بيدها دورها كيضحك عوال ع ليها ، اما هي غير كضحك عليه حيت ماعندو ماياخد منها من غير خيبة امل
سكينة: بلاااتي.. وابلاااتي نتفاهمو
رخا ليها كيتسناها تمشي بالخاطر
غالي: فاش غنتفاهمو
ناضت سخفانة كتجمع شهرها وقالت بوحهها احمر
سكينة. غندير انا وياك اتفاق.(جاتها الضحكة) حيت نتا انا عااارفاك مغتبعدش مني وغتبقا كدور بيا
هز حاجبو كيشوف فيها ويضحك بمكر .. جابتها ليك لاسقة
سكينة: كتنفس بتعب) دابا سمع(ربعات رجليها) غدا نمشي انا وياك ياك… نمشيو عند طبيبة .. الى كنت ماشي بنت دير اللي عجبك.. كاااع داكشي اللي باغي دير…والى كنت بنت غتبعد مني تافقنا
سكت بقا غير كيشوف فيها زربات عليه بهاد القضية لاكن مع ذلك مادخلاتش ليه راسو وباغيها بالخاطر ماشي بالعنف وجلس كيسايس
غالي: دابا نتي كتخرجي وكتلعبي وباغا تحمقيني واش انا ( دار صباع على راسو) عندي الودنين
سكينة: شادة الضحكة) هانتا غييير باش تفهم .. راه ماشي اي وحدة كتخرج راه كدير داكشي اللي كيحسابك !!! كاينين البنات كيخرجر باش ينشطو مع بعضياتهم… اما داك ال زبلان كاااع ماكيجلسو معاه واحق الله نحلف ليك على القرآن انا كاع
غالي: ميل واسو) وكتشطحو ليهم !!!
سكينة: هزات صبعها) مااااشي كولشي!!!… والله ماشطحت .. مكنعرفش نشطح داك الشطيح .
غالي: شوفي .. انا ماباغيش نفهم هادشي هادا كااامل.. ديري معايا حل
سكينة هزات حاجبها) اشمن حل!!! نتا والله حت مريض!!! واش عندك خواتاتك ياك!! عندك
غالي: وبلاااا متبداي عليا عندك خواتاتك وديك الهضرة تفيقي عليا الضمير زعما.. انا كن بغيت نشدك نشدك مانحيرش فيك
سكينة: حتى وانا رالله كن كنتي شي شماتة مانجي معاك .. عارفاك ولد الناس
قالتها ورجعات اللور كتشوف فيه بنص عين .. تراجع بهدوء كيضحك وقال هاز صبعو حدا ودنو
غالي: تبتييييني بدبك الهضرة… غدا نوريك ولد الناس من ولد لحرام
جرات المخدة شادة الضحكة كتشوف فيه بنص عين وهوا غادي جاي كيدورها فراسو
غالي: عااااندك الزهر .. طحتي معايا ماشي مع شي مكبوت يطلق فاسيان فالسقف رجل هنا ورجل لهيه ( شار بصبعو)
سكينة: لالا ولد الناس نتا انا كان عندي احساس
رد كيحرك راسو عاطيها بالضهر
غالي : مابغييتش ندير فيك راسي…نتي وااااااحد
دور راسو وضار كيشوف فيها كانت كضحك فخفوت وجمعاتها بسرعة شافت فيه بجدية ..
جمعات الضحكة ودارت يدها على فمها.. اما هوا بقا غير واقف وكيشوف فيها.. ماكرهش يشدها ينشرها لاكن ماشي من طبعو شي وحدة يتعدا عليها ولا تسمح ليه نفسو يقيسها بلا رضاها . واخا عندو رغبة قوية لاكن كيضرب حساب للعواقب وكيشوفها كائن ضعيف تكون كما بغات تكون كتبقا بنت وماعندوش الحق يتكرفس عليها ويقتاحم جسدها ضلما وعدوانا .. تراجع بقا غير كيشوف فيها وخلاها مشا توضى ورجع طلق السجادة قدامها وهي كتشوف فيه بنص عين وضحك عليه بخفوت .. صلى العشا وعاود صلى جوج ركعات ينهيوه على المنكر اللي كيدور ليه فالراس وهي معاه فالبيت .. مكانش مخطط لهادشي.. كان كيضن غتوافق بسهولة مدام مشات حتى لعندو فأكيد عندها كلشي مباح .
سلم وهي كتشوف فيه بنص عين مستغربة حتى ضار شافيها كيتمم الدعاء بفمو
سكينة: مرضتي الشيطان… هانتا معاه هانتا ضدو !! حمقتيه
كمل الدعاء كيضحك وناض كينعل الشيطان ويطوي السجادة غالي: كحزي لهيه (شاف الساعة) غدا عندي فوغماسيو مع التمنية.. غنرجع مع طناش نتبعو هضرتك .
سكينة:هزات حاجبها ) كتهضر بصح غنمشيو عند طبيبة!!
غالي: ببرودة) نتأكد راسي شدانا لهاد الطبيبة كاع
سكينة: دابا نتا جبتيني معاك غيير على هادشي!!
غالي: بسخرية) وانتي من الاول بادية هاكا!!
سكينة: كحزات للجنب) لالا خليييني نمشي للطبيبة حسن ليا
تكا حداها داير يديه تحت راسو لاكن ناضت كدور فعينيها
سكينة: اصلا الصهد الموت .. انا غنمشي نعس حدا داك السرجم .. عزيزة هليا الارض
شافت فيه بنص عين ومشات طلقات واحد الغطا فوق الموكيط اللي كان مطلوق فالبيت كامل وحطات وسادتها وهزات ليزور ومشات تكات جنب النافدة الطويلة اللي كانت محلولة من السقف حتى للارض الهواء بارد كيدخل والضو طفا .. غالي حيد تيشورط وتكا كيشوف فتيليفون وسكينة كدور فعينيها مامولفاش تنعس بكري
سكينة: غالي عطيني تيليفونك نحل فايسبوك ديالي
تلفت للجنب جر تيليفون اخر لاحو ليها فوق السرير
غالي: هاكي هادا
ناضت خداتو ورجعات بلاصتها حلاتو مشات للفايس بوك مباشرة حلات حسابها وجلس واحد شاد تيليفون فبلاصتو حتى شافو طفاه وتقلب على كرشو للجهة لاخرى نعس وبقات هي جالسة فالشاط هاكا بالاك والفوحان مع اللي كتعرف مكاين غير انا مسافرة انا مدوزة الصيف فباغي حتى بدات تعيا وداتها عينيها ونعسات .
صبح واقف لابس سروال التوب كلاسيكي اسود وشوميز زرقاء والسمطة.. اللي شافو يقول الراجل المثالي.. حلم اي بنت شكلا ومضمونا.. الجسد المطلوب والقبول ..مسرار متول ونقي والريحة عاطية..دواق والوقفة والمشية والكاريزما .. الختورية كتبان عليه فديك اللحضة وهوا كيسد الساعة .. هز لافيست. ديالو لبسها وشاف فيها كامن فالارض عاطياه بالضهر الشعر تحل كل طرف فين مرمي ورجلها عوجة ..كتنعس مشتتة وفمها محلول .
هز تيليفونو وخلا ليها التيليفون الثاني حداها وخرج
مع العشرة بدا الدقان الباب …. كانت كتسمع وهي غارقة فعز النوم لاكن ماقدراتش تسوعب.. موراه بنص ساعة. رجع الدقان و رجعات كتبرزط فنعاسها من جديد.. موراه مع الحداش تعاود الدقان وتقلبات على جنبها بملل.. الحداش ونصف حلات عينيها على نفس الدقان ورجعات ضارت للجهة لاخرى سادة ودنيها ..
طناش تحل الباب ودخل غالي لقاها مزالة فبلاصتها ناعسة ومشا عندها مباشرة جلس القرفصاء كيفيقها ويحركها بصعوبة باش قدرات تجلس سخفانة ماقادراش تهز يديها
غالي: هي طناش!!! نوضي دغيا مزال راجع للفوغماسيو يالاه..يالاه غيمشي الحال على لغونديفو
سكينة: شافت فيه بنعاس) اشمن رونديفو
غالي: رونديفو اللي درنا لبارح .. يالاه نوضي
وقفها بزز دايخة كتمشي وتجي.. عينيها تقال وطلقها مشات كتعتر فشنطتها للطواليط .. تعاود الدقان فالباب ومشا فتح كانت خدمة الغرف.. بنت شقراء هازة معدات التنضيف بدات كتهضر معاك بقلق وتشكي ليه على المحاولات العديدة اللي دارت بدون جدوى.. اعتذر منها وسمح ليها دخلات بينما مشا للنافدة وقف وهي كتنضف بطريقة سريعة .. خرجات سكينة غاسلة وجهها وكتحل عينيها بزز لقاها كتمسح الموكيط . حيدات من حداها ومشات هزات حوايجها
غالي: تلفت) ماسمعتيهاش دقات عليك؟
سكينة: لا!!
حرك راسو بالايجاب عطاهم بالضهر بجوج داير يدو فجيبو حتى وجدات وخرجات معاه لابسة كسوة مقزبة من الفخاد واليدين كحلة قصيرة مزيرة ولايحة عليها قميجة بيضاء طويلة والشعر مدفور يالاه خرج استعمل التطبيق من تيليفونو وحانت السيارةكتسناهم ركبها وركب حداها وهي كضحك عاد توضات ليه
سكينة: كنتخيل وجهك !! فين غتعطي بالراس
غالي: جاتو الضحكة وشاف فيها بنص عين ) هاحنا غنشوفو.. الواعرة هي الى خدمتيني على والو
دورات وجهها كضحك وتفرج وكحزات عليه شوية كتقاد
سكينة. صورني
غالي: دابا وقت التصاور؟!!
سكينة: باصرار) واصورني.. يالاه.. صورني
تقادات وجبد تيليفون صورها وعطاها شافت ماعجباتهاش وقال
سكينة: مازويناش عاودها
عاودها المرة الثانية وماعجباتها والمرة الثالتة هددها ميعاودش يصورها وقبلات باي تصويرة
دخلات للعيادة مع الموعد مباشرة .. ضارت كتشوفيه تابعها وضحكات
سكينة. غدخل معايا
غالي: زيدي وسكتي
دخلات والضحكة على فمها .. كتسمع وشي كتفهمو وشي مكتفهموش فالحوار ديالو مع الطبيبة .. دخلات لغرفة الفحص وكان فاصل بيناتهم ريدو من ورق كيتطوا فقط .. كان غادي جاي ويديه فجيابو كيفكر قدام داك الريدو الاخضر وسكينة لداخل شادة الضحكة والطبيبة كتفحصها ..فلاتها من جميع الجهات عاد ناضت خرجات كضحك وتقاد القميجة .. بقات واقفة ماجلساتش الا هوا اللي جلس تقابل مع الطبيبة بدات كتهضر معاه فالفرنسية وسكينة متبعة تعابير وجهه اللي تحولو للجدية وبدات كتبان عليه الصدمة .. اش كاين كيقول واشنو كانت كتقول مافهمات والو ..اللي فهمات هوا انه عرف الحقيقة وبانت من خلال نضرتو ليها اللي نوعا ما حس بالاحراج
خرجات قدامو على وجهها الضحك وحابساه حتى للزنقة.. اما هوا تلف ماقدرش يستعوعب!! على بالو جايب معاه بنت متاحة فأي وقت او كانت كتعاند وتتكبر!! لاكن اللي سمع مكانش ضارب ليه الحساب! خلاها يسكت ويهزها فدماغو وكتر فيه التناقض.. من جهة ماعجبوش الحال حيت مكان هاز هم وناوي يدوز الوقت وعاجباه.. دابا رجع مسؤول فجأة على بنت دارهم !! طايشة وهوا اللي سفرها بيديه وخرجها من بلادها !! عندها اب وام واسرة تماما كما حتى هوا عندو اسرة واخوات! عرف باللي البنت اللي معاه ماعندها عقل! وغامرات معامرة كبيرة وماضرباتش حساب للعواقب! .. حس براسو تشمت من واحد الناحية.. ومن جهة اخرى تأسف على سوء الضن!! كيبقا انسان عندو مبادئ وعندو اخلاق واخا عندو شهوات.. كبر فبيئة نقية وكيراعي للغير.. شاف راسو غلط غلطة كبيرة وماحكمش عقلو وخلا النزوات يأثرو عليه.. خايبة فحقو وماشي ديالو وماشي قدها باش يدير راسو فيها ويتعاند معاها !! هادا هوا اللي دار راسو فالبراهش وصبح فاطر! عاد فاق وعرف شكون جايب معاه!.. جايب معاه منتيف متبوع ويقدر يدير ليه مشاكل هوا فغنى عنها. ماشي وحدة مطلوقة ماعندهاش مشكل وماعندهاش اللي يسول عليها! هنا عرف صنفها ولمن كتمني.. لدوك البنات اللي كيبغيو يبانو واعرين .. باغين يكبرو قبل الوقت.. كيطيرو ومتبوعين بالمشاكل.. كيبغير يفهم فكلشي وكيحساب ليهم راسهم مطورين . وهاد السفر هادا فحد داتو كلاخ !.
رجع للرشد ديالو وتبدلات نضرتو ليها .. هز هم مكانش ضارب حسابو.. وتلاشا داك الاعجاب وداك الشغف بلمح البصر .. لحسن الحظ ماكلاش مخها بالهضرة واخا ناوي عليها .. كانت تقدر طيح فيه .. كان قادر استعمل معاها اساليب اخرى يخليها تبغيه..تضعاف ليه !
شاف فيها كضحك عاجبها الحال حيت صدماتو وكتحس بالانتصار .. رسم ليها بسمة باردة باش ميقمعهاش ووصلها للاوتيل حتى لبلاصتها وتلفت كيطوي الورقة اللي عطاتو الطبيبة فالجيب
غالي: حتى نجي فلعشية ونهضرو فهادشي
خلاها كضحك وهوا غير كيشوف .. عارفها عاجبها الحال لاكن داكشي مكعجبش.. سد الباب مشا بقات هي كدور لقات الفطور فبلاطو محطوط.. فطرات وشبعات ورجعات للتصاور والفايسبوك لعشية كلها حتى رجع. دخل لقاها واجدة كتنساه
سكينة: قلتي غترجع نخرجو
حط الحاسبو فالجنب وحيد لافيست وشار براسو ليها وقال مع بسمة خفيفة
غالي: جلسي بلاتي.. باغي نهضر معاك
ربعات يديها وجلسات كدور عينيها بارتياح .. الشعر مسبسب والقصيصة .. البرائة فعينيها وكانت. باينة ماشي من بنات الزنقة.. ربما تعاما لاكن وقف على كلام امين اللي قاليه راه ب بنت دارهم . فعلا عندو خبرة وبعد النضر اللي مكانش عند غالي بسبب التصرفات اللي كلنت كدير و داكشي اللي كان كيشوف عليها
صلى وسلم وهي كتشوف فيه وضحك .. مابغاش يقمعها فاش ناض لاكن ماضحكش معاها.. حط السجادة وجلس جنبها بدجينز وتقاشر بيضين وتيشورط كحلة.. تقابل معاها وتكا على ركابيه كيشوف فيها مطولا ويخمم .. اما هي حابسة الضحكة ويدها على وجهها وقالت
سكينة: مالك كتشوف فيا!
غالي:عقد حجبانو كيتسائل ) شنو قلتي لداركم باش تجي لهنا؟
سكينة: بعفوية) دابا غنبقاو كنهضرو ؟ غيمشي الحال !!
غالي: شد الساعة بيدو شاف فيها) مزال الحال .
عاود شافها بنضرات كتكرر نفس السؤال
سكينة: مشاو للبلاد.. بقيت غير انا وختي
غالي: شيك اصابعو برزانة) ماخفتيش على راسك؟ امم؟ …… ماخفتيش باك يحصلك؟… ولا ترقع ليك شي حاجة؟ …… يتعدا عليك شي واحد؟
دورات وجهها بملل مابغاتش تسمع هاد الهضرة والنصائح وبقات كتسوط فصمت .. اما هوا بقا غير كيشوف فيها فهمها مافيها اللي يسمع لاكن كان خاصو يهضر معاها
غالي: مشطها بعينيه) علاياش كتقلبي ؟ على شي واحد يكرهك فحياتك كوولها .. ماتبقايش قادرة لا تخرجي لا ضحكي… حتى الضحكة ماتقدريش ضحكيها!! ….. ماكتخافيش على راسك ؟ …..بنت زويونة اي واحد يبغي يطمع فيها…. كن طحتي فشي واحد مريض كان يتعدا عليك كما بغا .. يبيع ويشري فالأعضاء ديالك ولا من يجيب ليك الخبار.. مايعرفوك واليديك ميتة ولا حية و لافين مشيتي!… … عند بالك الحياة ضحك ولعب وصافي!! … شنو قصة دوك الاكراميات وعلاش كتمشي ؟ على قبل الفلوس؟! امم؟
ميعات كتشوف فجنابها مارضاتش.. طلع الستار وعرا ليها على جنابها نيشان بلا زحتى تحرجات
غالي: يعجبك الحال تمشي تسهري على اساس نتي ق٠٠٠٠ ؟ ….. كلشي ينعت فيك وكن غيير كنتي فعلا ….. نتي ماشي هاكاك وباغا تكوني ق٠٠٠٠
سكينة: عقدات حجبانها مارضاتش) لهلا يحييك
غالي: بسخرية) وراه هي هاديي!!!! نتي باغا تخرجي باغا تعراي باغا تعيشي حياة الق٠٠٠٠٠٠ ماشي حياة بنات ديورهم كينقزو غير فجنابهم وكيخافو على راسهم!!… (شار بيدو. بصرامة) نتي عزبااا كديري داكشي اللي كيديرو. بنات الزنقة اللي ماعندهمش علاش يخافو!… خافي غي على راسك بعدا .. يتكرفس عليك شي واحد …. راهم ق٠٠٠ب وكيخافو على راسهم … ماوصلوش لهاد النيفو اللي وصلتي ليه نتي!!..حتى لفييين اسكينة حتى لفين؟ عاجبك هادشي؟؟
حسات بالقاصح وبقا فيها الحال وناضت .. جاتها البكية لاكن حبساتها فعينها ومالقات باش ترد.. مشات جهة النافدة كتشتت النضر فصمت وبقا هوا جالس على نفس الوضعية متبع ليها عينو كيشوف فيها ويطلع ويهبط .. مقزبة رجليها عريانين البودي عريان من الضهر والشعر مطلوق … الصباغة فاليدين والرجلين … زوينة وكيوت وخسارة يضحك عليها شي واحد.. يدمرها ويدمر ديك الصورة .. خسارة ماعطياش قيمة لراسها .. اللي شافها يحسدها .. واي واحد يطمع فيها والى طاحت فيدين شي واحد مغاديش يرحمها .
ناض وقف كيتنهد بحسرة مشا داير يديه فجيابو وقف حدا سبرديلتو كيخشي فيها رجلو وقال بدون ميشوف فيها
غالي: هزي معاك شي حاجة كيتحرك البرد بالليل
تأثرات من كلامو حتى بقا فيها الحال لاكن فور ما شافت برج إيفل حلات فمها ونسات داكشي اللي أثر فيها بالحرف. هزات فيه عينيها بانبهار كتشوف هنا ولهيه واللي داز حداها كيبدا يشوف فيها بديك القصيصة والشعر الطويل الملفت للأنضار. كان غالي كيلاحظ نضرات الناس ليها وهوا وراها واقف حاشي صبعانو فجيابو ومجبد فالوقفة دافع صدرو وعروق يديه كيبانو الا هي اللي حالة فمها فبرج ايفل
سكينة: واش كيطلعو لفوق؟!!
غالي: هز يدو شاف الساعة ) مشا الحال .. خاصنا نجيو شوية بكري
سكينة: بالغبينة) بصح!! واغير شوف واش باقي
غالي: راه البارا سادينها ماشفتيهاش!!
رجعات اللور بملل كدوز يدها على شعرها
سكينة: صورني
تحمسات ووقفات هازة رجل اللور ويديها فالهوا وهوا كيشوف فتيليفون باغي يصورها ويضحك
سكينة: غير بقا كتصور يالاه تصدق وحدة
غالي: هاهما سبعة
رجعات كتجري عندو وتشوف فتيليفون بحماس
سكينة: صااافي.. هاكا مزيان
غالي:مد ليها يدو) يالاه نتحركو
شدات فيه ومشات حداه فشوارع باريز .. راسها واصل لكتفو ..كان لابس كويرة كحلة دالجلد وتيشور من لتحت وهي لايحة عليها كاب ناعم بني شاداه بيد وكيتساراو كل واحد فين كيشوف ..بقاو غادين جارين والدنيا عامرة .. كل مرة شنو يشري ليها ..غادية وكتاكل وساهية فالناس غاديين كيتباوسو حداها .. فينما تشوف شي جوج جوج مشادين فالبوسان كتبقا حاضياهم حتى كتبعد ..
دخلو مع شاورع ضيقة شعبية فيها لاختيزانا ديالهم ودوزها قدامو وشد فكتافها بجوج غادي موراها فالزحام والبيران محلولين كاشي معرين كلشي كيشرب على برا وهي مخرجة عينيها مصدومة والموسيقى مطلوقة متبعة لدوك الحانات عينيها وضارت قالت ليه باستغراب
سكينة: عندهم داكشي معري!!
غالي:هز حاجبو) اييوا ..تاقافتهم… (غمزها) حنا مسلمين.. هما غرب
بقات غير مصدومة فدوك البيران المعريين وكلشي كيشرب على برا .. مامولفاش بداك المنضر ومامتعوداش عليه ماقدراتش تستوعب بسهولة.
خرجها منها تما حتى هوا تخنق فديك البلاصة وداك ا لقرف اللي كان كيشوف فالبنات والبوسان والحركات المقرفة وردها لاوتيل سخفانة بالمشية وفيدها كارطونة فيها الماكلة وصاك فيه السقاطة والمشروبات باش تتنوس راسها فغيابو .
لقاو البيت مرتب مقاد .. دوش ولبس شورط وتيشورط وهي جلسات على طرف السرير قدامها طبلة حطات ديك الكارطونة والصك ولوات شعرها فالسما خلاتو واقف كيهضر مع شيماء ومتكي على النافدة .
كانت مشهية ديك السلطة اللي فوقها براعم النبات الرقيقة وقشدة طرية ..شراها ليها بشهوة منها مرافقة لبعض الاطعمة اخرى .
كملات ماكلتها ومشات وقفات حداه وتكات على يديها جنبو كطل فصمت حتى كمل المكالمة وشافت كضحك
سكينة: شيماء مسكينة طاااحت فيك… عنداك تقولبها ولا ضحك عليها
الليل والضوء فالبيت هادي.. البرودة داخلة مع ديك النافدة الطويلة فين واقفين، رجع تيليفون فالجيب شاف فيها وقال بتحايل
غالي: نتييي… نتييي حااايلة مع راسك
سكينة: هزات راسها كضحك) مالي اش قلت ؟؟ مسكينة كتبغييك.. بنت الناس ماتلقاش ماحسن منها
غالي: قلب عينيه لجهة اخرى ) نتيي راني قلت لييييك داك الراس عندك خصو يتهرس.. كتفهمييي كتعرفي العجب
سكينة: شداتها الضحكة) دابا ب بيني وبينك .. علاش ماديرش عقلك وتكون اسرة ؟ ها شيماء كتبغيك كتحماق عليك.. تعيش معاها فوق السلك
غالي: تكا بيديه اللور عكس النافدة) ونتي شنو الدور ديالك فالحياة؟ تنصحي ؟ (صغر عينيه) راه داك الرااس الى حليتو … (خرج لسانو) دابا شنو بغيتي ؟
سكينة: هزات حاجبها) اش غنبغي؟؟
تدفع جيهتها قرب منها حتى لسقها مع السرجم فحركة تحرش وبدات كدور فعينيها .. بعد الشعر على جبهتها كيشوف فيها عن قرب ونزل يدو مع خدها حت لدقنها شدو بيد اصابعو وهز ليها راسها كيتأمل ملامح وجهها ويدو الثانية على دراعها حسسها بأنوثها فحراكات حنينة ونضرات معبرة خلاو مشاعرها تحرك وقرب لشفايفها بدون مادير حتى رد فعل.. كانت عيونها اللي كتحرك فقط وتشوف فيه حتى كان غيبوسها لاكن فاجأها
غالي: بصوت منخفض خشن) دابا جيتي بين يدي.. تخلصي على كاع داكشي اللي درتي
فيقها من سهوتها فجأة وتحولات نضاراتها للدعر وفطنات براسها ودفعاتو اللور وهوا كيسوف فيها بابتسامة جانبية وحاجبو مرفوع زعما طحيتك
مشات هربات الحمام سدات عليها حتى تسمعات الساقطة وتقنتات مع الحيط كتنهج وقلبها كيضرب بالجهد!! .. مافهماتش شنو وقع ليها ؟ لاول مرة نرتاح فشي لمسة .. لاول مرة ماتنفرش !! لاول مرة نحس داك الشعور وداك الخفقان اللي تكول لخوف فجأة.. كانت غير كطنز عليه باغا تعرف من باب الفضول فاش كيفكر حتى فاجئها بشي حاجة خلاها تحس بأنوثتها بهاد الشكل لاول مرة فحياتها .
غالي: خرجي واه كنضحك معاك خرجي
سمعاتو قالها من البعيد وحلات الباب كتشوف فيه بنص عين كتحاول تستوعب .. تباع ليها اللسان مابقاتش هضرات.. اما هوا كان مزال بلاصتو كيشوف فيها بنفس النضرة .. بنت زوينة ضريفة كيعاملها بحال شي وحدة صغيرة . تقلب عطاها بالضهر كيضحك ورجع طل من النافدة .. لاكن هي تبدلات نضرتها ليه فديك اللحضة.. حسات بالضعف ومشات زعامتها ولسانها الطويل وتسلل لقلبها الشعور بالخجل.. جلسات على طرف الناموسية ساكتة شادة تيليفون فيدها وعينيها عليه كتأمل فيه .. فوقفتو .. فضهرو ..فشعرو .. بدا كيبانو ليها معايير الرجولة والاعجاب بدون ماتحس .. بدون ماتنتابه لراسها قادها احساسها فالتأمل بدون تفكير حت تلفت وهبطات راسها بسرعة شافت فتيليفون
شافها جالسة شادة تيليفون وقال كيضحك
غالي: اماالكي تلفتي؟؟
سكينة:عقدات حجبانها وشافت فيه) خلعتيني .
غالي: بشبح ابتسامة) خلعتك !
كان حاس بيها ضعفات من لمسة ولو كمل كانت غتجاوب معاه .. ولو زادها جوج كلمات كانت تقدر طيح فيه..لاكن بغا يبين ليها شحال ساهل عندو يضحك عليها لاكن مابغاش.. فقط بغا يفيقها .
هاد الحركة بالنسبة لسكينة قمعة .. مارضاتش وتصدمات فراسها وفنفس الوقت ماحملاتوش على ديك القمعة اللي دار ليها .. طيح بيها فالارض لاكن داواتها وتغابات وكملات معاه باش ماتبقاش مزيرة وقالت بميوعة كتشوف فيه بنص عين
سكينة: اممم… راه عادي فين كاين المشكل!! مالي انا ثلاجة
دور وجهه كيضحك وغير نطقاتها برتاحت وكملات قائلة
سكينة: اي واحد دار بحال هاكاك لشي بنت راه كتسها!! انا غير سهيت
غالي: هز حاجبو كيضحك) سهييتي!!
سكينة: قلبات وجهها ) اه غيير سهيت !
غالي: وا هاد السهوة عندك غتديك لهيييه شي نهار(شار بعينو جهة الفراش)
سكينة: بززاف عليك … (هزات صبعها )شوف اخويا ماتعاودش تقرب مني الله يحفضك.. عندك صاحبتك حتارمها ماشي فعايل هادو!!
مسح على لحيتو كيضحك ويحرك راسو يمين يسار وضار عطا وججهه للشارع كيشوف ويضحك بوحدو وقال
غالي: نتي خاصك الزيار شوية.. بان ليا باك رااخف ليك
سكينة: بغات تعطيه صبع ورجعات جمعاتو) واسييير سير اخويا بغيت نعس حيد من تما
مشات هازة شراوطها بغات تفرش لاكن تلفت عندها شار بعينو وقال
غالي: سيري نعسي تما غير سيري.. انا غنعس هنا
حطات ليه الفراش حدا رجلو ومشات ترمات على الناموسية طلعات عليها الغطا وتخشات تحتو شادة تيليفون كتلعب بيه فصمت بينما غالي متكي على ضهرو ويدو تحت راسو طالق رجل وهاز وشاد تيليفون عاطي وقت لشيماء .
نفس التبرزيط .. الدقان كل نص ساعة مللي كضرب التسعود.. خربقاتها فام دميناج فنعاسها ومرضاتها حتى ناضت حلات ليها الباب معصبة كتسوط عين محلولة وعين مسدودة ورجعات نعسات غرقات فالنعاس حتى رجع غالي مع الخمسة ودخل لقاها مزالة ناعسة .. مشا حط لافيست فالجنب وجلس حداها عرا ليها الغطا الابيض على وجهها طل عليها وبعد ليها الشعر عل وجهها كيفيقها
حلات عينيها وجمعات فمها ناضت حناكها حومر بالنعاس جلسات وهوا متكي على جنبو بشيح الابتسامة الجانبية كيشوف فيها
غالي: قالك البنت باش تعرفها مسرارة شوفها فاش يالاه كتفيق.. كينزل عليها سر النعاس
ضارت عندو مزالة دايخة وقالت
سكينة: فين غنمشيو ليوم؟
غالي: تهز من حداها كيضحك ) وانوضي بعدا وحلي عينيك الخمسة هادي
لاحت الغطا وناضت للروتين
خرجها هاد المرة لمعلمة تاريخية ..“notre dame“ لقات الناس كيتصورو قدام جمالها وبدات حتى هي كدور ليه من ليمن ليسر كتصور بكسوة قصيرة بحال الوردة وردية فاتحة فيها رسمات دالورد كبار .. مزيرة على الكرش والصدر والضهر عاري مشدودة بسميطات على الكتاف وكلوش من الجزء السفلي.. رجليها كيلامسو بعض بنعومة وصنيديلة بلخيوط والشعر منسدل وراء الضهر ولقصيصة والصاك صغير طويل محملاه بالجنب. كان واقف قدامها لابس شورط ازرق غامق مع حداء رياضي ابيض وتيشورط بيضاءوعلى كتافو تريكو خفيف من القطن ازرق غامق رابط يديه على صدرو ونضرات شمسية بنية شاد تيليفون كيصورها وفيدو ساعة يدوية فاخرة وخاتم فضي
سكينة: بدلع) غالييييي عاود صورني هاكا
تقلبات هاز وجل وكتف كيصورها ب ابتسامة رضى حتى شبعات ومشات شدات فيدو كضحك
سكينة: فيا الجوع طلق منها ودور يدو وراها عنقها
غالي : نديك لواحد البلاصة زوينة غتعجبك
سكينة: بمزحة) فيها الماكلة؟
غالي: فيييها الماكلة
دوزات يدها ورا ضهرو كضحك شدات فيه حتى وصلها لجسر مايئ بالقفال الغرامية المعلقة .. تما طلقات منو وتقدمات بعفوية وقفات الوسط وطلقات يديها
سكينة: صوري هنا
خدا ليها صور كثيرة كل مرة بوضعية وبغات حتى هي تعلق قفل .. كانو اصحاب الاقفال كيبيعهم فالارض خدات منهم واحد طويل احمر كتبات على سميتو ” سكينة شينوية “
بغات تعلقو لاكن وقف عليها غالي هاز حتجبو بمزحة
غالي: وفين انا ؟؟
ضارت كضحك كتبات تحت سميتها غالي لاكن خدا منها القفل وقال
غالي: اري نوريك اري..نعلمك كيفاش تخلي الذكرى ماتعرفي شي مرة ترجعي لهنا تفكريني
كتب تحت الاسماء التاريخ وردو ليها شداتو فأول الجسر باش تعقل عليه في حالة ما رجعات شي يوم من الايام. دخلاتو بين الاقفال وسداتو وناضت كتنسح يديها
غالي: كيمد ليه تيليفون ) هانتي صورتك يالاه ..ماتقوليش ماخدامش معاك
شدات تيليفون كتشوف فالصورة بإعجاب وبالفرحة عنقات ليه دراعو كترعد عليه بغات تنقز
دخل شاد ليها فيدها لمطعم صغير تونسي . . تما كان متافق مع زملائه فالعمل يتلاقاو مجموعين . دخلات مافهمات والو بقات غير كدور فيعينيها وهما كيشوفو فيها .. هاد الدخلة كانت سيف حاد فقلب حكيمة اللي كانت من ضمن دوك الافراد الستة اللي جالسين .. من بينهم هي وجوج نسا وثلاتة دالرجال مجموعين كاملين على مائدة وحدة صافحهم كاملين برزانة وشار بيدو للنساء اللي كان من ضمنهم وحدة متزوجة ..و الاخرى مخطوبة شعرها قصير وحكيمة بالحجاب واللبسة محترمة تزيرات وحطات الماكلة من يدها بقات كتشوف فيه بخبية أمل وحزن نابع من عيونها ،خفاتو بابتسامة وكتشوف فسكينة مصدومة .. اخر توقعاتها كإمرأة محترمة لمسات فيه المعقول والحياء والاحترام يكون فجعبتو بنت بحال سكينة فديك اللبسة والشعر يستحي الواحد يطلقو كامل والفتنة كلها كتمشى على رجليها.. باعات الغصة بينما سكينة كتشوف فيهم بابتسامة خجولة حتى هي مكانتش متوقعة يلاقيها بيهم وقربات شادة فصاكها الصغير بيديها بجوج شافت وحدة منهم صاحبة الشعر الاسود القصير ناضت عندها سلمات عليها بوجهها وقربات من البقية حتى هما سلمات عليهم بالوجه بارتباك وجلسات جنب غالي كدور فعينيها بخجل كتشوف فيهم بنص وتشتت النضر بينما النساء كيشوفو فيها وفشكلها ..كاين اللي بان الاعجاب من بريق عينيها وابتسامتها وكاين اللي تخلعات من شكلها وبدات الصدمة فعينيها واخا عيات تخفيها ، من بين الرجال بثلاتة كان أحمد جالس واللي سبق ليه شافها فاش مشا معاه المقهى وفاش تعرض ليها فالمحطة .
لحضات من الخجل .. وكل ما زادو نضرات النساء ليها زاد خجلها وهي كتلعب بشعرها با اذافرها الجميلة بعفوية
مد ليها غالي لائحة الطعام ليدها ويدو ورا الكرسي ديالها مايل براسو عندها وقال بمزحة غير بينها وبينو
غالي: لحم اللحوف اللي كاين كيجي فستيك بنين
حلات عينيها وشافت غيه كترمش وقالت بخفوت ويدها حدا فمها
سكينة: اويلي !! زعما كتصلي!!
دور وجهه كيضحك ورجع تلفت عندها
غالي: كلشي كتربطيه بالعبادة … الاللة مكاين لا حلوف لا حمار غير كولي بالصحة
هزات عينيها كتشوف فطباسلهم بنص عين وميلات راسها بخف
سكينة: بحال هاداك
حول عينو لطبق حكيمة ورجع كيقلب عليه فالائحة
اما حكيمة تسدات ليها الشهية .. عينيها كتمشي ليه نيشان وتمشي لسكينة ..الوجه رجع احمر مزير حتى بدات كتفتف .. صدمتها كانت اكبر من انه جايب معاه بنت او شكون تقدر تكون .. خطيبتو ولا مرتو ولا صاحبتو … وإنما صدمتها فيه هوا والصورة اللي كانت واخدة عليه ..المجهود اللي كانت كدير باش تبان بنت الناس معقولة محترمة والكل كيوقرها ويحتارمها .. الميول ديالو دخلها فصدمة والصدمة شخصيا قدامها كتشوف فيها .. عكس توقعاتها تماما بكل التفاصيل.. لا والاهم باقا صغيرة !! كيفاش هوا كيبان بعقلو..رزين .. وصارم فالخدمة يميل اهاد النوع من البنات !!!
تبسمات وناضت للحمام .. ورفيقتها المتزوجة “عزيزة” حتى هي كانت محجبة .. غليوضة شوية ومحترمة تبعاتها لقاتها واقفة متكية بضهرها على لافاو ويدها على فمها ونيفها شادة فالرخاجة اللي وراها ومزيرة عليها سادة عينيها
عزيزة: مالكي علاش جيتي لهنا ؟
حكيمة: سادة عينيها ويدها على فمها) صدمنييي..صدمنيييي
عزيزة هادة ليها الهم .. من ديما كتعاود هي وياها كتقيل حكيمة شادة معاها الخط فايليفون بالليل والهضرة غير عليه كيحللو الشوفات والهضرة والحركة .. هضرت معاه وضحك معايا.. داز حدايا وتبسم ايوا شنو كتعني هادي!! شنو بان ليك؟
لبارح شاف فيا واحد الشوفة يالا فسريها نتي؟
اشنو بغا يقصد زعما ؟
دار ليا بيدو هاكا.. مافهمتهاش شنو بغا دعما يقصد؟
واغير يجي يوضح ليا هوا ماباغيش يوضح ليا انا غنتفهمو ..
بلعكس مايلقاش معايا مشكل ياك نتي عارفاني؟ مايلقاش معايا مشكل نهائيا وكنفهمو ..
قالي واش نجيب ليك قهوى معايا ودابا شنو كتعني هادي يالاه ماشي كنعجبو ؟ كنعجبوووو وماقدرش يجي يصارحني عييت ما نبين ليه باش يزعم .. حشومي بزاف
– خايف نقمعو مثلا !! داكشي علاش مازعمش حيت خدام معايا
عييت نبين ليه يزعم .. نتي عارفاني اختي عزيزة كي دايرة .. يلقا حسني مني يالاه ؟ واخا يدور حتى يعيا مايلقاش حسن مني نتعاونو انا وياه على الزمان وياخد بيدي وناخد بيديه .. دارهم على عيني وراسي نتي عارفاني صبارة مافياش المشاكل
لا مبغاش العرس منديروهش المهم هوا التفاهم هااااااا هنتي دابا هضرتي.. التفاهم هوا كلشي.. هادشي اللي كنبغي نوصل ليه باش يزعم .
كثرة الهضرة والاحلام والتخيلات اللتي ليس لها معنى .. كل تصرف او مجاملة كتفسرو بطريقة ترضيها هي وتريحها والنتيجة فالاخير هي هادي!
عزيزة: في حيرة) ياختي حتى انا صدمني ..مانويتهاش ولا جات على البال ولا خاطر !! … زعما الرجال!!! تعياي تفهمي ماتفهمييي واالو طاح من عيني.. مايستاهلكش والله مايستاهلك
حكيمة: بدموع محجرة) ماقديتش اعزيزة ختي .. ماقديتيش.. تصدمت حاسة بالدوخة
عزيزة: شادة فيها) ناااري قطعتي لي قلبي.. صافي ماديريش فراسك هاد الحالة الله يعطيك الستر .. والله مايستاهل شوفي غير كي دايرة اويلي عريانة كلها لابسة طرف ديال الترب
حكيمة: كترعد) شفتيها كي دايرة؟ (باشمأزاز) شفتي ديك الحالة اوييلي ماقدراش نتيق !!! واش كنحلم !! غالي!! اوييلي واش غالي اللي كنعرفو
عزيزة: الله يعطيك الستر الى مسحي دموعك .. هاد حال الرجال عزيز عليهم الرخص.. كما كان نوعو
حكيمة: مكيفرووتش الصلاة!!! كيسبقها على الماكلة !! مقدرتش مقدرتش! ماقدرتش جاتني الدوخة !!
عزيزة: وصافي نعلي شيطان.. راني قلت ليك الرجال راه خطار .. حتى هوا غيكون كيدوز الوقت .. نتي بنت الناس معقولة محتارمة راسك مافتحيتش ليه الباب باش يتفلى .. اصلا الى ماكانوش هادو اللي بحالها معامن بغيتو يتفلاو؟ نتي مازعمش عليك ..ماقدش عليك .. كتباني ليه فمرتبة عالية يبغي يهضر يحشم منك .. عارفك ماشي ديال التفلية وديال ضحك وميزعمش عليك. فييين هي وفين نتي اصاحبتي . نوضي نوضي.. نوضي غسلي وجهك وهزي راسك وجلسي قدامو شوفي فيه وضحكي خليه يحس براسو صغير قدامك ..يالاه
تجمع الكل على الطبلة.. من الخجل كانت سكينة كتاكل بشوي ودور عينيها فجنابها.. حضات بنضرات حكيمة ليها متشي عاديين.. ماهوا نضرات اعجاب ولا نضرات برائة .. شي حاجة فثها ماشي عادية.. الشي ة هادة خنافرها مبسمة من قنات شنايفها وكدير تصرفات ماشي طبيعين.. ماشي ديال وحدة خدامة معاه وصافي! ترادت فيها ضلعة وكتهضر وتسمع صوتها وضحك!
احيانا الانسام مكيشعرش بشنو كيدير.. بحال حكيمة بغات تبين انها مامسوقاش! نسات انها عندها مكانة اجتماعية ومنضب زوين وثقافة . نسات هادشي كله وتحركات فيها الغيرة وقات تتصرف انطلاقا من العاطفية ومبالغة بدون متنتابه حتى خرجات على المعتاد وعلى كيفاش مولفين بيها الموضفين اللي معاها ! لدرجة انتابه ليها غالي وفهمها وفهم ضحكاتها مع عزيزة اللي مسايراها وتلفت حاط يدو على لحيتو بسخرية جهة احمد اللي كيشوف حتى هوا بنص عين
غالي: women
ضحك احمد ومابينش دغيا قلب وجهه كيشتت النضر هوا وغالي.
حكيمة يحساب ليها عايقين بيها .. باش تبين العكس زادت عماتها وبدات ترحب بمبالغة بسكينة وتبسم ليها بلا متحس انها بهادشي عاد كتزيد دخل الشك للانسان وتبان ليه غريبة الاطوار! هادشي طباعا للي مكيعرفهاش.. اما اللي شام ريحتها بحال غالي من اللول فهوا فهام علاش وكيفاش .. وبهادشي زادت قللات من قيمتها قدام راسها وقدام غالي وفكل مرة تبغي تقادها عاد مكتزيد تعورها .. لا هي قادرة تخليها كي كانت ولا هي قادرة تصلحها
حكيمة: مرحبا بيييك احبيبة .
بغات تبين انهم مضاسرين .. حتى انها تيقاتها وخلات غالي غير كيشوف فيها وماعجبوش الحال
حكيمة: يمكن ساكنة هنا ياك احبيبة
تبسمت سكينة بخجل كترد الشعر ورا ودنها وقالت بصوت شتوي
سكينة: اا.. لا
حكيمة: غالي ماعرفتيناش على المادموزيل
دورات سكينة وجهها للجنب ويدها على فمها كتشتت النضر وقالت بهمس جهة غالي
سكينة: هاد الخرية واش مريضة فكرها..شو كيدايرة
رجعات دورات وجهها وغالي كيضحك وحكيمة كتشوف فيهم من فوق نيفها كأنها اللجنة وكأنهم الاعضاء
عزيزة: بغات تلطف الجو)عنداااك غير نكونو كناكلو لحك الخنزير
احمد: ان الله غفور رحيم .. ماقصدناش هههه كاينة ولالا اطارق؟
طارق: بمزحة)قول غير بسم الله .. وتوكل على الله
حكيمة: بمزحة) كاين اللي كيجي حتى لحم الخنزير ريقول حرام
شافت فسكينة وقلبات عينها لعزيزة كضحك .. اما سكينة دورات وجهها لغالي بخفوت ويدها على فمها
سكينة: كدق عليا؟؟
غالي: ماديهاش فيها
دورات سكينة وجهها بابتسامة شافت فيها وحكيمة كتبسم
حكيمة: كول احبيبة ماعجبكش ؟ ياكما تقتي راه غير كنضحكو ههه هادا طبعنا
سكينة: بمزحة ) لا حبيبة ماعنديش مشكل حتى لحم بنادم كيجيني بنين
الكل كيتجمع ويضحك وسكينة ساكتة حتى كملو الماكلة وخرجو مجموعين كيتمشاو .. الرجال كيضهرو والعيالات حاضيين بعضياتهم .
اما سكينة شادة فيد غالي كتشوف وساكتة ووراها حكيمة وعزيزة كيشوفو فيها من راسها لرجليها
مالقاو مايعيبو.. كاع داكشي اللي غتغطي بالحوايج زوين
حكيمة: اوييلي على شوهة هادي غادا معانا
عزيزة: حتى هوا الصراحة مدار فيها مايصلاح.. حنا كوليكَ مع بعضياتنا محتارمين بعضياتنا مكانشخاصو يجيب معاه وحدة يدخلها بيناتنا!! ماحتارمناش !
عائشة : امرأة كبيرة) ايوا ماشي مشكل .. كل واحد حر
حكيمة: لالا صراحة ماجاتش… وعاد جايبها بداك الحالة انا حشمت !! حشمت بلاصتها !.. هادا راه عدم الاحترام اختي اويلي
هما كيضهرو اللور ويحللو ويناقشو وغالي وسكينة قدامهم وحمد حداه كيتجمعو .
رجعو كاملين لاوتيل طالعين فالاسانسور وحكيمة مخرجة عينيها كترعد وتنخز عزيزة بخفوت
حكيمة: اوييلي !!! اويلي هادا زاد فيه !!! واش تسطا؟
وصل للكولوار فين نازلين كاملين وتفارق معاهم مشا شاد لسكينة فيدها دخل معاها للبيت وسد الباب.. يالاه جلسو ورتاحو وبدات سكينة تنكر على حكيمة وصلو مسج فتيليفون وتجبد فالوقفة كيقراه كله بالفرنسية
حكيمة: سلام غالي.. لاباس عليك كلشي مزيان . انا جيت نهض معاك نيشان وكنتمنا متفهمنيش غلط. حنا زملاء فالخدمة كنحتارمو بعضياتنا وجينا فورماسيو وعندنا فيها هدف واحد.. متوقعناش منك بحال هاد التصرف ابدا .. سمح ليا غنكون صريحة معاك ، ماعجبناش الحال دخل علينا بنت بداك الشكل وحنا نساء فينا المتزوجات محتارمين راسنا ومعانا اصدقاء فالعمل , على الاقل تفرق بين زملاء العمل ربين اصدقائك الشخصيين.. ماقدرتيناش وماحتارمتيناش وماشي احترام .. والله ماحتارمتينا ماقدرتينا زعما مالقيت منقول فاجئتينا الصراحة !
حطات التيليفون بصرامة هازة راسها وهي جالسة فوق السرير ..لابسة بيجامة نص كم بسروالها وشعرها بني ملس بزاف على الراس من كثرة الحجاب
حكيمة: بصرامة وحدة) سيفطتو ليه يالاه.. خليه يعرف غلطو حيت كان ضاروري شي واحد يفيقو.. اويلي قلة الاحترام هادي !!
ردات عليها عزيزة وهي جالسة فالجهة لاخرى من السرير ديالهم فاصل بينتها كوافوز صغير . حتى بلامس مريحة شعرها اسود قصير طالقاها ملوي وشادة تيليفون فيدها
عزيزة: مزياان عبرتي عليه .. قلة الاداب
هزات حكيمة راسها ودارت رجل على رجل .. يديها ورجليها حومر مطبزين شوية .. كتبان حادكة وقادة كما كيقولو ديال الزمان .
ك صونا ليها تيليفون فيدها وشافت فعزيزة مندهشة
حكيمة: كيصوني!!
عزيزة: غمزاتها) غيبدا يبرر دابا .. هزي راسك باش يعرف معامن
حكيمة : بتحدي ) انا نتفاهم معاه (فتحات الخط وقالت بصرامة وعزة نفس) ويي غالي؟؟
غالي: بجدية) محتارمتكش الاللة دخلت عليك رقاصة؟؟ اش هاد قلللة الاداب بعدا واش !! واش عارفة واسك شنو كتقولي ولا ماااا!!! على اساس نتي شكون باش تعطيني محاضرة ! اشنووو هوا الاحترام عندك ؟؟
حكيمة رجعات حمرا غير قصح معاها بدات دخل وتخرج فالهضرة وزادت تشبتات بهضرتها اكثر كتحداه
حكيمة: ماشي تصرف!!! انا ماضهرتش معاك قلت ليك لا هاديك حياتك الشخصية وكتنتهي فحدود حياتنا الشخصية حنا !! حطيتينا امام الامر الواقع ومعانا زملاء كاين اللي حشم ماقدرتش يهضر !!
غالي: قاطعها) الاللة حتارمي راسك خليني نحتارمك الله يجازيك بيخير الى كنتي باغا تفرضي الاحترام سيري جلسي فمطعم بوحدك شداك اصلا ليكوليكَ تجلسي معاهم مالي جايا عندك هدف!! غنبداو نهضرو شي هضرا ماشي هي هاديك… خليني نحتارمك حسن ما نوليو فشي حوايج اخرين ميعجبوكش.. اش هاد الضسارة هادي ؟
حكيمة: تزيرات) سمح ليا انا ماعجبنيش الحال مااا… مارضيتش قدام ليكوليg نشوف منضر بداك الشكل هادا علاش(وهزات خنافرها)
غالي: شوفيه الاللة ولا كتشوفيهش واش بغيتي نخرجو للعيب؟ حتارمي راسك الله يخليك ولزمي حدودك
قطع عليها فالوجه حتى بدات كتبكي ورجع وجهها احمر ضارت عند عزيزة مزيرة بدات كتبكي وترعد بينما هوا مابرداتش ليه بقا واقف فالبيت عاقد مية وحداش تاصل بأحمد يبرد بيه على راسو
غالي: واخاي احمد… ملاباسش اصاحبي شوف ليا المسج اللي وصلني دابا واش داكشي جاك عادي ديالك وحدة محترمة راسها!!
احمد: قريتو ولاكن مافهمتش اش هادشي علاش ؟
غالي: ما اافهمتش اش هادشي طلعات ليا الدم فهاد العشية مابغيتش ننن سمع ليها شي هضرة دفن راسها فالارض.. و اهاد العيالات اصاحبيييييي…. مايخليوكش كاع دخل سوق كرررك
احمد: كيضحك) اصاافي برد ماتجاوبهاش على وجه داك البيرو اللي جامعكم.. (تنهد) واش شغادير شوف وقول الله يستر هادشي اللي دير خلي الوقار بيناتكم
غالي: كيبرد) مشاكيييل مع الجنس…. عصباااتني اصاحبي كنت باغي نقوليها شي هضرة دااازت فوجه هاد الخدمة اللي جامعانا.. شوووف دابا على بنادم يالاه!! والله اصاحبي كن بغيت معاها الشوهة نخليها حتى نتجمعو كاااملين فوق شي طبلة ونوريها ماحتارمتيناش.. توريني شكون هادو اللي تشكاو وشكون اللي ماعجبوش الحال!! تورييهم ليا نشوف اشمن حسااااب عندهم معايا ونشوف هاد الزعامة فيين الحد ديالها .
احمد: ايواا راه جاتها الغيرة ولا منعرف .. العيالات هما هادو مايرتاحو مايخليوك ترتاح
غالي: لا حولة ولا قوة الا بالله .. يالا اخاي احمد حتو لغدا نشوفك ..تصبح على خير
قطع وتلفت طالع ليه الدم شاف فسكينة اللي مربعة رجليها على طرف الناموسية بالبيجامة كتشوف فيه بميوعة
سكينة: علاش ماسبيتيهاش!!! سبها باش تعلم ولا عطيني نسبها
غالي: بالنفي) كن مكانش معايا فنفس الخدمة كن عطيتها هضرة اخرى .. غتبدا تساب مع الناس اللي معاك فالخدمة وتبرهش وسط الوزارة !!
سكينة: وا خليني انا غنعطيها واحد جوج كلمات نوريها .
غالي: نتي غي سكتي .. ماتهضريش بقاي بعيدة على هادشي .. حتى والى عاودنا تلاقينا ماتشوفيش فيها كاع
هناك رجال كيسيطر عليهم الغضب ويقدرو يفوتو الشخص المعادي ليهم فاسلوب الرد. بدون مايخمم او يضرب حساب للعواقب.. هاد النوع هوا اللي كيكون فالخدمة بين الموضفين كيبان صغير .. قليل فين كيضربو ليه الاحترام .. العيب على طرف لسانو وكيكبر المواضيع وديما منعوت بالمشاكل وكيبغي يبان مسيطر وقوي بالغوات والضهرة و تخراج العينين ..كتلقا راسو فارغ خاوي فراس مالو الهضرة والاعصاب والتكبير المواضيع.. هاد النوع حتى واحد مكيعول عليه .. حتى فالمناصب كيخليوه هوا اللخر .. مامقبولش وماشي قد المسؤولية وماعندوش فن الرد والسيطرة على نفس .. غالبا كيكون من المتابعين وقدامو قائد . وهاد القائد غالبا ما كيكون من نوع غالي.. اللي بالرغم من الغضب والاعصاب كيفرق بين زملاء العمل وبين الاصدقاء وبين الاحبة.. كل واحد كيتعامل معاه حسب مكانتو .. هاد النوع كيكون حكيم فالعمل وبين العائلة والاصدقاء ورابط لسانو ومتحكم فراسو .. اسلوبو فالرد كان محدود فحدود العلاقة بالعمل . مكيخلي حتى واحد يفرض عليه شي حاجة .. كيدير داكشي اللي كيرتاح فيه وعندو فيه رغبة .. وفنفس الوقت فارض الاحترام وكيقدم الاحترام للجميع بعقلانية وحدود حتى لو كان داك الشخص قليل العفة معاه فالعمل وماعندو كي يدير يتفك منو ومشارك هوا وياه الحوار بزز منو .
اما سكينة مامولفاش بجو العمل والزملاء فالعمل عندها زايد ناقص .. تسبها وتعريها وتمشي بحالها مرتاحة
ربعات يديها وكانت مصرة باش يسبها لاكن رفض وحط تيليفون خلاها كطلع وتهبط .. فهمها وشرح ليها لاكن مابغاتش تفهم وخلاها ومشا للدوش دوش بينما ناضت للتيليفون بغات دير شرع يديها ساعة لقاتو بالكود وحطاتو كتزفر .. خرج عندها لابس شورط و تيشورط بالسماطي كحلة مستغرب وكيشوف فيها وقال
غالي: واش مغتعيطيش لباك تسولي فيه؟؟ شتك نسيييتي داركم
سكينة:هزات كتفها) خفت
غالي: شار بيدو) واهزي تيليفون عيطي ليه شوفي شنو واقع .. راه مشارجي غير عيطي
هزاتو بتردد والقلب بدا يضرب فالتسعين .. سبقات من رانية هي اللولة عيطات ليها لقات عقلها خارج كتغوت
رانيا: فييينك ؟؟؟ فين مشيتي ؟؟؟ كحلتييييييهز من عند بااااا
قفزات سكينة من بلاصتها طار ليها العقلة فالبلاصة بقات كدور فعينيها مخلوعة وتهضر بالجهد بالخلعة حتى خلعات غالي من ردة فعلها مشا حداها وقف والفوطة على كتفو كيشوف فيها
سكينة: بهلع) اويلي!!! اويلي با جاا
رانيا: وافييييينك … مرضتييييني الله ياخد فيك الحق اجيييي دااااااابااااا
سكينة: بجنون) وجاوبيني شنو وااااقع جاوبي
رانيا: اجي وغتعرفي شنو واااقع اجي دااابا
تعصبات سكينة بدات كترعد فبلاصتها بغات تبكي والخلعة كتشطحها فبلاصتها ويدها على فمها بالدفار طوال كترعد
سكينة: قالتها لبابا… اويلي قالتها لبابا هاااهيايهنننننن
غالي: كيهدنها) بلاتي بلاتي شنوو ؟ شنو قالك ليك ؟
سكينة : كتمشي وتجي بلاصتها) مشيت فيها مشيت فيها مشييييت غيقتلني ..صافي صافي منرجعش صافي مغنعاودش نرجع ارييييليييييي هااااععععع هاويلي (كضرب وجهها )
غالي: وثراتو) واشنو قالت ليييك ؟؟ (شدها تبتها) هضري شنو قالت ؟
سكينة: تنقز بلاصتها) قودتهااااااااا … صافي كحلتها قالت لي كحلتيهااا
هز تيليفون من فوق السرير وهوا شادها كيتبتها ماقدراتش تتبت وكأنتا شاعلة فيها العافية وشادها الحريق
غالي: مد ليها تيليفون) عيطي لباك.. شدي عيطي ليه
سكينة:رجعات مدعورة) لالالالا منقدرش منقدرش
تكمشات فراس السرير ومشا طلع على ركابيه تبعها وثنا رجليه قدامها كيهدنها بعصبية
غالي: واسمعيييي.. عيطي لباك هضري معاه .. سمعي منو شنو غيقول بعدا .. شدي
مد ليها تيليفون كترعد وتقفقف وزيرها باش تهضر لاكن تفكات ان باها طاح ليه تيليفون فالماء وتاصلات بأمها والرعدة فيها كتسناها تجاوبها سخفانة حتى تشد الخط وردات مونية
مونية: الووو؟
استغربات كدور عينيها من ردة فعل مونية الباردة والاصوات حداها ديال الضحك وجمعا البكية بقاو غير الاثار بحال الدموع والحمورية والنيف كيسيل مع الشعر على الوجه
سكينة : باستغراب) ماما!! هانيا ؟
مونية: واش سووكاااينااا؟؟
سكينة: اه! واش لاباس
مونية: بسعادة ) لالاباس كولششييي لاباس كيسولو علييكم فين هما البناات علاش مجاااوش ولاهييلا
هزات عينها فغالي اللي هاز حاجبو كيشوف فيها واقف على ركابيه ومركز معاها
سكينة: وبابا لاباس؟ كولشي مزيان ؟
مونية: هاااهوا فين كيشوي فالدوارة .. دبحو هاد النهار واحد الحولي .. ايوا مكاين غير الشوااا.. شكادير رانيا
سكينة: بلعات ريقها كترمش) ببببببخير .. اري بابا نهضر معاه ..بغيت نسول فيكم
قالتها وعينيها مهزوزة فغالي اللي مقنتها باش تبت وكيحرك راسو بالايجاب تكمل
مونية: هاااهوا .. هاك ابناصر سكينة كتسول
بناصر: بصوت مرتفع) ااالو… اش كتعاودو؟؟؟ مزيااان كلشي مزياان مال تيليفون ديالك طافي؟
سكينة: غير تحرقات ليا لاكارط وصافي درت نمرة جديدة
بناصر: اش كدير رانيا دوزها ليا
خرجات عينيها فغالي كتشطح بالخلعة قالت عاضة على شفاهها بعنف
سكينة: فطواليط .. بلاتي تخرج
بناصر: يالاه بلاتي دوزها ليا يالاه
سكينة: بارتجاف ) واخا
قطعات وطاحت كأنها جاها ارتجاج فالمخ
سكينة: قالي دوزي لي رانيا.. (طارت من بلاصتها وقفات) صاافي مشيت فيها مشيييت فيها عاوتاني
جرها من يدها جلسها وسد عينيه كيسوط هاز صبعو بتمعن فيها
غالي: سمعي..اري نمرة رانيا(هز تيليفون) دغيا
سكينة: علاش شنو بغيتي دير؟
غالي: اري النمرة ورصاااي..تبتي لارض وسكتي
خدا النمرة عيط لرانيا وسكينة كتاكل صباعها ختى شد الخط
غالي: ختي رانيا.. ان امي ديال سكينة هاكي باك بغا يهضر معاك غير دوي عادي بحال الى حداك سكينة
شد تيليفون سكينة دوز نمرة باها ومدو ليها
غالي: جاوبيه قوليه ها رانيا ( رد على رانيا) تسمعي صوتو هضري اختي الله يحفضك(كبر الاصوات)
شدات تيليفون كترعد وردت
سكينة: الو بابا.. ها رانيا.
بناصر: الو رانيا..
رانيا: بصوت مستغرب) بابا!!
بناصر. لاباس بيخير ؟؟ كلشي مزيان؟
رانيا: الحمد لله.
بناصر: واتهلاو فبعضياتكم .. يالاه كونو كبابل.. ها العرس مابقا لو والو واجيو تفوجو
رانيا: ان شاء الله
رانيا كانت كتهضر وخايفة ومافاهمة والو .. حتى قطع بناصر وتأكد منو غالي وقرب تيليفون لفمو
غالي: شكرا ختي رانيا سمحي لينا ها سكينة
شدات سكينة تيليفون متفاجأة مافاهمة والو ردت
سكينة: تقلبات بغضب) عقلييييي فيها … واعقلييييييي هاهيا ..ديريها فين تجيك
رانيا: بغضب) وافيييينك معامن نتي؟؟؟؟؟ اجي داااابا الله يعطيك العداب
سكينة: يجييييك ابنت الحرام عقلي على هادشي اللي كديري ليا
رانيا: هييييه!! انا اللي غنعقل ولا نتي؟؟ ايوا بلاااتي الى ماوصلت لرش هادشي كااامل اللي كاديري هانا هانتي (قطعات عليها)
سكينة: لاحت تيليفون) افففف سخفاتني
غالي: رجع اللور ) نتي راه ميمكنش!! عنداك ختك تعيط لباك
سكينة: لالالا متقدرش !! هي كتخاف غير من صوتو
غالي:تطلق حداها تكا ) هاد الخوف كااامل فيك !!
سكينة: كضحك) انا كنخاف من جوج فهاد الدنيا..بابا والبوليس صافي
بقا غير كيشوف فيها وهي كضحك رتاحت وتطلقات ودازت الموجة دالخوف والهلع وبداها الحماس وتطمنات عللى الآخر ..
طفا الضو بواحد تيليكوموند صغير وشعل الفايوز حداه تنفس وجرها من يدها جلسها حداه وهي كدور فعينيها وتشوف فيه
غالي: كمش ليها وجهها) وا غااجي جلسي حدايا باغي غير نشوفيك .. تخافي ماتحشمي !
تكات على كرشها حداه كلعب فصبعانها وتشوف فيه وقالت
سكينة: غالي .. دابا نتا حتا لفين قريتي؟:
تبسم كيشوف فيها ويلعب فخصلات شعرها بيدو
غالي: الماستر فالهندسة … وشي عماين فالدكتورة متكملتهاش
سكينة: وعلاش؟
غالي: شاد ليها نيفها) كانت عندي ضروف فالخدمة
سكينة: دابا شحال باش جيتي لرباط؟
غالي: تكون شهراين دابا
سكينة: وفين كنتي قبل خدام؟
غالي: فالبنكة … اشمن نيفو عندك؟
سكينة: نيفو باك
غالي: علاش مكملتيش؟.
سكينة : كدور فعينيها) مكملتش وصافي
غالي: رجعي كملي قرايتك ديري باك ليبر.. باقي الحال عليك
سكينة: بافتخار) عندي بروجي ديالي ديال البلدي
غالي: هاز حاجبو) مزياان!! وعلاش كتمشي للاكراميات؟
سكينة:دورات وجهها كضحك ) مشيت مرة وحدة صافي.. هي فاش جيت انا وشيماء عندك للدار
شكت كيشوف فيها مطولا شاد فدقنها وقال
غالي: مع غمزة مصغر عينو) شنو قال ليك راسك ديك الليلة هم؟!
دورات عينيها يمين يسار باحراج وبدات تجمع يديها وركابيها بغات تنوض سالتة لاكن جرها طيحها فبلاصتها هاز حاجبو
غالي: جلسي نهضر معاك
رجعات حمرا بقات كدور فعينيها والصهد كيعطي منها وقالت
سكينة: شنو بغيييتييي؟؟
غالي:شدها من عنقها جرها عندو ) علاش كنتي كطلي؟ يالاه دوي
شدها من رقبتها طيحها حداه
سكينة: بإحراج وغضب) الخراااا نتفتيني … طلق مني
غالي: زير على يدها عاض شنايفو ) هضري شنو كنتي كديري فديك الليلة حدا للباب هاا؟
سكينة: بغضب ) ااااي يدي يدي
غالي:رخاها شوية) علاياش كتقلبي؟؟ يلاه دوي
عاود شدها من رقبتها كيضحك معاها لاكن هي تحرجات وتقصحات حتى بانت على وجهها وهي كتغرفت هي وياه ويتجارو فاللخر تنفضات بزز سخفانة شادة البكية وشادة فيدها مشات مارضاتش وقاطعاها مشات جهة السرجم وقفات وخرجات من ها البكية بلا ارادتها قلبات وجهها كتبكي وتجمع شعرها للجنب فصمت وتنخصص .
حس بيها بقا فيها الحال وناض عندها كيضحك يالاه حط يدو على كتفها هبطاتها وقلبات وجها كتمسح عينيها باحراج فصمت
عنقها من اللور كيضحك وشد ليها وجهها بيدو
غالي: وابكااااية تا نتي على سبة!!! صافي ضحكت معاك نضتي تبكي!!
نترات كتفها لاكن ماخلاهاش تنتر وتبكي وعنقها بقوة من اللور جامع ليها يديها بمزحة
غالي: غنزيد نزير عليك شووية نقسمك .. وصافي…(طل عليها جنب شعرها) وصااافي
سكينة:دورات وجهها كتنخصص) بعد مني
غالي: هاانا مبعد منك
رخاها شوية وهي كتمسح عينيها فصمت بردات على قلبها بديك البكية فاجات عليها من الخوف والتوثر وجمين المشاعر السلبية ورتاحت عاد تنفسات وضارت شافت فيه بقرف
سكينة: شحال باسل
غالي: هز حاجبو) اياااه!!! ( جمعها بنص وشد ليها فيدها) ها البسالة
كانت غطيح ووقفها مخلوعة شدات فيه حتى وقفات وقالت
سكينة: حيد ..بغيت نعس. حيد
مشات للفراش هاربة من الاحراج باش مايعاودش يسولها وتخبات مغطية قاطعة لحس شحال عاد هزات الراس لقاتو متكي على المخدة على ضهرو جنب النافدة والصهد ..مسرح يدو حداه والثانية تحت الراس .عرفاتو كيطيب النعاس ورجعات لبلاصتها نعسات .
كالعادة رجع مع الخمسة لقاها مزالة ناعسة فيقها بزز وخرجها دور نسات اللي وراها واللي قدامها .. معاوداتش شافت حكيمة مرة اخرى فمرة وكانت خرجاتو غير هوا وياها .. مخلا بيها حتى بلاصة حتى وصل الويكاند وناض فيها الحماس اضعاف الجمعة بالليل وهي حدا الباليزة كتقلب على شنو تلبس لغد ليه لديزني لاند بحماس كبير بينما هوا قدام النافدة واقف داير يدو فجيب السروال بيجامة وتيليفون فيدو كيضهر
غالي: حتى لتنين ان شاء الله عاد غنجي
اسية: الله يرضي عليك اولدي.. سمير خوك بغا يسافر للرباط الويكاند هوا ومراتو .. بغيت نعطيه سوارت الدار يدوزو فيها هاد العطلة
غالي: ماشي مشكل الوالدة الله اودي
اسية: اللع يرضي عليك .. ايوا بغيت نتشاور معاك واخا عارفاك ماتقول والو
غالي: دنيا هاانيا
اسية: صافي انا نعطيك الدوبل دالسوارت لي عندي .. الله يرضي عليك الحبيب
غالي : امييين الوالدة
اسية: الله يجيك على خير
غالي: بغيتي شي حاجة نجيبها لك ؟
اسية: اللي جبتيه سمن وعسل
غالي: تفكري الى كنتي باغا شي حاجة اخرى اسية: الله يحفضك وينجيك
غالي: اميين الله يخليك ليا الغالية ديالي ..تهلاي لي فراسك
تلفت لقاها كتقاد الحوايج وتوجد وداز من حداها عنكش ليها شعرها
غالي: نوضي تنعسي غتفسق مع تمنية
سكينة: اوييلي بزاف؟
غالي: عندنا شي ساعة ولا ساعتاين ديال الطريق لديزني لاند
سكينة: علاش ماشي فباغي!!
غالي: خارجة عليها شوية ..يالاه نوضي باش تفيقي بكري
ناضت مشات لبلاصتها سدات عينيها بدات كطيب فالنعاس وهوا جالس حداها كيلعب ليها فشعرها وتيليفون فيدو حتى نعسات .
صبح الصباح كيفيقها وهي بحال الميت.. كتهز يد وتقوليه مابغيتش مابقيتش غادا،، وفكل مرة يمشي يدور ويرجع كيلقاها باقا كما هي ويعاود معاها المحاولات بدون جدوى فالاخير بدا كيرشها بالماء ويعاود عاد حلات عينيها بزز وجرها من يدها نضات دايخة مشات نيشان للحمام فيقات راسها بغسلة للوجه وحكة للسنان
مشات
شافها كتقيس الكسوة وقال كيلبس تيشورط على السروال دجينز
غالي: مصالحا ليكش الكسوة اسكينة .. تهزي رجلك ولا تبغي طلعي على شي حاجة مايصلاحليكش
شافت فيها بتراجع وهزات شورط قصير طالع للكرش لبساتو مع تيشورط قصيرة وبانت فكرشها بيرسينغ مدورة كتبري فالصرة لفتات انتباه غالي لاول مرة ومشا على وجهه شبح الابتسامة والاستغراب وقف حداه حط يود ورا ضهرها تبتها وطلع ليها تيشورط على كرشها دوز يدو على ديك الصرة كيستكشف وقال
غالي: شنو هادشي!! دايرة بيرسيينغ!!!
هبطات على كرشها بسرعة كدور فعينيها تفاديا للاحراج مع النصائح ديالو وقالت
سكينة: امم.. ويالا يالاه ياك مشا الحال
غالي:رجع شدها وقفها ) اري نشوف
سكينة:زيرات تيشورط على كرشها ) واالو
غالي: وانشووف!!بغيت نشوف
دورات عينيها حشمات وخلاتو طلع ليها تيشورط على كرشها كيشوف فيها ويدوز صبعو على ديك البيسينغ.. من جهة عجباتو ومن جهة اخرى فاجأتو خلاتو غير كيشوف وقال هز حاجبو
غالي: وهادي لمن دايراها يشوفها!!!
سكينة: سير سير قالك لمن دايراها !! دايراها راسي !! ولاهيلا
دورات وجهها كدور فعينيها وهوا واقف حداها كيشوف ويحرك راسو و يدورو
غالي: هييي هااي هااي..مساهلااش ااا(هز حاجبو)
قطعات لحس حشمات وماعوداتش هضرات بقات ساكتة وحتى هوا ميك وماعطاهاش صورة خايبة .. ومكيقدرش ينويها فيها خايبة على حسب ماقالت ليه الطبيبة اللي فحصاتها مزيان وعطاتو رابور ديالها بالتفصيل كما وقع مع بناصر تماما . رجع كيشوف من منضور اخر .. على اساس كيعجبها داكشي كتبغي. لراسها او ربما تكون كتبغي تلفت بيه الانتباه فقط او تتزين بيه .
ديزني لاند!!! او مدينة الالعاب او عاصمة الافلام الكارتونية.
حماسها وهي فالطريق معاه فالتران مكانش بقدر السعادة والفرحة اللي كانت غتلفها عليه فاش وصلات ليها وهزات عينيها شافتها من برا .. مابقاتش كترمز ولا تبت راسها ! فرفرات ويغات تحماق بدات كتنقز فبلاصتها بجنون اكثر من الدراري الصغار.. بحال سكينة منهم عدد .. مكيقدروش يتمالكو نفسهم فالفرح او القرح .. فالحزن كيدوخو والفرح كيفرفرو .. كينساو راسهم واللي قدامهم واللي وراهم نسبة التبات عندهم صفر..ربما الاطفال الصغار تابتين عليهم لاكن هي واللي بحالها كيفدو السيطرة والتحكم فالنفس فكل شيء..الغضب والحزن والسعادة.
بدات كتنقز من شدة الفرحة دوخاتو وهوا مزير على يدها كيتبتها ويشوف فجنباو
غالي: بسوية شوهتينا !! الدراري الصغار دايرين عقلهم
طارت ليه عل كتفو عنقاتو وشدات ليه وجهو كمشاتو وباستو فحنكو بقوة لسقات ليه بوسة حتى بدا كيضحك ويحرك راسو يكين وشمال وهي كتكمد الفرحة
سكينة: فففففحححححح …غنمووووت بالاه ندخلو يالاه
غالي: بلاتي نقطعو تيكي!! شدرتي هنا يعلم الله فاش دخلي اداخل!
شدات ليه فيدو كترعد بالحماس وسنانها كيتقرقبو وتسناه حتى قطع التيكي ودخلها مع الباب كيشوف فيها وفردة فعلها ولسانو فالجنب بعفوية
سكينة: حالة فمها ) ناااري غنموووت .. ناااااري
غرغرو عينيها من شدة الفرح.. احساسها غلب عليها وبطبعها حساسة بدرجة كبيرة كتأثر من الزوينة والخايبة .. ضارت عنقاتو بقوة حاللة عينيها كتنفس وتسوط على وجهها وبدات كضحك
سكينة: بمزحة) غي الفرحة الفرحة
مسح على راسها كيضحك وهي داخلة كتشوف يمين يسار فالمتاجر اللي فالدخلة كأنها فقرية من الرسوم المتحركة .. حتى حاجة مكانت عادية.. كلشي كان عبارة عن رسوم متحركة حتى من الاحجار المحطوطة على الجنب والمتاجر والبيوت اللي فقو منها .. كأنها داخل التلفاز ! كتشوف البنات داخلين خارجين من دوك المتاجر لابسين بوندو فيه على الراس فيه ودينات وكاين اللي لابس تيشوط فيها ميكي ولا ميمي وكاين اللي حامل شكارة وكاين اللي هاز نفاخات ..
سكينة: بحماس) اجي اجي ندخلو لهنا اجي
جراتو من يدو وهوا غادي وراها داير نضارات شمية دخل معاها بين البنات الشقراوات اللي كيلبسو ويحطو .. مشات حتى هي كدور وتشوف فالمحل اللي كيبيع كل ما يتعلق بالرسوم متحركة .. العاب كؤوس ملابس.. شافتهم كيهزو الملابس وهزات تيشورط فيه ميكي وبوندو فيه ودينات كحل وضارت عندو بغات تقوليه شري ليا هادو لقاتو كيشوف فالبنات اللي فالجنب كيتصور ويديه فجيابو .. جمعات الضحكة وتقمعات فيها بقات كتشوف فيهم وتشوفيه حتى ضار عندها بعفوية لقا وجهها صفر .. لاحت دوك الحوايج وقالت
سكينة: يالاه نمشيو بحالنا
ارتابك شافها غادية ومشا جرها باستغراب
غالي: ااجي مالك شنو وقع؟؟
سكينة:نترات يدها ) ماحتارمتينيش ..انا جايا معاك وناا كتشوف تما شنو غيقولو عليا هادوك !!
غالي:دور وجهه كيضحك بعفوية ) ماسمعتيهمش شنو كانو كيقولو؟؟؟ والله ماديتها فيهم انا كنت كنسمع ديك الهضرة اللي كيقولو بيناتهم صافي
سكينة: فاش تكون بوحدك شوف فينما بغيتي.. راه بنادم غيبدا يشوف فيا شوفة ناقصة علااش!!
غالي: وصافي صاافي.. يالاه سيري رجعي هزي داكشي اللي كنتي باغا تهزي
قلبات عينيها بميوعة مارضاتش وبدات كتشوف فيه بنص عين وهوا مربع يديه ومهبط وجهه كيضحك .
سكينة: هاهاها..عنداك يحساب شي حاجة!! واخا يكون خويا معايا ندير ليه هاكا
غالي: واخا يالاه صافي ساليتي؟ هادو اللي بغيتي.. وايالاه
سكينة: انلبسهم باش نتصور
غالي: يالاه سيري
سكينة:ضارت موراها) واجي لهنا(هزات حاجبها) مطور مع راسك ! شيماء خاصها تخلصني حاضية ليها رزقها
غالي: شاد الضحكة) واسيري غنجي نوريك …
دخلات لبسات تيشورط والبوندو فوق القصيصة بالودينات والشعر مطلوق والشورط قصير وخرجات دايرة يدها على جنبها كضحك
سكينة: كي جيييت؟
تلفت ويدو على لحيتو وقال
غالي: نااضية
سكينة: يالاه ادفع الثمن يا عزيزي ههههه
غالي: شدها من كتفها) غا زيدي زيدي فوجتي عليا بعدا فهاد السيمانة
خرج معنقها وصبعو الابهم على حنكها بحنان كيضحك وهي هازة تيليفون كتصور وتعاود فالسيلفيات .. جات تصورو وباسها فحنكها مزير على خدودها وفمها مكمش وعينيها ضاحكين .. كملات طريقها شادة فيدها الدونالت بالشكلاط هي وياه كيتساروا وطالعين هابطين من لعبة لعبة ومن الالعاب للمسرح ..جلسو شادين الذرة كيتفرجو فبلونش نيج والموسقى و البرودة ديال المسرح اللي فيه الثلج تعبيرا على المشهد .. من تما طلعها للعبة اخرى عبارة عن صاروخ مضلم فيه الناس جالسين .. جربو انطلاقة الصاروخ بين الكواكب اللي كانو كيبانو فجنابهم وهما معارفينش راسهم فين كأنها حقيقة وكأنهم فصاروخ حقيقي . من بعدها جلسو فمطعم مع الناس والاطفال بكثر ة.. خدات بيتزا ومشروب غازي كلاتهم بزز مكهومة بكثرة الحلويات اللي مرة تاكل.
كانت تجربة ممتعة جدا .. حماسية وشيقة ماسخاتش تخرج من تما .. لاكن خرجات مشحونة بطاقة اجابية وبذكرايات جميلة تبقا تذكرها بصورها وما غانيها ومشاعرها . اجمل ما وقع فحياتها فديك السنة العشرينية !! بداية العشرينات بحدث اقل مايقال عنه رائع يخليها تذكر ديك السنة وتتمنى لو ترجع ليها
كان يوم حافل وممتع جدا.. رجعات ناعسة عل كتفو طول الطريق حتى وصلات وفيقها كيضحك شد ليها فيدها دايخة والبوندو فوق الراس عوج .. قادو ليها ومشا كمل طريقو رجعها لاوتيل غير دخلات نعسات نيشان مافاقت حتى لغد ليه لقاتو كيشرب قهوة وناضت مقلوبة كتزير على عينيها
غالي: نوضي تفطري … بقا لينا ليوم غنحرجو نتقداو شوية باش الصباح نمشيو
مشات نيشان من الفراش للطبلة هزات القهوى كتجبد عينيها
سكينة: نشرب هاد القوة باش يالاه نفيق
بدات كتشرب وتشم وهوا وربع يدو على الطبلة كيشوف فيها بتمعن
غالي: إلى قالو ليك تعيشي فباغي تعيشي
سكينة:حلات عينيها بحماس) اه نعييش
غالي: ولاكن مغتعيشيش بحال هاد السيمانة اللي عشتيها ..نتي جيتي غير سياحة ..اما اللي عايشين هنا واه مكيخرجوش يوميا
سكنية: ايوا بلاش اللهم خروب بلادي
غالي: هبط راسو كيضحك ) توحشتي المغرب؟
سكينة: حسيت براسي بحال الى جلست هنا شهر !!
غالي: ماعندكش احساس الرجوع لهنا مرة اخرى ؟
سكينة: بلعكس عندي احساس الرجوع ماجاتنيش شي حاجة اللي صعيبة
غالي: مابغيتش نفكرك ولاكن … شنو عتقولي لباك فاش يشوف الباسبور؟
سكينة: مكنضنش يشوفو.. ماعندوش علاش يقلبو اصلا عارف اش فيه! يعني ماعندوش علاش يجبدو ويبدا كيدور فيه
غالي: الى وقع سي مشكل علميني عنداك تمشي تهربي
سكينة: شنو غدير ليا زعما نتا؟
غالي: مابغيناهاش توقع ولاكن نعرف شنو وقع .
سكينة: مغيوقع والو (غمزاتو)
غالي: عنكش ليها شعرها) يالاه لبسي حوايجك نتحركو
نزل هوا وياها قدام بريمارك .. كان ناوي يشري لخواتاتو وخوتو ومو واسرته وهي كانت ناوية نزيدو بمشتريات .. داخت وتلفات بقات غير كدور بين الحوايج بغات تسطا.. الفم تحل والعينين خرجو .. مولفة بحوايج المدينة والحوانت المزاحمين بزز باش كتلقا داكشي اللي عجبها . اما دابا كولشي عجبها من الباب حتى القاع وفقدات السيطرة عاوتاني بدات غا ية حداه وحالة فمها
سكينة: هييييه!!! هادشي كيحمممممق
غالي: كتعرفي تحسبي بالاورو؟
سكينة: لا!
غالي: زيدي صفر لكل رقم.. بحال واحد اورو .. زيدي صفر تولي عشرة بالدرهم ديالهم …خمسة اورو .. خمسين درهم ديالنا
سكينة: ااه فهمتك
غالي: وا عندك الف وخمس مية درهم ماتفوتيهاش يالاه
تجبدو ملامحها بابتسامة عريضة على بانو سنانها وحلات عينيها مشات كتجري رجعات السلة هزاتها وتبعاتو غادي وكيتجبد فالوقفة شاد تيليفون تابع المتطلبات اللي سيفطو ليه خواتاتو .. اما سكينة سالو ريوكها على الصنادل لقاتهم صولد بثلاتين درهم مغربية وداكشي اللي كيعجبها وبدات تهز فالالوان .. ودور من قنت لقنت فجنابو كتهز وتحط .
رجعو لاكيس شدو صف طويل وهي قدام اكسيسوارات كتشوف فواحد لاتخوس وغالي مهبط راسو على تيليفون .. شاف فيها بنص عين كدور فعينيها وهزات واحد لاتروسة غوز مربعة لتحتها فالسلة دخواتاتو ودورات وجهها بسرعة كأنها مادارت والو .
غالي: ااديك لحرايمية
قلبات وجهها كضحك ويدها عل نيفها وهوا كيشوف فتيليفون
وصلا نوبتو وحمعو داكشي كامل وكملو الدوران فالمول.. ردها لاوتيل حطو التقل ورجع خرجها عاض على شنايفو
غالي: باقت بلاصة وحدة..
سكينة: فين؟
غالي: كالغي لافييت واحد المول كبييير .
سكينة: اممم .. حتى دورتيني انا وخواتاتك فديك القسارية دالخاريج فيها حوايج رخاس عاد دايني لموا؟؟
غالي:جرها كيضحك ) هااانتي دابا فهمتي
حطات رجلها فأكبر مول .. الماركات العالمية ..شافت المول كأنها فشي قصر من القصور دالملوك البريطانيين القدامى فالشكل.. عامر محلات تجارية غخمة وساحة فالاسفل كلها ماركات للمكياج مجموعين .. خلاتو ومشات ليهم كتجري وهوا تابعها رجعها من يدها و عينيها خارجين
غالي: اجي بلاتي ناخد دي شوميز للخدمة ونرجعو
سكينة: غير سير خليني حتى تجي
خلات معاه لكازا ديال الرجال.. الهبة كتعطي من داك المحل والريحة رجولية.. جلسات كدور فعينيها ماعندها غرض وهوا واقف كيقلب قميجات للخدمة حتى كمل شغلو وخرجها رجعات نيشان للمحلات ديال المكياج دخلات ليهم بدات تعكر وتماكي .. دارت على الروايح كاملين كترش وبقات شادة فوحدة صغيرة مابغاتش طلق منها باش يشوفها بينما هوا واقف كيشم فعطور الرجال وجمع وحدة كحلة فيدو وداز لعطور النساء كيشم وهز باك مربع كبير شوية ومشا للكيس حطهم وهي حداه
سكينة: حتى هادي زويينة
تبسم وشدها ضمها للبقية وجمع كاشي كل وحدة فصاكها وفتح البزطام كامل وراه ليها كيضحك
غالي: الله على راحاااااااااا
سكينة: صافي خوا!
غالي: غير الى مابغاش
سكينة: دابا غدا غنرجعو
غالي: ماسخيتيش!!)
سكينة: طاح عليا الضيم
شد فيدها خرجها من تما ورجعو لاوتيل بداو يستفو فدو الحوايج
غالي: هادوك غنديهم فلافاليز ديالي حتى توصلي وخوديهم
سكينة: والى مشاو؟
غالي: ماعندهم فين يمشيو.. باش متلفيش ولا ينقصو ليك شي حاجة فالمطار
سكينة: دابا مغنمشيش انا وياك ؟
غالي: غتمشي بنفس الطريقة ماتخافي ماوالو حيت قطعت ليك الي وروتور فنفس الطيارة .. الصباح غنوصلك .. مخايفاش؟
سكينة: بالنفي) لا
غالي: لحداش!! نعسي باش تفيقي الطيارة ما معاهاش اللعب
جمعات حوايجها ومشات تخشات فبلاصتها كطيب النعاس وتقلب من جهة لجهة حتى مشا تكا حداها كيمرر يدو على شعرها بنعومة
غالي: ماجاكش النعاس؟
سكينة: مابغاش يجيني النعاس
تكا على كرشو فوق الغطا وهز تيليفون فالسما كضحك
غالي: اجي ناخدو اخر سوفونير لينا هنا
ضحكات وقربات منو كتشوف فالكامرة خدا صورة طلعات رائعة
سكينة: عنداك توري هاد الصورة لشي واحد
غالي: هز حاجبو) ماشي هضرة هادي!
سكينة:خدات تيليفون بحماس) يالاه اجي نتصورو
شدات تيليفون وناض تكا عنقها بيدو وهي شادة فركبتو اللي واقفة قدامو محنية حدا كرشو كتصور وكتقلب فالراس مرة تكا عليه مرة تهز الراس .. هز خصلة من شعرها دوزها على مسطاشو هاز راسو وهي كضحك وتصور حتى شبعات وضارت عندو
سكينة: عرفتي فاللول كنت غاالطة فيك
غالي: عرفتيها بعدا
سكينة: مكنتش كنحملك
غالي: هز حاجبو) ودابا؟
سكينة: تلاحت ليه عنقاتو ) عزيييييز عليا
كمش عينيه مع نيفو كيضحك وشد فنيفها
غالي: ردي البال راسك ماتقيش.. ااا طونسيو ..طيحي فشي بسيكو ولا شي مكبوت يندمك
سكينة: الله يستر. !!
غالي: انا علمتك .. نتي مزااالة نية.. واخا كيتقولي فاهمة وعارفة..مافاهما تا لعبة .. ماتبقايش تسافري مع بنادم مكتعرفيهش
سكينة: اويلي عمرني سافرت… اول مرة ويمكن اخر مرة .. دابا غنرجعو غنمشي انا وختي للبلاد لعرس عمي فخنيفرة
غالي: هااا. هي دابا نتي شلييحة
سكينة : بافتخار كتلعب فشعرها) ااييييه شلحااااا
غالي: هي كتعرفي تشطحي
سكينة: معلوم .. وبالموزون
غالي: يالاه اري عليها شي طرح
سكينة: طاحت فوق المخدة) لالا والله مافيها مقطع فيا اللحم
غالي: كتعرفي تهضري الشلحة؟
سكينة: شوية وكان ههه
غالي: كتغني؟
سكينة: نهز اللغا هههه فهمتي؟…. اللغا هوا الكلام وهز هوا نعلي الكلام بحال لا قلتي نقول موال .. ولاكن مايصلاحش هنا غيسمعونا من برج ايفل
غالي: كيضحك) صافي سكتي.. انا نغني ليك
سكينة: كتعرف!!
غالي: شد فيدها ) لاللة يا لاللة لاللة يا لاللة يامولات الدار الكبيرة والصور العااالي .. لحمام مابغاا يوالف يا شيكييية يا لهواوية ،، ويلى كنت حاجبة جلسي في داارك راه العبيد يشاورو عليييك
سكينة: بانبهار) وااااو صوتك واعر!!!
غالي: هادا كلام دمكانسا
سكينة : وغني شي حاجة اخرى
غالي: ياضلييييي يا رووووحي
سكينة: سكتاتو ) لاء متغنيش ليا هاد الاغنية مكنحملهاش
غالي: كيضحك) واهاد راه وائل لكفوري اللي كيغنيها
سكينة:دات يدو وجابتها) ويكون حتى هارييي بوتر .. مكتعجبنيش
غالي: طلع ليها لغطا على وجهها ) نعسي.. نعسي نعسي غتفيقي بكري.. الى مابغيتيش تفيقي غنجرك كن شعرك يالاه لبدي
جاءت ساعة العودة.. وكأنها كتودع بلادها وحبابها.. نزل عليها الضيم وهي كتلبس حوايجها والحقائب قدامها وغالي مشطون مع الوزن فيدو ميزان صغير كيهز بيه الشنطة بيد وحدة ويعبر تقلها.. رجل هنا ورجل لهيه لابس فيست خفيف سبورتيف كيزير السماطي للحقائب ويجمع فالسلوكا ويلوي هنا ولهيه فالشارجورات ..
تنهدات وجلسات كتشوف فيه كيوقف الشنط حدا بعضياتهم ومشا جلس تحنا على سبرديلتو كيلبس وقال على عجلة بشنطة
غالي: صافي واجدة؟ (شاف فالساعة) يالاه نوصلك دغيا باش نرجع يالاه نجي مع الوقت حتى انا
وقفات لايحة عليها جاكيط خفيفة من برد الصباح مع الفجر
هزات صاكها دايخة وهوا كيزرب من هنا لهنا ويهز ويحط ويضرب فجيابو لاينسا شي حاجة .. عينيه كتشتت فالاجاء ومركز مع الجميع .. مشات حلات الباب خارجة وهوا وراها كيشوف وراه بانتباه من النسيان. حتى بان ليه تيليفونها ورجع هزو
غالي: هانتي شوفي شنو ناسيا
مدو ليها وجر ليها الباليزة كيقاد ليها اليد .
وصلها قدام الكار اللي كان مديماري بالصوت ونزلها بالزربة مشا للكوفر دخل الشنطة وهي تالفة كتفتف ورجع عندها بسرعة وقف قدامها كيشوف فيها وفحالتها
غالي: مانسيتي والو ؟ هاكي ها الباسبور ديالك .. تما البيي دالروتور شدي وردي البال عندااااك تلفيه ولاتنعسي فالكار .
سكينة: لالا صافي كون هاني
غالي: فتح يدو وتبسم) يالاه اجي نعنقك
حلا ت يديها شادة الوراق نعسات على صدرو عنقها وباسها فخدها وما معاها للباب حتى طلعات وشدات بلاصتها ورجع اللور كيشوف فيها كطل عليه ودير ليه باي باي وهوا كيشير ليها بدو حدا ودنو بمعنى نتعايطو في حين الكار كيتحرك من قدامو ويدير الصوت حتى خرج من المحطة ورجعات دورات وجهها كتنهد والصيم طايح عليها كتشوف فباغي فداك الصباح الباكر وهوائو النضيف .. غادية ومتبعة للبنايات عينيها والنهدة كطلع وتهبط ،، مساخياش بالرجوع وكتفكر شنو عاشت فهاد المدينة فوقت صغير كتحسر على رجوعها
بقات هاكاك حتى عرغرو عينيها فاخر قنطرة شافتها قبل مايفوت الكار المدينة ويبعد ويخليها وراه ويشد طريق طويلة لمدينة لبوفَي فين كتسناها طيارة العودة.
******
سمير:على عجلة) ونيسة؟؟؟ صافي واجدة ؟
خرجات كتمسح يديها من المطبخ
ونيسة: صافي كلشي هوا هاداك بقات الميكة دزبل نخرجوها معانا
سمير: على عجلة) صافي يالاه لبسي حوايجك انا لتحت نسخن طموبيل .. ماتنسايش تسدي الباب بالساورت
ونيسة: صافي كون هاني.
خرج سمير ورجعات ونيسة لغرفة غالي تلبس حوايجها من بع. ماخلات ليه الدنيا كتشعل بالنقى .. ونيسة بنت عائلة .. من النوع اللي كيبغي يدير اسرة ويربي وليدات وكيهتم بالعادات والتقاليد والقيل والقال .. التاويل من اولوياتها وماترضاش شي واحد يقرل فيها كلمة خايبة.. من النساء الحرات اللي كيعرفو اش كيديرو او كيجيب ليهم راسهم راهم كيعرفو ويفهمو فكلشي.
لبسات جلابتها وتيليفون كيصوني ..هزاتو فتحات الخط ضامة شافيفها لداخل
ونيسة: الو وفاء…
وفاء: مشيتو ولا باقيين ؟
ونيسة: يالاه خارجين … خوه جاي هاد العشية من فرنسا .. راني عاودت ليك
وفاء: اممم.. ايوا مزيان
وفاء: تشوفي الدار اللي كاري .. وتخا صغيرة غزالة وفنة ..ياك جينا على غفلة ! لقينها نقية كتشعل.. حوايج مستفين والقوامج محددين.. بيت نعاس جديد .. ماعرفت مالو مابغاش يتزوج ياختي
وفاء: زعما ميكونش كيعرف شي وحدة؟ مايمكنش
ونيسة: لالااا ماشي ديال داكشي.. ديت وجبت مع سمير فالهضرة قلت ليه علاش ماتزوج قالي غير مالقاش بنت الناس.. ايوا غيرررر.. بالي بيه
وفاء: وياختي كي ندير ليه فين كنشوفو انا شفتو فالعرس مرة وحدة ماشاف فينا تا كي دايرين .. جاني متكبر حاس براسو
وفاء: واخليك تا تديه لالاك .. عرفتي ايلا تزوجيتيه واااو ..جوج خواتات مزوجين جوج خوت وااعرة!… العائلة غتبقا غير حالة فمها
وفاء: الصراحة غتجي زويينة تجي من جيههتي ونجي من جيهتك …مندخلوش البراني بيناتنا
نزلات فالمطار والضحكة معرية الضراس.. خارجة كتفرنس وتجر شانطتها مع المسافرين واللي دارت حداه تفرنس ليه.. الصباغة فالرجلين طلعات والصنيديلة بخيوط رقاق والشورط قصير.
مشات شدات طاكسي نيشان لدارهم وطلعات كتجر فالباليزة بزز حتى للباب ودخلات ريحة فرنسا كتعطي منها لقات رانيا جالسة حاطة البيض كتفطر رسط الدار وغير شافتها داخلة جارة الباليزة ناضت ليها
رانيا: فيين كنتي؟ هاااا؟ فين مشيتي ؟؟ هضري دابا معااامن كنتي ؟
جراتها رانيا من شعرها لاكن سكينة مكانتش ساهلة ليها حتى هي شداتها طيحاتها وغلبات عليها حتى بدات رانيا كتبكي وناضت سكينة كتنفخ وتجمع شعرها
سكينة: بندم) نتي اللي جبتيني قلت ليك ماتبقايش دوري بيا عطيني التيساع
رانيا: مقنتة كتبكي) اهاااهههااااا… والله حتى نقولها لباااا
تحنات عندها سكينة مخرجة عينيها
سكينة: وابعديييي مني .. بعدي منييييي شنو بغيتي شنوووووو ااععععععععععووووووو(عوتات وشدات فراسها) علاش حاضياني واش مي واش باااا؟ وابعدي منااااااااععععععععييييي
سمعاتهم فتيحة جارتهم اللي قدامهم وبدات دق ..مشات سكينة حلات ليها وطلعات فيها وهبطات .. من ديما مكتحملهاش سكينة حيت حاضياها فالدخلة والخرجة وديما كتشوف فيها نبص عين وخارجة ليها فعودها.. واخر مرة خدات ليها الحوايج اللي خلات فالمكانة ديال الضو وحساب ليها ديال وحدة اخرى .
فتيحة: هااويلي!! مالكم على لغوات شواقع ؟
خلاتها سكينة ردخلات جرات باليزتها للبيت بينما دخلات فتيحة دافعة كرشها وطويلة شافت رانيا فالقنت فرق السداري حمرا كتبكي ومقنتة مبهبطة راسها وشعرها الناعم مسبسب على وجهها
فتيحة: جلسات حداها) مالكم شواقع؟؟ رانيا!! ارانيا ؟ (شافت جهة سكينة فالبيت) مالك نتي وختك ؟؟ سكيناا
نصلات سكينة البودي قدام البلاكار كتجبد وتعيبها وتفلات فالجنب بصوت منخفض كتمتم
سكينة: تقوي… تفوو.. مقابلاني .. هاد الخررية هادي بقيتي لي غي نتي
فتيحة: ااسكيناااا… اجي ..مالك مع ختك
شارت سكينة بيدها كتسبها من البيت وتمتم فنفسها
سكينة: سييري الله يعطيك الموت.. ديها فحياتك ..خرا كي داير
بدلات حوايجها لبسات سروال دجينز مزير مؤخرتها غتفركع والبودي عريان من الكتاف وصندالتها دالصبع دفارها طوال بالفرانش ودارت مع الباب هازة يديها فالسما كتجمع شعرها وفتيحة تابعاها كطل عليها وتعيط
فتيحة: صارت عند رانيا) مالكم اش وااقع؟ علاش كتبكي ؟
رانيا: هزات وجهها ) غير خليها الى ماقلت هادشي كااامل اللي كدير لبا مانتسماش
فتيحة: شداارت ؟؟
رانيا: سيمانة وهي غابرة عاد جاات .. بغيت نحماق هنا
فتيحة: اويلي!!! هييه!..متأ!! وصافي نعلو شيطان ..نعلو شيطان راكم خواتات ..بعقلكم
ولدها كيعط من برا: مامااااا
فتيحة هانا جايا
ناضت طبطبات عليها ومشات خرجات للكولوار تكلمات لولدها ودازت للطبقة السفلية عند جارتها كدق
فتيحة: وايطووو… شكديري
يطو من اداخل: دخلي زييدي.. كنصاوب شوية دالمسن لعبد الحق يديه معاه للخدمة.. دخلي هانا فالكوزنية
دخلات فتيحة طلات عليها كانت مرى قصيرة وسمرا كتعجن المسمن
فتيحة: شارت براسها) ماشتيش سكينة بنت مونية سيمانة ماجات للدار!! (دارت صبعها على فمها) غا دارهم مشاو سافرو دارت الكرون
يطو: هاااوييلي!!
فتيحة: جات نوضاتها مع رانيا خليتها كتبكي
يطو: كطيير من المقلة يعلم الله فين زادت كراه مشات تفلا عليها شي واحد
فتيحة: هادي مافيها شك.. واش لي تغبر سيمانة من دارهم باقي عاد تشكي فيها!! هيييه!!!!!
مشات لاوية شعرها فالسما كتكسول فالحومة حتى للحانوت ديالها لقاتو مسدود وخرجات عينيها طرطقاتهم فيه ..كملات طريقها نيشان لدار سارة حتى دقات وحلات ليها سارة كتمضغ
سكينة: علاش محليتيش؟
سارة: واختي فيا الوجع دايغيكل كنمووت
سكينة: اري ليا الساروت.. باقي فيك الوجع؟
سارة: عاد شربت الدوا
سكينة: ويالاه معايا لتما وتكاي
سكينة
جراتها بزز منها باش تجلس ليها فالمحل في حالة ما جاتها خرجة على غفلة.
حلو الحانوت ومشات نيشان لاكيس جبدات الفلوس اللي فيها بدات كتحسب وتسول وطواتهم وجبدات تيليفون تبين لباها راها ماقبلة الخدمة والشغل
سكينة: في تيليفون) الو بابا..
بناصر: هااالوو
سكينة: والو لغيت غير نقوليك انا خلي ليك فلوس مجموعين .. جات واحد الف درهم
بناصر: صافي خليهم تا نجي.. باش نخلصو الحرا والضو وراك عارفة
سكينة: صافي واخا
بناصر: خوي يالاه واحد خمسين درهم شري بيها شي حاجة .. ومادابزوش نتي وختك هانا كنوصيك
سكينة: لالا بابا كون هاني
قطعات ورجعات جلسات كدور عينيها وتفوح على سارة بفرنسا وتعاود ليها فين مشات وفين جات .. كملاتها خرجات مشات كتقلب على كوتر فدارهم لقاتها مشات للبحر وخدات النمرة من عند ختها ورجعات للتيليبوتيك كتصوني حتى شد
سكينة: وافيين .. قالت ليك ختك مشيتي للبحر !! اينا بحر ؟
كوتر: وافييين سكينااا جيتيي!!!
سكينة: جيييت قبييييلا
كوتر: هاحنا راجعين صافي .. انا ندوز عليك نشي غا فالحانوتش
سكينة: اه انا نتسناك
قطعات وجات خارجة سمعات كلاكصون موراها وتلفتات اللور شافت سيارة كحلة تابعاها ووقفات كضحك طلات عليه
سكينة: nipoo!!! فيين !!(كدفع الباب) حل حل
حل ليها الباب وطلعات جلسات حداه .. كان شاب صغير شعرو اشقر مكريبي كتافو عراض وضعييف. شاف فيها كيضحك ويطلع ويهبط
نيبو: وافين اسوكااا!!! غبرتيييي
سكينة: كنت ففرنسا ونتا!
نيبو: ايياه!!! الناس مشات لافخونص!! انا داير مع اسماء ومريم نخرجو
سكينة: بااقي مع مريم!
نيبو: واا..(غمزها) لاسقاني مابغيتش نقمعها
سكينة: وايالاه نخرجو .. خليهم يمشيو ينشرو حوايجهم ..تلقاهم مزال منشفو
نيپو : يالاه والله تاصرعتييها.. فين نمشيو؟
سكينة: نمشيو نقصرو؟
نيپو: عرفتي يعرفوك معايا يحيدو حوايجهم .. سكينة: كضحك) تا انا داكشي اللي باغا
نيپو: مريم كتصوني..شنو نقوليها راكي معايا
سكينة: قوليها تسناوني انا جاي خليهم يتسناو
بيپو: وي مريم…
مريم: بصوت شتوي) الو نيپو.. حنا حدا القيسارية فينك ؟
نيپو : هانا جاي تسناوني
مريم: واخا متعطلش
قطع الخط وسكينة كضحك .. لأول مرة تعطيه وقت .. من نهار تلاقاها هي وصحباتها وصحابو خرجات معاهم مرة وحدة وتصاحبات مع صاحبو نهار واحد قلبات عليه من تما ماعاوداتش شافتو .. من بعد تصاحب مع مريم عماين مستمرة ليومنا هاذا .. كانت سكينة عارفاك مريم كتبغي نيپو .. بل مكيديهاش النعاس وكتمرض وتقطع الماكلة فاش كيتخاصمو .. وكانت ديما كتعيبو ليها باش تنساه لاكن مانفع مع مريم لا تعياب ولا غوات
اهاااستا لافيدا لوكااا لوكا لوكا لوووكا ..تيگانا لاموسيكاااا تي توكا توكا تووككااااااا
جهدات فيها على حر جهدها فالسيارة وبدات كتشطح بيديها ونيپو شاعل كارو ويدو مدلية للجهة لاخرى كيضحك ..ضارت عندو كتشير بيديها وضحك
سكينة: بصوت مرتفع باش يسمعها) دوز دوز حدا لقيسا رية نشوفهم هههههه
نيپو : غضبري ليا عليها مع مريم
سكينة: واتمشيييييتتتتت… تاهاديك يتصاحبو معاها الناس ياكما طايح فيها!!!
نيپو: واسيييري مالكي مريضة غا مسلك معاها
سكينة: وادوز معاها.. انا نخرج معاك تمشي هي تق٠٠٠٠ مجااتش معاك والله
نيپو: عرفتي الى شافونا غيفگسووووو
سكينة: وانا بغيتها تفگسسسس… يالاه يالاه نضحكو شوية نشوفوهم هههههه
دازت كتشطح لداخل فسيارة وضحك قدام القيسارية فين كانت مريم واسماء واقفين واحد الوقفة ديال الموقف كيتسناو ويد فوق يد متبعين الطموبيلات اللي طالعين واللي نازلين مع الشارع بعفوية حتى شافتهم سكينة من لداخل وهبطات الزاج كضحك مع نيپو والزدحة مسموعة لتفتت انتباهم بعفوية بقار كيشوفو فيها مستغربين والللون فوجههم كيتبدل وسكينة كتشوف فيهم بنص عين وتموت بالضحك .. كملاتها هزات رجليها وتكات جهة نيفو وخرجات رجلها من النافدة والسيارة غادية كطير ونيپو عاجبو الحال .
حتى بعدو عاد ناضت جلسات كضحك ونزلات عليه رشقاتو
سكينة: لعااااار واش يفتيهم هههههههااااااا
نيپو : غينصلو سراولهم هههه
سكينة: نااااري غنبوووورل بالضحك
نيپو : لبارح كنا فالبحر
سكينة : وليوم عاوتاني باغيين يخرجو !! خليهم يمشيو يرتاحو هههه يصبنو الحوايج … بلاتي بلاتي متخرج من الحي تسنا نشوف كوتر صاحبتي
نيپو : شكون كوتر ؟
سكينة: صاحبتي جايا من البحر.. تسنا مشارجي؟
نيپو: اه
سكينة: ارا تيليفون
هزات تيليفون ديالو كتصوني لكوتر
سكينة: فين عزية وصلتي؟
كوتر: يالاه حطيت زكي
كوتر: انا غندوز عندك متي فالدار
كوتر: انشلل من الرملة داغي
سكينة: ماتعطليش انا غندوز عندك دااابا
قطعات ومع القطعة بدا تيليفون نيبو كيصوني طالعة ليه ميمي
سكينة: كتعيبو) ميمي!! هادي تاهيا يعيطو ليها الناس ميمي
نيبو شدارت ليك هههه
سكينة: شفارة !… اكبر ڤولورة فحي الفتح هي وديك المسطرة اللي معاها
نيپو: شنو شفرات لك!!
سكينة: شفرات ليا سبعالاف درهم !!
نيپو:كمش وجهه) اااححح..
سكينة: اااه راه اكبر شفارة ونتا مصاحب معاها .. بعدا كتموووت عليك واكلة عليك الشراوط مكتنعسسسسسش
نيپو: يااك!! وبانت ليا طايحة يمكن
سكينة: ماشي غا طااايحة .. الاخت ودعاات .. تقوليها عطيني كلوتك تعطيها ليك ..دور من هنا ووقف
وقفات السيارة وجلسات كتخيب ليه راسو وضحك حتى نزلات كوتر مفركسة ومقادة الراسطة كوتشوفال كتفرنس طلعات اللور وكتشوف فيهم ومدات يدها
كوتر: فيين الفرنساوية.. هااقهه…فين اخويا صافا
نيپو: الله يحفضك اختي
سكينة: نمشيو إم إل ؟
نيپو: يالاه
كوتر: ماعنديش مشكل
سكينة: يالاه
فتح باب بيت النعاس وخرج لابس سروال والصدر عريان ..السنسلة رقيقة شبه مخفية فالعنق والشعر معنكش كيرجعو اللور .
كحزات الوسط تقادات فالنعاس مطلعة على صدرها الغطا وتقاد شعرها للجنب وعينيها فدوك الصيكان الورقية اللي فالبلاكار والباب مايل عليهم شوية كتشوف فيهم وتشوف فالشنط اللي محطوطين فالجنب
وقف فشرفة المطبخ مكروازي رجليه كيصوني حتى جاوباتو والصدع حداها كأنها فشي موسم
سكينة: الوو غالي
غالي: بصوت خشن ) فين صافا؟.. وصلتي مزيان
سكينة: بيخير ونتا كي وصلتي؟
غالي: صافا كلشي مزيان ..مالقيتي تا مشكل؟
سكينة: لا مكاين والو كلشي هوا هاداك
غالي: وا مزيان يالاه تهلاي تا نعاود نعيط ليك
سكينة: باي باي
قطع ورجع لاخ تيليفون فالجيب رجع لبيت النعاس هاز قرعة دالماء فيدو ورجع تكا بابتسامة جانيية حداها
شيماء: مشيتي بوحدك لفرنسا؟
غالي: مع ناس دالخدمة
جرات تيليفون ديالو بغات تحلو لقات فيه الكود وقالت
شيماء: حلو
غالي: علاش بغيتيه؟ مجموعين
شيماء: باحراج) بغيت نشوف وصافي
غالي: اش بغيتي تشوفي فيه؟
شيماء: علاش ديك المرة خليتيني نشوف؟
غالي: دابا دخلت فيه شي حوايج دالخدمة ماعندك ماديري بيه
خدا من يدها لاحو للجنب وتكا ودخل يدو تحت راسو سد عينيه وهي كتشوف فدوك الصيكان وقالت كتلعب فصدرو بدلع
شيماء: غاالي.. فين الكادو ديالي ؟
تلفت عاقد حجبانو وقال
غالي: اينا كادو!
شيماء: الكادو ديالي من فرنسا
بقا ساكت دار راسو ماسمعش وهي كتشوف فيه ودور عينيها ماعاوداتش سولاتو .. شافتو ساد عينيه وحطات يدها على عنقو
شيماء: مالك ؟؟ غالي!!
غالي: والو غير العيا ديال السفر
شيماء:نعسات على صدرو ) توحشتك .. هاد السيمانة دازت عندي بحال الشهر … عاود ليا شنو درتي .. معامن مشيتي… امم؟
هبط يدو دوزها على راسها بتعب
غالي: ماشي دابا .. تاا رتاح ..(تيليفون كيصوني). بلاتي.. شششت الواليدة (جلس وفتح الخط )الو الواليدية
اسية: الو وليدي كي داير الحبيب كي وصلتي؟
غالي: صافا الحمد لله ونتي مزيانة مالين. دار. كلشي مزيان ؟
اسية: كوولشي مزيان الحبيب،، غتجي غدا قلتي لي ياك
غالي: ،، ان شاء الله
مونية: مرات خوك راها حاملة تبارك الله،، ايوا دابا جات عندنا قلنا نديرو ك شي عشيوة
غالي: اااه .. ايوا الله يكمل بلخير
اسية: امين الحبيب .. صافي نتسناوك ؟
غالي: صافي غدا نتحرك من هنا نعلمك ( جاتو مكالمة اخرى ) يالاه تهلاي ليا فراسك ( قطع وفتح الخط) الو الواليد)
ناض من حداها رجع للشرفة وناضت هي كتسلت مشات لدوك الصيكان كطل عليهم بتخبية لقات فيهم باكات ديال العطور ورجعات بسرعة للفراش
غالي: وي الواليد صافا بيخير
مصطفى: الحمد لله هاد الساعة موصلني مزيان ؟
غالي: الحمد لله
مصطفى: شوف ..انا هضرت مع واحد صاحبي.. قالي ماعندش لاش يشريها جديدة غيسخر فيها بزاف .. يدخلها من برا بروميير مان يعشرها وحسن ليه من ديك الجديدة
غالي: تخااف من الحديد الخاريج الواليد
مصطفى: ماعندك مادير ما بالكريدي.. السيد صااحبي كنقوليك .. الطموبيل المخيرة اللي بغيتيها .. وراه كاينة واحد المرسيديس الى بغيتي تخرجها جديدة هنا تخرجها بتمانين مليون!! كاينة وااجدة الى بغيتيها نهضر معاه يدخلها ليك بأقل ثمن.. الى ناقصك شي حاجة نكمل ليك حتى تردهم وقت اللي قديتي حسن ليك من داك الكريدي تغرق راسك فيه
غالي. وصافي سيفط لي نشوفها ويكون خير
رجع للبيت شاد تيليفون والتعب فعينيه باغي حتى واحد يقنطو . دخل للبيت شافها متكية وشار براسو
غالي: يالاه نوصلك دابا تا نعيط ليك صافي
شيماء: نايضة من بلاصتها ) شنو كاين شي مشكل
غالي: لا غير لواليد عيط دابا
ناضت وقفات كتجمع حوايجها وهوا كيسمح على شعرو حتى هزات صاكها ووصلها للباب مد ليها ميتين درهم
غالي: عرفتي شنو شدي طاكسي كورسة ماعنديش الوقت نمشي حتى لخي لفتح ونرجع
شيماء: ماشي مشكل ( شدات منو الفلوس) تيليفون بيناتنا صافي
غالي: عنقها) صافي
تبسم وباسها مشح على خدها وهي كضحك حتى خرجات وسد الباب كيحل عينيه بزز مشا رجع لبلاصتو تلاح وسط الناموسية وغطا وجهه بمخدة . اما هي غادية جهة الطاكسيات بملل قنطانة مساخياش تخرج من عندو من الدار وكانت باغا تبات معاه واخا تبات معنقاه لاكن تخطيطها ماصدقش وحتى حوايجها اللي كانت هازة معاها باش تبات ماستعملاتهمش. هزات تيليفون واقفة حدا الطاكسيات كدوز النوامر
شيماء: الوو بيبيش؟ صافا؟ كاين شي بلان ليوم؟ بغيت نخرج قنطت… ماشي مشكل بلا متجي حتى اهنا انا نشد طاكسي تعرضي ليا لتما صافي.. صافي انا غنزل فحي الرياض نعيط ليك تجي عندي ..يالاه بسلامة
قطعات ومشات شارت بيدها لطاكسي صغير شداتو وركبات بسرعة شدات الطريق .
••••
سكينة: جاوبها لعاااار ولا عطيني نجاوبها هههه
نيپو: كتبدا تسب فينا تمرضنا فكرنا خلينا جالسين شو الحو كي زويون .
سكينة: واغير ارا
حدات ليه تيليفون وهما جالسين تحت خيمة بلدية فأحد الفيلات الكبيرة عبارة عن كلوب فيه مسبح ومنصة فيها الشبعيي وجليسات بالفوطويات فجهة وفجهة اخرى جليسات بالطبالي والكراسا فالهواء الطلق مع حوايج المغرب
سكينة. ميوعة ) الوووو.. مالك احبيبة
مريم: كترعد بالفقصة) عطي تيليفون لنيپو
كوتر : بسخرية) عنداااك تشرفااارگعيييص
سكينة: مانساليش نيپو احبيبة خارج معانا
اسماء: وراك غ ا ق٠٠٠٠ مالك تسحابي راسك
سكينة: حبيبة هاد النمرة ماتبقايش تعيطي فيها اوكي حيت هادي نمرة صاحبي الزين يالا ماتعاودييش باااي
قولها وضحك عليها فالكلوب مع الشيشة والشطيح والبنات كيدورو .. كانت سكينة من قبل كتشوف راسها قل منهم وباغا تقلدهم .. اما دابا ولات كتبين راسها باش هما يقلدوها .. عاجبها راسها لابسة حوايج جداد من فرنسا وكتبها من خلال نضاراتها للبنات والشباب اللي معاهم .. اما نبيپو كان جالس حداها بحال القرد شاداه غير باش ميمشيش لمريم وتحرق ليها دمها وتبكيها الدم .. عارفاها كتبغيه وتمرض من جيهتو .. وعولات تشدو بالمصاحبة شي ايام على بيدمن تبرد ويطلع ليها فالراس وتقلب عليه كأنه عمرو مكان .. حتى هوا كان عاجبو الحال وفرحان مقاداه فرحة .. شكون بحالو بدل مريم بسكينة وبلا ادنى مجهود .
دارت العشية من داكشي الرفيع حتى لجوج ديال الليل عاد لسقات فكوتر ورجعو للدار دخلو لقاو رانيا ناعسة وفمها محلول ويدها مدلية .. جلسو وسط الدار كيتجمعو وبدات سكينة تعاود على ايام ففرنسا بحماس وكوتر كتشعها
كوتر: والله تا ضيعيه اصاحبتي كوغا تشديتي فيه .. ديال زواج . شتي مللي مقاسكش والله تشا راجل
سكينة: سيري اختي اشمن زواج مالي مريضة نوض نتزوج دابا ونجلس فالدار يلبسني الجلابة .. الله يستر
كوتر: علاش يلبسك جلابة هاهوا كيسافر تسافري معاه خدااام خدمة زوييينة وبوكوووص .. شوفي غا فورمتو طيح قبيلة
سكينة: لالا اختي ماعندي مندير بشي دواج تزوجي غا نتي انا باغا ندور باغا نعيش ماعندي ماندير بواحد يبقا لاسق ليا فقزيبتي تا نموت
كوتر: عطاتها صبع) وهاكي.. دابا تديه شيماء اللي تعرف ليه .. وبقاي نتي
سكينة: غا بالصحة .. انا مايصلاحش ليا لا زواج لا لمصاحبة .. ماعندي مانعطيه ومانقدرش نتزوج بيه لا هوا لا غيرو .. انا خاصني شي شااااااارف قريب يموت.. يكون لاباس عليه وكيتفتف .. نتزوج بيه فديك ستة وعشريين ولا سبعة وعشرييين .. ويموت ويجلي ليا الفلوس ونعيييش اختي نتبرررع
بقات كوتر غير كتشوف فيها وتقلبات نعسات .
٠ شاد الطريق لمكناس كيشوف فتيليفون.. طلق من المقود وحسد نضارات الشمسية ورجع كيشوف فتيليفون ويدو شادة المقود .. كانت سيارة بيضاء ناصعة كتلمع كأنها بولة شاعلة .. روايدها كوحل وسقفها من الاعلى كامل اسود كيلمع .. كانت سيارة فخمة من نوع ميرسيديس سقفها فيه نافدة مربعة فالصورة الثانية محلولة .. وفالصورة الثالتة من الداخل كان جلدها فالبني فاتح مائل للبيج .. لون فخم نضيف مع مزيج من الاسوط فالطايلو والمقود.. شاشة كبيرة جنب المقود وعلى الجوانب ازرار كثيرة شاعلة بالضوء.. عجباتو شكلا مكانش من الاساس مخطط لداك النوع من المستوى العالي فالحديد الجديد. السيارة كتبان جديدة .. جاه اتصال من باه ورد بابتسامة
غالي: الو الواليد
مصطفى: ايوا ..شتيها ؟ عجباتك ؟
غالي: وهي من ناحية زوينة زوينة .. ولاكن واش مافيها لا طرافيك لا والو
مصطفى: كنقوليك راه مزيانة عندها ست شهور .. يالاه خرجها ولدو بست شهور ماكتابش ليه يركب فيها .. بقات محطوطة دابا بغا يبيعها قالي والله المصطفى كن ما كنتي عزيز مانخليها ليك بداك الثمن
غالي: وصافي الى كان هاكاك نتوكلو على الله
مصطفى: صافي غنعيط ليك دابا نتفاهم معاه هاهوا داخل هاد الصيف يجيبها معاه ونتوكلو على الله.. ماتشري حتى تشوفها بعينك
غالي: صافي الله يسخر
مصطفى: هاديك غتبيعها ياك ؟
غالي. لا غنخليها الواليدة تا هيا بغاتها
مصطفى: بعصبية) ااش غنخلي ليها ااش حتى شرفات عاد بغات تعاند زايدة بالخطية حتى هي ماتمشي تكمش تلبس الزيف ديالها وتسبح ،، عاد بغات تسوق الطموبيل .. على قاعدة .. ماتخلي حتى واحد يربي الريش لاحولة ولا قوة الا بالله. العيالات كيبيعو دهبهم يعاونو ولادهم هي زايداهم بالخطية .
غالي دار راسو مكيفهمش وسكت ،،اما مصطفى تعصب حيت غيكمل من جيبو فلوس الطموبيل .. الكريدي اللي غيهز غالي من البنك غيهزو من باه وفعوض ما يخلص البنت يخلص باه .. مسألة وقت فقط احسن ما يبقا يتسنا الفلوس تتجمع وشي فلوس مغتجمع .
وصل لمكناس ..للفيلا الصغيرة ديال الورتة .. او بالاحرى العائلة .. من الفيلا لقدام بالطراز لقديم من عهد الاستعمار لاكن صلحوها بالاصلاح البلدي المغربي. الزليج المغريبي والموافد بالزجاج ملون والخشب والسقف بالجبص والجردة صغيرة بدون مسبح . لقا سيارة سمير وهشام فالباب ..عرف باللي العائلة مجموعة .. كان مكناس كيغلي ويولول بالصهد تقول جهنم الحمرا والشوم والهواء كيخنق بالحر عكس سلا فين الهواء مبرد وبالليل يزيد يتبرد .
دخل لابس شورط دجينز ازرق غامق وتيشورط بلو مارين كول v نض كم مزير على عضلات يديه ومرخوف شوية على صدرو ..حداء رياضي واللحية كحلة والشعر مسرح كحل ..فيدو سوارت الطموبيل ونضارضر واليد لاخرى هاز تيليفوناتو بجوج وجار معاه شنطة قصيرة وصيكام ورقية. لقا الدار كتغلي بالهضرة والجموع والضحك ودخل عليهم وهما كيرحبو بيه وناضو كاملين استقبلوه .. داز عليهم واحد واحد على خواتاتو بجوج اللي كانو تما وعلى مو وجدو الراجل الكبير النحيف اللي كان لابس دراعية رماضية وبلغة ولحيتو بضاء كيبان عليه الوقار ووجهه منور . كان فالصالون كذلك خوه هشام وسمير وزوج اخته منال كلهم بالدراعيات منشورين على السدادر التقليدية .. اما فجهة اخرى اللي داز حداها كان صالون صغير فيه مرت خوه جالسة بالجلابة متولة والابتسامة وحداها ختها حتى هي بالشعر مطلوق بني رطب وجليلبة والتاويل والضهرة بالكرام .. مد ليهم يدو من جنب اليد دالفوطوي بابتسامة واحترام ومشا مد لمو الصيكان شداتهم من يدو وبدا يتصرف على راحتو بعفوية فالدار قدام مرت خوه وختها اللي كانت مهبطة راسها بخجل وحناكها حومر كتشوف فيه بنص عين والحواجب مقلزين من شدة الاعجاب والحشمة .. كانت غليوضة شوية مسرارة وزوين عندها الحناك عامرين والفم مجموع الوسط صغير والعيوينات مكحلين بالشفار طالعين .. كتشوف فيه وتسبل عينيها وتخشا فختها اللي حداها وتقاد جلابتها من الجناب كل مرة وترتبها على الصدر
حطات المرى الكبيرة يدها على فخض الضيفة وقالت
كلتوم: مرحبا بيك ابنتي لاتحسميس
ونيسة : مسكينة جات تعاوني فهاد الشهور اللولة .. عدبتها
تجمعو الرجال فالصالة بوحدهم والعيالات فالصالون الصغير حتى هما بوحدهم تحط العشا وتعشاو مفرقين كل واحد يلغي بلغاه .. جابو النقاشة للعروسة بعد العشا وانتقلو للصالون البلدي بينما خرجو الرجال كاملين والجد مشا للجامع يصلي .
جلسات ونيسة فالقنت بالتاويل والصواب جنب ركن خشبي فالقنت مدلي عليه توب بالهذب وفوق هاتف غالي الثاني كيتشارجا .. جلسات النقاشة كتنقش ليها رجليها ويدها محطوطة فوق المخدة اللي جنب الركن حتى سمعات تيليفونو كيفيبري حداها وتلفتات طلات عليه لقات اسم “شيماء” فديك الاثناء دخل غالي للصالون فين كانت جالسة مشا مباشرة جهة تيليفون ديالو ابتسم ليها وحاول ما امكن يبعد عليها وتجبد لداك الركن طل على تيليفونو بعفوية حلو بلسمة ورجع هبطو بدون مايطفيه وتراجع اللور مشا خرج ،، شافت ونيسة بنص عين جهة التيليفون كان الضو ديالو مزال شاعل ومدات يدها بشوية هبطاتو حداها جنب المخدة لقاتو مزال محلول وبدات كدخل بسرعة ويدها كترعد وتشوف بنص عين لايشوفها شي واحد او يرجع لتيليفونو .. دخلات للمكالمات كتقوا وتشوف لقات جوج نمرات وحدة بإسم بالشينوية ووحدة بإسم شيماء والباقي فيه باه ومو وارقام واسماء اخرى . رجعات خرجات كتفتف بسرعة للواتساب كطلع وتهبط وتقلب لقات شيماء هي اللولة دخلات ليها نيشان قرات اخر مسج ” جاوبيني ” متقدراتش تقرا الباقي من شدة اك توثرها وخرجات مشات للصور تشوف التصاور !! تصدمات بصور سكينة معاه ففرنسا هما اللولين فوق صور المرسيديس واكثر صورة صدماتها صورتو معاها فرق الفراش كيضحكو وحتط شعرها على شلاغمو ومعنقها من كرشها والباقي سيلفيات وصورتو فديزني لاند شاد ليها حنكها كيبوسها .. ونيسة طلعات ليها السخانة كأنها حصلات راجلها كيخونها .. تلفات وداخت وخرجات من تما بسرعة كتشوف بنص وتفتف رجعاتو بلاصتو بسرعة وضارت شدات يدها عندها مصدومة ووجهها اصفر حتى رجعات وفاء كتمسح يديها بكلينيكس جلسات حداها فالسداري لاخر شافت فيها ماشي هي هادي وهمسات
وفاء: مالك؟
شارت ونيسة بيدها كتشتت النضر بمعنى ماشي دابا حتى لمن بعد..
مدازش بزاف دالوقت رجع غالي شاف فيهم بابتسامة واحترام مشا للتيليفون ووفاء كتبسم ليه وجمعات رجليها دارت ليه الطريق داز هز تيليفون وشارجور ورجع مشا بحالو خلاهم كينقشو فالصالون .. وقف برا داير يدو فجيبو مجبد فالوقفة كيشوف فتيليفون فإذا به كيلقا ثلاتة ديال الصفحات مجموعين سبق ليهم تحلو !! كيفاش هادو تحلو وتيليفون كان طافي مافيه حتى صفحة محلولة ونيشان حطو يتشارجا ومالعبش فيه!! طلع الصفحات بلمسة يد بانو ليه مستفين حدا بعضهم ودخل للواتساب لقا مسج شيماء محلول والوقت فاش تسيفط وتقرا هوا نفس الوقت اللي صونات فيه ودخل طل على لابيل والمسج اللي وصل وخلاه هاكاك بدون مايقراه او يلمسو .. لقا البوم الصور كذلك محلول والمكالمات وبقا غير كيشوف فداكشي فصمت بنضرة غير راضية وهز عينيه كيشوف قدامو بغضب صامت .
اما ونيسة تكات جنب وفاء اللي كانت كتنقش فالصالون بينما العائلة فالاعلى كيشوفو ويقيسو الهدايا اللي جاب غالي.
النقاشة نقشات غير صبعات لوفاء ومشات عمد كلتوم للبيت الصغير فين كانت متكية دير ليها الباروك وبقات ونبسة وختها بوحدهم وحدة محنية اليدين والرجلين ووحدة محنية يديها كيتعاودو بخفوت
ونيسة: ويييلي غير سكتي …قلبت ليه تيليفون نشوف واش كيعرف شي وحدة وكي ولا كي دايرة هاد الوحدة .. لقيتو محيح!! اوييلي مصور هوا وياها واحد التصويرة فبيت النعاس انا وحشمت نتصورها .. مساااري ليك هوا وياها ففرنسا
وفاء: اويلي!!
ونيسة: صافي السيد طاح
وفاء: وتكون غير صاحبتو كيدوز بيها الوقت راه باينة غيكون كيعرف شي وحدة وهادي فيها الشك
ونيسة: كدور راسها) مسيفطا ليه مسج قالت ليه جاوبني.. ومسيفطا ليه هاااكا جرائد دالهضرة ماصلاحليش نبدا نقوا فداكشي
وفاء: عبسات وزفرات من مناخرها) هاد بنات الحرام ماخلا لبنات الاصل مايقولو.. حوتة وحدة خنزات الشواري يخ
ونيسة: وييلي يا صاحبتي ماحسابنيش غنلقا داكشي كامل!!
كانت كتهضر حتى شافتو داخل للصالون شاد تيليفون فيدو كيشوف فيه ومشا جلس قريب ليهم فصمت وهما يجمعو الجلسة كيتلسمو
ونيسة: كي دازت الفوغماسيو اغالي ؟
بقا ساكت كيشوف فتيليفون وشبح الابتسامة على وجه كإبتسامة الديب الخفية وقال كيشوف فتيليفون
غالي: شي واحد دخل للتيليفون ديالي قلب فيه…. دخل للتصاور والواتساب والمكالمات !!!(شاف فيها بنفس الابتسامة) نتي ياك؟
ونيسة تلونات رجعات زرقاء شافت فيه مصدومة والقلب وقف وختها كتشوف فيه حتى هي رجعات حمرا وحناكها بغاو يطرطقو .. مالقات ونيسة ماتقول وسط الصدمة بقات كتمتم وعقدات حجبانها كترمش ويديها منشورين بالحنة
ونيسة: مافهمتش!! شنو ؟
غالي: مصغر واحد العين) زعما مافهمتش علاش بنادم كيطول يدو لحاجة ديال الناس ويقلب فيها اش غيستافد؟؟ … وكاع عرف شي حوايج ماشي من حقو يعرفو عرفهم شنو غيربح ؟ (هز حاجبو مستغرب ورجع شاف فتيليفونو) مابغاتش تفهم ليا هادي!!
ونيسة : بارتباك وتوثر) ماعرفتش ماشي انا والله ما أنا !! علاش غنقلبليك تيليفون شنو معناتها هادي؟؟
غالي: حرك راسو ببرودة وغينو فتيليفون) نتي… انا عارف .. يعني مكاينش علاش تكدبي صافي قلبتي تيليفون قولي قلبتو والسلام
ونيسة: اوييلي اغالي( كضحك بالفقصة) واش كتهضر بصح هاكا نويتيها. فيا انا نقلب ليك تيليفون !!
تنهد وجمع تيليفونو معجب ومستغرب مشافش كاع فيها وحرك يدو
غالي: بلا متحلفي صافي… ياك قلبتيه؟ عرفتي شنو فيه؟ رتاحيتي( تبسم) كتهمنا راحتك اكثر من كلشي
هز راسو ويدو فالجيب مشا خرج من الصلاة وخلاهت جالسة ضهرها تقوس من شدة الخجل بحال الى نزل عليها شي واحد بمقلة كبيرة للراس طواها وختها حداها كدور فعينيها وصدرها بحال المضخة كيتنفض
وفاء: ويلي ويلي على شوهة صافي عاق بيك صافي تشهونا اش داك لتيليفون شدااك ليه علاش تقلبي فيه
ونيسة: بتوثر) وهوا باش عرفني باش باش عرفتي انا يالاه .. تفوو .. سيري دغيا كلمي ليا سمير دغياا
ناضت وفاء كتزرب والجلابة من اللور داخلة فالشقة مشات كتجري لقاتو راجع من الجامع فيدو سجادة كلماتو لونيسةومشات للحمام غسلات ديك الحنة بالفقصة والتحشيمة .. دخل جلس ونشر يديه شاف فيها وقال
سمير: بالصحة
ونيسة. بتوثر) سمير.. وقع ليا مشكل بغيتك تعاوني
سمير: مالك ياك لاباس؟!!
ونيسة: خوك غاليحط تيليفون حدايا وانا من باب الفضول لعبت فيه وندمت وقالي نتي .. عفاك قوليه نتا الله يسهل عليك اسمير حشمت مابقاش عندي الوحه باشنشوف فيه
جمع سمير الجلسة خرج عينيه فيها مزيان بغضب وقال مخفض صوتو
سمير: شدااك ليه لتيليفونو وكتقولي فيها بوجهك حمر ماحشمتيش ؟؟
ونيسة: والاه ماقصدتش شي حاجة غير فضول وندمت والله الى ندمت الله يحفضك ليا سمير فكني من هادي انا مزاوكة ليك فالميمة
سمير: هادي راه قلة ترابي .. ولاكن حتى نمشيو للدار ونتفاهمو عليها
ناض خرج خلاها فالصالون كتاكل فجنابها. وخرج لبرا لقا غالي وهشام جالسين مجمعين على لكراسا وقف هاز راسو بمزحة
سمير: اش داكشي عندك الغالي .. راني ضربت دورة عندك فتيليفون شفت ليك شي حاجة .. مايحسابك كبرتي مابقا حد يقلب من وراك
تلفت غالي شاف فيه بابتسامة واكتفى حرك ليه راسو بتثاقل بالايجاب ورجع دور وجهه عند هشام
اسية وبناتها وختها الكبيرة كلتوم بحالها بحال شحال من وحدة كتكبر مكتزوجش وكتبقا فدار ..كبرات بالهم والتفكير وفاتت سنها ..لاكن كلشي كيوقرها ويحتارما وهي بمتابة الام للكل
بربعة مجموعين فالبيت كيشوفو الكادويات والبنات كيجبدو الحوايج ويقيسو
اسية: هزات علبة مربعة) هادي ديالي قالي جابها لي.. هادي ديال كلتوم عطيوها ليها
كلتوم: شداتها فرحانة) الله يعطيييه الخييير الغالي ديالي
اسية: هانتي مانسا حتى واحد حتى ولد ختو جاب ليه
كلتوم: مغتعطي والو لونيسة ! شافت الصيكان داخلين مع الباب
اسية: بالنفي) جبنا ليها النقاشة ..صافي براكة .. مابقا مانعطيها واه مشا غير فورماسيو ماشي عايش تما ولا مشا للحج
منال:الاخت الكبرى) مجاب والو لا حلوى لا والو ؟ عطيها شي حاجة حاملة كتوحم
كلتوم: داكشي اللي بغيت نقول وقلت نسكت
اسية: وشنو نعطيها ؟ غنفرق معاها هاد المجموعة اللي جاب لي هادشي اللي غندير ..ناخد الريحة ونعطيها لكريم
منال: صافي عطيها حتى هاد الصندالة عندي انا صنادل
اسية: جمعيهم اكلتوم فشي صاك الله يعطيك الخير حتى لغدا تكون غادية .
جمعات الام وبناتها وفرقو كلشي وجمعو وطواو وكلشي مشا ينعس فبيت . صبح الحال شي نزل يفطر شي خرج بكري شي مزال ناعس.
ونيسة غير كدور عينيها حشمانة وكتشوف فيهم على اساس وصلاتهم الخبار .. جات خارجة مع الباب كتسلم عليهم وسمير كيتسناها برا هي وفاء اللي مهبطة راسها وحشمانة
اسية: مدات ليها الكادو) شي حاجة خفيفة كادو جابها غالي من فرنسا
ونيسة سمعات سميتو تزيرات بقات كدور فعينيها وشداتو كتفتف
ونيسة: شكرا اخالتي.. الله يجازيك بالخير
اسية: بالصحة والراحة .
***
العصر دازت والجو بدا يبرد.. الشباب فالقهوى مجموعين بحال العادة ..هاد المرة معاهم صديق قديم زايد اربعيني ..لحيتو كحلة طويلة وحبتهو كحلة بالصلاة. مجموعين كاملين على الطبلة بربعة ،،هشام وغالي وأمين ،، اسماعيل، لابسين الفوقيات كاملين كيتبردو قدام الشارع كيتنضرو فاللي غادي واللي جاي .. الضحك والهضرة وهضرة كتدي هضرة بداو فسوق النسا وهاد المرة اسماعيل اللي جبد الهضرة بالضحك
اسماعيل: وادابا الشباب مابقا عندكم حتى شي عذر!!
غالي. كيشير بصبعو بالضحك ) صاافي تزوجتييي بغيتي تجر معاك كولشي اسماعيل
اسماعيل: كيضحك) لالا الشباب كنهضر نيييشان.. الزواج كما هوا سترة للمرة سترة الراجل وقاية وحماية واستقرار
امين: بجدية) فيين اودي هاد الاستقرار وهاد الحماية !! مكاين غير العراااا .. تبيع حوايجك اصاحبي خلينا من
اسماعيل: كيضحك) الزواج نصف الدين.. وانا عااارفكم داك التفكير عندكم
امين: و ابا كملنا النصف اللول بقا غير النصف الثاني اودييي خليني ساكت
هشام : الله اودي معامن غتستاقر فين هما بنات الناس
اسماعيل: و ابا الى هضرت معاكم نيشان متعجبكمش الهضرة ديالي!!! ودابا نسكت حسن
امين: لالا غير هضر والله تا تهضر
غالي : انا بعدا مكنفرش كااع فالزواج هاكا مرتاااح بوحدي
اسماعيل: بسياسة ) فين عمر الوحدانية كانت راحة ؟ حنا فوق الارض وكنقولو هاد الهضرة!! المرأة كائن مهم فحياة الراجل.. والا مكانش ادم عليك السلام يقنط ويبغي الونيس وهوا فالجنة… والله عز وجل جرج ليه حواء من الكتف ديالو .. تونسو .. ياك كان فالجنة !! وواخا هاكا حتاج الونيس.. نتوما مغاااتعجبكش هضرتي
غالي: لالا بلعكس والله كنتقبلها لعل وعسى يهدينا الله ماتعرف
اسماعيل: هانتا دابا الحمد لله سهل عليك الله .. منصب زوين .. وصلتي لسن الرشد .. اشنو مزال كتنسى علاش متجمعش راسك وتشوف ليك شي بنت الناس
هشام: انا مزاال باقي ماعنديش خدمة مستقرة هاد الساعة
غالي: رد على سماعيل) مسؤووولية اصاااحبي ماافهمتش انا كيبان ليا ازواج فوق الخمسين .
اسماعيل: علاااش اصاحبي!!!! مالك على هاد التشائم
امين: فيين هما بنات الناس اللي تلقاها صاينة راسها حتى تتزوج
غالي: كااينين كااايني
اسماعيل: ودابا جيتو للمعقوووول.. شكون خلا هاد بنات الناس فتيقار؟ نتوما اصاحبي اللي ماخليتوش بنات ..صافي دوزتي ودوزات تزوجها اش فيها ؟ نسا اللي فات وسترها تسترك وكملو حياتكم تاخد فيها الاجر
امين: الهضرة اللي كتعجب الهاربات.. اودي اخاي اسماعيل راك ماشفتي واالو.. كن تشوف اش واقع كااع كتقول هاد الهضرة
اسماعيل: شوف.. بغيتي تاخد الاجر مع الله سبحانه .. كما نتا دوزتي غتقبل على وحدة حتى هي دوزات.. سالينا . ماتقلبش على بنت الناس.. كتشرطو اصاحبي بزاف !! مالها الى كانت عندها ثلاتين عام اش فيها ؟؟ تكون قدك ولا صغر منك بشوية على الاقل شاربة عقلها .. ولو كاع تكون غلطات راه جابوها من البيران وصدقات حسن من بنت الناس شخصيااا سمع مني نقولك
هشام: رتب على كتفو) الله يكمل باخير .. الله يسخر.
اسماعيل: كنهضر معاك اصاحبي !! باغيينها عندها عشرين عام ونتوما دوزتو العجب
امين. ابا شكاتقول اصاحبي واش عارف العيشة مع مولات ثلاتين كي دايرية!! انا مطلق وحدة عندها ثلاتة وثلاتين.. لا علااقة ليا .. ماتعييشش اصاحبي المعاندة على الطلامط والماعن مافيهاش لينغجي لداكشي.. كترشق ليها غير على الطياب والكوزينة والفبرد اصاحبي لابسة تقاشر تا للسما ولكولون والبينوار والشعر مكتمشطش
اسماعيل: شبغيتيها تلبس ليك اصاحبي دوبياس!! البرد والصميقلي وتبند قدامك نتا مخشي فالكاشة تفرج فيها باش ميجيكش اكتآب!!
هشام: انا عن نفسي مستحيل نتزوج وحدة كبيرة وفوق هادشي مدوزاا
غالي: حتى انا .. (بجدية) دابا نتا هضرتي من الناحية الدينية .. فعلا عندك الحق تاخد اجر معاها وتسترها وكيما نتا دوزتي تا هيا دوزات ،، هادشي كامل متافق معاك فيه ، نهضرو دابا من الناحية العلمية ،، بيناتنا دابا.. فاش كندخلو بيت النعاس مع وحدة راه عارفين اش كيوقع فيه .. بالنسبة ليا انا وحدة كي قال هشام كبيرة ومدورة ماتبغيهاش ولو ندوز اللي دوزت .. مكانتش بنت .. بنت ديال بصح حيد عليا القوالب .. بنت ماقاسهاش شي واحد مانديهاش من اللخر وغنجاوبك على هضرتك من الناحية العلمية
اسماعيل: يالاه سير.. الى قنعتيني نكرط يماها هاد اللحية هادي(جرها بيدو)
غالي: كيضحك) ماشي باغي نقنعك .. الى كنتي مقتانع بالفكرة اللي عندك .. تزوج وحدة فعمرها تلاتين ومدوزة .. انا خويا لا.. باغيها فييغج .. ماضحكتش على شي بنت وجريتها وخليتها هادي اللولة.. ثانيا كااع اللي عرفت كااملين كانو داافعين بلا تسبيق غير دخل.. علاش انا ندي وحدة من هادو !! داكشي اللي درتو فيها انا داروه قبل مني وجات حتى لعندي وبغات توب وبغات دير عقلها وبغاتني نستهرها !! لالالا
اسماعيل: واخا اسيدي فين هي هاد العلمية ؟
غالي: واخا سيدي… هاد ختنا هادي اللي طالقة اللعب ومولفة ارلا مغتبغيش تزوج حتى تقنع ،، ومغتقنع حتى دير واحد ثلاتين ولا ربعة ثلاتين علميا المرأة كتقل شوية وتبدا تفكر فاش كترصل الثلاتينا الراجل لا .. حتاا كيوصل الربعينات عااد كيرصل للمرحلة اللي وصلات ليها المرأة فالثلاتينا ت.. زيد عليها هاد الفترة كووولها اللي دوزات هاد ختنا هادي( صغر عينو وحاجبو) فهاد عشر سنين ديال الهزان كووولها فنضرك دازت هانية ؟؟ ماتفورات ما طيحات ما مرضات ما تحكات عشر سنين داازت آليييز كلها مرتاحة!!! واسيير اصاحبي انا نتحداك ارا وحدة صربات سبع سنين ولا عشر سنين كضرب فيه مايكون عندها حتى مشكل وهادشي متبت علميا .. لقليلة دايرة واحد ثلاتة حتى لسبعة دالكورطاج ،، زيد عليها الكينة اللي كتشرب بلا اصلا ماتعرف واش جات معاها ولالا غيير كتشد وتشرب بلا لوغدونوص الى مكانش عندها طونسيو كيطلع ولا يهبط غيكون عندها التكيسس فالمبيض والحمل خارج الرحم وغتلقا معاها مشااكيل فالولاد هادشي الى مكانش كتجيها ايموغاجي مع اللحم كيتفتت يقدر يكون عندها سرطان بسباب البروسطاط اللي كل مرة يخوي فيها واحد باش هوا ميجيهش السرطان يجيبها يدوز بيها الليلة يخويه فيها بجوج دريال .. وحتى الى سلمات من هادشي كاااامل مغتسلكش من الاكتآب ديال هادشي كامل اللي دوزات ومغتعرفش مالها ونتا اللي غتبقا معدب معاها معارفش اش كيوقع و تبقا تسول راسك علاش وكيفاش ومالها وشنو وقع ونقلبو على حل وهي تاهيا تالفة م فاهمة والو .. الراجل الى ماخواش البروسطاط واحد عشرين مرة فالشهر يمرض بسرطان وهاد البروسطاط فين غيخويه ؟؟ فوحدة نجي نسترها انا !!! سمح ليا بصحتك سيير عيش حياتك وماتجيش تقوليا حقا كي المرى كي الراجل الراجل كيخري المرى اللي كتهز .. بريزيرفاتيف وهاهوا مهني من الامراض يختار شكون والسلام
سماعيل بقا ساكت غير كيشوف فيه وامين كيحرك راسو مد ليه يدو كيضحك
امين: تباارك الله على الدكتور ديالنا من شحال هادشي كنقول راه هاد الاخ واخا ساكت ماساهلش
غالي: صاحبتي طبيبة قرات فكندا كانت معايا والله ماتخليك تخوي فيها .. وواخا هاكاك تقولبات وجهضات . . تجي وحدة تقوليا كنغلطو وهي شبعات قوالب النيطواياج حتى نشفو ليها الوالدة ! ديها عندها ربعين عام فييغج نقية وماتديهاش عندها سبعطاش لعام كااع فايتة لاعبين فيها
اسماعيل: واشغنقوليك الله يهدي ماخلق
هشام: هادا اللي كيهر راه دامعاه وحدة حتى لفرنسا
غالي: هاديك باااقا فييغج .. شتي كاع اللي كيطيرو باقين فييغج ندوزهم ونجلس معاهم ونشط معاهم كنرتاح مع وحدة نقية وكيعجبنييي الحال .. اما وحدة اصاحبي محلووولة راه مكدوورزش ليا واخا نتعاشر معاها عشر سنين كتبقا الشهوة كتهضر ومتقدرش دوز ليها حتى كلمة .. كتزيان فديم اللحضة صافي كترجع تعيفها و نتا غادي
اسماعيل: وانعل الشيطان هانتا واعي واحمع راسك بنات الناس موجودين
غالي: ماشي دابا اصاحبي خليني عليك ههه
اسماعيل: تيق بيا والله ودرتي المرى فالحلال حتى ترتاح .. تيق بيا.. تسلم من الذنب حسن ليك
غالي: بالرفض) مكنشوفش راسي غنصبر لوحدة نبقا مشاوم معاها الحياة حتى للموت .. الله يسمح لينا وصافي
اسماعيل: مالك مخلوع من الزواج اصاحبي؟؟
غالي: وماشي مخلوووع.. وها يك خيتي اللي غدخل معايا فحياتي مغنقدرش نصبر ليها وهضرتها وفشوشها ومرضها وزمرها انا دااابا مكنطيييقش العيالات لا فهضرتهم ولا فتفكيرهم وتزيد وحدة تحكم ليا فحياتي !! مالنا اصاحبي على هاد المرض!! تزوجتي بيها صااافي!! غتولي باغا تحكم الكروا وباغا تشد العصمة وباغا تعرف عليك كووولشي !! تقهرني بالنكير فين مشيتي فين جيتي فين كنتي والبكا والحسابات والتبوحيط علااا؟ حياة محلة مقابل ليلة ولا جوج باغي نعيشهم انا !
امين: تا ديك الليلة غدوزها بالمرقة فالبرد وبريحة العرق فالصيف غا سكت
هشام: مشاكييييل والله العضيم
غالي: وا لسقااا يا صاحبي.. حل واحد اللي غيزوجني انا .. شي زعطاااا منهزش فيها الراس ع هادي هي اللي غتخليني منشوفش سلبيات الزواج كاااملين
اسماعيل: كيضحك) الله يلاقيك مع بنت الناس تعمي ليك العنين تسكت ليك القلب فمرة
هشام: كيحك لحيتو) انا بعدا كنشوف الزواج اكبر تقوليبة للراجل.
امين: و هادي متافق معاك ) فلوسها فلوسها وفلوسك فلوسها .. مها وباها وعائلتها متافقين عليههم ! مك وباك وعائلتك لااا مانتافقينش عليهم كترجع تقولك داااري ويجيو بالموعد.. ومها هاانيا واخا تعطيها السوارت ودخل ليك لبيت النعاس.. كتولي مزوج بيها هي وخواتتها ومها وباها .. اي حاااجة وقعات توصلها ليهم
غالي: كيحك لحيتو ساهي) هادا هوا المشكل.. خصوصا الى كانت جاهلة.. بالنسبة ليا انا. .. الى مكانتش بحالي .. انجينيور ولا طبيبة وتكون عندها لاطاااي ههه.. نيفو عالي بلوس لاطاي واخا متكونش وااعرة وزوينة مهم مقبولة كتزيان فاش كتبغي.. من غير هادشي ماعندي مندير بيها . ( هز صبعو) اولا تكون شي بوكوصة كتفتن واخا مطنگة المهم تكون قتاالة بالزين ولاطاي نشوفها نسخف . . وبيان سيغ فيييغج فهادو بجوج من غير هادشي ماعندي مندير بشي دواج من بعد ربعين عام براكة عليا رضات الوالدية
هابطة مع الشارع كتلوز بالشورط والمؤخرة وليهونش مزيرين واللحم مشدود حاصية الطموبيلات اللي دايزين وكوتر حداها كتسناها تصيد حتى دازت كاط كاط فيها واحد شارف لابس كوستيم وطل عليهم بابتسامة مكمشة
– بونجووغ
سكينة: دورات وجهها قالبة عينيها) غي شي وتحد بحال عادا يكون ميليونير بااراكة عليا .
كوتر: مخرجة عينيها) تشي من نيتك باغا شارف!!!
سكينة: عرفتي ويجيني شي واحد بحال هادا للزواج نبات مانصبح ،،يفكني من قجان بابا
شوفي شوفي شيماء شوفي
تبسمات كتمايل وتبان بجنابها مفتاخرة براسها مابقاتش محتاجة لحوايج شيماء.،،اما شيماء لونها كان مخطوف واصفر وهي راجعة للدار هازة الصاك لقاتهم كيدورو ومشات شدات فيهم بتعب
شيماء: شي وحدة تجيب ليا قرعة دالماء البنات
سكينة: بخوف) اويلي مالكي!! يدك عرقانة !
شيماء: عيانة فيا السخفة
سكينة: كتشوف يمين يسار) اجي اجي ..نجلسو فديك القهوى
شدات فيهم قاطعة الشانطي والعقل غايب في حين كان صلاح دايز بالموطور شيرات ليه سكينة بمعنى حتى نرجع وبقات كوتر واقفة مدات ليه يدو كضحك وتراشق معاه فالشارع المعاكس.
جلسو بجوج على طبلة وحدة وهبطات شيماء راسها ويدها على وجهها كتشوف يمين يسار سخفانة وسكينة كتمشطها بفضول
سكينة: مالكي؟؟!!
شيماء: عضات شنايفها ) غير سكتي عاد جيت دابا من عند طبيبة قالت ليك حاملة
سكينة:خرجات عينيها مصدومة ) اوييلي!!
شيماء: ماعرفت شنو ندير .. نعيط لغالي نقولها ليه ولا شنو ؟؟
سكينة: تصدمات) اوييلي؟؟؟
شيماء: شنو ندير دخت!! بان لي نعيط ليه نقولها ليه هادا هوا الحل
سكينة: ونتي عارفة شكون !!
شيماء: غالي اصاحبتي انا من نهار عرفتو ماطلعت باس باس
سكينة: هزات كتفها كدور راسها) عيطي ليه اختي!! قوليها ليه قولي ليه راني حاملة وترجل معايا وكدا
شيماء: يدي كترعد شوفي.. كنعرق.. ماتقولي والو لكوتر خليها بيناتنا
سكينة: راها مع صلاح
شيماء: جبدات تيليفون) انا نعيط ليه نقولها ليه … يجي يزرب عليا نديرو خطبة بالزربة ونتزوجو
سكينة سمعات الزواج حسات بالاكتآب والضيق والقنط والنفور بقات غير كتشوف مكمشة وجهها وشيماء كتصوني
شيماء: الو بب..صافا؟ باقي فمكناس؟
غالي: صافا حبيبة ونتي؟
شيماء: صافا صافا
دورات سكينة وجهها كتشوف فيها بنص عين وتميع من ديك الحب اللي كيتشاير بيناتهم
شيماء: فوقاش غتجي؟
غالي: دابا شوية غنشد الطريق
شيماء: واخا بب بغيت نشوفك
غالي: نوصل نعيط ليك
شيماء: اوك انا نتسناك بيزو (قطعات) دابا غيشد الطريق حسن نتلاقاه ونقولها ليه فاص
سكينة: ماشي مشكل انا نمشي معاك نونسك
وصلات عليهم كوتر وبدلو الموضوع لموضوع اخر كيهضرو وشيماء تالفة شاداها الدوخة وغير كتفتف .. طولو فديك القهوى جالسين حتى ضربات التمنية دالليل وعاودات الاتصال مرة اخرى بغالي وهي واقفة برا من بعد ما صدرو كوتر بلا متحس
شيماء: الو غالي .. وصلتي ولا مزال
غالي: وصلت
شيماء: علاش ماعيطتيش ليا. كنت كنتسناك
غالي: كنت فالدوش
شيماء: صافي انا جايا عندك بب
غالي: اوك كنتسناك (قطعات) كيتسناني فالدار .. يالاه معايا مابغيتش نمشي بوحدي ..خايفة يتسيف عليا
سكينة: شدات فيها بشجيع) لالا انا نمشي معاك متخافيش غير يالاه …عرفتي شنو بان ليا واحد البلان ..بلاتي ماتمشيش تسناي
خلاتها واقفة ومشات كتجري للحانوت دصلاح ضحكات معاه شوية وجمعات هي وياه وخدات الموطور ركبات وقلزات فالسما بالشورط و كلاكيطة وصباع رجليها صغار .. مشات بالموطور جهة طاكسيات كتقلب على شيماء مالقاتها ش وضارت شافت فالكوتي
سكينة: شاكيييب .. مابانتش ليك شيماء؟ خليتها هنا !!
شكيب: كيشير وفيدو الورقة وستيلو) طلعات اختشي دابا فطاكسي
سكينة: ااه ! صافي شكرا
هبطات وجهها وصدرها على المقود وضارت مع الدور مشات غادية كطير والهوا كيضرب حتى للخرجة ديال حي الفتح ووقفات فالجنب جبدات الكاسك من قدامها فصندوق صغير حطاتو على راسها وتقادات فالجلسة وزعمات على لاول على الخروج من حي الفتح بالموطور .. لاول مرة تغامر وتشد الطريق بوحدها ،، لاكن بكثرة ما كتركب فيه مع صلاح وتمشي معاه حفضات القنات والطرقان والسلتات اللي كيدير من البوليس وتبعات الخط ديالو كتحايل فالطريق وكطير منين مادازت كتخلي السيارات اللور تابعينها والماطر ديال الدراري حاضيينها وسالتة من البوليس بتحدي وفكل مرة تسلت من شي بوليسي كيعجبها الحال وتبدا ضحك .. فضولها وحماسها تحضر خلاها تغامر بداك الشكل المجنون حتى وصلات لحي سلام وبالضبط قدام عمارة غالي وبقات واقفة هازة راسها كتحيد الكاسك ..ماصلاحش ليها كيفاش دير طلع وتخلي الموطور وبقات كدور فعينيها بحيرة وتقلب حتى لقات شي دراري صغار لتحت كيلعبو الكورة ويشوفو فيها باعجاب هي والموطور وشيرات لواحد فيهم كضحك ويدها كتعلق الكاسك فالجنب
سكينة: اجيتسخر ليا
الولد: اهاه فين؟
سكينة:كلم ليا واحد الدري ساكن هنا
عطاتو الرقم والسمية وطلع كيجري ق على غالي اللي حل ليه الباب كيمسح عنقو بالفوطة
الولد: غالي؟؟
غالي: اييه؟؟
الولد: واحد البنت سكميتها سكينة كتسناك لتحت
غالي: باستغراب) سكينة !! واخا هانا جاي
ضهر شبح الابتسامة على وحهه ورجع لبس تيشورط على الشورط الاسود وكلاكيطة رياضية فرحلو كحلة ونزل عندها لقاها جالسة على الموطور بديباردو والدفرة دالسبولة من قلب الراس لاسفل الشعر وكضحك
غالي: اهلا اهلا اهلا ..!!(كيشوف فيها بإعجاب)
مد وجههو وعنقها باسها فحنكها
سكينة: كضحك) مجاتش عندك شيماء؟؟
غالي: لا !! مزال ماوصلات قالت لي جايا فالطريق ( زير على خدودها ) اش هادشي !! ماخفتيش جايا بوحدك !! يوقفوك فالطريق الشماكرية ياخدو ليك الموطور
سكينة: كضحك) الا قدو يلحقوه غا يديوه هههه من نيتك. (بحماس) عرفتي علاش جايا عندك شمياء!
غالي: علاش؟
سكينة: جايا تقوليك راها حاملة !! ولاكن دير راسك ماعارف والو
بقات الضحكة فوجه غالي لاكن عينيه بدلو النضرة كأنه تطرش
غالي: كيفاش؟
سكينة: كتشوف يمين يسار) غتجي دابا مابغيتهاش تشوفني حيت درت معاها نجي اناوياه وعلقات عليا وخلاتني جاب الله سبقتها
غالي: اجي نحيدو من هنا
هزات رجلها كديماري وتجبدات على كرشها مشات بخفة البرق كانها نقزات بالموطور قلبات الدورة بسرعة مع الشارع لكبير اللي موراه ووقفات حدا اتصالات المغرب عاد وصل عليها ونزلات وقفات وتكات على الموطور
غالي: عاودي اش قلتي؟؟(بجدية) كيفاش حاملة؟!!
سكينة: كدور عينيها وتخبش اصابعها مع بعض بتركيز ) طلاقيتها قبيلة ياك .. كنا انا وكوتر هابطين مع الشارع وهي طالعة قالت ليا عاد جيت من عند الطبيبة قالت ليا حاملة ياكا ،، صدماتني وعاود قالت ليا نعيط لغالي نقولها ليه ياكا وعيطات ليك قالت ليك نتلاقاو باش تزرب تخطبها وتزوج بيها دغيا
ربع واحد اليد واليد لاخرى حطها على لحيتو كيشوفيها بجدية مخرج عينيه ويفكر
غالي: ومتأكدة انا!! حيت ميمكنش هادشي عارف اش كندير .
سكينة: وماانعرف هادشي قالت ليا وهربات عليا قلت ليها تسنايني مشات ونشراتني
غالي: بانزعاج)مقالت ليك والو من غير هادشي؟
سكينة: لا
غالي: بتخمين) مزياان مللي علمتيني .. (تيليكيصوني) كتصوني
سكينة: ماشتيني ماشتك صافي
غالي: شوو(فتح الخط) وي شيماء.. وصلتي؟ صافي خليك تما انا جاي مشيت نقضي واحد الغرض دغيا ونجي(قطع وقال بحرقة) بلااتي نشوف هاد الق٠٠ي هادا ..نتي اللي لاقيتيني بيها
سكينة: وانا قلت ليك حملها !!
غالي: صافي دابا .. (كيصوني ) الو امين .. ملاباسش اصاحبي ق٠٠دت
امين: مالك اش كاين ؟
غالي: شيماء !! جاي ا عندي تقولي ليا راني حاملة
امين: ضهشر) شنوو؟؟ شكاتقول؟؟
غالي. مصييية !!
امين: غا بشوية بشوية كتوقع .. تكالما وهداااا مادير والو .. شكون قاليك هادشي بعدا ؟
غالي: سكينة .. سبقاتها قالتها ليا .. دابا راه كتسناني مفاراسها والو عاد غتقولها ليا
امين: غا برد برد كتوقااااع متعصب ماوالو .. صافي دير راسك تقبلتيها عادي .. تا نشوفو اش غنديرو ..مصييبة كحلة هادي
غالي: تربحجت اصاحبي الدنيا ضارت بيا
امين: صافي غا تهدن خليها تسنا تا تبرد.. برد وهضر معاها عادي خليها على خاطرها هاحنا غنشوفو ليها شي تخريجة
غالي: باغا تلسق اصاحبي ماعرفتو منين جا اصلا
امين: راحنا فاهميين وصافي كاالما غنشوفو الحل .. دابا ساويها شوف اش تحت راسها وشنو باغا واش باغا تفك ولا باغا تلسق .. مهم اللي بغاتها قوليها واخا واخا عارفها قاصحة ولاكن ماعندك مادير غير صبر
قطع غالي وتزير بدا يتنفس بصعوبة ويدوز على شعرو وسكينة كتشوفيه جاتها الضحكة
سكينة: تصيدتي المعلم
غالي: سد عين بعمق وهز صبعو كيتهدن ) شششششوووو… ماضحكيش معايا دابا(حل عينيه) دابا نتي عرفتي شغديري.. لسقيها هاد اليوماين شوفي شنو كيدور عندها
سكينة: انا غنمشي للبلاد!!
غالي. وقتاش؟
سكينة: غنمشي بعد غدا
غالي: اجي مكتعرفيش شي صاحبتها ولا شي واحد كتعرفو قريب ليها كتعاود ليه !!
سكينة: ساهية بمكر) عرفتي شنو!! خاصني تيليفونها
غالي: علاش؟
سكينة: خاصني تيليفونها والكود ديالو
غالي: في حيرة ) وينفعك؟
سكينة: اه ..كنعرف واحد الق٠٠٠٠”. الى كانت حاملة من شي حولي هي غتكون عارفة حيت ديجا قالت ليا كتعاون البنات اللي كيحملو ويبغيو يطيحو
غالي: بحسم) صافي دابا يكون عندك
سكينة: يالاه انا نتسناك ؟
غالي: متبقايش هنا رجعي حدا العساس وقفي حداها يالاه
للتذكير … الاحداث وااقيييييييعية
رجع لقاها واقفة حدا الباب وجهها اصفر شافت فيه وسبقات شفايفها باستو وهوا كيتضحك معاها فوق نفسو . طلعها معاه للدار ودخلو كيتصرف عادي كأن شيئا لم يكن ..بل عنقها من اللور كيضحك وهي عيانة كتوقف بزز .. جلسات بتعب وشدات ليه فيدو جلساتو حداها
شيماء: غالي..بغيت نقوليك شي حاجة
دور وجهه باع الريق بصبر وحرك راسو
غالي: شنو كاين؟
شيماء: غالي انا … حسيت براسي ماشي هي هاديك وو..مشييت دوزت لقيت راسي حاملة
دور وجهه فالبلاصة واخا عارف عاودات قصحاتو وحط يدو على نيفو كيكمدها ورجع شاففيها بصبر
غالي: كيفاش حاملة؟؟ من امتى هادشي؟
شيماء: بخجل) من نعار عرفتك… عقلتي ..
غالي، ولاكن كنا دايرين احتياط
شيماء: ولاكن شحال من مرة طرق
مسح على لحيتو بعنف وصبر كيغزز فسنانو كتبان ليه حياتو تقلبات فساعة دالمكانة .. ندم وكره حياتو فديك اللحضة وكرهت اشد الكره لدرجة بغا يقلع معدتو من بلاصتها وجاتو التقية. .. من اكبر الهموم والمشاكل العويصة اللي ممكن يطيح فيها اي راجل هي قضية الحمل الغير شرعي.. كابوس بالنسبة ليهم كي خلهم فاكتآب حتى النعمة ماتبقاش دوز ليهم ولا يغمض ليهم جفن.. كيبانو ليهم المحاكم والمشاكيل والشوهة وفوق هادشي مسؤولية ديال بيبي غيبقا متبوع بيه وعلى عاتقو الى الممات زائد مرى تزادت فحياتو غتبقا عندها تأثير عليه ولو بعيدة عليه.. مشكل بالنسبة ليهم ورم وسلاط عليهم كيطير النعاس ويضعف الجسد ويسد الشهية وفوق هادا فرض اجباري تفرض عليهم ضرب ليهم المخطط دحياتهم كامل الفزيرو .
كاع داكشي داز قدام عينين غالي اللي تصبب العرق من جبينو وهوا كيحاول يصبر ويدو كترعد باغي يضرب بيها اس حاجة تنفسو من الاختناق اللي كيعيش فديك الساعة .. لاكن صبر وكاير فوق النفس والروح وتلفت شاف فيها وقال
غالي: دابا متأكدة انا؟
شيماء: بتعجب) غالي !! من نيتك !! معلوم متأكدة ! علاش انا كنعرف شي واحد من غيرك؟!
غالي: صافي هادشي اللي بالي نعرف.. دابا شنو الحل اللي نقدرو نديرو ؟
شيماء: بتردد) ودابا نتا تعرف!!.. شنو اللي غنديرو ؟
غالي: غيكون عندو دابا شهر.. علاش متحيديهش
شيماء: اويلي!! ندير اجهاض!
غالي: حنا يالاه باديين زعما وعاد كنتعارفو .. واخا رتاحينا لبعضياتنا مزال خاصنا شوية دالوقت باش نكونو واحد العلاقة جدية
شيماء: علاش ماتجيش تخطبني !! غالي انا مابغيتش ندير اجهاض ماما غتعيق بيا وبابا ..
غالي: شد فيدها بابتسامة ) واخا لاللة اللي بغيتي.. غنعيط للوالدة ونهضر معاها ..(مسح على حنكها) انا ماباغيش نخليك اشيماء ..مرتاح معاك وغنوقف معاك راجل وبااغي نكمل حياتي معاك كوني غير بنت الناس.. غتلقايني معاك ولد الناس
تبسمات بخجل وحنان وعنقاتو بقوة سادة عينيها وهوا كذلك معنقها وكيترعد من لداخل من شدة الصبر
غالي: سيري دابا ترتاحي.. صافي..سيري للدار نيشان غنعيط ليك لقاك فالدار تفاهمنا ..داك الخروج والدخول صافي سالينا منو منلقاكش خارجة بلا خباري هاني علمتك
ناضت فرحانة كضحك باستو فخدو ووصلها حتى للباب خرجات وهوا كيوصيها ويضحك حتى ركبات فالمصعد ورحع سد الباب وضار شاد وجهه وراسو فالسما وهبط على واحد الحيط بيديه بجوج بلكمة وتكا براسو على لحيط ساد عينيه كينهج ورجع هز واسو كتنفس وبسرعة ضرب يدو بقوة لكم الحيط ووجهه معصب حتى مابقاتش يدو كتحرك ورجع اللور مشا للمطبخ بغا يشرب كينهج م اقدرش يحرك يدو ونفضها بغضب ماكرهش يحيدها .. جنع النفس ورجع نزل بسرعة لبرا ضربو البرد وتلفت جهة سكينة مباشرة مشا عندها وجهه مكيبشرش بالخير جبد تيليفون من حيبو مدو ليها
غالي: ها تيليفون .. عرفتي الى فكيتيني.. نديك تا لليابان والله تا نديك
سكينة: باستفسار ) ديالها؟
غالي: ديالها ..الكود انا عارفو
سكينة: شافت يدو) مال يدك المسخوط!! ويلي ويلي
غالي: وافكييي ليا هاد الق٠٠٠ ي دابا خلييك من يدي
سكينة: تمينة دابا!! الاكراميات غيكونو بداو
غالي: باستفسار ) اينا اكراميات؟
سكينة: تسنا بلاتي
شدات تيليفون كتقلب فيه تا طاحت غلى النمرة دبيبيش وجبداتها بحماس
سكينة: انا نصوني ليا تسنا
غالي: يالاه سيري
سكينة: كتصون) الو بيبيش
بيبيش: شيماء؟
سكينة: لا ماشي شيماء سكينة صاحبتها كنعيط ليك من تيليفونها .. بغيت نسولك ..مكاينش شي بلان
بيبيش: سكينة ديك الشينوية؟ .. حبيبتي دابا مشا الحال الى بغيتي تجي اجي لحي الرياض نخرج نتعرض ليك
سكينة: صافي دابا نكون تما شكر
غالي:جبد الفلوس بلا ميحسب كمشهم ليها ) هاكي باش تحركي .. عاقلة على الكود؟
سكينة: اه صافي متحممش..انا مشيت
غالي: عنداك هاد الاكراميات يخرجو عليك !
سكينة: الااا ويييلي ههه غنمشي دغيا ونجي منتعطلش
غالي: علميني فاش توصلي
سكينة: منقدرش ندخل تيليفون .. مهم مع ديك الطناش ولا الوحدة نعلمك غالبا غتسالي السهرة مع هاد الوقت
غالي: عيطي ليا نجي نجيبك
سكينة:صافي كون هاني
لبسات الكاسك وخشات تيليفون فالجيب انطلقت بينما رجع مباشرة لسيارتو فاتجاه لكلينيك
حطات الموطور لصلاح وسلتات عليه كضحك مشات كطير للدار دخلات كدور فعينيها لقات الحس مقطوع ورانيا مكيناش . هزات صاك فيه حوايجها وصندالة عالية ورجعات نزلات كتجري شدات طاكسي لحي الرياض عاد تاصلات ببيش اللي مكاملاش خمسة دقايق كانت حداها بالسيارة وطلعات بسرعة حداها كضحك كأنها مولفة .. فرحانة من جهة راجعة لديك البلاصة وغتسد الفلوس ومن جهة غتعرف خبار شيماء من داك الوسط .
بيبش: غين غبورك ؟
سكينة: كضحك ) مشا ليا تيليفون .
بيبيش: شيماء مجاتش
سكينة: عيااانة مسكينة… فخبارك راها حاملة
تنهدات بيبيش وهي كتسوق وقالت
بييبيش: اييوا هي مكتسمعش.. عيينا فيها كنقولو ليها مانخليش الزبل يخوي فيك هيا كيعجبهااااا الحال خليها تا يحيدو لمها الوالدة عاد تهنى
سكينة: واييه مسكينة قاالتها ليا.. ولاكن دابا مابغاتش نحيدو
بيبيش: تلقاها ضبرات على شي دمدومة بغات تلسقو ليه.. كااملين كيديروها
سكينة خرجات عينيها كي الدويبة كدور هم تصدمات لاكن دغيا خفات تعابير وجهها وقالت
سكينة: علاش ماتلسقو لسي واحد فدوك الحوالا اللي مرفحين
بيبيش: بسخرية وتقالة) حولي هه.. حولي يعقل عليها !! غيخوي ويزيد راه عاارفين هادشي ماعندها ماتصور منو هي اللي خاسرة .. هوا حاط فلوسو باش تجي وحدة تقوليه انا حاملة!! زوينة هادي.. تا توصل ليه بعدا ولا لقات اللي يوصلها ليه
سكينة: دابا هي حاملة من صاحبها !!
بيبيش: بعيون تقيلة وريحة الشراب كتعطي منها) وااحد البرهووش.. عجبها طلعات معاه هوا مكيبغيشيدير داك البيزيرفاتيف وهي خلاتو خوا .. مع كانت شاربة ماعاقلاش.. تا جابت الربحة.. خليها دابا نشوفو هاد صاحبها باش غينفعها اللي باغا تلسقو ليه.. متأ ..تاهي صاافي مابقااااتش تعطي ..بقا لها شوية ماتبقاش دور هنا
سكتات سكينة وهبطات عينها للتيليفون قطعات الخط اللي كان مطلوق من تيليفون شيماء لغالي ورجعاتو للصاك .. شافتو كيصوني وقطعات ليه الحس خلاتو قالت غتكون غير شيماء ضربات الفكد فتيليفونها
اما غالي رجعات فيه الروح اخيرا فاش سمع الحوار كامل وهز راسو تنفس الصعداء وهوا خارج من لكلينيك فيدو فاصمة مدورة كأنه طلع من البير .. مسح على لحيتو كيرد النفس وكتب ليها مسج فتيليفونها
” صافي رجعي فحالك ماعندك ماديري تما “
شافت المسج وماجاوباتوش رداتو للصاك ومشات للسهرة .دوزاتها بيبيش نيشان للسهرة اللي كانت بادية بكسوة قصيرة لقات الشيخ جالس وسلتات للطواليط حتى طلع ورجعات جلسات شوية مع البنت كتعرف عليهم حتى خرجوهم وخدات تيليفوناتها بجوج عاد سيفطات ليه مسج
” صافي انا غندوز عندك للدار نيشان “
جوج ديال الليل.. مداهش النعاس كان غير متكي على احدى الكنبات كيشوف فالتلفازة حتى سمع الدقان فالباب.. ناضت نيشان بالشورط كحل وتيشورط شاف من العين السحرية بانت ليه كدور فعينيها فالعمارة . تبسم وفتح الباب لقاها واقفة بكسوة مزيرة والطالون عالي والشعر مكمش لفوق كأنها هارجة من شي قفص ديال الدجاج وكتحاك فرجليها مع بعضياتهم . غير حل الباب دفعاتو علىغفلة مشات كتلوح الصندالة من رجليها
سكينة: فيا بيبي فيا بيبي
طارت ترمات على الباب ديال الطواليط ودخلات خلاتو راجل لبلاصتو جلس فين كان حتى خوجات شادة البابي فيدها كتمسح يديها وعاضة على شنايفها كضحك ودور راسها
سكينة: نااري كنتي غتمشي فيها .. على زهر عندك
غالي: تكا اللور ومسح على راسو تنفس ) سدات ليا النفس.. (هز حاجبو) كنت مشييت نيشان
مشات كضحك جلسات مقابلة معاه جامعة رجليها ومتكية على ركابيها
سكينة: ولاكن تقدر دير تحاليل وتعرف الحقيقة
غالي: دور راسو بسخرية ) حتااا نتشوهو ونتفضحو وتوصل للقمر ويبقا يحلل ليا بنادم فحياتي عاااد نوصلو للتحاليل!! تا يتزاد هادا
سكينة: علاش فالكرش مايدارش ليه تحاليل!
غالي: وكي غادير ليه!! أثرو عليك الافلام (طلع فيها وهبط) اجي !! جايا هاكا بوحدك!!
سكينة: اويلي لا راه وصلاتني ديك بيبيش حتى لهنا !
غالي: درتي اللي قاليك راسك صافي بغيتي تسهري مشيتي سهرتي
سكينة: كضحك) بلاااتي هه.. راه خبارها كانت عند البنات كااملين ..كوولشي عارفها حاملة .. اجي دابا شنو غدير؟؟
غالي: (كيتنهد) مغنبقاش هنا فهاد الدار(هز عينيه كيتأمل) غدا الصباح غنشوف شي دار اخرى
سكينة: اجي عندنا لحي الفتح!!
غالي: دابا نشوف
سكينة: الصراحة حسن ليك تحول من هنا .. حيت هي بانت ليا بااغا تلسق فيه والسلام المهم الشوهة راه غديرها ليك (عشات شنايفها) عندها وااحد مها… كتااار منها
غالي: داكشي اللي كاين.. (غمزها) مهم نتي غير خليك معاها ماتبينيش ليها .. شوفي اش كيوقع تما وصافي
سكينة: هاد التيليفون بعدا غناخدو.. مزال كاع ماقلبتو نشوف اش فيه
غالي: شتي دابا مللي تهنييت من هاد المشكل عرفت اش كاين .. صاافي
سكينة: عنداك غي تعاودها
غالي: بحسم) ماباقيش ندور بشي مغربية .. صافي من اليوم
سكينة: كيتقلب تيليفون) هاي هاي هاي عاااايشة!!!
غالي: مصغر عينيه) مالكي معاها نتي بنتي ليا مكتحمليهاااش
سكينة: فيها الفعايل.. كانت عزيزة عليا غير عرفاتك بغات تبزطني انا وتحطني فالجنب!! وناااري شخال من آل سعود عندها فتيليفون!!! عرفتي هاد تيليفون هوا راس مالها .. مشا ليها دابا صافي غتبغي تنتاحر
غالي: حيدي ديك الكارطة ديالها
سكينة: حيدتهاااهه.. دابا مغتلقا شكون يخرجها.. مغيديهاش النعاس هاد الليلة (كدور عينيها) كاين شي مايتكال؟؟ ماكليتش من الصباح
غالي: شار بعينو) سييري شوفي التلاجة اش فيها ..الى مالقيتي والو نمشي نجيب ليك شي حاجة
خلاها فالدار ومشا حتى لماكدو جاب ليها صاك فيه الماكلة حطو ليها بالفرحات عليه وجلسات كتاكل وهوا متكي كيديه النعاس حداها حتى غمض عينيه..تبعاتو حتى هي تكات كتشوف فتيليفون شيماء فرحانة بيه وعاجبها الحال حتى داتها عينها. الصباح خرجها فطرات فالقهوى هي وياه ووصلها حتى للحومة ديالها نزلات هازة. الصاك ومشات كتجري للدار بالشورط مقزب دخلات لقات و رانية حمرا بغات طرطق وقدامها الباليزة دالحوايج
رانيا: واش بغيتي تحمقيني!!! ويلي ويلي ويلي شهاد الحوايج لابسة!! واش بغيتي تشوهينا قدام الناس
سكينة: بلا مبالات) شوفي الله يرحم باك ماتهضريني مانهضرك
رانيا: بغيض) با عيط ليا قالي مع الربعة نكونو تما غيلبسو للعريس هادالعشية.. نتي مجامعة لا حوايج لا !!! ماشي سوقي ( بدات تجمع بسرعة) مهم فاش يعيط ديك الساعة تفاهمي معاه
كل وحدة شنو مشات كدير .. جابتهم الوحدة واجدين ولابسين الجلالب بجوج باش يمشيو للبلاد عند العائلة وباها غيشوفهم لازم يكونو محتارمين.. شوية ديال المكياج بانو بيه مع البلاغي وجمعو حوايجهم اللي شرا ليهم باهم وخرجو للطاكيات جارين باليزة وحدة والصيكان فيديهم ووقفو كيتسناو الطاكسي اللي توصلهم للمحطة دالكيران .
تكات رانيا على الزاجة فالكار ساهية مكتهضر مكتكلم.. اللي بغا يهضر معاها كيعاني باش يتراصل معاها من كثرة صمتها وانعزالها الدائم . اما سكينة جالسة حداها كتفرنس شادة تيليفون الايفون فرحانة بيه سيفطات لغالي ابيل موا سيلتربلي .. جاوبها فالبلاصة صونا ليها طلبات منو يشارجي ليها لكونيكسيو وشارجاها ودخلات كدور فالفايسبوك ورانيا مرة مرا كدور تشوفيها
رانيا: منين جاك داك تيليفون!! هيييه!!
سكينة: ديالي عطاه ليا واحد الدري
رانيا: بإعجاب) انشوف!! واااعر !!
سكينة: بنص عين) مزال باغا تشكمي بيا لبا!!
رانيا: واعطيه ليا ومانشكمش بيه
سكينة: هااايهاااي سيري سيري لهلا يوريك اش دوزت على هاد تيليفون باش خديتو
رانيا: يالاه عطيني لاخر اللي عندك
سكينة: نعطييييك لاخر يالاه
رانيا: يالاه اري
سكينة: جبداتو) هاكي.. الى سولك با منين جاني هادا قولي ليه نساوه عندي فالحانوت وماعاودوش رجعو عندو
رانيا: لااالا ياربي غير ميسولنيش منقدرش نقوليه شي حاجة
سكينة: هييييه!!! ماعنديش الشارجور!!! تفووووو شتي دابا.. يالاه باش غنشارجيه الى طا يخخ.. نسيت ماشريتو
رانيا: كطل)واقيلا وصلنا
سكينة: نزلي يالاه نزلي…بلاتي كي جيت زوينة؟
رانيا: بحماس)اه وانا ؟؟
سكينة: حتى نتي.. غنتلاقاو عاوتاني دوك بنات بولمان تفوو شحال فيهم تحنزيز
كان بناصر بواحد الدراعية بيضاء واقف والطربوش مربع على راسو وصندالة بنية دالجلد وحداه حميد الاخ ديالو واقفين كيتجمعو شافو الكار داخل والبنات كيطلو فرحانين من النافدة وشار ليهم بيدو نزلو عندو كيضحكو متحمسات..حتى هوا كان متحمس كيتسناوهم بالفرحة .. سلم عليهم العم اللي كانت لحيتو مكرطة من غير الموسطاش الكحل اللي تحت مناخرو وحبانو الغلاض. لابس قميجة وسروال بيج حتى هوا وصندالة بنية دالجلد..فرحان بيهم. ركبو فالسيارة اللور وبناصر كيتعاود هوا وحميد والبنات ساكتين قاطعين الحس .. خرجو من المدينة شوية ودخلو فلابيست.. كان فيلاج صغير فيه محلات تجارية مدارس شوارع .. وصلو الحي للي باني في بناصر دارو بالطبقات واللي فيه مديور العرس ديال عمهم لقاو الدنيا عامرة والشيوخ على برا جالسين فالكراسا والرايات فوق السطوحة . نزلو عاجبهم الحال وفرحانين تلاقاو مع الشطيح والرديح لداخل بين النسا كيشيطحو احيدوس . بنات بناصر بنات بناصر شي كيقولها لشي..كانت عند بناصر الهبة فبلادو والمكانة العالية بين خوتو وعائلتو .. كلمتو مكتنزلش للارض واللي قالها هي اللي تكون والى زعف وشمع لشي واحد الهضرة مايعاودش يسمع الرد.. لا ولاد عمومو لا ولاد خوالو..كولشي كان كيحتاومو ويحني ليه الراس..حتى من عمو الوحيد اللي نزل من الجبل كيحشم مو ويقدرو. كان جالس تما الكل فالكل .. الشوار شوارو والحكام حكامو واللي قالها هي اللي تمشي. اما العريس كان خوه الاصغر.. فايت ثلاتينا .. كيحشم وحادر الراس.. مكاين غير عزيزي عزيزي.. قولو لعزيزي شوفو مع عزيزي.. كان عند بناصر اخت كبرى سميتها فاطمة هاد الاخت اللي عايشة في فاس ..جميع ولادها معلمين واساتذة..كانت مرى حكيمة ورزينة وفالجلسة شامخة والهضرة بالنخوة..واخا مرى كبيرة شوية وبلدية لاكن معقولة وحقانية.. حتى هي كان ليها دور كبير فالعائلة .. هي والاخت اللي تابعاها يامنة.. يامنة كان عندها مشكل السمع..الى بغاها شي واحد خاصو يغوت بالجهد باش تسمعو ..لاكن كتن عندها عقل يوزن. وكلام تقيل وحكيمة ..وفوق هادشي كامل كتفهم وتنبه فالاصول و كدير بحساب العادات وكلامها معقول وقاصحة .. اما الاخت اللي تابعاهم بجوج ..هاديك تزوجات صغيرة ورجعات بحال البرانية عليهم ..حتى بحالهم لاكن مكتحني مكدني كي ما كيقولو.. ماكدخل لا فهادي لا ديك الا الى استافزاتها شي حاجة
بقاو جوج خواتات وهوما الصغارات.. واللي كبرو مع رانيا وسكينة واخا كبار عليهم .. حتى هما مزوجات لاكن الاقرب للبنات .. من اطيب خلق الله .. مايجيدو عار ما يدخلو فشبوقات. الوحيدة اللي كانت كتبغي تمشي كلمتها على بناصر وتعاند هي مرت خوه .. خوه حميد.. مسكينة معارفاش بناصر وطباعو وجات بين ليلة ونهار لقات حميد كيقدرو ويحتارمو بغات تبدل العادة والتقاليد .. بمعنى حتى واحد مايميشي كلمتو على لاخر . ساعة مع الدخلة دبناصر هاد العشية وكان على سبة عليها لقاها كتري عليهم فالكوزنية .. هوا قاليهم عمدو اتاي وهي مشات عمرات برمة. القهوى .. بغات تفهم لاكن وراها الفاهمة قدام الناس .. دخل شم ريحة القهوى فالكوزينة وسول على اتاي.. ساعة من سعد حضها قالت ليه
مليكة: درنا القهوى اتاي حتى لمور العشا .. خلي الناس يالاه يفيقو للباس دالعريس
بناصر مافهمهاش بهاد المفهوم.. فيس النفخة اللي فيه والنرجسية ديالو وقفات لقدام وحسبها عياقة منها وماضرباتش حسابو..مشا لديك البرمة قدام خواتو فالكوزينة وهي واقفة خواها فلافابو وهبطها فالارض معصب وزطم فيها حتا تكمشات وناضت فاطمة مخلوعة شدات ليه فيدو كتهدنو هي وختها الصماء ..اما مونية فالمناسبات مكدورش بيه واخا يطيح الروح .كتعطيه التيساع وتخليه منو لعائلتو حسن مايقمعها شي قمعة قدام المبير والصغير.
مليكة مافهمات والو !! ماحسابهاش الامور غتوصل لهاد الحد. اما بناصر خرج عينيه المخيفة من مكانها وشار بصبعو كيترعد عليها بصوت المفزوع
بناصر: قلت ليكم دير اتاااااي هي غاديرو اتااايي انا الللي كنرييي هنا واللي بغا يدير اللي فراسو يخرج عليا رانيا وسكينة مزال حتى ماسلمو على الناس سمعو صوت بناصر فالكوزينة قالب الدنيا . اما مليكة جاتها البكية وبغات تواجهه كي مولفة تواجه حميد
مليكة: اش فيها الى درنا القهوى علاش مالها تخري النعمة دربي
قبل مايغضب عليها دخل حميد جرها من تما والعكوزة عاد ساقت الخبار.. كانت عكوزة طويلة ورقيقة.. لابسة قميص بلدي محزم بحزام رقيق معاقين فيه السوارت والزيف على راسها والحنة فصبعان يديها .. كتبان عليها حارة ديال الزمان .. وكلشي كيعتارف بالفطنة والذهاء وحتى الذكاء ديالها .عيبها الوحيد لسانها .
مليكة بغات تمشي بحالها لاكن راجلها رطبها وسكتها كيهدنها
حميد: صافي علاش تجاحدي معاه؟ قالكم ديرو هادي ديرو هادي صافي ..مكتعرفيش عزيزي كي داير!! صافي براكة من البكا بغدي كاع من ديك الكوزينة وخليو هاد العرس يدوز على خير
العكوزة:بصوت مرتفع قليل كتهر الشلحة) ايواا هاك على قلة الحيااا..تواجبي الراجل غينيك فعينو !! الله يقلك حياك
الاخت الصغيرة حليمة: صافي خرجو مي من تما من ديك الكوزينة كتزيد لعزيزي اللي بقا هوا كيسمع غيزيد يشعل
فاطمة: ايماااا.. اجي اجي.. تكلمي اجي
عجاجة ودازت بحال جميع العجاجات اللي قبل منها.. من وراها تبدلات الاجواء عاوتاني ورجع كلشي للنشاط وبناصر مشا حدا طموبيلتو اللي حدا الدار ووقف متكي عليها قولها وضحك عليها مع صحابو من الجيران اللي حداه.. اللي داز من ديك الطريق كيمشي يسلم عليه ويزيد . اما رانيا وسكينة تبعو مهم مونية للفرق .. طلعاتهم لواحد البيت وراتهم فين يحطو حواجيهم ويبدلو وخرجو للخزاين فين غيبداو عادات وتقاليد حنة العريس.
كلهم لبسو قفطان جوهرة وتقادو .. جات سكينة طلق الشعر وحرماتو عليها مونية فالباب جمعاتو ليها دفرة عاد خلاتها تخرج باش متصابش بالعين لا من القريب ولا البراني
خرجو للساحة دالخزانات البلدية فين كان سداري مفرش تما والكل مجموع عليه..شدو بلايصهم على لكراسا وبنات العائلة كيسولو عليهم فين جالسين وبالفرحة مشاو تجمعو عليهم وجلسو معاهم حتو خرجو العريس بالزغارت والصواني والكل كيزغرت والرجال والعيالات مصافين شي بالقفاطن شي بالجلالب جمب بعض كيشطحو احيدوس ويرميو بيديهم لقدام . وقف بناصر حدا بناتو راشقة ليه شافهم جالسين وتكا بيدو على واحد الحديدة معبس كيشوفو فيهم وبدا ينخزهم
بناصر: سيرو تشطحو.. نوضو تكعدو. جيتو تجلسو
نوضهم مشات كل وحدة فين دخلات وهوا كيفرنس فالقنت ومرة مرة كيعقد غرباشتو فشي وحدين باش ميضسروش عليه وعينيه كيدورو حاضي شنو داخل وشنو خارج وشكون غرم وشكون ماغرمش وشكون جا وشكون ماجاش.. الكتاب عندو غير فراسو. مكينساش وكيعقل وبلا ميكتبها فورقة كيقيدها فراسو.. كهز الغضبة من اللمدعويين اللي عرض وماجاوش وكييتنفخ على اللي محاملوش وجاي بلا عراضة. فاش كتكون راشقة ليه حتى حاجة ماتعكر ليه المزاج ديالو وكيرقف اي واحد عند حدو باش مرتاح وفرحان . انا فاش كيكون معصب وطاير ليه خاصو يطيرها لكلشي ويسود الدنيا ومايخلي حتى واحد ناشط وفرحان كان دايك التقليقة اللي عليه مخاصهاش تكرن عليه هوا بوحدو.. وانما على الجميع عاد يرتاح .
العريس لبس ودارو ليه الحنة وجمع الفلوس ودخلوه . و الفراجة بدات فديك الخزانة غير بين العائلة .. ها العموم ها العمات ها بناتهم ها ولادهم .. شي تركن فالارض وفرق السدادر شد البنادر وشي واقف محزم بالموزون وخدام بحال سكينة ورانيا وبنات العائلة وعماماتها بجوج .. الوسط عامر وكل وحدة فين كدور المؤخرة والدراري والعموم كيطبلو ويصفقو ويلوحو بالراس بالشلحة والموسيقى سريعة منوضة الشياط فديك الخيمة . شافو بناصر دايز كيدور راسو عاجبو الحال وجروه الوسط وهوا كيرفض لاكن دخلوه بزز منو بديك القشابة اللي لابس هز بيدو وهز خنافرو وراسو وهز واحد الرجل وبدا ينقز بلخرى داير ليهم الخاطر واخا مكيعرفش يشطح وبدا كيضحك وخرج من ديك الخيمة . اما مونية بانت ليها سكينة من السطح كتدي وتجيب فداك الشعر ونزلات عندها كتغدد ماصلاحش ليها تهرجها قدام كلشي ووقفات فالرنكة حاطة يد فالجنب وكرشها خارجة محزماها وحازمة راسها اللور حتى هوا ويدها الثانية حدا فمها غتمز رتقرص بفمها وتشد شلاقمها بصبعها بمعنى خرجي خرجي من تما .
يتبع
شاركنا رأيك في هذا الفصل 🌹