من دالناس؟؟؟
نعيمة: اوا شنو فلمكتااب اختي (تحط لعشا ولكاملة دايرة صوااب وبراسها فرحاانة حيت تأجل لاكط وهادشي ممنعهاش دير صوااب وبزايد شوية.. اما شيماء دخلات عند جهان لبيتها عطاتها زرورة ديالها 500 درهم وكاشة زوينة فلون زرق لبيبي وبقات جااسة حدااهم حتى شافت أنوار داز من تماك وعيط ليها ردت الشال على راسها لاويااه.. وخرجت عندو تحت نظرااتهم وغير فاتت لباب جمعو بيها لي قالها زويتة وللي قالها خايبة)
شيماء: (فرحانة) على سلامتك
أنوار: احح الزين عندنا فالدار وانا نكول مال هاد القنت نور
شيماء: ههه
أنوار: وشنوو نتي ماشبة وتزيااني
شيماء: اوا نتا للي ضيعتي هاد الزين منين معقدناش
أنوار: لا لا غنعقد داابا بانليا
شيماء: هههه صافي ضيعتي الفرصة
أنوار: كفاش ضيعت الفرصة
شيماء: يعني مزال نفكر ولا حتى يقرب العرس ونديرووه
أنوار: معامن تشاورتي؟
شيماء: (بدلع) مع رااسي
أنوار: امم هادشي خاص نهضرو فيه بجووج ازين
شيماء: اوا حتى تساليلي
أنوار: مسالي لقطيطة ديالي ديييما غير نتي خاص تحايدي ديك الغيرة منك شوية وتن.
الكاملة: (وقفت حداهم بحال عزرين) شيمااا اجي تعشاي
شيماء: وااخا عكووزتي لحبييبة (مشات ولكاملة كارهاها وكتبسم بالسيف عليها وصلو للصالون ودخلات شيماء جلسات حدا ماماها.. تعشااو ومشاو لدار الحاجة فالسفلي تماك كانت ديجا مفرشة عطاتهم لبيت لمزيااان وعاد شي عيالات نعسو فالصالون ولفوق كانت الحاجة دهند للي نعسات بكري حدها جمعات معاهم شوية ومشات ترتاح على حساب دواها وكاينين خوتات الحاجة للي جاو يحضرو لسبوع وللحفلة للي غيدير زهير…)
~~~~~~~~~~~
أصبحنا وأصبح الملك لله
زهير: (أصلا منعسش سنيين وهو كيحلم بهاد نهار حس بتوتر بشكل واخا ممبينش الا بينو وبين راسو كيدعي باش رلي يسهل فهاد المشروع للي حط فيه فلوس صحييحة للي أعوام وهو كيجمع فيهم برياال لبس حوايجو لقا وليد حتى هو فايق صلاو الفجر لبسو حوايجهم وخرجو من تماك نيشان للمحال) نسييت مجاش فبالي كاع هاد القضية عرفتي نتا للي غنديرك
وليد: (هز حاجبو فيه) بنيتك!!
زهير: وماالها هه والله ملقى للي نأمنو على محالي حسن منك
وليد: سيير ازهير خلينا ندوزو هاد صبااح
زهير: ههه وسمو فيها مغتلكاش خدمة حسن من سيكيريتي لمحال خوك
وليد: ههه وااباااااازز (مشاو كيكملو خدمتهم لتحت خرج زهير مشا جاب فطور رتاحو كيفطرو ورجعو للخدمة كانت شي حاجة فالضو كيقادووها بحكم وليد عندو خبرة فهاد المجاال….)
أمال: (فاقت مسخسخة على فيبرور تيليفونها هزاتو بانت ليها اسم MAMA قفزت وجاوبت) ألوو
فتيحة: الوو مزال ناعسة؟؟
أمال: ها لا لا غير مكنتش سمعتو
فتيحة: راكي كتقراي ولا فين؟؟
أمال: فالمعهد علاش؟؟
فتيحة: واش نتي فوكما سولتك تردي علية بعلاش
أمال: لا غير زعما سولت وصافي
فتيحة: واش ممشيتيش تجيبيلي داكشي علاش وصيتك
أمال: (زعمت) ممم ممشيتش
فتيحة: وعلاه ابنت لحرام ياك كلتها ليك لبارح
أمال: اوا لبارح كلتيهالي مع 3 ونص وانا دخلت نقرا مع 4 و6 لقيتك جيتي وانا مور 6 كنخاف نخرج
فتيحة: اوا دابا طيري جيبيهوملي لهنا لدار الحاجة
أمال: راه الدار بعيدة اماما وحتى هند مكيناش راها كتقرا
فتيحة: اليوم بالليل نكون لبسااهم لقفوزية كتغرفيها غير منين تبغي ديريها (قطعت عليها ورجعت متبسمة لحدا لعيالات)
أمال: (تكرهات وفنفس الوقت خافت الا مجابتلهاش شنو بغات ترجعها معاها.. ناضت مشات لبيت هند لقاتها خرجات مشات للكوزينة قدات أتاي وحطات كتفطر وغير كتفكر.. ناضت لبست حوايجها هزت بزطامها جمعت نفسها وخرجات شدات تاكسي نيشان لسوق الفلاح أول مرة غتجي بوحدها هنا عقلات على فين شراتلها لمرة اللولة مشات قاصدااه تقدات شنو بغااات…. ورجعات فحالها كانت 11 مشات تقدات من لحانوت لتحت شوية ديال خضرة ديال كسكسو ورابعة ديال سميد و2 دراهم حمص فازك ومشات نيسان قدات كسكسو حيت هند كتبغييه خلات كيطيب وهي جالسة فلكوزينة كتقرا دوك لبوليكوبات للي طبعات علييهم دورات على شي مفردات معرفاتهمش حتى تقلب على شروحات ديالهم بقات كتقرا وفنفس الوقت مقابلة كسكسو سمعت الساروت عرفتها جااات)
هند: واااااه دايرة كسكسوووووووو ههه
أمال: هههه
هند: (عجبها الحال) عرفتي جاية وكنت غنقولك لبسو نمشيو ناكلوه فشي ريسطو انا نمشي نجيب لبن ونجي
أمال: راني جبتو
هند: (هزت حاجبها) هاي هاي هاي زعمتي الالة وليتي تخرجي
أمال: وراه مشيت جبت لماما داكشي للي بغات
هند: اممم نتغدا ندوش وننشيو نديوه لييها
أمال: اوكي (كملات طياب سقات فطبسيل على قدهم وحطاتو مع جوج كيسان لبن)
هند: اممم تيسطيني يااا ختي وتبارك الله علييك خاصكي تعلميني
أمال: اوا طلبيه فالمعهد كتخلثي فلوسك غير هكاك
هند: وييع ولكن هوما طيابهم قليل فين تيبطيبو شي حاجة بلدية أغلبية داكشي ديال زوااق
أمال: اوا نعلمو ليك أنا.. (كملو أمال غسلات لماعن وهند دخلات دوشات على مخرجات دخلتت أمال حتى هي دوشات بالزربة لبسو حوايجهم وهند تقدات شوية ونيشان لدار باش تعطي لمها علاش وصااتها)
هند: الالة صعاابيتي…..
أمال: وصلو لتماك وقلبها كيضرب مدخلاتش هند بطموبيلتها حيت شافت أغلبية الطموبيلات برا.. نزلو بجوج بيهم ودخلو صونات امال لعند مها لقتها هي ونعيمة فجنان…) راهم فجنان (هند قطعات)
هند: حتى مي لالة والحاجة معاهم
أمال: بفف الله يستر مع الله يحفظ (مشاو لجهة جنان دخلو كانو جالسين مشاو عندهم سلمو علييهم وأمال مدات لمها ساشية)
فتيحة: (طلات عليهم وحركت راسها زعما راه هوما) قارية!!
أمال: واه
فتيحة: اممم اوا هاد لقراية صباح وعشية
هند: أمال سربي راه مخاصنيش نتعطل
أمال: ياله بسلامة
الحاجة: رجعي اأمال (وقفت ومشات هي عندها) مفخباركش ابنتي اليوم زهير غيحل داك المحال
أمال: (حشمت مقدرتش تجازب ولكن عينيها بانو تبسمو)
هند: فخبارنا وعرضنا
أمال: (بلا متحس) أنا كاع معرضني
هند: ههه وزييدي ابنتي زيدي
الحاجة: هه الله يرضي عليكم ابناتي (رجعت لبلاصتها وفتيحة غير متبعاهم بعينيها للي بحال صقر مع خرجو كانت شيماء خارجة مع أنوار مفركسة مزيااان غير شافتهم)
شيماء: انا جاية احبيبي
أنوار: متعطليش (مشا ركب فطموبيلتو وبقا حاضيهم من لمرايا)
شيماء: هند صاافا مغتمشيش لمحال زهير
هند: معرفتش
شيماء: ونتي امال ميمكنش متمشيش لعندو
أمال: ونتي مالك نمشي ولا منمشيش
شيماء: ههه كضحكو علية نتي مصاحبة مع زايد وهاد
أمال: اش هاد مصاحبة (كتعوجها) مصاحبة!! قدك قداش ومزالة كتكولي هاد مصااحبة ترقااي شوية ابنت عمي وطلعي نييفو (جرت هند للي كتموت بالظحك ومشاو) ههه احح شحال زوينة تكوني مرة مرة خايبة ههه
هند: هههه قلتلتك صعابيتي (مع غتركب داز من حداهم انوار بجرا خلا لعجاج من موراه وعلى سنتيم من حدا أمال) ولد لحراام
أمال: شتي شتي كلب لاخر (هزت حجرة وضربات جابتها غير حداها) كلب لاخر
هند: هههه عولنا علييك بكري (ركبو كيضحكو ونيشان رجعو لدار…)
~~~~~~~~~~~~
زهير: (كان لابس حوايج زوينين كان مسكسف على الحالة هو ووليد للي واقفين حدا لباب وطالقين امداح وربحة العود الفاخرة كيستقبلو شي شخصيات فوجدة للي جاو المحال دخلو مع الاصحاب والاهل حتى الحاجة جات هي ولكبير وكان انوار وشيماء وخوتو وخوتاتتو كولشي كان حاضر عاد الناس للي شافو الأنونص جاو يتمنظرو ويعرفو الأثمنة ولكاليتي كان كولشي زويين ومقااد لدرجة الناس بداو يساومو على الاثمنة وزهير مقابل مو كيورييها كولشي وحتى هي فرحانة حتى دمعو عينيها وباش متخليش الناس بوحدهم من بعد مرضات عليه وصلها أنوار لدار وخلا شيماء للي مبغاتش تمشي وتسناه حتى يرجع.. فهاد الاثناء وقفات طموبيلة ديال هند للي كانت مقادة شعور ولابسة كسيوة طويلة جاية لاسقة مع ريبيكا من لفوق جاية خطيرة وعاد مكياج سامبل وحتى امال لبست كسيوة حجابية تركية مع حزام فالخصر وحتى من طريقة الشال دارتها تركية ومكياج ناااعم هازة فيديها ساشية)
أمال: ناري حشمت
هند: هههه عادي عادي (كان باين المحال عامر وعاد فالدخلة دايرين ديك لعيبة للي كتكون فالدخلة ظيال قاعات الاعراس وعاد بوكيات لورد كبيرة) واااو كما قلتليه
أمال: (دخلت شادة فيد هند كان داكشي راااائع كولشي مستف ومقاااد كدور فعينيها… كان فالمكتب لفووق كيهضر مع شي نااس كيظحك هز عينو بانتلو فلكاميرا داخلة وحيت داير المكتب كولو زاااج هز راسو بانتلو شوية غبرت)
زهير: سمحولي انا جاي (غمز وليد يكمل معاهم وهو خرج ووقف فدروج كيشوفها كانت عاطياه بظهر وهو بعينيه للي مفضووحين انه عاجبااه هبط بشوية متبعها حتى وصل حداها كانت هازة وسادة ديال الريش شافت الثمن وضحكاات مع هند للي شافت زهير وتبسمت ضارت امال بالزربة لقاتو من موراها وقرييب عينييه علييها بخال شي صقر وحتى هي شافت فيه مدة ديال 5 الثواني رمشات جوج دلمرات وبعدات كانت موراها نمووسية كلاتها غير التكاية)
زهير: عجبااتك
أمال: (تبسمت) زوينة
زهير: كولشي دياالك (عينو عبراتها كاملة وستقرات فوجهها لاغي ݣاع لبشار للي حداه) خوديها
أمال: ها (وترها) غالية
زهير: (تبسم لتوترها) الغالي يجي ݣدامك أبنت الناس ويرخاس
أمال: (جامعة تفرنيسة للي الا طلقاتها غتشدلها من لودن لودن غير بالسيف) حم مبرووك علييك زوين المحال بزاااف
زهير: (بشوية) نتي للي زيينة اݣلييع لݣلب
أمال: ههه (مداتلو الساشية) مبروووك…
أمال: ههه (مداتلو الساشية) مبرووك
زهير: (تبسم شاف فالساشية ورجع شاف فيها شد الساشية من لتحت باش ميفيسش يديها) نورمال انا للي نجيب لكادو
أمال: (محافظة على الابتسامة اصلا من عينيها باينة متبسمة وفرحانة كااع) لا انا للي نجيبو (دورت عبنها على المحال هاربة من عينيه) المحال زوين بزااف
زهير: (بقا غير متبعها بعينييه كانت اول وأطول مرة تهضر وتجاوب معاه.. حنات راسها وهو طل عل الساشية كانت مغلفة مقشعش شنو كاين تمااك رجع) طلعي تشوفي معايا لبيرو لفوݣ؟؟
أمال: اممم (جات ضور عينها كان نبيل داخل خرجت عنينيها)
زهير: (بانت فيها) ماالكي
أمال: (عطات بظهر) ولد عمي جا
زهير: وليد؟
أمال: لا لا خوووه انا نمشي
زهير: صبري علاه تخافي هاك
أمال: (بترجي) عفااك مݣادة على شي شوهة ولا صداع عفاك (مشات كتقلب على هند وهو كتفوه يدييه مامنحقو يدير واالو ولكن معجبووش الحال مقاال بدات تطلق معاه شوية تبع نبيل للي بحال كيقلب على شي حد دار لقا أماال واقفة مع هند مع بانت ظحكتها مع تبسم فلداخل دياالو وهاد المجية عندها توش كبييييرة عليه طلع لفوق لبيرو ولفرحة فرحتين المحال ولقلييب للي عاجبو حاالو)
هند: هاي هاي هاي الناس مسااهلينش
أمال: ناري كرجف والله هههه
هند: حمقة داك نبيل ديما مخربها علييك
أمال: ياله نهبطو لتحت
هند: هداك زمر دوليد كاع مباانش زعما يكون مجااش ميمكنش
أمال: معرفت (شافت لفوق لبيرو كان عامر) دابا يكولو زهير جات هند ويجي يجري
هند: اممم حسابلك زهير هدا راه غير نتي للي لقيتي واحد بحال زهير وليد غيييير حيت عارفني انا بااغااه أما زهير كيحااول يقنعك باش تبغييه
أمال: (معرفتش علاش فرحت كتر من كلام هند) بالصح!!
هند: اوا شنو بان ليك نتي؟؟
أماال: (فرنست مقاداش تجمع تبسيمتها)
هند: لا حولة معوقة وخلاص (تشادو وجاو هابطين لقاو شيماء طالعة وكان بوحدها وقفات حدااهم) هانتي بوحدك
أمال: (هبطت سابقة هند خلات شيماء متبعاها)
شيماء: على خرية
هند: واش نتوما مكتقداوش صافي كولها تشد تيقارها
شيماء: زعما انا للي ميتة علييها شكون عرفها حتى عايشة
هند: وداكشي حتى هي للي دايرة معااك
شيماء: فخبارك لغيت العقد
هند: هااء عاد قبيلة كنتي معاه
شيماء: وراني كلتلك غير لغييتو اختي بغيت نفكر مزيان حبو لية مكافينيش
هند: اشمن حب وهو (بغات تقولها مزال تابع امال وهي تسكت باش متشعلش الخبث ديالها) الا تبعي راي الناس حسن بعدي منو اشيماء
شيماء: اوا حتى انا داكشي للي كندير واخا هو معجبوش الحال ولكن كلت نتقل شوية متعرفي يباااااان شي حد حسن منوووو ههه
هند: (بقات كتشوف فيها) شي تنوعيرة جديدة
شيماء: اشمن تنوعيرة شنو ذنبي منين كيجيو عندي وانا للي مكنبغيش
هند: انقولك واحد الحاجة واحد كنتي غتعيشي معااه طووب وراك شفتي الشونتيو ديال مريم شي لاخر غير الا بان شي حد معاارفكش كدايرة
شيماء: مكتشوفيش راسك كتزيدي فييه وهادشي عاد غتكوني من العائلة
هند: ولو غدا ندخل لهاد العائلة حتى حاجة مغتبدل اشيماء نتي بالصح خسرتيني وخسرتي بنت عمك سووو رااجعي راااسك ومتزيديش تخسري نااس كتر (هبطت مخليااها وبقات متبعااهم كتن يسحابلها منين تعرف هند شيماء راه عرفت انها هي وخوها بيناتهم شي حاجة غتبقى تعاملها مزيان ودير بحسابها ساعة صدق العكس طلعت كتنكر ومشات رجعت كتفرج فداك الاثااث… أما زهير عاطي وقت للناس وفنفس الوقت جاه فضوول كبير يعرف شنو لكادو للي جابت ليه أمال مهاموش واش واعر ولا بسيييط المهم هو كادو واحسن كادو جاااه… خرجو دوك الناس ومشا وليد باش يوريهم المحال وهو بقا معطل بحال كيقاد شي حاجة باش يلحقهم حل الساشية وجبد كان شال ديال العنق كحل فيه خطوط فلكري من جناب.. عجبو بزااااف.. دورو على عنقو وحيت بالحركة كان دمو سخوون رجع حايدو وخبع الساشيات تحت لبيرو وهبط بقا كيوري لدوك الناس وفنفس الوقت كيرحب بالناس للي كيباركو ليه ويدو فوق صدرو كيعبر ليهم على الامتنان ديالو بحضورهم وفنفس الوقت عينيه خدااامين يقلبو عليها مكينااش هبطو لتحت فين كاين جهة ديال الألكترونيات تلافز سبيراتور غير الي تابع لجليسات وعاد الجهة الاخرى باقي الاثاث تماك بانتلو أمال هي وهند كيظحكو.. شحال كتعجبو منين يشوفها ظاحكة دخل مع الناس لديبو فين مخزن للي باقي ومكرهش دوك الناس يمشيو دغيا غير باش يمشي حدااها…)
أنوار: (كان بقا برا خلا غير نبيل للي دخل.. صونا على دعاء للي لقى ليزابيل من عندها) وييي حبيبة
دعاء: من قبيلة كنت كنصوني عليك
أنوار: مسمعتوش احبيبة كنت صايك
دعاء: اخر مرة نصووني ومتجاوبش على تيليفونك
أنوار: كفاش هاد اخر مرة!! مريضة فراسك ولا شنوو!!
دعاء: وعلاش متتجاوبش
أنوار: (بعصبية) راه كلنا لييك كنت صايك نكلب بدين *** هادي اللوطو باش نجااوبك نتي
دعاء: (شافتو تعصب) صافي تكالما
أنوار: كفاش هاد تكاالما عرفتي شنو بلاتي ونهضرو نتي مزال معرفتيني الي غتجي تكوليلي اخر مرة (قطع عليها شافها رجعت كتصوني دارو فجيبو وهبط بهدووء من طموبيلتو قشع طموبيلة ديال هند الحمرا للي كتبان من لبعييد عقد حواجبوو ودخل لداخل لقا السرباية كيدورو اتاي وعواصر وشي حلاوي قلب بعينييه كان زهير وشي رباعة لفوق طلع عندهم)
نبيل: عاد دخلت
أنوار: واه ياكما بعيت ترجع ولا ضرب شي ضويرة
نبيل: لا لا انا مرتاح هاكا ابن عمي
أنوار: (تبسم معاه ومشا حدا زهير) الناس بداو يشريو لتحت
زهير: مزيان
وليد: (كيشرب اتاي وتفكيرو فهند هادييك للي كانت كتشوف فيه بطرف عينييها)
أنوار: عييتينا نسيب اصااحبي
وليد: هم لا لا بلعكس
زهير: (دوك الناس الناس خرجو من عند السيد للي خدام من بانكا***** وقف زهير تبعو وليد ودعووهم هبطو وفطريقهم كيتمنظرو كل واحد وشنو مشا شرا وكاين للي جايب معاه لمدام لسقاتلو فشي حاجة وهنا كاين دراري الي مكلفين بلبييع.. دخل زهير مع دخل خووه لكبير وشي صحاابو وقف زهير دار صواب معاهم هبطو وبقا بوحدو مع دراري زهير تجبد من يديييه وطرطق عنقو) وليد سير ترتاح شوية اصاحبي
وليد: لا لا مزيااان
نبيل: عادشي زين اخاي زهير الله يكمل بلخير
زهير: الله يحفظظك اخاي نبيل (معندوووش معاه بزااف من نهار عرفو حاط عينيه على امال وباغي يتزوجها مشات عينو لبيسي طلق لكاميرات كاملين مقوس عينو كيقلب على مولات لكسوة لكرونة مبانتش.. دخل عندو واحد من للي كيبيع مشا عند وليد جبد دفتر فين مصورين الاثاث والثمن للي يتباع بيه وراه شنو اخر تباع وعطاه بريكا دلفوس وليد حطهم حدا زهير مكمل الهضرة مع نبيل للي كيستفسر على المحل حطهم فلمجر وخادشي تحت أنظار أنوار للي كيشوف فعلاقة وليد وزهير كداايرة نورمال هو للي كان خاص يكون بلاصة وليد وفبالو غير واش وليد دخل مع زهير فهاد البيعة وشرياااا… هبطو لتحت مجموعين شيماء غير شافت انوار بغات تمشي عندو ساعة لقاتو مع خوتها دارت بناقص وبقات بووحدها)
هند: (واقفة هي وامال خداو جوج وسايد جبدت فلوس من بزطامها وعطاتهم لي كيبيع وقفو حدااه زهير هز 300 درهم من يد لاخر حيت لوحدة دايرة 150 درهم (وسادة فحجم متوسط مربعة ديال الريش) مدها لهند)
زهير: هادي العبااسية
هند: (تبسمت) لا لا حشوومة (أمال حنات راسها من انوار ومن نبيل ومن زهير خيفااه يتغزل بييها)
زهير: صافي هضرت معاك ردي دراااهمك لصاكك هنا متعاوديش تشري للي بغيتيها خوديها (هضرتو لهند وعينييه لأماال للي غير قالها تبسمت شوية)
هند: (عارفة راسو قاسح) شكرا اخويا ومبرووك عليك هادشي غزاال ومتول الله يجيب التسيير
زهير: أمين اختي هند (شاف فأمال للي حانية الراس أما وليد موقف وجهو بتعالي وكيشوف هند غير بالجنب قتلاه الفقسة علاش هي مولاتش صونات ولا عبرااتو ولا حتى فتحات موضووعهم وزايداها دابا مجاتش تهضرو لدرجة شك فراسو واش هو للي خاصو يتقلق وياخد موقف ولا هي!! زهير جر داك للي كيبيع) زهير: هادو بجوج متعاودش تاخد منهم فلوس!!
…: من العائلة؟؟
زهير: (شاف فيه شوفة ديال شغلك ومشا رجع عند دراري للي تحركو من حدااهم وخلا دوك الجوج فاهمين أن هند وزهير بيناتهم شي حاجة….)
هند: (تمات خارجة هي وامال وغطيح بالاعصاب واخا ممبيناش مكانتش كتسنى من وليد يقلب علييها وللي مهدئها شوية هو منين كتقشعو كيشوف فيها وصلو حدا الطموبيل ياله غتحل الطموبيل لقات زهير جاي تشاوفو هي وأمال للي من الجهة الاخرى مشا حدااها وهي خايفة شي حد يشووفها)
زهير: غتجي للدار!! (شاف فهند) نتي وهند
أمال: معرفت
زهيى: ميمكنش اجي راها كاينة حتى مك
أمال: (فنفسها على حسابها مبغيتش نجي)
زهير: دااير زردة صغيرة (تبسم) الا مكنتيش نتي فيها راه مكاااين والو
أماال: (تبسمت)
زهير: روااحي صافي!!
أمال: (حركت راسها باه غمزها ومشا رااجع وهي بقات حاضياااه)
هند: ركبي ركبي بقات فية غير لكسوة للي شريت ومسوقلها حد
أمال: هههه (ركبت شافت شيماء جاية حلت لباب اللوراني وجلست مكرهة)
هند: فين اشريفة
شيماء: شنو اهند حتى نتي غطرديني؟؟؟
هند: فين بغيتي نوصلك
شيماء: علاش ننتوما مغتمشييوش لعند الحاجة؟؟
أمال: انا منمشييش
هند: حتى انا منمشيش
شيماء: بففف راه صيفطوني كالولي سيري مع لبنات ياااه لهاد الدرجة كرهتوني متسنيتهاش منك اهند
هند: بلاا متبداي تنفخيلي راسي اشيماء
أمال: (شافت فهند للي كانو باغيين يمشيو يبدلو حوايجهم ويحايدو لمكياج.. دارتلها باشارة كما تافقنا منوريوش لشيماء فين ساكنين)
هند: أمال نمشيو نسهرو شوية ونرجعو
أمال: اممم والله معرفت
شيماء: (كتحسها كتلعب ليها على أعصابها وغير كتصوط من نيفها بحال شي غوريلا🦍)
هند: واااعفاااااك
شيماء: بففف وا سربييو راه يتسناونا موااااتنا
أمال: والله معرفت نفكر شوية
هند: ههه (سكتاات الطموبيل) فكري الآلة على خااطرك (كانت 7 وظلام بدا يطيح… شيماء تكرهات ومقدرتش تغوت على أمال حيت مبقاتش كتسكت لا رجعات كتجاوب وكضرب كاع وعاد كلامها رجع قااسح وديما كتقمعها..)
أما: اوا ياله ولكن منتعطلوش السيتي كيسد مع 10
هند: هههه (بقاو كيظحكو مخليين شيماء كتنوى) دوك لوسيدات شحال وانا باغا نشريهم
أمال: فنيين عجبوني حتى دوك طابيات ديالهم
شيماء: (تبسمت بسخرية) الطابيات ولا مول الطابيات اللي عجبك
أمال: (دارتها بحال مكيناش) معاش غدا غتدخلي؟؟
هند: مع 8 والله حتى وليت نعكز نفيق بكري ونتي
أمال: حتى انا 8 غنمشي لفاك ضرووري خاصني ندخل عند داك لبروف للي كلتلك كبيلة
هند: ااه مخاصكش تزكلييه والمعهد
أمال: أنا شفت ديك السيدة كالتلي داك الثمن ونمشي نشوف فواحد لبلاصة اخرى حيت وحدة كالتلي موصلينش لداك الثمن
هند: صافي حتى نمشيو بجوج
أمال: مهم انا 10 نمشي كنتي مسالية لحقي بية مكنتيش صافي بلاش
شيماء: (غير كتشوف فأمال جاتها تبدلات هاد شهرين ونص ولا 3 جاتها تبدلات بزاااف واش هادي هي أمال للي الا كانت عطشانة مطلبكش كاس لما غير الا عطيتيه ليها نتا وصلو للدار كانت عامرة هند وأمال مشاو لدار الحاجة وشيماء تبعاهم من اللور كارهة أمال وحتى الشوفة فيييها….)
—————
دعاء: (خرجت من الخدمة وهي مديرونجية أنوار والو مكيجاوبش على ليزابيل وحتى لميساجات مكيشوفهمش مكانتش عارفااه صعييب قد هاكا لدرجة مقدرتش تركز فخدمتها وطلبت من مديرتها تخرج (خدامة مراسلة فشي صحيفة فرنسية) جلست فطموبيلتها كتصوني واالو) علاش متيجااوبش بففف ندمت علاش غوت علييه (ساكت ومشات دازت عند ماماها حيت اليوم الجمعة كولشي فالعائلة كيتجمع نهار الجمعة وباقي الايام كولها فين مشغوول وهادشي من شحال هادي حيت العائلة أغلبيتها ففرنسا كولشي مزيوود تمااك ولكن تقاليدهم مكينساوهاش) ماما واش غتقولهم على زواجي
ام دعاد: (متفتحة) هو لمحت ولكن مغنهضرش فيه بزاف حتى يجي انوار
دعاء: رجعت قبيلة على حساب لوراق قالولي غيخدمو فيهم يعني مغيتعطلوش وااخا هو مبغاش قالي بغيت نطلع بوراقي أنا ولكن داكشي باقي عندهم معطل بزاف فالموغريب
أم دعاء: حاجة مزيانة باش ميبانش طامع
دعاء: مكنظنش طامع فشي حاجة وهو اصلا برزقو تمااك راك شفتييه
أم دعاء: وي ولكن فاش غيجي هنا شنو غيخدم
دعاء: عندو ديبلومات ديالو غيدفع وقالي الا مجاش التيسير بيهم يقدر يفتح شي مشروع صغير
أم دعاء: الا كان معقول غنعاونو
دعاء: نو نو نو مغيبغييش
أم دعاء: هادشي من بعد ابنتي نتي قدامهم متهضريش بزااف واخا
دعاء: (بتنهيدة) واخا ماما واخا هو راه معصب مني غوت عليه قبيلة ويمكن مرضااش ومبقاش بغا يهضرني
أم دعاء: منقدرش ندخل ابنتي حيت معرفاش اساس المشكل فين هو
دعاء: صونيت عليه مجاوبش ومنين جاوب غوت عليه قلتلو اخر مرة متجاوبش ومعجبوش الحال
أم دعاء: حاولو تفااهمو ابنتي وورجال الشرقيين مكيبغيوش تهديد بحال تقول اخر مرة بحال هاكا مكيبغيوهاش
دعاء: انا نعتاذر منو
أم دعاء: واخا ولكن عتاذري مرة وحدة حيت ماشي شي حاجة للي كغااف وفنفس الوقت ميولفش هاد لكلمة منك
دعاء: (حركت راسها باهوردت التيليفون فصااكها حتى يولي يصوني…)
~~~~~~~~~~~~
محمد: (جالس فريسطو هو ومريم كيطلو على منظر زوييين وكيهضر) من نهار خرجت من لقرايا وجلست فتاوريرت الخدمة الخدمة الخدمة جااني راسي رجعت فشكل
مريم: بحالاش
محمد: (معرفش يوصف) بحال شي آلة خاصني نخدم باش ندخل لفلوس لاكيس نتحاسب مع هدا وهدا رجعت مكرحمش
مريم: بلعكس ديما كتبانلي حنين؟
محمد: (ظحكاتو) حنين؟؟ انا؟ واقلة غير نتي للي كنبالك هاكا
مريم: هه معرفت
محمد: (بقا مستغرب بهاد الكلمة يعني غير أمال ختو كان كيشوف فعينها ديما الخوف منو وحتى من شيماء كانت كتقولو نتا ماشي حنين.. خلاتو فدوامة) علاش زعما كلتي حنين؟؟
مريم: من خالتي فتيحة من ديما كتكول عليك حنين وانا كنشوفك كضرب تماارة ومكتكولش اي ولا عييت غير باش تهز الحمل على باك وخوك وولاد عمك
محمد: (بقا غير كيسمع ليها عمرو تخيل يبقى يسمع لشي وحدة ويعطيها وقت ودابا ها هو كيسمع لمرتو للي عمرو حتى فكر يتزوجها) نهار كلتيلي خايفة ولدي ولا بنتي يجيو عندي ويكولولي نتي مقرياش ويعايرووك (طرطقت عينها) لعكس الوعي مجاش بلقراية شحال من وحدة قارية ومعندهاش هاد العقلية للي عندك
مريم: (تبسمت فرحاانة)
محمد: أحسن حاجة ولادي غتكوني نتي ماماهم
مريم: ههه (بلفرحة ولحشمة بقات غير كظحك)
محمد: عندتك تكوني كتشربي شي حاجة
مريم: (باحراج عضت شنافتها وحركت راسها بلا)
محمد: هكاك الله يرضي عليييك (جا السرباي حطلهم شنو طلبو) وكوولي مزياان منبغيش فتاتة ترجع عندهم
مريم: ههه وااخا….
———————
أمال: (رجعو للطموبيل خلاو شيماء طلعات بوحدها للدار.. دارت كاب عليها) جاب الله جبتو معايا
هند: (كترجف بابرد حيت كانو عوالين يرجعو للدار) انا بردت (فلبلاصة امال حيداتو وعطاتو لهند كما كان الحال هي لابسة مزيان) الاااا اصاحبتي رديه ليك
أمال: لا لا والله حتى بيخيير (بصوت خافت) خايفة غير من ماما تحشمني حداهم عاود
هند: لا لا الدنيا عامرة (دخلو كانت باينة الدنيا عامرة عند دار الحاجة حيت تماك كاينين لعيالات.. طلعو لفوق كانت الدنيا عامرة أعلبية العائلة جات قلبت مكانتش مها تماااك وحتى الحاجة مكيناش غير بناتها للي واقفين.. جات حداهم شيماء)
شيماء: راهم مشاو عند مرت لووسي
هند: اممم
شيماء: ياله اهند نمشيو لتمااك (أمال عوجت فمها قالبة وجهها)
هند: أمال تمشي؟؟
شيماء: لااا موحال واش يبغي غير أنوار مبقاش كيبغي يشوفها احراااك تمشي لدارهم
أمال: ههه عرفتي ياله نمشيو لجنان توحشتووو
هند: ههه ياله (خرجو مخليين شيماء كيتحلف هزت كرهها وسمها ومشا عند دار الكاملة أما لبنات مشاو لجنان كانو طافيين فيه الضو مشاو جلسو فلبلاصة للي كاينين كرااسة) عييت هاد نهار ووليد زاد طلعلي الدم
أمال: علاش مجااش يهضر معاك؟
هند: وهادشي للي زاد عصبني
أمال: وشنو غديري
هند: معندي مندير حتى يتفش على خااطرو (صونات مريم عندهم أبيل فيديو) ويينو شكون كيصووني ههه (جاوبات) أفييبن الغزاالة
مريم: (كانت فالدار بوحدها حاطة التيليفون وجالسة فطابل دونوي كتقاد وجها) سلاام شعلو الضو مكنشوفكمش
هند: حنا فبلاصة مظلمة
أمال: (طلات) سلااام مريم
مريم: سلام ختي امال لباس عليك
أمال: الحمد الله اختي ونتي؟
مريم: (تبسمت) الحمد الله
هند: هاي هاي هاي على تفرنيسة النااس صرااحة حسدتك قتلنا لبرد
مريم: ههههه
أمال: (دارت يدها على وجها وكظحك) مكتحشمييش
هند: هاني حشمت الالة (بقاو مجمعين مع مريم) اكتى غتجي؟؟
مريم: والله معرفت داك نهار محمد سولني كالي واش تبغي نبقاو هنا ديما
هند: كنت عاارفة باغي يبقى ديما تمااك والله كنت حااسة
أمال: واش صافي مغتوليوش ترجعو؟؟
مريم: والله اختي معرفت
أمال: (بخوف الا بقا تماك وعرفاتها فتيحة غترجعها راه محمد للي مخليها تكمل هاد العام أما وكان رجعوها شحال هادي)
هند: نتي شنو قلتيليو؟؟
مريم: انا كلتلو للي بانلك نتا وصافي مبقاش هضر وانا مكنقدش نعاود نسولو حتى كيجي هو يكولي شنو بغا
هند: اممم اوا مزيان (كملو معاها جموع واما هضرتها قلالت حتى سمعات محمد رجع وهوما يقطعو معاها…) مالكي اامال
أمال: واالو ياله رجعو باش ماما تعرف راه جيت مقاادة على شي صداع من داابا (نتضو رجعو شافو لعيالات ماشيين لدار الحاجة) بففف راها ماما
هند: ومالكي تخشبتي
أمال: لا لا واالو (مشاو من مورااهم وفهاد اللحظة زهير ورباعتو للي كانو معاه جااو خلاو الطموبيلات برا حيت الدنيا لداخل عامرة)
أمال: (كانت شافت شيماء ضارت ومن موراها ضارت فتيحة زربت ووصلت لحدااهم شافتها وقفت ووقفت حداها هنا فتيحة طلعاتها وهبطاتها مزيان لوخرين طلعو وهند بقات حدا امال) غير سبقي اهند انا جاية (خافت فتيحة طرد هند ولا تقولها شي كلمة خايبة.. طلعات هند وفتيحة جرت بنتها للدخلة ديال الدار السفلية كتزبل فيها وعلى لبلس ولمكياج للي دايرة.. فهاد الاثناء دوك رباعة داخلين وزهير وقف حدا دار مو)
زهير: غير سبقو لدار خوويا نشوف ما ونجي….
————————-
محمد: (دخل لبيت نعاس نيشان كيقلب على مريم وجلس فوق النموسية وهي حطات لعكر لي كانت كدير) مريم انا راه فكرت بزااف ولكن ضرووري غنشاورك
مريم: شنو؟؟؟
محمد: واش تبغي نعيشو هنا ولا رجعو للمغرب لتاوريرت
مريم: ونتا شنو باغي
محمد: انا كنكبر فراسي امريم نيمكنش غنبقى عايش غير من ديك الخدمة عيني تحلو على شحال من حاجة حتى الا رجعت لتماك غنبقى نجي هنا على ود شي خدمة انا وولد عمي
مريم: وخالتي فتيحة؟؟
محمد: انا كنسولك نتي؟؟
مريم: (شافت هنا معندها حد وهي معمرها تفرقت على الناس ودابا محمد مخدامش يعني نهار يخدم مغتبقاش تشوفو بزاف وعاد تخاف خالتها تاخد عليها فكرة ويحسابلها بسبابها هي ولدها مشا عليها وحتى مها مغتسخااش بيها وخواتاتها)
محمد: شنو امريم؟؟؟ نبقاو هنا مرة فالعام او عماين نهبطو عندهم
مريم: منبغييكش تغرب امحمد تماك عائلتنا كيبغيونا غيتوحشونا وغنتوحشوهم وعاد نتا للي هاز تمااك كولشي على داركم
محمد: (طاحتلو فالنقطة وتفكر انه هو للي هاز كولشي تمااك) وحياتناا؟؟؟
مريم: (بابتسامة) كولشي غيكون زويين
محمد: (كان اناني خاصو غير يبعد من تمااك ولكن هدا بحد ذااتو ضعف منو ميمكنش بسباب وحدة غيبعد من كولشي باش ميتفكرهااش وعاد مريم للي كل نهار كتوشيييه وحس بانه مرتاح معاها حتى فنعاس للي كان كيقول ميقدرش يقيسها لقاها حلوة على قلبو.. وحتى فكرتها انها مبغاتش تبقى هنا على حساب باش ميتغربش كبرات فعيينو حيت كان مندفع ولكن كان كيتسنى من عندها تختار…. ولكن تفكيرو باش يبدل حياتو ويزيد يجمع فلووس متبدلش وحتى فكرة باش يعزل واخا يمشي لتاوريرت كااينة.. بعني قرر من نخار عقد غيأسس عائلتو ولكن بووحدو….)
~~~~~~~~~~~~
زهير: (مع بغا يدخل يطلع دروج سمع هضرة من مور الحيط)
فتيحة: سكتي لمك باغا تزيدي تفضحييني يا الشاايطة
أمال: مداايرة واالو اماما والله
زهير: (عرفها امال ومها بقا وااقف ومع هوما فالدخلة ديال الدار السفلية مباينلهمش وعاد ظلام وهي عاطية بظهر)
فتيحة: مدايرة والو؟ (خمجتلها وجهها بيدها وبحال مسحاتو غير بعصبية زيادة)
اماال: أااااي
فتيحة: وهادشي يا السلكوطة شنوو؟؟ باغا تشوهيني كدام لعياالات وعاد لابسة هاد لباس وطالية لديك لكمارة جهد لمكيااج وتكولي مدايرة واالو الله ينزل عليك اللعنة لليل ونهار
أمال: (جاتها لبكية تعيا تقوى ولكن باش ترد على مها متقدرش وخا تكون ديما مظلوومة)
فتيحة: الله يبكيييو عليك ابنت لحرام
أمال: حشوومة عليك ديريلي هااك
فتيحة: (بفقسة) ولايني خلي خوك يرجع وديك السااع نشوفو شنو يدييير (زهير بقا غير مغووبش ماشي غير مغوبش تعصب ولقروود لعبولو فراسو ولكن جات فمها ومقدرش حتى يتدخل خرج برا شاف فتيحة طلعاات وكيتفكر أمال ولباسها كان محترم وحتى من وجهها مفرزش راها دايرة شي مكيااج بقا حاضي لباب واش تبان محس غير دخل عندها شعل الضو لقااها واقفة ومطرطقة عينها سااهية مع شعل الضو ديال دروج شافتو بحال تصدمت أما هو مكانش ظااحك وقرب لييها..)
زهير: مالها مك معاك؟؟
أمال: (بتوتر) امممم واالو
زهير: (مبغاش يحكر اصلا سمع كولشي) غي حيت سمعت شي صداع حسابلي معاك نتي
أمال: انا نطلع
زهير: (وصلت حداه) حتى حاجة متستاهل تقلقي على جالها
أمال: (وقفت كتسمع فيه ومحرجة خافت غير يكون سمع مها شنو قالت)
زهير: نتي بنت زيينة وكولشي فيك زيين تعجبيني بزااف أمل (دخلت فرحة لقلبها نساتها الغمة ديال مهاا تبسمت)
أمال: انا نطلع
زهير: (حرك راسو باه دازت من حدااه مسكانيها وتبعها فدرووج حتى ضارت معاهم خرج هو وطلع شهيق وزفر بقوة نساتو مو للي كان جاي على قبلها ومشا لداارو يبدل علييه… ولكن كلام مها مفهمووش لبنت كولشي كيشهد ليها باخلاقها وبلا حتى ميشهد الكتاب باين من عنواانو وأمال بااينة رجع لكلام وليد ان مها قاسحة معاها بزااف ولكن متخيلش لهاد الرجة وكلمة #سلكووطة محملهاش ومعجبااتوش ونتسرطاتلوش ولكن مبغاش يديرر عدااوة حيت مزال غراضو مخداااه منهم…)
——–
زهير: والله مااانتا راجل سامعها تضربات وبقيت فبلاصتك.. ولاه سمو ندير واش نضرب مهاا.. (بقا مضارب غير مع رااسو بدل عليه سمع الدقاان) وييييي
الحاجة: انا اوليدي
زهير: (لبس جاكيطتو ورش بارفان ديالو يبعد عليه ريحة الكارو وخرج عندها متبسم كعادتو) ما (باس راسها) لباس عليك؟؟
الحاجة: (بفرحة) والله يااا وليدي حتى فرحت ليك بزاف هاد نهار كنشووفك كدااش فداك المحال
زهير: (تبسم حتى عينييه تبسمو) الله يطول فعمرك تشوفي المحال اللول والتاني والتالت
الحاجة: ياا ربي يا وليدي نشووف ولادك داابا
زهير: منين ذكرتيها (دخلها لبيت نعاس وجلسها وهو حنا على ركبو) واش مجاش باين أمل معاهم؟؟
الحاجة: هههه اوا منين نويت مجاتش نطلبوها منهم حتى ويكون جا باها نمشيو عندهم للدار
زهير: اودي الفقهة كاينين لتحت نجيبو جوج عدوول ونفكو هاد لمنامة
الحاجة: هههه الله يعطبك الخير اوليدي صبر بعدا غير خوها يجي من برا راه
زهير: وانا عاد نتسنى خووها!!
الحاجة: صبر اوليدي زعما معروفة عليك تقاالة (بقاو كيهضرو حتى هبطو بجوج) اوليدي دابا خاصك تفرش الدار
زهير: راه بديت بواحد لكاسرونات اححح ديك الطفلة غتسيزيني من نهار اللول كتمشي غير لغلاا
الحاجة: ههه راها غالية وتبغي الغالي (بقا معنق مو كيحاول يلهي الأفكار الكنوانية للي فرااسو.. وصلو حدا النافورة ودخلو لدار لكبير هي مشات عند الكاملة باش تعلمها لعشا غيحط حيت زهير مول الوليمة جاب عيالات يطيبو فسطح مو وغيتفرق على رجال للي فدار خوه ولعيالات عند مو…)
أمال: (جالسة ممرتاحاش مع مها للي حدااها حطو لعشا مقدرتش تاكل بزاف مزال فيها الفقسة واش زهير سمع ولا لا حيت غتحس بإحراج كبيير قدامو كأي بنت ديما كتبغي تبان فعينين للي كيعجبها مع هزو الديسير وقفاات امال)
فتيحة: فين ماشية نتي
أمال: غنمشي لسيتي غيسد
هند: (فهماتها) اه قبل ميسد السيتي وعاد غدا داخلين مع 8
شيماء: غدا السبت!!!
هند: واخا السبت راه كنقرااو
نعيمة: ونتي اشيماء مغتقرايش؟؟
شيماء: حتى الاثنين اصلا غدا ماشي ضروري نمشيو
فتيحة: اوا جلسي نتي منين ماشي ضرووري ولا ضروري خاصك فير طيري
أمال: راه شيماء اصلا مكتقرااش أما انا كندخل نقرا (شيماء جات تهضر وهي تقرسها نعيمة.. اما امل عارفة مها مغيعجبهاش الحال ولكن الا بقات امال دقيقة اخرى غتنفااجر خرجت وتبعتها هند بلا حتى ميسلمو على الحاجة هبطو جاو مع خروج رجاال وللي كانو بزااف ومع الدنيا مضوية بانو ليهم.. لبنات تضهشرو بتلفة باش يرجعو يدخلو مشاو لطموبيلة دهند وطلعو دغيا)
هند: بففف (قلبها كيضرب) ناااري حشمت ههه تخيلي انا حشمت
أمال: هه حتى أنا
هند: مالكي بنتيلي من قبيلة تبدلتي
أمال: (عاودات ليها مبقات كتخبي والو فقلبها) فقساتني فقسااتني وخفتو يكون سمع
هند: بففف هاد مك خاصها عقل
أمال: بغات ترجعني خارجة طريق فعنين كولشي
هند: متديهاش فيها وفأي واحد بغا يقلل منك دابا فكري غير كنديرو نخرجو من هنا را (شافت وليد ركب اللور ضارت عندو كتشوف فيه وحتى هو عينيه النايميين علييها) وليد!!
وليد: اش خرجكم دابا فهاد الوقت
هند: كنا غاديين فحالنا لقينا الدنبا عامرة وبقينا هنا على ميخرجو
وليد: امم ومنين لكيتوها عامرة دخلو فحاالكم
هند: تلفنا وصاافي (شافتو بحال مرشقلوش) مالك
وليد: والو
هند: لا لا بيك شي حاجة واصلا مجيتيش حتى تسلم علية
وليد: وعلاش غنجي نسلم عليك ولا صافي حيت هضرت معاك مرة ولا جوج ومشيت درت واجب معاك خاصني نجي عندك كل مااشفتك!!!!!
هند: (صدمها بقات غير كتبرق عينها فيييه أما امال حنات راسها وخرجت عيينها)
وليد: سموو كذبت!!.. خارجة بشعورك هاكا ورجال ولفقها خارجين ممسوقاااش ضاربة فلعاالم وزايدة كتمختري فيين بااغا توصلي بهادشي دياالك (دق زهير على وليد خرج بوجه باارد.. أما هي ضاارت وحنوكها حوومر مخرجة عينها ديماراات الطموبيل ورجعت ماشريال كانت غتدووز فيه حيت كانت باقي متكي حدا الطموبيل.. تسمعو روايض محكومين فالأرض ضربت الدورة تخت انظار الكل وخرجت وروايض كيمييلو)
زهير: مااااااالهم (مسا كيجري لطموبيلة دخوه للي شادها حاليا تبعو وليد ركب)
وليد: زيد دغيا من موراهم جاع دير شي مصييبة (بخوف علييهم ركبو وخرجو مخليين للي برا مفاهمين واالو أما هي عينيها مضببن بدموع كتمسحهم بزعااف وامال حداها ميتة بلخلعة فبالها هنا نتقلبو هنا نتقلبو ومقدرتش حتى تقولها حبسي نهبط حيت خافت حتى على هند تمشي بووحدها)
أمال: هند ختي غير بشوية
هند: (مكتسمع واالو غير ودنيها كيصفرو وكتشخر بمناخرها ديرونجااها الطموبيل للي من كوراها كتسني ليها بالضو وكتكلاكصوني عليها واالو مبغاتش توقف عاد مكتزيد فالسرعة وحيت طموبيلتها خفيفة دغيا كتسبقهم)
زهير: ماالها كدير هاااك!!!
وليد: (ندم علاش هضر معاها هاكا صدماتو بردة الفعل ديالها)
زهير: (بعصبية) وهضر **** ماالها؟؟ الطموبيل قربت طير
وليد: داابا غير زييد من بعد ونهضرو (مد يدو كيكلاكصووني هز تيليفونو دوز نمرتها كيصوني ووالو غير مكتزيد فالسرعة حتى وصلو الرومبوان ودخلو فالمدينة ومع الليل كانت الحركة خفيفة شوية وحتى هي نقست من السرعة وليد مكرهش غير يوصلها يقتلها عصا على هادشي للي دارت بقاو تابعينها معارفينش فين ماشية حتى وصلت لبلاصة فين كارية هبطت كتجري وطلعات لفوق وأمال مع حلات لباب ردت كاع داكشي للي واكلة نهار كاملة داخت بالجهد مقدرتش توقف هنا وقفو حتى لوخرين ونزل زهير مشا حدا أمال ولاخر طلع يلحق بالتانية… غير شافها كترد مشا لطموبيلتو جاب قرعة ديال لماء باقي فيها النص ووقف حداها) غير بشوية عليييك
أمال: (دارت يدها على وجهها)
زهير: (حنا لعندها) عادي هادشي امل.. (عوج راسو كيشوف فيها وهي دايرة يدها على فمها) واش نتي بيخير؟؟
أمال: (حركت راسها باه حشمانة من التقية للي تمااك وقف)
زهير: اجي غسلي يديك ووجهك وتمشي ليك الدوخة (وقفت سادة باب الطموبيل تبعاتو حدا طموبيبتو مدت يدها غسلتها وغسلت وجهها جاب موشوار عطاها تمسح وبقا كيشوف فيها) مالها علاش دارت هااك
أمال: (شافت فيه) غير تعصبت شوية
زهير: واخا تعصب طريق مافيهاش اللعب
أمال: (سكتت) نطلع نشوف مالها؟؟
زهير: اجي.. واش سكنتو هنا؟؟
أمال: واه غير واحد شوي
زهير: كفاش شوي؟؟
أمال: دابا حناين هند جات معانا وهند كرات باش تبقى معاها وحتى انا جابتني هنا على متمشي حناها ورجعو للسيتي
زهير: ونتي غتبقاي ساكنة فالسيتي منوياش تبدلي العتبة
أمال: (مفهماتش) هااا..
زهير: مزال مناوية تجي تسكني معايا والله حتى لعيشة معاية زااهية وتعجبك
أمال: ههه
زهير: (شافها ظحكت مهربتش ولا حنات راسها) سوليني الا باغية تعرفي شي حاجة علية؟؟
أمال: (معرفت متقوول اصلا الفرحة للي فيها خلاتها معارفة باش تبدا هو كيشوف فيها حسها باغية تهضر ولكن خايفة ولا مترددة بقا غير مربع يدو كيشوف فييها تفكر مها وتفكر كلام وليد هادشي كيزيدو تعلقا فييها… هزت عينها فيه حيت سقيير تبسمت فوجهو وهادشي هو للي كان بااغي)
زهير: عجبني لكادو للي جبتي
أمال: حم غير شي حاجة وصاافي
زهير: حاجة كبييييرة وغالية عندي بزااف (هبط وليد منيرفي أمال بعدت واخا كانت ديجا مبعدة) صافي سيري طلعي نتي
أمال: (دازت من حداه مشافش حتى فيها وباين معصب ضارت لقات زهير مزال كيشوف فييها محست غير هزت يدها دارتلو باي باي على شوي بغا يهز يدو يدير نفس الحركة.. حرك راسو وهي مفهمتش لاش دارت هااكا وزربت دخلت للعمارة) أحااي شنو درت
زهير: امحااينك على هاد لݣلب ابا زهيير ومدااير فيك (رجع عند وليد للي ركب ولاينة طلعاالو القردة كتشطح) سمو وااقع دابا!!!!
أمال: راه انا امال حلي اهند
هند: (معصبة) بوحدك؟؟
أمال: والله لقسام الا بوحدي
هند: (حلات ليها كانت بووحدها زدحت لباب ودخلت معصبة منين فاقت هاد نهار كان فيها حماااس كبير ووحشة كبييرة باش تشووفو ولكن دابا باش يسممها بهاد الهضرة خلاها معصبة ونادمة علاش مشات) تفوو تفوو تفوووووو
أمال: واش دابزتووو شتو هبط مكيشوفش حدااه
هند: يمشي ي*** تفوووو أصلا محليتلووش لباب
أمال: وكان غير هضرتو اهند وتهنيتي
هند: اش غنهضر ماشتييش القمعة للي عطاني قبييلة
أمال: هو معجبوش الحال تباني فديك لوقيييتة ورجاال خارجين من الصدقة
هند: ماشي شغلوووو (كانت معصبة بزااف مبيهاش واش قمعها قدام امال اصلا كانت غتعاودلها هي للي مرضها علاش هادشي يجي يهضر نيشان مكتحملش للي يقمعها راه مبقاتش مع واليديها غير على هادشي ودابا هو ناضت مدابزة غير من الزربية للي حدا رجليها)
أمال: فين ماشية
هند: غندخل لبيت نعس (دخلات زادحة لباب وأمال بقات فوسط الدار معرفت مدير لهند هي هاد لقميع عندها سااهل اصلا شكون للي مقمعهااش فحيااتها ولكن هند متحملاتهاااااش.. ناضت دقت على هند) هند عطيني نسد الطموبيل راه بقات مفتوحة
هند: (معصبة) دخلي امال هزي زمر ولا خلي مها تشفر كااااااع (دخلت امال وشافت فيها كانت جالسة حدا لمرايا) عفااك اختي متقاقييش رووحك دابا يجي يهضر معااك
هند: متهزيش الهم أمال
أمال: (هزت سوارت وهبطت لتحت مشات لطموبيل ديال هند للي وقفاتها معوجة لقاتهم مزال تمااك حسابلها يكونو مشااو لاح زهير لكارو ومشا خرج عندها أما وليد بقا كيشووف وكان وقعاتلها شي حاجة فطريق يبغي يهبل أبدا متوقعش منها هاد العصبية للي تخليها تغامر فطريق هاكاا)
زهير: اش مخرجك فهاد الليل
امال: (بتوتر خافتو يفهم غلاط) لا لا مخرجتش انا غير هبطت نسد الطموبيلة دهند
زهير: (شافها هازة سوارت) كتعرفي تصوكي
أمال: لا
زهير: لا لا كتعرفيييييي (تبسم شد عليها يوارت الطموبيل ومشا ركب فيها قداها مع لبارك فين محطوطين الطموبيلات سدها ورجع ليها سوارت) دابا نعلمك
أمال: (بفرحة تبسمت وحركت راسها)
وليد: (خرج ومشا حدا أمال كان مغووبش) لباب محلول ديال الدار
أمال: وااه
وليد: انا نطلع عندها
زهير: ماشي دابا غدا وتلقاو وهضرو دابا طلع مجاااتش سيري امل نتي طلعي
وليد: بففف (مشا رجع للطموبيل)
أمال: (مشات وصلات حدا لباب رداتو وطلات عليه) تصبح على خير
زهير: نهار نصبح على هاد لوجه الزين غنصبح فووݣ بيخيير
أمال: (طرطقت عينها) احاااااي (سدت لباب عاد طلقات تفرنييسة طلعت فدروج كتلعب بحال شي بنت صغيرة حتى بغات تجيب الربحة حيت الكسوة طويلة ظحكت على راسها ودخلات للدار دوزات ساقطة ودخلت رجعات سوارت لهند ملقاتهاش عرفاتها فلحمام مشات لبيتها طلات فلمراايا لقات لماسكارا مجلخة فعينها شهقت شادة على فمها تفكرت منبن غسلت وجهها بلما بقات كتمسح وجهها بديماكيوور حيدات الشال وكتفكر غير واش كان كيتغزل بيها عينيها كانو بحال لباندا سمعت هند خرجت تبعاتها كانت بدلات لابسة مولون وبودي ديالو وشعرها مجموع تبعاتها لبيتها) كان بغا يطلع عندك ومخلاهش زهير تلقايه مزال لتحت يتسنااك
هند: (هزت عينها فيها) بالصح؟؟
أمال: والله اختي
هند: (بنرفزة) ولااش قاامع منين غيبقى عااصر لتحت…
أصبحنا واصبح الملك لله
هند: (ضربتها لفيقة بكري نوضات أمال لبسو فطرو واخا هند مكلات والو غير نقبات وصلات امال لفاك وهي مشات تلاقا مع المجموعة للي دايرة معاها سوتنونس.. أما فدار الحاجة كولشي كيفيق بكري حيت اليوم غيسمييو)
شيماء: تفوو وكان غير مسيت لسيتي حسن لي من الجلسة هنا
نعيمة: حشوومة ابنتي (كتلبس شالها وقربت ليها حيت كانت كتجمع لفراش) ها شنو كلتلك داك نهار هدا وراكي مزالة ضييفة أما ميخصك عليها ابنتي تفيفي مع لفجر
شيماء: اوا صاااااافي (جمعت فراسها وفراش مها وفتيحة للي كتقاد وتلبس فذهوبات خرجو تصادفو مع زهير طالع حتى هو عند مو وباينة عليه مشابعش نعااس تبسمت معاه شيماء)
شيماء: سلام زهير لبلس عليك
زهير: سلام اختي سلام خالتي نعيمة بيخير (شاف ففتيحة وحرك راسو زعما سلام واخا راه مزال محملهاش على لبارح)
نعيمة: سلام وليدي لبلس علييك مبروك عليك المحال
زهير: الله يبارك فيك اخالتي
نعيمة: وليد راه مزال ناعس
زهير: ههه عيااا لبارح ومحنتو هاد اليوماين معايا اصلا من نهار بديت وهو محن معايا
نعيمة: ما محن واالو راكم خووت للي تقالت عليك خفافت عليه
زهير: ربي يخليك اخالتي طلعوو مرحباا بيكم (طلع هو بالزربة وفتبحة غير كتشووف زادت حدا شيماء)
فتيحة: هدا هو للي بغا يخطب امال؟؟
شيماء: اويييلي عليك اخالتي فتيحة واش هدا غيشوووف فبنتك
فتيحة: وماالها ناقصها يد ولا رجل
شيماء: ومااشي هكااك ولكن امال مسلووتة وشوفي غير هو لقلدة
فتيحة: اوا راه جا طلبها من عند خووها
شيماء: اوا ورجع؟؟؟
فتيحة: راني عاارفة ديك المنونخة معمر شي حد يجي عندها ولا يفكر يتجوجها تمااك غتبقالي فالركنة
شيماء: اااااااوا لمكاتيييب وصاافي راه مزال نبيل باغيها واقلة هههه (طلعو كان لفطور محطوط وشي عيالات كاينين شيماء بقات حاضية زهير للي فلكوزينة كيظحك مع مو عرفات غيمشي مشات لدروج كتلعب بواحد لورد تمااك معلق فالحيط ودايرة التيليفون على ودنيها)
شيماء: والله حتى عبرتي اصلا زهير حسن ليك من هداك … ولا ماشي زعما حيت لبلس عليه زهير ولد الناس وبغااك من اللول واخا الا عرفك خلاطة هههه ميوليش يدور بييك.. ههه لا لا والله حتى ولد الناس وألف وحدة تمنااه خاصك غير ترجعي بنت الناس معاه ومتبقايش تصنعي بزااف حيت داكشي مداايمش اصااحبتي.. ياله بسلامة حتى نتلقاو بلاتي ونكملو.. بسلامة (قطعت وهي كتسمع خطوات فدروج غير بشوية دارت وتبسمت بحقد وهي شادة التيليفون.. دخلت وعندها شهية كبيرة لفطوور من بعد هاد المشهد للي دارت… مشات جلسات حدا فتيحة ناشطة حتى طلعاتلها ابيل فيديو من عند مريم) يا لالة طالقة لكونكسيون على صباااح
فتيحة: محمد كالي نطلقها كبيل
شيماء: اممم
فتيحة: (جاوبت كانت مريم تبسمت معاها حتى بانو ضروسها) السلام امريم لباس
شيماء: (قلشت ودنيها وطلات بنص عينها بانتلها مريم لابسة تيشورت وشعر دايرة غير بوندو ومطلوق وحطاه وهازة غراف باينة فيه قهوة)
مريم: سلام خالتي لباس عليك
نعيمة: سلمي عليها افتيحة
مريم: سلمي على خالتي نعيمة بزااف
فتيحة: كتسمعك ابنتي فين محمد لباس عليه؟؟
مريم: الحمد الله اخالتي ها هو كيفطر فين أمال مكيناش حدام
فتيحة: لا مشات تقرا.. مزال مبانلكم مجيان ابنتي
محمد: (فمو عامر نطق) نكملو العاام ونجيبو….
محمد: (فمو عاامر.. نطق) نكملو العام ونجيو ان شاء الله
فتيحة: (بقات كضور عينها وقلبتها ظحك) هههه اييه اوليدي ݣاع منݣد على فرااقك
محمد: (دار لمريم إشارة باش تقلب التيليفون جيهتو جات تقلب بانتلو شيماء وكاين البشري) حتى لمن بعد ونصووني (شد التيليفون قطع) مشفتيش كاين بزاف دلعيالات تمااك؟؟
مريم: (شافتو تقلق) هاا مشفتهومش والله
محمد: مريم داكشي ديالي منبغيش يعرفو شي حد من غير الدار
مريم: والله مشفت
محمد: عرفتك مستيش ولكن منين نبغيو نهضرو فشي حاجة ديالنا نشوفو شكون كااين عاد نهضرو
مريم: (حركت رأسها باه) وااخ
محمد: ياله انا غنمشي…
~~~~~~~~~~
زهير: (بقا مع مو للي مخلاتوش يمشي حتى فطر فلكوزينة وكلا من بطبوطها للي قداات عاد تم هابط لقا وليد واقف بوحدو) واش فطرت
وليد: واه فطرت فدار الحاج
زهير: باقي مكره
وليد: (حرك راسو بلا) ياله نمشيو راه تعطلنا
زهير: ياله 8 اصاحبي شكون غيشري على صباح
وليد: (ركبو وشاف فصاحبو للي كولو نشااط) شتك راشقة لييك
زهير: وعلاش مترشقلييش الحمد الله بييخيير غير نتا باغي تعقدها وصاافي عندك مشكل مع هند بسيط حلووه بالعقل لومها بلعقل تقلق عليها ولكن ماشي تعاودو داك تبرهيش دلبارح لا نتا لا هي
وليد: داكشي دلبارح مغنفوتوش هكاك
زهير: وحتى تفوتو ليك هي هههه يااا محااينك أوليد الطفلة صدقت تقليلقتها خاايبة وهادي عاد ديما ظااحكة أما لبرغوتة للي معاها علم الله تقلقيقتها كداايرة
وليد: (ظحكو) ههه لا لا امال مسااالمة مسكيينة
زهير: هادشي ݣاع مكنشوفو معايا.. ولكن خليها هاكا عجبااني (وصلو لمدينة)
وليد: عارف فين كيقراو على لفراملية هنا؟؟؟
زهير: لا
وليد: (دار لابليكاسيون (wizz) كيقلب)
زهير: وباش عرفتها تماك؟؟؟
وليد: عارف (عطاوه بقا كينعتلو طريق وصلو لتماك ولاخر مشا للمحال ديالو.. وباش تأكد طموبيلتها الحمرة جبد تيليفونو صونا عليها واالو مكتجاوبش.. دخل لتماك ووقف حدا طموبيلتها رجع صونا عليها ووالو مصلاحلوش حتى يدخل عندها شاف مكاينش كيدير خرج شد تاكسي ومشا عند زهير للمحال دياالو.. أما هي كانت دايرة سيلوونص لتيليفونها وجالسة كتخدم البحث ديالها وفنفس الوقت معصبة وفنفس الوقت منين عرفاتو بقا تحت الدار مدة طفالها شوية ديك العصبية.. أما أمال خرجت مع 10 مشات للمعهد للي تحول داكشي للي قراوه تطبيقي وعطاوهم شنو الماكينات لي غيحتاجو تكون عندهم ونوع الخيط والثوب وكاع لماتريال للي غتبغي تماك الأثمة غالية بزااف هي عطاتها وحدة عنوان وحدة كتبيع هادشي بثمن زوين خرجت دايرة الصاك جنب مشات تيرات 3000 درهم وتفكرت فلووسها لي مشاااو هكااك تحسرت ولكن ربي عطاها صبر وحتى النسيان كان الجو دافي مغيم ولكن الجو مباردش تمشاات على رجليها عاجبها الحال عاد لبارح جات لهاد وجدة لابسة عباية واسعة عليها بتريبل وخايفة غيررالا حد شاف فيها ودابا لابسة كاجوال للمحجبات سروال بوي فراند واسع مع قبية طويلة وشال على الطريقة التركية صونا تيليفونها كانت مها رداتوو لصاكها متأكدة غتقولها شي حاجة غير طبيعية شحال باش جات لوجدة مكتعيطش ليها ودابا منين هي جات كتعيطلها باش تزيد تشوهها قطعات طريق وبصدفة دازت من حدا الشاريع للي فيه محال زهير بقات كتقلب على المحال بعينيها حيت جاي فالوسط وكملت طريقها للمحال للي فظهر كما وصفات ليها مشات دخلات كانت كتبيع داكشي بونوكازيو ولكن السلعة نقية جبدات تيليفونها كتاكد لقاتها هي وكما وصاتها هند تشاطر قالتلها 2500 درهم وبقات امال كتشاطر تبقى غير 2000 درهم)
زهير: (ظحكاتو بلمشاطرة للي كدير.. كان خارج من الصاكا شرا كارو وشافها محس غير تبعها.. شاف ديك للي كتبيع خلاتها ليها ب 2300 درهم وأمال مزال لاسقة ب2000 درهم) ههه صافي غير جمعي لماكينة فكرطوونة (ضارت امال لقاتو هو طرطق عينو) الا خصاتك شي حاجة اخرى شوفيها ولا نمشيو لمحال اخر….
زهير: الا خصاتك شي حاجة اخرى شوفيها ولا نمشيو محال اخر (جبد من جيبو ظمسة دلفلوس وبقا كيحسب مشات حداه)
أمال: لا لا لا عندي والله حتى عندي
زهير: بزعطة الا عندك
أمال: هء!!
زهير: (حسب فلوس وعطاهم للسيدة للي كتبيع) جمعي هادشي فكرطونة انا لعشية ندوز من موراهم
أمال: (حشمت) حشومة عليك والله حتى عندي
زهير: (أكتر كلمة كيكرها هي حشومة علييك) عادي ابنتي واش خاصك شي حاجة كنعرف واحد السيد كيبيع ثواب حدايا فالمحاال
أمال: لا لا شريتهم
زهير: (هز حاجبو) ڤري؟؟؟
أمال: (مقدرتش تحلف) واااه
زهير: (خرجو برا المحال وديما داير مسافة بيناتهم) كنتي قارية؟؟
أمال: (رجعت كتبسم) واه قريت صباح فلفاك
زهير: مزيان فوكاش الامتحان
أمال: شهر 6
زهير: اممم اوا مبقى واالو ومن بعد سموو ديري؟؟
أمال: هه من بعد غتسالا كونطرا ديال الحرية ورجع فحالي حيت مغيخليونيش رجع هنا لوجدة حتى يكون شي امتحان
زهير: علاش
أمال: حيت ديك بنت عمي للي كانت معايا غتجوج
زهير: علاش ݣلتي كونطرا دلحرية؟؟
امال: (معرفت متشرحلو اصلا مكانتش باغية تقولها)
زهير: (شافها ضربت الطم) فاطرة؟؟ (قبل متجاوب) وحتى وتكوني فطرتي اجي كاينة محلابة زيينة هنا (شافها مترددة) نتي جلسي فطبلة وانا فطبلة
أمال: ههه معليش نمشي
زهير: اجي معايا للمحال الا مبغيتيش تجلسي معايا لوحدك نكملو غير هضرتنا راه عاد جاني الفرج ورجعتي تجاوبيني ومتخلينيش بلاكة
أمال: (خافت من وليد) لا لا حشوومة
زهير: زيدي راه كاين حتى ولد عمك وباش نيت نوريك لبيرو (خرج عينو) وااا زيدي الناس كتشووف (شافها زادت حانية الراس) من نهار عرفك ݣلت هادي كامونية
أمال: هه
زهير: (تبسم وزاد كانت مسافة بيناتهم وصلو للمحال كان فيه الناس) طلعي للفوݣ هاني جاي.. احمد سير محلبة الزوهرة جيب شي فطور (مشا كيتبابع مع الناس وأمال فرحانة طالعة فدرووج حلات باب الزاج كانت ريحة زوينة ديال العود ولبيرو مأنتك جلست فكرسي زوين تمااك دايرة صاكها فوق حجرها ومربعة يديها كطل عليه من الزاج كفاش كيظحك ويهضر مع الناس شد فلوس وجا عندو واحد من دوك لي كيخدمو بداك لكتاب تعرض لواحد هز بلاطو ومطلعها معاه حل لباب كان بلاطو فيه حرشة فيها جبن وعسيلة وملوية فيها جبن وعسل وجوج كيسان ديال الرايب وشحال عجبها هاد لفطوور حطو حدا الطبلة فين كان جالس وجلس اونفاص معاها..) يعجبك هادشي ولا نجيب ليك شي حاجة اخرى؟؟
أمال: (حشمانة ومفرنسة) لا لا مزيااان
زهير: هاد الحشمة مطولة (هز كيااكل وكيشوف فيها)
أمال: (تبسمت وقلبت وجهها هادي أول مرة يجلسو ياكلو بجوج ويكونو فشي بلاصة مسدودة واخا كولها زاج بوحدهم)
زهير: واا امل زيدي تاكلي (هزات كاس الرايب ومعلقة وبقات كتاكل بشوية) نجيبلك شي حاجة اخرى؟
أمال: لا لا (هزت من الحرشة وبقات كتاكل بشوية وكتحاول المضغة متسمعش ليه)
زهير: اوا كفاش قضية الحرية
أمال: (بغات تصحح ليه التفكير) لا زعما غير منقراش على خاطري هاكا غنمشي لتاوريرت حتى يكون امتحان ونجي
زهير: علاه نتي مزالة ناوية ترجعي لتاوريرت
أمال: (تبسمت)
زهير: ديك بنت عمك ممفتهمينش نتي وياها بزااف
أمال: (وحلات ليها) ها لا بنت عمي
زهير: وي عارفها بنت عمك ولكن ماشي كيف هند
أمال: (حركت راسها بلا)
زهير: امممم مهضرتيش معاها هاد صباح
أمال: لا اصلا معندهاش حتى نمرتي مكنهضروش بزااف ولكن هادشي معارفوش وليد وكولشي
زهير: وعلاش؟؟ حتى جيتو هنا عاد دابزتو؟؟
أمال: ماشي دابزنا غير حتى وحدة مكتفاهم مع لوخرا صافي ومبقيناش ككنا عفاك متݣولهاش لوليد…
زهير: (هز حاجبو فيها) انا كنسولك حيت انا باغي نعرف عليك كولشي أمل ماشي باش نشد بيك براد أتاي ونبقى نتعاااود عليك
أمال: حم غير باش ميتقلقش وصافي
زهير: اممم بغيتي زعما باش مبحكرووش عليكم وتصالحو ونتي مباغاش
أمال: وااه أنا صافي خليت تبقى بنت عمي منعاود ليها متعاود لية
زهير: اممم براكة عليك غير انا تعاوديلي (شافها خرجت عينها) وهند الله اودي وحنا نسااو هند
أمال: ههه (وقفت دارت صاكها على كتفها) أنا نمشي
زهير: خلييك شوية
أمال: لا نمشي مزال خاصني نشري شي تواب شي حا.. (سكتت وهو وقف وهز حاجبو فييها) عفااك باش مرة أخرى نهضر معاك
زهير: ههه بَزْ انا كديريلي هاكا
أمال: (جات خارجة وتبسمت معاه) شكرا بزاف
زهير: (غير كيشووف فيها حتى مرݣات خرجات وهبطات بشوية وهو وقف متبعها غير من مور الزاج خرجت نيشان مشات وهو رجع جلس كانت كلات غير شوية هز من كاسها ومن نفس معالقتها وبقا كيااكل) صافي مشيييت خلااا…
~~~~~~~~~~~~~~
نبيل: واخا امّي انا نهود عندكم غير كونو لابسين ما فيا للي يݣعد يتسناكم
نعيمة: لا حنا داربا لبسو (قطعت) ياله افتيحة نمشيو للسوق شيماء لبسي حوايجك ابنتي
شيماء: (طالع ليها الدم أنوار معاطيهاش وقت) مافياش اماما
نعيمة: ياله تخرجي شنو تجلسي ديري وحدك
شيماء: نمشي نجلس حدا لبنات
فتيحة: انا ديك الجدرة مجوبتنيش فالتيليفون
نعيمة: تلقايها مزال كتقرا
شيماء: علاش متعيطيلهمش ونمشيو كاملين حتى هوما يكونو قنطو بلقرايا
فتيحة: صبر رااسها خليوني غير ففقستي سمعتي انعيمة شنو ݣال
نعيمة: اوا الا كان غيدير مستقبلو تماك خليييه
فتيحة: هااويلي على خلييه والله متكون لييهم
نعيمة: ههه اوا سيري تبعييهم
شيماء: ماما وليد طول هاد المرة بزاااف شهرين هادي
نعيمة: معرفتش ابنتي
شيماء: ياكما غيرجع يخدم مع داك زهير عرفتي فاللول حسابلي غير سبااغ ههه ساعة صدق لبااااس علييه
نعيمة: (مكتجاوبهاش بقات غير كتلبس حوايجها وكل مرة كتأكد من قرارها أن بنتها غتعذب فهاد زواج داكشي باش قبلات تجي لهاد لعراضة للي كان ممكن ترفضها بطريقة لبقة ولكن هي لا كانت طاالبة عليها باش تحضر باش تشوف كفاش كيتعاملو مع بنتها للي اصلا بينت انها مزال عقلها صغير ممستاعدش يكون أسرة وتكون مسؤوولة على عائلة كبيرة بحال عائلة الكاملة..) ياله افتيحة ونتي غير تخممي ولادنا راه مغيمشيو غير فين مشااهم الله والا هو رتاح تمااك علاش تمنعيه وماشي حتى بوحدو راه معااه مرتو وراك شفتي شحال متفاهمين تبارك الله (شيماء بقات كتشوف وكتخيل محمد ومريم عايشيين لاڤيدا ولامووغ)
فتيحة: ݣاع لا تݣوليها يا نعييمة يمشي ويخليني لا لا والله حتى نمشي فيها
نعيمة: هانا وليد راه كيمشي كنبغي نهبل ولكن كنݣول مهم مرتاح وعاد راه كاين علي وها امال غترجع
فتيحة: لا لا محمد بلاصتو وحدو اختي منݣدش يتفرق علية
وليد: (مشا للدار كان نعس شوية باش يرتاح حيت غيشد لعشية على زهير فاق حيت كان داير ريڨيي اول وحدة جات على باالو هي هند غووبش معجبووش الحال لهادشي للي وصلولو من ديما كان الحوار هو سلاحو ولكن معاها كان معصب بزااف كان كيتسنى من بعد مااا رجع من فااس غتعيط ليه وتصاارحو باش يتلقااو ويهضرو فهادشي سااعة من تمااك مصونات علييه وحتى منين شافها مجاتش عندو حس براااسو معندووش أهمية عندو وواخا هكاك كان كيتسنى الوقت باش هو يمشي عندها حتى شافها ديك الليلة خارجة بشعوراتها وشاف شي دراري كشاافو فييها وعاد واحد قال “هااااا طروووفا ديال الصح” خنزر فيه مشا عندها محس غير لاح ديك الهضرة فوججها خرج باش يبرد حتى شافها صاݣت فديك الطريقة صدمااتو كخلاها زهير تقليقتها خايبة كانت غتقلب راسها وحتى أمال بسباب تهور منها وصنف ردة فعلها بالمتهورة حيت حتى حاجة متستاهل داكشي للي داارتو.. معرف شنو يديير كان هو للي خاص يتقلق ماشي هي.. وكملاتها ختو منين كان طالع درووج باش يعيط على زهير ونيت يشوف مو ومرت عمو واش خاصهم شي حاجة حتى صدمااتو منين سمعها كتهضر مع أمال هكااك وعلى قبل زهير وشك كبييير منو انها مكانتش كتهضر مع أمال حيت علاقتهم مبقاتش ككانت وعاارف أمال ماشي داك النووع متااقش فختو فمرة وعصبااتو هبط باش ميدييرش شي شووهة وخوفو غير يكون شي حد سمع ولا هي نيت لمن كانت باغا لميساج يوصل… ناض من بلاصتو مشا للحمام قضا روتينو توضى خرج صلا وهبط لتحت كانت أذن العصر لقا أنوار جالس مع شي دراري حدا النافوورة داز من حداهم) السللاام عليكم
الكل: وعليكم السلام
وليد: (مشا من حدااهم خارج باش بقلب على شي تاكسي حتى سمع أنوار كيعيط ليه ضار) وي
أنوار: ماشي عند زهير؟؟
وليد: واه
أنوار: انا نوصلك
وليد: لا لا متعييش رااسك
أنوار: اصبر اصاحبي نجيب سوارت ونوصلك حشوومة ݣاع نخلي نسيبي (تبسم معاه ومسا لاخر أما وليد هضرة أنوار كتجييه بااسلة)
أشرف: خو خطيبتك هاديك
أنوار: واه لي شاف دافن حياتو فبرا وقزديرة باش يتحرك معندووش
أشرف: بحال عمك حتى هو واالو
أنوار: وبعدها هداك حتى حل محاال نااضي أما هدا مفهمتوش اصلا شنو كيدير هنا (مشا عند وليد للي كان خرج برا ماشي بقا كيتسنااه وقف عليه أنوار وبقاو كيهضرو فبزاف دالأمور.. حتى وصلو)
وليد: شكرا اخااي أنوار
أنوار: اندخلو نشووفو هاد خوونا شنو كيدير (دخل كان زهير لفوق كيشوف شنو تباع وشنو الاثاث للي مشا وعاد الناس للي دومونداو شي حاجة حتى وقف عليه أنوار ووليد) كاين شي روااج؟؟
زهير: الحمد الله وليد شوية رتاحيت؟
وليد: الحمد الله انا نهبط لديبو على ود شي لعبة كان وصاني عليها واحد خينا
زهير: واه.. جلس انوار (جلس كمل داك لحساب وشاف فيه) امتى ناوي تعقد؟؟
أنوار: غير تفوت هاد المناسبة
زهير: انا وليد ݣالي حتى للصيف
أنوار: اهاااه الا كانو بغاو حتى للصيف وتجمع العائلة ونيت يجيو خوتاتي مزيان
زهير: سمع أنوار عينك فزواج رْݣْلْ عينك فلعوااج زلݣ
أنوار: علاش عارف شي حاجة
زهير: معندي ماانعرف للي غنعرفو غنعرفو من عندك نتا وهادشي دياالك مبانلييش فييه ولا مكانوش يخليو حتى للصيف
أنوار: انا الا بغاو من غدا نجمع وراقي ونعقد على لبنت
زهير: كفاش الا بغااو نتا شنو بااغي
أنوار: انا لبنت عاجباني عائلتها ناس ملاح مغلقاش حسن منهم
زهير: هااا ودني أنوار دوك الناس منبغيش نتحااشم معااهم
أنوار: ونفتارضو سمو ما بغا يوقع دابزنا انا وبنتهم ومتفاهمناش نتا لاااش راه ميمكنش اصااحبي راه زواج هدا متعرف الرمانة كغتكون
زهير: كانت زينة ولا خامجة غطليها وضرب الطم حيت نتا ماشي شي واحد للي مسݣد باش تعايب على شي حد اخر
أنوار: هههه ودابا غير مسبقين العيب
زهير: ممسبق عيب اولد خويا انا غير كنعلمك بغيتي تكمل مزيان مببغيتيش حسن متوصلو لشي كاغييط
أنوار: لا لا مزيااان.. ونتا كفاش بلانك مدخل صاحبك معاك فلمشروع وانا لا
زهير: واش نتا هبيل ندخلك باش ندير فاييت معاك نهار اللول نتا كتعرف فداكشي دلحسااب وراك ماشي مع باك مزيان وانا باقي فكلامي تفتح شي محال صغير نعااونك فالسلعة
أنوار: ارااهم فلوس
زهير: ل***** للي غتشووف السلعة نجيبها ليك انا درااهم متحلمش
أنوار: ههه الزقرام لاخر مهم نتقااشعو بلاتي باش نمشيو للدار…
أمال: (فرحانة منين جلست مع زهير شحال حسات براسها مرتاحة معااه لدرجة مشات على رجليها وصلات طلعات للدار لقات هند كتفتح لباب وباينة مسخسخة) هند
هند: (ضارت عن) زييين صاڤا
أمال: الحمد الله كبقتي
هند: مزيااان عييت وصاافي
أمال: مهضرتيش مع وليد؟؟
هند: (دخلت وحطات الساروت فبلاصتو) لا (شعلت تيليفونها لقات بواط ڤوكال منو شي 4 دلمراات تعجبت وجلست مجبدة رجلييها) لقيتو مصوني مع 8 ونص
أمال: (جلست قدامها) نعاودلك واحد الحاجة؟؟
هند: (شافت فيها باستغراب) قولي!!
أمال: (كتجمع التبسيمة) صباح خرجت من المعهد مشيت نشري ماكينة دلخيااطة
هند: اوا حقا شريتيها؟؟
أمال: اممم ولكن زهير للي شراهالي تصدمت كنت نتشاطر حتى لݣيتو يݣولها جمعي هادشي فكرطونة انا نجي من موراه والله مخلاني نخلص وخلص هو وعاد بدا يݣولي ياله نشريو تواب
هند: (تبسمت) هه وهاانتي على باااا زهير باا ختي ڤغييمون سعدااااتك بيه أماال
أمال: صدمني والله وعاد مشييييت ااااا
هند: (هزت حاجبها) فين مشيييتي
أمال: والله هو للي لسݣ فية
هند: اويلي فين مشيتي ههه
أمال: مشيت معاه لمحال وجاب فطور وفطرنا بجوج فلبيرو ديالو
هند: هااي هاااي هاااااي صعاابيتي ابنتي
أمال: واش درت شي حاجة خاايبة
هند: (حركت رأسها بلا) بلعكس والله زهيير يستااهل وحدة بحالك ونتي تستاهلي واحد بحاالو عطييه فرصة السيد ما شفتي منو غير الخييير
أمال: صعيييب اهند
هند: للي صعييب دااز انا قلت عمرك تنسااي أنوار ونتي براسك قلتيها ودابا مكتقديش حتى تشووفي فكماارتو
أمال: (عوجت وجهها) والله مكنحمل الشوفة فيه
هند: ها صعيب للي جاي سااهل أما قضية تعادي لزهير على ماضييك كيبقى اختيارك نتي وهو ممنحقوش يدخل حيت عمركي فتي الحدود مع داك راس ال****
أمال: هه مكتحشمييش
هند: (تنهدت) اودي لا حشمة لا عفة جابولي مع داك خينا
أمال: ياله نخرجو باش متبقايش هاكا
هند: ما فيااش اختي والله
أمال: وا ياله نمشييو للحمام
هند: ياااا دي النيييلة على احماام دور دوورة وتقولي الحماام
أمال: كيحمقني ههه راه غنتحرم منو اصاحبتي
هند: للي سمعك غيقول غتمووتي
أمال: اوا شكون عرف راه الرجعة لديك الدار كتسمى عندي قبر (تحمست) عرفتي شنو ݣالي زهير هه ݣالي علاش نتي مزالة ناوية ترجعي لداركم
هند: ههه كيسالي معايا بالهضوور ديالو
أمال: هه واه زويين
هند: اممم زويييييييييين هادشي بدا يكبر ههه (وقفت) نمشي ندوش عرفتي عرفتي بزاااف ونجبد عليها بنعسة
أمال: ومتغداايش
هند: نجيبو شي طاكوس ولا بيتزا
أمال: أنا نݣاد شي مريقة حسن نهبط نجيب الخبز غير سيري نتي رتاحي
هند: واش نتي ديما غتعيي راسك انا راه ݣاع مكنطيبش
أمال: نتي غير ظحكي
هند: (مشات عنقااتها وحتى أمال رجعت كتعنقها الوحيدة للي أمال كتعنقها) ختييي نتي… (مشات هند كتجر رجليها وحايرة واش تهضر معاه ولا تخلي حتى يبرد حيت غير لبارح بان فيه معصب وأكترية منين مبغاتش تحلو لباب…)
~~~~~~~~~~~~~~~
نبيل: (من بعد مدورهم تقداو شنو بغااو وحملو فالطموبيل)
شيماء: نبيل دوزنا لمحال ديال زهير
نعيمة: (خرجت عينها فيها) علاه؟؟
شيماء: غير نشوفوه وزايدون حتى وليد كيكوون تماااك
فتيحة: اوا ندووزو حتى الا عجبتنا شي حاجة نديوها
شيماء: داااكشي غاااالي امرت عمي
فتيحة: اوا حتى نكون نسعى وݣولي غاالي
شيماء: اممم (مشااو لتماك حيت كانو قرااب هبطو وشيماء باغا تشوف زهير شحال معصب من لكلام للي قالت صباح وسمعاتوولو….)
نعيمة: (دخلات كتشوف فلمحاال عجبها حتى شافت ولدها كيتباايع شحال عجبها الحال وفسرها تمنات لييه شي محاال بحال هاكا غير شافهم جاي مبسم باس ليها راسها) الله يرضي عليك اولدي
وليد: هانتووما هنا
فتيحة: تبااارك الله محال زيييييين
شيماء: وااه غزاااال
وليد: (مشافش فختو) ياله هانتوما كتشووفو نمشي نشوف لكلياان
شيماء: (كدور عينها ملقااتش زهير فكرت ممكن يكون لتحت تسلات من مها وفتيحة وهبطات لتحت كان خااوي لتحت دغيا لحق بيها وليد جبد ختو من ذراعها وخرج عينو فيها) ماالك اخويا
وليد: كلمة وحدة مغتعااودش.. نعاود نلݣاااك حاطة رجلييك هنا غنحر وااالديييك
شيماء: هااء شنو درت
وليد: تحركي هنا وبقااي لاسݣة فمك (بلغوااات) ياااله (شافت فالدري للي كاين تمااك وقلب وجهو طلعت مرضياااش ومفقووسة ومفهماش مال هدا عااود لسقات فمها خرجو من تماك ولحق وليد عندهم)
وليد: صافي مشييتو؟؟
نعيمة: اوا نمشييو اولدي غدا غير نحضرو لسبوع نشدو طريييݣ انشاء الله
وليد: مزيان فوجتو بعدا شوية شيما غىتجع معااك
شيماء: (خرجت عينها) الااا ولقرااية
وليد: (ببرود فيها) مرحبااا
شيماء: (عمرو كان معااها هاكا بقات غير كتشووف فيه)
وليد: اوا سيييرو المحال راني مݣابلو وحدي… (مشاو وهو رجع شاف فتيليفونو كان زهير للي مشا يشوف شي ورااق) فييين
زهير: المحال عامر؟؟
وليد: الحمد الله كاين الروااج
زهير: راه جايب معايا واحد الفرد على ݣدو هههه
وليد: ههه مرحباا بيهم (دخل وعقلو مقسووم بين هند وبين ختو شيماء علاش دارت هكااك كفاش هي مخطوبة وكدير دوك التصرفات مع أمال وعلاش اصلا دااابزو بقا حاااير جا زهير مع دخل وبداو يدخلو شي ناس وعمر المحال عااود وكولها فين كيشري ومع وليد معطيلو داكشي دلبيع للي جاي على كرسي زاد معاه طبلة وشي توااشي يعطيو تمان ويبقى لاخر يتشاطر حتى يوصل الثمن الأصلي للي دايرين كملو معاهم وزهير عاد صيفط على طوييجين ليهم انا دراري عندهم نص ساعة لواااحد مسؤول على مكلتو.. طاحو فيه عمىى)
زهير: واااايلي سموو نسيييت
وليد: مالك
زهير: (وقف مسح يدوو) انا جاي (هبط لتحت لكاڤ بجرا غسل يدو مزياان وخرج باش يلحق لمرا للي دار معاها على ماكينة ديال لخيااطة لقاها كتسد عطاتو لكرطوونة ومشا هازها حتى وصلها لمحال دارها حدا لباب وتجبد) ظهري تݣسم ولبنت مزال حتى معطااتك كلمة ابا زهيير اييييه ݣلبي عدوويا طاح قلبي تمرمد جد اصل مو (تبسم غير الخطوة للي دارت صباح عجباااتو أما شيمااء مفهمهااش لاش بغاات توصل وخلاها فباالو يمكن ماشي أمال للي هضرت معاااها شي بنت اخرى منين كان ماشي يغسل يدو حدا لڤابو للي حدا لباب وسمعها كتهضر هكاااك)
وليد: (عيا بزاااف والساعة كانت 8 وزهير هدا هو الوقت للي داير باش كيسد.. كملو إجراءات وسدو لباب برا وجرو الريدو ديال لحدييد بقا كيحرك رااسو) اليوم الفقهة دسبوع؟؟
زهير: واااه والله حتى تسخسخت
وليد: واالو مغنݣدش نصبر خااص نمشي عند هند
زهير: علاش منديوهمش معانا يفوجو شوية حتى هوما ولبنت تجلس مع مها وهند مع حنااها
وليد: وااه ولكن متصووݣش
زهير: ههه انا نعرف نݣلس ديالي حدايا ونتوما بينااتكم (صاݣ زهير نيشان لعند دار لبنات وقف تماك حل لقجر جبد ريحتو رشها على عنقو ولمس على شعرو بحال كيقادو ووليد كيشووف فيه)
وليد: واش نتا غتردنا شي حاجة اخرى راه بنت عمي اشريييف هاديييك
زهير: بزعطة الا بنت عمك انا ݣلتها لييك نهار نعقد عليها أول واحد يݣلب عليها هو نتا
وليد: هههه (بقاو تمااك صونا على هند وجاوباات) هبطي
هند: (قلبها غيسكت) لتحت
وليد: اممم ولبسي مزيان نتي وأمال تمشيو لسبوع
هند: (حسابلها غيبغيها لوحدها باش بهضرو) اممم ما فياااش للي يمشي
وليد: (بقا ساكت) غير غتهبطي ولا غنطلع
هند: غطلع بصيفتك اااش (سمعت طيط طييط) حوووح فييك حساابلك مردهالكش وااخا نكوون كنتجواانطا عليييك
أمال: ههه واش قطعتي علييه هههه (سمعت الدقاان) احاااي واش هو للي يدق
هند: معرفت اووف واش قفرتها والله مكنت غرتاح الا مرديتهالوووش
أمال: ههه (ناضت لبست شاالها وردت بينواارها كتحزم لحزام) هضرو غير بشوية
هند: بففف انا لبس سيري حلي
أمال: (مشات حلات لباب لقات زهير تمااك شافت فيه متبسمة وهو حتى هو تبسم)
زهير: شتي شحاال زينية تحلي لباب على كمااارتي
أمال: ههه
وليد: (مكره) حااايد ازهير حايد
أمال: (شافت وليد وحشمت لدرجة توترت وبانت فييها) خوويا وليد
وليد: ياله لبسو حوايجكم متبقاوش بوحدكم تماك وݣاع العائلة مجموعة
زهير: انا هبطت لتحت (هبط كيتبسم كيعيا يشد فرااسو ولكن غير كيشووفها كيبغي يقنعها أنه مزيااان وصاالح لزواااج وانه بااغيها بقلبو وعقلو ولكوولشي)
أمال: احم انا ندخل نݣولها لهند
وليد: ݣولها الا مهلطتش غتجي لوحها مع درووج نورييها شكوون انا
أمال: واخا خويا وليد متعصبش هاحنا نجيييو (مشا هبط وهي دخلت عند هند للي كانت كتسمع كولشي عوجت فمها ومشات تلبس حواايجها دخلت عليها امال لقاتها كتلبس) احاااي وشحاال معصب
هند: بعااودها رااسو اصلا نمشي باش نشووف مي لالة
أما: اممم مي لاااالة
هند: سييري تمشي سييري (مشات أمال لبسات كيطمة فوق منها مونطو مدارت والو فوجهها وحتى هند حدهم كل وحدة دارت بارفان رشة صغيييرة لقاو دراري راكبين غير هبطو هبط زهير حل ليهم لباب ووليد كيميق فييه مشااو ساكتين من غير الراديو للي خداام زهير ممساليش كيقلب على أمال غير من لمراايا وحتى هي عايقة بيه وكدير راسها سااهية فالزااج ومرة تبسم بلبااقة حتى وصلو)
وليد: نيشاان الداار ومتخرجو حتى نصوني علييك أمال باش نوصلكم
هند: (خرجت قبل ميكمل هضرتو وهو متبعها غير بطرف عينو.. أما زهير شد فيه مزيان حتى عصبو مشاو بدلو علييهم ودخلو جلسو مع لفقهة)
أمال: (دخلت سلمات على لعيالات كاع للي جالسين ومنهم الحاجة للي عنقااتها) ربي يخلييك الحاجة
الحاجة: توحشتكم وشحال غبرتو علية
أمال: غير مع لقرايا الحااجة
الحاجة: اوا رواحي تروحي معاانا ابنتي
فتيحة: (فبالها ميمكنش هاد الاهتمام ومغتزوجهااش لولدها) اوا غدا ياله معانا
أمال: (خافت وبان فييها وحتى الحاجة شافت فأمال) نهار الاثنين قارية
فتيحة: اممم
شيماء: (بقات غير كتشووف وحتى من امال كتبان ليها مرتاحة يعني زهير مقال ليها وااالو شافت أنوار صونا عليها قطعت علييه محملاش تهضر معاه حااليا….)
كملو الصدااقة وأمال كتحااول تهرب من مها باش متقولهاش شي فضيحة حتى من طبلة لعشا امال هربات هي وهنظ لصالون وكلاو مع ناس اخرين مع جمعو
أمال: ياله نمشييو
هند: امم صبري حتى كولشي يخوي
أمال: ههه خفتيييييي
هند: سيري تزمري (بقاو تماااك حتى كولشي خوا جات حداهم فتيحة)
فتيحة: وهااانتوما هنا
أمال: هاحنا غنمشيييو
فتيحة: ضسرتييييي.. ولكن عقلي على دشي مزياااان محمد راجع راااجع ونشوفو واش تبقااي ساايبة
أمال: (غير كتشووف ميمكنش تجاوب معااها وهند كتنغزها زعما متديش علييها مشات فتيحة) ياله نمشيو اهند (هبطو من مورااها من بعد هند مودعات جداها للي لقات ونيييس للي هو الحاجة هبطات كانو رجال جالسين حدا النافوورة غير زهير قشع امال خارجة لاح لكارو وعفس عليه برجلو)
زهير: ياله
وليد: (ضار لقا لبنات حدا لباب وعاطيين بظهر وقف وانوار وخوتو ونبيل وأشرف وشافو جيهة لباب)ف
نبيل: فين ماشية دي؟؟؟
أنوار: (كان عارفو هو للي عاودات ليه هند كان بغا يخطبها ومبغاوش وبراسها أمال عاودات عليه مرة ومكانتش باغاااه) معرفت اخويا هاد لبنات مكيشدوش لارض
نبيل: (مشا تابع وليد) ولييد رواح (مشا وزهير غير قرب ضارت هند حرك راسو زعما ياله وشدت فأمال ومشاو تابعيينو) هاد الساايبة كفاش عينيينا عليها وهي مداايراانا حسااااب
وليد: شكون؟
نبيل: أماال
وليد: ياا دييها فرااسك اصااحبي واش هاد أمال للي ملݣا ميديير يجبدها
نبيل: وهاااني ݣلتلك محمد راه خلاها أمانة عندي
وليد: سير برااكة من تبرهييش نهار تعقد عليها وݣول أمااانة (مشا مكره مخلييه واقف ومشا طلع الطموبيل منين شافهم طلعو زدح لباب وجلس)
زهير: سمو بغا؟؟
وليد: تبرهيييش وصاافي (قلب وجهو وهند كتكااال خاصها يهضرها وهو وااالو)
زهير: غتجييو غدا؟؟؟
أمال: (تبسمت وقلبت وجهها متقدرش تجاوبو ووليد تماااك)
هند: موحاال عدنا بزاااف ميداار
وليد: (والو مكيجاوبش وهي بغات غير كلمة منو صافي بقاو ساكتين زهير محتارم سكوت امال براكة غير كاينة معااه وعاد كتجاوب معاه وصلهم هبطو الا هو)
زهير: نطلع ليك لماكينة
أمال: بلا متعذب رااسك
زهير: ابردي وعلى منعذبش رااسي
أمال: ههه (شافت فهند لقاتها مسكانية عينها كتشوف فالطموبيل للي فيها وليد ومهبطش محملاتش راااسها ممنتابهاش لعصافير الحب.. بغات تمشي عندو ولكن رزناات حتى شافتوو هبط دارت ملامح هادئة على وجهها حتى جا وقف اونفااص معااها كيشووف فيها ببرود وهي كتشووف فيه بعناااد…)
وليد: ياله ازهير
هند: (حسابلها غيهضر معاها حيت كان كيشوف فيها شافت فامال) ياله
زهير: صافي غدا روااحو مّا بغاتكم بلعشية
هند: وييي نجيو لحااجة منقدرش نخسر ليها خااطرها ومي لالة تفاهماات معااها
زهير: واه تفااهمو ياله سيرو طلعو (أمال غير كتبسم وهادشي عااجبو)
أمال: تصبحو على خير
زهير: تصبحي على خير (مشاو لبنات ووليد ضار عندو) عيقتي لا!!
وليد: ماشي شغلك
زهير: ههه ورااه بااينة فييك ابن عمي غير طلݣ اللعب خلااص
وليد: حتى ندمها على داك تبرهيييش
زهير: (طلعو للطموبيل) بانلي غير نتا للي راك تݣطع ههه (مشااو للدار كيهضرو فكولشي وصلو كان أنوار بوحدو حدا النافوورة شاد تيليفون وكيسب فشيماء للي مبغاتش تجاوبو وكانو دايرين يتلقاااو فجنان خلاتو بلاكة ومهبطتش عاود صونا وهي تقطع وصيفطاتلو ميساااج *من نهار خطبتني كاادو مفكرتنيش بيه حتى كلامك ناقص معاايا* استغرب مموالفش شيماء تشكى عارفها غير كتمووت عليه وقف حداه زهير ووليد) عاد جييتو
زهير: امم هانتا مزال سهراان
أنوار: كنتفجج وصاافي ياله تصبحو على خير (طلع للدار ولوخرين مشااو لدار زهير)
وليد: خاصني نكري شي دار محدي مزال مطول
زهير: الدار هنا ونتا تكري صاڤا پا
وليد: (مجاوبوش حيت غيدير للي فبااالو باش يعرف واش هادشي يسلك ولا لا… شيماء كانت حاضيااهم من السرجم دلبيت حتى طلعو.. عوجت شنايفها ورجعت لسداريها جابدة عليها بنعسة…)
~~~~~~~~~~
أصبحنا وأصبح الملك لله
فتيحة ونعيمة لابسين جلابات اخر ما خرج ودايرين ذهوبااتهم أما شيماء قداات راسها مزياان بحال خارجة من عند ميكاب أرتيست والشال غير لوااتو مخلية سوالفها باينين شوية وفينما كانت عندها شي قطعة ديال ذهب داارتها
نعيمة: غطي داك شعر
شيماء: وا ماما راه غير لعياالات وزايدون انا بغيت نبان أحسن وحدة باش غيعرفو رأسهم معامن
نعيمة: لا حولة بقاي تعلاي برݣبتك حتى تݣرض شي نهار
شيماء: اممم خالتي فتيحة مغتجيش بنتك؟؟
فتيحة: اش تجي تݣجدر هنا انا مدا بيا ندوز نهزها ونمشيو للدار نخملوها ݣبل ميجي محمد ومرتو
شيماء: اممم غيجيييو؟؟؟
فتيحة: اوا راه شبعو مسارية
شيماء: اوا بالصح يجي يقابل خدمتو شوية راه ݣاع الدرك بقا لخووتي
فتيحة: اوا بحرا يتعلمو شوية شغل الصح راه محمد للي هاز كولشي
شيماء: (عوجت فمها ياله خرجو بانلها أنوار خارج جيهت طموبيلتو غير شافها قلبت وجهها بتكبر خلاتو غير مصدووم فيها ودخلو لدارهم)
أنوار: ياو مال هاد ال**** عااود (ركب فطموبيلتو ونيشان للقنصلية فين عيطو ليه…. دخلو وتعرضات ليهم لكاملة كترحب بيهم واخا محملاش شيماء الا دايرة صوااب ومكترة تسالمات مع شيماء وهي تسكانيها وهضرت بشوية)
الكاملة: جمعي سواالفك ابنتي
شيماء: معجبووكش اخالتي؟؟
الكاملة: لا
شيماء: (تبسمت معاها قالية ليها السم) أنا عاااجبني… فين جهان
الكاملة: (ياله كتصرط القمعة) راها فبيتها
شيماء: ماما انا مشيت حدا لبنات (زادت حيدات شالها مخلية لكاملة كتبسم بفقسة مع مها أما لوخرا مشات كتعوج بشعرها وطالوها مخلية لعيالات كيهضرو حيت ديجا لكاملة عرفات بخطيبة ولدها صغيير… مشات لبيت جهان كانت لبسات قفطانها ولاوية درور عليها وضاربة الطليسة دلحنا فيدها وفرجليها) يااا ختي راه لحال داافي
جهان: اوا راني محلولة اصاحبتي
شيماء: قوة درور وصاافي جلسي جلسي نقاد ليك وجهك وهو صفر حاالتو غتخلي غير بنادم شاد بيك جموع ومعمر بيك أتااي (جهان جلست عاطية وجهها لشيماء)
جهان: متكتريش راه مكتبغيش عݣوزتي
شيماء: سميتها راجلي للي مكيبغيش نتا مجوجة بالراجل ولا بلعݣووز
جهان: ههه والله الا…. (قداتلها وجهها داكشي خفيف ولكن بينها زوينة وحتى شديدة قداتها ليها مزيان هزت ولدها وخرجات حدا لعيالات كيزغرتو ويشطحو بزريييع….)
هند: (دايرة نظاظر بروطيكسيون ومتخشعة قدام لاب توب ديالها حست بلعيااا حيدت نظاظر حكات عينيها وشافت فأمال للي كتحفض شي تلاخيص منين فاقو مع 10 فطرو وهوما فلحفااضة) عييييت
أمال: (هزت راسها كتحفض وعاجبينها دوك المواضيع) انا مزال
هند: صافي كملي نتي لحفاضة نوض نقاد لغدا
أمال: انا نوض نݣاد
هند: واا تي كملي حفاااضتك قالاك تنوضي متبقاايش تعيقي
أمال: وااا غير زعم (لقاتها خرجات كتحشم ممخلصة كرا حتى من لمصرووف كولشي من هند ومخلاتهاش تمشي لسيتي حيت حشمت بقات كتكمل حفااضتها تفكرت لبارح زهير تبسمت مخلي نغيزة ديال الطاقة الإيجابية تزيدها باش تحفظ وتفهم نسات راسها شي ساعة كتبانلها هند جايبة طاجين دلكفتة بمطيشة وفريت حطات لخبز وعصير معلب وجلسو كيااكلو) واش نمشيو عند الحاجة
هند: ولات تعجبك الحاجة
أمال: انا اصلا عزيزة علية والله كنحس بيها كتبغييني نييت
هند: وراه بالصح كتعزك بااينة وولدها كتتر هه
أمال: هه هداك حمق
هند: بلعكس اختي قلالو رجال بحالو ظحووكي وباينة عليه راجل دلوقت تعولي عليييه
أمال: حتى وليد
هند: وي عاارفة ولكن جاتني فشكل هاد تقليقة ديالو ولففتو ديما ظاحك ونااشط
أمال: شتي يانا وكان زهير تقلق مني هاكا كيفك ݣاع منعس ولا نحفظ نبقى غير نخمم فيه
هند: ههه حيت حمقة لقليييب بووحدو ومستقبلي بووحدو ميمكنش شحال وانا تنقرا ونخدم ونيهر ليالي باش يجي بوق*** يخليني ماسحة كولشي وشاد بوحدو تفكييري وليد انا تنبغيييه وبزااف ولكن مخدمة دماغي كتر
أمال: (بقات كتسمع ليها) بالصح
هند: هاا نتي داكشي للي دوز عليك أنوار خاايب بزااف يااك (لوخرا حركت راسها باه) واخا هكااك هانتي كتقاتلي تقراي هنا وهنا وبلعكس دغيا فتيي الأزمة وحبيتي نتي ݣاع من جدييد
أمال: يعني مكنتش نبغيه
هند: ههه اييه هاديك نقطة بوحدها للي بغيت نفهمك يعني ها نتي دايرة حدوود بين قلبك وعقلك هههه والله حتى ظحكتيني نتي باينة نهار شفتي أنوار حلمتي بالعمارية معاه
أمال: ورااه للي ظحكلي كنت كنحلمها معاه
هند: هههه حاالتك صعييبة.. وزهير؟
أمال: (فرنست) عمر شي حد دارلي بحال زهير
هند: وي كتعجبيني فهادشي ممسوقالوش وهو ميت على كلمة منك صرااحة رجعتي القدوة ديالي ههه هاكا خاص ندير لداك لعوج دوليد
أمال: ههه وليد ماشي عوج
هند: (كتعيبها) وليد ماشي عوج.. ݣاع ديك لقبيلة ديالكم عوجة
أمال: ههه عارفة (ناضت جمعات الدنيا ومشات غسلات لماعن وهند جمعات الدنيا كانت 5 دلعشية لبسو حوايجهم وتقاادو هزو بيجامااتهم وخرجو) انا راه منمشي لتماك حتى نعرف ماما مشات فحاالها
هند: نمشيو نتقهواو اصلا شحال مخرجنا بدلنا الجو (داكشي للي دارو مشاو لقهوة طلبو عصير وحلوة وببقاو مجمعين حتى صونات هند على جداها وقالتلها راه مشااو) نمشييو؟؟
أمال: (انبها ضميرها حيت ممشاتش شافت مها واخا كتعاملها خاايب مكتبغيش دير بحالها جبدت تيليفونها وصونات عليها قطعت عليها وشافت فهند) صافي ياله نمشيو (خرجو كان بدا يظلام لحال شوية ركبو ونيشان لدار الحاجة….)
زهير: (كيجمع شي حساب ووليد كيفتي عليه حتى دخلها لاب تووب) القضية زيينة تبارك الله
وليد: دوك الناس للي جبت لييك دارو معاك الرب دبيخيير
زهير: وااه ربح بلا عذااب مخيرة ندير ليهم اشهار فالمحل وبربح ديالي
وليد: وي مزياانة ومزال صيفطت شي ايميلات لشي شركات
زهير: (عجبو دماغ وليد) مخييييرة
وليد: (بتعالي) قرينا غير هكااك
زهير: (تبسم كان امنيتو يكمل قرايتو ولكن متفائل للي دارو ربي فيه الخير وموااعد راسو ولادو يقريييهم حتى يشبعو….)
شيماء: (بقات مع الحاجة حتى لغدا ويوصلها خوها لسيتي غير دخلو لبنات بظحكهم كحلات بلعمى محملاتهمش يجييو سلمات سلام ناقص أمال للي مكتعبرهاش واخا من لداخل ديالها مزالة راسمة ديك بنت عمها للي كانو بحال لخواتاات جلسو والحاجة وجدات هند كانو موجودين كاسكرووت وكسكسو لعشا حيت طلبو زهير مكلاهش الجمعة وبقا بحال لمريووح.. ناضت شيماء وهبطت لتحت هزت تيليفونها وصونات على أنوار ) االو
انوال: مال دين*** هاد اليوماين
شيماء: شووف نتا كدير شي حوايج مكيعجبونيش وزايدها منسوقش لية وانا للي غنكون مرتك
أنوار: كتخراي فيييه ابناادم
شيماء: موووهييييم
أنوار: لموهيم هو نتلݣاو دابا شوية وغنتفاهم مع ***
شيماء: نشووف متنساش خويا راه هنا
أنوار: وا هاد خووك سكن هنا لا؟؟؟
شيماء: ياكما تقل علييك
أنوار: وحيت باغي نشوف الزين ديالي ونيت غنهضرو فداكشي دلكاغيط
شيماء: وااخا (قطعت وبقات فظلام غير كتفكر.. أما لبنات لفوق ناشطييين)
الحاجة: انا نمشي نجيب شي حرورات من جنان
أمال: انا نمشي الحاجة
الحاجة: (طالبة عليها) الله يرضي عليك ابنتي راه حدا مطيشة نيت راه زهير شوية ويجي يهز طعام باش يديه لصحاابو
أمال: (فنفسها ومنين نعرف بلاصة مطيشة وظلام ناضت لبست بنطوفتها قلبت على هند تمشي معاها لقاتها كتصلي هبطت لتحت داية تيليفونها معاها هنا دخل أنوار بطموبيلتو قشع أمال تبعها بعينييه فين ماشية ومعامن ومشا حط طموبيلتو فين كيحطها.. امال كتقلب على مطيشة بلبييل ديالها لقتها ولقات مزيودات حداها هزت شي 5 حتى شي واحد ضورها بالجهد مفهمت والو مع لبيل بانلها وجه أنوار خرجت عينها)
أنوار: اليووم غيتحدو ليييك
أمال: (بخوف) سيير سير بعد مني
أنوار: هاا حصلتي وفين ديك زعاامة والصنطييحة كما خورت فخرااك اليووم نعاود نفرݣعها لمك
أمال: والله حتى نغوت
أنوار: اصلا منين ****** غتغوتي
أمال: (بغات تهرب وهو يشدها) طلق مني الحمااار والله حتى نغوت
أنوار: تو تو تو داكشي غنديروه بالخااطر بحال نهار اللول
أمال: أنا مدرت معااك واالو نتا كذبتي علية ووهمتيني راك تكرفستي علية
أنوار: اوا اليوم مغنوهمكش غتشوفي بعويناتك وبالخااطر وحتى الا مبغيتيش بالخاطر تصاورك وفيديوهاتك يوصلو لشمااتة ديال ولد عمك
أمال: (خاافت) كدااب
أنوار: (خرب فتيليفونو وجبد تصويرتها كانت ناعسة فطموبيلتو وباين الديبرادور منين قطع حوايجها) نوريك لوخرين
أمال: (بخوف) علاااش كدير هااكا
أنوار: لا لا بلاتي نوريك التصويرة للي غتخلي ديلمك تكوزي داابا (ياله كيخرب خطلاتلو التيليفون وظرباتو مع الارض ومن حسن حظها جابتو فحجرة كبيررة حتى تسمع تشخشخ وكل جيهة جات فقنت فلبلاصة جمع معاها بطرشة حتى طيحها الأرض كيخسر الهضرة ومشا كيقلب على تيليفونو للي غير من ضو الݣمرة بانلو لافيشور مشخشخة خرج عينيين جا يضربها ملقااهاش هزت حروورها للي كان طايح حداها وتيليفونها للي شاعل لبيل ومشات كتعكل تبعها مع شافتو تعكلات ضربها بركلة بالخوف ناضت فين جا يجرها ظفارها غرزو فيديه رخف يدو تنترت وهربت وصلت للساحة كتنفض راسها وقلبها غيسكت ريقها نشف من حلقها كتنفس بصعووبة كان زهير هبط من دار مو تسناها حدا لباب توصل حداه عيط ليها)
زهير: أمل (دازت من حداه بعيدة بشي 3 متر صافي تخطااتو وطلعات للدار مكتشووفش وفنفسها كتمنى التيليفون يكوون ودع وميبقااش خدااام….)
أمال: (طلعت كتجري دخلات للحمام لي حدا لباب وسدت عليها سعلات الضو وبدات تنفض راسها) أحاااي الحمد الله منين مكانوش ساݣيين الدنيا إما كون عمرت غييس (شافت فوجهها الطرشة حمرات ليها الحنك بدات تقرس الحنك التاني باش يحمار خاافت بزااف ينتاقم منها ولكن للي مربحها جزئيا هو التيليفون للي شخشخاتلو ومن تعصيبتو باينة تصاور عندو غير تماااك دابا معندو ميوري لا لزهير لا لولييد لا لحتى واااحد غسلت وجهها مزياان وخرجت مخيفاش يجيها هنا حيت كاين للي يدافع علييها مشات حطات لحرور فوق لبوطاجي ومشات دخلات حدا هند وجدااها… جا زهير خدا الݣصعة باش يمشي يتعشى فمحال ديالو مع دراري وهوما تعشااو فجو الظحك من غير شيماء للي حسابلهم مشات لدار عكوزتها ونيت مسوق ليها حد…. كل وحدة مشات تخشاات فبلاصتها للي عطاتها الحاجة وبقاو مجمعين أمال حتى عرفت كولشي نعس ولبيبان تسدو وهي تجلس)
هند: مالكي؟؟
أمال: (عاودات ليها كولشي)
هند: (شهقت) أوييييلي ولد *****
أما: ايييه شمااتة ولكن هرست لمو داك التيليفون
هند: هههه والله حتى عبرتي علييه دابا مبقاو عندو لا ابيل لا ميساجات لا تصااور لا واالو ههههه ويشد فييه دابا
أمال: فين يشد؟؟
هند: دابا نقولها قد رااسك هههههه
أمال: وغير ݣوليلي فاش يشد محدي زاعمة باش نمشي عندو نهرسولو
هند: هههه (جاتها لفو غيغ) عفااك صاافي ندمتييني ههههههه اووو كرشيي
أمال: علاش كظحكي
هند: صافي امال كنت بغيت نقولك غير يشد فالأرض
أمال: اممم بفف عرفتي هم وتنحى من فوݣ كتاافي
هند: وييييه ونعسي داابا (شافت تيليفونها شعل الضو شعلاتو كان ميساج من عند وليد دخلات بالزربة كتقرا بصوت عالي) غدا قبل متمشي تسنايني (هزت حاجبها) ومتعرفش تصوني أبيييل بففف شحال كيتعاااند
أمال: وليد!!!
هند: وااه
أمال: انا زهير ݣاع مكيصونيلي
هند: وعلاش نتي عطيااه النمرة
أمال: لا
هند: وباش غيصوني بترمتو
أمال: أحااي والله متحشمي
هند: اوا قولي شي حاجة معقوولة نعسي نعسي…
~~~~~~~~~~~~~~~
محمد: الوو ألوو
وليد: كتسمعني!!
محمد: واه دورك نسمعك بيخيير اخااي؟؟
وليد: الحمد الله ابن عمي نتا بيخير لمدام مزيان؟؟
محمد: الحمد الله اخاااي
وليد: راك ماشي فالمحال مزياان ݣالتلي ميشيل على لكومووند للي خرجتي
محمد: اوا مشغليين
وليد: كنت عاارفك دماااغ
محمد: ههه شوي وصاافي سمو نتا درتي فبلانك
وليد: مزال غنشوف شي دار لكرا ودابا شاد لمحال مع زهير
محمد: عنداك تسمح فهاد المحال راه مدخل صرف صحيح
وليد: وانا هبييل ولكن غنشوف هنا ولهييه تمااك كنتخنق مهم مزال نݣلبها فدمااغي مزيان
محمد: الله يسر اسيدي راني ݣلت ليك جامع حتى انا تبغي نزعمو نزعمووو
وليد: انا كنشووف
محمد: اوا الله يهنييك دابا (قطع حتى قبل ميكمل مع وليد منين شاف مريم لبساتلو شنو جاب ليها كان غوب دونوي غير خيووط وجاها كما شاف فالتصوييرة) اوا دااابا هضرتي رواااحي رواااحي
مريم: (غتموت بلحشمة تفضل تبقى عريانة ولا هاد لفضييحة وعاد التعكيرة للي طلب) صافي هانتا شتي
محمد: الاااااا نقييس وديك السااع انا نݣولك سمو نديير…..
أصبحنا وأصبح الملك لله…
هند: (فاقو بكري لبسو كوايجهم كانت الحاجة وجدة هند وسميرة المساعدة ديالها فايقين وجالسين فسطح طلعات عندها لقاتها مساخياش تمشي معاها وحتى لحاجة ضربت لسقت فيها بكترة القنط ولقات مرآة مثقفة بحال جدة هند وشحال من حاجة كانت معرفاهاش ورااتها سلمت عليهم هي وأمال للي لحقت ومشاو بلا فطور باش ميتعطلوش مع نزلو كان وليد واقف غير شافهم جا عندهم وهند مطلعة الشوفة فيه كان لابس نظاظر كوحل وكل مرة وشكل ديالهم كداير مع قبية فلݣري وسروال كحل وسبردية شحال كبعجبها لبسو هزت عينيها فيه معرفتش واش كيشوف فيها ولا لا ولكن مقدرتش تحايد عينيها علييه كيعجبها وكتر وصل حدااهم وزاد دوخها بعطرو)
وليد: صباح لخير
أمال: صباح لخير (هند مردااتش)
وليد: (عينو فهند) فين شيماء مغتقراش؟؟ (حتى وحدة مجاوباات) انا نطلع لها
هند: (حسات بيه معصب) لا راه كتلبس غير سبقنا صبر نمشي نعيط علييها (مشات دغيا وهو متاكد غير ضرقت عليها وصاافي طلعت كتجري مشات لبيت للي فيه التلفازة لقاتها خامرة نعاس زعزعااتها) نوضي ازمرة راه خووك محيح لتحت
شيماء: (تفافاات وهي كتعلثم) ها ششنو شنو وااقع
هند: خوك راه بغا يطلع عندك باش تمشي تقرااي
شيماء: خرا تفووووو ميحكمش فية يمشي يحكم فيك نتي
هند: انووضي ت*** ياكما حساابلك أمال للي غنسكت ليك كلمة أخرى نسا لخرا كامل ونستف ليك سناانك حداااك ودابا تهزي تلبسي حواايجك وسربي راه تابعنا قراايا ما فينا للي يجلس يفااك فيييك منو
شيماء: (دارت قرب وناضت كتصووط لبست حوايجها دارت لفولار هزت صاكها للي كانت جامعااه وزادت خرجت لقات هند واقفة مكرهة عيطت وتبعتها كان وليد كيهضر فالتيليفون جا حدااهم)
وليدي: هند وصليها معاك اختي
هند: (مجاوباتوش طلعت باينة فيه معصب ولكن ختي علاش.. شيماء شافتوو مهضرش حتى معاها وحتى فلوس معطاهاش كما موالف ركبت معاهم كتأفأف طل عليهم)
وليد: (حيد نظاظرو كانو ملامحو جامديين) انا غنشد محال زهير على ميرجع من بلجيكا لفااك كل نهار غنجي نسول عليك كل نهار (أمال تصدمت من زهير للي مشا وشيماء تصدمت من صرامة خوها كفاش غيسول فييها وهند فرحت حيت عرفاتو مززال مطول شاف فيها كانت حاضيااه بحال معنالها شي حاجة بعينييه وحرك راسو مفهمتش الاشارة ولكن حركت راسها باه)
وليد: بشوية عليك فالصوݣان
هند: طلع نوصلك
وليد: غير سيري (بعد من حداهم وهند ديماراات وزادت وهو شدها رجل بشانطتو لكبيرة ومشا كيقلب على grand taxi… مشااو فسكااات نيشان لسيتي)
شيماء: مغتهبطووش نتوما
هند: لا حنا غنمشيو نقراااو
شيماء: بففف على تخربيق فين عايشة (هبطت ولبنات زادو وأمال غير صااقرة حسات بيها هند)
هند: مالكي
أمال: وااااالو
هند: واش كنتي عارفة زهير مشا؟؟
أمال: والله مكنت عارفة علاش مشاا واش صافي رجع ومبقاش يولي
هند: جاتني فشكل ميقولهالكش
أمال: حتى انا والله وبزاااااف تصدمت
هند: بففف غيكون بغا يقولهالك لبارح ومقدرش
أمال: راه عندو نمرتي أحاااي (شدت راسها)
هند: اويلي ماالكي
أمال: كنحس براسي مرييضة بييه
هند: ههه سميتها مزعووطة فييه هههه قالتلك مرييضة الله أبا زهير عاد بدات الزعطة كتشد فلحشومية دياالك….
زهير: (غير وصل مشا لوطيل نيشان كان مسخسخ منعسش ݣاع طلع فلاسونسور وهاز صااك فيدو ديال الجلد ومغووبش داكشي للي دارتلو امال معجبووش فاش عيط ليها باش يعلمها بالسفر دياالو ويقولها غير غيرجع نيشان غيخطبها من عند دارهم وهي شنو مخسراتش حتى الشووفة فيه فهم انه مبغيااهش وغير فارض راسو عليها وكتعامل معاه كأخ لا غيييير.. وصل للشومبر ديالو بدل حوايجو دوش توضى وصلا صلاتو وظلم مزيان الشومبر وجبد عليها بنعسة وهو ممرتاحش…)
~~~~~~~~~~~
محمد: (من بعد نصونا عليه وليد وعلمو راه محمد وصل لبلجيكا فاق من نعاسو شاف فمريم للي ناعسة حداه عرياانة غطاها مزيان وهو ناض كان ناعس غير بشوورطو دخل دوش
اصلا من مور مصلا هو ومريم لفجر شدها مطلقهاش مشا للكوزينة قاد قهوة وشعل كارو كيكمي حتى تعصرات القهوة شرب منها حتى شافها جاية لابسة ديباردور وشوورط ومجياش حشمانة كما كانت فاللول وبراسو هو كان كيحشم فاللول جات باستو فحنكو)
مريم: صباح الخير
محمد: صباح الخير ازين دياالي كبقيتي
مريم: الحمد الله ونتا؟؟
محمد: الحمد الله مهم انا غنخرج للمحال ونقدر نتعطل هاد نهار ݣادي غدااك وهانتي فالدار حتى نجي
مريم: (مكتسولش فين وعلاش وامتى) وااخا
محمد: صاحبي جا وخاص نتݣاه
مريم: واه صاافي
محمد: تبغي شي حاجة من برا؟؟
مريم: (بابتسامة) كولشي عندي (ناض ومشا يلبس تبعاتو عاوناتو كتمد ليه حوايج وبلا ميحس كيلبس من اختيارها لبس سبرديلتو كبططب على راسها كنوع من الرضا وخرج عمرو فكر شي نهار يرتاح مع مريم كيتصرف بطبيعتو مكيديرش مجهود باش يعجبها وكيلقااها كتمووت فاي حركة منو…. )
~~~~~~~~~~~~~
أنوار: (مع فاق هز طموبيلتو نيشان عند صاحبو أشرف كيݣاد فالتيليفونات حطلو التيليفون لمشخيخ) هدا نبغييه يرجع ولا رجعلي تصاور ولميساجات ونواامر
أشرف: هههه اربك (استغفر الله ولكن اغلبية دوك نجيمات فالحديث كيكون هاكا حيت شي وجادة هكا هضرتهم غير باش نقرب ليكم) شكون دݣدݣ ليك هاد المشقووف
أنوار: (معصب) داابا ݣاد هاد لق**** وارا شي تيليفون ندير هاد النمرة راه القنصلية ليوم غيعيطولي على شي ورااق
أشرف: (مد ليه ريدمي ولاخر شاف فيه) اخويا بغيت ايفوون حط فلوسو ههه
أنوار: ارا وكان نقضي
أشرف: بااز كولك فلووس ومتشريش تيليفون
أنوار: دوك لفلووس درهم باغييها
أشرف: (بقا كيشوف فداك التيليفون والو مبغاش يشعل دار معاه ݣاع لمحاولات) عطيني Gmail باش مدخل
أنوار: معقلتش عليه
أشرف: اوا خويا معندو ميرجع
أنوار: ولاش فاضحنا نعرف كدا ونعرف كدة
أشرف: ماالك ابنادم هاد صباح شااعل
أنوار: شووف خدم فيه بغيت دوك تصاور
أشرف: معنديش كندير راه ضااع ونتا معارفش الإيميل
أنوار: (زفر وخرج من تمااك محلف فيها طلعاتلو نمرة ديال برا عرفها دعاء برد وهضر معاه كبتحااب ويتمعشق معاها وهو حالتو محاس بيها غير هو…)
وليد: (مشا حل لمحال على ميجي السمسار لي دار معاه… غير جاو درااري ضربات 2 دنهار كيتكون الحركة قليلة سد باب البيرو وجر شانطتو شد تاكسي نيشان للحي فين شاف الدار للي غيكري ختارها صغيرة بيت نعاس وحمام وكوزينة وسيجور صغير مفرشة كانت ب40 ألف حط شانطتو ورجع عند السمسار لتحت عطاه فلوس التسبيق وتضويرة دياالو شاف طموبيلة ديال هند واقفة فباركينغ شد تاكسي ومشا عند صاحبو للي كيبيع ماتر كان متفاهم معاه على شي Tmax خلاه ليه ل15000 درهم اصلا كيعشق لمااتر كان مريݣلو لوراق والامور دار الكاسك ديالو وزاد نيشان للخدمة حطو ووصى العساس باش يحضييه ودخل لداخل هز تيليفونو ودوز نمرة شيماء مجاوباتش رجع صونا وجاوبات بصوت نعساان) علاش مكتجاوبيش
شيماء: (توݣضات حيت كانت ناعسة) ها غير مكانش حدايا اخويا
وليد: قاارية؟؟
شيماء: ها لا لا قريت غير صباح لعشية مقريااش
وليد: انا فلعشية غنجي عندك لسيتي (قطع وخلاها كتسب بقات مرهونة وأنوار داير معاها يتلقااو أما هو كمل لبيع وشرا وغير يكمل مع الناس يمشي يخدم لبيع اون لاين صونا عليه زهير بالنمرة لقديمة للي كان خدام بيها فلبجيكا فاش كانو بجوج تبسم) واايلي فين فكرتيني
زهير: (تبسم) صاڤا!!!
وليد: بييخير
زهير: لݣيتي الدار
وليد: مشيت حطيت فيها حوايجي
زهير: باااز اسيدي كدير غير للي فراسك
وليد: وخاص نخوي اصااحبي شحال ݣدني نبقى مزاحم معاه
زهير: شكيت عليك ابناادم كنتي معمر القنت بعدا
وليد: ههه اخويا نوض تجوج للي تعمر عليك القنت ليمن وليسر
زهير: (مكره) اودي مبقى جوااج
وليد: كنعرفك عقلك واسع
زهير: عقلي تيراان ولكن منبززش روحي على بنادم مهم (بقاو كيهضرو على الخدمة والسلعة للي غيجيب قطع وشاف محمد للي جاي عندو…)
~~~~~~~~~~
أمال: (مهزاتهاش الأرض منين عرفااتو مشا وبلا حتى ميقولها محساات حتى نطقت وهوما كيتعشاو) باك هو باغيني لاش مݣلهااش!!
هند: (دارت يدها فوق راسها) اربيييييي نفختيلي راااسي
أمال: نتي ݣاع محااسة بية
هند: هههه عبر علييك باينة درتيلو شي حاجة وعصباتو وخرج من هنا مبقاش غيرجع
أمال: الااااااا
هند: اويييلي لبنت غتبكي ههههه
أمال: (ناضت مكملتش ماكلتها مفقووسة وخايفة يمشي ميرجعش راه هو للي مصبرها على الويل فين عايشة حتى منين هرست لأنوار التيليفون وتصنطحت معاه كان مقويها هو وعارفة غيدافع عليها من أنوار من محمد من شيماء من مها من الدنيا كاملة وداابا منين مشا حست بالخووف رجع لييها حيت غيجيو يدييوها مكاينش للي يݣول هدا ولا حبس كحاالت الدنيا فعينييها شكون غيظحكها ودلعها ويعاملها بحال الأميرة دخلت عندها هند وهي كتمووت بالظحك ناضت امال وكان مهربتش هند تنتفها بقات على لغواات والظحك حتى سمعو الدقاان حلات هند وهي لابسة كولون وبودي ديالو فلحمر مع حلات جمعت الظحكة) ولييد!!!!
وليد: (طرطق عينو فلفخااض وليهونش طلع عينو بالزز لوجهها) ماالكم!!
هند: (باستغراب) ممالناش!!!
وليد: (كيوݣض راسو) سمعت صدااع
هند: فين سمعتيه؟؟؟؟
وليد: لتحت.. تحت من داركم
هند: (حلات فمها) سكنتي لتحت؟؟
وليد: اممم
هند: (بتعالي) مزيان
وليد: سيري لبسي حوايجك واجي (ضارت كتمشا بتمختر مع لكولون مطرطق مخليااه كيطرطق عينو ويݣمݣم أما هي غير غبرت بقات كتنقز بالفرحة وصلت حدا امال) وليد سكن تحت منا يااااااي ما سكن تحت منا غير باش يبقى قرييب ليية
أمال: هههه واش راه يتسناك؟؟
هند: (لبست بينوار وليجومب) وييي ومقدرش يشووفني هااكا غيكوون ق***
أمال: (دارت يدها على راسها) اربيييييي منين عرفتك وانا نفهم فالميخ وكان غير بقيت ككنت
هند: باش تعيقي ازمرة مهم نخلييك نمشي عند لحيبااان دياالي (تبسمت لهند غير تفكرت زهير رجعت كتغبن وتحسر مشات لتيليفونها صونات على نمرتو لقاتها مزال مطفية) ياا ربي طفا نمرتو صاافي نسااااني….
هند: (خرجت عندو لقاتو متكي) دخل
وليد: (خرج عينو فيها) لا وشحال من مرة ݣلت لك متعاوديش تعرضي لوااحد عندك متكونيش أوووفر بزااف
هند: بففف
وليد: كتصوطي علية؟؟؟
هند: لا وليد عندك الصح فكلامك
وليد: (سكت ثواني وهضر) بغيت غير نسولك
هند: وااخا
وليد: شيماء وانوار (مراضيش) كانو كيتعارفو من قبل
هند: معرفتش
وليد: صاحبتها ومتعرفيش
هند: شيماء مكانت كتقولنا واالو وحتى الا تعارفو هو جا وخطبها نيشان
وليد: (جبد الورقة من جيبو) هاد السرتفيكة لاش؟!!!! لقيتها يمكن فطموبيلتك ودرتها فجيبي
هند: (بانت فيها توترات واخا حاولات ترجع ملامحها لعاديين ولكن هو شد شنو بغا يشد) اشمن سرتفيكة
وليد: ديال vierge العذرية
هند: متأكد لقيتيه فطموبيلتي؟؟ ياكما كان فالملف ديالي حيت فاش كنت كندوز سطاج بق…
وليد: (قبل متكمل كلامها) نتي كيني اهند تروييض متغفيلييش عقلي الله يرضي عليك
هند: والله معرفت واش متأكد لقيتها فطموبيلتي
وليد: واه
هند: (حركت راسها معارفة متقول وكدير ما فجهدا قدام نظراتو الباردة للي تخليك تݣر غير باش تبقى طبيعية) معرفتش
وليد: هند انا كنتيق فيك وكنتيق فيك بزااف منين جيت سولتك مݣلتش لا هاديك برانية نبحث بوحدي ولكن مكنحسش بيناتنا انا وياك هادشي
هند: (كلامو نزل عليها بحال الثلج متقدرش تقولو ديال امال) والله معرفت فين لقيتها
وليد: فطموبيلتك
هند: واش كتشك فية انا؟؟؟
وليد: لا
هند: وفاش؟؟؟
وليد: هادشي للي سولتك
هند: واخا دخل ونعاودو نتفكرو هاد الوقفة هنا كولشي غيسمعنا شنو تنقولو
وليد: (بقا كيشوف فيها شحال) واخا اصلا لوقفة هنا مزيناش وكان ماشي كانت ضرورية مغنجيش نبرزطك ولكن جاوبي على شي حاجة نتوما علاش قطعتو علاقتكم بشيمااء
هند: (جاوبات دغيا) أمال وشيماء للي تخاصمو على قبل خوها محمد
وليد: (غوبش) اش دخل محمد؟؟
هند: (فكها يا من وحلتيها) شيماء بقات كتعاير فمحمد وكانت كتنقص منو وأمال واخا كيعاملوها خايب جاتها النفس وصافي تخاصمو مخاصمة كبيرة وتقاطعو الهضرة وانا كنت حيادية واخا معجبنيش الحال شيماء تنقص من ولد عمها
وليد: (هز حاجبو) كانت كتهضر معاه قبل متخطب؟؟؟؟؟؟
هند: (حسات بظغط رهيب وهي تحت أسئلتو لي ماشي من شيمها تقول اسرار الناس) عفااك ماااااا انا معاارفة واالو
وليد: (قرب ليها وركز فعينيها) بغيت نعرف اهند شيماء حسيتها مبدلة بزااف هادشي معاجبنيش لا أنا لا مها
هند: راها صاحبتي أوليد راه ممزيانش نقول أسرارها والله فوق طااقتي ونتا علاش كتعقد الأمور هي مخطوبة ومحمد مزوج
وليد: يااك جاك هادشي تعقااد
هند: قولي هييي شنو تحت راسك
وليد: صافي اهند دخلي
هند: لا
وليد: هضرت معااك دخلي
هند: سمع نتا مباغيش أنوار يبقى مع ختك
وليد: دخلي اهند غدا منين تكملي قراية ديالك دوزي عندي للمحال
هند: واخ (هبط درجة وشاف فيها)
وليد: مغتسديش داك لباب!!!
هند: بفف (دخلات وسدااتو بقد فرحتها جا سكن بقد متوترااات باينة فييه غيبحث دخلت معصبة عند أمال للي شادة تلخيص فيدها بغات تقولها شنو كاين ولكن عارفاها رهيييفة غتسمح فلقراية وتبدأ تبكي وتغبن)
أمال: شنو بغاك وليد
هند: مشكلة بغا يعرف علاش مدابزبن مع شيماء
أمال: وشنو ݣلتيلو
هند: ݣلتلو شيماء بقات كتنقص من محمد وتعاير فيه ونتي مرضيتيش ودابزتو
أمال: وتاقك
هند: لا… جاني نيشان وݣالي واش كانت مصاحبة معاه وزاد ݣالي ديك الخطبة مع أنوار مباغيينهاش وهو وخالتي نعيمة معاجبهمش حال شيماء وللي زعزعني كتر اصاحبتي هو منين قالي كيتيق فية وبغا يعرف مني انا حيت مكيحسش انني برانية علييه واش كتعرفي معنى هاكا
أمال: (حركت راسها بلا)
هند: الا كذبت عليه فشي حاجة غيحس براسو تغذر مني كتر
أمال: ووراه بالصح شيما تبدلات بزااف وزايدون أنوار ماشي دجواج
هند: بفففف غتخلق لينا بزاف دلمشاكل أمال
أماال: بالصح ولكن مدرنا حنا واالو
هند: مهم غدا غنتلقاو انا وياااه
أمال: عفاك اهند عنداكي تݣوليلي كنت نهضر مع داك شماااتة
هند: سير تخراي نتي عااود واش هادي هضرة تقال بنت ليك برهوشة
أمال: مبغيتش ندير ليك المشاكل مع وليد والله
هند: مغيكونوش غير نعسي…
~~~~~~~~~~
أنوار: (حس بشمتة منين ضاعلو التيليفوون كولشي مشا كيتفكر كيتجنن صونا على شيماء) خرجي عندي انا حدا السيتي ومتبينيش لدوك لكلبات
شيماء: اصلا معرفت ليهم فين زاادو مكيباتوش هنا
أنوار: ق**** سمو تسناي منهم خرجي دغيا (قطع وخرجات عندو وصلات وطلعات حداه فالطموبيل وزولت الشال كانت ياله مقادااه هو ووجها كانت جاية زوينة سلم عليها بالوجه) غير مكتزيدي تزيااني
شيماء: (شافت فيه) سبوع دااز مزال مفكرت فلعقيد؟؟
أنوار: من غدا
شيماء:. واخا غدا مزيان انا نهبط لتاوريرت ونتا لحݣ مع داركم
أنوار: ولكن اشيماء تصبري علية على لفلوس
شيماء: علاش معندكش فلوس؟؟
أنوار: انا بغيت نعطيك صدااق معاطيهش ولد لمرا لمرتو
شيماء: صافي عطيهلي شنو المشكل نتا عندك فلوس
أنوار: واه عندي ولكن احبيبة ݣلتلك دوك لفلوس جامهم مجمدهم فلبانكا باغي ندير المحال ديالي باش نعزل بووحدي ياك هاكا باغيين انا ويااك
شيماء: ولكن صداقي ماشي هوما ݣاع لفلوس للي عندك قابلة غير بمليون
أنوار: لا لا منݣدش نعطيك غير مليوون لقليلة خاص 5
شيماء: صافي عطيني 5
أنوار: لاااااا نتي ممزياناش مبغيتيناش نديرو مستقبلنا وانا كنفكر بعييد ونتي هاامك غير لمااادة
شيماء: اووف كما درت معاك وحلة نتا لاسق ف5 وماباغيش تعطيها واش ندير أنا
أنوار: هاديك 5 للي عندك عطيها نتي
شيماء: اشمن 5؟؟
أنوار: (غير توقع مدام أمال عندها حتى هي غيكون عندها الضووبل حيت عارف شيماء قاسحة ومتحنش) عارف عندك 5 فلكونت
شيماء: (تكرهت) ݣالتها ليك أماال وزايدون عندي غير 3ونص ماشي 5 ولكلبة دأمال للي عندها 10 ولا قل أما أنا جمعت غير شنو كانو كيعطيوني ووليد كان يصور معايا بزااف
أنوار: مهم نتي هاد لكورة فيدييك ياك الفكرة ديالك نعزلو ونعيشو بيس انا ويااك (هز يديها وباسها) فهميني احبيبة دوك لفلوس راه دياولي أنا ويااك واصلا داك نهار منين ݣلتيلي امال كتسرق خوتها تقتك حيت ميمكنش نتي تسرقي ومبغيتش نݣولها ولكن حتى انا كشطاتني ههه
شيماء: بالصح!! أماال؟؟؟
أنوار: وي ولكن مكنبغييش نݣولها
شيماء: بففف مبقيتش نحملها تفو كرهتها وزادت عمرات خويا علية مزيان حتى مبقاش يشووف فية
أنوار: ومك؟؟
شيماء: (بحزن) حتى ماما وليت كنتسنى غير امتى نتزوجو باش نعيش معاك
أنوار: واا هي الا سمعتي كلامي وانا من غدا نهبط نعقد عليك
شيماء: صافي وااخا ولكن واش من بعد غتعطيني صدااقي
أنوار: وهادي هضرة هادي نتي دوك لفلوس غتوريهم ليهم ورجعيهم على منجيبهم ليك
شيماء: عارفاك غتهلى فية ولكن مكديرش معايا ككنتي دير مع ديك متقبة لوجه
أنوار: اولا متعاوديش تقارني روحك بديك الشايطة تانيا للي حليتي فمك عليه يوصلك نتي غير امري داابا
شيماء: (تبسمت) اممم بغيت طابليط
أنوار: وراه عندك
شيماء: لأ بغيت واحد جديد وغدا أنوار ولا بالصح نتا مكتبغينييش
أنوار: واخا.. جاتك احبيبة (بقا كيقرب ليها) شنوو دابا
شيماء: لا أنوار فية ليغييݣل
أنوار: ومن بعد
شيماء: كنحس براسي ممم معاجبنييش الحاال ولحمي غير كيرجف يمكن فية سخاانة ولحلاقم ومبغيتش نعديك
أنوار: (رجع راسو اللور مكره ولكن ممبينهاش بزاف) اممم اوا نوصلك
شيماء: شفتي وكان كانت امال كنت تقولها نتعشاو
أنوار: انا غير خفت عليك ازين وكنت ناوي نمشي نجيبلك لعشا.. أبرديي رجعتي منوية بزااف نعرفك تاايقة فروووحك
شيماء: بففف وليت معصبة بقيت بوحدي ونتا هضرتك قليلة معاايا
أنوار: حبيبة الا غفلت عليه راه غير مع الخدمة أما أنا ݣاع وقتي دياالك
شيماء: (تبسمت) ربي يخليك ليا كنبغييك بزاف أنوار
أنوار: حتى انا… فين بغات لغزالة تمشي تعشا
شيماء: (تنهدت) فينما مهم نكونو بجوج (صاݣ لأقرب سناك خلاها طلب للي بغات كلاو ومن بعد رجعها لسيتي وهو نيشان صاݣ لدارهم شاد الخط مع دعاء….)
~~~~~~~~~~~
الكاملة: راه كظل تسب فية
لكيير: لبنت وعائلتها الله يعمرهم سلعة
الكاملة: (كتسايس معاه) راه نقسم ليك بالله حتى عايراتني وخرجت عينها فية مااا مرة ما جوووج
لكبير: غير يبان ليك
لكاملة: ياااك الكبيير على عمري رديتني غير يبان لية لبنت راه مصالحااش لجواج وهاني فين ݣلتها لييك
لكبير: نتي متعرفي لوالو
لكاملة: شتي لولد حتى تݣااد ورجع يخدم ويسمع كلامك غيجي هاد جواج ويضيعو وهاني فين ݣلتها ليييك هو خاصو شي وحدة موقرة وتخاف عليه من هضرة لواحد أماا شيما راه مزال عينها خصرة باغية تقزب وتبرج
لكبير: سكتي علية ومتنسايش واخا بناتك مجوجيين راهم وليااات
لكاملة: هاانا سااكتة وانا غنخليك تحكم بعينيييك وديك السااع مدخلونيش المشاكل للي غتشعلهم بيناتنا (خرجت نيشان عند جهان باش تشد ليها لولد ودخل دوش)….
أصبحنا وأصبح الملك لله
أمال: (فاقت لقات هند مشات تقرا وهي معندهاش قراية هاد نهار بقات كتجر فرجليها للكوزينة اصلا ما فيها مياكل ردات طاجين يطيب ومشات للماكينة دايرة يوتيوب ومتبعة الطريقة باش تخدم واخا قراوهم بقات كتلسق تواب للي مفصلاهم وتجمع عاد بدات فالطرز وتفكيرها كولو عند زهييير حسات براسها موحشااع موحشة شووفتو للي كترهبها بطريقة كتخلي قلبها يشطح بالفرحة توحشت ابتسامتو معاها للي نابعة من قلبو توحشتك كولشي فيييه… جبدت تلخيص على مترتاح من لخياطة وبقات ساااهية فيها مقدرتش تشد حرف وااحد ݣاع تفكيرها وخووفها من فقدااان زهير حطت التلخيص ودوزت نمرتووو كتلقااها طافية.. صونات على هند للي كانت طالعة فدرووج قطعت ومشات طلات على الطاجين كان غيتحرق طفات عليه سمعات الساروت كيدور وخرجت بملامح الحزن) كنصوني عليه طاافي واش مبولوكوني مبليكيني مبلو داك زمر للي كتݣولي
هند: هههه (سلمات عليها) سميتها مبلوكيك ولكن نتي واش عندك النمرة ديالو ديال بلجيكا؟؟
أمال: لا كنصوني غير فالنمرة ديالو (لبنات للي كيسولو على أمال منين جابت نمرتو راكم ممركزبنش معايا مزيان… نهار زهير دار مع أمال باش يديها لفاس صونا عليها فداك صباح منين جاب نمرتها من عند تيليفون مو، كان صونا عليها ولقا غير بواط فوكال وطلعات لأمال وعرفاتو هو منين لقات لميساجات فلوقيتة للي كان داير معاها وعاد نمرتها كانت عند غير هند ومحمد ومها والحاجة)
هند: ههه حمقة راه النمرة كيبدلوها فالمطاار
أمال: (بحزن) باينة بدلني حتى يانا
هند: اوا نتي تعفرتي على نعمة سيدي ربي (دخلت كتشد فيها حتى بغات أمال تبكي وبقات كتعطيها آمال أنه غيرجع تغداو أمال بقات فالدار كتحفظ وهند تقادات دارت كسكيطتها ولبسات طويل شوية ونيشان عند وليد للي كان كيتسناها غير شافها خرج من لبيرو وشير ليها طلعات وكتشد فيديها متسلمش حيت مكيسلمش دخلات وتبعها وسد لباب جلس اونفاص معاها كان موجد عصير ولي صواري عجبها الحال..)
وليد: صاڤا!!
هند: الحمد الله نتا مزيان مع الخدمة؟
وليد: صاڤا صرااحة خدمة مرييحة واخا فيها تمارة ولكن بحلاوتها
هند: وي مشروع زويين
وليد: يعجبك مشروع بحال هاكا
هند: با ويييي بزااف ݣاع نتشاركو أنا وياااك
وليد: هههه مرحبااااا
هند: (شحال مشاافت ظحكتو تبسمت حتى تغمضو عينيها) خليك ديما ظاااحك
وليد: داك نهار تعصبت عليك بزااف ولكن (جمع التبسيمة) بربي تعاودي داك الصوݣان حتى نشخشخ مها ديك لبخووشة ونخليك شاداها رجل
هند: ههه لا لا إلا لالة مينة دياالي
وليد: متهوريييش ابنتي
هند: واااخا اسيدي
وليد: شربي عصير
هند: من بعد عاد تغدييت
وليد: بصحتك الالة هند ولا نݣولو غيثة؟؟؟؟
————————
زهير: (قاد شغلو كامل لدرجة شاف السلعة قلبها وتجمعات باش تمشي للمغرب وخلصها كان متوقع يجلس أيااام ماشي يوماين مشا رجع للمحال ديال وليد لقا محمد خدام فيه جلس حتى جا جلس حدااه) امتى غترجع
محمد: شي يامات وصاافي على حساب عيد لكبير لي بقاتلو غير شهر والخدمة كتكون فيه بزااف
زهير: والله حتى كنت ناسيه
محمد: ولكن مزال حاير نقدر رجع هنا
زهير: حتى وليد مزال ممم تالف لݣينا المحال زيين وكبير ومݣاد صباغة مغيخسرهاش فيه ولكن غالي شوية ݣلتلو رهن على متعرف راسك
محمد: داكشي للي ݣلتلو فلوسي على فلوسوو ونفتحووه واخا نزاحمووك
زهير: رزق على الله محالي ديالكم نوريكم السلعة منين جاية
محمد: الله يكبر بييك اخوويا
زهير: اوا نخلييك داابا
محمد: لا لا لعشا عندي
زهير: واايلي اصاحبي مرتك مزال عروس ونتا غتخدمها (وقف)
محمد: لا لا بلعكس نتسنااوك
زهير: ان شاء الله (خرج من تمااك صونا على مو هضر معاها جلس فجردة من بعد ما قطع محاملش هاد الاحساس للي كيخلييه مباغيش يفكر فامال ولكن هي عطاتو الجوااب للي بغا يسمعو…)
~~~~~~~~~~~~~~
وليد: بصحتك الالة هند ولا نݣولو غيثة؟؟
هند: (تبسمت ووجها رجع حمر متوقعاتش يحطها فلوسط)
وليد: علاش كذبتي فسمية
هند: (حسات بأمال للي مكتعرفش شنو تجاوب وبقات حانية راسها) حم
وليد: حيت زعما حكمت عليك فاللول مبغيتش تݣولي سميتك (هزت راسها فيه بحال محصلها فشي وضع خااايب) حتى من لفولار ݣلتيلي دايراااه
هند: لا نتا للي كتقولي منصونيش عليك ابيل فيديو حيت غتكوني ممقاداش فولارك
وليد: (هز حاجبو) ياااك!!!
هند: (كتسناه امتى يتعصب يغوت يحيح ساعة لقات العكس) انا مكنتش باغا نكذب عليك والله مكنت نعس شي مرااات حتى كنبغي نقولك وكنخاااف
وليد: علاش خفتي؟؟
هند: خفت متبغيش تبقى تهضر معايا
وليد: وشكون ݣالك مكنتش عايق بيك من نهار اللول وكان غيعجبني الحال تجي منك
هند: نهار وصلتيني لفاس كنت متأكدة راك عارف
وليد: وشنو للي مخلاكش تجي تݣوليلي افلان انا هي هاديك للي كنت نهضر معاك كتر من 5 شهور
هند: (بعينين ذابلبن شافت فيه) مكنتش بغيت نخسرك معارفاش حتى واش تتبغيني أوليد
وليد: (سكت كيشوف فيها) دابا منين حطينا لورااق علاقتنا باغيها تكون معقوولة
هند: (مفهمتش) واش مغدابزش؟؟؟
وليد: هههه رجع صعيب علية اهند براكة غير مداابز مع راسي وكنݣول واش هادي للي بغيتي كذبات عليك وسامحتيها قبل حتى متلوومها
هند: للي بغيتي؟؟ يعني كتبغييني؟؟؟
وليد: مهم
هند: (تبسمت) لا لا بالصح مزعوط فية (وقف فرحانة) مغداابزش معاايا (حطت يدها على قلبها) هههه ناري ممتيقااش عرفتي شحال كنت خاايفة نخسرك
وليد: (عاجبااه ردة فعلها فقط متبسم بحب)
هند: (جلست وشربت من العصير) قولي تنبغيييك
وليد: رسي مع حنااك باش غنجي نخطبك
هند: وقولي تنبغييك
وليد: (كيجمع التبسيمة) هنييينا اهند
هند: عفااك عفااك واش صاافي دابا انا ويااك فعلاقة
وليد: لا حولة وااا لبنت عرفي سمو راك تݣوولي
هند: (مقدرتش تخبع فرحتها بقات كتشوف فيه فرحانة وحتى هو عينو فاضحاااه حتى دق واحد من دوك دراري ضار شاف فيه وهي متبعااه بكل حب)
وليد: شربي عصيرك وكولي حلوتك وعينيك للارض من دابا السيستييم غيتبدل
هند: (تبسمت وغمزااتو حرك راسو بلا حولة ولكن التبسيمة باينة فعينيييه أما هي فلبلاصة جبدت تيليفونها كتصوني على أماال…..)
هند: (فرحتها مهزااهاش غير كتمشى فداك لبيرو حتى دخل وليد مكرهتش تعنقو تبووسو ولكن) مكرهتش نبووسك
وليد: (جمع التبسيمة ديما كتفاجئو بجرئتها) اديييك البنت
هند: فرحاانة أوليد
وليد: اييه ݣاع فرحانين ولكن.. مهم سيري للدار دابا المحال هاد الوقت كيعمر
هند: اوكي بيبي
وليد: لا حولة ولا قوة الا بالله
هند: ههه ياك قلتي السيستم غيتبدل اييوا ولف اكبيييدة
وليد: هه (عاجبو الحال أما هي هزات صاكها دارتو جنب) تسناي نهبط معاك
هند: بلاش عارفة عندك الخدمة (تبسمت معاه) بسلامة
وليد: بسلامة وصوݣي بشوية عليك (خرجت وبقا متبعها زفر حاس بالراااحة شحال قدو يكذب على راسو ويكول مكيبغيهاش وحتى باش يحااسبها جاتو باايخة قدام العلاقة زوينة للي بيناتهم… هبط لتحت من بعد مسورت لكوفر دلفلوس وكمل الخدمة مع درااري.. أما هند صايݣة وطالقة لمزيكا على جهدها وكتغني) **الدنيا حلوة وأحلى سنين**
**بنعيشها وحنا يا ناس عاشقين***
، **ننسى للي فاتنا ونعيش حياتها**
**على الحب متواعدين… ***
**كل الأحبة ثنين ثنين**
**متجمعين في الهوا ذايبيين**
**على إييه نكشر ولييه نفكر**
**دا العمر كل يوميين…**
دازت خدات شي تقدية وخدات ورد ليها فرحانة برااسها عاد مشات للدار كتدندن فتحات لباب لقات امال معرضة ليها بابتسامة عريضة عنقااتها
هند: ناااري أمال حسابلي غيقجني بالأسئلة ساااعة كان كيتمعشق ويقولي نخطبك
أمال: ههه فرحت ليك بزااااف الله يكمل عليكم بالخير
هند: (باستها فحنكها) حتى نتي أكبيييدة الله بجمعك مع با زهير
أمال: هو مشاا صافي نساااني
هند: وعلاش شكون يقد ينسى هاد التووتة
أمال: (تبسمت) شراالك لورد؟؟؟
هند: لأ شريتو رااسي من ديما فاش تنفرح تنشريه راسي ههه حمقة انا ياااك
أمل: بلعكس نتي أحسن وحدة عرفت فهاد الدنيا (دخلو لبيت هند فين بدلت حوايجها كتعاود ليها بالتفصيل الممل وعلى اللازانيا للي غتقاد ليه لعشا مشات للكوزينة دايرة يوتيوب ومتبعة الطريقة وطلقعا حلوقها كتغني وأمال كتسمع فيها من السيجور فين كتحفظ وكظحك فرحانة لفرحة صاحبتها…. وصلات 8 كانت قداتها خلاتو حتى يجي عاد دخلها للفران شعلات لباف وبقات كتشطح نوضات امال للي مكتعرفش للشعبي حدها كتصفق ) هانتي ديري هاااكا
أمال: مكنعرفش ههه
هند: والله هاد الليلة حتى نعلمك با زهير فرفووش وباينة علييه كيبغي اللياالي الحمراااء والزرقااء
أمال: ههه وباش عرفتي
هند: انا نقولي ونتي قولي الله وعلم ههه (بقاو عاطيينها لشطيح والدردييݣ حتى شافت فالساعة كانت وصلت 😎 نمشي نديرها فلفراان
أمال: (مكرهتش تكول لوليد عطيني نمرة زهير ولكن عمرها دييرها جمعت الدنيا تمااك كانت عامرة بلبوليكوباات وشطبت الدنيا مشات حدا هند لقاتها لبسات كيطمة كولون وقبية طويلة وجمعت شعرها على شكل كعكة مخربقة مخرجة لافخونش دارت كلوص وأيلينر خفيف مع رشات بارفان فعنقها وبقاو هي وأمال ناشطيين حتى شافت تيليفونها كيصوني كان وليد جاوباات) الووو
وليد: نخرجو نهضرو شوية
هند: اهااه
وليد: غير لتحت (قطع معاها وبقا كيتسنى لتحت أما هي علمات أمال تخرج لازاني حتى ترجع وتكمل طيابها وهبطاات لتحت كتقلب علييه حتى شافتو جالس فوق Tmax استغرب ومشات حداه) فيين
هند: شريتييه؟؟
وليد: (قاس فيه) واه عاد هاد صباح
هند: بصحتك زويين.. توور بية
وليد: ههه من بعد
هند: (حركت راسها باه)
وليد: امتى تعلمي حنااك
هند: (تبسمت) علمتي خالتي نعيمة
وليد: من شحال هادي
هند: (خرجت عينها) أوييييلي
وليد: تأ لاش هاد اويليي؟؟ حايديها من فمك الله يرضي عليك
هند: ناري غنحشم
وليد: مهم هضري مع حنااك وحتى مع واليدييك باش نرصييو الامور
هند: (تبسمت وهي كتشوف فيه) نفكر بعدا
وليد: (هز حاجبو) فاش
هند: واش نقبل نتزوجك ولا لا
وليد: (بكل ثقة) غتموتي وتزوجي بية
هند: (شهقت) وااااات!! يو وييش (كتحلم) وموحال واش نبغي مزال خااصك ترغب وتزااوݣ ونشووف نشووف
وليد: لالة هند تستاهل كولشي
هند: (بثقة) عاارفة ههه مفيكش الجوع؟؟
وليد: عاد نطلع نشوف شنو يتخشا فلوجه
هند: مقادة ليك الأكلة للي تتعجبك لازااانيا
وليد: اممم هند مطيبة بلاش والله ما فيا للي يمشي لشي صبيطار…
——————-
شيماء: (كطابي كولشي transféré للعربية واخا خرج داكشي مزعلك ولكن فهماات قارناات داكشي مع الوقت بحثاات فتيليفونها على التوقييت ولقات راسها كانت فتاوريرت هي وأمال وهند ونفس الوقت قبل ميجي أنوار يخطب.. حتى لبلاصة كانت باسم ببلاصة فوجدة) غيكون هزلها فلوسها زعما!!! وعلاش هي عطااتو لفلووس يااكما حتى هي ݣالها نخطبك ولكن عطي صدااق نتي على منجمع فلوس كما خطب عليها هو!!! ياكما نهار جا خطبني كان عالمها حتى هي باش دارت ديك الشووهة!!! (ب يصبركمبقات كتخيط وتفصل وأكترية منين كلمة الشفار تعاوداات ما مرة ما جوووج فاش كانت أمال كتعايرو لا هي لا هند.. صونات على هند واالو مكتجااوبش) اوووف جاوبي ازبل (كانت مصيفطا ميساج لأنوار فلواتس انها مواافقة على قضية صدااق مسحااتو من عندهم بجوج وبقا message supprimer كتباتلو: “حبيبي غير حرف مشا بالغلط ومسحتو” حطت تيليفونها مغوبشة.. تنهدت حست بوحدة خااايبة معندها معامن تهضر تعاود تظحك لدرجة توحشت أيامها مع لبنات ولكن غير كتفكر أمال مصاحبة مع زهير كتفݣس وااخا متأكدة مغيدييهاش أما فقسة أنوار خلاتلها غمة كبييييرة فقلبها….)
~~~~~~~~~~~~
وليد: (كياكل وهو متبسم) هادشي زيييين غتولفيني طيااب فالدار
هند: لا كبيييدة بلا متولف
وليد: (خرج عينو فيها بشوية وأمال حنات راسها وحرك راسو بلا حولة أما هي غير كتفرنس)
أمال: حم جات زوينة اهند
هند: عاارفة راسي الا دخلت للكوزينة غنتقن طياااب
أما: واه بالصح
وليد: تيقتييها اختي أمال ونتي نقسي شوية لفيخرااات
هند: داابا تشووف واش غنعجبك (كتقليلو السم بحاجبها) ولا لا
وليد: (حنا كياكل كمل) الحمد الله.. الله يخلف (وقف) انا مشييت
هند: هانتا جاالس معانا
وليد: مشا الحال 9 ونص هادي.. (خرج كان مخلي لباب محلول جا يسدو بالعرش البطيء فين شاف فهند ودار إشارة انه غيصوني عليها تبسمت معاه سد لباب وهبط.. دخل لدارو نيشان بدل حوايجو دوش كان مصلي اوقااتو لبس مزيان وبقا كيضور فالدار شعل التلفاازة وصونات نعييمة) الوااالدة
نعيمة: (بصوت بااكي) ولدي اجي لتاورييرت
وليد: (تخلع حتى وقف) اش كاااين؟؟؟ با وخوتي مزيانين؟؟ نتي نتي واش مزياانة؟؟؟
نعيمة: (كتبكي) عمك عمك اوليدي راه فصبيطاار طااح على وقفتو ودابا دخلووه للعناية المركزة
وليد: لا حولة ولا قوة الا بالله العلي العظييم.. سمو وقع
نعيمة: معرفت اولدي ݣلتلك حتى طاح على طوولتو وخرجو من فمو لكشاكش
وليد: وااخا الوالدة واش امال فخبارها؟؟
نعيمة: مݣالها ليها حد اولييدي وانا مݣديتش
وليد: صافي صافي انا نطلع نݣولها لييها شوية ونجييو (قطع مع مو خاف على عمو من ديما علاقتهم مزياانة خرج من دارو وطلع عند لبنات دق حتى حلات هند) فين أمال
أمال: (طلات عليه متبسمة) صافي انا ندخل لبيتي
وليد: صبري (دخل معارف ميقولها كتعز عليه بزااف) انا نݣولك شي حاجة ولكن بلعقل نت..
أمال: (شهقت) زهير طراااتلو شي حاجة؟؟؟؟
وليد: (تلفااتو سكت مدة حتى) لا باك عمي راه فصبيطار
أمال: (طرطقت عينها) بابا!!!!
وليد: خاص نشدو دابا طريݣ لتاوريرت
هند: ان شاء الله يكون مزياان
أمال: (معرفوها واقفة مصدومة ولا شنو ولكن أمال داز شرييط قصييير قدام عينيها عليه.. حتى زعزعاتها هند) ها واه واه خاص نمشيو واش هو بيخيير؟؟
وليد: (حرك راسو باه وهي مشات وتبعاتها هند تبع ليهم العين ومسح على وجهو) استغفر الله (شنو غيتوقع منها اصلا عارف عمو مكيحملش امال قالها مرارا وتكرارا.. جبد تيليفونو صونا على زهير والو مكيجاوبش حاار فشنو غيدير فالمحال للي بقا أمااانة عندو… صونا على شيماء) وجدي راسك نمشيو لتاوريرت راه عمك مريض بزااف (قطع حتى قبل متجاوبو شاف لبنات جاو وأمال مخطوف منها اللون هبطو حيت كان ساكن فسفلية دخل ليها لموتور وسورت لباب وركبو فطموبيلة دهند للي صاك نيشان للمحال يقاد شي حاجة قبل ميمشيييو….)
وليد: (دخل للمحال صونا على محمد للي دغيا جاوب وباينة كيلهت) غي بشوية عليك
محمد: سير أوليد اخويا لحݣ دغيا
وليد: انا ماشي ودااي معايا امال
محمد: مريم بقاي هنا هاني جااي.. وليد غنقطع راه انا وزهير كنݣلبو على بيي
وليد: راه معاك زهير دوزوولي (شد زهير التيليفون) كنت تالف اصاحبي معرفت فين نخلي سواارت
زهير: عاد كتفكر اصاحبي خلي مو مطرق سير لحݣ عمك
وليد: بففف واخا (قطع ورجع عند لبنات ركب بلا ميهضر براسو عزيز عندو عمو بزااف وعاد تفكر بااه للي هو وخوه بحال تواام مشا عند شيماء للي كان فخبارها دخلت صاكها حدااها لقات هند جالسة حداه منطقات حتى بكلمة فقط شافت فأمال لقاتهها كتشوف فطريق كان سكاااات حتى صونا تيليفون وليد قلبو تهز كانت مو دار سبيكر) راني سااايݣ كبقى عمك
نعيمة: (بشهقة) عمك ماااات اولدي
وليد: (بلا ميحس يدو تهزات من لفولون وكان شاد لوتورووت وموراه الناس صايݣين ب 160كلم غير هند للي نقذات الوقت وبقات كدور لفولوون لبلاصة فين كيحبسو أما أمال بقات على وضعها تهز قلبها ونفسها وراسها تزنزن)
شيماء: مسكييين عممي كنت عندو عزيييزة هءء هءء
وليد: (نزلت دمعة مسحها دغيا) لا حولة ولا قوة الا بالله العلي العظيم لا حول ولا قوه الا بالله العلي العظيم إنا لله وإنااااا إليه راجعون الله أكبر
هند: (طاحو دموعها) الله يرحمو (قاست فكتف وليد) الله يرحمو ويصبركم (ضارت عند أمال بحزن) أمال أماال (كانت على حركتها كتشوف فالسرجم وعينيها مضببين)
هند: أمال (حيدات لاسانتيغ وهبطت لقات لبرد ضارت جهتها وفتحات لباب جرات امال وعنقااتها) الله يرحمو اختي (لا رد خرج وليد مكانش باين مع ظلام ولكن منين هضر بانت فصوتو مخنووق)
وليد: أمال (بحال مصدوومة كتسمعهم كتشوفهم ولكن بحال مفهمااش.. شافها هكاك) دخليها باش نمشيو (بقات فيه بنت عمو من ديما أمال كتبقى فيه… )
هند: أنا نكمل الصوݣان
وليد: لا
هند: عفااك أوليد نتا ماشي فحالة تصووݣ فيها وانا نصوݣ غير بشوية (قنعاتو ومشات جلسات كتصوݣ وهو جلس حداها غير كيزفر وكيستغفر الله وشريط عمو داز من حدا عينو حتى شيماء بقا فيها ومرة مرة كطل على أمال لقاتها قالبة وجهها معرفاتهاش حتى واش كتبكي ولا لا… جبدت تيليفونها وصيفطات ميساج لأنوار كتقلب على للي يواسييها وصيفطات ميساج لأنوار *عمي مات* وردااتو لصاكها بقاو صاقرين وتيليفون وليد مرة مرة باه ولا مو كيصونيو… 3 سوايع كانو فتاوريرت بقا كينعت ليها وليد نيشان مشاو لصبيطار أمال كتحس بركابيها فاشليين إحساااس فشكل عيات تجرب فاحسيس الخداع الخيانة الغذر الكره وهدا جاها فشكل شافت كولشي خرج فتحلها وليد لباب وخرجت مباغيااش تشوف شي وااحد ولكن العادات كتسبق مشاعرها وشنو بااغا… شافت وليد مشا كيعنق فمو وبااه وخوها علي وهي بقات حداها هند حتى من شيماء جات نعيمة كتعنقها هي كتقلب غير على مها حتى بانتلها خارجة كتبكي وتليد وختها مݣودااها مشات حدااها معرفت مدييير ولكن أول مرة تشوف مها كتبكي بهاد الحرقة بقات فيها بزااف)
أمال: (بصوت كيرجف) ماااماا…
—————————–
محمد: (كانت علاقتو مع باه زوينة بزااف بكى مزيااان وموت الغفلة شحال كتصدم كان عارف الرئة ديالو فيها مشاكل بحكم كيكمي السبسي بزاااف…. وحداه مريم كطبطب على كتفو وظهرو وكتبكي حيت باه مشافت منو غير الخير وعاد نهار خطبوها عاملها مزيان مفهمتش سبب موتو للي جا على غفلة وهي للي عارفااه صحيح وممريضش.. زهير كان راكب من مورا محمد للي كيشوف من الشقة بين لكراسة مرة مرة كيبكي كيبقى فييه اوطوماتكمو فكر فأمال وكيف غتكون حاالتها وااخا تكون مباغااهش ولكن حس براسو خاصو يكون قرييب ليها وهادشي للي خلاه يرجع مع محمد واخا خلصو لبيي غالية حيت مقطعوش بكري ياله جوج سوايع لاش قلبو وباقي 4 سوايع عاد 3 سوايع لتاوريرت يعني 7 سوايع وما غيوصلو لتاوريرت حتى ل 9 صباح…)
~~~~~~~~~~~~~~
أمال: ماما
فتيحة: (كتبكي وتليد) اهااااااه على عماارة دااري ولمن غتخليني مشااات ما وتبعتها نتا مزال حتى مفرحتي بولاد ولادك محمد وعلي تيتمو وهوما مزال صغااار (غير كتشوف بعينيها مخنووقة باغا تبكي ولكن مقداااش مهماهااش كلام مها حيت بالصح باها مااات وحتى هي تيتمااات الحياة علماتها بزااف ومنهم كلام مها الجارح دوز علبه مروور الكرااام وتعذرها راه مات راااجلها سوا عتابراتها بنتها او عدوتها راه غتبقى مها حتى تردم تحت تراااب بقات غير كتشوف جا علي كيعنق مو وحتى هو كيبكي أول مرة تشوفو كيبكي بقى فييها بزااف) علي علي (واالو مداارش عندها الوحيدة للي جات عندها وعنقاتها هي هند)
هند: أمال ختي بكي متبقايش حابسااها
أمال: (مقدرتش حتى تجاوبها غير كتشوف فعينيها للي بداو يحماارو سمعو وليد غيدخل يشوفو يتسامح معاه جات تدخل حتى هي حتى جات عندها نعيمة كتعنقها وتبكي وتواسيها ولكن لدابا مقداتش تبكي)
نعيمة: دخلي ابنتي شوفي بااك وسمحيلو ابنتي من قلبك خلييه مايمشييش متقل
أمال: (نفسها بدا يتقطع بغات غير تبكي واالو اول وحدة قالت سمحييلو مشات بوحدها تابعة وليد للي كان معاه علي ونبيل وادم أما مصطفى خوه وعمامو بجووج (كنت ديجا ذكرت عندو عمامو صغار وجدو حي وجداتو ميتة ولكن مزوج) طاحلو الطونسيو ودخلوه للطموبيل كيبكي وكان حتى باه تمااك كيبكي على موت ولدو… أمال غير كتجر رجليها مقاادااش تشووفو ميت ولفااتو ديما كيخلعها وبالهبة ديالو شافتهم هبطو دروج حيت دخلووه لفريݣو بقات مسندة على الحيط وهابطة حتى من هند مخلاوهاش دخل… غير كتنهد وقفت شافتهم دخلو تماااك وزاادت حتى هي طلات بانولها مجموعين على واحد لباياص وهنا رجليها مبقااوش كيستاجبو لدماغها باش يتحركو غير كتشووف مكرهتش تغوت دماااغها بحال متحملش دااكشي حتى شافتهم ضايريين)
وليد: (صوتو مخنوق باينة شابع بكى) اجي أمال
أمال: (غير كتشوف)
علي: (بنفس خنقة ديال الصوت) وزيدي خلااااص الا باغا تشوفي بااك
وليد: بشوية على لبنت اصاحبي (بهدوء) اجي أمال… (قربت ملامح وجهها كيبينو انها كتبكي ولكن عينيها غير مضببين بدموع ولكن مكاينة حتى دمعة قربت حدا وليد ومشات تشوف هداك الراجل للي تحت ليزار كان مزال مدخلوه لفريݣو ببطئ زول لغطاء غير على وجهو للي كان بحال غير ناعس محساتش بيه ميت محست غبييدها ولاول مرة زعزعاتو فكتافو ووليد بقاات فييه بالجهد) بوسيلو راسو أمال
أمال: (مقداااتش خافتو يعتابرها قاسحة ولكن مقداااتش)
وليد: بوسيلو راسو أمال راه هادي اخر مرة غتشوفيه اختي (رجع نفسها مضطرب كتر وبحرا كطلع النفس باش توصلو لريتها وحرييق فكرشها ضغطات على راسها وباين جبهتو للي كانت بااردة.. حس بيها راه كان عارف شنو داز عليها ولكن هو خوها لكبير خاصو يعرف كفاش يتعامل معاها)
وليد: (غطا على راس عمو ومشا حداها) عارف هادشي قاسح عليك وبززاف اختي امال ولكن بااك مشاا يعني خاصك ومفرووض عليك كإبنة خلووقة تسامحي للمرحووم (غير حانية راسها ملامح وجهها كيبغيو يبكيو ولكن عينيها عندهم رأي اخر…) باك اختي مات حيت كان عندو مشكل فالرية (مبغاش يقولها كان كيكمي بزاف حيت هادشي غتعرفو غتعرفو من بعد) ياله نمشيو (ضارت ومشات لقات خوها حدا لباب زادو وهي بقات من موراهم وفبالها غير اخر مرة شافت بااها وكان لباس عليه ومبيناش فيه كان مريض كقال وليد…. خرجو برا فين مزال كيبكيييو تعرضاتلها هند وداتها للطموبيل حيت أمال حسات بركابيها تحشو لييها وشافت كولشي ركب فطموبيلتو وزاادو… هند صايكة وكتشوف فأمال للي غير مطرطقة عينها وساهية مبغاتش تهضرها وصلو للدار وتمو طالعين وهي فكرة باها مات جايااها فشكل…..
أمال: دخلات لدارهم لقات مها جالسة فالسيجور وكتبكي وتليد
فتيحة: (كتلهت) جييتي جييتي ياا مسخوطة دبااها هاااا هو مشااا مرضى علييك مسااامحك وخلي الدووران وتسلݣيط ديااالك ينفعك
نعيمة: اعوووذ بالله افتيحة نعلي الشيطاان وعرفي شنو راكي تݣولي
فتيحة: تبعدنيييييييي منبغييش نشووفها ݣداامي
نعيمة: شيماء سيري مع أمال وهند لفووݣ ونتي افتيحة نعلي الشيطان راه عندك غير بنية وحدة تحطي الراس علييها
فتيحة: احيااااني انعيييمة مشااا للي نحط عليه الراااس مشااااااا (بقاو معاها حتى دخلوها لبيتها كتبكي عطاوها كينة دالراس وختها كريمة جالسة تواسي فيييها)
شيماء: (مبينالها انها معجباهاش تكون عندهم فالدار) تباتي فالصالوون؟؟؟
هند: صافي نبااتو فالصالون (هند خنزرات فشيمااء وجرت امال للصالون وكلام مها مزال كيتعاود فراسها وكتأكدو بالصح هو مشا وعمرها سمعات من عندو رضى ديما كتسمع من عندو السخط للحظة تيقات ݣاع دوك المصائب لي كيوقعولها بسباب سخط مها وبااها حتى نطقت وهي كتشوف فهند) انا بقالي غير نعبدهم كندير نجيب رضاااتهم
هند: ششتتت كلام مك دخليه من ودن وخرجيه من ودن
أمال: (جابت ليهم شيماء كواش وخرجات وهي متبعاها وفنفسها كتقول واش هادي هي بنت عمي وللي كنت دايرها ختي للي كنت نرمي راسي فالنار عليها… شافت نعيمة دخلات عندهم)
نعيمة: نوضو ابناتي دخلو لبيت وليد تنعسو
هند: معليش اخالتي نعيمة
نعيمة: لواااه هدا بيت ضياف ونتوما راكم مني زيدو دخلو
هند: (بغات تسولها على وليد فين ينعس منين يديولو بيتو ولكن متقدرش كنوع من الاحترام هزو كواشهم ومشاو لبيت وليد تابعين نعيمة للي كتستغفر الله.. هند فرشات ونعيمة كتواسي فأمال دخل وليد عندهم لقا مو كتهضر مع أمال وهند واقفة مشا حدااها)
وليد: خاصك شي حاجة؟؟
هند: امم لا (أول مرة يتجرأ قدام مو ويجي يهضر معاها) واش نتا بيخير؟؟؟؟
وليد: (زفر وحرك راسو باه شافت فعينيه ذابلييين) عطيني لكونطاكط نمشي نعمر ليصانص للطموبيل حيت خوات
هند: (تفكرت) بالتلفة راني خليتو فوسط الطموبيل
وليد: (تبسم ابتسامة موصلاش لعينيه) نعسي ورتاحي (ضار وهبط بالزربة جاع يزيدولها بيها ركب ونيشان لصطاصيون حيت كانت خوات عمر لبلان ورجع للدار للي تكى منعسش كولشي تقريبا فايق من غير شيماء وهند للي نعسو ولكن نعاس مخربق.. امال غير كتقلب فبلاصتها وكتحاول مديرونجيش هند وتفكر فباااها وكل ما تحل ولا تغمض عينيها تشوفو قدامها محسات غير ناضت من بلاصتها ومشات للسرجم حلات السرجم وضرب فيها الهوا تفكرت صورة باها وهو فصبيطار ميت ومنين باستو فجبهتو وهوما يطيحو دمووعها بغاات تغوت ولكن مقدرااش بحال شي واحد ساد ليها فمها رجعت لبلاصتها وهي غير ساهية حتى سمعت التحراك برا لبيت ناضت وخرجت سدات لباب على هند هبطت نيشان لعند مها لتحت لقاتها جالسة فالسيجور والعائلة جاو ولكن للي شافت أن مها لابسة كولشي بيض من تقاشرها والصابو لدرة والشال حنات عليها وباست ليها راسها ولوخرا مكتحركش ومكتشوفش فيها.. أمال معرفت مدير من غير جلست حداها كتشوف فالدار تفكرت باها فين كيجلس.. باها داخل للدار بسلهامو وجلابتو كيحنحن… باها غيغوت حطو لغدا ولا حطو لعشا… ولا كيقلب على صلايتو… قلبها ضرها كتر ورجعو عينيها تضببو حتى زعزعاتها مها وهي كتعيط)
فتيحة: علييييييي علييييييي (خرج من الصالون كيجري وجا عندها) فين هو ولدي محمد اولدي
علي: راهم فطريݣ امّي
فتيحة: (بحرا كتهضر) يجي يشوف باااه ݣبل ميتدفن اااااه وشحال كان يبغيييكم وكنتو نتوما عينيييه خلا رجال من موراه خليتي رجاال امصطفى خليتي فظهري وفكتافي جوج رجااال ولكن بلاصتك اخويا كبيييييرة
أمال: (غير حانية راسها بقات فيها مها أما كلامها خلا حريق فكرشها ممسوقالوش.. ناضت فتيحة من تماك هي وولدها ومشات دخلات الصالون لي العائلة بقات تجمع تماااك تحط فطور للي قدلو زاد كلا للي مسدودلو الشهية راه متسع وغير ساهي حتى صونا وليد للي تعرض لمحمد فمستودع الأموات وكانت حاالتو خايبة شاف بااه بكى عليييه حتى بغا يهبل عاد رجع للدار للي مو تعرضاتلو فدروج كتليد وهو غيحماااق غير وصل حداها عنقااتو وكتغوت بالجهد وهو كيصبرها وبرااسو غيهبل أمال مقدرتش تخرج محدها كتسمع لغوات وهي كتبغي غير تغوت حتى دخلو وقفت كتشوف خوها محمد ومتشوقة غير شي واحد يجي عندها شافتو كان وجهو حمر وعامر دموع دخل للصالون نيشان وتابعو كولشي حتى كتشوف زهير للي غير شافها رجليه داوه حتى لعندها…)
زهير: (وقف حداها وهي لقات خيبة أمل من عند محمد شافت فيه بعينين ذابلين.. منظر عينيها كان يخلع كانو حومر بزااف وماشي حومر طبيعيين بحال شي مصاص دماء وكاسر ديك لحموية مومو دعينيها للي عسلي غامق) البركة فراسك أمل
أمال: (ملامحها باغا تبكي ولكن… مجوباتش)
زهير: الله يرحمو والله يصبرك
أمال: (بصوت خافت اصلا مقدراتش تهضر) اامين
زهير: انا ندخل…
أمال: (مكرهاتش تقولو بقا واسيني شوفني راه حتى واحد مكنبانلو حتى هزت عينها لقاتو مشا تنهدت وتبعاتهم للصالون فين مها كتسخف بلبكى وحداها محمد من جهة ومريم للي كتبكي من جهة.. ماشي كره فمريم واخا ماشي وقتها ولكن هي خاصها تكون تمااك تخنقت بزاااف ورجعتلها الحالة كتنفس بصعوبة باش توصل الهوا لريتها كتشوف نظرات بزاف دالعائلة وفاهمة شوفتهم ديال نتي بنتو ومبكيتيش عليه وغير مطرفة زهير غير حاضيها واخا كيجاوب وليد شوية دخلت هند ووقفت امال حتى جات عندها ولوخرا كتنفس بالزز بانت فيها)
هند: بشوية عليك مالكي
أمال: والو نخرج من هنا (خرجات ومشات جلسات برا الدار بدات تعمر بزااف دلهوا قريتها باش يرجعلها تنفسها الطبيعي وبقات غير ساكتة كترد نفسها حتى سمعو لغواات عااود امال بدات ترجف ووقفت حتى شافو نعش مغلفينو فمانطة فالخضر مدخلينها لقلب الدار عرفاتو نعش بااها عينيها خرجووو ورجعت ليها الحاالة بقات تغوت ولكن على قد صوتها ونفسها للي ممساعفهااش) مااات بابا اهند مااات بابا اهند مااات بابا اهند وااخا عمرني سمعت منو كلمة بنتي ولكن غيكون كيبغييني ماااات اهند وهو سااخط علية ومكيشوفش فوجهي (بقات كتبكي بشهقاات عالية لدرجة هند بقات كتبكي على حالة صاحبتها شافت محمد وعلي ووليد ونبيل هزو داك النعش فوق كتاافهم وكولشي خرج كانت الدار فيها لغرق دلبشاار جاتها هستيرية غير كتغوت بكلمات ممفهومينش مع مخارج حروفها وفمها بحال كيتعوج حتى واحد مضار شاف فيها وصوتها ممسموعش ليهم.. من غير هند للي كتحاول تسكتها..
هبطو معاه وهي بغات تهبط ولكن تعكلات وطاحت رجعت وقفت وهند جراتها لعندها كتعنقها طلعو لعيالات للدار ورجال مشاو لدفينة حبت لعيالات ممنوعين يمشيو يدفنو كولشي ضاير كيعزي ففتيحة وفمريم وهي دخلاتها هند لبيتها وحيت هي تخصص ترويض كتحاول غير ترض ليها يديها لبلاصتها وهي غير كتغوت وعينيها خارجين… دخلت مريم لبيتها مع مها للي كتعاود ليها كفاش حتى كان عمها داخل ينعس حتى طاح كيكح على قولت ختها حتى خرجو كشاكشو مجا فين يوصل حتى مات لبسات جلابتها فلببج ودارت شال فلبيض وخرجو لعند لعزااية…
كملات دفينة رجعو رجال وبداو يستقبلو العزاايا وتبنات قاعة لتحت تحت الدار حيت كان من التجار لكبار فلمدينة وكان كيجيو بزاف دناس يعزيو زهير حتى هو مخلاش من جهدو كل واحد بشنو مشا تكلف محس حتى دخل عليهم 100 دجاجة و100 اخرى على متقااد خلا محمد تالف معرف ميقولو وحتى هو مكيسناش الشكر كولشي كيعتابرو فسبيل الله.. ركب نمرتو دالمغرب وهوما يجبوه ميساجات ومشا صونا على مو علمها بشنو وقع وقالها لخوه باه يجيب مو ويجي حتى هو يديرو الواااجب والاجر.. عاد دخل لميساجات لقا بزاف ديال بواط ڤوكال من عند أمال شاف التوقيت لقاه من نهار مشا كتصوني صباح وعشية وليل بقى كيفكر شنو زعما واش كانت باغياه مفهمش ومفكرش يفهم حيت معندوش علاش يحمق راسو بالتفكير كيقصد بنادم نيشان… جا عندو وليد كانو عينيه ذابلين بقاو كيهضرو شوية حتى تحط لغدا حلفو لزهير يدخل يتغدا دخل وكلا للي قسملو الله ورجع حدا دراري كيعاون الا لقى ميعاون حتى جات لعشية كان وليد قنع يطلع زهير يرتاح شوية فالدار عندهم ومحمد مشا للخبزة يجيل على الخبز…
هنا كانت فتيحة جالسة فالسيجور تستقبل لعزاايات للي جايبة السكر للي جايبة فلووس كل واحد وباش سخااه الله… من بعد أمال متقدات صحتها شوية وقدرت توقف كانت هند خرجات تشري لأمال متلبس حيت مجابو واالو خرجات لقات مها فالسيجور وجات العين فالعين مشات حداها)
أمال: ماام…
فتيحة: (دفعاتها فتييحة) بعديييني يا المسخوووطة (كولشي سقر وضار كيشووف) تهنيتي ها بااك مات وهو ساااخط علييك دمعة يااا لكافرة بالله مطيحتيهااش، ݣولي كنتي تسناايه يموووت باش تجري طواالك
نعيمة: افتييييحة
فتيحة: خلييني انعيمة (رجعت كتبكي) للي متحنش فبااها وتجي طل عليه شنو تسنااي منها
أمال: والله مكنت نعرفو مري (جمعت معاها بطرشة حتى تطراسا الخاتم فحنك أمال)
فتيحة: غبري من ݣدامي يا مسخوطة باااها (بلغوات) غبريييي ولا عرفتي (وقفت وأمال دارت حركة كتحمي وجهها جرتها من ذراعها وجاراها لباب) سيري تييهي فين كنتي تايهة هنا معندك حد (وصلاتها حدا لباب ودفعاتها حتى طاحت حدا العتبة كانت غتشقلب فدروج وكان مشدتش فراسها ونسا من موراها كيشدووها هادشي داز قدام زهير ووليد للي كانو حدا باب الدار وسمعو لغوات وضارو كيشوفو فباب دار فتيحة…)
زهير: (طلع بجرا وتابعو وليد)
وليد: مالك امرت عمي
فتيحة: (كتعرعر) هاد مسخوطة بااها متباانش ݣدامي تخرج علييييية من داااري للي ما فيهاش الخير فباها مفيها خير فيا (زهير حنا عينو لأمال للي مقداش تهز وجهها شاف ففتيحة)
زهير: بشوية اشريفة على بنتك راه حتى هي باها ماات وتيتمات على صغرها ماشي وقت هاد الهضرة ولا لحسااب
وليد: (كعا) بزااف على هاد لبنت هادشي للي راك ديري فيه امرت عمي
فتيحة: (بعصبية) بعدوووني خليو للي فيا كافييني
زهير: اشريييفة منين كطردي فلبنت دابا شنو معنااتها
فتيحة: معناتها تبعدني طلع لدار عمها ولا تمشي تمووت اصلا موتها حسن من حياتها
زهير: (حرك راسو بلا حولة وشد فذراع أمال برك عليه باش تستاجبلو ووقفها وهي حانية الراس وباغا غير تهرب وهو شادها) مغتمشيش لدار عمها غتزيد معايا
فتيحة: هاء
أمال: (كتحاول تجر يديها)
زهير: ونتي لحتيها ݣدام باب الدار للي كبرت فيها وفنهار للي باها مات وتيتمات صافي غير دخلي وتهنااي انا باغيها فلحلال وغنديها مّا كتبغيها كتر من بنتها
فتيحة: (غير كتشوف ولعيالات كيطلو يديو ميعاودو)
وليد: (همس ليه) زهير ماشي وقت هاد الهضرة
زهير: (صاعر حتى خلع الناس حيت عاد كان كيهضر مهدن) ياااو بااااااللله منتزعزعز من هنا حتى ندييييها
وليد: واش راك تخور اصاحبي لموووت هادي وباها ياله دفناه هاد صباح ونتا تݣول جواج
زهير: واا شتي بااااا هزووه من قبرو وجيبوه ݣداامي يݣولي ريييييض ازهير اوالله منسمعلووو لبنت داابا دااايها من هنا (زادو تجمعو الناس كيشوفو ولي كتويل فلداخل وللي كتشفى وهي غير مصدوومة… شاف فيها باغي يهضر)
محمد: (طالع فدرووج) اسموو وااقع (وصل حدااهم)
فتيحة: (بدات تندب وشافت فنعيمة للي دغيا ضارت كدخل فالناس محمد شاف زهير شاد امال فذراعها ومو للي مطرطقة عينها ووليد للي مكره)
وليد: صافي نع..
زهير: مكاينش نعيل الشيطان خااي محمد نهار اللول جيت قااصدك على ختك
محمد: وايلي اخاي زهير واش هدا وقتو
زهير: سمع المرحوم الله يرحمو انا ختك مساخيش بيها تطرد لبرا فزنااقي
وليد: زهير نطلعو لفوݣ ونهضرو
فتيحة: شتي اولدي ديما هي جايبة لينا الشوهة
زهير: (عصباااتو) اشمن شوووهة واش نتي مخرجة بنتك دافعاها حتى بغات تشقلب من درووج وكتݣولها متعاوديش تجي لهاد الدار وتسبيها فبنتك
محمد: (شاف فمو مصدووم منها عارفها ديرها وزهير ماشي برهوش باش يتبلا على مو)
وليد: (كيهمسلو) زهير الا عندك امال عزيزة ريض اصااحبي..
زهير: واخا ولكن مغتبقاش هنا حدااها
وليد: طلع للدار ونهضر
زهير: (شاف فأمال للي حانية راسها وتشهق بلا بكى) ݣدام مك وخوك انا باغيك للحلال جاوبي دابا واش نتي باغاني ابنت الناس نحطك فوݣ راسي ومنخليك مخصوصة حتى من حاجة كولشي للي عندي ديالك ومّا غتحط فوݣ راسها
أمال: (مشافتش فيه حركت راسها باه.. هو غير شافها هكاك شاف فمها ورجع شاف فخووها)
زهير: تكمل الربعين وغنجي نخطبها رسمي (جرها من ذراعها قدامهم ومطلعها ووليد تابعها أما محمد كيشوف غير فمو تحط فموقف خاايب واحد غريب كيدافع على ختو صغييرة فنهار للي تدفن فيه بااهم ومو بغات تطردها بالشوووهة حدو نزل مع دروج حاني راسو وهي غير كتشووف مشا نيشان لواحد القنت جبد ݣارو وبقى كيكمي وهو غير ساااهي وحاني الرااس….)
فتيحة: (دخلت مصدومة مكانش فبالها هداك باغي بنتها لجواج غير مادة حنكها للعزاية)
نعيمة: (جات جلسات حداها من بعد مطردات 4 من نسا كانو يعايرو فأمال وحتى ففتيحة) اربي اش ديك الشوووهة افتيييحة واش مهداتك موت على ديك ابنت مهدك واااالو.. لاش مشوهااها مع الناس ومع كوولشي وطارداها من دار بااها باااااز يا لالة
كريمة: اوا مراهاش فراسها
نعيمة: نتي بعدا سكتي يا حسرة نتي خالتها باش توقفي معاها وتحبسي حتى تبزݣيل ختك جالسة تشجعييها
كريمة: (سكتت معاجبهاش الحال موالفة من ديما كتسمع غير كلام صواب من عند نعيمة)
~~~~~~~~~~~~~
شيماء: (فاقت من نعاسها قلبات فتيليفونها لقات ميساج من عند أنوار *لبراكة فراسك احبيبة بلاتي ونصوني عليك* زفرت) هادشي علاش ݣاد اودي اودي علامن معولة فيك غير الزين والطموبيل وشي لاخر الله يجيييب (خرجت كتحك فشعرها حتى كيبان ليها زهير شاد امال مدخلها وتابعهم وليد طرطقت عينها ودخلات لبيتها دارت شالها ولبست بينوارها ومشات للصالون)
زهير: وليد غااا متحمقش رااسك معايا امل ودااايها معايا الله يجعل نجلس معاكم هنا حتى تكملو ديك 40 يوم
وليد: (جابلو الظحك) اصااحبي وااا حضر عق (دخلات شيماء مستغربة ضار عندها) مهبطتيش لتحت؟؟؟
شيماء: هاني عاد غنهبط كنت كنطيب شي مسيمنات باش نهبطهم أماال مالكي؟؟
وليد: صافي غير هبطي نتي (تيليفونو صونا كانت هند للي خرجات لحوانت تشري شي بيجامة ليها ولأمال جاوب) الو (دار إشارة اشيماء باش تمشي) انا جاي (خرج وشيماء خارجة ولفضول قاتلها)
زهير: (شاف فامال) علاش دارت معاك هااكا
أماا ل: (هزت عينها فيه خلعاتو بديك لحمورية لي فعينيها.. طرطق عينو)
زهير: مااالكي فعينيك
أمال: (قاست فعينيها) والو
زهير: مغنخليكش أمل والله نهاية حتى تكوني على كفوف الراحة ݣوليلي غير علاش دارت معاك هاكا واش دابزتو ولا رديتي عليها الهضرة ولا سمو وقع؟؟؟؟؟ غير هضري متبقايش سااكتة
أمال: (غير كتشوف مشقلبة شنايفها فوضعية لبكى)
زهير: (بقات فيه) أمل هضري الله يسهل علييك
أماال: (حنات راسها بشوية مرضياش بشنو وقع قداام الناس وخااصة قدامو هو) انا مبغيتش (بقات كتشهق وحروف كلماتها ممقادينش) هادشي يوقع
زهير: حتى انا والله مكانت نيتي نغوت على مك وراه بفففف وبربي امل الا شدييت راسي منبغيش للي يقلل منك منحملش لحݣرة وعليك نتي بالظبط منقبلهاااش (مزال شادها فذراعها)
أمال: عفااك منمشيش باش الهضرة متكترش على خوتي وماما واخا جرحوووني (طرطقت كتبكي وهاد لمرة خرجو دميعات من عينيها) وموت بابا صدمني (كتبكي) والله مبغيتو يمووت علاش مفهمونيش
زهير: (دار يدو فوق صدرو) انا نفهمك
أمال: (بقات كتبكي وهاد المرة بكل حرقة وهو بقد مباغيش يشوف بكاها بقد معاذرها) عفاااك متزيدش توقف فوجههم
زهير: لا لا على قبلك واخا يكون للي بغا يكوون
أمال: (حنات راسها)
زهير: (زفر) انا مبغيتش نوض صداع وربي عالم جيت من لهيه ندير الواجب وحتى على قبلك واخا صافي ݣلت هاد لبنت نعطيها التيقار حيت مباغيانيش
أمال: لا باغااااك (سرطت لسانها وحنات رااسها كتوبخ فراسها وتندم على تسرعها)
زهير: (فبالو ماشي وقت هاد الهضرة ولكن اكفس ظروفها سمع هضرة شهور وهو تابعها علييها) منين الأمور هاكا مغنخليكش وعمري نخلييك وللي هضر غنحي والدييه بقاي هنا نصيفط ليك هند (طلق من ذراعها وقف وضار شاف فيها مزال حانية راسها وكتلعب بصباع يديها خرج لقا وليد واقف ومعاه هند) دخلي عند امل متخليهاش وحدها…
كريمة: (غير دخلت مريم لبيتها تبدل الجلابة للي توسخات ليها من ولد ختها للي زلع عليها رايبي تبعاتها مها) ويييييلي على شوووهة
مريم: حشومة على خالتي فتيحة والله حتى صدماتني
كريمة: حتى يانا مݣلتش تطرد بنتها ݣدام الناس وهاد هداااك سمو ݣال
مريم: وراه هداك للي جا معانا سميتو زهير الله يعمرها داار اماما
كريمة: وشوووفيلك السعد المسݣد
مريم: اشمن سعد أ ماما ومها شوهاتها ومخلاتها مسكينة حتى تحزن فخااطرها نتي عارفة امال كدايرة سكوتية وحدودية وݣدامنا عمرها ردت الهضرة على مها علاش ديرلها هكاااك
كريمة: بيناتهم يا لحمارة نتي عݣوزتك عليك عليها بالاحترااام
مريم: انا راه بقات فية أمال بزااف نطلع نتبعها
كريمة: والله وطلعي حتى نشوهك كتر منها مزيااان تبارك الله عمك عاد مات ونتي تبعي لية أمال بدلي حوايجك وزيدي تجلسي حدا خااالتك
مريم: (غوبشت وتبعت مها جلسات حدا فتيحة للي عقلها غير مع محمد ودوك الشوفات للي دار مغيدوزش هادشي مرور الكرااام وجد لعشا وهي ناضت لقيتها فين جات ختها جلست حداها كيتعاودو…..)
~~~~~~~~~~~~~~
وليد: (صيفطلو محمد يجيو عندو) نهبطو عند محمد
زهير: (خارجيم من الدار) شووف انا غنطلع لسطح جيبو نهضر باش نخرج لا
وليد: ههه لعزا هدا اصااحبي وقدر الظرووف
زهير: اشمن عزا غير يجمعو هاد *** ويطويو بنت وحدة ومحانينش فيها لاش يمثلو على الناس وانا مشغليش فهاد لحزاق كاامل للي هامني راك عارفة
وليد: واخا أما نطلعو لسطح ومتقجرس راك عارف حالتو كدايرة
زهير: (جبد ݣارو وبقا كيكمي وليد هبط غير قشعاتو شيماء هبط حيت كانت مخبعة فالحمام للي حدا باب الدار.. طلعت كتجري لسطح مع دخلت ضار)
شيماء: هاء سمحلي مشفتكش
زهير: هانية (صار عاطيها بظهر تمشات حدات)
شيماء: شنو واقع سمعت غوات لتحت
زهير: (ببرود) انا مسمعتش
شيماء: لا لا عفاك غير ݣولي
زهير: (خنزر فيها) ياو ݣلنا ليك مسمعناش ولا حسابلك سميتي زبيدة باش نجي نتعاود معااك
شيماء: حشوومة عليك علاش كتغوت علية هااكا وانا عاد قلبي علييك وغير كنشوفك تابع أمال كنبغي غير نصحك
زهير: سمعي مرة أخرى متعاوديش هاد لبسالة معايا المرة اللولة دوزتها ليك لمرة التانية مغنديرش لحساب خووك ولا مك ولا حتى وااااحد أمااال خط حمر داك الخزعبيلات ماشي علية كانت عندك مع خوها محمد شي مشكل سيري حلييييه امل كنعاودها بعيييدة على تبرهيش دياالك متخلينيش نغلط فيييك حيت نهار نتعصب عليك مغتبانيليش واش دري ولا بنت
شيماء: (تصدمات فيييه وفكلامو وتهديداااتو)
زهير: تݣلعي من هنا ومرة أخرى متبقايش عاسة على خوك يخرج باش تجمعي مع رجال ابنتي عرفي حدووودك وحتارمي داك خوك متصيفطيهش للحبس على وااالو (بقات كتشوف فيه مطرطقة عينها وحالة فمها) واااااا يااااله مفهمتش داك لعقل فين بااغي يوصل عندك ابناادم هاديك بنت عمك للي جالسة تاكلي فلحمها وباغية تبينيها خاايبة فعييني شنو كتسنااي مني نشوف فيك؟؟؟ نفكرك فولد خويا للي خااطبك!!! سيري ابنتي برااكة من هاد تبرهيش لخااوي ورااعي لخووك ( جوج صباعو للي شاد بيهم لݣارو شيرلها حدا لباب وعطى بظهر وااقف منتصب بظهرو.. ضارت ولبكية واحلة لييها هبطت بالزربة مع درووج ورجعت للحمام تخبع وتصرط الصدمة بشوية… ميمكنش يغوت عليها هااكا… اما هو غير تاقا فيها وجه الله ووجه صاحبو وعائلتها أما يوريها ضسااارة ديالها ولكن علمها مرة أخرى كفاش غيكون تعامل معاها واخا يتمنى متكونش مرة أخرى وحتى ديك الخطوبة ديال ولد خووه معجباااهش حيت هي فيها دغل ولاخر كتر….. تم طالع محمد ووليد لاح لكارو التاني وعفس عليه برجلو وبقا كيشوف فيييه بكل ثقة انه امال غيديها غيديها…..)
———————–
فتيحة: (مخرجة عينها صدمة زهير باغي بنتها كتر من موت راجلها حاليا لدرجة ندمت علاش طرداتها ماشي خوفا حيت غتقلل منها بلعكس هي مبغاتش بنتها تشوف نهار الزين على شنو وقع..!! ولكن على ولدها للي لدابا مزال مبااان وهي رادة بزااف دالحب لمحمد وعاد كفاش واحد بحال هداك برزقو وزينو يشوف فبنتها للي ديما فبالها وجهها كحل وصحتها مطبعة ووجها عامر حبوب وشعر وعينيها صوفر وفمها خانز وشعرها كرد وموسخة يبغيها واحد بحال هاديك وكفاش مو كتبغيها بزااف يعني من شحال وهوما راسمين على امال… غتصطى لدرجة مبغاتش مزال تخرج من بيتها تسلم على لعزايا للي كيمشيو ولا حتى للي جايين.. دخلت عندها مريم) فين محمد
مريم: معرفتش اخالتي ݣبيلة ݣالي يمشي يجيب الخبز من تماك مباان ياكما شي واحد ݣالو شنو وقع
فتيحة: (غوتت عليها) اش وقع اش وقع؟؟ سييري شوفي الناس من بعد واجي (خرجت مريم للي بقا فيها الحال ولكن هادشي واالو على للي كدير لبنتها صونات على محمد لقات تيليفونو طاافي زادت تخلعات علييه.. مشات عند كريمة للي كتشد قوالب السكر دخلهم لبيت لخزين) ماما محمد لدرك مزال مباان
كريمة: معرفتلو ابنتي تلݣليه راه يظابز مع داك للي محشم مرمش يݣول نتجوج لبنت نهار تدفن باها
مريم: (شهقت) علاه عرف
كريمة: وا نوضي على سلامتك راه حضر لكولشي هداك طلع ديك المسخوطة لدار عمها وهو حنا الراس وهبط لتحت ولكن انا للي عارفة محمد والله مينساها فيهم بجووج
مريم: علاش تݣولي عليها مسخوطة اماما (خلاتها ومشاات متقدرش تخرج قدام الدار تقلب عليه مشات للكوزينة كتشوف متعاون حيت كولشي جايبينو للي تغسل لمعان وللي طيب أما للي كيجمع راه من العائلة ونعيمة وكريمة وتا باقي كيجمعو علاش قدو حيت خير فتيحة ساابق….)
~~~~~~~~~~~~~
محمد: داكشي للي درتي راه مكيداااارش
زهير: بنيتك امحمد راك راااجل الدار اصاااحبي (محمد خنزر) تشوف ختك كتحݣر ونتا كتفرج
محمد: (غوت) انا مشتهااش
زهير: مشفتيهاش اليوم ولكن شفتيها قبل.. سمع ختك بطليع الروح داايها والله منخلييها هنا الله يجعلها نحطها عند مّا ومنخليهاش هنا (بعصبية) واش فااهم ولا لا (خرج عينو وغلض صوتو كتر) ختك نهار باها تدفن مها طرداتها للزنقة وتجي دابا تفهم علية هاد الزابور سير سولو لمك لاش دير ديك الشووهة على وااالو (محمد معرف باش يجاوب ووليد غير كيتفرج وهاد نهار كره كره كره مرت عمو حتى كتباتلو شيطان فسيفة بنادم) جااوبني داابا واش عمرك حصلتي شي حاجة على ختك!!!!! عمرها هزت فيك العيين ولا غوتت عليك ولا ضرباااتك؟؟؟
محمد: نتا غتعرف ختي حسن مني
زهير: واه عرفت معدنها نهار اللول ولا علاش لسݣت فيها!!! والا كان فيها شي ديفو هضر ݣولو نعرف هاد الكره كامل علاش؟؟
محمد: مكاين لا كره لا واالو ونتا ممنحقكش تغوت على مي
زهير: (بغا يهضر وسكت ماسح على لحيتو) من هادشي كاامل حيت هضرتي وجوابي مغيعجبكش ياااا اخي انا وجاتني النفس على ختك منين غتكمل 40 يوم غنجي نخطبها منكم ولا من شي واحد معتابرها بناادم وغتخطب بعزها وغتجوج بعزها
محمد: يعني سيف علينا؟؟
زهير: سمع اخاي محمد درت معاك الاصول وغنتسنى 40 تفوت أما غدا نجمع ليها كواغطها ونديها لوجدة نعقد عليها
وليد: محمد واش تبغي كلام الصح؟؟ مرت عمي دارت شي حاجة للي مكداارش ونتا محضرتيش من اللول
محمد: (هو عارف كولشي غير كيدافع على لهوا وخصوصا منين كان شافها منين ياله دخل ومو تعكلات وبقات كتعرج باش دخل للصالون كان بغا يمشي عندها ويعنقها.. بانت فوجهو مهمووووم وبزااف وضااايقة بيه الأرض وعاد داكشي للي دار زهير وختو للي قالت وااااه ليه عرف انها عايشة شي حاجة كتر من الجحيم معاااهم ولكن شنو يدير يطرد مو كدارت هي مع ختو؟؟ حاار حتى الأم واخا تكوون شيطان غتبقى مووو… جبد كارو وبقى كيكميه وحتى من زهير كيشد عصبيتو ووليد مشا طبطب على كتف محمد)
وليد: محمد زهير معطاتوش خاطرو يصبر ولوكان مهضرش هو كنت انا نهضر وشتي وكان ماشي زهير بغا يتجوجها كنت نتجوجها انا وندييها برا ومنخليهاش
زهير:اااش كتخور السيموحمد
وليد: راه ݣلت لوكان
زهير: (بعصبية) ماااتݣولش لوكاان (كشاكشو خرجو ومشا عند وليد محمد للي وقف فالوسط ووليد جاتو فوغيغ) لاش تݣووولها والله وكان مكنتي صاحبي وعارف نيتك حتى لوووح والديك من هاد سطح ونهبط نكمل عليييك
محمد: وصاافي هنيونا
زهير: (مكرهش يخلطهم بجووج دفع محمد وتم هابط خلا محمد غير كيشوف واش هدا كيتزلل على ختو وهو كيزيد يبردو!!!!!!!!! )
شيماء: (بقات فطواليط جالسة فالارض ومطرطقة عينها مبغاش يتهضملها شنو دااار متوقعاتش منو هاد ردة الفعل غتموووت بلفقسة لدرجة بقات كتبكي دخل وليد للحمام لقاها جاالسة فالأرض وكتبكي استغرب وهي وقفااات) خوويا
وليد: مااالكي
شيماء: بقات فية أمال هءءء واخا مكنهضروش حطيت راسي فبلاصتها (كتهشق) مرضااش نتعامل هكاااااك وعاد باها مات واخا مكانوش يحنو فيها ولكن ماشي ݣاع هاكا قداام الناس
وليد: (تاقها جرها كيعنقها) شتي باش تحمدي الله على مك وتبقااي تبعي كلامها
شيماء: والله حتى كنسمع اخويا انا للي طلباتو مني ندييرو ياك غير نتا اخويا ݣلتيلي اجي لكاغيط أجلتو وحتى ماما عجبها الحال
وليد: (مزال فراسو بزاف ميتقال ولكن ماشي وقتها) سيري دخلي لبيتك ونعسي تعشيتي؟؟ (جرها مخرجها)
شيماء: مافياااش
وليد: انا نجيبلك شنو تاكلي (دازو من حدا زهير للي جالس فالسيجور.. شيماء بقات كتشوف فيه بطرف عينيه مكانش كيشوف فيها دخلات للبيتها) متعاوديش تبكي فالحمام جلسي هنا ومتخرجيش
شيماء: واخا خويا (خرج وليد وبحال شي ماسك فوجهها حيدات ايموجي ديال الحزن ورجع الكره لوجهها) انا بهضر معايا هكاااك!!! (بقات كتجنن بوحدها)
~~~~~~~~~~~~~
هند: (من بعد معودات ليها أمال) مبقيتش تنحمل هاد مك
أمال: (كتمسح مناخرها) وكان غير ما ومنعيش هاد نهار منقدرش نهز راسي اه (دخل زهير وحنات الراس)
زهير: علاش متهزيش رااسك؟؟ (دخل حتى محمد وهنا هيا تزيرااات وخاافت منو)
محمد: (جا جلس حداااها وشاف فيها براسو مقدش ومكيعرفش كفاش يطيب خااطرها) هاديك راه داركم حتى واحد ممنحقو يطردك منها كما هي عندها حق حتى نتي راك وارثة
زهير: (حس بيه باغي يواسيها ولكن غير كيزروط فالهضرة أما أمال غير حانية راسها وكتسمعلو)
محمد: ياله تهبطي
أمال: (أول مرة تزعم واخا بصوت خاافت) لا
محمد: سموو؟؟
زهير: صافي خليها على خاطرها اخااي محمد
محمد: (شاف فيها ووقف خرج وزهير وقف شاف فامال)
زهير: ووو أمل (هزت راسها فيه عجبو الحال تشوف فيه ولكن دوك عينيها الحومر جايينو فشكل) دخلي ترتاحي نمشي نجيبلك شنو تاكلي
أمال: (بصوت خافت حيت مقداش تهضر) لا لا عفاك
زهير: الاخت خدامة بلحجر؟؟
أمال: (تبسمت ابتسامة باهتة وهو خرج لقا وليد واقف حدا محمد هبطو بتلاتة محمد دخل لدارهم حيت الدنيا تقريبا خوات وهو دخل كيقلب على مو كريمة مشات تجري لبيت اختها علماتها وهو يدخل محمد)
محمد: خرجي اخالتي نهضر مع مي
كريمة: (خرجات بكرامتها وفتيحة دايرة يدها فوق راسها وباين فيها حريق الراس من عينيها للي ذابلين هو بقا كيشوف فيها)
فتيحة: (بصوت باح) جلس اوليدي
محمد: علاش درتي ديك الشوهة
فتيحة: جلس اولدي بعدا
محمد: (بعصبية) وعلاااااش طردتي بنتك؟؟؟؟؟؟؟
فتيحة: (خرجت عينها) مااا بنتي منعرفها مااا نحمل للي يعرفها
محمد: وعلاش هادشي كاامل قربتي ديري حفاادك ومزاالة رادة ليها سباب حيت مكتولديش
فتيحة: (كتبكي وتخبط فصدرها) زيييدني اولدي عااايرني وانا على قبلكم بقيت فالصهد مع بااااكم الله يرحمك يا مصطفى نهار خويتي ولادك قربو يضربووني ياااكما نخرج انا اولدي لا إلا بغيتي نخرج نخرج
محمد: (لبساتو بدموعها وكضرب فراسها) لاش تحولي فالهضرة انا نسولك على بنتك
فتيحة: ياك بنتي اوا مني لييييها
محمد: (عصبااتو) ولاش ديك الشووووهة سمو دارت هاد لبنت ݣاع
فتيحة: (بصوت مخنوق) انا للي عارفة وجواج متحلمش بيييه يانا ضيعاتلي حياتي وهي تمشي تفطح
محمد: (هنا كشكشااتو) وااش مرييضة فمخك
فتيحة: هاني هضرت
محمد: (كيعرعر) لبنت يانا غنجوجها للراجل للي حن فيها حسن مني ومنك معرفت علاش كنت نطاوعك فاللول خليتيني شمااااتة فعينين ختي لدرجة واحد خطبها فعزا باها وبغات غير تهرب منا فييقي شوية شكون ݣال با يموووت وهو صحيح فصييح تقاااي ربك لديك لبنت (خرج معصب زدح لباب وهي غير كتشوف فيه ورجع حلو بعصبية) وحقي دلورت عاطيه ليها باش دخل لدار باها كبغاااات (زدح لباب ومشا نيشان لبيتو كانت مريم حاضيااه دخلات من موراه وكريمة كيتويل مشات دخلات لبيت ختها حتى بقات كتغوت)
مريم: صووت ماما هدا
محمد: (خرج كيجري وتبعاتو مريم دخل لبيت مو للي سبقو شي عيالات لقا مو مجبدة فالارض وصفرااا هزها كانت تقيلة عوناتو خالتو ودخل علي للي كان فالصالون حتى هبطووها كان وليد داخل فطموبيلة ديال باه هو وزهير للي ياله بغاو يهبطو حيت مشاو شراو شي حاجة لقاو الجوقة هبط زهير وبان لبلان عاونهم حلهم الطموبيل وبقا وليد صاك بيهم ومشا طااير)
زهير: سمو وقع؟؟
ادم: والله مافهمت اخااي طلع ترتاح راك مرتاحيتيش من صباح ونتا فتماارة
زهير: (من عادتو ميتشفاش فعدياانو) نمشيو نشوفو السيدة واش مزيان!!!
ادم: (شير بيدو زعما متسوقش) التيليفون يوصل لخبار (طلع مباغيش شي حاجة تزيد تمرض أمال نيشان لدار وليد دخل نيشان الصالون كانت الدار خاوية ملقاش أمال) غيكونو هبطو لتحت دخل لبيت وليد ورتاااح راه فالتالي دلكولوار
زهير: (ديجا وليد ݣالو راه باتو تمااك دق فلباب) أمل!!!
شيماء: (بيتها حدا خوها قلشت ودنيها ومشات حدا لباب كتصنت)
أمال: (كانو متكيين هي وهند حتى تفافات ناضت قافزة وشداتها الدوخة بديك الزربة باش وقفات) حليلو نتي
هند: لا هو قال امال
أمال: (حشمت دارت الشال مقاد وحلات لباب كان غيرجع يدق) حم
زهير: شوية!!!
أمال: (بتنهيدة) الحمد الله
زهير: اصااافي ظحكي وستغفري الله حتى حاجة متستاهل تقتلي رووحك علييييها
أمال: (بحزن) ماشي سااهل
زهير: (زفر) ماشي سااهل وحااس بيك راني حتى يانا يتييم الأب وفهاد العمر كنݣول يارييتو حي ولكن ربي يغااه وبغا باااك حنا منقدروش نعتارضو قضاء الله وقدره
أمال: (كتسمعلو من أعماااقها) وماما؟؟
زهير: ماماك فاش كانت صغيرة شي حد ضربها بمقلة وهربلها الفرخ وحسابلها نتي.. منين تعصب كتبانيلها غير نتي
أمال: (جابلها الظحك) هه
زهير: (تبسم لضحكتها) هانتي دابا أمل للي عرفت دعييلو بالرحمة والمغفرة ونتي فكري فروووحك وفكري فللي شااريك والله (حط يدو فوق صدرو وقوس عينو) معايا ميخصك واااالو نديرك بنتي وختي ومرتي وحبيبتي
أمال: هاء
زهير: مهم كلام طويييل (مد يدو) تبقى شي حاجة نعلݣ والديك
أمال: (حشمات منو حيت غير باش يوقف معاها راه دار أكبر واكتر حاجة كانت ناقصااها)
زهير: ياله شدي
أمال: (شدت) شكرا
زهير: دخلي ترتاااحي انا غير فالصالون وشوية ونصوني عليك
أمال: (حركت راسها باه ودخلت سدات لباب بطريقة لبقة كان هو مشا واخا مكرهش يشد معاها جموع حتى تنهي ويبقى حداها غير يعرفها راها مرتاااحة….)
أصبحنا وأصبح الملك لله
محمد: (نعس شي جوج سوايع فاق مع الفجر لقا مريم ناعسة وباين فيها لعيا خرج كيجر فرجليه لقا شي عيالات فلكوزينة وريحت لمسمن فااايحة مشا توضى حيت مزال ممقاد الحمام باش يدووزلو سخون ورجع لبيتو صلا صلاتو وبقا كيذكر الله تفكر باااه للي كان بتحت القبر واول ليلة ليه زاد تأثر وبقا كيبكي عليه حيت كان مقرب بزااف مع ولادو رجال ناض وخرج مشا نيشان لبيت مو حل كانت ناعسة تفكر لبارح لقاو الطونسيو عندها هاابط زاىد موكلاش دارولها السيروم ودݣو ليها إبرة ديال الكالسيوم ورجعو للدار.. سد لباب وطلع نيشان لسطح جبد ݣارو كيكميه وهو حاااير فكرة ديال رجوع برا والاستقرار تمااك رجعت مستحييلة كولشي دابا فرݣبتو عاد مشكلة مو وختو وعاد موت باااه خلا راسو غيطرطق بدأت الشمس كتشرق مزيان هبط لتحت وهو كيستغفر الله تلاقى مع زهير هاابط هاد الرااجل فيقو بزااف من نهار عرفو وهو كبحس براسو شماااااتة والمشكل كيحتاارمو وعاجبو الحال يسمع من عندو محاضرات عكس مع الناس أجمع)
زهير: شوية امحمد؟؟
محمد: الحمد الله اخوويا
زهير: مّا وخويا لكبير راهم قربة يوصلو لتحت باش يديرو الواجب ووا
محمد: على راسي اخوويا دار ولدهم والله يكتر خيييرهم (هبط محمد لقا خالتو كدور فالدار حيت كتسير داكشي) خالتي الناس معاش غنتناسب جاايين يعزييو تهلاي فييهم
كريمة: (خلاها وزااد على قبل بنتها دير للي بغاو مشات كتوجد صينية مقاادة وعاد علمت ختها للي لقات فاقت وبقات فبلاصتها كتحسر على شبابها للي مشا بقا فيها موت رااجلها بزااف ومضناااتش تجي موت الغفلة تديييه وعاد كلام ولدها من ديما محمد تحت جناحها ودابا بدا يتعكس ليها.. دخلات عندها كريمة علاماتها بالناس للي دخلو والحاجة رحبات بيها مكان غير ناضت دايرة شال على راسها وخارجة عندهم ولعيا باين فييها… عطات صواب وكترات وولدها حداها خايف تمشي تبزݣل)
الحاجة: فيينها بنتي امال؟؟؟
محمد: انا نطلع نجيبها لبارح كانت باتت مع لبنات باش يبقاو معاها
الحاجة: انا نطلع لها اولدي الا راها عياانة
محمد: لا لا هي تهود (خرج لقا محمد حدا لباب) دخل اصاحبي
زهير: غير خليني فين ماشي نتا
محمد: نكلم امال للحاجة (زهير حرك راسو باه ولاخر طلع لقا امال مجلساها نعيمة كتفطرها وحداها هند وشيماء وسناء مرت اادم) امال اجي معايا لتحت الحاجة بغاااتك
أمال: (جاتها قاسحة ترجع لديك الدار وخافت حتى من مها.. هند وقفات معاها وتمشاو أما شيماء كانت كتشوف فمحمد للي والو الشوفة مكيشوفهاش فييها.. هبطو لتحت شافت زهير لي لبارح مصوناش عليها وبقات رادة لبال معاه وهو مصوناش غير باش ترتاح عوج راسو شاف فيها ممسوقش لمحمد)
زهير: أمل شوية؟؟؟
أمال: (حنات راسها) الحمد لله
زهير: (دخل من مورااها مباغيهاش تبقى بوحدها دخلو للصالون وأمال مشات نيشان عند الحاجة للي وقفت كتبكي على أمال وحتى أمال عنقااتها وبقات كتبكي بقهرة موت باها وقهرة مها للي مشافتش فيها حيت هاد المرة صافي مقدرتش تبرك على راسها جلسات والحاجة غير كتبوس فيها وتوااسي وهادشي عجب زهييير حيت أمال غتكون بيناتهم مرتااحة أما فتيحة غير كتشووف ومحمد براسو متبع الحاجة وختو تجمعو الناس باش كولشي غيمشي لقبر باش يترحمو ويديرو التفرقة (هي كيعطيو حليب خبز فلوس حوايج تمر في سبيل الله يسقيو القبر ويقراو عليه القرآن ويرجعو) ناضو كيلبسو لعيالات جلالب وأمال عطاتها مريم وحدة حيت معندهاش هنا غير وحدة شراتها فوجدة من دوك للي طالعين وهند لبسات غير كيطمة حيت واخا ضعيفة عندها ليهونش واي جلابة ابياتها غتبان معيقة خرجو ركبو فالطموبيلات وأول مرة امال تخرج وعارفة فظهرها للي يحميها ركبات مع هند فطموبيلتها وهي مكتسناش للي يجي بفتي عليها ولا يأمرها تركب حداااه ركبت الحاجة حدااهم وطل عليهم زهير)
زهير: صوݣي غير بشوية
هند: ههه متخافش على الحاجة
زهير: وحتى المدام الله يخليييك
الحاجة: (كتويل حيت ماشي وقت هاد الهضرة) آآآآآزهيير!!
زهير: (شاف فامال) انا مورااكم
هند: صافي الحاجة راه سمعاااتك….
هند: (صاݣت وكتشوف فأمال للي عينيها متبسمين ملامح وجهها متناقضة مع الزمن ولبلاصة للي ماشيين ليها عرفات صاحبتها تزعطااات وزهير نساااها فعائلتها الحقيييرة.. شافت قدامها وهي كتفكر واش حتى هي الا مات باها وليد غينسييها فيهم واخا كانو قاسحين معاها الا كاين اختلاف كبيييير على امال حيت كانو معاها مزيااان فاللول حتى طلقو وكل واحد عاش حياتو ولكن مبلغ مهم فكل تالي دشهر كيكون فلوكنت ديالو لسنوات وعمر شي شهر متعطلو علييها يعني من الناحية المادية مهليين وموفيين زائد هي كتجابه معاهم ماشي كتحني الرااس يعني اختلاف كبيير على أمال وصلو للمقبرة وكانو كينزلو نزلات ومشات عاونات الحاجة تنزل وأمال جاتها تبورييشة جراتها الحاجة معنقااها)
الحاجة: بنتي عنداك تبكي غتحرݣي باك فقبرو دعيلو غير بالرحمة والمغفرة
أمال: (حركت راسها باه دخلو للمقبرة وبقاو هابطين مع دروج حيت القبر جاي بحال فجبل وصلو للمقبرة كانو فينا ناس بزاااااااف لعيالات فجيهة ورجال فجييهة والفقهة ضايرين بالقبر كيقراو ما تيسر من القران وختموها بدعاء للي خلا المقربين كيبكيو وحتى أمال بكاات حيت هنا تأكدات راه بااها ماات وتحت ترااب كتواسيها الحاجة وحتى هند تمو راجعين فحاالهم الا أما بقات مع هند زادت لقبرو كتقرا سميتو مكتوبة بالطباشير على ياجورة مصطفى الغازي رقم 1000 تقدمت بووحدها وتحنات جالسة على تراب للي كان مطين حيت سقاو بلما وحتى ماء زهر محست حتى نطقات بصوت كيرجف بدموع وهي كتقيس نمرتو) سمحلي ابابا على للي درت ليك واخا عمرني بغيت ندرلك شي حاجة مكتعجبكش ويمكن هادي أول مرة نوقف حداك ونهضر انا مسااامحاك على كولشي ولكن بقا فيا الحال بزااف انا ماشي سباب باش ماما مبقاتش تولد داكشي راه دربي أنا براسي ݣاع مابغيت نبقى فهاد الدنيا حتى حاجة مزينة (تنهدت) الله يرحمك وانا مسمحااك (كتمسح دموعها بيديها ) منبغيش يربي يحاسبك على بنتك للي من لحمك يانا مسامحااك (هند من موراها كتشهق وحتى وليد متأثر وقفت كانت عامرة طين لقات هند كتبكي مشات عنقاتها ووليد طبطب فظهر أمال وحتى فظهر هند)
وليد: أمال هادشي للي درتي ابنت عمي زيين وشي واحد بلاصتك ميسوقش ݣاع تبارك الله عليك (جا زهير منين شافهم تلاو لقاوهم راجعين)
زهير: مالكي؟؟
وليد: والو ترحمات على قبر باها
زهير: امم الله يرحمو ياله باش نشدو طريق
وليد: (جر زهير) خليها شي يامات وانا غنجيبها
زهير: راه هضرت داك نهار أوليد
وليد: راه غتبقى فدارنا وقدام عيني
هند: انا خاصني نمشي باش غندي مي لالة لفاس حيت مبقى والو على الحج
وليد: مݣلتيليش هادشي!!
هند: ممم مجاتش فالهضرة
وليد: وعلاش هادي عاد تحتاج تݣلبيلها على وقت
زهير: امال رواحي معايا نݣولك (قربت حداه) انا خاصني نرجع لوجدة على قبل الخدمة ومنݣدش نخليك هنا
أمال: حتى نجي مع هند
زهير: هند سمعتيها غترجع يعني غتبقاي لوحدك
أمال: غيبقى وليد
زهير: (قندش ولكن ميقدرش يهلل ولا يغوت عليها ولا يدير حتى شي ردة فعل) حتى وليد غيرجع للخدمة (كيقنعها ترجع معاه) وعاد المعهد ولماكينة للي شريتي
أمال: (جابلها الظحك)
زهير: سمو تمشي؟؟
أمال: (معرفت مدير وحدة من ديما كتخاف من كلام الناس شنو غدير وياله باها ميت ب3 أيام!! ولكن فكرات فتيحة رجعت عندها كاابووس كتخاف غير من الشوفة فيها.. شافت فالفوق لقات كولشي مشا يعني حتى حد مااا قلب عليها باش ترجع معاهم) نمشي معاك
زهير: (تبسم) تجلسي مع ماّ
أمال: حتى نتجوجو
زهير: اخخ شحال خايبة نترومانساااو هنا ولكن عجباتني هادي حتى نتجوجو
أمال: هااء (زادت دايزة من حدا وليد وهند للي كيتناݣرو وكتجمع التبسيمة معرفتش علاش هاد الاحساس ديال الرااااحة حست براسها أنانية نورمال خاصها تحزن ولكن هي علاش جهة فقلبها فرحاان تابعها زهير من اللور عاجبو الحال ياله كان كيݣول مبغاتنيش ساعة لقا العكس لقات محمد واقف بوحدو وكيكمي ملامحها تبدلو لاح لݣارو وشاف فيها ووزهير وقف حداها…)
محمد: (شاف فيها) اجي معايا
أمال: (محست غير قلبت عنقها وشافت لزهير للي حرك راسو باه وهادشي خلا محمد غيتقسم زادت حداه وهو تمشا تمشات معاه وزهير جبد باكية دلݣارو وهز منها واحد ودارو فومو متبعهم وشعلو وبقا كيكمي حتى وصلو هند ووليد حداهم) انا راه مكنتش بفففف داكشي للي دارت لبارح مى خايب ومعجبنيش وضرت فيها داكشي باش ديناها لصبيطار فالليل
أمال: (مكانتش عارفاها وصلات لصبيطار) انا مدرت ليها والو هي للي من نهار تولدت مكتحملنيش وحتى واحد فيكم مكيبغييني
محمد: مكيناش هاد الهضرة واش كاينة شي ام مكتبغيش بنتها
أمال: (محست حتى ظحكات حيت هنا كانت قوية ضارت كاملة ووقفت شافت فيه) لا نتا لا داك خوك لا بااك للي تحت لقبر لا مك للي فالدار حتى واحد مكيبغييني وهادشي نتا عارفو من ديما سميتو فالدار يا لحمارة يا المنحوسة يا لمسخوطة كل نهار كنتضرب الا مكانتش منها منك نتا ولا من خووك (طرطقت عينها) كذبني فهادشي
محمد: متنسايش انا خوك لكبير
أمال: لا منسيتش ولكن نتوما نسيتو انا ختكم سمع امحمد (غمضت عينها وحلاتهم متحدية الخوف للي فيها) انا عمرني حسيت براسي وحدة منكم لدرجة غير كنجي لهنا كنتخنق كنحسب بدقايق باش منكونش معاكم بابا للي مات كنت اصلا كنحس براسي يتيمة من شحال هادي يعني دابا يتيمة بلورااق واش فهمتي شنو كنحس.. (شافت فيه غوبش ولكن تغوبيشة ديال التأثر) شنو نتا يعجبك الحال مك طردك ݣدام الناس وديما طيح بييك وديما مشوهاني
محمد: محدي معاك دابا مغتوقعلك حتى شي حاجة
أمال: (حركت رأسها بلا) لا لا لاااااا منݣدش رجع عندها عفااك بلا مترجعني
محمد: هاديك راه داركم فين تولدتي امال
أمال: كتعرف سميتي بعدا؟؟ اوا غتكون كتعرف حتى مك
محمد: (شاد معاها الخاطر) عارف ودابا كنݣولك متخافيش وبقاي فداركم ونهار تكمل 40 غيجي يخطبك زهير وت..
أمال: لا لا لا عفااك
محمد: امال غير سمعيني هي مغتبقاش تقيسك ولا ضربك خليني غير هاد ليامات نكون معاك مزياان
أمال: (بقات كتشوف فيه وحابسة لبكية بحال ككتشوفو حابس البكية)
محمد: سيمانة!! سيمانة وانا نرجعك لامتحانات ديالك
أمال: (مستغربة وحالتو كتزيد تشجعها تهضر وتقول شنو فقلبها) واش خفتي من كلام الناس يݣولو هادي مشات وباها مزال مضور حتى شهر
محمد: انا بغيتك نتي تبقاي فدار بااك
أمال: واش هي للي ݣالتلك خليها باش تقتلني؟؟؟
محمد: (استغرب لتفكيرها) سمو؟؟
أمال: شوف انا نمشي انا منبقاش وراه ݣلت لزهير مغنبقاش معاكم حتى نتجوجو (عاد طلعات معاها)
محمد: أمال الله يرحم ليك الواليدين اختي بقااي انا نوصلك سيمانة متفوتيهاش
أمال: علااااش وعلاش حتى لدابا تهضر معايا هااك ياك من شحال هادي كنت غير زاايدة عندك علاش دابا دير هاااك (بقاو دموعها كيطيحو)
محمد: (محس حتى هو طاحو دموعو) ندمت برب العااالي الا ندمت
أماال: (زعزعها وبقات غير كتشوف أما المجموعة لوخرا واقفين حدا الطموبيل وغير زهير للي كيشوف ومتبع)
محمد: (دغيا مسح دمعتو قبل متوصل لحنكو) من هاد نهار انا باك وانا خووك نساااي داكشي للي فات.. هاد محمد لا علاقة بداك الجاااهل للي كان
أمال: (معرفت متجاوبو تعيا تقسح فراسها وخوها غسلها بدموعو وللي كتر من ساعة وهو كيرغبها تنهدت وحنات راسها)
محمد: واخا؟؟
أمال: معرفت….
أمال: (قلبت وجهها غير شافها زهير دارت ديك الحركة بحال عيطاتلو جاي قاصدهم محمد كيعض فشنافتو التحتانية كيتسنى جوابها حتى وقف حداهم زهير)
محمد: أمال غتبقى واحد السيمانة وغنجيبها لوجدة لسيتي تكمل قرايتها ونهار تبغي تخطب غتعيطلي نجيبها لدارهم واجي مرحبا بيييك
زهير: (حس بيه مرضاش حيت مشي كلامو علييهم وعذرو ولكن) سمو ݣلتي نتي امل؟؟
أمال: (شافت فخوها) صافي واخا
محمد: مزيان (تبسم بلا متوصل لعينيه) ياله نمشيو للدار
أمال: امم غرجع مع هند
زهير: انا نمشي معاك اصلا باغي نهضر معاك
أمال: (مشات من حدااهم وهي حاسة بطاقة كبيرة فيها نورمال الاب منين يموت كيكسر الواحد وهادشي بان فمحمد عكسها هي واخا قالت للي فقلبها ولكن ضميرها أنبها مشات حدا هند ووليد)
وليد: ياكما غوت عليك داك الجحش؟
أمال: لا (تبسمت) بلعكس رغبني نبقى سيمانة وهو يردني لوجدة
هند: محمد رغبك؟؟
وليد: بحال واالو اهند منين رجع وهو فشكل الواحد كيتبدل (قوس عينو فمحمد للي من لبعيد كيهضر مع زهير) مهم ياله نطلعو ونتي اهند صبري غدا ونوصلك لوجدة ونديو حناك لفاس
هند: (تبسمت) غتمشي معايا؟؟؟
وليد: (مجوبهاش ركب وركبات حداه فرحانة وأمال اللور كتفكر غير فخوها محمد.. وصلو للدار وهوما كيتكلمو على محمد وصلو كانت طموبيلة ديال محمد مكيناش طلعات أمال كانت الدار مسطوكية مقداتتش دخل ولكن الحاجة للي تماك دخلات كانت معاها هند كانو جالسين ففلبيت صغير للي فيه تلفاازة جلسات امال حدا الحاجة للي كتنصحها بصبر وهند بالفرحة مصبرتش وعاودات ليها على وليد لقاوها كوول وتصنصحها وتعااود ليها الطرائف لدرجة أمال نساات انها فݣنازة ديال باها فرحت بزااف زهير طبق الاصل على مو بقاو كيهضرو حتى شافت واحد لمرا داخلة لابسة كولشي بيض استغربااات قالت يمكن هادي شي وحدة عاد ميت ليها الرااجل شوية طلات عليها مريم كتعيط ليها)
مريم: امال اجي (ناضت وحضات بيجامة ديال امال للي عامرة غيس) هند سيري عند أمال ݣولها تبدل ببجامتها راه مسكينة مرظاتش لبال للغيس
هند: واه راكي عارفة بقات شحال فقبر بااها
الحاجة: (تنهدت) مسيكيينة بنتي تيتمات على صغرها
هند: اوا لمكتاب الحاااجة
أمال: شنو اختي
مريم: (تمشات وتبعتها أمال بشوية مبعدين على الناس) خالتي لداخل فبيتنا محيحة على واحد لمرا كتݣول هي مرت عمي مصطفى الله يرحمو
أمال: (شهقت) احاااااااي واش سمعتيها؟؟
مريم: واه راهم لداخل هي وماما وخالتي
أمال: (بقات مصدومة) دابا تقتلها
مريم: الا (سكتت شوية ممتيقناش من جوابها) زعما؟؟؟
أمال: واش كبيرة ولا صغيرة؟؟
مريم: اختي باينة كبيرة شوية ماشي زعما شي وحدة صغيرة
أمال: (تحل لباب شافت مها خارجة مطرطقة عينها بداك الوجه للي كيخلع وتكون معولة على خزييت غير شافتها أمال محسات غير خرجت كتجري حيت غتسبي فييها ان باها تجوج عليها حيت ولدات بنت ومبقاتش تولد محداتهم غير لتحت بانلها خوها وزهير مزال فالطموبيل كيهضرو مشافوهااش… ضارت الدورة وبقات كتزرب فمشيتها هااربة من الاتهام للي غتعطيها مها عااود وتحملها شنو دار باااها….)
يتبع
شاركنا رأيك في هذا الفصل 🌹